\id 2PE
\h 2 PEDRO
\toc1 2 PEDRO
\mt1 A JEꞌ JUꞌUNAꞌ, PACHIR CAJ U CAꞌ TSꞌIBTA PEDRO
\mt2 2 PEDRO
\c 1
\s Rajiꞌ tu tsꞌibtaj Pedro tiꞌ a yacsmʌnob tu yorob
\p
\v 1 A tenoꞌ Simón Pedrojen. Caj in tsꞌibta techex a jeꞌ juꞌunaꞌ. A tenoꞌ u cꞌurewen Jesucristo. Rajiꞌ Jesucristo caj u tuchiꞌten. A tenoꞌ caj in tsꞌibt a jeꞌ juꞌunaꞌ techexaꞌ quireꞌ caj a wacsex ta worex tiꞌ Jesucristo. Rajen taj ij corex cu yiricoꞌonex Cꞌuj yejer ic Jaj Tsꞌurex Jesucristo a mac caj u tacajoꞌonexeꞌ.
\v 2 Quireꞌ a werex Cꞌuj, baxuc a werex Jesús ic Jaj Tsꞌurirex. Rajen in cꞌat jach manan u yamtiquechex Cꞌuj, quireꞌ u yajechex Cꞌuj. In cꞌat jach manan u quiꞌtar a worex tiꞌ Cꞌuj soc mʌnaꞌ baꞌ ca tucrex.
\s Caꞌ ij quirex mac bic tabar a caj u yacsaj tu yor tiꞌ Cꞌuj
\p
\v 3 Mʌꞌ ja wirej, a Cꞌujoꞌ caj u tsꞌaja toꞌonex u mucꞌ. Jach manan u tsoyir Cꞌuj caj u tsꞌaja toꞌonex soc ic manex tu tsoyir. A Cꞌujoꞌ caj u tsꞌaja toꞌonex u mucꞌ soc chʌcaꞌan tan ic sʌjtiquex Cꞌuj. Mʌꞌ ja wirej, caj u tsꞌaja toꞌonex u mucꞌ quireꞌ ij querex Cristo. Rajen a Cꞌujoꞌ caj u tetajoꞌonex soc ij querex rajiꞌ jach carem. Soc ij querex raꞌ u tsoyir Cꞌuj.
\v 4 Rajen a Cꞌujoꞌ caj u toc araj: “Jeꞌ u tsꞌic toꞌonex u mucꞌ quir ic manex tu tsoyir. Quir ic rʌc pꞌʌtiquex, a cꞌasoꞌ a baꞌ cu pachiticob tu yorob a mac a mʌꞌ yerob Cꞌuj.” Caj u toc tsꞌaja toꞌonex a baꞌ caj u toc araj toꞌonex Cꞌuj soc ij cʌniquex Cꞌuj. Mʌꞌ ja wirej, caj u tsꞌaja toꞌonex u tꞌʌn a baꞌ jach tsoyoꞌ bayiriꞌ a jach manan coꞌojoꞌ.
\v 5 Rajen caꞌ a quiꞌ pꞌisex a bʌjex soc mʌꞌ chen ca wacsiquex ta worex. Caꞌ a pꞌisex a bʌjex soc a manex ich u tsoyir xan. Mʌꞌ chen caꞌ a pꞌisex a bʌj soc a manex ich u tsoyir, caꞌ a pꞌisex a bʌj soc a werex a baꞌ u cꞌat Cꞌuj techex. 
\v 6 Mʌꞌ a chen pꞌisiquex a bʌjex soc a werex a baꞌ u cꞌat Cꞌuj techex. Caꞌ a pꞌisex a bʌjex a suꞌsiquex a bʌjex soc mʌꞌ a pachtiquex a cꞌasoꞌ. Mʌꞌ a chen pꞌisiquex a bʌjex a suꞌsiquex a bʌjex soc mʌꞌ a pachtiquex a cꞌasoꞌ. Caꞌ a pꞌisex a bʌjex soc pacachbirechex. Mʌꞌ a chen pꞌisiquex a bʌjex soc pacachbirechexiꞌ. Caꞌ a pꞌisex a bʌjex soc a cʌniquex Cꞌuj xan.
