\id 2TI
\h 2 TIMOTEO
\toc1 2 TIMOTEO
\mt1 A JEꞌ JUꞌUNAꞌ, PACHIR CAJ U CAꞌ TSꞌIBTA PABLO TIꞌ TIMOTEO
\mt2 2 TIMOTEO
\c 1
\s Tsꞌibtaꞌb Timoteo ten Pablo
\p
\v 1 A tenoꞌ Pablojen tu tuchiꞌten Jesucristo quir in tsecꞌtic u tꞌʌn quireꞌ tsoy tu tꞌʌn Cꞌuj caꞌ xiquen. Mʌꞌ ja wirej, binen quireꞌ aroꞌ quet yejer u tꞌʌn uch. Caj yaꞌaraj, yʌn toꞌon cuxtar munt qꞌuin quireꞌ rajiꞌ Cristo Jesús. 
\v 2 A jeꞌ juꞌunaꞌ quin tsꞌibtic tech Timoteo, quireꞌ tech in jach yajech, in pararech. Mʌꞌ ja wirej, caj a wacsaj ta wor caj a wuꞌyaj in tsecꞌt u tꞌʌn Cꞌuj rajen in pararech. Quin tꞌʌnic Cꞌuj caꞌ u yam tech soc u yajquintiquech. Quin tꞌʌnic quir u quiꞌtar a wor soc mʌnaꞌ baꞌ ca tucric. Bayiriꞌ quin cꞌatic tiꞌ ic Jaj Tsꞌurirex Cristo Jesús xan. 
\s Cu tsicbar Pablo bic jach tsoy a Cristojeꞌ
\p
\v 3 Quin wac tiꞌ Cꞌuj: “Bayoꞌ”, quen tiꞌ Cꞌuj quin cꞌujintiquech rajen jach tsoy in tucur. Baxuc xan in nunquir uch xan tu cꞌujintajob Cꞌuj rajen jach tsoy u tucurob in nunquir uch. Quin wac “bayoꞌ” tiꞌ Cꞌuj quireꞌ a tech Timoteojoꞌ ta wacsaj ta wor. Rajraꞌ quin tꞌʌnic Cꞌuj tech.
\v 4 A tenoꞌ jach manan in cꞌat in caꞌ iric a wich tu caꞌten. Quireꞌ in cꞌʌꞌomʌn caj a wacꞌtaj a bʌj caj in pꞌʌtech ich u cajar Efeso uch. Wa quin wiric a wicheꞌ, jach manan u quiꞌir in wor tech.
\v 5 Mʌꞌ ja wirej, taj ta cʌn a wacsic ta wor tiꞌ a chich Loida. Bayiriꞌ ta cʌn a wacsic ta wor tiꞌ a nʌꞌ Eunice. Robob jach taj tu yacsob tu yorob rajen tech xanoꞌ taj ta wacsaj ta wor xan.
\p
\v 6 Rajen tan in cꞌasic tech soc mʌꞌ u tubur tech. Mʌꞌ a chaꞌic u tupsic a wor quireꞌ a wet acsʌꞌorirob tu ca camsic tiꞌob. Mʌꞌ ja wirej, tu tsꞌaja a beyaj Cꞌuj uch. Raꞌ u qꞌuinin caj in tsꞌancꞌʌbtob tech ten yejer u jach tsꞌurirob tu cu cꞌayob jeroj caj oquech ta beyaj tiꞌ Cꞌuj. Rajen chichquint a wor quir a beyaj tiꞌ Cꞌuj. 
\v 7 Mʌꞌ ja wirej, wa quic chꞌic sajaquir tiꞌ mac tu quic tsecꞌtic u tꞌʌn Cꞌuj aroꞌ mʌꞌ ju tar ich Cꞌuj. Cꞌʌꞌotej u Tajꞌor u Pixam Cꞌuj bin u caꞌ u chuquej toꞌon u mucꞌ. Mʌꞌ ja wirej, a Cꞌujoꞌ cu tsꞌic toꞌon quir ic yajquintic tu cotor mac a ju yaj Cꞌujeꞌ. A Cꞌujoꞌ cu chuquic toꞌon u tsoyir soc cꞌuchaꞌan ij cor mʌꞌ jic man tu cꞌasir. 
\v 8 Rajen mʌꞌ a yʌn chꞌic sajquir quir a tsicbar tiꞌ u jer winic Cꞌuj a mac ic Jaj Tsꞌurirex. Mʌꞌ ja chꞌic surquir ten Timoteo, quireꞌ cꞌʌraꞌanen tu cu maꞌcʌr winic. Mʌꞌ ja wirej, mʌcaꞌanen quireꞌ tin tsecꞌt u tꞌʌn ic Jaj Tsꞌurirex. Cꞌʌꞌotej Timoteo, soc pꞌeriꞌ ic mucꞌyaj quireꞌ u jach tsoyir u tꞌʌn Cꞌuj. Mʌꞌ ja wirej, a Cꞌujoꞌ cu chichquintic ij cor soc cꞌuchaꞌan ij cor ic mucꞌtej.
