\id REV
\h APOCALIPSIS
\toc1 APOCALIPSIS
\mt1 A JEꞌ JUꞌUNAꞌ, TSꞌAꞌB U TUCUR QUIR U TSꞌIBTIC JUAN BIQUIRAꞌ JESÚS 
\mt2 APOCALIPSIS
\c 1
\s Biquiraꞌ Jesús
\p
\v 1 Ich a jeꞌ juꞌunaꞌ a tu tsꞌibtaj Juan, tiꞌ tsꞌibaꞌan a baꞌ tsꞌaꞌb u tucur Juan ten Jesucristo. A jeꞌraꞌ tsꞌaꞌb ten Cꞌuj tiꞌ Jesús soc u tsꞌabʌr tiꞌ u cꞌurewob Cꞌuj a baꞌ tabar u cꞌuchur tu qꞌuinin. A baꞌ tsꞌibaꞌan teꞌraꞌ tsꞌaꞌb u tucur Juan ten Jesús. A Juanoꞌ, u cꞌurew Jesús. Mʌꞌ ja wirej, Jesús tuchiꞌtej u yʌjmasir u tꞌʌn ich Juan soc u tsꞌibtic Juan.
\v 2 A Juanoꞌ, raꞌ caj u yaꞌaraj a baꞌ caj u wʌyʌcꞌt u tꞌʌn Cꞌuj, a caj u tsꞌibtaj techex bajeꞌrereꞌ, bayiriꞌ xan, tiꞌ a baꞌ araꞌb ten Jesucristo tiꞌ tu cotor u tꞌʌn Cꞌuj. 
\p
\v 3 Quiꞌ yor a mac a cu bin xaquic a jeꞌ juꞌunaꞌ. Quiꞌ yor xan, a mac a cu bin yubej a jeꞌ tꞌʌnaꞌ, caj u quibaj a baꞌ tsꞌibaꞌan ich a jeꞌ juꞌunaꞌ. Mʌꞌ ja wirej, tabar u nupꞌsic a baꞌ tsꞌibaꞌan ich a jeꞌ juꞌunaꞌ.
\s A Juanoꞌ caj u tsꞌibtaj tiꞌ a yacsmʌnob tu yorob tu cu muchqꞌuinticob u bʌjob quir u cꞌujinticob Cꞌuj, a siete najoꞌ tu cu cꞌujinticob Cꞌuj
\p
\v 4 A tenoꞌ Juanen, quin tsꞌibtic techex a mac a yacsmʌnob tu yorob, a cu muchꞌquinticob u bʌjob quir u cꞌujinticob Cꞌuj ich u ruꞌumin Asia, a siete najoꞌ tu cu cꞌujinticob Cꞌuj. Caꞌ u yamtechex Cꞌuj, caꞌ u yira otsirechex Cꞌuj. Caꞌ tac a worex tiꞌ Cꞌuj soc tiꞌ yʌn a worex. Mʌꞌ ja wirej, rajiꞌ Cꞌuj cuxaꞌan munt qꞌuin, cax a uchoꞌ, cax bajeꞌrer, cax saman. Bayiriꞌ xan caꞌ u yamtej techex a siete u pixamoꞌ a cu tarob ich Cꞌujoꞌ caj u yira otsirechex. Caꞌ tac a worex tiꞌ a siete u pixamoꞌ a tiꞌ yʌnob ʌcʌtan Cꞌuj soc tiꞌ yʌn a worex xan. Mʌꞌ ja wirej, a siete u pixamoꞌ, a cu tar ich Cꞌuj, tiꞌ yʌnob ich ʌcʌtan u cutan Cꞌuj tu cu reyintaꞌr Cꞌuj. A pixamoꞌ a sietejoꞌ, u cꞌat yaꞌaric u Tajꞌor u Pixam Cꞌuj.
\v 5 Bayiriꞌ xan caꞌ a cꞌʌmiquex Jesucristo a baꞌ tsoy tu tꞌʌn, bayiriꞌ xan, caꞌ tac a worex tiꞌ Jesús soc yʌn a worex. Rajiꞌ a mac a cꞌuchaꞌan ij corex ij cꞌʌmiquex u tꞌʌn quireꞌ rajiꞌ taj. Quireꞌ yʌn batꞌan ricꞌsaꞌb Jesús ten Cꞌuj tu quimirir. Mʌꞌ ja wirej, a Cristojoꞌ, rajiꞌ cu bin u reyinticob tu cotor rey ich yocꞌocab. Caꞌ ij quiꞌ tꞌʌnej Cristo quireꞌ u yajoꞌonex quireꞌ tu pꞌoꞌoꞌonex yejer u qꞌuiqꞌuer quir u rucꞌsic ic siꞌpirex. 
\v 6 A Jesúsoꞌ, rajiꞌ jeꞌ u yacsicoꞌonex iroꞌonex rey tu cu reyinticoꞌonex mac. Rajiꞌ tu tacoꞌonex soc u yacsicoꞌonex tic beyajex iroꞌonex sacerdotes quir ic beyajex tiꞌ Cꞌuj ic Tetex, quireꞌ rajiꞌ u Cꞌuj Cristo xan. Caꞌ ij quiꞌ tꞌʌntex Cꞌuj, caꞌ ij quiꞌ sʌjtex a tiꞌoꞌ, yejer tu cotor mac, caꞌ u reyintoꞌ Cꞌuj tu cotor mac, munt qꞌuin.
\p
\v 7 Uꞌyex baꞌ quin wac techex. Tan u tar Cristo ich u muyʌrir. Caꞌ bin uruc, bin u caꞌ irbir ten tu cotor mac ich u sasirir. A mac a caj u pꞌactaj Cristo ich yocꞌocab, bin u caꞌ u yacꞌtob u bʌj caꞌ bin iric, quireꞌ robob caj u bʌjob ich cruz. Bayiriꞌ xan, tiꞌ cu bin irbir Cristo ten tu cotor mac a yer tꞌʌnoꞌ. Robob bin u caꞌ yacꞌtob u bʌj xan. Aroꞌ bin u caꞌ tar taj aroꞌ, jeroj jeꞌ u tareꞌ.
\p
\v 8 “A tenoꞌ, quij Jaj Tsꞌur, pʌyber batꞌan cuxaꞌanen, bayiriꞌ xan a tenoꞌ mʌꞌ biqꞌuin quin xur. Rajen cꞌuchaꞌan in wor tiꞌ tu cotor baꞌ.” Mʌꞌ ja wirej, rajiꞌ a Cꞌujoꞌ u bereroꞌ bayiriꞌ xan, munt qꞌuin u bereroꞌ.
\s Juan caj u wʌyʌcꞌtaj Jesús tu cotor u sasirir Cꞌuj
\p
\v 9 A techexoꞌ, a mac a tiꞌ yʌnoꞌ, a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj ich u ruꞌumin Asia, a sietej najoꞌ. A tenoꞌ Juanen, a wet acsʌꞌorirenex. Baxuc an ten bic cu chuquicob a pachex, bayiriꞌ ten xan, cu chuquicob in pach, quireꞌ tin wacsaj tin wor. An ten bic Cꞌuj bin u caꞌ yacsiquechex tu quic bin ic reyintiquex, baxuc ten, bin u caꞌ u yacsen quireꞌ pꞌeriꞌoꞌonex. An ten bic techex ca mucꞌtiquex a baꞌ cu tar techex, baxuc ten quin mucꞌtic, quireꞌ Jesucristo quin mucꞌtic. Rajen caj u purenob teꞌ ich u peꞌtenin cꞌacꞌnab u cꞌabaꞌ Patmos. Tu pꞌatenob tu peꞌtenin Patmos, quireꞌ caj in tsecꞌt u jach tsoyir u tꞌʌn Jesucristo. 
\v 10 A tenoꞌ, tan in cꞌujintic Cꞌuj tu qꞌuinin domingo caj tar tin wocꞌor u Tajꞌor u Pixam Cꞌuj, soc rajiꞌ quin tsꞌurintic. Jach seb caj cꞌamjij u tꞌʌn mac irej wa cu yutstic mac u bac wacʌx, caj in wuꞌyaj tin pach. 
\v 11 A mac a cu tꞌʌn uch, caj u yaꞌaraj ten:
\p ―A tenoꞌ ―quij Jaj Tsꞌur―, Cꞌujen, a mac a cu yʌnxchun tu cotor baꞌ, bayiriꞌ xan, a tenoꞌ a mac a cu tsꞌocsic tu cotor baꞌ. Toc tsꞌibtej Juan, a baꞌ ca bin a wirej, soc a tuchiꞌtic in tꞌʌn tiꞌ a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj, tu yʌn a sietej najoꞌ, a tiꞌ yʌnob tu ruꞌumin Asia. Tiꞌ yʌn tuririꞌ ich u cajar Efeso, tiꞌ yʌn u jer ich u cajar Esmirna, tiꞌ yʌn u jer ich u cajar Pérgamo, tiꞌ yʌn u jer ich u cajar Tiatira, tiꞌ yʌn u jer ich u cajar Sardis, tiꞌ yʌn u jer ich u cajar Filadelfia, bayiriꞌ xan, tiꞌ yʌn u jer ich u cajar Laodicea. Baxuc caj u yaꞌaraj tenoꞌ. 
\p
\v 12 Caj in sut in bʌj caj in pʌct in pach caj in wiraj mac a cu tꞌʌniquen uchoꞌ. Jeroj tuneꞌ, caj in wiraj irej wa ras, a yʌn u cꞌʌbiroꞌ, a siete u cꞌʌbiroꞌ, toc rʌc betaꞌb u mascabir oro.
\v 13 Tiꞌ yʌn mac chꞌiquicbar chumuc a rasoꞌ, a sietej u cꞌʌbiroꞌ, rajiꞌ irej xib u buquiman jach nocꞌ. Caj xur u yoquir u nocꞌ tu car yoc. Yʌn u cꞌax u nʌcꞌ, chen tiꞌ yʌn tu boj u sem. U cꞌax u sem betaꞌb u mascabir oro.
\v 14 U tsotser u joꞌr jach manan sʌc irej tʌmʌn, ir u bajaꞌ xan. Raꞌ u wichoꞌ ir u mʌsʌcꞌaqꞌuir cꞌacꞌ sasirir. 
\v 15 Caj in wiraj yoqueꞌ, chꞌiquicbar, robob irej wa ju chuquij cꞌacꞌ, robob xan, tan u rembaj irej chʌc taqꞌuin tan u rembaj, a ricꞌbenoꞌ. Caj in wuꞌyaj u tꞌʌn, an ten bic u jum yoc jaꞌ, a cu man ich mʌctunoꞌ, chen jach manan cꞌam caj in wuꞌyaj, quij.
\v 16 Caj in wiraj u cꞌʌb, a nojoꞌ, yʌn u baꞌinquirir irej sab ich u cꞌʌb. Tiꞌ yʌn siete sab tu cꞌʌb a ju mʌchmʌnoꞌ. Caj in wuꞌyaj u tꞌʌn a cu jocꞌar tu chiꞌ, rajiꞌ irej wa tu ram in wor, caj in wuꞌyaj irej wa yʌn u mascabir tu chiꞌ, a yʌn caꞌtur yej. Caj in wiraj u wich raꞌ irej u sasirir a qꞌuinoꞌ, a cꞌacꞌchun qꞌuinoꞌ, a mʌꞌ ju nocar ten u muyariroꞌ.
\p
\v 17 Caj in wiraj aroꞌ, caj rubuquen, quij, irej quimen a tenoꞌ, taj ruben ich yocoꞌ. Soc u ricꞌsiquen, rajiꞌ caj u tʌrajen yejer u noj u cꞌʌb. Jeroj tuneꞌ, caj u yaꞌaraj ten:
\p ―Mʌꞌ a chꞌic sajquir quireꞌ a tenoꞌ, pʌyberen a tenoꞌ quireꞌ toc cuxaꞌanen a ten uchoꞌ. A tenoꞌ jeꞌ in rajraꞌ cuxtar. Baxuc caj u yaꞌaraj ten.
\v 18 A tenoꞌ, quij, raꞌ cuxaꞌanenoꞌ, a tenoꞌ xan, quimen uch xan. Iric Juan, wʌcꞌʌs cuxrajen. A tenoꞌ, munt qꞌuin cuxaꞌanen bajeꞌrer. Mʌꞌ ja wirej, a tenoꞌ yʌn u cꞌʌrʌbar u jor quir in mʌquic u jor, wa quir in qꞌueyic u jor xan, tu yʌn u pixamob a mac a quimij uchoꞌ.
\v 19 Jeroj tuneꞌ, a Jaj Tsꞌuroꞌ caj u yaꞌaraj ten, caj in tsꞌibta a baꞌ in wiramʌn, yejer a baꞌ caj in wira bajeꞌrer, yejer a baꞌ chʌcaꞌan in wiric pachiroꞌ.
\v 20 Quireꞌ mʌꞌ ja najt a baꞌ u cꞌat yaꞌaric a siete saboꞌ, a wirmʌn in mʌchmʌn tin noj. Robob cu yetsꞌticob u yʌjmasirob u tꞌʌn Cꞌuj tiꞌ a yacsmʌnob tu yorob a cu muchꞌquinticob u bʌjob quir u cꞌujinticob Cꞌuj, a sietej najoꞌ a tiꞌ yʌnoꞌ ich u ruꞌumin Asia. Bayiriꞌ xan, a rasoꞌ a sietej u cꞌʌbir xanoꞌ, a betaꞌb a taqꞌuin a orojoꞌ, robob cu yetsꞌticob a yacsmʌnob tu yorob a cu muchꞌquinticob u bʌjob quir u cꞌujinticob Cꞌuj, a sietej naj xanoꞌ. Baxuc caj u yaꞌaraj ten a Jaj Tsꞌuroꞌ.
\c 2
\s Rajiꞌ u tꞌʌn Cristo tiꞌ a yacsmʌnob tu yorob a cu muchꞌquinticob u bʌjob quir u cꞌujinticob Cꞌuj, tu yʌn a sietej najoꞌ. Rajiꞌ u tꞌʌn tiꞌ a mac a cu muchꞌquinticob u bʌj ich u cajar Efeso
\p
\v 1 Caj yaꞌaraj Jaj Tsꞌur ten:
\p ―Juan ―quij Jaj Tsꞌur―, tsꞌibt a jeꞌ juꞌunaꞌ tiꞌ a pastoroꞌ a u tsꞌurir a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj ich u cajar Efeso. Tsꞌibtej tiꞌ caj a waꞌarej tiꞌ: “A tenoꞌ, in mʌchmʌn tin cꞌʌb a nojoꞌ, a saboꞌ, a sietejoꞌ. Arej tiꞌ a ray pastoroꞌ, quin man ich a rasoꞌ, a yʌn sietej u cꞌʌbiroꞌ a betaꞌb a taqꞌuin a orojoꞌ.
\v 2 Arej tiꞌ a pastoroꞌ: A tenoꞌ in wer tu cotor baꞌ ca betic. Quin cꞌʌꞌotic a baꞌ ca wiriqueꞌ, cax a tsoyoꞌ, cax a mʌꞌ tsoyoꞌ tu ca mucꞌyaj. Quin wiric xan, mʌꞌ ja mucꞌtaj a mac a cu tus camsicob u tꞌʌn Cꞌuj, mʌꞌ ja wacsaj a tiꞌob xanoꞌ. A techoꞌ, caj a quiꞌ tumt a wirej wa jach tuchiꞌtaꞌb ten Cꞌuj soc u camsicob u tꞌʌn. Quireꞌ, baxuc caj yaꞌarob tech: Cꞌuj tu tuchiꞌtenob a tenoboꞌ tech, cax mʌꞌ robob tuchiꞌtaꞌb ten Cꞌuj. Caj tsꞌoc a tumtic a wirej a wer tan u tusiquechob.
\v 3 Caj a mucꞌtaj a mac a tu tus arob tuchiꞌtaꞌb ten Cꞌuj xan. Jach nemʌꞌ biquech caj a mucꞌtaj a tiꞌoboꞌ. Mʌꞌ ja wirej, tu ca mucꞌyaj caj mucꞌyajnʌjech, quireꞌ ca beyaj, ten quij Jesús, mʌꞌ tupsaꞌan a wor tu ca beyajiꞌ. 
\v 4 Cax yʌn baꞌ jach tsoy caj in wiraj tiꞌ tech, chen yʌn baꞌ mʌꞌ tsoy in wiric. Mʌꞌ ja wirej, tan a pꞌʌtic a yaj, a Jaj Tsꞌuroꞌ Jesucristo. Mʌꞌ ja quiꞌ yajquinten a tenoꞌ an bic caj a yʌnxchun a yajquintiquen uch, caj a wacsaj ta wor ten.
\v 5 Wʌcꞌʌs cꞌas ta bʌjiriꞌeꞌ, bic caj a yajquint a Jaj Tsꞌuroꞌ uch. Toc cꞌaxej a wor tan a pꞌʌtiquex a cꞌasirex soc a man tu tsoy an ten bic caj manech uch. Wa mʌꞌ seb ca cꞌaxic a wor, tan a pꞌʌtic a cꞌasir soc jeꞌ in rucꞌsic tech soc u chꞌejar a beyaj ich u cajar Efeso. 
\v 6 Chen yʌn baꞌ ca betic a techoꞌ, a cu quiꞌquintic in woroꞌ, quireꞌ ca pꞌactic a baꞌ cu beticob a mac a cu yaꞌaric nicolaítas, quireꞌ robob caj u yacsob u siꞌpirob mac. Bayiriꞌ xan, a tenoꞌ quin pꞌactic xan.
\v 7 Quin chich aric tech, caꞌ a quibej a baꞌ cu yaꞌaric u Tajꞌor u Pixam Cꞌuj tiꞌ a mac a tiꞌ yʌn ich a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj. A mac a cꞌuchaꞌan yor tiꞌ a baꞌ cu tumtic u yor, soc u man tu tsoyir jeꞌ u tsꞌabʌr ten Cꞌuj caꞌ u jant u wich cheꞌ u cheꞌer, a cu tsꞌic u cuxtar mac, a tan u chꞌijir ich u cor Cꞌujoꞌ.”
\s Rajiꞌ u tꞌʌn Jesucristo tiꞌ u pastorir a tiꞌ yʌn tu cajar Esmirna
\p
\v 8 Caj u yaꞌaraj Jaj Tsꞌur ten:
\p ―A techoꞌ Juan ―quij Jaj Tsꞌur―, tsꞌibtej a baꞌ quin waꞌaric a jeꞌ juꞌunaꞌ tiꞌ a pastoroꞌ, a ju tsꞌurir a yacsmʌnob tu yorob, tu cu muchꞌquinticob u bʌjob quir u cꞌujinticob Cꞌuj ich u cajar Esmirna. A jeꞌraꞌ in tꞌʌn: “A tenoꞌ pʌyberen tiꞌ a mac a yʌn cuxaꞌan uchoꞌ. A tenoꞌ, jeꞌ in rajraꞌ cuxtareꞌ. A tenoꞌ quimen uch. Chen iric Juan, wʌcꞌʌs cuxrajen a tenoꞌ.”
\v 9 Arej tiꞌ: “A tenoꞌ, quij Jesús, in wer tu cotor baꞌ ca betic. A tenoꞌ quin cꞌʌꞌotic baꞌ ca wiric, cax a tsoyoꞌ, cax a mʌꞌ tsoyoꞌ. Quin cꞌʌꞌotic bic caj mucꞌyajnʌjech tu cu chuquicob a pach, tu cu pꞌastiquechob a racꞌob, tu jach otsirchʌjech. Chen jach manan ricojech quireꞌ rajiꞌ Cristo yʌninech. Quin cꞌʌꞌotic a mac a cu pꞌactiquechob, a cu tus aricob: U winiquirob judíojen. Rajiꞌ mʌꞌ taj cu yaꞌaricobiꞌ: U winquirob judíojen, quireꞌ mʌꞌ yacsmʌnob tu yorob tiꞌ Cristo. Robob cu yaꞌaric cu cꞌujinticob Cꞌuj tu chan najir, chen cu jach cꞌujinticob quisin, a mac u jach cꞌabaꞌ Satanás.
\v 10 Mʌꞌ a yʌn chꞌic chichin sajquir quireꞌ tabar a mucꞌyaj, quireꞌ a quisinoꞌ, rajiꞌ cu bin u tsꞌurinticob mac soc u puriquech tu cu maꞌcʌr winicob. Jun yarob techex, cu bin purbir ten quisin soc u tumtic a worex quir a pꞌʌtiquex u tꞌʌn Cꞌuj. Caꞌ bin mucꞌyajnʌquex diez u qꞌuinin, chen a mac a mʌꞌ ju pꞌʌtic u tꞌʌn Cꞌuj, cax quinsbir ten u racꞌob, raꞌ jeꞌ u tsꞌabʌr ten Cꞌuj a baꞌ jach manan coꞌoj, bin u caꞌ tsꞌabʌr u cuxtar munt qꞌuin, soc tiꞌ cu cuxtar ich ʌcʌtan tu wich Cꞌuj.
\v 11 Quin chich aric tech caꞌ a quibej a baꞌ cu yaꞌaric u Tajꞌor u Pixam Cꞌuj tiꞌ a mac a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj. A mac a cꞌuchaꞌan yor tiꞌ a baꞌ cu tumtic u yor, soc u man tu tsoyir, rajiꞌ mʌꞌ ju bin ich u cꞌaqꞌuir betnaj a tiꞌ yʌn munt qꞌuin.”
\s Rajiꞌ u tꞌʌn Jesucristo tiꞌ u pastorir a tiꞌ yʌn ich u cajar Pérgamo
\p
\v 12 Caj yaꞌaraj Jaj Tsꞌur ten:
\p ―A techoꞌ, Juan ―quij Jaj Tsꞌur―, tsꞌibtej a baꞌ quin waꞌaric ich a jeꞌ juꞌunaꞌ tiꞌ u pastorir, a ju tsꞌurir a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj ich u cajar Pérgamo. Arej tiꞌ: “A jeꞌ tꞌʌnaꞌ u tꞌʌn a mac a yʌn u mascab, a jach quiꞌ yej, a yʌn caꞌtur yejeꞌ.”
\v 13 Arej tiꞌ: “A tenoꞌ, in wer tu cotor baꞌ ca betic. A tenoꞌ, quij Jaj Tsꞌur, quin cꞌʌꞌotic baꞌ ca wiric, cax a tsoyoꞌ, cax a mʌꞌ tsoyoꞌ. Quin cꞌʌꞌotic tu cotor baꞌ a cu tumtic a wor tu yʌnech, quireꞌ jach cꞌas tu yʌnech quireꞌ rajiꞌ cu jach tsꞌurinticob a Satanásoꞌ. Mʌꞌ ja wirej, rajiꞌ Antipas, caj u yaꞌaraj: A tenoꞌ quin wacsic tin wor tiꞌ Cristo, tan in quibic u tꞌʌn Cristo. Rajiꞌ tan u cꞌʌꞌotic u mucꞌ Cristo, tan u yaꞌaric u jach cꞌujintic Cꞌuj, cax tan u chuquicob u pach Antipas. Caj quinsaꞌb ten u racꞌob Antipas, cax quinsbir, taj caj u yacsaj tu yor ten tu yʌn uch. Quireꞌ tar yʌnoꞌ cu tsꞌurinticob quisin a winquirob ich u cajar Pérgamo.
\v 14 Cax yʌn baꞌ jach tsoy tech quin wiric. Yʌn baꞌ mʌꞌ tsoy in wiric, chen mʌꞌ yaꞌab a mʌꞌ tsoyiꞌ. Quireꞌ yʌn mac tu yʌntech ta cajar Pérgamo cu quibicob a baꞌ cu camsic Balaam tiꞌ Balac a uchoꞌ. Mʌꞌ ja wirej, a baꞌ camsaꞌb ten Balaam tiꞌ Balac caj u pʌyaj u siꞌpir u winquirob israel uch. Quireꞌ tu jantob a yoꞌochoꞌ a tsꞌaꞌb ten u winquirob Balac tiꞌ u tus cꞌuj, jeroj pachir, robob caj manob yejer a xquicoꞌ.
\v 15 Mʌꞌ jaririꞌ, yʌn mac tu yʌnech xan, cu sayʌrob tu pachob a baꞌ camsaꞌb ten u winquirob nicolaítas. A baꞌ camsaꞌb tiꞌoboꞌ quin pꞌactic, quij Jesús.
\v 16 Rajen cꞌax a wor, caꞌ a pꞌʌt a baꞌ mʌꞌ tsoy in wiriquiꞌ. Wa seb ca cꞌaxic a worex, tan a pꞌʌtiquex a cꞌasirex mʌꞌ jin tsꞌictar techex. Quireꞌ wa ber caꞌ bin in tꞌʌnechex, yaj ca bin a wuꞌyejex in tꞌʌn, an ten bic uꞌyex wa ja mascaboꞌ, a yʌn caꞌtur yej, uꞌyex wa tan u ramiquechex. 
\v 17 Quin chich aric tech, caꞌ a quibej a baꞌ cu yaꞌaric u Tajꞌor u Pixam Cꞌuj tiꞌ a mac a yacsmʌnob tu yor tu cu muchꞌquinticob u bʌjob quir u cꞌujinticob Cꞌuj. A mac a cꞌuchaꞌan yor tiꞌ a baꞌ cu tar u tumtic u yor soc u man tu tsoyir, rajiꞌ jeꞌ in jansic a baꞌ cu cuxquintic u pixamoꞌ, a baꞌ a mʌꞌ cꞌuchaꞌan yor yiric mac. Jeꞌ in tsꞌic tiꞌ tuririꞌ sʌc tunich, soc yer tu quiꞌquint in wor. Tiꞌ tsꞌibaꞌan yocꞌor a ray sʌc tunichoꞌ u jer u cꞌabaꞌ, chen rajiꞌ yer u cꞌabaꞌ a mac a cu cꞌʌmic u chan sʌc tunichiroꞌ.”
\s Rajiꞌ u tꞌʌn Jesucristo tiꞌ u pastorir a tiꞌ yʌn tu cajar Tiatira
\p
\v 18 Caj yaꞌaraj Jaj Tsꞌur ten:
\p ―A techoꞌ, Juan ―quij Jaj Tsꞌur―, tsꞌibtej a jeꞌ juꞌunaꞌ tiꞌ a pastoroꞌ, a ju tsꞌurir a yacsmʌnob tu yorob tu cu muchꞌquinticob u bʌj quir u cꞌujinticob Cꞌuj ich u cajar Tiatira. Tsꞌibtej, caꞌ a waꞌarej tiꞌ: “A jeꞌraꞌ u tꞌʌn u parar Cꞌuj, a mac yʌn u wich ir u sasirir cꞌacꞌ, rajen chʌcaꞌan yiric tu cotor baꞌ. Rajiꞌ yʌn yoc xan, tu chꞌicaꞌan irej u chuquij cꞌacꞌ, robob cu rembaj irej a chʌc taqꞌuinoꞌ, a ricꞌbenoꞌ.”
\v 19 Arej tiꞌ a pastoroꞌ: “A tenoꞌ, in wer tu cotor baꞌ ca betic. A tenoꞌ, quin cꞌʌꞌotic a baꞌ ca wiric, cax a tsoyoꞌ, cax a mʌꞌ tsoyoꞌ. Quin cꞌʌꞌotic ca yajquintic a wet acsʌꞌorir. Mʌꞌ ca chen wacsic ta wor tiꞌ ten, ca quiꞌ beyaj ten xan. Ca man tu tsoyir, a jeꞌraꞌ ta quiꞌ cʌn a techoꞌ. Nemʌꞌ biquech xan.
\v 20 Cax yʌn tech, baꞌ jach tsoy in wiric, yʌn baꞌ tech a mʌꞌ tsoy in wiric xan. Mʌꞌ ja wirej, yʌn tech tu ca muchꞌquintic a bʌjob quir a cꞌujinticob Cꞌuj, turiꞌ xquic, u cꞌabaꞌ Jezabel. Rajiꞌ caj chaꞌb u camsic a wet acsʌꞌorirex quireꞌ caj u yaꞌaraj wa tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj. Rajiꞌ caj u tus camsaj tiꞌob, caꞌ u jantej yoꞌoch a tsꞌaꞌb tiꞌ u tus cꞌuj. Rajiꞌ xan, caj u tus camsaj tiꞌob caꞌ manʌcob yejer mac.
\v 21 A uchoꞌ, caj in chich araj tiꞌ Jezabel caꞌ u cꞌaxej tu yor quir u pꞌʌtic u man u yiric mac. Caj manij yaꞌab u qꞌuinin mʌꞌ ju cꞌaxa yor soc u pꞌʌtic u cꞌasiriꞌ. 
\v 22 Rajen tiriꞌ, quin bin in pichꞌintej tu chꞌac quir u mucꞌyaj. Bayiriꞌ xan, u yet manacob winic, chen robob, jach chꞌic yum mucꞌyaj cu bin u mucꞌyajob quireꞌ tu quibob u tꞌʌn Jezabel. Chen wa ber caꞌ bin u cꞌaxob tu yorob, tan u pꞌʌticob tu cu manob tu cꞌasir, tan u yacꞌtob u bʌj, jeroj tuneꞌ, mʌꞌ ju tar tiꞌob u mucꞌyajob. 
\v 23 Quireꞌ a mac a caj u quibob u tꞌʌn Jezabel jeꞌ in chaꞌic caꞌ quinsacob. Rajen a mac a yacsmʌnob tu yoroboꞌ soc yerob jach sasir in wich rajen quin wiric a baꞌ cu tucricob, bayiriꞌ a baꞌ tiꞌ yʌn tu yorob xan. A tenoꞌ, quij Jaj Tsꞌur, bin in caꞌ in boꞌot u boꞌorir u cꞌʌb tu cotor a mʌꞌ ju chen quibob u tꞌʌn Jezabel.
\v 24 Bajeꞌrer, bin in caꞌ in tꞌʌnechex a mac a mʌꞌ tu quibob u tꞌʌn Jezabel. Quin tꞌʌnicob a mac a yacmʌnob tu yorob tu cu muchꞌquinticob u bʌjob quir u cꞌujinticob Cꞌuj ich u cajar Tiatira. Quireꞌ mʌꞌ ta tumtex quir a wirex a baꞌ cu yaꞌaric ich a racꞌobex, a cu jach mucu tꞌʌn tiꞌ a quisinoꞌ, quireꞌ soc a werex baꞌ quiriꞌ a tiꞌoꞌ. Mʌꞌ jin bin in tsꞌʌr a pachex caꞌ mucꞌyajnʌquex quireꞌ tiꞌtiꞌ tu mucꞌyajnʌjechex uch.
\v 25 Chen tu cotor baꞌ a yʌn techex tiꞌ a tajoꞌ, quiꞌ cʌnantexiꞌ hasta caꞌ bin uruquen a tenoꞌ.
\v 26 Arej tiꞌob: A mac a cꞌuchaꞌan yorob tiꞌ a baꞌ cu tar u tumtic u yorob soc u manob tu tsoyir hasta cu quimin, rajiꞌ quin bin in wacsej caꞌ u yam ten tu bin ocar u reyintiquenob mac tu cotor.
\v 27 Tu cu bin u yamtiquen u reyinticob, bin u caꞌ quiꞌ reyintoꞌonex mac. Mʌnaꞌ mac cu bin u cꞌuchur u yorob toꞌonex, tu cotor mac bin u caꞌ u sʌjtoꞌonex. A mac a cu pꞌacticoꞌonex, quic bin ic chꞌesicob an ten bic a cu pꞌʌpꞌʌchꞌʌtic u pꞌurir yoꞌoch jaꞌ yejer u mascab, quireꞌ baxuc caj tetaꞌb ten Cꞌuj.
\v 28 A tenoꞌ, quij Jaj Tsꞌur, iren a sab a cococh ichoꞌ, a yʌjꞌacsʌyʌjir qꞌuinoꞌ, a jach sasir u wichoꞌ. A mac a cꞌuchaꞌan yor tiꞌ a baꞌ cu tumtic u yor, jeꞌ in chaꞌic u yocar tu yʌnen wa ber caꞌ bin uruquen a tenoꞌ.
\v 29 Quin chich aric tech caꞌ a quibej a baꞌ cu yaꞌaric u Tajꞌor u Pixam Cꞌuj tiꞌ a mac a yacsmʌnob tu yor tu cu muchꞌquinticob u bʌjob quir u cꞌujinticob Cꞌuj, soc u man tu tsoyir.”
\c 3
\s Rajiꞌ u tꞌʌn Jesucristo tiꞌ u pastorir a tiꞌ yʌn ich u cajar Sardis
\p
\v 1 Caj yaꞌaraj Jaj Tsꞌur ten:
\p ―Juan ―quij Jaj Tsꞌur―, tsꞌibt a jeꞌ juꞌunaꞌ tiꞌ a pastoroꞌ a ju tsꞌurir a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj ich u cajar Sardis. Tsꞌibtej tiꞌ, caꞌ a waꞌarej tiꞌ: “A tenoꞌ, Jaj Tsꞌuren, tiꞌ yʌnen tu yʌnob a siete u pixamoꞌ, a tiꞌ yʌnob ich ʌcʌtan tu wich Cꞌuj. Bayiriꞌ xan, a tenoꞌ, in mʌchmʌn ich in cꞌʌb, a nojoꞌ, a siete u saboꞌ. Arej tiꞌ: A tenoꞌ in wer tu cotor baꞌ ca betic. Quin cꞌʌꞌotic a baꞌ ca wiric, cax a tsoyoꞌ, cax a mʌꞌ tsoyoꞌ. Tu cotor mac tan u man u jumintob bic tabar caj a wacsaj ta worex tiꞌ u tꞌʌn Cꞌuj, chen a tenoꞌ quin wiric tech an ten bic u chuquij cꞌacꞌoꞌ, a tabar u tupuroꞌ.
