\id TIT
\h TITO
\toc1 TITO
\mt1 A JEꞌ JUꞌUNAꞌ, CAJ U TSꞌIBTA PABLO TIꞌ TITO
\c 1
\s Pablo cu tsꞌibtic tiꞌ Tito
\p
\v 1 A tenoꞌ Pablojen, u cꞌurewen Cꞌuj. A tenoꞌ Pablojen, caj u tuchiꞌten Jesucristo, Tito. Caj tu tuchiꞌten quir in camsic a mac a tu tetajob Cꞌuj. A tenoꞌ caj u tuchiꞌten quir in yamtic a mac a tetaꞌanob ten Cꞌuj, soc u quiꞌ acsicob tu yorob tiꞌ u tꞌʌn Cꞌuj. A tenoꞌ caj u tuchiꞌten Cꞌuj quir in yamtic tiꞌob soc u quiꞌ najticob u tꞌʌn Cꞌuj soc u quiꞌ cꞌujinticob Cꞌuj.
\v 2 Ca wiric, a tenoꞌ quin beyaj tiꞌ Cꞌuj, quireꞌ tan in pajic u qꞌuinin quir in cuxtar munt qꞌuin. Mʌꞌ ja wirej, tu toc araj Cꞌuj:
\p ―Jeꞌ in tsꞌic tech a cuxtar munt qꞌuineꞌ.
\p A Cꞌujoꞌ mʌꞌ ju tus. Mʌꞌ ja wirej, tu chꞌic chunin caj u yaꞌaraj Cꞌuj uch:
\p ―Jeꞌ in tsꞌic tech a cuxtar munt qꞌuineꞌ, quij.
\p
\v 3 A bajeꞌrereꞌ, caj u toc esa toꞌon Cꞌuj quir ij quiric bic tabar ij cuxtar munt qꞌuin. Quireꞌ ij cuꞌyaj u tsecꞌtic u tꞌʌn Cꞌuj uch. Caj u chich araj ten Cꞌuj, quij Pablo: 
\p ―Xen tsecꞌt in tꞌʌn.
\p Baxuc caj u yaꞌaraj yʌjtaquiroꞌon ten.
\v 4 A jeꞌ juꞌunaꞌ Tito, tin tsꞌibtech quireꞌ, Tito, irech in pararech quireꞌ, caj a wacsa ta wor u tꞌʌn Cꞌuj, Tito. Baxuc tenoꞌ, quij Pablo. In cꞌat Tito, caꞌ u yamtech Cꞌuj ic Tet. Baxuc xan in cꞌat caꞌ u yamtech Jesucristo ij cʌjtaquir, Tito. In cꞌat caꞌ u yajquin tech Cꞌuj, Tito. Baxuc Jesucristo. In cꞌat caꞌ quiꞌac a wor Tito tiꞌ Cꞌuj baxuc tiꞌ Jesucristo, soc mʌnaꞌ baꞌ ca tucric.
\s Tiꞌ cu beyaj a Titojoꞌ ich u petenin cꞌacꞌnab. Creta u cꞌabaꞌ
\p
\v 5 Tito, quen. Caj in pꞌʌtech ta beyaj ich u petenin cꞌacꞌnab. Creta u cꞌabaꞌ u petenin cꞌacꞌnab. Caj in pꞌʌtech ta beyaj Tito soc a toc tsꞌocsic in beyaj soc a quiꞌ tajquintic. “Bin in caꞌ Tito”, quen tech. A techoꞌ quir a tetic u tsꞌurirob ich a wet acsʌꞌorirob tu cu muchꞌquinticob u bʌj. Caꞌ a tet u jach tsꞌurirob tu cu muchꞌquinticob u bʌj. Jujuntur u tsꞌurirob, quireꞌ u tirir tiꞌ u cajar tu cu cꞌayob xan.
