\id 1TH
\h 1 TESALONICENSES
\toc1 1 TESALONICENSES
\mt1 A JEꞌ JUꞌUNAꞌ, CAJ U YɅN BATꞌAN TSꞌIBTA PABLO TIꞌ U YET ACSɅꞌORIROB ICH U CAJAR TESALÓNICA
\mt2 1 TESALONICENSES
\c 1
\s A Pablojoꞌ quet u tsꞌib yejer u nupꞌ tu cu naj cꞌujinticob Cꞌuj tu cajar Tesalónica
\p
\v 1 A tenoꞌ, Pablojen, quin tsꞌibtic techex a jeꞌ juꞌunaꞌ yejer Silvano quin tsꞌibtic. Yejer Timoteo quin tsꞌibtic techex xan. Quin tsꞌibticob techex ij quet acsʌꞌorirex tu ca muchꞌquintiquex a bʌjex quir a cꞌujintiquex Cꞌuj ich u cajar Tesalónica. Quin tsꞌibticob techex quireꞌ pꞌeriꞌ a worex yejer ic Tetex Cꞌuj. Baxuc, pꞌeriꞌ a worex yejer ic Jaj Tsꞌurirex Jesucristo xan. A tenob, quin tꞌʌnicob Cꞌuj techex caꞌ u yamtechex ic Tetex Cꞌuj. Baxuc tiꞌ ic Jaj Tsꞌurirex Jesucristo. Caꞌ quiꞌac a worex tiꞌ ic Tetex Cꞌuj soc mʌnaꞌ baꞌ ca tucriquex. Baxuc tiꞌ ic Jaj Tsꞌurirex Jesucristo, xan.
\s Taj tan u cꞌʌmicob u tꞌʌn Cꞌuj ich u cajar Tesalónica 
\p
\v 2 U qꞌuinin quin cꞌʌꞌotiquechex quin tꞌʌnicob Cꞌuj techex: “Bayoꞌ Cꞌuj”, quen tiꞌ, quireꞌ a mac a tiꞌ cʌjaꞌanob ich u cajar Tesalónica. Rajraꞌ quin waricob tiꞌ Cꞌuj: Bayoꞌ. 
\v 3 Wʌ ber quin tarob ʌcʌtan tiꞌ Cꞌuj quin tꞌʌnicob. Quin cꞌʌꞌoticob bic tabar caj a wacsex ta worex tiꞌ Cristo rajen ca beyajex tiꞌ Cꞌuj. Quireꞌ tan a pajiquex caꞌ bin tac Jesucristo ic Jaj Tsꞌurirex. Rajen tan a chichquintiquex a worex soc mʌꞌ a pꞌʌtiquex u tꞌʌn Jaj Tsꞌur tu ca mucꞌyajex. 
\v 4 In bʌjobechex a mac a yajquintaꞌb ten Cꞌuj. In werob tu tetechex Cꞌuj soc raꞌ yʌninechex.
\v 5 Caj tarenob in camsiquechexob bic tabar a taꞌquiquex a bʌjex. Mʌꞌ chen tꞌʌn in caꞌob uch caj in tsecꞌtob u tꞌʌn Cꞌuj chen yejer u mucꞌ u Tajꞌor u Pixam Cꞌuj caj in tsecꞌtajob techex. Caj in tsecꞌtob uch quireꞌ in werob raꞌ jach taj u tꞌʌn Cꞌuj quin waricob techex, a jach erex a tiꞌ cʌjaꞌanenob ich a cajarex quir in yamtiquechexob quir a cʌnex u tꞌʌn Cꞌuj uch.
\p
\v 6 A bʌjiriꞌ caj a cʌnmʌnenobexeꞌ baxuc caj a cʌnex Jaj Tsꞌur xan. Quiꞌ a worex caj a cꞌʌmex u tꞌʌn Cꞌuj. Caj u quiꞌquintaj a worex, u Tajꞌor u Pixam Cꞌuj cax ca mucꞌyajnʌjex uch.
\v 7 Baxuc caj u cʌnob a nachirob. Baxuc caj u cʌna techex a mac cʌjaꞌan tu cajarob ich u ruꞌumin Acaya. Bayiriꞌ xan, a mac a cʌjaꞌan tu cajarob ich u ruꞌumin Macedonia. Mʌꞌ ja wirej, tu cʌnob techex quireꞌ tu yirob a quiꞌ acsmʌnex ta worex u tꞌʌn Cꞌuj.
\v 8 Mʌꞌ jariꞌ ta wacsex ta worex chen caj binechex a tsecꞌtex u tꞌʌn Cꞌuj ich tu cotor u cajarob tu ruꞌumin Macedonia. Bayiriꞌ tu ruꞌumin Acaya ta tsecꞌtex tiꞌob. Baxuc ich tantanxer u ruꞌumin tu yubob bic ta wacsex ta worex u tꞌʌn Cꞌuj. Mʌꞌ baꞌwir quin tsecꞌtic bic tabar ta wacsex ta worex quireꞌ tu toc uꞌyob.
