\id 2TH
\h 2 TESALONICENSES
\toc1 2 TESALONICENSES
\mt1 A JEꞌ JUꞌUNAꞌ, PACHIR CAJ U CAꞌ TSꞌIBTA PABLO TIꞌ U YET ACSɅꞌORIROB ICH U CAJAR TESALÓNICA
\mt2 2 TESALONICENSES
\c 1
\s Tsꞌibtaꞌb a jeꞌ juꞌunaꞌ ten Pablo yejer u nupꞌob soc u xaquicob u yet acsʌꞌorirob tu cajar Tesalónica
\p
\v 1 A tenoꞌ, Pablojen, quin tsꞌibtic techex a jeꞌ juꞌunaꞌ yejer Silvano quin tsꞌibtic. Yejer Timoteo quin tsꞌibtic techex xan. Quin tsꞌibticob techex ij quet acsʌꞌorirex tu ca muchꞌquintiquex a bʌjex quir a cꞌujintiquex Cꞌuj ich u cajar Tesalónica. Quin tsꞌibticob techex quireꞌ pꞌeriꞌ a worex yejer ic Tetex Cꞌuj. Baxuc, pꞌeriꞌ a worex yejer ic Jaj Tsꞌurirex Jesucristo xan.
\v 2 A tenob, quin tꞌʌnicob Cꞌuj techex caꞌ u yamtechex ic Tetex Cꞌuj. Baxuc tiꞌ ic Jaj Tsꞌurirex Jesucristo. Caꞌ quiꞌac a worex tiꞌ ic Tetex Cꞌuj soc mʌnaꞌ baꞌ ca tucriquex. Baxuc tiꞌ ic Jaj Tsꞌurirex Jesucristo, xan.
\s A Cꞌujoꞌ bin u caꞌ yaꞌarej wa tsoyoꞌonex wa mʌꞌ tsoyoꞌonex winiquiꞌ caꞌ bin uruc Cristo
\p
\v 3 A tenoboꞌ rajraꞌ quin waꞌaricob tiꞌ Cꞌuj: “Bayoꞌ Cꞌuj” quireꞌ a mac a yacsmʌnob tu yorob tu cajar Tesalónica. Quin wacob tiꞌ: Bayoꞌ Cꞌuj, quireꞌ jach tsoy aroꞌ. Mʌꞌ ja wirej, taj tan u quibicob a tꞌʌn Cꞌuj, quenob tiꞌ. Bayiriꞌ xan, Cꞌuj, quenob tiꞌ. Jach manan u yajquinticob tu cotor u yet acsʌꞌorirob quireꞌ tan u pacran yajquinticob u bʌjob.
\v 4 Rajen quiꞌ in worob in tsicbarob tiꞌ a bʌjobex tu cu muchꞌquinticob u bʌjob quir yubicob a techex. Mʌꞌ ja wirej, nemʌꞌ biquechex cax a mac a cu chuquicob a pachex. Cax tan u tsꞌic a mucꞌyajex tan a mucꞌticobex. A baxucoꞌ tan a wesiquex tiꞌ tu cotor mac bic tabar ta quibex u tꞌʌn Cꞌuj.
\v 5 Mʌꞌ ja wirej, a baywoꞌ Cꞌuj tan yesic bic jach taj cu yiricoꞌonex. Quireꞌ caꞌ bin tsꞌocac yiric wa tsoy ij corex tu quic mucꞌyajex bin u caꞌ u quiꞌ quiꞌ acsoꞌonex tu cu bin u reyintic Cꞌuj.
\p
\v 6 Mʌꞌ wa taj a Cꞌujoꞌ caꞌ u boꞌotej tu cotor mac a cu chuquicob a pachex? A Cꞌujoꞌ cu chꞌaꞌic ic mucꞌyajex soc
\v 7 caꞌ ic jesex ic bʌjex caꞌ bin uruc ic Jaj Tsꞌurirex, Jesucristo. Yet tarob u yʌjmasirob u tꞌʌn Cꞌuj a mac a jach chich u mucꞌob. Yet tar cꞌacꞌ, a tar u tar caꞌananoꞌ. 
\v 8 Quir u boꞌotic u boꞌorir a mac a mʌꞌ yer Cꞌuj. Baxuc cu bin u boꞌotej u boꞌorir a mac a mʌꞌ tu quibob u jach tsoyir u tꞌʌn Cꞌuj.