\v 2 Quiꞌ cʌnant a bʌj soc mʌꞌ a pꞌʌtic u tꞌʌn Cꞌuj. Chichquint u yorob a mac a cu cꞌujinticob Cꞌuj, caꞌ a chich arej tiꞌob caꞌ manacob tu tsoyir quireꞌ or u binob, ir u chuquij cꞌacꞌ, a tabar u tupuroꞌ. Mʌꞌ ja wirej, a Cꞌujoꞌ cu yiric mʌꞌ ja jach man tu tsoyir, rajen mʌꞌ ja quiꞌquint u yor Cꞌuj. Baxuc quin wac tech, quireꞌ yaꞌaraj Jaj Tsꞌur. 
\v 3 Quin cꞌasic tech, quij Jaj Tsꞌur, bic caj a quiꞌ cꞌʌm u tꞌʌn Cꞌuj uch, wa ber caj a wuꞌy u jach tsoyir u tꞌʌn Cꞌuj. Quiꞌ cʌnantej u tajir u tꞌʌn Cꞌuj, a baꞌ ta cꞌʌmaj uch. Toc cꞌax a wor tiꞌ a baꞌ ta pꞌʌtaj. Wa mʌꞌ ja sar a xiquin tiꞌ a baꞌ quin chich aric tech, seb quin bin ur quir in taquic a joꞌr, a ray u qꞌuininoꞌ a mʌꞌ ja tucr in wuꞌuroꞌ, raꞌ u qꞌuininoꞌ seb quin wuꞌur, an ten bic mac a cu taꞌquic baꞌ, a mʌꞌ pajaꞌan caꞌ bin tacoꞌ a baxucoꞌ, seb quin wuꞌur.
\v 4 Cax yʌn yaꞌab mac tu ca tsecꞌtic u tꞌʌn Cꞌuj ich u cajar Sardis, a cu manob tu cꞌasirob, chen yʌn jun yarob tu yʌnech robob mʌꞌ tu ecꞌquintaꞌb u nocꞌobiꞌ, robob a jeꞌ in wet binac yejerob a sʌc u nocꞌoboꞌ quireꞌ tsoy tu wich Cꞌuj.”
\v 5 Arej tiꞌob ―quij Jaj Tsꞌur―: “A mac a cꞌuchaꞌan yor tiꞌ soc mʌꞌ u bin acsaꞌbir u siꞌpir, cax a baꞌ cu tumtic u yoreꞌ. Raꞌ cu bin tsꞌaꞌbʌr tiꞌ ten Cꞌuj caꞌ u buquintej sʌc nocꞌ quir u yesic rajiꞌ caj u cʌnaj Cꞌuj. Caꞌ bin xuruc tꞌʌn, tiꞌ cu bin irbir ten Cꞌuj a ray macoꞌ u cꞌabaꞌ tu juꞌunin a cu tsꞌabʌr tiꞌ cuxtar munt qꞌuin. A ray u qꞌuinin xanoꞌ, bin in caꞌ in wac tiꞌ in Tet Cꞌuj ich caꞌanan yejer u yʌjmasirob u tꞌʌn wa rajiꞌ caj u cʌnaj in tꞌʌn.
\v 6 Quin chich aric techex caꞌ a quibej a baꞌ cu yaꞌaric u Tajꞌor u Pixam Cꞌuj tiꞌ a mac a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj soc u manob tu tsoyir.”
\s Rajiꞌ u tꞌʌn Jesucristo tiꞌ u pastorir a tiꞌ yʌn ich u cajar Filadelfia
\p
\v 7 Caj yaꞌaraj Jaj Tsꞌur ten:
\p ―Juan ―quij Jaj Tsꞌur―, tsꞌibt a jeꞌ juꞌunaꞌ tiꞌ a pastoroꞌ, a ju tsꞌurir a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj ich u cajar Filadelfia. Tsꞌibtej, caꞌ a waꞌarej tiꞌ a pastoroꞌ: “A tenoꞌ, quij Jaj Tsꞌur, taj in wor quireꞌ rajraꞌ quin betic a baꞌ tsoy tu tꞌʌn Cꞌuj, bayiriꞌ xan, a tenoꞌ taj a baꞌ quin waꞌaric tiꞌ mac. A tenoꞌ, yʌn ten u cꞌʌrʌbar, raꞌ u cꞌat yaꞌaric, yʌn in mucꞌ a tenoꞌ an ten bic rey quir u reyinticob mac an ten bic ic nunquirex rey a David a uchoꞌ.”
\v 8 Arej tiꞌ: “A tenoꞌ, quij Jaj Tsꞌur, In wer tu cotor baꞌ a ca beticoꞌ. Quin cꞌʌꞌotic a baꞌ ca wiric, cax a tsoyoꞌ, cax a mʌꞌ tsoyoꞌ. A tenoꞌ caj in tsꞌajaj tech u jor naj quir a beyaj tiꞌ Cꞌuj. Mʌnaꞌ mac cꞌuchaꞌan yor u cꞌʌric quir u suꞌsic soc mʌꞌ a wesic Cꞌuj tiꞌ mac. Cax mʌꞌ toy tajac a wacsic ta wor mʌꞌ ja pꞌʌt u tꞌʌn Cꞌujiꞌ. Taj caj a waꞌaraj: Tin wacsaj tin wor tiꞌ u tꞌʌn Jesucristo, tu tu chucob in pach.
\v 9 Uꞌyex baꞌ quin wac techex. Bin in caꞌ in tsꞌʌr u pachob caꞌ xonrac ʌcʌtan techex a mac a cu tus aricob: U winquirenob judío, chen robob u tsꞌurir quisin, raꞌ cu cꞌujinticob. Bin in caꞌ in tsꞌʌric u pachob soc u sʌjtiquenob, soc yerob, a techexoꞌ in jach yajechex.
\v 10 Mʌꞌ ja wirej, jach pacachbirech caj a wesaj tiꞌ a racꞌob an ten bic in cꞌat tech, cax tu cu chuquicob a pach, rajen bin in caꞌ in cʌnantech soc mʌꞌ a pꞌʌtic in tꞌʌn tu cu chuquicob a pach. Yʌn baꞌ cu bin tar tu yʌnech, chen mʌꞌ jaririꞌ tu yʌnech, jeꞌ u cꞌuchur tu cotor u ruꞌumin ich yocꞌocab. Tabar u bin u tumt a wor. Yaꞌab mac a cu bin tumtaꞌbir yorob, bin u caꞌ u pꞌʌtob in tꞌʌn, chen a techoꞌ mʌꞌ ja bin a pꞌʌtej quireꞌ quin cʌnantiquech.
\v 11 A tenoꞌ, seb quin wuꞌur quir in cʌnantiquech. Caꞌ manaquech tu tsoyir quireꞌ ta wacsaj ta wor, mʌꞌ a pꞌʌtic. Quireꞌ a mac a mʌꞌ ju man tu tsoyir, a mʌꞌ ju quib u tꞌʌn Cꞌuj mʌꞌ ju quiꞌ bin tsꞌabʌr ten Cꞌuj a baꞌ jach manan coꞌoj. Chʌcaꞌan u tsꞌabʌr tiꞌ u cuxtar munt qꞌuin, soc tiꞌ cu cuxtar ich ʌcʌtan tu wich Cꞌuj.
\v 12 A mac a cꞌuchaꞌan u yor tiꞌ a baꞌ a cu tumtic u yor soc u man tu tsoyir, a mʌꞌ ju pꞌʌt u tꞌʌn Cꞌuj, rajiꞌ jeꞌ u pꞌatʌr ich yicnʌn Cꞌuj munt qꞌuin. A tenoꞌ, bin in caꞌ in tsꞌibtic ich yocꞌor a tiꞌoꞌ u cꞌabaꞌ in Tet Cꞌuj, bayiriꞌ xan, in cꞌabaꞌ a tenoꞌ, a ricꞌbenoꞌ. Bayiriꞌ bin in caꞌ in tsꞌibtic ich yocꞌor a tiꞌoꞌ, u cꞌabaꞌ u cajar in Tet Cꞌuj a tu cʌjaꞌaniꞌ. Raꞌ u cajaroꞌ, u cajar a ricꞌbenoꞌ ich caꞌanan pʌchaꞌan u cꞌabaꞌ Jerusalén. Rajiꞌ bin u caj tar ich caꞌanan teraꞌ ich yocꞌocab. 
\v 13 Quin chich aric techex caꞌ a quibex a baꞌ cu yaꞌaric u Tajꞌor u Pixam Cꞌuj, tiꞌ a mac a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj soc u manob tu tsoyir.”
\s Rajiꞌ u tꞌʌn Jesucristo tiꞌ a pastorir a tiꞌ yʌn tu cajar Laodicea
\p
\v 14 Caj yaꞌaraj Jaj Tsꞌur ten:
\p ―Juan ―quij Jaj Tsꞌur―, tsꞌibt a jeꞌ juꞌunaꞌ tiꞌ a pastoroꞌ, a ju tsꞌurir a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj ich u cajar Laodicea. Tsꞌibtej, caꞌ a waꞌarej tiꞌ a pastoroꞌ: “A tenoꞌ, quij Jaj Tsꞌur, bin in caꞌ in nupꞌsej a baꞌ quin toc aric tiꞌ mac. Aroꞌ taj, quireꞌ a tenoꞌ quin masic tech a baꞌ cu yaꞌaric Cꞌuj taj ich a jeꞌ juꞌunaꞌ. A tenoꞌ, caj in betaj tu cotor a baꞌ tiꞌ yʌn, an ten bic Cꞌuj caj u toc araj ten.”
\v 15 Arej tiꞌ a pastoroꞌ: “A tenoꞌ in wer tu cotor baꞌ a ca betic. Quin cꞌʌꞌotic a baꞌ ca wiric, cax a tsoyoꞌ, cax a mʌꞌ tsoyoꞌ. A tenoꞌ, in wer a techoꞌ mʌꞌ chʌcowech tiꞌ Cristojiꞌ, mʌꞌ sisech tiꞌ Cristo xaniꞌ, jaj ix tiꞌ in wer mʌꞌ a jach yajquin ten wa mʌꞌ ja jach cꞌʌmaj ten xan. In cꞌat in wirej wa ta jach cꞌʌmaj Cristo, wa mʌꞌ ta cꞌʌmaj Cristo.
\v 16 Quireꞌ mʌꞌ ta jach cꞌʌmaj Cristo, mʌꞌ ta jach pꞌuspachtaj Cristo xan, rajen caj a choquint in wor, rajen bin in caꞌ in xumpꞌʌtech.
\v 17 A techoꞌ, quij Jaj Tsꞌur, ca tus tucric ta wor, tan a waꞌaric: A tenoꞌ, yʌn ten yaꞌab baꞌ a ten yʌninoꞌ, quireꞌ caj in wacsaj tin wor. Tan u jach tꞌajʌr, quech, rajen baꞌwir u jer ten jach yaꞌab, cax tsireꞌej in man tu tsoyireꞌ. Baxuc a wʌcꞌʌs bʌjiriꞌ tus aric, chen mʌꞌ a wer wa jach otsirchʌjech, mʌꞌ tan ja cꞌʌꞌotej xan. Rajen a cꞌat otsirirech quireꞌ cax yaꞌab a baꞌtac, mʌꞌ raꞌ cu yamtic a pixam, quireꞌ saꞌtʌr a caꞌ, irech a mac a mʌnaꞌ u wich, a mʌnaꞌ u nocꞌ xan.
\v 18 Rajen, quij Jaj Tsꞌur, a tenoꞌ, quin chich aric tech caꞌ a cꞌʌmen, quij Jaj Tsꞌur, a baꞌ cu jach coꞌojquintech an ten bic oro, a jach tsoyoꞌ. Quireꞌ wa taj ca cꞌujintic Cꞌuj yʌn tech tu cotor baꞌ a cꞌat. Mʌꞌ ja wirej, a mac a tan u yacsic tu yor, raꞌ irej a mac tan u tsꞌabʌr sʌcꞌ nocꞌ tiꞌ, soc mʌꞌ u chꞌic suraquir, quireꞌ chʌcpiten. Mʌꞌ ja wirej, a mac a tan u yacsic tu yor, rajiꞌ cu bin irbir bic jach manan tsoy a tenoꞌ, quij Jaj Tsꞌur. Rajiꞌ, a mac a tan yacsic tu yor ten, rajiꞌ irej a mac a mʌnaꞌ u wich uch, chen bajeꞌrer sasichʌjij u wich quireꞌ tu yacsaj tu yor ten.
\v 19 Mʌꞌ ja wirej, tan in chich aric tech, quij Jaj Tsꞌur, quireꞌ in jach yajech, rajen tan in qꞌueyiquech soc a quibic in tꞌʌn. Rajen jach pꞌis a bʌj caꞌ a cꞌax a wor tan a pꞌʌtic a cꞌasir quir a quibic in tꞌʌn.
\v 20 Mʌꞌ ja wirej, a tenoꞌ, quij Jaj Tsꞌur, taren ir a winicoꞌ a cu tar yirej yet winiquirob, a cu bʌxic chuncheꞌe, soc u tꞌʌnic u yet winiquirob, jaj ix tʌco cu yacsiquen. Mʌꞌ ja wirej, wa cu yacsiquen, quij Jaj Tsꞌur, jeroj pꞌeri quic janʌnex.
\v 21 A mac, quij Jaj Tsꞌur, a cꞌuchaꞌan yor tiꞌ a baꞌ cu tumtic u yor soc u man tu tsoyir, rajiꞌ cu bin tsꞌabʌr u mucꞌ soc pꞌeriꞌ cu bin u reyinticoꞌonob mac. An ten bic in Tet caj u betaj ten, quireꞌ caj u yiraj cꞌuchaꞌan in wor tiꞌ a quisinoꞌ uch. Mʌꞌ ja wirej, jeꞌ u tsꞌabʌr ic mucꞌ ten Cꞌuj a toꞌonexoꞌ quir u cꞌuchur ij corex tiꞌ a quisinoꞌ, quij Jaj Tsꞌur, bayiriꞌ tiꞌ a baꞌ a tiꞌ yʌn ich yocꞌocab.
\v 22 Quin chich aric techex caꞌ a quibex a baꞌ cu yaꞌaric u Tajꞌor u Pixam Cꞌuj, tiꞌ a mac a yacsmʌnob tu yorob tu cu muchꞌquinticob u bʌjob quir u cꞌujinticob Cꞌuj, soc u manob tu tsoyir.”
\c 4
\s A mac a cu cꞌujinticob Cꞌuj ich caꞌanan
\p
\v 1 Caj tsꞌoc in wʌyʌcꞌtic Jaj Tsꞌur, quij Juan, yejer a baꞌ tu yaꞌaraj ten Jaj Tsꞌur caꞌ in tsꞌibtej. Jeroj tuneꞌ, caj in wʌyʌcꞌtaj caꞌanan irej wa baxuc qꞌueb u jor naj quir in wiric ich caꞌanan. A baꞌ tin yʌn batꞌan uꞌyaj caj tar ich caꞌanan, caj yaꞌaraj a cu tꞌʌniquenoꞌ: 
\p ―Cojen Juan ich caꞌanan, quir in wesic tech a baꞌ cu bin tar caꞌ bin cꞌuchuc tu qꞌuinin, cax ich caꞌanan, cax a tiꞌ yʌn ich yocꞌocab.
\p Raꞌ cu tꞌʌniquenoꞌ caj u tꞌʌnajen irej jum u bac wacax a cu yutsic mac.
\p
\v 2 Seb caj u tar tin wocꞌor u Tajꞌor u Pixam Cꞌuj soc rajiꞌ quin tsꞌurintic. A baꞌ tin yʌn iraj ich caꞌanan caj in wʌyʌcꞌtaj, a Cꞌujoꞌ, tiꞌ yʌn tu cutan a jach caremoꞌ. 
\v 3 A mac a tin wʌyʌcꞌtaj a curucbar tu cutan a jach caremoꞌ, raꞌ u yochir caj in wiraj, quij Juan, an ten bic u tunich a jach coꞌoj u cꞌabaꞌ jaspe yejer u jer a cu yaꞌaricob cornalina. Tiriꞌ yʌn u cher xan, tan u bʌcristic u cutanoꞌ a jach caremoꞌ. A cheroꞌ, caj in wiraj irej u wich a tunichoꞌ, jach coꞌoj, jach yaꞌax u wich, a pʌchaꞌan u cꞌabaꞌ esmeralda.
\v 4 Tiꞌ yʌnob u jer mac caj in wʌyʌcꞌtaj ich caꞌanan. Tiꞌ yʌn veinticuatro. Tiꞌ curaꞌanobiꞌ tu cutanob an ten bic a rey yʌninoꞌ. Chen robob u cutanob an ten bic a rey yʌninoꞌ, tan u bʌcristicob tu cutan a jach caremoꞌ a tu curaꞌan mac a tin yʌn iraj. A robob a veinticuatrojoꞌ, jach chꞌijob. U buquimʌnob sʌc nocꞌ. U pꞌoquimʌnob u chan pꞌoc betmanob oro an ten bic a reyoꞌ cu pꞌoquintic. 
\v 5 Caj in wʌyʌcꞌtaj ich caꞌanan tu yʌn u cutanoꞌ a jach caremoꞌ, a caj in rʌc iraj, caj tar u raram ich u cutanoꞌ, a jach caremoꞌ, bayiriꞌ xan, caj tarob u pec, bayiriꞌ xan jach cꞌam u jum. Bayiriꞌ xan, ʌcʌtan u cutanoꞌ a caremoꞌ, tiꞌ yʌn baꞌ a cu yercꞌacꞌtic tu cotor mac, a yʌn u ras a sietejoꞌ a cu yercꞌacꞌtic tu cotor mac. Robob u siete pixamob, a tiꞌ yʌnob ʌcʌtan tu wich Cꞌuj. 
\v 6 Bayiriꞌ xan, caj in wʌyʌcꞌtaj ʌcʌtan ich u cutan a jach caremoꞌ tu curaꞌan mac a tin yʌn iraj caꞌch, tiꞌ yʌn irej ras a jach sascꞌʌrenoꞌ an ten bic a cꞌacꞌnaboꞌ quire jach coch.
\p Caj in wiraj xan, u jer baꞌ a irej bʌcꞌoꞌ, jach cuxaꞌan, chen u tiririꞌ tiꞌ u winquirir. Caj in wiraj cuatro a tiꞌoboꞌ. Robob xan, tiꞌ yʌn ich yicnʌn u cutanoꞌ a caremoꞌ, bayiriꞌ xan, robob caj u bʌcristob u cutan a caremoꞌ. Robob tʌcʌj yʌn u wichob, caj in wiraj tu cotor u winquirir, quireꞌ wa ca pʌctic u wichob ir u wich. Wa ca pʌctic u pachob ca wiric u wich xan.
\v 7 A baꞌ tin yʌn iraj, a baꞌ irej bʌcꞌ, a cuxaꞌanoꞌ, raꞌ irej chʌc barum. A tin wiraj a caꞌtur xanoꞌ, rajiꞌ irej a ton wacaxoꞌ. U jer a tin wirajoꞌ, a tresoꞌ, rajiꞌ yʌn u wich irej winic. U jer caj tin wiraj, a cuatrojoꞌ rajiꞌ irej coticaꞌan a tan u xitꞌic u xicꞌoꞌ.
\v 8 Robob, a baꞌ cuxaꞌanoꞌ, a cuatrojoꞌ, rʌc yʌn u xicꞌ xan. Jujuntur yʌn seis u xicꞌob. Cax tu ca wiric tiꞌob yʌn u wich. Raꞌ u beyajob quir u cꞌʌyicob Cꞌuj. Rajraꞌ tan u cꞌʌyicob:
\q Jach caremech Cꞌuj quireꞌ taj a wor, a techoꞌ Cꞌuj. Jach chich a mucꞌ a techoꞌ, munt qꞌuin cuxaꞌanech, cax a uchoꞌ, cax a bajeꞌrer, cax saman.
\p
\v 9 A mun u tenen a cuatrojoꞌ a baꞌ cuxaꞌanoꞌ cu yaꞌaricob tiꞌ, a mac a curucbar ich u cutan, a jach caremoꞌ, tan u caremquinticob u cꞌabaꞌ, a tan u sʌjticoboꞌ, tan yaꞌaricob tiꞌ: “Bayoꞌ Cꞌuj”, quireꞌ munt qꞌuin tiꞌ yʌnechiꞌ.
\v 10 A raꞌ u qꞌuininoꞌ a cuatrojoꞌ cu yaꞌaricob tiꞌ Cꞌuj aroꞌ, robob xan a veinticuatro xib a nuxiboꞌ, a curucbarob tu cutanoꞌ, an ten bic u cutan rey, cu rʌc bin xontarob ich ʌcʌtan a mac a curucbar tu cutan a jach caremoꞌ quir u cꞌujinticob, quireꞌ munt qꞌuin tiꞌ yʌniꞌ. Bayiriꞌ xan, cu rucꞌsicob u chan pꞌoc a ju betmʌn oro quir u pichꞌinticob ʌcʌtan tiꞌ a mac curucbar tu yʌn u cutan a jach caremoꞌ. Robob tan u cꞌʌyicob tiꞌ:
\q
\v 11 Jach manan tsoy caꞌ ij cꞌʌyech Cꞌuj, quireꞌ jach caremech, quireꞌ jach chich a mucꞌ, rajen quic sʌjtiquech Cꞌuj. Mʌꞌ ja wirej, ta toc betaj tu cotor baꞌ, quireꞌ baxuc a cꞌat, quireꞌ jach tsoy ta wich a techoꞌ. Baxuc cu cꞌʌyicob tiꞌ Cꞌuj.
\c 5
\s Juan caj u yir u juꞌunin a tsꞌibaꞌan tiꞌ, caj u yiraj tʌmʌn yuc
\p
\v 1 A tin wʌyʌcꞌtaj caj in wʌyʌcꞌtaj ich caꞌanan a caj in wʌyʌcꞌtaj Cꞌuj, tiꞌ yʌn curucbar tu cutanoꞌ a jach caremoꞌ. Tin wiraj ich u cꞌʌb Cꞌuj a curucbar tu cutanoꞌ a jach caremoꞌ. Tin wiraj u mʌchmʌn tu noj u cꞌʌb u juꞌunin toc catsꞌaꞌan. Toc tsꞌibaꞌan tu pach bayiriꞌ tu tan. Yʌn baꞌ nichꞌaꞌan quir u suꞌsic jumbuj. Tiꞌ yʌn siete baꞌ nichꞌaꞌan tu juꞌunin.
\v 2 Caj in wʌyʌcꞌtaj caꞌanan, caj in wiraj tuririꞌ yʌjmasirob u tꞌʌn Cꞌuj, a mac jach chich u mucꞌ. Rajiꞌ cꞌam caj u tsecꞌtaj, tan u cꞌatic:
\q A mac jach noꞌj soc cꞌuchaꞌan yor u qꞌueyic a jeꞌ juꞌunaꞌ, soc u rucꞌsic a baꞌ nichꞌaꞌan tu juꞌunin? Baxuc caj yaꞌaraj yʌjmasir u tꞌʌn Cꞌuj.
\p
\v 3 Mʌꞌ ja wirej, quij yʌjmasir u tꞌʌn Cꞌuj, a mac a betaꞌb ten Cꞌuj, a tiꞌ yʌn ich caꞌananoꞌ, mʌꞌ cꞌuchaꞌan u yorob tiꞌ caꞌ u qꞌueꞌej. Bayiriꞌ xan, quij yʌjmasir u tꞌʌn Cꞌuj, mʌnaꞌ mac a betaꞌb ten Cꞌuj a tiꞌ yʌnob ich yocꞌocabaꞌ, mʌꞌ cꞌuchaꞌan yorob tiꞌ. Mʌnaꞌ mac cꞌuchaꞌan yor caꞌ u pʌctej quir u xaquic. Baxuc caj u yaꞌaraj yʌjmasirob u tꞌʌn Cꞌuj.
\v 4 Rajen a tenoꞌ, quij Juan, jach chich ocꞌnʌjenoꞌ, quireꞌ mʌꞌ irir ten Cꞌuj a mac jach noꞌjiꞌ quir u qꞌueꞌic a juꞌunoꞌ, a tiꞌ yʌn ich u cꞌʌb Cꞌuj, cax cu pʌctic quir u xaquic.
\v 5 Caj araꞌb ten a tuririꞌ mac a curucbar tu cutan, an ten bic u cutan a reyoꞌ. Rajiꞌ tuririꞌ ich a xiboꞌ a nuxiboꞌ. Rajiꞌ caj u yaꞌaraj ten:
\p ―Chur a wich. Mʌꞌ ja wirej, tiꞌ yʌn tuririꞌ mac a cꞌuchaꞌan yor caꞌ u qꞌueꞌej, quireꞌ rajiꞌ cꞌuchaꞌan yor tiꞌ a quisinoꞌ, rajij yʌn u mucꞌ quir u qꞌueꞌic. Bayiriꞌ xan, yʌn u mucꞌ quir u rʌquic a baꞌ nichꞌaꞌan ich a ray juꞌunoꞌ, a siete baꞌ nichꞌaꞌan tiꞌoꞌ. Rajiꞌ rey, cax mʌꞌ toy tac u reyinticob u winiquirob israel David. Rajiꞌ xan, u yoꞌnen Judá xan. Rajiꞌ jeꞌ ic reyintiquex yejer tu cotor mac. Baxuc caj u yaꞌaraj a mac nuxiboꞌ tenoꞌ.
\p
\v 6 Caj in pʌctaj, quij Juan, caj in wiraj xʌcric tu chumuc tu yʌn a cuatro baꞌ, a cuxaꞌanobeꞌ, yejer a veinticuatro xiboꞌ, a nuxiboꞌ. Caj in wiraj, tiꞌ xʌcaꞌan u chan tʌmʌn yuc an ten bic quinsaꞌb quir u tsꞌic tiꞌ Cꞌuj. A tʌmʌn yucoꞌ, yʌn u bac u joꞌr. Yʌn siete u bac u joꞌr. Yʌn u wich xan, yʌn siete u wich. Robob a ju wichoꞌ a sietejoꞌ, raꞌ quir u camsicoꞌonex raꞌ u Tajꞌor u Pixam Cꞌuj quir u bin ich yocꞌocab quir u yiric tu cotor baꞌ.
\v 7 A ray tʌmʌn yucoꞌ an ten bic quinsaꞌboꞌ, rajiꞌ caj binij caj u chꞌaj a ray juꞌunoꞌ, a catsꞌmʌnoꞌ, a tiꞌ yʌn ich u noj a mac a curucbar tu cutan a jach caremoꞌ. 
\v 8 Caj tsꞌoc u chꞌic a ray juꞌunoꞌ, a catsꞌaꞌanoꞌ. Robob a veinticuatro xiboꞌ, a nuxiboꞌ, caj rʌc xonrajob ich ʌcʌtan a tʌmʌn yucoꞌ, an ten bic quinsaꞌboꞌ, quir u cꞌujinticob a tiꞌoꞌ. Quet bayiriꞌ xan, caj u betaj a cuatro baꞌ a irej bʌcꞌoꞌ, a cuxaꞌanoꞌ. Jujunturob a veinticuatro xiboꞌ, a nuxiboꞌ yʌn tiꞌob arpa quir u pʌxicob. Yʌn xan tu cꞌʌbob chan ruch u mʌchmʌnob chup yejer pom. A ruchoꞌ, rajiꞌ caj betaꞌb oro. Raꞌ quir u tsꞌic tiꞌ Cꞌuj an ten bic mac tan u tꞌʌnic Cꞌuj, rajen raꞌ u tꞌʌn a mac a yerob Cꞌujoꞌ.
\v 9 Caj cꞌaynʌjob yubej tʌmʌn yuc a baꞌ mʌꞌ u cꞌʌymʌnob mac uchoꞌ. Caj u cꞌʌyob a jeraꞌ:
\q Quireꞌ caj quinsaꞌbech tiꞌ toꞌonex quir a boꞌotic u boꞌorir ic siꞌpirex, rajen cꞌuchaꞌan a wor a chꞌic u juꞌunin a catsꞌaꞌaneꞌ quir a rʌquic a baꞌ nichꞌaꞌan tiꞌeꞌ. Mʌꞌ ja wirej, jocꞌ a qꞌuiqꞌuer quir u pꞌobar tu cotor mac tiꞌ u siꞌpirob, cax a baꞌ u yoꞌnen, cax a baꞌ u tꞌʌn, cax a baꞌ u ruꞌumin tu cʌjaꞌaniꞌ.
\v 10 A techoꞌ, ca bin a wacsicoꞌonex iroꞌonex rey soc ic yamtiquechex tu ca bin a wocar u reyinticob mac ich yocꞌocab. Caj a tacoꞌonex soc ic manex tu cu beyaj Cꞌuj iroꞌonex sacerdotejoꞌonex. Baxuc caj u yaꞌaraj tu cu cꞌayob uch.
\p
\v 11 Caj in wʌyʌcꞌtaj caj in pʌctaj a baꞌ tiꞌ yʌn ich caꞌananoꞌ. Tin wuꞌy u tꞌʌn u yet cꞌayob. Chen u jer jach pꞌencʌch millones yʌjmasirob u tꞌʌn Cꞌuj. Robob caj u rʌc bʌcristajob a mac a curucbar tu cutanoꞌ, a jach caremoꞌ yejer a cuatro irej bʌcꞌ, a cuxaꞌanoꞌ yejer a veinticuatro xib, a nuxiboꞌ. Rʌc chꞌiquicbarob, tu rʌc bʌcristob a mac a curucbar ich u cutanoꞌ, a jach caremoꞌ.
\v 12 Toc jumpuriꞌ caj u rʌc purob u tꞌʌn tiꞌ. Jach cꞌam caj u purob u tꞌʌn:
\q Quireꞌ rajiꞌ u tʌmʌn yuquech Cꞌuj, rajen caj a cꞌubaj a bʌj tiꞌ Cꞌuj quir a quinsaꞌ, rajen tu tsꞌaj tech a mucꞌ Cꞌuj. A baꞌ cu bin tsꞌabʌr tech caꞌ bin cꞌuchuc tu qꞌuinin, jach pajar cu bin tsꞌabʌr tech. Bin u caꞌ tsꞌa tech a ju neꞌer Cꞌujoꞌ. Yʌn tech a mucꞌ quir a tsꞌocsic a baꞌ a cꞌat. Caꞌ ij carex tech: Jach caremech Cꞌuj quireꞌ quin sʌjtiquechex soc tu cotor mac cu cꞌujinticob techoꞌ, caꞌ u yajquintechob xan. Baxuc caj u rʌc purob u tꞌʌn tiꞌ u tʌmʌn yuc Cꞌuj.
\p
\v 13 Tu cotor a baꞌ betaꞌb ten Cꞌuj, a tiꞌ yʌn ich caꞌanan, bayiriꞌ a baꞌ tiꞌ yʌn ich yocꞌocab, bayiriꞌ xan, a baꞌ tiꞌ yʌn ich cꞌacꞌnab, bayiriꞌ xan, a tiꞌ yʌn tu quimirir, caj in wuꞌyob caj u yaꞌarob:
\q Caꞌ ij carex tiꞌ a mac a curucbar tu cutanoꞌ, a jach caremoꞌ, quet bayiriꞌ tiꞌ a tʌmʌn yucoꞌ. Caꞌ ij carex, jach caremech, caꞌ ic sʌj tech soc tu cotor mac cu cꞌujinticob tech. Toc yʌn a mucꞌ soc ic reyintiquech mac soc u yajquintiquechob munt qꞌuin.
\p
\v 14 A cuatro baꞌ, irej bʌcꞌ, a cuxaꞌanoboꞌ, caj u yaꞌarob tiꞌ u tʌmʌn yuc Cꞌuj: “Caꞌ nupꞌuc u tꞌʌnob an ten bic caj u rʌc aꞌarob tech.” Robob a xiboꞌ a nuxiboꞌ caj rʌc xonrajob ich ʌcʌtan a tʌmʌn yucoꞌ quir u cꞌujinticob a mac a munt qꞌuin cu cuxtaroꞌ.
\c 6
\s A siete baꞌ a nichꞌaꞌan tu juꞌunin a catsꞌaꞌanoꞌ
\p
\v 1 Tu tin wʌyʌcꞌtaj ich caꞌanan, caj in wiraj a tʌmʌn yucoꞌ caj u pitaj a baꞌ nichꞌaꞌan tu juꞌunin a catsꞌaꞌanoꞌ. Tu chen rʌcaj tuririꞌ, quireꞌ tiꞌ yʌn siete a baꞌ nichꞌaꞌan tu juꞌunin. Caj tsꞌoc u rʌquic a tuririꞌ baꞌ tu nichꞌaꞌan tu juꞌunin caj in wuꞌyaj cꞌam tꞌʌnajij tuririꞌ a baꞌ, irej bʌcꞌ, a cuxaꞌanoꞌ. Rajiꞌ tuririꞌ ich a cuatro a baꞌ, irej bʌcꞌ, a cuxaꞌanoboꞌ. Caj in wuꞌyaj u tꞌʌn irej a baꞌ cu pec. Rajiꞌ caj u yaꞌaraj ten:
\p ―Cojen Juan, quen, caꞌ a pʌct a baꞌ cu bin tar caꞌ bin cꞌuchuc tu qꞌuinin.
\p
\v 2 Jeroj ʌcʌtan caj in wiraj tin wich tiꞌ xʌcaꞌan tuririꞌ tsimin, chen sʌc. A mac a cʌpaꞌan tu pach a tsiminoꞌ, rajiꞌ u mʌchmʌn jʌrʌr quir u bin u jurej mac. Tin wiraj u toc pꞌoquinmʌn tu joꞌr u pꞌoc an ten bic mac a toc cꞌuchaꞌan yor tiꞌ mac. Tin wiraj yʌn u wich an ten mac a cꞌuchaꞌan yor tiꞌ mac. Mʌꞌ ja wirej, rajiꞌ yer jeꞌ u cꞌuchur u yor tiꞌ mac tu cotor.