\v 9 Tu cotor mac u bʌjiriꞌ cu tsicbar tenob tiꞌ techex. U bʌjiriꞌ cu tsicbarob tenob a cu cꞌuchur tu yʌnenob. Caj u tsicbarob tenob, raꞌ qꞌuinin caj tarenob in wiriquechex uch. Caj yaꞌarob bic ta quiꞌ acsenobex, tan a rʌc pꞌʌtiquex a tus cꞌujintiquex u rʌquir cꞌuj soc Jach Cꞌuj ca quiꞌ cꞌʌmiquex soc a beyajex tiꞌ Jach Cꞌuj. Rajiꞌ ca beyajex tiꞌ jach cuxaꞌan. Rajiꞌ jach Cꞌuj a cuxaꞌanoꞌ.
\v 10 Rajiꞌob caj u tsicbatob a tenoboꞌ bic tabar bajeꞌrer tan a pajiquex Jesús ich caꞌanan. Rajiꞌ u parar Cꞌuj, caj wʌcꞌʌs ricꞌsaꞌb tu quimirir Jesús ten Cꞌuj. Rajiꞌ a cu taꞌquicoꞌonex tu cu bin u jʌsicob Cꞌuj u qꞌuinin caꞌ bin xuruc tꞌʌn soc mʌꞌ ic binex erar ich cꞌacꞌ. 
\c 2
\s Tiꞌ cu beyaj Pablo yejer u racꞌob ich u cajar Tesalónica 
\p
\v 1 A bʌjiriꞌeꞌ, quij Pablo, in bʌjobechex a werex caj tarenob in wirechexob. Caj in tsicbʌtob techex quireꞌ tu tsꞌaj tenob in mucꞌ u Tajꞌor u Pixam Cꞌuj.
\v 2 Mʌꞌ wa cꞌajtechex caj tarenob tu cʌjaꞌanechex uch, caj cꞌuchenob tu cajar Filipos. Tiꞌ tu pꞌastenob tu cajar Filipos. Tiꞌ tu chuc u jʌtsꞌenob in pachob. Aroꞌ a werex caj u jʌtsꞌob in pachob. A mac a quin cꞌujinticob a jach Cꞌujoꞌ, caj u yamtenob caj in tsecꞌtechex soc a najtiquex a jach tsoyir u tꞌʌn Cꞌuj.
\v 3 Cax mʌꞌ u chaꞌicob a wuꞌyiquex u tꞌʌn Cꞌuj, cax caj u chejtenob, a tenoboꞌ caj in tsicbatob a wuꞌyex u tꞌʌn Cꞌuj. Caj tarenob mʌꞌ cꞌas tin waꞌarob techexiꞌ. In werob u jach tajir u tꞌʌn Cꞌuj. Mʌꞌ tarenob quir in tus aricob techexiꞌ. Mʌꞌ tarenob quir in cꞌaticob a taqꞌuinexiꞌ. Chen jach tarenob, mʌꞌ ja wirej, a Cꞌujoꞌ tu tumtaj yirej wa tsoy in worob. Caj tsꞌoc yiriqueꞌ caj u tuchiꞌtenob caꞌ xiquenob in tsicbarob tiꞌ u jach tsoyir u tꞌʌn Cꞌuj.
\v 4 A mac a yer ic pixamex, a Cꞌujoꞌ yer ic pixamex. Rajiꞌ in cꞌatob in quiꞌquinticob yor Cꞌuj. Mʌꞌ in cꞌatob in quiꞌquinticob yor xibiꞌ tu quin tsicbarob u tꞌʌn Cꞌuj. 
\v 5 Quireꞌ caj tarenob mʌꞌ tin tsicbʌtob bic tabar jach tsoyechexiꞌ. Baxuc a werex. Mʌꞌ in tusarob techex soc a quiꞌ acsiquenobex. Mʌꞌ jin tus pachtob u tꞌajʌr in taqꞌuinobiꞌ. A Cꞌujoꞌ cu yiric mʌꞌ jin tusarob techex. 
\v 6 Mʌꞌ tarenobiꞌ quir u sʌjtiquenob u jer winicobiꞌ cax wa techex xan. Mʌꞌ ja wirej, cꞌuchaꞌan in worob in cꞌatiquechexob caꞌ a sʌjtenob quireꞌ tu tuchiꞌten ten Cristo quir in tsecꞌtic u jach tsoyir u tꞌʌn Cꞌuj tu yʌnechex.
\v 7 Mʌꞌ tin cꞌatob techex caꞌ a sʌjtenobiꞌ quireꞌ quin quiꞌ yajquinticob techex. Mʌꞌ ja wirej, tin cʌnatechexob irenob a nʌꞌenob a techexoꞌ. Tan in quiꞌ tsemtiquechexob irechex in pararob soc in quiꞌ cʌnantiquexob.
