\id 1PE
\h 1 PEDRO
\toc1 1 PEDRO
\mt1 A JEꞌ JUꞌUNAꞌ, CAJ U YɅN BATꞌAN TSꞌIBTA PEDRO
\mt2 1 PEDRO
\c 1
\s Pedro caj u tsꞌibtaj a jeꞌ juꞌunaꞌ tiꞌ u yet acsʌꞌorirob a tantanxer yʌn u cajarob
\p
\v 1 A tenoꞌ Pedrojen, a jin wʌjtuchiꞌyʌjiroꞌ Jesucristo. U cꞌat yaꞌaric a mac tuchiꞌtaꞌb ten Jesús quir u tsecꞌtic u tꞌʌn. Caj in tsꞌibta techex a jeꞌ juꞌunaꞌ, a tantanxer cʌjaꞌanechex quireꞌ caj a wacsex ta worex u tꞌʌn Cꞌuj. Rajen caj in tsꞌibta techex. Caj in tsꞌibta techex, a tantanxer cʌjaꞌanechex ich u ruꞌumin Ponto. A tiꞌ yʌnechex ich u ruꞌumin Galacia. A tiꞌ yʌnechex ich u ruꞌumin Capadocia. A tiꞌ yʌnechex ich u ruꞌumin Asia. A tiꞌ yʌnechex ich u ruꞌumin Bitinia.
\v 2 Caj u yʌn batꞌan tetechex Cꞌuj ic Tetex Cꞌuj quireꞌ yʌn baꞌwir techex. Mʌꞌ ja wirej, u cꞌat u quiꞌquintic a worex. Caj u tetechex ic Tetex Cꞌuj soc u yamtiquechex u Tajꞌor u Pixam Cꞌuj quir a quibiquex u tꞌʌn Jesucristo. Caj u tetechex ic Tetex Cꞌuj quir u jawsic a siꞌpirex Jesucristo wa ber caj quimij ich cruz. A tenoꞌ, quij Pedro, quin cꞌatic tiꞌ Cꞌuj caꞌ u quiꞌquiꞌ cʌnan techex Cꞌuj, baxuc, caꞌ quiꞌac a worex ten Cꞌuj soc mʌnaꞌ baꞌ ca tucriquex.
\s Tan ic pajiquex u taꞌquicoꞌonex Cꞌuj
\p
\v 3 Caꞌ ij carex tiꞌ Cꞌuj, raꞌ u Tet ic Jaj Tsꞌurirex Jesucristo: “Jach caremech Cꞌuj, caj ij caꞌarex tiꞌ. A techoꞌ caj a yajquin toꞌonex soc mʌꞌ ic saꞌtʌrex. A techoꞌ Cꞌujech, caj ij caꞌarex tiꞌ. Ta tsꞌaja toꞌonex ij cuxtarex a ricꞌbenoꞌ caj a ricꞌsaj Jesucristo ich u quimirir. Rajen quiꞌ ij corex ic pajiquex u tar Jesucristo quir u tsꞌic ij cuxtarex munt qꞌuin.” Baxuc caꞌ ij caꞌarex tiꞌ Cꞌuj. 
\v 4 Tan ic chꞌuctiquex u tsꞌic toꞌonex ij cuxtarex munt qꞌuin quireꞌ rajiꞌ tan u quiꞌ cʌnantic ich caꞌanan tu mʌꞌ ju pocꞌar. Tu mʌꞌ ju tsꞌutsꞌur irej u top cheꞌ teraꞌ.
\v 5 A rayoꞌ yʌn techex ich caꞌananoꞌ quireꞌ ta wacsex ta worex tiꞌ Cꞌuj. Rajen yʌn u mucꞌ Cꞌuj cu cʌnantiquechex quir u tsꞌic techex a cuxtarex munt qꞌuin, a ca pajiquexeꞌ. 
\p
\v 6 Rajen quiꞌquint a worex bajeꞌrer. Cax ca jamach mucꞌyajex tu cu tumticob a worex a racꞌob.
\v 7 Mʌꞌ ja wirej, irej oro cu tumtic yirej. Baxuc techex, irej oro cu tumtic yirej wa cu toꞌquic, cu yerar a orojoꞌ. A cu tar u tumtic ij corex soc yiric wa taj quij cacsiquex tij corex. A taj caj u yacsaj tu yor, cu mucꞌtic tu cu tumtaꞌr yor ten u racꞌob. A mac a cu mucꞌticoꞌ, jach tsoy yirir ten Cꞌuj. A orojoꞌ mʌꞌ munt qꞌuiniꞌ. Mʌꞌ ja wirej, cu toꞌcaꞌr caꞌ erac quir u rucꞌsic yeqꞌuir. Caꞌ bin tsꞌocac u tumtaꞌr a worex Cꞌuj cu bin yaꞌaric: Jach tsoyechex. Caꞌ bin tac Jesucristo, jeꞌ a bin cʌjtarex yejer Cꞌuj. Jeꞌ a wuꞌyiquex yaꞌaraꞌ ten Cꞌujoꞌ: “Tsoyechex, quij, tu ta mucꞌtex.”
\p
\v 8 Cax mʌꞌ a wirmʌnex Jesúsiꞌ, caj a yajquintex caj a wacsex ta worex tiꞌ. Rajen jach manan quiꞌir a worex, cax mʌꞌ a wirmʌnexiꞌ.
\v 9 Rajen quiꞌ a worex quireꞌ caj a wacsex ta worex soc a taquiquex a pixamex.
\p
\v 10-11 A uchoꞌ caj araꞌb ten u Tajꞌor u Pixam Cꞌuj tiꞌ yʌjtseqꞌuirob u tꞌʌn Cꞌuj, a baꞌ caꞌ u tsꞌibtob. Caj araꞌb tiꞌob caj u tsꞌibtob: “Bin u caj tar mac quir u mucꞌyaj soc u taquicoꞌonex quireꞌ u yajoꞌonex Cꞌuj.” Robob u yʌjtseqꞌuirob u tꞌʌn Cꞌuj mʌꞌ ju najtob a baꞌ cu tsicbarob tiꞌ Cristo. Rajen caj u cʌxtob u juꞌunin u tꞌʌn Cꞌuj quireꞌ u cꞌat yerob mac cu tsicbarob caꞌ bin tac. Baxuc wa ber caꞌ bin tac. A uchoꞌ, yʌjtseqꞌuirob u tꞌʌn Cꞌuj caj u cʌxtob ich u tꞌʌn Cꞌuj caꞌ u najtob bic tabar u taquiquex a pixamex. A baꞌ cu tsecꞌticob mʌꞌ ju najtob u bʌjiriꞌ yʌjtseqꞌuirob u tꞌʌn Cꞌuj. Robob caj u tsecꞌatob soc jeꞌ u tar yʌjtaquir ic pixamex.
