\id COL
\h COLOSENSES
\toc1 COLOSENSES
\mt1 A JEꞌ JUꞌUNAꞌ, TIꞌ U YET ACSɅꞌORIROB ICH U CAJAR COLOSAS. RAJIꞌ TU TSꞌIBTA PABLO
\mt2 COLOSENSES
\c 1
\s A Pablojoꞌ cu tsꞌibtic tiꞌ a mac a yacsmʌnob tu yorob tu cajar Colosas
\p
\v 1-2 A tenoꞌ Pablojen, yʌjtseqꞌuiren Jesucristo quireꞌ baxuc u cꞌat Cꞌuj. A tenoꞌ quet yejer in wet acsʌꞌorir Timoteo quin tꞌʌniquechex in wet acsʌꞌorirex ich u cajar Colosas quireꞌ ta wacsex ta worex tiꞌ Jesucristo. A tenoboꞌ in cꞌatob caꞌ u yam techex Cꞌuj, ic Tetex, bayiriꞌ xan in cꞌatob caꞌ u yam techex Cꞌuj soc mʌnaꞌ baꞌ ca tucriquex. 
\s A Pablojoꞌ cu tꞌʌnic Cꞌuj tiꞌ a mac a yacsmʌnob tu yorob 
\p
\v 3 A tenoboꞌ, quin tꞌʌnicob ic Tetex Cꞌuj, a mac u Tet ic Jaj Tsꞌurirex Jesucristo. Rajraꞌ quin tꞌʌnicob Cꞌuj, tan in waꞌaricob tiꞌ: “Bayoꞌ Cꞌuj”, quireꞌ ij quet acsʌꞌorirex a tiꞌ yʌnob ich u cajar Colosas. A baywoꞌ quin tꞌʌnicob Cꞌuj tiꞌ.
\v 4 Mʌꞌ ja wirej, quin waꞌaricob “Bayoꞌ tiꞌ Cꞌuj”, quireꞌ tin wuꞌyob bic jach taj ta wacsex ta worex tiꞌ Cristo Jesús. Tin wuꞌyob xan, bic caj a yajquintex tu cotor a wet acsʌꞌorirex.
\v 5 Quireꞌ wa ber ta yʌn batꞌan uꞌyex u tajir u tꞌʌn Cꞌuj, raꞌ u jach tsoyir u tꞌʌn Cꞌuj, raꞌ ta wuꞌyex a baꞌ ca pajiquex ich Cꞌuj, rajen ca wacsiquex ta worex, rajen ca chen yajquintiquex a wet acsʌꞌorirex.
\v 6 Mʌꞌ ja wirej, u jach tsoyir u tꞌʌn Cꞌuj tu cu cꞌuchur ich mac cu cꞌaxicob u cuxtarob soc mʌꞌ u cꞌat yacsicob u siꞌpirob. Rajen cu yacsicob tu yorob tiꞌ Cꞌuj, bayiriꞌ xan, cu yajquinticob u yet acsʌꞌorirob an ten bic techex. A rayoꞌ ir a techexoꞌ ta wuꞌyex u jach tsoyir u tꞌʌn Cꞌuj caj a najtex tu jach tajir u jach tsoyir u tꞌʌn Cꞌuj.
\v 7 Raꞌ ta cʌnex tiꞌ Epafras, a mac in yajob, quij Pablo, tu quin beyajob tiꞌ Cꞌuj. Mʌꞌ ja wirej, rajiꞌ cu chichiquintic a worex Epafras tu cu beyaj tiꞌ Cristo tiꞌ tenob tu yʌnechex. 
\v 8 Caj urij Epafras tin wicnʌnob caj u tsicbataj in wuꞌyob bic ca jach yajquintiquenobex, quireꞌ pꞌeriꞌoꞌonex ich u Tajꞌor u Pixam Cꞌuj.
\p
\v 9 Rajen rajraꞌ quin tꞌʌnicob Cꞌuj techex, raꞌiriꞌ qꞌuinin tin wuꞌyob ta wacsex ta worex tiꞌ Cristo. Quin tꞌʌnicob Cꞌuj soc u yamtiquechex quir a najtiquex a baꞌ cꞌasoꞌ, bayiriꞌ a baꞌ tsoyoꞌ, tan a yamtaꞌrex ten u Tajꞌor u Pixam Cꞌuj.
\v 10 Wa tan a najtiquex aroꞌ quireꞌ u Tajꞌor u Pixam Cꞌuj tan u yamtiquechex, jeroj cꞌuchaꞌan a worex a manex tu tsoyir an bic u cꞌat ic Jaj Tsꞌurirex, rajraꞌ tan a quiꞌquintiquex u yor ic Jaj Tsꞌurirex xan. Bayiriꞌ bin a caꞌex a quiꞌ cʌnex Cꞌuj.
\v 11 Quin tꞌʌnicob Cꞌuj caꞌ u chuquej techex u jach mucꞌ Cꞌuj soc cꞌuchaꞌan a worex a mucꞌtex a baꞌ cu tar techex. Soc quiꞌ a worex ca bin a mucꞌtex quireꞌ nemʌꞌ biquechex. 
\v 12 Quin tꞌʌnicob Cꞌuj xan, caꞌ a cʌnex a waꞌarex tiꞌ Cꞌuj: “Bayoꞌ, quechex tiꞌ, ic Tetex Cꞌuj, quireꞌ ta quiꞌ yajquintenob.” Mʌꞌ ja wirej, a Cꞌujoꞌ tu tsꞌaja toꞌonex u mucꞌ soc u jʌsic a baꞌ yʌn ich caꞌananoꞌ a tu ricꞌsaj tiꞌ mac a Cꞌuj yʌninoꞌ, a tiꞌ yʌn tu sasirir Cꞌujoꞌ. 
