\id JAS
\h SANTIAGO
\toc1 SANTIAGO
\mt1 A JEꞌ JUꞌUNAꞌ, RAJIꞌ TIꞌ U YET WINIQUIROB JUDÍO A TANTANXER CɅJAꞌANOB. RAJIꞌ TU TSꞌIBTA SANTIAGO
\c 1
\p
\v 1 A tenoꞌ Santiagojen. U cꞌurewen Cꞌuj. U cꞌurewen Jaj Tsꞌur Jesucristo xan. Tantanxer ich yocꞌocab quin rʌc tꞌʌnic a rajiꞌob u yoꞌnen Israel, a doce yoꞌnenoꞌ, rajen tan in tsꞌibtic techex a jeꞌ juꞌunaꞌ soc a xaquic a wirex. 
\s Caꞌ ic najtej a baꞌ cu tar ich Cꞌujeꞌ
\p
\v 2 Quiꞌquint a worex in bʌjobechex caꞌ bin a wuꞌyex u tumtic a worex. Cax wa baꞌ quir u tumtic a worex.
\v 3 Mʌꞌ ja wirej, raꞌ u qꞌuinin caꞌ bin a wuꞌyex u tumtic a worex yirej wa taj ta wacsa ta worex. Chichquint a worex soc a quiꞌ cʌniquex soc nemʌꞌ biquechexiꞌ.
\v 4 Rajen caꞌ a mucꞌtex a baꞌ cu tar u tumtiquex a worex soc raꞌ cu bin u chichquintiquex a worex soc abaywoꞌ cꞌuchaꞌan a worex a mucꞌtex tu cotor baꞌ. A baxucoꞌ wa ta cʌneꞌex aroꞌ taj ta wacsex ta worex.
\p
\v 5 Rajen wa mʌꞌ a werex bic tabar a mʌnex tu tsoyir an ten bic Cꞌuj u cꞌat, jeꞌ u tsꞌic techex Cꞌuj quir a najtiquex bic tabar a mʌnex tu tsoyir wa ca cꞌatiquex tiꞌ Cꞌuj. Quireꞌ a Cꞌujoꞌ jeꞌ u tsꞌic techex, cax wa mun a cꞌatex, quireꞌ quiꞌ yor u tsꞌic techex. Mʌꞌ ju yaꞌarej mʌꞌ u tsꞌa techex a Cꞌujoꞌ.
\v 6 Wa ber ca cꞌatiquex tiꞌ Cꞌuj, toc acsex ta wor u tꞌʌn caꞌ bin u tsꞌaje techex Cꞌuj. Mʌꞌ a tucriquex ta worex chichin, mʌꞌ ju tsꞌaꞌbʌr techex. Wa ca tucriquex ta worex chichin, a baxucoꞌ mʌꞌ tan a wacsiquex ta wor, rajen irechex u yamin petjaꞌ cu tar yicꞌar cu wʌcꞌʌs bin u yamin tu pach.
\v 7 Wa baxuc tu cʌn u yamin petjaꞌ. Mʌꞌ u chen tucric wa jeꞌ u tsꞌaꞌbʌr tiꞌ ten Cꞌuj a baꞌ u cꞌatoꞌ
\v 8 quireꞌ rajiꞌ ir u yaꞌamin petjaꞌ quireꞌ mʌꞌ ju tucraj wa jeꞌ u yamtaꞌr ten Cꞌujeꞌ. A baywoꞌ mʌꞌ u yer bic tabar u man tu tsoyiriꞌ.
\p
\v 9 Wa otsirchʌjechex in bʌjobechex quiꞌquint a worex caꞌ a wuꞌy u yamtiquechex Cꞌuj, tsoy caꞌ a wuꞌyex jach caremechex ten Cꞌuj.
\v 10 Baxuc a neyʌn a taqꞌuinex in bʌjobechex quiꞌquint a worex quireꞌ Cꞌuj tu chaꞌ u choquint a worex u jer. Mʌꞌ ja wirej, a mac neyʌn u taqꞌuin mʌꞌ u yuchtar teꞌ ich yocꞌocab bayiririꞌ u taqꞌuin mʌꞌ u yuchtar. Irej u topcheꞌ, quij, mʌꞌ u chich pꞌatʌr cu rʌc jutur.
\v 11 Wa cu nacar ic yum cu jach chʌcʌchʌjʌr, cu tijir a suꞌucoꞌ, cu jutur u topꞌ, cax tsoy u topꞌ caꞌch, cu tsꞌutsꞌur cu cꞌastar. Baxuc a neyʌn u taqꞌuin xan, mʌꞌ u chich pꞌatʌr, cu quimin tu cu nejaric u taqꞌuin. 
\s A baꞌ cu tar u tumtic ij corex
\p
\v 12 Quiꞌ ij corex wa quic mucꞌtiquex a baꞌ cu tar toꞌon. Caꞌ bin tsꞌocac u tumtic ij corex wa mʌꞌ tic pꞌuspachtex Cꞌuj, jeꞌ u tsꞌic toꞌonex Cꞌuj quir ij cuxtarex munt qꞌuin. Jeꞌ u tsꞌic toꞌonex Cꞌuj quireꞌ quic yajquintiquex Cꞌuj, quireꞌ baxuc caj u toc ara toꞌonex Cꞌuj.
\v 13 A Cꞌujoꞌ, mʌnaꞌ mac tumtic yor a Cꞌujoꞌ quireꞌ u pʌyic u siꞌpir. Baxuc xan, a Cꞌujoꞌ, mʌꞌ u tumtej yor mac quir u pʌyic u siꞌpir.
\v 14 Mʌꞌ ja wirej, rajiꞌ cu pʌyic ic siꞌpirex a baꞌ quic jach pachtiquex tij corex, a cꞌasoꞌ. Bayiriꞌ xan raꞌ cu pʌyic ic siꞌpirex a cꞌas quic tucriquexoꞌ.
\v 15 Wa quic chaꞌic u pʌyic ic siꞌpirex aroꞌ quireꞌ cꞌas quic pachtiquex, quireꞌ cꞌas quic tucriquex. Rajiꞌ cu bin u jach pʌyic ic berex soc jach yʌn ic siꞌpirex. Rajiꞌ cu bin sʌticoꞌonex.
\p
\v 16 Rajen mʌꞌ a wʌcꞌʌs tus aric a bʌjiriꞌexeꞌ in bʌjobechex, quij, quireꞌ in jach yajechex quireꞌ a Cꞌujoꞌ mʌꞌ u tumtic yor mac quir u pʌyic a siꞌpir. Chen a Cꞌujoꞌ cu pʌyiquechex tu tsoyir.
