\id 1CO
\h 1 CORINTIOS
\toc1 1 CORINTIOS
\mt1 A JEꞌ JUꞌUNAꞌ, CAJ U YɅN BATꞌAN TSꞌIBTA PABLO TIꞌ U YET ACSɅꞌORIROB ICH U CAJAR CORINTO
\mt2 1 CORINTIOS
\c 1
\s A Pablojoꞌ caj u tsꞌibtaj a jeꞌ juꞌunaꞌ tiꞌ a yacsmʌnob tu yorob ich u cajar Corinto
\p
\v 1 A tenoꞌ, Pablojen, quireꞌ jach tsoy tu tꞌʌn Cꞌuj caj u pʌyen Cꞌuj soc yʌjtseqꞌuiren u tꞌʌn Jesucristo. A tenoꞌ, Pablojen, baxuc in wet acsaꞌorir Sóstenes quin tꞌʌnicob techex.
\v 2 Quin tsꞌibtic techex a jeꞌ juꞌunaꞌ, a mac a yacsmʌnob tu yorob ich u cajar Corinto, soc a xaquiquex tu ca muchꞌquintiquex a bʌjex. Mʌꞌ ja wirej, Cꞌuj yʌninechex, quireꞌ caj a wacsex ta worex tiꞌ u parar, Jesucristo. A Cꞌujoꞌ, cu pʌyiquechex soc a cꞌujintiquex Cꞌuj. Mʌꞌ chen techex cu pʌyaꞌr ten Cꞌuj quir a cꞌujintiquex Cꞌuj, tan u pʌyic tu cotor mac cax tu cʌjaꞌanob, a mac a yacsmʌnob tu yorob tiꞌ ic Jaj Tsꞌurirex. Mʌꞌ ja wirej, pꞌeriꞌoꞌonex quireꞌ yejeroꞌonex Jesucristo.
\v 3 A tenoꞌ, in jach cꞌat Cꞌuj caꞌ u quiꞌ cʌnantechex, soc mʌnaꞌ baꞌ ca bin a tucrex. Baxuc quin cꞌatic tiꞌ ic Jaj Tsꞌurirex Jesucristo techex xan.
\s Bic tabar caj u yam toꞌonex Jesucristo
\p
\v 4 A tenoꞌ, quin waꞌaric tiꞌ Cꞌuj: “Bayoꞌ, Cꞌuj, quireꞌ caj a wacsaj tiꞌob ta tsoyirob, a mac a yacsmʌnob tu yorob tiꞌ Jesucristo, a robob a tiꞌ yʌnob tu cajarob Corinto.” Rajraꞌ quin waꞌaric tiꞌ Cꞌuj.
\v 5 Mʌꞌ ja wirej, quin waꞌaric: “Bayoꞌ tiꞌ Cꞌuj”, quireꞌ wa ber caj a wacsex ta worex tiꞌ Jesús, caj a cꞌʌmex tu cotor a baꞌ jach tsoy soc cꞌuchaꞌan a worex a quiꞌ tsecꞌtiquex u tꞌʌn Cꞌuj. Bayiriꞌ xan, caj a quiꞌ najtex a baꞌ tiꞌ yʌn ich u jach tajir u tꞌʌn Cꞌuj.
\v 6 Rajen jach chich a worex tiꞌ u tꞌʌn Cꞌuj, quireꞌ caj a cꞌʌmex tu cotor a baꞌ jach tsoyoꞌ, caj a wuꞌyex in tsecꞌtob Cristo tuꞌ yʌnechex.
\v 7 Mʌꞌ ja wirej, ca manex a quiꞌ tsecꞌtiquex u tꞌʌn Cꞌuj. Bayiriꞌ xan, ca quiꞌ najtiquex a baꞌ tiꞌ yʌn ich u tajir u tꞌʌn Cꞌuj, quireꞌ raꞌ tsꞌabij techex ten Cꞌuj. Quireꞌ caj a jach cꞌʌmex u jach tsoyir u tꞌʌn, a caj in tsecꞌtob techex uch. Quireꞌ ca quiꞌ pajiquex u qꞌuinin caꞌ bin uruc ic Jaj Tsꞌurirex Jesucristo. A ray u qꞌuininoꞌ, cu jocꞌar u tajir tu cotor baꞌ.
\v 8 Chen a Cꞌujoꞌ, jeꞌ u chichquintic a worex hasta a ray u qꞌuininoꞌ, caꞌ bin xuruc tꞌʌn soc mʌnaꞌ mac cꞌuchaꞌan yor u pʌqꞌuic a pachex, cax tu qꞌuinin cu yocar Jesucristo juez.
\v 9 Mʌꞌ ja wirej, a Cꞌujoꞌ, rajraꞌ cu betic an ten bic caj u toc araj uch tiꞌ mac. Rajiꞌ caj u pʌyechex raꞌ u qꞌuinin caj a wuꞌyex u tꞌʌn Cꞌuj, soc a wet manex yejer Jesucristo, quireꞌ rajiꞌ u parar, bayiriꞌ xan ic Jaj Tsꞌurirex.
\s Pꞌeriꞌquint a worex
\p
\v 10 A tenoꞌ, Pablojen, quin chich cꞌatic techex in wet acsaꞌorirex, quireꞌ tsꞌaꞌb in beyaj ten ic Jaj Tsꞌurirex Jesucristo. Rajen quin waꞌaric techex caꞌ a pꞌeriquintex a tꞌʌnex tu cotorechex, soc quet a worex, soc pꞌeriꞌ a tucurex xan. Mʌꞌ ja wirej, mʌꞌ tsoy tu tꞌʌn Cꞌuj wa ca pꞌusiquex a bʌjex, caꞌ a chen pꞌeriꞌquintex a bʌjex. 
\v 11 In wet acsaꞌorirex caj in wuꞌyaj yaꞌaraꞌ ten a mac a cʌjaꞌan ich u yatoch Cloé, ca pacran nunquiquex a tꞌʌnex tuꞌ yʌnechex.
\v 12 Uꞌyex baꞌ u cꞌat yaꞌaric aroꞌ. Jujunturechex ca waꞌariquex: “Pablo, rajiꞌ yʌninen quireꞌ tan in cʌnic u tꞌʌn.” U jer, tan yaꞌaric: “A tenoꞌ, Apolos, rajiꞌ yʌninen, quireꞌ tan in cʌnic u tꞌʌn.” U jer, tan yaꞌaric: “A tenoꞌ, Cefas rajiꞌ yʌninen quireꞌ tan in cʌnic u tꞌʌn.” U jer tan yaꞌaric: “A tenoꞌ, Cristo, rajiꞌ yʌninen quireꞌ tan in cʌnic u tꞌʌn.”
\v 13 Barej caj a nunquex a tꞌʌnex irechex wa tan a jʌsiquex jun xotꞌ Cristo techexiꞌ. Mʌꞌ ja wirej, a Cristojoꞌ, rajiꞌ yʌnin tu cotor mac a yacsmʌnob tu yorob. Arex wa Pablo caj sinij ich u cruz quir u boꞌotic u boꞌorir a siꞌpirex? A werex, mʌꞌ tajiꞌ. Arex ten, caj acsaꞌb jaꞌ ta joꞌrex a uchoꞌ, caj acsaꞌb jaꞌ ta joꞌrex soc ten yʌninechex? A werex mʌꞌ tajiꞌ.
\v 14 Quin chen aꞌaric tiꞌ Cꞌuj: “Bayoꞌ Cꞌuj quireꞌ caj in chen acsaj jaꞌ tu joꞌr Crispo yejer Gayo.” Mʌꞌ jin wacsaj jaꞌ tu joꞌr u jer mac ich techex.
\v 15 Rajen, mʌnaꞌ mac cꞌuchaꞌan yor u sosoc aric: “A tenoꞌ, acsaꞌb jaꞌ tin joꞌr ten Pablo soc in cʌnicob u tꞌʌn Pablo.”
\v 16 Jaj bʌcaꞌan, cꞌaj ten, caj in wacsaj jaꞌ tu joꞌrob u bʌjob ich yatoch Estéfanas. Mʌꞌ jin wacsaj jaꞌ tu joꞌr u jer, mʌꞌ jin cꞌʌꞌoman bajeꞌrer. Tin tꞌʌn, mʌnaꞌ u jer.
\v 17 Biquinin chen mʌꞌ yaꞌab caj in wacsaj jaꞌ tu joꞌrob, quireꞌ Cristo caj u chen tuchiꞌten quir in man in tsecꞌt u jach tsoyir u tꞌʌn, mʌꞌ quir in wacsic jaꞌ tu joꞌrob mac, caj u yaꞌaraj. Caꞌ in tsecꞌt u tꞌʌn, mʌꞌ jin nonoj cꞌʌnej u tꞌʌnob a mac a ju neꞌer baꞌ ich yocꞌocab, soc mac cu chen bin u quibicob u nonoj tꞌʌnob, mʌꞌ ju yacsicob tu yorob tiꞌ Jesús, a mac a quimij ich u cruz quir u boꞌotaꞌr u siꞌpirob.
\s Cristo a mac u chichir u mucꞌ Cꞌuj bayiriꞌ u neꞌer Cꞌuj 
\p
\v 18 Mʌꞌ ja wirej, a mac a mʌꞌ ju cꞌʌm u tꞌʌn Cꞌuj, a cu chen pꞌastic tu cu yubic a mac a caj u tsecꞌtaj bic tabar quimij Cristo ich u cruz, a caj u yaꞌaraj, mʌꞌ tajiꞌ, rajiꞌob cu bin erarob ich cꞌacꞌ. Chen toꞌonexoꞌ, a mac a u cꞌʌmʌnob u tꞌʌn Cꞌuj, ij querex a jeꞌ tꞌʌnaꞌ, raꞌ u jach chichir u mucꞌ Cꞌuj quir u taquicoꞌonex. 
\v 19 Rajen caj u tsꞌibtaj uch, a mac a tsꞌab u tucur ten Cꞌuj quir u tsꞌibtic uch, caj u yaꞌaraj:
\q A tenoꞌ, quij Cꞌuj, bin in caꞌ in rucꞌsic u tꞌʌn a mac a ju netus er tu cotor baꞌ. Bayiriꞌ a cu tus aricob cu najticob tu cotor baꞌ. Baxuc caj araꞌb ten Cꞌuj uch. 
\p
\v 20 Rajen, a Cꞌujoꞌ, caj u yesaj toꞌonex jach jot, a baꞌ a cu tus aricob u neꞌer tu cotor baꞌ, cax u neꞌer juꞌunob, cax a netꞌojob tu cu tsicbarob ich u yet tꞌojirob. Mʌꞌ ja wirej, mʌꞌ cꞌuchaꞌan yorob u quetquinticob a baꞌ u neꞌerob mac yejer a baꞌ u neꞌer Cꞌuj.
\v 21 Quireꞌ jach tsoy tu tꞌʌn Cꞌuj, rajen caj u tucraj u taꞌquic a mac a cu yacsicob tu yorob tiꞌ Cristo, caj u cꞌʌnenob a mac a tsꞌaꞌb u tucur ten Cꞌuj soc in tsecꞌticob u tꞌʌn cax caj u pꞌastajob bic tabar u quimij Cristo ich u cruz. Mʌꞌ ja wirej, Cꞌuj caj u tucraj wa mʌꞌ ju chaꞌbar mac u yerob u bʌjiriꞌ Cꞌuj a cu tus aricob u neꞌer tu cotor baꞌ ich yocꞌocab.
\p
\v 22 A ju winiquirob judíojoꞌ, caj u cꞌatob jach carem beyaj an bic cu betic Cꞌuj, soc yerob wa yʌn u mucꞌ Cꞌuj Jesús, soc caꞌ yacsob tu yorob tiꞌ Cristo. Chen u winiquirob griego, caj u cʌxtob bic tabar yerob Cꞌuj an ten bic u cʌnicob u neꞌer baꞌ.
\v 23 Chen a tenoboꞌ, quin man in tsecꞌticob u tꞌʌn Cristo, mʌꞌ jin wesob carem beyaj an bic cu betic Cꞌuj ich u winiquirob judío. Mʌꞌ jin camsob ich u winiquirob griego a raꞌ u neꞌer baꞌ. Quin tsecꞌticob Cristo an bic caj quimij ich u cruz. Rajen u winiquirob judío cu choctar u yorob, bayiriꞌ xan, u winiquirob griego cu yaꞌaricob: “Jot a Cristojoꞌ”, quireꞌ quimij ich u cruz.
\v 24 Chen yʌn u winiquirob judío, yejer u winiquirob griego, a tetaꞌb ten Cꞌuj caj u yacsajob tu yorob. Rajen robob yerob a Cristojoꞌ jach chich u mucꞌ tu quimij ich u cruz. Bayiriꞌ yerob xan, a baꞌ cu tucric Cꞌuj tiꞌ Cristo jach manan tsoy.
\v 25 Mʌꞌ ja wirej, a baꞌ cu yaꞌaricob mac, a tiꞌ yʌn ich yocꞌocab, tiꞌ Cꞌuj: “Jot a Cꞌuj, an ten bic cu yaꞌaric u tacoꞌonexoꞌ.” Chen a Cꞌujoꞌ, jach manan tsoy caj u yiraj aroꞌ. Bayiriꞌ a mac a tiꞌ yʌn ich yocꞌocab cu yaꞌaricob: “Quireꞌ Cristo quimij ich u cruz mʌnaꞌ u mucꞌ.” Barej a Cꞌujoꞌ, jach manan u chichir u mucꞌ caj u yiraj aroꞌ. 
\v 26 Quiꞌ cꞌʌꞌotex bic Cꞌuj caj u tetechex in wet asaꞌorirex. Tu tetaj wa yaꞌab a ju neꞌer baꞌ? Mʌꞌ ju tetaj, quireꞌ baxuc cu teticob mac teraꞌ ich yocꞌocab. A Cꞌujoꞌ, mʌꞌ ju tetaj techex quir u tsꞌurintiquex mac. Mʌꞌ ju tetaj techex Cꞌuj, quireꞌ rochaꞌbechex ten a nʌꞌ ich yatoch rey wa gobernador. Chʌc yʌn ich techex u tajir, chen mʌꞌ yaꞌabiꞌ.
\v 27 U bʌjiriꞌ Cꞌuj caj u tetechex quireꞌ tsoy tu tꞌʌn caj u tetechex. Mʌꞌ ja wirej, a mac teraꞌ ich yocꞌocab cu yaꞌaric techex: “Mʌꞌ ja jach uꞌyex tꞌʌn irej wa mʌnaꞌ a xiquinex.” Chen a Cꞌujoꞌ caj u tetechex soc u suraꞌquinticob a mac a cu tus neꞌer tu cotor baꞌ. Mʌꞌ ja wirej, caj u tetechex Cꞌuj, cax a mac teꞌ yʌn ich yocꞌocabaꞌ, cu yaꞌaricob: “Jot a mac a yacsmʌnob tu yorob.” Caj u tetechex quir u suraꞌquinticob a mac a cu pꞌasticob techex, quireꞌ u bʌjiriꞌ cu tucricob jach chich u mucꞌ.
\v 28 A Cꞌujoꞌ, caj u tetaj mac, cax pꞌastaꞌb ten u racꞌob. Cax cu tucricob a racꞌobex: “Irechex u pꞌupꞌirechex robir”, caj u tetechex Cꞌuj soc u chꞌesic a mac a cu tsicbarob baxuc cu yaꞌaric u pꞌupꞌirechex robir.
\v 29 A baywoꞌ, caj u tetoꞌonex Cꞌuj soc mʌnaꞌ mac cu bin yaꞌaric ʌcʌtan tiꞌ Cꞌuj: “Caj u tetajen Cꞌuj quireꞌ caj u yiraj jach manan tsoyiren.”
\v 30 U bʌjiriꞌ Cꞌuj, caj u pꞌeriꞌquintechex yejer Cristo, quireꞌ caj a wacsajex ta worex. Rajen a wet manex Cristo, rajen quij cariquex: “A Cristojoꞌ, rajiꞌ cu camsicoꞌonex soc ij querex Cꞌuj.” Mʌꞌ ja wirej, quireꞌ caj ij cacsex tij corex tiꞌ Cristo, rajen cu cꞌʌmicoꞌonex Cꞌuj. Quireꞌ caj ij cacsex tij corex tiꞌ Cristo, quic beyajex tiꞌ Cꞌuj. Quireꞌ caj ij cacsex tij corex tiꞌ Cꞌuj, jeroj bin u caꞌ u tacoꞌonex Cꞌuj.
\v 31 Soc u nupꞌur a baꞌ cu yaꞌaric ich u tꞌʌn Cꞌuj, arex tiꞌ a mac yaꞌaric tiꞌ u wʌcꞌʌs bajiriꞌ: “Jach tsoyen a tenoꞌ.” Caꞌ a waꞌarej: “Jach tsoyech a techoꞌ Jaj Tsꞌurir, quireꞌ a baꞌ caj a betaj tech a tenoꞌ.” Baxuc cu yaꞌaric u tꞌʌn Cꞌuj a tsꞌibaꞌan uchoꞌ.
\c 2
\s U tꞌʌn ten Pablo tiꞌ a baꞌ caj u betaj Cristo caj quimij ich cruz
\p
\v 1 Caj taren uch tu yʌnechex, quir in tsecꞌtic techex in wet acsaꞌorirex. Caj in tsecꞌtaj u tajir u tꞌʌn Cꞌuj. Mʌꞌ jin tsecꞌtaj an ten bic mac u jach er u tsecꞌtic, mʌꞌ yejer u tꞌʌn a mac a ju jach neꞌer tsicbar.
\v 2 A tenoꞌ, caj in pꞌisaj in bʌj caꞌ in chen camsechex tiꞌ Cristo, soc a werex biquinin caj quimij ich u cruz. Rajen mʌꞌ taren irej mac a ju neꞌer bareꞌ.
\v 3 Caj in tsecꞌtaj techex, mʌꞌ jach tiꞌ yʌn in wor, quin babacʌncʌr, quireꞌ jach sajquen mʌꞌ ja wacsex ta worex tiꞌ u tꞌʌn Cꞌuj.
\v 4 Barej caj tsicbanʌjen techex u jach tsoyir u tꞌʌn Cꞌuj tuj in tsecꞌtaj techex. Mʌꞌ ja wirej, mʌꞌ jin cꞌʌnaj tꞌʌn iren a mac a caj u neꞌer tꞌʌn. Chen in cꞌʌnaj tꞌʌn a tu tsꞌaja ten u Tajꞌor u Pixam Cꞌuj ten, rajen caj a wacsex ta worex, quireꞌ raꞌ u mucꞌ Cꞌuj.
\v 5 Rajen caj a wacsex ta worex tiꞌ u tꞌʌn Cꞌuj caj a quibex, quireꞌ rajiꞌ u Tajꞌor u Pixam Cꞌuj. Mʌꞌ ja wacsex ta worex quireꞌ u tꞌʌn mac, a ju neꞌer tꞌʌn.
\s Chen u Tajꞌor u Pixam Cꞌuj cu tsꞌic ij querex Cꞌuj
\p
\v 6 Chen a tenoꞌ, wa ber quin tsicbar tiꞌ a mac a chich yor tiꞌ u tꞌʌn Cꞌuj, a ray u qꞌuininoꞌ quin tsicbar raꞌ u jach er tꞌʌnoꞌ. Chen a ray tꞌʌnoꞌ, mʌꞌ raꞌ u tꞌʌnoꞌ a cu tar teꞌ ich yocꞌocab, chen tiꞌ u tar caꞌanan a ray tꞌʌnoꞌ. A ray tꞌʌnoꞌ mʌꞌ u tiꞌ u tar ich u jach tsꞌurir, a cu tsꞌurinticob a mac a tiꞌ ich yʌnob yocꞌocab, quireꞌ jeꞌ u chꞌejar a ray tꞌʌnoꞌ, cax bajeꞌrer tan u chꞌejaꞌriꞌ.
\v 7 A baꞌ quin tsicbarob, raꞌ mʌꞌ quet yejer a baꞌ cu tsicbarob, a mac a tiꞌ yʌn ich yocꞌocab. Mʌꞌ ja wirej, u neꞌer Cꞌuj a quin tsicbarob tiꞌ mac, a raꞌ u mucu neꞌer Cꞌuj, quireꞌ mʌꞌ toy yertob a mac a mʌꞌ yerob Cꞌuj ich yocꞌocab. Quireꞌ a Cꞌujoꞌ, cax mʌꞌ toy betac a jeꞌ ruꞌum uch, tu chꞌic chunin tu cotor baꞌ, Cꞌuj caj u tucraj bic tabar cu bin u yacsicoꞌonex, soc pꞌeriꞌoꞌonex quic bin ic reyintiquex Cꞌuj ich u sasirir Cꞌuj.
\v 8 Mʌꞌ ja wirej, a mac a cu tsꞌurinticob mac ich yocꞌocab, a caj u yaꞌarob caꞌ quinsac Cristo ich u cruz, robob mʌꞌ yerob u neꞌer Cꞌuj quireꞌ wa yerob uch, mʌꞌ biqꞌuin u quinsob Cristo ich u cruz. Quireꞌ ic Jaj Tsꞌurirex jach manan tsoy.
\v 9 A tenoꞌ, quin tsecꞌtic an ten bic caj u tsꞌibtaj a mac tsꞌaꞌb u tucur ten Cꞌuj quir u tsꞌibtic uch. Uꞌyex baꞌ cu yaꞌaric Cꞌuj:
\q U ricꞌsamʌnoꞌonex Cꞌuj bajeꞌrer, tiꞌ mac a cu yajquinticob Cꞌuj. Mʌnaꞌ mac caj u chen uꞌyaj, mʌnaꞌ mac caj u tucraj a baꞌ caj u ricꞌsaj toꞌonex Cꞌuj, quireꞌ jach manan a baꞌ cu tucric mac.
\m
\v 10 Chen a Cꞌujoꞌ, caj u yesaj toꞌonex a cu yajquinticob Cꞌuj, a baꞌ mʌꞌ yerob a cu tsꞌurinticob mac. Mʌꞌ ja wirej, caj u yesaj toꞌonex a neꞌer Cꞌuj. A raꞌ u cꞌat yaꞌaric, caj u yesaj toꞌonex Cristo, a mac tuchiꞌtaꞌb ten Cꞌuj ich yocꞌocab. A toꞌonexoꞌ, mʌꞌ cꞌuchaꞌan ij corex ic najtex aroꞌ, wa mʌꞌ ju yesaj toꞌonex u Tajꞌor u Pixam Cꞌuj. Mʌꞌ ja wirej, a mac a cu yajquintic Cꞌuj, quet yejer a mac a tan u toꞌcar ten Cꞌuj, toc yʌn u Tajꞌor u Pixam Cꞌuj. Rajen rajiꞌ cu yesic tiꞌob a baꞌ u chen er Cꞌuj, cax a baꞌ cu jach tar tam ich u tucur Cꞌuj. Quireꞌ raꞌ u beyaj u Tajꞌor u Pixam Cꞌuj, quireꞌ cu cʌxtic soc yer tu cotor a baꞌ cu tucric Cꞌuj.
\p
\v 11 Mʌꞌ ja wirej, baxuc yejeroꞌonex xan. Mʌnaꞌ mac yer a baꞌ cu tucric mac, chen u bʌjiriꞌ u pixam yer. Mʌꞌ wa baxuc a Cꞌujoꞌ? Mʌnaꞌ mac yer a baꞌ cu tucric Cꞌuj wa mʌꞌ ju Tajꞌor u Pixam Cꞌuj cu yesic toꞌonex. U Tajꞌor u Pixam Cꞌuj, rajiꞌ yer tu cotor baꞌ tiꞌ Cꞌuj.
\v 12 A toꞌonexoꞌ, a mac caj u yacsaj tu yor tiꞌ Cristo, mʌꞌ jic chen tucrex an ten bic tu cotor mac cu tucricob, quireꞌ quic tucriquex an ten bic u Tajꞌor u Pixam Cꞌuj u cꞌat a ray u qꞌuinin caj u tsꞌaja toꞌonex Cꞌuj u Tajꞌor u Pixam Cꞌuj. Rajiꞌ caj u tsꞌaja toꞌonex u Tajꞌor u Pixam Cꞌuj soc ij querex tu cotor u tsoyir a caj u tsꞌaja toꞌonex Cꞌuj.
\v 13 Rajen quij cariquex a baꞌ caj u camsoꞌonex u Tajꞌor u Pixam Cꞌuj toꞌonex. A ray tꞌʌnob, mʌꞌ ju tꞌʌn a camsaꞌb ten xib, a ju neꞌer tꞌʌn ich yocꞌocab. Mʌꞌ ja wirej, quic toc ariquex a baꞌ caj u camsoꞌonex u Tajꞌor u Pixam Cꞌuj toꞌonex, soc ij cariquex tiꞌ a mac a toc yʌn u Tajꞌor u Pixam Cꞌuj.
\p
\v 14 Chen a mac a mʌnaꞌ u Tajꞌor u Pixam Cꞌuj tiꞌ, mʌꞌ cꞌuchaꞌan yor u cꞌʌmic u tajir a baꞌ camsaꞌb ten u Tajꞌor u Pixam Cꞌuj. Mʌꞌ ju bin u jach najtej quireꞌ cu yaꞌaric: “Jach jot, quij, mʌꞌ bʌꞌ wir.” Mʌꞌ ja wirej, wa rajiꞌ mʌnaꞌ u Tajꞌor u Pixam Cꞌuj tiꞌ, mʌꞌ cꞌuchaꞌan yor yiric a baꞌ jach manan coꞌojoꞌ, a cu tsꞌabʌr ten u Tajꞌor u Pixam Cꞌuj tiꞌ mac.
\v 15 A mac a yʌn u Tajꞌor u Pixam Cꞌuj tiꞌ, cꞌuchaꞌan yor u najtic tu cotor a baꞌ tsꞌab ten u Tajꞌor u Pixam Cꞌuj. Chen a mac a mʌnaꞌ u Tajꞌor u Pixam Cꞌuj tiꞌ, mʌꞌ ju najtej a mac a yʌn u Tajꞌor u Pixam Cꞌuj tiꞌ.
