\id MAT
\h SAN MATEO
\toc1 SAN MATEO
\mt1 A JEꞌRAꞌ U JACH TSOYIR U TꞌɅN CꞌUJ TU TSꞌIBTA MATEO
\c 1
\s Raꞌ u nunquirob Jesucristo uch
\r (Lc. 3.23‑38)
\p
\v 1 A tan in tsꞌibtic techex, quij Mateo, tʌcʌ robob u nunquirob Jesucristo uch. A Jesúsoꞌ u chꞌic parar u nunquir David. Bayiriꞌ xan a Jesúsoꞌ u chꞌic parar u nunquir Abraham. 
\p
\v 2 Abraham raꞌ u tet Isaac. A Isaacoꞌ caj cꞌuchij tu qꞌuinin u pararʌncʌr u racꞌ yʌn u parar Jacob. A Jacobojoꞌ caj cꞌuchij tu qꞌuinin u pararʌncʌr u racꞌ yʌn u parar u cꞌabaꞌ Judá. A Jacobojoꞌ raꞌ u tet. Mʌꞌ ja wirej, pꞌeri u tetob yejer yitsꞌinob yejer u sucuꞌunob.
\v 3 A Judájoꞌ yʌn caꞌtur u pararob yejer u racꞌ Tamar. Tuririꞌ raꞌ u cꞌabaꞌ Fares. U jer tuririꞌ u parar, Zara u cꞌabaꞌ. A Faresoꞌ caj cꞌuchij tu qꞌuinin u pararʌncʌr u racꞌ yʌn u parar, raꞌ u cꞌabaꞌ Esrom. A Esromoꞌ caj cꞌuchij tu qꞌuinin u pararʌncʌr u racꞌ yʌn u parar u cꞌabaꞌ Aram.
\v 4 Baxuc xan, quij Mateo, a Aramoꞌ caj cꞌuchij tu qꞌuinin u pararʌncʌr u racꞌ yʌn u parar uch raꞌ u cꞌabaꞌ Aminadab. A Aminadaboꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Naasón. A Naasónoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Salmón.
\v 5 A Salmónjoꞌ caj u raqꞌuintaj raꞌ u cꞌabaꞌ Rahab. Caj cꞌuchij tu qꞌuinin u pararʌncʌr u racꞌ Rahab yʌn u parar raꞌ u cꞌabaꞌ Booz. A Boozoꞌ caj u raqꞌuintaj raꞌ u cꞌabaꞌ Rut. Caj cꞌuchij tu qꞌuinin u pararʌncʌr u racꞌ Rut yʌn u parar raꞌ u cꞌabaꞌ Isaí.
\v 6 A Isaíajoꞌ caj cꞌuchij tu qꞌuinin u pararʌncʌr u racꞌ yʌn u parar David. A Davidoꞌ rajiꞌ oc rey u winiquirob israel. Caj u raqꞌuintaj David u racꞌ Urías. Caj cꞌuchij tu qꞌuinin u pararʌncʌr u racꞌ David yʌn u parar David raꞌ u cꞌabaꞌ Salomón.
\p
\v 7 A Salomónoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Roboam. A Roboamoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Abías. A Abíasoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Asa.
\v 8 A Asajoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Josafat. A Josafatoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Joram. A Joramoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Uzías.
\v 9 A Uzíasoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Jotam. A Jotamoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Acaz. A Acazoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Ezequías.
\v 10 A Ezequíasoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Manasés. A Manasésoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Amón. A Amónoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Josías.
\v 11 A Josíasoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Jeconías. A Jeconíasoꞌ yʌn yaꞌab u sucuꞌunob. A Jeconíasoꞌ caj pararnʌjij u racꞌ tu qꞌuininin caj bin purbir ich u ruꞌumin Babilonia u winiquirob israel. Chucbir u winiquirob israel caj bin purbir ich u ruꞌumin Babilonia.
\p
\v 12 Caj tsꞌoc u purbir u winiquirob israel tu ruꞌumin Babilonia. Caj pararnʌjij u racꞌ yʌn u parar raꞌ u cꞌabaꞌ Salatiel. A Salatieloꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Zorobabel.
\v 13 A Zorobabel caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Abiud. A Abiudoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Eliaquim. A Eliaquimoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Azor.
\v 14 A Azoroꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Sadoc. A Sadocoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Aquim. A Aquimoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Eliud.
\v 15 A Eliudoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Eleazar. A Eleazaroꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Matán. A Matánoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Jacob.
\v 16 A Jacoboꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ José. José rajiꞌ caj u raqꞌuintaj María. A Maríajoꞌ raꞌ u cꞌabaꞌ u nʌꞌ Jesús. Rajiꞌ Jesús a tuchiꞌtaꞌb ten Cꞌuj ich yocꞌocab rajen u cꞌabaꞌ Cristo. 
\p
\v 17 Mʌꞌ ja wirej, quij Mateo, yʌn catorce u nunquirob Jesús. Cu yʌnx chun yejer Abraham cʌjaꞌan ich yocꞌocab hasta cꞌuchij tu qꞌuinin tiꞌ u rey David. Yʌn u jerob catorce u nunquirob Jesús. Caj quimij u rey David hasta caj bin purbir u winiquirob israel ich u ruꞌumin Babilonia. Yʌn u jerob catorce u nunquirob Jesucristo caj wʌcꞌʌs urob ich u ruꞌumin Canaán hasta caj rochaꞌb Jesucristo ten u nʌꞌ. Mʌꞌ ja wirej, raꞌ u qꞌuinin quir u taquic winic a tiꞌ yʌnob ich yocꞌocab.
\s Ber caj rochaꞌb Jesucristo ten u nʌꞌ
\r (Lc. 2.1‑7)
\p
\v 18 Baxuc a jeraꞌ caj rochaꞌb Jesucristo ten u nʌꞌ uch. Caj cꞌataꞌb María, u nʌꞌ Jesús. José caj u cꞌata tiꞌ u tet María. Chen caj u toc cꞌataj. Mʌꞌ toy u raqꞌuintej. Caj yʌnjij u parar María quireꞌ u Tajꞌor u Pixam Cꞌuj. Rajiꞌ caj u yaꞌaraj u yʌntar u parar María.
\v 19 Caj yuba yʌn u parar María. A Joséjoꞌ mʌꞌ u cꞌat u raqꞌuintej María quireꞌ tsoy yor a Joséjoꞌ. Chen u cꞌat u muc u tuchiꞌtic María, José, soc mʌꞌ u cheꞌtaꞌr ten u racꞌob.
\v 20 José caj u tucraj ich yor bic cu bin u pꞌʌtic María. Caj u wʌyʌcꞌtaj José yʌjmasir u tꞌʌn Cꞌuj. Araꞌb tiꞌ ten yʌjmasir u tꞌʌn Cꞌuj:
\p ―Mʌꞌ ja chꞌic sajaquir ―quij yaꞌaraj tiꞌ José―, quireꞌ a techoꞌ u pararech a nunquir David. Tsoy a chꞌic a raqꞌuintej María. Yʌn u parar quireꞌ araꞌb tiꞌ ten u Tajꞌor u Pixam Cꞌuj caꞌ yanac u parar.
\v 21 A Maríajoꞌ ―caj u yaꞌaraj yʌjmasir u tꞌʌn Cꞌuj―, bin u caꞌ pararʌncʌr María xib u parar María.
\p Caj u toc araj yʌjmasir u tꞌʌn Cꞌuj tiꞌ José:
\p ―Caꞌ a pʌchej u cꞌabaꞌ JESÚS caꞌ bin a pʌchej u cꞌabaꞌ. Rajen pʌchaꞌan u cꞌabaꞌ Jesús, quireꞌ bin u jawsic u siꞌpir a mac a cu quibic u tꞌʌn soc mʌꞌ u bin ich cꞌacꞌ. 
\p
\v 22 Mʌꞌ ja wirej, quij Mateo, a Cꞌujoꞌ caj u toc araj jeꞌ u tar Cristojeꞌ. Quireꞌ baxuc caj u tsecꞌtaj yʌjtseqꞌuir u tꞌʌn Cꞌuj Isaías uch. Rajen nupꞌ u tꞌʌn bajeꞌrereꞌ. Mʌꞌ ja wirej, tarij Cristo. Uꞌyex baꞌ caj u yaꞌaraj yʌjtseqꞌuir u tꞌʌn Cꞌuj uch:
\q
\v 23 Irej a xquicoꞌ ―quij Isaías: Mʌꞌ toy u chꞌaꞌiꞌ caj yʌnjij u parar ―quij Isaías―. Bin u pachej u cꞌabaꞌ Emanuel ―quij Isaías.
\m U cꞌabaꞌ Emanuel u cꞌat yaꞌaric: Tiꞌ yʌn Cꞌuj yejeroꞌon ich yocꞌocab. Baxuc caj u yaꞌaraj yʌjmasir u tꞌʌn Cꞌuj caj u wʌyʌcꞌtaj José.
\p
\v 24 Caj tsꞌoc u wʌyʌcꞌ José. Caj ajij caj u chꞌaj u raqꞌuintej María quireꞌ baxuc caj u yaꞌaraj yʌjmasir u tꞌʌn Cꞌuj. Rajen caj u chꞌaj u raqꞌuintej José.
\v 25 Barej José mʌꞌ u wenʌn yejer, yiric yʌn u parar María, hasta caj rochaꞌb u parar Cꞌuj ten u nʌꞌ. Caj pach u cꞌabaꞌ JESÚS quireꞌ caj u toc araj yʌjmasir u tꞌʌn Cꞌuj.
\c 2
\s A mac u neꞌer baꞌ tar yiricob chan Jesús
\p
\v 1 Jesús, quij Mateo, caj rochaꞌb ich u cajar Belén. A Belénoꞌ tiꞌ yʌn ich u ruꞌumin Judea. Cu reyintic Herodes ich u ruꞌumin Judea caj rochaꞌb Jesús. Tar u tar ich u cajar Jerusalén. Caj cꞌuchob ich u cajar Jerusalén tar u tarob tu cu tar ic yum. Robob u neꞌer baꞌ caj cꞌuchob. Jun yarob caj cꞌuchob ich u cajar Jerusalén.
\v 2 A mac u neꞌer baꞌ caj u cꞌatajob ich u winiquirob judío tu cajar Jerusalén:
\p ―Tu rochaꞌb u rey u winiquirob judío? Mʌꞌ ja wirej, tij quiraj u sab, jach carem, a cu yesic toc rochaꞌb ten u nʌꞌ. Tij quiraj tu cu tar ic yum. Rajen caj taroꞌon caꞌ ij cꞌujintej ich u cajar Jerusalén.
\p
\v 3 Caj yubaj u rey Herodes baꞌ cu manob u cꞌaticob caj jaqꞌuij yor, Herodes. Baxuc tu cotor mac cʌjaꞌan ich u cajar Jerusalén, caj jaqꞌuij yorob a baꞌ caj u yubob u cꞌatobiꞌ.
\v 4 Rajen u rey Herodes, caj u pʌyaj u cꞌatej tiꞌob, tu cu bin rochbir a mac a cu bin tuchiꞌbir ten Cꞌuj quir u taquic mac tu cotor. Caj u cꞌataj tiꞌ u jach tsꞌurirob sacerdote u winiquirob judío. Baxuc, caj u cꞌataj Herodes tiꞌ a cu camsicob u tꞌʌn Moisés tiꞌ u winiquirob judío: 
\p ―Tu cu bin rochbir Cristo? ―quij Herodes.
\p
\v 5 Robob caj u yaꞌarajob tiꞌ Herodes:
\p ―Yʌn u rochaꞌr Cristo ich u cajar Belén quireꞌ tiꞌ yʌn tu ruꞌumin Judea. Mʌꞌ ja wirej, baxuc caj u tsꞌibtaj yʌjtseqꞌuir u tꞌʌn Cꞌuj uch:
\q
\v 6 Caj yaꞌaraj yʌjtseqꞌuir u tꞌʌn Cꞌuj uch: Tar yʌn ich u cajar Belén tu ruꞌumin Judea, quij. Jach manan coꞌoj u cajar Belén ich tu cotor u cajar tu ruꞌumin, quij Cꞌuj. Quireꞌ tiꞌ cu tar tub yʌnech, quij, a mac cu bin u reyinticob u winiquirob israel, quij Cꞌuj. Tiꞌ cu bin rochaꞌr ten u nʌꞌ, a mac a cu bin u cʌnantic u winiquirob israel.
\m Baxuc caj u yaꞌaraj Cꞌuj tiꞌ yʌjtseqꞌuir u tꞌʌn Cꞌuj uch.
\p
\v 7 Rajen caj u muc u pʌyaj Herodes caj u cꞌataj tiꞌ a u neꞌer baꞌ:
\p ―Pꞌiseten ―quij Herodes― mun u qꞌuinin caj a yʌn irex u jocꞌar sab u rey u winiquirob judío?
\p
\v 8 Caj u tus aꞌaraj Herodes tiꞌ a ju neꞌer baꞌ:
\p ―Caꞌ xiquechex ich u cajar Belén caꞌ a quiꞌ cʌxtex a wirej tu yʌn Cristo tu rochaꞌb. Wa ca wiriqueꞌ, purex a tꞌʌn ten soc in tar in cꞌujintic xan.
\p
\v 9 Caj tsꞌoc yubic yaꞌaraꞌ ten u rey Herodes caj binob a ju neꞌer baꞌ. Caj jocꞌob ich u cajar Jerusalén caj yirob sab quet cu binob yejer, sab tu cu tar ic yum, hasta cꞌuchij tu yʌn chan Cristo. Tiꞌ xurij sab ich chan Cristo.
\v 10 Caj yirob xurij sab jach manan quiꞌ yorob a ju neꞌer baꞌ.
\v 11 Caj ocob ich yatoch tu yʌn chan Cristo. Caj yirob rochaꞌan chan Cristo ten u nʌꞌ María. Caj yirob chan Cristo caj xonrajob ich Cristo quir u cꞌujinticob. Sansan caj u jarob u chan coprej quir u sijajob baꞌ tiꞌ chan Cristo. Caj u sijajob oro. Caj u sijajob tiꞌ u tsꞌac pom. Caj u sijajob u tsꞌac mirra. A jeꞌ tsꞌacaꞌ quir u choꞌwic tu baquer mac a cu quimineꞌ quireꞌ quiꞌ u boc.
\v 12 Caj tsꞌoc yiricob chan Cristo a ju neꞌer baꞌ, caj araꞌb tiꞌob ten Cꞌuj tu cu wʌyʌcꞌob:
\p ―Mʌꞌ ja binex ich u rey Herodes ―quij Cꞌuj.
\p Rajen caj sutnʌjob tu cajarob chen u jer u berir tiꞌ binobiꞌ.
\s Caj putsꞌ José yejer María ich u ruꞌumin Egipto yejer chan Cristo
\p
\v 13 Caj tsꞌoc u binob a ju neꞌer baꞌ. A Joséjoꞌ caj u wʌyʌcꞌtaj yʌjmasir u tꞌʌn Cꞌuj. Caj araꞌb tiꞌ ten yʌjmasir u tꞌʌn Cꞌuj:
\p ―Riqꞌuen caꞌ xiquech yejer chan Cristo yejer u nʌꞌ. Tar a bin ich u ruꞌumin Egipto, tiꞌ ca pꞌatʌr ich u ruꞌumin Egipto hasta quin waꞌaric tech caꞌ suꞌnʌquech teraꞌ. Quireꞌ u rey Herodes u cꞌat u cʌxtic u quinsej chan Cristo ―baxuc caj araꞌb tiꞌ ten yʌjmasir u tꞌʌn Cꞌuj tu cu wʌyʌcꞌ José.
\p
\v 14 Caj tsꞌoc u wʌyʌcꞌ José caj ajij, caj riqꞌuij caj binij yejer María yejer chan Cristo. Binob ich u ruꞌumin Egipto, cax acꞌbir caj binob.
\v 15 Tiꞌ pꞌatobiꞌ ich u ruꞌumin Egipto hasta quimij u rey Herodes. Soc u nupꞌur u tꞌʌn Cꞌuj, rajen binob ich u ruꞌumin Egipto. Quireꞌ caj u yaꞌaraj yʌjtseqꞌuir u tꞌʌn Cꞌuj uch: “Tiꞌ quin payic in parar, quij Cꞌuj, ich u ruꞌumin Egipto.” Baxuc caj u yaꞌaraj yʌjtseqꞌuir u tꞌʌn Cꞌuj uch.
\s Herodes caj u yaꞌaraj: Xen quinsex a chan ochir ich u cajar Belén
\p
\v 16 Caj yubaj Herodes caj u tusarob tiꞌ Herodes a ju neꞌer baꞌ. Caj tsꞌiquij u rey Herodes. Rajen caj u yaꞌaraj Herodes tiꞌ u soldadojob:
\p ―Caꞌ xiquex a quinsex a chan ochir xib ich u cajar Belén. Caꞌ a rʌc quinsex chan ochir, a caꞌtur yaxqꞌuin caj rochaꞌb ten u nʌꞌ. Cax tep u caꞌob, rʌc quinsex ich u cajar Belén. Baxuc caj u yubaj yacob a ju neꞌer baꞌ.
\p Caꞌtur yaxqꞌuin caj irob a saboꞌ. Rajen caj u toc quinsajob chan ochir soldadojob:
\p ―Cʌxtex u chan ochir a nʌtsꞌaꞌan ich u cajar Belén caꞌ a quinsex.
\p
\v 17 Baxuc caj u chꞌic araj yʌjtseqꞌuir u tꞌʌn Cꞌuj Jeremías uch. Quireꞌ caj u yaꞌaraj Jeremías uch:
\q
\v 18 Caj yubob u tꞌʌnob ich u cajar Ramá, Jeremías tu chꞌic tsecꞌtaj. Mʌꞌ toy quinsac chan ochir caj u tsecꞌtaj: Tan yocꞌarob tan yacꞌticob quireꞌ mʌnaꞌ u chan ochir. Jach yaꞌab cu yacꞌticob u chan ochir an ten bic Raquel caj u yacꞌtaj uch. Mʌnaꞌ mac cu quiꞌquintic yorob quir u chꞌenʌn yocꞌarob quireꞌ yiric mʌnaꞌ u chan ochir. 
\m Baxuc caj u tsecꞌtaj Jeremías uch.
\p
\v 19 Barej caj quimij u rey Herodes. José caj u wʌyʌcꞌtaj yʌjmasir u tꞌʌn Cꞌuj ich u ruꞌumin. Caj araꞌb tiꞌ:
\p
\v 20 ―Xen ―quij yaꞌaraj tiꞌ―. Mʌnaꞌ Herodes, quimij. Mʌnaꞌ mac cu quinsic chan Cristo. Riqꞌuen caꞌ xiquech yejer chan Cristo. Caꞌ sutnʌquech ta pach ich u ruꞌumin Israel ―baxuc araꞌb tiꞌ José ten yʌjmasir u tꞌʌn Cꞌuj. 
\p
\v 21 Caj tsꞌoc u wʌyʌcꞌ José. Caj ajij José caj riqꞌuij, caj bin ich u ruꞌumin Israel. Caj bin yejer u nʌꞌ chan Cristo, bayiriꞌ yejer chan Cristo.
\v 22 Caj yubaj yaꞌaraꞌ José cu reyintic u parar Herodes ich u ruꞌumin Judea. Caj yuba yaꞌaraꞌ oc u reyintic caj quim u tet. U cꞌabaꞌ u parar Herodes, Arquelao. Rajen caj u chꞌaj sajaquir José quir u sut tu pach ich u ruꞌumin Judea. Caj u wʌyʌcꞌtaj yʌjmasir u tꞌʌn Cꞌuj José. Caj araꞌb tiꞌ:
\p ―Xen ich u ruꞌumin Galilea.
\p Rajen binij José ich u ruꞌumin Galilea.
\v 23 Baxuc caj cꞌuchij José yejer u nʌꞌ Jesús ich u ruꞌumin Galilea. Caj bin u cʌjtarob ich u cajar Nazaret. Tiꞌ cajij quir u nupꞌur u tꞌʌn Cꞌuj. Baxuc araꞌb tiꞌ ten yʌjtseqꞌuir u tꞌʌn Cꞌuj uch:
\p ―Rajiꞌ tiꞌ cu tar ich u cajar Nazaret. Rajen araꞌan u winiquir nazaret.
\c 3
\s Juan caj u tsecꞌtaj ich tʌcay ruꞌum. Tiꞌ caj u yacsaj jaꞌ tu joꞌr mac
\r (Mr. 1.1‑8; Lc. 3.1‑9, 15‑17; Jn. 1.19‑28)
\p
\v 1 Tiꞌ toy cʌjaꞌan Jesús ich u cajar Nazaret, caj tarij Juan ich u ruꞌumin Judea. Caj u tsecꞌtaj ich tʌcay ruꞌum. Caj u yacsaj jaꞌ tu joꞌrob macob.
\v 2 Caj u tsecꞌtaj Juan caj yaꞌaraj:
\p ―Cꞌaxex a worex caꞌ a pꞌʌtex a cꞌasoꞌ quireꞌ cꞌuchij tu qꞌuinin u reyinticob Cꞌuj ―baxuc caj u yaꞌaraj Juan. 
\p
\v 3 A jeꞌ Juanaꞌ, quij Mateo, tsꞌibtaꞌb uch ten yʌjtseqꞌuir u tꞌʌn Cꞌuj Isaías. Caj yaꞌaraj Isaías tiꞌ Juan uch cax mʌꞌ tac Juan:
\q Quij cuꞌwic u tꞌʌn, quij Isaías. Quij cuꞌwic u tꞌʌn mac cu tsecꞌtic ich tʌcay ruꞌum. Aroꞌ a cu tsecꞌtic quij cuꞌwic u yaꞌaric: “Tajquintex a worex soc cꞌuchaꞌan a worex a quiꞌ acsiquex Jaj Tsꞌur, irex ca jariquex u ber soc u tar rey.”
\m Baxuc caj u tsꞌibtaj Isaías tiꞌ Juan uch. Rajen a bajeꞌrer nupꞌ u tꞌʌn Cꞌuj.
\p
\v 4 A Juanoꞌ u tsotser yʌrʌcꞌ camello cu sactaꞌ u buquintej. U cꞌax u nʌcꞌ Juanoꞌ, otꞌ. Cꞌaxicab cu mʌqꞌuic Juan, yejer sacꞌ cu chiꞌic Juan.
\v 5 Pim mac cu bin ich Juan quir yubicob u tsecꞌtaꞌ ten Juan. Tar u tarob ich u cajar Jerusalén. Tar u tarob ich u ruꞌumin Judea. Jach pim binob ich Juan a cu tarob ich u ruꞌumin Judea.
\v 6 A mac a caj u yaꞌaraj tiꞌ Cꞌuj, yʌn u siꞌpir. A caj u yaꞌaraj yʌn u siꞌpir jawsaꞌb u siꞌpir ten Cꞌuj. Rajen acsaꞌb jaꞌ tu joꞌrob ten Juan ich yaꞌarir Jordán.
\p
\v 7 Caj yiraj Juan caj tarob u winiquirob judío a fariseojoꞌ. Yet tarob judío a u winiquirob saduceojoꞌ. Quireꞌ u winiquirob judío a fariseojoꞌ cu quiꞌ cʌnanticob u tꞌʌn u nunquirob Moisés. Barej u winiquirob judío a saduceojoꞌ cu yaꞌaricob: 
\p ―Mʌnaꞌ mac cu riqꞌuir tiꞌ quimen.
\p Pim caj yiraj u tarob Juan, a saduceojoꞌ yejer a fariseojoꞌ. Caj tarob a saduceojoꞌ yejer a fariseojoꞌ quir yacsaꞌ jaꞌ tu joꞌrob ten Juan. Caj irir caj araꞌb tiꞌob ten Juan:
\p ―A techexoꞌ ―quij Juan―, jach cꞌasechex. U pararechex quisin. A mac arej a putsꞌurex quireꞌ tabar u tar xur tꞌʌn. A cꞌat wa ja taquiquex a bʌj?
\p
\v 8 Juan caj u yaꞌaraj tiꞌob:
\p ―Toc pꞌʌtex a cꞌasirex tu ca mʌnex, soc a mʌnex tu tsoyir, soc chʌcaꞌan yiricob a racꞌob caj a jach cꞌaxex a worex.
\p
\v 9 Juan caj u yaꞌaraj tiꞌ a saduceojoꞌ yejer a fariseojoꞌ: 
\p ―Mʌꞌ a yʌn tucriquex a waꞌariquex ta worex. Mʌꞌ chichin ca waꞌariquex: “U chꞌic pararenob Abraham. Mʌꞌ ja wirej, raꞌ in nunquirobꞌ.” Mʌꞌ ja tucriquex wa ju taquiquechex Cꞌuj quireꞌ u chꞌic pararechex a nunquirex Abraham.
\p Caj araꞌb tiꞌob ten Juan:
\p ―Uꞌyex baꞌ quin wac techex. A Cꞌujoꞌ cꞌuchaꞌan yor u waysic a jeꞌ tunichaꞌ soc rajiꞌob u chꞌic pararob a nunquirex Abraham soc u cʌnicob a nunquirex Abraham. 
\p
\v 10 Juan caj u yaꞌaraj tiꞌ a fariseojoꞌ yejer a saduceojoꞌ: 
\p ―Bajeꞌrer an ten bic cꞌuchij tu qꞌuinin u chꞌʌcar cheꞌ a cꞌasoꞌ a mʌnaꞌ u wicheꞌ. Tiꞌ cu bin purbir caꞌ tocac ich cꞌacꞌ. Baxuc xan, a mac a mʌꞌ u betej a baꞌ tsoyir, raꞌ cu bin uꞌwibir u tsꞌictar ten Cꞌuj.
\p
\v 11 Caj yaꞌaraj Juan:
\p ―A tenoꞌ jach jaj quin wacsic jaꞌ tu joꞌr mac a caj u pꞌʌtaj a cꞌasoꞌ quireꞌ caj u cꞌaxaj tu yor. Caꞌ bin tac Cristo. Tabar u tar Cristo. Rajiꞌ Cristo cu bin u tsꞌic techex u Tajꞌor u Pixam Cꞌuj soc a wet manex u Tajꞌor u Pixam Cꞌuj soc u rʌc rucꞌsic tu cotor a cꞌasirex. Caꞌ bin tac a Cristojiꞌ jach noꞌoj. A tenoꞌ ―quij Juan―, mʌꞌ noꞌojeniꞌ. Mʌꞌ ja wirej, a tenoꞌ mʌꞌ jach pajareniꞌ in pitic u cꞌanin u pechꞌ xʌnʌb, cax u cꞌurewen a tenoꞌ. 
\p
\v 12 Caj yaꞌaraj Juan:
\p ―Caꞌ bin tacoꞌ a Cristojoꞌ, jeꞌ u jʌsic techex irej techex ca rucꞌsiquechex u sor a wochex trigo. Chen a tsoyoꞌ, raꞌ cu pꞌatʌr a wochex trigo. Ca puriquex u sor a toꞌquiquex. Baxuc caꞌ bin xuruc tꞌʌn, caꞌ bin u muchꞌquinticoꞌon ic Tetex Cꞌuj. A cꞌasoꞌ, raꞌ cu bin purbir ich cꞌacꞌ tu mʌꞌ u tupur cꞌacꞌ. Chen a tsoyoꞌ cu bin yacsac ich caꞌanan.
\s Acsaꞌb jaꞌ tu joꞌr Jesús ten Juan
\r (Mr. 1.9‑11; Lc. 3.21‑22)
\p
\v 13 Raꞌ u qꞌuininoꞌ, caj tarij Jesús ich Juan. Tar u tar ich u ruꞌumin Galilea. A Juanoꞌ tiꞌ yʌn. Juan nʌtsꞌaꞌan ich yaꞌarir Jordán. Tarij ich Juan caꞌ acsac jaꞌ tu joꞌr ten Juan.
\v 14 Chen Juan mʌꞌ ju cꞌat yacsic jaꞌ tu joꞌr. Caj yaꞌaraj Juan:
\p ―A tenoꞌ, ca yʌn acsic jaꞌ tin joꞌr ―quij Juan―. A techoꞌ, mʌꞌ tarech quir in wacsic jaꞌ ta joꞌriꞌ.
\p A Juan u cꞌat u yiric u cꞌaxic u tucur Jesús rajen caj u yaꞌaraj Juan tiꞌ Jesús.
\p
\v 15 Caj u nuncaj Jesús caj araꞌb tiꞌ Juan:
\p ―Tsireꞌej bajeꞌrer. Mʌꞌ ja waꞌaric. Acsej jaꞌ tin joꞌr. Caꞌ ic betej tu cotor a baꞌ tsoy tu tꞌʌn Cꞌuj.
\p Rajen Juan caj u yacsaj jaꞌ tu joꞌr Jesús.
\v 16 Caj tsꞌoc u yacsic jaꞌ tu joꞌr Jesús ten Juan caj joqꞌuij Jesús ich chiꞌ jaꞌ, caj yiraj u buj caꞌanan. Seb caj yiraj Jesús u Tajꞌor u Pixam Cꞌuj. Caj emij tiꞌ caꞌanan. Caj irir ten Jesús caj emij u Tajꞌor u Pixam Cꞌuj oc yicnʌn Jesús. Irej susuy.
\v 17 Caj yubob tar u tar u tꞌʌn caꞌanan. Caj yaꞌaraj Cꞌuj: 
\p ―A techoꞌ ―quij―, a jach in pararech, in jach yajech. A techoꞌ caj a quiꞌquintaj in wor.
\c 4
\s Tumtaꞌb yor Jesús ten quisin quir yiric wa cu yacsic u siꞌpir
\r (Mr. 1.12‑13; Lc. 4.1‑13)
\p
\v 1 Caj pay u ber Jesús ten u Tajꞌor u Pixam Cꞌuj soc cu tumtaꞌr yor ich tʌcay ruꞌum. A quisinoꞌ, cu bin tumtic yor Jesús, quir yirir wa cu yacsic u siꞌpir.
\p
\v 2 Tiꞌ yʌn ich tʌcay ruꞌum cuarenta u qꞌuinin. Caj u jamach pꞌat u janʌn u burur qꞌuin u burur acꞌbir. Caj tsꞌoc u jamach pꞌʌtic u janʌn. Jesús caj wichʌjij.
\v 3 A quisinoꞌ, caj u nʌtsꞌ u bʌj ich Jesús soc u tumtic yor Jesús. Caj araꞌb tiꞌ Jesús:
\p ―Wa tech, jach taj u pararech Cꞌujeꞌ, waysej a jeꞌ tunichaꞌ waj caꞌ a waysej a woꞌoch waj quir a jantic.
\p
\v 4 Barej Jesús caj u nuncaj. Caj yaꞌaraj Jesús:
\p ―Baxuc tu tsꞌibaꞌan u tꞌʌn Cꞌuj, cu yaꞌaric toꞌon: “Mʌꞌ chen a woch waj cu cuxquintiquech. A xiboꞌ cu cuxtar wa cu yaꞌaric Cꞌuj.”
\p
\v 5 Caj payir Jesús ten quisin soc u bin ich u cajar Jerusalén. U winiquirob judío tiꞌ cu naj cꞌujinticob Cꞌuj ich u cajar Jerusalén. Caj payir Jesús ten quisin caꞌanan tu joꞌr carem naj tu cu naj cꞌujinticob Cꞌuj u winiquirob judío.
\v 6 Caj araꞌb ten quisin tiꞌ Jesús:
\p ―Wa jach taj u pararech Cꞌuj, pur a bʌj caꞌ rubuquech. Quireꞌ ―quij quisin― cu yaꞌaric u tꞌʌn Cꞌuj:
\q Quireꞌ a Cꞌujoꞌ cu yaꞌaric tiꞌ u yʌjmasir u tꞌʌn Cꞌuj: “Caꞌ a cʌnantej a mac in jach yaj. Jeꞌ a ricꞌsiquex yejer a cꞌʌbex cax mʌꞌ u nac chꞌʌctej tunich, soc mʌꞌ u yajtar u yocob ten tunich.”
\m Baxuc caj u yaꞌaraj quisin.
\p
\v 7 Jesús caj u nuncaj caj yaꞌaraj tiꞌ quisin:
\p ―Baxuc cu yaꞌaric tu tsꞌibaꞌan u tꞌʌn Cꞌuj xan: “Mʌꞌ tsoy ic tumtic yor ic Jaj Tsꞌurirex Cꞌuj soc ij quirej wa taj a baꞌ cu yaꞌaric.”
\p
\v 8 Tu caꞌ ten wʌcꞌʌs payir Jesús ten quisin. Bin yejer quisin ich joꞌr wits. Jach caꞌanan u witsir. Caj esaꞌb tiꞌ ten quisin soc yiric Jesús tu cotor u ruꞌumin tu cu reyinticob rey. Caj yiraj Jesús, jach tsoy u ruꞌumin tu cu reyinticob.
\v 9 Caj araꞌb tiꞌ Jesús ten quisin:
\p ―Jeꞌ in tsꞌic tech a jeꞌ baꞌ tu cotor, a jeꞌ tsoyaꞌ ich yocꞌocab, wa ca xontar tu yʌnen caꞌ a cꞌujinten ―quij quisin.
\p
\v 10 Jesús caj u yaꞌaraj tiꞌ quisin:
\p ―Joqꞌuen xen, quisinech. Quireꞌ u tꞌʌn Cꞌuj cu yaꞌaric: “Cꞌujintej a Jaj Tsꞌur Cꞌuj. Jariꞌ rajiꞌ ca beyaj tiꞌ.”
\p
\v 11 Caj tsꞌoc u tumtaꞌ yor Jesús, caj binij quisin, caj tarob u yʌjmasir u tꞌʌn Cꞌuj ich Jesús. Caj tarob yamtaꞌbir Jesús ten yʌjmasirob u tꞌʌn Cꞌuj.
\s Jesúsoꞌ u yʌnxchun u beyaj ich u ruꞌumin Galilea
\r (Mr. 1.14‑15; Lc. 4.14‑15)
\p
\v 12 Caj yubaj Jesús mac Juan ich tu cu naj maꞌcʌr winiquir. Caj wʌcꞌʌs bin Jesús ich u ruꞌumin Galilea.
\v 13 Jesús mʌꞌ wʌcꞌʌs cajij ich u cajar Nazaret. Caj bin u cʌjtar ich u cajar Capernaum. Tiꞌ yʌn ich u chiꞌcꞌacꞌnab. A Capernaum tiꞌ yʌn ich u ruꞌumin Zabulón. Baxuc xan, ich u ruꞌumin Neftalí.
\v 14 Caj bin cʌjtar Jesús ich u cajar Capernaum quir u nupꞌsic u tꞌʌn Cꞌuj, baxuc caj u tsꞌibtaj Isaías uch.
\p
\v 15 Isaías caj yaꞌaraj uch, cax mʌꞌ toy tac Jesús uch. Caj u toc araj Isaías:
\q Tar yʌn ich u ruꞌumin Zabulón. Tar xan ich u ruꞌumin Neftalí. Raꞌ u berir ich chiꞌcꞌacꞌnab. Chen pʌchir yaꞌarir Jordán tu cu tar ic yum. Raꞌ u ruꞌumin Galilea, tiꞌ cʌjaꞌan a mʌꞌ u winiquirob judío.
\v 16 A mac yʌn u siꞌpirob, a cʌjaꞌanob ich u ruꞌumin Zabulón yejer u ruꞌumin Neftalí. Jeꞌ yiricob yʌjtaquirobeꞌ a mac a yʌn u siꞌpirob. A mac tiꞌ cʌjaꞌan ich yacꞌbirir quireꞌ yʌn u siꞌpirob, tiꞌ cu bin cꞌuchur Cristo tu yʌnob soc u yacsic tiꞌob a mʌꞌ u winiquirob judío ich u sasirir Cꞌuj.
\m Baxuc caj u yaꞌaraj Isaías uch.
\p
\v 17 Caj cꞌuchij tu cʌjtar Jesús ich u cajar Capernaum. Caj u yʌnxchun u tsecꞌtic u tꞌʌn Cꞌuj Jesús:
\p ―Cꞌaxex a wor ―quij Jesús―. Caꞌ a pꞌʌtex a cꞌasiroꞌ, quireꞌ cꞌuchij tu qꞌuinin bin u caꞌ u reyinticob Cꞌuj weꞌ.
\s Jesús caj u tꞌʌnaj a cu chuc cʌyeꞌ caꞌ xicob yicnʌn Jesús; cuatro caj u tꞌʌnaj
\r (Mr. 1.16‑20; Lc. 5.1‑11)
\p
\v 18 Jesús caj bin ich chiꞌ cꞌacꞌnab. U cꞌabaꞌ u cꞌacꞌnabir Galilea. Caj irir Pedro ten Jesús. U jer u cꞌabaꞌ Pedro, Simón. Cu puric u chimin u chuc cʌy. Tiꞌ yʌn yitsꞌin Pedro, u cꞌabaꞌ Andrés. Quireꞌ raꞌ u beyajob Simón yejer Andrés, cu chuc cʌyob.
\v 19 Caj araꞌb tiꞌob ten Jesús:
\p ―Cojenex caꞌ in camsechex tiꞌ u tꞌʌn Cꞌuj, soc a camsiquex a racꞌobex. Raꞌ a beyajex bajeꞌrer.
\p
\v 20 Seb caj u pꞌʌtob u chuc cʌyob caj binob ich u pach Jesús. Simón yejer yitsꞌin, caj binob tu pach Jesús.
\p
\v 21 Sansameꞌ caꞌ u caꞌ ir u jer. Baꞌiriꞌ caꞌtur xan. Caꞌtur yejer yitsꞌin. Sucuꞌunbir Jacobo. Itsꞌinbir Juan. Pꞌeriꞌ u tetob. Zebedeo u cꞌabaꞌ u tetob. Tiꞌ yʌnob ich chem yejer u tetob cu chuwicob u chimin u chuc cʌyob, quireꞌ tꞌoc u chimin. Jesús caj u payaj caꞌ tacob tu pach u cʌnicob u tꞌʌn Jesús.
\v 22 Seb caj u pꞌʌtob u tetob yejer u chem quir u cʌnicob u tꞌʌn Jesús.
\s Jesús cu camsic jach pim mac
\r (Lc. 6.17‑19)
\p
\v 23 Pachir caj man Jesús u camsic tu cotor u cajar ich u ruꞌumin Galilea. Cu yocar u camsej tu cu naj cꞌujinticob Cꞌuj u winiquirob judío ich u chan najir. Jujuntur u cajar cu yocar u camsej u tꞌʌn Cꞌuj. Caj u tsecꞌ tiꞌob bic cu bin u reyintic Cꞌuj ich yocꞌocab. Cax a baꞌ yajir yʌn tiꞌob cu rʌc jawsic Jesús.
\v 24 Caj yubob u jumintaꞌ tiꞌ yʌn Jesús ich u ruꞌumin Galilea hasta tu ruꞌumin Siria. Caj u yubob u jumintaꞌ bic cu jawsic mac, rajen tarob u puricob a mac yajob ich Jesús. Tu cotor a baꞌ yajireꞌ yʌn tiꞌob, caj tar u purob ich Jesús. A macob mʌꞌ u riqꞌuir chꞌictareꞌ, cu tar purbir. A macob acaꞌan quisin tiꞌeꞌ, cu tarob purbir ich Jesús. A macob cu sʌjquimin, cu tarob purbir ich Jesús caj rʌc jawsaꞌb u yajirob ten Jesús.
\v 25 Caj tarob ich Jesús quir yubicob. Tiꞌ u tarob ich pʌchir yaꞌarir Jordán. Tiꞌ u tarob ich u ruꞌumin Galilea. Tiꞌ u tarob ich u cajarob Decápolis. Tiꞌ u tarob ich u cajar Jerusalén. Tiꞌ u tarob ich u ruꞌumin Judea. Jach pim rʌc tarob ich Jesús.
\c 5
\s A baꞌ caj u tsecꞌtaj Jesús ich chan pꞌuc wits
\p
\v 1 Caj yiraj Jesús jach pim mac. Jesús caj naquij joꞌr pꞌuc wits. Tiꞌ curaj Jesús ich u joꞌr wits. Caj natsꞌob u camsʌwinicob Jesús ich u joꞌr pꞌuc wits.
\v 2 Baxuc a jeraꞌ Jesús caj u camsaj u camsʌwinicob.
\s A mac jach quiꞌ yorob
\r (Lc. 6.20‑23)
\p
\v 3 Caj u camsaj Jesús caj yaꞌaraj tiꞌ u camsʌwinicob: 
\p ―Quiꞌ yorob ―quij Jesús―, quireꞌ yerob jeꞌ u jawsaꞌr u siꞌpirob ten Cꞌuj. Quireꞌ robob cu bin yamticob Cꞌuj tu cu bin u reyintic caꞌanan.
\p
\v 4 ’Quiꞌ yorob ―quij Jesús―, a mac mʌꞌ quiꞌ yoreꞌ bajeꞌrer, quireꞌ cu bin u quiꞌquintaꞌ yor ten Cꞌuj.
\p
\v 5 ’Quiꞌ yorob ―quij Jesús―, a cu tucricob u racꞌob. Chen u bʌjiriꞌ mʌꞌ u tucric, quireꞌ bin u cꞌʌmej a baꞌ araꞌb tiꞌ ten Cꞌuj quir u quiꞌ cuxtar ich yocꞌocab. 
\p
\v 6 ’Quiꞌ yorob ―quij Jesús―, a cu pachticob tu yor u manob ich u tsoyir. Quireꞌ jeꞌ u yamtaꞌ ten Cꞌuj soc u manob ich u tsoyir.
\p
\v 7 ’Quiꞌ yorob ―quij Jesús―, a cu tucric tiꞌ u racꞌob, cu yamtic u racꞌob. Quireꞌ Cꞌuj cu bin u yajquintic a mac a cu yajquintic u racꞌob.
\p
\v 8 ’Quiꞌ yorob ―quij Jesús―, a mac jawsaꞌ u siꞌpir ten Cꞌuj. Quireꞌ jeꞌ yiricob Cꞌuj caꞌananeꞌ.
\p
\v 9 ’Quiꞌ yorob ―quij Jesús―, a mac cu man u sisquintic u yor u racꞌob. Quireꞌ a Cꞌujoꞌ jeꞌ bin yaꞌaric: “Aroꞌ in parar” ―quij―.
\p
\v 10 ’Quiꞌ yorob ―quij Jesús―, a mac a chucob u pachob, quireꞌ cu manob tu tsoyir. Tiꞌ cu bin u reyinticob caꞌanan yejer Cꞌuj.
\p
\v 11 ’Cax cu pꞌastic techex ―quij Jesús―, quiꞌquintej a worex. Cax cu cheꞌtiquechex, quiꞌquintej a worex. Cax cu chuquicob a pachex, quiꞌquintej a worex.
\p Jesús caj yaꞌaraj:
\p ―Cax cu pʌqꞌuicob a pachex quireꞌ caj a wacsajex ta wor tiꞌ in tꞌʌn ―quij Jesús―. Quiꞌquintej a worex. 
\p
\v 12 Caj yaꞌaraj Jesús ich u joꞌr pꞌuc wits tiꞌ u camsʌwinicob: 
\p ―Quiꞌquintej a worex, caꞌ tsoyac a worex wa ber cu pꞌastiquechexob. A Cꞌujoꞌ ―quij Jesús―, tiꞌ cu bin u quiꞌ yacsiquechex caꞌanan. Quireꞌ caj a muctajex tu cu pꞌastiquechexob.
\p Caj yaꞌaraj Jesús:
\p ―Baxuc caj u chucob u pachob yʌjtseqꞌuirob u tꞌʌn Cꞌuj tu cʌjaꞌanob uch.
\s Camsaꞌb ten Jesús irob yoꞌoch xaꞌan
\r (Mr. 9.50; Lc. 14.34‑35)
\p
\v 13 Caj yaꞌaraj Jesús tiꞌ u camsʌwinicob:
\p ―A techexoꞌ, irechex xaꞌan teꞌ yocꞌocab. Chen wa cu jawar chꞌochꞌer cu yubic mʌnaꞌ chꞌochꞌ. Wa mʌꞌ chꞌochꞌ, jot mʌꞌ baꞌwir tiꞌ, quireꞌ mʌꞌ u caꞌ chꞌochꞌtar. Rajen cu pichꞌintic mac. Rajen caꞌ a cʌnantex a mucꞌ techex a tsꞌaꞌb techex ten Cꞌuj.
\p
\v 14 Caj yaꞌaraj Jesús:
\p ―A cajaroꞌ, ich u joꞌr wits, chʌcaꞌan irir ten tu cotor mac. An ten bic a quiboꞌ quir u yercꞌacꞌtic a mac cʌjaꞌan ich yocꞌocab, baxuc techex xan, quir a yamtiquex mac quireꞌ a werex Cꞌuj.
\v 15 Baxuc a mac cu tꞌʌbic u quib. Mʌꞌ u yacsic yaran chꞌac. Cu cuquintic u quib caꞌanan soc sasir yatoch soc u yercꞌacꞌtic yatochob.
\v 16 Rajen caꞌ manaquex tu tsoyir ich a racꞌob soc chʌcaꞌan yiricob, soc u bin u sʌjticob Cꞌuj a mac ic Tetex a tiꞌ yʌn ich caꞌanan.
\s Jesús tu camsic a baꞌ yarmʌn Moisés uch
\p
\v 17 Caj yaꞌaraj Jesús tiꞌ u camsʌwinicob ich u joꞌr pꞌuc wits:
\p ―Mʌꞌ taren in waꞌaric techex quir a pꞌʌtiquex u tꞌʌn Moisés. Mʌꞌ taren in waꞌaric techex quir a pꞌʌtiquex a baꞌ caj u camsajechex yʌjtseqꞌuirob u tꞌʌn Cꞌuj uch. 
\p Caj yaꞌaraj Jesús:
\p ―Caj taren in camsiquechex soc a werex a baꞌ caj u yaꞌaraj Moisés yejer yʌjtseqꞌuirob u tꞌʌn Cꞌuj. Quireꞌ mʌꞌ taj caj u camsechexob yʌjcamsayʌjirob u tꞌʌn Moisés bajeꞌrer. Taren ―quij Jesús―, in rʌc nupꞌsej a baꞌ araꞌb ich u tꞌʌn Moisés, baxuc ich u tꞌʌn yʌjtseqꞌuirob u tꞌʌn Cꞌuj.
\v 18 Cꞌʌꞌotex a baꞌ quin wac techex ―quij Jesús―. Mʌꞌ xuruc tꞌʌniꞌ ich yocꞌocabiꞌ hasta cu rʌc nupꞌur u tꞌʌn Cꞌuj a tsꞌibtaꞌb ten Moisés uch. Mʌꞌ chichin cu pꞌatar caꞌ bin xuruc tꞌʌn ich yocꞌocab.
\p
\v 19 Caj yaꞌaraj Jesús:
\p ―A mac cu jenmastic u tꞌʌn Moisés bajeꞌrer, cax chichin cu jenmastic. Baxuc cu bin u camsic tiꞌ u racꞌob, chen bay cu cꞌuchur ich caꞌanan. Barej mac taj caj u quibaj u tꞌʌn Moisés. Baxuc taj cu quiꞌ camsic tiꞌob u tꞌʌn Moisés. Aroꞌ yaꞌab cu bin u tsꞌurintic caꞌanan.
\p
\v 20 Caj yaꞌaraj tiꞌ u camsʌwinicob, Jesús:
\p ―A tenoꞌ ―quij Jesús―. Chich quin wac techex. Wa mʌꞌ jach manex tu tsoyir. Mʌꞌ ja wirej, u winiquirob judío a fariseojoꞌ yejer u racꞌob a cu camsicob u tꞌʌn Moisés mʌꞌ ju manob tu tsoyir. Mʌꞌ cꞌuchaꞌan a worex a bin ich caꞌanan tu cu reyintic Cꞌuj.
\s Jesús cu camsic mʌꞌ tsoy u tsꞌictar mac
\r (Lc. 12.57‑59)
\p
\v 21 Caj yaꞌaraj tiꞌ u camsʌwinicob, Jesús:
\p ―Caj a wuꞌyaj yaꞌaric a nunquirex uch: “Mʌꞌ tsoy a quinsic mac. Wa cu quinsiqueꞌ, tar cu bin ʌcʌtan ich juez soc yer bic tabar caj u quinsaj.”
\v 22 Chen a tenoꞌ ―quij Jesús―. Quin chich aric techex: A mac cu tsꞌictar yejer u bʌj, tiꞌ cu bin ʌcʌtan Cꞌuj soc yubic biquinin.
\p Caj yaꞌaraj Jesús:
\p ―A mac cu pꞌastic u bʌj, caꞌ bin xic ʌcʌtan tu cotor a jach tsꞌurirob u winiquirob judío soc yaꞌaric bic caj u pꞌastaj. A mac a cu yaꞌaric tiꞌ u bʌj: “Jach chich a joꞌr tech”, tabar u bin yerar ich cꞌacꞌ, quireꞌ u siꞌpir.
\p
\v 23 Caj yaꞌaraj tiꞌ u camsʌwinicob, Jesús:
\p ―Rajen a tenoꞌ, chich quin waꞌaric techex.
\v 24 Wa tabarech a quinsej wacax a sije tiꞌ Cꞌuj soc u jawar a siꞌpir. Wa ca cꞌʌꞌotic tu tsꞌiquech yejer a bʌj, jamach pꞌʌtej u boꞌorir a siꞌpir. Caꞌ sutnʌc a sisquintej yor a bʌj. Jeroj caj tsꞌoquij a sisquintic yor a bʌj, tsoy a bin a quinsic wacax soc u jawsic a siꞌpir Cꞌuj.
\p
\v 25 Caj yaꞌaraj tiꞌ u camsʌwinicob, Jesús:
\p ―Wa yʌn winic cu bin u puriquech ʌcʌtan ich juez quir yiric wa ja boꞌor tiꞌ. Joqꞌuen sisquintej yor soc mʌꞌ u bin u puriquech ich juez. Quireꞌ caj tsꞌoc yiric yʌn a siꞌpir, cu bin u cꞌubiquech tu cu naj maꞌcʌr winic. 
\p
\v 26 Caj yaꞌaraj tiꞌ u camsʌwinicob, Jesús:
\p ―Jach taj quin waꞌaric techex: Hasta ca quiꞌ boꞌotic policía cu jocꞌsiquech.
\s Jesús cu camsic mʌꞌ tsoy u man xib, cax xquic mʌꞌ tsoy u man
\p
\v 27 Caj yaꞌaraj tiꞌ u camsʌwinicob, Jesús:
\p ―A techexoꞌ, a wuꞌymʌn yaꞌaraꞌ ten a nunquirex: “Mʌꞌ tsoy u man xib.”
\v 28 Chen a tenoꞌ ―quij Jesús―. Chich quin waꞌaric techex: A mac tan tu yiric xquic. Cu pachtej u man yejer raꞌ xquicoꞌ, irej wa cu jach man yejer quireꞌ cu jach pachtic yor.
\p
\v 29 Caj yaꞌaraj tiꞌ u camsʌwinicob, Jesús:
\p ―Wa jumbuj a wich tabar u yacsic a siꞌpir, mʌꞌ ja quibej. Tucrej an ten bic caj a toc jocꞌsaj a purej nachir. Mʌꞌ ja wirej, jach manan tsoyir a sʌtic tuririꞌ a wich soc mʌꞌ a bin ich cꞌacꞌ munt qꞌuin.
\v 30 Wa raꞌ tabar u siꞌpir a cꞌʌbeꞌ, mʌꞌ a quibej. Tucrej an ten bic caj a curchꞌʌctaj caj a puraj. Quireꞌ jach manan tsoyir a sʌtic a cꞌʌb soc mʌꞌ a bin ich cꞌacꞌ munt qꞌuin.
\s Mʌꞌ tsoy u pꞌʌtic u racꞌ
\r (Mt. 19.9; Mr. 10.11‑12; Lc. 16.18)
\p
\v 31 Caj yaꞌaraj tiꞌ u camsʌwinicob, Jesús:
\p ―Caj a wuꞌyex yaꞌaraꞌ a nunquirex uch: “A mac a u cꞌat u pꞌʌtic u racꞌ. Yʌn u cʌxtic caꞌ u tsꞌibtej u juꞌun soc tsoy u pꞌʌtic u racꞌ.”
\v 32 Chen a tenoꞌ ―quij Jesús―, chich quin waꞌaric techex: Mʌꞌ tsoy a pꞌʌtiquex a racꞌ.
\p Caj yaꞌaraj tiꞌ u camsʌwinicob, Jesús:
\p ―Chen wa cu man yejer u jer mac tsoy a pꞌʌtic. Chen a mac wa rajiꞌ cu chꞌic, a caj u pꞌʌtaj a raqꞌueꞌ. Wa cu chꞌic u jer mac, cax mʌnaꞌ u siꞌpir chen caj u chꞌaj u raqꞌuintej caj u pʌyaj u siꞌpir. Baxuc a pꞌataꞌb ten u mam, yʌn u siꞌpir.
\s Mʌꞌ tsoy u yaꞌaric mac: Cꞌuj cu yiric ber cu toc aric baꞌ tiꞌ mac
\p
\v 33 Caj yaꞌaraj tiꞌ u camsʌwinicob, Jesús:
\p ―A wuꞌymʌnex yaꞌaraꞌ ten a nunquirex uch: “Caꞌ a boꞌotej, a caj a toc araj tiꞌ Cꞌuj, wa caj a chuquex Cꞌuj.”
\v 34 Chen a tenoꞌ ―quij Jesús―, chich quin camsic techex; mʌꞌ tsoy a waꞌariquex: “Cꞌuj cu yiric” wa ber ca toc ariquex baꞌ tiꞌ mac. Baꞌiriꞌ xan: mʌꞌ tsoy a chuquex Cꞌuj caꞌanan, tiꞌ taroꞌ tu cu reyintic Cꞌuj.
\v 35 Mʌꞌ tsoyiꞌ ―quij Jesús―, a chuquiquex ich ruꞌum, tu ca toc aric baꞌ tiꞌ mac quireꞌ Cꞌuj tiꞌ yʌn ich ruꞌum xan. Mʌꞌ tsoy a chuquiquex Jerusalén, tu ca toc ariquechex baꞌ tiꞌ a racꞌob, quireꞌ raꞌ u cajar Cꞌuj.