\v 7 Mʌꞌ a chen cʌniquex Cꞌuj. Caꞌ a pꞌisex a bʌjex soc a yajquintiquex a wet acsʌꞌorir. Mʌꞌ a chen pꞌisiquex a bʌj a yajquintex a wet acsʌꞌorir. Caꞌ a pꞌisiquex a bʌj soc a yajquintiquex tu cotor mac.
\p
\v 8 Wa caj a quiꞌ pꞌisex a bʌjex, a quiꞌ cʌniquex a jeꞌ tꞌʌnaꞌ. Jeꞌ a bin manex tu tsoyir. Jeꞌ a quiꞌ cʌniquex a Cꞌujoꞌ. Mʌꞌ ja bin a pꞌʌtex Jesucristo ic Jaj Tsꞌurirex quireꞌ chʌcaꞌan yiric tu cotor mac a werex Jesucristo. 
\v 9 A jeꞌ tꞌʌnaꞌ wa mʌꞌ ta quiꞌ cʌnex irechex a mac a chꞌop u wichoꞌ. Wa irechex a mac a acꞌbirchʌj u wichoꞌ, chen bʌytʌc cu yiric. Mʌꞌ ja wirej, tub tiꞌ bic jawsaꞌb tiꞌ u siꞌpir uch.
\v 10 Rajen in wet acsʌꞌorirechex, mʌꞌ u yʌn tubu techex tu pʌyechex Cꞌuj tu beyaj. Mʌꞌ u yʌn tubu techex quireꞌ caj u tetechex Cꞌuj. Wa ca pꞌisiquex a bʌjex soc mʌꞌ u tubu techex a baꞌ caj in waꞌaraj techex sam. Mʌꞌ ja bin a pꞌʌtex u tꞌʌn Cꞌuj mʌꞌ biqꞌuin ca pꞌʌtiquechiꞌ. 
\v 11 Wa baxuc ca cʌniquexoꞌ, jeꞌ u quiꞌ quiꞌ acsiquechex ic Jaj Tsꞌurirex raꞌiriꞌ ij cʌjtaquirex Jesucristo tu cu bin u reyintej munt qꞌuin.
\p
\v 12 Rajen suꞌsuꞌ quin bin in cꞌase techex tiꞌ u tꞌʌn Cꞌuj, a quin camsiquechex. Cax ta chen toc uꞌyajex, cax ta toc acsex ta worex tiꞌ Cristo.
\v 13 A tenoꞌ quin tucric raꞌ in jach beyaj quir in cꞌasic techex tiꞌ a baꞌ caj in camsechex uch, soc mʌꞌ ju tubur techex hasta quin quimin.
\v 14 Baxuc caj yaꞌar ic Jaj Tsꞌurirex uch. Bin in caꞌ quinsbir a tenoꞌ bajeꞌrer, tabar in quinsaꞌ.
\v 15 Baxuc bajeꞌrer quin cꞌasic techex soc pachir a toc cꞌʌꞌotiquex. Wa jaj ix tʌcoj tabar u cꞌuchur tu qꞌuinin in quimin. Rajen tsꞌajan in wor caꞌ in pꞌʌtechex a baꞌ jeꞌ u cꞌasiquechex tiꞌ in tꞌʌn.
\s A mac caj u yira u waysaꞌb Jesús
\p
\v 16 A tenoꞌ caj in toc araj techex u mucꞌ ic Jaj Tsꞌurirex Jesucristo, soc a werex biquiraꞌ. Mʌꞌ ja wirej, bin u caꞌ ur ich u sasirir. Aroꞌ mʌꞌ raꞌ u bʌjiriꞌ u tꞌʌn xib quir u tusaric tiꞌ u racꞌob. Mʌꞌ rajiꞌ a baꞌ tenob quin chen acsicob tin worob a cu bin tar. Mʌꞌ ja wirej, caj in wirob tin wich caj waysaꞌb Jesús jach tu sasir uch.
\v 17 A tenoboꞌ caj in wirob caj sʌjtaꞌb Jesús ten u Tet Cꞌuj wa ber caj waysaꞌb Jesús ich u joꞌr wits. Mʌꞌ ja wirej, tar u tar u sasirir Cꞌuj ich u muyarir a caj u bobʌst tenob u muyarir caj in wuꞌyob yaꞌaric Cꞌuj: “A jeꞌraꞌ in parar, in jach yaj. Raꞌ cu quiꞌquintic in wor.” Baxuc caj araꞌb ten Cꞌuj ich u joꞌr wits.