\v 9 Cꞌʌꞌotej Timoteo, a Cꞌujoꞌ, tu taꞌcoꞌon soc ij cʌnic u tꞌʌn. Mʌꞌ ju chen taꞌcoꞌon cax yirej tsoy ic beyaj. Mʌꞌ ju chen tacoꞌon a Cꞌujoꞌ, cax yirej tsoyoꞌon. Tu chen tacoꞌon quireꞌ yʌn baꞌwir toꞌon. Tu chen tacoꞌon quireꞌ u cꞌat u yamtic toꞌon Jesucristo, soc mʌꞌ jic bin ich cꞌacꞌ. A Cꞌujoꞌ tu yajquintoꞌon tu chꞌic chunin uch cax mʌnaꞌ mac cax mʌnaꞌ yocꞌocab uch. Tu yajquintoꞌon quireꞌ u parar Cꞌuj a Jesucristojoꞌ.
\v 10 A Cꞌujoꞌ, mʌꞌ tari teꞌraꞌ ich yocꞌocab hasta caj tarij ij cʌjtaquir ich yocꞌocab. Rajiꞌ Jesucristo, soc mʌꞌ ic bin quimin. Caj ij cuꞌy u jach tsoyir u tꞌʌn Cꞌuj, caj ij cuꞌya bic tabar ij cuxtar munt qꞌuin.
\p
\v 11 Mʌꞌ ja wirej, tu tetajen Cꞌuj soc in bin in tsecꞌt u tꞌʌn ich tu cotor mac a mʌꞌ u winiquirob judío. Rajen tan in man in cams u tꞌʌn ich a mac a mʌꞌ u winiquirob judío.
\v 12 Rajen Timoteo, caj u chucajenob caꞌ u mʌquenob tu cu maꞌcʌr winic. Rajen tan in mucꞌyaj bajeꞌrer. Barej mʌꞌ jin chꞌaj sajaquir tiꞌiꞌ cax quin mucꞌyaj. Quireꞌ in jach er a mac a tin wacsaj tin wor a tiꞌoꞌ. Rajen in toc er cꞌuchaꞌan yor Jesús u cʌnantic in pixam a tin cꞌubaj tiꞌoꞌ hasta tu qꞌuinin u yuꞌur Cristo. Rajen tin wacsaj tin wor a tiꞌoꞌ.
\p
\v 13 Quiꞌ cʌnej u tajir tꞌʌn Cꞌuj a tin camsaj tech Timoteo, soc rajiꞌ ca wʌcꞌʌs camsic tiꞌ u jer winic. Jach manan caꞌ a cʌnej soc taj ca wacsic ta wor. Soc taj ca yajquintic winic quireꞌ u pararech Cristo Jesús bajeꞌrer.
\v 14 Cʌnʌt u tꞌʌn Cꞌuj, a cꞌubaꞌan tech ten u Tajꞌor u Pixam Cꞌujoꞌ uch. Mʌꞌ ja wirej, u Tajꞌor u Pixam Cꞌuj cu cʌjtar tu yor a mac a tu quibaj u tꞌʌn. Rajiꞌ cu bin u yam tech soc a quiꞌ camsic tiꞌ u jer winic.
\p
\v 15 Ta toc uꞌyaj a jeraꞌ Timoteo. Tu cotor winic a yacsmʌnob tu yorob ich u ruꞌumin Asia caj u xumpꞌʌtenob. Quet yejer Figelo yejer Hermógenes.
\v 16 Barej in cꞌat Cꞌuj caꞌ u yajquinte Onesíforo yejer u bʌjob a tiꞌ yʌnob tu yatoch Onesíforo, soc u yamtaꞌr tiꞌob. Mʌꞌ ja wirej, susuꞌ caj tarij Onesíforo quir u chichquintej in wor tu cꞌʌraꞌanen. Mʌꞌ ju chꞌaj sujraquiriꞌ cax tu yiren cꞌʌraꞌanen tu cu maꞌcʌr winic.
\v 17 Caj cꞌuchij tu cajar Roma caj u sebquint u cʌxtiquen tu cꞌʌraꞌanen. Caj u quiꞌquiꞌ cʌxten hasta tu yiren. 
\v 18 Quin tꞌʌnic Cꞌuj caꞌ yajquintaꞌc Onesíforo ten Cꞌuj caꞌ bin cꞌuchuc tu qꞌuinin xur tꞌʌn quireꞌ tu tucren Onesíforo. Cꞌʌꞌotej Timoteo bic caj u yamtoꞌon Onesíforo tu cajar Efeso uch. In wer a jach cꞌʌꞌomʌn uch.
\c 2
\s Caꞌ u cʌnej bajen soldado tiꞌ Jesucristo
\p
\v 1 A techeꞌ in pararech Timoteo quireꞌ caj a quib u tꞌʌn Cꞌuj caj in tsecꞌtech uch. Caꞌ a chaꞌej Cꞌuj caꞌ u chichquint a wor quireꞌ tu yamtech caꞌ a wacsej ta wor u tꞌʌn Cristo Jesús. Tu yamtajech quireꞌ u yajech.