\v 36 Cax mʌꞌ a waꞌariquex: “In joꞌr cu yiric” tu ca toc ariquex baꞌ tiꞌ mac. Quireꞌ mʌꞌ cꞌuchaꞌan a worex a waysiquex a joꞌrex sʌc, mʌꞌ yaꞌax a joꞌrex cꞌuchaꞌan a waysiquex. Cax turiꞌ u tsotser a joꞌrex mʌꞌ u cꞌuchur a worex tiꞌ. 
\p
\v 37 Jesús caj u yaꞌaraj tiꞌ u camsʌwinicob:
\p ―Wa ca chen ariquex tiꞌ a racꞌob: “Jeꞌ in bin” ―quech tiꞌ―, wa “mʌꞌ jin bin” ―quech tiꞌ―. Baxuc tsoy a nunquiquex tiꞌ. Wa ju jer a tꞌʌn ca waquex tiꞌ, tiꞌ cu tar ich quisin. Rajen turiꞌ tꞌʌn ca nunquiquex soc u quibic a tꞌʌn.
\s Jesús caj u camsaj a mʌꞌ tsoy u pʌquic u boꞌorir
\r (Lc. 6.29‑30)
\p
\v 38 Caj yaꞌaraj tiꞌ u camsʌwinicob, Jesús:
\p ―A wuꞌymʌnex yaꞌaraꞌ ten a nunquirex uch: “Toc pʌquej u boꞌorir yejer a mac caj u chucaj a pach.”
\v 39 Chen a tenoꞌ ―quij Jesús―, chich quin camsic techex: Mʌꞌ ja pʌquic u boꞌorir a jach cꞌasoꞌ, cax cu raxic a techoꞌ. Mʌꞌ a pʌquej a bʌj. Wa caj u raxaj jumbuj a pꞌuc. Raꞌ mʌꞌ a cʌniquex. Ca tsꞌic u raxej jumbuj a pꞌuc xan.
\p
\v 40 Caj yaꞌaraj Jesús tiꞌ u camsʌwinicob ich u joꞌr pꞌuc wits:
\p ―Wa mac u taꞌquic a joꞌr soc u chꞌic a nocꞌ. Pitej a nocꞌ, caꞌ a tsꞌaj tiꞌ ―quij Jesús―, cax u caꞌ yaꞌarir a nocꞌ xan.
\p
\v 41 Caj yaꞌaraj Jesús:
\p ―Wa cu tsꞌʌric a pach soldado caꞌ a cuchej u baꞌtac turiꞌ nachir. Caꞌ arej tiꞌ: “Jeꞌ in cuchic caꞌtureꞌ nachir quir in yamtiquech.”
\p
\v 42 Caj yaꞌaraj Jesús tiꞌ u camsʌwinicob:
\p ―Wa mac caj u cꞌataj tech a baꞌtac. Mʌꞌ ja waꞌaric mʌꞌ ja tsꞌic tiꞌ. Tsꞌajex tiꞌ, cax a mac a cu tar u majantej. Tsꞌajex tiꞌ.
\s Yajquintej a mac a cu pꞌactiquechex
\r (Lc. 6.27‑28, 32‑36)
\p
\v 43 Caj yaꞌaraj tiꞌ u camsʌwinicob, Jesús:
\p ―A wuꞌymʌnex yaꞌaraꞌ ten a nunquirex uch ―quij Jesús―: “A mac cu yajquintiquex, quet yajquintej. A mac a cu pꞌactiquexoꞌ quet a pꞌactiquex xan.”
\v 44 Chen a tenoꞌ ―quij Jesús―, chich quin camsic techex. Yajquintex a mac cu pꞌactic techex. Quiꞌ tꞌʌnex a mac a cu cʌrʌxtꞌʌntiquex. Ca waquex tiꞌ: “Caꞌ u yamtech Cꞌuj.” Quiꞌ yamtex a mac a cu pꞌactiquechex. A mac cu pꞌactiquechex, tꞌʌnex Cꞌuj tiꞌ. Cax cu cheꞌtiquechex, tꞌʌnex Cꞌuj tiꞌ xan.
\p
\v 45 Caj yaꞌaraj Jesús tiꞌ u camsʌwinicob:
\p ―Wa ca yaj a cu pꞌactiquechexoꞌ u pararechex Cꞌuj, caj a cʌnex Cꞌuj. Quireꞌ a Cꞌujoꞌ cu yajquintic mac, cax tiꞌ yʌn a cꞌasoꞌ, cax a tiꞌ yʌn a tsoyoꞌ. A Cꞌujoꞌ cu chaꞌic u tar jaꞌ tiꞌ a cꞌasoꞌ soc u chꞌijir u pʌcꞌar. Baxuc xan, tiꞌ a tsoyoꞌ, cu chaꞌic u tar jaꞌ soc u chꞌijir u pʌcꞌar xan.
\p
\v 46 Caj yaꞌaraj Jesús:
\p ―Wa ca chen yajquintiquex a mac a yajexeꞌ. Jeꞌ wa ju boꞌotiquechex Cꞌuj. Mʌꞌ ju boꞌotiquechex, quireꞌ a mac jach cꞌas xanoꞌ, cu yajquintic a ju jach yaj u racꞌob. U jeroj, mʌꞌ ju yajquintej, cu pꞌactic.
\p
\v 47 Caj yaꞌaraj Jesús tiꞌ u camsʌwinicob:
\p ―Baꞌwir ca tꞌʌniquex a racꞌob chen mʌꞌ a tꞌʌniquex a cu pꞌactiquechex. Tsoy wa mʌꞌ a tsoyiꞌ? ―quij Jesús―. Quireꞌ a mac mʌꞌ yer Cꞌuj baxuc cu tꞌʌnic u racꞌob xan, mʌꞌ ju tꞌʌnic a mac cu pꞌacticob.
\p
\v 48 Caj yaꞌaraj tiꞌ u camsʌwinicob, Jesús:
\p ―Cʌnex Cꞌuj ―quij Jesús―. Quire mʌnaꞌ u siꞌpir a Cꞌujoꞌ soc irechex Cꞌuj, mʌnaꞌ a siꞌpirex.
\c 6
\s Jesús cu camsic soc taj u beyajob
\p
\v 1 Caj yaꞌaraj tiꞌ u camsʌwinicob, Jesús ich u joꞌr pꞌuc wits:
\p ―Wa ca manex ta tsoyir soc chen yiric ten a racꞌob. Mʌꞌ ju bin u quiꞌ boꞌotiquechex ic Tet Cꞌuj a mac tiꞌ yʌn ich caꞌanan. Rajen cʌnantechex a bʌj tu ca manex tu tsoyir.
\v 2 Rajen ―quij Jesús―, quin waꞌaric techex. Wa ca wiriquex mʌnaꞌ nocꞌ. Cu tsꞌoc a jʌsiquex tiꞌ, chen mʌꞌ a manex a waꞌarex tiꞌ tu cotor mac irex wa caꞌtur u tucur. Mʌꞌ ja wirej, aroꞌ cu man yaꞌaric soc yaꞌaric tiꞌ: “Jach tsoyech quireꞌ caj a jʌsaj tiꞌ.” Baxuc u cꞌat yubicob u jumintej tu cu man u cꞌujinticob Cꞌuj a fariseojoꞌ. Baxuc u cꞌat yubicob u jumintej tu cu man u tꞌʌnicob u racꞌob a caꞌtur u tucuroꞌ. Taj quin waꞌaric techex, toc boꞌotaꞌb ten u racꞌob caj yaꞌarajob: “Jach tsoyech.” 
\v 3 Chen a tenoꞌ ―quij Jesús―, quin camsic techex. Wa ca jʌsiquex mac mʌnaꞌ baꞌ tiꞌ. Mʌꞌ ja manex a waꞌarex. 
\v 4 Muc u tsꞌajex tiꞌ baꞌ, a mʌnaꞌ baꞌ tiꞌ. A Cꞌujoꞌ, cu yiric a muc u tsꞌiquex tiꞌ. Jeꞌ u quiꞌ boꞌotic techexeꞌ caꞌ bin xiquechex caꞌanan.
\s Jesús cu camsic u camsʌwinicob bictabar u tꞌʌnicob Cꞌuj
\r (Lc. 11.2‑4)
\p
\v 5 Caj yaꞌaraj Jesús tiꞌ u camsʌwinicob:
\p ―Mʌꞌ ja bin a tꞌʌnex Cꞌuj irechex caꞌturex a tucurex. Quireꞌ cu chꞌictarob tu cu naj cꞌujinticob Cꞌuj u winiquirob judío caꞌ tus iric ten u racꞌob. Baxuc a mac cu tꞌʌnicob ich tanbej, caꞌ tus iric ten u racꞌob.
\p Jesús caj u yaꞌaraj:
\p ―Taj quin wac techex. Yʌn u boꞌorir quireꞌ irir ten u racꞌob.
\v 6 Chen a tenoꞌ ―quij Jesús―. Quin camsic techex, caꞌ bin a tꞌʌnex Cꞌuj ta junanex. Mʌꞌ ich tu yʌn pim winic. Mʌc u jor jun cꞌas a watochex, caꞌ a tꞌʌnex Cꞌuj ta junʌn, soc mʌꞌ chʌcaꞌan yiricob techex a racꞌob. A Cꞌujoꞌ, cu yiric ca tꞌʌniquex ta junanex, jeꞌ u boꞌotiquechex biqꞌuin.
\p
\v 7 Caj yaꞌaraj Jesús:
\p ―Caꞌ bin a tꞌʌnex Cꞌuj, mʌꞌ a caꞌcaꞌ ariquex irechex wa mac mʌꞌ yerob Cꞌuj. Aroꞌ yaꞌab cu tsicbarob. Cu tus tucricobeꞌ, cu yubic tiꞌob u tus Cꞌuj a yaꞌab cu tsicbarob. 
\p
\v 8 Caj yaꞌaraj Jesús:
\p ―Rajen mʌꞌ ja yʌn cʌniquex, a mac a mʌꞌ yerob Cꞌuj. Mʌꞌ ja wirej, cax a techex mʌꞌ toj a cꞌatex baꞌ tiꞌ. A Cꞌujoꞌ, yer baꞌ a cꞌatex, cax mʌꞌ toj a tꞌʌniquex. 
\p
\v 9 Caj u yaꞌaraj Jesús:
\p ―A jeꞌ quin camsic techex. Cʌnex a tꞌʌnex Cꞌuj. Arex tiꞌ Cꞌuj: Ic Tet caꞌanan, ca waꞌariquex tiꞌ. Caꞌ u sʌjtejob a cꞌabaꞌ tu cotor mac, Cꞌuj.
\v 10 Sebquintej a tar Cꞌuj quir a reyintic Cꞌuj ich yocꞌocab ―quechex tiꞌ―. Caꞌ in quibob a tꞌʌn Cꞌuj teꞌ yocꞌocab an ten bic u quibicob a tar caꞌananoꞌ, a yʌjmasirob a tꞌʌn tech Cꞌuj ―quechex tiꞌ―.
\v 11 Chuquej tenob in woꞌoch waj, soc tiꞌtiꞌ tenob.
\v 12 Caꞌ a jawsej in siꞌpirob ―quechex tiꞌ Cꞌuj―, an ten bic caꞌ in jawsej u siꞌpirob in racꞌob.
\v 13 Taquej a tenob, tu cu tumtic in worob a quisinoꞌ ―quechex tiꞌ Cꞌuj―. A techoꞌ, Cꞌuj, cꞌuchaꞌan a wor a reyintic ich yocꞌocab. A techoꞌ, Cꞌuj, yʌn a mucꞌ quir a reyintic ich yocꞌocab. Caꞌ u quiꞌ cꞌujintiquech, Cꞌuj, tu cotor mac ich yocꞌocab. Caꞌ u cꞌujintiquech munt qꞌuin ―quechex tiꞌ.
\p
\v 14 Caj yaꞌaraj tiꞌ u camsʌwinicob, Jesús:
\p ―Mʌꞌ ja wirej, an bic tech, ca jawsic u siꞌpir mac. Baxuc tech cu jawsic a siꞌpir Cꞌuj. Rajiꞌ a Tet caꞌanan. 
\v 15 Wa tech mʌꞌ ja jawsej u siꞌpir a racꞌob, baxuc mʌꞌ ju jawsic a siꞌpir a Tet Cꞌuj xan.
\s Jesús cu camsic bic a jamach pꞌʌtic a janʌn soc a tꞌʌnic Cꞌuj
\p
\v 16 Caj yaꞌaraj tiꞌ u camsʌwinicob, Jesús:
\p ―Wa ber u qꞌuinin ca jamach pꞌʌtiquex a janʌnex soc a tꞌʌniquex Cꞌuj. Mʌꞌ ja chaꞌiquex yiricob a racꞌobex, caj a jamach pꞌʌtajex a janʌnex. Quireꞌ a mac caꞌtur u tucurob, cu yesicob tiꞌ u racꞌob tu jamach pꞌʌticob u janan. Rajiꞌob cu tus tucurob soc irir ten u racꞌob. 
\p Yaꞌaraj Jesús:
\p ―A tenoꞌ, taj quin camsic techex. A caꞌtur u tucurob, toc boꞌtaꞌan ten u racꞌob quireꞌ irir ten u racꞌob. 
\p
\v 17 Caj yaꞌaraj tiꞌ u camsʌwinicob, Jesús:
\p ―Wa ber u qꞌuinin ca jamach pꞌʌtiquex a janʌnex quir a tꞌʌniquex Cꞌuj. Quiꞌ tsictej a joꞌrex. Quiꞌ pꞌoꞌej a wichex
\v 18 soc mʌnaꞌ mac yer caj a pꞌʌtex a janʌnex. Chen a Cꞌujoꞌ, tiꞌ yʌn yejerechex tu junan, caj u yiraj ta jamach pꞌʌtajex a janʌnex. Rajiꞌ cu bin u boꞌotic techex biqꞌuin.
\s Jesús caj u yaꞌaraj bic tabar neyʌn a taqꞌuin caꞌanan 
\r (Lc. 12.33‑34)
\p
\v 19 Jesús caj yaꞌaraj tiꞌ u camsʌwinicob ich u joꞌr pꞌuc wits:
\p ―Mʌꞌ tsoy u netꞌajar a taqꞌuinex ich yocꞌocab quireꞌ jeꞌ u yajtar, a worex tiꞌ. Mʌꞌ ju xʌntar quireꞌ jeꞌ u rʌc jantaꞌ ten cꞌʌmʌs. Bayiri ca sʌtiquex a taqꞌuinex xan. Mʌꞌ ja wirej, yʌn mac cu yocar ta watochex cu yacric a taqꞌuinex xan.
\p
\v 20 ’Rajen quiꞌ pꞌisex a bʌj quir a cuxtarex ich caꞌanan, quireꞌ aroꞌ irechex a mac yʌn u taqꞌuin ich caꞌanan. Tu mʌꞌ u jantaꞌ ten cꞌʌmʌs. Mʌꞌ ju rapar, mʌꞌ ju yocar mac u yaꞌcric techex.
\v 21 Ca wiric ―quij Jesús―, a tu yʌn a taqꞌuinex rajiꞌ ca pachtiquex. Rajiꞌ ca pachtiquex a taqꞌuinex wa yʌn ich yocꞌocab. Wa tiꞌ yʌn a taqꞌuinex caꞌanan, tiꞌ ca pachtiquex a binex caꞌanan xan.
\s U sasir a winquirirex
\r (Lc. 11.34‑36)
\p
\v 22 Caj yaꞌaraj Jesús tiꞌ u camsʌwinicob:
\p ―A wichexoꞌ irej quib. Quireꞌ raꞌ ca cꞌʌniquex soc u yercꞌacꞌtic a berex. Baxuc a wichexoꞌ, wa sasirchʌji a wichex, mʌꞌ ja manex tu yacꞌbirir, quireꞌ sasirchʌjij a wichex.
\v 23 Chen waj acꞌbirchʌjij a wichex ca manex tu yacꞌbirir. Baxuc a tucurex xan. Wa tsoy a tucurex, ca bin a quiꞌ najtex tu cu bin u reyintej Cꞌuj. Wa mʌꞌ ja cꞌʌmajex Cꞌuj, mʌꞌ tsoy a tucurex, irechex a cu manob tu yacꞌbirir, a jach manan acꞌbiroꞌ.
\s Cu bin u tsꞌurintiquechex Cꞌuj wa ja taqꞌuinex ca bin a tsꞌurintex?
\r (Lc. 16.13)
\p
\v 24 Caj yaꞌaraj tiꞌ u camsʌwinicob, Jesús:
\p ―Mʌnaꞌ mac cꞌuchaꞌan yor u beyaj a caꞌtur u tsꞌuriroꞌ. A caꞌturoꞌ u tsꞌuriroꞌ, cu pꞌactic junturiꞌ. Tuririꞌ cu yajquintic u tsꞌurir. A caꞌturoꞌ u tsꞌuriroꞌ, mʌꞌ u quiꞌ beyaj tiꞌ. Tuririꞌ u tsꞌurir cu quiꞌ beyaj tiꞌ. Baxuc techex, mʌꞌ cꞌuchaꞌan a worex a yajquintex Cꞌuj wa ca yajquintex a taqꞌuinex.
\s A Cꞌujoꞌ cu cʌnantic u parar
\r (Lc. 12.22‑31)
\p
\v 25 Caj yaꞌaraj Jesús tiꞌ u camsʌwinicob:
\p ―Chich quin waꞌaric techex. Mʌꞌ ja tucriquex baꞌ ca bin a jantex. Mʌꞌ ja tucriquex a baꞌ ca bin a wuqꞌuiquex. Mʌꞌ ja tucriquex bic ca bin cuxtarex. Mʌꞌ ja tucriquex a noqꞌuex baꞌ ca bin a buquintex. A Cꞌujoꞌ ―quij Jesús―, raꞌ cu cʌnantic techex. Mʌꞌ wa raꞌ cu bin u tsꞌic techex a woꞌochex, cax a noqꞌuex xan?
\p
\v 26 Jesús caj yaꞌaraj tiꞌ u camsʌwinicob:
\p ―Irej a wirex. A chꞌichꞌoꞌ, cu chꞌic u xicꞌ caꞌanan. Mʌꞌ ju pʌqꞌuicob yoꞌoch irej winic. Mʌꞌ ju jaqꞌuicob yoꞌoch a chꞌichꞌoꞌ, irej winic. Mʌnaꞌ u caꞌancheꞌir irej winiquir. Chen a Cꞌujoꞌ cu tsꞌic yoꞌoch. Mʌꞌ ja wirej, jach manan cojir techex, chen a chꞌichꞌoꞌ, mʌꞌ cojiꞌ ʌcʌtan tu wich Cꞌuj. Rajen a Cꞌujoꞌ cu cʌnantic techex quireꞌ u jach yajechex a Cꞌujoꞌ.
\p
\v 27 Caj araꞌb tiꞌob ten Jesús:
\p ―Arej ten ―quij Jesús―, tu yʌnechex a cꞌuchaꞌan yor u bʌjiꞌ caꞌ u betej caꞌ satsꞌac cu nesatsꞌar u baquer, cax chumuc metro? Mʌnaꞌ mac cꞌuchaꞌan yor u betic caꞌ satsꞌac u baquer chichin.
\p
\v 28 Caj yaꞌaraj Jesús tiꞌ u camsʌwinicob:
\p ―Biquinin ca tucriquex a noqꞌuex? Cʌnex irechex u topꞌcheꞌ tu cu wacꞌar u topꞌ. Mʌꞌ ju beyaj, mʌꞌ ju cꞌuch irej winic, u topꞌ a cheꞌoꞌ.
\v 29 Cax mʌꞌ ju beyaj, cax mʌꞌ ju cꞌuch. U topꞌ a cheꞌoꞌ, u bʌjiriꞌ cu wacꞌar, barej jach manan u tsoyir u topꞌ a cheꞌoꞌ. Quin wac techex ―quij Jesús―. A werex Salomón uch, a cu reyintic a nunquirex uch. Rajiꞌ mʌꞌ ju buquintej jach tsoy u nocꞌ. A ju topꞌ cheꞌoꞌ jach manan tsoyir. A Salomónoꞌ mʌꞌ jach tsoy u noqꞌuiꞌ.
\p
\v 30 Caj yaꞌaraj Jesús tiꞌ u camsʌwinicob:
\p ―A Cꞌujoꞌ, caj u betaj a suꞌuc a tiꞌ yʌn bajeꞌrer chen samʌn mʌnaꞌ. Cu bin erar. Cax a suꞌucoꞌ tabar u bin, chen quiꞌquintex a worex, quireꞌ a Cꞌujoꞌ jach manan u cʌnantiquechex.
\v 31 Rajen mʌꞌ a yʌn tucriquex a baꞌ ca bin a jantex. Mʌꞌ ja tucriquex a baꞌ ca bin a wuqꞌuiquex. Mʌꞌ ca bin a tucriquex a baꞌ ca bin a buquintex.
\v 32 A mac mʌꞌ yer Cꞌuj rajraꞌ cu cʌxticob baꞌ cu bin u jantejob. Rajraꞌ cu cʌxtejob yuqꞌuej. Rajraꞌ cu man u cʌxtejob u buquintejob nocꞌ.
\p Caj u yaꞌaraj Jesús:
\p ―Yʌn a Tetex caꞌanan a mac cu cʌnantic techex. Rajiꞌ yer a baꞌ a cꞌatex. Rajiꞌ Cꞌuj caꞌanan.
\v 33 Barej ―quij Jesús―, pʌyber arex tiꞌ Cꞌuj: Caꞌ a reyintex Cꞌuj. Bayiriꞌ xan, caꞌ quiꞌquintaquex yor Cꞌuj caꞌ manaquex ich u tsoyir. Wa baxuc caj a quibex jeꞌ u tsꞌic techex tu cotor baꞌ a cꞌatex. Cax a woꞌochex, jeꞌ u tsꞌic techex. Cax a noqꞌuex, jeꞌ u tsꞌic techex. Cax a wucꞌurex jeꞌ u tsꞌic techex.
\p
\v 34 Caj yaꞌaraj tiꞌ u camsʌwinicob Jesús:
\p ―Rajen ―quij Jesús―, baꞌwir ca wacꞌtiquex a baꞌ caꞌ bin tac samʌn. Tiꞌ tiꞌ a baꞌ ca wacꞌtiquex bajeꞌrer. Baꞌwir ca xaquiquex, a ca wacꞌtiquex a baꞌ cu bin tar samʌn yejer a ca wacꞌtiquex bajeꞌrer. Caꞌ ic tucriquex a baꞌ cu tar samʌn quireꞌ u qꞌuinin samʌniꞌ.
\c 7
\s Mʌꞌ a taꞌquiquex u joꞌr a racꞌob
\r (Lc. 6.37‑38, 41‑42)
\p
\v 1 Jesús caj u yaꞌaraj tiꞌ u camsʌwinicob ich u joꞌr pꞌuc wits:
\p ―Mʌꞌ a yʌn tucriquechex, wa tsoyechex quir a wocar juezirechex tiꞌ a racꞌob, soc a taꞌquiquex u joꞌr. 
\v 2 Wa ca wocarex juezirechex quir a taꞌquiquex u joꞌr a racꞌob. An ten bic techex caj a taꞌquex u joꞌr a racꞌob, baxuc Cꞌuj cu bin u taꞌquic a joꞌr techex. Toc jawsex a baꞌ cꞌasir caj u betaj techex a racꞌob, soc Cꞌuj cu jawsic baꞌ cꞌasir caj a betajex xan.
\p
\v 3 Caj yaꞌaraj tiꞌ u camsʌwinicob, Jesús:
\p ―Biquinin ca pʌqꞌuiquex u pach a racꞌob, cax chichin baꞌ yʌn tiꞌ? Mʌꞌ ja wirej, a baꞌ yʌn techex, a cu pʌqꞌuicob u pach u racꞌob, jach manan cꞌas. Aroꞌ irej a cu yiric u pꞌupꞌir a chichinoꞌ tu wich u racꞌob. Chen u bʌjiriꞌ, mʌꞌ ju cꞌʌꞌotic yʌn u pꞌupꞌir jach carem tu wich.
\p
\v 4 Caj yaꞌaraj Jesús:
\p ―Mʌꞌ ja wirej, wa ca tsicbarex tiꞌ a racꞌob a baꞌ caj u yʌn betaj uch. Chen a techexoꞌ, a baꞌ yʌn techex jach cꞌas, aroꞌ irej wa ca waꞌariquex tiꞌ a racꞌob: “Arej in rucꞌsej u pꞌupꞌir a wich a chichinoꞌ.” Chen a techexoꞌ, u pꞌupꞌir ta wichex jach carem.
\v 5 A techexoꞌ, caꞌtur a tucurex. Mʌꞌ ja wirej, caꞌ a pꞌʌtex a jach cꞌasoꞌ techex soc cꞌuchaꞌan a worex a yamtiquex a bʌjoꞌ caꞌ u pꞌʌtej u cꞌasir a cu betic chichin.
\p
\v 6 Caj yaꞌaraj Jesús tiꞌ u camsʌwinicob:
\p ―Jaj ix tʌcoj, mʌꞌ tsoy ca wesiquex Cꞌuj tiꞌ mac a jach tam u pixam. Jaj ix tʌcoj, cu tsꞌictar wa ca tsicbar tiꞌ u tꞌʌn Cꞌuj, irej pecꞌ wa ca tsꞌiquex tiꞌ yoꞌoch. Cu chen tar u chiꞌechex. Irej qꞌuecꞌʌn cu tar u yaꞌchꞌʌctic uj wa ca puriquex tiꞌ a wujex a jach coꞌoj.
\s Jesús cu camsic quiꞌ cꞌatej tiꞌ Cꞌuj a baꞌ a cꞌat
\r (Lc. 11.9‑13; 6.31)
\p
\v 7 Jesús caj u camsaj tiꞌ u camsʌwinicob ich u joꞌr pꞌuc wits:
\p ―Cꞌatex tiꞌ Cꞌuj a baꞌ a cꞌatex. Jeꞌ u tsꞌic techex Cꞌuj. Mʌꞌ ja wirej, aroꞌ irechex ca cꞌatiquex baꞌ tiꞌ a racꞌob, jeroj cu tsꞌic techex. Wa ca tꞌʌniquex mac tu yatoch. Jeroj cu yacsiquechex.
\v 8 Wa ca cʌxtiquex a baꞌ a cꞌatex. Jeroj jeꞌ a wiriquexeꞌ. 
\p
\v 9 Caj yaꞌaraj Jesús tiꞌ u camsʌwinicob:
\p ―Jeꞌ wa ja tsꞌiquex u jantej a pararex tunich, wa cu tar u cꞌatic techex yoꞌoch waj? A techexoꞌ, ca tsꞌiquex tiꞌ yoꞌoch waj quireꞌ a parar.
\v 10 Jeꞌ wa ca tsꞌiquex quir u chiꞌic can, wa cu cꞌatic techex cʌy quir u chiꞌic? Jeꞌ a tsꞌiquex tiꞌ yoꞌoch cʌy.
\p
\v 11 Caj yaꞌaraj Jesús tiꞌ u camsʌwinicob:
\p ―Cax cꞌasechex, ca tsꞌiquex tiꞌ a pararex a baꞌ jach tsoy. Mʌꞌ ja tsꞌiquex tiꞌ a pararex a baꞌ cꞌasiꞌ. Baxuc a Cꞌujoꞌ. Jach manan tsoyir cu tsꞌic tiꞌ a mac cu cꞌatic tiꞌeꞌ. A mac cu cꞌatic tiꞌ ic Tet Cꞌuj caꞌanan. Tsꞌajaꞌan yor cu tsꞌic tiꞌ.
\p
\v 12 Caj yaꞌaraj tiꞌ u camsʌwinicob, Jesús:
\p ―Rajraꞌ caꞌ a yamtex a racꞌob an ten bic a cꞌatex u yamtiquechex xan. Wa baxuc ca betiquex caj a toc quibex a baꞌ tsꞌibtaꞌb ten Moisés yejer yʌjtseqꞌuirob u tꞌʌn Cꞌuj uch.
\s Jach chichin u jor quir yocar ich u berir caꞌanan
\r (Lc. 13.24)
\p
\v 13 Caj yaꞌaraj Jesús tiꞌ u camsʌwinicob:
\p ―Cax jach yaj a wuꞌyiquex a pꞌʌtiquex a baꞌ ca pachtiquex ta worex. Chen pꞌixex a bʌjex soc a pꞌʌtiquex aroꞌ quir a quibex u tꞌʌn Cꞌuj, soc a binex caꞌanan. A tenoꞌ ―quij Jesús―, quin waꞌaric techex. Mʌꞌ yaꞌab cu bin cꞌuchur ich caꞌanan.
\v 14 Mʌꞌ ja wirej, aroꞌ an ten bic chichin u jor tu cu yocar, baxuc u bej, jach cꞌax tu cu manob. Chen a mac a cu manob tu cu pachticob tu yorob tiꞌ yʌnob ich coꞌcoch u jor quir u yocarob. Baxuc tiꞌ yʌnob ich coꞌcoch u bej tu cu manob. Chen caꞌ bin xicob ʌcʌtan Cꞌuj tiꞌ cu bin jocꞌsaꞌ ten Cꞌuj caꞌ xicob ich cꞌacꞌ.
\s Jesús cu camsic biquiraꞌ a cu tus camsicob u tꞌʌn Cꞌuj 
\r (Lc. 6.43‑44)
\p
\v 15 Caj yaꞌaraj tiꞌ u camsʌwinicob, Jesús:
\p ―Quiꞌ cʌnantex a bʌjex soc mʌꞌ u tusiquechex u tus ʌjcamsʌyʌjirob u tꞌʌn Cꞌuj. Rajiꞌob cu yaꞌaricob: “Mʌꞌ jach caremenobiꞌ”, chen jach cꞌasob.
\v 16 Jeꞌ a cꞌʌꞌotiquex a tus ʌjcamsʌyʌjirob u tꞌʌn Cꞌuj, quireꞌ jeꞌ a wiriquex u manob ich u cꞌasir. Mʌꞌ ja wirej, jeꞌ wa ja bin a wirex u wich uva ich u cheꞌer a yʌn u qꞌuiꞌixereꞌ. Mʌꞌ raꞌ u yaqꞌuir u wich uva. Mʌꞌ ja bin a wirex u wich higo ich u cheꞌer a yʌn u qꞌuiꞌixereꞌ. Mʌꞌ raꞌ u cheꞌer u wich higo.
\v 17 Cʌnex a jeraꞌ ―quij Jesús―. Wa tsoy u cheꞌer tsoy u wich xan. Wa mʌꞌ tsoy u cheꞌer, cꞌas u wich xan.
\v 18 A tsoy u cheꞌer, mʌꞌ u cꞌastar u wichiꞌ, tsoy u wich. A cꞌas u cheꞌer cu cꞌastar u wich. Mʌꞌ cꞌuchaꞌan yor u tsoyquintej u wichob, quireꞌ cꞌas u cheꞌer.
\v 19 Baxuc rajiꞌob a tus yʌjcamsʌyʌjirob u tꞌʌn Cꞌuj. A tu cu beyajob ca bin a wirex wa cu manob tu tsoyir wa cu chen tusaricob. Cꞌʌꞌotex a cꞌas u cheꞌer, cu jocꞌsic mac quir u toquej.
\v 20 Baxuc a tus ʌjcamsʌyʌjirob cu bin yubicob u tsꞌiquir Cꞌuj. Tar cu binob ich cꞌacꞌ.
\s Mʌꞌ ju bin ocar tu cotor tu cu bin u reyinticob Cꞌuj 
\r (Lc. 13.25‑27)
\p
\v 21 Jesús caj yaꞌaraj tiꞌ u camsʌwinicob:
\p ―Tu cotor mac a cu tꞌʌnic ten: “Jaj Tsꞌur” ―quij―, irej wa caj u cꞌʌmaj in tꞌʌn. Mʌꞌ jin bin in wacsic tu cu reyintic Cꞌuj. Jariꞌ a mac a cu quibic u tꞌʌn in Tet caꞌanan. Raꞌ quin bin in wacsej.
\v 22 U qꞌuinin caꞌ bin cꞌuchuc, tu qꞌuinin u xur tꞌʌn, yaꞌab mac cu bin mamax aꞌaric ten: “Jaj Tsꞌur, caj in tsecꞌtaj a tꞌʌn. Caj in jocꞌsob cꞌacꞌas quisin xan. Caj in waꞌarob: Joqꞌuen cꞌacꞌas quisin ich u cꞌabaꞌ Jesús. Baxuc caj in betob carem tech.” Baxuc cu bin yaꞌaric tiꞌ ten caꞌ bin xuruc tꞌʌn.
\v 23 Raꞌ u qꞌuinin caꞌ bin in cꞌasej tiꞌob. Jeꞌ in wac tiꞌob: “Mʌꞌ jin wer maquechex. Mʌꞌ jin wirmʌnechex.” Quin bin in waꞌaric tiꞌob: “Xenex quireꞌ caj manex ta cꞌasir.” 
\s A mac jach tꞌaj
\r (Lc. 6.47‑49; Mr. 1.22)
\p
\v 24 Jesús caj yaꞌaraj tiꞌ u camsʌwinicob:
\p ―A mac jach tꞌaj cu yubic in tꞌʌn, cu quibic a baꞌ quin chich aric tiꞌ. Aroꞌ irej a cu cʌxtic u panic yoc naj tu yʌn tunich soc mʌꞌ u riquir.
\v 25 Pachir caj tarij jaꞌ, caj burij, caj tarij icꞌ yejer jaꞌ. Caj u pecsaj naj icꞌ yejer jaꞌ. Chen mʌꞌ riquiꞌ naj quireꞌ chich yoc u najir. Rajen mʌꞌ ju riquir.
\p
\v 26 Caj yaꞌaraj Jesús:
\p ―A mac cu yubic in tꞌʌn chen mʌꞌ ju quibej irej a mac jach chich u joꞌr. Mʌꞌ ja wirej, aroꞌ caj u cꞌʌxaj naj tu jupꞌ.
\v 27 Caj tarij jaꞌ, caj burij. Caj tarij jaꞌ yejer yicꞌar. Caj u pecsaj naj. Caj riquij yoc. U najir caj rupꞌ ich ruꞌum. Cꞌam caj rupꞌ u najir. Caj u jacꞌsaj yor mac. 
\p
\v 28 Caj tsꞌoc u camsic u camsʌwinicob Jesús. Jach jaqꞌuij yorob caj yubob bic caj u camsaj tiꞌob.
\v 29 Quireꞌ caj u camsaj tiꞌob a ju jach neꞌer u camsic tiꞌob. Mʌꞌ ju camsaj bajen yʌjcamsʌyʌjirob u tꞌʌn Moisés. Rajiꞌob mʌꞌ u neꞌer u camsicob. Quireꞌ yejer u mucꞌ Cꞌuj Jesús cu camsic tiꞌob.
\c 8
\s Jesús cu jawsic iqꞌuer u caꞌ tiꞌ xib
\r (Mr. 1.40‑45; Lc. 5.12‑16)
\p
\v 1 Ucheꞌ tiꞌ yʌn Jesús ich u joꞌr pꞌuc wits. Caj emij caj rʌc sayob tu pach mac. Jach pim caj binob tu pach Jesús. 
\v 2 Caj u jutsꞌaj u bʌj tu yʌn Jesús raꞌ u cʌnmʌn iqꞌuer u caꞌ, xib. Caj xonraj ich tu yʌn Jesús. Caj yaꞌaraj: 
\p ―In wer cꞌuchaꞌan a wor a jawsiquen Jaj Tsꞌurir wa ja cꞌat a jawsiquen ―quij a iqꞌuer u caꞌ.
\p
\v 3 Jesús caj u tʌraj a iqꞌuer u caꞌ. Caj u tʌraj Jesús caj araꞌb ten Jesús:
\p ―In cꞌat in wiric a jawʌr ―quij Jesús.
\p Seb caj toc jawij iqꞌuer u caꞌ.
\v 4 Caj u toc araj tiꞌ, Jesús:
\p ―Iric, mʌꞌ a bin a waꞌaric tu ca man bic jawech. Chen tar a bin ich sacerdote u winiquirob judío quir a sijic tiꞌ a baꞌ yaꞌaraꞌ Moisés uch. Soc yer tu cotor mac jawsaꞌbech ―quij Jesús.
\s Jawsaꞌb ten Jesús u cꞌurew yʌjtꞌʌnin cien soldados u winiquir romano
\r (Lc. 7.1‑10)
\p
\v 5 Caj cꞌuchij ich u cajar Capernaum caj u nupꞌaj u winiquir romano. Yʌjtꞌʌnin cien soldados caj cꞌuchij ich Jesús caj u chich cꞌataj caꞌ xic ich yatoch.
\v 6 Caj yaꞌaraj tiꞌ:
\p ―Jaj Tsꞌurir ―quij―. Yaj in cꞌurew tiꞌ yʌn tin watoch. Jach yaj mʌꞌ u pec.
\p
\v 7 Jesús araꞌb tiꞌeꞌ:
\p ―Jeroj, cux in jawsej.
\p
\v 8 Caj u nuncaj yʌjtꞌʌnin cien soldados:
\p ―Jaj Tsꞌurir, mʌꞌ tsoy in wacsiquech tin watoch, quireꞌ yʌn in siꞌpir. Caꞌ a jawsej in cꞌurew.
\v 9 Mʌꞌ ja wirej, cax yʌjtꞌʌninen cien soldados quin tsꞌurintic. Raꞌ in tsꞌurir a mac a cu yaꞌaric in beyaj, raꞌ in jach tsꞌurir. Rajen wa quin tꞌʌnic tuririꞌ in soldado caꞌ xic, cu bin. Wa quin tꞌʌnic u jer caꞌ tac, cu tar. Wa quin tꞌʌnic in cꞌurew caꞌ xic tu beyaj, cu bin. Baxuc a techoꞌ, in wer wa ca waꞌaric caꞌ jawʌc, jeꞌ u jawʌreꞌ. 
\p
\v 10 Caj tsꞌoc yubic Jesús a baꞌ araꞌb tiꞌ ten yʌjtꞌʌnin cien soldados caj jaqꞌuij yor Jesús. Caj u tꞌʌnaj a mac a cu tar u cʌnicob u tꞌʌn. Caj yaꞌaraj Jesús:
\p ―Mʌꞌ in wiramʌn mac tu cotor ich u winiquirob judío, wa caj u quiꞌ acsaj tu yor an bic yʌjtꞌʌnin cien soldados. Raꞌ caj u quiꞌ acsaj tu yor tiꞌ Cꞌuj.
\p
\v 11 Caj yaꞌaraj Jesús tiꞌ:
\p ―Uꞌyex baꞌ quin wac. Tar u tar jach pim ich yocꞌocab, quireꞌ u yet binacob Abraham yejer Isaac yejer Jacob, soc pꞌeriꞌob u cʌjtarob ich caꞌanan tu cu bin u reyinticob Cꞌuj.
\v 12 Barej a techexoꞌ, a cu tus yaꞌaricob: “A tenob, in nunquirob Abraham, rajen cu bin u yacsiquenob Cꞌuj.”
\p Chen a tenoꞌ, quin waꞌaric techex, cu bin jocꞌsaꞌbirechex ten Cꞌuj ich cꞌacꞌ. Tiꞌ ca bin a jʌchꞌiquex a cojex ich cꞌacꞌ, quireꞌ jach yaj ca bin a mucꞌyajex. Ta ca bin a wacꞌtiquex a bʌjex ich cꞌacꞌ.
\p
\v 13 Caj yaꞌaraj Jesús. Yaꞌaraj tiꞌ yʌjtꞌʌnin cien soldados: 
\p ―Xen ta watoch. A ta wuꞌyajeꞌ, toc jaw, quireꞌ caj a wacsaj ta wor.
\p Raꞌ u qꞌuinin caj jaw u yajir u cꞌurew yʌjtꞌʌnin cien soldados.
\s Jesús caj u jawsaj yixquit Pedro
\r (Mr. 1.29‑31; Lc. 4.38‑39)
\p
\v 14 Jesús caj bin tu yatoch Pedro. Caj yiraj yixquit Pedro. Caj yiraj characbar tu chꞌac, yaj u joꞌr.
\v 15 Caj tar u cꞌʌb yixquit ten Jesús. Caj jaw u yajir u joꞌr. Caj riqꞌuij, caj yʌnx chun u jansic tiꞌob.
\s Jesús caj u jawsaj mac; yaꞌab mac caj u jawsaj u yajirir 
\r (Mr. 1.32‑34; Lc. 4.40‑41)
\p
\v 16 Caj acꞌbirchʌjij, caj tar u muchꞌquinticob u bʌjob ich Jesús. Jach pim caj rʌc tar ich Jesús. Caj tarob purbir tiꞌ, a acaꞌan tiꞌob quisin. Caj rʌc jocꞌsaꞌb u quisinin ten Jesús. Caj u tꞌʌnaj quisin caꞌ jocac. Rʌc jaw u yajirir a mac a jach tar purbir tiꞌ.
\v 17 Jawsaꞌb ten Jesús tu cotor mac quir u nupꞌur u tꞌʌn a tsꞌibtaꞌb ten yʌjtseqꞌuir u tꞌʌn Cꞌuj, Isaías uch. Caj yaꞌaraj Isaías uch: “U bʌjiriꞌ Cristo cu bin u jawsic u yajir a mac yʌn tiꞌ”, baxuc caj yaꞌaraj Isaías uch. 
\s A mac a ju cꞌat u sayʌr tu pach Jesús
\r (Lc. 9.57‑62)
\p
\v 18 Caj yiraj jach pim mac Jesús. Mʌꞌ tu cu man, quireꞌ jach pim. Caj yaꞌaraj:
\p ―Caꞌ xicoꞌonex pʌchir cꞌacꞌnab.
\p
\v 19 A raꞌ u qꞌuininoꞌ, caj cꞌuchij yʌjcamsʌyʌjir u tꞌʌn Moisés ich Jesús. Caj araꞌb tiꞌ ten yʌjcamsʌyʌjir u tꞌʌn Moisés:
\p ―In wʌjcamsʌyʌjirech, arej in tar ta pach quir in cʌnic a tꞌʌn cax tu ca bin.
\p
\v 20 Jesús caj u nuncaj tiꞌ:
\p ―A bʌcꞌoꞌ yʌn u way tu cu wenʌn. A chꞌichꞌoꞌ yʌn u cꞌʌꞌcheꞌ tu cu wenʌn. Barej a tenoꞌ, a baxuquenechexoꞌ, mʌnaꞌ in watoch tu quin wenʌn.
\p
\v 21 U jer u camsʌwinicob caj yaꞌaraj tiꞌ Jesús:
\p ―Arej in yʌn pꞌatʌr ich yicnʌn in tet hasta cu quimin. Caꞌ bin tsꞌocac u quimin, caj in mucaj u baquer in tet. Quin tar ta pach quir in cʌnic a tꞌʌn.
\p
\v 22 Jesús caj u nuncaj tiꞌ:
\p ―Cojen tin pach. Tsireꞌej a tet. Arej a mac a toc quimen ʌcʌtan tu wich Cꞌuj, quireꞌ mʌꞌ ju yacsob tu yorob, caꞌ u muquejob u baquer u quimirirob.
\s Jesús caj u tꞌʌnaj yicꞌar caꞌ chꞌenac caꞌ chꞌenac u yaꞌamin xan
\r (Mr. 4.35‑41; Lc. 8.22‑25)
\p
\v 23 Caj tsꞌoc aroꞌ. Jesús caj oquij ich chem quir u chꞌʌctic cꞌacꞌnab. Yet binac u camsʌwinicob.
\v 24 Caj tar yicꞌar tu yʌnob ich cꞌacꞌnab. Cꞌam yicꞌar caj tarij. Caj burij u chem quireꞌ u yaminin. Wenʌn u caꞌ Jesús caj burij chem.
\v 25 U camsʌwinicob caj as Jesús caj yaꞌarob:
\p ―Tabar in jururob, Jaj Tsꞌurir. Cʌnante tenob soc mʌꞌ in jururob.
\p
\v 26 Jesús caj u nuncaj tiꞌ u camsʌwinicob:
\p ―Biquinin sajaquechex? Chichin a wacsmʌnex ta worex. 
\p Caj riqꞌuij Jesús u tꞌʌnej yicꞌar. Quet caj chꞌen yicꞌar yejer u yaminin. Quiꞌ chꞌen u yaminin. Quiꞌ chꞌen yicꞌar xan.
\v 27 Caj yirob u camsʌwinicob caj jaqꞌuij yorob. Caj yaꞌarajob: 
\p ―Baꞌ xibiriꞌ a jeraꞌ, cax cu jawsic u tar yicꞌar? Cax u yaminin cꞌacꞌnab cu jawsic.
\s Jocꞌsaꞌb cꞌacꞌas quisin ten Jesús. Caꞌ tur xib jocꞌsaꞌb cꞌacꞌas quisin tiꞌob
\r (Mr. 5.1‑20; Lc. 8.26‑39)
\p
\v 28 Caj cꞌuchij Jesús pʌchij cꞌacꞌnab tu ruꞌumin Gadara. Caꞌtur xib caj cꞌuchob ich Jesús tu cu butꞌur u baquer macob. Tiꞌ cʌjaꞌanob tu cu butꞌur u baquer macob. Caj jocꞌob tu japnin tunich tu cu butꞌur u baquer macob. A caꞌtur xiboꞌ yʌn u quisinin. Jach tsꞌicob, rajen mʌꞌ u chaꞌbʌrob u manob u racꞌob.
\v 29 A mac acaꞌanob tiꞌ quisineꞌ, raꞌ caj u purob u tꞌʌn tiꞌ Jesús. Caj yaꞌarob:
\p ―Baꞌ a cꞌat tenob Jesús? A techoꞌ, u pararech Cꞌuj. Tarech a puriquenob ich cꞌacꞌ cax mʌꞌ cꞌuchuc tu qꞌuinin? 
\p
\v 30 Mʌꞌ nenach yʌn tu yʌn Jesús yejer u camsʌwinicob. Tiꞌ yʌn acaꞌanob cꞌacꞌas quisiniꞌ. Tiꞌ yʌn yʌrʌcꞌ cajij qꞌuecꞌʌn, jach pim. Cu manob u janʌnob xiw.
\v 31 A quisinoꞌ, acaꞌanob ich a caꞌtur xib, caj u chich cꞌatajob tiꞌ Jesús:
\p ―Ar in binob ich cajij qꞌuecꞌʌn wa ca jocꞌsiquenob. 
\p
\v 32 Caj u nuncaj Jesús caj u yaꞌaraj tiꞌob:
\p ―Xenex ―quij.
\p Caj jocꞌ u quisinin ich xibob, caj bin ich u cajij qꞌuecꞌʌn. Caj yubob u quisinin u cajij qꞌuecꞌʌn caj rucꞌ yacꞌab. Caj rucꞌ yacꞌab ich chꞌicaꞌanin wits. Caj u purob u bʌjob ich cꞌacꞌnab. Caj rʌc bint jaꞌ, caj rʌc quimin.
\p
\v 33 A cu cʌnanticob u yʌrʌcꞌ cajij qꞌuecꞌʌn, caj yirob u rʌc bin cajij qꞌuecꞌʌn, caj jaqꞌuij yorob. Caj u cꞌʌnajob yacꞌab, caj u bin yaꞌarajob tu cajar a baꞌ u ber tiꞌ u yʌrʌcꞌ cajij qꞌuecꞌʌn. Caj binob yaꞌarej tu cajar baꞌ u ber tiꞌ u racꞌob, a mac acaꞌanob quisin tiꞌ u racꞌob xan.
\v 34 Caj rʌc jocꞌob tu cajar tu cotor mac. Caj binob ich Jesús. Caj yirob Jesús caj chich araꞌb tiꞌ Jesús:
\p ―Xen tech ich u jer ruꞌum.
\c 9
\s Jesús cu jawsic a mʌꞌ u chꞌitareꞌ
\r (Mr. 2.1‑12; Lc. 5.17‑26)
\p
\v 1 Caj tsꞌoc aroꞌ caj oc Jesús ich chem. Caj bin pʌchir cꞌacꞌnab quir u bin ich u cajar Capernaum. Caj urij ich Capernaum.
\v 2 Caj tarob purbir a mech yoc ten u racꞌob. A mech yocoꞌ xib, characbar ich chꞌac. Jesús caj u yiraj bic tabar caj u yacsajob tu yorob, caj u tꞌʌnaj a mech yocoꞌ: 
\p ―Quiꞌquintej a wor in pararech. Tsoy in wiriquech quireꞌ toc jaw a siꞌpir.
\p
\v 3 Tiꞌ yʌn yʌjcamsʌyʌjirob u tꞌʌn Moisés ich Jesús. Mʌꞌ yaꞌab tiꞌ yʌnob. Chen tu yorob caj u mucu arob, caj yaꞌarob: “Cu pachꞌic Cꞌuj, Jesús wa ber cu yaꞌaric baxucoꞌ.” 
\v 4 A Jesúsoꞌ, yer a baꞌ cu tucricob tu yorob a yʌjcamsʌyʌjirob u tꞌʌn Moisés. Araꞌb tiꞌob ten Jesús:
\p ―Mʌꞌ a yʌn tucriquex cꞌas.
\p
\v 5 Jesús caj yaꞌaraj tiꞌ yʌjcamsʌyʌjirob u tꞌʌn Moisés: 
\p ―Wa quin wac a jeꞌ mech yocaꞌ: “Caj in jawsaj a siꞌpir”, a techexoꞌ mʌꞌ a werex wa yʌn u mucꞌ Cꞌuj ten, wa mʌnaꞌ u mucꞌ Cꞌuj ten. Barej wa quin wac tiꞌ: “Riqꞌuen caꞌ xiquech.” Jeꞌ a werexeꞌ yʌn u mucꞌ Cꞌuj ten.
\p
\v 6 Caj araꞌb ten Jesús tiꞌ yʌjcamsʌyʌjirob u tꞌʌn Moisés: 
\p ―Ar in wesej techex in mucꞌ quir in jawsic u siꞌpir mac ich yocꞌocab, quireꞌ taren in yamtej tu cotor mac. 
\p Jesús caj u tꞌʌnaj a mac a mech yocoꞌ:
\p ―Riqꞌuen ―quij―. Chꞌaj a chꞌac caꞌ xiquech ich a watoch.
\p
\v 7 A mech yocoꞌ, caj riqꞌuij caj bin ich yatoch.
\v 8 Caj yirob u riqꞌuir a mech yoqueꞌ, caj jaqꞌuij yorob u winiquirob judío. Caj yaꞌarob u winiquirob judío: 
\p ―Jach caremech Cꞌuj, quireꞌ ta tsꞌaja mucꞌ tiꞌ Jesús quir u jawsic a mech yocoꞌ.
\s Jesús caj u pʌyaj Mateo caꞌ tac cʌnbir u tꞌʌn Jesús
\r (Mr. 2.13‑17; Lc. 5.27‑32)
\p
\v 9 Jesús caj u pꞌʌtaj u cajar Capernaum jeroj caj yiraj tuririꞌ xib Jesús, u cꞌabaꞌ Mateo. Curucbar tu cu cꞌʌmic u taqꞌuin gobernador romano. Caj pay Mateo ten Jesús: 
\p ―Cux ―quij Jesús―, quir a cʌnic in tꞌʌn.
\p Caj riqꞌuij Mateo, caj bin tu pach Jesús.
\p
\v 10 Jesús tiꞌ yʌn uch ich yatoch Mateo. Curucbar janʌn Jesús yejer u camsʌwinicob, yejer a cu cꞌʌmicob u taqꞌuin gobernador romano. Tiꞌ yʌn ich Jesúseꞌ, a yʌn u siꞌpirobeꞌ, cu janʌnob xan. Pꞌeriꞌoꞌ cu janʌnob yejer Jesús.
\v 11 A farisejoꞌ, caj yirob cu janʌnob yejer Jesús, a yʌn u siꞌpirob, yejer a cu cꞌʌmicob u taqꞌuin gobernador romano. Caj cꞌataꞌb ten u winiquirob judío a fariseoboꞌ, u camsʌwinicob Jesús:
\p ―Biquinin a wʌjcamsʌyʌjirex cu janʌn yejer a yʌn u siꞌpireꞌ, yejer a cu cꞌʌmicob u taqꞌuin gobernador romano?
\p
\v 12 Jesús caj yubaj a baꞌ cꞌataꞌbob tiꞌ u camsʌwinicob. Jesús caj yaꞌaraj tiꞌ u winiquirob judío a fariseoboꞌ: 
\p ―A mʌꞌ yajoꞌ, mʌꞌ u cꞌatic tsꞌac, quireꞌ toc yʌn yor. A mac a yajoꞌ, raꞌ cu bin u cʌxtic yoꞌoch tsꞌac.
\p
\v 13 Caj araꞌb tiꞌ u winiquirob judío a fariseojoꞌ ten Jesús:
\p ―Xen, cʌnex a baꞌ tsꞌibaꞌan ich u tꞌʌn Cꞌuj, a tu cu yaꞌaric: “Caꞌ yajquinte mac baxuc u cꞌat Cꞌuj. Mʌꞌ a chen quinsiquex a wʌrʌcꞌ wacʌx a sija ten”, quij Cꞌuj. Rajen tarenoꞌ. Quireꞌ taren in pʌyic a mac yʌn u siꞌpirob caꞌ u cꞌaxej tu yorob soc u pꞌʌticob a cꞌasoꞌ. Mʌꞌ taren in pʌyic a mac a cu yaꞌaric mʌnaꞌ u siꞌpirob. A ray winicoꞌ, caꞌ u quibob a baꞌ araꞌb tiꞌob ten Cꞌuj, a tu cu yaꞌaric: “Jach manan tsoyir caꞌ a yajquintej a racꞌob. Mʌꞌ ja chen quinsiquex a wʌrʌcꞌ wacʌx a sijetenex.” 