\v 12 Yʌjtseqꞌuirob u tꞌʌn Cꞌuj cu tsꞌabʌr u tucurob ten u Tajꞌor u Pixam Cꞌuj soc caꞌ ic najtex bic tabar u tar Cristo. Mʌꞌ rajiꞌ tiꞌ u bʌjiriꞌ yajtseqꞌuirob rajiꞌ u tꞌʌn Cꞌuj, rajiꞌ tiꞌ u jer winic caꞌ bin tac, toꞌonex bajeꞌreroꞌ. Mʌꞌ ja wirej, raꞌiriꞌ tiꞌeꞌ u tꞌʌn Cꞌuj cu tsecꞌtic techexeꞌ. Caj a wuꞌy. Raꞌiriꞌ tiꞌeꞌ, quireꞌ tuchiꞌbir ten Cꞌuj yʌjtseqꞌuirob u tꞌʌn Cꞌuj soc u tsecꞌtic techex a wuꞌyex quir a taquiquex a pixamex. Yejer u mucꞌ u Tajꞌor u Pixam Cꞌuj caj u tsecꞌtob techex. A rayoꞌ yʌjmasirob u tꞌʌn Cꞌuj caꞌanan xan u cꞌat u najticob bic tabar ic taquiquex ic pixamex. Chen mʌꞌ ju najtob. 
\s Cꞌujoꞌ u cꞌat yiric mac u man tu tsoyir
\p
\v 13 Quiꞌquiꞌ tucrex a baꞌ ca bin a betexeꞌ soc mʌꞌ a wacsiquex a siꞌpirex. Rajen quiꞌ cʌnant a bʌjex. Quiꞌquiꞌ pajex Jesucristo caꞌ bin uruc. Jeꞌ u tsꞌic techex a cuxtarex caꞌ bin uruc quireꞌ cu yajquintiquechex Jesucristo. 
\v 14 Yʌn quiꞌquiꞌ uꞌyex u tꞌʌn a Tetex. Mʌꞌ ja wirej, a Tetex Cꞌuj. Mʌꞌ a manex tu cꞌasir an bic caj manechex uch. Mʌꞌ ja wirej, a ray u qꞌuininoꞌ mʌꞌ a werex u tꞌʌn Cꞌuj uchiꞌ.
\v 15 Rajen caꞌ a cʌnex Cꞌuj, quireꞌ rajiꞌ mʌnaꞌ u siꞌpir. Quireꞌ rajiꞌ caj u pʌyechex soc rajiꞌ yʌninechex. Rajen caj manaquechex tu tsoyir. Baxuc caj araꞌb ten Cꞌuj. 
\v 16 Cꞌʌꞌotex tu tsꞌibaꞌan u tꞌʌn Cꞌuj tu ju yaꞌaraj toꞌonex: “Mʌꞌ a yʌn acsiquex a siꞌpirex. Baxuquenoꞌ, in cꞌat caꞌ a cʌnenex, quij Cꞌuj.”
\p
\v 17 Wa ber caꞌ bin tsicbanʌcoꞌonex yejer Cꞌuj. Caꞌ ij carex tiꞌ Cꞌuj: “Ic Tetex.” Mʌꞌ ja wirej, rajiꞌ ic Tetex. Cꞌʌꞌotex, a Cꞌujeꞌ ic Tetex bin u caꞌ yirej a mac a tu yacsaj tu yoroꞌ. Caꞌ bin tac, taj cu bin yirej wa quiꞌ beyanʌjoꞌon wa tij quiꞌ quibex u tꞌʌn tiꞌ Cꞌuj. Rajen caꞌ ic sʌjtex Cꞌuj a munt qꞌuin tiꞌ yʌnoꞌonex ich yocꞌocab.
\v 18 A werex bic tabar caj u taquechex Jesús. Jach coꞌoj caj u boꞌotaj, quireꞌ yejer u qꞌuiqꞌuer caj u toc boꞌotaj. Mʌꞌ yejer taqꞌuiniꞌ caj u boꞌotaj, quireꞌ a taqꞌuinoꞌ cu rabʌr. Rajen a taqꞌuinoꞌ mʌꞌ cꞌuchaꞌan yor u boꞌotic u boꞌorir a siꞌpirexiꞌ. Tu boꞌotaj u boꞌorir a siꞌpirex yejer u qꞌuiqꞌuer soc u jawsic a siꞌpirex. Rajen a baꞌ caj a wuꞌyex yaꞌaric a nunquirex uch. Jot, a baꞌ caj u camsechex a nunquirex uch.
\v 19 Caj quinsaꞌb Jesús ich cruz. Quinsaꞌb irej tʌmʌn yuc a jach tsoyoꞌ a cu quinsaꞌr uch, u boꞌorir u siꞌpir mac. Caj quimij Jesús ich cruz mʌnaꞌ cꞌʌs siꞌpir chichin. 
\v 20 Cꞌaj techex. Toc araꞌb tiꞌ Cristo u tar ten Cꞌuj tu chꞌic chunin uch. Cax mʌꞌ toy betaꞌc ruꞌum uchiꞌ. Toc tetaꞌb Cristo quir u quimin toꞌonex. Caj cꞌuchij tu qꞌuinin a tu pꞌis u qꞌuinin Cꞌuj caj tar Cristo caj ij quirex, quij. Mʌꞌ ja wirej, tarij quir u quimin toꞌonex. Quir u boꞌotic ic siꞌpirex.
\v 21 Caj a wacsex ta worex tiꞌ Jesucristo baxuc caj a wacsex ta worex tiꞌ Cꞌuj. Mʌꞌ ja wirej, ricꞌsaꞌb Jesús ten Cꞌuj tu quimirir. Rajen ta wacsex ta worex tiꞌ. Ricꞌsaꞌb Jesús ten Cꞌuj soc yer mac jach noꞌj Jesús. Rajen ta wacsex ta worex tiꞌ Cꞌuj quir a cuxtarex munt qꞌuin quireꞌ rajiꞌ ca pajiquex Cꞌuj caꞌ u tsꞌa techex a cuxtarex. 
\p
\v 22 Bajeꞌrer a techexoꞌ, ta wuꞌyex u tꞌʌn Cꞌuj, rajen u yajechex u Tajꞌor u Pixam Cꞌuj. A baywoꞌ tu jaws a siꞌpirex, rajen ca quiꞌquiꞌ yajquintiquechex a wet acsʌꞌorirex. Caꞌ a pacran yajquint a bʌjex. Taj ca quiꞌ yajquint a bʌjex.
\v 23 A techexoꞌ ricꞌbenechex quireꞌ ta quibex u tꞌʌn Cꞌuj, rajiꞌ cuxriquechex u tꞌʌn Cꞌuj. Ricꞌbenechex ire caꞌ rochaꞌbechex ten a nʌꞌex. Mʌꞌ ja wirej, u tꞌʌn Cꞌuj mʌꞌ ju tsꞌocar, rajen quic bin cuxtarex munt qꞌuin. Mʌꞌ ja wirej, ic tetex, mʌꞌ ju jach tsꞌaj ij cuxtarex ich yocꞌocabiꞌ jeꞌ ij quiminexeꞌ.