\v 13 A Cꞌujoꞌ caj u tacoꞌonex tiꞌ a quisinoꞌ, a mac ic jach tsꞌurintiquex a uchoꞌ. Quireꞌ a uchoꞌ quic manex ic yacꞌbirir a quisinoꞌ. Caj u masoꞌonex a Cꞌujoꞌ soc ij quiꞌ tsꞌurintiquex u parar Cꞌuj, quireꞌ u jach yaj u parar a Cꞌujoꞌ.
\v 14 Mʌꞌ ja wirej, Jesucristo tu tacoꞌonex caj u jawsaj ic siꞌpirex quireꞌ jocꞌ u qꞌuiqꞌuer toꞌonex, u boꞌorir ic siꞌpirex.
\s U bʌjiriꞌ Cꞌuj caj u wʌcꞌʌs masoꞌonex caj quimij Cristo soc rajiꞌ yʌninoꞌonex
\p
\v 15 A jach Cꞌujo mʌꞌ irir ten wa mac, chen ber tu chꞌaj u winquirir Jesús, jeroj tij quirex Cꞌuj. Mʌꞌ ja wirej, cax mʌꞌ toy betaꞌc yocꞌocab uch, quij, tiꞌ toc yʌn a Cꞌujoꞌ chꞌic uch, u beriꞌ tiꞌ toc yʌn Jesucristo.
\v 16 A Cristojoꞌ caj u betaj tu cotor a baꞌ tiꞌ yʌn ich caꞌananoꞌ, bayiriꞌ xan, a tiꞌ yʌn teraꞌ ich yocꞌocab. Cax a quij quiriquex, cax a baꞌ mʌꞌ jij quirex, rajiꞌ tu betaj. Tu cotor a macoꞌ a yʌn u mucꞌoꞌ ich caꞌananoꞌ a cu tsꞌurintaꞌr a baꞌ tiꞌ yʌn tiꞌ taroꞌ cax a tiꞌ yʌnob ich yocꞌocab, robob toc betaꞌb ten Cristo. Mʌꞌ ja wirej, toc betaꞌb ten Cꞌuj tu cotor baꞌ yejer Cristo soc u rʌc cꞌujintaꞌr Cristo quireꞌ jach carem.
\v 17 Tu chꞌic chunin, cax mʌnaꞌ baꞌ betaꞌb, mʌnaꞌ ich caꞌanan, mʌnaꞌ ich yocꞌocab, u beriꞌ tiꞌ yʌn Cristo. A Cristojoꞌ cu tsꞌurintaꞌr ten tu cotor baꞌ soc mʌꞌ u jubur.
\v 18 Raꞌiriꞌ Cristo u Jaj Tsꞌurirob a mac a yacsmʌnob tu yorob, quireꞌ rajiꞌ u joꞌr, rajen a toꞌonexoꞌ iroꞌonex u winquirir Cristo. Quireꞌ rajiꞌ yʌn batꞌan riqꞌuij tu quimirir rajen jeꞌ ic riqꞌuirex xan, a baywoꞌ, jach manan u mucꞌ tiꞌ tu cotor baꞌ, a tiꞌ yʌnoꞌ.
\v 19 Mʌꞌ ja wirej, a baywoꞌ, rajiꞌ Cristo quireꞌ rajiꞌ jach Cꞌuj u tajir.
\v 20 Mʌꞌ ja wirej, a Cꞌujoꞌ u jach cꞌat u yamticoꞌonex quireꞌ rajiꞌ Jesucristo. Rajen tu betaj soc cꞌuchaꞌan yor tsoy yiric tu cotor mac ich yocꞌocab, bayiriꞌ ich caꞌanan. Caj rʌc chꞌatoꞌonex u bʌjiriꞌeꞌ wa ber caj jocꞌ u qꞌuiꞌquer Cristo caj quimij ich cruz.
\p
\v 21 Cꞌaj wa techex xan, ta pꞌactex Cꞌuj, mʌꞌ a cꞌatex a tiꞌoꞌ quireꞌ tan a manex ta cꞌasirex uch. Bayiriꞌ xan, jach cꞌas a baꞌ ta tucrex uch. Chen a Cꞌujoꞌ tu wʌcꞌʌs payechex yicnʌn u bʌjiriꞌeꞌ.
\v 22 Mʌꞌ ja wirej, quimij u parar ich cruz u boꞌorir a siꞌpirex. A baywoꞌ tu tsoyquintaj a pixamex soc jach tsoy, soc mʌnaꞌ u cꞌasir ta pixamex. Mʌꞌ ja wirej, ʌcʌtan tu wich Cꞌuj, mʌnaꞌ a siꞌpirex, quij.
\v 23 Baxuc jeꞌ u betic techex wa ca quiꞌ acsiquex ta worex tiꞌ, wa ca pꞌeriꞌquintic a worex yejer, wa mʌꞌ u tupsic a worex tiꞌ u jach tsoyir u tꞌʌn Cꞌuj. Bayiriꞌ xan, mʌꞌ tan a sutex ta pachex tiꞌ u jach tsoyir u tꞌʌn Cꞌuj a ta wuꞌyex. Tu cotor mac tu yubob a ray tꞌʌnoꞌ, a raꞌ quin tsecꞌticoboꞌ.
