\id ROM
\h ROMANOS
\toc1 ROMANOS
\mt1 A JEꞌ JUꞌUNAꞌ, RAJIꞌ TIꞌ U YET ACSɅꞌORIROB ICH U CAJAR ROMA. RAJIꞌ TU TSꞌIBTA PABLO
\mt2 ROMANOS
\c 1
\s Pablo cu tsꞌibtic tiꞌ a mac a yacsmʌnob tu yorob ich u cajar Roma
\p
\v 1 A tenoꞌ Pablojen, a quin tsꞌibtic techex, a mac a yacsmʌnob tu yorob ich u cajar Roma. A tenoꞌ, quin beyaj tiꞌ Jesucristo. A Cꞌujoꞌ, caj u teten soc rajiꞌ yʌjtseqꞌuiren Cꞌuj soc caꞌ xiquen in tsecꞌtej u jach tsoyir u tꞌʌn Cꞌuj.
\p
\v 2 A mac a caj u tsꞌibtajob u tꞌʌn Cꞌuj a uchoꞌ caj u tsꞌibtajob a tsꞌaꞌb u tucurob ten Cꞌuj, a tarij ich yorob. Rajen caj u tsꞌibtajob caj yaꞌarob uch: “Jeꞌ u tar ich yocꞌocab, a jeꞌ u jach tsoyir u tꞌʌn Cꞌujaꞌ, a caꞌ bin cꞌuchuc tu qꞌuinin.” Mʌꞌ ja wirej, u bʌjiriꞌ Cꞌuj caj u yaꞌaraj tiꞌob, caꞌ tsꞌibtac u tꞌʌn ten a mac a tsꞌab u tucur ten Cꞌuj uch.
\v 3 U jach tsoyir u tꞌʌn Cꞌuj cu camsicoꞌonex u parar Cꞌuj, Jesucristo, a mac ic Jaj Tsꞌurirex. Barej, caj tarij uch Jesucristo ich yocꞌocab, caj rochaꞌb ten u nʌꞌ an ten bic chan och. A Davidoꞌ, raꞌ u nunquir Jesucristo. A Davidoꞌ, rajiꞌ rey a uchoꞌ, rajiꞌ u rey u winiquirob israel. 
\v 4 Mʌꞌ ja wirej, u Tajꞌor u Pixam Cꞌuj, caj u ricꞌsaj Jesús caj quimij. A baywoꞌ, caj esaꞌb ten Cꞌuj tiꞌ tu cotor mac wa Jesucristo jariꞌ rajiꞌ u parar Cꞌuj, raꞌ a jach chich u mucꞌoꞌ.
\v 5 Quireꞌ Jesucristo, a Cꞌujoꞌ caj u yajquin ten caj u teten soc yʌjtseqꞌuiren soc in tsecꞌtic u jach tsoyir u tꞌʌn Cꞌuj ich tu cotor mac. Mʌꞌ ja wirej, a Cꞌujoꞌ, caj u tuchiꞌten soc in tsecꞌtic soc a mac a tiꞌ yʌnob ich yocꞌocab jeꞌ u yacsicob tu yorob, quireꞌ tan u quibicob tiꞌ.
\v 6 Baxuc a techexoꞌ, a tiꞌ yʌnechex ich u cajar Roma, quin waꞌaric techex, a Cꞌujoꞌ, caj u tetechex soc rajiꞌ yʌninechex Jesús.
\p
\v 7 A tenoꞌ, quin tsꞌibtic techex, a mac yajbir ten Cꞌuj, ich u cajar Roma. Mʌꞌ ja wirej, a Cꞌujoꞌ caj u tetechex soc rajiꞌ yʌninechex Cꞌuj. A tenoꞌ, in cꞌat Cꞌuj caꞌ u yirechex tsoyechex, baꞌiriꞌ xan, a tenoꞌ, in cꞌat u yiriquechex Jesucristo tsoyechex xan. A tenoꞌ, in cꞌat tiꞌ Cꞌuj quet yejer Jesucristo caꞌ u tsꞌa techex soc mʌnaꞌ baꞌ ca tucriquex.
\s Pablo u cꞌat yiric u cajar Roma
\p
\v 8 Pʌyber, quin yʌn aric techex. Quin waꞌaric tiꞌ Cꞌuj: “Bayoꞌ Cꞌuj tiꞌ in wet acsaꞌorirob a tiꞌ yʌnob ich u cajar Roma.” A tenoꞌ, caj in waꞌaraj baxucoꞌ, quireꞌ tu cotor mac tu cʌjaꞌanob, quireꞌ cu manob u juminticob bic tabar caj a wacsex ta worex tiꞌ Cristo.
\v 9 Quireꞌ a Cꞌujoꞌ, yer mʌꞌ jin tus, mʌꞌ ju tsꞌocar in chich beyaj tiꞌ Cꞌuj, tu quin tsecꞌtic u jach tsoyir u tꞌʌn Jesucristo. A Cꞌujoꞌ, yer yubic quin tꞌʌnic, rajraꞌ quin tꞌʌnic, caꞌ u yamtechex.
\v 10 In cꞌatic xan, jaj ix tʌcoj, wa cu chaꞌic in tar tu yʌnechex soc in wiriquechex bajeꞌrer. Mʌꞌ ja wirej, jach uch, in cꞌat in tar in wirechex.
\v 11 Quireꞌ a tenoꞌ, in jach cꞌat in bin tu yʌnechex, soc in yamtiquechex, caꞌ chichac a worex tiꞌ Cꞌuj, soc ca bin a quiꞌ acsex ta worex tiꞌ Cristo.
\v 12 Mʌꞌ ja wirej, a tenoꞌ in cꞌat in tar in wiriquechex soc ic pacran chichquintiquex ij corex soc ij quiꞌ acsiquex tij corex.
\p
\v 13 Chen a tenoꞌ, in cꞌat a werex, in wet acsaꞌorirex, jach yaꞌab u tenin in cꞌat in tar in wiriquechex. Chen mʌꞌ cꞌuchaꞌan in wor in tar. A tenoꞌ, in jach cꞌat in bin soc in tsecꞌtic u tꞌʌn Cꞌuj tiꞌ mac tu yʌnechex, soc jaj ix tʌcoj a mac ti taroꞌ, jeꞌ u yacsicob tu yorob tiꞌ Cristo, an ten bic caj in tsecꞌtaj uch tiꞌ a mac, a mʌꞌ ju winiquirob judío, jeroj, caj u yacsob tu yorob tiꞌ Cristo.
\v 14 A Cꞌujoꞌ, caj u yaꞌaraj ten in tsecꞌtej u tꞌʌn ich a mac a cʌjaꞌan ich u cajarob, cax ich a mac a cʌjaꞌan ich u corob. Caꞌ xiquen in tsecꞌtej u tꞌʌn ich a mac yerob u juꞌunin, cax ich mac a mʌꞌ yerob u juꞌunin. 
\v 15 Rajen a tenoꞌ, in jach cꞌat in tsicbʌtej techex xan, u jach tsoyir u tꞌʌn Cꞌuj techex ich u cajar Roma.
\s U jach tsoyir u tꞌʌn Cꞌuj jach chich u mucꞌ
\p
\v 16 Quireꞌ a tenoꞌ, mʌꞌ jin cꞌʌs chꞌaꞌej suraquir chichin, tiꞌ u jach tsoyir u tꞌʌn Jesucristo. A mac a cu yubic a jeꞌ tꞌʌnaꞌ, a Cꞌujoꞌ, cu yʌnxchun u beyaj yejer u mucꞌ soc u taquic tu cotor mac, a cu yacsic tu yor tiꞌ Cristo. Mʌꞌ ja wirej, a Cꞌujoꞌ, u batꞌan cꞌat u yʌn iric u winiquirob judío, caꞌ u yacsej tu yorob, pachir xan, robob a mac a mʌꞌ ju winiquirob judío xan.
\v 17 Mʌꞌ ja wirej, a Cꞌujoꞌ, caj u yesaj toꞌonex, caꞌ u rucꞌsej ic siꞌpirex, jariꞌ chen wa quij cacsiquex tij corex tiꞌ Cristo, quireꞌ cu yaꞌaric ich u tꞌʌn Cꞌuj uch: “A mac a cu yacsic tu yor tiꞌ Cꞌuj, jariꞌ cu bin rucꞌsaꞌbir u siꞌpir ten Cꞌuj soc u cuxtar.” Baxuc cu yaꞌaric ich u tꞌʌn Cꞌuj uch.
\s Tu cotor mac cʌjaꞌan ich yocꞌocab, rʌc yʌn u siꞌpirob 
\p
\v 18 Quireꞌ a Cꞌujoꞌ, a tiꞌ cʌjaꞌan ich caꞌanan, caj u yesaj, rajiꞌ jeꞌ u tsꞌic u mucꞌyaj a mac a cu manob tu sipir. Mʌꞌ ja wirej, robob, a cu manob tu cꞌasir, mʌꞌ ju tarob tu yʌn ic Jaj Tsꞌurirex, mʌꞌ ju chaꞌ u jerob mac u yubicob u tajir, a tiꞌ yʌn ich u tꞌʌn Cꞌuj.
\v 19 Quireꞌ robob, cꞌuchaꞌan yorob soc yerob biquiraꞌ Cꞌuj. Mʌꞌ ja wirej, a Cꞌujoꞌ, caj u yesaj tiꞌob biquiraꞌ Cꞌuj.
\v 20 Mʌꞌ ja wirej, cax mʌꞌ cꞌuchaꞌan ij corex ij quiriquex Cꞌuj. Chen raꞌ u qꞌuinin caj betaꞌb yocꞌocab ten Cꞌuj, jach chʌcaꞌan ij quiriquex biquiraꞌ Cꞌuj, quireꞌ a tu cotor caj u betaj Cꞌuj. Toc irir Cꞌuj, yʌn u mucꞌ, a mʌꞌ biqꞌuin cu xupur u mucꞌ. Rajen mʌꞌ cꞌuchaꞌan ij corex ij carex mʌꞌ ij querex biquiraꞌ Cꞌuj.
\v 21 Cax robob yerob tiꞌ yʌn Cꞌuj, mʌꞌ ju yaꞌarajob tiꞌ Cꞌuj, wa rajiꞌ jach carem. Bayiriꞌ xan, mʌꞌ ju yaꞌarob: “Bayoꞌ Cꞌuj quireꞌ tu cotor a baꞌ ca tsꞌic tenob.” Cax a baꞌ cu tucricob, jach jot, rajen bajeꞌrer, cu manob ich yacꞌbirir.
\v 22 Cu tus aricob: “In jach neꞌerob baꞌ.” Chen u bʌjiriꞌ chichquint u joꞌrob.
\v 23 Quireꞌ baxuc caj u tucrajob, rajen caj pꞌʌtajob u cꞌujinticob Cꞌuj, a mac jach caremoꞌ, a mac a mʌꞌ ju quimin xan. Caj u tus cꞌujinticob u yochir mac, a cu quiminoꞌ. Baxuc xan, a yʌn u xicꞌ bʌcꞌ, caj u tus cꞌujintob, baxuc xan, a cu xʌctar ruꞌumibʌcꞌ, baxuc xan, a bʌcꞌ a com yocoꞌ a cu man, raꞌ caj u tus cꞌujintob.
\p
\v 24 Rajen a Cꞌujoꞌ, caj u pꞌʌtaj tu cꞌasir an ten bic caj u pachtob tu yorob. Robob caj u pacran betajob a baꞌ jach cꞌas, yejer u bʌjiriꞌob u winquirirob.
\v 25 Rajen Cꞌuj, caj u pꞌʌtaj u betajob a baxuc aroꞌ quireꞌ caj u rʌc pꞌʌtajob u tajir u tꞌʌn Cꞌuj, a tan u yacsicob tu yorob tiꞌ a baꞌ mʌꞌ tajiꞌ. Mʌꞌ ja wirej, robob caj u cꞌujintob a baꞌ betaꞌb ten Cꞌuj, chen mʌꞌ ju tucrajob Cꞌuj a mac a caj u betaj tu cotor baꞌ. Mʌꞌ ja wirej, rajiꞌ Cꞌuj jach manan tsoy munt qꞌuin.
\p
\v 26 Quireꞌ robob caj u tus cꞌujintob a baꞌ betaꞌb ten Cꞌuj, chen mʌꞌ ju cꞌujintob Cꞌuj, a mac a caj u betaj aroꞌ, rajen Cꞌuj caj pꞌatob soc u pʌyicob u siꞌpir an ten bic caj u pachtaj tu yorob. Rajen a xquicoꞌ, u cꞌat u yet xquiquir, quireꞌ mʌꞌ ju cꞌat u mam.
\v 27 Quet bayiriꞌ xan, caj u betaj a xiboꞌ xan. Rajiꞌ mʌꞌ ju cꞌat u chꞌic u racꞌ, quireꞌ cu jach pachtic tu yorob yiric u yet xibir. Quireꞌ cu pacran iricob u yet xibir, rajen caj u jach cꞌasquintaj u winquirirob, quireꞌ a baꞌ caj u betob jach cꞌas.
\v 28 Quireꞌ robob mʌꞌ ju cꞌatob, caꞌ u tsꞌurintej Cꞌuj tu yorob, rajen Cꞌuj caj pꞌatob soc cax u tsꞌurintob u cꞌasir u tucurob, rajen mʌꞌ ju chꞌaj u suraquirob quir u beticob a baꞌ mʌꞌ tsoy u beticob.
\v 29 Mʌꞌ ja wirej, jach manan caj u cʌxtob u siꞌpirob. Jeroj, caj u yirob u racꞌob cax mʌꞌ ju chꞌaj u raqꞌuintob xquic, mʌꞌ ju mʌmintob xan. Jeroj, caj u pʌyob u siꞌpirob, jeroj, caj u pachtob u baꞌtac u racꞌob soc raꞌ yʌnin u baꞌtac. Jeroj, caj u pachtob u cꞌasirob bar mac. Jeroj, pacran qꞌuexij yorob. Jeroj, caj u pacran quinsob u bʌjob. Jeroj, caj u pacran nuncob u tꞌʌnob. Jeroj, caj u tus arob tiꞌ u racꞌob. Jeroj, caj pꞌactob u racꞌob. Jeroj, caj u tus tsicbʌtob tiꞌ u jer mac.
\v 30 Jeroj, caj u pʌcꞌob u pachob u racꞌob. Jeroj, caj u pꞌactob Cꞌuj. Jeroj, caj u pꞌastob mac. Jeroj, u cꞌat baꞌ tiꞌ u nonoj bʌjiriꞌob. Jeroj, u bʌjiriꞌob cu yaꞌaricob tsoyirob u bʌjob. Jeroj, cu cʌxticob bic tabar u yacsicob tiꞌ u jer u cꞌasirob. Jeroj, mʌꞌ ju sʌjtob u tet yejer u nʌꞌ.
\v 31 Jeroj, mʌnaꞌ baꞌ caj u najtob. Jeroj, jach manan u tusob. Jeroj, mʌꞌ ju cꞌʌs yajquintob mac. Jeroj, mʌꞌ ju jawsob u siꞌpir u racꞌob, cax chichin u sipir u racob. Jeroj, mʌꞌ ju tucraj u racꞌob, cax yirej yaj u racꞌob.
\v 32 Baxuc cu beticob, cax yerob caj araꞌb ten Cꞌuj caꞌ u boꞌotob u boꞌorir u siꞌpirob. Robob, mʌꞌ jariꞌ cu pʌyic u siꞌpirob, chen robob jach quiꞌ yorob yejer mac a cu pachticob u manob tu cꞌasirob an ten bicob u naj pachticob u manob tu cꞌasirob.
\c 2
\s A Cꞌujoꞌ taj cu bin u taꞌquic u joꞌr mac
\p
\v 1 Arej in waꞌarej tiꞌ a mac a cu pʌqꞌuic u pach tu cotor mac, wa yʌn u siꞌpir. Rajiꞌ mʌꞌ cꞌuchaꞌan yor yaꞌaric a ju bʌjiriꞌoꞌ: “A tenoꞌ, quij, mʌnaꞌ in siꞌpir”, quij, cax maquiꞌ. Mʌꞌ ja wirej, a baꞌ cu betic mac baxuc raꞌiriꞌ cu betic xan. Rajiꞌ cu yaꞌaric: “Mʌꞌ tsoy a baꞌ ca betej”, quij, baxuc raꞌiriꞌ mʌꞌ tsoy a baꞌ cu betic xan.
\v 2 Chen ij querex wa Cꞌuj cu yaꞌaric mac a cu betic baxuc aroꞌ toc yʌn u siꞌpirob. Bayiriꞌ xan, ij querex a baꞌ cu yaꞌaric Cꞌuj rajiꞌ taj.
\v 3 Rajen tu cotor mac mʌꞌ tsoy ju tus tucric wa mʌꞌ ju bin u boꞌotic u boꞌorir u siꞌpirob. Jeꞌ u boꞌoticob u boꞌorir u siꞌpirob, quireꞌ an ten bic rajiꞌ caj u tacaj u joꞌr u racꞌob, baxuc Cꞌuj cu bin taquic u joꞌrob xan. Mʌꞌ ja wirej, quet bayiriꞌ, caj betob xan.
\v 4 Quireꞌ rajiꞌ mʌꞌ ju yirej wa jach tsoy a Cꞌujoꞌ, mʌꞌ yer xan wa Cꞌuj cu mucꞌtic baꞌ, quireꞌ jach nemʌꞌ bic a Cꞌujoꞌ, rajen ix tʌcoj mʌꞌ ju tucrej Cꞌuj. Mʌꞌ ju yirej, rajraꞌ nemʌꞌ bic Cꞌuj quireꞌ cu pajic u qꞌuinin caꞌ bin u cꞌaxej yor mac, soc u pꞌʌtic a cꞌasoꞌ.
\v 5 Chen rajiꞌ mʌꞌ ju yubaj a baꞌ cu yaꞌaric Cꞌuj, mʌꞌ u cꞌat u cꞌaxic yor, rajen cu jach tꞌajar u boꞌorir u siꞌpir, bin u caꞌ u cꞌʌmej caꞌ bin cꞌuchuc tu qꞌuinin u xur tꞌʌn.
\v 6 A raꞌ u qꞌuinin tunoꞌ, cu bin tsꞌabir ten Cꞌuj tiꞌ jujunturoꞌonex a baꞌ jach taj an ten bic caj ic betex teꞌ ich yocꞌocab uch a cuxaꞌanoꞌonex uch.
\v 7 A Cꞌujoꞌ, jeꞌ u tsꞌic toꞌonex ij cuxtarex munt qꞌuin, wa rajraꞌ ic manex tu tsoyir, quireꞌ ij cꞌat ij cuxtarex ich caꞌanan. Jeroj, wa quic manex tu tsoyir, a Cꞌujoꞌ, jeꞌ u quiꞌ acsicoꞌonexeꞌ soc ij cuxtarex munt qꞌuin. 
\v 8 Chen a Cꞌujoꞌ, bin u caꞌ tsꞌictar yejer a mac a cu yaꞌaricoꞌ nojnoj u bʌjiriꞌ cu tucric. Rajen bin u caꞌ tsꞌabir u mucꞌyaj ten Cꞌuj, quireꞌ mʌꞌ ju quibaj u tajir u tꞌʌn Cꞌuj, chen cu man tu cꞌasir.
\v 9 Tu cotor mac a yʌn u siꞌpir ich yocꞌocab, cax u winiquirob israel bin u caꞌ tsꞌabir u mucꞌyajob ten Cꞌuj, quireꞌ raꞌ tu yʌn uꞌyob u tꞌʌn Cꞌuj uch, pachir a mʌꞌ ju winiquirob israel cu bin tsꞌabir u mucꞌyaj ten Cꞌuj.
\v 10 Chen a mac a cu manob tu tsoyir, a Cꞌujoꞌ jeꞌ u yiric nenoꞌj. A Cꞌujoꞌ, jeꞌ u tucric jach tsoy, rajen cu bin u quiꞌtar u yor, quireꞌ mʌnaꞌ baꞌ cu tucric. Baxuc cu bin yubicob, cax u winiquirob israel, cax mʌꞌ ju winiquirob israel.
\p
\v 11 A Cꞌujoꞌ, quet u rʌc iric tu cotor mac, quireꞌ tʌc quet cu bin boꞌtbir.
\v 12 Robob, a mac a mʌꞌ yerob u tꞌʌn Cꞌuj a caj u tsꞌibtaj Moisésoꞌ, wa yʌn u siꞌpirob, bin u caꞌ tsꞌabir u mucꞌyajob ten Cꞌuj, chen mʌꞌ ju tocar u joꞌrob ten u tꞌʌn Moisés. Wa caj u pʌyajob u siꞌpirob a mac a toc yʌn a baꞌ tsꞌibtaꞌb ten Moisés uch, raꞌ cu bin taquic u joꞌrob, u tꞌʌn Moisés. 
\v 13 Mʌꞌ ja wirej, a Cꞌujoꞌ, mʌꞌ cꞌuchaꞌan yor yaꞌaric taj yor a mac a mʌꞌ u quibej, a cu chen uꞌyic u tꞌʌn Moisés, chen mʌꞌ ju betej a baꞌ cu yaꞌaric. Chen a Cꞌujoꞌ, cꞌuchaꞌan yor yaꞌaric tiꞌ mac, taj yor a cu quibic a baꞌ cu yaꞌaraꞌ tiꞌ.
\v 14 Iric a mac a mʌꞌ ju winiquirob israel. Robob, mʌnaꞌ tiꞌ u tꞌʌn Moisés, chen yʌn qꞌuin robob cu beticob a baꞌ cu yaꞌaric ich u tꞌʌn a caj u tsꞌibtaj Moisés. Quireꞌ tu yorob, yerob a baꞌ jach tsoy. Rajen a baꞌ cu tucricob, raꞌ u tꞌʌn Moisés tiꞌob.
\v 15 A mac a mʌꞌ ju winiquirob israel wa cu beticob a baꞌ jach tsoyoꞌ, raꞌ cu yesic yerob tu yorob a baꞌ cu yaꞌaric ich u tꞌʌn Moisés. Mʌꞌ ja wirej, robob yerob tu yorob, wa ber cu beticob a tsoyoꞌ, yerob xan, wa ber cu beticob a cꞌasoꞌ. Bayiriꞌ xan, yʌn qꞌuin cu tucricob: “Biquinin caj in betaj cꞌas?” Yʌn qꞌuineꞌ, yerob caj u betob a tsoyoꞌ.
\v 16 Mʌꞌ ja wirej, caꞌ bin cꞌuchuc tu qꞌuinin a pꞌisaꞌan ten Cꞌuj, rajiꞌ cu bin jocꞌsic u parar Jesucristo, soc rajiꞌ cu bin u tsꞌic u mucꞌyaj tiꞌ a mac a cu manob tu cꞌasir, cax a baꞌ caj u muc u betob. Baxuc caj yaꞌaraj ich u jach tsoyir u tꞌʌn Cꞌuj, a caj in tsecꞌtaj uch. 
\s U winiquirob israel yejer u tꞌʌn a tsꞌibtaꞌb ten u nunquir Moisés
\p
\v 17 Arej in waꞌarej techex a mac u winiquirob israel. Rajiꞌ cu tucric tu quiꞌ cʌnantaj a baꞌ, caj u tsꞌibtaj u nunquir Moisés uch, rajen u nonoj bʌjiriꞌ cu tus tsicbar u bʌjiriꞌ tus aꞌaric wa jach manan yajbir ten Cꞌuj. 
\v 18 Rajiꞌ aꞌarej xan, yer a baꞌ u cꞌat Cꞌuj. Rajiꞌ aꞌarej xan, yer a baꞌ tsoy u betic, bayiriꞌ rajiꞌ aꞌarej xan, yer a baꞌ mʌꞌ tsoy u betic, quireꞌ caj u cʌnaj a baꞌ caj u tsꞌibtaj u nunquir Moisés uch.
\v 19 U bʌjiriꞌ cu tus tucric yer bic tabar u camsic a mac a mʌꞌ yer u tꞌʌn Moisés. Rajiꞌ aꞌarej bin u caꞌ u sasiquint u tucur a mac an ten bic tiꞌ yʌnob ich yacꞌbirir, quireꞌ mʌꞌ yerob Cꞌuj.
\v 20 Rajiꞌ cu tus tucric cu camsic a mac a mʌꞌ yerob baꞌ tiꞌ Cꞌuj. Rajiꞌ cu tus tucric, wa cꞌuchaꞌan yor u camsic a mac a mʌꞌ camsaꞌb tiꞌ a baꞌ tiꞌ yʌn ich u tꞌʌn Cꞌuj. Rajiꞌ cu tus tucric caꞌ bin u pʌy u berob a mac a mʌꞌ toy u quiꞌ cʌnob, quireꞌ rajiꞌ u tus yer a baꞌ tsꞌibaꞌan ich u tꞌʌn Cꞌuj a uchbenoꞌ, a baꞌ tsoy caꞌ u cʌnej mac. 
\v 21 Jaj ix tʌcoj, wa ber cu camsic mac, tin tꞌʌn, u bʌjiriꞌ mʌꞌ toy u quiꞌ cʌniꞌ a baꞌ cu camsic. Rajiꞌ cu tsecꞌtic tu cu cꞌujinticob Cꞌuj wa mʌꞌ tsoy u yaꞌcric baꞌ, jaj ix tʌcoj u berer yaꞌcric baꞌ.
