\id PHP
\h FILIPENSES
\toc1 FILIPENSES
\mt1 A JEꞌ JUꞌUNAꞌ, RAJIꞌ TIꞌ U YET ACSɅꞌORIROB ICH U CAJAR FILIPOS. RAJIꞌ TU TSꞌIBTA PABLO
\mt2 FILIPENSES
\c 1
\s A Pablojoꞌ caj u yʌnxchun u tsicbar tiꞌ ij quet acsʌꞌorirex 
\p
\v 1 A tenoꞌ Pablojen, quet yejer in wet acsʌꞌorir Timoteo, a tenoboꞌ, u cꞌurewenob Jesucristo. A tenoboꞌ, tan in tꞌʌnicob techex ich a jeꞌ u juꞌuninaꞌ. Tan in tsicbarob techex, a mac a cʌjaꞌanob ich u cajar Filipos quireꞌ quet yejer toꞌonex Jesucristo quireꞌ rajiꞌ yʌninoꞌonex. Tan in tsicbarob techex xan, a mac oc caꞌ tsꞌurintaꞌc ten u yet acsʌꞌorirob bayiriꞌ xan, techex a mac a caꞌ tsꞌurirex a wet acsʌꞌorirex.
\v 2 Quin tꞌʌnicob Cꞌuj, a mac ic Tetex Cꞌuj, quet yejer ij Jaj Tsꞌurirex caꞌ u yam techex an bic tsoy tu tꞌʌnob, a baywoꞌ mʌnaꞌ baꞌ ca bin a tucrex.
\s Baxucoꞌ Pablo caj u tꞌʌnaj Cꞌuj tiꞌ u yet acsʌꞌorirob 
\p
\v 3 Wa ber quin cꞌʌꞌotiquechex quin waꞌaric tiꞌ Cꞌuj: “Bayoꞌ Cꞌuj, quen tiꞌ, quireꞌ in wet acsʌꞌorirob a cu yacsicob tu yorob a tꞌʌn.” A baywoꞌ quin waꞌaric tiꞌ Cꞌuj.
\v 4 Mʌꞌ ja wirej, wa ber quin tꞌʌnic Cꞌuj techex, jach quiꞌ in wor quireꞌ pꞌeriꞌ ij corex quic beyajex tiꞌ Cꞌuj.
\v 5 Raꞌ u qꞌuinin caj a wacsex ta worex tiꞌ Cꞌuj hasta u qꞌuinin bajeꞌrer. Rajen, u jach tsoyir u tꞌʌn Cꞌuj tan u man tu cotor mac.
\v 6 A tenoꞌ, in wer a jeꞌraꞌ, a Cꞌujoꞌ a mac a tu yʌnxchun u beyaj ta pixamex, rajiꞌ Cꞌuj cu bin u beyaj tic pixamex aroꞌ. Rajraꞌ cu betic hasta caꞌ bin cꞌuchuc tu qꞌuinin cu yuꞌur ic Jaj Tsꞌurirex.
\v 7 Jach tsoy wa baxucoꞌ caꞌ in cꞌʌꞌotechex. Mʌꞌ ja wirej, in jach yajechex, quireꞌ quet toꞌonex yejer Cꞌuj caj u yajquinoꞌonex rajen cax cꞌʌraꞌanen a teraꞌ tu cu maꞌcʌr winic, quet toꞌonex cꞌuchaꞌan ij corex ic pacran yamtiquex ic bʌjex xan. Mʌꞌ ja wirej, tan ic pacraj yamtiquex ic bʌjex xan wa cu puriquenob ʌcʌtan ich juez soc a tiꞌ taroꞌ quin toc aric tiꞌob u jach tsoyir u tꞌʌn Cꞌuj.
\v 8 A Cꞌujoꞌ yer wa jin jach yajechex an ten bic Jesucristo u yajoꞌonex.
\v 9 A tenoꞌ tan in tꞌʌnic Cꞌuj techex soc a jach quiꞌ erex Cꞌuj, bayiriꞌ soc Cꞌuj u chaꞌic a werex a baꞌ jach tsoy, soc cꞌuchaꞌan a worex a yajquintiquex mac soc a yajquintiquex mac jach manan.
\v 10 A baywoꞌ cꞌuchaꞌan a worex a tetiquex a baꞌ jach manan tsoyir. Jeroj tuneꞌ, wa ber caꞌ bin tac Cristo quir u pʌyicoꞌonex caꞌanan, a ray u qꞌuinino, jeꞌ u yiric Cristo u jach tsoyir ta pixamex. Quireꞌ Cristo jeꞌ u yiric mʌnaꞌ mac tu pꞌuspachtajob Jesús quireꞌ a baꞌ ta betex taj uch.
\v 11 A baywoꞌ cꞌuchaꞌan a worex a betex tu cotor a baꞌ jach taj quireꞌ Jesucristo tan u beyaj ta pixamex. A baywoꞌ, a Cꞌuj xanoꞌ bin u caꞌ sʌjtaꞌbir ten u jer mac quireꞌ techex, rajen jeꞌ u bin u tsicbarob an ten bic jach tsoy a Cꞌujoꞌ quireꞌ techex tan a manex tu tsoyir. 