\s A Pablojoꞌ toc araꞌb tiꞌ quir u camsic u tꞌʌn Cꞌuj tiꞌ a yacsmʌnob tu yorob
\p
\v 24 Cax bajeꞌrer toc cꞌʌraꞌanen ich u cajar Roma, quiꞌ in wor, quireꞌ tan in mucꞌyaj techex soc in yamtiquechex. Mʌꞌ ja wirej, baxuc mucꞌyajnʌjij Cristo, rajen quin mucꞌyaj techex, a mac a yacsmʌnob tu yorob. Quin mucꞌyaj jun xotꞌ tu mucꞌyajnʌjij Cristo xan quir in nupsic u tiꞌar a yacsmʌnob tu yorob.
\v 25 Bayiriꞌ tetaꞌben ten Cꞌuj quir in beyaj tiꞌ. Mʌꞌ ja wirej, tu cꞌub in beyaj raꞌ quir in rʌc tsecꞌtic u tꞌʌn Cꞌuj techex, bayiriꞌ soc yer mac tu cotor xan. 
\v 26 A Cꞌujoꞌ tu tsꞌaj in beyaj a tenoꞌ uch, soc in toc aric tiꞌ mac, a baꞌ a mʌꞌ araꞌan ten Cꞌuj tiꞌ mʌnaꞌ mac uch. Mʌnaꞌ mac yer, quireꞌ mʌꞌ araꞌan tiꞌ a mac tsꞌaꞌb u tucur ten Cꞌuj quir u tsicbarob a baꞌ cu yac Cꞌuj, cax tu chꞌic chunin mʌnaꞌ mac yeriꞌ. Chen a Cꞌujoꞌ tu toc araj tiꞌ a mac a tu yacsob tu yorob bajeꞌrer. Robob tsꞌab u najticob ten Cꞌuj.
\v 27 Mʌꞌ ja wirej, a Cꞌujoꞌ caj u tucraj caꞌ u chaꞌbʌr ij querex, a toꞌonex a mac a yacsmʌnob tu yorob tiꞌ ratiꞌ. Mʌꞌ ja wirej, tan u yamtiquechex Cꞌuj a mac a mʌꞌ u winiquirob judío. A baꞌ u ber jach manan tsoy quireꞌ, quij, a wet manex Cristo rajen a werex bin a caꞌex caꞌananex.
\p
\v 28 Rajen a tenoboꞌ quin binob in tsecꞌticob tiꞌ mac tu cotor, tan in waꞌaricob tiꞌob tiꞌ Cristo. Tan in chich aricob tiꞌob soc mʌꞌ u betob a baꞌ cꞌasoꞌ. Bayiriꞌ tan in quiꞌ camsicob a tiꞌoboꞌ soc taj yerob u tꞌʌn Cꞌuj. Tan in quiꞌ camsicob u tꞌʌn Cꞌuj soc cꞌuchaꞌan in worob in wacsicob tu cotor mac ʌcʌtan tiꞌ Cꞌuj soc taj cu yacsicob tu yorob tiꞌ Cristo.
\v 29 Rajen, quin jach beyaj quireꞌ tin cꞌʌmaj u chichir u mucꞌ Cristo a mac a tiꞌ yʌn tin pixam. Rajen quin pꞌisic in bʌj chich beyaj.
\c 2
\s U beyaj Pablo ich u cajar Tesalónica
\p
\v 1 Mʌꞌ ja wirej, a tenoꞌ in cꞌat a wertiquex wa quin tucriquechex quet yejer a mac a cʌjaꞌan ta cajarex Laodicea, bayiriꞌ quet yejer a mac a mʌꞌ yirmʌnob.
\v 2 Quireꞌ a tenoꞌ in cꞌat in chichquintic a worex soc jach manan ca pacran yajquintiquex a bʌjex, soc a baywoꞌ a werex u tꞌʌn Cꞌuj a ta wacsex ta worex rajiꞌ taj. Bayiriꞌ xan, soc jach manan a werex Cristo, quireꞌ a uchoꞌ, mac mʌnaꞌ yerob u tꞌʌn Cristo.
\v 3 A Cristojoꞌ jeꞌ u tsꞌic toꞌonex caꞌ ic najtex baꞌ wa quij cꞌatiquex tiꞌ, soc ij querex a baꞌ tsoy caꞌ ic betex.
\v 4 Bayiriꞌ tan in waꞌaric techex aroꞌ soc mʌꞌ u tusaric techex cax tsoy u tsicbarob techex.
\v 5 Jach taj mʌꞌ tiꞌ yʌnen tu yʌnechex bajeꞌrer, chen tan in cꞌʌꞌotiquechex. Jach quiꞌ in wor quireꞌ in wer taj ta wacsex ta worex, bayiriꞌ, pꞌeriꞌ a worex ich u beyaj ic Jaj Tsꞌurirex Jesucristo.
\p
\v 6 Raꞌiriꞌ qꞌuin caj a cꞌʌmex Cristo Jesús soc rajiꞌ a Jaj Tsꞌurirex, yʌn manenex tu tsoyir, quireꞌ a wet manex Cristo bajeꞌrer.
\v 7 Toc jumpuriꞌ u tsꞌurint a pixamex soc a betiquex a baꞌ cu yaꞌaric techex Jesús, an ten bic caj camsꞌb ten yʌjcamsayʌjirob techex. Jeꞌ u nechichtar a worex a wacsiquex ta worex, rajraꞌ tan a waꞌariquex tiꞌ Cꞌuj: “Bayoꞌ Cꞌuj”, quechex tiꞌ.
