\id 1JN
\h 1 JUAN
\toc1 1 JUAN
\mt1 A JEꞌ JUꞌUNAꞌ, CAJ U YɅN BATꞌAN TSꞌIBTA JUAN
\mt2 1 JUAN
\c 1
\s A jeꞌraꞌ u tꞌʌn quir ij cuxtarex
\p
\v 1 A tenoꞌ Juanen quet yejerenob a mac a tuchiꞌtaꞌb ten Jesús ucheꞌ caꞌ in tsꞌibtob techex u juꞌunin u tꞌʌn Jesucristo, a mac toc tiꞌ yʌn uch, u toc chꞌic chunin tiꞌ yʌn uch. A mac tiꞌ yʌn uch, u toc chꞌic chunin tiꞌ yʌn, rajiꞌ u tꞌʌn quir ij cuxtarex munt qꞌuin. Rajiꞌ quin tsꞌibticob a wuꞌyex, a tin wuꞌyob tin xiquin ucheꞌ. Caj in tʌrob uch yejer in cꞌʌb. Caj in jach irob tin wich uch xan.
\v 2 Rajiꞌ caj jocꞌ yes u bʌj, rajiꞌ quir ij cuxtarex caj ij quirex. Rajen taj quin waꞌaricob caꞌ a wuꞌyex. Rajen taj quin tsꞌibticob techex. Quin tsicbʌticob a wuꞌyex a tiꞌ yʌn ich u Tet uch, quireꞌ rajiꞌ quir ij cuxtarex munt qꞌuin. Rajiꞌ caj u yes u bʌj toꞌonex uch.
\v 3 Rajen quin tsicbʌticob a wuꞌyex a baꞌ caj in wirob. Caj in wuꞌyob xan, raꞌ quin tsicbʌticob a wuꞌyex xan. Soc jach taj pꞌeriꞌoꞌonex ij quet manex Cꞌuj. Soc pꞌeriꞌoꞌonex ij quet manex Jesucristo u parar Cꞌuj xan. Soc pꞌeriꞌ ic manex yejer ij quet acsʌꞌorirex xan.
\v 4 Rajiꞌ caj in yʌn batꞌan tsꞌibtob techex sam. Caj in tsꞌibtob techex soc jach manan quiꞌ ij corex.
\s A Cꞌujoꞌ rajiꞌ sasir
\p
\v 5 A jeꞌraꞌ u tꞌʌn Jesucristo a tu camsenoboꞌ. A tu yaꞌaraj tenob caꞌ in tsicbʌtob a wuꞌyex, rajiꞌ a Cꞌujoꞌ sasir. U beriꞌ, rʌc sasir, mʌnaꞌ u cꞌasir a tiꞌoꞌ. Mʌnaꞌ u siꞌpir a Cꞌujoꞌ, mʌꞌ acꞌbir a tiꞌoꞌ.
\v 6 Wa quij cariquex in wet mʌnob Cꞌuj, chen raꞌiriꞌ u qꞌuinin tan ic betiquex a cꞌasoꞌ. Tan ic tusex xan. Mʌꞌ tan ic manex tu tsoyir xaniꞌ.
\v 7 Wa taj tij cꞌʌmex u tꞌʌn Cꞌuj, ij quet manex Cꞌuj yejer u sasirir. Pꞌeriꞌ ij corex, a tij cacsex tij corex xan. Mʌꞌ ja wirej, caj u rʌc jaws ic siꞌpirex, caj quimij Jesús u parar Cꞌuj. Caj u jawsa ic siꞌpirex yejer u qꞌuiqꞌuer Jesús xan.
\p
\v 8 Wa quij cariquex: “Mʌnaꞌ ic siꞌpirex”, chen ic wʌcꞌʌs bʌjiriꞌex tan ic tusariquex quireꞌ quic tucriquex taj aroꞌ. Rajen mʌnaꞌ u tꞌʌn Cꞌuj tij corex.
\v 9 Wa quic toc ariquex tiꞌ Cꞌuj: “Yʌn ic siꞌpirex”, quibej a baꞌ cu yac Cꞌuj quireꞌ taj. Jeꞌ u rʌc jawsic tu cotor ic siꞌpirexeꞌ. Jeꞌ u rʌc jawsic a cꞌas tic betajexoꞌ. Quireꞌ a Cꞌujoꞌ rajraꞌ cu betic a baꞌ jach tsoy tu tꞌʌnoꞌ. 
\v 10 Wa quij cariquex: “Mʌnaꞌ ic siꞌpirex”, aroꞌ iroꞌonex quij cariquex tiꞌ Cꞌuj: “Tus a caꞌ.” Mʌꞌ taj tij cꞌʌmex u tꞌʌn Cꞌujiꞌ.
\c 2
\s A Cristojoꞌ yʌjyaminoꞌonex
\p
\v 1 A tin yʌn tsꞌib techex sam, in chan pararechex, soc mʌꞌ a wacsiquex a siꞌpirex. Cax wa ca cꞌʌs acsiquex a siꞌpirex, yʌn toꞌonex yʌjyaminoꞌonex ʌcatan ich ic Tetex Cꞌuj, Jesucristo u cꞌabaꞌ. Rajiꞌ rajraꞌ cu betic a baꞌ tsoy tu tꞌʌn Cꞌuj. Jeꞌ u tꞌʌnic Cꞌuj toꞌonexeꞌ. 