\v 2 Cꞌʌꞌotej Timoteo, in tꞌʌn caj in tsecꞌtaj uch ʌcʌtan yaꞌab winic. A tꞌʌnoꞌ a ta wuꞌyaj uch caꞌ a camsej tiꞌ u jer winic, a mac a tu jach quib u tꞌʌn Cꞌuj xan. A pꞌeriꞌ yoroboꞌ tiꞌ u beyaj Cꞌuj. Camsej tiꞌob a tsoy yoroboꞌ soc u caꞌ camsic tiꞌ u jer winic. Camsej tiꞌob a mac cꞌuchaꞌan yorob u wʌcꞌʌs camsicob tiꞌ u jer winic. 
\p
\v 3 A techoꞌ Timoteo chichquint a wor quir a mucꞌyaj. Mʌꞌ ja wirej, caꞌ a mucꞌtej an bic u mucꞌtic soldado soc jach tsoyech u soldadojech Jesucristo.
\v 4 Mʌꞌ ja wirej, a mac a cu yocar soldado mʌꞌ ju bin yir u cor. Bayiriꞌ a baꞌ yʌn tu yatoch. Quireꞌ u cꞌat u quiꞌquintic u yor u jach tsꞌurir soldado. Baxuc toꞌon tiꞌ ij Jaj Tsꞌurirex xan.
\v 5 Bayiriꞌ xan a mac a cu chich acaboꞌ. Caꞌ u quiꞌ cꞌʌne yacab an ten bic tsꞌibaꞌan tu juꞌunin. Wa mʌꞌ ju cꞌʌne yacab baxucoꞌ mʌꞌ u chiꞌ u jer a yet chich acabeꞌ. Cax cu yʌn cꞌuchur pʌyber. Mʌꞌ tiꞌ binij quir u cꞌʌmic a baꞌ cu bin sijbir tiꞌ. Baxuc toꞌon tiꞌ ic Jaj Tsꞌurirex. Caꞌ ij quib u tꞌʌn soc u quiꞌ acsic toꞌonex.
\v 6 Baꞌiriꞌ xan, a mac a cu jach pʌqꞌuic a coroꞌ, quireꞌ chich beyanʌjij tsoy caꞌ u yʌn batꞌan jantej a baꞌ tu pʌcꞌaj. Cax mʌꞌ rajiꞌ yʌnin u cor. Tsoy u chan ber jantic. Baxuc toꞌon tiꞌ ic Jaj Tsꞌurirex. Caꞌ chich beyanʌcoꞌon tiꞌ soc u tsꞌic toꞌon a baꞌ u cꞌat Cꞌuj soc yʌn baꞌ toꞌon ich caꞌanan.
\v 7 Rajen quiꞌ tucrej Timoteo a baꞌ quin wac tech. Mʌꞌ ja wirej, a Jaj Tsꞌur Cꞌujoꞌ bin u caꞌ yam tech caꞌ a najtej tu cotor baꞌ.
\v 8 Cꞌaj tech Timoteo tiꞌ Jesucristo a ricꞌsaꞌb ich u quimrir ten Cꞌuj quireꞌ cuxaꞌan bajeꞌrer. Cꞌaj tech xan rajiꞌ u chꞌic mam a Davidoꞌ u nunquir Jesús. A Davidoꞌ rajiꞌ tu reyintaj tu ruꞌumin Judea uch. Baxuc tin tsecꞌtaj tiꞌ mac tu cotor quireꞌ jach tsoy a jeꞌ tꞌʌnaꞌ.
\v 9 Mʌꞌ ja wirej, quireꞌ tin tsecꞌtaj a jeꞌ u tsoyir u tꞌʌn Cꞌuj caj u chuquenob u winiquirob romano. Tan in mucꞌyaj quireꞌ cꞌʌraꞌanen tu cu maꞌcʌr winic, iren a mac jach cꞌas. Cax cꞌʌraꞌanen, u tꞌʌn Cꞌuj mʌꞌ cꞌʌraꞌan. Tan u manob u jumintob u tꞌʌn Cꞌuj.
\v 10 Rajen tu cotor baꞌ quin mucꞌtic quir in yamtic a mac a yacsmʌnob tu yorob, quireꞌ robob tetaꞌb ten Cꞌuj. A mac a yacsmʌnob tu yorob jeꞌ yiricob bic tabar in mucꞌtic, jeꞌ u chichtar u yorob. Tan in mucꞌtic soc pꞌeriꞌob. A baywoꞌ, bin u caꞌ tacbirob rajen bin u caꞌ pʌybirob ten Cristo Jesús soc munt qꞌuin tiꞌ yʌnob tu yicnʌn. Robob bin u caꞌ u yamtob Cꞌuj tu cu bin u reyintej Cꞌuj.
\p
\v 11 A jeꞌ tꞌʌn a quin tsꞌibtic tech Timoteo jach taj. Rajen caꞌ ij cacsej tij cor tiꞌ. Uꞌyej baꞌ cu yaꞌaric tech:
\q Quet bayiriꞌ quimoꞌonex yejer Cristo caj quimij ich cruz, baxuc cu yiricoꞌonex Cꞌuj. Quet bayiriꞌ cuxaꞌanoꞌonex yejer Cristo, caj riqꞌuij, baxuc cu yiricoꞌonex Cꞌuj. 
