\id HEB
\h HEBREOS
\toc1 HEBREOS
\mt1 A JEꞌ JUꞌUNAꞌ, RAJIꞌ TIꞌ U YET WINIQUIROB JUDÍO A CU TSICBAROB U TꞌɅN HEBREO
\mt2 HEBREOS
\c 1
\s A Cꞌujoꞌ caj tsicbanʌjij tiꞌ toꞌonex soc ic najtiquex u tꞌʌn
\p
\v 1 Chꞌic uch, a Cꞌujoꞌ, quij, caj u tꞌʌnob ic nunquirex u winiquirob judío. Yaꞌab u tenin caj u tꞌan tiꞌob, caj u tsꞌaja u tucurob yʌjtseqꞌuirob u tꞌʌn Cꞌuj quir u tsicbarob tiꞌ ic nunquirex a baꞌ u cꞌat Cꞌuj. A jun xotꞌoꞌ caj tsꞌaꞌb tiꞌ jujunturi mac uch, u jer jun xotꞌ u tꞌʌn caj tsꞌaꞌb tiꞌ u jer mac. Bayiriꞌ caj esaj yaꞌab baꞌ tiꞌob soc yerob a baꞌ u cꞌat Cꞌuj.
\v 2 Chen a jeꞌ qꞌuinaꞌ, quireꞌ tab u xur tꞌʌn rajiꞌ caj u tꞌʌnajoꞌonex, tan u cꞌʌnic u parar quir u tꞌʌnic toꞌonex. A Cꞌujoꞌ caj u betaj tu cotor baꞌ, cax a ruꞌumoꞌ, cax a caꞌananoꞌ caj u cꞌʌnaj Jesús quir u betic a caꞌananoꞌ, quir u betic ich yocꞌocab xan. A Cꞌujoꞌ, caj u toc rʌc tsꞌaj tiꞌ u parar tu cotor baꞌ soc rajiꞌ yʌnin u parar. 
\v 3 An ten bic cu sasir ic yumoꞌ, bayiriꞌ a Jesúsoꞌ cu yesic u mucꞌ u Tet Cꞌuj. Mʌꞌ ja wirej, pꞌeririꞌob, Jesús quet yejer u Tet. Rajiꞌ, yejer tu cotor u mucꞌ cu cʌnantic a jeꞌ yocꞌocab. Mʌꞌ ja wirej, rajiꞌ cu cʌnantic tu cotor aroꞌ quireꞌ jach chich u mucꞌ u tꞌʌn. Rajiꞌ caj tsꞌoc u rʌc rucꞌsic u siꞌpir tu cotor mac ich cruz. Caj curaj ich u noj Cꞌuj ich caꞌanan, a mac jach manan u mucꞌ. Caj curaj ich u noj Cꞌuj quir u bin sʌjtaꞌbir ten tu cotor mac.
\s A yʌjmasirob u tꞌʌn Cꞌujoꞌ, jach noꞌj, chen a noꞌjoꞌ a raꞌ yʌnin u parar Cꞌuj, jach manan noꞌj
\p
\v 4 U parar Cꞌuj jach manan tiꞌ u yʌjmasirob u tꞌʌn Cꞌuj. Jach manan tiꞌ quireꞌ baxuc u cꞌat Cꞌuj, rajen tsꞌaꞌb tiꞌ u mucꞌ ten Cꞌuj, cax a tiꞌob yʌjmasirob u tꞌʌn Cꞌuj. 
\v 5 Mʌꞌ ja wirej, a Cꞌujoꞌ mʌꞌ biqꞌuin caj u yaꞌaraj tiꞌ yʌjmasirob u tꞌʌn Cꞌuj, mʌꞌ tuririꞌ caj u yaꞌaraj tiꞌ yʌjmasirob u tꞌʌn Cꞌuj:
\q A techoꞌ, quij Cꞌuj, in pararech, bajeꞌrer caj in wesaj a techoꞌ, in pararech quij.
\m Bayiriꞌ xan mʌꞌ tu yaꞌaraj Cꞌuj tiꞌ yʌjmasirob u tꞌʌn: 
\q Rajiꞌ in pararoꞌ, a tenoꞌ in Tet.
\m
\v 6 Caj tuchiꞌtaꞌb ten Cꞌuj u parar, a tuririꞌ u pararoꞌ. A raꞌ caj rochaꞌb ten u nʌꞌ ich yocꞌocab. Caj yaꞌaraj Cꞌuj:
\q A techexoꞌ, ʌjmasirechex in tꞌʌn, caꞌ a cꞌujintex in parar, tu cotorechex caꞌ a cꞌujintex in parar quij. 
\m
\v 7 Uꞌyex baꞌ caj yaꞌaraj Cꞌuj tiꞌ yʌjmasirob u tꞌʌn uch: 
\q Wa ber caj betaꞌb ten Cꞌuj yʌjmasirob u tꞌʌn robob irob a icꞌoꞌ quir u cꞌʌnic a tiꞌoboꞌ. Robob caj betaꞌb ten Cꞌuj yʌjmasirob u tꞌʌn irob cꞌacꞌ soc u cꞌʌnic a tiꞌoboꞌ. 
\m
\v 8 Uꞌyex baꞌ caj u yaꞌaraj Cꞌuj tiꞌ u parar:
\q Tiꞌ a cutanoꞌ tech Cꞌuj tu cu bin u reyintiquechob mac. Munt qꞌuin cu bin u reyintiquechob mac. Jach taj tech cu bin u reyintiquechob mac quireꞌ a techoꞌ mʌnaꞌ a cꞌasir a techoꞌ.
\v 9 Mʌꞌ ja wirej, a techoꞌ ca yajquintic a tsoyoꞌ, chen a cꞌasoꞌ ca pꞌactic. Rajen a tenoꞌ in Cꞌujech tin quiꞌquint a wor jach manan tiꞌ a wet manob, quireꞌ tan in tetic tech quireꞌ u reyintiquechob mac.
\m
\v 10 Caj wʌcꞌʌs aꞌaraj tiꞌ u parar:
\q A techoꞌ u Jaj Tsꞌurirech tu cotor mac. A techoꞌ caj a betaj yocꞌocab tu yʌnxchun yejer u jach chichir a mucꞌ. A bʌjiriꞌ ta betaj a caꞌananoꞌ yejer u jach chichir a mucꞌ xan.
\v 11 Rajen, cax caꞌ bin xuruc aroꞌ, chen a techoꞌ munt qꞌuin tiꞌ yʌnech. A caꞌananoꞌ jeꞌ u rabareꞌ an ten bic cu rabar nocꞌ quireꞌ uchben.
\v 12 Irej nocꞌ cu cꞌoxar cu buquintic u jer. Cu bin cꞌaxbir tech a caꞌananoꞌ. Chen a bʌjiriꞌ a techoꞌ raꞌiriꞌech, mʌꞌ a quimin a techoꞌ munt qꞌuin.
\m
\v 13 A Cꞌujoꞌ mix biqꞌuin caj yaꞌaraj tiꞌ yʌjmasirob u tꞌʌn:
\q Curen teꞌ tin noj hasta quin tsꞌic tech in mucꞌ soc in rucꞌsic a mac a cu pꞌactiquech soc mʌꞌ u wʌcꞌʌs pꞌactiquechob.
\m Baxuc caj u yaꞌaraj Cꞌuj ich u tꞌʌn.
\p
\v 14 Mʌꞌ ja wirej, caj betaꞌb ten Cꞌuj yʌjmasirob u tꞌʌn soc u yamtic a mac tetaꞌb quir u yacsic tu yor. Robob yʌjmasirob u tꞌʌn Cꞌuj raꞌ u pixamob a cu tarob ich Cꞌuj.
\c 2
\s Caꞌ ij quiꞌ cʌnantex ic bʌjex soc mʌꞌ u tubur toꞌonex u tꞌʌn Cꞌuj
\p
\v 1 Quireꞌ a Cristojoꞌ jach manan u mucꞌ tiꞌ yʌjmasirob u tꞌʌn Cꞌuj, rajen caꞌ ij quibex a baꞌ tij cuꞌyex soc mʌꞌ ic pꞌʌtiquexiꞌ.
\v 2 Mʌꞌ ja wirej, ic toc erex u tꞌʌn caj masaꞌb toꞌonex ten yʌjmasir u tꞌʌn Cꞌuj tiꞌ Moisés uch chʌcaꞌan yiricob wa jach taj, quireꞌ a mac a mʌꞌ tu cꞌʌmobiꞌ uch a mʌꞌ tu quibobiꞌ, toc seb caj tsꞌaꞌb u mucꞌyaj uch.
\v 3 Baxuc a toꞌonex xanoꞌ, Wa mʌꞌ ic sariquex ic xiquinex tu quij cuꞌyiquex u tsicbarob u jach tsoyir u tꞌʌn Cꞌuj. Mʌꞌ cꞌuchaꞌan yor u taquicoꞌonex Cꞌuj tu quic binex mucꞌyaj. Mʌꞌ ja wirej, jach noꞌj u jach tsoyir u tꞌʌn Cꞌuj quireꞌ pʌyber toc tsecꞌtaꞌb tiꞌ ten u bʌjiriꞌ Jaj Tsꞌur tu tsecꞌtaj. Mʌꞌ ja wirej, robob a mac a tu yubob tiꞌ caj u yacsob tu yorob tiꞌ, jeroj pachir caj u masajob tiꞌ toꞌonex.
\v 4 Mʌꞌ jaririꞌoꞌ, a Cꞌujoꞌ u bʌjiriꞌ xan, caj u yesaj jach yaꞌab carem beyaj yejer a baꞌ mʌꞌ yiramʌnob uch, mʌꞌ biqꞌuin yiramʌnob mac soc yer mac jach taj. Cax tsꞌab u mucꞌ u Tajꞌor u Pixam Cꞌuj tiꞌ toꞌonex an ten bic u cꞌat Cꞌuj.
\s Caj waysaꞌb Jesús ten Cꞌuj soc baxuc toꞌonex a yacsmʌnob tu yorob
\p
\v 5 Mʌꞌ ja wirej, a tenob quin tsicbarob tiꞌ a ricꞌben yocꞌocaboꞌ yejer a ricꞌben caꞌananoꞌ. Robob bin u caꞌ betbirob ten Cꞌuj soc a tiꞌ taroꞌ a Cꞌujoꞌ jeꞌ u reyinticob tu junan. Mʌꞌ u chaꞌbʌr u reyintaꞌ yʌjmasirob u tꞌʌn. 
\v 6 Mʌꞌ ja wirej, quij, tiꞌ tsꞌibaꞌan ich u tꞌʌn Cꞌuj uch bic tabar tan u tꞌanan Cꞌuj ten mac tan yaꞌaric:
\q Baꞌwir a xiboꞌ, Cꞌuj quen, soc a tucrej tiꞌ? Jot a tiꞌoꞌ. Baꞌwir a xiboꞌ quireꞌ cu quimij? Baꞌwir caꞌ a cʌnantej? 
\v 7 Mʌꞌ yaꞌabir u qꞌuinin ca chaꞌic u cuxtar a xiboꞌ teꞌ ich yocꞌocab. Mʌꞌ u cꞌuchur tiꞌ baxuc u mucꞌ yʌjmasirob a tꞌʌn Cꞌuj, quij. Caj a tsꞌajaj xib a mucꞌ tiꞌ bayiriꞌ xan, caj a tsꞌaja u beyaj quir u betic a baꞌ jach manan tsoy.
\v 8 A techoꞌ Cꞌuj, caj a chaꞌaj u tsꞌurintej a xiboꞌ tu cotor a baꞌ a tiꞌ yʌn ich yocꞌocab.
\m Quireꞌ a Cꞌujoꞌ caj u tsꞌajaj tiꞌ xib soc rajiꞌ cu tsꞌurintic tu cotor baꞌ yʌn teꞌ ich yocꞌocabaꞌ, rajen rajiꞌ caꞌ u tsꞌurintej, chen tiꞌ toy yʌn baꞌ mʌꞌ toy rʌc u tsꞌurintej ich yocꞌocab.
\v 9 Chen ij quirmʌnex Jesús, a mac jach manan u mucꞌ, a yʌjmasirob u tꞌʌn Cꞌujoꞌ, mʌꞌ quet u mucꞌ yejer Jesús. Barej caj u jamach pꞌʌtaj u mucꞌ Jesús, quireꞌ u bʌjiriꞌ tu chꞌaj u winquirir an ten bic toꞌonex teꞌ ich yocꞌocabaꞌ. Bajeꞌrer tij quirex Jesús caj tsꞌaꞌb u jach chichir u mucꞌ wa ber caj acsaꞌb ich u noj Cꞌuj tu cu bin sʌjtaꞌbir ten tu cotor mac, quireꞌ caj quimij ich cruz. Mʌꞌ ja wirej, quireꞌ jach tsoy tu tꞌʌn Cꞌuj rajen rajiꞌ caj u betaj tu cotor aroꞌ soc Jesús caꞌ quimic tiꞌ tu cotor mac.
\p
\v 10 Tu cotor baꞌ rajiꞌ yʌnin Cꞌuj, quireꞌ rajiꞌ caj u betaj tu cotor baꞌ rajen a Cꞌujoꞌ u jach tsꞌurir tu cotor baꞌ. Rajiꞌ xan, u cꞌat u yacsic tu cotor a yacsmʌnob tu yorob ich caꞌanan quireꞌ u pararob Cꞌuj a yacsmʌnob tu yorob. Mʌꞌ ja wirej, rajen chaꞌb ten Cꞌuj ij cʌjtaquirex quireꞌ a baꞌ mucꞌyajnʌij caꞌ u taquej mac, rajen jach manan cꞌuchaꞌan yor tiꞌ tu cotor baꞌ.
\v 11 Mʌꞌ ja wirej, a mac tan u pꞌobar tiꞌob u siꞌpir tiꞌob, bayiriꞌ xan, a robob a tan u pꞌobarob u siꞌpirob ten Jesús, quet bayiriꞌ, pꞌeriꞌ u Tetob. Rajen rajiꞌ mʌꞌ ju chꞌic u suraquir u yaꞌaric a robob u bʌjob quireꞌ rajiꞌ yʌninob Cꞌuj.
\v 12 Mʌꞌ ja wirej, tiꞌ tsibaꞌan ich u tꞌʌn Cꞌuj, tan yaꞌaric: 
\q Jeꞌ in bin in tꞌʌnic in witsꞌinob tiꞌ tech Cꞌuj, quij. Jeꞌ in cꞌayob tiꞌ tech Cꞌuj ʌcʌtan tu cotor mac a tu yacsob tu yorob tiꞌ tech tu cu muchꞌquinticob u bʌj quir u cꞌujintiquech Cꞌuj.
\m
\v 13 Tiꞌ wʌcꞌʌs tsꞌibaꞌan ich u tꞌʌn Cꞌuj tu cu yaꞌaric: 
\q Jeꞌ in wacsic tin wor tiꞌ Cꞌuj, quij.
\m Caj wʌcꞌʌs tsꞌibtaꞌb xan tu cu yaꞌaric:
\q Teꞌ yʌnenaꞌ yejer in pararob a ta tsꞌaj ten Cꞌuj.
\p
\v 14 Mʌꞌ ja wirej, quij, a mac a pꞌeriꞌ u tet pꞌeriꞌ u yoꞌnen xan. Rajen u bʌjiriꞌ Jesús caj u chꞌaj u winiquir caꞌ u rubs u mucꞌ a quisinoꞌ soc mʌꞌ u quinsic mac. 
\v 15 A baxucoꞌ Jesús mʌꞌ u chaꞌic mac u sʌjticob u quimin mac. A tiꞌoboꞌ uch irob u cꞌurewob quisin, rajen caj u sʌjtob u quiminob u burur qꞌuin.
\v 16 Mʌꞌ ja wirej, jach chʌcaꞌan caꞌ ic najtex tarij ic Jaj Tsꞌurirex quir u taquic a mac a cu tar ich u yoꞌnen Abraham, mʌꞌ tarij quir u taquic yʌjmasirob u tꞌʌn Cꞌuj uch.
\v 17 Rajen, a Jesúsoꞌ caj waysaꞌb uch an ten bic a toꞌonexoꞌ soc u wʌcꞌʌs bʌjiriꞌ caj mucꞌyaj irej toꞌonex quic mucꞌyajex quireꞌ tu yiraj otsiroꞌonex. Mʌꞌ ja wirej, rajiꞌ u sacerdote a jach manan noꞌj quir u yamtic yitsꞌinob tan u tꞌʌnic toꞌonex Cꞌuj. Bayiriꞌ caj u cꞌubaj u bʌj soc u rʌc rucꞌsic ic siꞌpirex ich u cruz.
\v 18 Quireꞌ u bʌjiriꞌ Jesús caj mucꞌyajnʌjij wa ber tumtaꞌb yor ten a quisinoꞌ, rajen bajeꞌrer toc tiꞌ yʌn Jesús quir u taquic a mac a tan u tumtaꞌr yor ten quisin. 
\c 3
\s Jesucristo jach manan noꞌj tiꞌ u nunquir u winiquirob judío u cꞌabaꞌ Moisés
\p
\v 1 In wet acsʌꞌorirex a techexoꞌ a mac a tetaꞌb ten Cꞌuj soc rajiꞌ yʌninechex Cꞌuj. Rajiꞌ caj u tꞌʌn techex quir u tsꞌic techex a cuxtarex a cu tar ich caꞌanan. Tucrex Jesús. Mʌꞌ ja wirej, rajiꞌ tuchiꞌtaꞌb ten Cꞌuj quir u tsꞌic toꞌonex a baꞌ cu yaꞌaric Cꞌuj, bayiriꞌ rajiꞌ u sacerdote a jach manan noꞌjoꞌ tiꞌ Cꞌuj a mac a quij cariquex ij cꞌujintiquex.
\v 2 An ten bic Moisés caj u rʌc quibaj a baꞌ araꞌb ten Cꞌuj uch wa ber caj cuxaꞌan Moisés ich u racꞌob uch. Baxuc xan, ic Jaj Tsꞌurirex Jesucristo caj u rʌc quibaj tu cotor a baꞌ araꞌb ten Cꞌuj. Mʌꞌ ja wirej, quireꞌ a Jesúsoꞌ caj tsꞌaꞌb u mucꞌ ten Cꞌuj.
\v 3 Jach tsoy caꞌ ic sʌjtiquex ic nunquirex Moisés, chen jach manan caꞌ ic sʌjtex ic Jaj Tsꞌurirex Jesucristo. Mʌꞌ ja wirej, rajiꞌ irej a mac ic sʌjtiquex a cu cꞌʌxic yatoch, mʌꞌ ic sʌjtiquex yatoch a cꞌax ten mac.
\v 4 Jujuntur yatoch cꞌax ten xib. Bayiriꞌ xan, tu cotor baꞌ a tiꞌ yʌn ich yocꞌocab toc betaꞌb ten Cꞌuj.
\v 5 Jach taj a Moisésoꞌ tu betaj u beyaj Cꞌuj, caj u quibaj tu cotor baꞌ a raꞌ u qꞌuininoꞌ tiꞌ yʌn Moisés ich u yet winiquirob judío uch. Mʌꞌ ja wirej, u beyaj Cꞌuj tiꞌ Moisés quir u tsecꞌtic u tꞌʌn Cꞌuj tiꞌ u yet winiquirob judío. A mun tsꞌaꞌb ten Cꞌuj tiꞌ Moisés raꞌ tu toc masaj tiꞌ u yet winiquirob judío uch cax a cu bin tar caꞌ bin cꞌuchuc tu qꞌuinin.
\v 6 Bayiriꞌ xan, ic Jaj Tsꞌurirex Jesucristo caj u toc rʌc quibaj tu cotor a baꞌ araꞌb ten Cꞌuj. Chen ju mucꞌoꞌ tsꞌaꞌb tiꞌ ten Cꞌuj jach manan tiꞌ Jesús cax a Moisésoꞌ, quireꞌ rajiꞌ Jesús u parar Cꞌuj. Wa quij quiꞌ quibiquex tu cotor a baꞌ araꞌb ten Cꞌuj tiꞌ toꞌonex mix quic pꞌʌtiquex u tꞌʌn hasta u qꞌuinin caꞌ bin uruc quir u taquicoꞌonex, jeꞌ u quiꞌ acsicoꞌonex quireꞌ rajiꞌ yʌninoꞌonex Cꞌuj. 