\v 2 Rajiꞌ Cristo an ten bic tʌmʌn yuc caj quinsaꞌb tiꞌ Cꞌuj quir u boꞌotic ic siꞌpirex. Mʌꞌ chen toꞌonex caj u boꞌot ic siꞌpirexiꞌ, caj u boꞌot u siꞌpirob tu cotor mac yocꞌocab.
\p
\v 3 Rajen wa quij quiꞌ quibiquex a baꞌ cu yaꞌaric toꞌonex Cꞌujoꞌ, jach taj, tun, quic jach manex yejer Cꞌuj. Tan ic jach cʌnantiquex u tꞌʌn Cꞌuj.
\v 4 A mac cu yaꞌaric: “In wer Cꞌuj.” Chen mʌꞌ ju quib a baꞌ cu tsicbʌtic Cꞌuj, mʌnaꞌ tiꞌ u tꞌʌn Cꞌuj. Tus u caꞌ xan. 
\v 5 Barej, a mac a cu quibic u tꞌʌn Cꞌujeꞌ, rajiꞌ cu yajquintic Cꞌuj. Jeroj tun, cꞌuchaꞌan yor, taj cu yajquintic Cꞌuj. Baxucoꞌ, ij querex quic manex yejer Cꞌuj.
\v 6 A mac cu yaꞌaric: “Rajraꞌ cu man yejer Cꞌuj.” Ar u man tu tsoyir irej Jesucristo caj man tu tsoyir uch.
\s Ricꞌben tꞌʌn chen yubmʌn uch
\p
\v 7 In bʌjobechex, mʌꞌ in tsꞌibte techex tiꞌ u jer ricꞌben tꞌʌn. Raꞌiriꞌ tꞌʌneꞌ, a tu toc araj Cristo ucheꞌ. Raꞌiriꞌ tꞌʌn ucheꞌ a yʌnxchun a wacsiquex ta worex ucheꞌ. A ta toc uꞌyex ucheꞌ, raꞌ u tꞌʌn uch xan.
\v 8 Cax uchben, raꞌ quin tsꞌibtic techex ricꞌben weꞌ. Mʌꞌ ja wirej, iraꞌan uch, quireꞌ a baꞌ cu yiric Cristo uch, baxuc xan iraꞌan tu yʌnechex quireꞌ a mac mʌꞌ yerob jach Cꞌuj tan u pꞌʌticob u tus cꞌuj tu cu cꞌujinticob uch. Jach taj u tꞌʌn tan u cꞌuchur bajeꞌrer, rajiꞌ cu yubicob.
\p
\v 9 Rajen a mac a cu tusaric caj u yacsaj tu yor, chen wa cu pꞌactic a tu yacsaj tu yor, u beriꞌ bajeꞌrer mʌꞌ ju jach acsaj tu yoriꞌ.
\v 10 A mac a tu quiꞌ acsaj tu yor u tꞌʌn Cꞌuj, a mac a cu quiꞌ yajquintic u yet acsʌꞌorirob, rajen mʌnaꞌ baꞌ yʌn quir u yacsic u siꞌpir u racꞌob.
\v 11 Barej a mac u pꞌactic u yet acsʌꞌorirob cu man tu cꞌasiroꞌ. Mʌꞌ yer baꞌ u siꞌpir yʌniꞌ quireꞌ mʌnaꞌ u xiquin, mʌꞌ ju yube tꞌʌn.
\p
\v 12 Rajen tan in tsꞌibtic techex in chan pararechex quireꞌ Cꞌuj caj u jawsaj toꞌonex ic siꞌpirex quireꞌ quimij Jesucristo.
\v 13 A xiboꞌ caj u yʌn acsaj tu yor ucheꞌ, caj in tsꞌibta techex. Rajen caj in tsꞌibta techex quireꞌ a werex Cꞌuj, a mac a tiꞌ yʌn tu yʌnxchun tu cotor baꞌ ucheꞌ. Caj in tsꞌibte techex a tan tu yacsic tu yor, a chichanoꞌ quireꞌ mʌꞌ ja sip tu wensaquechex quisinoꞌ.
\p Caj in tsꞌibta techex in chan pararechex, quireꞌ a werex Cꞌuj a Tetex.
\v 14 A xiboꞌ caj u yʌn acsaj tu yor ucheꞌ, caj in tsꞌibta techex quireꞌ a werex Cꞌuj, a mac tiꞌ yʌn tu yʌnxchun tu cotor baꞌ ucheꞌ. Caj in tsꞌibta techex tiꞌ a chichanoꞌ, a tan tu yacsic tu yoreꞌ quireꞌ jach chich a muqꞌuex. Mʌꞌ ja wirej, rajraꞌ ca tucriquex u tꞌʌn Cꞌuj, rajen jach chich a muqꞌuex. Rajen mʌꞌ ja chaꞌ u wensiquex quisiniꞌ.
\p
\v 15 Mʌꞌ a yʌn pachtiquechex a betiquex a baꞌ cu beticob, a mac a cu manob tu cꞌasiroꞌ. Mʌꞌ a yʌn pachtiquechex a baꞌ yʌn yocꞌocab a baꞌ jach cꞌas xanoꞌ. Wa tiꞌ yʌn mac cu pachtic baꞌ yocꞌocab, mʌꞌ ju yajquinte u Tet Cꞌuj.