\s Jach manan quiꞌ yor Pablo wa cu sʌjtaꞌ Cristo ten mac 
\p
\v 12 In wet acsʌꞌorirex, a tenoꞌ in cꞌat a werex cax a baꞌ in ber a tenoꞌ mʌꞌ jin mʌꞌquintaj u jach tsoyir u tꞌʌn Cꞌuj cax tiꞌ yʌnenaꞌ tu cu maꞌcʌr winicob. Yaꞌab mac tu toc yubajob u jach tsoyir u tꞌʌn Cꞌuj.
\v 13 Ich tu cotor yatochob a soldadojoꞌ u winiquirob romano tu cajaꞌanob, cax a soldadojoꞌ u rey César, robob ti taroꞌ xan, yubmʌnob tiꞌ yʌnen tu cu maꞌcʌr winicob quireꞌ quin sayʌr tu pach Jesucristo. Tiꞌ yʌn u jer mac yaꞌab yubmʌnob xan.
\v 14 Quireꞌ tiꞌ yʌnen tu cu maꞌcʌr winicob yʌn yaꞌab in wet acsʌꞌorirob jach chichij yorob ʌcʌtan tiꞌ Cꞌuj. Rajen, tan u manob u masicob u jach tsoyir u tꞌʌn Cꞌuj. Tsꞌoc u chꞌic sajquirob bajeꞌrer.
\p
\v 15 Tu cotor tan u tsecꞌticob Cristo. Yʌn mac qꞌuex yorob tu cu tsecꞌticob quireꞌ u cꞌat yiric wa cꞌuchaꞌan yorob an ten bic quin tsecꞌtic ten. Yʌn mac tan u tsecꞌticob u jach tsoyir u tꞌʌn Cꞌuj quireꞌ tsoy u pixamob.
\v 16-17 Aroꞌ cu tsecꞌticob quireꞌ u yajenob. Yʌn mac u jer qꞌuex yorob ten rajen tan u manob u tsecꞌticob u jach tsoyir u tꞌʌn Cꞌuj. U cꞌat yiricob in mucꞌyaj a tenoꞌ, cax wa ber tu mʌcaꞌanen tu cu maꞌcʌr winicob quireꞌ u cꞌat u yiricob u chuquiquenob.
\v 18 A ray winicoꞌ, mʌꞌ jach noꞌj tiꞌ teniꞌ wa baxuc cu tucricob tu yorob. Mʌꞌ ja wirej, a baꞌ jach noꞌj tiꞌ ten wa cu tsecꞌticob Cristo, cax mʌꞌ tan u tsecꞌticob quireꞌ tsoy u pixamob. Jach quiꞌ in wor wa cu tsecꞌticob Cristo.
\p Mʌꞌ tucur in caꞌiꞌ.
\v 19 Mʌꞌ jarariꞌ, quireꞌ ca tꞌʌniquex Cꞌuj ten. U Tajꞌor u Pixam Cꞌuj, a mac tuchiꞌtaꞌb ten Cristo, jeꞌ u yamtiqueneꞌ. Rajen in wer jeꞌ in siptareꞌ.
\v 20 A tenoꞌ jach manan in cꞌat wa mʌꞌ in chꞌaꞌej suraquir wa ber caꞌ bin uruc Cristo. A tenoꞌ in jach er, jeꞌ u yamtiqueneꞌ, rajen, jeꞌ in man in toc araj tiꞌob Cristo soc u sʌjtaꞌ ten mac quireꞌ a tenoꞌ, cax quimiquen. 
\v 21 Tiꞌ toy cuxaꞌanen teꞌraꞌ ich yocꞌocab, a tenoꞌ, quin chen pachtic wa Cristo jeꞌ u bin sʌjtaꞌbir quireꞌ a tenoꞌ tin tsecꞌtaj Cristo. Rajen, wa quin quimin, a Cristojoꞌ jach manan cu bin sʌjtaꞌbir.
\v 22 Wa tiꞌ toy cuxaꞌanen teꞌraꞌ ich yocꞌocab, a baywoꞌ jeꞌ in chen beyaj tiꞌ Cristo. Rajen, mʌꞌ in wer a baꞌ in chen cꞌat in betej.
\v 23 A tenoꞌ, mʌꞌ in wer a baꞌ quin tetic ich a caꞌturoꞌ. A tenoꞌ in cꞌat in pachtej in quimin soc caꞌ xiquen caꞌanan tu yʌn Cristo, quireꞌ jach manan tsoy a ich caꞌananoꞌ.
\v 24 Quireꞌ mʌꞌ cꞌuchaꞌan a worex ta junanex, rajen, jach nojen a tenoꞌ wa tiꞌ toy quin pꞌatʌr in yamtiquechex. 
\v 25 Quin wuꞌyic tin wor, rajen in wer jeꞌ in toc cuxtareꞌ soc jeꞌ in yamtiquechex a quiꞌ acsex ta worex tiꞌ Cristo. Bayiriꞌ jeꞌ u chichtar u mucꞌ a pixamexeꞌ. Wa ca quiꞌ acsiquex ta worexeꞌ, in wer jeꞌ u nequiꞌtar a worexeꞌ. 
\v 26 Rajen, wa ber quin wʌcꞌʌs tar tu yʌnechex, jach manan ca bin a waꞌariquex tiꞌ Cristo: “Bayoꞌ Cristo, quireꞌ siptaꞌb Pablo tu cu maꞌcʌr winicob.”