\v 12 Wa quic mucꞌyajex tiꞌ u tꞌʌn Cꞌuj quic bin ic reyintiquex yejer Cꞌuj. Wa quij cariquex mʌꞌ ij querex Cristo an ten bic ij cʌjtaquirex, baxuc xan bin u caꞌ yaꞌarej toꞌonex mʌꞌ yeroꞌonex macoꞌonex xan caꞌ bin xicoꞌonex ʌcʌtan Cꞌuj.
\v 13 Wa toꞌonex tic pꞌuspachtex tu tij cacsajex tij corex, a tiꞌoꞌ mʌꞌ ju pꞌuspachtoꞌonex mʌꞌ biqꞌuin. Baxuc cu yaꞌaric Cꞌuj. Mʌꞌ u cꞌax u tꞌʌn a Cꞌujoꞌ a baꞌ tu toc aroꞌ.
\s Rajiꞌ irir jach tsoy ten Cꞌuj
\p
\v 14 Timoteo quen. Cꞌasej tiꞌob a baꞌ tin chich araj tiꞌ u tꞌʌn Cꞌuj. Arej tiꞌob wa ʌcʌtan tu wich Cꞌuj mʌꞌ ju nuncob u tꞌʌn mac. Mʌꞌ ja wirej, aroꞌ mʌꞌ ju yamtej mac quir u cʌnic Cꞌuj, cu chen choquintic u yorob a mac a cu yubicob u nunquicob u tꞌʌn.
\v 15 Quiꞌ sar a xiquin Timoteo caꞌ a quiꞌ cʌn u tꞌʌn Cꞌuj soc rajiꞌ Cꞌuj cu bin u yac tech:
\p ―Jach tsoyech Timoteo quireꞌ ta quiꞌ quibaj a baꞌ tin waꞌaraj tech.
\p Jeꞌ u yac tech aroꞌ wa taj ca tsecꞌtic u tꞌʌn Cꞌuj a baꞌ jach taj. Rajen mʌꞌ a chꞌic suraquir tiꞌ a beyaj. Rajen pꞌis a bʌj ta beyaj.
\v 16 Quiꞌ cʌnat a bʌj tiꞌ a mac a cu nunquicob u tꞌʌnob. Quireꞌ tꞌʌntꞌʌnan u caꞌob. Baxuc u tꞌʌnob quireꞌ mʌꞌ ju sʌjtob Cꞌuj, rajen tan u manob ich cꞌas hasta cu wayʌr jach cꞌas.
\v 17 A baꞌ cu camsicob ir a iqꞌuer u caꞌoꞌ. Mʌꞌ ju xur u man hasta chꞌejar mac. Cꞌʌꞌotej Himeneo yejer u racꞌob Fileto. Quireꞌ irej iqꞌuer u caꞌ u camsicob.
\v 18 Robob caj u pꞌʌtob u camsicob u tajir u tꞌʌn Cꞌuj. Tan u camsicob a baꞌ jach cꞌas, quireꞌ yʌn jun yarob a yacsmʌnob tu yorob tu quibob a baꞌ camsaꞌbob. Mʌꞌ ja wirej, camsaꞌbob tsꞌoc u riqꞌuirob mac tu quimen. Caj u camsaꞌbob mʌꞌ u yʌn yʌn wʌcꞌʌs riqꞌuir mac tu quimen. Rajen a macoꞌ tu pꞌʌtob u tꞌʌn Cꞌuj.
\v 19 Chen mʌꞌ a chꞌic sajquir Timoteo, tiꞌ a mac a cu tus camsicob a ray tꞌʌnoꞌ. Chichquint a wor, quireꞌ a mac a cu yacsicob tu yorob tiꞌ u tꞌʌn Cꞌuj mʌꞌ ju chꞌejar quireꞌ caj u yaꞌaraj Cꞌuj. Mʌꞌ ja wirej, toc tsꞌibaꞌan ich u tꞌʌn Cꞌuj uch a cu yaꞌaric: “A Cꞌujoꞌ yer a mac a cu yaꞌaric: A tenoꞌ in wer Cristo. Rajen caꞌ u pꞌʌtej tu cotor u cꞌasiꞌ. A baywoꞌ Cꞌuj yer mac tu quibajiꞌ.” 
\p
\v 20 A toꞌonexoꞌ a tij cacsex tij corex tiꞌ yʌn yaꞌab toꞌonex, barej u tiriꞌ tiꞌ ic beyajex. Mʌꞌ ja wirej, a toꞌonexoꞌ iroꞌonex u rʌquir yoꞌoch ich jach carem naj. Tu japnin naj cu cꞌʌnicob u rʌquir a betaꞌb tiꞌ oro wa betaꞌb tiꞌ sʌc taqꞌuin. Tiꞌ yʌn xan, cu cꞌʌnicob u rʌquir a betaꞌb tiꞌ cꞌʌt wa betaꞌb tiꞌ cheꞌ. Yʌn u rʌquir cu cꞌʌnicob u qꞌuinin cu chen quiꞌ quiꞌ janʌnob. U tiriꞌ u rʌquir a rajraꞌ u cꞌʌnicob.