\p
\v 3 Caj tsꞌoc in pʌctic aroꞌ, caj in wiraj a tʌmʌn yucoꞌ caj u wʌcꞌʌs rʌc u jer baꞌ a nichꞌaꞌan tu juꞌunin, a catsꞌaꞌanoꞌ. Jeroj caj u jit u juꞌunin, a catsꞌaꞌanoꞌ hasta cꞌuchij tu yʌn a tres baꞌ a nichꞌaꞌan tu juꞌuninoꞌ. Jeroj tuneꞌ, caj in wʌcꞌʌs uꞌyaj u tꞌʌn u jer a baꞌ irej bʌcꞌ, a cuxaꞌanoꞌ, rajiꞌ a caꞌtur ich a cuatro a baꞌ irej bʌcꞌ, a cuxaꞌanoꞌ. Caj jocꞌ u tꞌʌn, caj u yaꞌaraj ten:
\p ―Cojen, quen, Juan, caꞌ a pʌct a baꞌ cu bin tar caꞌ bin cꞌuchuc tu qꞌuinin.
\p
\v 4 Jeroj ʌcʌtan tin wich caj in wiraj tiꞌ yʌn u jer tsimin xʌcaꞌan, rajiꞌ chʌc, caj joqꞌuij. A mac a cʌpaꞌan tu pach aroꞌ caj tsꞌaꞌb u mucꞌ ten Cꞌuj soc a mac a tiꞌ yʌnob ich yocꞌocab bin u caꞌ u pacran quinsicob u bʌj soc tu cotor mac mʌꞌ quet yorob, rajen u mʌchmʌn u mascab a cʌpaꞌan tu pach chʌc tsimin.
\p
\v 5 Barej caj tsꞌoc in pʌtic aroꞌ, caj in wir a tʌmʌn yucoꞌ, caj u rʌc u jer a baꞌ nichꞌaꞌan tu juꞌunin. Rajiꞌ caj u jit u juꞌunin tu catsꞌaꞌanoꞌ hasta cꞌuchij tu yʌn a cuatro baꞌ, a nichꞌaꞌan tu juꞌunin. Jeroj tuneꞌ, caj in wuꞌyaj u tꞌʌn a baꞌ irej bʌcꞌ, a cuxaꞌanoꞌ, rajiꞌ tres ich a cuatro a baꞌ irej bʌcꞌ, a cuxaꞌanoꞌ. Rajiꞌ caj u puraj u tꞌʌn ten caj yaꞌaraj:
\p ―Cojen Juan, caꞌ a pʌct a baꞌ cu bin tar caꞌ bin cꞌuchuc tu qꞌuinin.
\p Jeroj tuneꞌ, caj in wiraj u jer tsimin, chen box. A mac a cʌpaꞌan tu pach a tsiminoꞌ, u tꞌuymʌn u baꞌinquiriꞌ quir u ribratic baꞌ.
\v 6 Raꞌ u qꞌuininoꞌ caj in wuꞌy u tꞌʌn, jaj ix tiꞌ cu tar tiꞌ a mac a curucbar tu cutanoꞌ a jach caremoꞌ, quireꞌ tiꞌ yʌn chumuc a cuatro a irej bʌcꞌoꞌ, a cuxaꞌanoꞌ. Rajiꞌ caj u yaꞌaraj:
\p ―Jaririꞌ turiꞌ u kilo buꞌur u boꞌorir u cꞌʌb tuririꞌ u qꞌuinin ―quij―, a mac a cu beyaj cu chen bin u jaric u boꞌorir u cꞌʌb. Bayiriꞌ, xan, jaririꞌ mʌnaꞌ u nupꞌ u kilo yoꞌoch nʌr bin u jar u yoꞌoch u boꞌorir u cꞌʌb tuririꞌ u qꞌuinin u beyaj. A cu tꞌʌnoꞌ caj u toc aꞌaraj: “Mʌꞌ a cꞌasquintic u yucꞌur soc chʌc yʌn yucꞌur.” Bayiriꞌ yoꞌoch tsats xan, mʌꞌ a cꞌasquintic soc chʌc yʌn yoꞌoch tsats xan.
\p
\v 7 Caj tsꞌoc in pʌctic aroꞌ caj in wiraj u tʌmʌn yuc caj u pitaj a baꞌ nichꞌaꞌan tu juꞌunin caj u jitaj hasta xurij ich a baꞌ nichꞌaꞌan tu juꞌunin, a cincojoꞌ. Jeroj, tuneꞌ, caj u pur u tꞌʌn ten irej a bʌcoꞌ, a cuxaꞌanoꞌ, a cuatrojoꞌ. Rajiꞌ caj u yaꞌaraj:
\p ―Cojen, quen, Juan, soc a wiric a baꞌ cu bin tar caꞌ bin cꞌuchuc tu qꞌuinin.
\p
\v 8 Jeroj ʌcʌtan tin wich tu tin wʌyʌcꞌtaj tiꞌ yʌn u jer tuririꞌ tsimin tiꞌ xʌcaꞌaniꞌ, aroꞌ jach cꞌʌn. A mac a cʌpaꞌan tu pach, raꞌ u cꞌabaꞌ tu cu naj bin mac a cu quiminoꞌ quireꞌ raꞌ u cꞌabaꞌ. A mac a cu say tu pach a yʌn jocꞌoꞌ, rajiꞌ cʌpaꞌan tu pach u jer tsimin. Raꞌ u tsꞌurir tu cu bin a mac a cu quiminoꞌ. Robob toc tsꞌaꞌb u mucꞌ ten Cꞌuj a caꞌturoꞌ, quir u quinsicob mac tu cu chꞌʌquicob u bʌj, cax tu cu wiꞌichʌjʌr mac, cax tu cu yajtarob mac, bayiriꞌ xan cu bin quinsbir ten u cꞌaxir bʌcꞌ. Robob jeꞌ u quinsicob junxotꞌ a mac a cuxaꞌan ich yocꞌocab.
\p
\v 9 Caj tsꞌoc in wiric aroꞌ, jeroj tuneꞌ, caj in wʌcꞌʌs pʌctaj caj in wiraj a tʌmʌn yucoꞌ, caj u jit u jer a baꞌ nichꞌaꞌan tu juꞌunin, a catsꞌaꞌanoꞌ. Rajiꞌ caj u sʌtsꞌ u juꞌunin hasta caj xurij tu yʌn a sextojoꞌ quireꞌ tu jit a quintojoꞌ a baꞌ nichꞌaꞌan tu juꞌunin. Wa ber caj in wʌyʌcꞌtaj aroꞌ, caj in wiraj a mac quinsaꞌb ten u racꞌob quireꞌ tu quibob u tꞌʌn Cꞌuj caj u yacsob tu yorob tiꞌ Cristo uch. Robob tiꞌ yʌnob tu cuchir irob wa yaran tu cu naj quinsic yʌrʌcꞌ quir u tsꞌabʌr tiꞌ Cꞌuj quir u rucꞌsic u siꞌpir mac.
\v 10 Robob caj u purob u tꞌʌn tiꞌ Jaj Tsꞌur, caj cꞌam tꞌʌnajob tan yaꞌaricob:
\p ―Mun u qꞌuinin ic Jaj Tsurirex caꞌ ic pajex quir a boꞌotic u boꞌorir u cꞌʌb a mac a tu quinsoꞌonex ich yocꞌocab uch? Mun u qꞌuinin caꞌ ic pajex quir a taꞌquic u joꞌr a mac a tu quinsoꞌonex uch, quireꞌ rajraꞌ ca betic a baꞌ tsoy tu tꞌʌn Cꞌuj. Bayiriꞌ xan, jach taj a tsicbar quireꞌ rajraꞌ ca betic a baꞌ tsoy tu tꞌʌn Cꞌuj, a techoꞌ. 
\p
\v 11 Robob tsꞌaꞌb u buquintaj u sʌc nocꞌ ten Cꞌuj quireꞌ quinsaꞌb. Jujuntur tsꞌaꞌb u sʌc nocꞌ. Caj araꞌb tiꞌob caꞌ u jeꞌsob u bʌj u jer mʌꞌ yaꞌab u qꞌuinin quireꞌ mʌꞌ toy nupuquiꞌ a mun u yet acsʌꞌorirob a cu bin quinsbir ten u racꞌob xan. Bayiriꞌ xan, a cu bin u chucob u pachob an ten bic caj chucob u pachob xan.
\p
\v 12 Caj tsꞌoc in pʌctic aroꞌ, caj in wʌcꞌʌs iraj a tʌmʌn yucoꞌ, caj u rʌcaj, caj u jit u jer a baꞌ nichꞌaꞌan tu juꞌunin, a catsꞌaꞌanoꞌ. Rajiꞌ caj u sʌtsꞌaj u juꞌunin hasta xurij tu yʌn a septimojoꞌ, quireꞌ tu rʌcaj caj u jit a sextojoꞌ baꞌ, a nichꞌaꞌan tu juꞌunin. Jeroj tuneꞌ, caj in wir u chꞌic yum u pec ruꞌum, a qꞌuinoꞌ caj acꞌbirchʌjij soc irej jach ecꞌ nocꞌ, a mac a cu naj buquinticoꞌ quir u yesic tiꞌ mac, tucur u caꞌ. A jic nʌꞌoꞌ, tꞌʌraꞌan caj waysaꞌb soc chʌc u wich irej qꞌuiqꞌuer.
\v 13 Jeroj, caj in wiraj a saboꞌ ich caꞌananoꞌ, caj in wiraj u rubob ich caꞌanan, caj rubob irej wa ju wich cheꞌ cu jutur cu tar u chꞌic yum icꞌ, cax cꞌasaꞌan u wichob.
\v 14 Bayiriꞌ xan, a caꞌanoꞌ, binij an ten bic a juꞌunoꞌ, a mʌꞌ catsꞌaꞌanoꞌ, u catsꞌic u bʌj an ten bic juꞌun a catsꞌaꞌanoꞌ. A ruꞌumoꞌ yejer u witsoꞌ bayiriꞌ xan yejer u petenin jaꞌ caj rʌc rucꞌsaꞌb tu cuchir tu yʌnob uch.
\v 15-16 A ray u qꞌuininoꞌ, a reyoꞌ, a cu reyinticob mac, yejer a mac a cu tsꞌurinticob mac, yejer a capitanoꞌ, a ju tsꞌurir u soldado, yejer a mac a neyʌn u taqꞌuinoꞌ, yejer a mac a jach chich u mucꞌ quireꞌ yʌn u winiquirob, yejer a mac a cu cꞌʌnicob u jer mac, yejer a mac a ju cꞌurewob, yejer a mac a mʌꞌ cꞌanan ten u jer, caj rʌc putsꞌob tu japnin tunich, cax ich u tunichir ich witsꞌ quir u tacꞌbirob u bʌj, quireꞌ mʌꞌ u cꞌatob irir ten Cꞌuj tu cu bin u taquicob u joꞌrob ten Cꞌuj, yejer a tʌmʌn yucoꞌ, quireꞌ rajiꞌ cu bin u tuchiꞌticob soc u tsꞌaꞌbʌr u mucꞌyaj a tiꞌoboꞌ.
\v 17 Mʌꞌ ja wirej, cꞌuchij tu qꞌuinin caj urij Jesucristo a mac cꞌuchaꞌan u yor tsꞌabʌr u mucꞌyajob.
\c 7
\s U tetmʌn u winiquirob israel a cu tar tiꞌ u doce yoꞌnenob u nunquirob
\p
\v 1 Caj tsꞌoc in wʌyʌcꞌtic aroꞌ, a baꞌ u ber a tʌmʌn yucoꞌ, a caj u rʌcaj a baꞌ nichꞌaꞌan tu juꞌunin a catsꞌaꞌanoꞌ, quireꞌ tsꞌoc u rʌquic a seisoꞌ, a nichꞌaꞌan tu juꞌunin, soc in wer a baꞌ u ber caꞌ bin cꞌuchuc tu qꞌuinin. Jeroj tuneꞌ, caj in wʌyʌcꞌt u jer, caj in pʌctaj caj in wiraj u yʌjmasirob u tꞌʌn Cꞌuj. Cuatro caj in wiraj, tiꞌ yʌn tuririꞌ yʌjmasir u tꞌʌn Cꞌuj ich xʌman caꞌan, tiꞌ yʌn u jer tuririꞌ yʌjmasir u tꞌʌn Cꞌuj ich nojar, tiꞌ yʌn u jer yʌjmasir u tꞌʌn Cꞌuj tu cu tar a qꞌuinoꞌ, tiꞌ yʌn u jer tuririꞌ yʌjmasir u tꞌʌn Cꞌuj tu cu bin qꞌuin. Robob chꞌiquicbarob caj in wiraj yʌjmasirob u tꞌʌn Cꞌuj mʌꞌ ju chaꞌ u tar icꞌ ich yocꞌocab, cax tu ruꞌumin, cax ich cꞌacꞌnab, cax tu yʌn cheꞌoꞌ xan.
\v 2 Tin wir u jer yʌjmasir u tꞌʌn Cꞌuj, rajiꞌ caj u nac tu cu tar a qꞌuinoꞌ. Rajiꞌ u mʌchmʌn a baꞌ tsꞌaꞌb tiꞌ ten Cꞌuj, a cuxaꞌanoꞌ quir u cꞌʌnic. Raꞌ quir u tsꞌibtic tu pam mac soc rajiꞌ yer Cꞌuj yʌnin. Rajiꞌ caj u pur u tꞌʌn tiꞌ yet yʌjmasirob u tꞌʌn Cꞌuj, a cuatrojoꞌ. Jach cꞌam caj araꞌb tiꞌob a mac tsꞌaꞌb u mucꞌ quir u cʌrʌxbetic a ruꞌumoꞌ yejer a cꞌacꞌnaboꞌ, raꞌ a cuatrojoꞌ. Rajiꞌ caj u yaꞌaraj:
\p
\v 3 ―Mʌꞌ a chaꞌiquex u tar a icꞌoꞌ, ich ruꞌumoꞌ yejer a cꞌacꞌnaboꞌ yejer a cheꞌoꞌ. Mʌꞌ ja wirej, caꞌ batꞌan manʌcoꞌonex ic tsꞌibtex baꞌ tu pam mac a cu beyajob tiꞌ Cꞌuj. Cu tsꞌocar aro, jeroj tsoy a chaꞌiquex. Baxuc caj yaꞌaraj yʌjmasirob u tꞌʌn Cꞌuj tiꞌ u yet yʌjmasirob u tꞌʌn Cꞌuj.
\p
\v 4 A tenoꞌ, caj in wuꞌyaj yaꞌaraꞌ mun yaꞌabir u winiquirob israel caj tsꞌibtaꞌb tu pam ten u yʌjmasirob u tꞌʌn Cꞌuj. Caj yaꞌarob, yʌn ciento cuarenta mil yejer u jer cuatro mil ich u winiquirob israel. Robob tarob ich tu cotor u yoꞌnen u winiquirob israel.
\v 5 Caj tsꞌibtaꞌb tu pam ten yʌjmasirob u tꞌʌn Cꞌuj, a cu tar a yʌn yoꞌnen Judá, tiꞌ yʌn doce mil. U jer doce mil caj tarob ich a yʌn yoꞌnen Rubén. U jer doce mil caj tarob ich a yʌn yoꞌnen Gad.
\v 6 Caj tsꞌibtaꞌb tu pam ten yʌjmasirob u tꞌʌn Cꞌuj a cu tarob, ich a yʌn yoꞌnen Aser, yʌn doce mil. Bayiriꞌ xan, u jer doce mil caj tarob ich a yʌn yoꞌnen Neftalí. U jer doce mil caj tarob ich a yʌn yoꞌnen Manasés.
\v 7 U jer caj tarob ich a yʌn yoꞌnen Simeón. U jer doce mil caj tarob ich a yʌn yoꞌnen Leví. U jer doce mil caj tarob ich a yʌn yoꞌnen Isacar.
\v 8 U jer doce mil caj tarob ich a yʌn yoꞌnen Zabulón. U jer caj tarob ich a yʌn yoꞌnen José. U jer doce mil caj tarob ich a yʌn yoꞌnen Benjamín.
\s Rajiꞌ jach pim a mac u buquimʌnob sʌc nocꞌ
\p
\v 9 Caj tsꞌoc in wʌyʌcꞌtic a baꞌ u ber tiꞌoboꞌ, caj in wʌcꞌʌs iraj u jer. Caj in wiraj jach pim winiquirob. Mʌnaꞌ mac cꞌuchaꞌan yor u xaquej yirej mun yaꞌabir tiꞌ yʌniꞌ. Caj tarob u muchꞌquinticob u bʌj tiꞌ tu cotor u ruꞌumin tu cʌjaꞌanobiꞌ. Bayiriꞌ a tu cotor yʌn yoꞌnenoboꞌ, bayiriꞌ tu cotor a mac yer tꞌʌn. Robob caj u toc buquintob sʌc nocꞌ, bayiriꞌ xan, u rʌc mʌchmʌnob tu cꞌʌb u reꞌ xaꞌan. Caj u rʌc muchꞌquintob u bʌj ʌcʌtan tiꞌ u cutan, a caremoꞌ, a tin batꞌan iraj uch, bayiriꞌ xan, tiꞌ tu muchꞌquintob u bʌj ich ʌcʌtan a ju tʌmʌn yuc Cꞌujoꞌ. 
\v 10 A pimoꞌ, caj u cꞌamquintob u tꞌʌnob, tan yaꞌaricob: 
\q A techoꞌ caj a taquenob tiꞌ in siꞌpirob, bayiriꞌ xan, caj a taquenob uch tiꞌ a mac a tu chucob in pachob uch. Caꞌ ic sʌjtechex Cꞌuj a curucbarech ich a cutanoꞌ, a jach caremoꞌ, bayiriꞌ xan, tech u tʌmʌn yuquech Cꞌuj. Baxuc caj yarob a jach pimoꞌ.
\p
\v 11 Jeroj tuneꞌ, caj in wʌyʌcꞌt u yʌjmasirob u tꞌʌn Cꞌuj, caj rʌc chꞌicrajob ich ʌcʌtan a cutanoꞌ, a jach caremoꞌ tan u rʌc bʌcristicob xan. Bayiriꞌ xan, a veinticuatro xiboꞌ, a nuxiboꞌ, yejer a baꞌ irej bʌcꞌ a cuxaꞌanoꞌ, a cuatrojoꞌ. Robob caj xonrajob ʌcʌtan u cutan, a jach caremoꞌ caj u cꞌujintob Cꞌuj.
\v 12 Caj yaꞌarob tu tu cꞌujinticob Cꞌuj:
\q Raꞌ jach taj a baꞌ cu cꞌʌyob tech Cꞌuj yejer a tʌmʌn yucoꞌ. Caꞌ u sʌjtechob Cꞌuj yejerech a tʌmʌn yucoꞌ caꞌ u yajquintechob. Jach manan caꞌ u quiꞌ tꞌʌnechob an bic jach caremech. Jach manan a neꞌer. Caꞌ u yaꞌarechob: “Bayoꞌ.” Caꞌ u sʌjtechob quireꞌ jach manan a mucꞌ. Mʌꞌ ja wirej, jach manan chichir a mucꞌ, quireꞌ cꞌuchaꞌan a mucꞌ tu cotor baꞌ munt qꞌuin. Jeroj tsꞌoquij.
\p
\v 13 Tuririꞌ tuneꞌ, ich a veinticuatro xiboꞌ, a nuxiboꞌ, caj u tꞌʌnen, tan yaꞌaric:
\p ―Mac a ca wiriqueꞌ ich a pimoꞌ a ju buquimʌnob sʌc nocꞌ. Tub u tarob?
\p
\v 14 A Juanoꞌ caj u nuncaj tiꞌ tun:
\p ―A techoꞌ, in tsꞌurirech a wer ix tiꞌ.
\p Rajiꞌ, a xiboꞌ a nuxiboꞌ caj u yaꞌaraj ten:
\p ―A ray winic ca wiricoꞌ ―quij―, robob caꞌ bin jocꞌac tu yajirir a cu bin tar tu qꞌuinin ich yocꞌocab tu cu mucꞌyajob, chen tsꞌoquij bajeꞌrer. Robob u nocꞌob, a ju buquimʌnob caj tsꞌab u nocꞌoboꞌ caj rucꞌsaꞌb u siꞌpirob ten u qꞌuiqꞌuer tʌmʌn yuc. Rajen sʌc u nocꞌob quireꞌ caj u yacsob tu yorob tiꞌ Cristo.
\v 15 Rajen caꞌ bin chꞌicracob ʌcʌtan tu curaꞌan Cꞌuj ich u cutan, a jach caremoꞌ, soc rajraꞌ u cꞌanʌnob ten Cꞌuj tiꞌ a baꞌ u cꞌat, an ten bic a sacerdotejoꞌ. Rajiꞌ tan u quiꞌ acsaꞌob tu yʌnoꞌ soc u cʌnantaꞌob.
\v 16 A baꞌ u cꞌatoboꞌ bin u caꞌ tsꞌabʌr tiꞌob, rajen mʌꞌ ju bin wichʌjʌrob, mʌꞌ ju bin ucꞌchʌjʌrob, mʌꞌ ju bin yubob chʌcʌw qꞌuin, mʌꞌ ju bin qꞌuicꞌab xan.
\v 17 Quireꞌ a tʌmʌn yucoꞌ, raꞌ cu bin u cʌnantic irej a mac a cu cʌnantic u yʌrʌcꞌ tʌmʌn yuc quir u tsꞌic tiꞌob u yoꞌoch jaꞌ, a cu tar ich yicꞌ jaꞌ munt qꞌuin. Quireꞌ a Cꞌujoꞌ bin u caꞌ u chur u wich a mac a cu yocꞌar tu yʌnob a tiꞌoboꞌ.
\c 8
\s A baꞌ nichꞌaꞌan tu juꞌunin, a sietejoꞌ, bayiriꞌ u baꞌinquiriꞌ a rajiꞌ betaꞌb oro
\p
\v 1 Caj in wʌyʌcꞌtaj ich caꞌanan caj in pʌctaj caj in wir u tʌmʌn yuc caj u rʌcaj a baꞌ nichꞌaꞌan tu juꞌunin, raꞌ a sietejoꞌ. Caj tsꞌoc u rʌquic a baꞌ nichꞌaꞌan tu juꞌunin, rʌc chꞌen a mac a cu cꞌayob caꞌch. Jeroj mʌnaꞌ mac u tꞌʌn hasta manij chumuc hora.
\v 2 Jeroj tuneꞌ, caj in wiraj ich ʌcʌtan Cꞌuj pim u yʌjmasirob u tꞌʌn Cꞌuj. Ich a ray yʌjmasirob u tꞌʌn Cꞌuj, yʌn siete a cu chꞌictarob ich ʌcʌtan Cꞌuj. Caj tsꞌaꞌb tiꞌob ten mac u mascabir quir u xuxupticob, aroꞌ cu jum irej u bac wacax cu jum, raꞌ quir yer mac a baꞌ cu bin tar. Jujuntur yʌjmasirob u tꞌʌn Cꞌuj caj tsꞌaꞌb u macabir quir u xuxupticob. Yʌn siete tsꞌaꞌb tiꞌob.
\v 3 Pachir caj tar u jer yʌjmasir u tꞌʌn Cꞌuj tuneꞌ. Rajiꞌ caj bin chꞌictar ʌcʌtan u cuchir tu cu naj tar mac quir u toquic a baꞌ quiꞌ u boc tiꞌ Cꞌuj. A raꞌ cuchir a rajiꞌ betaꞌb oro xan. Rajiꞌ, u yʌjmasir u tꞌʌn Cꞌuj u mʌchmʌn u chan cuchir quir u cuchic a quiꞌ u bocoꞌ irej pom. Bayiriꞌ xan, u chan cuchir a ju mʌchmʌn a rajiꞌ betaꞌb u mascabir oro. Toc tsꞌaꞌb tiꞌ yaꞌab a quiꞌ u boqueꞌ irej pom quir u toquic tu cuchir a tiꞌ yʌn ʌcʌtan tiꞌ Cꞌuj. Raꞌ caj u tocaj soc quet yejer u tꞌʌn a mac a cu tꞌʌnicob Cꞌuj quet u binob. Robob a cu tꞌʌnicob Cꞌuj, robob u winiquirob Cꞌuj. A baꞌ tocaꞌb tiꞌ caꞌch, raꞌ irej a baꞌ cu naj toquic tu cuchir a tiꞌ yʌn ich u japnin, tu cu naj cꞌujinticob Cꞌuj u winiquirob israel. Chen aroꞌ caj in wiraj, tiꞌ yʌn ʌcʌtan tu cutan, a jach caremoꞌ.
\v 4 U butsꞌir a quiꞌ u boqueꞌ, a caj in wiraj, raꞌ irej u butsꞌir pom cu nacʌr ich Cꞌuj, a butsꞌoꞌ, cu nacʌr quet yejer a baꞌ tꞌʌn cu tꞌʌnicob u winiquirob Cꞌuj, quij. Robob naquij ich Cꞌuj. Raꞌ a quiꞌ u boqueꞌ a irej pom caj tocaꞌb ten yʌjmasir u tꞌʌn Cꞌuj.
\v 5 Caj bin u yʌjmasir u tꞌʌn Cꞌuj ich tu cu naj toquic a quiꞌ u boqueꞌ quir u tsꞌic tiꞌ Cꞌuj. Caj u cuchaj u chan mascabir, a rajiꞌ betaꞌb mascabir oro, a yʌn u quiꞌir u boc a irej pom. Caj cꞌuchij ich u cuchir tu cu naj toquic a quiꞌ u boqueꞌ quir u tsꞌic tiꞌ Cꞌuj, jeroj tunej, caj u ruchaj u chuquicꞌacꞌ a tiꞌ yʌn tu cuchir tu cu naj toquic a quiꞌ u boqueꞌ. Jeroj chupij tu japnin u chan mascabir a quir u cuchic a quiꞌ u boqueꞌ, jeroj tuneꞌ caj u pichꞌint u chuquicꞌacꞌ ich yocꞌocab, caj raramnʌj ich yocꞌocab, bayiriꞌ xan, caj pecnʌj a ruꞌumoꞌ, bayiriꞌ xan, jach cꞌam pecnʌj, cꞌam u jum.
\s A sietejoꞌ u macabir quir u yutstaꞌr mac
\p
\v 6 Wa ber caj in wʌyʌcꞌtaj u yʌjmasirob u tꞌʌn Cꞌuj, a robob a chꞌicaꞌanoꞌ ich ʌcʌtan Cꞌuj. A sietejoꞌ, a tin wiraj sam. Jeroj tin wiraj u ricꞌsicob u mascabir quir u yutstaꞌr mac, quireꞌ tabar u yutsicob.
\p
\v 7 U yʌjmasir u tꞌʌn Cꞌuj, a pʌyberoꞌ, caj u yutstaj u mascabir quir u yutstaꞌr mac. Rajen pur u bajaꞌ ich yocꞌocab, toc xaxacaꞌan yejer cꞌacꞌ, yejer qꞌuiqꞌuer xan, caj purij ich yocꞌocab. Jun xotꞌ a cheꞌoꞌ ich yocꞌocab, caj erij quireꞌ a cꞌacꞌoꞌ. Chen a suꞌucoꞌ, caj rʌc erij, bayiriꞌ xan jun xotꞌ a ruꞌumoꞌ, erij.
\p
\v 8 U jer yʌjmasir u tꞌʌn Cꞌuj, a caꞌturoꞌ caj u yutst u mascabir quir u yutstaꞌr mac. Rajen purij ich cꞌacꞌnab u baꞌin quiriꞌ irej a witsoꞌ, toc tꞌʌbaꞌan, rajen jun xotꞌ a cꞌacꞌnaboꞌ caj waysaꞌb chʌc, ir u qꞌuiqꞌuer mac.
\v 9 Quireꞌ a witsob, a tꞌʌbaꞌanoꞌ, jun xotꞌ a baꞌ tiꞌ yʌn ich cꞌacꞌnab caj quimij. Bayiriꞌ xan, jun xotꞌ u chemicꞌacꞌnab a tiꞌ yʌnoꞌ, caj jurobij.
\p
\v 10 U jer yʌjmasir u tꞌʌn Cꞌuj, a tresoꞌ, caj u yutstaj u mascabir quir u yutstaꞌr mac. Rajen purbij chꞌic yum sab toc tꞌʌbaꞌan, irej tʌjteꞌ cu yerar. Tar rub ich jun xotꞌ yicꞌ jaꞌ yejer chan sʌyab xan.
\v 11 Pʌchaꞌan u cꞌabaꞌ a ray saboꞌ, Cꞌaj cheꞌ, quireꞌ cꞌajij yoꞌoch jaꞌ tu rub a saboꞌ. Mʌꞌ ja wirej, jun xotꞌ cꞌajij. A mac jach bʌytʌc tiꞌ yoꞌoch jaꞌ, caj u yucꞌob aroꞌ caj quimij. Yaꞌab quimij quireꞌ cꞌajij yoꞌoch jaꞌ.
\p
\v 12 U jer yʌjmasir u tꞌʌn Cꞌuj, a cuatrojoꞌ, caj u yutst u mascabir quir u yutstaꞌr. Rajen caj acꞌbirchʌjij jun xotꞌ a saboꞌ yejer a qꞌuinoꞌ, yejer ic nʌꞌoꞌ soc chen chʌcaꞌan yiric mac irej jun xotꞌ acꞌbirchʌjij, cax chun qꞌuin cax acꞌbir.
\p
\v 13 Caj in wʌyʌcꞌtaj u jer yʌjmasir u tꞌʌn Cꞌuj, jeroj caj in pʌctaj caj in wiraj xicꞌ u caꞌ ich caꞌanan. Jeroj, tuneꞌ, caj in wuꞌyaj jach cꞌam u tꞌʌn tan yaꞌaric: 
\p ―Ay, quen, jach ay quen, otsirchʌjob a mac a cʌjaꞌan ich yocꞌocab quireꞌ tiꞌ toy yʌn u jer u mascabir quir u yutstaꞌr. Tiꞌ toy yʌn mʌnaꞌ u nupꞌ. Jeroj tabar u yutstaꞌr ten u yʌjmasirob u tꞌʌn Cꞌuj. Baxuc tu yaꞌaraj yʌjmasir u tꞌʌn Cꞌuj a xicꞌ u caꞌ.

\c 9
\p
\v 1 Jeroj, tuneꞌ, u jer yʌjmasir u tꞌʌn Cꞌuj, a cincojoꞌ, caj u yutst u mascabir quir u yutstaꞌr mac. Jeroj tin wiraj sab caj rub ich caꞌanan ich yocꞌor ruꞌum, a ray saboꞌ u cꞌat yaꞌaric cꞌas yʌjmasir u tꞌʌn Cꞌuj. Rajiꞌ tsꞌaꞌb ten mac u cꞌʌrʌbar a tu yʌn u jorir ich ruꞌum, a mʌꞌ u xuraꞌan u taminoꞌ.
\v 2 Rajiꞌ caj u qꞌueꞌ u jor a tu yʌn u jorir ich ruꞌum a mʌꞌ u xuraꞌan u taminoꞌ, jeroj caj naquij u butsꞌij ich caꞌanan a ir chꞌic yum u butsꞌir cꞌacꞌ. Quireꞌ a butsꞌoꞌ caj acꞌbirchʌjij a chunqꞌuinoꞌ, rajen caj u bʌr a qꞌuinoꞌ quireꞌ a butsꞌoꞌ, a cu nacʌr ich u jorir ruꞌum, a mʌꞌ xuraꞌan u taminoꞌ.
\v 3 Caj nac u butsꞌir a cu tar tu jorir ich ruꞌum a mʌꞌ u xuraꞌan u tamin. Jeroj, tuneꞌ, quet caj joqꞌuij saꞌacꞌ ich yocꞌocab, chen jach pim. Jeroj, caj tsꞌaꞌb chiꞌbiroꞌ mac soc u chiꞌbirob an ten bic roroch cu chiꞌbar ich yocꞌocab.
\v 4 Caj toc araꞌb tiꞌ a saꞌacꞌoꞌ mʌꞌ a jantiquex a baꞌ pʌcꞌaꞌan ich coroꞌ, mʌꞌ a jantiquex a cheꞌ xanoꞌ, mʌꞌ a jantiquex a suꞌuc xanoꞌ chen caꞌ a chiꞌex mac a mʌꞌ tsꞌibtaꞌan u pam ten yʌjmasir u tꞌʌn Cꞌuj uch.
\v 5 Tsꞌaꞌb tiꞌob ten Cꞌuj u mucꞌ quir u chiꞌbir a mac a mʌꞌ tsꞌibaꞌan u pam ten yʌjmasir u tꞌʌn Cꞌuj. Mʌꞌ u chaꞌbʌr u quinsaꞌrob chen quir u mucꞌyajob cinco ic nʌꞌ. Robob bin u caj mucꞌyajob an ten bic mac caj chiꞌbir ten roroch.
\v 6 A ray u qꞌuininoꞌ, a mac a chiꞌbir ten a saꞌacꞌoꞌ, bin u caꞌ u pachtob u quimin quireꞌ yaj yubicob u chiꞌbirob, chen mʌꞌ ju bin quiminob cax u cꞌat u quinsicob u bʌj. 
\p
\v 7 Caj in wir u winquirir a saꞌacꞌoꞌ, raꞌ irej yʌrʌcꞌ tsimin a mac a tabar u baꞌtetic mac. Tu joꞌrob tiꞌ u pꞌoquimʌn u pꞌoc irej u pꞌoc a reyoꞌ, rajiꞌ caj betaꞌb u mascabir oro. Chen robob u wich ir u wich xib.