\v 24 Mʌꞌ ja wirej, tiꞌ tsꞌibaꞌan ich u tꞌʌn Cꞌuj a cu yaꞌaric: 
\q Tu cotor mac irej suꞌuc. Mʌꞌ ja wirej, tu cotor ju tsoyoꞌ ich yocꞌocab, cu manob irej suꞌuc u topꞌ. Cu tijir a suꞌucoꞌ, cu jutur u topꞌ. Baxucoꞌonex, xan, caꞌ bin quimicoꞌonex mʌꞌ ju cꞌajʌrtoꞌonex ic racꞌobex.
\v 25 Barej u tꞌʌn Cꞌuj, mʌꞌ ju tsꞌocar munt qꞌuin yʌn. 
\m Raꞌiriꞌ tiꞌ u tꞌʌn Cꞌuj, caj tsecꞌtaꞌb techex quir a wacsiquex ta worex.

\c 2
\p
\v 1 Rajen caꞌ a rʌc pꞌʌtex tu cotor cꞌasoꞌ. Caꞌ a rʌc pꞌʌtex a tusariquex. Caꞌ a rʌc pꞌʌtex u qꞌuextar a worex. Caꞌ a rʌc pꞌʌtex a cꞌacꞌas tꞌʌnex.
\v 2 Yʌn cʌnex tun, baxuc a chichanoꞌ a tan tu rochaꞌr ten u nʌꞌeꞌ. Mʌꞌ ja wirej, rajraꞌ cu chuꞌch. Baxuc toꞌonex, soc rajraꞌ ic pachtiquex u tꞌʌn Cꞌuj. Quireꞌ u tꞌʌn Cꞌuj mʌꞌ xacaꞌaniꞌ quireꞌ taj. Mʌꞌ ja wirej, rajiꞌ cu chꞌisicoꞌonex quir ij cuxtarex ricꞌben soc u chichtar ic muqꞌuex. 
\v 3 Mʌꞌ ja wirej, a toc erex bic tabar u yajquintiquechex ic Jaj Tsꞌurirex.
\s A Cristojoꞌ etsꞌ bajen tunich
\p
\v 4 Cꞌʌmex ic Jaj Tsꞌurirex Jesucristo quireꞌ raꞌ cu tsꞌic techex a cuxtarex munt qꞌuin. Rajiꞌ bajen tunich quir u tsꞌʌpquintic quir u pʌqꞌuic yatoch. Chen caj pichꞌintaꞌb ten winic quireꞌ mʌꞌ u cꞌatobiꞌ. Chen a Cꞌujoꞌ, caj u tetaj quireꞌ jach noꞌj, a tunichoꞌ.
\v 5 An ten bic mac, cu maric tunich quir u cꞌʌxic yatoch tu cu bin u cꞌujinticob Cꞌuj. Chaꞌex u mariquechex Cꞌuj an bic mac cu maric tunich quir u cꞌʌxic yatoch. Caꞌ u marechex soc caꞌ cʌjrac ta wicnanex u Tajꞌor u Pixam Cꞌuj. A baywoꞌ, jeꞌ a tsꞌiquex tiꞌ Cꞌuj, a baꞌ u cꞌat, an ten bic u sacerdote tu cu naj cꞌujinticob Cꞌuj u winiquirob judío cu tsꞌicob tiꞌ Cꞌuj a baꞌ u cꞌat Cꞌuj. Mʌꞌ ja wirej, jach manan tsoyirechex sacerdotejechex quireꞌ caꞌ bin beyanʌquechex tiꞌ Cꞌuj quireꞌ caj u tsꞌaja techex a beyajex Jesucristo.
\v 6 Rajen, tiꞌ tsꞌibaꞌan ich u tꞌʌn Cꞌuj uch caj yaꞌaraj: 
\q A tenoꞌ, quij yaꞌaric Cꞌuj, tin tetaj yoc naj tuririꞌ. Jach coꞌoj caj in tetaj. Etsꞌ bajen Cristo. Caj tsꞌoc in tetic, caj in jupaj yoc naj ich u cajar Sión. Soc rajiꞌ cu chichquintic u mucꞌ naj. A jeꞌ yoc najaꞌ, jach chich. Rajen a mac a cu yacsic tu yor tiꞌ, mʌꞌ ju bin u chꞌic suraquir tiꞌ Cristo. Quireꞌ caj u yacsaj tu yor tiꞌ Cristo. 
\p
\v 7 A techexoꞌ a mac a ju yacsmʌnob tu yorob tiꞌ Cristo. Caj a quiꞌ yajquintex Cristo. Chen a mac a mʌꞌ yacsmʌnob tu yorob tiꞌ Cristo. Mʌꞌ ju yajquintob Cristo. Robob irob u tsꞌurirob u winiquirob judío quireꞌ caj u cʌnob mac a tu cꞌʌxob naj uch tu cu cꞌujinticob u winiquirob judío an ten bic caj u yaꞌarar ich u tꞌʌn Cꞌuj uch. 
\q Robob caj u pichꞌintob yoc naj quireꞌ caj u tucrob cꞌas. Pachir, caj u chucob u jupob u yoc naj quireꞌ nechich u mucꞌ yoc naj quir u jach chichquintic u mucꞌ naj.
\p
\v 8 Baxuc tsꞌibaꞌan ich u tꞌʌn Cꞌuj xan a uchoꞌ:
\q Irej tiꞌ yʌn tuririꞌ tunich cu coja yocob, or u ruburob tiꞌ a ray tunichoꞌ.
\m A ray Jesúsoꞌ, irej tunich cu coja yocob, wa ber u jach tsꞌurirob u winiquirob judío mʌꞌ u cꞌat yubob u tꞌʌn Cꞌuj robob irob mac a cu coja yoc ten tunichoꞌ. Baxuc tu yaꞌaraj Cꞌuj uch.
\s A mac a caj u yacsa tu yoroꞌ, u parar Cꞌuj
\p
\v 9 Chen a techexoꞌ mʌꞌ ja cʌnex a mac a caj u pꞌuspachtob ij cʌj taquirex quireꞌ caj u tetechex Cꞌuj, soc rajiꞌ yʌninechex, mʌnaꞌ u jer. Soc rajiꞌ ca reyintiqutechex Cꞌuj quireꞌ a techexoꞌ, sacerdotejechex. Mʌꞌ ja wirej, caj a tsꞌiquex tiꞌ Cꞌuj a baꞌ u cꞌat Cꞌuj techex. Quireꞌ ricꞌsaꞌbechex ten Cꞌuj soc caꞌ beyanʌquechex tiꞌ Cꞌuj irechex u winiquirob israel uch. Caj u tetechex Cꞌuj soc a wesiquechex tiꞌ a racꞌob a baꞌ cu bin u tsꞌʌr u pachob. Soc a racꞌob cu bin yaꞌarob tiꞌ Cꞌuj: “Jach caremech Cꞌuj quireꞌ jach tsoyech Cꞌuj. Quireꞌ robob a macob uchoꞌ cu manob tu cꞌasir uch. Chen bajeꞌrer cu manob tu tsoyir quireꞌ caj u yacsob tu yorob tiꞌ tech.”