\v 17 Tu cotor a baꞌ tsoyir cu tar toꞌonex quij cꞌʌmiquex tiꞌ Cꞌuj. Quireꞌ mʌꞌ cꞌas a cu tar ich Cꞌujoꞌ. Mʌꞌ ja wirej, Cꞌuj tu bet u sasirir caꞌanan. Yʌn qꞌuineꞌ cu baꞌar u sasirir caꞌanan. Mʌꞌ baxuc a Cꞌujoꞌ, chen u jach tsoyir a Cꞌuj mʌꞌ ju baꞌarʌr. Mʌꞌ ju cꞌaxic u tucur rajen a Cꞌujoꞌ mʌꞌ u tumte yor mac quir u pʌyir u siꞌpir.
\v 18 Rajen caj ic yʌn batꞌan acsaj tij corex tiꞌ u tajir u tꞌʌn Cꞌuj quireꞌ a baywoꞌ u cꞌat Cꞌuj, rajen jach nojechex a techexoꞌ. Rajen tu chꞌaj u pararintoꞌonex Cꞌuj.
\s Bic tabar jach taj caꞌ ij cꞌujintiquex Cꞌuj
\p
\v 19 Uꞌyex in bʌjobechex in jach yajechex wa mac cu tsicbʌtechex. Toc quiꞌ uꞌyex soc mʌꞌ seb a nunquiquex a baꞌ ca tucriquex, soc mʌꞌ seb cu pꞌujurex a worex.
\v 20 Mʌꞌ ja wirej, wa tic tsꞌiquenta mac. Mʌꞌ tsoy caꞌ ic tus tucrej wa tij quiꞌquintex yor Cꞌuj.
\v 21 Rajen caꞌ ic pꞌʌtex a baꞌ cꞌasir cu pʌyic ic siꞌpirex, caꞌ ic pꞌʌtex ic tsicbʌtiquex a tiꞌ yʌn jach manan cꞌasoꞌ. Seb a quiꞌ cꞌʌmiquex u tꞌʌn Cꞌuj a tu tsꞌa techex Cꞌuj quireꞌ rajiꞌ cꞌuchaꞌan yor u taquicoꞌonex u tꞌʌn Cꞌuj.
\p
\v 22 Quibex a baꞌ cu yaꞌaric techex Cꞌuj. Mʌꞌ chen jariꞌ a wuꞌyiquex a baꞌ cu yaꞌaric Cꞌuj. Quireꞌ caꞌ manacoꞌonex tu tsoyir xan. Wa mʌꞌ jic manex tu tsoyir, ic wʌcꞌʌs bʌjiriꞌex tan ic tusiquex.
\v 23 Wa quic chen uꞌyiquex u tꞌʌn Cꞌuj chen mʌꞌ tan ij quibiquex, cu tubur toꞌonex iroꞌonex a mac a cu yiric u wich yejer nen.
\v 24 Caꞌ bin tsꞌocac ij quiriquex ij quichex yejer nen quic binex. Jeroj seb cu tubur toꞌon wa ecꞌ ij quichex. 
\v 25 Mʌꞌ ja wirej, a baꞌ tu toc araj toꞌonex Cꞌuj jach tsoy. Quireꞌ raꞌ cu rucꞌsic toꞌonex ic siꞌpirex. Quireꞌ bajeꞌrer tij cuꞌyex rajen tic acsex tij corex. Wa mʌꞌ ju tubur toꞌonex a baꞌ tij cuꞌyex yaꞌaric Cꞌuj. Caꞌ ic quibiquex a Cꞌujoꞌ bin u caꞌ u quiꞌ yamtoꞌonex. Jeroj quiꞌ ij corex a baꞌ quic betiquex.
\p
\v 26 Wa quic tus tucriquex tij corex tij cacsex tij corex. Chen quic pꞌastiquex ic racꞌobex. Ic wʌcꞌʌs bʌjiriꞌex quic tusariquex quireꞌ mʌꞌ tan ic jach cꞌujintiquex Cꞌuj.
\v 27 Wa taj caj ij quibex u tꞌʌn Cꞌuj tiꞌ ic Tetex. Caꞌ ic yajquintex mac caꞌ ic yamtex. Bayiriꞌ xquic caꞌ ic yamtex a quimen u mamoꞌ. Bayiriꞌ caꞌ ic yamtex a quimij u nʌꞌ, a quimij u tet xan. Baxuc xan mʌꞌ ic chaꞌic ij cacsiquex ic siꞌpirex. Quireꞌ a baywoꞌ tan ic quiꞌquintiquex yor Cꞌuj.
\c 2
\s Caꞌ a quiꞌ acsex tu cotor mac
\p
\v 1 Quireꞌ a toꞌonex a tij cacsex tij corex u tꞌʌn ic Jaj Tsꞌurirex. Rajiꞌ jach manan tsoyir ic Jaj Tsꞌurirex rajen mʌꞌ tsoy ij coyen tetiquex ij cacsex mac.
\v 2 Caꞌ ic quiꞌ tucrex a baꞌ quic bin ic betex tu quic cꞌayex. Jeroj cu tar tuririꞌ a neyʌn u taqꞌuinoꞌ. Jeroj cu tar a neꞌotsiroꞌ. A neyʌn u taqꞌuinoꞌ jach tsoy u nocꞌ. Bayiriꞌ yʌn u cꞌarabar u cꞌʌb oro. A otsiroꞌ, cu yocar rab u nocꞌ.
\v 3 Tsoy wa quij quiꞌ acsiquex a neyʌn u taqꞌuinoꞌ. Rajen quij cariquex tiꞌ tu junan: “Teꞌ a cutar techaꞌ tu jach tsoyir a cutan.” Baxuc quij cariquex tiꞌoꞌ. Chen wa mʌꞌ ij quiꞌ acsic a otsiroꞌ. Rajen quij cariquex tiꞌ: “Tiꞌ tar a chꞌictaroꞌ wa mʌꞌ ju cꞌat u chꞌictar ca waꞌariquex tiꞌ “Tiꞌ tar a cutar ich ruꞌumoꞌ.” Baxuc quij cariquex tiꞌoꞌ.”
\v 4 Wa baxuc tan ic betiquex. Tan ic tetiquex ij cacsex mac. Mʌꞌ ja wirej, tan ij coyen acsiquex mac. Rajen cꞌas ic tucurex, quireꞌ iroꞌonex juez, quireꞌ mʌꞌ ij coyen acsej a otsiroꞌ.
