\id GAL
\h GÁLATAS
\toc1 GÁLATAS
\mt1 A JEꞌ JUꞌUNAꞌ, RAJIꞌ TIꞌ U YET ACSɅꞌORIROB ICH U RUꞌUMIN GALACIA. RAJIꞌ TU TSꞌIBTA PABLO
\mt2 GÁLATAS
\c 1
\s Pablo caj u yʌnxchun u tsꞌibtic a mac a yacsmʌnob tu yorob ich u ruꞌumin Galacia
\p
\v 1 A tenoꞌ Pablojen caj u toc teten caꞌ xiquen in tsecꞌt u tꞌʌn Cꞌuj. Mʌnaꞌ xib tu teteniꞌ, mʌꞌ pim xib tu teteniꞌ. Chen a tenoꞌ u bʌjiriꞌ Jesucristo tu teten quet yejer in Tet Cꞌuj caj u tetenob. A tenoꞌ tu teten Cristo a mac ricꞌsaꞌb ten Cꞌuj ich u quimirir. Raꞌ caj u tsꞌaj ten in beyaj.
\v 2 A tenoꞌ yejer in wet acsʌꞌorirob a teꞌ yʌn tu yʌnenaꞌ, tan in tsꞌibticob techex a mac tiꞌ yʌnoꞌ ich u ruꞌumin Galacia. Caj in tsꞌibtob techex a mac yacsmʌnob tu yorob u tꞌʌn Cꞌuj tu ruꞌumin Galacia.
\v 3 A tenoꞌ in cꞌat caꞌ u tsꞌa techex ic Tetex a baꞌ tsoy tu tꞌʌn Cꞌuj, baxuc xan caꞌ tac u quiꞌir a worex tiꞌ Cꞌuj. A tenoꞌ in cꞌat caꞌ tac aroꞌ ich ic Tetex Cꞌuj. Baxuc xan tiꞌ ic Jaj Tsꞌurirex Jesucristo.
\v 4 Mʌꞌ ja wirej, u bʌjiriꞌ Jesús caj u cꞌub u bʌj quir u quinsaꞌ u boꞌorir ic siꞌpirex quir u taquicoꞌonex. Caj u cꞌub u bʌj soc mʌꞌ ic mʌnex tu cꞌasir a tiꞌ yʌn ich yocꞌocab bajeꞌrer. Caj u cꞌub u bʌj quir u taquicoꞌonex quireꞌ baxuc jach tsoy tu tꞌʌn Cꞌuj.
\v 5 Caj u cꞌub u bʌj Jesús quir u taquicoꞌonex mʌꞌ wa jach carem ij Cꞌujex, caꞌ ij carex: “Jach caremech Cꞌuj munt qꞌuin uch.” Baxuc ij cꞌatexoꞌ.
\s Mʌnaꞌ u jer u tꞌʌn Cꞌuj quir u taquicoꞌonex
\p
\v 6 A tenoꞌ jach jacꞌ in wor caj in wuꞌyaj sep caj a pꞌʌtex u tꞌʌn Cꞌuj quir a tus uyiquex u jer. Mʌꞌ ja wirej, a Cꞌujoꞌ tu tꞌʌnechex quireꞌ caj u yajechex quireꞌ Cristo caj u yiraj otsirechex. Chen bajeꞌrer caj a pꞌʌtex Cꞌuj quir a tus uyiquex u jer u tꞌʌn, jaj ix tʌcoj cu bin u taquiquex.
\v 7 Mʌnaꞌ u jer u jach tsoyir u tꞌʌn Cꞌuj quir u taquiquechex. Jariꞌ a caj in waꞌaraj techex. Mʌꞌ ja wirej, caj tar mac quir u tubsic a worex quir u cꞌaxicob u tꞌʌn Cristo soc mʌꞌ a werex bic tabar a quibiquex u tꞌʌn Cꞌuj.
\v 8 Barej wa toꞌonex cax wa ju jer turiꞌ yʌjmasir u tꞌʌn Cꞌuj cu tar caꞌanan caj u tsecꞌtaj techex u jer jach tsoyir u tꞌʌn Cꞌuj. Wa mʌꞌ quet yejer u tꞌʌn Cꞌuj caj in tsecꞌtaj techex uch. Caꞌ xic aroꞌ tu cu yerar winic ich cꞌaqꞌuir benaj quisin. Quireꞌ mʌꞌ taj a baꞌ caj tsicbanʌjij.
\v 9 A tenoꞌ caj in waꞌaraj techex sam chen bajeꞌrer quin wʌcꞌʌs aric techex: Uꞌyex wa cu tar mac tan u tus tsecꞌtic u jer tꞌʌn mʌꞌ quet yejer a ta toc cꞌʌmajexiꞌ. Arej tiꞌ caꞌ xic tu cu yerar munt qꞌuin ich cꞌacꞌ.
\p
\v 10 Wa bin a caꞌ tucriquex a Pablojoꞌ, tan u quiꞌquintic yorob u racꞌob, jeꞌ win quiꞌquintic yorob in racꞌob? Mʌꞌ ja wirej, a tenoꞌ in chen cꞌat in quiꞌquintic yor a Cꞌujoꞌ. Mʌꞌ ja wirej, wa quin chen quiꞌquintic yorob in racꞌob a tenoꞌ mʌꞌ taj quin beyaj tiꞌ Cꞌuj.
\s An ten bic Pablo tetaꞌb ten Cꞌuj quir u tsecꞌtic u tꞌʌn 
\p
\v 11 Uꞌyex baꞌ quin bin in wac techex in wet acsʌꞌorirex. U jach tsoyir u tꞌʌn Cꞌuj, a caj in tsecꞌtaj techex uch, mʌꞌ tiꞌ u tar ich u tucur winiquiꞌ.
\v 12 Quireꞌ a tenoꞌ, quij Pablo, mʌꞌ jin cꞌʌm u tꞌʌn a winicoꞌ. A tenoꞌ mʌꞌ ju camsen u jer maquiꞌ tiꞌ teniꞌ. Chen u bʌjiriꞌ Jesús caj u tsꞌaj in tucur.
\p
\v 13 A techexoꞌ, a toc uꞌyamʌnex uch bic tabar a tenoꞌ caj in cꞌujintaj Cꞌuj uch an ten bic nan u cꞌujintajob Cꞌuj u winiquirob judío. A techexoꞌ a toc uꞌyamʌnex uch bic tabar a tenoꞌ jach tsꞌiquen a tenoꞌ. Mʌꞌ ja wirej, caj in chuc u pach a mac a cu yacsicob tu yorob. A tenoꞌ caj in chꞌesob a tiꞌoboꞌ, mʌꞌ otsir caj in wirob a tiꞌoboꞌ.
\v 14 A tenoꞌ caj in jach pꞌis in bʌj caꞌ in quiꞌ cʌnej tu cotor a baꞌ tsꞌibtaꞌb ten ic nunquirex tiꞌ u winiquirob judío uch. U jer in racꞌob a jin wet mʌnob mʌꞌ ju jach cʌn an ten bic ten, quij. A tenoꞌ jach manan caj in cʌn u tꞌʌn in nunquir.
\v 15 Barej cax mʌꞌ toy u rochen in nʌꞌ uch a Cꞌujoꞌ caj u toc teten quir in beyaj tiꞌ. Mʌꞌ ja wirej, u jach yajen. Caj u teten quireꞌ tsoy tu tꞌʌn Cꞌuj.
\v 16 A Cꞌujoꞌ caj u chen esaj ten u parar Jesucristo wa jin wer rajiꞌ u parar Cꞌuj. Yesaj ten u parar Cꞌuj soc quin bin in tsecꞌt u tꞌʌn Cꞌuj. Rajen seb caj binen in tsecꞌt u jach tsoyir u tꞌʌn tiꞌ Jesús ich a mʌꞌ u winiquirob judío. Raja caj binen mʌꞌ jin war in biniꞌ.
\v 17 Mʌꞌ binen ich u cajar Jerusalén quir in tꞌʌnic a tiꞌoboꞌ a mac a yʌn tetaꞌb ten Cꞌuj quir u bin u tsecꞌticob u tꞌʌn. Mʌꞌ ja wirej, a tenoꞌ pachir caj u yʌn teten Cꞌuj, a tenoꞌ. Jeroj seb caj binen tu ruꞌumin Arabia. Caj tsꞌoc u tsꞌic in tucur Cꞌuj tiꞌ u tꞌʌn caj sutpʌjen, ich u cajar Damasco caj binen.
\p
\v 18 Caj tsꞌoc u man tres u yaxqꞌuinin aroꞌ caj binen ich u cajar Jerusalén. Raꞌ u qꞌuininoꞌ caj in tꞌʌna Pedro. A Pedrojoꞌ caj u yacsen tu yatoch. Quince u qꞌuinin tiꞌ yʌnen tu yʌn Pedro.
\v 19 Barej mʌꞌ jin wir u racꞌob, Pedro u yet yʌjtseqꞌuirob u tꞌʌn Jesús. Jariꞌ caj in wiraj Jacobo u yitsꞌin Ic Jaj Tsꞌurirex.
\v 20 A baꞌ quin tsꞌibtic techex bajeꞌrer a Cꞌujoꞌ yer mʌꞌ jin tusechex. Taj quin waꞌaric techex.