\v 16 Mʌꞌ ja wirej, a mac a yʌn u Tajꞌor u Pixam Cꞌuj tiꞌ, cꞌuchaꞌan yor u najtic tu cotor baꞌ, quireꞌ yʌn u tucur Jesucristo tiꞌ. Rajen a mac a mʌnaꞌ u Tajꞌor u Pixam Cꞌuj tiꞌ, mʌꞌ ju najtej a mac a yʌn u Tajꞌor u Pixam Cꞌuj tiꞌ. Uꞌyex, baꞌ cu yaꞌaric a mac a tsꞌab u tucur quir u tsꞌibtic u tꞌʌn Cꞌuj uch. “A mac yer u tucur Cꞌuj? Mʌnaꞌ mac. Jeꞌ wa ju cꞌuchur tu qꞌuinin cu camsic tiꞌ Cꞌuj mac? Mʌnaꞌ mac cu bin u camsej.” Chen a toꞌonexoꞌ, yʌn u tucur Jesucristo. 
\c 3
\s Ij quet beyajex yejer Cꞌuj
\p
\v 1 Rajen in wet acsaꞌorirex, mʌꞌ cꞌuchaꞌan in wor in tꞌʌniquechex an ten bic in tꞌʌnic a mac a toc yʌn u Tajꞌor u Pixam Cꞌuj. Quin chen tꞌʌniquechex an bic mac a cu man ich yocꞌocab cu tꞌʌnic a chichanoꞌ. Mʌꞌ ja wirej, chichanechex tiꞌ u tꞌʌn Cꞌuj.
\v 2 Caj in camsechex u tꞌʌn Cꞌuj uch, raꞌ quir a cꞌʌmiquex Cꞌuj. A tenoꞌ, iren mac a cu tsꞌic u chuch chan och. Biquinin caj in chen camsechex uch baxucoꞌ? Quireꞌ mʌꞌ toy cꞌuchuc a worex tiꞌ u tꞌʌn Cꞌuj a tiꞌ a mac a chichij yor tiꞌ u tꞌʌn Cꞌuj. Quireꞌ irechex chan och a mʌꞌ cꞌuchuc tu qꞌuinin u chiꞌic yoch bʌcꞌ. U berer bʌjeꞌrer, mʌꞌ toy cꞌuchuc tu qꞌuinin in camsiquechex u tꞌʌn Cꞌuj a tiꞌ a mac a chichij tiꞌ u tꞌʌn Cꞌuj.
\v 3 Mʌꞌ ja wirej, caj a manex ich a cꞌasoꞌ irechex a mac a mʌꞌ yerob Cꞌuj, quireꞌ robob cu tsꞌurinticob a cꞌasoꞌ. Wa ber tiꞌ yʌn mac tu yʌnechex caj qꞌuexij yorob. Wa ber tiꞌ yʌn mac tu yʌnechex caj u nuncob u tꞌʌnob, mʌꞌ wa taj quin waꞌaric ca manex ich u cꞌasir an ten bic mac a mʌꞌ yerob Cꞌuj? Rajen quin waꞌaric, mʌꞌ ja manex irechex mac a pay u berob ten u Tajꞌor u Pixam Cꞌuj.
\v 4 Quireꞌ wa ber cu yaꞌaric mac tu yʌnechex: “A tenoꞌ, quij, jach taj rajiꞌ yʌninen Pablo, quireꞌ caj in cʌn u tꞌʌn.” U jer caj u yaꞌaraj: “A tenoꞌ, jach taj raji yʌninen Apolos, quireꞌ caj in cʌn u tꞌʌn.” Mʌꞌ wa jach taj mʌꞌ tan a manex irechex a mac a pay u ber ten u Tajꞌor u Pixam Cꞌuj?
\p
\v 5 Rajen quin bin in waꞌaric techex. Apolos yejerenob xan, a tenoboꞌ u cꞌurewenob Cꞌuj quir in tsecꞌticob u tꞌʌn Cꞌuj techex, soc a wacsiquex ta worex tiꞌ Cristo. Chen u tiririꞌ tiꞌ in beyajob, caj tsꞌaja a tenoboꞌ Cꞌuj a tenoboꞌ.
\v 6 Mʌꞌ ja wirej, a tenoꞌ, caj in tsecꞌ techex u tꞌʌn Cꞌuj caj a wacsex ta worex, rajen caj a yʌnxchun a muchꞌquintajex a bʌjex quir a wuꞌyiquex u tꞌʌn Cꞌuj. Rajen iren yʌjpʌqꞌuiren a narex ich a corex. A Apolosoꞌ, caj tarij tuꞌ yʌnechex soc u camsiquechex u tꞌʌn Cꞌuj soc a quiꞌ acsiquex ta worex tiꞌ Cristo. Rajen a Apolosoꞌ, irej a mac a cu joꞌyaꞌtic u yijir ta corex quir u jocꞌar. Chen a Cꞌujoꞌ, caj u chꞌisaj u pʌcꞌar soc u nunctar.
\v 7 Uꞌyex baꞌ u cꞌat yaꞌaric aroꞌ. A mac a cu pʌqꞌuic u yijir quet yejer a mac a cu joꞌyaꞌtic u yijir cax noj, chen a Cꞌujoꞌ, a cu chꞌisic u yijir, jach manan noj. 
\v 8 A tenoꞌ, pꞌeriꞌ in beyajob yejer Apolos cax u tiririꞌ tiꞌ in beyajob, quireꞌ Apolos, rajiꞌ irej a mac a cu joꞌyaꞌtic u yijir. A tenoꞌ, iren a cu pʌqꞌuic u yijir. Caꞌ bin cꞌuchuc tu qꞌuinin, a Cꞌujoꞌ cu bin u boꞌotic u boꞌorir in cꞌʌbob jujunturenob, an ten bic caj beyajnʌjenob. 
\v 9 Mʌꞌ ja wirej, a tenoboꞌ, quet in beyajob yejer Cꞌuj, Apolos yejeren. A techexoꞌ, irechex in corob tu beyajnʌjenob Apolos yejeren, quireꞌ techex caj a wacsajex ta worex tiꞌ Cristo, bajeꞌrer ca sayirex tu pach jach Cꞌuj.
\p Bayiriꞌ xan, cꞌuchaꞌan ij corex ij cariquex irechex u najirechex Cꞌuj, quireꞌ Cꞌuj cu cꞌʌxic techex irej mac a cu cꞌʌxic u yatoch.
\v 10 Quireꞌ tsoy tu tꞌʌn Cꞌuj, rajen tsꞌaꞌb in beyaj ten Cꞌuj tu quin yʌnxchun in tsecꞌtic u tꞌʌn Cꞌuj caꞌ in muchꞌquint mac quir u yubic u tꞌʌn Cꞌuj. Rajen iren a mac neꞌer u tsꞌʌpquintic tunich quir u cꞌʌxic yatoch. A tenoꞌ, caj in tsꞌʌpquinta tunichir soc u chichtar u yoc yatoch. Mʌꞌ ja wirej, tu quin yʌnxchun in tsecꞌtic tiꞌ mac soc u yacsic tu yor tiꞌ Cristo. Aroꞌ irej tunich tu cu yʌnxchun u tsꞌʌpquintic quir u cꞌʌxic yatoch. Caj tsꞌoc in tsꞌʌpquintic u tunichir, a cu yʌnxchun, jeroj, u jer mac cu bin u cꞌuchur quir u tsꞌʌpquintic u jer tunich. Aroꞌ irej u jer mac cu cꞌuchur ta wicnʌnex, quir u camsiquechex u tꞌʌn Cꞌuj. Chen quin chich aric tiꞌ jujuntur mac: “Quiꞌ irej bic tabar u tsꞌʌpquintic.” Mʌꞌ ja wirej, jujunturoꞌonex, bin in caꞌex ich ʌcʌtan Cꞌuj, rajen quiꞌ irej baꞌ cu camsaꞌ tiꞌ a yacsmʌnob tu yorob.
\v 11 Barej, caj in tsecꞌtaj techex Jesucristo uch, aroꞌ ir a tenoꞌ, quin tsꞌʌpquintic u tunichir soc u chichtar u yoc yatoch. Rajen quij cariquex rajiꞌ Jesucristo caj ij tsꞌʌpquintex, mʌnaꞌ u jer u tsꞌʌpquinir tunich quir u chichtar u yoc yatoch, jaririꞌoꞌ, mʌnaꞌ u jer.
\v 12 Yʌn mac cu bin u pʌqꞌuic baꞌ ich yocꞌor u tunichir quir u chichtar u yoc yatoch. Jaj ix tʌcoj, cu bin u pʌqꞌuic oro, a baꞌ jach coꞌojoꞌ. Wa sʌc taqꞌuin, a baꞌ jach coꞌoj xanoꞌ. Wa cu bin u pʌqꞌuic chan tunich a jach coꞌoj xanoꞌ. Jaj ix tʌcoj, u jer mac cu bin u pʌqꞌuic u jer baꞌ ich yocꞌor u tunichir quir u chichtar u yoc yatoch. Jaj ix tʌcoj, cu bin u pʌqꞌuic cheꞌ, wa suꞌuc cu pʌqꞌuic, wa ju sor cu pʌqꞌuic.
\v 13 Chen a mac a cu pʌqꞌuic baꞌ ich yocꞌor u tunichir quir u chichtar u yoc yatoch, jeꞌ u bin tumtaꞌbir u beyaj. Caꞌ bin cꞌuchuc tu qꞌuinin, cꞌacꞌ cu bin tumtic u beyaj. Cu bin tumtaꞌbir tu qꞌuinin u xur tꞌʌn. A ray u qꞌuininoꞌ, cu bin irbir biquiraꞌ u beyaj mac wa tsoy u beyaj, wa mʌꞌ tsoy u beyaj mac.
\v 14 Wa jix tʌcoj cu chʌc pꞌatar u beyaj, a baꞌ u pʌcꞌaj yocꞌor u tunichir quir u chichtar u yoc, caj tsꞌoc u tumtaꞌb ten cꞌacꞌ, jeroj cu bin quiꞌ acsaꞌbir ten Cꞌuj a mac tsoy u beyaj ich caꞌanan. Cu bin boꞌotbir u boꞌorir u cꞌʌb ten Cꞌuj.
\v 15 Chen a mac a caj u pʌcꞌaj baꞌ ich yocꞌor u tunichir quir u chichtar u yoc yatoch, wa yʌn baꞌ caj u pʌcꞌaj, chen caj toc rʌc erij tuj tumtaꞌb ten Cꞌuj, jeroj, sat u beyaj, cax u bʌjiriꞌ cu bin tacbir ten Cꞌuj quir u cuxtar munt qꞌuin. Aroꞌ ir a mac a tacbir ten mac tu erij yatoch, chen rʌc sat u baꞌtac.
\p
\v 16 A tenoꞌ, in wer a werex wa ju najirechex Cꞌuj quireꞌ tiꞌ acaꞌan techex u Tajꞌor u Pixam Cꞌuj.
\v 17 Wa jix tʌcoj, wa mac cu cꞌasquintic u najir Cꞌuj an ten bic mac cu cꞌʌxic u yatoch yejer rʌb cheꞌ. Bin u caꞌ tsꞌaꞌbir u mucꞌyaj munt qꞌuin caꞌ bin xuruc tꞌʌn. Mʌꞌ ja wirej, a najoꞌ tu ricꞌsa Cꞌuj quir u beyaj Cꞌuj. Yʌn cꞌaj techex a bʌjiriꞌex u najirechex Cꞌuj.
\p
\v 18 A tenoꞌ, quin chich aric techex. Arex tiꞌ mac: “Mʌꞌ ja tus aric a bʌjiriꞌ.” Wa yʌn mac tuꞌ yʌnechex tu ca muchꞌquintiquex a bʌjex quir a wuꞌyiquex u tꞌʌn Cꞌuj wa cꞌuchaꞌan yor u tetic quir u sayir tu pach a mac a camsic u tꞌʌn Cꞌuj, quireꞌ jach tꞌoj tiꞌ a baꞌ yʌn ich yocꞌocab. Arex tiꞌ wa ju cꞌat u waysic u bʌj jach tꞌojir, caꞌ yacsej tu yor. Chen a ray u qꞌuininoꞌ, a mac a mʌꞌ yer Cꞌuj bin u caꞌ yaꞌarej tiꞌ: “Jot a techoꞌ.” 
\v 19 Rajen ʌcʌtan tu wich Cꞌuj a baꞌ cu cay aricob a mac a tiꞌ yʌn ich yocꞌocab: “In neꞌer baꞌ.” A Cꞌujoꞌ, cu yaꞌaric: “Jot aroꞌ”, quij. Mʌꞌ ja wirej, tiꞌ tsꞌibaꞌan ich u tꞌʌn Cꞌuj ten a mac tsꞌaꞌb u tucur ten Cꞌuj quir u tsꞌibtic. Rajiꞌ caj yaꞌaraj: “A Cꞌujoꞌ, mʌꞌ ju chaꞌbʌr a mac a tiꞌ yʌn ich yocꞌocab, a cu yaꞌaric u neꞌer baꞌ caꞌ u pʌyej u ber u bʌjiriꞌeꞌ. A Cꞌujoꞌ, cu macʌr u berob.”
\v 20 Tiꞌ toy yʌn u jer tu tsꞌibaꞌan u tꞌʌn Cꞌuj tu cu yaꞌaric: “A Cꞌujoꞌ, yer a baꞌ cu tucric, a mac a ju neꞌer baꞌ rajen rajiꞌ yer jach jot u tucurob.”
\v 21 Rajen mʌꞌ tsoy a wuꞌyiquex ta worex ir wa jach caremechex quireꞌ a neꞌerex baꞌ. Baxuc mʌꞌ tsoy a wuꞌyiquex ta worex wa jach caremechex quireꞌ caj sayechex tu pach a mac a cu camsiquex u tꞌʌn Cꞌuj.
\v 22 Mʌꞌ ja wirej, a Cꞌujoꞌ, caj u chuc u tsꞌa techex tu cotor baꞌ a cꞌatiquex. Mʌnaꞌ wa tu tuchiꞌta techex Pablo yejer Pedro yejer Apolos soc u yamtiquechex? Jeroj, Cꞌuj caj u tsꞌaja techex a yocꞌocaboꞌ quir a cʌjtarex. Jeroj, Cꞌuj caj u tsꞌaja techex quir a cuxtarex, baxuc caj u tsꞌaja techex a quiminex soc u yamtiquechex. Jeroj, Cꞌuj caj u tsꞌaja techex tu cotor baꞌ a tiꞌ yʌn bajeꞌreraꞌ, baxuc Cꞌuj caj u tsꞌaja techex tu cotor baꞌ, a cu bin taroꞌ caꞌ bin cꞌuchuc tu qꞌuinin. A techexoꞌ, techex yʌnin tu cotor baꞌ.
\v 23 Biquinin a techexoꞌ, techex yʌnin tu cotor baꞌ, quireꞌ rajiꞌ yʌninechex Cristo. Bayiriꞌ xan, a Cristojoꞌ, rajiꞌ yʌnin Cꞌuj.
\c 4
\s Rajiꞌ u beyaj a mac tetaꞌb ten Cristo uch quir u tsecꞌtaꞌr u tꞌʌn
\p
\v 1 Quireꞌ jach taj a baꞌ caj in waꞌaraj techex, rajen caꞌ a wirenobex an ten bic u cꞌurewenob Cristo. Mʌꞌ ja wirej, Cꞌuj caj u tetenob caꞌ in tsecꞌtob a baꞌ u cꞌat Cꞌuj, soc u yerob a mac a tiꞌ yʌnob ich yococaboꞌ. Rajen caj in tsecꞌtajobiꞌ, rajen u caꞌ tsꞌurirenob tiꞌ ic Jaj Tsꞌurirex.
\v 2 A techexoꞌ, a werex a baꞌ jach manan noj tiꞌ u caꞌ tsꞌurir mac. Raꞌ u caꞌ tsꞌurir mac caꞌ u toc betej tu cotor a baꞌ chen cꞌataꞌb tiꞌ ten u jach tsꞌurir.
\v 3 A tenoꞌ, mʌꞌ jin bin in waꞌarej wa caj in toc rʌc betaj tu cotor a baꞌ tu chen cꞌata ten in Jaj Tsꞌurir a tenoꞌ. U bʌjiriꞌ in Jaj Tsꞌurir jeꞌ u cʌxtic u yirej wa caj in toc rʌc betaj a baꞌ tu chen cꞌata a tenoꞌ. A tenoꞌ, quin chen nunquic tiꞌ Cꞌuj, mʌꞌ techex jin nunquej, mʌꞌ tiꞌ u jer maquiꞌ. Rajen mʌꞌ cꞌuchaꞌan in wor in waꞌaric wa caj in toc rʌc quibaj.
\v 4 Cax tin tꞌʌn a tenoꞌ, mʌnaꞌ baꞌ quin tucric quireꞌ mʌꞌ jin wuꞌyaj tin wor wa yʌn baꞌ caj in tucraj uch. Mʌꞌ ja wirej, u bʌjiriꞌ ic Jaj Tsꞌurirex cu bin u cʌxtej yirej soc rajiꞌ cu bin yaꞌaric wa mʌꞌ jin toc rʌc betaj tu cotor a baꞌ caj u cꞌata ten uch.
\v 5 Rajen quin chich aric techex, mʌꞌ ja yʌn taquiquex u joꞌr mac wa oc tu cꞌasir a mac a cu beyaj tiꞌ Cꞌuj, wa mʌꞌ oc tu cꞌasir. Quireꞌ mʌꞌ cꞌuchij tu qꞌuinin a pꞌisaꞌan ten Cꞌuj. Yʌn pajex u qꞌuinin caꞌ bin uruc ic Jaj Tsꞌurirex quireꞌ rajiꞌ juez. Jeroj, jeꞌ u jocꞌar u tajir tu cotor baꞌ. A ray u qꞌuininoꞌ, ic Jaj Tsꞌurirex tiꞌ cu bin u jocꞌsaꞌbir tu sasirir a baꞌ caj u mucu betob mac uch. Jeꞌ u bin esbir biqꞌuinin caj u betob baꞌ uch. Caꞌ bin tsꞌocac u yiric u tajir tu cotor baꞌ, jeroj Cꞌuj cu bin yaꞌaric: “Jach tsoyech, quireꞌ a baꞌ ta betex tsoy.”
\p
\v 6 A tenoꞌ, barej caj in waꞌaraj techex aroꞌ in wet acsaꞌorirex, caj in chen cꞌʌnaj Apolos yejer in bʌjiriꞌ quir in camsic techex baꞌ. A tenoꞌ, quin tsicbar tiꞌ u jer mac a tiꞌ yʌn tu yʌnechex xan. Rajen mʌꞌ ja chen tucriquex quin chen tsicbar yejeren Apolos. Mʌꞌ ja wirej, a baxucoꞌ ca bin a cʌniquenobex, quireꞌ ta wirenobex in beyajob. Rajen caꞌ cuxracoꞌonex an ten bic cu yaꞌaric u tꞌʌn Cꞌuj. Mʌꞌ ja wirej, in wet acsaꞌorirex, mʌꞌ tsoy wa ca waꞌariquex: “A tenoꞌ, rajiꞌ yʌninen mac quireꞌ tan in cʌnic u tꞌʌn.” Pachir ca pꞌastic u jer, a cu camsic u tꞌʌn Cꞌuj.
\v 7 Arex ten mac caj u yaꞌaraj techex tsoy ca waꞌariquex: “A tenoꞌ rajiꞌ yʌninen mac quireꞌ tan in cʌnic u tꞌʌn?” A techexoꞌ, ca tucriquex jach manan tsoyechex rajen? Mʌꞌ wa Cꞌuj caj u tsꞌaja techex tu cotor a baꞌ yʌn techex? Bic tabar ca tucriquex jach tsoyechex an ten bic a bʌjiriꞌex toc yʌn techex tu cotor baꞌ?
\p
\v 8 Ca tus tucriquechex toc yʌn techex u tꞌʌn Cꞌuj, irechex mac a jach nachʌji tu cu janʌn. Mʌꞌ baꞌwir u jer yoꞌoch. A techexoꞌ, caj a tus tucrex xan, jach quiꞌ a worex mʌnaꞌ baꞌ ca tucriquex, rajen mʌnaꞌ a cꞌatex. A techexoꞌ, irechex a mac a toc oc u reyintob Cꞌuj. Chen caj oquechex a reyintiquex Cꞌuj, irechex mac a mʌꞌ jin yamtob a Apolosoꞌ, yejerenob. An bic in jach cꞌat in wiriquechex a reyintiquex Cꞌuj u jach tajir soc quet tiꞌ yʌnoꞌonex tu quic bin ic reyintex Cꞌuj.
\v 9 Yʌn tentenin in soꞌsoc tucric Cꞌuj caj u tetaj a tenoboꞌ yʌjtseqꞌuirenob soc jach pachir in cꞌuchurob a tenoboꞌ a tu yʌn tuchiꞌtenob Cristo caꞌ xiquenob in tsecꞌtajob u tꞌʌn, soc pʌyber cu cꞌuchurob a tu tsecꞌtob u tꞌʌn Cꞌuj uch. Tin tꞌʌn, Cꞌuj caj u tetenob soc jach pachirenoboꞌ, irenob mac a cu bin quinsbir ten u tsꞌurir u cajar soc yirir ten u winiquirob bic tabar in quinsaꞌrob. Soc yirir ten yʌjmasirob u tꞌʌn Cꞌuj xan, soc yirir ten tu cotor mac ich yocꞌocab a cu yaꞌaricob a tenoboꞌ: “Jach jot.”
\v 10 Uꞌyex biquinin caj in waꞌaraj techex aroꞌ. Quireꞌ quin manob in tsecꞌtob u tꞌʌn Cristo tuꞌ yʌn a mʌꞌ yerob Cꞌuj, robob cu yaꞌaricob: “Jach jot a mac a yʌn tuchiꞌtaꞌb ten Cristo quir u tsecꞌticob u tꞌʌn.” Chen a techexoꞌ, ca cay ariquex a bʌjiriꞌex: “Jach tꞌojenob tiꞌ u tꞌʌn Cꞌuj.” Chen robob u caꞌ aricob a tenob: “Jach otsichʌjob.” Baxuc cu yaꞌaricob a tenoboꞌ, a mac a mʌꞌ yerob Cꞌuj. Chen a techexoꞌ, ca cay ariquex a bʌjiriꞌex: “In jach neꞌer baꞌ tiꞌ u tꞌʌn Cꞌuj.” A mac a mʌꞌ yerob Cꞌuj cu pꞌactiquenob a tenoboꞌ, chen a techexoꞌ, cu jach suractiquechexob. 
\v 11 A tenob, u berer bajeꞌrer, quin mucꞌyajob quireꞌ wiꞌijenob. U berer bajeꞌrer, quin mucꞌyajob quireꞌ ucꞌchʌjenob. U berer bajeꞌrer, quin mucꞌyajob quireꞌ rab in nocꞌob yejer in pechꞌ xʌnabob. U berer bajeꞌrer quin mucꞌyajob tu cu tacꞌjʌtsꞌtiquenob. U berer bajeꞌrer quin mucꞌyajob quireꞌ mʌnaꞌ in wayob tu quin wenenob.
\v 12 Quin jach beyajob yejer in cꞌʌbob soc in mʌnicob in woꞌochob. Tuꞌ quin man in tsecꞌtob u tꞌʌn Cꞌuj, wa cu cʌrʌxtꞌʌntiquenob, quin wac u yamtaꞌrob ten Cꞌuj. Barej ber caj chucob in pachob, jeroj, quin mucꞌticob. 
\v 13 Bayiriꞌ xan, barej ber cu yaꞌaric baꞌ a tenob a mac a mʌꞌ ju yerob Cꞌuj, chanber quin tꞌʌnicob a tiꞌoboꞌ caj in waꞌarob tiꞌ mac, mʌꞌ ju yʌn manob tu cꞌasir. A cu yiriquenob a tenoboꞌ, irenob a mac a jach cꞌas, a cu puricob ich cꞌacꞌnab u winiquirob griego soc u tus jawsicob u yajirob. Baxuc cu tus tucricob a tenoboꞌ. 
\p
\v 14 A jeraꞌ a quin tsꞌibtic techex, mʌꞌ quir in pʌyic a suraquirex, chen quir in chich aric techex an ten bic u tet cu tꞌʌnic u parar u jach yaj. Mʌꞌ ja wirej, a techexoꞌ, in pararechex in jach yajechex.
\v 15 Wa jix tʌcoj, yʌn techex jach pim mac quir u camsiquechex tiꞌ u tꞌʌn Cristo, mʌꞌ ju bin pimtar a tetex, quireꞌ a tenoꞌ, a jach tetenex quireꞌ tin pararin techex tu tin tsecꞌta techex u jach tsoyir u tꞌʌn Cꞌuj.
\v 16 Rajen, quin chich aric techex quetquintej a worex soc pꞌeriꞌ ij corex yejeroꞌonex.
\p
\v 17 Quireꞌ in cꞌat in wiriquechex ic pꞌeriꞌquintic ij corex yejeroꞌonex, rajen caj in tuchiꞌtechex Timoteo, a mac in jach yaj, ir wa jin jach parar xan, quireꞌ caj in tsicbʌtaj tiꞌ ic Jaj Tsꞌurirex. Rajiꞌ cu betic a baꞌ toc araꞌb tiꞌ. A Timoteojoꞌ, jeꞌ u cꞌasic techex bic tabar caj manen tu tsoyir, caj in wacsaj tin wor uch tiꞌ Cristo, an ten bic caj in camsaj ich tu cotor mac a tu cu muchꞌquinticob u bʌjob quir u yubicob u tꞌʌn Cꞌuj.
\v 18 Tiꞌ yʌn mac tuꞌ yʌnechex a mac mʌꞌ wa yerob quin tar in wirechex, rajen robob caj u yubob chich yorob, quireꞌ cu tus tucricob tu yorob ire wa jach manan tsoyob. 
\v 19 Wa ju cꞌat ic Jaj Tsꞌurirex caꞌ tac in wirechex, jeroj seb quin bin cꞌuchur tu yʌnechex. A ray u qꞌuininoꞌ, jeꞌ in tumtic in wirej a baꞌ cꞌuchaꞌan yorob u beticob a ray winiquiroboꞌ, a cu yubicob tu yorob jach manan tsoyirob, mʌꞌ chen a baꞌ cu yaꞌaricoboꞌ.
\v 20 Mʌꞌ ja wirej, a mac a cu bin ocar tu cu bin u reyinticob Cꞌuj, caꞌ manac tu tsoyir, soc mʌꞌ ju chen tꞌʌnob.