\v 8 A saꞌacꞌoꞌ, jach cꞌʌrʌb u tsotser u joꞌr irob u joꞌr a xquicoꞌ. U cojoꞌ a saꞌacꞌoꞌ, irob u coj barum.
\v 9 A saꞌacꞌoꞌ, yʌn u boxer u tsem irob a betaꞌb u mascab quir u pixic u tsem mac wa ber cu bin tu baꞌteꞌ u jer soldado. A saꞌacꞌoꞌ, caj jumnʌj u xicꞌob, caj jumʌjob irob u chan carro a cu jitaꞌr ten tsimin quireꞌ chich u bin tu cu yocar baꞌteꞌ mac, tu jach pim cu bin baꞌteꞌ 
\v 10 A saꞌacꞌoꞌ, yʌn u yach an ten bic u yach roroch. Yʌn xan u yachob soc cꞌuchaꞌan yor u chiꞌbir mac soc u mucꞌyaj cinco ic nʌꞌ a mac a chiꞌbir ten a saꞌacꞌoꞌ. 
\v 11 A saꞌacꞌoꞌ, yʌn u tsꞌurir, rajiꞌ u yʌjmasir u tꞌʌn Cꞌuj uch, a mac jach cꞌas, a cu tar tu jor ich ruꞌum, a mʌꞌ xuraꞌan u tamin. Rajiꞌ pʌchaꞌan u cꞌabaꞌ ich u tꞌʌn hebreo Abadón, chen u cꞌabaꞌ pʌchaꞌan ich u tꞌʌn griego Apolión. Raꞌ u cꞌat yaꞌaric, a mac a cu chꞌesic baꞌ.
\p
\v 12 Caj araꞌb ten mac tu quin wʌyacꞌ uch: “A saꞌacꞌoꞌ, quij, tuririꞌ u mucꞌyaj caj manij, quij, tiꞌ toy yʌn u jer caꞌtur quir u tar u jer. Jeroj tabar u tar, caꞌ bin tsꞌocac a ray pʌyberoꞌ.” Baxuc caj u yaꞌaraj mac ten.
\p
\v 13 Caj in wʌyʌcꞌtaj ich caꞌanan caj in pʌctaj caj in wir u yʌjmasir u tꞌʌn Cꞌuj, caj u yutst u mascabir quir u yutstaꞌr, rajiꞌ a seisoꞌ. Caj tsꞌoc u yutstic caj in wuꞌy u tꞌʌn mac tar u tar u tꞌʌn ich yocꞌor u cuchir a tu tocaꞌb ten yʌjmasir u tꞌʌn Cꞌuj a quiꞌ u boqueꞌ caꞌch. A rayoꞌ tiꞌ yʌn ʌcʌtan ich Cꞌuj, rajiꞌ betaꞌb u mascabir oro, rajiꞌ yʌn u bac caj betaꞌb tu yʌn mac irej u bac a wacʌxoꞌ. Chen yʌn cuatro u bac tu joꞌr u cuchir a tu tocaꞌb ten yʌjmasir u tꞌʌn Cꞌuj a quiꞌ u boc caꞌch.
\v 14 A mac a cu tꞌʌn, a cu tar tu cuchir a tuj tocaꞌb a quiꞌ u boqueꞌ ich ʌcʌtan Cꞌuj, rajiꞌ caj u yaꞌaraj tiꞌ u yʌjmasir u tꞌʌn Cꞌuj, a tsꞌoc u yutstic u mascabir soc u yutsaꞌr mac:
\p ―Caꞌ xiquech a siptej a cuatro yʌjmasirob u tꞌʌn Cꞌuj, a mac a jach chich u mucꞌ, a mac tan u susaꞌ ten Cꞌuj quireꞌ cꞌʌxaꞌan bajeꞌrer, a tiꞌ yʌnoꞌ tu yʌn u yaꞌarir Eufrates.
\p
\v 15 Robob caj siptaꞌb ten a mac a caj u yutstaj u mascabir quir u yutstaꞌr, rajiꞌob a seisoꞌ, caꞌ xicob a raj cuatro yʌjmasirob u tꞌʌn Cꞌuj a jach chich u mucꞌob. Quireꞌ robob tetaꞌb ten Cꞌuj caꞌ tsꞌocac u mucꞌyaj a cu bin tar soc u quinsicob jun xotꞌ a mac a tiꞌ yʌn ich yocꞌocab. Mʌꞌ ja wirej, toc pꞌisaꞌan a horajoꞌ, bayiriꞌ xan, a qꞌuinoꞌ, bayiriꞌ xan, a ic nʌꞌoꞌ bayirir xan, a yaxqꞌuinoꞌ quir u siptaꞌr u mucꞌyaj.
\v 16 A mac a ju tsꞌurirob, a robob a cuatro yʌjmasirob u tꞌʌn Cꞌuj, robob caj u cꞌʌnob u yʌrʌcꞌ tsimin quir u quinsicob mac. Caj in wuꞌyaj mun caj u xacobiꞌ, caj in wuꞌyaj yʌn doscientos millones. Bayuc caj in wuꞌyaj uch.
\p
\v 17 Caj in wʌyʌcꞌtaj a rayoꞌ, caj in wiraj a mac cʌpaꞌan tu pach u yʌrʌcꞌ tsiminob, bayiriꞌ caj in wiraj biquiraꞌ u yʌrʌcꞌ tsiminob. A mac a cʌpaꞌan tu pach a tsiminob yʌn u nocꞌ a cu buquintic mac wa ber cu bin quinsbirob mac. Chen robob u nocꞌ cu rembaj irej cꞌacꞌ. U jer jun xotꞌ u nocꞌ yʌn cꞌʌn, u jer jun xotꞌ u nocꞌ yʌn baraꞌan chʌc. Robob u tsiminob a tu cʌpaꞌanob tu pachob, robob yʌn u joꞌr an ten bic u joꞌr barum. Tin wiraj u job cꞌacꞌ tu chiꞌob yejer u butsꞌir. Caj in wuꞌy u chuj cꞌacꞌ ich u chiꞌ tsiminoboꞌ xan.
\v 18 Rajiꞌ caj u quinsa mac a cʌpaꞌan tu pachob a ju yʌrʌcꞌ tsiminoboꞌ. Jun xotꞌ a mac tiꞌ yʌn ich yocꞌocab caj quinsaꞌb, quireꞌ a cu jocꞌar tu niꞌob u yʌrʌcꞌ tsimin cꞌacꞌ yejer u chiꞌ, rajiꞌ cꞌacꞌ yejer u butsꞌir yejer u job cꞌacꞌ.
\v 19 A tsiminoꞌ cꞌuchaꞌan yorob u tsꞌic mucꞌyajob mac yejer u nej xan. Mʌꞌ ja wirej, caj in wiraj yʌn chan can tu nej a tsiminoꞌ, chen a canoꞌ yʌn yaꞌab u joꞌrob. Rajen quinsaꞌb yaꞌab mac quireꞌ a baꞌ cu tar tu chiꞌ a tsiminoꞌ, yejer a mac chiꞌbir ten can ten u nej a tsiminoꞌ.
\p
\v 20 A mac a pꞌatob, a mac a mʌꞌ quinsaꞌb ten yajirir a yʌrʌcꞌ tsiminoboꞌ, robob mʌꞌ ju tucrob tu yorob u cꞌaxic u yorob caꞌ u pʌtob u tus cꞌuj a cu cꞌujinticob, cax wa betaꞌb u mascabir oro, cax u tus cꞌuj betaꞌb u mascabir sʌc taqꞌuin, cax wa betaꞌb u mascabir chʌc taqꞌuin, cax u tus cꞌuj betaꞌb tunich, cax u tus cꞌuj betaꞌb cheꞌ. Mʌꞌ ja wirej, robob u tus cꞌujob mʌꞌ ju jocꞌar u tꞌʌn, mʌꞌ ju yire baꞌ, mʌꞌ ju ximbar xan, mʌꞌ ju pꞌʌtob u cꞌujinticob u quisinin u winiquirob a quisinoꞌ.
\v 21 Robob, a mac pꞌatob a mʌꞌ quinsaꞌb ten a cu tar tu chiꞌ a tsiminoboꞌ baxuc tu nej a tsiminoboꞌ, robob mʌꞌ ju cꞌaxob tu yorob tan u pꞌʌticob u cꞌasirob quireꞌ tu quinsob mac uch, mʌꞌ ju pꞌʌtob u cꞌʌyicob u bʌj. Mʌꞌ ju cꞌaxob tu yorob tan u pꞌʌticob u cꞌasirob quireꞌ cu manob, mʌꞌ ju cꞌaxob tu yorob tan u pꞌʌticob u cꞌasirob quireꞌ cu yaꞌcrob baꞌ uch.
\c 10
\s U yʌjmasir u tꞌʌn Cꞌuj a yʌn u juꞌunin
\p
\v 1 Caj in wʌyʌcꞌtaj Cꞌuj ich caꞌanan, caj in pʌctaj caj in wiraj u jer yʌjmasir u tꞌʌn Cꞌuj. Rajiꞌ tsꞌaꞌb u mucꞌ soc jach chich u mucꞌ, quireꞌ eman u caꞌ caj in wiraj ich caꞌanan caꞌ xic ich yocꞌocab. Caj in wiraj a ray yʌjmasir u tꞌʌn Cꞌuj, rajiꞌ ir u tapmʌn u bʌj yejer muyar. Caj in wiraj a baꞌ pꞌoquinmʌn tu joꞌroꞌ, raꞌ irej a cheroꞌ. Rajiꞌ u tan u wich xan, jach sasir ir u sasirir a qꞌuinoꞌ, chen caj in wiraj tu cotor u yoc yejer u chac bʌqꞌuer yoc robob irej a cꞌacꞌoꞌ a cu nacʌr caꞌananoꞌ.
\v 2 Tiꞌ yʌn tu tan u cꞌʌb tuririꞌ chan juꞌun toc choraꞌan. U noj u yocoꞌ caj u yachꞌʌctaj ich yocꞌor cꞌacꞌnab. U tsꞌic u yocoꞌ caj u yachꞌʌctaj ich yocꞌor ruꞌum.
\v 3 Rajiꞌ wa ber caj jocꞌ u tꞌʌn, cꞌam caj u tꞌʌnaj ir u yacan barum. Wa ber caj tsꞌoc u cꞌam tꞌʌn, cu yubic mac ir u jum a cu pec, chen an ten bic siete cu pecoꞌ cu nuncaꞌr tiꞌ a cu pecoꞌ tiꞌ.
\v 4 A tenoꞌ, tabar in tsꞌibtic a baꞌ tin wuꞌyaj caj tar u tꞌʌn mac ich a caꞌananoꞌ, rajiꞌ caj u yaꞌaraj ten: 
\p ―Mʌꞌ a waꞌaric baꞌ ta wuꞌyaj yaꞌaric a siete a cu pecoꞌ. Mʌꞌ a tsꞌibej ―quij, baxuc caj u yaꞌaraj tenoꞌ, quij.
\p
\v 5 A ray yʌjmasir u tꞌʌn Cꞌuj a tin wʌyʌcꞌtaj, a yʌn tuririꞌ u yoc ich yocꞌor ruꞌum yejer u jer u yoc ich yocꞌor a cacꞌnaboꞌ, caj in wiraj u ricꞌsic u cꞌʌb a nojoꞌ ich caꞌanan.
\v 6 Rajiꞌ caj u chich araj soc Cꞌuj cu yiric, quireꞌ a Cꞌujoꞌ munt qꞌuin tiꞌ yʌniꞌ, rajiꞌ caj u betaj tu cotor baꞌ a tiꞌ yʌn ich yocꞌocab uch, cax a baꞌ tiꞌ yʌn ich caꞌanan, cax a baꞌ tiꞌ yʌn ich cꞌacꞌnab. Rajiꞌ caj u yaꞌaraj:
\p ―Jeroj tabar u yutstaꞌr u mascabir quir u yutstaꞌr. Rajiꞌ cu bin ustic, a siete yʌjmasir u tꞌʌn Cꞌuj.
\v 7 Mʌꞌ ja wirej ―quij yʌjmasir u tꞌʌn Cꞌuj―, caꞌ bin yutstac u mascabir quir u yutstaꞌr ten a siete yʌjmasir u tꞌʌn Cꞌuj, jeroj cꞌuchij tu qꞌuinin a Cꞌujoꞌ bin u caꞌ u betic a baꞌ tu mucu tucraj uch quir u betic. Jariꞌ a mac tsꞌaꞌb u tucur ten Cꞌuj uch quir u tsicbar a baꞌ u cꞌat Cꞌuj uch robob yerob quireꞌ cu beyajob tiꞌ Cꞌuj. Robob yerob a baꞌ cu bin u betic Cꞌuj quireꞌ tsꞌaꞌb u tucur soc yerob a baꞌ cu bin tar cax mʌꞌ toy cꞌuchuc tu qꞌuinin.
\p
\v 8 A tenoꞌ, quij Juan, a mac a tu tꞌʌnen caꞌch ich caꞌanan caj u wʌcꞌʌs araj ten, tan yaꞌaric:
\p ―Xen, Juan, ich yʌjmasir u tꞌʌn Cꞌuj, a rayoꞌ, a yʌn u yoc ich yocꞌor ruꞌum, yejer u jer u yoc ich yocꞌor cꞌacꞌnab. A ray chan juꞌunoꞌ, a tiꞌ yʌn tu tan u cꞌʌb, toc chꞌaꞌej a techiꞌ, a tiꞌ yʌn choraꞌan tu cꞌʌb.
\p
\v 9 Rajen caj binen ich yʌjmasir u tꞌʌn Cꞌuj tun, caj in waꞌaraj tiꞌ caꞌ u chan chuquej ten u juꞌunin a tiꞌ yʌn tu cꞌʌb a chan choraꞌanoꞌ. Rajiꞌ caj u yaꞌaraj ten: 
\p ―Chꞌaꞌej techiꞌ, toc jantej. Wa ber caꞌ bin tsꞌocac a jantiqueꞌ, ca bin a wuꞌyej ta nʌcꞌ cꞌaj, chen ta chiꞌ ca bin a wuꞌyej chꞌujuc irej wa ta tumtaj cab ―baxuc tu yaꞌaraj yʌjmasir u tꞌʌn Cꞌuj.
\p
\v 10 Caj in chꞌaj u juꞌunin a tiꞌ yʌn tu cꞌʌb a yʌjmasir u tꞌʌn Cꞌuj, caj in jantaj. Chꞌujuc caj in wuꞌyaj tin chiꞌ irej wa tin tumtaj cab. Chen caj tsꞌoc in rʌc jantic, cꞌaj caj in wuꞌyaj tin nʌcꞌ.
\v 11 Jeroj caj tsꞌoc in jantic u juꞌunin, caj yaꞌaraj ten yʌjmasir u tꞌʌn Cꞌuj ten:
\p ―Caꞌ xiquech a tsecꞌt u tꞌʌn Cꞌuj ich ʌcʌtan yaꞌab mac tu cʌjaꞌanob, cax yaꞌab u ruꞌumin tu cʌjaꞌanob. Bayiriꞌ, caꞌ a tsecꞌt u tꞌʌn Cꞌuj ich ʌcʌtan reyes, bayiriꞌ xan, caꞌ a tsecꞌt u tꞌʌn Cꞌuj tu cu tsicbar mac ich u jer u tꞌʌnob ―baxuc tu yaꞌaraj yʌjmasir u tꞌʌn Cꞌuj tiꞌ ten.
\c 11
\s Caꞌtur a mac tsꞌaꞌb u tucur quir u tsicbar a baꞌ u cꞌat Cꞌuj
\p
\v 1 Caj tsꞌoc aroꞌ, caj tsꞌaꞌb ten tuririꞌ jʌrʌr an ten bic cu chꞌic u pꞌis baꞌ. Caj araꞌb ten tuneꞌ:
\p ―Riqꞌuen Juan, caꞌ xiquech a chꞌu pꞌis mun a tu cu naj cꞌujinticob Cꞌuj, a carem najoꞌ. Bayiriꞌ xan, u cuchir tu cu naj tar u quinsic yʌrʌcꞌ quir u tsꞌic tiꞌ Cꞌuj. Bayiriꞌ xan, caꞌ a xaquej munob a tan u cꞌujinticob Cꞌuj
\v 2 ―caj araꞌb ten―. Chen a tancaboꞌ tu cu naj cꞌujinticob Cꞌuj, rajiꞌ u tirir tiꞌeꞌ. Mʌꞌ a yʌn chꞌic u pꞌis, quireꞌ raꞌ yʌnin a winiquirob a mʌꞌ u winiquirob israel, caꞌ bin cꞌuchuc tu qꞌuinin. Mʌꞌ ja wirej, robob u tsꞌurirob a tancaboꞌ, tu cu naj cꞌujinticob Cꞌuj u winiquirob israel. Bayiriꞌ xan, robob u tsꞌurirob u cajar Jerusalén, raꞌ u cajar Cꞌuj. Bin u caꞌ u tsꞌurintob u cajar tac u man cuarenta y dos ic nʌꞌ.
\v 3 A mac a cu tꞌʌniquen caꞌch, caj u yaꞌaraj ten: “A tenoꞌ, jeꞌ in tuchiꞌtic caꞌtur xib a cu bin u tsecꞌticob a Cꞌujoꞌ a tiꞌ toy cu betic ich caꞌanan, bayiriꞌ xan ich yocꞌocaboꞌ tiꞌ cu beticob. Robob cu bin u tsecꞌticob tꞌʌn tac u man cuarenta y dos ic nʌꞌ. Robob bin u caꞌ u buquintob ecꞌ nocꞌ soc yer mac caꞌ u cꞌaxob u yorob caꞌ u pꞌʌtob u manob tu cꞌasir.”
\p
\v 4 Robob toc tsecꞌtaꞌb ten a mac tsꞌaꞌb u tucur ten Cꞌuj uch caꞌ u tsꞌibtej an ten bic u cꞌat Cꞌuj uch. Rajiꞌ u cꞌabaꞌ Zacarías a tu tsecꞌtaj uch. Mʌꞌ ja wirej, robob u cheꞌer oliva yejer a rasoꞌ quireꞌ caꞌturoꞌ. Cu yetsꞌicob caꞌtur u cheꞌer yejer caꞌtur ras ich ʌcʌtan Cꞌuj. Chen tar cu binob ich yocꞌocab quir u tsecꞌticob Cꞌuj.
\v 5 Wa yʌn mac u cꞌat u chuquic u pachob, cu jocꞌar cꞌacꞌ tu chiꞌob quir u toquicob a mac a cu pꞌactic a tiꞌoboꞌ. A baywoꞌ caꞌ bin quimic a mac a cu pachtic u chuquicob u pachob.
\v 6 Robob tsꞌaꞌb u mucꞌ ten Cꞌuj soc caꞌ bin tꞌʌnob Cꞌuj soc mʌꞌ u tar yaꞌarir ich yocꞌocab, jeroj mʌꞌ ju tar yaꞌarir tac caꞌ bin tsꞌocac u tsecꞌticob u tꞌʌn Cꞌuj. Bayiriꞌ xan, tsꞌaꞌb u mucꞌ soc u waysicob jaꞌ irej qꞌuiqꞌuer. Bayiriꞌ xan, tsꞌaꞌb u mucꞌ soc u waysicob baꞌ ich ruꞌum quir u cꞌasquinticob mac a mun u qꞌuinin cu pachticob tiꞌ.
\v 7 Chen wa ber caꞌ bin tsꞌocac u beyajob tiꞌ Cꞌuj tu cu yesicob Cꞌuj tiꞌ mac, jeꞌ u jocꞌar tu jorir ich ruꞌum a mʌꞌ xuraꞌan u taminoꞌ ir a bʌcꞌoꞌ, a jach manan cꞌas. Rajiꞌ cu bin u tsꞌictar yejer a caꞌtur mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj. Rajiꞌ cu bin quinsicob, quireꞌ rajiꞌ jach chich u mucꞌ.
\v 8 Caꞌ bin tsꞌocac u quinsaꞌrob a tiꞌoboꞌ, robob u baquerob tiriꞌ cu bin pꞌatʌrob tu ber tu cu naj man mac ich a carem cajaroꞌ, a tu quinsaꞌb ic Jaj Tsꞌurirex uch, a tus pʌchaꞌan u cꞌabaꞌ Sodoma yejer u cꞌabaꞌ Egipto, quireꞌ bin u caꞌ yub u tsꞌiquirob Cꞌuj.
\v 9 A mac a cʌjaꞌan tu cajaroꞌ, yejer a mac a cu tsicbar ich u jer tꞌʌnob, yejer a mac a yʌn u yoꞌnenob, yejer a mac cax tu cʌjaꞌanob tu ruꞌumin, robob bin u caꞌ u yirob u baqueroꞌ tiꞌ charaꞌan ich ber tac u man mʌnaꞌ u nupꞌ u qꞌuinin caꞌ tac u jer chumuc. Mʌꞌ ju chꞌabʌr mac caꞌ u mucob u baquerob.
\v 10 Mʌꞌ ja wirej, a mac a cʌjaꞌanob ich yocꞌocab, a mʌꞌ yerob Cꞌuj, jach quiꞌ yorob, quireꞌ quinsaꞌb a caꞌtur mac a tsꞌaꞌb u tucur ten Cꞌuj quir u tsicbarob a baꞌ u cꞌat Cꞌuj. Mʌꞌ ja wirej, robob caj u tsꞌaj u mucꞌyaj a mac a mʌꞌ yerob Cꞌuj, rajen a mac mʌꞌ yerob Cꞌuj caj bin u sijob baꞌ tiꞌ u racꞌob quireꞌ quiꞌ yorob.
\v 11 Chen caꞌ tsꞌoc u man mʌnaꞌ u nupꞌ u qꞌuinin caꞌ tac u jer chumuc u qꞌuinin, jeroj wʌcꞌʌs ricꞌsaꞌb a caꞌtur mac a tsꞌaꞌb u tucur ten Cꞌuj quir u tsicbarob a baꞌ u cꞌat Cꞌujoꞌ, quireꞌ wʌcꞌʌs ocob u pixamob, quireꞌ tsꞌaꞌb tiꞌob ten Cꞌuj. Jeroj caj wʌcꞌʌs chꞌicrarob, caj jaqꞌuij yorob a mac caj yiroboꞌ.
\v 12 Jeroj tuneꞌ, robob, a caꞌtur mac, a tsꞌaꞌb u tucur ten Cꞌuj quir u tsicbarob a baꞌ u cꞌat Cꞌujoꞌ, caj yubob u tꞌʌn mac ich u muyarir, tan u puric u tꞌʌn tiꞌob. Cꞌam caj araꞌb tiꞌob:
\p ―Teꞌ a tarexaꞌ.
\p Jeroj tuneꞌ, caj binob caꞌanan ich u muyarir. A mac a cu pꞌacticob a tiꞌoboꞌ caj yirob u binob.
\v 13 A raꞌ u qꞌuininoꞌ caj binob ich caꞌanan, caj chich pecnʌjij a ruꞌumoꞌ. A cajaroꞌ a caremoꞌ, caj pecnʌjij, rajen tuririꞌ najoꞌ ich a diezoꞌ caj rʌc jubij. Wa ber caj pecnʌj ruꞌum caj quinsaꞌb siete mil xib tu jubij a najoꞌ ich a carem cajaroꞌ. A mac a mʌꞌ quinsaꞌb wa ber caj pecnʌjij a ruꞌumoꞌ jach jaqꞌuij yorob, caj u cꞌʌꞌotajob Cꞌuj rajiꞌ cu tsꞌurinticob mac ich yocꞌocab. 
\v 14 Toc araꞌb ten a mac a cu tꞌʌniquen tu quin wʌyʌcꞌtic ich caꞌanan:
\p ―Tsꞌoc u man u jer u yajirir a caꞌturoꞌ. Chen tiꞌ toy yʌn u jer tuririꞌ quir u tar. Jach tabar aroꞌ, rajiꞌ a mʌnaꞌ u nupꞌoꞌ. Baxuc tu yaꞌaraj a mac a cu tꞌʌniquen uch.
\s U mascabir quir u yutstaꞌr, a sietejoꞌ
\p
\v 15 Caj in wʌyʌcꞌtaj ich caꞌanan caj in pʌctaj caj in wir u jer yʌjmasir u tꞌʌn Cꞌuj. Rajiꞌ a sietojoꞌ. Rajiꞌ caj u yutst, jeroj caj in wuꞌyaj u tꞌʌn, tar u taroꞌ ich caꞌanan. Rajiꞌ cu tꞌʌnob yaꞌab mac. Cꞌam caj u purob u tꞌʌn tan yaꞌaricob:
\q Tu cotor u ruꞌumin tu cu reyinticob a reyoꞌ bajeꞌrer, rajiꞌ yʌnin a Jaj Tsꞌur Cꞌujoꞌ yejer u Cristo a tiꞌeꞌ. Robob quic reyintiquex munt qꞌuin.
\p
\v 16 Caj in wiraj a veinticuatro xiboꞌ, a nuxiboꞌ, a rayoꞌ a tiꞌ yʌn ich ʌcʌtan Cꞌuj tiꞌ curaꞌanob ich u cutan an ten bic u cutan a reyoꞌ. Robob caj ricꞌob caj u xonrajob ich ʌcʌtan Cꞌuj quir u cꞌujinticob Cꞌuj.
\v 17 Caj araꞌb ten a veinticuatro xiboꞌ, a nuxiboꞌ:
\q Bayoꞌ Cꞌuj, quireꞌ cꞌuchij tu qꞌuinin quir ic reyintiquechex quireꞌ a techoꞌ jach manan chichir a mucꞌ. A techoꞌ munt qꞌuin tiꞌ yʌnech, cax a uchoꞌ, cax a bajeꞌrer, cax a samʌnoꞌ.
\v 18 Cax caj pꞌujob a mac a cu tsꞌurinticob u tsꞌurir, cax caj pꞌujob a mac a ju reyinticob u reyob, quireꞌ cꞌuchij tu qꞌuinin a bin a taꞌc u joꞌrob a mac a mʌꞌ tu cꞌʌmob tech. Bayiriꞌ cꞌuchij tu qꞌuinin quir a boꞌotic u boꞌorir u cꞌʌbob a mac a beyajnʌjob tech, a mac a ta tsꞌaj a tucur tiꞌob quir u tsicbarob a baꞌ a cꞌat uch. Bayiriꞌ xan, cꞌuchij tu qꞌuinin a boꞌotic u boꞌorir u cꞌʌb a mac a cu sʌjtiquechob, cax a mac u tsꞌurir, cax a mac mʌꞌ u tsꞌurir mac. Cꞌuchij tu qꞌuinin xan, quir a boꞌotic a mac a tu cꞌasquintob u ruꞌumin ich yocꞌocab, robob bin u caꞌ chꞌesaꞌbir.
\p
\v 19 Caj in wʌyʌcꞌtaj ich caꞌanan uch, caj in pʌctaj caj in wiraj tu cu naj cꞌujinticob Cꞌuj, rajiꞌ caj qꞌueyaꞌb, jeroj caj in wiraj u chan cuchir, a cu jach jacꞌʌr yor mac, a tu tsꞌibtaj Moisés ich u tꞌʌn uch. Jeroj tuneꞌ, caj raramnʌj tun, caj pecnʌjij, caj jumnʌjij, caj u jach chich pecnʌjij ruꞌum, bayiriꞌ, caj tar u baꞌ jaꞌ, a jach aroꞌ.
\c 12
\s A xquicoꞌ yejer a ayimoꞌ
\p
\v 1 Caj in wʌyʌcꞌtaj ich caꞌanan uch, caj in wiraj u cꞌuchur ich caꞌanan a baꞌ cu bin u camsiquen a tabar u cꞌuchur tu qꞌuinin, quireꞌ a baxucoꞌ u cꞌat Cꞌuj. Jeroj caj in wiraj tuririꞌ xquic a ju buquinman u nocꞌ irej wa ju buquinmʌn a qꞌuinoꞌ. Caj in pʌctaj caj in wiraj yaran yoc irej wa tan u yachꞌʌctic ich yocꞌor ic nʌꞌ. Yʌn baꞌ u pꞌoquinmʌn tu joꞌr irej u pꞌoc a reyoꞌ. Bayiriꞌ xan, ich yocꞌor u chan pꞌoc tiꞌ yʌn irej sab. Yʌn doce ir a saboꞌ.
\v 2 A xquicoꞌ a tin wʌyʌcꞌtaj caj u yacꞌt u bʌj, tan u yocꞌar quireꞌ tabar u rochic u parar. Mʌꞌ ja wirej, tan u mucꞌyaj quireꞌ yʌn yʌrʌcꞌ och.
\v 3 A raꞌ u qꞌuininoꞌ, caj cꞌuchij u jer baꞌ ich caꞌanan. Jeroj caj in wiraj tuririꞌ ayim, jach manan carem, jach chʌc u winquirir irej qꞌuiqꞌuer. Yʌn siete u joꞌr, jujuntur u joꞌreꞌ yʌn u pꞌoc an ten bic u pꞌoquinmʌn a reyoꞌ. Raꞌ u jach pꞌoquinmʌn u pꞌoc ich u bac. Yʌn diez u bac tu joꞌr.
\v 4 A ray ayimoꞌ, a jach manan caremoꞌ, caj u mistaj yejer u nej tuririꞌ mil sab ich a diez mil ich a caꞌananoꞌ soc caꞌ rubucob ich yocꞌocab quireꞌ tsꞌic. Caj bin a ayimoꞌ, a jach manan caremoꞌ, ich ʌcʌtan a xquicoꞌ, quir u pajic caꞌ rochac ten u nʌꞌ, a ochoꞌ. Rajiꞌ yer jeꞌ u chiꞌbir a chan ochoꞌ caꞌ bin tsꞌocac u rochaꞌr ten u nʌꞌ.
\v 5 A xquicoꞌ, caj tsꞌoc u rochic u chan ochir, caj u rochaj chan xib. Rajiꞌ cu bin ocar u reyinbir ten mac cax tu cʌjaꞌanob tu ruꞌumin, rajiꞌ chich cu bin u reyinticob, mʌnaꞌ mac cu bin u cꞌuchur u yor tiꞌ. Rajen mʌꞌ chiꞌbij u parar a xquicoꞌ ten a ayimoꞌ, a jach manan caremoꞌ, quireꞌ jampaytaꞌb ten Cꞌuj soc tiꞌ yʌn ich Cꞌuj.
\v 6 A xquicoꞌ tuneꞌ, caj putsꞌij ich tʌcay ruꞌum quireꞌ a Cꞌujoꞌ tu toc betaj u cuchir tu cu putsꞌur quir u cʌnantaꞌr a tiꞌoꞌ tac u man cuarenta y dos ic nʌꞌ. 
\p
\v 7 Caj tsꞌoc in wʌyʌcꞌtic aroꞌ, caj in pʌctaj caj in wiraj riqꞌuij baꞌteꞌ a ayimoꞌ, a jach manan caremoꞌ, caj pꞌujij yejer yʌjmasirob u tꞌʌn Cꞌuj, a mac a yʌn u tsꞌuirir u cꞌabaꞌ Miguel. Bayiriꞌ xan, a ayimoꞌ, a jach manan caremoꞌ yʌn u yʌjmasirob u tꞌʌn xan, robob rʌc ricꞌob tu baꞌteꞌ xan, quireꞌ pꞌujob yejer Miguel yejer u yet yʌjmasirob u tꞌʌn Cꞌuj.
\v 8 Cax riqꞌuij u baꞌteꞌ, a ayimoꞌ, a jach manan caremoꞌ, yejer Miguel yejer u yet yʌjmasirob u tꞌʌn Cꞌuj, mʌꞌ cꞌuchaꞌan yorob tiꞌiꞌ, rajen rʌc tacꞌ ten Miguel yejer u yet yʌjmasirob u tꞌʌn Cꞌuj caꞌ xicob a ayimoꞌ, a jach caremoꞌ, yejer u bʌjiriꞌ u yʌjmasir u tꞌʌn soc mʌꞌ u pꞌatʌrob ich caꞌanan.
\v 9 Caj pichꞌintaꞌbob ten u jach tsꞌurir u yʌjmasir u tꞌʌn Cꞌuj a Migueloꞌ, a ayimoꞌ, a jach manan caremoꞌ yejer u nupob. Mʌꞌ ja wirej, a ray ayimoꞌ, a jach manan caremoꞌ, rajiꞌ u bʌjiriꞌ quisineꞌ a mac u cꞌabaꞌ Satanás, rajiꞌ jach uchben u qꞌuinin, tiꞌ yʌn uchiꞌ. Rajiꞌ cu man u tusaric tiꞌ tu cotor mac a tiꞌ yʌn ich yocꞌocab. Tar rʌc pichꞌintaꞌb ten Miguel, a ayimoꞌ, a jach caremoꞌ, teraꞌ ich yocꞌocab, rajiꞌ yejer u yʌjmasirob u tꞌʌn quisin.
\p
\v 10 Caj in wuꞌy u tꞌʌn mac wa ber caj in wʌyʌcꞌtaj caꞌanan. Jach cꞌam caj in wuꞌyaj u tꞌʌn, tar u tar ich caꞌanan. A mac a cu tꞌʌn caj yaꞌaraj:
\p ―Jeroj, cꞌuchij tu qꞌuinin, rajiꞌ Cꞌuj caj u toc rʌc tacoꞌonex tiꞌ u mucꞌ a quisinoꞌ. Rajiꞌ Cꞌuj cu bin u reyinticob ich yocꞌocab. Rajiꞌ Cristo ricꞌsaꞌb ten Cꞌuj quir u yocar u reyinbir ten tu cotor mac. Jeroj, chʌcaꞌan yiric mac bic tabar u mucꞌ Cꞌuj, quireꞌ rajiꞌ caj u jocꞌsaj a quisinoꞌ, a mac tan u pacꞌʌr u pachob a mac ij quet acsʌꞌorirex. Mʌꞌ ja wirej, rajiꞌ rajraꞌ cu pʌqꞌuic u pachob ich ʌcʌtan tiꞌ Cꞌuj. Chen bajeꞌrer toc jocꞌsaꞌb a quisinoꞌ.
