\id MRK
\h SAN MARCOS
\toc1 SAN MARCOS
\mt1 A JEꞌRAꞌ U JACH TSOYIR U TꞌɅN CꞌUJ TU TSꞌIBTA MARCOS
\c 1
\s Juan, a cu yacsic jaꞌ tu joꞌr mac tu tsecꞌtic ich tʌcʌy ruꞌum
\r (Mt. 3.1‑12; Lc. 3.1‑9, 15‑17; Jn. 1.19‑28)
\p
\v 1 U jach tsoyir u tꞌʌn Jesucristo u parar Cꞌuj caj u yʌnxchun bic a jeꞌ tsꞌibaꞌan a raꞌ cu bin tarej.
\p
\v 2 Tu yʌnxchun an ten bic Isaías u tsꞌibmʌn uch quireꞌ rajiꞌ tsꞌaꞌb u tucur ten Cꞌuj quir u tsꞌibtic a baꞌ u cꞌat Cꞌuj. Uꞌyex baꞌ tu tsꞌibtaj:
\q Iric, quij Cꞌuj, quin tuchiꞌtic yʌjtseqꞌuir in tꞌʌn, quij Cꞌuj, pʌyber cu tsoyquintic a ber tu ca bin cꞌuchur. 
\v 3 Tiꞌ yʌn mac tan u cꞌam tꞌʌnic ich tʌcay ruꞌum. Rajiꞌ tan yaꞌaric: “Tajquintex a worex soc cꞌuchaꞌan a worex a quiꞌ acsiquex Jaj Tsꞌur irex tan a jariquex u ber rey quir u tar.”
\m Baxuc caj u tsꞌibtaj Isaías uch.
\m
\v 4 Rajen cꞌuchij Juan tan u yacsic jaꞌ tu joꞌr mac ich tʌcay ruꞌum tan u tsecꞌtic caꞌ u cꞌaxej tu yor mac soc u pꞌʌticob u cꞌasirob soc u jawsaꞌ u siꞌpirob ten Cꞌuj.
\v 5 Tiriꞌ caj rʌc binob yicnʌn Juan tu cotor mac a cʌjaꞌanob tu ruꞌumin Judea quet bayiriꞌ tu cotor mac tiꞌ u cajar Jerusalén. Tu toc arajob baꞌ cꞌasir caj u betob quir u jawsaꞌ u siꞌpirob ten Cꞌuj. Jeroj tuneꞌ, caj acsaꞌb jaꞌ tu joꞌrob ten Juan ich u yaꞌarir Jordán.
\p
\v 6 A Juanoꞌ u buquinmʌn u nocꞌ a sʌctaꞌb tiꞌ u tsotser u yʌrʌcꞌ camello. Tu cꞌʌxaj u nʌcꞌ yejer otꞌ. Rajiꞌ cu chiꞌic sacꞌ. Cu mʌquic cab a mʌꞌ ʌcrʌcꞌaꞌan.
\v 7 Caj u tsecꞌtaj Juan:
\p ―Tan u tar tin pach a mac jach noꞌj. A tenoꞌ ―quij Juan―, mʌꞌ noꞌjen. Mʌꞌ pataren, a tenoꞌ, cax in chen pꞌuxtar in pitic u cꞌanin u pechꞌ xʌnʌb.
\v 8 A tenoꞌ ―quij Juan―, caj in wacsaj jaꞌ ta joꞌrex chen a mac a caꞌ bin cꞌuchuc jeꞌ u tsꞌic techex u Tajꞌor u Pixam Cꞌuj.
\s Acsaꞌb jaꞌ tu joꞌr Jesús
\r (Mt. 3.13‑17; Lc. 3.21‑22)
\p
\v 9 Mʌꞌ uch caj ruqꞌuij Jesús ich u cajar Nazaret, raꞌ u waꞌan u ruꞌumin Galilea. Caj cꞌuchij Jesús yicnʌn Juan caj acsaꞌb jaꞌ tu joꞌr xan ich u yaꞌarir Jordán.
\v 10 Caj tsꞌoc u yacsic jaꞌ tu joꞌr Jesús ten Juan tan u bin ich chiꞌ jaꞌ, Jesús seb caj u yiraj u buj caꞌanan. A jeroj caj yiraj xan, u Tajꞌor u Pixam Cꞌuj tan yeman irej susuy caj oc yicnʌn Jesús.
\v 11 Rajiꞌ caj u yubaj u tꞌʌn a cu tar caꞌananoꞌ, caj u yaꞌaraj:
\p ―A techoꞌ ―quij―, in pararech, in jach yajech. A techoꞌ ta quiꞌquin tin woreꞌ.
\s Tumtaꞌb u yor Jesús ten Satanás
\r (Mt. 4.1‑11; Lc. 4.1‑13)
\p
\v 12 A jeroj tuneꞌ, seb caj pay u ber Jesús ten u Tajꞌor u Pixam Cꞌuj caꞌ xic ich tʌcay ruꞌum.
\v 13 Tiriꞌ yʌn Jesús uch ich tʌcay ruꞌum quir u tumtaꞌ u yor ten Satanás, rajiꞌ u tsꞌurir a quisinoꞌ. Caj tumtaꞌb u yor ten Satanás cuarenta qꞌuin. Caj tumtaꞌb yor Jesús ten Satanás quir u yiric wa cu yacsic u siꞌpir. Tiꞌ yʌn cꞌaxir bʌcꞌ tu yʌn Jesús, chen tarob u yʌjmasirob u tꞌʌn Cꞌuj quir u yamtaꞌrob Jesús.
\s Jesús tu yʌnxchun u tsecꞌtic u tꞌʌn Cꞌuj ich u ruꞌumin Galilea
\r (Mt. 4.12‑17; Lc. 4.14‑15)
\p
\v 14 Chen caj tsꞌoc u cꞌʌric Juan tu cu naj maꞌcʌr mac, cꞌuchij Jesús ich u ruꞌumin quir u tsecꞌtic u jach tsoyir u tꞌʌn a cu tar ich Cꞌuj.
\v 15 Rajiꞌ Jesús caj u yaꞌaraj:
\p ―Bajeꞌrer, cꞌuchij tu qꞌuinin a caj u yaꞌaraj Cꞌuj uch. Bajeꞌrer cu bin reyinbir Cꞌuj, rajen cꞌaxex a worex soc a pꞌʌtiquex a cꞌasirex, ca wacsiquex ta worex a jach tsoyir u tꞌʌn Cꞌujoꞌ.
\s Jesús caj u pʌyaj xib, a rʌc yʌn u nub xib a cu chuquicob cʌy
\r (Mt. 4.18‑22; Lc. 5.1‑11)
\p
\v 16 A ray u qꞌuininoꞌ tan u man Jesús ich u chiꞌ cꞌacꞌnab, u cꞌabaꞌ u cꞌacꞌnabir Galilea, jeroj caj u yiraj Simón yejer u yitsꞌin Andrés. Tu chuquicob cʌy quireꞌ raꞌ u beyajob. Cu chuquicob cʌy yejer yajow chim.
\v 17 Caj u yaꞌaraj Jesús tiꞌob:
\p ―Sayenex tin pach quir in camsic techex in tꞌʌn soc a manex a tsecꞌtex in tꞌʌn ich a wet winiquirex judío. 
\p
\v 18 Seb caj u pꞌʌtajob u chuc cʌyob, caj sayob tu pach Jesús.
\p
\v 19 Wa ber caj bin mʌꞌ nachiꞌ, a jeroj caj u yiraj Jacobo, u parar Zebedeo, yejer Juan u yitsꞌin Jacobo. Robob caj u chuyob u chimin u chuc cʌyob ich u chemob.
\v 20 An ten bic caj u yiraj tiꞌob, seb caj pay Jacobo yejer Juan ten Jesús. A jeroj tuneꞌ, caj u pꞌʌtajob u tetob Zebedeo ich chem yejer u cꞌurewoꞌ, caj sayob tu pach Jesús.
\s Tiꞌ yʌn xib tuririꞌ, yʌn u cꞌacꞌas quisinin
\r (Lc. 4.31‑37)
\p
\v 21 Caj cꞌuchob tu cajar Capernaum. Ber caj cꞌuchij tu qꞌuinin tu cu jesicob u bʌjob u winiquirob judío, caj oquij Jesús tu chan najir tu cu naj cꞌujinticob Cꞌuj u winiquirob judío. Caj oquij tu yʌnxchun u camsaꞌob. 
\v 22 A mac a tiꞌ yʌnob a caj u yubob jach jaqꞌuij yorob an ten bic caj u camsaj tiꞌob. Mʌꞌ ja wirej, Jesús caj u camsaj, jach noj u camsej mac. Mʌꞌ an ten bic yʌjcamsʌyʌjirob u tꞌʌn Moisés.
\v 23 A ray u qꞌuininoꞌ seb caj oquij ich u chan najir tu cu naj cꞌujinticob Cꞌuj u winiquirob judío a mac acaꞌan quisin tiꞌeꞌ. Rajiꞌ cꞌam caj u yaꞌaraj:
\p
\v 24 ―Baꞌ a cꞌat tiꞌ a tenoboꞌ Jesúsech a cu tar ich u cajar Nazaret? Taraꞌanech a chꞌesiquenob, in werechob maquechiꞌ, a techoꞌ a mac a cu tar ich Cꞌuj, a techoꞌ caj a ricꞌsaj a wʌcꞌʌs bʌjiriꞌ soc Cꞌuj yʌninech.
\p
\v 25 Jesús caj u qꞌueyaj, caj u yaꞌaraj:
\p ―Nup a chiꞌ, caꞌ jocꞌaquech, caꞌ a pꞌʌtej a jeꞌ xibaꞌ. 
\p
\v 26 A cꞌacꞌas quisinoꞌ, caj u betaj caꞌ babanʌquiꞌ, jeroj tuneꞌ caj joqꞌuij tiꞌ, tan u cꞌam awʌt.
\v 27 A mac a tiꞌ yʌnob ich u chan naj tu cu naj cꞌujinticob Cꞌuj u winiquirob judío jach manan rʌc jaqꞌuij yorob, rajen caj u pacran cꞌaticob ich u yet winiquirob judío: 
\p ―Baꞌquiriꞌ a jeraꞌ, quij yaꞌaraꞌob? Baꞌ u jer tꞌʌn cu camsaꞌ? Quireꞌ cu camsaꞌ an ten bic mac yʌn u mucꞌ. Mʌꞌ ja wirej, a jeꞌ xibaꞌ, cax cu tꞌʌnic a quisinoꞌ, cu quibicob a baꞌ cu yaꞌaraꞌob tiꞌ ten Jesús.
\p
\v 28 Caj jocꞌob a mac a tiꞌ yʌnob ich u chan najir tu cu naj cꞌujinticob cꞌuj u winiquirob judío seb caj u jumbintajob a baꞌ caj u yirob ich tu cotor u ruꞌumin Galilea, baxuc xan, caj u jumbintob a baꞌ caj u yubajob. 
\s Jesús cu jawsic u yixquit Simón Pedro
\r (Mt. 8.14‑15; Lc. 4.38‑39)
\p
\v 29 Wa ber caj ruqꞌuij Jesús tiꞌ u chan najir tu cu naj cꞌujintiob Cꞌuj u winiquirob judío, yet binacob u camsʌwinicob. Yet binacob Jesús a Jacobo yejer Juan, bayiriꞌ xan Simón Pedro yejer Andrés, a jeroj caj cꞌuchob tu yatoch Simón Pedro yejer Andrés.
\v 30 Barej u yixquit Simón Pedro characbar quireꞌ jach ar u joꞌr. Seb caj araꞌb tiꞌ Jesús yaj u yixquit Simón Pedro. 
\v 31 Cꞌuchij tun, rajiꞌ, caj u mʌchaj u cꞌʌb caj u ricꞌsaj, jeroj seb caj jaw, caj u yʌnxchun u jansaꞌrob.
\s Jesús cu jawsic pim mac
\r (Mt. 8.16‑17; Lc. 4.40‑41)
\p
\v 32-33 Tan u bin u qꞌuinin caj jach acꞌbichʌjij tun. Tu cotor a mac a pꞌeriꞌ u cajarob yejer Simón Pedro yejer Andrés caj cꞌuchob tu cu naj ocar mac tu yatoch Simón Pedro yejer Andrés. Caj tar purbirob a mac a jach yaj ich Jesús yejer a mac a acaꞌan tiꞌ quisinoꞌ. Tiriꞌ caj u rʌc muchꞌquintajob u bʌj tu yʌn Jesús.
\v 34 Caj u jawsaj yaꞌab mac yejer yaꞌab u yajirir. Bayiriꞌ xan, caj u jocꞌsaj tiꞌ mac a yʌn yaꞌab u quisininoꞌ. Mʌꞌ ju chaꞌbʌr u jocꞌar u tꞌʌnob ten Jesús quireꞌ u jach erob jach rajiꞌ Cristo.
\s Jesús caj u tsecꞌt u tꞌʌn ich u ruꞌumin Galilea
\r (Lc. 4.42‑44)
\p
\v 35 Cꞌʌs aꞌacꞌbir mʌꞌ toy quiꞌ sasichʌjʌquiꞌ caj ruqꞌuij Jesús tu junan tu mʌnaꞌ mac soc u tꞌʌnic Cꞌuj.
\v 36 Jesús cu man cʌxtaꞌbir ten Simón Pedro yejer u yet camsʌwiniquirob.
\v 37 Wa ber caj irir Jesús ten a mac tarob cʌxtaꞌbir. Caj u yaꞌarob:
\p ―Tu cotor mac cu cʌxtiquechob.
\p
\v 38 Caj yaꞌaraj tiꞌob:
\p ―Caꞌ xicoꞌonex ich u jer cajarob a baytʌcoꞌ caꞌ in tsecꞌtej xan, quireꞌ rajen ruqꞌuen tiꞌ a ray cajaroꞌ. 
\p
\v 39 Jesús rʌc man ich tu cotor u ruꞌumin Galilea cu yocar jujuntur tu chan najir tu cu naj cꞌujinticob Cꞌuj u winiquirob judío tiriꞌ caj u tsecꞌt u tꞌʌn Cꞌuj. Jujuntur u cuchir tu cu naj tsecꞌtic u tꞌʌn Cꞌuj tu oquij caj u jocꞌsaj a mac acaꞌan u quisinin tiꞌ.
\s Jesús caj u jaws a mac u cʌnmʌn iqꞌuer u caꞌ
\r (Mt. 8.1‑4; Lc. 5.12‑16)
\p
\v 40 A mac a ju cʌnmʌn iqꞌuer u caꞌ, cꞌuchij yicnʌn Jesús, caj xonrʌj caj u yaꞌaraj:
\p ―Wa ja cꞌateꞌ, cꞌuchaꞌan a wor a jawsic iqꞌuer u caꞌ ten.
\p
\v 41 Jesús caj u tucraj tiꞌ, caj u nuncaj caj u yaꞌaraj: 
\p ―In cꞌat ―quij Jesús―, jawen quen.
\p
\v 42 A jeroj tuneꞌ, seb caj jawij a iqꞌuer u caꞌ tiꞌ. 
\v 43 Jesús caj u tꞌʌnaj caꞌ xic tan u chich aric tiꞌ: 
\p
\v 44 ―Mʌꞌ a bin a waꞌaric tu ca man bic jawech. Chen tar a bin ich sacerdote u winiquirob judío quir a sijic tiꞌ a baꞌ caj yaꞌaraj Moisés uch. Soc yerob tu cotor mac jawsaꞌbech ―quij Jesús.
\p
\v 45 Rajiꞌ mʌꞌ caj u yubaj a baꞌ araꞌb ten Jesús, seb caj u toc rʌc araj ich u racꞌob. Caj yubob jaw a iqꞌuer u caꞌ tiꞌeꞌ. Rajen Jesús mʌꞌ cꞌuchaꞌan yor u jocꞌar ich tu cotor mac cax a baꞌ cajarob. Cu chen jocꞌar tu mʌnaꞌ mac, cax tiꞌ cu bin Jesús tiꞌ rʌc cꞌuchob yicnʌn Jesús. 
\c 2
\s Jesús cu jawsic a mʌꞌ u chꞌictareꞌ
\r (Mt. 9.1‑8; Lc. 5.17‑26)
\p
\v 1 Mʌꞌ yaꞌab u qꞌuinin caj wʌcꞌʌs urij Jesús ich u cajar Capernaum. A jeroj caj yubob u jumintaꞌb, tiꞌ yʌn Jesús ich yatoch.
\v 2 Seb caj u muchꞌquintajob u bʌj ich Jesús jach pim, cax tu cu naj ocar mac ich yatoch mʌꞌ u pꞌatar tu cu yocar mac quireꞌ pech. A Jesúsoꞌ caj u tsecꞌtaj u jach tsoyir u tꞌʌn Cꞌuj tiꞌob.
\v 3 Caj tar purbirob yicnʌn Jesús a mac a mʌꞌ u chꞌictar. Mʌꞌ yaꞌab caj tar purbirob cuatro xib tan u cꞌochicob tiꞌ.
\v 4 Chen mʌꞌ cꞌuchaꞌan yorob u natsꞌarob yicnʌn Jesús quireꞌ a pimoꞌ. Tar nacob ich pach naj, caj u rʌc paꞌaj u pach naj soc u yensʌꞌr a mac a mʌꞌ u chꞌictar tu yicnʌn Jesús. Yej u tas caj emsaꞌb ich Jesús. Mʌꞌ ja wirej, mʌꞌ cꞌuchaꞌan yorob u yocarob ich naj tu yicnʌn Jesús uch. 
\v 5 A Jesúsoꞌ caj u yiraj bic caj u yacsob tu yorob wa Jesús cꞌuchaꞌan yor u jawsic caj u yaꞌaraj tiꞌ a mac a mʌꞌ u chꞌictareꞌ:
\p ―In yajech ―quij Jesús―, toc jaw a siꞌpir.
\p
\v 6 Chen tiꞌ yʌn mʌꞌ yaꞌab yʌjcamsʌyʌjirob u tꞌʌn Moisés tiꞌ curaꞌanobiꞌ. Tu yorob tu tucrajob tiꞌ Jesús:
\v 7 “Biquinin baxuc cu tsicbar a ray xiboꞌ? A baywoꞌ pochꞌ u caꞌ. Jeꞌ wa ju chꞌuchur u yor u jawsic u siꞌpir maqueꞌ, chen u bʌjiriꞌoꞌ Cꞌuj cꞌuchaꞌan yor u jawsic mac?”
\v 8 Chen seb caj u yubaj Jesús tu pixam a baꞌ tu mucu tucrajob, rajen caj u yaꞌaraj tiꞌob:
\p ―Biquinin a baxucoꞌ ca tucriquex ta pixamex?
\v 9 Wa quin wac tiꞌ a jeꞌ a mʌꞌ u chꞌictareꞌ: “Tin jawsaj a siꞌpir”, a techexoꞌ, mʌꞌ a werex wa yʌn in mucꞌ tiꞌ Cꞌuj wa mʌꞌ yʌn in mucꞌ tiꞌ Cꞌuj. Barej wa quin wac tiꞌ: “Riqꞌuen caꞌ xiquech”, jeꞌ a werex yʌn in mucꞌ tiꞌ Cꞌuj. 
\v 10 Caj araꞌb ten Jesús tiꞌ yʌjcamsʌyʌjir u tꞌʌn Moisés: “Arej in wesej techex yʌn u mucꞌ ten Cꞌuj quir in jawsic u siꞌpir mac ich yocꞌocab quireꞌ baxuquenechexoꞌ, quij.” 
\p Jesús caj u tꞌʌnaj a mac a mʌꞌ u chꞌictareꞌ:
\p
\v 11 ―Riqꞌuen ―quij―, chꞌaj a tas caꞌ xiquech ich a watoch.
\p
\v 12 A mac mʌꞌ u chꞌitareꞌ caj riqꞌuij caj u chꞌaj u tas caj joqꞌuij ʌcʌtan tu cotor mac rajen tu cotor mac jach jaqꞌuij yorob caj u rʌc quiꞌ tꞌʌntajob Cꞌuj:
\p ―Jach caremech Cꞌuj. Mʌꞌ biqꞌuin ij quiramʌnex a baxuc a jeraꞌ.
\s Leví tꞌʌn ten Jesús
\r (Mt. 9.9‑13; Lc. 5.27‑32)
\p
\v 13 Caj jocꞌ Jesús caj bin ich u chiꞌ cꞌacꞌnab u cꞌabaꞌ Galilea. Tu cotor a pimoꞌ tarob tu yicnʌn Jesús, a jeroj tuneꞌ, caj u yʌnxchun u camsic tiꞌob.
\v 14 Cariqueꞌ tan u man wa ber caj u yiraj Leví, u parar Alfeo curucbar tu cuchir tu cu naj cꞌʌmic u taqꞌuin gobierno romano. Caj pʌyir ten Jesús caj u yaꞌaraj tiꞌ: 
\p ―Cux ―quij Jesús―, quir a cʌnic in tꞌʌn.
\p Caj riqꞌuij, caj bin tu pach Jesús.
\p
\v 15 Pachir tiꞌ yʌn Jesús ich yatoch Leví. Curucbar janʌn Jesús yejer u camsʌwinicob, yejer a mac a cu cꞌʌmicob u taqꞌuin gobierno romano. Tiꞌ yʌn xan, a mac a mʌꞌ patarob, pꞌeriꞌob u janʌnob yejer Jesús. Quireꞌ yʌn yaꞌab mac cu sayob tu pach quir u cʌnicob u tꞌʌn Jesús.
\v 16 U camsʌyʌjirob u tꞌʌn Moisés a fariseojoꞌ caj u yirajob curucbar janʌn u caꞌ Jesús yejer a mac a cu naj cꞌʌmicob u taqꞌuin gobierno romano yejer a mac a mʌꞌ patarob, caj u yaꞌarob tiꞌ u camsʌwinicob Jesús:
\p ―Biquinin a wʌjcamsʌyʌjirex ―quij yaꞌaraj tiꞌ― pꞌeriꞌ u janʌnob yejer a mac a cu naj cꞌʌmicob u taqꞌuin u gobierno romano, bayiriꞌ xan, yejer a mac a mʌꞌ patarobeꞌ? 
\p
\v 17 A ber caj u yubaj Jesúseꞌ, caj u yaꞌaraj tiꞌob:
\p ―A mʌꞌ yajoꞌ, mʌꞌ u cꞌatic tsꞌac, quireꞌ toc yʌn yor. A mac a yajoꞌ raꞌ cu bin cʌxtic yoꞌoch tsꞌac. Rajen tarenoꞌ. Quireꞌ taren in pʌyic a mac a yʌn u siꞌpirob caꞌ u cꞌaxej tu yorob soc u pꞌʌticob a cꞌasoꞌ. Mʌꞌ taren in pʌyic a mac a cu yaꞌaricob mʌnaꞌ u siꞌpirob.
\s U cꞌatbar yubej wa cu pꞌʌtic u janʌn
\r (Mt. 9.14‑17; Lc. 5.33‑39)
\p
\v 18 U camsʌwinicob Juan yejer camsʌwinicob a fariseojoꞌ tan u jamach pꞌʌticob u janʌnob soc u quiꞌ cꞌujinticob Cꞌuj. Caj tarob cꞌataꞌbir tiꞌ ten jun yarob mac caj u yaꞌarajob:
\p ―Biquinin u camsʌwinicob Juan yejer u camsʌwinicob a farisejoꞌ cu jamach pꞌʌticob u janʌnob soc u quiꞌ cꞌujinticob Cꞌuj, barej a camsʌwinicob mʌꞌ u jamach pꞌʌticob u janʌnob quir u quiꞌ cꞌujinticob Cꞌuj?
\p
\v 19 Jesús caj u yaꞌaraj tiꞌob:
\p ―A mac a cu bin u chꞌic u raqueꞌ, cu pʌyic u racꞌob quir u quiꞌ quiꞌ janʌnob. A tarobeꞌ, mʌꞌ tsoy wa cu tucricob.
\v 20 Barej wa cu cꞌuchur tu qꞌuinin cu bin, a tu chꞌaj u raqꞌueꞌ, jeroj a ray u qꞌuininoꞌ cu bin u jamach pꞌʌticob u janʌnob. Wa ber caꞌ bin xiquen a ray u qꞌuininoꞌ jach jaj cu bin u jamach pꞌʌticob u janʌnob in camsʌwinicob. 
\p
\v 21 Caj u yaꞌaraj Jesús:
\p ―Mʌꞌ tsoy xan, caꞌ a xaxactiquex a baꞌ caj a cʌnex tiꞌ a nunquirex yejer a baꞌ ca cʌniquex tiꞌ ten. Mʌꞌ ja wirej, mʌnaꞌ mac cu jompʌcꞌtic u rabir u nocꞌ yejer ricꞌben. Cu mosar a ricꞌbenoꞌ cu jatar, cu cochtar. Jach carim u jorir u nocꞌ u cochtar.
\v 22 Bayiriꞌ xan, mʌnaꞌ mac cu tꞌajic u cꞌab u wich uva ich u rabir yotꞌer chivo. Quireꞌ caꞌ bin pajnʌc, cu bujur, hasta u rʌc wecar u cꞌab uva. Cu rʌc jatar u yotꞌer chivo xan. A ricꞌben u cꞌab u wich uva, caꞌ u tꞌajej ich ricꞌben yotꞌer chivo soc mʌꞌ u bujur soc mʌꞌ u rʌc wecar u cꞌab uva.
\s U camsʌwinicob Jesús caj u jichꞌtob u pʌcꞌar u wich trigo tu qꞌuinin tu cu jesic u bʌjob winiquirob judío 
\r (Mt. 12.1‑8; Lc. 6.1‑5)
\p
\v 23 Raꞌ u qꞌuinin tu cu jesic u bʌjob u winiquirob judío, cu chꞌʌtob u cor mac Jesús, quet yejer u camsʌwinicob. Robob caj u tarob tu pach Jesús. U camsʌwinicob Jesús caj u jichꞌtajob u pʌcꞌar u wich trigo, u jantejob quireꞌ wichʌjob.
\v 24 A winiquirob judío a fariseojoꞌ tun, caj u yaꞌarob tiꞌ Jesús:
\p ―Iric a camsʌwinicob. Biquinin cu jichꞌticob u pʌcꞌar u wich trigo u qꞌuinin tu cu jesicob u bʌj u winiquirob judío. Quireꞌ cu beyajob tu qꞌuinin tu cu jesic u bʌjob u winiquirob judío.
\p
\v 25 Jesús caj u yaꞌaraj tiꞌ u winiquirob judío a fariseojoꞌ: 
\p ―Mʌꞌ wa ta xacajex tu tsꞌibaꞌan u tꞌʌn Cꞌuj tiꞌ David uch ber caj wichʌjij David yejer u racꞌob uch?
\v 26 Caj oquij David yejer u racꞌob ich naj tu tꞌinaꞌan yotꞌer chivo quir u cꞌujinticob Cꞌuj u winiquirob judío. Caj tsꞌaꞌb yoꞌoch pan ten a sacerdote. A ra u qꞌuininoꞌ tiꞌ yʌn u jach tsꞌurir sacerdote u cꞌabaꞌ Abiatar. A jeroj tuneꞌ, caj u jantajob David yejer u racꞌob quireꞌ wichʌjob, cax mʌꞌ tsoy u jantic a caj tsꞌaꞌb tiꞌ David ten sacerdote. Mʌꞌ ja wirej, raꞌ quir u tsꞌabʌr tiꞌ Cꞌuj, cu chen janticob a sacerdotejoꞌ.
\p
\v 27 Bayiriꞌ xan, caj u yaꞌaraj tiꞌob:
\p ―Mʌꞌ ja wirej, u qꞌuinin tu cu jesic u bʌjob raꞌ betaꞌb tiꞌ winic quir u jesic u bʌjob. Mʌꞌ betaꞌb winic ten Cꞌuj tiꞌ u qꞌuinin tu cu jesic u bʌjob.
\v 28 A tenoꞌ, baxuquenechex, chen a tenoꞌ cu tsꞌuririntiquen tu cotor baꞌ, inan a baꞌ cu yiric mac tu qꞌuinin tu cu jesicob u bʌj u winiquirob judío ―quij Jesús.
\c 3
\s A xiboꞌ a mʌꞌ u jitir u cꞌʌbeꞌ
\r (Mt. 12.9‑14; Lc. 6.6‑11)
\p
\v 1 Caj wʌcꞌʌs oquij Jesús ich u chan najir tu cu naj cꞌujintiob Cꞌuj u winiquirob judío ich u cajar Capernaum. Ti yʌn uch tuririꞌ xib a mʌꞌ u jitir u cꞌʌb.
\v 2 Yʌn jun yarob u cꞌat u pacꞌʌrob u pach Jesús rajen caj u quiꞌquiꞌ pʌctob quir yiricob wa jeꞌ u jawsic mac tu qꞌuinin tu cu jesic u bʌjob u winiquirob judío. 
\v 3 Jesús tun, caj u yaꞌaraj tiꞌ a mac a mʌꞌ u jitir u cꞌʌboꞌ:
\p ―Riqꞌuen caꞌ taquech chumuc tu yʌnoꞌonex, soc chʌcaꞌan yiriquech tu cotor mac.
\p
\v 4 Caj u yaꞌaraj tiꞌob
\p ―Yʌn baꞌ quir in cꞌatic techex ―quij Jesús―. Baꞌ cu chaꞌbʌr a toꞌonex caꞌ ic betex u tꞌʌn Moisés tu qꞌuinin tu quic jesic ic bʌj u winiquirob judío? Cꞌuchaꞌan yor mac u betic a baꞌ jach tsoy, wa cꞌuchaꞌan yor mac u betic a baꞌ cꞌas? Cꞌuchaꞌan yor mac u yamtic mac u jer, wa cꞌuchaꞌan yor mac u quinsic mac?
\p Barej a pimoꞌ mʌꞌ ju nucobiꞌ.
\v 5 Jesús caj u rʌc pʌctaj yirej jujuntur, jach tsꞌic u wich Jesús quireꞌ caj u yiraj mʌꞌ ju tucrob a mʌꞌ u jitir u cꞌʌb ten u yet winiquirob judío. Caj u yiraj jach chich u joꞌrob. Caj u yaꞌaraj tiꞌ a mac a mʌꞌ u jitir u cꞌʌboꞌ:
\p ―Tichꞌ a cꞌʌb caꞌanan.
\p A xiboꞌ caj u tichꞌ u cꞌʌb seb caj toc quiꞌ jaw u cꞌʌb. 
\v 6 Caj jocꞌ tun u winiquirob judío a fariseojoꞌ caj u muchꞌquintob u bʌj yejer u yet winiquirob judío a cu yaꞌaricob herodiano quireꞌ cu sayʌrob tu pach u rey Herodes. Caj u sebquintajob u muchꞌquinticob u bʌj quir u pꞌeriꞌquintajob u tucurob quir u quinsicob Jesús. 
\s A pimoꞌ ich u chiꞌ cꞌacꞌnab
\p
\v 7 Barej Jesús caj bin yejer u camsʌwinicob tu chiꞌ cꞌacꞌnab. Caj sayob tu pach ten Jesús a jach pim mac a tar u tarob tu ruꞌumin Galilea.