\s Ricꞌbenchʌjij ic pixamex ten Cristo
\p
\v 8 Quiꞌ cʌnantex a bʌjex soc mʌnaꞌ mac a cu tarob u camsiquechex tꞌʌn soc mʌꞌ a pꞌʌtiquex bic caj a wacsex ta worex quireꞌ a baꞌ cu tus camsiquechex. Mʌꞌ ja wirej, u tusarbar techex u tꞌʌnoꞌ quireꞌ mʌꞌ tajiꞌ, quireꞌ a baꞌ cu tus camsicob mac raꞌ u tꞌʌn winic, mʌꞌ u tꞌʌn Cꞌuj. Quireꞌ a baꞌ cu camsicob raꞌ cu yaꞌaricob u nunquirob. A ray tꞌʌnoꞌ mʌꞌ u tꞌʌn Cristo. Robob a yʌjcamsayʌjirob, cu camsicob u tꞌʌn ich yocꞌocab.
\p
\v 9 Mʌꞌ ja wirej, a Cristojoꞌ u bʌjiriꞌ Cꞌuj.
\v 10 Quireꞌ tiꞌ yʌn Cristo ta pixamex, rajen mʌꞌ baꞌwir quir a cꞌʌmiquex u jer. Mʌꞌ ja wirej, a Cristojoꞌ yʌn u mucꞌ rajen raꞌ cu tsꞌurintaꞌr ten tu cotor mac a yʌn u mucꞌob xanoꞌ cax a teꞌ yʌn ich yocꞌocab cax a yʌn u mucꞌ ich a quisinoꞌ.
\v 11 Quireꞌ rajiꞌ Cristo yʌninechex, jeroj ricꞌbenchʌj a pixamex quireꞌ rajiꞌ yʌninechex. Mʌꞌ ja wirej, ta pꞌʌtex a cꞌasirex a ta betex uchoꞌ quireꞌ betaꞌb a pixamex ten Cristo soc ricꞌben a pixamex.
\v 12 Mʌꞌ ja wirej, caj acsaꞌb jaꞌ ta joꞌrex irechex a tꞌajaꞌan a baquerex tu japnin tunich a ten bic tꞌoj u baquer Cristo ich japnin tunich uch. Jeroj caj tsꞌoc u yacsic jaꞌ ta joꞌrex irechex ricꞌsaꞌbechex ta quimirirex an ten bic Cristo caj ricꞌsaꞌb tu quimirir xan. Mʌꞌ ja wirej, ta wacsex ta worex tiꞌ Cꞌuj a mac chich u mucꞌ, quireꞌ tu ricꞌsaj Jesús tu quimirir xan.
\v 13 A techexoꞌ, tu cajar Colosas, quireꞌ quimechex ʌcʌtan tu wich Cꞌuj uch, quireꞌ acaꞌan techex ta siꞌpirex, bayiriꞌ xan, mʌꞌ ta quibex u tꞌʌn Cꞌuj. Mʌꞌ jariꞌ, quireꞌ mʌꞌ u winiquirechex judío, rajen mʌꞌ a werex a baꞌ cu yaꞌaric u tꞌʌn Moisés. Chen bajeꞌrer, toc ricꞌsaꞌbechex quir a cuxtarex yejer Cristo, a mac tu jawsaj a siꞌpirex bajeꞌrer.
\v 14 A Cꞌujoꞌ, mʌꞌ tu chen jawsaj ic siꞌpirex, tu rʌc rucꞌsaj u tꞌʌn Moisés, a cu taꞌquic ic joꞌrex tiꞌ ic siꞌpirex. A raꞌ u qꞌuinin caj quinsaꞌb Jesús ich cruz, raꞌiriꞌ u qꞌuinin toc rucꞌsaꞌb u tꞌʌn Moisés.
\v 15 Bareꞌ caj quimij Jesús ich cruz, a ray u qꞌuininoꞌ, caj rubsaꞌb u mucꞌ a quisinoꞌ yejer yet quisinin. Quireꞌ quimij Jesús ich cruz, Cꞌuj tu yesaj, tu toc chꞌesaj u mucꞌ quisin, quireꞌ u parar Cꞌuj cꞌuchaꞌan yor tiꞌ a quisinoꞌ. Rajen, mʌꞌ u cꞌuchur yor toꞌonex a quisinoꞌ. 
\s Caꞌ a cʌxtex a baꞌ tsoy tu tꞌʌn Cꞌuj
\p
\v 16 Rajen, mʌꞌ a chꞌic suraquirex wa mac cu pʌqꞌuic a pachex, cax a baꞌ ca jantiquex, cax a baꞌ ca wucꞌurex, cax wa mʌꞌ a cʌnantiquex u qꞌuinin tu cu quiꞌ janʌnob wa raꞌ ic nʌꞌoꞌ, cax wa raꞌ yaxqꞌuinoꞌ, cax wa raꞌ u qꞌuinin tu cu jeꞌrar u winiquirob judío.
\v 17 Aroꞌ a tin chen araj techex, cu chen camsicoꞌonex, yʌn toy a cu bin tar caꞌ bin cꞌuchuc tu qꞌuinin soc a werex a jach tajoꞌ, a rayoꞌ chen u yochir ca wiriquex. Rajen aroꞌ mʌꞌ nojiꞌ, quireꞌ caj tarij Cristo ich yocꞌocab jeroj rajiꞌ u bʌjiriꞌ ic Jaj Tsꞌurirex.