\v 21 Rajen quin wac tech Timoteo, quireꞌ tech ca camsic tiꞌ u tꞌʌn Cꞌuj. Mʌꞌ a xactic a bʌj yejer a tus yʌjcamsʌyʌjirob u tꞌʌn Cꞌuj, soc a Cꞌujoꞌ cu cꞌʌniquech irech u rʌquir betaꞌb tiꞌ oro. Mʌꞌ ja wirej, a Cꞌujoꞌ cu cꞌʌnic a mac a tu ricꞌsaj u bʌj tiꞌ cꞌas soc mʌꞌ ju bin tu cꞌasir. Soc caꞌ bin cꞌuchuc tu qꞌuinin a Cꞌujoꞌ. Toc cꞌuchaꞌan yor quir u quiꞌ beyaj tiꞌ Cꞌuj.
\v 22 A techoꞌ Timoteo soc baxuquech caꞌ u cꞌʌnech Cꞌuj. Caꞌ a pꞌʌt a baꞌ ca pachtic ta wor a cꞌasoꞌ an ten bic mac mʌꞌ toy quiꞌ xuruc u baquer cu pachtic cꞌas. Caꞌ a cʌn u tꞌʌn Cꞌuj soc Cꞌuj cu yamtiquech soc tsoy a wor. Caꞌ a cʌnej u tꞌʌn Cꞌuj soc mʌꞌ a pꞌusic mac. Caꞌ a cʌn u tꞌʌn Cꞌuj soc a yajquintic tu cotor mac. Caꞌ a yajquintej Cꞌuj, soc taj ca wacsic ta wor. Cʌxtej u quiꞌtar a wor an ten bic a taj tu yacsaj tu yor u tꞌʌn Cꞌuj, a mac a cu tꞌʌnicob Cꞌuj.
\v 23 Mʌꞌ a yʌn nunquic u tꞌʌn a mac a mʌꞌ tu cʌnicob Cꞌuj. Quireꞌ mʌꞌ yer baꞌ u cꞌat Cꞌuj. Ca wiric cu chen nunquicob tꞌʌn, a cu pꞌusicob yorob mac.
\v 24 Cꞌʌꞌotej Timoteo a mac a cu beyaj tiꞌ Cꞌuj mʌꞌ ju nunc u tꞌʌn mac. Mʌꞌ ja wirej, tsoy cu tꞌʌnic tu cotor mac. Bayiriꞌ xan, nemʌꞌ biquiꞌ tu cu camsic u tꞌʌn Cꞌuj. Mʌꞌ seb cu choquintic u yor mac.
\v 25 Rajiꞌ chanber cu tajquintic a mac a mʌꞌ ju cꞌʌmʌn u tꞌʌn Cꞌuj. Ca wiric, mʌꞌ ij querex wa Cꞌuj cu chaꞌbʌr u cꞌaxicob yorob soc u jawʌrob u siꞌpirob quir u yacsicob tu yorob.
\v 26 Jaj ix tʌco wa cu jepsicob yorob tiꞌ a mac a tabsaꞌb ten quisin uch, soc yerob cꞌanaꞌan ten quisin aroꞌ. Soc u tocar ten Cꞌuj.
\c 3
\s Bic tabar a winicoꞌ caꞌ bin cꞌuchur tu qꞌuinin xur tꞌʌn
\p
\v 1 Cꞌʌꞌotej a baꞌ quin wac tech Timoteo. Raꞌ u qꞌuininoꞌ tabar u xur tꞌʌn jach pajar u mucꞌyajob cu bin yubejob. 
\v 2 Raꞌ u qꞌuininoꞌ yaꞌab mac cu chen bin u cʌxt u taqꞌuinob. Cu chen bin u cʌxt a baꞌ cu quiꞌquinticob u yorob. U wʌcꞌʌs bʌjiriꞌ cu chen tucric mʌꞌ ju tucrej Cꞌuj. A baywoꞌ rajraꞌ yacob mun u yaꞌabir u baꞌtac yʌn a tiꞌoboꞌ. Mʌꞌ ja wirej, u cꞌat caꞌ u tubsej yorob a mac a mʌnaꞌ u baꞌtʌcob. Seb cu bin u pꞌasticob Cꞌuj, baxuc xan bin u caꞌ pꞌasticob yet xibir xan.
\v 3 Mʌꞌ ju bin yub u tꞌʌn u nʌꞌ mʌꞌ ju bin yub u tꞌʌn u tet xan. Mʌꞌ ju bin yaꞌarej: “Bayoꞌ.” Rajraꞌ u tsꞌicob quireꞌ mʌꞌ yacsmʌnob tu yorobiꞌ. Mʌꞌ ju bin yajquintob mac. Chen choc yorob, chen amaꞌan u sistar yorob. Seb cu pʌqꞌuicob u pach u jer. Mʌꞌ ju cꞌuchur u yorob u maꞌquinticob a baꞌ cꞌasir cu pachticob. Mʌꞌ ju bin u yajquintob a baꞌ tsoyoꞌ. Mʌꞌ quiꞌ yorob yiricob a mac jach tsoyoꞌ. Seb cu bin cꞌuchurob mac soc u quinsaꞌrob. 