\v 22 Rajiꞌ u winiquirob israel, a cu yaꞌaric wa mʌꞌ tsoy mac u pʌyic xquic, a yʌn u mamoꞌ, chen tin tꞌʌn, rajiꞌ cu pʌyic xquic a yʌn u mamoꞌ. Bayiriꞌ xan, rajiꞌ cu yaꞌaric mʌꞌ tsoy tu tꞌʌn wa mac cu betic u tus cꞌuj. Chen tin tꞌʌn, rajiꞌ u berer yaꞌcric a baꞌ tiꞌ yʌn tu cu binob u tus cꞌujinticob cꞌuj, a mac a mʌꞌ yerob Cꞌuj, a baꞌ mʌꞌ tsoy tu tꞌʌn.
\v 23 Cu yubic jach tus carem, quireꞌ yʌn tiꞌ a baꞌ tsꞌibtaꞌb ten u nunquir Moisés, chen mʌꞌ ju betic a baꞌ cu yaꞌaric ich u tꞌʌn Moisés, rajen cu pꞌastic Cꞌuj.
\v 24 Rajiꞌ u winiquirob israel caj u tus betob a baꞌ cu yaꞌaric ich u tꞌʌn Cꞌuj tu caj u yaꞌaraj: “Quireꞌ raꞌ u sipirob u winiquirob israel, rajen pꞌastaꞌb tiꞌ Cꞌuj ten a mac a mʌꞌ ju winiquirob israel.” Baxuc caj tsꞌibtaꞌb ich u tꞌʌn Cꞌuj uch.
\p
\v 25 Tin tꞌʌn, wa caj u quibaj a baꞌ tsꞌibtaꞌb ten Moisés uch, jach tsoy cu bin yubic tu yor a mac u winiquirob israel. Chen wa mʌꞌ ju quibej a baꞌ tiꞌ yʌn ich u tꞌʌn Moisés, a ray u qꞌuininoꞌ, caj waysaꞌbob tiꞌ mʌꞌ ju winiquirob israel.
\v 26 Bayiriꞌ xan, a mac a mʌꞌ ju winiquirob israel bin u caꞌ waysaꞌbirob irej wa ju winiquirob israel. Baxuc cu bin tar tiꞌ, wa cu quibic a baꞌ tsꞌibtaꞌb ten Moisés. 
\v 27 Mʌꞌ ja wirej, a techexoꞌ, u winiquirechex israel, bin u caꞌ tacbir a joꞌrex ten a mʌꞌ ju winiquirob israel, soc u tsꞌabʌr a mucꞌyajex ten Cꞌuj. Quireꞌ a techexoꞌ, mʌꞌ ja quibex a baꞌ tiꞌ yʌn ich u tꞌʌn Moisés, cax toc yʌn techex toc rʌc tsꞌibaꞌan u tꞌʌn Moisés, cax caj a cꞌʌmex a tsꞌiriquex a bʌqꞌuerex an ten bic caj yaꞌaraj Cꞌuj uch. Mʌꞌ ja wirej, robob a mʌꞌ ju winiquirob israel caj u quibob a baꞌ tiꞌ yʌn ich u tꞌʌn Moisés, cax mʌꞌ tu cꞌʌmaj u tsꞌiric u bʌqꞌuer an ten bic nanij cu beticob u winiquirob israel, rajen jeꞌ u taquicob a joꞌrex a mʌꞌ u winiquirob judío.
\v 28 Mʌꞌ rajiꞌ yʌnin Cꞌuj, cax u parar u nunquir Abraham, cax ir bajen u wich u winiquirob israel, mʌꞌ rajiꞌ yʌnin Cꞌuj. Mʌꞌ rajiꞌ yʌnin Cꞌuj quireꞌ caj u cꞌʌmaj u tsꞌiric u bʌqꞌuer an ten bic nanij cu betic u winiquirob israel.
\v 29 Uꞌyex baꞌ quin wac, a werex wa mac rajiꞌ yʌnin Cꞌuj, rajiꞌ a yʌn Cꞌuj tu yor. A baxucoꞌ, jach taj tsꞌiraꞌan u bʌqꞌuer an ten bic nanij cu betic u winiquirob israel, a raꞌ u qꞌuininoꞌ cu beyaj Cꞌuj tu yor yejer u Tajꞌor u Pixam Cꞌuj. Mʌꞌ ja wirej, robob jach tsoy irir ten Cꞌuj, mʌꞌ chen ich u racꞌob xan.

\c 3
\p
\v 1 Wa jach taj aroꞌ, bic tabar jach manan tsoy u winiquirob israel, chen u jer a mʌꞌ ju winiquirob israel mʌꞌ tsoyiꞌ? Baꞌwir tun, cu tsꞌiricob u bʌqꞌuerob an ten bic nanij cu beticob u winiquirob israel?
\v 2 Mʌꞌ ja wirej, jach manan tsoy tiꞌob. Quireꞌ a Cꞌujoꞌ, caj u batꞌan tsꞌaja tiꞌob u winiquirob israel u tꞌʌn soc u quiꞌ cʌnanticob.
\v 3 Chen wa yʌn jun yarob u winiquirob israel mʌꞌ ju quibob Cꞌuj, ca tucriquex wa Cꞌuj mʌꞌ ju bin u nupꞌsic a baꞌ caj u toc araj tiꞌob uch, cax a jun yarob u winiquirob israel mʌꞌ u quibobiꞌ?
\v 4 Aroꞌ mʌꞌ tajiꞌ, a Cꞌujoꞌ, taj cu tsicbar, cax wa mac cu tus. Quireꞌ baxuc tu tsꞌibaꞌan tu cu yaꞌaric a mac tsꞌab u tucur ten Cꞌuj a tarij tu yor:
\q A baꞌ cu yaꞌaric Cꞌuj cu jocꞌar u tajir. Baxuc jeꞌ u jocꞌar u tsoyir cax cu taquicob u joꞌr.
\m Baxuc tsꞌibaꞌan uch.
\p
\v 5 Uꞌyex baꞌ cu yaꞌaric a mac chich u joꞌroꞌ bajeꞌrer: “Wa raꞌ cu yesic taj yor Cꞌuj, tu quin man tu cꞌasir biquinin cu coyen taquic in joꞌr quir in mucꞌyaj, rajen mʌꞌ tsoy a Cꞌujoꞌ”, baxuc cu tus aꞌaric a mac chich u joꞌroꞌ. 
\v 6 Wa jix tʌcoj cu coyen taquic u joꞌr mac Cꞌuj. Jeꞌ wa ju cꞌuchur u yor Cꞌuj u taꞌquic u joꞌr mac tu cotor a yʌn u siꞌpir? Mʌꞌ ju cꞌuchur u yor Cꞌuj u taꞌquic u joꞌr mac.
\p
\v 7 Uꞌyex baꞌ cu yaꞌaric a mac a chich u joꞌroꞌ: “A Cꞌujoꞌ, quij, mʌꞌ ju yʌn tsꞌic in mucꞌyaj quireꞌ quin tus. Baxuc cu tus aric mʌꞌ ja wirej, quireꞌ quin tus, rajiꞌ cu yesaꞌr tiꞌ mac bic tabar jach carem Cꞌuj, bayiriꞌ xan, bic tabar jach taj u tꞌʌn”, baxuc cu tsicbar a mac a chich u joꞌroꞌ.
\v 8 Rajen, rajiꞌ cu yaꞌaric: “Cax manex tic siꞌpirex, quireꞌ jach tsoy caꞌ ij quesex jach taj Cꞌuj”, baxuc cu tus aꞌaric. Bayiriꞌ xan, cu tus pʌqꞌuicob in pach quireꞌ cu yaꞌaricob baxuc quin camsic xan, aroꞌ mʌꞌ tajiꞌ. Jach tsoy, ix tʌcoj caꞌ tsꞌabʌc u mucꞌyaj ten Cꞌuj tiꞌob, quireꞌ cꞌas cu tucricob ten, quij Pablo.
\s Tu cotoroꞌonex rʌc yʌn ic siꞌpirex
\p
\v 9 Bic tabar tuneꞌ, a tenob u winiquirenob israel jach manan tsoyenob quireꞌ u winiquirenob israel, chen u jer mac, a mʌꞌ ju winiquirob israel, mʌꞌ tsoyiꞌ. Mʌꞌ tajiꞌ, quireꞌ tic toc araj techex wa tu cotoroꞌonex yʌn ic siꞌpirex, cax u winiquiren israel, cax mʌꞌ ju winiquiren israel.
\v 10 Baxuc tiꞌ tsꞌibaꞌan ich u tꞌʌn Cꞌuj uch xan:
\q A teꞌ ich yocꞌocab, quij yaꞌar Cꞌuj, mʌnaꞌ mac taj yor, tuririꞌ.
\v 11 Mʌnaꞌ mac u cꞌat yer a baꞌ u cꞌat Cꞌuj, mʌꞌ u cꞌat u yet man yejer Cꞌuj xan.
\v 12 Caj u rʌc pꞌʌtob a baꞌ caj yaꞌaraj Cꞌuj quir u bin ich u jer tus cꞌuj. Mʌnaꞌ mac cu man tu tsoyir, tuririꞌ. 
\v 13 An ten bic u mucnʌj tu cu muquicob u baquer mac, baxuc u chiꞌob mac, irej wa tuꞌ u chiꞌob, quireꞌ cu cʌrʌxtꞌʌnticob mac. Robob tu cu tsicbarob yejer mac, cu tusaricob mac. U tꞌʌnob a cu tsicbarob a cu jocꞌar tu chiꞌob, irej u yʌquir u coj can, raꞌ irej wa cu quinsicob mac.
\v 14 Robob nanij cu cʌrʌxtꞌʌnticob mac, bayiriꞌ, nanij u tsꞌictarob.
\v 15 U chen cꞌat u quinsicob u jer mac.
\v 16 Cax tu cu binob cu choquinticob u yor mac.
\v 17 Mʌꞌ ju sisquinticob u yorob mac tu cʌjaꞌanobiꞌ.
\v 18 Mʌꞌ ju sʌjticob Cꞌuj.
\m Baxuc caj tsꞌibtaꞌb ich u tꞌʌn Cꞌuj uch tiꞌ mac.
\p
\v 19 A toꞌonexoꞌ, ij querex a baꞌ tan tu yaꞌaric Cꞌuj, aroꞌ cu yaꞌaric biquiraꞌ u winiquirob israel. A baywoꞌ, mʌꞌ cꞌuchaꞌan yor u tusaricob: “A tenoboꞌ, mʌnaꞌ in siꞌpirob.” Mʌꞌ ja wirej tu cotor mac bin u caꞌ ʌcʌtan tiꞌ Cꞌuj, soc u nunquicob tiꞌ u siꞌpirob. Mʌꞌ ja wirej, u tꞌʌn Moisés, a baꞌ cu sayʌrob tu pachob u cʌnicob u winiquirob israel. Raꞌ cu yaꞌaric bic tabar caꞌ cuxracob.
\v 20 Rajen mʌnaꞌ mac cꞌuchaꞌan yor yaꞌarej: “Taj in wor ʌcʌtan tu wich Cꞌuj, quireꞌ caj in toc betaj tu cotor a baꞌ cu yaꞌaric ich u tꞌʌn Moisés.” Mʌꞌ ja wirej, a baꞌ tsꞌibaꞌan ich u tꞌʌn Moisés cu chen esic toꞌonex bic tabar quic manex tu cꞌasir.
\s A Cꞌujoꞌ cu chen taquicoꞌonex wa quij cacsiquex tij corex tiꞌ
\p
\v 21 Chen bajeꞌrer Cꞌuj caj u yesaj toꞌonex bic tabar u rucꞌsic ic siꞌpirex tic pixamex. Mʌꞌ raꞌ u tꞌʌn Moisés a cu sayʌrob tu pach u cʌnicob u winiquirob israel. Chen ich a raꞌiriꞌ u tꞌʌn, a xiboꞌ, a tsꞌaꞌb u tucur ten Cꞌuj tiꞌob caj u tsꞌibtob jeꞌ u taquicoꞌonex Cꞌuj biqꞌuineꞌ.
\v 22 Chen bajeꞌrer, tu cotor mac a cu quibic Jesucristo, a Cꞌujoꞌ cu rucꞌsic u siꞌpir tu pixam. Baxuc cu bin u betic tiꞌ a mac a cu quibic, quireꞌ a Cꞌujoꞌ, pꞌeriꞌ yiricoꞌonex an ten bic mac a yʌn u siꞌpirob.
\v 23 Mʌꞌ ja wirej, biquinin Cꞌuj pꞌeriꞌ yiricoꞌonex? Quireꞌ tu cotoroꞌonex caj ij cacsex ic siꞌpirex. Rajen, a Cꞌujoꞌ, mʌꞌ cꞌuchaꞌan yor yaꞌarej: “Jach tsoyechex”, quireꞌ mʌnaꞌ mac cu man tu tsoyir an ten bic Cꞌuj u cꞌat.
\v 24 Quireꞌ raꞌ tu yajquin toꞌonex an ten bic tsoy tu tꞌʌn Cꞌuj. Mʌꞌ ja wirej, caj u sija toꞌonex u cuxtar munt qꞌuin a raꞌ u qꞌuininoꞌ caj ij cacsaj tij corex tiꞌ Jesucristo. Mʌꞌ boꞌorir u caꞌ, quireꞌ Jesús caj u boꞌotaj u boꞌorir ic siꞌpirex.
\v 25 Quireꞌ a Cꞌujoꞌ caj u tacoꞌonex. Mʌꞌ ja wirej, u bʌjiriꞌ Jesús, caj u boꞌotaj u boꞌorir ic siꞌpirex. Rajen mʌꞌ ju bin tsꞌabir ic mucꞌyajex quireꞌ jocꞌ u qꞌuiqꞌuer Jesús toꞌonex, caj quimij toꞌonex. Mʌꞌ ja wirej, a Cꞌujoꞌ caj u cꞌubaj Jesús quir u quimin soc u jawsic ic siꞌpirex wa quic chen acsic ij corex tiꞌ. A baywoꞌ, Cꞌuj caj u yesaj toꞌonex bic jach taj u yor a raꞌ u qꞌuinin caj u mucꞌtaj u siꞌpirob a mac cuxaꞌanob uch, a mac a mʌꞌ ju quibob Cꞌuj uch.
\v 26 Barej, caj quimij Jesús ich cruz, aroꞌ cu yesic bic tabar caj u yajquin toꞌonex Cꞌuj, quireꞌ u cꞌat ij querex tsoy cu betic a Cꞌujoꞌ, bayiriꞌ xan, cu rucꞌsic u siꞌpir a mac a cu yacsic tu yor tiꞌ Cristo.
\p
\v 27 Quireꞌ Jesucristo, caj u rucꞌsaj ic siꞌpirex, rajen quij cacsiquex tij corex tiꞌ. Rajen mʌꞌ cꞌuchaꞌan ij corex caꞌ ij carex: “In bʌjiriꞌ quin taquic in bʌj tuj in quibaj a baꞌ tsꞌibaꞌan ich u tꞌʌn Moisés.” Rajiꞌ mʌꞌ ju bin u taquic mac.
\v 28 Tij toc uꞌyex bic tabar Cꞌuj cu bin u rucꞌsic toꞌonex ic siꞌpirex, wa quij cacsiquex ij corex tiꞌ Cristo. Mʌꞌ jij cuꞌyex wa Cꞌuj cu bin u rucꞌsic toꞌonex tic siꞌpirex, wa quij quibiquex u tꞌʌn a tu tsꞌibtaj Moisés uch.
\p
\v 29 Ca chen tucriquex wa Cꞌuj, rajiꞌ Cꞌuj chen tiꞌ u winiquirob israel? Mʌꞌ wa rajiꞌ u Cꞌuj xan, cax mʌꞌ ju winiquirob israel? Rajiꞌ jach taj, rajiꞌ xan, u Cꞌujir, cax tiꞌ a mac a mʌꞌ ju winiquirob israel.
\v 30 Quireꞌ tuririꞌ Cꞌuj yʌn, rajen a Cꞌujoꞌ cꞌuchaꞌan yor yiric mac taj yor, a cu yacsic tu yor tiꞌ Cristo, cax u winiquirob israel, cax wa mʌꞌ ju winiquirob israel. 
\v 31 Rajen, mʌꞌ tajiꞌ wa mac cu yaꞌaric toꞌonex caj ic pꞌʌtex a baꞌ tsꞌibtaꞌb ten Moisés raꞌ u qꞌuinin caj ij cacsajex ij corex tiꞌ Jesucristo. Mʌꞌ ja wirej, raꞌ u qꞌuinin caj ij quiꞌ acsex ij corex, jeroj raꞌ u qꞌuininoꞌ caj yʌnxchun ij quibiquex Cꞌuj.
\c 4
\s Baꞌ cu camsicoꞌonex u nunquir u winiquirob israel, u cꞌabaꞌ Abraham
\p
\v 1 Caꞌ ij tucrex bajeꞌrer ic nunquirex Abraham.
\v 2 Mʌꞌ ja wirej, u winiquirob israel cu tus tucricob Cꞌuj cꞌuchaꞌan yor yiric taj yor u nunquirob Abraham, quireꞌ u bʌjiriꞌ a baꞌ caj u betaj uch, rajen cꞌuchaꞌan yor Cꞌuj yiric Abraham taj yor. Wa taj a baꞌ cu yaꞌaricob u winiquirob israel tiꞌ Abraham, jeroj cꞌuchaꞌan yor u tajquintic u yor. Chen mʌꞌ tajiꞌ, quireꞌ mʌꞌ cꞌuchaꞌan yor u tajquintic u yor, quireꞌ u bʌjiriꞌ u beyaj a baxucoꞌ. Rajen mʌꞌ cꞌuchaꞌan yor yaꞌaric baxuc tiꞌ Cꞌujoꞌ. 
\v 3 Uꞌyex baꞌ tsꞌibaꞌan ich u tꞌʌn Cꞌuj tiꞌ ic nunquirex Abraham uch: “Raꞌiriꞌ u qꞌuininoꞌ, caj irir ten Cꞌuj taj yor Abraham barej caj u yacsaj tu yor”, baxuc tsꞌibaꞌan ich u tꞌʌn Cꞌuj tiꞌ Abraham uch.
\v 4 Caꞌ ij cʌnex baꞌ cu camsicoꞌonex a jeꞌ raꞌ. A mac a cu beyaj tiꞌ u jer mac caꞌ boꞌotac. Mʌꞌ cꞌuchaꞌan yor yaꞌarej: “Sijbir ten a jeꞌ taqꞌuinaꞌ.” Quire rajiꞌ cu cꞌʌmic u taqꞌuin, quireꞌ raꞌ u boꞌorir u cꞌʌb tiꞌ u beyaj. 
\v 5 Chen Cꞌuj, mʌꞌ ju yaꞌaraj wa caꞌ ic betex a tsoyoꞌ, quir u rʌc rucꞌsic ic siꞌpirex, quireꞌ jach tsoy tu tꞌʌn caj u rucꞌsaj ic siꞌpirex, quireꞌ caj ij cacsex ij corex tiꞌ Cristo.
\v 6 Baxucoꞌ, caj u yaꞌaraj ic nunquirex David uch, caj yaꞌaraj: “Jach quiꞌ yor a mac a araꞌb ten Cꞌuj, mʌnaꞌ u siꞌpir, cax mʌnaꞌ yutsir caj u betaj quireꞌ toc ten Cꞌuj.”
\v 7 Mʌꞌ ja wirej:
\q Jach quiꞌ yor caj u yubaj mac caj jawsaꞌb u siꞌpir ten Cꞌuj. Jach manan quiꞌ yor caj u yubaj mac rucꞌsaꞌb u siꞌpir ten Cꞌuj xan.
\v 8 Jach quiꞌ yor caj u yubaj mac mʌꞌ ju tocar u joꞌr ten Cꞌuj quireꞌ cax yʌn u siꞌpir.
\m Baxuc caj u yaꞌaraj David uch.
\p
\v 9 Uꞌyex baꞌ quin cꞌatic techex. Jeꞌ wa ju chen uꞌyic quiꞌ yor u winiquirob israel, an ten bic caj yaꞌaraj ic nunquirex David uch? Mʌꞌ wa ju bin yubic u quiꞌtar yor a mac a mʌꞌ ju winiquirob israel? Bajeꞌrer, caꞌ ij cꞌʌꞌotex tiꞌ u nunquirob u winiquirob israel, u cꞌabaꞌ Abraham. Ic toc erex, caj u yacsaj tu yor tiꞌ Cꞌuj, rajen Cꞌuj cꞌuchaꞌan yor yiric taj yor Abraham. 
\v 10 Barej, caj araꞌb ten Cꞌuj cꞌuchaꞌan yor yiric wa taj yor Abraham, caj tsꞌoc wa ju cꞌʌmic Abraham u tsꞌiric u bʌqꞌuer an ten bic nanij cu beticob u winiquirob israel pachir. Mʌꞌ ja wirej, mʌꞌ toy u cꞌʌmaj Abraham u tsꞌiric u bʌqꞌuer caj araꞌb ten Cꞌuj Abraham. Cꞌuchaꞌan yor yiric taj yor Abraham, quireꞌ caj u yacsaj tu yor tiꞌ Cꞌuj.
\v 11 Mʌꞌ ja wirej, pachir Abraham caj u cꞌʌmaj u tsꞌiric u bʌqꞌuer quir u yesic jeroj tajij yor ʌcʌtan tu wich Cꞌuj. Chen cꞌaj techex, batꞌan tajij yor Abraham, quireꞌ caj u yacsaj tu yor tiꞌ Cꞌuj, raꞌ pʌyber, rajen pachir caj u cꞌʌmaj u tsꞌiric u bʌqꞌuer, soc ij querex wa taj yor Abraham. Rajen xan, araꞌb tiꞌ Abraham, rajiꞌ u tet tu cotor a mac a cu yacsicob tu yor, cax mʌꞌ toy u cꞌʌmob u tsꞌiric u bʌqꞌuerob an ten bic nanij cu beticob u winiquirob israel. Mʌꞌ ja wirej, caj u chen acsob tu yorob.
\v 12 A Abrahamoꞌ, rajiꞌ irej wa ju tet a mac a caj u cꞌʌmob u tsꞌiric u bʌqꞌuer an ten bic nanij cu beticob u winiquirob israel. Chen rajiꞌ mʌꞌ irej wa ju tet tiꞌob cax tu cꞌʌmajob u tsꞌiric u bʌqꞌuerob. Jariꞌ rajiꞌ u tetob, quireꞌ caj u yacsob tu yorob tiꞌ Cꞌuj an ten bic Abraham caj u yacsaj tu yor uch.
\s A baꞌ araꞌb ten Cꞌuj uch, cu bin u cꞌʌmic a mac a cu yacsicob tu yorob tiꞌ
\p
\v 13 Mʌꞌ ja wirej, a Cꞌujoꞌ, caj u toc araj tiꞌ Abraham yejer u pararob wa cu bin tsꞌabir tiꞌob u ruꞌumin ich yocꞌocab, quireꞌ caj toc araj tiꞌob. Aroꞌ irej an ten bic mac cu pꞌʌtic u baꞌtac tiꞌ u parar, wa ber cu chꞌijirob u pararob. A Cꞌujoꞌ, caj u tsꞌajaj u tꞌʌn tiꞌ Abraham, cax mʌꞌ tu bet a baꞌ araꞌb ich u tꞌʌn Moisés uch. Caj u tsꞌajaj u tꞌʌn tiꞌ Abraham, rajen caj u yacsob tu yor, rajen Cꞌuj cꞌuchaꞌan yor yiric taj yor.
\v 14 Mʌꞌ ja wirej, a mac a cu quibicob u tꞌʌn Moisés, wa chen raꞌ cu bin tsꞌabir u ruꞌum ich yocꞌocab ten Cꞌuj. Mʌꞌ baꞌwir quij cacsiquex tij corex. Jot, a baꞌ cu toc aric Cꞌuj xan.
\v 15 Quireꞌ u tꞌʌn Moisés cu yesic Cꞌuj cu bin tsꞌabir u mucꞌyaj a mac a cu manob tu cꞌasir. Mʌꞌ ja wirej, wa mʌnaꞌ u tꞌʌn Moisés, mʌꞌ cꞌuchaꞌan ij corex ij cariquex wa yʌn u siꞌpir mac.
\p
\v 16 Rajen a Cꞌujoꞌ, caj u toc araj tiꞌ mac a cu yacsic tu yor, jeꞌ u bin tsꞌabir tiꞌ u ruꞌum ich yocꞌocab quireꞌ caj u toc araj Cꞌuj, quireꞌ tsoy a Cꞌujoꞌ. A baywoꞌ, tu cotor u caꞌ pararob u pararob u nunquirob Abraham cꞌuchaꞌan yorob u cꞌʌmicob, quireꞌ caj u yacsob tu yorob an ten bic Abraham, cax u winiquirob israel a tu cʌnantajob u tꞌʌn Moisés, cax a mʌꞌ ju winiquirob israel. Caj u jach cꞌʌmob Cꞌuj an ten bic Abraham caj u cꞌʌmaj Cꞌuj uch. Rajen ij cariquex a Abrahamoꞌ, rajiꞌ u tet tu cotor an cu yacsic tu yorobeꞌ.
