\id EPH
\h EFESIOS
\toc1 EFESIOS
\mt1 A JEꞌ JUꞌUNAꞌ, RAJIꞌ TIꞌ U YET ACSɅꞌORIROB ICH U CAJAR EFESO. RAJIꞌ TU TSꞌIBTA PABLO
\mt2 EFESO
\c 1
\s A Pablojoꞌ caj u yʌnxchun u tsicbar tiꞌ yet acsʌꞌorirob teꞌ ich u cajar Efeso
\p
\v 1 A tenoꞌ Pablojen. A tenoꞌ yʌjtsꞌeqꞌuiren u tꞌʌn Jesucristo quireꞌ baxuc u cꞌat Cꞌuj. A tenoꞌ, tan in tsicbar yejerechex ich a jeꞌ juꞌunaꞌ. Tan in tsꞌibtic techex a mac a cu jach quibicob a baꞌ araꞌb ten Jesús tiꞌ techex quireꞌ ta wacsex ta worex tiꞌ. Tan in tsꞌibtic tiꞌ techex a mac a tiꞌ yʌnob ich u cajar Efeso.
\v 2 A tenoꞌ in cꞌat Cꞌuj caꞌ u yamtej techex, bayiriꞌ xan, in cꞌat caꞌ u yamtej techex Jesucristo ic Jaj Tsꞌurirex soc caꞌ quiꞌac a worex soc mʌnaꞌ baꞌ ca tucriquex. 
\s Caj quiꞌ quintaꞌb u yorob ten Cꞌuj quireꞌ a baꞌ betaꞌbob tiꞌob ten Cristo
\p
\v 3 Caꞌ ij carex tiꞌ Cꞌuj, a mac Cꞌuj, bayiriꞌ a mac u Tet ic Jaj Tsꞌurirex, Jesúsristo, raꞌ caꞌ ij carex tiꞌ: “Bayoꞌ Cꞌuj, quireꞌ tu cotor a baꞌ ta tsꞌaj tenob quireꞌ Cristo. Ta quiꞌquintaj ij corex Cꞌuj quireꞌ a baꞌ tu cotor a ta tsꞌajaj tiꞌ tenob Cꞌuj quireꞌ Jesucristo.”
\v 4 A Cꞌujoꞌ mʌꞌ toy u betaj a jeꞌ yocꞌocabaꞌ, caj u tetaj toꞌonex soc rajiꞌ yʌninoꞌonex quireꞌ Jesucristo. Caj u tetaj toꞌonex Cꞌuj soc u tajquintic ij corex soc mʌnaꞌ ic siꞌpirex ʌcʌtan tu wich Cꞌuj.
\v 5 Mʌꞌ ja wirej, a Cꞌujo caj u yajquintaj toꞌonex, rajen, tu chꞌic chunin tu cotor baꞌ uch, caj u toc araj tu cotor baꞌ quir u chꞌic pararinquintic toꞌonex quireꞌ Jesucristo. Rajen a Cꞌujoꞌ caj u betaj baxuc tiꞌ toꞌonex, quireꞌ baxuc u cꞌat.
\v 6 Rajen caꞌ ij carex tiꞌ Cꞌuj: “Bayoꞌ Cꞌuj, ca yajoꞌonex quireꞌ u tsoyir a pixam.” Caꞌ ij carex tiꞌ Cꞌuj: “A yajquinticoꞌonex quireꞌ jach manan tsoy ta tꞌʌn tech ca yajquinticoꞌonex, quireꞌ a pararenob Jesucristo.”
\v 7 Mʌꞌ ja wirej, jach manan Cꞌuj cu yajquintic toꞌonex, rajen caj u tuchiꞌtaj u parar Cristo quir u quinsaꞌ ich cruz quir u boꞌotic u boꞌorir ic siꞌpirex. Rajen, tu tacoꞌonex bajeꞌrer, quireꞌ tu rʌc rucsaj ic siꞌpirex. 
\v 8 Baxuc caj u betaj tiꞌ toꞌonex Cꞌuj quireꞌ tu tsoyir u pixam, bayiriꞌ xan, quireꞌ cu yajquinticoꞌonex. Mʌꞌ ja wirej, quireꞌ tu tsoyir u pixam, caj u tsꞌaja toꞌonex caꞌ ij querex tu cotor baꞌ.
\v 9 Bayiriꞌ xan, caj u tsꞌaja toꞌonex u tucur Cꞌuj soc ic najtex a baꞌ tu muc u tucraj Cꞌuj uch. Bajeꞌrer caj u chaꞌic ic najtiquex a baꞌ caj tu tucraj uch, quij. 
\v 10 Mʌꞌ ja wirej, a Cꞌujoꞌ caj u chaꞌ ij querex a baꞌ tu tucraj wa ber caꞌ bin tsꞌabac u beyaj ten Cꞌuj tiꞌ Cristo soc cu bin tsꞌurinbir tu cotor baꞌ. Cax a baꞌ tiꞌ yʌn ich caꞌanan, cax a baꞌ tiꞌ yʌn ich yocꞌocab, rajiꞌ Jesús cu bin tsꞌurinbir.
\p
\v 11 Quireꞌ tu cotor baꞌ a caꞌ bin tac caꞌ bin cꞌuchuc tu qꞌuinin, raꞌ cu bin tar quireꞌ Cꞌuj tu toc araj uch, rajen baxuc cu bin tar tu jach jajir. Quireꞌ baxuc u cꞌat Cꞌuj quireꞌ rajiꞌ yʌninoꞌonex quireꞌ Cristo. Baxuc Cꞌuj caj u tucraj, tu chꞌic chunin, rajen toc nupꞌaꞌan bajeꞌrer.
\v 12 Rajen caꞌ ij carex tiꞌ Cꞌuj: “Bayoꞌ Cꞌuj quireꞌ ta yamtenob.” Baxuc caꞌ in waꞌarob tiꞌ Cꞌuj, rajraꞌ, a tenob pʌyberenob caj in wacsaj tin worob tiꞌ Jesucristo.
\p
\v 13 A baꞌ in berob tenob uch, bayiriꞌ xan tiꞌ techex uch, ber ta wuꞌyajex u jach tsoyir u tꞌʌn Cꞌuj, raꞌ quir u taquic techex, jeroj, ta wacsex ta worex. A baywoꞌ xan, u Tajꞌor u Pixam Cꞌuj an ten bic ta wuꞌyajex jeꞌ a bin cꞌʌmex. Rajiꞌ jeꞌ u tsꞌic techex Cꞌuj quir ij querex rajiꞌ yʌnenoꞌonex.
\v 14 U Tajꞌor u Pixam Cꞌuj, a mac tij cꞌʌmajex, rajiꞌ quir u yesic toꞌonex wa jeꞌ ij cuxtarex ich caꞌanan. Quireꞌ tic toc cꞌʌmajex a baꞌ tu toc araj Cꞌuj wa jeꞌ ij cꞌʌmajex. Mʌꞌ ja wirej, u Tajꞌor u Pixam Cꞌuj rajiꞌ cu yesic tiꞌ toꞌonex rajiꞌ tu mana toꞌonex. Rajen, jeꞌ u cꞌuchur tu qꞌuinin u tar u bisicoꞌonex ich yicnʌn caꞌanan. Rajen, caꞌ ij carex tiꞌ Cꞌuj: “Bayoꞌ Cꞌuj quireꞌ a yajoꞌonex quireꞌ otsir ta wiraj tiꞌ toꞌonex.”
\s A Pablojoꞌ tan u tꞌʌnic Cꞌuj
\p
\v 15 Caj tsꞌoc in wuꞌyic tiꞌ techex ta wacsaj ta worex tiꞌ Jesucristo, ic Jaj Tsꞌurirex. Bayiriꞌ xan, caj in wuꞌya tiꞌ techex an ten bic caj a yajquintajex tu cotor a wet acsʌꞌorirex cax tu yʌnob.
\v 16 Rajen, wa ber caj in wuꞌyaj tiꞌ techex caj in tꞌʌnaj Cꞌuj uch, caj in waꞌara tiꞌ: “Bayoꞌ Cꞌuj quireꞌ a mac a tantan xer tan u yacsicob tu yorob tiꞌ tech Cꞌuj.” Baxuc caj in waꞌaraj tiꞌ Cꞌuj. U beriꞌ bajeꞌrer tan in tꞌʌnic Cꞌuj tiꞌ techex, tan in cꞌʌꞌotic techex.
