\id JHN
\h SAN JUAN
\toc1 SAN JUAN
\mt1 A JEꞌRAꞌ U JACH TSOYIR U TꞌɅN CꞌUJ TU TSꞌIBTA JUAN
\c 1
\s A jeraꞌ cu tsicbar tiꞌ toꞌonex a mac a cu tar ich Cꞌuj soc u tsicbʌtic toꞌonex bicyʌraꞌ Cꞌuj
\p
\v 1 Mʌꞌ toy betac ruꞌum mʌꞌ toy betac caꞌanan xan. Rajraꞌ tiꞌ yʌn a mac a cu bin tar u tsicbar toꞌonex bicyʌraꞌ Cꞌuj. Rajiꞌ tiꞌ yʌn yejer ic Tet Cꞌuj quireꞌ rajiꞌ Cꞌuj a cu bin tar.
\v 2 Rajraꞌ tiꞌ yʌn a mac a cu bin tar ich ic Tet Cꞌuj cax mʌꞌ toy betac ruꞌum yejer caꞌanan xan.
\v 3 Tu cotor a baꞌ tiꞌ yʌn, rajiꞌ u beyaj Cꞌuj. Mʌnaꞌ mac u jer tu betaj. Rajiꞌ tu junan caj u betaj.
\v 4 Rajiꞌ tu junan cu tsꞌic ij cuxtarex. Rajiꞌ tu tsꞌaj ic najtiquex ij cuxtarex munt qꞌuin. Quireꞌ a baꞌ caj u betaj rajen rajiꞌ u sasirir toꞌonex a mac a cu manob ich yocꞌocab a mac a cu manob ich yacꞌbirir quireꞌ yʌn u siꞌpirob.
\v 5 Rajiꞌ quib a cu yeꞌcꞌacꞌtic tu yʌn acꞌbir. A acꞌbiroꞌ mʌꞌ cꞌuchaꞌan yor u tupic u sasirir. Baxuc arayoꞌ yejer Jesús xan, cax mʌꞌ u cꞌatob Jesús mac. Rajiꞌ tan u tsꞌic toꞌonex ij cuxtarex munt qꞌuin.
\s A jeraꞌ cu tsicbar bic tabar u parar Cꞌuj tu chꞌaj u winquirir
\p
\v 6 A uchoꞌ tiꞌ yʌn mac u cꞌabaꞌ Juan. Rajiꞌ tsꞌaꞌb u beyaj ten Cꞌuj.
\v 7 A Juanoꞌ caj u tsecꞌtaj u sasirir a cu tar ich Cꞌuj a cu sasiquintic mac. Mʌꞌ ja wirej, wa quij cacsiquex ij corex u sasirir ic pixamex, mʌꞌ acꞌbir ic pixamexiꞌ. Juan caj u tsecꞌtaj soc u yacsic tu yor tu cotor mac a baꞌ cu yubic yaꞌaric Juan.
\v 8 A Juanoꞌ mʌꞌ raꞌ cu sasiquintic mac, u sasirir a cu tar ich Cꞌuj, cu chen tsecꞌtic a cu sasiquintic mac. Quireꞌ araꞌb tiꞌ caꞌ u tsecꞌtej.
\v 9 Wa ber a Juanoꞌ tan u tsecꞌtic tiꞌ uch. Toc tsꞌoc u cꞌuchur teraꞌ ich yocꞌocab, rajiꞌ a cu tsꞌic ij cuxtarex soc u sasiquintic ic pixamex. Quireꞌ raꞌ u beyaj.
\p
\v 10 Rajiꞌ cꞌuchij ich yocꞌocab a caj u betaj yocꞌocab. Chen mʌꞌ cꞌʌꞌotaꞌb ten a mac tiꞌ yʌn ich yocꞌocaboꞌ. 
\v 11 Caj cꞌuchij ich yocꞌocab soc u yet manob u winiquirob judío a mac tetaꞌb ten Cꞌuj uch. Chen mʌꞌ tu sʌjtajobiꞌ. 
\v 12 Chen yʌn mʌꞌ yaꞌab mac a tu sʌjtajoꞌ, a tu yacsaj tu yor a tiꞌoꞌ. Rajiꞌob yer tsꞌaꞌb u beyaj ten Cꞌuj soc u toꞌcar tiꞌob. Araꞌb tiꞌob ten Cꞌuj, rajiꞌob u parar Cꞌuj a cu yacsicob tu yor tiꞌ.
\v 13 Mʌꞌ ja wirej, a maqueꞌ u parar Cꞌuj quireꞌ caj u yacsaj tu yor. Rajiꞌ mʌꞌ baxuc a mac jach pararintaꞌb ten u tet quireꞌ rajiꞌ quir a cuxtar techex yocꞌocab. Rajiꞌ mʌꞌ baxuc u pararintaꞌb ten u nʌꞌ quireꞌ baxuc cu pachtic u pararʌncʌr a xquicoꞌ. Chen a mac a ju parar Cꞌuj munt qꞌuin u cuxtar.
\p
\v 14 Chen a mac a tar tsicbʌta toꞌonex bicyʌraꞌ Cꞌuj tu chꞌaj u winquirir an ten bic toꞌonex. Tarij soc ij quet man a mac a ju winiquirob judío. Tij quiraj jach manan u mucꞌ. Quireꞌ rajiꞌ u parar Cꞌuj, rajen baxuc jach manan u neꞌer baꞌ. Ic Tet Cꞌuj jariꞌ tuririꞌ u parar. Rajiꞌ quet cu yajquintoꞌonex. Rajiꞌ quet taj cu tsicbar.
\v 15 A Juanoꞌ caj u tsecꞌtaj tiꞌ a cu bin tar. Caj u yaꞌaraj tiꞌ:
\p ―A jeroj, bin, a mac a tin waꞌaraj techex uch. A pachir cu tar, rajiꞌ jach noꞌj beyaj caj in waꞌaraj. Chen in beyaj a tenoꞌ, mʌꞌ nenoꞌjeniꞌ. Cax mʌꞌ toy u rochen in nʌꞌ, u toc beriꞌ a tiꞌoꞌ quireꞌ rajraꞌ tiꞌ yʌn. 
\p
\v 16 Quireꞌ jach tsoy yor a cu tar ich Cꞌuj, rajen u jach tsoyirir Cꞌuj caj ij cꞌʌmaj. Rajraꞌ tan u tsꞌic toꞌon a baꞌ tsoy tu tꞌʌn Cꞌuj.
\v 17 Mʌꞌ ja wirej, u winiquirob judío caj u cꞌʌmajob u nunquirob u tꞌʌn Cꞌuj a tsꞌab ten Moisés uch. Chen a Jesucristojoꞌ caj u yesaj bic Cꞌuj caj u yajquintaj toꞌonex quireꞌ otsir toꞌonex yiricoꞌonex. Quireꞌ a Jesucristojoꞌ xan tij cuꞌyajex u tꞌʌn Cꞌuj a baꞌ taj.
\v 18 Mʌnaꞌ mac yirmʌn Cꞌuj. Chen u parar Cꞌuj tu yiraj u Tet. Jariꞌ u parar tuririꞌ rajiꞌ jach yajbir ten u Tet. Rajiꞌ caj u yesaj toꞌonex bicyiraꞌ Cꞌuj.
\s Juan a cu yacsic jaꞌ tu joꞌr mac caj u tsecꞌtaj tiꞌ Jesucristo
\r (Mt. 3.11‑12; Mr. 1.7‑8; Lc. 3.15‑17)
\p
\v 19 U winiquirob judío a tiꞌ cʌjaꞌanob ich u cajar Jerusalén. Rajiꞌob caj u tuchiꞌtajob sacerdote yejer a mac a cu beyajob ich carem naj tu cu naj cꞌujinticob u winiquirob judío. Levitas u cꞌabaꞌob. Tuchiꞌtaꞌb quir u cꞌataꞌ tiꞌ Juan:
\p ―Maquechiꞌ?
\p
\v 20 A Juanoꞌ mʌꞌ ju mucraj caj u yaꞌaraj:
\p ―Mʌꞌ Cristojeniꞌ, mʌꞌ yʌjtaquiren maquiꞌ, a cu bin tar.
\p
\v 21 Caj u caꞌ cꞌatob tiꞌ Juan:
\p ―Arej toꞌon maquechiꞌ? A techoꞌ wa Elíasech soc in waꞌaricob tiꞌ in racꞌob a tu tuchiꞌtenob?
\p Juan caj yaꞌaraj:
\p ―Mʌꞌ Elíaseniꞌ.
\p Caj u caꞌ cꞌatob tiꞌ:
\p ―Mʌꞌ wa tech yʌjtseqꞌuirech u tꞌʌn Cꞌuj a tan in pajicob u tar?
\p Juan caj u nuncaj, tan yaꞌaric tiꞌob:
\p ―Mʌꞌ teniꞌ.
\p
\v 22 A tuchiꞌtaꞌb caj u yaꞌarob tiꞌ Juan:
\p ―Arej tenob maquechiꞌ soc in waꞌaricob tiꞌ a macob a tu tuchiꞌtenob baꞌ a beyaj tech, arej tenob.
\p
\v 23 A Juanoꞌ caj u nuncaj caj u yaꞌaraj:
\p ―Isaías caj u tsecꞌtaj tiꞌ ten uch. Baxuc a jeraꞌ caj u tsecꞌtaj Isaías uch tan yaꞌaric: “Tiꞌ cu bin tar mac caꞌ bin cꞌuchuc tu qꞌuinin quir u cꞌam tsecꞌtic ich tʌcay ruꞌum.” Cꞌam cu bin yaꞌaric: “Tajquintex a worex soc cꞌuchaꞌan a worex a quiꞌ acsiquex Jaj Tsꞌurir irex ca jariquex u ber soc u tar rey.” Baxuc caj yaꞌaraj Isaías uch.
\p
\v 24 A mac tuchiꞌtaꞌb ten u winiquirob judío a fariseojoꞌ caj cꞌuchob ich Juan.
\v 25 Caj cꞌuchob caj u cꞌatajob tiꞌ Juan:
\p ―Biquinin ca wacsic jaꞌ tu joꞌr mac wa mʌꞌ tech Cristojech? Quireꞌ mʌꞌ Elíasech xan, baxuc mʌꞌ yʌjtseqꞌuirech u tꞌʌn Cꞌuj xan?
\p
\v 26 Juan caj yaꞌaraj tiꞌob:
\p ―A tenoꞌ raꞌ in beyaj quir in wacsic jaꞌ tu joꞌr mac. Chen a mac jach noꞌj beyaj tiꞌ yʌn tu yʌnechex bajeꞌrer. Chen a techex mʌꞌ a cꞌʌꞌomʌnexiꞌ.
\v 27 Rajiꞌ a cu tar pachir rajiꞌ jach noꞌj u beyaj chen a tenoꞌ mʌꞌ jach noꞌjen beyaj. Mʌꞌ pataren a tenoꞌ cax in chen pitic u cꞌanin pechꞌ u xʌnʌb.
\p
\v 28 Caj tarob u cꞌatej tiꞌ Juan tu yʌn cu yaꞌaricob Betábara, rajiꞌ pichir yaꞌarir Jordán tu cu tar ic yum. Ti taroꞌ Juan tan yacsic jaꞌ tu joꞌr mac.
\s Juan caj u yaꞌaraj: Rajiꞌ irej u tʌmʌn yuc Cꞌuj
\p
\v 29 U jer u qꞌuinin Juan caj yiraj Jesús Juan. A Jesúsoꞌ tan u jutsꞌic u bʌj ich yicnʌn Juan. Caj yaꞌaraj Juan:
\p ―Ir a wirex a jeꞌ cu taroꞌ tsꞌaꞌb u beyaj ten Cꞌuj. Rajiꞌ irej u tʌmʌn yuc Cꞌuj quireꞌ cu bin u quinsaꞌr soc u rʌc rucꞌsic ic siꞌpirex. Baxuc tu cotor mac a tiꞌ yʌn ich yocꞌocab.
\v 30 A jeraꞌ a tin yʌn batꞌan araj tech uch caj in waꞌaraj techex: “A pachir cu taroꞌ, rajraꞌ tiꞌ yʌn a pachir cu tar cax mʌꞌ toy u rochen in nʌꞌ uch a tiꞌoꞌ. Toc beriꞌ uchoꞌ.”
\p
\v 31 Juan caj yaꞌaraj:
\p ―A tenoꞌ xan mʌꞌ tin cꞌʌꞌotaj wa rajiꞌ ij cʌjtaquirex. Mʌꞌ ja wirej, taren in wacsic jaꞌ tu joꞌr u winiquirob judío soc u cꞌʌꞌoticob a cu tar ich Cꞌujoꞌ.
\p
\v 32 Juan caj yaꞌaraj tiꞌob:
\p ―A tenoꞌ caj in wiraj u yeman u Tajꞌor u Pixam Cꞌuj ich caꞌanan, irej susuy caj cꞌuchij tu yʌniꞌ. Tiꞌ pꞌatij tu yʌniꞌ.
\v 33 A tenoꞌ uch mʌꞌ tin cꞌʌꞌotaj. Chen a Cꞌujoꞌ a tu tsꞌaj in beyaj quir in wacsic jaꞌ tu joꞌr mac caj yaꞌaraj ten Cꞌuj: “Caꞌ bin a wirej, quij Cꞌuj, u yeman u Tajꞌor u Pixam Cꞌuj. Ca wiric tu cu pꞌatʌr yejer. Rajiꞌ cu bin u tsꞌic tech u Tajꞌor u Pixam Cꞌuj.” Baxuc caj yaꞌaraj Cꞌuj tiꞌ ten ―quij Juan―.
\v 34 Baxuc caj in wiraj, rajen quin wac techex rajiꞌ u parar Cꞌuj.
\s U camsʌwinicob Jesús a tu yʌn pʌyajeꞌ
\p
\v 35 U jer u qꞌuinin a Juanoꞌ tiriꞌ yʌn tu yʌn joꞌraj. Tiꞌ yʌn Juan yejer caꞌtur u camsʌwinicob.
\v 36 Juan caj yiraj u man Jesús, caj u yaꞌaraj tiꞌ u camsʌwinicob: 
\p ―Iriquex a jeraꞌ, rajiꞌ irej u tʌmʌn yuc Cꞌuj, quir u rucꞌsic u siꞌpir tu cotor mac ich yocꞌocab.
\p
\v 37 Caj yubob yaꞌaric Juan a caꞌtur u camsʌwinicob Juan caj sayob tu pach Jesús.
\v 38 Jesús caj u sut u bʌj u pʌctej tu pach. Caj yiraj tan u tar tu pach, caj araꞌb tiꞌob:
\p ―Baꞌ ca cʌxtiquex? ―quij.
\p Robob caj yaꞌarob tiꞌ:
\p ―In wʌjcamsʌyʌjirechob, tu cʌjaꞌanech?
\p
\v 39 Jesús caj u nucaj tiꞌob, tan yaꞌaric:
\p ―Cuxex a wirej.
\p Caj cꞌuchob tu yirajob tu cʌjaꞌan. Jesús caj u yacsaj tiꞌob quireꞌ tabar u bin qꞌuin. Tiꞌ wenob.
\p
\v 40 Tuririꞌ a tu yuba yaꞌaric Juan, a caꞌtur u camsʌwinic, caj say tu pach Jesús, rajiꞌ u cꞌabaꞌ Andrés. Rajiꞌ u sucuꞌun Simón Pedro.
\v 41 Seb caj bin u cʌxtej u sucuꞌun Simón. Caj yaꞌaraj tiꞌ: 
\p ―Tin wiraj a cu yaꞌaraꞌ Mesías ―rajiꞌ u cꞌat yaꞌaric Cristo a tuchiꞌtaꞌb ten Cꞌuj.
\p
\v 42 Andrés caj bin yejer u sucuꞌun tub yʌn Jesús. Caj irir Simón ten Jesús, caj u yaꞌaraj tiꞌ:
\p ―A techoꞌ ―quij Jesús―, Simónech, u pararech Jonás. Chen yʌn in pʌchic a cꞌabaꞌ Cefas, aroꞌ Pedro a cꞌabaꞌ ―a Cefasoꞌ ich u tꞌʌn u winiquirob judío, quet ich u tꞌʌn griego cu yaꞌaric Pedro.
\s Jesús cu pʌyic Felipe yejer Natanael
\p
\v 43 Caj sasij Jesús u cꞌat u bin ich u ruꞌumin Galilea. Mʌꞌ toy xiquiꞌ caj u nupꞌa Felipe caj yaꞌara tiꞌ:
\p ―Sayen ―quij Jesús―, tin pach quir a cʌnic in tꞌʌn. 
\p
\v 44 A jeꞌ Felipejaꞌ tiꞌ cʌjaꞌan ich u cajar Betsaida. Tu cʌjaꞌanob Andrés xan yejer Pedro.
\v 45 Felipe caj bin u cʌxtej Natanael, caj u yiraj caj yaꞌaraj tiꞌ:
\p ―Tij quiraj ―quij Felipe―, a mac tsꞌibtaꞌb ten ic nunquir Moisés uch ich u tꞌʌnob. Baxuc rajiꞌob tu tsꞌibtajob ic nunquir yʌjtseqꞌuirob u tꞌʌn Cꞌuj uch. Baxuc rajiꞌ u parar José a tiꞌ cʌjaꞌan ich u cajar Nazaret.
\p
\v 46 Natanael caj cꞌataj tiꞌ Felipe tan yaꞌaric:
\p ―Mʌꞌ ij cuꞌwimʌn a mac jach tsoy a cu tar ich u cajar Nazaret.
\p Felipe caj u nuncaj:
\p ―Cojen irej ―quij yaꞌaraj tiꞌ.
\p
\v 47 Jesús caj u yiraj tan u cꞌʌs jutsꞌic u bʌj Natanael ich Jesús. Jesús caj yaꞌaraj:
\p ―A jeꞌ cu taraꞌ a mac taj u yor ich u winiquirob judío. Mʌꞌ yer bic tabar u tus aric mac.
\p
\v 48 Natanael caj u cꞌataj tiꞌ:
\p ―Bic a cꞌʌꞌotiquen?
\p Jesús caj yaꞌaraj tiꞌ:
\p ―A tenoꞌ ―quij Jesús―, caj in wirech yaran u cheꞌer higuera cax mʌꞌ toy u tꞌʌnech Felipe.
\p
\v 49 Caj araꞌb tiꞌ ten Natanael:
\p ―In wʌjcamsʌyʌjirech ―quij Natanael―, a techoꞌ u pararech Cꞌuj. Baxuc jeꞌ a wocar a reyintic u winiquirob judío.
\p
\v 50 Jesús caj u nuncaj tiꞌ, tan yaꞌaric:
\p ―Quireꞌ ―quij Jesús―, caj in waꞌaraj tech caj in wirech yaran u cheꞌer higuera, rajen caj a wacsa ta wor ten? Jach tsoy baxuc, quireꞌ ta wacsaj ta wor. Caꞌ bin cꞌuchuc tu qꞌuinin jeꞌ in wesic tech jach manan in neꞌer baꞌ.
\p
\v 51 Baxuc xan Jesús caj u yaꞌaraj tiꞌ u camsʌwinicob. 
\p ―Taj a baꞌ quin wac techex. A techexoꞌ jeꞌ a wiriquex u qꞌueꞌpʌjʌr caꞌanan soc a wiriquex u yeman yʌjmasirob u tꞌʌn Cꞌuj tu yʌnen. Jeꞌ a wiriquex u nacar ich caꞌanan yʌjmasirob u tꞌʌn Cꞌuj. Quireꞌ a tenoꞌ baxuquenechexoꞌ. 
\c 2
\s Jesús caj bin yirej u chꞌic u racꞌ mac
\p
\v 1 Caj manij mʌnaꞌ u nup u qꞌuinin caj tsꞌoc yiric Natanael yejer Felipe. Yʌn mac cu bin u chꞌic u racꞌ ich u cajar Caná raꞌ u waꞌan u ruꞌumin Galilea. Tiꞌ yʌn xan u nʌꞌ Jesús, tar yiric u chꞌic u racꞌ mac.
\v 2 Caj pay u camsʌwinicob Jesús caj yirajob u chꞌic u racꞌ mac. Yet payac Jesús.
\v 3 Tiꞌ toy yʌn Jesús tu cu bin u chꞌic u racꞌ mac caj xup u cꞌab uva. Caj araꞌb tiꞌ Jesús ten u nʌꞌ:
\p ―Xup u cꞌab uva. Biquinin mʌꞌ a yamtic tiꞌob?
\p
\v 4 Jesús caj yaꞌaraj:
\p ―In nʌꞌech ―quij Jesús―, biquinin ca waꞌaric ten xup? Mʌꞌ toy jach cꞌuchuc tu qꞌuinin soc in wesic in mucꞌ.
\p
\v 5 U nʌꞌ Jesús caj u yaꞌaraj tiꞌ u cꞌurewob a mac cu bin u chꞌic u racꞌ:
\p ―Quibex a baꞌ cu yaꞌaric techex.
\p
\v 6 Tiꞌ tꞌanaꞌaniꞌ u yajaw pꞌurir yoch jaꞌ, u cuchir tu cu tꞌajic yoch jaꞌ soc tiꞌ cu pꞌoꞌicob u cꞌʌb. Baxuc tiꞌ cu pꞌoꞌicob yoc. Quireꞌ baxuc u pꞌurir cu chꞌic ochenta litros yoch jaꞌ.
\v 7 Jesús caj yaꞌaraj tiꞌ u cꞌurewob a mac a cu bin u chꞌic u racꞌ:
\p ―Toc chupex yaꞌarir a jeꞌ tꞌanaꞌan u pꞌurir yoch jaꞌ. 
\p Tu toc chupaj u yaꞌarir u jor u pꞌurir.
\v 8 Jesús caj u yaꞌaraj tiꞌob:
\p ―Jopex caꞌ xiquex a purex tiꞌ yirej yʌjtꞌʌjir a woꞌochex. 
\p Caj binob u purej tiꞌ.
\v 9 Yʌjtꞌʌjir yoch caj u tumtaj jaꞌ a waysaꞌb u cꞌab uva. Chen mʌꞌ yer tub u tar yaꞌarir u cꞌab uva. Chen u cꞌurewob yerob chen jaꞌ caꞌch caj u jopajob. Rajen u yʌjtꞌʌjir yoꞌoch caj u tꞌʌnaj a mac a cu chꞌic u racꞌ.
\v 10 Yʌjtꞌʌjir yoꞌoch caj yaꞌaraj tiꞌ:
\p ―A racꞌob ―quij―, rajiꞌ cu batꞌan tsꞌic a jach tsoy u cꞌab uva. Cu tsꞌocar u yuqꞌuicob yaꞌab u cꞌab uva, cu tsꞌic tiꞌ u racꞌob u cꞌab uva, a mʌꞌ quet yejer a tsoyoꞌ. Chen tech ta ricꞌsaj u cꞌab uva a jach tsoyoꞌ hasta bajeꞌrer.
\p
\v 11 Baxuc caj u betaj Jesús ich u cajar Caná, raꞌ u waꞌan u ruꞌumin Galilea. Rajiꞌ u yʌnxchun u carem beyaj soc yesic tiꞌ u racꞌob u winiquirob judío jach yʌn u mucꞌ Cꞌuj. Rajen u camsʌwinicob caj u yacsob tu yorob tiꞌ quireꞌ yerob u parar Cꞌuj.
\p
\v 12 Caj tsꞌoc aroꞌ caj binob ich u cajar Capernaum. Jesús yejer u nʌꞌ yejer yitsꞌinob yejer u camsʌwinicob. Chen mʌꞌ yaꞌab u qꞌuinin tiꞌ pꞌatob ich u cajar Capernaum. 
\s Jesús cu jocꞌsic mac a cu canicob baꞌ ich carem naj tu cu naj cꞌujinticob Cꞌuj u winiquirob judío
\r (Mt. 21.12‑13; Mr. 11.15‑18; Lc. 19.45‑46)
\p
\v 13 Tabar u cꞌuchur tu qꞌuinin u quiꞌquiꞌ janʌnob u qꞌuinin pascua. Raꞌ u qꞌuinin u winiquirob judío quireꞌ naꞌnij u cꞌʌꞌoticob quireꞌ baxuc caj potmastaꞌb u winiquirob judío ich u ruꞌumin Egipto ten yʌjmasir u tꞌʌn Cꞌuj uch. Caj bin Jesús yejer u camsʌwinicob ich u cajar Jerusalén. 
\v 14 Caj bin Jesús tu reꞌaꞌan carem naj tu cu naj cꞌujinticob Cꞌuj u winiquirob judío. Tiꞌ tu yiraj mac ich carem naj. A mac cu canicob yʌrʌcꞌ wacʌx a tonoꞌ yejer tʌmʌn yuc yejer susuj. Rʌc tiꞌ yʌnob tu reꞌaꞌan carem naj. Caj irir xan tiꞌ curaꞌan yʌjcꞌaxir u taqꞌuin soc u cꞌoxar u taqꞌuin a mac a cu tar nach.
\v 15 Rajen caj u cʌxtaj sum soc u jitꞌic quir u jatsꞌʌr u pachob. Caj u rʌc jocꞌsaj ich carem naj tu cotor a mac a cu canicob yʌrʌcꞌ tʌmʌn yuc yejer yʌrʌcꞌ wacʌx a tonoꞌ. Baxuc a mac cu cꞌaxicob u taqꞌuinob mac caj u rʌc wec u taqꞌuinob yejer u pojcheꞌirob u taqꞌuinob. 
\v 16 Jesús caj u yaꞌaraj tiꞌ a mac a cu canic susuj:
\p ―Toc rʌc jocꞌsex a wʌrʌcꞌ susuj. Quireꞌ rajiꞌ yatoch in Tet, mʌꞌ a cꞌaxiquex irej tu cu naj coꞌnan baꞌ.
\p
\v 17 Caj u yirob baꞌ tu betaj Jesús, rajen cꞌaj tiꞌ u camsʌwinicob Jesús a baꞌ tsꞌibaꞌan ich u tꞌʌn Cꞌuj uch: “Quireꞌ qꞌuex in wor tiꞌ yatoch Cꞌuj rajen cu bin u pꞌactiquen mac.” Baxuc araꞌb ich u tꞌʌn Cꞌuj uch.
\p
\v 18 U jach tsꞌurirob sacerdote caj u cꞌatob tiꞌ Jesús tan yaꞌaricob:
\p ―Mac caj u tsꞌaj a beyaj quir a jocꞌsic mac a cu canicob baꞌ ich carem naj? Ese tenob carem beyaj soc in werob mac caj u tsꞌaj a beyaj.
\p
\v 19 Jesús caj yaꞌaraj tiꞌob:
\p ―Jubse a jeꞌ carem najaꞌ caꞌ bin cꞌuchuc mʌnaꞌ u nup u qꞌuinin, quin bin in caꞌ ricꞌsej u jer ricꞌben.
\p
\v 20 U jach tsꞌurirob sacerdote caj yaꞌarob:
\p ―Yʌn cuarenta y seis yaxqꞌuin caj tsꞌoc u tsꞌʌpquintic u tunichir quir u tsꞌocsicob a jeꞌ carem najaꞌ. Bic tabar tech caꞌ bin a ricꞌsic mʌnaꞌ u nup u qꞌuinin? 
\p
\v 21 Jesús tan u tsicbar tiꞌ u winquirir, mʌꞌ cu yaꞌaric jach carem naj tu cu naj cꞌujinticob Cꞌuj u winiquirob judío.
\v 22 Rajen caj riqꞌuij Jesús ich u quimirir. U camsʌwinicob cꞌaj tiꞌob a baꞌ araꞌb tiꞌ u jach tsꞌurirob sacerdote ten Jesús. Raꞌiriꞌ u qꞌuinin caj u quibob u tꞌʌn Cꞌuj tu tsꞌibaꞌan tan yaꞌaric: “Jeꞌ u caꞌ riqꞌuir tu quimirir.” Rajen yerob taj u camsʌwinicob a baꞌ araꞌb tiꞌ u jach tsꞌurirob sacerdote ten Jesús.
\s Jesús yer baꞌ cu tucricob tu cotor mac
\p
\v 23 Tiꞌ pꞌat Jesús yejer u camsʌwinicob ich u cajar Jerusalén hasta caj tsꞌoc u man u qꞌuinin pascua. Yaꞌab mac caj u yacsaj tu yor quireꞌ yerob yʌjtaquirob quireꞌ yirob u carem beyajob Jesús.
\v 24 Quireꞌ Jesús yer baꞌ cu tucric tu cotor mac rajen yer mac mʌꞌ quet yor yejeriꞌ.
\v 25 A Jesúsoꞌ mʌꞌ baꞌwir cu tar yaꞌaric tiꞌ bicyʌraꞌ mac quireꞌ Jesús u toc er bicyʌraꞌ.
\c 3
\s Nicodemo cu tar u tsicbar yejer Jesús
\p
\v 1 A uchoꞌ tiꞌ yʌn u winiquir judío a fariseojoꞌ a uchoꞌ, rajiꞌoꞌ u cꞌabaꞌ Nicodemo. Rajiꞌ tuririꞌ u tsꞌurir ich u winiquirob judío. A fariseojoꞌ cu quibicob a baꞌ araꞌb ten u nunquir u winiquirob judío.
\v 2 Oqꞌuin caj bin Nicodemo tu yʌn Jesús quir u tsicbar yejer. Caj yaꞌaraj tiꞌ:
\p ―In wʌjcamsʌyʌjirech. In wer Cꞌuj tu tuchiꞌtech quir a camsicoꞌon. Wa mʌꞌ Cꞌuj tu tuchiꞌtech, mʌꞌ cꞌuchaꞌan a wor a wesic carem beyaj an ten bic ca betic.
\p
\v 3 Jesús caj yaꞌaraj tiꞌ:
\p ―Taj quin waꞌaric tech. A mac u cꞌat u yocar tu cu reyintic Cꞌuj, u Tajꞌor u Pixam Cꞌuj yʌn u tsꞌic u cuxtar a cu tar ich caꞌanan. Irej wa ju caꞌ rochaꞌr ten u nʌꞌ. 
\p
\v 4 Nicodemo caj yaꞌaraj tiꞌ Jesús:
\p ―Bic tabar u caꞌ rochar ten u nʌꞌ quireꞌ uch chꞌijic? Mʌꞌ cꞌuchaꞌan yor u caꞌ ocar ich u nʌcꞌ winic soc u caꞌ rochaꞌ ten u nʌꞌ.
\p
\v 5 Jesús caj u nuncaj tiꞌ, tan yaꞌaric tiꞌ:
\p ―Taj a baꞌ quin wac tech. Mʌꞌ chen jariꞌ jaꞌ cu yacsaꞌ ta joꞌr, caꞌ a cꞌʌmej u Tajꞌor u Pixam Cꞌuj quireꞌ baxuc toc araꞌb ten Cꞌuj. A baywoꞌ cꞌuchaꞌan a wor a wocar tu cu reyintic Cꞌuj.
\v 6 Tu qꞌuinin caj u rochech a nʌꞌ, rajiꞌ quir a chen cuxtar ich yocꞌocab. Tu qꞌuinin cu tsꞌic tech a cuxtar u Tajꞌor u Pixam Cꞌuj, raꞌ cu tar ich caꞌanan, rajiꞌ quir a cuxtar munt qꞌuin. Aroꞌ irej wa tu caꞌ rochech a nʌꞌ. 
\v 7 Mʌꞌ ju jacꞌʌr a wor Nicodemo quireꞌ tin waꞌaraj tech aroꞌ. Mʌꞌ ja wirej, u Tajꞌor u Pixam Cꞌuj jeꞌ u tsꞌic a cuxtar a cu tar ich caꞌanan soc cꞌuchaꞌan a wor a bin caꞌanan.
\v 8 A icꞌoꞌ cu rʌc man tu cotor. Ca wuꞌyic u jum, chen mʌꞌ a wer tub u tar, mʌꞌ ja wer, tu cu bin. Baxuc aroꞌ tu cotor mac a tsꞌab u cuxtar a cu tar ich caꞌanan ten u Tajꞌor u Pixam Cꞌuj. Cu chen beyaj tiꞌ techex chen mʌꞌ a werex bic tabar.
\p
\v 9 Nicodemo, mʌꞌ toy u jach quiꞌ najtiꞌ caj u caꞌ nuncaj, tan yaꞌaric:
\p ―Bic tabar cu betic a baxuc aroꞌ?
\p
\v 10 Jesús caj a nuncaj tiꞌ tan yaꞌaric:
\p ―A techoꞌ a neꞌer a camsic, ca chen camsic u winiquirob judío. Mʌꞌ wa ja najtej a tin waꞌaraj tech?
\v 11 Jach taj quin waꞌaric tech Nicodemo. A tenob in waꞌaricob tech a baꞌ in werob, baxuc a baꞌ tin wirob. Chen techex mʌꞌ ja quibex a baꞌ quin waꞌaricob.
\v 12 Wa mʌꞌ ja quibiquex a baꞌ quin tsicbar techex, a baꞌ yʌn ich yocꞌocab an ten bic caj in waꞌaraj yʌn u caꞌ rochiquech a nʌꞌ. Jeꞌ wa ja quibic a baꞌ quin waꞌaric techex, a baꞌ yʌn ich caꞌanan?
\p
\v 13 Jesús caj yaꞌaraj:
\p ―Mʌnaꞌ mac binij ich caꞌanan caj wʌcꞌʌs ur teraꞌ quir yaꞌaric bicyʌraꞌ caꞌanan. Chen a tenoꞌ cꞌuchaꞌan in wor in waꞌaric bicyʌraꞌ quireꞌ tiꞌ in tar ich caꞌanan quireꞌ a tenoꞌ irenechex. Tiꞌ quin wʌcꞌʌs bin xan.
\v 14 An ten bic ic nunquir Moisés caj u nacsaj can a betaꞌb tiꞌ mascab, caj u nacsa yejer cheꞌ ich tacay ruꞌum. Soc rajiꞌ quir u jawʌr a mac chiꞌbir ten can wa cu pʌctic. An ten bic a canoꞌ caj nacsaꞌb ich cheꞌ baxuc ten caꞌ bin u bʌjen ich cruz soc u nacsiquen soc in jawsic u siꞌpir mac quireꞌ a tenoꞌ irenechex.
\v 15 Wa mac cu yacsic tu yor ten quireꞌ bin u caꞌ bʌjbiren ich cruz soc in taquic tiꞌob, jeꞌ u cuxtar munt qꞌuin. 
\s Ic Tet Cꞌuj cu yajquintic tu cotor mac
\p
\v 16 ’Mʌꞌ ja wirej, a Cꞌujoꞌ jach manan cu yajquintic tu cotor mac ich yocꞌocab. Rajen tu tuchiꞌtaj u parar tuririꞌ. Rajen tu cotor mac a cu yacsic tu yor tiꞌ cu bin tacbir soc mʌꞌ u bin erar ich cꞌacꞌ. Chen cu bin tsꞌabʌr u cuxtar munt qꞌuin.
\v 17 Ic Tet Cꞌuj tu tuchiꞌtaj u parar teraꞌ ich yocꞌocab. Mʌꞌ tarij quir u tsꞌic u mucꞌyaj a tiꞌ yʌn ich yocꞌocab quireꞌ yʌn u siꞌpirob. Mʌꞌ ja wirej, tarij quir u yamtic tu cotor mac.
\p
\v 18 ’A mac cu yacsic tu yor tiꞌ cu bin tacbir ten u parar Cꞌuj, mʌꞌ ju bin u boꞌotic u boꞌorir u siꞌpir. Chen a mac a mʌꞌ u cꞌat u toꞌcar ten u parar Cꞌuj. A Cꞌujoꞌ caj u toc tetaj tub u wich u bin, quireꞌ mʌꞌ tu quibaj u tꞌʌn u parar a tuririꞌ, rajiꞌ ij cʌj taquir.
\v 19 Mʌꞌ ja wirej, tarij u parar Cꞌuj ich yocꞌocab quireꞌ tu toc tucraj a Cꞌujoꞌ bic cu bin u rucꞌsic u siꞌpir mac. Mʌꞌ ja wirej, caꞌ bin tac u sasirir a aꞌacꞌbiroꞌ chʌcaꞌan a wiric baꞌ u ber wa cꞌas. Baxuc xan caj tar u parar Cꞌuj chʌcaꞌan yiric wa yʌn u siꞌpir tu cotor mac. Chen a winiquiroꞌ mʌꞌ u cꞌat u tar tu yʌn u parar Cꞌuj quireꞌ cu manob tu cꞌasir quireꞌ rajiꞌob cu jach pachticob u siꞌpirob.
\v 20 Quireꞌ tu cotor mac a naꞌnij cu betic a cꞌasoꞌ mʌꞌ u cꞌat caꞌ iric a baꞌ cu betic. Rajen mʌꞌ u cꞌat u tar tu yʌn u parar Cꞌuj.
\v 21 Chen a mac a rajraꞌ cu betic a baꞌ u cꞌat Cꞌuj, mʌꞌ ju chꞌaꞌej sajquir u tar yicnʌn u parar Cꞌuj. Mʌꞌ ja wirej, irir rajiꞌob yamtaꞌb ten Cꞌuj.
\s Juan a cu yacsic jaꞌ tu joꞌr mac, cu tsicbʌtic Jesús 
\p
\v 22 Pachir caj binij Jesús yejer u camsʌwinicob ich u ruꞌumin Judea. Tiꞌ pꞌat yejer u camsʌwinicob yaꞌab u qꞌuinin. Jesús tu tsꞌaj u beyaj quir u yacsic jaꞌ tu joꞌr mac wa tu quib u tꞌʌn.
\v 23 Baxuc Juan xan tan yacsic jaꞌ tu joꞌr mac ich u cajar Enón. A Enónoꞌ cꞌʌs bʌytʌc u cajar Salim. Quireꞌ tiꞌ yʌn yaꞌab yicꞌ jaꞌ. A mac cꞌuchob ich Juan caj acꞌsaꞌb jaꞌ tu joꞌr wa tu quib u tꞌʌn xan.
\v 24 Quireꞌ a Juanoꞌ, mʌꞌ toy chucuc quir u maꞌcʌr, tan yacsic jaꞌ tu joꞌr mac ich u cajar Enón.