\v 9 Robob a mac a mʌꞌ yerob Cꞌuj quet yejer a mac a mʌꞌ u quibob u jach tsoyir u tꞌʌn Cꞌuj, yʌn boꞌotaꞌ ten Cꞌuj. Tar binoꞌ cu yerar munt qꞌuin. Bin u caꞌ jocꞌsaꞌbir ten Cꞌuj soc mʌꞌ yiricob u wich ic Jaj Tsꞌurirex. Mʌꞌ ju bin yiricob u mucꞌ ic Jaj Tsꞌurirex a mac a jach manan tsoyiroꞌ.
\v 10 Caꞌ bin u boꞌotacob tiꞌob ten Cꞌuj raꞌ u qꞌuinin caꞌ bin sʌjtaꞌbir ten a mac tu yacsajob tu yorob. Jesús bin u caꞌ sʌjtaꞌbir ten a yacsmʌnob tu yorob. Raꞌ u qꞌuinin caꞌ bin uruc ic Jaj Tsꞌurirex. A mac a cu yacsicob tu yorob tiꞌeꞌ bin u caꞌ u yaꞌarob mun jach carem ic Jaj Tsꞌurirex. Bin u caꞌ u yaꞌarob aroꞌ tiꞌ ic Jaj Tsꞌurirex quireꞌ caj u yacsob tu yorob a tiꞌoꞌ. Baxuc a techex xanoꞌ quireꞌ ta wacsex ta worex u tꞌʌn caj in tsecꞌtob techex uch.
\p
\v 11 Rajen tan in tꞌʌnicob Cꞌuj soc yiriquechex jach tsoyechex. Wa cu yiriquechex jach tsoyechex quireꞌ ta toc quibex u tꞌʌn. Jeꞌ u quiꞌ acsiquechex tu ruꞌumin tu cu bin u reyintic Cꞌuj. Rajen tan in tꞌʌnicob Cꞌuj techex soc u tsꞌiquex a muqꞌuex Cꞌuj. Soc u nupꞌur a baꞌ ta tsꞌibtenob a techexoꞌ quireꞌ tsoy. Rajen quin tꞌʌnicob Cꞌuj techex soc u tsꞌiquex a muqꞌuex Cꞌuj soc cꞌuchaꞌan a worex a manex tu tsoyir.
\v 12 Mʌꞌ ja wirej, a baywoꞌ bin u caꞌ sʌjtaꞌbir ten tu cotor mac ic Jaj Tsꞌurirex, quireꞌ tu yubob taj ta cꞌʌmex u tꞌʌn ich u cajar Tesalónica. Bayiriꞌ a Cꞌujoꞌ, bin u caꞌ u sʌjbensirtic techex, quireꞌ ta sʌjtex u parar Cꞌuj Jesucristo. Bin u caꞌ u sʌjbensirbir techex quireꞌ cu yajquintiquechex Cꞌuj quir u yamtic techex ic Jaj Tsꞌurirex Jesucristo.
\c 2
\s A mac a jach manan cꞌas
\p
\v 1 A techexoꞌ caj a cꞌatex tenob bic tabar caꞌ bin ic muchꞌquintiquex ic bʌjex caꞌ bin uruc ic Jaj Tsꞌurirex Jesucristo. Chich quin wacob techex in wet acsʌꞌorirechexob. Raꞌ u qꞌuinin caꞌ bin uruc Jesús.
\v 2 Mʌꞌ a yʌn xacꞌ tucurex mʌꞌ u jacꞌʌr a worex xan. Cax cu jumbinticob techex. Cax ta wuꞌyex tiꞌ yʌn u juꞌunin ten. Quireꞌ ta wuꞌyex cꞌuchij tu qꞌuinin cu yuꞌur ic Jaj Tsꞌurirex.
\v 3 Mʌꞌ a chꞌaꞌic u tabsiquex mac chichin. Cax mʌꞌ toy tac u qꞌuinin u tar Jesús rajiꞌ cu yʌn cꞌuchur u qꞌuinin a winicoꞌ. Rajiꞌ cu yʌn yaꞌarej: Mʌꞌ a cꞌujintiquex Cꞌuj quireꞌ mʌnaꞌ Cꞌuj. Rajen bin u caꞌ rʌc pꞌʌtob u tꞌʌn Cꞌuj. Pachir caꞌ bin tac xib a mac jach manan cꞌasoꞌ. Ara xiboꞌ bin u caꞌ tu cꞌaqꞌuir betaꞌan munt qꞌuin quireꞌ toc araꞌb ten Cꞌuj uch, quij.