\v 8 A tenoboꞌ jach manʌn caj in yajquintob techex. Rajen mʌꞌ jariꞌ quin tsꞌicob techex u jach tsoyir u tꞌʌn Cꞌuj, cax quin quinsaꞌob tiꞌ techex xan.
\v 9 Mʌꞌ ja wirej, jach manan chich beyajenob uch? Chich beyanʌjenob tu yʌnechex ich techexoꞌ soc in jaricob in taqꞌuinob soc raꞌ quir in janʌnob. Chich beyanʌjenob soc mʌꞌ in tꞌʌnicob mac quir u tsꞌic in woꞌochob soc in tsecꞌticob techex u jach tsoyir u tꞌʌn Cꞌuj uch. 
\p
\v 10 Raꞌ ta wirex uch. Caj a wirexiꞌ tiꞌ cʌjaꞌanenobiꞌ ta wicnʌnex uch. Baxuc Cꞌuj tu yiraj mʌnaꞌ baꞌ tin betob. Quiꞌ manenob tu tsoyir tu yʌnechex a tu yacsajob tu yorob u tꞌʌn Cꞌuj uch. Cꞌuj caj yiraj mʌꞌ baꞌ tin betob soc a taꞌquic in joꞌrob.
\v 11 Baxuc xan, a werex tan in manob in chichquinticob yor a jujunturiꞌ mac soc u manob tu tsoyir, irenob wa ja tetenex quin manob in chichquinticob yor in pararob. 
\v 12 Tin chich arob techex uch, soc mʌꞌ a manex tu cꞌasir soc a cʌniquex Cꞌuj. Mʌꞌ ja wirej, tu pʌyechex Cꞌuj soc quet a reyintiquex Cꞌuj tu sasirir.
\p
\v 13 Rajen rajraꞌ quin tꞌʌnicob Cꞌuj tan in waꞌaricob tiꞌ: “Bayoꞌ Cꞌuj”, quen tiꞌ, quireꞌ in bʌjob a tiꞌ yʌnob tu cajar Tesalónica. Baxuc quin waꞌaricob tiꞌ Cꞌujoꞌ. Mʌꞌ ja wirej, caj a wuꞌyex u tꞌʌn Cꞌuj a tin tsecꞌtajob techex ucheꞌ. Caj a cꞌʌmajex u tꞌʌn Cꞌuj quireꞌ a werex a jeꞌ tꞌʌnaꞌ tiꞌ u tar ich Cꞌujiꞌ quireꞌ mʌꞌ u tꞌʌn xibiꞌ. Tan u beyaj techex u tꞌʌn Cꞌuj quireꞌ ta wacsajex ta worex tiꞌ u tꞌʌn Cꞌuj. Rajen quin wacob u jach tꞌʌn Cꞌuj techex.
\v 14 Yʌn baꞌ a berechex tiꞌ u tꞌʌn Cꞌuj in bʌjobechex caj u chucob a pachex a wet cajarex. Baxuc xan, caj u chucob u pachob a wet acsʌꞌorirex Jesucristo tu cu cꞌayob tu ruꞌumin Judea. Rajiꞌob chucob u pachob ten u yet cajarob u winiquirob judío.
\v 15 Caj u quinsob ic Jaj Tsꞌurirex Jesús u winiquirob judío. Rajiꞌob caj u quinsob yʌjtsecꞌirob u tꞌʌn Cꞌuj uch xʌn. Rajiꞌob caj u jocꞌsenob ten yejer Silvano yejer Timoteo. Mʌꞌ tan u quiꞌquinticob yor Cꞌuj u winiquirob judío. Jach manan cu tsꞌiquinticob tu cotor mac.
\v 16 Quireꞌ caj binenob in tsecꞌtob u tꞌʌn Cꞌuj ich mʌꞌ u winiquirob judío.
\p Caj yaꞌarob ten u winiquirob judío: “Tsꞌoc a tsecꞌtiquex tiꞌob, tsireꞌej a tsecꞌtiquex tiꞌobeꞌ”, cax in cꞌatob in tsecꞌtic quir u taꞌquicob u bʌjob. Mʌꞌ ju chaꞌob in tsecꞌtob u tꞌʌn Cꞌuj. Rajen tan u jach tꞌajar u siꞌpirob. Jeroj cꞌuchij tu qꞌuinin bajeꞌrer cu tsꞌiquinticob Cꞌuj. Jach yaj cu bin yubob a mac a cu tsꞌiquinticob Cꞌujoꞌ. 
\s A Pablojoꞌ u cꞌat u wʌcꞌʌs bin u tsicbʌtic u bʌjob tu cajar Tesalónica
\p
\v 17 Barej caj in jamach pꞌʌtob a techexoꞌ, in bʌjobechex ta cajarex Tesalónica. Cax mʌꞌ in wiricob a wichex naꞌan in tucriquechex tin worob. Jach manan in cꞌat in tar in wiriquechex.