\p
\v 25 Yʌn u camsʌwinicob Juan mʌꞌ quiꞌ yorob quireꞌ u winiquirob judío tan u binob ich Jesús caꞌ acsac jaꞌ tu joꞌrob. Rajen u camsʌwinicob Juan quet tan u chich aricob tuririꞌ u winiquir judío.
\v 26 U camsʌwinicob Juan caj binob yaꞌarej tiꞌ Juan tan yaꞌaricob tiꞌ:
\p ―In wʌjcamsʌyʌjirech a mac tarij tub yʌnech uch ich pʌchir yaꞌarir Jordán a mac a ta waꞌaraj uch yʌn u tar. A bajeꞌrer tiꞌ yʌn tan yacsic jaꞌ tu joꞌr mac, tu cotor mac tan u rʌc bin yicnʌn.
\p
\v 27 Juan caj u nuncaj tan yaꞌaric tiꞌob:
\p ―Mʌꞌ ja wirej, u bʌjiriꞌ Cꞌuj cu tsꞌic u beyaj tiꞌ mac a baꞌ yʌn u betej.
\v 28 A techexoꞌ caj a wuꞌyajex mʌꞌ jin mucraj tin toc araj: Mʌꞌ Cristojen. Mʌꞌ taren in taquechex. A Cꞌujoꞌ, tu tsꞌaj in beyaj quir in chen pʌyic u ber ij cʌjtaquirex. 
\v 29 A mac a caj u raqꞌuintaj a jeꞌ xquicaꞌ rajiꞌ u mam. A mac u jach yajoꞌ cu yiric tan u chꞌic u racꞌ. Cu yubic u tsicbar cu quiꞌ tar yor yubic tan u chꞌic u racꞌ. Aroꞌ baxuc ten, jach quiꞌ in wor in wiric u bin a pimoꞌ ich Jesús.
\p
\v 30 Juan caj yaꞌaraj:
\p ―Mʌꞌ u neman u jumin ten, chen a Jesúsoꞌ, raꞌ cu jach jumintejob, quireꞌ baxuc u cꞌat Cꞌuj.
\s A mac a cu tar ich caꞌananoꞌ
\p
\v 31 Juan caj yaꞌaraj tiꞌ u camsʌwinicob:
\p ―A Jesúsoꞌ tuchiꞌtaꞌb ten Cꞌuj teraꞌ ich yocꞌocab, rajiꞌ u tsꞌurir tu cotor baꞌ. A tenoꞌ ―quij Juan―, teꞌ toc yʌnenaꞌ ich yocꞌocab, quin chen beyaj a teraꞌ. A tenoꞌ, quin chen aric techex a baꞌ quin wiric ich yocꞌocab. A Jesúsoꞌ tar u tar ich caꞌanan, rajen u neꞌer tu cotor baꞌ. Rajen neyʌn u mucꞌ.
\v 32 A Jesúsoꞌ cu yaꞌaric a baꞌ caj u yiraj tu yʌn a Cꞌujoꞌ. Baxuc a baꞌ caj u yubaj, rajiꞌ cu yaꞌaric. Chen mʌꞌ yaꞌabiꞌ cu quibic a baꞌ cu yac.
\v 33 Chen a mac a cu quibic u tꞌan Jesús quireꞌ tarij ich caꞌanan tan u quibic a baꞌ araꞌb tiꞌ Jesús ten Cꞌuj. 
\v 34 A Jesúsoꞌ tuchiꞌtaꞌb ten Cꞌuj, rajen cu yaꞌaric u tꞌʌn Cꞌuj. A Cꞌujoꞌ mʌꞌ ju pꞌisej mun cu tsꞌabʌr tiꞌ Jesús u Tajꞌor u Pixam Cꞌuj. mʌꞌ ja wirej, rajraꞌ yʌn u Tajꞌor u Pixam Cꞌuj tiꞌ.
\v 35 Ic Tet Cꞌuj cu yajquintic u parar rajen caj u tsꞌaj tiꞌ tu cotor a baꞌ yʌn tiꞌ, Cꞌuj caꞌ u cʌnantej u parar. 
\v 36 Tu cotor mac a cu yacsic tu yor tiꞌ u parar cu bin tacbir ten u parar Cꞌuj. Munt qꞌuin cu bin cuxtar. Tu cotor mac a mʌꞌ u cꞌat u yacsic tu yor tiꞌ, mʌꞌ u bin tacbir ten u parar Cꞌuj. Mʌꞌ u bin cuxtar munt qꞌuin, tar cu bin ich cꞌacꞌ. Yʌn u tsꞌabʌr u mucꞌyaj ten Cꞌuj. 
\c 4
\s Jesús cu tsicbar yejer xquic a tiꞌ cʌjaꞌanoꞌ tu cajar Samaria
\p
\v 1 Jesús tu najtaj tiꞌ a baꞌ araꞌb ten mac tiꞌ a fariseojoꞌ. U camsʌwinicob Jesús tan u pimtar quireꞌ tan u jach pimtar a mac acsaꞌb jaꞌ tu joꞌrob. Tan u jach osar u camsʌwinicob Juan. Baxuc araꞌb tiꞌ a fariseojoꞌ ten mac.
\v 2 Baxuc caj jumintaꞌb tiꞌ Jesús. Chen u bʌjiriꞌ Jesús mʌꞌ ju yacsaj jaꞌ tu joꞌrob mac. Chen u camsʌwinicob rajiꞌob cu yacsic jaꞌ tu joꞌrob mac.
\v 3 Quireꞌ Jesús yer baꞌ cu yaꞌaricob a fariseojoꞌ quireꞌ mʌꞌ u cꞌatob yiricob u pimtar u yacsicob tu yorob tiꞌ Jesús. Rajen ruqꞌuij ich u ruꞌumin Judea soc u wʌcꞌʌs bin ich u ruꞌumin Galilea.
\p
\v 4 Raꞌ u berir tu cu bin uch, tiꞌ cu chꞌʌctic u ruꞌumin u cꞌabaꞌ Samaria.
\v 5 Tiꞌ cꞌuchob Jesús yejer u camsʌwinicob ich u cajar Sicar. Raꞌ u cajar ich u ruꞌumin Samaria. Aroꞌ jach bʌytʌc tiꞌ u ruꞌumin a tiꞌ tsꞌab tiꞌ José uch ten u tet Jacob. 
\v 6 Tiꞌ yʌn yicꞌ jaꞌ ich ruꞌum chen tam yʌn yaꞌarir. Rajiꞌ u nunquir u winiquirob judío caj u panaj uch, Jacob u cꞌabaꞌ. Quireꞌ Jesús caꞌanij tu cu tar ich bej. Tan u jesic u bʌj bʌytʌc tu yʌn yicꞌ jaꞌ. Bʌytʌc cꞌacꞌchunqꞌuin. 
\v 7 Caj tarij xquic a tiꞌ cʌjaꞌan ich u ruꞌumin Samaria. Quir u paytic yoch jaꞌ quireꞌ tam. Jesús caj yaꞌaraj tiꞌ:
\p ―Chan chuquej ―quij Jesús―, ten jaꞌ quir in wuqꞌuic. 
\p
\v 8 Mʌꞌ ja wirej, u camsʌwinicob Jesús, binob ich u cajar Sicar quir u mʌnicob yoꞌoch.
\v 9 A xquicoꞌ a tiꞌ cʌjaꞌan tu ruꞌumin Samaria caj u yaꞌaraj tiꞌ Jesús:
\p ―Biquinin ca cꞌatic ten jaꞌ quire mʌꞌ u winiquir judíojen? U xquiquiren u ruꞌumin Samaria.
\p Baxuc caj yaꞌaraj a xquicoꞌ quireꞌ pꞌactaꞌb u winiquirob samaria ten u winiquirob judío.
\v 10 Jesús caj u nuncaj tiꞌ, tan yaꞌaric:
\p ―Wa ja chen er Cꞌuj u cꞌat u sijic tech baꞌ, wa ta cꞌʌꞌotajen a mac a tu yaꞌaraj tech: “Chan chuquej ten jaꞌ quir in wuqꞌuic”, a techoꞌ jach jaj ta yʌn batꞌan cꞌata ten sam jaꞌ caꞌ in tsꞌa tech jaꞌ soc rajiꞌ quir a cuxtar munt qꞌuin.
\p
\v 11 A xquicoꞌ caj yaꞌaraj:
\p ―Jaj Tsꞌurir ―quij―. A techoꞌ mʌnaꞌ quir a paytic jaꞌ quireꞌ tam yicꞌ yaꞌarir. Bic tabar ca bin a tsꞌic jaꞌ ten, a ray jaꞌoꞌ an ten bic caj a waꞌaraj ten? 
\v 12 Ic nunquir Jacob caj u pꞌʌta toꞌon a jeꞌ yicꞌ jaꞌaꞌ. Quireꞌ u bʌjiriꞌ tiꞌ tu yucꞌaj xan uch. Baxuc tiꞌ caj u yucꞌob u pararob xan, baxuc tiꞌ caj u yucꞌob u yʌrʌcꞌ. Jach manan wa noꞌjech ta beyaj a techoꞌ, cꞌuchaꞌan waj a wor a tsꞌic ten jaꞌ an ten bic ta waꞌaraj?
\p
\v 13 Jesús caj u nuncaj, caj yaꞌaraj tiꞌ:
\p ―Tu cotor mac a cu yuqꞌuic a jeꞌ jaꞌaꞌ, jeꞌ u caꞌ ucꞌchʌjʌreꞌ cax a wuqꞌuej.
\v 14 A mac a cu yuqꞌuic jaꞌ a quin tsꞌic a tiꞌoꞌ, mʌꞌ ju bin yʌnyʌn ucꞌchʌjʌr. Quireꞌ a jaꞌoꞌ a quin tsꞌic tiꞌ, cu wayʌr yicꞌ jaꞌ irej u bosirʌncʌr jaꞌ tu pixam soc u cuxtar munt qꞌuin.
\p
\v 15 Mʌꞌ toy u najtiꞌ, wa tan u tsicbar tiꞌ u cuxtar munt qꞌuin, rajen a xquicoꞌ caj yaꞌaraj:
\p ―Jaj Tsꞌurir ―quij―, chan chuquej a jeꞌ jaꞌaꞌ a caj a waꞌaraj caꞌ in wuqꞌuej soc mʌꞌ in yʌnyʌn ucꞌchʌjʌr baxuc soc mʌꞌ in caꞌ tar in tꞌuyic in woch jaꞌ yejer sum.
\p
\v 16 Jesús caj yaꞌaraj tiꞌ:
\p ―Joqꞌuen pʌyej a mam soc a tar yejer.
\p
\v 17 A xquicoꞌ caj u nuncaj caj u yaꞌaraj:
\p ―Mʌnaꞌ in mam ―quij yaꞌaraj tiꞌ Jesús.
\p Rajen Jesús caj yaꞌaraj tiꞌ:
\p ―Taj caj a waꞌaraj ten mʌnaꞌ a mam
\v 18 quireꞌ yʌn tech cinco a mam jach jaj uch. Rajraꞌ tan a tuchiꞌtic caꞌ xic a mac jach rajiꞌ a mam. Rajen a baꞌ ta waꞌaraj sam taj quireꞌ mʌꞌ jach a mamiꞌ, cax tiꞌ cʌjaꞌanech yejer.
\p
\v 19 A xquicoꞌ, caj tsꞌoc yubic a baꞌ araꞌb tiꞌ ten Jesús, caj yaꞌaraj:
\p ―Jaj Tsꞌurir ―quij―, quin wiric irech yʌjtseqꞌuirech u tꞌʌn Cꞌuj.
\v 20 Quireꞌ in nunquirob uch tu cꞌujinticob Cꞌuj uch ich a jeꞌ u joꞌr u witsiraꞌ. Chen techex ca waꞌariquex caꞌ xiquenob ich u cajar Jerusalén quir in cꞌujinticob Cꞌuj. 
\p
\v 21 Jesús caj yaꞌaraj:
\p ―Quibej a baꞌ quin waꞌaric tech, xquic. Caꞌ bin cꞌuchuc tu qꞌuinin, mʌꞌ ju bin yaꞌaricob caꞌ in cꞌujintejob Cꞌuj ich a jeꞌ joꞌr witsiraꞌ. Mʌꞌ ju bin u yaꞌaricob: “Caꞌ ij cꞌujintej Cꞌuj ich u cajar Jerusalén.”
\v 22 A techexoꞌ u winiquirechex samaria mʌꞌ a werex Cꞌuj, a mac a ca cꞌujintiquex. Chen u winiquirob judío yerob in Tet Cꞌujob, a mac in cꞌujinticob quireꞌ araꞌb tiꞌob ten Cꞌuj: “Bin in caꞌ in tar quir in taquicob quireꞌ pꞌeriꞌen yejer u winiquirob judío.”
\v 23 Bajeꞌrer cꞌuchij tu qꞌuinin tu cotor mac a cu quiꞌ acsic tu yorob, taj cu bin u cꞌujinticob ic Tet Cꞌuj tu pixam. Quireꞌ baxuc u cꞌat ic Tet Cꞌuj, taj caꞌ u cꞌujintejob ten mac tu pixamob.
\v 24 Ic Tet Cꞌuj mʌꞌ cꞌuchaꞌan a worex a wiric quireꞌ mʌnaꞌ u winquirir. Rajen mʌꞌ ja wirej. Baxucoꞌ mʌꞌ cꞌuchaꞌan a wor a wiric a mac a taj cu cꞌujintic Cꞌuj tu pixam. Quireꞌ tu pixamob taj cu cꞌujinticob Cꞌuj. Baxuc Cꞌuj u cꞌat taj caꞌ ij cꞌujintej ―baxuc caj u yaꞌaraj Jesús. 
\p
\v 25 A xquicoꞌ caj yaꞌaraj:
\p ―In wer mac cu bin tar cu yaꞌaraꞌ Mesías ―rajiꞌ u cꞌat yaꞌaric Cristo cu bin tsꞌabir u beyaj ten Cꞌuj quir u taquic mac tu cotor caꞌ bin tac―. Rajiꞌ cu bin u camsicoꞌon tu cotor baꞌ.
\p
\v 26 Jesús caj yaꞌaraj tiꞌ:
\p ―Rajiꞌen a tan in tsicbar yejerech.
\p
\v 27 Raꞌiriꞌ u qꞌuinin caj urob u camsʌwinicob tu bin u mʌnejob yoꞌoch. Caj jacꞌob yorob caj yirob Jesús tan u tsicbar yejer xquic. Mʌꞌ ja wirej, a mac a cu camsic u tꞌʌn Cꞌuj mʌꞌ ju tsicbar yejer xquic ich tan bej, baxuc naꞌnij cu betic u winiquirob judío. U camsʌwinicob surac u cꞌatob: “Biquinin ca tsicbar yejer xquic baxuc aroꞌ?”
\v 28 Rajen a xquicoꞌ caj u pꞌʌta u pꞌurir yoch jaꞌ tu chiꞌ u jorir yaꞌarir caj bin ich u cajar Sicar. Caj cꞌuchij caj yaꞌaraj tiꞌ u racꞌob:
\p
\v 29 ―Cojenex ―quij―, caꞌ a wirex a mac a tu yaꞌaraj tu cotor baꞌ a tin betaj. Jaj ix tʌco wa rajiꞌ tiꞌ Cristo a cu bin tuchiꞌbir ten Cꞌuj.
\p
\v 30 Rajen seb caj tarob ich Jesús caj jocꞌob tu cajar. 
\v 31 Caj bin a xquicoꞌ caꞌch, u camsʌwinicob tan u chich aꞌaricob tiꞌ Jesús:
\p ―In wʌjcamsʌyʌjirech chan janen.
\p
\v 32 Jesús caj u nunca tan yaꞌaric tiꞌob:
\p ―Yʌn ten quir in janʌn. A baꞌ yʌn ten mʌꞌ a werex wa yʌn ten.
\p
\v 33 U camsʌwinicob caj pacran tsicbanʌjob tan yaꞌaricob: 
\p ―Yʌn wa mac tar u puric yoꞌoch quir u janʌn?
\p
\v 34 Jesús caj yaꞌaraj tiꞌ u camsʌwinicob:
\p ―Raꞌ in woch a tenoꞌ caꞌ in betej a baꞌ u cꞌat Cꞌuj quireꞌ rajiꞌ tu tuchiꞌtajen. Caꞌ in tsꞌocsej a tu tsꞌaj in beyaj.
\p
\v 35 Jesús caj yaꞌaraj tiꞌ u camsʌwinicob:
\p ―Baxuc ca waquex tech yʌn cuatro ic nʌꞌ quir ic wʌtic ij coꞌoch trigo. Uꞌyex baꞌ quin wac techex. Pʌctex a wirex a raꞌ cu tar winiquirob tub yʌnoꞌon. Rajiꞌob irob trigo a cu tijireꞌ ich cor quir u wʌtic.
\v 36 Jeroj cꞌuchij tu qꞌuinin a yamtic mac u yacsic tu yor ten. Irechex a mac tan a wʌtiquex trigo ich cor a tiquinoꞌ. A mac a cu yamtic mac caꞌ u yacsej tu yor, irob a mac a cu maric yoch trigo a tiquineꞌ. Jeꞌ u quiꞌ acsaꞌrob ten Cꞌuj. A mun cu bin yambir caꞌ u yacsej tu yor cu bin cuxtar munt qꞌuin. Rajen pꞌeriꞌ quiꞌ yorob a mac a cu tsꞌabʌr tiꞌ u tꞌʌn Cꞌuj tu pixam mac yejer a mac a cu yamtic caꞌ u yacsej tu yor.
\v 37 Quireꞌ taj a cu yaꞌaric mac: “Tuririꞌ yʌjpʌqꞌuir tuririꞌ yʌjwʌtir.”
\v 38 A tenoꞌ caj in tsꞌaj a beyajex techex quir a mariquex a mac a tu yacsaj tu yor ten. Quin tuchiꞌtiquechex tub mʌꞌ beyajnʌjaꞌanechex. Mʌꞌ ja wirej, u jer mac tu pʌcꞌaj u tꞌʌn Cꞌuj tu pixamob. Quireꞌ raꞌ a beyaj a techexoꞌ quir a quiꞌ camsic tiꞌob tiꞌ u tꞌʌn Cꞌuj soc u quiꞌ acsicob tu yorob.
\p
\v 39 Yaꞌab u winiquirob samaria a cʌjaꞌanob ich u cajar Sicar tu yacsob tu yorob tiꞌ Jesús quireꞌ a baꞌ tu tsicbʌtaj a xquicoꞌ tiꞌob quireꞌ tu yubob yaꞌaric: “Rajiꞌ tu yaꞌaraj ten tu cotor baꞌ caj in betaj uch.”
\v 40 Caj tarob u winiquirob samaria ich Jesús. Caj u chich arob caꞌ pꞌatʌc yejerob. Tiꞌ pꞌatij Jesús caꞌtur u qꞌuinin. 
\v 41 Yaꞌab u winiquirob samaria caj u yacsajob tu yorob a baꞌ caj u yubob yaꞌaric Jesús xan.
\v 42 Rajen yaꞌab u winiquirob samaria caj u yaꞌarajob tiꞌ a xquicoꞌ:
\p ―Bajeꞌrer tij cacsaj tij cor, mʌꞌ chen tij cuꞌyaj a waꞌaric. Quireꞌ tij cuꞌyaj u tꞌʌn Jesús, rajen ij quer rajiꞌ Cristo a tar u taquic tu cotor mac ich yocꞌocab. 
\s Jesús cu jawsic u parar a mac a cu beyajoꞌ tiꞌ rey 
\p
\v 43 Caj tsꞌoc u man caꞌtur u qꞌuinin. Caj rucꞌ Jesús ich u ruꞌumin Samaria quir u bin ich u ruꞌumin Galilea.
\v 44 Caj binob ich u ruꞌumin Galilea quireꞌ yerob mʌnaꞌ mac cu bin u pꞌactic Jesús caꞌch quireꞌ mʌꞌ sʌjtaꞌb ten u racꞌob. Quireꞌ Jesús caj u yaꞌaraj: “A mac a cu tsecꞌtic u tꞌʌn Cꞌuj mʌꞌ u bin sʌjtaꞌbir tu chꞌijir.”
\v 45 Caj cꞌuchij Jesús ich u ruꞌumin Galilea, mac tiꞌ cʌjaꞌanob quiꞌ yorob yiricob Jesús. Mʌꞌ ja wirej, tu yirob tu cotor a baꞌ caj u betaj Jesús u qꞌuinin pascua ich u cajar Jerusalén quireꞌ binob xan.
\p
\v 46 Jesús caj wʌcꞌʌs bin ich u cajar Caná raꞌ u waꞌan u ruꞌumin Galilea tuꞌ tu waysaj jaꞌ u cꞌab uva. Tiꞌ yʌn mac a cu tar tiꞌ u cajar Capernaum. Rajiꞌ cu beyaj tiꞌ rey. Rajiꞌ u parar yaj.
\v 47 A cu beyaj tiꞌ rey caj yuba yaꞌaric cꞌuchij Jesús tar u tar ich u ruꞌumin Judea bajeꞌrer cꞌuchij ich u ruꞌumin Galilea. Caj bin yirej quir u chich pʌyic caꞌ xic ich yatoch quir u jawsaꞌ u parar quireꞌ tabar u quimin.
\v 48 Caj cꞌuchij ich Jesús caj araꞌb tiꞌ ten Jesús:
\p ―A techexoꞌ mʌꞌ ja quibiquex cax jach manan in mucꞌ hasta ca wiriquex carem in beyaj.
\p
\v 49 Chen a mac a cu beyaj tiꞌ rey caj yaꞌaraj tiꞌ Jesús: 
\p ―In Jaj Tsꞌurir ―quij―, sepquintej a tar, mʌꞌ toy quimic in parar.
\p
\v 50 Jesús caj yaꞌaraj tiꞌ:
\p ―Caꞌ xiquech ta watoch jeꞌ u jawʌr a parar.
\p A xiboꞌ tu quibaj u tꞌʌn a baꞌ araꞌb tiꞌ ten Jesús. Caj wʌcꞌʌs sutnʌj tu yatoch
\v 51 Tabar u cꞌuchur tu yatoch caj bin nupbir ten u cꞌurew ich bej. Tar u tar ich yatoch caj araꞌb tiꞌ:
\p ―A parar jawij.
\p
\v 52 A xiboꞌ caj u cꞌataj tiꞌ u cꞌurew:
\p ―Tuꞌ qꞌuin caj jawij?
\p U cꞌurew caj yaꞌaraj:
\p ―Joꞌraj cꞌʌs sarpʌj u qꞌuinin caj jawij u chʌcwirir u joꞌr.
\p
\v 53 U tet u parar caj u cꞌʌꞌotaj raꞌiriꞌ u qꞌuinin caj araꞌb tiꞌ ten Jesús joꞌraj: “Jeꞌ u jawʌr a parareꞌ”; rajen a xiboꞌ yejer tu cotor mac tiꞌ yʌn tu yatoch caj u yacsob tu yorob tiꞌ Jesús.
\p
\v 54 A jeraꞌ u carem beyaj tu caꞌ esaj Jesús soc yesic yʌn u mucꞌ Cꞌuj. Rajiꞌ tu betaj caj urij ich u ruꞌumin Judea caj cꞌuchij ich u ruꞌumin Galilea.
\c 5
\s Jesús cu jawsic a mechoꞌ, a mac a characbar tu cuch yacʌr yaꞌarir, u cꞌabaꞌ yaꞌarir Betesda
\p
\v 1 Pachir caj cꞌuchij tu qꞌuinin u quiꞌquiꞌ janʌn u winiquirob judío. Raꞌ u qꞌuinin pascua, caꞌten binob Jesús yejer u camsʌwinicob ich u cajar Jerusalén.
\v 2 Tiꞌ yʌn ich u cajar Jerusalén tu cuch yacʌr yaꞌarir. Tiꞌ yʌn tu cu yocar yʌrʌcꞌ tʌmʌn yuc ich u jor u paꞌteꞌir tunich. Tar cu binob ich carem naj a tʌmʌn yucoꞌ. Yʌn u cꞌabaꞌ tu cu yacʌr yaꞌarir u cꞌabaꞌ Betesda. Baxuc cu yaꞌaric ich u tꞌʌn hebreo Betesda. Tiꞌ cꞌʌxaꞌan cinco yatoch tu nʌcꞌ tu cuch u yacʌr yaꞌarir. Chen yatochob mʌꞌ paꞌteꞌtaꞌan.
\v 3 Tiꞌ muchꞌaꞌanob yaꞌab u yajirir yejer chꞌop u wich yejer a mac mech yoc yejer a mac a mʌꞌ ju riqꞌuir. Rʌc tiꞌ yʌnob ich yatochob tu cuch yacʌr yaꞌarir characbarob ich ruꞌum. Quireꞌ tan u pajicob u pecsaꞌr yaꞌarir.
\v 4 Mʌꞌ ja wirej, tar cu yeman yʌjmasir u tꞌʌn Cꞌuj tu cuch yacʌr yaꞌarir. Tenten cu yeman yʌjmasir u tꞌʌn Cꞌuj quir u pecsic yaꞌarir. Caj tsꞌoc u pecsaꞌ yaꞌarir, a mac yʌn pʌybej em ich yaꞌarir caj jawij u yajir cax baꞌ yajirir.
\v 5 Tiꞌ yʌn turiꞌ u winiquir judío jach uch tu cʌnaj u yajir. Yʌn treinta y ocho yaxqꞌuin tiꞌ.
\v 6 Jesús caj u yiraj tiꞌ charaꞌan. Yer uch yajac rajen caj u yaꞌaraj tiꞌ:
\p ―A cꞌat wa ja jawʌr?
\p
\v 7 A yajoꞌ caj u nunca tan yaꞌaric:
\p ―In Jaj Tsꞌurir ―quij―, mʌnaꞌ mac cu bin u yacsiquen tu cuch u yacʌr yaꞌarir, cu tsꞌocar u pecsaꞌr yaꞌarir. Cax in cꞌat in wocar, u jer cu tar, rajiꞌ cu batꞌan ocar.
\p
\v 8 Jesús caj yaꞌaraj tiꞌ:
\p ―Riqꞌuen catsꞌe yor xaꞌan caꞌ ximbanʌquech.
\p
\v 9 Seb caj jawij caj u catsꞌa yor xaꞌan caj u yʌnxchun u ximbar. Chen raꞌ u qꞌuinin cu jesic u bʌj u winiquirob judío caj jawsaꞌb ten Jesús.
\v 10 Rajen u winiquirob judío caj yaꞌarob tiꞌ a mac jawsaꞌb: 
\p ―Tiꞌ toy u qꞌuinin quir ic jesic ic bʌjex, tech tan a cʌrʌxbetic u tꞌʌn Moisés quireꞌ tan a cuchic yor xaꞌan. 
\p
\v 11 A xiboꞌ caj u nuncaj tan yaꞌaric tiꞌob:
\p ―A mac a tu jawsajen. Rajiꞌ caj u yaꞌaraj ten: “Catsꞌej yor xaꞌan caꞌ ximbanʌquech” ―quij.
\p
\v 12 Robob caj u cꞌatob tiꞌ:
\p ―Mac caj u yaꞌaraj tech catsꞌej yor xaꞌan caꞌ ximbanʌquech? 
\p
\v 13 A jawsaꞌb u yajirir mʌꞌ yer mac jawsej quireꞌ seb caj binij Jesús quireꞌ pim winicob caj u muchꞌquintajob u bʌj.
\v 14 Pachir Jesús caj u nupꞌaj tu japꞌnin carem naj. Jesús caj yaꞌaraj tiꞌ:
\p ―Jawech bajeꞌrer. Mʌꞌ toy jawac a siꞌpir wa ca pꞌatʌr ich a siꞌpir, jach manan ca bin a mucꞌyaj.
\p
\v 15 A xiboꞌ caj bin ich u jach tsꞌurirob sacerdote caj yaꞌaraj tiꞌob:
\p ―A mac a tu jawseniꞌ, rajiꞌ Jesús.
\p
\v 16 Quireꞌ Jesús caj u jawsaj a xiboꞌ u qꞌuinin u jesic u bʌj u winiquirob judío rajen u jach tsꞌurirob sacerdote cu pꞌacticob Jesús. U cꞌatob u quinsicob Jesús.
\v 17 Jesús caj yaꞌaraj tiꞌob:
\p ―In Tetoꞌ tiꞌ toy cu beyaj. Baxuc aroꞌ tiꞌ toy quin beyaj xan.
\p
\v 18 Rajen u jach tsꞌurirob sacerdote u cꞌatob u jach quinsicob Jesús. Cu tucricob mʌꞌ ju cʌnantaj u qꞌuinin tu cu jesicob u bʌj u winiquirob judío. Bayiriꞌ quireꞌ caj yaꞌaraj: “Rajiꞌ in Tet Cꞌuj.” Baxuc tu pꞌeriꞌquintaj u bʌj yejer Cꞌuj.
\s U parar Cꞌuj, rajiꞌ tsꞌaꞌb u beyaj ten Cꞌuj
\p
\v 19 Jesús caj yaꞌaraj tiꞌob:
\p ―Taj a baꞌ quin wac techex, a tenoꞌ u pararen Cꞌuj. In bʌjiriꞌ mʌꞌ cꞌuchaꞌan in wor tiꞌ baꞌ. Quin chen betic a baꞌ quin wiric u betic in Tet. A baꞌ cu betic in Tet, baxuc a tenoꞌ quin betic quireꞌ u pararen.
\v 20 In Tet cu yajquintiquen quireꞌ u pararen. Cu yesic ten tu cotor baꞌ cu betic. Techex bajeꞌrer ta wirex chichin a baꞌ caj in betaj. Jeꞌ u chaꞌic in betic Cꞌuj jach manan carem in beyaj. Caꞌ bin tsꞌocac in betic, jach manan cu bin jacꞌʌr a worex.
\v 21 An ten bic in Tet cu ricꞌsic a quimenoꞌ soc u tsꞌic u cuxtar. Baxuc a tenoꞌ quin tsꞌic u caꞌ cuxtar a mac in cꞌat u caꞌ cuxtarob.
\v 22 In Tetoꞌ mʌꞌ ju bin u jʌsic a mac yʌn u siꞌpirob. Chen tu yaꞌaraj ten, quireꞌ u pararen, soc in jʌsic a mac yʌn u siꞌpirob.
\v 23 Rajen tu cotor mac jeꞌ u sʌjtiquen an ten bic cu sʌjticob in Tet. A mac a mʌꞌ ju sʌjtiquen cax u pararen Cꞌuj, baxuc mʌꞌ ju sʌjtaꞌ in Tet a mac a tu tuchiꞌtajen. 
\p
\v 24 Jesús caj yaꞌaraj tiꞌob:
\p ―Taj quin waꞌaric techex: Cꞌuchij tu qꞌuinin a mac a cu yubic in tꞌʌn a tenoꞌ u pararen Cꞌuj, a mac a cu yubic in tꞌʌn wa cu yacsic tu yor tiꞌ a mac a tu tuchiꞌtajen, jeꞌ u cuxtar munt qꞌuin. Mʌꞌ ju bin tsꞌabir u mucꞌyaj. Baxuc mʌꞌ ju bin satʌr chen cu bin tsꞌabir u cuxtar ricꞌben quir u cuxtar munt qꞌuin.
\v 25 Taj quin waꞌaric techex. Cꞌuchij tu qꞌuinin a mac a cu yubic in tꞌʌn a tenoꞌ u pararen Cꞌuj. A techexoꞌ irechex wa quimrechex ʌcʌtan ten. A mac a cu yacsic tu yor in tꞌʌn jeꞌ u cuxtar munt qꞌuineꞌ.
\v 26 An ten bic in Tet Cꞌuj yʌn u mucꞌ quir u tsꞌic u cuxtar munt qꞌuin tiꞌ mac. Baxuc caj u tsꞌaj ten u mucꞌ quir in tsꞌic u cuxtar munt qꞌuin tiꞌ mac, quireꞌ u pararen. 
\v 27 Baxuc caj u tsꞌaj ten u mucꞌ quir in jʌsic mac a yʌn u siꞌpirob quireꞌ a tenoꞌ bajenenoꞌ winic ich yocꞌocab. 
\v 28 Mʌꞌ u jacꞌʌrex a worex quireꞌ caj in waꞌaraj techex aroꞌ. Mʌꞌ ja wirej, jeꞌ u cꞌuchur tu qꞌuinin tu cotor mac a quimenoꞌ cu bin u yubic in tꞌʌn quireꞌ u pararen Cꞌuj.
\v 29 Tu cotor mac cu bin riqꞌuir tu mucnaj. A mac a tu betaj tsoy cu bin cuxtar munt qꞌuin ich caꞌanan. A mac a tu betaj cꞌasoꞌ cu bin tsꞌabir u mucꞌyaj quireꞌ raꞌ u boꞌorir u siꞌpirob.
\s A mac a cu yaꞌaricoꞌ taj tiꞌ Jesús
\p
\v 30 Jesús caj yaꞌaraj:
\p ―A tenoꞌ ―quij―, in bʌjiriꞌ mʌꞌ cꞌuchaꞌan in wor tiꞌ baꞌ. An ten bic caj u yaꞌaraj in Tet baxuc quin bin in jʌsic a mac a yʌn u siꞌpirob. Taj quin bin in jʌsic mac. A tenoꞌ mʌꞌ in bin in jʌsej an ten bic in cꞌat. A tenoꞌ quin betic an ten bic u cꞌat in Tet a tu tuchiꞌtajen. 
\v 31 Quireꞌ techex ca tucriquex in bʌjiriꞌ quin tsicbar tin junan. Rajen ca tus tucriquex mʌꞌ cꞌuchaꞌan a worex a wacsiquex ta worex ten.
\v 32 Yʌn ten mac cu tsicbar tiꞌ ten. Taj a baꞌ cu tsicbar tiꞌ ten.
\v 33 A techexoꞌ ta tuchiꞌtajex mac quir u cꞌataꞌ tiꞌ Juan a cu yacsic jaꞌ caj u joꞌr mac. Taj a baꞌ tu yaꞌaraj techex Juan ten.
\v 34 Mʌꞌ baꞌwir Juan quir u tsicbar ten. Quin chen aric techex aroꞌ quir in cꞌasictechex soc cꞌuchaꞌan a worex a wacsiquex ta worex.
\v 35 A Juanoꞌ irej quib, cu yeꞌcꞌacꞌtic a berex soc chʌcaꞌan a berex tu ca binex. Cax tabar u qꞌuinin, Juan caj u camsaj techex soc a werex ten. Quiꞌex a worex caj u tsecꞌtaj techex Juan.
\v 36 A Juanoꞌ, tu chen tsicbʌtajen. Chen in beyaj cu chaꞌic Cꞌuj in betic jach carem. Aroꞌ cu yesic techex Cꞌuj tu tuchiꞌtajen.
\v 37 In Tet Cꞌuj a mac tu tuchiꞌtajen, rajiꞌ cu tsicbʌtic ten. A techexoꞌ mʌꞌ ja wuꞌyʌmʌnex chichin u tsicbar, mʌꞌ ja wiramʌnex bicyʌraꞌ Cꞌuj.
\v 38 Quireꞌ mʌꞌ tiꞌ yʌn u tꞌʌn ta pixamex. Rajen mʌꞌ ja wacsiquex ta worex tiꞌ ten a mac tu tuchiꞌtajen Cꞌuj. 
\v 39 Mʌꞌ ja wirej, rajraꞌ ca quiꞌ xaquiquex u tꞌʌn Cꞌuj tu tsꞌibaꞌan quireꞌ ca tus tucriquex baxucoꞌ ca bin a cuxtarex munt qꞌuin. Chen u tꞌʌn Cꞌuj mʌꞌ ju yaꞌaric aroꞌ. Cu tsicbar tiꞌ ten a tsꞌibaꞌan u tꞌʌn Cꞌuj quir in tsꞌic a cuxtarex munt qꞌuin.
\v 40 Chen a techexoꞌ mʌꞌ ja cꞌat a wacsiquex ta wor tiꞌ ten quir in tsꞌic a cuxtarex munt qꞌuin.
\p
\v 41 ’Cax mʌꞌ a sʌjtiquenex mʌꞌ jin pʌqꞌuiquechex.
\v 42 Quireꞌ in werechex, mʌꞌ ja yajquintiquex Cꞌuj ta pixamex. 
\v 43 A techexoꞌ mʌꞌ a cꞌat a wacsiquex ta wor tiꞌ ten cax tiꞌ in tar ich in Tet. Chen a mac mʌꞌ tuchiꞌtaꞌb ten in Tet ca sʌjtiquex.
\v 44 Mʌꞌ cꞌuchaꞌan a worex a wacsiquex ta worex quireꞌ ca pachtiquex caꞌ u tus yirechex a racꞌob jach tsoyechex. Mʌꞌ ja wirej, mʌꞌ tan a cʌxtiquex soc chen Cꞌuj cu yiriquechex jach tsoyechex.
\v 45 Mʌꞌ a chen tucriquex wa chen ten quin bin in taꞌquiquex a joꞌrex ʌcʌtan tiꞌ in Tet. Quireꞌ ca tus tucriquex a quiꞌ cʌnantiquex tu cotor a baꞌ tsꞌibtaꞌb ich u tꞌʌn Moisés. Ta pʌyex a siꞌpirex quireꞌ mʌꞌ ta quibex an ten bic caj u yaꞌaraj Moisés uch.
\v 46 Wa ta quibex a baꞌ caj u tsꞌibtaj Moisés baxuc jeꞌ a quibiquex in tꞌʌn quireꞌ Moisés tu tsꞌibtaj ten uch. 
\v 47 Quireꞌ wa mʌꞌ a quibiquex a baꞌ caj u tsꞌibtaj Moisés uch, baxuc xan mʌꞌ ja bin a quibex a baꞌ quin wac techex xan ―baxuc caj yaꞌaraj Jesús tiꞌ u jach tsꞌurirob sacerdote. 
\c 6
\s Jesús cu jansic cinco mil xib
\r (Mt. 14.13‑21; Mr. 6.30‑44; Lc. 9.10‑17)
\p
\v 1 Pachir Jesús caj binij pichij cꞌacꞌnab Galilea. U jer u cꞌabaꞌ u cꞌacꞌnabir Tiberias.
\v 2 Yaꞌab mac tan u binob tu pach Jesús quireꞌ tu yirob carem u beyaj. Baxuc caj yirob u jawsaꞌrob a mac yʌn u yajirir.