\v 18 A tenoboꞌ caj in wuꞌyob u tꞌʌn caꞌanan. Tar u tar u tꞌʌn caꞌanan a tenoboꞌ tiꞌ yʌnenob ich u joꞌr wits yejer ic Jaj Tsꞌurirex. A rayoꞌ u witsir Cꞌuj.
\p
\v 19 Rajen in toc erob, raꞌ jach taj a baꞌ tsecꞌtaꞌb ten yʌjtseqꞌuirob u tꞌʌn Cꞌuj ich u juꞌunin uch, quireꞌ caj u tsecꞌob caꞌ bin tac Cristo. Mʌꞌ ja wirej, a tsꞌibaꞌan u tꞌʌn Cꞌuj a tsꞌibtaꞌb ten yʌjtseqꞌuirob Cꞌuj uch, irob quib, a cu yercꞌacꞌtic ic berex raꞌ quir u yamticoꞌonex soc chʌcaꞌan ic berex hasta cu tar u sastareꞌ cu tar coꞌcoch ich. Rajen ij querex tabar u sastar. Baxuc u tꞌʌn yʌjtseqꞌuirob u tꞌʌn Cꞌuj uch. Rajiꞌ quir u yamticoꞌonex soc u pʌyicob ic berex hasta caꞌ bin uruc ic Jaj Tsꞌurirex. Rajen caꞌ a quibex u tꞌʌn yʌjtseqꞌuirob u tꞌʌn Cꞌuj uch quir u yamtic techex.
\v 20 Caꞌ a quiꞌ sar a xiquinex soc a najtiquex a baꞌ quin waꞌaric. Mʌnaꞌ mac, tuririꞌ cꞌuchaꞌan yor u najtej tu tsꞌibaꞌan u tꞌʌn Cꞌuj wa mʌꞌ yamtaꞌ ten u Tajꞌor u Pixam Cꞌuj.
\v 21 Cꞌaj techex a baꞌ caj u tsecꞌtob u yʌjtseqꞌuirob u tꞌʌn Cꞌuj uch, u bʌjirirob mʌꞌ ju tsecꞌtobiꞌ. Tu chen tsecꞌtob u tꞌʌn Cꞌuj, quireꞌ araꞌb ten u Tajꞌor u Pixam Cꞌuj tiꞌob. Rajen caj u tsecꞌtob a baꞌ araꞌb ten Cꞌuj. 
\c 2
\s Tus yʌjcamsʌyʌjirob u tꞌʌn Cꞌuj
\p
\v 1 Cꞌaj techex wa tiꞌ yʌn uch tus yʌjcamsʌyʌjirob u tꞌʌn Cꞌuj tu qꞌuinin tiꞌ yʌn ic nunquirex uch. Baxuc jeꞌ u caꞌ tarob tus yʌjcamsʌyʌjirob u tꞌʌn Cꞌuj. Jeꞌ u tar tu yʌnechex xan quir u sosoc aric a baꞌ cu yaꞌaric u tꞌʌn Cꞌuj. Bin u yʌnxchun u muc u camsicob aroꞌ. A baywoꞌ, cu jocꞌsicob ic Jaj Tsꞌurirex tu yorob cax rajiꞌ tu boꞌot u boꞌorir u siꞌpirob. Mʌꞌ ja wirej, irob wa mac u cꞌat sep u binob ich cꞌacꞌ.
\v 2 Yaꞌab mac cu bin u cꞌʌmicob a baꞌ camsaꞌb ten a tus yʌjcamsʌyʌjirob u tꞌʌn Cꞌuj. Bin u caꞌob yacs u siꞌpirob a baꞌ jach cꞌas, quireꞌ cu pachticob cꞌas. Rajen bin u caꞌob yaꞌaric cꞌas tiꞌ u tꞌʌn Cꞌuj, cax taj u tꞌʌn Cꞌuj.