\v 16 A baꞌ cu pachtic tu yoroꞌ, mʌꞌ tiꞌ u tar ich Cꞌuj. Tar u tar ich yocꞌocab. A baꞌ yʌn tu cotor yocꞌocab, wa baꞌ cꞌasir yʌn tu yorob. A cu pachticobeꞌ, a cu yiric winic tu wich, mʌꞌ tiꞌ cu tar ich Cꞌuj. A baꞌ yʌn tu yoririꞌeꞌ. A ju cꞌat irbir ten u racꞌob quireꞌ u baꞌtac, mʌꞌ tiꞌ u tar ich Cꞌuj, tar u tar ich yocꞌocab.
\v 17 Yet bin u xur tu cotor ich yocꞌocab. A baꞌ cꞌasir cu pachticob yocꞌocab. Cax bajeꞌrer tabar u xur. Barej a mac cu betic a baꞌ tsoy tu wich Cꞌuj, munt qꞌuin bin u caꞌ cuxtarob.
\s A baꞌ quiriꞌ taj
\p
\v 18 Tabar u xur tꞌʌn in chan pararechex. A uchoꞌ, a wuꞌyamʌnechex bin u caꞌ tar a cu pꞌacticob Cristojeꞌ. A bajeꞌrer, toc tiꞌ yʌn yaꞌab a cu jach pꞌacticob Cristojeꞌ. Rajen ij querex tabar u xur tꞌʌn.
\v 19 Mʌꞌ ja wirej, a cu pꞌacticob Cristojeꞌ, mʌꞌ jach taj caj u cꞌʌmob u tꞌʌn Cꞌuj yejeroꞌonexiꞌ. Rajen caj u pꞌʌtajoꞌonex. Wa jach taj caj u cꞌʌmob u tꞌʌn Cꞌuj ucheꞌ, mʌꞌ ju pꞌʌtajoꞌonexiꞌ. Tu pꞌʌtajoꞌonex soc chʌcaꞌan yiric tu cotor mac. Soc chʌcaꞌan yiric jach taj mʌꞌ u cꞌʌmob u tꞌʌn Cꞌuj yejeroꞌonex. 
\p
\v 20 Quireꞌ tsꞌaꞌb techex ten Cristo u Tajꞌor u Pixam Cꞌuj rajen a werex a tajoꞌ. Mʌꞌ ja wirej, taj caj a cꞌʌmex u tꞌʌn Cꞌuj.
\v 21 A werex a baꞌ jach taj, rajen caj in tsꞌibtaj techex. Wa mʌꞌ a werex a baꞌ mʌꞌ taj caꞌcheꞌ, mʌꞌ jin tsꞌibta techexiꞌ. Mʌꞌ ja wirej, a baꞌ cu tus, mʌꞌ ju yʌnxchun u tar tiꞌ a baꞌ jach taj.
\v 22 Cꞌʌꞌotex a maqueꞌ tus u caꞌ, rajiꞌ cu yaꞌaric: “A Jesúsoꞌ, mʌꞌ rajiꞌ Cristojiꞌ, a mac tuchiꞌtaꞌb ten Cꞌuj quir u cʌjtar yejeroꞌonex.” Rajiꞌ a cu pꞌacticob Cristojoꞌ, bayiriꞌ cu pꞌactic u Tet Cꞌuj, xan.
\v 23 Tu cotor mac a mʌꞌ ju cꞌʌꞌot u parar Cꞌuj wa Cristo, baxuc xan mʌꞌ ju cꞌʌꞌot Cꞌuj. Chen a mac cu cꞌʌmic Jesús, u parar Cꞌuj xan, baxuc xan u cꞌʌmʌn u Tet Cꞌuj.
\p
\v 24 Quiꞌ cʌnantex u jach tsoyir u tꞌʌn Cꞌuj ta pixamex. A ta yʌn uꞌyexoꞌ caj u tsecꞌtob u tꞌʌnob techex uch. A baꞌ caj a wuꞌyex caj u yʌnxchun u tsecꞌticob a wuꞌyex uch, quiꞌ cʌnantex ta pixamex. Soc pꞌeriꞌ a worex yejer Cꞌuj yejer u parar Cꞌuj xan.
\v 25 Quireꞌ caj u toc araj toꞌonex Jesucristo jeꞌ u tsꞌic toꞌonex caꞌ cuxracoꞌonex munt qꞌuineꞌ.
\p
\v 26 Caj in tsꞌibta techex quireꞌ tabar u tus aric techex mac.
\v 27 Mʌꞌ ja wirej, caj a cꞌʌmex u Tajꞌor u Pixam Cꞌuj, quireꞌ caj u tsꞌaja techex u Tajꞌor u Pixam Cꞌuj Jesucristo. Rajen mʌꞌ baꞌwir u jer quir u camsiquechex, quireꞌ u bʌjiriꞌ u Tajꞌor u Pixam Cꞌuj caj u camsechex u tꞌʌn. A baꞌ cu camsic techexoꞌ taj. Mʌꞌ tus, taj u caꞌiꞌ, quij. Rajen quibex u tꞌʌn u Tajꞌor u Pixam Cꞌuj soc pꞌeriꞌ a worex yejer Cristo.