\s Biquinin mʌꞌ u pꞌʌticob u janʌnob u camsʌwinicob Jesús 
\r (Mr. 2.18‑22; Lc. 5.33‑39)
\p
\v 14 Caj cꞌuchob mʌꞌ yaꞌab u camsʌwinicob Juan ich Jesús. Raꞌ cu yacsic jaꞌ tu joꞌr mac. Caj araꞌb tiꞌ Jesús ten u camsʌwinicob Juan:
\p ―Biquinin mʌꞌ u pꞌʌticob u janʌnob a camsʌwinicob quir u cꞌujinticob Cꞌuj? Biquinin a tenob in pꞌʌticob in janʌnob yejer u winiquirob judío a fariseoboꞌ?
\p
\v 15 Caj u nuncaj Jesús:
\p ―A mac cu bin u chꞌic u raqꞌueꞌ, cu pʌyic u racꞌob quir u quiꞌquiꞌ janʌnob. A tarobeꞌ, mʌꞌ tsoyiꞌ wa cu tucricob. Barej caꞌ bin cꞌuchuc tu qꞌuinin cu bin, a tu chꞌaj u raqꞌueꞌ, jeroj raꞌ u qꞌuininoꞌ, cu bin u pꞌʌticob u janʌnob. Baxuc a tenoꞌ. A mac a caj in pʌyaj mʌꞌ baꞌwir u pꞌʌticob u janʌnob. Wa ber caꞌ bin xiquen, a raꞌ u qꞌuininoꞌ, jach taj cu bin u pꞌʌticob u janʌnob in camsʌwinicob.
\p
\v 16 Caj yaꞌaraj Jesús:
\p ―Mʌꞌ tsoy xan caꞌ a xaxactiquex a baꞌ caj a cʌnex tiꞌ a nunquirex yejer a baꞌ tan a cʌniquex tiꞌ ten. Mʌꞌ ja wirej, mʌnaꞌ mac cu jompʌcꞌtic u rabir u nocꞌ yejer ricꞌben. Cu mosar a ricꞌben cu jatar a raboꞌ cu cochtar u jor. Jach carem u jorir u nocꞌ u cochtar. 
\p
\v 17 Caj yaꞌaraj Jesús:
\p ―Mʌnaꞌ mac cu tꞌajtic u cꞌab u wich uva ich u rabir yotꞌer chivo. Quireꞌ caꞌ bin pajnʌc, cu bujur. Hasta u rʌc wecar u cꞌab uva cu rʌc jatʌr u yotꞌer chivo xan. A ricꞌben u cꞌab uva yʌn u tꞌajic ich ricꞌben yotꞌer chivo soc mʌꞌ ju bujur soc mʌꞌ ju rʌc wecar u cꞌab uva.
\s U parar Jairo caj jawsaꞌb ten Jesús
\r (Mr. 5.21‑43; Lc. 8.40‑56)
\p
\v 18 Mʌꞌ toy tsꞌocac u camsic u bujur u yotꞌer chivo Jesús. Caj tar pʌybir Jesús ten Jairo. Raꞌ u jach tsꞌurir u winiquirob judío. Caj araꞌb tiꞌ ten Jairo tu cu xonraj:
\p ―Jach quimin in chan parar xquic. Cojen, chan tsꞌancꞌʌbtej caꞌ wʌcꞌʌs riqꞌuir in chan parar xquic.
\p
\v 19 Jesús caj riqꞌuij caj bin yejer u camsʌwinicob yejer Jairo.
\v 20 Tiꞌ yʌn u jer xquic, caj tar tu pach Jesús tu cu bin ich Jairo. Mʌꞌ ju jawʌr u yajir. Yʌn u yajir doce yaxqꞌuin. Mʌꞌ ju jawʌr tu cu mucꞌyaj. Mʌꞌ ju tsoytar. Caj u jutsꞌaj u bʌj xquic ich Jesús. Tu pach Jesús caj u tʌra u yoquir u nocꞌ Jesús ten xquic.
\v 21 Caj u tucraj a xquicoꞌ, caꞌ u tʌrej u yoquir u nocꞌ Jesús. Caj yaꞌaraj xquic tu yor: “Wa quin tʌric u yoquir u nocꞌ Jesús, jeꞌ in jawareꞌ.”
\v 22 A Jesúsoꞌ, caj u sut u bʌj ich u pach quir yiric mac caj u tʌraj u yoquir u nocꞌ. Caj yiraj xquic, caj u tʌraj u nocꞌ Jesús. Caj yaꞌaraj tiꞌ:
\p ―Quiꞌquintej a wor in jach pararech. Quireꞌ caj a wacsaj ta wor tiꞌ ten ―quij yaꞌaraj tiꞌ―, rajen toc jawech. 
\p Raꞌiriꞌ u qꞌuinin toc jaw a xquicoꞌ.
\p
\v 23 Caj cꞌuchij Jesús ich yatoch Jairo. Raꞌ u jach tsꞌurir u winiquirob judío. Caj yiraj Jesús cu churob mac, quireꞌ tabar u mucur u baquer u parar Jairo, quireꞌ baxuc nanij u betic u winiquirob judío. Jach pim cu yocꞌarob tan yacꞌtaꞌr u parar Jairo.
\v 24 Caj yaꞌaraj Jesús:
\p ―Chan joqꞌuenex tancab ―quij Jesús―. Mʌꞌ quimeniꞌ. Wenʌn u caꞌ in wiric a tenoꞌ ―quij Jesús.
\p Caj pꞌastaꞌb Jesús ten a pimoꞌ quireꞌ yerob jach quimij u chan parar Jairo.
\v 25 Caj tsꞌoc u rʌc jocꞌsic mac tancab Jesús. Jesús caj oc ich yatoch, caj mach u cꞌʌb ten Jesús caj riqꞌuij. Caj u chꞌaꞌaj yor chan xquic, u parar Jairo.
\v 26 Caj man u rʌc tsicbʌticob ich tu cotor u ruꞌum. Caj yaꞌaraj tiꞌ u racꞌob bic tabar caj ricꞌsaꞌb u parar Jairo ten Jesús.
\s Jesús caj u jawsaj a chꞌop u wichobeꞌ
\p
\v 27 Caj joqꞌuij Jesús ich yatoch Jairo. Caj tar mʌnaꞌ u wich ich u pach Jesús. Caꞌtur a chꞌop u wichobeꞌ. Caj u purob u tꞌʌn tiꞌ Jesús:
\p ―Yajquin tenob, yamtej tenob quireꞌ u pararech ic nunquir David.
\p
\v 28 Jeroj, caj oc Jesús ich yatoch mac quet caj ocob a chꞌop u wichobeꞌ. Caj u jutsob u bʌjob ich Jesús. Caj cꞌataꞌb tiꞌob ten Jesús:
\p ―Ca tucriquex cꞌuchaꞌan in wor in jawsiquechex?
\p Caj yaꞌarob a chꞌop u wichobeꞌ:
\p ―In werob Jaj Tsꞌurir cꞌuchaꞌan a wor a jawsiquenob. 
\p
\v 29 Jesús caj u tʌr u wich a chꞌop u wichobeꞌ. Caj yaꞌaraj tiꞌob:
\p ―An ten bic tabar caj a wacsajex ta worex tiꞌ ten, baxuc u jawʌr a wichex xan.
\p
\v 30 Caj quiꞌ jawʌc u wichob ten Jesús. Caj u toc araj tiꞌob: 
\p ―Mʌꞌ a yʌn bin a waꞌarex wa jaw a wichex ―quij yaꞌaraj tiꞌob.
\p
\v 31 Tan tu tsꞌocar u jawar u wichob. Caj toc rʌc bin yaꞌarej ich tu cotor an bic tabar caj jawsaꞌb u wich ten Jesús. 
\s Jesús caj u jawsaj a mʌꞌ u jocꞌar u tꞌʌn
\p
\v 32 Caj jocꞌob ich Jesús, a jaw u wichobeꞌ, caj caꞌ tar purbir u jer. A mʌꞌ u jocꞌar u tꞌʌn quireꞌ acaꞌan cꞌacꞌas quisin tiꞌ.
\v 33 A Jesúsoꞌ, caj u jocꞌsaj u cꞌacꞌas quisinin, a mʌꞌ u jocꞌar u tꞌʌn. Caj jocꞌ u cꞌacꞌas quisin, caj jocꞌ u tꞌʌn. Caj yirob u racꞌob caj jaqꞌuij yorob. Caj yaꞌarob: 
\p ―Mʌnaꞌ ij quiric mac cu jocꞌsic quisin. Cax tu cotor u ruꞌumin Israel.
\p
\v 34 Caj tsꞌoc yiricob u winiquirob judío a fariseojoꞌ u jocꞌsic quisin Jesús. Caj u tus arob tiꞌ u yet winiquirob judío:
\p ―A werex tub u tar u mucꞌ quir u jocꞌsic a quisinoꞌ? Ich u jach tsꞌurir quisin.
\s Quin yajquintic mac
\p
\v 35 Jesús caj rʌc man u tsecꞌtic tiꞌob u jach tsoyir u tꞌʌn tu cotor u cajar. Cax tu chan cajar cax tu carem u cajarob caj u tsecꞌtaj tiꞌob u jach tsoyir u tꞌʌn. Tiꞌ cu man u camsic Jesús ich u chan najir tu cu naj cꞌujinticob Cꞌuj u winiquirob judío. Caj u tsecꞌtaj Jesús tu cu bin u reyinticob Cꞌuj. Jesús caj man u jawsaj mac, cax a baꞌ yajir cu jawsic Jesús.
\v 36 Caj yiraj Jesús jach pim mac, caj u yajquinta Jesús, quireꞌ caj u yiraj mʌnaꞌ mac caj u camsob tu cu bin u reyinticob Cꞌuj. Yiraj Jesús u winiquirob judío irej wa tʌmʌn yuc, quireꞌ mʌnaꞌ yʌjcʌnʌnyʌjirob u winiquirob judío.
\v 37 Caj yaꞌaraj tiꞌ u camsʌwinicob, Jesús:
\p ―Taj quin waꞌaric techex. Yʌn mac pim ―quij―, u cꞌat yubicob u tꞌʌn Cꞌuj. Barej a cu beyajoꞌ, mʌꞌ pim yʌjtseqꞌuir u tꞌʌn Cꞌuj tiꞌob. Aroꞌ irej wa tiꞌ yʌn jach yaꞌab nʌr quir u jaqꞌuic, chen mʌꞌ tiꞌ yʌn mac quir u jaqꞌuic. 
\v 38 Rajen caꞌ tꞌʌnex Cꞌuj soc u tuchiꞌtic mac quir u bin u tsecꞌtic u tꞌʌn Cꞌuj soc cꞌuchaꞌan yorob u yubicob u tꞌʌn Cꞌuj.
\c 10
\s Tetaꞌb ten Jesús a mac a cu bin tsecꞌticob u tꞌʌn
\r (Mr. 3.13‑19; Lc. 6.12‑16)
\p
\v 1 Caj tsꞌoc aroꞌ Jesús caj u muchꞌquintaj u camsʌwinicob doce. Caj u tsꞌaja u mucꞌ tiꞌob tu cu bin u camsʌwinicob quir u jocꞌsicob quisin. Cax baꞌ yajir, cu jawsicob. 
\p
\v 2 Yʌn u cꞌabaꞌ caj u tetaj doce xib. A jeroj Simón, caj caꞌ pach u jer u cꞌabaꞌ ten Jesús. Caj pach u cꞌabaꞌ Pedro, Jesús. Pachir caj tetaꞌb Andrés ten Jesús. Raꞌ u bʌjob Pedro, Andrés. U jer Jacobo u bʌjob Juan. Caj tetaꞌb Juan xan. Pꞌeriꞌ u tetob Zebedeo Jacobo yejer Juan.
\v 3 Caj tetaꞌb Felipe ten Jesús. U jer caj tetaꞌb Bartolomé. U jer caj tetaꞌb Tomás. U jer caj tetaꞌb Mateo yʌjcꞌʌmin u taqꞌuin gobernador romano. Caj tetaꞌb Jacobo raꞌ u tet Alfeo. U jer tetaꞌb Lebeo raꞌ pʌchaꞌan u jer u cꞌabaꞌ Tadeo.
\v 4 Caj tetaꞌb u jer Simón raꞌ cu sayʌr tu pach cananista. Caj tetaꞌb Judas Iscariote, raꞌ caj u cꞌubaj Jesús, Judas. 
\s Jesús caj u tuchiꞌtaj u camsʌwinicob quir u bin u tsecꞌticob u tꞌʌn Cꞌuj
\r (Mr. 6.7‑13; Lc. 9.1‑6)
\p
\v 5 Jesús caj u tuchiꞌtaj u camsʌwinicob doce. Caj yaꞌaraj tiꞌ u camsʌwinicob:
\p ―Mʌꞌ a yʌn bin a tsecꞌtex u tꞌʌn Cꞌuj ich u cajar u winiquirob Samaria. Mʌꞌ a yʌn binex a tsecꞌtex u tꞌʌn Cꞌuj ich a mʌꞌ u winiquirob judío.
\v 6 Jariꞌ yʌn xenex a tsecꞌtex tu yʌn u jach winiquirob judío. A caj u pꞌʌtob u tꞌʌn Cꞌuj. Mʌꞌ ja wirej, irob yʌrʌcꞌ tʌmʌn yuc a satʌrobeꞌ.
\p
\v 7 Caj yaꞌaraj Jesús tiꞌ u camsʌwinicob:
\p ―Xenex, tsecꞌtex in tꞌʌn. Arex tiꞌob: “Tabar u cꞌuchur a mac a cu bin u reyintejob Cꞌuj.”
\v 8 Jawsex a mac u cʌnmʌnob iqꞌuer u caꞌob ―quij Jesús―. A baꞌ yajirir, jawsex ―quij Jesús―. Rʌc jocꞌsex u quisinin ―quij Jesús.
\p Caj yaꞌaraj Jesús tiꞌ u camsʌwinicob:
\p ―Ricꞌsex u quimirir. Mʌꞌ in cꞌatej techex u boꞌorir in mucꞌ caj in tsꞌaja techex. Baxuc xan, a yamtiquex mac, mʌꞌ a cꞌatiquex u boꞌorir.
\p
\v 9 Caj yaꞌaraj tiꞌ u camsʌwinicob, Jesús:
\p ―Mʌꞌ a chꞌaꞌex a taqꞌuinex.
\v 10 Mʌꞌ a chꞌaꞌiquex u mucuquir a noqꞌuex, chen a buquinmʌnex ―quij Jesús―. Chen raꞌ a chꞌaꞌex. Mʌꞌ a yʌn chꞌiquex u jer xʌnʌb, cax tuririꞌ. Baxuc a xonteꞌ, mʌꞌ a chꞌiquex. Quireꞌ a cu beyajoꞌ, cu tsꞌabʌr yoꞌoch bayiriꞌ nocꞌ. 
\p
\v 11 Caꞌ bin cꞌuchuquex chan cajar, cax carem u cajar. Cʌxtex a mac a tsoy yoroꞌ soc raꞌ cu yacsiquex. Tsoy a wocarex tu yatoch hasta a caꞌ binex.
\v 12 Jesús caj yaꞌaraj tiꞌ u camsʌwinicob:
\p ―Caꞌ bin ocaquex ich mac yʌnin yatoch. Tꞌʌnex Cꞌuj soc u quiꞌ cʌnantaꞌ ten Cꞌuj a mac a cu yacsiquechex.
\v 13 Wa mʌꞌ u yacsechex tsoy a wʌcꞌʌs chꞌic a tꞌʌn ―quij Jesús―, quireꞌ mʌꞌ u quiꞌ acsechexiꞌ. Wa caj u quiꞌ acsechex cu pꞌatʌr a tꞌʌnex tiꞌ.
\v 14 A mʌꞌ ju yacsexoꞌ, a mʌꞌ u cꞌat u cꞌʌmicob a tꞌʌnex. Mʌꞌ ju cꞌat yubejobiꞌ. Joqꞌuenex tu yatoch, cax tu cajar. Pustex u ruꞌumin a woquex soc yerob u beriꞌ yʌn u siꞌpirob ―quij Jesús―.
\v 15 Taj quin waꞌaric techex ―quij Jesús―. Caꞌ bin cꞌuchuc tu qꞌuinin u tar Cꞌuj, yaj cu bin yubic yerar, a mʌꞌ u chaꞌj a wocarex a tsecꞌtex u tꞌʌn Cꞌuj. Jach manan cu bin mucꞌyajob. A tu cajar Sodoma quet yejer u cajar Gomorra mʌꞌ neyaj cu bin yubicob mucꞌyajob.
\s Jeꞌ u cꞌuchur tu qꞌuinin cu bin u chuquicob a pachex wa cu quinsiquechexob
\p
\v 16 Caj yaꞌaraj Jesús tiꞌ u camsʌwinicob:
\p ―Uꞌyex baꞌ quin waꞌaric techex ―quij Jesús―. Quin tuchiꞌquechex tu yʌn a netsꞌiqueꞌ ―quij Jesús―. Aroꞌ irej a mac a caj u tuchiꞌtaj u yʌrʌcꞌ tʌmʌn yuc ich a bobochiꞌoꞌ. Rajen quiꞌ cʌnantex a bʌjex ―quij Jesús―, soc mʌꞌ nemʌꞌ biquechexiꞌ.
\p
\v 17 Caj yaꞌaraj Jesús tiꞌ u camsʌwinicob:
\p ―Quiꞌ cʌnantex a bʌjex, quireꞌ jeꞌ u chuquicob a pachechex. Jeꞌ u chuquic u mʌchiquechex a jach tsꞌurir tu cajarob. Jeꞌ u bin u puriquechex ʌcʌtan u jach tsꞌurir a pim mac. Jeꞌ u jʌtsꞌiquechex a pachex tu chan najir tu cu naj cꞌujinticob Cꞌuj u winiquirob judío.
\p
\v 18 Caj yaꞌaraj Jesús tiꞌ u camsʌwinicob:
\p ―Tiꞌ cu bin u puriquechex ʌcʌtan ich gobernadores baxuc ich reyes cu bin u puriquechexoꞌ, quireꞌ caj a wacsajex ta worex in tꞌʌn. A baywoꞌ ―quij Jesús―, cꞌuchaꞌan a worex a tsecꞌtiquex in tꞌʌn tiꞌ reyes yejer gobernadores. Cax mʌꞌ u winiquirob judío.
\p
\v 19 Caj yaꞌaraj tiꞌ u camsʌwinicob, Jesús:
\p ―Wa ber u puriquechex ʌcʌtan ich u jach tsꞌurirob u cajar. Mʌꞌ ju jacꞌʌr a worex a baꞌ ca bin a tsicbarex tiꞌob. An bic ca bin a tsicbarex tiꞌob mʌꞌ u jacꞌʌr a worex tiꞌ. A Cꞌujoꞌ cu bin u yamtiquechex bic tabar ca bin a nunquiquex tiꞌob. Toc raꞌ u qꞌuininoꞌ, cu bin u yamtiquechex Cꞌuj.
\v 20 Cax cu yubic techex a tꞌʌnex. Mʌꞌ techex ca tꞌʌnexiꞌ ―quij Jesús―. Chen u tꞌʌn u Tajꞌor u Pixam Cꞌuj cu tꞌʌn, quireꞌ cu tar ich a Tetex Cꞌuj.
\p
\v 21 Caj yaꞌaraj tiꞌ u camsʌwinicob, Jesús:
\p ―Cax a bʌj cu bin u cꞌubiquechex quireꞌ yirob caj a wacsex ta worex. Cax u wʌcꞌʌs parar cu bin u cꞌubic quinsbir ten u tet. Cax u wʌcꞌʌs tet cu bin cꞌubic caꞌ quinsac ten u parar.
\v 22 Tu cotor mac cu bin u pꞌactic techex quireꞌ caj a wacsajex ta worex tiꞌ in tꞌʌn. Wa mac mʌꞌ ju pꞌʌtic u cʌnic in tꞌʌn hasta cu quimin, raꞌ u quinin bin in taquej.
\v 23 Wa mac cu chuquicob a pachex ich a cajarex. Xenex tu yʌn u jer cajar. Taj quin waꞌaric techexiꞌ. Quireꞌ mʌꞌ toy rʌc manʌquechex a putsꞌurex quir a tsecꞌtex tiꞌ in tꞌʌn ich tu cotor u cajar tu ruꞌumin u winiquirob Israel, caꞌ bin wʌcꞌʌs uren ten ―quij Jesús―. Quireꞌ taren in yamtic mac tu cotor.
\p
\v 24 ’Cʌnex a jeraꞌ. U camsʌwinic mac mʌꞌ u cꞌuchur u yor tiꞌ u yʌjcamsʌyʌjir. Baxuc u cꞌurew mʌꞌ u cꞌuchur u yor tiꞌ u jach tsꞌurir.
\v 25 Rajen a jeꞌ u camsʌwinic mac yʌn u quiꞌquintic yor a caj u cʌnaj u camsʌyʌjir. Quireꞌ a baꞌ u ber tiꞌ u yʌjcamsʌyʌjir bayiriꞌ cu bin tar tiꞌ u camsʌwinic xan. Bayiriꞌ xan, u cꞌurew mac caꞌ u quiꞌquintac yor a caj cʌnaj u jach tsꞌurir. Quireꞌ a baꞌ u ber tiꞌ u jach tsꞌurir bayiriꞌ cu bin tar tiꞌ u cꞌurew xan.
\p Caj yaꞌaraj Jesús tiꞌ u camsʌwinicob:
\p ―An bic caj u tꞌʌnenob, baxuc cu bin u tꞌʌniquechexob: “U pararechex Beelzebú.” Chen jach manan cu bin yaꞌaricob tiꞌ techex.
\s Chꞌajex sajaquir tiꞌ Cꞌuj
\r (Lc. 12.2‑9)
\p
\v 26 Caj yaꞌaraj tiꞌ u camsʌwinicob, Jesús:
\p ―Quireꞌ a werex baꞌ cu bin tar techex. Mʌꞌ a sʌjtiquex mac. Quireꞌ a baꞌ u mucuber tiꞌ mac jeꞌ u rʌc uꞌyicobeꞌ, cax a baꞌ u mucuber tiꞌ.
\p
\v 27 Caj yaꞌaraj tiꞌ u camsʌwinicob, Jesús:
\p ―A baꞌ caj in camsechex ta junanex. Caꞌ a manex a rʌc ariquex ich tu cotor mac. A caj in camsex ta junanex caꞌ a puriquex a tꞌʌnex tu cotor soc yerob baꞌ quiriꞌ caj in camsajex.
\p
\v 28 Caj yaꞌaraj tiꞌ u camsʌwinicob, Jesús:
\p ―Mʌꞌ ja chꞌaꞌiquex sajaquir tiꞌ mac, cax cu quinsiquex. Mʌꞌ ju quinsejob a pixamex. Caꞌ a sʌjtex Cꞌuj, quireꞌ cꞌuchaꞌan yor u puriquechex ich cꞌacꞌ. Tu cu yerar a winquirex quet yejer a pixamex.
\p
\v 29 Caj yaꞌaraj tiꞌ u camsʌwinicob, Jesús:
\p ―Wa ber ca mʌnex chꞌichꞌ caꞌtur quir a chiꞌiquex. Ca boꞌotiquex turiꞌ centavo. “Jot” ―quechex tiꞌ―, quireꞌ mʌꞌ coꞌoj chꞌichꞌ. Chen a chꞌichꞌoꞌ, mʌꞌ u quimin wa mʌꞌ tsoy tu tꞌʌn Cꞌuj ic Tetex caꞌanan.
\v 30 Chen a Cꞌujoꞌ, jach manan u cʌnantic techex, biquinin a joꞌrex cu cʌnantic xan.
\v 31 Rajen baꞌwir ca tucriquex a bʌj quireꞌ a techexoꞌ jach yaꞌab a boꞌorirex, a chan chꞌichꞌoꞌ, mʌꞌ coꞌojiꞌ. 
\s A mac cu tsicbar tiꞌ u racꞌob tiꞌ Cristo
\r (Lc. 12.8‑9)
\p
\v 32 Caj yaꞌaraj tiꞌ u camsʌwinicob, Jesús:
\p ―Bayiriꞌ tu cotor mac a taj cu yacsic tu yor tiꞌ ten, aroꞌ chʌcaꞌan yiricob u racꞌob. Raꞌ quin bin in quiꞌ acsic ʌcʌtan in Tet Cꞌuj caꞌanan.
\p
\v 33 Caj yaꞌaraj tiꞌ u camsʌwinicob, Jesús:
\p ―A mac a mʌꞌ ju yaꞌaraj tiꞌ u racꞌob wa ju yacsaj tu yoroꞌ. Caꞌ bin xiquiquen ʌcʌtan ich in Tet Cꞌuj caꞌanan caꞌ bin xuruc tꞌʌn. Jeꞌ in wac tiꞌ in Teteꞌ: “Mʌꞌ in wer maquiꞌ.”
\s Jesús caj tar u jʌsic mac cax u wʌcꞌʌs bʌjob
\r (Lc. 12.51‑53; 14.26‑27)
\p
\v 34 Caj yaꞌaraj tiꞌ u camsʌwinicob, Jesús:
\p ―Mʌꞌ a chen quibiquex wa rʌc taren in quetquintic yor tu cotor mac. Quireꞌ a mac a cu yacsic tu yor tiꞌ ten, u racꞌob cu bin u tsꞌictarob yejer.
\v 35 Mʌꞌ ja wirej, a pararoꞌ, cu bin u tsꞌictarob yejer u tet. A xquicoꞌ, cu bin u tsꞌictar yejer u nʌꞌ ―quij Jesús―. A xquicoꞌ, cu bin u tsꞌictar yejer yixquit. 
\p
\v 36 Caj yaꞌaraj tiꞌ u camsʌwinicob:
\p ―Cax u wʌcꞌʌs u bʌjob cu bin u pꞌactaꞌbir yejer.
\p
\v 37 Caj yaꞌaraj tiꞌ u camsʌwinicob, Jesús:
\p ―Wa mac jach manan u yajquintic u tet, baxuc u nʌꞌ, chen mʌꞌ u neyajquinten, quireꞌ u tet jach yaj, baxuc u nʌꞌ. Baꞌwir quin waꞌaric: “Ten yʌnin aroꞌ.”
\p
\v 38 Caj yaꞌaraj tiꞌ u camsʌwinicob, Jesús:
\p ―A mac cu bin yacsic tu yor tiꞌ ten, bin u caꞌ mucꞌyaj an ten bic caj u bajij mac ich cruz. Wa mʌꞌ u cꞌat, baꞌwir cu yacsic tu yor ten?
\v 39 Mʌꞌ ja wirej, a mac u cꞌat u taquic u bʌj soc mʌꞌ u mucꞌyaj, chen jeꞌ u saꞌtʌr u pixam, quireꞌ caj u pꞌʌtaj u yacsic tu yor in tꞌʌn. Chen a mac u cꞌat u quinsaꞌ tiꞌ ten, quireꞌ caj u yacsaj tu yor tiꞌ ten. Mʌꞌ u saꞌtʌr u pixam, cax quinsaꞌb ten u racꞌob.
\s A mac a cu bin cuxtar ich caꞌanan
\r (Mr. 9.41)
\p
\v 40 Caj yaꞌaraj tiꞌ u camsʌwinicob, Jesús:
\p ―Wa mac cu yacsiquechex, baxuc cu yacsiquen, xan. A mac cu yacsiquen cu yacsic Cꞌuj xan quireꞌ caj u tuchiꞌten Cꞌuj.
\v 41 A mac a cu yacsic yʌjtseqꞌuir u tꞌʌn Cꞌuj quireꞌ tuchiꞌtaꞌb ten Cꞌuj quir u tsecꞌtic u tꞌʌn. Quet caꞌ bin boꞌotaꞌc ten Cꞌuj. A mac a cu yacsic xib, a jach tsoy yoroꞌ, quireꞌ yer jach tsoy yor xib. Raꞌiriꞌ quet caꞌ bin boꞌotac ten Cꞌuj tiꞌ techex, quireꞌ caj a wacsajex xib ta watochex. 
\p
\v 42 Caj yaꞌaraj tiꞌ u camsʌwinicob, Jesús:
\p ―Yʌn mac a caj u yacsaj tu yor ten, cu bin arbir ten a mʌꞌ yer Cꞌujeꞌ: “Jot aro.” Chen a mac a cu tsꞌic yucꞌur sisis jaꞌ tiꞌob, Cꞌuj bin u caꞌ boꞌotej tiꞌob.
\c 11
\s A mac tuchiꞌtaꞌb ten Juan ich Jesús. A raꞌ cu yacsic jaꞌ tu joꞌr
\r (Lc. 7.18‑35)
\p
\v 1 Caj tsꞌoc u camsic aroꞌ tiꞌ u camsʌwinicob Jesús. Caj bin Jesús quir u man u tsecꞌtic u tꞌʌn Cꞌuj ich tu cotor u racꞌob ich tu cotor u cajarob, caꞌ bin u camsic u racꞌob xan.
\p
\v 2 Tiꞌ yʌn Juan a cu yacsic jaꞌ tu joꞌr mac tiꞌ yʌn tu cu naj maꞌcʌr winic. Caj yubaj u jumintaꞌ Juan ten u camsʌwinicob. Quireꞌ yaꞌarob u camsʌwinicob: “Jach carem u beyajob Jesús.” Caj u tuchiꞌtaj caꞌtur u camsʌwinicob Juan ich Jesús quir u cꞌatic baꞌ tiꞌ Jesús.
\v 3 Caj cꞌuch u camsʌwinicob Juan ich Jesús. Caj araꞌb ten u camsʌwinicob Juan:
\p ―Arej tenob wa Cristojech, a quin pajicob u tar tiꞌ Cꞌuj quir u taquiquenob ―quij yac tiꞌ, u camsʌwinicob Juan―. Arej tenob wa yʌn in pajicob u jer?
\p
\v 4 Caj araꞌb tiꞌ u camsʌwinicob Juan ten Jesús:
\p ―Joqꞌuen, arex tiꞌ Juan a baꞌ caj a wirex in camsic mac.
\v 5 Arex tiꞌ Juan, a caj a wirex in jawsic a chꞌop u wicheꞌ. A caj a wirex in jawsic a mech yoqueꞌ. Arex tiꞌ Juan, a caj a wirex in jawsic iqꞌuer u caꞌob. Arex tiꞌ Juan, a caj a wirex in jawsic a mʌꞌ u yubejoꞌ tꞌʌn. Bayiriꞌ a caj a wirex in ricꞌsic u quimirir mac ―quij Jesús―. Arex tiꞌ Juan, a caj a wirex in tsecꞌtic u jach tsoyir u tꞌʌn Cꞌuj a mac a cu yaꞌaricob: “Otsirchʌjen a tenoꞌ.” 
\p
\v 6 Caj yaꞌaraj Jesús tiꞌ u camsʌwinicob Juan:
\p ―Arex tiꞌ Juan. A tenoꞌ, quin waꞌaric a mac a rajraꞌ cu yacsic tu yor tiꞌ ten yejer tu cotor u pixam tsoy yʌn tiꞌ.
\p
\v 7 Caj bin u camsʌwinicob Juan. Wʌcꞌʌs sutnʌjob u camsʌwinicob Juan tu pachob. Caj u tsicbʌtaj Jesús Juan tiꞌ u winiquirob judío, a tiꞌ yʌnob ich Jesús. Caj araꞌb ten Jesús tiꞌ u winiquirob judío:
\p ―Baꞌ bin a wirex ich Juan tu cu tsecꞌtic u tꞌʌn Cꞌuj uch. Baxuc wa caꞌtur u tucur? Samaneꞌ wa ju jer u tucur. A mac irej jʌrʌr cu yumtaꞌ ten icꞌ? Baxuc wa caj a wirex Juan? Mʌꞌ caj a wirex aroꞌ.
\p
\v 8 Caj araꞌb tiꞌ u winiquirob judío ten Jesús:
\p ―Mʌꞌ wa binechex a wirex mac a cu cꞌaxic u tucur. Mʌꞌ binex a wirex a mac a cu buquintic jach tsoy u nocꞌ. A mac cu buquintic jach tsoy u nocꞌ tiꞌ yʌn ich yatoch rey. A Juanoꞌ mʌꞌ u buquintic jach tsoy u noqꞌuiꞌ.
\v 9 Mʌꞌ chen binechex a wirex mac cu buquintic jach tsoy nocꞌ. Mʌnaꞌ mac a cu cꞌaxic u tucur. Jach binechex a wirex a mac a cu jach tsecꞌtic u jach tsoyir u tꞌʌn Cꞌuj. Rajiꞌ mʌꞌ chen a mac a cu tsecꞌtic u tꞌʌn Cꞌuj. 
\p
\v 10 Caj yaꞌaraj Jesús:
\p ―Mʌꞌ ja wirej, tsꞌibtaꞌb tiꞌ Juan ten yʌjtseqꞌuir u tꞌʌn Cꞌuj Isaías uch cax mʌꞌ toy tac Juan. Caj yaꞌaraj Isaías uch:
\q Jeꞌ u tar yʌjtseqꞌuir u tꞌʌn Cꞌuj, quij Isaías. Pʌyber cu bin tar. Mʌꞌ ja wirej, tabar u tar Cristo soc mac yer jeꞌ u tareꞌ Cristo.
\m Baxuc caj yaꞌaraj Isaías uch.
\p
\v 11 Caj yaꞌaraj Jesús tiꞌ u winiquirob judío:
\p ―Jach taj quin wac techex. Mʌnaꞌ mac cu cꞌuchur orben tiꞌ Juan a cu yacsic jaꞌ tu joꞌr mac. Cax a mac a tiꞌ yʌn ich yocꞌocab. Cax a mac cʌjaꞌan bajeꞌrer. Mʌꞌ ju cꞌuchur orben tiꞌ Juan, a cu yacsic jaꞌ tu joꞌr mac. A mac cu bin cꞌuchur orben tiꞌ Juan a cu yacsic jaꞌ tu joꞌr cax chichin caj u yacsaj tu yor. Hasta cu cꞌuchur tu qꞌuinin u reyinticob Cꞌuj jeꞌ u cꞌuchur orben tiꞌ. 
\p
\v 12 Jesús caj yaꞌaraj tiꞌ u winiquirob judío:
\p ―Caj u yʌnxchun u tsecꞌtic Juan a cu yacsic jaꞌ tu joꞌr mac. Caj rʌc tarob u winiquirob judío quireꞌ u jach cꞌat yocarob tu cu bin u reyintejob Cꞌuj. Caj u jach pꞌisob u bʌj tiꞌ u tꞌʌn Cꞌuj. Quireꞌ u cꞌat yubicob u tꞌʌn Cꞌuj cax bajeꞌrer.
\v 13 Mʌꞌ ja wirej, rajiꞌob caj u tsecꞌtajob yʌjtseqꞌuirob u tꞌʌn Cꞌuj uch, cax Moisés caj u tsecꞌtaj u tꞌʌn Cꞌuj tu cu bin u reyintejob Cꞌuj hasta tari Juan a cu yacsic jaꞌ tu joꞌr mac.
\p
\v 14 Caj yaꞌaraj Jesús tiꞌ u winiquirob judío:
\p ―Wa ja cꞌat a cꞌʌmiquex u tꞌʌnob Juan. Quireꞌ a Juanoꞌ, irej Elías a uchoꞌ, a cu tsecꞌtic u tꞌʌn Cꞌuj uch. Eliás rajiꞌ ca pajiquex caꞌ tac. A tsecꞌtaꞌb uch: “Jeꞌ u tareꞌ.” 
\v 15 Rajen caꞌ a wuꞌyex a baꞌ caj in waꞌaraj techex.
\p
\v 16 Caj yaꞌaraj Jesús tiꞌ u winiquirob judío:
\p ―A mac a cuxaꞌan a jeꞌ qꞌuinaꞌ, quin wiric an ten bic a chichanoꞌ, a cu baxarob tu cu naj mʌnicob yoꞌoch mac. Cu puricob u tꞌʌn tiꞌ u yet baxarob.
\v 17 Cu yaꞌaricob tiꞌ yet baxʌrob: “Cax chen churnʌquenob, mʌꞌ a wocꞌatex quireꞌ quiꞌ a worex. Cax chen cꞌaynʌquenob, mʌꞌ a wocꞌarex, cax ocꞌnʌjenob a quin cꞌʌyicob techex.” 
\v 18 Quireꞌ caj tar Juan a cu yacsic jaꞌ tu joꞌr mac. Mʌꞌ u nejanan Juan a nequiꞌ yoꞌochoꞌ. Mʌꞌ u yucꞌur u cꞌab u wich uva.
\p Caj yaꞌaraj Jesús tiꞌ u winiquirob judío:
\p ―Caj a waꞌaraj techex: “Acaꞌan quisin tiꞌ Juan.” Rajen rajiꞌob a mac a cuxaꞌan a jeꞌ qꞌuinaꞌ irob a ray chichanoꞌ. 
\p
\v 19 Jesús caj yaꞌaraj tiꞌ u winiquirob judío:
\p ―Caj taren quir in yamtic mac tu cotor. Quin quiꞌ janʌn ―quij Jesús―. Quin wuꞌqꞌuic u cꞌab u wich uva. Ca tus aꞌariquex jach manan quiꞌ quin janʌn ―quij Jesús tiꞌ u winiquirob judío―. Bayiriꞌ ca tus aꞌariquex quin neꞌucꞌur. A techexoꞌ ―quij Jesús―, a ca waꞌariquex in wet man yejer a yʌn u siꞌpirobeꞌ. Bayiriꞌ ca tus aꞌariquex in wet man yejer a mac a cu cꞌʌmicob u taqꞌuin gobernador. Quireꞌ jach manan cu cꞌaticob taqꞌuin gobernador. 
\p Caj yaꞌaraj Jesús tiꞌ u winiquirob judío:
\p ―A mac a cu pꞌactic u beyaj quin beticob mʌꞌ tꞌajiꞌ. Quireꞌ a mac a tꞌajiꞌ yerob a baꞌ quin beticob raꞌ u beyaj Cꞌuj.
\s A ich u cajar u winiquirob judíojoꞌ mʌꞌ u yubejob u tꞌʌn Cꞌuj
\r (Lc. 10.13‑15)
\p
\v 20 Jesús caj yubaj ich u cajar u winiquirob judío mʌꞌ ju cꞌaxic yorob quir u pꞌʌticob u cꞌasir, cax caj u yirob jach carem u beyaj Jesús. Caj chich qꞌueyaꞌb u winiquirob judío ten Jesús.
\p
\v 21 Caj yaꞌaraj Jesús tiꞌ u winiquirob judío:
\p ―Otsirechex ich a cajarex u cꞌabaꞌ Corazín, quireꞌ mʌꞌ ja cꞌaxex a worexiꞌ quir a pꞌʌtiquex a cꞌasirex. Bayiriꞌ a mac a tiꞌ yʌnob tu cajar Betsaida. Wa caj u chen irob carem u beyaj ucheꞌ caj u cꞌaxob yorob ich u cajar Sidón uch. Bayiriꞌ ich u cajar Tiro wa caj u yirob carem u beyaj ucheꞌ an ten bic carem in beyajiꞌ. A mʌꞌ seb caj u cꞌaxob yorob quireꞌ yirob carem in beyaj. Caj manob yacꞌticob u bʌj, quireꞌ manob tu cꞌasir uch. Caj u buquintob tsots nocꞌ yejer u tꞌotꞌic tan tu joꞌr jeꞌ u manob yacꞌtob u bʌj an ten bic nani u betic u winiquirob judío.
\v 22 Quin waꞌaric techex ―quij Jesús―. Jach yaj ca bin a mucꞌyajex caꞌ bin xuruc tꞌʌn. Chen a mac tu cʌjaꞌanob tu cajar Tiro mʌꞌ neyaj cu bin yubic u mucꞌyajob. Bayiriꞌ xan, ich u cajar Sidón. Mʌꞌ neyaj cu bin yubic u mucꞌyajob. 
\p
\v 23 Caj yaꞌaraj Jesús tiꞌ u racꞌob a cʌjaꞌanob ich u cajar Capernaum:
\p ―A techexoꞌ, teꞌ cʌjaꞌanechex ich u cajar Capernaum. Ca tucriquex jeꞌ u sʌjtiquechex a racꞌob quireꞌ ca wiriquex tiꞌ cʌjaꞌaneniꞌ ―quij Jesús―. Caꞌ bin xuruc tꞌʌn ich yocꞌocab ―quij Jesús―. Tiꞌ ca bin erarexiꞌ, quireꞌ mʌꞌ ja cꞌaxex a woriꞌ. Mʌꞌ ja wirej, wa caj u yirob in carem beyajob tu cajar Sodoma ucheꞌ, a caj a wirajex uch ta cajarex uch, tiꞌ toy yʌn u cajariꞌ Sodoma bajeꞌrer. Mʌꞌ erabir ten Cꞌuj uchiꞌ.
\v 24 Quin waꞌaric techex ―quij Jesús―. Caꞌ bin xuruc tꞌʌn, jach yaj ca bin a werarex ich u cajar Capernaum. Mʌꞌ ja wirej, mʌꞌ ja cꞌaxex a worexiꞌ ―quij Jesús―. Chen a tiꞌ cʌjaꞌan uch ich u cajar Sodoma mʌꞌ neyaj cu bin yubic yerarobiꞌ.
\s Cojen tu yʌnen ―quij Jesús―, caꞌ in jawechex wa baꞌ ca tucriquex
\r (Lc. 10.21‑22)
\p
\v 25 Raꞌ u qꞌuininaꞌ, caj urob u camsʌwinicob ich u winiquirob judío, caj u tꞌʌnaj Cꞌuj, Jesús. Caj yaꞌaraj Jesús tiꞌ Cꞌuj:
\p ―Jach caremech Cꞌuj in Jach Tsꞌurech u Cꞌujirech yocꞌocab xan, quireꞌ u Cꞌujirech caꞌanan xan. A techoꞌ Cꞌuj ―quij Jesús―, caj a wesaj a tꞌʌn tiꞌ a mac a mʌꞌ u neꞌer a tꞌʌn. A techoꞌ Cꞌuj ―quij Jesús―, mʌꞌ ja wesaj tiꞌ a mac a cu tus aꞌaric u neꞌer a tꞌʌn. A cu tus aꞌaric cu jach najtic a tꞌʌn.
\p
\v 26 Caj u tꞌʌnaj Cꞌuj:
\p ―Jach jaj Cꞌuj, quireꞌ raꞌ tsoy ta tꞌʌn tech, quireꞌ baxuc a cꞌat.
\p
\v 27 Caj yaꞌaraj Jesús tiꞌ a mac a tiꞌ yʌnoboꞌ:
\p ―Cꞌuj caj u rʌc tsꞌaj ten tu cotor baꞌ ich yocꞌocab quir u tsꞌurinticob ten. Baxuc ich caꞌanan Cꞌuj caj u rʌc tsꞌaj ten quir u tsꞌurinticob ten. Mʌnaꞌ mac cu najtiquen a teraꞌ ―quij Jesús―. Chen in Tet cu jach najtiquen. Baxuc Cꞌuj xan, mʌnaꞌ mac cꞌuchaꞌan yor u najtic Cꞌuj, chen ten quin najtic Cꞌuj. Mʌnaꞌ mac cꞌuchaꞌan yor u najtar in Tet, jariꞌ a mac a jin bʌjiriꞌ caj in camsaj soc yer biquiraꞌ in Tet.
\p
\v 28 ’Cojen tu yʌnen ―quij Jesús―, caꞌ in jawsej wa baꞌ ca tucriquex, wa choc a worex tiꞌ a siꞌpirex, soc u quiꞌtar a worex.
\p
\v 29 Caj yaꞌaraj Jesús:
\p ―Quibex a baꞌ quin waꞌaric techex. Mʌꞌ yaj a cʌniquex in tꞌʌn. Quireꞌ ―quij Jesús―, wa ca cꞌʌmiquex in tꞌʌn, jach quiꞌ a worex. Caꞌ a cʌnenex ―quij Jesús―. Mʌꞌ tsꞌiquen a tenoꞌ, mʌꞌ biqꞌuin quin pꞌujur a tenoꞌ ―quij Jesús―. 
\v 30 Wa baxuc techexoꞌ, mʌꞌ yaj ca bin quibiquex in tꞌʌn, quireꞌ jach tsoy ca bin a wuꞌyiquex in tꞌʌn.
\c 12
\s U camsʌwinicob Jesús caj u jiꞌchtajob u wich trigo
\r (Mr. 2.23‑28; Lc. 6.1‑5)
\p
\v 1 Caj u chꞌʌctob u cor mac Jesús. A ju camsʌwinicob caj tarob tu pach Jesús. Caj u jiꞌchtajob u wich trigo u jantejob quireꞌ wichʌjob. Raꞌ u qꞌuinin cu jesicob u bʌj u winiquirob judío.
\v 2 U winiquirob judío a farisejoboꞌ, irob u jiꞌchticob u wich trigo. Caj araꞌb tiꞌ Jesús ten u winiquirob judío a farisejoboꞌ:
\p ―Iric, biquinin cu jiꞌchticob u wich trigo a camsʌwinicob quireꞌ u qꞌuinin ic jesicob ic bʌj. Baxuc tsꞌibaꞌan ich u tꞌʌn Moisés uch. Mʌꞌ tsoy u beyaj tu qꞌuinin tu cu jesic u bʌj u winiquirob judío.
\p
\v 3 Jesús caj yaꞌaraj tiꞌ u winiquirob judío a farisejoboꞌ: 
\p ―Mʌꞌ wa ja xacajex tu tsꞌibaꞌan u tꞌʌn Cꞌuj tiꞌ David uch? Caj wichʌjob David yejer u racꞌob uch.
\v 4 Caj oquij David yejer u racꞌob ich yatoch tu tꞌinaꞌan yotꞌer chivo tu cu naj cꞌujinticob Cꞌuj u winiquirob judío. Caj tsꞌaꞌb yoꞌoch pan ten sacerdote caꞌ u jantajob David yejer u racꞌob quireꞌ wichʌjob, cax mʌꞌ tsoy u janticob caj tsꞌab tiꞌ David ten sacerdote. Mʌꞌ ja wirej, raꞌ quir u tsꞌabʌr tiꞌ Cꞌuj. Cu chen janticob u winiquirob judío a sacerdotejoꞌ.
\p
\v 5 Jesús caj yaꞌaraj tiꞌ u winiquirob judío a farisejoboꞌ: 
\p ―Baxuc xan, mʌꞌ a xacmʌnex ich u tꞌʌn Moisés a cu yaꞌaric u beyajob sacerdote cax u qꞌuinin tu cu yʌn jesicob u bʌj. Rajiꞌob cu beyajob ich carem naj tu cu naj cꞌujinticob Cꞌuj u winiquirob judío aroꞌ mʌꞌ cꞌasiꞌ. Mʌꞌ ju tar u siꞌpirob.
\v 6 Quin waꞌaric techex ―quij Jesús―, tiꞌ u winiquirob judío a farisejoboꞌ. Quireꞌ tsꞌaꞌb u mucꞌ ten Cꞌuj tiꞌ sacerdote soc u beyajob ich carem naj tu cu naj cꞌujinticob Cꞌuj. Cax cu beyajob a sacerdotejoꞌ tu qꞌuinin tu cu jesicob u bʌj, chen tsoyoꞌ ―quij Jesús―. Chen a tenoꞌ jach manan u tsꞌabʌr in mucꞌ ten Cꞌuj. A ray u mucꞌoꞌ tsꞌaꞌb tiꞌ sacerdote mʌꞌ u cꞌuchur u mucꞌ teniꞌ.
\v 7 A techexoꞌ, ―quij Jesús― mʌꞌ a wuꞌyex a baꞌ cu yaꞌaric a jeꞌ tsꞌibaꞌan ich u tꞌʌn Cꞌuj? Uꞌyex ―quij Jesús―: “In cꞌat ―quij Cꞌuj―, caꞌ a yajquintej a racꞌob caꞌ a yamtej tiꞌob. Mʌꞌ a chen quinsiquex a wʌrʌcꞌ quir a sijic ten quir in jawsic a siꞌpirex. Jach manan tsoyir caꞌ a yajquintej a racꞌob.” Baxuc cu yaꞌaric tu tsꞌibaꞌan u tꞌʌn Cꞌuj. Wa ja najtajex aroꞌ, mʌꞌ a pʌqꞌuiquex u pachob in wʌjcamsayʌjirob, quireꞌ mʌꞌ cꞌas caj u betob. 
\p
\v 8 Caj yaꞌaraj Jesús tiꞌ u winiquirob judío a farisejoboꞌ: 
\p ―A tenoꞌ baxuquenechex, cu tsꞌurintiquen tu cotor baꞌ, cax a baꞌ cu yiric mac tu qꞌuinin tu cu jesicob u bʌj u winiquirob judío ―quij Jesús.
\s A xiboꞌ a mʌꞌ u jitir u cꞌʌbeꞌ
\r (Mr. 3.1‑6; Lc. 6.6‑11)
\p
\v 9 Raꞌ u qꞌuininoꞌ Jesús caj toc pꞌat u winiquirob judío a farisejoboꞌ, caj bin Jesús, caj oc tu cu naj cꞌujinticob Cꞌuj u winiquirob judío.
\v 10 Tiꞌ yʌn xibiꞌ a mʌꞌ u jitir u cꞌʌb. Caj cꞌataꞌb tiꞌ Jesús ten u winiquirob judío:
\p ―Are toꞌonex. Tsoy wa jic jawsic mac tu qꞌuinin ic jesicob ic bʌj?
\p U cꞌat u pacꞌarob u pach Jesús, rajen caj u tus cꞌatic u winiquirob judío.
\p
\v 11 Jesús caj u nuncaj:
\p ―A techex ―quij Jesús―, wa cu rubur a wʌrʌcꞌ tʌmʌn yuc. Cu rubur tu chꞌicaꞌan. Mʌꞌ wa ja jocꞌsex enan tu qꞌuinin tu ca jesiquex a bʌj? A mʌꞌ ca jocꞌsiquex a wʌrʌcꞌ tʌmʌn yuc xan enaj tu qꞌuinin a jesiquex a bʌj. 
\v 12 Mʌꞌ ja wirej, a xiboꞌ, jach coꞌoj enan a wʌrʌcꞌ tʌmʌn yuc a ca jocꞌsiqueꞌ, mʌꞌ necoꞌojiꞌ. Rajen tsoy a man a yamtiquex mac tu qꞌuinin tu ca jesiquex a bʌjex. Mʌꞌ ja wirej, mʌꞌ cꞌasiꞌ ―quij Jesús.
\p
\v 13 Jesús caj u tꞌʌnaj xib a mʌꞌ u jitir u cꞌʌb:
\p ―Tichꞌ a cꞌʌb caꞌanan ―quij Jesús.
\p Caj u tichꞌaj u cꞌʌb, caj jawij u cꞌʌb an ten bic jumbuj u cꞌʌb caj jawij.
\v 14 Caj jocꞌob u winiquirob judío a farisejoboꞌ caj irob jawij u cꞌʌb a mʌꞌ ju jitir u cꞌʌb. Caj u rʌc muchꞌquintob u bʌjob a farisejoboꞌ quir u tsicbʌticob tiꞌ u racꞌob soc yubicob bic tabar caꞌ bin u quinsejob Jesús.
\s Toc araꞌb ten yʌjtseqꞌuirob u tꞌʌn Cꞌuj: Jeꞌ u tar Cristo 
\p
\v 15 Jesús caj yubaj baꞌ cu tucricob. Caj u pꞌʌtaj u cajar a mʌꞌ u jitir u cꞌʌb, caj bin Jesús. Caj uyaꞌb u bin Jesús, caj binob a pim mac ich u pach Jesús. Caj rʌc jawsaj u yajirob.
\p
\v 16 Caj yaꞌaraj Jesús tiꞌ a tu jawsaj:
\p ―Mʌꞌ a yʌn bin a waꞌarex wa tin jawsajechex soc mʌꞌ yerob mac tu tuchiꞌtajen Cꞌuj.
\v 17 A baywoꞌ caj u nupꞌsaj Jesús a baꞌ tsꞌibtaꞌb tiꞌ ten Isaías uch. Mʌꞌ ja wirej, caj yaꞌaraj Isaías caj araꞌb tiꞌ Jesús:
\q
\v 18 A jeraꞌ in cꞌurew, raꞌ cu beyaj ten, a mac caj in tetaj, quij Isaías, tiꞌ Cꞌuj. A mac caj in yajquintaj quiꞌ in wor yejer a tin tetajeꞌ, quij Isaías, quireꞌ yʌn u Tajꞌor u Pixam Cꞌuj tiꞌ in cꞌurew. Jeꞌ u bin ʌcʌtan tu cotor mac quir u tsecꞌtic in tꞌʌn soc u manob tu tsoyir. Cax ich a mʌꞌ u winiquirob judío cu bin ʌcʌtan quir u tsecꞌtic tiꞌob.
\v 19 Mʌꞌ ju tsꞌictar in cꞌurew, mʌꞌ u nunquic u tꞌʌn mac, in cꞌurew, quij Isaías. Mʌnaꞌ mac cu bin yubic u tsꞌictar in cꞌurew. Mʌꞌ u bin u tupsic yor mac, a caj u yacꞌt u bʌj quireꞌ u siꞌpir.
\v 20 Chen cu bin chichquintic yorob. Rajraꞌ cu bin u betic soc caꞌ bin cꞌuchuc tu qꞌuinin cu bin manob tu tsoyir. A rajiꞌob, a mac a tiꞌ yʌn yocꞌocab a cu bin u yacsicob tu yorob tiꞌ.
\v 21 Rajen tu cotor mac ich u cajarob caj u pajob Cristo quir u tocar ten Cꞌuj.
\m Baxuc caj yaꞌaraj Cꞌuj tiꞌ Isaías uch caj u tsꞌibtaj. 
\s Pacꞌ u pach Jesús acaꞌan quisin tiꞌ
\r (Mr. 3.19‑30; Lc. 11.14‑23; 12.10)
\p
\v 22 Caj tar purbir xib ten u racꞌob a chꞌop u wicheꞌ. Mʌꞌ ju jocꞌar u tꞌʌn quireꞌ yʌn cꞌacꞌas quisin tiꞌ xib. Caj u jawsaj Jesúsoꞌ, caj jocꞌ u tꞌʌn, caj yiraj u berir xan.