\p
\v 21 Pachir caj binen tu ruꞌumin Siria yejer u ruꞌumin Cilicia quir in tsecꞌtic tiꞌob u tꞌʌn Cꞌuj.
\v 22 U winiquirob judío a yacsmʌnob tu yorob tu ruꞌumin Judea, mʌꞌ yerob maqueniꞌ quireꞌ mʌꞌ ju yirob in wich quireꞌ mʌꞌ binen in wirobiꞌ.
\v 23 Tu chen uꞌyob in jumintarob a tenoꞌ: “A mac tu chucaj ic pachex uchoꞌ bajeꞌrer, tan u mʌn u tsecꞌt u tꞌʌn Cꞌuj. Caj u chich tsecꞌt u tꞌʌn Cꞌuj. Caj u chich tsecꞌt u tꞌʌn Cꞌuj a tu pꞌast a uchoꞌ.”
\v 24 Rajen bajeꞌrer cu yaꞌaricob tiꞌ Cꞌuj: “Jach caremech Cꞌuj quireꞌ caj a tacaj Pablo a tu chꞌesic a winiquirob uchoꞌ.”
\c 2
\s U yet ʌjtseqꞌuirob u tꞌʌn Cꞌuj cu yacsaꞌrob Pablo
\p
\v 1 Caj tsꞌoc u man catorce u yaxqꞌuinin wʌcꞌʌs binen ich u cajar Jerusalén. In wet binac Bernabé. Caj in pʌya Tito xan. Caj in pʌyaj in nupintej.
\v 2 Caj binen ich u cajar Jerusalén quireꞌ tu yaꞌara ten Cꞌuj: “Caꞌ xiquech, Pablo, ich u cajar Jerusalén.” Tu junan caj in pʌyob u tsꞌurirob a yacsmʌnob tu yorob. Quireꞌ in cꞌat soc yertaꞌrob biquinin a tenoꞌ tan in man in tsecꞌt u tꞌʌn Cꞌuj ich a mʌꞌ u winiquirob judío. Caj in toc araj tiꞌob u jach tsoyir u tꞌʌn Cꞌuj a quin tsecꞌticoꞌ, soc in wer wa tsoy tu tꞌʌn a tiꞌoboꞌ caꞌ xic in tsecꞌtej u tꞌʌn Cꞌuj wa mʌꞌ tsoy in tsecꞌt. Jaj ix tʌcoꞌ caj in sʌt in beyaj tiꞌ Cꞌuj.
\v 3 Barej in nup a Titojoꞌ, cax mʌꞌ u winiquirob judío, rajiꞌ mʌꞌ araꞌb ten u jach tsꞌurirob a yacsmʌnob tu yorob ich u cajar Jerusalén caꞌ u tsꞌir u bʌqꞌuer. An ten nanij u tsꞌiricob u winiquirob judío, quireꞌ quiꞌ yorob yubicob bic tabar caj in tsecꞌtaj.
\v 4 Cax wa tiꞌ yʌnob mac ich u yet acsʌꞌorirob caj u cꞌatob u tsꞌʌric u pachob Tito caꞌ tsꞌirac u bʌqꞌuer tu cu wix Tito. Robob caj u pꞌeriꞌquintob u bʌj yejer a yacsmʌnob tu yorob cax u tus arajob u yacsmʌnob tu yorob. Tarob u pʌquicob in pach a tenoꞌ, cu tus aricob wa mʌꞌ jin quiꞌ cams u tꞌʌn ic nunquirex Moisés. Tarob u tus irob wa jach taj siptaꞌboꞌonex ten Cristo Jesús tiꞌ a baꞌ tsꞌibaꞌan ich u tꞌʌn Moisés. Robob mʌꞌ u cꞌat yirej toꞌonex caꞌ siptacoꞌonex tiꞌ u tꞌʌn Moisés. U cꞌat yiroꞌonex caꞌ ij quiꞌquiꞌ cʌnantex u tꞌʌn Moisés cax mʌnaꞌ mac cꞌuchaꞌan yor tiꞌ uch.
\v 5 A tenoboꞌ, Bernabé yejerenoꞌ, mʌꞌ jin wuꞌy u tꞌʌnob a mac u cꞌat caꞌ in tsꞌirob u bʌqꞌuer mac an ten bic nanij u tsꞌiricob u winiquirob judío, mʌꞌ cꞌʌs chichin caj in wuꞌyaj. Mʌꞌ ja wirej, a tenoboꞌ caj in quiꞌ canantob u jach tajir u tꞌʌn Cꞌuj soc mʌꞌ xacaꞌaniꞌ. Caj in cʌnantob techex u tꞌʌn Cꞌuj soc techex yʌnin xan.
\p
\v 6 Barej u jach tsꞌurirob ij quet acsʌꞌorirob mʌꞌ ju toc camsen u jer ricꞌben soc in wʌcꞌʌs camsic tiꞌ a mʌꞌ u winiquirob judío. Baꞌ cu tucric mac tiꞌob u jach tsꞌurirob u yet acsaꞌorir. Jot a tenoꞌ. Quireꞌ a Cꞌujoꞌ mʌꞌ ju jocꞌsej mac, toc pꞌeririꞌ cu yiricoꞌonex.
\v 7 Barej u jach tsꞌurirob a yacsmʌnob tu yorob mʌꞌ ju yarob caꞌ in cams a mʌꞌ u winiquirob judío. Mʌꞌ ju yaꞌarob caꞌ in camsej tiꞌob u jer tꞌʌn. Chen robob caj u yirob an bic Cꞌuj caj u cꞌub u tꞌʌn Cꞌuj ten soc in beyaj tu yʌn a mʌꞌ u winiquirob judío. Soc yerob bic tabar u taquicob u bʌj. Mʌꞌ ja wirej, caj u yirob bic Cꞌuj caj cꞌub u beyaj Pedro ten Cꞌuj caꞌ u camsej u tꞌʌn tiꞌ u winiquirob judío. U tiriꞌ tiꞌ in beyajob.
\v 8 Mʌꞌ ja wirej, a Cꞌujoꞌ caj tsꞌaꞌb u beyaj Pedro caꞌ xic u tsecꞌt u tꞌʌn ich u yet winiquirob judío. Baxuc xan, a Cꞌujoꞌ, caj u tsꞌaja in beyaj soc in tsecꞌtic u tꞌʌn tu yʌnechex a mʌꞌ u winiquirechex judíojoꞌ. 
\p
\v 9 Caj yirob Jacobo yejer Pedro yejer Juan a mac u jach tsꞌurinticob u yet acsʌꞌorirob an bic tabar a Cꞌujoꞌ caj u chen teten caꞌ xiquen beyaj tu yʌn a mʌꞌ u winiquirob judío. Rajen caj u tsꞌajob u cꞌʌb ten yejer Bernabé, a baywoꞌ tu yacsenob tu beyajob. Quet ic beyajex, jariꞌ robob cu beyaj ich u winiquirob judío. Chen a tenoꞌ, quin beyaj tu yʌn a mʌꞌ u winiquirob judío, irechex. 
\v 10 U jach tsꞌurirob u yet acsʌꞌorirob tu cajar Jerusalén caj u chen arob ten caꞌ in yamt a mac otsirchʌjij ich u cajar Jerusalén. A tenoꞌ caj in waꞌaraj in chich beyaj quir in yamtic a mac otsichʌjij in wet acsʌꞌorir a tiꞌ yʌn ich u cajar Jerusalén.
\s Qꞌueyaꞌb Pedro ten Pablo tu cajar Antioquía
\p
\v 11 Caj tar Pedro tu cajar Antioquía. Jeroj ʌcʌtan tu cotor u yet acsʌꞌorirob caj in qꞌueyaj Pedro quireꞌ a baꞌ cu man yirej Pedro mʌꞌ quet yejer u tꞌʌn Cꞌujiꞌ.
\v 12 Mʌꞌ ja wirej, mʌꞌ toy cꞌuchucobiꞌ a mac tuchiꞌtaꞌb ten Jacobo u jach tsꞌurir u yet acsʌꞌorirob tu cajar Jerusalén. Mʌꞌ toy cꞌuchucobiꞌ a Pedrojoꞌ, tan u janʌn yejer a mʌꞌ u winiquirob judío, a yacsmʌnob tu yorob. Barej caj cꞌuchob a mac tuchiꞌtaꞌb Jacobo, a Pedrojoꞌ caj u pꞌʌt u janʌnob yejerob a mʌꞌ u winiquirob judíojoꞌ soc mʌꞌ u pʌcꞌʌr u pach ten a mac tuchiꞌtaꞌb ten Jacobo. 
\v 13 Baxuc xan u yet acsʌꞌorirob a u winiquirob judío caj u yesob bic tabar mʌꞌ chichnʌc yor tiꞌ u tꞌʌn Cꞌuj quet yejer Pedro. Rajen cax Bernabé caj u pꞌʌt u janʌnob yejer a mʌꞌ u winiquirob judío a tu yacsajob tu yorob. Quireꞌ caj u chꞌajob sajquirob tiꞌ a mac a cu tus tucricob tsoy caꞌ u rʌc tsꞌirob u bʌqꞌuerob a yacsmʌnob tu yorob tiꞌ Cristo, a mʌꞌ u winiquirob judío, an ten bic nan u beticob u winiquirob judío uch xan.