\v 21 Arex baꞌ a cꞌatex ten. A cꞌatex wa rajraꞌ a betex a baꞌ ca betiquex bajeꞌrer soc in tsꞌic a mucꞌyajex caꞌ bin cꞌuchuquen. Wa ja cꞌatex a betex a baꞌ tsoy soc in quiꞌ tsicbar techex wa ber caꞌ bin cꞌuchuquen. 
\c 5
\s Biquinin caj u jocꞌsob u bʌj tu cu muchꞌquinticob u bʌjob tu cu yubicob u tꞌʌn Cꞌuj
\p
\v 1 Tin wuꞌy u juminticob mac, a tan yaꞌaricob: “Yʌn mac tuꞌ yʌn a yacsmʌnob tu yorob ich u cajar Corinto, cu man yire xquic, a mac u chꞌamʌn u tet uch”, quij. A baꞌ cu man u jumintob mac mʌnaꞌ ich winiquir a mʌꞌ yerob Cꞌujoꞌ. Mʌꞌ ja wirej, robob mʌꞌ ju raqꞌuintej xquic, a ju chꞌamʌn u tet uch.
\v 2 A techexoꞌ, a ca wuꞌyiquex ta worex jach manan tsoyirechex, arex ten biquinin mʌꞌ ja wacꞌt a bʌjex, quireꞌ a baꞌ u ber tiꞌ a wet acsaꞌorirex? Toc jocꞌsex tu ca muchꞌquintiquex a bʌjex tu ca wuꞌyiquex u tꞌʌn Cꞌuj a ray xiboꞌ, quireꞌ a baꞌ caj u betaj!
\v 3 Toc jocꞌsex cax mʌꞌ tiꞌ yʌnen quir in jocꞌsic, quireꞌ nach yʌnen. Toc jocꞌsex tiꞌ, irej wa jin bʌjiriꞌ tiꞌ yʌnen ta wicnʌnex. Mʌꞌ ja wirej, tsꞌoc in toc taꞌquicob u joꞌr techex a tiꞌoꞌ, rajen caꞌ jocꞌac.
\v 4 Caj in toc tac u joꞌr quireꞌ tsꞌaꞌb in beyaj ten Ic Jaj Tsꞌurirex. Rajiꞌ caj u yaꞌaraj tsoy in taꞌquic u joꞌr a mac a cu man tu cꞌasir. Rajen caj in toc taꞌcaj u joꞌr a ray xiboꞌ quireꞌ a baꞌ caj u betaj uch. Rajen caꞌ a muchꞌquint a bʌjex tu ca wuꞌyiquex u tꞌʌn Cꞌuj irej wa tiꞌ yʌnen ten ta wicnʌnex. U mucꞌ ic Jaj Tsurirex cu bin u yamtiquechex, cax mʌꞌ tiꞌ yʌnen ta wicnʌnex. 
\v 5 A ray xiboꞌ, caꞌ a jocꞌsex tu ca muchꞌquintic a bʌjex quir a wuꞌyiquex u tꞌʌn Cꞌuj, caꞌ a cꞌubex tiꞌ quisin soc rajiꞌ cu bin tsꞌic u mucꞌyaj. Jaj ix tʌcoj, caꞌ bin tsꞌocac u tsꞌic u mucꞌyaj jeꞌ u toꞌcar u pixam ten Cꞌuj caꞌ bin uruc ic Jaj Tsꞌurirex Jesucristo.
\p
\v 6 Rajen quin waꞌaricob techex. Mʌꞌ ja yʌn uꞌyiquex ta worex jach tsoyechex, quireꞌ a baꞌ u ber tuꞌ yʌnechex bajeꞌrer. A jach erex: “A chichin a pʌj sʌcʌnoꞌ, cu rʌc pʌjquintic tu cotor a sʌcʌnoꞌ.” Mʌꞌ ja wirej, tsoy a wiriquex a ray xiboꞌ a cu manoꞌ, rajiꞌ cu bin yacs a siꞌpirex.
\v 7 Rajen a bʌjiriꞌex caꞌ a rucꞌsex a baꞌ cꞌasir a cʌnmʌnex uch, a raꞌ u quininoꞌ mʌꞌ ja werex Cꞌuj. Caꞌ a rucꞌsex aroꞌ, irej u winiquirob judío a cu macanticob yoꞌoch a tabar u qꞌuinin pascua. Mʌꞌ ja wirej, cu man u cʌxtob quir u rucꞌsicob tu yatochob a pʌj sʌcʌnoꞌ, soc mʌꞌ ju pacꞌʌr ich yoꞌoch. Rajen rucꞌsex a ray xiboꞌ soc mʌꞌ ju pacꞌʌr techex. Quireꞌ yʌn cꞌaj techex, caj quinsaꞌb Jesús ir u chan ar a tʌmʌn yucoꞌ. Caj quinsaꞌb a tʌmʌn yucoꞌ quir u banic u joꞌr yatoch yejer u qꞌuiqꞌuer tʌmʌn yuc soc mʌꞌ ju quimin mac a tiꞌ yʌn ich yatochoꞌ. Caj quinsaꞌb Jesús toꞌonex quir u rucꞌsic ic siꞌpirex. 
\v 8 Quireꞌ Cristo caj u cꞌub u bʌj soc u quinsaꞌ, u boꞌorir ic siꞌpirex rajen rajraꞌ caꞌ manacoꞌonex tu tsoyir, caꞌ ic pꞌʌtex ic manex a tu cotor a cꞌasoꞌ an ten bic u winiquirob judío caj u rʌc rucꞌsob a pʌj sʌcʌnoꞌ, soc mʌꞌ ju pacꞌʌr. Caꞌ ic pꞌʌtex ic tucriquex baꞌ, caꞌ ic tucrex a tsoyoꞌ. Caꞌ ic pꞌʌtex a cꞌasoꞌ soc taj ic manex tu tsoyir.
\p
\v 9 Caj in tsꞌibtaj juꞌun techex uch, caj in waꞌaraj techex: “Mʌꞌ ja rajraꞌ manex yejer xib a mac a nanij u man yejer xquic.”
\v 10 Caj in waꞌaraj techex uch aroꞌ, mʌꞌ jin cꞌat a tus tucriquex caꞌ a rʌc juts a bʌjex tu cotor mac a tiꞌ yʌnob ich yocꞌocaboꞌ, a mac u nonoj bʌjiriꞌob cu tucricob, wa tiꞌ a mac a cu yaꞌcric baꞌ, wa tiꞌ mac a cu manob, wa tiꞌ mac a cu tus cꞌujinticob tus cꞌuj. Mʌꞌ ja wirej, wa ja toc quibiquex a caj in waꞌaraj techex, jeroj, chen yejer a wet acsaꞌorirex ca tsicbarex yejer.
\v 11 Chen ich a jeꞌ juꞌunaꞌ, caj in waꞌaraj mʌꞌ ja yʌn tꞌʌniquex a mac a caj u tus araj yacsic tu yor wa taj cu man, wa ju nonoj bʌjiriꞌ cu chen tucric. Wa cu tus cꞌujintic tus cꞌuj, wa cu pʌqꞌuic u pach mac, wa nanij cu carchʌjʌr, wa cu yaꞌcric baꞌ. Wa baxucoꞌ, mʌꞌ ja wacsiquex ta watochex.
\v 12-13 Mʌꞌ ja wirej, mʌꞌ raꞌ in beyaj a tenoꞌ, quir in taꞌquic u joꞌrob a mac a mʌꞌ yerob Cꞌuj. A Cꞌujoꞌ, bin u caꞌ taꞌcbir u joꞌrob a tiꞌoboꞌ. Quireꞌ raꞌ a beyajex quir a wiriquex a wet acsaꞌorirex quireꞌ cu manob tu cꞌasir. Caꞌ a rucꞌsex a mac a cu manob tu cꞌasir. Baxuc tiꞌ tsꞌibaꞌan ich u tꞌʌn Cꞌuj.
\c 6
\s A mac a yacsmʌnob tu yorob cu nunquicob u tꞌʌnob ich ʌcʌtan juez
\p
\v 1 Wa jix tʌcoj, tiꞌ yʌn mac tuꞌ yʌnechex, a yʌn baꞌ choquintaꞌb yor ten yet acsaꞌorirob. Yʌn arex tiꞌ, mʌꞌ ju yʌn yʌn bin ich ʌcʌtan u tsꞌurir u cajar quir u taꞌquic u joꞌr yet acsaꞌorir. Arex tiꞌ, caꞌ xicob ʌcʌtan ich u tsꞌurirob u yet acsaꞌorirob.
\v 2 Biquinin mʌꞌ wa ja werex caꞌ bin cꞌuchuc tu qꞌuinin u xur tꞌʌn, a techexoꞌ, ca bin ocarex reyir yejer Cꞌuj ich yocꞌocab. Wa ca bin ocarex reyir yejer Cꞌuj ich yocꞌocab, jeroj, cꞌuchaꞌan a worex a cʌxtiquex a wirex baꞌ cꞌasir yʌn tiꞌ mac tuꞌ yʌnechex cax chichin.
\v 3 Biquinin mʌꞌ wa ja werex quet reyoꞌonex yejer Cristo, rajen rajiꞌ quic bin ic tsꞌurintex a yʌjmasirob u tꞌʌn Cꞌuj. Rajen cꞌuchaꞌan a worex a sisquintiquex u yor a mac a choquintaꞌb yor yet acsaꞌorirob tuꞌ yʌnechex quireꞌ mʌꞌ jar a sisquintic yor aroꞌ.
\v 4 Wa jix tʌcoj cꞌuchur tu qꞌuinin bin a caꞌ a sisquintej yor mac a choquij yor ich yococab tuꞌ yʌnechex. A tenoꞌ, tin tꞌʌn, mʌꞌ ja bin a yacsiquex a wet acsaꞌorirex ich ʌcʌtan a mac a mʌꞌ yerob Cꞌuj, quireꞌ mʌꞌ pꞌeriꞌ yorob yejeroꞌonexeꞌ.
\v 5 Caj in waꞌaraj techex aroꞌ soc a pʌyiquex a suꞌtarex, a techexoꞌ, a ca wuꞌyiquex ta worex jach tsoyechex. Arex ten wa mʌnaꞌ mac tiꞌ yʌn tuꞌ yʌnechex tu ca muchꞌquintiquex soc a wuꞌyiquex u tꞌʌn Cꞌuj, a cꞌuchaꞌan yor u najtej bic tabar u sisquintic u yor u yet acsaꞌorir?
\v 6 Chen biquinin cu chen bin mac a yacsmʌnob tu yor tiꞌ Cristo ich ʌcʌtan u jach tsꞌurir u cajar quir u taꞌquic u joꞌrob u yet acsaꞌorirob? Mʌꞌ ja wirej, mʌꞌ tsoy tiꞌ a mac a mʌꞌ yacsmʌnob tu yorob tiꞌ Cristo u sisquintic yorob a pacran yet acsaꞌorirob.
\p
\v 7 Rajen, toc ocar yajaw siꞌpirex tuꞌ yʌnechexex raꞌ u qꞌuinin a bʌjiriꞌex caj a pacran tac a joꞌrex ich ʌcʌtan u jach tsꞌurir a cajarex, a mʌꞌ yerob Cꞌujoꞌ. Mʌꞌ wa jach tsoy, caꞌ a mucꞌtex a baꞌ a ber techex? Mʌꞌ wa jach manan tsoy caꞌ a mucꞌtex wa ber cu tsꞌʌricob a pachex quir u chꞌicob a baꞌ yʌn techex?
\v 8 Chen a techexoꞌ, caj a waꞌarex: “In wacsmʌnob tin worob”, a bʌjiriꞌex, ca betiquex a ray cꞌasoꞌ. Bayiriꞌ irej wa ca tus aꞌcriquex u baꞌtac a wet acsaꞌorirex quireꞌ mʌꞌ ja sutexiꞌ.
\p
\v 9 A tenoꞌ, mʌꞌ cꞌuchaꞌan in wor in najtic biquin mʌꞌ ja mucꞌtiquex a baꞌ a ber techex, cax cu chꞌicob a baꞌtaquex a cu tus aꞌcricob cax mʌꞌ u wʌcꞌʌs suticob a baꞌtaquex. Mʌꞌ wa ja werex a mac a cu betic a cꞌasoꞌ a tu yʌnechex, rajiꞌ mʌꞌ ju bin acsaꞌbir ten Cꞌuj tu cu bin u reyinticob Cꞌuj. Rajen, mʌꞌ tsoy yaꞌaric mac wa tsoy u man yejer xquic, cax yʌn u racꞌ, wa cu yaꞌaric, wa tsoy u man xquic yejer xib, cax yʌn u man. Rajen mʌꞌ tsoy yaꞌaric mac wa tsoy u tus cꞌujintic tus cꞌuj. Rajen mʌꞌ tsoy yaꞌaric, wa xquic u man yejer u yet xquiquir, wa xib cu man yejer u yet xibir.
\v 10 Baxuc xan, a mac a cu yaꞌcric baꞌ, mʌꞌ ju bin acsaꞌbir ten Cꞌuj, cax a mac a cu pachtic u baꞌtac u racꞌob, a mac a cu carchʌjʌr, a mac a cu tsicbar cꞌas tiꞌ u jer mac, a mac a cu yaꞌcric baꞌ tiꞌ mac a cu raxic. 
\v 11 A uchoꞌ, baxuc yʌn jun yarechex, a mʌꞌ toy a wacsajex ta worex tiꞌ Cristo. Chen Cꞌuj caj u rucꞌs a siꞌpirex. Bajeꞌrer, caj a cꞌʌmajex u mucꞌ Cꞌuj quir a manex tu tsoyir. Bayiriꞌ xan, caj a cꞌʌmajex u mucꞌ soc cꞌuchaꞌan a worex tiꞌ a tsoyoꞌ. Mʌꞌ ja wirej, caj a cꞌʌmajex u mucꞌ, quireꞌ caj a wacsex ta worex tiꞌ ic Jaj Tsꞌurirex Jesucristo, quireꞌ caj u yamtechex u Tajꞌor u Pixam Cꞌuj. 
\s A winquirirex quir u jach beyaj tiꞌ Cꞌuj soc yiric mac jach manan jach carem Cꞌuj
\p
\v 12 Tiꞌ yʌn mac tu yʌnechex a cu yaꞌaricob: “Cꞌuchaꞌan in wor in betic tu cotor baꞌ a mʌꞌ araꞌan ten Cꞌuj wa tsoy in betej.” A tenoꞌ, quin nunquic, yʌn baꞌ cꞌuchaꞌan in wor in betic, chen yʌn tenten mʌꞌ tsoy caꞌ in betej. Cax cꞌuchaꞌan in wor in betic tu cotor baꞌ, chen mʌꞌ jin chaꞌ in tsꞌurintejen baꞌ.
\v 13 Tiꞌ yʌn u jer mac tu yʌnechex a cu yaꞌaric: “Ij coꞌochex rajiꞌ yoꞌoch ic nʌqꞌuex, bayiriꞌ xan, a ij nʌqꞌuexoꞌ rajiꞌ quir u bin ij coꞌoch, quet bayiriꞌ.” A tenoꞌ, quin bin in nunquic: “Jin, chen a Cꞌujoꞌ jeꞌ u rʌc chꞌesiqueꞌ a caꞌturoꞌ.” Mʌꞌ ja wirej, u winquirir mac, mʌꞌ quir u man yejer xquic, mʌꞌ yer xib xan. Raꞌ u winquirir mac quir u cꞌujintic Cꞌuj soc rajiꞌ u tsꞌurintic Cꞌuj. 
\v 14 Quireꞌ ic Tetex Cꞌuj caj u ricꞌsaj ic Jaj Tsꞌurirex ich u quimirir. Rajiꞌ cu bin u ricꞌsicoꞌonex ich u quimirir, quireꞌ yʌn u jach chichir u mucꞌ quir u ricꞌsicoꞌonex. 
\p
\v 15 Biquinin mʌꞌ ja werex wa rajiꞌ ic winquirirex tu tajir u winquirir ic Jaj Tsꞌurirex Jesucristo. Arex ten wa jach tsoy in jocꞌsic in winquirir a raꞌ yʌnin in winquirir Cristo, caꞌ in tsꞌaj tiꞌ xquic in winquirir, a nanij u man? A tenoꞌ quin nunquic, mʌꞌ biqꞌuin quen. 
\v 16 Biquinin mʌꞌ ja werexiꞌ wa mac caj u pꞌerꞌquintaj u bʌj yejer xquic a nanij u manoꞌ, caj u pꞌerꞌiquint u winquirir, rajen tuririꞌ yejer. Mʌꞌ wa cꞌaj techex tu tsꞌibaꞌan ich u tꞌʌn Cꞌuj, taj cu yaꞌaric toꞌonex: “Cax robob caꞌtur u winquirirob, robob tuririꞌchʌj u winquirirob.”
\v 17 Chen a mac a yacsmʌnob tu yorob tiꞌ ic Jaj Tsꞌurirex Jesucristo toc tuririꞌchʌj u pixam yejer.
\p
\v 18 Rajen mʌꞌ ja manex yejer xquic, mʌꞌ a manex yejer xib xan, quireꞌ tu cotor u siꞌpir cu yacsic mac, mʌꞌ ju cꞌasquintic u bʌjiriꞌ u winquirir. Chen a mac a cu man yejer xquic, cax wa yejer xib, cu yacsic u siꞌpir tu winquirir caj u rucꞌsaj u winquirir, a raꞌ yʌnin u winquirir Cristo caj u tsꞌaj tiꞌ xquic u winquirir a nanij u man.
\v 19 Biquinin mʌꞌ ja werex a winquirirex raꞌ u yatoch u Tajꞌor u Pixam Cꞌuj quir u cʌjtar toꞌonex. Raꞌ tsꞌajaꞌan ten Cꞌuj toꞌonex, rajen a techexoꞌ mʌꞌ ja yʌn tsꞌurintiquex a winquirirex, quireꞌ mʌꞌ techex yʌnin a winquirirexiꞌ. 
\v 20 Yʌn cꞌaj techex Cꞌuj caj u boꞌot u boꞌorir ic siꞌpirex yejer a baꞌ jach coꞌoj. Rajen cꞌujintex Cꞌuj ich a winquirirex, bayiriꞌ yejer a pixamex xan.
\c 7
\s Bic tabar mac cu chꞌic u mam wa ju racꞌ
\p
\v 1 Bajeꞌrer, jeꞌ in waꞌaric techex a baꞌ caj a cꞌatex ten ich u juꞌunin a ta tsꞌibtex ten. A tenoꞌ, tin tꞌʌn, tsoy wa xib mʌꞌ ju chꞌa u racꞌ.
\v 2 Chen quireꞌ yaꞌab mac cu manob ta cajarex, rajen jach manan tsoy wa jujuntur xib cu chꞌic u racꞌ, baxuc xan, wa jujuntur xquic u chꞌic u mam xan.
\v 3 Arex tiꞌ, a mac a tu chꞌaj u racꞌ, caꞌ u bet a baꞌ u cꞌat tiꞌ u racꞌ, baxuc xan, arex xan tiꞌ a xquicoꞌ, a tu chꞌaj u mamoꞌ caꞌ u bet a baꞌ u cꞌat tiꞌ u mam xanoꞌ.
\v 4 A xquicoꞌ, mʌꞌ ju yʌn maꞌquintic u bʌjiriꞌ u winquirir, quireꞌ raꞌ u tsꞌurir u winquirir u mam. Baxuc xan, a mamoꞌ, mʌꞌ ju yan maꞌquintic u winquirir quireꞌ raꞌ u tsꞌurir u winquirir u racꞌ.
\v 5 Rajen mʌꞌ ja pacran maꞌquintic a winquirirex tiꞌ a bʌjiriꞌex. Jariꞌ wa ta quetquint a worex soc tenten a pacran maꞌquintic a winquirirex quir a tꞌʌniquex Cꞌuj. Tsoy wa baxucoꞌ, chen barej caꞌ bin tsꞌocac a tꞌʌniquex Cꞌuj, Caꞌ a pꞌʌtiquex a pacran maꞌquint a winquirirex. Jaj ix tʌcoj, jeꞌ u tumtaꞌr a worex ten quisin quireꞌ ca pacran maꞌquint a winquirirex.
\p
\v 6 A tenoꞌ, caj in waꞌaraj techex tsoy wa mac cu chabʌr u chꞌic u racꞌ, wa ju mam tsoy cu chabʌr u chꞌic u mam chen mʌꞌ jin waꞌaraj tiꞌ tu cotor mac u chꞌa u racꞌ wa ju mam.
\v 7 An bic in jach cꞌat tu cotor xib caꞌ u cʌnen a tenoꞌ, mʌꞌ jin raqꞌuintic xquic. Chen a tenoꞌ, in wer jujuntur caꞌ u betej a baꞌ tsꞌabij ten Cꞌuj tiꞌ, caꞌ u betej. Jujuntur u tirir tiꞌ. U jer u tirir tiꞌ xan.
\p
\v 8 Bajeꞌrer, quin waꞌaric tiꞌ a mac a mʌnaꞌ u racꞌ, bayiriꞌ tiꞌ a mac a yʌn u mam uch, chen quimij. Arex tiꞌob tsoy wa cu pꞌatʌrob an bic ten.
\v 9 Chen wa mʌꞌ u cꞌuchur u yor u mucꞌtej, arex tiꞌob caꞌ u chꞌa u racꞌ wa ju mam. Quireꞌ jach tsoy u chꞌic u racꞌ, wa ju mam quireꞌ cu jach pachtej u chꞌa u racꞌ wa ju mam.
\p
\v 10 Bajeꞌrer, quin waꞌaric tiꞌ a mac a ju chꞌajmʌnob u racꞌ wa ju mam. A tenoꞌ, quin waꞌaric wa ja xquicoꞌ a ju chꞌamʌnob u mamoꞌ. Mʌꞌ ju yʌn pꞌʌtob u mam. A tenoꞌ, mʌꞌ jin waꞌarej, u bʌjiriꞌ ic Jaj Tsꞌurirex caj u yaꞌaraj. 
\v 11 Wa jaj ix tʌcoj, a xquicoꞌ caj u toc pꞌʌt u mam, arex tiꞌ soc mʌꞌ ju yʌn mʌmintic u jer. Jaj ix tʌcoj jeꞌ u wʌcꞌʌs bin ich u mam a tu pꞌʌtaj soc pꞌeriꞌ u yorob yejer u mam xan. A ju mam xan, mʌꞌ ju yʌn pꞌʌt u racꞌ.
\p
\v 12 Tiꞌ a mac a tꞌirij, uꞌyex baꞌ quin waꞌaric techex. A baꞌ quin bin in waꞌarej techex chen in bʌjiriꞌ in tꞌʌn, a rayoꞌ mʌꞌ u camsmʌnen ic Jaj Tsꞌurirex aroꞌ toꞌonex. Wa ja wet acsaꞌorirex u toc chꞌamʌn u racꞌ, a mʌꞌ yacsmʌn tu yor tiꞌ Cristojoꞌ. Wa quet yor u cʌjtar ich yicnʌn u mam. Arex tiꞌ mʌꞌ ju yʌn pꞌʌtic u racꞌ.
\v 13 Bayiriꞌ xan, tiꞌ a xquicoꞌ, a yacsmʌn tu yoroꞌ, chen yʌn u mam a mʌꞌ yacsmʌn tu yor tiꞌ Cristojoꞌ. Wa quet yor u mam u cʌjtar ich yicnʌn u racꞌ. Arex tiꞌ a ray xquicoꞌ mʌꞌ ju yʌn pꞌʌtic u mam.
\v 14 Quireꞌ a ju mamoꞌ, a mʌꞌ yacsmʌn tu yor cu bin cꞌʌmbir ten Cꞌuj irej wa tsoy quireꞌ caj u raqꞌuintaj xquic a yacsmʌn tu yor tiꞌ Cristojoꞌ. Bayiriꞌ xan, a ju racꞌoꞌ, a mʌꞌ yacsmʌn tu yor cu bin cꞌʌmbir ten Cꞌuj irej wa tsoy, quireꞌ caj u mamintaj xib a yacsmʌn tu yor tiꞌ Cristojoꞌ. Wa mʌꞌ baxucoꞌ, robob u pararob, irob u pararob a mʌꞌ yacsmʌnob tu yorob tiꞌ Cristo. Chen bajeꞌrer, jeꞌ u chꞌijirob quir u beticob tsoy u tꞌʌn tiꞌ Cꞌuj.
\v 15 Jaj ix tʌcoj wa yʌn mac, a mʌꞌ yacsmʌn tu yoroꞌ u cꞌat u pꞌʌtic u racꞌ, wa ju mam a caj u yacsaj tu yoroꞌ, tsireꞌej u pꞌʌtiqueꞌ. Quireꞌ a baꞌ cu yubic tu yor a mac a mʌꞌ yacsmʌn tu yoroꞌ. Arex tiꞌ a mac a yacsmʌn tu yoroꞌ, cax xib, cax xquic, mʌꞌ ju yʌn suꞌsej u mam wa ju racꞌ, quireꞌ Cꞌuj mʌꞌ ju cꞌat yiric mac cu jocꞌar yor.
\v 16 Arex ten, a techoꞌ xquic, a caj a wacsaj ta wor bic tabar a wertic wa jeꞌ u yacsic tu yor a mam, a mʌꞌ toy u yacsaj tu yor? Mʌꞌ a wertic. Baxuc tech, a xiboꞌ a caj a wacsaj ta wor. Bic tabar a wertic wa jeꞌ u yacsic tu yor a racꞌ, a mʌꞌ toy u yacsaj tu yor? Mʌꞌ a wertic xan. Rajen chaꞌ u binob.
\p
\v 17 Chen jujunturechex, caꞌ a betex a baꞌ u cꞌat Cꞌuj u betej. An ten bic Cꞌuj u cꞌat jujuntur u betej caꞌ u betej, rajen caꞌ ic toc betex. Raꞌ quin chich aric tiꞌ tu cotor in wet acsaꞌorirob tu cu muchꞌquinticob u bʌj quir u yubicob u tꞌʌn Cꞌuj, caꞌ u betob.