\p
\v 28 Soc chichex a worex tiꞌ Cꞌuj, in chan pararechex. Pꞌeriꞌquint a worex yejer Cꞌuj bajeꞌreraꞌ, soc mʌꞌ a chꞌic suraquirex tiꞌ Cristo caꞌ bin tac quir a wiriquex ta wichex.
\v 29 Quireꞌ a jach erex a Cristojoꞌ, rajiꞌ rajraꞌ cu betic a baꞌ tsoy tu tꞌʌn Cꞌuj. Rajen a werex a mac a rajraꞌ cu betic a baꞌ tsoy tu tꞌʌn Cꞌuj, bayiriꞌ rajiꞌ u parar Cꞌuj xan.
\c 3
\s A toꞌonexoꞌ u pararoꞌonex Cꞌuj
\p
\v 1 Irex mun u caꞌ cu yajquinticoꞌonex ic Tetex Cꞌuj. Mʌꞌ ja wirej, mun u caꞌ cu yajquinticoꞌonex quireꞌ cu tꞌʌnicoꞌonex u pararoꞌonex Cꞌuj. Rajiꞌoꞌonex, rajen jach taj u pararoꞌonex Cꞌuj. Rajen a mac a mʌꞌ yerob Cꞌujiꞌ mʌꞌ u cꞌʌꞌomʌnoꞌonexiꞌ quireꞌ mʌꞌ yerob Cꞌuj xaniꞌ.
\v 2 In bʌjobechex, in jach yajechex a bajeꞌrereꞌ u pararechex Cꞌuj. Chen mʌꞌ ju yesaj toꞌonexiꞌ bic quic bin ic betexiꞌ caꞌ bin cꞌuchuc tu qꞌuinin. Chen ij querex caꞌ bin cꞌuchuc tu qꞌuinin u tar Jesucristo bajenoꞌonex Jesús, quij. Quireꞌ jeꞌ ij quiriquexeꞌ jach taj Cristo baxuc Cꞌujoꞌ. 
\v 3 Rajen tu cotor a yacsmʌnob tu yorobeꞌ a cu pajicob Cristojeꞌ. Cu quiꞌ cʌnantic u bʌj soc mʌꞌ u yocar u siꞌpir, soc mʌnaꞌ u siꞌpir bajen Cristojeꞌ.
\p
\v 4 Mʌꞌ ja wirej, tu cotor mac cu yacsic u siꞌpir cu cꞌasquintic u tꞌʌn Cꞌuj. A ju siꞌpiroꞌ, rajiꞌ cꞌasquintic u tꞌʌn Cꞌuj.
\v 5 A toc erex tarij Cristo quir u rucꞌsic ic siꞌpirex. Mʌꞌ ja wirej, a werex mʌnaꞌ u siꞌpir a Cristojeꞌ.
\v 6 Rajen, tuneꞌ, tu cotor a yacsmʌnob tu yorobeꞌ yet manob Cristoj. Mʌꞌ ju naj acs u siꞌpir. A najij u yacsic u siꞌpiroꞌ, mʌꞌ yer Cꞌujiꞌ, mʌnaꞌ chichin yerob Cꞌujiꞌ. Mʌꞌ ju najta Cꞌuj.
\v 7 In chan pararechex, mʌꞌ a chaꞌic u tus aric techex a ju cꞌat yiric a wacsiquechex a siꞌpirexeꞌ. Cꞌʌꞌotex a mac a rajraꞌ cu betic a baꞌ tsoy tu tꞌʌn Cꞌuj, rajiꞌ toc tsoy, an ten bic Cristo rajiꞌ toc tsoy.
\v 8 A mac naniꞌ u yacsic u siꞌpir, rajiꞌ u parar quisin. Mʌꞌ ja wirej, u toc chunin yʌn u siꞌpir a quisinoꞌ. Rajen tarij Cristo quir u rucꞌsic toꞌonex quisin, soc mʌꞌ rajiꞌ ic tsꞌurirex quisiniꞌ.
\p
\v 9 A mac u parar Cꞌujoꞌ mʌꞌ nani yacsic u siꞌpiriꞌ, quireꞌ tsꞌaꞌb u cuxtar ten Cꞌuj. Rajen mʌꞌ ju cꞌʌs acs u siꞌpir, chichin. Mʌꞌ ja wirej, u parar Cꞌuj.
\v 10 Bic tabar a werex wa ju parar Cꞌuj? Bic tabar a werex wa ju parar quisin? Mʌꞌ ja wirej, tu cotor mac, a mʌꞌ u yajquint u yet acsʌꞌorirob, mʌꞌ taj a baꞌ cu yiricoꞌ. Mʌꞌ u parar Cꞌujiꞌ.
\s Caꞌ ic rʌc yajquintex ic bʌjex
\p
\v 11 Cꞌʌꞌotex a baꞌ tij cuꞌyex caj u yʌnxchun u tsecꞌtic ucheꞌ. Caj u yaꞌaraj Jesús: “Caꞌ ic rʌc pacran yajquintex ic bʌjex.”
\v 12 Mʌꞌ a yʌn cʌniquex Caín a tu quinsaj yitsꞌinoꞌ quireꞌ rajiꞌ bajen quisineꞌ. Biquinin caj u quinsaj yitsꞌin? Mʌꞌ ja wirej, a Cainoꞌ, cꞌas caj u toc betaj uch, chen a yitsꞌinoꞌ, toc tsoy caj u betaj uch.