\p
\v 5 Uꞌyex baꞌ quin wac in jach yajechex in bʌjobechex. A Cꞌujoꞌ tan u tetic a mac otsiroꞌ teꞌ a yʌn ich yocꞌocab. A tu yacsob tu yor raꞌ u netaqꞌuinob a tiꞌoboꞌ. Mʌꞌ ja wirej, a Cꞌujoꞌ caj u yaꞌaraj tiꞌ cu bin u quiꞌ acsʌbir a tiꞌoboꞌ tu cu bin u reyintic Cꞌuj. Quireꞌ Cꞌuj tu yaꞌaraj tiꞌ cu bin ocar a mac a cu yajquinticob Cꞌujoꞌ.
\v 6 Chen atechexoꞌ, mʌꞌ ta coyen quiꞌ acsex a otsiroꞌ. Ta coyen quiꞌ acsex a neyʌn u taqꞌuinoꞌ. Raꞌ cu cꞌʌniquechex ta beyajex. Mʌꞌ wa robob cu taꞌquicob a joꞌrex ich juez? 
\v 7 Quireꞌ a neyʌn u taqꞌuinoꞌ robob cu pꞌasticob Cristo, baxuc xan tu pꞌastiquechexob xan quireꞌ caj a wacsajex ta worex u tꞌʌn Cristo.
\p
\v 8 Mʌꞌ ja wirej, tiꞌ tsꞌibaꞌan ich u tꞌʌn Cꞌuj: “Yajquintej a racꞌob an ten bic a bʌjiriꞌ ca wʌcꞌʌs yajquintiqueꞌ a bʌjiriꞌ.” Baxuc cu yaꞌaric Cꞌuj. Rajen caꞌ a quiꞌ quibiquex a jeꞌ tꞌʌnaꞌ, quireꞌ jach manan tsoyir. Bayiriꞌ jeꞌ a quiꞌ yajquintic xan a otsiroboꞌ quet bayiriꞌ a yajquintic a yʌn u taqꞌuinoꞌ.
\v 9 Wa quij coyen tetiquex mac caꞌ ij cacsex. Tic pʌyej ic siꞌpirex quireꞌ mʌꞌ jij quibexiꞌ a baꞌ cu yaꞌaric Cꞌuj toꞌonexeꞌ.
\v 10 Cax wa chen cꞌuchaꞌan a worex a rʌc quibex a baꞌ cu yaꞌaric toꞌonex Cꞌujoꞌ. Wa ta cꞌasquintex a tuririꞌoꞌ, ta toc rʌc cꞌasquintex tu cotor a baꞌ tu yaꞌaraj Cꞌuj toꞌonexoꞌ.
\v 11 Bayiriꞌ caj yaꞌaraj toꞌonex Cꞌuj: “Mʌꞌ a yʌn manex.” Bayiriꞌ caj yaꞌaraj xan: “Mʌꞌ a yʌn quinsiquechex mac.” Rajen wa mʌꞌ jic manex rajen wa tic chen quinsaj mac, jeroꞌ tij cꞌasquintex a baꞌ tu yaꞌaraj toꞌonex Cꞌuj uch. Tic pʌy ic siꞌpirex.
\v 12 Rajen caꞌ ij carex baꞌ tsoy tu quic tsicbarex. Rajen caꞌ ic manacoꞌonex tu tsoyir iroꞌonex mac a tabar ic binex ʌcʌtan Cꞌuj quir yiric wa tsoy ic beyajex. Quireꞌ Cꞌuj tu rucꞌs ic siꞌpirex soc ic man tu tsoyirex.
\v 13 Mʌꞌ ja wirej, wa toꞌonex mʌꞌ jic yajquintex mac bajeꞌrereꞌ. Bayiriꞌ xan caꞌ bin cꞌuchuc tu qꞌuinin ic binex ʌcʌtan ich Cꞌuj, bayiriꞌ mʌꞌ u yajquintoꞌonex Cꞌuj xan. Wa quic yajquintiquex ic racꞌobex bajeꞌrereꞌ. Baxuc caꞌ bin xicoꞌonex ʌcʌtan ich Cꞌuj bin u caꞌ u yajquintoꞌonex xan. Bayiriꞌ mʌꞌ ju jocꞌsicoꞌonex xan Cꞌuj.
\s A mac tu yacsaj tu yor u tꞌʌn Cꞌuj caꞌ yese taj u beyaj 
\p
\v 14 Mʌꞌ tsoy ic tusariquexiꞌ in bʌjobechex tij cacsex tij corex, chen tiꞌ toy quic manex tu cꞌasiriꞌ. Wa baxuc tan ij cariquex mʌꞌ ju bin u tacoꞌonex Cꞌuj.
\v 15 Aroꞌ irej wa quij cariquex ij quet acsʌꞌorirex wa mʌnaꞌ u nocꞌ wa mʌnaꞌ yoꞌoch quir u janʌnob.
\v 16 Tsoy wa quij cariquex: “Joqꞌuen xen, caꞌ a cʌxt a nocꞌ, caꞌ a cʌxt a woꞌoch quir a janʌn xan. Mʌꞌ ja wacꞌtic a bʌj.” Wa baxuc quij cariquex tiꞌob chen mʌꞌ jic tsꞌaj a tiꞌ u nocꞌ mʌꞌ jic tsꞌaja yoꞌoch. Mʌꞌ tan ij cacsiquex tij corex tiꞌ Cristo.
\v 17 Wa baxuc tic betex chacaꞌan yiricob mac, wa tic jach acsex tij corex wa mʌꞌ tic jach acsex tij corex.
\p
\v 18 Wa tiꞌ yʌn mac tan u tus aric: “A tenoꞌ jach manan tsoyiren caj in chen acsa tin wor u tꞌʌn Cꞌuj.” U jer cu tus aric: “A tenoꞌ jach manan tsoyiren quireꞌ quin man tu tsoyir. Rajen mʌꞌ in wer baꞌ quin jach bin in quibej.” Wa baxuc cu yaꞌaric: A tenoꞌ, quij Santiago, quin bin in cꞌatej tiꞌ. Rajiꞌ a cu yaꞌaric: “Jach manan tsoyiren caj in chen acsa tin wor u tꞌʌn Cꞌuj.” Arej ten bic tabar ca bin a wese ten ta wacsaj ta wor wa mʌꞌ ja man tu tsoyir? Arej ten bic tabar ca bin man tu tsoyir wa mʌꞌ ta wacsaj ta wor? Mʌꞌ cꞌuchaꞌan a wor a man tu tsoyiriꞌ. 
