\id JUD
\h JUDAS
\toc1 JUDAS
\mt1 A JEꞌ JUꞌUNAꞌ, CAJ U TSꞌIBTA JUDAS
\c 1
\s A Judasoꞌ caj u tsꞌibtaj tiꞌ a mac tetaꞌb ten Cꞌuj
\p
\v 1 A tenoꞌ Judasen. A tenoꞌ u cꞌurewen Jesucristo. Judasen a jin sucuꞌunoꞌ Jacobo. A jeꞌ juꞌunaꞌ quin tsꞌibtic techex a mac tetaꞌan ten ic Tetex Cꞌujoꞌ, soc rajiꞌ yʌninechex. Quin tsꞌibtic a jeꞌ juꞌunaꞌ tiꞌ a mac jach yajquintaꞌb ten Cꞌuj. A mac cu quiꞌ cʌnantaꞌr ten Jesucristo tiꞌ a cꞌasoꞌ.
\v 2 Caj u yiraj otsirechex Jesucristo. Jach manan caj yiraj otsirechex Jesucristo. Jach manan u chꞌaꞌic caꞌ quiꞌac a worex tiꞌ Cꞌuj, jach manan u quiꞌ tar a worex tiꞌ Cꞌuj. Caꞌ u quiꞌ yajquintechex Cꞌuj. Jach manan u yajquintiquechex Cꞌuj.
\s Judas caj yaꞌaraj jeꞌ u tarob u tus ʌjcamsʌyʌjirob 
\p
\v 3 A tenoꞌ, quij Judas. In jach cꞌat in tsꞌibtic a jeꞌ juꞌunaꞌ techex in jach yajechex. A tenoꞌ in jach cꞌat in tsꞌibtic techex a jeꞌ juꞌunaꞌ soc a werex Cꞌuj cu taquicoꞌonex. Chen a bajeꞌreroꞌ aroꞌ mʌꞌ jin bin in tsꞌibtej techex. Chen quin bin in chich arej techex soc a pꞌisiquex a bʌj, quij Judas, soc mʌꞌ u cꞌaxicob u tꞌʌn Cꞌuj a cu tus camsicob u tꞌʌn Cꞌujoꞌ. Chichquintex a worex quir a waꞌariquex tiꞌob. Mʌꞌ ja wirej, aroꞌ mʌnaꞌ mac cu yʌnyʌn bin cꞌaxic u tꞌʌn Cꞌuj. Mʌꞌ biqꞌuin quireꞌ Cꞌuj caj u toc tsꞌaja toꞌonex uch.
\v 4 A tenoꞌ quin chich cꞌatic techex quireꞌ yʌn xib, mʌꞌ pim xibiꞌ a cu tar u muchꞌquintob u bʌjob yejerechex. Robob mʌꞌ ju yaꞌarob baꞌwir cu tarob quireꞌ cꞌas. Robob mʌꞌ ju sʌjtob Cꞌuj. Cu tus aꞌaricob: “Cax quic manex quireꞌ a Cꞌujoꞌ, jach tsoy yor cax quic manex.” Robob cu yaꞌaricob mʌꞌ yerob Cꞌuj, bayiriꞌ Jesucristo. Chen a toꞌonexoꞌ quij cariquex: “Rajiꞌ ic tsꞌurirex, aroꞌ ic Jaj Tsꞌurirex. A uchoꞌ, caj tsꞌibtaꞌb ten yʌjtseqꞌuirob u tꞌʌn Cꞌuj jeꞌ yubicob u tsꞌiquirob Cꞌuj an ten bic tsꞌibaꞌan ich u tꞌʌn uch.”
\p
\v 5 Cax a toc erex, quij Judas, tu cotor a baꞌ ta toc uꞌyex a uchoꞌ. A tenoꞌ in cꞌat in caꞌ cꞌasic techex, quij Judas. In cꞌat in caꞌ cꞌasic techex bic tabar chꞌesaꞌb ten Cꞌuj u winiquirob Israel quireꞌ mʌꞌ ju quibob u tꞌʌn Cꞌuj. Cax yʌn toc ten Cꞌuj uch tiꞌ u ruꞌumin Egipto.
\v 6 Cꞌaj techex wa yʌjmasirob u tꞌʌn Cꞌuj uch, a jun yaroboꞌ, quij Judas. Mʌꞌ ju cʌnantob u beyajob uch, tu cu beyajob ich caꞌanan, tu cu tsꞌurinticob Cꞌuj. Caj jocꞌsaꞌbob ten Cꞌuj, caj binob purbir ich yaran ruꞌum uch. Tiꞌ cꞌʌraꞌanob ten Cꞌuj yʌjmasirob u tꞌʌn Cꞌuj uch. Caꞌ bin cꞌuchuc tu qꞌuinin jeꞌ u binob ʌcʌtan Cꞌujeꞌ quir u jasʌrob ten Cꞌuj. Mʌꞌ ja wirej, tu pꞌʌt u beyajob ich caꞌanan.