\v 18 Mʌnaꞌ mac yʌn aric techex wa mʌꞌ tsoy bic tabar ca cꞌujintiquex Cꞌuj, quireꞌ tan a wesiquex wa mʌꞌ caremechex. Tan u chich aricob techex wa caꞌ a cꞌujintiquex u yʌjmasirob u tꞌʌn Cꞌuj. Robob, cu tusaricob tu tu wʌyʌcꞌtajob Cꞌuj, rajen tsoy tu tꞌʌn. Mʌꞌ a quibiquex tiꞌob quireꞌ cu tusaricob jach caremob. Cꞌas cu tucricob rajen jot aroꞌ. 
\v 19 Robob cu tus tucricob ij quet acsʌꞌorirex, cax mʌꞌ tan u sayʌrob tu pach a baꞌ cu camsicoꞌonex Cristo, a mac ic Jaj Tsꞌurirex, quireꞌ rajiꞌ ic joꞌrex. Mʌꞌ ja wirej, rajiꞌ cu chichquintic u mucꞌob tu cotor in winquirirob. Rajen, cꞌuchaꞌan ij corex ic beyajex tiꞌ Cristo, a baywoꞌ jeꞌ ic tsoytarex an ten bic Cꞌuj u cꞌat u tsoyquinticoꞌonex. 
\v 20 A techexoꞌ tu cajar Colosas, a werex caj quimij Cristo quet quimechex xan. Rajen, baꞌwir ca chaꞌiquex u jer u chich aricob techex caꞌ a cꞌujintiquex Cꞌuj an ten bic u tus ʌjcamsayʌjirob u tꞌʌn Cꞌuj u cꞌatob.
\v 21 Rajen mʌꞌ a quibiquex a cu yaꞌaricob: “Mʌꞌ a tʌriquex a jeꞌraꞌ, quij. Mʌꞌ a chiꞌiquex aroꞌ, quij, mʌꞌ a tumtiquex ara xanoꞌ.”
\v 22 Mʌꞌ ja wirej, aroꞌ chen u bʌjiriꞌob u tꞌʌnob. Aroꞌ jariꞌ u tꞌʌn winic tan a quibiquex, mʌꞌ u tꞌʌn Cꞌujiꞌ. A uchoꞌ, mʌꞌ noꞌj quic chen cꞌʌniquex quireꞌ ic jantiquex. 
\v 23 A baꞌ cu chich aricob techex caꞌ a cʌnex yejer a baꞌ cu camsiquechex cu tus tucricob jach manan tsoy. Rajen cu tus cꞌujinticob a baꞌquiriꞌ u bʌjiriꞌob tu tucrajob. Mʌꞌ ja wirej, cu tus tucricob mʌꞌ necaremob tu cu tus cꞌujinticob yʌjmasirob u tꞌʌn Cꞌuj. Tan u tsꞌaꞌbʌr u mucꞌyajob u wʌcꞌʌs winquirir quireꞌ cu tus tucricob jach tsoy tu wich Cꞌuj aroꞌ. Cax cu beticob aroꞌ mʌꞌ ju cꞌuchur yorob u pꞌʌticob a baꞌ cꞌasir cu pachticob tu yorob xan.

\c 3
\p
\v 1 Mʌꞌ ja wirej, wa ber caj ricꞌsaꞌb Jesús ten Cꞌuj uch quir u cuxtar quet bayiriꞌ ricꞌsaꞌbechex xan, quir a cuxtarex soc a manex tu tsoyir. Rajen caꞌ a cʌxtex a baꞌ tsoy tu tꞌʌn Cristo, a rajiꞌ tiꞌ yʌn ich u noj Cꞌuj quireꞌ rajiꞌ jach yʌn u mucꞌ Cꞌuj a caremoꞌ.
\v 2 Toc tsꞌajex a tucurex tiꞌ a baꞌ u cꞌat Cꞌuj. Rajraꞌ caꞌ tucriquex a tiꞌoꞌ soc mʌꞌ a chen cʌxtiquex a baꞌ yʌn teꞌ ich yocꞌocabaꞌ.
\v 3 Quireꞌ a techexoꞌ quimenechex tiꞌ a baꞌ oc a tsꞌurintajex uch, a tu pʌy a siꞌpirex uch. Toc yʌn a cuxtarex munt qꞌuin a tan u cʌnantaꞌr ten Cristo techex bajeꞌrereꞌ. 
\v 4 Caꞌ bin uruc Cristo a raꞌ cu cʌnantic, ij cuxtarex munt qꞌuin, a raꞌ cu bin u tsꞌic toꞌonex. A raꞌ u qꞌuininoꞌ, Jesús cu bin esbir ten Cꞌuj ich u sasirir quet yejeroꞌonex a mac a yacsmʌnob tu yorob tiꞌ Cristo.
\s A baꞌ tic tsꞌurintaj uch yejer a baꞌ tic tsꞌurinta bajeꞌrer
\p
\v 5 Rajen, in wet acsʌꞌorirex, toc jumpuriꞌ caꞌ a pꞌʌtex a manex ich a cꞌasirex a tiꞌ yʌn a teraꞌ ich yocꞌocab a ca pachtiquex ta winquirirex. Jot, quij, mʌꞌ a man a wirej a mʌꞌ u mamiꞌ, bayiriꞌ xan a mʌꞌ man a wirej a mʌꞌ a raqꞌuiꞌ, quij. Jot, mʌꞌ a muc a pʌyej xquic ich u racꞌob. Jot, quij, mʌꞌ a pachtic xquic ta wor, bayiriꞌ mʌꞌ a pachtic xib ta wor soc mʌꞌ a bin yejer. Jot, quij, mʌꞌ a pachtic u baꞌtac soc tech yʌnin chꞌic yaꞌab. Mʌꞌ ja wirej, a mac a cu pachtic u baꞌtac soc rajiꞌ yʌnin yaꞌab, rajiꞌ quet yejer a cu tus cꞌujinticob u tus cꞌuj.