\v 8 Bayiriꞌ tarob tiꞌ u ruꞌumin Judea yejer a mac a cʌjaꞌanob tu cajar Jerusalén, yejer a mac a cʌjaꞌanob pichir u yaꞌarir Jordán tu cu tar qꞌuin, yejer a mac a cʌjaꞌan tu ruꞌumin Idumea, yejer a mac a cʌjaꞌanob baytʌc tu cajar Tiro yejer u cajar Sidón. Pꞌencʌch pim tarob yicnʌn Jesús quireꞌ caj u yubob a baꞌ caj u betaj Jesús a baꞌ a mʌnaꞌ mac iramʌn biqꞌuin.
\v 9 Quireꞌ jach manan pim a mac a tarob rajen Jesús caj u yaꞌaraj tiꞌ u camsʌwinicob caꞌ u cʌxejob chem quir u yocar. Yubic cu maxʌr. Yiric cu rʌc nactanticob u bʌj ich Jesús.
\v 10 Mʌꞌ ja wirej, caj u yirob caj u jawsaj yaꞌab mac rajen a mac a yajob cu nactanticob u bʌj ich Jesús caj u tʌrejob u nocꞌ quir u jawʌr u yajiriroꞌ.
\v 11 Wa ber a mac a acaꞌan quisin tiꞌ caj tarob caj u purajob u bʌj ʌcʌtan tiꞌ Jesús, cu cꞌam awʌt tu cu yaꞌaricob: 
\p ―A techoꞌ u pararech Cꞌuj.
\p
\v 12 Barej rajiꞌ Jesús caj u jach qꞌueyaj quisin soc mʌꞌ u yaꞌaricob mac Jesús.
\s Tetaꞌb ten Jesús a mac a cu bin u tsecꞌtaꞌr u tꞌʌn
\r (Mt. 10.1‑4; Lc. 6.12‑16)
\p
\v 13 A jeroj tuneꞌ, Jesús caj u nacajtaj u pꞌuc wits caj u pʌyaj a mac u cꞌat u pʌyic. Robob caj binob tiꞌ quir u camsaꞌrob.
\v 14 Caj u tetaj doce xib soc tiꞌ yʌnob tu yicnʌn, soc caꞌ bin tuchiꞌtacob ten Jesús quir u tsecꞌticob u tꞌʌn. 
\v 15 Bayiriꞌ xan, tsꞌaꞌb u mucꞌ tiꞌob ten Jesús quir u jocꞌsicob quisin, bayiriꞌ xan, tsꞌaꞌb u mucꞌ tiꞌob ten Jesús quir u jawsicob a mac a yajoꞌ.
\v 16 A jeraꞌ u cꞌabaꞌob a doce xiboꞌ a tetaꞌb ten Jesús. A jeraꞌ Simón a mac caj u tsꞌaj u cꞌabaꞌ Pedro.
\v 17 A jeraꞌ Jacobo u parar Zebedeo yejer Juan u yitsꞌin Jacobo, tiꞌ mac caj u tsꞌaj u jer u cꞌabaꞌob Boanerges, u cꞌat yaꞌariqueꞌ, U Parar A Cu Pecoꞌ, quireꞌ tsꞌicob.
\v 18 A jeraꞌ Andrés, a jeraꞌ Felipe, a jeraꞌ Bartolomé, a jeraꞌ Mateo, a jeraꞌ Tomás, a jeraꞌ Jacobo, u parar Alfeo, a jeraꞌ Tadeo, a jeraꞌ Simón, a cu sayʌr tu pach cananista. 
\v 19 A jeraꞌ Judas Iscariote, a mac pachir caj u cꞌubaj Jesús.
\s Pacꞌ u pach Jesús acaꞌan quisin tiꞌ
\r (Mt. 12.22‑32; Lc. 11.14‑23; 12.10)
\p Caj tsꞌoc u tetic Jesús tiꞌob yet binacob tu yatoch. 
\v 20 U jer jach pim tarob rajen mʌꞌ u chaꞌbʌr u janʌn quireꞌ jach pim cu tarob.
\v 21 Barej caj u yubajob u jach u bʌjob Jesús, rʌc tarob quir u chuquicob Jesús quireꞌ cu yaꞌaricob uch:
\p ―Jaj ix tʌcoj, mʌnaꞌ u yor a Jesúsoꞌ.
\p
\v 22 Bayiriꞌ xan, u camsʌyʌjirob u tꞌʌn Moisés a tar u tarob tu cajar Jerusalén. Pacꞌ u pach Jesús ten u camsʌyirob u tꞌʌn Moisés quireꞌ caj u yaꞌarob wa acaꞌan quisin tiꞌ:
\p ―Acaꞌan Beelzebú tiꞌ mʌꞌ raꞌ tsꞌic u muqꞌuiꞌ u tsꞌurir quisin. U mucꞌ u tsꞌurir quisin Beelzebú caj u jocꞌsej quisin.
\p
\v 23 Rajen Jesús caj u tꞌʌnajob caꞌ tacob u muchꞌquinticob u bʌj caj u yaꞌaraj tiꞌob tu cu camsicob:
\p ―A Satanásoꞌ bic tabar u wʌcꞌʌs bʌjiriꞌ u jocꞌsic? Mʌꞌ cꞌuchaꞌan yor u jocꞌsic u wʌcꞌʌs bʌjiriꞌ.
\v 24 Mʌꞌ ja wirej, wa ju wʌcꞌʌs bʌjiriꞌ cu bin tsꞌictar ich u ruꞌumin tu cu reyinticob rey, jeꞌ u rʌc chꞌesicob u bʌj.
\v 25 Cax wa ju wʌcꞌʌs bʌjob tu yatoch cu tsꞌictarob jeꞌ u rʌc quinsicob u bʌj.
\v 26 Bayiriꞌ xan, a quisinoꞌ, u jach cꞌabaꞌ Satanás, wa ju yet quisinin bin u jocꞌsejob, jeroj caj u toc chꞌesob u bʌj, jeroj mʌnaꞌ quisin.
\p
\v 27 ’Bic tabar in jocꞌsic quisin wa mʌꞌ tin yʌn chꞌesaj u mucꞌ u jach tsꞌurir quisin, Satanás? A baywoꞌ ―quij Jesús―, cꞌuchaꞌan in wor in jocꞌsic quisin. Quireꞌ aroꞌ irej a mac a oquij ich yatoch a mac chich u mucꞌ irej wa tu cꞌʌxaj soc u rʌc chꞌic u baꞌtac.
\p
\v 28 ’Taj quin waꞌaric techex, tu cotor u siꞌpirob bin jawsac tiꞌ mac ten Cꞌuj, cax a baꞌ pochꞌnʌjij uch bin jawsac tiꞌ xan.
\v 29 Barej, a mac a cu pꞌastic u Tajꞌor u Pixam Cꞌuj mʌꞌ biqꞌuin cu bin jawsabir u siꞌpir, munt qꞌuin sipnʌjij. 
\p
\v 30 Baxuc caj u yaꞌaraj Jesús quireꞌ yʌn jun yarob tus yarmʌnob uch: “Yʌn quisin tiꞌ Jesús.”
\s U nʌꞌ yejer u yitsꞌinob Jesús
\r (Mt. 12.46‑50; Lc. 8.19‑21)
\p
\v 31 Caj tarob tun u yitsꞌinob yejer u nʌꞌ Jesús, chen pꞌatob ich tancab yatoch tu yʌn Jesús, caj u tuchiꞌtajob tꞌʌnbir.
\v 32 A yaꞌab macoꞌ tiꞌ curaꞌanob yicnʌn Jesús, robob caj u yaꞌarajob tiꞌ:
\p ―Iric, a nʌꞌ cu tꞌʌniquech, tiꞌ yʌn yejer a witsꞌinob ich tancab cu cʌxtiquech yiriquech a nʌꞌ yejer a witsꞌinob. 
\p
\v 33 Jesús caj u nuncaj tiꞌob tan yaꞌaric:
\p ―Taj ca waꞌaric raꞌ in nʌꞌ yejer in witsꞌinob.
\p
\v 34 Caj u pʌctaj a jach yaꞌab mac a curaꞌanob yicnʌn Jesúsoꞌ, caj u yaꞌaraj:
\p ―A jeꞌraꞌ irob in nʌꞌ, a jeraꞌ irob in witsꞌinob. 
\v 35 Quireꞌ cax a mac a cu betic a baꞌ u cꞌat Cꞌuj raꞌ irej in nʌꞌ raꞌ irej in jach itsꞌinob.
\c 4
\s Yʌjqꞌuichꞌinyʌjir
\r (Mt. 13.1‑9; Lc. 8.4‑8)
\p
\v 1 Jesús caj wʌcꞌʌs bin ich u chiꞌcꞌacnab u cꞌabaꞌ Galilea caj u yʌnx chun u camsic bʌytʌc tu yʌn u chiꞌcꞌacꞌnab. Jach yaꞌab mac caj u muchꞌquintob u bʌj yicnʌn Jesús rajen caj oquij ich chem a tiꞌ yʌn ich cꞌacꞌnab caj curajij. Tu cotor a mac tiꞌ yʌnob ich ruꞌum tu chiꞌ cꞌacꞌnab.
\v 2 Caj u yaꞌaraj yaꞌab baꞌ tu cu camsaꞌrob. Tu cu camsaꞌrob caj u yaꞌaraj tiꞌob:
\p
\v 3 ―Uꞌyex a baꞌ quin camsic techex. Caj bin mac quir u pʌqꞌuic u pʌcꞌar ich u cor.
\v 4 A mac caj bin u qꞌuichꞌintej ich u cor. Cariqueꞌ caj u qꞌuichꞌintaj caj rub jun yar u pʌcꞌar ich tam bej. Caj tar u ruqꞌuic chꞌichꞌ.
\v 5 U jer jun yar rub ich tunich tu mʌꞌ pim u ruꞌumin. Seb caj tsꞌernʌj quireꞌ jay u ruꞌumin, rajen seb caj jocꞌ.
\v 6 Barej caj naquij qꞌuin caj quimij mʌꞌ tu bin ocac u mots, rajen quimij.
\v 7 U jer jun yar caj u rʌc qꞌuichꞌintaj, caj rub ich qꞌuiꞌix. Caj chꞌijij caj rʌc bobostaꞌb ten qꞌuiꞌix mʌꞌ ju tsꞌajaj u wich.
\v 8 U jer jun yar caj u rʌc caꞌ qꞌuichꞌintaj ich u jer u ruꞌumin. Jach tsoy u ruꞌumin. Caj tsꞌernʌj, caj chꞌijij, caj u netsꞌaj u wich. Cien caj u toc tsꞌaj u wich. U jer caj u tsꞌaj u wich sesenta. U jer caj u tsꞌaj u wich treinta.
\p
\v 9 Uꞌyex baꞌ quin camsic techex soc a wuꞌyiquex, soc a najtiquex a baꞌ u cꞌat yaꞌaric.
\s Biquinin cu camsic tiꞌob
\r (Mt. 13.10‑17; Lc. 8.9‑10)
\p
\v 10 Caj tsꞌoc u camsaꞌ ten Jesús caj u jutsꞌ u bʌj u doce camsʌwinicob Jesús tu yicnʌn, quet yejer a mac a tiꞌ yʌnob bʌytʌc tiꞌ. Caj araꞌb tiꞌ:
\p ―Biquinin ca camsic a pimoꞌ bic tabar u qꞌuichꞌintic u pʌcꞌar ich u cor?
\p
\v 11 Caj u yaꞌaraj tiꞌob:
\p ―Jeꞌ u tsꞌic techex Cꞌuj quir a najtiquex a baꞌ caj u mucu araj ten Cꞌuj tiꞌ Cristo. Chen a pimoꞌ mʌꞌ ju bin u najtejob quireꞌ mʌꞌ ju cꞌʌmajob u tꞌʌn Cꞌuj. Tu chen soꞌsoc uꞌyajob camsaꞌrob.
\v 12 Rajen, a mac a mʌꞌ yerob Cꞌuj a cu yubicob in camsicob cu chen uꞌyicob cax cu yubicob mʌꞌ ju najtejob. Mʌꞌ bin u cꞌʌꞌoticob soc u yacsicob tu yorob soc u tocaꞌrob ten Cꞌuj.
\s Jesús cu tajquintic u camsʌwinicob a baꞌ quiriꞌ mʌꞌ ju najtajobiꞌ
\p
\v 13 Caj u yaꞌaraj tiꞌob:
\p ―Mʌꞌ ja najtajex a jeꞌ baꞌ caj in camsajechex. Bic tabar ca bin a najtex tu cotor a baꞌ ca soꞌsoc uꞌyiquex in camsiquechex?
\v 14 A mac a caj bin u qꞌuichꞌintic u pʌcꞌar ich u cor rajiꞌ cu qꞌuichꞌintic u yijir u tꞌʌn Cꞌuj.
\v 15 Yʌn jun yarob mac ich tan bej tu cu qꞌuichꞌitaꞌr u tꞌʌn Cꞌuj, barej caj u yubob seb caj tar Satanás u taquic tiꞌ mac u tꞌʌn Cꞌuj a baꞌ yubmʌniꞌ soc mʌꞌ ju najticobiꞌ, irej u yijir a rub ich tan bej a caj in camsajechex sam.
\v 16 U jer jun yarob mac, robob irob u yijir a qꞌuichꞌintaꞌb ich u tunich robob caj yubob u tꞌʌn Cꞌuj quiꞌ yorob caj u cꞌʌmajobiꞌ.
\v 17 Quireꞌ robob irej u yijir a mʌꞌ tam oc u mots. Seb caj u toc pꞌʌtajob u tꞌʌn Cꞌuj caj yubajob u tumtaj u yorob. Caj yubajob u chucur u pachob quireꞌ u tꞌʌn Cꞌuj, rajen caj u pꞌʌtajob u tꞌʌn Cꞌuj.
\v 18 U jer jun yarob irob u yijir a qꞌuichꞌintaꞌb a rub ich qꞌuiꞌix, robob a tu yubob u tꞌʌn Cꞌuj.
\v 19 Chen a jeꞌ macaꞌ cu tucric u tꞌajar u baꞌtac yejer u tꞌajar u taqꞌuin yejer u beyaj. A baꞌ yʌn yocꞌocab cu pachtic, rajen bobʌstaꞌ u tꞌʌn Cꞌuj soc mʌꞌ cꞌuchaꞌan yor u quiꞌquintic u yor Cꞌuj irej qꞌuiꞌix caj u bobʌstaj tu qꞌuichꞌintaꞌb.
\v 20 A rub yijir tu tsoy u ruꞌumin raꞌ quir u camsiquechex a mac a caj u jach cꞌʌmaj u tꞌʌn Cꞌuj, caj u tsꞌaj u wich cien, raꞌ cu quiꞌ man tu tsoyir. U jer caj u caꞌ tsꞌajaj u wich sesenta, raꞌ cu man tu tsoyir chen mʌꞌ cꞌuchaꞌan yor tiꞌ a caj u tsꞌaj u wich cien. U jer caj u tsꞌajaj u wich treinta, raꞌ cu man tu tsoyir chen mʌꞌ cꞌuchaꞌan yor tiꞌ a caj u tsꞌajaj u wich sesenta. 
\s U tꞌʌn quir u camsic tiꞌ quib
\r (Lc. 8.16‑18)
\p
\v 21 Bayiriꞌ xan Jesús caj u yaꞌaraj tiꞌob:
\p ―Mʌnaꞌ mac cu yacsic u quib yaram u chꞌac, mʌꞌ ich yaram rec xan. Mʌꞌ ja wirej, cu tꞌʌquintic caꞌanan quir u yercꞌacꞌtic yatoch. Rajen a baꞌ cu camsic tiꞌob irej wa tꞌʌbaꞌan u quib.
\v 22 Bayiriꞌ xan, tu cotor baꞌ a mucutacaꞌan tu cu bin u reyinticob Cꞌuj bajeꞌrer, caꞌ bin cꞌuchuc tu qꞌuinin jeꞌ u jocꞌar u tajireꞌ. Baxuc tu cotor mac jeꞌ u cꞌʌꞌotic caꞌ bin cꞌuchuc tu qꞌuinin jeꞌ u yubiqueꞌ.
\v 23 Uꞌyex baꞌ quin camsic techex soc a wuꞌyiquex soc a najtiquex a baꞌ u cꞌat yaꞌaric.
\p
\v 24 Caj u yaꞌaraj tiꞌob xan:
\p ―Quiꞌ uꞌyex soc mʌꞌ ju tubur techex a baꞌ ca wuꞌyiquex. Wa chichin ca wuꞌyiquex u tꞌʌn Cꞌuj chichin cu bin u camsic techex. Wa yaꞌab ca wuꞌyiquex u tꞌʌn Cꞌuj jeroj yaꞌab cu bin u camsic techex.
\v 25 A mac a yʌn u tꞌʌn Cꞌuj tiꞌeꞌ u cꞌat u quiꞌ najtic, Cꞌuj cu bin u camsic yaꞌab. Chen a mac tiꞌ, chichin u tꞌʌn Cꞌuj, mʌꞌ u cꞌat u quiꞌ najtic, jeꞌ u pꞌʌtiqueꞌ. 
\s Quir u camsic tiꞌ u yijir a cu chꞌijireꞌ
\p
\v 26 Jesús tu cu camsic caj u yaꞌaraj xan:
\p ―Tu cu bin u reyinticob Cꞌuj raꞌ irej tu cu man mac cu pʌqꞌuic u yijir ich ruꞌum.
\v 27 Rajraꞌ cu wenʌn, rajraꞌ cu yajar, jeroj u man u qꞌuinin cu yiric a baꞌ u cꞌat. U yijir a caj u pʌcꞌajeꞌ tsꞌernʌj, jeroj cu chꞌijir. Chen mʌꞌ yer bic tabar u chꞌijiriꞌ. 
\v 28 Mʌꞌ ja wirej, u bʌjiriꞌ u ruꞌum tu junan cu chꞌisic u yijir a pʌcꞌaꞌan tiꞌ, cu cꞌʌs chꞌijireꞌ, cu jocꞌar u reꞌ. Cu tsꞌocar u chꞌijireꞌ cu jobar yiꞌij. Cu jobar yiꞌij cu tar u wich.
\v 29 Cu tijireꞌ seb cu jaqꞌuic quireꞌ cꞌuchuc tu qꞌuinin u jaqꞌuic.
\s Quir u camsic tiꞌ u yijir mostaza
\r (Mt. 13.31‑32; Lc. 13.18‑19)
\p
\v 30 Jesús caj u yaꞌaraj xan:
\p ―An bic jeꞌ in quetquintic tu cu bin u reyinticob Cꞌuj? An bic tabar jeꞌ in camsic techex? A baꞌ tꞌʌnin quin waꞌaric techex?
\v 31 An ten bic u chꞌijir u pʌcꞌar mostaza xib ich ruꞌum. Mʌnaꞌ u jer pʌcꞌar jach ne mijin yijir mostaza.
\v 32 Cu chꞌijireꞌ jach manan u xitꞌir u cꞌʌb. U jer pʌcꞌar mʌꞌ u ne xitꞌir u cꞌʌb. Hasta chꞌijir u cheꞌer a jeroj, cu tar chꞌichꞌ u cꞌʌxicob u cꞌuꞌ ich u boꞌoy.
\s Biquinin Jesús cu camsic a jeraꞌ
\r (Mt. 13.34‑35)
\p
\v 33 Yejer jach yaꞌab a jeꞌ camsaꞌbir u tꞌʌn an ten bic a jeraꞌ caj u yaꞌaraj tiꞌob u tꞌʌn hasta tu cꞌuchaꞌan yorob u najtejob.
\v 34 Wa mʌꞌ yejer a camsaꞌbir tꞌʌn mʌꞌ ju tsicbʌtej tiꞌob baꞌ, barej caj u toc araj tu cotor baꞌ tiꞌ u camsʌwinicob caj bin tu junanob.
\s Jesús tu tꞌʌnaj yicꞌar quir u chꞌenan bayiriꞌ u yamin 
\r (Mt. 8.23‑27; Lc. 8.22‑25)
\p
\v 35 Raꞌiriꞌ u qꞌuinin caj bin qꞌuin caj u yaꞌaraj Jesús tiꞌ u camsʌwinicob:
\p ―Cuxex tanxer ich cꞌacꞌnab.
\p
\v 36 Caj tsꞌoc u tuchiꞌtic a yaꞌab macoꞌ, toc tiꞌ yʌn chem caj toc oquij Jesús quet yejer u camsʌwinicob. Yet binacob u jer jun yarob chem.
\v 37 A jeroj caj tar chꞌic yum yicꞌar, caj tar u yamin xan, tan u burur u chemin, tabar u jurur u chem.
\v 38 Rajiꞌeꞌ, tan u wenʌn. Yʌn u cꞌanjoꞌr tu cu wenʌn ich yach chem. Aꞌas Jesús ten u camsʌwinicob, caj u yaꞌarob tiꞌ:
\p ―In wʌjcamsʌyʌjirechob, mʌꞌ wa ca tucriquenob? Tabar in jururob.
\p
\v 39 Caj ajij Jesús caj u tꞌʌnaj yicꞌar caꞌ chꞌenac:
\p ―Xurej, icꞌ ―quij―. Mʌꞌ a tar.
\p A jeroj, chꞌen u tar yicꞌar, caj chꞌen u yamin cꞌacꞌnab xan.
\v 40 Jesús caj u yaꞌaraj tiꞌob:
\p ―Biquinin tu jacꞌsaj a worex, mʌꞌ wa ja wacsmʌnex ta worexiꞌ?
\p
\v 41 Caj u jach chꞌaj chꞌic yum sajaquirob, caj u pacran arajob ich u yet camsʌwinicob:
\p ―A mac a jeꞌ xibaꞌ cu yubaꞌr u tꞌʌn cax a icꞌoꞌ cax u yamin cꞌacnab cu quibicob u tꞌʌn Jesús?
\c 5
\s Jesús cu jawsic a mac acaꞌan quisin tiꞌeꞌ
\r (Mt. 8.28‑34; Lc. 8.26‑39)
\p
\v 1 Caj cꞌuchob pichir cꞌacꞌnab Galilea, tiꞌ u ruꞌumin a cu yaꞌaricob Gadarajoꞌ.
\v 2 Jesús tan tu jocꞌar ich chem, a jeroj seb caj jocꞌ tu tꞌajaꞌan u baquer u quimiriroꞌ tuririꞌ xib a mac acaꞌan quisin tiꞌeꞌ.
\v 3 Tiꞌ cʌjaꞌan ich tu tꞌajaꞌan u baquer u quimiriroꞌ. Mʌnaꞌ mac cꞌuchaꞌan yor u cꞌʌxic cax yejer mascab a irej sumoꞌ.
\v 4 A uchoꞌ chuquij ten u racꞌob caj cꞌʌrij yoc yejer mascabir a irej sumoꞌ, bayiriꞌ xan yejer u mascabir cꞌʌb chen caj u pꞌicaj u mascabir cꞌʌb caj u xexetꞌaj u mascabir yoc. Mʌnaꞌ mac cꞌuchaꞌan yor u suquintic quireꞌ jach manan chich u mucꞌ.
\v 5 U burur acꞌbir yejer u burur qꞌuin cu man uch awʌt u caꞌ ich tu tꞌajaꞌan u baquer u quimiriroꞌ, bayiriꞌ xan, ich wits, bayiriꞌ xan, cu man u cꞌubic u bʌj yejer tunich.
\v 6 Barej caj u yiraj Jesús u tar nachir, raꞌ caj u cꞌʌnaj yacab caj xonraj ich Jesús.
\v 7 Cꞌam awʌtnʌjij caj u yaꞌaraj:
\p ―Baꞌ a cꞌat ten Jesús? A techoꞌ u pararech Cꞌuj a mac u Cꞌujir caꞌanan. Quin chich cꞌatic tech tu quin chuquic Cꞌuj, mʌꞌ a tsꞌic ten in mucꞌyaj.
\p
\v 8 Mʌꞌ ja wirej, baxuc caj yaꞌaraj a mac a acaꞌan quisin tiꞌeꞌ quireꞌ sam araꞌb tiꞌ ten Jesús:
\p ―Joqꞌuen tiꞌ a macaꞌ a techoꞌ quisinech.
\p
\v 9 Sam caj u cꞌataj tiꞌ quisin:
\p ―Baꞌ a cꞌabaꞌ?
\p Caj u nuncaj, tan yaꞌaric:
\p ―Legión in cꞌabaꞌ. Mʌꞌ ja wirej, pimenob acaꞌanenob tiꞌ.
\p
\v 10 Rajraꞌ tan u cꞌataꞌ tiꞌ Jesús ten a mac a acaꞌan quisinoꞌ mʌꞌ u tuchiꞌtaꞌrob tanxer ruꞌum.
\v 11 Mʌꞌ nenach tu yʌn Jesús yejer u camsʌwinicob, tiꞌ yʌn yʌrʌcꞌ cajij qꞌuecꞌʌn, jach pimob. Cu manob u janʌnob xiw ich pꞌuc wits.
\v 12 Caj u chich cꞌatajob tiꞌ tu cotor a quisinoboꞌ a acaꞌanob ich a ray xiboꞌ tan yaꞌaricob:
\p ―Arej in binob ich a ray cajij qꞌuecꞌʌnob quir in caꞌ wocarob ich a ray qꞌuecꞌʌnob.
\p
\v 13 Seb chaꞌb tiꞌob ten Jesús, a jeroj caj jocꞌob a quisinob caj ocob ich cajij qꞌuecꞌʌnob. Tu cotor a cajij qꞌuecꞌʌnoꞌ caj u cꞌʌnajob yacab tu chꞌincaꞌan wits caj u rʌc purob u bʌj ich cꞌacꞌnab caj rʌc quimij. Dos mil qꞌuecꞌʌn caj quimij.
\p
\v 14 Rʌc putsꞌob tun, a mac a cu cʌnanticob yʌrʌcꞌ cajij qꞌuecꞌʌn quireꞌ jaquij yorob. Jeroj caj binob u jumintejob ich u cajarob, bayiriꞌ xan ich mac a tiꞌ yʌnob tu corob. Caj jocꞌob u yirob a baꞌ u ber tiꞌ.
\v 15 Caj rʌc cꞌuchob yicnʌn Jesús. Caj u yirajob a mac a acaꞌan tiꞌ a quisinoꞌ Legión uch, a jeroj caj u yirajob curucbar u buquinmʌn u nocꞌ, bajeꞌrer yʌn yor xan, robob caj u chꞌajob sajquir.
\v 16 A yʌjꞌirirob caj u tsicbʌtajob baꞌ u ber tiꞌ a mac a acaꞌan quisin tiꞌeꞌ Legión u cꞌabaꞌ uch, bayiriꞌ xan, a baꞌ u ber tiꞌ a cajij qꞌuecꞌʌnoꞌ.
\v 17 Rajen caj yʌnxchun u yaꞌaricob tiꞌ Jesús caꞌ xic Jesús nachir soc mʌꞌ tiꞌ yʌniꞌ.
\p
\v 18 Jesús caj u yocar ich chem caj cꞌuchij a mac a acaꞌan quisin tiꞌeꞌ a Legión u cꞌabaꞌ ucheꞌ, caj u chich cꞌataj tiꞌ caꞌ xic tu pach Jesús.
\v 19 Barej a Jesúsoꞌ mʌꞌ ju chaj u tar tu pachiꞌ barej caj u yaꞌaraj tiꞌ:
\p ―Xen ich a watoch ich a bʌjob. Xen jumintej an ten bic caj in yajquin tech. Arej yubej u jach carem beyaj caj u betaj Cꞌuj tiꞌ tech. Arej yubej bic jocꞌsaꞌb tech quisin ten Jaj Tsꞌur.
\p
\v 20 A ray xiboꞌ a jocꞌsaꞌb u quisininoꞌ caj jocꞌ caj yʌnxchun u tsicbʌtic u ruꞌumin Decápolis tu cotor baꞌ a betaꞌb tiꞌ ten Jesús. Tu cotor mac a caj u yubajob caj jaqꞌuij yorob.
\s U parar a Jairojoꞌ xquic yejer a xquic a tu tʌraj u nocꞌ Jesús
\r (Mt. 9.18‑26; Lc. 8.40‑56)
\p
\v 21 Barej Jesús caj u wʌcꞌʌs chꞌʌctaj a cꞌacꞌnaboꞌ ich chem tanxer pichir. Tiriꞌ ich chiꞌ cꞌacꞌnab caj u muchꞌquintajob u bʌj a pimoꞌ ich yicnʌn Jesús.
\v 22 Caj cꞌuchij tuririꞌ xib u jach tsꞌurir u chan najir tu cu naj cꞌujinticob Cꞌuj u winiquirob judío, Jairo u cꞌabaꞌ. Barej caj u yiraj Jesús caj tar pꞌuxtar ʌcʌtan Jesús ich yoc.
\v 23 Caj u chich cꞌataj tiꞌ, tan yaꞌaric:
\p ―Cojen ―quij―, jawsej in chan parar xquic quireꞌ tabar u quimin. Cojen caꞌ a tsꞌancꞌʌbtej caꞌ jawac, soc u cuxtar.
\p
\v 24 Caj bin Jesús yejer rajiꞌ, barej jach pim caj sayob tu pach Jesús, cu rʌc nactanticob u bʌj yicnʌn Jesús. 
\v 25 Tiriꞌ ich a pimoꞌ a sayob tu pach Jesús tiꞌ yʌn tuririꞌ xquic. Mʌꞌ u tsoytar uch. Yʌn manij doce yaxqꞌuin caj u cʌnaj u yajir.
\v 26 Cax tsꞌacʌc ten a mac a yerob tsꞌac mʌꞌ u tsoytar quireꞌ aroꞌ caj u rʌc xupaj u taqꞌuin yejer u baꞌtac, barej mʌꞌ yamtaꞌbiꞌ chen cu jach quiꞌ cꞌastar.
\v 27 A ray xquicoꞌ caj u yubaj tsicbʌtaꞌr Jesús. Caj cꞌuchij ich u pimʌn a yajeꞌ caj tar tu pach Jesús caj u tʌraj u nocꞌ Jesús.
\v 28 Quireꞌ cu yaꞌaric:
\p ―Wa quin tʌric u noqꞌueꞌ, chen u nocꞌ quin tʌriqueꞌ, jeꞌ in tsoytareꞌ.
\p
\v 29 Seb caj tsꞌoc u tʌric u nocꞌ Jesús tsits u qꞌuiqꞌuer a xquicoꞌ, caj u yubaj tu winquirir caj jawij.
\v 30 Jeroj seb caj u yubaj Jesús caj u jawsaj u yajir mac quireꞌ caj u yubaj u bin u mucꞌ caj tsꞌoc u tarʌr u nocꞌ. Jeroj caj u sut u bʌj caj u pʌctaj a pimoꞌ, caj cꞌataꞌb tiꞌ:
\p ―Mac, tʌr in nocꞌ? ―quij Jesús.
\p
\v 31 U camsʌwinicob Jesús caj u yaꞌarajob tiꞌ:
\p ―Iric a jach pim mac a cu nactanticob u bʌj ta wicnʌn, biquinin ca waꞌaric: “Mac tʌr in nocꞌ?”