\v 4 Mʌꞌ ju tucrob a baꞌ cu tsicbaroboꞌ baxuc a baꞌ cu yiricob. Cu chen tucricob tu yorob: “Jach caremenob”, quij, cax mʌꞌ caremobiꞌ. Cu chen pachticob tu yorob a cꞌasoꞌ, chen mʌꞌ ju bin u yajquintob Cꞌuj.
\v 5 Wa mac cu yiricobeꞌ cu tus cꞌujinticob Cꞌuj. Barej mʌꞌ ju quibob Cꞌuj.
\p Barej mʌꞌ ja manob Timoteo yejerob.
\v 6 A baxucoꞌ a raꞌ u qꞌuininoꞌ, jeꞌ u tar mac quir u tabsaꞌr mac. Bin u caꞌ manob u tus camsicob u tꞌʌn Cꞌuj soc u tus acsic tu yatoch xquic. Rajen cu tus camsicob baꞌ soc u quibicob xquic a mʌꞌ chich u yoroboꞌ. Ca wiric a xquicoꞌ jach chich u joꞌrob. A jeꞌ xquicaꞌ u jach tsꞌurir u cꞌasir a cu pachticob tu yoroboꞌ. Rajen jach yʌn u siꞌpirob.
\v 7 A jeꞌ xquicaꞌ, rajraꞌ u chen cꞌat u cʌnicob u tꞌʌn a baꞌ tsoy tu xiquinob. Yubicob rajen mʌꞌ ju cꞌʌmob u tꞌʌn Cꞌuj a baꞌ jach tajoꞌ. Mʌꞌ ju cꞌuchur yorob tiꞌ. 
\v 8 Cꞌʌꞌotej Timoteo tu qꞌuinin a tiꞌ yʌn ic nunquir Moisés uch. Yʌn caꞌtur xib, a tu pꞌastob Moisés xan uch. Janes u cꞌabaꞌ tuririꞌ, yejer u jer u cꞌabaꞌ Jambres. Baxuc xan a yʌjtus camsʌyʌjirob a tin waꞌaraj tech, caj u pꞌastob u jach tsoyir u tꞌʌn Cꞌuj. A jeꞌ u tus ʌjcamsʌyʌjirob jach manan cꞌasir u tucurob. Mʌꞌ ja wirej, Timoteo, tu tus acsob tu yorob u tꞌʌn Cꞌuj.
\v 9 Cꞌaj tech uch Timoteo, baꞌ u berob tiꞌ Janes yejer Jambres a caj u pꞌastob Moisés? Caj irir ten tu cotor u winiquirob judío mʌꞌ cꞌuchij yorob tiꞌ Moisésiꞌ. Raꞌiriꞌ cu bin yirob tu cotor mac bic tu tusarob tiꞌ mac a tus yʌjcamsʌyʌjirob tu yʌnech. Tabar yiricob tu cotor mac a tus yʌjcamsʌyʌjirob mac.
\s Pablo caj u chich araj tiꞌ Timoteo
\p
\v 10 Chen a techoꞌ Timoteo, caj a cꞌʌm u tꞌʌn Cꞌuj a tin camsech uch. Tan a quiꞌ quibic a techoꞌ. Ta wiraj bic tabar in cuxtar tu yʌnech uch. Ta wiraj bic caj in pꞌis in bʌj tin beyaj. Ta wiraj bic caj in wacsaj tin wor. Ta wiraj mʌꞌ jin bʌbʌ pꞌʌte in beyajiꞌ. Tech ta wira nemʌꞌ biqueniꞌ. Tech ta wira caj in yajquintaj tu cotor mac.
\v 11 Tech ta wiraj quireꞌ tin tsecꞌtaj u tꞌʌn Cꞌuj tiꞌ yʌnech caj u chucob in pach. A techoꞌ Timoteo, ta wiraj baꞌ in ber a tenoꞌ ich u cajar Antioquia yejer u cajar Iconio yejer u cajar Listra. A wer jach manan tu chucob in pach. Barej tu taquen Jaj Tsꞌur.
\v 12 Cꞌʌꞌotej a jeꞌ tꞌʌnaꞌ. A mac a jach manan u cꞌat u quiꞌ cʌnej Cꞌuj soc u quiꞌ sayʌr tu pach quir u cʌnic u tꞌʌn Jesucristo. Jeꞌ u mucꞌyajtiqueꞌ, quireꞌ bin u caꞌ chucbirob u pach ten u racꞌob.
\v 13 Barej a mac jach cꞌasoꞌ yejer a mac u tusarbaroꞌ, bin u caꞌ man tu cꞌasir hasta jach manan u cꞌasirob. A mac cu tusaricob, u wʌcꞌʌs bʌjiriꞌ cu yʌn bin tusarbir tiꞌ.