\v 3 Rajen Jesús naquij ich u joꞌr chan pꞌuc wits yejer u camsʌwinicob Jesús caj curʌj quir u camsic tiꞌob. 
\v 4 Tabar u cꞌuchur tu qꞌuinin u quiꞌquiꞌ janʌnob u winiquirob judío raꞌ u qꞌuinin pascua.
\v 5 Jesús caj u yiraj a pimoꞌ tan u tarob cʌxtaꞌbir. Rajen caj u yaꞌaraj tiꞌ Felipe:
\p ―Tu quic bin ic mʌnic yoch pan quir ic jansic a pimoꞌ a cu tarob.
\p
\v 6 Baxuc caj u yaꞌaraj Jesús quireꞌ cu tumtic Felipe yubej baꞌ cu yaꞌaric quireꞌ a Jesúsoꞌ yer baꞌ cu bin u betej. 
\v 7 Felipe caj u nuncaj tiꞌ tan yaꞌaric:
\p ―Cax wa yʌn u taqꞌuin a mun cu jaric mac tuririꞌ yaxqꞌuin, quir a mʌnic yoch pan tiꞌ a pimoꞌ, mʌꞌ ju bin nupꞌur cax caꞌcaꞌ xetꞌ.
\p
\v 8 Andrés, raꞌiriꞌ u camsʌwinic Jesús xan. Andrés, u yitsꞌin Simón Pedro, caj yaꞌaraj tiꞌ:
\p
\v 9 ―Tiꞌ yʌn chan chichan teraꞌ yʌn tiꞌ cinco yoꞌoch pan betaꞌb tiꞌ u pʌcꞌar cebada raꞌ yoch u winiquirob judío. Yejer caꞌtur cʌy. Jeꞌ wa ju rʌc nupꞌur tiꞌ a pimoꞌ quireꞌ jach pim?
\p
\v 10 Jesús caj yaꞌaraj tiꞌ u camsʌwinicob:
\p ―Arex tiꞌob caꞌ curacob ich suꞌuc.
\p Quireꞌ tiꞌ yʌn yaꞌab suꞌuc tub yʌnob. Caj curʌjob, yʌn cinco mil xib. Mʌꞌ tu xacajob mun xquic yejer chichan. 
\p
\v 11 Jesús caj u chucaj pan a cincojoꞌ caj u yaꞌaraj tiꞌ: 
\p ―Bayoꞌ Cꞌuj.
\p Caj tsꞌoquiꞌ caj u tsꞌaja tiꞌ u camsʌwinicob quir u jʌsicob tiꞌ a pimoꞌ, a tiꞌ curaꞌanob. Baxuc caj u betaj xan yejer yoch cʌy, tan u rʌc jʌsic tiꞌob a mun u cꞌat. 
\v 12 Caj nachʌjob. Jesús caj yaꞌaraj tiꞌ u camsʌwinicob: 
\p ―Marex u xetꞌer tuꞌ mʌꞌ ju rʌc jantob soc mʌꞌ u saꞌatʌr. 
\p
\v 13 Rajen tu rʌc marob u xetꞌer. Caj u butꞌob ich xac, rʌc chupij doce xac a mun yʌn samoꞌ cinco yoch pan a betaꞌb tiꞌ yoch cebada.
\v 14 A pimoꞌ caj u yirob baꞌ caj u betaj Jesús quireꞌ yerob carem u beyaj. A pimoꞌ cu pacran aricob:
\p ―Mʌꞌ wa rajiꞌ jach jaj yʌjtseqꞌuir u tꞌʌn Cꞌuj a araꞌb bin u caꞌ tar teraꞌ ich yocꞌocab?
\p
\v 15 Chen Jesús caj u najtaj a pimoꞌ u cꞌat u tsꞌʌricob u pach u yocar rey ten u piman. Rajen Jesús caj bin tu junan ich u joꞌr pꞌuc wits.
\s Jesús cu ximbar ich yocꞌo jaꞌ
\r (Mt. 14.22‑27; Mr. 6.45‑52)
\p
\v 16 U camsʌwinicob Jesús tan yiricob tan yacꞌbirchʌjʌr caj bin ich chiꞌ cꞌacꞌnab.
\v 17 Caj rucꞌocob ich chem quir u chꞌʌcticob cꞌacꞌnab quir u cꞌuchurob ich u cajar Capernaum. Jach acꞌbirchʌjij tan u binob ich chem. A Jesúsoꞌ, mʌꞌ toy uruquiꞌ.
\v 18 Caj u yʌnxchun u tar yicꞌar. Jach cꞌam caj jach nuquij u tar u yamin xan.
\v 19 Caj nachijob tan u binob yejer chem. Yʌn cinco kilómetros caj yirob Jesús. Tan u ximbar ich yocꞌo jaꞌ, tan u cꞌʌs natsꞌʌr ich chem caj u chꞌaj sajquirob u camsʌwinicob caj yirob u tar Jesús.
\v 20 Chen Jesús caj yaꞌaraj tiꞌob:
\p ―Ten ca wiriquenex ―quij―, mʌꞌ a chꞌiquex sajquir. 
\p
\v 21 Caj quiꞌjij yorob caj acsaꞌb Jesús ich chem. Rajen seb caj cꞌuchob pichij cꞌacꞌnab tu cu binob caꞌch. 
\s A pimoꞌ tan u cʌxticob Jesús
\p
\v 22 Caj sasij a pimoꞌ a pꞌatob pichir cꞌacꞌnab caj u najtob binob u camsʌwinicob tu junanob ich chem. Quireꞌ tiꞌ yʌn tuririꞌ u chem ich chiꞌ cꞌacꞌnab caꞌch. Caj u najtob xan mʌꞌ binij Jesús yejer u camsʌwinicob.
\v 23 Tarob u jer chemob tiꞌ u tar ich u cajar Tiberias tiꞌ manob tuꞌ jansaꞌb a pimoꞌ ten u Jaj Tsꞌurir caj tsꞌoc yaꞌaric:
\p ―Bayoꞌ Cꞌuj ―quij.
\p
\v 24 Quireꞌ tu yirob mʌꞌ tiꞌ yʌn Jesús mʌꞌ tiꞌ yʌn u camsʌwinicob xan. Caj ocob ich chem. Caj binob ich u cajar Capernaum quir u cʌxtaꞌob Jesús.
\s A Jesúsoꞌ rajiꞌ irej yoch waj soc u tsꞌic u cuxtar munt qꞌuin tiꞌ mac
\p
\v 25 Caj cꞌuchob a pimob ich pichi cꞌacꞌnab caj u nupꞌob Jesús caj u cꞌatob tiꞌ, tan yaꞌaricob:
\p ―In wʌjcamsʌyʌjirech, tuꞌ qꞌuin cꞌuchuquech teraꞌ? 
\p
\v 26 Jesús caj yaꞌaraj tiꞌob:
\p ―Taj quin waꞌaric techex. Tarechex a cʌxtiquenex quireꞌ ta wuꞌyajex najchʌjechex tiꞌ a woch pan. Mʌꞌ tarechex a cʌxtiquenex quireꞌ ta wacsajex ta wor ten a carem beyaj tin betaj.
\v 27 Mʌꞌ rajraꞌ ca tucriquex a wochex quireꞌ cu xupur aroꞌ. Caꞌ a cʌxtex a wochex tiꞌ a pixamex quireꞌ munt qꞌuin tiꞌ yʌn a pixamex. Jeꞌ in tsꞌic techex a tenoꞌ a mac tuchiꞌtaꞌb ten Cꞌuj. Quireꞌ baxuc caj u tsꞌaj in beyaj in Tet Cꞌuj.
\p
\v 28 A pimob caj u nuncob tan yaꞌaricob:
\p ―Bic tabar ic betic u beyaj Cꞌuj?
\p
\v 29 Jesús caj u nuncaj tiꞌob tan yaꞌaric:
\p ―Raꞌ u beyaj Cꞌuj quir a wacsiquex ta worex ten quireꞌ tu tuchiꞌten Cꞌuj.
\p
\v 30 A pimob caj yaꞌarob:
\p ―Baꞌ carem beyaj ca wesic tenob soc cꞌuchaꞌan in worob in wacsicob tin worob tiꞌ a tꞌʌn? Baꞌ beyaj ca wesic tenob?
\v 31 Ic nunquir caj u jantob yoch mana a irej waj uch ich tacay ruꞌum. Baxuc cu yaꞌaric tu tsꞌibaꞌan u tꞌʌn Cꞌuj: “A tu tsꞌaj tiꞌob yoch waj a manajoꞌ a cu tar ich caꞌanan. Baxuc tech yʌn a tsꞌic tenob.”
\p
\v 32 Jesús caj yaꞌaraj tiꞌob:
\p ―Taj quin wac techex. Mʌꞌ Moisés caj u tsꞌaja tiꞌ a nunquirex yoch pan a manajoꞌ ich tacay ruꞌum. Cꞌub u beyaj Moisés ten Cꞌuj. Chen Cꞌuj tu tsꞌaj tiꞌob quir u janticob. A tu jantajob a nunquirex uch chen quir u cuxtar a teraꞌ ich yocꞌocab. Chen bajeꞌrer in Tet cu bin u tsꞌic techex a wochex quir a cuxtar munt qꞌuin. 
\v 33 A Cꞌujoꞌ cu tsꞌic yoꞌoch a jach jaj cu tar tiꞌ caꞌanan. A jeꞌ ochaꞌ quir a cuxtarex munt qꞌuin a mac a tiꞌ yʌnob ich yocꞌocab.
\p
\v 34 A pimob caj u yaꞌaraj tiꞌ Jesús:
\p ―In Jaj Tsꞌurob rajraꞌ ca tsꞌic tenob in woch panob a ca tsicbʌtic tenob bajeꞌrer.
\p
\v 35 Jesús caj yaꞌaraj tiꞌob:
\p ―An ten bic cu cuxriquechex tiꞌ a woꞌoch wajex. Baxuc a tenoꞌ iren waj quir a cuxtarex munt qꞌuin. A mac a cu tar tin wicnʌn tan yacsic tu yor ten. Aroꞌ irej wa mʌꞌ u yucꞌchʌjʌr baxuc irej wa mʌꞌ ju wiꞌchʌjʌr xan. 
\v 36 Chen a tenoꞌ caj in waꞌaraj techex cax ta wirenex mʌꞌ a cꞌatex a wacsex ta worex ten.
\v 37 Tu cotor mac a cu tsꞌabʌr tiꞌ ten Cꞌuj. Jeꞌ u tar tin wicnʌn. A mac a cu tar tin wicnʌn ten quiꞌ in wor in tsꞌic tiꞌob u cuxtar munt qꞌuin. Mʌꞌ biqꞌuin quin bin in jocꞌsic.
\v 38 In Tet caj u tuchiꞌtajen mʌꞌ quir in betic a baꞌ in cꞌat a tenoꞌ. A tenoꞌ taren quir in betic a baꞌ u cꞌat in Tet quireꞌ rajiꞌ tu tuchiꞌten.
\v 39 In Tet a mac a tu tuchiꞌten, u cꞌat u yiric tu cotor mac a tu tsꞌajten mʌꞌ u saꞌtʌr mʌꞌ tuririꞌ. Wa cu quimin jeꞌ in ricꞌsic caꞌ bin cꞌuchuc tu qꞌuinin u xur tꞌʌneꞌ. 
\v 40 Baxuc u cꞌat in Tet xan tu cotor mac a cu yaꞌaric: “U pararech Cꞌuj” tiꞌ ten. A mac a cu quibic in tꞌʌn jeꞌ in taquic soc u cuxtar munt qꞌuin. Wa cu quimin jeꞌ in ricꞌsic caꞌ bin cꞌuchuc tu qꞌuinin u xur tꞌʌneꞌ. 
\p
\v 41 U winiquirob judío caj u yʌnxchun u choctar yorob tiꞌ Jesús quireꞌ a baꞌ caj u yubob yaꞌaric quireꞌ Jesús caj u yaꞌaraj: “A tenoꞌ iren a woch wajex a cu tar ich caꞌanan quir a cuxtarex munt qꞌuin.”
\v 42 U winiquirob judío caj yaꞌarob; tan u pacran aricob: 
\p ―Mʌꞌ wa rajiꞌ Jesús, u parar José? Ij quiramʌn u tet yejer u nʌꞌ. Chen cu yaꞌaric tiꞌ u tar ich caꞌanan. Bic tabar aroꞌ?
\p
\v 43 Jesús caj u nuncaj tiꞌob tan yaꞌaric:
\p ―Mʌꞌ u choctar a worex ten.
\v 44 Mʌnaꞌ mac cu bin tar tin wicnʌn quir u yacsic tu yor wa mʌꞌ tetaꞌb ten Cꞌuj a mac tu tuchiꞌtajen. A mac cu tar tin wicnʌn quir u yacsic tu yor wa cu quimin jeꞌ in caꞌ ricꞌsiqueꞌ caꞌ binin cꞌuchuc u qꞌuinin cu xur tꞌʌneꞌ.
\v 45 Mʌꞌ ja wirej, baxuc tu tsꞌibtajob yʌjtseqꞌuirob u tꞌʌn Cꞌuj uch, tan yaꞌaricob: “Tu cotor mac cu bin camsabir ten Cꞌuj.” Baxuc caj u yaꞌarajob yʌjtseqꞌuirob u tꞌʌn Cꞌuj. Rajen tu cotor mac tu yubob a baꞌ caj u yaꞌaraj Juan a mac Jesúsoꞌ, quij Juan. Rajiꞌob camsaꞌb ten Cꞌuj, rajen cu tar tin wicnʌn quir u cʌnicob in tꞌʌn.
\p
\v 46 ’Mʌnaꞌ mac yiramʌn u wich Cꞌuj. Caj yaꞌaraj Jesús. Chen ten tin junan caj in wiraj u wich Cꞌuj quireꞌ tiꞌ in tar a tenoꞌ ―quij Jesús―.
\v 47 Taj a baꞌ quin wac techex ―quij Jesús―, a mac a cu yacsic tu yor teneꞌ yʌn u cuxtar munt qꞌuin.
\v 48 A tenoꞌ iren a woch wajenex ―quij Jesús―, quir in tsꞌic a cuxtarex munt qꞌuin.
\v 49 A nunquirex a uchoꞌ caj u jantob yoch mana irej a woch panex ich tacay ruꞌum. Chen mʌꞌ ju yirob u cuxtar munt qꞌuin cax tu jantajob a manajoꞌ, chen quimob. 
\v 50 A woch panex a quin tsicbar techex, toc tarij tiꞌ caꞌananoꞌ soc a mac a cu jantic tiꞌ jeꞌ u cuxtar munt qꞌuineꞌ.
\v 51 A tenoꞌ taren ich caꞌanan, iren a woch wajenex quir a cutarex munt qꞌuin. Tu cotor mac a cu jantic yoch waj a quin tsicbar tiꞌ techex, jeꞌ u cuxtar munt qꞌuineꞌ. A woch wajex a quin tsꞌic techex rajiꞌ in winquirir. Jeꞌ in tsꞌic tiꞌ soc tu cotor mac cu bin u cuxtar munt qꞌuin.
\p
\v 52 Rajen u winiquirob judío caj u chich arob tan yaꞌaricob: 
\p ―Bic tabar cu bin u tsꞌic toꞌon u winquirir quir ic chiꞌic?
\p
\v 53 Jesús caj yaꞌarj tiꞌob:
\p ―Taj quin waꞌaric techex wa mʌꞌ a jantiquex in winquirir a tenoꞌ iren techex mʌꞌ ja bin a cuxtarex munt qꞌuin. Wa mʌꞌ ja wuqꞌuiquex in qꞌuiqꞌuer mʌꞌ ja bin a cuxtarex munt qꞌuin.
\v 54 A mac a cu jantic in winquirir yejer in qꞌuiqꞌuer cu yuqꞌuic, munt qꞌuin cu bin cuxtar wa cu quimin. A tenoꞌ jeꞌ in ricꞌsic caꞌ bin cꞌuchuc tu qꞌuinin u xur tꞌʌneꞌ.
\v 55 Mʌꞌ ja wirej, in winquirir irej a jach ochex a ca jantiquex. In qꞌuiqꞌuer xanoꞌ irej a jach ucꞌurex a ca wuqꞌuiquex. Rajen a mac a cu jantic jeꞌ u cuxtar munt qꞌuineꞌ. Baxuc a mac a cu yuqꞌuic in qꞌuiqꞌuer jeꞌ u cuxtar munt qꞌuineꞌ.
\v 56 A mac a cu jantic in winquirir baxuc cu yuqꞌuic in qꞌuiqꞌuer pꞌeriꞌen yejer quireꞌ tiꞌ yʌnen tu pixam. 
\v 57 In Tetoꞌ a mac tu tuchiꞌtajen rajiꞌ yʌn u cuxtar munt qꞌuin quireꞌ a Cꞌujoꞌ toc berer uch. Rajen yʌn in cuxtar a tenoꞌ quireꞌ in Tet Cꞌuj. Baxucoꞌ a mac a cu jantic in winquirir cu bin u cuxtar munt qꞌuin quireꞌ ten quin tsꞌic u cuxtar.
\v 58 A woch wajex a quin tsicbʌtechex tsꞌoc u tar ich caꞌanan. Rajiꞌ mʌꞌ quet yejer yoch mana a tu jantob a nunquirex uch. Quireꞌ mʌꞌ tu yirob u cuxtarob munt qꞌuiniꞌ cax tu jantob a manajoꞌ toc rʌc quimob uch. Chen a mac cu jantic a wajoꞌ a quin tsicbʌtechex bajeꞌrer munt qꞌuin cu bin cuxtar.
\p
\v 59 Jesús tiꞌ tu camsajob a jeraꞌ ich u chan najir tu cu naj cꞌujinticob Cꞌuj u winiquirob judío ich u cajar Capernaum.
\s Jesús cu camsic bic u cuxtarob munt qꞌuin
\p
\v 60 Yaꞌab u qꞌuinin tan u tar yaꞌab mac tu pach Jesús quir u cʌnicob u tꞌʌn. Caj u yubob a baꞌ caj u yaꞌaraj Jesús caj yaꞌarob:
\p ―Jach yaj ij cʌnic aroꞌ mʌꞌ ij cꞌat ij cuꞌyic aroꞌ. 
\p
\v 61 Chen Jesús tu najtaj tu yor tan u choctar yorob u camsʌwinicob. Rajen tu cꞌataj tiꞌob:
\p ―Cu jocꞌsiquex wa ja worex a tin waꞌaraj techex?
\v 62 Baꞌ ca bin a waꞌariquex wa caꞌ bin a wirex in bin tub in wʌcꞌʌs tar uch a tenoꞌ a mac tuchiꞌtaꞌben ten Cꞌuj?
\v 63 Quireꞌ a pixamex jeꞌ u cuxtarex munt qꞌuin quireꞌ a winquirirex mʌꞌ nenoꞌjiꞌ. Mʌꞌ ja wirej, in tꞌʌn a tin waꞌaraj techex, rajiꞌ tiꞌ a pixamex quir u cuxtarex munt qꞌuin.
\v 64 Tiꞌ toj yʌnechex jun yarechex, mʌꞌ toy a wacsex a worex.
\p Quireꞌ Jesús u toc er tu yʌnxchun u beyaj mac cu quibic u tꞌʌn, baxuc a mac a cu bin u cꞌubur Jesús.
\v 65 Caj araꞌb tiꞌob ten Jesús:
\p ―Rajen caj in waꞌaraj techex uch mʌnaꞌ mac cu tar tu yʌnen quir u cʌnic in tꞌʌn wa mʌꞌ tetaꞌb ten Cꞌuj. 
\p
\v 66 Rajen yaꞌab mac a cu sayʌr tu pach Jesús caj u pꞌʌtob u binob tu pach Jesús caj wʌcꞌʌs binob tu yatoch.
\v 67 Jesús caj u cꞌataj tiꞌ u camsʌwinicob a docejoꞌ: 
\p ―Baꞌ ca tucriquex? Jeꞌ wa ja wʌcꞌʌs binex ta watochex? 
\p
\v 68 Simón Pedro caj u nuncaj tiꞌ Jesús tan yaꞌaric:
\p ―Mʌnaꞌ mac quir ic bin ic tsicbar tiꞌ u tꞌʌn Cꞌuj. Chen a techoꞌ yʌn a tꞌʌn quir ij cuxtarex munt qꞌuin. 
\v 69 Quireꞌ a tenoboꞌ tin toc wacsob tin worob tech. Quireꞌ a techoꞌ in werob Cristojech rajiꞌ tu tsꞌaj a beyaj Cꞌuj quir a yamtiquenob quireꞌ u pararech Cꞌuj a cuxaꞌanoꞌ. 
\p
\v 70 Jesús caj u nuncaj tiꞌob tan yaꞌaric:
\p ―A tenoꞌ tin tetajechex doce chen tiꞌ yʌn tuririꞌ ich techex a mac acaꞌan quisin tiꞌ.
\p
\v 71 Jesús tan u tsicbar, tiꞌ Judas u parar Simón Iscariote quireꞌ rajiꞌ cu bin u cꞌubic Jesús. Quireꞌ rajiꞌ tuririꞌ ich a doce u camsʌwinicob.
\c 7
\s U yitsꞌinob Jesús mʌꞌ ju yacsob tu yorob tiꞌ
\p
\v 1 Pachir caj bin Jesús ich u ruꞌumin Galilea quireꞌ mʌꞌ u cꞌat u bin ich u ruꞌumin Judea quireꞌ u tsꞌurirob u winiquirob judío u cꞌat u quinsicob Jesús.
\v 2 Tabar u cꞌuchur tu qꞌuinin u quiꞌ janʌnob u winiquirob judío raꞌ u qꞌuinin cu cꞌʌxicob paser an ten bic araꞌb ten Cꞌuj uch.
\v 3 Rajen araꞌb tiꞌ Jesús ten u yitsꞌinob:
\p ―Mʌꞌ a pꞌatʌr teraꞌ caꞌ xicoꞌon ich u ruꞌumin Judea. Soc a camsʌwinicob caꞌ bin u yirob a carem beyaj tu qꞌuinin u quiꞌquiꞌ janʌnob u winiquirob judío soc yerob Cꞌuj tu tsꞌaj a beyaj tech.
\v 4 Quireꞌ mʌnaꞌ mac cu muc u beyaj wa ju cꞌat u yeticob tu cotor mac u beyaj. Joqꞌuen es a bʌj tiꞌ a pimob wa ca beyaj tiꞌ Cꞌuj.
\p
\v 5 Cax rajiꞌ yʌjtaquirob mʌꞌ ju yacsob tu yorob u yitsꞌinob Jesús.
\v 6 Jesús caj yaꞌaraj tiꞌ u yitsꞌinob:
\p ―Mʌꞌ cꞌuchuc tu qꞌuinin ten quir in bin ich u cajar Jerusalén quir in quiꞌquiꞌjanʌn. Chen techex xenex wa ja cꞌat a binex.
\v 7 Rajen, mʌꞌ ja wirej, a mac tiꞌ yʌn ich yocꞌocab mʌꞌ ju pꞌactiquechex a techexoꞌ, chen a tenoꞌ cu pꞌactiquenob quireꞌ quin waꞌaric tiꞌob cꞌas cu beticob.
\v 8 Xenex ta quiꞌquiꞌ janʌnex ich u cajar Jerusalén. Quireꞌ a tenoꞌ mʌꞌ cꞌuchuc tu qꞌuinin in bin hasta cu cꞌuchur tu qꞌuinin jeroj quin bin.
\p
\v 9 Caj tsꞌoc yaꞌaric mʌꞌ ju bin, tiꞌ pꞌat Jesús ich Galilea yejer u camsʌwinicob.
\s Jesús cu bin ich u cajar Jerusalén u qꞌuinin cu cꞌʌxicob paser quir u quiꞌquiꞌ janʌnob
\p
\v 10 Caj tsꞌoc u binob u yitsꞌinob Jesús ich u cajar Jerusalén quir u quiꞌquiꞌ janʌnob caj bin Jesús yejer u camsʌwinicob. Mʌꞌ bin yejer u racꞌob chen tu junan yejer u camsʌwinicob caj bin, quireꞌ mʌꞌ u cꞌat u yesic u bʌj tiꞌ a pimob. 
\v 11 U tsꞌurirob sacerdote tan u cʌxticob Jesús u qꞌuinin cu quiꞌquiꞌ janʌnob u winiquirob judío. Tan u cꞌaticob: 
\p ―Tuꞌ yʌn? ―quijob.
\p
\v 12 Mʌꞌ ja wirej, a pimob rajraꞌ cu tsicbarob tiꞌ Jesús. Yʌn mac tan yaꞌaricob: “Jach tsoy a Jesúsoꞌ.” Chen yʌn u jerob cu yaꞌaricob: “Bic tabar jach tsoy. Quireꞌ cu tusaric tiꞌ mac.”
\p
\v 13 Quireꞌ cu sʌjticob u tsꞌurirob sacerdote. Rajen cu manob u muc u aricob Jesús.
\p
\v 14 Caj cꞌuchij chumuc u qꞌuinin u quiꞌquiꞌ janʌnob Jesús caj bin ich carem naj tu cu naj cꞌujinticob Cꞌuj u winiquirob judío caj u yʌnxchun u camsic.
\v 15 Caj jaqꞌuij yorob a pimob, rajen tu yaꞌarob:
\p ―Bic tabar ij quet winquirir caj u cʌnaj quireꞌ mʌnaꞌ mac tu camsaj chen u neꞌer u camsaꞌ?
\p
\v 16 Jesús caj u nuncaj tiꞌob tan yaꞌaric:
\p ―Mʌꞌ raꞌ in tꞌʌn a quin camsic techex. Rajiꞌ u tꞌʌn in Tet a mac tu tuchiꞌten.
\v 17 Wa mac u cꞌat caꞌ u betej a baꞌ Cꞌuj u cꞌat. Cu bin tsꞌabir u najtic ich u tꞌʌn Cꞌuj tuꞌ quin camsic wa rajiꞌ cu tar ich Cꞌuj wa chen in bʌjiriꞌ in tꞌʌn quin camsic.
\v 18 A mac a cu camsic u bʌjiriꞌ u tꞌʌn tan u cʌxtic soc sʌjtaꞌ ten mac. A tenoꞌ tan in cʌxtic caꞌ a sʌjtex a mac a tu tuchiꞌtajen. Rajen mʌꞌ tan in tusariquex, taj a baꞌ quin wac techex.
\p
\v 19 ’Moisés caj u tsecꞌtaj techex uch a baꞌ tu toc araj Cꞌuj uch. Chen techex mʌꞌ tuririꞌ tan a quibiquex a baꞌ caj u yaꞌaraj Moisés uch quireꞌ wa ta quibajex, mʌꞌ ja tsicbʌtiquex a cꞌatex a quinsiquenex.
\p
\v 20 A pimob caj u nuncob tan yaꞌaric:
\p ―Acaꞌan quisin tech, mac u cꞌat u quinsiquech?
\p
\v 21 Jesús caj yaꞌaraj:
\p ―A tenoꞌ tin jawsa mac tuririꞌ, u qꞌuinin ca jesiquex a bʌjex, rajiꞌ tu jacꞌsaj a worex.
\v 22 Moisés caj u tsꞌaj u tꞌʌnin quir a tsꞌiriquex a pararex xib tu cu wix. Mʌꞌ Moisés tu yʌn aꞌrajiꞌ, chen a nunquirex, rajiꞌ tu yʌn aꞌraj. Rajen cax u qꞌuinin ca jesiquex a bʌjex ca tsꞌiriquex a chan pararex xib.
\v 23 Tsoy caꞌ quibiquex u tꞌʌn Moisés tu cu yaꞌaric: “Tsꞌirej a chan pararex xib.” Cax tu qꞌuinin ca jesiquex a bʌjex caꞌ tsꞌiric. Rajen biquinin ca pꞌactiquenex ca wiric in jawsic mac u qꞌuinin ca jesiquex a bʌjex.
\v 24 Mʌꞌ tsoy wa sep ca taꞌquiquex u joꞌr mac. Caꞌ a quiꞌ tucrex wa taj tan u betic cꞌas mac.
\s Jesús cu tsicbar tu cu tar
\p
\v 25 A mac a tiꞌ cʌjaꞌanob ich u cajar Jerusalén caj yaꞌarob: 
\p ―A jeꞌ xibaꞌ mʌꞌ wa rajiꞌ tu cʌxticob u quinsej.
\v 26 Iric tiꞌ yʌn. Mʌꞌ tu mucraꞌr tu yaꞌaraj ich tu cotor mac. U jach tsꞌurirob sacerdote mʌnaꞌ baꞌ caj u yaꞌarob tiꞌ. Jaj ix tʌcoꞌ tan u quibicob rajiꞌ Cristo a cu taroꞌ. 
\v 27 A toꞌonexoꞌ ij querex tub u tar a ra xiboꞌ. Chen caꞌ bin tac a Cristojoꞌ ij cʌjtaquirex mʌnaꞌ mac yer tub u tar ―baxuc caj yaꞌaraj a mac cʌjaꞌanob ich u cajar Jerusalén.
\p
\v 28 Rajen Jesús caj u cꞌam araj tu cu camsic ich carem naj tu cu naj cꞌujinticob Cꞌuj u winiquirob judío. Caj u yaꞌaraj tiꞌ a pimob:
\p ―Ca tucriquex a werenex. Ca tucriquex a werex tub in tar. In wʌcꞌʌs bʌjiriꞌ mʌꞌ taren chen a mac jach tajoꞌ, rajiꞌ tu tuchiꞌtajen. Chen a techexoꞌ, mʌꞌ a werex maquiꞌ a tu tuchiꞌtajen.
\v 29 A tenoꞌ ―quij Jesús―, in wer quireꞌ tiꞌ in tar tub yʌniꞌ. Quireꞌ rajiꞌ tu tuchiꞌtajen.
\p
\v 30 Rajen u cꞌatob u chuquicob Jesús quir u bin u mʌquicob tu cu maꞌcʌr winic. Mʌꞌ cꞌuchaꞌan yorob u chuquejob Jesús quireꞌ mʌꞌ cꞌuchuc tu qꞌuinin cu chuquicob quir u mʌquicob.
\v 31 Yʌn yaꞌab mac tu yacsob tu yorob tiꞌ quireꞌ yerob yʌjtaquirob. Caj yaꞌarob:
\p ―A jeꞌ xiboꞌ jach manan carem u beyaj caj u yesaj toꞌonex an ten bic cu yaꞌaric cu bin u betej Cristo caꞌ bin tac. Rajen ij querex rajiꞌ Cristo.
\s A fariseosjoꞌ caj u tuchiꞌtajob policía quir u chuquicob Jesús
\p
\v 32 A fariseojoꞌ caj yubob yaꞌaric a mac tu yacsob tu yor tiꞌ Jesús. Tu yubob yaꞌaricob a Jesúsoꞌ:
\p ―Rajiꞌ Cristo a cu bin tar.
\p Rajen a fariseojoꞌ yejer u jach tsꞌurirob sacerdote caj u tuchiꞌtajob u policía a cu beyajob ich carem naj tu cu naj cꞌujinticob Cꞌuj u winiquirob judío quir u chuquicob Jesús quir u mʌquicob.
\v 33 Jesús caj yaꞌaraj tiꞌ a pimob:
\p ―Mʌꞌ yaꞌab u qꞌuinin quin pꞌatʌr tub yʌnechex quireꞌ bin in caꞌ tub yʌn a mac a tu tuchiꞌtajen.
\v 34 Quireꞌ a techexoꞌ ca bin a cʌxtiquenex chen mʌꞌ ja bin a wirenexiꞌ. Quireꞌ a tu quin binoꞌ mʌꞌ cꞌuchaꞌan a worex a tarex.
\p
\v 35 U winiquirob judío tan u pacran tsicbarob tan yaꞌaricob: 
\p ―Tub u wich u bin cu yaꞌaric mʌꞌ ic yʌnyʌn iric? Tiꞌ wa cu bin ich ij quet winquirirob judío a tar yʌnob tantanxer ich u ruꞌumin u winiquirob griego? U tiriꞌ cu bin u camsic u winiquirob griego.
\p
\v 36 Caj yaꞌarob:
\p ―Baꞌ u cꞌat yaꞌaric toꞌonex a tu yaꞌaraj toꞌonex: “Ca bin a cʌxtenex chen mʌꞌ ja bin a wiriquenex quireꞌ a tu quin binoꞌ mʌꞌ cꞌuchaꞌan a worex a tarex”? ―baxuc cu pacran tsicbarob u winiquirob judío.
\s A cu yacsic tu yor u tꞌʌn Cꞌuj rajraꞌ cu bin jocꞌar tsoy tu pixam
\p
\v 37 U qꞌuinin a jach noꞌjoꞌ raꞌ u qꞌuinin quir u tsꞌocsic u quiꞌquiꞌ janʌnob u winiquirob judío. Raꞌiriꞌ u qꞌuinin caj riqꞌuij caj chꞌicrʌj Jesús caj u cꞌam araj tiꞌ a pimob, tan yaꞌaric:
\p ―Wa mac cu yucꞌchʌjʌr, arej caꞌ tac ten quir u yucꞌur. 
\v 38 Mʌꞌ ja wirej, a mac a cu yacsic tu yor ten, jeꞌ u yʌn tar tu pixam an ten bic yicꞌ jaꞌ cu bosirancʌr a cu tsꞌic u cuxtar a ricbenoꞌ quireꞌ baxuc cu yaꞌaric ich u tꞌʌn Cꞌuj ―baxuc cu tsicbar Jesús.
\p
\v 39 Mʌꞌ ja wirej, cu tsicbar tiꞌ u Tajꞌor u Pixam Cꞌuj a cu bin tsꞌabir tiꞌ a mac a cu yacsic tu yor tiꞌ. U Tajꞌor u Pixam Cꞌuj mʌꞌ taquiꞌ quireꞌ mʌꞌ toy xic Jesús ich caꞌanan. 
\s Mʌꞌ quet yorob u winiquirob judío
\p
\v 40 Tiꞌ yʌn mac tuꞌ yʌn Jesús caj yubob yaꞌaric baxuc aroꞌ caj u yaꞌarajob:
\p ―Aroꞌ jach jaj yʌjtseqꞌuir u tꞌʌn Cꞌuj a tij cuꞌyajex yaꞌaraꞌ yʌn u tar.
\p
\v 41 Chen yʌn mac jujuntur tan yaꞌaricob:
\p ―Rajiꞌ a jeraꞌ Cristo yʌjtaquir mac tu cotor.
\p Tiꞌ yʌn mac jujuntur tan yaꞌaricob:
\p ―A Cristojoꞌ, mʌꞌ u bin tar ich u ruꞌumin Galilea.
\v 42 Quireꞌ cu yaꞌaric ich u tꞌʌn Cꞌuj tuꞌ tsꞌibaꞌan: “A Cristojoꞌ a caꞌ bin tacoꞌ tiꞌ cu bin rochbir ten u nʌꞌ ich u cajar Belén quireꞌ David, rajiꞌ u chꞌic sucuꞌun Cristo. Tiꞌ cu bin rochbir ten u naꞌ Cristo quireꞌ tiꞌ rochaꞌb u chꞌic sucuꞌun ten u naꞌ.”
\p
\v 43 Rajen mʌꞌ quet yorob a pimob tiꞌ Jesús.
\v 44 Yʌn mac u cꞌatob u chuquicob quir u mʌquicob. Chen mʌnaꞌ mac tu chucajob.
\s U jach tsꞌurirob u winiquirob judío mʌꞌ ju yacsicob tu yorob tiꞌ Jesús
\p
\v 45 Caj urob a policíajoꞌ a cu beyajob ich carem naj tu cu naj cꞌujinticob Cꞌuj u winiquirob judío. Caj cꞌuchob tiꞌ yʌnob u jach tsꞌurirob sacerdote yejer a fariseojoꞌ. Caj cꞌataꞌb tiꞌob ten u jach tsꞌurirob:
\p ―Biquinin mʌꞌ ta chuquexiꞌ?
\p
\v 46 Caj u nuncob a policíajoꞌ tan yaꞌaricob:
\p ―Mʌnaꞌ mac cu tsicbar baxuc a tar yʌn xiboꞌ.
\p
\v 47 A fariseojoꞌ caj yaꞌarob:
\p ―U tus aꞌbar techex xan?
\v 48 Mʌꞌ ja wirej, mʌnaꞌ u tsꞌurirob u winiquirob judío tu yacsaj tu yor tiꞌ. Baxuc a tenoboꞌ u winiquirenob fariseo, mʌꞌ tin wacsajob tin worob tiꞌ.
\v 49 Chen a pimob tu yacsob tu yorob tub muchꞌaꞌanob. Robob jach chichob u joꞌr. Mʌꞌ yerob a baꞌ tsꞌibaꞌan ich u tꞌʌn Cꞌuj, toc rʌc satob.
\p
\v 50 Tiꞌ yʌn Nicodemo a cu bin tsicbar yejer Jesús uch. Acꞌbir caj binij. Rajiꞌ tuririꞌ u tsꞌurir u winiquirob judío. Caj u yaꞌarajob tiꞌ u yet winiquirob fariseo: 
\p
\v 51 ―Mʌꞌ cꞌuchaꞌan ij corex ic tsꞌiquex u mucꞌyaj mac wa mʌꞌ toy ij cuꞌyex u tꞌʌn wa mʌꞌ tij quirex baꞌ u siꞌpir yʌn tiꞌ, quireꞌ baxuc cu yaꞌaric u tꞌʌn Moisés. 
\p
\v 52 Robob caj u nuncajob tiꞌ tan yaꞌaricob;
\p ―A techoꞌ irech a mac a cu tar ich u ruꞌumin Galilea. Xaquej a wirej tuꞌ tsꞌibaꞌan ich u tꞌʌn Cꞌuj. Mʌꞌ ja bin a wirej, cu yaꞌaric u tar tuririꞌ yʌjtseqꞌuir u tꞌʌn Cꞌuj ich u ruꞌumin Galilea.
\s A xquicoꞌ a nanij cu man tu cꞌasir
\p
\v 53 Jujuntur u tsꞌurirob u winiquirob judío caj rʌc binob tu yatoch.