\p
\v 32 Jesús rajiꞌ caj u pʌctaj a mac a u bʌcꞌrismʌnobiꞌ Jesús quir yiric a mac tʌr u nocꞌ.
\v 33 A xquic tunoꞌ, sajacchʌjij cu quiquirʌncʌr quireꞌ yer baꞌ u ber tu winquirir caj u nʌtsꞌaj u bʌj yicnʌn Jesús caj xonrʌj caj u yaꞌaraj tiꞌ tu cotor jach jaj. 
\v 34 Jesús caj u yaꞌaraj tiꞌ:
\p ―Xquic, quireꞌ caj a wacsaj ta wor tiꞌ ten rajen jawech. Xen in jach yajech caꞌ quiꞌac a wor. Caꞌ quiꞌ tsoyaquech. 
\p
\v 35 Mʌꞌ toy tsꞌocaquiꞌ u tsicbar Jesús, jeroj caj cꞌuchob jun yarob mac yicnʌn Jairo, tiꞌ u tarob ich yatoch Jairo u jach tsꞌurir u chan najir tu cu naj cꞌujinticob Cꞌuj u winiquirob judío, caj tarob caj u yaꞌarajob:
\p ―Quimij ―quij yaꞌaraꞌ tiꞌ Jairo― a chan parar xquic. Tsireꞌej, cax mʌꞌ u tar a wʌjcamsayʌjir.
\p
\v 36 Barej seb caj u yubaj Jesús rajen caj u yaꞌaraj tiꞌ Jairo:
\p ―Mʌꞌ a chꞌic sajaquir, chen acsej ta wor ten. Yʌn tsireꞌej yaꞌaricobeꞌ quim a chan parar xquiqueꞌ.
\p
\v 37 Mʌꞌ ju chaj u bin mac tu pach Jesús, chen Pedro bin tu pach Jesús yejer Jacobo yejer Juan, u yitsꞌin Jacobo. 
\v 38 Caj cꞌuchob taroꞌ tu yatoch u jach tsꞌurir u chan naj tu cu naj cꞌujinticob Cꞌuj u winiquirob judío caj u yiraj jumrac yocꞌarob quireꞌ cu yacꞌticob.
\v 39 Caj tsꞌoc u yocareꞌ caj u yaꞌaraj tiꞌob:
\p ―Biquinin a jumrac a wocꞌarex? A tenoꞌ quin wiric wenʌn u caꞌ, cax a techexoꞌ ca wiriquex quimen a chan xquicoꞌ. 
\p
\v 40 Caj pꞌastaꞌb Jesús ten a mac a tiꞌ yʌnob tu yatoch Jairo quireꞌ yerob jach quimij a chan xquicoꞌ. Barej rajiꞌeꞌ caj tsꞌoc u rʌc jocꞌsic tu cotor mac tancab, caj acsaꞌb u tet yejer u nʌꞌ a chan xquicoꞌ yejer a mac a yet taracobeꞌ caj ocob tu quimen a chan xquicoꞌ. 
\v 41 Jesús caj u mʌchaj u cꞌʌb a chan xquicoꞌ caj u yaꞌaraj tiꞌ:
\p ―Talita cumi ―u cꞌat yaꞌaric: Chan xquic quin waꞌaric tech, riqꞌuen.
\p
\v 42 Seb caj riqꞌuij a chan xquicoꞌ, caj yʌnxchun u ximbar quireꞌ yʌn doce yaxqꞌuin tiꞌ uch. Seb caj jaqꞌuij yorob, jach manan caj jaqꞌuij u yorob.
\v 43 Barej rajiꞌ caj u jach chich araj tiꞌob:
\p ―Mʌꞌ a yʌn aquex tiꞌ mac.
\p Caj u yaꞌaraj caꞌ tsꞌabac u janʌn a chan xquicoꞌ.
\c 6
\s Pꞌuspachtaꞌb Jesús ten mac tu cajar Nazaret
\r (Mt. 13.53‑58; Lc. 4.16‑30)
\p
\v 1 Caj joqꞌuij ich Jairo caj bin tu jach cajar. Yet binacob u camsʌwinicob Jesús.
\v 2 Caj cꞌuchij tu qꞌuinin tu cu jesicob u bʌj u winiquirob judío caj oc tu chan najir tu cu naj cꞌujinticob Cꞌuj u winiquirob judío caj oc quir u camsic tiꞌob. Yaꞌab mac a caj u yubobeꞌ, jʌprʌj u chiꞌob quireꞌ a baꞌ camsaꞌbob. Caj u yaꞌarajob:
\p ―A tub u tar tiꞌ a ray xiboꞌ a jeꞌ baꞌraꞌ? Bic tabar tsꞌaꞌb u tucur a tiꞌeꞌ a mʌꞌ cꞌuchaꞌan yor u betaj a baꞌ a mʌnaꞌ mac yiramʌn, mʌꞌ biqꞌuin uch a cu jacꞌar u yor mac.
\v 3 A ray xiboꞌ mʌꞌ wa raꞌ cu suscheꞌ uchiꞌ, u parar María, u sucuꞌun Jacobo José, Judas yejer Simón? Mʌꞌ wa tiꞌ yʌnʌnob xan tu yʌnoꞌonex u yitsꞌinob a xquicob?
\p Rajen mʌꞌ ju sʌjtajobiꞌ cu pꞌuspachticob tiꞌ.
\v 4 Barej Jesús caj u yaꞌaraj tiꞌob:
\p ―U yʌjtseqꞌuir u tꞌʌn Cꞌuj, a tsꞌaꞌb u tucureꞌ ten Cꞌuj quir u tsicbar a baꞌ u cꞌat Cꞌuj mʌꞌ u cꞌat yirir ten yet cajarob tu jach cajar. Cax u wʌcꞌʌs u bʌjob mʌꞌ u cꞌat yiricob. Chen a mac cʌjaꞌan nach u cꞌat yubicob. 
\p
\v 5 A taroꞌ mʌꞌ cꞌuchaꞌan yor u betic a baꞌ mʌnaꞌ mac yiramʌnob uch mʌꞌ biqꞌuin chen caj u jawsaj jun yarob a mac a yajoꞌ. Caj u tsꞌancꞌʌbtaj quir u jawarob.
\v 6 A Jesusoꞌ jacꞌaꞌan yor tiꞌob quireꞌ mʌꞌ ju yacsajob tu yorob. Pachir Jesús caj cꞌuchij tu chan cajarob a rʌc bʌcaꞌan tiꞌ u jach cajar Jesús, caj u camsaj tiꞌob. 
\s U beyajob a docejoꞌ
\r (Mt. 10.5‑15; Lc. 9.1‑6)
\p
\v 7 Jeroj, caj tꞌʌnaj yicnʌn u doce camsʌwinicob, caj yʌnxchun u tuchiꞌticob caꞌcaꞌturiꞌ, caj u tsꞌajaj u mucꞌ tiꞌob quir u jocꞌsicob u quisininob.
\v 8 Caj u jach araj tiꞌob:
\p ―Mʌꞌ a chꞌiquex bar ich a ber. Chen xomteꞌ ca chꞌiquex, baxuc chim mʌꞌ a chꞌiquex. Baxuc a woj wajex mʌꞌ a chꞌiquex, baxuc a taqꞌuinex mʌꞌ a chꞌiquex ich u poxajir a taqꞌuinex. 
\p
\v 9 Chen a pechꞌ xʌnʌb ca chꞌiquex, baxuc tuririꞌ a noqꞌuex a chꞌiquex.
\v 10 Caj u yaꞌaraj tiꞌob:
\p ―Wa ber caꞌ bin acsaquechex ich naj caꞌ pꞌataquechex hasta ca jocꞌarex ca caꞌ binex.
\v 11 Wa ca cꞌuchurex ich mac a mʌꞌ u cꞌat u yacsiquechex a mʌꞌ u cꞌat u yubicob a tꞌʌnex, caꞌ jocꞌaquechex tiꞌ taroꞌ. Puxtex u noy ruꞌum ta woquex soc yerob yʌn u siꞌpirob quireꞌ mʌꞌ u cꞌatob yubejob a tꞌʌnex. Jach taj quin waꞌaric tiꞌ techex, a ray macoꞌ ich a ray cajaroꞌ jach manan caꞌ bin mucꞌyajnʌcob tu qꞌuinin u xur tꞌʌn, chen a mac a cʌjaꞌanob uch tu cajarjob Sodoma yejer u cajar Gomorra mʌꞌ nejach bin mucꞌyajnʌcobiꞌ. 
\p
\v 12 Jeroj, u doce camsʌwinicob caj jocꞌobeꞌ caj u tsecꞌtajob tiꞌ mac caꞌ u cꞌaxej u yorob caꞌ u pꞌʌtejob u cꞌasir tu cu manob.
\v 13 Bayiriꞌ xan, caj u jocꞌsajob yaꞌab quisin tu acaꞌanob ich mac, caj u jicꞌtajob tsats quir u jawʌr mac a yajoꞌ, jach yaꞌab jawij.
\s Quinsaꞌb Juan a cu yacsic jaꞌ tu joꞌr mac
\r (Mt. 14.1‑12; Lc. 9.7‑9)
\p
\v 14 Bajeꞌrer caj u yubaj rey Herodes u tsicbʌticob u cꞌabaꞌ Jesús a Herodesoꞌ rajen yaꞌab mac tus pacꞌ Juan a cu yacsic jaꞌ tu joꞌr:
\p ―Tin tꞌʌn ―quij―, wʌcꞌʌs riqꞌuij tu quimirir Juan rajen cꞌuchaꞌan yor u betic a mʌnaꞌ mac yirmʌnob uch, mʌꞌ biqꞌuin yirmʌnob.
\p
\v 15 Chen u jerob junintaꞌb yubej, caj u yaꞌarajob:
\p ―Rajiꞌ Elías u yʌjtseqꞌuir u tꞌʌn Cꞌuj a tsꞌaꞌb u tucuric ten Cꞌuj uch.
\p U jerob caj u yaꞌarajob:
\p ―Rajiꞌ yʌjtseqꞌuir u tꞌʌn Cꞌuj a tsꞌaꞌb u tucuric ten Cꞌuj quir u tsicbʌtic a baꞌ u cꞌat Cꞌuj rajen rajiꞌ irej yʌjtseqꞌuir u tꞌʌn Cꞌuj uch.
\p
\v 16 Barej caj yubaj Herodeseꞌ, caj u yaꞌaraj:
\p ―Rajiꞌ Juan, a mac a tin chꞌʌcaj u car ucheꞌ, rajiꞌ riqꞌuij tu quimirir.
\p
\v 17 Mʌꞌ ja wirej, rajiꞌ Herodes caj u tuchiꞌtaj mʌcbir Juan caj u cꞌʌraj tu cu naj mʌquic mac. Tiriꞌ tu mʌcaj, quireꞌ Herodías u racꞌ u sucuꞌun Felipe. Mʌꞌ ja wirej, Herodes caj u chꞌaj u racꞌ u sucuꞌun.
\v 18 Mʌꞌ ja wirej, caj u yaꞌaraj uch tiꞌ Herodes:
\p ―Mʌꞌ tsoy a taquic u racꞌ a sucuꞌun quireꞌ raꞌ u toc chꞌamʌn a sucuꞌun.
\p
\v 19 A Juanoꞌ pꞌactaꞌb ten Herodías rajen cu chꞌuctic quireꞌ u cꞌat u quinsej barej mʌꞌ cꞌuchaꞌan u yor tiꞌ.
\v 20 Mʌꞌ ja wirej, Herodeseꞌ sajʌc tiꞌ Juan quireꞌ yer rajiꞌ tuririꞌ xib a mac taj yor, a mac a mʌꞌ u naj man tu cꞌasir, rajen cu cʌnantaꞌ Juan soc mʌꞌ u quinsaꞌ. Tenten caj yubaj cax tucurnʌjij quireꞌ tsoy yubic tu xiquin a baꞌ tsecꞌtaꞌb ten Juan.
\v 21 Jeroj, cꞌuchij tu qꞌuinin Herodías cu pajic quir u quinsic Juan. Rajiꞌ u qꞌuinin u cꞌabaꞌ u rey Herodes, ber cu cꞌʌꞌoticob u qꞌuinin caj rochaꞌb Herodes ten u nʌꞌ uch. Rajen caj u pʌyaj tu quiꞌquiꞌ janʌnob u jach tsꞌurirob a cu yamticob u rey Herodes tu cu reyinticob. Yet payacob a mac u tsꞌurirob u soldadojob yejer a mac a neyʌn u taqꞌuinoꞌ tu ruꞌumin Galilea.
\v 22 Barej caj oc tun u parar xquic Herodías, ocꞌatnʌjij tu cuchir tu cu naj quiꞌquiꞌ janʌnob u rey Herodes yejer u racꞌob. Jach tsoy tu wich u rey Herodes yejer a mac a curucbarob tu cu quiꞌquiꞌ janʌnob. Rajen caj u yaꞌaraj a reyoꞌ tiꞌ u parar xquic Herodías:
\p ―Cꞌatej ten, cax a baꞌ a cꞌat, a tenoꞌ jeꞌ in tsꞌic techeꞌ.
\p
\v 23 Caj u yaꞌaraj:
\p ―Cꞌuj cu yiric ―quij Herodes―. Tu cotor baꞌ caꞌ a cꞌatej teneꞌ jeꞌ in tsꞌic techeꞌ tac tan chumuc u ruꞌumin tu quin reyinticob.
\p
\v 24 Caj jocꞌ rajiꞌ u xquic u parar Herodías, caj u yaꞌaraj tiꞌ u nʌꞌ:
\p ―Baꞌ quin bin in cꞌatej?
\p U nʌꞌ tuneꞌ, caj yaꞌaraj:
\p ―Raꞌ a catej u joꞌr Juan a cu yacsic jaꞌ tu joꞌr mac. 
\p
\v 25 Seb caj wʌcꞌʌs sutnʌjij tu yicnʌn rey Herodes caj u cꞌataj, cu yaꞌaric tiꞌ:
\p ―In cꞌat caꞌ a tsꞌic ten bajeꞌrer u joꞌr Juan a cu yacsic jaꞌ tu joꞌr mac, caꞌ a tsꞌa ten tuririꞌ u rʌquir quir in peꞌic.
\p
\v 26 Mʌꞌ jach quiꞌ yor a rey Herodeseꞌ, tu chen tucric, barej quireꞌ caj u yaꞌaraj: “Cꞌuj cu yiric”, bayiriꞌ xan, quireꞌ yubob yaꞌaric tu cotor mac a cu quiꞌquiꞌ janʌnob rajen yʌn u tsꞌic tiꞌ.
\v 27 Seb a reyoꞌ caj u tuchiꞌtaj tuririꞌ u soldado a cu cʌnantic a reyoꞌ soc caꞌ tac purbir u joꞌr Juan.
\v 28 Rajiꞌ caj bineꞌ caj u chꞌʌcaj u car Juan tu cu naj macar mac, caj bin u purej u joꞌr ich tuririꞌ u rʌquir quir u peꞌic. Jeroj, caj u cꞌubaj tiꞌ a ray xquicoꞌ u parar Herodías aroꞌ tuneꞌ caj u tsꞌajaj tiꞌ u nʌꞌ. 
\p
\v 29 Barej u camsʌwinicob Juan caj u yubob a baꞌ u ber, tarob u chꞌaꞌob u baquer Juan caj u tꞌajaj ich tuririꞌ tu cu naj tꞌojar u baquer mac.
\s Jesús caj u jansaj cinco mil xib
\r (Mt. 14.13‑21; Lc. 9.10‑17; Jn. 6.1‑14)
\p
\v 30 A mac a tuchiꞌtaꞌb ten Jesús uch quir u tsecꞌtaꞌr u tꞌʌn, caj urob caj u muchꞌquintajob u bʌj yicnʌn Jesús, caj u tsicbʌtajob tiꞌ tu cotor baꞌ a caj u betob uch, bayiriꞌ xan, yejer a baꞌ caj u camsob uch.
\v 31 Rajiꞌ tuneꞌ, caj u yaꞌaraj tiꞌob:
\p ―Cuxex ich tʌcay ruꞌum quir a jeꞌsiquex a bʌj.
\p Mʌꞌ ja wirej, yaꞌab mac cu tarob bayiriꞌ xan, cu binob, rajen mʌꞌ jeꞌerarob mʌꞌ quir u man u janʌnob.
\v 32 Pꞌeriꞌob caj rʌc ocob ich chem quir u binob ich tʌcay ruꞌum. U tiririꞌ tiꞌ caj binob soc tu junʌnob.
\v 33 Irob u binob ten yaꞌab mac, caj cꞌʌꞌotaꞌbob ten a yaꞌab macoꞌ. Rajen caj jocꞌob tiꞌ tu cotor u cajarob soc u binob tiꞌ taroꞌ xan, caj u cꞌʌnajob yacab. Raꞌ batꞌan cꞌuchob a yaꞌab macoꞌ.
\v 34 Barej caj jocꞌ Jesús ich chem, caj u yiraj yaꞌab mac toc cꞌuchob, rajen caj yajquintaꞌbob quireꞌ irob a tʌmʌn yucoboꞌ a mʌnaꞌ yʌjcʌnanyʌjir tʌmʌn yuc. Jeroj tuneꞌ, caj yʌnxchun u camsic yaꞌab baꞌ tiꞌob.
\v 35 Tabar u bin qꞌuin, caj tarob u camsʌwinicob tu yicnʌn caj yaꞌarajob:
\p ―Chen tʌcay ruꞌum a teraꞌ mʌnaꞌ mac cʌjaꞌan cu bin qꞌuin cabar.
\v 36 Tuchiꞌtaboꞌ caꞌ xicob tiꞌ corob, cax tiꞌ u chan cajarob a rʌc bʌcaꞌanob a teraꞌ, caꞌ u mʌnejob yoꞌoch waj quir u janʌnticob quireꞌ mʌnaꞌ baꞌ caj u jantob.
\p
\v 37 Caj u nuncaj Jesús, caj u yaꞌaraj tiꞌob:
\p ―Tsꞌajex yoꞌoch quir u janʌnob ―quij.
\p Caj u yaꞌarajob tiꞌ:
\p ―Jeꞌ wa jin mʌnicob yoꞌoch a yaꞌab macoꞌ caꞌ in jʌsejob tiꞌob. Mʌꞌ ja wirej, mʌꞌ nupaꞌan u boꞌorir yoꞌochob, quireꞌ baxuc u boꞌorir u beyaj mac tuririꞌ yaxqꞌuin. 
\p
\v 38 Jesús caj u yaꞌaraj tiꞌob:
\p ―Joqꞌuenex irex mun pan yʌn techex.
\p Caj tsꞌoc u yiricobeꞌ, caj u yaꞌarajob:
\p ―Yʌn cinco pan yejer caꞌtur cʌy.
\p
\v 39 Caj u yaꞌaraj tiꞌob u binob u cutarob jujumuchꞌob ich suꞌuc.
\v 40 Pꞌeriꞌ rʌc curajob u tirir tiꞌ junmuchꞌ curaꞌanob. U tirir tiꞌ caj u cuquintajob junmuchꞌ curicob cincuenta. U jer junmuchꞌ curicob cien.
\v 41 Jeroj tuneꞌ, Jesús caj u chꞌaj a cinco panoꞌ yejer a caꞌtur cʌyeꞌ, caj u pʌctaj caꞌanan caj u yaꞌaraj: “Bayoꞌ Cꞌuj tiꞌ ij coꞌochex.” Jeroj caj u xatꞌaj a panoꞌ caj u tsꞌaj tiꞌ u camsʌwinicob quir u caꞌ tsꞌaꞌicob ʌcʌtan a pimoꞌ. Bayiriꞌ xan, caj u jʌsaj tiꞌ tu cotor mac a caꞌtur cʌyeꞌ.
\v 42 Rʌc janob caj najchʌjob xan.
\v 43 Pachir caj u wʌcꞌʌs marajob doce xacob chup yejer u xetꞌer pan yejer a cʌyoꞌ.
\v 44 A mac a caj u jantob a panoꞌ cuch cinco mil xibob. 
\s Jesús cu ximbar yocꞌor jaꞌ
\r (Mt. 14.22‑27; Jn. 6.16‑21)
\p
\v 45 Jesús caj u yaꞌaraj tiꞌ u camsʌwinicob:
\p ―Caꞌ xiquechex ich chem soc a batꞌan cꞌuchurex ich u cajar Betsaida a tiꞌ yʌn pichir cꞌacꞌnab.
\p Quireꞌ rajiꞌ cu tuchiꞌtic a yaꞌab macoboꞌ.
\v 46 Caj tsꞌoc u tuchiꞌticobeꞌ caj bin ich tuririꞌ pꞌuc wits quir u tꞌʌnic Cꞌuj.
\v 47 Barej caj acꞌbirchʌjij, a chemoꞌ tiꞌ yʌn uch teꞌ ich tan chumuc cꞌacꞌnab. Rajiꞌ tuneꞌ, pꞌat Jesús tu junan ich ruꞌum.
\v 48 Jesús caj u yiraj jach chich tu cu babticob a chemoꞌ quireꞌ caj u nupꞌob icꞌ, rajen caj tar Jesús tu yicnʌnob tan u ximbar yocꞌor a cꞌacꞌnaboꞌ. Jach tabar u sastar caj u yirajob u tar. Jesús u cꞌat u man pʌybej.
\v 49 U camsʌwinicob Jesús tuneꞌ, caj u yirajob tan u ximbar yocꞌor a cꞌacꞌnaboꞌ caj u tucrajob quisin cu tar, caj awʌtʌjob.
\v 50 Quireꞌ tu cotor caj u yirajob, caj u chꞌaj saquirob, jeroj, seb tꞌʌnob, caj yaꞌaraj tiꞌob:
\p ―Chichquintej a worex ten ―quij―, mʌꞌ a chꞌiquex sajaquir ―quij Jesús.
\p
\v 51 Caj naquij yicnʌnob ich a chemoꞌ, caj chꞌen u tar yicꞌar. U camsʌwincob Jesús bin yorob quireꞌ jach manan jacꞌaꞌan yorob.
\v 52 Quireꞌ mʌꞌ ju cꞌʌꞌotajob tu yorob u mucꞌ, cax caj u yirajob u tꞌajʌr a panoꞌ quireꞌ jach chich u joꞌrob. 
\s Jesús cu jawsic u yajirob tu cajar Genesaret
\r (Mt. 14.34‑36)
\p
\v 53 Barej caj cꞌuchob tanxer ruꞌum tarob tu ruꞌumin Genesaret, caj u macob a chemoꞌ.
\v 54 Barej caj jocꞌob tiꞌ a chemoꞌ seb cꞌʌꞌotaꞌb Jesús ten a macoꞌ.
\v 55 Caj acabnʌjob tiꞌ tu cotor a tiꞌ cʌjaꞌanob ich a ruꞌumoꞌ quir u tarob purbir yicnʌn Jesús a mac a yajoꞌ. Caj yʌnxchun u tarob u puricob a mac yajoꞌ tiꞌ chꞌac, jaj ix tʌco caj u yubob tiꞌ yʌn ucheꞌ.
\v 56 Jaj ix tʌco teꞌ cu yocarobeꞌ cax wa ju chan cajarob wa ju yajaw cajarob, cax wa ju corob, robob cu tarob purbir mac a yajoꞌ tiꞌ tu cu naj mʌnicob yoꞌoch, tiriꞌ cu chich cꞌaticob caꞌ u tʌrejob cax u yoquir u nocꞌ. Tu cotor mac a caj u tʌrobeꞌ, jeroj jaw.
\c 7
\s A baꞌ cu yacsic u siꞌpir maqueꞌ
\r (Mt. 15.1‑20)
\p
\v 1 Caj muchꞌrʌjob yicnʌn Jesús a ju winiquirob judío a fariseojoꞌ yejer jun yarob yʌjcamsʌyʌjirob u tꞌʌn Moisés. Tiꞌ cu tarob tu cajarob Jerusalén.
\v 2 A rayoꞌ caj u yirajob jun yarob u camsʌwinicob Jesús rajraꞌ caj u jantob waj, u cꞌat yaꞌaric, mʌꞌ u pꞌoꞌob u cꞌʌbob, rajen caj u pʌcꞌaj u pachob.
\v 3 Mʌꞌ ja wirej, a winiquirob judío a fariseojoꞌ yejer tu cotor u winiquirob judío cu naj pꞌoꞌicob u cꞌʌbob wa mʌꞌ u pꞌoꞌicob u cꞌʌbob mʌꞌ u janʌnob quireꞌ a baꞌ araꞌb tiꞌob ten u nunquirob uch.
\v 4 Barej cu yurob tu cu naj mʌnicob yoꞌoch wa mʌꞌ u pꞌoꞌicob u bʌj mʌꞌ ju janʌnob. Yʌn u jer yaꞌab baꞌ caj u naj cʌnajob tiꞌ u nunquirob an ten bic caꞌ u pꞌoꞌej u ruchir tu cu yucꞌur. Caꞌ u pꞌoꞌej u pꞌurir u yoꞌoch jaꞌ. Caꞌ u pꞌoꞌej u ruchir a mascaboꞌ. Caꞌ u pꞌoꞌej u chꞌac tu cu wenʌn.
\v 5 Rajen u winiquirob judío a fariseojoꞌ yejer a yʌjcamsʌyʌjirob u tꞌʌn Moisés caj u cꞌatajobiꞌ:
\p ―Biquinin a camsʌwinicob mʌꞌ u cuxtarob an ten bic cu naj camsicob ic nunquirex barej rajraꞌ cu janʌnob? 
\p
\v 6 Caj u nuncajob rajiꞌeꞌ, caj yaꞌaraj tiꞌob:
\p ―Caꞌtur a tucurechex a techexoꞌ. Jach taj caj u tsecꞌtaj Isaías tiꞌ tu cotorechex quireꞌ rajiꞌ tsꞌaꞌb u tucuric ten Cꞌuj quir u tsꞌibtic a baꞌ u cꞌat Cꞌuj rajen caj u tsꞌibtaj:
\q A jeꞌ macaꞌ, quij Cꞌuj, cu tusaricob: “Quin sʌjticob Cꞌuj”, chen a tu pixamob cu yaꞌaricob: “Jeꞌ wa jin sʌjticob Cꞌuj.”
\v 7 A Cꞌujoꞌ cu yaꞌaric: “Baꞌ wir cu chen cꞌujintiquenob wa mʌꞌ u quibicob in tꞌʌn? Mʌꞌ ja wirej, chen u tꞌʌn winic cu quibicob quireꞌ robob cu camsicob u tꞌʌn winic irej wa ju tꞌʌn Cꞌuj cu camsicob.”
\m Baxuc caj u tsꞌibtaj Isaías uch.
\v 8 Biquinin ca pꞌʌtiquex u tꞌʌn Cꞌuj quir a quiꞌ cʌnantiquex u tꞌʌn a nunquirirex an ten bic u pꞌobar ruch. Caꞌ u pꞌoꞌej u ruchir tu cu yucꞌur ca betiquex xan yaꞌab u jer baꞌ an ten bic a jeraꞌ.
\p
\v 9 Caj u yaꞌaraj tiꞌob xan:
\p ―Ca waꞌariquex xan, mʌꞌ patarex u tꞌʌn Cꞌuj tiꞌ techex, chen a nunquirexoꞌ ca quiꞌ cʌnantiquex u tꞌʌn. Ca toc tsꞌocsiquex a baꞌ yarmʌnex a nunquirex uch.
\v 10 Biquinin Moisés caj u yaꞌaraj uch: “Caꞌ a sʌjtex a tet yejer a nʌꞌ. Wa cꞌas cu tsicbar tiꞌ u tet, tiꞌ u nʌꞌ xan, cu jocꞌsaꞌ quinsbir”, quij Moisés uch.
\v 11 Barej a techexoꞌ, ca waꞌariquex: Wa tuririꞌ parar cu yaꞌaric tiꞌ u tet wa tiꞌ u nʌꞌ: “Tu cotor baꞌ a ten yʌnin a ca pajiquex u yamtiquechex ucheꞌ rajiꞌ Corbán”, u cꞌat yaꞌaric in toc sijmʌn tiꞌ Cꞌuj;
\v 12 rajen mʌꞌ tan a chaꞌiquex u parar u betic u jer baꞌ quir u yamtic u tet wa ju nʌꞌ.
\v 13 A baywoꞌ ca cꞌasquintiquex a baꞌ araꞌb ten Cꞌuj quireꞌ ca quiꞌ cʌnantiquex a baꞌ naj camsaꞌbechex ten a nunquirex quir a wʌcꞌʌs masiquex tiꞌ a pararex. Baxuc ca betiquex yaꞌab u jer a baꞌ an ten bic aroꞌ.
\p
\v 14 Caj u wʌcꞌʌs tꞌʌnaj tu cotor a yaꞌab macobeꞌ, caj yaꞌaraj tiꞌob:
\p ―Uꞌyex baꞌ quin wac ―quij―, chꞌaj a najtex.
\v 15 Mʌnaꞌ baꞌ a cu jantic mac a cu yasic u siꞌpir, jariꞌ a baꞌ cu betic, wa baꞌ cu yaꞌaric, raꞌ cu yacsic u siꞌpir mac.
\v 16 Uꞌyex a baꞌ quin camsic techex soc a wuꞌyiquex soc a najtiquex a baꞌ u cꞌat yaꞌaric.
\p
\v 17 Barej caj oquij Jesús tu japnin naj caj u pꞌʌtaj a yaꞌab macoboꞌ, jeroj tuneꞌ, caj cꞌataꞌb tiꞌ ten u camsʌwinicob Jesús baꞌ quiriꞌ caj tsꞌoc a camsiquenob.
\v 18 Caj u yaꞌaraj tiꞌob:
\p ―Mʌꞌ wa quiꞌ ca tucriquex baꞌ? A baꞌ cu jantic mac mʌꞌ raꞌ cu yacsic u siꞌpiriꞌ.
\v 19 Quireꞌ a yoꞌochoꞌ mʌꞌ u yocar tu tucur mac chen ich u nʌcꞌ, pachir cu jocꞌar tu chocher.
\p A baywoꞌ Jesús caj u yaꞌaraj tsoy u jantaꞌ ten a mac a yacsmʌnob tu yorob tu cotor yoꞌoch.
\v 20 Barej caj u yaꞌaraj:
\p ―Mʌnaꞌ baꞌ a cu jantic mac cu yacsic u siꞌpir, jariꞌ a ba cu betic, wa ja baꞌ cu yaꞌaric, raꞌ cu yasic mac u siꞌpir.
\v 21 Quireꞌ ich u tucur mac cu jocꞌar a baꞌ cu yacsic u siꞌpir mac. Mʌꞌ ja wirej, tu tucur cu jocꞌar a cꞌas u tucuroꞌ, tu tucur cu tucric u pʌyic xquic wa yʌn u mam cax wa mʌnaꞌ u mam. Tu tucur cu tucric u pʌyic xib a yʌn u raqꞌueꞌ, cax a mʌnaꞌ u raqꞌueꞌ. Tu tucur cu tucric u quinsic mac, rajen cu quisic. Tu tucur cu tucric u yaꞌcric u baꞌtac mac, rajen cu yaꞌcric.