\v 18 A tenoꞌ in cꞌat in wʌcꞌʌs tar in wirechex cax ten Pablojen quin bin tin junan, quij Pablo. Rajraꞌ tu suꞌsenob a quisinoꞌ. Satanás u cꞌabaꞌ. Cax yaꞌab in cꞌat in tarob in wiriquechex. Rajraꞌ tu suꞌsenob a quisinoꞌ.
\v 19 Caꞌ bin uruc ic Jaj Tsꞌurirex Jesús, a werex baꞌ quin pachticob tin worob? Caꞌ in wirob techex yicnʌn Cꞌuj. Rajen tan in pajicob u qꞌuinin quir u tar soc in wiricob a wichex. Jach manan quiꞌ in worob in wiricob techex ich yicnʌn Cꞌuj. Quireꞌ rajiꞌ cu bin yiraj taj in beyajob a Cꞌujoꞌ.
\v 20 Quireꞌ tu yirob a racꞌobex taj in beyajob. Mʌꞌ ja wirej, a techexoꞌ, jach taj ta nequiꞌquintex in worob. 

\c 3
\p
\v 1 Mʌꞌ ja wirej, mʌnaꞌ baꞌ tin wuꞌyob techex uch. Mʌꞌ jin mucꞌobiꞌ tan u jacꞌʌr in worob. Rajen tiꞌ pꞌatenob tin junanob tu cajar Atenas yejer Silvano.
\v 2 Caj in tuchiꞌtob caꞌ tac yirechex ta cajarex Tesalónica ic bʌjobechex Timoteo. Mʌꞌ ja wirej, in nupꞌob Timoteo in wet beyajob tu quin tsecꞌticob u tꞌʌn Cꞌuj. Rajiꞌ u cꞌurew Cꞌuj quireꞌ tan u man u tsecꞌt u tꞌʌn Cristo. Tin tuchiꞌtob caꞌ tac ta wicnʌnex quir u quiꞌ camsiquechex tu cotor u tꞌʌn Cꞌuj caꞌ u chich arex techex u tꞌʌn Cꞌuj.
\v 3 Caj in tuchiꞌtob Timoteo caꞌ tac ta wicnʌnex quir u chichquintic a worex tu cu chuquicob a pachex a racꞌob soc mʌꞌ a pꞌʌtiquex u tꞌʌn Cꞌuj. A werex a Cꞌujoꞌ cu chaꞌic u tar quir u chucob a pachex quireꞌ tsoy tu tꞌʌn Cꞌuj toꞌonex.
\v 4 Mʌꞌ jariroꞌ, tiꞌ toy yʌnenob ta wicnʌnex uch. Caj in toc araj techex: Jeꞌ u tar u chucob ic pachex quireꞌ tij cacsex tij corex u tꞌʌn Cꞌujeꞌ. A baywoꞌ, cꞌuchij tu qꞌuinin u chucob a pachex an ten bic a werex bajeꞌrer. 
\v 5 Rajen tin tuchiꞌtob Timoteo ta wicnʌnex. Quireꞌ mʌꞌ ju cꞌuchur in wor in mucꞌtej tu jer qꞌuin. Caꞌ in wirej wa taj ta wacsex ta worex tiꞌ u tꞌʌn Cꞌuj. Caj in sʌjtaj in beyaj quireꞌ ta wʌcꞌʌs acsex a siꞌpirex. Wa ta wʌcꞌʌs acsex a siꞌpirex toc sat in beyaj.
\p
\v 6 Caj tsꞌoc u wʌcꞌʌs ur Timoteo tin wicnʌn ich a cajarex Tesalónica. Caj yaꞌaraj Timoteo tenob, tan u quiꞌ quibicob u tꞌʌn Cꞌuj. Caj yaꞌaraj, tan a quiꞌ yajquintiquex mac, rajen jach quiꞌ in worob. Caj u yaꞌaraj tenob Timoteo, rajraꞌ cꞌaj techex tenob. Tan a quiꞌ tucriquex a tenoboꞌ quireꞌ ta yajquint tenob a techexoꞌ. Caj yaꞌaraj tenob Timoteo bic a techexoꞌ a jach cꞌatex a wiriquenobex. Baxuc a tenoboꞌ, in jach cꞌatob in wiriquechexob xan. 
\v 7 Cax yaꞌab tu jʌtsꞌob in pachob cax, quireꞌ a techexoꞌ in wet acsʌꞌorirex caj a chichquintex in worob. Quireꞌ tan a quibiquex u tꞌʌn Jaj Tsꞌur.
\v 8 Caj tsꞌoc in wuꞌyicob mʌꞌ ta pꞌʌtex u tꞌʌn Cꞌuj, a techexoꞌ. Quireꞌ ta quiꞌ cꞌʌmex u tꞌʌn Cꞌuj rajen caj caꞌ quiꞌjij in worob.