\v 23 Caj jaqꞌuij yorob u racꞌob caj yirob u jawar a mʌꞌ u jocꞌar u tꞌʌn, a chꞌop u wich ucheꞌ. Caj yaꞌaraj a pimoꞌ:
\p ―Mʌꞌ wa ju parar ic nunquirex David a caj ic pajex caꞌ tac?
\p
\v 24 A ju winiquirob judío a fariseoboꞌ caj yubob a baꞌ araꞌb ten u racꞌob. Caj yaꞌarob:
\p ―A jeꞌ xibaꞌ cu jocꞌsic quisin. Mʌꞌ raꞌ tsꞌic u muqꞌuiꞌ u tsꞌurir quisin. U mucꞌ u tsꞌurir quisin Beelzebú caj u jocꞌsej quisin.
\p
\v 25 Caj yubaj Jesús a baꞌ caj u tucraj u winiquirob judío a fariseoboꞌ. Caj yaꞌaraj Jesús tiꞌ u winiquirob judío a fariseoboꞌ:
\p ―Wa ju wʌcꞌʌs bʌjiriꞌ cu bin tsꞌictar ich u ruꞌumin tu cu reyinticob rey. Jeꞌ u rʌc chꞌesicob u bʌj. Cax ich u chan cajar tu cu bin u tsꞌictarob. Cax wa ju wʌcꞌʌs bʌjob cu tsꞌictarob jeꞌ u rʌc quinsicob u bʌj.
\v 26 Bayiriꞌ a quisinoꞌ, u jach cꞌabaꞌ Satanás. Wa ju yet quisinin bin u jocꞌsejob. Jeroj caj u toc chꞌesob u bʌj. Jeroj mʌnaꞌ quisin.
\p
\v 27 Jesús caj u nuncaj tiꞌ u winiquirob judío a fariseoboꞌ: 
\p ―A techexoꞌ, ca waꞌariquex caj in jocꞌsaj cꞌacꞌas quisin yejer u mucꞌ Beelzebú. Wa taj a baꞌ ca waꞌariquex ―quij Jesús―. Arex ten bic tabar cu jocꞌsic cꞌacꞌas quisin a camsʌwiniquex?
\p Caj yaꞌaraj Jesús tiꞌ u winiquirob judío a fariseoboꞌ: 
\p ―Cu jocꞌsicob quireꞌ cꞌacꞌas quisin yejer u mucꞌ jach tsꞌur Beelzebú xan. Mʌꞌ ju jocꞌsejob quisin yejer u mucꞌ Beelzebú. Rajen a camsʌwiniquex xan, cu yesicob mʌꞌ taj a baꞌ ca waꞌariquex tiꞌ ten ―quij Jesús.
\p
\v 28 Caj yaꞌaraj Jesús tiꞌ u winiquirob judío a fariseoboꞌ: 
\p ―A tenoꞌ, quin jocꞌsic cꞌacꞌas quisin ―quij Jesús―. Quireꞌ caj u tsꞌaj ten u Tajꞌor u Pixam Cꞌuj. Rajen chʌcaꞌan a wiriquex tiꞌ yʌn u mucꞌ Cꞌuj tu yʌnechex.
\p
\v 29 Caj yaꞌaraj Jesús tiꞌ u winiquirob judío a fariseoboꞌ: 
\p ―Bic tabar in jocꞌsic u cꞌacꞌas quisin wa mʌꞌ tin yʌn rubsaj u mucꞌ u jach tsꞌurir quisin, Satanás? A baywoꞌ ―quij Jesús―, cꞌuchaꞌan in wor in jocꞌsic quisin. Quireꞌ aroꞌ irej a mac oquij ich yatoch a mac chich u mucꞌ irej wa caj u cꞌʌxaj soc u rʌc chꞌic u baꞌtac. 
\p
\v 30 ’A mac a mʌꞌ ju yamtiquen, cu pꞌactiquen an ten bic a pꞌactiquenex. A mac mʌꞌ ju chaꞌic caꞌ in taquic mac caj u jocꞌsaj u racꞌob caꞌ xicob ich cꞌacꞌ.
\p
\v 31 ’Rajen quin waꞌariquex tech ―quij Jesús―. Techex ca pꞌastiquenex caj a wirex in jocꞌsic cꞌacꞌas quisin. Cax ca pꞌastiquenex ―quij Jesús―. Cax ca pachꞌiquenex quin jawsiquex a siꞌpirex.
\p Caj yaꞌaraj Jesús:
\p ―Wa ca pꞌastiquex u Tajꞌor u Pixam Cꞌuj mʌꞌ biqꞌuin cu jawʌr a siꞌpirex.
\v 32 A tenoꞌ, taren in yamtej tu cotor mac. A mac a cu pꞌastiqueneꞌ, jeꞌ u jawʌr u siꞌpireꞌ. A mac a cu jach pꞌastic u Tajꞌor u Pixam Cꞌuj mʌꞌ u bin jawʌr u siꞌpir, cax u qꞌuinin bajeꞌrer, cax u qꞌuinin u xur tꞌʌn, mʌꞌ u jawʌr u siꞌpir.
\s A werex wa baꞌ cheꞌer a mʌꞌ u wichʌncʌr
\r (Lc. 6.43‑45)
\p
\v 33 Caj yaꞌaraj Jesús tiꞌ u winiquirob judío a fariseoboꞌ: 
\p ―Wa ca wiriquex u cheꞌer a cu wichʌncʌr. Mʌꞌ a werex wa jach tsoy u cheꞌer wa cꞌas u cheꞌer. Wa chʌcaꞌan a wiriquex wa tsoy u wich a wer tsoy u cheꞌer. Bayiriꞌ xan, wa chʌcaꞌan a wiric wa cꞌas u wich a werex cꞌas u cheꞌer. Rajen a werex biquiraꞌ u cheꞌer. Cʌnex tiꞌ aroꞌ. Mʌꞌ a chen man a pʌqꞌuiquex u pach a racꞌob, an ten bic caj a waꞌarex ten quin beyaj yejer quisin ―quij Jesús―. A mac cu man tu tsoyir caꞌ a waꞌarex: “Tsoy a rayoꞌ”, an bic caj a wirex in jocꞌsic cꞌacꞌas quisin. Mʌꞌ wa tsoy caꞌ in jocꞌsej quisin? ―quij Jesús―. A mac mʌꞌ ju man tu tsoyir tiꞌ cu man tu cꞌasir.
\p
\v 34 Caj yaꞌaraj Jesús tiꞌ u winiquirob judío a fariseoboꞌ: 
\p ―Jach cꞌasechex ―quij Jesús―. Tiꞌ cu jocꞌar a tꞌʌnex ich a chiꞌex an ten biquechex can. Mʌꞌ ja wirej, a canoꞌ, cu chiꞌic mac. Mʌꞌ u jocꞌar tsoy a tꞌʌnex. Mʌꞌ ja wirej, toc cꞌasechex. Rajen mʌꞌ taj a baꞌ ca waꞌariquex, quireꞌ a baꞌ cu jocꞌar ta chiꞌex tiꞌ cu tar ich a pixamex quireꞌ cꞌas a pixamex.
\p
\v 35 Caj yaꞌaraj Jesús:
\p ―A xiboꞌ, wa toc tsoy cu jocꞌar u tꞌʌn, toc tsoy u pixam. Baxuc xan, a xiboꞌ, wa cꞌas cu yaꞌaric, mʌꞌ toc tsoy u pixam. Mʌꞌ ja wirej, cꞌas cu yaꞌaric.
\v 36 Rajen quin waꞌaric techex. Taj quin waꞌaric techex, raꞌ u qꞌuinin caꞌ bin xuruc tꞌʌn a baꞌ caj a waꞌarex raꞌ ca bin a wuyiquex yaꞌaric techex Cꞌuj. Quireꞌ cꞌas caj a waꞌarex. Tu cotor mac cu bin yubic yaꞌaraꞌ ten Cꞌuj u ricꞌsmʌnex a tꞌʌnex Cꞌuj.
\v 37 A wʌcꞌʌs tꞌʌnex cu bin u taꞌquiquex a joꞌrex quir a bin erarex. Bayiriꞌ xan, a wʌcꞌʌs tꞌʌnex cu bin u taquiquex soc mʌꞌ a werarex.
\s A mac cꞌas cu tar u tus cꞌatej carem beyaj
\r (Mr. 8.12; Lc. 11.29‑32)
\p
\v 38 Caj tarob u winiquirob judío a fariseoboꞌ. Caj cꞌataꞌb tiꞌ Jesús. Yet tarac yʌjcamsʌyʌjirob u tꞌʌn Moisés. Mʌꞌ yaꞌab tarob ich Jesús. Caj araꞌb tiꞌ Jesús ten u winiquirob judío a fariseoboꞌ yejer u camsʌyʌjirob u tꞌʌn Moisés: 
\p ―Esej toꞌonex carem beyaj in wʌjcamsʌyʌjirech soc ij querex tarech ich Cꞌuj.
\p
\v 39 Caj u nuncaj Jesús:
\p ―A techexoꞌ, a mac cʌjaꞌan tu qꞌuinin bajeꞌrer jach cꞌasechex. Mʌꞌ taj ca cꞌujintiquex Cꞌuj. Rajen caj a tus cꞌatenex caꞌ in wesic techex carem beyaj. Jariꞌ ca bin a wirex an ten bic Jonásen, u yʌjtseqꞌuirir u tꞌʌn Cꞌuj uch, soc a werex taren ich Cꞌuj.
\v 40 An ten bic Jonás tiꞌ yʌn ich u japnin u nʌcꞌ cʌy. Caj rucꞌ ten cʌy a caremoꞌ. Mʌnaꞌ u nupꞌ u qꞌuinin tiꞌ yʌn Jonás ich u japnin u nʌcꞌ cʌy. Acꞌbir xan tiꞌ yʌn Jonás. Baxuc ten xan biqꞌuinoꞌ mʌnaꞌ u nupꞌ u qꞌuinin tiꞌ yʌnen ich u japnin ruꞌum xan. Mʌnaꞌ u nupꞌ acꞌabir xan tiꞌ yʌnen quireꞌ taren in yamtic mac tu cotorob. 
\p
\v 41 Caj yaꞌaraj Jesús:
\p ―Cꞌaj techex wa Jonás caj bin u tsecꞌtej u tꞌʌn Cꞌuj ich u cajar Nínive caj jocꞌ ich u nʌcꞌ cʌy. Caj u rʌc cꞌaxaj tu yorob caꞌ u rʌc pꞌʌtob u manob tu cꞌasir tu cotor mac ich u cajar Nínive.
\p Jesús caj yaꞌaraj:
\p ―Caꞌ bin xuruc tꞌʌn, a mac caj u cꞌaxaj tu yorob caj u pꞌʌtajob u cꞌasirob ich u cajar Nínive cu bin yaꞌaricob: “Jach cꞌasechex”, mʌꞌ ta cꞌaxex a worex soc a pꞌʌtiquex a cꞌasirex cax caj a wirex in tar in tsecꞌtechex a wuꞌyex u tꞌʌn Cꞌuj ―quij Jesús―. Jach manan in tsecꞌtic techex ―quij Jesús―. A Jonásoꞌ mʌꞌ necꞌuchaꞌan yor u tsecꞌtic.
\v 42 Cꞌaj wa techex, caj tar xquic reina tu cu reyinticob u ruꞌumin Etiopía. Tar yubej a baꞌ cu najtic Salomón tu cotor a baꞌ tiꞌ yʌn ich yocꞌocab. Cax jach nach caj tar yubic ich Salomón. Caꞌ bin xuruc tꞌʌn jeꞌ yaꞌaric xquic tiꞌ Cꞌuj: “Jach cꞌas aroꞌ a mac cʌjaꞌanob tu qꞌuinin tiꞌ yʌn Jesús ich yocꞌocab. Quireꞌ mʌꞌ tu cꞌʌmajob u tꞌʌn Jesús.” Chen a tenoꞌ ―quij Jesús―, taren in tsecꞌtic u tꞌʌn Cꞌuj quir a najtiquex, chen mʌꞌ a cꞌʌmexiꞌ. Chen a Salomónoꞌ, mʌꞌ ne manan u camsic. A tenoꞌ ―quij Jesús―, jach manan quin camsic tu cotor mac.
\s A cꞌacꞌas quisin ―quij Jesús―, cu wʌcꞌʌs ur tu cʌjaꞌan a mac acaꞌan tiꞌ
\r (Lc. 11.24‑26)
\p
\v 43 Caj yaꞌaraj Jesús tiꞌ u winiquirob judío a fariseoboꞌ: 
\p ―A techex irex a mac acaꞌan cꞌacꞌas quisin tiꞌ uch. Caj joc quisinꞌ caj bin ich tʌcay ruꞌum quir u cʌjtar quisin chen mʌꞌ tu yiraj.
\v 44 Rajen a cꞌacꞌas quisinoꞌ u cꞌat u wʌcꞌʌs ur ich winic tu jocꞌsaꞌb uch. Caj tar yiraj jach tsoy, irej naj, toc mistaꞌan.
\v 45 Rajen rʌc bin u pʌyic yet quisinin. Siete caj u pʌyaj u yet quisinin. Jach manan cꞌasir u yet quisinin. Caj wʌcꞌʌs oc ich a xiboꞌ. Jach manan cꞌas, a uchoꞌ, mʌꞌ necꞌasiꞌ. Baxuc ca rʌc bin a cʌniquex a cuxaꞌanex mac bajeꞌrer ―quij Jesús―, a raꞌ acaꞌan u quisininoꞌ. 
\s Caj tar irbir Jesús ten u nʌꞌ bayiriꞌ u yitsꞌinob caj tarob
\r (Mr. 3.31‑35; Lc. 8.19‑21)
\p
\v 46 Jesús mʌꞌ toy tsꞌocac u tsicbar yejer a pimoꞌ caj cꞌuchij u nʌꞌ Jesús yejer yitsꞌinob Jesús. Tar xur nach tu mʌnaꞌ mac, quireꞌ pim bʌcristaꞌb Jesús. Tarob u tsicbarob yejer Jesús.
\p
\v 47 Caj araꞌb tiꞌ Jesús ten mac:
\p ―Tu tꞌʌniquech a nʌꞌ yejer a witsꞌinob ―quij―. U cꞌat u tsicbar yejerech a nʌꞌ ―quij―, quet yejer a witsꞌinob.
\p
\v 48 Caj tꞌan ten Jesús tiꞌ a mac a tar tꞌʌnbir Jesús:
\p ―Taj ca waꞌaric, raꞌ in nʌꞌ yejer in witsꞌinob.
\p
\v 49 Caj u tuchbar tiꞌ u camsʌwinic, Jesús:
\p ―A jeraꞌ irob in jach nʌꞌ. A jeroj irob in jach itsꞌinob. 
\v 50 Mʌꞌ ja wirej, a mac cu man u betic a baꞌ tsoy tu tꞌʌn Cꞌuj, in Tet caꞌanan. Raꞌ irej in jach nʌꞌ. Raꞌ irej in jach itsꞌinob.
\c 13
\s A Jesúsoꞌ cu camsic a baꞌ pʌcꞌaꞌir ich cor
\r (Mr. 4.1‑9; Lc. 8.4‑8)
\p
\v 1 Raꞌiriꞌ u qꞌuinin caj joqꞌuij Jesús ich naj caj bin chiꞌ cꞌacꞌnab. Raꞌiriꞌ u qꞌuinin caj toc bin Jesús cutar ich chiꞌ cꞌacꞌnab quir u camsic mac.
\v 2 Caj rʌc tar muchꞌtaꞌbir ich Jesús jach pim. Caj oc Jesús ich chem caj curʌj. Caj rʌc chꞌicrʌj a pim ich chiꞌ cꞌacꞌnab.
\v 3 Caj u camsaj Jesús a pimoꞌ an bic tabar u pʌqꞌuic u pʌcꞌar tu cor chen quir u camsic. Caj yaꞌaraj Jesús: 
\p ―Mac bin u pʌqꞌuic, u pʌcꞌar ich u cor.
\v 4 A mac caj bin u qꞌuichꞌintej ich u cor. Caj u qꞌuichꞌintaj caj rʌc rub ich bej mʌꞌ yaꞌabiꞌ. Caj tar u ruqꞌuic chꞌichꞌ. 
\v 5 U jer tar rʌc rubeꞌ ich tunich tu mʌꞌ pim u ruꞌumin. Seb caj tsꞌejernʌji, quireꞌ chan jay u ruꞌumin. Rajen seb caj jocꞌ.
\v 6 Caj naquij qꞌuin caj quimin, quireꞌ jay u ruꞌum. Mʌꞌ tu bin ocac u mos. Rajen quimij.
\v 7 U jer caj rʌc qꞌuichꞌintaj. Caj rub ich qꞌuiꞌix. Caj chꞌijij caj rʌc bobʌstaꞌb ten qꞌuiꞌix caj quimij.
\v 8 U jer caj u rʌc caꞌ qꞌuichꞌintaj ich u jer ruꞌum. Jach tsoy u ruꞌum. Caj u netsꞌaja u wich. Cien caj u toc tsꞌaj u wich. U jer caj u tsꞌaj u wich sesenta. U jer caj u tsꞌaja u wich treinta.
\v 9 Uꞌyex baꞌ quin camsic techex soc a wuꞌyiquex soc a najtiquex a baꞌ u cꞌat yaꞌaric.
\s Biquinin caj u camsajoꞌonex Jesús tiꞌ u qꞌuichꞌintic yijir
\r (Mr. 4.10‑12; Lc. 8.9‑10)
\p
\v 10 Caj tsꞌoc u camsaꞌ ten Jesús caj u jutsꞌ u bʌj u camsʌwinicob ich Jesús. Caj cꞌataꞌ tiꞌ Jesús:
\p ―Biquinin ca camsic a pim bic tabar u qꞌuichꞌintic yijir ich u cor?
\p
\v 11 Jesús caj yaꞌaraj tiꞌob:
\p ―Jeꞌ u tsꞌiquex tech Cꞌuj quir a najtiquex a baꞌ tu mucu araj ten Cꞌuj tiꞌ Cristo. Chen a pimoꞌ mʌꞌ ju bin u najtejob quireꞌ mʌꞌ tu cꞌʌmajob u tꞌʌn Cꞌujiꞌ.
\v 12 A baꞌ ta chʌc cʌnajex bajeꞌrer ca chʌc najtiquex. Chen jeꞌ a najtiquex hasta ca quiꞌ najtiquex bic tabar u reyinticob Cꞌuj. Chen a pimoꞌ mʌꞌ ju bin u najtejobiꞌ. Chen a baꞌ caj in chʌc camsaj tiꞌob jeꞌ u rʌc tubur tiꞌob. Mʌꞌ ju pꞌatʌr tiꞌob.
\v 13 Rajen caj in chʌc camsa a pimoꞌ bic tabar u qꞌuichꞌintic yijir u pʌcꞌar ich cor, quireꞌ cu chen uyicob mʌꞌ ju najtobiꞌ.
\v 14 Quireꞌ a baꞌ tsecꞌtaꞌb ten Isaías tiꞌ u winiquirob judío uch jach joqꞌuij u tajir bajeꞌrer. Uꞌyex baꞌ araꞌb ten Isaías tiꞌ u winiquirob judío uch:
\q Rajraꞌ ca bin a wuꞌyex, chen mʌꞌ a bin a najtex. Rajraꞌ ca bin a wirex, chen mʌꞌ a bin a jach irex.
\v 15 Quireꞌ jach chich u joꞌr u winiquirob judío. Mʌꞌ ja wirej, caj u mʌchajob u xiquinob, caj u mutsꞌajob u wichob soc mʌꞌ cꞌuchaꞌan yor yiricob. Bayiriꞌ soc mʌꞌ cꞌuchaꞌan yor yubicob u tꞌʌn Cꞌuj, soc mʌꞌ ju najtejob xan. Soc u cꞌaxicob u yorob soc u jawsaꞌr u siꞌpir ten Cꞌuj.
\m Baxuc caj tsecꞌtaꞌb ten Isaías tiꞌ u winiquirob judío uch.
\p
\v 16 A techexoꞌ, quiꞌ a worex quireꞌ ca chʌc najtiquex bic tabar cu bin u reyinticob Cꞌuj.
\v 17 Caj yaꞌaraj Jesús tiꞌ u camsʌwinicob:
\p ―Jach taj quin waꞌaric techex. Yaꞌab u yʌjtseqꞌuir u tꞌʌn Cꞌuj u cꞌat yiricob a baꞌ ca wiriquex bajeꞌrer. Baxuc xan, yaꞌab mac a tsoy yorob u cꞌat yiricob a baꞌ ca wiriquex bajeꞌrer. Baxuc xan, caj u cꞌat yubicob a baꞌ quin camsiquechex. Chen mʌꞌ tu yubob quireꞌ quimob. 
\s Jesús cu tajquintic u camsʌwinicob a baꞌ quiriꞌ mʌꞌ ju najtajobiꞌ
\r (Mr. 4.13‑20; Lc. 8.11‑15)
\p
\v 18 Caj yaꞌaraj Jesús tiꞌ u camsʌwinicob:
\p ―Uꞌyex bic tabar a caj in camsechex bic tabar u bin u pʌqꞌuic u pʌcꞌar ich u cor.
\p
\v 19 Jesús caj u tajquintaj tiꞌ u camsʌwinicob:
\p ―A caj a wuꞌyajex sam. A mac a caj yubaj in tꞌʌn tiꞌ u ruꞌumin tu cu bin u reyintejob Cꞌuj. Cu tar a quisinoꞌ cu taꞌquic tiꞌ mac u tꞌʌn Cꞌuj soc mʌꞌ u najtej, irej u yijir rub ich bej, a caj in camsajechex sam.
\v 20 Baxuc xan, a rub yijir ich tunich, an ten bic a mac cu yubic u tꞌʌn Cꞌuj seb caj quiꞌjij yor, quireꞌ caj u cꞌʌmaj u tꞌʌn Cꞌuj.
\v 21 Aroꞌ irej u yijir a mʌꞌ tam oc u mos. Seb caj u toc pꞌʌtaj u tꞌʌn Cꞌuj quireꞌ caj yubaj u tumtaj yor. Caj yub u chucur u pach quireꞌ caj u yacsaj tu yor. Rajen caj u pꞌʌta yacsic tu yor.
\v 22 A yijir tu qꞌuichꞌintaj, rub ich qꞌuiꞌix. Baxuc cu camsiquechex tiꞌ u tꞌʌn Cꞌuj, an ten bic mac cu yubic u tꞌʌn Cꞌuj. Mʌꞌ ja wirej, a baꞌ yʌn yocꞌocab cu pachtic. Cu pachtic u nejaꞌric u taqꞌuin, raꞌ cu bobʌstic irej qꞌuiꞌix caj u bobʌstaj tu qꞌuichꞌintaj. Rajen mʌꞌ ju nequiꞌ acsic yor. Mʌꞌ taj cu yacsic tu yor.
\p
\v 23 Caj yaꞌaraj Jesús tiꞌ u camsʌwinicob:
\p ―A rub yijir tu tsoy u ruꞌumin, raꞌ quir u camsiquechex a mac tu jach cꞌʌmaj u tꞌʌn Cꞌuj. Caj u toc tsꞌaja u wich cien. Raꞌ cu quiꞌ man tu tsoyir. U jer caj u caꞌ tsꞌaja u wich sesenta. Raꞌ cu man tu tsoyir, chen mʌꞌ cꞌuchaꞌan yor tu quiꞌ acsic tu yor cien. U jer caj u caꞌ tsꞌajaj u wich treinta u wich. Raꞌ cu man tu cꞌʌs tsoyir, chen mʌꞌ tu quiꞌ acsaj tu yor tiꞌ sesenta u wich ―baxuc caj yaꞌaraj Jesús tiꞌ u camsʌwinicob.
\s Jesús caj u camsa bic tabar u chꞌijir u robirir ich u pʌcꞌar trigo
\p
\v 24 Jesús cu caꞌ camsic u camsʌwinicob bic tabar cu bin u reyinticob Cꞌuj. Caj yaꞌaraj Jesús:
\p ―An bic tabar u pʌqꞌuic u pʌcꞌar trigo ich cor. Caj u rʌc qꞌuichꞌintaj tu cor.
\v 25 Caj man u rʌc purej u robir tub u pʌcꞌman u pʌcꞌar trigo a mac a cu pꞌactic tiꞌ. Quireꞌ wenʌn u caꞌob, mac caj man u pur u robirir tub u pʌcꞌar trigo u racꞌob. Pꞌactaꞌb ten u racꞌob, rajen cu man u pʌqꞌuic u robir tu pʌcꞌaꞌan trigo. Caj tsꞌoc u puric u robir caj bin ich yatoch.
\v 26 Caj chꞌijij u pʌcꞌar trigo, yet chꞌijac u robirir hasta job u wich u pʌcꞌar trigo. Quet tar u wich u robirir. 
\v 27 Caj bin yaꞌaraj u cꞌurew tiꞌ u jach tsꞌurir: “A ta pʌcꞌaj trigojeꞌ Jach Tsꞌur, xacaꞌan yejer robirir cu chꞌijir. A caj a pʌcꞌaj yirir ucheꞌ tsoy. U chꞌijir a bajeꞌrer yʌn u robirir xacaꞌan. An tub u tar u robirir caj jocꞌ?”
\p
\v 28 Caj araꞌb ten u jach tsꞌurir: “Yʌn mac caj u pʌcꞌaj u robirir ich trigo. Raꞌ cu pꞌactiquen. Rajiꞌ caj u pʌcꞌaj u robirir.” Caj yaꞌaraj tiꞌ u jach tsꞌurir: “Ar in rʌc bin in jaquej u robirir.”
\v 29 Caj yaꞌaraj u jach tsꞌurir: “Mʌꞌ, chen u robirir ca jaquiquiꞌ quet ca bin a jaquic xan u wich trigo.
\v 30 Cax chꞌijir u robirir yejer trigo hasta cu tsꞌic u wich trigo. Jeꞌ in tuchiꞌticob u wʌticob u wich trigo, yet bin u jaquicob u robirir. U robirir cu yʌn bin u jaquejob caꞌ u jepꞌ cꞌʌxtejob u robirir caꞌ u toquejob. Cu tsꞌocareꞌ cu wʌticob trigo caꞌ u ricꞌsejob.”
\s Jesús caj u camsaj bic tabar u chꞌijir u yijir u pʌcꞌar mostaza
\r (Mr. 4.30‑32; Lc. 13.18‑19)
\p
\v 31 Jesús caj u camsaj bic tabar cu bin u reyinticob Cꞌuj. Rajen caj u yaꞌaraj tiꞌob:
\p ―An ten bic u chꞌijir u pʌcꞌar mostaza xib ich ruꞌum. 
\p
\v 32 Jesús caj yaꞌaraj:
\p ―Mʌnaꞌ u jer yijir jach mijin yijir mostaza. Cu chꞌijireꞌ jach manan u xitꞌir u cꞌʌb. U jer u pʌcꞌar mʌꞌ u nexitꞌir u cꞌʌb. Hasta chꞌijir u cheꞌer jeroj cu tar chꞌichꞌ u cꞌʌxicob u cꞌuꞌ.
\s Jesús caj u camsaj tiꞌ u tsꞌac pan quir u sip yoꞌoch pan
\r (Lc. 13.20‑21)
\p
\v 33 Jesús caj u caꞌ camsaj. Rajen caj yaꞌaraj tiꞌob:
\p ―Bajen u ruꞌumin tu cu bin u reyinticob Cꞌuj raꞌ irej u tsꞌac yoch pan a xquicoꞌ cu puric ich harina mʌnaꞌ u nup u tenin u puric. Cu tsꞌocar u puric cu rʌc sip tu cotor.
\s Biquinin Jesús caj u cꞌʌnaj u tꞌʌn quir u camsic tiꞌ a pimoꞌ
\r (Mr. 4.33‑34)
\p
\v 34 Mʌꞌ u camsaꞌ u jer tꞌʌn. Toc raꞌiriꞌ caj u camsaj. Bic tabar caj u pʌcꞌaj u yijir mostaza soc yerob bic tabar cu bin u reyintic Cꞌuj.
\v 35 Soc u nupꞌur u tꞌʌn a baꞌ araꞌb ten yʌjtseqꞌuir u tꞌʌn Cꞌuj uch, rajen a baywoꞌ Jesús caj u camsaj tiꞌob. Mʌꞌ ja wirej, a mac a tsꞌaꞌb u tucur ten Cꞌuj caj u tsꞌibtaj uch:
\q Quin waꞌaric tiꞌob, quij yʌjtsꞌeqꞌuir u tꞌʌn Cꞌuj, an ten bic mʌꞌ yubmʌn uch raꞌ u qꞌuinin caj tsꞌoc u betaꞌr ich yocꞌocab.
\m Baxuc caj u tsꞌibtaj a mac tsꞌaꞌb u tucur ten Cꞌuj uch. 
\s Jesús cu camsic bic tabar u chꞌijir u robirir ich u pʌcꞌar trigo soc u najticob
\p
\v 36 Jesús caj yaꞌaraj tiꞌ a pimoꞌ:
\p ―Xenex ich a watochex. Caj binob Jesús caj oc ich yatoch mac. Caj u jutsꞌob u bʌj u camsʌwinicob ich Jesús.
\p Caj yaꞌarob u camsʌwinicob:
\p ―Arej tenob a baꞌ ca camsic tenob cu jocꞌar u robirir u pʌcꞌar trigo.
\p
\v 37 Caj yaꞌaraj Jesús tiꞌ u camsʌwinicob:
\p ―Quireꞌ a mac a cu man u pʌqꞌuic tsoy yijireꞌ, ten ―quij Jesús―. Quireꞌ taren in yamtic mac tu cotor. Yʌjpʌqꞌuiren.
\v 38 A tu quin pʌqꞌuic yijireꞌ, teꞌ ich yocꞌocab. A quin pʌqꞌuic yijireꞌ ich yocꞌocab, raꞌ u winiquir cu yacsic tu yor in tꞌʌn. A robirireꞌ, rajiꞌ winiquir mʌꞌ tu yacsaj tu yor tiꞌ ten.
\v 39 Raꞌ u qꞌuinin caj u wʌticob u wich trigo yejer u robirir, raꞌ u qꞌuinin caꞌ bin xuruc tꞌʌn. Rajiꞌob a tu wʌtajob u wich trigo yejer u robirir. Mʌꞌ raꞌ cu bin jach wʌticob, yʌjmasirob u tꞌʌn Cꞌuj. Wa mac caj u pʌcꞌaj robirir, quisin caj u pʌcꞌaj yijir, quireꞌ cu pꞌactiquen.
\v 40 Baxuc a cu maric u robirir u purejob ich cꞌacꞌ. Quet bayiriꞌ cu bin u teticob a mac mʌꞌ ju yacsob tu yorob. Raꞌ cu bin purbir ten yʌjmasirob u tꞌʌn Cꞌuj ich cꞌacꞌ caꞌ bin xuruc tꞌʌn.
\p
\v 41 Caj yaꞌaraj Jesús:
\p ―A tenoꞌ, a mac tar u yamtic tu cotor mac. Quin bin in tuchiꞌtic yʌjmasirob u tꞌʌn Cꞌuj quir u teticob a mac yʌn u siꞌpir. Chen cu yʌn bin u teticob a mac a caj u pʌyob u siꞌpir u racꞌob.
\v 42 Tar cu bin jocꞌar purbir ich cꞌacꞌ. Tiꞌ cu bin yacꞌticob u bʌj ich cꞌacꞌ tu cuch tu cu toꞌquic mac. Tiꞌ cu bin u jach mucꞌyaj ich cꞌacꞌ.
\v 43 Chen a mac a caj u yacsaj tu yor in tꞌʌn ―quij Jesús―, a Cꞌujoꞌ cu bin yaꞌaric tiꞌ a mac a caj u cꞌʌmob in tꞌʌn.
\p Jeꞌ yaꞌaraꞌ ten Cꞌuj:
\p ―Quiꞌ in wor in wiriquech ―quij Cꞌuj―.
\p Jeꞌ u yesiquech tiꞌ tu cotor mac quir yiric quiꞌ yor yiriquechex Cꞌuj. Quiꞌ uꞌyex baꞌ quin waꞌaric techex. 
\s Jesús caj u camsaj bic tabar a mac a caj u yiraj u taqꞌuin
\p
\v 44 Caj yaꞌaraj Jesús:
\p ―Bic tabar cu bin u reyintic Cꞌuj irej a mac a mʌnmʌn u ruꞌum, caj yiraj tiꞌ mucaꞌan u taqꞌuin. Caj yiraj tiꞌ mucaꞌan u taqꞌuin quiꞌ yor. Caj u caꞌ mucaj caj bin u mʌnej u ruꞌum. Caj u rʌc xupaj u taqꞌuin tu u mʌnmʌn u ruꞌum. Cax tu rʌc canaj u baꞌtac xan quir u mʌnic.
\s Jesús caj u camsaj caj yiraj sʌc uj a jach coꞌoj
\p
\v 45 Caj yaꞌaraj Jesús tiꞌ u camsʌwinicob:
\p ―Soc a werex bic tabar cu bin u reyintic Cꞌuj. Irej a mac a nanij cu man u cʌxtej u mʌnej sʌc uj, a jach coꞌoj.
\v 46 Caj u yiraj jach coꞌoj sʌc uj, caj yiraj mʌꞌ cꞌuchaꞌan yor u mʌnic quireꞌ jach coꞌoj. Rajen caj rʌc bin u canic u baꞌtac quir u mʌnic sʌc uj.
\s Jesús caj u camsaj bic tabar u chuquic cʌy ich chim 
\p
\v 47 Caj yaꞌaraj Jesús tiꞌ u camsʌwinicob:
\p ―A werex bic tabar cu bin u reyintic Cꞌuj. Irej a cu puric u chimin cʌy quir u chuquic cʌy ich cꞌacꞌnab. Caj u chucaj xacaꞌan baꞌ cʌyir cu yocar ich chim.
\v 48 Caj chup u cʌyir ich chim, caj u jitaj ich chiꞌcꞌacꞌnab. Caj curʌj u tetej a tsoyoꞌ, caj u rʌc puraj a cꞌasoꞌ, quireꞌ mʌꞌ quiꞌ u chiꞌbir. Caj u butꞌaj ich xac a tsoyoꞌ. 
\v 49 Baxuc cu bin u betic ich yocꞌocab caꞌ bin xuruc tꞌʌn. Jeꞌ u tarob yʌjmasirob u tꞌʌn Cꞌuj quir u teticob a mac cꞌas quir u tetic a mac tsoy xan.
\v 50 Tar cu bin u teticob a mac cꞌas quir u tetic a mac tsoy xan. Tar cu bin purbir ich cꞌacꞌ tu cuchir u toꞌquic mac quireꞌ cꞌas. Tu cu bin u jach mucꞌyaj. Tu cu bin u jach acꞌticob u bʌj tu cu yerar.
\s A baꞌ uchben, a baꞌ ricꞌben
\p
\v 51 Caj cꞌataꞌb ten Jesús tiꞌ u camsʌwinicob:
\p ―Ta rʌc najtajex a baꞌ tin camsajechex?
\p Caj u nuncajob u camsʌwinicob:
\p ―Tin cʌnajob Jaj Tsꞌur.
\p
\v 52 Caj yaꞌaraj Jesús tiꞌ u camsʌwinicob:
\p ―Mʌꞌ ja wirej ―quij Jesús―. Quireꞌ caj a najtex tu cu bin u reyintej Cꞌuj caꞌ bin a cʌnex irechex yʌjcamsʌyʌjirob u tꞌʌn Moisés a cu camsicob tiꞌ u racꞌob a baꞌ camsaꞌb ten yʌjtseqꞌuirob u tꞌʌn Cꞌuj uch. Baxuc ca bin a camsex tiꞌob u tꞌʌn Cꞌuj a ricꞌbenoꞌ.
\s Jesús wʌcꞌʌs bin ich u cajar Nazaret
\r (Mr. 6.1‑6; Lc. 4.16‑30)
\p
\v 53 Jesús caj tsꞌoc u camsic bic tabar cu bin u reyinticob Cꞌuj caj bin Jesús.
\v 54 Caj cꞌuchij Jesús tu cajar Nazaret tu chꞌijij Jesús uch. Caj u yʌnxchun u camsic tiꞌob Jesús tu cu naj cꞌujinticob Cꞌuj u winiquirob judío:
\p ―Tub u tar caj yubaj a jeꞌ xibaꞌ a baꞌ cu camsicoꞌon? A ju neꞌer u camsicoꞌon Jesús. An tub u tar caj u cʌnaj carem u beyaj ―baxuc caj yaꞌarob u racꞌob ich u cajar. 
\p
\v 55 Caj yaꞌarob:
\p ―Mʌꞌ wa rajiꞌ u parar yʌjsusicheꞌ?
\p Caj yaꞌarob:
\p ―Biquinin raꞌ u bʌj Jacobo. Raꞌ u bʌj José xan. Raꞌ u bʌj Simón xan. Raꞌ u bʌj Judas xan.
\p
\v 56 Caj yaꞌaraj u racꞌob tu cajar Nazaret:
\p ―Tiꞌ cʌjaꞌan xquic u bʌjob Jesús. Pꞌeriꞌ yejeroꞌonex. An tub u tar caj u cʌnaj aroꞌ?
\p
\v 57 Rajen u racꞌob caj choquij yorob tiꞌ Jesús. Caj araꞌb ten Jesús tiꞌ u racꞌob:
\p ―Mʌꞌ u cꞌat yirir a mac tsꞌaꞌb u tucur ten Cꞌuj wa tiꞌ cʌjaꞌan tu jach cajar. Cax u wʌcꞌʌs u bʌjob, mʌꞌ u cꞌat yiricob. Chen mac cʌjaꞌan nach u cꞌat yubicob. 
\p
\v 58 Mʌꞌ yaꞌab caj u jawsa mac Jesús tu cajar Nazaret quireꞌ mʌꞌ ju yacsob tu yorob tiꞌ Jesús.
\c 14
\s Caj quinsaꞌb Juan a cu yacsic jaꞌ tu joꞌr mac
\r (Mr. 6.14‑29; Lc. 9.7‑9)
\p
\v 1 Raꞌ u qꞌuinin tiꞌ yʌn Jesús ich u cajar Nazaret. Caj yub u rey Herodes tiꞌ yʌn Jesús. Caj yubaj u jumbintaꞌ jach carem u beyaj Jesús. Raꞌ Herodes gobernador u ruꞌumin Galilea.
\v 2 Caj araꞌb ten Herodes tiꞌ a mac a cu yamticob u reyinticob Herodes:
\p ―In wer rajiꞌ Juan ―quij Herodes―, a cu yacsic jaꞌ tu joꞌr mac. Riqꞌuij caj quimij rajen jach carem u beyaj Juan ―quij Herodes.
\p
\v 3-4 Uch chuc Juan ten Herodes. Caj mac tu cu maꞌcʌr u winiquir. Caj cꞌarar Juan. Caj cꞌarij yoc Juan ten Herodes. Caj araꞌb ten Juan tiꞌ Herodes:
\p ―Mʌꞌ tsoy a chꞌic a muꞌ.
\p Herodías u cꞌabaꞌ u racꞌ u yitsꞌin Felipe. Rajen chuc Juan.
\p
\v 5 Cax Herodes u cꞌat u quinsic Juan, cu chꞌic sajquir tiꞌ a pimoꞌ. Herodes yer jeꞌ u pꞌujur a pimoꞌ, quireꞌ yerob a Juanoꞌ cu tsecꞌtic u tꞌʌn Cꞌuj.
\v 6 Caj cꞌuchij tu qꞌuinin quir u cꞌʌꞌotic tuj rochaꞌb Herodes ten u nʌꞌ uch. Caj u pʌyaj u racꞌob Herodes quir u quiꞌquiꞌ janʌnob. Caj jocꞌ u tsꞌenʌꞌ Herodes. Caj ocꞌatnʌjij tu pim a mac. Jach tsoy yirir yocꞌat ten Herodes.
\v 7 Tsꞌoc yocꞌat u tsꞌenʌꞌ, caj yaꞌaraj tiꞌ u tsꞌenʌꞌ: 
\p ―Ʌcʌtan tu wich Cꞌuj wa baꞌ a cꞌat jeꞌ in tsꞌic tech. Wa mʌꞌ in tsꞌa tech cax u quinsen Cꞌuj.
\p
\v 8 U tsꞌenʌꞌ Herodes caj bin tu yʌn u nʌꞌ. Caj araꞌb tiꞌ ten u nʌꞌ:
\p ―Xen cꞌatej caꞌ u xonchꞌʌctej u car Juan a cu yacsic jaꞌ tu joꞌr mac caꞌ u tsꞌaj tech u joꞌr Juan. Caꞌ u butꞌej tech ich u rʌquir quir a peꞌjic u joꞌr Juan.
\p
\v 9 Caj yubaj u cꞌataꞌr ten u tsꞌenʌꞌ:
\p ―Chuquej ten u joꞌr Juan. Tu pachir tucraj quireꞌ mʌꞌ u cꞌat u quinsaꞌr Juan ten Herodes. Quireꞌ tu rʌc uꞌyajob mac curaꞌan tu cu quiꞌquiꞌ janʌnob, quireꞌ caj u toc araj: “Jeꞌ in tsꞌic tech a baꞌ a cꞌat.” Rajen caj tuchiꞌtaꞌb ten Herodes caꞌ xonchꞌʌctac u car Juan.
\p
\v 10 Caj yaꞌaraj Herodes:
\p ―Xen xonchꞌʌctej u car Juan tu mʌcaꞌan.
\p
\v 11 Seb caj u chꞌaj u joꞌr Juan ich u rʌquir. Caj tsꞌaꞌb tiꞌ xquic caj bin u tsꞌaj tiꞌ u nʌꞌ.
\p
\v 12 Caj tarob u camsʌwinicob Juan. Caj tar chꞌaꞌbir u baquer Juan, caj u mucob u baquer. Tsꞌoc u muquicob u baquereꞌ, caj bin arbir tiꞌ Jesús: “Mʌnaꞌ Juan.”
\s Jesús caj u tsꞌaj yoꞌoch a cinco mil xiboꞌ
\r (Mr. 6.30‑44; Lc. 9.10‑17; Jn. 6.1‑14)
\p
\v 13 Jesús caj yubaj bic tabar caj quinsaꞌb Juan caj bin Jesús. Tu junan caj binij. Caj binij yejer chem tu mʌnaꞌ mac. Caj yubob caj bin Jesús tu junan, caj rʌc tar a pimoꞌ. Caj rʌc cꞌuchob ich Jesús. A pimoꞌ, caj jocꞌob tu cajar caj binob ich yoc tu yʌn Jesús.
\v 14 Caj oc Jesús ich chem caj yiraj jach pim mac caj u muchꞌquintob u bʌj ich Jesús. Caj yiraj a pimoꞌ, caj u yajquintaj quireꞌ otsir caj irir ten Jesús rajen. Caj jawsaꞌb u yajirir a mac tar purbir.
\v 15 Oqꞌuin caj cꞌuchij u camsʌwinicob ich Jesús. Caj cꞌuchob u camsʌwinicob Jesús caj yaꞌarob:
\p ―Cu bin ic yum. Mʌnaꞌ mac a teraꞌ. Arej u binob u mʌnejob yoꞌoch quir u janticob a pimoꞌ. Arej tiꞌob caꞌ xicob u mʌnejob yoꞌoch ich u chan cajarob.
\p
\v 16 Jesús caj yaꞌaraj tiꞌob:
\p ―Cax mʌꞌ ju binob ―quij Jesús―. Tsꞌajex yoꞌoch pan. 
\p
\v 17 Caj u nuncajob u camsʌwinicob:
\p ―Mʌꞌ yaꞌab in woꞌoch panobiꞌ. Yʌn cinco pan tenob. Caꞌtur cʌy yʌn tenobiꞌ.
\p
\v 18 Jesús caj yaꞌaraj:
\p ―Chuquej teraꞌ ―quij Jesús.
\p
\v 19 Jesús caj yaꞌaraj tiꞌ a pimoꞌ:
\p ―Rʌc muchꞌquintex a bʌj. Curenex ich suꞌuc.
\p Caj rʌc curʌjob. Caj u ratꞌaj yoꞌoch pan a cinco panoꞌ. Caj u ratꞌaj yoꞌoch cʌy xan, caꞌtur cʌy. Caj u pʌctaj caꞌanan caj u tꞌʌnaj Cꞌuj Jesús:
\p ―Bayoꞌ Cꞌuj ―quij Jesús―. Ta tsꞌaj ij coꞌochex pan. 
\p Caj tsꞌoc u tꞌʌnic Cꞌuj Jesús, caj u rʌc jʌsaj tiꞌ u camsʌwinicob. Robob caꞌ u rʌc tꞌaxaj yoꞌoch tiꞌ a pim. 
\v 20-21 Caj u jantob a pimoꞌ, cinco mil xib caj rʌc naꞌachʌjob. Mʌꞌ u xacaj a xquic, mʌꞌ u xacaj u chan tiꞌar. Pachir caj u marajob doce xac, chup u xetꞌer. Caj u rʌc marob u xetꞌer quireꞌ mʌꞌ ju rʌc jantaj.
\s Jesús tan u bin ich yocꞌo jaꞌ
\r (Mr. 6.45‑52; Jn. 6.16‑21)
\p
\v 22 Seb caj yaꞌaraj Jesús yocarob u camsʌwinicob ich chem quir u chꞌʌctic cꞌacꞌnab. Raꞌ yʌn u cꞌuchurob camsʌwinicob pach cꞌacꞌnab. Pachir caꞌ bin cꞌuchuc Jesús. Caj bin u tꞌʌnej caꞌ xicob a pimoꞌ.
\v 23 Caj tsꞌoc u tuchiꞌtic a pimoꞌ, caj rʌc binob. Caj bineꞌ, caj bin Jesús u tꞌʌnej Cꞌuj ich u joꞌr pꞌuc wits. Tu junan caj bin. Caj bin ic yum tiꞌ yʌn Jesús tu junan. 
\v 24 A chemoꞌ, tiꞌ yʌn chumuc cꞌacꞌnab. Caj cꞌuchij chumuc cꞌacꞌnab caj tar yicꞌar. Caj nupꞌoꞌ yicꞌar ich chumuc cꞌacꞌnab. Cu tsꞌicchꞌintaꞌr u chemin ten u yamin.
\v 25 Cu sastar caj cꞌuchij Jesús tu yʌnob u camsʌwinicob. Caj tar Jesús ich yocꞌo jaꞌ.
\v 26 Caj yiraj u camsʌwinicob cu tar Jesús ich yocꞌo jaꞌ caj jaqꞌuij yorob. Caj awʌtnʌjob quireꞌ sajʌcob. Caj yaꞌarob:
\p ―Quisin cu tar.
\p
\v 27 Seb caj u puraj u tꞌʌn, Jesús caj yaꞌaraj:
\p ―Chichquintej a worex, ten ―quij Jesús―. Mʌꞌ ja chꞌiquex sajquireꞌ ten.
\p
\v 28 Caj yaꞌaraj Pedro:
\p ―Jaj Tsꞌur, ar in tar tu yʌnech ich yocꞌo jaꞌ wa tech ca tar ich yocꞌo jaꞌ.
\p
\v 29 Caj yaꞌaraj Jesús:
\p ―Cojen.
\p Caj jocꞌ ich chem Pedro. Caj bin yocꞌo jaꞌ caj cꞌuchuc tu yʌn Jesús.
\v 30 Caj yubaj u tar cꞌam yicꞌar Pedro caj jaqꞌuij yor. Caj jaqꞌuij yoreꞌ caj u yʌnxchun u jurur. Caj awʌtnʌjij: 
\p ―Taquen, Jaj Tsꞌur.
\p
\v 31 Tabar u cꞌuchur ich Jesús caj jur. Caj chuc u cꞌʌb ten Jesús, caj jocꞌsaꞌb ten Jesús. Caj araꞌb ten Jesús: 
\p ―Chichin ca wacsic ta wor ten Pedro. Mʌꞌ ju yʌn jacꞌʌr a wor.
\p
\v 32 Caj wʌcꞌʌs oc Pedro ich chem yejer Jesús caj chꞌenij yicꞌar.
\v 33 A mac a tiꞌ yʌnob ich chem, caj rʌc xonrʌj tu yʌn Jesús quir u cꞌujintaꞌr Jesús. Caj yaꞌarob:
\p ―U pararech Cꞌuj.
\s Jesús caj u jawsaj u yajir ich u cajar Genesaret
\r (Mr. 6.53‑56)
\p
\v 34 Caj cꞌuchob ich chiꞌcꞌacꞌnab tu cajar Genesaret quireꞌ caj u chꞌʌctob cꞌacꞌnab.
\v 35 A mac a tiꞌ yʌn ich u cajar Genesaret u cꞌʌꞌomʌnob Jesús. Caj rʌc manob u jumbintejob tiꞌ yʌn Jesús. Rajen rʌc tarob purbir u yajirir ich Jesús. Cax u cajar nʌtsꞌaꞌan, tiꞌ cu tarob purbir u yajirir.
\v 36 Caj chich cꞌataꞌb tiꞌ Jesús ten a mac a yajeꞌ:
\p ―Cax in tʌrejob yoquirir a nocꞌ wa ja cꞌat in tʌricob yoquir a nocꞌ ―quij yaꞌaraj tiꞌ Jesús.
\p Caj rʌc tarij yoquirir u nocꞌ Jesús caj rʌc jaw.
\c 15
\s Bic tabar cu pʌyic u siꞌpir mac
\r (Mr. 7.1‑23)
\p
\v 1 Caj tarob tu yʌn Jesús. Tarob u winiquirob judío a fariseoboꞌ quir u cꞌaticob tiꞌ Jesús. Tar u tar u winiquirob judío a fariseoboꞌ ich u cajar Jerusalén. Yet taracob yʌjcamsʌyʌjirob u tꞌʌn Moisés. Mʌꞌ yaꞌab caj cꞌuchob ich Jesús.
\v 2 Caj cꞌataꞌb tiꞌ ten u winiquirob judío a fariseoboꞌ yejer yʌjcamsʌyʌjirob u tꞌʌn Moisés:
\p ―Biquininiꞌ a camsʌwinicob mʌꞌ u quibejob a baꞌ cu yaꞌaricob ic nunquir? Rajraꞌ cu janʌnob. Mʌꞌ u pꞌoꞌicob u cꞌʌb cu janʌnob.
\p
\v 3 Caj cꞌataꞌb tiꞌob ten Jesús:
\p ―Biquinin ca cʌrʌx betiquex u tꞌʌn Cꞌuj? Biquinin u tꞌʌn a nunquirex ca cʌniquex? Mʌꞌ tan a quibiquex a baꞌ cu yaꞌariquex Cꞌuj.
\p
\v 4 Caj u yaꞌaraj Jesús:
\p ―“Caꞌ a sʌjt a tet, quij Cꞌuj. Baxuc a nʌꞌ xan ca sʌjtic. Mʌꞌ tsoy a pachꞌic a tet yejer a nʌꞌ. Bin a caꞌ quimin, quireꞌ caj pachꞌaj u tet yejer u nʌꞌ. Cu jocꞌsaꞌ chꞌinbir u joꞌr ten u racꞌob quireꞌ caj u pachꞌaj u tet yejer u nʌꞌ.” Baxuc caj yaꞌaraj Cꞌuj ich u tꞌʌn.
\v 5 Biquinin techex ca waꞌariquex a tet yejer a nʌꞌ mʌꞌ u cꞌuchur a worex a yamtex a tet yejer a nʌꞌ quireꞌ a baꞌ yʌn techex caj a toc tsꞌajex tiꞌ Cꞌuj? Bajeꞌrer mʌꞌ techex yʌnin, Cꞌuj yʌnin.
\v 6 A techexoꞌ, ca camsiquex cax a mac cu yaꞌaric: “Mʌꞌ in yamtic in tet yejer in nʌꞌ. Caj in toc rʌc tsꞌaj tiꞌ Cꞌuj.” Quireꞌ mʌꞌ caj a quibex u tꞌʌn Cꞌuj a cu yaꞌaric: “Caꞌ a sʌjtex a tet yejer a nʌꞌ.” Ca chen quiꞌ cʌnantiquex u tꞌʌn a nunquirex.
\p
\v 7 Caj yaꞌaraj Jesús tiꞌ u winiquirob judío a fariseoboꞌ: 
\p ―Irechex wa caꞌtur a tucurex, quireꞌ taj caj u camsa techex Isaías uch. Caj u tsꞌibtajechex uch:
\q
\v 8 A jeꞌ macaꞌ, quij Isaías. Cu tusaricob: “Quin sʌjticob Cꞌuj”, chen a tu pixamoꞌ cu yaꞌaricob: “Mʌꞌ in sʌjtic Cꞌuj.” 
\v 9 Caj u tsꞌibtaj Isaías uch: A Cꞌujoꞌ cu yaꞌaric: “Baꞌwir cu chen cꞌujintiquenob wa mʌꞌ u quibicob in tꞌʌn? Mʌꞌ ja wirej, chen u tꞌʌn winiquir cu quibicob quireꞌ rajiꞌob cu camsicob u tꞌʌn winic irej wa ju tꞌʌn Cꞌuj cu camsicob.” 
\m Baxuc caj u tsꞌibtaj Isaías uch.
\p
\v 10 Jesús caj u pʌyaj mac a pimoꞌ. Caj yaꞌaraj Jesús tiꞌ a mac caj u muchꞌquintob u bʌj:
\p ―Uꞌyex baꞌ quin waꞌaric techex caꞌ a cʌnex.
\v 11 A mac a cu yubic u siꞌpir, raꞌ mʌꞌ u yacsic u siꞌpir quireꞌ a baꞌ caj u jantaj. Raꞌ cu yacsic tu siꞌpir u tꞌʌn a cu jocꞌar tu chiꞌ, a cꞌasoꞌ.
\p
\v 12 U camsʌwinicob Jesús caj u jutsꞌob u bʌj ich Jesús. Caj araꞌb tiꞌ Jesús ten u camsʌwinicob:
\p ―A baꞌ caj a waꞌaraj tiꞌob sam, caj a choquintaj u yorob u winiquirob judío a fariseojoꞌ. Mʌꞌ wa ta wuꞌyaj ―quij u camsʌwinicob?