\v 6 Mʌꞌ ja wirej, a mac a tiꞌ toy cu manob ich a ray u cꞌasiroꞌ, caꞌ bin cꞌuchuc tu qꞌuinin u xur tꞌʌn, bin u caꞌ tsꞌaꞌbʌr u mucꞌyaj ten Cꞌuj a tiꞌoboꞌ.
\v 7 Cꞌaj techex, a uchoꞌ ta wacsex a siꞌpirex irechex a wet cajarex, raꞌ u qꞌuinin ta tsꞌurintex a cꞌasiroꞌ a tin tsꞌibtaj techex bajeꞌrer.
\v 8 Quireꞌ bajeꞌrer, tsꞌoc a pʌyiquex a siꞌpirex an ten bic a uchoꞌ, rajen cʌnex a wet acsʌꞌorirex xan, tan a pꞌʌtiquex a cꞌasoꞌ bajeꞌrer. Rajen, caꞌ a pꞌʌtex a jeꞌraꞌ, pꞌʌtex a pꞌujurex. Pꞌʌtex a tsꞌictarex. Pꞌʌtex a pꞌactex ta worex a racꞌob. Pꞌʌt a chejtiquex a racꞌob. Pꞌʌt a tsicbarex tiꞌ cꞌas.
\v 9 Toc rʌc pꞌʌtex a pacran tusex, quireꞌ ta toc rʌc pꞌʌtex a baꞌ cꞌasir nani a pʌyiquex uch.
\v 10 Mʌꞌ ja wirej, a cꞌʌmʌnex a ricꞌben cuxtarex bajeꞌrer, rajen tan a nequiꞌ cʌniquex Cꞌuj soc ca pꞌeriꞌquintiquex a tucurex yejer Cꞌuj a mac a tu betajechexoꞌ.
\v 11 Rajen cax mʌꞌ u winiquirechex judío, cax wa ju winiquirechex judío, cax wa ta quibex a tsꞌiriquex a wotꞌerex an ten nani u beticob u winiquirob judío, cax wa mʌꞌ ta quibex a tsꞌiriquex a wotꞌerex an ten nani u beticob u winiquirob judío, cax wa ja werex juꞌun, cax wa mʌꞌ a werex juꞌun, cax wa ju cꞌurewechex mac, cax wa mʌꞌ u cꞌurewechex mac, a baꞌquir toc jach nojoꞌ wa pꞌeriꞌoꞌonex yejer Cristo quireꞌ rajiꞌ acaꞌan tic pixamex.
\p
\v 12 A techexoꞌ u winiquirechex Cꞌuj. Quireꞌ tu yajquintechex Cꞌuj rajen tu tetechex soc rajiꞌ yʌninechex. Quireꞌ tan a cʌniquex Cꞌuj a bajeꞌreraꞌ, caꞌ a yajquintex a racꞌobex, quireꞌ caꞌ a yamtex a tiꞌoboꞌ, mʌꞌ tsꞌutechex yejerob a wet acsʌꞌorirexiꞌ. Caꞌ a toc tucrex a wet acsʌꞌorirex an bic tsoyoꞌ, mʌꞌ a cʌxtiquex a baꞌquiriꞌ a bʌjiriꞌex a cꞌatexeꞌ. Caꞌ a cʌnex nemʌꞌ biquechex yejer a mac a cu pꞌusiquexob, quireꞌ mʌꞌ ja nunquicobex tiꞌ.
\v 13 Yʌn mucꞌtex u choquintic a worex a wet acsʌꞌorirex. Cax wa tu choquint a worex a wet acsʌꞌorirex, yʌn jawsex u siꞌpir a tiꞌoꞌ, cax wa baꞌquir u choquintic a worex an ten bic toc jawsaꞌb a siꞌpirex ten ic Jaj Tsꞌurirex Jesús. Yʌn toc jawsex u siꞌpir a wet acsʌꞌorirex xan. 
\v 14 Quireꞌ a werex a baꞌ jach manan noꞌjoꞌ wa ca yajquintiquex a wet acsʌꞌorirex. Rajen cu pꞌeriꞌquinticob yorob u yet acsʌꞌorirob quireꞌ u yajob u bʌj rajen quet yorob yejer yet acsʌꞌorirob.
\v 15 Mʌꞌ ja wirej, a Cristojoꞌ tu pʌyechex u bʌjiriꞌ soc a pꞌeriꞌquintic a worex yejer Cristo. Rajen caꞌ a pachtex a pꞌeriꞌquintic a worex yejer a wet acsʌꞌorirex. Mʌꞌ a betiquex a baꞌquir a cu jocꞌsic yor a wet acsʌꞌorirex. 
\p
\v 16 A techexoꞌ, caꞌ a chaꞌex u tsꞌurintic u tꞌʌn Cꞌuj a pixamex soc cꞌuchaꞌan a worex a pacran camsiquex a bʌjex xan, soc a pacran chich tꞌʌniquex a bʌjex, quij, a baywoꞌ jeꞌ a cꞌʌyiquex u cꞌay Cꞌuj, soc a waꞌariquex: “Bayoꞌ tiꞌ Cꞌuj.”