\p
\v 13 Rajen in bʌjobechex mʌꞌ u yʌn jacꞌʌr a worex tiꞌ a mʌꞌ yacsmʌnob tu yorobeꞌ wa cu pꞌactiquechex.
\v 14 Ic jach erex tu masoꞌonex Cꞌuj soc mʌꞌ jij quiminex. Caj masoꞌonex Cꞌuj quir ij cuxtarex uch. Rajen a werex quireꞌ ca yajquintiquex a wet acsʌꞌorirex. A mac a mʌꞌ ju yajquint u yet acsʌꞌorireꞌ mʌꞌ masaꞌb tiꞌ quiminiꞌ aroꞌ.
\v 15 Rajiꞌ yʌjquinsir mac a cu pꞌactic u yet acsʌꞌorirob. A werex, a mac u cꞌat u quinsic u yet acsʌꞌorirob, mʌꞌ ju quiꞌ acsa tu yoriꞌ quir u cuxtar munt qꞌuiniꞌ.
\v 16 Rajen ij querex cu quiꞌ yajquintic toꞌonex a Cꞌujoꞌ, quireꞌ quimij toꞌonex Cristo. Bayiriꞌ toꞌonex, jaj ix tʌco wa tsoy tu tꞌʌn Cꞌuj, caj quimicoꞌonex tiꞌ ij quet acsʌꞌorirex xan quireꞌ quic yajquintiquex a tiꞌoboꞌ. 
\v 17 A mac a yʌn tiꞌ yaꞌab u baꞌtaqueꞌ, yiric mʌnaꞌ tiꞌ u baꞌtac u yet acsʌꞌorirob. Mʌꞌ ju yajquintej wa mʌꞌ ju tsꞌaja tiꞌ. Ca wiric, mʌꞌ taj cu yajquintic Cꞌujiꞌ. Mʌꞌ patar yaꞌariquiꞌ: “In yaj Cꞌuj”, quij.
\v 18 In chan pararechex, caꞌ ij quesex taj caj ic yajquintaj Cꞌuj. Mʌꞌ chen jariꞌ ij cariquex. Caꞌ ij quesex taj quireꞌ an ten bic tabar quic betex baꞌ.
\s Chichquinte a worex tiꞌ Cꞌuj
\p
\v 19 Quireꞌ a jeꞌraꞌ, jeroj, quic yajquintiquex mac taj. Bayiriꞌ mʌꞌ jic tus arej ic yajquintiquex mac. Jeroj, rajiꞌ Cꞌuj yʌninoꞌonex, a mac tajoꞌ. Rajen quij cuꞌyiquex quiꞌ yor ic pixamex wa ber caꞌ bin xicoꞌonex ʌcʌtan Cꞌuj.
\v 20 Cax a wʌcꞌʌs pixamex cu pʌqꞌuic a pachex: “Mʌꞌ u jawsic a siꞌpirex”, a Cꞌujoꞌ jeꞌ u jawsic a siꞌpirexeꞌ quireꞌ jach carem a Cꞌujoꞌ. A toꞌonexoꞌ, mʌꞌ jach caremex ic pixamexiꞌ a toꞌonexoꞌ. A Cꞌujoꞌ yer baꞌ tu cotor.
\v 21 Rajen in bʌjobechex in jach yajechex wa mʌꞌ u pʌqꞌuic ic pachex, ic wʌcꞌʌs pixamex caꞌ bin tsicbanʌcoꞌonex yejer Cꞌuj, toc tsoy ij corex ij cuꞌyiquex ʌcʌtan ich Cꞌuj.
\v 22 Rajen rajiꞌ cu tsꞌic toꞌonex tu cotor a baꞌ quij cꞌatiquex tiꞌ, quireꞌ wa bej quij quibex u tꞌʌn, quireꞌ quic betiquex caꞌ quiꞌac yor Cꞌuj.
\v 23 A jeꞌraꞌ u tꞌʌn caꞌ ij quibex, caꞌ ij quibex u tꞌʌn u parar Jesucristo. Caꞌ ic pacran yajquintex ij quet acsʌꞌorirex quireꞌ rajiꞌ arej caꞌ ic yajquintex.
\v 24 A mac a cu quibic u tꞌʌn Cꞌuj, yet man Cꞌuj. Bayiriꞌ xan, u yet manob Cꞌuj. Ij cꞌʌꞌotex ij quet manex a Cꞌujoꞌ quireꞌ caj u tsꞌa toꞌonex u Tajꞌor u Pixam Cꞌuj caj ij cacsex tij corex tiꞌ Cꞌuj.
\c 4
\s A mac taj cu camsic u tꞌʌn Cꞌuj, a maqueꞌ mʌꞌ taj cu camsic u tꞌʌn Cꞌuj
\p
\v 1 In bʌjobechex, in jach yajechex, mʌꞌ a yʌn quibiquechex tu cotor mac. Mʌꞌ a yʌn quibic a baꞌ cu camsic tiꞌ u tꞌʌn Cꞌujoꞌ. Tumt a wirej wa yʌn u Tajꞌor u Pixam Cꞌuj wa mʌnaꞌ u Tajꞌor u Pixam Cꞌuj. Mʌꞌ ja wirej, tan u pimtar u tus aricob ich yocꞌocab a cu tus camsicob u tꞌʌn Cꞌujoꞌ.