\v 22 Tu tucur cu tucric u pachtic a baꞌ yʌn tiꞌ u jer mac. Tu tucur cu tucric baꞌ, rajen cu pachtic a xquicoꞌ wa ja xiboꞌ. Tu tucur cu tucric baꞌ rajen cu tus aric mac. Tu tucur cu tucric baꞌ, rajen cu qꞌuextar yor. Tu tucur cu tucric baꞌ, rajen cu pʌqꞌuic u pach mac. Tu tucur cu tucric baꞌ, rajen mʌꞌ u cꞌʌmic u tꞌʌn Cꞌuj. Tu tucur cu tucric baꞌ, rajen mʌꞌ u cꞌujintic Cꞌuj.
\v 23 Tu cotor a ray cꞌasoꞌ cu jocꞌar tu tucur mac, rajen cu yacsic u siꞌpir mac.
\s A xquicoꞌ a cu tar ich tanxer ruꞌum
\r (Mt. 15.21‑28)
\p
\v 24 Barej caj ruqꞌuij taroꞌ caj bin tu ruꞌumin Tiro yejer u ruꞌumin Sidón. Caj cꞌuchij caj oquij ich naj. Mʌꞌ u cꞌat yertaꞌ wa tiꞌ yʌn ten a yaꞌab macoboꞌ, barej mʌꞌ cꞌuchaꞌan yor u taquic u bʌj Jesús soc mʌꞌ yirir.
\v 25 Tu jumintaꞌ yubej tiꞌ yʌn Jesús ich naj, caj cꞌuchij xquic yicnʌn Jesús, caj u puraj u bʌj ich u yoc Jesús quir u sʌjtaꞌ. Rajiꞌ yʌn tuririꞌ u chan parar xquic a mac acaꞌan quisin tiꞌeꞌ.
\v 26 A xquicoꞌ griego u tꞌʌn, chen rajiꞌ tiꞌ naj cʌjaꞌan tu ruꞌumin sirofeniciajoꞌ. Caj u chich cꞌataj tiꞌ caꞌ jocꞌsac a quisinoꞌ tiꞌ u chan parar xquic.
\v 27 Barej Jesús caj u yaꞌaraj tiꞌ:
\p ―Caꞌ yʌn batꞌan janac u pararob quir u nachajʌrob. Mʌꞌ tsoy u puric u yoꞌoch u pararob tiꞌ a chan pecꞌoboꞌ. 
\p
\v 28 A xquicoꞌ caj u nuncaj, tan yaꞌaric tiꞌ:
\p ―Taj a baꞌ ca wac Jaj Tsꞌurir ―quij―, cax cu jantic yaran pojcheꞌ tu cu jutur u pꞌupꞌir yoꞌoch a chan pararob. A chan pecꞌoꞌ cu janʌn yaram pojcheꞌ tu cu jutur u pꞌupꞌir. 
\p
\v 29 Jeroj tuneꞌ, caj u yaꞌaraj tiꞌ:
\p ―Quireꞌ a jeꞌ tꞌʌnaꞌ ―quij―, caꞌ xiquech, toc jaw a chan parar xquic tiꞌ u quisinin.
\p
\v 30 Caj wʌcꞌʌs ur tu yatochoꞌ caj u yiraj u chan parar xquic characbar ich u chꞌac, toc jocꞌsaꞌb u quisinin. 
\s Jesús cu jawsic a mac a mʌꞌ u tꞌʌneꞌ a mʌꞌ u yubej tꞌʌneꞌ
\p
\v 31 Jesús caj joqꞌuij tu caꞌten tiꞌ u ruꞌumin Tiro caj u chꞌʌctaj u ruꞌumin Sidón caj cꞌuchij tu cꞌacꞌnabir Galilea. Caj u chꞌʌctaj tan chumuc u ruꞌumin Decápolis. 
\v 32 Jeroj caj tar purbir tiꞌ tuririꞌ xib, a mʌꞌ u jocꞌar u tꞌʌneꞌ, a mʌꞌ u yubej tꞌʌn xan. Caj u chich cꞌatajob tiꞌ caꞌ u tsꞌancꞌʌbtej tiꞌ quir u jawʌr.
\v 33 U tiriꞌ tiꞌ caj u pʌyaj Jesús a mac a macar u xiquineꞌ soc mʌꞌ pꞌeriꞌ tu yʌn a yaꞌab macobob. Jeroj caj u tsꞌaj yar u cꞌʌb tu xiquin a mac a mʌꞌ u yubic tꞌʌneꞌ, caj tubnʌjij Jesús, caj u tʌraj u yacꞌ xan.
\v 34 Caj u nacsaj u wich caꞌanan caj u putaj yicꞌ, caj u yaꞌaraj tiꞌ:
\p ―Efata, u cꞌat yaꞌaric: Caꞌ jepʌjʌc a xiquin ―quij yaꞌaraꞌ ten Jesús.
\p
\v 35 Jach seb jaw a mʌꞌ u yubej tꞌʌn. Tsoyjij u yacꞌ caj quiꞌ tꞌʌnʌj ich u tꞌʌn.
\v 36 Caj u maquintaj tiꞌobeꞌ:
\p ―Mʌꞌ a yʌn ariquex tiꞌ mac.
\p Cax caj u chen maquintaj tiꞌob yaꞌab tu jen tsicbʌtajob. 
\v 37 Jach jaqꞌuij yorob tun, cu yaꞌaricob:
\p ―Jach tsoy tu betaꞌr tu cotor, cax inan a mʌꞌ u jocꞌar u tꞌʌn cu jawsiqueꞌ, cu jocꞌar u tꞌʌn a macar u xiquineꞌ. 
\c 8
\s Jesús cu jansic cuatro mil xib
\r (Mt. 15.32‑39)
\p
\v 1 A ray u qꞌuininoꞌ, caj tsꞌoc u muchꞌquinticob yaꞌab macob. Mʌnaꞌ yoꞌoch pan bin u jantobiꞌ. Jesús caj u tꞌʌnaj u camsʌwinicob tu yicnʌn, caj u yaꞌaraj tiꞌob:
\p
\v 2 ―Quin yajquintic a yaꞌab macobaꞌ chen tsꞌoc u man mʌnaꞌ u nup u qꞌuinin tiꞌ yʌnob yejerenob bajeꞌrer, u yoꞌochob tu rʌc xupajob.
\v 3 Wa quin tuchiꞌticob caꞌ xicob tu yatochobeꞌ jeꞌ u rubur u mucꞌob ich bejeꞌ quireꞌ wiꞌij. Mʌꞌ ja wirej, yʌn jun yarob ich a yaꞌab macobaꞌ nach tub u tarob. 
\p
\v 4 U camsʌwinicob caj u nuncajob tiꞌ:
\p ―Jeꞌ wa ju cꞌuchur yor mac ich a jeꞌ tʌcay ruꞌumaꞌ caꞌ u naꞌajquintej yejer yoꞌoch pan a jeꞌ yaꞌab macobaꞌ? Mʌꞌ ja wirej, mʌnaꞌ mac teꞌ cʌjaꞌanobaꞌ.
\p
\v 5 Caj u cꞌataj tiꞌob:
\p ―Mun pan yʌn techexiꞌ?
\p Robobeꞌ caj u yaꞌarajob:
\p ―Siete pan yʌn a tenobiꞌ.
\p
\v 6 Caj u yaꞌaraj tiꞌ a yaꞌab macoboꞌ caꞌ curacob ich ruꞌum. Jeroj caj u chꞌaj a siete panoꞌ caj u yaꞌaraj: “Bayoꞌ Cꞌuj quireꞌ caj a tsꞌaj toꞌonex ij coꞌochex”, jeroj tuneꞌ, caj u xatꞌaj caj u tsꞌaj tiꞌ u camsʌwinicob quir u tsꞌicob ʌcʌtan a yaꞌab macoboꞌ. Robob tuneꞌ caj u tsꞌajob ʌcʌtan a yaꞌab macoboꞌ.
\v 7 Yʌn xan tiꞌob jun yarob majʌn cʌyob, jeroj caj u tꞌʌnaj Cꞌuj: “Bayoꞌ Cꞌuj quireꞌ caj a tsꞌaj toꞌonex ij coꞌoch cʌyex”, caj u yaꞌaraj tiꞌ u camsʌwinicob caꞌ tsꞌabac xan ʌcʌtan a yaꞌab macoboꞌ.
\v 8 Caj janobeꞌ caj naꞌajchʌjob, jeroj tuneꞌ, caj u marajob u xetꞌer, caj u marajob siete xac chup yejer u xetꞌer. 
\v 9 A mac janoboꞌ tac cuatro mil. Jeroj tuneꞌ, caj u yaꞌaraj tiꞌob caꞌ xicob tu yatochob.
\v 10 Seb caj oquij yejer u camsʌwinicob ich chem, caj cꞌuchob tu ruꞌumin u cꞌabaꞌ Dalmanuta.
\s Cꞌataꞌb tiꞌ caꞌ iric carem u beyaj Jesús
\r (Mt. 16.1‑4; Lc. 12.54‑56)
\p
\v 11 Caj cꞌuchob a winiquirob judío a fariseojoꞌ caj yʌnxchun u nunquicob a baꞌ cu tsicbar Jesús, caj u cꞌatob tiꞌ u esacob tiꞌ caꞌanan a baꞌ mʌnaꞌ mac yiramʌn uch mʌꞌ biqꞌuin yiramʌn. Mʌꞌ ja wirej, cu tumticob u yor Jesús. 
\v 12 Caj tsꞌoc yubic yaꞌaraꞌ tiꞌ ten u winiquirob judío a fariseojoꞌ caj u putaj yicꞌ, caj u yaꞌaraj:
\p ―A techexoꞌ, a mac cuxaꞌanob tu qꞌuinin bajeꞌrer ca cꞌatic tenex caꞌ in wesej techex a baꞌ a mʌnaꞌ mac yiramʌn uch mʌꞌ biqꞌuin yiramʌn. Jach taj quin waꞌaric techex mʌꞌ biqꞌuin quin bin in wesej tiꞌ techex a baꞌ a mʌnaꞌ mac yiramʌn uch a mʌꞌ biqꞌuin yiramʌnoꞌ.
\p
\v 13 Jeroj tuneꞌ, caj u pꞌʌtajobeꞌ, caj wʌcꞌʌs oc ich chem caj bin tanxer ruꞌum pichir cꞌacꞌnab.
\s U pʌj sʌcʌnob a winiquirob judío a fariseojoꞌ
\r (Mt. 16.5‑12)
\p
\v 14 U camsʌwinicob Jesús tuꞌub tiꞌob uch u chꞌicob yoꞌoch waj, Chen tuririꞌ yoꞌoch waj caj u chꞌaj ich chem.
\v 15 Caj u camsaj tiꞌob tan yaꞌaric:
\p ―Quiꞌ cʌnantechex a bʌjex tiꞌ a baꞌ cu camsic techex u winiquirob judío a fariseojoꞌ yejer a baꞌ cu camsic techex a mac u yajob u bʌj Herodes. A baꞌ cu camsicob irej a pʌj sʌcʌnoꞌ.
\p
\v 16 U camsʌwinicob Jesús caj u pacran tꞌʌnajob ich u yet camsʌwinicob caj yaꞌarob:
\p ―Raꞌ ix tiꞌ cu yaꞌaric quireꞌ mʌnaꞌ toꞌonex waj quir ic janʌnex.
\p
\v 17 Jesús caj u cꞌʌꞌotaj u tucurob caj u yaꞌaraj tiꞌob: 
\p ―Biquinin ca pacran tꞌʌniquex a bʌjex quireꞌ tub techex a chꞌiquex a woꞌoch panex? Biquinin mʌꞌ a toy cꞌʌꞌotiquex biquinin mʌꞌ a toy najtiquex? Taquij u qꞌuinin bajeꞌrer chich a joꞌrex.
\v 18 Yʌn a wichex biqinin mʌꞌ a wiriquex baꞌ? Yʌn a xiquinex biquinin mʌꞌ a wuꞌyiquex tꞌʌn? Mʌꞌ wa cꞌaj techex?
\v 19 Barej caj in xatꞌaj a cinco yoꞌoch pan ich a cinco mileꞌ mun xac chup yejer u xetꞌer caj a marajex?
\p Robob caj u nuncajob:
\p ―Doce xac caj in marob.
\p Jesús caj u wʌcꞌʌs cꞌataj tiꞌob:
\p
\v 20 ―Barej caj in xatꞌaj yoꞌoch pan yejer cʌy ich a cuatro mileꞌ, mun xac chup yejer u xetꞌer caj a marex? 
\p Robob caj u nuncajob:
\p ―Siete xac caj in marobiꞌ.
\p
\v 21 Caj u yaꞌaraj tiꞌob:
\p ―Biquinin mʌꞌ toy a najtajexiꞌ?
\s Ich u cajar Betsaida jawsaꞌb a chꞌop u wich ten Jesús 
\p
\v 22 Jesús yejer u camsʌwincob caj cꞌuchob tu cajar Betsaida. Caj tar purbir tiꞌ tuririꞌ chꞌop u wich, caj u chich cꞌatajob tiꞌ caꞌ u tʌrej quir u jawʌr u wich.
\v 23 Caj u mʌchaj tun u cꞌʌb a chop u wichoꞌ caj u jocꞌsaj tancab tu cajar tu yʌnob. Caj tubaꞌb u wich, caj u tsꞌan cꞌʌb tu boxer u wich caj u cꞌataj tiꞌ:
\p ―Ca wiric wa baꞌ? ―caj cꞌataꞌb tiꞌ ten Jesús.
\p
\v 24 A chꞌop u wichoꞌ caj pacatnʌjij caj u yaꞌaraj:
\p ―Quin wiric a macoꞌ an ten bic cheꞌ, barej quin wiric u manobeꞌ irej cheꞌ cu manob.
\p
\v 25 Seb wʌcꞌʌs tsꞌancꞌʌbtaj yocꞌor u boxer wich caj u pacat, jeroj quiꞌ tsoyquintaꞌb u wich, cax nach cu quiꞌ yiric tu cotor.
\v 26 Caj u tuchiꞌtaj u yatoch, caj u yaꞌaraj tiꞌ:
\p ―Mʌꞌ a yʌn bin a waꞌarej ich a jeꞌ cajaraꞌ.
\s Araꞌb ten Pedro tiꞌ Jesús: Cristojech
\r (Mt. 16.13‑20; Lc. 9.18‑21)
\p
\v 27 Caj jocꞌ Jesús yejer u camsʌwinicob, caj binob ich u cajarob nʌtsꞌaꞌan, u cajar u cꞌabaꞌ Cesarea Filipo. A ich bejoꞌ caj u cꞌataj tiꞌ u camsʌwinicob, caj yaꞌaraj tiꞌob:
\p ―Caj u jumintajob a wuꞌyajex, baꞌ cu yaꞌaricob ten, a macoboꞌ?
\p
\v 28 Robob caj u nuncajob:
\p ―Juanech ―quij―, a cu yacsic jaꞌ tu joꞌr mac bin. U jerob cu yaꞌaric, Elíasech. U jerob, cu yaꞌaric jaj ix tiꞌ yʌjtseqꞌuirech u tꞌʌn Cꞌuj a tsꞌaꞌb u tucuric ten Cꞌuj quir u tsicbar a baꞌ u cꞌat Cꞌuj.
\p
\v 29 Rajiꞌ tuneꞌ caj u yaꞌaraj tiꞌob:
\p ―Ten wa ca waquenex?
\p Pedro tuneꞌ, caj u nuncaj caj u yaꞌaraj tiꞌ:
\p ―A techoꞌ, rajiꞌ Cristojech caj u tuchiꞌtajech Cꞌuj. 
\p
\v 30 Rajiꞌ caj araꞌb tiꞌob ten Jesús:
\p ―Mʌꞌ a yʌn bin a waꞌariquex tiꞌ mac wa Cristojen.
\s Jesús cu yaꞌaric bin in caj quimin
\r (Mt. 16.21‑28; Lc. 9.22‑27)
\p
\v 31 Jeroj tuneꞌ, caj yʌnxchun u camsic tiꞌob bin in caj batꞌan mucꞌyaj a tenoꞌ baxuquenechexoꞌ. Bin u caꞌob u xurpꞌʌtiquenob u jach tsꞌurirob u winiquirob judío, a nuxiboꞌ yejer u jach tsꞌurirob sacerdote u winiquirob judío yejer yʌjcamsʌyʌjirob u tꞌʌn Moisés. Bin in caj quinsbir barej caꞌ bin manac mʌnaꞌ u nup u qꞌuinin bin in caj wʌcꞌʌs riqꞌuir quir in cuxtar.
\v 32 Tu quiꞌ toc rʌc araj tiꞌob quir u najticob. Caj pay Jesús ten Pedro soc u tiriꞌ cu tsicbar caj u majquintaj Pedro caj yaꞌaraj:
\p ―Mʌꞌ a yʌn aric a quinsaꞌ.
\p
\v 33 Rajiꞌ tuneꞌ, caj u sutaj u bʌj caj u pʌctaj u camsʌwinicob caj qꞌueyaꞌb Pedro ten Jesús caj yaꞌaraj:
\p ―Joqꞌuen Pedro irech a quisinoꞌ a Satanásoꞌ ―quij Jesús―. Mʌꞌ a pꞌusic in wor ―quij Jesús―. Mʌꞌ quet a wor yejer Cꞌuj, quet a wor yejer a xiboꞌ Pedro.
\p
\v 34 Caj u tꞌʌnaj yaꞌab macob yejer u camsʌwinicob, caj u yaꞌaraj tiꞌob:
\p ―An ten bic ten caꞌ bin mucꞌyajnʌquen ich in cruz. Baxuc techex caꞌ bin mucꞌyajnʌquechex quireꞌ caj a cꞌʌmajex in tꞌʌn cax ca quiminex ich a cruzex. Baxuc xan, caꞌ a pꞌʌtex a baꞌ ca pachtiquex ta worex wa ja cꞌatex a cʌniquex in tꞌʌn ―quij Jesús―.
\v 35 Quireꞌ a mac a mʌꞌ u cꞌat u taquic u cuxtar tiꞌ u racꞌob tu cu chucurob u pach ten u racꞌob, quireꞌ caj u yacsaj tu yor tiꞌ in tꞌʌn, bayiriꞌ xan, quireꞌ u jach tsoyir u tꞌʌn Cꞌuj, raꞌ cu bin taquic u pixam. 
\v 36 Cax chen toc yʌn a baꞌtaquex ich yocꞌocab chen wa cu saꞌtar a pixamex jeroj tuneꞌ, baꞌ wir a baꞌtaquex ich yocꞌocab?
\v 37 Jeꞌ wa ju cꞌuchur u yor u boꞌotic u pixam yejer u baꞌtac wa yejer u taqꞌuin? Mʌꞌ biqꞌuiniꞌ, cꞌuchaꞌan yor u boꞌotic.
\v 38 Wa mac cu chꞌic suraquir ten yejer a baꞌ quin tsecꞌtic, quireꞌ a jeꞌ cuxaꞌanob mac bajeꞌrer, a cu naj acsicob u siꞌpirob, bayiriꞌ xan, tiꞌ a jeꞌ cuxaꞌanob mac, a cu naj manob, baxuc ten caꞌ bin in chꞌaꞌej suraquir tiꞌ, quireꞌ a tenoꞌ baxuquenechexoꞌ. Quin bin in chꞌic suraquir tiꞌ caꞌ bin taquen ich u sasirir Cꞌuj in Tet yejer u mucꞌ u yʌjmasirob u tꞌʌn Cꞌuj caꞌanan.

\c 9
\p
\v 1 Caj u yaꞌaraj tiꞌob xan:
\p ―Chen taj quin waꞌaric tiꞌ techex, yʌn jun yarob ich mac a teraꞌ mʌꞌ u bin quimin hasta cu yiric bic Cꞌuj cu bin u reyintic yejer u chichir u mucꞌ.
\s Waysaꞌb Jesús ten Cꞌuj
\r (Mt. 17.1‑13; Lc. 9.28‑36)
\p
\v 2 Tiꞌ yʌn Jesús uch ich u cajar Cesarea de Filipo tuj u camsaj tiꞌob u camsʌwinicob. Caj manij seis u qꞌuinin Jesús caj u pʌyaj Pedro yejer Juan yejer Jacobo. Caj binob ich u joꞌr wits tu caꞌanan u joꞌr witsir. Chen robob pay ten Jesús. Ʌcʌtan u camsʌwinicob Jesús caj waysaꞌb Jesús.
\v 3 Caj waysaꞌ u nocꞌ bajen u baꞌ jaꞌ, sʌc tꞌinaꞌan u nocꞌ, baxuc jach chaꞌaj u nocꞌ. Mʌnaꞌ mac cꞌuchaꞌan yor u pꞌoꞌic u nocꞌ an ten bic a ray sʌcoꞌ.
\v 4 Seb irir ixbaj Moisés yejer ixbaj Elías ten u camsʌwinicob a mʌnaꞌ u nupoꞌ. Cu tsicbarob yejer Jesús caj irir ten u camsʌwinicob Jesús.
\v 5 Pedro caj u tꞌʌnaj caj u yaꞌaraj tiꞌ Jesús:
\p ―Jaj Tsꞌurir ―quij―, jach tsoy teꞌ yʌnoꞌonexaꞌ teraꞌ. Arej in chan tʌsej paser, u tirir tiꞌ tech, u tirir tiꞌ ixbaj Moisés, u tirir tiꞌ ixbaj Elías.
\p
\v 6 Mʌꞌ ja wirej, jach jacꞌaꞌan yorob u camsʌwinicob rajen Pedro caj yaꞌaraj aroꞌ quireꞌ mʌꞌ ju quiꞌ tucraj a baꞌ caj u yaꞌaraj.
\v 7 Quireꞌ cu tsicbar Pedro caj tarij tuririꞌ u muyʌrir caj bobʌstaꞌb ten u muyʌrir caj jocꞌ u tꞌʌn Cꞌuj tiꞌ a ray u muyʌriroꞌ, tan yaꞌaric:
\p ―A jeꞌ in jach parar in jach yaj. Caꞌ uꞌyex u tꞌʌn. 
\p
\v 8 Seb caj u sut u bʌj pacatnʌjobeꞌ mʌꞌ ju wʌcꞌʌs irob mac yicnʌnob, chen Jesús yʌn.
\p
\v 9 Quireꞌ cu yemanob ich u joꞌr pꞌuc wits caj u chen quiꞌ araj tiꞌob soc mʌꞌ ju yaꞌarob a baꞌ tsꞌoc u yiricob hasta caꞌ bin riqꞌuiquen tin quimirir a tenoꞌ a baxuquenechex. 
\v 10 Tu chen quibajob a baꞌ araꞌb tiꞌob ten Jesús, chen cu chan ber sʌjʌj tꞌʌnob tan u yaꞌaricob:
\p ―A baꞌ u cꞌat yaꞌaric a caꞌ bin wʌcꞌʌs riqꞌuic tu quimirir?
\p
\v 11 Caj u cꞌatajob tiꞌ, tan yaꞌaricob:
\p ―Quireꞌ tech caj a waꞌaraj tenob, mʌꞌ in yʌn bin in waꞌaricob wa caj in wirob ixbaj Elías yejer ixbaj Moisés. Biquinin cu yaꞌaricob yʌjcamsʌyʌjirob u tꞌʌn Moisés: “Rajiꞌ cu batꞌan bin tar Elías uch quir u pʌyic u ber Cristo soc pachir cu tar a Cristojoꞌ”?
\p
\v 12 Caj u nuncaj rajiꞌeꞌ, caj u yaꞌaraj tiꞌob:
\p ―Taj ―quij Jesús―. Elías cu yʌn batꞌan tar uch quir u pʌyic u bej Cristo soc u cꞌaxicob yorob soc u rʌc pꞌʌticob u cꞌasir u winiquirob judío. Chen arex ten biquinin u tsꞌibaꞌan tꞌʌn Cꞌuj cu tsicbar caꞌ bin mucꞌyajnʌquen a tenoꞌ a baxuquenechexoꞌ, bayiriꞌ xan caꞌ bin u xunpꞌʌtenob ten u jach tsꞌurirob u winiquirob judío.
\v 13 A tenoꞌ ―quij Jesús―, quin waꞌaric techex toc tarij Elías, bayiriꞌ xan, robob caj u betob tiꞌ tu cotor a baꞌ caj u pachtajob tu yorob an ten bic tiꞌ tsꞌibaꞌan ich u tꞌʌn Cꞌuj tiꞌ rajiꞌ a baꞌ u ber.
\s Jesús cu jawsic a mac a mʌꞌ u jocꞌar u tꞌʌn
\r (Mt. 17.14‑21; Lc. 9.37‑43)
\p
\v 14 Caj urob Jesús ich u joꞌr wits yejer u mʌnaꞌ u nup camsʌwinicob caj tar tu yicnʌn a ju camsʌwinicob a pꞌatoboꞌ. Caj urob Jesús yejer mʌnaꞌ u nup u camsʌwinicob jeroj caj u yiraj rʌc bʌcristaꞌb ten yaꞌab macob. A yʌjcamsʌyʌjirob u tꞌʌn Moisés cu nunquicob u tꞌʌn yejer u camsʌwinicob Jesús.
\v 15 A ray u qꞌuininoꞌ tuneꞌ, caj irir Jesús ten a yaꞌab macob caj jaqꞌuij u yorob caj u cꞌʌnajob yacab tu yicnʌn quir u rʌc tꞌʌnicob.
\v 16 Rajiꞌ caj u cꞌataj tiꞌob:
\p ―Biquinin ca nunquiquex u tꞌʌnob a yʌjcamsʌyʌjirob u tꞌʌn Moisés?
\p
\v 17 Caj u nuncaj tuririꞌ ich a yaꞌab macoboꞌ, caj u yaꞌaraj: 
\p ―In wʌjcamsʌyʌjirech, taren in puric in parar tech quireꞌ acaꞌan quisin tiꞌ, rajen mʌꞌ u jocꞌar u tꞌʌn. 
\v 18 Caꞌ bin chucuc purbir in parar ten quisin tu cu bin man, cu rubsic ruꞌum, cu yomancʌr u chiꞌ, cu jʌchꞌic u coj, cu tochtar u winquirir rajen jach mʌnaꞌ u mucꞌ xan. Caj in waꞌaraj tiꞌ a camsʌwinicob caꞌ u jocꞌsejob tiꞌeꞌ, barej mʌꞌ cꞌuchaꞌan yorob u jocꞌsej.
\p
\v 19 Caj u nuncaj Jesús caj u yaꞌaraj tiꞌob:
\p ―A techexoꞌ a mac a cuxaꞌanechex u qꞌuinin bajeꞌrer, am biquinin mʌꞌ a wacsic ta worex? A mun u qꞌuinin yʌn in pꞌatʌr ta wicnʌnex quir a wacsic ta worex? Joqꞌuen chꞌaꞌej ten.
\p
\v 20 Tabar u natsꞌʌr ich Jesús, barej caj irir Jesús ten a quisinoꞌ, jeroj seb titꞌab a pararoꞌ, caj rub ruꞌum caj bʌcrʌnʌjij caj omnʌj u chiꞌ.
\v 21 Caj cꞌataꞌb tiꞌ u tet ten Jesús:
\p ―Ber ocac quisin tiꞌ a parar?
\p Caj u nuncaj u tet:
\p ―Tu chichanin caj oc quisin tiꞌ.
\v 22 Yaꞌab u tenin cu purur ich cꞌacꞌ bayiriꞌ ich jaꞌ quir u quinsic. Barej wa cꞌuchaꞌan a wor a betiqueꞌ, jocꞌsej a quisinoꞌ. Yajquintenob ―quij u tet u parar―, yʌm tenob.
\p
\v 23 Jesús tun, caj u yaꞌaraj tiꞌ:
\p ―Wa jeꞌ u cꞌuchur a wor a wacsic ta woreꞌ, tu cotor cꞌuchaꞌan yor tiꞌ mac a cu yacsic tu yoroꞌ.
\p
\v 24 Jeroj tuneꞌ, seb caj cꞌam tꞌʌnaj u tet a pararoꞌ, caj u yaꞌaraj:
\p ―Quin wacsic tin wor, wa mʌꞌ tiꞌtiꞌ yam ten.
\p
\v 25 Barej caj u yiraj Jesús, cu tar yacabob tu yicnʌn a yaꞌab macob, jeroj Jesús caj u qꞌueyaj a quisinoꞌ, tan yaꞌaric tiꞌ:
\p ―A techoꞌ a mʌꞌ a chaꞌej u tꞌʌn, bayiriꞌ a mʌꞌ a chaꞌej u yubic tꞌʌn. A tenoꞌ quin waꞌaric tech, joqꞌuen tiꞌ, bayiriꞌ xan, mʌꞌ a wʌcꞌʌs ocar tiꞌ a chan pararoꞌ. 
\p
\v 26 Caj awatnʌjij a quisinoꞌ seb caj titaꞌb, caj jocꞌ tiꞌ, caj pꞌat an ten bic mac a quimeneꞌ, rajen yaꞌab macob caj u yaꞌaraj: “Jeroj quimij, quij.”
\v 27 Barej Jesúseꞌ caj u mʌchaj u cꞌʌb, caj u ricꞌsaj caj chꞌiraj.
\p
\v 28 Barej caj oc ich naj, u camsʌwinicob caj u cꞌatajob tiꞌ tu junan:
\p ―Biquinin a tenobeꞌ mʌꞌ cꞌuchaꞌan in worob in jocꞌsicob a quisinobiꞌ?
\p
\v 29 Caj u yaꞌaraj tiꞌob:
\p ―Wa ja cꞌatex caꞌ a jocꞌsex baxuc a baywoꞌ caꞌ a tꞌʌniquex Cꞌuj tu ca jamach pꞌʌtiquex a janʌnex.
\s Jesús cu wʌcꞌʌs aric bin u caj quimin
\r (Mt. 17.22‑23; Lc. 9.43‑45)
\p
\v 30 Caj tsꞌoc u rucꞌurob tiꞌ taroꞌ, caj manob tu ruꞌumin Galilea. Mʌꞌ ju cꞌat wa mac u yerob wa tiꞌ yʌniꞌ.
\v 31 Quireꞌ cu camsic u camsʌwinicob caj u yaꞌaraj tiꞌob uch:
\p ―Quireꞌ bin u caj cꞌubiren a tenoꞌ tiꞌ mac a cu pꞌactiquenob a tenoꞌ a baxuquenechexoꞌ. Bin quinsaquen ten a ray xiboboꞌ, barej caꞌ bin tsꞌocac in quimeneꞌ bin in caj cuxtar caꞌ bin manʌc mʌnaꞌ u nup u qꞌuinin.
\p
\v 32 U camsʌwinicob Jesús mʌꞌ ju najtob a baꞌ araꞌb tiꞌob ten Jesús, tu cu camsic tiꞌob, sajacchʌjob u cꞌaticob tiꞌ.
\s A mac a jach noꞌjeꞌ
\r (Mt. 18.1‑5; Lc. 9.46‑48)
\p
\v 33 Caj cꞌuchob tu cajar Capernaum. Quireꞌ tiꞌ yʌnob ich naj caj u cꞌataj tiꞌob:
\p ―Baꞌ ca sʌjʌj ariquex ich a bej?