\v 17 A Cꞌujoꞌ, rajiꞌ u Cꞌujir ic Jaj Tsꞌurirex Jesucristo, rajiꞌ u Tet a jach manan tsoyir u pixam, rajiꞌ quin tꞌʌnic soc u tsꞌic techex u tucur Cꞌuj soc a werex tu cotor baꞌ.
\v 18 Tan in tꞌʌnic Cꞌuj tiꞌ techex xan, soc u sasichʌjʌrex a wichex quet yejer a tucurex soc a werex caꞌ bin cꞌuchuquechex ich caꞌanan quireꞌ rajiꞌ caj u tꞌʌnechex. A baywoꞌ a werex a baꞌ jach manan tsoy wa ber caꞌ bin cꞌuchucoꞌonex ich caꞌanan quir ic rʌc cꞌʌmiquex a baꞌ yʌn tiꞌ Cꞌuj. 
\v 19 A baywoꞌ a werex Cꞌuj yʌn jach manan u mucꞌ, bayiriꞌ xan soc a werex raꞌ u mucꞌ a jach manan tan u beyaj ta pixamex, a wacsmʌnex ta worex tiꞌ Cꞌuj.
\v 20 An ten bic u beyanʌjij Cꞌuj caj u cꞌʌnaj u mucꞌ uch, quij, caj u ricꞌsaj Cristo ich u quimirir soc u wʌcꞌʌs cuxtar. Jeroj, pachir caj cuquintac Cristo ich u noj ich caꞌanan quir u sʌjtaꞌ ten tu cotor mac, a baxucoꞌ Cꞌuj, tan u yamtic toꞌonex bajeꞌrer yejer u chichir u mucꞌ.
\v 21 Rajen, tan u sʌjtaꞌ Cristo ten Cꞌuj quireꞌ tsꞌaꞌb u beyaj ten Cꞌuj tiꞌ Cristo a jach noꞌoj. Rajiꞌ tu tsꞌajaj u tꞌʌn tiꞌ tu cotor presidente cax rey, cax a mac a cu beyajob tiꞌ gobierno, cax a mac a cu tsꞌurinticob mac teꞌ ich yocꞌocab. Mʌnaꞌ mac u jer jach sʌjtaꞌb ich yocꞌocab an ten bic Cristo, cax bajeꞌrer, cax u qꞌuinin caꞌ bin tac. Chen ic Jaj Tsꞌurirex cu bin sʌjtaꞌbir.
\v 22 A Cꞌujoꞌ caj u tetaj Cristo quir u tsꞌurintic tu cotor mac. Bayiriꞌ xan, Cꞌuj caj u chaꞌ ic tsꞌurintiquex Cristo xan a mac a yacsmʌnob tu yorob tiꞌ Cristo. A Cristojoꞌ caj cuquintaꞌb ten Cꞌuj soc rajiꞌ ic Jaj Tsꞌurirex irej ic joꞌrex.
\v 23 Rajen a toꞌonexoꞌ irej wa u winquiriroꞌonex Cristo, a tenob a yacsmʌnob tu yorob tiꞌ Cristo, a baywoꞌ tij cꞌʌmajex u jach tsoyir u pixam Cꞌuj, a mac cu tsꞌurintic tu cotor baꞌ.
\c 2
\s Quireꞌ u jach tsoyir u pixam Cꞌuj, rajen Cꞌuj caj u yajquintajoꞌonex 
\p
\v 1 Mʌꞌ ja wirej, a Cꞌujoꞌ caj u yirajechex jach manan cꞌas a pixamex, rajen caj u tsꞌaja techex a cuxtarex quireꞌ Cristo.
\v 2 Mʌꞌ ja wirej, a techexoꞌ uch, quij, ta chen sayʌrex tu pachob a racꞌob, cax tu cu binob uch. A techexoꞌ, caj a quibex a baꞌ u tar ta worex tiꞌ u tsꞌurir a mac yʌnin ich yocꞌocab, rajiꞌ a quisinoꞌ. Mʌꞌ ja wirej, rajiꞌ rajraꞌ tan u beyaj ich a mac a mʌꞌ yerob Cꞌuj quir u manob tu cꞌasir.
\v 3 A uchoꞌ, baxuc tiꞌ yʌnoꞌonex ich ic racꞌobex. Mʌꞌ ja wirej, a baꞌ tu pachtaj ic winquirirex rajiꞌ tic betajex uch. An ten bic tu cotorob ic racꞌobex baxuc a toꞌonex xan, rajen caꞌ bin cꞌuchuc tu qꞌuinin jeꞌ u tsꞌaꞌbʌr u mucꞌyaj ten Cꞌuj caꞌ bin mucꞌyajnʌcoꞌonex.
\v 4 Chen a Cꞌujoꞌ a jach yaj yiricoꞌonex rajen u yajoꞌonex, caj u yirej otsiroꞌonex caj yajquintoꞌonex.
\v 5 Quireꞌ ic siꞌpirex, a Cꞌujoꞌ caj u yiraj toꞌonex iroꞌonex wa quimiroꞌonex. Rajen, quet caj u tsꞌajex toꞌon ij cuxtarex quet yejer Cristo wa ber caj u tsꞌaja u cuxtar Cristo caj u ricꞌsaj Cristo tu tꞌajaꞌan u baquer uch. Quireꞌ u jach tsoyir u pixam rajen caj u yamtaj toꞌonex. 
\v 6 A Cꞌujoꞌ cu yiric toꞌonex an ten bic quet Cꞌuj caj u ricꞌsajoꞌonex wa ber caj ricꞌsaꞌb Jesús, quet tan u tsꞌic toꞌonex ij cuxtarex xan. Bayiriꞌ xan, a Cꞌujoꞌ cu yiricoꞌonex an ten bic tu cuquintajoꞌonex a teꞌ caꞌananoꞌ quet yejer Cristo.
\v 7 A baywoꞌ caj u yesaj toꞌonex Cꞌuj bic tabar u yajoꞌonex. Mʌꞌ ja wirej, u yajoꞌonex quireꞌ Jesucristo. Jach manan u yajoꞌonex tu yesaj tiꞌ tu cotor mac. Aroꞌ munt qꞌuin cu bin esbir u yajoꞌonex Cꞌuj.
\v 8 Mʌꞌ ja wirej, quireꞌ u jach tsoyir u pixam Cꞌuj, caj u tacajoꞌonex wa ber tij cacsex tij corex tiꞌ Cristo. Mʌꞌ u tacbaroꞌonex Cꞌuj cax a baꞌ tic betajex. Mʌꞌ ja wirej, tu tacaj toꞌonex quireꞌ a baꞌ u bʌjiriꞌ caj u betaj, tu chen sija toꞌonex.
\v 9 Mʌꞌ ja wirej, quij, mʌꞌ tu tacatoꞌonex Cꞌuj quireꞌ ic beyajex, quireꞌ jeꞌ ic manex tan ij cariquex bic tabar tu tacajoꞌonex Cꞌuj soc a racꞌobex cu bin u tucricob techex jach caremechex.
\v 10 Mʌꞌ ja wirej, a Cꞌujoꞌ caj u betatoꞌonex, rajen caj u sijtoꞌonex u ricꞌben cuxtar quireꞌ Jesucristo. Rajen, cꞌuchaꞌan ij corex ic manex tan ic betiquex a tsoyoꞌ. Mʌꞌ ja wirej, baxuc tu chꞌic chunin a Cꞌujoꞌ caj u tucraj caꞌ manacoꞌonex tan ic betiquex a jach tsoy.
\s Quireꞌ Cristo rajen pꞌeriꞌ ic tucurex bajeꞌrer
\p
\v 11 Yʌn cꞌaj techex, a uchoꞌ, quij, u winiquirob judío mʌꞌ tu yirajechex an ten bic u pararechex Cꞌuj, quireꞌ techex mʌꞌ ta cꞌʌmex a tsꞌiriquex a bʌqꞌuerex an ten bic nanij u beticob u winiquirob judío a tu cꞌʌmob uch.
\v 12 Mʌꞌ u yʌn tubur techex bic tabarechex uch, wa ber mʌꞌ toy a wacsex ta worex tiꞌ Cristo. Quireꞌ u tirir tiꞌ u winiquirob israel, cu tucricob u winiquirob israel mʌꞌ jach nojechex tiꞌ Cꞌuj. Mʌꞌ ja wirej, caj u tus tucrajob u winiquirob judío wa chen u winiquirob israel chen rajiꞌob cu bin tacbir ten Cꞌuj quireꞌ robob u pararob u chꞌic nunquir, a mac u cꞌabaꞌ Israel. Rajen mʌnaꞌ ta pajex u taquiquechex Cꞌuj quireꞌ mʌꞌ a werex Cꞌuj uch. Mʌꞌ wa baxucoꞌ techex uch?