\v 2 Wa baxuc cu yaꞌaric: “A jeꞌraꞌ u parar Cꞌuj, Jesucristo, tarij ich yocꞌocab. Caj u chꞌaj u winiquirir baxuc toꞌonex”, aroꞌ taj cu camsic, quireꞌ yamtaꞌb ten u Tajꞌor u Pixam Cꞌuj.
\v 3 Wa mac cu tar tu yʌnechex mʌꞌ ju cꞌʌꞌotaj tarij Jesús, rajiꞌ cu tus aꞌaric: “Mʌꞌ ju chꞌaj u winquirir baxuc toꞌonex”, aroꞌ mʌꞌ tuchiꞌtaꞌb ten Cꞌujiꞌ. A mac mʌꞌ taj cu camsic, cu pꞌactic Cristo. A ta toc uꞌyex uch: “Bin u caꞌ tar u camsic a mʌꞌ tajoꞌ.” Bajeꞌreraꞌ rajiꞌ tarij yocꞌocab a mʌꞌ taj cu camsicoꞌonexoꞌ.
\p
\v 4 Cꞌuj yʌninechex in chan pararechex. Mʌꞌ ja wirej, u pararechex Cꞌuj. Rajen mʌꞌ cꞌuchaꞌan yorob u tus camsiquechex a cu tusoꞌ. Mʌꞌ ja wirej, a mac a acaꞌan techexoꞌ, jach chich u mucꞌ, quireꞌ rajiꞌ u Tajꞌor u Pixam Cꞌuj. A mac mʌꞌ taj cu camsicoꞌonexoꞌ mʌꞌ chich u muqꞌuiꞌ, quireꞌ toc acaꞌan a tiꞌoboꞌ a quisinoꞌ, a mac tiꞌ yʌnob ich yocꞌocabiꞌ.
\v 5 Rajiꞌob yʌninob ich yocꞌocab rajen cꞌas. Rajen cu yaꞌaricob baꞌ. Rajen tsoy yubicob yet cꞌasirob ich yocꞌocab.
\v 6 Chen rajiꞌ yʌninoꞌonex Cꞌuj quireꞌ u pararoꞌonex Cꞌuj. A mac cu cꞌʌꞌotic Cꞌujoꞌ cu yubicoꞌonex. A mac a mʌꞌ ju cꞌʌꞌotej Cꞌujoꞌ mʌꞌ ju yuboꞌonex. Rajen cꞌuchaꞌan ij corex ij cꞌʌꞌotex a mac taj cu camsicoꞌonexeꞌ. Rajen cꞌuchaꞌan ij corex ij cꞌʌꞌotex a mac cu tus camsicob u tꞌʌn Cꞌujoꞌ.
\s A Cꞌujoꞌ u yajoꞌonex
\p
\v 7 In bʌjobechex in jach yajechex caꞌ ic pacran yajquintex ic bʌjex, quireꞌ Cꞌuj cu yajquinticoꞌonex. A mac cu yajquintic yet acsʌꞌorir, rajiꞌ u parar Cꞌuj. Rajiꞌ yet man Cꞌuj.
\v 8 A mac mʌꞌ ju yajquint u yet acsʌꞌorir mʌꞌ yer Cꞌujiꞌ quireꞌ Cꞌuj cu yajquinticoꞌonex.
\v 9 Baxuc a jeꞌraꞌ, Cꞌuj cu yajquinticoꞌonex caj u tuchiꞌtaj u parar tuririꞌ ich yocꞌocab, soc yʌn ij cuxtarex munt qꞌuin tiꞌ Jesús.
\v 10 Caj u yesaj techex bic u yajquintiquechex Cꞌuj. Rajen caj u tuchiꞌt u parar Cꞌuj, quir u quimin, quir u jawsic ic siꞌpirex. Cax mʌꞌ tic yajquintex Cꞌuj a toꞌonexoꞌ. Chen Cꞌuj caj u yajquin toꞌonex.
\p
\v 11 Baxuc aroꞌ in chan pararechex, wa Cꞌuj, cu yajquinticoꞌonex rajen xan caꞌ ic pacran yajquintex ic bʌjex.
\v 12 Mʌnaꞌ mac u jach yirmʌn Cꞌuj tu wich. Wa quic pacran yajquintiquex ic bʌjex. Ij quet manex Cꞌuj, tiꞌ yʌn Cꞌuj tij corex. A baywoꞌ, taj caj ij quibex u tꞌʌn, wa quic yajquintiquex ij quet acsʌꞌorirex.
\v 13 Bic a jach etiquex wa a wet man Cꞌuj? Ic jach erex quireꞌ, caj u tsꞌaj toꞌonex u Tajꞌor u Pixam Cꞌuj, soc tiꞌ yʌn tic pixamex.
\v 14 Tij quirex tij quich caj u tuchiꞌtaj u parar Cꞌuj, Jesucristo, quir u taquic tu cotor mac. Raꞌ quic tsecꞌtiquex tiꞌ tu cotor mac xan.
\v 15 Wa mac cu yaꞌaric tiꞌ tu cotor mac: “U parar Cꞌuj, a Jesúsoꞌ”, rajiꞌ xan yet man Cꞌuj. Bayiriꞌ xan, a Cꞌujoꞌ, ij quet manex Cꞌuj xan.