\v 10 A bajeꞌrereꞌ, a tsꞌurirex Cꞌuj. A uchoꞌ, mʌꞌ toy a wacsex ta worex tiꞌ Cꞌuj, a tsꞌurirex quisin a uchoꞌ. A uchoꞌ mʌꞌ ju yamtechex Cꞌuj, chen bajeꞌrer tu yamtechex Cꞌuj. A bajeꞌrereꞌ, yʌn yʌjyaminechex quireꞌ cu yajquintiquechex Cꞌuj.
\s Taj a wacsiquechex ta worex
\p
\v 11 Mʌꞌ a yʌn pachtiquex baꞌ cu cꞌasquintic a pixamex. Mʌꞌ ic ruꞌumin a teraꞌ. Tar yʌn ic jach ruꞌumex ich caꞌanan. Rajen in bʌjobechex a mac in jach yajeꞌ. Rajiꞌ quin chich aric techex: “Mʌꞌ tsoy a pachtiquex a cꞌasoꞌ.”
\v 12 Caꞌ quiꞌ manʌquechex tu tsoyir soc wa cu yiricob a racꞌobex a mʌꞌ yacsmʌnob tu yorobeꞌ. Cu bin yiricob tsoyechex, cax caj u pacꞌob a pachex. Cax bajeꞌrer caj yaꞌarajob: “Cꞌasechex.” Jeꞌ u yaꞌaraꞌ tiꞌ Cꞌuj caꞌ bin xuruc tꞌʌn: “Jach tsoy a tiꞌeꞌ, quireꞌ caj u quiꞌ quib a tꞌʌn.” Baxuc cu bin yaꞌaricob a cu pʌqꞌuicob a pachexeꞌ.
\p
\v 13 A techexeꞌ quireꞌ caj a wacsex ta worex u tꞌʌn Jaj Tsꞌur Jesús. Caꞌ a quibex u tꞌʌn u jach tsꞌurirob a ruꞌumex. Cax rey, quireꞌ rajiꞌ u jach tsꞌurir tu cotor u ruꞌumin tu yʌnechex ich yocꞌocab.
\v 14 Caꞌ a wuꞌyex u tꞌʌn u jach tsꞌurirob a cu yamticob a reyoꞌ. Baxuc a mac a tuchiꞌtaꞌb ten u jach tsꞌurirob quir u chuquicob a mac jach cꞌasoꞌ. Mʌꞌ ja wirej, jeꞌ u cʌnanticob a mac jach tsoyoꞌ.
\v 15 A Cꞌujoꞌ jach tsoy yiriquechex wa quic manex tu tsoyir. Soc mʌꞌ ju nuncaꞌr ten a mʌꞌ yacsmʌnob tu yorob yejer a mac cu netusoꞌ.
\p
\v 16 Quireꞌ caj a wacsex ta worex tiꞌ Cristo, rajen mʌꞌ a tsꞌurintiquex a siꞌpirex. Rajen manenex tu tsoyir. Mʌꞌ a tus tucriquex quireꞌ toc jawsaꞌb a siꞌpirex ten Cꞌuj cax mʌꞌ a caꞌ manex tu cꞌasir. Caꞌ manaquechex tu tsoyir quireꞌ caj u yaꞌaraj Cꞌuj: “Manenex tu tsoyir.” 
\v 17 Sʌjtex tu cotor mac. Sʌjtex Cꞌuj. Yajquintex a wet acsʌꞌorirex. Sʌjtex a rey xanoꞌ.
\s Cʌnex Cristo soc baxuc a mucꞌtiquexoꞌ
\p
\v 18 A mac a cu beyaj tiꞌ u jer, ar u quib a baꞌ cu yaꞌaric u tsꞌurir, quireꞌ rajiꞌ cu beyaj tiꞌ. Quiꞌ beyanen tiꞌ a tsꞌurir, cax mʌꞌ ju quiꞌ yajquintiquech. Quiꞌ beyanen tiꞌ a tsꞌurir, cax cu quiꞌ yajquintiquech.
\v 19 Cax ca mucꞌyaj quireꞌ a tsꞌurir cu tiquin qꞌueyiquech. Chen wa ca mucꞌtic a techoꞌ, quireꞌ ca sʌjtic Cꞌuj. Jach tsoy cu bin jocꞌar tech.
\v 20 Mʌꞌ ja wirej, cax wa ca wuꞌyic u qꞌueyiquech. Mʌꞌ a chen tucric wa tsoy caj a betaj caj a wuꞌy u qꞌueyiquech chen mʌꞌ quiꞌ beyanʌjechiꞌ. Wa tsoy beyanʌjech tu ca beyaj ich a tsꞌurir. Wa ber cu chen tiquin qꞌueyiquech aroꞌ ca mucꞌtic u tiquin qꞌueyiquech mʌꞌ a nunquic, a baxucoꞌ ca jocꞌar tsoyir a techoꞌ.
\v 21 A baxucoꞌ soc a cʌniquex chen paquechbirechex. Quireꞌ tu tetech Cꞌuj. Quireꞌ baxuc Jesús caj mucꞌyajnʌjij toꞌonex soc ij cʌniquex ic mucꞌyajex irej Jesús caj mucꞌyajnʌjij uch.
\v 22 Mʌꞌ ja wirej, a Jesúseꞌ mʌnaꞌ u siꞌpir mʌꞌ ju tusaj maquiꞌ.
\v 23 Wa ber caj pꞌastaꞌb Jesús ten u racꞌob yejer soldado. Mʌꞌ quet u pꞌastaꞌr soldado yejer u racꞌob ten Jesús. Yaꞌab tsꞌaꞌb u mucꞌyaj ten soldado. Mʌꞌ ju pʌc u bʌjiꞌ, quireꞌ yer bin u caꞌ u jasej caꞌ bin xuruc tꞌʌn. Quireꞌ a Cꞌujoꞌ, jeꞌ u jʌsiqueꞌ. Taj cu bin jʌse mac, quireꞌ taj yor a Cꞌujoꞌ.
\v 24 Cꞌaj techex u bʌjiriꞌ Cristo caj cuch ic siꞌpirex tu bʌqꞌuer caj baj ich cruz. Caj baj toꞌonex Cristo soc quir ij quibiquex u tꞌʌn. Soc mʌꞌ ij cacsiquex ic siꞌpirex. 
\v 25 A uchoꞌ satʌrechex irechex tʌmʌn yuquechex, ca rʌc waccheꞌchʌꞌechex. Bajeꞌrereꞌ caj a cꞌaxex a worex caj wʌcꞌʌs tarechex ich Cristo, a mac a cu cʌnantiquechex irej tʌmʌn yuc cu cʌnantaꞌr. Rajiꞌ jach yʌjcʌnanyʌjir a pixamex.
\c 3
\s Raꞌ u tꞌʌn tiꞌ a mac u chꞌamʌn u mamoꞌ. Raꞌ u tꞌʌn Cꞌuj xan tiꞌ a mac u chꞌamʌn u racꞌoꞌ
\p
\v 1 Baxuc a cu beyaj tiꞌ u tsꞌurirob cu quibic u tꞌʌn xan. Baxuc a xquic xanoꞌ, caꞌ u quib u tꞌʌn u mam. Wa ju mamoꞌ mʌꞌ yacsmʌnoꞌ tu yor, jaj ix tʌcoj cu yiric u racꞌ tan u quibic a baꞌ quireꞌ tiꞌ cu betic. Jaj ix tʌcoj, bin u caꞌ cꞌaxej tu yor u mam soc u yacsic tu yor u tꞌʌn Cristo xan. Cax mʌꞌ u tsicbʌtaꞌr ten u racꞌ. 