\p
\v 27 Yʌn manenex tu tsoyir. Mʌꞌ ja wirej, aroꞌ jach nojechex quireꞌ a techexoꞌ ta wacsex ta worex tiꞌ u jach tsoyir u tꞌʌn Cꞌuj, a cu tsicbar Cristo. Wa cu siptiquenoboꞌ jeꞌ in tar in wiriquechexeꞌ, a baywoꞌ jeꞌ in wiric bic tabarechex. Wa mʌꞌ ju siptenoboꞌ jeꞌ in wuꞌyic u tsicbar mac techexeꞌ. Chichquint a worex. Toc pꞌeriꞌquint ja worex. Mʌꞌ ja wirej, a baywoꞌ quet ca bin a pꞌisiquex a bʌjex quir a masiquex u jach tsoyir u tꞌʌn Cꞌuj.
\v 28 Mʌꞌ a chꞌiquex sajquirechex chichin tiꞌ a mac a cu pꞌactiquechexoꞌ. Cax cu pꞌactiquechexob, a baywoꞌ chʌcaꞌan yiricob wa ju bʌjiriꞌob jeꞌ u bin sʌtbirob. Chen a toꞌonexoꞌ a mac a tu mucꞌtaj tu cu chuquicob ic pachex, jach manan ij querex a Cꞌujoꞌ cꞌuchaꞌan yor u yamticoꞌonex a Cꞌujoꞌ.
\v 29 Mʌꞌ ja wirej, a Cꞌujoꞌ tu tetoꞌonex mʌꞌ quir ic chen acsiquex tij corex tiꞌ Cristo. A Cꞌujoꞌ caj u tetoꞌonex caꞌ ic mucꞌtex u chucur ic pachex quireꞌ tij cacsex tij corex tiꞌ Cristo.
\v 30 Rajen, quet caꞌ ij cꞌʌmex u chucur ic pachex caꞌ ij quibex tu cotoroꞌonex cu chucur ic pachex. A uchoꞌ ta wuꞌyex tu chucob in pach, bayiriꞌ bajeꞌrer tan a wuꞌyiquex teꞌraꞌ tan u chuquicob in pach xan.
\c 2
\s Quireꞌ Cristo mʌꞌ ju tucr u bʌjiriꞌeꞌ a mʌꞌ nacsaꞌb ten ich Cꞌuj caꞌanan
\p
\v 1 A techexoꞌ, a werex tu chichquint a worex Cristo quireꞌ a baꞌ tu betaj Cristo uch. A werex quiꞌ a worex quireꞌ u yajechex Cristo, bayiriꞌ a werex cu cʌjtar ta pixʌmex u Tajꞌor u Pixam Cꞌuj, bayiriꞌ tun, toc pacran yajquintex a bʌjex.
\v 2 Rajen quiꞌ in wor tiꞌ techex, chen jach manan a quiꞌquintiquex in wor wa ca betiquex a jeꞌraꞌ. Caꞌ a pꞌeriꞌquint a tucurex, caꞌ a pacran yajquintex a bʌjex soc cꞌuchaꞌan a worex soc periꞌ a beyajex.
\v 3 Rajen mʌꞌ a mʌꞌquintiquex u beyajob a wet acsʌꞌorirex. Mʌꞌ a pacran nojquintiquex a bʌjex soc u tus tucricob jach nojechex a wet acsʌꞌorirex.
\v 4 Caꞌ a sʌjtex a wet acsʌꞌorirex. Mʌꞌ ja wirej, jach manan tsoy wa mʌꞌ a nojquintiquex a bʌjex. Mʌꞌ chen a nonoj bʌjiriꞌex ca pacran yajquintex, quet caꞌ a pacran yajquintex a bʌjex.
\p
\v 5 Caꞌ a cʌnex u pixam Jesucristo.
\v 6 Mʌꞌ ja wirej, a Cristojoꞌ u bʌjiriꞌ Cꞌuj, chen tu pꞌʌt u chichir u mucꞌ yejer u mucꞌ a yʌn tiꞌ uch.
\v 7 Wa ber caj u ways u bʌj Jesús xib. Rajiꞌ tarij quir u yamtic mac, rajen caj u chꞌaꞌ u winquirir, raꞌ u winquirir irej toꞌonex teꞌraꞌ ich yocꞌocab wa ber caj rochaꞌb ten u nʌꞌ uch.
\v 8 Mʌꞌ tu chen chꞌaꞌ u winquirir irej toꞌonex. Mʌꞌ chen oc tu cꞌurewir, caj u quibaj u tꞌʌn u Tet tu yaꞌaraj caꞌ xic quimin ich cruz.
\v 9 Caj quinsaꞌb ich cruz, rajen caj ricꞌsaꞌb Cristo ten Cꞌuj ich u sasirir Cꞌuj. Tu cotor mac rajen jach manan cu bin sʌjtaꞌbir u cꞌabaꞌ Cristo. Mʌnaꞌ u jer quet cu bin sʌjtaꞌbir u cꞌabaꞌ ten mac tu cotor jariꞌ Cristo u cꞌabaꞌoꞌ.
\v 10 Mʌꞌ ja wirej, tu cotoroꞌonex a mac a tiꞌ yʌnob teꞌraꞌ ich yocꞌocab, bayiriꞌ, quet yejer a mac a tiꞌ yʌnob ich caꞌananoꞌ, bayiriꞌ quet yejer a mac a tiꞌ yʌnob ich yaran ruꞌum, jeꞌ u rʌc xontarob ich Cristo Jesúseꞌ. 
