\id 2CO
\h 2 CORINTIOS
\toc1 2 CORINTIOS
\mt1 A JEꞌ JUꞌUNAꞌ, PACHIR CAJ U CAꞌ TSꞌIBTA PABLO TIꞌ U YET ACSɅꞌORIROB ICH U CAJAR CORINTO
\mt2 2 CORINTIOS
\c 1
\s Pablo caj u tsꞌibtaj tiꞌ a mac a cu muchꞌquinticob u bʌjob quir u yubicob u tꞌʌn Cꞌuj ich u cajar Corinto 
\p
\v 1 A tenoꞌ Pablojen, pꞌeriꞌen yejer Timoteo, ij quet acsaꞌorirex, tan in tsꞌibticob techex a jeꞌ juꞌunaꞌ. Cꞌuj caj u teten soc yʌj tseqꞌuiren Jesucristo quir in beyaj tiꞌ, quireꞌ tsoy tu tꞌʌn Jesús, rajen quin tsecꞌtic u tꞌʌn. Tan in tuchiꞌticob a jeꞌ juꞌunaꞌ soc a xaquiquex, a mac a yacsmʌnob tu yorob ich u cajar Corinto quet yejer a mac Cꞌuj yʌninob, a mac a cʌjaꞌan ich tu cotor u ruꞌumin Acaya.
\v 2 A tenoꞌ in cꞌat Cꞌuj ic Tetex caꞌ u yam techex soc mʌnaꞌ baꞌ ca tucriquex. Bayiriꞌ xan, in cꞌat techex aroꞌ ic Jaj Tsꞌurirex Jesucristo.
\s A baꞌ mucꞌyajnʌjij Pablo tiꞌ a mac a mʌꞌ yerob Cꞌuj
\p
\v 3 Caꞌ ij carex tiꞌ Cꞌuj, a mac u Tet ic Jaj Tsꞌurirex Jesucristo: “Bayoꞌ Cꞌuj, tech ta tucrenob, rajraꞌ tan a chichquintic in worob.”
\v 4 Mʌꞌ ja wirej, rajiꞌ cu chichquintic ij corex wa ber cu cꞌuchur toꞌonex tu cotor mucꞌyaj. Rajen, cꞌuchaꞌan ij corex ic chichquintiquex u yorob ij quet acsaꞌorirex wa ber cu mucꞌyajob, quireꞌ Cꞌuj caj u chichquintaj ij corex tu mucꞌyajnʌjoꞌonex uch.
\v 5 Mʌꞌ ja wirej, a mac a yacsmʌnob tu yorob, bin u caꞌ tar u mucꞌyajob an ten bic mucꞌyajnʌjij Cristo uch soc u cʌnicob Cristo, chen rajiꞌ cu chichquintic ij corex wa ber quic mucꞌyajex.
\v 6 A tenoboꞌ tan in mucꞌyajob bajeꞌrer soc cꞌuchaꞌan in worob in chichquinticob a worex, bayiriꞌ soc jeꞌ u toꞌcar a pixamex. Wa ber Cꞌuj cu chichquintic in worob, jeroj jeꞌ a wiriquex bic tabar xan cu bin chichquintic a worex Cꞌuj. Bayiriꞌ bic tabar cu bin tacbir a pixamex ten Cꞌuj. Quireꞌ wa ber cu tar techex a mucꞌyajex an ten bic mucꞌyajnʌjenob, a tenoboꞌ in cꞌatob a quiꞌ mucꞌtiquex a mucꞌyajex a tan u tar techex.
\v 7 Mʌꞌ nacʌr in worob quireꞌ a techexoꞌ. Mʌꞌ ja wirej, in werob wa ca mucꞌyajex xan an ten bic a tenoboꞌ mucꞌyajnʌjenob jeꞌ u chichquintaꞌr a worex xan.
\p
\v 8 A tenoboꞌ in cꞌat in cꞌasicob techex, in wet acsaꞌorirex bic tabar mucꞌyajnʌjenob tar ich u ruꞌumin Asia. Quireꞌ jach manan mucꞌyajnʌjenob soc orac mʌnaꞌ in worob, rajen in werob wa jeꞌ in quimenobeꞌ.
\v 9 A tenob in werob jeꞌ u cꞌubiquenobeꞌ a tenoboꞌ soc in quinsaꞌob. Mʌꞌ ja wirej, a baꞌ in ber a tenoboꞌ tarij quireꞌ Cꞌuj soc in cꞌubic in bʌjob tiꞌ Cꞌuj, a mac cu ricꞌsic mac ich u quimirir soc u wʌcꞌʌs cuxtar. Tarij soc in cʌnicob wa mʌꞌ in mucꞌticob in bʌjiriꞌob tin junanob.
\v 10 Chen Cꞌuj caj u jocꞌsen a tenoboꞌ tu tabar u chꞌesiquenob a tenoboꞌ. Raꞌiriꞌ Cꞌuj xan jeꞌ u jocꞌsiquen a tenob a raꞌ u qꞌuinin a cu taroꞌ, rajen quin wacsic tin worob wa jeꞌ u rajraꞌ jocꞌsiquenob soc in toꞌcarob a tenoboꞌ. 
\v 11 Wa ca yamtiquenobex quireꞌ tan a tꞌʌnic tenob Cꞌuj. Wa jaj ix tiꞌ, yaꞌab mac cu tꞌʌnicob Cꞌuj tenob, yaꞌab mac cu bin yaꞌarej: “Bayoꞌ Cꞌuj” quireꞌ ta wesaj a tenob u jach tsoyir a pixam.
\s Biquin mʌꞌ seb binij Pablo ich u cajar Corinto
\p
\v 12 A tenob jach quiꞌ in worob caj in wuꞌyajob quireꞌ caj in betob tsoy techex, a mac a tiꞌ yʌnob ich yocꞌocab. A tenoboꞌ caj in pꞌis in bʌjob soc in manob tu tsoyir. A baywoꞌ caj in betob wa ber tiꞌ yʌnenob yejerechex uch, quireꞌ tu yamtajenob Cꞌuj. A tenoboꞌ mʌꞌ jin najtob baꞌ an ten bic mac ich yocꞌocab cu chen najticob baꞌ. 
\v 13 A techexoꞌ, a werex aroꞌ jach taj. A tenoboꞌ mʌꞌ tin waꞌarajob u jer tꞌʌnob ich u jer u juꞌunin caj in tuchiꞌtechex uch, jariꞌ a baꞌ cꞌuchaꞌan a worex a xaquex a wirex. Bayiriꞌ a baꞌ tan a najtiquex, an bic quin pajicob cu cꞌuchur tu qꞌuininin jeꞌ a quiꞌ najtiquexeꞌ.
\v 14 Mʌꞌ ja wirej, ta chʌc najtex chichin rajen jeꞌ u quiꞌ tar a worex quireꞌ a tenoboꞌ, bayiriꞌ xan jeꞌ u quiꞌtar in worob quireꞌ a techexoꞌ caꞌ bin cꞌuchuc tu qꞌuinin caꞌ bin uruc ic Jaj Tsꞌurirex Jesucristo.
\p
\v 15 A tenoꞌ in jach er tu jaj aroꞌ. Rajen in wer in man pʌyber tu yʌn techex soc a baywoꞌ quic pacran iric ic bʌjex tu caꞌten, mʌꞌ chen tuririꞌ quij quiric ic bʌjexiꞌ.
\v 16 Quireꞌ in wer wa ber quin bin ich u ruꞌumin Macedonia tiꞌ quin bin man tu yʌnechex. Bayiriꞌ caꞌ bin uquen tu ruꞌumin Macedonia tiꞌ quin bin wʌcꞌʌs man tu yʌnechex. In cꞌat a yamtiquenex soc cꞌuchaꞌan in wor in bin tu ruꞌumin Judea.
\v 17 Raꞌ in jach cꞌat in wirechex uch, chen a tenoꞌ mʌꞌ tareniꞌ. Jaj ix tʌcoj ca tus tucriquex a tenoꞌ quin betic an ten bic mac cʌjaꞌan teꞌ ich yocꞌocab cu chen beticob. Robob cu yaꞌaricob cu bin u beticob baꞌ, chen robob yerob mʌꞌ ju bin u beticobiꞌ.
\v 18 Mʌꞌ ja wirej, a Cꞌujoꞌ, rajiꞌ jach taj yor Cꞌuj, rajen mʌꞌ in manob in cacay tsicbʌtob.
\v 19 A tenoboꞌ caj in tsecꞌtob techex u tꞌʌn Jesucristo uch, rajiꞌ u parar Cꞌuj aroꞌ mʌꞌ cacay caj in tsecꞌtob xan. Bayiriꞌ xan, caj in tsecꞌtechex quet yejer Silvano yejer Timoteo. Tu cotorenob caj in tsecꞌtob techex caj in waꞌarob techex wa Cristojoꞌ rajiꞌ taj.
\v 20 Mʌꞌ ja wirej, rajiꞌ Cristo caj u nupꞌsaj tu cotor u tꞌʌn Cꞌuj a tu toc araj Cꞌuj uch. Rajen tan ic sʌjtiquex Cꞌuj wa quij cacsiquex tij corex tiꞌ u parar Cꞌuj.
\v 21 U bʌjiriꞌ Cꞌuj tan u chichquintic ij corex soc mʌꞌ ic pꞌʌtiquex Cristo soc pꞌeriꞌ ij corex yejer Cristo. Rajiꞌ Cꞌuj caj u tsꞌaja tenob in beyajob.
\v 22 A Cꞌujoꞌ caj u tetenob soc rajiꞌ yʌninenob a tenoboꞌ. In werob quireꞌ tu chaj u Tajꞌor u Pixam Cꞌuj u cʌjtar tin pixamob soc in werob yʌn toj quir u tar u nupꞌsej a baꞌ u toc aramʌn Cꞌuj.
\p
\v 23 A tenoꞌ quin waꞌaric techex ʌcʌtan Cꞌuj rajiꞌ yer wa taj quin waꞌaric techex. A tenoꞌ in wer mʌꞌ jin tar in wirechex uch quireꞌ in wer bin in caꞌ in qꞌueyechex quireꞌ a baꞌ ta betajex uch.
\v 24 A tenob mʌꞌ in cꞌat a tsꞌurintiquenex, mʌꞌ jin tsꞌʌrob a pachex quir a wacsiquex ta worex. Mʌꞌ ja wirej, pꞌeriꞌ in beyajob yejerechex soc quiꞌ a worex quireꞌ tan a quiꞌ acsiquex ta worex ti Cristo.

\c 2
\p
\v 1 Rajen in wer wa jach tsoy mʌꞌ jin wʌcꞌʌs tar in wirechex, quireꞌ wa taren caꞌch jariꞌ u yajij a worex ta wuꞌyajex caꞌch. Quireꞌ a tenoꞌ wa taren caꞌch bin in caꞌ in qꞌueyechex quireꞌ a baꞌ caj a betex uch.
\v 2 Mʌꞌ ja wirej, wa ja tenoꞌ caj in yajquint a worex caꞌch mac cu bin u quiꞌquintic in wor a tenoꞌ? Jariꞌ techex cꞌuchaꞌan a worex a quiꞌquintiquex in wor. Chen mʌꞌ cꞌuchaꞌan a worex a quiꞌquintiquex in wor wa ber quin qꞌueyiquechex quireꞌ jeꞌ u yajtar a worex teneꞌ. 
\v 3 A tenoꞌ caj in tsꞌibtaj techex a raꞌ tꞌʌn uch soc mʌꞌ in tucur wa ber quin cꞌuchur tu yʌnechex. Mʌꞌ ja wirej, in cꞌat a quiꞌquintiquex in wor quireꞌ in wer a bʌjiriꞌex jeꞌ u quiꞌtar a worex wa ber ca wiriquex quiꞌ in wor quireꞌ techex quiꞌ a worex.
\v 4 Wa ber caj in tsꞌibtaj techex a ray juꞌunoꞌ uch, choc in wor tin pixam, bayiriꞌ jach cꞌux in wor quireꞌ techex a baꞌ ta betex. Jach ocꞌar in caꞌ quireꞌ techex ta betex baꞌ. Mʌꞌ ja wirej, mʌꞌ in cꞌat in yajquintic a worex, chen in cꞌat caꞌ a cꞌʌꞌotex biquinin jach manan in yajquintiquechex tu cotor.
\s Jawsex u siꞌpir a mac a tu raqꞌuintaj u racꞌ u yum 
\p
\v 5 Wa mac tu cꞌuxquinta yor mac, mʌꞌ tu chen cꞌuxquinta tin wor a tenoꞌ, tu cꞌuxquinta ta worex techex. Mʌꞌ ja wirej, tu cꞌuxquintaj orac tu cotor a worex.
\v 6 An bic ta qꞌueyex a ray xiboꞌ a tu pʌy u siꞌpir caꞌch, tiꞌtiꞌ bajeꞌrer. Arex tiꞌ a wet acsaꞌorirex soc u tsꞌocsic u qꞌueyaꞌr quireꞌ qꞌueyaꞌb ten yaꞌab mac.
\v 7 Chen a bajeꞌreroꞌ caꞌ a yʌn jawsex u siꞌpir, caꞌ a chichquintex u yor soc mʌꞌ u tupsaꞌr yor, soc mʌꞌ u bin tu pach.
\v 8 Rajen quin waꞌaric techex caꞌ a tsꞌajex yer soc caj a jach yajquintex a tiꞌoꞌ.
\v 9 Rajen caj in tsꞌibtaj a ray juꞌunoꞌ tiꞌ techex soc in wuꞌyic wa ta mucꞌtex wa ber caj in tumt a worex. A tenoꞌ in cꞌat in wuꞌyic wa rajraꞌ ca bin a quibex in tꞌʌn a quin toc aric techexoꞌ.
\v 10 Wa ber ca jawsex u siꞌpir mac baxuc a tenoꞌ quin jawsic u siꞌpir xan. A tenoꞌ caj in jawsaj u siꞌpir ʌcʌtan Cristo wa yʌn baꞌ quir in jawsic, quin jawsic quireꞌ techex.
\v 11 Mʌꞌ ja wirej, caꞌ ic jawsex u siꞌpir soc cꞌuchaꞌan ij corex tiꞌ a quisinoꞌ. Baxuc quin waꞌaricoꞌ quireꞌ ij querex bic tabar cu tucric a quisinoꞌ.
\s A baꞌ jacꞌsaꞌb yor Pablo ich u cajar Troas
\p
\v 12 Caj cꞌuchen ich u cajar Troas uch quir in tsecꞌtic u jach tsoyir u tꞌʌn Cristo, u winiquirob tu cajar caj u pachtob yubob u tꞌʌn Cristo quireꞌ Cꞌuj toc tʌr u pixamob. 