\v 3 Quireꞌ cu nepachticob u jaricob u taqꞌuinob a tus yʌjcamsayʌjirob, rajen cu bin u camsiquechex a baꞌ mʌꞌ tajiꞌ tu cu tus camsiquechexob soc u tus jaricob u taqꞌuinob. A Cꞌujoꞌ, a mac a juesoꞌ, tan u toc pajic caꞌ u jʌse, uch tan u pajic u jʌsic soc tiꞌ cu binob satʌriꞌ.
\p
\v 4 Mʌꞌ ja wirej, mʌꞌ jawsaꞌb u siꞌpir ten Cꞌuj yʌjmasirob u tꞌʌn Cꞌuj uch, a caj u yacsob u siꞌpir. Quireꞌ caj jocꞌsaꞌb ten Cꞌuj. Caj cꞌarob yejer mascab ich cꞌacꞌ. Tiꞌ yʌnob ich yacꞌbirir quireꞌ tan u cʌnantaꞌr hasta cu cꞌuchur tu qꞌuinin cu jasʌr mac.
\v 5 Baxuc xan, mʌꞌ jawsaꞌb u siꞌpirob ten Cꞌuj, a tiꞌ cʌjaꞌanob yejer Noé, uch. Chen Noé quireꞌ caj u yacsa tu yor. Rajiꞌ xan, caj u tsecꞌtaj ich u yet cajarob a baꞌ u cꞌat Cꞌuj tiꞌob. Jariꞌ siete winicob yejer Noé caj toc ten Cꞌuj, caj burij ich yocꞌocab. Mʌꞌ ja wirej, a Cꞌujoꞌ, yaꞌar u burur, quireꞌ cu manob tu cꞌasir uch, rajen rʌc quimob.
\v 6 Baxuc xan, mʌꞌ jawsaꞌb u siꞌpirob ten Cꞌuj a mac a cʌjaꞌan tu cajar Sodoma uch. Baxuc xan a mac a cʌjaꞌan tu cajar Gomorra. Rʌc tocaꞌb ten Cꞌuj rʌc erij, chen u taꞌanin pꞌatij. Raꞌ quir u camsic tiꞌ a mac a cꞌasoꞌ, a cu bin cꞌuchur tu qꞌuinin a mac a cʌjaꞌanoboꞌ ich yocꞌocaboꞌ soc mʌꞌ u cʌnicob.
\v 7 Jariꞌ a Lotoꞌ, caj toc ten Cꞌuj tu cajar Sodoma yejer Gomorra, quireꞌ a Lotoꞌ, tsoy yor. Jach choquij yor Lot caj yiraj u manob ich u cꞌasir u yet cajarob.
\v 8 Mʌꞌ ja wirej, yaj yiric Lot u racꞌob, quireꞌ cu tucric u racꞌob. Caj yiraj cꞌas cu beticob. Chen cꞌas cu yubic Lot, quireꞌ rajraꞌ cu yubic quireꞌ tiꞌ cʌjaꞌaniꞌ. Cꞌas cu yubic Lot quireꞌ tsoy yor a Lotoꞌ.
\v 9 A baywoꞌ, ic Jaj Tsꞌurirex quiꞌ yor u yamtic a mac a cu tucric Cꞌujoꞌ soc mʌꞌ ju pʌy u siꞌpir. Bayiriꞌ xan bin u caꞌ u pure ich cꞌacꞌ, a mac a mʌꞌ ju tucre Cꞌujoꞌ soc tiꞌ taroꞌ cu bin u pajicob u qꞌuinin tu cu bin jʌsbirob ten Cꞌuj tu cotor mac.
\p
\v 10 Cꞌaj techex. Jeꞌ u boꞌotic u boꞌorir u siꞌpirob a mac a tan u manob u pachticob cꞌas tu yorob. Jach manan cu bin u boꞌoticob. Jeꞌ u boꞌoticob, quireꞌ mʌꞌ ju quibob u tꞌʌn Cꞌuj xan. Mʌꞌ ju chꞌajob sajquirob tiꞌ Cꞌuj xan. Cu chen tucricob u bʌjiriꞌ: “Jach caremenob.” Tan u pꞌasticob a mac a cu beyajob tiꞌ Cꞌuj ich caꞌanan.