\p
\v 34 Barej, robobeꞌ mʌꞌ tu nuncajob, quireꞌ ich bej cu nunquicob u tꞌʌnob soc yerob mac jach noꞌj ich u yet camsʌwinicob.
\v 35 Barej caj curaj Jesús tuneꞌ, caj u tꞌʌnaj a docejoꞌ caj u yaꞌaraj tiꞌob:
\p ―Wa mac u cꞌat bin pʌyber arej u bin pachir soc rajiꞌ u cꞌurewintaꞌr ten tu cotor mac.
\p
\v 36 Jeroj caj u chꞌaꞌaj tuririꞌ chan parar quir u chꞌiquintic tan chumuc tu yicnʌnob, caj u mecꞌaj, caj u yaꞌaraj tiꞌob:
\p
\v 37 ―Wa tsoy ca betiquex tiꞌ a jeꞌ chichanaꞌ, cax tiꞌ u jer xan, quireꞌ ca yajquintiquenex. Tsoy ca betiquenex ten xan. Baxuc tsoy ca betiquex tiꞌ Cꞌuj a mac a caj u tuchiꞌtajen.
\s Wa mac mʌꞌ pꞌec yiricoꞌonex pꞌeriꞌoꞌonex xan
\p
\v 38 Caj u tꞌʌnaj Juan, tan yaꞌaric tiꞌ:
\p ―In wʌj camsʌyʌjirech, caj in wirob tuririꞌ mac cu jocꞌsic quisin. Cu tꞌʌnic a cꞌabaꞌ. Caj in waꞌarob: “Tsireꞌej”, quireꞌ mʌꞌ u sayʌr ta pach quir u cʌnic a tꞌʌn, an ten bic a tenob quin sayʌrob ta pach.
\p
\v 39 Jesús caj u yaꞌaraj:
\p ―Tsireꞌej, cax mʌꞌ a waꞌariquex tiꞌ quireꞌ mʌnaꞌ mac cꞌuchaꞌan yor u betic tsoy tin cꞌabaꞌ wa caꞌ bin tsꞌocaqueꞌ cu bin u pꞌastic in cꞌabaꞌ.
\v 40 Quireꞌ a mac a mʌꞌ u pꞌacticoꞌonex cu yamticoꞌonex. 
\v 41 Taj quin waꞌaric techex, wa mac jeꞌ u tsꞌic techex tuririꞌ ruch jaꞌ quir a wuꞌqꞌuiquex quireꞌ caj a wacsaj ta worex tiꞌ Cristo, quin waꞌaric techex mʌꞌ u bin satʌr u boꞌorir tu cu tsꞌic a woj jaꞌex.
\s Mʌꞌ a chaꞌiquex u tar a siꞌpirex
\r (Mt. 18.6‑9; Lc. 17.1‑2)
\p
\v 42 Jesús caj u yaꞌaraj tiꞌob:
\p ―A mac a cu yacsic u siꞌpir u racꞌob a tu cʌnaj chichan a caj u yacsaj tu yor. Arej jach manan tsoy caꞌ u jichꞌej ich u car yejer yajaw caꞌ. Caꞌ u purej u bʌj ich cꞌacꞌnab quireꞌ caj u toc pʌyaj u siꞌpir u racꞌob.
\v 43-46 Rajen quin waꞌaric techex: Xonchꞌʌtej a cꞌʌb wa rajiꞌ cu pʌyic a siꞌpirex. Cax a woc wa rajiꞌ cu pʌyic a siꞌpirex. Cax bujuch cꞌʌbech cax bujuch oquech soc a taquic a bʌj soc mʌꞌ a bin tu ca werarex ich cꞌacꞌ munt qꞌuin yejer caꞌtur a cꞌʌb, bayiriꞌ xan soc mʌꞌ a bin tu ca werarex ich cꞌacꞌ munt qꞌuin yejer caꞌtur a woc. Mʌꞌ ja wirej, tiꞌ taroꞌ u noqꞌuer bʌcꞌ mʌꞌ u quimin, mʌꞌ biqꞌuin a cꞌacꞌoꞌ u tupur.
\v 47 Baxuc xan, a wichex. Wa rajiꞌ cu pʌyic a siꞌpirex rʌquej a wichex, jach manan tsoy caꞌ ocaquechex bujuch ichechex tu cu bin u reyintic Cꞌuj wa quet yejer caꞌtur a wichex cu bin u puriquechex ich tu cu yerar mac. 
\v 48 Tu yʌn nocꞌor bʌcꞌ mʌꞌ u quimin, tu mʌꞌ u tupur a cꞌacꞌoꞌ.
\p
\v 49 Caj yaꞌaraj Jesús tiꞌob:
\p ―A ʌrʌcꞌoꞌ a cu sijic u winiquirob judío tiꞌ Cꞌuj tabtaꞌan cu toquic ich cꞌacꞌ. Bayiriꞌ xan, cu bin tumtaꞌbir yor a mac a cu sayʌr tin pach. Cu bin tumtaꞌbir yor ten a mac a cu chuquic u pach a cu sayʌr tin pachoꞌ. Cu bin tumtaꞌbir yor mac soc yiric wa taj cu yacsic tu yor.
\v 50 Tsoy yʌn u xaꞌanin, chen wa cu rucꞌur u xaꞌanin, mʌꞌ chꞌoꞌochiꞌ. Taj ca cꞌʌmejex u tꞌʌn Cꞌuj soc irechex xaꞌan. Caꞌ sisac a worex yejer a racꞌobex.
\c 10
\s Jesús cu camsic mʌꞌ tsoy u pꞌʌtic u racꞌ
\r (Mt. 19.1‑12; Lc. 16.18)
\p
\v 1 Caj ruqꞌuij tiꞌ taroꞌ caj tar tu cu xur u ruꞌumin Judea caj u chꞌʌtaj yaꞌarir u cꞌabaꞌ Jordán. A yaꞌab macobeꞌ caj u wʌcꞌʌs muchꞌquintajob u bʌj tu yicnʌn Jesús. Jeroj tuneꞌ, caj u yʌnxchun u wʌcꞌʌs camsic tiꞌob an ten bic cu nanij u camsic tiꞌob uch.
\v 2 Caj cꞌuchob u winiquirob judío a fariseojoꞌ yicnʌn Jesús, caj u chich cꞌatajob tiꞌ quir u tumticob yor, wa tsoy tuririꞌ mam u pꞌʌtic u racꞌ.
\v 3 Barej Jesús caj u nuncaj, caj u yaꞌaraj tiꞌob:
\p ―Baꞌ yarmʌn techex Moisés uch?
\p
\v 4 Robobeꞌ caj u yaꞌarajob:
\p ―A Moiséseꞌ araꞌb u tsꞌibtej u juꞌunin quir u pꞌʌtic u racꞌ. Caꞌ bin tsꞌocac u tsꞌibtic u juꞌunin jeroj tsoy u pꞌʌtic. Baxuc araꞌb ten Moisés.
\p
\v 5 Caj u nuncaj Jesús, caj u yaꞌaraj tiꞌob:
\p ―Barej caj u tsꞌibtaj techex a raꞌ tꞌʌnoꞌ caj u tsꞌibtaj quireꞌ caj u yiraj jach chich a joꞌrex.
\v 6 Barej u chꞌic chunin ber caj betaꞌb ich yocꞌocabeꞌ, raꞌ u qꞌuinin caj betaꞌb tu cotor a baꞌ, caj araꞌb ich u tꞌʌn Cꞌuj: “Xib yejer xquic caj betaꞌb ten Cꞌuj.” 
\v 7 “Rajen juntur a xibeꞌ bin u pꞌʌtej u tet yejer u nʌꞌ quir u pꞌeriquintic u bʌj yejer u racꞌ.
\v 8 A caꞌturoꞌ caꞌcheꞌ tu pꞌeriꞌquintaj u bʌjob.” Rajen robob mʌꞌ caꞌturobiꞌ chen tuririꞌ yʌn.
\v 9 Rajen a baꞌ pꞌeriquintaꞌb ten Cꞌuj mʌꞌ tsoy u jʌsic a xiboꞌ.
\p
\v 10 Barej caj ocob ich naj u camsʌwinicob caj tarob u cꞌaticob tiꞌ baꞌ caj u camsaj tiꞌob sam.
\v 11 Caj u yaꞌaraj tiꞌob:
\p ―Wa mac cu pꞌʌtic u racꞌ quir u bin u chꞌic u jer, caj tsꞌoc u chꞌic u jer, yʌn u siꞌpir, irej a mac a cu man yejer u jer xquic.
\v 12 Wa ja xquicoꞌ cu pꞌʌtic u mam quir u bin u chꞌic u jer, caj tsꞌoc u chꞌic u jer, yʌn u siꞌpir, irej a xquicoꞌ a cu man yejer u jer xiboꞌ.
\s Jesús cu tꞌʌnic Cꞌuj tiꞌ a chichanoꞌ
\r (Mt. 19.13‑15; Lc. 18.15‑17)
\p
\v 13 Yʌn mac caj tar purbir chichan ich Jesús quir u tsꞌancꞌʌbaꞌrob ten Jesús soc u yamtaꞌrob ten Cꞌuj. Caj u tꞌʌnej Cꞌuj Jesús quir u yamtaꞌrob chichan ten Cꞌuj. A yʌjpurirob chichan ich Jesús caj qꞌueyaꞌbob ten u camsʌwinicob Jesús.
\v 14 Cꞌuxij yor Jesús caj u yiraj rajen caj u yaꞌaraj tiꞌob: 
\p ―Tsireꞌej u tar purbir a chichanoꞌ, caꞌ u yirenob. Mʌꞌ a mʌquex u berob quir u tarob ten. Mʌꞌ ja wirej, a chichanoꞌ seb cu tar tu yʌnen.
\v 15 Wa mac u cꞌat u yocar tu cu bin u reyintejob Cꞌuj arej u cʌnejob a chichanoꞌ.
\v 16 Jeroj tuneꞌ, caj u chꞌaj u mecꞌob jujuntur a chichanoꞌ caj u tsꞌaj u cꞌʌb yocꞌorob jujuntur a chichanoꞌ caj u tꞌʌnaj Cꞌuj soc u yamtaꞌrob ten Cꞌuj a chichanoꞌ.
\s A mʌꞌ uch xuruc u baquer xib a neyʌn u taqꞌuin
\r (Mt. 19.16‑30; Lc. 18.18‑30)
\p
\v 17 A ray u qꞌuininoꞌ cu jocꞌar Jesús quir u bin tu bej, caj tar yacab yicnʌn Jesús tuririꞌ mac, caj xonraj ʌcʌtan caj u cꞌataj tiꞌ:
\p ―Jach tsoyech in wʌjcamsʌyʌjirech. Arej ten baꞌ caꞌ in betej soc in cuxtar munt qꞌuin?
\p
\v 18 Jesús caj u yaꞌaraj tiꞌ a xiboꞌ:
\p ―Biquinin ca waꞌaric tsoyen? Mʌnaꞌ mac jach tsoy chen jariꞌ Cꞌuj tsoyoꞌ.
\v 19 Tech a wer baꞌ caj u tsꞌibtaj Moisés uch: “Mʌꞌ a yʌn man yejer xquic, baxuc xquic mʌꞌ u yʌn man yejer xib. Baxuc xan, mʌꞌ ja quinsic mac. Baxuc xan, mʌꞌ a waꞌcric baꞌ. Baxuc xan, mʌꞌ a yʌn tusic mac. Baxuc xan, mʌꞌ a yʌn tusaric baꞌ. Yʌn sʌj ta tet yejer a nʌꞌ xan.”
\p
\v 20 Rajiꞌ tuneꞌ, caj u nuncaj, caj u yaꞌaraj tiꞌ:
\p ―In wʌjcamsayʌjirech, tu cotor aroꞌ caj in toc quibaj tin chichʌnin uch.
\p
\v 21 Jesús tuneꞌ, caj u pʌctajeꞌ caj u yajquintaj, caj u yaꞌaraj tiꞌ:
\p ―Yʌn tuririꞌ baꞌ mʌꞌ ta quibaj, caꞌ a betej aroꞌ. Canej tu cotor a baꞌ yʌn tech. Cu tsꞌocar a rʌc canic, caꞌ a jʌsej a taqꞌuin tiꞌ a mac otsiroꞌ. Cu tsꞌocar aroꞌ caꞌ taquech tin pach quir a cʌnic in tꞌʌn, cax wa jeꞌ a quimin. Caꞌ bin cꞌuchuquech ich caꞌanan, cu bin tsꞌabʌr tech a baꞌ jach coꞌojoꞌ.
\p
\v 22 Caj tsꞌoc yubic a baꞌ caj u yaꞌaraj Jesús tiꞌ caj tucurnʌjij quireꞌ jach yʌn u taqꞌuin. Caj bineꞌ, yajij yor.
\p
\v 23 Jesús tuneꞌ, caj sut u bʌj caj pacatnʌjij caj u yaꞌaraj tiꞌ u camsʌwinicob:
\p ―Jach yaj yocar mac a neyʌn u taqꞌuineꞌ tu cu reyinticob Cꞌuj.
\p
\v 24 Caj jacꞌ yorob u camsʌwinicob Jesús quireꞌ a ray tꞌʌnoꞌ a baꞌ caj u yaꞌaraj Jesús. Jeroj tuneꞌ, caj u wʌcꞌʌs araj tiꞌob:
\p ―In pararechex, jach yaj yocar mac a neyʌn u taqꞌuineꞌ tu cu reyinticob Cꞌuj quireꞌ u yaj u taqꞌuin.
\v 25 Jeꞌ wa ju cꞌuchur yor yocar yʌrʌcꞌ tsimin ich u jorir yitꞌ putsꞌ? Mʌꞌ u cꞌuchur yor quireꞌ chichin u jorir yitꞌ putsꞌ. Jeꞌ wa ju cꞌuchur yor ocar ich caꞌanan a mac a ne yʌn u taqꞌuin? Mʌꞌ u yocar quireꞌ u yaj u taqꞌuin. Jaj ix tʌcoj, jeꞌ u yocar yʌrʌcꞌ tsimin ich u jorir u yitꞌ putsꞌ. Chen a mac a neyan u taqꞌuin mʌꞌ ju yocar tu cu bin u reyintejob Cꞌuj quireꞌ u yaj u taqꞌuin. 
\p
\v 26 Caj u yubajob u camsʌwinicob caj jaqꞌuij yorob caj u pacran cꞌatajob ich u yet camsʌwinicob:
\p ―A mac cu bin tacbir ten Cꞌuj tun?
\p
\v 27 Jesús caj pactaꞌbob caj u yaꞌaraj:
\p ―A xiboꞌ mʌꞌ cꞌuchaꞌan yor u taquic u bʌj, chen Cꞌuj cꞌuchaꞌan yor u taquic tu cotor mac, quireꞌ Cꞌuj cꞌuchaꞌan yor tiꞌ tu cotor baꞌ.
\p
\v 28 Pedro tuneꞌ, caj u yʌnxchun yaꞌaric tiꞌ:
\p ―Jaj Tsꞌurir biquinin a neyʌn u taqꞌuin mʌꞌ u rʌc pꞌʌtaj a baꞌ yʌn tiꞌ quir u say ta pach quir u cʌnic a tꞌʌn? A tenob caj in rʌc pꞌʌtajob a baꞌ yʌntenob caj sayenob ta pach quir in cʌnicob a tꞌʌn. An baꞌ cu bin u tsꞌic tenob Cꞌuj, quireꞌ caj in toc rʌc pꞌʌtajob a baꞌ yʌn tenob uch?
\p
\v 29 Caj u nuncaj Jesús caj u yaꞌaraj:
\p ―Jach taj quin waꞌaric techex. A mac a caj u pꞌʌtaj yatoch tu cotor, cax u wʌcꞌʌs u bʌjob, cax u wʌcꞌʌs tet, cax u nʌꞌ, cax wa ju pararob, cax wa ju ruꞌumin quir u yamtiquen yejer u jach tsoyir u tꞌʌn Cꞌuj.
\v 30 A mac a caj u pꞌʌtaj aroꞌ cu bin u cꞌʌmej tiꞌ Cꞌuj a baꞌ jach tsoyoꞌ tu qꞌuinin bajeꞌrer, jach manan cu bin tsꞌabʌr tiꞌ. Cu bin tsꞌabʌr yatochob. Cu bin tsꞌabʌr tiꞌ u ruꞌumob. Raꞌiriꞌ u qꞌuinin xan, jeꞌ u chuquicob u pach quireꞌ caj u yacsaj tu yor in tꞌʌn. Baxuc xan, caꞌ bin xuruc tꞌʌn, jeꞌ u tsꞌabʌr tiꞌ u cuxtar munt qꞌuin.
\v 31 Barej yaꞌab a raꞌ yʌn pʌybejeꞌ bajeꞌrer, cu bin man pachir cu man u tsꞌatiꞌ pachir pʌybejiꞌ.
\s Jesús cu wʌcꞌʌs aric bin u caj quimin
\r (Mt. 20.17‑19; Lc. 18.31‑34)
\p
\v 32 Jesús cu bin ich u berir Jerusalén, yet binacob yaꞌab macob. Jesús pʌybej cu bin. Jacꞌaꞌan yorob cu binob a yet binacob, a cu sayʌrob tu pacheꞌ caj sajʌcchʌjob. Jeroj tuneꞌ, tu junanob caj u pʌyaj u camsʌwinicob quireꞌ u tsicbʌtic tiꞌob u docejob. Caj u yʌnxchun u yaꞌaric tiꞌob a baꞌ cu bin tar tiꞌ caꞌ bin cꞌuchucob tu cajar Jerusalén:
\p
\v 33 ―Iric quic binex tu cajar Jerusalén. Tiꞌ cu bin u quinsiquenob. Tiꞌ cu yʌn bin u cꞌubiquenobiꞌ tiꞌ u jach tsꞌurirob sacerdote u winiquirob judío, yejer yʌjcamsʌyʌjirob u tꞌʌn Moisés. Robob cu bin yaꞌarejob caꞌ quinsaquen, a tenoꞌ a baxuquenechexeꞌ. Mʌꞌ ja wirej, cu bin u cꞌubiquenob xan tiꞌ a mʌꞌ u winiquirob judío.
\v 34 Robob bin u pꞌastiquenob, bin u jʌtsꞌenob, bin u tubiquenob, jeroj tuneꞌ, bin u quinsenob. Mʌnaꞌ u nup u qꞌuinin caꞌ bin riqꞌuiquen tiꞌ in quimirir.
\s A baꞌ u cꞌatob Jacobo yejer Juan
\r (Mt. 20.20‑28)
\p
\v 35 Jacobo tun, yejer Juan, u pararob Zebedeojoꞌ caj tarob tu yicnʌn Jesús, caj u yaꞌarajob:
\p ―In wʌjcamsayʌjirechob, wa quin cꞌaticob baꞌ tiꞌ tech, in cꞌatob caꞌ a betej tiꞌ a tenob.
\p
\v 36 Rajiꞌ tuneꞌ, caj u yaꞌaraj tiꞌob:
\p ―Baꞌ a cꞌatex caꞌ in betej techex?
\p
\v 37 Robob caj u yaꞌarajob tiꞌ:
\p ―Arej tenob caꞌ curaquenob tuririꞌ ta noj bayiriꞌ tuririꞌ ta tsꞌic caꞌ bin cꞌuchuc tu qꞌuinin caꞌ ocaquech tu cu reyinticob Cꞌuj a mac tu cotor.
\p
\v 38 Jesús tuneꞌ, caj u yaꞌaraj tiꞌob:
\p ―A techexoꞌ, mʌꞌ a werex baꞌ ca cꞌatiquex ten. Arex ten wa cꞌuchaꞌan a worex a mucꞌyajex an ten bic caꞌ bin mucꞌyajnʌquen ich cruz? Bayiriꞌ xan, arex ten wa cꞌuchaꞌan a worex a mucꞌyajex an ten bic caꞌ bin mucꞌyajnʌquenob tiꞌ a macob?
\p
\v 39 Robob caj u yaꞌarajob tiꞌ:
\p ―Cꞌuchaꞌan in worob in mucꞌyajob an bic tech.
\p Jesús caj u yaꞌaraj tiꞌob:
\p
\v 40 ―Taj quin waꞌaric. Jeꞌ a mucꞌyajex an bic ten. Chen mʌꞌ cꞌuchaꞌan in wor in curquintiquechex ich in noj mʌꞌ ich in tsꞌic quireꞌ mʌꞌ ten yʌnin. Quireꞌ in Tet Cꞌuj yʌnin quir u curquintic mac u cꞌat Cꞌuj. Rajiꞌ u yʌn ricsmʌn uch.
\p
\v 41 Barej caj yubob a diezoꞌ u yet camsʌwinicob a baꞌ cꞌataꞌb tiꞌ Jesús ten Juan yejer Jacobo. U yet camsʌwinicob caj pꞌujob yejer Juan yejer Jacobo.
\v 42 Barej Jesús caj u tꞌʌnaj caꞌ u muchꞌquintejob u bʌj u camsʌwinicob quir u camsic, caj u yaꞌaraj tiꞌob: 
\p ―A werex a mac u jach tsꞌurirob u cajarob a mʌꞌ u winiquirob judío, cu jach tsꞌuririnticob u winiquirob. Bayiriꞌ xan, cu naj tsꞌuririnticob u winiquirob quir u beticob a baꞌ u cꞌatob u jach tsꞌurirob.
\v 43 Mʌꞌ a yʌn cʌniquex a baxuc u jach tsꞌurirob a mʌꞌ u winiquirob judío, a mac u cꞌat u tsꞌuririnticob u yet acsaꞌorirob. Arej caꞌ u yamtej u yet camsʌwinicob. 
\v 44 Cax a mac ich techex u cꞌat u tsꞌuririntic u yet camsʌwinicob, arej caꞌ u yamtej u yet camsʌwinicob soc irej u cꞌurew.
\p
\v 45 Caj u yaꞌaraj Jesús:
\p ―Caꞌ a cʌniquenex, a tenoꞌ a baxuquenechex. Mʌꞌ taren quir u yamtiquenob. Taren in yamtic tu cotor mac. Taren quir in quinsaꞌr soc in rʌc boꞌotic u boꞌorir caꞌ siptacob u binob u siꞌpirob yaꞌab mac.
\s Jawsaꞌb u wich Bartimeo ten Jesús
\r (Mt. 20.29‑34; Lc. 18.35‑43)
\p
\v 46 Caj tarob tu cajar Jericó. Quireꞌ cu jocꞌar ich u cajar Jericó yet binacob u camsʌwinicob yejer xan pꞌencʌch yaꞌab macob, tiꞌ curaꞌan a chꞌop u wicheꞌ ich nʌcꞌ bej. Cu cꞌatic u taqꞌuin quir u janʌn. Bartimeo u cꞌabaꞌ a chꞌop u wicheꞌ, rajiꞌ u parar Timeo.
\v 47 Barej caj u yubaj Jesús a cu tar tu cajar Nazaret caj maneꞌ caj u yʌnxchun u yawʌt caj yaꞌaraj:
\p ―Jesús, u pararech a nunquir u rey David, chan yajquin ten.
\p
\v 48 Qꞌueyaꞌb ten yaꞌab mac caꞌ u mʌc u chiꞌ. Barej rajiꞌ caj u jach cꞌamquintic awʌt:
\p ―U pararech a nunquir u rey David chan yajquin ten. 
\p
\v 49 Jesús caj xurij ich bej caj u pʌyaj a chꞌop u wicheꞌ. Caj u pʌyajob a pimoꞌ tiꞌ a chꞌop u wicheꞌ, caj yaꞌarob tiꞌ:
\p ―Chichquintej a wor, riqꞌuen cu tꞌʌniquech ―quij yaꞌaraꞌ ten a pimoꞌ.
\p
\v 50 Bartimeo tuneꞌ, caj ricꞌ caj u pitaj u caꞌ yaꞌarir u noqꞌueꞌ, caj u chꞌaj u sitꞌ, caj tarij yicnʌn Jesús. 
\v 51 Caj tꞌʌn ten Jesúseꞌ, caj u yaꞌaraj tiꞌ:
\p ―Baꞌ a cꞌat ten quir in yamtiquech?
\p A Bartimeojoꞌ caj u yaꞌaraj tiꞌ:
\p ―In wʌj camsʌyʌjirech caꞌ sasichʌjʌc in wich soc chʌcaꞌan in wiric in ber.
\p
\v 52 Caj u yaꞌaraj Jesús tiꞌ:
\p ―Xen, quireꞌ caj a wacsaj ta wor ten, jaw a wich. Seb caj jaw u wich, caj pacatnʌjij, caj bin tu pach Jesús ich bej.
\c 11
\s Jesús tiꞌ oquij ich u cajar Jerusalén
\r (Mt. 21.1‑11; Lc. 19.28‑40; Jn. 12.12‑19)
\p
\v 1 Barej caj natsꞌob tu cajar Jerusalén, caj yʌn cꞌuchob u chan cajar u cꞌabaꞌ Betfagé quet yejer u chan cajar Betania. Jach baytʌc tu yʌn u chan pꞌuc witsir u cꞌabaꞌ Olivos quireꞌ tiꞌ pʌcaꞌan u pʌcꞌar ich u cor u cheꞌer Olivos. Jesús caj u tuchiꞌtaj caꞌtur u camsʌwinicob caꞌ xicob.
\v 2 Caj yaꞌaraj tiꞌob:
\p ―Xenex ich u chan cajar cꞌʌs baytʌc. Caꞌ bin ocaquechex ich u cajar jeꞌ a wiriquex chan tsimin tiꞌ macaꞌan, mʌnaꞌ mac nacaꞌan cʌptar u cʌpmʌn tu pach. Pitex caꞌ a pʌyex teraꞌ.
\v 3 Wa mac cu cꞌatic techex: “Biquinin ca pitiquex chan tsimin?” Yʌn are baxuc a jeraꞌ: Quireꞌ ic Jaj Tsꞌurir u cꞌat u cʌptar tu pach, quechex tiꞌ. Caꞌ bin tsocac u cꞌʌniqueꞌ seb cu wʌcꞌʌs tuchiꞌtej teraꞌ.
\p
\v 4 Caj binob caꞌtur u camsʌwinicob Jesús caj u yirajob a chan tsininoꞌ tiꞌ macaꞌan tancab baytʌc tu yʌn u jor a najoꞌ. Tu ber yʌn. Jeroj tuneꞌ, caj u pitajob a chan tsiminoꞌ.
\p
\v 5 Jun yarob tiꞌ a macob, a tiꞌ tar yʌnobob, caj u cꞌatajob tiꞌob:
\p ―Baꞌ ca betex? Biquinin ca pitiquex a chan tsiminoꞌ? 
\p
\v 6 Robob tuneꞌ, caj u yaꞌarajob tiꞌob quireꞌ araꞌbob ten Jesúseꞌ, caj chaꞌaj tiꞌob chan tsimin.
\v 7 A caꞌtur u camsʌwinicob caj u paytajob chan tsimin, caj binob u purej ich Jesús, caj u jʌyajob nocꞌ tu pach chan tsimin. U camsʌwinicob Jesús caj u yamtajob Jesús quir u cʌptar tu pach chan tsimin.
\v 8 Yaꞌab mac cu jʌyicob uch u caꞌ yarir u nocꞌob teꞌ ich bejoꞌ tu cu man yʌrʌcꞌ chan tsimin an ten bic rey cu cꞌuchur tu cajar. U jer jun yarob caj u chꞌʌcajob u cꞌʌb cheꞌ caj u jʌyajob teꞌ ich bej xan, a baywoꞌ cu yesicob cu sʌjticob a mac a cu tar ich bej.
\p
\v 9 A mac a cu bin pʌybej tiꞌ Jesús yejer a raꞌ cu tarob tu pach, caj cꞌayʌnʌjob tu cu yaꞌaricob:
\p ―Jach caremech Cꞌuj. Cꞌuj caj a yamtaj a mac a cu tar tu cꞌabaꞌ Jaj Tsꞌur. Caꞌ ij carex Hosanna.
\v 10 Jach manan tsoy wa macob cu quiꞌ tꞌʌnticob tu cu bin u reyinticob u rey ic nunquirex David a cu bin tar. Caꞌ ij carex Jach caremech Cꞌuj.
\p
\v 11 Caj oc Jesús tu cajar Jerusalén. Barej caj oc Jesús tu carem naj tu cu naj cꞌujinticob Cꞌuj u winiquirob judío, caj u rʌc pʌctaj tu cotor a baꞌ tiꞌ yʌnoꞌ. Jeroj tuneꞌ, caj jocꞌ quir u bin tu cajar Betania yejer u docejoꞌ u camsʌwinicob quireꞌ cu bin qꞌuin.
\s Jesús caj u yaꞌaraj tiꞌ: Mʌꞌ a wichʌncʌr u cheꞌer higo 
\r (Mt. 21.18‑19)
\p
\v 12 Caj sasij, jeroj tuneꞌ, caj jocꞌob tu cajar Betania, caj wiꞌijchʌjij.
\v 13 Caj u yiraj nach tuririꞌ u cheꞌer higo, yʌn u reꞌ, rajen caj u jutsꞌ u bʌj Jesús yirej wa jix tiꞌ yʌn u wich, caj yiraj mʌnaꞌ u wich chen u reꞌ yʌn, quireꞌ mʌꞌ raꞌ u qꞌuinin u wichʌnʌcʌr.
\v 14 Jeroj tuneꞌ, caj u tꞌʌnaj, Jesús caj u yaꞌaraj tiꞌ: 
\p ―Mʌꞌ biqꞌuin caꞌ bin macꞌʌc a wich ten mac ―quij yaꞌaraꞌ tiꞌ u cheꞌer higo.
\p Caj uꞌyaꞌb ten u camsʌwinicob.
\s Jocꞌsaꞌb a mac cu naj conanob ich carem naj tu cu naj cꞌujinticob Cꞌuj u winiquirob judío
\r (Mt. 21.12‑17; Lc. 19.45‑48; Jn. 2.13‑22)
\p
\v 15 Barej caj urob tu cajar Jerusalén tiriꞌ caj oquij Jesús ich carem naj tu cu naj cꞌujinticob Cꞌuj u winiquirob judío. Caj u yʌnxchun u jocꞌsic a mac a cu canicob u baꞌtac tu japnin carem naj, bayiriꞌ xan, a mac cu mʌnicob, caj u rʌc jʌwʌcchꞌintej Jesús u pocheꞌir tu cu cꞌaxicob u taqꞌuin, bayiriꞌ xan, caj u rʌc jʌwʌcchꞌintej u cutanob tu cu canic u yʌrʌcꞌ susuy.
\v 16 Mʌꞌ chaꞌb u chꞌaꞌacob baꞌ ich carem naj tu cu naj cꞌujinticob Cꞌuj u winiquirob judío.
\v 17 Caj u camsaj tiꞌob, tan yaꞌaric:
\p ―Mʌꞌ wa cꞌaj techex tub tsꞌibaꞌan ich u tꞌʌn Cꞌuj tu cu yaꞌaric Cꞌuj: “A jeraꞌ u najir quir u yocar mac u tꞌʌnic Cꞌuj, cax tu cotor mac tu cu tarob tu cajarob ich tu cotor u ruꞌumirob”; chen a techexoꞌ caj a waysajex irej u japnin tunich tu cu naj tar a mac a cu yaꞌcricob baꞌ.