\v 13 Chen mʌꞌ tsoy in tucur quireꞌ mʌꞌ jin nupa tiꞌ taroꞌ in wet acsaꞌorir Tito. Rajen caj in tꞌʌnaj tiꞌob a ray winiquirob quireꞌ bin in caꞌ caj binen ich u ruꞌumin Macedonia.
\s Jeꞌ u jocꞌar u tsoyir tu cotor baꞌ quireꞌ Cristo
\p
\v 14 Caꞌ ij carex tiꞌ Cꞌuj: “Bayoꞌ Cꞌuj, quireꞌ rajraꞌ tech tan a yamtiquenob soc cꞌuchaꞌan in worob tu cotor baꞌ quireꞌ tech Cꞌuj ta pꞌeriꞌquin tenob yejer Cristo.” Rajen Cꞌuj caj yam toꞌonex soc ic masiquex u tꞌʌn ich tu cotor mac ich yocꞌocab soc yerob biquiraꞌ Cꞌuj. Bayiriꞌ tan u quiꞌquintic ij corex u tꞌʌn cꞌuj.
\v 15 A baywoꞌ, tan ij quiꞌquintiquex u yor Cꞌuj quireꞌ cu yiric toꞌonex tan ic tsecꞌtiquex u tꞌʌn Cristo ich tu cotor mac. Wa ber mac cu yubicob ic tsecꞌtiquex u tꞌʌn Cꞌuj yʌn mac cu yacsicob tu yorob tiꞌ u tꞌʌn Cꞌuj, jeroj rajiꞌob toc ten Cꞌuj. Yʌn mac u jer mʌꞌ ju yacsejob tu yorob tiꞌ u tꞌʌn Cꞌuj, jeroj rajiꞌob satʌr u caꞌob. 
\v 16 Rajen yʌn mac jeꞌ u toc satʌr quireꞌ mʌꞌ u cꞌat u tꞌʌn Cꞌuj. Bayiriꞌ xan yʌn mac jeꞌ u bin tocar ten Cꞌuj quireꞌ u cꞌatob u tꞌʌn Cꞌuj. Ay, bic tabar yaj ic beyajex! 
\v 17 Mʌꞌ ja wirej, a tenoboꞌ mʌꞌ in betob an ten bic u jer mac tan u beticob, rajiꞌob tan u masicob u tꞌʌn Cꞌuj quir u jaricob u taqꞌuinob. A tenoboꞌ ʌcʌtan tiꞌ Cꞌuj tsꞌajaꞌan in worob in tsecꞌticob u tꞌʌn Cꞌuj quireꞌ rajiꞌ tu tuchiꞌtenoboꞌ. A tenob quin tsecꞌticob a baꞌ tajoꞌ.
\c 3
\s U tꞌʌn Cꞌuj irej wa ricꞌben
\p
\v 1 Wa ber caj in tsꞌibtob techex aroꞌ, a techexoꞌ mʌꞌ a yʌn turiquex wa tan in wʌcꞌʌs aricob wa tsoyir in bʌjob soc a tus tucriquex wa jach caremenob. A tenoboꞌ mʌꞌ baꞌ wir quir in wesic techex juꞌun a cu tsicbar jach tsoy tꞌʌn a tenoboꞌ. A bʌjiriꞌex a werex bic tabar a tenoboꞌ, bayiriꞌ xan u jer yerob xan.
\v 2 Mʌꞌ ja wirej, chʌcaꞌan yiric mac wa tin betob a tsoyoꞌ tu yʌnechex uch, quireꞌ a techexoꞌ caj a cꞌax ta worex tiꞌ Cꞌuj caj a pꞌʌt a manex ich a siꞌpirex. A baywoꞌ chʌcaꞌan yiricob a racꞌobex biquiraꞌ a pixamex.
\v 3 Robob chʌcaꞌan yiricob wa irechex tuririꞌ juꞌun toc tsꞌibtaꞌb ich yocꞌor ten u bʌjiriꞌ Cristo. A raꞌ juꞌunoꞌ tin toc cꞌubob tiꞌ a racꞌobex ich a cajarex. A baꞌ tsꞌibaꞌan ich yocꞌor mʌꞌ tsꞌibtaꞌb yejer u jach aꞌarir tsꞌib, chen tsꞌibtaꞌb ten u Tajꞌor u Pixam Cꞌuj a mac cuxaꞌan. U tꞌʌn caj u tsꞌibtaj aroꞌ mʌꞌ tsꞌibaꞌan ich yocꞌor tunich an ten bic uch tu qꞌuinin in nunquirob Moisés caj tsꞌibtaꞌb ten Cꞌuj. Mʌꞌ ja wirej, tiꞌ tsꞌibaꞌan ich a pixamex.
\p
\v 4 Rajen taj quin wuꞌyic tin worob quireꞌ Cꞌuj. Mʌꞌ ja wirej, Cristo caj u betaj aroꞌ.
\v 5 A tenoboꞌ quin wuꞌyicob tin worob wa jin nonoj bʌjiriꞌob mʌꞌ cꞌuchaꞌan in worob tiꞌ a ray beyajoꞌ, chen a Cꞌujoꞌ cu chichquintic in mucꞌob soc in beyajob tiꞌ soc in man in tsecꞌtob u jach tsoyir u tꞌʌn, a ricꞌbenoꞌ. A jeꞌ tꞌʌnaꞌ, mʌꞌ raꞌ u tꞌʌn a uchbenoꞌ a tu tsꞌibt in nunquirirob Moisés a uchoꞌ.
\v 6 Mʌꞌ ja wirej, u tꞌʌn Moisés raꞌ cu yaꞌaric bin ij caꞌ quiminex quireꞌ tan ic manex ich ic siꞌpirex. Chen u tꞌʌn a quin tsecꞌticob raꞌ u tꞌʌn a cu camsic u Tajꞌor u Pixam Cꞌuj. A jeꞌ tꞌʌnaꞌ cu tsꞌic ij cuxtarex.
\p
\v 7 Jach jaj jach tsoy u tꞌʌn Cꞌuj a uchbenoꞌ a tsꞌibaꞌan ich tunich uch. Jariꞌ raꞌ cu taquic ic joꞌrex quireꞌ yʌn ic siꞌpirex. A ray u qꞌuininoꞌ Moisés caj u cꞌʌmaj u tꞌʌn Cꞌuj, u wich Moisés caj u chucaj u sasirir Cꞌuj tu chꞌicaꞌan yejer Cꞌuj. Rajen u winiquirob israel mʌꞌ cꞌuchaꞌan yor u pʌcticob uch u wich Moisés quireꞌ u sasirir cax tabar u jawʌr u sasirir Cꞌuj u wich ich Moisés.
\v 8 Chen a techexoꞌ a werex jach manan tsoy u tꞌʌn Cꞌuj a tu tsꞌaja toꞌonex u Tajꞌor u Pixam Cꞌuj.
\v 9 Jach taj u tꞌʌn Cꞌuj a uchbenoꞌ a caj tsꞌab ten Cꞌuj tiꞌ Moisés a uchoꞌ. A raꞌ u qꞌuininoꞌ caj u chꞌaj sajquirob u winiquirob israel. Cax cu taꞌquic u joꞌrob quireꞌ yʌn u siꞌpirob, cax quic chꞌic sajquirex tiꞌ u tꞌʌn a ricꞌbenoꞌ, jach manan tsoy quireꞌ cu yaꞌaric bic tabar Cꞌuj cu cꞌʌmicoꞌonex.
\v 10 Mʌꞌ ja wirej, a uchoꞌ jin werob a tꞌʌnoꞌ a uchbenoꞌ jach tsoy an ten bic tsꞌabir ten Cꞌuj, chen u tꞌʌn a ricꞌbenoꞌ, a yʌn toꞌonex bajeꞌrer jach manan tsoy. 
\v 11 A tꞌʌnoꞌ a ricꞌbenoꞌ, a jeꞌ tꞌʌnaꞌ jeꞌ u pꞌatʌr munt qꞌuin quireꞌ jach manan tsoy. Chen u tꞌʌn a uchbenoꞌ cax tsoy, u tsoyir tan u man.
\p
\v 12 Rajen mʌꞌ in chꞌaꞌej sajquirob in tsecꞌticob u tꞌʌn Cꞌuj.
\v 13 Mʌꞌ ja wirej, a tenoboꞌ mʌꞌ irenob in nunquirob Moisés, quireꞌ rajiꞌ tu pix u wich yejer nocꞌ soc u winiquirob israel mʌꞌ u pʌcticob u wich quir u yiricob wa ju sasir u wich tabar u jawar u sasirir Cꞌuj tu wich Moisés.
\v 14 U winiquirob israel u berer bajeꞌrer mʌꞌ ju najtob a baꞌ tu tsꞌibt u nunquirob Moisés uch, cax cu quiꞌ cʌxticob a baꞌ tsꞌibaꞌan tiꞌ ich u tꞌʌn a uchbenoꞌ, mʌꞌ ju najtobiꞌ. Quireꞌ mʌꞌ ju najtob wa Cristo tu toc rʌc nupꞌsaj a baꞌ tiꞌ yʌn a tiꞌoꞌ.
\v 15 Jach taj u berer bajeꞌrer rajiꞌob mʌꞌ ju najtob cax cu quiꞌ cʌxtic ich u tꞌʌn u nunquirob Moisés.
\v 16 Caꞌ bin cꞌuchuc tu qꞌuinin cu yacsicob tu yorob tiꞌ ic Jaj Tsꞌurirex, jeroj jeꞌ u najticobeꞌ.
\v 17 Mʌꞌ ja wirej, ic Jaj Tsꞌurirex yejer u Tajꞌor u Pixam Cꞌuj robob quet bayiriꞌ. Jeroj a mac a ju yet man u Tajꞌor u Pixam Cꞌuj toc rucꞌsaꞌb tiꞌ u tꞌʌn Moisés, a raꞌ cu yaꞌaric mac cu bin tsꞌaꞌbir u mucꞌyaj. Toc siptaꞌb tiꞌ. 
\v 18 Mʌꞌ ja wirej, mʌnaꞌ baꞌ cu pixic ij quichex. A tenoboꞌ irenob nen tan in wesicob u jach caremir Cꞌuj. Quireꞌ chan chanber tan u waysicoꞌonex soc tsoyoꞌonex an ten bic tsoy ic Jaj Tsꞌururex. Jesús tan u betic toꞌonex aroꞌ quireꞌ acaꞌan tic pixamex u Tajꞌor u Pixam Cꞌuj.

\c 4
\p
\v 1 Rajen mʌꞌ biqꞌuin tupsaꞌan in worob quireꞌ Cꞌuj, a cu tucric macoꞌ, caj u cꞌubenob beyajob, raꞌ quir in manob in tsecꞌtob u tꞌʌn.
\v 2 Toc jumpuriꞌ mʌꞌ in betob a cꞌasoꞌ, bayiriꞌ xan, mʌꞌ jin pachtob in tusaricob tiꞌ mac, mʌꞌ jin jenmastob u tꞌʌn Cꞌuj xan. Mʌꞌ jin sosoꞌ arob u tꞌʌn Cꞌuj quireꞌ taj quin waꞌaricob tiꞌ, soc mac tu cotor cꞌuchaꞌan yorob yiricob wa tsoy in beticob ʌcʌtan tiꞌ Cꞌuj.
\v 3 Jach taj u tꞌʌn Cꞌuj a quin tsecꞌticob tiꞌ mac soc yerob bic tabar u jawʌr u siꞌpirob, raꞌ mʌꞌ quet cu najticob a mac a cu satʌroboꞌ.
\v 4 Mʌꞌ ja wirej, a quisinoꞌ, a mac a cu pʌyic u ber a mac a mʌꞌ yer Cꞌuj. A quisinoꞌ mʌꞌ ju tsꞌ u tucur mac soc u najticob u tꞌʌn ic Jaj Tsꞌurirex, bayiriꞌ soc u cꞌʌmicob u jach tsoyir u tꞌʌn Cꞌuj. Rajen mʌꞌ cꞌuchaꞌan yor yerob u caremir ic Jaj Tsꞌurirex, a mac irej u bʌjiriꞌ ic Tetex Cꞌuj.
\v 5 A tenoboꞌ mʌꞌ in tsecꞌticob bic tabar a tenob. A tenob quin tsecꞌticob bic tabar ic Jaj Tsꞌurirex. Quin waꞌaricob wa quin yamticob mac tu cotor quireꞌ Jesucristo ic Jaj Tsꞌurirex a ju yajoꞌonex.
\v 6 A tenoboꞌ quin tsecꞌticob u tꞌʌn Cristo quireꞌ Cꞌuj, rajiꞌ caj u yaꞌaraj: “A quiboꞌ caꞌ u sasiquint tu yacꞌbirir.” Baxuc tu yaꞌaraj Cꞌuj. Mʌꞌ ja wirej, caj u tsꞌaj in najticob rajen in werob biquiraꞌ Cꞌuj, a mac jach manan caremoꞌ an ten bic Cristo tu tsꞌaj u tucur Cꞌuj tiꞌ a tenoboꞌ. 
\s Bic tabar quic manex tu tsoyir
\p
\v 7 Chen a tenobob mʌꞌ patarenobiꞌ a mac a yʌn a jeꞌ jach tsoy u tꞌʌnaꞌ soc chʌcaꞌan yiricob mac jach manan carem ij Cꞌujirex, a mac jach chich u mucꞌ xan. A tenob, mʌꞌ chen ten yʌnin a ray u mucꞌoꞌ quireꞌ Cꞌuj yʌnin.
\v 8 Yʌn baꞌ in berob tu quin binob. Chen a Cꞌujoꞌ cu rucꞌsaꞌr u cꞌʌbob tenob soc mʌꞌ u chuquiquenob. A tenoboꞌ cꞌʌs tucur in caꞌob, chen mʌꞌ choc in worob tenob.
\v 9 Wa ber cu chuquicob in pachob mʌꞌ jin wuꞌyob wa tu pꞌʌtajenob Cꞌuj. Cax jatsꞌob in pachob chen mʌꞌ chꞌesaꞌbenobiꞌ. 
\v 10 Cax tu quin cꞌuchurob, quin cꞌubic in bʌjob soc in quinsaꞌob an ten bic Cristo caj u betaj, a mac quinsaꞌb ich cruz. Quireꞌ a jeroj mac tu cotor jeꞌ u yerticobeꞌ wa Jesús rajiꞌ a mac cuxaꞌan quir u yamtenob a tenob. 