\v 18 Jaj ix tʌcoj, wa yʌn mac ber caj u yacsaj tu yor toc tsꞌiraꞌan u yotꞌer an ten bic nanij u tsꞌiricob u winiquirob judío, arex tiꞌ mʌꞌ ju yʌn chꞌic suraquir tiꞌ, quireꞌ toc tsꞌiraꞌan yotꞌer. Jaj ix tʌcoj wa yʌn mac ber caj u yacsaj tu yor mʌꞌ tsꞌiraꞌan yotꞌer an ten bic nanij u tsꞌiraꞌan yotꞌer u winiquirob judío, arex tiꞌ, mʌꞌ ju yʌn chꞌic suraquir quireꞌ mʌꞌ u tsꞌirmʌnob u yotꞌer an ten bic nanij cu tsꞌiricob yotꞌer u winiquirob judío.
\v 19 Cax tsꞌiraꞌan u yotꞌer an ten bic nanij u tsꞌiricob u yotꞌer u winiquirob judío, mʌꞌ baꞌwir tiꞌ. Cax mʌꞌ toy tsꞌiraꞌan u yotꞌer mac an ten bic nanij cu tsꞌiricob u yotꞌer u winiquirob judío, mʌꞌ baꞌwir xan. A baꞌ caꞌ ic betex quireꞌ jach manan tsoy, caꞌ ic betex tu cotor a baꞌ u cꞌat Cꞌuj caꞌ ic betex.
\v 20 Cax a baꞌ a beyajex uch, ber mʌꞌ toy a wacsex ta worex tiꞌ Cristo, tiriꞌ ca pꞌatʌrex.
\v 21 Jaj ix tʌcoj wa ju cꞌurew mac caj u yacsaj tu yor, rajen mʌꞌ ju cꞌuchur yor u bin tub u cꞌat, mʌꞌ ju chen tucrej tiꞌ. Chen wa cu cꞌuchur tu qꞌuinin u rucꞌur tu cꞌʌnaꞌan ten u tsꞌurir, caꞌ u pꞌis u bʌj u rucꞌur caꞌ xic a tiꞌoꞌ.
\v 22 Mʌꞌ ja wirej, a mac a yacsmʌn tu yoroꞌ tiꞌ Cristo ic Jaj Tsꞌurirex, cax wa rajiꞌ u cꞌurew mac, rajen mʌꞌ cꞌuchaꞌan yor u bin tub u cꞌat, jariꞌ a baꞌ u cꞌat u tsꞌurir. Arex tiꞌ ʌcʌtan tu wich Cꞌuj, toc chꞌabir. Arex tiꞌ a mac a toc chꞌabir uch ber caj u yacsaj tu yor tiꞌ ic Jaj Tsꞌurirex. A bajeꞌreraꞌ, rajiꞌ u cꞌurew Cꞌuj.
\v 23 Rajen, ic Jaj Tsꞌurirex rajiꞌ cu yaꞌaric ic beyajex, quireꞌ jach coꞌoj caj u boꞌotechex, rajen mʌnaꞌ u jer mac cu yaꞌaric a beyajex.
\v 24 Rajen in wet acsaꞌorirex, cax a baꞌ u betic mac, ber caj u yacsaj tu yor tiꞌ Cristo, arex u pꞌatʌr tiꞌ taroꞌ. Quireꞌ bajeꞌrer, ic Jaj Tsꞌurirex tiꞌ yʌn quir u yamtaꞌrob a tiꞌoboꞌ.
\s Ajeraꞌ cu tsicbar tiꞌ a xquicoꞌ a mʌꞌ chꞌabir ten xib, bayiriꞌ tiꞌ xquic a mʌnaꞌ u mamoꞌ quireꞌ quimij
\p
\v 25 Bajeꞌrer, bin in caꞌ in waꞌarej techex tiꞌ a xquicoꞌ, a mʌꞌ chꞌajaꞌan ten xiboꞌ. Quin waꞌaric tiꞌob baꞌ quin chen tucric. A tenoꞌ, tin tꞌʌn, cax mʌꞌ yarman ten ic Jaj Tsꞌurirex a tenoꞌ. Chen a tenoꞌ, quin waꞌaric a baꞌ in wer, quireꞌ in Jaj Tsꞌurir tu yajquinten quireꞌ yira otsirten. Rajiꞌ yer raꞌ quin waꞌaric an ten bic u cꞌat. 
\v 26 Rajen, quin waꞌaric, jach tsoy mac cax cu pꞌatʌr an ten bic rajiꞌ bajeꞌrer, cax wa yʌn u racꞌ, cax wa mʌnaꞌ u racꞌ. Quireꞌ jach tabar u tar ic mucꞌyajex a toꞌonexoꞌ, a mac a yacsmʌnob tu yorob tiꞌ Cristo.
\v 27 Rajen a mac a yʌn u racꞌ, arex tiꞌ mʌꞌ ju yʌn pꞌʌtic. Bayiriꞌ, a mac a mʌnaꞌ u racꞌ, arex tiꞌ, mʌꞌ ju yʌn cʌxtic a racꞌ.
\v 28 Chen wa xib cu chꞌic u racꞌ, mʌꞌ ju pʌy u siꞌpir quireꞌ caj u chꞌaj. Bayiriꞌ, a xquicoꞌ, wa mʌꞌ chꞌamaꞌan ten mac wa cu mamintic xib, a rayoꞌ, mʌꞌ ju pʌy u siꞌpir xan. Quireꞌ quic mucꞌyajex a caꞌ bin tac toꞌonex, a mac yʌn u racꞌ, yejer a mac a yʌn u mam, jach yaꞌab cu bin mucꞌyaj. A raꞌ quin waꞌaric techexoꞌ, soc in yamtic techex.
\v 29 Rajen, in wet acsaꞌorirex, a tenoꞌ, quin waꞌaric techex jeꞌ u tar tu qꞌuinin cu tar ic mucꞌyajex a toꞌonexoꞌ. A mac a toc yʌn u racꞌ, arex tiꞌ, mʌꞌ ju chen tucric u racꞌ.
\v 30 Quin waꞌaric tiꞌ a mac a tucur u caꞌ, arex tiꞌ, mʌꞌ ju chen tucric a baꞌ cu tucric. Quin waꞌaric xan, tiꞌ mac a quiꞌ yoroꞌ, arex tiꞌ, mʌꞌ ju chen tucric a baꞌ cu quiꞌquintic u yor. Quin waꞌaric tiꞌ a mac a cu mʌnic baꞌ, arex tiꞌ, mʌꞌ ju chen tucric tiꞌ a baꞌ cu mʌnic. 
\v 31 Bayiriꞌ xan, quin waꞌaric tiꞌ a mac a cu pachtic u ne tꞌajʌr u baꞌtac teꞌ ich yococab, arex tiꞌ mʌꞌ ju chen tucric u baꞌtac. Quireꞌ tu cotor a baꞌ quij quiriquex jeꞌ u rʌc chꞌejar biqꞌuiniꞌ.
\p
\v 32 Rajen, a tenoꞌ, in cꞌat techex wa mʌꞌ ja chaꞌbʌrex a bʌjiriꞌex a ca tucriquex tiꞌ a baꞌ tiꞌ yʌn ich yococab. Mʌꞌ ja wirej, a mac a mʌnaꞌ u racꞌ, cu tucric Cꞌuj, quireꞌ u cꞌat u quiꞌquintic yor Cꞌuj tu cu beyaj a tiꞌoꞌ.
\v 33 Chen a mac a yʌn u racꞌ, rajiꞌ cu tucric u racꞌ. Bayiriꞌ xan, bic tabar cu bin u quiꞌquintic u yor u racꞌ.
\v 34 Baxuc a xquic xanoꞌ, u tiriꞌ tiꞌ a xquic xanoꞌ u tiriꞌ u beyaj a xquicoꞌ, a toc chaꞌan yejer a mʌꞌ chaꞌan a xquicoꞌ u beyaj a xquicoꞌ, a toc chꞌaꞌan, yejer a xquicoꞌ a mʌꞌ chꞌajaꞌaniꞌ. Mʌꞌ ja wirej, a xquicoꞌ a mʌꞌ chꞌaꞌan ten xib cu chen tucric bic tabar u quiꞌquintic yor Cꞌuj yejer tu cotor u pixam. Chen a xquicoꞌ a chꞌaꞌan ten u mam, cu chen tucric bic tabar a baꞌ caꞌ u betej baꞌ teꞌ ich yococab, yejer an ten bic tabar u quiꞌquintic u yor u mam.
\p
\v 35 Aroꞌ quin waꞌaric techex, quireꞌ in cꞌat in yamtiquechex. A tenoꞌ, mʌꞌ jin cꞌat in maꞌquic a berex. Chen in cꞌat caꞌ a betex a baꞌ jach tsoyoꞌ. Bayiriꞌ xan, in cꞌat a quiꞌ sayʌrex tu pach Cꞌuj quir a cʌniquex u tꞌʌn, mʌꞌ in cꞌat a chaꞌiquex u maꞌquintej a berex mac.
\p
\v 36 Chen u tetoꞌ, cu chen tucric wa jach tsoy u parar xquic cu chꞌijir cax mʌꞌ ju mamintej xib, arex tiꞌ caꞌ u betej a baꞌ u cꞌat u tet. Bayiriꞌ xan, wa ju chen cꞌat u yir u parar u mʌmintej xib, arex u chaꞌbʌr u chꞌic u mam, aroꞌ mʌꞌ u pʌy u siꞌpir.
\v 37 Jaj ix tʌcoj wa ju tetoꞌ, u bʌjiriꞌ aric, mʌnaꞌ u jer arej tiꞌ, chen jach taj ich u pixam caj u yaꞌaraj: “Tsoy in parar xquic cu chꞌijir, cax mʌꞌ u mamintic xib.” Raꞌ jach tsoy xan, mʌꞌ ju pʌy u siꞌpiriꞌ.
\v 38 Rajen a mac a cu tsꞌic u parar xquic quir u mamintic xib, tsoy caj u betaj. Chen a mac a mʌꞌ ju cꞌat u tsꞌic u parar xquic quir u mamintic xib, jach manan tsoy caj u betaj xan.
\p
\v 39 A xquicoꞌ, a yʌn u mam, caꞌ u pꞌatʌc ich yicnʌn u mam, a mun qꞌuinin cuxaꞌan. Wa ber caꞌ bin quimic u mam, a ray u qꞌuininoꞌ, cꞌuchaꞌan yor u mamintic u jer wa ju cꞌat. Chen caꞌ u mʌmintej a mac a yacsmʌnob tu yorob tiꞌ Cristo.
\v 40 Chen a tenoꞌ, tin tꞌʌn, jach manan quiꞌ yor a xquicoꞌ, wa mʌꞌ ju chꞌa u jer u mam caj tsꞌoc u quimin u mam. Wa ca waꞌariquex yʌn techex u Tajꞌor u Pixam Cꞌuj. Baxuc a tenoꞌ yʌn ten u Tajꞌor u Pixam Cꞌuj a mac cu pʌyic in beroꞌ.
\c 8
\s A yoꞌochoꞌ, a tsꞌaꞌbir ten mac tiꞌ u tus rʌquir u cꞌuj 
\p
\v 1 Bajeꞌrer, in cꞌat in waꞌaric techex tiꞌ a yoꞌochoꞌ a tiꞌ tꞌʌraꞌan ich u tus rʌquir u cꞌuj. Jach tajir an ten bic caj a waꞌarex ten ich a juꞌunex a ta tsibtex tenob: “A toꞌonexoꞌ, ij querex tu cotoroꞌonex caj ic najtex bic tabar aroꞌ, quireꞌ quiꞌ camsaꞌboꞌonex aroꞌ.” Caꞌ ij cʌnex xan, cax quic najtiquex baꞌ. Jaj ix tiꞌ u tsꞌic ij cuwiquex jach nojoꞌonex, rajen jeꞌ ic pꞌastiquex mac. Chen wa quic pacran yajquintiquex ic bʌjex, jeroj cꞌuchaꞌan ij corex ic yamtiquex tu cotor mac.
\v 2 Jaj ix tʌcoj wa yʌn mac cu tus tucric, wa rajiꞌ jach manan u najtic baꞌ. Rajiꞌeꞌ, mʌꞌ toy u yʌnxchun u yer bic tabar u najtic baꞌ, mʌꞌ yer bic tabar u yʌn cꞌuchur u najtic baꞌ.
\v 3 Chen yʌn mac u yajquintic Cꞌuj, rajiꞌ tsoy yiric tu wich Cꞌuj.
\p
\v 4 Bajeꞌrer, quin waꞌaric techex tiꞌ yoꞌoch a tiꞌ tu tꞌʌquinta mac ich u tus rʌquir u cꞌuj tu yʌnechex. A tenoboꞌ, in werob u tus rʌquir u cꞌuj, a tiꞌ yʌn ich yococab jach jot. Bayiriꞌ xan, in werob, mʌnaꞌ u jer Cꞌuj jariꞌ tuririꞌ Cꞌuj, a tiꞌ yʌn ich caꞌananoꞌ.
\v 5 Yʌn mac a cu yaꞌaric yʌn cꞌujob a tiꞌ yʌnob ich caꞌanan, bayiriꞌ cu yaꞌaricob tiꞌ yʌn ich yocꞌocaboꞌ. Cax robob cu yaꞌaric, yʌn yaꞌab u jach tsꞌurirob, bayiriꞌ cu yaꞌaric yaꞌab u cꞌujob, a tenob mʌꞌ jin waꞌarob baxucoꞌ. 
\v 6 Chen a tenob, in werob yʌn tuririꞌ Cꞌuj, rajiꞌ in Tetob Cꞌuj, quireꞌ rajiꞌ yʌnin tu cotor baꞌ a tiꞌ yʌnoꞌ. Rajiꞌ xan, caj u tsꞌaj ij cuxtarex teraꞌ soc ij cꞌujintiquex Cꞌuj. Bayiriꞌ xan, in werob yʌn jariꞌ tuririꞌ ic Jaj Tsꞌurirex Jesucristo. Rajiꞌ caj u betaj tu cotor a baꞌ tiꞌ yʌn, quireꞌ rajiꞌ xan, caj u tsꞌaj ij cuxtarex rajen cuxaꞌanoꞌonex bajeꞌrer.
\p
\v 7 Chen aroꞌ tu cotor mac mʌꞌ ju najtic an ten bic a toꞌonexoꞌ quic najtiquex. Mʌꞌ ja wirej, yʌn mac nanij caj u tꞌʌquinta yoꞌoch ʌcʌtan ich u tus rʌquir u cꞌuj uch. Baxuc caj u betajob uch, chen bajeꞌrereꞌ caj u pꞌʌtob u tꞌʌquinticob yoꞌoch ʌcʌtan u tus rʌquir u cꞌuj, quireꞌ caj u yacsajob tu yorob. Chen wa tsꞌaꞌbir yoꞌoch tiꞌob ten mac quir u janticob, a baꞌ tꞌʌquintaꞌb ʌcʌtan tiꞌ u tus rʌquir u cꞌuj. Robob, cax u bʌjiriꞌob mʌꞌ ju tꞌʌquintob yoꞌoch ich ʌcʌtan u tus rʌquir u cꞌuj, chen wa ber cu janticob a baꞌ ochir tꞌʌquintaꞌb ten mac ich ʌcʌtan u tus rʌquir u cꞌuj, robob cu yubicob an ten bic u bʌjiriꞌob caj u tꞌʌquintob ich u tus rʌquir cꞌuj, quireꞌ wa ber cu janticob a ray yoꞌochoꞌ, mʌꞌ quiꞌ yorob yubicob. Quireꞌ mʌꞌ ju quiꞌ najtob tu cotor, rajen u bʌjiriꞌob cu yaꞌaricob, mʌꞌ tsoy a baꞌ cu beticob. 
\v 8 Mʌꞌ ja wirej, cax a baꞌ ochir quic jantiquex, aroꞌ mʌꞌ ju bin u quiꞌquintej yor Cꞌuj soc tsoy yiric toꞌonex Cꞌuj. Cax wa quic jantiquex aroꞌ, cax wa mʌꞌ ic jantiquex aroꞌ. A yoꞌochoꞌ, mʌꞌ ju bin yacsoꞌonex ich ʌcʌtan Cꞌuj soc u yaꞌaric wa jach tsoyoꞌonex wa mʌꞌ jach tsoyoꞌonex. 
\v 9 Chen a tenoꞌ, quin chich aric techex, quiꞌ cʌnant a bʌjex, cax a werex rajiꞌ mʌꞌ ju cꞌasquintechex, wa ber ca jantiquex. Chen, quireꞌ u jer winic a mʌꞌ toy u quiꞌ najtej tu cotor a baꞌ, an ten bic caj u yacsaj tu yor. Rajiꞌ jeꞌ u pʌyic u siꞌpir wa cu yiric a jantiquex a woꞌochoꞌ, a tꞌʌraꞌan ich u rʌquir u tus cꞌuj.
\v 10 A techexoꞌ, a werex wa ca jantiquex baꞌ, rajiꞌ mʌꞌ ju cꞌasquintex chichin. Jaj ix tʌcoj, wa tiꞌ yʌn mac a mʌꞌ toy quiꞌ najtej bic tabar caj ij cacsajex tij corex tu cotor. Wa cu yiricob techex curiquechex tu ca janʌnex, ca jantiquex a baꞌ tꞌʌquintaꞌb ten mac ich ʌcʌtan tiꞌ rʌquir u tus cꞌuj. Rajen quireꞌ, caj u yirechex ca jantiquex aroꞌ. Mʌꞌ wa jeꞌ u pachticob u jantej xan, a baꞌ tꞌʌquintaꞌb ten mac ich ʌcʌtan tiꞌ u rʌquir u tus cꞌuj?
\v 11 Rajen caꞌ a quiꞌ cʌnant a bʌjex, soc mʌꞌ ja pʌyiquex u siꞌpir, a mac a mʌꞌ toy u quiꞌ najtej tu cotor a baꞌ yʌn. Rajen jeꞌ u pꞌʌtic u yacsic tu yor tiꞌ Cristo, cax a techexoꞌ, caj najtajex tu cotor baꞌ. Mʌꞌ ja wirej, Cristo caj u boꞌot u boꞌorir u siꞌpir a wet acsaꞌorirex an ten bic caj u boꞌot u boꞌorir a siꞌpirex xan.
\v 12 Mʌꞌ ja wirej, wa jix tiꞌ ca betiquex aroꞌ tiꞌ a mac a mʌꞌ toy u quiꞌ najtej tu cotor baꞌ, caj a pʌyex u siꞌpir a wet acsaꞌorirex. A baꞌ u siꞌpir caj a wacsajex tiꞌ a wet acsaꞌorirex, mʌꞌ quiꞌ yor Cristo, caj u yiraj a pʌyiquex u siꞌpir a wet acsaꞌorirex.
\v 13 Rajen, quireꞌ aroꞌ, wa jix tiꞌ in wet acsaꞌorir mʌꞌ ju quiꞌtar u yor, quireꞌ a baꞌ yiric in jantic, rajen jach manan tsoy wa mʌꞌ jin jantic a baꞌ cu pʌyic u siꞌpir in wet acsaꞌorir, soc mʌꞌ ju pꞌʌtic u yacsic tu yor tiꞌ Cristo.
\c 9
\s Caꞌ sʌjtac a mac a tuchiꞌtaꞌb ten Cristo
\p
\v 1 Arex ten a baꞌ ca tucriquex. Mʌꞌ wa caj u tuchiꞌten ic Jaj Tsꞌurirex quir in tsecꞌtic u tꞌʌn, baꞌ ca tucriquex? Mʌꞌ wa cꞌuchaꞌan in wor in bet a baꞌ u cꞌat ic Tetex Cꞌuj, baꞌ ca tucriquex? Mʌꞌ wa jin wiramʌn ic Jaj Tsꞌurirex? Biquinin, a techexoꞌ, caj a wacsajex ta worex quireꞌ beyanʌjen tuꞌ yʌnechex.
\v 2 Cax u jer mac cu yaꞌaric: “Mʌꞌ tuchiꞌtaꞌb Pablo ten Cristo quir u tsecꞌtaꞌr u tꞌʌn.” Chen a techexoꞌ, a jach erex caj u tuchiꞌten Cristo quir in tsecꞌtic u tꞌʌn, quireꞌ techex caj a wacsex ta worex tiꞌ ic Jaj Tsꞌurirex caj in waꞌaraj techex u tꞌʌn. A baxucoꞌ, caj esaꞌb ten Cꞌuj jach taj rajiꞌ caj u tuchiꞌten.
\p
\v 3 A baꞌ caj in chen araj techex, jeꞌ in waꞌaric tiꞌ tu cotor mac a ju cꞌat u taꞌquic in joꞌr a tenoꞌ.
\v 4 Arex ten, biquinin mʌꞌ tsoy in janʌnob, cax wa ucꞌurnʌjenob ich yatoch mac tu quin tsecꞌticob u tꞌʌn Cꞌuj?
\v 5 Mʌꞌ wa tsoy a tenoꞌ caꞌ in raqꞌuintej xquic, a yacsmʌn tu yor, bayiriꞌ xan, soc in wet bin wa ber caꞌ bin xiquenob tu quin tsecꞌticob u tꞌʌn an ten bic u jer yʌjtseqꞌuirob Cristo? Baxuc caj u betob xan u yitsꞌinob ic Jaj Tsꞌurirex. Baxuc caj u betaj xan Pedro.
\v 6 Arex tenob yejer Bernabé, a tenoboꞌ tsoy mʌꞌ wa jin pꞌʌticob in beyajob quir in jaricob in taqꞌuin soc in janʌnob?
\v 7 Tu yʌn a soldadojoꞌ caꞌ xic u cʌxtaꞌbir tu cotor baꞌ u cꞌat? Tu yʌn a mac a cu pʌqꞌuic u yaqꞌuir u wich uva cu mʌqꞌuic u wich uva wa ber cu tsꞌic u wich? Tu yʌn mac a yʌn yʌrʌcꞌ wacax yaꞌab a cu yʌtsꞌic u yim yʌrʌcꞌ wacax soc u yuqꞌuic?
\v 8 A techexoꞌ, ca chen tucriquex wa quin soꞌsoꞌ aꞌaric aroꞌ quireꞌ in bʌjiriꞌ in tꞌʌn? Mʌꞌ wa ja werex baxuc caj yaꞌaraj Moisés ich u tꞌʌn xan uch?
\v 9 Quireꞌ tiꞌ tsꞌibaꞌan ich u tꞌʌn Moisés, a tu cu yaꞌaric: “Mʌꞌ tsoy a mʌquic u chiꞌ ton wacax yejer chan chim tu cu yarchꞌʌctic u wich trigo quir u rucꞌur u sor, soc tsoy u jansan tu cu beyaj a ton wacaxoꞌ.” Baxuc caj u yaꞌaraj Moisés uch. Biquinin a Cꞌujoꞌ, cu chen tucric a ton wacaxoꞌ, rajen caj u yaꞌaraj toꞌonex aroꞌ?
\v 10 Mʌꞌ wa raꞌ cu yaꞌaric tu cotoroꞌonex? Jach taj caj u tsꞌibtoꞌonex aroꞌ, soc caꞌ bin jansac a mac a cu beyaj tiꞌ Cꞌuj. Mʌꞌ ja wirej, a mac a cu muxic ruꞌum quir u pʌqꞌuic u pʌcꞌar trigo, caꞌ u yʌn muxic u ruꞌum quir u mʌcantic a baꞌ cu bin u pʌqꞌuej. Caꞌ boꞌotac u boꞌorir u cꞌʌb. Bayiriꞌ xan tiꞌ a mac a cu chachtic u sor trigo rajiꞌ caꞌ boꞌotac u boꞌorir u cꞌʌb xan. 
\v 11 A tenoboꞌ caj in yʌn tsecꞌtob techex tiꞌ u tꞌʌn Cꞌuj, jach coꞌoj wa caꞌ in pajicob techex a baꞌ quin chen cꞌaticob?
\v 12 Raꞌ u quinin tiꞌ yʌn u jer mac a mʌꞌ ju jach tucricob u cꞌatejob baꞌ tiꞌ techex. Mʌꞌ wa jach manan tsoy caꞌ in cꞌatejob baꞌ techex xan, quireꞌ caj in yʌn tsecꞌtob techex u tꞌʌn Cꞌuj uch?
\p Chen a tenob, mʌꞌ tin betajob aroꞌ, soc mʌꞌ jin jocꞌsicob u yorob mac tu yʌnechex. Rajen mʌꞌ jin mʌꞌquinticob u ber mac soc u yacsic tu yor tiꞌ Cristo.
\v 13 Biquinin mʌꞌ wa ja werex a sacerdotejoꞌ a cu beyaj ich carem naj tu cu naj cꞌujinticob Cꞌuj u winiquirob judío caj boꞌotaꞌb u boꞌorir u cꞌʌb tu cu cꞌʌmicob a baꞌ tsꞌajaꞌan ten u winiquirob judío tiꞌ Cꞌuj, a baywoꞌ, cu jaricob u boꞌorir u beyajob. Mʌꞌ wa ja werex a mac a cu cʌnanticob u baꞌyirinquiriꞌ tu cu tꞌʌquinticob yʌrʌcꞌ quir u tsꞌic tiꞌ Cꞌuj. Jeꞌ u tsꞌaꞌbʌr tiꞌ jun xotꞌ a yʌrʌcꞌoꞌ, a tꞌʌraꞌan ich u baꞌyirinquiriꞌ, quireꞌ raꞌ u boꞌorir u cꞌʌb.
\v 14 Bayiriꞌ xan, caj u toc araj ic Jaj Tsꞌurirex: “A mac a cu tsecꞌtic u tꞌʌn Cꞌuj caꞌ u boꞌotaꞌ ten mac a cu yubicob u jach tsoyir u tꞌʌn Cꞌuj.” Baxuc caj u yaꞌaraj Jesús uch.
\v 15 Chen a tenoꞌ mʌꞌ in cꞌatman baꞌ techex, cax caj u yaraꞌaj toꞌonex Cristo wa tsoy ic jariquex ic taqꞌuinex tu quic tsecꞌtiquex u tꞌʌn Cꞌuj. Bayiriꞌ xan, wa ber caj in tsꞌibtaj techex a jeꞌ juꞌunaꞌ, mʌꞌ quir in cꞌatic techex caꞌ a tsꞌajex ten a baꞌ in cꞌat. A biquinin a tenoꞌ mʌꞌ jin man in cꞌatej baꞌ, cax wa quimen tu quin man in tsecꞌ u tꞌʌn Cꞌuj soc mʌꞌ jin man in cꞌat u jansenob tu quin tsecꞌticob u tꞌʌn Cꞌuj.