\v 11 Mʌꞌ ja wirej, a robob yʌjmasirob u tꞌʌn Cꞌuj ich caꞌanan a mac noꞌj beyajob. Cax jach manan u mucꞌob quir u tsꞌurintaꞌr ten mac. Mʌꞌ ju taꞌcob u joꞌr mac ich ʌcʌtan ic Jaj Tsꞌurirex. Mʌꞌ u pꞌasticob ich ʌcʌtan ic Jaj Tsꞌurirex xan.
\p
\v 12 A werex a bʌcꞌoꞌ caj tsꞌaꞌb ten Cꞌuj quir ic chuquiquex ij quinsej. Baxucoꞌ, a tus yʌjcamsʌyʌjirob u tꞌʌn Cꞌuj, irob bʌcꞌ, quireꞌ chich u jorob, mʌꞌ ju yube tꞌʌnoꞌ. A baꞌ noꞌj tiꞌ cu yaꞌaricob cꞌasoꞌ rajen bin u caꞌob satʌrob.
\v 13 Quireꞌ robob bin u caꞌ boꞌoticob u boꞌorir tu cu mucꞌyajob quireꞌ caj u yacsob tu siꞌpirob a mac a tu tus camsob. Mʌꞌ ja wirej, cu manob tu cꞌasir, cax chunqꞌuin, quireꞌ mʌꞌ suracobiꞌ. Irob baꞌ cu jach pocꞌar. Irob baꞌ jach tuꞌ, quireꞌ rajraꞌ cu manob tu siꞌpirob. Wa ber pꞌeriꞌob cu janʌnob yejerechex, cu chen tusaricob techex an ten bic taj caj u yasajob tu yorob u tꞌʌn Cꞌuj yejerex. 
\p
\v 14 Mʌꞌ ja wirej, u burur u qꞌuinin cu pachticob tu yorob xquic, soc u manob yejer. Raꞌ cu payicob yejer u wichob quireꞌ mʌꞌ cꞌuchaꞌan yorob u pꞌʌticob xquiquiꞌ. A ray winicoꞌ a mʌꞌ u racꞌoꞌ cu tusaric tiꞌ quireꞌ mʌꞌ ju quiꞌ acsa tu yor u tꞌʌn Cꞌujiꞌ. A ray winicob jach manan tsꞌut. Rajiꞌob cu tus tabsicob mac tu cotor quir u binob ich u siꞌpirob a mac a mʌꞌ chichac yorob tiꞌ u tꞌʌn Cꞌuj. A ray winicob mʌꞌ tsoy tu wich Cꞌuj rajen cu rʌc binob yerar ich cꞌacꞌ.
\v 15 Mʌꞌ ja wirej, robob caj u pꞌʌt u toc berob quir u binob ich Cꞌuj. Bajeꞌrer tiꞌ yʌnob tu berir tu cu bin satʌrob. Caj u chꞌaꞌob u ber a tu chꞌaj Balaam, raꞌ u parar Beor. Cꞌaj wa techex, rajiꞌ a tu pachtaj taqꞌuin a cu bin tsꞌabir tiꞌ quir u betic cꞌas.
\v 16 A Balaamoꞌ mʌꞌ ju betaj a baꞌ caj u tucraj quireꞌ suꞌsaꞌb ten chan tsimin ich ber quireꞌ tꞌan ten chan tsimin Balaam. Tꞌan ten chan tsimin quireꞌ chaꞌb ten Cꞌuj caꞌ jocꞌac u tꞌʌn irej winic cu tꞌʌn. Rajen suꞌsaꞌb. Rajen mʌꞌ ju betaj a baꞌ caj tu tucraj tu yor.
\p
\v 17 Chen a jeꞌ tus yʌjcamsayʌjirob irob yicꞌ jaꞌ tu quic bin ij quirex ij coꞌochex jaꞌ, chen mʌnaꞌ, quireꞌ rʌc sajij. Baxuc xan, irob muyarob, a cu pictaroꞌ ten icꞌ, rajen mʌꞌ ju tar yaꞌarir. A baywoꞌ, yejer a tus yʌjcamsʌyʌjirob, jot, caꞌ jij cacsex tij corex u tꞌʌnob, quireꞌ mʌꞌ ju yamtoꞌonex chichin. Toc araꞌb ten Cꞌuj tu cu binob. Tiꞌ cu binob yacꞌbirir munt qꞌuin.