\p
\v 13 Caj yaꞌaraj Jesús tiꞌ u camsʌwinicob:
\p ―U tꞌʌn Cꞌuj mʌꞌ u chꞌejaꞌr. A cu tus camsicob cu yaꞌaricob u tꞌʌn Cꞌuj cu tsecꞌticob. Raꞌ cu bin chꞌejaꞌr ten ic Tet Cꞌuj caꞌanan. Irej a mac a cu jocꞌsic u cheꞌer yejer u moꞌos.
\p
\v 14 Caj yaꞌaraj Jesús tiꞌ u camsʌwinicob:
\p ―Tsireꞌej u tucurob u winiquirob judío a fariseojoꞌ. Irob mʌnaꞌ u wichob a fariseojoꞌ. A mac a cu pʌyic u jer chꞌop u wich tu cu bin rubur tu chꞌicaꞌanin ruꞌum. Mʌꞌ ja wirej, tu cu binob erar ich cꞌacꞌ. Mʌꞌ ja wirej, cu yubic u tꞌʌn a fariseojoꞌ.
\p
\v 15 Pedro caj tarij ich Jesús. Caj cꞌataꞌb tiꞌ Jesús ten Pedro:
\p ―Baꞌ quireꞌ u cꞌat yaꞌaric a caj a camsaj u winiquirob judío a fariseojoꞌ. A caj a waꞌaraj tiꞌ: “Cax mʌꞌ ju pꞌoꞌic u cꞌʌb cu janʌn.”
\p
\v 16 Caj yaꞌaraj Jesús tiꞌ Pedro:
\p ―Mʌꞌ wa ja najtex irechex u winiquirob judío a fariseojoꞌ xan?
\p
\v 17 Araꞌb tiꞌ Pedro ten Jesús:
\p ―A ca jantic a woꞌochoꞌ, cu bin ta chocher, ca taꞌic. 
\v 18 Mʌꞌ ja wirej, tiꞌ u tar cu jocꞌar a tꞌʌn ta chiꞌ. A cꞌasoꞌ, tiꞌ u tar tiꞌ u tucur mac. Quireꞌ cꞌas rajen cu pʌyic u siꞌpir. Mʌꞌ quir u janʌn.
\v 19 Quireꞌ a cꞌas ca tucric tiꞌ cu yʌnxchun tu tucur mac, quireꞌ cu tucric u quinsic mac. Quireꞌ a mac a cu man, tiꞌ cu tar a cu tucric. Quireꞌ cax mʌnaꞌ u mam cu tucric u man, tiꞌ cu tar cu jocꞌar tu tucur. Baxuc xib xan, cu tucric u man cax mʌnaꞌ u racꞌ. Tiꞌ cu tar u jocꞌar tu tucur. A cu chꞌic u baꞌtʌc mac, tiꞌ cu tar u jocꞌar tu tucur. Quireꞌ a cu tus, tiꞌ u tar u jocꞌar tu tucur. Quireꞌ a cu pacꞌʌr u pach u racꞌob, tiꞌ u tar u jocꞌar tu tucur.
\v 20 A ray u siꞌpiroꞌ cu casquintic mac. Quireꞌ a baꞌ cu janʌn mac cax rajraꞌ cu janʌn mʌꞌ u pʌyic u siꞌpir mac.
\s Caj tar xquic ich jumpet ruꞌum. Tar ich Jesús
\r (Mr. 7.24‑30)
\p
\v 21 Rucꞌ Jesús tu cajar tuj tar cꞌatbir ten u winiquirob judío a fariseojoꞌ tiꞌ Jesús:
\p ―Biquinin mʌꞌ u pꞌoꞌicob u cꞌʌbob a camsʌwinicob cu janʌnob?
\p Caj jocꞌ Jesús tar cu bin tu ruꞌum bʌytʌc tu yʌn u cajar Tiro yejer u cajar Sidón.
\v 22 Caj tar xquic. Tiꞌ u tar xquic u ruꞌumin cananea. Caj tar cʌjtar ich u ruꞌumin Tiro yejer u cajar Sidón. Caj tar ich Jesús caj u cꞌam tꞌʌntaj:
\p ―Jaj Tsꞌurir ―quij―, quireꞌ u pararech a nunquir David. Yajquinte ten yejer in chan parar xquic. Acaꞌan quisin tiꞌ, jach yaj.
\p
\v 23 Barej Jesús mʌꞌ ju nuncajiꞌ. Caj tarob u camsʌwinicob Jesús caj u chich cꞌatajob tiꞌ Jesús:
\p ―Cu jach chich tꞌʌniquenob a xquicoꞌ.
\p
\v 24 Caj yaꞌaraj Jesús:
\p ―Mʌꞌ yaꞌaraj in bin Cꞌuj, chen tu satʌr u winiquirob judío. Quin bin in tsecꞌtej tiꞌob quireꞌ Cꞌuj cu yiric irob tʌmʌn yuc a satʌroꞌ.
\p
\v 25 Caj u jutsꞌaj u bʌj xquic ich Jesús caj xonrʌj. Caj yaꞌaraj:
\p ―Jaj Tsꞌurir, chan yam ten.
\p
\v 26 Caj yaꞌaraj Jesús tiꞌ xquic:
\p ―Mʌꞌ tsoy in tsꞌic tech a baꞌ caj u tsꞌaja Cꞌuj tiꞌ u winiquirob judío. Mʌꞌ quir in yamtiquech. Mʌꞌ u winiquir judíojech. Quireꞌ mʌꞌ tsoy u tsꞌabʌr tech a tsꞌajaꞌan tiꞌ u winiquirob judío irej wa tan u taquic u yoch u parar quir u tsꞌic tiꞌ pecꞌ.
\p
\v 27 Caj yaꞌaraj a xquic:
\p ―Jach jaj, Jaj Tsꞌur, a baꞌ ca waꞌaric. A pecꞌoꞌ cu chuquic u jantej u pꞌupꞌir yoꞌoch u winiquirir wa cu potar ich yaran pojcheꞌ. Rajen quin cꞌatic tech caꞌ a yam ten cax chichin.
\p
\v 28 Jesús caj u nuncaj tiꞌ xquic:
\p ―Taj caj a quiꞌ acsaj ta wor ten xquic. Caꞌ jocꞌac u quisinin a chan parar xquic. A ta chich cꞌata ten. 
\p Sep caj jaw u chan parar xquic.
\s Jesús caj u jawsaj mac, jach yaꞌab caj u jawsaj mac 
\p
\v 29 Caj jocꞌ Jesús tu caj u jawsaj u parar chan xquic acaꞌan quisin tiꞌ. Caj manij chiꞌcꞌacꞌnab. U cꞌabaꞌ u cꞌacꞌnabir Galilea. Caj nac Jesús ich u joꞌr pꞌuc wits caj curaj.
\v 30 Caj cꞌuchij a pimoꞌ tu yʌn Jesús. Caj tar purbir mech yoc. Caj tar purbir xan chꞌop u wich. Caj tar purbir xan mʌꞌ u jocꞌar u tꞌʌn. Caj tar purbir mech u cꞌʌb xan. Baxuc u yajirir yaꞌab, caj tar purbir ich Jesús. Caj tar chaquinbir ich yoc Jesús. Caj jawsaꞌb ten Jesús. 
\v 31 Caj yirob a pimoꞌ jawsaꞌb a mʌꞌ u jocꞌar u tꞌʌn, caj jocꞌ u tꞌʌn. Caj yirob a pim caj jaw u yacꞌbir u wich, caj u quiꞌ iraj u ber. Caj yirob u rʌc jawʌr mech yoc, caj yirob u ximbar. Caj yirob u jawʌr mech u cꞌʌb, caj tsoyij u cꞌʌb. Caj jaqꞌuij yorob a pimoꞌ. Caj yaꞌarab tiꞌ Cꞌuj:
\p ―Jach caremech Cꞌuj u Cꞌujirech u winiquirob israel. 
\s Jesús cu tsꞌic yoꞌoch cax cuatro mil xib cu jansic 
\r (Mr. 8.1‑10)
\p
\v 32 Caj u pʌyaj u camsʌwinicob Jesús caj yaꞌaraj tiꞌ u camsʌwinicob:
\p ―In cꞌat in yajquinticob tiꞌ a pimoꞌ, quireꞌ wiꞌichʌjob. Quireꞌ mʌnaꞌ u nup u qꞌuinin tiꞌ yʌnob tu yʌnen. Mʌnaꞌ yoꞌoch, mʌꞌ baꞌ cu janticob. Mʌꞌ jin cꞌat in tuchiꞌtaꞌr ich yatochob, quireꞌ mʌnaꞌ baꞌ cu janticob. Quireꞌ mʌꞌ ju cꞌuchurob ich bej, quireꞌ wiꞌij.
\p
\v 33 Caj yaꞌaraj u camsʌwinicob:
\p ―Bic tabar ij quirej ij coꞌoch quireꞌ jach pim? Quireꞌ mʌnaꞌ mac cʌjaꞌan teraꞌ quir ic mʌnic yoꞌoch.
\p
\v 34 Jesús caj u cꞌataj tiꞌ u camsʌwinicob:
\p ―Mun yʌn techex a woꞌochex pan?
\p Caj u nuncajob:
\p ―Yʌn siete pan. Mʌꞌ yaꞌab cʌy yʌn tiꞌ.
\p
\v 35 Caj araꞌb u cutarob a pimoꞌ ten Jesús ich ruꞌum.
\v 36 Caj tsꞌaꞌb tiꞌ Jesús ten u camsʌwinicob. Siete pan caj tsꞌaꞌb tiꞌ Jesús. Tsꞌaꞌb tiꞌ cʌy Jesús. Caj u tꞌʌnaj Cꞌuj Jesús:
\p ―Bayoꞌ Cꞌuj caj a tsꞌaj toꞌon ij coꞌoch.
\p Caj tsꞌoc u tꞌʌnic Cꞌuj, caj u tsꞌaja tiꞌ u camsʌwinicob Jesús. Caj u rʌc jʌsajob ich a pimoꞌ.
\v 37 Caj jantob caj rʌc najchʌjob. Caj xur u janticob tiꞌ rʌc pꞌat u xetꞌer. Caj u marob u xetꞌer caj chup siete xac.
\v 38 Yʌn cuatro mil xib caj janob. Mʌꞌ tu xacob mun a xquic caj janʌnob. Mʌꞌ xacaꞌan u parar xan.
\v 39 Caj tsꞌoc u janʌnob caj yaꞌaraj tiꞌob a pim caꞌ xicob. Caj oc Jesús ich chem caj bin tu ruꞌumin Magdala.
\c 16
\s U winiquirob judío a fariseojoꞌ caj cꞌataꞌb tiꞌ Jesús wa carem beyaj. Caj u cꞌatajob u winiquirob judío a saduceoboꞌ xan
\r (Mr. 8.11‑13; Lc. 12.54‑56)
\p
\v 1 U winiquirob judío a fariseojoꞌ yejer u winiquirob judío a saduceoboꞌ, caj binob irbir Jesús quir yubicob u tꞌʌn Jesús. Soc cꞌuchaꞌan yorob u chucur Jesús. Rajen caj u tus cꞌatajob tiꞌ u carem beyaj a cu tar ich Cꞌuj. 
\v 2 Jesús caj u nuncaj tiꞌob:
\p ―A techexoꞌ, ca waꞌariquex: “Mʌꞌ ju tar yaꞌarir oqꞌuin quireꞌ chʌc u muyarir.”
\v 3 A techexoꞌ, ca waꞌariquex cu sastar jeꞌ u tar yaꞌarir a mʌꞌ acꞌbir u muyarir yejer chʌc. A techexoꞌ, jach cꞌasechex. Ca waꞌariquex cꞌuchaꞌan a worex a waꞌariquex mʌꞌ ju tar yaꞌarir. A techexoꞌ, cꞌuchaꞌan a worex a waꞌariquex: Jeꞌ u tar yaꞌarireꞌ. Chen aroꞌ cꞌuchaꞌan a worex a najtiquex tiꞌ. Chen mʌꞌ ju cꞌuchur a worex a najtex u carem beyaj a betaꞌb ten Cꞌuj tu qꞌuinin bajeꞌrer.
\p
\v 4 Caj yaꞌaraj Jesús tiꞌob u winiquirob judío a fariseojoꞌ yejer u winiquirob judío a saduceoboꞌ:
\p ―Techex a mac a cuxaꞌan tu qꞌuinin bajeꞌrer ca cꞌatiquex carem beyaj quireꞌ jach cꞌasechex. Quireꞌ mʌꞌ taj caj a cꞌujintex Cꞌuj. Chen ca binex a wirex in riqꞌuir mʌnaꞌ u nup u qꞌuinin. Iren Jonás caj wʌcꞌʌs xeja Jonás ten cʌy quireꞌ Cꞌuj. Raꞌ u carem beyaj bin a caꞌ a wirex. 
\p Caj bin Jesús nach, caj pꞌat u winiquirob judío a fariseojoꞌ yejer u winiquirob judío a saduceoboꞌ.
\s Quiꞌ cʌnantex a baꞌ cu camsicob u winiquirob judío a fariseojoꞌ
\r (Mr. 8.14‑21)
\p
\v 5 Caj bin u camsʌwinicob Jesús pʌchi cꞌacꞌnab. Caj tubi tiꞌob u chꞌicob yoꞌoch pan u jantejob.
\v 6 Caj yaꞌaraj Jesús tiꞌ u camsʌwinicob:
\p ―Quiꞌ cʌnantex a bʌj tiꞌ a baꞌ ca cʌniquex tiꞌ u winiquirob judío a fariseojoꞌ yejer u winiquirob judío a saduceoboꞌ. Quireꞌ baꞌ cu beticob irej u tsꞌac pan cu sip.
\p
\v 7 Quireꞌ cu tsicbarob u camsʌwinicob ich u racꞌob:
\p ―Rajen ―quij yaꞌaric toꞌon ij cʌjcamsʌyʌjir― quireꞌ caj u yiraj mʌꞌ ic chꞌaꞌic ij coꞌoch pan.
\p
\v 8 Jesús caj yubaj a baꞌ cu muc u aricob u camsʌwinicob. Caj yaꞌaraj:
\p ―Biquinin ca waꞌariquex: “Mʌnaꞌ a wochex pan.” Chichin a wacsamʌnex ta worex. Quireꞌ Jesús yer caj u tucrajob mʌꞌ tu chꞌajob yoꞌoch pan. Chen tar pꞌatoꞌ.
\p
\v 9 Caj yaꞌaraj Jesús:
\p ―Mʌꞌ wa ta najtajex? Mʌꞌ wa cꞌaj techex? Yʌn toꞌon cinco pan caꞌch caj in rʌc jʌsaj tiꞌ cinco mil xib. Mʌꞌ wa cꞌaj techex mun xac cax chup a ta marex? Mʌꞌ ja wirej, u carem beyaj caj a wirajex?
\v 10 Mʌꞌ wa cꞌaj techex a yʌn siete pan caj in rʌc jʌsaj tiꞌ cuatro mil xib. Mʌꞌ wa cꞌaj techex mun xac caj ic rʌc maraj. Mʌꞌ ja wirej, u carem beyaj caj a wirajex? 
\p
\v 11 Caj yaꞌaraj Jesús tiꞌ u camsʌwinicob:
\p ―Biquinin mʌꞌ a quiꞌ najtajex? Mʌꞌ rajiꞌ quin wac techex a woꞌochex pan. Caj in waꞌaraj techex, quiꞌ cʌnantex a bʌj tiꞌ a tsꞌac a cu sip yoꞌoch pan u winiquirob judío a fariseojoꞌ yejer u winiquirob judío a saduceojoꞌ. 
\p
\v 12 Caj u najtajob u camsʌwinic Jesús: “A baꞌ caj u yaꞌaraj Jesús, mʌꞌ rajiꞌ cu yac toꞌon. Tu camsa toꞌon an ten bic cu sip yoꞌoch pan, a baꞌ cu camsicoꞌon u winiquirob judío a fariseojoꞌ yejer u winiquirob judío a saduceojoꞌ. Quiꞌ cʌnantex a bʌj tiꞌ a baꞌ cu camsiquech u winiquirob judío a fariseojoꞌ yejer u winiquirob judío a saduceojoꞌ.” 
\s A techoꞌ, Cristojech a quic pajic u tar ich Cꞌuj
\r (Mr. 8.27‑30; Lc. 9.18‑21)
\p
\v 13 Caj cꞌuchij Jesús bʌytʌc ich u cajar Cesarea de Filipo. Caj u cꞌataj tiꞌ u camsʌwinicob:
\p ―Mac cu yaꞌariquenob ―quij Jesús― a pimoꞌ u pararen Cꞌuj quireꞌ taren in yamtic mac tu cotor?
\p
\v 14 Caj yaꞌarajob:
\p ―Mʌꞌ yaꞌab tij cuꞌyaj u juminticob caj u pʌchechob: “Juanech, a cu yacsic jaꞌ tu joꞌr mac.” U jer caj yaꞌarob: “Elíasech.” Tiꞌ yʌn xan cu yaꞌaric: “Jeremíasech.” U jer cu yaꞌaric: “U jerech yʌjtseqꞌuirech u tꞌʌn Cꞌuj.”
\p
\v 15 Caj yaꞌaraj Jesús tiꞌob:
\p ―A techexoꞌ, a mac ca waꞌariquex ten?
\p
\v 16 Caj yaꞌaraj Simón Pedro tiꞌ Jesús:
\p ―A techoꞌ, Cristojech, a mac tuchiꞌtaꞌb ten Cꞌuj. U pararech Cꞌuj. A Cꞌujoꞌ cuxaꞌan.
\p
\v 17 Jesús caj u nuncaj tiꞌ:
\p ―Quiꞌquintej a wor Simón, raꞌ a tet Jonás. Cꞌuj caj u tsꞌaj a najtej wa Cristojen. Mʌnaꞌ mac caj u tsꞌaj a najtej tech. Chen ic Tet a tiꞌ yʌn caꞌanan rajiꞌ caj u tsꞌaj a najtej.
\v 18 A tenoꞌ quin waꞌaric tech Pedrojech. U cꞌat yaꞌaric a cꞌabaꞌ Tunichech. Quireꞌ mʌꞌ u cꞌax a tucur toc taj ca tucric jach Cristojen. Mʌꞌ ju cꞌuchur u yor ten quisin u taquiquech tiꞌ ten quireꞌ ca jach cꞌujintiquen Cristo. 
\p
\v 19 Caj yaꞌaraj Jesús tiꞌ Pedro:
\p ―A tenoꞌ quin wacsiquech u tsꞌurirech a racꞌob quireꞌ in mucꞌ cu bin tsꞌabir tech. A baꞌ cu beticob a racꞌob wa tsoy ta tꞌʌn tech, bayiriꞌ tsoy tu tꞌʌn Cꞌuj. Wa mʌꞌ tsoy cu beticob a racꞌob quireꞌ mʌꞌ tsoy ta tꞌʌn, tech bayiriꞌ tiꞌ Cꞌuj xan.
\p
\v 20 Caj u chich araj Jesús tiꞌ u camsʌwinicob:
\p ―Mʌꞌ a yʌn bin a waꞌarex wa Cristojen.
\s Jesús cu yaꞌaric bin u caꞌ quimin
\r (Mr. 8.31―9.1; Lc. 9.22‑27)
\p
\v 21 Raꞌ u qꞌuinin Jesús caj u yʌnxchun u camsic u camsʌwinicob. Tiꞌ cu bin u mucꞌyaj Jesús ich u cajar Jerusalén quireꞌ u jach tsꞌurirob sacerdote. Bayiriꞌ xan tiꞌ yʌjcamsʌyʌjirob u tꞌʌn Moisés. Bayiriꞌ tiꞌ u jach tsꞌurir u cajarob u winiquirob judío. Bin u caꞌ quinsbir Jesús ich u cajar Jerusalén. Yaꞌaraj caꞌ bin riqꞌuir tu quimirir: “Caꞌ bin manac mʌnaꞌ u nup u qꞌuinin quin caꞌ riqꞌuir” ―quij Jesús.
\p
\v 22 Pedro caj mach u cꞌʌb Jesús caj bin Pedro yejer Jesús tu junan quir u tsicbar. Caj yaꞌaraj Pedro:
\p ―In cꞌat Cꞌuj caꞌ u yamtech Jaj Tsꞌur soc mʌꞌ a mucꞌyaj soc mʌꞌ a quinsaꞌ.
\p
\v 23 Chen Jesús caj pꞌus u pach tiꞌ Pedro. Mʌꞌ ju cꞌat yubic Jesús yaꞌaric Pedro: “Mʌꞌ a yʌn quinsaꞌr.” Caj yaꞌaraj Jesús: 
\p ―Joqꞌuen Pedro, irech quisin Satanás ―quij Jesús―. Mʌꞌ a pꞌusic in wor ―quij Jesús―. Mʌꞌ quet a wor yejer Cꞌuj, quet a wor yejer xib Pedro.
\p
\v 24 Caj yaꞌaraj Jesús tiꞌ u camsʌwinicob:
\p ―An ten bic ten caꞌ bin mucꞌyajnʌquen ich cruz. Baxuc techex, caꞌ bin mucyajnʌquechex quireꞌ caj a cꞌamex in tꞌʌn, cax ca bin a quimechex ich cruz. Baxuc xan, caꞌ a pꞌʌtiquex a baꞌ ca pachtiquex ta worex wa ja cꞌatex a cʌniquex in tꞌʌn ―quij Jesús―.
\v 25 Quireꞌ a mac mʌꞌ u cꞌat u taquic u cuxtar tiꞌ u racꞌob tu cu chucur u pach ten u racꞌob, quireꞌ caj u yacsaj tu yor tiꞌ in tꞌʌn. Chen raꞌ cu bin taquic u pixam. Chen a mac u cꞌat u taquic u cuxtar tiꞌ u racꞌob tu cu chucur u pach ten u racꞌob. Jeꞌ u satʌr u pixameꞌ, quireꞌ mʌꞌ ju cꞌat u cꞌʌmic in tꞌʌn quir u cuxtar munt qꞌuin ich caꞌanan.
\v 26 Cax chen toc rʌc yʌn a baꞌ yʌn teꞌ ich yocꞌocab. Chen u pixam jeꞌ u satʌreꞌ. Rajen mʌꞌ baꞌwir tiꞌ u baꞌtʌc ich yocꞌocab. Mʌꞌ biqꞌuin cꞌuchaꞌan yor u boꞌotej u pixam.
\p
\v 27 Jesús caj yaꞌaraj tiꞌ u camsʌwinicob:
\p ―Caꞌ bin taquen yejerob yʌjmasirob u tꞌʌn Cꞌuj. Yejer u sasir Cꞌuj caꞌ bin taquen. Jujuntur quin bin in boꞌotej, a tu jach cꞌʌmajob in tꞌʌn an ten bic caj man tu tsoyir Cꞌuj. Quireꞌ taren in yamtic mac tu cotor.
\p
\v 28 Caj yaꞌaraj Jesús:
\p ―Taj quin waꞌaric techex. Yʌn mac mʌꞌ yaꞌab teraꞌ mʌꞌ ju quimin hasta yiric in tar ich yocꞌocab quir a reyintiquex Cꞌuj.
\c 17
\s Caj waysaꞌb Jesús ʌcʌtan ich u camsʌwinicob
\r (Mr. 9.2‑13; Lc. 9.28‑36)
\p
\v 1 Tiꞌ yʌn uch Jesús ich u cajar Cesarea de Filipo tu caj u camsej tiꞌob u camsʌwinicob. Caj manij seis u qꞌuinin Jesús caj u pʌyaj Pedro yejer Juan yejer Jacobo. U bʌjob Jacobo, Juan. Caj binob ich u joꞌr wits tu caꞌanan u joꞌr wits. Caj binij Jesús yejer u camsʌwinicob mʌꞌ yaꞌab. Mʌnaꞌ u nup.
\v 2 Ʌcʌtan u camsʌwinicob caj waysaꞌb Jesús. Caj waysaꞌb u sasirir u wich Jesús, irej u sasirir ic yum qꞌuin. Baxuc u jach chaꞌaj u nocꞌ, irej u sasirir ic yum.
\v 3 Seb caj irir ix baꞌ Moisés yejer ix baꞌ Elías ten u camsʌwinicob. Caj tsicbanʌjob yejer Jesús, caj ir ten u camsʌwinicob Jesús.
\v 4 Pedro caj u tꞌʌnaj Jesús:
\p ―Jaj Tsꞌurir ―quij―. Jach tsoy teꞌ yʌnoꞌonaꞌ teraꞌ. Arej in chan tʌsej paser. U tiririꞌ tech. U tiririꞌ tiꞌ Moisés. U tuririꞌ tiꞌ Elías.
\p
\v 5 Caj u yub u tꞌʌn Cꞌuj Pedro caꞌanan. Caj yiraj u tar u muyarir, jach sʌc tꞌinaꞌan, rʌc bʌcristaꞌb tu cotor. Caj yubaj u tꞌʌn ich u muyarir. Caj yubaj yaꞌaric Pedro: 
\p ―A jeꞌ in jach parar, in jach yaj. Jach quiꞌ in wor. Caꞌ a uꞌyex u tꞌʌn.
\p Tiꞌ toy cu tꞌʌn Pedro yejer Jesús caj yir u tar u muyarir. 
\p
\v 6 Caj tsꞌoc yubic u tꞌʌn ich u muyarir u camsʌwinicob Jesús, caj rʌc nacrʌjob ich ruꞌum. Jach jaqꞌuij yorob. 
\v 7 Jesús caj u jutsꞌ u bʌj ichob u camsʌwinicob. Caj u tʌraj tiꞌob soc yerob tiꞌ yʌn Jesús. Caj yaꞌaraj tiꞌob: 
\p ―Riqꞌuenex mʌꞌ a chꞌic sajaqꞌuirex.
\p
\v 8 Caj ricꞌob u camsʌwinicob Jesús caj yirob mʌnaꞌ ix baꞌ Moisés, bayiriꞌ ix baꞌ Elías. Mʌnaꞌ mac chen Jesús tu junan.
\p
\v 9 Cu yemenob ich u joꞌr pꞌuc wits. Jesús caj u toc tꞌʌnaj u camsʌwinicob soc mʌꞌ yaꞌaricob wa yirob ix baꞌ Moisés yejer ix baꞌ Elías, cax a baꞌ yubmʌnob xan, hasta in caꞌ riqꞌuir caꞌ bin quimiquen, a tenoꞌ a mac tar u yamtic mac tu cotor. Jeroj arex a baꞌ caj a wirex.
\p
\v 10 Caj u cꞌatajob u camsʌwinicob tiꞌ Jesús:
\p ―Quireꞌ tech caj a waꞌaraj toꞌon. Mʌꞌ a yʌn bin a waꞌarex wa caj in wirob ix baꞌ Elías yejer ix baꞌ Moisés. Biquinin cu yaꞌaric yʌjcamsʌyʌjirob u tꞌʌn Moisés: “Rajiꞌ cu yʌn bin tar ix baꞌ Elías, pachir cu tar a Cristojo”?
\p
\v 11 Caj u nuncaj tiꞌob Jesús:
\p ―Taj ―quij Jesús―. Ix baꞌ Elías cu yʌn bin tar uch quir u pʌyic u ber Cristo soc u cꞌaxicob yorob, soc u rʌc pꞌʌticob cꞌas u winiquirob judío.
\v 12 A tenoꞌ, ―quij Jesús―, quin waꞌaric techex, toc tarij Elías chen mʌꞌ u cꞌʌꞌotajob Elías. Mʌꞌ tu yacsajob tiꞌ, caj quinsaꞌb tiꞌ, quireꞌ baxuc u cꞌatob a mac caj u chucajob tiꞌ. Baxuc a tenoꞌ ―quij Jesús―, quin bin in mucꞌyaj caꞌ bin u chuquenob xan.
\p
\v 13 U camsʌwinicob caj yubob baꞌ yaꞌaraj Jesús caj u jach najtajob rajiꞌ Juan cu tsicbʌtic Jesús. Raꞌ Juan a cu yacsic jaꞌ tu joꞌr mac.
\s Jesús caj u jawsaj chan xib a cu yʌn saj quimin
\r (Mr. 9.14‑29; Lc. 9.37‑43)
\p
\v 14 Caj urob Jesús ich u joꞌr caꞌanan wits. Caj cꞌuchij tu yʌnob a pimoꞌ. Caj u juts u bʌj turiꞌ xib ich tu yʌn Jesús. Caj xonrʌj ʌcʌtan ich Jesús.
\p
\v 15 Caj yaꞌaraj:
\p ―Jaj Tsꞌurir ―quij―. Caꞌ yajquintej in parar. Yamtej tiꞌ, cu sʌj quimin. Tiriꞌ cu rʌc rubur ich jaꞌ. Cu jach mucꞌyaj.
\v 16 Caj tar in puric ich a camsʌwinicob mʌꞌ tu jawsajobiꞌ. A camsʌwinicob, mʌꞌ cꞌuchaꞌan yorob u jawsej.
\p
\v 17 Caj yaꞌaraj Jesús tiꞌ:
\p ―A techexoꞌ, a mac cuxaꞌan tu qꞌuinin bajeꞌrer, mʌꞌ ca wacsiquex ta worex. Mʌꞌ ca quibiquex in tꞌʌn. Mʌꞌ yaꞌab u qꞌuinin tiꞌ yʌnen tu yʌnechex. Arex mun u qꞌuinin quin mucꞌtic techex quireꞌ mʌꞌ a quibex in tꞌʌn. Arex caꞌ tac purbir chan xib teraꞌ.
\p
\v 18 Jesús caj u jocꞌsaj cꞌacꞌas quisin. Caj u qꞌueyaj. Raꞌiriꞌ u qꞌuinin caj toc jaw chan xib.
\p
\v 19 Caj tarob u camsʌwinicob yicnʌn Jesús caj tsicbanʌjob yejer Jesús, quireꞌ rʌc binob a pimoꞌ. Caj cꞌataꞌbi tiꞌ: 
\p ―Biquinin a tenobeꞌ mʌꞌ cꞌuchaꞌan in worob in jocꞌsicob quisin?
\p
\v 20 Caj yaꞌaraj Jesús tiꞌob.
\p ―Mʌꞌ ca wacsiquex ta worex, rajen mʌꞌ cꞌuchaꞌan a worex a jocꞌsex. Taj quin waꞌariquex tech, an ten bic yijir u wich mostaza. Mʌꞌ ja wirej, jach mijin. Wa bayiriꞌ ca wacsiquex ta worex, cax an ten bic mijin u yijir mostaza, cax a baꞌ cu tar techex cꞌuchaꞌan a worex tiꞌ. Cꞌuchaꞌan a worex tiꞌ tu cotor baꞌ wa ca wacsiquex ta worex tiꞌ ten.
\v 21 A jeꞌ quisin caj in jocꞌsajoꞌ juntur quisin. Chen a techexoꞌ caꞌ a tꞌʌnex Cꞌuj. Bayiriꞌ caꞌ a pꞌʌtex a janʌnex soc cꞌuchaꞌan a worex a jocꞌsiquex.
\s Bin in caꞌ quimin
\r (Mr. 9.30‑32; Lc. 9.43‑45)
\p
\v 22 Tiꞌ cu manob Jesús yejer u camsʌwinicob ich u ruꞌumin Galilea. Jesús caj yaꞌaraj:
\p
\v 23 ―A tenoꞌ bin in caꞌ quinsbir. Cu yʌn tarob u chuquiquenob mac quir in quinsaꞌ. Caꞌ bin mʌnac mʌnaꞌ u nup u qꞌuinin jeꞌ in caꞌ riqꞌuireꞌ.
\p Caj yubob yaꞌaric Jesús caj jach tucraꞌb Jesús ten u camsʌwinicob.
\s Cu boꞌotic u boꞌorir tu cu yocar u cꞌujinticob Cꞌuj u winiquirob judío ich carem naj
\p
\v 24 Caj cꞌuchob Jesús yejerob u camsʌwinicob ich u cajar Capernaum. Caj tar yʌjcꞌʌmin u taqꞌuin tu cu naj cꞌujinticob Cꞌuj u winiquirob judío. Caj bin ich Pedro caj cꞌataꞌb tiꞌ Pedro:
\p ―Cu boꞌotic wa ja wʌjcamsʌyʌjir tu cu yocar ich carem naj tu cu naj cꞌujinticob Cꞌuj u winiquirob judío?
\p
\v 25 Caj nuncaj Pedro:
\p ―Cu boꞌotic u boꞌorir tu cu yocar.
\p Caj tsꞌoc u yaꞌaric aroꞌ, caj oc ich yatoch tu yʌn Jesús. Caj u yʌn tꞌʌnaj Pedro, Jesús. Caj cꞌataꞌb tiꞌ Pedro ten Jesús:
\p ―Baꞌ ca tucric tech Pedro. A mac a cu tar nach yʌn u cꞌatic u boꞌorir ten gobierno. A mac a tiriꞌ cʌjaꞌan mʌꞌ u cꞌataꞌr u boꞌorir?
\p
\v 26 Caj yaꞌaraj Pedro:
\p ―Raꞌ cu cꞌatic u boꞌorir a mac nach u tar.
\p Caj yaꞌaraj Jesús:
\p ―Rajen cax mʌꞌ in boꞌotic tu cu yocar u naj cꞌujinticob Cꞌuj u winiquirob judío.
\p
\v 27 Caj araꞌb ten Jesús tiꞌ Pedro:
\p ―Soc mʌꞌ u pʌqꞌuicob in pach soc mʌꞌ yaꞌaric caj in pꞌastaj carem naj tu cu naj cꞌujinticob Cꞌuj u winiquirob judío. Joqꞌuen xen ich chiꞌcꞌacꞌnab joqꞌuen rutsej cʌy. A ca yʌn rutsiqueꞌ jʌp u chiꞌ a wirej wa yʌn u taqꞌuin. Raꞌ soc quir a boꞌotic quir ij cocar carem naj tu cu naj cꞌujinticob Cꞌuj u winiquirob judío. Joqꞌuen a boꞌotej tiꞌob.
\c 18
\s A mac jach carem tu cu bin u reyintejob Cꞌuj
\r (Mr. 9.33‑37; Lc. 9.46‑48)
\p
\v 1 Raꞌ u qꞌuinin caj tsicbanʌj Jesús yejer Pedro caj u jutsꞌob u bʌj u camsʌwinicob ich Jesús. Caj cꞌataꞌb tiꞌ Jesús ten u camsʌwinicob:
\p ―Arej toꞌon a mac jach carem tu cu bin u reyinticob Cꞌuj?
\p
\v 2 Jesús caj u pʌyaj u chan parar mac. Caj u pʌyaj chꞌictar chumuc tu yʌn Jesús.
\v 3 Caj yaꞌaraj Jesús:
\p ―Jach taj quin waꞌaric techex. Caꞌ a cꞌaxex a worex soc a cʌniquex chichan quireꞌ cu quibic u tꞌʌn mac. Wa ja cꞌatex a wocarex tu cu bin u reyinticob Cꞌuj ich caꞌanan.
\v 4 Rajen a mac a cu cʌnic a chichanoꞌ quireꞌ cu quibic u tꞌʌn mac caꞌ bin cꞌuchuc tu qꞌuinin u reyintic Cꞌuj raꞌ jach manan carem.
\v 5 A mac cu yacsic mac a caj u cʌnaj chichan, quireꞌ rajiꞌ caj u yacsaj tu yor tiꞌ ten bayiriꞌ cu yacsiquen xan.
\s Quiꞌ irej a wacsiquex a siꞌpir
\r (Mr. 9.42‑48; Lc. 17.1‑2)
\p
\v 6 Caj yaꞌaraj Jesús tiꞌ u camsʌwinicob:
\p ―A mac a cu yacsic u siꞌpir u racꞌob, a caj u cʌnaj chichan, a caj u yacsaj tu yor. Arej jach manan tsoy caꞌ u jichꞌej ich u car yejer yajaw caꞌ. Caꞌ u purej u bʌj ich cꞌacꞌnab quireꞌ caj u pʌyaj u siꞌpir u racꞌob. 
\v 7 A mac cu jach cꞌasquintic mac ich tu cotor yocꞌocab jach yaj cu bin yubic yerar a jeꞌ xiboꞌ. Yʌn u tar u jer mac quir u cꞌasquintic u racꞌob. Rajraꞌ yʌn u tar quir u cꞌasquintic mac jach manan cꞌas aroꞌ.
\p
\v 8 ’Rajen quin wac techex: Xonchꞌʌctej a cꞌʌb wa rajiꞌ cu yacsic a siꞌpir. Cax a woc wa rajiꞌ cu yacsic a siꞌpir. Cax bujuch cꞌʌbech, cax bujuch oquech soc a taquic a bʌj. Soc mʌꞌ a bin tu ca werar ich cꞌacꞌ munt qꞌuin yejer caꞌtur a cꞌʌb. Bayiriꞌ soc mʌꞌ a werar yejer caꞌtur a woc.
\v 9 Baxuc xan a wich. Wa rajiꞌ cu pʌyic a siꞌpir rʌc a wich. Cax bujuch ichech soc mʌꞌ a bin erar ich cꞌacꞌ. Soc a taquic a bʌj wa yejer caꞌtur a wich ca bin tu ca werar.
\s Cax tʌmʌn yuc a irej satʌr Jesús quir u camsic
\r (Lc. 15.3‑7)
\p
\v 10 Caj yaꞌaraj Jesús tiꞌ:
\p ―Mʌꞌ a yʌn cheꞌtic a chichan a caj u yacsaj tu yor ten, a tiꞌ yʌn ich yocꞌocab, a irob a jeꞌ chichanaꞌ. Quireꞌ tiꞌ yʌn u yʌjmasirob u tꞌʌn Cꞌuj tiꞌ chichan ʌcʌtan tiꞌ Cꞌuj caꞌanan. Rajiꞌob cʌnanticob yʌjmasirob u tꞌʌn Cꞌuj.
\p
\v 11 Caj yaꞌaraj Jesús:
\p ―Taren in yamtic mac tu cotor ich yocꞌocab a mac satʌr quir u jawsic u siꞌpir.
\p
\v 12 ’Quiꞌ tucrex a baꞌ quin bin in camsic techex. Mʌꞌ wa tiꞌ yʌn xib yʌjcʌnʌnyʌjir cien tʌmʌn yuc. Caj satij tuririꞌ jeꞌ u bin u cʌxtej a tuririꞌ saꞌat. Cu jamach pꞌʌtic yʌrʌcꞌ tʌmʌn yuc a noventa y nueve a tiꞌ yʌnob ich u joꞌr wits, caꞌ xic u cʌxtej tuririꞌ.
\v 13 Wa cu yiric yʌrʌcꞌ tʌmʌn yuc a tuririꞌ taj quin waꞌaric jach quiꞌ yor. Cax tiꞌ yʌn a noventa y nueve a mʌꞌ saꞌatʌrob. Mʌꞌ quiꞌ yor hasta cu yiric a tuririꞌ, a raꞌ u qꞌuininoꞌ cu jach quiꞌ tar yor.
\p
\v 14 Caj yaꞌaraj Jesús:
\p ―Rajen baxuc ic Tet Cꞌuj. Mʌꞌ u cꞌat yiric u satʌr a chichan tuririꞌ a mac a cu yacsic tu yor tiꞌ ten, a ca wiriquex bʌytʌc tu yʌnechex.
\s Bic tabar a jawsiquex u siꞌpir a wet acsaꞌorir
\r (Lc. 17.3)
\p
\v 15 Caj yaꞌaraj Jesús tiꞌ u camsʌwinicob:
\p ―Wa ja wet acsaꞌorir cꞌas cu yac techex. Cax wa baꞌ cu betic techex. Tu junan ca waꞌariquex tiꞌ wa baꞌ cu yaꞌaric techex. Wa caj u quibaj a tꞌʌn a wet acsaꞌorir, pꞌeriꞌ a wor yejer. Mʌꞌ ja wirej, caj u yacꞌtaj u bʌj tu siꞌpir caj u pʌyaj. Caj a tacaj soc mʌꞌ u tsꞌictar tiꞌ Cꞌuj.
\v 16 Wa mʌꞌ u quibic a tꞌʌn a wet acsaꞌorir, joqꞌuen pʌyej tuririꞌ wa caꞌtur. Caꞌ a pʌyej soc yubic a wet acsaꞌorir yʌn u siꞌpir yet acsaꞌorir. Soc yiric wa cꞌuchaꞌan yor u pꞌeriꞌquinticob yor. Soc mʌnaꞌ u nup yubic yʌn u siꞌpir. 
\v 17 Wa mʌꞌ u yubiquex a tꞌʌnex a wet acsaꞌorir, caꞌ a rʌc arex yubejob tu cotor u tsꞌurir a wet acsaꞌorir tu ca muchꞌquintiquex a bʌj. Wa mʌꞌ yubic u tꞌʌn tu cotor u tsꞌurir yet acsaꞌorir. Mʌꞌ ja tꞌʌniquex an ten bic mac mʌꞌ yer Cꞌuj.
\p
\v 18 Jach taj quin waꞌariquechex:
\p ―A baꞌ quir mʌꞌ a cꞌatex tu ca muchꞌquintiquex a bʌj ich yocꞌocab, baxuc xan, a Cꞌujoꞌ mʌꞌ u cꞌat. A baꞌ quir tsoy techex tu ca muchꞌquintiquex a bʌj, baxuc a Cꞌujoꞌ, tsoy yiric Cꞌuj.
\p
\v 19 ’Taj quin waꞌaric techex. Cax wa chan caꞌturechex yejer a wet acsaꞌorir teꞌ ich yocꞌocab. Jeꞌ u tsꞌic techex ic Tet Cꞌuj a baꞌ a cꞌat wa quet a worex.
\v 20 Cax wa mʌnaꞌ u nup cu tar u muchꞌquinticob u bʌj tiꞌ yʌnen ―quij Jesús―. Cax wa caꞌtur quir u cꞌujinticob Cꞌuj cu bin tsꞌabir ten Cꞌuj tiꞌ techex a baꞌ ca cꞌatiquex tiꞌ.
\p
\v 21 Caj tar Pedro ich Jesús caj u cꞌataj tiꞌ:
\p ―Wa cu tar in bʌjob, Jaj Tsꞌur. Yaꞌarej caꞌ in jawsej u siꞌpir wa baꞌ caj u yaꞌaraj. Arej ten mun caꞌ bin in jawsej u siꞌpir. Yaꞌab u tenin, cax wa siete quin jawsic u siꞌpir?
\p
\v 22 Caj u nuncaj Jesús:
\p ―Mʌꞌ jin waꞌarej a jawsej siete, cax yaꞌab u tenin u tar cax setenta.
\s Jesús cu camsic bic tabar mʌꞌ jawsic u yet cꞌurew
\p
\v 23 Rajen caj yaꞌaraj Jesús tu cu camsicob:
\p ―U ruꞌumin tu cu bin u reyinticob Cꞌuj caꞌanan irej a rey a cu bin u cꞌatic u boꞌorir tiꞌ u cꞌurew, a mac yʌn u boꞌor.
\v 24 Caj u yʌnxchun yiric yʌn u boꞌor u cꞌurew tiꞌ u rey. Caj tar purbir tiꞌ rey u cꞌurew quireꞌ rajiꞌ yʌn u boꞌor yaꞌab. Jaj ix tʌcoj cuatro millones pesos.
\v 25 U cꞌurew mʌꞌ cꞌuchaꞌan yor u boꞌotic u rey. Caj u toc araj rey: “Ar u rʌc cʌnej u baꞌtac. Bayiriꞌ u racꞌ, caꞌ u canej yejer u parar caꞌ u canej. A baꞌ yʌneꞌ, caꞌ u rʌc canej quir u boꞌotic rey.”
\v 26 Caj xonrʌj u cꞌurew ʌcʌtan u rey. Caj yaꞌaraj tiꞌ: “Caꞌ a yajquin ten, Jaj Tsꞌur. Sisquintej a wor ten. Jeꞌ in rʌc boꞌotiquech.”
\v 27 Caj sisij yor rey, caj u yajquintaj tiꞌ u cꞌurew. Caj yaꞌaraj tiꞌ u cꞌurew: “Tsireꞌej cax mʌꞌ a boꞌotic.” Caj yaꞌaraj u rey: “Siptej in cꞌurew caꞌ xic.”
\v 28 Raꞌiriꞌ u cꞌurew tan tu jocꞌar ich rey caj u nupꞌob u bʌj u yet cꞌurewir a mac yʌn u boꞌor tiꞌ yet cꞌurewir. Mʌꞌ necoꞌoj u boꞌor ten u yet cꞌurewir. Yʌn ix tʌcoj cuatro pesos. Caj chuc yʌtꞌbir u cꞌoꞌoch ten yet cꞌurewir. Caj yaꞌaraj: “Boꞌoten.”
\v 29 Caj xonraj u yet cꞌurewir ʌcʌtan Caj u chich araj: “Yajquinten. Jeꞌ in rʌc boꞌotiquech tu cotor.”
\v 30 “Jot” ―quij―. Caj u cꞌubaj u yet cꞌurewir a mʌꞌ yaꞌab u boꞌor caꞌ xic mʌcbir hasta cu boꞌotic u boꞌor tiꞌ u yet cꞌurewir.
\v 31 U yet cꞌurewir yaꞌab, caj yajij yorob a baꞌ caj u yirob caj binob ich rey yaꞌarajob tiꞌ baꞌ u ber.
\v 32 Caj u pʌyaj u cꞌurew rey. Caj cꞌuchij u cꞌurew tu yʌn rey. Caj yaꞌaraj tiꞌ u cꞌurew: “Jach cꞌasech, a tenoꞌ caj in waꞌaraj mʌꞌ a boꞌotej a boꞌor quireꞌ caj a chich cꞌataj ten.
\v 33 Biquinin mʌꞌ ja yajquintaj a wet cꞌurewir an ten biquen caj in yajquin tech?”
\v 34 A ju rey caj jach tsꞌiquij. Caj u cꞌubaj u cꞌurew xan, caꞌ maꞌcac hasta cu rʌc boꞌotic u boꞌor.
\p
\v 35 Jesús quir u tsꞌocar u camsic bic tabar u jawsic u siꞌpir mac caj yaꞌaraj:
\p ―Baxuc in Tet xan a tar yʌn ich caꞌanan. Mʌꞌ ju jawsic techex Cꞌuj wa mʌꞌ a jawsic u siꞌpir a wet acsaꞌorir jeꞌerer, mʌꞌ u jawsej.
\c 19
\s Jesús cu camsic mʌꞌ tsoy u pꞌʌtic u racꞌ
\r (Mr. 10.1‑12; Lc. 16.18)
\p
\v 1 Caj tsꞌoc yaꞌaric Jesús bic tabar u jawsic u yet acsaꞌorir caj u pꞌataj u ruꞌumin Galilea. Caj cꞌuchij tu ruꞌumin Judea caj caꞌ bin pʌchir yaꞌarir Jordán tu cu tar ic yum.
\v 2 Jach pim caj sayob tu pach Jesús caj bin pʌchir yaꞌarir Jordán caj jawsaꞌb u yajir.
\p
\v 3 Caj tar cꞌatbir tiꞌ Jesús ten jun yarob u winiquirob judío a fariseojoꞌ. Caj u jutsꞌajob u bʌj ich Jesús quir u tumtaꞌrob yor Jesús. Caj tus cꞌatob tiꞌ:
\p ―Tsoy wa ju pꞌʌtic u racꞌ cax a baꞌ quiriꞌ?
\p
\v 4 Caj u nuncaj:
\p ―Mʌꞌ wa ja xacmʌnex tu tsꞌibaꞌan: “A Cꞌujeꞌ tu yʌn betaj xib yejer xquic caj u betaj yocꞌocab?”
\v 5 Bayiriꞌ Cꞌuj caj yaꞌaraj xan: “Rajen a xiboꞌ yʌn u pꞌʌtic u tet bayiriꞌ u nʌꞌ soc u bin u chꞌaꞌej u racꞌ. Caj tsꞌoc u chꞌic u racꞌ caꞌtur yejer u racꞌ irej wa tu junan.”
\p
\v 6 Caj yaꞌaraj Jesús:
\p ―Rajen mʌꞌ biqꞌuin caꞌtur a mac a tu chꞌaj u racꞌ quireꞌ a Cꞌujoꞌ cu yiric tuririꞌ yʌn. Quireꞌ Cꞌuj caj u toc muchꞌquintaj xib, yejer u racꞌ raꞌ u qꞌuinin caj u chꞌaj u racꞌ. Jeroj, turiꞌ cu yiric Cꞌuj rajen mʌꞌ tsoy u pꞌʌtic u racꞌ xib.
\p
\v 7 Caj yaꞌaraj u winiquirob judío a fariseojoꞌ:
\p ―Biquinin caj yaꞌaraj Moisés uch: “Tsoy caꞌ a tsꞌibtej u juꞌunin quir a pꞌʌtic a racꞌ?”
\p
\v 8 Jesús caj u nuncaj tiꞌob:
\p ―Quireꞌ chich u joꞌr a racꞌob rajen yaꞌaraj Moisés: “Tsoy u tsꞌibtic u juꞌunin quir u pꞌʌtic u racꞌ.” Chen tu yʌnxchun tu cotor baꞌ mʌꞌ tsoy u pꞌʌtic u racꞌ quireꞌ baxuc u cꞌat Cꞌuj.
\v 9 A tenoꞌ ―quij Jesús―. Quin waꞌaric techex. Tsoy a pꞌʌtiquex a racꞌ wa cu man. Barej wa mʌꞌ u man, mʌꞌ tsoy a pꞌʌtiquex a racꞌ. Mʌꞌ tsoy u pꞌʌtic u racꞌ caꞌ u raqꞌuinte u jer. Wa caj u raqꞌuintaj u jer cu man. Wa caj u raqꞌuintaj u jer a pꞌat ten xib cu man yejer.
\p
\v 10 U camsʌwinicob Jesús caj yaꞌarob:
\p ―Wa ja xibeꞌ cu chen pꞌʌtic u racꞌ a cu man mʌꞌ baꞌ wir caꞌ ic chꞌaꞌic ic raqꞌuintej.
\p
\v 11 Caj yaꞌaraj Jesús:
\p ―Mʌꞌ tu cotor mʌꞌ cꞌuchaꞌan yor mʌꞌ u chꞌic u racꞌ quireꞌ Cꞌuj tsꞌaꞌb tiꞌ u mucꞌ soc mʌꞌ ju chꞌic u racꞌ. Jaririꞌ mʌꞌ u chꞌic u racꞌ quireꞌ Cꞌuj cu tsꞌic u mucꞌ quir u quibej.
\v 12 Yʌn u jer xib mʌꞌ ju chꞌic u raqꞌuintej xquic quireꞌ toc cꞌas caj rochaꞌb ten u nʌꞌ uch. U jer xib mʌꞌ ju chꞌic u racꞌ quireꞌ capontaꞌb ten mac. Yʌn u jer xib mʌꞌ ju chꞌic u racꞌ soc u quiꞌ beyaj tiꞌ Cꞌuj. A mac cꞌuchaꞌan yor mʌꞌ u cꞌat u chꞌic u racꞌ, tsoy. A mac mʌꞌ cꞌuchaꞌan yor, tsoy u chꞌic u racꞌ. A mac mʌꞌ ju bin u chꞌic u racꞌ quireꞌ u cꞌat u quiꞌ beyaj yejer Cꞌuj tsoy xan.
\s Caj tar purbir ich Jesús a chichan
\r (Mr. 10.13‑16; Lc. 18.15‑17)
\p
\v 13 Yʌn mac caj tar purbir chichan ich Jesús quir u tsꞌancꞌʌbtic Jesús soc u yamtaꞌ ten Cꞌuj. Caꞌ u tꞌʌnej Cꞌuj Jesús quir u yamtaꞌr a chichanoꞌ Jesús. Rajiꞌob qꞌueyaꞌb ten u camsʌwinicob Jesús a mac tar u puricob a chichanoꞌ.
\v 14 Caj yaꞌaraj Jesús:
\p ―Tsireꞌej u tar purbir chichan. Mʌꞌ ja mʌquex u berob quir u tarob ten. Mʌꞌ ja wirej, a chichanoꞌ sep cu tar tu yʌnen. Wa mac u cꞌat yocar tu cu bin u reyintejob Cꞌuj caꞌ u cʌnejob a chichanoꞌ.
\p
\v 15 Caj u taꞌrob ten Jesús a chichanoboꞌ soc u yamtaꞌr a chichanoboꞌ ten Cꞌuj. Caj wʌcꞌʌs bin Jesús.
\s Mʌꞌ uch xuruc a jach neyʌn u taqꞌuin. Rajiꞌ cu tsicbar yejer Jesús
\r (Mr. 10.17‑31; Lc. 18.18‑30)
\p
\v 16 Caj bin ich Jesús a mʌꞌ uch xuruc xib, caj u cꞌataj tiꞌ Jesús:
\p ―Baꞌ quin yʌn uꞌyic in wʌjcamsayʌjirech quireꞌ jach tsoyech. Baꞌ caꞌ in betej a jach tsoyoꞌ, soc in cuxtar munt qꞌuin?
\p
\v 17 Caj u nuncaj Jesús:
\p ―Biquinin ca waꞌaric jach tsoyiren? Chen Cꞌuj a jach tsoyoꞌ, mʌnaꞌ u jer. Wa ja cꞌat u yacsiquech Cꞌuj caꞌ a quibej u tꞌʌn tu tsꞌibaꞌan.
\p
\v 18 Caj u cꞌataj xib a mʌꞌ uch xuruc. Caj yaꞌaraj:
\p ―Tu yʌn? ―quij.
\p Caj u nuncaj Jesús:
\p ―Mʌꞌ a yʌn quinsic mac. Mʌꞌ a yʌn man yejer a mʌꞌ a racꞌ. Mʌꞌ a waꞌcric baꞌ. Mʌꞌ a tus pʌquic mac.