\v 19 Yʌn mac cu yaꞌaric: “A tenoꞌ quin wacsic tin wor quireꞌ tuririꞌ Cꞌuj yʌniꞌ”, jach tsoy wa baxucoꞌ. Ca tusaric tiꞌtiꞌ quir a wacsic ta wor. Mʌꞌ ja wirej, quij Santiago. Quet bayiriꞌ u nupꞌ a quisinoꞌ. Cu yacsicob tu yorob quireꞌ tuririꞌ Cꞌuj yʌniꞌ. Chen u nupꞌob, a quisinoꞌ mʌꞌ quiꞌ yorobiꞌ quireꞌ cu chꞌic sajaquirob tiꞌ Cꞌuj quireꞌ tuririꞌ Cꞌuj yʌniꞌ.
\v 20 A techexoꞌ, jach chichex a joꞌrex quireꞌ mʌꞌ tiꞌbir a wacsiquex ta worex. Rajen caꞌ manaquechex tu tsoyir xan. Mʌꞌ ja wirej, tan a tusaric taj ta wacsex ta worex. Mʌꞌ taj ta wacsajex ta worex.
\v 21 Uꞌyex baꞌ cu camsicoꞌonex ic nunquirex Abram. Mʌꞌ ja wirej, ic nunquirex caj u sijaj u parar tiꞌ Cꞌuj quir u quinsic. Raꞌ u parar Isaac. Caj u chaquint u parar tu cu quinsaꞌr yʌrʌcꞌ quir u sijic tiꞌ Cꞌuj. A Cꞌujoꞌ tsꞌoc yiric a baꞌ tu betaj Abram, ʌcʌtan tu wich Cꞌuj jach tsoy Abram.
\v 22 Ta wirex bic tabar ic nunquir Abram caj bin u chaquint u parar soc u quinsic quireꞌ tu yacsaj tu yor, rajen tu betaj aroꞌ, a baꞌ araꞌb ten Cꞌuj uch. A baxucoꞌ aroꞌ chʌcaꞌan ij quiriquex taj tu yacsaj tu yor Abram.
\v 23 Baxuc chʌcaꞌan ij quiriquex taj a baꞌ tsꞌibtaꞌb tiꞌ Abram ten Cꞌuj uch. Tu cu yaꞌaric: “Quireꞌ tu quibaj u tꞌʌn Cꞌuj Abram rajen ʌcʌtan tu wich Cꞌuj yiric jach tsoy Abram.” Baxuc tu tsꞌibaꞌan u jer jun xotꞌ u tꞌʌn Cꞌuj tiꞌ Abram. Cu yaꞌaric: “U yet man Cꞌuj Abram.”
\p
\v 24 Ta wirex in bʌjobechex. Bic tabar a Cꞌujoꞌ mʌꞌ chen jariꞌ cu yiric wa tsoyoꞌon wa quic chen acsiquex tij corex chen caꞌ manacoꞌon tu tsoyir xan quireꞌ a baywoꞌ Cꞌuj cu yiric tsoyoꞌonex.
\v 25 Baxuc, a xquicoꞌ Rahab u cꞌabaꞌ uch. Rajiꞌ cu naj man uch quir u jaric u taqꞌuin. Jach tsoy irir ten Cꞌuj Rahab quireꞌ caj u quiꞌ acsa tu yatoch quir u wenʌn caꞌtur xib a tuchiꞌtaꞌb ten Josué quir u masicob u tꞌʌn uch. Caj tsꞌoc u wenʌnob caj tuchiꞌtaꞌb ten Rahab ich u jer bej soc mʌꞌ u chucur ten soldado.
\v 26 Mʌꞌ ja wirej, a teꞌ ich yocꞌocab chen cuxaꞌanoꞌonex quireꞌ yʌn ij qꞌuiqꞌuerex bayiriꞌ yʌn ic pixamex. Wa mʌnaꞌ toꞌonex aroꞌ quimenoꞌonex. Bayiriꞌ xan quir ij cuxtarex munt qꞌuin caꞌ ij cacsex tij corex. Bayiriꞌ xan caꞌ manacoꞌonex tu tsoyir soc ic cuxtarex. Wa mʌꞌ baxucoꞌ, mʌꞌ ij cuxtarex munt qꞌuin.
\c 3
\s Ij caqꞌuex
\p
\v 1 Uꞌyex in bʌjobechex. Arex tiꞌ a racꞌobex soc mʌꞌ yaꞌab cu yocarob u camsic tiꞌ u tꞌʌn Cꞌuj. Mʌꞌ ja wirej, caꞌ bin cꞌuchuc tu qꞌuinin caꞌ bin xiquenob ʌcʌtan Cꞌuj. Jach manan cu bin u qꞌueyiquenob Cꞌuj wa mʌꞌ taj tin camsajob tiꞌoꞌ.
\v 2 Tu cotoroꞌonex quic jen masiquex a baꞌ quij cariquex ich ic racꞌobex. Barej wa tiꞌ yʌn tuririꞌ mac mʌꞌ u jen masic tiꞌ u racꞌob, aroꞌ jach manan tsoyir. Quireꞌ cꞌuchaꞌan yor u tsꞌurintic u winquirir soc bayiriꞌ mʌꞌ u man tu cꞌasir.
\v 3 Caꞌ ij cʌnex u mascabir a cꞌapar tu chiꞌ tsimin. Cax chichin u mascabir a cu cꞌapar tu chiꞌ tsimin. Raꞌ quir u tsꞌurintic u winquirir tsimin. Baxuc toꞌonex ij caqꞌuex cax chichin ij caqꞌuex caꞌ ij cʌnantex soc cꞌuchaꞌan ij corex, ic tsꞌurintex ic winquirirex.
\v 4 Baxuc xan caꞌ ij cʌnex a jeꞌ chem. Cax carem cu cuchur ten icꞌ. Yʌn u chan cꞌʌb u chemin quir u tajquintic soc taj u bin. Cax tub u cꞌat bin u winquirir u chem tiꞌ cu biniꞌ.
\v 5 Baxuc xan ij caqꞌuex cax chichin ij caqꞌuex jach manan yaꞌab quij cariquex tiꞌ mac, soc u tus tucric jach carem.
\p A werex a cꞌacꞌoꞌ, cax chichin mʌꞌ u xur u bin u yerar. Seb cu rʌc erar. Wa mʌꞌ seb u tupur, cu rʌc erar cꞌax. 