\v 11 Chen a tenob tiꞌ toy cuxaꞌanenob, chen yʌn mac u cꞌat u quinsiquenob quireꞌ raꞌ u yajir in wacsic tin wor tiꞌ Jesucristo. A baywoꞌ cꞌuchaꞌan yor yiricob mac wa Cristo tan u yamtiquenob soc in cuxtarob teꞌ ich yocꞌocab.
\v 12 A tenoboꞌ jach yaꞌab tan in mucꞌyajob, bayiriꞌ xan tabar in quiminob, chen Cꞌuj tan u beyaj yejerechex soc a cuxtarex.
\p
\v 13 Uꞌyex baꞌ cu yaꞌaric ich u tꞌʌn Cꞌuj: “A tenoꞌ quin wacsic tin wor tiꞌ a tꞌʌn rajen tsicbʌnʌjen.” Baxuc cu yaꞌaric ich u tꞌʌn Cꞌuj. A tenoboꞌ quin wacsic tin worob an ten bic mac caj u tsꞌibtaj a ray tꞌʌnoꞌ, a baywoꞌ quin tsicbarob u tꞌʌn quireꞌ tin wacsob tin worob. 
\v 14 A tenoboꞌ in werob Cꞌuj jeꞌ u ricꞌsicoꞌonex ich u quimirir soc ij cuxtarex yejer Jesucristo quireꞌ tu ricꞌsaj ic Jaj Tsꞌurirex ich u quimirir soc u cuxtar. Jeroj pꞌeriꞌoꞌonex ich caꞌanan jeꞌ ij cuxtarex.
\v 15 Baxuc caj u betaj Cꞌuj techex. Mʌꞌ ja wirej, a techexoꞌ, a mac Cꞌuj yʌninechex, jeꞌ a jach pimtarex quireꞌ jeꞌ u man u tꞌʌn Cꞌuj nach ich tanxer ruꞌum. A baywoꞌ yaꞌab mac, quireꞌ tsoy tu tꞌʌn Cꞌuj, bin u caꞌ yaꞌarob: “Bayoꞌ Cꞌuj.” A baywoꞌ cu yesicob bic jach carem ij Cꞌujex.
\p
\v 16 Rajen mʌnaꞌ baꞌ cu tupsic in worob, cax tan u jach nuxibchʌjʌr in winquirob, a jin pixamob, rajraꞌ tan u chichquintaꞌr u mucꞌob ten u Tajꞌor u Pixam Cꞌuj.
\v 17 A tenoboꞌ tan in cꞌʌs mucꞌyajob bajeꞌrer. Mʌꞌ ja wirej, a jeꞌ mucꞌyaj a quin mucꞌyajob bajeꞌrer tan u pʌyiquenob u tsoyir Cꞌuj a mʌꞌ u tsꞌocar biqꞌuinoꞌ.
\v 18 A tenoboꞌ mʌꞌ tan in tucricob tiꞌ a baꞌ chʌcaꞌan in wiricob a teraꞌ ich yocꞌocab. Chen a tenoboꞌ tan in tucricob a baꞌ toꞌonex mʌꞌ toy ij quirex. Mʌꞌ ja wirej, a baꞌ quij quiriquex bajeꞌrer mʌꞌ yaꞌab u qꞌuinin tiꞌ yʌn, chen a baꞌ mʌꞌ toy ij quirex aroꞌ munt qꞌuin tiꞌ yʌniꞌ.
\c 5
\p
\v 1 A toꞌonex ic winquirirex irob yatoch a ju rabʌrob tu quij cʌjarex. Rajen ic toc erex tiꞌ yʌn u jer ricꞌben ich caꞌanan tu quic binex cʌjtarex wa jic winquirirex cu chꞌejar. A ray u winquiriroꞌ, mʌꞌ irej yatoch a xiboꞌ cu cꞌʌxicoꞌ quireꞌ aroꞌ cu rabʌr. U winquirir a cu bin tsꞌabir ten Cꞌuj toꞌonex mʌꞌ ju rabʌr quireꞌ Cꞌuj cu bin u betic tiꞌ, soc munt qꞌuin tiꞌ yʌn.
\v 2 Jach taj a toꞌonexoꞌ, a mac yer Cꞌuj jach tucur ij caꞌex quireꞌ tiꞌ toy yʌnoꞌonex ich yocꞌocab. Quireꞌ quic jach pachtiquex ij cʌjtarex ich caꞌanan ich Cꞌuj soc yʌn toꞌonex ricꞌben ic winquirirex.
\v 3 Tu quic bin ij cʌjtarex ich caꞌanan, jeꞌ u yʌntarex ricꞌben ic winquirirex, rajen mʌꞌ cꞌuchaꞌan ij corex ij cariquex mʌnaꞌ ij winquirirex.
\v 4 A mun u qꞌuinin tiꞌ toy yʌnoꞌonex teꞌ ich yocꞌocab quic xobex quireꞌ tan ic mucꞌyajex. A tenoꞌ mʌꞌ in cꞌat in waꞌaric wa in cꞌat in pꞌʌtic in winquiriroꞌ. Chen a tenoꞌ in cꞌat in cꞌʌmic u jer ricꞌben. Chen jach manan tsoy caꞌ xicoꞌonex ich caꞌanan tu yʌn Cꞌuj quir ij cʌjtarex tu mʌꞌ ju quimin mac.
\v 5 Mʌꞌ ja wirej, a Cꞌujoꞌ tu toc nupꞌsa a baꞌ tu tucraj quireꞌ tu toc bet aroꞌ. Bayiriꞌ xan, tu tuchiꞌt u Tajꞌor u Pixam Cꞌuj soc u pꞌatʌr tij quicnʌnex, rajen ij querex jeꞌ u jocꞌar u tajir a cu bin u tsꞌic toꞌonex aroꞌ tsoy.
\p
\v 6 Rajen jach manan quiꞌ in worob quireꞌ in werob tiꞌ toy cuxaꞌanenob teꞌ ich yocꞌocab mʌꞌ toy xiquenob ich tu yʌn ic Jaj Tsꞌurirex.
\v 7 Chen tan ij quet manex yejer mac a ju tꞌʌn a tij quibex a mac a mʌꞌ ij quirex.
\v 8 Jach quiꞌ ij corex. Mʌꞌ ja wirej, tsꞌajaꞌan ij corex ij cʌjtarex tu yʌn ic Jaj Tsꞌurirex soc ic pꞌʌtiquex a jeꞌ ic winquirirex.
\v 9 Rajen in cꞌat in quiꞌquinticob u yor ic Jaj Tsꞌurirex, cax wa cuxaꞌanenob teꞌ ich yocꞌocab, cax wa cuxaꞌanenob tu yʌn ic Jaj Tsꞌurirex.
\v 10 Mʌꞌ ja wirej, tan u tar u qꞌuinin u xur tꞌʌn wa ber cu tumtic ij corex tu cotoroꞌonex Cristo an ten bic cuxrajaꞌanonex teꞌ ich yocꞌocab uch. A raꞌ u quininoꞌ jeꞌ u tsꞌabʌr ten Cristo tiꞌ jujunturoꞌonex u boꞌorir a baꞌ tic betex u qꞌuinin tiꞌ yʌnoꞌonex ich yocꞌocab uch cax wa tsoy cax wa mʌꞌ tsoy.
\s Cristo tu quetquint ij corex tiꞌ Cꞌuj
\p
\v 11 Quireꞌ rajen aroꞌ quin chꞌic sajquirob tiꞌ Cꞌuj, rajen quin man in tsicbatob Cꞌuj soc u yacsicob tu yorob tiꞌ Cristo. A Cꞌujoꞌ yer a baꞌ tan in camsicob bayiriꞌ xan, in cꞌatob a werex ta worex xan a baꞌ tan in camsicob. 
\v 12 A tenoboꞌ mʌꞌ tan in waꞌaricob techex wa jach tsoyenob xiben, chen a tenoboꞌ in cꞌatob a quiꞌquintiquex a worex yejeren soc a werex bic tabar a nunquiquex a mac a quiꞌ yoroboꞌ yejer mac a tus tsoyoꞌ, chen mʌꞌ u jach erob biquiraꞌ u pixam.
\v 13 Jot a baꞌ cu tucric mac a tenoboꞌ, cax cu tucricob mʌꞌ in wer baꞌ quin beticob quir in yamtiquechexoꞌ. A tenoboꞌ, jeꞌ in beticob a baꞌ u cꞌat Cꞌuj cax a baꞌ quiriꞌ u cꞌat a tiꞌoꞌ.
\v 14 Mʌꞌ ja wirej, a Cristojoꞌ jach manan u yajenob rajen quin jach pꞌisic in bʌjob quir in beticob a baꞌ u cꞌat. Mʌꞌ ja wirej, a Cristojoꞌ caj quimij tiꞌ tu cotor mac, rajen robob irob rʌc quimenob.
\v 15 Cristo caj quimij soc u taquic tu cotoroꞌonex. Bajeꞌrer mʌꞌ jic tucrex ic bʌjiriꞌex ic betiquex. Jariꞌ bajeꞌrer quij cuxtarex quir ic betiquex a baꞌ u cꞌat Cristo, a mac quimij caꞌ wʌcꞌʌs riqꞌuij.
\v 16 Rajen tu qꞌuinin bajeꞌrer hasta quij quiminex mʌꞌ jic yʌn iriquex mac irej wa chen winic. Cax a uchoꞌ caj in wiraj Cristo irej wa chen winic. A bajeꞌrer a tenoꞌ mʌꞌ tan in wiric Cristo an bic chen winic quireꞌ tin cꞌaxaj tin tucur bajeꞌrer.
\v 17 Rajen a mac a tu yacsob tu yorob tiꞌ Cristo robob ricꞌbenchʌjob u pixamob. A baꞌ cu tucricob bajeꞌrer toc cꞌaxaꞌan, rajen tu pꞌʌtob a tu cu manob uch. An bic cu manob bajeꞌrer toc ricꞌben.
\p
\v 18 Tu cotor aroꞌ caj betaꞌb ten Cꞌuj quireꞌ Cristo. Mʌꞌ ja wirej, a Cꞌujoꞌ caj u masaj toꞌonex ich a ricꞌben bejoꞌ. Bajeꞌrer tsoy yiricoꞌonex Cꞌuj quireꞌ Cristo tu toc boꞌot u boꞌorir ic siꞌpirex. Caj u tsꞌajaj a tenob in beyajob soc in manob in waꞌarej tiꞌ u jer macob soc tsoy yiricob Cꞌuj.
\v 19 Uꞌyex bic tabar a ray tꞌʌnoꞌ. A Cꞌujoꞌ caj u tuchiꞌta Cristo quir u quetquintic yor Cꞌuj yejer mac soc pacran tsoy ij quiriquex ic bʌjex, rajen Cꞌuj mʌꞌ ju tucrej wa yʌn ic siꞌpirex. Rajiꞌ tu tsꞌajaj a tenob in beyajob caꞌ manquenob in waꞌarob bic tabar u jawar u siꞌpir mac.
\v 20 Rajen tarenob yʌjtseqꞌuirenob Cristo quir in beyajob tiꞌ. A tenoboꞌ quin tsecꞌticob u tꞌʌn Cꞌuj, chen Cꞌuj, rajiꞌ tan u chich aric tiꞌ mac. A tenoboꞌ quin chich aricob techex ʌcʌtan tiꞌ Cristo: “Caꞌ yiriquechex tsoyechex Cꞌuj.”
\v 21 A Cristojoꞌ mʌnaꞌ u siꞌpir chen tar quir u boꞌotic u boꞌorir ic siꞌpirex, a Cꞌujoꞌ caj u tuchiꞌtaj caꞌ quinsaꞌ ich cruz tiꞌ ic siꞌpirex. Rajen ʌcʌtan tu wich Cꞌuj wa ber toꞌonex quij cacsiquex tij corex tiꞌ Cristo, jeroj toc rucꞌsaꞌb ic siꞌpirex.
\c 6
\p
\v 1 Quireꞌ a tenoboꞌ in wet beyajob tiꞌ Cꞌuj. Quin chich aricob techex mʌꞌ a maꞌquintiquex u jach tsoyir u pixam Cꞌuj a tsꞌaꞌb ten Cꞌuj techex. Mʌꞌ a chaꞌiquex u satʌrex. 
\v 2 Mʌꞌ ja wirej, tiꞌ tsꞌibaꞌan ich u tꞌʌn Cꞌuj tu cu yaꞌaric: 
\q Tu qꞌuinin a tin pꞌisaj tin tsꞌajaj techex a baꞌ tsoy tu tꞌʌn Cꞌuj. Wa ber ta tꞌʌnaꞌanex, quij Cꞌuj, tin wuꞌyaj a baꞌ ta waꞌaraj tenex. Raꞌ u qꞌuin caj in yamtaj techex quir in taquiquechex techex, quij Cꞌuj.
\m Mʌꞌ ja wirej, toc bajeꞌrer u qꞌuinin quir a tꞌʌniquex Cꞌuj, toc bajeꞌrer u qꞌuinin quir a taquiquex a pixamex. 
\p
\v 3 A tenoboꞌ quin cʌxticob bic tabar a baꞌ quin beticob cu jocꞌar tsoy, quireꞌ a tenoboꞌ mʌꞌ in cꞌat mac yaꞌaric u tꞌʌn Cꞌuj a quin tsecꞌticob mʌꞌ tsoyiꞌ.
\v 4 Mʌꞌ ja wirej, a tenoboꞌ in cꞌatob tu cotor mac yerob tan in beticob u beyaj Cꞌuj. Rajen quin mucꞌticob a mun yajir cu tar tin wocꞌor. Yʌn u qꞌuinin a tenob mʌnaꞌ ten a baꞌ in jach cꞌat. Yʌn u qꞌuinin mac tan u chuquicob in pach.
\v 5 Yʌn u qꞌuinin wa ber cu jʌtsꞌiquenob. Yʌn u qꞌuinin wa ber cu yacsiquenob tu cu maꞌcʌr winicob. Yʌn u qꞌuinin wa ber cu puricob u bʌjob tin wocꞌor. Yʌn u qꞌuinin wa ber rajraꞌ quin beyajob mʌꞌ jin jerarob. Yʌn u qꞌuinin mʌꞌ jin wenʌnob quireꞌ a baꞌ quin beticob. Yʌn u qꞌuinin wiꞌijenob.