\p
\v 19 Caj yaꞌaraj Jesús tiꞌ:
\p ―Sʌjtej a tet, bayiriꞌ sʌjtej a nʌꞌ. Yajquintej a wet cajar an ten bic a yajquintic a wʌcꞌʌs bʌjiriꞌ.
\p
\v 20 Caj u nuncaj a mʌꞌ uch xuruc xib:
\p ―Aroꞌ caj in toc rʌc quibaj, caj in toc quibaj tin chichanin. Yʌn wa ju jer wa jaririꞌoꞌ?
\p
\v 21 Caj yaꞌaraj Jesús:
\p ―Wa ja cꞌat caꞌ u quiꞌ acsech Cꞌuj. Joqꞌuen, xen cʌnej a baꞌtac. Caj tsꞌoc a canic a baꞌtac, yʌn a taqꞌuin, tsꞌaj tiꞌ a mac jach otsiroꞌ. Soc a baywoꞌ yʌn tech ich Cꞌuj jach manan tsoyir, quireꞌ caj a yamtaj a racꞌob. Pachir caj sayʌr tin pach quir a cʌnic in tꞌʌn.
\p
\v 22 Caj yuba a mʌꞌ uch xuruc xib. Caj tsꞌoc yubic a baꞌ araꞌb ten Jesús tiꞌ caj choquij yor quireꞌ nejach yʌn u taqꞌuin. Caj wʌcꞌʌs bin a xib mʌꞌ uch xuruc.
\p
\v 23 Caj yaꞌaraj tiꞌob u camsʌwinicob, Jesús:
\p ―Taj quin waꞌaric techex. Jach yaj yubic a neyʌn u taqꞌuin. Jach yaj yubic xan, quir u yocar tu cu bin u reyinticob Cꞌuj, quireꞌ u yaj u taqꞌuin.
\v 24 In wʌcꞌʌs caꞌ aric techex ―quij Jesús―, jeꞌ wa ju cꞌuchur yor yocar yʌrʌcꞌ tsimin ich u jor yitꞌ putsꞌ? Mʌꞌ u cꞌuchur yor, quireꞌ chichin u jor yitꞌ putsꞌ. Jeꞌ wa ju cꞌuchur yor ocar ich caꞌanan a mac neyʌn u jach taqꞌuin? Mʌꞌ ju yocar quireꞌ u yaj u taqꞌuin. Jaj ix tʌcojoꞌ jeꞌ yocar yʌrʌcꞌ tsimin ich u jor yitꞌ putsꞌ. Chen a mac neyʌn u taqꞌuin mʌꞌ ju yocar tu cu bin u reyintejob Cꞌuj quireꞌ u yaj u taqꞌuin.
\p
\v 25 Caj yubob u camsʌwinicob caj jaqꞌuij yorob. Caj u cꞌatajob tiꞌ Jesús u wʌcꞌʌs u bʌjirirob u camsʌwinicob Jesús:
\p ―A mac cu bin tacbir ten Cꞌuj?
\p
\v 26 Jesús caj u pʌctaj u camsʌwinicob caj yaꞌaraj tiꞌob: 
\p ―A xiboꞌ mʌꞌ cꞌuchaꞌan yor u taquic u bʌj. Chen Cꞌuj cꞌuchaꞌan yor u taquic tu cotor quireꞌ cꞌuchaꞌan yor tiꞌ tu cotor baꞌ.
\p
\v 27 Caj yaꞌaraj Pedro:
\p ―Jach Tsꞌurir, biquinin a yʌn u taqꞌuin mʌꞌ tu rʌc pꞌʌtaj u baꞌtac mʌꞌ u sayʌr ta pach quir u cʌnic a tꞌʌn? A tenoboꞌ, caj in rʌc pꞌatajob a baꞌ yʌn tenob caj sayenob ta pach quir in cʌnicob a tꞌʌn. Baꞌ cu bin u tsꞌic tenob Cꞌuj quireꞌ caj in toc rʌc pꞌʌtob in baꞌtacob? 
\p
\v 28 Jesús caj u nuncaj:
\p ―Jach taj, quinin waꞌaric techex. Raꞌ u qꞌuinin caꞌ bin u betej u jer ricꞌben teꞌ ich yocꞌocab. Raꞌ u qꞌuinin xan quin bin in cutar tu cu bin u reyinticob Cꞌuj. Tiꞌ quin bin in cutar tu sasirir Cꞌuj a tenoꞌ taren in yamtic mac tu cotor. Bayiriꞌ techex, a bin a tsꞌurintiquex u winiquirob Israel. Caꞌ a tsꞌurintiquex a doce yoꞌnen u winiquirob Israel.
\v 29 A mac tu rʌc pꞌʌtaj yatoch tu cotor. Cax u wʌcꞌʌs u bʌjob. Cax u wʌcꞌʌs tet, cax u nʌꞌ, cax wa ju racꞌ cax wa ju parar cax wa ju ruꞌumin. Quireꞌ cu tar tin pach quir u cʌnic in tꞌʌn. Rajen cu pꞌʌtic tu cotor soc u quibic in tꞌʌn. A caj u rʌc pꞌʌtaj aroꞌ, cu bin u cꞌʌmej tiꞌ Cꞌuj a baꞌ jach tsoy bajeꞌrer. Jach manan cu bin tsꞌabʌr tiꞌ. Baxuc xan, caꞌ bin xuruc tꞌʌn jeꞌ u tsꞌabʌr tiꞌ quir u cuxtar munt qꞌuin.
\p
\v 30 Caj yaꞌaraj Jesús:
\p ―A mac caj u yʌn acsaj tu yor in tꞌʌn cu quiꞌ acsaꞌr ten Cꞌuj. Bayiriꞌ a mac pachir caj u yacsaj tu yor. Bayiriꞌ xan cu bin quiꞌ acsaꞌrbir ten Cꞌuj. A Cꞌujoꞌ mʌꞌ u coyen acsej a caj u yʌn acsaj tu yor. Quet caꞌ bin u rʌc acsejob a pachir caj u yacsajob tu yorob.
\c 20
\s Jesús cu camsic tiꞌ mac cu pʌyic u jer quir u beyaj 
\p
\v 1 Caj yaꞌaraj Jesús:
\p ―Tu cu bin u reyinticob Cꞌuj caꞌanan an ten bic u bin mac caj bin u pʌyic mac quir u beyaj, quir u tꞌaquic u wich uva tu cor. Aꞌacꞌbir caj bin u pʌybir ten u tsꞌurir. 
\v 2 Caj tsicbajnʌjij u tsꞌurir yejer yʌjtꞌaquirob u wich uva mun u boꞌorir cu bin boꞌotbir. Tres pesos turiꞌ u qꞌuinin u boꞌorir quir u tꞌaquic u wich uva. Baxuc u boꞌorir uch cu boꞌotaꞌr. Caj u tuchiꞌtaj beyajob ich u cor.
\v 3 Caj jocꞌ u jach tsꞌurir a las nueve caj yiraj u jerob. Tiꞌ yʌnob ich tu naj coꞌonan yoꞌoch. Mʌnaꞌ u beyajob cu manob.
\v 4 Caj araꞌb tiꞌob ten u jach tsꞌurir: “Xenex ta beyajex tin cor. Tꞌaquex u wich uva. Jeꞌ in boꞌotiquex caꞌ bin xiquechex ta beyajex. A baꞌ tsoy tin tꞌʌn jeꞌ in boꞌotiquex.” 
\v 5 Caj jocꞌ u jach tsꞌurir caj bin u tsꞌurir tu cu naj mʌnic yoꞌoch. Cꞌacꞌchunqꞌuin caꞌ u caꞌ iraj u jerob. Caj u tuchiꞌtaj beyajob ich u cor. A las tres caj u caꞌ irajob u jerob caj u tuchiꞌtaj beyajob.
\v 6 Caj wʌcꞌʌs bin u jach tsꞌurir tu cu naj mʌnic yoꞌoch a las cinco. Caj u caꞌ iraj u jerob. Mʌnaꞌ u beyajob. Caj araꞌb tiꞌob: “Biquinin u bur u qꞌuinin ca manex teraꞌ? Biquinin mʌnaꞌ a beyajex?”
\v 7 Caj araꞌb tiꞌ u jach tsꞌurir ten a mac mʌnaꞌ u beyajob: “Mʌnaꞌ mac caj u pʌyoꞌon tic beyaj.” Caj araꞌb tiꞌob ten u jach tsꞌurir: “Xenex ta beyajex ich in cor. Jeꞌ in tsꞌic techex a baꞌ tsoy tin tꞌʌn.”
\v 8 U jach tsꞌurir caj u tuchiꞌtaj yʌjtꞌʌnin. Oqꞌuin caj u tuchiꞌtaj quir u boꞌotaꞌr yʌjtꞌaquirob u wich uva. Yʌn boꞌotaꞌr a mac pachir caj tarob. Caj tsꞌoc u boꞌotic a pachir, caj tarob caj u boꞌotaj a mac chꞌic tarob sam.
\v 9 Quet bayiriꞌ u boꞌorir caj tsꞌaꞌb tiꞌ. Cax pachir caj tarob tu beyajob. Tres pesos caj boꞌotaꞌb.
\v 10 Caj cꞌuchij tu qꞌuinin u boꞌotic a mac yʌn chꞌic tarob. Cu tucricobeꞌ yerob jach coꞌoj cu bin boꞌotbir. Caj boꞌotaꞌbeꞌ tres pesos u boꞌorir.
\v 11 Caj tsꞌoc u boꞌotaꞌr caj choquij yorob yejer u jach tsꞌurir.
\v 12 Caj yaꞌarajob tiꞌ u jach tsꞌurir: “Baxuc a pachirob xan, caj beyajnʌjob cax turiꞌ hora. Bayiriꞌ caj boꞌotaꞌb xan. Cax a tenob tin jach mucꞌob chʌcʌr qꞌuin tu quin beyajob.”
\v 13 Caj u nuncaj tiꞌob u jach tsꞌurir caj yaꞌaraj: “Biquinin ca chen tsꞌiquintiquenex in tus yaj in bʌj. Toc tsicbanʌjen techex uch caj in tuchiꞌtechex ta beyajex. Tin toc araj tres pesos.
\v 14 Chꞌaꞌex u boꞌorir a beyajex caꞌ xiquechex. A tenoꞌ, wa jin cꞌat in tsꞌic techex bayiriꞌ u boꞌorir a beyajex cax pachir caj tarob. Bayiriꞌ quin tsꞌic tiꞌob u boꞌorir u beyajob xan.
\v 15 Mʌꞌ wa tsoy quin tsꞌic in taqꞌuin a mun u boꞌorir in cꞌat in boꞌotic tiꞌob quireꞌ ten in taqꞌuin? Biquinin choquex a worex ten quireꞌ mʌꞌ tsꞌuꞌten?”
\v 16 Bayiriꞌ baxuc, caꞌ bin xuruc tꞌʌn xan ich yocꞌocab. A mac pachir tar tu beyaj tiꞌ Jaj Tsꞌur cu tucric mʌꞌ coꞌoj cu bin boꞌotbir, chen quet cu bin boꞌotbir. Barej a mac a yʌn tarij tu beyaj cu tucric jach coꞌoj cu bin boꞌotbir a tiꞌob, chen quet cu bin boꞌotbir ten Jaj Tsꞌur. Mʌꞌ ja wirej, cax yaꞌab mac cu yubic u tꞌʌn Cꞌuj, mʌꞌ u rʌc quibicob u tꞌʌn Cꞌuj.
\s Cu wʌcꞌʌs caꞌ aric Jesús bin u caꞌ quinsbir
\r (Mr. 10.32‑34; Lc. 18.31‑34)
\p
\v 17 Jesús caj bin ich u berir Jerusalén. Tu junan caj u pʌyaj u camsʌwinic a docejoꞌ. Caj yaꞌaraj tiꞌob:
\p
\v 18 ―Jeroj, cuꞌuxex ich u cajar Jerusalén. Tiꞌ cu bin u quinsiquenob. Tiꞌ cu yʌn cꞌubiquenob tiꞌ u jach tsꞌurirob sacerdote yejer u yʌjcamsʌyʌjirob u tꞌʌn Moisés. Robob cu bin u yaꞌarejob caꞌ quinsaquen.
\v 19 Robob u winiquirob judío cu bin u cꞌubiquenob tiꞌ u winiquirob romano soc u pꞌastiquenob. Soc u rʌc jʌtsꞌicob in pach, soc u bʌjiquenob ich cruz soc in quimin. Mʌnaꞌ u nup u qꞌuinin caꞌ bin caꞌ riqꞌuiquen tiꞌ in quimin. 
\s Caj tar u nʌꞌob Jacobo yejer Juan ich Jesús
\r (Mr. 10.35‑45)
\p
\v 20 Caj u jutsꞌ u bʌj u nʌꞌob Jacobo yejer Juan. Raꞌ u tet Zebedeo. Quet caj tar yejer u pararob. Caj xonrʌj ich Jesús
\v 21 quir u cꞌatic baꞌ tiꞌ:
\p ―Baꞌ a cꞌat ten? ―quij.
\p Caj yaꞌaraj tiꞌ:
\p ―Caꞌ bin cꞌuchur tu qꞌuinin caꞌ bin u reyinticob Cꞌuj. Arej u cutarob tuririꞌ ta noj, bayiriꞌ tuririꞌ ta tsꞌic soc u sʌjtaꞌr ten u racꞌob.
\p
\v 22 Caj u nuncaj Jesús:
\p ―A techoꞌ, mʌꞌ a wer baꞌ ca cꞌatic ten. Arej ten wa cꞌuchaꞌan yorob a parar u mucꞌyajob an ten bic ten caꞌ bin mucꞌyajnʌquen ich cruz.
\p Caj yaꞌarajob Juan yejer Jacobo:
\p ―Cꞌuchaꞌan ij cor ic mucꞌyaj an bic tech.
\p
\v 23 Jesús caj yaꞌaraj tiꞌob:
\p ―Taj quin waꞌaric techex. Jeꞌ a mucꞌyaj an ten biquen. Chen mʌꞌ cꞌuchaꞌan in wor in curquintechex ich in noj mʌꞌ ich in tsꞌic, quireꞌ mʌꞌ ten yʌnin. Quireꞌ in Tet Cꞌuj yʌnin quir u curquintic mac u cꞌat Cꞌuj. U yʌn ricsmʌn uch.
\p
\v 24 Caj yubob a diez a yet camsʌwinicob caj pꞌujob yejer Juan yejer Jacobo.
\v 25 Jesús caj u tꞌʌnaj caj u muchꞌquinticob u bʌj u camsʌwinicob quir u camsic. Caj yaꞌaraj:
\p ―A werex a mac u jach tsꞌurir u cajar a mʌꞌ u winiquirob judío. Cu jach tsꞌictarob tu cu tsꞌurinticob u winiquirob. Bayiriꞌ a mac a cu yamticob tiꞌob cu jach pꞌasticob a mac cu tsꞌurinticob u jach tsꞌurir.
\v 26 Mʌꞌ ja yʌn cʌniquex a baxuc u tsꞌurirob a mʌꞌ u winiquirob judío. A mac u cꞌat u tsꞌurintic u yet acsaꞌorir. Arej tiꞌ, caꞌ u yamtej u yet acsaꞌorir.
\v 27 Cax a mac ichechex u cꞌat u tsꞌurintic u yet camsʌwinicob. Arej caꞌ u yamtej u yet camsʌwinicob soc irej wa ju cꞌurew.
\p
\v 28 Caj yaꞌaraj Jesús:
\p ―Caꞌ a cʌnenex. A tenoꞌ taren in yamtic tu cotor mac. Mʌꞌ taren quir u yamtiquenob. Taren quir in quinsaꞌr soc in rʌc taquic tu cotor mac.
\s Jesús caj u jawsaj chꞌop u wich caꞌtur
\r (Mr. 10.46‑52; Lc. 18.35‑43)
\p
\v 29 Caj jocꞌob Jesús yejerob u camsʌwinicob ich u cajar Jericó. Jach pim caj sayob tu pach Jesús.
\v 30 Tiꞌ yʌn chꞌop u wich caꞌtur curaꞌanob ich nʌcꞌ bej. Quireꞌ cu cꞌaticob u taqꞌuin wa mac cu man ich nʌcꞌ bej. Caj yubob yaꞌaraj cu man Jesús ich bej caj awʌtnʌjob: 
\p ―Jaj Tsꞌurir, u pararech wa ja nunquir David. Yajquinte tenob otsirenob, yam tenob.
\p
\v 31 Caj qꞌueyaꞌb ten a pim soc mʌꞌ yawʌtob. Mʌꞌ yubob yaꞌaraj tiꞌob. Mʌꞌ tsꞌocar yawʌtob. Tu jach cꞌamquintajob yawʌt:
\p ―Yajquinte tenob, otsirenob yam tenob, Jaj Tsꞌur, u pararech wa David.
\p
\v 32 Jesús caj xurij ich bej caj u pʌyaj chꞌop u wichob. Caj tarob caj cꞌataꞌb tiꞌob:
\p ―Baꞌ a cꞌatex ten quir in yamtiquechex?
\p
\v 33 Caj u nuncob tiꞌ:
\p ―Jaj Tsꞌurir, arej caꞌ sasichʌjʌc in wichob soc chʌcaꞌan in wiricob in berob.
\p
\v 34 Jesús caj u yajquintob a chꞌop u wichob. Caj tar u wichob. Sep caj toc jaw u wichob. Caj binob tu pach Jesús. 
\c 21
\s Caj cꞌuchij Jesús ich u cajar Jerusalén
\r (Mr. 11.1‑11; Lc. 19.28‑40; Jn. 12.12‑19)
\p
\v 1 Tabar u cꞌuchur Jesús ich u cajar Jerusalén. Jach bʌytʌc u cꞌuchur ich u cajar Betfagé. Nʌtsꞌaꞌan u witsir u cheꞌer Olivos. Jesús caj u tuchiꞌtaj u camsʌwinicob caꞌtur caꞌ xicob ich u cajar jach bʌytʌc,
\v 2 caj yaꞌaraj:
\p ―Jeꞌ a wiriquex chan tsimin yejer yar. Pitex caꞌ taquechex a purex teraꞌ. Seb ―quij Jesús―, caꞌ bin a toc irex chan tsimin yejer u yar caꞌ taquex a purex ten.
\v 3 Wa tiꞌ yʌn mac ―quij―. Cu yiric a pitic chan tsimin yejer yar. Wa cu yaꞌaric techex: “Baꞌwir techex?” Arex tiꞌ: “U Jach Tsꞌurir jeꞌ u wʌcꞌʌs tar u purej techeꞌ caꞌ bin tsꞌocac u cꞌʌnic.” Jeꞌ u chaꞌic a pitiquex. Seb cu bin u chaꞌej a pitiquex.
\p
\v 4 Caj u jamach mʌjantaꞌb u chan tsimin tiꞌ yejer yar quir u cʌptar tu pach tsimin Jesús. Quir u nupꞌur a baꞌ tsꞌibaꞌan ten yʌjtseqꞌuir u tꞌʌn Cꞌuj uch. Caj u toc araj yʌjtseqꞌuir u tꞌʌn Cꞌuj uch tiꞌ Cristo.
\q
\v 5 Arex tiꞌ u winiquirob a cʌjaꞌan ich u cajar Jerusalén: “Ira wirex cu cꞌuchur a reyex. Aroꞌ mʌꞌ tsꞌic, a cʌpaꞌan ich u pach chan tsimin. Quet u tar yejer yar tsimin.” 
\m Baxuc caj u tsꞌibtaj uch yʌjtseqꞌuir u tꞌʌn Cꞌuj.
\p
\v 6 U camsʌwinicob Jesús caj binob. Caj u pʌyajob u chan tsimin a toc araꞌb ten Jesús.
\v 7 Caj tarob u purej chan tsimin yejer yar ich Jesús. Caj u jʌyob u noqꞌuirob tu pach tsimin. Jesús caj nac u cʌpʌtar ich u pach chan tsimin.
\v 8 A pim mac a cu yiricob Jesús cu jʌyicob u noqꞌuir ich tan bej soc u yachꞌʌctic u chan tsimin. Caj u rʌc jan chꞌʌctajob u reꞌ cheꞌ irej u reꞌ tuts quir u jʌyicob ich tan bej quir u yachꞌtic chan tsimin. Rajen cu jʌyicob u reꞌ cheꞌ ich tan bej yejer u nocꞌob. Cu rʌc jʌyicob quireꞌ cu yesicob cu sʌjticob Jesús irej rey cu sʌjticob. 
\v 9 A mac caj u pʌyob u ber Jesús. Bayiriꞌ caj binob tu pach Jesús caj u cꞌam tꞌʌnicob Jesús soc yubicob u racꞌob: 
\p ―Quiꞌ quiꞌ tꞌʌnex a pimoꞌ, u parar a nunquirex David. Caꞌ ij caric tiꞌ Cꞌuj: “Bayoꞌ Cꞌuj caj a tuchiꞌtaj a mac a cu bin u reyinticob u winiquirob judío.” Caꞌ ij carej tiꞌ Cꞌuj: “Jach caremech Cꞌuj.”
\p
\v 10 Caj jach cꞌuchij Jesús ich u cajar Jerusalén. Tu cotor mac caj u rʌc cꞌatob:
\p ―Mac a jeraꞌ? ―quij.
\p Caj rʌc jocꞌob ich yatochob. Rʌc xibcheꞌchʌjijob cu manob caj yubob yaꞌaraj:
\p ―Cu tar Cristo a tuchiꞌtaꞌb ten Cꞌuj.
\p
\v 11 Caj yaꞌaraj a pimoꞌ:
\p ―Rajiꞌ Jesús, yʌjtseqꞌuir u tꞌʌn Cꞌuj. Tiꞌ cu tar ich u cajar Nazaret ich u ruꞌumin Galilea.
\s Jesús tu rʌc jocꞌsaj a baꞌ cu canicob ich carem naj tu cu naj cꞌujinticob Cꞌuj u winiquirob judío
\r (Mr. 11.15‑19; Lc. 19.45‑48; Jn. 2. 13‑22)
\p
\v 12 Caj cꞌuch Jesús ich u cajar Jerusalén, caj oc ich carem naj tu cu naj cꞌujinticob Cꞌuj u winiquirob judío. Jesús caj u rʌc jocꞌsaj a mac a cu canicob baꞌ. Bayiriꞌ a mac a cu mʌnicob, caj u rʌc jʌwʌcꞌchꞌintaj Jesús u pojcheꞌir tu cu cꞌaxicob u taqꞌuin. Baxuc caj u rʌc jʌwʌcꞌchꞌintaj u cutanob tu cu canicob u yʌrʌcꞌ susuy.
\v 13 Jesús caj yaꞌaraj tiꞌob:
\p ―Mʌꞌ wa cꞌaj techex tu tsꞌibaꞌan u tꞌʌn Cꞌuj: “A jeraꞌ u najir quir u yocar u tꞌʌnicob Cꞌuj”, chen techex caj a waysajex irej u japnin tunich tu cu tar a mac a cu yacꞌricob baꞌ.
\p
\v 14 Caj tarob a chꞌop u wicheꞌ, yet tarac a mech yoqueꞌ ich carem naj tu cu naj cꞌujinticob Cꞌuj u winiquirob judío. Caj u jutsꞌob u bʌj ich Jesús a chꞌop u wicheꞌ yejer a mech yoqueꞌ. Caj jawsaꞌb tiꞌob ten Jesús.
\v 15 Caj pꞌujob u jach tsꞌurirob sacerdote yejer yʌjcamsʌyʌjirob u tꞌʌn Moisés. Caj irob u jawsic Jesús a mac yajoꞌ rajen pꞌujob. Caj yubob yawʌt tꞌʌnticob ten a chichan ich carem naj tu cu naj cꞌujinticob Cꞌuj u winiquirob judío: “Quiꞌ tꞌʌnex u parar ic nunquir rey David.”
\v 16 Caj yaꞌarajob u jach tsꞌurirob sacerdote yejer yʌjcamsʌyʌjirob u tꞌʌn Moisés:
\p ―Uyej baꞌ cu yaꞌaricob a chichanoboꞌ?
\p Caj u nuncaj Jesús:
\p ―In wer a xacmʌnex tub tsꞌibaꞌan u tꞌʌn Cꞌuj:
\q An ten bic a chichan a cu chuch cu yaꞌaricob bic jach carem Cꞌuj quireꞌ camsaꞌb bayiriꞌ a man jacaꞌanoꞌ.
\m Biquinin mʌꞌ tsoy yaꞌaric: Jach carem Cꞌuj a jeꞌ chichanaꞌ quireꞌ taren teraꞌ?
\p
\v 17 Caj jocꞌ Jesús ich carem naj caj u pꞌʌtaj tu yʌnob u tsꞌurirob sacerdote yejer yʌjcamsʌyʌjirob u tꞌʌn Moisés. Caj bin ich u cajar Betania quir u wenʌn acꞌbir. 
\s Jesús caj u tꞌʌnaj u cheꞌer higuera soc mʌꞌ u wichʌncʌr 
\r (Mr. 11.12‑14, 20‑26)
\p
\v 18 Caj sasij caj wʌcꞌʌs bin Jesús ich u cajar Jerusalén. Caj wichʌjij ich bej.
\v 19 Yiraj Jesús tiꞌ yʌn u cheꞌer higuera ich nʌcꞌ bej. Caj u jutsꞌ u bʌj Jesús. Caj cꞌuchij ich u cheꞌer caj yiraj mʌnaꞌ u wich, chen u reꞌ yʌn. Caj yaꞌaraj Jesús tiꞌ u cheꞌer higuera:
\p ―Mʌꞌ a yʌn yʌn caꞌ ichancʌr biqꞌuin.
\p Seb caj quim u cheꞌer.
\v 20 Caj yirob u camsʌwinicob Jesús, caj quim u cheꞌer, caj jaqꞌuij yorob. Caj cꞌataꞌb ten u camsʌwinicob Jesús: 
\p ―Biquinin seb caj quimin u cheꞌer higuera?
\p
\v 21 Jesús caj u nuncaj tiꞌob:
\p ―Jach taj quin waꞌaric techex. Wa ca acsiquex ta worex wa mʌꞌ tan a waquex ta worex: “Mʌꞌ cꞌuchaꞌan in worob tiꞌ.” Mʌꞌ chen jariꞌ cꞌuchaꞌan a worex tiꞌ a baꞌ caj in waꞌaraj tiꞌ u cheꞌer higuera. Jeꞌ u cꞌuchur a worex tiꞌ baꞌ. Cax a jeꞌ witsaꞌ ca tꞌʌniquex caꞌ xic ich chiꞌcꞌacꞌnab. Jeꞌ u bineꞌ ―quij―, wa taj ca wacsic ta wor ―quij Jesús.
\p
\v 22 Jesús caj yaꞌaraj:
\p ―Wa yʌn baꞌ a cꞌat tu ca tꞌʌniquex Cꞌuj. Jeꞌ a quiꞌ cꞌʌmiquex wa taj ca wacsiquex ta wor.
\s Tu cu tar u mucꞌ Jesús
\r (Mr. 11.27‑33; Lc. 20.1‑8)
\p
\v 23 Caj cꞌuchij Jesús ich u cajar Jerusalén caj caꞌ oquij ich carem naj tu cu naj cꞌujinticob Cꞌuj u winiquirob judío. Caj u jutsꞌob u bʌj u jach tsꞌurirob sacerdote yejer u jach tsꞌurirob u winiquirob judío a cu yaꞌaric a Nuxibeꞌ. Caj u jutsꞌob u bʌj ich Jesús tu cu camsic mac caj cꞌataꞌb tiꞌ Jesús:
\p ―Tu yʌn mac caj u yaꞌaraj tech caꞌ a jocꞌsej joꞌoraj. Tub u tar a mucꞌ quir a jawsic mac. Tub u tar a mucꞌ quir a camsic mac. Mac tu tsꞌaj a mucꞌ?
\p
\v 24 Jesús caj u nuncaj tiꞌob:
\p ―Baxuc techex xan, jeꞌ in cꞌatic techex wa taj ca nunquiquex ten. Jeꞌ in waꞌaric techex tub u tar in mucꞌ quir in betic aroꞌ.
\v 25 Arej ten ―quij Jesús―. Mac tu tuchiꞌtaj Juan quir u yacsic jaꞌ tu joꞌr mac. Cꞌuj wa tuchiꞌtej wa xib tuchiꞌtej? 
\p Caj tsꞌoc yubicob a baꞌ cꞌataꞌb tiꞌob ten Jesús. Caj u nuncob u tꞌʌn ich u bʌjirirob tan yaꞌaricob:
\p ―Wa quij caric tiꞌ: “Cꞌuj tuchiꞌtej”, jeꞌ yaꞌaric toꞌon: “Biquinin mʌꞌ ta quibex u tꞌʌn Juan uch?”
\v 26 Wa quij caric tiꞌ: “Tuchiꞌtaꞌb ten xib, quic sʌjticob a pim quireꞌ a pim cu tucricob tuchiꞌtaꞌb Juan ten Cꞌuj u tsecꞌtej u tꞌʌn Cꞌuj uch.”
\p
\v 27 Baxuc caj araꞌb tiꞌ Jesús:
\p ―Mʌꞌ ij quer mac tuchiꞌtej Juan.
\p Baxuc caj u caꞌ nuncaj Jesús caj yaꞌaraj:
\p ―Baxuc xan, mʌꞌ in waꞌaric tub u tar in mucꞌ a baꞌ quin betic.
\s Jesús cu camsic bic u quibicob u tꞌʌn u tet a caꞌtur u parar
\p
\v 28 Jesús caj u cꞌataj tiꞌ u jach tsꞌurirob sacerdote yejer u jach tsꞌurirob u winiquirob judío a cu yaꞌaric a Nuxibeꞌ:
\p ―Arex ten baꞌ ca najtiquex tiꞌ a jeraꞌ. Tiꞌ yʌn xib caꞌtur u pararob. Caj yaꞌaraj tiꞌ u parar tuririꞌ: “Xen ta beyaj ich in cor bajeꞌrer quir a tꞌaquic u wich uva.”
\v 29 Caj u nuncaj u parar: “Mʌꞌ in cꞌat in bin beyaj.” Pachir caj u cꞌaxaj u tucur caj bin beyaj.
\v 30 A mac yʌn u parar caꞌtur caj bin yirej u parar juntur. Caj yaꞌaraj: “Xen ta beyaj ich in cor.” Caj u nuncaj: “Jeꞌ in bin beyaj Tet”, quij. Chen mʌꞌ binij.
\p
\v 31 Jesús caj u cꞌataj tiꞌ u jach tsꞌurirob sacerdote yejer u jach tsꞌurirob u winiquirob judío a cu yaꞌaric a Nuxibeꞌ:
\p ―Arex ten mac caj u quibaj u tꞌʌn u tet?
\p U tsꞌurirob caj u nuncajob:
\p ―A tu yʌn tuchiꞌtꞌaj bin beyaj cax tu cay araj: “Mʌꞌ u bin.”
\p Jesús caj yaꞌaraj:
\p ―Jach taj, quin waꞌariquex tech an ten biquechex u parar a mʌꞌ tu quibaj u tꞌʌn u tet. Quireꞌ techex mʌꞌ ca quibex u tꞌʌn Cꞌuj. Rajen a xquicoꞌ a cu man cu bin quiꞌ acsaꞌbir ten Cꞌuj tu cu bin u reyintej Cꞌuj. Bayiriꞌ, a mac a cu cꞌʌmicob u taqꞌuin gobierno, quireꞌ caj u quibob u tꞌʌn Juan a tu yacsaj jaꞌ tu joꞌr mac. Chen a techex mʌꞌ u yacsiquechex Cꞌuj.
\v 32 Mʌꞌ ja wirej ―quij Jesús―. Caj tar uch quir u tsecꞌtic techex u tꞌʌn Cꞌuj mʌꞌ ta quibexiꞌ. Chen a xquic a cu manoꞌ, baxuc a yʌjcꞌʌmirob u taqꞌuin gobierno, rajiꞌob caj u cꞌaxajob u yorob caj u quibob u tꞌʌn Juan. Chen a techex mʌꞌ ja quibex u tꞌʌn Juan mʌꞌ ja cꞌaxex a worex cax caj a wirex cu cꞌaxicob yorob a mac yʌn u siꞌpirob. 
\s Jesús cu camsic tiꞌ a tsꞌuroꞌ a mʌꞌ boꞌotaꞌb ten u winiquirob
\r (Mr. 12.1‑12; Lc. 20.9‑19)
\p
\v 33 Caj yaꞌaraj Jesús tiꞌ u tsꞌurirob sacerdote yejer u jach tsꞌurirob u winiquirob judío a cu yaꞌaric a Nuxibeꞌ:
\p ―Uꞌyex baꞌ quin camsiquex u jer. Rajiꞌ u ruꞌumin tu tu pʌcꞌaj yaqꞌuir uva ich u yajaw cor. Caj u paꞌteꞌtaj u cor. Caj u betaj u baꞌinquir quir u yʌtsꞌic u cꞌab u wich uva. Caj u tsꞌʌpquintaj tunich quir u chꞌictar caꞌanan soc u cʌnantic yaqꞌuir u wich uva soc mʌꞌ u rʌc mʌqꞌuicob chꞌichꞌ.
\p ’Caj yaꞌaraj u cʌnantaꞌr u cor ten u winiquirob. Quireꞌ bin u caꞌ tiꞌ u jer ruꞌum nachir.
\v 34 Caj cꞌuchij tu qꞌuinin u wichʌncʌr, caj tuchiꞌtob u cꞌurew ten u jach tsꞌurir quir u cꞌatic u boꞌorir tu cu tꞌacaꞌrob u wich uva yʌjcʌnanyʌjirob u cor. Quireꞌ yʌn u jasʌrob tiꞌ u tsꞌurir, quireꞌ u boꞌorir u cor tu cu cʌnantaꞌob u cor.
\v 35 Caj chuc u cꞌurew ten yʌjcʌnanyʌjirob u cor. Caj u jʌtsꞌajob tuririꞌ, u jer quinsaꞌb. U jer caj u chꞌinajob u joꞌr.
\v 36 U wʌcꞌʌs tsꞌurir caj u tuchiꞌtaj u caꞌ jer cꞌurew quir u cꞌaticob u boꞌorir tiꞌ yʌjcʌnanyʌjirob tu tu tꞌacajob u wich uva ich u cor. Pim caj u toc tuchiꞌtaj u cꞌurew u jach tsꞌurir. A tu yʌn tuchiꞌtaj mʌꞌ pimiꞌ. Raꞌiriꞌ caj u chꞌinajob u cꞌurew u jach tsꞌur ten yʌjcʌnanyajirob u cor. Caj jatsꞌob xan, caj quinsaꞌb u jer.
\p
\v 37 ’Caj cꞌuchij tu qꞌuinin caj u tuchiꞌtaj u parar. Yer yʌjcʌnanyʌjirob u cor jeꞌ u sʌjtaꞌr u parar ten yʌjcʌnanyʌjirob u cor.
\v 38 Caj cꞌuchij u parar caj ir ten yʌjcʌnanyʌjirob u cor caj yaꞌarajob: “Rajiꞌ u parar cu tar. Rajiꞌ cu bin chꞌic u cor wa cu quimin u tet. Caꞌ xicoꞌon ij quinsej u parar soc toꞌon quic bin ic chꞌic u cor.”
\v 39 Caj u chucajob caꞌ xicob u quinsejob ich u nʌcꞌ cꞌaxir u cor. Tiꞌ tu jach quinsajob ich nʌcꞌ cꞌaxir u cor. 
\p
\v 40 Jesús caj u cꞌataj tiꞌob:
\p ―Arex ten baꞌ cu bin u betic u jach tsꞌurir u cor tiꞌ u yʌjcʌnanyʌjirob u cor caꞌ bin tac?
\p
\v 41 U jach tsꞌurirob sacerdote yejer u jach tsꞌurirob u winiquirob judío a cu yaꞌaric a Nuxibeꞌ caj u nuncajob: 
\p ―U jach tsꞌurir cu rʌc bin quinsic u yʌjcʌnanyʌjirob u cor quireꞌ jach cꞌas. Jeꞌ u caꞌ cʌxtic u jer winiquirob a mac cu boꞌotaꞌr u tꞌaquic u wich uva ich u cor. Caꞌ bin cꞌuchuc tu qꞌuinin cu tsꞌicob tiꞌ u tsꞌurir u wich uva u boꞌorir u cor.
\p
\v 42 Jesús caj yaꞌaraj tiꞌ u tsꞌurirob u winiquirob judío: 
\p ―Mʌꞌ wa ja xacmʌnex a tu tsꞌibtaj yʌjtseqꞌuir u tꞌʌn Cꞌuj uch caj yaꞌaraj:
\q U yoc naj caj u pichꞌintajob yʌjcꞌʌxirob naj quireꞌ mʌꞌ u cꞌatob. A jeꞌ tu purajob mʌnaꞌ u jer jach chich u mucꞌ. Caj bin u wʌcꞌʌs chꞌaꞌej u cꞌʌxej naj. Aroꞌ caj u betaj Cꞌuj rajen cu jacꞌʌr ij cor, quij quiric.
\m Baxuc caj u tsꞌibtaj yʌjtseqꞌuir u tꞌʌn Cꞌuj uch tiꞌ Cristo.
\p
\v 43 ’Rajen quin waꞌariquex tech, an ten bic caj pichꞌtaꞌb yoc naj, caj bin u wʌcꞌʌs chꞌaꞌej quir u wʌcꞌʌs cꞌʌxic yatoch. Baxuc ten, ca bin a xumpꞌʌtenex soc in quinsaꞌr. Rajen a Cꞌujo cu bin u taquic techex a ruꞌumex quir u tsꞌic tiꞌ u jer mac soc rajiꞌob cu quiꞌ beyajob tiꞌ u boꞌorir u ruꞌumob.
\v 44 Ber u qꞌuinin mac mʌꞌ u cꞌamiquen an ten bic mac rub ich yajaw tunich. Jach yaj caj yubaj caj rub ich yocꞌor. Baxuc xan, a mac a quin tsꞌictar yejer an ten bic mac cu tar actun tu yocor, caj rʌc maxij.
\p
\v 45 U jach tsꞌurirob sacerdote yejer u winiquirob judío a fariseojoꞌ caj yubob a baꞌ caj u camsaj Jesús. Caj yertajob caj u camsaj Jesús quir u cʌnic u tsꞌurirob u winiquirob judío.
\v 46 Rajen u jach tsꞌurirob sacerdote yejer u winiquirob judío a fariseojoꞌ u cꞌat chucurob Jesús. Cu chen sʌjtaꞌrob a pimoꞌ. Mʌꞌ ja wirej, yerob a pimoꞌ rajiꞌ yʌjtseqꞌuir u tꞌʌn Cꞌuj Jesús.
\c 22
\s Jesús cu camsic tiꞌ a mac cu bin u chꞌic u racꞌ
\p
\v 1 Jesús caj u yʌnxchun u wʌcꞌʌs caꞌ camsic tiꞌ a pimoꞌ. Caj yaꞌaraj tiꞌob:
\p
\v 2 ―Quin waꞌaric techex bic cu bin u reyinticob Cꞌuj ich caꞌanan, irej rey a cu pʌyic u racꞌob quir u quiꞌquiꞌ janʌnob. Quireꞌ u parar rey cu bin u chꞌic u racꞌ.
\v 3 A reyoꞌ, caj u tuchiꞌtaj u cꞌurew quir u pʌyicob a mac a caj u yaꞌaraj caꞌ tacob, quireꞌ cꞌuchij tu qꞌuinin. Robob mʌꞌ ju quibajob u tarob.
\v 4 Caj u wʌcꞌʌs caꞌ tuchiꞌtaj u jerob u cꞌurew: “Arex tiꞌob a mac caj in yʌn araj u tarob. Arex tiꞌob tin toc rʌc quinsaj a woꞌoch bʌqꞌuex quir a quiꞌ janʌnex. Jach paroc ca bin a jantex. Toc rʌc chʌcaꞌan soc a jantiquex. Cojenex ta quiꞌ janʌnex soc u chꞌic u racꞌ in parar.”
\v 5 Mʌꞌ ju quibob caj bin pʌybir caj u pꞌastob yoꞌoch. Caj bin tuririꞌ tu cor. U jer caj bin tu cu conan baꞌ. 
\v 6 U jerob caj u chucajob u cꞌurewob rey, caj u raxob caj u quinsajob u cꞌurew.
\v 7 Caj yuba baꞌ u ber u cꞌurew rey caj jach tsꞌiquij. Caj u tuchiꞌtaj u soldadojob quir u quinsaꞌr yʌjquinsirob u cꞌurewob, caꞌ u rʌc toꞌcacob u cajarob.
\v 8 Caj yaꞌaraj tiꞌ u cꞌurewob, rey: “Toc rʌc tsꞌacaꞌan yoꞌochob quir u quiꞌquiꞌ janʌnob quir u chꞌic u racꞌ in parar. Chen a mac caj in yʌn chꞌic pʌyaj mʌꞌ ju quibob u tarob jot, quij. Mʌꞌ tsoyob u tarobiꞌ.
\v 9 Joqꞌuenex xenex pʌyex a tu cu naj muchꞌquinticob u bʌj ich bej. Arex tiꞌob. Cojenex ta quiꞌquiꞌ janʌnex quireꞌ caꞌ u chꞌaj u racꞌ in parar. Arex tiꞌ caꞌ rʌc tacob a muchꞌaꞌan a ca wiriquexeꞌ.”
\v 10 U cꞌurewob caj binob ich u berir tu cu naj muchꞌquinticob u bʌj winic. Caj u rʌc pʌyajob, cax tsoy caj u pʌyob, cax mʌꞌ tsoy caj u pʌyob xan. Tu pʌyob caj rʌc tarob, caj rʌc chup tu najir tu cu yocar.
\p
\v 11 ’Caj oc yiraj rey a mac caj u pʌyob u cꞌurewob. Caj yiraj xib tiꞌ yʌn. Mʌꞌ tu quiꞌ buquintaj u nocꞌ quir yiric u chꞌic u racꞌ mac.
\v 12 Caj yaꞌaraj rey: “Biquinin caj oquech teraꞌ quireꞌ mʌꞌ ja buquintaj a nocꞌ quir a wiric u chꞌic u racꞌ in parar?” Caj rʌc tsꞌoc u tꞌʌnob, quireꞌ yubaj yaꞌaraꞌ ten u rey.
\v 13 A reyoꞌ, caj yaꞌaraj tiꞌ u cꞌurewob a cu jansicob a pimoꞌ: “Maquex yoc yejer u cꞌʌb. Jocꞌsex, a purex tancab soc u yacꞌtic u bʌj. Quireꞌ mʌꞌ ju buquintaj u nocꞌ. Tiꞌ cu bin u chiꞌic u yacꞌ quireꞌ cu mucꞌyaj.”
\v 14 Mʌꞌ ja wirej ―quij Jesús―, jach yaꞌab mac caj payij ten Cꞌuj soc u yocar u reyinticob Cꞌuj. Chen mʌꞌ yaꞌab cu bin tetbir ten Cꞌuj quireꞌ mʌꞌ ju quibob u tꞌʌn. 
\s Jesús cu camsic bic tabar u boꞌotic u boꞌorir u cꞌʌb gobierno
\r (Mr. 12.13‑17; Lc. 20.20‑26)
\p
\v 15 U winiquirob judío a fariseojoꞌ caj bin muchꞌquinticob u bʌj quir yubicob bic tabar cu bin u chuquicob Jesús, quir u wayticob u tꞌʌn Jesús, quir u taꞌquicob u joꞌr Jesús.
\v 16 Caj u tuchiꞌtajob u camsʌwinicob a fariseojoꞌ ich Jesús, yet binac u camsʌwinicob Herodes. Caj cꞌuchob ich Jesús caj yaꞌarajob tiꞌ:
\p ―In wʌjcamsʌyʌjirech, in werob taj ca camsiquenob bic tabar in manob tu tsoyir baxuc u cꞌat Cꞌuj.
\p Caj yaꞌarajob tiꞌ Jesús:
\p ―Cax mac cu cꞌuchur tu yʌnech mʌꞌ ja pꞌastej, quireꞌ pꞌeriꞌoꞌon ca wiricoꞌonex.
\v 17 Arej tenob wa tsoy caꞌ ic boꞌotej u boꞌorir ic ruꞌum tiꞌ César u rey u winiquirob romano? Wa mʌꞌ tsoy ic boꞌotic? Arej tenob baꞌ ca tucric a techeꞌ?
\p
\v 18 Jesús caj yubaj tarob quir u waytaꞌr u tꞌʌn Jesús. Caj araꞌb tiꞌob ten Jesús:
\p ―Biquinin ca tarex a tumtic in worex yʌjtusarirechex ten.
\v 19 Joqꞌuenex chꞌa tenex a taqꞌuinex tu ta boꞌotajex a ruꞌumex soc in wiric ―quij Jesús.
\p Caj binob u chꞌajob taqꞌuin.
\p
\v 20 Caj yaꞌaraj Jesús tiꞌob:
\p ―Mac yochir a joꞌortꞌʌn ich taqꞌuin?
\p
\v 21 Caj u nuncajob:
\p ―Rajiꞌ yochir a joꞌortꞌʌn César, u rey u winiquirob romano.
\p Jesús caj yaꞌaraj:
\p ―Caꞌ a quibex u tꞌʌn a cu yaꞌaric techex César. Bayiriꞌ xan, caꞌ a quibex a baꞌ cu yaꞌaric techex Cꞌuj.
\p
\v 22 Caj yubob yaꞌaric Jesús a jeraꞌ, caj jach jaqꞌuij yorob. Caj u pꞌʌtob Jesús, caj binob ich u winiquirob judío a fariseojoꞌ.
\s Caj tarob u cꞌatob ich Jesús yubej wa cu riqꞌuir tu cu quimin
\r (Mr. 12.18‑27; Lc. 20.27‑40)
\p
\v 23 Raꞌiriꞌ u qꞌuinin caj cꞌuchij u winiquirob judío a saduceojoꞌ. Raꞌ cu camsicob mac mʌꞌ u riqꞌuir tiꞌ quimen. Caj cꞌuchob ich Jesús caj tarob cꞌatbir tiꞌ Jesús ten u winiquirob judío a saduceojoꞌ.
\v 24 Caj yaꞌarob tiꞌ Jesús:
\p ―In wʌjcamsʌyʌjirechob, ic nunquir Moisés caj yaꞌaraj uch. Wa xib cu quimin, mʌnaꞌ u parar yejer u racꞌ. U yitsꞌin cu caꞌ wʌcꞌʌs bin u chꞌaj u muꞌ. Cu wʌcꞌʌs caꞌ bin u chꞌaꞌic soc u pararancʌr yejer u muꞌ quir u cꞌʌꞌotic u ixbaꞌ sucuꞌun, a quimeneꞌ.
\v 25 Yʌn seis yitsꞌin a yʌn quimen xib, caj quimij mʌnaꞌ u parar. U yitsꞌin aroꞌ caj u caꞌ chꞌaj u muꞌ.
\v 26 Baxuc caj u caꞌ chꞌaj u jer u muꞌ, caj quimij mʌnaꞌ u parar xan. U yitsꞌin aroꞌ tu caꞌ chꞌaj u muꞌ. Mʌnaꞌ u parar yejer caj quimin. Hasta tu rʌc chꞌaj u muꞌ caj rʌc quimin mʌnaꞌ u parar yejer.
\v 27 Caj rʌc tsꞌoc u quiminob u mamob caj quimin xquic xan.
\p
\v 28 Caj yaꞌaraj u winiquirob judío a saduceojoꞌ:
\p ―Are tenob mac cu bin raqꞌuintej caꞌ bin caꞌ riqꞌuir mac tu quimin. Mʌꞌ ja wirej, siete caj u chꞌaj u mam. 
\p
\v 29 Jesús caj u nuncaj:
\p ―A wʌcꞌʌs bʌj cu tusariquex. Mʌꞌ ja najtiquex a baꞌ tsꞌibaꞌan ich u tꞌʌn Cꞌuj. Mʌꞌ ja werex wa jach chich u mucꞌ Cꞌuj.
\v 30 Caꞌ bin cꞌuchuc tu qꞌuinin u wʌcꞌʌs riqꞌuir tiꞌ quimen. A xiboꞌ mʌꞌ ju raqꞌuintej xquic. Bayiriꞌ a xquic mʌꞌ ju mʌmintej xib quireꞌ u jer cu bin waysaꞌr ten Cꞌuj irej yʌjtꞌʌnirob Cꞌuj caꞌanan.
\p
\v 31 ’Soc a cʌniquex baꞌ u cꞌat yaꞌaric jeꞌ u riqꞌuir mac tiꞌ quimen. Cꞌaj wa techex tu tsꞌibaꞌan u tꞌʌn Cꞌuj. Caj yaꞌaraj Cꞌuj tiꞌ u winiquirob israel:
\v 32 “Tu cꞌujinten Abraham uch. Bayiriꞌ Isaac yejer Jacob.” A Cꞌujoꞌ mʌꞌ quimen yiric a nunquirex. Cuxaꞌan yiric a Cꞌujoꞌ. Mʌꞌ ja wirej, cuxaꞌan yiric Cꞌuj tu cotor mac. 
\p
\v 33 Caj yubob a pimoꞌ, caj jaqꞌuij yorob. Caj yubob yaꞌaraj ten Jesús bic Cꞌuj cu yiric mʌꞌ quimen mac.
\s U tꞌʌn Cꞌuj caꞌ ij quiꞌ quibic
\r (Mr. 12.28‑34)
\p
\v 34 U winiquirob judío a fariseojoꞌ caj yubob yaꞌaric Jesús mʌꞌ cꞌuchaꞌan yorob u nunquicob u tꞌʌn Jesús a saduceojoꞌ. Caj u muchꞌquintajob u bʌj yejer u winiquirob judío a saduceojoꞌ soc u tarob ich Jesús.
\v 35 Caj tuchiꞌtaꞌb ten u winiquirob judío a fariseojoꞌ yejer u winiquirob judío a saduceojoꞌ tuririꞌ u racꞌob. Caj bin u tus cꞌatejob baꞌ tiꞌ Jesús soc tumtaꞌr yor Jesús. Rajiꞌob caj u tuchiꞌtajob yʌjcamsʌyʌjir u tꞌʌn Moisés.
\v 36 Caj cꞌataꞌb tiꞌ Jesús ten yʌjcamsʌyʌjir u tꞌʌn Moisés: 
\p ―In wʌjcamsʌyʌjirech. Arej tenob a jach manan tsoyir u tꞌʌn Cꞌuj caꞌ in quiꞌ quibejob.
\p
\v 37 Jesús caj u nuncaj tiꞌ:
\p ―Caꞌ a yajquintej Cꞌuj, quireꞌ rajiꞌ a Jaj Tsꞌurir. Quet a yajquintej Cꞌuj yejer tu cotor a pixam yejer tu cotor a tucur yejer tu cotor a wor xan, quireꞌ rajiꞌ pʌybej ich u tꞌʌn Cꞌuj.
\v 38 Mʌnaꞌ u jer jach manan tsoyir, quireꞌ rajiꞌ pʌyber ich u tꞌʌn Cꞌuj. Rajen caꞌ a quiꞌquibex a jeraꞌ.
\v 39 Quet bayiriꞌ, tiꞌ yʌn u jer cu yaꞌaric: “Yajquintej a racꞌob an ten bic ca wʌcꞌʌs yajquintic a bʌj.”
\v 40 Wa ca quibic a jeꞌ caꞌtur tꞌʌn tsꞌibaꞌan uch. Caj a rʌc quibaj tu cotor u tꞌʌn Cꞌuj a tsꞌibaꞌan ten Moisés yejer yʌjtseqꞌuirob u tꞌʌn Cꞌuj uch.
\s Mac u nunquir Cristo
\r (Mr. 12.35‑37; Lc. 20.41‑44)
\p
\v 41 Mʌꞌ toy xicob u winiquirob judío a fariseojoꞌ tu muchꞌaꞌan ich Jesús. Caj cꞌataꞌb tiꞌob ten Jesús:
\p
\v 42 ―Baꞌ ca najtiquex tiꞌ Cristo, a tuchiꞌbir ten Cꞌuj. Mac u nunquir?
\p Caj yaꞌarob a winiquirob judío a fariseojoꞌ:
\p ―Raꞌ u nunquir David.
\p
\v 43 Jesús caj yaꞌaraj:
\p ―Arex ten biquin David caj u tꞌʌnaj: “In Jaj Tsꞌurirech.” Mʌꞌ ja wirej, caj yamtaꞌb ten u Tajꞌor u Pixam Cꞌuj caj u tsꞌibtaj a jeraꞌ:
\q
\v 44 A Cꞌujoꞌ caj in wuꞌyaj yaꞌaric tiꞌ in Jaj Tsꞌurir, quij David: “Curen tin noj, quij Cꞌuj, hasta quin rʌc chꞌesic a mac a cu pꞌactiquechoꞌ.” Baxuc tu tsꞌibtaj David uch. 
\p
\v 45 Bic tabar Cristo u parar a nunquirex David wa David u bʌj tꞌʌnej: “In Jaj Tsꞌurir.” Rajen ij quer rajiꞌ mʌꞌ chen u parar a nunquirex David.
\p
\v 46 Mʌnaꞌ mac caj u nuncaj u tꞌʌn Jesús, mʌꞌ ju caꞌ tarob u cꞌaticob u jer tꞌʌn tiꞌ Jesús.
\c 23
\s Jesús caj u tacajob u joꞌrob u winiquirob judío a fariseojoꞌ yejer u yʌjcamsʌyʌjirob u tꞌʌn Moisés
\r (Mr. 12.38‑40; Lc. 11.37‑54; 20.45‑47)
\p
\v 1 Jesús caj yaꞌaraj tiꞌ a pimoꞌ yejer u camsʌwinicob: 
\p
\v 2 ―Ocob tu beyajob yʌjcamsʌyʌjirob u tꞌʌn Moisés yejer u winiquirob judío a fariseojoꞌ. Rajiꞌob u beyajob quir u camsicob u tꞌʌn Moisés.
\v 3 Quireꞌ raꞌ u beyajob quir u camsiquechex u tꞌʌn Cꞌuj, rajen caꞌ a yʌn quibex a cu yaꞌariquexob ich u tꞌʌn Moisés. Chen a baꞌ cu man u beticob, mʌꞌ a yʌn cʌniquex. Cax cu chen aric baꞌ jach tsoy, chen cu manob ich cꞌas. 