\v 14 Barej a tenoꞌ caj in wiraj mʌꞌ toy ju manob tu jach taj a baꞌ tsꞌibaꞌan ich u tꞌʌn Cꞌuj. Caj in tꞌʌnaj Pedro ʌcʌtan u wich tu cotor yet acsʌꞌorirob. Caj in waꞌaraj tiꞌ: “Cax u winiquirech judíojech Pedro uch, caj a pꞌʌtaj a baꞌ nanij caj u camsech a nunquirex. Biquinin sep caj a tsꞌʌr u pachob a mʌꞌ u winiquirob judío, a mac mʌꞌ yubmʌn u tꞌʌn Moisés quir u quibicob a baꞌ ta pꞌʌtaj?” 
\s U winiquirob judío quet yejer tu cotor mac caꞌ yacsej tu yor u tꞌʌn Cristo
\p
\v 15 Mʌꞌ ja wirej, u toc winiquiren judío, quireꞌ rochaꞌben ten in nʌꞌ. Rajen in werob a baꞌ u cꞌat Cꞌuj. Chen a mʌꞌ u winiquirob judío mʌꞌ u cꞌʌs erob a baꞌ u cꞌat Cꞌuj. Quireꞌ tenoboꞌ u winiquenob judío, rajen in werob Cꞌuj. 
\v 16 A Cꞌujoꞌ mʌꞌ ju bin u cꞌʌs acsej mac quireꞌ caj u quiꞌ cʌnantej tu cotor a baꞌ tsꞌibaꞌan ich u tꞌʌn ic nunquirex Moisés. Ij querex a Cꞌujoꞌ bin u caꞌ u yacsej mac a tu yacsaj tu yor tiꞌ Jesucristo. Cax a tenoboꞌ judíojenob quireꞌ tin wacsa tin worob tiꞌ Jesucristo soc u yacsiquenob ich caꞌanan. Cax mʌꞌ jin cʌnantej a baꞌ tsꞌibaꞌan ich u tꞌʌn Moisés. Mʌnaꞌ mac cu bin acsaꞌbir ten Cꞌuj ich caꞌanan quireꞌ tu cʌnantaj a baꞌ tsꞌibaꞌan ich u tꞌʌn Moisés.
\v 17 Quireꞌ a tenoboꞌ caj in cʌxtob bic tabar cu bin u yacsiquenob ich caꞌanan Cꞌuj quireꞌ caj in wacsaj tin worob tiꞌ Cristo. Barej wa cu cꞌuchur tu qꞌuinin cu yiricob a tenoboꞌ queten yejer a mac a mʌꞌ u cʌnanticob u tꞌʌn Moisés, a mʌꞌ u winiquirob judío. A raꞌ u qꞌuininoꞌ taj wa Cristojoꞌ caj u yacsa toꞌonex ic siꞌpirex quireꞌ tic pꞌʌtex u tꞌʌn Moisés. Quin wac techex, mʌꞌ tajiꞌ. 
\v 18 Wa jach taj caꞌ bin cꞌuchuc tu qꞌuinin quin wʌcꞌʌs aric tsoy caꞌ ij quibex u tꞌʌn Moisés a caj in rucsaj ucheꞌ soc raꞌ cu pʌyic u ber a mac a yacsmʌnob tu yorob tiꞌ Cristo. A ray u qꞌuininoꞌ taj a baꞌ cu yac mac. In bʌjiriꞌ tin pʌy in siꞌpir a tenoꞌ.
\v 19 Quireꞌ a tenoꞌ Pablojen jach ire wa quimen. Mʌꞌ ja wirej, u tꞌʌn Moisés caj u quinsen quireꞌ mʌꞌ cꞌuchaꞌan in wor in quibej. Rajen quireꞌ a baꞌ caj u betaj ic Jaj Tsꞌurirex toc cuxaꞌanen ʌcʌtan tu wich Cꞌuj. Rajen mʌꞌ baꞌwir u tꞌʌn Moisés ten.
\v 20 Mʌꞌ ja wirej, caj quimij Jesús ich u cruz, quet caj quimoꞌonex yejer. Baxuc cu yiric Cꞌuj toꞌonex tiꞌ u tꞌʌn Moisés. Rajen mʌꞌ tu chen chaꞌjen tiꞌ a uchben cuxtar tu quin man uch. Tu sijaten ricꞌben cuxtar quireꞌ tiꞌ yʌn Cristo acaꞌan tin wor. Yʌn ten cuxtar ricꞌben quireꞌ caj in wacsaj tin wor tiꞌ u parar Cꞌuj a cu yajquintiquen. 
\v 21 A tenoꞌ mʌꞌ in cꞌat in pꞌʌtic an bic Cꞌuj caj u tuchiꞌt u parar ich yocꞌocab. Mʌꞌ ja wirej, mʌꞌ baꞌwir caj tarij Cristo quir u quimij wa cꞌuchaꞌan ij corex ic taquiquex ic bʌj tu quij cʌnantiquex a baꞌ tsꞌibaꞌan ich u tꞌʌn Moisés.
\c 3
\s U tꞌʌn Moisés yejer a baꞌ araꞌb ten Cꞌuj tiꞌ ic nunquirex 
\p
\v 1 An biquinin jach chich a joꞌrex u winiquirechex u cajar Galacia, quij. Arej ten mac tu nays a worex soc a quibiquex u tꞌʌn a mʌꞌ tajiꞌ? A uchoꞌ caj in tsecꞌt u tꞌʌn Cꞌuj ʌcʌtan ta wichex ta jach uꞌyex bic caj quimij Jesús ich u cruz.
\v 2 Are tenex u winiquirechex u cajar Gálatas wa acaꞌan techex u Tajꞌor u Pixam Cꞌuj raꞌ u qꞌuinin tan a manex a wuꞌyex u tꞌʌn Moisés? Mʌꞌ wa tar u Tajꞌor Pixam u Cꞌuj ta wicnʌnex raꞌ u qꞌuinin tan a manex a wuꞌyex u jach tsoyir u tꞌʌn Cꞌuj? Mʌꞌ wa ta cꞌʌmex u Tajꞌor u Pixam Cꞌuj caj a wacs ta worex?
\v 3 Jach taj mʌꞌ ja najtex. Caj a yʌn acsa ta worex caj u yamt techex u Tajꞌor u Pixam Cꞌuj. Chen bajeꞌrer ca tucriquex cꞌuchaꞌan a worex ta junanex. Rajen ca quibiquex a baꞌ tsꞌibaꞌan ich u tꞌʌn Moisés.
\v 4 Mʌꞌ ja wirej, caj u chucob a pachex uch u winiquirob judío quireꞌ qꞌuex yorob. Caj u yirob a wacsiquex ta worex u tꞌʌn Cristo. Wa bajeꞌrer bin a quibex a baꞌ tsꞌibaꞌan ich u tꞌʌn Moisés, baꞌwir mucꞌyajnʌjechex uch? Mʌꞌ baꞌwir tiꞌ. A tenoꞌ, quin pajic yʌn baꞌwir tiꞌ caꞌ mucꞌyajnʌjechex. Quin pajic mʌꞌ ja pꞌʌtex u jach tsoyir u tꞌʌn Cꞌuj.
\v 5 Rajen quin wʌcꞌʌs cꞌatic techex. Wa ber caj u tsꞌaja techex Cꞌuj u Tajꞌor u Pixam Cꞌuj. Mʌꞌ wa jach manan caj u tsꞌaj techex u Tajꞌor u Pixam Cꞌuj? Mʌꞌ wa ju jach beyaj ta worex u Tajꞌor u Pixam Cꞌuj quir u tajquintic a worex? Arex ten a techex ber tar u Tajꞌor u Pixam Cꞌuj? Tarij wa ta wicnʌnex quireꞌ ta quibex u tꞌʌn Moisés wa tarij ta wicnʌnex quireꞌ ta wacsex ta worex u tꞌʌn Jesús? Mʌꞌ wa tarij quireꞌ ta wacsex ta worex tiꞌ Cristo.
\v 6 A baꞌ caj in waꞌaraj techex toc tiꞌ yʌn ich u tꞌʌn Cꞌuj quireꞌ araꞌb tiꞌ in nunquir Abraham uch. Abraham caj u yacsa tu yor a baꞌ arab tiꞌ ten Cꞌuj. Rajen caj cꞌamij Abraham ten Cꞌuj, irej mʌnaꞌ u siꞌpir caj cꞌamij. Baxuc techex bajeꞌrer.
\v 7 Rajen ca wiric a mac a cu yacsic tu yor tiꞌ Cristo an ten bic ic nunquirex Abraham caj u yacsaj tu yor tiꞌ Cꞌuj. Robob jach tajir u parar ic nunquirex Abraham xan. Rajen a Cꞌujoꞌ bin u caꞌ acsaꞌbirob.
\v 8 A uchoꞌ a mac caj u tsꞌibt u tꞌʌn Cꞌuj caj u tsꞌibtaj a baꞌ araꞌb ten Cꞌuj, cax mʌꞌ ju najtej a cu tsꞌiboꞌ caj u yaꞌaraj: “A mac a mʌꞌ u winiquirob judío cu bin acsaꞌbir ten Cꞌuj quireꞌ bin u caꞌ yacsob tu yorob.” Rajen caj araꞌb tiꞌ Abraham ten Cꞌuj cax mʌꞌ toy u yacsej tu yor a mac a mʌꞌ u winiquirob judío. Caj araꞌb ten Cꞌuj tiꞌ Abraham a jeꞌ tsoy tꞌʌnaꞌ: “Yaꞌab mac teraꞌ ich yocꞌocab bin u caꞌ quiꞌ tar yor quireꞌ bin u caꞌ yacsej tu yor.” Baxuc araꞌb ten Cꞌuj.