\v 18 Robob u bʌjiriꞌ, cu yaꞌaricob mun jach caremob, chen jot a baꞌ cu yaꞌaricob, quij Pedro, quireꞌ mʌꞌ baꞌwir tiꞌob. Robob cu tsicbʌticob a baꞌ cu pachticob tu yorob, a cꞌasoꞌ soc a mac a mʌꞌ chichac u yorob tiꞌ u tꞌʌn Cꞌuj cu pachticob xan. Quireꞌ tiꞌ cu bin yubicob u tꞌʌn Cꞌuj soc u putsꞌurob tiꞌ a baꞌ cu yiricob a mac a mʌꞌ yerob Cꞌujoꞌ.
\v 19 Robob a tus yʌjcamsʌyʌjirob u tꞌʌn Cꞌuj cu tus aꞌaricob cꞌuchaꞌan yorob u betej a baꞌ u cꞌatob. Baxuc cu tus aꞌaricoboꞌ tus yʌjcamsʌyʌjirob tiꞌ a mac a cu yacsmʌnob tu yorob. Barej u bʌjiriꞌ mʌꞌ cꞌuchaꞌan yorob a baꞌ u cꞌatoboꞌ quireꞌ cu tsꞌurinticob u siꞌpirob. Mʌꞌ ja wirej, wa ij cꞌat caꞌ ic tsꞌurint a cꞌasoꞌ, raꞌ quic tsꞌurintic xan.
\v 20 Mʌꞌ ja wirej, a mac a teꞌ ich yocꞌocabaꞌ caj pꞌat u siꞌpir quireꞌ yer ic Jaj Tsꞌurirex Jesucristo ij cʌjtaqꞌuirex. Chen caj u caꞌ pacht u siꞌpir tu caꞌten, soc raꞌ cu caꞌ tsꞌurintic tu caꞌten. Jach manan cꞌas aroꞌ, a uchoꞌ, mʌꞌ necꞌasiꞌ cax mʌꞌ toy yer a Jesúsoꞌ.
\v 21 Jach manan tsoyir wa uch mʌꞌ yer u berir tu cu cuxtar munt qꞌuin. Mʌꞌ ja wirej, jach yaj yubic wa mac yer u ber quir u cuxtar munt qꞌuin, pachir caj u pꞌus u pach a baywoꞌ, caj u pꞌʌt u tꞌʌn Cꞌuj.
\v 22 A werex baꞌ u ber tiꞌ a mac, a cu pꞌus u pach tan u pꞌʌt u tꞌʌn Cꞌuj irob a pecꞌob a cu sut quir u retꞌsic u xej. Baxuc cu yaꞌaric. Bayiriꞌ xan, irob a cajij qꞌuecꞌanob, caj tsꞌoc u pꞌobar ten mac, cu wʌcꞌʌs bin u baxtej rucꞌ. Baxuc cu yaꞌaric mac.
\c 3
\s Jeꞌ u caꞌ tar ij cʌjtaquirexeꞌ
\p
\v 1 A jeꞌ juꞌunaꞌ, quin tsꞌibtic techex, in jach yajechex, yejer a tin yʌn batꞌan tsꞌibtaj techex. Caj in cꞌasa techex bic tabar a wacsman ta worex quireꞌ tsoyjij a worex, rajen quin wʌcꞌʌs cꞌasic techex.
\v 2 Bajeꞌrer in cꞌat in cꞌasic techex, soc a cꞌʌꞌotiquex a baꞌ caj u yaꞌarob u yʌjtseqꞌuirob u tꞌʌn Cꞌuj uch. Baxuc quin cꞌasic techex soc a cꞌʌꞌotiquex a baꞌ araꞌb ten ij cʌjtaquirex Jesús, a tin camsob techex ten yejer in wet camsʌwinicob uch.
\p
\v 3 Jach manan soc a werex a baꞌ u ber caꞌ bin tac tu qꞌuinin tabar u xur tꞌʌn. Jun yarob a raꞌ winicoꞌ bin u caꞌob u pꞌastob a baꞌ cu yaꞌaric Cꞌujoꞌ bin u caj u manob a baꞌ cu pachticob tu yorob, a cꞌasoꞌ.