\v 17 Rajen tiꞌ tsꞌibaꞌan ich u tꞌʌn Cꞌuj a baꞌ araꞌb tiꞌ Abraham. Baxuc caj araꞌb ten Cꞌuj tiꞌ Abraham: “A tenoꞌ, quin bin in caꞌ ricꞌsiquech Abraham, quij yaꞌaraꞌ ten Cꞌuj, soc tech u nunquirech tiꞌ a mac a cʌjaꞌanob ich yaꞌab u ruꞌumin.” Jeroj, Abraham caj u quibaj. Mʌꞌ ja wirej, rajiꞌ Cꞌuj, a cu ricꞌsic mac ich u quimirir a tu quimenoboꞌ. Wa rajiꞌ cu chen tsꞌic u tꞌʌnin, a baꞌ a mʌꞌ toy tac ich yocꞌocab, jeꞌ u jocꞌar ich yocꞌocabeꞌ. Mʌꞌ ja wirej, a Cꞌujoꞌ, mʌꞌ jar u jocꞌsic caꞌ cuxrac chan och a mac a mʌꞌ toy rochac ten u nʌꞌ.
\p
\v 18 Mʌꞌ ja wirej, a Abrahamoꞌ, caj u chꞌuctaj caꞌ bin tsꞌabac u parar ten Cꞌuj, cax a Abrahamoꞌ, man u qꞌuinin u pararʌncʌr, quireꞌ toc chꞌijij uch. Abraham caj u quibaj a baꞌ toc araꞌb tiꞌ ten Cꞌuj. Caj u quibaj Abraham, wa rajiꞌ jeꞌ u pararʌncʌr yaꞌab mac ich yaꞌab ruꞌumin, an ten bic Cꞌuj caj u yaꞌaraj tiꞌ wa ber caj yaꞌaraj: “Raꞌ u qꞌuinin bin in caꞌ ricꞌsech soc tech, u nunquirech a mac a cʌjaꞌanob ich yaꞌab ruꞌumin.” Jeroj Cꞌuj caj u nupꞌsaj u tꞌʌn tiꞌ Abraham.
\v 19 A Abrahamoꞌ, mʌꞌ tubsaꞌan yor u chꞌuctic a baꞌ toc araꞌb tiꞌ ten Cꞌuj, cax yʌn u cien yaxqꞌuin xan, cax man u qꞌuinin u pararʌncʌr, cax yer mʌꞌ cꞌuchaꞌan yor u pararʌncʌr u racꞌ Sara, mʌꞌ biqꞌuin.
\v 20 A Abrahamoꞌ, mʌꞌ ju tucraj chichiniꞌ, wa mʌꞌ taj a baꞌ caj u toc araj Cꞌuj tiꞌ. Chen jach tsꞌajaꞌan yor u quiꞌ acsic tu yor, quireꞌ yer Cꞌuj, jeꞌ u nupꞌsic a baꞌ caj u toc araj tiꞌ. Jeroj, caj yaꞌaraj Abraham tiꞌ Cꞌuj: “Jach caremech Cꞌuj”, quij.
\v 21 Mʌꞌ ja wirej, Abraham caj u toc rʌc najtaj wa mʌꞌ jar u betic a baꞌ cu toc aric Cꞌuj tiꞌ.
\v 22 Rajen, caj araꞌb ten Cꞌuj tiꞌ Abraham, caj cꞌamij Abraham ten Cꞌuj, quireꞌ caj u yacsaj tu yor tiꞌ Cꞌuj.
\p
\v 23 A rayoꞌ, mʌꞌ chen tsꞌibtaꞌb tiꞌ Abraham, mʌꞌ raꞌ quir yaꞌaric wa jach tsoy Abraham.
\v 24 Aroꞌ tsꞌibtaꞌb toꞌonex quir u camsicoꞌonex quir ij cacsiquex ij corex Cꞌuj. Cꞌuj cu yaꞌaric: “Cꞌuchaꞌan in wor in wiric taj yor mac a cu yacsic u yor tiꞌ in tꞌʌn.” Mʌꞌ ja wirej, caj ij cacsex tij corex tiꞌ a mac a caj u ricꞌsaj Jesús ich u quimirir, rajen taj ij corex. 
\v 25 Mʌꞌ ja wirej, Cꞌuj caj u tuchiꞌt u parar quir u quimin teꞌ ich yocꞌocab. A baywoꞌ, caj u boꞌotaj u boꞌorir ic siꞌpirex. Rajen, caj ricꞌsaꞌb Jesucristo ich u quimirir soc cꞌuchaꞌan yor u cꞌʌmicoꞌonex, quireꞌ rucꞌsaꞌb ic siꞌpirex.
\c 5
\s Jeroj Cꞌuj caj u cꞌʌmoꞌonex
\p
\v 1 Cꞌuj caj u rucꞌsaj ic siꞌpirex, quireꞌ tij cacsex tij corex tiꞌ. Mʌꞌ ja wirej, Jesús caj u pꞌeriꞌquintaj ij corex tiꞌ Cꞌuj, soc mʌnaꞌ baꞌ quic tucriquex bajeꞌrer. 
\v 2 Mʌꞌ ja wirej, Cꞌuj caj u betaj tsoy toꞌonex, quireꞌ tij cacsex tij corex tiꞌ Cristo. Rajen quiꞌ ij corex quireꞌ ij querex tu quic binex ich u sasirir Cꞌuj.
\v 3 Mʌꞌ chen quiꞌ in worob quireꞌ aroꞌ, jach quiꞌ in worob xan, cax a teraꞌ quin mucꞌyajob. Mʌꞌ ja wirej, in werob a baxucoꞌ, cu chichtar in mucꞌob ich Cꞌuj soc quin mucꞌticob baꞌ, cax a baꞌ cu tar tin wocꞌorob.
\v 4 Mʌꞌ ja wirej, barej caj chichij ic muqꞌuꞌex tu quic mucꞌyajex, a raꞌ u qꞌuininoꞌ, Cꞌuj cu bin yaꞌaric: “Jach tsoyechex”, rajen quic chꞌuctiquex Cꞌuj cu bin u yacsicoꞌonex ich u sasirir.
\v 5 Quireꞌ baxucoꞌ, quic chꞌuctiquex, rajen mʌꞌ jic bin ic chꞌic suraquirex tiꞌ a baꞌ quic chꞌuctiquex ij quirex. Mʌꞌ ja wirej, u Tajꞌor u Pixam Cꞌuj, a tsꞌaꞌb ten Cꞌuj toꞌonex, cu tsꞌic ic najtex wa Cꞌuj u jach yajoꞌonex.
\p
\v 6 Barej a uchoꞌ, mʌꞌ cꞌuchaꞌan ij corex ic pꞌʌtiquex a cꞌasoꞌ, mʌꞌ ij querex xan, bic tabar ic taquiquex ic bʌjex, jeroj caj cꞌuchij tu qꞌuinin, a toc pꞌisaꞌan ten Cꞌuj uch, caj quimij Cristo tiꞌ a mac a mʌꞌ yerob Cꞌuj.
\v 7 Jaj ix tʌcoj, ij querex mac, jeꞌ u quimin tiꞌ a mac jach taj yoroꞌ. Chen tin tꞌʌn, ix tiꞌ, mʌnaꞌ mac cu quimin tiꞌ a mac a jach tsoy yoroꞌ.
\v 8 Chen tiꞌ toy yʌnoꞌonex ich a cꞌasoꞌ, caj cꞌuchij Cristo quir u quimin toꞌonex, a baywoꞌ, ij querex jach manan u yajoꞌonex Cꞌuj.
\v 9 A bajeꞌreroꞌ, Cꞌuj caj u rucꞌsaj ic siꞌpirex, quireꞌ tarij Cristo caj jocꞌ u qꞌuiqꞌuer caj quimij ich u cruz. Rajen, ij querex Cristo, caj u tacoꞌonex soc Cꞌuj mʌꞌ ju tsꞌictar yejeroꞌonex caꞌ bin xuruc tꞌʌn.
\v 10 A uchoꞌ, quireꞌ yʌn ic siꞌpirex, rajen tic pꞌactex Cꞌuj. Chen caj quimij u parar Cꞌuj, jeroj sisquintaꞌb yor Cꞌuj ten Cristo. Jeroj Cristo, caj u pꞌeriꞌquintaj ij corex yejer Cꞌuj, rajen mʌꞌ ju tsꞌajej ic mucꞌyajex Cꞌuj, quireꞌ riqꞌuij Jesús ich u quimirir.
\v 11 Mʌꞌ jaririꞌ, cax caj u tacoꞌonex tu quic bin ic mucꞌyajex, bajeꞌrer, quiꞌ ij corex yejer Cꞌuj, quireꞌ ic Jaj Tsꞌurirex caj u pꞌeriꞌquintaj ij corex yejer Cꞌuj.
\s Adán yejer Cristo
\p
\v 12 Quireꞌ Jesús, caj u pꞌeriꞌquintaj ij corex yejer Cꞌuj, rajen mʌꞌ ju bin u tsꞌajex ic mucꞌyajex Cꞌuj, a toꞌonexoꞌ, rajen quic bin cuxtarex munt qꞌuin. Mʌꞌ ja wirej, quireꞌ tuririꞌ mac, Adán xan, rajiꞌ ic chꞌic nunquirex, rajiꞌ caj u yʌnxchun u yacsic u siꞌpir teꞌ ich yocꞌocab. Quireꞌ u siꞌpir ic nunquirex Adán, rajen tij cʌnex,, rajen xan, quireꞌ tij cʌnex jeroj cu quimin mac quireꞌ yʌn u siꞌpirob.
\v 13 Cax mʌꞌ toy araꞌac ten Cꞌuj Moisés caꞌ u tsꞌibtej u tꞌʌn ich u joꞌr u witsir Sinaí, teꞌ ich yocꞌocab tu cotor mac cu manob tu cꞌasir. Chen tu mʌnaꞌ u tꞌʌn Moisés, rajiꞌ mʌꞌ ju tac u joꞌr mac, cax yʌn u siꞌpirob. Mʌꞌ ja wirej, mʌꞌ yerob wa yʌn u siꞌpirob.
\v 14 Chen a mac a mʌꞌ ju pʌyob u siꞌpirob an ten bic ic chꞌic nunquirex Adán caj u pʌy u siꞌpir. Mʌꞌ ja wirej, Adán caj u pʌy u siꞌpirob quireꞌ mʌꞌ u quibaj a baꞌ araꞌb tiꞌ ten Cꞌuj. Cax mʌꞌ baxuc u siꞌpirob tu cotor mac, robob caj quimob xan, quireꞌ raꞌ u siꞌpirob tu chꞌic chun yejer Adán. Rajraꞌ tiꞌ yʌn u siꞌpirob a mac hasta cꞌuchij tu qꞌuinin caj u tsꞌibtaj u tꞌʌn Cꞌuj Moisés uch. A Adánoꞌ, caj u yʌnxchun ic siꞌpirex teꞌ ich yocꞌocab, chen caj tarij Jesús, a mac tetaꞌb ten Cꞌuj tu chꞌic chun tu cotor baꞌ, raꞌ caj u yacsoꞌonex tu tsoyir Cꞌuj.
\p
\v 15 A baꞌ caj u tsꞌaja toꞌonex Adán quir ij quiminex u tirir tiꞌ, mʌꞌ quet yejer a baꞌ caj u tsꞌaja toꞌonex Jesúcristo. Quireꞌ raꞌ u siꞌpir Adán, cax tuririꞌ mac, yaꞌab mac caj quimob. Baxuc xan tiꞌ Jesucristo, cax tuririꞌ mac, jeroj, caj u tsꞌa u tsoyir toꞌonex Cꞌuj, quireꞌ u yajoꞌonex, jeroj caj tacoꞌonex Jesús.
\v 16 A Adánoꞌ, chen tuririꞌ mac, caj u pʌyaj u siꞌpir, jeroj caj u rʌc pʌyaj ic siꞌpirex tu cotoroꞌonex, rajen Cꞌuj cu yaꞌaric: “Tu cotor mac yʌn u siꞌpir.” A baꞌ caj u cꞌasquintaj ic chꞌic nunquirex Adan, a Jesúsoꞌ caj u toc rʌc tsoyquintaj a baꞌ tu betaj Adán uch. Rajen, a baꞌ caj u betaj Jesús, a Cꞌujoꞌ, cꞌuchaꞌan yor jach tsoy yiric.
\v 17 Quireꞌ ic chꞌic nunquirex Adán, cax tuririꞌ caj u pʌy u siꞌpir, jeroj, tu cotoroꞌonex bin in caj quiminex. Chen bajeꞌrer, quireꞌ u jer mac, rajiꞌ Jesucristo, rajen a Cꞌujoꞌ, quireꞌ tsoy tu tꞌʌn caj u jaws ic siꞌpirex. Rajen a Cꞌujoꞌ, caj u yiroꞌonex taj ij corex. Rajen tu cotor mac a cu cꞌʌmic a baꞌ jach manan tsoy tu tꞌʌn Cꞌuj cu bin u reyinticob Cꞌuj munt qꞌuin ich caꞌanan. 
\p
\v 18 Mʌꞌ ja wirej, wa jach taj tuririꞌ mac caj u pʌy u siꞌpir, raꞌ ic chꞌic nunquirex Adán, rajen bin in caj quiminex. Baxuc yejer a jeraꞌ, u jer mac caj u betaj a baꞌ tajiꞌ, rajiꞌ Cristo. Rajen a baꞌ caj u betaj Cristo, a Cꞌujoꞌ cꞌuchaꞌan yor yiric tu cotor mac tsoy yor quireꞌ jawsaꞌb u siꞌpirob, rajen bin u caꞌ tsꞌaꞌbir u cuxtarob munt qꞌuinob.
\v 19 Quireꞌ tuririꞌ mac mʌꞌ ju quibaj a baꞌ araꞌb tiꞌ ten Cꞌuj, rajen caj u yacsaj u siꞌpirob tu cotor mac, rajen tu cotor mac cu manob tu cꞌasir. Baxuc xan, tiꞌ u jer mac tuririꞌ xan, rajiꞌ Jesucristo, quireꞌ caj u quibaj a baꞌ araꞌb tiꞌ ten Cꞌuj, rajen yaꞌab mac irir ten Cꞌuj tsoy yorob.
\v 20 Mʌꞌ ja wirej, caj araꞌb ten Cꞌuj Moisés caꞌ u tsꞌibtej u tꞌʌn Moisés soc yiric tu cotor mac mun u siꞌpirob caj u yacsob uch. Bajeꞌrer, ic toc erex mun a yʌn u sipir ich yocꞌocab, bayiriꞌ xan, jach manan ij querex a mun jach tsoy tu tꞌʌn caj u rucꞌs ic siꞌpirex.
\v 21 A uchoꞌ, tu cotor mac bin u caꞌ quiminob, quireꞌ caj u yacsob tu sipirob. Chen Cꞌuj, quireꞌ jach manan cu yajquinticoꞌonex. Mʌꞌ ja wirej, quireꞌ jach tsoy tu tꞌʌn Jesucristo, jeroj Cꞌuj cꞌuchaꞌan yor yiricoꞌonex tsoy ij corex, rajen bin in caj cuxtarex munt qꞌuin. 
\c 6
\s Ic siꞌpirex quinsicoꞌonex, chen Cristo cu tsꞌic ij cuxtarex 
\p
\v 1 Tin tꞌʌn yʌn mac cu bin u tus aꞌarej: “Caꞌ ij quiꞌ acs ic siꞌpirex soc jach manan u yajquinticoꞌonex Cꞌuj.” 
\v 2 A tenoꞌ, quin nunquic. Cax mʌꞌ ic yʌn acsiquex ic siꞌpirex, mʌꞌ biqꞌuinin quic acsic ic siꞌpirex, quireꞌ an ten bic u baquer mac, a jach quimin mʌꞌ cꞌuchaꞌan yor u wʌcꞌʌs acs u sipiriꞌ, baxuc toꞌonex xan. Rajen tsireꞌej, cax mʌꞌ ic yʌn acsiquex ic siꞌpirex.
\v 3 Uꞌyex baꞌ quin cꞌatic techex. Mʌꞌ wa ja werex biquinin caj acsaꞌb jaꞌ ta joꞌrex? Mʌꞌ ja wirej, caj acsaꞌb jaꞌ ta joꞌrex soc yiric tu cotor mac wa pꞌeriꞌechex yejer Cristo. Rajen caj acsaꞌb jaꞌ ta joꞌrex, jeroj irej wa pꞌeriꞌ caj quimechex yejer Cristo.
\v 4 Raꞌ u qꞌuinin caj acsaꞌb jaꞌ tic joꞌrex, raꞌ u cꞌat yaꞌaric quimoꞌonex yejer Cristo. Bayiriꞌ xan, quet rʌc butꞌaꞌan ic baquerex yejer Cristo. Rajen, caj ricꞌsaꞌb Cristo ten u jach tsoyir u chichir u mucꞌ Cꞌuj ich u quimirir, baxuc toꞌonex xan caj ricꞌsaꞌboꞌonex, caj waysaꞌboꞌonex ten Cꞌuj soc ricꞌben winiquiroꞌonex. Rajen caꞌ ic pꞌʌtex a baꞌ tic betex uch.
\p
\v 5 Quireꞌ a toꞌonexoꞌ, pꞌeriꞌoꞌonex yejer Cristo, rajen, iroꞌonex wa quimenoꞌonex yejer Cristo caj quimij ich u cruz uch. Rajen caj ricꞌsaꞌb Cristo ich u quimirir, baxuc iroꞌonex wa ricꞌsaꞌboꞌonex ich ic quimirirex, rajen ricꞌben winicoꞌonex.
\v 6 Baꞌ u cꞌat yaꞌaric aroꞌ? Ic toc erex, a uchoꞌ, caj manoꞌonex ich tu cotor u cꞌasir, mʌꞌ jic tucrex a uchoꞌ, chen bajeꞌrer ic toc erex, quet caj bajoꞌonex yejer Cristo ich u cruz, rajen, mʌꞌ raꞌ quic tsꞌurintiquex a cꞌasoꞌ.
\v 7 Mʌꞌ ja wirej, an ten bic mac quimen mʌꞌ cꞌuchaꞌan yor yacsic u sipir, baxuc toꞌonex xan.
\v 8 An ten bic caj quimij Jesús ich u cruz, baxuc toꞌonex xan, rajen caj riqꞌuij Jesús ich u quimirir soc u wʌcꞌʌs cuxtar. Baxuc quij cacsiquex tij corex quet caꞌ bin cuxracoꞌonex yejer Cristo.
\v 9 Mʌꞌ ja wirej, ic toc erex, a Cristojoꞌ, mʌꞌ cꞌuchaꞌan yor u wʌcꞌʌs quimin, mʌꞌ ju bin caꞌ quimin biqꞌuin, quireꞌ ricꞌsaꞌb ich u quimirir, rajen mʌnaꞌ mac yʌn u mucꞌ quir u caꞌ quinsic Cristo.
\v 10 Mʌꞌ ju wʌcꞌʌs quimin Jesús, mʌꞌ ju bin caꞌ quimij biqꞌuin, quireꞌ caj quimij, chen teniꞌ cu quimin quir u rucꞌsic ic siꞌpirex. Chen bajeꞌrer, a Jesúsoꞌ cuxaꞌan quir u betic tu cotor baꞌ u cꞌat Cꞌuj.
\v 11 Rajen, caꞌ a tucrex a baxuquechex a mac jach taj quimij, soc mʌꞌ cꞌuchaꞌan a worex a wacsiquex a siꞌpirex, chen cuxaꞌanechex soc a betiquex tu cotor a baꞌ u cꞌat Cꞌuj. Mʌꞌ ja wirej, cuxaꞌanechex quireꞌ pꞌeriꞌechex yejer Jesucristo ic Jaj Tsꞌurirex.
\p
\v 12 Quireꞌ bin u caj quimin a winquirex, rajen mʌꞌ ja chaꞌiquex u yacsiquex a siꞌpirex, mʌꞌ a quibiquex a baꞌ cu pachtic a cꞌasoꞌ.
\v 13 Mʌꞌ ja chaꞌiquex a tsꞌurintiquex cꞌasoꞌ a ca pachitiquex ta worex quir a betiquex, a baꞌ mʌꞌ ju quiꞌquintej yor Cꞌuj. Quireꞌ a toꞌonexoꞌ, a uchoꞌ, quimoꞌonex, chen bajeꞌrer toc cuxaꞌanoꞌonex, baxuc cu yiricoꞌonex Cꞌuj. Rajen toc cꞌubechex a wʌcꞌʌs bʌjiriꞌex tiꞌ Cꞌuj, soc a chen manex tu tsoyir.
\v 14 Quireꞌ mʌꞌ baꞌwir quir a wacsiquex a siꞌpirex bajeꞌrer, quij Pablo, u tꞌʌn Moisés a baꞌ caj u tsꞌibtaj uch, rayoꞌ mʌꞌ ja tsꞌurintiquex. Mʌꞌ ja wirej, rajiꞌ ca tsꞌurintiquex Cꞌuj, a mac a jach yajechexoꞌ.
\s Mac a tsꞌurirex?
\p
\v 15 A tenoꞌ, tin tꞌʌn, yʌn mac bin u caꞌ u tus aꞌarej: “Caꞌ ic pʌyex ic siꞌpirex, raꞌ u qꞌuininoꞌ mʌꞌ jic tsꞌurintex u tꞌʌn Moisés, mʌꞌ biqꞌuin, chen jariꞌ Cꞌuj, rajiꞌ quic tsꞌurintiquex bajeꞌrer, rajen tu yajquin toꞌonex?”
\v 16 Mʌꞌ ja wirej, a mac a cu cꞌubic u bʌj, quir u quibic u tꞌʌn u jer mac, jeroj oc cꞌurewir. Tin tꞌʌn, a werex aroꞌ, rajen wa ca manex tu cꞌasir ca quibiquex a cꞌasoꞌ, jeroj oquechex ta cꞌurewirex. U boꞌorir cu bin tsꞌabir techex, quir a quiminex. Chen wa ca quibiquex Cꞌuj, caꞌ ocaquechex u cꞌurewechex Cꞌuj. Rajiꞌ cu bin u tsꞌic techex a cuxtarex, a baꞌ jach tsoy.
\v 17 A uchoꞌ, caj a manex ich u cꞌasir, chen bajeꞌrer quin jach aꞌaric tiꞌ Cꞌuj: “Bayoꞌ”, quireꞌ caj a wuꞌyajex a mac a caj u tsecꞌtaj techex u jach tsoyir u tꞌʌn Cꞌuj caj a quibex a wacsiquex ta worex tiꞌ Jesús.
\v 18 Rajen, a Cꞌujoꞌ, caj u jawsechex tiꞌ a siꞌpirex a ca tsꞌurintiquex uchoꞌ, soc u yacsiquechex u cꞌurewechex Cꞌuj.
\v 19 A tenoꞌ, quin camsiquechex an ten bic mac cu tsicbar ich yocꞌocab, quireꞌ a baxucoꞌ, a mac a tiꞌ yʌn ich yocꞌocab cu bin u najtob. Mʌꞌ ja wirej, a uchoꞌ, ca manex ich tu cotor u cꞌasir soc a quiꞌ acsic a siꞌpirex. Baxucoꞌ xan, bajeꞌrer, quiꞌ manenex tu tsoyir soc a cʌniquex Cꞌuj a manex tu tsoyir.
\p
\v 20 Quireꞌ a uchoꞌ, ca manex a quiꞌquint a worex ich tu cotor u cꞌasir, rajen mʌꞌ cꞌuchaꞌan a worex a cꞌʌs manex tu tsoyir, chichin.
\v 21 Arex ten wa quiꞌ a worex tu ca manex tu cꞌasir uch. Tin tꞌʌn, mʌꞌ jach quiꞌ a worex uch, chen bajeꞌrer caj a chꞌaj suraquirex tu manechex tu cꞌasir uch. Mʌꞌ ja wirej, a mac a cu yacsic u siꞌpir cu bin u tsꞌaꞌbir u mucꞌyaj.
\v 22 Chen bajeꞌrer, jach taj caj a toc pꞌʌtex a siꞌpirex caj a wacsex a siꞌpirex uch, quireꞌ caj a quibajex u tꞌʌn Cꞌuj. Rajen caj a cꞌubex a bʌjex tiꞌ Cꞌuj soc u tsꞌic techex a cuxtarex munt qꞌuin.
\v 23 Mʌꞌ ja wirej, u boꞌorir u siꞌpir mac quir u tsꞌabir u mucꞌyaj. Chen a Cꞌujoꞌ, caj u sijatoꞌonex quir ij cuxtarex munt qꞌuin quireꞌ tij cacsex tij corex tiꞌ Jesucristo ic Jaj Tsꞌurirex.
\c 7
\s Yʌn baꞌ caꞌ ij cʌnex tu cu chꞌic u racꞌ mac
\p
\v 1 A techexoꞌ, in wet acsaꞌorirex, a werex bic tabar a juezoꞌ yʌn u mucꞌ, rajen caꞌ ij quibex u tꞌʌn, a mun qꞌuin cuxaꞌanoꞌ. Chen wa ber cu quimin mac, a tsꞌoc u tsꞌurintaꞌr juezoꞌ.
\v 2 Uꞌyex baꞌ quin camsiquechex. A xquicoꞌ, a tu chꞌaj u mameꞌ, cu yaꞌaric a juezoꞌ: “Mʌꞌ ja yʌn pꞌʌtic a mam a mun yaxqꞌuin cuxaꞌan ich a wicnʌn tech.” Chen a ray u qꞌuininoꞌ, cu quimin u mam, a juezoꞌ cu yiric a xquicoꞌ, irej wa mʌꞌ u chꞌamʌn u mam.