\s Jeꞌ u tar yor mac a Cꞌuj yʌnin
\p
\v 7 Mʌꞌ ja wirej, wa baxucoꞌ, jach manan tsoy caꞌ ij quibex u tꞌʌn Cꞌuj an ten bic caj araꞌb ten u Tajꞌor u Pixam Cꞌuj uch, tu cu yaꞌaric tiꞌ a mac tsꞌaꞌb u tucur quir u tsicbar a baꞌ u cꞌat Cꞌuj. Uꞌyex baꞌ cu yaꞌaric Cꞌuj: 
\q Bajeꞌrer wa ber ca wuꞌyiquex u tꞌʌniquechex Cꞌuj.
\v 8 Mʌꞌ a chichquintiquex a joꞌrex irechex a nunquirex caj u chichquintob u joꞌrob uch. Mʌꞌ ja wirej, a nunquirex caj u chichquintob u joꞌrob ich tʌcay ruꞌum uch, caj u pꞌʌtob in tꞌʌn, quij Cꞌuj.
\v 9 Mʌꞌ ja wirej, a nunquirex mʌꞌ tu yacsob tu yorob tiꞌ ten, quij Cꞌuj, cax tu yirob in carem beyaj ich tʌcay ruꞌum tu caj in pʌy u berob cuarenta yaxqꞌuin.
\v 10 Rajen caj tsꞌiquijen, quij Cꞌuj, yejer a nunquirex, a raꞌ cuxaꞌanob a raꞌ u qꞌuininoꞌ. Rajen caj in waꞌaraj: Robob mʌꞌ cꞌuchaꞌan yorob u tucricob taj mʌꞌ biqꞌuin cꞌuchaꞌan yor u tucricob taj, robob mʌꞌ u quetquintic yorob yejer a baꞌ tin betaj.
\v 11 Rajen caj tsꞌiquijen yejer a nunquirex caj in toc chich araj tiꞌob mʌꞌ biqꞌuin quin bin in wacsic tiꞌob ich u ruꞌumin a tin toc araj: Jeꞌ in tsꞌic techexeꞌ. 
\p
\v 12 Rajen in wet acsʌꞌorirex, quiꞌ cʌnantex a bʌjex soc mʌꞌ a chichquintic a joꞌrex soc mʌꞌ a pꞌʌtiquex a wacsiquex ta worex tiꞌ Cꞌuj, a mac cʌjaꞌan ich caꞌanan, quij. 
\v 13 Rajen caꞌ ic pacran chich ariquex tiꞌ ic bʌjobechex hasta caꞌ bin uruc ic Jaj Tsꞌurirex. Rajraꞌ caꞌ ic pacran chich arex tiꞌ ic bʌjobechex soc mʌꞌ ic tus pʌyiquex ic siꞌpirex soc mʌꞌ u chichtar ij joꞌrex ten ic siꞌpirex. 
\v 14 Rajen caꞌ ic pacran chich ariquex tiꞌ ic bʌjobechex. Quireꞌ caꞌ bin uruc ic Jaj Tsꞌurirex Jesucristo jeꞌ ic pacran cꞌʌmiquex a baꞌ rajiꞌ yʌnin, wa quij quibejex a baꞌ tu yaꞌaraj toꞌonex, tan ij cacsiquex tij corex tiꞌ an ten bic pʌyber caj ij yʌn acsex tij corex tiꞌ caj ic yʌn quibex u tꞌʌn uch.
\v 15 Mʌꞌ ja wirej, caꞌ ij quibex a baꞌ cu chich aric toꞌonex, quireꞌ tu toc araj uch, quij:
\q Jeroj ta wuꞌyajex in tꞌʌn bajeꞌrer, rajen mʌꞌ a chichquintic a joꞌrex an ten bic a nunquirex uch tu chichquintajob u joꞌrob ich tʌcay ruꞌum uch.
\m
\v 16 Mʌꞌ ja wirej, a mac a tu yubob u tꞌʌn Cꞌuj uch ich tʌcay ruꞌum. Raꞌiriꞌ u bʌjiriꞌ tu pꞌʌtob u tꞌʌn Cꞌuj. Robob, tu cotor u winiquirob judío a paꞌy u berob ten Moisés caj jocꞌob ich u ruꞌumin Egipto uch.
\v 17 Mʌꞌ ja wirej, u winiquirob israel, a tu pʌyob u siꞌpirob, caj quimob ich tʌcay ruꞌum. Robob caj u tsꞌiquintob Cꞌuj cuarenta yaxqꞌuin a tiꞌ quimob ich tʌcay ruꞌum. 
\v 18 U winiquirob israel a mac mʌꞌ tu quibob u tꞌʌn Cꞌuj ich tʌcay ruꞌum uch caj araꞌb ten Cꞌuj tiꞌob tan u chich araꞌ ten Cꞌuj: “Jach taj, quij Cꞌuj, mʌꞌ biqꞌuin quin bin in wacsiquechex tu ruꞌumin a tin toc araj: Jeꞌ in tsꞌic techexeꞌ, quij.”
\v 19 Rajen ij querex u winiquirob israel mʌꞌ cꞌuchaꞌan yorob u yocar tu ruꞌumin a tu yaꞌaraj Cꞌuj: Jeꞌ in tsꞌic techex. Quireꞌ mʌꞌ tu yacsob tu yorob tiꞌ.

\c 4
\p
\v 1 Rajen, a Cꞌujoꞌ, tiꞌ toy cu tsꞌic toꞌonex u tꞌʌn bajeꞌrer, “Jeꞌ u yacsic toꞌonex.” Rajen caꞌ ij cʌnantiquex ic bʌjex soc cꞌuchaꞌan ij corex ij cocarex quir ic jeꞌsic ic bʌjex yejer Cꞌuj. Caꞌ ij cʌnantex ic bʌjex wa jix tʌco cu tus tucric mʌꞌ ju yocar.
\v 2 A Cꞌujoꞌ caj u tsꞌajaj tiꞌ ic nunquirex u jach tsoyir u tꞌʌn an ten bic caj u tsꞌajaj tiꞌ a toꞌonexoꞌ. Chen ic nunquirex ich a tʌcay ruꞌumoꞌ, cax tu yubob a baꞌ araꞌb tiꞌob ten Cꞌuj mʌꞌ baꞌwir tiꞌob quireꞌ mʌꞌ tu quibob u tꞌʌn, quireꞌ mʌꞌ tu yacsob tu yorob.
\v 3 A toꞌonexoꞌ, bajeꞌrer tan ij cocarex quir ic jeꞌsic ic bʌjex yejer Cꞌuj wa tij cacsex tij corex tiꞌ Cꞌuj. Mʌꞌ ja wirej, a uchoꞌ caj araꞌb ten Cꞌuj tiꞌ ic nunquirex: 
\q Rajen tan in chich ariquechex, “Jach taj, mʌꞌ biqꞌuin robob cu bin yocarob tu ruꞌumin a tin toc araj: Jeꞌ in tsꞌic tiꞌob, quireꞌ ta tsꞌiquintajenex.” quij Cꞌuj. 
\m Mʌꞌ ja wirej, a Cꞌujoꞌ caj tsꞌoc u betic a yocꞌocabeꞌ toc cꞌuchaꞌan yor mac u yocor u jeꞌsic u bʌj yejer Cꞌuj.
\v 4 Aroꞌ, quij, taj, quireꞌ tiꞌ toc tsꞌibaꞌan ich u jer junxotꞌ u tꞌʌn Cꞌuj uch. Raꞌ tan u tsicbʌtic tiꞌ u qꞌuinin sábado. Uꞌyex baꞌ cu yaꞌaric Cꞌuj tiꞌ sábado:
\q Caj cꞌuchij u qꞌuinin sábado quireꞌ tu tsꞌocsaj u beyaj Cꞌuj tu caj u betaj yocꞌocab jeroj tu jeꞌsaj u bʌj. 
\m
\v 5 Baxuc xan, tiꞌ toc tsꞌbaꞌan ich u tꞌʌn Cꞌuj tu cu yaꞌaric: 
\q Mʌꞌ biqꞌuin quin bin in wacsic tiꞌob quir u jeꞌsicob u bʌj yejeren, quij Cꞌuj.
\m
\v 6 Baxuc caj yaꞌaraj Cꞌuj rajen, a Cꞌujoꞌ quiꞌ yor u yacsic mac u jeꞌsic u bʌj yejer Cꞌuj cax jun yarob. Quireꞌ u winiquirob israel, a paꞌy u ber ten Moisés uch ich tʌcay ruꞌum tu yubob u jach tsoyir u tꞌʌn Cꞌuj, chen mʌꞌ tu cꞌʌmobiꞌ rajen mʌꞌ acsaꞌb ten Cꞌuj quir u jeꞌsic u bʌj yejer Cꞌuj.
\v 7 Rajen caj manij chꞌic yaꞌab yaxqꞌuin a Cꞌujoꞌ caj u wʌcꞌʌs aꞌaraj tiꞌ u winiquirob Israel. Chen aroꞌ tin toc tsꞌibtaj techex sam. Mʌꞌ ja wirej, rajiꞌ u yaꞌaraj tiꞌ David caꞌ u tsꞌibtej uch:
\q Uꞌyex baꞌ quin wac. Ta wuꞌyex u tꞌʌn Cꞌuj, bajeꞌrer mʌꞌ a chichquintic a joꞌrex.
\m
\v 8 Mʌꞌ ja wirej, a Cꞌujoꞌ tu cu bin acsaꞌbir a raꞌ yʌninob Cꞌuj soc pꞌeriꞌob yorob. Raꞌ mʌꞌ baxuc u ruꞌumin tu caj acsaꞌb u winiquirob israel ten Josué uch. Mʌꞌ ja wirej, wa raꞌ u ruꞌumin tu cu bin acsaꞌbir ten Cꞌuj uch mʌꞌ baꞌwir cu bin wʌcꞌʌs acsaꞌbir mac quir u jeꞌsic u bʌj yejer Cꞌuj.
\v 9 Chen, a toꞌonexoꞌ a raꞌ yʌninoꞌonex Cꞌuj cꞌuchaꞌan ij corex ij cocarex ic jeꞌsiquex ic bʌjex yejer Cꞌuj toc bajeꞌrer.
\v 10 Quireꞌ a raꞌ yʌninob Cꞌuj, a cu bin acsaꞌbirob ten Cꞌuj, cu bin u jeꞌsicob u bʌj an ten bic Cꞌuj caj u jeꞌsaj u bʌj caj tsꞌoc u betic yocꞌocab.
\v 11 Rajen caꞌ ic jach pꞌisex ic bʌjex soc u yacsicoꞌonex Cꞌuj. A tenoꞌ, mʌꞌ in cꞌat caꞌ ij cʌnex ic nunquirex, quireꞌ mʌꞌ tu yacsob tu yorob tiꞌ Cꞌuj. Mʌꞌ in cꞌat tuririꞌ toꞌonex caꞌ ij cʌnex ic nunquirex quireꞌ mʌꞌ tu yacsob tu yorob tiꞌ Cꞌuj ic nunquirex uch.
\p
\v 12 Quireꞌ a baxucoꞌ, u tꞌʌn Cꞌuj yʌn jach manan chichir u mucꞌ tiꞌ. Jach cuxaꞌan u mucꞌ xan. Mʌꞌ ja wirej, cu cꞌuchur u tꞌʌn Cꞌuj tu tamin u pixam mac. Jach seb cu cꞌuchur u tꞌʌn Cꞌuj tu pixam mac. Raꞌ irej u mascabir a caꞌ wʌrʌcꞌ yʌn yej tiꞌ. Mʌꞌ wa seb cu cꞌuchur u tꞌʌn Cꞌuj tu pixam mac? U tꞌʌn Cꞌuj cu yesic a baꞌ cu tucric tu yor xan.
\v 13 Mʌnaꞌ baꞌ betꞌab ten Cꞌuj mʌꞌ wa chʌcaꞌan yirir u wich ten Cꞌuj. Rajen mʌnaꞌ mac cꞌuchaꞌan yor u taꞌquic u bʌjob soc mʌꞌ cu yirir ten Cꞌuj quireꞌ sasir u wich a Cꞌujoꞌ. Yʌn ic toc nunquiquex tiꞌ Cꞌuj a baꞌ tic betajexiꞌ. 
\s A Jesúsoꞌ jach manan ic nonoꞌj sacerdotex
\p
\v 14 Ic Jaj Tsꞌurirex Jesucristo, rajiꞌ u parar Cꞌuj, rajiꞌ xan ic nonoꞌj sacerdotex ʌcʌtan tiꞌ Cꞌuj. Mʌꞌ ja wirej, rajiꞌ wʌcꞌʌs bin ich Cꞌuj caꞌ u chich cꞌatej tiꞌ Cꞌuj tiꞌ toꞌonex caꞌ u yamtej tiꞌ toꞌonex. Rajen yʌn ij quiꞌ toc acsiquex tij corex quireꞌ mʌꞌ jic pꞌʌtex u tꞌʌn. 
\v 15 A quisinoꞌ, caj u rʌc quiꞌ tumtaj u yor ic Jaj Tsꞌurirex Jesucristo, chen mʌꞌ tu pʌy u siꞌpir mʌꞌ tuririꞌ. Rajen yer Jesús bic tabar u chꞌic otsir toꞌonex tu mʌꞌ cꞌuchaꞌan ij corex tu cu tumtic ij corex, quireꞌ u bʌjiriꞌ tumtaꞌb yor tiꞌ tu cotor baꞌ an ten bic a toꞌonexoꞌ, chen rajiꞌ mʌꞌ tu pʌyaj u siꞌpir a Jesúsoꞌ.
\v 16 Cojenex, quij, caꞌ ic nʌtsꞌex ic bʌjex ich Cꞌuj. Caꞌ ic chichquint ij corex wa ber quic natsꞌʌrex ich Cꞌuj soc rajiꞌ caꞌ u yirej otsiroꞌonex a toꞌonexoꞌ Cꞌuj. Bayiriꞌ quir ij cꞌʌmiquex a baꞌ tsoy tu tꞌʌn Cꞌuj wa ber quij cuꞌyiquex mʌꞌ cꞌuchaꞌan ij corex tiꞌ a baꞌ cu tumtic ij corex.

\c 5
\p
\v 1 Mʌꞌ ja wirej, jujuntur sacerdote, a jach noꞌjoꞌ, toc tetaꞌan tiꞌ tu cotor mac ich u winiquirob israel soc u tꞌʌnicob Cꞌuj tiꞌ u racꞌob. Rajen tetaꞌb soc quinsic u yʌrʌcꞌob mac quir u toquic quir u sijic tiꞌ Cꞌuj quir u rucꞌsic u siꞌpir u racꞌob.
\v 2 Rajen, rajiꞌ cꞌuchaꞌan yor u yirej otsir u racꞌob quireꞌ u bʌjiriꞌ yer mʌꞌ cꞌuchaꞌan yor tiꞌ tu cotor a baꞌ a cu tar tiꞌ. Rajen nemʌꞌ biquiꞌ ich u racꞌob a sacerdote quir u yamtic a mac a jach amaꞌan u cʌnic baꞌ, cax yejer mac a tu pʌy u siꞌpir.
\v 3 Mʌꞌ ja wirej, u bʌjirirob a sacerdotejoꞌ yʌn u quinsic yʌrʌcꞌ quir u toquic quir u sijic tiꞌ Cꞌuj u boꞌorir u wʌcꞌʌs siꞌpir u bʌjiriꞌ an ten bic u racꞌob xan. 
\p
\v 4 Mʌnaꞌ mac cꞌuchaꞌan yor u tetic quir u beyaj a sacerdotejoꞌ soc u bʌjiriꞌ cu yocar beyaj sacerdote a noꞌjoꞌ. Chen u bʌjiriꞌ Cꞌuj cꞌuchaꞌan yor u tetic soc yocar beyaj sacerdote an ten bic tsꞌaꞌb u beyaj Aarón ten Cꞌuj uch. 
\v 5 Bayiriꞌ xan, Cristo. U bʌjiriꞌ, quij, mʌꞌ tu tetaj u bʌjiriꞌ quir u beyaj quir u yocar sacerdote, a noꞌjoꞌ. Mʌꞌ ja wirej, u bʌjiriꞌ Cꞌuj caj u tsꞌajaj u beyaj quireꞌ. Cꞌuj caj u yaꞌaraj tiꞌ:
\q A techoꞌ, quij Cꞌuj, in pararech. Tin pararinquintajech bajeꞌrer, quij.
\m
\v 6 Baxuc xan tiꞌ wʌcꞌʌs araꞌb tiꞌ ten Cꞌuj an ten bic tsꞌibaꞌan ich u tꞌʌn Cꞌuj uch:
\q A tenoꞌ, quij Cꞌuj, tin tetajech soc a wocar sacerdotejech a jach noꞌjoꞌ soc yʌn tech u mucꞌ a Melquisedecoꞌ. Munt qꞌuin yʌn tech u mucꞌ Melquisedec.
\m
\v 7 Wa ber cuxaꞌan Jesús teꞌraꞌ ich yocꞌocab uch. Jach chich caj u tꞌʌnaj Cꞌuj tu cu cꞌatic a baꞌ u cꞌat, tan u yocꞌar yaꞌarir u wich. Cax yʌn u mucꞌ a Cꞌujoꞌ quir u toꞌcar Jesús chen quinsaꞌb uch, quireꞌ baxuc u cꞌat Cꞌuj. Cax Cꞌuj caj u yubaj u tꞌʌn Jesús quireꞌ Jesús rajraꞌ cu quibic u tꞌʌn.
\v 8 Cax a Jesúsoꞌ u parar Cꞌuj, cu naj quibic u tꞌʌn Cꞌuj Jesús, cax tu cu naj mucꞌyaj.
\v 9 Caj tsꞌoc u quibic tu cotor baꞌ, Jesús caj u cꞌub u bʌj soc caꞌ quimic. Caj quimij soc tu cotor mac a cu bin yacsej tu yor, cu bin tacbir ten Jesús quir u cuxtar munt qꞌuin.
\v 10 Quireꞌ a baxucoꞌ, quij, rajen a Cꞌujoꞌ caj u tetaj u parar soc u yocar sacerdote, a jach noꞌjoꞌ soc yʌn u mucꞌ Melquisedec.
\s Quiꞌ irex, quij soc mʌꞌ a pꞌʌtiquex a wacsiquex ta worex tiꞌ Jesucristo
\p
\v 11 Tiꞌ yʌn yaꞌab baꞌ tiꞌ Cristo, a sacerdotejoꞌ a noꞌjoꞌ, quir in camsiquechex chen jach yaj quir a cʌniquex. Mʌꞌ ja wirej, mʌꞌ a cꞌatex a najtexiꞌ.
\v 12-13 Jeroj uch, a techexoꞌ, caj a wacsex ta worex tiꞌ Jesús. Chen a bʌjiriꞌex, mʌꞌ tan a camsiquex mac u tꞌʌn Cꞌuj. Ca chen cʌxtex mac caꞌ u camsequechex tiꞌ u tꞌʌn Cꞌuj, a baꞌ ta yʌn cʌnajex uch caj a yʌn acsajex ta worex uch. Ta chen cʌnex a chichanoꞌ, a mʌꞌ cꞌuchaꞌan yor u jantic yoꞌoch, cu chen chuch. Baxuc ta cʌnex, quireꞌ mʌꞌ tan a quiꞌ najtiquex a baꞌ cu yaꞌaric u tꞌʌn Cꞌuj, mʌꞌ tan a manex tu tsoyir xan.
\v 14 A mac a cu quiꞌ najtic a baꞌ tsꞌibaꞌan ich u tꞌʌn Cꞌuj yer bic tabar u tetic a baꞌ jach tsoy. Cu najtic xan a baꞌ mʌꞌ tsoyiꞌ.

