1
00:00:05,000 --> 00:00:28,020
Isim ti Yesu ri mam fe ira yine, awu pu ayib tso yi apupwen u ri baa, “Itse, kiye ru ba pu yi, nda ande ti a nungye rurob ukwe na Umbae-fu, ikyaen ti Umbae-fu ú tatso ande rurob ukwe-fu ama.

2
00:00:28,020 --> 00:00:34,380
Ikyaen ti, afu nda wu kuko risu ande ti utense meme, ti wu na sa unyang ti tsi kukunn na meme ande ba ti afu pu sang kujwo-wu.

3
00:00:34,380 --> 00:00:50,100
Unde ti site unyang ti tsi kukunn, awu u nungye fu Rimam, afu amam ti si Rimam ti kubenti. Cwucwo, awu u nungye Yesu Unde ti Rimam Tsab Tsi, u tom ba.

4
00:00:50,100 --> 00:00:59,580
Uwae utense wune, ame tatso pu m ande rurob ukwe-fu. Ame nde tag pu m wande ti afu nda m baa, ame na nde.

5
00:00:59,580 --> 00:01:17,460
Tine ama, Itse-m, cwe na m ti m kafe ba sang rurob ukwe-fu u te fu som te atso uwae riyinn-fu, pangma ti ame te fu som uwog ti rurob te atso kute, titawe ti a mam utense wune.

6
00:01:17,460 --> 00:01:34,260
“Ame nda ande bane nungye fu – ande ba ti afu pu ruye uwae utense wune u pu ba na m kujwo. Aba si ana-fu, afu ti pu ba na m. Aba ama nae pu ba risu riben te ira-fu.

7
00:01:34,260 --> 00:01:42,060
Tine aba ru ba nung pu ba baa, meme iken ti afu nda m na ru uwog-fu ba.

8
00:01:42,060 --> 00:01:58,540
Ame sa ira ti afu ri te m tsag te ba, aba ama paembe yi. Aba nung pu ba baa, ayi na si kubenti ti ame ru uwog-fu ba, ama aba ru uwae kinjo baa, afu ti na tom me.

9
00:01:58,540 --> 00:02:13,020
“I si aba ti ame ku jwam fu risu-ba. Ame ku jwam-m afu risu ande ti utense be, ame ku jwam fu risu ande ti afu pu na m kujwo, ikyaen ti, aba si ana-fu.

10
00:02:13,020 --> 00:02:31,860
Meme ande ba ti si ana-m si ana-fu. Meme ande ti afu site si ana-m ama. Uwog-ba, ande ku nung m te rurob.

11
00:02:31,860 --> 00:02:57,820
Tine ame ru ku ba yi uwog-fu. Ame u ta-m uwae utense cwucwo be, amaa aba u ta ti uwae utense. Itse-m, afu amam ti si Rimam, nungkyi ba nyinyang te kuko na rinyi-fu, ayi kuko ti afu nda m ama, ikyaen ti a ú si iken kinjo pangma ti ame te fu si iken kinjo.

12
00:02:57,820 --> 00:03:26,380
Kiye ti ame te ba ta tetso, ame ye su ba nyinyang te kuko na rinyi-fu, ayi rinyi ti afu nda m. Ame nungkyi ba, ama ko kinjo uwae-ba yagta-wu be. Nyáng awu ti a sa tsi ti wu na tu itwenji, ikyaen ti ayi ā kumunn ira ti a bae uwae kutsingken kute.

13
00:03:26,380 --> 00:03:44,580
Tine ame ru ku ba yi uwog-fu, ama ame ku ri ira yine kiye ti ame ta ti uwae utense ikyaen ti aba ā tu utob ti tsen-m uwae utob-ba, ti a na tu yi ti rimunn-yi.

14
00:03:44,580 --> 00:03:56,860
Ame sa ira ti ri-fu ri te pu m aba. Ande ti utense pyir ira-ba ikyaen ti, aba si-ba ana utense be, pangma ti ame si-m ana utense be ama.

15
00:03:56,860 --> 00:04:11,300
Ame ku jwam-m afu ti fu na pu ba ruye uwae utense be. Ame ku jwam fu ti fu na nungkyi ba, ikyaen ti Awu titibi ā nde-wu aba iken iki be.

16
00:04:11,300 --> 00:04:17,300
Aba si-ba ana utense be pangma ti ame si-m ana utense be ama.

17
00:04:17,300 --> 00:04:23,060
Tatso ba ira ti kubenti. Jwosaen ba yi fengo na ira ti kubenti. Ira-fu ti si ira ti kubenti.

18
00:04:23,060 --> 00:04:30,420
Pangma ti afu tom me ru ba yi utense, ame tom ba ru ka sang kutampwa ande ti utense ama.

19
00:04:30,420 --> 00:04:39,300
Ame yer kob risu-m ikyaen-ba, ikyaen ti aba ama ā tsi sisaen yi fengo na ira-fu ti kubenti, ti aba ama ā sa unyang-ba na fu.

20
00:04:39,300 --> 00:04:51,500
“Ame ku jwam-m afu iken yine ikyaen ande bane amam be, amaa ikyaen ande meme ti a ru uwae kinjo uwog-m uwae ira ti abane u tsag te ba.

21
00:04:51,500 --> 00:05:14,260
Ame ku jwam ti meme-ba na si kinjo, ama ti aba ā ren tso uwog-ti, pangma ti afu Itse-m ta uwae-m, ame ama ta uwae-fu. Ame ku jwam yine ikyaen ti ande ti utense ā ru uwae kinjo baa, afu ti na tom me ru ba.

22
00:05:14,260 --> 00:05:26,620
Pangma ti afu nda m rurob ukwe, ame nda ba rurob ukwe ama ikyaen ti aba na si kinjo pangma ti ame te fu si kinjo.

23
00:05:26,620 --> 00:05:48,100
Pangma ti afu ta uwae-m, ame ama ta uwae-ba, ikyaen ti aba meme-ba ā si kinjo rikaen. Ayine u tatso ande ti utense baa, afu ti na tom me, ama afu na site ure te ba pangma ti afu na site ure te m.

24
00:05:48,100 --> 00:06:09,340
“Itse-m, ande bane ti afu pu na m, ame ku sha ti a na ta te m uwog ti ame ta atang, ti a na nung riyinn na ukwe-m. Riyinn yine, afu nda m ikyaen ti, afu ye ure te m ti ti afu tā-fu imbyi utense wune khika be.

25
00:06:09,340 --> 00:06:25,820
Itse-m, afu ti ku nde nyang iken ti kubenti amam, ande ti utense nung-ba afu be, amaa ame nung pu m afu. Ande ba nung pu ba ama baa, afu ti na tom me.

26
00:06:25,820 --> 00:06:43,340
Ame tatso pu m aba itso ti afu tsi, ama ame u tsi kunn ti ku tatso ba itso ti afu tsi, ikyaen ti ure ti afu site yi te m ā ta uwog-ba ama, ti ame ama ā ta uwae-ba.”