\v 6 An ten bic ij caqꞌuex irej cꞌacꞌ. Cu tsicbʌtic tu cotor cꞌas. Ij caqꞌuex cu cꞌasquintic tu cotor ic winquirirex cax chichin ij caqꞌuex ich ic winquirirex quireꞌ ij caqꞌuex irej wa cu rʌc tꞌʌbic ij cuxtarex caꞌ erac. Tiꞌ u tar a cꞌacꞌoꞌ ich quisin a cu tar ich ij caqꞌuex. 
\v 7 Mʌꞌ ja wirej, a bʌcꞌoꞌ a cu man ich cꞌax. Bayiriꞌ can xan cu tsꞌurinticoꞌonex. Bayiriꞌ chꞌichꞌ xan baxuc cʌy cu rʌc tsꞌurinticoꞌonex. Tu cotoroꞌonex cu rʌc tsꞌurinticoꞌonex. 
\v 8 Chen mʌnaꞌ mac cꞌuchaꞌan yor u tsꞌurintic ij caqꞌuex uch. Mʌnaꞌ mac cꞌuchaꞌan yor u suꞌsic u cꞌasir ij caqꞌuex. Mʌꞌ ja wirej, a canoꞌ yʌc u coj, wa cu chiꞌic mac cu quimin. Baxuc ij caqꞌuex xan irej yʌquir u coj can a cu quinsic mac.
\v 9 Yejer ij caqꞌuex quic tꞌʌniquex Cꞌuj. Quij cariquex tiꞌ Tetex Cꞌuj: “Bayoꞌ Cꞌuj jach caremech.” Bayiriꞌ yejer ij caqꞌuex quij qꞌueyiquex mac cax chen rajiꞌ betoꞌonex a Cꞌujoꞌ, chen bajoꞌonex a Cꞌujoꞌ, quic qꞌueyiquex mac. 
\v 10 Raꞌiriꞌ tiꞌ ic chiꞌex xan, cu jocꞌar ic tꞌʌnex quij cariquex: “Bayoꞌ Cꞌuj, jach caremech Cꞌuj.” Sʌsameꞌ cu jocꞌar ic tꞌʌnex quij qꞌueyiquex mac. A baxucoꞌ in bʌjobechex mʌꞌ tsoy ij cariquex baxucoꞌ.
\v 11 Caꞌ a tucrex wa cu jocꞌar yicꞌ jaꞌ caꞌtur. Wa chꞌaja cu jocꞌar wa juntur cꞌaj cu jocꞌar yicꞌ jaꞌ. Mʌnaꞌ yicꞌ jaꞌ chꞌaja cu jocꞌar yejer cꞌaj. Bayiriꞌ tiꞌ ij caqꞌuex xanoꞌ.
\v 12 Caꞌ tucrex xan in bʌjobechex. Jeꞌ wa ju wichʌncʌr on tu cheꞌer ʌrʌxaj. Mʌꞌ biqꞌuin cu wichʌncʌr on ich u cheꞌer ʌrʌxaj. Jeꞌ wa ju wichʌncʌr siquiteꞌ ich u cheꞌer on. Mʌꞌ biqꞌuin cu wichʌncʌr ich u cheꞌer on. Baxuc xan mʌꞌ u jocꞌar yicꞌ jaꞌ caꞌtur, mʌꞌ biqꞌuin cu jocꞌar yicꞌ jaꞌ caꞌtur. Mʌnaꞌ cꞌaj, mʌnaꞌ chꞌaj, chen tuririꞌ yicꞌ jaꞌ.
\s A mac a jach er u camsic mac
\p
\v 13 A mac a ju jach quiꞌ cʌmʌn quir u camsic u racꞌob, a tiꞌ yʌn tu yʌnechex. Arej yese taj u man tu tsoyir quireꞌ rajiꞌ cu bin u yese u jach eroꞌ u camsaꞌ quireꞌ cu yirir ten u racꞌob mʌꞌ u tucrej wa jach carem.
\v 14 Wa techex ca chen tus pꞌisex a bʌjex tu ca tus camsiquex mac soc yiricob jach cꞌuchaꞌan a worex a camsiquex a tiꞌoboꞌ. Rajen mʌꞌ tsoy a tucriquexoꞌ a waꞌarex: “Ic jach erex ij camsex.” A techexoꞌ tus a caꞌex quireꞌ a techexoꞌ mʌꞌ tan a quibex u tꞌʌn Cꞌuj, a jach tajoꞌ. 
\v 15 Aroꞌ mʌꞌ ju tar ich Cꞌuj. Quireꞌ ca chen betiquex an ten bic a mac a mʌꞌ yerob Cꞌuj cu beticob. Ca chen quibiquex a baꞌ ca pachtiquex ta worex rajen cꞌas. Ca chen quibiquex a baꞌ u cꞌat a quisinoꞌ.
\v 16 Quireꞌ wa quic chen pꞌis ic bʌjex tu quic camsiquex mac soc yiricob jach cꞌuchaꞌan ij cor ij camsiquex tiꞌob, quic chen pꞌus yorob mac, a baywoꞌ mʌꞌ ij querex baꞌ tsoyir caꞌ ic betiquex. Quic chen manex tu cꞌasir. 
\v 17 Chen a mac u neꞌer u camsic u racꞌob quireꞌ tsꞌab u tꞌʌnin ten Cꞌuj soc yer u camsic u racꞌob. Rajiꞌ jach tsoy yor quir u cuxtar. Rajen mʌꞌ u pꞌusej yor u racꞌob. Mʌꞌ ju choquintic yor u racꞌob. Cu quibir u tꞌʌn ten u racꞌob. Cu betic a tsoyoꞌ. Bayiriꞌ cu yajquintic u racꞌob xan. Mʌꞌ coyen u yajquintic u racꞌobiꞌ.
\v 18 A mac a ju neꞌer u camsic u racꞌob quireꞌ tsꞌaꞌb u tꞌʌnin ten Cꞌuj. Rajen a baywoꞌ, tan u man u sisquint u yor u racꞌob. Rajen a baywoꞌ jeꞌ u cʌnicob u manob tu tsoyir u racꞌob. A baywoꞌ u wʌcꞌʌs u bʌjiriꞌ cu bin u quiꞌquintic yor.
\c 4
\s A baꞌ yʌn ich yocꞌocab a cu quiꞌ yajquintic
\p
\v 1 An tub u tar quic tucric ic tsꞌictarex? An tub u tar quic tucric ic nunquex u tꞌʌn ic racꞌobeꞌ. Tiꞌ cu tar ich cꞌas. Quireꞌ quic pachtiquex tij corex cꞌas. Rajen tan ic manex ic tsꞌiquint ic racꞌobex.