\v 11 A raꞌ u qꞌuininoꞌ tu cotoroꞌonex jeꞌ ij cariquex ʌcʌtan tu cotor maqueꞌ: “A techoꞌ ic Jaj Tsꞌurirex.” Aroꞌ jeꞌ ij cariquex ich ʌcʌtan tiꞌ Jesucristojeꞌ. A baywoꞌ jeꞌ u tsicbarob tu cotor mac tiꞌ ic Tetex Cꞌujeꞌ: “Jach manan tsoy ic Tetex Cꞌuj.”
\s Caꞌ ic yercꞌacꞌtej tu cotor mac a tiꞌ yʌn ich yocꞌocab quireꞌ a tenoboꞌ an ten biquenob a quiboꞌ
\p
\v 12 A techexoꞌ, a mac in jach yajechex. Tiꞌ toy yʌnen tu yʌnechex uch ta wesenex rajraꞌ ta quibex a baꞌ tꞌʌnin Cꞌuj caj u yaꞌaraj techex uch. Rajen cax mʌnaꞌnen tu yʌnechex bajeꞌrer, quibex a baꞌ tꞌʌnin Cꞌuj caj u yaꞌaraj techex uch. Esex tiꞌ mac tu cotor ta cꞌʌmex a cuxtarex a ricꞌbenoꞌ. Yʌn sʌjtex Cꞌuj. Yʌn cꞌaj techex wa mʌꞌ cꞌuchaꞌan a worex a betex baꞌ ta junanex.
\v 13 Mʌꞌ ja wirej, a Cꞌujoꞌ tan u beyaj ta pixamex, rajen a cꞌatex a betex a baꞌ u cꞌat Cꞌuj techexoꞌ. Rajiꞌ jeꞌ u yamtiquechexeꞌ soc jeꞌ u cꞌuchur a worexeꞌ a betex a baꞌ u cꞌat Cꞌuj techexoꞌ.
\p
\v 14 Rajen tu qꞌuinin a Cꞌujoꞌ, cu yaꞌaric u tꞌʌn techex, toc quibex, soc mʌꞌ a choquintiquex yor Cꞌuj, soc mʌꞌ a nunquex u tꞌʌn Cꞌuj.
\v 15 A baywoꞌ mʌꞌ ja bin a pʌyex a siꞌpirex, a baywoꞌ jeꞌ u tsoytar a pixamex, a baywoꞌ chʌcaꞌan yiric mac wa techex u pararechex Cꞌuj, a baywoꞌ xan, a mac a cu manob ich u siꞌpirob jeꞌ u yiricob wa mʌnaꞌ a siꞌpirexeꞌ. Robob jeꞌ u yiricob techex an ten biquechex quibeꞌ, a cu yercꞌacꞌtic u ber mac ich yacꞌbirir.
\v 16 Mʌꞌ ja wirej, jeꞌ a chaꞌiquex a mac a mʌꞌ u yerob Cꞌuj caꞌ u yirob u berir quir u cuxtarob. Rajen wa ber caꞌ bin uruc Cristo, jeꞌ u quiꞌtar in wor quireꞌ tiꞌ yʌnechex ich caꞌanan. Mʌꞌ ja wirej, chʌcaꞌan yiric tu cotor mac mʌꞌ jin sʌt in beyaj quireꞌ tiꞌ yʌnechex ich caꞌanan quireꞌ tsoy caj beyanʌjen tu yʌnechex uch. 
\v 17 Quireꞌ a techexoꞌ, ta quiꞌ acsex ta worex tiꞌ Cꞌuj, rajen mʌꞌ ja wacꞌtex a bʌjex quireꞌ ta mucꞌtex tu tu chucob ta pachex, rajen quiꞌ a worex. Bayiriꞌ jach quiꞌ in wor techex xan. Bayiriꞌ xan, yejeren wa quin quinsaꞌ, quiꞌ in wor xan.
\v 18 Quireꞌ jeꞌ u quiꞌtar in wor cax wa quin quinsaꞌ, rajen quiꞌquint a worex ten xan.
\s A Pablojoꞌ cu tsicbar tiꞌ a mac cʌjaꞌan ich u cajar Filipos. Cu tsicbar tiꞌob tiꞌ Timoteo yejer Epafrodito 
\p
\v 19 Wa baxuc u cꞌat ic Jaj Tsꞌurirex Jesucristo caꞌ in tuchiꞌtej caꞌ tac soc tabar u tar ij quet acsʌꞌorirex Timoteo. Rajen caꞌ bin uruc Timoteo tin wicnʌn teꞌraꞌ tu yʌnen jeꞌ u tsicbar ten bictabarechex. Jeroj, jeꞌ u quiꞌquintic in wor Timoteojeꞌ quireꞌ a baꞌ ta betex a jach tsoyoꞌ techex.
\v 20 Mʌꞌ ja wirej, mʌnaꞌ u jer mac an ten bic Timoteo a cu yubic tsoyir u pixam a tiꞌoꞌ, quireꞌ u manej qꞌuin cu jach pꞌisic u bʌj quir u yamtiquechex.
\v 21 U jer mac tu cotor tan u manob u cʌxtob a baꞌ quiriꞌ u nonoj bʌjiriꞌ u cꞌatob tu junanob. Mʌꞌ ju jach tucrob a baꞌ caꞌ u betob tiꞌ Jesucristo.
\v 22 A techexoꞌ, a werex wa Timoteo, jach tsoy u pixam. Rajiꞌ irej wa in parar, quireꞌ quet caj binenob in tsecꞌticob u jach tsoyir u tꞌʌn Cꞌuj uch.