\v 2 Jeꞌ u yacsic tu yor tiꞌ Jesús u mameꞌ. Mʌꞌ ja wirej, cu yiric u sʌjtaꞌr ten u racꞌ. Quireꞌ cu yiric cu quibir u tꞌʌn.
\v 3 A xquicoꞌ, quij, mʌꞌ u chen tucric wa tsoy yirir ten u racꞌob, u chen buquintic a jach manan tsoy u nocꞌob. Baxuc u joꞌr, mʌꞌ u chen tucric wa tsoy yirir u chomcꞌʌxtic u joꞌr ten u racꞌob. Baxuc u yuj, mʌꞌ u chen tucric tsoy yirir u yujintic ten u racꞌob.
\v 4 A werex baꞌ caꞌ a tucrex jach tsoy? Caꞌ a cʌxtex u tsoyir a pixamanex tiꞌ Cꞌuj an ten bic nemʌꞌ biquechex ta worex, aroꞌ ʌcʌtan tu wich Cꞌuj jach manan tsoy yiric Cꞌuj.
\v 5 Baxucoꞌ caj u yesob tiꞌ u racꞌob a xquic, a uchoꞌ. Baxuc caj u yajquintob Cꞌuj uch. Caj u yesob taj caj u cꞌʌmob u tꞌʌn Cꞌuj. Mʌꞌ ja wirej, caj u tsꞌurint u mam, quiꞌ yorob a xquicoꞌ.
\v 6 Bayiriꞌ a Sarajoꞌ, caj u yaꞌaraj tiꞌ u mam Abraham: “In jach tsꞌurirech”, quij bin uch Sara. Mʌꞌ ja wirej, caj u quib u tꞌʌn u mam uch. Baxuc caꞌ a cʌnex Sara tsꞌurintex a mamex xan, quij. Quireꞌ caj a wacsex ta worex ti Cristo soc bajenechex u pararechex Sara bajeꞌrer. Jaj ix tiꞌoꞌ, ca manaquechex tu tsoyir, bayiriꞌ mʌꞌ a yʌn chꞌic sajquirex tiꞌ mac quireꞌ ta wacsex ta worex tiꞌ Cristo.
\p
\v 7 A yacsmʌnob tu yorob a caj u chꞌaꞌob u raqꞌueꞌ. Cꞌʌꞌotex tu cʌjaꞌanechex yejer a raqꞌuex. Caꞌ a sʌjtex a raqꞌuex xan, quireꞌ mʌꞌ cꞌuchaꞌan yorob techexiꞌ a raqꞌuiꞌ. Cꞌʌꞌotex, tsꞌaꞌb a cuxtarex ten Cꞌuj tiꞌ a xiquicoꞌ, baxuc techex xan, quireꞌ caj a cꞌʌmex Cꞌuj. Wa ca cꞌʌꞌotiquex aroꞌ, Cꞌuj cu bin yub a tꞌʌn wa ber ca tꞌʌniquex a tiꞌoꞌ. 
\s Cu jach mucꞌtic u qꞌueyaꞌ quireꞌ tu cꞌʌm u tꞌʌn Cꞌuj 
\p
\v 8 Uꞌyex baꞌ quin waꞌaric techex. Tsꞌocar u caꞌ in tsicbar techex. Pacran pꞌeriꞌquint a worex. Pacran yajquintex a bʌjex irej wa a jach bʌjex ca yajquintiquex. Caꞌ a tucrex tsoyob a bʌjobex. Mʌꞌ a wʌcꞌʌs tucric a bʌj wa jach tsoyechex soc nemʌꞌ bic a worex tiꞌ a racꞌobex. 
\v 9 Mʌꞌ a pʌquiquex a bʌjex wa tu cꞌasquintiquechex mac. Cax a wuꞌyex u cʌrʌx tꞌʌntiquechex. Mʌꞌ a pʌquic a bʌjex. Tꞌʌnex Cꞌuj tiꞌob, soc u yamtaꞌr ten Cꞌuj. Mʌꞌ ja wirej, Cꞌuj caj tetechex uch, soc u yamtiquechex.
\v 10 Cꞌʌꞌotex a baꞌ cu yaꞌaric u tꞌʌn Cꞌuj uch. A cu yaꞌaric: 
\q A mac u cꞌat u cuxtar yocꞌocab quiꞌ yorob. Arex tiꞌ, caꞌ u quiꞌ cʌnant u bʌj, soc mʌꞌ yaꞌaric cꞌas, soc mʌꞌ tus.
\v 11 Arex tiꞌ, caꞌ u pꞌʌtej cꞌas soc mʌꞌ ju bin tu cꞌasir. Arex caꞌ manac tu tsoyir. Caꞌ u cʌxt a baꞌ jach tsoy tiꞌ u pixam. Arex tiꞌ caꞌ u quiꞌ cʌxt u tsoyir u pixam. 
\v 12 Cʌnex aroꞌ, quireꞌ a Jaj Tsꞌuroꞌ, cu quiꞌ cʌnantic a mac a taj yor ʌctan tu wich Cꞌuj. Aroꞌ rajraꞌ cu yubaꞌr u tꞌʌn ten Cꞌuj tu cu tꞌʌnic Cꞌuj. Barej a Jaj Tsꞌuroꞌ, pꞌec u yiric a mac a cu man tu cꞌasiroꞌ.
\p
\v 13 Mʌnaꞌ mac cꞌuchaꞌan yor u cꞌasquintiquech wa rajraꞌ ca man tu tsoyir.
\v 14 Cax cu chuquicob a pachex quireꞌ yiricob ca manex tu tsoyir. Quiꞌquint a worex tiꞌ quireꞌ Cꞌuj cu bin yamtiquechex. Mʌꞌ a chꞌic sajaquirex tiꞌ mac. Mʌꞌ u jacꞌʌr a worex tiꞌ mac xan.
\v 15 Chen caꞌ a sʌjtex ta worex Cristo. Chaꞌ a tsꞌurintiquex Jaj Tsꞌur Jesucristo. Sepquint a quiꞌ nunquexiꞌ tu cotor mac, bic tabar caj a wacsex tiꞌ Cristo ta worex wa cu cꞌatic techex. Mʌꞌ a soꞌsoc nunquex tiꞌ soc quiꞌ yubic a tsicbarex tiꞌ. Chan ber a tꞌʌniquex a tiꞌoꞌ quir yubic a tꞌʌnex.
\v 16 Mʌꞌ a wacsiquex a baꞌ cu cꞌasquintic a pixamex. Baxuc cax cu pʌqꞌuicob a pachex soc caꞌ bin pꞌastiquechex ten a mac a mʌꞌ yacsmʌnob tu yorob. Mʌꞌ ja wirej, jeꞌ u chꞌic suraquirob tu tꞌʌnob u bʌjiriꞌeꞌ quireꞌ tu yirob taj ta wacsex ta worex tiꞌ Cristo.