\v 9 Mʌꞌ ja wirej, an ten bic Abraham caj u yacsaj tu yor u tꞌʌn Cꞌuj, rajen rucꞌsaꞌb u siꞌpir baxuc tu cotor mac a cu yacsicob tu yorob tiꞌ Cristo, rucꞌsaꞌb u siꞌpir xan.
\p
\v 10 Tu cotor mac a cu tus cʌxtic quir u taquic u bʌj, a cu cʌnantic a baꞌ tsꞌibaꞌan ich u tꞌʌn Moisés, rajiꞌ cu bin taꞌcbir u joꞌr ten u tꞌʌn Moisés, quireꞌ mʌꞌ ju cꞌuchur yor u quiꞌ cʌnantic a tiꞌoꞌ. Cꞌaj wa techex tu tsꞌibaꞌan ich u tꞌʌn Cꞌuj: “A mac mʌꞌ rajraꞌ cu quibic a baꞌ tsꞌibaꞌan ich u tꞌʌn Moisés tiꞌ cu bin ich cꞌacꞌ.” Baxuc caj u tsꞌibtaj Moisés uch.
\v 11 Chʌcaꞌan yirir ten tu cotor mac wa mʌnaꞌ mac cu yacsaꞌr ten Cꞌuj ich caꞌanan quireꞌ caj u cʌnantaj a baꞌ tsꞌibaꞌan ich u tꞌʌn Moisés. Mʌꞌ ja wirej, toc tsꞌibaꞌan ich u tꞌʌn Cꞌuj tu cu yaꞌaric: “A mac a cu bin yacsaꞌr ten Cꞌuj caꞌ yacsej tu yor u tꞌʌn. Rajiꞌ tsoy yirir ten Cꞌuj, rajen bin u caꞌ cuxtar munt qꞌuin.” Baxuc cu yaꞌaric u tꞌʌn Cꞌuj.
\v 12 Wa caꞌ ic chen quibex a baꞌ tsꞌibaꞌan ten Moisés uch, quic bin ij cuꞌyex jach noꞌjoꞌonex. Rajen quic bin ij cuꞌyex mʌꞌ jach noꞌjoꞌonex wa caꞌ ij cacsex tij corex quireꞌ u tꞌʌn Cꞌuj tu tsꞌibaꞌan cu yaꞌaric tiꞌ: “A mac cu cʌnantic a baꞌ tsꞌibaꞌan tiꞌ cu bin cuxtar munt qꞌuin.” Baxuc caj u tsꞌibtaj yʌjtseqꞌuirob u tꞌʌn Cꞌuj uch.
\p
\v 13 Quireꞌ mʌꞌ cꞌuchaꞌan ij corex ic toc quibex a baꞌ tsꞌibaꞌan. Rajen cu yaꞌaric toꞌonex bin ij caꞌex ic bin ic mucꞌyajex. Rajen a Cristojoꞌ, caj quimij ich cruz caj u chaꞌoꞌonex soc mʌꞌ jic bin erarex ich cꞌacꞌ. Mʌꞌ ja wirej, caj u boꞌot u cꞌaqꞌuir caj ic mʌnex, quireꞌ ich cruz tsꞌaꞌb u mucꞌyaj Cristo toꞌonex. Aroꞌ tu nups u tꞌʌn Cꞌuj tu cu yaꞌaric: “Bin u caꞌ tsꞌaꞌbir u mucꞌyaj ten Cꞌuj a mac sinbir ich cheꞌ.” Baxuc araꞌb tiꞌ ic Jaj Tsꞌurirex ten mac caj quimij ich cruz.
\v 14 Rajen Cristo caj u boꞌotaj u cꞌaqꞌuir a tic mʌnex soc u yacsicoꞌonex Cꞌuj quireꞌ tij cacsex tij corex u tꞌʌn, rajen a mac a mʌꞌ u winiquirob judío bin u caꞌ acsaꞌbirob ten Cꞌuj quireꞌ cu yacsob tu yorob u tꞌʌn Cristo Jesús. Baxuc caj yaꞌaraj Cꞌuj uch tiꞌ ic nunquirex Abraham, bin u caꞌ acsaꞌbirob quireꞌ tu yacsaj tu yor u tꞌʌn xan. Rajen tar u Tajꞌor u Pixam Cꞌuj quir u yamticoꞌonex soc taj quij cacsiquex tij corex.
\s U tꞌʌn Moisés yejer u tꞌʌn a toc araꞌan tiꞌ u nunquirob u winiquirob judío
\p
\v 15 Bajeꞌrer bin in caꞌ in camsechex in wet acsʌꞌorirechex an ten bic u betic mac ich yocꞌocab. A mac a cu pꞌeriꞌquinticob u beyajob soc u quiꞌ pꞌeriꞌquintic u tsꞌibticob u juꞌunin. Caj tsꞌoc u pꞌeriꞌquintic u tsꞌibticob u juꞌunin toc junpuriꞌ caj u tsꞌibtob u juꞌunin soc mʌꞌ u yʌnyʌn cꞌaxicob quireꞌ pꞌeriꞌ yorob.
\v 16 Baxuc a Cꞌuj a uchoꞌ, caj u toc araj tiꞌ ic nunquirex Abraham yejer u parar a cu bin u pararʌncʌr biqꞌuin. A Cꞌujoꞌ mʌꞌ ju yaꞌaraj tiꞌ Abraham: “Jeꞌ in tsꞌic tiꞌ a pararob a ca bin pararʌncʌr”; irej wa yaꞌab. Caj yaꞌaraj tiꞌ: “A parar a ca bin a pararʌncʌr”; chen tuririꞌ mac, Cristo.
\v 17 Uꞌyex baꞌ u cꞌat yaꞌar aroꞌ. A Cꞌujoꞌ caj u toc araj tiꞌ Abraham bin u caꞌ tacbir a tiꞌoꞌ, quireꞌ tu yacsaj tu yor. Caj manij cuatro cientos treinta yaxqꞌuin caj cꞌuchij tu qꞌuinin Cꞌuj caj u yaꞌar u tꞌʌn tiꞌ Moisés. Cax caj u yaꞌar u tꞌʌn tiꞌ Moisés, a baꞌ caj u yaꞌaraj Cꞌuj tiꞌ Abraham, mʌꞌ ju pꞌʌtej quireꞌ caj u toc araꞌb tiꞌ Abraham uch.
\v 18 Wa quin chen quibic a baꞌ tsꞌibtaꞌb ten ic nunquirex Moisés quir u taquicoꞌonex mʌꞌ baꞌ wir caꞌ ij cacsex tij cor tiꞌ Cristo. Mʌꞌ ja wirej, chen ic nunquirex Abraham caj toc ten Cꞌuj quireꞌ tsoy tu tꞌʌn an ten bic caj u toc araꞌb tiꞌ. Rajen caꞌ ij cacsex tij cor a tiꞌ xanoꞌ. 
\p
\v 19 A techexoꞌ, ca bin a cꞌatiquex ten: Biquinin caj tsꞌaꞌb ten Cꞌuj u tꞌʌn Moisés quireꞌ chꞌic pachir caj tsꞌaꞌb tiꞌ Moisés? A tenoꞌ quin nunquic caj tsꞌaꞌb tiꞌ Moisés soc ij querex baꞌ quirir ic siꞌpirex. Barej cu chen pꞌatʌr u tꞌʌn Moisés hasta tu qꞌuinin caj rochaꞌb u caꞌ parar ten u nʌꞌ, rajiꞌ Cristo. Rajiꞌ u chꞌic parar u nunquir Abraham a caj u toc araj Cꞌuj tiꞌ Abraham rajiꞌ cu bin tar. Mʌꞌ ja wirej, caj tarij Cristo man u qꞌuinin tiꞌ u tꞌʌn Moisés. A techexoꞌ, caj a cꞌʌmex u tꞌʌn Moisés raꞌ u qꞌuinin caj u chuquex tech yʌjmasirob u tꞌʌn Cꞌuj. Jeroj u bʌjiriꞌ Moisés caj u wʌcꞌʌs mas u tꞌʌn Cꞌuj techex.
\v 20 Caj tsꞌaꞌb ten Cꞌuj tiꞌ Moisés caj u mas u tꞌʌn tiꞌ u winiquirob judío. Barej u bʌjiriꞌ Cꞌuj caj u toc araj tiꞌ Abraham bic cu bin u yacsej mac. Tu junan caj u yaꞌaraj tiꞌ. Mʌꞌ ju tuchiꞌtaꞌr yʌjmasir u tꞌʌn.