\v 3 Wa raꞌ xquicoꞌ cu pꞌʌtic u mam quir u mamintic u jer, cax tiꞌ toy cuxꞌaꞌan u jach mam. Jach cꞌas cu betic. Chen wa quimij u mam, a ray xquicoꞌ, bajeꞌrer siptaꞌb quir u bin u chꞌic u jer u mam. Mʌꞌ ja wirej, ʌcʌtan a juezoꞌ, siptaꞌb a ray xquicoꞌ.
\p
\v 4 Baxuc techex in wet acsaꞌorirex, caj quimij Jesús ich u cruz, quet caj quimoꞌonex xan, rajen mʌꞌ baꞌwir toꞌonex u tꞌʌn Moisés, quireꞌ siptaꞌboꞌonex ten Cꞌuj. Mʌꞌ ja wirej, siptaꞌboꞌonex soc pꞌeriꞌoꞌonex yejer u jer, a ricꞌsaꞌb ten Cꞌuj caꞌ ic betex an ten bic Cꞌuj u cꞌat.
\v 5 A uchoꞌ, mʌꞌ toy ij cacsex tij corex caj manoꞌonex ich a baꞌ quic pachtiquex tij corex, a jach cꞌasoꞌ. A ray u qꞌuininoꞌ a baꞌ araꞌb ich u tꞌʌn Moisés tu chen pꞌus ij corex soc ic chen pachtiquex a cꞌasoꞌ, soc ic tsꞌurintiquex a cꞌasoꞌ, rajen oric u tsꞌic mucꞌyajex. 
\v 6 Caj ij cacsex tij corex tiꞌ Cristo, caj u siptoꞌonex tiꞌ a baꞌ tsꞌibtaꞌb ich u tꞌʌn Moisés uch, quireꞌ quet caj quimoꞌonex yejer Jesús ich u cruz. Rajen quic beyajex tiꞌ Cꞌuj, quireꞌ caj u tsꞌajaj toꞌonex u ricꞌben cuxtar u Tajꞌor u Pixam Cꞌuj, soc mʌꞌ biqꞌuin ic tsꞌurintiquex a baꞌ tsꞌibaꞌan ich u tꞌʌn Moisés.
\s Ic siꞌpirex yejer a baꞌ tsꞌibaꞌan ich u tꞌʌn Cꞌuj
\p
\v 7 Mʌꞌ jij carex wa jach cꞌas a baꞌ tsꞌibaꞌan ich u tꞌʌn Moisés. Mʌꞌ cꞌasiꞌ, quen. Mʌꞌ ja wirej, u tꞌʌn Moisés caj u yesaj toꞌonex baꞌ jach cꞌas, raꞌ ic siꞌpirex. Quireꞌ jeꞌ wa jij querex wa tij cacsex ic siꞌpirex caj ij pachtiquex u baꞌtac mac? Mʌꞌ ja wirej, u tꞌʌn Moisés caj yaꞌaraj: “Mʌꞌ ja yʌn pachtex u baꞌtac mac.” Rajen ij querex baꞌ ic siꞌpirex.
\v 8 Mʌꞌ ja wirej, caj u cꞌʌnaj u tꞌʌn Moisés soc u tumtic ij corex wa quic pachtiquex tij corex tu cotor a baꞌ jach cꞌasoꞌ. Mʌꞌ ja wirej, taroꞌ cu yaꞌaric ich u tꞌʌn Moisés, a baꞌ mʌꞌ tsoy toꞌonex. Chen wa mʌnaꞌ u tꞌʌn Moisés mʌꞌ ij querex wa quic manex ij cacsex tic siꞌpirex. 
\v 9 A uchoꞌ, mʌꞌ jij quiꞌ najtex a baꞌ tsꞌibaꞌan ich u tꞌʌn Moisés. A toꞌonexoꞌ, caj ic tucrex jach tsoyoꞌonex. Chen caj ij quiꞌ najtex a baꞌ tsꞌibaꞌan ich u tꞌʌn Moisés uch, jeroj, a ray u qꞌuininoꞌ caj ij quirex ij cacsex tic siꞌpirex. Tij quirex mʌꞌ quiꞌ ij corex, orac u tsꞌic ic mucꞌyajex toꞌonex.
\v 10 A baywoꞌ, caj ic cꞌʌꞌotex a baꞌ tsꞌibaꞌan ten Moisés uch, rajiꞌ caj ic tus tucrex rajiꞌ cu tsꞌic ij cuxtarex, jariꞌ caj u chen tsꞌatoꞌonex quir ij quiminex.
\v 11 Mʌꞌ ja wirej, caj u tus araj toꞌonex quireꞌ u cꞌasir ij corex. Ij querex uch wa cꞌuchaꞌan ij corex ic tus betex uch tu cotor a baꞌ tiꞌ yʌn ich u tꞌʌn Moisés, a caj u toc aꞌara toꞌonex u tꞌʌn, chen raꞌiriꞌ tꞌʌn cu yaꞌaric wa jeꞌ u bin tsꞌabir ic mucꞌyajex, quireꞌ raꞌ ic siꞌpirex.
\v 12 A ray tunoꞌ, u tꞌʌn Moisés, a caj u tsꞌibtaj uch, rajiꞌ u tꞌʌn Cꞌuj. Tu cotor a baꞌ tsꞌibaꞌan jach tsoy, quireꞌ taj.
\v 13 Bic tabar a baꞌ jach tsoy an ten bic u tꞌʌn Moisés caj u yesaj toꞌonex bin in caj quiminex? Mʌꞌ ja wirej, jach tsoy u tꞌʌn Moisés, quireꞌ caj u yes ij cacsiquex ic siꞌpirex, rajen cu tsꞌabʌr ij quiminex. A baꞌ tsꞌibaꞌan ich u tꞌʌn Moisés tsoy, quireꞌ caj u yesaj toꞌonex a baꞌ sipir caj ij cacsex. Rajen a baꞌ araꞌb tiꞌ Moisés ten Cꞌuj tsꞌaꞌb tiꞌ, soc chʌcaꞌan ij quiriquex a baꞌ quic betiquex jach cꞌas.
\p
\v 14 Mʌꞌ ja wirej, u Tajꞌor u Pixam Cꞌuj, caj u tsꞌajaj u tꞌʌn tiꞌ Moisés, chen a toꞌonexoꞌ, quic manex tiꞌ a baꞌ quic pachtiquex tij corex, a baꞌ jach cꞌasoꞌ. Raꞌ quic tsꞌurintiquex, a cꞌasoꞌ.
\v 15 Rajen mʌꞌ jin betej a baꞌ in cꞌat in betic. Cax a baꞌ mʌꞌ jin cꞌat, raꞌ quin betej. A tenoꞌ, mʌꞌ jin wer biquinin baxuc quin betic aroꞌ.
\v 16 Rajen wa quin wacsic in siꞌpir, cax mʌꞌ jin cꞌat in wacsic tin siꞌpir, jeroj quin cꞌʌꞌotic a baꞌ tsꞌibaꞌan ich u tꞌʌn Cꞌuj, a caj u tsꞌibtaj Moisés jach tsoy, quireꞌ cu maꞌquintic in ber tiꞌ a baꞌ jach cꞌasoꞌ.
\v 17 Chen mʌꞌ ten betiquiꞌ. Mʌꞌ ja wirej, u cꞌasir a acaꞌan tin wor, raꞌ cu betic a baꞌ mʌꞌ jin cꞌat in betej. 
\v 18 Rajen ij querex jach taj mʌnaꞌ u tsoyir acaꞌan tin wor, quireꞌ cax in chen pacht a baꞌ jach tsoyoꞌ mʌꞌ ju cꞌuchur in wor in betej, quij.
\v 19 Quireꞌ in chen cꞌat in betic a tsoyoꞌ, chen mʌꞌ cꞌuchaꞌan in wor in betej a tsoyoꞌ. Chen a baꞌ mʌꞌ tsoyoꞌ, raꞌ quin betic cax mʌꞌ jin cꞌat in betic.
\v 20 Wa quin chen betic a baꞌ mʌꞌ jin cꞌateꞌ, rajen mʌꞌ ten betic aroꞌ, chen in siꞌpir a acaꞌan tin woroꞌ raꞌ acsic in siꞌpir.
\p
\v 21 A werex baꞌ in ber a tenoꞌ? A tenoꞌ, in jach cꞌat in betic a tsoyoꞌ, chen a cꞌasoꞌ, a acaꞌan tin woroꞌ raꞌ cꞌastic in ber.
\v 22 Jeroj tin woroꞌ, in jach cꞌat in tsꞌurintic u tꞌʌn Cꞌuj.
\v 23 Cax in jach cꞌat in tsꞌurintic u tꞌʌn Cꞌuj, chen tiꞌ yʌn baꞌ a cu chich pʌyiquen, soc in wacsic a baꞌ quin pachtic tin woroꞌ, rajraꞌ cu yacsic in siꞌpir.
\v 24-25 Rajen otsiren, a tenoꞌ, in jach cꞌat a baꞌ u cꞌat Cꞌuj, chen a tiꞌ yʌn, baꞌ a cu chich pʌyiquen soc u yacsic in sipir. Mac cu bin u siptiquen tiꞌ a baꞌ cu chich pʌyiquen quir in quinsaꞌr? “Bayoꞌ”, quin waꞌaric tiꞌ Cꞌuj, quireꞌ in wer cu siptiquen Jesucristo ic Jaj Tsꞌurirex.
\c 8
\s Quij cuxtarex quireꞌ u Tajꞌor u Pixam Cꞌuj
\p
\v 1 Rajen a toꞌonexoꞌ, mʌꞌ u bin tsꞌabir ic mucꞌyajex ten Cꞌuj, a mac tu pꞌeriꞌquintob u bʌjob yejer Cristo. Mʌꞌ ja wirej, cu beticob a baꞌ u cꞌat u Tajꞌor u Pixam Cꞌujoꞌ. Rajen mʌꞌ ju manob tu cꞌasir an ten bic cu pachticob tu yorob.
\v 2 Mʌꞌ ja wirej, u Tajꞌor u Pixam Cꞌuj, a mac quic tsꞌurintiquex caj u tsꞌaj toꞌonex quir ij cuxtarex ricꞌben, quireꞌ tij cacsex tij corex tiꞌ Jesucristo. Rajen caj u tacoꞌonex tiꞌ ic siꞌpirex, a raꞌ quic tsꞌurintex ucheꞌ. Bajeꞌrer, mʌꞌ ju bin tsꞌabir ic mucꞌyajex.
\v 3 Mʌꞌ ja wirej, ic bʌjiriꞌex, mʌꞌ cꞌuchaꞌan ij corex ij quiꞌ betiquex a baꞌ u jach cꞌat toꞌonex ich u tꞌʌn Moisés. Rajen u tꞌʌn Moisés, mʌꞌ cꞌuchaꞌan yor u taquicoꞌonex. Chen a Cꞌujoꞌ, cꞌuchaꞌan yor u taquicoꞌonex, quireꞌ rajiꞌ caj u tuchiꞌtaj u parar tuririꞌ ich yocꞌocab soc u chꞌic u winquirir an ten bicoꞌonex ic winquirirex, quir u rucꞌsic ic siꞌpirex. A toꞌonexoꞌ, yʌn ic siꞌpirex, chen a Jesúsoꞌ, mʌnaꞌ u siꞌpir a tiꞌoꞌ.
\v 4 Baxuc caj u betoꞌonex Cꞌuj soc cꞌuchaꞌan ij corex ic betiquex u tsoyir, an ten bic cu yaꞌaric ich u tꞌʌn Moisés. Mʌꞌ ja wirej, jeꞌ u cꞌuchur ij corex ic betiquex aroꞌ, quireꞌ mʌꞌ jic bin ic betex a baꞌ quic pachtiquex tij corex a cꞌasoꞌ. Jeꞌ ic chen betiquex a baꞌ u cꞌat u Tajꞌor u Pixam Cꞌujoꞌ.
\p
\v 5 Quireꞌ ij querex a mac a cu betic a baꞌ cu pachtic tu yor, a cꞌasoꞌ, cu chen uꞌyic u cꞌasir a cu pachtic tu yoroꞌ. Baxuc ij querex a mac a cu betic a baꞌ u cꞌat u Tajꞌor u Pixam Cꞌuj cu bin u chen cʌxtic bic tabar u quiꞌquintic u yor Cꞌuj.
\v 6 Quireꞌ a mac a cu chen cʌxtic u quiꞌquintic u bʌjiriꞌ yor yejer a baꞌ yʌn ich yocꞌocab, jeꞌ u quimineꞌ. Chen a mac a cu cʌxtic a baꞌ cu quiꞌquintic u yor Cꞌujoꞌ, jeꞌ u quiꞌtar yor tiꞌ Cꞌuj, bayiriꞌ jeꞌ u cuxtar munt qꞌuineꞌ.
\v 7 Mʌꞌ ja wirej, a mac a cu yubic a baꞌ cu pachtic tu yor, a cꞌasoꞌ, rajiꞌ cu pꞌactic Cꞌuj, quireꞌ u cꞌat u betic a baꞌ cu yaꞌaric ich u tꞌʌn Moisés. Cax u cꞌat u betic a baꞌ cu yaꞌaric ich u tꞌʌn Moisés, mʌꞌ ju cꞌuchur u yor u betic.
\v 8 Mʌꞌ ja wirej, a cu yubic a cu pachtic tu yor a cꞌasoꞌ, mʌꞌ biqꞌuin cu bin u betic a baꞌ cu bin u quiꞌquintic u yor Cꞌuj.
\p
\v 9 Chen bajeꞌrer, mʌꞌ ja betex a baꞌ uchben cuxtarex u cꞌat. Ca bin a betex a baꞌ u cꞌat u Tajꞌor u Pixam Cꞌuj, quireꞌ ricꞌben winiquechex wa jach acaꞌan ta worex u Tajꞌor u Pixam Cꞌuj. A mac a mʌꞌ acaꞌan u Tajꞌor u Pixam Cꞌujiꞌ tiꞌ, rajiꞌ mʌꞌ ju chan parar Cꞌuj.
\v 10 Cax cu bin quimin a winquirirex quireꞌ yʌn a siꞌpirex, chen wa jach acaꞌan Jesucristo ta pixamex ca bin cuxtarex munt qꞌuin ich caꞌanan, quireꞌ Cꞌuj caj u rucꞌsaj ic siꞌpirex.
\v 11 A Cꞌujoꞌ, caj u ricꞌsaj Jesús ich u quimirir. Wa jach acaꞌan ta worex u Tajꞌor u Pixam Cꞌuj, jeroj an ten bic Cꞌuj caj u ricꞌsaj Jesús ich u quimirir, baxuc techex, bin u caꞌ u ricꞌsic a winquirirex a cu bin quimin. Mʌꞌ ja wirej, cu bin u ricꞌsic a winquirirex, quireꞌ acaꞌan u Tajꞌor u Pixam Cꞌuj ta pixamex bajeꞌrer.
\p
\v 12 Quireꞌ a Cꞌujoꞌ, baxuc cu bin u betic toꞌonex, rajen in wet acsaꞌorirex, caꞌ ic betex a baꞌ u cꞌat Cꞌuj. Tsireꞌej, a baꞌ u cꞌat ij cuxtarex a uchbenoꞌ, a cꞌasoꞌ, a quic pachtex tij corexoꞌ.
\v 13 Quireꞌ wa quij cacsiquex ic siꞌpirex an ten bic quic pachtiquex tij corex tiꞌ a cꞌasoꞌ, jeroj munt qꞌuin, quic bin satʌrex quireꞌ yʌn ic siꞌpirex. Chen tiꞌ yʌn u Tajꞌor u Pixam Cꞌuj quir u yamticoꞌonex, soc ic pꞌʌtiquex a baꞌ quic pachtiquex tij corex tiꞌ a cꞌasoꞌ. Wa quic pꞌʌtiquex a baꞌ quiriꞌ cꞌas a quic betiquex, jeꞌ ij cuxtarex munt qꞌuin.
\p
\v 14 Tu cotor raꞌ u chan parar Cꞌuj a cu chaꞌbʌr u pʌyʌr u ber ten u Tajꞌor u Pixam Cꞌuj.
\v 15 Barej, caj ij cꞌʌmex u Tajꞌor u Pixam Cꞌuj, rajen tu chꞌu chan pararintoꞌonex a Cꞌujoꞌ. A bajeꞌrer, a toꞌonexoꞌ, mʌꞌ jic yʌn chꞌaꞌex sajquirex tiꞌ Cꞌuj an ten bic u cꞌurewob cu chꞌic sajquirob tiꞌ u tsꞌurirob. Quireꞌ u Tajꞌor u Pixam Cꞌuj cu yamticoꞌonex soc ic tꞌʌniquex Cꞌuj baxuc: “Ic Tetex”, quij yaꞌaraꞌ tiꞌ.
\v 16 Mʌꞌ ja wirej, raꞌiriꞌ cu yaꞌaric toꞌonex u Tajꞌor u Pixam Cꞌuj wa ju pararoꞌonex Cꞌuj.
\v 17 Mʌꞌ ja wirej, an ten bic u parar mac bin u caj cꞌʌmob tu cotor a baꞌ cu bin tsꞌabir ten u tet tiꞌob. Baxuc tiꞌ Cꞌuj xan, jeꞌ ij cꞌʌmiquex tu cotor a baꞌ cu bin u tsꞌajej toꞌonex Cꞌuj. Jach taj quet caꞌ bin ij cꞌʌmiquex yejer Jesucristo a baꞌ cu bin tsꞌajej ten toꞌonex Cꞌuj. Chen bin ij caꞌex mucꞌyajex an ten bic mucꞌyajnʌjij Cristo Jesús uch, soc quet ij cuxtarex ich u sasirir Cꞌuj ich caꞌanan.
\p
\v 18 Jach taj quic mucꞌyajex ich yocꞌocab an ten bic cu chuquicob ic pachex, baxuc tu quic yajtarex, baxuc tu cu chiꞌob ic pachex. Chen pachir jeꞌ u jocꞌar tsoyoꞌonexeꞌ. Mʌꞌ ja wirej, u bʌjiriꞌ Cꞌuj cu bin u betic aroꞌ. Rajen mʌꞌ ic yʌn tucrex ic bʌjex cax quic mucꞌyajex ich yocꞌocabaꞌ, quireꞌ raꞌ tu quic binex jach manan tsoy aroꞌ.
\v 19 Mʌꞌ ja wirej, tu cotor a baꞌ betaꞌb ten Cꞌuj ich yocꞌocab uch, raꞌ cu pachticob, jach manan cu pachticob u yirob u qꞌuinin caꞌ bin cꞌuchuc soc Cꞌuj cu bin yaꞌaric toꞌonex: “Jeroj in pararechex.” Raꞌ quic bin ij cuꞌyiquex, quireꞌ u pararoꞌonex Cꞌuj.
\v 20 Mʌꞌ ja wirej, tu cotor baꞌ a tiꞌ yʌn ich yocꞌocab, mʌꞌ ju betaj baxuc caj u betaj Cꞌuj tu chꞌic chun. Cꞌuj tu rorobtꞌʌntaj soc mʌꞌ ju jach jocꞌar tsoyir quireꞌ rajiꞌ u siꞌpir Adán. Chen bajeꞌrer robob cu cꞌujinticob Cꞌuj quir u wʌcꞌʌs betic u ricꞌbenin.
\v 21 Quireꞌ tu cotor a baꞌ teꞌ yʌnaꞌ, rajraꞌ cu quiminob. Chen barej caꞌ bin waysacoꞌonex u pararoꞌonex Cꞌuj, quet baxuc cu bin waysaꞌbir soc jach manan tsoyir xan tu cotor a baꞌ betaꞌb ten Cꞌuj.
\v 22 Mʌꞌ ja wirej, ij querex tu cotor baꞌ a betaꞌb ten Cꞌuj, a teꞌ yʌnaꞌ ich yocꞌocab, cu mucꞌyajob bajeꞌrer, quireꞌ mʌꞌ waysaꞌbiꞌ soc jach manan tsoyir tu caꞌ ten. Cu mucꞌyaj irej xquic, a cꞌuchij tu qꞌuinin u rochic chan och.
\v 23 Quireꞌ toc acaꞌan tic pixamex u Tajꞌor u Pixam Cꞌuj, rajen ij querex cu bin u waysicoꞌonex u pararoꞌonex Cꞌuj. Rajen quetoꞌonex yejer a baꞌ caj u betaj Cꞌuj ich yocꞌocab, quic xoptiquex tij corex caꞌ bin waysacoꞌonex u pararoꞌonex Cꞌuj, quet yejer ic winquirirex. Quic chꞌuctiquex a raꞌ u qꞌuininoꞌ.
\v 24 Caj tij cacsajex tij corex tiꞌ Cristo, caj araꞌb toꞌonex bin u caꞌ tsꞌabir ten Cꞌuj toꞌonex u jer ricꞌben ic winquirirex. Rajiꞌ tiꞌ toy quic pajiquex bajeꞌrer. Jeꞌ wa jin pajic a baꞌ caj u toc tsꞌaja ten? Mʌꞌ jic pajex. 
\v 25 Chen a toꞌonexoꞌ, quic pajiquex a baꞌ mʌꞌ ij quirmʌnexoꞌ, quireꞌ ic toc erex jeꞌ u waysicoꞌonex. Rajen caꞌ ic mucꞌtex cax a baꞌ a cu tar toꞌonex hasta caꞌ bin cꞌuchuc tu qꞌuinin.
\p
\v 26 Tiꞌ yʌn xan, u Tajꞌor u Pixam Cꞌuj quir u yamticoꞌonex a mac mʌꞌ toy chichac u yor tiꞌ u tꞌʌn Cꞌuj. A toꞌonexoꞌ, mʌꞌ ij querex bic tabar ij cꞌatiquex baꞌ tiꞌ Cꞌuj. Mʌꞌ bic tabar ic tsicbarex tiꞌ Cꞌuj. Cax mʌꞌ cꞌuchaꞌan ij corex ic tsicbarex tiꞌ Cꞌuj, quic xoptiquex. Jeroj a raꞌ u qꞌuininoꞌ, u Tajꞌor u Pixam Cꞌuj cu chich tꞌʌnic Cꞌuj toꞌonex. Mʌꞌ ja wirej, u Tajꞌor u Pixam Cꞌuj jach manan cu tꞌʌnic Cꞌuj toꞌonex.
\v 27 Quireꞌ a Cꞌujoꞌ, u quiꞌ er tu cotor baꞌ a tiꞌ yʌn tij corex, bayiriꞌ Cꞌuj cu najtic a baꞌ cu yaꞌaric u Tajꞌor u Pixam Cꞌuj. Mʌꞌ ja wirej, u Tajꞌor u Pixam Cꞌuj cu tꞌʌnic Cꞌuj, quireꞌ yer a baꞌ tsoy tu tꞌʌn Cꞌuj, baxucoꞌ, cu chich tꞌʌnic Cꞌuj tiꞌ tu cotor a yacsmʌnob tu yorob. 
\s Jach manan cu yajquinticoꞌonex Cꞌuj
\p
\v 28 Bayiriꞌ xan, ij querex a mac a cu yajquinticob Cꞌuj, cax wa baꞌ u ber a tiꞌoboꞌ, bin u caꞌ jocꞌar u tsoyirob. Quireꞌ a Cꞌujoꞌ, caj u quiꞌ tucrob, rajen caj u tetaꞌbob soc u tarob, soc pꞌeriꞌ yorob yejer Cꞌuj.
\v 29 Mʌꞌ ja wirej, a Cꞌujoꞌ, yer tu toc chunin cax mʌꞌ toy betac yocꞌocab, Cꞌuj u toc er mac cu bin yacsic tu yor tiꞌ. Rajen pʌyber Cꞌuj caj u tucroꞌonex quir u waysicoꞌonex an ten bic u parar Jesucristo, a baywoꞌ tu cotoroꞌonex ic sucuꞌunex, Jesucristo a toꞌonexoꞌ yitsꞌinoꞌonex.
\v 30 Rajen Cꞌuj caj u pʌyoꞌonex quir ic tarex quireꞌ Cꞌuj pʌyber caj u tucroꞌonex tu chꞌic chunin tu cotor baꞌ. Rajen Cꞌuj caj u rucꞌs ic siꞌpirex, quireꞌ Cꞌuj caj u toc araj caꞌ u tacoꞌonex tiꞌoꞌ. Rajen xan cu bin u jocꞌar tsoyoꞌonex ich caꞌanan quireꞌ Cꞌuj caj u toc rucꞌs ic siꞌpirex.
\p
\v 31 Mʌꞌ ja wirej, a Cꞌujoꞌ mʌꞌ ju pꞌʌticoꞌonex, rajen tsireꞌej wa ju jer mac cu chen pꞌacticoꞌonex.
\v 32 Cꞌaj techex a Cꞌujoꞌ, caj u tsꞌaj u parar tuririꞌ quir u boꞌotic u boꞌorir ic siꞌpirex. Mʌꞌ jariꞌoꞌ, caj u tsꞌaj u parar quir u quimin toꞌonex, quet caj u tsꞌajaj toꞌonex tu cotor a baꞌ ij cꞌatex.
\v 33 Tiꞌ wa yʌn mac a cꞌuchaꞌan yor u taquic ic joꞌrex a toꞌonexoꞌ, a tij cacsex tij corex tiꞌ Cristo? Mʌnaꞌ mac cꞌuchaꞌan yor u taquic ic joꞌrex tiꞌ Cꞌuj, quireꞌ u bʌjiriꞌ Cꞌuj caj u toc araj: “Taj ij corex.”