\v 6 A baꞌ cu yesic jach tsoy tu quin beyajob a quin manob tu tsoyir. A baꞌ cu yesic jach tsoy tu quin beyajob tiꞌ Cꞌuj a quin najticob u jach tsoyir u tꞌʌn Cꞌuj. A tenoboꞌ quin mucꞌticob tu cotor baꞌ mac cu beticob tiꞌ a tenob. Jach tsoy quin beticob tiꞌ mac. Bayiriꞌ xan, u Tajꞌor u Pixam Cꞌuj cu yamtiquenob soc cꞌuchaꞌan in worob in beyajob tiꞌ Cꞌuj. Jach taj quin yajquinticob tu cotor mac.
\v 7 A Cꞌujoꞌ caj u chichquint in mucꞌob soc cꞌuchaꞌan in worob in quiꞌ tsicbar a baꞌ jach taj. A tenoboꞌ jach tsꞌajaꞌan in worob in manob ich a tsoyoꞌ soc a baywoꞌ cꞌuchaꞌan in worob tiꞌ a cꞌasoꞌ a tiꞌ yʌn ich tu cotor ruꞌum.
\v 8 Yʌn mac tsoy yiriquenob tu quin beyajob tiꞌ Cꞌuj. Yʌn mac mʌꞌ tsoy yiriquenob tu quin beyajob tiꞌ Cꞌuj. Yʌn mac xan, cu tsicbar tsoy tenob. Yʌn mac cu tsicbar cꞌas tenob. Yʌn mac a cu yaꞌaric quin tusaricob tiꞌ mac. Chen a tenoboꞌ rajraꞌ quin tsicbarob u tꞌʌn a tajoꞌ. 
\v 9 Yʌn mac cu yaꞌaricob mʌꞌ u yerenob a tenoboꞌ, chen yʌn mac cu yaꞌaricob u yerenob a tenoboꞌ. Yʌn mac u cꞌat yiricob in quiminob, chen tiꞌ toy cuxaꞌanenob. Yʌn mac cu chuquicob in pachob, chen mʌꞌ toy quinsaꞌbenobiꞌ. 
\v 10 Cax tin wor quin wuꞌyicob tucur in caꞌob quireꞌ a baꞌ cu tar tin wocꞌor, chen tin tucurob jach quiꞌ in worob. Cax otsichʌjenob, chen a jeꞌ tꞌʌnaꞌ a quin tsicbarob tiꞌ yaꞌab mac jach tsoy cu betic tiꞌob. Cax mʌꞌ yaꞌab in baꞌtacob, chen a Cꞌujoꞌ caj u tsꞌajaj tenob tu cotor a baꞌ in cꞌatob.
\p
\v 11 Uꞌyex baꞌ quin waꞌaric techex in wet acsaꞌorirex ich u cajar Corinto. Tin toc arob techex a baꞌ tiꞌ yʌn tin pixamob. Ne mʌꞌ biquenob yejerechexoꞌ.
\v 12 Mʌꞌ tan in waꞌaric wa mʌꞌ pacran tsoy yiroꞌonex ic bʌjex a baꞌ in jach cꞌat in waꞌaricob tiꞌ techex, chen a bʌjiriꞌechexoꞌ ta junanex mʌꞌ a cꞌatex soc tsoy yiricoꞌonex. 
\v 13 A tenoboꞌ quin tꞌʌniquexob an ten bic u tet cu tꞌʌnic u pararob. Yajquintex a tenoboꞌ an ten bic in jach yajechexob. 
\s A Cꞌujoꞌ cu cʌjtar tu yicnʌn a mac a cu yacsicob tu yorob tiꞌoꞌ
\p
\v 14 Yʌn macob ich yocꞌocab a mʌꞌ ju yacsicob tu yorob tiꞌ Cꞌuj. Mʌꞌ a yʌn pꞌeriꞌquintic a bʌjex yejerob. Mʌꞌ ja wirej, a mac a cu beticob a tsoyoꞌ mʌꞌ pꞌeriꞌ u tucur yejer mac a cu beticob cꞌas. Robob u tirir tiꞌ, an ten bic u sasirir u tirir tiꞌ a yacꞌbiriroꞌ.
\v 15 Mʌꞌ ja wirej, a Cristojoꞌ mʌꞌ quet u betej a baꞌ cu betic a quisinoꞌ. Bayiriꞌ xan, yejer a mac a yacsmʌnob tu yorob tiꞌ Cristo, mʌꞌ quet u beticob a baꞌ cu beticob a mac a mʌꞌ yacsmʌnob tu yorob tiꞌ Cristo.
\v 16 Bayiriꞌ xan, ich yatoch Cꞌuj, jariꞌ a Cꞌujoꞌ cuxaꞌan, rajiꞌ tan u cꞌujintaꞌr tiꞌ taroꞌ. Mʌꞌ ju chaꞌbʌr u cꞌujinticob tus Cꞌuj tiꞌ taroꞌ. Mʌꞌ ja wirej, a Cꞌujoꞌ cu yiriquechex irej wa techex yatoch Cꞌuj quireꞌ Cꞌuj cu yaꞌaric:
\q A tenoꞌ, in wet man yejer a mac a cu cꞌujintiquen a tenoꞌ. A tenoꞌ u Cꞌujiren a tiꞌoꞌ xanoꞌ, bayiriꞌ xan ten yʌnin a tiꞌoboꞌ, quij Cꞌuj.
\m
\v 17 A Cꞌujoꞌ cu yaꞌaric xan:
\q Toc pꞌʌtex tu cʌjaꞌanechex yejer mac a cu beticob cꞌas. Mʌꞌ a betiquex a cꞌasoꞌ. Mʌꞌ a betiquex a cꞌasoꞌ a cu beticoboꞌ casoꞌ a baywoꞌ jeꞌ in wacsiquechex ich a caꞌananoꞌ.
\v 18 A tenoꞌ, quij Cꞌuj a Tetenex bayiriꞌ xan a techexoꞌ in chan pararechex. Baxuc cu yaꞌaric Cꞌuj, a yʌn tu cotor u mucꞌoꞌ.

\c 7
\p
\v 1 Uꞌyex baꞌ quin waꞌaric techex in wet acsaꞌorirex, a mac in jach yaj. A baywoꞌ yʌn toꞌonex u tꞌʌn Cꞌuj a tu toc araj baꞌ cu yʌn bin u betej toꞌonex. Rajen caꞌ ic pꞌʌtex tu cotor cꞌas a tiꞌ yʌnoꞌ. Caꞌ ic pꞌʌtex a baꞌ cu yacsic ic winquirirex tiꞌ ic siꞌpirex. Caꞌ ic pꞌʌtex a tꞌʌnoꞌ a cu cꞌasquintic ij tucurex quireꞌ cu pʌyic ic siꞌpirex. Caꞌ ic yʌn sʌjtex Cꞌuj. Tan ic tsꞌiquex tiꞌ Cꞌuj ic pixamex munt qꞌuin.
\s Quiꞌ cʌnant a bʌjex tiꞌ a baꞌ cu cꞌasquintiquex tiꞌ mac a mʌꞌ yerob Cꞌuj
\p
\v 2 Uꞌyex in wet acsaꞌorirex caꞌ a wacsenex ta pixamex. Yʌn yajquintenex quireꞌ a tenoboꞌ mʌꞌ jin beta cꞌas techex, mʌꞌ in wacsob mac u siꞌpir, mʌꞌ jin tusarob mac soc u chuquejob baꞌ tenob.
\v 3 Cax caj in waꞌaraj aroꞌ techex mʌꞌ jin pʌcꞌ a pachex wa mac tu betaj cꞌas. A tenoꞌ caj in toc araj techex in jach yajechex. Jeꞌ in yajquintiquechex wa mun qꞌuin cuxaꞌanen, cax tu caꞌ in quimin.
\v 4 A tenoꞌ, tin tꞌʌn jeꞌ a quibex a baꞌ quin waꞌaric techex. Tan a quiꞌquintiquex in wor an bic tabar a manex tu tsoyir. Jach quiꞌ in wor cax tan in mucꞌyaj, quireꞌ wa ber cu tar tin tucur a baꞌ ca betiquex jeroj quin quiꞌquintic in wor.
\p
\v 5 Caj cꞌuchen ich u ruꞌumin Macedonia uch, mʌꞌ cꞌuchaꞌan in wor in jeꞌsic in bʌj quireꞌ yʌn baꞌ rajraꞌ tu yajquint in wor, a tenoꞌ yaꞌab tin wuꞌyaj. Tiꞌ yʌn yaꞌab baꞌteꞌ. Tan in tucricob bic tabar wa jeꞌ jocꞌareꞌ.
\v 6 Chen a Cꞌujoꞌ cu chichquintic u mucꞌoꞌ a mac a mʌnaꞌ u mucꞌ, rajen Cꞌuj caj u chichquint in worob wa ber caj cꞌuchij Tito tin wicnʌn.
\v 7 Mʌꞌ chen quiꞌjij in wor caj in wʌcꞌʌs iraj Tito, bayiriꞌ xan jach manan quiꞌjij in wor quireꞌ caj u yaꞌaraj Tito bic tabar ta chichquintex u yor Tito xan. Mʌꞌ ja wirej, a Titojoꞌ jach quiꞌ yor yejerechex. A Titojoꞌ caj u yaꞌaraj ten xan bic tabar jach tucur a caꞌex quireꞌ ta yajquintex in wor. Rajiꞌ caj u yaꞌaraj bic tabar a cꞌat a wiriquenex. Caj in wuꞌyaj a raꞌ tꞌʌnoꞌ jach yaꞌab quiꞌjij in wor. Caj u yaꞌaraj xan bic tabar ta cꞌʌꞌotenex.
\p
\v 8 Wa ber caj in tuchiꞌt in juꞌun techex, caj in wuꞌyaj yaj tin wor quireꞌ u tꞌʌn a tiꞌ yʌn ich a ray juꞌunoꞌ. Mʌꞌ ja wirej, in wer jeꞌ a wuꞌyiquex yaj ta worex tucur a caꞌex tiꞌ wa ber caj a xaquex a ray juꞌunoꞌ a tin tuchiꞌta techex. A bajeꞌreroꞌ mʌꞌ tucur in caꞌ quireꞌ caj in tsꞌibta techex a ray juꞌunoꞌ. Mʌꞌ ja wirej, in wer bajeꞌrer jawij a tucurex.
\v 9 Bajeꞌrer jach quiꞌ in wor, chen mʌꞌ quiꞌ in wor quireꞌ tucurnʌjechex uch. Chen quiꞌ in wor quireꞌ ta wesex bic tabar tucurnʌjechex. Mʌꞌ ja wirej, ta cꞌaxex ta worex caj a pꞌʌtex u cꞌasir a ta betex uchoꞌ. Rajen quin waꞌaric techex Cꞌuj caj u bet aroꞌ rajen caj jocꞌ u tsoyir techex. Bayiriꞌ xan, mʌnaꞌ cꞌas ta wuꞌyex ta worex tiꞌ a tenoꞌ.
\v 10 Mʌꞌ ja wirej, a mac a cu yubic yaj tu yor quireꞌ a baꞌ cꞌasir tu betaj uch, jeroj tuneꞌ caj u cꞌaxaj tu yor caj u pꞌʌtaj u cꞌasir an bic tu betaj uch. Jeroj tsoy yiric Cꞌuj, jeꞌ u taꞌquic u pixameꞌ. Chen wa tiꞌ yʌn mac a mʌꞌ ju cꞌat u yacsic tu yor tiꞌ Cꞌuj cax tucur u caj u yor, a ray macoꞌ mʌꞌ ju bin taꞌcbir u pixam. 
\v 11 Mʌꞌ ja wirej, caj a wacꞌt a bʌjex wa ber ta xaquex u juꞌunin quireꞌ a siꞌpir ta wacsex uch. Ta quiꞌquintex yor Cꞌuj bajeꞌrer quireꞌ a baꞌ ta betex bajeꞌrer. Cꞌuchaꞌan a worex a wirex a baꞌ a berex pachir caj a wuꞌyex a baꞌ siꞌpir ta wacsex a siꞌpirex uch. Ta jach acsex ta worex quireꞌ ta chꞌaꞌex sajaquirex tiꞌ Cꞌuj quireꞌ a werex jeꞌ u tsꞌic a mucꞌyajex Cꞌuj. Rajen ta chichquint a worex quir a qꞌueyiquex a mac a tu yacs u siꞌpir uch. Baxuc caj a wesex mʌꞌ quet a worex yejer u siꞌpir a tu betaj uch. Jeroj bajeꞌrer a cꞌatex a wiriquenex. 
\v 12 Wa ber caj in tsꞌibtaj techex a ray juꞌunoꞌ a tin tuchiꞌtechex, a tenoꞌ mʌꞌ jariꞌ in cꞌat in tsꞌic u mucꞌyaj tiꞌ a mac a tu yacs u siꞌpir uch. Mʌꞌ in cꞌat in yamt aray winicoꞌ, a betaꞌb cꞌas tiꞌ ten, a tu yacs u siꞌpir uch. Chen a Cꞌujoꞌ yer a baꞌ in cꞌat in betej uch. Mʌꞌ ja wirej, a tenoꞌ in cꞌat in wuꞌyic wa ʌcʌtan tiꞌ Cꞌuj quet pacran pꞌeriꞌ ij corex, ta quibex in tꞌʌn uch.
\v 13 Rajen ta chichquintex in wor bajeꞌrer.
\p Bayiriꞌ jach quiꞌ in wor quireꞌ tin wiraj Tito quiꞌ yor quireꞌ ta quiꞌ acsex tu yʌnechex.
\v 14 Wa ber mʌꞌ toy xic Tito tu yʌnechex uch, a tenoꞌ caj in waꞌaraj tiꞌ, jeꞌ a quibiquex in tꞌʌn a caj in tuchiꞌtatechexoꞌ. A baxucoꞌ caj in waꞌaraj tiꞌ Tito uch a baxuc raꞌiriꞌ caj a betex. A baxucoꞌ chʌcaꞌan yiric mac jach jaj a baꞌ caj in waꞌaraj tiꞌ Tito an ten bic tiꞌ yʌnen yejerechex uch, tu cotor a tin waꞌaraj techex jach taj xan.
\v 15 Rajen bajeꞌrer Tito jach manan u yajquintiquechex quireꞌ tu cotor u tꞌʌn caj u yaꞌaraj techex uch a techexoꞌ ta quibex. Mʌꞌ ja wirej, tu cotor u tꞌʌn Tito caj u yaꞌaraj techex uch jach tsꞌajaꞌan a worex a betexiꞌ.
\v 16 A tenoꞌ, bajeꞌrer, tan in quiꞌquintic in wor quireꞌ in wer jach taj jeꞌ a betiquex a tsoyoꞌ.