\v 9 Mʌꞌ in wer bic tabar in tꞌʌnicob Cꞌuj techex. Caj in chen arob tiꞌ Cꞌuj: “Bayoꞌ Cꞌuj tiꞌ a mac a cʌjaꞌanob ich u cajar Tesalónica.” Quireꞌ jach manan quiꞌ in worob techex caj in tꞌʌnob Cꞌuj.
\v 10 Rajraꞌ quin chich tꞌʌnicob Cꞌuj wa ju cꞌat Cꞌuj caꞌ taquenob in wiriquechex ta cajarex soc in wiricob a wichex. Mʌꞌ ja wirej, in cꞌatob caꞌ taquenob in yamticob techex soc taj ca wacsiquex a worex u tꞌʌn Cꞌuj, quireꞌ tiꞌ toy caꞌ a cʌnex.
\p
\v 11 A werex in bʌjobechex baꞌ in jach cꞌat tiꞌ ic Tetex Cꞌuj? In cꞌat caꞌ xiquenob in wirechexob. Raꞌ in jach cꞌatob caꞌ u yamtenob ic Tetex Cꞌuj yejer ic Jaj Tsꞌurirex Jesucristo. In cꞌatob caꞌ u yamtejenob soc in tar in wirechex.
\v 12 Quin chich cꞌaticob tiꞌ Cꞌuj soc rajraꞌ cu yamtiquechex Cꞌuj soc a jach yajquintiquex a wet acsʌꞌorirex. Cax tu cotor mac caꞌ a yajquintex an ten bic in yajquinechexob xan.
\v 13 Quin chich cꞌaticob tiꞌ Cꞌuj caꞌ chichac a worex soc mʌꞌ a wacsiquechex a siꞌpirex. A baxucoꞌ mʌnaꞌ mac cu bin u taꞌc a joꞌrex tiꞌ ic Tetex Cꞌuj caꞌ bin tac Jaj Tsꞌur quir u muchꞌquinticob u bʌj yejer yet acsʌꞌorirob xan.
\c 4
\s A baꞌ cu quiꞌquintic yor Cꞌuj
\p
\v 1 Bin u caꞌ tsꞌocar in wacob techex bajeꞌrer, in bʌjobechex. Chich quin wacob techex quireꞌ baxuc u cꞌat Jesucristo caꞌ in chich arej techex. Rajen quin chich cꞌaticob techex caꞌ a quiꞌ cʌnex a baꞌ tin camsob techex tiꞌ u tꞌʌn Cꞌuj quireꞌ tan a sayʌrex tu pach Jesús.
\v 2 Mʌꞌ wa cꞌaj techex a baꞌ tin camsexob, a uchoꞌ? Rajen tin camsechexob quireꞌ baxuc caj u toc araj Jesús ic Jaj Tsꞌurirex. Rajiꞌ a werex.
\v 3 A Cꞌujoꞌ u cꞌat techex caꞌ a cʌnex Cꞌuj soc mʌnaꞌ a siꞌpirex, soc mʌꞌ a wacsiquex a siꞌpirex. A Cꞌujoꞌ mʌꞌ u cꞌat yirechex a manex ich u cꞌasir mac.
\v 4 A Cꞌujoꞌ u cꞌat yiriquechex yejer a raqꞌuiriꞌeꞌ. Tsoy yiric a Cꞌujoꞌ wa maquix yʌn u raqꞌuirireꞌ.
\v 5 A Cꞌujoꞌ mʌꞌ u cꞌat yirechex a manex yejer a xquic a mʌnaꞌ u mam, mʌꞌ tsoyiꞌ. Mʌꞌ ja wirej, a mac a mʌꞌ yacsmʌnob tu yorob mʌꞌ yer Cꞌuj, raꞌ cu pachticob xquic. 
\v 6 Mʌꞌ a yʌn cʌniquex a tus pʌyiquex u racꞌ a wet acsʌꞌorirex. Mʌꞌ ja wirej, ic Jaj Tsꞌurirex jach manan yaj cu bin u tsꞌajic mucꞌyaj a tiꞌoꞌ. A tenoꞌ baxuc tin chich araj techex a uchoꞌ.
\v 7 A Cꞌujoꞌ tu tetajoꞌonex soc mʌꞌ ic manex ich cꞌas. Mʌꞌ u cꞌat ij cʌxtiquex ic siꞌpirex. Tu chen tetajoꞌonex Cꞌuj soc taj quij cacsex tij corex u tꞌʌn Cꞌuj.
\v 8 A mac a cu pꞌastic a jeꞌ tꞌʌnaꞌ, a quin camsicob techex bajeꞌrer. Mʌꞌ xib cu pꞌastiquiꞌ, Cꞌuj cu pꞌastic. Raꞌiriꞌ a tu tsꞌaj toꞌonex u Tajꞌor u Pixam Cꞌuj.