\v 34 Mʌnaꞌ mac cꞌuchaꞌan yor u taquic ic joꞌrex a toꞌonexoꞌ, a tij cacsex tij corex soc u bin tsꞌabir ic mucꞌyajex, quireꞌ Cristo caj u boꞌotaj u boꞌorir ic siꞌpirex caj quimij, bayiriꞌ caj ricꞌsaꞌb ich u quimirir. Bayiriꞌ tiꞌ curaꞌan ich u noj Cꞌuj tu cu tꞌʌnic Cꞌuj toꞌonex. 
\v 35 Mʌꞌ ja wirej, a Cristojoꞌ, cu yajquinticoꞌonex, rajen mʌnaꞌ mac cu bin u rucꞌsicoꞌonex tiꞌ Cristo. Jaj ix tʌcoj, bin ij caꞌex ic mucꞌyajex. Jaj ix tʌcoj bin u caꞌ u chiꞌob ic pachex. Jaj ix tʌcoj bin u caꞌ u chuquicob ic pachex. Jaj ix tʌcoj, bin ij caꞌex ic wiꞌijchʌjʌrex. Jaj ix tʌcoj, wa mʌnaꞌ ic noqꞌuex quir ic buquintiquex. Jaj ix tiꞌ, yʌn mac cu bin pꞌactiquechex. Jaj ix tʌcoj, bin ij caꞌex quiminex, quireꞌ chꞌʌcꞌbir ic joꞌrex yejer mascab. Cax baxucoꞌ bin ij caꞌex mucꞌyajex, mʌnaꞌ mac cu bin u rucꞌsicoꞌonex tiꞌ Cristo.
\v 36 Baxuc caj tsecꞌtaꞌb toꞌonex bin ij caꞌex mucꞌyajex tiꞌ Cristo. Uꞌyex baꞌ cu yaꞌaric ich u tꞌʌn Cꞌuj uch: 
\q Quireꞌ tij cacsajex tij corex tech Cꞌuj, rajen, cu sayʌrob tic pachex soc ij quinsaꞌrex u buru qꞌuin an ten bic cu quinsicob u yʌrʌcꞌ tʌmʌn yuc ich tu cu naj quinsicob tʌmʌn yuc.
\m
\v 37 Jach taj rajraꞌ quic mucꞌyajex, quireꞌ tij cacex tij corex, chen mʌꞌ ju cꞌuchur u yorob u chiꞌoꞌonexob. Mʌꞌ ja wirej, rajraꞌ quic mucꞌtiquex tu cotor, quireꞌ tsꞌaꞌb ic muqꞌuex ten Cristo quireꞌ u yajoꞌonex.
\v 38 Rajen, in wer jach taj mʌnaꞌ mac cꞌuchaꞌan yor u taquiquen tiꞌ Cꞌuj, quireꞌ jach manan u yajen Cꞌuj, cax wa quij quiminex u yajoꞌonex. Cax wa cuxaꞌanoꞌonex cu yajoꞌonex. Cax wa ju yʌjmasirob u tꞌʌn Cꞌuj u cꞌatob u taquicoꞌonex, mʌꞌ cꞌuchaꞌan yorob tiꞌ. Cax wa ju jach tsꞌurir quisin. Cax wa baꞌ ic ber toꞌonex bajeꞌrer, mʌꞌ ju tacoꞌonex. Cax wa pachir a baꞌ ic ber toꞌonex tu qꞌuinin caꞌ bin tac, mʌꞌ ju cꞌuchur yor u tacoꞌonex quireꞌ jach manan cu yajoꞌonex a Cꞌujoꞌ.
\v 39 Cax wa baꞌ cu tar ich yaraꞌan ruꞌum. Cax wa raꞌ cu tar ich caꞌanan, cax wa tiꞌ yʌn u jer a baꞌ a betaꞌb ten Cꞌuj, mʌꞌ ju cꞌuchur yor u tacoꞌonex, quireꞌ jach manan u yajoꞌonex Cꞌuj quireꞌ tij cacsex tij corex tiꞌ Jesucristo ic Jaj Tsꞌurirex.
\c 9
\s Tetaꞌb u winiquirob israel ten Cꞌuj
\p
\v 1 A tenoꞌ, caj in wacsaj tin wor tiꞌ Cristo, rajen taj quin waꞌaric techex. Mʌꞌ tus in caꞌ. Bayiriꞌ xan, acaꞌan u Tajꞌor u Pixam Cꞌuj tin pixam, rajen in wer taj a baꞌ quin waꞌariqueꞌ.
\v 2 Jach manan quin tucric in wet winiquirob israel.
\v 3 Quireꞌ jach manan quin tucric in wet winiquirob israel, a mac in bʌjob, quij Pablo. Rajen a tenoꞌ, jeꞌ in chaꞌic Jesús u puriquen ich cꞌacꞌ, soc mʌꞌ ju binob in wet winiquirob israel ich cꞌacꞌ, wa cu chen bin quiꞌ acsaꞌbir ten Cꞌuj ich caꞌanan, chen mʌꞌ cꞌuchaꞌan in wor tiꞌ. 
\v 4 Mʌꞌ ja wirej, a Cꞌujoꞌ, caj u tetaj a tenob u winiquirenob israel quireꞌ u pararenob Cꞌuj. Robob caj yirob u jach sasirir Cꞌuj. Rajiꞌ xan, caj u tsꞌaja tiꞌob u tꞌʌn soc yerob baꞌ cu bin u betic Cꞌuj. Caj tsꞌaꞌb tiꞌob ten Cꞌuj u tꞌʌn Moisés. Caj esaꞌb tiꞌob bic tabar u cꞌujinticob Cꞌuj. Bayiriꞌ xan, Cꞌuj caj u yaꞌaraj tiꞌob a baꞌ cu bin tsꞌaꞌbir ten Cꞌuj tiꞌob.
\v 5 Bayiriꞌ xan, robob u winiquirob israel, u pararob u chꞌic nunquirob uch. Mʌꞌ ja wirej, ich u winiquirob israel tarij Cristo caj cꞌuchij tu qꞌuinin u chꞌic u winquirir. Rajiꞌ u cꞌujir tu cotor mac, caꞌ sʌjtaꞌc ten tu cotor mac muntqꞌuin. Jeroj.
\p
\v 6 Cax quin jach tucric in wet winiquirob israel, mʌꞌ jin waꞌarej techex wa Cꞌuj mʌꞌ toy u nupꞌsej a baꞌ caj u toc araj tiꞌ in wet winiquirob israel uch. A baꞌ quin jach aric techex, yʌn mac ich u winiquirob israel, robob mʌꞌ ju pararob Cꞌuj.
\v 7 Mʌꞌ ja wirej, tu cotor u pararob ic nunquir Abraham mʌꞌ ju xaca Cꞌujiꞌ, an ten bic u jach pararob u nunquir Abraham. Cꞌaj techex wa ja baꞌ araꞌb ten Cꞌuj tiꞌ ic nunquir Abraham uch? “Chen raꞌ u caꞌ parar a parar Isaac, raꞌ quin bin in xaquic an ten bic a jach parar a techoꞌ.” Baxuc araꞌb ten Cꞌuj.
\v 8 A baꞌ tsꞌibaꞌan ich u tꞌʌn Cꞌuj cu yaꞌaric wa Isaac caj tetaꞌb ten Cꞌuj mʌꞌ ju jeriꞌ. Rajen rajiꞌ Isaac jach taj u parar Abraham, rajiꞌ cu bin cꞌʌmbir a baꞌ toc araꞌb ten Cꞌuj tiꞌ u tet Abraham. Raꞌ cu camsicoꞌonex, tu cotor mac mʌꞌ raꞌ u parar Cꞌuj, cax robob u pararob ic nunquir Abraham. Jariꞌ a mac araꞌb ten Cꞌuj ich u tꞌʌn, robob jach taj u pararob Abraham.
\v 9 Quireꞌ, uꞌyex baꞌ araꞌb tiꞌ Abraham ten Cꞌuj a ray u qꞌuinin uchoꞌ: “Bajeꞌrer a ray yaxqꞌuinoꞌ Abraham, a racꞌ u cꞌabaꞌ Sara, jeꞌ u pararʌncʌr.” Baxuc caj araꞌb ten Cꞌuj tiꞌ Abraham.
\p
\v 10 Mʌꞌ chen jeraꞌ. Caj cꞌuchij tu qꞌuinin caj chꞌijij Isaac, caj u chꞌaj u racꞌ Rebeca. Caj pararnʌjij Rebeca, yʌn caꞌtur u chan ochir tu nʌcꞌ, pꞌeriꞌob u tet, rajiꞌ ic nunquir u winiquirob israel.
\v 11-12 Cax u pararob Isaac mʌꞌ toy rochaꞌc ten u nʌꞌ Rebeca uch, cax u chan ochir Isaac mʌꞌ tu betaj a tsoyoꞌ mʌꞌ ju betaj a cꞌasoꞌ, tiꞌ toy yʌn ich u nʌcꞌ u nʌꞌ, Cꞌuj caj u tetaj tuririꞌ u parar Isaac. Raꞌ quir u yesic toꞌonex wa Cꞌuj tsoy tu tꞌʌn, u tetic mac, cax mʌꞌ baꞌ caj u betaj caj u tetaj Cꞌuj. Quireꞌ a Cꞌujoꞌ cu tetic a mac u cꞌat. Rajen caj u yubaj Rebeca u chan ochir tu nʌcꞌ caj yubaj yaꞌaraꞌ ten Cꞌuj Rebeca: “Raꞌ sucuꞌunbir cu bin beyaj tiꞌ yitsꞌin.” Baxuc caj yaꞌaraj Cꞌuj tiꞌ Rebeca. 
\v 13 Baxuc caj araꞌb ten Cꞌuj xan. Tan u tsicbar Cꞌuj tiꞌ u pararob Rebeca: “Jach manan in yajquintic a Jacoboꞌ, quij Cꞌuj, chen Esaú, mʌꞌ jin neyajquintic.” Baxuc caj araꞌb ten Cꞌuj xan.
\p
\v 14-15 Yʌn mac cu bin yaꞌaric a baꞌ cu betic Cꞌuj mʌꞌ tsoyiꞌ, quireꞌ caj u tetaj Jacob, chen mʌꞌ ju tetaj Esaú. Chen raꞌ mʌꞌ tajiꞌ. Quireꞌ a Cꞌujoꞌ, cu betic a baꞌ tsoy tu tꞌʌn. Rajen caj araꞌb ten Cꞌuj Moisés: “A tenoꞌ, quin yajquintic a mac in cꞌat in yajquintic.” Baxuc caj yaꞌaraj Cꞌuj.
\v 16 Uꞌyex baꞌ cu camsicoꞌonex aroꞌ. A Cꞌujoꞌ mʌꞌ ju yajquintic mac, quireꞌ u bʌjiriꞌ u cꞌat, cax cu jach pꞌis u bʌj quir u yajquintaꞌr ten Cꞌuj. Aroꞌ mʌꞌ biquin cu yajquintaꞌr ten Cꞌuj. Cu chen bin yajquinbir ten Cꞌuj a mac wa ju cꞌat Cꞌujoꞌ.
\v 17 Bayiriꞌ xan, tiꞌ tsꞌibaꞌan ich u tꞌʌn Cꞌuj caj u yaꞌaraj tiꞌ u rey u winiquirob egipto: “A tenoꞌ, quij Cꞌuj, caj in wacsech soc tech ca bin u reyintiquechob u winiquirob egipto soc yiricob mac a carem beyajoꞌ wa quin betic quireꞌ tech. A baywoꞌ tu cotor mac jeꞌ u yiricob cꞌuchaꞌan in wor in betic tu cotor baꞌ.” Baxuc tsꞌibaꞌan ich u tꞌʌn Cꞌuj.
\v 18 Raꞌ cu camsicoꞌonex, a Cꞌujoꞌ cu yajquintic mac u cꞌat u yajquintic. Baxuc xan, a Cꞌujoꞌ cu bin u chichquintic u joꞌr mac soc mʌꞌ cꞌuchaꞌan yor u quibic Cꞌuj.
\p
\v 19 Yʌn ix tiꞌ mac, a cu bin yaꞌaric wa baxucoꞌ, Cꞌuj biquinin cu taquic ic joꞌrex soc ic bin mucꞌyajex ich cꞌacꞌ, quireꞌ mʌꞌ cꞌuchaꞌan yor mac tiꞌ Cꞌuj.
\v 20 Chen a tenoꞌ quin bin in nunquic tiꞌ: “Maquech tech, quireꞌ chen winiquech, bic tabar a nunquic tiꞌ Cꞌuj?” Jeꞌ wa yac u rac, a pʌtbir ten mac: “Biquinin caj a chen pʌten a baxucoꞌ?”
\v 21 Mʌꞌ ja wirej, a mac a cu pʌtic cꞌʌt cꞌuchaꞌan yor u pʌtic a baꞌ u cꞌat. Wa ju cꞌat u pʌtic tuririꞌ soc tsoy yirir ten mac, jeꞌ u pʌtiqueꞌ. Wa ju cꞌat u pʌtic tuririꞌ soc u tꞌachquintic ich cꞌacꞌ, jeꞌ u pʌtic xaneꞌ, quir u tꞌachquintic ich cꞌacꞌ. Cax wa tiꞌ cu tarob tu yachꞌabirir cꞌʌt tuririꞌ.
\v 22 Mʌꞌ wa baxuc Cꞌuj yejer xan? A Cꞌujoꞌ, u cꞌat yer mac wa rajiꞌ cu tsꞌabʌr u mucꞌyaj ten Cꞌuj a mac a yʌn u siꞌpir, bayiriꞌ soc yer mac, a Cꞌujoꞌ, yʌn u mucꞌ jach manan. Rajen mʌꞌ ju rucꞌsaj a ray winicoꞌ cax robob bin u caꞌ tsꞌabir u mucꞌyajob uch. A Cꞌujoꞌ, caj u mucꞌtaj tiꞌob. Mʌꞌ ja wirej, nemʌꞌ bic a Cꞌujoꞌ.
\v 23 Cꞌuj u cꞌat yesic tiꞌ a mac a chꞌaꞌb yajquinbir ten Cꞌuj quireꞌ jach manan yajbirob ten Cꞌuj, soc yerob jach carem Cꞌuj. Mʌꞌ ja wirej, tu chꞌic chun, toc tetaꞌb ten Cꞌuj quir u yacsaꞌrob ich caꞌanan.
\v 24 Mʌꞌ ja wirej, baxuc Cꞌuj caj u betaj toꞌonex quireꞌ caj u tetoꞌonex xan, cax u winiquirob israel, cax mʌꞌ ju winiquirob israel. Cꞌuj caj u tetaj tu cotor mac a cu yacsicob tu yorob.
\v 25 Baxuc xan, Cꞌuj caj yaꞌaraj tiꞌ mac a caj u tsꞌaj u tucurob soc u tsicbarob a baꞌ u cꞌat Cꞌuj. Rajiꞌ u cꞌabaꞌ Oseas, rajiꞌ caj u tsꞌibtaj a jeꞌ:
\q Tiꞌ yʌn mac uch, a mʌꞌ tu cꞌujinten ucheꞌ, chen bajeꞌrer cu cꞌujintiquenob. A uchoꞌ, mʌꞌ jin yajquintob, chen bajeꞌrer quin yajquinticob.
\q
\v 26 Caj yaꞌaraj Cꞌuj tiꞌ Oseas caj u tsꞌibtaj: “Tu caj in waꞌaraj tiꞌob: A techexoꞌ mʌꞌ ta yʌn cꞌujintenexiꞌ. Jeroj raꞌiriꞌ caj u quibob ten, rajen robob in pararob xan.”
\m Baxuc caj araꞌb ten Cꞌuj Oseas.
\v 27 Baxuc caj u yaꞌaraj a mac a tsꞌab u tucur ten Cꞌuj soc u tsicbar a baꞌ u cꞌat Cꞌuj. U cꞌabaꞌ Isaías. Rajiꞌ caj u yaꞌaraj tiꞌ u winiquirob israel uch: “A techexoꞌ, u winiquirechex israel, ca jach pimtarex irechex u saꞌamin a tiꞌ yʌn ich u chiꞌ cꞌacꞌnab. Chen mʌꞌ pimechex cu bin tacbirechex ten Cꞌuj.
\v 28 A Cꞌujoꞌ, cu bin u tsꞌabir u mucꞌyaj tiꞌ a yaꞌab macoꞌ, an ten bic caj u yaꞌaraj. Jach seb cu bin u tsꞌabir u mucꞌyaj tiꞌob. Taj cu bin tsꞌabir u mucꞌyajob.” Baxuc caj u tsꞌibtaj Isaías uch.
\v 29 Raꞌiriꞌ Isaías caj u tsecꞌtaj xan, tan yaꞌaric uch: 
\q Wa jic Jaj Tsꞌurirex, rajiꞌ u jach tsꞌurir tu cotor baꞌ, cax a tiꞌ yʌn ich caꞌanan, cax a tiꞌ yʌn ich yocꞌocab. Wa rajiꞌ mʌꞌ ju yajquin toꞌonex, a baꞌ u ber tiꞌ a mac a cʌjaꞌanob ich u cajar Sodoma yejer Gomora uch, caj rʌc chꞌesaꞌb ten Cꞌuj quireꞌ u yʌn siꞌpirob baxuc toꞌonex xan, jeꞌ ic chʌc pꞌatʌrex xan mʌꞌ yaꞌab mac.
\s U winiquirob israel yejer u jach tsoyir u tꞌʌn Cꞌuj 
\p
\v 30 Rajen, quiꞌ uꞌyex baꞌ quin waꞌaric tu cotorechex bajeꞌrer. Mʌꞌ ja wirej, a mac a mʌꞌ ju winiquirob israel, caj yiraj bic tabar u rucꞌsaꞌrob u siꞌpirob ten Cꞌuj, quireꞌ caj u yacsob tu yorob tiꞌ Cristo.
\v 31 Mʌꞌ ja wirej, u winiquirob israel yerob wa cu quibicob a baꞌ araꞌb ten Moisés, jeroj, cu bin rucꞌsaꞌbir u siꞌpirob ten Cꞌuj. Chen mʌꞌ rucꞌsaꞌb u siꞌpirob ten u tꞌʌn Moisés, quireꞌ mʌꞌ cꞌuchaꞌan yorob u quibicob a baꞌ u chen cꞌatob.
\v 32 Biquinin mʌꞌ cꞌuchaꞌan yorob u quibicob a baꞌ tiꞌ tsꞌibaꞌan ich u tꞌʌn Moisés? Mʌꞌ ja wirej, u winiquirob israel cu cʌxticob bic u rucꞌsicob u siꞌpirob chen ich u tꞌʌn Moisés. Mʌꞌ ju yacsob tu yorob tiꞌ Cristo. Quireꞌ mʌꞌ ju cꞌʌmobiꞌ, rajen robob irob a mac orac rubuc tiꞌ tunich, a tunichoꞌ, raꞌ cu rubsic mac.
\v 33 Baxuc caj u tsꞌibtaj ich u tꞌʌn Cꞌuj uch xan. Uꞌyex baꞌ caj yaꞌaraj a tsꞌaꞌb u tucur ten Cꞌuj uch, soc u tsicbar a baꞌ u cꞌat Cꞌuj:
\q Tar ich u cajar u cꞌabaꞌ Sión, tij pꞌatiꞌ a mac a tuchiꞌbir ten Cꞌuj. Rajiꞌ irej tunich a cu rubur yocꞌor. A mac a cu rubur yocꞌor rajiꞌ cu bin satʌr ich cꞌacꞌ. Rajen, raꞌ irej a mac a cu jach rubur ich ruꞌum. Baxuc a mac a cu yacsic tu yor tiꞌ Jaj Tsꞌur pachir. Jeꞌ u yiric wa tu cotor taj baꞌ a cu pajic uch, bajeꞌrer jach taj. 
\m Baxuc caj u yaꞌaraj a tsꞌaꞌb u tucur ten Cꞌuj quir u tsꞌibtic a baꞌ u cꞌat Cꞌuj.

\c 10
\p
\v 1 A werex, in wet acsaꞌorirex, a baꞌ in jach cꞌat? Jach manan in cꞌat in wiric in wet winiquirob israel cu rʌc acsiquicob tu yorob tiꞌ Cristo soc u bin tacbirob. Baxuc caj in cꞌataj tiꞌ Cꞌuj tu quin tꞌʌnic.
\v 2 Mʌꞌ ja wirej, robob cu jach pꞌisicob u bʌjob quir u beticob a baꞌ u cꞌat Cꞌuj, chen mʌꞌ ju quiꞌ najtob a baꞌ u cꞌat Cꞌuj.
\v 3 Robob u winiquirob israel, mʌꞌ ju cꞌat u tsꞌic u yorob tiꞌ Cristo soc u bʌjiriꞌ Cꞌuj cu rucꞌsic u siꞌpirob. Mʌꞌ ja wirej, u winiquirob israel, u bʌjiriꞌob u cꞌat u rucꞌsic u siꞌpirob, rajen, mʌꞌ cꞌuchaꞌan yor u beticob a baꞌ araꞌb tiꞌob ten Cꞌuj.
\v 4 Quireꞌ tu cotor mac a yacsmʌnob tu yorob tiꞌ Cristo, caj u yirob mʌꞌ cꞌuchaꞌan yorob u rucꞌsicob u siꞌpirob yejer a baꞌ tsꞌibtaꞌb ten Moisés uch, cax cu quibicob. Mʌꞌ ja wirej, tu chen rucꞌsaꞌrob u siꞌpirob quireꞌ caj u yacsob tu yorob tiꞌ Cristo.
\p
\v 5 A uchoꞌ Moisés, a raꞌ cu beyaj tiꞌ Cꞌuj caj u tsꞌibtaj, caj tsicbanʌjij tiꞌ a mac a cu tucric, jeꞌ u rucꞌsaꞌrob u siꞌpirob wa cu chen beticob a baꞌ caj u yaꞌaraj u tꞌʌn. Uꞌyex baꞌ caj u yaꞌaraj Moisés uch: “Wa jix tiꞌ mac jeꞌ u toc rʌc betic a cu yaꞌaric ich u tꞌʌn Cꞌuj, jeroj jeꞌ u cuxtar munt qꞌuin.” Baxuc caj yaꞌaraj Moisés uch. 
\v 6 Chen cu yaꞌaric ich u tꞌʌn Cꞌuj bic tabar cu bin u rucꞌsic u siꞌpir a mac a cu yacsic tu yor tiꞌ Cristo, quireꞌ cu yaꞌaric ich a tsꞌibaꞌan u tꞌʌn Cꞌuj, tan yaꞌaric: “Mʌꞌ ju chen aꞌaric bic tabar mac cu bin ich caꞌanan quir u pʌyic Cristo caꞌ tac ich yocꞌocab quir u yamticoꞌonex.” 
\v 7 Baxuc xan, mʌꞌ ja yʌn tucric: “Mac cu yʌn bin u ricꞌsic Cristo tiꞌ u quimirir?”
\v 8 A bajeꞌrer, mʌꞌ baꞌwir a ca cʌxtiquex a jeꞌ tꞌʌnaꞌ bic tabar u rucꞌsaꞌr u siꞌpir mac, quireꞌ tiꞌ tsꞌibaꞌan ich u tꞌʌn Cꞌuj tu cu yaꞌaric: “A jeꞌ tꞌʌnaꞌ bajeꞌrer, jach bʌytʌc tu yʌnech. A bajeꞌrer, ca tsicbar a jeꞌ tꞌʌnaꞌ, a tiꞌ yʌn ta pixam xan.” Mʌꞌ ja wirej, a jeꞌ tꞌʌnaꞌ a quin tsicbar, raꞌ u tꞌʌn caj in waꞌaraj techex, caꞌ a yʌn acsex ta worex tiꞌ Cristo.
\v 9 Mʌꞌ ja wirej, soc u taquiquechex Cꞌuj caꞌ a wacsex ta worex ta pixamex wa Jesucristo ic Jaj Tsꞌurirex. Caꞌ a wacsex ta worex ta pixamex wa ricꞌsaꞌb Jesús ich u quimirir. Caꞌ a waꞌarex, rajiꞌ a Jaj Tsurirex ca cꞌʌmiquex. 
\v 10 Quireꞌ a mac a caj u yacsaj tu yor tiꞌ, jeꞌ u rucꞌsaꞌr u siꞌpir ten Cꞌuj. Wa ber quij cariquex tiꞌ mac wa tij cacsex tij corex tiꞌ ic Jaj Tsꞌurirex Jesucristo, jeroj, caj u tacoꞌonex.
\p
\v 11 Mʌꞌ ja wirej, tiꞌ tsꞌibaꞌan ich u tꞌʌn Cꞌuj, tan yaꞌaric: “A mac a cu yacsic tu yor tiꞌ Jaj Tsꞌur, pachir jeꞌ u yiric wa tu cotor baꞌ a cu pajic uch, bajeꞌrer jach taj.” 
\v 12 Ʌcʌtan tu wich Cꞌuj, quet cu yiricoꞌonex, cax u winiquirob israel, cax mʌꞌ ju winiquirob israel. Jariꞌ rajiꞌ quic tsꞌurintiquex, rajiꞌ Cꞌuj. Rajen, jach manan cu yajquintic tu cotor mac a cu cꞌujinticob jach Cꞌuj, a mac a cu cꞌatic u tocaꞌr ten Cꞌuj.
\v 13 Quireꞌ tiꞌ tsꞌibaꞌan baxuc a jeraꞌ: “Tu cotor a mac a cu cꞌatic tiꞌ Jaj Tsꞌur quir u tocaꞌr, jeꞌ u tocaꞌr ten Jaj Tsꞌur.”