\v 4 A ray u qꞌuininoꞌ bin u caꞌob u cꞌatob tiꞌ a mac a yacsmʌnob tu yorob: “Biquinin mʌꞌ ju tar Jesús an ten bic caj u toc yaꞌaraj uch? A raꞌ qꞌuin caj quim ic nunquir mʌnaꞌ baꞌ u ber ich yocꞌocab, u beriꞌ tiꞌ yʌn tu cotor baꞌ.” Baxuc cu bin yaꞌaricob.
\v 5 Cax baxuc bin u caꞌob yaꞌaricob a ray u qꞌuininoꞌ, quireꞌ mʌꞌ u cꞌat u cꞌʌꞌoticob u beyaj Cꞌuj uch. Mʌꞌ ja wirej, caj araꞌb ten Cꞌuj caꞌ jocꞌac caꞌanan yejer yocꞌocab caj betaꞌb. U ruꞌumin tar u tar ich jaꞌ, a ruꞌumoꞌ, cu cuxtar tiꞌ jaꞌ. Baxuc caj betaꞌb ten Cꞌuj uchoꞌ.
\v 6 Pachir, caj burij ich yocꞌocab an ten bic caj araꞌb ten Cꞌuj uch, rajen caj quimij mac quireꞌ rʌc bint jaꞌ. Raꞌ cu rʌc tubur tiꞌob a baꞌ u ber chꞌic uchoꞌ.
\v 7 Mʌꞌ ja wirej, caj araꞌb ten Cꞌuj xan, bin u caj cꞌuchur tu qꞌuinin wa ber cu bin tocbir a caꞌananoꞌ quet yejer a yocꞌocaboꞌ, a ca wiriquex bajeꞌreroꞌ. Raꞌ u qꞌuininoꞌ xan, a mac a mʌꞌ yerob Cꞌuj, bin u caꞌob tacbir u joꞌrob quireꞌ u siꞌpir. A ray u qꞌuininoꞌ robob bin u caj chꞌejarob. 
\p
\v 8 Uꞌyex baꞌ quin wac in wet acsʌꞌorirechex, a mac in jach yaj. Mʌꞌ u yʌn tubur techex, a Cꞌujoꞌ, mʌꞌ u xac u qꞌuinin an ten bic a toꞌonexoꞌ quic xaquiquex u qꞌuinin. A Cꞌujoꞌ cu yiric tuririꞌ u qꞌuinin irej wa mil yaxqꞌuin. Baxuc xan cu yiric mil yaxqꞌuin an ten bic tuririꞌ u qꞌuinin. Raꞌiriꞌ yiric a Cꞌujoꞌ.
\v 9 Tiꞌ yʌn mac a cu tucricob baj yaꞌaraj ic Jaj Tsꞌurirex mʌꞌ ju tar tiꞌob. Jeꞌ u tareꞌ an ten bic caj yaꞌaraj Jesús uch. Mʌꞌ ja wirej, nemʌꞌ bic cu pajic mac, soc mʌꞌ u satʌr quireꞌ u cꞌat yiric u rʌc cꞌaxicob u yorob caꞌ u pꞌʌt u cꞌasirob.
\p
\v 10 Mʌꞌ ja wirej, a mac a cu yaꞌcric baꞌ, cu cꞌuchur ich yacꞌbirir soc mʌꞌ yer mac ber cu cꞌuchur. Baxuc xan, u qꞌuinin caꞌ bin tac ic Jaj Tsꞌurirex. Mʌnaꞌ mac yer ber cu bin tar. Wa ber caꞌ bin tac, a ray u qꞌuinin tunoꞌ jach manan cꞌam cu bin tar u jum a caꞌananoꞌ, u bʌjiriꞌ cu bin rucꞌur caꞌ bin xuruc tꞌʌnoꞌ. A baꞌ quij quiriquex ich caꞌananoꞌ a cu yercꞌacꞌticoꞌonex acꞌbiroꞌ, bin u caꞌ rʌc erar. U ruꞌumin yejer tu cotor a baꞌ betaꞌb bin u caꞌ rʌc erar xan.