\s Baꞌwir tiꞌ u tꞌʌn Moisés
\p
\v 21 Jaj ix tʌco, jeꞌ a waꞌariquex ten: “A tenoꞌ, tin tꞌʌn a baꞌ caj u tsꞌibtaj Moisés toꞌonex uch mʌꞌ quet a baꞌ araꞌb tu cotor u tꞌʌn Cꞌuj.” A tenoꞌ bin in caꞌ in nunquej techex, quij caj yaꞌaraj Pablo: “Mʌꞌ tajiꞌ aroꞌ.” Wa jaj ix tiꞌ, yʌn ich u tꞌʌn Cꞌuj wa rajiꞌ cuxricoꞌonex soc cꞌuchaꞌan ij corex ij cʌnantex tu cotor a baꞌ caj u yaꞌaraj toꞌonex Moisés. Jeroj cꞌuchaꞌan ij corex quir ij cacsiquex ic bʌjex caꞌanan. Chen mʌnaꞌ tꞌʌn cu yaꞌaric. 
\v 22 A cu yaꞌaric ich u tꞌʌn Cꞌujoꞌ, wa mʌnaꞌ mac cꞌuchaꞌan yor u quibic a baꞌ caj u tsꞌibtaj Moisés ich u tꞌʌn uch. Rajen tu cotoroꞌonex yʌn ic siꞌpirex. Rajen mʌꞌ ju cꞌuchur u yor u taquicoꞌonex u tꞌʌn Moisés. Wa quic chen acsiquex tij corex tiꞌ Jesucristo, jeroj cu bin u taquicoꞌonex Cꞌuj, an ten bic caj u toc araj Cꞌuj tiꞌ Abraham uch.
\p
\v 23 Mʌꞌ ja wirej, mʌꞌ toy tac Cristo ich yocꞌocabiꞌ soc ij cacsiquex tij corex tiꞌ Cristo. Barej u tꞌʌn Moisés a tsꞌaꞌb tiꞌ ten Cꞌuj, cu chen taquic ic joꞌrex hasta caj cꞌuchi tu qꞌuinin jach tarij Cristo ich yocꞌocab quir u taquic mac a cu yacsic tu yor tiꞌ Cristo.
\v 24 Mʌꞌ ja wirej, u tꞌʌn Moisés irej yʌjtanrir mac, quireꞌ raꞌ quir u yesic toꞌonex a baꞌ jach tsoy tiꞌ Cꞌuj chen u tꞌʌn Moisés mʌꞌ ju yamta toꞌonexiꞌ bic tabar caꞌ ic betex tiꞌ. U tꞌʌn Moisés tsꞌaꞌb toꞌonex hasta cꞌuchij tu qꞌuinin caj tar Cristo soc ic binex tu yicnʌn Cristo. Jeroj Cꞌuj cu yiricoꞌonex tsoy, quireꞌ tij cacsex tij corex tiꞌ Cristo.
\v 25 Jeroj caj tari Cristo quir ij cacsex tij corex tiꞌ, rajen a toꞌonexoꞌ a mac tij cacsex tij corex tiꞌ, mʌꞌ baꞌwir toꞌonex u tꞌʌn Moisés, mʌꞌ biqꞌuin.
\p
\v 26 Mʌꞌ ja wirej, tu cotoroꞌonex u pararex Cꞌuj, raꞌ u qꞌuinin caj ij cacsex tij corex u tꞌʌn Cristo Jesús. 
\v 27 Rajen tu cotor mac a tiꞌ yʌn tu yʌnex caj toc acsaꞌb jaꞌ tu joꞌrob quireꞌ tu cꞌʌmob Cristo quireꞌ rajiꞌ ʌjtaquirob quireꞌ u pararob Cꞌuj, rajen pꞌeriꞌob yejer Cristo.
\v 28 Rajen mʌnaꞌ u winiquirob judío, mʌnaꞌ u winiquirob griego. Raꞌ u qꞌuinin cu yacsicob tu yorob u tꞌʌn Cristo. Mʌnaꞌ cꞌurew, mʌnaꞌ u tsꞌurir. Mʌnaꞌ xib, mʌnaꞌ xquic quireꞌ pꞌeriꞌoꞌonex yejer Jesucristo rajen turiroꞌonex. 
\v 29 Quireꞌ bajeꞌrer Cristo yʌninechex, rajen Cꞌuj cu yiriquechex irej wa techex u pararechex Abraham. Quireꞌ ta wacsex ta worex irej Abraham caj u yacsaj tu yor uch. Rajen a baꞌ caj u toc aꞌaraj Cꞌuj tiꞌ ic nunquirex Abraham, rajiꞌ cu bin u caꞌ tsꞌabir techex.

\c 4
\p
\v 1 Uꞌyex baꞌ quin wac techex bajeꞌrer. U parar u tsꞌurir a cu bin ocar u tsꞌurintic u baꞌtac u tet u qꞌuinin caꞌ bin quimic u tet. Chen mʌꞌ toy u ocac u tsꞌurintej quireꞌ chichan. Rajiꞌ quet yejer u cꞌurew u tet cax bin u caꞌ ocar u tsꞌurintej yatoch u tet.
\v 2 Mʌꞌ ja wirej, tiꞌ toy chichaniꞌ, yʌn u yʌjtanrir soc u quiꞌ cʌnantic hasta cꞌuchij tu qꞌuinin cu yocar u tsꞌurintej u baꞌtac u tet. Quireꞌ mʌꞌ cꞌuchij tu qꞌuinin caj u pꞌis u tet.
\v 3 Baxuc, xan, a toꞌonex uchoꞌ, mʌꞌ toy tac Cristo, mʌꞌ ij querex biquinin caj ic tsꞌurintex a baꞌ caj u camsoꞌonex ic nunquirex quir ij cꞌujintiquex Cꞌuj.
\v 4 Barej caj jach cꞌuchij tu qꞌuinin caj u pꞌisa Cꞌuj caj u tuchiꞌt u parar. Chen turiꞌ u parar, caj rochaꞌb ten u nʌꞌ, baxuc xan irenob u winiquirenob judío, a Jesúsoꞌ.
\v 5 Mʌꞌ ja wirej, tarij Cristo quir mʌꞌ u sipticoꞌonex tiꞌ u tꞌʌn Moisés quireꞌ mʌꞌ cꞌuchaꞌan ij corex tiꞌ u tꞌʌn Moisés. Tarij Cristo soc u pararinticoꞌonex Cꞌuj, soc mʌꞌ ic tsꞌurintiquex u tꞌʌn Moisés.
\p
\v 6 Quireꞌ bajeꞌrer u toc pararoꞌonex Cꞌuj, rajen Cꞌuj caj u tuchiꞌt u Tajꞌor u Pixam Cꞌuj quir u cʌjtar tic pixamex. Rajen u Tajꞌor u Pixam Cꞌuj a tiꞌ yʌn tic pixamex, rajiꞌ cu tꞌʌn tic pixamex. Rajen quij caꞌariquex: “Tet”, quij, tiꞌ Cꞌuj.
\v 7 Rajen a techexoꞌ, mʌꞌ u winquirechex u jer maquiꞌ, bajeꞌrer u pararechex Cꞌuj. Rajen u pararechex Cꞌuj a baꞌ tiꞌ yʌn Cꞌuj, jeꞌ u tsꞌabʌr techex.
\s A Pablojoꞌ cu quiꞌ tucric a mac a tu yacsaj tu yor u tꞌʌn Cꞌuj
\p
\v 8 A uchoꞌ, quireꞌ mʌꞌ a werex jach Cꞌuj rajen caj a cꞌujintex a baꞌ mʌꞌ jach cꞌujoꞌ, caj a quibex a tiꞌoboꞌ.
\v 9 Chen bajeꞌrer a werex tu yʌn Cꞌuj, bajeꞌrer a Cꞌujoꞌ yerechex. Chen mʌꞌ jin najtej biquinin a cꞌatex a wʌcꞌʌs quibiquex a baꞌ a mʌꞌ ju yamtechex, a mʌꞌ baꞌwir techex. Arex ten wa ja cꞌatex raꞌ ca tsꞌurintiquex?
\v 10 Quireꞌ caj in wuꞌyaj caj a quiꞌ ricꞌsex tu cotor u qꞌuinin u quiꞌquiꞌ janʌnob u winiquirob judío.
\v 11 Rajen caj in tucraj wa jin rʌc sʌtic in beyaj tu jin rʌc tsecꞌta techex tiꞌ u tꞌʌn Cꞌuj.
\p
\v 12 A tenoꞌ quin chich aric techex in wet acsʌꞌorirechex caꞌ a cʌnen bajeꞌrer quireꞌ a tenoꞌ tin cʌnechex quireꞌ ta wacsex ta worex. Mʌꞌ ja wirej, a tenoꞌ caj in pꞌʌtaj a baꞌ nanij caj u betob u winiquirob judío. Rajen chʌc irenechexex. Quireꞌ mʌꞌ ja cꞌasquintenexiꞌ, rajen quin tsicbar techex baxucoꞌ.
\v 13 Quireꞌ a werex yajen a uchoꞌ, rajen yʌn pꞌaten ta ruꞌumex. Rajen ta batꞌan uꞌyajex u jach tsoyir u tꞌʌn Cꞌuj a tin tsecꞌtaj techex.
\v 14 A techexoꞌ mʌꞌ ja pꞌastenexiꞌ mʌꞌ ja xumpꞌʌtenexiꞌ cax ta wirex baꞌ yajij in cʌnmʌn ten, cax tu pʌy a xejex. Chen a techexoꞌ ta quiꞌ acsenex, iren a mac a cu jach tar ich Cꞌuj. A techexoꞌ, caj a wacsenex irenoꞌ u wʌcꞌʌs u bʌjiriꞌ Jesucristo.