\p
\v 9 A baꞌ ta cꞌatex a tenoboꞌ jach tsoy a yajquintiquex a wet acsʌꞌorirex. Chen mʌꞌ baꞌwir quin tsꞌibticob techex ich juꞌun. Mʌꞌ ja wirej, Cꞌuj tu toc araj uch caꞌ a pacran yajquintex a bʌjex a wet acsʌꞌorirex.
\v 10 Mʌꞌ ja wirej, quin wiricob rajraꞌ tan a yajquintiquechex tu cotor a wet acsʌꞌorirex ich u ruꞌumin Macedonia. Chen a tenoboꞌ in cꞌatob techex, in bʌjobechex soc jach manan a jach yajquintiquex a wet acsʌꞌorirex. Rajiꞌ quin chich cꞌaticob techex.
\v 11 Caꞌ a pꞌisex a bʌjex soc mʌnaꞌ baꞌ cu yaꞌaricob soc pꞌeriꞌiꞌ a worex yejer a racꞌobex. Bayiriꞌ xan, caꞌ a pꞌisex a bʌjex quir a beyajex. Mʌꞌ tsoy a pꞌʌtiquex a beyaj. Caꞌ a beyanʌquex a bʌjiriꞌex. Cꞌaj techex a tin toc arajob techexeꞌ soc rajraꞌ a beyajex.
\v 12 A baywoꞌ a mac a cu tar, a mʌꞌ yacsmʌnob tu yorob bin u caꞌ sʌj techex quireꞌ a wacsmʌnex ta worex. Mʌꞌ ja wirej, yirob jach sacꞌorechex quireꞌ toc yʌnex a woꞌochex. Rajen mʌꞌ baꞌ wir ca bin a cꞌatex a woꞌochex ich u jer mac.
\s Tan u tar Jesucristo
\p
\v 13 A tenoboꞌ, quij Pablo. In cꞌatob a werex, in bʌjobechex baꞌ u ber u quimrir a yacsmʌnob tu yorob. In cꞌat a werex baꞌ u ber tiꞌ u quimrir soc mʌꞌ a wacꞌtiquex u quimrir, irechex a mac a mʌꞌ yacsmʌnob tu yorob. Rajen cu yacꞌticob u bʌj quireꞌ mʌꞌ u jach erob tu cu binob, rajen cu yacꞌticob u bʌj.
\v 14 Quireꞌ quimij toꞌonex Jesús quireꞌ rajiꞌ quij cacsiquex tij corex tiꞌ Jesús. Quireꞌ ricꞌ toꞌonex tu quimrir Jesús quireꞌ rajiꞌ quij cacsiquex tij corex tiꞌ Jesús. Quet bayiriꞌ quij cacsiquex tij corex tiꞌ Cꞌuj, rajiꞌ cu bin u ricꞌsoꞌonex tij quimrirex a mac a yacsmʌnob tu yorobeꞌ. Bin u pʌybir Jesús caꞌ bin wʌcꞌʌs uruc teraꞌ. 
\p
\v 15 Rajen quin camsicob techex aroꞌ, quireꞌ raꞌ u tꞌʌn ic Jaj Tsꞌurirex Jesucristo. Mʌꞌ ja wirej, wa tiꞌ yʌnoꞌonex caꞌ bin uruc Jesús. Mʌꞌ pʌyber quic binex caꞌanan quireꞌ pꞌeriꞌ caꞌ bin xicoꞌonex yejer a mac a quimenob a yacsmʌnob tu yorob uch.
\v 16 Pꞌeriꞌ caꞌ bin xicob yejeroꞌonex. Mʌꞌ ja wirej, u bʌjiriꞌ Jesús caꞌ bin wʌcꞌʌs tac teraꞌ ich yocꞌocab. Ta u tar ich caꞌanan caꞌ bin tac. Jach cꞌam caꞌ bin yustej yejer u mascabir quir u yutstaꞌr. Cꞌam caꞌ bin u tꞌʌnej yʌjmasirob u tꞌʌn Cꞌuj quireꞌ baxuc araꞌb ten Cꞌuj tiꞌob soc cꞌam u tꞌʌnic. A mac quimenob uch, a yacsmʌnob tu yorob rajiꞌob pʌyber cu yʌn riqꞌuir.
\v 17 Caj tsꞌoc u riqꞌuirob a quimeneꞌ, a cuxaꞌanoboꞌ pachir caꞌ bin xicob a tiꞌoboꞌ. Tiꞌ quic bin ic muchꞌquinbiroꞌonex ich caꞌanan. Pꞌeriꞌ caꞌ bin muchꞌquintacoꞌonex ich u muyarir yejer ic Jaj Tsꞌurirex. A baxucoꞌ tiꞌ yʌnoꞌonex yejer ic Jaj Tsꞌurex munt qꞌuiniꞌ.
\v 18 Rajen pacran quiꞌquintex a wor quireꞌ jeꞌ tar Jesúseꞌ. 