\v 6 A mac a bin tetbir ten u bʌjob tu cu cꞌayob Tito. Arej u tetob a mʌꞌ u pacꞌʌꞌrob u pach ten u racꞌoboꞌ. Caꞌ u teticob u tsꞌurirob tu cu cꞌayob, a yʌn tuririꞌ u raqꞌueꞌ. A yʌn u pararoꞌ, a tu yacsob tu yoroboꞌ. A yʌn u pararoꞌ, a mʌꞌ tan u manob tu cꞌasir, cax baxuc cu yaꞌaric u racꞌoboꞌ tan u manob tu cꞌasir, quij. A yʌn u pararoꞌ a cu quibicob u tꞌʌn u teteꞌ.
\v 7 A mac bin u caꞌ tetbir ten u bʌjob tu cu cꞌayob. Arej tiꞌob caꞌ u tetob a mac a mʌꞌ u pʌcꞌ u pachob u racꞌoboꞌ. Quireꞌ robob cu bin tetbir quir u beyaj yejer Cꞌuj. Caꞌ u tetob a mʌꞌ seb cu pꞌujur u yoroboꞌ. A mac a mʌꞌ ju tucrej tu yorob:
\p ―Jach caremen, a tenoꞌ.
\p Mʌꞌ u yʌn teticob a cu carchʌjʌreꞌ. A mʌꞌ ju pꞌuse yorob u racꞌobeꞌ. A mʌꞌ ju nepachtob u taqꞌuin u racꞌobeꞌ. 
\v 8 Rajen arej u tetob a cu man tu tsoyir, a cu bin ocar tu tsꞌurir tu cu cꞌayob. Ar u cʌxtob a mac a nanij u yacsic mac tu yatocheꞌ. Cʌxt a mac a tu cʌna Cꞌujoꞌ. Cʌxt a mac a nemʌꞌ biquiꞌ. Cʌxt a mac a cu cʌnantic u bʌj tiꞌ a cꞌasoꞌ.
\v 9 Cʌxt a tetej a mac a cu quiꞌ cʌnantic u tajir u tꞌʌn Cꞌuj. A mac a cu man u chiquint u yorob u racꞌoboꞌ. A cu camsic u tajir ich u tꞌʌn Cꞌuj, cax pꞌastaꞌb ten mac, an bic camsaꞌb a tiꞌoboꞌ. Tan u camsic tiꞌob a baꞌ taj tiꞌ u tꞌʌn Cꞌuj. Bayiriꞌ, a cꞌuchaꞌan yor u yesic u tꞌʌn Cꞌuj tiꞌ a mʌꞌ u quibicob u tꞌʌn Cꞌuj. Cax cu chen nunquicob u tꞌʌn Cꞌuj. Jaj ix tʌcoj cu cꞌaxicob tu yorob u tucurob tiꞌ u tꞌʌn Cꞌuj a mʌꞌ tu quibob u tꞌʌn Cꞌuj, jaj ix tiꞌ jeꞌ u quibicob u tꞌʌn Cꞌuj xaneꞌ.
\p
\v 10 A baywoꞌ arej tiꞌob caꞌ u tetob u tsꞌurir an ten bic tin waꞌaraj tech. Mʌꞌ ja wirej, yʌn yaꞌab mac mʌꞌ tan u quibicob u tꞌʌn Cꞌuj. Tan u chen tꞌʌnob. Mʌꞌ ju tucrob a baꞌ cu man yaꞌarob. Tan u tusaricob tiꞌ u racꞌob. Baxucoꞌ aroꞌ mʌꞌ taj u tsicbar ich u winiquirob judíojiꞌ. 
\v 11 Rajen arej tiꞌ u tsꞌurir a wet acsʌꞌorirob a tetaꞌb ten u bʌjoboꞌ caꞌ u yaꞌarej tiꞌob:
\p ―Caꞌ u nupꞌob u chiꞌob.
\p Mʌꞌ ja wirej, Tito, tan u rʌc xaxacꞌticob u tucurob, a tiꞌ pꞌeriꞌ cʌjricoboꞌ. Quet yejer u xaxacꞌticob u tucurob, tan u tus camsicob tiꞌ u tꞌʌn Cꞌuj, quir u jaricob u taqꞌuin, cax mʌꞌ taj a baꞌ cu camsicoboꞌ. 