\v 23 Rajen wa quin wuꞌyic a baꞌ cu bin tar ten. Jeroj jeꞌ in tuchiꞌtic Timoteo techex soc pʌyber cu cꞌuchur tu yʌnechex.
\v 24 A tenoꞌ, tin tꞌʌn wa tsoy tu tꞌʌn tiꞌ ic Jaj Tsꞌurirex, jach tabar in tar tu yʌnechex xan.
\p
\v 25 Quireꞌ mʌꞌ tabar in tarob tu yʌnechex bajeꞌrer, rajen in wer jach manan tsoy wa jin wʌcꞌʌs tuchiꞌtic techex ij quet acsʌꞌorirex, u cꞌabaꞌ Epafrodito. Rajiꞌ jach tsoy beyanʌjij teꞌraꞌ yejerenob quireꞌ quet tu cotoroꞌonex u soldadojoꞌonex Cristo. Rajiꞌ caj tuchiꞌtatenob uch soc u yamtiquenob quireꞌ caj tar uch caj u pꞌʌtenob a baꞌ ta sijatenob uch.
\v 26 Rajiꞌ jach tsꞌanaꞌan yor tar u yirechex quireꞌ tucur u caꞌ. Mʌꞌ ja wirej, tu yubaj ta wuꞌyex rajiꞌ tu cʌn u yajir.
\v 27 Jach jaj tu cʌnaj u yajir uch, orac quimic xan. Chen a Cꞌujoꞌ caj u yira otsir caj u yajquintaj. Mʌꞌ chen yajquintaꞌb ten Cꞌuj, a Cꞌujoꞌ caj u yiraj otsiren xan, quireꞌ wa quimij uch Epafrodito jeꞌ in wacꞌtic caꞌcheꞌ. 
\v 28 Rajen tan in wʌcꞌʌs tuchiꞌtic techex Epafrodito bajeꞌrer soc u quiꞌtar a worex, quireꞌ jeꞌ a wʌcꞌʌs iriquex Epafrodito. Rajen jeꞌ u quiꞌtar in wor cax tiꞌ toy yʌnen teꞌraꞌ tu cu maꞌcʌr winicob.
\v 29 Quiꞌquint a worex tun, wa ber caꞌ bin cꞌuchuc Epafrodito tu yʌnechex. Acsex a tiꞌoꞌ quireꞌ a wet acsʌꞌorirex. Tu cotor mac a yʌn u pixam irej Epafrodito yʌn sʌjtex a tiꞌoꞌ.
\v 30 Mʌꞌ ja wirej, jach jaj orac quimic Epafrodito uch quireꞌ tu beyanʌjij tiꞌ Cristo. Mʌꞌ tu cꞌʌs tucraj wa ju cuxtar quireꞌ yer a cꞌatex a tiꞌoꞌ caꞌ u pꞌis u bʌj tu beyaj quir u yamtiquen. Rajen jach manan beyanʌjij quir u yamtiquen uch.
\c 3
\s Tsꞌajaꞌan yor Pablo quireꞌ u cꞌat u cꞌuchur ich caꞌanan 
\p
\v 1 Rajen in wet acsʌꞌorirex, tabar in tsꞌocsic a baꞌ tan in tsꞌibtic techex bajeꞌrer ich a jeꞌ u juꞌuninaꞌ. Quiꞌquint a worex ich ic Jaj Tsꞌurirex. Cax yaꞌab u tenin caj in tsꞌibtajechex aroꞌ. Jeꞌ in wʌcꞌʌs tsꞌibtic techex aroꞌ soc mʌꞌ u tusiquex mac.
\v 2 Rajen uꞌyex baꞌ quin waꞌaric techex. Quiꞌ cʌnantex a bʌjex tiꞌ a mac a mʌꞌ tsoy yorob quireꞌ a baꞌ cu beticob jach cꞌas. Tan u camsicob a yacsmʌnob tu yorob: “Yʌn, quir a tsꞌiriquex a bʌqꞌuerex an ten bic nan u beticob u winiquirob judío.” Rajen quiꞌ cʌnant a bʌjex tiꞌob.
\v 3 Mʌꞌ ja wirej, tu cu tsꞌiric u bʌqꞌuer an ten bic nanij cu beticob u winiquirob judío raꞌ u cꞌat u camsicoꞌonex rajiꞌ u tsꞌurir ic pixamex, rajiꞌ u Tajꞌor u Pixam Cꞌuj. A baywoꞌ cꞌuchaꞌan ij corex taj quij cꞌujintiquex Cꞌuj. A baywoꞌ ij querex jeꞌ u taquicoꞌonex Jesucristo. A baywoꞌ mʌꞌ raꞌ quir u taquicoꞌonex Cꞌuj quireꞌ a baꞌ quic betiquex. 
\v 4 Wa jix tiꞌ u tacbaroꞌonex Cꞌuj quireꞌ a baꞌ tic betex a jach manan tsoyoꞌ, jeroj a tenoꞌ, tu toc taquen Cꞌuj mʌnaꞌ u jer baꞌ caꞌ in betej quir u taquiquen Cꞌuj. 