\c 8
\p
\v 1 Chen a Jesúsoꞌ yejer u camsʌwinicob caj binob ich u joꞌr wits u cꞌabaꞌ Olivos.
\v 2 Caj sasij caj sutnʌj Jesús caj oc ich carem naj tu cu naj cꞌujinticob Cꞌuj u winiquirob judío. Caj u rʌc muchꞌquintajob u bʌj ich Jesús. Caj curʌj Jesús caj u yʌnxchun u camsic a pimob.
\v 3 Caj cꞌuchob yʌjcamsʌyʌjirob u tꞌʌn Moisés yejer a fariseojoꞌ. Caj tarob u purej xquic a jach irir tan u man tu cꞌasir. Caj cꞌuchob caj u purajob ʌcʌtan tu yʌn Jesús.
\v 4 Robob caj yaꞌarob tiꞌ Jesús:
\p ―In wʌjcamsʌyʌjirechob, caj in wirob a jeꞌ xquicaꞌ caj in jach chucob tu cu man ich u cꞌasir.
\v 5 Quireꞌ Moisés tu toc araj uch caꞌ ic chꞌinex u joꞌr a xquicoꞌ a quic jach iriquex cu man tu cꞌasir. Are tenob baꞌ ca waꞌaric a techoꞌ?
\p
\v 6 Baxuc caj yaꞌarob quireꞌ u cꞌatob u tumticob yor Jesús soc u pʌyicob u siꞌpir soc yʌn baꞌwir quir u taquicob u joꞌr. Jesús caj pꞌuxrʌj caj u tsꞌibtaj ich u noy ruꞌum yejer u yar u cꞌʌb.
\v 7 Mʌꞌ ju tsꞌocor u cꞌaticob tiꞌ caj u tajquintaj u bʌj Jesús caj yaꞌaraj:
\p ―Arej a mac a mʌnaꞌ u siꞌpir tu yʌnechex, arej tiꞌ rajiꞌ cu yʌn batꞌan chꞌinic u joꞌr yejer tunich a ray pay sameꞌ.
\p
\v 8 Caj caꞌ pꞌuxrʌj Jesús u tsꞌibtej ich noy ruꞌum.
\v 9 Caj tsꞌoc u yubicob baꞌ nuncaꞌb ten Jesús caj rʌc jocꞌob tan u binob. Jujuntur caj rʌc binob quireꞌ caj u tucurajob u siꞌpirob. Caj u yʌnxchun u binob a mac jach uch chꞌijic, pachir caj rʌc binob a mʌꞌ uch chꞌijiquiꞌ. Pꞌatij Jesús yejer xquic ich a pimob chen u tsꞌurirob u winiquirob judío binob.
\v 10 Jesús caj u tajquintaj u bʌj a mac tarob u purob a xquicoꞌ rʌc binob chen xquic tiꞌ yʌn. Rajen Jesús caj yaꞌaraj tiꞌ:
\p ―Xquic ―quen―. A mac a tu taꞌcajob a joꞌr sam mʌnaꞌ, rʌc bin. Mʌnaꞌ mac tu chꞌinaj a joꞌr quireꞌ yʌn a siꞌpir ―quij Jesús.
\p
\v 11 A xquicoꞌ caj u yaꞌaraj:
\p ―Mʌnaꞌ mac tu chꞌinaj in joꞌr, Jaj Tsꞌurir ―quij xquic. 
\p Jesús caj yaꞌaraj tiꞌ:
\p ―Baxuc a tenoꞌ, mʌꞌ in tsꞌaj a mucꞌyaj cax yʌn a siꞌpir. Xen ―quij―, mʌꞌ a yʌnyʌn acsic a siꞌpir.
\s Jesús u sasirir ich yocꞌocab
\p
\v 12 Jesús cu caꞌ camsic a pimob ich carem naj tu cu naj cꞌujinticob Cꞌuj u winiquirob judío. Caj u yaꞌaraj:
\p ―A tenoꞌ a quin camsic mac a tiꞌ yʌnob ich yocꞌocab, iren quin yercꞌacꞌtic mac. Tu cotor mac a cu yacsic tu yor ten, mʌꞌ u binob ich yacꞌbirir. Jeꞌ u binob tu sasirir quireꞌ quin tsꞌic tiꞌob u cuxtar a ricꞌbenoꞌ. 
\p
\v 13 A fariseojoꞌ caj yaꞌarob tiꞌ Jesús:
\p ―A wʌcꞌʌs bʌjiriꞌ ca tsecꞌtic tech, rajen mʌꞌ in quibicob. Mʌnaꞌ yʌjꞌirirech soc yaꞌaric taj a baꞌ ca waꞌaric. 
\p
\v 14 Jesús caj u nuncaj tiꞌob tan yaꞌaric:
\p ―Cax wa ca tucriquex in wʌcꞌʌs bʌjiriꞌ tan in tsecꞌtic. Taj a baꞌ quin wac techex. In wer tub in tar, baxuc in wer tuꞌ quin bin. A techexoꞌ mʌꞌ a werex tub in tar, mʌꞌ a werex tuꞌ quin bin.
\v 15 A techexoꞌ seb ca quibiquex wa ju jer mac yʌn u siꞌpir. Mʌꞌ a quiꞌ tucrex. A tenoꞌ ―quij Jesús―, mʌꞌ in tucric baꞌ tiꞌ u jer mac.
\v 16 Wa yʌn baꞌ quin tucric, taj a baꞌ quin tucric. In wʌcꞌʌs bʌjiriꞌ mʌꞌ in tucric quireꞌ pꞌeriꞌ quin tucric yejer in Tet, a mac tu tuchiꞌtajen.
\v 17 Tiꞌ tsꞌibaꞌan ich u tꞌʌn Cꞌuj tiꞌ techex: “Tsoy a quibiquex u tꞌʌn quireꞌ caꞌtur yʌjꞌirirob wa quet u tꞌʌnob.”
\v 18 A tenoꞌ quin tsecꞌtic tiꞌ in wʌcꞌʌs bʌjiriꞌ. In Tetoꞌ a mac tu tuchiꞌtajen, cu tsecꞌtic tiꞌ ten xan.
\p
\v 19 Robob caj u cꞌatob tiꞌ tan yaꞌaricob:
\p ―Tuꞌ yʌn a Tet a ca tsicbʌtic tenob?
\p Jesús caj u nuncaj tiꞌob tan yaꞌaric:
\p ―A techexoꞌ mʌꞌ a werenexiꞌ. Mʌꞌ a werex in Tet xan. Wa baxuc a werenex baxuc a werex in Tet xan.
\p
\v 20 Jesús tan u camsic a jeꞌ tꞌʌnaꞌ ich carem naj tu cu naj cꞌujinticob Cꞌuj u winiquirob judío tu cu butꞌicob u taqꞌuin quir u sijic tiꞌ u beyaj Cꞌuj. Mʌnaꞌ mac cꞌuchaꞌan yorob u chuquicob u mʌquejob quireꞌ mʌꞌ cꞌuchuc tu qꞌuinin u chuquicob u mʌquejob.
\s “A tuꞌ quin bin a tenoꞌ mʌꞌ cꞌuchaꞌan a worex a tarexiꞌ” 
\p
\v 21 Jesús caj u caꞌ araj tiꞌob:
\p ―Tuꞌ quin bin a tenoꞌ, ca bin a cʌxtiquenex, chen mʌꞌ ja bin a wiriquenex ca bin a quiminex tiꞌ a siꞌpirex quireꞌ tuꞌ quin bin a tenoꞌ mʌꞌ cꞌuchaꞌan a worexiꞌ a tarex.
\p
\v 22 Rajen u winiquirob judío caj u pacran arob, tan yaꞌaricob: 
\p ―Bin u caꞌ quins u bʌj, tin tꞌʌn quireꞌ cu yaꞌaric: “Tuꞌ quin bin mʌꞌ cꞌuchaꞌan a worex a tarexiꞌ”, ―baxuc cu pacran aricob.
\p
\v 23 Jesús caj yaꞌaraj tiꞌob:
\p ―Mʌꞌ pꞌeriꞌoꞌonex, rajen mʌꞌ pꞌeriꞌ ic tucriquex baꞌ, quireꞌ a tenoꞌ tar in tar ich caꞌanan, quireꞌ a techexoꞌ toc tiꞌ yʌnechex ich yocꞌocab.
\v 24 Rajen quin waꞌaric techex: Bin a caꞌ quiminex tiꞌ a siꞌpirex, quireꞌ mʌꞌ ja wacsex ta worex ten wa ten a mac cu bin u rucsic a siꞌpirex. Rajen ca quiminex tiꞌ a siꞌpirex.
\p
\v 25 Robob caj u cꞌatob tiꞌ Jesús tan yaꞌaricob:
\p ―Maquechiꞌ?
\p Jesús caj u nuncaj tiꞌob tan yaꞌaricob:
\p ―A tenoꞌ tin toc araj techex uch maqueniꞌ.
\v 26 Yʌn toy yaꞌab quir in waꞌaric techex baxuc quir in waꞌaric techex baꞌ siꞌpir yʌn techex. A tenoꞌ quin chen aric techex a baꞌ caj u yaꞌaraj ten in Tet a mac tu tuchiꞌtajen. In Tet a mac tu tuchiꞌtajen, taj u tꞌʌn a tiꞌoꞌ.
\p
\v 27 Quireꞌ mʌꞌ ju yacsob tu yor tiꞌ Jesús quireꞌ rajiꞌ Cristo a tuchiꞌtaꞌb ten Cꞌuj, rajen mʌꞌ ju najtob wa tan u tsicbar tiꞌ u Tet Cꞌuj.
\v 28 Rajen Jesús caj yaꞌaraj tiꞌob:
\p ―Caꞌ bin a sinenex ich cruz quireꞌ a tenoꞌ a mac tuchiꞌtaꞌben ten Cꞌuj, raꞌiriꞌ u qꞌuinin caꞌ bin a najtex a wʌjtaquirenex. Raꞌiriꞌ u qꞌuinin xan caꞌ bin a wetiquex, jariꞌ tin waꞌaraj techex an ten bic tu yaꞌaraj in Tet, a mac a tu tuchiꞌtajen.
\v 29 In Tetoꞌ mʌꞌ u pꞌʌten quireꞌ rajraꞌ quin betic a baꞌ u cꞌat ―quij Jesús.
\p
\v 30 Tiꞌ toy cu camsic tiꞌob, yaꞌab mac caj u yacsajob tu yorob tiꞌ, quireꞌ yerob yʌjtaquirob.
\s A mac a tu yacsaj tu yor tiꞌ u tꞌʌn Cꞌuj yejer a mac a mʌꞌ tu yacsaj tu yor
\p
\v 31 Rajen Jesús caj yaꞌaraj tiꞌ u winiquirob judío a tu yacsajob tu yorob tiꞌ:
\p ―Wa ja techexoꞌ teniꞌ ta toc acsex ta worex a baꞌ tin waꞌaraj techex a baxuc aroꞌ in jach camsʌwiniquechex. 
\v 32 A tenoꞌ tan in camsic techex a baꞌ taj, a jeꞌ tꞌʌnaꞌ a baꞌ tajiꞌ cu bin u chaꞌbʌr techex tiꞌ a ca tsꞌurintiquex. 
\p
\v 33 U winiquirob judío caj u nuncajob tiꞌ tan yaꞌaricob: 
\p ―A tenobob u pararenob in nunquir Abraham, mʌꞌ in tsꞌurinticob baꞌ. Bic tabar ca waꞌaric a siptiquenex tiꞌ baꞌ.
\p
\v 34 Jesús caj yaꞌaraj tiꞌob:
\p ―Taj a baꞌ quin wac techex. Tu cotor a mac a cu man tu cꞌasir rajiꞌ cu tsꞌurintic u siꞌpirob.
\v 35 A mac a mʌnbir ten u tsꞌuriroꞌ quir u beyaj tiꞌ, rajiꞌ mʌꞌ rajraꞌ cu pꞌatʌr tu yatoch u tsꞌurir quireꞌ cu bin caꞌ canbir ten u tsꞌurir. Chen a mac a jach u parar u tsꞌuriroꞌ, rajiꞌ u parar munt qꞌuin.
\v 36 A techexoꞌ irechex a mac a mʌnbir ten tsꞌur chen a tenoꞌ a mac tuchiꞌtaꞌb ten Cꞌuj cꞌuchaꞌan in wor in chaꞌiquechex soc jach jaj chaꞌanechex.
\v 37 Bʌꞌwir ca waquex u pararechex a nunquirex Abraham quireꞌ techex a cꞌatex a quinsiquenex quireꞌ cꞌas ca tucriquex ta pixamex. Rajen mʌꞌ ju yocar in tꞌʌn ta pixamex.
\v 38 A tenoꞌ tin tsecꞌtaj an ten bic in Tet tu chaꞌj in wiric. A techexoꞌ ca betiquex an ten bic a tet quisin tu toc tsꞌaj u tꞌʌnintechex.
\p
\v 39 Robob caj u nuncob tiꞌ tan yaꞌaricob:
\p ―Ic tetex rajiꞌ ic nunquir Abraham.
\p Caj araꞌb tiꞌob ten Jesús:
\p ―Wa ju pararechex a nunquirex Abraham ta quibex u tꞌʌn Cꞌuj xan an ten bic a nunquirex Abraham caj u quibaj u tꞌʌn Cꞌuj uch.
\v 40 Chen bajeꞌrer a cꞌat a quinsiquenex quireꞌ caj in waꞌaraj techex a baꞌ jach tajiꞌ a tin wuꞌyaj ich Cꞌuj. A nunquirex Abraham mʌꞌ ju betaj baxuc aꞌrayoꞌ.
\p Jesús caj yaꞌaraj tiꞌob:
\p ―Ca betiquex u beyaj a tetex quisin.
\p
\v 41 Robob caj u nuncob tiꞌ tan yaꞌaricob:
\p ―A tenob mʌꞌ u pararenob a yʌn u siꞌpir ―quij yaꞌaric u winiquirob judío―. Jariꞌ yʌn tenob tuririꞌ in tetob. Rajiꞌ in Tetob Cꞌuj ―baxuc caj yaꞌaraj u winiquirob judío tiꞌ Jesús.
\p
\v 42 Jesús caj yaꞌaraj tiꞌob:
\p ―Wa ja jach tetex Cꞌuj jeꞌ a yajquintiquenex quireꞌ a tenoꞌ taren ich Cꞌuj. Mʌꞌ in bʌjiriꞌ taquen quireꞌ Cꞌuj tu tuchiꞌtajen.
\v 43 Mʌꞌ ja najtiquex in tꞌʌn quireꞌ mʌꞌ a cꞌat a najtiquex in tꞌʌn.
\v 44 A techexoꞌ a tetex quisin. Mʌꞌ ja wirej, ta pixamex ca betiquex a baꞌ u cꞌat a tetex. Rajiꞌ yʌjquinsir mac uch tu yʌnxchun a winicoꞌ ich yocꞌocab uch. Mʌꞌ u cꞌat a baꞌ jach tajiꞌ quireꞌ mʌnaꞌ u tajir tu pixam. Wa cu tus xan, cu tus quireꞌ a cu tusoꞌ u tet quisin, rajen cu camsic tus.
\v 45 Quireꞌ taj a baꞌ quin wac techex, rajen mʌꞌ a cꞌatex a quibiquex in tꞌʌn.
\v 46 Mʌꞌ cꞌuchaꞌan a worex a wiriquex wa yʌn in siꞌpir. In tꞌʌn a tin waꞌaraj techex taj, rajen biquinin mʌꞌ ja quibiquex in tꞌʌn?
\v 47 A maqueꞌ, rajiꞌ Cꞌuj yʌnin cu yubic u tꞌʌn Cꞌuj. Rajen a techexoꞌ mʌꞌ Cꞌuj yʌninechex. Rajen mʌꞌ a cꞌatex a wuꞌyiquex u tꞌʌn.
\s U berer tiꞌ yʌn Cristo uch mʌꞌ rochac Abraham ten u nʌꞌ 
\p
\v 48 Caj yaꞌarob u winiquirob judío tiꞌ Jesús.
\p ―Taj a baꞌ quic tucriquex uch. U winiquirech samaria acaꞌan tech cꞌacꞌas quisin ―baxuc tan u tus pacꞌʌr u pach Jesús ten u winiquirob judío.
\p
\v 49 Jesús caj u nuncaj tiꞌob, tan yaꞌaric;
\p ―A tenoꞌ mʌꞌ acaꞌan ten cꞌacꞌas quisiniꞌ. A tenoꞌ quin sʌjtic in Tet chen a techexoꞌ mʌꞌ ja sʌjtiquenex.
\v 50 A tenoꞌ mʌꞌ jin cʌxtic soc u sʌjtiquen mac quireꞌ in Tet u cꞌat yiric u sʌjtiquen tu cotor mac. A mac mʌꞌ u sʌjtiquen caꞌ bin cꞌuchuc tu qꞌuinin. Jeꞌ u yaꞌaraꞌ ten Cꞌuj: Biquinin mʌꞌ ja sʌjtaj Jesús uch?
\v 51 Taj a baꞌ quin wac techex a mac a cu quibic in tꞌʌn mʌꞌ ju bin quimin ―quij Jesús.
\p
\v 52 U winiquirob judío caj yaꞌarob:
\p ―Bajeꞌrer ij quer acaꞌan quisin tech. Quireꞌ ic nunquir Abraham quimij uch. Baxuc yʌjtseqꞌuirob u tꞌʌn quimob uch. Chen tech ca waꞌaric: “A mac a cu quibic a baꞌ quin waꞌaric tiꞌ mʌꞌ ju bin quimin.”
\v 53 Biquinin a techoꞌ ca tucric jach noꞌjech a beyaj? Ic nunquir Abraham a mac quimij uch, jach noꞌj beyaj. Baxuc yʌjtseqꞌuirob u tꞌʌn Cꞌuj caj quimob jach noꞌj beyajob uch. Mac ca tucric jach manan noꞌj a beyaj, tech wa?
\p
\v 54 Jesús caj u nuncaj tiꞌob, tan yaꞌaric:
\p ―Wa quin cʌxtic soc u sʌjtiquen mac jot aroꞌ. Wa quin cʌxtic soc u sʌjtiquen mac, in Tet a mac ca tucriquex a Cꞌuj techex, rajiꞌ cu yaꞌaric: “Jach caremech in pararech Jesús.”
\v 55 A techexoꞌ mʌꞌ a werex Cꞌuj. Chen a tenoꞌ in wer Cꞌuj. Wa quin waꞌaric mʌꞌ in wer Cꞌuj, baxuc aroꞌ tus in caꞌ an ten bic techex ca tusex. Chen a tenoꞌ in jach er Cꞌuj quin wuꞌyic u tꞌʌn.
\v 56 A tetex a nunquirex Abraham a ca tsicbʌtiquex quiꞌji yor uch quireꞌ yuba tabar in tar. Tu quibaj jeꞌ in tareꞌ rajen tu jach quiꞌquintaj yor uch.
\p
\v 57 Rajen u winiquirob judío caj yaꞌarob tiꞌ Jesús:
\p ―A techoꞌ mʌꞌ cꞌuchuc cincuenta yaxqꞌuinechiꞌ. Tuꞌ ta wiraj ic nunquir Abraham quireꞌ mʌꞌ uch chꞌijiquechiꞌ? 
\p
\v 58 Jesús caj u nuncaj tiꞌob tan yaꞌaric:
\p ―Taj quin wac techex. Mʌꞌ toy rochac Abraham ten u nʌꞌ uch in toc berer uch ―quij Jesús.
\p
\v 59 Rajen u winiquirob judío caj u chucob tunich quir u chꞌinicob u joꞌr Jesús. Jesús caj u taꞌc u bʌj ich u racꞌob. A baywoꞌ caꞌ jocꞌ tancab tiꞌ manij chumuc tuꞌ yʌnob, caj bin.
\c 9
\s A mac chꞌop u wichoꞌ caj toc rochaꞌb ten u nʌꞌ uch, jawsaꞌb ten Jesús
\p
\v 1 Tu cu man Jesús, tiꞌ tu yiraj chꞌop u wich toc berer caj rochaꞌb ten u naꞌ.
\v 2 U camsʌwinicob caj u cꞌatajob tiꞌ Jesús tan yaꞌaricob: 
\p ―A wʌjcamsʌyʌjirenob ―quij―. Mac u siꞌpir quireꞌ toc chꞌop u wich caj rochaꞌb ten u naꞌ? Wa ja jeꞌ xibaꞌ yʌn u siꞌpir wa ju tet yejer u naꞌ, yʌn u siꞌpirob? 
\p
\v 3 Jesús caj u nuncaj tiꞌob tan yaꞌaric:
\p ―Mʌꞌ u bʌjiriꞌ u siꞌpir, mʌꞌ u siꞌpir u tet yejer u naꞌ xan. Toc berer chꞌopir u wich caj rochaꞌb ten u naꞌ soc yesaꞌ ten Cꞌuj jach carem beyaj tiꞌ a jeꞌ xibaꞌ.
\v 4 Tiꞌ toy cuxaꞌanen bajeꞌrer teꞌ ich yocꞌocabaꞌ. Yʌn u qꞌuinin quir in beyaj tiꞌ in Tet Cꞌuj a mac tu tuchiꞌtajen. Caꞌ bin quimiquen tsꞌoc in beyaj teraꞌ ich yocꞌocab. 
\v 5 Mun qꞌuin tiꞌ yʌnen ich yocꞌocab, quireꞌ a tenoꞌ tuchiꞌtaben ten Cꞌuj, iren quib quir in wesiquex tech u jach jajir u tꞌʌn Cꞌuj.
\p
\v 6 Caj tsꞌoc yaꞌaric aroꞌ Jesús caj u tubaj ich u noy ruꞌum caj u jachꞌquintaj u noy ruꞌum caj u chꞌaj u jachꞌir u ruꞌumin caj u jicꞌtaj tu boxer u wich a chꞌop u wichoꞌ.
\v 7 Jesús caj yaꞌaraj tiꞌ:
\p ―Caꞌ xiquech caꞌ a jaꞌxtej a wich tu cuch u yacʌr yaꞌarir pʌchaꞌan u cꞌabaꞌ Siloé ―u cꞌat yaꞌaric aroꞌ tu cuch u tar yaꞌarir.
\p A chꞌop u wichoꞌ caj binij u jaꞌxtej u wich ich u cuch yaꞌarir Siloé caj urij chʌcaꞌan yiric u bej.
\v 8 Rajen u yet cajarob caj yirob. Baxuc a mac tu yirob uch a chꞌop u wichoꞌ caj u pacran arob tan yaꞌaricob: 
\p ―Mʌꞌ wa rajiꞌ a cu cutar u cꞌatej u taqꞌuin ucheꞌ? ―baxuc u pacran aricob.
\p
\v 9 Yʌn mac tu yaꞌarob:
\p ―Rajiꞌ.
\p Yʌn u jerob tu yaꞌarob:
\p ―Mʌꞌ rajiꞌ.
\p Mʌꞌ ja wirej, cu cꞌʌs cꞌʌꞌoticob. Chen u bʌjiriꞌ tu yaꞌaraj:
\p ―Jach jaj rajiꞌ ten ―quij―, a chꞌop in wich ucheꞌ. 
\p
\v 10 Rajen robob caj u cꞌatob tiꞌ, tan yaꞌaric:
\p ―Bic tabar caj jaw u chꞌopir a wich bajeꞌrer?
\p
\v 11 A chꞌop u wich uchoꞌ caj u nuncaj tiꞌob, tan yaꞌaric: 
\p ―A ray xiboꞌ, Jesús u cꞌabaꞌ, caj u jachꞌquintaj u noy ruꞌum caj u jicꞌtaj tu boxer in wich. Caj yaꞌaraj ten: “Caꞌ xiquech, quij, ich tu cu yacʌr yaꞌarir u cꞌabaꞌ Siloé.” Rajen binen in jax tin wich. Rajen bajeꞌrer chʌcaꞌan in wiric in ber ―quij a chꞌop u wichoꞌ.
\p
\v 12 Robob caj u cꞌatob tiꞌ a chꞌop u wich uchoꞌ.
\p ―Tuꞌ yʌn a mac a ta tsicbʌtaj uchoꞌ?
\p Caj u yaꞌaraj tiꞌob:
\p ―Mʌꞌ in wer tuꞌ yʌniꞌ.
\s A fariseojoꞌ cu cꞌaticob tiꞌ bic jawsaꞌb u wich
\p
\v 13 Caj bin purbir a mac jawsaꞌb u wich ʌcʌtan ich a fariseojoꞌ.
\v 14 Raꞌ u qꞌuinin cu jesicob u bʌj u winiquirob judío caj u jachꞌquintaj u noy ruꞌum Jesús caj u jawsaj a chꞌop u wich uchoꞌ.
\v 15 A fariseojoꞌ xan caj u cꞌatob tiꞌ a xiboꞌ bic jawsaꞌb u wich. Rajiꞌ caj u yaꞌaraj tiꞌob:
\p ―Jesús ―quij―, caj u jicꞌtaj tu boxer in wich a tu jachꞌquintaj u noy ruꞌum. Pachir caj binen in jaꞌx tin wich, rajen chʌcaꞌan in wiric in ber bajeꞌrer. 
\p
\v 16 Rajen caj yaꞌarob a tiꞌ yʌn jun yarob a fariseojoꞌ: 
\p ―A xiboꞌ a ray ca tsicbar tiꞌ mʌꞌ rajiꞌ Cꞌuj yʌnin quireꞌ rajiꞌ mʌꞌ u cʌnantic u qꞌuinin ic jesiquex ic bʌjex.
\p Chen u jerob caj yaꞌarob:
\p ―Bic tabar a mac a cu betic carem beyaj a mac yʌn u siꞌpir?
\p Rajen mʌꞌ pꞌeriꞌ yorob a fariseojoꞌ.
\v 17 Rajen robob caj u caꞌ cꞌatob tiꞌ a chꞌop u wich uchoꞌ. Tech, baꞌ ca wac tech tiꞌ a mac a tu jawsaj a wich? 
\p A xiboꞌ caj u nuncaj tiꞌob, tan yaꞌaric:
\p ―A tenoꞌ quin waꞌaric rajiꞌ yʌjtseqꞌuir u tꞌʌn Cꞌuj ―quij.
\p
\v 18 U winiquirob judío mʌꞌ u cꞌat u quibicob a baꞌ araꞌb tiꞌob ten a chꞌop u wich uchoꞌ. Mʌꞌ ju quibob u tꞌʌn hasta caj tarob u naꞌ yejer u tet a mac jawsaꞌb u wich. 
\v 19 Caj cꞌuchob u tet yejer u naꞌ caj u cꞌatob tiꞌob: 
\p ―A jeꞌraꞌ a pararex toc chꞌop wa ju wich caj rochaꞌb ten u naꞌ uch? Baxuc ca waꞌaric uch? Bic tabar bajeꞌrer quireꞌ chʌcaꞌan yiric u ber?
\p
\v 20 U tet yejer u naꞌ caj u nuncob tiꞌob tan yaꞌaric: 
\p ―In werob a jeraꞌ quireꞌ in pararob toc berer tiꞌ chꞌop u wich caj rochaꞌb ten u naꞌ uch.
\v 21 Chen a tenoboꞌ mʌꞌ in werob bic tabar caj jaw u wich. Baxuc mʌꞌ in werob mac tu jawsaj u wich. Cꞌatex a wuꞌyej tiꞌ quireꞌ chꞌijij, u bʌjiriꞌ cu yac techex tu junan. 
\p
\v 22 Baxuc caj u nuncob u tet yej u naꞌ quireꞌ tu chꞌajob sajquir tiꞌ u jach tsꞌurirob sacerdote. Mʌꞌ ja wirej, u jach tsꞌurirob sacerdote tu tsꞌajob u tꞌʌnin tan yaꞌaricob: “Toc jumpuriꞌ mʌꞌ u yʌnyʌn ocar ich u chan najir tu cu naj cꞌujinticob Cꞌuj u winiquirob judío, a mac tu yubaj yaꞌaric tiꞌ u racꞌob: A Jesúsoꞌ, rajiꞌ yʌjtaquiroꞌonex.”
\v 23 Rajen u tet yejer u naꞌ caj yaꞌarob: “Cꞌatex a wuꞌyex tiꞌ quireꞌ chꞌijij. Jeꞌ yac techex bic caj jaw u wich.” 
\p
\v 24 U jach tsꞌurirob sacerdote caj u wʌcꞌʌs pʌyob a chꞌop u wich uch, caj yaꞌarob tiꞌ:
\p ―Caꞌ a waꞌarej tiꞌ Cꞌuj: “Bayoꞌ Cꞌuj tech ta jawsaj in wich.” A mac a ca tsicbar tiꞌ, a tenoboꞌ in werob yʌn u siꞌpir.
\p
\v 25 Rajiꞌ caj u yaꞌaraj tiꞌob:
\p ―A tenoꞌ mʌꞌ in wer wa yʌn u siꞌpir. In chen er bajeꞌrer quireꞌ chʌcaꞌan in wiric in ber. A uchoꞌ mʌꞌ chʌcaꞌan in wiric in ber ―quij.
\p
\v 26 Robob caj u caꞌ cꞌatob tiꞌ:
\p ―Baꞌ tu betaj tech? Bic tabar caj u jawsaj a wich? ―quijob.
\p
\v 27 Rajiꞌ caj u nuncaj tiꞌob tan yaꞌaric:
\p ―Biquinin tin toc araj techex caꞌch? Chen techex mʌꞌ a cꞌatex a quibexiꞌ. Biquinin a cꞌatex a caꞌ uꞌyiquex, jeꞌ wa ja binex tu pach quir a cʌniquex u tꞌʌn?
\p
\v 28 Robob caj u yʌnxchun u pꞌasticob tiꞌ tan yaꞌaricob tiꞌ:
\p ―A techoꞌ ca bin tu pach quir a cʌnic u tꞌʌn a mac a yʌn u siꞌpiroꞌ. Chen a tenoboꞌ quin binob tu pach ic nunquir Moisés quir in cʌnicob u tꞌʌn Moisés uch. 
\v 29 A tenoboꞌ in werob Cꞌuj cu tsicbar tiꞌ Moisés uch. A ray ca tsicba tiꞌ mʌꞌ in werob tub u tariꞌ ―quijob u winiquirob judío.
\p
\v 30 A xiboꞌ caj u nuncaj tiꞌob, tan yaꞌaric:
\p ―A techexoꞌ ca jacꞌsiquex in wor quireꞌ ca waquex mʌꞌ a werex tub u tariꞌ. Tu jawsaj in wich mʌꞌ wa ca wiriquex jaw in wich.
\v 31 Ij querex a Cꞌuj mʌꞌ ju yubic u tꞌʌn a mac a yʌn u siꞌpireꞌ. A Cꞌujoꞌ cu chen uꞌyic u tꞌʌn a mac a cu sʌjtic Cꞌuj, a mac a tan u betic a baꞌ u cꞌat Cꞌujoꞌ. Raꞌ cu yubic Cꞌuj.
\v 32 Mʌꞌ ja wirej, caj yʌnxbetaꞌb yocꞌocab taquij bajeꞌrer, mʌꞌ ij cuꞌyimʌnex mac jawsaꞌb u wich chꞌop a ju toc berer caj rochaꞌb ten u nʌꞌ ―rajiꞌ, aric a chꞌop u wichoꞌ―.
\v 33 A quin tsicbʌtic tiꞌ, wa mʌꞌ tarij ich Cꞌuj, mʌꞌ cꞌuchaꞌan yor u betic baxuc a jeraꞌ ―quij a chꞌop wich uchoꞌ. 
\p
\v 34 Robob caj u nuncob tiꞌ tan yaꞌaric:
\p ―Bic ca bin a camsic tenob? Mʌꞌ toy u rochech a naꞌ, uch toc yʌn a siꞌpir tech uch ―baxuc caj yaꞌarob tiꞌ. 
\p Robob caj yaꞌarob tiꞌ jumpuriꞌ:
\p ―Mʌꞌ a yʌnyʌn ocar ich chan naj tu cu naj cꞌujinticob Cꞌuj u winiquirob judío.
\s A mac a cu tus tucric yer Cꞌuj, u berer a mac chꞌop u wichob
\p
\v 35 Jesús caj yubaj a mac chꞌop u wich uchoꞌ, toc jumpuriꞌ toc jocꞌsaꞌb ich chan naj tu cu naj cꞌujinticob Cꞌuj u winiquirob judío. Rajen Jesús caj tar u tsicbar tiꞌ a xiboꞌ, raꞌ jaw u wichoꞌ. Caj u yiraj caj u cꞌataj tiꞌ:
\p ―Ca wacsic wa ta wor tiꞌ u parar Cꞌuj a mac a yʌn tu cotor u mucꞌ Cꞌuj?
\p
\v 36 A xiboꞌ a jaw u wichoꞌ caj u nuncaj tiꞌ tan yaꞌaric: 
\p ―Maquiꞌ in Jaj Tsꞌurir? In cꞌat in wacsic tin wor tiꞌ. 
\p
\v 37 Jesús caj u nunca tiꞌ tan yaꞌaric:
\p ―A techoꞌ ta wirajen bajeꞌrer. Rajiꞌen a tan u tsicbar yejerech.
\p
\v 38 A xiboꞌ caj u nuncaj tiꞌ, tan yaꞌaric:
\p ―Quin wacsic tin wor tech, Jaj Tsꞌurir.
\p Caj xonrʌj tuꞌ yʌn Jesús.
\v 39 Jesús caj yaꞌaraj tiꞌ:
\p ―A tenoꞌ taren ich yocꞌocab soc u sasichʌjʌr u wich a mac chꞌop u wicheꞌ. A mac a cu yaꞌaric: “Sasij in wichoꞌ”, cu bin tar tiꞌ, irej wa chꞌop u wich.
\p
\v 40 Tiꞌ yʌn a fariseojoꞌ tuꞌ yʌn Jesús caj yubob a baꞌ caj u yaꞌaraj Jesús. Rajen caj u cꞌatob tiꞌ:
\p ―Ca tucric wa ja tenob chꞌopob in wichob ―baxuc caj yaꞌarob.
\p
\v 41 Jesús caj u nuncaj tiꞌob, tan yaꞌaric:
\p ―Wa chꞌop a wichex mʌnaꞌ a siꞌpirex techex. Quireꞌ ca waquex: “Sasir in wichob”, rajen yʌn a siꞌpirex techex quireꞌ ca waquex sasir a wichex.
\c 10
\s Jesús cu camsic tiꞌ a mac a taj u yʌjcʌnanyʌjirob tʌmʌn yuc
\p
\v 1 Jesús caj yaꞌaraj tiꞌ a pimob:
\p ―Taj a baꞌ quin wac techex. Rajen uꞌyex, a mac a cu tar yaꞌcric tʌmʌn yuc, mʌꞌ ju yocar tu jor u paꞌteꞌ tu japꞌnin quir u yaꞌcric. Cu chen nacatic u paꞌteꞌir quir u yaꞌcric.
\v 2 Chen a mac rajiꞌ u jach winquirir u tʌmʌn yuc cu jach ocar tu jor u paꞌteꞌir tuꞌ yʌn yʌrʌcꞌ tʌmʌn yuc.
\v 3 A mac a cu cʌnantic u jor u paꞌteꞌir tuꞌ yʌn yʌrʌcꞌ tʌmʌn yuc cu qꞌueꞌic u jor u paꞌteꞌir soc u yocar a taj yʌjcʌnanyʌjir tʌmʌn yuc. A tʌmʌn yucoꞌ cu cꞌʌꞌotic u tꞌʌn u winquirir. Cu tꞌʌnic u yʌrʌcꞌ tʌmʌn yuc quireꞌ jujuntur yʌrʌcꞌ tʌmʌn yuc cu tꞌʌnic u cꞌabaꞌ soc u pʌyic ich tancab caꞌ jocꞌacob ich u paꞌteꞌir.
\v 4 Caj tsꞌoc u jocꞌsic tu cotor u yʌrʌcꞌ tʌmʌn yuc cu pʌyic u berob. U yʌrʌcꞌ tʌmʌn yuc cu sayʌrob tu pach quireꞌ cu cꞌʌꞌoticob u tꞌʌn, rajen cu binob tu pach. 
\v 5 U tʌmʌn yuc mʌꞌ u sayʌrob tu pach a mac a mʌꞌ u yocar tu jor u paꞌteꞌir quireꞌ mʌꞌ raꞌ u winquirir. Cu putsꞌurob u tʌmʌn yuc quireꞌ mʌꞌ u cꞌʌꞌoticob u tꞌʌn.
\p
\v 6 Jesús caj u yaꞌaraj a jeꞌ tꞌʌnaꞌ quir u camsic tiꞌ a mac a muchaꞌan tiꞌoꞌ. Chen mʌꞌ tu najtob a baꞌ u cꞌat yaꞌaric.
\s “Quin quiꞌ cʌnantic a mac cu yacsic tu yor tenoꞌ”
\p
\v 7 Jesús caj yaꞌaraj tiꞌ a pimob:
\p ―Taj quin waꞌaric techex, a tenoꞌ yʌjcʌnanyʌjiren u jor u paꞌteꞌir tuꞌ yʌn yʌrʌcꞌ tʌmʌn yuc Cꞌuj.
\v 8 A mac a ca tucriquex yʌjcʌnanyʌjirob, robob irob a mac a cu yaꞌcric tʌmʌn yuc quireꞌ u cꞌat u taquic tiꞌ ten a mac a cu sayʌrob tin pach. Mʌꞌ ju yubicob u tꞌʌn u tus ʌjcʌnanyʌjirob tʌmʌn yuc.
\v 9 A tenoꞌ ―quij Jesús―, quin cʌnantic u jor u paꞌteꞌir tuꞌ yʌn yʌrʌcꞌ tʌmʌn yuc Cꞌuj. A mac a cu yacsic tu yor ten quireꞌ yerob quin bin in taquej. Robob waysaꞌb irob yʌrʌcꞌ tʌmʌn yuc Cꞌuj. Cu bin cʌnanbirob ten Cꞌuj, cu bin jach quiꞌquinbir yorob ten Cꞌuj.
\p
\v 10 ’A mac a cu tar yaꞌcric tʌmʌn yuc, raꞌ u beyaj quir u yaꞌcric. Baxuc quir u quinsic. Baxuc quir u chꞌesic xan. Chen a tenoꞌ taren in tsꞌic tiꞌob u cuxtarob munt qꞌuin soc jach manan u quiꞌ tar yorob.