\v 4 Bin u caꞌ xacꞌ tu bʌj tu cotor a baꞌ cꞌujintaꞌb ten winic cax jach Cꞌuj, cax tus cꞌuj. Bin u caꞌ u pꞌastob quireꞌ bin u caꞌ yaꞌarej: A tenoꞌ, jach caremen, arayoꞌ mʌꞌ cꞌuchaꞌan yorob teniꞌ quireꞌ jach manan caremen atenoꞌ. Bin u caꞌ ocar cutar tu japnin naj tu cu naj cꞌujinticob Cꞌuj u winiquirob israel soc yaꞌaric: A tenoꞌ, quij, jach cꞌujenꞌ soc u cꞌujintaꞌr ten mac tu cotor. 
\p
\v 5 Mʌꞌ wa cꞌaj techex a uchoꞌ tiꞌ yʌnenob ta wicnʌnex caj in waꞌaraj techex aroꞌ?
\v 6 A werex cu suꞌsaꞌ ten Cꞌuj a mac jach cꞌas hasta cu cꞌuchur tu qꞌuinin cu chaꞌbʌr u tar. Mʌꞌ ja wirej, chen Cꞌuj suꞌsic a bajeꞌrer soc mʌꞌ u tar.
\v 7 A mac a jach cꞌasoꞌ, a bin u caꞌ yes u bʌj, a tan u muc u beyaj bajeꞌerer. Hasta cu bin a mac a mʌꞌ ju chaꞌbʌr u tar, a mac a cu muc u beyaj bajeꞌrer.
\v 8 Caꞌ bin cꞌuchuc tu qꞌuinin u chaꞌbʌr u tar, bin u caꞌ yesic u bʌj, a mac a jach manan cꞌasoꞌ. Rajiꞌ bin u caꞌ quinsbir ten Cꞌuj. Rajiꞌ bin u caꞌ quinsbir ten u yicꞌar u chiꞌ ic Jaj Tsꞌurirex Jesús. Jeꞌ chꞌejsaꞌr xan ten u sasirir Cꞌuj caꞌ bin tac Jesús.
\v 9 A mac a jach cꞌasoꞌ bin u caꞌ yesic u bʌj. Bin u caꞌ yesic u bʌj quireꞌ yamtaꞌ ten quisin. Aroꞌ bin u caj tar jach chich u mucꞌ, quireꞌ bin u caꞌ u tus esej jach carem u beyajob irej wa Cꞌuj.
\v 10 A rayoꞌ, a mac a jach cꞌasoꞌ bin u caꞌ u cꞌʌmob tu cotor cꞌas, soc u jach tusic tu cotor mac a mʌꞌ ju cꞌʌmob u tꞌʌn Cꞌuj. Mʌꞌ ja wirej, robob bin u caꞌob erar ich cꞌacꞌ. Tiꞌ cu binobiꞌ quireꞌ mʌꞌ u cꞌatob u yacsicob tu yorob u tꞌʌn Cꞌuj soc u cuxtarob munt qꞌuin.
\v 11 Rajen a Cꞌujoꞌ, jeꞌ u chaꞌic u tabsaꞌrob ten a cu tusoꞌ soc u quibicob a baꞌ mʌꞌ tajiꞌ, quireꞌ mʌꞌ u cꞌatob u parar Cꞌujiꞌ.
\v 12 A Cꞌujoꞌ cu chaꞌic caꞌ u quibob a mac a cu tusoꞌ soc u bin tuchiꞌtaꞌrob ten Cꞌuj ich cꞌacꞌ. Quireꞌ mʌꞌ u yacsmʌnob tu yorob tiꞌ Jesucristo rajen bin u caꞌob ich cꞌacꞌ quireꞌ chen robob cu quiꞌquinticob yorob ich a cꞌasoꞌ. 