\p
\v 16 A Cꞌujoꞌ tij cꞌʌꞌotex caj u yajquintoꞌonex. Tij cacsex tij corex caj u yajquintoꞌonex Cꞌuj. A Cꞌujoꞌ, u yajoꞌonex. A mac cu yajquintic Cꞌujoꞌ yet man Cꞌuj xan.
\v 17 Baxuc arayoꞌ jeꞌ u cꞌuchur tu qꞌuinin taj quic yajquintiquex Cꞌuj. Soc tꞌajoꞌonex caꞌ bin xicoꞌonex ʌcʌtan Cꞌuj caꞌ bin xuruc tꞌʌn. Mʌꞌ ja wirej, tiꞌ yʌnoꞌonex ich yocꞌocab bajenob Jesucristo quireꞌ quic pacran yajquintiquex ic bʌjex. Quireꞌ ij quet manex Cꞌuj.
\v 18 A mac cu yajquintic Cꞌuj mʌꞌ sajʌquiꞌ. Baꞌwir cu sʌjtic Cꞌuj? Mʌꞌ ja wirej, taj cu yajquintic mac Cꞌuj. Cu chꞌic sajquir tiꞌ Cꞌuj quireꞌ cu tucric cu tsꞌiquintaꞌr ten Cꞌuj. Rajen cu chꞌic sajquir tiꞌ, quireꞌ mʌꞌ cꞌuchuc tu qꞌuinin taj cu yajquintic Cꞌuj. A taj cu yajquintic Cꞌujoꞌ, cu jawsic u sajquirir.
\p
\v 19 Rajen a toꞌonexoꞌ tic yajquintex Cꞌuj quireꞌ a Cꞌujoꞌ rajiꞌ tu yʌn batꞌan yajquintaj toꞌonex.
\v 20 Wa tiꞌ yʌn mac cu tus aric u yajquintej Cꞌuj, chen tiꞌ toy cu pꞌactic u yet acsʌꞌorir. Cu jach tus aroꞌ. A mac mʌꞌ ju yajquintob u bʌjob, a cu yiriqueꞌ, bic tabar u yajquintic Cꞌuj, a mʌꞌ toy yiraj Cꞌujoꞌ.
\v 21 A Cristojoꞌ a caj u tsꞌaj toꞌonex u tꞌʌn Cꞌuj, rajiꞌ caj u yaꞌaraj: “A mac cu yajquintic Cꞌuj caꞌ u yajquin tu bʌjob xan.”
\c 5
\s A yacsmʌnob tu yorobeꞌ cꞌuchaꞌan yorob u pꞌʌticob cꞌas 
\p
\v 1 A mac cu yacsic tu yor tiꞌ Jesús yer Cristo tuchiꞌtaꞌb ten Cꞌuj. Rajen a caj u yacsob tu yorob tiꞌ Jesús. Robob u parar Cꞌuj mʌꞌ ja wirej, a cu yajquintic u Tet, baxuc cu yajquintic u pararob u Tet xan.
\v 2 Wa ber caꞌ bin ic yajquintex Cꞌuj baxuc xan, a baꞌ u cꞌat Cꞌuj quic betiquex tiꞌ. Ij querex, tun, ic yajquintex ij quet acsʌꞌorirex.
\v 3 A mac cu yajquintic Cꞌujoꞌ caꞌ u quibej a baꞌ cu yaꞌaraꞌ tiꞌ u tꞌʌn. U tꞌʌn a cu quibicoꞌ, cꞌuchaꞌan yor tiꞌob. 
\v 4 Mʌꞌ ja wirej, tu cotoroꞌonex u pararoꞌonex Cꞌuj cꞌuchaꞌan ij corex ic pꞌʌtiquex a cꞌasoꞌ ich yocꞌocab. Tij cacsex tij corex rajen cꞌuchaꞌan ij corex tiꞌ.
\v 5 Jariꞌ a mac a cu yacsic tu yor tiꞌ Jesús, quireꞌ yer rajiꞌ u parar Cꞌuj. Arayoꞌ cꞌuchaꞌan yorob u pꞌʌticob u cꞌasir ich yocꞌocab.
\s Rajiꞌ u parar Cꞌuj cu tsicbʌtic u Tajꞌor u Pixam Cꞌuj
\p
\v 6 Caj tarij caꞌanan Jesús, caj acsaꞌb jaꞌ tu joꞌr ten Juan. Baxuc caj quimij ich cruz xan. Mʌꞌ chen tarij quir u yacsaꞌ jaꞌ tu joꞌr. Tarij quir u quimin xan. Quireꞌ taj caj yaꞌaraj toꞌonex u Tajꞌor u Pixam Cꞌuj. Quireꞌ u bʌjiriꞌ caj u yaꞌaraj, rajen taj.
\v 7 Tiꞌ yʌn mʌnaꞌ u nupꞌob ich caꞌanan, a cu yaꞌaric taj tiꞌ Jesucristo, raꞌ u parar Cꞌuj. A jeꞌraꞌ, tiꞌ yʌn ic Tetex Cꞌuj. A jeꞌraꞌ tiꞌ yʌn, Jesucristo. A jeꞌraꞌ tiꞌ yʌn, u Tajꞌor u Pixam Cꞌuj. Cax mʌnaꞌ u nupꞌ chen tuririꞌ a cu tsicbar toꞌonexoꞌ tiꞌ Jesucristo, raꞌ u parar Cꞌuj quij.