\c 6
\p
\v 1 Quireꞌ a baxucoꞌ, caꞌ ij cʌnex a baꞌ tsꞌibaꞌan ich u tꞌʌn Cꞌuj soc ij quiꞌ najtiquex tiꞌ. A baꞌ tic yʌn cʌnajex uch caj ic yʌn acsex tij corex tiꞌ u tꞌʌn Cristo, cax yaꞌab, mʌꞌ rajraꞌ caꞌ ij cʌnex quireꞌ tiꞌ toy yʌn yaꞌab tsꞌibaꞌan ich u tꞌʌn Cꞌuj. Caꞌ ic yʌn cʌnex a baꞌ tsoy. Mʌꞌ tsoy caꞌ ic chen cʌnex bic tabar caꞌ ij cꞌaxex tij corex soc ic pꞌʌtiquex ic siꞌpirex, tan ic toc ariquex tiꞌ Cꞌuj a baꞌ siꞌpir tij cacsex uch. An ten bic caj ij cacsex tij corex tiꞌ Cꞌuj uch.
\v 2 Mʌꞌ rajraꞌ caꞌ ij cʌnex a cu yaꞌaric, rajraꞌ cu yacsic jaꞌ tu jor mac, mʌꞌ rajraꞌ quij cʌnex a baꞌ a cu yaꞌaric, cu tsꞌancꞌʌbtej mac. Mʌꞌ rajraꞌ caꞌ ij cʌnex bic tabar a cu ricꞌsic mac u quimirir, mʌꞌ rajraꞌ quij cʌniquex bic tabar a Cꞌujoꞌ bin u caꞌ taꞌquic u joꞌr mac a yʌn u siꞌpir soc u bin erar ich cꞌacꞌ munt qꞌuin. Mʌꞌ ja wirej, mʌꞌ chen jariꞌ caj cʌnexiꞌ aroꞌ.
\v 3 Quireꞌ tiꞌ yʌn jach yaꞌab ich u tꞌʌn Cꞌuj caꞌ ij cʌnex soc jach manan caꞌ ij quiꞌ najtex u tꞌʌn Cꞌuj. A baxucoꞌ jeꞌ ic betiquex an ten bic tsoy tu tꞌʌn Cꞌuj.
\p
\v 4 Yʌn mac a tu cꞌʌmajob u sasirir a cu tar tiꞌ Cꞌuj. Robob caj u cꞌʌs tumtaj u tsoyir a tsꞌaꞌbob tiꞌ ten u Tajꞌor u Pixam Cꞌuj.
\v 5 Robob caj u cꞌʌmajob a baꞌ jach tsoy tiꞌ u tꞌʌn Cꞌuj. Robob caj esaꞌb tiꞌob ten Cꞌuj jun yar u chichir u mucꞌ Cꞌuj, chen a ray mucꞌoꞌ jach manan cu bin irbir caꞌ bin cꞌuchuc tu qꞌuinin ich caꞌanan.
\v 6 Wa baxucoꞌ caj cꞌuchob tiꞌ Cꞌuj chen pachir caj u pꞌuspachtob tiꞌ Cꞌuj aroꞌ irej wa wʌcꞌʌs sinij u parar Cꞌuj ich cruz quireꞌ tan u pachꞌicob tiꞌ.
\v 7 A Cꞌujoꞌ cu betic tiꞌ tsoy a ruꞌumoꞌ, a tenten u tar a yaꞌariroꞌ cu yuqꞌuic a ruꞌumoꞌ soc u yamtic a mac a yʌn u cor soc u tsꞌic yoꞌoch tiꞌ a mac a cu jaric u cor.
\v 8 Wa ja ruꞌumoꞌ cu chen jocꞌar u qꞌuiꞌixer yejer u roꞌobir, a raꞌ cu bin tocar ten a mac a cu jaric u cor. A baxucoꞌ cu betic Cꞌuj tiꞌ mac xan.
\s Caꞌ ij quiꞌ acsex tij corex tiꞌ Cristo
\p
\v 9 A tenoꞌ caj in tsꞌib techex in wet acsʌꞌorirex a mac in jach yaj soc a werex baꞌ u ber tiꞌ mac a cu pꞌuspachticob tiꞌ Cꞌuj. Quireꞌ quin tsꞌibtic tiꞌ techex quireꞌ in wer jach taj jeꞌ u taquiquechex Cꞌujeꞌ. Quireꞌ rajiꞌ tan u yamtiquechex quir a manex tu tsoyir.
\v 10 A Cꞌujoꞌ, jach tsoy quireꞌ rajraꞌ cu betic a baꞌ jach manan tsoy. Rajiꞌ cu bin boꞌotbir mac a cu yajquintic mac, quireꞌ cu yamtic tiꞌ mac. U berer bajeꞌrer cu yamtic a tiꞌoboꞌ. Mʌꞌ ja wirej, a Cꞌujoꞌ mʌꞌ u tubur tiꞌ, jeꞌ u bin boꞌotbirob ten Cꞌuj.
\v 11 Chen caꞌ a quiꞌ pꞌisex a bʌjex an ten bic caj a yamtex tiꞌ mac uch hasta caꞌ bin cꞌuchuc tu qꞌuinin a Cꞌujoꞌ cu bin u quiꞌ acsiquechex ich caꞌanan.
\v 12 Mʌꞌ a yʌn mʌꞌ cꞌortarex tu ca muchꞌquintiquex a bʌjex quir a wuꞌyiquex u tꞌʌn Cꞌuj, chen quiꞌ cʌnex a mac a tu quiꞌ cʌnaj u yacsic tu yor tiꞌ u tꞌʌn Cꞌuj, a robob a cu pajicob, jeꞌ u bin cꞌʌmbir a baꞌ toc araꞌb tiꞌ ten Cꞌujeꞌ.
\p
\v 13 Wa ber a Cꞌujoꞌ caj u toc araj tiꞌ Abraham uch, bin u caꞌ pararinquintic u parar, caj u jach toc araj Cꞌuj yejer u mucꞌ, quireꞌ mʌnaꞌ u jer mac yʌn u mucꞌ an ten bic Cꞌuj yʌnin, quireꞌ jach manan u mucꞌ a Cꞌujoꞌ. 
\v 14 Caj araꞌb ten Cꞌuj tiꞌ ic nunquirex Abraham uch: “Jeꞌ in quiꞌ yamtiquech Abraham. A tenoꞌ, quij Cꞌuj, quin bin in pimquintic u parar a caꞌ parar”, quij.
\v 15 Ic nunquirex Abraham caj pararnʌjij u parar an ten bic toc araꞌb tiꞌ ten Cꞌuj Abraham. Nemʌꞌ biquiꞌ Abraham hasta cꞌuchij tu qꞌuinin caj u toc nupꞌsaj a Cꞌujoꞌ, a baꞌ tu toc araj tiꞌ uch. Mʌꞌ ja wirej, Sara, rajiꞌ u racꞌ, caj u rochaj u chan ochir.
\v 16 Mʌꞌ ja wirej, a mac a tiꞌ yʌn ich yocꞌocabaꞌ cu yaꞌaric ich u racꞌob: “Cꞌuj cu yiric”, wa mac cu jach toc aric a baꞌ tiꞌ mac. Baxuc cu yaꞌaricob, quireꞌ mʌnaꞌ u jer yʌn u mucꞌ an ten bic Cꞌuj. Rajen cu yaꞌaricob: “Cꞌuj cu yiric”, tu cu jach toc aric baꞌ, quireꞌ mʌꞌ baꞌwir quir u yaꞌaric u jer, toc tsꞌoquij.
\v 17 Baxucoꞌ xan, a Cꞌujoꞌ caj u toc araj tiꞌ ic nunquirex Abraham, cu bin u pararʌncʌr caj u toc aꞌaraj Cꞌuj yejer u mucꞌ, soc yer taj mac wa rajiꞌ jeꞌ u nupꞌsic a baꞌ tu toc araj tiꞌ ic nunquirex Abraham. A mʌꞌ ju cꞌax u tucur a Cꞌujoꞌ.
\v 18 Mʌꞌ ja wirej, baxuc caj u toc araj Cꞌuj yejer tu cotor u mucꞌ, rajen cꞌuchaꞌan ij corex caꞌ ij cacsex tij corex tiꞌ wa ber cu toc aric baꞌ tiꞌ toꞌonex. Mʌꞌ ja wirej, tu cotoroꞌonex a tij cꞌubex ic pixamex tiꞌ Cꞌuj quir u taquicoꞌonex, mʌꞌ baꞌwir caꞌ ic jacꞌsex ij corex. Jeꞌ u taquicoꞌonex an ten bic caj u toc araj tiꞌ toꞌonex. 
\v 19 Quireꞌ cu taquicoꞌonex an ten bic tu toc araj toꞌonex uch. Rajen mʌꞌ u pec ic pixamex, quireꞌ jach manan u cʌnantaꞌ ic pixamex quireꞌ pꞌeriꞌ ic pixamex yejer Cꞌuj ich caꞌanan.
\v 20 Mʌꞌ ja wirej, Cristo tu betaj u berir tiꞌ toꞌonex quir ij cꞌuchurex ich Cꞌuj. A baywoꞌ, quij, tiꞌ yʌn Jesús ich caꞌanan tiꞌ toꞌonex an ten bic sacerdote a jach noꞌjoꞌ, chen yʌn u mucꞌ Jesús an ten bic u mucꞌ sacerdote Melquisedec, a mʌꞌ u bin xupur u mucꞌ mʌꞌ biqꞌuin cu xupur u mucꞌ.
\c 7
\s Ic Jaj Tsꞌurirex Jesucristo toc yʌn u mucꞌ Melquisedec 
\p
\v 1 A jeꞌ Melquisedecaꞌ, rajiꞌ u rey u cajar Salem uch. Raꞌiriꞌ u bʌjiriꞌ xan sacerdote a jach noꞌj tiꞌ Cꞌuj. Rajiꞌ yʌn u mucꞌ Cꞌuj jach manan. A uchoꞌ caj urij ic nunquirex Abraham tu tu baꞌtetaj cuatro a reyob, quireꞌ robob caj u yaꞌcrajob u yum Abraham. A Melquisedecoꞌ, caj joqꞌuij tu cajar quir u nupꞌic ic nunquirex Abraham ich ber. Rajiꞌ caj u tꞌʌnaj Cꞌuj tan u cꞌataꞌ tiꞌ caꞌ yamtac Abraham ten Cꞌuj tiꞌ.
\v 2 Mʌꞌ ja wirej, ic nunquirex Abraham caj u jʌsaj tiꞌ a sacerdote, a noꞌjoꞌ, raꞌ u cꞌabaꞌ Melquisedec. Caj jasij ten Abraham a baꞌ tu chꞌaj caj u baꞌtetaj a cuatro reyob. Tu tu chꞌaj diez u baꞌtʌc caj u tsꞌaja tuririꞌ tiꞌ Melquisedec. Baxuc caj u betaj, jas tiꞌ ten Abraham ich tu cotor baꞌ a tu chꞌaj tu tu baꞌtetaj a reyoꞌ. A Melquisedec rajiꞌ u rey u cajar Salem. U cꞌabaꞌ Melquisedec u cꞌat yaꞌarej: “Jach tsoy rey.” Bayiriꞌ ij querex tu cu reyinticob Melquisedec tu cajar Salem mʌꞌ tsꞌic mac, quireꞌ baxuc u cꞌat yaꞌarej u cꞌabaꞌ u cajar: “Mʌꞌ tsꞌic mac.”
\v 3 A Melquisedecoꞌ irej wa mac tu junan caj tar quireꞌ mix yer mac u nʌꞌ, mix yer mac u tet xan. Mʌꞌ ij querex maquiꞌ. Mix yer mac baꞌ yoꞌnen Melquisedec. Mʌnaꞌ mac yer ber caj rochaꞌb ten u nʌꞌ, mix mac yer ber caj quimij. Rajen rajiꞌ irej ic Jaj Tsꞌurirex Jesucristo u parar Cꞌuj. Mʌꞌ ja wirej, rajiꞌ caj oc tu beyaj an ten bic sacerdote a jach manan noꞌjoꞌ, quireꞌ rajiꞌ yʌn u mucꞌ, a mʌꞌ u xupur u mucꞌ.
\p
\v 4 Mʌꞌ ja wirej, chʌcaꞌan ij quiriquex wa Melquisedec toc yʌn u mucꞌ quir u beyaj tiꞌ Cꞌuj. A Melquisedecoꞌ irej sacerdote, a jach noꞌjoꞌ. Quireꞌ cax ic nunquirex Abraham uch tu tu chꞌaj u baꞌtac tu tu baꞌteꞌtaj rey, a cuatrojoꞌ, caj u tsꞌaja tiꞌ Melquisedec. Caj u tsꞌaja tiꞌ Melquisedec tuririꞌ u baꞌtacoꞌ ich a diezoꞌ.
\v 5 Cꞌaj wa techex baꞌ tsꞌibtaꞌb ten ic nunquirex Moisés ich u tꞌʌn Cꞌuj uch, quij. Caj u chich araj toꞌonex u winiquirob judío: “Caꞌ a jʌsex a baꞌtaquex a tiꞌ a sacerdotejoꞌ a raꞌ cu tar tiꞌ yoꞌnen Leví. Caꞌ a jʌsex tiꞌob tuririꞌ a baꞌtaquex wa ber yʌnechex diez.” Baxuc caꞌ ij quibex quireꞌ tu cotoroꞌonex raꞌ ic nunquirex Abraham.
\v 6 Chen a Melquisedecoꞌ, cax mʌꞌ raꞌ u yoꞌnen Leví caj u cꞌʌmaj a baꞌ tsꞌab tiꞌ ten ic nunquirex Abraham uch. Mʌꞌ ja wirej, a Cꞌujoꞌ caj u toc araj tiꞌ Abraham uch, cu bin u quiꞌ yamtej Abraham caj tsꞌoc u cꞌubic u parar Isaac quir u quinsac uch. Chen Melquisedec caj u cꞌʌmaj a baꞌ tsꞌaꞌb tiꞌ ten Abraham rajen Melquisedec caj u cꞌataj tiꞌ Cꞌuj caꞌ u yamt ic nunquirex Abraham uch. 
\v 7 A toꞌonexoꞌ, ij querex wa mac cu tꞌʌnic Cꞌuj caꞌ u yamtej u racꞌob, raꞌ jach manan yʌn u mucꞌ. Chen a mac a cu bin yamtac ten Cꞌuj, mʌꞌ ju cꞌuchur yor tiꞌ a mac a tu tꞌʌnaj Cꞌuj soc yamtaꞌbir ten Cꞌuj u racꞌob.
\v 8 Mʌꞌ ja wirej, a sacerdotejoꞌ, a tiꞌ cu tar yoꞌnen Leví uch, a tuririꞌ baꞌ tu cꞌʌmaj, wa ber yʌn diez u baꞌtacob tiꞌ u yet winiquirob judío. Robob a sacerdotejoꞌ, a tiꞌ cu tar yoꞌnen Leví, quimij xan, chen a baꞌ tsꞌibaꞌan ich u tꞌʌn Cꞌuj tiꞌ Melquisedec irej wa tiꞌ toy cuxaꞌan. 
\v 9-10 A Levíjoꞌ yejer tu cotor sacerdote, a rub tu pach Leví, quireꞌ u beririꞌ bajeꞌrer cu cꞌʌmicob a tuririꞌ u baꞌtac ich a diezoꞌ. A Levíjoꞌ raꞌ u nunquir tiꞌ tu cotor sacerdote irob wa pꞌeriꞌob yejer ic nunquirex Abraham ber caj sʌjtaꞌb Melquisedec ten Abraham, cax mʌꞌ toy rochaꞌb ten u nʌꞌ Leví tu qꞌuinin Abraham, quireꞌ rajiꞌ u chꞌic sucuꞌun.
\p
\v 11 Tiꞌ u tar a sacerdotejoꞌ, tiꞌ u nunquir Leví, bayiriꞌ xan, a sacerdotejoꞌ, a tiꞌ cu tar Aarón, robob u beyajob quir u beticob tu cotor a baꞌ tiꞌ yʌn ich u tꞌʌn Moisés soc u yamticob u yet winiquirob israel. Chen u winiquirob israel mʌꞌ cꞌuchaꞌan yor u bin tacbirob ten u beyaj sacerdote a cu tar tiꞌ u nunquir Leví. Rajen a Cꞌujoꞌ yer yʌn u tuchiꞌtic Jesucristo soc yʌn u mucꞌ Melquisedec, a sacerdote a jach noꞌjoꞌ. Mʌꞌ ja wirej, rajiꞌ mʌꞌ tarij tiꞌ yoꞌnen Leví.
\v 12 Rajen a Cꞌujoꞌ caj cꞌox u mucꞌ a sacerdotejoꞌ, bayiriꞌ xan, caꞌ cꞌox u jer u tꞌʌn an ten bic tabar sacerdote caj cꞌox u mucꞌ.
\v 13 Baxuc caj joqꞌuij, quireꞌ ic Jaj Tsꞌurirex Jesucristo mʌꞌ rajiꞌ yoꞌnen Leví, a tu cu tar a mac a cu yocar beyaj a sacerdotejoꞌ.
\v 14 Mʌꞌ ja wirej, chʌcaꞌan caꞌ ij quirex tub u tar u yoꞌnen ic Jaj Tsꞌurirex, jach taj tiꞌ u tar yoꞌnen ich Judá. Mʌꞌ ja wirej, a Moisésoꞌ caj u toc araj tiꞌ u tar yoꞌnen ich Leví a sacerdotejoꞌ, jaririꞌ ich yoꞌnenob u winiquirob israel. Mʌꞌ ju yaꞌaraj u jer.
\p
\v 15 Mʌꞌ ja wirej, jach chʌcaꞌan ij quiriquex caj cꞌox u jer u tꞌʌn an ten bic tabar a sacerdotejoꞌ, quireꞌ ic Jaj Tsurirex quij, yʌn jach chich u mucꞌ an ten bic jach chich u mucꞌ Melquisedec uch.
\v 16 Mʌꞌ ja wirej, tsꞌaꞌb u mucꞌ ten Cꞌuj Jesús, cax mʌꞌ rajiꞌ yoꞌnen Leví a tiꞌ cu naj tar a sacerdotejoꞌ ich u winiquirob israel. Chen Jesús yʌn u mucꞌ munt qꞌuin an ten bic tabar a sacerdotejoꞌ. Mʌꞌ ja wirej, mʌꞌ u quimin xan.
\v 17 Mʌꞌ ja wirej, baxuc caj tsicbanʌj Cꞌuj uch, caj u tsicbʌtaj tiꞌ Cristo uch caj yaꞌaraj:
\q A techoꞌ, quij Cꞌuj, caj in tetatech soc a wocar beyaj sacerdotejech, a jach noꞌjoꞌ, soc yʌn tech a mucꞌ an ten bic u mucꞌ Melquisedec uch. A mucꞌ a techoꞌ, munt qꞌuin tech yʌn a mucꞌ. Mʌꞌ u xupur a mucꞌ.
\m
\v 18 Baxucoꞌ, a Cꞌujoꞌ caj u cꞌax u jer tꞌʌn an ten bic tabar u beyaj a sacerdote an ten bic caj u tsꞌibtaj Moisés a uchoꞌ, quireꞌ aroꞌ mʌnaꞌ u mucꞌ a yʌn betaꞌb quir u tocar mac.
\v 19 Quireꞌ mʌꞌ cꞌuchaꞌan yor mac tacbir tiꞌ u siꞌpir ten u tꞌʌn Moisés. Barej caj tarij ic Jaj Tsꞌurirex, a mac jach manan u mucꞌ, rajiꞌ caj u rucꞌs u tꞌʌn Moisés quireꞌ mʌꞌ baꞌwir tiꞌ. Rajen caꞌ ij cacsex tij corex caꞌ yacsoꞌonex Cꞌuj ich caꞌanan.
\p
\v 20 Mʌꞌ ja wirej, wa ber caj tuchiꞌtaꞌb ic Jaj Tsꞌurirex ten Cꞌuj, rajiꞌ jach toc araꞌb yocar beyaj an ten bic a sacardotejoꞌ.