\v 14 Chen wa yʌn mac a mʌꞌ toy yacsej tu yor tiꞌ Cristo. Bic tabar u cꞌuchur yor u cꞌatej? Bic tabar u cꞌuchur yor u yacsic tu yor wa mʌꞌ yubmʌn Cristo soc u yacsic tu yor tiꞌ? Bic tabar cu bin yubic wa mʌnaꞌ mac tuchiꞌtaꞌb quir u tsicbar tiꞌ u tꞌʌn Cꞌuj?
\v 15 Bayiriꞌ xan wa Cꞌuj mʌꞌ ju tuchiꞌtej mac quir u tsecꞌtic tiꞌ u tꞌʌn Cꞌuj, jeroj mʌnaꞌ mac cu bin u tsecꞌtic tiꞌ u tꞌʌn Cꞌuj. Uꞌyex baꞌ caj u yaꞌaraj a mac a tsꞌaꞌb u tucur ten Cꞌuj soc u tsicbar a baꞌ u cꞌat Cꞌuj uch. Rajiꞌ caj u tsꞌibtaj: “Jach manan tsoy wa cu cꞌuchur mac quir u tsecꞌtic toꞌonex u jach tsoyir u tꞌʌn Cꞌuj.” Baxuc caj u tsꞌibtaj uch.
\p
\v 16 Chen cax caj u yubob u jach tsoyir u tꞌʌn Cꞌuj, tu cotor mac mʌꞌ ju cꞌʌmobiꞌ. Rajen a mac a tsꞌaꞌb u tucur ten Cꞌuj soc u tsicbar a baꞌ u cꞌat Cꞌuj uch, rajiꞌ caj u tsꞌibtaj, tan yaꞌaric: “Biquinin Jaj Tsꞌur, chen mʌꞌ yaꞌab caj u yacsob tu yorob?” Baxuc caj u yaꞌaraj a tsꞌaꞌb u tucur ten Cꞌuj, u cꞌabaꞌ Isaías.
\v 17 Rajen caꞌ u yubob u tꞌʌn Cꞌuj mac soc cꞌuchaꞌan yorob u yacsicob tu yorob tiꞌ Cꞌuj. Rajen caꞌ xic mac quir u tsicbʌtic tiꞌ u tꞌʌn Cꞌuj soc u yerob Cristo.
\p
\v 18 Chen u winiquirob israel mʌꞌ ju yacsob tu yorob. Jaj ix tʌcoj, wa mʌꞌ ju yubob a jeꞌ u tꞌʌn Cꞌuj. A tenoꞌ, quin waꞌaric u toc uwimʌnobiꞌ quireꞌ cu yaꞌaric ich u tꞌʌn Cꞌuj tu cu yaꞌaric:
\q A mac a tsꞌaꞌb u tucur ten Cꞌuj quir u tsicbarob a baꞌ u cꞌat Cꞌuj caj binob ich tu cotor mac quir u tsicbarob. Rajen u tꞌʌnob caj jumbintaꞌb ten mac ich tu cotor mac ich yocꞌocab.
\m
\v 19 Wa ju yubmʌnob, jaj ix tʌcoj mʌꞌ ju najtobiꞌ. Chen caj u najtob, quireꞌ a mac a mʌꞌ ju winiquirob israel caj u najtob quireꞌ an ten bic caj yaꞌaraj ich u tꞌʌn Cꞌuj:
\q A tenoꞌ, quij Cꞌuj, bin in caꞌ in taquic u jer mac, a mʌꞌ ju winiquirob israel, rajen a techexoꞌ, u winiquirechex israel, bin u caꞌ qꞌuextar a worex. A tenoꞌ, quij Cꞌuj, bin in caꞌ taquej u jer mac, a mʌꞌ ju winiquirob israel, rajen bin a caꞌ tsꞌictarex.
\m Baxuc caj yaꞌaraj a tsꞌaꞌb u tucur ten Cꞌuj uch soc u tsicbar a baꞌ u cꞌat Cꞌuj. Rajiꞌ u cꞌabaꞌ Moisés.
\p
\v 20 Baxuc caj u yaꞌaraj a tsꞌaꞌb u tucur ten Cꞌuj uch, soc u tsicbar a baꞌ u cꞌat Cꞌuj. Rajiꞌ u cꞌabaꞌ Isaías. Mʌꞌ ju chꞌaj sajquir quir u yaꞌaric, rajen caj u yaꞌaraj tiꞌ u yet winiquirob israel:
\q Uꞌyex baꞌ cu yaꞌaric Cꞌuj. A mac a mʌꞌ ju cʌxtenob, robob caj u yirenob uch. Cax mʌꞌ yerenob, robob caj in wesaj in bʌj tiꞌob.
\m Baxuc caj u tsꞌibtaj Isaías uch.
\p
\v 21 Caj yaꞌaraj Isaías uch tiꞌ u yet winiquirob israel uch, caj u yaꞌaraj: “Rajraꞌ quin pʌyic mac a mʌꞌ tan u quibicob in tꞌʌn quir u tar soc in cꞌʌmic. Chen mʌꞌ ju tar u cꞌaxic yor quireꞌ chich u joꞌr.” Baxuc caj araꞌb ten Cꞌuj tiꞌ u winiquirob israel.
\c 11
\s A mac toc ten Cꞌuj ich u winiquirob israel
\p
\v 1 Soc mʌꞌ ja yʌn tucriquex wa Cꞌuj caj u toc rʌc pꞌʌtaj u winiquirob israel irechexen. A tenoꞌ, u winiquiren israel. A tenoꞌ, u pararen in nunquir Abraham xan. A tenoꞌ in woꞌnen Benjamín. Rajen quin waꞌaric mʌꞌ pꞌʌtaꞌan ten Cꞌuj u winiquirob israel.
\v 2 Mʌꞌ ja wirej, a Cꞌujoꞌ, caj u tetaj u winiquirob israel tu chꞌic chunin soc Cꞌuj yʌninob u winiquirob israel. Rajen mʌꞌ rʌc pꞌat ten Cꞌuj u winiquirob israel. Mʌꞌ wa cꞌaj techex a baꞌ caj u yaꞌaraj ich u tꞌʌn Cꞌuj uch, a tsꞌaꞌb u tucur ten Cꞌuj soc u tsicbar a baꞌ u cꞌat Cꞌuj. Rajiꞌ Elías, caj yaꞌaraj tiꞌ Cꞌuj tu cu taꞌquic u joꞌr u yet winiquirob israel. Caj yaꞌaraj:
\v 3 “In Jaj Tsꞌurirech, quij Elías, a mac a nanij u tsecꞌticob a tꞌʌn a techoꞌ, toc quinsaꞌb ten in wet winiquirob israel. Robob xan, caj u rʌc jubsob tu nanij u chaquinticob yʌrʌcꞌ quir u quinsaꞌrob quir u tsꞌic tech. Jariꞌ ten pꞌat, mʌnaꞌ u jer. Baxuc xan, cu cʌxtiquenob u quinsenob xan.” Baxuc caj u yaꞌaraj Elías uch.
\v 4 Chen Cꞌuj caj u yaꞌaraj tiꞌ Elías soc yubic: “Mʌꞌ ju jacꞌʌr a wor Elías, quireꞌ tiꞌ yʌn siete mil xib ich a wet winiquirob israel a caj in tetajoꞌ mʌꞌ ju xonrajob ʌcʌtan tus cꞌujiꞌ, a pʌchaꞌan u cꞌabaꞌ Baal.” Baxuc caj araꞌb ten Cꞌuj tiꞌ Elías uch.
\v 5 Baxuc bajeꞌrer xan, tiꞌ toy yʌn mac ich u winiquirob israel a tetaꞌb ten Cꞌuj, quireꞌ tsoy tu tꞌʌn Cꞌuj. Chen tiꞌ yʌn yaꞌab a tetaꞌb ten Cꞌuj.
\v 6 Rajen caj tocob u winiquirob israel. Chen mʌꞌ tocob u winiquirob israel, quireꞌ u bʌjiriꞌob u beyajob. Quireꞌ mʌꞌ tetaꞌb ten Cꞌuj, quireꞌ u bʌjiriꞌob u beyajob. Wa baxucoꞌ, mʌꞌ ju tocar ten Cꞌuj quireꞌ tsoy tu tꞌʌn Cꞌuj.
\v 7 Rajen, quiꞌ uꞌyex baꞌ quin waꞌaric techex. Ir a wirex u winiquirob israel, mʌꞌ ju yirob bic tabar u rucꞌsicob u siꞌpirob ʌcʌtan u wich Cꞌuj. Cax caj u quiꞌ cʌxtobiꞌ. Chen mʌꞌ yaꞌabiꞌ, caj u yirob bic tabar u rucꞌsicob u siꞌpirob ʌcʌtan u wich Cꞌuj, chen robob a mac a tetaꞌb ten Cꞌuj caj u yirobiꞌ. Barej u jerob, a mun pꞌat ich u winiquirob israel caj chichij u joꞌrob ten Cꞌuj soc mʌꞌ cꞌuchaꞌan yorob u yacsicob tu yorob.
\v 8 Mʌꞌ ja wirej, chichij u joꞌrob u winiquirob israel, soc u nupꞌur u tꞌʌn Cꞌuj tu cu yaꞌaric a mac tsꞌaꞌb u tucur ten Cꞌuj uch, soc u tsicbar a baꞌ u cꞌat Cꞌuj. Rajiꞌ caj u yaꞌaraj: “Cꞌuj chichquintej u joꞌrob, soc cax cu bin u xacob a baꞌ tsꞌibaꞌan ich u tꞌʌn Cꞌuj, mʌꞌ ju bin u najtob. Cꞌuj chichquintej u joꞌrob soc cax yubob u tsecꞌticob u tꞌʌn Cꞌuj, mʌꞌ ju bin u yacsob yorob.” U beriꞌ bajeꞌrer.
\v 9 Quet bayiriꞌ caj u tsecꞌtaj David, a uchoꞌ, caj u yaꞌaraj: 
\q Tu cotor u qꞌuinin tu cu quiꞌquiꞌ janʌnob u winiquirob israel quir u cꞌujinticob Cꞌuj, ʌcʌtan u wich Cꞌuj, jot, quij. Mʌꞌ tu cu bin putsꞌurob tu cu bin tsꞌabʌr u mucꞌyaj ten Cꞌuj tiꞌob. Jeꞌ u tar tu qꞌuinin a mʌꞌ ju tucrob u taroꞌ.
\v 10 Tu yorob u winiquirob israel, mʌꞌ ju bin u najtob a baꞌ u berob tiꞌ. Mʌꞌ ja wirej, jeꞌ u tsꞌabʌr u mucꞌyaj munt qꞌuin, aroꞌ irej wa mac jach pꞌux u pach, quireꞌ yʌn u cuch, quireꞌ jach ar u cuch.
\m Baxuc caj u yaꞌaraj David uch.
\s Caj yiraj bic tabarob u tocar ten Cꞌuj a mʌꞌ ju winiquirob israel
\p
\v 11 Tin tꞌʌn, yʌn mac cu bin u tus tucrej tu yor tiꞌ u winiquirob israel: “Robob chichquintaꞌb u joꞌrob ten Cꞌuj soc munt qꞌuin cu bin satʌrob.” A mac a ju bʌjiriꞌ, cu tus tucric tu yor, a baxucoꞌ mʌꞌ tajiꞌ, quij. Mʌꞌ ja wirej, u winiquirob israel tu cu manob tu cꞌasir, caj u pꞌuspachob Cꞌuj. Rajen cꞌuchij tu qꞌuinin soc u jer winiquirob, a mʌꞌ ju winiquirob israel quir u tocar ten Cꞌuj. Rajen cu bin qꞌuextar u yorob u winiquirob israel caꞌ bin yirob u jer tan u tocꞌar ten Cꞌuj. Jeroj, cu bin u pachtob u yacsicob tu yorob tiꞌ Cristo xan. 
\v 12 Mʌꞌ ja wirej, u winiquirob israel caj u yacsob u siꞌpirob quireꞌ tu pꞌuspachtob Cꞌuj, rajen tu cotor mac a cuxaꞌanob ich yocꞌocab bajeꞌrer cꞌuchaꞌan yor u tocarob ten Cꞌuj. Rajen cꞌuchaꞌan yor a mʌꞌ ju winiquirob israel u tocarob ten Cꞌuj quireꞌ u winiquirob israel mʌꞌ ju yacsmʌnob tu yorob. Caꞌ bin cꞌuchuc tu qꞌuinin u winiquirob israel bin u caꞌ yacsob tu yorob, a raꞌ u qꞌuininoꞌ, jach manan quic bin yamtaꞌbirex ten Cꞌuj. Mun caj u yajquintoꞌonex Cꞌuj, cax u winiquirob israel mʌꞌ toy u yacsob tu yorob tiꞌ Cristo.
\p
\v 13 A tenoꞌ Pablojen, quin tsicbar techex a mʌꞌ ju winiquirob israel. Mʌꞌ ja wirej, caj u teten Cꞌuj quir in beyaj techex. Rajen in wer jach carem in beyaj caj u tsꞌaj ten Cꞌuj.
\v 14 Mʌꞌ ja wirej, wa jin wer jach carem in beyaj caj u tsꞌaj ten Cꞌuj. Tin tꞌʌn, in wet winiquirob israel bin u caꞌ u pachtob tu yorob caꞌ beyanʌc Cꞌuj tu yorob an ten bic caj beyanʌjij ta worex techex uch, wa jix tʌcoj bin u caꞌ yacsob tu yorob tiꞌ Cristo, cax mʌꞌ yaꞌab.
\v 15 A tenoꞌ, quin jach pachtic in wirej in wet winiquirob israel caꞌ yacsob tu yorob tiꞌ Cristo. Mʌꞌ ja wirej, a Cꞌujoꞌ, caj u masaj u winiquirob israel, rajen bajeꞌrer cꞌuchaꞌan a worex a wacsiquex ta worex tiꞌ Cristo, soc u taquiquechex cax mʌꞌ ju winiquirex israel. A wer baꞌ u ber caꞌ bin cꞌuchuc tu qꞌuinin, u winiquirob israel bin u caꞌ yacsob tu yorob? Tin tꞌʌn, a raꞌ u qꞌuininoꞌ, irob u winiquirob israel an ten bic mac caj wʌcꞌʌs ricꞌsaꞌb ich u quimirir quir u caꞌ cuxtarob.
\v 16 Mʌꞌ ja wirej, a mac caj u yʌn acsob tu yorob, tʌcʌ robob u winiquirob israel. Rajen, ij querex a Cꞌujoꞌ mʌꞌ ju masob u winiquirob israel munt qꞌuiniꞌ. Uꞌyex baꞌ cu camsicoꞌonex a cheꞌoꞌ. Wa ju mos cheꞌ rajiꞌ yʌnin Cꞌuj, baxuc xan u cꞌʌbir cheꞌ, Cꞌuj yʌnin xan.
\p
\v 17 Mʌꞌ ja wirej, robob u winiquirob israel, irob u cꞌʌbir cheꞌ, a tiꞌ yʌn u cheꞌer olivo. Tiꞌ yʌn mʌꞌ yaꞌabiꞌ ich u winiquirob israel caj rucꞌsaꞌb tiꞌ u jach cheꞌer, quireꞌ mʌꞌ ju yacsob tu yorob. Rajen, a techexoꞌ, a mʌꞌ ju winiquirechex israel, cax u jer u cꞌʌbirechex cheꞌ. A uchoꞌ, ich cꞌax yʌnechex uch. Jeroj, caj u tʌqꞌuechex ich u jach cheꞌer olivo soc a wuqꞌuiquex u yits ich u cheꞌer olivo. Mʌꞌ ja wirej, a techexoꞌ, u cꞌʌbirechex cheꞌ taqꞌuechex yejer u jer u cꞌʌbir ich u jach cheꞌer olivo. Rajen ca wuqꞌuiquex u yits u mos u cheꞌer olivo. 
\v 18 Cax robob u winiquirob israel rucꞌsaꞌb soc caꞌ tacꞌʌquechex ich u jach cheꞌer olivo. Mʌꞌ ja yʌn tucriquex wa jach caremechex. Chen cꞌaj techex u cꞌʌbir a cheꞌoꞌ, mʌꞌ raꞌ cuxriqꞌuij u cheꞌer. Chen u mos a cheꞌoꞌ rajiꞌ quir u jach cuxtar.
\p
\v 19 A tenoꞌ, in wer cꞌuchaꞌan a worex a waꞌarex: “Cax u winiquirob israel irob u jach cꞌʌbir u cheꞌer olivo.” Tin tꞌʌn, ca bin a waꞌariquex ten: “Jach tsoyenob,” quireꞌ robob u winiquirob israel caj curchꞌacob ten Cꞌuj soc in tacꞌʌrob ich u cheꞌer olivo.
\v 20 Jach taj, robob cuchꞌacob, quireꞌ mʌꞌ ju yacsob tu yorob, rajen tʌcꞌbirechex ich u cheꞌer olivo, quireꞌ caj a wacsex ta worex. Chen quin chich aric techex, mʌꞌ ja waꞌariquex wa jach caremechex, chen jach sʌjtex Cꞌuj.
\v 21 Mʌꞌ ja wirej, wa Cꞌuj caj u cuchꞌʌtaj u cꞌʌbir ich u jach cheꞌer olivo, quireꞌ robob mʌꞌ ju yacsob tu yorob, jeꞌ u curchꞌʌtiquechex xan, wa mʌꞌ ja wacsex ta worex xan, quij.
\v 22 Ir a wirex, bic tabar a mʌꞌ ju yajoꞌonex Cꞌuj. Baxuc xan, ir a wirex, bic tabar u jach tsꞌaꞌbʌr u mucꞌyaj ten Cꞌuj mac. Jach taj tsꞌaꞌb u mucꞌyaj ten Cꞌuj tiꞌ u winiquirob israel, quireꞌ caj u yacsob u siꞌpirob uch. Chen Cꞌuj, jeꞌ u quiꞌ yajquintic techex wa ca pꞌatarex ich yicnʌn Cꞌuj. Chen wa ca pꞌʌtiquex a wacsiquex ta worex, jeꞌ u curchꞌʌtiquechex irechex u cꞌʌbir cheꞌ quir u purur ich cꞌacꞌ.
\v 23 Mʌꞌ ja wirej, wa ju winiquirob israel cu rʌc cꞌaxicob tu yorob quir u yacsicob tu yorob tiꞌ Cristo, cꞌuchaꞌan yor Cꞌuj u wʌcꞌʌs tʌqꞌuej ich u cheꞌer tu curchꞌacob uch.
\v 24 A techexoꞌ, a mʌꞌ ju winiquirechex israel irechex u cꞌʌbir u cheꞌer olivo, a cꞌax yʌnoꞌ. Caj curchꞌac u cꞌʌbir soc u tacꞌʌrechex ich u jach cheꞌer olivo. Cax a baywoꞌ, mʌꞌ nanij u tacꞌʌr u cꞌʌbir u cheꞌer ich cꞌaxir olivo. Rajen quin waꞌaric techex, a Cꞌujoꞌ, jach manan cꞌuchaꞌan yor u wʌcꞌʌs tacꞌʌr u winiquirob israel tu yʌnob uch, quireꞌ robob u jach cꞌʌbir u cheꞌer olivo. Mʌꞌ ja wirej, jeꞌ u cꞌuchur tu qꞌuinin cu bin u wʌcꞌʌs tacꞌʌrob ten Cꞌuj ich u jach cheꞌer olivo.
\s A Cꞌujoꞌ bin u caꞌ u yajquintej tu cotor mac
\p
\v 25 A techexoꞌ, in wet acsaꞌorex, in cꞌat a werex a baꞌ mʌꞌ yer mac uch, chen Cꞌuj yer. Quin waꞌaric techex aroꞌ soc mʌꞌ ja tucriquex jach noꞌjechex. Yʌn ich u winiquirob israel jach chichij u joꞌrob, quireꞌ mʌꞌ ju najtob a baꞌ u jach cꞌat Cꞌuj tiꞌob. Mʌꞌ ju bin u najtob a baꞌ u cꞌat Cꞌuj tiꞌob hasta yaꞌab winic, a mʌꞌ ju winiquirob israel, caj tsꞌoc u yacsicob tu yorob tiꞌ Cristo.
\v 26 Caꞌ bin tsꞌocac u yacsicob tu yorob, a mac a mʌꞌ ju winiquirob israel, jeroj tu cotor u winiquirob israel jeꞌ u tocar ten Cꞌuj, quireꞌ baxuc caj u yaꞌaraj a mac a tsꞌaꞌb u tucur ten Cꞌuj soc u tsicbar a baꞌ u cꞌat Cꞌuj uch. Uꞌyex baꞌ caj u yaꞌaraj:
\q Jeꞌ u tar mac ich u cajar Sión, a cu bin u taquic u winiquirob. Rajiꞌ bin u caꞌ rucꞌsaꞌbir u siꞌpirob u winiquirob israel, quireꞌ robob u pararob Jacob.
\v 27 Jeꞌ in rʌc jawsic u siꞌpirob u winiquirob israel. A raꞌ u qꞌuininoꞌ xan, jeꞌ in nupꞌsic a baꞌ caj in toc araj tiꞌ a nunquirex.
\m Baxuc caj u tsꞌibtaj a mac tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj uch.
\p
\v 28 Yʌn ich u winiquirob israel caj u choquintob u yor Cꞌuj, quireꞌ robob mʌꞌ yacsmʌnob tu yorob tiꞌ Cristo. Rajen, cꞌuchaꞌan a worex a techexoꞌ, a mʌꞌ ju winiquirechex israel quir a wacsiquex ta worex tiꞌ Cristo. Chen yʌn cꞌʌꞌotex Cꞌuj caj u batꞌan tetaj u winiquirob israel soc robob yʌninob Cꞌuj uch. Mʌꞌ ja wirej, Cꞌuj u jach yaj u winiquirob israel, quireꞌ a baꞌ caj u toc araj u nunquirob uch.
\v 29 Mʌꞌ ja wirej, Cꞌuj mʌꞌ u cꞌax u tucur. A baꞌ cu tsꞌic Cꞌuj tiꞌ mac, mʌꞌ ju caꞌ tocar tiꞌ, mʌꞌ ju pꞌʌtʌr a mac a toc tetaꞌb xan.
\v 30-31 Baxuc a techexoꞌ, a mʌꞌ ju winiquirechex israel a uchoꞌ, mʌꞌ ta quibex Cristo. Chen bajeꞌrer Cꞌuj, caj u yajquintechex, quireꞌ u winiquirob israel mʌꞌ ju quibob Cristo. Baxuc xan, yejer u winiquirob israel, bajeꞌrer mʌꞌ ju yacsob tu yorob tiꞌ Cristo, rajen an ten bic Cꞌuj caj u yajquintechex baxuc xan, yejer u winiquirob israel, pachir cu bin yajquinbir a tiꞌoboꞌ. 
\v 32 Mʌꞌ ja wirej, Cꞌuj caj u tac u joꞌr tu cotor mac, quireꞌ yʌn u siꞌpirob, rajen cꞌuchaꞌan yor u chaꞌbʌr yajquinbir tu cotor mac cax maquiꞌ.
\p
\v 33 Jach manan noꞌj a Cꞌujoꞌ, baxuc xan, Cꞌuj yer tu cotor baꞌ, jach manan yer a baꞌ tu cotor. A toꞌonexoꞌ, mʌꞌ jij querex bic tabar Cꞌuj caj u tucraj baꞌ a cu bin tar soc u jach tar. Mʌꞌ cꞌuchaꞌan ij corex ic najtex baꞌ u cꞌat Cꞌuj.
\v 34 Baxuc tiꞌ tsꞌibaꞌan ich u tꞌʌn Cꞌuj uch:
\q Mʌꞌ ja wirej, mʌnaꞌ mac yer baꞌ cu tucric Cꞌuj, bayiriꞌ xan, mʌnaꞌ mac camsʌmʌnin, a Cꞌujoꞌ, u toc er tu cotor baꞌ.
\v 35 Mʌnaꞌ mac pʌyber cu yʌn tsꞌic baꞌ tiꞌ Cꞌuj. Rajen pachir caj u yaꞌaraj quireꞌ caj u tsꞌaja baꞌ tiꞌ Cꞌuj, jeroj Cꞌuj caꞌ bin u sut u boꞌorir xan.
\m
\v 36 A Cꞌujoꞌ, caj u betaj tu cotor baꞌ. Tu cotor a baꞌ tiꞌ yʌn quireꞌ rajiꞌ u mucꞌ Cꞌuj. U bʌjiriꞌ Cꞌuj cu tsꞌurintaꞌr ten tu cotor baꞌ. U bʌjiriꞌ Cꞌuj yʌnin tu cotor baꞌ, rajen caꞌ ij quiꞌ tꞌʌnex Cꞌuj: “Jach caremech Cꞌuj, munt qꞌuin jach caremech.” Jeroj.
\c 12
\s Bic tabar ic beyajex tiꞌ Cꞌuj
\p
\v 1 Rajen, in wet acsaꞌorirex, quireꞌ Cꞌuj caj u chꞌaj u yajquintechex, rajen quin chich aric techex caꞌ a cꞌubex a wʌcꞌʌs bʌjiriꞌex tiꞌ Cꞌuj. Mʌꞌ ja wirej, wa baxuc a bʌjiriꞌex ca tsꞌiquex tiꞌ Cꞌuj, a Cꞌuj yʌninoꞌ, caꞌ a sijex tiꞌ Cꞌuj, a baꞌ jach cuxaꞌan. A baywoꞌ, ca quiꞌquintiquex u yor Cꞌuj, baxuc xan, caj a cꞌujintex Cꞌuj yejer a pixamex.