\v 17 Mʌꞌ ja wirej, jach tsoy wa quic mucꞌyajex quireꞌ tan ic manex tu tsoyir. Aroꞌ tsoy yaꞌaric Cꞌuj ic mucꞌyajex wa raꞌ u cꞌat Cꞌuj. Chen wa cu mucꞌyaj mac, quireꞌ caj u yacs u siꞌpir. Caj mucꞌyajnʌjij quireꞌ raꞌ u boꞌorir u siꞌpir.
\p
\v 18 Mʌꞌ ja wirej, u bʌjiriꞌ Cristo caj u cꞌub u winquirir caꞌ quinsaꞌc u boꞌorirex ic siꞌpir. Caj u toc rucꞌs ic siꞌpirex. A Jesúsoꞌ mʌnaꞌ u siꞌpir a tiꞌoꞌ, caj quinsaꞌb quireꞌ jach cꞌasoꞌonex a toꞌonexoꞌ. Caj quim u winquirir, chen ricꞌsaꞌb u jach pixamoꞌ quir u pʌyic ic berex caꞌanan.
\v 19 Caj tsꞌoc u quimin Jesús, caj ricꞌsaꞌb u pixam. Chen mʌꞌ toy ocac u winquirir caj bin u tsecꞌtaj u tꞌʌn. Tiꞌ bin u tsecꞌtej u tꞌʌn tu cu yerar a mac a tiꞌ yʌnob ich cꞌacꞌ.
\v 20 Caj bin u pixam Jesús caj u tsecꞌt u tꞌʌn tu cu yerar winic. A jeꞌ winicaꞌ mʌꞌ ju quibob u tꞌʌn Cꞌuj uchiꞌ. Robob cuxaꞌanob tu qꞌuinin tiꞌ yʌn Noé uch. Cꞌaj techex, a Cꞌujoꞌ, caj u paj u betic u chem Noé uch. Cax chan ber u betic Noé uch, caj u quiꞌ pajaꞌb u caꞌ cꞌaxic yorob quir u pꞌʌticob u siꞌpirob. Chen mʌꞌ yaꞌab caj oc ich chemiꞌ. Chen ocho caj ocob ich chem. Ocob putsꞌurob ich chem, soc mʌꞌ u quimin soc mʌꞌ u jururob.
\v 21 Tij quirex bic tabar caj u tac u bʌj Noé uch. Aroꞌ, quir u camsicoꞌonex biquinin cu yacsic jaꞌ tu joꞌr mac. Mʌꞌ ja wirej, rajiꞌ cu taquicoꞌonex xan, a cu yacsaꞌr jaꞌ tic joꞌrexoꞌ. Mʌꞌ quir a wichirexiꞌ quir a waꞌariquex tiꞌ Cꞌuj ta cꞌaxex ta worex quir a wacsex ta worex tiꞌ Cristo. A mac toc acsaꞌb jaꞌ tu joꞌr rajiꞌ irej Jesús caj riqꞌuij caj tsꞌoc u quimin. Rajen tu tac toꞌonex Jesús.
\v 22 Mʌꞌ ja wirej, caj riqꞌuij Jesús ich u quimirir, caj bin caꞌanan. Tar cu bin cutar tu noj Cꞌuj, soc ic tsꞌurintiquex ich caꞌanan yejer tu cotor mac. Rajiꞌ tsꞌurintaꞌb Jesús ten yʌjmasirob u tꞌʌn Cꞌuj. Rajiꞌ tsꞌurintaꞌb Jesús ten yʌjtꞌʌninob a tiꞌ yʌnob ich yocꞌocab.
\c 4
\s Caꞌ beyanʌcoꞌonex yejer Cꞌuj, cax a baꞌ yʌn toꞌonex 
\p
\v 1 Baxuc caj mucꞌyajnʌjij Cristo u winquirir uchoꞌ. A techexoꞌ xan, chichquin ta worex quir a mucꞌyajex tiꞌ Cristo. Mʌꞌ ja wirej, a mac caj mucꞌyajnʌjij u winquirir, mʌꞌ rajraꞌ u yacsic u siꞌpir quireꞌ rajiꞌ quimij irej Jesús quimin.
\v 2 Aroꞌ cax wa mun u yaxqꞌuinin tiꞌ yʌn ich yocꞌocab, bin u caꞌ u quib a baꞌ u cꞌat Cꞌuj a tiꞌoꞌ. Mʌꞌ ja wirej, rajiꞌ mʌꞌ ju pachte cꞌas mʌꞌ irob a mac a tiꞌ yʌn ich yocꞌocab cu pachticob tu yorob.
\v 3 Jeroj, tiꞌtiꞌ a baꞌ caj a betex a uchoꞌ, a raꞌ u qꞌuinin mʌꞌ toy a wacsex ta worex tiꞌ Cristo, quireꞌ caj a betex a baꞌ tsoy tu tꞌʌn a mac a mʌꞌ yacsmʌnob tu yorob tiꞌ Cristo. Quireꞌ robob cu pachticob cꞌas. Ca manex uch quir a pʌyiquex xquic. Baxuc a xquicoꞌ, cu man uch quir u pʌyic xib. Caj carchʌjechex uch tu ca wuqꞌuiquex a woch trago uch. Ca manex a betex cꞌas uch. Tu ca quiꞌ quiꞌ janʌnex uch, mʌꞌ ju tsꞌocar a quiꞌ quiꞌ jen janʌnex uch. Caj a cꞌujintex tus cꞌuj uch caj araꞌb ten Cꞌuj mʌꞌ tsoyiꞌ.
\v 4 A bajeꞌreroꞌ, a mac mʌꞌ yacsmʌnob tu yorob cu jacꞌʌr yorob, caj yirob mʌꞌ a binex yejerob. Cu jacꞌʌr yorob yiricob mʌꞌ a binex ich cꞌas yejerob rajen cu pꞌastiquechexob a techexoꞌ.
\v 5 Chen a mʌꞌ yacsmʌnob tu yorob, a cu pꞌasticob a yacsmʌnob tu yorob. Bin u caꞌob ʌcʌtan Jesucristo quireꞌ rajiꞌ tetaꞌb quir u beyaj quir u yaꞌaricob tiꞌ Jesús biquinin caj u pꞌastob a yacsmʌnob tu yorob uch. Tu cotor mac bin u caꞌ ʌcʌtan Jesucristo, baxuc a cuxaꞌanob, baxuc a quiminoboꞌ. Rʌc bin u caꞌob ʌcʌtan Jesucristo.
\v 6 Rajen caj tsecꞌtaꞌb u jach tsoyir u tꞌʌn Cꞌuj ten mac tiꞌ a mac, a mʌꞌ yerob Cꞌuj quireꞌ irob a mac a quimeneꞌ. Tsecꞌtaꞌb soc yubicob u tꞌʌn Cꞌuj quireꞌ tiꞌ toy cuxaꞌanob soc u yacsicob tu yorob quir u cuxtarob munt qꞌuin ich caꞌanan an ten bic Cꞌuj cu cuxtar. Cax robob toꞌcob ten Cristo soc mʌꞌ ju bin erar munt qꞌuin. Caꞌ bin cꞌuchuc tu qꞌuinin u quimin u winquirirob cu bin quiminob an ten bic tu cotor mac cu quimin ich yocꞌocab.