\v 4 U manob u tus camsicob u tꞌʌn Moisés, baxuc cu jenmasticob u tꞌʌn Cꞌuj. Rajen u winiquirob judío mʌꞌ cꞌuchaꞌan yorob u quibicob. Cu chen tsꞌʌricob u pach u racꞌob caꞌ u quibejob a baꞌ cu tus camsicob. Chen u wʌcꞌʌs bʌjiriꞌob mʌꞌ ju quibicob a baꞌ cu tus camsicob, mʌꞌ ju quibicob chichin.
\v 5 Cu tus quiꞌ beyajob tiꞌ Cꞌuj soc u tus irir ten u racꞌob cu quiꞌ cꞌʌmicob u tꞌʌn Cꞌuj. Bayiriꞌ cu tus buquinticob u nocꞌob, a jach tsoy yejer u baꞌyinquirir, soc sʌjtaꞌr ten u racꞌob.
\p
\v 6 Caj yaꞌaraj Jesús:
\p ―U winiquirob judío a fariseojoꞌ cu pachticob cu quiꞌ acsicob u racꞌob tu cu quiꞌquiꞌ janʌnob, tu cu naj cutar jach tsꞌur, soc u tus quiꞌ sʌjtaꞌ ten u racꞌob. Cax ich u chan najir tu cu naj cꞌujinticob Cꞌuj u winiquirob judío, u cꞌat u cutarob tu yʌn u cutan a nojoꞌ soc u tus sʌjtaꞌ ten u racꞌob.
\p
\v 7 ’U cꞌat yubicob u tus quiꞌquiꞌ tꞌʌnʌn ten u racꞌob tu nanij cu mʌnicob yoꞌoch. U cꞌat yubicob u tus quiꞌquiꞌ tꞌʌnʌn ten u racꞌob: “In wʌjcamsʌyʌjirech.”
\p
\v 8 Caj yaꞌaraj Jesús:
\p ―Mʌꞌ a chaꞌiquex u tꞌʌniquex: “In wʌjcamsʌyʌjirech” quireꞌ chen winiquechex. Ca chen ariquex tiꞌ Cꞌuj: “In wʌjcamsʌyʌjirech” quireꞌ tu cotorechex a wʌcꞌʌs bʌjex.
\v 9 Mʌꞌ a chaꞌic u tꞌʌniquex: “Tet” teꞌ ich yocꞌocab quireꞌ tuririꞌ ic Jach Tet a tiꞌ yʌnoꞌ caꞌanan.
\v 10 Mʌꞌ a chaꞌic u tꞌʌniquex: “Jaj Tsꞌurir” ―quij―, quireꞌ yʌn techex tuririꞌ a Jach Tsꞌurirex, rajiꞌ Cristo a tuchiꞌtaꞌb ten Cꞌuj quir u taquiquechex.
\v 11 A mac a nenoꞌjiꞌ ich techex, rajiꞌ jach manan cu bin sʌjtaꞌbir ten a wet camsawinic, wa cu cʌnic a cꞌurewoꞌ. 
\v 12 A mac a cu yaꞌaric: “Jach caremen a tenoꞌ” jeꞌ u jocꞌsaꞌr ten Cꞌuj tiꞌ u beyaj. Chen a mac a mʌꞌ ju yaꞌarej: “Jach caremen” rajiꞌ cu bin acsaꞌbir ten Cꞌuj tu beyaj.
\p
\v 13 Jesús caj yaꞌaraj tiꞌ u winiquirob judío a fariseojoꞌ yejer u yʌjcamsʌyʌjirob u tꞌʌn Moisés:
\p ―Otsirechex, quireꞌ caj a tusarex tiꞌ a racꞌob. A techexoꞌ, mʌꞌ a chaꞌiquex u cꞌʌmicob u tꞌʌn Cristo a racꞌob irechex ca maquiquex u jor soc mʌꞌ u yocarob u reyinticob Cꞌuj ich caꞌanan. Baxuc techex, mʌꞌ a cꞌʌmiquex u tꞌʌn Cristo soc a wocarex tu cu bin u reyinticob Cꞌuj ich caꞌanan. 
\p
\v 14 Jesús tiꞌ toy cu tꞌʌnic u winiquirob judío a fariseojoꞌ yejer yʌjcamsʌyʌjirob u tꞌʌn Moisés:
\p ―Otsirechex, quireꞌ caj a tusarex tiꞌ a racꞌob. Quireꞌ ca tus taquiquex yatoch a xquicoꞌ a quimen u mameꞌ. Caj a tus tꞌʌniquex Cꞌuj, omaꞌan u tsꞌocar a tus tꞌʌniquex Cꞌuj soc u tus iricobechex a racꞌob. Rajen jach manan yaj ca bin a wuꞌyiquex a mucꞌyajex caꞌ bin xuruc tꞌʌn. 
\p
\v 15 Caj yaꞌaraj Jesús:
\p ―Otsirechex, quireꞌ caj a tusariquex tiꞌ a racꞌob. Techex, ca manex ich tu cotor yocꞌocab quir a camsiquex mac quir u cꞌujinticob Cꞌuj an ten bic ca cꞌujintiquex. Caj tsꞌoc u cʌnicob jach manan cꞌasoꞌ. Jach manan cꞌas a tiꞌoboꞌ cax a techexoꞌ cꞌasechex, chen a mac a tu cʌnajechexob jach manan cꞌas. Jach yaj cu bin u mucꞌajob ich cꞌacꞌ, mʌꞌ neyaj ca bin a mucꞌyajex ich cꞌacꞌ. 
\p
\v 16 ’Techex, irechex a chꞌop u wichob, chen a cꞌatex a pʌyiquex u bej u jer chꞌop u wichob. Otsirechex, quireꞌ caj a camsex a racꞌob. Mʌꞌ ja wirej, wa ca toc aric tiꞌ a racꞌob, ca waꞌariquex tiꞌob: “Taj quin waꞌaric tech quireꞌ tiꞌ yʌn carem naj tu cu naj cꞌujinticob Cꞌuj u winiquirob judío.” Cax mʌꞌ ja betej a baꞌ ta toc aꞌaraj quireꞌ caj a waꞌaraj tiꞌ carem naj tu cu naj cꞌujinticob Cꞌuj u winiquirob judío rajen mʌꞌ a betej xan. Chen wa ca toc ariquex tiꞌ a racꞌob: “Taj quin waꞌaric tech quireꞌ tiꞌ yʌn oro ich carem naj tu cu naj cꞌujinticob Cꞌuj u winiquirob judío.” Jeroj taj caꞌ a betex aroꞌ, quireꞌ caj a waꞌarex tiꞌ oro a tiꞌ yʌn ich carem naj tu cu naj cꞌujinticob Cꞌuj u winiquirob judío.
\v 17 Jach chich a joꞌrex, quireꞌ mʌꞌ ja najtiquex. Mʌꞌ ja wirej, jach manan coꞌoj a carem naj tu cu naj cꞌujinticob Cꞌuj u winiquirob judío quireꞌ tiꞌ ca bin a cꞌujintiquex Cꞌuj. A orojoꞌ mʌꞌ nejach coꞌoj, chen tsoy quireꞌ tiꞌ yʌn ich carem naj tu ca naj cꞌujintiquex Cꞌuj.
\v 18 Baxuc techex caj a camsex a racꞌob: Wa ca toc aric tiꞌ a racꞌob: “Taj quin waꞌaric tech quireꞌ tiꞌ yʌn u baꞌyinquirir tu cu quinsic yʌrʌcꞌ quir u tsꞌic tiꞌ Cꞌuj.” Cax mʌꞌ ju betej a baꞌ caj u toc araj. Chen wa mac cu toc aric tiꞌ u racꞌob: “Taj quin waꞌaric tech quireꞌ yʌrʌcꞌ a tabar u quinsic ich carem naj. Jeroj caꞌ u toc betej a baꞌ caj u yaꞌaraj.”
\v 19 Jach chich a joꞌrex, quireꞌ mʌꞌ ja najtex. Mʌꞌ ja wirej, jach manan tsoy u baꞌyinquirir tu cu naj quinsic yʌrʌcꞌ wacax quir u boꞌoticob u boꞌorir u siꞌpir. Ich yocꞌor u baꞌyinquirir cu naj quinsob yʌrʌcꞌ rajen jach manan tsoyir u baꞌyinquirir, quireꞌ tiꞌ cu boꞌotic u boꞌorir u siꞌpir a racꞌob.
\v 20 Mʌꞌ ja wirej ―quij Jesús―. A mac a caj u toc arar u racꞌob quireꞌ u baꞌyinquirir tu cu naj quinsic yʌrʌcꞌ wacax. Cu toc aric tiꞌ a baꞌ yʌn yocꞌor xan, mʌꞌ chen tu junan yʌn.
\v 21 Mʌꞌ ja wirej, a mac a caj u toc arar u racꞌob quireꞌ tiꞌ yʌn carem naj tu cu naj cꞌujinticob Cꞌuj u winiquirob judío. Bayiriꞌ caj u toc araj u racꞌob xan, quireꞌ Cꞌuj tiꞌ yʌn tu cu naj cꞌujinticob Cꞌuj, quireꞌ rajiꞌ yʌnin Cꞌuj.
\v 22 Wa caj a toc arex a racꞌob quireꞌ a baꞌ yʌn caꞌanan, caj a toc chuquex Cꞌuj quireꞌ tiꞌ yʌn Cꞌuj caꞌanan tu cu bin u reyintejob Cꞌuj tu cotor mac.
\p
\v 23 ’A techex u winiquirechex judío a fariseojoꞌ yejer yʌjcamsʌyʌjirex u tꞌʌn Moisés. Otsirechex, caj a chʌc jʌsex tiꞌ Cꞌuj u tsꞌac a woꞌochex a cu yaꞌaric u cꞌabaꞌ mienta, yejer u tsꞌac a woꞌochex cu yaꞌaric u cꞌabaꞌ anis. Yejer u tsꞌac a woꞌochex, a cu yaꞌaric u cꞌabaꞌ comino, quireꞌ baxuc cu yaꞌaric ich u tꞌʌn Moisés. Chen mʌꞌ ja quibex a baꞌ tsꞌibaꞌan ich u tꞌʌn Cꞌuj, a tu caj u chꞌic arex techex Cꞌuj caꞌ a quibex u tꞌʌn. Quireꞌ mʌꞌ ja yajquintaex tiꞌ a racꞌob. Mʌꞌ ca manex tu tsoyir. Mʌꞌ ca wacsiquex ta worex u tꞌʌn Cꞌuj. Caꞌ a toc rʌc quibex tu cotor u tꞌʌn Cꞌuj. Mʌꞌ ja pꞌʌtex tuririꞌ u tꞌʌn Cꞌuj. Quet a wuꞌyiquex.
\v 24 Quireꞌ irechex chꞌop a wichex a ca pʌyiquex u berob a racꞌob a mac chꞌop u wich xan. Chen jariꞌ ca chachtiquex a mijin tiꞌ a wucꞌurex. Chen jariꞌ ca pꞌʌtiquex u sor, an ten bic a quiꞌ cʌnantiquex a baꞌ mʌꞌ tsoy tu tꞌʌn Cꞌuj. Chen a baꞌ jach tsoy tu tꞌʌn Cꞌuj, mʌꞌ a quiꞌ cʌnantexiꞌ. 
\p
\v 25 ’Jach otsirechex, u winiquirechex judío a fariseojoꞌ yejer u yʌjcamsʌyʌjirechex u tꞌʌn Moisés. Yʌjtusariquechex tiꞌ a racꞌob. Mʌꞌ ja wirej, ca chen pꞌoꞌiquex u pach a ruchex, chen ich u japninoꞌ ecꞌ. Baxuc u ruchirex a woꞌochex, ca pꞌoꞌiquex, ecꞌ ich u japnin. An ten biquex a pixamex jach ecꞌ quireꞌ caj manex a waꞌcriquex u baꞌtac a racꞌob, quireꞌ jach tsꞌuꞌ techex.
\v 26 A techexoꞌ, mʌꞌ ja najtex u tꞌʌn Cꞌuj u winiquirechex judío a fariseojoꞌ. Biquinin mʌꞌ ja toc pꞌʌtex a wacꞌriquex u baꞌtac a racꞌob. Caꞌ a pꞌʌtex a tsꞌuꞌtar. Wa ca yʌn pꞌʌtiquex aroꞌ, caj a rucꞌsajex u yeqꞌuir a pixamex. 
\p
\v 27 ’A techexoꞌ, u winiquirechex judío a fariseojoꞌ yejer yʌjcamsʌyirechex u tꞌʌn Moisés. Yʌjtusarirex tiꞌ a racꞌob. Jach otsirechex, ca tus cꞌujintiquex Cꞌuj soc u tusaricob a racꞌob: “Jach tsoyechex”, chen jach cꞌasechex.
\v 28 Baxuc yʌnechex quireꞌ a racꞌob cu tucric: “Jach tsoyechex.” Chen ca tusariquex tiꞌ mac ca jach cꞌujintiquex Cꞌuj, rajen jach cꞌasechex.
\p
\v 29 ’Jach otsirechex, u winiquirechex judío a fariseojoꞌ yejer u yʌjcamsʌyʌirechex u tꞌʌn Moisés quireꞌ yʌjtusarirechex tiꞌ mac. Caj a toc tsꞌʌpquintajex tunich tu tꞌojaꞌan u baquer yʌjtseqꞌuir u tꞌʌn Cꞌuj uch. Baxuc xan, caj a quiꞌ banajex u pach tunich a mac quiꞌ manob tu tsoyir uch, quir a cꞌʌꞌoticobex.
\v 30 A techexoꞌ, ca waquex tiꞌ a racꞌob: “Wa cuxaꞌanechex uch tu qꞌuinin tiꞌ yʌn a nunquirex uch mʌꞌ ta yamtajex a mac a caj u quinsajob yʌjtseqꞌuirob u tꞌʌn Cꞌuj.”
\v 31 Rajen quetechex yejer a nunquirex yʌjquinsirob yʌjtseqꞌuirob u tꞌʌn Cꞌuj, quireꞌ pꞌeriꞌ a nunquirex.
\v 32 Joqꞌuenex, tsꞌocsex u beyajob a nunquirex. Bin a caj toc cꞌubenex quinsbirenex yejer in camsʌwinicob.
\p
\v 33 ’Irechex can, a yʌc u coj a cu quinsic mac. Mʌꞌ ju cꞌuchur a worex a putsꞌurex ich cꞌacꞌ tu ca bin a jach mucꞌyajex.
\p
\v 34 Caj yaꞌaraj Jesús tiꞌob:
\p ―Rajen caꞌ a quiꞌ sarex a xiquinex, quireꞌ yʌn in toc tuchiꞌtic techex a mac a cu bin tsecꞌtic u tꞌʌn Cꞌuj techex. Yʌn in toc tuchiꞌtic yʌjcamsʌyʌjirob u tꞌʌn Cꞌuj xan, yejer a mac u neꞌer u tꞌʌn Cꞌuj. A techexoꞌ, bin a caj quinsiquex yaꞌab mac. U jerob bin a caj cꞌubiquex quinsbir ich cruz. A techexoꞌ, bin a caj jʌtsꞌiquex u pachob u jerob tu cu naj cꞌujinticob Cꞌuj u winiquirob judío. A techexoꞌ, bin a caj chuquiquex u pachob u jerob tu cu bin ich u cajar, cax tu cu putsꞌurob, bin a caj chuquiquex u pachob.
\v 35 Rajen ca bin a boꞌotiquex u boꞌorir a siꞌpirex, quireꞌ a mac quinsaꞌb ten a nunquirex, cax mʌnaꞌ cꞌas caj u betajob a mac quinsbir uch. Rajen bin a caj boꞌotiquex u boꞌorir a siꞌpirex, quireꞌ quinsaꞌb Abel uch a mac jach tsoyir yor hasta u qꞌuinin caj quinsaꞌb Zacarías xan. Raꞌ u tet Berequías. Rajiꞌ caj a quinsajex ich carem naj tu ca naj cꞌujintiquex Cꞌuj. Chumuc u berir carem naj caj quinsaꞌb Zacarías.
\p
\v 36 Caj yaꞌaraj Jesús:
\p ―Taj quin waꞌariquex tech. A techexoꞌ, bajeꞌrer a mac cuxaꞌan, bin a caj boꞌotiquex a siꞌpirex. Quireꞌ raꞌ u qꞌuinin caj a quinsajex Zacarías hasta u qꞌuinin caj quinsaꞌb Abel ten a nunquirex.
\s Jesús cu yocꞌar quireꞌ u yaj u winiquirob judío ich u cajar Jerusalén
\r (Lc. 13.34‑35)
\p
\v 37 Caj yaꞌaraj Jesús:
\p ―A techexoꞌ, u winiquirechex judío ich u cajar Jerusalén. A techexoꞌ, caj a quinsajex yʌjtseqꞌuirob u tꞌʌn Cꞌuj a caj in tuchiꞌtaj. Baxuc xan, caj a rʌc chꞌinajex u joꞌr a mac caj in tuchiꞌtaj caꞌ u tsecꞌtej techex u tꞌʌn Cꞌuj. Yaꞌab u tenin in cꞌat in muchꞌquintic techex soc in cʌnantic techex irej u nʌꞌ cax cu pʌyic cu muchꞌquintic u yar yarʌn u xicꞌ. Chen mʌꞌ ta chaꞌex in muchꞌquintiquechex soc in cʌnantiquechex.
\v 38 Cꞌʌꞌotex caꞌ bin cꞌuchuc tu qꞌuinin, jeꞌ a rʌc pꞌʌtiquex a cajarex soc chen saj naj, quireꞌ mʌꞌ ja chaꞌex in muchꞌquintiquechex.
\v 39 A tenoꞌ, quin waꞌaric techex, mʌꞌ a yʌn yʌn bin a wiren hasta caꞌ bin cꞌuchuc tu qꞌuinin ca bin a waꞌariquex: “Caꞌ ic sʌjtej Jesús, quireꞌ rajiꞌ a mac tuchiꞌtac ten Cꞌuj.”
\c 24
\s A cu bin jubsic carem naj ten u winiquirob romano
\r (Mr. 13.1‑2; Lc. 21.5‑6)
\p
\v 1 Jesús caj jocꞌ tu japnin carem naj tu cu naj cꞌujinticob Cꞌuj u winiquirob judío. Toc bin u caꞌ caꞌch caj u jutsꞌob u bʌj u camsʌwinicob ich Jesús. Caj yaꞌarajob:
\p ―Iric carem naj. Mʌꞌ wa quiꞌ cꞌʌxaꞌan carem naj?
\p
\v 2 Jesús caj u nuncaj tiꞌob:
\p ―Cꞌʌꞌotex a jeꞌ carem naj bic tabar caj a wirex quireꞌ jach taj quin toc aric a wuꞌyex. Caꞌ bin cꞌuchuc tu qꞌuinin cu bin jubsaꞌbir. Mʌꞌ ju bin pꞌatʌr tunich tu tsꞌʌpaꞌan. Mʌꞌ ja bin a wirex caꞌtur tsꞌʌpaꞌan.
\s Rajiꞌ cu bin yesic toꞌonex biqꞌuin bic tabar u xur tꞌʌn
\r (Mr. 13.3‑23; Lc. 21.7‑24; 17.22‑24)
\p
\v 3 Caj jocꞌ Jesús ich carem naj, caj bin ich u joꞌr chan pꞌuc wits Olivos. Jesús caj curʌj. Tiꞌ curaꞌan Jesús, caj u jutsꞌob u bʌj u camsʌwinicob ich Jesús soc tu junanob cu yubicob.
\p ―Tar in cꞌatob a toc aric tenob wa ber caꞌ bin jubsac carem naj. Biquiraꞌ carem naj caꞌ bin cꞌuchuc tu qꞌuinin cu xur tꞌʌn caꞌ bin urquech?
\p
\v 4 Caj u nuncaj Jesús caj yaꞌaraj:
\p ―Quiꞌ cʌnantex a bʌj soc mʌnaꞌ mac cu tar u tusiquex. 
\v 5 Quireꞌ yaꞌab mac cu bin u tus aric: “Cristojen quireꞌ caj u tuchiꞌtajen Cꞌuj. Rajen quin tar quir in taquic tu cotor mac.” Yaꞌab mac cu bin u quibicob a baꞌ cu yaꞌaric tus Cristo.
\v 6 Raꞌ u qꞌuininoꞌ caꞌ bin a wuꞌyiquex u jumintac: “Tan u quinsicob u bʌj ich u jer ruꞌum.” Cax tub yʌnechex caꞌ bin u quinsicob u bʌj. Jeꞌ a wuꞌyiquex tabar u quinsicob u bʌj. Mʌꞌ ja chꞌaquex sajaquirex quireꞌ yʌn u tar u quinsicob u bʌj. Cax cu manob u quinsicob u bʌj. Mʌꞌ toy cꞌuchuc tu qꞌuinin u xur tꞌʌn.
\v 7 Raꞌ u qꞌuininoꞌ ca wuꞌyiquex cu tsꞌictarob winic ich jumpet ruꞌum. Cu bin u quinsicob u bʌj yejer u winiquirob ich jumpet ruꞌum. Bayiriꞌ jeꞌ u wichʌjʌrob xan ich jumpet ruꞌum. Cax jach bʌytʌc cu bin u wichʌjʌjrob. Bayiriꞌ yʌn u tar u yajir. Bayiriꞌ jeꞌ a wuꞌyiquex u pec u chꞌic yum ruꞌum.
\v 8 Tu cotor aroꞌ tan u mucꞌyaj. Rajiꞌ u yʌnx chꞌic chun u mucꞌyaj a cu bin tar ich yocꞌocab.
\p
\v 9 ’A raꞌ u qꞌuininoꞌ cu bin u pꞌastiquechex, quireꞌ caj a wacsex ta worex tiꞌ ten. Rajen cu bin u taꞌquicob a joꞌrex. Rajen cu bin u chuquicob a pachex. Bayiriꞌ cu bin u quinsiquechex. Baxuc tu cotor mac xan.
\v 10 Quireꞌ aroꞌ, a raꞌ u qꞌuininoꞌ yaꞌab mac cu bin u pꞌʌtejob u yacsicob tu yorob. Jeꞌ u bin u pꞌacticob u bʌj. Jeꞌ u taꞌquic u joꞌr u racꞌob ʌcʌtan u jach tsꞌurirob u cajarob.
\v 11 A raꞌ u qꞌuininoꞌ, yaꞌab mac cu bin tar quir u tusaricob tuchiꞌtac ten Cꞌuj quir u tus camsicob a pimoꞌ. Yaꞌab mac cu bin u quibicob.
\v 12 A raꞌ u qꞌuininoꞌ, yaꞌab mac cu bin manob tu cꞌasir. Jach mananob tu cꞌasir. Rajen a mac a cu manob tu tsoyir mʌꞌ u neyajquinticob u racꞌob.
\v 13 A mac a mʌꞌ ju pꞌʌticob u quibicob in tꞌʌn hasta caꞌ bin manac a jeꞌ mucꞌyaj a tin waꞌaraj. Raꞌ cu bin tacbir ten Cꞌuj.
\v 14 Mʌꞌ toy cꞌuchuc tu qꞌuinin u xur tꞌʌn, quireꞌ yʌn u man u tsecꞌticob u jach tsoyir u tꞌʌn an ten bic cu bin u reyintejob Cꞌuj caꞌanan. Bin u caj tsecꞌtic ich tu cotor mac ich yocꞌocab soc yerob tu cotor mac tu cʌjaꞌanob. Raꞌ u qꞌuinin caꞌ bin tsꞌocac u tsecꞌticob raꞌ u qꞌuinin cu bin xur tꞌʌn.
\p
\v 15 Caj yaꞌaraj Jesús tiꞌ u camsʌwinicob:
\p ―Caj u tsꞌibtaj Daniel a caj u tsecꞌtaj u tꞌʌn Cꞌuj uch. Raꞌ tu tsecꞌtaj uch: “Wa ca wiriquex a baꞌ jach cꞌas chꞌicaꞌan ich u japnin carem naj tu cu naj cꞌujinticob Cꞌuj u winiquirob judío. Quiꞌ tucrex, quij Daniel, quireꞌ rajiꞌ cu bin u cꞌasquintic u winiquirob israel.”
\v 16 A ray u qꞌuininoꞌ ca wiriquex aroꞌ, joqꞌuenex ta putsꞌurex ich u joꞌr wits. Wa cʌjaꞌanechex ich u ruꞌumin Judea, sebquintex a toc putsꞌurex.
\v 17 A ray u qꞌuininoꞌ wa tiꞌ yʌn mac tu joꞌr yatoch tu taj u joꞌr yatoch. Arex tiꞌ mʌꞌ tsoy u yocar u chꞌic u baꞌtac. Arex u toc putsꞌur.
\v 18 A ray u qꞌuininoꞌ wa tiꞌ yʌn mac ich u cor. Arex mʌꞌ u sut u chꞌic u nocꞌ. Arex u toc putsꞌur.
\v 19 A ray u qꞌuininoꞌ, jach otsirchʌjij a xquic a tabar u rochic u chan ochir. Bayiriꞌ a xquicoꞌ, a cu tsꞌic u chuch tiꞌ chan ochir.
\v 20 A ray u qꞌuininoꞌ, tꞌʌnex Cꞌuj soc mʌꞌ raꞌ u qꞌuinin a putsꞌurex tu qꞌuinin queꞌer. Quireꞌ mʌꞌ ju cꞌuchur a worex a mucꞌtiquex queꞌer. Tꞌʌnex Cꞌuj soc mʌꞌ ray u qꞌuinin tu ca jesiquex a bʌj.
\v 21 Quireꞌ a ray qꞌuininoꞌ, jach manan cu bin u mucꞌyajob winic. U jer winic mʌꞌ u nemucꞌyajob an ten bic cu bin u mucꞌyajob u winiquirob tu qꞌuinin cu bin xur tꞌʌn. Mʌꞌ biqꞌuin yubmʌnob.
\v 22 A ray u qꞌuininoꞌ, wa Cꞌuj u cꞌat u chaꞌic coch u pach qꞌuin soc omaꞌan cu bin mucꞌyaj. Mʌnaꞌ mac cu bin pꞌatʌrob. Chen tabar u mucꞌyajob, quireꞌ tiꞌ yʌnob a toc tetaꞌb ten Cꞌuj quireꞌ yajbir ten Cꞌuj.
\p
\v 23 ’Caꞌ bin cꞌuchuc a ray u qꞌuininoꞌ wa mac cu bin yaꞌaric: “Ire wirex Cristo toc cꞌuchij quir u taquic mac tu cotor.” Mʌꞌ a quibiquex a baꞌ cu yaꞌaricob. Cax cu yaꞌaricob: “A ray Cristojoꞌ.”
\v 24 Quireꞌ a ray u qꞌuininoꞌ, yaꞌab cu bin tar quir u tusaricob tiꞌ u racꞌob: “A tenoꞌ taren ich yocꞌocab quir in taquic mac quireꞌ caj u tuchiꞌten Cꞌuj.” Tu cu tusaricob tiꞌ mac jeꞌ u tus esicob carem beyaj tiꞌ u racꞌob xan. Cax a mac tetaꞌb ten Cꞌuj orac u quibicob quireꞌ cu tus esicob carem beyaj, quireꞌ baxuc u cꞌatob, chen mʌꞌ ju cꞌuchur u yorob tiꞌ.
\p
\v 25 Jesús caj yaꞌaraj tiꞌ u camsʌwinicob:
\p ―Quin toc aric techex a jeꞌ tꞌʌnaꞌ soc a toc erex a baꞌ cu bin tar biqꞌuin soc mʌꞌ u jacꞌarex a worex. 
\v 26 Rajen a ray u qꞌuininoꞌ jeꞌ u yaꞌaric techex: “Tiꞌ yʌn Cristo ich tʌcay ruꞌum.” Bayiriꞌ jeꞌ u tusaricob techex: “Tiꞌ yʌn Cristo teraꞌ ich yatoch.” Mʌꞌ ja yʌn quibiquex xan.
\v 27 Jeꞌ a wiriquex in wuꞌur, a tenoꞌ taren in yamtic mac tu cotor, teraꞌ ich yocꞌocab an ten bic a wiriquex u raram ich caꞌanan. Mʌꞌ ja wirej, sasir cu raram soc chʌcaꞌan yiric tu cotor mac ten quin tar.
\v 28 Ray u qꞌuininoꞌ, a mac yʌn u siꞌpir yʌn u boꞌotic u boꞌorir u siꞌpir mʌꞌ tu cu putsꞌur.
\s Bic tabar caꞌ bin uruc u parar Cꞌuj
\r (Mr. 13.24‑37; Lc. 21.25‑33; 17.26‑30, 34‑36)
\p
\v 29 Caj yaꞌaraj Jesús tiꞌ u camsʌwinicob:
\p ―A ray u qꞌuininoꞌ, tabar u tsꞌocar u mucꞌyaj a winiquiroꞌ. Jeꞌ yacꞌbirchʌjʌr qꞌuin. Mʌꞌ u sasichʌjʌr. Bayiriꞌ ic nʌꞌ xan, jeꞌ yacꞌbirchʌjʌr. A saꞌaboꞌ cu bin yiricob irej wa tan u rʌc rubur. Tu cotor a baꞌ yʌn ich caꞌanan cu chaꞌic u pec Cꞌuj.
\v 30 A ray u qꞌuininoꞌ, jeꞌ yesic carem beyaj Cꞌuj ich caꞌanan soc yer mac tu cotor tan in wuꞌur, a tenoꞌ quir in yamtic mac tu cotor. Tu cotor mac a tiꞌ cʌjaꞌan ich yocꞌocab cu bin u yacꞌticob u bʌj, quireꞌ cu yiricob in wuꞌur ich u muyar yejer jach chich in mucꞌ. Yejer u sasirir Cꞌuj quin bin ur.
\v 31 Caꞌ bin uruquen, jeꞌ yubicob u jum caꞌ bin usac ten yʌjmasir u tꞌʌn Cꞌuj. Cꞌam cu bin yubicob. Jeꞌ in tuchiꞌtic u yʌjmasirob u tꞌʌn Cꞌuj quir u muchꞌquintaꞌr a mac caj in tetaj ich yocꞌocab. Cax tu yʌnob tiꞌ cu bin u muchꞌquintaꞌr.
\p
\v 32 ’A werex cu jutur u reꞌ cheꞌ quir u topꞌʌncʌr, quireꞌ tan yocar yaxqꞌuin.
\v 33 An bic taj aroꞌ, bayiriꞌ xan baꞌ ca wiriquex a baꞌ caj in camsajechex sam tan u tar. Jeroj tabar u xur tꞌʌn.
\p
\v 34 Jesús caj yaꞌaraj tiꞌ u camsʌwinicob:
\p ―Taj quin waꞌaric techex. Tiꞌ yʌn mac bajeꞌrer. Raꞌ cu bin cuxtarob hasta cu yiricob a baꞌ caj in toc araj techex cu tar ich tu yʌnechex.
\v 35 A caꞌananoꞌ, jeꞌ u rʌc tsꞌocareꞌ a jeꞌ ruꞌumaꞌ jeꞌ u rʌc tsꞌocareꞌ xan. Chen in tꞌʌnoꞌ mʌꞌ u bin tsꞌocar quireꞌ yʌn u toc rʌc nupꞌur in tꞌʌn ich yocꞌocab.
\p
\v 36 ’Chen a ray u qꞌuinin cu bin tar a baꞌ caj in toc araj techex. Mʌnaꞌ mac yer wa ber u tar, cax yʌjmasirob u tꞌʌn Cꞌuj. Mʌꞌ u parar Cꞌuj yer, chen u bʌjiriꞌ Cꞌuj yer wa ber u tar. Rajen mʌnaꞌ mac yer wa ber hora cax beqꞌuin.
\p
\v 37 ’Caꞌ bin uruquen a tenoꞌ quir in yamtic mac tu cotor. Cu bin tar an ten bic tu qꞌuinin cuxaꞌan Noé uch yejer u racꞌob caj rʌc burob.
\v 38 U racꞌob Noé rajraꞌ quiꞌ yorob tan u janʌnob, cu quiꞌ ucꞌurob xan. Baxuc caj man u cʌxtob u racꞌ u parar. Cax rajraꞌ caj u betob hasta oquij Noé ich u chem. Mʌꞌ tu najtajob quireꞌ seb caj tar yaꞌarir. Caj u yʌnxchun u burur. Rajen rʌc quimij u racꞌob Noé.
\v 39 Baxuc caꞌ bin uruquen a tenoꞌ taren in yamtic mac tu cotor. Cax wa tan u janʌnob. Cax tan yucꞌurob. Mʌꞌ ju bin u najticob wa ber caꞌ bin uruquen a mac tan u man tu cꞌasir, quireꞌ a baꞌ cu yiricob.
\v 40 Ray u qꞌuinin caꞌ bin uruquen cax wa caꞌturoꞌ tan u beyajob ich u cor. Caꞌ bin tac yʌjmasirob u tꞌʌn Cꞌuj, jeꞌ u pʌyʌr tuririꞌ a caj u yacsaj tu yor. Tuririꞌ cu bin pꞌatʌr.
\v 41 Baxuc xan xquic. Cax wa caꞌturoꞌ tan u juchꞌob. Chen jeꞌ u payʌr tuririꞌ ten yʌjmasirob u tꞌʌn Cꞌuj. Tuririꞌ cu pꞌatʌr xan.
\p
\v 42 ’Quiꞌ pajex u qꞌuinin wa ber caꞌ bin uruquen ―quij Jesús―. Quireꞌ mʌꞌ a werex caꞌ bin uruquenex a Jaj Tsꞌurirenex. 
\v 43 Quiꞌ cʌnex a baꞌ quin bin in camsic techex. Irej a mac cu tar yaꞌcric a baꞌtac. Wa mac rajiꞌ yʌnin yatoch yer wa ber cu tar aꞌcraꞌbir u baꞌtac ten mac. Acꞌbir cu pajic u tar soc mʌꞌ u chaꞌic yaꞌcraꞌr u baꞌtac. Rajen cʌnex u jach tsꞌurir yatoch.
\v 44 Baxuc techex, caꞌ a quiꞌ pajenex quireꞌ seb caꞌ bin uruquen a tenoꞌ taren in yamtic mac tu cotor. Wa raꞌ u qꞌuinin mʌꞌ ja pajiquenex.
\s Jesús cu camsic u cꞌurew mac bic tabar u pajic u jach tsꞌur
\r (Lc. 12.41‑48)
\p
\v 45 Caj yaꞌaraj Jesús tiꞌ u camsʌwinicob:
\p ―Uꞌyex baꞌ quin waꞌaric techex bajeꞌrer. Tiꞌ yʌn u cꞌurew mac cu nequiꞌ quibic u tꞌʌn u jach tsꞌurir. Caj bin u jach tsꞌurir ich jumpet ruꞌum. Caj araꞌb tiꞌ ten u jach tsꞌurir: “Quiꞌ cʌnantej a wet cꞌurewirob. Quiꞌ jansej a baꞌ quiriꞌ u cꞌatob. Quiꞌ irej u beyajob a wet cꞌurewirob.” Caj bin u jach tsꞌurir.
\v 46 Jach quiꞌ yor u cꞌurew u jach tsꞌurir a rajraꞌ cu quibic u tꞌʌn u jach tsꞌurir hasta cu yuꞌur u jach tsꞌurir.
\v 47 Taj quin waꞌaric techex ―quij Jesús―. Wa tu quiꞌ quibaj u tꞌʌn u jach tsꞌurir a cꞌurewoꞌ. Jeꞌ u quiꞌ tsꞌabʌr u mucꞌ tiꞌ quir u cʌnantic a baꞌquir yʌn tiꞌ u jach tsꞌurir.
\v 48 Chen wa ju cꞌurew cu tucric mʌꞌ seb cu bin yuꞌur u jach tsꞌurir.
\v 49 Rajen cu yʌnxchun u cʌrʌxbetic tiꞌ u yet cꞌurewirob. Bayiriꞌ u cꞌurew cu jocꞌar janʌn. Bayiriꞌ cu jocꞌar yucꞌur yet a mac cʌraꞌanob.
\v 50 U jach tsꞌurir seb caꞌ bin caꞌ uruc raꞌ u qꞌuinin u cꞌurew mʌꞌ tan u pajic yuꞌur u jach tsꞌurir.
\v 51 Caꞌ bin uruc u jach tsꞌurir jeꞌ u jach jʌtsꞌic u cꞌurew. Jach yaj cu bin yubic an ten bic Cꞌuj cu bin jocꞌsic a mac cu tusaric tiꞌ u racꞌob. Mʌꞌ ja wirej, irob a mac a mʌꞌ tu cꞌʌmajob u tꞌʌn Cꞌuj. Jeꞌ u bin mucꞌyaj ich cꞌacꞌ. Tiꞌ cu bin yacꞌticob u bʌj ich cꞌacꞌ. Tu cu bin mʌmʌx chiꞌicob u yacꞌ ich cꞌacꞌ.
\c 25
\s Jesús cu camsic an bic xquic cu binob u quiꞌ quiꞌ janʌnob, a diez xquiqueꞌ
\p
\v 1 Jesús caj yaꞌaraj tiꞌ u camsʌwinicob:
\p ―Raꞌ u qꞌuinin caꞌ bin tac u reyinticob Cꞌuj. Cu bin tar tiꞌ u winiquirob an ten bic caj tuchiꞌtaj xquic quir u nupic a mac a cu bin u chꞌic u racꞌ. Tuchiꞌtaꞌ xquic diez, raꞌ u nupꞌ a cu bin u chꞌic u mam. Caj u rʌc chꞌaꞌob u quibob.
\v 2 Cinco xquic caj u chꞌajob u quib. Mʌꞌ tu quiꞌ cʌnantajob u quib. U jer cinco caj u quiꞌ cʌnantajob u quib.
\v 3 A mac a tu quiꞌ cʌnantajob u quib, caj u chꞌajob u chujir yaꞌarir u quib quir u tꞌajicob u jer yaꞌarir. Toc chup yaꞌarir u quib caj u chꞌajob.
\v 4 A mac a mʌꞌ tu quiꞌ cʌnantajob u quib a tu chꞌajob. Mʌꞌ yaꞌab caj u chꞌajob yaꞌarir u quib. Chen u quib caj u chꞌajob.
\v 5 Quireꞌ omaꞌan caj cꞌuchij a cu bin u chꞌic u racꞌ, rajen a xquicoꞌ, caj tar u wenʌnob. Caj cꞌʌs wenʌneb. 
\v 6 Caj yubob u tar chumuc acꞌbir. Caj yubob yawʌt: “Tan u tar a mac a cu bin u chꞌic u racꞌ. Xenex caꞌ a nupex ich chumuc bej.”
\v 7 Caj ricꞌob, a xquicoꞌ, caj u pustaj u tanin u joꞌr u quib caj u tꞌʌbajob.
\v 8 A xquicoꞌ, a cinco a mʌꞌ u quiꞌ cʌnanticob u quib, caj yaꞌaraj tiꞌ u yet tꞌʌn: “Jamach chuquej tenob yaꞌarir quib, quireꞌ tan u tupꞌur tenob in quibob, quireꞌ tan xupur yaꞌarir.”
\v 9 A xquicoꞌ a caj u quiꞌ cʌnantajob yaꞌarir u quib. Caj u nuncajob: “Mʌꞌ jin tsꞌajob techex cʌrʌx xupuc tenob yaꞌarir. Joqꞌuenex mʌnex yaꞌarir techex tu cu naj coꞌonan yaꞌarir.”
\v 10 Caj binob u mʌnejob yaꞌarir u quib a cinco xquicoꞌ. Caj cꞌuchij a mac a cu bin u chꞌic u racꞌ. Caj ocob a tu quiꞌ cʌnantajob yaꞌarir u quib. Caj ocob yejer a cu bin u chꞌic u racꞌ. Caj u mʌcob u jor.
\v 11 Sansam u mʌcob u jor, caj cꞌuch a xquic a bin u mʌnejob u yaꞌarir u quib. Caj u purob u tꞌʌn: “Jach tsꞌurir ―quij―. Jeꞌej in jor quir in wocarob.”
\v 12 A mac a cu bin u chꞌic u racꞌ caj u nuncaj: “Taj quin waꞌaric techex. Mʌꞌ in wirmʌnechex, rajen mʌꞌ in wacsiquechex.” 
\p
\v 13 Caj tsꞌoc u camsaꞌrob a xquicoꞌ caj yaꞌaraj Jesús tiꞌ u camsʌwinicob:
\p ―Cꞌʌꞌotex a jeraꞌ a caj in camsajechex soc a pajiquex in tar, quireꞌ mʌꞌ a werex wa ber u qꞌuinin caꞌ bin taquen quir in yamtic mac tu cotor.
\s Jesús cu camsic bic tabar caj u pꞌʌtaj u taqꞌuin u cꞌurew u jach tsꞌurir soc u jaric u jer
\p
\v 14 ’U winiquir cu bin u jach tsꞌurintic Cꞌuj irob u cꞌurew jach tsꞌurir. U jach tsꞌurir bin u caꞌ ich u jer ruꞌum. Caj u rʌc muchꞌquintaj u cꞌurewirob quir u pꞌʌtic u taqꞌuin tiꞌob quir u caꞌ jaricob u jer u taqꞌuin.
\p
\v 15 ’Caj tsꞌaꞌb u taqꞌuin cinco mil ten u jach tsꞌurir tiꞌ u cꞌurew tuririꞌ. U jer caj u caꞌ tsꞌaꞌb tiꞌ u cꞌurew dos mil. U jer caj u caꞌ tsꞌaꞌb tiꞌ mil. Caj tsꞌaꞌb u taqꞌuin an ten bic cꞌuchaꞌan yorob u cꞌurewirob tu beyajob. Caj bin u tsꞌurirob nach.
\v 16 A mac a caj u cꞌʌmaj u taqꞌuin cinco mil caj u cꞌʌnaj quir u caꞌ jaric u jer. Caj u caꞌ jaraj u jer cinco mil tu cu beyaj.
\v 17 A mac a tsꞌaꞌb tiꞌ dos mil caj u cꞌʌnaj. Caꞌ u caꞌ jaraj u jer dos mil tu cu beyaj.
\v 18 A mac a tsꞌaꞌb tiꞌ mil caj u taꞌcaj u taqꞌuin. Caj u pan u jor u ruꞌum quir u muquic u taqꞌuin. Caj u mucaj u taqꞌuin ich ruꞌum.
\p
\v 19 ’Jach yaꞌab u qꞌuinin caj ur jach tsꞌurir. Caj u caꞌ muchꞌquintaj u cꞌurewob. Caj cꞌataꞌb tiꞌob: “Mun u taqꞌuinob.” Caj u jarajob u taqꞌuinob.
\v 20 Raꞌ yʌn cꞌuchij a tsꞌaꞌb tiꞌ cinco mil, caj yaꞌaraj tiꞌ u jach tsꞌurir: “Caj binech caj a tsꞌaja ten cinco mil quir in cꞌʌnic. A tenoꞌ caj in jaraj u jer cinco mil tech tu quin beyaj. Jeꞌ a taqꞌuin cinco mil yejer u jer cinco mil caj in jaraj.”
\v 21 Caj yaꞌaraj u jach tsꞌur: “Tsoyech in cꞌurewech. Taj ta waꞌaraj ten. Quiꞌ beyanʌjech. Caj a jaraj a taqꞌuin, cax mʌꞌ yaꞌab taqꞌuin, caj in tsꞌaj tech. A bajeꞌrer jeꞌ in caꞌ tsꞌic tech u jer jach yaꞌab. Pꞌaten tin wicnʌn soc u quiꞌtar ij cor.”
\v 22 Caj cꞌuchij a tsꞌaꞌb tiꞌ dos mil. Caj yaꞌaraj tiꞌ u jach tsꞌurir: “Caj binech caj a tsꞌajaj ten dos mil quir in cꞌʌnic. U jer caj in caꞌ jaraj tech. Yʌn ten u jer dos mil. A jeꞌ a dos mil a caj a tsꞌajaj ten. Caj bin yejer u jer a caj in jaraj tech.”
\v 23 Caj yaꞌaraj u jach tsꞌurir: “Tsoyech in cꞌurewech. Jach taj ca waꞌaric ten. Quiꞌ beyanʌjech caj a jaraj in taqꞌuin, cax mʌꞌ yaꞌab taqꞌuin, caj in tsꞌa tech. A bajeꞌrer jeꞌ in caꞌ tsꞌic tech a taqꞌuin jach yaꞌab. Pꞌaten tin wicnʌn soc u quiꞌtar ij cor.”
\v 24 Caj cꞌuchij a tsꞌaꞌb tiꞌ turiꞌ mil caj yaꞌaraj tiꞌ u jach tsꞌurir: “Jach tsꞌurir, quij. In wer jach tsꞌuꞌtech ca nejaric a taqꞌuin tu ca cꞌʌnic. Rajen jach manan ca jaric a taqꞌuin.
\v 25 Rajen mʌꞌ jin cꞌʌnaj a taqꞌuin quireꞌ caj in chꞌaj sajquir. Rajen caj in chen panaj u jor u ruꞌumin quir in muquic a taqꞌuin. Jeraꞌ tech a taqꞌuin.”
\v 26 U jach tsꞌurir caj u nuncaj tiꞌ u cꞌurew: “Jach cꞌasech mʌꞌ jach cꞌorech. A wer jach tsꞌuꞌten caꞌ in nejaric in taqꞌuin tu quin cꞌʌnic. Rajen jach manan yaꞌab quin jaric in taqꞌuin.
\v 27 Biquinin mʌꞌ binech a butꞌej in taqꞌuin ich u najitaqꞌuin soc in chʌc jaric u jer in taqꞌuin. Caꞌ bin uruquen ca chʌc tsꞌic ten in taqꞌuin yejer u jer caj a jaraj ich u najitaqꞌuin?”
\v 28 U jach tsꞌurir caj yaꞌaraj tiꞌ mac tiꞌ yʌnob: “A mun yʌn tiꞌ, chꞌa, a tsꞌa u taqꞌuin a mac yʌn tiꞌ diez mil.
\v 29 A baxucoꞌ cu tar tiꞌ winic xan. A mac yʌn tiꞌ jach yaꞌab u taqꞌuin. Jeꞌ u tꞌajʌr u baꞌtac hasta jach yaꞌab u baꞌtac. Chen a mac mʌꞌ yaꞌab u taqꞌuin jeꞌ u tocar tiꞌ, cax mʌꞌ yaꞌab yʌn tiꞌ.”
\v 30 Caj yaꞌaraj u jach tsꞌurir tiꞌ u cꞌurew: “Chuquex a purex a jeꞌ in cꞌurewaꞌ. Jocꞌsex a pichꞌintex ich tancab tu acꞌbir.” Baxuc cu bin u betic tiꞌ a mac jach cꞌas, tiꞌ cu bin ocarob tu cu bin mucꞌyajob ich cꞌacꞌ. Tiꞌ cu bin u yacꞌticob u bʌj. Tiꞌ cu bin u chiꞌic u yacꞌob ich cꞌacꞌ quireꞌ mucꞌyaj u caꞌob.
\s Jeꞌ u cꞌuchur tu qꞌuinin cu rʌc bin ʌcʌtan ich Cꞌuj 
\p
\v 31 Caj yaꞌaraj Jesús tiꞌ u camsʌwinicob:
\p ―Caꞌ bin taquen a tenoꞌ a mac tar quir in yamtic mac tu cotor. Quin tar in reyintic tu cotor mac. In wet tar yʌjmasirob u tꞌʌn Cꞌuj yejer u sasirir Cꞌuj xan. Tiꞌ quin bin in cutar tu cu naj cutar rey quir in wiric a mac tsoy wa mʌꞌ tsoyiꞌ.
\v 32 Tiꞌ cu bin u muchꞌquinticob u bʌj tu cotor mac wa tiꞌ cu tar ich u jer ruꞌum. Tiꞌ cu bin u rʌc muchꞌquinticob u bʌj ʌcʌtan ten ―quij Jesús―. U tiriꞌ quin bin in jʌsic irij a mac yʌn yʌrʌcꞌ tʌmʌn yuc cu jʌsic yejer yʌrʌcꞌ chivo. Jujuntur tiꞌ quin bin in jʌsic hasta caj in rʌc jʌsaj tu cotor mac.
\v 33 A mac cu jach man tu tsoyir tiꞌ quin bin in jʌsej ich in noꞌj. Wa mac cu man tu cꞌasir tiꞌ quin bin in jʌsic tin tsꞌic.
\v 34 A tenoꞌ ―quij Jesús―, quin bin in waꞌaric a mac tiꞌ yʌnob tin noꞌj: “Jeꞌ in quiꞌ acsiquechex tu cu bin u reyintic Cꞌuj, quireꞌ Cꞌuj caj u betaj tsoy tiꞌ techex. Cax mʌꞌ toy betaj teꞌ ich yocꞌocab Cꞌuj caj u toc betaj u cuchir quir u yacsiquechex ich caꞌanan a mac a caj u yacsajob tu yorob tiꞌ.
\v 35 Mʌꞌ ja wirej, tsoy in wacsiquechex. Mʌꞌ ja wirej, caj wichʌjen uch caj a tsꞌaj in woꞌoch. Caj ucꞌchʌjen caj a tsꞌaj in wucꞌur. Caj a wacsajenex quireꞌ mʌnaꞌ in way tu quin wenen.
\v 36 Caj a wirajex mʌnaꞌ in nocꞌ caj a sijex ten in buquintej. Caj a wirex yajen caj tarechex a wirenex. Caj a wirenex mʌcaꞌanen caj tarechex a wirenex.”
\v 37 Robob cu bin yaꞌaric: “Jaj ix tʌcoj ic Jaj Tsꞌurirex. A tenob quireꞌ mʌꞌ tin jansajob tech. Mʌꞌ tin tsꞌajob quir a wucꞌur. Mʌꞌ tin wacsajob tech quireꞌ mʌnaꞌ a way. Mʌꞌ tin yamtajob tech a baywoꞌ.
\v 38 A tenob mʌꞌ tin wacsajob tech mʌꞌ tin tsꞌajob tech a nocꞌ quir a buquintic.
\v 39 Caj yajijech mʌꞌ tarenob in wirechob. Tiꞌ mʌcaꞌanech xan mʌꞌ tarenob in wirechob.”
\v 40 A tenoꞌ quin bin in nunquic techex: “Jach taj quin waꞌaric techex quireꞌ caj a yamtajex a mac a caj u yacsajob tu yorob in tꞌʌn cax ca wiric irej moso quet tan a yamtiquenex.”
\p
\v 41 ’A tenoꞌ quin bin in waꞌaric tiꞌ a mac a tiꞌ yʌnob tin tsꞌic: A techex satʌrechex. Joqꞌuenex, xenex ich cꞌacꞌ soc munt qꞌuin ca werarex a toc betaꞌan ten Cꞌuj tiꞌ quisin yejer yʌjmasirob u tꞌʌn quisin.
\v 42 Mʌꞌ jin wacsajechex, quireꞌ mʌꞌ ta jansajenex, cax wiꞌijen. Caj ucꞌchʌjen mʌꞌ ta cꞌʌs tsꞌajex in wucꞌur. 
\v 43 Caj manen tu yʌnechex, cax caj a wirajenex mʌnaꞌ in nocꞌ, mʌꞌ ta cꞌʌs tsꞌajex ten in buquintej. Cax caj a wirex mʌnaꞌ in way, mʌꞌ ta wacsajenex. Caj yajijen mʌꞌ tarechex a cꞌʌs irenex. Bayiriꞌ tiꞌ mʌcaꞌanen, mʌꞌ tarechex a cꞌʌs irenex.
\v 44 A mac tiꞌ yʌnob tin tsꞌic cu bin u yacob ten: “Jaj Tsꞌurir, wa ber caj in wirob wiꞌijech cax ucꞌchʌjech. Cax mʌnaꞌ a way mʌꞌ in tsꞌajob tech. Caj in wirob tiꞌ mʌcaꞌanechob mʌꞌ tarenob in wiriquechob. Caj in wirob yajech mʌꞌ tarenob in wirechob mʌꞌ tin yamtechob?”
\v 45 A tenoꞌ quin bin in nunquic a mac tiꞌ yʌn ich in tsꞌic: “Taj quin waꞌaric techex quireꞌ caj a pꞌuspachtaj a caj u yacsaj tu yorob in tꞌʌn. Quireꞌ mʌꞌ a tucriquex wa tsoyob a yacsmʌnob tu yorob in tꞌʌn. Bayiriꞌ caj u pꞌuspachtajenex.”
\v 46 Rajen quin bin in waꞌaric tiꞌ a mac tiꞌ yʌn ich in tsꞌic: “Xenex ta werarex ich cꞌacꞌ munt qꞌuin ca werarex.” Chen a mac tiꞌ yʌn tin noꞌj quin bin in waꞌaric tiꞌob: “Jeꞌ in quiꞌ acsiquechex quir a cuxtar munt qꞌuin ich caꞌanan.”
\c 26
\s U tsꞌurirob u winiquirob judío cu tucricob bic tabar u bin u chuquicob Jesús
\r (Mr. 14.1‑2; Lc. 22.1‑2; Jn. 11.45‑53)
\p
\v 1 Caj tsꞌoc yaꞌaric Jesús a baꞌ caj u camsaj sam tiꞌ u camsʌwinicob. Caj u rʌc araj tiꞌ u camsʌwinicob:
\p
\v 2 ―Techex a werex ―quij Jesús―. Caꞌbej cu cꞌuchur tu qꞌuinin u quiꞌquiꞌ janʌnob u winiquirob judío. Raꞌ u qꞌuinin quir u cꞌʌꞌoticob caj u potmastajob yʌjmasir u tꞌʌn Cꞌuj uch. Soc mʌꞌ u quimin u parar a yʌn rochaꞌb ten u nʌꞌ uch. Raꞌ u qꞌuinin caꞌbej, quir u cꞌubiquenob, a tenoꞌ taren in yamtic mac tu cotor, caꞌ quinsaquen ten u jach tsꞌurirob u winiquirob judío.