\v 2 Mʌꞌ a yʌn cʌniquex a bʌjex bayiriꞌ xan a mac a tiꞌ yʌn ich yocꞌocaboꞌ a cu manob tu siꞌpiroboꞌ. Caꞌ tucrex Cꞌuj soc caꞌ manaquex ich a cuxtarex, a ricꞌbenoꞌ, soc Cꞌuj cu cꞌaxic a tucurex soc cꞌuchaꞌan a worex a werex a baꞌ u jach cꞌat Cꞌuj tiꞌ techex. A baywoꞌ cꞌuchaꞌan a worex a quiꞌquintiquex u yor Cꞌuj.
\p
\v 3 Quireꞌ tsoy tu tꞌʌn Cꞌuj, rajen tsꞌaꞌb in beyaj caꞌ in waꞌarej techex a baꞌ caꞌ a betex. Rajen quin waꞌaric techex mʌꞌ tsoy a manex, caꞌ a tucrex jach caremechex, quireꞌ mʌꞌ jach caremechexiꞌ. Chen tsoy wa ja bʌjiriꞌex ca tucriquechex an ten bic taj tiꞌ wʌcꞌʌs a bʌjiriꞌexeꞌ. Wa yʌn baꞌ cꞌuchaꞌan a worex a betej a tsoyoꞌ, quireꞌ a wacsmʌnex ta worex toc betej.
\v 4-5 Mʌꞌ ja wirej, a jic winquirirex chen tuririꞌ. Yʌn toꞌonex ij cꞌʌbex, yʌn toꞌonex ij coquex. Jujunturob aroꞌ u tirir tiꞌ u beyaj ich ic winquirirex. Baxuc yejeroꞌonex, a tij cacsex tij corex. Cax yʌn pimoꞌonex, yejer a yacsmʌnob tu yorob tiꞌ Jesucristo, chen pꞌeriꞌoꞌonex yejer Cristo, an ten bic tuririꞌ ic winquirirex. Bayiriꞌ xan, jujunturoꞌonex yʌn ic beyajex quir ic betiquex.
\p
\v 6 Quireꞌ tsoy tu tꞌʌn Cꞌuj, rajiꞌ caj u tsꞌaja jujunturoꞌonex ic beyajex soc cꞌuchaꞌan ij corex ic yamtiquex mac. A mac tsꞌaꞌb u beyaj quir u tsecꞌtic u tꞌʌn Cꞌuj, arej caꞌ u tsecꞌtej tiꞌ, caꞌ u tsecꞌtej a baꞌ quij cacsiquex tij corex a tiꞌoꞌ.
\v 7 Wa Cꞌuj caj u yaꞌaraj toꞌonex ic yamtex mac, caꞌ manʌcoꞌonex ic yamtex mac. Wa Cꞌuj caj u yaꞌaraj toꞌonex caꞌ ij camsex mac, caꞌ ij camsex mac.
\v 8 Wa Cꞌuj caj u yaꞌaraj toꞌonex caꞌ ic chich arex tiꞌ mac, jeroj, caꞌ manʌcoꞌonex ic chich arex mac. Wa Cꞌuj caj u yaꞌaraj toꞌonex ic jʌsiquex a baꞌ yʌn toꞌonex, caꞌ manʌcoꞌonex ic jʌsex soc mʌꞌ ju chen tucriquex tsoyex. Chen jach tsꞌaj tiꞌob. Wa Cꞌuj caj a yaꞌaraj toꞌonex ij cocarex caꞌ u jach tsꞌurir toꞌonex ij quet acsaꞌorirex, caꞌ beyanʌcoꞌon tiꞌob. Tsꞌajaꞌan ij corex ic beyajex tiꞌ ij quet acsaꞌorirex. Wa Cꞌuj caj u yaꞌaraj toꞌonex ic yamtex mac a jach otsichʌjoꞌ. Caꞌ ic yamtex tiꞌob, quireꞌ quiꞌ ij corex ic yamtiquex tiꞌob.
\s Baꞌ caꞌ ic betex quireꞌ tij cacsex tij corex
\p
\v 9 Tsꞌajaꞌan a worex a yajquintiquex mac. Pꞌactex a cꞌasoꞌ. Pꞌʌtex a baꞌ cꞌasoꞌ, chen manenex tu tsoyir.
\v 10 Pacran yajquintiquex a bʌjex, irej wa jach a bʌjex. Wa mac caj u betaj a tsoyoꞌ. Arex tiꞌ: “Jach tsoy caj a betaj a techoꞌ.”
\p
\v 11 Chich beyanenex tiꞌ Cꞌuj, cax a baꞌ cu tsꞌic techex a betiquex. Tsꞌajaꞌan a worex a beyajex tiꞌ Cꞌuj.
\p
\v 12 Caꞌ quiꞌac a worex tiꞌ a baꞌ ca pajiquex. Mʌꞌ ja suꞌsiquex a tꞌʌniquex Cꞌuj. Mucꞌtex tu cu chuquicob a pachex.
\p
\v 13 Wa ber ca wiriquex a wet acsaꞌorirex, yʌn baꞌ u cꞌat, yamtex. Quiꞌ acsex a mac a cu tar yirechex.
\v 14 Tꞌʌnex Cꞌuj wa cu chuquic a pachex, caꞌ yamtac ten Cꞌuj. Mʌꞌ ja cꞌatiquex tiꞌ Cꞌuj caꞌ roꞌroꞌb tꞌʌntac a mac a caj u chuquic a pachex.
\p
\v 15 Quet quiꞌex a worex yejer a mac a quiꞌ yoroꞌ. Bayiriꞌ xan, quet a wocꞌarex yejer a mac ocar u caꞌ.
\p
\v 16 Periꞌquintex a tucurex yejer a wet acsaꞌorirex, mʌꞌ ja tucrex wa jach caremechex, mʌꞌ ja pꞌastiquex a wet acsaꞌorirex. Periꞌquint a bʌjex yejer a mac otsichʌjij. 
\p
\v 17 Cax mac cu cꞌasquintiquechex, mʌꞌ ja pʌqꞌuiquex a bʌjex yejer. Taj ca betiquex tu cotor baꞌ soc mʌnaꞌ mac cu bin u pʌqꞌuic a pachex.
\v 18 Jach pꞌis a bʌjex a quetquintic a worex yejer tu cotor mac.
\v 19 In wet acsaꞌorirex, mʌꞌ ja yʌn pʌqꞌuic a bʌjex yejer mac. Yʌn cꞌaj techex, a Cꞌujoꞌ cu chen bin u tsꞌic u mucꞌyaj mac. Quireꞌ tiꞌ tsꞌibaꞌan ich u tꞌʌn Cꞌuj tu cu yaꞌaric: “A tenoꞌ, quij Cꞌuj, quin tsꞌic u mucꞌyaj mac.” Baxuc caj yaꞌaraj Cꞌuj uch.
\v 20 Yʌn cꞌaj techex xan, tiꞌ tsꞌibaꞌan ich u tꞌʌn Cꞌuj tu cu yaꞌaric: “Wa tiꞌ yʌn mac a cu pꞌactiquechex, chen cu quimin yejer wiꞌij, jansex a tiꞌoꞌ. Wa ucꞌchʌjij, tsꞌajex yucꞌur. Wa baxuc ca betiquex, pachir a mac a cu pꞌactiquechex cu bin u chꞌic suraquir.”
\v 21 Mʌꞌ ja chaꞌiquex yacsic a siꞌpirex, a mac a cu manob tu cꞌasir. Toc betex tiꞌob a tsoyoꞌ, a baywoꞌ cꞌuchaꞌan a worex tiꞌ a quisinoꞌ.

\c 13
\p
\v 1 Quin chich aric techex. Tu cotor mac caꞌ u quibej a baꞌ cu yaꞌaric u tsꞌurir ic ruꞌumex. Mʌꞌ ja wirej, Cꞌuj caj u tetaj a mac a cu yocar u tsꞌurir ic ruꞌumex. Cꞌuj caj u tsꞌajaj tiꞌob u beyaj soc ic tsꞌurintiquex. 
\v 2 Rajen a mac a mʌꞌ ju quibej a baꞌ cu yaꞌaric u tsꞌurir ic ruꞌumex, baxuc mʌꞌ ju quibej Cꞌuj a mac a tu tsꞌaj tiꞌob u beyajob. Rajen bin u caꞌ tsꞌabir u mucꞌyajob wa mʌꞌ ju quibobiꞌ.
\v 3 Mʌꞌ ja wirej, a mac a acsaꞌb tu beyaj ten u racꞌob, tsꞌaꞌb u beyaj mʌꞌ quir u jacꞌsic u yorob a mac a cu beticob a tsoyoꞌ. Acsaꞌb tu beyajob quir u jacꞌsic yor a mac a cu manob tu cꞌasir. Wa ja cꞌat mʌꞌ ju pecsicob a worex tu cʌjaꞌanechex, jeroj toc betex a tsoyoꞌ, soc yiricob tsoyechex.
\v 4 Robob ocob tu tsꞌurir ic ruꞌumex, cu beyaj tiꞌ Cꞌuj soc u yamtiquechex. Caꞌ toc chꞌajex sajquirex tiꞌob, quireꞌ raꞌ u beyajob quir u tsꞌic u mucꞌyajob tiꞌ a mac a cu manob tu cꞌasir. Wa mʌꞌ cꞌas caj a betex mʌꞌ baꞌwir ca chꞌiquirex sajquirex tiꞌob.
\v 5 Rajen, caꞌ a quibex tiꞌ a mac acsaꞌb tu beyaj ta ruꞌumex. Quireꞌ a werex taj ca betiquex quireꞌ ca wuꞌyiquex ta worex caꞌ a quibex u tꞌʌnob.
\v 6 Rajen, caꞌ a boꞌotex u boꞌorir u cꞌʌb u tsꞌurirob a ruꞌumex. Mʌꞌ ja wirej, robob cu beyajob tiꞌ Cꞌuj, rajen quir u tsꞌocsicob u beyajob Cꞌuj. Caꞌ a boꞌotex tiꞌob. 
\p
\v 7 Wa mʌꞌ a boꞌtmʌnex a boꞌorex, toc boꞌtex. Boꞌotex a boꞌorex yejer gobierno, cax a mac a cu cꞌʌmicob u boꞌor gobierno. Sʌjtex a mac tsoy a sʌjtiquexoꞌ. Quiꞌ tꞌʌnex a mac tsoy a tꞌʌniquexoꞌ.
\v 8 Caꞌ bin boꞌotac a boꞌorex jariꞌ caꞌ a chen pacran yajquintex a bʌjex. Quireꞌ a cu yajquintic mac caj u nupꞌsaj tu cotor a baꞌ cu yaꞌaric ich u tꞌʌn Moisés. 
\v 9 Uꞌyex baꞌ cu yaꞌaric ich u tꞌʌn Moisés: “Mʌꞌ ja manex yejer u racꞌ mac. Mʌꞌ ja yʌn quinsiquex mac. Mʌꞌ ja waꞌcriquex baꞌ. Mʌꞌ ja pachtiquex a baꞌ yʌn mac.” Yʌn tun, u jer yaꞌab baꞌ ich u tꞌʌn Cꞌuj a ricꞌsaꞌan ten Cꞌuj soc caꞌ ic betex. Tu cotor a jeꞌ tꞌʌnaꞌ, toc nupꞌaꞌan wa ca betiquex a baꞌ quin waꞌaric techex a jeraꞌ: “Yajquintex mac irej a wʌcꞌʌs bʌjiriꞌ ca yajquintic.”
\v 10 Mʌꞌ ja wirej, wa ca yajquintiquex mac, mʌꞌ ja bin a cꞌasquintiquex mac. Rajen wa ca yajquintiquex mac, ca quibiquex tu cotor a baꞌ tsꞌibaꞌan ich u tꞌʌn Cꞌuj. 
\p
\v 11 Caꞌ a quibex tu cotor a jeꞌ tꞌʌnaꞌ, a tan tin waꞌaric techex quireꞌ jach tabar ic Jaj Tsꞌurirex u yuꞌur. Tsireꞌej, a manex ich a cꞌasoꞌ. Tsꞌajaꞌan a worex a quiꞌ acsiquex ta worex. A ray u qꞌuininoꞌ caj ij cacsex tij corex ij querex mʌꞌ jach tabar u qꞌuinin quir u yuꞌur ic Jaj Tsꞌurirex, chen bajeꞌrer jach tabar u cꞌuchur ij Jaj Tsꞌurirex quir u taquicoꞌonex.
\v 12 A jeꞌ ruꞌumaꞌ, tu cʌjaꞌanoꞌonex irej wa tiꞌ yʌn tu yacꞌbirir quireꞌ yʌn u siꞌpirob a teraꞌ ich yocꞌocab. Chen bajeꞌrer, tin tꞌʌn, tabar u sastar. Mʌꞌ ja wirej, tabar u cꞌuchur Cristo, caꞌ bin cꞌuchuc, jeꞌ u rucꞌsic tu cotor u siꞌpir a teꞌ yʌnaꞌ. A ray u qꞌuininoꞌ, irej wa cu sastar. Rajen caꞌ ic pꞌʌtex a baꞌ cu beticob a mac a tiꞌ toy cu manob tu yacꞌbirir quireꞌ robob mʌꞌ yerob Cristo. Tsꞌajaꞌan ij corex ij cacsex tij corex tiꞌ Cꞌuj soc cꞌuchaꞌan ij corex ic mucꞌtex a cꞌasoꞌ, a cu tar toꞌonex. Caꞌ manacoꞌonex tu sasirir.
\v 13 Caꞌ manacoꞌonex tu tsoyir an ten bic mac a yʌn u sasirir Cristo tu yorob. Mʌꞌ jic yʌn manex tu yacꞌbirir. Mʌꞌ jic yʌn cajchʌjʌrex. Mʌꞌ jic yʌn manex yejer xquic. Mʌꞌ jic yʌn manex tu cꞌasir. Mʌꞌ jic yʌn tsꞌictarex. Mʌꞌ ju yʌn qꞌuextar ij corex.
\v 14 Caꞌ manacoꞌonex yejer Jesucristo ic Jaj Tsꞌurirex soc mʌꞌ ic pachiquex tij corex ic betex a baꞌ jach cꞌasoꞌ. 
\c 14
\s Mʌꞌ ja pʌqꞌuiquex u pachob a wet acsaꞌorirex
\p
\v 1 Wa tiꞌ yʌn mac a caj u yacsaj tu yor tiꞌ Cristo, chen mʌꞌ chichac u yor tiꞌ u tꞌʌn Cꞌuj. Quetquintej a worex yejer, chen mʌꞌ ja pꞌastiquex a tiꞌoꞌ, quireꞌ mʌꞌ ju quiꞌ najt u tꞌʌn Cꞌuj an ten bic techexoꞌ ca najtiquex. 
\v 2 Yʌn mac tsꞌajaꞌan yor u yacsicob tu yorob tiꞌ Cristo, rajen cu tucricob cꞌuchaꞌan yor u jantic a baꞌ u cꞌat. Chen yʌn u jer a caj u yacsaj tu yor tiꞌ Cristo, chen mʌꞌ chichac u yor tiꞌ u tꞌʌn Cꞌuj, rajen mʌꞌ cꞌuchaꞌan yor u jantic tu cotor baꞌ.
\v 3 Rajen, a techexoꞌ, a cꞌuchaꞌan a worex a jantiquex a baꞌ a cꞌatex, mʌꞌ ja pꞌastiquex a mʌꞌ ju chiꞌic bʌcꞌ. Baxuc a techexoꞌ, a mʌꞌ ja chiꞌiquex bʌcꞌoꞌ, mʌꞌ ja pꞌastiquex a mac a cu chiꞌic bʌcꞌoꞌ. Mʌꞌ ja wirej, a Cꞌujoꞌ, cu cꞌʌmic tu cotor a yacsmʌnob tu yorob cax chichac u yorob tiꞌ u tꞌʌn Cꞌuj, cax mʌꞌ chichac u yorob tiꞌ u tꞌʌn Cꞌuj.
\v 4 Quin cꞌatic techex, maquechex quir a pꞌastiquex a mac a cu beyaj tiꞌ u jer mac? Mʌꞌ ja wirej, rajiꞌ a cu pꞌastaꞌr, rajiꞌ cu beyaj tiꞌ Cꞌuj. Chen Cꞌuj cꞌuchaꞌan yor yaꞌaric wa tsoy caj beyanʌjij u cꞌurew, wa jix tʌcoj mʌꞌ tsoy u beyaj. Bayiriꞌ xan, a Cꞌujoꞌ, cꞌuchaꞌan yor u yamtic mac quir u man tu tsoyir.
\p
\v 5 Yʌn mac ich a yacsmʌob tu yorob, cu yaꞌaric yʌn u qꞌuinin, a jach noꞌjoꞌ, bayiriꞌ yʌn u jer u qꞌuinin mʌꞌ jach nojiꞌ. Yʌn u jer mac a cu yaꞌaric, toc pꞌeriꞌ a qꞌuinoꞌ, toc quet u qꞌuinin. Mʌꞌ ja wirej, tu cotor mac soc yer baꞌ u bʌjiriꞌ cu tucric tu yor, a raꞌ jach tsoyoꞌ. Mʌꞌ ju pꞌas a baꞌ cu tucric u jer mac.
\v 6 Mʌꞌ ja wirej, yʌn mac mʌꞌ ju beyaj, caꞌ bin cꞌuchuc tu qꞌuinin a caj u ricꞌsaj, quireꞌ cu tucric jach noꞌj a ray u qꞌuininoꞌ quir u cꞌujintic Cꞌuj. Tiꞌ yʌn u jer mac xan, mʌꞌ ju ricꞌsic u qꞌuinin quir u cꞌujintic Cꞌuj quireꞌ cu tucric tu cotor u qꞌuinin tsoy u qꞌuinin u cꞌujintic Cꞌuj. Yʌn mac cu jantic a baꞌ u cꞌat, quireꞌ cu tucric tu yor baxucoꞌ, tsoy quir u cꞌujintic Cꞌuj quireꞌ caj yaꞌaraj: “Bayoꞌ Cꞌuj”, quij. Yʌn u jer mac a mʌꞌ ju chiꞌic bʌcꞌ yejer u wich cheꞌ, quireꞌ cu tucric tu yor baxucoꞌ, tsoy quir u cꞌujintic Cꞌuj. Rajiꞌ caj u yaꞌaraj: “Bayoꞌ Cꞌuj”, quireꞌ a baꞌ cu jantic xan.
\p
\v 7 Quireꞌ a mac a yacsmʌnob tu yorob, mʌꞌ ju bʌjiriꞌ u tsꞌurir wa ber cuxaꞌan teꞌ ich yocꞌocab. Baxuc, mʌnaꞌ mac u bʌjiriꞌ u tsꞌurir caꞌ bin cꞌuchuc tu qꞌuinin u quimin xan.
\v 8 Rajen, wa mac cu cuxtar cu chen betic a baꞌ tsoyir tu tꞌʌn Cristo. Chen wa cu quimin mac, jeꞌ u quimin soc u bin ich ic Jaj Tsꞌurirex. Mʌꞌ ja wirej, a toꞌonexoꞌ, rajiꞌ yʌninoꞌonex Cꞌuj, cax tiꞌ toy cuxaꞌanoꞌonex ich yocꞌocab, cax wa quimenoꞌonex.
\v 9 Rajen, caj quimij Cristo, bayiriꞌ caj ricꞌsaꞌb tiꞌ u quimirir, bayiriꞌ cuxaꞌan, cax bajeꞌrer ich caꞌanan soc rajiꞌ quic tsꞌurintiquex. Bayiriꞌ xan, rajiꞌ cu tsꞌurinticob a quimenoꞌ. Baxuc rajiꞌ cu tsꞌurinticob a cuxaꞌan bajeꞌreroꞌ.
\p
\v 10 Chen tech biquinin ca tucriquex cꞌas tiꞌ a wet acsaꞌorirex? Arej ten biquinin ca pꞌastiquex a tiꞌoꞌ? Yʌn cꞌaj techex, bin a caꞌex ʌcʌtan tiꞌ Cꞌuj soc bin u caꞌ u tumtej yirechex Cristo wa tsoy caj ic betex wa cꞌas caj ic betex.
\v 11 Quireꞌ baxuc caj u tsꞌibta a mac a tsꞌaꞌb u tucur ten Cꞌuj quir u tsicbar a baꞌ Cꞌuj u cꞌat uch. Jeroj, caj u yaꞌaraj:
\q A tenoꞌ Cꞌujen, jach cuxaꞌanen, quij Cꞌuj. A baꞌ caj in toc araj uch jeꞌ u tareꞌ. Tu cotor mac cu bin xontar ʌcʌtan ten quir u cꞌujintiquenob.
\m Baxuc araꞌb ten Cꞌuj tiꞌ a mac a tsꞌaꞌb u tucur ten Cꞌuj quir u tsicbar uch.
\v 12 A ray u qꞌuininoꞌ, jujunturoꞌonex jeꞌ ic jach ariquex tiꞌ Cꞌuj a baꞌ tic betex ich yocꞌocab.
\s Mʌꞌ ja pʌyiquex u siꞌpir a wet acsaꞌorirex
\p
\v 13 Rajen, mʌꞌ jic yʌn tucriquex cꞌas tiꞌ ij quet acsaꞌorirex. Caꞌ ij cʌnant ic bʌjex soc mʌꞌ ic pʌyiquex u siꞌpir ij quet acasaꞌorirex.
\v 14 A tenoꞌ, tsꞌajaꞌan in wor in wacsic tin wor tiꞌ ic Jaj Tsꞌurirex Jesucristo. Rajen in wer tu cotor yoꞌoch a tiꞌ yʌn mʌꞌ cꞌas quir a jantiquex, baxuc caj u yesaten Cristo. Chen wa mac cu tucric: “Aroꞌ cꞌas quir in jantic”, quireꞌ mʌꞌ tsoy tu tꞌʌn, mʌꞌ ju yʌn jantej quireꞌ cu tucric cꞌas quir u jantic.
\v 15 Wa yʌn a wet acsaꞌorirex caj choquij yor, quireꞌ caj u yiraj tech caj a jantaj a baꞌ caj u tucraj mʌꞌ tsoy u jantic. A techoꞌ, mʌꞌ ja yajquint a wet acsaꞌorir, quireꞌ caj a jantaj a baꞌ mʌꞌ tsoy tu tꞌʌn a wet acsaꞌorir. Mʌꞌ ja jantic a baꞌ cu sʌjtic a wet acsaꞌorir. Mʌꞌ ja wirej, Cristo caj quimij tiꞌ a ray a wet acsaꞌorirex. 
\v 16 Cax ca tucric, tsoy caj a betaj, chen jach manan tsoy mʌꞌ ja betic aroꞌ, wa mac cu bin u tucric cꞌas tech. Tsireꞌej wa baꞌ cꞌas cu yaꞌaric tech.
\v 17 Mʌꞌ ja wirej, a toꞌonex a quic tsꞌurintiquex Cꞌuj, rajen mʌꞌ ic yʌn tucriquex a baꞌ quic bin ic jantex, baxuc a baꞌ quic bin ij cuqꞌuex. Jach manan tsoy caꞌ manacoꞌonex tu tsoyir, soc mʌꞌ ic tsꞌictarex. Caꞌ quiꞌac ij corex, quireꞌ acaꞌan toꞌonex u Tajꞌor u Pixam Cꞌuj. 
\v 18 Wa tsꞌajaꞌan ij corex ij quibex Cristo, jeroj quic bin ij quiꞌquintiquex u yor Cꞌuj, a baxucoꞌ, mʌnaꞌ mac cu tucricob cꞌas toꞌonex.
\p
\v 19 Rajen, caꞌ manʌcoꞌonex ij quirex a baꞌ cu bin u pꞌeriꞌquintoꞌonex soc u yamticoꞌonex ij quiꞌ acsiquex tij corex tiꞌ Cristo. 
\v 20 Mʌꞌ ja yʌn jantiquex a baꞌ ca pachtiquex ta worex a jantiquex. Rajen cu pꞌʌticob Cꞌuj, a mac a mʌꞌ chichac u yorob tiꞌ u tꞌʌn Cꞌuj. Chen wa jij quet acsaꞌorirex tic pʌyex u siꞌpirob, quireꞌ tu yirob ic jantiquex a baꞌ mʌꞌ tsoy tu tꞌʌn. Tij cacsex ic siꞌpirex xan, cax ij coꞌochex betaꞌb ten Cꞌuj jach tsoy.
\v 21 Jach manan tsoy wa mʌꞌ jic chiꞌex bʌcꞌ, cax wa mʌꞌ jij cuqꞌuex u cꞌab u wich uva, cax wa ju jer ij coꞌochex wa raꞌ cu choquintic u yorob ij quet acsaꞌorirex. Orac etsꞌ rubuc caj nʌctantaꞌb quireꞌ aroꞌ, jaj ix tʌcoj cu pꞌʌticob u tꞌʌn Cꞌuj.
\v 22 Wa jach taj cꞌuchaꞌan a worex a chiꞌiquex tu cotor bʌcꞌ, quireꞌ caj a wacsex ta worex, chen arej tiꞌ Cꞌuj. Jach quiꞌ yor a yacsmʌnob tu yorob, quireꞌ caj u quiꞌ tucrob a baꞌ cu yiricob. Mʌꞌ ja wirej, tu yorob yerob a baꞌ caj u yirob caj u yirob a baꞌ u cꞌat Cꞌuj.