\p
\v 7 Tabar u xuꞌr u tꞌʌn ich yocꞌocab. Rajen quiꞌ cʌnantex a bʌjex soc mʌꞌ a wacsiquex a siꞌpirex. Quiꞌ cʌnantex a bʌjex soc cꞌuchaꞌan a worex a quiꞌ tꞌʌniquex Cꞌuj. 
\v 8 A werex a baꞌ jach manʌn aroꞌ wa caꞌ a pacran yajquintex a bʌjex ich yocꞌocab. Mʌꞌ ja wirej, cu jawsicob u siꞌpirob tu cu pacran yajquinticob u bʌjob. Cu jawsic yaꞌab u siꞌpirob.
\v 9 Mʌꞌ a waꞌariquex: “Biquinin cu tar aroꞌ?” Quireꞌ a mac a cu tar ta watochexoꞌ, caꞌ a quiꞌ acsex.
\v 10 Caꞌ ij quiꞌ yamtex ij quet acsʌꞌorirex wa cꞌuchaꞌan ij corex ic yamtex. Cꞌuj caj u tsꞌaj u tꞌʌn toꞌonex quir ic yamtiquex ij quet acsʌꞌorirex. Rajen caꞌ ij cꞌʌnex a baꞌ caj u tsꞌaj toꞌonex Cꞌuj. Mʌꞌ ja wirej, tu tsꞌaja toꞌonex Cꞌuj quir ic yamtiquex ij quet acsʌꞌorirex. 
\v 11 A mac a tsꞌaꞌb u beyaj quir u tsecꞌtic u tꞌʌn Cꞌuj. Arej caꞌ u tsecꞌtej quireꞌ rajiꞌ yer jach u tꞌʌn Cꞌuj a cu tsecꞌticoꞌ. A mac a tsꞌaꞌb u beyaj soc u yamtic u yet acsʌꞌorirob. Arex caꞌ beyanʌc yejer u mucꞌ a tsꞌaꞌb tiꞌ ten Cꞌuj. Quireꞌ caj ij cacs tij corex tiꞌ Jesucristo rajen ich tu cotor baꞌ quic betiquex. Rajiꞌ jach tsoy caꞌ ij carex: “Jach caremech Cꞌuj.” Baxuc, caꞌ ij carex tiꞌ ic Jaj Tsꞌurirex. “Jach yʌn a mucꞌ munt qꞌuin, a tiꞌ yʌnech ich caꞌananoꞌ. Jach manan caꞌ ic sʌjtech munt qꞌuin.” Bayoꞌ, tsꞌoquij, quij.
\s Jeꞌ u cꞌuchur tu qꞌuinin ic mucꞌyajex quireꞌ tij cacsex tij corex
\p
\v 12 Mʌꞌ u jacꞌʌr a worex, in bʌjobex quireꞌ in jach yajechex. Wa cu tar tu yʌnechex a cu tar u tumtex a worex. Yaj caꞌ bin a wuꞌyex wa cu tumtic a worex, irej cꞌacꞌ wa cu chujiquechex. Mʌꞌ a tucriquex biquin baꞌ a berex a techexoꞌ.
\v 13 Chen mʌꞌ u jacꞌʌr a worex. Quiꞌquint a worex quireꞌ a wet mucꞌyajex Cristo. Wa baxucoꞌ, ca betiquex jach manan u quiꞌtar a worex caꞌ bin a wirex Cristo ich caꞌanan. 
\v 14 Wa cu pꞌastiquechex a racꞌobex quireꞌ caj yirob a wacsex ta worex tiꞌ Cristo. Toc quiꞌquint ta worex. Mʌꞌ ja wirej, chʌcaꞌan a wet manex u Tajꞌor u Pixam Cꞌuj, a mac jach manan tsoyiroꞌ. Quireꞌ a techexoꞌ ca sʌjtiquex u Tajꞌor u Pixam Cꞌuj.
\v 15 Chen wa tiꞌ yʌn mac cu mucꞌyaj quireꞌ caj u quinsaj mac. Baxuc quireꞌ caj u yaꞌcraj baꞌ. Baxuc quireꞌ rajiꞌ cꞌacꞌas mac. Baxuc caj mucꞌyajnʌjij quireꞌ caj u pʌcꞌaj u pach u racꞌob, rajiꞌ u boꞌorir u siꞌpir. Rajen a toꞌonexoꞌ a tij cacsex tij corex caꞌ chen mucꞌyajnʌcoꞌonex tiꞌ u tꞌʌn Cꞌuj.
\v 16 Chen wa mac caj mucꞌyajnʌjij quireꞌ caj u yacsaj tu yor tiꞌ Cristo. Arej mʌꞌ u chꞌic suraquir. Chen caꞌ u quiꞌ acsej tu yor tiꞌ Cristo soc u sʌjticob Cristo tu cotor mac.
\p
\v 17 Jeroj cꞌuchij tu qꞌuinin u jʌsicoꞌonex cax a mac a tu yacsaj tu yor tiꞌ Cristo. Quireꞌ wa cu yʌnxchun Cꞌuj quir u jʌsicoꞌonex a mac a tu yacsaj tu yor. A baꞌ u ber tiꞌob, a mʌꞌ ju yacsob tu yorob tiꞌ Cristo uch? Jach manan cu bin u mucꞌyajob cꞌacꞌ. Baxuc cu yaꞌaric ich tu tsꞌibaꞌan u tꞌʌn Cꞌuj uch. Baxuc caj yaꞌaroꞌ: 
\v 18 “Orac mʌꞌ ju tocarob ten Cꞌuj a mac a yacsmʌnob tu yorob. Baꞌ u ber tiꞌ a mac mʌꞌ yacsmʌnob tu yorob? Baxuc tiꞌ a mac a yʌn u siꞌpirob? Robob cu bin ich cꞌacꞌ munt qꞌuin.”
\v 19 Rajen a mac a tan u mucꞌyaj quireꞌ tan u man tu tsoyob an ten bic u cꞌat Cꞌuj. Arej caꞌ manac tu tsoyir rajraꞌ cu cꞌubic tu cotor baꞌ tiꞌ Cꞌuj. Quireꞌ a Cꞌujoꞌ a tu betaj yocꞌocab, cꞌuchaꞌan yor u betic a baꞌ caj u toc araj tiꞌ uch.
\c 5
\s U tꞌʌn Pedro tiꞌ a yacsmʌnob tu yorob
\p
\v 1 Quin toc aric a wuꞌyex bajeꞌrer soc a chich ariquex in tꞌʌn, tiꞌ a mac a tsꞌurintiquex tu ca cꞌayex, quireꞌ baxuc a tenoꞌ rajiꞌ u tsꞌurirenob a yacsmʌnob tu yorob. A tenoꞌ in wirmʌn u mucꞌyaj Cristo ich cruz. A Cꞌujoꞌ, quij Pedro, bin u caꞌ tsꞌa ten u mucꞌ an ten bic cu bin u tsꞌabir tiꞌ Jesús ten Cꞌuj caꞌ bin uruc caꞌanan. 