\p
\v 11 Rajen wa tu cotor a jeꞌ cu bin chꞌesaꞌbir biqꞌuinaꞌ caꞌ ij cʌnantex ic bʌj soc mʌꞌ ic pʌyic ic siꞌpirex. Caꞌ ic sʌjtex Cꞌuj.
\v 12 Rajen caꞌ ic pajex u qꞌuinin soc quiꞌ ij corex quireꞌ a Cꞌujoꞌ bin u caꞌ u jʌse tu cotor mac. Toc quiꞌ pʌyex u jer u qꞌuininaꞌ, soc caꞌ tac seb. Mʌꞌ ja wirej, a ray qꞌuininoꞌ u ruꞌumin bin u caj rʌc erar, ti cotor a baꞌ tiꞌ yʌn bin u caj rʌc chꞌejar. Tu cotor a baꞌ cu yercꞌacꞌticoꞌonex caꞌanan, bin u caj rʌc yiqꞌuir xan.
\v 13 Chen a toꞌonexoꞌ tan ic pajiquex u qꞌuinin caꞌ tac u jer ricꞌben caꞌanan yejer u jer ricꞌben ruꞌumin an ten bic caj araꞌb ten Cꞌuj. A ti taroꞌ bin ij caj manex ich u tsoyir Cꞌuj.
\p
\v 14 Quireꞌ tu cotor aroꞌ in wet acsʌꞌorirechex a mac in jach yaj quireꞌ tan a pajiquex caꞌ tac Cristo. Rajen caꞌ a pꞌisex a bʌjex soc a baywoꞌ mʌꞌ jic pʌyex ic siꞌpirex. Soc mʌnaꞌ chichin ic siꞌpirex caꞌ bin iric ten Cꞌuj wa ber ca binex ʌcʌtan tiꞌ Cꞌuj. Mʌꞌ ja wirej, a baywoꞌ tsoy bin u caꞌ yiricoꞌonex a Cꞌujoꞌ.
\v 15 Cꞌʌꞌotej techex, ajeraꞌ ic Jaj Tsꞌurirex u cꞌat caꞌ u tacoꞌonex. Rajen uch tan u pajicoꞌonex caꞌ tacoꞌonex. Mʌꞌ ja wirej, baxuc caj u tsꞌibtaj Pablo techex ij quet acsʌꞌorirex, ic bʌjex Pablo, ic jach yajex xan. Raꞌ tsꞌaꞌb u tucur ten Cꞌuj quir u tsꞌib.
\v 16 Baxucoꞌ, a Pablojoꞌ, cu tsꞌibtic tu cotor u juꞌunin a cu tsꞌibtic tiꞌ u yet acsʌꞌorirob. Chen quireꞌ yʌn baꞌ a cu tsꞌibtic Pablo tu juꞌunin jach yaj ic najtiquex rajen a mac a mʌꞌ quiꞌ camsaꞌb tiꞌ u tꞌʌn Cꞌuj, yejer a mac a mʌꞌ chichac yor tiꞌ u tꞌʌn Cꞌuj. Robob cu cꞌaxic a baꞌ u jach aꞌaric an ten bic caj u cꞌaxob a baꞌ cu jach aꞌaric ich u jer jun xotꞌ u tꞌʌn Cꞌuj. Rajen bin u caj satʌrob quireꞌ baxuc cu beticoboꞌ.
\p
\v 17 A techexoꞌ, a mac a caj in tsꞌibtaj quireꞌ in yajechex. Caj a toc uꞌyex, rajen quiꞌ cʌnant a bʌjex soc mʌꞌ u pʌyicob a berex quir u sʌtiquechex. Mʌꞌ a wacsiquex ta worex tiꞌ u tꞌʌn, a mac a mʌꞌ u najtob a baꞌ cu jach aꞌaric tiꞌ u tꞌʌn Cꞌuj. Mʌꞌ ja wirej, robob mʌꞌ ju yacsob tu yorob.
\v 18 Chen caꞌ ic pꞌis ic bʌjex soc jach manan ij querex u yajoꞌonex ic Jaj Tsꞌurirex Jesucristo, caj u yiraj otsiroꞌonex, rajen tu tacoꞌonex. Caꞌ ic sʌjtex bajeꞌrer bayiriꞌ munt qꞌuin. Jeroj, tsꞌoc u tsicbar Pedro.