\c 5
\p
\v 1 Barej mʌꞌ baꞌ wir quin tsꞌibticob techex in wet acsʌꞌorirechex ber qꞌuin caꞌ bin uruc Jesús. Mʌꞌ ij querex wa tan jaꞌ caꞌ bin tac Jesús. Wa yaxqꞌuin caꞌ bin tac.
\v 2 Quireꞌ a techexoꞌ a quiꞌ erex ber caꞌ bin uruc Jaj Tsꞌur mʌnaꞌ mac yer ber caꞌ bin tac. Raꞌ u qꞌuinin mʌꞌ tan a pajiquex u tar Jaj Tsꞌur raꞌ u qꞌuinin caꞌ bin tac. Jeꞌ u tareꞌ baxuc u tar a mac a chꞌaꞌ a baꞌtaquex. Baxuc caꞌ bin tac Cristo.
\v 3 Wa ber qꞌuin cu yaꞌaric winic: mʌnaꞌ baꞌ yʌn ten, quiꞌ in wor a tenoꞌ. Mʌnaꞌ mac cu tar u chuquiquen. Jeroj, seb cu bin tar u yajir jach manan yaj cu bin yubej irej wa a xquicoꞌ. A cu yajtar u nʌcꞌ, yubic u chiꞌibar quireꞌ tabar u chuquic yʌrʌcꞌ och. Caj cꞌuchij tu qꞌuinin mʌꞌ tu cu putsꞌur a mac a mʌꞌ yacsmʌnob tu yorob u tꞌʌn Cꞌuj.
\v 4 Chen atechexoꞌ, in bʌjobechex ta wacsechex ta worex tiꞌ u tꞌʌn Cꞌuj. Mʌꞌ ja wirej, caꞌ bin tac ic Jaj Tsꞌurirex mʌꞌ u jacꞌʌr a worex quireꞌ ta wacsex a worex. Ta toc quiꞌ cʌnantechex a bʌjex quireꞌ tan a pajiquex u qꞌuinin quir u tar ic Jaj Tsꞌurirex.
\v 5 Iroꞌonex a mac a cu tar yor quireꞌ caj jocꞌoꞌonex tu sasirir Cꞌuj. Bajeꞌrer mʌꞌ u pararoꞌonex quisin quireꞌ mʌꞌ ic manex tu yacꞌbirir quisin.
\v 6 Rajen mʌꞌ tsoy yʌn ic wenʌnex irob a mac a cu manob tu yacꞌbirir quisin a mac a mʌꞌ yacsmʌnob tu yorob. Quiꞌ pꞌisex a bʌjex quireꞌ tabar u tar ic Jaj Tsꞌurirex. Rajen mʌꞌ tsoy a manex tu cꞌasiriꞌ.
\v 7 Mʌꞌ ja wirej, a mac a cu wenʌn cu wenʌnob jach acꞌbir. A cu carchʌjʌrob cu carchʌjʌrob jach acꞌbir xan.
\v 8 Chen a toꞌonexoꞌ, quij Pablo, quireꞌ tij cacsex tij corex tiꞌ Cꞌuj caj jocꞌoꞌonex tu sasir Cꞌuj. Caꞌ ij cʌnex a soldado. Baxuc a toꞌonexoꞌ caꞌ ij quiꞌ acsex tij corex tiꞌ Cꞌuj, quet caꞌ ij yajquintex ij quet acsʌꞌorirex. Mʌꞌ ja wirej, a baywoꞌ ta quiꞌ cʌnantiquechex a bʌjex irechex a soldadojoꞌ a cu cʌnantaꞌr u tsem ten mascab. Caꞌ ic pajex u qꞌuinin quir u taꞌquicoꞌonex iroꞌonex a soldado a cu pꞌoquintic u taꞌ mascab soc mʌꞌ u chꞌacʌr u joꞌr soc u taꞌquic u bʌj xan.
\v 9 Mʌꞌ ja wirej, a Cꞌujoꞌ tan u taꞌquicoꞌonex soc mʌꞌ ij querarex ich cꞌacꞌ. Tu chen tetajoꞌonex quir u taꞌquicoꞌonex. Rajiꞌ taꞌquicoꞌonex ic Jaj Tsꞌurirex, Jesucristo.
\v 10 A Jesúsoꞌ caj quimij toꞌonex quir ij cuxtarex munt qꞌuin ich caꞌanan yejer Jesús. Cax cuxaꞌanoꞌonex caꞌ bin tac cax toc quimen caꞌ bin tacoꞌonex.
\v 11 Rajen pacran chichquintex a worex bayiriꞌ xan pacran yajquintex a bʌjex soc a pacran yamtiquex a bʌjex an ten bic tan a betiquex bajeꞌrer.