\v 5 Quireꞌ caj manij tuririꞌ semana uch. Caj tsꞌoc u rochiquen in nʌꞌ caj u tsꞌiraj in chan bʌqꞌuer an ten bic nan u beticob u winiquirob judío. Quireꞌ a tenoꞌ u chꞌic pararen in nunquir Israel. Raꞌ in woꞌnen u winiquirob benjamín, a mac jach noꞌj ich u winiquirob israel. In chꞌic sucuꞌun tsicbajnʌjij u tꞌʌn hebreo. A uchoꞌ u winiquiren fariseo. Caj in tus tucraj tan in jach quibic u tꞌʌn Cꞌuj a ricꞌsaꞌb u winiquirob israel. Rajen in wer uch Cꞌuj jeꞌ u yiriquen an ten bic taj in woreꞌ. 
\v 6 A tenoꞌ caj in tus tucraj uch jach manan tan in cꞌujintic Cꞌuj. Rajen caj in chuc u pachob a mac a yacsmʌnob tu yorob. Mʌꞌ ja wirej, tin tus tucraj tan in quibic u tꞌʌn Cꞌuj a araꞌb ten Cꞌuj tiꞌ u winiquirob israel, rajen in wer Cꞌuj jeꞌ u yiriquen an ten bic taj in woreꞌ. 
\v 7 A baꞌ tin jach pachtaj uch a bajeꞌrereꞌ, jot mʌꞌ baꞌwir a tenoꞌ. In chen cꞌat Cristo caꞌ u yiren jach tsoy tu tꞌʌn.
\v 8 Toc jumpuriꞌ caj in rʌc toc pichꞌintaj tu cotor baꞌ soc bajeꞌrer in wer Cristo Jesús an ten bic in Jaj Tsꞌurir. Raꞌ jach manan tsoy. Mʌꞌ ja wirej, quireꞌ a baꞌ tu betaj Jesucristo, rajen toc jumpuriꞌ tin toc rʌc pichꞌintaj tu cotor baꞌ an ten bic u pꞌupꞌir baꞌ. Toc teniꞌ tin cꞌub in bʌj tu cꞌʌb Cristo.
\v 9-10 U manej qꞌuin in wet man yejer Cristo, tiꞌ yʌnen ʌcʌtan tiꞌ a Cristojoꞌ. A Cꞌujoꞌ mʌꞌ ju yiren taj in wor quireꞌ a baꞌ tin betaj a jach tsoyoꞌ. A Cꞌujoꞌ, cu yiriquen taj in wor quireꞌ tin wacsaj tin wor tiꞌ Cristo. Mʌꞌ ja wirej, quireꞌ tij cacsex tij corex rajen Cꞌuj cu yiricoꞌonex an ten bic Cꞌuj a taj yoroꞌ. Rajen in cꞌat caꞌ in cʌn Cristo soc mʌꞌ in chen tsꞌurintic tu cotor in siꞌpir an ten bic Cristo mʌꞌ ju tsꞌurint u siꞌpir, rajen chen cꞌuchaꞌan yor tiꞌ wa ber caj riqꞌuij tu tꞌajaꞌan u baquer uch. Rajen quin mucꞌtic a baꞌ cu tar ten an bic Cristo caj u mucꞌtaj soc quin quimij tiꞌ in siꞌpir an ten bic Cristo quimij a tiꞌoꞌ.
\v 11 Mʌꞌ ja wirej, in cꞌat in riqꞌuir ich u quimirir soc in cuxtar.
\p
\v 12 Mʌꞌ toy tsꞌocac u cꞌuchur in wor tiꞌ tu cotor aroꞌ, quireꞌ mʌꞌ toc jach manan tsoyen. Chen tan in pꞌisic in bʌj cu bin tsꞌaꞌbir ten, wa quin cꞌuchur in cꞌʌmej tiꞌeꞌ rajen cu pʌyen Cristo.
\v 13 Mʌꞌ ja wirej, in wet acsʌꞌorirex, mʌꞌ jin waꞌarej wa cꞌuchaꞌan in wor in tsꞌocsic a baꞌ tin tsꞌibtaj sam techex, quij Pablo. Uꞌyex baꞌ quin betic, in cꞌat u tubur ten a baꞌ toc man in betic uchoꞌ. A tenoꞌ tan in tucric a tu quin bin cꞌuchur bajeꞌrereꞌ.
\v 14 Rajen tan in quiꞌ pꞌisic in bʌj bajeꞌrereꞌ soc u quiꞌ acsiquen Cꞌuj quireꞌ a baꞌ tu betaj Cristo uch. Caꞌ bin cꞌuchuquen ich a caꞌananoꞌ, quij, cu boꞌotic u boꞌorir tuj in pꞌis in bʌj Cꞌuj.
\p
\v 15 Rajen a toꞌonexoꞌ a mac a tsꞌaꞌb ten Cꞌuj tu cotor baꞌ, caꞌ ij quiꞌ tucrex tic pixamex tiꞌ soc a baywoꞌ quij Pablo. Chen wa tiꞌ yʌn mac tuꞌ yʌnechex, a mac a mʌꞌ baxuc u pixamob cu tucricob, a Cꞌujoꞌ jeꞌ u tsꞌaꞌbʌr u najticobeꞌ.
\v 16 Cax tu cotoroꞌonex mʌꞌ quet a baꞌ quic najtiquex aroꞌ. Chen caꞌ ij quibex a baꞌ tu pʌy ic berex bajeꞌrereꞌ. 
\p
\v 17 In wet acsʌꞌorirex, cʌnex in pixam, rajraꞌ caꞌ a quiꞌ pʌctex tu cotor mac a bayiriꞌ tu cʌnob in pixam xan.