\v 13 A techex uchoꞌ mʌꞌ a werex Cꞌuj, chen bajeꞌrer a werex Cristo quireꞌ a techex tu pʌyechex ich Cꞌuj quireꞌ u bʌjiriꞌ Cristo tu cꞌub u bʌj soc u quinsaꞌr.
\v 14 Rajen quireꞌ Jesucristo pꞌeriꞌ ic tucurex bajeꞌrer, rajen mʌꞌ ic pacran tsꞌiquintic ic bʌjex. Quireꞌ tu pꞌeriꞌquintajoꞌonex Cꞌuj uch a baꞌ mʌꞌ u periꞌquinmʌn Cꞌuj, quireꞌ u tirir tiꞌ techex tiꞌ u winiquirob israel uch. Rajen mʌꞌ ij quet pacran pꞌactic ic bʌjex quireꞌ Cristo tu pꞌeriquintoꞌonex bajeꞌrer.
\v 15 Mʌꞌ ja wirej, wa ber caj quinsaꞌb Jesús ich cruz caj u rʌc rucsaj a baꞌ tu ricsaj u tꞌʌnin Moisés uch. A baywoꞌ caj u betaj Cristo soc u pꞌeriꞌquintic a toꞌonexoꞌ soc mʌꞌ ic tirir techex tiꞌ a tenob u winiquirenob judío. Rajen quetoꞌonex bajeꞌrer, ricꞌben winiquiroꞌonex quireꞌ tu pꞌeriquintaj toꞌonex.
\v 16 Wa ber caj quimij ich cruz tiꞌ toꞌonex. A baywoꞌ caj u wʌcꞌʌs pʌyajoꞌonex ich Cꞌuj. Rajen jach pꞌeriꞌoꞌonex bajeꞌrer, cax a tenob in tiriroꞌ tenob uch tiꞌ a techexoꞌ uch. Rajen bajeꞌrer tsꞌoc ic pacran pꞌactic ic bʌjex. 
\v 17 Mʌꞌ ja wirej, caj tarij Cristo quir u tsicbar toꞌonex u jach tsoyir u tꞌʌn Cꞌuj soc quetoꞌonex cu bin tacbiroꞌonex ten Cꞌuj. Cax a techexoꞌ mʌꞌ a werex Cꞌuj uch, cax a tenob uch rajraꞌ in werob Cꞌuj.
\v 18 Cax a tenoboꞌ yejerechexoꞌ uch mʌꞌ quetoꞌonex, bajeꞌrer quetoꞌonex wa ber quic tsicbarex tiꞌ Cꞌuj. Mʌꞌ ja wirej, chen pꞌeriꞌ yʌn toꞌonex u Tajꞌor u Pixam Cꞌuj a mac quic tsꞌurintiquex.
\v 19 Rajen mʌꞌ u tirir tiꞌ techex tiꞌ a tenob u winiquirenob judío. Ʌcʌtan tu wich Cꞌuj tsꞌoc u yiric mʌꞌ u winiquirechex judío techex, quij. Pꞌeriꞌ ic ruꞌumex tu quic binex. Pꞌeriꞌ Cꞌuj yʌninoꞌonex, quet bayiriꞌoꞌonex u pararoꞌonex Cꞌuj bajeꞌrer.
\v 20 Mʌꞌ ja wirej, cu yaꞌaric yiroꞌonex bajen yatochoꞌonex Cꞌuj a tiꞌ toy tsꞌʌpquintaꞌ bajeꞌrer. Ca wiric u tunichiroꞌ a pʌyber tsꞌʌpquintaꞌb tu cu paꞌtetic yatoch tu cu nupic u jer u paꞌteꞌ, raꞌiriꞌ u tunichiroꞌ jach manan noꞌj quireꞌ rajiꞌ Jesucristo. A ray tunichoꞌ a cu bin u tsꞌʌpquintej ich yocꞌor u jer tunich chan ber u bin chichtar u mucꞌ a tu cu tsꞌʌpquintic a tunichoꞌ. A jeꞌ tunichaꞌ a cu tsꞌʌpquintaꞌ ich yocꞌor u jer, robob yʌjtseqꞌuirob u tꞌʌn Cꞌuj uch yejer a mac tsꞌaꞌb u tucurob ten Cristo quir u tsicbarob a baꞌ u cꞌat Cristo uch. 
\v 21 Quireꞌ chen Jesucristo baxuc chan chan ber cu tsꞌʌpquintic yatoch. Mʌꞌ ja wirej, chan chan ber u jer mac cu yacsic tu yor cu bin tsꞌʌpquinbir hasta caꞌ bin cꞌuchuc tu qꞌuinin jeroj cu waysic yatochoꞌonex tu cu bin cꞌujinbir ic Jaj Tsꞌurirex.
\v 22 Mʌꞌ ja wirej, quireꞌ a techexoꞌ caj a wacsajex ta worex tiꞌ ic Jaj Tsꞌurirex, rajen a techexoꞌ tu cotorechex jun xotꞌ techex a ray yatochoꞌ xan. Rajen waysaꞌboꞌonex iroꞌonex yatochoꞌonex Cꞌuj quireꞌ tiꞌ yʌn tic pixamex u Tajꞌor u Pixam Cꞌuj.
\c 3
\s A Pablojoꞌ tsꞌaꞌb u beyaj ten Cꞌuj soc u tsecꞌtic u tꞌʌn Cꞌuj ich mʌꞌ u winiquirob judío
\p
\v 1 Mʌꞌ ja wirej, a uchoꞌ araꞌb ten Cꞌuj wa cu bin tꞌʌnbir a mac a mʌꞌ u winiquirob judío. Rajen a tenoꞌ, Pablojen, rajen maquen ich tu cu maꞌcʌr winic quireꞌ binen in tsecꞌtej tiꞌ u tꞌʌn Cꞌuj techex, a mac a mʌꞌ u winiquirob judío. Quireꞌ tan in tꞌʌnic Cꞌuj tiꞌ techex.
\v 2 Tin tꞌʌn, caj a wuꞌyex tiꞌ ten wa ju jach tsoyir u pixam Cꞌuj caj u tsꞌaja ten in beyaj caꞌ xiquen in tsecꞌtej techex u tꞌʌn Cꞌuj.
\v 3 A Cꞌujoꞌ, caj u chaꞌ in wer tin pixam a baꞌ in nunquirob mʌꞌ chaꞌb yerob uch. Rajen aroꞌ caj in tsꞌibtaj techex uch cax chichin tin waꞌaraj techex.
\v 4 Rajen wa ber caꞌ bin a xaquex a jeꞌ juꞌunaꞌ, a techexoꞌ jeꞌ a wiriquex wa Cꞌuj caj u chaꞌ in wertic tin pixam wa Cristo jeꞌ yiric tsoyirechex tiꞌ a techexoꞌ, a mac mʌꞌ u winiquirob judío, bayiriꞌ xan, chʌcaꞌan jeꞌ u yamtic techex. Raꞌ mʌꞌ yeroꞌ u winiquirob judío a uchoꞌ. 
\v 5 A chꞌic uchoꞌ, mʌꞌ u chaꞌb Cꞌuj yerticob aroꞌ, chen bajeꞌrer, tu chaꞌ in werob, a tenob, a mac tetaꞌb ten Cristo quir in binob in tsecꞌticob u tꞌʌn yejer a mac a tu tsecꞌtajob u tꞌʌn Cꞌuj a uchoꞌ. Mʌꞌ ja wirej, quireꞌ u Tajꞌor u Pixam Cꞌuj tu chaꞌ in werob aroꞌ.
\v 6 Chaꞌb in werob wa quet quic bin ij cꞌʌmiquex tiꞌ Cꞌuj a baꞌ cu bin u yamtic tu cotoroꞌonex, cax wa ju winiquirob judío cax wa mʌꞌ u winiquirob judío. Mʌꞌ ja wirej, Cꞌuj tu pꞌeriꞌquintoꞌonex quireꞌ Jesucristo. Caj toc araꞌb ten Cꞌuj, quet quic bin ij cuxtarex munt qꞌuin, quireꞌ tij cacsaj tij corex tiꞌ u jach tsoyir u tꞌʌn Cꞌuj. 
\v 7 A Cꞌujoꞌ caj u tsꞌajaj ten in beyaj quireꞌ u jach tsoyir u pixam. Bayiriꞌ xan, quireꞌ u jach tsoyir u pixam Cꞌuj caj u chichquint in wor soc cꞌuchaꞌan in wor in beyaj tiꞌ Cꞌuj.