\s Tetaꞌbechex ten Cꞌuj soc u taꞌquiquechex
\p
\v 13 In wet acsʌꞌorirechexob yajbirechex ten ic Jaj Tsꞌurirex quireꞌ tetaꞌbechex ten Cꞌuj. Mʌꞌ ja wirej, a tu yʌnx chun a wuꞌyiquex u tꞌʌn Cꞌuj caj a wacsex ta worex tiꞌ u tꞌʌn. Rajen rajraꞌ quin waꞌaricob: “Bayoꞌ Cꞌuj” quireꞌ tetaꞌbechex ten u Tajꞌor u Pixam Cꞌuj. Mʌꞌ ja wirej, rajiꞌ tu pʌyechex wa ber caj a quibex u tꞌʌn Cꞌuj soc a wacsiquex ta worex u tajir u tꞌʌn.
\v 14 Rajen a techexoꞌ, tetaꞌbechex ten Cꞌuj quireꞌ tu tꞌʌnechex wa ber caj in tsecꞌtob techex u jach tsoyir u tꞌʌn Cꞌuj uch. Caj u tetechex Cꞌuj soc u yacsiquechex ic Jaj Tsꞌurirex tu ruꞌumin tu cu bin u reyintic Cꞌuj.
\p
\v 15 Rajen quin wacob techex in wet acsʌꞌorirechexob, mʌꞌ u pec a worex. Quiꞌ cʌnantex u tꞌʌn Cꞌuj a baꞌ ta wuꞌyex in camsicob uch. Cax a baꞌ tin tsꞌibtob techex uch. Cax a baꞌ ta wuꞌyex in camsicob techex, quiꞌ cʌnantex. 
\v 16 Bajeꞌrer a Cꞌujoꞌ, a mac ic Tetex, quireꞌ cu yajquinticoꞌonex, tan u chichquintic a worex munt qꞌuin. Bayiriꞌ xan ic Jaj Tsꞌurirex. Raꞌ in cꞌatob Cꞌuj techex. Mʌꞌ ja wirej, tan ic pajiquex Cꞌuj yejer Jesucristo quireꞌ cu yamticoꞌonex quireꞌ u yajoꞌonex.
\v 17 Quin cꞌatob tiꞌ Cꞌuj caꞌ u quiꞌquintej a worex soc chich a worex quir a betex tu cotor a tsoyoꞌ. Soc caꞌ a wuꞌyex a baꞌ jach tsoyoꞌ.
\c 3
\s Yʌn tꞌʌnex Cꞌuj soc u yamtiquenob
\p
\v 1 Tiꞌ yʌn u jer in tꞌʌnob quir in wacob techex in bʌjobechex. Yʌn tꞌʌnex Cꞌuj soc u yamtiquenob Cꞌuj soc seb u cꞌuchur u tꞌʌn ic Jaj Tsꞌurirex ich tu cotor mac ich yocꞌocab. Tꞌʌnex Cꞌuj soc u cꞌʌmicob u tꞌʌn Cꞌuj irechex caj a cꞌʌmex. Mʌꞌ ja wirej, ta quiꞌ acsex ta worex quireꞌ tan a quiꞌ quibiquex.
\v 2 Yʌn tꞌʌnex Cꞌuj xan, soc u taquiquenob tiꞌ a mac a cu chuquicob in pachob. Mʌꞌ ja wirej, tu cotor mac mʌꞌ ju bin u yacsob tu yorob u tꞌʌn Cꞌuj.
\v 3 Cꞌʌꞌotex a Jaj Tsꞌuroꞌ, rajraꞌ tiꞌ yʌn quir u yamticoꞌonex. Rajiꞌ jeꞌ u chichquintic a worex. Rajiꞌ jeꞌ u cʌnantiquechex soc mʌꞌ u chuquiquechex a quisinoꞌ.
\v 4 A tenoboꞌ in werob quireꞌ ic Jaj Tsꞌurirex tan u yamtiquechex. Rajen cꞌuchaꞌan a worex a quiꞌquibex a baꞌ tin camsob techex uch. Cax wa bajeꞌrer cax wa ju jer qꞌuin.
\v 5 Quin tꞌʌnicob Cꞌuj techex soc a najtiquex bic tabar u yajquintechex Cꞌuj. Baxuc quin tꞌʌnicob Cꞌuj techex soc a mucꞌtiquex an ten bic Jesús caj u mucꞌtaj uch. 