\v 15 Jach manan quiꞌ a worex uch quireꞌ a baꞌ caj in camsechex. Chen am baꞌ a berex a techex bajeꞌreroꞌ quireꞌ mʌꞌ quiꞌ a worex? Jach taj quin wac techex, a uchoꞌ wa cꞌuchaꞌan a worex tiꞌ caꞌ a chuque tenex a baꞌ jach manan cojij techex, cax a wichex quir a tsꞌiquex ten, caꞌ sasichʌjʌc in wich.
\v 16 Jaj ix tʌco, bin a caꞌ pꞌactenex bajeꞌrer quireꞌ taj caj in waꞌaraj techex a jeꞌ tꞌʌnaꞌ.
\p
\v 17 A mac a cu camsiquechexob quir a quiꞌ cʌnantiquex u tꞌʌn Moisés yʌn baꞌwir techex, u cꞌat u cꞌʌniquechexob. Mʌꞌ ja wirej, u jach cꞌatob caꞌ a xumpꞌʌtenex yejer in racꞌob, a mac taj caj u camsajechex u tꞌʌn Cꞌuj uch. Soc a sayirex tu pachob irex ta sayirex tin pachob uch. Soc a chen yajquintiquex a tiꞌoboꞌ.
\v 18 Jach tsoy wa tiꞌ yʌn mac rajraꞌ u yamtiquechex quireꞌ mʌꞌ rajraꞌ tiꞌ yʌnen tu yʌnechex. Mʌꞌ jin waꞌare mʌꞌ in cꞌat u jer mac caꞌ u yam techex. Wa ca jocꞌarex tu tsoyirechex mʌnaꞌ baꞌ quin bin in wac techex.
\v 19 A tenoꞌ quin chen tꞌʌniquechex an bic u yʌjcamsʌyʌjirob cu tꞌʌnic u chan camsʌwinicob. A werex baꞌ quin wuꞌyic a tenoꞌ? Jach mucꞌyaj in caꞌ quireꞌ techex iren a nʌꞌ a tenoꞌ a tabar u rochic u chan ochir. Jach yaj quin bin in wuꞌye hasta quin wiric tin wich bic jach taj caj a wacsex ta worex u tꞌʌn Cristo.
\v 20 Am biquinin in jach cꞌat in bin in wirej a wichex bajeꞌrer, chen mʌꞌ ju cꞌuchur in wor in wirex a wichexiꞌ. A tenoꞌ, quin pachtic in bin in tsicbar techex. Mʌꞌ in cꞌat in chen tsꞌibtic techex quireꞌ quin tucriquechex tin wor quireꞌ ca cꞌʌmiquex a baꞌ cu camsicob techex u tꞌʌn Moisés.
\s A baꞌ cu camsicoꞌonex ixbar Agar yejer ixbar Sara
\p
\v 21 Arex ten a mac u cꞌat u quibic a baꞌ tsꞌibaꞌan ich u tꞌʌn Moisés quir u taquicob u bʌj. Mʌꞌ wa ta najtex a baꞌ cu yaꞌaric u tꞌʌn Moisés?
\v 22 Tiꞌ quic xaquic ich u tꞌʌn Cꞌuj tiꞌ a Abraham ic nunquir a uchoꞌ yʌn caꞌtur u parar Abraham. Turiꞌ rochaꞌb u parar ten u cꞌurew, u jer caj rochaꞌb u jer u parar ten u jach raqꞌuirireꞌ a mʌꞌ u cꞌureweꞌ.
\v 23 Chen u racꞌ Abraham Agar pararnʌjij quireꞌ caj u chen pacht u winquirir. Sara caj pararnʌjij quireꞌ caj u toc araj Cꞌuj bin u caꞌ pararʌncʌr an ten bic caj u toc aꞌaraj uch.
\v 24 A jeꞌ tꞌʌnaꞌ tiꞌ a xquicoꞌ, a caꞌturoꞌ, yʌn baꞌ quir u camsicoꞌonex. Uꞌyex baꞌ u cꞌat yaꞌaric: A caꞌtur xquicoꞌ, yʌn caꞌtur u tꞌʌn Cꞌuj toꞌonex. Tuririꞌ tiꞌ Agar, rajiꞌ irej a cu tar tiꞌ u tꞌʌn Cꞌuj a tsꞌaꞌb tiꞌ Moisés caj bin ich u joꞌr u witsir Sinaí. Mʌꞌ ja wirej, u parar Agar rajiꞌob u cꞌurewob quireꞌ cꞌurewintaꞌb ten u tꞌʌn Moisés.
\v 25 Ca wiric, a xquicoꞌ, Agar u cꞌabaꞌ, rajiꞌ irej u tꞌʌn Cꞌuj a tsꞌaꞌb tiꞌ Moisés ten Cꞌuj. Tsꞌaꞌb tiꞌ ich u joꞌr u witsir Sinaí, a tiꞌ yʌn tu ruꞌumin Arabia. Chen bajeꞌrer Agar irej tu cotor u winiquirob judío a mac yʌnin u cajar Jerusalén. Robob toc tsꞌurintaꞌb ten tu cotor a baꞌ tsꞌibaꞌan ich u tꞌʌn Moisés, a mʌꞌ ju bin u taquic mac.
\v 26 Barej a mac a caj u yacsajob tu yorob u tꞌʌn Jesucristo tar yʌn u cajar ich caꞌanan. Rajiꞌ u cajar Jerusalén tar yʌn ich caꞌanan. Robob a tu yacsob tu yorob tiꞌ Jesús bajeꞌrer mʌꞌ ju chabʌr u cꞌurewinticob u tꞌʌn Moisés. Rajen a toꞌonexoꞌ quij cariquex tiꞌ quic binex cʌjtarex tar ich caꞌanan.
\v 27 Cꞌaj techex wa baꞌ tsꞌibaꞌan ich u tꞌʌn Cꞌuj tu cu yaꞌaric:
\q A techoꞌ, a xiquic a mʌꞌ pararnʌjij, caꞌ quiꞌac yor. Jach manan u quiꞌtar a wor a techoꞌ a mac mʌꞌ ju yuba bic jach yaj caꞌ a rochaꞌb a parar, quireꞌ mʌꞌ pararnʌjech. Caj awʌtnʌquech quireꞌ quiꞌ a wor, cax tu pꞌʌtech a mam caꞌ bin tsꞌabac tech neyaꞌab a parar. A mac a yʌn u mameꞌ, mʌꞌ ju nepararʌncar.
\p
\v 28 Baxuc tun a techexoꞌ, in wet acsʌꞌorirechex. A toꞌonexoꞌ iroꞌonex Isaac u parar Abraham. Mʌꞌ ja wirej, Sara, a mʌꞌ u pararʌncar cuch, caj u rochaj u parar Isaac quireꞌ toc araꞌb ten Cꞌuj: “Bin u caꞌ u roch u tiꞌar.” An ten bic techex caj a wacsex ta worex u tꞌʌn Cꞌuj, caj a quibex a baꞌ cu yaꞌaric techex. Rajen u pararechex Abraham xan. 
\v 29 Barej baxuc a uchoꞌ, caj rochaꞌb ten Agar Ismael, u cꞌabaꞌ u parar Agar quireꞌ Abraham caj u pacht u pararʌncʌr yejer mʌꞌ u jach raqꞌueꞌ. A Ismaeloꞌ caj u chucaj u pach yitsꞌin Isaac. A Isaacoꞌ caj rochaꞌb ten u nʌꞌ quir u nupꞌsic a baꞌ caj toc araꞌb ten u Tajꞌor u Pixam Cꞌuj uch. U beriꞌ bajeꞌrer cu chuquic ic pachob a cu tus tucricob u tocar ten Cꞌuj quireꞌ a baꞌ cu yiricob ic betiquex.
\v 30 Chen cu yaꞌaric ich u tꞌʌn Cꞌuj: “A Agaroꞌ u cꞌurew Sara pararnʌjij yejer u mam Sara, quireꞌ u parar u cꞌurew Sara, u cꞌabaꞌ Ismael mʌꞌ ju bin ocar u tsꞌurintej yatoch a ju sucuꞌun Isaacoꞌ. Quireꞌ Isaac u jach parar Sara.”
\v 31 Rajen a toꞌonex bajeꞌreroꞌ a tij cacsex tij corex u tꞌʌn Cꞌuj mʌꞌ u pararoꞌonex cꞌurew a mac a cu beyaj tiꞌ u jer, irej Agar. A toꞌonexoꞌ u pararoꞌonex a xquicoꞌ a mʌꞌ cꞌurew, irej Sara.
\c 5
\s Chichquint a worex soc mʌꞌ a tsꞌurintex u tꞌʌn Moisés 
\p
\v 1 A Cristojoꞌ mʌꞌ ju siptoꞌonex soc mʌꞌ ic tsꞌurintiquex u tꞌʌn Moisés. Rajen chichquintex a worex ich u tꞌʌn Cꞌuj soc mʌꞌ a wʌcꞌʌs tsꞌurintex u tꞌʌn Moisés tu caꞌten. Mʌꞌ ja wirej, Jesús tu toc chaꞌ ic binex soc tsoy ic binex.