\v 8 A tenoꞌ, quij, mʌꞌ jach nojeniꞌ, chen u jer in wet acsʌꞌorirob a mac Cꞌuj yʌninob, robob jach manan nojob. Cax wa mʌꞌ jach nojen a Cꞌujoꞌ caj u tsꞌaja in beyaj quireꞌ u jach tsoyir u pixam Cꞌuj, mʌꞌ ja wirej, tu chaꞌ in tsecꞌtic u tꞌʌn ich a mac a mʌꞌ u winiquirob judío. Tin tsecꞌtaj tiꞌob u jach manan u tsoyir u pixam Cꞌuj quireꞌ Cristo, soc mʌꞌ biqꞌuin mʌꞌ u tsꞌocor yerob biquiraꞌ u tsoyir u pixam Cꞌuj.
\v 9 A tenoꞌ caj in tsecꞌtaj tiꞌ tu cotor mac, tan in waꞌaric tiꞌob, quet a Cꞌujoꞌ cu taquicoꞌonex, cax a techexoꞌ a mʌꞌ u winiquirechex judío, cax u winiquirob judío, quet cu tocar tu cotor mac. Mʌꞌ ja wirej, baxuc Cꞌuj caj u tucraj u betej tu chꞌic chunin tu cotor baꞌ, chen a mac cuxaꞌan a uchoꞌ mʌꞌ yerobiꞌ.
\v 10 Caj yirob yʌjmasirob u tꞌʌn Cꞌuj bic tabar tij cacsex tij corex tiꞌ Jesús bajeꞌrer, caj u yirob u jach tsꞌurir yʌjmasirob u tꞌʌn Cꞌuj ich caꞌanan, caj u yirajob a Cꞌujoꞌ yer tu cotor baꞌ. U jach tsꞌurir yʌjmasirob u tꞌʌn Cꞌuj tu yirob xan bic tabar Cꞌuj cu tucric u jer yaꞌab baꞌ.
\v 11 Mʌꞌ ja wirej, a Cꞌujoꞌ baxucoꞌ rajraꞌ tu tucraj ich u pixam wa jeꞌ u pꞌeriꞌquintajoꞌonex quireꞌ a baꞌ cu bin u betic Jesucristo ic Jaj Tsꞌurirex.
\v 12 Mʌꞌ ja wirej, quij, quireꞌ a baꞌ caj u betaj Jesucristo yʌn toꞌonex u chichquintic ij corex quir ic binex ʌcʌtan tiꞌ Cꞌuj. Mʌnaꞌ baꞌ quic tucriquex, wa ber quic tsicbarex tiꞌ Cꞌuj, mʌꞌ ic chꞌaꞌex sajaquirex, quireꞌ tij cacsex tij corex tiꞌ u parar.
\v 13 Rajen, mʌꞌ a wacꞌtiquex a bʌjex, cax tan in mucꞌyaj quireꞌ tin tsecꞌtaj u tꞌʌn Cꞌuj tiꞌ techex. Tiꞌ yʌnen tu cu maꞌcʌr winic soc u jocꞌar tu tsoyir techex.
\s Jach manan u yajquinticoꞌonex Cristo
\p
\v 14 Rajen quin xontar ʌcʌtan tiꞌ ic Tet Cꞌujex. Quireꞌ quin tꞌʌnic Cꞌuj tiꞌ techex.
\v 15 Mʌꞌ ja wirej, rajiꞌ ic Tetex, Cꞌuj, rajiꞌ ic Tetex yejer yʌjmasirob u tꞌʌn Cꞌuj ich caꞌanan, cax toꞌonex ich yocꞌocab rajiꞌ ic Tetex Cꞌuj.
\v 16 Rajen quin cꞌatic tiꞌ Cꞌuj, soc u chichquintic a worex u Tajꞌor u Pixam Cꞌuj. Jeꞌ u tsꞌic techex quireꞌ jach manan tsoyir u pixam a Cꞌujoꞌ.
\v 17 A tenoꞌ, quij, quin cꞌatic tiꞌ Cꞌuj toc jumpꞌeriꞌ caꞌ u tsꞌurintej a pixamex Cristo quireꞌ ta wacsaj ta worex tiꞌ Cristo. Quireꞌ u yajechex rajen caꞌ a yajquintex Cꞌuj. A baywoꞌ, cu bin u chichquintej a worex soc mʌꞌ u pec a worex.
\v 18-19 A baywoꞌ toc quet yejer ij quet acsʌꞌorirex jeꞌ ij quiꞌ cʌniquex ich ic pixamex wa jach manan Cristo cu yajquinticoꞌonex. Mʌꞌ bic tabar quic chꞌic u pꞌis ij querex bic tabar u yajoꞌonex, a mac yʌnin Cꞌuj. A tenoꞌ in jach cꞌat a werex wa Cristo u jach yajechex, mʌꞌ cꞌuchaꞌan ij corex ic najtiquex mun u jach yajoꞌonex Cristo. Wa baxuc ca wacsiquex ta worex, a Cꞌujoꞌ jeꞌ u yocar ta pixamex soc jariꞌ ca bin a betex a baꞌ u cꞌat Cꞌuj caꞌ a betex.
\p
\v 20 A Cꞌujoꞌ rajraꞌ cu beyaj tic pixamex. Mʌꞌ ja wirej, a Cꞌujoꞌ cꞌuchaꞌan yor jach manan u beyaj tiꞌ a baꞌ quic tucriquex. Cax wa mun quic tucriquex caꞌ ij cꞌatex tiꞌ Cꞌuj jach manan cꞌuchaꞌan yor u tsꞌic toꞌonex Cꞌuj. 
\v 21 Caꞌ ic sʌjtex Cꞌuj, rajraꞌ caꞌ ic sʌjtex Cꞌuj, cax munt qꞌuin caꞌ ic sʌjtex Cꞌuj tu cotoroꞌonex a mac a cu bin tacbir ten Jesucristo caꞌ ic sʌjtex Cꞌuj.
\c 4
\s Quireꞌ u Tajꞌor u Pixam Cꞌuj tu pꞌeriꞌoꞌonex
\p
\v 1 A tenoꞌ, Pablojen, a mac tiꞌ yʌnen tu cu maꞌcʌr winicob quireꞌ raꞌ u beyaj Cꞌuj. Bajeꞌrer tan in chich aric techex quireꞌ Cꞌuj caj u pʌyajechex soc raꞌ yʌnin techex Cꞌuj. Rajen yʌn a manex tu tsoyir quireꞌ rajiꞌ yʌninex Cꞌuj. 
\v 2 Mʌꞌ a yʌn tucriquex wa chen jach nojechex, mʌꞌ a tucriquex wa jach caremechex. A baywoꞌ pacran jawsex a baꞌ cꞌasir caj betaj u jer a tiꞌ yʌn tuꞌ yʌnechex. Jeroj tuneꞌ, tu cotor mac jeꞌ u yiricob wa ca pacran yajquintiquex a bʌjex.
\v 3 Mʌꞌ ja wirej, caj u toc pꞌeriꞌquintajechex u Tajꞌor u Pixam Cꞌuj, rajen mʌꞌ a pacran jʌsiquex a bʌj tiꞌ a wet acsʌꞌorirex. Caꞌ a cʌnex mun jach noꞌj aroꞌ soc mʌꞌ a jʌsiquex a bʌj.
\v 4 Raꞌ u qꞌuinin caj u pꞌeriꞌquintaj toꞌonex u Tajꞌor Pixam Cꞌuj a mac a tu yacsob tu yorob tiꞌ Jesús, bayiriꞌ chen tuririꞌ yʌn u Tajꞌor Pixam Cꞌuj a tij cꞌʌmajex. Bayiriꞌ xan, tuririꞌ ij cuxtarex caꞌ bin ij cꞌʌmiquex wa ber caꞌ bin cꞌuchucoꞌonex caꞌanan, quireꞌ quetoꞌonex caj u pʌyajoꞌonex Cꞌuj.
\v 5 Tuririꞌ ic Jaj Tsꞌurirex, bayiriꞌ xan tuririꞌ tꞌʌn, quij, caj tij cacsex tij corex tiꞌ tuririꞌ xan. Bayiriꞌ xan, chen tuririꞌ tu cu yacsic jaꞌ tu joꞌr mac tuririꞌ xan.
\v 6 Tuririꞌ xan, ic Tetex Cꞌuj, rajiꞌ pꞌeriꞌ ic Tetex tij cotorex. Jariꞌ rajiꞌ cu yaꞌaric toꞌonex. Rajiꞌ quic tsꞌurintex soc ic yamtiquex tiꞌ. Rajiꞌ tiꞌ yʌn tic pixamex.