\v 18 Jach suꞌ caj in waꞌaraj techex tiꞌ in racꞌob wa jach cꞌas cu beticob quireꞌ chʌcaꞌan yiric wa cu pꞌacticob Cristo. Mʌꞌ tu jach acsa tu yorob wa Cristo quimij ich u cruz toꞌonex. A bajeꞌrereꞌ ocꞌar in caꞌ cax tan in waꞌaricob tiꞌob.
\v 19 Quireꞌ bin u caꞌ satʌrob u pixamob. Mʌꞌ ja wirej, cu chen quibicob a baꞌ cu pachticob tu winquirir. Mʌꞌ ja wirej, cu binob ich cꞌas, mʌꞌ ju chꞌa suraquirob ich u pixamob. Tan u pachticob tu pixamob a baꞌ tiꞌ yʌn ich yocꞌocab.
\v 20 A tenob tiꞌ yʌn in ruꞌumob ich caꞌananiꞌ quireꞌ tan in pajicob yuꞌur in wʌjtaquirob ich caꞌanan quireꞌ rajiꞌ in Jaj Tsꞌurirob Jesucristo.
\v 21 Mʌꞌ ja wirej, mʌnaꞌ u chichir u mucꞌ ic winquirirex a yʌn toꞌonex bajeꞌrereꞌ. Rajiꞌ, Cristo caꞌ bin uruc, jeꞌ u tsꞌic toꞌonex u jer ricꞌben ic winquirirexeꞌ an ten bic Cristo u mucꞌ u winquirir rajiꞌ yʌn, a baꞌ jach manan tsoy, quireꞌ rajiꞌ yʌn tu cotor ic mucꞌ, rajen rajiꞌ u tsꞌurir tu cotor baꞌ, rajen cꞌuchaꞌan yor u betic u tsꞌic u mucꞌ ic winquirirex.
\c 4
\s Quiꞌquintej a worex quireꞌ rajiꞌ ic Jaj Tsꞌurirex Jesucristo 
\p
\v 1 Rajen in wet acsʌꞌorirex, a mac in jach yaj. A tenoꞌ, in cꞌat in tar in wirechex. Jach quiꞌ in wor quireꞌ a techexoꞌ. Mʌꞌ ja wirej, ta wuꞌyex in tꞌʌnob rajen a wacsmʌnex ta worex tiꞌ Cristo. Rajen caꞌ bin cꞌuchuquen ich caꞌanan tu quin bin boꞌtbir ten Cꞌuj u boꞌorir in cꞌʌb. Mʌꞌ a yʌn sutex ta pachex a techexoꞌ a mac in jach yajeꞌ.
\p
\v 2 A techoꞌ in wet acsʌꞌorirech Evodia yejer Síntique, in wet acsʌꞌorirech xan. Quin chich aric techex, mʌꞌ a pacran nunquic a tꞌʌnex. Pꞌeriꞌquint a worex ʌcʌtan tiꞌ Cꞌuj.
\v 3 Bayiriꞌ xan, a techoꞌ in wet acsʌꞌorirech quireꞌ quet quic beyajex tiꞌ ic Jaj Tsꞌurirex, chʌc yamtej a jeꞌ xquicaꞌ a tan in tsꞌibtic tiꞌob bajeꞌrer, pꞌeriꞌ caj beyanʌjenob yejer Clemente yejer u jer yaꞌab mac, a mac tsꞌibaꞌan ten Cꞌuj ich u juꞌunin a tu tsꞌibaꞌan quir ij cuxtarex munt qꞌuin.
\p
\v 4 Rajraꞌ quiꞌquint a worex quireꞌ rajiꞌ ic Jaj Tsꞌurirex. Cax a baꞌ cu tareꞌ quin wʌcꞌʌs aric techex, quiꞌquint a worex.
\v 5 Yʌn esex tiꞌ tu cotor mac soc yerob u jach tsoyir a pixamex, quireꞌ tabar u yuꞌur ic Jaj Tsꞌurirex.
\p
\v 6 Mʌꞌ a chen tucriquex baꞌ, chichin. Tu cotor a baꞌ u cꞌat a pixamex tꞌʌnex Cꞌuj tiꞌ a pixam. Yʌn cꞌaj techex, wa rajiꞌ tu yamtechex uch. Mʌꞌ u yʌn tubur techex mun u yaꞌabir caj u yam techex uch.
\v 7 A baywoꞌ jeꞌ u tsꞌaꞌbʌr techex ten Cꞌuj ta pixamex soc mʌnaꞌ baꞌ ca tucriquex. Aroꞌ jach manan mʌnaꞌ baꞌ quic tucriquex cax wa tic tucrex uch. Quireꞌ a jeꞌraꞌ mʌꞌ baꞌ quic bin ic tucrex quireꞌ ij quet manex Cristo. 
\s Ca chen tucriquex a baꞌ jach tsoyoꞌ
\p
\v 8 In wet acsʌꞌorirex, tan in waꞌaric techex a jeꞌraꞌ, tabar in tsꞌocsic in tsꞌibtic techex ich a jeꞌ juꞌunaꞌ. Caꞌ a chen tucrex a baꞌ tajiꞌ, a baꞌ caꞌ a yʌn sʌjtex, a baꞌ u jach tajir, a baꞌ quet yejer u tꞌʌn Cꞌuj, a baꞌ jach manan tsoy, a baꞌ tsoy tu tꞌʌn Cꞌuj, a baꞌ mac cu yaꞌaric jach tsoy tu cotor, a tsoy ca betiquex raꞌ a yʌn tucrex a tiꞌoboꞌ.