\p
\v 11 A mac a cu tꞌʌn caj yaꞌaraj:
\p ―Mʌꞌ ja wirej ―quij―, quireꞌ caj jocꞌ u qꞌuiqꞌuer Cristo, a mac u tʌmʌn yuc Cꞌujoꞌ, rajen bin u caj tocar ij quet acsʌꞌorirex ten Cꞌuj tiꞌ a baꞌ cu pʌqꞌuic u pachob ten a quisinoꞌ. Robob caj manob tan yesicob Cꞌuj tu cu tsecꞌticob a baꞌ tajoꞌ. Robob mʌꞌ ju chꞌaꞌob sajquiriꞌ tiꞌ a quisinoꞌ, quireꞌ a baꞌ chʌcaꞌan u betic a tiꞌoboꞌ. Robob cax tabar u quinsaꞌrob quireꞌ tsoy tu tꞌʌn Cꞌuj. 
\v 12 Quireꞌ jocꞌsaꞌb ten Cꞌuj a ayimoꞌ, a jach caremoꞌ, ich caꞌanan, rajen quiꞌquint a worex a techexoꞌ, u yʌjmasirob u tꞌʌn Cꞌuj, yejer a techexoꞌ, a mac a tiꞌ yʌn ich caꞌananoꞌ a tu yacsob tu yorob. Chen jach otsirechex a mac a cʌjaꞌanob ich yocꞌocab bajeꞌrer, mʌꞌ jariroꞌ, quireꞌ pichꞌintaꞌb a quisinoꞌ ich yocꞌocab tu yʌnechex. Caꞌ a chꞌaꞌej sajquirex tiꞌ a baꞌ cu bin u betic a quisinoꞌ ich yocꞌocab, quireꞌ jach tsꞌic, quireꞌ rajiꞌ yer tabar u qꞌuinin a tiꞌoꞌ. Rajen jach otsir a mac a cʌjaꞌan ich yocꞌocab, cax a mac a tiꞌ yʌn ich a cꞌacꞌnaboꞌ ―baxuc caj u yaꞌaraj a mac a cu tꞌʌn ich caꞌananoꞌ. 
\p
\v 13 A ayimoꞌ, a jach manan caremoꞌ, caj tsꞌoc u jocꞌsic, caj pichꞌintaꞌb ten Cꞌuj ich yocꞌocab quir u chen beyaj ich yocꞌocab, rajen caj bin u chuc u pach a xquicoꞌ, a tu roch u chan ochir xib uch.
\v 14 Chen a xquicoꞌ, caj tsꞌaꞌb ten Cꞌuj, quireꞌ baxuc u cꞌat. A xquicoꞌ tsꞌaꞌb caꞌtur u xicꞌ cot maꞌax soc u putsꞌur ich tʌcay ruꞌum tub u betaꞌan u cuchir ten Cꞌuj, quir u cʌnantic tac u man cuarenta y dos ic nʌꞌ soc u tocar tiꞌ a ayimoꞌ, a jach manan caremoꞌ.
\v 15 Rajiꞌ a ayimoꞌ, caj u wacaj jaꞌ tiꞌ u chiꞌ quir u bint jaꞌ a xquicoꞌ. Chich yoc jaꞌ caj u wacaj a ayimoꞌ, a jach caremoꞌ, irej wa ju yoc chan sayab.
\v 16 Chen a xquicoꞌ, caj yamtaꞌb ten a ruꞌumoꞌ quir u taquic u bʌj tiꞌ a ayimoꞌ, a jach caremoꞌ. Quireꞌ a ruꞌumoꞌ caj u yucꞌaj yaꞌarir a cu jocꞌar tu chiꞌ a ayimoꞌ, a jach caremoꞌ.
\v 17 Quireꞌ mʌꞌ ju cꞌuchur yor tiꞌ a xquicoꞌ, rajen a ayimoꞌ, a jach caremoꞌ, caj pꞌujij yejer u parar a xquicoꞌ, a tu yacsob tu yorob tiꞌ Cꞌuj. Mʌꞌ ja wirej, robob a mac a tan u quibicob u tꞌʌn Cꞌuj, cax tu yʌnob quireꞌ tu yacsob tu yorob tiꞌ Jesucristo.
\c 13
\s A caꞌtur bʌcꞌoꞌ, a jach manan cꞌasoꞌ
\p
\v 1 A tenoꞌ, quij Juan, caj chꞌicrajen ich u chiꞌ cꞌacꞌnab tuj in wʌyʌcꞌtaj ich caꞌanan. Jeroj, caj in pʌctaj caj in wiraj u jocꞌar ich cꞌacꞌnab tuririꞌ bʌcꞌ. A jach carem bʌcꞌoꞌ a tin wiraj, yʌn siete u joꞌr. Yʌn diez u bac tu joꞌr xan, chen ich yocꞌor jujuntur u bac u joꞌr u pꞌoquimʌn u pꞌoc an ten bic u pꞌoquimʌn rey. Bayiriꞌ xan, jujuntur u joꞌr yʌn baꞌ tsꞌibaꞌan tiꞌ a tan u pachꞌic Cꞌujoꞌ.
\v 2 A ray bʌcꞌoꞌ, a jach caremoꞌ, a caj in wiraj irej jach barum, chen mʌꞌ bay u yoc, quireꞌ u yoc irej u yoc saꞌnjoꞌr. Caj in wir u chiꞌ raꞌ irej u chiꞌ chʌc barum. Rajiꞌ tsꞌaꞌb u mucꞌ ten u tsꞌurir a mac a ayimoꞌ, a jach caremoꞌ, soc rajiꞌ cu tsꞌurinticob a bʌcꞌoꞌ a jach caremoꞌ cax tu cʌjaꞌanob mac ich yocꞌocab rajiꞌ cu tsꞌurintic.
\v 3 A tenoꞌ, caj in wiraj tuririꞌ u joꞌr a bʌcꞌoꞌ, a jach caremoꞌ, rajiꞌ chꞌʌcbir ten mac, chen orac quimic uch wa mʌꞌ jawsaꞌbij. Rajen jacꞌsaꞌb yor a mac a tiꞌ yʌnob ich yocꞌocab, rajen caj sayob tu pach a bʌcꞌoꞌ, a jach caremoꞌ.
\v 4 Robob caj u cꞌujintob a ayimoꞌ, a jach caremoꞌ, quireꞌ tan u tsꞌabʌr u mucꞌ a bʌcꞌoꞌ, a jach caremoꞌ ten a ayimoꞌ, a jach caremoꞌ. Mʌꞌ ja wirej, robob a mac tiꞌ yʌnoꞌ caj u cꞌujintob a bʌcꞌoꞌ, a jach caremoꞌ, quireꞌ caj u yaꞌarob:
\p ―Mac cꞌuchaꞌan yor tiꞌ a bʌcꞌoꞌ, a jach caremoꞌ quireꞌ jach chich u mucꞌ ―baxuc tu yaꞌaraj a mac a tan u cꞌujinticob tiꞌ.
\p
\v 5 Rajen tan u pachꞌic Cꞌuj, a bʌcꞌoꞌ, a jach caremoꞌ, quireꞌ tsꞌaꞌb u mucꞌ ten a ayimoꞌ, a jach caremoꞌ soc baxuc cu tsicbar. Mʌꞌ ja wirej, rajiꞌ tsꞌaꞌb u mucꞌ ten a ayimoꞌ, a jach caremoꞌ tiꞌ a bʌcꞌoꞌ, a jach caremoꞌ soc yʌn u mucꞌ tac u man cuarenta y dos ic nʌꞌ.
\v 6 A bʌcꞌoꞌ, a jach caremoꞌ, caj u jach pachꞌaj Cꞌuj tan u pꞌastic u mucꞌ Cꞌuj xan. Bayiriꞌ caj u pꞌastaj tu cu naj cꞌujinticob Cꞌuj mac, bayiriꞌ rajiꞌ caj u pꞌastaj a mac a jach taj tan u cꞌujinticob Cꞌuj.
\v 7 A bʌcꞌoꞌ, a jach caremoꞌ, caj chaꞌb ten Cꞌuj caꞌ tsꞌicac yejer u winiquirob Cꞌuj quir u chꞌesaꞌr a tiꞌoboꞌ. Bayiriꞌ xan, rajiꞌ, a bʌcꞌoꞌ caj tsꞌaꞌb u mucꞌ quir u tsꞌurinticob mac, cax a baꞌ yoꞌnen yʌn tiꞌob, cax a baꞌ u tꞌʌnob, cax tu yʌn u cajarob, cax tu cʌjaꞌanobiꞌ.
\v 8 Rajen tu cotor mac a cʌjaꞌan ich yocꞌocab bin u caꞌ u cꞌujinticob a bʌcꞌoꞌ, a jach caremoꞌ. Jariꞌ a mac a mʌꞌ tsꞌibaꞌan tu juꞌunin a yʌnin Jesucristo, a ju tʌmʌn yuc Cꞌuj, robob cu bin u cꞌujinticob a bʌcꞌoꞌ. Mʌꞌ ja wirej mʌꞌ toy betaꞌb yocꞌocabiꞌ, tiꞌ toc tsꞌibaꞌan u cꞌabaꞌ a mac a cu bin u cꞌʌmicob Cꞌuj. Robob tiꞌ tsꞌibaꞌan ich u juꞌunin u cuxtar a tʌmʌn yuc yʌnin, quireꞌ rajiꞌ quinsaꞌb tiꞌob.
\p
\v 9 Uꞌyex baꞌ quin wac techex tiꞌ a bʌcꞌoꞌ, a jach caremoꞌ, quireꞌ rajiꞌ jach noꞌj.
\v 10 Cʌnex a jeꞌraꞌ, a mac a cu chuquic u jer mac quir u cꞌʌnic tu beyaj, raꞌ cu bin chucbir quir u cꞌanan ten u jer mac xan. Bayiriꞌ xan, a mac a cu quinsic u jer mac yejer mascab u bʌjiriꞌ cu bin quinsbir ten u jer mac yejer u mascab xan. Rajen caꞌ u mucꞌtej a baꞌ cu tar tiꞌ a mac a tu yacsaj tu yor soc pacachbiriꞌ. 
\p
\v 11 Caj tsꞌoc in wʌyʌcꞌtic a raj ayimoꞌ, a jach caremoꞌ, caj in pʌctaj caj in wiraj u jer a bʌcꞌoꞌ. Chen rajiꞌ caj jocꞌ ich u ruꞌumin, rajiꞌ yʌn caꞌtur u bac u joꞌr ir u bac tʌmʌn yuc. Chen caj jocꞌ u tꞌʌn caj tꞌanajij irej uꞌyu tꞌʌn a ayimoꞌ, a jach caremoꞌ.
\v 12 A ray bʌcꞌoꞌ, yʌn u mucꞌ ir u mucꞌ a ayimoꞌ, a jach caremoꞌ, a tin yʌn batꞌan iraj uch. Mʌꞌ ja wirej, quet bayiriꞌ u mucꞌ caj esaꞌb ten a bʌcꞌoꞌ, a pachir caj jocꞌ ich ruꞌum. Rajen, rajiꞌ caj u tsꞌʌraj u pach tu cotor mac a tiꞌ yʌn ich yocꞌocab caꞌ u sʌjtob a ayimoꞌ, a chꞌʌcbir tu joꞌr uch, chen mʌꞌ quimiquiꞌ, quireꞌ jawsaꞌb tu chꞌaquij.
\v 13 A bʌcꞌoꞌ, a pachir caj joqꞌuij ich ruꞌum caj u tus betaj jach carem beyaj a baꞌ mʌꞌ yirmʌn mac mʌꞌ biqꞌuin yirmʌn, cax tu tꞌʌnan cꞌacꞌ caj u rubsaj ich caꞌanan soc u rubur ich yocꞌocab ich ʌcʌtan tu wich a mac tiꞌ yʌnoꞌ.
\v 14 A bʌcꞌoꞌ, a caj joqꞌuij ich ruꞌum, caj u tus ara tiꞌ mac a cʌjaꞌanob ich yocꞌocab quireꞌ u tus carem beyajob a ju chaꞌbʌr u betic ʌcʌtan tu wich a bʌcꞌoꞌ a jach caremoꞌ, a yʌn joqꞌuij ich cꞌacꞌnab. A bʌcꞌoꞌ, a jocꞌ ich ruꞌum caj u yaꞌaraj tiꞌ a mac a tiꞌ yʌn ich yocꞌocab: “Toc betex u yochir a bʌcꞌoꞌ, a jach caremoꞌ, a orac quimic uch, quireꞌ chꞌʌcbir ten mac, chen jawij. Toc betex u yochir quir a sʌjtiquexiꞌ.” Baxuc caj araꞌb ten a bʌcꞌoꞌ a joqꞌuij ich ruꞌum.
\v 15 Barej caj tsꞌoc u beticob u yochir a bʌcꞌoꞌ a joqꞌuij ich cꞌacꞌnab a jach caremoꞌ, caj chaꞌb u tus jocꞌar u tꞌʌn u yochir a bʌcꞌoꞌ, a jach caremoꞌ caj chaꞌb u jocꞌar u tꞌʌn soc u quinsic a mac a mʌꞌ ju sʌjt a bʌcꞌoꞌ, cax a mun a mʌꞌ ju sʌjt a bʌcꞌoꞌ. Baxuc caj betaj a bʌcꞌoꞌ, a joqꞌuij ich ruꞌumoꞌ.
\v 16 Mʌꞌ jaꞌririꞌ aroꞌ, caj araꞌb tiꞌ tu cotor mac ten a bʌcꞌoꞌ, a joqꞌuij ich ruꞌum, caꞌ tsꞌibtac ten mac baꞌ ich u noj u cꞌʌboꞌ wa ich u pam, tsꞌibaꞌan xan. Cax a reyoꞌ cax a mʌꞌ reyoꞌ, cax a mac yʌn u taqꞌuinoꞌ, cax a mʌꞌ yʌn u taqꞌuinoꞌ, cax a mac u tsꞌurir, cax a mac a mʌꞌ tsꞌurir u caꞌ.
\v 17 Wa mʌꞌ tsꞌibaꞌan a bʌcꞌoꞌ, a jach caremoꞌ, mʌꞌ ju chaꞌbʌr u mʌnic baꞌ, cax yoꞌoch, mʌꞌ ju chaꞌbʌr u canic baꞌ xan. A baꞌ tsꞌibaꞌan tu noj u cꞌʌboꞌ wa tu pam raꞌ u cꞌabaꞌ a bʌcꞌoꞌ a jach manan caremoꞌ bayiriꞌ xan, raꞌ a mun número cu xaquic u cꞌabaꞌ.
\v 18 A mac a jach tꞌojoꞌ, arej tiꞌ caꞌ u najtej baꞌ númeroꞌ yʌn tiꞌ a bʌcꞌoꞌ, a jach caremoꞌ. Quireꞌ tuririꞌ a númerojoꞌ rajiꞌ an ten bic tuririꞌ letra. Toc xacaꞌan u número u cꞌabaꞌ, a bʌcꞌoꞌ, a jach caremoꞌ, rajiꞌ cu jocꞌ seiscientos sesenta y seis.
\c 14
\s A baꞌ cu cꞌʌyicob a 144,000
\p
\v 1 Caj tsꞌoc in wʌyʌcꞌtic a bʌcꞌoꞌ, a jach caremoꞌ, rajiꞌ a caꞌturoꞌ. Caj in pʌctaj caj in wiraj u jer, chen raꞌiriꞌ a tʌmʌn yucoꞌ a tin wiraj chꞌiquicbar ʌcʌtan tiꞌ a mac a curucbar tu cutan, a jach caremoꞌ uch. Tu yʌn a tʌmʌn yucoꞌ, tin wiraj tan u chꞌictar ich u joꞌr pꞌuc wits, raꞌ u cꞌabaꞌ Sión. Tiꞌ yʌn jach pim mac yejer a tʌmʌn yucoꞌ. Tiꞌ yʌn ciento cuarenta y cuatro mil mac. Robob toc tsꞌibaꞌan tu pam u cꞌabaꞌ a tʌmʌn yucoꞌ, quet yejer u cꞌabaꞌ u Tet Cꞌujoꞌ.
\v 2 Caj in wuꞌy u tꞌʌn mac teꞌ caꞌananoꞌ an ten bic cꞌam u jum u yoc jaꞌ, chich u man a jach yoc jaꞌoꞌ, irej wa jach yaꞌab jaꞌ. A raꞌ tꞌʌnoꞌ a tin wuꞌyoꞌ, raꞌ ir u tꞌʌn a cu pec. A werex baꞌ quiriꞌ, tin wuꞌy u cꞌay a mac a tan u pʌxicob arpa. Tan u cꞌʌyicob u cꞌay a mʌnaꞌ mac yubmʌn uch.
\v 3 A rayoꞌ, ich ʌcʌtan a mac a curucbar tu cutan a jach caremoꞌ, tan u cꞌʌyicob quireꞌ tiꞌ yʌn a baꞌ irej bʌcꞌ, a cuxaꞌanoꞌ, a cuatrojoꞌ, bayiriꞌ xan tiꞌ yʌn a veinte y cuatro xib, a nuxiboꞌ. Chen jariꞌ a ciento cuarenta y cuatro mil mac caj u cꞌayob a cꞌayoꞌ a mʌnaꞌ mac yubmʌn uch. Quireꞌ u jer mʌꞌ ju cꞌuchur yor u cʌnej quireꞌ robob caj tacaꞌb ten Cꞌuj ich tu cotor mac ich yocꞌocab. Chen robob cu najticob.
\v 4 Robob a cu cꞌayob, mʌꞌ ju manob yejer xquic uch, mʌꞌ ju manob yejer xib xan, mʌꞌ ju chꞌaj u mam xan, mʌꞌ ju chꞌ u racꞌ xan, quireꞌ tu quibob u tꞌʌn a tʌmʌn yucoꞌ, soc raꞌ cu pʌyic u berob. Robob tiꞌ yʌnob, quireꞌ toc ten Cꞌuj ich mac tu cotor. Robob jun yarob ich a mac pʌyber toc ten Cꞌuj a tu yacsaj tu yorob tiꞌ Cꞌuj, bayiriꞌ xan, a tu yacsob tu yorob tiꞌ a tʌmʌn yucoꞌ. 
\v 5 Robob taj tu yacsob tu yorob, mʌꞌ ju tus aꞌarobiꞌ, rajen toc taj yorob ʌcʌtan tu curucbar a Cꞌujoꞌ ich u cutan a jach caremoꞌ.
\s U tꞌʌn tuchiꞌtaꞌb ten Cꞌuj yejer a mʌnaꞌ u nup yʌjmasirob u tꞌʌn Cꞌuj
\p
\v 6 Caj in wʌyʌcꞌtaj caj in pʌctaj caj in wir u jer yʌjmasir u tꞌʌn Cꞌuj. Rajiꞌ xicꞌ u caꞌ teꞌ ich caꞌananoꞌ, soc mʌꞌ jar u bin u tsecꞌt u jach tsoyir u tꞌʌn Cꞌuj, quireꞌ munt qꞌuin mʌꞌ ju cꞌoxar ten Cꞌuj. Raꞌ cu bin tsecꞌbir ich tu cotor mac a tiꞌ yʌn ich yocꞌocab, cax tu cʌjaꞌanob, cax a baꞌ u tꞌʌnob, cax a baꞌ yoꞌnen yʌn tiꞌob, cax a baꞌ cajar tu yʌnob cu rʌc man tsecꞌbir.
\v 7 A ray yʌjmasir u tꞌʌn Cꞌujoꞌ cꞌam caj yaꞌaraj:
\p ―Toc chꞌaꞌex sajquir tiꞌ Cꞌuj tan a caremquintiquex u cꞌabaꞌ, quireꞌ rajiꞌ tabar u toꞌcar u joꞌr a mac a cu sʌjticob a bʌcꞌoꞌ, a jach caremoꞌ yejer a ayimoꞌ a jach manan caremoꞌ. Toc cꞌujintex Cꞌuj, quireꞌ raꞌ tu betaj a ruꞌumoꞌ, yejer a caꞌananoꞌ yejer a cꞌacꞌnaboꞌ yejer a yicꞌ jaꞌoꞌ ―baxuc caj yaꞌaraj yʌjmasir u tꞌʌn Cꞌuj.
\p
\v 8 Sansam caj in wʌcꞌʌs ir u jer yʌjmasir u tꞌʌn Cꞌuj, rajiꞌ rub tu pach a yʌn binij. Rajiꞌ caj yaꞌaraj:
\p ―Toc chꞌesaꞌbir ten Cꞌuj u winiquirob, raꞌ u cajar Babilonia. Quiꞌquint a worex, cax noꞌj u cajar a chꞌesaꞌb ten Cꞌuj, quireꞌ pay u siꞌpir ten mac a cʌjaꞌan tu cajar Babilonia u yet cajar ich yocꞌocab. Mʌꞌ ja wirej, araꞌb u manob irbir xquic ten xib, bayiriꞌ xan, araꞌb u manob irbir xib ten xquic, bayiriꞌ araꞌb mac caꞌ u pʌy u siꞌpir, rajen tu yubob u tsꞌiquir Cꞌuj.
\p
\v 9 Sansam caj in wʌcꞌʌs ir u jer yʌjmasir u tꞌʌn Cꞌuj, rajiꞌ say tu pach a caꞌturoꞌ, a tan tu manob sam. Caj tarij, rajiꞌ cꞌam caj u yaꞌaraj:
\p ―Robob, a mac a cu chaꞌbʌrob caꞌ u tsꞌibt u cꞌabaꞌ a bʌcꞌoꞌ, a jach caremoꞌ, cax tu cꞌʌb wa tu pam. Robob a mac a caj u sʌjtob u yochir a bʌcꞌoꞌ, a jach caremoꞌ. 
\v 10 Robob bin u caꞌ yubob u jach tsꞌiquir Cꞌuj tu cu bin tsꞌabʌr u mucꞌyaj, quireꞌ jach manan cu bin yubob u tsꞌiquir Cꞌuj. Tar cu bin ich cꞌacꞌ quir u tsꞌabʌr u mucꞌyajob. Robob cu bin tsꞌabʌr u mucꞌyajob ich ʌcʌtan u yʌjmasirob u tꞌʌn Cꞌuj, bayiriꞌ ich ʌcʌtan a tʌmʌn yucoꞌ.
\v 11 A ray winiquirob, a mac a tu sʌjtob a bʌcꞌoꞌ, yejer u yochir a betaꞌb ten mac, cax a mac a yʌn tsꞌibaꞌan u cꞌabaꞌ a bʌcꞌoꞌ, a jach caremoꞌ tu winquirir, rajiꞌ mʌꞌ ju bin jawʌr u yajirir, quireꞌ rajraꞌ cu bin u mucꞌyaj. U butsꞌir tu cu mucꞌyaj rajraꞌ cu bin u nacʌr caꞌanan.
\v 12 Rajen a mac a tu yacsaj tu yor tiꞌ u tꞌʌn Cꞌuj yejer a mac a tan u quibic u tꞌʌn Cꞌuj caꞌ u cʌnej Jesús soc nemʌꞌ biquiꞌ.
\p
\v 13 Jeroj tuneꞌ, caj in wuꞌy mac cu tꞌʌniquen caꞌanan. Rajiꞌ caj u yaꞌaraj ten:
\p ―Tsꞌibtej a jeꞌraꞌ, quij: “Jach quiꞌ yor a mac a cu bin quimin tu qꞌuinin bajeꞌrer hasta caꞌ bin tac u xur tꞌʌn quireꞌ tu yacsaj tu yor tiꞌ u tꞌʌn Cꞌuj.” Rajiꞌ taj cu yaꞌaric u Tajꞌor u Pixam Cꞌuj. Robob bin u caꞌ u jesob u bʌj tu chich beyajnʌjob uch, quireꞌ a baꞌ tu betob, quet cu bin yejerob.
\s Bic tabar cu bin xur tꞌʌn
\p
\v 14 Tu tin wʌyʌcꞌtaj ich caꞌanan caj in pʌctaj caj in wiraj tuririꞌ u muyarir, jach sʌc. Ich yocꞌar u muyaroꞌ, tiꞌ yʌn mac curucbar, rajiꞌ irej an ten bic xib, u pꞌoquinmʌn tu joꞌr u pꞌoc a betaꞌb tiꞌ u mascabir oro, an ten bic a reyoꞌ cu pꞌoquintic. Rajiꞌ u mʌchmʌn tu cꞌʌb u chan mascabir a tu cu naj tꞌoj cꞌuptic u chan cꞌʌbir u yaqꞌuir u wich uva, soc u tꞌaquic u wich uva. Jach quiꞌ u yej u chan mascabir.
\v 15 Caj in wʌcꞌʌs ir u jer yʌjmasir u tꞌʌn Cꞌuj. Raꞌ jocꞌ tu cu naj cꞌujinticob Cꞌuj. Rajiꞌ caj u cꞌamquint u tꞌʌn, tan yaꞌaric tiꞌ a mac curucbar ich u muyariroꞌ:
\p ―Jup u chan mascabir tu ca naj tꞌojcꞌuptic u wich uva a ta pʌcꞌaj irech a mac tu pʌcꞌaj u yaqꞌuir u wich uva uch. Quireꞌ cꞌuchij tu qꞌuinin in tꞌojcꞌuptic u wich uva quireꞌ tʌcꞌan u wich ir u corir u pʌcꞌar u wich uva ich yocꞌocab ―baxuc tu yaꞌaraj u yʌjmasir u tꞌʌn Cꞌuj.
\p
\v 16 A mac a curucbar ich u muyarir caj u jup u chan mascabir tu cu naj tꞌojcꞌuptic u wich uva quir u tꞌojcꞌuptic u pʌcꞌar u wich uva, jeroj caj u rʌc tꞌojcꞌupt u pʌcꞌaj u wich uva ich yocꞌocab.
\p
\v 17 Caj in wʌcꞌʌs ir u jer yʌjmasir u tꞌʌn Cꞌuj. Rajiꞌ caj joqꞌuij tu cu naj cꞌujinticob Cꞌuj ich caꞌanan. Bayiriꞌ xan, rajiꞌ u mʌchmʌn u chan mascabir tu cu naj tꞌojcꞌuptic u wich u pʌcꞌar uva. Jach quiꞌ u yej u chan mascabir.
\v 18 Caj in wʌcꞌʌs ir u jer yʌjmasir u tꞌʌn Cꞌuj. Rajiꞌ caj joqꞌuij tu cuchir tu cu naj toquic a baꞌ cu bin u tsꞌic tiꞌ Cꞌuj. Rajiꞌ tiꞌ yʌn ʌcʌtan tu cu naj cꞌujinticob Cꞌuj. A ray yʌjmasir u tꞌʌn Cꞌujoꞌ, cu cʌnantic u cꞌaqꞌuir a tiꞌ yʌnoꞌ, soc rajraꞌ tꞌʌbaꞌanoꞌ. Rajiꞌ caj u cꞌamquint u tꞌʌn tiꞌ u yet yʌjmasir u tꞌʌn Cꞌuj a yʌn u chan mascabir a jach quiꞌ yej quir u naj tꞌojcꞌuptic u pʌcꞌar u wich uva. Caj u yaꞌaraj tiꞌ:
\p ―Jup a chan mascabir, a quiꞌ yej, caꞌ a tꞌojcꞌuptej u wich uva, cax tu yʌniꞌ quireꞌ tʌcꞌan u wich ich yocꞌocab, quireꞌ ir u corir u pʌcꞌar u wich uva.
\p
\v 19 Rajen a ray yʌjmasir u tꞌʌn Cꞌujoꞌ, caj u jup u chan mascabir quir u tꞌojcꞌuptic u pʌcꞌar u wich uva irej u corir u pʌcꞌar u wich uva. Caj tsꞌoc u rʌc tꞌojcꞌuptiqueꞌ, caj u pichꞌintaj tu cu naj yʌchꞌic u cꞌab uva. Rajiꞌ u cꞌat yaꞌaric wa ber caꞌ bin tsꞌabʌc u mucꞌyaj ten Cꞌuj quireꞌ jach yaj u mucꞌyaj caꞌ bin tac.
\v 20 A raꞌ u tsꞌiquir Cꞌuj bin u caꞌ yubob mac, jach manan bin u caꞌ yubob an ten bic cu yʌchꞌic a ray u pʌcꞌar u wich uvajoꞌ ich tancab u cajaroꞌ. A tu cu naj yʌchꞌic u pʌcꞌar u wich uvajoꞌ ich tancab u cajar jeꞌ u jocꞌar u qꞌuiqꞌuer mac quireꞌ tsꞌiquij Cꞌuj. Bin u caj turur, tam ʌcriquic u qꞌuiqꞌuer mac a cu jocꞌar, hasta cu cꞌuchur tu chiꞌ a tsiminoꞌ a xʌcʌcbaroꞌ. Jeꞌ u bin u qꞌuiqꞌuer nach tac tresciento kilómetros tu cu yʌchꞌicoꞌ. 
\c 15
\s U yajirir a cu bin tar yejer u yʌjmasir u tꞌʌn Cꞌuj. Rajiꞌob a sietejoꞌ
\p
\v 1 Tu tin wʌyʌcꞌtaj ich caꞌanan caj in pʌctaj caj in wir u jer baꞌ quir u camsaꞌ. Aroꞌ jach manan tsoy tin wich, quireꞌ cu jacꞌʌr u yor mac. Tin wiraj u yʌjmasirob u tꞌʌn Cꞌuj a yʌn sietejoꞌ. Robob yʌn baꞌ a cu bin tsꞌocsic u tsꞌiquir Cꞌuj yejer a mac a tiꞌ yʌnoꞌ ich yocꞌocab, jeꞌ u tsꞌabʌr u mucꞌyaj a tiꞌoboꞌ. Jujuntur yʌjmasirob u tꞌʌn Cꞌuj bin u caꞌ tsꞌabʌrob tiꞌ u mucꞌyaj a mac a tiꞌ yʌnob ich yocꞌocab.
\p
\v 2 Caj in wiraj u jer baꞌ xan. Tiꞌ xitꞌaꞌan a rasoꞌ, jach sascꞌʌren, jach coꞌoch an ten bic cꞌacꞌnab. A rasoꞌ, xaxacꞌaꞌan yejer chʌc soc irej cꞌacꞌ. Caj in wiraj xan, tiꞌ yʌn mac a cꞌuchaꞌan yorob tiꞌ a bʌcꞌoꞌ, a jach manan caremoꞌ yejer u yochir a bʌcꞌoꞌ, a jach manan caremoꞌ. Mʌꞌ ja wirej, robob mʌꞌ ju sʌjtobiꞌ, mʌꞌ ju chaꞌbʌrob u tsꞌibt u cꞌabaꞌ a baꞌ numero yʌn ich u winquirir, rajen tiꞌ yʌnob chꞌiquicbar bʌytʌc a rasoꞌ. Robob u mʌchmʌnob arpa quir u pax, quir u cꞌʌyicob Cꞌuj. 
\v 3 Robob caj cꞌaynʌjob u cꞌay quireꞌ tacbirob ten Cꞌuj, rajen cu cꞌʌyicob quir yaꞌaricob: “Bayoꞌ Cꞌuj”, an ten bic camsaꞌbob ten Moisés uch, a mac a cu beyaj tiꞌ Cꞌuj uch. Caj u cꞌʌyob tiꞌ a tʌmʌn yuc Cꞌujoꞌ, quireꞌ rajiꞌ yʌjtaquirob. Mʌꞌ ja wirej, tu cu cꞌayob caj u yaꞌarob: 
\q Jach chich a mucꞌ tu ta taquenob, caj a yajquintenob rajen cu jacꞌʌr in worob. Quireꞌ a techoꞌ, in Jaj Tsꞌurirob Cꞌujech, a mac in reyintiquechob. Quireꞌ a techoꞌ, jach taj ca tsicbar, bayiriꞌ jach taj ca bin a taquic u joꞌr mac.
\v 4 Quireꞌ u mucꞌyajob a tabar u yubicob a bʌcꞌoꞌ, a jach caremoꞌ yejer u yochir a bʌcꞌoꞌ a jach caremoꞌ, raꞌ cu bin u camsic mac caꞌ u sʌjtech quir u cꞌujintiquechob Cꞌuj. Jeroj bin u caꞌ sʌjtob a cꞌabaꞌ quireꞌ bin a caꞌ a wesej tiꞌ mac, chen tech taj a wor. Caꞌ bin iric ten a mac a cʌjaꞌan ich tu cotor u ruꞌumin bic caj a chꞌesaj a bʌcꞌoꞌ, a jach caremoꞌ, yejer u yochir xan. Robob jeꞌ u tarobeꞌ quir u cꞌujintiquechob Cꞌuj.
\p
\v 5 Caj tsꞌoc in wiric a mac a cꞌuchaꞌan yorob tiꞌ a bʌcꞌoꞌ a jach manan caremoꞌ yejer u yochir. Caj in wir tu japnin tu cu naj cꞌujinticob Cꞌuj ich caꞌanan tu yʌn u chan cuchir a cu jacꞌʌr u yor mac. Raꞌ tin wiraj, toc qꞌueꞌaꞌan soc in pʌctic, rajen caj in wiraj tu yʌn u tꞌʌn a tsꞌab tiꞌ Moisés ten Cꞌuj uch.