\p
\v 14 Barej uꞌyej bar quin wac tech Timoteo. Caꞌ a chichquint a wor a baꞌ ta cʌnaj. Ta toc acse ta wor tiꞌ, quireꞌ taj aroꞌ. Quireꞌ a wer mac tu camsech uch a tsoy yoroꞌ. 
\v 15 Quireꞌ toc chichanech caj a cʌnaj u tꞌʌn Cꞌuj, rajen a neꞌer u tꞌʌn Cꞌuj quireꞌ caj a quibaj u tꞌʌn Jesucristo caj. Mʌꞌ ja wirej, u tꞌʌn Cꞌuj a tsꞌibaꞌanoꞌ, cꞌuchaꞌan yor u camsic mac soc u quibic soc u yacsic tu yor tiꞌ Cristo Jesús.
\v 16 Cꞌʌꞌot a jeroꞌ Timoteo. Tu cotor a baꞌ yarmʌn Cꞌuj tiꞌ tsꞌibaꞌan ich u tꞌʌn Cꞌuj soc u camsicoꞌon a baꞌ caꞌ ij quibej. Tiꞌ tsꞌibaꞌan quir ij cꞌaxic ij cor. Tiꞌ tsꞌibaꞌan quir u chich aric toꞌon soc ic man tu tsoyir. Tiꞌ tsꞌibaꞌan quir u chich aric toꞌon soc mʌꞌ jic bin tu cꞌasir. 
\v 17 A Cꞌujoꞌ tu tsꞌaj toꞌon u tꞌʌn, soc cꞌuchaꞌan ij cor ic beyaj tiꞌ Cꞌuj. Rajen ic neꞌer baꞌ u cꞌat Cꞌuj soc ic man tu cotor tu tsoyir.

\c 4
\p
\v 1 Rajen quin chich aric tech Timoteo quireꞌ Cꞌuj cu yiric baxuc Jesús cu yiric xan. Quireꞌ raꞌ cu bin tar biqꞌuin quir yiric a mac yʌn u siꞌpir wa mʌnaꞌ u siꞌpir. Jeꞌ yiric a macoꞌ cuxaꞌanoꞌ bayiriꞌ a mac a quimenoꞌ. Quireꞌ a wer Timoteo, caꞌ bin uruc Jesús jeroj bin u caꞌ u reyintej ich yocꞌocab.
\v 2 Rajen caꞌ a tsecꞌt u jach tsoyir u tꞌʌn Cꞌuj. Cax raꞌ u qꞌuinin tsoy yubic mac cax mʌꞌ raꞌ u qꞌuinin u cꞌat yub a tꞌʌn. Chichquint a wor a wac tiꞌob, soc a wesic a baꞌ siꞌpir yʌn tiꞌobeꞌ quir u yaꞌaric tiꞌ Cꞌuj caꞌ jawsac u siꞌpir ten Cꞌuj. Chich a wac tiꞌob caꞌ u pꞌʌtob a cu pʌyic u siꞌpirob caꞌ a chichquint yorob a mac a cu quibicob u tꞌʌn Cꞌujoꞌ. Jach nemʌꞌ biquech caꞌ a camsej tiꞌob u tꞌʌn Cꞌuj soc u cʌnicob.
\v 3 Jeꞌ u cꞌuchur tu qꞌuinineꞌ a winicoꞌ, mʌꞌ u cꞌat yub camsaꞌr u tajir u tꞌʌn Cꞌuj. Bin u caj manob u cʌxtob u jer yaꞌab yʌjcamsʌyʌjirob hasta cu yubicob tsoy u camsaꞌr. Mʌꞌ ja wirej, u cꞌatob yubob camsaꞌr a baꞌ cu pachticob tu yoroboꞌ.
\v 4 Jeꞌ u pꞌuspachticob u jach tsoyir u tꞌʌn Cꞌuj soc u saricob u xiquinob, a baꞌ camsaꞌb ten u nunquir uchoꞌ. Rajen chen tꞌʌn u caꞌob uch.
\v 5 Barej a techoꞌ Timoteo, quiꞌ cʌnant a pixam tu cotor baꞌ a cu bin taroꞌ. Caꞌ a mucꞌtej wa cu tar u chuquicob a pach. Quireꞌ raꞌ a beyaj a techoꞌ, quir a tsecꞌtic u jach tsoyir u tꞌʌn Cꞌuj. Quiꞌ tsecꞌt u tꞌʌn Cꞌuj, soc tu cotor mac yer bic tabar u taquicob u bʌj.
\p
\v 6 Tabar in quinsaꞌr an ten bic quinsbir yʌrʌcꞌ a cu sijic tiꞌob Cꞌujoꞌ. Cꞌuchij tu qꞌuinin in quinsaꞌr tiꞌ u yajir u beyaj Cꞌuj.
\v 7 Tsꞌoc in beyaj. Tin quiꞌ quibaj tu cotor a baꞌ yaraj ten Cꞌuj uch.