\p
\v 2 Uꞌyex baꞌ quin wac techex, a tenoꞌ Pablojen quin wac techex. Wa cu chabʌr techex a tsꞌiriquex u bʌqꞌuer tu ca wixex, baxuc an ten bic nanij cu beticob u winiquirob judío, rajen quin wac techex mʌꞌ bʌꞌwir Cristo techex. 
\v 3 A tenoꞌ quin wʌcꞌʌs aric techex. Mac tu cotor a cu chabʌr u tsꞌiric u bʌqꞌuer tu cu wixob, irej u winiquirob judío soc u yacsaꞌr ten Cꞌuj. Rajiꞌob caꞌ u quibej tu cotor a baꞌ tsꞌibaꞌan ich u tꞌʌn Moisés.
\v 4 Wa tiꞌ yʌn winic tu yʌnechex a cu tus tucric u yacsaꞌr u ten Cꞌuj quireꞌ caj u quib u tꞌʌn Moisés, mʌꞌ taj baꞌ cu tucriquiꞌ. Tu pꞌʌtaj baꞌ tsoy tu tꞌʌn Cꞌuj.
\v 5 Chen a tenoboꞌ a mac a caj tin wacsob tin worob, jach jaj bin u caꞌ u yamtenob u Tajꞌor u Pixam Cꞌuj soc tsoy yiriquenob Cꞌuj. Jeꞌ u betic aroꞌ quireꞌ caj in wacsob in worob tiꞌ u parar Cꞌuj.
\v 6 Tiꞌ a mac a caj u yacs tu yor tiꞌ Cristo, mʌꞌ noꞌoj wa tsꞌiraꞌan u bʌqꞌuer tu cu wix wa mʌꞌ tsꞌiraꞌan u bʌqꞌuer tu cu wix. A baꞌ jach noꞌojoꞌ caꞌ ij cacsex tij corex bayiriꞌ caꞌ ic yajquintex ij quet acsʌꞌorirex. 
\p
\v 7 Caj a yʌn batꞌan acsex ta worex tiꞌ Cristo uch, biquinin jach taj caj a wacsex ta worex tiꞌ Cristo. Chen bajeꞌrer biquinin ca wuꞌyex a mac a cu susiquechex soc mʌꞌ ja wuꞌyex, soc mʌꞌ ja quibex u tajir u tꞌʌn Cꞌuj?
\v 8 A yʌjtuscamsʌyʌjirob u tꞌʌn Cꞌuj a cu camsiquechex soc a pꞌʌtiquex u tajir u tꞌʌn Cꞌuj. Robob mʌꞌ tiꞌ u tar ich Cꞌuj quir u camsiquechex, a techexoꞌ tu tet techex Cꞌuj.
\v 9 Mʌꞌ u yʌn tubur techex. Cax tuririꞌ a mac a cu yʌnxchun u camsiquechex. Aroꞌ cax chichin cu sip cu yacsiquechex ta cꞌaxirex, an ten bic chichin u tsꞌac pan cu sip tu cotor yoꞌoch pan.
\v 10 A tenoꞌ mʌꞌ jin tucrej quireꞌ Cꞌuj cu bin u yamtiquechex soc mʌꞌ ja quibex u tꞌʌn. Barej rajiꞌ cu bin tsꞌabir u mucꞌyaj ten Cꞌuj a mac u cꞌat u tusaric techex.
\p
\v 11 In bʌjobechex. A mac a cu pꞌactiquenoboꞌ cu man u tsicbʌtob caj tus aꞌarob ten quin man in camsej bic tabar u tsꞌirej u bʌqꞌuer tu cu wixob, an ten bic nani cu beticob u winiquirob judío. Caj u tus aꞌarob xan quin man in camsob bic u quibicob u tꞌʌn Moisés quir u tocar ten Cꞌuj. Baxuc cu tus aꞌaricob tenoboꞌ. Wa baxuc quin quiꞌ camsicob, mʌꞌ ju chucob in pach u winiquirob judío, u quiꞌ yajenob. Quiꞌ yorob u yubiquenob in camsic. Mʌꞌ ja wirej, tiꞌ toy cu chuquicob in pach. Jaj ix tʌcoj, mʌꞌ u pꞌuj yorob quireꞌ caj in tsicbʌticob tu cu baj ich cruz soc u jawsic ic siꞌpirex Cristo.
\v 12 Am biquinin jach manan in cꞌat in wiric caꞌ a jocꞌsex a mac a cu tus camsiquechex caꞌ a tsꞌirex a bʌqꞌuerex soc u tus taquiquex Cꞌuj. In cꞌat in wiriquex a jocꞌsiquex soc mʌꞌ u yacsic a siꞌpirex.
\p
\v 13 Barej a techexoꞌ in wet acsʌꞌorirex, mʌꞌ ju toc sip techex Cꞌuj soc mʌꞌ a tsꞌurintiquex a baꞌ tsꞌibaꞌan ich u tꞌʌn Moisés. Cax mʌꞌ siptaꞌbechex ten Cꞌuj barej mʌꞌ tsoy a mʌnex a pach ta worex a cꞌasoꞌ. Caj u sip techex Cꞌuj soc a yajquintiquex a wet acsʌꞌorirex soc a yamtiquex a tiꞌoboꞌ.
\v 14 Wa quij quibiquex a tu cu yaꞌaric: “Caꞌ a yajquintex a wet cajarex an ten bic a wʌcꞌʌs bʌjiriꞌex ca yajquintiquex”, jeroj, ca quibiquex tu cotor a baꞌ araꞌb ten Cꞌuj jach taj.
\v 15 Mʌꞌ a yʌn pacran tsꞌictarex, quireꞌ a jeꞌraꞌ u tꞌʌn Cꞌuj tu yʌnechex bin u caj chꞌejar.
\s A baꞌ cu pachtic tu yor winic yejer a baꞌ cu pachtic u Tajꞌor u Pixam Cꞌuj
\p
\v 16 Uꞌyex baꞌ quin chich aric techex soc caꞌ a cʌnex. Chaꞌex u pʌyic a berex u Tajꞌor u Pixam Cꞌuj soc mʌꞌ a pachtiquex ta worex a cꞌasoꞌ.
\v 17 Mʌꞌ ja wirej, a baꞌ quic pachtiquex tij corex cu pʌyic ic berex tu cꞌasir. Rajen cu pꞌactic u pʌyic ic berex u Tajꞌor u Pixam Cꞌuj. Mʌꞌ ja wirej, mʌꞌ quet yor u Tajꞌor u Pixam Cꞌuj yejer a cꞌasoꞌ a quic pachtiquexoꞌ tij corex xanoꞌ. Rajen mʌꞌ ic mʌnex ic baꞌ a cꞌatex quireꞌ cu pacran pꞌaticob u bʌj u Tajꞌor u Pixam Cꞌuj yejer a cꞌasoꞌ.
\v 18 Wa ca chaꞌiquex caꞌ u camsechex u Tajꞌor u Pixam Cꞌuj tu cu pʌyic a berex, jeroj, mʌꞌ ju bin u taꞌquic a joꞌrex tiꞌ u tꞌʌn Moisés.
\p
\v 19 Wa quij quibiquex a baꞌ quic pachtquex tij corex, a cꞌasoꞌ, baxuc a jeꞌ quic bin ic betex: Quic manex soc ij quiriquex xquic. Cu man xquic xan quir u yiric xib. Quic bin ic chuquiquex xquic. Quic bin ic betex tu cotor a cꞌasoꞌ.
\v 20 Wa quij quibiquex a baꞌ quic pachtiquex tij corex a cꞌasoꞌ, quic bin ij cꞌujintex tus Cꞌuj. Quic bin ij cꞌʌyex mac. Quic bin ic pacran pꞌequintiquex ic bʌjex, mʌꞌ baꞌwir tiꞌ u jer mac. Cu bin qꞌuextar ij corex. Quic bin ic tsꞌictarex. Quic bin ic tucrex ic nojnoj bʌjiriꞌex. Quic bin ic pꞌusex yor ic racꞌob soc mʌꞌ quet yorob. Quic bin ic pꞌactex ic racꞌob soc u tiriꞌ a tiꞌoꞌ.
\v 21 Quic bin ij cꞌatex a baꞌ yʌn tiꞌ mac. Quic bin ij carchʌjarex. Quic bin ic nejenjanrex. Quic bin ij quinsiquex mac. Quic bin ic betex tu cotor a cꞌasoꞌ baxucoꞌ. A mac a cu betic baxucoꞌ mʌꞌ cꞌuchaꞌan yor u yocar tu cu reyinticob Cꞌuj ich caꞌanan. Tsꞌoc in waꞌaric techex aroꞌ chen quin wʌcꞌʌs caꞌ aric techex aroꞌ.
\p
\v 22 Chen tu cu pʌyic a berex u Tajꞌor u Pixam Cꞌuj quic bin ic betex baxuc jeraꞌ: Quic bin ic yajquintex mac. Cu bin u quiꞌtar ij corex. Mʌꞌ jic tucriquex baꞌ. Nemʌꞌ jach bicoꞌonex. Jach tsoy ij corex yejer mac. Quin bin ic manex tu tsoyir. Taj baꞌ quic bin ij carex.