\v 11 An ten bic a mac yʌjcʌnanyijir tʌmʌn yuc a jach tsoyoꞌ cu quiꞌ cʌnantic u yʌrʌcꞌ tʌmʌn yuc cax quinsbir tiꞌ u yʌrʌcꞌ tʌmʌn yuc. Baxuc a tenoꞌ quin quiꞌ cʌnantic mac a cu yacsic tu yor ten cax quinsbiren quir in taquic tiꞌob.
\v 12 Chen a mac u chen cꞌat u cʌnantic tʌmʌn yuc caꞌ bin yirej u tar bʌcꞌ chiꞌbir u yʌrʌcꞌ tʌmʌn yuc cu putsꞌur quireꞌ mʌꞌ rajiꞌ u winquirir. Rajen chiꞌbir yʌrʌcꞌ tʌmʌn yuc ten bʌcꞌ rʌc waccheꞌ u binob yʌrʌcꞌ tʌmʌn yuc. 
\v 13 A mac a cu chen cꞌat u cʌnantic tʌmʌn yuc cu putsꞌur quireꞌ mʌꞌ u yajquintic tʌmʌn yuc.
\v 14 An ten bic a mac yʌjcʌnanyʌjir tʌmʌn yuc a jach tsoyoꞌ. Cu quiꞌ cʌnantic u tʌmʌn yuc. Baxuc a tenoꞌ quin quiꞌ cʌnantic a mac a cu yacsic tu yor ten. In wer mac tu yacsaj tu yor ten. Baxuc xan robob yerob tu yacsajob tu yor ten.
\v 15 In pacran erob in bʌjob an ten bic in Tet yeren in pacran erob in bʌjob. In Tet yeren xan, baxuc ten in wer in Tet xan. Baxuc quin cꞌubic in bʌj soc in quinsaꞌ tiꞌ a mac a cu sayʌr tin pach.
\v 16 Yʌn mac mʌꞌ u winiquirob judío cu bin u yacsicob tu yorob ten xan. Bin in caꞌ in pʌyejob xan. Robob cu bin u yubicob in tꞌʌn xan soc pꞌeriꞌob yejerechex u winiquirechex judío chen tuririꞌ yʌjcʌnanyʌjir, rajiꞌen. 
\p
\v 17 ’In Tetoꞌ cu yajquintiquen quireꞌ tin cꞌubaj in bʌj soc in quinsaꞌ tiꞌ a mac a cu sayʌrob tin pach. Pachir in caꞌ riqꞌuir.
\v 18 Mʌnaꞌ mac cꞌuchaꞌan yor u quinsiquen. In wʌcꞌʌs bʌjiriꞌ in cꞌat in chaꞌic in quinsaꞌ. Cꞌuchaꞌan in wor in chaꞌic in quinsaꞌ. Cꞌuchaꞌan in wor in wʌcꞌʌs riqꞌuir quireꞌ baxuc caj u yaꞌaraj ten in Tet. Baxuc tu tsꞌaj u tꞌʌnin tiꞌ in Tet xan.
\p
\v 19 Rajen mʌꞌ quet yorob a pimob a baꞌ caj u yubob yaꞌaric Jesús.
\v 20 Yaꞌab mac tu yaꞌarob:
\p ―Acaꞌan tiꞌ cꞌacꞌas quisin.
\p U jerob cu yaꞌaricob:
\p ―Chochoc tꞌʌn u caꞌ quireꞌ mʌnaꞌ yor. Biquinin ca wuꞌyiquex u tꞌʌn?
\p
\v 21 U jerob u winiquirob judío caj yaꞌarob:
\p ―Rajiꞌ mʌꞌ u tsicbar baxuc wa acaꞌan cꞌacꞌas quisin. Mʌꞌ ja wirej, a mac acaꞌan cꞌacꞌas quisin mʌꞌ cꞌuchaꞌan yor u jawsic a mac chꞌop u wichoꞌ ―baxuc yaꞌarob. 
\s U winiquirob judío u cꞌat quinsicob Jesús
\p
\v 22 Cꞌuchij tu qꞌuinin u quiꞌquiꞌ janʌnob u winiquirob judío ich u cajar Jerusalén. Raꞌ u qꞌuinin u winiquirob judío cu cꞌʌꞌoticob caj tsꞌoc u quiꞌ tsoyquinticob carem naj tu cu naj cꞌujinticob Cꞌuj uch soc tiꞌ cu wʌcꞌʌs cꞌujinticob Cꞌuj.
\v 23 Raꞌ u qꞌuinin queꞌer tan xetꞌir. Tiꞌ yʌn Jesús caꞌch tan u man tu japꞌnin carem naj tu reꞌjaꞌan naj u cꞌabaꞌ Salomón.
\v 24 U winiquirob judío caj u muchꞌquintob u bʌj caj u bʌꞌcristob Jesús caj yaꞌarob tiꞌ:
\p ―Arej tenob ber caꞌ bin tsꞌocac a choquintic in worob. Mʌꞌ a mucric, toc arej tenob wa Cristojech a tuchiꞌtaꞌbech ten Cꞌuj.
\p
\v 25 Jesús caj u nuncaj tiꞌob tan yaꞌaric:
\p ―Tin toc araj techex chen mʌꞌ ja quibiquex. A wiramʌnex xan tin betaj carem beyajob quireꞌ tu yamtajen in Tet Cꞌuj. Rajiꞌ cu yesic tar in tar ich Cꞌuj.
\v 26 A techexoꞌ mʌꞌ ja quibiquex in tꞌʌn quireꞌ mʌꞌ ten yʌninechex baxuc caj in waꞌaraj techex uch.
\v 27 Quireꞌ a mac ten yʌnin ―quij Jesús―, a cu yubicob in tꞌʌn quireꞌ in wer maquiꞌ. Robob cu sayʌrob tin pach. 
\v 28 Quin tsꞌic u cuxtarob munt qꞌuin mʌꞌ ju bin satʌrob mʌꞌ biqꞌuin. Mʌnaꞌ mac cꞌuchaꞌan yor u taquic ten quireꞌ ten yʌnin.
\v 29 In Tet Cꞌuj caj u tsꞌaj tiꞌob ten soc ten yʌninob. In Tetoꞌ jach manan cꞌuchaꞌan yor tiꞌ tu cotor baꞌ. Mʌnaꞌ mac cꞌuchaꞌan yor u taquic tiꞌ in Tet quireꞌ rajiꞌ yʌninob xan.
\p
\v 30 Jesús caj yaꞌaraj:
\p ―A tenoꞌ yejer in Tet tuririꞌenob.
\p
\v 31 Rajen u winiquirob judío tu caꞌ chucob tunich u cꞌatob u chꞌinicob u joꞌr Jesús.
\v 32 Jesús caj yaꞌaraj tiꞌob tan yaꞌaric:
\p ―A techexoꞌ a wiramʌnex yaꞌab carem in beyaj caj in betaj quireꞌ tu yamtajen in Tet. Arex ten baꞌ tsoyir beyaj ta wirex in betic. Rajen a cꞌat a chꞌiniquex in joꞌr.
\p
\v 33 U winiquirob judío caj u nuncob tiꞌ tan yaꞌaricob: 
\p ―Mʌꞌ jin bin in chꞌinicob a joꞌr quireꞌ tsoy a beyaj. Quin bin in chꞌinicob a joꞌr quireꞌ tan a pꞌastic Cꞌuj. Mʌꞌ ja wirej, chen xibech ca tucric Cꞌujech.
\p
\v 34 Jesús caj u nuncaj tiꞌob tan yaꞌaric:
\p ―Tiꞌ tsꞌibaꞌan tu cu yaꞌaric Cꞌuj tiꞌ techex: “Techex, quij Cꞌuj, ca wesiquenex tiꞌ mac Cꞌujen.”
\p Aroꞌ araꞌb tiꞌ u juez u winiquirob judío uch ten Cꞌuj. 
\v 35 Baxuc caj araꞌb tiꞌ a mac tsꞌab u beyajob ten Cꞌuj uch. Rajen mʌꞌ ju bin rucꞌsaꞌbir ich u tꞌʌn Cꞌuj tu tsꞌibaꞌan. 
\v 36 A techexoꞌ u winiquirechex judío ca waquex jach tsoyoꞌ a mac araꞌb ten Cꞌuj ca wesiquenex tiꞌ mac Cꞌujen. Rajen biquinin ca waꞌariquex quin pꞌastic Cꞌuj quireꞌ tin waꞌaraj u pararen Cꞌuj. Mʌꞌ ja wirej, tu tsꞌaj in beyaj Cꞌuj, rajen taren ich yocꞌocab.
\v 37 Wa ca tucriquex, mʌꞌ u beyaj Cꞌuj quin betic mʌꞌ a yʌn acsiquex ta worex ten.
\v 38 Wa ca wiriquex raꞌ u beyaj Cꞌuj quin betic, quibex aroꞌ, cax mʌꞌ a quibiquex in tꞌʌn. Quireꞌ wa ca quibiquex raꞌ u beyaj Cꞌuj quin betic, baxuc a werex xan turiꞌen yejer Cꞌuj.
\p
\v 39 Rajen u caꞌ cꞌatob u chuquicob Jesús chen mʌꞌ cꞌuchaꞌan yorob u chuquicob chen Jesús putsꞌij.
\p
\v 40 Tu caꞌten caꞌ bin Jesús pichir yaꞌarir Jordán tu cu tar ic yum, tiꞌ pꞌatij tu cu yacsic jaꞌ tu joꞌr mac Juan uch.
\v 41 Tiꞌ toy yʌn Jesús pʌchir yaꞌarir Jordán caj tarob yaꞌab mac quir u yirirob Jesús. A pimob caj u pacran arob: 
\p ―Cax Juan mʌꞌ tu yesaj carem beyaj chen taj a baꞌ caj u yaꞌaraj Juan tiꞌ Jesús.
\p
\v 42 Rajen yaꞌab mac tu yacsob tu yorob tiꞌ Jesús.
\c 11
\s Quimij Lázaro
\p
\v 1 Tiꞌ yʌn mac uch tu cʌnaj u yajir. Rajiꞌ u cꞌabaꞌ Lázaro, tiꞌ u tar uch ich u cajar Betania, raꞌ u waꞌan u ruꞌumin Judea. Lázaro tiꞌ cʌjaꞌanob ich u cajar uch yejer u yitsꞌinob María yejer Marta.
\v 2 María, rajiꞌ a tu jayaj a quiꞌ u bocoꞌ tu yoc Jesús caj u tisaj yejer u tsotser u joꞌr caꞌ tijic. A mac u cʌmʌn u yajir rajiꞌ u sucuꞌunob Lázaro.
\v 3 Rajen u yitsꞌinob Lázaro caj tuchiꞌtaꞌb caꞌ xic pʌybir Jesús tan yaꞌaricob tiꞌ:
\p ―Jaj Tsꞌurir ―quij―, a mac a jach yaj a wiric bajeꞌrer yajij ―baxuc caj yaꞌarob a mac tuchiꞌtaꞌb ten María yejer Marta.
\p
\v 4 Jesús caj yuba caj yaꞌaraj:
\p ―A tu cʌnaj u yajir, mʌꞌ quir u jach quimin chen quir u sʌjtaꞌ Cꞌuj ten tu cotor mac. Cu bin quimij soc ten xan cu sʌjtiquenob tu cotor mac quireꞌ u pararen Cꞌuj a tuchiꞌtaꞌben ten Cꞌuj.
\p
\v 5 Jesús tu yajquintaj Marta yejer u yitsꞌin María yejer Lázaro,
\v 6 chen pꞌatij Jesús u jer caꞌtur u qꞌuinin tuꞌ yʌniꞌ cax tu yubaj tu cʌnaj u yajir Lázaro.
\v 7 Pachir caj yaꞌaraj tiꞌ u camsʌwinicob:
\p ―Jeroj cuxex caꞌ wʌcꞌʌs xicoꞌon ich u ruꞌumin Judea ―quij Jesús.
\p
\v 8 Chen u camsʌwinicob caj yaꞌarob:
\p ―A wʌjcamsʌyʌjirenob ―quij―, u winiquirob judío u cꞌat u chꞌinicob a joꞌr uch. Biquinin a cꞌat a caꞌ bin tiꞌ taroꞌ?
\p
\v 9 Jesús caj u yaꞌaraj tiꞌob bic yiraꞌ u beyaj Cꞌuj. Rajen caj u yaꞌaraj tiꞌob:
\p ―A Cꞌujoꞌ tu tsꞌaj toꞌonex juntur u qꞌuinin doce horas. Mʌꞌ ja wirej, a mac a cu man chunqꞌuineꞌ, mʌꞌ ju cojar yoc, quireꞌ tiꞌ toy chunqꞌuiniꞌ.
\v 10 Chen wa cu yacꞌbirchʌjʌr cꞌuchij tu qꞌuinin cu cojar yoc quireꞌ mʌꞌ sasiriꞌ.
\p Baxuc a jeraꞌ Jesús tu chaꞌ ic najtic mʌꞌ ju bin quinsbir Jesús hasta cu cꞌuchur tu qꞌuinin a tu pꞌisa Cꞌuj uch. Rajen mʌnaꞌ baꞌ u ber tiꞌ Jesús ten mac.
\p
\v 11 Pachir Jesús caj u yaꞌaraj tiꞌ u camsʌwinicob:
\p ―A Lázarojoꞌ a jic jach yaj tan u wenʌn. Tar quin binoꞌ quir in wʌsic quireꞌ wenʌn u caꞌ ―quij Jesús.
\p
\v 12 U camsʌwinicob caj yaꞌarob tiꞌ:
\p ―Jaj Tsꞌurir ―quij―, wa wenʌn u caꞌ, jeꞌ u chꞌic yoreꞌ.
\p
\v 13 Baxuc Jesús caj u yaꞌara tiꞌob quireꞌ jach quimen Lázaro chen u camsʌwinicob cu tucricob jach wenʌn u caꞌ tan u jeꞌsic u bʌj. Rajen cu bin u chꞌic yor.
\v 14 Rajen Jesús mʌꞌ tu mucraj caj u yaꞌaraj tiꞌob:
\p ―Lázaro jach quimij.
\p
\v 15 Caj yaꞌaraj Jesús:
\p ―Quiꞌ in wor quireꞌ mʌꞌ tiꞌ yʌnenob tuꞌ yʌn Lázaro, soc a wacsiquex ta wor ten. Chen cuxex ij quirej.
\p
\v 16 Rajen Tomás caj u yaꞌaraj tiꞌ u yet camsʌwinicob, rajiꞌ cu yaꞌaricob u yet camsʌwinicob Gemelo, mʌꞌ ja wirej, caj rochaꞌb ten u naꞌ toc caꞌtur:
\p ―Cuxex caꞌ quimicoꞌonex yejer Jesús. Yer jeꞌ u quinsaꞌr Jesús.
\s Quireꞌ a tenoꞌ yʌn u cuxtar mac munt qꞌuin
\p
\v 17 Caj u bin Jesús yejer u camsʌwinicob caj cꞌuchob cuatro u qꞌuinin tub butꞌi u baquer ich u japꞌnin tunich Lázaro. 
\v 18 U cajar Lázaro, rajiꞌ Betania baytʌc ich u cajar Jerusalén. Yaꞌaric caꞌtur kilómetro chumuc u nachir.
\v 19 Yaꞌab u winiquirob judío caj binob tuꞌ yʌn Marta yejer María quir u quiꞌquintaꞌ yorob soc pꞌeriꞌob yaꞌcticob u sucuꞌunob.
\v 20 Marta caj yuba tabar u cꞌuchur Jesús caj binij quir u nupꞌic ich bej. Chen María tiꞌ pꞌatij ich naj.
\v 21 Marta caj cꞌuchij ich Jesús caj yaꞌaraj:
\p ―Jaj Tsꞌurir ―quij―, wa tiꞌ yʌnech uch caj u cʌnaj u yajir in sucuꞌun mʌꞌ quimij uch jeꞌ a jawsiqueꞌ. 
\v 22 Quireꞌ in wer Cꞌuj cu tsꞌic tech bajeꞌrer a baꞌ ca cꞌatic tiꞌ ―quij Marta.
\p
\v 23 Jesús caj yaꞌaraj tiꞌ:
\p ―A sucuꞌun jeꞌ u riqꞌuireꞌ tu butꞌij ich japꞌnin tunich ―quij Jesús.
\p
\v 24 Marta caj u yaꞌaraj tiꞌ:
\p ―In wer in sucuꞌun jeꞌ u caꞌ cuxtareꞌ caꞌ bin xuruc tꞌʌn caꞌ bin cuxrac tu cotor mac.
\p
\v 25 Jesús caj u yaꞌaraj tiꞌ:
\p ―Quireꞌ a tenoꞌ yʌn u cuxtar mac. Quireꞌ a tenoꞌ yʌn u caꞌ cuxtar mac, a maqueꞌ cu yacsic tu yor ten quireꞌ yer yʌjtaquiren a tenoꞌ cax cu bin quimin cu bin cuxtar munt qꞌuin.
\v 26 Tu cotor mac a cu cuxtar munt qꞌuin a mac a cu yacsic tu yor ten quireꞌ yer yʌjtaquiren a tenoꞌ. Mʌꞌ ju bin satʌr mʌꞌ biqꞌuin. Ta quibaj aroꞌ ―quij Jesús.
\p
\v 27 Marta caj u yaꞌara tiꞌ:
\p ―Quin quibic Jaj Tsꞌurir in wer a techoꞌ Cristojech, u pararech Cꞌuj a mac a cu bin tar ich yocꞌocab ―quij Marta.
\s Jesús ocꞌnʌjij
\p
\v 28 Marta caj tsꞌoc yaꞌaric aroꞌ caj bin u pʌyej u yitsꞌin caj u muc u araj tiꞌ:
\p ―Ij cʌjcamsʌyʌjir cꞌuchij caj u tuchiꞌtajen caꞌ in pʌyech.
\p
\v 29 Caj yuba yaꞌaric aroꞌ María seb caj riqꞌuij caj bin irbir Jesús.
\v 30 Jesús mʌꞌ toy cꞌuchuc ich u cajar tiꞌ yʌn tub u nupꞌa Marta ich bej caꞌch.
\v 31 Rajen u winiquirob judío a tarob u quiꞌquinticob yor a tiꞌ yʌnob ich yatoch yejer caꞌch. Caj yirob seb u jocꞌar María caj sayob tu pach quireꞌ cu tucricob tiꞌ cu bin tuꞌ butꞌ u baquer u sucuꞌun quir u yactic. 
\p
\v 32 Caj cꞌuchij María tuꞌ yʌn Jesús caj xonrʌj tuꞌ yʌn Jesús tan yaꞌaric tiꞌ:
\p ―Jaj Tsꞌurir ―quij―, wa tiꞌ yʌnech uch caj u cʌnaj u yajir in sucuꞌun mʌꞌ quimij uch jeꞌ a jawsiqueꞌ ―quij María.
\p
\v 33 Jesús caj u yiraj yocꞌar María baxuc u winiquirob judío a sayob tu pach María yaj yubaj tu yor quireꞌ mʌꞌ u cꞌat yiric u quimin mac.
\v 34 Jesús caj u cꞌataj tiꞌob:
\p ―Tub a butꞌex u baquer Lázaro?
\p Caj yaꞌarob:
\p ―Jaj Tsꞌurir, cojen irej ―quij.
\p
\v 35 Jesús caj ocꞌnʌjij.
\v 36 A mac a tiꞌ yʌnob caj u pacran arob:
\p ―Iric, cu yajquintic Lázaro.
\p
\v 37 Tiꞌ yʌn mac caj u yaꞌarob:
\p ―Aroꞌ rajiꞌ a tu jawsaj u wich a chꞌopoꞌ uch. Mʌꞌ wa rajiꞌ cꞌuchaꞌan yor yamtaꞌbir Lázaro soc mʌꞌ u quimij? 
\s Ricꞌsaꞌb Lázaro ten Jesús quir u cuxtar
\p
\v 38 Jesús caj cꞌuchij tuꞌ butꞌaꞌan u baquer Lázaro yʌn u japꞌnin tunich caj u tucraj tu yor quireꞌ mʌꞌ u cꞌat yiric quimin mac. Tuꞌ butꞌij yʌn u mac u jor.
\v 39 Jesús caj yaꞌaraj:
\p ―Rucꞌsex ―quij―, u mac u jor tunich.
\p Marta, a yitsꞌin ixba Lázaro caj u yaꞌaraj tiꞌ:
\p ―Jaj Tsꞌurir ―quij―, tuꞌjij tin tꞌʌn quireꞌ toc yʌn cuatro qꞌuin caj butꞌij.
\p
\v 40 Jesús caj u yaꞌaraj tiꞌ:
\p ―Mʌꞌ wa tin waꞌaraj tech wa ca wacsic ta wor ca bin a wirej jach manan u mucꞌ Cꞌuj? ―quij Jesús.
\p
\v 41 Caj u rucꞌsob u tunichir u mac u jor tuꞌ butꞌaꞌan u baquer Lázaro. Jesús caj u pʌctaj ich caꞌanan caj u yaꞌaraj:
\p ―In Tet Cꞌuj ―quij―, quin waꞌaric tech: “Bayoꞌ” quireꞌ rajraꞌ ca wuꞌyic in tꞌʌn.
\v 42 In wer rajraꞌ ca wuꞌyic in tꞌʌn. Baxuc quin wac tiꞌ tech quireꞌ tiꞌ yʌn mac teraꞌ soc yubic baꞌ caj in waꞌaraj tech soc yacsicob tu yorob tech ta tuchiꞌtajen. 
\p
\v 43 Caj tsꞌoc yaꞌaric aroꞌ Jesús caj u cꞌam tꞌʌnaj:
\p ―Lázaro ―quen―, joqꞌuen tiꞌ taroꞌ ―quij Jesús.
\p
\v 44 A quimenoꞌ caꞌ joqꞌuij toc sʌsʌ cꞌʌxaꞌan u cꞌʌb yejer nocꞌ, baxuc u yoc xan. Baxuc u wich tapaꞌan yejer panyu. Jesús caj yaꞌaraj tiꞌob a mac tiꞌ yʌnob:
\p ―Jitex u nocꞌ soc u bin ―quij Jesús.
\s Cu tucricob bic tabar cu bin u chuquicob Jesús
\r (Mt. 26.1‑5; Mr. 14.1‑2; Lc. 22.1‑2)
\p
\v 45 Rajen yaꞌab u winiquirob judío a tiꞌ yʌnob yejer María tu yacsob tu yorob tiꞌ Jesús quireꞌ yerob yʌjtaquirob quireꞌ tu yirob Jesús u ricꞌsic Lázaro.
\v 46 A mac mʌꞌ tu yacsajob tu yorob quireꞌ mʌꞌ u cꞌat yiricob baꞌ cu betic Jesús. Rajen caj binob ich a fariseojoꞌ caj u tsicbʌtajob a baꞌ caj u betaj Jesús.
\v 47 Rajen u tsꞌurirob sacerdote yejer a fariseojoꞌ caj u muchꞌquintajob u bʌj u yet tsꞌurirob u winiquirob judío, caj yaꞌarob:
\p ―Baꞌ quic bin ic betejex tiꞌ a xiboꞌ a tar yʌnoꞌ quireꞌ tan u yesic carem u beyajob?
\v 48 Quireꞌ wa quic aric: “Tsireꞌej”, tu cotor mac cu bin u yacsicob tu yorob tiꞌ quireꞌ yerob yʌjtaquirob. A baywoꞌ cu bin acsaꞌbir ten a pimob quir ic tsꞌurintiquex, rajen u rey ich u cajar Roma cu bin u tsꞌictar yejeroꞌonex. Cu bin tuchiꞌtic a soldadojoꞌ caꞌ tacob u quinsicoꞌonex caꞌ tacob u rʌc jocꞌsicoꞌonex.
\p
\v 49 Chen tuririꞌ u yet tsꞌurirob u cꞌabaꞌ Caifás, rajiꞌ a jeꞌ yaxqꞌuinaꞌ cꞌuchij tu qꞌuinin u yocar u jer u jach tsꞌurir sacerdote, rajiꞌ Caifás. Rajiꞌ caj yaꞌaraj tiꞌob:
\p ―Mʌnaꞌ baꞌ a werex a techexoꞌ.
\v 50 Mʌꞌ wa ca najtiquex wa tsoy cu quimin tuririꞌ mac tiꞌ tu cotoroꞌonex soc tu cotor mac mʌꞌ u bin quinsbir ten u winiquirob romano.
\p
\v 51 A Caifásoꞌ mʌꞌ u bʌjiriꞌ tu yaꞌaraj a jeraꞌ quireꞌ rajiꞌ u jach tsꞌurir sacerdote quireꞌ cꞌuchij tu qꞌuinin u yocar u jer u jach tsꞌurir sacerdote.
\v 52 Mʌꞌ chen tiꞌ toꞌonex, quij Caifás, cu bin quinsbir Jesús. Cu bin quinsbir u parar Cꞌuj tiꞌ tu cotor a mac Cꞌuj yʌnin a tiꞌ yʌnob ich yocꞌocab soc u pꞌeriꞌquinticoꞌonex a mac a Cꞌuj yʌninoꞌ.
\v 53 Rajen u tsꞌurirob sacerdote seb caj u tucrajob u cꞌat u quinsicob Jesús.
\p
\v 54 Rajen Jesús mʌꞌ ju yes u bʌj tiꞌ u winiquirob judío. Tu junan caj binij yejer u camsʌwinicob ich u ruꞌumin Judea, caj bin ich tʌcay ruꞌum. Caj cꞌuchij ich u cajar Efraín. Tiꞌ pꞌatij yejer u camsʌwinicob.
\p
\v 55 Tabar u cꞌuchur tu qꞌuinin u quiꞌquiꞌ janʌnob u winiquirob judío. Raꞌ u qꞌuinin pascua, raꞌ u qꞌuinin cu cꞌʌꞌoticob tu potmastaꞌb ten yʌjmasirob u tꞌʌn Cꞌuj uch soc mʌꞌ u quimin u parar a yʌn rochaꞌb ten u naꞌ. Yaꞌab winiquirob caj rʌc binob ich u cajar Jerusalén cax mʌꞌ cꞌuchuc tu qꞌuinin pascua soc u nupꞌsic a baꞌ cu yaꞌaric ich u tꞌʌn Moisés soc tsoy yiricob Cꞌuj.
\v 56-57 Caj cꞌuchob u winiquirob judío ich u cajar Jerusalén. Caj yubob yaꞌaricob a baꞌ araꞌb tiꞌob ten u jach tsꞌurirob sacerdote yejer a fariseojoꞌ: “Wa mac cu yiric tuꞌ yʌn Jesús caꞌ tac yaꞌarej tuꞌ tu yiraj Jesús soc u bin chucbirob quir u maꞌcʌr.” Rajen tan u manob cʌxtaꞌbir Jesús. Tu cotor mac tiꞌ yʌn ich carem naj tan u pacran cꞌaticob tan yaꞌaricob:
\p ―Baꞌ ca tucric jeꞌ wa ju tar Jesús caꞌ bin cꞌuchuc tu qꞌuinin u quiꞌquiꞌ janʌn? ―baxuc tan u pacran tsicbarob tiꞌ Jesús.
\c 12
\s A xquicoꞌ cu jicꞌtic tsꞌac tu yoc Jesús
\r (Mt. 26.6‑13; Mr. 14.3‑9)
\p
\v 1 Yʌn seis u qꞌuinin quir u cꞌuchur tu qꞌuinin pascua. Caj binob Jesús yejer u camsʌwinicob ich u cajar Betania tu cʌjaꞌan Lázaro a tu ricꞌsaj Jesús tu quimirir.
\v 2 Marta caj u pʌyaj Jesús yejer u camsʌwinicob quir u quiꞌ janʌnob. Tiꞌ yʌn Lázaro yejer u jer macob tan u janʌnob yejer ich u pojcheꞌob. Marta cu tar purbir yoch tiꞌob.
\v 3 María, u yitsꞌin Marta, tu chꞌaj tuꞌ yʌn Jesús chumuc kilo a quiꞌ u boqueꞌ u cꞌabaꞌ nardo. Jach coꞌoj a nardojoꞌ caj u rʌc jicꞌtaj tu yoc Jesús, María caj u tisaj yejer u wʌcꞌʌs tsotser u joꞌr. Tu cotor u japnin yatoch tu rʌc bacꞌaj u boc nardo.
\v 4 Tiꞌ yʌn Judas Iscariote u yet janʌn Jesús, rajiꞌ u parar Simón Iscariote. Rajiꞌ tuririꞌ ich u camsʌwinicob Jesús chen rajiꞌ, Judas, cu wʌcꞌʌs bin u cꞌubic Jesús caꞌ quinsac. Rajiꞌ caj yaꞌaraj:
\p
\v 5 ―Wa tu canaj a jeꞌ quiꞌ u boc a tu jicꞌtaj tu yoc Jesús, a tu chen jaraj u taqꞌuin caꞌch tres cientos denarios ―u cꞌat yaꞌaric u taqꞌuin a mac a cu jaric tuririꞌ yaxqꞌuin tu cu beyaj―. Jach tsoy caꞌ u jʌsej tiꞌ a mac otsireꞌ ―baxuc caj yaꞌaraj Judas.
\p
\v 6 Judas mʌꞌ u jach tucric a mac otsir tu chen araj aroꞌ quireꞌ Judas cu cʌnantic u taqꞌuin u yet camsʌwinicob Jesús. Mʌꞌ ja wirej, a Judasoꞌ, cu chʌc aꞌcric taqꞌuin tu cu tsꞌabʌr u cʌnantej tiꞌ ten u yet camsʌwinicob Jesús.
\v 7 Jesús caj yaꞌaraj tiꞌ Judas:
\p ―Tsireꞌej mʌꞌ a waꞌaric aroꞌ quireꞌ tu cʌnantaj a jeroj soc u cꞌuchur tu qꞌuinin in quimin.
\v 8 Rajraꞌ tiꞌ yʌn otsir tuꞌ yʌnechex. Chen a tenoꞌ mʌꞌ rajraꞌ tiꞌ yʌnen tuꞌ yʌnechex ―quij Jesús.
\s U tsꞌurirob sacerdote cu tucricob u quinsej Jesús
\p
\v 9 Jach pim a winiquirob judío a tu muchꞌquintajob u bʌj ich u cajar Jerusalén caj yubob cꞌuchij Jesús yejer u camsʌwinicob ich u cajar Betania. Rajen binob u yirejob Jesús. Mʌꞌ chen cꞌuchob quir u yiricob Jesús quir yiric Lázaro xan a mac ricꞌsaꞌb tuꞌ quimen ten Jesús.
\v 10-11 Caj tarob ich u cajar Betania mʌꞌ toy u yacsajob tu yorob tiꞌ Jesús. Caj jocꞌob tu cajar Betania tu yacsob tu yorob tiꞌ Jesús quireꞌ yerob yʌjtaquirob quireꞌ tu yirob Lázaro rajiꞌ ricꞌsaꞌb ten Jesús tuꞌ quimen. Rajen u jach tsꞌurirob sacerdote tu pꞌeriꞌquintob yorob u tucricob u quinsicob Lázaro xan.
\s Jesús cʌpaꞌan ich u pach chan tsimin tan u yocar ich u cajar Jerusalén
\r (Mt. 21.1‑11; Mr. 11.1‑11; Lc. 19.28‑40)
\p
\v 12 Caj sasij a pimob tan u muchꞌquinticob u bʌj ich u cajar Jerusalén quireꞌ cꞌuchij tu qꞌuinin u quiꞌquiꞌ janʌnob u winiquirob judío. Caj yubob tan u cꞌuchur Jesús ich u cajar Jerusalén.
\v 13 Rajen caj jocꞌob u janchꞌʌtejob u reꞌ pajoꞌ caj jocꞌob tancab ich u cajar Jerusalén. U mʌchmʌnob u reꞌ pajoꞌ quir u binob u nupꞌicob Jesús ich bej. Cꞌam tan u tꞌʌnob tu cu tarob ich bej. Caj yaꞌarob:
\p ―Jeꞌ cu tar ij cʌjtaquirex jach quiꞌ ij corex quireꞌ bajeꞌrer tuchiꞌtaꞌb ten Cꞌuj. Caꞌ quiꞌac ij corex. Rajiꞌ cu bin yocar quir ic reyintiquex a tenoboꞌ u pararenob ic nunquirex Israel. Caꞌ ij carex tiꞌ Cꞌuj: “Jach caremech Cꞌuj.”
\p
\v 14 Tiꞌ yʌn chan tsimin taroꞌ. Jesús caj naquij quir u cʌptar tu pach an ten bic tsꞌibaꞌan ich u tꞌʌn Cꞌuj uch tan yaꞌaric:
\q
\v 15 A techexoꞌ, a xquicoꞌ a mac cʌjaꞌan ich u cajar Jerusalén, u jer u cꞌabaꞌ Sión, mʌꞌ a chꞌiquex sajaquir, jeꞌ u tar a mac caꞌ bin a reyintiquex. Jeꞌ u tar cʌpʌcbar tu pach chan tsimin.
\m Baxuc cu yaꞌaraꞌ tiꞌ Jesús uch.
\p
\v 16 U camsʌwinicob Jesús, mʌꞌ ju najtobiꞌ caj yirob Jesús u captar tu pach chan tsimin quir u sʌjtaꞌ ten tu cotor mac. Caj wʌcꞌʌs binij Jesús ich caꞌanan caj cꞌaj tiꞌob a baꞌ tsꞌibtaꞌb tiꞌ Jesús uch.
\p
\v 17 A pimob a tarob ich bej quir u nupꞌicob Jesús quireꞌ tu yubob yaꞌaric: “Rajiꞌ tu tꞌʌnaj caꞌ jocꞌac Lázaro tu butꞌ u baquer.
\v 18 Rajiꞌ tu ricꞌsaj Lázaro tuꞌ quimen.”
\v 19 Rajen a fariseojoꞌ caj u pacran arob:
\p ―Iriquex mʌꞌ cꞌuchaꞌan ij corex tiꞌ quireꞌ tu cotor mac tan u binob tu pach quir u cʌnicob u tꞌʌn ―baxuc caj u pacran arob.
\s A mac a cu tꞌʌn griego u cꞌat u tsicbarob yejer Jesús 
\p
\v 20 Tiꞌ yʌnob u winiquirob griego a rajraꞌ cu tarob cu cꞌuchur tu qꞌuinin u quiꞌquiꞌ janʌnob u winiquirob judío quir u cꞌujinticob Cꞌuj, irob u winiquirob judío. Caj tarob u sijejob baꞌ tiꞌ Cꞌuj xan.
\v 21 Robob caj tarob u tsicbarob yejer Felipe. Rajiꞌ u camsʌwinic Jesús a cu tar tu cajar Betsaida a tiꞌ yʌn tu ruꞌumin Galilea, caj u chich arajob tiꞌ:
\p ―Jach tsꞌurir, quen, in cꞌatob in wiricob Jesús ―quij. 
\p
\v 22 Rajen Felipe caj bin ich Andrés caj yaꞌaraj tiꞌ. Rajen caꞌturoꞌ u camsʌwinicob Jesús caj binob ich Jesús caj yaꞌarob tiꞌ.
\v 23 Jesús caj yaꞌaraj tiꞌob:
\p ―Cꞌuchij tin qꞌuin a tenoꞌ a tu tuchiꞌten Cꞌuj soc u caremquintiquen Cꞌuj, a tenoꞌ irenechex.
\v 24 Taj a baꞌ quin wac techex, u yijir u wich trigo cu tsꞌabʌr u wich wa cu pʌcꞌʌr ich ruꞌum. Wa pʌcꞌaꞌan cu netsꞌajic u wich trigo. Wa mʌꞌ pʌcꞌaꞌan chen tu junan yʌn. Baxuc ten ―quij Jesús―, wa quin quimin, yaꞌab mac cu bin u yacsicob tu yorob ten quir u tar tin pach ―quij Jesús―.
\v 25 Baxuc yejer techex. A mac mʌꞌ u cꞌat u cꞌubic u bʌj tiꞌ ten soc u quinsaꞌ irej ten, cu bin tsꞌabir u mucꞌyaj munt qꞌuin. Chen a mac u cꞌat u cꞌubic u bʌj tiꞌ ten soc u quinsaꞌ, rajiꞌ cu bin u cuxtar munt qꞌuin.
\v 26 Tu cotor mac u cꞌat u yamtiquen caꞌ tacob tin pach. Baxucoꞌ cu bin cꞌuchur ich caꞌanan tuꞌ yʌnen quireꞌ a mac a tu yamtajen cu bin quiꞌ acsaꞌbir ten Cꞌuj.
\s Yʌn in quinsaꞌ
\p
\v 27 Jesús caj yaꞌaraj:
\p ―Yaj in wuꞌyic tin wor bajeꞌrer. Mʌꞌ cꞌuchaꞌan in wor in wac tiꞌ in Tet Cꞌuj: “Yʌmtej ten, Tet”, quireꞌ taren ich yocꞌocab quir in mucꞌyaj a baꞌ cu bin tar ten. Rajen taren quir in mucꞌyaj.
\p
\v 28 Jesús caj u tꞌʌnaj Cꞌuj tan yaꞌaric:
\p ―Baxuc in cꞌat caꞌ u sʌj techob Cꞌuj.
\p Jeroj tuneꞌ, caj yubob u tꞌʌn caꞌanan. Cꞌuj caj u nuncaj, tiꞌ u tar u tꞌʌn ich caꞌanan:
\p ―Tan in toc sʌjtaꞌreꞌ, jeꞌ in caꞌ sʌjtaꞌreꞌ ―quij Cꞌuj―, raꞌ u qꞌuinin caꞌ bin quinsaquech.
\p
\v 29 A mac a tiꞌ yʌnob a tan u chꞌictarob caj yubob u tꞌʌn cꞌam a tar u tar ich caꞌanan. Robob caj u pacran arajob tan yaꞌaricob:
\p ―Baꞌ pecnʌjij sam, a tiꞌ ij cuꞌyajex?
\p U jer caj yaꞌarob:
\p ―Yʌjmasir u tꞌʌn Cꞌuj, rajiꞌ tꞌʌnʌjij. Rajiꞌ tin wuꞌyajob, tin tꞌʌn.