\p
\v 12 Cꞌaj tech wa Tito, a uchoꞌ, tiꞌ yʌn yʌjtseqꞌuir u tꞌʌn a cu tar ich u petenin Creta, caj u yaꞌaraj:
\p ―A jin racꞌoboꞌ u bur u qꞌuinin tan u man tus. A jin racꞌoboꞌ jach cꞌas, irob bʌcꞌ, tsꞌic. A jin racꞌoboꞌ jach coch u nʌcꞌob. Mʌꞌ jach cꞌorob xan.
\p
\v 13 A baꞌ caj u yaꞌaraj tiꞌ u racꞌob, yʌjtsqꞌuir u tꞌʌn uch taj, quen. Rajen caꞌ a chich qꞌueyob a tiꞌoboꞌ a mac a cʌjaꞌanob ich u petenin Creta, soc u quibicob a baꞌ jach tsoyoꞌ.
\v 14 Chich qꞌuey a tiꞌoboꞌ soc mʌꞌ ju cʌnicob a baꞌ cu sosoc aricob, u winiquirob judío. Quireꞌ aroꞌ, mʌꞌ taj a cu yaꞌaricoboꞌ. Arej tiꞌob soc mʌꞌ u yʌn quibicob a mac a tu pꞌuspachtob u tꞌʌn Cꞌuj.
\p
\v 15 Mʌꞌ raꞌ cu pacꞌʌr u siꞌpirob a baꞌ camsaꞌb ten u nunquirob uch. Mʌꞌ ja wirej, tu cotor baꞌ tsoy tiꞌ a mac a rucꞌsaꞌb u siꞌpirob ten Cꞌuj. Chen a mac a mʌꞌ tsoy yorob, cꞌas cu tucricob. Rajiꞌ cu pacꞌʌr u siꞌpirob a baꞌ camsaꞌb ten u nunquir. Quireꞌ mʌꞌ ju yacsob tu yorob quir u rucꞌsicob u siꞌpirob. Rajen xaxacꞌaꞌan u tucurob. Rajen mʌꞌ yer bic tabar u manob tu tsoyir. 
\v 16 Robob cu tus aꞌaricob:
\p ―In wet manob Cꞌuj.
\p Chen mʌꞌ ju manob tu tsoyir, rajen ij quer tus u caꞌob. Mʌꞌ ja wirej, robob caj pꞌactaꞌboboꞌ ten Cꞌuj quireꞌ mʌꞌ ju quibicob u tꞌʌn mac. Rajen mʌꞌ ju cꞌuchur u yorob u manob tu tsoyir.
\c 2
\s Bic tabar u quiꞌ camsic tiꞌob u tꞌʌn Cꞌuj
\p
\v 1 Barej a techoꞌ Tito, Camsej tiꞌob a jach quet yejer u tꞌʌn Cꞌuj. Rajraꞌ caꞌ a camsej tiꞌob, a quet yejer u tꞌʌn Cꞌuj.
\v 2 Toc chich arej tiꞌob a nuxibeꞌ. Mʌꞌ tsoy u carchʌjʌrob. Arej tiꞌ a nuxiboꞌ soc u manob tu tsoyir. Arej tiꞌob soc mʌꞌ u chejticob u racꞌob. Arej tiꞌob caꞌ u quiꞌ acsob tu yorob u tꞌʌn Cꞌuj. Arej tiꞌob caꞌ u yajquintob u racꞌob a nuxibeꞌ. Arej tiꞌob soc u cʌnicob nemʌꞌ bicob. Cax mac cu chuquicob u pachob a nuxibeꞌ, quij.
\v 3 Arej tiꞌob xan, a xquicoꞌ, a nuxibeꞌ caꞌ manacob tu tsoyir, soc yer u racꞌob tu yacsob tu yorob. Quireꞌ cu yiricob mʌꞌ tan u manob tu cꞌasir. Arej tiꞌob Tito, soc mʌꞌ u manob u pʌcꞌob u pach mac, a nuxibeꞌ a xquicoꞌ. Arej tiꞌob soc mʌꞌ u carchʌjʌrob, a xquiqueꞌ a nuxibeꞌ. Caꞌ manacob tu tsoyir soc u cʌnicob chan xquic, u manob tu tsoyir.