\v 2 Caꞌ in waꞌarex techex caꞌ a quiꞌ cʌnantex a yacsmʌnob tu yorob tu ca cꞌayex. Cʌnantex a tiꞌoboꞌ irej u cʌnanticob u yʌrʌcꞌ tʌmʌn yucob ten yʌjcʌnʌnyʌjirob tʌmʌn yuc. Caꞌ a cʌnantex a tiꞌoboꞌ quireꞌ raꞌ a beyajex. Caꞌ a cʌnantex tiꞌob quireꞌ a bʌjiriꞌex a jach cꞌatex a cʌnantiquex a tiꞌoboꞌ quireꞌ mʌꞌ tsꞌʌrbir a pachexiꞌ. Baxuc u cꞌat Cꞌuj. Caꞌ in chich arej techex caꞌ a cʌnantex a tiꞌoboꞌ mʌꞌ quir a jaric a taqꞌuinexiꞌ. Quin chich aric techex caꞌ a cʌnantex a tiꞌoboꞌ quireꞌ a cꞌatex a jach beyajex tiꞌ Cꞌuj.
\v 3 Mʌꞌ quir a qꞌueyiquex a tsꞌurirexiꞌ irej wa techex yʌnin a cꞌurewex a wet acsʌꞌorir. Mʌꞌ a yʌn cʌniquex aroꞌ quireꞌ baxuc gente. Caꞌ a pꞌis a bʌjex soc a manex tu tsoyir soc u cʌniquechex a wet acsʌꞌorirex.
\v 4 Caꞌ in chich are techex caꞌ a quiꞌ cʌnantex a wet acsʌꞌorirex soc caꞌ bin tac Jesús. Rajiꞌ u Jach Tsꞌurirob yʌjcʌnanyʌjirob tʌmʌn yucob quireꞌ a yacsmʌnob tu yorob irob yʌrʌcꞌ tʌmʌn yuc. Robob cu bin boꞌotbirob ten u Jach Tsꞌurirob yʌjcʌnanyʌjirob tʌmʌn yuc tu ju cʌnant u yet acsʌꞌorirob. Robob bin u caꞌob cꞌʌmbir soc u sʌjtaꞌr ten tu cotor mac. Soc u cuxtarob munt qꞌuin.
\p
\v 5 Bayiriꞌ tiꞌ a chichanoꞌ, Caꞌ yub a tꞌʌniquex a mac cu tsꞌurintiquechex tu ca cꞌayex. Tu cotor caꞌ a pacran yamt a bʌjex irechex u cꞌurewechex a wet acsʌꞌorirex. Mʌꞌ ja wirej. Baxuc tiꞌ tsꞌibaꞌan ich u tꞌʌn Cꞌuj:
\q A mac a cu yaꞌaric jach tsoy u bʌj. Cu pꞌactaꞌr ten Cꞌuj. Chen a Cꞌujoꞌ cu yamtic tiꞌ a mac a mʌꞌ u tucrej yaꞌarej nojir u bʌj. Quireꞌ a Cꞌujoꞌ cu yajquintic aroꞌ. 
\m
\v 6 A mac a cu yaꞌaric: “Tsoyir u bʌj”, a Cꞌujoꞌ mʌꞌ u cꞌat yubej. Arej caꞌ u pꞌʌtej yaꞌaric: “Tsoyir u bʌj.” Soc u cꞌanan ten Cꞌuj quir u beyaj quireꞌ a Cꞌujoꞌ, jach yʌn u mucꞌ. Bin u caꞌ quiꞌ acsaꞌbir ten Cꞌuj caꞌ bin cꞌuchuc tu qꞌuinin.
\v 7 A baꞌ ca tucriquex, pꞌʌtex, quireꞌ Cꞌuj cu cʌnantiquechex. 
\p
\v 8 Quiꞌ cʌnant a bʌjex, quiꞌ quiꞌ irex soc mʌꞌ u man u pʌyex a berex a quisinoꞌ. Quireꞌ rajiꞌ cu man u cʌxtechex quir a wacsiquex a siꞌpirex. Mʌꞌ ja wirej, cu pꞌactiquechex quisinoꞌ rajiꞌ irej barum jach wiꞌij. Cu yacan quir u chiꞌbir mac.
\v 9 Taj a wacsiquex ta worex ti Cristo soc cꞌuchaꞌan a worex tiꞌ a quisinoꞌ. Quiꞌ cꞌʌꞌotex a wet acsʌꞌorirex ich yocꞌocab. Mʌꞌ ja wirej, cu man tumtaꞌbir yorob ten quisin irechex caj man tumtaꞌbir a worex ten quisin. 
\v 10 Mʌꞌ yaꞌab u qꞌuinin cu bin tsꞌocar u tumtic a worex a quisinoꞌ. Tabar u tsꞌocar u tumtic a worex. Quireꞌ a Cꞌujoꞌ a mac a cu quiꞌ yajquintiquechex. Caj u tetechex soc a wacsiquex ta worex tiꞌ Cristo, quir a cuxtarex munt qꞌuin caꞌanan. U bʌjiriꞌ Cꞌuj jeꞌ u quiꞌ tajquintic a worexeꞌ. Caj tsꞌoc u tajquintic a worex Cꞌuj, mʌꞌ ju pec a worex. Cax a baꞌ cu tar techex, jach chich ij corex.
\v 11 Caꞌ ij carex tiꞌ Cꞌuj: “Jach caremech Cꞌuj. Jariꞌ a techoꞌ, bin a caꞌ a reyintej munt qꞌuin. Jeroj tsꞌoquij, quij.” 
\s Tsꞌoc u tꞌʌn Pedro
\p
\v 12 A jeꞌ juꞌunaꞌ, quin tsꞌibtic techex. Bin u caꞌ tar u pure techex Silvano. Chichin u juꞌunin quin bin in tsꞌibte techex. A Silvanojoꞌ taj caj u yacsaj tu yor. Rajen ic sucuꞌunex. Cu quiꞌ quibic u beyaj. A jeꞌ juꞌunaꞌ in cꞌat in tsꞌibtic techex soc a werex cu yajquinticoꞌonex Cꞌuj, tan u yamticoꞌon. A tenoꞌ caj in tumtaj caj in wiraj jach taj a jeꞌraꞌ. Quiꞌ cʌnantex u tꞌʌn Cꞌuj. Mʌꞌ a pꞌʌtiquex u tꞌʌn Cꞌuj.
\v 13 Tu cu cꞌayob ich u cajar Babilonia, a mac tetaꞌb ten Cꞌuj irechex caj u tetechex ten Cꞌuj. Caj yaꞌarob techex: “Tiꞌ wa yʌnechex?” In chan camsʌwinic Marcos ar in tꞌʌnechex. 
\v 14 Quiꞌ tꞌʌnex tu ca bin a wirex a wet acsʌꞌorirex. Caꞌ quiꞌ quiꞌac a worex, quireꞌ techex yʌnin Jesucristo. Jeroj tsꞌoquij, quij.