\v 7 Cꞌaj techex wa, quij Judas, u cajarob Sodoma yejer u cajarob Gomorra. Cꞌaj techex, quij Judas, tu boꞌotajob u boꞌorir u siꞌpirob quireꞌ tocaꞌb ten Cꞌuj ich u cꞌaqꞌuir munt qꞌuin. Mʌꞌ ja wirej, quij Judas, a uchoꞌ u cꞌat manob yejer u yet xibirob. Quireꞌ mʌꞌ tsoy u manob yejer u yet xibiriꞌ quireꞌ jach cꞌas aroꞌ, quij Judas. Baxuc xan, caj betaꞌb ten yʌjmasirob u tꞌʌn Cꞌuj uch, a tu pꞌʌtajob u beyajob. Aroꞌ quir u camsicoꞌonex bic tabar cu bin boꞌotaꞌr ten Cꞌuj a mac a yʌn u siꞌpirob.
\p
\v 8 Mʌꞌ ja wirej, a jeꞌ tus camsʌyʌjirob raꞌiriꞌ cu cʌxticob u siꞌpirob an ten bic u winquirirob Israel ich tʌcay ruꞌum uch. An ten bic u yʌjmasirob u tꞌʌn Cꞌuj, a tu pꞌʌtob u beyajob uch. An ten bic u winquirirob tu cajarob Sodoma yejer Gomorra. Cax a baꞌ tin toc araj tiꞌob tiꞌ toy cu cʌxticob u siꞌpirob. Mʌꞌ ja wirej, cu manob. Mʌꞌ ju yubob u tꞌʌn a mac a cu tsꞌurinticob. Cu pꞌasticob u yʌjmasirob u tꞌʌn Cꞌuj. Aroꞌ cu beticob quireꞌ yaꞌaricob cu yiricob Cꞌuj.
\v 9 Cꞌaj techex wa, quij Judas. A uchoꞌ yʌn tuririꞌ u cꞌabaꞌ Miguel. A rayoꞌ u tsꞌurir yʌjmasirob u tꞌʌn Cꞌuj ich caꞌanan. U bʌjiriꞌ Miguel mʌꞌ ju betaj an ten bic caj u betob u tus camsʌyʌjirob. Mʌꞌ ja wirej, a Migueloꞌ ber caj u nunca u tꞌʌn tiꞌ quisin soc yer mac cu bin u chꞌic u baquer Moisés. Mʌꞌ ju tus tucraj yʌn u mucꞌ soc u pꞌastic a quisinoꞌ. Rajen caj yaꞌaraj Miguel: “Jeꞌ u qꞌueyiquech Cꞌujeꞌ quisin, quij yaꞌaraꞌ ten Miquel quireꞌ cꞌasech”, quij Miguel, yʌjmasirob u tꞌʌn Cꞌuj.
\v 10 Chen a jeꞌ tus ʌjcamsʌyʌjirobaꞌ cu pꞌasticob u yʌjmasirob u tꞌʌn Cꞌuj a mac a mʌꞌ ju najtoboꞌ. Rajen arayob irob bʌcꞌ. Mʌꞌ ja wirej, a bʌcꞌoꞌ yer a baꞌ cu betic, chen mʌꞌ ju tucrobiꞌ. Rajen cu binob ich cꞌacꞌ a cu tus camsicob u tꞌʌn Cꞌujoꞌ.
\p
\v 11 Jach cꞌas cu bin tar tiꞌ a jeꞌ xibaꞌ a mʌꞌ ju quibob Cꞌuj, quij Judas. Mʌꞌ ja wirej, cu sayʌrob tu pach Caín a mʌꞌ ju quibaj Cꞌuj uch xanoꞌ. A jeꞌ xibaꞌ a cu tus camsicob u tꞌʌn Cꞌuj caj u cꞌubob u bʌj quir u camsicob a baꞌ cu sosoc aricob tiꞌ u tꞌʌn Cꞌuj. Soc u jaricob u taqꞌuin an ten bic Balaam caj u sosoc arbar tiꞌ u tꞌʌn Cꞌuj soc u tꞌajar u taqꞌuin uch. A jeꞌ xibaꞌ cu cʌnicob Coré. Cꞌaj techex Coré, tiꞌ cʌjaꞌan tu qꞌuinin Moisés uch. Caj u pꞌastaj Moisés tu cu tsꞌurintic Moisés u winquirirob Israel. Rajen caj quinsaꞌb Coré ten Cꞌuj. Baxuc cu bin quiminob a jeꞌ xib xanaꞌ.