\v 2 Mʌꞌ ja wirej, quic tus pachtex u jer a baꞌ mʌnaꞌ toꞌonex. Rajen quij quinsiquex mac. Rajen cu qꞌuextar ij corex quireꞌ quij quiriquex mʌnaꞌ toꞌonex. Rajen tan ic nunquiquex u tꞌʌn ic racꞌobex. Rajen mʌꞌ ij quiriquex a baꞌquirir ij cꞌatex quireꞌ mʌꞌ jij cꞌatex tiꞌ Cꞌuj.
\v 3 Cax wa quic chen tus cꞌatex tiꞌ Cꞌuj. Mʌꞌ u tsꞌaja toꞌonex Cꞌuj, quireꞌ ic nonoj bʌjiriꞌex ij cꞌatex.
\v 4 An ten bic a xquicoꞌ mʌꞌ quet yor yejer u mam wa cu man. Baxuc toꞌonex wa mʌꞌ quet ij corex yejer Cꞌuj. Mʌꞌ ja wirej, tan ic pꞌactex Cꞌuj wa quic pachtex cꞌas tij corex ir mac a mʌꞌ yer Cꞌuj. Wa quij quibiquex a baꞌ quic pachtiquex tij corex an ten bic mac mʌꞌ yer Cꞌuj. A Cꞌujoꞌ, cu pꞌacticoꞌonex xan.
\v 5 Rajen cu yaꞌaric toꞌonex tu tsꞌibaꞌan u tꞌʌn Cꞌuj uch. Tan yaꞌaric: “U Tajꞌor u Pixam Cꞌuj, mʌꞌ u cꞌat ic tsꞌurintiquex u jer chen u bʌjiriꞌ u cꞌat ic tsꞌurintiquex.” Baxuc cu yaꞌaric Cꞌuj.
\v 6 Mʌꞌ ja wirej, a Cꞌujoꞌ u cꞌat ic tsꞌurintiquex soc chen rajiꞌ ic Jaj Tsꞌurirex. Rajen Cꞌuj tsoy tu tꞌʌn quir u yamtic toꞌonex soc rajiꞌ ic jach tsꞌurir. Rajen cu yaꞌaric Cꞌuj: “A tenoꞌ Cꞌujen quin pꞌactic a mac a cu yaꞌaric tu yor: Jach caremen. Chen a tenoꞌ, quij Cꞌuj, quireꞌ tsoy tin tꞌʌn caꞌ in yamte tiꞌ mac a cu yaꞌaric ten: Mʌꞌ caremeniꞌ, quij.”
\v 7 Rajen caꞌ ic chaꞌex ic tsꞌurintiquex a Cꞌujoꞌ, chen caꞌ ic pꞌisex ic bʌjex soc mʌꞌ ic tsꞌurintiquex a quisinoꞌ, soc u pꞌʌticoꞌonex.
\v 8 Caꞌ ic jutsꞌex ic bʌj ich Cꞌuj quireꞌ tij cacsa tij corex. Bayiriꞌ jeꞌ u jutsꞌic u bʌj a Cꞌuj xanoꞌ tub yʌnoꞌon quir u cʌnanticoꞌonex. A techexoꞌ, a ca manex tu cꞌasir caꞌ a pꞌʌtex soc a manex tu tsoyir. Arex tiꞌ Cꞌuj caꞌ u rucꞌs a siꞌpirex quireꞌ soc quet a worex yejer Cꞌuj. 
\v 9 Caꞌ a quiꞌ acꞌtex a bʌj, quireꞌ ta pʌy a siꞌpirex, a techexoꞌ a bʌjiriꞌ tan a cheꞌejexeꞌ. Arex tiꞌ caꞌ yacꞌtex u bʌj quireꞌ ta wacsex u siꞌpirex. A techoꞌ quireꞌ quiꞌ a worex bajeꞌrereꞌ. Arex tiꞌ, caꞌ neyacꞌtex u bʌj quireꞌ ta wacsex ta siꞌpirex.
\v 10 Arex tiꞌ Cꞌuj: “Jach cꞌasen a tenoꞌ Jaj Tsꞌur quireꞌ mʌꞌ jin quib a tꞌʌn uch.” Baxuc caꞌ a warex, tiꞌ, soc u jawsic a siꞌpirex soc u quiꞌ acsicoꞌonex ic Jaj Tsꞌurirex caꞌ bin xuruc tꞌʌn.
\p
\v 11 Mʌꞌ a yʌn pʌqꞌuiquex u pach a wet acsʌꞌorirex in bʌjobechex. Wa ca paqꞌuiquej u pach a wet acsʌꞌorirex mʌꞌ tan a jach cʌnantiquex u tꞌʌn Cꞌuj. A tu yaꞌaraj uch: “Caꞌ a yajquintiquex a wet cajarex, irej a wʌsʌcꞌ bʌjiriꞌex ca yajquintiquex.” Mʌꞌ ja wirej, tan a pꞌastiquex a jeꞌ tꞌʌnaꞌ. Mʌꞌ ja wirej, tan a tus tetiquex u tꞌʌn Cꞌuj a tu yʌn tsoy a quibiquexeꞌ. A tiꞌ yʌn, a mʌꞌ tsoyoꞌ raꞌ ca tus quibiquex. Wa baxuc caj a tetex mʌꞌ ta jach quibex u tꞌʌn Cꞌuj. Mʌꞌ ja wirej, tan a tus tucriquex irechex wa juesechex.
\v 12 Chen tuririꞌ yʌn. Rajiꞌ tu tsꞌaj u tꞌʌn toꞌonex. Rajiꞌ tuririꞌ Jach Juéz yʌn. Rajiꞌ Cꞌuj. Rajiꞌ cꞌuchaꞌan yor u taquicoꞌonex. Jaririꞌ, rajiꞌ cꞌuchaꞌan yor u jocꞌsicoꞌonex caꞌ xicoꞌonex ich cꞌacꞌ. Caꞌ bin cꞌuchuc tu qꞌuinin. Rajen a toꞌonexoꞌ mʌꞌ tsoy ic tus tucriquex ic taꞌquiquex u joꞌr ij quet cajarex.
\s Mʌꞌ ij querex baꞌ cu bin tar samʌn
\p
\v 13 Uꞌyex a techexoꞌ, a mac a tu yaꞌaraj: “Caꞌ xicoꞌonex bajeꞌrer, cax wa samʌn ic binex tu cajar a tic tsicbatex joꞌoraj.” Caꞌ pꞌatʌcoꞌonex tuririꞌ yaxqꞌuin caꞌ ic cʌnjex baꞌ, quir ic jariquex ic taqꞌuinex. Bayiriꞌ caꞌ ic mʌnex baꞌtaquex soc ic jariquex ic taqꞌuinex xan. Baxuc caj a waꞌarex a techexoꞌ.