\p
\v 16 A tenoꞌ, quiꞌ in wor in wuꞌyic yaꞌaraꞌ, quin quiꞌ beyaj tu quin tsecꞌtic u jach tsoyir u tꞌʌn Cꞌuj. Mʌꞌ ja wirej, caꞌ manaquen in tsecꞌt u tꞌʌn Cꞌuj, quireꞌ caj u tuchiꞌten Cꞌuj. Jach otsiren wa mʌꞌ jin bin in tsecꞌt u tꞌʌn Cꞌuj. A Cꞌujoꞌ, bin u caꞌ tsꞌa in mucꞌyaj. 
\v 17 Wa jin bʌjiriꞌ quin tsecꞌtic u tꞌʌn Cꞌuj, jeꞌ in pajic in cꞌʌmic in taqꞌuin. Chen raꞌ u qꞌuinin caj u teten Cꞌuj soc in beyaj tiꞌ, rajen quin tsecꞌtic u tꞌʌn Cꞌuj, mʌꞌ quir in jaric in taqꞌuin quin beyaj, chen quir in quibic u tꞌʌn a tiꞌoꞌ.
\v 18 Baꞌ u tsoyir cu bin tar ten wa ber quin tsecꞌtic u tꞌʌn Cꞌuj? A werex wa baꞌ tsoyir cu bin tar ten? U jach quiꞌir in wor tu quin tsecꞌtic u tꞌʌn Cꞌuj, mʌꞌ boꞌotaꞌan quireꞌ tin tsecꞌtic u tꞌʌn. Cax jach tsoy in jaric in taqꞌuin quir in janʌn tu quin tsecꞌtic u tꞌʌn Cꞌuj, chen a tenoꞌ, mʌꞌ jin cꞌat u boꞌorir in beyaj tiꞌ Cꞌuj. 
\p
\v 19 Cax mʌꞌ baꞌwir ten tu cotor mac, chen a tenoꞌ quin chaꞌic u cꞌurewquintiquen tu cotor mac. Baxuc aroꞌ, quin betic soc cꞌuchaꞌan in wor in waꞌaric tiꞌ yaꞌab mac, caꞌ u yacsej tu yor tiꞌ Cristo.
\v 20 Barej wa ber tiꞌ yʌnen ich u winiquirob judío, a tenoꞌ quin wesic in bʌj irej wa ju winiquiren judío, soc cꞌuchaꞌan in wor in wesic tiꞌob u tꞌʌn Cꞌuj soc u yacsicob tu yorob tiꞌ Cristo. Wa ber tiꞌ yʌnen ich mac a cu yaꞌaric cu quibic a baꞌ cu yaꞌaric ich u tꞌʌn Moisés, bayiriꞌ ten quin quibic xan, soc cꞌuchaꞌan in wor in wesic tiꞌob u tꞌʌn Cꞌuj, soc u yacsicob tu yorob tiꞌ Cristo, cax mʌꞌ baꞌwir caꞌ in quibic baxucoꞌ.
\v 21 Chen, wa ber tiꞌ yʌnen ich a mac a mʌꞌ yubmʌnob u tꞌʌn Moisés, baxuc quin betic an ten bic robob cu beticob, soc cꞌuchaꞌan in wor in wesic tiꞌob u tꞌʌn Cꞌuj soc u yacsicob tu yorob tiꞌ Cristo. Chen a tenoꞌ, mʌꞌ jin pꞌuspacht u tꞌʌn Moisés, quireꞌ quin quibic u tajir u tꞌʌn Cristo.
\v 22 Barej wa ber tiꞌ yʌnen ich mac a mʌꞌ toy u quiꞌ najtob tu cotor baꞌ ich u tꞌʌn Cꞌuj. A ten xanoꞌ, quin betic an ten bic mʌꞌ jin najtej tu cotor baꞌ, soc cꞌuchaꞌan in wor in yamtic tiꞌob. A raꞌ u qꞌuinin in wer bic tabar jujuntur mac cu betic baꞌ, a tenoꞌ quin pꞌisic in bʌj soc quet bayiriꞌ quin betic xan, soc jun yarob cu yacsicob tu yorob tiꞌ Cristo, soc robob cu toꞌcar ten Cꞌuj.
\v 23 Rajen quin betic tu cotor aroꞌ soc cꞌuchaꞌan yor mac tu cotor caꞌ u yubob u tꞌʌn Cꞌuj ich tu cotor u ruꞌumin. Bayiriꞌ xan, soc pꞌeriꞌ quiꞌ in wor yejer a mac a caj u yubob u tꞌʌn Cꞌuj.
\p
\v 24 Biquinin mʌꞌ wa ja werex bic tabar a mac a cu cꞌʌnic u yacab tu cu baxar cu cꞌʌnic u yacab. Tu cotor a mac cu jach pꞌisic u bʌj soc yiricob mac a pʌyber cu cꞌuchuroꞌ. Chen a mac a cu bin tsꞌabir baꞌ quireꞌ pʌyber caj cꞌuchij, rajiꞌeꞌ a mac a jach manan chich acabnʌjij. Baxuc techex, caꞌ a pꞌis a bʌjex soc a cꞌʌmiquex a baꞌ caj u ricꞌsaj Cꞌuj techex.
\v 25 Tu cotor mac a cu bin u jach pꞌisic u bʌj u cꞌʌnic u yacab tu cu baxar cu cꞌʌnic yacab, pʌyber caꞌ u tumt u bʌj u yirej wa cꞌuchaꞌan yor tiꞌ. Robob jach taj cu jach pꞌisic u bʌj soc u cꞌʌmicob a baꞌ ricꞌsaꞌan quir u tsꞌabir tiꞌ, a pʌyber cꞌuchij. Chen a baꞌ tsꞌabir tiꞌ, tiꞌ cu bin tsꞌocar, chen a toꞌonexeꞌ, a quic jach pꞌisic ic bʌj quir ij cꞌʌmiquex a baꞌ ricꞌsaꞌan ten Cꞌuj toꞌonex, aroꞌ mʌꞌ ju tsꞌocar tiꞌ, muntqꞌuin tiꞌ yʌniꞌ.
\v 26 Rajen, a tenoꞌ, baxuc quin betic aroꞌ. Quin jach pꞌisic in bʌj in bet aroꞌ. Chen a tenoꞌ, mʌꞌ jin cꞌʌnic in wacab an ten bic mac mʌꞌ yer acab. Bayiriꞌ xan, quin betic an ten bic mac jach yer u baxʌr cu tus raxic mac, a jach tꞌoj baxʌr. A tenoꞌ, in chen er baxʌr an ten bic mac u tus raxic maqueꞌ. A tenoꞌ, mʌꞌ jin tus cʌnej mac a mʌꞌ yer u tus raxic mac.
\v 27 A tenoꞌ, in wʌcꞌʌs bʌjiriꞌ in winquirir quin tsꞌurintic soc in winquirir mʌꞌ ju bet a baꞌ u cꞌat. Quireꞌ mʌꞌ jin cꞌat caꞌ bin tac u jer u qꞌuinin wa ber caꞌ tsꞌocac in tsecꞌtic u tꞌʌn Cꞌuj ich u jer winiquirob, jeroj mʌnaꞌ baꞌ cu bin tar ten tiꞌ Cꞌuj caꞌ bin xuruc tꞌʌn. 
\c 10
\s Cu chich aric tiꞌob soc mʌꞌ ju cꞌujinticob u tus cꞌuj
\p
\v 1 Rajen in wet acsaꞌorirex, in cꞌat a werex baꞌ u ber in nunquirob u winiquirob judío uch. Barej caj pay u berob ten u muyarir ich tʌcay ruꞌum. A ray u qꞌuininoꞌ, caj u rʌc manob u winiquirob judío ich a cꞌacꞌnaboꞌ u cꞌabaꞌ chʌc. Tiꞌ manob u chꞌʌcticob ich chumuc cꞌacꞌnab.
\v 2 A baxucoꞌ, caj yaꞌarob tu cotor u winiquirob judío cu chen sayob tu pach Moisés, barej caj pay u berob ten u muyarir caj u chꞌʌctob a cꞌacꞌnab a chʌcoꞌ.
\v 3 Bayiriꞌ xan, tu cotor u winiquirob judío caj u jantajob a baꞌ ochir a tsꞌaꞌb ten Cꞌuj tiꞌob.
\v 4 Bayiriꞌ xan, tu cotor u winiquirob judío caj u yucꞌob a jaꞌoꞌ a tsꞌaꞌb ten Cꞌuj tiꞌob a caj tar tiꞌob ich yajaw actun. A ray actunoꞌ, irej bajen cu yuqꞌuicob Cristo, quireꞌ rajiꞌ yamticob, rajraꞌ tan u tsꞌabʌr tiꞌob yoꞌoch jaꞌ.
\v 5 Chen jach yaꞌab a ray winicoꞌ mʌꞌ ju betob a baꞌ u cꞌat Cꞌuj, rajen rʌc quimob ich tʌcay ruꞌum.
\p
\v 6 A baꞌ u ber u winiquirob judío uch ich tʌcay ruꞌum, caj tar tiꞌob soc u camsic toꞌonex bajeꞌrer wa mʌꞌ ic pachtiquex a baꞌ mʌꞌ tsoyiꞌ, an ten bic robob caj u betob uch.
\v 7 Rajen mʌꞌ ja cꞌujintiquex u tus rʌquir cꞌuj an ten bic yaꞌab u winiquirob judío caj u betob ich tʌcay ruꞌum. Quireꞌ tiꞌ tsꞌibaꞌan ich u tꞌʌn Cꞌuj tu cu yaꞌaric: “Robob caj curajob tu janʌnob, bayiriꞌ xan, quir u yucꞌurob a baꞌ tꞌʌrquintaꞌb ich ʌcʌtan u tus cꞌujob. Jeroj, caj ricꞌob baxʌr soc quiꞌ yorob.”
\v 8 Bayiriꞌ xan, mʌꞌ ic yʌn manex yejer xquic wa yejer xib, an ten bic yaꞌab u winiquirob judío caj u betaj ich tʌcay ruꞌum uch. Jeroj toc jumpuriꞌ, caj quimij veinte tres mil u winiquirob judío tuririꞌ u qꞌuinin uch.
\v 9 Bayiriꞌ xan, mʌꞌ ja yʌn tsꞌiquintiquex Cꞌuj an ten bic yaꞌab u winiquirob judío caj u betob ich tʌcay ruꞌum uch. Quireꞌ caj u tsꞌiquintaj Cꞌuj u winiquirob judío, jeroj, caj u yʌnxchun u quiminob quireꞌ chiꞌbir ten can.
\v 10 Bayiriꞌ xan, mʌꞌ ja pʌqꞌuiquex u pach Cꞌuj an ten bic yaꞌab u winiquirob judío caj u betajob ich tʌcay ruꞌum uch, jeroj, caj tar u yʌjmasirob u tꞌʌn Cꞌuj caj quinsaꞌbob a tiꞌoboꞌ.
\p
\v 11 A werex wa baꞌ u berob tiꞌob, u winiquirob judío ich tʌcay ruꞌum uch, tar tiꞌob quir ij cʌniquex a baꞌ u cꞌat Cꞌuj toꞌonex, soc ij querex xan, mʌꞌ ic yʌn betex a baxucoꞌ. A toꞌonexoꞌ, a mac cuxaꞌan tu qꞌuinin bajeꞌrer, cꞌuchaꞌan ij corex ic pʌctic u pachob u winiquirob israel caꞌ ij quirex tu cotor a baꞌ u ber uch tiꞌ u winiquirob judío.
\v 12 Rajen, arex tiꞌ mac a cu tucric cu betic tsoy, caꞌ u quiꞌ cʌnant u bʌj soc mʌꞌ ju betic a baꞌ cꞌasoꞌ.
\v 13 Tu cotor a baꞌ mʌꞌ tsoyiꞌ, a baꞌ cu tumtic a worex. Raꞌiriꞌ xan, cu tumtic u yor tu cotor a macoꞌ. Chen a Cꞌujoꞌ, cu betic an ten bic rajiꞌ rajraꞌ cu betic, a Cꞌujoꞌ jeꞌ u yamtic toꞌonexeꞌ wa ber caꞌ bin tumtac ij corex soc mʌꞌ ic pʌyej ic siꞌpirex. Quireꞌ a ray u quininoꞌ, cu bin u chichquintic ij corex Cꞌuj, soc ic mucꞌtiquex, soc mʌꞌ ic betex a baꞌ mʌꞌ tsoyiꞌ.
\p
\v 14 Rajen in wet acsaꞌorirex in jach yaj, mʌꞌ ja cꞌujintiquex u tus rʌquir cꞌuj.
\v 15 A tenoꞌ, quin tꞌʌniquex quireꞌ ca najtiquex baꞌ. Rajen caꞌ a tucrex baꞌ tabar in waꞌaric techex, wa taj wa mʌꞌ tajiꞌ.
\v 16 Jeroj, a ray ruchoꞌ wa quic chuquiquex wa jij cuqꞌuiquex wa ber quij cꞌʌꞌotiquex caj u jantaj Cristo u yoꞌoch oqꞌuin, a tabar u quinsaꞌ uch. Bayiriꞌ xan, quij cariquex bayoꞌ tiꞌ Cꞌuj. A ray u qꞌuininoꞌ quij cuqꞌuex biquin, mʌꞌ pꞌeriꞌoꞌnex wa ber quic betiquex aroꞌ? Mʌꞌ ja wirej, rajiꞌ cu cꞌasic toꞌonex tiꞌ u qꞌuiqꞌuer Cristo. A ray u qꞌuininoꞌ xan, wa ber quic chuquiquex ic xatex ic jantex a panoꞌ, pꞌeriꞌoꞌonex wa ber quic betiquex aroꞌ xan. Mʌꞌ ja wirej, rajiꞌ cu cꞌasic toꞌonex tiꞌ u winquirir Cristo xan.
\v 17 A ray panoꞌ, tuririꞌ yʌn, rajen a ray panoꞌ cu cꞌasic toꞌonex tiꞌ u winquirir Jesucristo. Baxuc a toꞌonex xanoꞌ, cax pimoꞌonex a toꞌonexoꞌ, chen toꞌonex iroꞌonex tuririꞌ ic winquirirex quireꞌ pꞌeriꞌ caj ic jantex a ray panoꞌ.
\p
\v 18 Bajeꞌrer iriquex bic tabar u winiquirob israel cu beticob. Wa ber cu chiꞌicob u bʌqꞌuer u yʌrʌcꞌ a cu quinsicob quir u chaquinticob ich yocꞌor u baꞌyirinquirir soc u rʌc toꞌquicob, quir u quiꞌtar yor Cꞌuj. Mʌꞌ wa pꞌeriꞌob yejer Cꞌuj, quireꞌ caj u betajob aroꞌ? Pꞌeriꞌob.
\v 19 Baꞌ quin jach aric wa ber quin waꞌaric aroꞌ, a tenoꞌ mʌꞌ jin cꞌat in waꞌaric wa ju tus rʌquir cꞌuj yʌn baꞌwir tiꞌ. Mʌꞌ in cꞌat in waꞌaric wa ja bʌcꞌoꞌ a tiꞌ tus tꞌʌraꞌan ʌcʌtan tiꞌ u tus rʌquir cꞌuj wa jach manan tsoy, quireꞌ tiꞌ tus tꞌʌraꞌan ich u rʌquir u tus cꞌuj, rajen u jer bʌcꞌ mʌꞌ jach tsoy. Jot aroꞌ.
\v 20 Chen soc a yʌn najtiquex a baꞌ quin waꞌaric techex, a tenoꞌ, quin waꞌaric techex wa mac, a mʌꞌ ju winiquirob judío, cu tꞌʌquinticob a baꞌ u cꞌatob ich ʌcʌtan u tus rʌquir cꞌuj. Chen a baꞌ cu tꞌʌquinticob ich ʌcʌtan u tus rʌquir cꞌuj cu jach tꞌʌquinticob ich ʌcʌtan quisin, mʌꞌ ju tꞌʌquinticob ich ʌcʌtan Cꞌuj. Rajen, mʌꞌ jin cꞌat in wiriquechex a pꞌeriquintic a worex yejer a raꞌ yʌnin quisinoꞌ.
\v 21 Rajen mʌꞌ cꞌuchaꞌan a worex a pꞌeriquintic a worex, caj a wuqꞌuex u ruchir a quij cꞌʌniquex tu quij cꞌʌꞌotiquex u janʌn oqꞌuin a tabar u quimin Jesús uch. Jeroj, pachir ca bin a sʌjtex u tus rʌquir cꞌuj. Bayiriꞌ xan, mʌꞌ cꞌuchaꞌan a worex a janʌnex tu pojcheꞌ a raꞌ yʌnin ic Jaj Tsꞌurirex, jeroj pachir ca bin a janʌnex tu pojcheꞌ a raꞌ yʌnin quisiniꞌ.
\v 22 Arex ten a jeraꞌ. A jach cꞌatex wa ja tsꞌiquintiquex Cꞌuj? Jeꞌ wa ja cꞌuchur a muqꞌuex tiꞌ Cꞌuj? A werex mʌꞌ cꞌuchaꞌan a muqꞌuex tiꞌ.
\s Caꞌ ic betex tu cotor baꞌ soc mac tu cotor cu yiric jach carem Cꞌuj
\p
\v 23 Rajen cu chen chaꞌbʌren in betic tu cotor baꞌ, chen mʌꞌ tsoy ten, cax cu chen chaꞌbʌr in betic tu cotor baꞌ. Wa quin betic tu cotor a baꞌ, jeroj, mʌꞌ cꞌuchaꞌan in wor in yamtic mac u man tu tsoyir.
\v 24 Arex tiꞌ mac, mʌꞌ ju chen cʌxtic a baꞌ tsoy tiꞌ u nonoj bʌjiriꞌ, chen ar u cʌxt a baꞌ tsoy tiꞌ tu cotor mac.
\p
\v 25 Bayiriꞌ xan, tu cotor bʌcꞌ a cu canicob ich tu cu naj canic baꞌ, toc chiꞌex. Mʌꞌ ja yʌn cꞌatiquex wa tꞌʌquintaꞌb uch ʌcʌtan tiꞌ u tus rʌquirex u cꞌuj. Mʌꞌ ja chꞌiquex sajquirex quir a chiꞌiquex.
\v 26 Mʌꞌ ja wirej, a jeꞌ ruꞌumaꞌ, yejer tu cotor baꞌ a tiꞌ yʌn teraꞌ, ic Jaj Tsꞌurirex yʌnin.
\p
\v 27 Wa mac, a mʌꞌ yacsmʌn tu yor cu pʌyiquechex ta janʌnex tu yatoch, toc xen, wa uts ta tꞌʌn caꞌ xiquechex. Tu cotor baꞌ cu tsꞌic techex a janʌnex, toc jantex. Mʌꞌ ja yʌn cꞌatiquex wa tꞌʌquintaꞌb uch ʌcʌtan tiꞌ u tus rʌquir cꞌuj.
\v 28 Chen wa mac cu yaꞌaric tiꞌ taroꞌ, tan yaꞌaric tech: “Aroꞌ tꞌʌquintaꞌb ʌcʌtan ich u tus rʌquir cꞌuj.” Baxuc cu yaꞌaric tech. Jeroj, mʌꞌ ja yʌn chiꞌic. Caꞌ a bet a baxuc caj in waꞌaraj tech, quireꞌ a baꞌ caj u yaꞌaraj tech mac, quireꞌ caj u yaꞌaraj mʌꞌ tsoy a jantic, rajen mʌꞌ ja jantic.
\v 29 A baꞌ quiriꞌ jach noj a raꞌ baꞌ cu yubic mac tu yor, a mac araꞌb tech mʌꞌ tsoy a jantic mʌꞌ raꞌ a wʌcꞌʌs bʌjiriꞌex ca wuꞌyiquex ta worex.
\p A tenoꞌ, tin tꞌʌn, yʌn mac bajeꞌrer jeꞌ u yaꞌaric: “Baꞌwir caꞌ in tucrej a baꞌ quin jantic quireꞌ u jer mac yubic tu yor, mʌꞌ tsoy in jantic, cax a tenoꞌ, tsoy in wuꞌyic tin wor in jantic.
\v 30 Bajeꞌrer, wa ber caj tsꞌoc in waꞌaric tiꞌ Cꞌuj: Bayoꞌ Cꞌuj, caj a tsꞌaj ten in woꞌoch. Arej ten biquinin u jer mac cu taꞌquic in joꞌr, tan u yaꞌaric wa mʌꞌ tsoy in jantic aroꞌ. Quireꞌ a tenoꞌ, caj in toc arej: Bayoꞌ Cꞌujꞌ, quireꞌ raꞌ jin woꞌoch.”
\v 31 Jeroj, wa ber ca janʌnex, cax wa ber ca wucꞌurex, cax a baꞌ ca betiquex, caꞌ a yʌn betex tu cotor baꞌ soc a sʌjtiquex Cꞌuj, quireꞌ a baꞌ caj a betajex.
\v 32 Caꞌ cʌjraquex ich tu cotor mac, soc mʌꞌ ja wacsiquex u siꞌpir, cax u winiquirob judío, cax mʌꞌ ju winiquirob judío, cax a mac a wet acsaꞌorir xan. An ten bic in betic a tenoꞌ, pꞌis a bʌjex a betex xan. Mʌꞌ ja tsꞌiquintiquex mac yejer a baꞌ ca betiquex.
\v 33 A tenoꞌ, mʌꞌ jin betej baꞌ soc u chen quiꞌquintic in wor. Quin yʌn betic a baꞌ cu quiꞌquintic u yor u jer mac xan. Quireꞌ a baxucoꞌ, cꞌuchaꞌan in wor in yamtic mac soc u yacsic tu yor soc u toꞌcar ten Cꞌuj.
\c 11
\p
\v 1 Rajen in wet acsaꞌorirex, an ten bic quin betic, pꞌisex a bʌjex a betej xan. Quireꞌ a tenoꞌ quin betic an ten bic Cristo cu betic.
\s Cu tsicbar tiꞌ xquic tu cu yocar u muchꞌquinticob u bʌj quir yubicob u tꞌʌn Cꞌuj
\p
\v 2 Bajeꞌrer, in wet acsaꞌorirex, jach quiꞌ in wor, quireꞌ tu cotor a baꞌ ca betiquex. Mʌꞌ ja wirej, rajraꞌ ca cꞌʌꞌotiquenex, mʌꞌ ju tubur techex a baꞌ caj in camsaj techex uch.
\v 3 Chen in cꞌat caꞌ a najtex wa Cristo rajiꞌ u jach tsꞌurir tu cotor xib, bayiriꞌ xan, a xiboꞌ, rajiꞌ u jach tsꞌurir a xquicoꞌ, bayiriꞌ xan ic Tetex Cꞌuj rajiꞌ u jach tsꞌurir a Jesucristojoꞌ.
\v 4 Rajen wa xib cu pixic u joꞌr wa ber cu tꞌʌnic Cꞌuj, cax wa ʌcʌtan mac cax tu cu tsecꞌtic u tꞌʌn Cꞌuj a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj cu suraꞌquintic Cristo.
\v 5 Bayiriꞌ xan, wa xquic, cax chichan, cax carem, arej mʌꞌ ju pixic u joꞌr tu cu tꞌʌnic Cꞌuj, cax tu cu chꞌictar u tsicbar u tꞌʌn Cꞌuj a tsꞌaꞌb u tucur ten Cꞌuj tiꞌ. Rajiꞌ cu suraꞌctic a ray xquicoꞌ u tsꞌurir quireꞌ a xicoꞌ rajiꞌ ir a xquicoꞌ rʌc cꞌos u joꞌr irej wa joꞌchtaꞌb u joꞌr.
\v 6 Rajen, wa xquic mʌꞌ ju pixic u joꞌr jeroj, jach manan tsoy caꞌ cꞌosac u joꞌr. Chen wa ja ray xquicoꞌ cu pʌyic u suꞌtar quireꞌ cꞌasaꞌan u joꞌr soc jach yur u joꞌr, jeroj rajen jach tsoy caꞌ u pix u joꞌr.
\v 7 A xiboꞌ mʌꞌ ju yʌn pꞌix u joꞌr quireꞌ ray yʌn betaꞌb ten Cꞌuj soc bajen Cꞌuj, soc quir u yesic rajiꞌ u yochir Cꞌuj xan.
\v 8 Chen a xquicoꞌ, caj betaꞌb tu yochir xib. Quireꞌ a xiboꞌ mʌꞌ tarij tiꞌ u winquirir xquic, chen a xquicoꞌ caj tar u winquirir tiꞌ xib, a caj betaꞌb ten Cꞌuj tu yʌnxchun tu cotor baꞌ.
\v 9 Bayiriꞌ xan, rajiꞌ yʌn batꞌan betaꞌb a xiboꞌ, mʌꞌ pachir betaꞌb xib ten Cꞌuj soc u nupintej xquic. Chen a xquicoꞌ pachir caj betaꞌb ten Cꞌuj quir u nupintej xib.
\v 10 Rajen, a xquicoꞌ caꞌ u pix u joꞌr, aroꞌ quir yesic cu surʌctic xib soc yʌjmasirob u tꞌʌn Cꞌuj cꞌuchaꞌan yor yiricob.
\v 11 Mʌꞌ ja wirej, ich ʌcʌtan u wich Cꞌuj, quet bayiriꞌ a xiboꞌ, yejer a xquicoꞌ. A xiboꞌ yʌn baꞌwir tiꞌ a xquicoꞌ, bayiriꞌ xan, a xquicoꞌ, yʌn baꞌwir tiꞌ a xiboꞌ. Yʌn pacran baꞌwir tiꞌob.
\v 12 An ten bic a xquicoꞌ caj betaꞌb ten Cꞌuj tiꞌ u winquirir xib. Baxuc xan, a xiboꞌ, jeꞌ u rochaꞌr ten xquic, chen a Cꞌujoꞌ, rajiꞌ caj u betaj tu cotor baꞌ.
\v 13 Tucrex ta junanex. Tsoy wa xquic cu tꞌʌnic Cꞌuj cax mʌꞌ pixaꞌan u joꞌr?
\v 14 Biquinin mʌꞌ ja werex bic tabar yʌn mac teraꞌ, wa xib cu chaꞌbʌr u satsꞌʌr u joꞌr, robob aꞌaric suracchʌjʌr wa chaꞌbʌr u satsꞌʌr u joꞌr.
\v 15 Chen tiꞌ a xquicoꞌ, quij yaꞌaraj tiꞌ, jach manan tsoy caꞌ satsꞌʌc u joꞌr soc jach cꞌʌrʌb soc ir u pꞌoc u joꞌr.