\v 12 A jeꞌ xibaꞌ, a cu tus camsicob u tꞌʌn Cꞌuj mʌnaꞌ u suraquirob. Tu qꞌuinin a quiꞌ quiꞌ janʌnex soc a wesiquex bic a yajquintex a wet acsʌꞌorirex. Robob cu chen cꞌat u janʌnob, mʌꞌ ju tucrob Cꞌuj. Chen u bʌjiriꞌob u quiꞌ quiꞌ janʌnob chen u racꞌob mʌꞌ u cꞌat u tsꞌicob tiꞌobiꞌ. Mʌꞌ ju yamtob mac. Robob mʌꞌ baꞌwir tiꞌob. Rajen irob a muyarob a cu cuchur ten iqꞌueꞌ. Mʌꞌ ju tar yaꞌarir quireꞌ cu cuchur u muyarir ten icꞌ. Robob mʌꞌ baꞌwir tiꞌob. Rajen irob cheꞌ a mʌꞌ ju tsꞌaj u wicheꞌ caꞌ bin cꞌuchuc tu qꞌuinin, mʌꞌ ju bin ichʌncʌr. Rajiꞌ chen an ten bic cheꞌ caj tijij u mos. Mʌꞌ chen teniꞌ barej tu caꞌten, quireꞌ mʌꞌ ju wichʌncʌr. Pachir cu rʌc jacaj u cheꞌer quireꞌ tijij.
\v 13 A jeꞌ u tus ʌjcamsʌyʌjirob u tꞌʌn Cꞌujaꞌ cu manob tu cꞌasir. Mʌꞌ ja wirej, irob, quij Judas, u yaꞌamin cꞌacꞌnab, a jach chich u bin u yaꞌaminoꞌ cꞌacꞌnaboꞌ. A cu pꞌʌtic u yom ich u chiꞌ cꞌacꞌnaboꞌ, a ju pꞌupꞌiroꞌ. Robob, quij Judas, mʌꞌ cꞌuchaꞌan yorob u pʌyicob u ber mac. Quireꞌ irob a saꞌab a tar yʌn ich caꞌananoꞌ. A ca wiric u manob ich caꞌanan, a caj u pꞌʌtajob u ber a saꞌaboꞌ, rajen mʌꞌ baꞌwir quir u yamtic mac. Rajen robob a tus ʌjcamsʌyʌjirob u tꞌʌn Cꞌuj bin u caꞌ tuchiꞌbir ten Cꞌuj ich yacꞌbirir munt qꞌuin.
\p
\v 14 Tsecꞌtaꞌb ten Enoc uch a baꞌ cu bin tareꞌ tiꞌ a jeꞌ tus ʌjcamsʌyʌjirob. Tsecꞌtaꞌb ten Enoc a baꞌ u ber tiꞌob. A Enocoꞌ u parar Adán uch, chen rajiꞌ rub tu pach u bʌjob cꞌuchij siete. Caj u tsecꞌtaj Enoc uch, caj u yaꞌaraj tiꞌob: “Uꞌyex u tꞌʌn Cꞌuj. Jeꞌ u tar ic Jaj Tsꞌurirexeꞌ, yet tarob yʌjmasirob u tꞌʌn Cꞌuj. Jach pimob yʌjmasirob u tꞌʌn Cꞌuj caꞌ bin tac. Miles caꞌ bin tac, quij Enoc. 
\v 15 A Jaj Tsꞌur caꞌ bin tacoꞌ, quij Enoc. Jeꞌ u jʌsic tu cotor mac. A mac cꞌas caj u betaj, bin u caꞌ tsꞌabir u mucꞌyaj, quireꞌ rajraꞌ cꞌas caj u betob. A mac a caj u pꞌastob Cꞌuj, tiꞌ cu bin tsꞌabir u mucꞌyaj quireꞌ rajraꞌ cꞌas caj u betob xan, quireꞌ tu pꞌastob Cꞌuj. Mʌꞌ ja wirej, jach cꞌas u tꞌʌnob”. Baxuc caj u tsecꞌtaj Enoc uchoꞌ.
\v 16 Cꞌaj techex, quij Judas, a mac a cu tus camsicob u tꞌʌn Cꞌuj, choc yorob. Bayiriꞌ cu manob u pʌcꞌob u pachob u racꞌob. U bʌjiriꞌob cu cʌxticob u siꞌpirob, a baꞌ cꞌasir cu pachticob tu yorob. Cu jach quiꞌ tsicbarob yejer mac soc caꞌ tsꞌabʌc tiꞌ tu tꞌʌn baꞌ soc rajiꞌ yʌnin. Robob cu tsicbarob an ten bic mac a netꞌojob. 