\p
\v 30 Jesús caj yaꞌaraj tiꞌob:
\p ―In Tet, Cꞌuj, caj u tꞌʌnajen, mʌꞌ chen jariꞌ tiꞌ ten, tiꞌ techex xan caꞌ a wuꞌyex soc a werex in Tet, Cꞌuj, cu yubic in tꞌʌn.
\v 31 Bajeꞌrer ―quij Jesús―, cꞌuchij tu qꞌuinin cu bin jʌsbir mac a yʌn u siꞌpireꞌ quireꞌ mʌꞌ biqꞌuin u cꞌat yacsicob tu yor ten. Bajeꞌrer ―quij Jesús―, cꞌuchij tu qꞌuinin xan cu bin rucꞌsaꞌbir u beyaj a quisinoꞌ quireꞌ rajiꞌ cu tsꞌurinticob ich yocꞌocab.
\v 32 Quireꞌ a tenoꞌ quin bin quinsbir ich cruz. A baywoꞌ tu cotor mac cu bin tar tuꞌ yʌnen quir u yacsicob tu yorob ten cax u winiquirob judío cax mʌꞌ u winiquirob judío.
\p
\v 33 Baxucoꞌ caꞌ u chaj u najticob tiꞌ cu bin quimin ich cruz.
\v 34 Rajen a pimob caj u nuncob tan yaꞌaricob:
\p ―Tij cuꞌyajex a baꞌ tsꞌibaꞌan ich u tꞌʌn Cꞌuj tiꞌ a Cristojoꞌ cu yaꞌaric: “Munt qꞌuin cu bin u cuxtar a Cristojoꞌ.” Wa Cristojech biquinin ca waꞌaric: “Bin in caꞌ quinsaꞌ ich cruz?” A techoꞌ ca waꞌaric: “Iren techex”, quireꞌ baxuc ca waꞌaric.
\p
\v 35 Jesús caj u yaꞌaraj tiꞌob:
\p ―Irej a mac a cu ximbar ich bej, cu jach pꞌisic u bʌj soc mʌꞌ u yacꞌbirchʌjʌr tu bej wa tabar u bin qꞌuin. Quireꞌ wa cu yacꞌbirchʌjʌr mʌꞌ yer tu cu bin. Aroꞌ baxuc ten, tabar in bin, a mac cu camsiquechex. Rajen toc acsex ta wor ten bajeꞌrer. Tiꞌ toy yʌn u qꞌuinin quir a wacsiquex ta worex soc a bin tacbirex munt qꞌuin. 
\v 36 Tiꞌ toj yʌnen tuꞌ yʌnechex, toc acsex ta worex ten. Quireꞌ a werex a wʌjtaquirenex a tenoꞌ soc a werex jach jaj u pararintechex Cꞌuj. Caj tsꞌoc yaꞌaric aroꞌ caj binij Jesús. Mʌꞌ u caꞌ u tsicbar tiꞌob.
\s Yaꞌab u winiquirob judío mʌꞌ cꞌuchaꞌan yorobob yacsicob tu yor ti Jesús
\p
\v 37 Cax yaꞌab tu yesaj carem beyaj Jesús tiꞌob, mʌꞌ tu yacsob tu yorob tiꞌ.
\v 38 Baxuc caj u nupꞌsaj a baꞌ araꞌb ten yʌjtseqꞌuir u tꞌʌn Cꞌuj Isaías uch. Quireꞌ Isaías tu tsꞌibtaj uch:
\q Jaj Tsꞌurir, quij Isaías, a mac a tin tsecꞌtaj a tꞌʌn tiꞌ uch, mʌꞌ tu yacsob tu yorob tiꞌ. Cax ta yamtaj tiꞌob, mʌꞌ tu sʌjtech Jaj Tsꞌurir, quij Isaías. A techoꞌ yʌn tu cotor a mucꞌ.
\p
\v 39 Rajen mʌꞌ cꞌuchaꞌan yor u winiquirob judío u yacsicob tu yor tiꞌ. Tu caꞌ ten Isaías tu tsꞌibtaj uch tan yaꞌaric: 
\q
\v 40 Acꞌbirquintaꞌb u wich ten Cꞌuj u winiquirob judío, bayiriꞌ caj chichquintaꞌb u joꞌr soc mʌꞌ u yiricob baꞌ soc mʌꞌ u najtic baꞌ xan, soc quir u cꞌaxicob yorob, soc u toꞌcarob ten Cꞌuj.
\m
\v 41 Baxuc caj yaꞌaraj Isaías uch quireꞌ u cꞌat caꞌ ij quirex Cristo, rajiꞌ yʌn tu cotor u mucꞌ. Rajen yaꞌaraj aroꞌ.
\p
\v 42 Cax yaꞌab u winiquirob judío mʌꞌ ju yacsob tu yorob tiꞌ Jesús. Chʌc yʌn u tsꞌurirob u winiquirob judío tu yacsajob tu yorob tiꞌ Jesús. Tu muc u acsajob tu yorob quireꞌ cu sʌjticob a fariseo cu bin jocꞌsabirob ich carem naj soc mʌꞌ u yʌnyʌn tar.
\v 43 Mʌꞌ ja wirej, cu tucricob soc tsoy irir ten u racꞌob chen mʌꞌ u tucricob soc tsoy irirob ten Cꞌuj, rajen mʌꞌ tu toc arob tiꞌ u racꞌob wa tu yacsob tu yorob. 
\s A mac mʌꞌ u yacsicob tu yorob tiꞌ Jesús cu bin tsꞌabir u mucꞌyajob ten Cꞌuj
\p
\v 44 Jesús caj u cꞌam araj tiꞌ a pimoꞌ tan yaꞌaric:
\p ―Tu cotor mac a cu yacsicob tu yorob tiꞌ in tꞌʌn, mʌꞌ chen ten cu yacsic tu yor tiꞌ in tꞌʌn. Baxuc cu yacsicob tu yor tiꞌ u tꞌʌn in Tet Cꞌuj a mac tu tuchiꞌtajen. 
\v 45 Tu cotor mac u yirmʌnen baxuc xan yirmʌn in Tet, a mac tu tuchiꞌtajen.
\v 46 A tenoꞌ ―quij Jesús―, iren quib quir in yercꞌacꞌtic techex a mac tiꞌ yʌn ich yocꞌocab. Tu cotor mac a cu yacsicob tu yorob ten mʌꞌ u mʌn tu yacꞌbirirob quireꞌ yerob Cꞌuj.
\v 47 A mac cu yubicob in tꞌʌn wa mʌꞌ ju yacsic tu yor tiꞌ in tꞌʌn mʌꞌ taren quir in taquic u joꞌr mac bajeꞌrer. Quireꞌ mʌꞌ taren quir in taquic u joꞌr mac quireꞌ taren quir in taquic mac.
\v 48 A maqueꞌ a mʌꞌ u sʌjtiquen a mʌꞌ ju yacsic tu yor tiꞌ in tꞌʌn caꞌ bin cꞌuchuc tu qꞌuinin u xur tꞌʌn cu bin tsꞌabir u mucꞌyaj in tꞌʌn a tin waꞌaraj tiꞌ. Rajiꞌ cu bin u taꞌquic u joꞌr quireꞌ mʌꞌ tu quibaj in tꞌʌn. Rajen cu bin tsꞌabir u mucꞌyaj quireꞌ mʌꞌ tu quibaj in tꞌʌn ―quij―.
\v 49 A tenoꞌ mʌꞌ tin chen araj techex in bʌjiriꞌ in tꞌʌn. In Tet Cꞌuj a mac tu tuchiꞌtajen tu yaꞌaraj baꞌ yʌn in wac techex. Baxuc a baꞌ yʌn in camsiquechex xan.
\v 50 In wer a baꞌ caj u yaꞌaraj ten in Tet, raꞌ quin tsecꞌtic techex soc yʌn techex a cuxtarex munt qꞌuin. Raꞌiriꞌeꞌ a tu yaꞌaraj ten in Tet, quin wac techex, quet bayiriꞌ quin wac techex.
\c 13
\s Jesús cu pꞌoꞌic u yoc u camsʌwinicob
\p
\v 1 Tabar u cꞌuchur tu qꞌuinin u quiꞌquiꞌ janʌnob u winiquirob judío u qꞌuinin pascua. Jesús yer cꞌuchij tu qꞌuinin tiꞌ cu wʌcꞌʌs bin ich u Tet caꞌanan. Jesús caj u yajquintaj a mac tsꞌaꞌb tiꞌ ten u Tet Cꞌuj. Jach manan caj u yajquintaj a tsꞌaꞌb ten u Tet.
\v 2-4 A quisinoꞌ toc acaꞌan tiꞌ Judas Iscariote. U tet Judas, Simón u cꞌabaꞌ. Rajen u cꞌat u cꞌubic Jesús soc u chucur. Jesús yer tsꞌaꞌb tiꞌ u beyaj ten u Tet Cꞌuj quir u cʌnantic tu cotor baꞌ. An ten bic caj tuchiꞌtaꞌb ich yocꞌocab yer xan jeꞌ u caꞌ bin ich caꞌanan ich u Tet Cꞌuj. Tiꞌ toy cu janʌnob oqꞌuin tu qꞌuinin pascua. Cax Jesús tarij ich Cꞌuj caj riqꞌuij caj u pitaj u caꞌ yarir u nocꞌ caj u chꞌaj u nocꞌ tu cu tisic baꞌ caj u witꞌcꞌʌxtaj tu nʌcꞌ, irej cꞌurew a nanij cu pꞌoꞌic yoc a mac acsaꞌb ich naj.
\v 5 Jesús caj u peꞌaj yaꞌarir ich palancan quir u pꞌoꞌic yocob u camsʌwinicob a curaꞌanob tu janʌnob. Caj u tisaj u yocob yejer a nocꞌoꞌ a tu witꞌcꞌʌxtaj tu nʌcꞌ.
\p
\v 6 Jesús caj cꞌuchij ich Simón Pedro quir u pꞌoꞌic u yocob caj yaꞌaraj:
\p ―Jaj Tsꞌurir, mʌꞌ jin najtic. Biquinin ca pꞌoꞌic in woc? ―quij.
\p
\v 7 Jesús caj u nuncaj tiꞌ, tan yaꞌaric:
\p ―A baꞌ quin betic bajeꞌrer mʌꞌ ja najtic chen pachir ca bin a najtic.
\p
\v 8 Pedro caj yaꞌaraj:
\p ―Mʌꞌ in chaꞌic a pꞌoꞌic in woc, mʌꞌ biqꞌuin.
\p Jesús caj u nuncaj tiꞌ, tan yaꞌaric:
\p ―Wa mʌꞌ jin pꞌoꞌic a woc, mʌꞌ ten yʌninechiꞌ.
\p
\v 9 Simón Pedro caj yaꞌaraj:
\p ―Jaj Tsꞌurir, quen, mʌꞌ chen in woc ca pꞌoꞌic, pꞌoꞌej in cꞌʌb xan yejer in joꞌr.
\p
\v 10 Jesús caj yaꞌaraj tiꞌ:
\p ―A mac tsꞌoc u yichir mʌꞌ baꞌwir cu pꞌobar tu cotor chen u yoc cu pꞌobar chen tiꞌ u yoc. Baxucoꞌ toc pꞌoꞌaꞌanechex. Mʌꞌ ja wirej, toc rucꞌsaꞌan a siꞌpirex chen tiꞌ yʌn tuririꞌ tu yʌnechex mʌꞌ rucꞌsaꞌan u siꞌpiriꞌ.
\p
\v 11 Quireꞌ Jesús yer Judas cu bin cꞌubic, rajen tu yaꞌaraj: “Tuririꞌ tuꞌ yʌnechex mʌꞌ rucꞌsaꞌan u siꞌpiriꞌ.”
\p
\v 12 Caj tsꞌoc u pꞌoꞌic yoc u camsʌwinic, Jesús tu caꞌ buquintaj u caꞌyarir u nocꞌ. Caj wʌcꞌʌs cura tu poꞌcheꞌir u janʌn caj u cꞌataj tiꞌob:
\p ―A wer wa biquinin caj in pꞌoꞌaj a woquex?
\v 13 Quireꞌ techex ca tꞌʌniquenex in wʌjcamsayʌjirechex, baxuc ca tꞌʌniquenex Jaj Tsꞌurir. Tsoy ca tꞌʌniquenex quireꞌ taj ten tin camsiquechex quireꞌ taj a Jaj Tsꞌurirenex xan.
\v 14 A tenoꞌ a Jaj Tsꞌurirenex, baxuc a yʌjcamsʌyʌjirenechex tan in pꞌoꞌic a woquex. Baxuc techex soc mʌꞌ a tucriquex jach noꞌjechex, caꞌ a yamtex a wet acsaꞌorirex.
\v 15 A techexoꞌ ta wirex baꞌ tin betaj, baxuc techex, rajraꞌ caꞌ a betex, an ten bic ten tin betaj.
\v 16 Taj a baꞌ quin waꞌaric techex, mʌꞌ tsoy wa ju cꞌurew cu tucric jach nenoꞌj u beyaj ―quij Jesús―, rajen mʌꞌ u bin u betic an ten bic u jach tsꞌurir. Mʌꞌ tsoy wa mac tuchiꞌtaꞌb cu tucric jach nenoꞌj u beyaj. Rajen bin u betic an ten bic a mac tuchiꞌtej.
\v 17 Wa ca najtiquex a jeꞌ quin camsiquechex ca bin a cʌniquenex. Rajen cu bin u quiꞌ tar a worex.
\p
\v 18 ’Mʌꞌ tan in tsicbar tiꞌ tu cotorechex. In wer mac tin tetajechex quir in camsiquechex. Chen tiꞌ yʌn tuririꞌ ich techex a mac tin tetaj, aroꞌ mʌꞌ quir u yamtiquen. A tenoꞌ tin chen tetaj quir in nupꞌsic a baꞌ tsꞌibaꞌan ich u tꞌʌn Cꞌuj tu cu yaꞌaric ich u tꞌʌn Cꞌuj uch: “A mac pꞌeriꞌ in janʌn yejeren a mac in wet man. Rajiꞌ cu bin u cꞌubiquen.” Raꞌ cu tsicbar tiꞌ ten.
\v 19 Mʌꞌ toy cꞌuchuc tu qꞌuinin u cꞌubiqueniꞌ quin toc aric techex soc a najtiquex soc caꞌ bin jach cꞌuchuc tu qꞌuinin u cꞌubiquen caꞌ bin a quiꞌ acsex ta worex ten. Quireꞌ a werex yʌjtaquirenechex.
\v 20 A mac a cu yacsic a mac tin tuchiꞌtaj, irej wa cu yacsiquen. A mac a cu yacsiquen, irej wa cu yacsic a mac a tu tuchiꞌtajeneꞌ.
\s Jesús cu yaꞌaric Judas cu bin u cꞌubic
\r (Mt. 26.20‑25; Mr. 14.17‑21; Lc. 22.21‑23)
\p
\v 21 Caj tsꞌoc yaꞌaric aroꞌ Jesús yaj cu yubic caj yaꞌaraj tiꞌ u camsʌwinicob:
\p ―Taj a baꞌ quin wac techex, tuririꞌ ich techex cu bin u cꞌubiquen.
\p
\v 22 Rajen u camsʌwinicob caj u yʌnxchun u pacran pʌcticob u bʌj quireꞌ mʌꞌ yerob mac tan u tsicbariꞌ tiꞌ.
\v 23 Tiꞌ yʌnen, quij Juan, rajiꞌ Jesús cu jach yajquintic jach bʌytʌc curaꞌan janʌn yejer Jesús.
\v 24 Simón Pedro caj yesaj tiꞌ Juan caꞌ u cꞌatej tiꞌ Jesús wa mac tan u tsicbar tiꞌ.
\v 25 Tiꞌ yʌn Juan bʌytʌc tuꞌ yʌn Jesús, rajen caj u cꞌataj: 
\p ―Mac aroꞌ? Jaj Tsꞌurir ―quij.
\p
\v 26 Rajen Jesús caj u nuncaj tiꞌ, tan yaꞌaric:
\p ―A mac a quin tsꞌic tiꞌ yoch pan a tsꞌoc in chuquic, rajiꞌ cu bin u cꞌubiquen.
\p Caj tsꞌoc u chuquic yoch pan caj u tsꞌaj tiꞌ Judas, rajiꞌ u tet Judas Simón Iscariote.
\v 27 Caj tsꞌoc u tsꞌabʌr yoch pan Judas, caj oc quisin tiꞌ Judas. Rajen Jesús caj u yaꞌaraj:
\p ―A baꞌ ca bin a betej bajeꞌrer toc sebquintej, betej bajeꞌrer.
\p
\v 28 U camsʌwinicob a mac yet janʌnob ich u pojcheꞌir mʌꞌ yerob biquinin caj yaꞌaraj aroꞌ tiꞌ Judas.
\v 29 Quireꞌ Judas raꞌ u beyaj quir u cʌnantic u taqꞌuin u yet camsʌwinicob, rajen caj u sosoc tucrajob Jesús tan yaꞌaric:
\p ―Joqꞌuen mʌnej a baꞌ ij cꞌat quir ij quiꞌquiꞌ janʌnex. 
\p Chen u jer caj u sosoc tucrajob araꞌb ten Jesús tiꞌ Judas caꞌ u jʌsej taqꞌuin tiꞌ a mac mʌnaꞌ.
\v 30 Caj tsꞌoc u jantic yoch pan Judas sep caj joqꞌuij, jach acꞌbir.
\s Jesús tu yaꞌaraj u jer u tꞌʌn ricꞌben
\p
\v 31 Caj tsꞌoc u bin Judas, Jesús caj u yaꞌaraj tiꞌ u camsʌwinicob: 
\p ―Bajeꞌrer cꞌuchij tu qꞌuinin cu bin u sʌjtiquen tu cotor mac. A tenoꞌ tu tuchiꞌ ten Cꞌuj a mac irenechex. Cu bin sʌjtaꞌbir Cꞌuj xan quireꞌ a baꞌ quin bin in betej. 
\v 32 Quireꞌ a baꞌ quin bin in betej cu bin sʌjtaꞌbir Cꞌuj ten mac. Baxuc a Cꞌujoꞌ cu bin u yiric jach caremen a tenoꞌ. Bajeꞌrer cꞌuchij tu qꞌuinin cu yiric caremen a tenoꞌ.
\v 33 In chan pararechex, tabar in bin, caꞌ bin a cʌxtiquenex an ten bic caj in waꞌaraj tiꞌob u winiquirob judío. Baxuc xan quin waꞌaric techex tuꞌ quin bin a tenoꞌ, mʌꞌ toy cꞌuchaꞌan a wor a tarex tuꞌ quin bin.
\v 34 Quin toc aric techex u jer in tꞌʌn ricꞌben. Quin wac techex: Yajquintex a pacran bʌjex. An ten bic quin yajquintic techex.
\v 35 Wa baxucoꞌ tu cotor cu bin u yerob in camsʌwiniquechex wa ca pacran yajquintex a bʌjex.
\s Jesús cu yaꞌaric tiꞌ Pedro: Jeꞌ a waꞌaric mʌꞌ a cꞌʌꞌoteneꞌ 
\r (Mt. 26.31‑35; Mr. 14.27‑31; Lc. 22.31‑34)
\p
\v 36 Simón Pedro caj u cꞌataj tiꞌ Jesús, tan yaꞌaric:
\p ―Jaj Tsꞌurir ―quij―, tub u wich a bin?
\p Jesús caj u nuncaj tiꞌ:
\p ―A tuꞌ quin bin a tenoꞌ mʌꞌ cꞌuchaꞌan a wor a tar bajeꞌrer. Chen pachir jeꞌ a tareꞌ ―quij Jesús.
\p
\v 37 Pedro, caj u yaꞌaraj:
\p ―Jaj Tsꞌurir ―quij―, biquinin ca waꞌaric mʌꞌ cꞌuchaꞌan in wor in tar ta pach bajeꞌrer? ―quij Pedro―. Cax quimiquen tiꞌ tech jach tsoy tin tꞌʌn.
\p
\v 38 Jesús caj yaꞌaraj tiꞌ:
\p ―A techoꞌ Pedro mʌꞌ a cꞌat a quiminiꞌ, taj quin wac tech mʌꞌ toy cꞌaynʌc a caxoꞌ mʌnaꞌ u nup u tenin caꞌ bin a waꞌarej mʌꞌ a cꞌʌꞌoteniꞌ. Tabar in bin, caꞌ bin a cʌxtiquenex a tenoꞌ.
\c 14
\s A tenoꞌ pꞌeriꞌen yejer in Tet Cꞌuj, quij Jesús
\p
\v 1 Jesús caj yaꞌaraj tiꞌ u camsʌwinicob:
\p ―Mʌꞌ a xacꞌ a tucriquex baꞌ, acsex ta wor tiꞌ Cꞌuj. Baxuc ten acsex ta worex ten xan.
\v 2 Tar quin binoꞌ ich in Tet Cꞌuj. Wa mʌꞌ taj caꞌch mʌꞌ in wac techex. Tar quin binoꞌ quir in tsoyquintic quir a wocarex quir a cʌjtarex.
\v 3 Cu tsꞌocar in tsoyquintiqueꞌ, jeꞌ in caꞌ tareꞌ quir in pʌyiquechex soc rajraꞌ tiꞌ yʌnechex tuꞌ yʌnen.
\v 4 A tuꞌ quin bin a tenoꞌ a toc erex bic tabar a tarex. 
\p
\v 5 Tomás caj u yaꞌaraj tiꞌ:
\p ―Jaj Tsꞌurir ―quij―, mʌꞌ in werob tuꞌ ca bin. Bic in weticob bic tabar in tar tuꞌ yʌnech?
\p
\v 6 Jesús caj u nuncaj tiꞌ, tan yaꞌaric:
\p ―Quireꞌ a tenoꞌ caꞌ bin cꞌuchuquechex tuꞌ yʌn in Tet Cꞌuj. Quireꞌ a tenoꞌ caꞌ bin a wetiquex a baꞌ taj. A tenoꞌ quin tsꞌic a cuxtarex ricꞌben. Chen a mac a cu yacsic tu yor ten cu bin u cꞌuchur tuꞌ yʌn in Tet Cꞌuj. A mac mʌꞌ u yacsic tu yor in tꞌʌn mʌꞌ cꞌuchaꞌan yor u yer Cꞌuj.
\v 7 Raꞌ u qꞌuinin mʌꞌ a werenexiꞌ, rajen mʌꞌ a werex in Tetiꞌ. Bajeꞌrer a chʌc erex in Tet xan quireꞌ tan a cʌnic a werenex xan.
\p
\v 8 Rajen Felipe caj yaꞌaraj tiꞌ:
\p ―Jaj Tsꞌurir ―quij―, chaꞌ in wiricob ic Tet Cꞌujex a baxucoꞌ tiꞌtiꞌ tenob.
\p
\v 9 Jesús caj yaꞌaraj:
\p ―Mun qꞌuin tiꞌ yʌnen yejerechex? Mʌꞌ toy a weren, Felipe? A mac yirmʌnen baxuc yirmʌn in Tet Cꞌuj xan. Biquinin ca wac ten: “Chaꞌ in wiricob ic Tetex Cꞌuj”?
\v 10 Mʌꞌ wa ta wacsex ta worex raꞌiriꞌenob yejer in Tet Cꞌuj? A baꞌ quin waꞌaric techex mʌꞌ in tꞌʌniꞌ. A quin waꞌaric techexoꞌ u tꞌʌn in Tet Cꞌuj. Mʌꞌ ja wirej, in Tet tiꞌ cʌjaꞌan tin pixam rajiꞌ cu betic a carem beyajoꞌ. 
\v 11 Acsex ta worex ten raꞌiriꞌenob yejer in Tet Cꞌuj. Wa mʌꞌ cꞌuchaꞌan a wor a wuꞌyic a baꞌ quin waꞌaric techex, rajen acsex ta worex tiꞌ a baꞌ quin betic.
\v 12 Taj a baꞌ quin wac techex. Acsex ta worex wa quin yamtiquechex soc quet bayiriꞌ carem a beyajex xan an ten bic ten carem in beyaj. Chen jach manan ca bin a betiquex quireꞌ caꞌ bin xiquen ich in Tet Cꞌuj.
\v 13 Quireꞌ ta wacsex ta worex ten, rajen cꞌuchaꞌan a worex a cꞌatic baꞌ tiꞌ Cꞌuj. Rajen a tenoꞌ quin bin in tsꞌic tu cotor a baꞌ ca cꞌatiquex tiꞌ in Tet. Soc a baxucoꞌ cu bin yaꞌaricob mac jach carem in Tet Cꞌuj quireꞌ ten tin yamtajechex ―quij Jesús―. Mʌꞌ ja wirej, u pararen Cꞌuj.
\v 14 Quireꞌ ca wacsiquex ta worex ten, rajen ca bin a cꞌatiquex baꞌ ten, rajen quin tsꞌic techex xan.
\s Jeꞌ in tuchiꞌtic techex u Tajꞌor u Pixam Cꞌuj
\p
\v 15 Jesús caj yaꞌaraj tiꞌob:
\p ―Wa ca yajquintiquenex jeꞌ a quibiquex tu cotor in tꞌʌn.
\v 16 Wa ca quibiquex in tꞌʌn jeꞌ in tꞌʌnic in Tet Cꞌuj soc u tsꞌic techex u Tajꞌor u Pixam Cꞌuj quir u yamtiquechex. Rajraꞌ tiꞌ yʌn yejerechex. Rajiꞌ cu cʌnantic in tꞌʌn xan a baꞌ jach tajeꞌ.
\v 17 A mac tiꞌ yʌn ich yocꞌocab mʌꞌ cꞌuchꞌaꞌan yorob u cꞌʌmic u Tajꞌor u Pixam Cꞌuj quireꞌ mʌꞌ u yacsicob tu yorob tiꞌ wa tiꞌ yʌn quireꞌ mʌꞌ yerob bic tabar cu beyaj. Quireꞌ caꞌ bin tac u Tajꞌor u Pixam Cꞌuj, jeꞌ a wetiquexeꞌ quireꞌ a wet binex yejer. Baxuc cu bin u cʌjtar ta pixamex.
\v 18 Mʌꞌ jin bin in pꞌʌtiquechex, jeꞌ in caꞌ tar soc tiꞌ yʌnen yejerechex tu caꞌ ten.
\v 19 A mac a tiꞌ yʌnob ich yocꞌocab, mʌꞌ yaꞌab u qꞌuinin cu bin yiriquenob. Chen techex rajraꞌ ca bin a wiriquenex quireꞌ ca bin a wiriquex in beyaj. Quireꞌ a tenoꞌ quin bin in cuxtar, rajen ca bin a cꞌʌmiquex ricꞌben cuxtar techex.
\v 20 Quireꞌ caꞌ bin tac u Tajꞌor u Pixam Cꞌuj quir u cʌjtar ta pixamex jeꞌ a cꞌʌꞌotiquex a tenoꞌ raꞌiriꞌen yejer in Tet Cꞌuj. Jeꞌ a cꞌʌꞌotiquex tiꞌ yʌnen yejerechex raꞌiriꞌen yejerechex quireꞌ tiꞌ yʌnen ta pixamex.
\v 21 A mac cu quibic in tꞌʌn a tu yubaj rajiꞌ cu yajquintiquen. A mac cu yajquintiquen rajiꞌ yajbir ten in Tet Cꞌuj. Baxuc ten quin yajquintic xan. Jeꞌ in tar tiꞌ soc u jach cꞌʌꞌotiquenob. 
\p
\v 22 Judas mʌꞌ raꞌ Iscariote caj yaꞌaraj tiꞌ Jesús:
\p ―Jaj Tsꞌurir ―quij―, biquinin mʌꞌ a wesic a bʌj tiꞌ tu cotor mac a tiꞌ yʌn ich yocꞌocab?
\p
\v 23 Jesús caj u nuncaj tiꞌ, tan yaꞌaric tiꞌ:
\p ―A mac a cu yajquintiqueneꞌ cu quibic a baꞌ quin wac tiꞌ. Rajiꞌ yajbir ten in Tet Cꞌuj. Quin tarob yejer in Tet quir in cʌjtarob tu pixamoꞌ.
\v 24 A mac a mʌꞌ u yajquintiquen, rajiꞌ mʌꞌ u quibic a baꞌ quin waꞌaric tiꞌ. Mʌꞌ ten in tꞌʌn a quin waꞌaric techexoꞌ. Rajiꞌ u tꞌʌn in Tet a mac tu tuchiꞌtajen.
\p
\v 25 ’Quin waꞌaric techex aroꞌ tiꞌ toy yʌnen yejerechex. 
\v 26 Quireꞌ tin cꞌataj tiꞌ in Tet caꞌ u tuchiꞌtej techex u Tajꞌor u Pixam Cꞌuj quir u yamtiquechex. Jeꞌ u camsiquechex tu cotor baꞌ. Baxuc jeꞌ u cꞌasic techex tu cotor a baꞌ caj in waꞌaraj techex uch.
\p
\v 27 ’Mʌꞌ toy xiquen, jeꞌ in chichquintic a worex. Mʌꞌ in chichquintic a worex an ten bic mac cu chichquintic u yor u racꞌob a tiꞌ yʌn ich yocꞌocabeꞌ. Quin bin in tsꞌic techex u quiꞌir in wor soc rajraꞌ quiꞌ a worex. Rajen mʌꞌ a xaꞌxacꞌ tucurex, baxuc mʌꞌ a chꞌiquex sajaquirex. 
\v 28 Quireꞌ tin waꞌaraj techex bin in caꞌ. Quireꞌ tin waꞌaraj techex jeꞌ in caꞌ tar in wiriquechex. Wa ca yajquintiquenex cu quiꞌ tar a worex quireꞌ wʌcꞌʌs bin in caꞌ ich in Tet Cꞌuj. In Tetoꞌ jach manan noꞌj, a tenoꞌ mʌꞌ nejach noꞌjeniꞌ.
\v 29 Quireꞌ quin wac techex aroꞌ tiꞌ toy yʌnen yejerechex quireꞌ mʌꞌ toy xiquen. Baxucoꞌ caꞌ bin xiquen jeꞌ a quibiquex a baꞌ tin waꞌaraj techexoꞌ.
\p
\v 30 ’Mʌꞌ yaꞌab u qꞌuinin quir in tsicbar yaꞌab techex quireꞌ tabar u cꞌuchur a quisinoꞌ quir u cʌxtiquen. Rajiꞌ cu cʌnantic tu cotor mac ich yocꞌocab a mac mʌꞌ yer Cꞌujoꞌ. Mʌꞌ ju cꞌuchur yor u betic mʌꞌ cꞌʌs baꞌ ten. 
\v 31 A tenoꞌ quin chen betic an ten bic tu yaꞌaraj ten in Tet. Baxuc soc yer mac quin yajquintic in Tet. Jeroj riqꞌuenex cuxex ―quij Jesús.
\c 15
\s A tenoꞌ iren u yaqꞌuir u wich uva
\p
\v 1 Jesús caj yaꞌaraj tiꞌ u camsʌwinicob:
\p ―A tenoꞌ ―quij―, iren u yaqꞌuir u wich uva. In Tet Cꞌuj irej a mac cu cʌnantic u yaqꞌuir u wich uva.
\v 2 Tu cotor mac cu tar tin wicnʌn irob u xaꞌyar yaqꞌuir uva. A mac a cu tar tin wicnʌn a mʌꞌ u betic a baꞌ u cꞌat in Tet Cꞌuj, rajiꞌ irej u xaꞌyar yaqꞌuir uva a mʌꞌ u tsꞌic u wicheꞌ. Wa ju xaꞌyar yaqꞌuir a mʌꞌ u tsꞌic u wich a mac cu cʌnantic u yaqꞌuir uva cu jancꞌubtic u xaꞌyar yaqꞌuir. Baxucoꞌ in Tet Cꞌuj cu bin u betej tiꞌ a mac a mʌꞌ u betic a baꞌ u cꞌat Cꞌuj. Chen a mac cu tar tin wicnʌn a cu betic a baꞌ u cꞌat Cꞌuj cu bin yamtaꞌbir ten Cꞌuj soc u man tu tsoyir. Rajiꞌ irej u xaꞌyar yaqꞌuir uva cu racʌr a baꞌ mʌꞌ tsoyeꞌ, ten a mac a cu cʌnantic soc u netsꞌic u wich.
\v 3 Mʌꞌ ja wirej, in Tet Cꞌuj tu toc rucꞌsaj a cꞌasirex a ta betajex quireꞌ ta wacsajex ta worex in tꞌʌn a tin waꞌaraj techex.
\v 4 Pꞌatenex tin wicnʌn soc in pꞌatʌr ta pixamex. Cꞌaj techex wa ju xaꞌyar yaqꞌuir wa mʌꞌ tiꞌ yʌn ich u jach aqꞌuir, mʌꞌ cꞌuchaꞌan yor u tsꞌic u wichiꞌ. Rajen, wa ca pꞌatʌrex tin wicnʌn soc in pꞌatʌr ta pixamex baxucoꞌ cꞌuchaꞌan a worex a betic a baꞌ u cꞌat Cꞌuj. Quireꞌ wa mʌꞌ a pꞌatʌrex tin wicnʌn mʌꞌ cꞌuchaꞌan a worex a betic a baꞌ u cꞌat Cꞌuj.
\p
\v 5 ’A tenoꞌ, iren u jach aqꞌuir uva, a techexoꞌ irechex u xaꞌyar yaqꞌuir uva. A mac a cu pꞌatar tin wicnʌn quin pꞌatar xan tu pixam rajiꞌob cu tsꞌic u wich, cu beticob a baꞌ u cꞌat Cꞌuj. A wʌcꞌʌs bʌjiriꞌex mʌꞌ cꞌuchaꞌan a worex tiꞌ mʌnaꞌ baꞌ, quireꞌ yʌn in yamtiquechex.
\v 6 A mac a mʌꞌ u cꞌat u quibic in tꞌʌn, rajiꞌ mʌꞌ u cꞌat u pꞌatʌr tin wicnʌn. Rajiꞌ irej u xaꞌyar yaqꞌuir uva a mʌꞌ u tsꞌic u wich. Rajen cu janchꞌʌctic. U xaꞌyar yaqꞌuir uva a tu janchꞌʌctaj cu tijir. Pachir cu tar u maric quir u toquic ich cꞌacꞌ.
\p
\v 7 ’Wa ca pꞌatʌrex tin wicnʌn, baxuc wa cu pꞌatʌr in tꞌʌn ta pixamex, cꞌuchaꞌan a worex a cꞌatiquex tu cotor baꞌ a cꞌatex tiꞌ Cꞌuj. Jeꞌ u tsꞌic techex.
\v 8 Wa rajraꞌ ca betiquex a jach tsoyoꞌ in Tet Cꞌuj cu bin sʌjtaꞌbir Cꞌuj ten tu cotor mac. Baxucoꞌ ca wesiquex in jach camsawiniquechex.
\v 9 An ten bic in Tet cu yajquintiquen, baxuc techex quin yajquintiquechex. Pꞌatenex soc in yajquintiquechex. 
\v 10 Wa ca quibiquex tu cotor a baꞌ quin wac techex. A baywoꞌ quin yajquintic techex an ten bic in Tet Cꞌuj cu yajquintiquen quireꞌ tin quibaj tu cotor a baꞌ caj u yaꞌaraj ten.
\p
\v 11 ’Rajen quin waꞌaric techex aroꞌ soc rajraꞌ quiꞌex a worex an ten bic ten quiꞌ in wor. A baywoꞌ jach manan quiꞌex a worex.
\v 12 A jeꞌ in tꞌʌnaꞌ tan in wac techex caꞌ a pacran yajquintiquex a bʌjex an ten bic ten caj in yajquin techex.
\v 13 A mac a cu cꞌubic u bʌj quir u quinsaꞌ tiꞌ a mac a cu jach yajquintic, rajiꞌ jach manan cu yajquintic. Baxuc quin bin in betej a tenoꞌ, rajen yʌn cʌniquenex. 
\v 14 Techex jach manan quin yajquintiquechex wa ca betiquex a baꞌ tin waꞌara techex bajeꞌrer.
\v 15 Bajeꞌrer raꞌiriꞌoꞌonex quireꞌ tin chaꞌ a najtiquex tu cotor a baꞌ in wuꞌymʌn ich in Tet Cꞌuj. A mac a cu beyaj mʌꞌ araꞌb ten u tsꞌurireꞌ tu cotor baꞌ cu tucric u betic. Chen ten tin toc araj techex rajen bajeꞌrer mʌꞌ in cꞌurewechex quireꞌ raꞌiriꞌoꞌonex.
\v 16 A techexoꞌ mʌꞌ ta tetajenex chen ten tin tetajechex. An ten bic u yaqꞌuir uva tsꞌaꞌb u beyaj ten Cꞌuj quir u wichʌncʌr. A tenoꞌ tin tsꞌaj techex a beyajex soc a wesic u beyaj Cꞌuj ta pixamex. U yaqꞌuir uva yʌn u qꞌuinin quir u wichʌncʌr. Chen mʌꞌ baxuc techex quireꞌ techex rajraꞌ cꞌuchaꞌan a worex a wesiquex u beyaj Cꞌuj ta pixamex. Rajraꞌ ca bin a betiquex aroꞌ quireꞌ ta wacsex ta worex ten. Rajen a baꞌ ca cꞌatiquex tiꞌ in Tet Cꞌuj jeꞌ u tsꞌic techex.
\v 17 A jeꞌ in tꞌʌnaꞌ tan in wac techex: caꞌ a pacran yajquintex a bʌjex.
\s U camsʌwinicob cu bin pꞌactabir ten a mac tiꞌ yʌn ich yocꞌocab
\p
\v 18 Jesús caj yaꞌaraj tiꞌ u camsʌwinicob:
\p ―Wa mac cu pꞌactiquechex mʌꞌ a pꞌʌtiquex in tꞌʌn, cꞌaj techex ten tu yʌn pꞌacten a tenoꞌ.
\v 19 Wa techex irechex a mac tiꞌ yʌn yocꞌocab cu yajquintiquechexob quireꞌ irechexob a mac tiꞌ yʌn yocꞌocab. Chen mʌꞌ irechex a mac tiꞌ yʌnob ich yocꞌocab quireꞌ ten tin tetajechex ich a mac a mʌꞌ ju yacsob tu yorob in tꞌʌn. Rajen cu bin u pꞌactiquechex a mac tiꞌ yʌnob yocꞌocab.