\v 21 Chen a Cꞌujoꞌ mʌꞌ jach toc araꞌb tiꞌ a sacerdotejoꞌ a tiꞌ u tar yoꞌnen Leví a baxucoꞌ. Chen a Cꞌujoꞌ, wa ber caj u tsꞌajaj u mucꞌ tiꞌ Jesús caj u jach toc araj tiꞌ an ten bic baxuc tsꞌibaꞌan xan uch. Ic Jaj Tsꞌurirex Cꞌuj caj u jach toc araj tiꞌ rajen yʌn u nupꞌsic a baꞌ tu yaꞌaraj Cꞌuj tiꞌ u parar. Caj araꞌb ten Cꞌuj tiꞌ u parar: 
\q A tenoꞌ, quij Cꞌuj, tin toc tetech soc a wocar beyaj sacerdotejech, a jach noꞌjoꞌ, soc yʌn tech a mucꞌ an ten bic u mucꞌ Melquisedec uch. A mucꞌ a techoꞌ, munt qꞌuin yʌn a mucꞌ. Baxuc caj araꞌb tiꞌ ten Cꞌuj.
\m
\v 22 Quireꞌ a Jesúsoꞌ, toc yʌn u mucꞌ baxucoꞌ, rajen a baꞌ jach toc araꞌb ten Cꞌuj Cꞌuj tiꞌ toꞌonex uch bin u caꞌ nupꞌsic u tꞌʌn. Mʌꞌ ja wirej, a baꞌ toc araꞌb ich yocꞌor Jesús jach manan tiꞌ a baꞌ toc araꞌb tiꞌ Moisés ten Cꞌuj uch.
\v 23 Robob, sacerdotejoꞌ, quij, a tiꞌ cu tar ich yoꞌnen Leví jach pim a uchoꞌ, caj rʌc quimob. Caj tsꞌoc u quiminob caj ocꞌob u jer tu beyajob. Caj quimob an ten bic tu cotor mac ich yocꞌocab cu quiminob, rajen caj ocaꞌb u jer tu beyajob.
\v 24 Chen ic Jaj Tsꞌurirex Jesucristo toc yʌn u mucꞌ an ten bic sacerdote a jach noꞌjoꞌ, munt qꞌuin quireꞌ rajiꞌ mʌꞌ u quimin. Mʌꞌ u xupur u mucꞌ.
\v 25 Chen a mac a cu bin acsaꞌbir ten Cꞌuj ich caꞌanan quireꞌ a baꞌ tu betaj Jesús uch, cu bin tacbir ten Jesús quir u cuxtar munt qꞌuin. Quireꞌ tiꞌ yʌn Jesús munt qꞌuin quir u tꞌʌnic Cꞌuj tiꞌob ich caꞌanan.
\p
\v 26 A baxucoꞌ, ij cꞌatex tuririꞌ sacerdote, a jach noꞌjoꞌ an ten bic Jesús. Rajiꞌ jach tsoy yor quireꞌ rajraꞌ cu betic a baꞌ jach manan soy tu tꞌʌn Cꞌuj, mʌnaꞌ u siꞌpir tiꞌ, A Jesúsoꞌ mʌꞌ quet yejer a mac a yʌn u siꞌpir. Caj u tsꞌajaj sʌjtaꞌbir Jesús ten Cꞌuj quireꞌ acsaꞌbir Jesús ich caꞌanan.
\v 27 Cꞌaj wa techex, robob a sacerdote uchoꞌ, a jach noꞌjoꞌ a nanij u quinsic yʌrʌcꞌ mac quir u toꞌquic u sijic tiꞌ Cꞌuj soc u boꞌotic u boꞌorir u siꞌpir mac. A sacerdotej a noꞌjoꞌ, mʌꞌ u chen quinsicob yʌrʌcꞌ tiꞌ u yet winiquirob israel, caj u quinsob u bʌjiriꞌ quir u boꞌoticob u boꞌorir u bʌjiriꞌ u siꞌpirob xan. Chen ic Jaj Tsꞌurirex Jesucristo, u bʌjiriꞌ tu cꞌubaj u bʌj soc u quinsaꞌ quir u rʌc boꞌotic u boꞌorir u siꞌpir tu cotor mac. Chen teniꞌ caj u boꞌotaj, quireꞌ mʌꞌ baꞌwir tiꞌ u jer. 
\v 28 Tu cotorob sacerdote a jach noꞌjoꞌ, a tiꞌ u tar yoꞌnen Aarón nanij u beyajob quir u beticob a baꞌ caj araꞌbob tiꞌ ten Moisés ich u tꞌʌn. Robob tʌcʌ yʌn u siꞌpirob. Chen u tꞌʌn a baꞌ tu toc araj Cꞌuj uch, cax mʌꞌ toy tsꞌibaꞌan u tꞌʌn Moisés, quireꞌ raꞌ pachir caj tsꞌibtaꞌb. A baꞌ tu toc araj Cꞌuj uch, raꞌ tu tetaj u parar uch. Rajiꞌ mʌnaꞌ u siꞌpir. Rajiꞌ jach manan cꞌuchaꞌan yor an ten bic sacerdote.
\c 8
\s A quet u tꞌʌnoꞌ, a ricꞌbenoꞌ
\p
\v 1 Ic Jaj Tsꞌurirex caj oquij ich caꞌanan an ten bic sacerdote a jach noꞌjoꞌ. Caj cuquintaꞌb ten Cꞌuj a Jesúsoꞌ ich u noj ich caꞌanan quir u caremquintic u cꞌabaꞌ. Aroꞌ jach noꞌj, mʌnaꞌ u jer jach manan noꞌj tiꞌ a baꞌ quin tsꞌibtic tiꞌ techex.
\v 2 Quireꞌ a sacerdote, a jach noꞌjoꞌ, a mac cʌjaꞌan teꞌ ich yocꞌocab, nanij u beyaj tu japnin carem naj tu cu naj cꞌujinticob Cꞌuj u winiquirob judío. A ray najoꞌ toc tsꞌʌpquintaꞌb ten mac ich yocꞌocab. Chen tu cu yocar Jesús ich caꞌanan mʌꞌ tsꞌʌpquintaꞌb ten mac.
\v 3 Robob a sacerdote, a jach noꞌjoꞌ, cu naj tsꞌic tiꞌ Cꞌuj a baꞌ cu tar purbir ten u yet winiquirob judíojoꞌ tu cu toꞌquicob tiꞌ Cꞌuj. Cax a sijbarob ten u yet winiquirob judío tiꞌ Cꞌuj, cax quir u boꞌotic u boꞌorir u siꞌpirob. Rajen ic Jaj Tsꞌurirex caj tarij tu cꞌub u wʌcꞌʌs bʌjiriꞌ quir u boꞌotic u boꞌorir ic siꞌpirex ich u cruz.
\v 4 Jaj ix tʌcoj wa jic Jaj Tsꞌirirex wa toc yʌn teꞌ ich yocꞌocab bajeꞌrer, rajiꞌ mʌꞌ cꞌuchaꞌan yor ocar beyaj sacerdote an ten bic sacerdote a cu bin purbir tu cu naj toꞌquic quir u tsꞌic baꞌ tiꞌ Cꞌuj, quir u quibic a baꞌ tsꞌibaꞌan ten Moisés ich u tꞌʌn. Mʌꞌ ja wirej, robob u sacerdote raꞌ u toc beyajob tiꞌ Cꞌuj.
\v 5 Mʌꞌ ja wirej, a sacerdotejoꞌ, a cu yocarob tu beyajob ich u japnin naj tu cu naj cꞌujinticob Cꞌuj u winiquirob judío. A ray najoꞌ, cꞌʌxbir ten u winiquirob judío ich yocꞌocab tus etsꞌbir quet yejer a baꞌ yʌn ich caꞌananoꞌ, quireꞌ tu caꞌtajob u winiquirob judío tiꞌ a baꞌ esbir tiꞌob ten Moisés uch. Mʌꞌ ja wirej, caj araꞌb ten Cꞌuj tiꞌ Moisés uch: “Quiꞌ irex bic tabar a cꞌʌxiquex u najir tu ca bin a cꞌujintiquenex yejer a wet winiquirob judíojoꞌ. Quet bayiriꞌ caꞌ a cꞌʌxex an ten bic caj in wesaj techex ich u joꞌr pꞌuc wits.” Baxuc caj araꞌb ten Cꞌuj.
\v 6 Robob a sacerdotejoꞌ, a tiꞌ cu tar ich yoꞌnen Leví, caj beyanʌjob teraꞌ ich yocꞌocab. Chen ic Jaj Tsꞌurirex caj oc beyaj caꞌanan an ten bic sacerdote a jach noꞌjoꞌ ʌcʌtan tiꞌ Cꞌuj quir u tꞌʌnic Cꞌuj tiꞌ toꞌonex. Rajen u mucꞌ a Jesúsoꞌ jach manan tiꞌ a sacerdotejoꞌ, a tiꞌ cu tar ich yoꞌnen Leví. Robob mʌꞌ ju cꞌuchur u mucꞌob tiꞌ Jesús. Mʌꞌ ja wirej, u mucꞌ a utsquintaꞌb ten Cꞌuj, jach manan tiꞌ u mucꞌ a tsꞌaꞌb ten Cꞌuj tiꞌ Moisés uch. A quet u tꞌʌnoꞌ a caj tsꞌaꞌb ten Cꞌuj tiꞌ toꞌonex bajeꞌrer jach manan tiꞌ a quet u tꞌʌnoꞌ, a tsꞌaꞌb ten Cꞌuj tiꞌ ic nunquirex uch.
\p
\v 7 A ray quet u tꞌʌnoꞌ, a uchbenoꞌ mʌꞌ nequiꞌ joqꞌuij rajen a Cꞌujoꞌ caj u wʌcꞌʌs paꞌaj u jer, quij.
\v 8 Quireꞌ ic Jaj Tsꞌurirex Cꞌuj caj u yiraj u winiquirob judío mʌꞌ quet yorob u tꞌʌn, a uchbenoꞌ rajen caj yaꞌaraj: 
\q Caꞌ bin cꞌuchuc tu qꞌuinin, quij Cꞌuj, jeꞌ in wʌcꞌʌs pajic u jer a quet u tꞌʌnoꞌ yejer u winiquirob israel, bayiriꞌ yejer a mac a tiꞌ cu tar yoꞌnen Judá.
\v 9 Jeꞌ in wʌcꞌʌs pajic u jer a quet u tꞌʌnoꞌ chen aroꞌ mʌꞌ quet yejer a tin betaj yejer a nunquirex wa ber caj in yamtob, caj in jocꞌsaj a tiꞌoboꞌ tu ruꞌumin Egipto uch. Robob mʌꞌ tu quibajob in tꞌʌn a tin tsꞌaja tiꞌob rajen caj in pꞌuspachtaj tiꞌob, baxuc cu yaꞌaric ic Jaj Tsꞌurirex Cꞌuj.
\v 10 Wa ber caꞌ bin cꞌuchuc tu qꞌuinin, quij Cꞌuj, caꞌ bin in tsꞌic tiꞌ u winiquirob israel u jerob a quet u tꞌʌnoꞌ, jeꞌ in tsꞌic tiꞌ caꞌ toc ocac in tꞌʌn tu pixamob u winiquirob israel soc u najticob in mucꞌ, quij soc mʌꞌ u bin tubur tiꞌ. A ray u quininoꞌ, quij Cꞌuj, a rajiꞌob a ten yʌninob, jach quiꞌ bin u yajquintiquenob. 
\v 11 Wa ber caꞌ bin cꞌuchuc a ray u qꞌuininoꞌ, quij Cꞌuj, mʌꞌ baꞌwir mac quir ij camsic. A mac tan yaꞌaric tiꞌ u bʌjob, cax wa ja mac cʌjaꞌan tu cajar: “Cʌnex Cꞌuj”, quireꞌ cu bin u rʌc najtob in tꞌʌn, cax a mac carem, cax a mac a mʌꞌ caremiꞌ, tu toc rʌc najtob.
\v 12 A tenoꞌ, quij Cꞌuj, quin bin in jawsic u siꞌpirob, mix quin bin in cꞌʌꞌotic u siꞌpirob, mʌꞌ biqꞌuin. A baxuc araꞌb ten Cꞌuj uch.
\p
\v 13 Quireꞌ a baxuc caj yaꞌaraj Cꞌuj caj u wʌcꞌʌs paꞌaj u jer quet u tꞌʌn yejer ricꞌben tꞌʌn. Rajen ij querex toc xup u mucꞌ a quet u tꞌʌn a uchbenoꞌ quireꞌ tabar u xupur u mucꞌ.
\c 9
\s A najir tu cu naj cꞌujinticob Cꞌuj u winiquirob judío ich u cajar Jerusalén. U najir a tajoꞌ a tiꞌ yʌn ich caꞌananoꞌ
\p
\v 1 Mʌꞌ ja wirej, ich a quet u tꞌʌnoꞌ a uchbenoꞌ Moisés caj u yaꞌaraj tiꞌ ij quet winiquirob israel bic tabar caꞌ ij cꞌujintex Cꞌuj ich u najir teraꞌ ich yocꞌocabaꞌ. 
\v 2 Mʌꞌ ja wirej, a ray naj sinaꞌanoꞌ. Tiꞌ yʌn jun cꞌas ich a ray najoꞌ a caj u yaꞌaraj ic nunquirex uch: “U cuchir tu cu jacꞌar u yor mac.” Tu japnin arayoꞌ, tiꞌ yʌn u cuchir a cu chꞌiquintic yaꞌab u quibir ras, bayiriꞌ tiꞌ yʌn xan, u pojcheꞌ tu tꞌʌraꞌan a panoꞌ, a cu jacꞌar yor macoꞌ.
\v 3 Caꞌ bin ocac mac tu japnin u najir tu cu naj cꞌujinticob Cꞌuj ic nunquirex uch. Tiꞌ tꞌinaꞌan u jer nocꞌ chumuc, jach pim a nocꞌoꞌ. Tiꞌ sinaꞌan u noqꞌuir ich u coꞌchir u tan naj. Jenen u yoquir u nocꞌ ich ruꞌum, quij. Tu pach a jach pim nocꞌoꞌ, tu tꞌinaꞌan ich u najir tu cu cꞌujinticob Cꞌuj u winiquirob israel, tiꞌ yʌn u cuchir tu cu tsꞌic tiꞌ Cꞌuj. Aroꞌ jun cꞌas naj, a jach manan u jacꞌar yor mac.
\v 4 A ray u cuchiroꞌ tu cu tsꞌic tiꞌ Cꞌuj, tʌcʌj oro betaꞌan u cuchir raꞌ quir u toꞌquic tiꞌ Cꞌuj a quiꞌ u boqueꞌ. Bayiriꞌ, xan, tiꞌ yʌn u jer u cuchir tu japnin naj tu cu cꞌujinticob Cꞌuj u winiquirob israel. A ray u cuchiroꞌ, u cuchir oro xan. Toc betaꞌan oro tu japnin u cuchir. Toc betaꞌan oro tu pach u cuchir. Toc betaꞌan oro tu tser u cuchir. A jeꞌ cuchir a caj betaꞌb a ray u qꞌuinino caj u quetquintajob u tꞌʌn u winiquirob israel yejer Cꞌuj. Raꞌ tu batꞌan quetquintob u tꞌʌnob uch yejer Cꞌuj. Tu japnin a ray u cuchiroꞌ tiꞌ butaꞌan u chan pꞌurir a betaꞌb oro. Tiꞌ butꞌaꞌan chichin och, u cꞌabaꞌ mana tu jantajob u winiquirob israel uch caj manob ich tʌcay ruꞌum uch, quij. Bayiriꞌ, xan, tiꞌ butꞌaꞌan u xonteꞌ Aarón a jocꞌ u cꞌucꞌ uch a raꞌ yʌnin Aarón u sucuꞌun Moises uch. Bayiriꞌ xan, tiꞌ butꞌaꞌan u tunichir tu tsꞌibaꞌan u tꞌʌn Cꞌuj, a diezoꞌ, a tsꞌaꞌb ten Cꞌuj tiꞌ Moisés uch. 
\v 5 U mac u jor u chan cuchir a rʌc toc betaꞌb oro raꞌjiꞌ cu waꞌquic u qꞌuiqꞌuer a yʌrʌcꞌoꞌ ich u mac u jor quir u boꞌotic u siꞌpir u winiquirob israel. Tiꞌ yʌn caꞌtur cu tus etsꞌtic yʌjmasirob u tꞌʌn Cꞌuj, tan u pixicob u mac u jor u chan cuchir a betaꞌb oro, chꞌiquicbarob u tus yʌjetsꞌirob yʌjmasirob u tꞌʌn Cꞌuj. Robob caj u joꞌtꞌantob oro ten mac soc u tus etsꞌticob yʌjmasirob u tꞌʌn Cꞌuj. Cu xitꞌob u cꞌʌbob ich yocꞌor u chan cuchir. Aroꞌ cu jach jacꞌar u yor mac quireꞌ tiꞌ cu tar Cꞌuj quir u tꞌʌnic u winiquirob israel. Chen bajeꞌrer tsꞌoc in tsicbar techex tiꞌ u chan cuchir a betaꞌb oro.
\v 6 A baywoꞌ, toc tiꞌ yʌn tu cotor baꞌ ich u japnin u najir tu tꞌinaꞌan quir u cꞌujinticob Cꞌuj u winiquirob israel. Tiꞌ cu naj ocar a sacerdote quir u betic an ten bic nanij cu betic quir u cꞌujinticob Cꞌuj u winiquirob israel.
\v 7 Chen tu jach japnin naj, tu yʌn u chan cuchir a cu jacꞌʌr yor mac. Jariꞌ cu cꞌuchur a sacerdotejoꞌ a jach noꞌjoꞌ, teniꞌ yocar sacerdotej. Tanjaꞌ caꞌ bin ocac tu japnin naj a jun cꞌasoꞌ tu cu jacꞌar yor mac. A sacerdotejoꞌ, a jach noꞌjoꞌ yet tar u qꞌuiqꞌuer yʌrʌcꞌ quir u rucꞌsic u boꞌorir u siꞌpir u yet winiquirob israel. Bayiriꞌ xan, u boꞌorir u wʌcꞌʌs bʌjiriꞌ u siꞌpir xan. Tiꞌ cu waqꞌuic u qꞌuiqꞌuer u mac tu jor u chan cuchir a cu jacꞌar yor mac quir u rucꞌsic u siꞌpirob.
\v 8 A baywoꞌ, u Tajꞌor u Pixam Cꞌuj tan u camsicoꞌonex caꞌ ic najtejex tiꞌ toy yʌn u mucꞌ a quet u tꞌʌnoꞌ a tu tsꞌibtaj Moisés uch. Tiꞌ toy cu beyaj quireꞌ tiꞌ toy tꞌinaꞌan u noqꞌuir a jach pimoꞌ tu chumuc u japnin naj, a jun cꞌasoꞌ tu cu naj cꞌujinticob Cꞌuj u winiquirob israel. Rajen tu cotor mac mʌꞌ cꞌuchaꞌan yor yocarob tu jach japnin naj tu yʌn a chan cuchir a cu jacꞌar yor macoꞌ.
\v 9 Quireꞌ a nocꞌoꞌ, a jach pim a tiꞌ tꞌinaꞌan tu japnin naj tu cu naj cꞌujinticob Cꞌuj u winiquirob israel. Raꞌ cu camsicoꞌonex u winiquirob israel mʌꞌ cꞌuchaꞌan yor u natsꞌar ich Cꞌuj quireꞌ tiꞌ toy yʌn u mucꞌ a quet u tꞌʌnoꞌ a tsꞌibtaꞌb ten Moisés uch. Mʌꞌ ja wirej, quij, cax a baꞌ cu tarob u purob quir u tsꞌic tiꞌ Cꞌuj u boꞌorir quir u rucꞌsicob u siꞌpirob. Mʌꞌ ju tar yor soc jach tiꞌ yʌn yor u winiquirob israel.
\v 10 Mʌꞌ ja wirej, quij, raꞌ u mucꞌ a uchbenoꞌ a quet u tꞌʌnoꞌ, a tu tsꞌibtaj Moisés uch, quij, raꞌ soc yerob quir u yesic u winiquirob israel bic tabar u pꞌoꞌicob u cꞌʌb quir u tar u cꞌujinticob Cꞌuj, bayiriꞌ xan, a baꞌ tsoy u janticob bayiriꞌ a baꞌ tsoy u yuqꞌuicob. Tu cotor aroꞌ tiꞌ yʌn hasta cꞌuchij tu qꞌuinin caj tuchiꞌtaꞌb ten Cꞌuj ic Jaj Tsꞌurirex Jesucristo quir u jocꞌsic a baꞌ jach manan tsoy.