\v 14 Wa ber ca waꞌariquex a techexoꞌ aroꞌ, quireꞌ mʌꞌ a werex wa tiꞌ toy cuxaꞌanechex samʌn. Irechex u pꞌur, sansameꞌ bin. Baxuc toꞌonex xan mʌꞌ yaꞌab u qꞌuinin tiꞌ yʌnoꞌonex jeroj, quij quiminoꞌonex xan.
\v 15 Rajen caꞌ ij carex, wa tsoy tu tꞌʌn ic Jaj Tsꞌur caꞌ cuxracoꞌonex jeꞌ ic betiquex baxucoꞌ. Wa baxuc quij cariquex, jach tsoy.
\v 16 Chen a techexoꞌ mʌꞌ baxuc ca waꞌariquex. A bʌjiriꞌex ca waꞌariquex: “Cꞌuchaꞌan in wor in wʌcꞌʌs bʌjiriꞌ in tsꞌurinticoꞌ.” A mac a cu yaꞌaric baxucoꞌ, jeroj, tu pʌyaj u siꞌpirob.
\v 17 Wa jij querex baꞌ quireꞌ jach tsoy chen mʌꞌ jic betiꞌ jeroj tij cacsex ic siꞌpirex.
\c 5
\s Cu chich araꞌ tiꞌ a neyʌn u taqꞌuineꞌ
\p
\v 1 Arex tiꞌ a mac neyʌn u taqꞌuineꞌ caꞌ u yʌxchun yaqꞌuic tu bʌj caꞌ awatꞌnʌc xan. Quireꞌ bin u caꞌob mucꞌyaj xan.
\v 2 Arex tiꞌob, jot u taqꞌuinob quireꞌ a Cꞌujoꞌ cu yiric irej wa rab. Bayiriꞌ xan jot u nocꞌ quireꞌ a Cꞌujoꞌ cu yiric irej wa ju jantmʌn chꞌoꞌ.
\v 3 Arex tiꞌob xan, jot u taqꞌuinob oro, baxuc u sʌc taqꞌuinob quireꞌ a Cꞌujoꞌ cu yiric jacꞌaꞌan yitsꞌ quireꞌ mʌꞌ ju xupicob u taqꞌuinob quir u beyaj tiꞌ Cꞌuj. Mʌꞌ ju beyajob yejer Cꞌuj xan. Robob a neyʌn u taqꞌuinob, mʌꞌ ju cꞌʌꞌotob wa cu yiric Cꞌuj jot yejer taqꞌuinob. Mʌꞌ ja wirej, cu chen tucricob u tꞌajʌr u taqꞌuinob tu yorob bajeꞌrer. Cax bajeꞌrer tan u chen tꞌajʌr u mucꞌyajob. Caꞌ bin cꞌuchuc tu qꞌuinin a tu pꞌisa Cꞌujoꞌ bin u caꞌob u jach mucꞌyaj. Raꞌ qꞌuininoꞌ bin u caꞌob mucꞌyaj munt qꞌuin ich cꞌacꞌ. 
\v 4 Wa ju taqꞌuin a neyʌn u taqꞌuinoꞌ cꞌuchaꞌan yor u tsicbar raꞌ a neyʌn u taqꞌuin, rajiꞌ jeꞌ yaꞌaric: “A tenoꞌ u taqꞌuinen a mac a beyanʌjob uch tiꞌ in Jach Tsꞌurir. Cax rʌc jocꞌ u nar in tsꞌurir mʌꞌ tu quiꞌ boꞌot yʌjjaqꞌuirob u nar in tsꞌurir.” Baxuc u yaꞌaric u taqꞌuin a neyʌn u taquinob wa cꞌuchaꞌan yor tsicbar. Chen ic Jaj Tsꞌurirex Cꞌuj rajiꞌ cu tsꞌurintic tu cotor mac. Caj yubaj yaꞌaraꞌ tiꞌ ten yʌjjaqꞌuirob u nar: “Mʌꞌ ja quiꞌ boꞌotaj tenobiꞌ.” Baxuc caj yuba Cꞌuj yaꞌaric.
\v 5 A techexoꞌ, a neyʌnex a taqꞌuinex, tan a manex a quiꞌquiꞌ janʌnex. Tan a manex a quiꞌ mʌnex a nocꞌ bayiriꞌ tan a manex a mʌniquex a baꞌtaquex xan teꞌraꞌ ich yocꞌocab. Mʌꞌ ja wirej, tan a chen manex a pachtex baꞌ tiꞌ a winquirirex. A techexoꞌ, tan cʌniquex an ten bic a qꞌuecꞌʌnoꞌ quireꞌ suꞌsuꞌ cu janʌn a qꞌuecꞌʌnoꞌ. Quireꞌ a qꞌuecꞌʌnoꞌ mʌꞌ ju tucr u quimin. Caꞌ bin tsꞌocac u poroc, jeroj, cu bin quinsbir. Baxuc techex xan wa neyʌn a taqꞌuinex. Mʌꞌ ja wirej, ca chen manex a pachtiquex baꞌ tiꞌ a winquirirex. Mʌꞌ rajraꞌ, ca bin cuxtarex quireꞌ jeꞌ a quiminexeꞌ. Jeroj ca binex ich cꞌacꞌ.
\v 6 A techexoꞌ, a neyʌn a taqꞌuinex. Mʌꞌ ja wirej, a techexoꞌ ca taꞌquiquex u joꞌr a mac a mʌnaꞌ u siꞌpiroꞌ. Jeroj ta quinsexoꞌ. A ta quinsajexoꞌ mʌꞌ ju tac u bʌj techexiꞌ. 
\s Tꞌʌnex Cꞌuj soc u chichquintiquex a wor
\p
\v 7 Rajen in bʌjobechex, caꞌ ic mucꞌtex caꞌ ic quiꞌ paj u qꞌuinin caꞌ bin uruc ic Jaj Tsꞌurirex. Caꞌ ic cʌnex yʌjpʌqꞌuir nar an ten bic cu pajic u tar yaꞌarir u pʌcꞌar nar. Yer caꞌ bin tsꞌoc u tar yaꞌarir, cu chꞌijir u pʌcꞌar nar. Cu jobar yiꞌjir. Cu tijireꞌ cu jaqꞌuic. 