\v 20 Cꞌaj techex a baꞌ caj in waꞌara techex: “A mac a cu beyaj tiꞌ u jer, mʌꞌ noꞌj u beyaj. Chen u tsꞌurir a mac a cu beyaj, rajiꞌ jach noꞌj u beyaj.” Robob caj u chucob in pach, baxuc techex xan cu bin u chuquicob a pachex. Robob wa tu quibajob in tꞌʌn, baxuc techex cu bin u quibicob a tꞌʌnex xan.
\v 21 Baxuc tu cotor aroꞌ, cu bin u beticob tiꞌ techex quireꞌ mʌꞌ tu yacsob tu yorob in tꞌʌn quireꞌ mʌꞌ yerob mac tu tuchiꞌtajen.
\p
\v 22 ’Wa mʌꞌ taren in tsicbar tiꞌob uch, mʌꞌ chʌcaꞌan yiricob u siꞌpirob. Quireꞌ taren, rajen mʌꞌ cꞌuchaꞌan yor yaꞌaricob mʌnaꞌ u siꞌpirob.
\v 23 Chen a mac a cu pꞌactiquen baxuc cu pꞌactic in Tet xan.
\v 24 Wa mʌꞌ tin wesob tiꞌ carem beyaj an ten bic mʌnaꞌ mac yiramʌn uch, mʌꞌ chʌcaꞌan yiricob u siꞌpirob cax tu yirob a baꞌ tin betaj caj u pꞌactajenob yejer in Tet.
\v 25 Chen robob caj u nupꞌsaj tuꞌ tsꞌibaꞌan ich u tꞌʌn Cꞌuj uch: “Tu chen pꞌactajenob quireꞌ baxuc u cꞌatob u bʌjiriꞌ cu pꞌacticquenob.” Baxuc tsꞌibtaꞌb ten uch yʌjtseqꞌuirob u tꞌʌn Cꞌuj uch.
\p
\v 26 ’Caꞌ bin cꞌuchuc tu qꞌuinin cu bin tar u Tajꞌor u Pixam Cꞌuj a mac quin tuchiꞌtic soc u yamtiquechex. Taj a baꞌ cu bin yac techex quireꞌ tiꞌ u tar ich u Tet Cꞌuj. Rajiꞌ cu bin u tsecꞌtiquen ―quij Jesús―.
\v 27 Techex xan ca bin a tsecꞌtiquenex tiꞌob quireꞌ techex tiꞌ yʌnechex yejeren caj u yʌnxchun in beyaj hasta bajeꞌrer.

\c 16
\p
\v 1 ’Quin toc aric techex a jeraꞌ soc mʌꞌ a pꞌʌtiquex in tꞌʌn pachir quireꞌ a werex mac cu pꞌactiquex.
\v 2 Robob cu bin u jocꞌsiquechex tu cu naj cꞌujinticob Cꞌuj u winiquirob judío. Jeꞌ u cꞌuchur tu qꞌuinin xan jeꞌ u quinsiquechex xan quireꞌ cu tus tucricob wa quet u beyaj Cꞌuj a cu beticob.
\v 3 Baxuc cu bin u beticob techex quireꞌ mʌꞌ yerob in Tet Cꞌuj. Baxuc ten xan mʌꞌ yerenobiꞌ.
\v 4 Mʌꞌ ja wirej, quin toc aric techex aroꞌ bajeꞌrer soc caꞌ bin cꞌuchuc tu qꞌuinin cu chuquicob a pachex ca bin a cꞌʌꞌotiquex a baꞌ caj in toc araj techexeꞌ.
\s U Tajꞌor u Pixam Cꞌuj cu bin u tsecꞌtic tiꞌ toꞌonex Jesús 
\p ’Caj in yʌn tetajechex uch mʌꞌ jin toc araj techex quireꞌ tiꞌ toy yʌnen yejerechex. Mʌꞌ ju bin u tar tiꞌ techex aroꞌ hasta caꞌ bin xiquen.
\v 5 Jesús caj yaꞌaraj tiꞌ u camsʌwinicob. Bajeꞌrer bin in caꞌ ich in Tet Cꞌuj a mac tu tuchiꞌtajen. Mʌnaꞌ tuririꞌ techex a cꞌatmʌnex ten biquinin ca bin.
\v 6 Jach yaj tan a wuꞌyiquex quireꞌ tucur a caꞌex quireꞌ tin waꞌaraj techex bin in caꞌ ich in Tet.
\v 7 Quireꞌ taj quin wac techex. Jach tsoy tiꞌ techex caꞌ xiquen ich in Tet Cꞌuj. Quireꞌ wa mʌꞌ jin bin mʌꞌ ju tar u Tajꞌor u Pixam Cꞌuj. Chen wa caꞌ bin xiquen jeꞌ in tuchiꞌtic techex u Tajꞌor u Pixam Cꞌuj.
\v 8 Caꞌ bin tac u Tajꞌor u Pixam Cꞌuj jeꞌ u yesic soc chʌcaꞌan yiric tu cotor mac ich yocꞌocab yʌn u siꞌpirob. Baxuc xan, jeꞌ u yesic mac soc chʌcaꞌan yiricob bic tabar u cuxtaroꞌ, a jach tajoꞌ. Baxuc xan jeꞌ u yesic soc chʌcaꞌan yiric cu bin u jʌsbir tiꞌob.
\v 9 Jeꞌ u yesic soc chʌcaꞌan yiric yʌn u siꞌpirob quireꞌ mʌꞌ tu toc acsajob tu yorob ten quireꞌ ten quin taquicob. 
\v 10 Jeꞌ u yesic mac a cuxtaroꞌ a jach tajoꞌ an ten bic caj cuxrajen ich yocꞌocab quireꞌ mʌꞌ cꞌuchaꞌan yorob yiriquenob quireꞌ caꞌ bin tsꞌocac in beyaj bin in caꞌ caꞌanan.
\v 11 Jeꞌ u yesic soc chʌcaꞌan yiric Cꞌuj cu bin jʌsbirob quireꞌ toc jʌsaꞌanob ten Cꞌuj quir u binob mucꞌyajob munt qꞌuinob.
\p
\v 12 ’Yʌn toy yaꞌab quir in camsiquechex chen mʌꞌ cꞌuchaꞌan a worex a najtiquex bajeꞌrer. Quireꞌ mʌꞌ toy cꞌuchuc tu qꞌuinin quir a najtiquexiꞌ.
\v 13 Caꞌ bin tac u Tajꞌor u Pixam Cꞌuj cu bin u camsiquechex tu cotor a baꞌ jach tajoꞌ. Mʌꞌ ju bin u tsicbar techex u wʌcꞌʌs bʌjiriꞌ u tꞌʌn. Raꞌ cu bin u tsicbar techex a baꞌ araꞌb ten in Tet Cꞌuj. Jeꞌ u tsicbar tiꞌ techex a baꞌ cu bin tar ich yocꞌocab.
\v 14 Jeꞌ u tsicbar techex soc a sʌjtiquenex quireꞌ raꞌ u beyaj u Tajꞌor u Pixam Cꞌuj quir u tsecꞌtic tiꞌ techex tiꞌ ten soc a werex u jach tajiren a tenoꞌ.
\v 15 Tu cotor a baꞌ yʌn tiꞌ in Tetoꞌ tu cotor ten yʌnin. Rajen tin waꞌaraj techex u beyaj u Tajꞌor u Pixam Cꞌuj raꞌ quir u tsecꞌtic tiꞌ techex tiꞌ ten soc a werex u jach tajiren a tenoꞌ.
\s Caꞌ bin cꞌuchuc tu qꞌuinin jeꞌ u quiꞌ tar a worex, quij Jesús
\p
\v 16 Jesús caj yaꞌaraj:
\p ―Chen sasameꞌ ca bin a wiriquenex. Chen mʌꞌ yaꞌab u qꞌuinin mʌꞌ ja bin a wiriquenex. Pachireꞌ jeꞌ a caꞌ iriquenex. Cu tsꞌocar aroꞌ quin caꞌ bin ich in Tet Cꞌuj ―quij Jesús.
\p
\v 17 Jun yarob u camsʌwinicob caj u pacran aricob:
\p ―Baꞌ u cꞌat yaꞌaric aroꞌ?: “Chen sasameꞌ ca bin a wiriquenex. Chen mʌꞌ yaꞌab u qꞌuinin mʌꞌ ja bin a wiriquenex. Pachireꞌ jeꞌ a caꞌ iriquenex. Cu tsꞌocar aroꞌ quin caꞌ bin ich in Tet Cꞌuj”, quij Jesús.
\v 18 Baꞌ u cꞌat yaꞌaric: Sansameꞌ? Mʌꞌ ic najtic a baꞌ cu yaꞌaric ―baxuc cu pacran aꞌaricob u camsʌwinicob Jesús. 
\p
\v 19 Jesús caj u najtaj u cꞌatob u cꞌatic a baꞌ u cꞌat yaꞌaric, a baꞌ araꞌb tiꞌob sameꞌ. Rajen Jesús caj yaꞌaraj tiꞌob:
\p ―In wer a baꞌ ca pacran ariquexeꞌ. Chen sasameꞌ ca bin a wiriquenex. Chen mʌꞌ yaꞌab u qꞌuinin mʌꞌ ja bin a wiriquenex. Pachireꞌ jeꞌ a caꞌ iriquenexeꞌ. Cu tsꞌocar aroꞌ quin caꞌ bin ich in Tet Cꞌuj ―quij Jesús―.
\v 20 Taj a baꞌ quin waꞌaric techex. Ca bin a wocꞌarex, ca bin a tucurex. Chen a pimob cu bin u quiꞌ tar u yorob. Sansameꞌ ca chen tucurex. Pachireꞌ cu quiꞌ tarex a worex jach jaj.
\v 21 Caꞌ bin cꞌuchuc tu qꞌuinin a xquicoꞌ cu bin u rochic chan och. Tucur u caꞌ quireꞌ mucꞌyaj u caꞌ, chen caꞌ bin tsꞌocac u rochic chan och, cu tubur tiꞌ u mucꞌyaj a tu yubaj. Chen pachir quiꞌ yor quireꞌ tu rochaj chan och.
\v 22 Baxuc techex xan bajeꞌrer tucur a caꞌex, irej a xquicoꞌ. Cu man mʌꞌ yaꞌab u qꞌuinin jeꞌ a caꞌ iriquenex. Baxuc cu bin u quiꞌtar a worex xan. Mʌnaꞌ mac cu bin u rucꞌsic u quiꞌir a worex.
\p
\v 23 ’Caꞌ bin cꞌuchuc a ray qꞌuinoꞌ mʌꞌ ja bin a cꞌatic baꞌ ten. Taj a baꞌ quin wac techex. Caꞌ bin a tꞌʌnex Cꞌuj chich a wor caꞌ bin a tꞌʌnejex. Jeꞌ u tsꞌic techex tu cotor baꞌ quireꞌ ta cꞌʌnex in cꞌabaꞌ.
\v 24 Mʌꞌ toy a tumtex chen bajeꞌrer a yʌnx chun techex a cꞌatiquex tiꞌ in Tet. Tan a cꞌʌniquex in cꞌabaꞌ tu ca tꞌʌniquex Cꞌuj.
\s Toc cꞌuchaꞌan in wor tiꞌ tu cotor baꞌ ich yocꞌocab, quij Jesús
\p
\v 25 ’A tenoꞌ ―quij Jesús―, tin cꞌʌs mucraj a baꞌ tin waꞌaraj techex uch. Jeꞌ u cꞌuchur tu qꞌuinin mʌꞌ in mucric techex quin bin in toc aric techex in Tet Cꞌuj. 
\v 26 Jeꞌ u cꞌuchur tu qꞌuinin caꞌ bin xiquen ich in Tet Cꞌuj a ray u qꞌuininoꞌ. A bʌjiriꞌex ta junanex ca bin a cꞌatex baꞌ tiꞌ in Tet Cꞌuj quireꞌ ta wacsex ta worex ten. Mʌꞌ baꞌwir quin cꞌatic tiꞌ in Tet Cꞌuj tiꞌ techex. 
\v 27 Quireꞌ u bʌjiriꞌ in Tet cu yajquintiquechex. Cu yajquintiquechex quireꞌ ta yajquintenex quireꞌ techex ta quibex tiꞌ in tar ich Cꞌuj.
\v 28 Rajiꞌ taj, a tenoꞌ taren ich Cꞌuj teraꞌ ich yocꞌocab. Rajen bajeꞌrer quin pꞌʌtic yocꞌocab quireꞌ wʌcꞌʌs bin in caꞌ ich in Tet Cꞌuj.
\p
\v 29 U camsʌwinicob caj yaꞌarob tiꞌ:
\p ―Bajeꞌrer tan a tsicbar soc in najticob a baꞌ ca waꞌaric. Mʌꞌ tan a cꞌʌs mucric a baꞌ ta waꞌaraj tenob tu ca pꞌeriꞌquintic a baꞌ ca camsic tiꞌ tenob uch.
\v 30 A tenoboꞌ, in werob tu cotor baꞌ a wer. Quireꞌ a wer yʌn baꞌ quin cꞌaticob tech cax mʌꞌ toy in cꞌatob tiꞌ tech a toc er. Rajen mʌꞌ baꞌwir mac quir u cꞌatic tech baꞌ. Rajen quin quibicob tu tuchiꞌtech Cꞌuj.
\p
\v 31 Jesús caj yaꞌaraj tiꞌob:
\p ―A wacsmʌnex ta worex chen yʌn toy a cꞌatex.
\v 32 Tabar u cꞌuchur tu qꞌuinin ca bin a pꞌʌtiquenex tantanxer caꞌ bin xiquechex. Chen tin junan ca bin pꞌʌtenex. Chen mʌꞌ tin junaniꞌ quireꞌ tiꞌ yʌn in nup, rajiꞌ in Tet Cꞌuj.
\v 33 Quin waꞌaric techex tu cotor aroꞌ soc mʌꞌ a chꞌiquex sajaquirex quireꞌ ta wacsex ta worex ten. Tiꞌ toy cuxaꞌanechex ich yocꞌocab, jeꞌ a mucꞌyajex. Chen mʌꞌ a chꞌiquex sajaquirex quireꞌ a tenoꞌ tsꞌoc in toc rucꞌsic u mucꞌ u tsꞌurir a mac tiꞌ yʌnob ich yocꞌocab. Baxuc techex ca bin a rucꞌsiquex u mucꞌ u tsꞌurir a tiꞌ yʌn ich yocꞌocabeꞌ. 
\c 17
\s Jesús cu tꞌʌnic Cꞌuj tiꞌ u camsʌwinicob
\p
\v 1 Jesús caj tsꞌoc u yaꞌaric aroꞌ caj u nacsaj u wich caꞌanan quir u tꞌʌnic Cꞌuj. Caj yaꞌaraj:
\p ―Tet ―quij―, cꞌuchij tin qꞌuin esej tiꞌob a winicoꞌ jach caremen a tenoꞌ quireꞌ a pararen soc cꞌuchaꞌan in wor in wesic tiꞌ a winicoꞌ jach caremech xan.
\v 2 Quireꞌ ta tsꞌaj in cʌnantej tu cotor mac a tiꞌ yʌn ich yocꞌocab cax a mun tiꞌ yʌn soc cꞌuchaꞌan in wor in tsꞌic tiꞌob u cuxtar muntqꞌuin a mac ta tsꞌaja ten. 
\v 3 In Tet jach Cꞌujech quireꞌ mʌnaꞌ u jer baxuquech. A tenoꞌ Jesucristojen a mac a ta tuchiꞌtaj ich yocꞌocab. Tu cotor mac u yerech, baxuc u yeren xan. Jeꞌ u cꞌʌmicob u cuxtar munt qꞌuin.
\p
\v 4 ’Tsꞌoc in wesic tiꞌ tu cotor mac a tiꞌ yʌn ich yocꞌocab jach caremech a techoꞌ. Quireꞌ tin tsꞌocsaj in beyaj a ta tsꞌaja ten bajeꞌrer.
\v 5 Bajeꞌrer Tet ―quij Jesús―, esej tiꞌ tu cotor mac jach caremen a tenoꞌ ʌcʌtanech an ten bic tiꞌ yʌnen uch yejerech cax mʌnaꞌ toy ruꞌum uch.
\p
\v 6 ’A tenoꞌ, tin wesaj tiꞌob bicyʌraꞌech tiꞌ a mac ta tetaj ich yocꞌocab quir a tsꞌic ten. Tech yʌnin caꞌ ta tsꞌajob ten caj u quibob a tꞌʌn.
\v 7 Tu cotor baꞌ a ta tsꞌaja ten u tar tiꞌ tech in Tetech. 
\v 8 A tenoꞌ tin toc araj tiꞌob a tꞌʌn, a ta waꞌaraj ten. Robob caj u cꞌʌmajob a tꞌʌn quireꞌ yerob taj, tiꞌ in tar tub yʌnech. Caj u yacsajob tu yorob tech ta tuchiꞌtajen. 
\p
\v 9 ’A tenoꞌ ―quij Jesús―, quin cꞌatic tech caꞌ a yamtejob. Mʌꞌ jin cꞌatic tech quir a yamtic tu cotor mac ich yocꞌocab. Chen caꞌ a yamtej a mac a pararob a mac a ta tetaj caꞌ u yacsejob tu yor ten.
\v 10 Tu cotor mac tech yʌnin, ten yʌnin xan. Tu cotor a mac ten yʌnin tech yʌnin xan. Pꞌeriꞌ toꞌon yʌnin quireꞌ a baꞌ cu bin u beticob quin bin sʌjtaꞌbir.
\p
\v 11 ’Bajeꞌrer tar in caꞌ ich tech tu caꞌten. Mʌꞌ jin pꞌatʌr ich yocꞌocab. Chen robob cu bin u pꞌatʌrob ich yocꞌocab tu junanob. In Tet ʌcʌtan tech a mʌnaꞌ u siꞌpiroꞌ quin cꞌatic tech caꞌ a cʌnantej tu cotor mac a ta tsꞌaj ten uch. Soc cꞌuchaꞌan yorob tiꞌ wa baꞌ cu tar u tumtic yorob. Quin cꞌatic tech caꞌ a cʌnantej tiꞌob soc pꞌeriꞌ u tucurob an ten bic tenob quireꞌ pꞌeriꞌ in tucurob xan.
\v 12 Tiꞌ toy yʌnen yejerob ich yocꞌocab a mac a ta tsꞌaja ten tin cʌnantajob tin camsaj tiꞌob a baꞌ a cꞌat. Tin cʌnantaj soc mʌꞌ u satʌrob. Chen tiꞌ toy cu sayʌrob tin pach a mac a ta tsꞌaja ten. Chen tuririꞌ satij. Quireꞌ tiꞌ tsꞌibaꞌan ich u tꞌʌn Cꞌuj cu bin satʌr.
\p
\v 13 ’Quireꞌ tar in caꞌ ta wicnʌn, Tet. Chen tan in tꞌʌniquech tiꞌob, tiꞌ toy yʌnen yejerob teraꞌ ich yocꞌocab. Soc cu yubicob soc cu chichquintaꞌr yorob quireꞌ in tꞌʌn. 
\v 14 Tin waꞌaraj tiꞌob a tꞌʌn. Bajeꞌrer robob caj pꞌactabir ten mac. Quireꞌ mʌꞌ pꞌeriꞌob u tucurob yejer a mac tiꞌ yʌn yocꞌocab. Quireꞌ baxuc ten ―quij Jesús―, mʌꞌ pꞌeriꞌ in tucur yejer a mac tiꞌ yʌn ich yocꞌocab.
\v 15 Mʌꞌ tan in cꞌatic tech caꞌ a jocꞌsicob ich yocꞌocab. Tan in cꞌatic tech caꞌ a cʌnantob tiꞌ a quisinoꞌ soc mʌꞌ u pꞌʌticob u tꞌʌn Cꞌuj.
\v 16 Quireꞌ mʌꞌ pꞌeriꞌ u tucurob yejer a mac tiꞌ yʌn ich yocꞌocab quireꞌ baxuc ten ―quij Jesús―, mʌꞌ pꞌeriꞌ in tucur yejer a tiꞌ yʌn ich yocꞌocab.
\v 17 Tsoyquintej yorob yejer a tꞌʌn quireꞌ a tꞌʌn a techoꞌ, rajiꞌ taj.
\v 18 An ten bic ta tuchiꞌtajen ich a mac a tiꞌ yʌnob yocꞌocab quir in waꞌaric a tꞌʌn. Baxuc tiꞌob quin tuchiꞌtic ich yocꞌocab quir u yaꞌaricob a tꞌʌn yocꞌocab.
\v 19 Quireꞌ tan in cꞌubic in bʌj quir in betic a baꞌ a cꞌat quireꞌ quin yajquinticob xan soc jach jaj tech yʌninob tu cotorob. Cꞌuchaꞌan yorob u beticob aroꞌ quireꞌ baxuc tin betaj ten xan.
\p
\v 20 ’Mʌꞌ chen tiꞌob quin cꞌatic tech, quin cꞌatic tech tiꞌob a mac a cu bin u yacsic tu yor pachir caꞌ bin yubej u tsecꞌticob a tꞌʌn.
\v 21 Quin tꞌʌniquech tiꞌob, Tet, soc pꞌeriꞌob u tucurob an ten bic tech yejeren, Tet, pꞌeriꞌenob in tucurob. Soc tu cotor mac cu bin u yacsicob tu yorob tech ta tuchiꞌtajen.
\v 22 A tenoꞌ tin tsꞌaja tiꞌob u tsoyir u pixamob an ten bic ta tsꞌajten u tsoyir in pixam soc pꞌeriꞌ u tucurob an ten bic tenob pꞌeriꞌ in tucurob xan ―quij Jesús―. 
\v 23 A tenoꞌ tiꞌ yʌnen tu pixamob, a techoꞌ tiꞌ yʌnech tin pixam xan soc rajiꞌob jach jaj pꞌeriꞌob u tucurob soc tu cotor mac yerob tech ta tuchiꞌtajen soc yerob xan tech ta yajquintaj a mac a cu yacsicob tu yorob in tꞌʌn an ten bic ten ca yajquintiquen, Tet.
\p
\v 24 ’Tet ―quij Jesús―, in cꞌat u tarob a mac a ta tsꞌaja ten tuꞌ quin bin a tenoꞌ soc munt qꞌuin tiꞌ yʌnob yejerenob. Soc yiricob a tenoꞌ u sasiriren a ta tsꞌaja ten quireꞌ ta yajquinten cax mʌnaꞌ toy yocꞌocab uch.
\v 25 In Tetech, Cꞌuj, taj a wor a techoꞌ. A mac a tiꞌ yʌn ich yocꞌocab mʌꞌ yerech chen ten in werech. In camsʌwinicob yerob tech ta tuchiꞌtajen.
\v 26 Tin camsaj tiꞌob soc yerechob. Tiꞌ toy jach yaꞌab u qꞌuinin bin in camsic tiꞌob soc yerechob a techoꞌ jach manan. Soc u yajquintiquechob an ten bic ca yajquintiquen soc tiꞌ quin cʌjtar ich u pixamob, ―baxuc caj u tꞌʌnaj Cꞌuj Jesús.
\c 18
\s Jesús caj chuquij ten u tsꞌurirob u winiquirob judío 
\r (Mt. 26.47‑56; Mr. 14.43‑50; Lc. 22.47‑53)
\p
\v 1 Caj tsꞌoc u tꞌʌnic Cꞌuj Jesús caj jocꞌ yejer u camsʌwinicob. Caj u chꞌʌctaj pʌchij chan jaꞌ u cꞌabaꞌ Cedrón. Tiꞌ cꞌuchij tuꞌ yʌn u chan corir u pʌcꞌar Olivo. Tiꞌ mani yejer u camsʌwinicob yaran u cheꞌer Olivo.
\v 2 Judas a cu bin u cꞌubic Jesús yer tu yʌn u chan corir quireꞌ tiꞌ nanij Jesús cu bin yejer u camsʌwinicob. 
\v 3 Tiꞌ cꞌuchij Judas yejer yaꞌab soldados yejer policía a cu beyajob ich carem naj tu cu naj cꞌujinticob Cꞌuj u winiquirob judío. Robob tuchiꞌtaꞌb ten u jach tsꞌurirob sacerdote yejer a fariseojoꞌ. Caj tarob u mʌchmʌnob tʌjteꞌ yejer u quib yejer u mascab xan.
\v 4 Jesús yer tu cotor baꞌ a baꞌ cu bin tar tiꞌ rajen rajiꞌ natsꞌij ich a pimoꞌ a cu tarob caj u cꞌataj tiꞌob: 
\p ―Mac tan a cʌxtiquex?
\p
\v 5 Caj u nuncob tan yaꞌaricob:
\p ―Tan in cʌxticob Jesús a cu tar ich u cajar Nazaret. 
\p Jesús caj u nuncaj tiꞌob tan yaꞌaric:
\p ―Rajiꞌen.
\p Tiꞌ yʌn Judas xan yejer a mac tarob tan u cꞌubic Jesús tiꞌ a pimob.
\v 6 Caj tsꞌoc u yaꞌaric Jesús: “Rajiꞌen”, caj cuncun pachnʌjob a mac a cu tarob u chuquicob Jesús caꞌch. Sep caj rubob ich ruꞌum.
\v 7 Jesús caj u caꞌ cꞌataj tiꞌob:
\p ―Mac tan a cʌxtiquex?
\p Caj u nuncajob:
\p ―Jesús a cu tar ich u cajar Nazaret tan in cʌxticob. 
\p
\v 8 Jesús caj u yaꞌaraj tiꞌob:
\p ―Tin waꞌaraj techex, rajiꞌen a ta wuꞌyajex in waꞌaric techex. Rajen robob in camsʌwinicob tsireꞌej u binob a tiꞌob quireꞌ chen ten ca cʌxtiquenex.
\p
\v 9 Jesús caj yaꞌaraj tiꞌob baxucoꞌ soc u nupꞌsic a baꞌ caj u yaꞌaraj tiꞌ Cꞌuj caj u tꞌʌnaj sam caj yaꞌaraj: “A mun ta tsꞌaja teneꞌ mʌꞌ ju bin saꞌtʌr”, baxuc caj u yaꞌaraj Jesús tiꞌ Cꞌuj uch.
\p
\v 10 Simón Pedro u chꞌaꞌmʌn u mascab caj u jarar tu pix u mascab caj u chꞌʌcaj u xiquin, rajiꞌ u cꞌurew u jach tsꞌurir sacerdote. Rajiꞌ u cꞌabaꞌ u cꞌurew Malco. Caj u racchꞌʌctaj u xiquin ich u noꞌoj.
\v 11 Jesús caj u yaꞌaraj tiꞌ Pedro:
\p ―Wʌcꞌʌs jupej a mascab tu pix. Wa baxuc ca betic mʌꞌ in bin in mucꞌyaj an ten bic in Tet u cꞌat in mucꞌyaj. 
\s Jesús cu bin purbir ʌcʌtan u jach tsꞌurir sacerdote u cꞌabaꞌ Anás
\r (Mt. 26.57‑58; Mr. 14.53‑54; Lc. 22.54)
\p
\v 12 Rajen u capitán yejer u soldado yejer policía a cu beyajob tiꞌ sacerdote caj u chucob Jesús caj u cꞌʌxob u cꞌʌbob, quir u binob u purej.
\v 13 Caj yʌn chꞌic binob u purob ich u jach tsꞌurir sacerdote, u cꞌabaꞌ Anás. Anás, rajiꞌ tu yʌcantaj Caifás. U jaꞌan Caifás, rajiꞌ u jach tsꞌurir sacerdote, raꞌ u yaxqꞌuinin caj quinsaꞌb Jesús.
\v 14 Mʌꞌ u jer Caifás, raꞌiriꞌ a tu yaꞌaraj:
\p ―Jach tsoy caꞌ quimic tuririꞌ mac tiꞌ tu cotoroꞌonex quireꞌ cax mʌꞌ tu cotoroꞌonex quij quiminex ―quij. 
\s Pedro cu yaꞌaric mʌꞌ u cꞌʌꞌotic Jesús
\r (Mt. 26.69‑70; Mr. 14.66‑68; Lc. 22.55‑57)
\p
\v 15 Simón Pedro, quij Juan, caj binenob tu pach Jesús quireꞌ u jach tsꞌurir u cꞌʌꞌoren, quij Juan. Tar binen ich u japnin tu reꞌaꞌan naj a yatochoꞌ u jach tsꞌurir sacerdote tu yʌn Jesús xan.
\v 16 Tar pꞌat Pedro tancab bʌytʌc tuꞌ yʌn u mac u jor yatoch u jach tsꞌurir sacerdote. Quireꞌ u cꞌʌꞌomʌnenob, rajen binen in waꞌarej tiꞌ a mac a cu cʌnantic u jor yatoch soc u yacsaꞌ Pedro. Rajen chaꞌb yocar Pedro tu japnin yatoch tu reꞌaꞌan.
\v 17 Rajen a mac cu cʌnantic u jor naj, rajiꞌ xquic, caj u cꞌataj tiꞌ Pedro:
\p ―Mʌꞌ wa tech u camsʌwiniquech a jeꞌ xibaꞌ?
\p Pedro caj u nuncaj tan yaꞌaric:
\p ―Mʌꞌ teniꞌ ―quij Pedro.
\p
\v 18 Tiꞌ chꞌicaꞌanob u cꞌurewob u jach tsꞌurir sacerdote yejer u policía u jach tsꞌurir sacerdote. Tu nutsꞌob u qꞌuich quireꞌ queꞌer. U cꞌacꞌ a tu tꞌʌbajob rajiꞌ u chuquir. Tu cu qꞌuichob tiꞌ chꞌicaꞌan Pedro xan, tan u qꞌuich xan yejerob.
\s Yʌn toc u joꞌr Jesús ten u jach tsꞌurir sacerdote
\r (Mt. 26.59‑66; Mr. 14.55‑64; Lc. 22.66‑71)
\p
\v 19 U jach tsꞌurir sacerdote caj u yʌnxchun u cꞌatic tiꞌ Jesús:
\p ―Mun yʌn a camsʌwinic tech? Baꞌ ta camsaj tiꞌob xan? 
\p
\v 20 Jesús caj u yaꞌaraj:
\p ―Ten ―quij Jesús―, mʌꞌ jin mucraj ich tu cotor mac caj in camsaj tiꞌob ich ʌcʌtan tu cotor mac. Rajraꞌ quin camsicob ich carem naj tu cu naj cꞌujinticob Cꞌuj tu cu muchꞌquinticob u bʌj u winiquirob judío. Baxuc ich chan naj tu cu naj cꞌujinticob Cꞌuj u winiquirob judío, rajraꞌ tin camsajob. Mʌꞌ jin muc u camsajiꞌ. 
\v 21 Biquinin ca cꞌatic ten? ―quij Jesús―. Cꞌatej a wuꞌyej tiꞌob a mac tu yubob in camsicob. Robob yerob a baꞌ caj in waꞌaraj tiꞌob.
\p
\v 22 Jesús caj tsꞌoc u yaꞌaric aroꞌ, tiꞌ yʌn tuririꞌ policía a cu beyaj ich carem naj caj u tacꞌ jʌtstaj Jesús, caj yaꞌaraj tiꞌ Jesús:
\p ―Biquinin ca nunquic baxucoꞌ tiꞌ u jach tsꞌurir sacerdote? 
\p
\v 23 Jesús caj u nuncaj tiꞌ tan yaꞌaric:
\p ―Wa cꞌas tin waꞌaraj, arej ten. Tuꞌ yʌn cꞌas tin waꞌaraj? Quireꞌ mʌꞌ cꞌas tin waꞌaraj. Biquinin ca tacꞌ jʌtstiquen? 
\p
\v 24 Anás tu tuchiꞌtaj Jesús ich Caifás toc cꞌʌxaꞌan. Rajiꞌ u jach tsꞌurir sacerdote a tan tu yocar u tsꞌurir sacerdote. 
\s Pedro cu maꞌquintic mʌꞌ ju cꞌʌꞌotej Jesús
\r (Mt. 26.71‑75; Mr. 14.69‑72; Lc. 22.58‑62)
\p
\v 25 Tiꞌ toy yʌn Pedro, tiꞌ chꞌicaꞌan qꞌuich. A mac yet qꞌuich caj u cꞌataj tiꞌ:
\p ―Mʌꞌ wa tech u camsʌwiniquech a jeꞌ xibaꞌ?
\p Pedro caj u caꞌ maꞌquintaj:
\p ―Mʌꞌ teniꞌ ―quij.
\p
\v 26 Tiꞌ yʌn u cꞌurew u jach tsꞌurir sacerdote. Rajiꞌ u bʌjob a mac chꞌac u xiquin ten Pedro. Caj u cꞌataj tiꞌ: 
\p ―Mʌꞌ wa tin wirech yejer a ra xiboꞌ ich u chan corir u pʌcꞌar Olivo?
\p
\v 27 Pedro caj u caꞌ maꞌquintaj:
\p ―Mʌꞌ ten ta wirajeniꞌ.
\p Sasameꞌ caj cꞌaynʌj cax.
\s Jesús ʌcʌtan ich Pilato
\r (Mt. 27.1‑2, 11‑14; Mr. 15.1‑5; Lc. 23.1‑5)
\p
\v 28 Caj jocꞌsaꞌb Jesús ich Caifás caj bin purbirob ich u palacio gobernador soc caꞌ toꞌcac u joꞌr. U cꞌabaꞌ u palacio gobernador pretorio, u cuchir tu cu naj taꞌquic u joꞌr mac. Chen tabar u sastar. U jach tsꞌurir sacerdote yejer u racꞌob mʌꞌ ju yocarob ich palacio. Mʌꞌ ja wirej, caꞌ bin cꞌuchuc tu qꞌuinin pascua mʌꞌ u xacꞌticob u bʌj yejer a mʌꞌ u winiquirob judío. Mʌꞌ toy u jantob yoch u qꞌuinin pascua. Wa cu yocarobeꞌ mʌꞌ u chaꞌbʌr u janticob quireꞌ baxuc u winiquirob judío nanij cu beticob.
\v 29 Rajen Pilato caj jocꞌ tuꞌ yʌnob, caj u cꞌataj tiꞌob: 
\p ―Baꞌ siꞌpir yʌn tiꞌ quir a tar a puric tenex?
\p
\v 30 Caj u nuncajob tan yaꞌaricob:
\p ―Wa mʌnaꞌ u siꞌpir uch mʌꞌ jin tarob in cꞌubicob tech. 
\p
\v 31 Pilato caj u yaꞌaraj tiꞌob:
\p ―Toc chꞌaꞌej techex a wʌcꞌʌs bʌjiriꞌeꞌ. Taꞌquej u joꞌr an ten bic tsꞌibaꞌan ich a tꞌʌn techex.
\p U jach tsꞌurir sacerdote caj u nuncaj tiꞌ:
\p ―U tꞌʌn u winiquir romano cu yaꞌaric mʌꞌ cꞌuchaꞌan in worob in quinsicob mac quireꞌ raꞌ a beyaj tech. 
\p
\v 32 Baxuc cu bin u tar tiꞌ Jesús an ten bic caj u yaꞌaraj uch. Cu bin quinsbir ich cruz ten u winiquirob romano. 
\v 33 Rajen Pilato caj caꞌ oquij tu cuchir tu nanij u taꞌquic u joꞌr mac. Pilato caj u yaꞌaraj tiꞌ Jesús:
\p ―In cꞌat in wuꞌyej wa tech u reyech u winiquirob judío? 
\p
\v 34 Jesús caj u yaꞌaraj:
\p ―Baxuc wa ca tucric tech wa yʌn mac tu yaꞌaraj tech tiꞌ ten?
\p
\v 35 Pilato caj u nuncaj, tan yaꞌaric:
\p ―Bic in wetic aroꞌ mʌꞌ u winiquir judíojen. A wet winiquirob judío yejer u jach tsꞌurirob sacerdote a mac tu cꞌubech tiꞌ ten. Baꞌ ta betaj tech tiꞌob?
\p
\v 36 Jesús caj u nuncaj tiꞌ tan yaꞌaric:
\p ―A tenoꞌ mʌꞌ in reyintic a teraꞌ ich yocꞌocab. Wa tin reyintic a teraꞌ, in camsʌwinicob uch jeꞌ u yamtiquenob soc mʌꞌ u chuquiquenob uch u policía a cu beyajob ich carem naj yejer soldado. Rajen uch mʌꞌ jin tar ʌcʌtan tech uch soc a taꞌquicob in joꞌr.
\p
\v 37 Pilato caj u yaꞌaraj tiꞌob:
\p ―Jaj a techoꞌ ca waꞌaric reyech ―quij.
\p Jesús caj u nuncaj tiꞌ:
\p ―A tenoꞌ reyen, rajen taren ich yocꞌocab caj u rochen in nʌꞌ soc in tsecꞌtic u tꞌʌn Cꞌuj a baꞌ jach taj. Tu cotor mac a ju cꞌat u cʌxtic a baꞌ jach taj cu yubic in tꞌʌn.
\p
\v 38 Pilato caj u yaꞌaraj:
\p ―Bic yerob mac baꞌquiriꞌ taj?
\s Jesús araꞌb caꞌ quinsaꞌc
\r (Mt. 27.15‑31; Mr. 15.6‑20; Lc. 23.13‑25)
\p Pilato caj tsꞌoc u yaꞌaric aroꞌ caj wʌcꞌʌs jocꞌ tuꞌ yʌn u jach tsꞌurirob sacerdote. Caj u yaꞌaraj tiꞌob: 
\p ―Mʌꞌ jin wiraj wa yʌn u siꞌpir.
\v 39 Quireꞌ techex nanij quin chaꞌic a tenoꞌ a mac mʌcaꞌan cu cꞌuchur tu qꞌuinin pascua. A cꞌatex wa jin chaꞌic a reyex techex u winiquirex judío?
\p
\v 40 Tu cotorob caj cꞌam awʌtꞌnʌjob tan yaꞌaricob:
\p ―Mʌꞌ a chaꞌic aroꞌ, chaꞌej Barrabás.
\p A Barrabásoꞌ rajiꞌ cu yaꞌcric baꞌ.