\s Caꞌ chich beyanʌcoꞌonex
\p
\v 6 Bajeꞌrer, in bʌjobechex quin chich aricob techex caꞌ a pꞌʌtex tu junʌn tu cotor a bʌjobex, a mʌꞌ cꞌor beyajoꞌ. Mʌꞌ a tꞌʌniquexiꞌ. Quin wacob techex aroꞌ quireꞌ baxuc u cꞌat ic Jaj Tsꞌurirex Jesucristo. Caꞌ a pꞌʌtex tu junʌn xan, quireꞌ mʌꞌ ju quibaj a baꞌ tin camsob techex uch a tiꞌ yʌnenob ta wicnʌnex. Caj in waꞌarob techex caꞌ chich beyanʌquechex.
\v 7 Mʌꞌ ja wirej, a techexoꞌ a werex caꞌ a toc cʌnex bic chich beyajob an ten biquenob uch. Mʌꞌ ja wirej, chich beyanʌjenob uch, caj tiꞌ yʌnenob ta wicnʌnex uch.
\v 8 Mʌꞌ jin jantob yoꞌoch winiquiꞌ wa mʌꞌ jin boꞌotobiꞌ. Jach chich beyanʌjenob, jach qꞌuicꞌabnʌjenob tu quin beyajob. Cax aꞌacꞌbir, cax chun qꞌuin tin beyajob soc mʌꞌ in xupic a taqꞌuinex quir a jansiquenob uch.
\v 9 Cax tsoy quir in cꞌaticob techex, quir a wacsenobex uch chen mʌꞌ jin cꞌatob quir a jansiquenobex. Quireꞌ in cꞌatob a cʌniquenob an ten bic in beyajob xan soc tsoy a beyajex xan.
\v 10 Mʌꞌ wa ja cꞌʌꞌotex uch tiꞌ yʌnenob ta wicnʌnex caj in chich arob techex: A mac a mʌꞌ ju beyaj bayiriꞌ xan mʌꞌ ju yʌn janʌn xan.
\v 11 Aroꞌ quin waꞌaricob techex quireꞌ tin wuꞌyob u jumintaꞌr chʌc yʌn winic tu yʌnechex mʌꞌ tan u beyajob. Chen bur u qꞌuinin man u caꞌob, tan yaꞌaricob baꞌ u ber ich u racꞌob.
\v 12 A rayoꞌ a cu manoboꞌ caꞌ in chich arob tiꞌob caꞌ u sar u xiquinob a baꞌ quin wac tiꞌob. Mʌꞌ chen tenob cu yaꞌaric, Jesucristo ic Jaj Tsꞌurirex cu yaꞌaric xan: Caꞌ beyanʌcob soc mʌꞌ u chen manob u jumintej wa tabar u tar Cristo. Arex tiꞌob caꞌ beyanʌcob soc yʌn yoꞌochob xan.
\p
\v 13 In bʌjobechex mʌꞌ u caꞌanan a worex a betex a baꞌ jach tsoy.
\v 14 Wa tiꞌ yʌn winic ta wicnʌnex a cu maꞌquintic u quibej a baꞌ tin tsꞌibtob ich a jeꞌ juꞌunaꞌ. Irex maquiꞌ, tun mʌꞌ a tꞌʌniquex soc u chꞌic suraquir.
\v 15 Mʌꞌ a yʌn pꞌactiquex a tiꞌoꞌ chen arex caꞌ u sar u xiquin yub u tꞌʌn Cꞌuj. Mʌꞌ ja wirej, rajiꞌ a wet acsʌꞌorirex xan.
\s Cu tsꞌocar u tꞌʌn Pablo
\p
\v 16 In cꞌatob caꞌ u quiꞌquint a worex ic Jaj Tsꞌurirex soc mʌnaꞌ baꞌ ca tucriquex. Cax rajraꞌ cu quiꞌquintic a worex wa baꞌ a berex. In cꞌatob soc rajraꞌ tiꞌ yʌn Jaj Tsꞌur ta wicnʌnex.
\p
\v 17 A tenoꞌ Pablojen, tan in jach tsꞌibtic a jeꞌ jun xotꞌ juꞌunaꞌ. Tin tsꞌibtaj quir in tꞌʌniquechex. A jeꞌraꞌ in tsꞌib soc yer mac tu cotor u tajir quin tsꞌibtic. Baxucoꞌ quin tsꞌibtic.
\v 18 Baxuc in cꞌatob caꞌ u quiꞌ cʌnantechex ic Jaj Tsꞌurirex ta wicnʌnex. Jeroj, quij Pablo, tsꞌoquij.