\c 8
\s Bic tabar u tsꞌic taꞌquin tiꞌ Cꞌuj
\p
\v 1 Uꞌyex baꞌ quin waꞌaric techex in wet acsaꞌorirex. A tenoꞌ in cꞌat in waꞌaric techex bic tabar a yacsmʌnob tu yorob ich u ruꞌumin Macedonia, a tu cʌjaꞌanob tu chan cajarob caj jocꞌob tsoy a tiꞌoboꞌ quireꞌ yamtaꞌbob ten Cꞌuj.
\v 2 Robob cax otsichʌjob quireꞌ chuc u pachob ten mac tu yʌnob, chen jach manan quiꞌ yorob. Cax otsichʌjob, tan u yamticob u yet acsaꞌorirob. Robob cu tsꞌicob u taqꞌuinob irob wa jach yaꞌab u taqꞌuinob.
\v 3 A tenoꞌ taj quin waꞌaric techex tiꞌob, cax wa ja baꞌ cu yamticob u yet acsaꞌorirob tan u tsꞌicob quireꞌ u yajob. Mʌꞌ ja wirej, a mun caj u tucrob u tsꞌic tiꞌob uch jach manan yaꞌab caj u tsꞌajob tiꞌob.
\v 4 Robob, a mac a cʌjaꞌanob ich u ruꞌumin Macedonia, caj u chich cꞌatob ten caꞌ in cꞌʌm u taqꞌuinob quir in tsꞌic tiꞌ a yacsmʌnob tu yorob ich u cajar Jerusalén. 
\p
\v 5 A baywoꞌ caj u betob, chen mʌꞌ an ten bic caj in tucrajiꞌ. Robob pʌyber u bʌjirirob caj u yʌn cꞌubob u bʌj tiꞌ Cꞌuj soc rajiꞌ yʌnin a tiꞌoboꞌ. A baywoꞌ, caj u yʌnxchun u cꞌaticob u yamtenob an ten bic Cꞌuj u cꞌat.
\v 6 Wa ber caj in wuꞌyaj winiquirob ich u ruꞌumin Macedonia tan u yamticob u yet acsaꞌorirob uch, bayiriꞌ mun cu tsꞌicob tiꞌob. Caj in waꞌaraj tiꞌ Tito caꞌ wʌcꞌʌs xic tu yʌnechex soc u chichquintic a worex uch soc rajraꞌ a muchꞌquintiquex a taqꞌuinex quir a yamtiquex yejer a taqꞌuinex a ta yʌnxchun a muchꞌquintiquex uch.
\v 7 A techexoꞌ tan a betiquex tsoy ich tu cotor a ta yʌn betex uch. Tan a quiꞌ acsiquex ta worex, bayiriꞌ xan, tan a quiꞌ najtiquex baꞌ, tan a quiꞌ tsicbarex xan, bayiriꞌ tan a pachtiquex a manex tu tsoyir. Bayiriꞌ tan a yajquintiquenob. Bayiriꞌ xan bajeꞌrer, in cꞌat caꞌ a quiꞌ yajquintex a wet acsaꞌorirex xan, tan a tsꞌiquex tiꞌob a baꞌ u cꞌatob bajeꞌrer.
\p
\v 8 A tenoꞌ, mʌꞌ tan in waꞌariquechex a jeꞌ tꞌʌnaꞌ irej wa tan in tsꞌic u tꞌʌnin techex soc a yamtiquex a wet acsaꞌorirex. Tan in waꞌariquechex aroꞌ soc a wesiquex tiꞌ tu cotor mac taj tan a yajquintiquex a wet acsaꞌorirex. Mʌꞌ ja wirej, jun yarob mac a yacsmʌnob tu yorob tsꞌajaꞌan yorob quir u yamticob u yet acsaꞌorirob.
\v 9 Mʌꞌ ja wirej, jach chʌcaꞌan ij quirex u jach tsoyir u pixam Cꞌuj a tsꞌaꞌb ten ic Jaj Tsꞌurirex Jesucristo toꞌonex. Iric rajiꞌ Jesús yʌnin tu cotor baꞌ a tiꞌ yʌn chen rajiꞌ u bʌjiriꞌ caj otsichʌjij quireꞌ u yajoꞌonex. A bʌjeꞌreroꞌ, quireꞌ u bʌjiriꞌ otsichʌjij rajen u jach tsoyir u pixam Cꞌuj jach manan cu cꞌuchur tu yʌnoꞌonex.
\v 10 Uꞌyex baꞌ quin tucric a baꞌ caꞌ a betex a techexoꞌ. Jach tsoy techex wa ca tsꞌocsiquex a baꞌ ta toc arex ca bin a betex uch, caj manij tuririꞌ u yaxqꞌuinin bajeꞌrer.
\v 11 Caꞌ a tsꞌocsex a ray a beyajex bajeꞌreroꞌ. Rajen caꞌ a tsꞌajex tiꞌ a wet acsaꞌorirex an ten bic u cꞌuchur a worex a tsꞌajex tiꞌob.
\v 12 Chen jach tsoy caꞌ a tsꞌajex a baxuc mac cꞌuchaꞌan yor u tsꞌic wa ju jach bʌjiriꞌ u cꞌat u tsꞌic. A toꞌonexoꞌ mʌꞌ jic yʌn tucriquex wa mʌnaꞌ toꞌonex quir ic tsꞌiquex tiꞌob.
\p
\v 13 A tenoꞌ mʌꞌ jin waꞌarej caꞌ a rʌc tsꞌajex tiꞌ u jer tu cotor baꞌ a yʌn techex. Mʌꞌ jin waꞌarej hasta mʌꞌ ju pꞌatʌr techex.
\v 14 A bajeꞌrer, yʌn techex quir a janʌnex, bayiriꞌ xan yʌn techex quir a buquintiquex. Rajen caꞌ a yamtex a wet acsaꞌorirex quireꞌ robob mʌnaꞌ tiꞌob, a baywoꞌ quetechex. Jaj ix tʌcoj caꞌ bin cꞌuchuc tu qꞌuinin wa yʌn tiꞌob quir u janʌnob, bayiriꞌ quir u buquinticob, chen a techexoꞌ mʌnaꞌ techex. Jeroj jeꞌ u yamtiquechex xan, a baywoꞌ jocꞌ quetechex xan.
\v 15 A baxucoꞌ, jeꞌ u jocꞌar an ten bic cu yaꞌaric ich tu tsꞌibaꞌan u tꞌʌn Cꞌuj: “A mac a yʌn yaꞌab quir u janʌn mʌꞌ u pꞌatʌr tu rʌc jantaj. A mac a yʌn chichin quir u janʌn mʌꞌ u caꞌ yʌn jant u yoꞌoch.” Baxuc cu yaꞌaric ich u tꞌʌn Cꞌuj.
\s A Titojoꞌ yejer u nupob
\p
\v 16 A tenoꞌ quin waꞌaric tiꞌ Cꞌuj: “Bayoꞌ Cꞌuj quireꞌ Tito.” Mʌꞌ ja wirej, caj tsꞌaꞌb u tucur ten Cꞌuj a Titijoꞌ caꞌ u yajquin techex an ten bic ten quin yajquintiquechex. 
\v 17 Wa ber caj in waꞌaraj tiꞌ Tito caꞌ tac yirechex, jach quiꞌ yor u bin, quireꞌ u cꞌat u yiriquechex.
\p
\v 18 Wa ber caꞌ bin tac Tito yejer u jerob ij quet acsaꞌorirob soc u yiricobechex xan. A jeꞌ ij quet acsaꞌorirex jach tsoy yirir ten ij quet acsaꞌorirex cax tu yʌnobiꞌ quireꞌ tsoy cu tsecꞌticob u jach tsoyir u tꞌʌn Cꞌuj.
\v 19 A jeꞌ ij quet acsaꞌorirex caj tetaꞌb ten a yacsmʌnob tu yorob tiꞌ u tꞌʌn Cꞌuj ich u cajar Jerusalén soc in wet binacob soc quir in pꞌʌtic a taqꞌuinoꞌ a tuchiꞌtaꞌb quir u yamticob yet acsaꞌorirob. A tenoboꞌ jeꞌ in beticob aroꞌ soc mac cu yaꞌaricob jach carem Cꞌuj, bayiriꞌ xan, jeꞌ u yiricob mac wa jin cꞌatob xan in yamticob ij quet acsaꞌorirex.
\v 20 A tenoboꞌ tan in cʌnanticob in bʌjob soc mʌnaꞌ mac cu bin u pʌqꞌuicob in pachob an bic quin man in jʌsicob a taqꞌuinex, a tan a tsꞌiquex tiꞌ a wet acsaꞌorirex ich u cajar Jerusalén.
\v 21 Mʌꞌ ja wirej, a tenoboꞌ in cꞌat in beticob a baꞌ tsoyoꞌ ʌcʌtan tu wich a mac a tiꞌ yʌnob ich yocꞌocab. 
\p
\v 22 A tenoboꞌ, jeꞌ in tuchiꞌticobeꞌ u jerob ij quet acsaꞌorirex soc caꞌ bin tacob yejer a caꞌturoꞌ, a cu bin u pꞌʌticob a taqꞌuinex. A jeꞌ ij quet acsaꞌorirex in werob bic tabar u beyajob tiꞌ Cꞌuj. Jach tsꞌajaꞌan yorob u beyajob tiꞌ Cꞌuj. Jach quiꞌ yorob quir u tarob tu yʌnechex quireꞌ yerob tsꞌajaꞌan a worex a yamtiquex a wet acsaꞌorirex a otsichʌjob bajeꞌrer.
\v 23 Wa tiꞌ yʌn mac tu yʌnechex a cu cꞌatic biquinin tan in tuchiꞌticob Tito tu yʌnechex. Arex tiꞌob, rajiꞌ tsoy in wiric, bayiriꞌ in wet beyajob. Rajiꞌ tan u cʌxtic bic tabar u betic tsoy techex. Bayiriꞌ, tiꞌ a caꞌturob a yet taracob, a cu tarob tu yʌnechex xan. Arex tiꞌ a racꞌobex a caꞌturob, caj tetaꞌb ten a wet acsaꞌorirex teraꞌ soc caꞌ tacob yejer Tito tu yʌnechex. Mʌꞌ ja wirej, quireꞌ robob u beyajob tiꞌ u racꞌob, tsoy yiricob Cristo. 
\v 24 Wa ber caꞌ bin cꞌuchucob a jeraꞌ a tin waꞌarajob techex, toc esex tiꞌob bic tabar a quiꞌ acsiquex tiꞌob soc tu cotor a wet acsaꞌorirex yerob a jach yajquintiquex a wet acsaꞌorirex. Mʌꞌ ja wirej, baxuc caj in waꞌaraj tiꞌ tu cotor mac, a jach manan a yajquintiquex a wet acsaꞌorirex.
\c 9
\s U taqꞌuin a cu muchꞌquinticobeꞌ quir u tsꞌicob tiꞌ u yet acsaꞌorirob
\p
\v 1 Mʌꞌ baꞌwir quin tsꞌibtic techex bic tabar quir a yamtiquex a wet acsaꞌorirex.
\v 2 Quireꞌ in wer a jach cꞌatex a yamtiquex a tiꞌoboꞌ. Wa ber caj manen in tsecꞌtob u tꞌʌn Cꞌuj uch ich u ruꞌumin Macedonia tin waꞌaraj tiꞌob: “Robob a mac a tiꞌ yʌn ich u ruꞌumin Acaya, raꞌiriꞌ u qꞌuinin tuririꞌ yaxqꞌuin tan u muchꞌquinticob u taqꞌuinob soc u yamticob u yet acsaꞌorirob.” Bajeꞌrer, quireꞌ a baꞌ ta betajex tan u man u juminticob techex ich a mac a cʌjaꞌanob ich u ruꞌumin Macedonia teraꞌ. Raꞌ tu chichquint u yorob soc u muchꞌquinticob u taqꞌuinob quir u yamticob u yet acsaꞌorirob an ten bic techex tan a yamtiquex a tiꞌoboꞌ xan.
\v 3 Rajen tan in tuchiꞌtiquechex ij quet acsaꞌorirex quir u wʌcꞌʌs aricob techex. Mʌꞌ ja wirej, a tenoꞌ in cꞌat a muchꞌquintiquex a taqꞌuinex tu ca bin a yamtiquex a wet acsaꞌorirex cax mʌꞌ toy taquen tu yʌnechex quireꞌ tin toc araj tiꞌ mac tsꞌajaꞌan a worex a yamtiquex a wet acsaꞌorirex.
\v 4 A baꞌ u ber in wet taracob a mac a cu tar ich u ruꞌumin Macedonia quir u tarob tu yʌnechex caꞌ bin cꞌuchucob jeroj mʌnaꞌ ta muchꞌquintex a taqꞌuinex soc a yamtiquex a wet acsaꞌorirex. Chen a tenoꞌ caj in waꞌaraj tiꞌob jach tsꞌajaꞌan a worex a yamtiquex a tiꞌoboꞌ. Jeroj jeꞌ in chꞌic surʌquireꞌ, bayiriꞌ xan, a techexoꞌ jeꞌ a chꞌic surʌquirex quireꞌ mʌnaꞌ a taqꞌuinex quir a yamtiquex a wet acsaꞌorirex.
\v 5 Rajen caj in tucraj wa tsoy caꞌ bin xicob ij quet acsaꞌorirex soc pʌyber cu tꞌʌniquechexob. Jeroj, jeꞌ u cꞌasic techexob tiꞌ a taqꞌuinex a ta toc muchꞌquintex uch. Jeroj, caꞌ bin cꞌuchuquenob toc tsꞌoc a muchꞌquintiquex tiꞌ. Mʌꞌ ja wirej, chʌcaꞌan yiric mac jach tsꞌajaꞌan a worex a yamtiquechex mac. Jeroj, mʌnaꞌ mac cꞌuchaꞌan yor yaꞌarej ten tin tsꞌʌraj a pachex a tsꞌiquex tiꞌob a taqꞌuinex.
\p
\v 6 Uꞌyex baꞌ quin waꞌaric techex bajeꞌrer. A mac a cu tsꞌic chichin bayiriꞌ jeꞌ u tsꞌabʌr ten Cꞌuj chichin xan. Chen a mac a cu tsꞌic yaꞌab, bayiriꞌ jeꞌ u tsꞌabʌr ten Cꞌuj yaꞌab.