\p
\v 7 Quireꞌ u jach tsoyir u pixam Cꞌuj rajen caj u tsꞌaja tiꞌ jujunturoꞌonex soc caꞌ ij cʌniquex ic neꞌer baꞌ. Mʌꞌ ja wirej, a Cꞌujoꞌ caj tsꞌaꞌb tiꞌ u neꞌer baꞌ Cristo, rajen a Cristojoꞌ quireꞌ u jach tsoyir u pixam xan caj u tsꞌaja tiꞌ toꞌonex ic neꞌerex baꞌ.
\v 8 Mʌꞌ ja wirej, cu yaꞌaric ich u tꞌʌn Cꞌuj a uchben tꞌʌnoꞌ, Cristo cu tsicbariꞌ:
\q Jeꞌ u rʌc chꞌesic u beyajob a mac a cu pꞌacticob tiꞌ, pachir jeꞌ u wʌcꞌʌs bin ich caꞌanan. Wa ber caꞌ bin wʌcꞌʌs xic ich caꞌanan jeꞌ u tuchiꞌtaꞌ tiꞌ toꞌonex ich yocꞌocab a baꞌ cu bin u yamte toꞌonex.
\m Baxuc cu yaꞌaric ich u tꞌʌn Cꞌuj, a uchben tꞌʌnoꞌ.
\p
\v 9 Mʌꞌ ja wirej, cu yaꞌaric: “Jeꞌ u wʌcꞌʌs bin ich caꞌanan” quireꞌ tarij uch ich caꞌanan, caj cꞌuchij ich yocꞌocab. Mʌꞌ chen cꞌuchij ich yocꞌocab, tiꞌ binij tu quimen mac. 
\v 10 Rajiꞌ Cristo caj cꞌuchij ich yocꞌocab. Bayiriꞌ xan, rajiꞌ wʌcꞌʌs binij ich caꞌanan. Raꞌiriꞌ xan, tiꞌ yʌn ich caꞌanan soc rajiꞌ quic bin ic tsꞌurintex tu cotor baꞌ, quij, cax caꞌanan, cax ich yocꞌocab, cax a tu cu bin mac a quimen.
\v 11 Rajiꞌ caj u tsꞌajaj a tenob in neꞌerob baꞌ, quij. Yʌn mac tub yʌnoꞌonex a tsꞌaꞌb tiꞌ u neꞌer baꞌ ten Cristo tiꞌob soc robob yʌjtseqꞌuirob u tꞌʌn Cristo. Yʌn mac ich a yacsmʌnob tu yorob a tsꞌaꞌb u neꞌer baꞌ soc u tsicbar an ten bic Cꞌuj cu yaꞌaric. Yʌn mac ich a yacsmʌnob tu yorob, a tsꞌaꞌb tiꞌ ten Cꞌuj u neꞌer baꞌ soc ic tsꞌurintiquex u quet acsʌꞌorirex. Yʌn mac ich a yacsmʌnob tu yorob, a tsꞌaꞌb tiꞌ ten Cꞌuj u neꞌer baꞌ soc u camsicob u yet acsʌꞌorirob u tꞌʌn Cꞌuj.
\v 12 Baxuc jeraꞌ caj u betaj Cꞌuj tiꞌ a mac a tetaꞌb ten Cꞌuj, soc caꞌ bin cꞌuchuc tu qꞌuinin a mac tetaꞌan ten Cꞌuj cu bin cꞌʌmbir soc quir u yamtic u beyajob Cꞌuj. A baxucoꞌ cu bin chichquinbir yorob tiꞌ u tꞌʌn Cꞌuj. 
\v 13 A baywoꞌ, chan chan ber jeꞌ u chꞌijir hasta caꞌ bin cꞌuchuc tu qꞌuinin toc quet tan ij cacsic tij corex, soc quet ij querex u parar Cꞌuj Cristo. A baywoꞌ toꞌonex yʌn u chichir ic mucꞌex tic pixamex, a baywoꞌ jeꞌ ij cꞌuchurex pꞌeriꞌoꞌonex yejer Cristo.
\v 14 Mʌꞌ ic yʌn cʌniquex a chichanoꞌ quireꞌ seb cu quibicob a baꞌ cu tar tiꞌ. Wa quij cʌniquex a chichanoꞌ yʌn u qꞌuinin caꞌ bin ij cuꞌyiquex tic pixamex quiꞌ ij corex quireꞌ tan ij cʌniquex Cꞌuj. Chen sansam tan ic pꞌuspachtiquex Cꞌuj. Rajen mʌꞌ tsoy ij cʌniquex a chichanoꞌ. A baꞌ cu tar cu quibicob a chichanoꞌ rajen irob a baꞌ cu cuchur ten icꞌ. Rajen caꞌ bin tac a mac a cu tus aricob u neꞌer baꞌ tiꞌ u tꞌʌn Cꞌuj. Jeroj seb cu quibicob a mʌꞌ quet yejer u tꞌʌn Cꞌuj.
\v 15 Caꞌ ij quibiquex u tꞌʌn Cꞌuj a baꞌ jach taj. Caꞌ ic yajquintiquex mac tu cotor. Caꞌ ij cʌniquex u pixam Cristo quireꞌ rajiꞌ ic joꞌrex.
\v 16 Mʌꞌ ja wirej, rajiꞌ quic tsꞌurintiquex Cristo. Rajen toc quet tsoyir ic beyajex. A baywoꞌ quic pacran yamtiquex ic bʌjex soc caꞌ bin tsꞌocac u beyaj Cꞌuj. A baywoꞌ xan, cu chichquintic ij corex quireꞌ quic pacran yajquintiquex ic bʌjex.
\s Tiꞌ u tar ij cuxtarex ich caꞌanan, a ricꞌben cuxtaroꞌ 
\p
\v 17 Quireꞌ tu tsꞌajaj ten in mucꞌ ic Jaj Tsꞌurirex, rajen quin waꞌaric techex a jeꞌraꞌ. Quin chich aric techex a jeꞌraꞌ mʌꞌ a cʌniquex a mac cuxaꞌan ich yocꞌocab quireꞌ a mʌꞌ yerob Cꞌuj, quireꞌ cꞌas cu tucricob. Caꞌ a pꞌʌtex aroꞌ.
\v 18 Mʌꞌ ja wirej, u pixamob tiꞌ yʌn ich yacꞌbirir, quireꞌ mʌꞌ tu cꞌʌmob u cuxtarob a ricꞌbenoꞌ. Mʌꞌ tu cꞌʌmob quireꞌ jach cꞌas u pixamob. Mʌꞌ ja wirej, mʌꞌ u cꞌatob u yacsicob tu yorob.
\v 19 Toc jumpuriꞌ caj u cʌnob a cꞌasoꞌ, rajen cu chen tucricob bic tabar cu pʌyicob mac soc u manob. U bʌjiriꞌob mʌꞌ u pꞌʌticob, mix chichin, quireꞌ jach manan quiꞌ yorob a mac a cu manob ich u cꞌasir.
\v 20 Mʌꞌ ta cʌniquex Cristo quir a manex an ten bicob a tiꞌoboꞌ a cu manob tu cꞌasir.
\v 21 Caj a wuꞌyex tiꞌ Cristo caj u camsechex tiꞌ Cristo caj a cʌnajex u tꞌʌn a jach tajoꞌ, rajen caj a sayex tu pach Jesús.
\v 22 Rajen tsireꞌej a manex an ten bic caj manechex uch an bic tabar a betex uch. Mʌꞌ ja wirej, ojij satoꞌonex uch quireꞌ quic tucriquex ic betiquex cꞌas a quic pachtiquex ic betiquex.
\v 23 Caꞌ a quiꞌ tucrex tiꞌ a ricꞌben cuxtarex, a yʌn techex bajeꞌrer.
\v 24 Caꞌ a pachtex a ricꞌben cuxtarex soc quir u tajquintic a pixamex. Mʌꞌ ja wirej, ij cꞌatex ic pixamex jach tsoy an ten bic u pixam Cꞌuj.
\p
\v 25 Rajen tsireꞌej tu cotor tus. Caꞌ a pacran ariquex a tajoꞌ. Mʌꞌ ja wirej, toc quetoꞌonex tu quic binex ich Cꞌuj.
\v 26 Wa ix tiꞌ ca tsꞌictarex, quiꞌ irej soc mʌꞌ a pʌyiquex a siꞌpirex. Seb caꞌ sisquintic a worex. Mʌꞌ a tsꞌictarex u bur u qꞌuinin.