\p
\v 9 A techexoꞌ, caꞌ a yʌn betex a baꞌ tin chaj a cʌniquex, a baꞌ tin pꞌʌtaj yejerechex uch, tu cotor tin waꞌaraj techex wa ta wirex ber tin betajiꞌ. A baywoꞌ a wet manex yejer Cꞌuj, a mac a cu tsꞌic toꞌonex baꞌ soc mʌnaꞌ baꞌ quic tucriquex.
\s Jach quiꞌ in wor quireꞌ ta wʌcꞌʌs cꞌʌꞌotajenex
\p
\v 10 Ʌcʌtan ic Jaj Tsꞌurirex jach manan quiꞌ in wor bajeꞌrer quireꞌ tan ta wʌcꞌʌs cꞌʌꞌotiquenex. In wer rajraꞌ tan a cꞌʌꞌotiquenex ta pixamex. Jariꞌ yʌn qꞌuin mʌꞌ cꞌuchaꞌan a worex a wiriquenex soc a yamtiquenex.
\v 11 Mʌꞌ tan in waꞌaric aroꞌ quireꞌ otsichʌjen. Quireꞌ wa yʌn ten baꞌ, cax wa mʌnaꞌ ten baꞌ, mʌꞌ jin tucrej, a baywoꞌ tin cʌnaj.
\v 12 In wer bic tabar in cuxtar cax otsichʌjen cax ricochʌjen. A Cꞌujoꞌ tu chaꞌ in wacsic tin wor wa quin mucꞌtic tu cotor baꞌ, cax wa yʌn ten yaꞌab in woꞌoch, cax wa wiꞌchʌjen, cax wa yʌn ten tu cotor in baꞌtac, cax wa mʌnaꞌ in baꞌtac.
\v 13 Jeroj cꞌuchaꞌan in wor in mucꞌtej tu cotor baꞌ quireꞌ Jesucristo quireꞌ rajiꞌ cu chichquintic in wor.
\v 14 Rajen jach tsoy caj a tucrenex an ten bic mac jach otsichʌjij, irej wa tan u mucꞌyaj.
\p
\v 15 Mʌꞌ ja wirej, a techexoꞌ, a mac cʌjaꞌanob ich u cajar Filipos. A techexoꞌ, a werex tin batꞌan tsecꞌtaj u jach tsoyir u tꞌʌn Cꞌuj ta ruꞌumex a techexoꞌ. A techexoꞌ, a werex xan, wa ber tin pꞌʌtaj u ruꞌumin tiꞌ taroꞌ, wa ber tin pꞌʌtaj Macedonia raꞌ u cꞌabaꞌ u ruꞌumin. A techexoꞌ, a werex mʌnaꞌ mac ich u jer ij quet acsʌꞌorirex a mac a tu yamtenob mʌꞌ ju cꞌʌs tsꞌaja tenob baꞌ, jariꞌ techex ta yamtenex.
\v 16 Tiꞌ toy yʌnen uch ich u cajar Tesalónica tu caꞌten techex ta tuchiꞌtenex a baꞌ in cꞌat uch.
\v 17 A tenoꞌ tin waꞌaraj ta betex tsoy ten. Mʌꞌ chen jariꞌ tin cꞌʌmaj a baꞌ ta sijatenex, chen ta quiꞌquintex u yor Cꞌuj xan, rajen jach manan quiꞌ in wor, quij Pablo. 
\v 18 A tenoꞌ tin cꞌʌmaj tu cotor a baꞌ yʌn ten bajeꞌrer, a baꞌ jach manan yaꞌab ten bajeꞌrer. A tenoꞌ jach tsoyen quireꞌ tin cꞌʌmaj a baꞌ ta tuchiꞌtenex yejer Epafrodito. Ta jach quiꞌquintex yor Cꞌuj quireꞌ a baywoꞌ ta sijatenex. A Cꞌujoꞌ chʌcaꞌan yiric a mun ta sijatenex, rajen quiꞌjij yor Cꞌuj, quireꞌ a baꞌ ta betex ten.
\v 19 Rajen ij Cꞌujirex jeꞌ u tsꞌic techex tu cotor a baꞌ a cꞌatexeꞌ. Jach manan tsoy jeꞌ u tsꞌabʌr techex ten Cꞌuj quireꞌ a baꞌ tu betaj Jesucristo uch.
\v 20 Rajen caꞌ sʌjtac ij Cꞌujirex munt qꞌuin ten tu cotor mac.
\s Cu tꞌʌnic u yet acsʌꞌorirob Pablo
\p
\v 21 Tꞌʌnex ten tu cotor mac a yacsmʌnob tu yorob tiꞌ Jesucristo. Tu cotor ij quet acsʌꞌorirex a tiꞌ yʌnob tin wicnʌn teraꞌ, cu tꞌʌniquechexob.
\v 22 Tu cotor mac a yacsmʌnob tu yorob tiꞌ Cristo a tiꞌ yʌnob teraꞌ, cu tꞌʌniquechex xan. Tu cotor mac a tiꞌ yʌnob tu yatoch u rey César, a yacsmʌnob tu yorob, cu tꞌʌniquechex xan.
\v 23 A tenoꞌ in cꞌat tiꞌ ic Jaj Tsꞌurirex Jesucristo caꞌ u quiꞌ cʌnantechex. Jeroj tsꞌoc in tsꞌibtic techex, quij Pablo.