\p
\v 18 Barej caj uꞌyaꞌb ten u jach tsꞌurirob tu cotor u sacerdote u winiquirob judío yejer yʌjcamsʌyʌjirob u tꞌʌn Moisés caj u cʌxtob bic tabar u quinsicob. Quireꞌ tu cotor macob jacꞌaꞌan yorob tiꞌ a baꞌ cu camsic, rajen robob, u jach tsꞌurirob tu cotor sacerdote yejer yʌjcamsʌyʌjirob u tꞌʌn Moisés caj u chꞌaj saquirob tiꞌ Jesús.
\v 19 Barej ber cu bin qꞌuin, caj jocꞌob tu cajar Jerusalén caj bin Jesús quet yejer u camsʌwinicob.
\s Tijij u cheꞌer higo
\r (Mt. 21.20‑22)
\p
\v 20 Aꞌacbir samam caj manob caj u yirajob rʌc tijij u cheꞌer higo tac tu mots.
\v 21 Caj cꞌajij yicꞌ Pedro, caj u yaꞌaraj tiꞌ:
\p ―In wʌjcamsʌyʌjirech, iric quimij a ray u cheꞌer higo a ta roꞌroꞌ tꞌʌntaj, caj rʌc tijij u cheꞌer.
\p
\v 22 Caj u nuncaj Jesúseꞌ, caj u yaꞌaraj tiꞌob:
\p ―Caꞌ acsex ta worex tiꞌ Cꞌuj.
\v 23 Taj quin waꞌaric techex, jeꞌ u cꞌuchur a worexeꞌ a tꞌʌnex cax a jeꞌ witsaꞌ caꞌ xic ich u chiꞌcꞌacꞌnab, jeꞌ u bineꞌ wa ca wacsiquex ta worex, wa ta worex mʌꞌ a waꞌariquex: “Jeꞌ wa ju bineꞌ wa quin wac tiꞌ.” Mʌꞌ ja wirej, jeꞌ u bineꞌ quireꞌ caj a wacsajex ta worex jeꞌ u bineꞌ.
\v 24 Rajen, quin waꞌaric techex, wa ber ca tꞌʌniquex Cꞌuj tiꞌ a baꞌ a cꞌatex, acsej ta worex wa bin a cꞌʌmiquex jeroj tuneꞌ bin tac tiꞌ techex tu cotor a baꞌ caj a cꞌatajex tiꞌ Cꞌuj.
\v 25 Wa ber ca tꞌʌniquex Cꞌuj caꞌ a pacran jawsex u siꞌpir a ca tucriquex wa mac caj u betaj cꞌas tiꞌ techex soc a Tetex caꞌanan caꞌ u jawsej a siꞌpirex xan.
\v 26 Quireꞌ wa techex mʌꞌ ja jawsiquex u siꞌpirob bayiriꞌ xan a Tetex a tiꞌ yʌn ich caꞌananoꞌ mʌꞌ u bin u jawsic a siꞌpirex xan.
\s Mac tsꞌaꞌb u beyaj tiꞌ Jesús
\r (Mt. 21.23‑27; Lc. 20.1‑8)
\p
\v 27 Caj cꞌuchij Jesús ich u cajar Jerusalén yejer u camsʌwinicob. Quireꞌ cu man ich carem naj tu cu naj cꞌujinticob Cꞌuj u winiquirob judío, caj u jutsꞌob u bʌj u jach tsꞌurirob tu cotor sacerdote u winiquirob judío yejer yʌjcamsʌyʌjirob u tꞌʌn Moisés yejer u jach tsꞌurirob u winiquirob judío a Nuxibeꞌ. Caj u jutsꞌob u bʌj ich Jesús caj cꞌatab tiꞌ Jesús.
\v 28 Caj u yaꞌarajob tiꞌ:
\p ―Mac caj u yaꞌaraj tech caꞌ a jocꞌsej joꞌoraj? Tub u tar a mucꞌ quir a jawsic mac? Tub u tar a mucꞌ quir a camsic mac? Mac caj u tsꞌaj a mucꞌ?
\p
\v 29 Caj nuncaj Jesúseꞌ, caj u yaꞌaraj tiꞌob:
\p ―Baxuc techex xan, jeꞌ in cꞌatic techex wa taj ca nunquiquex ten jeꞌ in waꞌaric techexeꞌ tub u tar in muqꞌueꞌ quir in betic aroꞌ.
\v 30 Arex ten ―quij Jesús―. Mac tuchiꞌtej Juan quir u yacsic jaꞌ tu joꞌr mac. Cꞌuj wa tuchiꞌtej wa xib tu tuchiꞌtaj? 
\p
\v 31 Caj tsꞌoc yubicob a baꞌ cꞌataꞌb tiꞌob ten Jesús, cu pacran nunquicob u tꞌʌn ich u bʌjiriꞌob tan yaꞌaricob: 
\p ―Wa quij cariquex tiꞌ: “Cꞌuj tuchiꞌtej”, jeꞌ u yaꞌaric toꞌonex: “Biquinin mʌꞌ ta quibex u tꞌʌn Juan uch?”
\v 32 Barej wa quij cariquex tiꞌ: “A Juanoꞌ tuxtaꞌb ten xib”, quic sʌjtiquex a yaꞌab macob quireꞌ robob cu tucricob tuchiꞌtaꞌb ten Cꞌuj rajen yerob jach jaj Juaneꞌ a mac tsꞌaꞌb u tucuric ten Cꞌuj quir u tsicbar a baꞌ u cꞌat Cꞌujoꞌ.
\p
\v 33 Caj u nucajob, caj u yaꞌarajob tiꞌ Jesús:
\p ―Mʌꞌ in werob mac tuchiꞌtej Juan.
\p Baxuc caj wʌcꞌʌs nuncaꞌb ten Jesús caj u yaꞌaraj:
\p ―Baxuc xan, mʌꞌ in waꞌaric tub u tar in mucꞌ a baꞌ quin betic.
\c 12
\s Yʌjcarirob u corir uva
\r (Mt. 21.33‑46; Lc. 20.9‑19)
\p
\v 1 Jesús caj u yʌnxchun u camsic a yaꞌab macob, caj u camsaj baxuc a jeraꞌ soc yerob a mac a mʌꞌ u cꞌat yacsic u yor quireꞌ bin u caj ich cꞌacꞌ. Rajen caj u camsaj a jeraꞌ:
\p ―Tiꞌ yʌn mac cuch caj tsꞌoc u chꞌʌquic u cheꞌer u cor, caj u rʌc tocaj u robirir, caj u pʌcꞌaj u yaqꞌuir uva. Caj tsꞌoc u pʌqꞌuic caj u paꞌteꞌtaj u cor, caj u tsꞌʌpquintaj tunich quir u chꞌictar caꞌanan soc u cʌnantic u wich uva soc mʌꞌ u rʌc mʌqꞌuicob chꞌichꞌ. 
\p ’Caj yaꞌaraj u cʌnataꞌrob u cor ten u winiquirob, quireꞌ bin u caj nachir.
\v 2 Caj cꞌuchij tu qꞌuinin u tꞌaquicob u wich uva u jach tsꞌurir caj u tuchiꞌtaj u cꞌurew tuririꞌ quir u cꞌatic u boꞌorir tu tu tꞌacajob u wich uva tiꞌ u yʌjcarirob u corir uva. Quireꞌ caꞌ u jʌsob ti u tsꞌurirob u boꞌorir u cor u tsꞌurir.
\v 3 Caj chuc jʌtsꞌbir ten yʌjcarirob u corir uva caj wʌcꞌʌs tuchiꞌtaꞌb ich u tsꞌurir, mʌnaꞌ baꞌ tsꞌaꞌb tiꞌ.
\v 4 Tu wʌcꞌʌs tuchiꞌtaj u jer u cꞌurew, barej caj u chꞌinajob u joꞌr, caj u bujʌtstajob u yotꞌer u joꞌr, toc chetaꞌb ten yʌjcarirob u corir uva caj wʌcꞌʌs tuchiꞌtaꞌb ten yʌjcarirob u corir uva ich u jach tsꞌurir.
\v 5 Caj wʌcꞌʌs tuchiꞌtaj u jer rajiꞌ xan caj u quinsajob. Bayiriꞌ xan yejer u jerob yaꞌab, jun yarob caj u bʌbʌjʌtstajob, jun yarob caj u quinsajob.
\p
\v 6 ’Tiꞌ toy yʌn uch tuririꞌ u parar ich yicnʌn u jach tsꞌurir, u jach yaj u parar. Jariꞌ mʌnaꞌ u jer mac quir u tuchiꞌtic, rajen caj u tuchiꞌtaj u parar. Yer u jach tsꞌurir jeꞌ u sʌjtaꞌ u parar ten yʌjcarirob u corir uva.
\v 7 Caj cꞌuchij u parar caj irir ten yʌjcarirob u corir uva caj u pacran arajob ich u yet carirob u corir uva: “Rajiꞌ u parar ic jach tsꞌurirex cu tar. Rajiꞌ cu bin chꞌic u cor wa cu quimin u tet. Caꞌ xicoꞌonex ij quinsex u parar soc toꞌonex quic bin ic chꞌiquex u cor.”
\v 8 Caj u chucajob caꞌ xicob u quinsejob ich u nʌcꞌ cꞌaxir u cor. Tiꞌ tu jach quinsajob ich u nʌcꞌ cꞌaxir u cor, caj u pichꞌintajob u baquer.
\p
\v 9 Jesús caj u cꞌataj tiꞌob:
\p ―Arex ten, baꞌ cu bin u betic u jach tsꞌurir u cor tiꞌ yʌjcarirob u corir uva caꞌ bin tac? Jeꞌ u tar u jach tsꞌurir quir u jocꞌsic u quinsej quir u tsꞌic tiꞌ u jerob mac.
\p
\v 10 Jesús caj u yaꞌaraj tiꞌ u jach tsꞌurirob u winiquirob judío:
\p ―Mʌꞌ wa ja xacmʌnex a tsꞌibaꞌan u tꞌʌn Cꞌuj a jeraꞌ: 
\q U yoc naj a caj u pichꞌintajob yʌjcꞌʌxirob naj quireꞌ mʌꞌ u cꞌatobiꞌ. A jeraꞌ yoc naj a caj u purob mʌnaꞌ u jer jach chich u mucꞌ. Chen caj u wʌcꞌʌs chucob quir u cꞌʌxicob naj soc u chichtar u mucꞌ.
\v 11 A jeraꞌ caj betaꞌb ten Cꞌuj. Mʌꞌ wa cu jacꞌar ij corex ij quiriquex?
\p
\v 12 Caj najtaꞌbir ten u jach tsꞌurirob tu cotor u winiquirob judío a baꞌ camsaꞌb tiꞌob sam raꞌ quir u najticob rajen caj u tumtajob u tuchiꞌticob chucbir Jesús. Quireꞌ cu sʌjticob a pimob rajen pꞌat, rajen binob.
\s Tar cꞌataꞌbir tiꞌ u boꞌorir gobierno
\r (Mt. 22.15‑22; Lc. 20.20‑26)
\p
\v 13 Caj u tuchiꞌtajob jun yarob u winiquirob judío a fariseojoꞌ yejer u camsʌwinicob Herodes tiꞌ Jesús quir u tus wayticob u tꞌʌn soc u tus taquicob u joꞌr ich gobernador.
\v 14 Barej caj tarob caj u yaꞌarajob tiꞌ:
\p ―In wʌjcamsʌyʌjirechob ―quij―, in werob taj a baꞌ ca wac. Baxuc taj a baꞌ ca camsic tiꞌ u tꞌʌn Cꞌuj. Mʌꞌ a coyen ca chich aric tiꞌ mac, quet ca waꞌaric tiꞌob. Quireꞌ baxuc taj ca camsic tenob a baꞌ u cꞌat Cꞌuj tiꞌ a tenob. Arej tenob quireꞌ in cꞌatob in werob wa tsoy in boꞌoticob in ruꞌumob tiꞌ rey? Wa mʌꞌ tsoy in boꞌoticob in ruꞌumob tiꞌ rey?
\p
\v 15 Jesús yer a baꞌ cꞌas cu tucricob tu yorob caj u yaꞌarajob: 
\p ―Biquinin tarechex a tumtiquex in wor? Esej ten tuririꞌ a taqꞌuinex caꞌ in wirej.
\p
\v 16 Caj u yesajob tiꞌ Jesús. Rajiꞌ caj u yaꞌaraj tiꞌob: 
\p ―Mac jotꞌaꞌan u yoꞌochir? Mac u cꞌabaꞌ tsꞌibaꞌan tiꞌ? 
\p Caj u yaꞌarajob tiꞌ:
\p ―Raꞌ u yoꞌochir u rey César, jotꞌaꞌan ich sʌc taqꞌuin. 
\p
\v 17 Caj u yaꞌaraj Jesús tiꞌob:
\p ―Taj a baꞌ ca waꞌariquex. Rajen caꞌ a quibex a baꞌ cu yaꞌaric techex u rey César, baxuc xan, caꞌ a quibex a baꞌ a cu yaꞌaric Cꞌuj tiꞌ techex.
\p Chan jacꞌaꞌan yorob a baꞌ yubajob yaꞌaric Jesús.
\s Tar cꞌataꞌbir bic tabar mac cu riqꞌuir tu quimirir 
\r (Mt. 22.23‑33; Lc. 20.27‑40)
\p
\v 18 Baxuc xan, tarob u winiquirob judío a saduceojoꞌ. Aroꞌ cu yaꞌaric: “Mʌꞌ u riqꞌuir mac tu quimirir.” Caj tarob u cꞌatej baꞌ tiꞌ Jesús caj yaꞌarajob tiꞌ Jesús:
\p
\v 19 ―In wʌjcamsʌyʌjirechob ―quij―, ic nunquirirex Moisés caj u tsꞌibtaj toꞌonex uch a baꞌ caꞌ ic betejex caj u yaꞌaraj wa ju mam cu quimin, cu pꞌatʌr u racꞌ, mʌnaꞌ u parar yejer, caj quimij u mam tu junan. Caj u yaꞌaraj Moisés, raꞌ u yitsꞌin u mam, rajiꞌ cu bin u chꞌic u raqꞌuintej u muꞌ. Soc yiric wa jeꞌ u pararʌncʌr yejer soc u chꞌisic u parar, irej wa ju tus parar u sucuꞌun uch.
\v 20 A sucuꞌunbiroꞌ yʌn seis yitsꞌinob. A sucuꞌunbiroꞌ, rajiꞌ tu yʌn chꞌaj u racꞌ, hasta u quimij mʌnaꞌ u parar. 
\v 21 A itsꞌinbiroꞌ, rajiꞌ caj u tacaj u chuch u sucuꞌun. Rajiꞌ caj u chꞌaj u racꞌ u sucuꞌun, mʌnaꞌ u parar xan caj quimij, a jach caꞌ itsꞌinbiroꞌ, rajiꞌ caj u tacaj u chuch u caꞌ sucuꞌun. Rajiꞌ caj u chꞌaj u racꞌ u caꞌ sucuꞌun. Mʌnaꞌ u parar xan.
\v 22 Hasta nup u rʌc chꞌic u yitsꞌin u mam, hasta rʌc quiminob mʌnaꞌ u parar, caj cꞌuchij tu qꞌuinin u quimin a xquicoꞌ, caj quimij.
\v 23 Caꞌ bin riqꞌuic tu quimirir, mac cu bin u chꞌic u raqꞌuintej quireꞌ, siete tu chꞌaj u mam?
\p
\v 24 Jesús tuneꞌ, caj u nuncaj tiꞌ:
\p ―Mʌꞌ wa ja wʌcꞌʌs bʌjiriꞌex ca tusariquex quireꞌ mʌꞌ ja najtex a baꞌ tsꞌibaꞌan ich u tꞌʌn Cꞌuj bayiriꞌ xan, mʌꞌ a werex wa jach chich u mucꞌ Cꞌuj.
\v 25 Quireꞌ caꞌ bin cꞌuchuc tu qꞌuinin u wʌcꞌʌs riqꞌuir mac tiꞌ u quimirir, a xiboꞌ mʌꞌ u raqꞌuintej xquic. Bayiriꞌ a xquicoꞌ mʌꞌ u mʌmintej xib quireꞌ u jer cu bin waysaꞌbir ten Cꞌuj robob irej yʌjtꞌʌnirob Cꞌuj caꞌanan. 
\v 26 Soc a cʌniquex baꞌ u cꞌat yaꞌaric, jeꞌ u riqꞌuir mac tiꞌ quimirir. Yʌn cꞌaj techex tub tsꞌibaꞌan u tꞌʌn Cꞌuj. Caj yaꞌaraj Cꞌuj tiꞌ Moisés ich a ray chan cheꞌer a erar u caꞌ uch an bic Cꞌuj cu yaꞌaric: “Tu cꞌujinten Abraham uch, bayiriꞌ Isaac yejer Jacob.”
\v 27 A Cꞌujoꞌ mʌꞌ quimen yiric a nunquirex, cuxaꞌan yiric a Cꞌujoꞌ. Mʌꞌ ja wirej, cuxaꞌan yiric a Cꞌujoꞌ tu cotor mac. Rajen mʌꞌ quiꞌjij a waquex.
\s Teꞌen u tꞌʌn ich u tꞌʌn Cꞌuj a jach noꞌojoꞌ
\r (Mt. 22.34‑40)
\p
\v 28 Caj u jutsꞌaj u bʌj tuririꞌ ich Jesús, yʌjcamsʌyʌjir u tꞌʌn Moisés a mac caj u yubaj uch bic cu nunquicob u tꞌʌn Jesús a saduceojoꞌ. Tsoy caj u yubaj u nunquic Jesús tiꞌ u pacran tꞌʌnob, caj u cꞌataj tiꞌ:
\p ―Arej ten a jach manan tsoyir u tꞌʌn Cꞌuj ich tu cotor caꞌ in quibejob.
\p
\v 29 Jesús tuneꞌ caj u nuncaj tiꞌ:
\p ―A jeraꞌ a jach manan tsoyir u tꞌʌn Cꞌuj ich tu cotor: “Uꞌyex tu cotor u winiquirechex israel a Jaj Tsꞌuroꞌ, rajiꞌ ij Cꞌujirex, jariꞌ rajiꞌ ic Jaj Tsꞌurirex.
\v 30 Yajquintej Cꞌuj, quireꞌ rajiꞌ a Jaj Tsꞌurirex. Quiꞌ yajquintej Cꞌuj yejer tu cotor a pixam, yejer tu cotor a mucꞌ yejer tu cotor a wor xan”, quireꞌ rajiꞌ pʌybej ich u tꞌʌn Cꞌuj. Rajen caꞌ a quiꞌ quibex a jeraꞌ.
\v 31 Quet bayiriꞌ tiꞌ yʌn u jer a cu yaꞌaric: “Yajquintej a racꞌob an bic ca wʌcꞌʌs yajquintic a bʌjiriꞌreꞌ.” Mʌnaꞌ u jer tu tsꞌibaꞌan ich u tꞌʌn a jach manan noj tiꞌ aroꞌ.
\p
\v 32 A yʌjcamsʌyʌjir u tꞌʌn Moisés tunoꞌ, caj u yaꞌaraj tiꞌ:
\p ―Jach taj caj a waꞌaraj ten, in wʌjcamsʌyʌjirech, caj a waꞌaraj jach taj, tuririꞌ Cꞌuj yʌn, mʌnaꞌ u jer, jariroꞌ.
\v 33 Taj caj a waꞌaraj caꞌ ic yajquintex Cꞌuj yejer tu cotor ic pixamex yejer tu cotor ic tucurex yejer tu cotor ic muqꞌuex, bayiriꞌ xan, caꞌ ic yajquintex ic racꞌobex an bic ic wʌcꞌʌs bʌjex ic yajquintiquex, a jeraꞌ a caj a waꞌaraj jach manan tiꞌ tu cotor a baꞌ ʌrʌcꞌaꞌan a cu toquic quir u sijic tiꞌ Cꞌuj, bayirꞌ tiꞌ tu cotor a baꞌ cax cu sijicob tiꞌ Cꞌuj.
\p
\v 34 Jesús caj u toc uꞌyaj tsoy an bic caj u nuncaj tiꞌ a yʌjcamsʌyʌjir u tꞌʌn Moisés quireꞌ caj u nuncaj an bic caj u najtaj a baꞌ araꞌb tiꞌ ten Jesús. Rajen caj u yaꞌaraj tiꞌ:
\p ―Tabar a wocar tu cu bin u reyinticob Cꞌuj.
\p Jeroj tuneꞌ, caj pꞌatob u tar u cꞌaticob baꞌ tiꞌ Jesús, sajʌcob u cꞌatej.
\s A Cristojoꞌ u chꞌic parar u nunquir David
\r (Mt. 22.41‑46; Lc. 20.41‑44)
\p
\v 35 Barej tiꞌ yʌn Jesús ich a carem naj tu cu naj cꞌujinticob Cꞌuj u winiquirob judío tu cu camsic caj u cꞌataj tiꞌob: 
\p ―Bic tabar cu yaꞌaric a yʌjcamsʌyʌjirob u tꞌʌn Moisés wa Cristo rajiꞌ u chꞌic caꞌ parar u nunquir David?
\v 36 Arex ten biquinin David caj u tꞌʌnaj: “In Jaj Tsꞌurir” ―quij David. Mʌꞌ ja wirej caj yamtaꞌb ten u Tajꞌor u Pixam Cꞌuj caj u tsꞌibtaj a jeraꞌ:
\q A Cꞌujoꞌ caj u yaꞌaraj tiꞌ in Jaj Tsꞌurir, quij yaꞌaric David: “Curen tin noj, quij Cꞌuj, hasta quin rʌc chꞌesic a mac a cu pꞌatiquech.”
\m
\v 37 Bic tabar Cristo u chꞌic caꞌ parar a nunquirex David wa David u bʌj tꞌʌnej: “In Jaj Tsꞌurir”? Rajen ij querex a Cristojoꞌ rajiꞌ mʌꞌ chen u chꞌic caꞌ parar a nunquirex David.
\p A macob a tiꞌ yʌnob, quireꞌ pꞌencʌch yaꞌab tiꞌ yʌnob, jach tsoy tu xiquinob caj u yubajob tiꞌ.
\s Jesús cu taꞌquic u joꞌr a yʌjcamsʌyʌjir u tꞌʌn Moisés 
\r (Mt. 23.1‑36; Lc. 11.37‑54; 20.45‑47)
\p
\v 38 Tu cu camsic Jesús caj u yaꞌaraj tiꞌob:
\p ―Quiꞌ cʌnantechex a bʌjex soc mʌꞌ a cʌniquex a yʌjcamsʌyʌjirob u tꞌʌn Moiséseꞌ. Mʌꞌ ja wirej, u yʌjcamsʌyʌjirob u tꞌʌn Moisés jach cꞌʌrʌp u nocꞌ cu manob soc u tus tucricob u racꞌob jach noj aroꞌ. Quiꞌ yorob yiricob baxucob. Jach quiꞌ yorob yiricob u tꞌʌnʌn ten u racꞌob tu cu naj bin u mʌnicob yoꞌochob quireꞌ cu yiricob tus noj aroꞌ.
\v 39 Baxuc cu teticob u cutanob tu cu cutarob a jach noꞌojoꞌ tu cu naj cꞌujinticob Cꞌuj tu chan najirob. Baxuc tu cu quiꞌquiꞌ janʌnob soc u tus irir jach nojob.
\v 40 Mʌꞌ ja wirej, a yʌjcamsʌyʌjirob u tꞌʌn Moisés cu tus aricob tiꞌ a xquicoꞌ a quimenob u mamob soc u tus tsꞌic yatoch yejer u baꞌtac cax a baꞌ yʌn tu yatochob. Robob jach amaꞌan cu tsꞌocar u tꞌʌnicob Cꞌuj soc u racꞌob cu tus tucricob cu quiꞌ cꞌujinticob Cꞌuj. Jach manan cu bin tsꞌabir u mucꞌyajob ten Cꞌuj quireꞌ cu beticob aroꞌ, cax yerob u tꞌʌn Cꞌuj. Chen u jer mac a mʌꞌ yerob Cꞌuj mʌꞌ neyaj cu bin mucꞌyajob.
\s U cuchir tu cu naj butꞌicob u taqꞌuinob
\r (Lc. 21.1‑4)
\p
\v 41 Quireꞌ curucbar Jesús ʌcʌtan tiꞌ tu cuchir tu cu naj butꞌicob taqꞌuin tu cu naj cꞌujinticob Cꞌuj u winiquirob judío. Raꞌ taqꞌuin tiꞌ carem naj tu cu naj cꞌujinticob Cꞌuj. Jesús caj u yiraj cu butꞌicob yaꞌab u taqꞌuin yaꞌab mac, a neyʌn u taqꞌuinob.
\v 42 Caj u yiraj xan xquic, a quimen u mameꞌ, otsir, caj u butꞌaj u majan taqꞌuin, caꞌtur chʌc taqꞌuin, a mʌꞌ cojiꞌ.
\v 43 Jesús tuneꞌ, caj u tꞌʌnaj caꞌ tacob u camsʌwinicob tu yicnʌn, caj u yaꞌaraj tiꞌob:
\p ―Taj quin waꞌaric techex, a jeꞌ xquicaꞌ a quimen u mameꞌ cax otsir, chen caj u butꞌaj caꞌtur chʌc taqꞌuin a mʌꞌ cojiꞌ, chen ʌcʌtan tu wich Cꞌuj coj caj u butꞌaj. Chen u racꞌob cax yaꞌab caj u butꞌajob, chen ʌcʌtan tu wich Cꞌuj mʌꞌ cojiꞌ.
\v 44 A mac a ne yan u taqꞌuinob caj u butꞌajob u taꞌquin tu cuchir tu cu naj butꞌicob u taqꞌuinob u winiquirob judío tu cu naj cꞌujinticob Cꞌuj. Quireꞌ jach manan yaꞌab caj u butꞌajob quireꞌ jach manan tꞌaj u taqꞌuinob, chen raꞌ caj u butꞌob quireꞌ mʌꞌ u rʌc cꞌʌnicobeꞌ u taqꞌuin. Chen a xquicoꞌ a otsiroꞌ caj u toc rʌc butꞌaj tiꞌoꞌ u taꞌquin cax mʌnaꞌ tu cu mʌnic yoꞌoch.
\c 13
\s Jesús cu yaꞌaric bin u caj jubur carem naj tu cu naj cꞌujinticob Cꞌuj u winiquirob judío
\r (Mt. 24.1‑2; Lc. 21.5‑6)
\p
\v 1 Quireꞌ cu jocꞌar Jesús tu japnin carem naj tu cu naj cꞌujinticob Cꞌuj u winiquirob judío. Toc bin u caj uch, caj u jutsꞌaj u bʌj tuririꞌ u camsʌwinicob ich yicnʌn Jesús. Caꞌ araꞌb tiꞌ:
\p ―In wʌjcamsʌyʌjirech, chaꞌantej biquiraꞌ a tunichob. Mʌꞌ wa jach caremoꞌ? Chaꞌantej biquiraꞌ a najoboꞌ mʌꞌ jach carem xan?
\p
\v 2 Jesús caj u nuncaj, caj u yaꞌaraj tiꞌ:
\p ―Cꞌʌꞌotej tech a jeꞌ carem najaꞌ bic tabar caj a wirajiꞌ quireꞌ jach taj quin toc aric a wuꞌyej, caꞌ bin cꞌuchuc tu qꞌuinin cu bin jubsaꞌbir. Mʌꞌ u pꞌat tunich tub tsꞌʌpaꞌan, mʌꞌ a bin a wirej caꞌtur tsꞌʌpaꞌan. Bin rʌc jubucob a carem najoboꞌ.
\s A cu yesic tabar u xur tꞌʌn
\r (Mt. 24.3‑28; Lc. 21.7‑24; 17.22‑24)
\p
\v 3 Caj jocꞌ Jesús ich carem naj caj bin ich u joꞌr chan pꞌuc witsir Olivos, Jesús caj curʌj, ʌcʌtan tiꞌ a carem najoꞌ tu cu naj cꞌujinticob Cꞌuj u winiquirob judío, quireꞌ cu pʌctic a carem najoꞌ, barej caj u jutsꞌob u bʌj u camsʌwinicob Pedro yejer Jacobo yejer Juan yejer Andrés soc tu junanob cu yubicob:
\p
\v 4 ―Tarenob in cꞌatob a toc aric tenob ber caꞌ bin jubsac carem naj? Biquiraꞌ carem naj caꞌ bin cꞌuchuc tu qꞌuinin cu xur tꞌʌn caꞌ bin urquech?
\p
\v 5 Caj nuncaꞌb tiꞌob ten Jesús caj u yʌnx chun u yaꞌaric: 
\p ―Quiꞌ cʌnantex a bʌjex soc mʌnaꞌ mac cu tar u tusaric techex, soc u pʌyicob techex caꞌ a quibiquex a baꞌ cu tusaricob techex.
\v 6 Quireꞌ yaꞌab mac cu bin tarob ich in cꞌabaꞌ, tan yaꞌaricob: “A tenoꞌ a Cristojenoꞌ.” Rajen cu bin u beticob caꞌ a quibexob a baꞌ cu tusaricob techex.
\v 7 Chen ber caꞌ bin a wuꞌyejex u jumintaꞌrob: “Tan u quinsicob u bʌj ich u jer ruꞌum”, cax tu yʌnechex xan, caꞌ bin u quinsicob u bʌj. Jeꞌ a wuꞌyiquex tabar u quinsicob u bʌj xan. Cax tan u manob u quinsicob u bʌj, mʌꞌ a chꞌaquex sajaquirex, quireꞌ yʌn u tar u quinsicob u bʌj an ten bic u cꞌat Cꞌuj. Mʌꞌ toy cꞌuchuc tu qꞌuinin u xur tꞌʌniꞌ.
\v 8 Raꞌ u quininoꞌ ca wuꞌyiquex cu tsꞌictarob winiquirob ich jumpet ruꞌum. Cu bin u quinsicob u bʌj yejer u winiquirob ich jumpet ruꞌum. Bayiriꞌ xan, u ruꞌumin tu reyintaꞌb ten rey cu bin u quinsicob u bʌj yejer u jer ruꞌum tu reyintaꞌb ten u jer rey. Bayiriꞌ, jeꞌ a wuꞌyiquex u pec chꞌic yum ruꞌumin ich u jerob yaꞌab ruꞌumob. Bayiriꞌ jeꞌ u wichʌjʌrob xan ich jumpet ruꞌum, cax baytʌc cu bin u wichʌjʌrob. Rajiꞌ u yʌnx chꞌic chun u mucꞌyaj a cu bin tar ich yocꞌocab.
\p
\v 9 ’Barej a techexoꞌ yʌn cʌnatechex a bʌj. Quireꞌ bin cꞌubuquechex quir u tocar a joꞌrex tu cu naj muchꞌquinticob u bʌj tu cotor u jach tsꞌurirob u winiquirob judío. Jeroj tuneꞌ, bin u caj u jʌtsꞌicob a pachex ich u chan najir tu cu naj cꞌujinticob Cꞌuj u winiquirob judío. Tiꞌ cu bin u chopʌytiquechexob quir u bin u puriquechexob ʌcʌtan rey yejer ich gobernador quir u taquiquex a joꞌrex quireꞌ caj a wacsaj ta worex tiꞌ ten, soc cꞌuchaꞌan a worex a waꞌariquex baꞌ u ber tiꞌ techex.