\v 7 Jujunturechex caꞌ a tsꞌajex a baꞌ ca tucriquex ta worex, a baꞌ quiꞌ a worex a tsꞌic. Arex mʌꞌ u yʌn tsꞌic wa mʌꞌ u cꞌat, mʌꞌ u yʌn tsꞌic quireꞌ tsʌrbir u pach. 
\v 8 Mʌꞌ ja wirej, a Cꞌujoꞌ yʌn u mucꞌ quir u tsꞌic techex a baꞌ a cꞌatex. Rajiꞌ jeꞌ u tsꞌic techex soc jach manan yʌn techex. Bayiriꞌ xan, quir a yamtiquechex a mac a cʌjaꞌanob ich yocꞌocab.
\v 9 Tu tsꞌibaꞌan u tꞌʌn Cꞌuj cu yaꞌaric:
\q A mac a jach tsoyoꞌ, rajiꞌ mʌꞌ u xupur baꞌ, quireꞌ jach manan u yamtic a mac otsichʌjij.
\m
\v 10 Mʌꞌ ja wirej, a Cꞌujoꞌ a cu tsꞌic u yijir tiꞌ mac quir u pʌqꞌuic soc yʌn yoꞌoch quir u jantic. Rajiꞌ xan, jeꞌ u tsꞌic techex tu cotor a baꞌ a cꞌatex. Jeꞌ u yʌntar techex soc yʌn techex quir a jʌsiquex tiꞌ u jer mac. 
\v 11 Rajiꞌ jeꞌ u tsꞌic techex soc jach manan yʌn techex, a baywoꞌ cꞌuchaꞌan a worex a tsꞌiquex tiꞌ mac a mʌnaꞌ tiꞌ. A baywoꞌ xan, a mac a yacsmʌnob tu yorob jeꞌ u yaꞌaricob tiꞌ Cꞌuj: “Bayoꞌ Cꞌuj”, quireꞌ jeꞌ in jʌsic a baꞌ ca bin a tuchiꞌtiquex tiꞌ a wet acsaꞌorirex ich u cajar Jerusalén.
\v 12 Quireꞌ wa ber ca tsꞌiquex quir a yamtiquex a wet acsaꞌorirex, mʌꞌ u chen bin tsꞌaꞌbir tiꞌob a baꞌ u cꞌatob, bayiriꞌ xan, wa ber cu bin u cꞌʌmbirob a sijbir tiꞌob jeꞌ u yaꞌaricob: “Bayoꞌ Cꞌuj”, quireꞌ a baꞌ ta sijex tiꞌob.
\v 13 Robob xan, jeꞌ u cꞌujinticob Cꞌuj quireꞌ chʌcaꞌan yiricob mac tu cotor biquiraꞌ a pixamex. Mʌꞌ ja wirej, chʌcaꞌan yiricob mac taj ta cꞌʌmajex u jach tsoyir u tꞌʌn Cꞌuj tiꞌ Cristo. Bayiriꞌ xan, tan a yamtiquex a wet acsaꞌorirex ich u cajar Jerusalén, bayiriꞌ xan tan a yamtiquex u jer mac.
\v 14 Robob jeꞌ u tꞌʌnicob Cꞌuj techex quireꞌ jach manan tu yirob a yajquintiquex a tiꞌoboꞌ. Mʌꞌ ja wirej, jeꞌ u yiricob bic tabar a Cꞌujoꞌ tu yesaj u jach tsoyir u pixam soc cꞌuchaꞌan a worex a betiquex tsoy tiꞌob. 
\v 15 Bajeꞌrer caꞌ ij carex tiꞌ Cꞌuj: “Bayoꞌ Cꞌuj”, quireꞌ tu tuchiꞌt u parar teꞌ ich yocꞌocab. Mʌꞌ ja wirej, a baꞌ tu betaj toꞌonex Cꞌuj jach manan tsoy. Mʌꞌ cꞌuchaꞌan ij corex ij carex bic jach manan coꞌoj a baꞌ tu betaj toꞌonex.
\c 10
\s Pablo u bʌjiriꞌ cu cʌnantic u bʌj
\p
\v 1 A tenoꞌ Pablojen, yʌn in tꞌʌn quir in waꞌaric techex. Chen a tenoꞌ chanber quin quiꞌ tꞌʌniquechex an ten bic Cristo tꞌʌnij mac ber tiꞌ cʌjaꞌan uch ich yocꞌocab. Yʌn mac tu yʌnechex bajeꞌrer tan u yaꞌaricob ten: “Wa tiꞌ yʌn teraꞌ u bʌjiriꞌ Pablo, chanber u tꞌʌn, quireꞌ mʌꞌ cꞌuchaꞌan yor yaꞌaric tenob. Chen wa ber caꞌ bin tsibanʌquenob ich juꞌun, jeroj jach chich cu tꞌʌniquenob.” 
\v 2 Uꞌyex baꞌ quin waꞌaric techex in wet acsaꞌorirex. Jutsꞌ a bʌjex tiꞌ tu cotor a baꞌ mʌꞌ tsoyiꞌ, soc caꞌ bin uruquenob tu yʌnechex jeroj tsoy in tsicbar techex. Tin tꞌʌn, mʌꞌ a cꞌatex in qꞌueyiquex bic tabar ca cuxtarex bajeꞌrer. Chen wa tiꞌ toy yʌn mac a tan yaꞌaricob tan in teticob in bʌj quir in beyaj tiꞌ Cꞌuj, jeroj robob caꞌ in chich arej tiꞌob ʌcʌtan tu wichob.
\v 3 Jach taj, a tenoꞌ chen xiben, chen a tenoꞌ mʌꞌ tan in betic u beyaj Cꞌuj yejer in bʌjiriꞌ in tꞌʌn.
\v 4 Mʌꞌ ja wirej, in bʌjiriꞌ mʌꞌ jin cʌxtej bic tabar in betic caꞌ jocꞌac u tsoyir u beyaj Cꞌuj. Quireꞌ yejer u bʌjiriꞌ u tꞌʌn mac mʌꞌ cꞌuchaꞌan yor tiꞌ. Rajen a Cꞌujoꞌ cu chichquintic in mucꞌ quir in beyaj tiꞌ soc cꞌuchaꞌan in wor in chꞌesic a cꞌasoꞌ.
\v 5 Quireꞌ u mucꞌ Cꞌuj a tu tsꞌaj ten Cꞌuj, jeroj cꞌuchaꞌan in wor tiꞌ a mac a cu nunquicob in tꞌʌn an bic cu tsicbarob. Mʌꞌ ja wirej, robob tan u cʌxticob bic u nunquicob in tꞌʌnob a quin tsicbar quireꞌ mʌꞌ u cꞌatob yerticob biquiraꞌ Cꞌuj. Ber caꞌ bin tsꞌocac u cꞌuchur in wor tiꞌ u tꞌʌnob, a cu tus tucricob, jeroj jeꞌ in wesic tiꞌob Cꞌuj soc u quiꞌ acsicob tu yorob tiꞌ Cristo.
\v 6 Wa ber chʌcaꞌan yiriquen tu quibob tꞌʌn a tin waꞌaraj techex jeroj cꞌuchaꞌan in mucꞌ in qꞌueyic a mac a mʌꞌ tu quibob a ray tꞌʌnoꞌ.
\p
\v 7 Arex ten biquinin ca chen iriquex u winquirir mac, chen mʌꞌ a werex a baꞌ tiꞌ yʌn tu yor? Arex tiꞌ a mac a cu nunquicob in tꞌʌnob a cu yaꞌaricob u beyajob tiꞌ Cristo xan, a tenoboꞌ quin beyajob tiꞌ Cristo xan.
\v 8 Cax cꞌuchaꞌan in worob in waꞌaric techex yaꞌab in tꞌʌnob an bic tsꞌaꞌb in beyajob ten ic Jaj Tsꞌurirex Jesús, chen mʌꞌ jin chꞌaꞌej suraquirob tiꞌ in tꞌʌnob. Quireꞌ in werob rajiꞌ ic Jaj Tsꞌurirex a tu tsꞌaj in beyajob soc in tsicbarob u tꞌʌn quir in chichquinticob a worex tiꞌ u tꞌʌn Jesucristo. A tenoboꞌ mʌꞌ tan in tupsicob a worex tiꞌ u tꞌʌn Cꞌuj an bic u jer mac tan u beticob. 
\v 9 Mʌꞌ a yʌn tucriquex tan in cꞌʌnicob juꞌun quir in jacꞌsicob a worex techex.
\v 10 Mʌꞌ ja wirej, yʌn mac tan yaꞌaricob: “A Pablojoꞌ wa ber cu tsꞌibtic mac quir u tuchiꞌtic tiꞌob juꞌun, jeroj, chich cu yaꞌaric mac. Chen wa ber u bʌjiriꞌ cu cꞌuchur tu yʌnob jeroj, chanber cu tꞌʌnic mac. A Pablojoꞌ, quij yaꞌaricob, chen tꞌʌnitꞌʌn u caꞌ.” Baxuc cu yaꞌaricob tenob.
\v 11 Arex tiꞌ mac a tan u yaꞌaricob baxucoꞌ. Jeꞌ yerticob wa mʌꞌ jin chich arejob tiꞌ mac caꞌ bin cꞌuchuquen. Mʌꞌ chen ich juꞌun quin chich aricob tiꞌ maquiꞌ. Bayiriꞌ xan, cꞌuchaꞌan in worob in waꞌaricob tiꞌ mac caꞌ bin cꞌuchuquenob tu yʌnechex.
\p
\v 12 Chen a tenob mʌꞌ cꞌuchaꞌan in worob in waꞌaricob bin caꞌ in betob an ten bic u jer mac tan u beticob tu yʌnechex, a mac a tan u nacsicob u bʌjob. Mʌꞌ ja wirej, cu tus tucricob u neꞌerob baꞌ, chen u jer mac mʌꞌ yerobiꞌ, chen robob jach yaj u cʌnicob baꞌ. Cu chen cʌxticob bic tabar jach manan tiꞌ u yʌjcamsayʌjirob. 
\v 13 A tenoboꞌ mʌꞌ tan in waꞌaricob caremenob quireꞌ a baꞌ quin waꞌaricob. A baꞌ quin beticob raꞌ in waꞌaricob tiꞌ mac. A tenoboꞌ, jariꞌ in cꞌatob in waꞌaricob techex tiꞌ u beyaj a tu tsꞌaj tenob Cꞌuj. Rajiꞌ tu tsꞌaj in beyajob tu cʌjaꞌanechex ich u cajar Corinto.
\v 14 Mʌꞌ ja wirej, Cꞌuj tu tsꞌaj in beyajob caꞌ xiquenob beyajob tu yʌnechex. A tenoboꞌ mʌꞌ in bʌjiriꞌob quin tucricob in binob tu yʌnechex. Chen a tenoboꞌ pʌyber yʌn tarenob in tsecꞌticob techex u jach tsoyir u tꞌʌn Cristo. Pachir caj tar u jer yʌjtseqꞌuirob u tꞌʌn Cꞌuj. 
\v 15 A tenoboꞌ in chen cꞌat in waꞌaricob techex in beyajob a quin beticob. A tenoꞌ mʌꞌ jin waꞌarob techex a baꞌ beyaj tu betaj u jer mac. Bajeꞌrer, in cꞌat in wiricob u chichtar a muqꞌuex tiꞌ u tꞌʌn Cꞌuj soc tu cʌjaꞌanechex jeroj, cꞌuchaꞌan in wor in beticob techex a tsoyoꞌ. 
\v 16 Jeroj pachir, cꞌuchaꞌan in worob xan in bin in tsecꞌtob u tꞌʌn Cꞌuj ich u jer cajarob a tiꞌ yʌn pʌchirechex. Chen a tenoboꞌ mʌꞌ jin bin in tsecꞌtob u jach tsoyir u tꞌʌn Cꞌuj tu toc yʌn a yacsmʌnob tu yorob. A tu mʌꞌ ju tsecꞌmʌnob mac, tiꞌ quin binobiꞌ.
\p
\v 17 Jeroj a mac u cꞌat yubej yaꞌaraꞌ: “Jach caremech a techoꞌ”, quireꞌ u beyaj a tu betaj caꞌ u yaꞌarej: “Carem in Jaj Tsꞌurir a tiꞌ yʌn ich caꞌanan a cu chichquintic in mucꞌ quir in beyaj tiꞌ.” Arej mʌꞌ u bʌjiriꞌ aric wa carem an ten bic u bʌjiriꞌ tu betaj u beyaj.
\v 18 Mʌꞌ ja wirej, a mac a cu jocꞌar tu tsoyir quireꞌ a baꞌ tu betaj tiꞌ ic Jaj Tsꞌurirex, rajiꞌ a mac cu bin arbir ten ic Jaj Tsꞌurirex: “Jach tsoy a beyaj a techexoꞌ”, mʌꞌ u jocꞌar tu tsoyir quireꞌ u bʌjiriꞌ tu yaꞌaraj. 
\c 11
\s Pablo yejer a tus yʌjtꞌʌnirob Cristo
\p
\v 1 A tenoboꞌ tan in tsicbarob irenob a mac a cu sosoc tsicbar. Chen mucꞌtex a baꞌ in cꞌat in waꞌaric techex. 
\v 2 A tenoboꞌ queten yejeren Cꞌuj, jach manan in cꞌatob mʌꞌ a pꞌʌtiquex Cristo. Mʌꞌ ja wirej, tin yam techex soc a wacsiquex ta worex tiꞌ Cristo. A bajeꞌreroꞌ an ten bic a xquicoꞌ a tabar u chꞌic u mam, a cu chen yajquintic a mac a cu bin u raqꞌuintej. Raꞌ irej u tꞌʌn a tabar in waꞌaric techex teraꞌ. A mac jach manan caꞌ a yajquintex. rajiꞌ Cristo.
\v 3 An ten bic Eva caj tus araꞌb ten quisin baxuc quin chꞌic u sajquirirob wa jeꞌ u tus aric techex mac soc a pꞌʌtiquex Cristo.
\v 4 Mʌꞌ ja wirej, cax mac a cu cꞌuchur tu yʌnechex wa baꞌ cu camsiquechex u tirir tiꞌ a baꞌ tin camsechexob uch tiꞌ Cristo, raꞌ ca quiꞌ sariquex a xiquinex tiꞌ. Mʌꞌ ja wirej, u tirir tiꞌ a baꞌ cu camsicob tiꞌ u Tajꞌor u Pixam Cꞌuj. U tirir tiꞌ a baꞌ cu camsicob tiꞌ u jach tsoyir u tꞌʌn Cꞌuj. A baꞌ cu camsicob raꞌ mʌꞌ quet yejer a baꞌ tin camsechexob uch.