\v 8 Tiꞌ yʌn mʌnaꞌ u nupꞌob teraꞌ ich yocꞌocab. A jeꞌraꞌ a cu tsicbʌtic taj tiꞌ Jesusoꞌ, u Tajꞌor u Pixam Cꞌuj. A jeꞌraꞌ, tu acsaꞌb jaꞌ tu joꞌr. A jeꞌraꞌ, tu quimij ich cruz. A mʌnaꞌ u nupꞌob pꞌeriꞌob cu camsicoꞌonex, rajiꞌ u parar Cꞌuj Jesucristo.
\v 9 Caj ij cꞌʌm u tꞌʌn a macoꞌ, chen jach manan u tꞌʌn a Cꞌujoꞌ. Rajen caꞌ a cꞌamex a baꞌ cu yaꞌaric Cꞌuj tiꞌ u parar Jesucristo. Quireꞌ taj cu yaꞌaric u tꞌʌn.
\v 10 A mac a caj u yacsa tu yor tiꞌ u parar Cꞌuj u bʌjiriꞌ yer yʌn u tꞌʌn Cꞌuj tu yor. A mac mʌꞌ ju yacsa tu yor tiꞌ Cꞌuj, tan yac tiꞌ Cꞌuj: “Tus a caꞌ.” Quireꞌ mʌꞌ ju yacsa tu yor u tꞌʌn a baꞌ caj u yaꞌaraj Cꞌuj tiꞌ u Parar.
\v 11 A jeꞌraꞌ caj u tsꞌa toꞌonex ij cuxtarex munt qꞌuin. Tiꞌ yʌn ich u parar Cꞌuj quir ij cuxtarex munt qꞌuin. Baxuc caj u yaꞌara toꞌonex Cꞌuj, a werex rajiꞌ taj.
\v 12 Wa mac mʌꞌ ju cꞌʌm u parar Cꞌuj mʌnaꞌ tiꞌ u cuxtar. Chen a mac caj u cꞌʌm u parar Cꞌuj yʌn u cuxtar munt qꞌuin.
\s Tabar u tsꞌocar u tsꞌib Juan
\p
\v 13 Rajen quin tsꞌibtic techex soc a werex toc yʌn techex quir a cuxtarex munt qꞌuin, quireꞌ ta wacsex ta worex tiꞌ u parar Cꞌuj.
\p
\v 14 Rajen chich ij corex ic tꞌʌniquex Cꞌuj, quireꞌ ij querex cu yubicoꞌonex Cꞌuj. Cu yubicoꞌonex wa tsoy tu tꞌʌn Cꞌuj, rajen chich ij corex ic tꞌʌniquex Cꞌuj.
\v 15 Ij querex cu yubic wa ber ic tꞌʌniquex. Mʌꞌ ja wirej, ij querex taj cu yubicoꞌonex. Rajen jeꞌ u tsꞌic toꞌonex a baꞌ quij cꞌatiquex tiꞌ Cꞌuj cax a baꞌ quij cꞌatiquex tiꞌ Cꞌuj.
\p
\v 16 Wa yʌn mac caj u yira u yacsic u siꞌpir u yet acsʌꞌorir, wa raꞌ u siꞌpir a mʌꞌ u chabʌr u jach quimin ten Cꞌuj. Tsoy a tꞌʌniquex Cꞌuj tiꞌ, jeꞌ u jawsaꞌr u siꞌpir ten Cꞌuj a tiꞌoꞌ. Yʌn u siꞌpir mac a cu chabʌr u jach quimin ten Cꞌuj, mʌꞌ tsoy a tꞌʌniquex Cꞌuj tiꞌiꞌ.
\v 17 Tu cotor a cꞌasoꞌ raꞌ u siꞌpir. Chen tiꞌ yʌn a cꞌasoꞌ raꞌ mʌꞌ ju chabʌr u jach quimin ten Cꞌuj.
\p
\v 18 A mac a caj u yacsaj tu yor mʌꞌ nani yacsic u siꞌpiriꞌ quireꞌ u parar Cꞌuj. Cu cʌnantaꞌr ten Cꞌuj. Mʌꞌ ja wirej, u parar. Mʌꞌ ju tarʌr ten quisin, a mac a caj u yacsaj tu yor tiꞌ Cꞌuj.
\p
\v 19 A mac mʌꞌ ju yacsaj tu yor tiꞌ Cꞌuj u tsꞌurir quisin. Chen a toꞌonexoꞌ ij querex u pararoꞌonex Cꞌuj.
\p
\v 20 Rajen ij querex tar u parar Cꞌuj uch. Caj tar u yamtoꞌonex caꞌ ic najtex Cꞌuj. Tarij caꞌ ij quirex a jach Cꞌujoꞌ. Mʌꞌ ja wirej, pꞌeriꞌ ij corex yejer jach Cꞌuj. Pꞌeriꞌ ij corex yejer u parar Jesucristo xan. A jeꞌraꞌ jach Cꞌuj Jesucristo quir a cuxtarex munt qꞌuin.
\v 21 Quiꞌ cʌnant a bʌjex in chan pararechex, soc mʌꞌ a cꞌujintiquex tus cꞌuj. Jeroj tsꞌoquij, quij Juan.