\v 10 Mʌꞌ ja wirej, mʌꞌ toy cꞌuchuc tu qꞌuinin u xur a tꞌʌnoꞌ u jach tsoyir u tꞌʌn Cꞌuj cu yʌn batꞌan tsecꞌtaꞌr ich tu cotor mac cax tu cʌjaꞌanob.
\v 11 Ber caꞌ bin chucuquechex caꞌ cꞌubuquechex ʌcʌtan a juezoꞌ quir u taquiquex a joꞌrex. Mʌꞌ ja tucriquex baꞌ ca bin a waꞌariquex tiꞌob, cax mʌꞌ toy xiquechex ʌcʌtan a mac a cu bin u taquiquex a joꞌrex. Barej cu bin tsꞌabir techex a ray a qꞌuininoꞌ, raꞌ ca waꞌariquex quireꞌ mʌꞌ techex ca tꞌʌnexiꞌ wa mʌꞌ a Tajꞌor u Pixam Cꞌujoꞌ.
\v 12 Mʌꞌ chen a mac a cu pꞌactiquechex cu bin u chuquicob a pachex, a tet yejer a nʌꞌ cax a bʌjob jeꞌ u cꞌubiquechexob, baxuc jeꞌ u quinsiquechexob. Baxuc xan, u wʌcꞌʌs pararob cu bin u cꞌubicob u tet yejer u nʌꞌ soc u quinsaꞌrob. 
\v 13 Quireꞌ techex caj a wacsajex ta worex ten, tu cotor mac cu bin u pꞌactiquechexob, jeꞌ u tsꞌabʌr techex a cuxtarex munt qꞌuin wa rajraꞌ ca mucꞌtiquex a baꞌ cu tar techex tu cu chuquicob a pachex.
\p
\v 14 ’Mʌꞌ ja wirej, caj u tsꞌibtaj Daniel a tsꞌab u tucuric ten Cꞌuj quir u tsꞌibtic a baꞌ u cꞌat Cꞌuj uch. Raꞌ caj u tsecꞌtaj uch: “Wa ber ca wiriquex a baꞌ jach cꞌas chꞌicaꞌan ich u japanin carem naj tu cu naj cꞌujinticob Cꞌuj u winiquirob judío tu mʌꞌ tsoy u chꞌictaroꞌ quireꞌ mʌꞌ raꞌ u beyaj. Quiꞌ tucriquex ―quij Daniel―, quireꞌ rajiꞌ cu bin u cꞌasquintic u winiquirob Israel.” Jeroj tuneꞌ, arej tiꞌob a mac a tiꞌ yʌnob tu ruꞌumin Judea a ray u qꞌuininoꞌ caꞌ putsꞌucob ich wits.
\v 15 A ray u qꞌuininoꞌ wa tiꞌ yʌn mac tu joꞌr yatoch tu taj u joꞌr yatoch. Arex tiꞌ mʌꞌ tsoy u yocar u chꞌic u baꞌtac. Arex u toc putsꞌur.
\v 16 A ray u qꞌuininoꞌ wa tiꞌ yʌn mac ich u cor. Arex mʌꞌ u sut u chꞌic u nocꞌ.
\v 17 A ray u qꞌuininoꞌ jach otsirchʌjij a xquicoꞌ a tabar u rochic u chan ʌrʌcꞌ ochir. Bayiriꞌ a xquic a cu tsꞌic chuch tiꞌ chan ʌrʌcꞌ och.
\v 18 A ray u qꞌuininoꞌ tꞌʌnex Cꞌuj soc mʌꞌ raꞌ u qꞌuinin a putsꞌurex tu qꞌuinin queꞌer, quireꞌ mʌꞌ a cꞌuchur a worex a mucꞌtiquex queꞌer.
\v 19 Quireꞌ a ray u qꞌuininoꞌ, jach manan cu bin mucꞌyajob a ra winiquiroboꞌ. U jer winiquirob mʌꞌ u ne mucꞌyajob an ten bic cu bin u mucꞌyajob a ra winiquiroboꞌ tu qꞌuinin cu bin xur tꞌʌn. Mʌꞌ biqꞌuin yubmʌnobiꞌ ra u qꞌuinin caj betaꞌb a ich yocꞌocaboꞌ tu chꞌic chun uch. Mʌꞌ caꞌ bin tac u jer u qꞌuinin a baxucoꞌ.
\v 20 A ray u qꞌuininoꞌ wa Jaj Tsꞌur u cꞌat u chaꞌic u cochtar u pach qꞌuin soc amaꞌan cu bin mucꞌyajob a ra winiquiroboꞌ, mʌnaꞌ mac cu bin pꞌatʌrob. Chen tabar u mucꞌyajob quireꞌ tiꞌ yʌnob a mac a toc tetaꞌb ten Cꞌuj quireꞌ yajbir ten Cꞌuj.
\p
\v 21 ’Caꞌ bin cꞌuchuc a ray u qꞌuininoꞌ wa mac cu bin yaꞌaric: “Irewirex, Cristo toc cꞌuchij quir u taquic mac tu cotor.” Mʌꞌ a quibex a baꞌ cu yaꞌaricob. Cax cu yaꞌaricob: “A ray Cristojoꞌ.”
\v 22 Quireꞌ a ray u qꞌuininoꞌ yaꞌab cu bin tarob quir u tusaricob tiꞌ u racꞌob: “A tenoꞌ taren ich yocꞌocab quir in taquic mac, quireꞌ tu tuchiꞌten Cꞌuj.” Tu cu tusaricob tiꞌ mac jeꞌ u tus esicob carem beyaj xan. Cax a mac a tetaꞌb ten Cꞌuj orac u quibicob quireꞌ cu tus iricob carem beyaj, quireꞌ baxuc u cꞌatob, chen mʌꞌ u cꞌuchur u yorob tiꞌ.
\v 23 Quin toc aric techex a jeꞌ tꞌʌnaꞌ soc a toc erex a baꞌ cu bin tar biqꞌuin soc mʌꞌ u jacꞌʌr a worex. 
\s Bic tabar caꞌ bin urac u parar Cꞌuj
\r (Mt. 24.29‑35, 42‑44; Lc. 21.25‑36)
\p
\v 24 Caj yaꞌaraj Jesús tiꞌ u camsʌwinicob:
\p ―A ray u quininoꞌ a tabar u tsꞌocar u mucꞌyaj a winiquiroboꞌ. Jeꞌ u yacꞌbirchʌjʌr qꞌuineꞌ. Mʌꞌ u sasichʌjʌr. Bayiriꞌ, ic nʌꞌ mʌꞌ u bin u tsꞌabir u sasirir.
\v 25 A saꞌaboꞌ, cu bin yiricob irej wa cu rʌc rubur. Tu cotor baꞌ a tiꞌ yʌn ich caꞌananoꞌ cu chaꞌic u pec Cꞌuj. 
\v 26 Jeroj tuneꞌ, cu bin yiricob in wuꞌur a tenoꞌ a mac bayxuquenechexoꞌ. Bin u yiriquenob quin tar tu muyʌrir yejer jach chich in mucꞌ, yejer u sasirir Cꞌuj quin wuꞌur.
\v 27 Jeroj tuneꞌ, bin tuchiꞌtac ten Cꞌuj u yʌjmasirob u tꞌʌn quir u bin u muchꞌquintaꞌrob a mac caj in tetajob ich yocꞌocab, cax tu yʌnob, tiꞌ cu bin u muchꞌquintaꞌrob. 
\p
\v 28 ’Cʌnex a baꞌ cu camsicoꞌonex cheꞌer higuera. A werex cu jutꞌur u reꞌ cheꞌ quir u topꞌʌncʌr quireꞌ cu yocar yaxqꞌuin, taj an ten bic aroꞌ.
\v 29 Bayiriꞌ xan, ber ca wiriquex a baꞌ caj in camsajechex sam cu tar, jeroj tabar u xur tꞌʌn.
\v 30 Cꞌaj techex a jeraꞌ, quireꞌ taj quin waꞌaric techex. Tiꞌ yʌn mac bajeꞌrer, raꞌ cu bin cuxtarob tac cu yiricob a baꞌ caj in toc araj techex cu tar ich tu yʌnechex. 
\v 31 A caꞌananoꞌ jeꞌ u rʌc tsꞌocareꞌ, a jeꞌ ruꞌumaꞌ jeꞌ u rʌc tsꞌocar xan. Chen in tꞌʌnoꞌ mʌꞌ u bin tsꞌocar quireꞌ yʌn u toc rʌc nupur in tꞌʌn ich yocꞌocab.
\p
\v 32 ’Chen ber cu bin tar a baꞌ caj in toc araj techex, mʌnaꞌ mac yer ber u tar. Cax u yʌjmasirob u tꞌʌn Cꞌuj, cax u parar Cꞌuj mʌꞌ yer, chen u bʌjiriꞌ Cꞌuj yer ber u tar. Rajen mʌnaꞌ mac yer ber hora, cax ber u qꞌuinin mʌꞌ yer.
\p
\v 33 ’Quiꞌ cʌnatex a bʌj, quiꞌ pꞌiric a wichex caꞌ a tꞌʌnejex Cꞌuj soc mʌꞌ u nayʌr a worex. Quireꞌ mʌꞌ a werex biqꞌuin quin tar ―quij Jesús―.
\v 34 Aroꞌ irej a xib a caj jocꞌ quir u bin nachir. Caj u pꞌʌtaj u yatoch, caj u tsꞌajaj u mucꞌ tiꞌ u cꞌurewob, caj u jʌsaj jujuntur u beyajob, caj u tuchiꞌtaj a mac a cu cʌnantic u jor yatoch tu cu naj ocar mac tu yatoch, caj yaꞌaraj tiꞌ caꞌ u quiꞌ pꞌirej u wich soc yiric u yuꞌur u jach tsꞌurir.
\v 35 Quiꞌ pꞌirej a wichex tun, quireꞌ mʌꞌ a werex ber caꞌ bin tac u jach tsꞌurir a najoꞌ, wa jix tiꞌ oqꞌuin cu yuꞌur, wa jix tiꞌ chumuc acꞌbir cu yuꞌur, wa jix tiꞌ caꞌ bin cꞌayʌnʌc cax cu yuꞌur, wa jix tiꞌ aꞌaꞌcbir cu yuꞌur.
\v 36 Mʌꞌ ja wirej, wa jix tiꞌ seb cu yuꞌur caꞌ bin uruc jeroj cu yiric techex wenʌn a caꞌex.
\v 37 A baꞌ quin waꞌaric techexaꞌ, quin waꞌaric tiꞌ tu cotor mac: “Quiꞌ pꞌirex a wichex.”
\c 14
\s Cu muchꞌquinticob u tucurob u chuquejob Jesús
\r (Mt. 26.1‑5; Lc. 22.1‑2; Jn. 11.45‑53)
\p
\v 1 Caꞌbej cu cꞌuchur tu qꞌuinin u quiꞌ quiꞌ janʌnob u winiquirob judío. Raꞌ u qꞌuinin quir u cꞌʌꞌoticob u potmasticob yʌjmasir u tꞌʌn Cꞌuj uch, soc mʌꞌ u quiminob u parar xib a yʌn rochaꞌb ten u nʌꞌ. Raꞌ u qꞌuinin xan, a panoꞌ a mʌꞌ u sipeꞌ, quireꞌ mʌꞌ pʌjiꞌ. U jach tsꞌurirob u sacerdote u winiquirob judío yejer a yʌjcamsʌyʌjirob u tꞌʌn Moisésoꞌ caj u cʌxtob bic tabar u tusaricob tiꞌ Jesús soc u chuquicob u quinsicob Jesús.
\v 2 Robob caj u yaꞌarajob:
\p ―Mʌꞌ tu qꞌuinin u quiꞌ quiꞌ janʌnob a pascuajoꞌ. Caꞌ ic yʌn pajex u tsꞌocar u quinin u quiꞌ quiꞌ janʌnob, soc mʌꞌ ic pꞌusiquex u yorob ij quet winiquirob judío a pimoꞌ.
\s Jesús ich u cajar Betania
\r (Mt. 26.6‑13; Jn. 12.1‑8)
\p
\v 3 Quireꞌ tiꞌ yʌn Jesús ich u cajar Betania, curucbar tu janʌn tu yatoch Simón. Raꞌ u cʌnmʌn iqꞌuer u caꞌ uch. Jeroj tuneꞌ, tarij tuririꞌ xquic ich yatoch Simón yejer tuririꞌ chan pꞌurir, chup yejer a ne quiꞌ u boqueꞌ, chen nardo u cꞌabaꞌ, a quiꞌ u boqueꞌ. A nardojoꞌ, jach coꞌoj u boꞌorir. A xquicoꞌ caj u paꞌaj a chan pꞌuroꞌ caj u wecaj a quiꞌ u boqueꞌ tu joꞌr Jesús.
\v 4 Yan jun yarob a tiꞌ yʌnob, caj pꞌujob, caj u yaꞌarajob: 
\p ―A biquinin caj u sʌtaj a raꞌ quiꞌ u boqueꞌ ich u joꞌr Jesús?
\v 5 Wa caj u canaj caꞌcheꞌ tu caꞌ jaraj u taqꞌuin quir u jasʌr tiꞌ a jach otsiroboꞌ. Quireꞌ u boꞌorir jach manij tres cientos sʌc taqꞌuinob.
\p Choc yorob tiꞌ a xquicoꞌ quireꞌ caj u xupaj a quiꞌ u boqueꞌ.
\p
\v 6 Barej Jesúseꞌ caj u yaꞌaraj:
\p ―Tsireꞌej, baꞌwir ca tsꞌiquintex a xquicoꞌ. Mʌꞌ ja wirej, caj u betaj tsoy ten, caj u jayaj tin joꞌr a quiꞌ u boqueꞌ.
\v 7 A otsireꞌ, rajraꞌ tiꞌ yʌn tu yʌnechex an ber a cꞌatex, jeꞌ u cꞌuchur a worex a betiquex tsoy tiꞌob, barej a tenoꞌ mʌꞌ rajraꞌ tiꞌ yʌnen tub yʌnechex.
\v 8 A jeꞌ xquicaꞌ, a baꞌ caj u betaj a baꞌ cꞌuchaꞌan yor tiꞌ, rajen caj u jayaj tin joꞌr a quiꞌ u boqueꞌ, quireꞌ tabar u muquicob in baquer.
\v 9 Jach taj quin waꞌariquex tech ―quij Jesús―. Cax wa tu cu bin u tsecꞌtic u jach tsoyir u tꞌʌn Cꞌuj, jeꞌ yaꞌariqueꞌ bic caj u jayaj tin joꞌr a xquicoꞌ, a quiꞌ u boqueꞌ soc u cꞌʌꞌotic u cꞌabaꞌ a jeꞌ xquicaꞌ.
\s Judas cu bin cꞌubic Jesús
\r (Mt. 26.14‑16; Lc. 23.3‑6)
\p
\v 10 Caj tsꞌoc yiric u joyar tu joꞌr Jesús a quiꞌ u boqueꞌ, caj bin Judas Iscariote quir u tsicbar yejer u jach tsꞌurirob sacerdote u winiquirob judío. Rajiꞌ tuririꞌ ich doce u camsʌwinicob Jesús. Caj bin u cꞌubic tiꞌob.
\v 11 Caj quiꞌjij yorob u jach tsꞌurirob sacerdote rajen caj u toc arajob jeꞌ u boꞌotaꞌ ten u jach tsꞌurir tu cotor u sacerdote quir u cꞌubic Jesús. Caj u yʌnxchun u cʌxtic bic tabar jeꞌ u cꞌubiqueꞌ.
\s A oqꞌuin janʌn u qꞌuinin pascua
\r (Mt. 26.17‑29; Lc. 22.7‑23; Jn. 13.21‑30; 1 Co. 11.23‑26) 
\p
\v 12 Caj cꞌuchij tu qꞌuinin u qꞌuinin a cu janticob yoꞌoch pan a mʌꞌ u sipeꞌ. Raꞌ u qꞌuinin xan, cu quinsicob yʌrʌcꞌ tʌmʌn yuc, chan ar soc u cꞌʌꞌoticob bic Cꞌuj caj u tacaj u nunquirirob u winiquirob judío ich u ruꞌumin Egipto. Cꞌuch u camsʌwinicob ich Jesús caj u cꞌatajob tiꞌ:
\p ―Arej tenob tub a cꞌat a jantej a woꞌoch oqꞌuin tu qꞌuinin u quiꞌ quiꞌ janʌnob u winiquirob judío? Arej tenob tub a cꞌat in chʌcob?
\p
\v 13 Caj u tuchiꞌtaj caꞌtur u camsʌwinicob, caj u yaꞌaraj tiꞌob:
\p ―Xenex a jeꞌ cajaroꞌ, tiꞌ ca bin a nupex tun, tuririꞌ xib cu cuchic u pꞌurir u yoꞌoch jaꞌ, sayenex tu pach. 
\v 14 Tu ca wiriquex tu cu yocar tu yatoch a caꞌ tsꞌap yatochoꞌ, arex tiꞌ u yumin a najoꞌ: “Yʌjcamsʌyʌnirecheꞌ cu cꞌatic: Tu yʌn u cuchir tu quin bin in jantejob a baꞌ cu naj janticob u winiquirob judío tu qꞌuinin pascua yejer in camsʌwinicob?”
\v 15 Rajiꞌeꞌ cu bin yesic techex junxotꞌ yatoch u caꞌ tsap yatochoꞌ toc yʌn u pojcheꞌir tu cu janʌn. Toc yʌn u cutan xan. Tiꞌ taroꞌ ca chʌquiquex ij coꞌochex.
\p
\v 16 Caj binob u camsʌwinicob Jesús caj yirajob an ten bic Jesús caj u yaꞌaraj tiꞌob, jeroj tuneꞌ, caj chʌcajob yoꞌoch quir u cꞌʌꞌoticob u qꞌuinin pascua.
\p
\v 17 Barej caj acꞌbirchʌjij, caj cꞌuchij Jesús quir u janʌn. Yet tarac u doce u camsʌwinicob.
\v 18 Caj curajob tu janʌnob yejer Jesús ich u pojcheꞌir yoꞌoch. Cu janʌn Jesús caj yaꞌaraj:
\p ―Jach taj quin waꞌaric techex. Yʌn tuririꞌ ich techex, a docejoꞌ, a mac a pꞌeriꞌ ic janʌnex, a cu bin u mucu cꞌubiqueneꞌ.
\p
\v 19 Caj jach choquij yorob u camsʌwinicob Jesús. Jujuntur u camsʌwinicob cu bin u cꞌaticob tiꞌ Jesús:
\p ―Ten wa quin bin in cꞌubiquech Jaj Tsꞌurir?
\p
\v 20 Rajiꞌ tuneꞌ, caj u nuncaj, caj u yaꞌaraj tiꞌob:
\p ―A mac tuririꞌ ich techex a docejoꞌ a jeꞌ cu ruchic yoꞌoch yejeren, rajiꞌ cu bin u cꞌubiquen a tiꞌ yʌn yejerechex.
\v 21 A tenoꞌ a baxuquenechexoꞌ, bin in caꞌ quinsbir, quireꞌ tabar u nupꞌur u tꞌʌn Cꞌuj. Chen otsir a mac a cu bin u mucu cꞌubiquen a mac a tar soc u yamtic mac tu cotor. Jach manan tsoyir wa mʌꞌ tiꞌ yʌn teraꞌ ich yocꞌocab. 
\p
\v 22 Quireꞌ tu cu janʌnobeꞌ, Jesús caj u chꞌaj yoꞌoch pan caj u yʌn tꞌʌnaj Cꞌuj:
\p ―Bayoꞌ Cꞌuj, quireꞌ caj a tsꞌaja toꞌonex ij coꞌochex pan.
\p Caj u rʌc xatꞌaj tiꞌ u camsʌwinicob caj u yaꞌaraj tiꞌob: 
\p ―Jantex a jeꞌ panaꞌ quireꞌ in bʌqꞌuer. Jantex.
\p
\v 23 Caj tsꞌoc u rʌc janticob yoꞌoch pan, Jesús caj u chucaj u chan ruch yejer u cꞌab u wich uva. Caj u yʌn tꞌʌnaj Cꞌuj:
\p ―Bayoꞌ Cꞌuj, tech caj a tsꞌaja toꞌonex u cꞌab u wich uva.
\p Caj u tsꞌaja tiꞌ u camsʌwinicob, caj u yaꞌaraj tiꞌob: 
\p ―Rʌc uqꞌuex caꞌ caꞌ xotꞌ techex a wuꞌqꞌuiquex u cꞌab u wich uva.
\p
\v 24 Caj yaꞌaraj tiꞌob:
\p ―A jeꞌ u cꞌab u wich uva, in qꞌuiqꞌuer quir u nupꞌur u tꞌʌn a baꞌ tu chꞌic araj Cꞌuj uch. A jeꞌ baꞌ cu bin jocꞌar in qꞌuiqꞌuer soc yiric mac, yaꞌab cu bin u jawsicob u siꞌpirob.
\v 25 Taj quin waꞌaric techex. Mʌꞌ in yʌnyʌn caꞌ uqꞌuic u cꞌab u wich uva hasta cu xur tꞌʌneꞌ, caꞌ bin in wuqꞌuej yejerex tu cu bin u reyinticob Cꞌuj.
\s Jesús cu tsicbar tiꞌ Pedro: A techoꞌ ca bin a waꞌaric mʌꞌ a wer maquen
\r (Mt. 26.30‑35; Lc. 22.31‑34; Jn. 13.36‑38)
\p
\v 26 Caj tsꞌoc u cꞌayob caj jocꞌob caj binob ich u witsir Olivos.
\v 27 Jesús tuneꞌ, caj u yaꞌaraj tiꞌob:
\p ―Techex tu cotorechex ca bin a pꞌʌtiquenex acꞌbir bajeꞌrer quireꞌ caꞌ nupꞌuc u tꞌʌn Cꞌuj tu cu yaꞌaric: “Quin chaꞌic u quinsic a mac a cu cʌnantic yʌrʌcꞌ tʌmʌn yuc, rajen cu bin putsꞌurob yʌrʌcꞌ tʌmʌn yuc.”
\v 28 Caꞌ bin wʌcꞌʌs riqꞌuiquen tin quimirir ―quij Jesús―, tiꞌ ca bin a wiriquenex ich u ruꞌumin Galilea. Chen a tenoꞌ quin yʌn batꞌan cꞌuchur ich u ruꞌumin Galilea. 
\p
\v 29 Pedro tuneꞌ, caj u yaꞌaraj tiꞌ:
\p ―Cax tu cotor in wet camsʌwinicob cu bin u pꞌʌtiquechob, chen a tenoꞌ mʌꞌ in pꞌʌtiquech.
\p
\v 30 Jesús caj u yaꞌaraj tiꞌ:
\p ―Jach taj, quin waꞌaric tech, Pedro. Mʌꞌ toy cꞌaynʌc cax acꞌbir bajeꞌrer, cax mʌnaꞌ u nup u tenin u cꞌay cax, ca bin a waꞌaric tiꞌ mac: “Mʌꞌ in wer mac Jesús.” 
\p
\v 31 Barej rajiꞌeꞌ caj u jach chen aꞌaraj tiꞌ:
\p ―Cax wa quet ij quimin, mʌꞌ in waꞌaric: “Mʌꞌ in cꞌʌꞌotechiꞌ.” 
\p Bayiriꞌ xan, caj yaꞌaraj u yet camsʌwinicob.
\s Jesús cu tꞌʌnic Cꞌuj ich u chan corir Getsemaní
\r (Mt. 26.36‑46; Lc. 22.39‑46)
\p
\v 32 Caj cꞌuchij Jesús yejer u camsʌwinicob ich u chan corir u cꞌabaꞌ Getsemaní. Caj u yaꞌaraj tiꞌ u camsʌwinicob: 
\p ―Teꞌ a yʌn cutarexaꞌ, quireꞌ tar quin bin baytʌc quir in tꞌʌnic Cꞌuj.
\p
\v 33 Caj u pʌyaj tu pach Pedro yejer Jacobo yejer u yitsꞌin Juan. Jesús caj u yʌnxchun u tucur, jach manan cu tucur caj cꞌuchij baytʌc.
\v 34 Caj u yaꞌaraj tiꞌob:
\p ―Jach tucur in caj. Cu jach bin in wor irej wa bin in caj quimin. Teꞌ a pꞌatarexaꞌ mʌꞌ a wenʌnex soc a yamtiquenex.
\p
\v 35 Jesús caj bin u tꞌʌnej Cꞌuj. Jach baytʌc caj bin, caj pʌchꞌraj quir u tꞌʌnej Cꞌuj ich ruꞌum. Caj u yaꞌaraj tiꞌ Cꞌuj:
\p ―Wa tsoy ta tꞌʌn tech Tet, wa mʌꞌ a chaꞌic in jach mucꞌyaj an ten bic caj a toc araj uch. Wa tsoy ta tꞌʌn tech ca chaꞌic in mucꞌyaj, baxuc ten tsoy tin tꞌʌn xan, caꞌ tac tiꞌ ten a baꞌ a cꞌat ten.
\p
\v 36 Tu cu tꞌʌnic Cꞌuj rajiꞌ caj u yaꞌaraj:
\p ―In Tetech Cꞌuj ―quij―, cꞌuchaꞌan a wor tiꞌ tu cotor baꞌ, rucꞌsej a jeꞌ mucꞌyajaꞌ a cu bin tar ten wa raꞌ a cꞌat caꞌ mucꞌyajnʌquen, jeꞌ in mucꞌyajeꞌ, quireꞌ in cꞌat in betic a baꞌ a cꞌat techeꞌ.
\p
\v 37 Caj riqꞌuij, caj bin ich u camsʌwinicob caj yiraj cu wenʌnob caj u yaꞌaraj tiꞌ Pedro:
\p ―Simón, tan wa ja wenʌn? Mʌꞌ wa cꞌuchaꞌan a wor a mucꞌtic a wenʌn caꞌ a yamtejen cax turiꞌ hora?
\v 38 Tꞌʌnex Cꞌuj, soc mʌꞌ u tumtic a worex, a quisinoꞌ. Cax a chen cꞌat ʌjaꞌanechex soc a tꞌʌniquex Cꞌuj tiꞌ ten. Chen mʌꞌ u cꞌuchur a worex a mucꞌtic a wenʌnex quireꞌ jach tac a wenʌnex.
\p
\v 39 Caj wʌcꞌʌs bin Jesús caj u wʌcꞌʌs tꞌʌnaj u Tet, caj u yaꞌaraj raꞌiriꞌ u caj wʌcꞌʌs tꞌʌnoꞌ.
\v 40 Caj ricꞌ Jesús caj wʌcꞌʌs ur tiꞌ yʌn u camsʌwinicob. Caj yiraj wenʌn u caꞌob, mʌꞌ u mucꞌtob u wenʌnob. Mʌꞌ u pꞌirir u wichob. Mʌꞌ u yerob baꞌ u nunquicob tiꞌ Jesús. 
\v 41 Caj tar mʌnaꞌ u nup u tenin ich u camsʌwinicob, caj u yaꞌaraj tiꞌob:
\p ―Tsoy a wenʌnex bajeꞌrer, jesej a bʌjex, bajeꞌrer, cꞌuchij tu qꞌuinin u tarob u chuquenob a tenoꞌ a baxuquenechexoꞌ, rajen tsireꞌej. Bin u cꞌubiquenob a mac a yʌn u siꞌpirobeꞌ. 
\v 42 Riqꞌuenex, caꞌ xicoꞌonex iric a mac a cꞌubiqueneꞌ tiꞌ yʌn jach baytʌc.
\s Chuc Jesús
\r (Mt. 26.47‑56; Lc. 22.47‑53; Jn. 18.2‑11)
\p
\v 43 Tiꞌ toy cu tsicbar Jesús barej seb caj cꞌuchij Judas Iscariote, rajiꞌ tiꞌ u camsʌwinicob Jesús yejer once. Yet taracob jach pim mac, u rʌc chꞌamʌnob u mascabir, bayiriꞌ u rʌc chꞌamʌnob cheꞌ. Tarob quireꞌ tuchiꞌtaꞌbob ten u jach tsꞌurirob sacerdote u winiquirob judío, yejer u jach tsꞌurirob u cajarob u winiquirob judío, a cu yaꞌaric a Nuxiboꞌ, yejer u yʌjcamsʌyʌjiriob u tꞌʌn Moisés.
\v 44 Mʌꞌ toy cꞌuchuc Judas ich Jesús caj u toc araj tiꞌob, a pimoꞌ:
\p ―A ca wiriquex in tsꞌutsꞌic u pꞌuc, raꞌ ca chuquiquex, caꞌ a quiꞌ cꞌʌxex u cꞌʌb, caꞌ a purex tiꞌ yejer mac a cu cʌnanticob tiꞌ soc mʌꞌ u putsꞌur Jesús.
\p
\v 45 Seb caj u jutsꞌ u bʌj ich Jesús, caj yaꞌaraj Judas tiꞌ Jesús:
\p ―In wʌjcamsʌyʌjirech, in wʌjcamsʌyʌjirech.
\p Jeroj tuneꞌ, caj u tsꞌutsꞌaj u pꞌuc an ten bic cu naj tꞌʌnic a cu camsic mac u winiquirob judío.
\v 46 Robob tuneꞌ, caj u mʌchajob, caj u chucajob.
\p
\v 47 Tuririꞌ ich a macob a tiꞌ yʌn tiꞌ taroꞌ, caj u jitaj u mascab caj u chꞌʌcaj u xiquin u cꞌurew u jach tsꞌurir sacerdote, caj rac u xiquin u cꞌurew u jach tsꞌurir sacerdote.
\v 48 Caj u tꞌʌnaj Jesús caj u yaꞌaraj tiꞌob:
\p ―Biquinin caj tarechex teraꞌ yejer mascab, bayiriꞌ yejer cheꞌ quir a chuquiquenex iren wa yʌjaꞌcriryʌjiren baꞌ.
\v 49 Rajraꞌ tiꞌ yʌnen ich carem naj tu ca naj cꞌujintiquex Cꞌuj, caj in camsechex. Biquinin mʌꞌ ta chuquenex uch? A baꞌ u ber ten bajeꞌrer quireꞌ caj u toc araj uch yʌjtseqꞌuir u tꞌʌn Cꞌuj, a tsꞌaꞌb u tucuric ten Cꞌuj quir u tsꞌibtic a baꞌ u cꞌat Cꞌuj, raꞌ quireꞌ u nupꞌur a baꞌ tsꞌibaꞌan. 
\p
\v 50 Raꞌiriꞌ u qꞌuinin tu cotor u camsʌwinicob Jesús caj rʌc putsꞌob. Pꞌat Jesús tu junan.