\p
\v 3 U jach tsꞌurirob sacerdote caj u rʌc muchꞌquintob u bʌj yejer yʌjcamsayʌjirob u tꞌʌn Moisés yejer u jach tsꞌurirob u cajar u winiquirob judío a cu yaꞌaric a Nuxiboꞌ. Tiꞌ cu muchꞌquinticob u bʌj ich yatoch Caifás. Raꞌ u jach tsꞌurir tiꞌ tu cotor sacerdote, tu reꞌaꞌan yatoch tu pach u paꞌteꞌ.
\v 4 Robob u cꞌat u tucricob bic tabar cu bin u muc u chuquicob Jesús soc u quinsaꞌr.
\v 5 Caj yaꞌarajob:
\p ―Caꞌ ic yʌn pajej u tsꞌocar u qꞌuinin u quiꞌquiꞌ janʌnob. Quireꞌ jeꞌ u tsꞌictarob a pimoꞌ wa quic chuquic Jesús tan u quiꞌquiꞌ janʌnob.
\s A xquic cu bin jayic tu joꞌr Jesús a quiꞌ u boqueꞌ
\r (Mr. 14.3‑9; Jn. 12.1‑8)
\p
\v 6 Jesús tiꞌ yʌn ich u cajar Betania. Tiꞌ yʌn ich yatoch Simón a ju cʌnmʌn iqꞌuer u caꞌ uch.
\v 7 Tiꞌ yʌn Jesús, cu janʌn ich u pocheꞌir och. Caj u juts u bʌj xquic. U chꞌamʌn tu tꞌajaꞌan a quiꞌ u boqueꞌ. U cꞌabaꞌ u chujir, alabastro, tunich u chujir tu tꞌajaꞌan yaꞌarir a quiꞌ u bocoꞌ. Jach manan coj a quiꞌ u bocoꞌ. Caj joy tu joꞌr Jesús tu curaꞌan janʌn.
\v 8 U camsʌwinicob Jesús caj yirob caj u jayaj tu joꞌr Jesús a quiꞌ u bocoꞌ caj pꞌujob. Caj yaꞌarajob:
\p ―Tu chen rʌc xup u taqꞌuin. Baꞌwir tiꞌ caj u chen mʌnaj? Mʌꞌ ja wirej, jach coꞌoj a quiꞌ u bocoꞌ.
\v 9 Wa caj cʌnaj caꞌcheꞌ, caj u caꞌ jaraj yaꞌab u taqꞌuin quir u jasʌr tiꞌ a jach otsir.
\p
\v 10 Jesús caj yuba baꞌ yaꞌarajob u camsʌwinicob. Caj yaꞌaraj tiꞌ u camsʌwinicob:
\p ―Baꞌwir ca tsꞌiquintiquex xquic. Tsoy caj u jayaj tin joꞌr a quiꞌ u boqueꞌ.
\v 11 A otsireꞌ rajraꞌ tiꞌ yʌn tu yʌnechex. Wa ber a cꞌat a yamtej a otsiroꞌ, caꞌ a yʌn yamtex. A tenoꞌ mʌꞌ rajraꞌ tiꞌ yʌnen tu yʌnechex.
\v 12 A xquicoꞌ, rajen caj u jayaj tin joꞌr a quiꞌ u boqueꞌ. Quireꞌ tabar u muquic in baquer mac.
\v 13 Jach taj quin waꞌaric techex ―quij Jesús―. Cax wa tu cu bin u tsecꞌtic u jach tsoyir u tꞌʌn Cꞌuj. Jeꞌ yaꞌaric bic caj u jayaj tin joꞌr xquic a quiꞌ u boqueꞌ soc u cꞌʌꞌotic a jeꞌ xquicaꞌ.
\s Judas cu bin cꞌubic Jesús
\r (Mr. 14.10‑11; Lc. 22.3‑6)
\p
\v 14 Caj tsꞌoc yiric u joyaj tu joꞌr Jesús a quiꞌ u boqueꞌ. Caj bin Judas Iscariote quir u tsicbar yejer u jach tsꞌurirob sacerdote. Judas rajiꞌ u camsʌwinic Jesús. Tuririꞌ ich u doce camsʌwinicob Jesús.
\v 15 Judas caj cꞌuchij caj u cꞌataj tiꞌ u jach tsꞌurir sacerdote:
\p ―Mun ca bin a boꞌoten wa quin cꞌubic Jesús?
\p Caj boꞌotaꞌb yejer sʌc taqꞌuin treinta.
\v 16 Raꞌ u qꞌuininoꞌ, caj u toc cʌxtaj bic tabar cu bin u cꞌubic Jesús tu junan.
\s Jesús caj janij oqꞌuin yejer u camsʌwinicob
\r (Mr. 14.12‑25; Lc. 22.7‑23; Jn. 13.21‑30; 1 Co. 11.23‑26) 
\p
\v 17 Yʌn turiꞌ u qꞌuinin quir u cꞌuchur tu qꞌuinin u quiꞌquiꞌ janʌnob saman. Raꞌ u qꞌuinin caꞌ bin u jantejob pan, rajiꞌ mʌnaꞌ u tsꞌac quir u sip. Cꞌuch u camsʌwinicob ich Jesús caj u cꞌatajob tiꞌ:
\p ―Arej tenob tub a cꞌat a jantej a woꞌoch oqꞌuin tu qꞌuinin u quiꞌquiꞌ janʌnob u winiquirob judío?
\p
\v 18 Caj u nuncaj Jesús caj yaꞌaraj tiꞌob:
\p ―Xenex ich u cajar Jerusalén. Jeꞌ a wiriquex turiꞌ xib ich yatoch. Arex tiꞌ: “A wʌjcamsʌyʌjir u cꞌat u tar tu janʌn oqꞌuin soc u cꞌʌꞌotic u qꞌuinin caj u potmastaj yʌjmasir u tꞌʌn Cꞌuj uch. Tabar u quinsaꞌr a wʌjcamsʌyʌjir rajen cu tar.”
\p
\v 19 U camsʌwinicob caj binob ich u cajar Jerusalén. Caj araꞌb tiꞌ xib an ten bic toc araꞌb ten Jesús. Caj toc botaꞌb yoꞌoch Jesús ten u camsʌwinicob quir u cꞌʌꞌotic u qꞌuinin caj potmastaꞌb yʌjmasir u tꞌʌn Cꞌuj uch.
\p
\v 20 Caj acꞌbirchʌjij, caj cꞌuchij Jesús quir u janʌn. Yet tarac doce u camsʌwinicob. Caj curob tu janʌnob yejer Jesús ich pojcheꞌir yoꞌoch.
\v 21 Tan tu janʌn Jesús caj yaꞌaraj:
\p ―Jach taj quin waꞌaric techex. Yʌn tuririꞌ techex ca bin a mucu cꞌubiquen.
\p
\v 22 Caj jach choquij yorob u camsʌwinicob Jesús. Jujuntur u camsʌwinicob cu bin u cꞌaticob tiꞌ Jesús:
\p ―Ten wa quin bin in cꞌubiquech Jaj Tsꞌurir?
\p
\v 23 Caj u nuncaj Jesús caj yaꞌaraj tiꞌob:
\p ―A jeꞌ cu ruchic yoꞌoch, rajiꞌ cu bin u cꞌubiquen tiꞌ yʌn yejerechex.
\v 24 A tenoꞌ taren in yamtic mac tu cotor. Rajen yʌn in bin quinsbir, quireꞌ tabar u nupꞌur u tꞌʌn Cꞌuj. Chen otsir a mac a cu bin u mucu cꞌubiquen. Jach manan tsoyir wa mʌꞌ tiꞌ yʌn teraꞌ ich yocꞌocab.
\p
\v 25 Judas a tu mucu cꞌubaj Jesús. Caj cataꞌb tiꞌ Jesús: 
\p ―Ten ix tiꞌ, quin bin in cꞌubiquech Jaj Tsꞌurir?
\p Caj u nuncaj Jesús:
\p ―Taj, tech ca bin cꞌubiquen.
\p
\v 26 Tiꞌ toy u janʌnob caj u chꞌaj yoꞌoch pan caj u yʌn tꞌʌnaj Cꞌuj:
\p ―Bayoꞌ Cꞌuj, quireꞌ caj a tsꞌaj tenob in coꞌochob pan. 
\p Caj u rʌc tꞌaxaj tiꞌ u camsʌwinicob caj yaꞌaraj tiꞌob: 
\p ―Jantex a jeꞌ pan quireꞌ in bʌqꞌuer. Jantex.
\p
\v 27 Caj tsꞌoc u rʌc janticob yoꞌoch pan. Jesús caj u chucaj u chan ruch yejer u cꞌab u wich uva. Caj u yʌn tꞌʌnaj Cꞌuj:
\p ―Bayoꞌ Cꞌuj, tech caj a tsꞌaj tenob u cꞌab u wich uva. 
\p Caj u tsꞌaj tiꞌ u camsʌwinicob. Caj yaꞌaraj tiꞌob:
\p ―Rʌc uqꞌuex caꞌcaꞌ xotꞌ techex a wuꞌquiquex u cꞌab u wich uva.
\v 28 A jeꞌ u cꞌab u wich uva in qꞌuiqꞌuer quir u nupꞌur u tꞌʌn a baꞌ caj u chꞌic araj Cꞌuj uch. A jeꞌ cu bin jocꞌar in qꞌuiqꞌuer soc yiric yaꞌab mac cu bin u jawsicob u siꞌpirob.
\v 29 Quin waꞌaric techex. Mʌꞌ in yʌnyʌn caꞌ uqꞌuic u cꞌab u wich uva hasta cu xur tꞌʌn. Caꞌ bin in wuqꞌuej yejerechex tu cu bin u reyinticob Cꞌuj.
\s Jesús cu tsicbar tiꞌ Pedro: Ca bin a waꞌaric mʌꞌ a wer maquen
\r (Mr. 14.26‑31; Lc. 22.31‑34; Jn. 13.36‑38)
\p
\v 30 Caj tsꞌoc u cꞌayob caj jocꞌob, caj binob ich u witsir Olivos.
\v 31 Caj cꞌuchob ich u joꞌr u witsir Olivos. Caj yaꞌaraj Jesús tiꞌ u camsʌwinicob:
\p ―Techex tu cotorechex ca bin a pꞌʌtiquenex acꞌbir bajeꞌrer, quireꞌ caꞌ nupꞌuc u tꞌʌn Cꞌuj tu cu yaꞌaric: “Quin chaꞌic u quinsic a mac a cu cʌnantic yʌrʌcꞌ tʌmʌn yuc. Rajen cu bin u putsꞌurob yʌrʌcꞌ tʌmʌn yuc.”
\v 32 Caꞌ bin in wʌcꞌʌs riqꞌuir tin quimirir ―quij Jesús―, tiꞌ ca bin a wiriquenex ich u ruꞌumin Galilea. Chen a tenoꞌ quin yʌn cꞌuchur ich u ruꞌumin Galilea.
\p
\v 33 Pedro caj yaꞌaraj tiꞌ Jesús:
\p ―Cax tu cotor in wet camsʌwinicob cu bin u pꞌʌtiquechob. Chen a tenoꞌ, mʌꞌ in pꞌʌtiquech.
\p
\v 34 Jesús caj yaꞌaraj:
\p ―Jach taj quin waꞌaric tech Pedro. Mʌꞌ toy cꞌaynʌc cax acꞌbir cax mʌnaꞌ u nup u tenin u cꞌay cax ca bin a waꞌaric tiꞌ mac: “Mʌꞌ jin wer mac Jesús.”
\p
\v 35 Caj yaꞌaraj Pedro:
\p ―Cax wa in quet quimin yejerech. Mʌꞌ jin waꞌaric, mʌꞌ jin werech.
\p Bayiriꞌ xan, caj yaꞌaraj u yet camsʌwinicob.
\s Jesús cu tꞌʌnic Cꞌuj ich u chan corir Getsemaní
\r (Mr. 14.32‑42; Lc. 22.39‑46)
\p
\v 36 Caj cꞌuchij Jesús yejer u camsʌwinicob ich u chan corir u cꞌabaꞌ Getsemaní. Caj yaꞌaraj tiꞌ u camsʌwinicob: 
\p ―Teꞌ a yʌn cutarex. Tar quin bin bʌytʌc quir in tꞌʌnic Cꞌuj.
\p
\v 37 Jesús caj u pʌyaj tu pach Pedro yejer u pararob Zebedeo. Caꞌtur u pararob. Jesús caj u yʌnxchun u tucur tu yor, bayiriꞌ xan, caj u yʌnxchun u mucꞌyaj. Jach manan cu tucur caj cꞌuchij bʌytʌc.
\v 38 Caj yaꞌaraj tiꞌob:
\p ―Jach tucur in caꞌ. Tan u jach bin in wor irej wa bin in caꞌ quimin. Teꞌ a pꞌatʌrex mʌꞌ ja wenʌnex soc a yamtiquenex. 
\p
\v 39 Jesús caj bin u tꞌʌnej Cꞌuj. Jach bʌytʌc caj bin. Caj pʌchꞌraj caj u tꞌʌnej Cꞌuj. Caj yaꞌaraj tiꞌ Cꞌuj:
\p ―Wa tsoy ta tꞌʌn tech, Tet. Mʌꞌ ja chaꞌic in jach mucꞌyaj an ten bic caj a toc araj uch. Wa tsoy ta tꞌʌn tech ca chaꞌic in mucꞌyaj. Baxuc ten tsoy tin tꞌʌn xan, caꞌ tac tiꞌ ten a baꞌ a cꞌat ten.
\p
\v 40 Caj riqꞌuij Jesús caj wʌcꞌʌs ur tu yʌn u camsʌwinicob. Caj yiraj wenʌn u caꞌob. Caj u tꞌʌnaj Pedro:
\p ―Mʌꞌ wa cꞌuchaꞌan a worex a mucꞌtic a wenex a tresechexeꞌ caꞌ a yamtenex cax turiꞌ hora?
\v 41 Mʌꞌ ja wenʌnex, tꞌʌnex Cꞌuj soc mʌꞌ u tumtiquex a worex quisin. Cax a chen cꞌat ajaꞌanechex soc a tꞌʌniquechex Cꞌuj tiꞌ ten. Chen mʌꞌ ju cꞌuchur a worex a mucꞌtic a wenʌnex quireꞌ jach tac a wenʌnex.
\p
\v 42 Caj wʌcꞌʌs bin Jesús caj u wʌcꞌʌs tꞌʌnaj u Tet:
\p ―Wa tsoy ta tꞌʌn, Tet, in mucꞌyaj ich cruz cax a baꞌ cu tar ten, tsoy.
\p
\v 43 Caj ricꞌ Jesús caj wʌcꞌʌs urij ich u camsʌwinicob. Caj yiraj wenʌn u caꞌob. Mʌꞌ tu mucꞌtob u wenʌnob. Mʌꞌ u pꞌirir u wichob.
\v 44 Caj u pꞌʌtaj u camsʌwinicob Jesús caj bin u caꞌ tꞌʌnej Cꞌuj. Mʌnaꞌ u nup u tenin u bin u tꞌʌnic Cꞌuj. Bayiriꞌ caj u wʌcꞌʌs tꞌʌnaj u Tet an ten bic caꞌcheꞌ. Baxuc caj u yʌn tꞌʌnaj sam.
\v 45 Caj ur Jesús ich u camsʌwinicob caj yaꞌaraj tiꞌob: 
\p ―Tsoy a wenʌnex bajeꞌrer, jes a bʌjex. Bajeꞌrer cꞌuchij tu qꞌuinin tu chuquenob a tenoꞌ taren in yamtic mac tu cotor. Bin u cꞌubiquenob tiꞌ mac a yʌn u siꞌpir. 
\v 46 Riqꞌuenex ―quij―, caꞌ xicoꞌon ic pajic a mac a mucu cꞌubiquen quireꞌ tan u tar.
\s Chuc Jesús
\r (Mr. 14.43‑50; Lc. 22.47‑53; Jn. 18.2‑11)
\p
\v 47 Tiꞌ toy cu tsicbar Jesús caj cꞌuchij Judas Iscariote raꞌiriꞌ tiꞌ u camsʌwinicob Jesús yejer a oncejoꞌ. Yet taracob a jach pim. U rʌc chꞌamʌnob u mascab, bayiriꞌ u rʌc chꞌamʌnob cheꞌ, caj tarob quireꞌ tuchiꞌtaꞌb ten u jach tsuririrob sacerdote yejer u jach tsꞌurirob u cajar u winiquirob judío a cu yaꞌaric a Nuxiboꞌ.
\v 48 Mʌꞌ toy cꞌuchuc Judas ich Jesús caj u toc araj tiꞌob a pimoꞌ:
\p ―A ca wiriquex in tsꞌuꞌtsꞌic u pꞌuc. Raꞌ ca chuquiquex. 
\p
\v 49 Seb caj u juts u bʌj ich Jesús caj yaꞌaraj Judas tiꞌ Jesús:
\p ―Taren in wʌjcamsʌyʌjirech.
\p Caj utsꞌbentaꞌb u pꞌuc ten Judas.
\v 50 Jesús caj u nuncaj:
\p ―In yajech baj tarech a wirej?
\p Caj u jutsꞌob u bʌj a pim caj chucob u cꞌʌb Jesús caꞌ xicob mʌcbir.
\p
\v 51 Tiꞌ yʌn raꞌ u camsʌwinic Jesús u nup. Caj u jitꞌaj u mascab caj u chꞌʌcaj u xiquin u cꞌurew u jach tsꞌurir sacerdote. Caj rac u xiquin.
\v 52 Jesús caj yaꞌaraj:
\p ―Jup a mascab tu pix. Mʌꞌ ja wirej, a mac cu quinsic mac yejer mascab rajiꞌ cu wʌcꞌʌs bin quinsaꞌr yejer mascab.
\v 53 Mʌꞌ ja wirej, wa cꞌuchaꞌan in wor in tꞌʌnic in Tet soc seb cu tuchiꞌtaꞌr yʌjmasirob u tꞌʌn Cꞌuj quir u taquicob ten. Jach pim yʌjmasirob u tꞌʌn Cꞌuj.
\v 54 Chen mʌꞌ in tꞌʌnic in Tet quireꞌ caꞌ u yʌn nupꞌur u tꞌʌn, a caj u toc araj uch, soc u tar ten an bic caj u toc araj uch.
\p
\v 55 Caj tsꞌoc u tꞌʌnan Pedro caj yaꞌaraj Jesús tiꞌ a mac yʌjchuquirob Jesús:
\p ―Biquinin caj tarechex teraꞌ yejer cheꞌ, bayiriꞌ yejer a mascabex quir a chuquiquenex iren wa yʌjacꞌricyʌjiren baꞌ. Rajraꞌ tiꞌ yʌnen ich carem naj caj in camsechex tu ca wocarex a cꞌujintex Cꞌuj. Biquinin mʌꞌ a toc chuquenex uch?
\v 56 A baꞌ u ber ten bajeꞌrer, quireꞌ caj u toc araj uch yʌjtseqꞌuirob u tꞌʌn Cꞌuj. Quireꞌ nupꞌ a baꞌ tsꞌibaꞌan uch.
\p Raꞌiriꞌ u qꞌuinin u camsʌwinicob Jesús caj rʌc putsꞌob. Pꞌat Jesús tu junan.
\s Jesús caj bin purbir ʌcʌtan u jach tsꞌurir u winiquirob judío
\r (Mr. 14.53‑65; Lc. 22.54‑55, 63‑71; Jn. 18.12‑14, 19‑24) 
\p
\v 57 Yʌjchuquirob Jesús caj bin purbir Jesús ich Caifás. Raꞌ u jach tsꞌurir sacerdote. Bayiriꞌ tiꞌ yʌn yʌjcamsʌyʌjirob u tꞌʌn Moisés. Tiꞌ yʌnob u jach tsꞌurirob u cajar u winiquirob judío a cu yaꞌaric a Nuxiboꞌ. U rʌc muchꞌquinmʌnob u bʌj xan.
\v 58 Pedro pachir u bin tu cu binob Jesús. Cꞌʌs nanach cu tar Pedro hasta cꞌuchij tu reꞌaꞌan yatoch Caifás. Caj oc ich tu reꞌaꞌan yatoch Caifás. Caj curaj yejer policía soc u yiric baꞌ u ber tiꞌ Jesús.
\p
\v 59 U jach tsꞌurirob sacerdote yejer tu cotor u tsꞌurirob u winiquirob judío. Tiꞌ u muchꞌquinmʌnob u bʌj quir u wayticob quir u tus taꞌquicob u joꞌr Jesús soc u quinsaꞌr Jesús.
\v 60 Mʌꞌ cꞌuchaꞌan yor u waytob quir u tus taꞌquicob u joꞌr Jesús. Cax jach pim mac cu tar quir u tus taꞌquicob u joꞌr Jesús. Pachir caj tarob caꞌtur u winiquirob judío. 
\v 61 Caj yaꞌarajob tiꞌ u jach tsꞌurirob u winiquirob judío: 
\p ―Tij cuꞌyaj yaꞌaric a jeꞌ xibaꞌ, cu bin u rʌc jubsic carem naj tu quij cꞌujintiquex Cꞌuj. Jeꞌ u caꞌ tsꞌʌpquintiqueꞌ u jer carem naj caꞌ bin tsꞌocac u man mʌnaꞌ u nup u qꞌuinin.
\p
\v 62 Caj ricꞌ u chꞌictar Caifás caj yaꞌaraj tiꞌ Jesús:
\p ―Biquinin mʌꞌ a cꞌʌs nunquic tiꞌ a mac tan u taꞌquic a joꞌr tech?
\p
\v 63 Jesús mʌꞌ u cꞌʌs nunquic. U jach tsꞌurir sacerdote caj u chuchaj Cꞌuj caj yaꞌaraj:
\p ―Cꞌuj cu yiric, a cuxaꞌanoꞌ. Arej toꞌon wa tech u pararech Cꞌuj a mac caj u toc araj Cꞌuj yʌn u tar quir u taꞌquic tu cotor mac? Arej toꞌon soc taj quic najtic.
\p
\v 64 Jesús caj u nuncaj caj yaꞌaraj:
\p ―An ten bic caj a waꞌaraj rajiꞌ ten. Rajiꞌ ten ca bin a wiren ich u noj Cꞌuj a jach manan chich u mucꞌ. Quireꞌ taren in yamtej tu cotor mac. Jeꞌ a wiric in tar tu muyarir caꞌanan.
\p
\v 65 U jach tsꞌurir sacerdote seb caj u jʌtaj u nocꞌ quireꞌ tsꞌic. Quireꞌ cu tucraꞌ cu pachꞌic Cꞌuj Jesús, an ten bic caj u nuncaj Jesús rajen Caifás caj yaꞌaraj:
\p ―Baꞌwir tiꞌ u jer mac quir u taꞌquic u joꞌr? A bʌjirex caj a wuꞌyajex cu pachꞌic Cꞌuj.
\v 66 Arex ten baꞌ ca tucriquex tiꞌ?
\p Robob u tsꞌurirob u winiquirob judío caj yaꞌarajob: 
\p ―Toc yʌn u siꞌpir caꞌ u yʌn u quimin.
\p
\v 67 Caj u tubajob u wich Jesús caj u jʌtsꞌajob. U jerob caj u tacꞌ jʌtsꞌtajob Jesús.
\v 68 Caj u tus yaꞌarajob:
\p ―Arej tenob mac tu tacꞌ jʌtsꞌtajech wa Cꞌuj caj u tuchiꞌtajech quir a taꞌquic mac tu cotor, quireꞌ baxuc caj a waꞌaraj. 
\s Mʌꞌ in wer mac Jesús
\r (Mr. 14.66‑72; Lc. 22.56‑62; Jn. 18.15‑18, 25‑27)
\p
\v 69 Tiꞌ toy yʌn Pedro ich tancab tu reꞌaꞌan yatoch Caifás. Caj u jutsꞌ u bʌj tuririꞌ xquic ich Pedro. Raꞌ u cꞌurew Caifás. Caj araꞌb tiꞌ Pedro:
\p ―A techoꞌ ―quij yaꞌaraj―, a wet man Jesús ich u ruꞌumin Galilea xan.
\p
\v 70 Pedro caj yaꞌaraj ʌcʌtan tu cotor mac:
\p ―A tenoꞌ, mʌꞌ in wer baꞌ ca waꞌaric a techoꞌ.
\p
\v 71 Sansam caj bin Pedro ich u jor yatoch Caifás. U jer xquic caj yiraj caj yaꞌaraj:
\p ―A jeꞌ xibaꞌ xanoꞌ, yet man Jesús raꞌ cu tar ich u cajar Nazaret.
\p
\v 72 Pedro caj yaꞌaraj, caj u chucaj Cꞌuj, caj yaꞌaraj: 
\p ―A Cꞌujoꞌ cu yiric. Mʌꞌ jin wiramʌn xib a ca cꞌatic tenoꞌ.
\p
\v 73 Sansam caj u jutsꞌ u bʌj xib ich Pedro caj araꞌb tiꞌ Pedro:
\p ―Taj tech a wet mʌn Jesús uch. A mʌꞌ quet baxuc a tꞌʌn yejer Jesús.
\p
\v 74 Caj araꞌb Pedro, caj u chucaj Cꞌuj, Pedro caj yaꞌarajeꞌ: 
\p ―Cꞌuj cu yiric, mʌꞌ in wiramʌn xib a jeꞌ ca waꞌaric tenoꞌ. Cax cu quinsiquen Cꞌuj.
\p Bayiriꞌ caj cꞌaynʌj cax.
\v 75 Pedro caj u cꞌasaj yicꞌ a baꞌ araꞌb ten Jesús uch: “Mʌꞌ toy cꞌaynʌc cax mʌnaꞌ u nup u tenin ca bin a waꞌaric mʌꞌ a wer maqueniꞌ.” Caj jocꞌ Pedro caj ocꞌnʌjij. Caj jach quiꞌ ocꞌnʌjij Pedro, caj u jach tucraj u bʌj.
\c 27
\s Jesús caj cꞌub tiꞌ Pilato
\r (Mr. 15.1; Lc. 23.1‑2; Jn. 18.28‑32)
\p
\v 1 Caj sasij. Tu cotor u jach tsꞌurirob sacerdote yejer u jach tsꞌurirob u cajar u winiquirob judío a cu yaꞌaric a Nuxiboꞌ, caj u tucrob bic tabar cu bin u quinsic Jesús. 
\v 2 Caj cꞌax u cꞌʌb Jesús caj tar purbir ich Poncio Pilato rajiꞌ gobernador.
\s Caj quim Judas
\p
\v 3 Judas caj yiraj bin u caꞌ quinsbir Jesús, yer rajiꞌ caj u cꞌubaj, caj u tucraj ich yor: “Jach cꞌasen.” Caj bin u wʌcꞌʌs sutbir u taqꞌuin, treinta sʌc taqꞌuin. Caj u tsꞌaj tiꞌ u jach tsꞌurirob sacerdote yejer u tsꞌurirob u cajar u winiquirob judío a cu yaꞌaric a Nuxiboꞌ.
\v 4 Judas caj yaꞌaraj tiꞌob:
\p ―A tenoꞌ, yʌn in siꞌpir ―quij―. Mʌꞌ ja wirej, caj in cꞌubaj Jesús caꞌ quinsac, cax mʌnaꞌ baꞌ caj u betaj. 
\p Caj u nuncajob u racꞌob:
\p ―Baꞌwir toꞌon caꞌ ic tucrej, quireꞌ raꞌ a beyaj tech. 
\p
\v 5 Caj u pichꞌintaj taqꞌuin Judas ich carem naj ʌcʌtan tiꞌob. Caj bin Judas caj u jichꞌ u cꞌoꞌoch.
\p
\v 6 U jach tsꞌurir sacerdote caj u chꞌichꞌaꞌb u taqꞌuin. Caj yaꞌarajob:
\p ―Mʌꞌ tsoy ic butꞌic a jeꞌ taqꞌuinaꞌ ich u copre taqꞌuin carem naj, quireꞌ raꞌ u boꞌorir u quinsaꞌ.
\p
\v 7 Seb caj u tucrajob u mʌnicob u ruꞌumin quir u muquic u baquer a mac quimin, a nach u tar. Rajiꞌ u cay taqꞌuin Judas uch. Caj bin u mʌnej u ruꞌumin u cꞌabaꞌ u ruꞌumin, Tu Cu Pʌtic Pac.
\v 8 Raꞌ u qꞌuininoꞌ, caj u cꞌaxob u cꞌabaꞌ u ruꞌumin. Caj u pʌchaj u cꞌabaꞌ, U Ruꞌumin U Qꞌuiqꞌuer. Quireꞌ u cay taqꞌuin Judas tu mʌnob u ruꞌumin.
\v 9 A baywoꞌ, caj nuꞌpsaj u tꞌʌn Jeremías yʌjtseqꞌuir u tꞌʌn Cꞌuj. Caj yaꞌaraj uch: “U winiquirob israel, caj u toc araj baxuc cu bin u boꞌotic quir u cꞌubur tiꞌ, treinta sʌc taqꞌuin
\v 10 cu bin u boꞌotej. Yejer u sʌc taqꞌuin caj u mʌnob u ruꞌumin a mac cu pʌtic pac. An ten bic caj u toc araj Jaj Tsꞌur uch.”
\s Jesús ʌcʌtan tiꞌ gobernador Pilato
\r (Mr. 15.2‑5; Lc. 23.3‑5; Jn. 18.33‑38)
\p
\v 11 Jesús caj bin chꞌictar ʌcʌtan gobernador. Caj cꞌataꞌb tiꞌ:
\p ―Taj wa u reyech u winiquirob judío?
\p Jesús caj u nuncaj:
\p ―Baxuc ca waꞌariquen, a tenoꞌ, u reyen u winiquirob judío?
\p
\v 12 U jach tsꞌurir sacerdote yejer u jach tsꞌurirob u cajar u winiquirob judío a cu yaꞌaric a Nuxiboꞌ, caj tocob u joꞌr Jesús, chen mʌꞌ u cꞌʌs nunquic.
\v 13 Pilato caj yaꞌaraj tiꞌ Jesús:
\p ―Biquinin mʌꞌ a cꞌʌs nunquic u taꞌquicob a joꞌr?
\p
\v 14 Jesús mʌꞌ ju cꞌʌs nuncaj chichin. Rajen jach jaqꞌuij yor gobernador.
\s Pilato caj u tucraj tu yor caꞌ xic sinbir Jesús ich cruz
\r (Mr. 15.6‑20; Lc. 23.13‑25; Jn. 18.38―19.16)
\p
\v 15 Toc beriꞌ cu siptic mac tu macaꞌan caꞌ bin cꞌuchur tu qꞌuinin u quiꞌquiꞌ janʌnob u winiquirob judío, u qꞌuinin caj u potmastaj yʌjmasir u tꞌʌn Cꞌuj uch. Gobernador cu bin u siptic a mac macaꞌan a cu cꞌataꞌ tiꞌ ten u winiquirob judío.
\v 16 A raꞌ u qꞌuininoꞌ, tiꞌ macaꞌan mac jach cꞌas. Raꞌ u cꞌabaꞌ Barrabás.
\v 17 Raꞌ u qꞌuinin tiꞌ muchꞌaꞌanob a pimob u winiquirob judío ich Pilato. Pilato yer qꞌuex yorob u jach tsꞌurirob sacerdote. Rajen caj u taꞌquob u joꞌr Jesús. Caj u cꞌataj tiꞌ a pimoꞌ:
\p ―A mac a cꞌat in siptic techex. Arex ten wa Barrabás wa Jesús a ca waꞌariquex Cristo?
\p
\v 18 Tiꞌ toy yʌn Pilato tu cu taꞌquicob u joꞌr Jesús u tsꞌurirob sacerdote. Caj tuchiꞌtaꞌb ten u racꞌ Pilato tiꞌ u mam. Caj yaꞌaraj tiꞌ:
\p
\v 19 ―A ray xiboꞌ mʌꞌ tsoy a sinic ich cruz quireꞌ mʌnaꞌ u siꞌpir. Baxuc caj in wʌyʌcꞌtaj acꞌbir caj u jacꞌsaj in wor. Rajen wa ca sinic jach yaj cu bin u tar toꞌon. 
\p
\v 20 Chen u jach tsꞌurirob sacerdote yejer u jach tsꞌurirob u cajar u winiquirob judío a cu yaꞌaric a Nuxiboꞌ, cu cay cꞌaticob tiꞌ u racꞌob:
\p ―Biquinin mʌꞌ a cꞌatex tiꞌ Pilato caꞌ u sinej Jesús ich cruz caꞌ siptac a Barrabásoꞌ?
\p Rajen u racꞌob caj u quibajob u tꞌʌn u jach tsꞌurirob yejer u jach tsꞌurirob u cajar u winiquirob judío a cu yaꞌaric a Nuxiboꞌ soc u sinic ich cruz Jesús. Chen cu siptaꞌ Barrabás ten Pilato.
\v 21 Pilato caj u wʌcꞌʌs cꞌataj tiꞌ a pimoꞌ:
\p ―Mac a cꞌat in siptic techex.
\p Caj u rʌc nuncajob, caj yaꞌaraj:
\p ―Siptej Barrabás.
\p
\v 22 Pilato caj u cꞌataj:
\p ―Bic in bin in betic tiꞌ Jesús a ca waꞌariquex Cristo? 
\p Caj u rʌc nuncajob tiꞌ:
\p ―Arej tiꞌ caꞌ xic sinbir ich cruz.
\p
\v 23 Pilato caj yaꞌaraj:
\p ―Biquinin cu bin sinbir ich cruz quireꞌ mʌnaꞌ cꞌas caj u betaj?
\p Robob a jach pimoꞌ caj u purob yawʌt:
\p ―Arej caꞌ sinic ich cruz.
\p
\v 24 Caj yiraj Pilato mʌꞌ ju cꞌuchur yor tiꞌ a pimoꞌ soc mʌꞌ u sinin Jesús ich cruz. Chen a pimoꞌ cu jach cꞌamtar u tꞌʌn. Rajen caj u tuchiꞌtaj mac caꞌ tac purbir jaꞌ quir u pꞌoꞌic u cꞌʌb Pilato ʌcʌtan pim soc yiricob mʌnaꞌ u siꞌpir Pilato. Pilato caj yaꞌaraj tiꞌob:
\p ―A jeꞌ xibaꞌ mʌnaꞌ u siꞌpir. Rajen mʌꞌ in cꞌat u quimin. Chen quin betic a baꞌ a cꞌatex ten.
\p
\v 25 Tu cotor a pimoꞌ caj u rʌc nuncaj:
\p ―Arej caꞌ sinic ich cruz. Tenob in siꞌpirob caꞌ xic sinbir Jesús. Baxuc yʌn u siꞌpir in tiꞌarob.
\p
\v 26 Pilato caj u siptaj Barrabás caꞌ xic. Caj yaꞌaraj tiꞌ soldado caꞌ jatsꞌʌc u pach Jesús. Caꞌ bin tsꞌocac u jatsꞌʌr cu bin sinbir ich cruz.
\p
\v 27 U soldado gobernador caj acsaꞌb Jesús ich palacio gobernador. Caj u rʌc muchꞌquintajob u bʌj u yet soldadojirob ich ʌcʌtan Jesús.
\v 28 Caj pit u nocꞌ Jesús ten soldado. Caj tsꞌaꞌb u buquintej chʌc nocꞌ Jesús.
\v 29 Caj u jitꞌob a qꞌuixer u caꞌ quir u tsꞌaꞌb u pꞌoquintej Jesús qꞌuiꞌix. Caj u chucajob oj caj tsꞌaꞌb u mʌchej tu noj Jesús. Caj xonrʌjob ʌcʌtan ich Jesús ʌcʌtan ich Jesús quir u cheꞌtic Jesús. Caj yaꞌarob:
\p ―Caꞌ cuxraquech munt qꞌuin, quireꞌ u reyech u winiquirob judío.
\p
\v 30 Caj tubaꞌb Jesús caj u chucaj cheꞌ aꞌ ju mʌchmʌn Jesús quir u jatsꞌʌr u joꞌr Jesús.
\v 31 Caj tsꞌoc u pꞌastar Jesús ten soldado. Caj pit u chʌc nocꞌ caꞌ wʌcꞌʌs tsꞌaꞌb u buquintej u noqꞌuirir Jesús. Caj pay caꞌ xic bʌjbir ich cruz Jesús.
\s Caj sinij ich cruz Jesús
\r (Mr. 15.21‑32; Lc. 23.26‑43; Jn. 19.17‑27)
\p
\v 32 Caj binob Jesús ich bej, caj u nupꞌajob xib tiꞌ u tar ich u cajar Cirene. Raꞌ u cꞌabaꞌ Simón. Caj tsꞌar u pach caꞌ cꞌochac u cruz Jesús tu cu bin bʌjbir.
\p
\v 33 Caj cꞌuchob tu chan witsir u cꞌabaꞌ Gólgota. U cꞌat yaꞌaric u witsir u baquer u joꞌr, quireꞌ bajen u baquer u joꞌr.
\v 34 Tiꞌ tsꞌaꞌb yuqꞌuej Jesús u cꞌab uva xacaꞌan u cꞌaj bʌcꞌ. Jesús caj u cay tumtaj, chen mʌꞌ tu yucꞌaj.
\p
\v 35 Caj tsꞌoc u bajʌr Jesús ten soldado. Caj u chictajob chan tunich quir yiric mac cu bin chꞌic u nocꞌ Jesús. A baywoꞌ caj u chictajob chan tunich quir u nupꞌ u tꞌʌn yʌjtseqꞌuir u tꞌʌn Cꞌuj tu cu yaꞌaric:
\p ―Rajiꞌob cu bin chicticob chan tunich quir yiric mac cu bin u chꞌic in nocꞌ.
\p
\v 36 Caj tsꞌoc u chꞌabʌr u nocꞌ Jesús tiꞌ toy curucbarob cʌnʌbir Jesús.
\v 37 Tsꞌibtaꞌb ich u xur u joꞌr u cruz Jesús quir yirir baꞌ u siꞌpir. Tu tsꞌibtaj: “A jeꞌ xibaꞌ Jesús, u rey u winiquirob judío.”
\p
\v 38 Bayiriꞌ xan, a cu yaꞌcricob baꞌ caꞌtur caj baj ten soldado. Tuririꞌ tu noj Jesús. Tuririꞌ tu tsꞌic xan, Jesús. 
\v 39 Quet yejer a cu manob ich Jesús tu bʌjaꞌan. Cu chicticob u joꞌr quireꞌ cu pꞌasticob Jesús. Caj u cheꞌjtajob.
\v 40 Caj yaꞌarajob tiꞌ Jesús tu bʌjaꞌan:
\p ―A techoꞌ, ca waꞌaric jeꞌ a jubsic carem naj ca waꞌaric mʌnaꞌ u nup u qꞌuinin tsꞌoc a wʌcꞌʌs tsꞌʌpquintej u jer carem naj. Tac a bʌj ich cruz caꞌ wʌcꞌʌs emaquech wa ju pararech Cꞌuj.
\p
\v 41 Ti yʌnob xan, cu pꞌasticob Jesús u jach tsꞌurirob sacerdote, bayiriꞌ u yʌjcamsʌyʌjirob u tꞌʌn Moisés, yejer u winiquirob judío a fariseojoꞌ, yejer u jach tsꞌurirob u cajar u winiquirob judío a cu yaꞌaric a Nuxiboꞌ.
\v 42 Caj yaꞌarajob ich u racꞌob:
\p ―A ray xiboꞌ, chen u jer cu taquic. U bʌjiriꞌ mʌꞌ cꞌuchaꞌan u mucꞌ u wʌcꞌʌs taquic u bʌj. Wa taj u rey u winiquirob Israel biquinin mʌꞌ ju yemʌn ich cruz ij quirej soc ij cacsic tij cor u tꞌʌn.
\v 43 U bʌjiriꞌ caj yaꞌaraj: A tenoꞌ quin wacsic tin wor tiꞌ Cꞌuj. Caꞌ ij quirej wa Cꞌuj cu tar u taquic wa cu yajquintaꞌr ten Cꞌuj, quireꞌ caj u yaꞌaraj uch: “U pararen Cꞌuj.”
\p
\v 44 Bayiriꞌ jujunturob u yʌjaꞌcrʌjyʌjirob baꞌ a bʌjaꞌan ich cruz xan. Caj u pꞌastob Jesús.
\s Caj quimij Jesús
\r (Mr. 15.33‑41; Lc. 23.44‑49; Jn. 19.28‑30)
\p
\v 45 A ray u qꞌuininoꞌ, caj toc rʌc acꞌbirchʌjij tu cotor u ruꞌumin. Cꞌacꞌchunqꞌuin caj acꞌbirchʌjij, hasta las tres caj sasichʌjij.
\v 46 A ray u qꞌuininoꞌ, a las tres, caj cꞌam awʌtnʌjij Jesús, caj yaꞌaraj:
\p ―Elí, Elí, lama sabactani? ―u cꞌat yaꞌaric: In Cꞌujech, in Cꞌujech, biquinin caj a toc pꞌʌtajen?
\p
\v 47 A mac tiꞌ yʌnob ich Jesús caj yubob yawʌt Jesús:
\p ―Ta wuꞌyex baꞌ caj u yaꞌaraj a jeꞌ xibaꞌ? Caj u tꞌʌnaj Elías yʌjtseqꞌuir u tꞌʌn Cꞌuj.
\p
\v 48 Tuririꞌ caj u cꞌʌnaj yacꞌab quir u chꞌic a irej nocꞌ, chen irej tʌmʌn. Caj u tꞌʌjaj ich u cꞌab uva a pʌjoꞌ. Caj u ricꞌcheꞌtaj quir u tsꞌabʌr yuqꞌuej Jesús.
\v 49 Chen u racꞌob a tiꞌ yʌnob caj yaꞌaraj:
\p ―Tsireꞌej, caꞌ ij quirej wa ju tar Elías ensbir Jesús. 
\p
\v 50 A ray u qꞌuininoꞌ, caj wʌcꞌʌs caꞌ awʌtnʌjij Jesús. Jach cꞌam caj awʌtnʌjij, caj quimij Jesús.
\v 51 U nocꞌ a tꞌinaꞌan ich carem naj tu cu naj cꞌujinticob Cꞌuj u winiquirob judío. A cu jʌsic junxotꞌ naj tu cu bin u waꞌquicob u qꞌuiqꞌuer yʌrʌcꞌ soc u rucꞌsic u siꞌpir mac. Raꞌ u nocꞌ, seb caj jat tu chumuquin. Caj u yʌnxchun u jatʌr caꞌanan hasta cꞌuchij u jatʌr ich u xax u nocꞌ. Baxuc xan, caj pecnʌj u chꞌic yum ruꞌum caj wacꞌ u tunichir.
\v 52 Caj rʌc wacꞌ tunich tu mucaꞌan u baquer a quimen, a yacsmʌnob tu yorob. Yaꞌab caj ricꞌsaꞌb quir u wʌcꞌʌs caꞌ cuxtar.
\v 53 Caj tsꞌoc u riqꞌuir Jesús tiꞌ quimen caj jocꞌ a yacsmʌnob tu yorob tu mucaꞌan, caj binob ich u cajar Jerusalén. Raꞌ u cajar Cꞌuj. Tiꞌ irir a cu wʌcꞌʌs riqꞌuir a yacsmʌnob tu yorob. Tiꞌ irir ten u racꞌob a jach pimoꞌ.
\p
\v 54 Yʌjtꞌʌnir cien soldados yejer u winiquirob soldado romano a cu cʌnanticob Jaj Tsꞌur. Caj jaqꞌuij yorob caj yubob u pec ruꞌum, yejer a baꞌ u ber tiꞌ a quimenob. Caj yaꞌarajob:
\p ―A jeꞌ xibaꞌ u jach parar Cꞌuj.
\p
\v 55 A ti taroꞌ, tiꞌ yʌn xquic yaꞌab, nanach chꞌicaꞌanob. Tan yiricob Jesús. Raꞌ yet manob yejer Jesús, caj tarob tu pach Jesús, caj u pꞌʌtaj u ruꞌumin Galilea. Robob caj u yamtajob Jesús.
\v 56 A tu yʌn a xquicoꞌ, tiꞌ yʌn María a cu tar ich u cajar Magdalena. Tiꞌ yʌn u jer xquic u racꞌ Zebedeo. Rajiꞌ a caꞌtur u parar.
\s Caj butꞌ u baquer Jesús ich u japnin tunich
\r (Mr. 15.42‑47; Lc. 23.50‑56; Jn. 19.38‑42)
\p
\v 57 Caj acꞌbirchʌjij caj tarij José. Tiꞌ cu tar ich u cajar Arimatea. Rajiꞌ jach yʌn u taqꞌuin. Bayiriꞌ caj u yacsaj tu yor u tꞌʌn Jesús.
\v 58 Caj bin ich Pilato José quir u cꞌataꞌr u baquer Jesús soc u butꞌic u baquer. Pilato caj yaꞌaraj tiꞌ u winiquirob soldado caꞌ tsꞌaꞌbʌc tiꞌ José u baquer Jesús.
\v 59 José caj bin chꞌabir u baquer Jesús. Caj emsaꞌb ich cruz. Caj u tapꞌaj u baquer Jesús yejer carem sʌc nocꞌ. 
\v 60 A Joséjoꞌ caj u butꞌaj u baquer Jesús tu japnin tunich, a ricꞌbenoꞌ. Mʌꞌ ja wirej, José caj u betaj tiꞌ u bʌjiriꞌ uch. Caj tsꞌoc u butꞌur u baquer Jesús caj u petsꞌtaꞌr u jor tunich tu butꞌ u baquer Jesús, caj binij.
\v 61 Tiꞌ toy yʌn María, tiꞌ cu tar ich u cajar Magdalena. U jer tiꞌ yʌn juntur María tiꞌ curaꞌan ʌcʌtan u jor tu butꞌaꞌan u baquer Jesús.
\s U winiquirob soldado romano a cu cʌnanticob tu butꞌaꞌn u baquer Jesús
\p
\v 62 Caj sasij raꞌ u qꞌuinin caj tsꞌoc u man viernes. Raꞌ u qꞌuinin quir u jesicob u bʌj u winiquirob judío. Caj cꞌuchij u jach tsꞌurirob sacerdote yejer u winiquirob judío a fariseojoꞌ, caj binob irbir Pilato.
\v 63 Caj cꞌuchob ich Pilato caj yaꞌarob tiꞌ:
\p ―Ic gobernadorech, caꞌ ij cꞌʌꞌotej a cu tusic mac. A cu yaꞌaric: “A caꞌ bin tsꞌocac u man mʌnaꞌ u nup u qꞌuinin jeꞌ in riqꞌuir tiꞌ in quimirir.”
\v 64 Rajen quic tar ij quirej tech, caꞌ a waꞌarej tiꞌ a winiquirob soldado romano, caꞌ u quiꞌ cʌnantacob u baquer Jesús tu butꞌaꞌan. Soc mʌꞌ u tar chꞌabir u baquer ten u camsʌwinicob acꞌbir. Caꞌ bin u tus arob: “Riqꞌuij tu quimirir.” Aroꞌ jach manan cu bin u tusaricob tiꞌ mac, a tu yʌn tusarob mʌꞌ jach cꞌasiꞌ.
\p
\v 65 Pilato caj yaꞌaraj tiꞌob:
\p ―Tar yʌnoꞌ in winiquirob soldado romano. Pʌyex caꞌ xicob cʌnanbir u baquer soc robob cu bin u cʌnantejob an ten bic a cꞌat techex.
\p
\v 66 Caj rʌc binob cʌnanbirob u baquer. Caj cꞌuchob caj u pʌcꞌajob u jor soc mʌnaꞌ mac cꞌuchaꞌan yor u rʌquic u jor. Caj pꞌat u winiquirob soldado romano quir u cʌnaticob. 
\c 28
\s Caj ricꞌsaꞌb Jesús ten Cꞌuj
\r (Mr. 16.1‑8; Lc. 24.1‑12; Jn. 20.1‑10)
\p
\v 1 Caj tsꞌoc u man sábado, raꞌ u qꞌuinin cu yʌnxchun semana, María, tiꞌ cu tar ich u cajar Magdalena. Tiꞌ yʌn u jer María juntur. Caj binob tu butꞌaꞌan u baquer Jesús. Jach aꞌacꞌbir caj binob.
\v 2 Seb caj yubajob u jach chꞌic yum u pec ruꞌum, quireꞌ caj tarij yʌjmasir u tꞌʌn Jaj Tsꞌur. Tiꞌ u tar caj emij caꞌanan. Caj cꞌuch tu butꞌaꞌan u baquer Jesús. Rajiꞌ caj rac u mac u jor, caj curaj tu jor.
\v 3 Jach sʌc tꞌinen u nocꞌ yʌjmasir u tꞌʌn Cꞌuj, irej u baꞌ jaꞌ, jach sʌc tꞌinen u wich, irej u raramʌncʌr xan.
\v 4 Caj yirob soldado romano yʌjmasir u tꞌʌn Cꞌuj caj jaqꞌuij yorob. Caj rʌc babʌcnʌjob orac sʌj quimicob.
\v 5 Caj yaꞌaraj yʌjmasir u tꞌʌn Cꞌuj tiꞌ xquic:
\p ―Mʌꞌ u jacꞌʌr a worex ten. In wer tan a cʌxtiquex Jesús a cu bʌjʌꞌr ich cruz.
\v 6 Mʌnaꞌ teraꞌ, quireꞌ riqꞌuij an ten bic caj u toc araj uch. Cojen irex u waꞌay tu yʌn caꞌch.
\v 7 Seb caꞌ xiquechex a waꞌarex tiꞌ u camsʌwinicob Jesús. Arex tiꞌob wʌcꞌʌs riqꞌuij tu quimirir Jesús. Ti cu yʌn bin ich u ruꞌumin Galilea. Tiꞌ taroꞌ cu bin u nupic tiꞌob. Tar cu bin yiricob. Jariꞌ yʌn in wac techex.
\p
\v 8 Jach jacꞌaꞌan yorob xquic caj binob arbir tiꞌ u camsʌwinicob. Seb caj binob yaꞌarej. Jach manan quiꞌ yorob.
\v 9 A xquicoꞌ, seb caj u nupob Jesús ich bej. Jesús caj u tꞌʌnaj. A xquicoꞌ, caj u juts u bʌjob ich Jesús, caj xonrʌjob. Caj mecꞌab yoc Jesús ten xquic quir u cꞌujinticob. 
\v 10 Caj yaꞌaraj Jesús:
\p ―Mʌꞌ ja sajquirex ten. Xenex, arex tiꞌ in camsʌwinicob: “Tar quin bin ich u ruꞌumin Galilea tiꞌ cu bin yiriquenob.” 
\s A baꞌ araꞌb tiꞌ soldado romano ten u tsꞌurirob sacerdote 
\p
\v 11 Caj binob a xquicoꞌ, caj binob soldado yʌjcʌnanyʌjirob u baquer Jesús. Mʌꞌ yaꞌab bin yaꞌarej tiꞌ u jach tsꞌurirob sacerdote ich u cajar Jerusalén. Caj yaꞌarob baꞌ u ber tiꞌ tu cotor.
\v 12 U jach tsꞌurirob sacerdote caj bin tsicbarob yejer u jach tsꞌurirob u cajar u winiquirob judío a cu yaꞌaric a Nuxiboꞌ. Quir u pꞌeriꞌquinticob yor quir u tsꞌabʌr u taqꞌuin tiꞌ soldado romano.
\v 13 Caj yaꞌaraj u jach tsꞌurirob sacerdote:
\p ―Tus arex tiꞌ mac: “Chumuc acꞌbir caj tar chꞌabir u baquer Jesús ten u camsʌwinicob. Quireꞌ wenʌn in caꞌob.” 
\v 14 Wa cu yubic u jumintaꞌr gobernador jeꞌ in binob in cʌnanticob a pachex soc in taꞌquiquechex tiꞌ gobernador ―quij yaꞌaricob sacerdote.
\p
\v 15 Caj tsꞌoc u cꞌʌmiquicob u taqꞌuin soldado romano caj binob yaꞌaricob ich u winiquirob judío a baꞌ toc araꞌb tiꞌ ten u jach tsꞌurirob sacerdote. Rajen a jeꞌ tꞌʌnaꞌ cu man u juminticob ich u winiquirob judío hasta bajeꞌrer.
\s Jesús cu tuchiꞌtic u camsʌwinicob quir u tsecꞌticob u tꞌʌn
\r (Mr. 16.14‑18; Lc. 24.36‑49; Jn. 20.19‑23)
\p
\v 16 Caj binob u camsʌwinicob a oncejoꞌ ich u ruꞌumin Galilea. Caj binob ich wits bic caj araꞌb ten Jesús uch. 
\v 17 Tiꞌ irir Jesús ten u camsʌwinicob ich u joꞌr pꞌuc wits. Caj u cꞌujintajob Jesús. Chen tiꞌ yʌn ich u camsʌwinicob caj u tucrajob:
\p ―Mʌꞌ rajiꞌ Jesús.
\p
\v 18 Jesús caj u jutsꞌaj u bʌj ich u camsʌwinicob caj yaꞌaraj tiꞌob:
\p ―Tu toc tsꞌaja ten Cꞌuj tu cotor u mucꞌ Cꞌuj, soc cꞌuchaꞌan in wor in betic a baꞌ in cꞌat, cax ich yocꞌocab, cax ich caꞌanan.
\v 19 Rajen quin toc aric techex: Caꞌ xiquechex ich tu cotor mac quir a camsiquex in tꞌʌn soc u yacsicob tu yor. Acsex jaꞌ tu joꞌr mac yejer u mucꞌ in Tet, yejer u mucꞌ u parar Cꞌuj yejer u mucꞌ u Tajꞌor u Pixam Cꞌuj.
\v 20 Bayiriꞌ camsex a racꞌob caꞌ u quibejob a caj in toc araj techex. A werex tiꞌ yʌnen yejerechex u burur qꞌuin. Mʌꞌ biqꞌuin bin in caꞌ pꞌʌtiquechex. Hasta cu xur tꞌʌn. Jeroj tsꞌoquij quij.