\s Quin chich aric tiꞌob, quij Judas. A mac a yacsmʌnob tu yorob caꞌ u cʌnant u bʌjob tiꞌ a cꞌasoꞌ
\p
\v 17 Cꞌaj techex, quij Judas, in jach bʌjobechex. Cꞌʌꞌotex a baꞌ caj a wuꞌyex yaꞌaricob a mac a batꞌan tuchiꞌtaꞌb ten ic Jaj Tsꞌurirex Jesucristo uch.
\v 18 Caj yaꞌarob uch: “Caꞌ bin cꞌuchuc tu qꞌuinin tabar u tar Jesucristo jeꞌ u tar mac quir u chejtiquechex, quij a mac tuchiꞌtaꞌb ten Jesús. Jeꞌ u cʌxticob u siꞌpirob a baꞌ cꞌasir cu pachticob tu yorob quireꞌ u cꞌat yacsicob tu siꞌpirob, quij a tuchiꞌtaꞌb ten Jesucristo uch.”
\v 19 Mʌꞌ ja wirej, quij Judas, a jeꞌ tus ʌjcamsʌyʌjirob u tꞌʌn Cꞌuj tan u jʌsiquechex soc mʌꞌ quet a worex yejer. A werex mac cu tsꞌurintic tu cotor cꞌas, raꞌ cu tsꞌurinticob. Mʌnaꞌ u Tajꞌor u Pixam Cꞌuj tiꞌob, quireꞌ cꞌas cu tsꞌurinticob. 
\p
\v 20 Barej a techexoꞌ, quij Judas, in jach bʌjobechex in jach yajechex. Mʌꞌ a yʌn cʌniquex a tus yʌjcamsʌyʌjirob u tꞌʌn Cꞌuj. Caꞌ a quiꞌ acsex ta worex tiꞌ Jesucristo an ten bic caj yaꞌaraj Cꞌuj. Caꞌ a tꞌʌnex Cꞌuj yejer u mucꞌ u Tajꞌor u Pixam Cꞌuj a cu tsꞌic techexeꞌ.
\v 21 Quiꞌ cuxrenechex ich a racꞌob an ten bic a wuꞌyiquex u yajechex Cꞌuj. Quireꞌ ca quiꞌ pajiquex u qꞌuinin quir u tar ic Jaj Tsꞌurirex Jesucristo. Soc caꞌ bin tac Jesucristo bin u caꞌ yirej otsirechex, rajen bin u caꞌ u tsꞌaj techex a cuxtarex munt qꞌuin.
\p
\v 22 Yajquintex a mac a mʌꞌ chichac yor tiꞌ u tꞌʌn Cꞌuj. 
\v 23 Quiꞌ arej yubob, quij Judas, soc mʌꞌ u binob tu cu yerar mac. Taquex a tiꞌoboꞌ an ten bic ca chopʌytiquex ta wicnʌnex mac soc mʌꞌ ju yerar ich jach cꞌacꞌ. Quiꞌ arej yubob tiꞌ u jer mac u tꞌʌn Cꞌuj, quireꞌ a tiꞌoboꞌ a yajex quireꞌ ca yamtiquex a tiꞌoboꞌ cax ca pꞌatiquex a tiꞌoboꞌ quireꞌ jach manan u siꞌpirob.
\s Jach caremech Cꞌuj, quij
\p
\v 24-25 Tiꞌ yʌn mac quir u quiꞌ cʌnantiquechex soc mʌꞌ a wacsiquex a siꞌpirex, chichin. Rajiꞌ Jesucristo. Tiꞌ yʌn mac quir u yacsicoꞌonex ich Cꞌuj. Rajiꞌ cu bin aric tiꞌ Cꞌuj: “Quiꞌ in wor in wesic tech in parar. Mʌꞌ ja wirej, in parar mʌnaꞌ u siꞌpir”, quij Jesús. Rajiꞌ cu bin u yacsicoꞌonex ich ʌcʌtan Cꞌuj quireꞌ mʌnaꞌ u jer Cꞌuj. Rajiꞌ cu taquicoꞌonex wa ber quij cacsiquex tij corex tiꞌ u parar Cꞌuj, a mac a cu taquicoꞌonexoꞌ. Caꞌ ij carex tiꞌ Cꞌuj: “A techoꞌ Cꞌuj, toc yʌn a mucꞌ munt qꞌuin. Caꞌ in reyintechob Cꞌuj tin cotorob cax baꞌ tu cotor munt qꞌuin. Caꞌ u cꞌʌꞌotech mac, mun jach caremech.” Mʌꞌ ja wirej, baxuc yʌn tiꞌ tu chꞌic chunin uch, baxuc yʌn tiꞌ bajeꞌrer. Jeroj tsꞌoquij, quij Judas.