\v 5 Robob a mac a cu camsiquechex a ray tꞌʌnob cu tus tucricob u bʌjiriꞌ: “Jach caremenob”, chen a tenoboꞌ mʌꞌ jin tucrej tiꞌob wa jach carem tenoboꞌ.
\v 6 Cax mac cu yaꞌaric mʌꞌ in werob bic tabar in tsicbarob soc tsoy yubicob mac in tꞌʌnob wa ber quin tsicbarob. Chen a tenoboꞌ in jach erob a baꞌ quin camsicob. Mʌꞌ ja wirej, a techexoꞌ ta quiꞌ uꞌyex in tꞌʌnob a tin tsꞌibtechexob caj in camsajechexob uch.
\p
\v 7 Ta tucrex wa tin betajob cꞌas quireꞌ mʌꞌ tin cꞌataj techexob in taqꞌuin wa ber tin waꞌara techexob u jach tsoyir u tꞌʌn Cꞌuj? Soc in beticob tsoy techex chich beyajnʌjenob quir in jaric in taqꞌuinob soc in janʌnob wa ber tin camsechexob u tꞌʌn Cꞌuj uch.
\v 8 Wa ber tan in beyajob uch tu quin camsiquechex u tꞌʌn Cꞌuj ta cajarex, u jer a yacsmʌnob tu yorob ich u jer u cajarob tu tsꞌajob tenob taqꞌuin quir in mʌnic a baꞌ in cꞌatob.
\v 9 Wa ber jamach cʌjaꞌajenob ich a cajarex uch yʌn u qꞌuinin mʌnaꞌ baꞌ quir in janʌnob. Chen mʌꞌ jin cꞌataj techex a baꞌ in cꞌatob. Chen robob a mac a cu tar ich u ruꞌumin Macedonia, ij quet acsaꞌorirex, robob caj u tsꞌajob tenob a baꞌ in cꞌatob uch. A baywoꞌ mʌꞌ jin cꞌatechexob a baꞌ in cꞌat uch. Mʌꞌ biqꞌuin jeꞌ in cꞌatechexob a baꞌ in cꞌat soc mʌꞌ jin pecsob a worex.
\v 10 Mʌꞌ ja wirej, quireꞌ tin wacsaj tin worob tiꞌ Cristo, taj quin waꞌaricob. Jach jaj mʌꞌ jin bin in cꞌatob taqꞌuin tiꞌ a mac a yacsmʌnob tu yorob tu cʌjaꞌanob ich u ruꞌumin Acaya. Jach quiꞌ in worob quireꞌ baxuc caj in betob. 
\v 11 Biquinin tan in waꞌariquechexob a ray tꞌʌnoꞌ? Mʌꞌ a tucriquex wa mʌꞌ jin yajquin techexob? A Cꞌujoꞌ yer jach manan in yajquintiquechexob.
\p
\v 12 Mʌꞌ ja wirej, a tu cʌjaꞌanechex mʌꞌ jin chꞌajob a taqꞌuinex soc a mac a cu camsicob techex mʌꞌ cꞌuchaꞌan yorob yaꞌaricob, robob cu beticob an ten biquenob quin beticob. A mac a cu tus aricob robob raꞌiriꞌ yejerenob wa ber cu camsicob an ten biquenob a tenoboꞌ quin camsicob. 
\v 13 A ray macoꞌ a cu camsicob a mac a quin tsicbar techexob bajeꞌrer, robob cu tus aricob wa robob u jach ʌj tseqꞌuirob u tꞌʌn Cristo, chen mʌꞌ tajiꞌ quireꞌ cu tus aricob mac. Robob cu tus etsꞌicob ʌjtseqꞌuirob u tꞌʌn Cristo.
\v 14 Mʌꞌ u yʌn jacꞌarex a worex quireꞌ a baꞌ caj in waꞌara techexob quireꞌ u bʌjiriꞌ a quisinoꞌ cu tus cꞌaxic u bʌj soc chʌcaꞌan yirir irej wa yʌjmasir u tꞌʌn Cꞌuj a cu tar ich caꞌanan.
\v 15 Rajen rajiꞌ taj wa mac a cu beyajob tiꞌ quisin xan cu tus esicob u bʌjob irej wa tsoy yor mac. Chen bic tabar u cuxtarob ich yocꞌocab mac jeꞌ u bin tsꞌabir u mucꞌyaj caꞌ bin cꞌuchuc tu qꞌuinin quireꞌ a baꞌ caj u betob.
\s A baꞌ caj u mucꞌtaj Pablo quireꞌ yʌjtseqꞌuir Cꞌuj
\p
\v 16 Uꞌyex baꞌ quin wʌcꞌʌs aric techex, chen mʌꞌ a yʌn tucriquex wa tin sʌt in tucur quireꞌ a baꞌ quin bin in waꞌarej techex. Chen wa ca tucriquex tin sʌt in tucur jeroj, chaꞌex in cꞌʌs tsicbar in bʌjiriꞌeꞌ.
\v 17 Raꞌ quin tsicbar techex bajeꞌrer mʌꞌ ju tsꞌaj in tucur Cꞌujiꞌ. In bʌjiriꞌ quin tsicbar an ten bic mac mʌnaꞌ u tucuroꞌ, a mac a cu tsicbar u bʌjiriꞌ.
\v 18 A techexoꞌ ta wirex yaꞌab mac a cu camsicob mac, cu tsicbarob tu cotor a baꞌ cu beticob. Rajen a ten xanoꞌ, in cꞌat in tsicbar techex a baꞌ tu cotor quin betic.
\v 19 Quireꞌ bajeꞌrer ca tus tucriquex wa ja neꞌerex baꞌ tu cotor. Jeroj, cꞌuchaꞌan a worex bajeꞌrer soc nemʌꞌ biquechex yejeren, cax yejer u tꞌʌn a cu tar a mac a tu sʌt u tucur.
\v 20 Mʌꞌ ja wirej, a mac a cu camsicob techex bajeꞌrer tan a tsꞌurintiquex. Chen a techexoꞌ tiꞌ toy ca mucꞌtiquex tiꞌob, cax a baꞌ cu beticob techex. Robob jariꞌ u cꞌat u chꞌicob a taqꞌuinex, cu yocarob u cꞌʌniquechex. Cu yaꞌaricob: “Jot a techexoꞌ”, cu tacꞌjʌtsꞌiquechex, chen ca mucꞌtiquex.
\v 21 A tenoboꞌ cax suraquenob in waꞌarej. A tenoboꞌ mʌꞌ chich in worob quir in beticob a baxuc a caj u betob a tus etsꞌ yʌjtseqꞌuirob u tꞌʌn Cꞌuj. Chen wa robob cu wʌcꞌʌs tsicbar tsoy u bʌjiriꞌob. A tenoboꞌ cꞌuchaꞌan in wor in tsicbarob jach manan tsoy in bʌjiriꞌeꞌ jaj ix tʌcoj ca waꞌariquex a Pablojoꞌ caj u sʌt u tucur. 
\p A ray macoꞌ a cu camsicob techex, cu tsicbarob a baꞌ caj u betajob, a cu tetic u bʌjob. A tenoboꞌ tabar in waꞌaric techex in bʌjiriꞌ cax ca waꞌariquex tin sʌt in tucur quireꞌ cꞌuchaꞌan in worob tiꞌ.
\v 22 A ray u winiquirob judiojoꞌ cu yaꞌaricob: U winiquirenob judio, baxuc a tenoꞌ u winiquiren judío. Robob cu yaꞌaricob u winiquirob u ruꞌumin Israel, baxuc a tenoꞌ u winiquirenoꞌ u ruꞌumin Israel. Robob cu yaꞌaricob: Rajiꞌ Abraham u nunquirob, baxuc ten xan, rajiꞌ Abraham in nunquir xan.
\v 23 Robob cu yaꞌaricob cu beyajob tiꞌ Cristo. Chen a ten xanoꞌ, jach manan quin betic u beyaj Cristo, mʌꞌ quet u beticob. Tin tꞌʌn, ca tucriquex jach taj caj in sʌt in tucur quireꞌ an bic tabar tan in tsicbar techex. Chen a tenoꞌ jach manan in beyaj, robob mʌꞌ quet u beyaj yejeren. Jach manan mucꞌyajnʌjen uch caj u jʌtsꞌob in pach a tiꞌoboꞌ mʌꞌ jach manan a tiꞌoboꞌ. Yaꞌab u tenin caj purenob tu cu maꞌcʌr winicob, mʌꞌ jach manan a tiꞌoboꞌ. Jach yaꞌab u tenin tabar in quinsaꞌ, mʌꞌ jach manan a tiꞌoboꞌ.
\v 24 Tiꞌ in wet winiquirob judío cinco u tenin caj u jach tsꞌaj in mucꞌyaj, caj u jʌtsꞌob in pach treinta y nueve u jatsꞌʌr in pach.
\v 25 Tres u tenin caj u jʌtsꞌob in pach yejer cheꞌ, tenin tu chꞌinob in joꞌr, tres u tenin u chemin jur tu quin man ich cꞌacꞌnab. Tiꞌ yʌnen tuririꞌ u qꞌuinin yejer tuririꞌ acꞌbir tiꞌ yʌnen ich cꞌacꞌnab quireꞌ jur a chemoꞌ.
\v 26 Tu quin bin in tsecꞌt u tꞌʌn Cꞌuj yaꞌab u tenin tan in man ich bej orac u cuchen u burij yaꞌarir. Orac quinsaquen ten a mʌꞌ u winiquirob judío. Tu quin tsecꞌtic u tꞌʌn Cꞌuj ich u cajarob orac quinsaquen xan. Orac quinsaquen ten a mac a mʌꞌ taj tu yacsob tu yorob. Tu quin man ich tʌcay ruꞌum tiꞌ mucꞌyajnʌjen. Tu quin chꞌʌctic cꞌacꞌnab tiꞌ mucꞌyajnʌjen xan.
\v 27 Yaꞌab mucꞌyajnʌjen quireꞌ wiꞌijen. Mucꞌyajnʌjen quireꞌ ucꞌchʌjen. Yaꞌab mucꞌyajnʌjen quireꞌ chich in beyaj. Yaꞌab u tenin mʌnaꞌ quir in wenʌn. Yaꞌab u tenin wa ber mʌnaꞌ in woꞌoch mʌnaꞌ in jantej baꞌ. Yaꞌab u tenin mucꞌyajnʌjen ich chʌcʌm quireꞌ jach queꞌer. Yaꞌab u tenin mucꞌyajnʌjen quireꞌ mʌꞌ yaꞌab in nocꞌ quir in buquintic.
\p
\v 28 Mʌꞌ jariꞌ aroꞌ, quin mucꞌyaj jujuntur u qꞌuinin wa ber quin wuꞌyic tin wor u yajirir in wet acsaꞌorirob cax tu yʌnob.
\v 29 Wa ber quin wiric tu yʌn a yacsmʌnob tu yorob a mʌꞌ chichac yorob tiꞌ u tꞌʌn Cꞌuj quin tucric an ten bic cu tucricob xan. Wa ber qꞌuin tiꞌ yʌn mac a yacsmʌnob tu yorob caj tus araꞌb ten mac soc u yacsicob u siꞌpir quin tucric cax cu yajtar in wor.
\v 30 Jaj ix tiꞌ wa quin wuꞌyic tsoy in wor in bʌjiriꞌeꞌ jeꞌ in wuꞌyic tsoy in wor in bʌjiriꞌeꞌ tiꞌ a baꞌ cu yesic a baꞌ mʌꞌ cꞌuchaꞌan in wor tiꞌ.
\v 31 A baꞌ caj in waꞌaraj techex, a Cꞌujoꞌ yer wa taj a baꞌ quin waꞌaric. Rajiꞌ Cꞌuj u Tet ic Jaj Tsꞌurirex Jesucristo. Rajiꞌ in cꞌat in wiric tu cotor mac caꞌ yaꞌarob munt qꞌuin tiꞌ Cꞌuj: “Jach caremech Cꞌuj!”
\v 32 Ich u ruꞌumin a cu reyintic u rey Aretas, tu yʌn u cajar Damasco. Rajiꞌ a mac gobernador tu ricꞌsaj u tꞌʌnin soc u cꞌʌricob u jor u paꞌteꞌir tunich soc u cʌnantaꞌr ten soldado. Mʌꞌ ja wirej, u cꞌat u chuquiqenob caꞌ u mʌquenob tu cu naj maquicob mac.
\v 33 Chen putsꞌen quireꞌ in wet acsaꞌorirob caj u yacsajenob ich yaja xac caj u jocꞌsob ich jor a tiꞌ yʌn ich u paꞌteꞌ tu cu chaꞌanob. Raꞌ u paꞌtemʌnob u cajarob. Jeroj, caj u yemsajenob, a baywoꞌ caj putsꞌen.
\c 12
\s A baꞌ tu wʌyʌcꞌtaj Pablo tiꞌ Cꞌuj
\p
\v 1 Mʌꞌ baꞌwir quin waꞌaric techex tiꞌ a baꞌ tin betaj soc tsoy a wiriquenex. Tin tꞌʌn, jach tsoy caꞌ in waꞌarej techex a baꞌ tu yesaten Jesús uch. Jeꞌ in waꞌaric a baꞌ tin wiraj caj wʌyacꞌnʌjen.
\v 2 Bajeꞌrer yʌn yaꞌab yaxqꞌuin caj in wacsaj tin wor tiꞌ Cristo. Yʌn catorce yaxqꞌuin caj payen ich caꞌanan tu yʌn ic Jaj Tsꞌurirex Jesús. Chen mʌꞌ in wer wa yejer in winquirir caj binen, wa mʌꞌ yejer in winquirir caj binen, wa tin chen wʌyʌcꞌtaj. Jaririꞌ u bʌjiriꞌ Cꞌuj yer baꞌ in ber a tenoꞌ.
\v 3 Rajiꞌ Cꞌuj yer wa binen yejer in winquirir wa mʌꞌ binen yejer in winquirir.
\v 4 Chen in wer a Jaj Tsꞌuroꞌ caj u pʌyajen tu cʌjaꞌan ich caꞌanan. A baywoꞌ caj in wuꞌyaj u tꞌʌn a mʌꞌ u chaꞌbʌr in tsicbar techex quireꞌ a baꞌ caj u yaꞌaraj ten.