\v 16 Wa tiꞌ yʌn mac a ju cꞌat u tsꞌiquintic quireꞌ aroꞌ, chaꞌj u pꞌujur tiꞌ, quireꞌ mʌꞌ nanij u tꞌʌnic a xquicoꞌ wa mʌꞌ pixaꞌan u joꞌr tu quin tsecꞌtic u tꞌʌn Cꞌuj. Mʌꞌ ju bin u yiricob ich u jer tu cu cꞌujinticob Cꞌuj, cu rʌc pixicob u joꞌr.
\s Cu chich tꞌʌnic tiꞌob yocꞌor u janʌnob tu cu janticob yoꞌoch quir u cꞌʌꞌotej bic tabar quimij Jesús
\p
\v 17 A bajeꞌrer xan, a baꞌ quin bin in waꞌaric techex, yʌn baꞌ wa mʌꞌ jin cꞌat in waꞌaric caꞌ a betex. Quireꞌ wa ber ca muchꞌquint a bʌjex soc tsoy ca betiquex chen soc a baꞌ mʌꞌ tsoy caj betex uch.
\v 18 Rajen pʌyber, in cꞌat in waꞌaric techex, wa ber ca muchꞌquint a bʌjex yejer tu cotor a yacsmʌnob tu yorob, tu jumbintenob tiꞌ yʌn mac pim tu yʌnechex a techexoꞌ, mʌꞌ quet yorob yejer junyar pim tu yʌnechex. Orac quin tucric taj a baꞌ caj u jumbinta tenob.
\v 19 Quireꞌ raꞌ cu yʌntar tu yʌnechex a mac a cu nunquicob u tꞌʌn mac, soc chʌcaꞌan ij quiriquex mac jach chich u yor tiꞌ u tꞌʌn Cꞌuj.
\v 20 Bayiriꞌ xan, wa ber ca muchꞌquint a bʌjex, soc quir a cꞌʌꞌotiquex a janʌnex a woꞌochex a caj u toc ar ic Jaj Tsꞌurirex soc rajraꞌ ic janʌnex. A baꞌ ca betiquex tu yʌnechex ti taroꞌ, a tenoꞌ, tin tꞌʌn, mʌꞌ ja cꞌʌꞌotiquex a jantiquex yoꞌoch a ic Jaj Tsꞌurirex a caj u toc araj soc rajraꞌ ic janʌnex.
\v 21 Quireꞌ wa ber pꞌeri ca janʌnex, jujuntur a cuchmanex quir a janʌnex a baꞌ yʌn techex. Tiꞌ yʌn u jer mac, a mʌnaꞌ tiꞌ, cu chen uꞌyic wiꞌij. Tiꞌ yʌn u jer cax cʌraꞌan.
\v 22 Arex ten biquinin ca betiquex baxucoꞌ? Biquinin ca pʌyiquex u suꞌtarob a mac a mʌnaꞌ baꞌ tiꞌ? Baꞌ quin waꞌaric techex quireꞌ a baꞌ ca betiquex? A tenoꞌ, mʌꞌ jach quiꞌ in wor techex.
\s Bic tabar caꞌ ic jantex a yoꞌochoꞌ, a oqꞌuinoꞌ, a tu toc ara Jaj Tsꞌur
\r (Mt. 26.26‑29; Mr. 14.22‑25; Lc. 22.14‑20)
\p
\v 23 Quireꞌ a baꞌ ic Jaj Tsꞌurirex u yarmʌn ten uch, aroꞌ raꞌiriꞌ caj in camsechex xan. A ic Jaj Tsꞌurirex Jesús, a raꞌ acꞌbiroꞌ caj cꞌubij ten Judas Jesús tiꞌ u winiquirob judío, caj u chucaj a yoꞌoch panoꞌ, quireꞌ raꞌ u qꞌuinin cu janʌnob.
\v 24 Barej caj tsꞌoc u yaꞌaric: “Bayoꞌ Cꞌuj”, quij, jeroj, caj u xatꞌaj, caj u yaꞌaraj tiꞌ u camsʌwinicob uch: “Chꞌaꞌex a jeꞌ panaꞌ a cu cꞌasic techex in winquirir wa ber ca jantiquex. A tenoꞌ, quin cꞌubic in winquirir soc in quinsaꞌ techex”, quij.
\v 25 Bayiriꞌ xan, caj tsꞌoc u janʌn Jesús, caj u chꞌaj a ray chan ruchoꞌ, caj yaꞌaraj: “A jeꞌ chan ruchaꞌ, quireꞌ a baꞌ tiꞌ yʌn ich chan ruch, cu tsicbar tiꞌ a ricꞌben a nupaꞌan tꞌʌnoꞌ, a Cꞌuj toc nup tꞌʌn techex, quireꞌ jeꞌ in quimineꞌ soc in jocꞌar in qꞌuiqꞌuer. Aroꞌ quir a cꞌʌꞌotiquenex wa ber ca muchꞌquintic a bʌjex quir a wuqꞌuiquex. Uqꞌuexex aroꞌ, quir a cʌꞌotiquenex a tenoꞌ”, quij Jesús.
\v 26 Wa ber ca wuqꞌuiquex a baꞌ tiꞌ yʌn ich a jeꞌ chan ruchaꞌ, bayiriꞌ xan wa ber caj jantiquex a jeꞌ panaꞌ, tan a tsꞌiquex tiꞌ mac soc yerob biquinin ic Jaj Tsꞌurirex quimij.
\p
\v 27 Wa mac, ix tiꞌ, cu jantic a ray panoꞌ, bayiriꞌ xan, wa mac cu yuqꞌuic a baꞌ tiꞌ yʌn ich ray chan ruchoꞌ, cu chen jantic, bayiriꞌ yuqꞌuic xan, mʌꞌ tan u tucric tiꞌ Cristo. A ray winicoꞌ jeꞌ u pʌyic yaꞌab u siꞌpireꞌ, quireꞌ a ray panoꞌ yejer a ray ucꞌuroꞌ cu tsicbar u winquirir yejer u qꞌuiqꞌuer Jesucristo.
\v 28 Rajen jujunturoꞌonex caꞌ ij cʌxtiquex tij corex ij quirex wa tan ic tucriquex Cristo, soc cꞌuchaꞌan ij corex ic jantiquex a ray panoꞌ, bayiriꞌ soc cꞌuchaꞌan ij corex ic uqꞌuex a ray ucꞌuroꞌ.
\v 29 Quireꞌ a mac a cu jantic a ray panoꞌ, yejer a mac a cu yuqꞌuic a ray ucꞌuroꞌ, chen ix tiꞌ mʌꞌ ju quiꞌ cʌxtic tu yor wa cu tucric Cristo, jeꞌ u pʌyic yaꞌab u siꞌpireꞌ wa ber cu jantic a panoꞌ yejer a ucꞌuroꞌ, quireꞌ raꞌ u tsicbar u winquirir Jesús yejer u qꞌuiqꞌuer Jesús.
\v 30 Rajen yʌn yaꞌab mac tuꞌ yʌnechex a tan u tsꞌabʌr u mucꞌyaj yejer u yajirir. Yʌn jun yarob quimij xan. 
\v 31 Rajen wa quij cʌxtiquex tij corex a baꞌ cꞌasir tic betex, jeroj tun, mʌꞌ baꞌwir Cꞌuj cu tsꞌic toꞌonex ic mucꞌyajex.
\v 32 Chen wa yʌn toꞌonex cꞌas tic betex, jeroj a Cꞌujoꞌ bin u caꞌ u tsꞌic mucꞌyajex bajeꞌrer soc caꞌ bin cꞌuchuc tu qꞌuinin u xur tꞌʌn, mʌꞌ ju tsꞌic a mucꞌyajex yejer tu cotor a mac a mʌꞌ yerob Cꞌuj.
\p
\v 33 Rajen in wet acsaꞌorirex wa ber caꞌ bin a muchꞌquint a bʌjex quir a cꞌʌꞌotiquex a jantiquex yoꞌoch ic Jaj Tsꞌurirex a caj u toc araj, soc rajraꞌ ic jantex, caꞌ a pacran pajex a bʌjex soc pꞌeriꞌ caꞌ janʌnex.
\v 34 Wa tiꞌ yʌn mac wiꞌijeꞌ, arej u janʌn ich u bʌjiriꞌ yatoch soc mʌꞌ cꞌas cu betic, caꞌ bin a muchꞌquintex a bʌjex quir a cꞌʌꞌotiquex a jantiquex yoꞌoch, ic Jaj Tsꞌurirex a caj u toc araj soc rajraꞌ ic jantiquex. Yʌn u jer yaꞌab baꞌ in cꞌat in waꞌarej techex chen raꞌ quin waꞌaric techex caꞌ bin cꞌuchuquen ta wicnʌnex. 
\c 12
\s A baꞌ cu tsꞌic toꞌonex u Tajꞌor u Pixam Cꞌuj soc ic beyajex tiꞌ Cꞌuj
\p
\v 1 Rajen in wet acsaꞌorirex, a tenoꞌ, in cꞌat in wiriquex a najtex a baꞌ u Tajꞌor u Pixam Cꞌuj caj u sijaj toꞌonex a jujunturoꞌonex, soc cꞌuchaꞌan ij corex ij querex bic tabar ic beyajex tiꞌ Cꞌuj.
\p
\v 2 Quireꞌ a raꞌ u qꞌuinin uchoꞌ, mʌꞌ toy a werex Cꞌuj uch, a techexoꞌ, irechex mac satʌr u caꞌob, quireꞌ caj manechex ich tu cotor u ruꞌumin tan a cꞌujintiquex u tus rʌquir cꞌuj uch.
\v 3 Rajen, a tenoꞌ, in cꞌat a najtex wa mac yʌn u Tajꞌor u Pixam Cꞌuj tu pixam, rajiꞌ mʌꞌ ju yaꞌarej cꞌas tiꞌ Jesús. Bayiriꞌ xan, mʌnaꞌ mac cuchaꞌan yor yaꞌaric: “A Jesúsoꞌ, rajiꞌ in Jaj Tsꞌurir jach jaj.” Wa mʌꞌ tsꞌaꞌb u tucur ten u Tajꞌor u Pixam Cꞌuj tiꞌ.
\p
\v 4 Bajeꞌrer, quin tsicbar techex tiꞌ u beyaj ic Tetex Cꞌuj. Jujunturoꞌonex, tij cꞌʌmajex baꞌ quir ic betiquex, chen u tirir tiꞌ baꞌ quic betiquex. Chen a Tajꞌor u Pixam Cꞌuj raꞌiriꞌ tiꞌ, rajen rajiꞌ, cu tsꞌic tiꞌ jujunturoꞌonex a baꞌ caꞌ ic betex.
\v 5 Rajen tu cotor mac a cu betic u beyaj Cꞌuj, robob u tirir tiꞌ u beyajob, chen a baꞌ u beyaj cu beticob, raꞌ u beyajob tiꞌ a raꞌiriꞌ u Tetob Cꞌuj.
\v 6 Bayiriꞌ xan, a mun robob u beyajob u tirir tiꞌ a baꞌ tu cꞌʌmob, jujuntur quir u beticob, a raꞌiriꞌ u Tetob Cꞌuj cu yamtic jujunturiꞌ yejer u beyaj a baꞌ caꞌ u betej.
\v 7 Rajen, a baꞌ tsꞌaꞌb ten u Tajꞌor u Pixam Cꞌuj jujunturoꞌonex quir ic betiquex, raꞌ caj tsꞌab toꞌonex quir ic yamtiquex tu cotor mac.
\v 8 Quireꞌ u Tajꞌor u Pixam Cꞌuj caj u tsꞌaj u jach er tiꞌ mac soc u tsicbar an ten bic Cꞌuj caj yaꞌaraj tiꞌ. A raꞌiriꞌ u Tajꞌor u Pixam Cꞌuj caj u tsꞌaja tiꞌ u jer mac soc caꞌ u najtej bic tabar u camsic mac.
\v 9 Baxuc xan, a raꞌiriꞌ u Tajꞌor u Pixam Cꞌuj cu tsꞌic tiꞌ u jer mac u quiꞌ acsic tu yor soc mʌꞌ ju pec yor. Raꞌiriꞌ u Tajꞌor u Pixam Cꞌuj cu tsꞌic tiꞌ u jer mac u mucꞌ quir u jawsic mac.
\v 10 Baxuc xan, a raꞌiriꞌ u Tajꞌor u Pixam Cꞌuj cu tsꞌic u jer mac u mucꞌ quir u betic jach carem beyaj. Tiꞌ u jer mac tsꞌab u tucur quir u tsicbar a baꞌ u cꞌat Cꞌuj. Tiꞌ u jer mac Cꞌuj cu tsꞌic u mucꞌ soc yer mac a cu jach beyaj tiꞌ Cꞌuj, tsꞌab u mucꞌ soc yer mac a cu tus aric u tus beyaj tiꞌ Cꞌuj. Tiꞌ u jer mac Cꞌuj cu tsꞌic u mucꞌ quir u tsicbar ich u jer tꞌʌn a mʌꞌ yer. Tiꞌ u jer mac cu tsꞌic u mucꞌ soc yaꞌaric a baꞌ cu yaꞌaric u jer mac a mʌꞌ ju najtaꞌr ten mac.
\v 11 Chen tu cotor aroꞌ, raꞌiriꞌ u Tajꞌor u Pixam Cꞌuj, a cu tar ich Cꞌuj, rajiꞌ cu betic an ten bic u bʌjiriꞌ u cꞌat caꞌ u tsꞌa tiꞌ jujuntur baꞌ quir u betic, chen u tirir tiꞌeꞌ.
\s Cax tuririꞌ ic winquirirex chen yaꞌab u xotꞌor ic winquirirex 
\p
\v 12 Mʌꞌ ja wirej, an ten bic ij winquirirex tuririꞌ yʌn, chen yaꞌab u xotꞌor ich ij winquirirex, chen tuririꞌ ic winquirirex. Baxuc xan, ic Jaj Tsꞌurirex Jesucristo, rajiꞌ pꞌeriꞌchʌjij yejer a mac a yacsmʌnob tu yorob tiꞌ Cristo.
\v 13 Tu cotoroꞌonex, a raꞌiriꞌ u Tajꞌor u Pixam Cꞌuj, a cu tar ich Cꞌuj, rajiꞌ caj u pʌcteꞌquin toꞌonex soc quetoꞌonex yejer soc pꞌeriꞌoꞌonex yejer, an ten bic ij winquirirex, cax wa ju winiquirob judío, cax wa ju winiquirob griego, cax wa mac a yʌn u tsꞌurir, cax wa mac a ju bʌjiririꞌ u tsꞌurir. Mʌꞌ ja wirej, jujunturoꞌonex tic jach cꞌʌmex a raꞌiriꞌ u Tajꞌor u Pixam Cꞌuj, a cu tar ich Cꞌuj.
\p
\v 14 Mʌꞌ ja wirej, ic winquirirex mʌꞌ chen tuririꞌ u xotꞌor, chen ic winquirirex rajiꞌ caj betaꞌb yaꞌab u xotꞌor. 
\v 15 Wa jix tiꞌ, ij coc cꞌuchaꞌan yor u tsicbar, tan yaꞌaric: “Quireꞌ a tenoꞌ, mʌꞌ cꞌʌbeniꞌ, quij, rajen mʌꞌ ten u xotꞌor ic winquirir”, quij. Baxuc cu tus aꞌaric ij coc. Cax cu tus aꞌaric aroꞌ, chen tiꞌ toy yʌn ich ic winquirir. 
\v 16 Wa jix tiꞌ, ic xiquin cuchaꞌan yor u tsicbar, tan yaꞌaric: “Quireꞌ a tenoꞌ, mʌꞌ ichen, rajen bajeꞌrer, mʌꞌ xotꞌor ic winquirir.” Baxuc cu yaꞌaric ij quich. Cax cu yaꞌaric aroꞌ, chen tiꞌ toy yʌn ich ic winquirir. 
\v 17 Wa tu cotor ic winquirirex chen ij quich, tu quij cuyic tꞌʌn? Wa jix tiꞌ tu cotor ic winquirirex chen ic xiquin. Tu quij cuwiquex a baꞌ yʌn u boc xan?
\v 18 Chen a Cꞌujoꞌ, caj u tsꞌajaj a jeꞌ ic winquiriraꞌ jujuntur u xotꞌor an ten bic u cꞌat.
\v 19 Bajeꞌrer, wa jix tiꞌ, robob tu cotor chen tuririꞌ u xotꞌor, jeroj mʌnaꞌ ic winquirirex.
\v 20 Chen u tajireꞌ, yʌn yaꞌab u xotꞌor ich ic winquirirex, chen toc tuririꞌ ic winquirirex.
\v 21 Rajen, ij quichoꞌ, mʌꞌ cꞌuchaꞌan yor yaꞌaric tiꞌ a ij cꞌʌboꞌ: “Mʌꞌ baꞌwir tech ten, quij yaꞌaric a ij quichoꞌ.” Baxuc a joꞌroꞌ, mʌꞌ cꞌuchaꞌan yor yaꞌaric tiꞌ a yocoꞌ: “Mʌꞌ baꞌwir tech ten, quij yaꞌaric tiꞌ.”
\v 22 Aroꞌ mʌꞌ tajiꞌ, quireꞌ a baꞌ a quij quiriquex, a tiꞌ yʌn ich ic winquirirex, a mʌnaꞌ u mucꞌ tiꞌ, aroꞌ jach manan ij cꞌatex tiꞌ.
\v 23 A baꞌ quij quiriquex, a tiꞌ yʌn ich ic winquirirex, a quic tucriquex mʌꞌ coꞌojoꞌ tij quichex. Raꞌ quic buquintiquex yejer a baꞌ jach manan tsoyir. Bayiriꞌ xan, quij cujintiquex xan, irej wa jach manan tsoy. Bayiriꞌ xan, a baꞌ quij quiriquex, a tiꞌ yʌn ich ic winquirirex, a quic tucriquex mʌꞌ tsoy tiꞌ ij quichex, quireꞌ quic chꞌic suraquirex tiꞌ. Chen a toꞌonexoꞌ jach manan quic tsoyquintiquexiꞌ soc mʌꞌ yirir ten mac.
\v 24 Chen u xotꞌor ic winquirirex a baꞌ quic tucriquex jach tsoy tiꞌ ij quichex, robob mʌꞌ baꞌwir quic betiquex soc jach manan tsoy tu wich mac. Chen Cꞌuj, caj u chen quetquint ic winquirirex an ten bic u cꞌat soc ic surʌctiquex ic winquirirex, tan ij quiꞌ cʌnantiquex tiꞌ cax mʌꞌ ne noj quic tucriquex.
\v 25 Baxuc Cꞌuj caj u betaj soc mʌꞌ chʌcaꞌan yiric wa yʌn tutur xotꞌor ich ic winquirirex jach tsoy ij quiriquex chen u jer u yet xotꞌor ich ic winquirirex mʌꞌ tsoy ij quiriquex. Cꞌuj caj u chen bet ic winquirirex soc pꞌeriꞌ quic surʌctic ic winquirirex.
\v 26 Rajen wa yʌn tutur u xotꞌor ich ic winquirirex a cu mucꞌyaj, jeroj tu cotor u xotꞌor ic winquirirex cu yubic yaj xan. Bayiriꞌ xan wa jach tsoy u xotꞌor ic winquirirex, jeroj, tu cotor u yet xotꞌor pꞌeriꞌ quiꞌ yorob xan.
\p
\v 27 Bajeꞌrer tun, tu cotorechex u winquirirechex Cristo, tutur u xotꞌorechex u winquirirechex Cristo.
\v 28 A baywoꞌ, Cꞌuj caj u tetaj jun yarob ich a mac a yacsmʌnob tu yorob. Jeroj, caj u tetaj mac a caj u yʌn tuchiꞌtaj, raꞌ yʌjꞌirob Cristo. Jeroj, caj u tetaj mac quir u tsꞌabʌr u tucur a tiꞌoboꞌ, quir u tsicbarob a baꞌ u cꞌat Cꞌuj. Jeroj, caj u tetaj mac a cu camsicob u tꞌʌn Cꞌuj. Jeroj, caj u tetaj mac a cu beticob carem beyajob. Jeroj caj u tetaj mac a cu jawsic a yajoꞌ. Jeroj, caj u tetaj mac a cu pʌyic u berob u beyaj u jer mac. Jeroj caj u tetaj mac a yer u tsicbar ich u tꞌʌn u jer mac.
\v 29 Arex ten baꞌ ca tucriquex bajeꞌrer. Rʌc tetaꞌb wa caꞌ xicob an ten bic yʌjtseqꞌuirob tꞌʌn Cristo? Mʌꞌ. Rʌc tetaꞌb soc tsꞌabʌr u tucur tiꞌob quir u tsicbarob a baꞌ u cꞌat Cꞌuj? Mʌꞌ. Rʌc tetaꞌb wa soc u camsicob mac? Mʌꞌ. Rʌc tetaꞌb wa quir u beticob carem beyaj? Mʌꞌ.
\v 30 Rʌc tetaꞌb wa quir u jawsic u yajir mac? Mʌꞌ. Rʌc tetaꞌb wa quir u tsicbar ich u jer tꞌʌn a mʌꞌ rajiꞌ yeriꞌ? Mʌꞌ. Rʌc tetaꞌb wa quir u yaꞌaricob baꞌ caj u najtaj tiꞌ, a cu tsicbar ich u jer u tꞌʌn a rajiꞌ mʌꞌ yeriꞌ? Mʌꞌ.
\v 31 Rajen yʌn cꞌatex tiꞌ Cꞌuj a baꞌ jach manan noj quir u tsꞌabʌr techex. Chen bajeꞌrer, bin in caꞌ in waꞌarej techex u jer baꞌ jach manan tsoy quir a jach cʌniquex a betiquexiꞌ.
\c 13
\s Bic tabar caꞌ ic yajquintex mac
\p
\v 1 Wa tin cꞌʌmaj Cꞌuj u mucꞌ quir in tsicbar ich u tꞌʌn u jer mac, cax u tsꞌa ten u mucꞌ quir in tsicbar an ten bic u yʌjmasir u tꞌʌn Cꞌuj cu tsicbar, chen mʌꞌ jin yajquintic mac, an ten bic Cꞌuj u cꞌat. A baꞌ quin betiqueꞌ jot ʌcʌtan u wich Cꞌuj.
\v 2 Wa yʌn ten u mucꞌ quir in tsicbar a baꞌ Cꞌuj cu yaꞌaric. Bayiriꞌ xan, wa yʌn ten u mucꞌ quir in najtic a baꞌ cu tar ich Cꞌuj, a mʌꞌ najtaꞌbir uch. Bayiriꞌ, wa yʌn ten u mucꞌ quir in najtic tu cotor baꞌ soc ij querex. Bayiriꞌ xan, wa tin cꞌʌmaj u mucꞌ Cꞌuj soc jach manan taj caj in wacsaj tin wor, mʌꞌ ju pec in wor chichin soc cꞌuchaꞌan in wor, caꞌ in waꞌarej tiꞌ wits: “Caꞌ xiquech”, jeroj cu quibic in tꞌʌn, cu bin. Chen wa mʌꞌ jin yajquintic mac an ten bic Cꞌuj u cꞌat, jach jot a tenoꞌ.
\v 3 Wa quin rʌc jʌsic tu cotor in baꞌtac quir in tsꞌic tiꞌ mac jach otsichʌjij. Bayiriꞌ, wa quin cꞌubic in winquirir quir u tocꞌar ich cꞌacꞌ. Chen wa mʌꞌ jin yajquintej mac an ten bic Cꞌuj u cꞌat, a raꞌ caj in betajoꞌ, mʌꞌ ju yam ten.
\p
\v 4 Quireꞌ a mac a cu yajquintic u jer mac an ten bic Cꞌuj u cꞌat, rajiꞌ nemʌꞌ biquiꞌ, jach tsoy yor xan. A mac a cu yajquintic u jer mac an ten bic Cꞌuj u cꞌat, rajiꞌ mʌꞌ ju tsꞌictar, quireꞌ cax cu yiric tu cotor mac yʌn tiꞌ, chen u bʌjiriꞌ mʌnaꞌ tiꞌ. Mʌꞌ ju tucrej u bʌjiriꞌ wa jach noj, mʌꞌ ju tucrej tu yor wa carem. 
\v 5 A mac a cu yajquintic u jer mac an ten bic Cꞌuj u cꞌat, rajiꞌ cu surʌctic u racꞌob, mʌꞌ ju chen tucr u nonoj bʌjiriꞌ, mʌꞌ ju tsꞌictar, mʌꞌ ju yajtar u yor quireꞌ a cu betaꞌ cꞌas tiꞌ.
\v 6 A mac a cu yajquintic u jer mac an ten bic Cꞌuj u cꞌat, rajiꞌ mʌꞌ ju quiꞌtar yoriꞌ quireꞌ a caj u yiraj a manob tu cꞌasir, cu chen quiꞌquintic yor quireꞌ a mac cu yiric a ju manob tu tsoyir.
\v 7 Mac a cu yajquintic u jer mac, cu mucꞌtic tu cotor baꞌ tiꞌ. Mʌꞌ ju yaꞌaric baꞌ tiꞌ mac. Rajiꞌ, tsꞌajaꞌan yor u quibic a baꞌ jach tsoy tiꞌ mac. Bayiriꞌ, cu pajic a baꞌ jach tsoy tiꞌ mac xan, cax robob acaꞌan tu siꞌpirob uch. A mac a cu yajquintic mac cu mucꞌtic baꞌ mʌꞌ ju wʌcꞌʌs tupsej yor.
\p
\v 8 Rajen, mʌꞌ ju cꞌuchur tu qꞌuinin wa ber caꞌ ic yʌn pꞌʌt ic yajquintiquex mac, mʌꞌ biqꞌuin. Quireꞌ rajraꞌ caj ic yajquintex mac. Chen a mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj, raꞌ cu bin tsꞌocar a tiꞌoꞌ. Baxuc a mac a tu cꞌʌm u mucꞌ tiꞌ Cꞌuj quir u tsicbar ich u jer tꞌʌn, a rajiꞌ mʌꞌ yeriꞌ, raꞌ cu bin tsꞌocar xan. Baxuc a mac a tu cꞌʌm u mucꞌ tiꞌ Cꞌuj soc yer tu cotor baꞌ a tiꞌ yʌn, raꞌ cu bin tsꞌocar xan. 