\v 4 Arej tiꞌob Tito, soc u camsicob tiꞌ xquic, a chichaneꞌ, caꞌ u cʌnob u yajquinticob u mam. Caꞌ u quiꞌ cʌnob u quiꞌ yajquinticob u parar, a xquic a chichaneꞌ.
\v 5 Soc mʌnaꞌ mac cu bin u pꞌasticob u tꞌʌn Cꞌuj. Arej tiꞌob, a xquic a nuxibeꞌ, caꞌ u camsob a xquic a chichaneꞌ soc mʌꞌ seb cu pꞌujur u yorob, a chichan xquiqueꞌ. Arej tiꞌob caꞌ u camsob tiꞌ, caꞌ u cʌnantob u bʌj soc mʌꞌ u yacsicob tu siꞌpirob. Arej tiꞌob caꞌ u camsob u quiꞌ jansicob u mam tan u quiꞌ misticob yatoch soc mʌꞌ rob yatoch. Arej tiꞌob, a xquiqueꞌ a nuxibeꞌ, caꞌ u camsob a chan xquic soc u yamticob u racꞌob. Arej tiꞌob caꞌ u camsob tiꞌ, soc u quiꞌ uꞌyicob u tꞌʌn u mam.
\p
\v 6 Arej tiꞌob, a chichan xib xan, soc mʌꞌ seb cu pꞌujur yorob.
\v 7 A techoꞌ, Tito, tꞌajquint a bʌj soc u cʌniquechob a chichan xib. Soc u quiꞌ cʌniquechob a baꞌ ca betic tu cotoreꞌ, tu ca camsic tiꞌob. Caꞌ a quiꞌ camsej soc tsoy yiricob a wor Tito, quireꞌ ca quiꞌ camsic tiꞌob soc yiricob taj ca camsic tiꞌob. Soc u sʌjtiquechob Tito a racꞌob.
\v 8 Tu ca camsic tiꞌob, Tito, a mac cʌjaꞌan ich u petenin cꞌacꞌnab Creta. Quiꞌ irej, Tito, soc yerob taj ca camsic. Soc mʌnaꞌ mac cu bin u pʌqꞌuicob a pach, Tito. Cax cu pꞌasticoꞌon Tito, a wer taj a baꞌ ca camsic, rajen a mac a cu pꞌasticoꞌon, Tito, jeꞌ u pʌyicob u suꞌtarob tech yejeren, quireꞌ taj quij camsicob.
\p
\v 9 A mac cu cꞌanan caꞌ beyanʌc caꞌ a camsej tiꞌob, Tito, soc u quiꞌ uꞌyicob u tꞌʌn u jach tsꞌurir, cax a baꞌ cꞌataꞌb tiꞌob ten u jach tsꞌurir. Arej tiꞌob caꞌ u quiꞌquintob yor u jach tsꞌurir tu cu beyajob. Arej tiꞌob soc mʌꞌ u nunquicob u tꞌʌn u jach tsꞌurir. Arej tiꞌob, Tito, a cu cꞌananob tu beyajob ten u jach tsꞌurir.
\v 10 Arej tiꞌob, mʌꞌ u yʌn acꞌricob u baꞌtac u jach tsꞌurir. Arej tiꞌob soc rajraꞌ chich u beyajob soc yerob u jach tsꞌurir jeꞌ u quibicob u beyajob. Rajen caꞌ u toc betej an ten bic tin waꞌaraj soc u jer a cu yiricob bin u caꞌ yaꞌarob: “Jach tsoy u tꞌʌn Cꞌuj”, quireꞌ yerob tu yacsob tu yorob tiꞌ ij cʌjtaquir.