\v 6 A siete u yʌjmasirob u tꞌʌn Cꞌuj a tin wiraj sam, robob caj jocꞌob tu japnin tu yʌn u chan cuchir a cu jacꞌʌr u yor mac. Mʌꞌ ja wirej, jujuntur u yʌjmasirob u tꞌʌn Cꞌuj yʌn u yajirir a cu bin u purur ich yocꞌocab, quireꞌ tsꞌiquij Cꞌuj. A ray yʌjmasirob u tꞌʌn Cꞌuj, robob u buquinmʌn sʌc nocꞌ u cꞌabaꞌ lino, jach chaꞌaj u nocꞌ, bayiriꞌ tʌcaj lino u nocꞌ. Toc cꞌʌxaꞌanob tu tsem u cꞌax u tsem, a betaꞌb u mascabir oro.
\v 7 Tu quin wʌyʌcꞌtic ich caꞌanan, caj in wiraj tuririꞌ ich a cuatro baꞌ irej bʌcꞌ, a cuxaꞌanoꞌ, caj u chucaj tiꞌ tuririꞌ yʌjmasir u tꞌʌn Cꞌuj ich a sietejoꞌ a caj in wiraj sam. Rajiꞌ caj u tsꞌajaj tiꞌ jujuntur u yʌjmasirob u tꞌʌn Cꞌuj u chan ruch a betaꞌb u mascabir oro. Tu chan ruch yʌn baꞌ ir wa ju yʌquir a cu tsꞌabʌr tiꞌ mac soc u quimin, aroꞌ cu yaꞌaric u tsꞌiquir Cꞌuj. Mʌꞌ ja wirej, rajiꞌ cu tar tiꞌ Cꞌuj, a Cꞌujoꞌ munt qꞌuin cuxaꞌan, ra qꞌuin uch hasta mʌꞌ u xupur u qꞌuinin.
\v 8 Quireꞌ tiꞌ yʌn Cꞌuj tu cu naj cꞌujinticob Cꞌuj, caj pꞌurnʌj u butsꞌir quireꞌ u sasirir Cꞌuj quet yejer u mucꞌ Cꞌuj rajen caj tur u butsꞌir. Rajen mʌnaꞌ mac cꞌuchaꞌan yor u yocar tu japnin quireꞌ u tsꞌiquir Cꞌuj, a ju mʌchmʌnob u yʌjmasirob u tꞌʌn Cꞌuj, a sietejoꞌ. Wa ber caꞌ bin tsꞌocac u tsꞌiquir Cꞌuj, jeroj cꞌuchaꞌan yor mac u yocar tu cu naj cꞌujinticob Cꞌuj ich caꞌanan.
\c 16
\s A siete chan ruch a betaꞌb u mascabir oro
\p
\v 1 Tu quin wʌyʌcꞌtic ich caꞌanan, caj in pʌctaj caj in wiraj a siete yʌjmasirob u tꞌʌn Cꞌujoꞌ. Jeroj, caj in wuꞌyaj mac cꞌam caj u puraj u tꞌʌn tiꞌ a siete yʌjmasirob u tꞌʌn Cꞌujoꞌ. Tar u tar u tꞌʌn tu japnin tu cu naj cꞌujinticob Cꞌuj. Caj araꞌb ten a mac a cu tꞌʌn tiꞌ a siete yʌjmasirob u tꞌʌn Cꞌujoꞌ:
\p ―Xenex ―quij―, caꞌ a jochquintex ich yocꞌor mac a tiꞌ yʌn ich yocꞌocab, a siete chan ruch, a yʌn u yajirir a Cꞌuj bin u caꞌ u tuchiꞌtoꞌ ―baxuc caj yaꞌaraj a cu tꞌʌnoꞌ.
\p
\v 2 Raꞌ pʌyber u yʌjmasir u tꞌʌn Cꞌuj caj joqꞌuij ich caꞌanan caj bin u jochquint u chan ruchir, caj u yʌnxchun u yajirir a mac a yʌn u tsꞌib a bʌcꞌoꞌ, a jach caremoꞌ tu pam. Bayiriꞌ tiꞌ, a mac a tu sʌjtob u yochir a bʌcꞌoꞌ, a jach manan caremoꞌ. Rajen a mac a tiꞌ yʌn ich yocꞌocab caj u cʌnob a iqꞌuer u caꞌob, a neyʌn u pujeroꞌ.
\p
\v 3 A caꞌtur u yʌjmasir u tꞌʌn Cꞌuj caj joqꞌuij, caj bin ich yocꞌocab quir u jochquint u chan ruchir. Rajiꞌ caj u jochquint ich cꞌacꞌnab, rajen caj waysaꞌb tiꞌ irej qꞌuiqꞌuer, raꞌ irej u qꞌuiqꞌuer a mac quimen quireꞌ jach ecꞌ u wich. Rajen a baꞌ tiꞌ yʌn ich cꞌacꞌnab rʌc quimij, quij.
\p
\v 4 A mʌnaꞌ u nup yʌjmasir u tꞌʌn Cꞌujoꞌ, caj joqꞌuij caj bin ich yocꞌocab quir u jochquint u chan ruchir xan. Rajiꞌ caj u jochquin tu cu yʌnxchun u yicꞌ jaꞌ, bayiriꞌ xan, tu cu yʌnxchun yoc yaꞌarir a chan sʌyaboꞌ caj rʌc waysaꞌb tiꞌ irej qꞌuiqꞌuer.
\v 5 Jeroj, caj in wuꞌy u tꞌʌn yʌjmasir u tꞌʌn Cꞌuj, a mac a cu cʌnantic a jaꞌoꞌ. Rajiꞌ caj u yaꞌaraj:
\p ―Jach taj a wor a techoꞌ, Cꞌuj ―quij yaꞌaraj tiꞌ―, quireꞌ u yajirir caj a tuchiꞌtaj, quireꞌ munt qꞌuin tiꞌ yʌnech, u beriꞌ tiꞌ yʌnech. Mʌꞌ ja wirej, a techoꞌ, caj a chaꞌb u wayʌr a jaꞌoꞌ, soc u wayʌr irej qꞌuiqꞌuer. 
\v 6 Mʌꞌ ja wirej, a mac a tiꞌ yʌnob ich yocꞌocab, robob caj u quinsob a winiquirob Cꞌuj, bayiriꞌ xan, a mac a tsꞌaꞌb u tucur ten tech Cꞌuj quir u tsicbar a baꞌ a cꞌat Cꞌuj. Rajen tech Cꞌuj caj a tsꞌaja tiꞌ irejob u yoꞌoch jaꞌ a waysaꞌb tiꞌ qꞌuiqꞌuer quireꞌ raꞌ u boꞌorir tu tu quinsob a winiquirob Cꞌuj ich u cajarob ―baxuc caj yaꞌaraj yʌjmasir u tꞌʌn Cꞌuj a cu cʌnantic a jaꞌoꞌ. 
\p
\v 7 A tenoꞌ, quij Juan, caj in wʌcꞌʌs uꞌy u jer u tꞌʌn a cu tar tu cuchir tu cu naj toꞌquic baꞌ quir u tsꞌic ti Cꞌuj ich caꞌanan:
\p ―Rajiꞌ taj a baꞌ cu yac yʌjmasir u tꞌʌn Cꞌuj. Taj ta toc araj tiꞌ a winiquirob Cꞌuj, rajen taj tan a taquic u joꞌr a mac a tu chucob u pach a winiquirob Cꞌuj, quireꞌ raꞌ u boꞌorir u cꞌʌb, quireꞌ a techoꞌ in Jaj Tsꞌurirechob Cꞌuj, a techoꞌ jach manan a mucꞌ ―baxuc caj araꞌb ten a cu tꞌʌn tu cuchir tu cu naj toꞌquic baꞌ tiꞌ Cꞌuj. 
\p
\v 8 A cuatro yʌjmasir u tꞌʌn Cꞌuj, caj jocꞌ quir u bin u jochquint u chan ruchir. Rajiꞌ caj u jochquintaj ich ic yum quir u tsꞌic u mucꞌ soc jach manan u chujur a mac a tiꞌ yʌnob ich yocꞌocab, a jic yumoꞌ.
\v 9 A mac a jach manan chujij ten ic yum, mʌꞌ ju cꞌax u yorob quir u pꞌʌticob u cꞌasir, cax raꞌ u boꞌorir u siꞌpir. Robob mʌꞌ ju sʌjtob Cꞌuj quir u quibicob u tꞌʌn. Chen robob caj u pachꞌob Cꞌuj, quireꞌ rajiꞌ caj u tuchiꞌtaj u mucꞌyajob, quireꞌ mʌꞌ rucꞌsaꞌb u mucꞌyaj ten Cꞌuj. Mʌꞌ ja wirej, a Cꞌujoꞌ yʌn u mucꞌ quir u tuchiꞌtic u mucꞌyaj an ten bic aroꞌ.
\p
\v 10 A cincojoꞌ yʌjmasir u tꞌʌn Cꞌujoꞌ, caj jocꞌ quir u jochquintic u chan ruchir xan. Rajiꞌ caj u jochquintaj tu cu jach tsꞌurinticob mac, a bʌcꞌoꞌ, a jach manan caremoꞌ. A mac a tiꞌ yʌnoꞌ, tu cu tsꞌurinticob mac a bʌcꞌoꞌ, a jach manan caremoꞌ caj acꞌbirchʌjij. Robob jach manan mucꞌyajnʌjob, rajen caj u chiꞌob u yacꞌ quireꞌ yʌn u yajirir.
\v 11 Quireꞌ yʌn u yajirir, bayiriꞌ xan, quireꞌ u cʌnmʌnob iqꞌuer u caꞌob uch, a caj tar tiꞌob, mʌꞌ ju cꞌax u yorob caꞌ u pꞌʌtob u cꞌasir, chen caj u pachꞌob Cꞌuj a tiꞌ yʌn ich caꞌananoꞌ.
\p
\v 12 A seisoꞌ u yʌjmasir u tꞌʌn Cꞌuj, caj jocꞌ quir u jochquintic u chan ruchir. Rajiꞌ caj u jochquintaj ich u yoc yaꞌarir u cꞌabaꞌ Eufrates, a ray yaꞌariroꞌ jach coch. Caj tsꞌoc u jochquintic u chan ruchir caj saꞌb yaꞌarir soc u man a reyob a cu reyinticob mac a tu cu tarob ic yumoꞌ. Mʌꞌ ja wirej, raꞌ u berir quir u binob ich u cajar Jerusalén. 
\p
\v 13 Tu tin wʌyʌcꞌtaj ich caꞌanan, caj in pʌctaj caj in wir a ayimoꞌ, a jach manan caremoꞌ, yejer u nup, rajiꞌ a bʌcꞌoꞌ, a jach caremoꞌ, yejer u jer mac a tsꞌaꞌb u tucur ten quisin quir u tsicbar a baꞌ u cꞌat a quisinob. Caj in wiraj caj jocꞌob tu chiꞌob a ray mʌnaꞌ u nup u quisinob. Caj jocꞌob mʌnaꞌ u nup u quisinob tu chiꞌob a yʌn u winquirob irob rerec.
\v 14 Quireꞌ a quisinoꞌ, rajiꞌ yʌninob, rajen a rerecoꞌ rajiꞌ bin u caꞌ u tus esob carem beyajob soc u tus aric a reyob, a cu reyinticob mac ich yocꞌocab, bayiriꞌ xan, bin u caꞌ u tus arob a mac a tiꞌ yʌnob ich yocꞌocab soc robob cu bin u muchꞌquinticob u bʌj quir u ricꞌsicob u baꞌteꞌticob, quireꞌ raꞌ u qꞌuinin a jach manan noꞌj tiꞌ a Cꞌujoꞌ, a mac a jach manan chichir u mucꞌ.
\v 15 “Rajen a ray u qꞌuininoꞌ, a mac a mʌꞌ tan u pajicob in tar, seb quin bin tar, an ten bic a mac a cu tar u taꞌquic baꞌ, a mʌꞌ u pajmʌn u tar. A baxucoꞌ, seb quin bin tar, a tenoꞌ. Rajen quiꞌ irechex soc quiꞌ a worex caꞌ bin uruquenoꞌ, a techexoꞌ a mac a yacsmʌnob tu yorob ten, soc ʌcʌtan u yʌjmasirob u tꞌʌn Cꞌuj yejer a mac a yerob Cꞌuj, mʌꞌ ja bin a chꞌiquex suraquir.” Baxuc tu yaꞌaraj Cꞌuj.
\v 16 A reyoboꞌ, yejer a mac a tiꞌ yʌnob ich yocꞌocab, a tus araꞌbob quir u muchꞌquinticob u bʌj quir u ricꞌsicob u baꞌteꞌticob. Robob cu bin u baꞌteꞌticob mac ich u ruꞌumin Armagedón, raꞌ u cꞌabaꞌ ich u tꞌʌn a mac a cu tsicbar hebreo.
\p
\v 17 Caj in wʌyʌcꞌtaj ich caꞌanan, caj in pʌctaj, caj in wiraj a siete yʌjmasir u tꞌʌn Cꞌuj caj joqꞌuij. Rajiꞌ caj joqꞌuij caj u jochquint u chan ruchir ich yocꞌor icꞌ. A ray u qꞌuininoꞌ, jocꞌ u tꞌʌn mac tu cu naj cꞌujinticob Cꞌuj tu yʌn u cutan a jach caremoꞌ. Cꞌam caj u yaꞌaraj: 
\p ―Jeroj tabar u tsꞌocar u tsꞌiquir Cꞌuj yejer a mac a tiꞌ yʌn ich yocꞌocab ―baxuc tu yaꞌaraj a mac a cu tꞌʌnoꞌ.
\p
\v 18 Wa ber caj jocꞌ u tꞌʌn quet caj jocꞌ u raram yejer u jum a cu pec, caj quiꞌ pecnʌj a ruꞌumoꞌ soc jach yaj u pec. Mʌnaꞌ mac yirmʌn u pec ruꞌum an ten bic baxuc a rayoꞌ.
\v 19 Rajen tu cotor a cajaroꞌ a caremoꞌ caj u rʌc jʌsob u bʌj, tu pecnʌj a ruꞌumoꞌ, rajen junxot tu jʌsob u bʌj u jer junxot caj u jʌsob u bʌj, baxuc, xan, u jer junxot caj u jʌsob u bʌj. Caj rʌc chꞌej a raj cajaroꞌ, bayiriꞌ xan caj rʌc chꞌej tu cotor u cajarob ich yocꞌocab a tuj tsꞌurintaꞌb u tsꞌurir a ray carem cajaroꞌ quireꞌ raꞌ u cajar Babilonia, a noꞌjoꞌ, quireꞌ cꞌuchij tu qꞌuinin u tsꞌictar Cꞌuj. Rajen bin u caꞌ chꞌesaꞌbir ten Cꞌuj. 
\v 20 Rajen tu cotor u peꞌtenin, cax tu yʌnob, caj chꞌesaꞌb soc mʌnaꞌ, bayiriꞌ xan, a witsoꞌ, bin u caꞌ chꞌesaꞌbir. Mʌꞌ ja wirej, bin u caj tar Cꞌuj, a mac cu bin u reyinticob ich yocꞌocab.
\v 21 Rajen caj rub ich caꞌanan bar jaꞌ, a jach caremoꞌ. Raꞌ caj purij ten Cꞌuj. Tuririꞌ a bar a jaꞌoꞌ, yʌn caꞌturꞌ arrobas. Rajen a mac a tiꞌ yʌn ich yocꞌocab caj u pachꞌob Cꞌuj quireꞌ yʌn u yajirir a cu rubur ich yocꞌor a tiꞌoboꞌ. Quireꞌ jach manan u yajirir a cu mucꞌyajoboꞌ.
\c 17
\s U yajirir tu cajar Babilonia
\p
\v 1 Caj tarij tin wicnʌn tuririꞌ u yʌjmasir u tꞌʌn Cꞌuj. Rajiꞌ tuririꞌ ich a sietejoꞌ, a tu jochquintob u yajirir ich u chan ruchob soc u tar u mucꞌyaj a caj u tuchiꞌtaj Cꞌuj uch. Rajiꞌ caj u yaꞌaraj ten:
\p ―Uꞌyej baꞌ quin wac tech, Juan. A tenoꞌ ―quij―, bin in caꞌ camsech a baꞌ cu bin tar an ten bic a Cꞌujoꞌ bin u caꞌ tsꞌictar yejer u cajar a tu pꞌʌtob u cꞌujinticob Cꞌuj quir u tus cꞌujinticob u jer. A raꞌ cajaroꞌ, tiꞌ yʌn tu yʌn cu man yaꞌab yoc yaꞌarir.
\v 2 Mʌꞌ ja wirej, rajiꞌ caj u pʌy u berob u jer u yet cajarob a tu cu reyinticob rey, rajiꞌ araꞌb u manob irbir xquic ten xib bayiriꞌ xan, rajiꞌ araꞌb u manob irbir xib ten xquic xan. Baxuc caj u toc araj a ray cajaroꞌ soc u tucricob a mac a tiꞌ yʌn ich yocꞌocab wa jach manan tsoy caꞌ u tus cꞌujintob u tus cꞌujob. 
\p
\v 3 Tu tin wʌyʌcꞌtaj ich caꞌanan uch, caj in wuꞌyaj an ten bic caj u pʌyen ich tʌcay ruꞌum. Rajiꞌ u Tajꞌor u Pixam Cꞌuj caj u pʌyen a tenoꞌ. Caj in wiraj tuririꞌ xquic. Tiꞌ yʌn, curucbar ich yocꞌor a bʌcꞌoꞌ, a jach caremoꞌ. Rajiꞌ jach chʌc u pach. Toc tsꞌibaꞌan tu pach aroꞌ u tꞌʌn quir u pachꞌic Cꞌuj. A carem bʌcꞌoꞌ yʌn siete u joꞌr, yejer diez u bac tu joꞌr xan.
\v 4 A ray xquicoꞌ, u buquinmʌn u chʌc nocꞌ yejer baraꞌan chʌc. Yʌn oro rʌc nichꞌaꞌan ich u nocꞌ, bayiriꞌ xan, tiꞌ nichꞌaꞌan u chan tunichir, a jach coꞌojoꞌ. Bayiriꞌ xan, tiꞌ nichꞌaꞌan ich u nocꞌ a chan sʌc ujoꞌ, u cꞌabaꞌ perla. Caj in wiraj u mʌchmʌn tu cꞌʌb u ruch a betaꞌb u mascabir oro, raꞌ quir u tus etsꞌbaroꞌonex tan u man tu cꞌasir.
\v 5 Caj in wiraj baꞌ tsꞌibaꞌan ich yocꞌor u pam u cꞌabaꞌ a xquicoꞌ. Rajiꞌ tu mucu araꞌan u cꞌabaꞌ, tan yaꞌaric: “Raꞌ u cajar Babilonia, a jach noꞌjoꞌ. A xquicoꞌ, a cu camsic mac caꞌ u pꞌʌt u jach cꞌujinticob Cꞌuj. Raꞌ cu camsic mac caꞌ manac tu cꞌasirob.”
\v 6 A ray xquicoꞌ irej wa cʌraꞌan. Rajij carchʌjij yejer u qꞌuiqꞌuer a mac a yacsmʌnob tu yorob tiꞌ Cꞌuj tu tu chucaj u pachob. Bayiriꞌ xan, caj carchʌjij yejer u qꞌuiqꞌuer a mac a quinsaꞌb quireꞌ tu yacsob tu yorob tiꞌ u tꞌʌn Jesús. Wa ber caj in wiraj a xquicoꞌ, caj jaqꞌuij in wor.
\v 7 Caj cꞌataꞌb ten yʌjmasir u tꞌʌn Cꞌuj:
\p ―Baꞌwir cu jacꞌʌr a wor? A tenoꞌ, bin in caꞌ in waꞌarej tech a baꞌ u tus etsꞌbar a xquicoꞌ, yejer a bʌcoꞌ, a jach caremoꞌ, a yʌn siete u joꞌr yejer diez u bac u joꞌr xan.
\v 8 A bʌcꞌoꞌ, a jach caremoꞌ a ta wiraj sam, raꞌ tus etsꞌbar irej wa mac a yʌn u mucꞌ uch, chen jamach bin u mucꞌ. Rajiꞌ caꞌ bin tac tu qꞌuinin bin u caꞌ u wʌcꞌʌs es u mucꞌ. Rajen pʌchaꞌan u cꞌabaꞌ a bʌcoꞌ, a jach caremoꞌ. Rajiꞌ u mucꞌ, tar u tar ich a quisinoꞌ. Caꞌ bin manac tu qꞌuinin, tiꞌ cu wʌcꞌʌs bin tu jor ich ruꞌum tu mʌꞌ xuraꞌan u tamin, tiꞌ cu bin tsꞌocar. A mac a cʌjaꞌan tu qꞌuinin a rayoꞌ, a robob a mʌꞌ ju yacsob tu yorob tiꞌ u tꞌʌn Cꞌuj, a mʌꞌ tsꞌibaꞌan u cꞌabaꞌ tu juꞌunin quir u cuxtar munt qꞌuin, robob u toc er Cꞌuj, raꞌ u qꞌuininoꞌ tu yʌnxchun tu cotor baꞌ. Mʌꞌ ja wirej, robob a mac a mʌꞌ yerob Cꞌuj, caj jaqꞌuij u yorob caj u yirob bic tabar a bʌcꞌoꞌ, a jach caremoꞌ yʌn u mucꞌ uch, caj u wʌcꞌʌs tar u mucꞌ a ju berer yʌnin a bʌcꞌoꞌ, a jach caremoꞌ ―baxuc caj araꞌb ten yʌjmasir u tꞌʌn Cꞌuj ten.
\p
\v 9 A yʌjmasir u tꞌʌn Cꞌuj caj yaꞌaraj:
\p ―Arej tiꞌ a mac a jach tꞌojoꞌ, caꞌ u najtej a jeꞌraꞌ. U joꞌr a bʌcꞌoꞌ, a jach caremoꞌ, a yʌn siete u joꞌroꞌ, raꞌ u tus etsꞌbar u tajir u jor u pꞌuc wits, a sietojoꞌ tu cu cutar a xquicoꞌ.
\v 10 A ray siete u jor u pꞌuc witsoꞌ, robob raꞌ u tus etsꞌbar u tajir a siete reyoboꞌ. Yʌn cinco a caj tsꞌoc u reyinticob mac. Tiꞌ yʌn tuririꞌ a bajeꞌrer tan u reyinticob mac. Tiꞌ toy yʌn u jer rey jeꞌ u yocar u caꞌ reyintac ten mac, chen tabar u yocar caꞌ reyintac ten mac.
\v 11 A bʌcꞌoꞌ, a jach caremoꞌ, a cuxaꞌan uchoꞌ chen bajeꞌrer mʌnaꞌ chen rajiꞌ cu tus etsꞌbar u tajir u rey, a ochojoꞌ, chen rajiꞌ quet yejer a siete reyoboꞌ cax rub tu pach a siete reyoboꞌ. Rajiꞌ cu bin chꞌesaꞌbir ten Cꞌuj.
\p
\v 12 ’Raꞌ u bac u joꞌr a diez ta wiraj ich a bʌcꞌoꞌ, a jach caremoꞌ a chʌc u pachoꞌ. A ray diez u bac u joꞌr, robob cu tus etsꞌbarob u tajir diez reyob a mʌꞌ toy ocacob caꞌ reyintacob mac, chen robob cu bin tsꞌabʌr u mucꞌ ten a bʌcꞌoꞌ, a jach caremoꞌ, soc u yocar caꞌ reyintacob ten mac. Jariꞌ tabar cu bin ocarob caꞌ reyintacob ten mac yejer a bʌcꞌoꞌ, a jach caremoꞌ.
\v 13 Robob a reyoboꞌ, a diezoꞌ, pꞌeriꞌ u tucurob quir u yamticob a bʌcꞌoꞌ, a jach caremoꞌ. Rajen yejer u mucꞌ tu cu reyintaꞌrob ten mac robob caj u chich yamtob a bʌcꞌoꞌ, a jach caremoꞌ.
\v 14 A reyoboꞌ, caj bin u baꞌteꞌtob u tʌmʌn yuc Cꞌuj, chen mʌꞌ ju bin u cꞌuchur yorob tiꞌ, quir u chꞌesicob a tʌmʌn yucoꞌ. Mʌꞌ ja wirej, a Jaj Tsꞌuroꞌ jach manan chichir u mucꞌ ich yocꞌocab, cax tiꞌ a reyoboꞌ, rajen robob bin u caꞌ u quibicob u tꞌʌn Jaj Tsꞌur. A mac a chuc u pachob ten a diez reyoboꞌ quireꞌ tu quibob u tꞌʌn a Jaj Tsꞌurob. Robob payob u ber ten u Jaj Tsꞌurob. Mʌꞌ ja wirej, robob tetaꞌb quir u manob u tsecꞌticob u tꞌʌn. Robob jach taj tetaꞌb quireꞌ mʌꞌ ju pꞌʌtob u tꞌʌn Cꞌuj tan u yesicob tiꞌ mac u yajob Jesús, cax chucob u pachob. ―baxuc caj yaꞌaraj ten yʌjmasir u tꞌʌn Cꞌuj.
\p
\v 15 Caj yaꞌaraj ten yʌjmasir u tꞌʌn Cꞌuj, tan yaꞌaric: 
\p ―Ber caj a wiraj a cajaroꞌ a tiꞌ yʌn tu yʌn jach yaꞌab yaꞌarir sam, tu curaꞌan a xquicoꞌ, a ray yaꞌariroꞌ cu tus etsꞌbarob pim winic, chen robob tan u cʌjtarob ich yaꞌab u cajarob, a tan u tsicbarob ich u jer yaꞌab u tꞌʌnob.
\v 16 A diez u bacoꞌ a ta wiraj tu joꞌr a bʌcꞌoꞌ, a jach caremoꞌ, a chʌc u pachoꞌ, robob cu tus etsꞌbarob a diez reyoboꞌ, a cu bin u pꞌactob u cajar, a tiꞌ yʌn tu yʌn u yoc yaꞌarir yaꞌab, tu curucbar a xquicoꞌ. Robob a reyob bin u caꞌ u chꞌesob a ray cajaroꞌ, soc mʌnaꞌ baꞌ cu pꞌatʌr. Robob bin u caꞌ u rʌc tocob a ray u cajaroꞌ quir u rubsic u mucꞌ tu cu reyintaꞌr ten mac soc jach saj cajaroꞌ.
\v 17 Mʌꞌ ja wirej, cꞌan ten Cꞌuj a reyoboꞌ, soc u quibicob a baꞌ u cꞌat Cꞌuj soc u chꞌesicob a ray u cajaroꞌ. Rajen periꞌob u tucurob quir u yamticob a bʌcꞌoꞌ a jach caremoꞌ, quireꞌ rajiꞌ u jach tsꞌurir a reyoboꞌ. Baxuc cu chaꞌbʌr tiꞌob ten Cꞌuj hasta cu cꞌuchur tu qꞌuinin a Cꞌujoꞌ bin u caꞌ u nupꞌsej a baꞌ tu toc araj uch.
\v 18 A xquicoꞌ a ta wiraj curic, rajiꞌ cu tus etsꞌbar u cajaroꞌ raꞌ u jach noꞌjoꞌ, rajiꞌ cu reyintaꞌr ten tu cotor rey cax tu cu reyintaꞌrob ten mac.
\c 18
\s U rubub u cajar Babilonia
\p
\v 1 Caj tsꞌoc in wʌyʌcꞌtic a ray xquicoꞌ, a curucbar ich u joꞌr wits, a sietejoꞌ. Caj in wʌyʌcꞌt u jer yʌjmasir u tꞌʌn Cꞌuj. Tar emij ich caꞌananoꞌ, rajiꞌ tuririꞌ u jach tsꞌurir ich u yet yʌjmasirob u tꞌʌn Cꞌuj. Rajiꞌ caj u yercꞌacꞌtic u ruꞌumin ich yocꞌocab quireꞌ pot sasir u winquirir.
\v 2 A ray yʌjmasir u tꞌʌn Cꞌuj caj u puraj u tꞌʌn, chꞌic cꞌam caj u puraj u tꞌʌn, tan yaꞌaric:
\p ―U cajar Babilonia cu bin chꞌesaꞌbir ten Cꞌuj soc u cʌjtar u quisinin tu yʌn u cajar Babilonia uch. Tiriꞌ xan, cu bin u cʌjtar a baꞌ jach cꞌas, bayiriꞌ xan, a baꞌ pꞌactaꞌb ten mac, cax chꞌichꞌ, cax bʌcꞌ.
\v 3 Mʌꞌ ja wirej ―quij―, a raj cajaroꞌ yaꞌarob u man yirej xquic. Bayiriꞌ xan, a xquicoꞌ yaꞌarob u man yirej xib cax ich tu cotor mac ich yocꞌocab. Bayiriꞌ xan, u cajar Babilonia caj yaꞌarob a mac a cu coꞌnan quir u manob xan, an ten bic baxuc a tiꞌoboꞌ. Rajen a mac a cu coꞌnan tu jach tꞌajʌr u taqꞌuinoꞌ quireꞌ a cu manoboꞌ. Robob, caj cuxrajob tiꞌ u nonoj bʌjiriꞌeꞌ, tan u manob a cu pachticob tu yorob a cꞌaxoꞌ. A cu coꞌnanob caj u purob ich u cajar Babilonia a baꞌ u pachtajob quir u manob tu cꞌasir ―baxuc caj u yaꞌaraj yʌjmasir u tꞌʌn Cꞌuj.
\p
\v 4 Jeroj, caj in wuꞌy u jer tꞌʌn mac ich caꞌananoꞌ tun. Rajiꞌ caj u yaꞌaraj:
\p ―A techexoꞌ, a mac a tu yacsob tu yorob tiꞌ Cꞌuj. Cojenex, caꞌ a pꞌʌtex u cajar Babilonia soc mʌꞌ a pʌyic a siꞌpirex xan, soc mʌꞌ pꞌeriꞌ ca bin a wuꞌyex u tsꞌiquir Cꞌuj, quireꞌ raꞌ u boꞌorir u siꞌpir a cu bin tuchiꞌbir tiꞌ ten Cꞌuj.
\v 5 Mʌꞌ ja wirej ―quij―, u siꞌpir u cajar Babilonia, quireꞌ jach cꞌas, rajen yiraj Cꞌuj. Rajiꞌ mʌꞌ tabar u tubur tiꞌ, a Cꞌujoꞌ. Rajiꞌ tu cꞌʌꞌotaj, rajen bin u caꞌ boꞌot u siꞌpirob.
\v 6 A techoꞌ, Cꞌuj ―quij yaꞌaraj tiꞌ―, ar u toc quiꞌ boꞌot u boꞌorir u siꞌpirob u cajar Babilonia. Toc boꞌot a tiꞌobeꞌ, mʌꞌ chen teniꞌ, caꞌ a wʌcꞌʌs caꞌ boꞌotej tiꞌob, soc jach manan cu yubicob, quireꞌ baxuc rajiꞌ caj u bet a tiꞌob xanoꞌ.
\v 7 Cꞌuj, toc ar u mucꞌyaj u cajar Babilonia. Ar u toc betej caꞌ ocꞌar xan, quireꞌ nonoj cuxrajob u bʌjiriꞌ u cꞌateꞌ, tan u beticob a baꞌ cꞌasir cu pachticob tu yorob. Mʌꞌ ja wirej, rajiꞌ cu yaꞌaric tu pixam tiꞌ u nonoj bʌjiriꞌeꞌ: “A tenoꞌ, quij, xquiquen, a tenoꞌ, u reyintiquenob mac. A tenoꞌ, mʌꞌ tucur in caꞌ an ten bic xquic a quim u mam. A tenoꞌ, quij, mʌꞌ jin bin in mucꞌyaj.” Baxuc cu yaꞌaric u cajar Babilonia.
\v 8 Mʌꞌ ja wirej, u cajar Babilonia seb cu bin u tsꞌabʌr u mucꞌyaj. A mac a cʌjaꞌanob tu cajar Babilonia, jeꞌ u quiminobeꞌ. Robob jeꞌ u tucurobeꞌ. Robob jeꞌ u wiꞌijchʌjʌrobeꞌ. Jeꞌ u tocarob yejer cꞌaqꞌueꞌ xan. Mʌꞌ ja wirej, a Jach Tsꞌur Cꞌujoꞌ cꞌuchaꞌan yor u tuchiꞌtaꞌr u yajirej an ten bic caj u toc aꞌaraj Cꞌuj.
\p
\v 9 Mʌꞌ ja wirej, robob a reyoboꞌ, a mac a tu pꞌeriꞌquintob u bʌj tu cu manob tu cajar Babilonia a tan u yiricob xquic, bayiriꞌ a tan yiricob xib. Robob, a reyoboꞌ, caj nonoj cuxracob tiꞌ u bʌjiriꞌeꞌ, tan u beticob a baꞌ cꞌasir cu pachticob tu yorob. Robob bin u caꞌ yacꞌtob u cajar Babilonia caꞌ bin chꞌesaꞌ ten Cꞌuj. Robob bin u caꞌ u tucrob u cajar Babilonia caꞌ bin yirob u tocar, caꞌ bin yirob u nacʌr u butsꞌir tu cu yerar.
\v 10 Robob, a reyoboꞌ, mʌꞌ ju bin u natsꞌob u bʌj quir u taquicob u cajar Babilonia quireꞌ u sajac u yubicob. Robob bin u caꞌ yaꞌarob:
\p ―Ay, quen, ay quen. Otsir u cajar Babilonia quireꞌ chꞌesaꞌbir ten Cꞌuj. Cax quiꞌ yorob uch. Mʌnaꞌ baꞌ caj u tucraj uch, chen seb caj cꞌuchij tu qꞌuinin u tsꞌiquir Cꞌuj a tiꞌeꞌ ―baxuc cu bin yaꞌaricob.