\s Chichquintaꞌb yorob ten Pablo a mac a tu yacsaj tu yor 
\p
\v 12 A tenob Pablojen yejer Silvano yejer Timoteo, quin chich cꞌaticob techex in wet acsʌꞌorirexob caꞌ a quiꞌ sʌjtex a mac a cu quiꞌ beyajob tu yʌnechex. Mʌꞌ ja wirej, tan u camsiquechexob soc a cʌniquechex u tꞌʌn Cꞌuj. Caꞌ a quiꞌ uꞌyiquechex u tꞌʌn araꞌ a cu quiꞌ beyajob tu yʌnechexeꞌ. 
\v 13 Caꞌ a quiꞌ sʌjtex a cu beyajob tu yʌnechexeꞌ quireꞌ cu beyajob tiꞌ Cꞌuj. Rajen caꞌ a quiꞌ yajquintex a cu beyajob tiꞌ Cꞌuj. Quiꞌ quiꞌ yajquintej. Bayiriꞌ caꞌ a quiꞌquintex u yorob a wet acsʌꞌorirex soc mʌꞌ u tsꞌictarob. 
\p
\v 14 A tenoboꞌ quin chich aricob techex in bʌjobechex, caꞌ a qꞌueyex a mac a mʌꞌ cꞌor u beyaj, soc sacꞌor u bayaj. Caꞌ a chichquintiquex yor a mac a mʌnaꞌ yoreꞌ. Caꞌ a yamtex a mac mʌꞌ ju quiꞌ acsa tu yoreꞌ. Mʌꞌ a yʌn choquintic a worex yejer a wet acsʌꞌorirex soc mʌꞌ biquechex yejer a wet acsʌꞌorirex.
\p
\v 15 Quiꞌ cʌnantex a bʌjex soc mʌꞌ a bʌbʌpʌquic a bʌjex yejer a racꞌobex. Barej manenex tu tsoyir yejer a racꞌobex ich yocꞌocab.
\p
\v 16 Cax a baꞌ cu tar rajraꞌ a quiꞌquintic a worex.
\v 17 Rajraꞌ a tꞌʌniquex Cꞌuj.
\v 18 Cax wa baꞌ a berex. Arej tiꞌ Cꞌuj: “Bayoꞌ”, quex tiꞌ Cꞌuj, ta tsꞌaj ten Cꞌuj. Quireꞌ baxuc u cꞌat Cꞌuj yubic a tꞌʌniquex a tiꞌoꞌ. U cꞌat Cꞌuj a baxuc yubicoꞌ quireꞌ a techexoꞌ ta wacsex ta worex u tꞌʌn Jesucristo.
\p
\v 19 Mʌꞌ a yʌn tupsiquex yor u Tajꞌor u Pixam Cꞌuj quireꞌ raꞌ cu beyaj techex.
\v 20 Mʌꞌ a yʌn pꞌastiquex a mac a cu tsecꞌtic u tꞌʌn Cꞌuj quireꞌ yamtaꞌb ten Cꞌuj.
\v 21 Tumtex a wirex wa tsoy tu cotor baꞌ soc a werex wa tiꞌ u tar ich Cꞌuj. Chen a tsoyoꞌ raꞌ ca chꞌiquechex, chen a mʌꞌ tsoyoꞌ, jot.
\v 22 Toc rʌc pꞌʌtex a cꞌasoꞌ.
\p
\v 23 A tenoboꞌ, quin tꞌʌnicob Cꞌuj a mac a cu yamtiquechex caꞌ quiꞌac a worex. Baxuc xan, quin tꞌʌnicob Cꞌuj caꞌ u yamtechex Cꞌuj soc mʌnaꞌ baꞌ ca tucriquex ta pixamex. Baxuc a winquirirex, soc mʌꞌ a wacsiquex a siꞌpirex hasta cu wʌcꞌʌs ur ic Jaj Tsꞌurirex Jesucristo.
\v 24 Mʌꞌ ja wirej, a Cꞌujoꞌ u bʌjiriꞌ pʌyoꞌonexeꞌ, rajen cu yajquinticoꞌonex. Rajen a Cꞌujoꞌ taj cu yaꞌaric toꞌonex: Jeꞌ u taꞌquicoꞌonexeꞌ.
\s A Pablojoꞌ cu tꞌʌnic tu cotor mac
\p
\v 25 Tꞌʌnex Cꞌuj ten in wet acsʌꞌorirechexob baxuc xan in wet beyajob.
\p
\v 26 Rʌc tꞌʌnex a bʌjex. Quiꞌ tꞌʌnex a bʌjex.
\p
\v 27 A jeꞌ juꞌunaꞌ quin chich aricob techex quir a xaquiquex tu ca muchꞌquintiquex a bʌjex soc u yubicob a wet acsʌꞌorirex. Toc xaquex yubob a wet acsʌꞌorirex. Raꞌ quin wacob techex quireꞌ Cꞌuj cu yiric.
\p
\v 28 Caꞌ xiquechex ta beyajex caꞌ u quiꞌ cʌnan techex ic Jaj Tsꞌurirex Jesucristo. Jeroj tsꞌoquij, quij Pablo.