\p
\v 11 Mʌꞌ ja wirej, a Cꞌujoꞌ caj u yesatoꞌon bic tabar u yajquinticoꞌonex. Jach manan cu yajquiticoꞌonex quireꞌ tu tuchiꞌt u parar caꞌ u tacoꞌonex wa quij cacsiquex tij corex u tꞌʌn Jaj Tsꞌur.
\v 12 A baywoꞌ Cꞌuj tan u camsicoꞌonex Tito caꞌ ic yʌn pꞌʌt a baꞌ cꞌasir, a tic betex uch. Caꞌ ic pꞌʌtex a baꞌ cꞌasir cu tar toꞌonex a baꞌ quic pachtiquex tij corex soc mʌꞌ seb quic pꞌusic ij corex. Soc caꞌ manacoꞌonex tu tsoyir ich yocꞌocab. Soc caꞌ ij quiꞌ cꞌujintex Cꞌuj bajeꞌrer xan.
\v 13 Quireꞌ tan ic pajiquex u qꞌuinin quir u tar ij cʌjtaquirex Jesucristo. Mʌꞌ ja wirej, a tiꞌ cu tar ich caꞌanan, jach manan tsoy caꞌ bin uruc ic Jaj Tsꞌurirex Jesucristo. Quireꞌ jach carem ij Cꞌujex jach tsoy ij cuꞌwiquex yur caꞌanan Tito.
\v 14 Mʌꞌ ja wirej, a Jesúsoꞌ, u bʌjiriꞌ tu cꞌubaj u bʌj caꞌ bajʌc ich cruz. Quir u rʌc boꞌotic tu cotor u boꞌorir ic siꞌpirex rajen quinsaꞌb. Rajen tu tacatoꞌonex Jesús tiꞌ ij cꞌasirex soc rajiꞌ yʌninoꞌonex. Caj u rʌc jawsaj ic siꞌpirex. Cax tu cotor u cꞌasir a tic betex uch soc ic manex tu tsoyir. Soc sacꞌoroꞌonex caꞌ ic yamtex ic racꞌob.
\p
\v 15 Tito, quen, baxuc xan caꞌ a camse tiꞌ a wet acsʌꞌorirex. Caꞌ a chichquint u yorob soc u cʌnicob. Caꞌ a chich arej tiꞌob soc yerob tu tetech Cꞌuj quir a camsic tiꞌob. Soc mʌꞌ a chaꞌic u pꞌastiquechob, Tito.
\c 3
\s Soc yiriquechob ta wacsaj ta wor
\p
\v 1 Tito, quen, caꞌ a waꞌarej tiꞌ a mac a cu camsicob u tꞌʌn Cꞌuj. Arej tiꞌob caꞌ u quibob u tꞌʌn u jach tsꞌurir tu cajar. Bayiriꞌ tiꞌ gobierno, caꞌ u quibob u tꞌʌn. Arej tiꞌob caꞌ u tꞌajquintob u bʌj tu beyaj wa tsoy u beyaj. Wa mʌꞌ tsoy u beyajob arej tiꞌob: “Jot”, quij. 
\v 2 Arej tiꞌob, soc mʌꞌ u pꞌasticob mac, soc mʌꞌ u tsꞌiquinticob mac. Arej tiꞌob soc nemʌꞌ bic u tsicbar tiꞌ mac, soc chan ber cu tsicbar tiꞌ u yet acsʌꞌorirob. Bayiriꞌ yejer a mac a mʌꞌ yacsmʌnob tu yorob u tꞌʌn Cꞌuj.