\v 27 Mʌꞌ ja wirej, wa ja tsꞌictarex jach seb a quisinoꞌ cu bin u tsꞌʌric a pachex soc a pʌyiquex a siꞌpirex. Rajen quiꞌ cʌnantex a bʌjex tiꞌ a quisinoꞌ.
\p
\v 28 A techoꞌ a mac tu yaꞌcraj baꞌ a uchoꞌ, bajeꞌrer mʌꞌ u yʌn aꞌcric baꞌ. A raꞌ winicoꞌ caꞌ u jaric u taqꞌuin. Rajiꞌ xan caꞌ betej a baꞌ jach tsoy soc u yamtic a mac jach otsichʌjij.
\p
\v 29 Mʌꞌ a yʌn cʌrʌxtꞌʌnex. Ca chen tsicbatiquex a tsoyoꞌ, quir a yamtiquex a mac a cu yubicob a tsicbʌtiquex. A baywoꞌ a cu yubicob a tꞌʌnobex cu bin yamtaꞌbir soc u manob tu berir a tsoyoꞌ.
\v 30 Mʌꞌ a tupsiquex yor u Tajꞌor u Pixam Cꞌuj a baꞌ ta betajex. Mʌꞌ ja wirej, u Tajꞌor u Pixam Cꞌuj irej a baꞌ a cu tsꞌibticob tu pach wacax soc yer raꞌ yʌnin a wacaxoꞌ. Raꞌ irej toꞌonex xan, tu tsꞌaj toꞌonex u Tajꞌor u Pixam Cꞌuj soc ij querex rajiꞌ yʌninoꞌonex Cꞌuj caꞌ bin cꞌuchuc tu qꞌuinin cu bin u taquicoꞌonex.
\p
\v 31 Pꞌʌtex u chʌctar a wichex, bayiriꞌ tsireꞌej u jocꞌar a worex tu ca tsꞌictarex. Mʌꞌ a yʌn jocꞌsiquex u yor mac, mʌꞌ a manex ich a cꞌasiroꞌ.
\v 32 Toc pacran yajquint a bʌjex. Chaꞌ u yiricob mac u jach tsoyir a pixamex. Toc pacran jawsex a siꞌpirex an ten bic Cꞌuj quireꞌ Cristo caj u jawsaj a siꞌpirex. 
\c 5
\s Chaꞌ yiricob a techexoꞌ u pararechex Cꞌuj
\p
\v 1 Quireꞌ u pararechex Cꞌuj a mac Cꞌuj, cu yajquintic, rajen caꞌ a pꞌisex a bʌj a cʌniquex Cꞌuj.
\v 2 Caꞌ a yajquintex tu cotor mac an ten bic Cristo cu yajquintechex, quireꞌ raji mʌꞌ tu yacꞌtaj u bʌj. U jach yajoꞌonex rajen tu cꞌubaj u bʌj soc u quinsaꞌ tiꞌ toꞌonex. Baxuc caj u betaj soc u quiꞌquintaj yor Cꞌuj quireꞌ u yajoꞌonex Cristo.
\p
\v 3 Yʌn mac a cu man. Yʌn mac a cu betic cꞌas. Yʌn mac a cu pachtic a baꞌ yʌn u jer mac, cax aroꞌ cu tsicbarob tiꞌ a mac a mʌꞌ yerob Cꞌuj, mʌꞌ a chaꞌiquex u tsicbarob ich techexoꞌ a mac yerob Cꞌuj quireꞌ Cꞌuj yʌnin techex. 
\v 4 Quireꞌ a techexoꞌ Cꞌuj yʌninechex, mʌꞌ quet yejer yor Cꞌuj wa ca cʌrʌx tꞌʌntiquex mac, cax mʌꞌ a soꞌsoc tꞌʌntiquex mac, cax mʌꞌ a tsicbarex tiꞌ xib wa xquic tiꞌ a cꞌasoꞌ. Caꞌ tsicbanʌquex a baꞌ quet yejer yor Cꞌuj. Caꞌ a waꞌarex tiꞌ Cꞌuj. “Bayoꞌ Cꞌuj.”
\v 5 Mʌꞌ a yʌn cʌniquex a jeꞌraꞌ. A mac a rajraꞌ cu manob, bayiriꞌ a mac a rajraꞌ cu man tu cꞌasir. Bayiriꞌ a mac a rajraꞌ cu pachtic a baꞌ yʌnin u racꞌob. Mʌꞌ ja wirej, a mac a cu pachtic a baꞌ yʌnin u taqꞌuin u jer mac raꞌ irej wa tus cꞌuj ten u cꞌujintic u taqꞌuin. Robob, mʌꞌ u bin acsaꞌbir tu cu bin u reyintej Cristo. Mʌꞌ ju bin acsaꞌbir tu yʌn Cꞌuj xan.
\v 6 Mʌꞌ a chaꞌiquex u tus aricob techex a mac a mʌꞌ tu yacsob tu yorob a tin waꞌaraj techex bajeꞌrer. Mʌꞌ ja wirej, robob tiꞌ toy cu manob tu cu cʌrʌxbeticob a baꞌ araꞌb ten Cꞌuj tiꞌob. Jeꞌ u cꞌuchur tu qꞌuinin caꞌ bin yubob u tsꞌiquir Cꞌuj.
\v 7 Rajen, mʌꞌ a wet manex yejer a mac a tan u pʌyicob u siꞌpirob.
\p
\v 8 A uchoꞌ a techexoꞌ tan a manex ich yacꞌbirir quireꞌ tiꞌ toy ca manex ich a siꞌpirex. Chen bajeꞌrer, tan a manex ich u sasirir quireꞌ tsoyquintaꞌb a pixamex ten Cristo. Rajen chaꞌex u yiricob techex mac bic caj tsoyjij a pixamex quireꞌ Cristo tu tsoyquintaj.
\v 9 Quireꞌ tsoyjij ic pixamex, jeꞌ u jocꞌar tiꞌ ic pixamex jach tsoy, bayiriꞌ xan, jeꞌ u jocꞌar tiꞌ ic pixam a jach taj, bayiriꞌ xan jeꞌ u jocꞌar tiꞌ ic pixamex tu tajirir.
\v 10 Caꞌ a cʌnex a baꞌ cu quiꞌquintic yor ic Jaj Tsꞌurirex. 
\v 11 Mʌꞌ a wet manex yejer a mac a cu manob tu cꞌasir quireꞌ robob cu manob ich yacꞌbirir. Mʌꞌ ja wirej, jach tsoy wa ca waꞌariquex tiꞌ u tꞌʌn Cꞌuj soc mʌꞌ u manob ich yacꞌbirir xan.
\v 12 Quireꞌ u cꞌasirir tu cu manob, jach manan cꞌas, rajen quic chꞌic suraquirex ij carex tiꞌ quireꞌ jach cꞌas. 
\v 13 Quireꞌ wa jij cariquex tiꞌob u tꞌʌn Cꞌuj, a baywoꞌ jeꞌ yiricob wa cu beticob jach cꞌas. Jeroj, wa cu yacsicob tu yorob wa tu pʌyob u siꞌpirob, yʌn ix tiꞌ mac jeꞌ u cꞌaxicob tu yorob tan u pꞌʌticob u man ich u cꞌasir, rajen jeꞌ u tsoytar u pixamob.
\v 14 Rajen, a baywoꞌ cu bin jocꞌar an ten cu yaꞌar:
\q A mac wenʌn u caꞌ ajenex a techexoꞌ. Cojenex caꞌ wʌcꞌʌs cuxraquex tu mucaꞌanechex. A Cristojoꞌ, jeꞌ u tsoyquintic a pixamex soc a manex tu tsoyir.
\m Baxuc cu yaꞌaric.
\p
\v 15 Quiꞌ cʌnantex a bʌj an bic tabar a manex tub yʌnechex. Caꞌ manaquex irechex a mac a u neꞌer baꞌ. Mʌꞌ a manex irechex a mac jach chich u joꞌrob.
\v 16 U manej qꞌuin caꞌ a betex a baꞌ jach tsoyoꞌ quireꞌ jach cꞌas a baꞌ u ber bajeꞌrer.
\v 17 Rajen mʌꞌ a yʌn betex a mʌꞌ tsoy. Caꞌ a cꞌatex tiꞌ Cꞌuj soc a werex baꞌ ca bin a betex.
\v 18 Soc mʌꞌ a chen carchʌjʌrechex quireꞌ raꞌ cu pʌyiquechex quir a satarex. Caꞌ a chaꞌex a tsꞌurintiquex u Tajꞌor Pixam Cꞌuj.