\v 11 Wa ber caj tarij Cristo uch, caj tarij an ten bic sacerdote a jach noꞌjoꞌ, quireꞌ yʌn u mucꞌ a ricꞌbenoꞌ, aroꞌ jach manan a ricꞌbenoꞌ, chen a uchbenoꞌ, mʌꞌ jach mananiꞌ. Pachir Jesús caj wʌcꞌʌs binij ich caꞌanan. Chen robob, sacerdote a jach noꞌjoꞌ, a yʌn u mucꞌ a uchbenoꞌ, robob cu naj beyajob tu cu naj cꞌujinticob Cꞌuj u winiquirob israel. A raꞌ najoꞌ toc betaꞌb ten u winiquirob israel, chen a Cristojoꞌ cu beyaj ich Cꞌuj.
\v 12 Chen robob, a sacerdotejoꞌ, a noꞌjoꞌ, cu naj binob tu yʌn u cuchir, a cu jacꞌʌr u yor mac, quir u waqꞌuicob u qꞌuiqꞌuer a yʌrʌcꞌ chivo, cax yʌrʌcꞌ chan wacax. Teniꞌ tanjaꞌ cu naj binob a sacerdotejoꞌ a noꞌjoꞌ quir u boꞌotic u boꞌorir u siꞌpirob. Barej ic Jaj Tsꞌurirex Jesucristo caj u cꞌubaj u bʌj caꞌ quinsac toc jumpuriꞌ toc yejer u wʌcꞌʌs qꞌuiqꞌuer caj u rucꞌsaj ic siꞌpirex caj u tacoꞌonex munt qꞌuin, caj wʌcꞌʌs binij ich Cꞌuj. Rajen mʌꞌ baꞌwir u jer bajeꞌrer.
\v 13 A uchoꞌ, tu qꞌuinin u mucꞌ a uchbenoꞌ, a tsꞌibtab ten Cꞌuj tiꞌ Moisés uch, robob a sacerdotejoꞌ, a noꞌjoꞌ, caj u wacꞌob u qꞌuiqꞌuer yʌrʌcꞌ chivo, cax u qꞌuiqꞌuer yʌrʌcꞌ ton wacax, quir u rucꞌsic u boꞌorir u siꞌpirob u winiquirob israel. Jeroj tuneꞌ caj tocaj yʌrʌcꞌ soc chen u taꞌanir yʌn. Raꞌ u taꞌanir yʌrʌcꞌ caj poꞌstantaꞌb tu joꞌr u winiquirob israel soc yerob tan u pꞌobarob tiꞌ u siꞌpirob, bayiriꞌ soc yer pꞌoꞌb tiꞌ a baꞌ cꞌasir caj u betob an ten bic caj u cꞌujintajob Cꞌuj.
\v 14 Chen u qꞌuiqꞌuer ic Jaj Tsꞌurirex Jesucristo jach manan noꞌj, quireꞌ mʌnaꞌ u siꞌpir, mix tuririꞌ tiꞌ. A Jesusoꞌ u bʌjiriꞌ tu tsꞌaj u bʌj quireꞌ yamtaꞌb ten u Tajꞌor u Pixam Cꞌuj, araꞌ munt qꞌuin tiꞌ yʌn u Tajꞌor u Pixam Cꞌuj. Jesús caj u tsꞌaj u bʌjiriꞌ soc u quinsaꞌ quir u jawsic ic siꞌpirex soc u taquicoꞌonex. Rajen toc tiꞌ yʌn ij corex quireꞌ tan ij quibiquex a baꞌ cu yaꞌaric Cꞌuj, a mac jach cuxaꞌan.
\v 15 Caj quimij Jesús, caj jocꞌ u qꞌuiqꞌuer quir u rucꞌsic u boꞌorir ic siꞌpirex, raꞌ u mucꞌ a quet u tꞌʌnoꞌ a ricꞌben tꞌʌnoꞌ. A rajiꞌ tiꞌ yʌn ich caꞌananoꞌ quir u tꞌʌnic toꞌonex Cꞌuj. Rajen, a mac a tetaꞌb ten Cꞌuj tiꞌ cu bin cʌjtar ich Cꞌuj an ten bic tu toc araj uch. Mʌꞌ ja wirej, caj u tacajoꞌonex Cꞌuj, quireꞌ caj jocꞌ u qꞌuiqꞌuer u parar Cꞌuj a Jesucristojoꞌ, rajen caj u jawsaj ic siꞌpirex Cꞌuj, cax mʌꞌ tij quibex u mucꞌ, a quet u tꞌʌnoꞌ, a uchben tʌnoꞌ.
\v 16 Mʌꞌ ja wirej, a mac a caj u tsꞌibtaj u juꞌunin quir u pꞌʌtic u baꞌtac tiꞌ u bʌjob, mʌꞌ u bin tsꞌabir u baꞌtac tiꞌ, hasta cu quimineꞌ a mac tu tsꞌib tu juꞌunin tiꞌ u baꞌtac. Hasta cu quimin, jeroj, cu tsꞌabar u baꞌtac, quireꞌ quimij.
\v 17 Wa tiꞌ toy cuxaꞌan, mʌꞌ ju bin tsꞌabir u baꞌtac. 
\v 18 Rajen, u mucꞌ a quet u tꞌʌnoꞌ, a tsꞌaꞌb ten Cꞌuj uch, caꞌ u yʌn jocꞌsic u qꞌuiqꞌuer yʌrʌcꞌ soc u nupꞌsic a baꞌ araꞌb ten Cꞌuj uch, quij.
\v 19 Rajen a Moisésoꞌ, caj tsꞌoc u toc araꞌaꞌ tiꞌ tu cotor u winiquirob israel a baꞌ araꞌb tiꞌ ten Cꞌuj. Raꞌ u mucꞌ a quet u tꞌʌnoꞌ a Moisésoꞌ, caj u chꞌaj junoc u tsotser yʌrʌcꞌ tʌmʌn yuc, aroꞌ banaꞌan chʌc. Bayiriꞌ xan, caj u chucaj u cꞌʌbir u chan cheꞌer yejer u reꞌ, a pʌchaꞌan u cꞌabaꞌ hisopo. A Moisésoꞌ, caj u chucaj tiꞌob caj u tsꞌʌmaj yejer u cꞌʌbir yejer u reꞌ ich u qꞌuiqꞌuer yʌrʌcꞌ chivo yejer u qꞌuiqꞌuer yʌrʌcꞌ chan ton wacax. Robob tu chꞌajob u tsotser tʌmʌn yuc yejer u cꞌʌbir u chan cheꞌ yejer u reꞌ xan, Moisés caj u tsꞌʌmaj ich jaꞌ. Jum puriꞌ caj u rʌc tsꞌʌmob Moisés ich jaꞌ. Jeroj Moisés caj u witsꞌcꞌʌbtaj u qꞌuiqꞌuer ich u juꞌunin a quet u tꞌʌnoꞌ a tu tsꞌbitaj Moisés a tsꞌab ten Cꞌuj tiꞌ Moisés. Bayiriꞌ xan, caj u chan witsꞌcꞌʌbtaj u qꞌuiqꞌuer ich yocꞌor u winiquirob israel.
\v 20 A Moisésoꞌ, caj tsꞌoc u witsꞌcꞌʌbtic a qꞌuiqꞌueroꞌ ich yocꞌor u winiquirob israel caj u yaꞌaraj: “U mucꞌ a quet u tꞌʌnob a cu tsꞌab tiꞌ techex ten Cꞌuj bajeꞌrer cu yʌnxchun.” Baxuc caj araꞌb ten Moisés uch.
\v 21 Bayiriꞌ xan, Moisés, caj oc tu japnin naj tu cu naj cꞌujinticob Cꞌuj u winiquirob israel, a tiꞌ yʌn ich tʌcay ruꞌum uch. Tiꞌ taroꞌ caj u witsꞌcꞌʌbtaj u qꞌuiqꞌuer ich yocꞌor tu cotor baꞌ a tiꞌ yʌn tu japnin. Bayirir xan, tu witsꞌcꞌʌbtaj ich yocꞌor u jach najir, a tꞌinaꞌan quir u cꞌujinticob Cꞌuj u winiquirob israel uch.
\v 22 Mʌꞌ ja wirej, u mucꞌ a quet u tꞌʌnob a tu tsꞌibtaj Moisés cu yaꞌaric, tu cotor baꞌ a cu cꞌʌnic u winiquirob israel tu cu cꞌujinticob Cꞌuj, a ray u qꞌuininoꞌ uch, caj pꞌob ten a witsꞌcꞌʌbtaꞌboꞌ a qꞌuiqꞌueroꞌ. Bayiriꞌ xan, yʌn u yʌn quinsic yʌrʌcꞌ u winiquirob israel soc u jocꞌar u qꞌuiqꞌuer soc Cꞌuj cu rucꞌsic u siꞌpir mac, quireꞌ jocꞌ u qꞌuiqꞌuer yʌrʌcꞌob. Mʌꞌ ja wirej, mʌꞌ jawsaꞌb u siꞌpir ten Cꞌuj wa mʌꞌ jocꞌac u qꞌuiqꞌuer yʌrʌcꞌob.
\s Caj quimij Jesús ich u cruz, caj u rucꞌsaj ic siꞌpirex 
\p
\v 23 Caj u yʌnxchun u chan najir a sinaꞌan quir u naj cꞌujinticob Cꞌuj u winiquirob israel uch, rajiꞌ tu yʌnx chun a baꞌ tsꞌibtaꞌb ten Moisés uch, rajiꞌ u mucꞌ a quet u tꞌʌnob, a uchben tꞌʌnoꞌ. Rajen caj tarob u cꞌujinticob Cꞌuj u winiquirob israel yerob mʌꞌ u rucꞌsaꞌr u siꞌpirob wa mʌꞌ witsꞌcꞌʌbtaꞌb u qꞌuiqꞌuer yʌrʌcꞌob. Mʌꞌ ja wirej, tu cotor a baꞌ a tiꞌ yʌn tu japnin naj tu cu naj cꞌujinticob Cꞌuj a cu cꞌʌnicob u winiquirob israel quir u cꞌujinticob Cꞌuj yʌn u yʌn pꞌob ten u qꞌuiqꞌuer yʌrʌcꞌob. Chen quir u bin yacsicoꞌonex Cꞌuj ich caꞌanan tu yʌn Cꞌuj, mʌꞌ baꞌwir u qꞌuiqꞌuer yʌrʌcꞌ, quireꞌ u cꞌat u jer jach manan u mucꞌ.
\v 24 Robob a sacerdote a noꞌjoꞌ, chen tsꞌaꞌbob u mucꞌ quir u beyajob tu cu naj cꞌujinticob Cꞌuj u winiquirob israel, a ray najoꞌ betaꞌb ten xib. Chen u mucꞌ a tsꞌaꞌb ten Cꞌuj tiꞌ Jesús, jach manan u mucꞌ Jesús, quireꞌ tiꞌ yʌn Jesús ich caꞌanan tan u tꞌʌnic Cꞌuj tiꞌ toꞌonex. A tiꞌ taroꞌ, yʌn u tajir a baꞌ tu etsꞌ catajob u winiquirob israel quir u beticob uch, a baꞌ tiꞌ yʌn quir u yamtaꞌob u cꞌujinticob Cꞌuj u winiquirob israel uch.
\v 25 Robob a sacerdote, a noꞌjoꞌ, nanij caj ocob tu japnin naj quir u witsꞌcꞌʌbtic u qꞌuiqꞌuer yʌrʌcꞌ ich yocꞌor u chan cuchir a cu jacꞌʌr yor mac. U jer yaxqꞌuin u jer u jer u cꞌat, quireꞌ baxuc tiꞌ yʌn ich a quet u tꞌʌnob, a uchben tꞌʌnoꞌ. Chen teniꞌ quimij Jesús quir u rucꞌsic ic siꞌpirex, jeroj caj toc tsꞌoquij.
\v 26 Mʌꞌ ja wirej, raꞌ u qꞌuininoꞌ caj yʌn betaꞌb ten Cꞌuj ich yocꞌocab, ic nunquirex, quij, caj u quinsob yʌrʌcꞌ soc u tsꞌic tiꞌ Cꞌuj quir u rucꞌsic u boꞌorir u siꞌpirob. Chen a Cꞌujoꞌ caj u wʌcꞌʌs pʌcaj u pac u jer quet u tꞌʌnob a ricꞌben tꞌʌnoꞌ, rajen tarij Cristo quir u quimin toc teniꞌ quir u rucꞌsic u boꞌorir ic siꞌpirex, quij.
\v 27 Mʌꞌ ja wirej, tu cotor mac teniꞌ cu chen quimin quireꞌ baxuc caj yaꞌaraj Cꞌuj. Bayiriꞌ chen teniꞌ cu bin ʌcʌtan Cꞌuj quir yiric baꞌ tu betaj uch.
\v 28 Bayiriꞌ xan, ic Jaj Tsꞌurirex teniꞌ caj quimij quir u rucꞌsic u boꞌorir u siꞌpirex tiꞌ tu cotor mac. Wa ber caꞌ bin uruc Jesús, mʌꞌ quir u wʌcꞌʌs quimin quir u rucꞌsic ic siꞌpirex chen quir u taquic a mac a tan u quiꞌ pajic tiꞌ.

\c 10
\p
\v 1 Mʌꞌ ja wirej, a mucꞌoꞌ, a caj u wʌcꞌʌs pʌcaj pac u jer, a quet u tꞌʌnoꞌ, a tu jocꞌsaj caj quimij Cristo, raꞌ jach manan tiꞌ a quet u tꞌʌnoꞌ, a tsꞌab tiꞌ Moisés uch. Chen a tsꞌaꞌb tiꞌ Moisésoꞌ, mʌꞌ cꞌuchaꞌan yor tiꞌ a quet u tꞌʌnoꞌ, a ricꞌbenoꞌ yejer a uchben tꞌʌnoꞌ. Mʌꞌ ja wirej, tu qꞌuinin a quet u tꞌʌnoꞌ a uchben tꞌʌnoꞌ u winiquirob israel mʌꞌ cꞌuchaꞌan yorob u natsꞌʌrob ich Cꞌuj, quireꞌ tiꞌ toy yʌn u mucꞌ a quet tꞌʌnoꞌ a tsꞌibtaꞌb ten Moisés uch. Mʌꞌ u tarob yor soc tiꞌ yʌn yorob. Cax a baꞌ cu tarob u puricob quir u tsꞌicob tiꞌ Cꞌuj u boꞌorirob quir u rucꞌsic u siꞌpir. Cax rajraꞌ u jer yaxqꞌuin cu quinsicob u tsꞌicob yʌrʌcꞌ quir u rucꞌsic u boꞌorir u siꞌpirob.
\v 2 Mʌꞌ ja wirej, wa ju winiquirob israel yerob toc teniꞌ caj rucꞌsaꞌb u siꞌpir, rajen mʌꞌ baꞌwir quir u wʌcꞌʌs bin u purob yʌrʌcꞌ quir u tsꞌicob tiꞌ Cꞌuj u boꞌorir u siꞌpirob. Chen robob mʌꞌ u yubmʌnob tu yorob wa tiꞌ yʌn u yorob quireꞌ u siꞌpirob, cax wa toc jumpuriꞌ rucꞌsaꞌb u siꞌpirob caj u quinsob yʌrʌcꞌ quir u jawʌr u siꞌpirob.
\v 3 Mʌꞌ ja wirej, rajraꞌ u jer yaxqꞌuin cu puricob tiꞌ Cꞌuj u yʌrʌcꞌ quir u rucꞌsic u siꞌpirob u winiquirob israel an ten bic nanij cu tsꞌicob tiꞌ, quireꞌ tan u cꞌaja tiꞌ u boꞌorir tiꞌ u siꞌpirob.
\v 4 Quireꞌ u qꞌuiqꞌuer yʌrʌcꞌ ton wacax yejer u qꞌuiqꞌuer yʌrʌcꞌ chivo mʌꞌ cꞌuchaꞌan yor u yamtaꞌ u winiquirob israel yirej wa ju jawsaꞌ u siꞌpirob teniꞌ.
\p
\v 5 Rajen, caj tarij ic Jaj Tsꞌurirex Jesucristo caj u yaꞌaraj tiꞌ Cꞌuj:
\q A techoꞌ Cꞌuj, quen, mʌꞌ ja cꞌat a wiric mac tan u quinsic yʌrʌcꞌ quir u tsꞌic tech soc u jawʌr u siꞌpirob. Rajen jach tsoy ta tꞌʌn tech caj a tsꞌaja ten in winquirir soc raꞌ in wʌcꞌʌs cꞌub in bʌj soc in quinsaꞌ.
\v 6 A techoꞌ Cꞌuj, quij Cristo, mʌꞌ a cꞌat a wirej u quinsic u yʌrʌcꞌob quir u rʌc toquic quir u tsꞌic tech quir a rucꞌsic u siꞌpirob.
\v 7 A techoꞌ, in cꞌujirech, quireꞌ taren ich yocꞌocab soc in quibic a baꞌ ta waꞌaraj, an ten bic caj araꞌb ten a mac tsꞌaꞌb u tucur uch quir u tsꞌibtic a baꞌ a cꞌat uch.
\m
\v 8 Ic Jaj Tsꞌurirex caj yaꞌaraj, a Cꞌujoꞌ mʌꞌ u cꞌat a baꞌ tsꞌaꞌbir tiꞌob u winiquirob israel, a yʌrʌcꞌ a cu quinsicob, cax a yʌrʌcꞌ a tocac quir u rucꞌsicob u siꞌpirob, cax a baꞌ cu quiꞌquintic yor Cꞌuj, cax wa mun cu tsꞌic tiꞌob, mʌꞌ u cꞌat Cꞌuj. Cax toc araꞌb ich u tꞌʌn Moisés caꞌ u yʌn tsꞌic tiꞌ Cꞌuj mʌꞌ u cꞌat xan.
\v 9 Caj u wʌcꞌʌs araj: “A tenoꞌ, quij Cristo, taren a teraꞌ ich yocꞌocab, Cꞌuj soc in quibic a baꞌ ta ricꞌsaj a tꞌʌn ten caꞌ in betej”, quij. Wa ber caj u yaꞌaraj Cristo aroꞌ, caj tsꞌoc u wʌcꞌʌs pʌquic u pac u jer a baꞌ tsꞌibtaꞌan ten Moisés, a quet u tꞌʌnoꞌ, a uchben tꞌʌnoꞌ caꞌ quinsaꞌ ich cruz quij, soc u winiquirob israel mʌꞌ u bin tsꞌic tiꞌ Cꞌuj yʌrʌcꞌ quir u rucꞌsicob u boꞌorir u siꞌpirob. 
\v 10 Quireꞌ baxuc Cristo caj u betaj a baꞌ u cꞌat Cꞌuj. A baywoꞌ caj u wʌcꞌʌs pʌquic u pac u jer a quet u tꞌʌnoꞌ a ricꞌben tꞌʌnoꞌ. Rajen caj u jawsaj ic siꞌpirex Cristo quireꞌ teniꞌ caj u cꞌub u bʌj soc u quinsaꞌ quir u pꞌobar ic siꞌpirex tan u ricꞌsic toꞌonex quir ic beyajex tiꞌ Cꞌuj.
\v 11 Tu qꞌuinin a quet u tꞌʌnoꞌ, a uchben tꞌʌnoꞌ, a tsꞌab ten Cꞌuj tiꞌ Moisés uch, robob a sacerdote a noꞌjoꞌ, cu naj toquicob baꞌ tiꞌ Cꞌuj. U jer, u jer u qꞌuinin yʌn u tsꞌic u jer tiꞌ Cꞌuj. Cax a baxucoꞌ caj tsꞌab ten sacerdote, a noꞌjoꞌ, tiꞌ Cꞌuj mʌꞌ ju chaꞌbʌr u tubur tiꞌ u winiquirob israel ten a quet u tꞌʌnoꞌ, a uchben tꞌʌnoꞌ wa toc teniꞌ rucꞌsaꞌb u siꞌpirob, rajraꞌ cu tsicob tiꞌ.