\p
\v 3 Cꞌʌꞌotej, Tito, quen. A toꞌon uchoꞌ mʌꞌ jic najtej a baꞌ tsꞌibaꞌan ich u tꞌʌn Cꞌuj uch. An ten bic toꞌon uch, Tito, mʌꞌ jij quibaj u tꞌʌn mac. Baxuc tiꞌ a mʌꞌ yacsmanob tu yorob bajeꞌrer. Wa cu pʌyicoꞌon ic racꞌob uch, tij quibaj ic bin tu cꞌasir mac uch. Quireꞌ satoꞌon tiꞌ u tꞌʌn Cꞌuj uch. Cꞌʌꞌotej, Tito, a toꞌonoꞌ rajiꞌ quic tsꞌurintic a baꞌ quic pachtic cꞌas uch. A wa quij quiric tij quich uch Tito. Quic jach pachtic cꞌas. A uchoꞌ quic man tu cꞌasir tan u qꞌuextar ij cor. Quic wʌcꞌʌs pꞌactic ic bʌj. Bayiriꞌ xan quic pacran pꞌactic ic racꞌob xan. 
\v 4 Barej Tito, caj u yesa toꞌon Cꞌuj bic tabar u tsoyir Cꞌuj cu yajquinticoꞌonex. Rajen caj u tuchiꞌtaj u parar ij cʌjtaquirex quir u yamticoꞌonex, a mac a teꞌ cʌjaꞌan ich yocꞌocab.
\v 5 Mʌꞌ ja wirej, Tito, cax wa tic chen betajex tsoyoꞌ, chen mʌꞌ rajiꞌ quir u taquicoꞌonex Cꞌuj. Tu chen tacajoꞌonex quireꞌ tu yajquintoꞌonex quireꞌ u cꞌat u yamticoꞌonex soc mʌꞌ ic binex cꞌacꞌ. Caj u rʌc rucꞌsa ic siꞌpirex wa ber caj u tacajoꞌonex. Caj u tsꞌaj toꞌonex u jer ij corex rajen u pararoꞌonex Cꞌuj bajeꞌrereꞌ. Rajiꞌ Cꞌuj ic Tetex bajeꞌrereꞌ. Mʌꞌ ja wirej, caj u tsꞌaja toꞌonex u jer quir ij cuxtarex munt qꞌuin. A baywoꞌ ricꞌben winicoꞌonex quireꞌ u Tajꞌor u Pixam Cꞌuj.
\v 6 A Jesucristojoꞌ caj u masaj toꞌonex u Tajꞌor u Pixam Cꞌuj quireꞌ rajiꞌ ij cʌjtaquirex. Jach manan caj u tsꞌaja toꞌonex u Tajꞌor u Pixam Cꞌuj.
\v 7 Tu cotor aroꞌ, caj betaꞌb ten Cꞌuj toꞌonex soc ʌcʌtan u wich tsoy yiricoꞌonex Cꞌuj. Mʌꞌ ja wirej, u bʌjiriꞌ a Cꞌujoꞌ caj u yajquintoꞌonex soc u yamticoꞌonex. A baywoꞌ, ʌcʌtan tu wich Cꞌuj tsoy yiricoꞌonex. Rajen tan ic pajiquex u qꞌuinin quir u yacsicoꞌonex soc ic cuxtarex munt qꞌuin.
\p
\v 8 A jeꞌ tꞌʌnaꞌ, a tin waꞌara tech sam jach taj, Tito. Rajen jach tsoy caꞌ a camsej tiꞌob a tu yacsob tu yorob. In cꞌat caꞌ a chich arej tiꞌ a yacsmʌnob tu yorob u tꞌʌn Cꞌuj. Arej tiꞌob caꞌ manacob tu tsoyir soc u yamticob u racꞌob. Arej caꞌ u pꞌis u bʌjob caꞌ u yamtob u racꞌob. Jach tsoy caꞌ a camsej tiꞌob aroꞌ, Tito. Quireꞌ caꞌ ic yamtic mac tu cotor.
\v 9 Tsireꞌeꞌ Tito. Pꞌʌtej joqꞌuen mʌꞌ a wocar tu cu chiꞌicob u niꞌ. Mʌꞌ baꞌwir cu chiꞌicob u niꞌ quireꞌ a techoꞌ, Tito, mʌꞌ tech a chiꞌicob u niꞌ quireꞌ rajraꞌ u cꞌatic bic tabar u nunquir uch, quij. Mʌꞌ ja wirej, raꞌ cu yʌnx chun u tsꞌictacob. Quireꞌ mʌꞌ ja chiꞌibar u niꞌ, a techoꞌ, Tito, quireꞌ a jeꞌraꞌ u tꞌʌn Moisés. Cax cu yaꞌaricob: “Mʌꞌ tsoy aroꞌ.” Rajiꞌ mʌꞌ u yamtob mac cu chen pꞌusic yorob.