\v 9 Quireꞌ a baꞌ ij querex bajeꞌrer, bayiriꞌ xan, a baꞌ quic tsicbarex an ten bic Cꞌuj cu yaꞌaric, mʌꞌ toy ij quiꞌ rʌc najtexiꞌ.
\v 10 Chen caꞌ bin cꞌuchuc tu qꞌuinin u caꞌ bin u nupꞌsej tu cotor baꞌ, a ray u qꞌuininoꞌ a tu cotor baroꞌ, jeꞌ ic rʌc najtiquexeꞌ, mʌꞌ ju tꞌirir tiꞌ a baꞌ mʌꞌ jic najtiquexeꞌ.
\p
\v 11 Wa ber chichanen uch, quin tsicbar an ten bic a chichan cu tsicbar. A uchoꞌ, caj in tucraj an ten bic a chichan cu tucric. Bayiriꞌ xan, caj in najtaj baꞌ an ten bic a chichan cu najtic baꞌ. Chen wa ber caj chꞌijen a tenoꞌ jach xiben, jeroj caj in pꞌʌtaj baꞌ nanij caj in betaj tin chichanin.
\v 12 Chen bajeꞌrer, quij quiriquex irej wa toꞌonex quic pʌctiquex ich nen, tic chen cay irex, chen caꞌ bin cꞌuchuc tu qꞌuinin, jeroj, jach taj quic bin ij quirex. Bajejer, mʌꞌ toy in rʌc najtej tu cotor baꞌ, chen caꞌ bin cꞌuchuc tu qꞌuinin, jeꞌ in rʌc najtic tu cotor baꞌ an ten bic Cꞌuj yeren a tenoꞌ.
\v 13 Chen tiꞌ yʌn baꞌ cu bin pꞌatʌr munt qꞌuin, yʌn tres. Tuririꞌ, tuj ij cacsex tij corex tiꞌ Cꞌuj, munt qꞌuin cu pꞌatʌr aroꞌ. U jer baꞌ, cu bin pꞌatʌr munt qꞌuin, a baꞌ quic pajiquex caꞌ tac. U jer baꞌ, a cu bin pꞌatʌr munt qꞌuin, caꞌ ic yajquintex mac an ten bic Cꞌuj u cꞌat. Chen ich a ray tresoꞌ, yʌn tuririꞌ jach manan tsoy, caꞌ ic yajquintex u jer mac an ten bic Cꞌuj u cꞌat.
\c 14
\s Cu tsicbar a baꞌ Cꞌuj caj u sijatoꞌonex quir ic beyajex tiꞌ
\p
\v 1 Rajen, caj a jach pꞌis a bʌjex soc a betiquex a baꞌ u cꞌat Cꞌuj. Caꞌ a pacran yajquint a bʌjex. Bayiriꞌ xan, caꞌ a jach pacht a betiquex a baꞌ u Tajꞌor u Pixam Cꞌuj, a cu tar ich Cꞌuj, caj u tsꞌajaj techex u mucꞌ quir a betiquex. Chen a baꞌ jach noj, raꞌ caꞌ ic betex an ten bic Cꞌuj cu tsꞌic toꞌonex u tucur quir ic tsicbarex a baꞌ u cꞌat Cꞌuj.
\v 2 Quireꞌ a mac a cu tsicbar ich u tꞌʌn wa mʌnaꞌ mac cu najtic, rajiꞌ mʌꞌ ju tsicbar tiꞌ mac, cu chen tsicbar tiꞌ Cꞌuj. Rajen mʌnaꞌ mac cu najtic a baꞌ cu yaꞌaric, quireꞌ u Tajꞌor u Pixam Cꞌuj caj u tsꞌajaj tiꞌ u mucꞌ quir u tsicbar a baꞌ mʌnaꞌ mac caj u najtaj uch.
\v 3 Chen a mac a tsꞌab ten Cꞌuj u tucur soc u tsicbar a baꞌ u cꞌat Cꞌuj. Rajiꞌ cu tsicbar tiꞌ mac soc u yamtic tiꞌ, tan u chichquintaꞌr yorob tiꞌ yʌniꞌ. Tan u chichquintaꞌr yorob tu cu mucꞌyaj soc u tar u yor a tiꞌoboꞌ.
\v 4 Mʌꞌ ja wirej, a mac a cu tsicbar ich u tꞌʌn wa mʌꞌ najtaꞌbir, raꞌ cu chen yamtic u bʌjiririꞌ, chen a mac a cu tsicbar an ten bic Cꞌuj u cꞌat, quireꞌ tsꞌaꞌb u tucur ten Cꞌuj, raꞌ cu yamtic tu cotor a yacsmʌnob tu yorob.
\p
\v 5 Jach tsoy wa cꞌuchaꞌan a worex a tsicbarex ich u tꞌʌn a mʌꞌ najtaꞌbir ten mac, chen a baꞌ jach manan in cꞌat caꞌ tsibanʌquechex a baꞌ u cꞌat Cꞌuj, quireꞌ rajiꞌ caj u tsꞌaj u tucur techex. Mʌꞌ ja wirej, a baywoꞌ, ca yamtic a wet acsaꞌorirex wa ber ca tsicbarex a baꞌ u cꞌat Cꞌuj, quireꞌ rajiꞌ caj u tsꞌajaj techex u tucur. Cax mʌꞌ ja tsicbarex ich u tꞌʌn a mʌꞌ najtaꞌbir. Chen ix tiꞌ, wa yʌn mac a tsꞌab u mucꞌ quir u yaꞌaric tiꞌ mac a baꞌ cu yaꞌaric, a mac a cu tsicbar ich u tꞌʌn a mʌꞌ najtaꞌbir, jach tsoy aroꞌ, quireꞌ cu yamtic u yet acsaꞌorirob. Rajiꞌ quet yejer a mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj.
\v 6 Rajen in wet acsaꞌorirex, wa jix tiꞌ, quin cꞌuchur tuꞌ yʌnechex wa caꞌ bin tsicbanʌquen techex ich u tꞌʌn a mʌꞌ najtaꞌbir, jeꞌ wa jin yamtic techex wa mʌꞌ jin waꞌaric techex a baꞌ cu tsꞌabʌr ten Cꞌuj tiꞌ in tucur soc in tsicbar a baꞌ u cꞌat Cꞌuj? Wa mʌꞌ jin waꞌaraj techex a baꞌ tsꞌaꞌb ten Cꞌuj tiꞌ in tucur quir in tsicbar a baꞌ u cꞌat Cꞌuj, mʌꞌ jin camsiquechex an ten bic tiꞌ yʌn ich u tꞌʌn Cꞌuj.
\p
\v 7 Baxuc xan, wa jix tiꞌ yʌn pax, cax chur, a cu bin u pʌxic wa cu bin chur, chen mʌꞌ ju yʌn irej wa tsoy u jum u pax wa ju chur tsoy soc u quiꞌ yuwic mac, wa mʌꞌ ju yirej baxucoꞌ, cꞌas cu bin yubej mac.
\v 8 Wa yʌn xan, u xurub quir u yustaꞌ soc u pʌyic u winiquirob soldado caꞌ u muchꞌquint u bʌjob soc u bin u quinsob a mac a cu tarob quinsbir xan. Chen a mac a mʌꞌ ju quiꞌ ustaj caꞌ tacob, jeꞌ wa ju tarobeꞌ? Mʌꞌ ju bin u muchꞌquint u bʌjob.
\v 9 Baxuc xan techex, wa mʌꞌ ja quiꞌ tsicbarex caꞌ u najtej mac, jeꞌ wa ju najtej a baꞌ ca tsicbarex? Wa chen tꞌʌn a caꞌex caꞌ bin yubej.
\v 10 Mʌꞌ ja wirej, a teraꞌ ich yocꞌocabaꞌ, yʌn yaꞌab u tꞌʌnob. Jujuntur u tꞌʌnob cu najticob a mac a yerob. 
\v 11 Wa mʌꞌ jin najtej a baꞌ u jer winic cu tsicbar, jeroj iren a mac tanxer ruꞌum cʌjaꞌanen tiꞌ a raꞌ cu tꞌʌnoꞌ. Rajen a raꞌ cu tsicbar tenoꞌ, rajiꞌ irej wa tanxer winic cu tsicbar ten xan.
\v 12 Quireꞌ tan a jach pacht a betex a baꞌ a jeꞌ a cꞌʌmiquex tiꞌ Cꞌuj, caꞌ a jach pꞌis a bʌjex quir a cꞌatiquex tiꞌ aroꞌ, soc a yamtiquex a wet acsaꞌorirex.
\v 13 Rajen, wa mac cu tsicbar ich u tꞌʌn a mʌꞌ najtaꞌbir. Arex tiꞌ caꞌ u tꞌʌnej Cꞌuj soc rajiꞌ cu tsꞌic u najtej quir u yaꞌaric a baꞌ tan tu yaꞌaric tiꞌ yet acsaꞌorir. 
\v 14 Quireꞌ wa quin tꞌʌnic Cꞌuj ich u tꞌʌn a mʌꞌ najtaꞌbir ten mac, bayiriꞌ mʌꞌ jin najtic a ten xanoꞌ, rajen a baꞌ tin tꞌʌnaj Cꞌuj mʌꞌ baꞌwir tiꞌ, quireꞌ mʌꞌ ju yamtej mac.
\v 15 An bic quin betic tun? Jach manan tsoy caꞌ in tꞌʌnej Cꞌuj soc in najtic, bayiriꞌ xan, soc in wer baꞌ quir tiꞌ. Bayiriꞌ xan, jeꞌ in cꞌayic a baꞌ quin najtic yejer a baꞌ in wer.
\v 16 Wa ber ca chen tsicbarex ich u tꞌʌn a mʌꞌ najtaꞌbir ten mac, tan a waꞌaric: “Bayoꞌ Cꞌuj.” Bic tabar a mac a mʌꞌ tsꞌaꞌb u mucꞌ quir u najt a baꞌ ca tsicbarex jeꞌ wa ju cꞌuchur yor yaꞌaric: “Amén”, tu ca waꞌariquex: “Bayoꞌ Cꞌuj”?
\v 17 Cax a techexoꞌ, tan a tsicbarex ich u tꞌʌn a mʌꞌ najtaꞌbir ten u jer mac a tiꞌ yʌn tu ca muchꞌquint a bʌjex quir a wuꞌyiquex u tꞌʌn Cꞌuj. Tan a quiꞌ ariquex “Bayoꞌ Cꞌuj.” Mʌꞌ ja yamtiquex a tiꞌoꞌ quireꞌ mʌꞌ ju najt a baꞌ ca tsicbarex.
\v 18 A tenoꞌ quin waꞌaric: “Bayoꞌ Cꞌuj”, quireꞌ a tenoꞌ jach yaꞌab quin tsicbar ich u tꞌʌn a mʌꞌ najtaꞌbir chen cax jujuntur tu cotorechex.
\v 19 Chen wa ber quin muchꞌquintic in bʌj yejer in wet acsaꞌorirob tu cu yubicob u tꞌʌn Cꞌuj. Jach manan tsoy caꞌ tsicbanʌquen yejer cinco tꞌʌn a tan u najtic mac, cax caꞌ tsicbanʌquen yejer diez mil tꞌʌn ich u tꞌʌn a mʌꞌ tan u najtaꞌr ten mac.
\p
\v 20 In wet acsaꞌorirex, mʌꞌ ja chen tucriquex an ten bic a chichanoꞌ, quireꞌ robob mʌꞌ ju najtob baꞌ. Bayiriꞌ xan, mʌꞌ ja betiquex a baꞌ jach cꞌasoꞌ, chen cʌnex a chichanoꞌ, quireꞌ robob mʌꞌ toy u betob a baꞌ cꞌasoꞌ. Chen caꞌ a najtex baꞌ an ten bic mac toc chꞌijij.
\v 21 Mʌꞌ ja wirej, tiꞌ tsꞌibaꞌan ich u tꞌʌn Cꞌuj uch tu cu yaꞌaric: “Jeꞌ in tsicbar tiꞌ a ray macoꞌ ich u tꞌʌn wa mʌꞌ ju najtob. Jeꞌ in tsicbar tiꞌob ich u tꞌʌn a mac a tanxer cʌjaꞌanob, chen mʌꞌ ju bin yubob in tꞌʌn cax baxuc quin waꞌaric tiꞌob.” Cax baxuc cu yaꞌaric ich u tꞌʌn Cꞌuj uch.
\v 22 Rajen wa ber Cꞌuj cu cꞌʌnic mac caꞌ tsꞌicbanʌc tiꞌ u tꞌʌn a mʌꞌ najtaꞌbir u tꞌʌn. A jeꞌ tꞌʌnaꞌ quir u tsicbar tiꞌ a mac a mʌꞌ yacsmʌnob tu yorob quir u yesaꞌ tiꞌob bin u caꞌob ʌcʌtan tiꞌ Cꞌuj. Mʌꞌ rajiꞌ tiꞌ a tu yacsajob tu yorob. Chen a mac a tsꞌab u tucur ten Cꞌuj quir u tsicbar a baꞌ u cꞌat Cꞌuj, raꞌ cu bin u yamtic a mac a yacsmʌnob tu yorob, mʌꞌ tiꞌ a mac a mʌꞌ yerob Cꞌuj. 
\v 23 Wa tiꞌ yʌn tu cotor a yacsmʌnob tu yorob tu cu naj muchꞌquinticob u bʌjob quir yubicob u tꞌʌn Cꞌuj, bayiriꞌ xan, tu cotor mac a cu tsicbar, cu chen tsicbar ich u tꞌʌn a mʌꞌ najtaꞌbir. Wa jix tiꞌ cu yocar mac a mʌꞌ tan u najtic aroꞌ, wa bayiriꞌ xan cu yocar u jer mac, a mʌꞌ yer Cꞌuj, baꞌ cu bin u yaꞌaricob? Mʌꞌ wa, jeꞌ u tucricob jach rocochʌjechex?
\v 24 Chen wa tu cotor a mac a cu tsicbarob, cu tsicbarob quireꞌ tsꞌaꞌb u tucur ten Cꞌuj quir u tsicbarob a baꞌ u cꞌat Cꞌuj. Jeroj cax cu yocar tu ca muchꞌquint a bʌjex quir a wuꞌyiquex u tꞌʌn Cꞌuj a mac a mʌꞌ yer Cꞌuj, wa mac a mʌꞌ ju najtic tu cotor baꞌ. Chen wa ber cu yubic aroꞌ, jeꞌ u cꞌasaꞌr tiꞌ wa yʌn u siꞌpir. Jeroj tun, jeꞌ u yubic tu yor a baꞌ cꞌasir caj u betaj uch.
\v 25 Jeroj tun, jeꞌ u cꞌʌꞌotic a baꞌ caj u betaj uch. Jeroj tun, jeꞌ u xontar quir u cꞌujintic Cꞌuj, tan u toc aric wa jach taj tiꞌ yʌn Cꞌuj tu yʌnechex.
\s Bic tabar caꞌ a cꞌujintex Cꞌuj
\p
\v 26 Yʌn baꞌ quiriꞌ yaꞌab u jer caꞌ in waꞌaretechex in wet acsaꞌorirex. Wa ber caꞌ bin a muchꞌquint a bʌjex quir a wuꞌyiquex u tꞌʌn Cꞌuj, yʌn mac, jeꞌ u cꞌay, yʌn u jereꞌ jeꞌ u camsiquechex, yʌn u jereꞌ, jeꞌ u yaꞌaric a baꞌ tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj soc a werex. Yʌn u jereꞌ, jeꞌ u tsicbar ich u jer tꞌʌn wa rajiꞌ mʌꞌ yeriꞌ. Yʌn u jereꞌ, jeꞌ u yaꞌaric tiꞌ u yet acsaꞌorirob a baꞌ caj u yaꞌaraj a mac a tan tu tsicbar ich u jer tꞌʌn wa rajiꞌ mʌꞌ yeriꞌ. Caꞌ a betex tu cotor aroꞌ soc cꞌuchaꞌan a worex a yamtiquex tu cotor mac.
\v 27 Wa tiꞌ yʌn mac a cu tsicbar ich u jer tꞌʌn wa rajiꞌ mʌꞌ yeriꞌ, arex caꞌ tsicbanʌc, cax wa yʌn dos wa tres u cꞌat u tsicbarob xan. Jariꞌ ar u tar tu pach a pʌyber tsicbanʌjij hasta jujuntur cu tsꞌocar u tsicbarob. Arex tiꞌ u jer mac, caꞌ u toc arej baꞌ cu yaꞌaricob a tsicbanʌjob ich u jer tꞌʌn, a mʌꞌ yerob soc yerob u yet acsaꞌorirob.
\v 28 Wa mʌnaꞌ mac tiꞌ yʌn quir u toc aric a baꞌ tsicbajnʌjij mac sam, jeroj tun, jach manan tsoy tiꞌ wa rajiꞌ caꞌ u yʌn mʌc u chiꞌ. Arex tiꞌ mʌꞌ ju yʌn tsicbar tu cu muchꞌquinticob u bʌjob quir u yubicob u tꞌʌn Cꞌuj, chen arex tiꞌ caꞌ tsicbanʌc tiꞌ Cꞌuj ich u jer u tꞌʌn, wa rajiꞌ mʌꞌ yeriꞌ quir u yamtic u bʌjiriꞌ, chen mʌꞌ tu cu cꞌujintic Cꞌuj.
\v 29 Bayiriꞌ xan, a mac a cu tsicbar quireꞌ tsꞌaꞌb u tucur ten Cꞌuj quir u yaꞌaric a baꞌ u cꞌat Cꞌuj. Arex tiꞌ wa chen dos wa tres cu tsicbarob soc u jer mac a tiꞌ yʌnob cu tucricob tub u tar u tꞌʌn wa cu tar ich Cꞌuj wa mʌꞌ tiꞌ u tar ich Cꞌuj.
\v 30 Chen wa tiꞌ yʌn mac tu ca cꞌujtinquex Cꞌuj, a curucbaroꞌ, wa Cꞌuj caj u tsꞌajaj u tucur quir u tsicbar a baꞌ u cꞌat Cꞌuj, jeroj chaꞌex u tsicbar techex. Arex tiꞌ mac a tiꞌ toy cu tsicbar caꞌ u jamach pꞌʌt u tsicbar.
\v 31 A baxucoꞌ, a techexoꞌ, jeꞌ u cꞌuchur a worex a tsicbarex jujunturechex, caꞌ bin cꞌuchuc ta qꞌuinex a baꞌ tsꞌaꞌb ten Cꞌuj ta tucurex quir a tsicbarex a baꞌ u cꞌat Cꞌuj soc tu cotor mac a tiꞌ yʌn tu ca cꞌujintiquex Cꞌuj jeꞌ u bin u cʌnicob. Bayiriꞌ, soc a rʌc chichquintiquex u yorob a wet acsaꞌorirex.
\v 32 Quireꞌ tu cotor a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj, yʌn caꞌ u picꞌ u bʌj soc caꞌ tsicbanʌc u jer, cax wa ber u cꞌat Cꞌuj.
\v 33 Quireꞌ Cꞌuj mʌꞌ ju cꞌat yiric mac xaxacaꞌan u tucur tu ca cꞌujintiquex Cꞌuj, rajiꞌ u jach cꞌat yirej quet a worex.
\p A baxucoꞌ, caꞌ u yʌn betob tu cotorob tu ca muchꞌquint a bʌjex quir a wuꞌyiquex u tꞌʌn Cꞌuj, a mac a yacsmʌnob tu yorob.
\v 34 A xquicoꞌ, caꞌ u yʌn mʌc u chiꞌ wa ber cu muchꞌquinticob u bʌjob quir u yubicob u tꞌʌn Cꞌuj, quireꞌ mʌꞌ tsoy u tsicbar quireꞌ ich u tꞌʌn Moisés cu yaꞌaric: “Mʌꞌ ju ocar xquic tsꞌurir.” Baxuc cu yaꞌaric Moisés uch.
\v 35 Wa ju cꞌat u yaꞌaricob baꞌ, quireꞌ mʌꞌ ju najtobiꞌ, ar u cꞌatob tiꞌ u mam caꞌ bin uruc tu yatoch. Quireꞌ a xquicoꞌ cu suractic mac wa cu tsicbarob tu cu muchꞌquint u bʌjob a yacsmʌnob tu yorob quir yubicob u tꞌʌn Cꞌuj. 
\p
\v 36 Mʌꞌ ja chen tucriquex wa cꞌuchaꞌan a worex a bʌjiririꞌex a tetiquex a baꞌ cꞌuchaꞌan a worex a betex. Quireꞌ u tꞌʌn Cꞌuj mʌꞌ pʌyber cꞌuchij techex. Mʌꞌ chen techex a wacsmʌnex ta worex.
\v 37 Wa tiꞌ yʌn mac tu yʌnechex a cu tucric wa rajiꞌ tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj, wa tiꞌ yʌn u jer cu yaꞌaric tsꞌaꞌb u mucꞌ ten Cꞌuj quir u betic u beyaj Cꞌuj, jeroj tun, caꞌ u najtej a baꞌ caj in tsꞌibtaj tiꞌ quireꞌ, jach taj Cꞌuj caj u yaꞌaraj ten.
\v 38 Wa mʌꞌ ju najtaj quireꞌ mʌꞌ ju cꞌat, chaꞌex tu junan quireꞌ Cꞌuj yer.
\p
\v 39 Rajen in wet acsaꞌorirex, yʌn jach pꞌis a bʌjex quir a tsicbarex an ten bic Cꞌuj u cꞌat quireꞌ tsꞌaꞌb a tucurex ten Cꞌuj a techexoꞌ. Bayiriꞌ xan, mʌꞌ ja yʌn mʌꞌquic u ber a mac a ju cꞌat u tsicbar ich u tꞌʌn wa rajiꞌ mʌꞌ yeriꞌ.
\v 40 Chen a techexoꞌ, yʌn betex tu cotor yʌn betbir, a jach tsoyoꞌ. Yʌn betex jujuntur an ten bic toc araꞌan techex.
\c 15
\s Bic tabar mac jeꞌ u riqꞌuir ich u quimirir
\p
\v 1 Bajeꞌrer in wet acsaꞌorirex, a tenoꞌ in cꞌat in wʌcꞌʌs cꞌasic techex soc a wʌcꞌʌs cꞌʌꞌotiquex an ten bic caj in waꞌaraj techex uch yocꞌor u jach tsoyir u tꞌʌn Cꞌuj. Quireꞌ caj a cꞌʌmajex aroꞌ, bayiriꞌ xan, jach chichij a worex tiꞌ u tꞌʌn Cꞌuj.
\v 2 Quireꞌ aroꞌ xan, tacaꞌanechex. Mʌꞌ ju bin tsꞌabir a mucꞌyajex wa ca quiꞌ cʌnantiquex a baꞌ caj in waꞌaraj techex. Chen wa mʌꞌ ta quiꞌ cʌnan ta worex, jeroj jot tu ta wacsex ta worex.
\p
\v 3 A tenoꞌ, caj in masaj techex a baꞌ caj in cꞌʌmaj tiꞌ Cꞌuj, a baꞌ jach nojoꞌ. Caj in waꞌaraj techex Cristo caj quimij quir u boꞌotic u boꞌorir ic siꞌpirex an ten bic caj yaꞌaraj tu tsꞌibaꞌan u tꞌʌn Cꞌuj.
\v 4 Caj in waꞌaraj techex butꞌaꞌan u baquer ich u japnin tunich. Jeroj, caj riqꞌuij quir u wʌcꞌʌs cuxtar mʌnaꞌ u nup u qꞌuinin. Baxuc tiꞌ tsꞌibaꞌan ich u tꞌʌn Cꞌuj xan.
\v 5 Jeroj tuneꞌ, Jesús caj u yes u bʌj soc u wʌcꞌʌs irir ten Pedro. Jeroj tuneꞌ, caj u wʌcꞌʌs es u bʌj soc yirir ten tu cotor u camsʌwinicob a caj u tuchiꞌtaj caꞌ xicob u tsecꞌtob u tꞌʌn, a docejoꞌ.
\v 6 Jeroj pachir caj irir ten a manan quinientos yet acsaꞌorirob tu muchꞌaꞌanob. Toc jumpuriꞌ caj u yirajob Jesús. A ray winicoboꞌ robob, tiꞌ toy cuxaꞌan yaꞌab, chen yʌn jun yarob xan quimenob.
\v 7 Jeroj caj u yes u bʌj tiꞌ Jacobo, caj tsꞌoc aroꞌ, caj u yes u bʌj tiꞌ tu cotor mac a caj u tuchiꞌtaj caꞌ u tsecꞌtob u tꞌʌn.
\p
\v 8 Jach pachir tu cotor aroꞌ, Jesús caj u yesaj u bʌj ten quir u tetiquen caꞌ in tsecꞌt u tꞌʌn an ten bic caj u tetaj u camsʌwinicob uch. Chen yʌn mac u soꞌsoc aricob wa mʌꞌ ju tetajen Jesús a ray u qꞌuininoꞌ.
\v 9 Mʌꞌ ja wirej, a tenoꞌ ich a mac a yʌjtseqꞌuirob Cristo, a tenoꞌ mʌꞌ nojeniꞌ. Quin wuꞌyic tin wor jach joten, chen quireꞌ tsoy tu tꞌʌn Cꞌuj, rajiꞌ caj u tetajen soc yʌjtseqꞌuiren Cristo.
\v 10 Chen quireꞌ tsoy tu tꞌʌn Cꞌuj a baꞌ caj u betaj ten Cꞌuj, rajen a tenoꞌ a ten biquen bajeꞌrer. Quireꞌ tsoy tu tꞌʌn Cꞌuj a baꞌ betaꞌb ten Cꞌuj ten, mʌꞌ tu sʌtajiꞌ. Mʌꞌ ja wirej, jach manan a tenoꞌ beyanʌjen tiꞌ u beyajob tu cotor a mac a tuchiꞌtaꞌb ten Cristo quir u tsecꞌtaꞌr u tꞌʌn. Chen aroꞌ caj in betaj yejer u mucꞌ Cꞌuj, quireꞌ jach maman tsoy tu tꞌʌn Cꞌuj caj u betaj ten.
\v 11 Rajen quin waꞌaric techex, cax wa quin tsicbar a tenoꞌ, wa cu tsicbarob a mac a tuchiꞌtaꞌb ten Cristo, raꞌiriꞌ tꞌʌn caj in tsecꞌtajob techex, raꞌiriꞌ xan a baꞌ ca wacsiquex ta worex a tiꞌoꞌ.