\p
\v 11 Robob, a mac a cu coꞌnan, tiꞌ u cajar Babilonia, cu bin u caꞌ u jach acꞌtob u bʌj, tan u yocꞌarob quireꞌ mʌꞌ tu cu bin u canob u baꞌtac ich u cajar Babilonia mʌꞌ cu bin u canejob biqꞌuin.
\v 12 Mʌꞌ ja wirej, a mac a cu canicob tiꞌ u cajar Babilonia caj u canob tiꞌ a chan tunich, a jach coꞌojoꞌ yejer a sʌc ujoꞌ, raꞌ u cꞌabaꞌ perla. Robob caj u canob tiꞌ u nocꞌ, raꞌ sʌc nocꞌoꞌ, u cꞌabaꞌ lino. Bayiriꞌ xan, chʌc nocꞌ a cu naj buquinticob a reyoꞌ. Caj u canob tiꞌ nocꞌoꞌ a sʌctaꞌbir nocꞌ, a ju cꞌuchoꞌ, a cu tar ich u cꞌan a nocꞌoꞌ, u cꞌabaꞌ xan seda, jeroj caj u canob u jer chʌc nocꞌ xan. Robob, caj u canob tiꞌ cheꞌ a nequiꞌ u boqueꞌ irej nabaꞌ, bayiriꞌ xan, cu canicob u cheꞌer a jach coꞌojoꞌ irej punʌꞌ, jach coꞌoj, bayiriꞌ xan, cu canicob tiꞌ tu cotor baꞌ a betaꞌb u coj a bʌcꞌoꞌ, u cꞌabaꞌ elefante, chen a baꞌ betaꞌ u cojoꞌ, raꞌ u cꞌabaꞌ marfil. Robob caj canob tiꞌ a chʌc taqꞌuinoꞌ, bayiriꞌ xan, mascab, bayiriꞌ xan, tunich a jach yuroꞌ, u cꞌabaꞌ mármol.
\v 13 Robob cu canicob u sor cheꞌ, a jach quiꞌ u bocoꞌ, bayiriꞌ xan, tsꞌac a quiꞌ u bocoꞌ, quir u jicꞌtic tu bʌqꞌuerob, bayiriꞌ u yits, a quiꞌ u boc, u cꞌabaꞌ mirra, bayiriꞌ xan, a quiꞌ u bocoꞌ a cu jicꞌticob tu joꞌrob, bayiriꞌ xan, u yucꞌur u cꞌab u wich uva, a cu yuqꞌuicob. Robob caj u canicob tiꞌ sas yejer u wich bax nʌr, a jach tsoyoꞌ, yejer u yoꞌoch trigo. Robob caj u canob tiꞌ u yʌrʌcꞌ burro yejer u carro a cu jitaꞌr ten yʌrʌcꞌ tsimin, bayiriꞌ xan, caj u canob u yʌrʌcꞌ tʌmʌn yuc, bayiriꞌ xan, u yʌrʌcꞌ chivo, bayiriꞌ xan, u yʌrʌcꞌ tsimin quir u cʌptarob tu pach. Cax winic caj u cꞌʌnob, cax xib caj u canob, cax xquic xan, caj u canob.
\v 14 Caꞌ bin arac tiꞌ u cajar Babilonia:
\p ―Raꞌ u wich cheꞌ caj a pachtex uch, cax a baꞌ tsoy ta chiꞌex, mʌnaꞌ mac cu tar purbir techex quir a mʌniquex, cax a baꞌtaquex, mʌꞌ biqꞌuin caꞌ bin a wirexiꞌ ta cajarex ―baxuc cu bin araꞌbir tiꞌob.
\p
\v 15 A mac a cu caninob uch tiꞌ a ray cajaroꞌ, a mac a tu nejarob u taqꞌuinoꞌ tiꞌ u cajar Babilonia. Robob, mʌꞌ ju bin u nʌtsꞌob u bʌj tiꞌ a ray cajaroꞌ quireꞌ jacꞌaꞌan yorob tiꞌob, quireꞌ sajʌcob caj u yirob u tsꞌabʌr u mucꞌyaj ich u cajar Babilonia. Robob jeꞌ u yacꞌticob u cajar Babiloniajeꞌ, tan u nequiꞌ acꞌticob. 
\v 16 A ray cu conanoboꞌ, jeꞌ u yaꞌaricobeꞌ:
\p ―Ay, quen, ay, quen, otsir u cajar Babilonia a jach noꞌjoꞌ. Irech uch a xquicoꞌ a ju buquinmʌn u sʌc nocꞌ, u cꞌabaꞌ lino, quireꞌ jach tsoy. Toc yʌn tech chʌc nocꞌ yejer baraꞌan chʌc nocꞌ, raꞌ nichꞌaꞌan ta nocꞌ u mascabir oro yejer u tunichir a jach coꞌojoꞌ yejer a sʌc ujoꞌ, u cꞌabaꞌ perla.
\v 17 Quireꞌ toꞌonex, jeꞌ u yaꞌaricob a mac cu conanob, raꞌ irej tuririꞌ hora mʌꞌ tuririꞌ qꞌuiniꞌ an ten bic caj tsecꞌtaꞌb tiꞌ u cajar Babilonia wa ber caj chꞌesaꞌb ten Cꞌuj tu cotor u baꞌtac tub u tar u taqꞌuin uch ―baxuc jeꞌ u yaꞌaricob a mac a cu conanob caꞌ bin cꞌuchuc tu qꞌuinin.
\p Tu cotor mac a ju tsꞌurirob u chemicꞌacꞌnab, yejer a mac a cu bin purbirob tu ruꞌumin yejer a mac u winquirir u chemicꞌacꞌnab, yejer tu cotor mac a cu jaricob u taqꞌuin tu cu cꞌanob u chem, robob mʌꞌ ju natsꞌʌrob ich u cajar Babilonia quireꞌ jacꞌaꞌan yorob tiꞌob.
\v 18 Robob, jeꞌ u bin yiricob u butsꞌir tu cu yerar u cajar Babilonia. A raꞌ u qꞌuininoꞌ jeꞌ u yacꞌticob u bʌjeꞌ, tan u yaꞌaricob:
\p ―Jeroj, esej toꞌonex u jer u cajar an ten bic u cajar Babilonia caj chꞌesaꞌb uch an ten bic u cajar Babilonia caj chꞌesaꞌb.
\p
\v 19 Raꞌiriꞌ xan, jeꞌ u tasicob u noy ruꞌum tu joꞌrob soc yerob mac tan u yacꞌticob u bʌj. Cꞌam cu bin ocꞌarob tu cu yacꞌticob u bʌj. Jeꞌ u yaꞌaricob:
\p ―Ay, quen, Ay, quen jach otsir u cajar Babilonia, a jach noꞌjoꞌ. Quireꞌ yejer u taqꞌuin caj u mʌnob a baꞌ jach coꞌoj tiꞌ u cajar, rajen tu nejarob u taqꞌuin a mac a yʌnin u chemicꞌacꞌnab tu tu canob baꞌ. Rajen tabar u chꞌesaꞌr ten Cꞌuj u cajar Babilonia ―baxuc caj u yacꞌtob u bʌj.
\p
\v 20 Tu tin wʌyʌcꞌtaj ich caꞌanan, caj in pʌctaj caj in wiraj u yʌjmasir u tꞌʌn Cꞌuj. Rajiꞌ caj u yaꞌaraj:
\p ―Quiꞌquint a worex a techexoꞌ, a mac a cʌjaꞌan ich caꞌanan. Bayiriꞌ xan, a techexoꞌ a tu tuchiꞌtechex Jesús quir a tsecꞌtiquex u tꞌʌn, bayiriꞌ xan a techexoꞌ a tsꞌab a tucurex quir a tsicbarex a baꞌ u cꞌat Cꞌuj uch, bayiriꞌ xan, a techexoꞌ a mac Cꞌuj yʌninechexoꞌ. Quiꞌquint a worex, quireꞌ a Cꞌujoꞌ caj tsꞌiquij yejer u cajar Babilonia quireꞌ a baꞌ tu betaj techex uch. Mʌꞌ ja wirej, Cꞌuj caj u yesaj a techexoꞌ caj a cꞌujintex Jach Cꞌuj, rajen tu chꞌesaj u cajar Babilonia tiꞌ ―baxuc caj u yaꞌaraj yʌjmasir u tꞌʌn Cꞌuj.
\p
\v 21 A ray u quininoꞌ, u yʌjmasir u tꞌʌn Cꞌuj, a mac jach chich u mucꞌ caj u chꞌaj tuririꞌ tunich an ten bic u caꞌir juchꞌ, chen jach manan carem a caꞌoꞌ. Rajiꞌ caj u pichꞌintaj ich cꞌacꞌnab, tan yaꞌaric:
\p ―An ten bic caj in pichꞌintaj yejer u chichir in mucꞌ ich cꞌacꞌnab, baxucoꞌ a Cꞌujoꞌ, yejer u chichir u mucꞌ cu bin u chꞌesic u cajar Babilonia soc mʌnaꞌ.
\p
\v 22 Caj araꞌb ten yʌjmasir u tꞌʌn Cꞌuj:
\p ―A cu jum a arpajoꞌ, a cu pʌxicob, yejer a mac a cu pax, mʌꞌ ju bin uyibir tu cajar mʌꞌ biqꞌuin. Cax a chur yejer a mac a cu churoꞌ, mʌnaꞌ. Cax a cu yutsic u mascabir quir u yutstaꞌr, mʌnaꞌ. Mʌꞌ ju bin irbir ten mac a cu beyaj tu cu jaric u taqꞌuinoꞌ tu cajar. Mʌꞌ ju bin irbir ten mac, a xquicoꞌ a tan u juchꞌoꞌ, mʌꞌ biqꞌuin.
\v 23 Tu cajar Babilonia, mʌnaꞌ mac cu bin irbir u ras quir u yercꞌacꞌtic u yatoch. Mʌꞌ ju bin yubob u quiꞌ yor mac a tu cu chꞌic u racꞌ, cax a cu tarob tu cajar, a mac a cu conanob, a mac a jach noꞌjoꞌ ich yocꞌocab. Chen techex ta tus arex tiꞌob soc a pʌyiquex u siꞌpirob an ten bic techex.
\p
\v 24 ’Caj cꞌuchij tu qꞌuinin quir a bin chꞌesaꞌbir ten Cꞌuj. Tij quirex bic tabar ta quinsex a mac a tu camsob u tꞌʌn Cꞌuj uch, yejer a mac a tu quibob u tꞌʌn Cꞌuj uch, irej wa ta toc quinsex tu cotor mac ta cajarex, cax nach quinsaꞌbob ―baxuc tu yaꞌaraj yʌjmasir u tꞌʌn Cꞌuj.

\c 19
\p
\v 1 Caj tsꞌoc in wʌyʌcꞌtic ich caꞌanan tu tin wir u cajar Babilonia, jeroj caj in wuꞌyaj u tꞌʌn mac a tu muchꞌaꞌanob ich ʌcʌtan tu cutan a caremoꞌ. Cꞌam caj u tꞌʌnob tan yaꞌaricob:
\q Caꞌ ij caremquintex u cꞌabaꞌ ic Jaj Tsꞌurirex Cꞌuj, quireꞌ tu tacoꞌonex soc mʌꞌ jic binex ich cꞌacꞌ. Caꞌ ic sʌjtex Cꞌuj, quireꞌ a baꞌ tu betaj. Caꞌ ic sʌjtex a tiꞌoꞌ tij corex quireꞌ rajiꞌ yʌn tu cotor u mucꞌ. Chen rajiꞌ yʌn u mucꞌ tu cotor, quireꞌ rajiꞌ ij cꞌujirex ic Jaj Tsꞌurirex. 
\v 2 Mʌꞌ ja wirej, a baꞌ u ber tiꞌ u cajar Babilonia, raꞌ u tajir u boꞌorir u siꞌpir, rajen tsꞌiquij Cꞌuj, yejer a xquicoꞌ, quireꞌ rajiꞌ cu tus etsꞌbar u cajar Babilonia. Mʌꞌ ja wirej, rajiꞌ tu pʌy u siꞌpir tu tu yaꞌaraj u man yejer xquic, bayiriꞌ xan, tu pʌy u siꞌpir tu tu yaꞌaraj u man yejer xib. Rajiꞌ tu pʌy u siꞌpirob, baxucoꞌ tiꞌ a mac a cʌjaꞌan ich yocꞌocab. A Cꞌujoꞌ, caj tsꞌiquij yejer quireꞌ tu chuc u pachob a mac a tu yacsob tu yorob tiꞌ Cꞌuj, quireꞌ tu quinsob.
\m Baxuc caj yaꞌaraj a mac a muchꞌaꞌan tu cutan a jach caremoꞌ.
\p
\v 3 A jach pimoꞌ, a muchꞌaꞌanob ich ʌcʌtan u cutan, a jach caremoꞌ, caj u wʌcꞌʌs arob:
\p ―Caꞌ ij caremquintex u cꞌabaꞌ ic Jaj Tsꞌurirex Cꞌuj, quireꞌ tu chꞌes u cajar Babilonia. Raꞌ u butsꞌir tu cu yerar, raꞌ ir u butsꞌir tu cu mucꞌyajob a mac a tiꞌ yʌn ich cꞌacꞌ munt qꞌuinoꞌ.
\p
\v 4 Jeroj tuneꞌ, robob, a xiboꞌ, a nuxiboꞌ, a veinticuatrojoꞌ, quet yejer a bʌcꞌ cuxaꞌanoꞌ, a cuatrojoꞌ, caj rʌc xonrʌjob ich ʌcʌtan mac a curucbar tu cutan, a jach caremoꞌ, quir u cꞌujinticob. Robob caj u yaꞌarob:
\p ―Quireꞌ nupꞌ a tꞌʌn an ten bic caj u rʌc arob tech, caꞌ ij caremquintex a cꞌabaꞌ ―baxuc caj yaꞌaraj a veinticuatro xib, a nuxiboꞌ yejer a bʌcꞌ cuxaꞌanoꞌ, a cuatrojoꞌ.
\p
\v 5 Jeroj tuneꞌ, a mac a bʌytʌc tu curucbar mac tu cutan, a jach caremoꞌ, caj u purob u tꞌʌn, tan yaꞌaricob: 
\q Caꞌ ij quiꞌ tꞌʌntex Cꞌuj, a mac quij cꞌujintiquex, cax a techex ich caꞌananoꞌ, quij, cax a techex ich yocꞌocaboꞌ. Quet yejer a mac a cu sʌjticob Cꞌuj, a tan u quibicob u tꞌʌn. Caꞌ a warex: “Bayoꞌ Cꞌuj”, cax u caꞌ tsꞌurir, cax u jach tsꞌurir.
\s U quiꞌquiꞌ janʌnob tu qꞌuinin caꞌ bin uruc Jesús
\p
\v 6 Tu tin wʌyʌcꞌtaj ich caꞌanan, caj in wuꞌy u tꞌʌn mac, rajiꞌ irej wa ju tꞌʌn pim mac cu tꞌʌnob. Chen cꞌam u tꞌʌnob irej u man u jum yoc jaꞌ, a chich u yoc jaꞌoꞌ, chen yaꞌab u man u jum u yoc jaꞌ. Bayiriꞌ xan, rajiꞌ u tꞌʌnob uꞌy u man u jum a cu pecoꞌ. A ray tꞌʌnoꞌ, caj u yaꞌaraj:
\q Caꞌ ij caremquintex u cꞌabaꞌ Cꞌuj, a mac jach chich u mucꞌ. Mʌꞌ ja wirej, rajiꞌ u yʌnxchun ij cocar ic reyintex bajeꞌrer.
\m
\v 7 A ray tꞌʌno caj u yaꞌaraj:
\q Caꞌ ij quiꞌquint ij corex a mac a tiꞌ yʌn ich caꞌananoꞌ, caꞌ ij quiꞌ tꞌʌnex Cꞌuj. Mʌꞌ ja wirej, cꞌuchij tu qꞌuinin caꞌ bin uruc ic Jaj Tsꞌurirex, a mac a rajiꞌ u tʌmʌn yuc Cꞌuj. Rajiꞌ cu tar quir u pʌyic a mac a tu yacsaj tu yor tiꞌ, ir a xiboꞌ a cu tar chꞌ u racꞌoꞌ, quireꞌ tu quiꞌ cʌnant u bʌj quir u tar pʌybir a tiꞌoꞌ.
\v 8 Ir a mac a cu chꞌic u racꞌoꞌ, rajiꞌ cu tsꞌic u nocꞌ u racꞌ.
\m Bayiriꞌ xan, a Jesúsoꞌ jeꞌ u tsꞌabʌr u nocꞌ tiꞌ, a jach manan tsoy tiꞌ, rajiꞌ lino u cꞌabaꞌ. Jach sʌc, mʌnaꞌ u yeqꞌuir a tiꞌoꞌ. Mʌꞌ ja wirej, rajiꞌ caj u tsꞌajaj tiꞌ a mac a tu yacsaj tu yor tiꞌ, quireꞌ raꞌ u nocꞌoꞌ sʌc an ten bic a mac a mʌnaꞌ u siꞌpir a tiꞌoꞌ.
\p
\v 9 A ray u qꞌuininoꞌ caj yaꞌaraj yʌjmasir u tꞌʌn Cꞌuj ten, tan yaꞌaric:
\p ―Tsꞌibtej, Juan, a baꞌ quin bin in wac tech. Arej tiꞌ: Jach quiꞌ yorob a mac a cu binob titaroꞌ, wa ber caꞌ bin uruc Jesús, a mac a rajiꞌ u tʌmʌn yuc Cꞌuj. A ray u qꞌuininoꞌ, bin u caꞌ u pꞌeriꞌquint u bʌjob yejer a raꞌ yʌnin Cꞌujoꞌ. Jach taj a baꞌ quin wac tech Juan, quireꞌ tin mas u tꞌʌn Cꞌuj tech ―baxuc tu yaꞌaraj yʌjmasir u tꞌʌn Cꞌuj.
\p
\v 10 Jeroj, caj xonrʌjen ich u yoc u yʌjmasir u tꞌʌn Cꞌuj quir in cꞌujintic. Chen rajiꞌ caj u yaꞌaraj ten:
\p ―Mʌꞌ a cꞌujintiquen ―quen―. Pꞌeriꞌ quet ic beyajex tiꞌ Cꞌuj, quet yejer a mac a tan u quibicob u tꞌʌn Jesús. Rajiꞌ tu junan caꞌ ij cꞌujintex. Mʌꞌ ja wirej, pꞌeriꞌoꞌonex ic beyajex tiꞌ Jesús, rajen mʌꞌ jic cꞌujintej ic bʌjex. Mʌꞌ ja wirej, rajiꞌ ic beyajex caꞌ manacoꞌonex ic tsecꞌtex Jesús rajen pꞌeriꞌoꞌonex ―baxuc caj yaꞌaraj yʌjmasir u tꞌʌn.
\s A mac a cʌpaꞌan tu pach a sʌc tsiminoꞌ
\p
\v 11 A tenoꞌ, caj in wʌcꞌʌs wʌyʌcꞌtaj ich caꞌanan. U jer, caj in wiraj u jeꞌpʌjʌr a caꞌananoꞌ quir in pʌctic ich caꞌanan. Jeroj tuneꞌ, tin wiraj sʌc tsimin. Yʌn mac cʌpaꞌan tu pach a sʌc tsiminoꞌ, rajiꞌ ic Jaj Tsꞌurirex Jesús. Rajiꞌ cu betic a baꞌ cu yaꞌaric. Rajiꞌ cu bin u reyinticob mac tu cotor. Rajiꞌ cu bin u tsꞌictar yejer a mac a jach cꞌasoꞌ quireꞌ taj u yor Jesús.
\v 12 U wich a mac a cʌpaꞌan tu pach a sʌc tsiminoꞌ. Rajiꞌ u wichob irej u sasirir cꞌacꞌ. Tu joꞌroꞌ, yʌn u pꞌoc, jach yaꞌab yʌn. Raꞌ u pꞌocoꞌ irej u pꞌoc a ju pꞌoquinmʌn a reyoꞌ. Ich yocꞌor u tan yʌn baꞌ tsꞌibaꞌan tiꞌ. Rajiꞌ u cꞌabaꞌ. Chen a mac a cu xaquic tiꞌ, mʌꞌ ju najtej baꞌ u cꞌat yaꞌarej. Chen u wʌcꞌʌs bʌjiriꞌ cu najtic. 
\v 13 A ray winicoꞌ, u buquinmʌn u nocꞌ. A nocꞌoꞌ, rajiꞌ irej u nocꞌ baxtaꞌb ten u qꞌuiqꞌuer. Rajiꞌ yʌn u cꞌabaꞌ a mʌnaꞌ u jer yʌnin. Rajiꞌ u tꞌʌn Cꞌuj.
\v 14 Robob a mac a cu sayʌrob tu pach, a mac a cʌpaꞌan tu pach sʌc tsimin, robob jach manan pim, robob u yʌjmasirob u tꞌʌn Cꞌuj yejer a mac a tu yacsob tu yorob tiꞌ u tꞌʌn Cꞌuj. Robob rʌc cʌpaꞌanob tu pach sʌc tsimin, u rʌc buquinmʌnob sʌc nocꞌ a jach tsoyoꞌ quireꞌ lino. Mʌnaꞌ u yeqꞌuir u nocꞌob.
\v 15 Caj jocꞌ u tꞌʌn tu chiꞌ Jesús ir u mascabir a caꞌ wʌrʌcꞌ u yejoꞌ. Rajiꞌ quir u chꞌesic a mac a cu pꞌacticob a tiꞌoꞌ, quireꞌ tu quibob u tꞌʌn a bʌcoꞌ, a jach caremoꞌ, yejer a mac tsꞌaꞌb u tucur ten quisin quir u tsicbar a baꞌ u cꞌat a quisinoꞌ. A Jesúsoꞌ, tu cu bin u reyinticob mac, mʌnaꞌ mac cu bin cꞌuchur yor tiꞌ. Robob, a mac a cu pꞌacticob a tiꞌoꞌ, bin u caꞌ chꞌesaꞌbirob irej an ten bic u wich uva cu yachꞌʌtʌr soc u jocꞌar u cꞌab, a baywoꞌ bin u caꞌ chꞌesaꞌbirob ten Cꞌuj.
\v 16 Tiꞌ tsꞌibaꞌan u cꞌabaꞌ a mac a cʌpaꞌan tu pach sʌc tsiminoꞌ. Tiꞌ tsꞌibaꞌan u cꞌabaꞌ yocꞌor u nocꞌ, bayiriꞌ xan, tu chacbʌqꞌuer tiꞌ tsꞌibaꞌan u cꞌabaꞌ. Rajiꞌ tsꞌibaꞌan. “Raꞌ u rey a cu reyinticob tu cotor rey. Raꞌ u tsꞌurir a mac a cu tsꞌurinticob tu cotor mac.”
\p
\v 17 Tu tin wʌyʌcꞌtaj ich caꞌanan, caj in pʌctaj caj in wiraj u jer yʌjmasir u tꞌʌn Cꞌuj. Caj in wiraj, chꞌiquicbar ich ic yum. Rajiꞌ cꞌam caj u puraj u tꞌʌn tiꞌ a chꞌichoꞌ, a cu chꞌic u xicꞌ ich caꞌananoꞌ, soc u yubic u tꞌʌnob. Rajen rajiꞌ caj yaꞌaraj:
\p ―Cojenex ―quij―, toc muchꞌquintex a bʌj quir a chiꞌiquex a woꞌoch bʌcꞌ a cu bin tsꞌajic techex ten Cꞌuj.
\v 18 Cojenex ―quij―, caꞌ a chiꞌex a woꞌoch bʌqꞌuex, u bʌqꞌuer a reyoꞌ a tu tsꞌurintajob a bʌcꞌ, a jach carem bʌcꞌoꞌ, yejer a mac a tsꞌaꞌb u tucur ten quisin quir u tus tsicbar an ten bic u cꞌat a quisin uchoꞌ. Cojenex caꞌ a chiꞌex a woꞌoch bʌqꞌuex, u bʌqꞌuer a mac a tu quibajob u tꞌʌn a reyoꞌ, yejer u soldadob, yejer u soldadojob a reyoꞌ a cu cʌptarob tu pach u yʌrʌcꞌ tsiminob, yejer u bʌqꞌuer u tsiminob xan. Cojenex ―quij―, caꞌ a chiꞌex a woꞌoch bʌqꞌuex u bʌqꞌuer mac, cax jach tsꞌurir, cax mʌꞌ jach tsꞌur, cax cꞌʌnaꞌan ten mac, cax mʌꞌ cꞌʌnaꞌan ten mac ―baxuc caj u yaꞌaraj u yʌjmasir u tꞌʌn Cꞌuj, a chꞌiquicbar ich ic yumoꞌ.
\p
\v 19 A tenoꞌ, caj in wiraj a bʌcꞌoꞌ, a jach carem bʌcoꞌ, yejer u reyob a cu reyinticob mac ich yocꞌocab, yejer u soldado, raꞌ quir u quinsicob mac. Robob tan u muchꞌquinticob u bʌj quir u riqꞌuirob u baꞌteꞌt a mac a cʌpaꞌanoꞌ tu pach a sʌc tsimin yejer u winiquirob, a pimoꞌ, a cʌpaꞌanoꞌ tu pach tsiminob xan.
\v 20 Jeroj tuneꞌ, caj chuc a bʌcꞌoꞌ, a jach carem bʌcꞌoꞌ quir u bin purbir ich cꞌacꞌ quir yerar ich azufre. Toc cuxaꞌan caj purij quet yejer a mac a tsꞌaꞌb u tucur ten quisin quir u tus tsicbar a baꞌ u cꞌat a quisinoꞌ, a tu tus araj mac a cʌjaꞌanob yocꞌocab yejer u tus carem beyajob. Rajiꞌ tu betaj u tus carem beyajob ich ʌctan a bʌcꞌoꞌ, a jach carem bʌcꞌoꞌ. Mʌꞌ ja wirej, quireꞌ a ray u tus carem beyajob, rajen tu cꞌʌmajob tu tsꞌibaꞌan u pam a bʌcꞌoꞌ, a jach carem bʌcꞌoꞌ quet yejer caj u sʌjtob u yochir a bʌcꞌoꞌ, a jach carem bʌcꞌoꞌ.
\v 21 Chen a mac caj ricsaꞌb tu baꞌteꞌob a paꞌay ten bʌcꞌ, a jach carem bʌcꞌoꞌ yejer a mac a tsꞌaꞌb u tucur ten quisin quir u tus tsicbar a baꞌ u cꞌat a quisinoꞌ. Robob caj rʌc quinsaꞌb ten a mac a cʌpaꞌan tu pach a sʌc tsiminoꞌ. Caj rʌc quinsaꞌb ten a raꞌ cʌpaꞌan tu pach sʌc tsimin yejer u mascabir a cu jocꞌar tu chiꞌ. Jeroj tuneꞌ, caj tar chiꞌbirob a u bʌqꞌuer ten chꞌichꞌoꞌ, caj rʌc najchʌjob a chꞌichꞌoꞌ.
\c 20
\s A mil yaxqꞌuinoꞌ
\p
\v 1 Tu tin wʌyʌcꞌtaj ich caꞌanan, caj in pʌctaj caj in wiraj yeman u jer yʌjmasir u tꞌʌn Cꞌuj. Rajiꞌ u mʌchmʌn tu cꞌʌb u cꞌʌrʌbar u mac u jor ich ruꞌum, a tu mʌꞌ xuraꞌan u tamin, raꞌ quir u bin purbir a quisinoꞌ quir u cʌjtar yejer u racꞌob, soc u cꞌʌric a mac u jor. Bayiriꞌ xan, rajiꞌ u mʌchmʌn cadena cꞌʌrʌb tuririꞌ quir u cꞌʌric a ayimoꞌ, a jach manan caremoꞌ tiꞌ cu bin cꞌʌrbir tu cu bin cʌjtar.
\v 2 Caj in wiraj yʌjmasir u tꞌʌn Cꞌuj caj u chich chucaj a ayimoꞌ, a jach manan caremoꞌ. Rajiꞌ uch, caj u ways u bʌj uch tiꞌ can quir u tus aric tiꞌ ic nunquirex, rajiꞌ a quisinoꞌ chen raꞌ u jach cꞌabaꞌ Satanás. Rajiꞌ caj cꞌʌrij ten yʌjmasir u tꞌʌn Cꞌuj yejer cꞌʌrʌb cadena. Rajiꞌ mʌꞌ u bin siptaꞌbir ten Cꞌuj tac tuririꞌ mil yaxqꞌuin. 
\v 3 Rajen caj bin purbir a quisinoꞌ tu jor u ruꞌumin tu mʌꞌ xuraꞌan u tamin ten yʌjmasir u tꞌʌn Cꞌuj. Toc puraꞌb tu cu bin cʌjtar tu jor u ruꞌumin tu mʌꞌ xuraꞌan u tamin tiꞌ tuririꞌ mil yaxqꞌuin. Jeroj tuneꞌ, toc cꞌʌraꞌan u mac u jor u ruꞌumin tu mʌꞌ xuraꞌan u tamin soc rajiꞌ mʌꞌ u jocꞌar. Bayiriꞌ xan, toc pʌcꞌaꞌan u mac u jor xan, soc u jer mac mʌꞌ u mucu chaꞌbʌr. Rajiꞌ toc cꞌʌraꞌan soc mʌꞌ u man u tus aric tiꞌ mac a cʌjaꞌanob ich yocꞌocab. Caꞌ bin manac tuririꞌ mil yaxqꞌuin cu yʌn jamach chaꞌbʌr ten Cꞌuj caꞌ jocꞌac, quireꞌ baxuc u cꞌat Cꞌuj u ramach chaꞌbʌr Cꞌuj.
\p
\v 4 Tu caj in wʌyʌcꞌtaj ich caꞌanan, quij, caj in pʌctaj caj in wiraj u cutan mac quir u cutarob quir u taquicob u joꞌr mac. Jun yarob u cutanob caj in wiraj, bayiriꞌ xan, tiꞌ yʌn mac ich a ray cutanob curucbarob. Robob tsꞌaꞌb u mucꞌ ten Cꞌuj quir u taquicob u joꞌr mac a cu tarob ʌcʌtan a tiꞌoboꞌ. Jeroj tuneꞌ, chʌcaꞌan in wiric u pixamob a mac curchꞌactaꞌan u carob ten mac, quireꞌ caj manob uch tan yaꞌaricob, rajiꞌ u jajir u parar Cꞌuj, a Jesúsoꞌ. Mʌꞌ ja wirej, robob caj manob caj u tsecꞌtob u tꞌʌn Cꞌuj uch. Rajen robob xan, mʌꞌ tu cꞌujintob bʌqꞌuiꞌ, a jach carem bʌcꞌoꞌ, mʌꞌ tu cꞌujintob yochir bʌcꞌ xan. Robob mʌꞌ ju chaꞌbʌrob u tsꞌibt tu pamob wa tu cꞌʌboꞌ cu tsꞌibtic a bʌcꞌoꞌ, a jach carem bʌcꞌoꞌ. Robob wʌcꞌʌs ricꞌsaꞌb ten Cꞌuj yejer u winquirirob soc u yamticob Jesús tu cu reyinticob mil yaxqꞌuin.
\v 5 Mʌꞌ ja wirej, a mac quimenob, a tan tin wiricoboꞌ, robob, jun muchꞌob a pʌyber ricꞌsaꞌb ten Cꞌuj a chꞌac u carob. A roboboꞌ a yʌn quimij uchoꞌ, pachir robob jeꞌ u bin ricꞌsaꞌbir wa ber caꞌ bin tsꞌocac mil yaxqꞌuinoꞌ cu bin ricꞌsaꞌbir.
\v 6 A mac a pʌyberoꞌ, cu bin ricꞌsaꞌbir tu quimirir ten Cꞌuj, quiꞌ yorob cu bin yubob, quireꞌ mʌꞌ u bin erar ich cꞌacꞌ munt qꞌuin. Quireꞌ yet manob Cꞌuj uch, rajen, mʌꞌ u bin yubob u cꞌaqꞌuir benaj. Mʌꞌ ja wirej, robob cu bin manob tu beyaj Cꞌuj yejer Cristo an ten bic sacerdote, a cu naj beyajob tiꞌ Cꞌuj ich yocꞌocab uch. Robob pꞌeriꞌob cu bin u reyinticob mil yaxqꞌuin yejer Cꞌuj yejer Cristo xan.
\p
\v 7 Caꞌ bin cꞌuchuc tu qꞌuinin cu xupur mil yaxqꞌuinoꞌ. Rajiꞌ bin u caꞌ u wʌcꞌʌs sipꞌtbir ten Cꞌuj caꞌ jocꞌac a quisinoꞌ tu macaꞌan.
\v 8 Caꞌ bin jocꞌac a quisinoꞌ, quir u tus aric tiꞌ tu cotor mac a tiꞌ yʌnob ich yocꞌocab, cax tu xuraꞌan u ruꞌumin ich u ruꞌumin a Gogoꞌ, cax tu xuraꞌan u ruꞌumin ich u ruꞌumin Magogoꞌ xan. Rajiꞌ cu bin u muchꞌquinticob u bʌj quir u ricꞌsicob u baꞌteꞌ yejer a mac a tu quibob Cꞌuj. A cu tarob quir u quinsicob a raꞌ yʌninob Cꞌuj, jach manan pim caꞌ bin cꞌuchob, mʌꞌ u cꞌuchur yor mac u xaquic quireꞌ pim, robob irob saꞌam a tiꞌ yʌn ich chiꞌcꞌacꞌnaboꞌ.