\p
\v 10 Wa tiꞌ yʌn mac tan u tsꞌiquintic u yet acsʌꞌorirob tu cu muchꞌquinticob u bʌjob. Arej tiꞌ, caꞌ u pꞌʌt u tsꞌiquintic u yet acsʌꞌorirob. Wa cu caꞌ tsꞌiquintic u yet acsʌꞌorirob. Arej tiꞌ, Tito, wa mʌꞌ ju yub a tꞌʌn, Tito, jocꞌsej tu cu cꞌayob. Arej tiꞌ, mʌꞌ u caꞌ tar tu cu cꞌayob quireꞌ caꞌten cu tsꞌiquintic u yet acsʌꞌorir. 
\v 11 Mʌꞌ ja wirej, Tito, saꞌtʌr a xiboꞌ quireꞌ mʌꞌ ju yubic u tꞌʌn, tu cu cꞌayob, bayiriꞌ xan yer baꞌ u siꞌpir a xiboꞌ.
\s Caj tsꞌoc u tꞌʌn Pablo tiꞌ Tito
\p
\v 12 Wa ber caꞌ bin in tuchiꞌt a wet beyaj, Tito. Cax wa Tíquico, quin tuchiꞌtic cax wa Artemas, quin bin in tuchiꞌtej caꞌ tac. Soc rajiꞌ cu pꞌatar tu beyaj ich u petenin Creta. Sebquint a cꞌuchur tin wicnʌn ich u cajar Nicópolis, quireꞌ in cꞌat in mas u qꞌuinin queꞌer ich u cajar Nicópolis.
\v 13 Yamtej Zenas yejer Apolos, Tito. A Zenasoꞌ, u jach er u tꞌʌn Moisés, a ic nunquiroꞌ. Quiꞌ yamtej tiꞌob, Tito, tu cu binob u tsecꞌt u tꞌʌn Cꞌuj wa yʌn tech taqꞌuin. Wa yʌn noqꞌueꞌ, jʌse tiꞌob Zenas yejer Apolos, soc mʌnaꞌ baꞌ u cꞌatob tu cu beyajob.
\v 14 Mʌꞌ ja wirej, Tito, caꞌ a camsic tiꞌ a bʌjob, soc u yamticob u yet acsʌꞌorirob. Cax mʌꞌ u yet acsʌꞌorirob, arej u yamtob. Camsej tiꞌob, Tito, soc u yamticob u yet acsʌꞌorirob a mʌnaꞌ u yoꞌochoꞌ. Wa mʌnaꞌ u nocꞌoꞌ, arej tiꞌob u jʌsej tiꞌob. Soc a baywoꞌ, mʌꞌ u pacꞌar ten mac, soc mʌꞌ yaꞌaricob: “Mʌꞌ cꞌor a yacsmʌnob tu yorob, rajen mʌnaꞌ baꞌ yʌn tiꞌob.”
\s Tꞌʌn a yacsmʌnob tu yorob, Tito
\p
\v 15 Tu cotor mac a tiꞌ yʌnob tin wicnʌn cu yacob, caꞌ in tꞌʌnech Tito. Caꞌ a tꞌʌnej tu cotor mac a jin jach yajeꞌ, tub yʌnech a tu yacsajob tu yorob u tꞌʌn Cꞌuj. Quin tꞌʌnic Cꞌuj caꞌ u quiꞌ cʌnantech Cꞌuj, Tito. Bayiriꞌ tu cotor mac a tu yʌnech, Tito. Quin tꞌʌnic Cꞌuj caꞌ quiꞌ cʌnantaꞌ ten Cꞌuj, xan. Jeroj tsꞌoquij Tito, quij Pablo.