\v 5 Quireꞌ a baꞌ caj in wuꞌyaj ich caꞌanan cꞌuchaꞌan in wor in tsicbar tsoy in bʌjiriꞌeꞌ, chen a tenoꞌ mʌꞌ tsoy in tsicbar in bʌjiriꞌeꞌ chen jeꞌ in tsicbar tsoy in bʌjiriꞌeꞌ a baꞌ quiriꞌ mʌꞌ cꞌuchaꞌan in wor tiꞌeꞌ. 
\v 6 Cax wa jin cꞌat in tsicbar tsoyen chen aroꞌ mʌꞌ socsoc tsicbar in caꞌiꞌ, a jeraꞌ tan in waꞌaric jach taj, barej, mʌꞌ jin bet aroꞌ. Jariꞌ in cꞌat a wirenex bic tabar quin cuxtar, bayiriꞌ a baꞌ ta wuꞌyajex in waꞌaric techex soc cꞌuchaꞌan a worex a wiriquex wa tajiꞌ.
\p
\v 7 A ray tꞌʌnoꞌ caj in wuꞌyaj uch jach manan tsoyir. Chen Cꞌuj mʌꞌ u cꞌat yiriquen wa quin tus tucric wa jach caremen quireꞌ a baꞌ caj in wuꞌyaj ich caꞌanan uch. Rajen rajiꞌ cu chaꞌic u tar quir in mucꞌyaj raꞌ irej wa qꞌuiꞌix tuj u tup in bʌqꞌuer a quisinoꞌ.
\v 8 Quireꞌ a ray mucꞌyajoꞌ caj in tꞌʌnaj Cꞌuj mʌnaꞌ u nup u tenin caꞌ u rucꞌsej ten.
\v 9 Chen Cristo caj u yaꞌaraj ten: “Jariꞌ soc a wer wa jin jach yajech soc chʌcaꞌan yiric mac ten, quij Jesús, tan in chichquintic a mucꞌ Pablo tu ca beyaj a techoꞌ.” Baxuc caj u yaꞌaraj ten. Mʌꞌ ja wirej, a baxucoꞌ chʌcaꞌan yiric mac Cristo cu chichquintic in mucꞌ tiꞌ a baꞌ quin betic. Rajen quiꞌ in wor wa mʌꞌ chich in mucꞌ.
\v 10 Rajen quiꞌ in wor wa ber quin mucꞌyaj. Yʌn qꞌuin wa ber cu pꞌastiquenob mac. Yʌn qꞌuin wa ber mʌnaꞌ baꞌ quir in jantic. Yʌn qꞌuin wa ber cu chuquicob in pach mac. Yʌn qꞌuin wa ber quin mucꞌyaj quireꞌ u beyaj a quin betic tiꞌ Cristo. Chen tan in quiꞌquintic in wor quireꞌ wa ber chʌcaꞌan yiric mac wa mʌꞌ chich in mucꞌ jeroj tun, chʌcaꞌan yiric mac rajiꞌ Cristo tan u chichquintic in mucꞌ tiꞌ a baꞌ quin betic.
\s A Pablojoꞌ tan u tucric tiꞌ a mac a yacsmʌnob tu yorob ich u cajar Corinto
\p
\v 11 A tenoꞌ quin socsoc tsicbar tsoy in bʌjiriꞌeꞌ quireꞌ a techexoꞌ caj a tsꞌʌrex in pach in wʌcꞌʌs tsicbar in wʌcꞌʌs bʌjiriꞌeꞌ. Biquinin mʌꞌ ja tsꞌib tenex tsoyen tiꞌ u ʌjꞌetsꞌ tseqꞌuirob u tꞌʌn Cꞌuj a tu yʌnechexoꞌ. Mʌnaꞌ mac jach tsoy quetenob baxuquenob tsoyirenoboꞌ cax cu yaꞌaricob: “Jotenob a tenoboꞌ.”
\v 12 Wa ber tiꞌ yʌnen tu yʌnechex uch caj in tsicbʌtaj techex u tꞌʌn Cꞌuj soc chʌcaꞌan yiricob mac tu tuchiꞌten Cristo quir in beyaj tiꞌ. Quireꞌ ich in beyaj a caj in betaj tiꞌ Cristo nemʌꞌ biqueniꞌ, caj in mucꞌtaj tu cotor a baꞌ caj u yaꞌaraj mac. A carem beyajoꞌ a baꞌ mʌꞌ yirmʌnob mac uch rajiꞌ cu yesic techex jach jaj tu tuchiꞌten Cristo.
\v 13 A tenoꞌ caj cuxrʌjen uch tu yʌnechex an ten bic in cʌjtar tu yʌn tu cotorob mac a yacsmʌnob tu yorob. Jariꞌ mʌꞌ jin cꞌatej techex caꞌ a jansenex. Caꞌ a jawsenex wa mʌꞌ tsoy caj in betaj techex.
\v 14 Jeroj tabar in wʌcꞌʌs tar in wirechex, raꞌ a mʌnaꞌ u nup u tenin in tar in wirechex. Chen a tenoꞌ mʌꞌ jin cꞌʌs cꞌata techex chichin a taqꞌuinex wa ber caꞌ cꞌuchuquen tu yʌnechex. A tenoꞌ jeꞌ in wesic techex in yajquintiquechex. Mʌꞌ ja wirej, a tetoꞌ cu pꞌisic u bʌj u cʌxt u taqꞌuin quir u cʌnatic u chan pararob. A chan pararobeꞌ, mʌꞌ ju cʌnant u tet.
\v 15 A tenoꞌ quin quiꞌquintic in wor caꞌ in rʌc xup in taqꞌuin yejer tu cotor a baꞌ ten yʌnin quir in yamtiquechex soc a taquic a bʌjex. Cax quin xupic in mucꞌ xan quireꞌ techex, quiꞌ in wor. Chen tin tꞌʌn cax jach manan quin yajquintiquechex a techexoꞌ. Chen a techexoꞌ, mʌꞌ ja neyajquintenex.
\p
\v 16 A techexoꞌ, a werex wa ber yʌn baꞌ in cꞌat uch, mʌꞌ jin cꞌʌs cꞌataj techex chichin. Chen yʌn mac tu yʌnechex a tan u pʌqꞌuicob in pach, tan u yaꞌaricob tan in tusaric techex.
\v 17 A techexoꞌ ca tucriquex wa caj in tuchiꞌtaj mac soc u tus jaric u taqꞌuin tu yʌnechex? Mʌꞌ jin tuchiꞌtaj mac, quij.
\v 18 Wa ber caj in tuchiꞌtaj Tito quir u tꞌʌniquechex, yet binac u jer ij quet acsaꞌorirex. Arex ten wa caj u jarajob taqꞌuin tu yʌnechex. Techex, a werex a Titojoꞌ caj u betaj an ten bic a tenoꞌ quin betic. A Titojoꞌ u chen cꞌat u betej tsoy techex yejer u tꞌʌn a caj u camsechex. Chen mʌꞌ ju cꞌat u taqꞌuin techexiꞌ.
\p
\v 19 Mʌꞌ a yʌn tucriquex wa quin tsicbar a jeꞌ tꞌʌnaꞌ tiꞌ techex soc tsoy a wiquenex, mʌꞌ raꞌ. Mʌꞌ ja wirej, a tꞌʌnoꞌ a quin tsicbaroꞌ raꞌ u cꞌat Cristo caꞌ tsicbanʌquen techex. A tꞌʌnoꞌ a quin tsicbar techex in wet acsaꞌorirex quin cʌxtic bic tabar quin chichquintic a worex tiꞌ u tꞌʌn Cꞌuj.
\v 20 Mʌꞌ ja wirej, sajquen caꞌ bin cꞌuchuquen tu yʌnechex wa quin wiriquechex, jaj ix tʌcoj, jeꞌ in wiric techex mʌꞌ ja manex tu tsoyir. Jaj ix tʌcoj, jeꞌ in wiriquex ca nunquiquex u tꞌʌn a racꞌobex, wa quin wiric qꞌuex a worex techex. Wa jix tiꞌ, tsꞌiquex, wa jix tiꞌ ca cʌxtiquex baꞌ tiꞌ a nonoj bʌjiriꞌex, wa jix tiꞌ, cu yaꞌaricob cꞌas tiꞌ u yet acsaꞌorirob, wa jix tiꞌ cu pꞌasticob u yet acsaꞌorirob, wa jix tiꞌ yʌn mac a cu tus tucric u bʌjiriꞌ wa jach carem. Wa jix tiꞌ, cu pꞌusicob u yorob u yet acsaꞌorirob. Tin tꞌʌn, mʌꞌ ja bin a quib in tsicbar techex an bic tabar a cꞌatex ten, quireꞌ jeꞌ u jocꞌar in wor quireꞌ cꞌas ca betiquex.
\v 21 Rajen sajquen tiꞌ a baꞌ quin bin in wirej caꞌ bin cꞌuchuquen tu yʌnechex. Jeroj, jeꞌ in chꞌic suraquir ʌcʌtan tu wich Cꞌuj quireꞌ a baꞌ ca betiquex. A tenoꞌ tin tꞌʌn, jeꞌ in wocꞌar wa quin wiric mac mʌꞌ ju jʌs u bʌjob tiꞌ a cꞌasoꞌ, bayiriꞌ ca manex yejer xquic a toc yʌn u mamoꞌ.
\c 13
\s A Pablojoꞌ cu tꞌʌnic u yet acsaꞌorirob
\p
\v 1 Bajeꞌrer, jeꞌ in wʌcꞌʌs tar in wirechex tu yʌnechex, aroꞌ mʌnaꞌ u nup u tenin caj taren in wirechex. Wa yʌn mac u cꞌat u taꞌquic u joꞌr u yet acsaꞌorirob, jeroj caꞌ u pʌyej dos wa mʌnaꞌ u nup yʌjirirob soc u jocꞌar u tajir.
\v 2 Wa ber tiꞌ toy yʌnen yejerechex uch, caj in waꞌaraj techex, cax bajeꞌrer, mʌꞌ tiꞌ yʌnen yejerechex tan in wʌcꞌʌs ara techex. A tenoꞌ caj in waꞌaraj mac a caj u pʌy u siꞌpirob uch, bayiriꞌ caj in waꞌaraj techex uch xan, jeꞌ in wʌcꞌʌs tar tu yʌnechex, jeroj mʌꞌ jin bin in jaws u siꞌpirob.
\v 3 Jeroj jeꞌ a tumtic a wirex a ca cʌxtiquex wa Cristo cu tsꞌic u tꞌʌn ten quir in tsicbar techex. Mʌꞌ ja wirej, a Cristojoꞌ mʌꞌ rajiꞌ chan ber u tꞌʌn wa ber cu pʌyiquechex chich u tꞌʌn.
\v 4 Cax Cristo mʌꞌ ju yesaj wa chich u mucꞌ wa ber caj sinij yejer u cruz, chen bajeꞌrer cuxaꞌan, bayiriꞌ tan u man ich u mucꞌ Cꞌuj. Baxuc, a ten xanoꞌ, bayiriꞌ xan, in wet man Cristo, a baywoꞌ jeꞌ u chichquintic in mucꞌ Cꞌuj ich u tꞌʌn, a quin bin in tsicbar techex wa ber caꞌ bin cꞌuchuquen tu yʌnechex.
\p
\v 5 Tumtex ta wor a wʌcꞌʌs bʌjiriꞌex wa tan a quiꞌ acsiquex ta worex tiꞌ Cristo soc a werex wa ja wet manex Cristo. Wa mʌꞌ a wet manex yejer Cristo mʌꞌ taj a wacsmʌnex ta worexiꞌ.
\v 6 A tenoꞌ tin tꞌʌn, jeꞌ a wuꞌyiquex ta worex wa taj in wet man Cristo, soc quet bayiriꞌ, a werex mʌꞌ jin tus ar techex.
\v 7 A tenoꞌ caj in chich tꞌʌna Cꞌuj soc mʌꞌ a pʌyiquex a siꞌpirex, chichin. Chen mʌꞌ jin tucr in beyaj a tin betaj a tu yʌnechex. Jariꞌ in chen cꞌat caꞌ manaquechex tu tsoyir. Tsireꞌej u jer cu tucricob mʌꞌ tsoy in beyaj. 
\v 8 A tenoꞌ mʌꞌ nanij in mʌꞌquintic mac a cu yacsic tu yor a baꞌ taj. Mʌꞌ ja wirej, tan in beyaj quireꞌ in cꞌat wa mac caꞌ u yacsej tu yor.
\v 9 Rajen chen quiꞌ in wor wa ber quin wuꞌyic yocꞌor ten wa mʌꞌ tan in chich tsicbar. A tenoꞌ in chen cꞌat caꞌ chichac a worex tiꞌ u tꞌʌn Cꞌuj. A tenoꞌ quin tꞌʌnic Cꞌuj techex soc a quiꞌ manex tu tsoyir.
\v 10 Mʌꞌ toy xiquen tu yʌnechex quir in tꞌʌniquechex tan in tuchiꞌtic techex a jeꞌ juꞌunaꞌ. A jeꞌ juꞌunaꞌ cu chich aric techex cax tiꞌ yʌnen nachir. A jeꞌ beyajaꞌ a quin betic raꞌ tu tsꞌa ten Cꞌuj a tenoꞌ. A tenoꞌ caj in cʌxta bic tabar in chichquintic a worex tiꞌ u tꞌʌn Cꞌuj. Mʌꞌ jin cʌxte bic tabar in chꞌesic a wacsiquex ta worex tiꞌ Cristo.
\p
\v 11 Bajeꞌrer in wet acsaꞌorirex caꞌ u yamtej techex Cꞌuj. Cʌxtex a manex tu tsoyir. In cꞌat Cꞌuj caꞌ u yamtej techex soc mʌnaꞌ baꞌ ca tucriquex. Caꞌ a pacran yajquint a bʌjex. Wa ta nuncajex u tꞌʌn a wet acsaꞌorirex, sisquint a worex. Wa baxuc ca betiquex, jeroj, tan a betiquex a baꞌ u cꞌat Cꞌuj. Bayiriꞌ xan, a Cꞌujoꞌ mʌꞌ ju jʌs u bʌj techex munt qꞌuin.
\v 12 Caꞌ a pacran quiꞌ tꞌʌn a bʌjex soc yerob mac a wet acsaꞌorirex.
\v 13 Tu cotor a wet acsaꞌorirex yejeroꞌonex tan u tꞌʌniquechex. 
\p
\v 14 A tenoꞌ in cꞌat caꞌ u yam techex ic Jaj Tsꞌurirex Jesucristo. Caꞌ u yajquin techex Cꞌuj. Caꞌ u pʌy a berex u Tajꞌor Pixam Cꞌuj. Soc a wet manex yejer u Tajꞌor Pixam Cꞌuj.