\s Bic tabar ic riqꞌuirex ich ij quimirirex
\p
\v 12 Quireꞌ caj in tsecꞌtob techex, rajiꞌ Cristo toc ricꞌsaꞌb ten Cꞌuj ich u quimirir, biquinin yʌn jun yarob tu yʌnechex a cu yaꞌaricob wa ju quimirir mʌꞌ ju bin ricꞌsaꞌbir ten Cꞌuj quir u wʌcꞌʌs cuxtarob?
\v 13 Wa raꞌ taj a baꞌ cu yaꞌaricob, aroꞌ u cꞌat yaꞌaric mʌꞌ ricꞌsaꞌb Cristo ich u quimirir.
\v 14 Mʌꞌ ja wirej, wa mʌꞌ ricꞌsaꞌb Cristo ich u quimirir, jeroj tun, mʌnaꞌ baꞌ quir in tsecꞌticob, bayiriꞌ xan, mʌnaꞌ baꞌ quir a wacsiquex ta worex tiꞌ.
\v 15 Mʌꞌ ja wirej, wa mʌꞌ tajiꞌ caꞌ ricꞌsac mac ich u quimirir, jeroj tun, bayiriꞌ xan, mʌꞌ tajiꞌ wa ricꞌsaꞌb Cristo ten Cꞌuj ich u quimirir uch.
\v 16 Quireꞌ wa mʌꞌ ju riqꞌuij mac ich u quimirir jeroj tun, a Cristojoꞌ, tiꞌ toy yʌn ich u quimirir.
\v 17 Bayiriꞌ xan, wa mʌꞌ ricꞌsaꞌb Cristo ten Cꞌuj ich u quimirir mʌꞌ baꞌwir caj a wacsajex ta worex tiꞌ Cristo, quireꞌ mʌꞌ boꞌtaꞌb u boꞌorir a siꞌpirex.
\v 18 Bayiriꞌ xan, a mac a toc yacsmʌnob tu yorob tiꞌ Cristo, a mac bajeꞌrer quimenob, jeroj tun, jeꞌ u bin tsꞌabir u mucꞌyajob.
\v 19 Wa tiꞌ toy cuxaꞌanoꞌonex ich yocꞌocab, quic pajiquex wa pachir jeꞌ u taquicoꞌonex Cristo caꞌ bin quimicoꞌonex, chen ix tiꞌ u tusabar ten Cristo toꞌonex. Ay quen, jach manan otsichʌjenob ich yococab.
\p
\v 20 Chen jach taj Cristo caj riqꞌuij ich u quimirir. Rajiꞌ pʌyber ich a mac a riqꞌuij ich u quimirir, ich tu cotor mac a quimenoboꞌ.
\v 21 An ten bic tu cotor mac, tu yʌnxchun a baꞌ u ber tiꞌob, rajen quij quiminex quireꞌ a baꞌ caj u betaj Adán uch. Bayiriꞌ xan, tu cotor mac, jeꞌ u riqꞌuir ich u quimirir quireꞌ a baꞌ caj u betaj Cristo.
\v 22 Quireꞌ tu cotor mac quimij, quire a baꞌ caj u betaj Adán. Mʌꞌ ja wirej, rajen caj u masa u siꞌpir Adán tiꞌ tu cotor mac. Bayiriꞌ xan, tu cotor mac wa cu yacsic tu yor tiꞌ Cristo jeꞌ u riqꞌuir ich u quimirireꞌ.
\v 23 A ju qꞌuininoꞌ, raꞌ toc tetaꞌb ten Cꞌuj uch wa ber caꞌ bin ricꞌsacoꞌonex. Mʌꞌ ja wirej, a Cristojoꞌ, rajiꞌ pʌyber riqꞌuij. Jeroj caꞌ bin cꞌuchuc tu qꞌuinin cu yuꞌur Cristo, tu cotor a mac a yacsmʌnob tu yorob tiꞌ jeꞌ u riqꞌuir ich u quimirir xan.
\v 24 Cu tsꞌocar u xur tꞌʌn, wa ber rajiꞌ cu bin u cꞌubic tiꞌ ic Tetex Cꞌuj a baꞌ tsꞌaꞌb u reyintej uch. Mʌꞌ ja wirej, a raꞌ u quininoꞌ, jeꞌ u rucꞌsic tu cotor rey a tu cu reyinticob u winiquirob. Jeꞌ u rucꞌsic xan, tu cotor jach tsꞌur yejer a mac a cu beticob a baꞌ u cꞌat teꞌ ich yococab.
\v 25 Quireꞌ Cristo caꞌ u yʌn reyintej caꞌ tac chꞌejsaꞌbir ten Cꞌuj tu cotor mac a cu pꞌacticob a tiꞌoꞌ, soc rajiꞌ cu bin u reyintic tu cotor baꞌ.
\v 26 Pachir tu cotor baꞌ, jeroj tuneꞌ, cu bin u chꞌejsic tu cotor baꞌ a quic pꞌactiquex, raꞌ ic quimirirexoꞌ. 
\v 27 Quireꞌ, baxuc tiꞌ tsꞌibaꞌan: “Tu cotor baꞌ a tiꞌ yʌnoꞌ, a Cꞌujoꞌ, caj u tetaj, soc rajiꞌ caꞌ reyintac ten tu cotor baꞌ, a tiꞌ yʌn.” Chen wa ber caj u yaꞌaraj: “Tu cotor baꞌ a tiꞌ yʌn caꞌ reyintac”, aroꞌ mʌꞌ ju cꞌat yaꞌarej wa Cristo cu bin u reyintej Cꞌuj. Mʌꞌ ja wirej, rajiꞌ caj u tsꞌaj u mucꞌ quir u reyintic tu cotor baꞌ a tiꞌ yʌn.
\v 28 Wa ber cu bin ocar u reyinbir Cristo tu cotor baꞌ a tiꞌ yʌn, jeroj tun, rajiꞌ Jesús xan, cu reyintic Cꞌuj a mac a tsꞌaꞌb u mucꞌ quir u reyintaꞌ ten tu cotor baꞌ a tiꞌ yʌn, soc rajiꞌ ic Tetex Cꞌuj jach manan rey. 
\p
\v 29 Bayiriꞌ in cꞌat in wʌcꞌʌs aric techex, wa mʌꞌ ju riqꞌuir a mac a quimin, biquinin acsaꞌb jaꞌ tu joꞌr mac quir u yamtic a mac quimen? Biquinin, wa yʌn acsaꞌbir jaꞌ tu joꞌr mac quireꞌ u baquer a mac xan?
\p
\v 30 Rajen baꞌwir quin mucꞌtic u chuquicob in pach tu cotor u qꞌuinin wa ja cu quiminoꞌ mʌꞌ ju bin ricꞌsaꞌ? 
\v 31 In wet acsaꞌorirex, rajraꞌ quin wuꞌyic wa tabar in quinsaꞌ. A tenoꞌ, quin waꞌaric techex aroꞌ quireꞌ ic pacran er ic bʌjex, quireꞌ caj ij cacsajex tij corex tiꞌ ic Jaj Tsꞌurirex Jesucristo.
\v 32 Bajeꞌrer, a tenoꞌ, caj baꞌteꞌnʌjenoꞌ yejer cꞌaxir bʌcꞌ ich u cajar Efesio, quireꞌ in jach bʌjiriꞌ in cꞌat, baꞌwir ten wa quin betic aroꞌ wa mʌꞌ ju riqꞌuir mac ich u quimirir? Yʌn mac cu tus tucric wa ber caꞌ bin quimic, jeroj tsꞌoquij baꞌ, mʌnaꞌ. Biquinin, mʌꞌ ju chen aꞌar: “Cux caꞌ janacoꞌonex, caꞌ ucꞌurnʌcoꞌonex xan, quireꞌ tabar ij quiminex, jaj ix tʌcoj samʌn.”
\p
\v 33 Mʌꞌ ja chaꞌiquex mac u tus aric techex, quireꞌ araꞌb a mac a cu manob tu cꞌasir a cu pʌyicob u jer mac quir u yacsic u siꞌpir xan, wa rajiꞌ ix tiꞌ cu sayʌr tu pachob.
\v 34 Toc pꞌʌtex a baꞌ ca soꞌsoꞌ tucriquexoꞌ soc a quiꞌ tucriquex an ten bic caꞌ a yʌn betex. Mʌꞌ ja wirej, tiꞌ yʌn yaꞌab mac ich a cajarex Corintio mʌꞌ toy u najtajob Cꞌuj. Aroꞌ quin waꞌaric techex soc a pʌyic a surʌquirex. 
\s Bic tabar cu bin riqꞌuir mac ich u quimirir
\p
\v 35 Chen yʌn mac jeꞌ u yaꞌariqueꞌ: “Bic tabar cu bin ricꞌsaꞌbir u quimirir soc u wʌcꞌʌs cuxtar? Bic tabar u winquirirob wa ber caꞌ bin ricꞌsacob ten Cꞌuj ich u quimirir?”
\v 36 A mac a cu tsicbar a baxucoꞌ, jach chich u joꞌr. Mʌꞌ ja wirej, wa mʌꞌ ju quimij u winquirir a yijiroꞌ, mʌꞌ ju jocꞌar u pixam u yijir xan.
\v 37 U yijir a baꞌ ca pʌqꞌuiquex, cax wa yijir trigo wa ju jer a pʌcꞌarex, chen a baꞌ cu jocꞌar quir u chꞌijir, u tirir tiꞌ u winquirir.
\v 38 Chen a Cꞌujoꞌ, cu betic a baꞌ u cꞌat, tu cotor pʌcꞌar rajiꞌ cu cuxquintic soc u yʌntar u winquirir. Rajen, jujuntur pʌcꞌar a cu chꞌijir yʌn u winquirir an ten bic yʌn tiꞌ uch.
\v 39 Bayiriꞌ xan, tu cotor u bʌqꞌuer mʌꞌ raꞌiriꞌ, chen u tirir tiꞌ. Mʌꞌ ja wirej, a winicoꞌ u tirir tiꞌ u bʌqꞌuer. A bʌcꞌoꞌ, u tirir tiꞌ xan. A chꞌichꞌoꞌ u tirir tiꞌ xan. A cʌyoꞌ u tirir tiꞌ xan.
\v 40 U tirir tiꞌ a baꞌ yʌn ich caꞌanan xan. Mʌꞌ quet yejer a baꞌ tiꞌ yʌn a baꞌ a teraꞌ yocꞌocab. A baꞌ tiꞌ yʌn ich caꞌananoꞌ, jach manan tsoy caj betaꞌb soc tiꞌ yʌn ich caꞌanan. Bayiriꞌ xan, a baꞌ betaꞌb soc tiꞌ yʌn ich yocꞌocab, jach manan tsoy caj betaꞌb.
\v 41 A ic yumoꞌ, u tirir tiꞌ u sasirir, bayiriꞌ xan, ic nʌꞌ, u tirir tiꞌ u sasirir. Bayiriꞌ xan, a saboꞌ, u tirir tiꞌ u sasirir, chen u tirir tiꞌ u sasirir tiꞌ jujuntur a saboꞌ.
\v 42 Bayiriꞌ xan, caꞌ bin cꞌuchuc tu qꞌuinin cu riqꞌuir mac ich u quimirir. Wa ber caj muc u bʌqꞌuer mac, cu toc rʌc tsꞌucur. Chen wa ber caꞌ bin wʌcꞌʌs ricꞌsac u baqꞌuer mac mʌꞌ ju bin quimin mʌꞌ biqꞌuin.
\v 43 Wa ber caj mucaꞌb u bʌqꞌuer mac, jot aroꞌ. Chen wa ber caꞌ bin ricꞌsac, jeroj jeꞌ u jocꞌar jach manan tsoyeꞌ. Wa ber caj mucaꞌb u baqꞌuer mac, raꞌ mʌnaꞌ u mucꞌ a tiꞌoꞌ, chen caꞌ bin wʌcꞌʌs ricꞌsac, jeroj jeꞌ u tar u mucꞌ jach manan chichir u mucꞌ.
\v 44 Wa ber caꞌ bin mucuc u baqꞌuer mac, rajiꞌ irej an ten bic tu cotor u baqꞌuer mac a mucbir. Chen wa ber caꞌ bin ricꞌsac quir u wʌcꞌʌs cuxtaroꞌ, jeroj, u tirir tiꞌ, quireꞌ Cꞌuj caj u waysaj soc ricꞌben. Jeꞌ u tirir tiꞌ, tu cotor a bʌqꞌuer mac, a tiꞌ yʌn uch, quireꞌ a Cꞌujoꞌ, jeꞌ u waysic soc ricꞌben u winquirir.
\p
\v 45 A baxucoꞌ, caj tsꞌibtaꞌb ten a mac a tsꞌaꞌb u tucur ten Cꞌuj quir u tsꞌibtic a baꞌ u cꞌat Cꞌuj. Rajiꞌ caj u yaꞌaraj tu cu tsꞌib: “A Adánoꞌ, a mac a pʌyber xiboꞌ, a betaꞌb ten Cꞌuj caj tsꞌaꞌb u cuxtar ten Cꞌuj.” Chen Cristo, a mac pachir, a rajiꞌ u tsꞌajmʌn toꞌonex ricꞌben cuxtaroꞌ. 
\v 46 Quireꞌ mʌꞌ raꞌ u yʌn batꞌan tar a ricꞌben winquiriroꞌ, a caj tar pʌyber, chen a raꞌ u jach winquiriroꞌ a tu yʌnx chun tu betaj, jeroj pachir jeꞌ u tar a ricꞌben winquirireꞌ.
\v 47 Mʌꞌ ja wirej, a pʌyber xiboꞌ, tiꞌ u tar tiꞌ a jeꞌ ruꞌumaꞌ, rajiꞌ betaꞌb tiꞌ a jeꞌ ruꞌumaꞌ. Chen a xiboꞌ a ju jeroj, a tar u tar ich caꞌananoꞌ, rajiꞌ Cristo. Quireꞌ an ten bic a pʌyber xiboꞌ, caj betaꞌb tiꞌ a jeꞌ ruꞌumaꞌ, bayiriꞌ xan, tu cotor mac a tiꞌ yʌn xan.
\v 48 Mʌꞌ ja wirej, an ten bic u winquirir tiꞌ a mac a caj tarij ich caꞌanan uch, bayiriꞌ xan jeꞌ u yʌn tar u winquirirob a mac a jeꞌ u bin caꞌananoꞌ.
\v 49 Quireꞌ a toꞌonex tiꞌ yʌnoꞌonex an ten bic pʌyber a xiboꞌ, a betaꞌb ten Cꞌuj tiꞌ u noy ruꞌum, baxuc xan, a toꞌonexoꞌ jeꞌ ic yʌn tarex an ten bic a xiboꞌ a tarij ich caꞌananoꞌ.
\p
\v 50 Rajen in wet acsaꞌorirex, quin waꞌaric wa jic winquirirex a yʌn toꞌonex bajeꞌrer, rajiꞌ mʌꞌ cꞌuchaꞌan yor u yocar ich caꞌanan tu quic bin ic reyintex Cꞌuj. Quireꞌ raꞌ cu bin quimin, mʌꞌ biqꞌuin cꞌuchaꞌan yor u yocar tu mʌnaꞌ cꞌʌs baꞌ cu bin quimin.
\v 51 A bajeꞌreraꞌ, quin bin in waꞌaric techex a baꞌ Cꞌuj caj u tsꞌajaj in najtic a tenoꞌ, a baꞌ mʌꞌ ju tsꞌajaj u najtic tiꞌ mʌnaꞌ mac uch. Tu cotoroꞌonex mʌꞌ jic bin quiminex, chen tu cotoroꞌonex cu bin cꞌʌmbir u jer ic winquirirex a ricꞌbenoꞌ.
\v 52 Jach seb bajen jun muts a ichoꞌ, wa ber cu bin ustaꞌbir u mascabir quir u yustaꞌr, a rajiꞌ yʌnin Cꞌujoꞌ. Quireꞌ wa ber cu bin ustaꞌbir u mascabir a raꞌ yʌnin Cꞌujoꞌ quir u yustaꞌr, jeroj tun, a mac a quimij uch, jeꞌ u riqꞌuir toc yejer u ricꞌben u winquirirob, a mʌꞌ ju quiminoboꞌ mʌꞌ biqꞌuin. A ray u qꞌuinin xanoꞌ, a toꞌonex xanoꞌ, jeꞌ ij cꞌʌmiquex ic ricꞌben winquirirexeꞌ. 
\v 53 Quireꞌ a jeꞌ winquiriraꞌ a cu quimineꞌ, yʌn waysaꞌbir soc mʌꞌ ju quimin. Mʌꞌ ja wirej, a jeꞌ ic winquirirexeꞌ jeꞌ u quimineꞌ, rajen yʌn waysaꞌbir soc mʌꞌ ju quimin. 
\v 54 Rajen, a jeꞌ ic winquirirex a cu bin quimin bin u caꞌ waysaꞌbir ten Cꞌuj, soc mʌꞌ ju quimin, soc mʌꞌ biqꞌuin cu bin quimin. Jeroj tuneꞌ, jeꞌ u nupꞌsic a baꞌ araꞌb ich u tꞌʌn Cꞌuj tu cu yaꞌaric: “A ju quimiriroꞌ toc tsꞌoquij, mʌꞌ biqꞌuin cu bin quimin mac.
\v 55 Teꞌen mac cu bin quimin bajeꞌrer? Teꞌen a mac yʌn bin mucbir, tu yʌnobiꞌ?” Baxuc caj yaꞌaraj ich u tꞌʌn Cꞌuj uch.
\v 56 Jeroj, wa jix tiꞌ mʌnaꞌ u siꞌpir, jeroj xan, mʌnaꞌ mac jeꞌ u quimin. Bayiriꞌ xan, wa mʌnaꞌ u tꞌʌn Moisés, mʌꞌ ju bin esbir wa yʌn u siꞌpir mac.
\v 57 Rajen a toꞌonexoꞌ, quij cariquex tiꞌ Cꞌuj: “Bayoꞌ Cꞌuj caj otsir a wirenob.” Quireꞌ mʌꞌ ju cꞌuchur u yor toꞌonex a ij quimiriroꞌ quireꞌ a baꞌ caj u betaj Jesucristo toꞌonex.
\p
\v 58 Rajen in wet acsaꞌorirex, jach pꞌis a bʌjex caꞌ sayʌquex tu pach Jesucristo. Mʌꞌ ja pꞌʌtex u tꞌʌn Cꞌuj. Toc betex u beyaj Cꞌuj, quireꞌ a werex a baꞌ beyaj ca betiquex tiꞌ Cꞌuj mʌꞌ ju bin satʌr.
\c 16
\s U sijbar taqꞌuin quir u yamtic u yet acsaꞌorirob
\p
\v 1 Bayiriꞌ bajeꞌrer, jeꞌ in waꞌaric techex bic tabar caꞌ a muchꞌquintex a baꞌ ca bin a sijex quir a yamtiquex a wet acsaꞌorirex ich u cajar Jerusalén, an ten bic caj in waꞌaraj tiꞌ a yacsmʌnob tu yorob ich u ruꞌumin Galacia caꞌ u betob xan, bayiriꞌ xan, caꞌ a betex xan. 
\v 2 Caꞌ bin cꞌuchuc tu qꞌuinin a cu yʌnxchun semana, rajiꞌ domingo, caꞌ a ricꞌsiquex junxotꞌ a baꞌ caj a jarex tu beyanʌjechex. Jamach yajquintex aroꞌ, soc caꞌ bin cꞌuchuquen mʌꞌ ja bin a muchꞌquintex a ray a taqꞌuinexoꞌ. 
\v 3 Jeroj tun, caꞌ bin cꞌuchuquen tu yʌnechex, jeroj, jeꞌ in tsꞌibtic juꞌun soc a mac a cu bin u puricob a taqꞌuinex a caj a muchꞌquintex tiꞌ a wet acsaꞌorirex ich u cajar Jerusalén, soc u yet bin a ray juꞌunoꞌ, yejer a mac a caj a tetex quir u binob.
\v 4 Wa tsoy tin tꞌʌn caꞌ xiquen robob caꞌ xiquenob yejerob. 
\s Quir u bin Pablo
\p
\v 5 Chen jeꞌ in tar in wirechex wa ber caꞌ bin tsꞌocac in chꞌʌctic tu cotor u cajar ich u ruꞌumin Macedonia. Mʌꞌ ja wirej, bin in caꞌ chꞌʌctic u ruꞌumin Macedonia. 
\v 6 Jaj ix tiꞌ in pꞌatʌr ta wicnʌnex, cax caꞌ bin cꞌuchuc tu qꞌuinin queꞌer. Jeroj tun, jeꞌ u cꞌuchur a worex a yamtiquenex quir in bin ich u jer ruꞌum, wa cajar, a tub in cꞌat in bin.
\v 7 Quireꞌ mʌꞌ jin cꞌat in chen jamach iriquechex, chen a tenoꞌ in cꞌat in pꞌatʌr ta wicnʌnex yaꞌab u qꞌuinin wa jic Jaj Tsꞌurirex u cꞌat.
\v 8 Chen bajeꞌrer, quin tucric in pꞌatʌr teraꞌ ich u cajar Efesio hasta cu man u qꞌuinin u quiꞌquiꞌ janʌn, a Pentecostésoꞌ. 
\v 9 Quireꞌ jach cꞌuchij tu qꞌuinin quir in betic jach yaꞌab u beyaj teraꞌ tiꞌ in Tet Cꞌuj. Chen yʌn yaꞌab mac xan mʌꞌ quet yor yejer u beyaj Cꞌuj, quireꞌ cu pꞌacticenob a tenoboꞌ.
\p
\v 10 Wa cu cꞌuchur Timoteo tu yʌnechex, yamtex a tiꞌoꞌ soc quiꞌ yor u pꞌatʌr ta wicnʌnex, quireꞌ cu betic u jach beyaj Cꞌuj an ten bic a tenoꞌ.
\v 11 Rajen mʌꞌ ja chaꞌiquex macob caꞌ pꞌastacob Timoteo. Chen yamtex a tiꞌ, soc mʌnaꞌ baꞌ cu tucric, soc seb u cꞌuchur tu yʌnen, quireꞌ quin pajic caꞌ bin uruc yejer u jer ij quet acsaꞌorirex.
\p
\v 12 Bayiriꞌ xan, in cꞌat in waꞌaric techex ij quet acsaꞌorirex Apolos. Caj in chich araj caꞌ xic tu yʌnechex, soc u yet binac u yet acsaꞌorirob wa ber caꞌ bin xicob, chen mʌꞌ ju cꞌat. Rajen, jeꞌ u bin, caꞌ bin tac tu qꞌuinin. 
\s Cu tsꞌocar u tꞌʌn Pablo
\p
\v 13 Quiꞌ pꞌir a wichex, mʌꞌ ja chaꞌiquex mac u tusaric techex. Caꞌ chichac a worex tiꞌ u tꞌʌn Cꞌuj. Chichquint a worex soc mʌꞌ ja pꞌʌtiquex u tꞌʌn Cꞌuj. Chichquin ta worex tiꞌ Cꞌuj soc irechex a mac jach xiboꞌ, soc mʌꞌ irechex a chichanoꞌ. Chichquint a worex tu ca wacsic ta worex.
\v 14 Cax tu cotor a baꞌ ca betiquexeꞌ, chaꞌ u yiriquechex mac bic a pacran yajquintiquex a bʌjex.
\p
\v 15 Bayiriꞌ xan, a werex in wet acsaꞌorirex, wa tu cotor u bʌjob Estéfanas, wa robob a caj u yʌn acsob tu yorob ich u ruꞌumin Acaya. Bayiriꞌ xan, a werex robob rajraꞌ cu yamticob a mac a cu yacsicob tu yorob.
\v 16 A tenoꞌ, quin waꞌaric techex, caꞌ a sʌjtex tu cotor mac a cu betic u beyaj a raꞌ cu beticoboꞌ. Bayiriꞌ xan, caꞌ a sʌjtex a mac a cu yamticob a mac a cu beyaj tiꞌ Cꞌuj.
\v 17 Wa ber caj cꞌuchob Estéfanas yejer Fortunato yejer Acaico, jach quiꞌjij in wor, quij Pablo, quireꞌ robob caj u yaꞌarob tu cotor bic tabar a betiquex, cax mʌꞌ tiꞌ yʌnen tu yʌnechex.
\v 18 Robob tu quiꞌquintob in wor wa ber caj u yaꞌarob ten techex, an ten bic cu bin u quiꞌquintejob a worex wa ber jeꞌ u yaꞌaricob bic tabar a tenaꞌ tu yʌnen quin betic. Yʌn surʌc tex mac a baxucoꞌ.
\p
\v 19 Tu cotor a yacsmʌnob tu yorob ich u ruꞌumin Asia, cu tꞌʌniquechex. Bayiriꞌ xan, Aquila yejer u racꞌ Priscila, cu tꞌʌniquechex. Bayiriꞌ xan, tu cotor a wet acsaꞌorirex a cu muchꞌquint u bʌjob quir u cꞌujinticob Cꞌuj ich yatoch Aquila yejer Priscila, cu tꞌʌniquechex. Jach manan cu tꞌʌnicob techex quireꞌ caj a wacsex ta worex tiꞌ Cristo.
\v 20 Bayiriꞌ xan, tu cotor a yacsmʌnob tu yorob teꞌ tu yʌnenaꞌ, cu tꞌʌniquechex. Bayiriꞌ xan, pacran tꞌʌn a bʌjex.
\p
\v 21 A tenoꞌ in bʌjiriꞌ quin tsꞌibtic a jeꞌ tꞌʌnaꞌ yejer in cꞌʌb soc in tꞌʌniquechex xan.
\p
\v 22 Wa tiꞌ yʌn mac a mʌꞌ ju cꞌat u yajquintej Cristo, arex u bin tu cu bin mucꞌyaj. Cojen ic Jaj Tsꞌurirex, seb a wuꞌur.
\p
\v 23 A tenoꞌ, in jach cꞌat caꞌ u yam techex Cꞌuj an ten bic tsoy tu tꞌʌn ic Jaj Tsꞌurirex Jesucristo.
\p
\v 24 A tenoꞌ, quin jach yajquintic techex quireꞌ a wacsmʌnex ta worex tiꞌ Jesucristo.