\v 12 Chen ic Jaj Tsꞌurirex Jesucristo caj quimij toc jumpuriꞌ caj u boꞌotaj u boꞌorir ic siꞌpirex, mʌꞌ baꞌwir tiꞌ u jer. Pachir caj u wʌcꞌʌs binij ich caꞌanan caj curaj ich u noj Cꞌuj.
\v 13 A tar yʌnoꞌ Jesús ich caꞌanan tan u pajic u qꞌuinin a Cꞌujoꞌ cu bin u tsꞌic tiꞌ Jesús u mucꞌ ich yocꞌor a mac a cu pꞌacticob Jesús soc u toc rʌc chꞌesicob tiꞌ. 
\v 14 Mʌꞌ ja wirej, toc jumpuriꞌ quir u taquic mac a cu yacsic tu yor wa ber caj u cꞌub u bʌj quir u pꞌobar ic siꞌpirex soc u ricꞌsmʌnoꞌonex Cꞌuj quir ic beyajex tiꞌ Cꞌuj.
\v 15 Aroꞌ jach taj quireꞌ tuririꞌ a mac a tsꞌab u tucur ten Cꞌuj caj u tsꞌibtaj a baꞌ u cꞌat Cꞌuj uch. Mʌꞌ ja wirej, rajiꞌ u Tajꞌor u Pixam Cꞌuj caj u yaꞌaraj tiꞌ uch. 
\v 16 Rajen caj u tsꞌibtaj:
\q Ic Jaj Tsꞌurirex Cꞌuj caj yaꞌaraj, caꞌ bin tac tu qꞌuinin bin in wʌcꞌʌs pʌquic u pac u jer quet tꞌʌnoꞌ a baꞌ quin toc aric tiꞌ u winiquirob israel. Jeꞌ in tsꞌic tiꞌ caꞌ ocac in tꞌʌn tu pixamob soc u najticob in mucꞌ soc mʌꞌ u bin tubur tiꞌob.
\m
\v 17 Pachir, quij, baxuc caj u yaꞌaraj xan:
\q A tenoꞌ, quij Cꞌuj, jeꞌ in rucꞌsic u siꞌpirob. Mʌꞌ biqꞌuin quin bin in cꞌʌꞌotic tiꞌob, cax a baꞌ cꞌasir caj u betob uch xan.
\m
\v 18 Wa ber u qꞌuinin a Cꞌujoꞌ caj u rucꞌsaj u siꞌpir mac mʌꞌ baꞌwir quir u wʌcꞌʌs tsꞌic tiꞌ Cꞌuj quir u rucꞌsicob u siꞌpirob. Toc tsꞌoquij.
\s Caꞌ ij cacsex tij corex quir ij cocarex tu yʌn Cꞌuj 
\p
\v 19 Rajen in wet acsʌꞌorirex, tu qꞌuinin a quet u tꞌʌnoꞌ, a uchben tꞌʌnoꞌ, mʌnaꞌ mac cꞌuchaꞌan yor u yocar tu japnin naj tu yʌn u chan cuchir, a cu jacꞌʌr yor macoꞌ. Chen quireꞌ a quet u tꞌʌnoꞌ, a ricꞌben tʌnoꞌ, tu jocꞌ u qꞌuiqꞌuer Cristo, jeroj cꞌuchaꞌan ij corex ij cocarex tiꞌ juncꞌas naj a cu jacꞌʌr yor macoꞌ, tu yʌn Cꞌuj, quireꞌ mʌꞌ u jacꞌʌr ij corex, quij, ij cocarex.
\v 20 Bayiriꞌ xan, rajiꞌ u bʌjiriꞌ Cristo tiꞌ yʌn ich caꞌanan ich Cꞌuj, quireꞌ ricꞌben bej a tu jaraj tiꞌ toꞌonex, jeroj cꞌuchaꞌan ij corex ij cocarex tu tajir ʌcʌtan tiꞌ Cꞌuj.
\v 21 Mʌꞌ ja wirej, ic Jaj Tsꞌurirex Jesucristo oquij tu beyaj an ten bic sacerdote a jach noꞌjoꞌ soc u tꞌʌnic Cꞌuj tiꞌ toꞌonex, quireꞌ raꞌ yʌninoꞌonex Cꞌuj.
\v 22 Caꞌ natsꞌʌcoꞌonex ich Cꞌuj yejer u tsoyir ic pixamex quireꞌ mʌꞌ baꞌwir caꞌ ic tucrex baꞌ, quireꞌ tij cacsex tij corex tiꞌ Cristo. Mʌꞌ ja wirej, toc rucꞌsaꞌb ic siꞌpirex ten Cꞌuj quireꞌ toc pꞌob ic pixamex. Mʌꞌ ja wirej, caj jocꞌ u qꞌuiqꞌuer Jesús soc u pꞌobaroꞌonex irej a mac toc pꞌob ich jaꞌ soc u rucꞌur u yeqꞌuir.
\v 23 Caꞌ ij cacsex tij corex wa Cꞌuj cu bin u yacsicoꞌonex, quireꞌ tij quibajex a baꞌ tu toc araj toꞌonex Cꞌuj wa ber tu yaꞌaraj aroꞌ uch.
\v 24 Caꞌ ic chichquintej yor ij quet acsʌꞌorirex soc ic pacran yajquintiquex ic bʌjex soc ic manex tu tsoyir. 
\v 25 Mʌꞌ ic yʌn pꞌʌtiquex ic muchꞌquintic ic bʌjex quir ij cuꞌyiquex u tꞌʌn Cꞌuj xan, quireꞌ yʌn junyarob, ij quet acsʌꞌorirex tan u pꞌʌticob u muchqꞌuinticob u bʌj quir yubicob u tꞌʌn Cꞌuj. Mʌꞌ ja wirej, rajraꞌ caꞌ ic chichquintej ij corex quireꞌ tabar u qꞌuinin caꞌ bin uruc ic Jaj Tsꞌurirex Jesucristo.
\p
\v 26 Wa tic najtajex u jach tsoyir u tꞌʌn Cꞌuj, chen rajraꞌ quic pʌyiquex ic siꞌpirex quireꞌ baxuc ic cꞌatex, jeroj mʌꞌ u jawsic ic siꞌpirex.
\v 27 Jeroj tuneꞌ, yʌn baꞌ caꞌ ic tucrex, quireꞌ jeꞌ ic binex ʌcʌtan ich Cꞌuj quir u toꞌcar ic joꞌrex, jeroj tuneꞌ, caꞌ bin tsꞌocac aroꞌ, jeꞌ ic binex ich cꞌacꞌ yejer a mac tu maꞌquintob Cꞌuj.
\v 28 A uchoꞌ tu cotor mac a tu pꞌuspachtob a quet u tꞌʌnoꞌ, a tu tsꞌibtaj Moisés uch, wa yirir ten u yet winiquirob israel a caj manob tu cꞌasir cax wa dos wa tres u yirob. A ray macoꞌ, a man tu cꞌasir caj jocꞌsaꞌb quinsbir ten u yet winiquirob israel. Mʌꞌ jawsaꞌb u siꞌpir ten u yet winiquirob israel toc quinsaꞌb.
\v 29 A mac a tu pꞌuspacht u parar Cꞌuj, jach manan cu bin mucꞌyaj, quireꞌ tu maꞌquintaj a quet u tꞌʌnoꞌ, a ricꞌben tꞌʌnoꞌ, quireꞌ tuchiꞌtaꞌb u parar Cꞌuj ten Cꞌuj. Mʌꞌ ja wirej, pꞌastaꞌb u parar Cꞌuj quireꞌ cu pꞌastic u qꞌuiqꞌuer a jocꞌsaꞌb quinsbir Jesús tiꞌ a quet u tꞌʌnoꞌ, irej wa mʌnaꞌ baꞌ, a ray qꞌuiqꞌueroꞌ a tu cu pꞌoꞌic ic siꞌpirex. Bayiriꞌ xan, tu maꞌquintaj u Tajꞌor u Pixam Cꞌuj a mac a cu yajquintic mac, rajen quiꞌ irej, quij.
\v 30 Quireꞌ tij quirex Cꞌuj caj u yaꞌaraj: “Jeꞌ in tsꞌictar yejer a mac a yʌn u siꞌpir, rajen jeꞌ u mucꞌyaj ten, quij, u boꞌorir u siꞌpirob.” Caj u wʌcꞌʌs araj Cꞌuj: “Jeꞌ in taquic u joꞌr a ten yʌnin quireꞌ a tenoꞌ, juezen.” 
\v 31 Jach yaj cu bin yubej mac caꞌ bin tsꞌicac Cꞌuj, a cuxaꞌan a Cꞌujoꞌ.
\p
\v 32 Mʌꞌ u yʌn tubur techex bic tabar Cristo caj u yacsaj techex ich u sasirir. Nemʌꞌ biquechex tu caj a mucꞌyanʌjechex uch, tub tu chuquex a pachex jach manan.
\v 33 Yʌn u qꞌuinin uch, caj u pꞌastob techex, tan u chich jʌtsꞌicob a pachex ʌcʌtan tu wichob mac. Jach yaj caj a wuꞌyaj ta worex caj a wirex u jatsꞌar a wet acsʌꞌorirex, a mac a wet binac caj chich jatsꞌaꞌb u pachob ten a cu pꞌactiquechexob.
\v 34 A techexoꞌ, caj a wirex otsir a wet acsʌꞌorirex a tiꞌ yʌn cꞌʌraꞌan tu cu maꞌcʌr mac. Jach nemʌꞌ bic techex tub caj u chucajob a baꞌtaquechex, quireꞌ techex a werex caꞌ bin xiquechex ich caꞌanan jeꞌ u wʌcꞌʌs pʌquic pac u jer techex a jach manan tsoyir, raꞌ yʌnex tex munt qꞌuin caꞌanan.
\v 35 Rajen mʌꞌ a yʌn tupsic a worex soc a bin a cꞌʌmex a baꞌ jach coꞌoj tiꞌ Cꞌuj.
\v 36 Mʌꞌ ja wirej, caꞌ a quiꞌ cʌnex nemʌꞌ bic techex soc a quibiquex u tꞌʌn Cꞌuj soc u yacsiquechex an ten bic caj u toc araj uch.
\v 37 Quireꞌ tiꞌ toc tsꞌibaꞌan ich u tꞌʌn Cꞌuj baxuc a jeꞌraꞌ: 
\q Jach tabar u cꞌuchur a mac a cu tar an ten bic caj yaꞌaraj uch. Mʌꞌ ju xʌntar u cꞌuchur.
\v 38 Chen a mac a cu yacsic tu yor tiꞌ ten, quij Cꞌuj, jariꞌ cu bin rucꞌsaꞌbir u siꞌpir quir u cuxtar munt qꞌuin. Chen wa cu pꞌuspachtiquen, jeꞌ in wacꞌtic tiꞌeꞌ. Baxuc caj araꞌb ten Cꞌuj uch.
\m
\v 39 A toꞌonexoꞌ caj ij cacsex tij corex tiꞌ Cꞌuj rajen rajiꞌ cu quiꞌ cʌnantic ic pixamex bajeꞌrer. A toꞌonexoꞌ mʌꞌ tij cʌnex a mac a tu pꞌuspachtob Cꞌuj a cu bin satʌr munt qꞌuin.
\c 11
\s Bic tabar a mac tu yacsob tu yorob tiꞌ Cꞌuj uch
\p
\v 1 Quireꞌ tij cacsex tij corex rajen ic toc erex jach taj jeꞌ u tsꞌic tiꞌ toꞌonex Cꞌuj a baꞌ tu toc araj toꞌonex Cꞌuj, chʌcaꞌan u tsꞌic tiꞌ toꞌonex. A toꞌonexoꞌ, ij querex yʌn baꞌ ich caꞌanan a mʌꞌ chʌcaꞌan ic jach iriquex yejer ic jach ichex.
\v 2 A baxucoꞌ yʌn baꞌ, quireꞌ ic nunquirex caj u yacsob tu yorob tiꞌ Cꞌuj, rajen a Cꞌujoꞌ cu yaꞌaric: “Robob jach tsoy.”
\p
\v 3 Quireꞌ tij cacsex tij corex tiꞌ Cꞌuj, rajen ij toc erex wa ju bʌjiriꞌ Cꞌuj caj u betaj yocꞌocab, cax mʌnaꞌ baꞌ uch, quij, a Cꞌujoꞌ caj u tꞌʌnaj caꞌ jocꞌac baꞌ, jeroj rʌc joqꞌuij.
\p
\v 4 A Abeloꞌ, caj u yacsaj tu yor tiꞌ Cꞌuj, rajen caj u tsꞌajaj u yʌrʌcꞌ tiꞌ Cꞌuj u boꞌorir u siꞌpir. A ray yʌcʌcꞌoꞌ, jach manan tsoy cax a baꞌ tsꞌaꞌbir tiꞌ ten u sucuꞌun Caín tiꞌ Cꞌuj. Quireꞌ a tsꞌaꞌb tiꞌ ten Caín, mʌꞌ ju cꞌʌmaj Cꞌuj. Mʌꞌ ja wirej, Abel caj u yacsa yor tiꞌ Cꞌuj. Rajen Cꞌuj caj u yiraj jach tsoy a baꞌ tu betaj Abel, quireꞌ a baꞌ tu tsꞌaja tiꞌ Cꞌuj uch. Rajen Cꞌuj caj yaꞌaraj: “Jach tsoy Abeloꞌ.” A uchoꞌ caj quimij Abel, chen quireꞌ tu yacsaj tu yor tiꞌ Cꞌuj, cax qꞌuinij bajeꞌrer tan u camsic tiꞌ toꞌonex bic tabar caꞌ ij cacsex tij corex tiꞌ Cꞌuj an ten bic Abel caj u yacsaj tu yor tiꞌ Cꞌuj. 
\p
\v 5 A Enocoꞌ, caj u yacsaj tu yor tiꞌ Cꞌuj, rajen acsaꞌb Enoc ten Cꞌuj ich caꞌanan, cax tiꞌ toy cuxaꞌan Enoc uch. U racꞌob a cʌjaꞌanob tu qꞌuinin Enoc, mʌꞌ tu caꞌ irobiꞌ. Mʌꞌ ja wirej, tiꞌ tsꞌibaꞌan tiꞌ Enoc ich u tꞌʌn Cꞌuj uch, bic tabar rajiꞌ jach tsoy yirir ten Cꞌuj quireꞌ tu yacsaj tu yor tiꞌ Cꞌuj.
\v 6 Soc tsoy yiricoꞌonex Cꞌuj caꞌ ij cacsex tij corex. Quireꞌ a mac a cu yacsic tu yor tiꞌ a cuxaꞌan Cꞌujoꞌ, jariꞌ robob cu bin yamtaꞌbir ten Cꞌuj.
\p
\v 7 A Noéjoꞌ caj u yacsaj tu yor tiꞌ Cꞌuj, rajen caj u quib u tꞌʌn Cꞌuj caj u betaj u yajaw chem yejer u jor an ten bic u jor naj. Quireꞌ caj u toc araj Cꞌuj bin u rʌc chꞌesic mac tu cotor a tiꞌob yʌn ich yocꞌocab uch, rajen Noé caj oquij ich u japnin yajaw chem yejer u bʌjob soc u tocarob ten Cꞌuj. Mʌꞌ ja wirej, yer Noé a baꞌ araꞌb ten Cꞌuj bin u caꞌ tar. A baywoꞌ Noé caj u yesaj tiꞌ u racꞌob jeꞌ u rʌc satʌr u racꞌob a mʌꞌ ju quibob u tꞌʌn Cꞌuj. Rajen Cꞌuj caj yaꞌaraj: “Jach tsoyech Noé.” Quireꞌ tu yacsa tu yor tiꞌ Cꞌuj, Noé.
\p
\v 8 A Abrahamoꞌ, quireꞌ tu yacsaj tu yor tiꞌ Cꞌuj rajen caj u quibaj a baꞌ araꞌb tiꞌ ten Cꞌuj uch: “Caꞌ xic tech, quij Cꞌuj, ich u jer ruꞌum a quin tsꞌic tech Abraham.” Caj binij Abraham cax mʌꞌ yer tu ju bin Abraham caj pay u ber ten Cꞌuj. Tu rʌc pꞌʌtaj u cajar quir u bin.
\v 9 Quireꞌ tu yacsaj tu yor tiꞌ Cꞌuj Abraham, rajen tu pꞌʌtaj u ruꞌumin, cax yʌn u jach tsꞌurir u ruꞌumin tu cu bin uch. Rajiꞌ tu sinaj u noqꞌuir naj quir u cʌjtar irej mac a cu naj bin. Bayiriꞌ u parar Abraham, a Isaacoꞌ yejer a Jacoboꞌ, toc araꞌb tiꞌob ten Cꞌuj chʌcaꞌan u tsꞌabʌr u ruꞌuminob a tiꞌob xanoꞌ xan.
\v 10 Abraham caj u sinaj u noqꞌuir naj ich u ruꞌumin tu cʌjaꞌan uch, quireꞌ tan u pajic u tar pʌybir ten Cꞌuj ich caꞌanan soc rajiꞌ cu bin cʌjtar caꞌanan a toc betaꞌ ten Cꞌuj, an ten bic caj u tucraj Abraham. A rajiꞌiꞌ, tiꞌ yʌn munt qꞌuin.
\p
\v 11 Bayiriꞌ xan, u racꞌ Abraham, u cꞌabaꞌ Sara, caj u yacsaj tu yor tiꞌ Cꞌuj. Mʌꞌ ja wirej, cax nuxib a Sarajoꞌ, cax man tu qꞌuinin u yiric yʌrʌcꞌ och. A Sarajoꞌ yer chʌcaꞌan u pararancʌr quireꞌ baxuc caj toc araꞌb ten Cꞌuj uch, quij.
\v 12 Tiꞌ a rayoꞌ, tu yʌnxchun u pararʌncʌr ic nunquirex Abraham uch. U tiriꞌ caj u yʌnxchun u pimtar u parar cax jach nuxib Abraham pararnʌjij. Mʌꞌ ja wirej, jach pimjij u parar Abraham an ten bic sab pim ich caꞌanan, baxuc u saꞌamin chiꞌ cꞌacꞌnab, baxuc pimij u parar ic nunquirex Abraham. Mʌꞌ cꞌuchaꞌan ij corex ic xaquiquex mun pimin u parar.
\p
\v 13 Robob, ic nunquirex caj rʌc quimob uch. Tu cotor a baꞌ araꞌb ten Cꞌuj tiꞌob mʌꞌ nupꞌsaꞌb a baꞌ toc araꞌb tiꞌ ic nunquirex uch. Chen ic nunquirex caj u pajob cu bin nupꞌsaꞌbir ten Cꞌuj a baꞌ toc araꞌab tiꞌob ten Cꞌuj uch. Rajen quiꞌ yorob quireꞌ yerob mʌꞌ u binob cʌjtar teraꞌ ich yocꞌocab munt qꞌuin. Mʌꞌ ja wirej, ic nunquirex yerob cu chen manob teraꞌ hasta cu cꞌuchur tu qꞌuinin cu binob ich caꞌanan.
\v 14 Quireꞌ baxuc caj yaꞌarob uch: “Mʌꞌ ic cʌjtarex teraꞌ ich yocꞌocab. Quic jamach cʌjtarex teraꞌ.” A baxucoꞌ, caj u yesob tiꞌ toꞌonex tan u pajicob caꞌ bin cꞌuchuc tu qꞌuinin u jach cʌjtarob ich caꞌanan.
\v 15 Wa caj u chen tucricob u cʌjtarob tu ruꞌumin a caj u pꞌʌtob uch, jeroj, tuneꞌ, cꞌuchaꞌan yorob u wʌcꞌʌs sutob tu pachob. Chen mʌꞌ sutnʌjob tu pachob quireꞌ mʌꞌ u cꞌatob u sutob tu pachob uch, quireꞌ tan u pajicob uch a baꞌquiriꞌ araꞌb tiꞌob ten Cꞌuj uch.
\v 16 Chen aroꞌ mʌꞌ tu tucrobiꞌ, quij, quireꞌ yerob tu yorob jach manan tsoy caꞌ bin xicob ich caꞌanan. Rajen a Cꞌujoꞌ quiꞌjij yor yejerob, rajen caj u yaꞌaraj tiꞌob: “Jach tsoyechex”, quij Cꞌuj, quireꞌ tan u cꞌaxicob u cajar tu cu bin jach cʌjtarob ich cꞌaꞌanan.