\v 23 Chen yʌn mac a yacsmʌnob tu yorob, mʌꞌ cꞌuchaꞌan yorob u chiꞌob tu cotor bʌcꞌ, cax yacsmʌnob tu yorob. Chen wa cu chiꞌicob jeroj u yacsob u siꞌpirob. Mʌꞌ ja wirej, caj u yubob tu yorob uch mʌꞌ tsoy u chiꞌicob, chen caj u chiꞌob, rajen caj u yacsob u siꞌpirob. Rajen, tu cotor baꞌ a mac a cu yubicob tu yorob, mʌꞌ tsoy u beticob, chen wa cu quibicob caj u betob, jeroj caj u yacsob u siꞌpirob.
\c 15
\s Quiꞌquintej u yorob a racꞌob, mʌꞌ ja wʌcꞌʌs bʌjiriꞌex 
\p
\v 1 Yʌn mac ich toꞌonex a mac a cu quiꞌ najticob u tꞌʌn, a quij cacsex tij corex. Rajen caꞌ ic yamtex a mac a mʌꞌ chichac tu yor tiꞌ u tꞌʌn Cꞌuj. Caꞌ ic betex aroꞌ, mʌꞌ jic manex ic betiquex a baꞌ ic wʌcꞌʌs bʌjiriꞌex ij cꞌatex.
\v 2 Wa tiꞌ yʌn tuririꞌ ij quet acsaꞌorirex a cꞌuchaꞌan ij corex ic yamtiquexiꞌ soc quiꞌ yor yejer a baꞌ tsoy tu tꞌʌn Cꞌuj, caꞌ ic pacran yamtex soc tsꞌaꞌajan yor u yacsic tu yor tiꞌ Cristo.
\v 3 Mʌꞌ ja wirej, caj tarij Cristo uch, mʌꞌ tarij quir u betic a baꞌ u wʌcꞌʌs bʌjiriꞌ u cꞌat. Caj tarij quir u betic a baꞌ u cꞌat u Tet Cꞌuj. Rajen caj mucꞌyajnʌjij uch, quireꞌ a baꞌ tsꞌibaꞌan ich u tꞌʌn Cꞌuj uch. Uꞌyex baꞌ cu yaꞌaric: “A mac a caj pꞌactaj tech uch, Cꞌuj, baxuc caj u pachꞌenob xanoꞌ.” Baxuc caj yaꞌaraj ich u tꞌʌn Cꞌuj uch.
\v 4 Quireꞌ a baꞌ tsꞌibtaꞌb ich u tꞌʌn Cꞌuj uch, caj u tsꞌibtob a mac a tsꞌab u tucur ten Cꞌuj uch quir u tsicbar a baꞌ u cꞌat Cꞌuj quir ij cʌniquex a baꞌ quiriꞌ tsoy. Caj u tsꞌibtob quir u quiꞌtar ij corex. Caj u tsꞌibtob quir u chichquinticob ij corex. Rajen nemʌꞌbicoꞌonex quic pajiquex a baꞌ cu tar tu qꞌuinin.
\p
\v 5 Mʌꞌ ja wirej, a Cꞌujoꞌ, cu bin u tsꞌic techex a muqꞌuex soc nemʌꞌbiquechex. Rajraꞌ cu bin u chichquintic a worex. Caꞌ u yamtechex Cꞌuj quir a quetquintiquex a worex yejer a mac a mʌꞌ chichac u yorob tiꞌ u tꞌʌn Cꞌuj, cax yejer a chichij u yorob tiꞌ u tꞌʌn Cꞌuj. Caꞌ a yajquintex mac an ten bic caj u camsoꞌonex Jesucristo.
\v 6 A tenoꞌ, in jach cꞌat caꞌ u yam techex Cꞌuj soc a cꞌujintiquex Cꞌuj a mac u bʌjiriꞌ u Cꞌuj ic Jaj Tsꞌurirex Jesucristo. Caꞌ a pꞌeriꞌquint a worex tu ca cꞌujintiquex Cꞌuj.
\s U jach tsoyir u tꞌʌn Cꞌuj caj tsecꞌtaꞌb ich mʌꞌ ju winiquirob israel
\p
\v 7 Rajen, an ten bic Cristo caj u cꞌʌmaj jujuturechex, baxuc caꞌ a cꞌʌmex mac tu ca muchꞌquintiquechex quir a wuꞌyiquex u tꞌʌn Cꞌuj. Wa ber cu yiric mac aroꞌ cu surʌcticob Cꞌuj.
\v 8 Uꞌyex baꞌ in cꞌat in waꞌaric techex. Caj tarij Cristo teꞌ ich yocꞌocab quir u yamtic u yet winiquirob israel. Bayiriꞌ xan, tarij soc u nupꞌsic a baꞌ toc araꞌb ten Cꞌuj tiꞌ u winiquirob israel uch. A baywoꞌ toc irir ten mac, a Cꞌujoꞌ, mʌꞌ ju tubur tiꞌ u tꞌʌn a caj u toc araj jeꞌ u betiqueꞌ.
\v 9 Bayiriꞌ xan, tarij Cristo soc a mʌꞌ ju winiquirob israel jeꞌ u yaꞌaricob jach carem Cꞌuj, quireꞌ caj yajquintaꞌbob ten Cꞌuj. Mʌꞌ ja wirej, baxuc caj araꞌb ich u tꞌʌn Cꞌuj uch:
\q Ich ʌcʌtan a mʌꞌ ju winiquirob israel quin bin in waꞌaric tech Cꞌuj: Jach caremech Cꞌuj, quin cꞌʌyiquech quir u quiꞌtar a wor.
\m
\v 10 Baxuc tiꞌ tsꞌibaꞌan ich u tꞌʌn Cꞌuj xan, tan yaꞌaric: 
\q Cax tu cotorex a mʌꞌ ju winiquirechex israel, jeꞌ a waꞌariquex tiꞌ Cꞌuj: Jach caremech Cꞌuj.
\m
\v 11 Bayiriꞌ tiꞌ tsꞌibaꞌan u jer ich u tꞌʌn Cꞌuj:
\q Quiꞌquint a worex a mʌꞌ ju winiquirechex israel yejer a mac Cꞌuj yʌninob tu cu cꞌujincob Cꞌuj.
\m
\v 12 Tiꞌ tsꞌibaꞌan ich u tꞌʌn Cꞌuj a caj u tsꞌibtaj Isaias uch, tan yaꞌaric:
\q Caꞌ bin rochac chan och ten u nʌꞌ. Rajiꞌ u parar Jesse, raꞌ u chꞌic nunquir u winiquirob israel. Caꞌ bin chꞌijic a raꞌ chan ochoꞌ, jeꞌ u tsꞌurintaꞌr ten tu cotor a mʌꞌ ju winiquirob israel. Bayiriꞌ, robob a cu yacsicob tu yorob, rajiꞌ cu bin tacbir ten Cꞌuj.
\m Baxuc araꞌb ich u tꞌʌn Cꞌuj uch.
\p
\v 13 A Cꞌujoꞌ, a cu yamticoꞌonex ic pajiquex Cristo, caꞌ quiꞌquintac a worex ten Cꞌuj. Caꞌ quiꞌac a worex tiꞌ Cꞌuj soc mʌnaꞌ baꞌ ca tucriquex, quireꞌ caj a wacsex ta worex tiꞌ Cꞌuj. Mʌꞌ ja wirej, u Tajꞌor u Pixam Cꞌuj caj u chichquint a muqꞌuex soc a quiꞌ pajiquex Cꞌuj.
\p
\v 14 A tenoꞌ, in jach er, in wet acsaꞌorirex jach tsoyechex, quireꞌ yaꞌab a werex u tajir u tꞌʌn Cꞌuj. Rajen cꞌuchaꞌan a worex a pacran cꞌasiquex tiꞌ a wet acsaꞌorirex tiꞌ u tꞌʌn Cꞌuj.
\v 15 Chen a tenoꞌ, in wet acsaꞌorirex, mʌꞌ jin chꞌaꞌej sajquir quir in cꞌasic techex a baꞌ caj in waꞌaraj techex uch, quireꞌ tsꞌaꞌb in beyaj ten Cꞌuj. Rajen caj in tsꞌibta techex bajeꞌrer.
\v 16 Mʌꞌ ja wirej, a Cꞌujoꞌ, caj u teten quir in beyaj tiꞌ Jesucristo. Quin camsic u jach tsoyir u tꞌʌn Cꞌuj ich a mʌꞌ ju winiquirob israeloꞌ. Baxuc quin beyaj, soc Cꞌuj tsoy yiric a mʌꞌ ju winiquirob israeloꞌ. Rajen cꞌamob ten Cꞌuj soc Cꞌuj yʌninob, quireꞌ tetaꞌb ten u Tajꞌor u Pixam Cꞌuj.
\p
\v 17 Quin waꞌaric: “Bayoꞌ tech, Jesucristo, quireꞌ caj a yamten tin beyaj ich a mʌꞌ ju winiquirob israeloꞌ, quireꞌ yaꞌab yacsmʌnob tu yorob tech.” Rajen, a tenoꞌ tin tꞌʌn, jach tsoy in beyaj tiꞌ Cꞌuj.
\v 18 A tenoꞌ, chen jach chich in wor, in chen aric a baꞌ caj u betaj Jesucristo yejeren, soc u yacsicob tu yorob a mʌꞌ ju winiquirob israeloꞌ. Mʌꞌ ja wirej, robob a mʌꞌ ju winiquirob israeloꞌ, caj u yacsob u yorob caj yubob in tsecꞌtic tiꞌob. Baxuc caj yirob a baꞌ caj in betaj xan.
\v 19 Robob caj yirob a carem beyaj caj in betaj, quireꞌ tsꞌaꞌb in mucꞌ ten u Tajꞌor u Pixam Cꞌuj, rajen caj u jacꞌ u yorob a mac a tu yirob. Caj binen ich tu cotor mac caj in tsecꞌtaj u jach tsoyir u tꞌʌn Cristo. Tar yʌn, caj in tsecꞌtaj ich u cajar Jerusalén hasta cꞌuchen chꞌic nachir uch, ich u ruꞌumin Ilírico.
\v 20 Mʌꞌ ja wirej, jach manan caj in pacht in tsecꞌtic u jach tsoyir u tꞌʌn Cristo tu mʌnaꞌ mac yubmʌnobiꞌ, soc mʌꞌ jin beyaj tu cu beyaj u jer mac.
\v 21 Baxuc caj in betaj quir in nupꞌsic u tꞌʌn Cꞌuj tu caj yaꞌaraj uch:
\q A mac a mʌꞌ yubmʌnob u tꞌʌn a cu yaꞌaricoꞌ, jeꞌ u cꞌuchur a mac a tuchiꞌtaꞌbir ten Cꞌuj. A raꞌ u qꞌuininoꞌ bin u caꞌ u najtob.
\m Baxuc caj yaꞌar u tꞌʌn Cꞌuj uch.
\s Pablo cu tucric u bin ich u cajar Roma
\p
\v 22 Rajen mʌꞌ cꞌuchaꞌan in wor in tar in wirechex cax in jach cꞌat.
\v 23 Chen tin tꞌʌn, jeꞌ in tar tu yʌnechex ich a cajarex Roma, quireꞌ mʌꞌ tu quin beyaj a teraꞌ tu yʌnenaꞌ. Tsꞌoc in tsecꞌtic tiꞌob quireꞌ tin rʌc tsecꞌtaj ich u ruꞌumin teraꞌ. Bayiriꞌ caj in pacht in tar uch tu yʌnechex. 
\v 24 A tenoꞌ, seb in cꞌat in tar in wirechex soc pꞌeriꞌ caꞌ quiꞌac ij corex. Caj tsꞌoc in wiriquechex caj paj a yamtiquenex caꞌ xiquen ich u ruꞌumin España.
\v 25 Chen bajeꞌrer, bin in caꞌ ich u cajar Jerusalén quir in pure tiꞌ ij quet acsaꞌorirex, taqꞌuin soc u jasʌꞌr tiꞌob a mac otsichʌjij.
\v 26 Mʌꞌ ja wirej, tiꞌ yʌn a yacsmʌnob tu yorob ich u ruꞌumin Macedonia yejer u jerob yacsmʌnob tu yorob ich u ruꞌumin Acaya, caj u tucrob uch, tiꞌ u yet acsaꞌorirob a tiꞌ yʌnob ich u cajar Jerusalén. Rajen caj u muchꞌquintob u taqꞌuinob ich u ruꞌumin Acaya, yejer u ruꞌumin Macedonia quir u tsꞌicob tiꞌ a mac otsichʌjij ich u cajar Jerusalén. 
\v 27 Cax robob, mʌꞌ ju winiquirob israel caj u tucrob u yet acsaꞌorirob ich u cajar Jerusalén. Quireꞌ tiꞌ tar caj yubob ich u winiquirob israel u jach tsoyir u tꞌʌn Cꞌuj, a mʌꞌ u winiquirob israel soc cꞌuchaꞌan yorob u yacsicob tu yorob tiꞌ Cristo. Rajen u jach cꞌat u yamticob u yet acsaꞌorirob ich u cajar Jerusalén soc yʌn u taqꞌuinob quir u mʌnicob yoꞌoch quir u janʌnob.
\v 28 Caꞌ bin tsꞌocac in puric u taqꞌuinob tiꞌ a mac otsichʌjij, tu cu muchꞌquinticob u bʌj a yacsmʌnob tu yorob ich u cajar Jerusalén. Tiꞌ tar quin bin cꞌuchur ich u cajar Roma tu yʌnechex quir in wiriquechex. Pachir in bin ich u ruꞌumin España.
\v 29 A tenoꞌ, in wer caꞌ bin manʌquen tu yʌnechex, caꞌ bin cꞌuchuquen, jach manan tsꞌajaꞌan in wor yejer u jach tsoyir u tꞌʌn Jesucristo. Baxuc quin bin in tsicbar techex tiꞌ u tꞌʌn Cꞌuj xan.
\p
\v 30 In wet acsaꞌorirex, a mac a wet manex yejer Jesucristo, caꞌ a pacran yajquintex a bʌjex an ten bic u Tajꞌor u Pixam Cꞌuj cu yamtic techex. Rajen quin chich cꞌatic techex caꞌ a tꞌʌnex Cꞌuj ten. Tsꞌajaꞌan a worex a tꞌʌnex Cꞌuj ten.
\v 31-32 Caꞌ a tꞌʌnex Cꞌuj soc u jach quiꞌtar in wor caꞌ bin cꞌuchuquen tu yʌnechex wa baxuc u cꞌat Cꞌuj, quir a chichquintiquex in wor. Caꞌ a cꞌatex tiꞌ Cꞌuj caꞌ u cʌnant in pach Cꞌuj, tiꞌ a mac a mʌꞌ yacsmʌnob tu yorob tu ruꞌumin Judea. Caꞌ a tꞌʌnex Cꞌuj xan, tiꞌ a mac cʌjaꞌanob ich u cajar Jerusalén, a yacsmʌnob tu yorob, soc jeꞌ u quiꞌ cꞌʌmicob a jeꞌ taqꞌuinaꞌ a quin bin in purob tiꞌob.
\v 33 A tenoꞌ, caj in tꞌʌnaj Cꞌuj techex, soc Cꞌuj a cu tsꞌic toꞌonex quiꞌ ij corex, soc caꞌ u cʌnant a berex xan. 
\c 16
\s Pablo cu tꞌʌnic u yet acsaꞌorirob ich u cajar Roma
\p
\v 1 A tenoꞌ, caj in tuchiꞌtaj techex ij quet acsaꞌorirex u cꞌabaꞌ Febe, xquic. A Febejoꞌ, cu beya yejer a yacsmʌnob tu yorob ich u cajar Cencrea.
\v 2 Quiꞌ acsex Febe an ten bic u yet acsaꞌorirob caꞌ u quiꞌ acsej mac. Mʌꞌ ja wirej, quetechex caj a wacsex ta worex tiꞌ Cristo. Cax a baꞌ u cꞌat Febe, yamtex, quireꞌ Febe caj u yamtaj yaꞌab a yacsmʌnob tu yorob, bayiriꞌ xan, Febe caj u yamten xan.
\p
\v 3 A techexoꞌ, ich u cajar Roma, tꞌʌnex ten Priscila yejer u mam Aquila. Mʌꞌ ja wirej, robob jach tsꞌajaꞌan yorob u beyajob yejeren uch tu quin beyaj tiꞌ ic Jaj Tsꞌurirex uch.
\v 4 Robob orac quinsacob Priscila yejer u mam Aquila uch, soc mʌꞌ ju quinsiquen. Rajen quin waꞌaric tiꞌob: “Bayoꞌ.” Baxuc xan, a mac a mʌꞌ ju winiquirob israel, a yacsmʌnob tu yorob cu yaꞌaricob tiꞌ Priscila yejer Aquila: “Bayo quireꞌ tacaquex Pablo.”
\v 5 Tꞌʌnex tu cotor mac a cu muchꞌquinticob u bʌjob ich yatoch Priscila yejer Aquila quir u yubicob u tꞌʌn Cꞌuj. Tꞌʌnex xan, in wet acsaꞌorir Epeneto, in jach yaj, quireꞌ rajiꞌ pʌyber caj u yʌn acsaj tu yor tiꞌ Cristo ich u ruꞌumin Acaya.
\v 6 Caꞌ a tꞌʌnex María a tsꞌajaꞌan yor u beyaj techex. 
\p
\v 7 Tꞌʌnex ten, in bʌjob Adrónico yejer Junias in wet mʌꞌcaꞌan winiquirob, tuj maquenob tu cu mʌꞌcar winiquirob uch. Robob jach nojob ich a mac a cu tsecꞌticob u tꞌʌn Cristo. Robob caj u batꞌan yacsajob tu yorob tiꞌ Cristo, a tenoꞌ pachir, quij.
\p
\v 8 Tꞌʌnex Amplias, in wet acsaꞌorir, a mac in jach yaj. 
\v 9 Tꞌʌnex tiꞌ ten Urbano ij quet beyajex tiꞌ Cristo. Bayiriꞌ xan, tꞌʌnex Estaquis, a mac in jach yaj.
\v 10 Tꞌʌnex Apeles, rajiꞌ caj u toc yesaj bic tabar taj caj u yacsaj tu yor. Tꞌʌnex ten a mac a cu beyajob ich yatoch Aristóbulo.
\v 11 Tꞌʌnex ten ij quet acsaꞌorirex Herodión, a mac in wet winiquirob judío xan. Tꞌʌnex, tu cotor mac a yacsmʌnob tu yorob tu cu beyajob ich Narciso.
\v 12 Tꞌʌnex ten a caꞌtur xquic. Tuririꞌ u cꞌabaꞌ Trifena yejer u jer xquic u cꞌabaꞌ Trifosa. Robob cu beyajob tiꞌ Jesucristo xan. Tꞌʌnex xan, Pérsida, xquic a mac ic jach yajex a tsꞌajaꞌan yor u beyaj tiꞌ ic Jaj Tsꞌurirex. 
\v 13 Tꞌʌnex ten Rufo, a mac tsꞌajaꞌan yor u yacsic tu yor tiꞌ Cristo. Tꞌʌnex u nʌꞌ Rufo, rajiꞌ irej wa jin nʌꞌ xan. 
\v 14 Tꞌʌnex ten in wet acsaꞌorirob, Asíncrito yejer Flegonte, yejer Hermas, yejer Patrobas, yejer Hermes, yejer u jer ij quet acsaꞌorirob, a mac cʌjaꞌanob yejerob.
\v 15 Tꞌʌnex xan, Filólogo yejer Julia, yejer Nereo, yejer u yitsꞌin Olimpas, yejer tu cotor a mac Cꞌuj yʌninob a cʌjaꞌanob tu yʌnob.
\p
\v 16 Pacran quiꞌ tꞌʌnex a bʌjex, jach manan ca tꞌʌniquex a bʌjex. Tu cotor a yacsmʌnob tu yorob a cu muchquinticob u bʌjob quir u yubicob u tꞌʌn Cꞌuj, cu rʌc tꞌʌniquexob xan.
\p
\v 17 Chen quin chich aric techex, in wet acsaꞌorirex, caꞌ a quiꞌ cʌnantex a bʌjex tiꞌ a cu tsꞌiquintic u yet acsaꞌorirob, soc mʌꞌ pꞌeriꞌ yorob. A baꞌ cu man yirob mʌꞌ quet yejer a baꞌ camsaꞌb techex ich u tꞌʌn Cꞌuj. Rajen tsar a bʌjex tiꞌob.
\v 18 Robob, a mac a cu manob u tsꞌiquinticob u yet acsaꞌorirob, mʌꞌ ju jach cꞌat u beticob a baꞌ u cꞌat ic Jaj Tsꞌurirex Jesucristo. Cu chen beticob a baꞌ u bʌjiriꞌob u cꞌatob. Mʌꞌ ja wirej, a cu manob u tus aricob tiꞌ mac, a mʌꞌ ju ne najticob baꞌ. A baꞌ cu tus tsicbarob irej wa tsoy u tꞌʌn, chen mʌꞌ tajiꞌ.
\v 19 Tu cotor mac yerob tsꞌajaꞌan a worex a quibiquex Cꞌuj, rajen quiꞌ in wor, quireꞌ baxuc ca betiquex. Chen a baꞌ in jach cꞌat in wiriquechex a nojtarex tiꞌ, tu ca manex tu tsoyir, soc mʌꞌ biqꞌuin a manex tu cꞌasir. 
\v 20 Mʌꞌ ja wirej, u bʌjiriꞌ Cꞌuj, a mac cu yamticoꞌonex, soc caꞌ quiꞌac ij corex, soc mʌnaꞌ baꞌ quic tucriquex. Jach tabar u yamticoꞌonex Cꞌuj, caꞌ ic petsꞌ tex a quisinoꞌ, u cꞌabaꞌ Satanás, quireꞌ rajiꞌ, ic Jaj Tsꞌurirex, rajraꞌ cu betic tsoy toꞌonex an ten bic tsoy tu tꞌʌn Cꞌuj. 
\p
\v 21 Ij quet acsaꞌorirex Timoteo, cu yaꞌaric caꞌ in tꞌʌnechex, rajiꞌ in wet beyaj. Bayiriꞌ xan, ij quet acsaꞌorirex Lucio, cu tꞌʌnic techex yejer Jasón yejer Sosípater. Robob in wet winiquirob judío xan.
\p
\v 22 A tenoꞌ, Terciojen, a quin tsꞌibtic a jeꞌ juꞌunaꞌ. A tenoꞌ quin tsꞌibtic u tꞌʌn Pablo a cu yaꞌaric ten. Quin tꞌʌniquechex xan, quireꞌ quin yamtic Pablo u tsꞌibtic tiꞌ ij quet acsaꞌorirob. Quin tꞌʌniquechex, quireꞌ quet ic yajquintiquex ic Jaj Tsꞌurirex.
\p
\v 23 Gayo cu tꞌʌniquechex xan. Rajiꞌ caj u yacsajen tu yatoch, bayiriꞌ xan, caj u chaꞌj u rʌc muchꞌquinticob u bʌjob ij quet acsaꞌorirex tu yatoch soc u yubicob u tꞌʌn Cꞌuj. Erasto, a cu cʌnantic u taqꞌuin tu cajar, rajiꞌ cu tꞌʌniquechex xan. Bayiriꞌ xan, ij quet acsaꞌorirex Cuarto tu tꞌʌniquechex.
\v 24 A tenoꞌ, in jach cꞌat ic Jaj Tsꞌurirex u yamtiquechex an ten bic tsoy tu tꞌʌn Cꞌuj.
\s Pablo cu yaꞌaric jach carem ij Cꞌujex
\p
\v 25-26 Mʌꞌ ja wirej, a Cꞌujoꞌ, cꞌuchaꞌan yor u chichquintic a worex soc tsꞌajaꞌan a worex a wacsiquex ta worex tiꞌ Cristo. Raꞌ u tꞌʌn, caj in tsecꞌtaj uch, soc yerob mac Jesucristo, quireꞌ Cꞌuj caj u yesaj ten u jach tsoyir u tꞌʌn. Mʌꞌ ja wirej, raꞌ u tꞌʌn tu yʌn mucraj tu chꞌic chunin uch, caj betaꞌb yocꞌocab, chen bajeꞌrer quic manex ij carex quireꞌ ij querex a baꞌ cu yaꞌaric Cꞌuj. Raꞌ u tꞌʌn caj u tsꞌibtob a mac a tsꞌaꞌb u tucur ten Cꞌuj soc u tsicbar a baꞌ u cꞌat Cꞌuj uch. Rajen Cꞌuj, a mac munt qꞌuin tiꞌ yʌn, caj yaꞌaraj caꞌ manʌcoꞌonex ic tsecꞌtex u tꞌʌn ich mac tu cotor ich yocꞌocab, soc u yacsicob tu yorob tiꞌ Cristo, soc u quibicob a baꞌ tsecꞌtaꞌb tiꞌob.
\p
\v 27 Chen Cꞌuj yer tu cotor baꞌ. Quireꞌ tij cacsajex tij corex tiꞌ Jesucristo, ic Jaj Tsꞌurirex, caꞌ ij carex tiꞌ: “Jach caremech Cꞌuj munt qꞌuin.” Jeroj, tsꞌoquij.