\v 19 A werex a baꞌ jach manan tsoy, wa ca pacran tsicbarex tiꞌ u tꞌʌn Cꞌuj, quet yejer u cꞌay Cꞌuj. Cꞌʌyex Cꞌuj ta pixamex. Suꞌsuꞌ a tꞌʌniquex Cꞌuj.
\v 20 Cax a baꞌ tu tsꞌa techex Cꞌuj, cax a baꞌ tu yamtechex Cꞌuj, cax wa yajechex, caꞌ a waꞌarex tiꞌ Cꞌuj: “Bayoꞌ ic Tetex Cꞌuj quireꞌ a baꞌ tu betaj ic Jaj Tsꞌurirex Jesucristo toꞌonex.”
\s Caꞌ a pacran quibechex wa cu yaꞌaric tech a wet acsʌꞌorirex 
\p
\v 21 Caꞌ a sʌr a xiquinex tiꞌ u tꞌʌn a wet acsʌꞌorirex, quireꞌ a baywoꞌ ca sʌjtex Cristo.
\v 22 A xquicoꞌ, caꞌ quib u tꞌʌn u mam, a baywoꞌ tan u quibicob u tꞌʌn u Jaj Tsꞌurirob Jesucristo.
\v 23 Quireꞌ a xiboꞌ, raꞌ tu jach tsꞌurintaꞌr ten u racꞌ. Raꞌiriꞌ irej an ten bic Cristo, rajiꞌ ic Jach Tsꞌurirex a toꞌonexoꞌ, a mac a tu yacsob tu yorob tiꞌ Cristo. Mʌꞌ ja wirej, a xquicoꞌ jeꞌ u tsꞌurintic u mameꞌ quireꞌ bin u caꞌ yamtaꞌbir ten u mam, irej an ten bic Cristo caj ic tsꞌurintex caj u cꞌub u bʌj toꞌonex soc u quinsaꞌ. 
\v 24 Rajen an ten bic caꞌ ij quibex u tꞌʌn Cristo, a toꞌonexoꞌ, a tij cacsex tij corex tiꞌ Cristo quij quibiquex u tꞌʌn Cristo. Baxuc a xquic xanoꞌ caꞌ u quibej u tꞌʌn u mam. 
\p
\v 25 A techexoꞌ, a xiboꞌ, caꞌ u yajquint a racꞌ an ten bic Cristo Jesús caj u yajquintoꞌonex, quireꞌ rajiꞌ tu cꞌub u bʌj soc u quinsaꞌ toꞌonex, a mac a yacsmʌnob tu yor tiꞌob.
\v 26 Rajiꞌ tu pꞌoꞌ ic pixamex yejer u tꞌʌn. Mʌꞌ ja wirej, tu acsaꞌb jaꞌ tic joꞌrex, raꞌ quir u camsicoꞌonex pꞌoꞌaꞌan ic pixamex yejer u tꞌʌn a baywoꞌ caj u tsoyquint ic pixamex.
\v 27 A baywoꞌ caj u betaj wa ber caj u pʌyoꞌonex. Mʌꞌ ja wirej, a mac a yacsmʌnob tu yorob mʌnaꞌ ic siꞌpirex chichin, a toꞌonexoꞌ, chen mʌnaꞌ cꞌasiroꞌonex, mʌnaꞌ u jer chichin baꞌ toꞌonex. A baywoꞌ irir ten mac u jach tsoyir ic pixamex a mac a yacsmʌnob tiꞌ Cristo.
\v 28 Quin waꞌaric tiꞌ a xib xanoꞌ, caꞌ u yajquint u racꞌ an ten bic u wʌcꞌʌs bʌjiriꞌ cu yajquintic u winquirir. A mac a cu yajquintic u racꞌ, u wʌcꞌʌs bʌjiriꞌ cu yajquintic xan, quireꞌ pꞌeririꞌ yʌn u winquirir yejer u raqꞌueꞌ. 
\v 29 Mʌꞌ ja wirej, mʌnaꞌ mac cu pꞌactic u wʌcꞌʌs bʌjiriꞌ u winquirireꞌ, cu jansic u winquirir, cu cʌnantic xan. An ten bic Cristo cu jansicoꞌonex, bayiriꞌ cu cʌnantic toꞌonex xan a mac a yacsmʌnob tiꞌ Cristojoꞌ tu yorob. 
\v 30 A toꞌonexoꞌ iroꞌonex waysaꞌboꞌonex u winquirir Cristo. Mʌꞌ ja wirej, iroꞌonex waysaꞌboꞌonex u bʌqꞌuer yejer u baquer Cristo quireꞌ cu cʌnantic toꞌonex.
\v 31 “Rajen a xiboꞌ cu pꞌʌtic u tet yejer u nʌꞌ soc u chꞌic u racꞌ. A raꞌiriꞌ u qꞌuininoꞌ, rajiꞌ pꞌeriꞌ yejer u raqꞌueꞌ.”
\v 32 Jach noꞌj aroꞌ cax mʌꞌ ic najtiquexiꞌ. Mʌꞌ ja wirej, raꞌ irej an ten bic tabar toꞌonex caj ic pꞌeriꞌquint ic bʌjex yejer Cristo, a mac a yacsmʌnob tu yorob tiꞌ Cristo.
\v 33 Bayiriꞌ xan, raꞌ irej an ten bic tabar jujunturechex caꞌ a yajquintex a raqꞌuex an ten bic a wʌcꞌʌs bʌjiriꞌex ca yajquintex. Bayiriꞌ xan, raꞌ irej an ten bic tabar a racꞌ bin u caꞌ sʌjt u mam.
\c 6
\s A chichanoꞌ yejer u tet yejer u nʌꞌ
\p
\v 1 A chichanoꞌ, cax xib, cax xquic, caꞌ u quib u tꞌʌn u tet yejer u nʌꞌ. A baywoꞌ, ca betiquex a tsoyoꞌ, quireꞌ ta wacsex ta worex tiꞌ Cristo.
\v 2-3 “Sʌtex a tetex yejer a nʌꞌex, rajen jeꞌ u jocꞌar tsoyirechex. A baywoꞌ, jach amaꞌan caꞌ bin quimiquex.” Baxuc cu yaꞌaric ich u tꞌʌn Cꞌuj uch. Rajiꞌ pʌyber tu yʌn araj Cꞌuj tu cu bin yamticoꞌonexeꞌ wa quij quibiquex aroꞌ.
\p
\v 4 A techexoꞌ, a mac a yʌn a pararexoꞌ. Mʌꞌ a tiquin qꞌueyiquex a pararex soc mʌꞌ u jocꞌar yorob a pararex. Quireꞌ acaꞌan ta pixamex ic Jaj Tsꞌurirex soc jach tsoy ca bin a tꞌʌniquex a tiꞌoboꞌ. Tsoy a qꞌueyiquex a tiꞌoboꞌ an ten bic u cꞌat ic Jaj Tsꞌurirex. Quireꞌ wa tsoy ca tꞌʌniquex a pararex jeꞌ u quibicob a tꞌʌnexeꞌ.
\p
\v 5 A techexoꞌ, u cꞌurewechex mac quireꞌ tu mʌnechex. Caꞌ a quib u tꞌʌn a tsꞌurirex. Caꞌ a chꞌaꞌex sajaquirex a tiꞌoboꞌ. Caꞌ a sʌjtex a tiꞌoboꞌ. Caꞌ quiꞌ beyanʌquex tiꞌob an ten bic caj quiꞌ beyanʌjechex tiꞌ Cristo.
\v 6 Mʌꞌ a chen quiꞌ beyajex tiꞌ a tsꞌurirex wa ber cu yiricob techex tu ca beyajex soc yaꞌaricob, jach tsoyechex, quij. Rajraꞌ quiꞌ beyanenex tiꞌob quireꞌ quiꞌ a worex. Quiꞌ beyanenex tiꞌoꞌ quireꞌ baxuc u cꞌat Cꞌuj, quireꞌ u curewechex Cꞌuj xan.
\v 7 Wa ber ca beyajex tiꞌ a jach tsꞌurirex, beyanenex yejer u tsoyir a pixamex. Yʌn cꞌaj techex, ca beyajex tiꞌ ic Jaj Tsꞌurirex Jesucristo, mʌꞌ a chen beyajex tiꞌ a jach tsꞌurirex ich yocꞌocab.
\v 8 Yʌn cꞌaj techex xan, ic Jaj Tsꞌurirex jeꞌ u boꞌotic u boꞌorir a cꞌʌbex tu quic beyajex. Quireꞌ a baꞌ beyaj tic betex wa jach tsoy, cax beyanʌjoꞌonex tiꞌ ic Jaj Tsꞌurirex cax u bʌjiriꞌ u tsꞌurir u bʌj cu beyaj.