\v 8 Baxuc toꞌonex caꞌ ij quiꞌ paje ic Jaj Tsꞌurirex rajen caꞌ ic chichquintex ij corex quireꞌ tabar yur ic Jaj Tsꞌurirex.
\v 9 In bʌjobechex mʌꞌ tsoy ic pacran pʌquiquex ic pachex, quireꞌ tan ic mucꞌyajex, soc caꞌ bin cꞌuchuc tu qꞌuinin, mʌꞌ ju taꞌquic ic joꞌrex Cꞌuj. Mʌꞌ ja wirej, tabar u cꞌuchur a mac cu bin u taꞌquic ic joꞌrexeꞌ.
\v 10 In bʌjobechex caꞌ ij quiꞌ cʌnex yʌjtseqꞌuirob u tꞌʌn Cꞌuj uch. Mʌꞌ wa cꞌaj techex caj u tsecꞌtob u tꞌʌn Cꞌuj uch. Robob tuchiꞌtaꞌb ten ic Jaj Tsꞌurirex. Mʌꞌ ja wirej, tu jach mucꞌtob caj chucob u pachob ten u racꞌob uch. Rajen tsoy caꞌ ij cʌnej yʌjtseqꞌuirob u tꞌʌn Cꞌuj uch soc baxuc toꞌonex xan.
\v 11 Rajen baxuc quij cariquex a mac a tu mucꞌtaj u yajirir uch, jach taj jach quiꞌ yor. An ten bic Job uch, mʌꞌ wa cꞌaj techex uch, caj u mucꞌt u yajirir Job uch, quireꞌ chichquintaꞌb yor ten ic Jaj Tsꞌurirex uch. Cꞌaj techex caj tsꞌoc u mucꞌtic u yajirir Job rajen pachir a Cꞌujoꞌ caj quiꞌ cʌnantaꞌb. Quireꞌ a Cꞌujoꞌ cu yajquinticoꞌonex bayiriꞌ cu quiꞌ tucricoꞌonex xan. Rajen yajquintaꞌb u parar Job rajen yamtaꞌb ten Cꞌuj.
\p
\v 12 Rajen in bʌjobechex, mʌꞌ a yʌn tus tꞌʌniquex Cꞌuj tu ca mucꞌyajex, rajen caꞌ a quiꞌ cʌniquex aroꞌ. Jach manan caꞌ a cʌnex aroꞌ. Rajen toc pꞌʌtex a tus tꞌʌniquex Cꞌuj. Mʌꞌ tsoy a waꞌariquex: “Cꞌuj cu yiric”, quireꞌ a Cꞌujoꞌ tiꞌ yʌn ich caꞌananiꞌ quireꞌ rajiꞌ tu betaj yocꞌocab. Taj caꞌ tsicbanʌquechex. Wa ca waꞌariquex jeꞌerereꞌ taj caꞌ a toc betex. Mʌꞌ a chen ariquex Cꞌuj cu yiric. Wa ca waꞌariquex mʌꞌ mʌꞌ a betiquex aroꞌ, caꞌ a toc arex mʌꞌ a chen ariquex Cꞌuj cu yiric soc mʌꞌ a wacsiquex a siꞌpirex soc mʌꞌ u taꞌquiquex a joꞌr Cꞌuj.
\p
\v 13 Wa tiꞌ yʌn mac tu yʌnechex wa tan u mucꞌyaj, arej tiꞌ caꞌ u tꞌʌnej Cꞌuj soc mʌꞌ u yacꞌtic u bʌj. Wa quiꞌex a worex cꞌaynʌquechex tiꞌ Cꞌuj.
\v 14 Wa tiꞌ yʌn tuririꞌ tu yʌnechex wa yaj. Arej tiꞌ caꞌ u pʌy u jach tsꞌurirob tu cu cꞌayob, a nuxiboꞌ, soc u tꞌʌnicob Cꞌuj tiꞌ a yajeꞌ. Soc u jicꞌtaꞌr u tsꞌac tsats tu joꞌr. Quireꞌ quet bayiriꞌ tan u tꞌʌnicob u Jaj Tsꞌurirob. 
\v 15 Jeꞌ u jawʌr u yajir u racꞌobeꞌ tu cu tꞌʌnicoꞌ Cꞌuj, quireꞌ tu yacsaj tu yor tiꞌ u tꞌʌn Cꞌuj. Jeꞌ u jawsaꞌr ten Cꞌuj wa yʌn u siꞌpir a yajeꞌ jeꞌ u jawsaꞌr u siꞌpir xaneꞌ.
\v 16 Rajen caꞌ a toc arex a siꞌpirex tiꞌ a racꞌobex. Tꞌʌnex Cꞌuj tiꞌ a racꞌobex soc Cꞌuj cu yamtiquechex wa ber ca yajtarex. Mʌꞌ ja wirej, a mac jach taj yoroꞌ jach neyʌn u mucꞌ tu cu tꞌʌnicob Cꞌuj. Aroꞌ rajiꞌ cꞌuchaꞌan yor tiꞌ tu cotor baꞌ.
\v 17 Uꞌyex baꞌ cu camsicoꞌon ic nunquirex Elías. Mʌꞌ ja wirej, a Elías iroꞌonex caj u tꞌʌnaj Cꞌuj Elías soc mʌꞌ ju tar yaꞌarir, rajen mʌꞌ tar yaꞌarir hasta man tres yaxqꞌuin u jer chumuc yaxqꞌuin mʌꞌ ju tar yaꞌarir. 
\v 18 Caj u wʌcꞌʌs tꞌʌnaj Cꞌuj Elías caꞌ tac yaꞌarir caj wʌcꞌʌs tar yaꞌarireꞌ, caj chꞌij u pʌcꞌʌrob.
\p
\v 19 In bʌjobechex wa tiꞌ yʌn mac tu yʌnechex a tu pꞌʌtaj u tꞌʌn Cꞌuj quireꞌ tus paꞌay u ber ten u tus ʌjcamsʌyʌjir u tꞌʌn Cꞌuj. Chen wʌcꞌʌs binij mac quir u yamtaꞌr a mac tus soc u jach cꞌaxic tu yor, jeroj tu jach cꞌaxaj tu yor.
\v 20 Arex tiꞌ a mac tu yamtaj a tus camsaꞌb caꞌ u cꞌaxic tu yor soc u pꞌʌtic u siꞌpir soc a tus camsaꞌbeꞌ soc mʌꞌ ju bin saꞌtʌr, rajen toc rʌc jawsaꞌb u siꞌpir a mun yʌn tiꞌ. Quireꞌ yamtaꞌb ten u yet acsʌꞌorir.