\p
\v 17-18 Ic nunquirex Abraham caj tumtaꞌb yor ten Cꞌuj quireꞌ tu yacsaj tu yor tiꞌ. Mʌꞌ ja wirej, ic nunquirex Abraham tu quibaj a baꞌ araꞌb tiꞌ ten Cꞌuj. Rajen caj bin u chaquintej u parar Isaac tu cu naj quinsic yʌrʌcꞌ quir u tsꞌic tiꞌ Cꞌuj, cax mʌnaꞌ u jer u parar. Tu chaquintaj u parar uch soc chʌcaꞌan u quinsic u parar, cax raꞌ toc araꞌb ten Cꞌuj tiꞌ Abraham: “Rajiꞌ Isaac, cu yʌxnchun a parar a cu bin cꞌʌmbir a baꞌ araꞌb tiꞌ ten Cꞌuj uch.”
\v 19 Mʌꞌ ja wirej, raꞌ ic nunquirex Abraham yer Cꞌuj cꞌuchaꞌan yor u ricꞌsic u parar Isaac tu quimirir. Quireꞌ caj u tucraj tu yor yʌn quinsaꞌ u parar, chen mʌꞌ quinsaꞌbir rajen irej wa wʌcꞌʌs ricꞌsaꞌb Isaac ten Cꞌuj tu tꞌʌn ic nunquirex Abraham uch.
\p
\v 20 Ic nunquirex Isaac, caj u yacsaj tu yor tiꞌ Cꞌuj, rajen caj araꞌb ten Isaac tiꞌ u parar Jacob yejer u parar Esaú, robob chʌcaꞌan yamtaꞌbir ten Cꞌuj.
\v 21 Ic nunquirex Jacob, quireꞌ caj u yacsaj tu yor tiꞌ Cꞌuj. Rajen jach tabar u cꞌuchur tu qꞌuinin u quimin Jacob, caj araꞌb ten Jacob tiꞌ u parar José cu bin yamtaꞌbir ten Cꞌuj soc yʌn baꞌ u cꞌat u parar a Joséjoꞌ, jujuntur u parar a Joséjoꞌ. Pachir ic nunquirex Jacob caj u quiꞌ tꞌʌntaj Cꞌuj, baxuc caj u betaj yocꞌor u xonteꞌ quireꞌ nuxib caj nupraj uch.
\v 22 Ic nunquirex José, quireꞌ caj u yacsaj tu yor tiꞌ Cꞌuj, rajen tu chich araj a tiꞌob u yet winiquirob israel, caꞌ bin cꞌuchuc tu qꞌuinin cu bin u rʌc pꞌʌticob u ruꞌumin Egipto. Caj yaꞌaraj: “Caꞌ bin xiquechex yʌn a toc cuchiquex in baquer”, quij José.
\p
\v 23 Bayiriꞌ xan, u nʌꞌ yejer u tet ic nunquirex Moisés, caj u yacsob tu yorob tiꞌ Cꞌuj. Rajen caj rochaꞌb Moisés ten u nʌꞌ caj u purob tiꞌ soc mʌnaꞌ mac cu yiric Moisés, rajen mʌꞌ irir ten mac hasta manij tres ic nʌꞌ. Robob mʌꞌ tu chꞌajob sajquir a baꞌ araꞌb tiꞌ ten u rey tiꞌ u ruꞌumin Egipto wa cu bin quinsbir tu cotor u chan ochir a xiboꞌ. Caj tacaꞌb ten u nʌꞌ tiꞌ a reyoꞌ quireꞌ yer Cꞌuj cu bin u cʌnantic chan Moisés quireꞌ u nʌꞌ yejer u tet caj u yirob jach tsoy u wich chan Moisés.
\v 24 Ic nunquirex Moisés, quireꞌ caj u yacsaj tu yor tiꞌ Cꞌuj, rajen caj tsꞌoc u chꞌijir Moisés mʌꞌ quiꞌ yor quireꞌ yubaꞌ chꞌaꞌb tsemtaꞌbir ten xquic, raꞌ u parar u rey u winiquirob egipto. Mʌꞌ u cꞌat yubic Moisés, mʌꞌ u nʌꞌ, a xquicoꞌ. Quireꞌ yubic yaꞌaric raꞌ u parar xquic.
\v 25 Quireꞌ a Moisésoꞌ, mʌꞌ man tu cꞌasir, mʌꞌ manij a baꞌ cu pachtic tu yor, a cꞌasoꞌ. Quiꞌ yor a Moisésoꞌ wa ber caj u pꞌeriꞌquintaj u yor yejer yet winiquirob israel soc pꞌeriꞌob u mucꞌyajob.
\v 26 A Moisésoꞌ, caj u quiꞌ tucraj wa jach manan tsoy caꞌ u rʌc pꞌʌtej tu cotor baꞌ a raꞌ yʌnin tu ruꞌumin Egipto quir u bin mucꞌyaj yejer yet winiquirob israel. Jach quiꞌ yor caj mucꞌyajnʌjij Moisés a uchoꞌ. Caj mucꞌyajnʌjij Moisés an ten bic Jesús caj u mucꞌyajnʌjij quireꞌ u yet winiquirob israel. Mʌꞌ ja wirej, Moisés yer a Cꞌujoꞌ cu bin tsꞌabʌr tiꞌ Moisés a baꞌ jach manan tsoy tiꞌ.
\v 27 Quireꞌ tu yacsaj tu yor tiꞌ Cꞌuj Moisés, cax tsꞌiquij u rey u ruꞌumin Egipto yejer Moisés, chen Moisés mʌꞌ tu chꞌaj sajaquir tiꞌ. Mʌꞌ ja wirej, rajiꞌ caj u pꞌʌtaj u ruꞌumin Egipto quireꞌ tu yacsaj tu yor tiꞌ Cꞌuj, a Cꞌujoꞌ a mʌꞌ iraꞌan ten mac.
\p
\v 28 Quireꞌ tu yacsaj tu yor tiꞌ Cꞌuj Moisés, rajen Moisés caj u sʌjtaj Cꞌuj a raꞌ u qꞌuininoꞌ caj tar yʌjmasir u tꞌʌn Cꞌuj, a tu potmastaj mac tu tu yiraj uch u qꞌuiqꞌuer a witsꞌcꞌʌbtaꞌboꞌ uch. Rajen tu chich araj Moisés tiꞌ tu cotorob u winiquirob israel caꞌ u baxtej u qꞌuiqꞌuer u yʌrʌcꞌ tʌmʌn yuc tu joꞌr yatoch tu cu naj ocarob tu yatochob soc mʌꞌ u bin quinsbir ten yʌjmasir u tꞌʌn Cꞌuj u parar xib, a yʌn batꞌan rochaꞌb ten u nʌꞌ.
\v 29 U winiquirob israel, quireꞌ caj u yacsob tu yorob tiꞌ Cꞌuj, rajen cꞌuchaꞌan yorob u chꞌʌcticob u chumuquir cꞌacꞌnab, a pʌchaꞌan u cꞌabaꞌ chʌc cꞌacꞌnabiꞌ. Mʌꞌ ja wirej, caj u chꞌʌctajob an ten mac cu chꞌʌcticob jach ruꞌum. Chen caj sayob tu pach, raꞌ u soldado u winiquirob egipto quir u tarob chucbir u winiquirob israel, caj wʌcꞌʌs tar yaꞌarir cꞌacꞌnab ich yocꞌor u soldado u winiquirob egipto, caj rʌc bintob jaꞌ, caj rʌc chuchob ten u yaꞌarir cꞌacꞌnab.
\p
\v 30 Rajen pachir u winiquirob israel, quireꞌ caj u yacsob tu yorob tiꞌ Cꞌuj, rajen caj rʌc manob u bʌcristicob tu cajar Jericó, a yʌn u paꞌteꞌ tsꞌʌpquintaꞌan yejer tunich soc jach caꞌananoꞌ. Caj tsꞌoc u manob tuririꞌ semana caj rʌc jubsaꞌb u paꞌteꞌir tu cajar Jericó.
\v 31 A xquicoꞌ, a mac u cꞌabaꞌ Rahab, a cu naj man uch quir u jaric u taqꞌuinoꞌ, caj u yacsaj tu yor tiꞌ Cꞌuj. Rajen caj u yacsaj tu yatoch a soldado u winiquirob israel, a tarob yiraj wa cꞌuchaꞌan yorob u rʌc quinsicob u winiquirob a cʌjaꞌanob ich u cajar Jericó. Rajen caj toc a Rahaboꞌ ten u winiquirob israel soc mʌꞌ u quinsaꞌ yejer a mac a mʌꞌ tu quibob u tꞌʌn Cꞌuj ich u cajar Jericó.
\p
\v 32 Tiꞌ toy yʌn yaꞌab u winiquirob israel a tu yacsob tu yorob tiꞌ Cꞌuj uch, chen mʌꞌ cꞌuchaꞌan in wor in rʌc tsꞌibtic techex quireꞌ chʌcaꞌan u man yaꞌab u qꞌuinin quir in tsꞌibtic. A tenoꞌ, quin chen cꞌasic techex tiꞌ jun yarob an ten bic Gedeón, an ten bic Barac, an ten bic Sansón, an ten bic Jefté, an ten bic David, an ten bic Samuel, an ten bic a mac tsꞌab u tucurob ten Cꞌuj quir u tsicbarob a baꞌ tsꞌaꞌb ich u yorob,
\v 33 quireꞌ robob caj u yacsob tu yorob tiꞌ Cꞌuj, rajen caj chꞌesaꞌb u cajar ten Cꞌuj a mac a tu pꞌactob a tiꞌoboꞌ. Yaꞌab caj u quiꞌ reyintajob u winiquir israel, yaꞌab yamtaꞌb ten Cꞌuj an ten bic caj toc araj tiꞌob. Yaꞌab caj u nupob barum caj toc ten Cꞌuj soc mʌꞌ u chiꞌbir ten barum.
\v 34 Yaꞌab mac a tu yacsob tu yorob tiꞌ Cꞌuj, rajen robob caj toc ten Cꞌuj soc mʌꞌ u tocar ten u racꞌob tu cu yerarob. Yaꞌab xan, toc ten Cꞌuj tu cu bin chꞌʌcbir yejer mascab soc mʌnaꞌ baꞌ cu yubob. Yaꞌab mac a tu yacsob tu yorob tiꞌ Cꞌuj, cax mʌnaꞌ u chichir u mucꞌ, jeroj tuneꞌ, caj tsꞌaꞌb u mucꞌ ten Cꞌuj soc jach chich u mucꞌ. Yaꞌab mac a tu yacsob tu yorob caj yamtaꞌb ten Cꞌuj tu tsꞌiquijob soldados, a mʌꞌ u winiquirob israel, rajen caj rʌc chꞌesaꞌb ten mac a yacsmʌnob tu yorob rajen caj u quinsob a soldadojoꞌ.
\v 35 Bayiriꞌ xan, yʌn xquic uch, quireꞌ tu yacsob tu yorob tiꞌ Cꞌuj, rajen ricꞌsaꞌb ten Cꞌuj tu quimirir a mac jach yajbir a xquicoꞌ, quireꞌ u yaj u parar a xquicoꞌ, jeroj, caj wʌcꞌʌs bin tu yatoch.
\p Yʌn yaꞌab mac xan, a yacsmʌnob tu yorob uch tiꞌ Cꞌuj rajen caj cꞌasquintaꞌb ten u racꞌob, caj chich xitꞌ u winquirir hasta caj rʌc jat u bʌqꞌuer. Chen robob mʌꞌ tu pꞌuspachtob Cꞌuj quireꞌ yerob chʌcaꞌan ricꞌsaꞌbir ich u quimirir soc caꞌ bin acsac ten Cꞌuj ich caꞌanan quir u cʌjtarob tu jach manan tsoy.
\v 36 Yaꞌab aroꞌ, caj chucaꞌb ten u racꞌob, caj pꞌastaꞌb, caj jatsꞌaꞌb u pachob, caj cꞌarij yejer mascab caj purob mʌcbir tu cu macar winicob.
\v 37 Yaꞌab aroꞌ caj chꞌinaꞌb u joꞌr soc u quininob. Yʌn yaꞌab uch caj bujchꞌʌcaj yejer jixib uch. Yʌn yaꞌab uch, caj quinsaꞌb yejer mascab. Yʌn yaꞌab uch, caj manob ich tʌcay ruꞌum cu chen buquinticob u nocꞌ a betaꞌb tiꞌ yotꞌer yʌrʌcꞌ chivo, bayiriꞌ xan yejer u yotꞌer yuc. Tan u manob jach otsirchʌjob, mʌnaꞌ yoꞌoch quir u janticob quire chucob u pachob uch.
\v 38 Robob caj cʌjrajob ich tʌcay ruꞌum a tu cꞌuchaꞌan yorob tiꞌ, cax ich wits, cax tu jorir ruꞌum, cax tu japnin tunich. Chen ʌcʌtan tu wich u racꞌob pꞌactaꞌb, chen ʌcʌtan tu wich a Cꞌujoꞌ jach yaj.
\v 39 A Cꞌujoꞌ cu yaꞌaric tiꞌob: “Jach tsoyechex”, quireꞌ tu yacsob tu yorob tiꞌ Cꞌuj. Chen tu cotor baꞌ a toc araꞌb tiꞌob ten Cꞌuj mʌꞌ toy nupuquiꞌ a baꞌ cu bin tsꞌaꞌbir tiꞌob.
\v 40 Quireꞌ toc araꞌbob ten Cꞌuj u pajob u qꞌuinin caꞌ u rʌc acsoꞌonex ich caꞌanan soc u tar yorob soc jach tiꞌ yʌn yorob yejeroꞌonex.
\c 12
\s Caꞌ ij quiꞌ asex tij corex tiꞌ ic Jaj Tsꞌurirex Jesucristo 
\p
\v 1 Quireꞌ ic toc erex tiꞌ yʌn yaꞌab mac a cuxaꞌanob uchoꞌ, a tu yesob bic tabar tu yacsob tu yorob tiꞌ Cꞌuj uch. Rajen caꞌ ij quiꞌ tucrex caꞌ ic pꞌʌtex a baꞌ cꞌasir quic pachtex tij corex, an ten bic a mac tan u jach pꞌisic u bʌj tub u cꞌʌnic yacab soc u cꞌuchur pʌyber tu yʌn u pꞌis. Bayiriꞌ xan, a toꞌonexoꞌ, caꞌ ic sayirex tu pach Cꞌuj tan ij quibiquex a baꞌ u cꞌat Cꞌuj.
\v 2 Rajen caꞌ ij quibex ic Jaj Tsurirex Jesucristo quireꞌ raꞌ caj u tsꞌajaj tiꞌ toꞌonex ic muqꞌuex quir ij acsiquex tij corex tiꞌ Cꞌuj soc u yacsicoꞌonex ich caꞌanan. Mʌꞌ ja wirej, u wʌcꞌʌs bʌjiriꞌ caj u cꞌub u bʌj soc u quinsaꞌ ich cruz, tu jach mucꞌyajnʌjij. Nemʌꞌ bic caj u mucꞌtaj quireꞌ yer caꞌ bin tsꞌocaquiꞌ jach nequiꞌ yor. A bajeꞌreroꞌ, tiꞌ cuxaꞌan ic Jaj Tsꞌurirex ich caꞌanan ich u noj Cꞌuj. 
\p
\v 3 Quiꞌ tucrex, quij, ic Jaj Tsꞌurirex Jesucristo bic tabar caj u quiꞌ mucꞌtaj a tu chucajob u pach uch ten mac, a yʌn u siꞌpirob, soc mʌꞌ u tupsic a worex soc mʌꞌ a pꞌʌtiquex u tꞌʌn Cꞌuj.
\v 4 Cax tan a mucꞌyajex bajeꞌrer tu cu chuquicob a pachex, mʌꞌ a yʌn acꞌtiquex a bʌj quireꞌ mix tuririꞌ ich techex caꞌ quinsaquechex an ten bic caj quinsaꞌb Jesús uch, quireꞌ tan a baꞌtetiquex a siꞌpiroꞌ tu yʌnechex.
\v 5 Cꞌaj wa techex a baꞌ tsꞌibtaꞌb ten a mac a tsꞌaꞌb u tucur ten Cꞌuj quir u tsꞌibtej a baꞌ u cꞌat Cꞌuj uch? Rajiꞌ caj u yaꞌaraj:
\q A tenoꞌ, quij a Jaj Tsꞌuriren Cꞌuj, quin chen camsic tech in pararech caꞌ a cʌnej tech quir a man tu tsoyir. Cꞌʌmej a baꞌ quin qꞌueyiquech. Mʌꞌ a yʌn choctar a wor tu quin qꞌuyiquech.
\v 6 A Cꞌujoꞌ tan yaꞌaric: a werex ten yʌninobechex, in jach yajechex chen a techexoꞌ quin camsiquechex caꞌ a cʌnex soc a manex tu tsoyir. Baxuc caj araꞌb ten Jaj Tsꞌur Cꞌuj uch.
\m
\v 7 Rajen quiꞌ mucꞌtex a baꞌ yajirir a cu tar tiꞌ techex, quireꞌ Cꞌuj tan u camsic techex baꞌ quir a cʌniquex. Mʌꞌ ja wirej, rajiꞌ Cꞌuj cu yiric techex an ten bic u parar rajen, rajiꞌ quir u yamtic techex. Ij querex tu cotor mac a cu qꞌueyic u parar cu qꞌueyic soc u yamtic tiꞌob.
\v 8 A mac a mʌꞌ camsaꞌ ten Cꞌuj quir u cʌnej baꞌ, an ten bic Cꞌuj cu camsic tu cotor u parar caꞌ u cʌnej quir u yamtic tiꞌob. Robob mʌꞌ u jach pararob. Robob irob u pararob a xquicoꞌ, a yʌn u parar tu cu man. Mʌꞌ ja wirej, raꞌ pararoꞌ mʌnaꞌ u jach tet, quij.
\v 9 Wa ber caj u tsemtoꞌonex ic nʌꞌex yejer ic tetex uch robob caj u qꞌueyaj toꞌonex uch quir u yamticob tiꞌ toꞌonex, rajen caj ic sʌjtex ic tetex yejer ic nʌꞌex. Jach manan tsoy xan caꞌ ic sʌjtex ic Tetex Cꞌuj a cʌjaꞌan ich caꞌanan. Quireꞌ rajiꞌ cu qꞌueyic toꞌonex soc ij cuxtarex an ten bic Cꞌuj u cꞌat caꞌ cuxracoꞌonex. Jach noꞌj caꞌ ij cꞌʌmex u qꞌueyic toꞌonex ic Tetex Cꞌuj.
\v 10 Caj u tsemtoꞌonex ic nʌꞌex yejer ic tetex uch, caj u qꞌueyajoꞌonexob quir u yamtic toꞌonex an ten bic caj u najtobiꞌ. Chen jach manan tsoy tiꞌ toꞌonex wa Cꞌuj cu qꞌueyiquoꞌonex quireꞌ rajiꞌ cu pachtic caꞌ ij cʌnex Cꞌuj soc ij cuxtarex an ten bic Cꞌuj cu pachtic caꞌ cuxrʌcoꞌonex ich yocꞌocab.
\v 11 Wa ber cu qꞌueyicoꞌonex Cꞌuj, mʌꞌ ic jach pachtiquexiꞌ u qꞌueyicoꞌonex, quireꞌ jach yaj quij cuꞌyiquexiꞌ u qꞌueyicoꞌonex Cꞌuj. Chen wa ber caj tsꞌoc ic natiquex biquin caj u qꞌueyoꞌonex aroꞌ jach tsoy. Mʌꞌ ja wirej, jach manan tsoy caꞌ ic najtex soc caꞌ cuxrʌcoꞌonex an ten bic Cꞌuj u pachtej ij cuxtarex soc tiꞌ yʌn ij corex.
\s Biquinin jach cꞌas a mac a cu pꞌuspachtic tiꞌ u tꞌʌn Cꞌuj.
\p
\v 12 Toc cꞌub a bʌjex tiꞌ Cꞌuj soc rajiꞌ cu bin u chichquintic a cꞌʌbex tu caꞌan a cꞌʌbex, baxuc a woquex tu caꞌan a woquex.