\s Putsꞌij a mac a mʌꞌ uch xuruc u baqueroꞌ
\p
\v 51 Barej say tu pach Jesús tuririꞌ xib, mʌꞌ uch xuruc u baquer, u chen buquinmʌn u winquirir yejer tuririꞌ sʌc nocꞌ, a linojoꞌ u cꞌabaꞌ u nocꞌ. Rajiꞌ caj chucob ten a pimoꞌ.
\v 52 Barej caj chuquij ten a pimoꞌ caj tsꞌub u nocꞌ caj putsꞌij, chʌcꞌʌren.
\s ʌcʌtan chꞌiriquic Jesús ich u jach tsꞌurirob u winiquirob judío
\r (Mt. 26.57‑68; Lc. 22.54‑55, 63‑71; Jn. 18.12‑14, 19‑24) 
\p
\v 53 Yʌjchuquirob Jesús caj bin purbir Jesús ich Caifás. Rajiꞌ u jach tsꞌurir tu cotor sacerdote, yejer u jer u caꞌ jach tsꞌurirob sacerdote, yejer u jach tsꞌurirob tu cotor u cajarob u winiquirob judío, a cu yaꞌaric, a Nuxiboꞌ, yejer u yʌjcamsʌyʌjirib u tꞌʌn Moisés, quireꞌ caj u muchꞌquintob u bʌj.
\v 54 Barej Pedrojeꞌ nach bin tu pach tu cu binob Jesús. Cꞌʌs nanach cu tar Pedro tac cꞌuchur tub reꞌaꞌan yatoch Caifás. Curucbar Pedro yejer a policíajoꞌ cu qꞌuich, pꞌeriꞌ yejerob.
\p
\v 55 U jach tsꞌurirob sacerdote yejer tu cotor u tsꞌurirob u winiquirob judío, tiriꞌ u rʌc muchꞌquinmʌnob u bʌj quir u wayticob quir u tus taquicob u joꞌr Jesús soc u quinsaꞌrob Jesús. Mʌꞌ cꞌuchaꞌan yor u wayticob quir u tus taquicob u joꞌr.
\v 56 Cax jach pim mac cu tar quir u tus taquicob u joꞌr Jesús, mʌꞌ tu quetquintajob u tꞌʌnob.
\v 57 Jeroj tuneꞌ, caj tarob caꞌtur u winiquirob judío quir u tus taquicob u joꞌr Jesús, robob tan yaꞌaricob: 
\p
\v 58 ―A toꞌonoꞌ, tij cuꞌyaj yaꞌaric a jeꞌ xibaꞌ cu bin u rʌc jubsic carem naj tu quic naj cꞌujintiquex Cꞌuj. A jeꞌ betaꞌanaꞌ yejer u cꞌʌb mac, jeꞌ u caꞌ tsꞌʌpquintic u jer carem naj caꞌ bin tsꞌocac u man mʌnaꞌ u nup u qꞌuinin, a mʌꞌ betaꞌan yejer u cꞌʌb mac.
\p
\v 59 Cax baxuc cu tsicbarob mʌꞌ tu quetquintajob u tꞌʌnobiꞌ. 
\p
\v 60 Jeroj tuneꞌ, caj ric chꞌictar Caifás ich ʌcʌtan tu cotor u yet jach tsꞌurirob u winiquirob judío caꞌ u cꞌatej baꞌ tiꞌ Jesús, tan yaꞌaric:
\p ―Biquinin mʌꞌ a cꞌʌs nunquic tiꞌ a mac cu taquicob a joꞌr tech?
\p
\v 61 Jesús u mʌcmʌn u chiꞌ uch, mʌꞌ u cꞌʌs nunquic tiꞌ u jach tsꞌurir. U jach tsꞌurir tu cotor sacerdote caj u wʌcꞌʌs cꞌatej tiꞌ tan yaꞌaric:
\p ―Arej tenob wa tech a Cristojoꞌ a mac caj u toc araj Cꞌuj yʌn u tar quir u taquic tu cotor mac? Arej tenob wa tech u pararech Cꞌuj a cu cꞌujintaꞌboꞌ ten mac?
\p
\v 62 Jesús caj u yaꞌaraj tiꞌ:
\p ―Ten ―quij―, bin a wirenex xan a tenoꞌ a baxuquenechexoꞌ curucbaren ich u noꞌoj Cꞌuj, a jach manan chichir u mucꞌoꞌ. Jeꞌ a wiriquex in tar tu muyʌrir caꞌanan.
\p
\v 63 U jach tsꞌurir tu cotor sacerdote u winiquirob judío, seb caj u jʌtaj u nocꞌ quir u yesic tsꞌiquij, quireꞌ cu tucraꞌ cu pachꞌic Cꞌuj Jesús an ten bic caj u nuncaj Jesús, caj u yaꞌaraj u jach tsꞌurir tu cotor sacerdote: 
\p ―Baꞌwir tiꞌ u jer mac quir u taꞌquic u joꞌr? A bʌjiriꞌex caj a wuꞌyajex cu pachꞌic Cꞌuj.
\v 64 Arex ten baꞌ ca tucriquex teꞌex?
\p Robob u jach tsꞌurirob tu cotor u winiquirob judío, caj u yaꞌarajob:
\p ―Toc yʌn u siꞌpir, caꞌ quinsac.
\p
\v 65 Jun yarob caj u yʌnx chun u tubob u wich, u jerob caj u pixob u wich Jesús caj u raxajob xan, cu yaꞌaricob: 
\p ―Arej tenob mac caj u raxech.
\p U policía a caj u chucajoboꞌ caj u tacjʌtsꞌajob Jesús. 
\s Pedro cu yaꞌaric: Mʌꞌ in wer maquiꞌ Jesús
\r (Mt. 26.69‑75; Lc. 22.56‑62; Jn. 18.15‑18, 25‑29)
\p
\v 66 Tiꞌ toy yʌn Pedro ich tancab tu reꞌaꞌan yatoch Caifás, caj u jutsꞌaj u bʌj tuririꞌ xquic ich Pedro. Raꞌ u cꞌurew xquic Caifás;
\v 67 Barej caj u yiraj cu qꞌuich Pedrojeꞌ, caj u pʌctaj, caj u yaꞌaraj tiꞌ:
\p ―A tech xaneꞌ ―quij yaꞌaraꞌ―, tiꞌ a wet man Jesús a cu tar tu cajar Nazaret.
\p
\v 68 Barej rajiꞌ, caj u yaꞌaraj:
\p ―Mʌꞌ teniꞌ ―quij Pedro―. Mʌꞌ in wer baꞌ ca waꞌaric. Mʌꞌ in wer maquiꞌ.
\p Pedro caj jocꞌ tancab baytʌc tu yʌn u jor naj, jeroj caj cꞌaynʌj a caxoꞌ.
\v 69 Caj wʌcꞌʌs irir ten u cꞌurew xquic Caifás caj wʌcꞌʌs aꞌara tiꞌ a macob a tiꞌ yʌnob taroꞌ:
\p ―A jeꞌ xibaꞌ, jach taj, u yet man Jesús.
\p
\v 70 Barej rajiꞌ caj u wʌcꞌʌs aꞌaraj:
\p ―Mʌꞌ teniꞌ ―quij caj yaꞌaraj.
\p Chen sansameꞌ, a mac a tiꞌ yʌnob uch taroꞌ, caj u wʌcꞌʌs aꞌarajob tiꞌ Pedro:
\p ―Jach tajeꞌ tech a wet mʌn Jesús uch, a mʌꞌ quet baxuc a tꞌʌn yejer Jesús quireꞌ u xibirech u ruꞌumin Galilea. 
\p
\v 71 Caj araꞌb Pedro, cu chuquic Cꞌuj, tan yaꞌaric:
\p ―Cꞌuj cu yiric, wa mʌꞌ in wer a mac a ca waꞌariquexeꞌ, cax u quinsiquen Cꞌuj.
\p
\v 72 Bayiriꞌ caj caꞌ cꞌaynʌj cax tu caꞌ ten, Pedro caj u cꞌasaj yicꞌ a baꞌ araꞌb ten Jesús uch: “Mʌꞌ toy wʌcꞌʌs cꞌaynʌc a caxoꞌ mʌnaꞌ u nup u tenin ca bin a waꞌaric mʌꞌ a wer maqueniꞌ.” Pedro caj ocꞌnʌjij. Caj jach quiꞌ ocꞌnʌjij Pedro tun.
\c 15
\s Jesús ʌcʌtan tiꞌ Pilato
\r (Mt. 27.1‑2, 11‑14; Lc. 23.1‑5; Jn. 18.28‑38)
\p
\v 1 Barej caj sasij seb tu cotor u jach tsꞌurirob sacerdote yejer u jach tsꞌurirob u cajarob u winiquirob judío, a cu yaꞌaricob a Nuxiboꞌ, yejer yʌjcamsʌyʌjirob u tꞌʌn Moisés, yejer a mac tꞌirir ich tu cotor u jach tsꞌurirob u winiquirob judío, caj u muchꞌquintajob u bʌj quir u tucricob bic tabar cu bin u cꞌubicob cꞌʌxbir Jesús ich Pilato. Caj cꞌax u cꞌʌb Jesús caj tar purbir ich Pilato, rajiꞌ gobernador.
\v 2 A Pilatojeꞌ caj u cꞌataj tiꞌ:
\p ―Taj wa ju reyech u winiquirob judío?
\p Caj u nuncaj rajiꞌ, cu yaꞌaric tiꞌ:
\p ―Baxuc ca waꞌariquen, a tenoꞌ u reyen u winiquirob judío.
\p
\v 3 U jach tsꞌurirob sacerdote, yaꞌab caj u tocob u joꞌr Jesús.
\v 4 A Pilatojeꞌ, caj u wʌcꞌʌs cꞌataj tiꞌ, cu yaꞌaric:
\p ―Biquinin mʌꞌ a cꞌʌs nunquic u taquicob a joꞌr quireꞌ jach yaꞌab tan u taquicob a joꞌr?
\p
\v 5 Jesús mʌꞌ u cꞌʌs nuncaj chichin, rajen jach jaqꞌuij yor Pilato.
\s Pilato caj u tucraj tu yor caꞌ xic sinbir Jesús ich cruz
\r (Mt. 27.15‑31; Lc. 23.13‑25; Jn. 18.38―19.16)
\p
\v 6 Toc beriꞌ cu siptic mac tub mʌcaꞌan caꞌ bin cꞌuchuc tu qꞌuinin u quiꞌ quiꞌ janʌnob u winiquirob judío, u qꞌuinin tu potmastaj yʌjmasir u tꞌʌn Cꞌuj uch. Mʌꞌ ja wirej, a gobernadoroꞌ cu bin u siptic a mac mʌcaꞌan a cu cꞌataꞌ tiꞌ ten u winiquirob judío.
\v 7 A ray u qꞌuininoꞌ tiꞌ mʌcaꞌan mac jach cꞌas. Raꞌ u cꞌabaꞌ Barrabás, rajiꞌ cꞌʌraꞌan yejer u yet ricꞌs ʌjbaꞌteꞌob, mac u quinsmʌnob winic tu tu ricꞌsajob baꞌteꞌ uch. 
\v 8 Raꞌ u quinin, tiꞌ cu tarob a yaꞌab macob u winiquirob judío, quir u muchꞌquinticob u bʌj ich Pilato, caj u yʌnxchun u cꞌaticob caꞌ u betej an ten bic cu naj betaꞌr tiꞌobeꞌ.
\v 9 Pilato tuneꞌ, caj u nuncaj tiꞌob, cu yaꞌaric:
\p ―A mac a cꞌat in siptiquex techex? Arex ten caꞌ in siptej tiꞌ techex u rey u winiquirob judío?
\p
\v 10 Mʌꞌ ja wirej, Pilato yer qꞌuex yorob u jach tsꞌurirob sacerdote, rajen cꞌubob Jesús ten u jach tsꞌurirob sacerdote u winiquirob judío.
\v 11 Barej u jach tsꞌurirob sacerdote u winiquirob judío caj u pꞌusaj u yorob a yaꞌab macob quir u chaꞌbʌr tiꞌob Barrabás, cax mʌꞌ u chaꞌbʌr Jesús.
\v 12 Jeroj tuneꞌ, caj u nuncaj Pilato, caj u wʌcꞌʌs aꞌaraj tiꞌob:
\p ―Baꞌ a cꞌatex caꞌ in betej tiꞌ a mac a ca waꞌariquex u rey u winiquirob judíojoꞌ?
\p
\v 13 Robob a pim macob, caj u cꞌamquintajob tꞌʌnob tiꞌ tu caꞌten:
\p ―Arej tiꞌ caꞌ xic sinbir ich cruz.
\p
\v 14 Barej Pilato caj u yaꞌaraj tiꞌob:
\p ―Biquinin cu bin sinbir ich cruz quireꞌ mʌnaꞌ cꞌas caj u betaj?
\p Caj chen cꞌamquintaj u tꞌʌnob a pimoꞌ:
\p ―Arej caꞌ sinic ich cruz.
\p
\v 15 A Pilatojeꞌ, quireꞌ u cꞌat u quiꞌquintic u yorob a pimoꞌ, rajen caj u chaꞌj u bin Barrabás. Caj tsꞌoc u jʌtsꞌicob u pach Jesúseꞌ, caj u cꞌuꞌsaj caꞌ quinsac tu cruz.
\v 16 A soldadojoꞌ tuneꞌ, caj acsaꞌb Jesús ich palacio gobernador, tu reꞌaꞌan naj. Caj u tꞌʌnajob u muchꞌquinticob u bʌj tu cotor u yet soldadojob gobernador.
\v 17 Caj pit u nocꞌ Jesús ten soldadojoꞌ, caj tsꞌaꞌb u buquintej chʌc nocꞌ Jesús. Caj jitꞌob a qꞌuiꞌixer u caꞌoꞌ quir u tsꞌaꞌbʌr u pꞌoquintej Jesús qꞌuiꞌix.
\v 18 Jeroj tuneꞌ, caj chinrajob ʌcʌtan tiꞌ Jesús ten a soldadojoꞌ, caj u tus tꞌʌnajob an ten bic cu naj tꞌʌnicob rey cu yaꞌaricob:
\p ―In cꞌatob caꞌ cuxraquech munt qꞌuin u reyech u winiquirob judío.
\p
\v 19 Caj u cꞌocꞌojʌtsꞌtajob tu joꞌr Jesús yejer jʌrʌr, caj u tubob u wich. Tiꞌ rʌc xonrʌjob ich ʌcʌtan Jesús an ten bic cu xontarob ich rey cu tus esicob u sʌjticob tiꞌ.
\v 20 Barej caj tsꞌoc u pꞌasticobeꞌ, caj u pitajob a chʌc noqꞌueꞌ, a tu tus tsꞌajob sam tiꞌeꞌ caj u buquintajob u wʌcꞌʌs nocꞌ caj u jocꞌsajob quir u quinsaꞌr tu cruz. 
\s Sinbir Jesús tu cruz
\r (Mt. 27.32‑44; Lc. 23.26‑43; Jn. 19.17‑27)
\p
\v 21 A ucheꞌ caj u man taroꞌ tuririꞌ xib, u cꞌabaꞌ Simón, u tet Alejandro yejer Rufo. A Simónoꞌ caj tar tu ruꞌumin Cirene uch. Cu yuꞌur tu cor caj tsꞌar u pach quir u cꞌoꞌochic u cruz Jesús tu cu bin bʌjbir.
\v 22 Caj u pʌyajob Jesús tu chan witsir u cꞌabaꞌ Gólgota, u cꞌat yaꞌaric: U Cuchir U Baquer U Joꞌr.
\v 23 Caj u tumtaj caꞌ tsꞌabʌc u cꞌab u wich uva u yuqꞌuej, aroꞌ xacaꞌan u tsꞌac mirra, barej rajiꞌeꞌ mʌꞌ tu yucꞌajiꞌ. 
\v 24 Jeroj tuneꞌ, caj tsꞌoc u bajʌr Jesús ten soldadojob caj u jʌsajob u nocꞌ Jesús caj u chictajob chan tunich quir yiric mac cu bin u chꞌic u nocꞌ Jesús. Soc yerob baꞌ cu bin chꞌic jujunturob.
\p
\v 25 Caꞌanan u qꞌuinin, jach jatsꞌcab caj u sinajob tu cruz.
\v 26 Tsꞌibtaꞌb ich cꞌʌs chumuc u joꞌr u cruz Jesús, irej wa ju cuchir tsꞌib quir yiric baꞌ u siꞌpir. Caj u tsꞌibtaj: “A jeꞌ xibaꞌ Jesús, u rey u winiquirob judío.”
\v 27 Caj u sinajob tu cruz yejer rajiꞌ caꞌtur xib, a cu yaꞌcricob baꞌ. Caj baj ten soldado. Tuririꞌ tu noj Jesús, tuririꞌ tu tsꞌic xan Jesús.
\v 28 Rajen toc nupꞌaꞌan a baꞌ tsꞌibaꞌan ich u tꞌʌn Cꞌuj a cu yaꞌaric: “Caj u tucrajob wa rajiꞌ pꞌeriꞌ yejer a mac a yʌn u siꞌpirobeꞌ.”
\v 29 A macob a cu manob ucheꞌ taroꞌ, caj u pꞌastajob, caj u chictob u joꞌr an bic cu naj pꞌasticob mac, tan yaꞌaricob:
\p ―A techoꞌ ca waꞌaric jeꞌ a jubsic carem naj, ca waꞌaric mʌnaꞌ u nup u qꞌuinin a wʌcꞌʌs tsꞌʌpquintej u jer carem naj.
\v 30 Tac a bʌj ich a cruz, wʌcꞌʌs emen ta cruz.
\p
\v 31 Tiꞌ yʌnob xan, caj u pꞌastob Jesús u jach tsꞌurirob, cu pacran yaꞌaricob, quet yejer yʌjcamsʌyʌjirob u tꞌʌn Moisés:
\p ―A ray xiboꞌ, chen u jer cu taquic, u bʌjiriꞌ mʌꞌ cꞌuchaꞌan u mucꞌ u wʌcꞌʌs taquic u bʌjiꞌ.
\v 32 Caꞌ ij quirex wa rajiꞌ Cristo, a mac tuchiꞌtaꞌb ten Cꞌuj, u rey u winiquirob Israel. Caꞌ emac tu cruz bajeꞌrer, caꞌ in wirejob soc caꞌ in wacsejob tin worob tiꞌ. Baxuc xan, u yet bʌjaꞌan winiquirob caj u pꞌastajob tiꞌ. 
\s Quimij Jesús
\r (Mt. 27.45‑56; Lc. 23.44‑49; Jn. 19.28‑30)
\p
\v 33 Caj cꞌuchij cꞌacꞌchun qꞌuin caj acꞌbirchʌjij ich yocꞌocab tac u man mʌnaꞌ u nup horas.
\v 34 Tabar u cꞌuchur a mʌnaꞌ u nup horasoꞌ caj cꞌam tꞌʌnʌj Jesús caj awʌtnʌjij, caj yaꞌaraj:
\p ―Eloi, Eloi, lama sabactani? ―u cꞌat yaꞌaric: In Cꞌujech, in Cꞌujech, biquinin ca pꞌʌtiquen tin junan?
\p
\v 35 Barej caj uꞌyab ten jun yarob a mac a tiꞌ yʌnob tiꞌ taroꞌ, caj u yaꞌarob:
\p ―Uꞌyex baꞌ cu yaꞌaric. Cu tꞌʌnic Elías, yʌjtsequir u tꞌʌn Cꞌuj.
\p
\v 36 Caj u cꞌʌnaj yacab tuririꞌ tu yʌn yaꞌarir a pʌj u cꞌab u wich uva, caj u tsꞌʌmaj u noqꞌuir quir u tsꞌutsꞌic yaꞌarir a pʌj u cꞌab u wich uvajoꞌ. Caj u chucaj caj u tʌcaj tu cheꞌer jʌrʌr quir u nacsic u tsꞌa tiꞌ yuqꞌuej. Caj u tsꞌaj u yuqꞌuej caj yaꞌaraj:
\p ―Pajoꞌonex, caꞌ ij quirex wa cu bin tar Elías, caꞌ u yensej tu cruz Jesús.
\p
\v 37 Barej Jesús caj cꞌam tꞌʌnaj, caj u putaj yicꞌ, caj quimij.
\v 38 U nocꞌ a tꞌinaꞌanoꞌ ich carem naj tu cu naj cꞌujinticob Cꞌuj u winiquirob judío, a cu jʌsic jun xotꞌ naj tu cu bin u waꞌquic u qꞌuiqꞌuer yʌrʌcꞌ soc u rucꞌsic u siꞌpirob mac. Raꞌ u noqꞌuir seb caj jat chumuc. Caj u yʌnxchun u jatʌr caꞌanan tac u cꞌuchur u jatʌr ich u xax u noqꞌuir.
\v 39 U jach tsꞌurir cien soldadojob u winiquirob romano, a tiꞌ yʌn uch ʌcʌtan ich Jesús, caj u yiraj tsꞌoc u quimin an ten bic a jeraꞌ, caj u yaꞌaraj:
\p ―A jeꞌ xibaꞌ jach taj u parar Cꞌuj.
\p
\v 40 Baxuc xan, tiꞌ yʌnob jun yarob xquicob, cꞌʌs nach cu pʌcticob Jesús a ray xquicob. Tiꞌ yʌnob María, raꞌ cʌjaꞌan tu cajar Magadalena, tiꞌ yʌn María u nʌꞌ Jacobo a chichanoꞌ, yejer José, tiꞌ yʌn xan Salomé.
\v 41 Raꞌ yet manacob yejer Jesús caj tarob tu pach Jesús. Caj tarob tu pach Jesús caj u pꞌʌtaj u ruꞌumin Galilea. Quireꞌ tiꞌ yʌn ich u ruꞌumin Galilea. Robob caj u yamtajob Jesús, tiꞌ yʌn u jer yaꞌab xquicob caj binob uch tu cajar Jerusalén yejer Jesús.
\s Caj tꞌoj u baquer Jesús ich japnin tunich
\r (Mt. 27.57‑61; Lc. 23.50‑56; Jn. 19.38‑42)
\p
\v 42 Barej caj acꞌbirchʌjij, rajiꞌ u qꞌuinin cu pac muchꞌquinticob yoꞌoch quir u quiꞌ quiꞌ janʌnob. Mʌꞌ ja wirej, saman u qꞌuinin u jesicob u bʌj u winiquirob judío.
\v 43 Caj tarij José, tiꞌ cu tar ich u cajar Arimatea, rajiꞌ tuririꞌ ich tu cotor u jach tsꞌurirob u winiquirob judío, a mac tsoy yor, ich u jach tsꞌurirob u winiquirob judío. Rajiꞌ xan, cu pajic u qꞌuinin tu cu bin u reyinticob Cꞌuj. Caj u chichquintaj u yor quir u bin ich ʌcʌtan Pilato quir u cꞌatic u baquer Jesús quir u butꞌic tu japnin tunich José.
\v 44 Jacꞌ yor Pilato, quireꞌ toc quimij Jesús, caj u tuchiꞌtaj tꞌʌnbir u jach tsꞌurir cien soldadojob u winiquirob romano, caj u cꞌataj tiꞌ wa taj toc quimij Jesús.
\v 45 Barej caj u yubaj tu chiꞌ tu jach tsꞌurir cien soldadojob u winiquirob romano, caj yubaj yaꞌaric wa quimij Jesús tu tsꞌaj u baquer tiꞌ José.
\v 46 Rajiꞌeꞌ caj u mʌnaj tuririꞌ sʌc nocꞌ, lino u cꞌabaꞌ a sʌc noqꞌueꞌ, caj tsꞌoc u yensic u baquer caj u tapaj yejer a sʌc noqꞌueꞌ, caj bin u butꞌej ich japnin tunich, raꞌ toc betaꞌb u japnin uch tiꞌ tunich. Jeroj tuneꞌ, caj u bʌcꞌʌstaj tuririꞌ tunich tu jor u japnin tunich quir u quiꞌ peꞌcheꞌtic.
\v 47 María a cu tar tu cajar Magdalena yejer María u nʌꞌ José ucheꞌ, caj u pʌctob tu bin tꞌajbir u baquer Jesús. 
\c 16
\s Riqꞌuij Jesús tu quimirir
\r (Mt. 28.1‑10; Lc. 24.1‑12; Jn. 20.1‑10)
\p
\v 1 Barej caj man u qꞌuinin tu cu jesicob u bʌj u winiquirob judío, María, a cu tar tu cajar Magdalena, quet yejer María, u nʌꞌ Jacobo, quet yejer xan Salomé, robob caj u mʌnajob a quiꞌ u boc soc cꞌuchaꞌan yorob u chojicob u baquer Jesús.
\v 2 U qꞌuinin u yʌnxchun semana, jach aꞌacꞌbir tan u tar qꞌuin caj tarob tu tꞌajaꞌan u baquer Jesús.
\v 3 Cu pacran aꞌaricob a xquicoꞌ:
\p ―Mac cu bin u bʌcꞌʌstic tiꞌ toꞌonex a tunichoꞌ a tiꞌ yʌn tu jor a tu tꞌajaꞌan u baqueroꞌ?
\p
\v 4 Caj cꞌuchob caj u nacsaj u wichobeꞌ, caj u yirajob a jach carem tunicheꞌ, toc bʌcꞌʌsaꞌan.
\v 5 Barej caj ocob tu tꞌajaꞌan u baquer Jesús, caj u yirajob tuririꞌ xib, mʌꞌ uch xuruc u baqueriꞌ. Tiꞌ cꞌuraꞌan tu noj a xquiqueꞌ. Rajiꞌ u buquinmʌn jach cꞌʌrʌp sʌc nocꞌ. Caj jaqꞌuij yorob a xquicoꞌ, caj yirob curic. 
\v 6 Barej rajiꞌeꞌ, caj u yaꞌaraj tiꞌob:
\p ―Mʌꞌ u jacꞌʌr a worex ―quij―, ca cʌxtiquex Jesús, a cu tar tu cajar Nazaret ucheꞌ, a mac quinsaꞌb tu cruz. Wʌcꞌʌs riqꞌuij, mʌnaꞌ Jesús teraꞌ ―quij―, caꞌ cuxrajij ―quij― teꞌ yʌn u waꞌayaꞌ tu chaquintaꞌb u baquer uchaꞌ, iric ―quij―.
\v 7 Barej xenex, arex tiꞌ u camsʌwinicob, quet a waꞌariquex tiꞌ, yejer Pedro: “Arex tiꞌob cu bin tu ruꞌumin Galilea, rajiꞌ cu bin yʌn batꞌan cꞌuchur. A techexoꞌ, pachir a cꞌuchurex. Tiꞌ ca bin a wirex aroꞌ an ten bic caj u toc araj techex uch.”
\p
\v 8 Caj jocꞌob ich tu tꞌajaꞌan u baquer Jesús uch, caj u cꞌʌnajob yacab quir u putsꞌurob quireꞌ jach manan sajʌcob, tu chen quiquirʌncʌrob. Mʌnaꞌ baꞌ caj u yaꞌarajob tiꞌ, quireꞌ jach sajʌcob.
\s Irir Jesús ten María a cu tar tu cajar Magdalena
\r (Jn. 20.11‑18)
\p
\v 9 Barej caj riqꞌuij Jesús tiꞌ u quimirir, aꞌacꞌbir, u qꞌuinin u yʌnxchun semana, caj u yʌn batꞌan esaj u bʌj tiꞌ María, a cu tar tu cajar Magdalena, raꞌiriꞌ María a jocꞌsaꞌb siete u quisinob ten Jesús uch.
\v 10 Caj bin María, caj u yaꞌaraj tiꞌ u yet manob uch Jesús, caj cꞌuchij María cu yocꞌarob, cu yacticob Jesús.
\v 11 Robobeꞌ, cax caj u yubajob cuxaꞌaneꞌ, cax yuboboꞌ irir ten María. Robob caj u yaꞌarajob:
\p ―Mʌꞌ tajiꞌ ―quij.
\s Irir Jesús ten caꞌtur u camsʌwinicob Jesús
\r (Lc. 24.13‑35)
\p
\v 12 Barej pachir caꞌtur caj u yirajob mʌꞌ irej Cristo, caj u yirajob quireꞌ jarpʌjij quimij, cu binob ximbar ich chʌcʌn, caj u yirajobiꞌ.
\v 13 Caj binob, robobeꞌ yaꞌarej tiꞌ u racꞌob, barej, mʌꞌ ju quibob caj yubob yaꞌaraꞌ tiꞌob, xan.
\s Jesús cu tsꞌic u beyaj tiꞌ u camsʌwinicob
\r (Mt. 28.16‑20; Lc. 24.36‑49; Jn. 20.19‑23)
\p
\v 14 Pachir caj u yesaj u bʌj cuxaꞌan tiꞌ a oncejoꞌ u camsʌwinicob tu junanob, quireꞌ curucbarob tu janʌnob. Caj qꞌueyaꞌbob tiꞌob quireꞌ cax araꞌb tiꞌob ten yʌjirirob Jesús, chen mʌꞌ ju yacsob tu yorob wa riqꞌuij. Caj qꞌueyaꞌbob xan, quireꞌ chich u joꞌrob.
\v 15 Caj u yaꞌaraj tiꞌob:
\p ―Joqꞌuenex caꞌ a tsecꞌtex u jach tsoyir u tꞌʌn Cꞌuj ich tu cotor mac ich yocꞌocab.
\v 16 A mac a cu yacsic tu yor bayiriꞌ xan, tan yacsaꞌ jaꞌ tu joꞌr, bin tocac ten Cꞌuj. Barej a mac a mʌꞌ ju yacsej tu yor, tiꞌ toy yʌn u siꞌpir quireꞌ mʌꞌ ju yacsaj tu yoreꞌ, rajiꞌ cu bin satʌreꞌ.
\v 17 A baꞌ mʌnaꞌ mac yirmʌniꞌ uch, mʌꞌ biqꞌuin yirmʌniꞌ, raꞌ cu bin esbir ten an mac a yacsmʌnob tu yorob an ten bic a jeraꞌ: Bin u jocꞌsicob quisinob quireꞌ ten tin tsꞌaja u mucꞌob. Bin u tsicbarob ich u tꞌʌn a mac mʌꞌ u najticob uchiꞌ.
\v 18 Wa cu chuquic can, cax wa cu yuqꞌuic a baꞌ cu quinsic mac, mʌꞌ u bin cꞌastar. Bin u cu tsꞌancꞌʌbtic a mac yajeꞌ, jeroj cu jawʌraꞌ.
\s Jesús caj bin caꞌanan
\r (Lc. 24.50‑53)
\p
\v 19 A Jaj Tsꞌuroꞌ, caj tsꞌoc u tsicbar yejerob caj bin caꞌanano,ꞌ caj curaj ich u noꞌoj Cꞌuj quir u sʌjtaꞌ ten tu cotor mac.
\v 20 U camsʌwinicob Jesús tuneꞌ, caj jocꞌobeꞌ quir u tsecꞌticob u tꞌʌn Jesús tiꞌ tu cotor mac, jach quet u beyaj u Jaj Tsꞌurir yejerob. A Jaj Tsꞌuroꞌ caj u yesaj a baꞌ cu tsicbarob u camsʌwinicob raꞌ taj cu yaꞌaricob. Jeroj Tsꞌoquij, quij.