\v 17 Tu cotor a baꞌ beyajir ca betiquex, cax tu ca tsꞌicbarex, cax tu ca beyajex caꞌ a wesex tiꞌ mac soc yer mac rajiꞌ yʌninechex wa a Jaj Tsꞌurirex Jesucristo. Rajiꞌ jeꞌ u yamtiquechex soc a wʌcꞌʌs ariquex: “Bayoꞌ tiꞌ ic Tetex Cꞌuj.”
\s Quireꞌ tij cacsex tij corex tiꞌ Cristo caꞌ ij quibex a jeꞌ tꞌʌnaꞌ
\p
\v 18 A mac a chꞌaꞌb raqꞌuinbir ten xib, a xquicoꞌ caꞌ u quib u tꞌʌn u mam, quireꞌ tu yacsaj tu yor tiꞌ Cristo. 
\v 19 A mac mamintaꞌb ten xquic caꞌ u yajquint u racꞌ, caꞌ u quiꞌ cʌnantej soc mʌꞌ u tsꞌictar tiꞌ u racꞌ. 
\v 20 Arej tiꞌ a pararex, soc u quibob u tꞌʌn u tet yejer u nʌꞌob soc u quiꞌquinticob yor Cꞌuj. Rajraꞌ caꞌ u quibob u tꞌʌn u tetob, quireꞌ tu yacsob tu yorob tiꞌ Cristo. 
\v 21 U tetechex a pararex, mʌꞌ a yʌn tsꞌiquintiquex a pararex soc mʌꞌ a tupsiquex yorob a pararex.
\v 22 A mac cꞌurewintaꞌb ten u jach tsꞌurir. Rajraꞌ caꞌ a quibex u tꞌʌn a jach tsꞌurirex. Mʌꞌ a chen quibiquex tu qꞌuinin tu cu tar yir a beyajex soc a wuꞌyiquex yaꞌaric techex a jach tsꞌurirex: “Jach tsoyechex quireꞌ ca beyajex.” Caꞌ a quiꞌ beyanʌquechex taj quireꞌ ca sʌjtiquex Cꞌuj.
\v 23 Tu cotor a baꞌ ca betiquex, quiꞌ beyanenex quireꞌ tan a quiꞌ beyajex tiꞌ Cꞌuj, cax tiꞌ a jach tsꞌurirex xan ca beyajex.
\v 24 Yʌn cꞌaj techex a Jaj Tsꞌurirex jeꞌ u boꞌotiquechex u boꞌorir a cꞌʌbex wa ja woquex xan. Jeꞌ a cꞌʌmiquex a cuxtarex munt qꞌuin tiꞌ Cristo xan, quireꞌ rajiꞌ a Jaj Tsꞌurirex tu ca beyajex tiꞌ xan.
\v 25 A Cꞌujoꞌ quet cu yiric tu cotor mac, quireꞌ cu boꞌotic u boꞌorir mac, a baꞌ cu jaric, cax wa mʌꞌ quiꞌ beyanʌjiꞌ mʌꞌ ju quiꞌ boꞌtar. Wa tsoy quiꞌ beyanʌjij cu quiꞌ boꞌtaꞌr. 

\c 4
\p
\v 1 A techexoꞌ, a cu jach tsꞌurintechex a cꞌurewex, caꞌ a betex tsoy tiꞌ a cꞌurewex. Mʌꞌ coyen a qꞌueyiquex a tiꞌoboꞌ, chen taj a cꞌʌniquex a tiꞌoboꞌ. Cꞌaj techex tiꞌ yʌn a tsꞌurirex xaniꞌ, quireꞌ ta wacsex ta worex tiꞌ. Rajiꞌ a tiꞌ yʌnoꞌ ich caꞌananoꞌ.
\v 2 Tu ca bin a tꞌʌnex Cꞌuj, pꞌisex a bʌjex a tꞌʌnex a tiꞌoꞌ, soc mʌꞌ u tar a tucurex tuꞌ ca tꞌʌniquex Cꞌuj. Arex tiꞌ Cꞌuj: “Bayoꞌ”, wa ber ca tꞌʌniquex a tiꞌoꞌ.
\v 3 Raꞌ u qꞌuinin ca bin a tꞌʌnex Cꞌuj, tꞌʌnex Cꞌuj tenob soc mʌnaꞌ mac cu mʌꞌquej in berob tu quin tsecꞌticob u tꞌʌn Cꞌuj. Tꞌʌnex Cꞌuj soc u quiꞌ cꞌʌmiquenob quir in tsicbarob tiꞌob Cristo, a mac tarij quir u jawsic u siꞌpirob soc cꞌuchaꞌan yorob u binob caꞌanan. Mʌꞌ ja wirej, a uchoꞌ mʌnaꞌ mac yer aroꞌ, rajen tu chucajenob u winiquirob judío caj u cꞌʌrajenob uch.
\v 4 Tꞌʌnex Cꞌuj xan, soc caꞌ bin in tsecꞌtej u tꞌʌn Cꞌuj, soc u quiꞌ najticob soc yerob bic tabar quin tsecꞌtic. 
\v 5 Quiꞌ cʌnantex a bʌjex bic tabar a tꞌʌniquex a mac a mʌꞌ yerob Cꞌuj, quireꞌ mʌꞌ yaꞌab u qꞌuinin quir u yuꞌur Cristo, rajen tꞌʌnex a tiꞌoboꞌ caꞌ u yubob Cristo. 
\v 6 Caꞌ bin a tꞌʌnex mac, quiꞌ ca tꞌʌniquex soc u tucricob jach tsoy a tꞌʌniquex. Bayiriꞌ xan, soc a werex bic tabar a nunquiquex u tꞌʌnob a mac a mʌꞌ yerob Cꞌuj soc u yacsicob tu yorob xan.