\v 23 Chen a mac caj pay u ber ten u Tajꞌor u Pixam Cꞌuj, cax pꞌastaꞌc ten mac mʌꞌ ju pꞌujur tiꞌ. Cꞌuchaꞌan yor tiꞌ a baꞌ cu tar u tumtaꞌbir yor quireꞌ yamtaꞌ ten u Tajꞌor u Pixam Cꞌuj. Mʌꞌ ja wirej, wa baxuc quij quibiquex a jeroj, mʌꞌ ju bin u taꞌc ic joꞌrex tiꞌ u tꞌʌn Moisés. 
\v 24 Rajen a mac a cu yacsic tu yor ti Cristo, mʌꞌ ju chaꞌ u pʌy u siꞌpir a baꞌ cu pachtic tu yor cax wa jach tsoy. Bayiriꞌ xan a cꞌasoꞌ cu toc rucꞌsic a mac yacsmʌn tu yor, bajen Jesús caj u rucꞌsaj caj bajij ich cruz uch.
\v 25 Wa ja cꞌat a wet manex u Tajꞌor u Pixam Cꞌuj chaꞌ u pʌyic a berex u Tajꞌor u Pixam Cꞌuj.
\p
\v 26 Mʌꞌ jic yʌn tucriquex wa jach manan caremoꞌonex quireꞌ a baywoꞌ quic choquintiquex yor ic racꞌob. Mʌꞌ tsoy u pacran qꞌuextar ij corexiꞌ.
\c 6
\s Pacran yamtex a bʌjex
\p
\v 1 A techexoꞌ in wet acsʌꞌorirechex a pay u berob ten u Tajꞌor u Pixam Cꞌuj. Caꞌ a yamtex a mac a tu pʌy u siꞌpir. Chan ber a wac soc u rʌc pꞌʌtic, chan chan ber a waquex tiꞌ. Chen bayiriꞌ techex quiꞌ cʌnant a bʌjex soc a wʌcꞌʌs bʌjiriꞌ mʌꞌ a caꞌ pʌyic a siꞌpirex.
\v 2 Wa baxuc ca betiquex, tan a pacran yamtiquex a wet acsʌꞌorirex cax a baꞌ cu tar techex. Quet bayiriꞌ ca quibiquex u tꞌʌn Jesucristo.
\p
\v 3 Quireꞌ wa mac cu tus tucric tu yor: “A tenoꞌ, quij, jach noꞌjen”, chen rajiꞌ mʌꞌ jach noꞌjiꞌ, jot, u bʌjiriꞌ tus ariqueꞌ.
\v 4 Chich quin waꞌaric techex a jeꞌraꞌ, junjunechex caꞌ a quetquint a bʌjex tiꞌ a baꞌ tsꞌibaꞌan ich u tꞌʌn Cꞌuj quireꞌ raꞌ a pꞌisex. Caj tsꞌoc a wiriquex taj a baꞌ caj a betajex. Jeroj quiꞌ a worex, quireꞌ caj a quiꞌquintex yor Cꞌuj xan. Mʌꞌ tsoy wa quij quetquintic ic bʌjex yejer ij quet acsʌꞌorirex quireꞌ robob mʌꞌ raꞌ a pꞌisexiꞌ.
\v 5 Quireꞌ jujunturoꞌonex caꞌ ic tucriquex baꞌ cu pʌyic ic siꞌpirex quireꞌ bin ij caꞌex ic nunquiquex tiꞌ Cꞌuj biqꞌuin.
\p
\v 6 A macaꞌ a camsaꞌ ten u tsꞌurir tu cu muchꞌquinticob u bʌj tu cu cꞌayob a tan u cʌnicob u tꞌʌn Cꞌuj. Robob caꞌ u jʌsob tiꞌ u yʌjcamsʌyʌjirob u tꞌʌn Cꞌuj a baꞌ yʌn tiꞌob a jach tsoyoꞌ.
\p
\v 7 Mʌꞌ wa ja wʌcꞌʌs bʌjiriꞌ tus ariquexeꞌ mʌꞌ cꞌuchaꞌan a worex a tusariquex tiꞌ a Cꞌujoꞌ. Mʌꞌ ja wirej, u tꞌʌn Cꞌuj bin u caꞌ u nupꞌsej, a baꞌ ta pʌqꞌuex caꞌ bin cꞌuchur tu qꞌuinin raꞌ ca bin a jaqꞌuex an ten ca pʌqꞌuiquex a narex raꞌiriꞌ ca jaqꞌuiquexeꞌ.
\v 8 Wa quic pʌqꞌuiquex a baꞌ quic pachtiquex tij corex a cꞌasoꞌ, quic bin ic pʌy ic siꞌpirex hasta cu cꞌuchur tu qꞌuinin munt qꞌuin quic bin saꞌtʌrex, quet yejer ic winiquirex. Chen wa quic pʌqꞌuiquex a baꞌ u cꞌat u Tajꞌor u Pixam Cꞌuj rajraꞌ jeꞌ ic manex tu tsoyir, jeꞌ u cꞌuchur tu qꞌuinin, munt qꞌuin, quic bin cuxtarex. 
\v 9 Rajen mʌꞌ jic chaꞌ u caꞌanan ij corex tu quic manex tu tsoyir quireꞌ caꞌ bin cꞌuchuc tu qꞌuinin Cꞌuj bin u caꞌ u quiꞌ acsoꞌonex wa mʌꞌ tupsaꞌan ij corex.
\v 10 Rajen caꞌ ic yamtex mac tu cotor, caꞌ bin tac u qꞌuinin quir ic yamtiquex a tiꞌoboꞌ. Barej jach manan caꞌ ic yamtex a mac caj u yacsa tu yor u tꞌʌn Cꞌuj, quireꞌ robob ic jach bʌjob.
\s Quir u tsꞌocar u tꞌʌn Pablo cu chich tꞌʌnic tiꞌob, bayiriꞌ cu rʌc tꞌʌnic xan
\p
\v 11 Ira wirex mun u caꞌ tsꞌib caj in tsꞌibt yejer in cꞌʌb, jach carem.
\v 12 Mʌꞌ ja wirej, a mac a caj u chich ar techex caꞌ a tsꞌirex a bʌqꞌuerex irej nani u beticob u winiquirob judío. Aroꞌ cu chen aric techex soc tsoy yirir ten u racꞌob, u yet winiquirob judío. Robob caj u camsob aroꞌ soc mʌꞌ u chucur u pachob quireꞌ Cristo quimij ich cruz tiꞌob.
\v 13 Mʌꞌ ja wirej, cu tus man u camsob u tꞌʌn Moisés soc tsoy yubicob caꞌ a tsꞌirex a bʌqꞌuerex tu ca wixex irej nan u beticob u winiquirob judío. Cax robob u wʌcꞌʌs bʌjiriꞌob mʌꞌ u quiꞌ quib a baꞌ tsꞌibaꞌan ich u tꞌʌn Moisés. Cu chen man u jumbintob caꞌ a tsꞌirex a bʌqꞌuerex, ir u winiquirob judío soc yubicob: “Tsoy caj a camsaj tiꞌob caꞌ u tsꞌir u bʌqꞌuerob.”
\v 14 Chen a tenoꞌ, bin in caꞌ in waꞌarej tiꞌ mac, mun jach tsoy a Jesúsoꞌ, quireꞌ caj tar u mucꞌyaj tiꞌ ten ich cruz quireꞌ mʌꞌ ju sipten tiꞌ u tꞌʌn a Moisésoꞌ. Bayiriꞌ xan, mʌꞌ u sipten tiꞌ a baꞌ cꞌasir quin pachtic tin wor a teraꞌ ich yocꞌocab. Baxuc quin waꞌaric tiꞌ mac.
\v 15 Jot mʌꞌ baꞌwir a mac tsꞌiraꞌan u bʌqꞌuer, cax a mac mʌꞌ tsꞌiraꞌan u bʌqꞌuer mʌꞌ baꞌ wir, jot. A mac u baꞌ jach noꞌojoꞌ, a mac ricꞌben winicoꞌ quireꞌ tu yacsaj tu yor tiꞌ Cristo.
\v 16 Tu cotor mac a cu man a cu pʌyʌr u ber ten u Tajꞌor u Pixam Cꞌuj an ten bic caj in camsechex soc a werex mʌꞌ ja manex tu cꞌasirob, robob jach taj u winiquirob israel, a cu jach cꞌujinticob Cꞌuj. Caꞌ u yajquin techex Cꞌuj, in cꞌat caꞌ u yamtechex Cꞌuj. Caꞌ quiꞌac a worex quireꞌ a werex toc jawsaꞌb a siꞌpirex ten Cꞌuj.
\p
\v 17 Tu qꞌuinin a bajeꞌrer toc arej tiꞌ a racꞌobex nac in wor, cax u jer u qꞌuinin caꞌ bin tac. Arej tiꞌ a racꞌobex mʌꞌ u nacsicob in wor. Quireꞌ tin toc araj tiꞌob bic u bʌjiꞌiriꞌ Jesús caj u tsꞌaj in beyaj. Wa cu jach tarob yirej baꞌ u ber in winquirir, tu quin man in tsecꞌt u tꞌʌn Cꞌuj, caj u jʌtsꞌob in pach, tu chꞌinob in joꞌr.
\p
\v 18 A tenoꞌ quin tꞌʌnic Cꞌuj techex in wet acsʌꞌorirechex caꞌ u yajquin techex Cꞌuj caꞌ u yamtechex. Jeroj tsꞌoquij, quij Pablo.