\p
\v 9 A techexoꞌ, a mac a yʌn u cꞌurewoꞌ. Caꞌ a betiquex a baꞌ jach tsoy tiꞌ a cꞌurewex. Mʌꞌ a yʌn tiquin qꞌueyiquex a cꞌurewex quireꞌ a werex tiꞌ yʌn mac ich caꞌanan a yʌninechex, a Jaj Tsꞌurirex. Mʌꞌ ja wirej, rajiꞌ cu yajquintic tu cotor mac, mʌꞌ ju chen yajquinta jun yarob macoꞌ. 
\s A baꞌ cu tsꞌic toꞌonex raꞌ quir ic chiꞌex a quisinoꞌ 
\p
\v 10 Jariꞌ a jeꞌraꞌ bin in tsꞌibtej techex. Mʌꞌ ja wirej, in wet acsʌꞌorirechex quireꞌ mʌnaꞌ u chichir a muqꞌuex ta pixamex ta junanex, rajen caꞌ a cꞌʌmex u chichir u mucꞌ u pixam ic Jaj Tsꞌurirex, quireꞌ pꞌeriꞌechex yejer ic Jaj Tsꞌurirex.
\v 11 Toc chꞌajex a wʌcꞌʌs a bʌjiriꞌexeꞌ a baꞌ tu tsꞌa techex Cꞌuj quir a cʌnantic a pachex, bayiriꞌ xan quir u yamtic techex tiꞌ a baꞌ cu tar ʌcʌtan techex. A baywoꞌ cꞌuchaꞌan a worex tiꞌ a quisinoꞌ. Caꞌ a betex aroꞌ irej a soldadojoꞌ a cu buquintic u noqꞌuir mascab quir u cʌnantic u bʌj quir u yocar baꞌ teꞌ.
\v 12 Quireꞌ mʌꞌ jic tsꞌictarex yejer a mac a quet u winquirir yejeroꞌonex, mʌꞌ quet ij qꞌuiqꞌuer yejeroꞌonexiꞌ. Tan ic tsꞌictarex yejer a mac a mʌꞌ chʌcaꞌan ij quiriquex, a mac mʌnaꞌ u winquiriroꞌ. Rajiꞌ, a quisinoꞌ, a mac u jach tsꞌurir quisinoꞌ, yejer robob u tsꞌurirob u siꞌpirob, a teꞌ yʌn ich yocꞌocabaꞌ. Robob yʌn yaꞌab mac a cu quibicob u tꞌʌnoꞌ wa ber cu yacob a tiꞌoboꞌ. 
\v 13 Rajen caꞌ a toc chꞌajex tiꞌ a bʌjirex a tu cotor tu tsꞌajex tech Cꞌuj, a baywoꞌ cꞌuchaꞌan a worex tiꞌ a quisin wa ber caꞌ bin tac u tumt a worex. Wa ca toc chꞌiquex tiꞌ a bʌjirex a baꞌ tu tsꞌa techex Cꞌuj, jeroj a quisinoꞌ mʌꞌ ju cꞌuchur yor techex.
\v 14 Wa ber caꞌ bin xic tu baꞌteꞌ soldado, toc tsꞌaꞌb tiꞌob baꞌ quir u binob. Yʌn cꞌax u nʌcꞌ quir u cꞌʌxic u nʌcꞌ. Yʌn u boxer u cꞌʌb quir u cʌnantic u bʌj. Yʌn u noqꞌuir mascab quir u buquintic. Baxuc techex xan, caꞌ a betex soc a cʌnantex a bʌj yejer u tꞌʌn Cꞌuj, a baꞌ tajiꞌ, bayiriꞌ xan, caꞌ manaquechex tu tsoyir. 
\v 15 Wa ber caꞌ bin xic a soldadojoꞌ ich baꞌteꞌ, toc tsꞌab tiꞌ pechꞌ xʌnab quir u binob. Baxuc techex xan, toc tsꞌajan a worex a binex a tsecꞌtex u jach tsoyir u tꞌʌn Cꞌuj, soc mʌnaꞌ baꞌ cu tucricob mac a cu cꞌʌmicob Cristo.
\v 16 A soldadojoꞌ cu cuchic u boxer u cꞌʌb caꞌ bin xic tu baꞌteꞌ, rajiꞌ cu cuchic soc mʌꞌ u bin jurbir ten mac a cu tar quinsbir a tiꞌoꞌ. Baxuc techex xan, caꞌ a quiꞌ acsex ta worex soc cꞌuchaꞌan a worex tiꞌ a quisinoꞌ. 
\v 17 A soldadojoꞌ caꞌ bin xic ich baꞌteꞌ, cu pꞌoquintic u boxer u joꞌr, a mascaboꞌ, soc u cʌnantaꞌr u joꞌr. Baxuc techex xan, caꞌ a cʌnantex a bʌj, rajraꞌ caꞌ a tucrex bic caj toquechex soc a cuxtarex munt qꞌuin. A soldadojoꞌ caꞌ bin xic tu cu baꞌteꞌ, u mʌchmʌn u mascab soc cꞌuchaꞌan yor tiꞌ a mac a cu tar. Baxuc techex xan, caꞌ a cꞌʌniquex u tꞌʌn Cꞌuj, a tsꞌab ten u Tajꞌor Pixam Cꞌuj soc cꞌuchaꞌan a worex tiꞌ a quisinoꞌ. Mʌꞌ ja wirej, caj a wacsex ta worex bin u caꞌ tacbirechex ten u Tajꞌor u Pixam Cꞌuj, aroꞌ irej a baꞌ cu cʌnantic a joꞌrex. U tꞌʌn Cꞌuj, a cu yaꞌaric techex u Tajꞌor u Pixam Cꞌuj raꞌ ir a mascabex.
\v 18 Rajraꞌ tꞌʌnex Cꞌuj. Cꞌatex tiꞌ Cꞌuj caꞌ u yam techex. Caꞌ a tꞌʌniquex Cꞌuj an ten bic u Tajꞌor u Pixam Cꞌuj cu pʌyic a berex. U yʌn pꞌir a wichex caꞌ a chichquint a worex soc rajraꞌ ca tꞌʌniquex Cꞌuj tiꞌ a mac a quet yejerechex a yacsmʌnob tu yorob tiꞌ Cristo.
\v 19 Caꞌ a tꞌʌnex Cꞌuj ten xan, soc a Cꞌujoꞌ cu tsicbar ten a baꞌ quin waꞌaric tiꞌ mac bic tabar cu bin tacbirob ten Cꞌuj, cax mʌꞌ u winiquirob judío bajeꞌrer.
\v 20 Mʌꞌ ja wirej, teꞌ yʌnenenaꞌ cꞌʌraꞌanen yejer mascab tu cu maꞌcʌr winic quireꞌ quin tsecꞌtic u tꞌʌn Cꞌuj. Caꞌ a tꞌʌnex Cꞌuj ten soc u chichquintic in wor soc mʌꞌ u jacꞌʌr in wor in tsecꞌtej u tꞌʌn Cꞌuj quireꞌ a baywoꞌ caꞌ in tsecꞌtej.
\s Cu tꞌʌnic u yet acsʌꞌorirob
\p
\v 21 Ij quet acsʌꞌorirex Tíquico, tiꞌ cu tar tu yʌnechex. Caꞌ bin cꞌuchuc tu yʌnechex jeꞌ u tsicbʌtic techex a baꞌ in ber ten. Rajiꞌ in jach yaj, rajraꞌ tan u beyaj tiꞌ ic Jaj Tsꞌurirex.
\v 22 A tenoꞌ tan in tuchiꞌtic techex Tíquico soc a wuꞌyiquex a tenob jach quiꞌ in worob, a baywoꞌ bin u caꞌ u chichquint a worex.
\p
\v 23 A tenoꞌ quin tꞌʌnic ic Tetex Cꞌuj techex, bayiriꞌ quin tꞌʌnic ic Jaj Tsꞌurirex techex soc mʌnaꞌ baꞌ ca tucriquex. Bayiriꞌ xan, soc a yajquintex tu cotor mac, bayiriꞌ soc a quiꞌ acsiquex ta worex.
\v 24 Quin tꞌʌnic Cꞌuj soc a werex u jach tsoyir u pixam Cꞌuj, a techexoꞌ yejer tu cotor mac a cu quiꞌ yajquinticob ic Jaj Tsꞌurirex. Jeroj tsꞌoqui, quij Pablo.