\s Pablo cu rʌc tꞌʌnic u yet acsʌꞌorirob
\p
\v 7 Caꞌ bin cꞌuchuc tu yʌnechex ij quet acsʌꞌorirex, u cꞌabaꞌ Tíquico, aroꞌ bin u caꞌ tsicbar techex a baꞌ in ber a tenoꞌ. A Tíquicojoꞌ, in jach yaj, quireꞌ caj u quiꞌ yamten, mʌꞌ ju pꞌʌt u beyaj hasta tu tsꞌocs u beyaj a tiꞌoꞌ. Quet caj beyanʌjen yejer u beyaj in Jaj Tsꞌurob.
\v 8 A mac a quin tuchiꞌtic techex, bin u caꞌ chichquint a worex soc a werex bic tabaren tu mʌcaꞌanen tu cu maꞌcʌr winicob, rajen tan in tuchiꞌtic techex Tíquico. 
\v 9 Yet tar Onésimo caꞌ bin tac Tíquico tu yʌnechex. Rajiꞌ in jach yaj xan, tan u quiꞌ beyaj tiꞌ ic Jaj Tsꞌurirex. Aroꞌ tiꞌ cʌjaꞌan ta cajarex uch. A baꞌ u ber a teraꞌ ich u cajar Roma tiꞌ a wet acsʌꞌorirex, jeꞌ u tsicbʌticob tiꞌ techex soc a wuꞌyiquex a baꞌ u berob ich u cajar Roma.
\p
\v 10 Bayiriꞌ in wet cꞌʌraꞌan winic, u cꞌabaꞌ Aristarco cu yaꞌaric caꞌ in tꞌʌnechex. Bayiriꞌ xan, u yum Bernabé, u cꞌabaꞌ Marcos, cu tꞌʌniquechex. A uchoꞌ rajiꞌ caj in tsꞌibtajex juꞌun soc a quiꞌ acsiquex caꞌ bin cꞌuchuc tu yʌnechex.
\v 11 A jeꞌraꞌ Jesús u cꞌabaꞌ, cu tꞌʌniquechex. Rajiꞌ caꞌtur u cꞌabaꞌ, u jer u cꞌabaꞌ Justo. Robob jaririꞌ ich in wet winiquirob judío a tu yacsob tu yorob. A jeꞌ tresaꞌ cu yamtiquenob tan u tsecꞌticob u tꞌʌn Cꞌuj. Robob tu chichquintob in wor.
\v 12 Jeroj cu tꞌʌniquechex Epafras. Rajiꞌ cʌjaꞌan ta cajarex uch. Bayiriꞌ xan, cu beyaj tiꞌ Cristo. A Epafrasoꞌ, rajraꞌ cu tꞌʌnic Cꞌuj techex. Cu mucꞌyaj tu cu tꞌʌnic Cꞌuj techex. Rajraꞌ tan u tꞌʌnic Cꞌuj soc wa baꞌ a ber techexoꞌ soc mʌꞌ a pꞌʌtiquex u tꞌʌn Cꞌuj. Cu tꞌʌnic Cꞌuj soc a manex tu tsoyir soc a betiquex a baꞌ tsoy tu tꞌʌn Cꞌuj.
\v 13 Mʌꞌ ja wirej, a tenoꞌ tin wiraj tin wich bic mucꞌyajnʌjij tu cu tꞌʌnic Cꞌuj techex. Mʌꞌ chen tiꞌ techex cu tꞌʌnic Cꞌuj, cu tꞌʌnic Cꞌuj a mac a cʌjaꞌan tu cajar Laodicea, bayiriꞌ xan cu tꞌʌnic Cꞌuj tiꞌ a mac a cʌjaꞌanoꞌ tu cajar Hierápolis.
\v 14 A Lucasoꞌ cu tꞌʌniquechex, rajiꞌ ic jach yajoꞌ. A Lucasoꞌ rajiꞌ cu tsꞌʌquic macoꞌ, bayiriꞌ Demas cu tꞌʌniquechex. 
\v 15 Tꞌʌnex ten ij quet acsʌꞌorirex, a tiꞌ yʌnob tu cajar Laodicea. Bayiriꞌ xan, tꞌʌnex a mac a cu tar u muchꞌquintob u bʌj quir yubicob u tꞌʌn Cꞌuj tu yatoch Ninfas. Tꞌʌnex Ninfas, a mac xquic xan, ij quet acsʌꞌorirex.
\v 16 Caꞌ bin tsꞌocac a xaquiquex a jeꞌ juꞌunaꞌ, caꞌ a tuchiꞌtex tiꞌ a yacsmʌnob tu yorob tu cajar Laodicea soc u xaquicob xan. Bayiriꞌ xan, caꞌ a xaquex u juꞌun a tin tsꞌibtaj tiꞌ a yacsmʌnob tu yorob ich u cajar Laodicea. Jeꞌ u caꞌ puric techex xan.
\v 17 Arex tiꞌ Arquipo: “Caꞌ a tsꞌocs a beyaj Arquipo a ta cꞌʌmajech tiꞌ ic Jaj Tsꞌurirex uch.” Baxuc caꞌ a waꞌarex tiꞌ ich u cajar Colosas.
\p
\v 18 A tenoꞌ Pablojen, tin tsꞌib techex quir in tꞌʌniquechex. Quiꞌ cꞌaj techex wa tiꞌ yʌnen tu cu maꞌcʌr winicob. A tenoꞌ in cꞌat caꞌ u quiꞌ cʌnan techex Cꞌuj, jeroj tsꞌoquij, quij Pablo.