\c 19
\p
\v 1 Pilato caj yaꞌaraj u jatsꞌʌr Jesús. Rajen u soldado Pilato caj u chꞌajob Jesús caj u jʌtsꞌajob u pach Jesús. 
\v 2 A soldadojoꞌ caj u jitꞌajob qꞌuiꞌix caj u tʌcʌjob caj u pꞌoꞌquintaj Jesús. Caj u tʌcob u buquintej Jesús u cꞌʌrʌb nocꞌ. Rajiꞌ u nocꞌ chʌc irej cu buquintic a reyoꞌ.
\v 3 Caj u tus tꞌʌnajob irej wa rey tan yaꞌaricob:
\p ―Caꞌ cuxraquech yaꞌab u qꞌuinin u reyech u winiquirob judío ―baxuc nanij cu tꞌanic jach rey. Rajraꞌ tan u tacꞌ jʌtsꞌticob Jesús.
\p
\v 4 Pilato caj caꞌ joqꞌuij ich tancab tuꞌ yʌnob u winiquirob judío caj u yaꞌaraj tiꞌob:
\p ―Irex, tin jocꞌsaj a jeꞌ xibaꞌ ʌcʌtan techex soc a werex mʌnaꞌ tuririꞌ u siꞌpir tin wiraj tiꞌ.
\p
\v 5 Caj jocꞌsab Jesús ʌcʌtan tiꞌob. Jesús tiꞌ toy u pꞌoꞌquinmʌn qꞌuiꞌix. Baxuc u nocꞌ tiꞌ toy u buquinmʌn a chʌc nocꞌoꞌ. Pilato caj u yaꞌaraj tiꞌ u winiquirob judío:
\p ―Ireꞌex a jeꞌ xibaꞌ.
\p
\v 6 Rajen caj yirob Jesús u jach tsꞌurirob sacerdote yejer u policía a cu beyajob ich carem naj tu cu naj cꞌujinticob u winiquirob judío. Caj u yʌnxchun u cꞌam aricob tiꞌ Pilato:
\p ―Bʌjej ich cruz, bʌjej ich cruz.
\p Rajen Pilato caj yaꞌaraj tiꞌob:
\p ―Chꞌaꞌex caꞌ a bʌjex ich cruz a bʌjiriꞌex quireꞌ a tenoꞌ mʌꞌ in wiric wa yʌn u siꞌpir.
\p
\v 7 U winiquirob judío caj u nuncob tiꞌ tan yaꞌaric:
\p ―A tenob yʌn in tꞌʌnob. Aj in tꞌʌnob cu yaꞌaric caꞌ in quinsob wa cu tucric u bʌjiriꞌ rajiꞌ u parar Cꞌuj. 
\p
\v 8 Pilato caj u toc chꞌaj sajquir uch a baꞌ cu bin tar tiꞌ Jesús. Caj tsꞌoc u yubic a baꞌ caj u yaꞌarob tiꞌ, tu jach chꞌaj sajaquir Pilato quireꞌ yerob u parar Cꞌuj, u winiquirob judío.
\v 9 Pilato caj caꞌ oquij ich palacio yejer Jesús caj u cꞌataj tiꞌ Jesús:
\p ―Tub a tar? ―quij.
\p Jesús mʌꞌ cꞌʌs baꞌ tu nuncaj tiꞌ.
\p
\v 10 Rajen Pilato caj u yaꞌaraj tiꞌ Jesús:
\p ―A techoꞌ mʌꞌ ja nunquic ten quireꞌ a tenoꞌ a tsꞌurirenex. Wa jin cꞌat in chaꞌiquech caꞌ xiquech. A tenoꞌ cꞌuchaꞌan in wor in waꞌaric caꞌ in quinsech ich cruz xan.
\p
\v 11 Jesús caj u yaꞌaraj tiꞌ:
\p ―Mʌꞌ cꞌuchaꞌan a wor a betic baxuc aroꞌ tiꞌ ten wa Cꞌuj mʌꞌ ju cꞌat, a tiꞌ yʌn ich caꞌananoꞌ. Rajen u jach tsꞌurirob sacerdote a mac tu cꞌubajenob tiꞌ tech, jach manan yʌn u siꞌpirob.
\p
\v 12 Rajen Pilato u cꞌat u chaꞌic Jesús caꞌ xic chen u winiquirob judío caj u cꞌam arob:
\p ―Wa ca chaꞌic u bin mʌꞌ tan a quiꞌ beyaj tiꞌ a rey César quireꞌ tu cotor mac a ju cꞌat yocar rey cu pꞌactic u rey César.
\p
\v 13 Pilato caj tsꞌoc yubic yaꞌaric a pimoꞌ caj u yaꞌaraj tiꞌ u soldado caꞌ u yacsej Jesús tu reꞌaꞌan naj. Ich chumuc tuꞌ reꞌaꞌan naj tiꞌ yʌn u cutan gobernador rajiꞌ betaꞌb tiꞌ tunich. Rajiꞌ quir u cutar soc yaꞌaric wa cu chaꞌbʌr wa yʌn u quinsaꞌr wa ber cu tsꞌocar u toꞌcar u joꞌr. U cutan gobernador pʌchaꞌan u cꞌabaꞌ ich u tꞌʌn hebreo Gabata. Rajen Pilato caj oc u cutar tiꞌ taroꞌ. 
\v 14 Caj cꞌuchij cꞌacꞌchunqꞌuin caj oc Pilato quir u cutar ich u cutan gobernador. Rajiꞌ u jach qꞌuinin pascua. Caj curʌj Pilato caj yaꞌaraj tiꞌ u winiquirob judío: 
\p ―Iriquex a jeꞌ reyexaꞌ.
\p
\v 15 U winiquirob judío caj u cꞌam arajob, tan yaꞌaricob: 
\p ―Sinej ich cruz caꞌ quimic. Sinej ich cruz caꞌ quimic. 
\p Chen Pilato caj yaꞌaraj tiꞌob:
\p ―Cax wa ja reyex quin sinic ich cruz caꞌ quimic?
\p U jach tsꞌurirob sacerdote caj u yaꞌarob:
\p ―Rajiꞌ mʌꞌ ic reyex aroꞌ. Chen rajiꞌ ic reyex César. 
\p
\v 16 Rajen Pilato caj u quibaj a baꞌ u cꞌatob caj u cꞌubaj tiꞌob u soldado caꞌ u bʌjej ich cruz. Rajen a soldadojoꞌ caj u pʌyob Jesús.
\s Bʌjaꞌan Jesús ich cruz
\r (Mt. 27.32‑44; Mr. 15.21‑32; Lc. 23.26‑43)
\p
\v 17 Rajen u soldado caj u tsꞌʌraj u pach Jesús, rajen tu cꞌochaj u cruz. Caj bin tu cuchir a cu yaꞌaric u baquer u joꞌr mac. Ich u tꞌʌn hebreo pʌchaꞌan u cꞌabaꞌ Gólgota.
\v 18 Tiꞌ tu bʌjob ich cruz, yet bajac caꞌtur mac, u tiriꞌ bʌjaꞌan xan tu tsꞌic, u tiriꞌ bʌjaꞌan xan tu noꞌoj Jesús. Chumuc yʌn Jesús.
\v 19 Pilato caj u tsꞌibtaj ich yocꞌo cheꞌ jun xotꞌ caj u tsꞌibta, baxuc tan yaꞌaric: “A jeꞌ Jesús a cu tar ich u cajar Nazaret, rajiꞌ u rey u winiquirob judío.” Rajiꞌ bʌjaꞌan ich yocꞌor u joꞌr Jesús ich u cruz.
\v 20 Yaꞌab u winiquirob judío cu xaquicob tuꞌ tsꞌibaꞌan quireꞌ tiꞌ bajij Jesús ich bʌytʌc tu cu yocarob ich u cajar Jerusalén. A baꞌ caj u tsꞌibtaj Pilato ich u tꞌʌn hebreo yejer ich u tꞌʌn griego yejer ich u tꞌʌn latino. 
\v 21 U jach tsꞌurirob sacerdote caj tsꞌoc yiricob a baꞌ tsꞌibaꞌan ich cruz Jesús caj bin yaꞌaricob tiꞌ Pilato: 
\p ―Cꞌaxej a baꞌ caj a tsꞌibtaj soc mʌꞌ yaꞌaric: “Rajiꞌ u rey u winiquirob judío.” Chen caꞌ a tsꞌibtej: “Rajiꞌ cu yaꞌaric u reyen u winiquirob judío.”
\p
\v 22 Pilato caj u nuncaj tiꞌob tan yaꞌaric:
\p ―An bic caj in tsꞌibtaj toc tsireꞌej, a tenoꞌ, mʌꞌ in cꞌaxic ―quij Pilato.
\p
\v 23 A mac a tu bʌjob Jesús cuatrojob soldado. Caj tsꞌoc u bʌjicob Jesús tu chꞌajob u nocꞌ. Jujuntur tu chꞌaj tuririꞌ, cꞌʌs pꞌatij tuririꞌ. Rajiꞌ u caꞌ yarir u nocꞌ Jesús quireꞌ toc coch caj sʌctaꞌb u tan u noqꞌuir, mʌnaꞌ u ber u chuyur.
\v 24 Rajen u soldado cu pacran aricob:
\p ―Cax mʌꞌ ic jʌtic. Caꞌ ij cʌrʌcꞌtej chan tunich, caꞌ ij quirej mac cu bin chꞌic u caꞌ yarir u nocꞌ.
\p A baxucoꞌ caj u nupꞌsaj tuꞌ tsꞌibaꞌan u tꞌʌn Cꞌuj uch caj u yaꞌaraj: “Mʌꞌ u bin u jʌticob u caꞌ yarir in nocꞌ. Cu chen binob yʌrʌcꞌticob chan tunich soc yiricob mac cu bin u toc chꞌic in nocꞌ”, quij. Baxuc yaꞌaric yʌjtseqꞌuir u tꞌʌn Cꞌuj uch. Rajen baxuc caj u betob u winiquirob soldado.
\p
\v 25 Tiꞌ chꞌicaꞌan u nʌꞌ Jesús tuꞌ bʌjaꞌan ich cruz Jesús. Tiꞌ yʌn u bʌj u nʌꞌ Jesús u cꞌabaꞌ María xan. U cꞌabaꞌ u mam Cleofas. Baxuc tiꞌ yʌn María Magdalena.
\v 26 Tiꞌ yʌn Juan bʌytʌc tuꞌ bʌjaꞌan Jesús, a mac jach yajbir ten Jesús. Tiꞌ yʌn tuꞌ yʌn u nʌꞌ Jesús. Rajen Jesús caj yiraj tiꞌ yʌnob u nʌꞌ yejer Juan, caj yaꞌaraj Jesús tiꞌ u nʌꞌ:
\p ―Nʌꞌ, quen, rajiꞌ Juan, chꞌaꞌej tech soc irej a parar. 
\p
\v 27 Jesús caj u yaꞌaraj tiꞌ Juan:
\p ―Rajiꞌ in nʌꞌ, chꞌaꞌej tech soc irej a nʌꞌ tech.
\p Rajen Juan tu yacsaj tu yatoch soc tiꞌ cu cʌjtar ich yatoch Juan.
\s Quimij Jesús
\r (Mt. 27.45‑56; Mr. 15.33‑41; Lc. 23.44‑49)
\p
\v 28 Caj tsꞌoc u toc aric tiꞌ Juan aroꞌ, Jesús yer yʌn u rʌc nupꞌsic a baꞌ tsꞌibaꞌan ich u tꞌʌn Cꞌuj uch, rajen caj u yaꞌaraj:
\p ―Ucꞌchʌjen ―quij Jesús.
\p
\v 29 Tiꞌ yʌn ich ruch chup u cꞌab uva, pʌj. Rajen caj u tsꞌʌmaj u noqꞌuir ich u cꞌab uva a pʌjoꞌ quir u tsꞌuꞌtsꞌic yaꞌarir a nocꞌoꞌ irej tʌmʌn. Caj u tʌcaj ich jʌrʌr u cꞌabaꞌ hisopo caj u tichꞌitej u chiꞌ Jesús caꞌ u tsꞌuꞌtsꞌaj. 
\v 30 Jesús caj u tsꞌuꞌtsꞌaj u cꞌab uva a pʌjoꞌ caj tsꞌoc aroꞌ caj u yaꞌaraj:
\p ―Tin tsꞌocsaj in beyaj ―quij Jesús.
\p Caj u chinquintaj u joꞌr quireꞌ quimij.
\s Caj rom u chꞌʌraꞌtir Jesús ten soldado
\p
\v 31 Quireꞌ a samanoꞌ u qꞌuinin quir u jesicob u bʌj u winiquirob judío, rajen u tsꞌurirob sacerdote. Mʌꞌ u cꞌatob yiricob u pꞌatʌrob u baquer ich cruz. Mʌꞌ ja wirej, tiꞌ u winiquirob judío jach noꞌj yiricob u qꞌuinin saman tu cu bin u jesicob u bʌj. Rajen caj u cꞌatajob tiꞌ Pilato soc u wʌticob u baquerob a mac a bʌjaꞌanob ich cruz xan, u chac bʌqꞌuerob soc seb cu quiminob soc cꞌuchaꞌan yorob u yemsicob u baquer ich cruz.
\v 32 Rajen caj cꞌuchob soldado caj u rʌc wʌtob u chac bʌqꞌuer a tuririꞌ u yet bʌjaꞌan winicoꞌ. Caj cꞌuchob tuꞌ yʌn u jer yet bʌjaꞌan winiquir caj u wʌtob u chac bʌqꞌuer.
\v 33 Caj natsꞌ tuꞌ yʌn Jesús caj yirob quimij, rajen mʌꞌ tu wʌtob u chac bʌqꞌuer Jesús.
\p
\v 34 Chen tuririꞌ soldado tu ramaj u chꞌaraꞌtir Jesús yejer ransa caꞌch. Sasameꞌ caj jocꞌ u qꞌuiqꞌuer yet jocac u yaꞌarir u bʌqꞌuer.
\v 35 A tenoꞌ, quij Juan, caj in wiraj bic caj quimij Jesús. Rajen taj a baꞌ quin waꞌaric soc baxuc a werex xan. 
\v 36 A baꞌ u ber tiꞌ Jesús ich cruz ten soldado, raꞌ quir u nupꞌsic a baꞌ tsꞌibaꞌan ich u tꞌʌn Cꞌuj uch, tu cu yaꞌaric: “Mʌꞌ ju bin wʌtbir u baquer, mʌꞌ tuririꞌ”, baxuc caj yaꞌaraj u tꞌʌn Cꞌuj uch.
\v 37 Baxuc tiꞌ tsꞌibaꞌan u jer ich u tꞌʌn Cꞌuj uch, tan yaꞌaric: “Robob cu bin u yiricob tiꞌ tuꞌ rom in chꞌʌraꞌtir”, baxuc tsꞌibaꞌan ich u tꞌʌn Cꞌuj xan.
\s Butꞌ Jesús ich japnin tunich
\r (Mt. 27.57‑61; Mr. 15.42‑47; Lc. 23.50‑56)
\p
\v 38 Pachir José a cu tar ich u cajar Arimatea, rajiꞌ tu muc u acsaj tu yor tiꞌ Jesús quireꞌ cu sʌjtic u jach tsꞌurirob u winiquirob judío, mʌꞌ ju yaꞌaraj tiꞌ u racꞌob wa tu yacsaj tu yor. Caj yiraj quimij Jesús caj bin ich Pilato quir u cꞌatic wa tsoy u chꞌic u baquer Jesús quir u butꞌic ich japnin tunich. Pilato caj u yaꞌaraj tiꞌ caꞌ yens u baquer ich cruz quir u chꞌic u butꞌ u baquer ich japnin tunich. Caj bin u chꞌic.
\v 39 Yet binac Nicodemo, rajiꞌ a mac bin tsicbar yejer Jesús oqꞌuin uch. Bin u yamtej José. Nicodemo tu mʌnaj u tsꞌac mirra, xacaꞌan yejer u tsꞌac áloes quir u jicꞌtic tu bʌqꞌuer Jesús, treinta kilos yʌn.
\v 40 Robob caj u cuchob u baquer Jesús, José yejer Nicodemo. Caj u sʌsʌjcꞌʌstajob u baquer Jesús yejer sʌc nocꞌ. Tu cu sʌsʌjcꞌʌsticob u baquer Jesús, tiꞌ cu puricob u tsꞌac mirra yejer u tsꞌac áloes soc mʌꞌ netuꞌ u boc quireꞌ baxuc nanij cu beticob u winiquirob judío tu cu bin u butꞌic u baquer u racꞌob ich japnin tunich.
\v 41 Tuꞌ tu sinob Jesús ich cruz uch bʌytʌc tiꞌ u chan corir u pʌcꞌar u cheꞌer Olivos. Tuꞌ yʌn u cheꞌer Olivos tiꞌ yʌn u mucnaj japnin tunich a betaꞌb ten mac. Mʌnaꞌ mac u butꞌmʌn u baquer quireꞌ ricꞌben.
\v 42 Tabar u qꞌuinin quir u jerar u winiquirob judío quireꞌ tabar u bin qꞌuin. Quireꞌ bʌytʌc tiꞌ yʌn u japnin tunich, rajen cꞌuchaꞌan yorob u butꞌicob u baquer Jesús.
\c 20
\s Jesús caj riqꞌuij quir u caꞌ cuxtar
\r (Mt. 28.1‑10; Mr. 16.1‑8; Lc. 24.1‑12)
\p
\v 1 Raꞌ u qꞌuinin cu yʌnxchun semana tiꞌ toy acꞌbir caj cꞌuchij María Magdalena tuꞌ butꞌ u baquer Jesús. Caj u yiraj toc bʌcꞌʌsaꞌan u tunichirir u mac u jor a tu tu butꞌaj u baquer Jesús.
\v 2 María Magdalena caj u cꞌʌnaj u yacab caj bin tuꞌ yʌn Juan u yajbir ten Jesús yejer Simón Pedro. Caj yaꞌaraj: 
\p ―Tu cuchob u baquer ic Jaj Tsꞌurirex, mʌꞌ ij quer tu tu purob u baqueriꞌ.
\p
\v 3 Rajen Pedro yejer Juan caj jocꞌob caj binob tuꞌ butꞌaꞌan u baquer Jesús.
\v 4 Quet caj u cꞌʌnob yacab. Chen Juan jach chich yacab rajiꞌ yʌn batꞌan cꞌuchij tu butꞌ u baquer Jesús. Chen Pedro sen yacab, pachir caj cꞌuchij.
\v 5 A Juanoꞌ caj u tac chꞌenaꞌbtaj tu japnin caj u yiraj u sʌc nocꞌ tu top u baquer Jesús uch. Tiꞌ janaꞌan ich ruꞌum. Juan mʌꞌ oc tu japnin tunich.
\v 6 Caj cꞌuchij Simón Pedro seb caj oquij tu japnin tu butꞌ u baquer Jesús uch. Rajiꞌ caj u yiraj tiꞌ janaꞌan u sʌc noqꞌuir tu top u baquer Jesús uch. U beriꞌ jenric.
\v 7 Baxuc tu yiraj u panyujir tu top u wich Jesús uch. Toc caꞌ tsꞌaꞌan, u tiriꞌ janaꞌan.
\v 8 Pachir caj oquij Juan a yʌn cꞌuch sasameꞌ tu butꞌ u baquer Jesús. Caj u yira tiꞌ toc janaꞌan u noqꞌuir caj u quibaj riqꞌuij Jesús tuꞌ quimen an ten bic caj u yaꞌaraj Jesús.
\v 9 A uchoꞌ mʌꞌ ju najtob tu tsꞌibaꞌan u tꞌʌn Cꞌuj uch wa yʌn u riqꞌuir Jesús tu quimirir. Raꞌiriꞌ u qꞌuinin caj u najtajob.
\v 10 Rajen Pedro yejer Juan yej u yet camsʌwinicob caj wʌcꞌʌs sutnʌjob tu yatochob.
\s Jesús cu yesic u bʌj tiꞌ María Magdelena
\r (Mr. 16.9‑11)
\p
\v 11 María caj caꞌ urij tu butꞌ u baquer Jesús uch. Caj bin Pedro yejer Juan tiꞌ pꞌat María. Ocꞌar u caꞌ. Tiꞌ toy cu yocꞌar caj u tac chꞌenaptaj yirej u japnin tu butꞌ u baquer Jesús uch.
\v 12 María caj yiraj yʌjmasirob u tꞌʌn Cꞌuj caꞌtur, jach sʌc u nocꞌob tiꞌ curaꞌanob tu chaquintaꞌb u baquer Jesús uch. Tuririꞌ tu joꞌrir, tuririꞌ tu yoquir tu chaquintaꞌb u baquer Jesús uch.
\v 13 Caj cꞌataꞌb tiꞌ ten yʌjmasirob u tꞌʌn Cꞌuj:
\p ―Xquic ―quen―, biquinin tan a wocꞌar?
\p Rajiꞌ caj u nuncaj tan yaꞌaric:
\p ―Quireꞌ tu cuchob u baquer in Jaj Tsꞌurir, mʌꞌ in wer tuj tu purob u baquer in Jaj Tsꞌurir.
\p
\v 14 María caj tsꞌoc yaꞌaric aroꞌ caj u sut u bʌj caj u yiraj tiꞌ yʌn Jesús chen mʌꞌ yer wa Jesúsiꞌ.
\v 15 Jesús caj yaꞌaraj tiꞌ María:
\p ―Xquic ―quij―, biquinin tan a wocꞌar? Mac tan a cʌxtiquiꞌ? 
\p María yer rajiꞌ a cu cʌnantic u chan corir tub u pʌcꞌmʌn u cheꞌer Olivo. Rajen caj u yaꞌaraj tiꞌ:
\p ―Tech wa ta chꞌajaj u baquer in Jaj Tsꞌurir, arej ten tub a puraj caꞌ xiquen in chꞌaꞌej.
\p
\v 16 Jesús caj u nuncaj tiꞌ:
\p ―María ―quij.
\p Rajen María caj u sut u bʌj caj u yaꞌaraj tiꞌ ich u tꞌʌn hebreo:
\p ―Raboni ―quij yaꞌaraj. Rajiꞌ u cꞌat yaꞌaric: A wʌjcamsʌyʌjiren, quij Juan.
\p
\v 17 Jesús caj u yaꞌaraj tiꞌ:
\p ―Mʌꞌ a yʌn suꞌsiquen quireꞌ mʌꞌ xiquen tuꞌ yʌn in Tet ich caꞌanan. Caꞌ xiquech a waꞌarej tiꞌob in camsʌwinicob a irej in witsꞌinob. Arej tiꞌob: tar quin bin ich in Tet. Baxuc tech, rajiꞌ a Tet xan. Tiꞌ quin bin ich Cꞌuj baxuc tech, rajiꞌ a Cꞌuj xan. Baxuc yʌn a wac tiꞌ in camsʌwinicob.
\p
\v 18 Rajen María Magdalena caj bin ich u camsʌwinicob Jesús caj u yaꞌaraj:
\p ―A tenoꞌ ―quij―, tin wiraj ic Jaj Tsꞌurirex.
\p Caj u yaꞌaraj tiꞌob tu cotor a baꞌ araꞌb tiꞌ ten Jaj Tsꞌur.
\s Jesús cu yesic u bʌj tiꞌ u camsʌwinicob
\r (Mt. 28.16‑20; Mr. 16.14‑18; Lc. 24.36‑49)
\p
\v 19 Raꞌiriꞌ u qꞌuinin, oqꞌuin tiꞌ toy u qꞌuinin cu yʌnxchun semana. U camsʌwinicob tiꞌ u muchꞌquinmʌnob u bʌj ich yatoch. U quiꞌ mʌcmʌnob u jor quireꞌ cu sʌjticob u jach tsꞌurirob u winiquirob judío. Seb caj yubob tiꞌ cꞌuchij Jesús tuꞌ yʌnob. Caj chꞌicrʌj Jesús chumuc tuꞌ yʌnob caj u rʌc tꞌʌnaj tan yaꞌaric:
\p ―Taren in quiꞌquint a worex ―quij Jesús.
\p
\v 20 Caj tsꞌoc yaꞌaric aroꞌ tiꞌob caj yes u cꞌʌb tuj bajij yejer u chꞌʌꞌraꞌtir tuj rom. Rajen yerob ic Jaj Tsꞌurirex. Rajen jach quiꞌ yorob.
\v 21 Jesús tu caꞌ araj tiꞌob:
\p ―Quiꞌquintex a worex. An ten bic in Tet caj u tuchiꞌtajen ich yocꞌocab. Baxuc techex quin tuchiꞌtiquechex quir a beyajex tiꞌ ten.
\p
\v 22 Caj tsꞌoc yaꞌaric aroꞌ caj u yustaj u camsʌwinicob caj yaꞌaraj tiꞌob:
\p ―Bajeꞌrer a wet binaquex u Tajꞌor u Pixam Cꞌuj.
\v 23 A mac cu cꞌaxicob yor cꞌuchaꞌan a worex a waꞌariquex tiꞌob: “Jawsaꞌb u siꞌpirob.” Chen a mac mʌꞌ u cꞌaxicob yor cꞌuchaꞌan a wor a waꞌariquex tiꞌob: “Mʌꞌ jawsaꞌan u siꞌpirobiꞌ.”
\s Tomás mʌꞌ ju quibaj wa riqꞌuij Jesús
\p
\v 24 Tomás mʌꞌ tiꞌ yʌn caꞌchiꞌ yejer u yet camsʌwinicob caj cꞌuchij Jesús. Rajiꞌ tuririꞌ ich a doce u camsʌwinicob Jesús. Rajiꞌ a toc caꞌtur caj rochaꞌb ten u nʌꞌ uch. 
\v 25 Caj cꞌuchij Tomás. U yet camsʌwinicob caj u yaꞌarob: 
\p ―Tin wirob ic Jaj Tsꞌurirex.
\p Chen Tomás caj u nuncaj tan yaꞌaric:
\p ―Wa mʌꞌ in wiric u cꞌʌb tu bajij yejer clavo. Wa mʌꞌ in jupic u yar in cꞌʌb tu jorir clavo tuj bajij u cꞌʌb, baxuc wa mʌꞌ in jupic in cꞌʌb tuj rom u chꞌʌraꞌtir, mʌꞌ in quibic wa riqꞌuir Jesús ―quij Tomás.
\p
\v 26 Caj cꞌuchij u jer semana u camsʌwinicob tiꞌ cu muchꞌquinticob u bʌj. A ray u qꞌuininoꞌ tiꞌ yʌn Tomás yejerob ich yatoch. Quiꞌ mʌcmʌnob u jor. Seb caj yubob tiꞌ yʌn Jesús yejerob caj chꞌirʌj Jesús chumuc tuꞌ yʌnob. Caj yaꞌaraj:
\p ―Taren in quiꞌquintic a worex ―quij Jesús.
\p
\v 27 Jesús caj yaꞌaraj tiꞌ Tomás:
\p ―Cojen jupej yar a cꞌʌb tuj bʌjaꞌan in cꞌʌb iric in cꞌʌb. Tichꞌej yar a cꞌʌb caꞌ a jupej tuj rom in chꞌʌraꞌtir. Mʌꞌ a tucric wa mʌꞌ tajiꞌ quireꞌ riqꞌuen tuj quimen. Quibej riqꞌuen ich in quimirir.
\p
\v 28 Rajen Tomás caj u nuncaj caj yaꞌaraj:
\p ―In Jaj Tsꞌurirech ―quij―, in Cꞌujech xan ―quij Tomás. 
\p
\v 29 Jesús caj yaꞌaraj tiꞌ:
\p ―Tomás ―quij―, a techoꞌ mʌꞌ ja quibaj hasta caj a wiraj riqꞌuen tiꞌ in quimirir. Chen jach manan quiꞌ yorob a mac a cu quibicob riqꞌuen tiꞌ in quimirir cax mʌꞌ ju yirajenob.
\s Biquinin Juan caj u tsꞌibtaj a jeꞌ juꞌunaꞌ
\p
\v 30 Tiꞌ toy yaꞌab carem beyajob tu yesaj Jesús tiꞌ u camsʌwinicob Jesús. Chen mʌꞌ tsꞌibtaꞌb ich a jeꞌ juꞌunaꞌ.
\v 31 Chen caj u tsꞌibtaj a jeꞌ tꞌʌnaꞌ soc a quibiquex a Jesúsoꞌ, rajiꞌ Cristo a tetaꞌb ten Cꞌuj quir u taquicoꞌonex, u parar Cꞌuj. Wa baxuc ca quibicoꞌ toc yʌn a cuxtar munt qꞌuin.
\c 21
\s Jesús cu yesic u bʌj tiꞌ u camsʌwinicob a sietejoꞌ 
\p
\v 1 Jesús caj u caꞌ esaꞌr u bʌj tiꞌ u camsʌwinicob. Caj u yesaj u bʌj ich chiꞌ cꞌacꞌnab u cꞌabaꞌ Tiberias. Baxuc a jeraꞌ caj u yesaj u bʌj tiꞌ u camsʌwinicob.
\v 2 Tiꞌ tu muchꞌquintajob u bʌj Simón Pedro yejer Tomás a toc caꞌtur caj rochaꞌb ten u nʌꞌ. Tiꞌ yʌn Natanael tiꞌ u tar ich u cajar Cana ich u ruꞌumin Galilea. Tiꞌ yʌn xan caꞌturob u camsʌwinicob Jesús rajiꞌ u tetob Zebedeo. Tiꞌ yʌn xan u jer caꞌturob u camsʌwinicob.
\v 3 Simón Pedro caj u yaꞌaraj tiꞌ u yet camsʌwinicob:
\p ―Bin in caꞌ chuc cʌy yejer chim.
\p Robob caj yaꞌarob:
\p ―Baxuc a tenob tar in caꞌob yejerech.
\p Caj rʌc ocob ich chem caj binob u chuquejob cʌy. U burur acꞌbir tu puricob u chimin, mʌꞌ ju chucobiꞌ.
\v 4 Caj sasij tiꞌ chꞌicaꞌan Jesús ich chiꞌ cꞌacꞌnab chen u camsʌwinicob mʌꞌ yerob wa rajiꞌ Jesúsiꞌ.
\p
\v 5 Jesús caj u cꞌataj tiꞌob:
\p ―Chichanechex, mʌꞌ wa ta chuquex u cʌyir?
\p Caj u nuncajob:
\p ―Mʌnaꞌ ―quij.
\p
\v 6 Jesús caj yaꞌaraj tiꞌob:
\p ―Purej u chimin tu noꞌoj chem. Jeꞌ a chuquiquex a cʌyoꞌ. 
\p Baxuc caj u betajob caj u purajob u chimin caj u jarajob u chimin jach chup u cʌyir. Rajen mʌꞌ ju cꞌuchur u yorob u jaricob ich cꞌacꞌnab.
\v 7 A Juanoꞌ, rajiꞌ a yajbir ten Jesús. Rajiꞌ u camsʌwinic xan, caj yaꞌaraj tiꞌ Pedro:
\p ―Rajiꞌ ic Jaj Tsꞌurirex.
\p Simón Pedro caj u yubaj yaꞌaric, “Rajiꞌ ic Jaj Tsꞌurirex”, caj u buquintaj u nocꞌ quireꞌ chʌcpiten caꞌch caj u puraj u bʌj ich jaꞌ quir u cꞌuchur ich chiꞌ cꞌacꞌnab tuꞌ yʌn Jesús.
\v 8 Caj tarob u camsʌwinicob yejer chem, tan u payticob u chimin cʌy quireꞌ jach chup u cʌyir. Mʌꞌ nach yʌn tiꞌ u chiꞌcꞌacꞌnab chen cien metros.
\v 9 Caj jocꞌob ich chem caj cꞌuchob ich chiꞌcꞌacꞌnab. Caj yirob nutsꞌaꞌan cꞌacꞌ. Tiꞌ yʌn u chuquir, tiꞌ yʌn cʌy, tan u cꞌacꞌtic yocꞌor yejer waj.
\v 10 Jesús caj u yaꞌaraj tiꞌob:
\p ―Chꞌayex cʌy jach yaꞌab a tan ta chuquiquex.
\p
\v 11 Rajen binij Simón Pedro ich chem. Caj u jitaj u chimin chup yejer cʌy. Jach carem u cʌyir caj u xacaj caj u yiraj ciento cincuenta y tres u cʌyir. Cax chup u chimin mʌꞌ ju jatʌr.
\v 12 Rajen caj u yaꞌaraj tiꞌob:
\p ―Cojenex ta jananex ―quij.
\p Mʌnaꞌ u camsʌwinicob caj u yaꞌaraj: “Maquech”, quireꞌ bajeꞌrer yerob rajiꞌ u Jaj Tsꞌurirob.
\v 13 Jesús caj u chucaj waj caj u tsꞌaj tiꞌob u camsʌwinicob. Baxuc caj u tsꞌaj tiꞌob yoch cʌy xan. Caj u rʌc jantajob. 
\p
\v 14 A jeraꞌ mʌnaꞌ u nup u tenin tu yesa u bʌj tiꞌob u camsʌwinicob a caj tsꞌoc u riqꞌuir tiꞌ u quimirir. 
\s Jesús cu tsicbar yejer Simón Pedro
\p
\v 15 Caj tsꞌoc u janʌnob Jesús caj u cꞌata tiꞌ Simón Pedro: 
\p ―Simón, u pararech Jonás. A nupob cu yajquintiquen, chen tech wa jach manan ca yajquintiquen?
\p Pedro caj u nuncaj:
\p ―Tech, Jaj Tsꞌurir, a wer quin yajquintiquech.
\p Jesús caj u yaꞌaraj tiꞌ:
\p ―Cʌnen, jansej tiꞌ ten tu cotor mac a tu yacsob tu yorob tiꞌ ten soc cu bin u chichquinticob tu pixamob an ten bic yʌjcʌnʌnyʌjir tʌmʌn yuc cu jansic u chan ar tʌmʌn yuc.
\p
\v 16 Jesús caj u caꞌ cꞌataj tiꞌ:
\p ―Simón, u pararech Jonás, jach quiꞌ wa ca yajquintiquen? 
\p Pedro caj u nuncaj:
\p ―Tech, Jaj Tsꞌurir, a wer in quiꞌ yajquintiquech.
\p Jesús caj yaꞌaraj tiꞌ:
\p ―Cʌnen, jansej tiꞌ ten tu cotor mac a tu yacsob tu yorob tiꞌ ten soc cu bin u chichquinticob tu pixamob an ten bic yʌjcʌnʌnyʌjir tʌmʌn yuc cu jansic u chan ar tʌmʌn yuc.
\p
\v 17 Mʌnaꞌ u nup caj cꞌataꞌb ten Jesús tiꞌ:
\p ―Simón, u pararech Jonás, ca jach quiꞌ wa ca yajquintiquen? 
\p Pedro caj tucurnʌjij quireꞌ tu yubaj mʌnaꞌ u nup u tenin caj cꞌataꞌb tiꞌ: “Ca yajquintiquen wa?” Caj u yaꞌaraj: 
\p ―Tech, Jaj Tsꞌurir, tu cotor a wer. A wer quin yajquintiquech. 
\p Jesús caj yaꞌaraj tiꞌ:
\p ―Cʌnen, jansej tiꞌ ten tu cotor mac a tu yacsob tu yor tiꞌ ten soc cu bin u chichquinticob tu pixamob an ten bic yʌjcʌnʌnyʌjir tʌmʌn yuc cu jansic u chan ar tʌmʌn yuc.
\p
\v 18 Jesús caj yaꞌaraj:
\p ―Taj a baꞌ quin wac tech. Chen chichanech uch ta quiꞌ buquintaj a nocꞌ caj bin tub a cꞌat. Caꞌ bin chꞌijiquech cu bin u cꞌʌxicob a cꞌʌb yejer a winquirir ich cheꞌ quir u quinsiquech.
\p
\v 19 Caj u yaꞌaraj tiꞌ aroꞌ quir u camsic bic tabar cu bin quimin soc mac cu bin u yiricob jach carem a Cꞌujoꞌ. Jesús caj yaꞌaraj tiꞌ:
\p ―Cojen tin pach ―quij.
\s U camsʌwinic a yajbir ten Jesús
\p
\v 20 Pedro caj u sut u bʌj caj u yiraj tan u tar Juan tu pach a mac yajbir ten Jesús, raꞌiriꞌ a tiꞌ yʌn ich Jesús caj u jantob yoch u qꞌuinin pascua, caj u cꞌataj uch tiꞌ: “Jaj Tsꞌurir, quij, mac cu bin u cꞌubiquech?” quij. 
\v 21 Pedro caj u yiraj Juan caj u cꞌataj tiꞌ Jesús:
\p ―Jaj Tsꞌurir ―quij―, baꞌ cu bin tar tiꞌ a ray in nupoꞌ?
\p
\v 22 Jesús caj u nuncaj tiꞌ, tan yaꞌaric:
\p ―Wa jin cꞌat caꞌ pꞌatac Juan hasta quin caꞌ ur, mʌꞌ baꞌwir ca tucric tiꞌ. Tech yʌn a tar tin pach ―quij. 
\p
\v 23 Rajen caj bin u sosoc arej ich mac a tu yacsob tu yorob, tan yaꞌaric:
\p ―A Juanoꞌ mʌꞌ ju bin quimin ―quij.
\p Chen Jesús mʌꞌ ju yaꞌaraj: “Mʌꞌ ju bin quimin.” Tu chen araj: “Wa jin cꞌat caꞌ pꞌatac Juan hasta quin wuꞌur mʌꞌ baꞌwir ca tucric tiꞌ.”
\p
\v 24 Tu cotor a baꞌ tsꞌibaꞌan a teraꞌ, rajiꞌ caj u yiraj Juan, baxuc caj u yubaj a rajiꞌ u camsʌwinic Jesús. Rajen ij querex taj a baꞌ cu yaꞌaric.
\p
\v 25 Tiꞌ toy yʌn yaꞌab baꞌ caj u betaj Jesús. Wa toc tsꞌibaꞌan jujuntur ich u juꞌunin jach pꞌecʌch yaꞌab u juꞌunin cu bin tsꞌibtaꞌbir. Chen a tsꞌibaꞌan a teraꞌ tiꞌtiꞌ soc ij querex bic tabar ic taquic ic bʌjex.