\v 13 Rajraꞌ caꞌ ximbarex ich u berir a tajoꞌ, soc mʌꞌ u yajtar yoc a mac yaj yoc chen caꞌ tsoyaquiꞌ.
\p
\v 14 Quiꞌ tucrex a manex tu tsoyir, mʌꞌ a tsꞌiquintex mac, toc quibex aroꞌ, quireꞌ a cʌniquex Cꞌuj soc a binex ich caꞌanan.
\v 15 Quiꞌ irex techex, quij, soc mʌnaꞌ mac cu pꞌuspachtic u jach tsoyir u pixam Cꞌuj quir u pꞌʌtej u jach tsoyir u pixam Cꞌuj. Quiꞌ cʌnantex a bʌj soc mʌnaꞌ mac ich techex caꞌ u cʌnej chan pʌcꞌaroꞌ, a jach cꞌajoꞌ, a caꞌ bin tsꞌocac u chꞌijir, jeꞌ u cꞌajquintic yaꞌab mac yejer u cꞌajir.
\v 16 Mʌꞌ a yʌn cʌjtarex yejer a mac a mʌꞌ chꞌa raqꞌuintej, a mʌꞌ ta chꞌa mʌmintej xan. Bayiriꞌ xan, mʌꞌ a yʌn pꞌʌtiquex a baꞌ jach tsoy tiꞌ techex an ten bic Esaú caj u pꞌʌtaj. Mʌꞌ ja wirej, rajiꞌ quireꞌ a chʌc janʌnoꞌ, a tsꞌaꞌb tiꞌ, caj u cꞌaxaj u jach tsoyir u tꞌʌn u tet Isaac, a mac cu bin u pꞌʌtic tiꞌ, quireꞌ sucuꞌunbir a Esaújoꞌ, soc rajiꞌ yʌnin a baꞌ toc araꞌa ten Cꞌuj tiꞌ u tet uch. 
\v 17 Cꞌaj techex, caj cꞌuchij tu qꞌuinin u tet caj tsꞌab tiꞌ yitsꞌin ten u tet? Mʌꞌ tsꞌabac tiꞌ Esaú ten u tet, cax caj u quiꞌ acꞌtaj u bʌj tiꞌ, quireꞌ toc con tiꞌ yitsꞌin Jacob ten Esaú uch. Mʌꞌ bic tabar u caꞌ cꞌaxic quireꞌ toc tsꞌaꞌb tiꞌ yitsꞌin uch.
\p
\v 18 Mʌꞌ ja wirej, ic nunquirex uch, caj mucꞌyajnʌjob uch, chen mʌꞌ baꞌwir tiꞌob caꞌ mucꞌyajnʌcob. Mʌꞌ ja wirej, caj binob ich u joꞌr pꞌuc wits caj u chen jacꞌ yorob quireꞌ tiꞌ taroꞌ tan yerar u chꞌic yum cꞌacꞌ, caj jach acꞌbirchʌjij, caj tarij u chꞌic yum icꞌ xan. 
\v 19 Quireꞌ ic nunquirex caj yubaj utstaꞌbir bajen u bac wacax. Caj yubaj Cꞌuj tan u tꞌʌnic tiꞌob. Rajen cu jach jacꞌar yorob tiꞌ u tꞌʌn Cꞌuj, caj u yaꞌarajob caꞌ u chan suꞌsej u tꞌʌnob tiꞌ.
\v 20 Caj u chꞌajob chꞌic yum sajaquirob ic nunquirex uch, quireꞌ a Cꞌujoꞌ caj u betaj u joꞌr pꞌuc witsꞌ a cu jacꞌʌr yor mac. Mʌꞌ ja wirej, Cꞌuj caj u toc araj u chꞌinin u joꞌr mac cax rʌmbir yejer ransa, cax yʌrʌcꞌ xan, caꞌ quinsac wa cu natsꞌʌrob ich wits. Rajen tu sʌjtajob u winiquirob israel. Yerob bin u caꞌ quinsbirob.
\v 21 Raꞌ u joꞌr a pꞌuc witsoꞌ a cu jacꞌʌr yor mac, a caj yirob. Rajen sʌjtaꞌb ten u winiquirob israel, bayiriꞌ xan, caj jac yor Moisés xan, quireꞌ caj quiꞌquirʌnʌjij Moisés uch. Quireꞌ u bʌjiriꞌ araj Moisés: “Tan in quiꞌquirʌncʌr a tenoꞌ”, quij Moisés uch.
\p
\v 22 Chen a toꞌonexoꞌ, jach manan tsoy tiꞌ toꞌonex, quireꞌ, mʌꞌ ic binex ich a ray u joꞌr pꞌuc witsoꞌ, quireꞌ tsꞌoc ij cꞌuchurex u joꞌr u witsir Sión, raꞌ u cajar Cꞌuj, a cuxaꞌanoꞌ, a mac a yʌn u mucꞌ a cu jacꞌʌr yor mac. A ray cajaroꞌ tiꞌ yʌn jach pim yʌjmasirob u tꞌʌn Cꞌuj a tan u rʌc quiꞌ tꞌʌnicob Cꞌuj.
\v 23 Tiꞌ taroꞌ ich caꞌanan, jeꞌ u pꞌeriꞌ muchꞌquinticoꞌonex Cꞌuj yejer a raꞌ yʌninoꞌonex Cꞌuj quireꞌ rucꞌsaꞌb ic siꞌpirex ten Cꞌuj. A tiꞌ taroꞌ xanoꞌ, yʌn u juꞌunin ich caꞌanan a toc rʌc tsꞌibtaꞌb u cꞌabaꞌ a yacsmʌnob tu yorob. A Cꞌujoꞌ rajiꞌ juez tiꞌ tu cotor mac cax a yʌn u siꞌpirob. Raꞌ Cꞌuj xan, a mac a tu waysaj u bʌj tu cotor baꞌ, a Cꞌujoꞌ caj u pacht u waysicob u bʌj.
\v 24 Mʌꞌ ja wirej, tij cacsex tij corex tiꞌ ic Jaj Tsꞌurirex Jesucristo xan, a mac a yʌn u mucꞌ a quet u tꞌʌnoꞌ a ricꞌbenoꞌ. Rajiꞌ tan u tꞌʌnic Cꞌuj tiꞌ toꞌonex. Raꞌ tu cꞌubaj u bʌj soc u quinsaꞌ caꞌ jocꞌac u qꞌuiqꞌuer soc Cꞌuj cu jawsic ic siꞌpirex. Ij querex, a Abeloꞌ uch, caj quinsaꞌb ten u yitsꞌin Cain. Caj joqꞌuij u qꞌuiqꞌuer Abel, raꞌ mʌꞌ tu yamtaj mac quireꞌ mʌꞌ cojiꞌ, quireꞌ a Cristojoꞌ jach coꞌoj u qꞌuiqꞌuer.
\p
\v 25 Quireꞌ Cꞌuj raꞌ yʌninoꞌonex, rajen, quiꞌ cʌnantex a bʌjex. Quireꞌ mʌꞌ tan a pꞌuspachtiquex a baꞌ tu chich araj techex caꞌ a quibexiꞌ. Cꞌaj techex ic nunquirex uch, caj u pꞌuspachtajob a baꞌ chich araꞌb ten Cꞌuj caꞌ u quibob ich u joꞌr pꞌuc wits. Chen robob mʌꞌ toc ten Cꞌuj. Baxuc a toꞌonex xan, chʌcaꞌan mʌꞌ u taquicoꞌonex Cꞌuj wa quic pꞌuspachtiquex a baꞌ tu chich araj toꞌonex caꞌ ij quibex xan, quireꞌ raꞌ cu tar tiꞌ caꞌananoꞌ. 
\v 26 Raꞌ u qꞌuininoꞌ ich u joꞌr pꞌuc wits uch ber caj chich araꞌb tiꞌob Cꞌuj, jeroj, pecnʌjij u ruꞌumin.
\v 27 Bayiriꞌ xan, jach noꞌj caꞌ ij cuꞌyiquex caꞌ ij quibex a baꞌ tu toc araj bajeꞌrer, quireꞌ tu toc araj: “Jeꞌ in wʌcꞌʌs chich aric tiꞌ mac. Mʌꞌ u chen pec u ruꞌumin, quin bin in jubsic tu cotor a baꞌ a tiꞌ yʌn ich caꞌanan a mʌꞌ u pꞌatʌr. Jariꞌ cu bin pꞌatʌr a baꞌ tin toc araj caꞌ pꞌatac.”
\v 28 Rajen, caꞌ ij carex tiꞌ Cꞌuj: “Bayoꞌ Cꞌuj, quireꞌ quic bin ij cʌjtarex yejerech Cꞌuj quireꞌ tech Cꞌuj reyech, yʌn a mucꞌ. A mucꞌoj, caj a tsꞌajoꞌonex, mʌꞌ u bin xupur ic mucꞌ tu quic reyintiquech Cꞌuj.” Caꞌ ij cꞌujintiquex Cꞌuj yejer tu cotor ic pixamex tu quic sʌjtiquex Cꞌuj. 
\v 29 Baxucoꞌ, caꞌ ij cꞌujintiquex Cꞌuj, quireꞌ u mucꞌ Cꞌuj jach manan jacꞌʌr yor mac, quireꞌ cu bin u jocꞌsic a mac a yʌn u siꞌpirob ich cꞌacꞌ tu cu binob.
\c 13
\s Bic tabar ij quiꞌ cꞌujintiquex Cꞌuj
\p
\v 1 Mʌꞌ a pꞌatiquex a yajquintiquex a wet acsʌꞌorirex. 
\v 2 Quiꞌ acsex a mac a cu cꞌuchur ta watochex. Mʌꞌ ja wirej, yʌn mac a tu yacsaj mac tu yatoch caj u yacsaj u yʌjmasirob u tꞌʌn Cꞌuj, cax mʌꞌ yirmʌn mac, caꞌ tu yacsaj tiꞌ. 
\p
\v 3 Yajquintex a mac a cꞌʌraꞌan tu cu maꞌcʌr winicob irechex wa ja bʌj cꞌʌraꞌan yejerob tu cu maꞌcʌr winicob. Yajquintex a mac chucaꞌan u pachob quireꞌ periꞌ cʌjaꞌanechex yejerob ich yocꞌocab.
\p
\v 4 Tu cotorechex, a yʌn a raqꞌuex, bayiriꞌ xan, a yʌn u mamoꞌ, mʌꞌ a yʌn manex yejer a mac chꞌajaꞌan ten u jer mac quireꞌ a Cꞌujoꞌ jeꞌ u tsꞌictar yejer tu cotor mac a cu manob yejer a mʌꞌ chꞌaꞌan winic, quet bayiriꞌ, yejer a mac a cu manob yejer toc chꞌaꞌan winic xan. 
\p
\v 5 Mʌꞌ a pachtiquex a taqꞌuinex. Quiꞌquint a worex yejer a baꞌ yʌn techex, quireꞌ a Cꞌujoꞌ tu toc araj mʌꞌ u pꞌʌtechex ta junanex, mʌꞌ ju bin u pꞌuspachtiquechex Cꞌuj.
\v 6 Rajen, caꞌ ij quiꞌ quibex tiꞌ an ten bic ic nunquirex uch. Mʌꞌ ja wirej, caj tsꞌibtaꞌb uch:
\q Raꞌ cu yamtiquen in Jaj Tsꞌur Cꞌuj, rajen mʌꞌ in wacꞌtic in bʌj, cax cu chuquicob in pach in racꞌob.
\p
\v 7 Caꞌ a cʌnex a jach tsꞌurirex a tu tsecꞌtatechex u tꞌʌn Cꞌuj uch. Cʌnex bic tabar caj manob tu tsoyir soc a sayʌrex tu pachob, tan a wacsic ta worex an ten bic tu yacsob tu yorob a jach tsꞌurirex uch.
\p
\v 8 A ic Jaj Tsꞌurirex Jesucristojoꞌ u bereroꞌ, mʌꞌ u cꞌaxic mʌꞌ biqꞌuin, rajiꞌ u wʌcꞌʌs bʌjiriꞌ a joꞌrajoꞌ, rajiꞌ u wʌcꞌʌs bʌjiriꞌ bajeꞌrer, rajiꞌ u wʌcꞌʌs bʌjiriꞌ saman xan.
\v 9 Mʌꞌ a yʌn cʌniquex a baꞌ a cu naj tus camsicob mac tiꞌ u Cꞌuj. Jach manan tsoy caꞌ a quibex a baꞌ cu yaꞌaric Cꞌuj soc u chichquintic a worex Cꞌuj, quireꞌ a Cꞌujoꞌ u yajechex. Mʌꞌ ja wirej, mʌꞌ a yʌn cʌniquex a yaꞌab baꞌ an ten bic cu tus camsicob tiꞌ mac ich yocꞌor u yoꞌoch a cu janticob. Quireꞌ mʌꞌ baꞌwir tiꞌ a mac a tiꞌ yʌn a cu cꞌujinticob Cꞌuj.
\p
\v 10 Bajeꞌrer tij cacsex tij corex tiꞌ Cristo a mac jocꞌ u qꞌuiqꞌuer ich cruz. Chen a sacerdotejoꞌ tiꞌ a quet u tꞌʌnoꞌ, a uchben tꞌʌnoꞌ, mʌꞌ cꞌuchaꞌan yorob u yacsicob tu yorob tiꞌ Cristo, a robob a tiꞌ toy cu sayʌrob tu pach a ray u quet u tꞌʌnoꞌ.
\v 11 Bayiriꞌ xan, tu qꞌuinin u mucꞌ a quet u tꞌʌnoꞌ, a uchben tꞌʌnoꞌ, a tu tsꞌibtaj Moisés uch, caj cꞌuchij sacerdote, a jach noꞌjoꞌ tu yʌn u cuchir a raꞌ cu jacꞌʌr yor macoꞌ. Rajiꞌ a sacerdote, a jach noꞌjoꞌ cu cꞌuchur yejer u qꞌuiqꞌuer yʌrʌcꞌ, a quinsaꞌb, raꞌ quir u rucꞌsic u siꞌpirob u yet winiquirob israel ten Cꞌuj. Chen u bʌqꞌuer a yʌrʌcꞌoꞌ, a tsꞌoc u quinsic quir u jocꞌsic u qꞌuiqꞌuer. A raꞌ bʌqꞌueroꞌ, caj u puraj ich tancab tu cajar soc u rʌc toꞌquic.
\v 12 Baxucoꞌ, ic Jaj Tsꞌurirex Jesucristo caj sinij ich cruz ten u winiquirob romano soc u quimij ich tancab tu cajar Jerusalén. A tiꞌ taroꞌ, caj jocꞌ u wʌcꞌʌs qꞌuiqꞌuer soc a Cꞌujoꞌ caj u jawsaj u siꞌpirob a mac tan u tocar ten Cꞌuj.
\v 13 Rajen caꞌ ij cacsex tij corex tiꞌ ic Jaj Tsꞌurirex Jesucristo tan ic sayʌrex tu pach. Caꞌ ic pꞌʌtiquex u mucꞌ a quet u tꞌʌnoꞌ, a uchbenoꞌ, cax cu pꞌasticoꞌonex ij quet winiquirex israel an ten bic caj u pꞌastob Jesús ij quet winiquirex israel.
\v 14 Mʌꞌ ja wirej, ic toc erex, a toꞌonexoꞌ, mʌꞌ ic bin ij cʌjtarex teꞌ ich yocꞌocab munt qꞌuin. Chen ic toc erex wa rajiꞌ cu bin u yacsicoꞌonex ich caꞌanan munt qꞌuin quireꞌ tij cacsex tij corex.
\v 15 Quireꞌ ic toc erex aroꞌ, rajen caꞌ ij quibex ic Jaj Tsꞌurirex Jesucristo, mʌꞌ tan ic pꞌʌtiquex ij cariquex tiꞌ Cꞌuj: “Bayoꞌ Cꞌuj”, tan ij quiꞌ tꞌʌntiquex Cꞌuj yejer ij caqꞌuex tu quij cꞌʌꞌotiquex u mucꞌ Cꞌuj.
\v 16 Manenex tu tsoyir tan a yajquintex a mac a otsichʌjob, caꞌ a yamtex tiꞌ quireꞌ aroꞌ jach tsoy tu wich Cꞌuj. 
\p
\v 17 Caꞌ a sʌjtex a tsꞌurirex tu ca muchꞌquintiquex a bʌjex quir a wuꞌiquex u tꞌʌn Cꞌuj. Caꞌ a quibex a baꞌ cu yaꞌacob tiꞌ techex, quireꞌ raꞌ u beyajob a tsꞌurirex, tiꞌ techex, soc taj ca wacsaj ta worex tiꞌ u tꞌʌn Cꞌuj. Robob bin u caꞌ u toc nuncob tiꞌ Cꞌuj quireꞌ a pixamex. Manenex tu tsoyir soc mʌꞌ u tucriquechex a tsꞌurirex soc quiꞌ yorob quireꞌ techex. Quireꞌ wa mʌꞌ a manex tu tsoyir an bic caj u camsechex a tsꞌurirex, mʌꞌ baꞌwir tiꞌ yaj yubicob.
\p
\v 18 Tꞌʌnex Cꞌuj tiꞌ toꞌonex. Mʌꞌ ja wirej, ij querex tan ic manex tu tsoyir. Bayiriꞌ xan, tan ic pachtiquex soc rajraꞌ quic manex tu tsoyir.
\v 19 A tenoꞌ in jach cꞌat caꞌ a tꞌʌnex Cꞌuj caꞌ chabʌquen caꞌ sutnʌquen soc tabar in wiriquechex.
\s Cu tꞌʌnic u bʌjob
\p
\v 20 Rajiꞌ, ij Cꞌujirex, a cu yamticoꞌonex, soc tiꞌ yʌn ij corex. Rajiꞌ tu wʌcꞌʌs ricꞌsaj ic Jaj Tsꞌurirex tu quimirir. Rajiꞌ cu cʌnantic toꞌonex irej a mac a cu cʌnantic u yʌrʌcꞌ tʌmʌn yuc. Mʌꞌ ja wirej, a Jesúsoꞌ, caj u cꞌubaj u bʌj caꞌ quinsac quir u jocꞌar u qꞌuiqꞌuer. Rajen toc nupꞌaꞌan a baꞌ tsꞌibaꞌan ich u tꞌʌn Cꞌuj uch, soc bajeꞌrer tiꞌ yʌn a quet u tꞌʌnoꞌ, a ricꞌben tꞌʌnoꞌ. 
\v 21 A tenoꞌ quin pachtic u tsꞌic tiꞌ techex Cꞌuj tu cotor a baꞌ jach tsoy, soc caꞌ a betex a baꞌ u cꞌat Cꞌuj. Caꞌ ic tsꞌiquex ic pixamex quir ij quiꞌquintiquex u yor Cꞌuj yejer Jesucristo xan, caꞌ ic betex a baꞌ u cꞌat Cꞌuj, caꞌ ij caremquintej u cꞌabaꞌ munt qꞌuin. Jeroj. 
\p
\v 22 A tenoꞌ caj in chich cꞌataj techex in wet acsʌꞌorirex caꞌ a quibex u tꞌʌn Cꞌuj. Mʌꞌ neyaꞌab caj in tsꞌibtaj techex, rajen mucꞌ techex a baꞌ tin chich araj techex. 
\v 23 Tan in waꞌaric caꞌ a najtex wa cu chaꞌbʌr Timoteo ij quet acsʌꞌorirex tu cu maꞌcʌr winicob. Wa seb cu cꞌuchur Timoteo tu yʌnen, quet caꞌ bin taquenob tu yʌnechex quir in wiric techex.
\p
\v 24 Tꞌʌnex tu cotor a tsꞌurirex tu ca muchꞌquintiquex a bʌjex quir a wuꞌyiquex u tꞌʌn Cꞌuj. Tꞌʌnex tu cotor in wet acsʌꞌorirechex. Robob ij quet acsʌꞌorirex, a cu tar tu ruꞌumin Italia, tan u tꞌʌniquechex xan.
\v 25 Tan in tꞌʌnic Cꞌuj caꞌ u yamtej techex, caꞌ u yajquintic techex xan, jeroj tsꞌoquij.