\v 9 Robob caj rʌc binob u rʌc bʌcristob u cajar Jerusalén, a ju yaj Cꞌujoꞌ, u cajar Jerusalén, tu yʌn a rajiꞌ yʌninob Cꞌuj. Robob caj u rʌc bʌcristob tu muchꞌaꞌanob a rajiꞌ yʌninob Cꞌuj. Jeroj tuneꞌ, teꞌ caꞌananoꞌ caj emij cꞌacꞌ, a tuchiꞌtaꞌb ten Cꞌuj, jeroj tuneꞌ, caj rʌc tocaꞌb, mʌꞌ baꞌ pꞌat, toc rʌc er.
\v 10 A ray quisinoꞌ, a mac a ju manoꞌ u tus aric mac tu cotor, caj bin puruc ten Cꞌuj ich cꞌacꞌ, a cu toquic azufre, rajiꞌ irej petjaꞌ a cu yerar. U tiriꞌ xan, cu purbir ten Cꞌuj a bʌcꞌoꞌ, a jach carem bʌcꞌoꞌ, yejer a mac a tsꞌaꞌb u tucur ten quisin quir u tus tsicbar a baꞌ u cꞌat a quisinoꞌ uch. Robob cu bin mucꞌyajob munt qꞌuin tu cꞌaqꞌuir petjaꞌ tu cu bin mucꞌyajoꞌ. Rajraꞌ cu binob mucꞌyaj.
\s Tu cotor mac ʌcʌtan tiꞌ Cꞌuj
\p
\v 11 Tu tin wʌyʌcꞌtaj ich caꞌanan caj in pʌctaj, caj in wiraj Cꞌuj curucbar ich u sʌc cutan, a jach manan tsoyoꞌ. Tin wiraj a ruꞌumoꞌ rʌc bin. Tin wiraj a caꞌanoꞌ, rʌc bin ten u sasirir Cꞌuj.
\v 12 A ray u qꞌuininoꞌ, caj in wiraj tu cotor mac a quimenob, cax a noꞌjoꞌ, cax a mʌꞌ noꞌjoꞌ uch. Rʌc tarob quir u binob ich ʌcʌtan Cꞌuj tu cu bin tacbir u joꞌrob ten Cꞌuj. Jeroj tuneꞌ, caj jitaꞌb u juꞌunin quir yiric wa mac manob tu tsoyir, wa mac mʌꞌ manob tu tsoyir mac. Jeroj tuneꞌ, caj in wʌcꞌʌs ir u jer u juꞌunin, tu tsꞌibaꞌan a mac a cu bin acsaꞌbir ten Cꞌuj ich caꞌanan quir u cuxtarob munt qꞌuin. Rajiꞌ toc jitaꞌb u juꞌunin xan. 
\v 13 Bayiriꞌ xan, a mac a quimij, a bint jaꞌ tu caj u chꞌʌtob a cꞌacꞌnaboꞌ uch, quij, caj binob ich ʌcʌtan Cꞌuj, cax a mac a mucaꞌb ich yocꞌocab caj binob ich ʌcʌtan Cꞌuj. Mʌꞌ ja wirej, robob rʌc binob quir yiric wa manob tu tsoyir wa mʌꞌ manob tu tsoyir.
\v 14 Jeroj tuneꞌ, Cꞌuj cu bin purbir tu cotor a mac manob tu cꞌasir an ten bic tij quirex sam. Tar cu bin purbir ten Cꞌuj ich cꞌacꞌ quir u mucꞌyajob munt qꞌuin, raꞌ mʌꞌ u xur u mucꞌyajob.
\v 15 Rajen a mac a caj cꞌuchij ich ʌcʌtan Cꞌuj wa mʌꞌ irir ich u juꞌunin tu tsꞌibaꞌan u cꞌabaꞌ mac quir u cuxtar munt qꞌuin, rajiꞌ cu bin purbir ich cꞌacꞌ tu cu yerar ich petjaꞌir cꞌacꞌ quireꞌ mʌꞌ irir tu tsꞌibaꞌan u cꞌabaꞌ quir u cuxtar munt qꞌuin.
\c 21
\s Ricꞌben caꞌanan yejer ricꞌben ruꞌum
\p
\v 1 Caj tsꞌoc in wʌyʌcꞌtic tu cu bin u toꞌcar u joꞌr mac ten Cꞌuj. Jeroj tuneꞌ, caj in pʌctaj caj in wiraj waysaꞌb a caꞌananoꞌ. Caj in wiraj waysaꞌb a ich yocꞌocaboꞌ soc irir ten mac jach ricꞌben. Robob, a uchbenob mʌnaꞌ, quij, caj rʌc tsꞌoquij, mʌnaꞌ, quireꞌ waysaꞌb ten Cꞌuj soc yʌn u jer ricꞌben ruꞌum. Caj waysaꞌb yejer u jer ricꞌben caꞌananoꞌ, chen a cꞌacꞌnaboꞌ mʌnaꞌ, rʌc tsꞌoquij. 
\v 2 A tenoꞌ, Juanen, caj in wiraj u cajar Cꞌuj, a Jerusalénoꞌ, irej wa tan yeman teꞌ ich caꞌananoꞌ, tu cu bin u cʌjtarob a mac a taj u yorob. A ray cajaroꞌ, caj in wiraj jach manan tsoy an ten bic a xquicoꞌ a cu buquintic u nocꞌ a jach manan tsoyoꞌ, quireꞌ tar chꞌabir ten u mam. Baxuc, caj in wiraj u cajar Cꞌuj.
\v 3 A tenoꞌ, caj in wuꞌyaj u tꞌʌn mac, jach cꞌam caj u puraj u tꞌʌn irej wa jach tꞌʌn Cꞌuj tin wuꞌyaj. Rajiꞌ caj u yaꞌaraj:
\p ―Cꞌuchij tu qꞌuinin cu bin u cʌjtar Cꞌuj yejer a mac a yerob Cꞌuj. U bʌjiriꞌ Cꞌuj cu bin u cʌjtar ich a yerob Cꞌuj. Mʌꞌ u bin pꞌʌtbir, a baywoꞌ rajiꞌ jeꞌ u yerob Cꞌuj soc ij quet man Cꞌuj.
\v 4 A ray u qꞌuininoꞌ, Cꞌuj cu bin churic u wich a mac ocꞌnʌj. Mʌnaꞌ mac cu bin quimin, mʌnaꞌ mac cu yocꞌar, mʌnaꞌ mac cu bin yacꞌtic u bʌj, mʌnaꞌ mac cu bin yajtar. Quireꞌ tu cotor baꞌ a tiꞌ yʌn uch ich yocꞌocabaꞌ tsꞌoquij, quireꞌ man ―baxuc caj u yaꞌaraj a mac a cu tꞌʌn uch. 
\p
\v 5 Jeroj tuneꞌ, caj in wuꞌyaj u tꞌʌn Cꞌuj, a curucbar tu cutanoꞌ, a jach caremoꞌ. Rajiꞌ caj u yaꞌaraj:
\p ―Jeroj ―quij―, a tenoꞌ ―quij―, tin betic tu cotor baꞌ jach ricꞌben. Rajen tsꞌibtej a baꞌ quin wac tech Juan, quireꞌ taj quin wac tech, rajen jach tsoy caj a wacsej ta wor tiꞌ in tꞌʌn.
\p
\v 6 Pachir, quij Juan, a Cꞌujoꞌ caj u wʌcꞌʌs araj ten:
\p ―Jeroj, toc rʌc tsꞌoc in beyaj tu cotor. A tenoꞌ, pʌyber cuxaꞌanen, bayiriꞌ xan, a tenoꞌ, mʌꞌ biqꞌuin quin quimin. Rajen a mac a ju cꞌat caꞌ in taquej soc u cuxtar munt qꞌuin, jeꞌ in tsꞌic tiꞌ, quireꞌ mʌnaꞌ u boꞌorir quir in tsꞌic tiꞌ.
\p
\v 7 Caj yaꞌaraj ten:
\p ―Arej tiꞌob, a mac a cꞌuchaꞌan yor tiꞌ a baꞌ cu tumtic yor soc u manob tu tsoyir rajiꞌob cu bin acsaꞌbir ten Cꞌuj, quireꞌ raꞌ u pararob, soc u cuxtarob munt qꞌuin. Rajiꞌob cu bin yamtaꞌbir ten Cꞌuj xan, quireꞌ raꞌ u Cꞌuj. 
\v 8 Chen a mac a tu chꞌaj sajquir tiꞌ u racꞌob, rajen mʌꞌ tu yacsajob tu yorob, quet yejer a mac jach taj mʌꞌ tu yacsajob tu yorob mʌꞌ u bin acsaꞌbir ich caꞌanan chen tiꞌ cu binob ich cꞌacꞌ, a cu toquic azufre, mʌꞌ u xur u mucꞌyaj. Rajiꞌ u petjaꞌir cꞌacꞌ. Tiriꞌ cu bin xan, a mac a pꞌactaꞌb ten u racꞌob quir u siꞌpirob, quet yejer a mac a cu cꞌujinticob u tus cꞌuj, quet yejer tu cotor mac a cu tus, quet yejer a mac a rajraꞌ cu manob, cax yejer xquic, cax yejer xib, quet yejer a mac a cu quinsicob mac, quet yejer mac a cunicob u racꞌob ―baxuc tu yaꞌaraj Cꞌuj ten, quij.
\s U cajar Jerusalén a ricꞌbenoꞌ
\p
\v 9 Jeroj tuneꞌ, caj cꞌuchij tu yʌnen tuririꞌ yʌjmasirob u tꞌʌn Cꞌuj. Rajiꞌ tuririꞌ ich a sietejoꞌ u yʌjmasirob u tꞌʌn Cꞌuj a tu jochꞌquintob u chan ruchob quir u yajtar mac ich yocꞌocab. Rajiꞌ tu tꞌʌnen quireꞌ a baꞌ tabar yesic ten. Rajiꞌ caj u yaꞌaraj:
\p ―Cojen teraꞌ Juan ―quij―. Quin bin in wesic tech an ten bic tu cotor a yacsmʌnob tu yorob. Robob cu bin cꞌʌmbirob ten u tʌmʌn yuc Cꞌuj irob a xquicoꞌ cu bin chꞌaꞌbir ten u mam ―baxuc caj u yaꞌaraj tenoꞌ u yʌjmasir u tꞌʌn Cꞌuj.
\p
\v 10 Caj in wʌyʌcꞌtaj ich caꞌanan, rajiꞌ caj u pʌyen ich u joꞌr wits. Jach carem a witsoꞌ, bayiriꞌ xan, jach caꞌanan. Soc chʌcaꞌan in wiric u cajar Jerusalén, u cajar Cꞌuj tu cu bin u cʌjtar mac a taj yoroꞌ. Raꞌ eman u caꞌ tiꞌ caꞌanan.
\v 11 A ray cajaroꞌ, eman u caꞌ, caj rembanʌjij yejer u sasirir Cꞌuj an ten bic u sasirir tunich, a jach manan coꞌojoꞌ. Rajiꞌ u tunichoꞌ, u cꞌabaꞌ jasper, quireꞌ sascꞌʌren ir a nenoꞌ sascꞌʌren.
\v 12 A ray cajaroꞌ, yʌn u paꞌteꞌ pʌcꞌaꞌan yejer tunich, jach pim xan u paꞌteꞌir pʌcꞌaꞌan yejer tunich, bayiriꞌ jach caꞌanan u paꞌteꞌir. Raꞌ tu bʌcrist u cajaroꞌ. Yʌn doce u jor ich paꞌteꞌ quir u man mac. Tu yʌn jujuntur u jor ich paꞌteꞌ, yʌn tuririꞌ yʌjmasirob u tꞌʌn Cꞌuj tan u cʌnanticob a tiꞌoboꞌ. Tar ich u jor paꞌteꞌ, tiꞌ toc tsꞌibaꞌan ich yocꞌor u jor paꞌteꞌ u cꞌabaꞌ a doce yoꞌnen u winiquirob israel.
\v 13 Caj in wiraj u cajar Jerusalén, a ricꞌbenoꞌ, caj in wiraj u jor ich u paꞌteꞌ, tres u jor tu cu tar ic yum. Bayiriꞌ xan, tin wiraj u jor ich paꞌteꞌ, tres u jor tu cu bin ic yum. Tin wiraj u jor ich paꞌteꞌ, tres u jor tu xʌman caꞌan, bayiriꞌ xan, tin wiraj u jor ich paꞌteꞌ, tres u jor ich nojar.
\v 14 Caj in wiraj xan ich yaran u paꞌteꞌir tunich, u tunichir quir u chichquinticob u yoc u paꞌteꞌir, quireꞌ jach ar u paꞌteꞌir. Tiꞌ tsꞌʌpaꞌan doce u tunichir quir u chichquinticob u yoc u paꞌteꞌir. Tiꞌ tsꞌibaꞌan ich yocꞌor u jujuntur a doce tunichir u cꞌabaꞌ mac tuchiꞌtaꞌb ten u tʌmʌn yac Cꞌuj quir u tsecꞌticob u tꞌʌn uch.
\p
\v 15 A mac a caj tsibanʌjij yejeren, rajiꞌ u mʌchmʌn u pꞌis quir u chꞌic u pꞌis u cajar Jerusalén. U pꞌis a ju mʌchmʌnoꞌ a betaꞌb u mascabir oro. Mʌꞌ chen cu bin u chꞌic pꞌis u cajar, cu bin u chꞌic u pꞌis u jor a tiꞌ yʌnob ich u paꞌteꞌir. Bayiriꞌ xan, cu bin u chꞌic u pꞌis u tunichiroꞌ, a cu chichquinticob u yoc u paꞌteꞌir. 
\v 16 Ber caj betaꞌb u cajar Jerusalén, yʌn cuatro u tser, quij, rajiꞌ u cochir u cajar quet yejer u tan u cajar, bayiriꞌ xan, quet u caꞌanirir. Rajiꞌ tu toc chꞌaj u pꞌis u cajar yejer u pꞌis a ju mʌmʌn caꞌch, jeroj, caj jocꞌ dos mil doscientos kilómetros. Tʌcʌj rʌc quet u cochir u cajar yejer u tan u cajar yejer u caꞌanrir u cajar.
\v 17 Bayiriꞌ xan, yʌjmasir u tꞌʌn Cꞌuj, caj u chꞌ u pꞌis u paꞌteꞌ a caj u bʌcrist u cajar Jerusalén. Rajiꞌ caj u yiraj u pꞌis sesenta y cuatro metros. A ray u pꞌisoꞌ irej an ten bic tsꞌur cu chꞌic u pꞌis, cax wa yʌjmasir u tꞌʌn Cꞌuj, toc quet u pꞌis.
\p
\v 18 Wa ber caj u tsꞌʌpquintob u tunichir quir u pʌqꞌuicob u paꞌteꞌ, raꞌ u tunichir jaspe, a jach coꞌojoꞌ, caj u cꞌʌnob. Caj u betob u yatochob ich u cajar Jerusalén, caj u cꞌʌnob u mascabir oro jach sʌc jamen, irej u nen sasir.
\v 19 Wa ber caj u tsꞌʌpquintob u tunichir quir u chichquinticob u yoc u paꞌteꞌ, jach coꞌoj u tunichir caj u cꞌʌnob xan. Caj u pʌcꞌajob quireꞌ jach tsoy yiric mac. Yaꞌab u tunichir caj u cꞌʌnob, tʌcʌj coꞌoj. Tu yʌn tsꞌʌpquintob u tunichir, jaspe u cꞌabaꞌ. Ich yocꞌor jaspe tu caꞌ tsꞌʌpquintob u tunichir zafiro. U jer tu caꞌ tsꞌʌpquintob u tunichir, u cꞌabaꞌ ágata. U jer tu caꞌ tsꞌʌpquintob, tu tsꞌʌpquintob u tunichir, esmeralda u cꞌabaꞌ.
\v 20 U jer tu caꞌ tsꞌʌpquintob, caj u tsꞌʌpquintob u tunichir, ónice u cꞌabaꞌ. U jer tu caꞌ tsꞌʌpquintob caj u tsꞌʌpquintob u tunichir, cornalina u cꞌabaꞌ. U jer tu caꞌ tsꞌʌpquintob caj u tsꞌʌpquintob u tunichir, crisólito u cꞌabaꞌ. U jer tu caꞌ tsꞌʌpquintob caj u tsꞌʌpquintob u tunichir, berilo u cꞌabaꞌ. U jer tu caꞌ tsꞌʌpquintob caj u tsꞌʌpquintob u tunichir, topacio u cꞌabaꞌ. U jer tu caꞌ tsꞌʌpquintob caj u tsꞌʌpquintob u tunichir, crisoprasa u cꞌabaꞌ. Jeroj tuneꞌ, u jer tu caꞌ tsꞌʌpquintob caj u tsꞌʌpquintob u tunichir, jacinto u cꞌabaꞌ. U jer tu caꞌ tsꞌʌpquintob caj u tsꞌʌpquintob u tunichir, amatista u cꞌabaꞌ.
\v 21 Caj u sinob u mac u jor ich paꞌteꞌ, raꞌ toc betaꞌb tiꞌ sʌc uj, u cꞌabaꞌ perla. Yʌn doce u mac u jor toc betaꞌb tiꞌ sʌc uj, a perlajoꞌ. Raꞌ u mac u jor ich u paꞌteꞌ toc betaꞌb tiꞌ tuririꞌ sʌc uj. U berir tu cu manob mac ich u cajar Jerusalén u mascab toc betaꞌ oro an ten bic u sasir nen.
\p
\v 22 A tenoꞌ, mʌꞌ jin wiraj tu cu naj cꞌujinticob Cꞌuj, quireꞌ mʌnaꞌ, quij, ich u cajar Jerusalén. Mʌꞌ baꞌwir tiꞌ, quireꞌ toc tiꞌ yʌn Cꞌuj, a mac jach manan chich u mucꞌ, bayiriꞌ xan tiꞌ yʌn Jesús u tʌmʌn yuc Cꞌuj.
\v 23 A ray u cajaroꞌ, mʌꞌ baꞌwir a ic yumoꞌ, quij, mʌꞌ baꞌwir ic nʌꞌ xan, quir u sasichʌjʌrob u cajaroꞌ. Mʌꞌ ja wirej, yʌn u toc sasirir Cꞌuj tiꞌ, yejer Jesús u tʌmʌn yuc Cꞌuj.
\v 24 Tu cotor u cajarob ich yocꞌocab a tu yacsob tu yorob cu bin u quiꞌtar u yorob quireꞌ u sasirir tu cajar Jerusalén. Mʌꞌ ja wirej, jeꞌ u cꞌuchur u sasirir tu cʌjaꞌanob ich yocꞌocab. Robob a mac a cu reyinticob ich yocꞌocab jeꞌ u binob purbir ich Cꞌuj a baꞌ noꞌj, cu binob purbir quir u ricꞌsicob tiꞌ Cꞌuj soc u sʌjticob Cꞌuj.
\v 25 U mac u jor u paꞌteꞌ mʌꞌ ju macʌr, rajraꞌ qꞌueꞌaꞌan, rajraꞌ cu yocar mac soc rajraꞌ cu jocꞌar mac xan. Mʌꞌ ju bin u mʌquicob u jor ich u paꞌteꞌ. Mʌꞌ biqꞌuin cu yacꞌbirchʌjʌr xan.
\v 26 Robob a cu bin cꞌuchur tu cajar Jerusalén cu binob tar purbir a baꞌ noꞌj tiꞌ mac quir u ricꞌsicob tiꞌ Cꞌuj soc u sʌjticob Cꞌuj.
\v 27 A baꞌ jach cꞌasoꞌ, quij, mʌꞌ ju bin acsaꞌbir tu cajar Jerusalén, mix a cu man tu cꞌasir, mix a mac a pꞌactaꞌb ten u racꞌob, quireꞌ u siꞌpir, mix a cu manob tus. Chen a mac cu bin ocar, a mac a tu yiraj Cꞌuj toc tsꞌibaꞌan u cꞌabaꞌ tu juꞌunin quir u cuxtar munt qꞌuin, a raꞌ yʌnin u tʌmʌn yuc Cꞌuj.

\c 22
\p
\v 1 Tu cajar Jerusalén tu cu bin u cʌjtar mac a cu tocar ten Cꞌuj. Rajiꞌ u yʌjmasir u tꞌʌn Cꞌuj caj u yesaj ten yicꞌ jaꞌ a cu tsꞌic quir u cuxtar mac. A yoc yicꞌ jaꞌoꞌ, tiꞌ cu man yoc yicꞌ jaꞌ ich yaran u cutanoꞌ, a jach caremoꞌ, bayiriꞌ xan, u yoc yicꞌ jaꞌ tu cu man tiꞌ u cutanoꞌ, a yʌnin u tʌmʌn yuc Cꞌuj. Chich yoc yaꞌarir, jach sʌc u wich an ten bic u sasir nen.
\v 2 A yoc yaꞌariroꞌ, cu man chumuc u berir u cajar Jerusalén. Tu chiꞌ yaꞌarir tiꞌ yʌn u cheꞌer a cu yaꞌaric u cheꞌer quir u cuxtar mac. Caꞌ wʌrʌcꞌ jumbuj u chiꞌ yaꞌarir tiꞌ yʌn a ray u cheꞌeroꞌ. Rajraꞌ cu wichʌncʌr, quireꞌ caꞌ bin tac u jer ic nʌꞌ yʌn u jer u wich. U burur yaxꞌquin yʌn u wich. U wich, a ray cheꞌeroꞌ, mʌꞌ u chen tsꞌabʌr u cuxtar mac, bayiriꞌ xan, u reꞌ, a ray cheꞌeroꞌ, cu jantic caꞌ jawʌc a baꞌ yajir yʌn tu cotor a cajaroꞌ, cu jantiqueꞌ cu jawʌr u yajir.
\v 3 Mʌꞌ ja wirej, quireꞌ a ray u qꞌuininoꞌ, mʌꞌ yacsaꞌ a cꞌasoꞌ, mix xan, a mac cꞌasoꞌ mʌꞌ u yacsaꞌ, mʌnaꞌ baꞌ a cu bin tacꞌbir u joꞌr ten Cꞌuj. A Cꞌujoꞌ, jeꞌ u reyinticob mac quet yejer Jesús u tʌmʌn yuc Cꞌuj. A ray u qꞌuininoꞌ, a ray yʌninob Cꞌuj jeꞌ u cꞌujinticob Cꞌuj. 
\v 4 A ray u qꞌuininoꞌ, jeroj tuneꞌ, robob a mac yʌninob Cꞌuj, rajraꞌ jeꞌ u binob ich ʌcʌtan tiꞌ Cꞌuj, quireꞌ rajiꞌ yʌninob Cꞌuj. Jeꞌ u tsꞌibtaj u cꞌabaꞌ tu pam a tiꞌoboꞌ.
\v 5 A ray u qꞌuininoꞌ, mʌꞌ ju bin acꞌbirchʌjʌr, mʌꞌ baꞌwir quib xan, mʌꞌ u sasirir ic yumoꞌ xan, quireꞌ u sasirir Cꞌuj cu bin u sasiquintic tiꞌ. Robob u pararob Cꞌuj jeꞌ u reyinticob mac irob quet reyob yejer Cꞌuj munt qꞌuin. 
\s Tabar u yuꞌur Jesucristo
\p
\v 6 Pachir caj u yaꞌaraj ten yʌjmasir u tꞌʌn Cꞌuj ten, tan yaꞌaric:
\p ―A baꞌ ta wʌyʌcꞌtaj ich caꞌanan Juan ―quij―, rajiꞌ taj, mʌꞌ u tusbarech Cꞌuj, jach taj. A baꞌ esaꞌb tech ich caꞌanan raꞌ quir a wer tabar u cꞌuchur aroꞌ, bayiriꞌ jach taj xan. Mʌꞌ ja wirej, raꞌiriꞌ Cꞌuj a tu tuchiꞌtaj a mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj uch. Rajiꞌ xan, caj u tsꞌajaj a tucur tech quir a tsꞌibtic a baꞌ u cꞌat Cꞌuj soc yerob u pararob Cꞌuj a baꞌ cu yʌnxchun, bayiriꞌ xan, a baꞌ a tabar u yʌnxchun ich yocꞌocab.
\p
\v 7 An ten bic caj yaꞌaraj ten ic Jaj Tsꞌurirex, a tenoꞌ, Juan, quin wʌcꞌʌs aric tech: “Tabaren in wuꞌur”, quij Jesús. Jach quiꞌ yor a mac a cu bin yubej tu yor, a cu quibic in tꞌʌn, u tꞌʌn a tin wesaj tech ich a jeꞌ u juꞌuninaꞌ. 
\p
\v 8 A tenoꞌ Juan, quij, caj in wiraj tin wich a baꞌ tin wʌyʌcꞌtaj ich a jeꞌ u juꞌuninaꞌ. Bayiriꞌ xan, a baꞌ tin wuꞌyaj ich a jeꞌ tꞌʌnaꞌ, a quin tsꞌibtic techex ich a jeꞌ u juꞌuninaꞌ. Quireꞌ a baꞌ tin wʌyʌcꞌtaj yejer a baꞌ tin wuꞌyaj, jeroj tuneꞌ, caj xonrajen ʌcʌtan yʌjmasir u tꞌʌn Cꞌuj quir in cꞌujintic yʌjmasir u tꞌʌn Cꞌuj. Caj in betaj a baxucoꞌ, quireꞌ a baꞌ caj u yesaj ten caj in cꞌujintaj.
\v 9 Caj yaꞌaraj ten yʌjmasir u tꞌʌn Cꞌuj:
\p ―Mʌꞌ a cꞌujintiquen, quen, pꞌeriꞌ ic beyaj yejer Cꞌuj. Mʌꞌ ja wirej, pꞌeriꞌoꞌon yejer a mac tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj uch. An ten bic Cꞌuj caj u cꞌanob a tiꞌoboꞌ caj u tsecꞌtob u tꞌʌn, bayiriꞌ xan, a tenoꞌ, a Cꞌujoꞌ caj u cꞌʌnajen xan. A tenoꞌ, iren an ten bic tu cotor mac, yʌn in toc quibic u tꞌʌn Cꞌuj xan, rajen Juan, caꞌ a cꞌujintej Cꞌuj ―baxuc caj yaꞌaraj ten.
\p
\v 10 Caj yaꞌaraj ten yʌjmasir u tꞌʌn Cꞌuj:
\p ―Arej tiꞌ a baꞌ tiꞌ yʌn ich a jeꞌ u juꞌuninaꞌ soc yerob mac a baꞌ tiꞌ tsꞌibaꞌan, quireꞌ tsꞌaꞌb u tucur ten Cꞌuj tiꞌ tech caꞌ a tsꞌibtej ich a jeꞌ juꞌuninaꞌ a baꞌ u cꞌat Cꞌuj. Quireꞌ tabar u yʌnxchun a baꞌ tsectaꞌb ich a jeꞌ juꞌuninaꞌ.
\v 11 Uꞌyex baꞌ quin waꞌaric techex. Wa ber caꞌ bin tsꞌocac a baꞌ tin wʌyʌcꞌtaj ich caꞌanan yejer a baꞌ tin wuꞌyaj, jeroj tuneꞌ, mʌꞌ tub u cꞌaxicob yorob, a mac a cꞌasoꞌ, quireꞌ rajiꞌob mʌꞌ u cꞌat u pꞌʌtob u cꞌasirob, rajiꞌob u beriꞌ caꞌ bin xicob ich cꞌacꞌ. A mac a cu manob tu cꞌasirob u beriꞌ caꞌ bin xicob ich cꞌacꞌ xan. Bayiriꞌ xan, a mac a cu manob tu tsoyirob u beriꞌ caꞌ bin xicob ich Cꞌuj. A mac a cu yet man Cꞌuj u beriꞌ caꞌ bin xicob ich Cꞌuj.
\p
\v 12 Cꞌaj techex a baꞌ araꞌb ten ic Jaj Tsꞌurirex uch:
\p ―Quiꞌ cʌnant a bʌjex quireꞌ tabar in wuꞌur. A tenoꞌ ―quij―, quin bin in boꞌotej a mac a beyajnʌjij tiꞌ ten an ten bic caj betnʌj tiꞌ Cꞌuj.
\v 13 A tenoꞌ ―quij― Jaj Tsꞌur, a pʌyber cuxaꞌanen. Bayiriꞌ xan, a tenoꞌ mʌꞌ biqꞌuin quin quimin ―quij―. A tenoꞌ, u beriꞌ tiꞌ yʌnen, bayiriꞌ xan, munt qꞌuin u beriꞌ tiꞌ yʌnen. A tenoꞌ ―quij Jaj Tsꞌur―, tin yʌnxchun tu cotor baꞌ, bayiriꞌ xan, a tenoꞌ a quin tsꞌocsic tu cotor baꞌ.
\p
\v 14 Jach quiꞌ yor a mac a pꞌob u pixamob ten Cꞌuj, quireꞌ rajiꞌ cu bin chaꞌbʌr ten Cꞌuj caꞌ u jant u wich cheꞌ ich u cheꞌer cuxtar soc u cuxtar munt qꞌuin, rajiꞌ xan, cu bin chaꞌbʌr u yocar tu jor u paꞌteꞌ, a tiꞌ yʌn ich a ray tu cajaroꞌ.
\v 15 Chen a mac a jach cꞌasoꞌ, yejer a mac a cu cunic u racꞌob, yejer a mac a rajraꞌ cu manob yejer mac, yejer a mac a cu quinsic u racꞌob, yejer a mac a cu cꞌujintic u tus cꞌujoꞌ, yejer a mac a quiꞌ yor u tusic mac, robob mʌꞌ u chaꞌbʌr ten Cꞌuj yocar a ray tu cajaroꞌ. 
\p
\v 16 Caj yaꞌaraj ten Jesús, quij:
\p ―A tenoꞌ ―quij Jesús―, caj in tuchiꞌtaj yʌjmasir u tꞌʌn Cꞌuj tiꞌ tech Juan, soc rajiꞌ cu masic tech, a jeꞌ tꞌʌnaꞌ, soc yerob mac tu cu muchꞌquinticob u bʌj quir u cꞌujinticob Cꞌuj ich u ruꞌumin Asia, a siete najoꞌ, tu cu muchꞌquinticob u bʌjob. Arej tiꞌob ―quij Jesús―, a tenoꞌ, u pararen David quireꞌ rajiꞌ in nunquir a tu reyintajob u winiquirob israel uch, an ten bic caj toc araj Cꞌuj uch tu tsꞌibaꞌan u tꞌʌn Cꞌuj, tu cu tsicbar tiꞌ Cristo. Mʌꞌ ja wirej, a tenoꞌ, iren yʌjyacsiryʌjiren qꞌuin, a coch u wichoꞌ, quireꞌ quin yercꞌacꞌtic a ruꞌumoꞌ tu yacꞌbirir.
\p
\v 17 Mʌꞌ ja wirej, rajiꞌ u Tajꞌor u Pixam Cꞌuj quet yejer tu cotor a yacsmʌnob tu yorob tan u tꞌʌnicob Cristo tan yaꞌaricob tiꞌ:
\p ―Cojen.
\p Bayiriꞌ xan, tu cotor mac a tan u yubicob a jeroj, bayiriꞌ xan, caꞌ yaꞌarej:
\p ―Cojen.
\p Rajen a mac a ju cꞌat tacbir soc u cuxtar munt qꞌuin, arej u tar, jeꞌ u tsꞌabʌr u cuxtar munt qꞌuin quireꞌ mʌnaꞌ u boꞌorir u cꞌat.
\p
\v 18 A tenoꞌ, Juanen, a baꞌ tin wʌyʌcꞌtaj yejer a baꞌ tin wuꞌyaj ich a jeꞌ juꞌuninaꞌ, rajiꞌ taj. Rajen tu cotor mac a tu cꞌʌꞌotaj a baꞌ tsecꞌtaꞌb ich a jeꞌ juꞌuninaꞌ, cax tu caj u yubaj, tub u xacmʌniꞌ, cax u yubaj u jumintaꞌ tiꞌ. Arej mʌꞌ u cꞌʌs tꞌajac baꞌ tiꞌ. Rajiꞌ jeꞌ u yubic u tsꞌiquir Cꞌuj an ten bic caj yubob a tsꞌibtaꞌb tiꞌ ich a jeꞌ juꞌuninaꞌ wa cu tꞌajar tiꞌ baꞌ jeꞌ yubic u tsꞌiquij Cꞌuj.
\v 19 Baxuc xan, wa mac cu rucꞌsic chichin baꞌ tiꞌ a baꞌ tsecꞌtaꞌb ich a jeꞌ juꞌuninaꞌ, a Cꞌujoꞌ mʌꞌ ju chaꞌbʌr u yocar ich u cajar Jerusalén tu tsꞌibaꞌan u cꞌabaꞌ mac quir u cuxtar munt qꞌuin. Rajiꞌ jeꞌ u yubic u tsꞌiquir Cꞌuj, an ten bic caj yubob a tsꞌibtaꞌb tiꞌ ich a jeꞌ juꞌuninaꞌ wa cu rucꞌsic chichin a baꞌ tsecꞌtaꞌb ich a jeꞌ juꞌuninaꞌ.
\p
\v 20 U bʌjiriꞌ ic Jaj Tsꞌurirex caj yaꞌaraj:
\p ―Jach taj, quin toc aric, seb quin wuꞌur.
\p Caj in nuncaj tiꞌ:
\p ―Cojen in Jaj Tsꞌurir, an ten bic ta wesaj ten ich a jeꞌ juꞌuninaꞌ. Cojen in Jaj Tsꞌurir quireꞌ baxuc in cꞌat. 
\p
\v 21 A tenoꞌ, in cꞌat caꞌ u yamtechex ic Jaj Tsꞌurirex quireꞌ otsir yiriquechex. Jeroj tsꞌoquij, quij Juan.