\v 8 Rajen mʌꞌ in pꞌʌt in wacsic tin woriꞌ. Bajeꞌrer quireꞌ cu yiric taj tin quibaj a Jesúsoꞌ, soc u tsꞌic ten u boꞌorir tu manen tu tsoyir. Raꞌ cu bin tsꞌa ten caꞌ bin xuruc tꞌʌn, quireꞌ taj cu yiric baꞌquiriꞌ yʌn toꞌon. Mʌꞌ chen ten cu bin tsꞌaꞌbʌriꞌ. Baxuc bin u caꞌ u tsꞌaꞌbʌr tiꞌ a mac a tan u quiꞌ pajic u qꞌuinin caꞌ bin uruc Jesús.
\s Tsꞌoc u tꞌʌn Pablo tiꞌ Timoteo
\p
\v 9 Caꞌ taquech tin wicnʌn. Seb a tar.
\v 10 Quireꞌ tu xunpꞌʌten Demas. Mʌꞌ ja wirej, rajiꞌoꞌ caj u yajquint a baꞌ yʌn teraꞌ yocꞌocab, rajen caj putsꞌij ich u cajar Tesalónica. Bin Crescente ich u ruꞌumin Galacia. A Titojoꞌ, bin tu ruꞌumin Dalmacia.
\v 11 Chen tiꞌ yʌn tin wicnʌn Lucas. Caꞌ bin taquech, toc pʌyej Marcos xan, quireꞌ cꞌuchaꞌan yor u yamtiquen tin beyaj.
\v 12 Tin tuchiꞌtaj caꞌ xic Tíquico ich u cajar Efeso.
\v 13 Caꞌ bin taquecheꞌ, toc chꞌa a pure ten u caꞌ yarir in nocꞌ, a tin pꞌʌtaj quireꞌ tubten ich yatoch Carpo ich u cajar Troas. Baxuc a ju cuchij in juꞌuneꞌ in xaquic yejer u juꞌunin a jin catsꞌmʌneꞌ. A jeꞌ juꞌunaꞌ a jin necꞌateꞌ.
\p
\v 14 A Alejandrojoꞌ a mac yer a betaꞌr mascaboꞌ. Tu jach cꞌasquinten. Chen a Cꞌujoꞌ rajiꞌ cu bin u boꞌotic u boꞌorir u cꞌʌb quireꞌ cꞌas tu betaj.
\v 15 A techoꞌ Timoteo, quiꞌ cʌnant a bʌj tiꞌ Alejandroj xanoꞌ. Quireꞌ tan u jach pꞌactic a baꞌ quij camsiqueꞌ. 
\p
\v 16 Raꞌ u qꞌuinin, caj u yʌn batꞌan ꞌuyij in tꞌʌn tu cu taꞌquicob in joꞌr ʌcʌtan u rey u winiquirob romano. Mʌnaꞌ in bʌjob tar u yamten quij. Tu rʌc pꞌʌtenob tin junan. Quin tꞌʌnic Cꞌuj caꞌ jawsac u siꞌpirob a mac a tu pꞌʌtenoboꞌ.
\v 17 Barej ic Jaj Tsꞌurirex pꞌat tin wicnʌn tan u chichquintic in wor. Rajen cꞌuchaꞌan in wor in bin in tsecꞌtic tu cotor u tꞌʌn Cꞌuj ʌcʌtan a mac a mʌꞌ u winiquirob judío caꞌ yubob. Rajen tu taquen soc mʌꞌ u puricob u chiꞌen barum.
\v 18 Cʌnej a jeroj, Timoteo. Ic Jaj Tsꞌurirex bin u caꞌ taquiquen tiꞌ a mac a ju cꞌat u cꞌasquintiquenob ten. Bin u caꞌ u cʌnanten hasta quin cꞌuchur tu ruꞌumin tu cu bin reyintic Cꞌuj ich caꞌanan. Rajen quin wac tiꞌ: “Jach caremech Cꞌuj.” Rajiꞌ quin bin in wac tiꞌ munt qꞌuin. Jeroj.
\s Cu chen tꞌʌnic u bʌjob Pablo
\p
\v 19 Quin tꞌʌnic Prisca yejer u mam Aquila u tiririꞌ yʌn, bayiriꞌ a mac tiꞌ yʌn tu yatoch Onesíforo.
\v 20 A Erastoeꞌ tiꞌ pꞌat tu cajar Corinto. Yajij Trófimoj rajen pꞌat tu cajar Mileto.
\v 21 Wa ber caꞌ bin taquech tin wicnʌn, mʌꞌ a yʌn tar u qꞌuinin queꞌer. Yaꞌaraj Eubulo caꞌ in tꞌʌnech. Baxuc Pudente yejer Lino yejer Claudia yejer tu cotor ic bʌjobex. 
\p
\v 22 Quin tꞌʌnic ic Jaj Tsꞌurirex Jesucristo caꞌ u quiꞌ cʌnantech tub yʌnech. Bayiriꞌ quin cꞌatic tiꞌ Cꞌuj caꞌ u yamtej tu cotor mac tub yʌnech. Jeroj, tsꞌoquij, quij Pablo.