\id ROM
\h Romanos
\toc1 Romanos
\mt Xa̱jo̱n ra tsikínda jè Pablo ra isìkasén‑la̱ xi̱ta̱ na̱xi̱ndá‑la̱ Cristo ra títsa̱jna ya̱ Roma
\c 1
\s Kóꞌsín nga síhixoꞌta Pablo xi̱ta̱ Roma ra makjiín‑la̱ ꞌén‑la̱ Nainá
\p
\v 1 ꞌA̱án tíbindá‑no jè xa̱jo̱n ra̱kìi̱, ꞌa̱n Pablo ra chi̱ꞌnda‑la̱ Jesucristo ma, ra xá ko̱ꞌsín inakjoá‑na nga ꞌa̱n tsikíxáya‑na jè Nainá, ti̱ꞌkoa̱á xá jahájin‑na mé‑ni nga ꞌa̱n sikáꞌbísòo̱n jè ꞌén xi̱tse̱ ra nda tsò ra a̱ꞌta ꞌtse̱ Nainá.
\p
\v 2 A̱ꞌta ꞌtse̱ ꞌén kìi̱, Nainá ijyeé ko̱ꞌsín kitsjà tsaꞌba nga ti̱ꞌsa̱ kjotseé, koni ꞌsín tíchja̱ Xa̱jo̱n‑la̱ Nainá ra tsikínda xi̱ta̱ ra kiìchja̱ ngajo‑la̱.
\v 3 Nga tíchja̱ ra a̱ꞌta ꞌtse̱ Iꞌndí‑la̱, jè Na̱ꞌín‑ná Jesucristo ra batéxoma‑ná. Ya̱á inchrabàꞌta‑ni tje̱‑la̱ ꞌtse̱ xi̱ta̱ ra tsiꞌkìn David nga xi̱ta̱ i̱sàꞌnde kjomà.
\v 4 ꞌKia̱ nga jaáya‑ila̱ ya̱ a̱jin‑la̱ miꞌken, jè Jesucristo, ꞌkoa̱á ꞌsín nda kijcha‑la̱ nga jè‑ní ra Iꞌndí‑la̱ Nainá ꞌmì ra ꞌñó tjín‑la̱ ngaꞌñó nga ngi Inìma̱ Tsje‑la̱ Nainá tíjnajin‑la̱ ra jè.
\v 5 Nga̱ a̱ꞌta ꞌtse̱ Cristo‑ní nga itjábé‑na kjo̱nda nga ꞌa̱n tsatéxáya‑na nga ꞌkenájmíya‑la̱ ra a̱ꞌta ꞌtse̱ Cristo jñà xi̱ta̱ na̱xi̱ndá ra tjín nga tjíjtsa i̱sàꞌnde, mé‑ni nga katasíhitjasòn nga katakjiín‑la̱ ra a̱ꞌta ꞌtse̱ Cristo, mé‑ni nga jeya katasíkíjna‑ni ra jè.
\v 6 Ti̱ꞌkoa̱á ra jiòn‑jiòn, xá ꞌkoa̱á ꞌsín inakjoá‑no nga xi̱ta̱‑la̱ Jesucristo ꞌkín‑no,
\v 7 ngaꞌtsì‑no ra titsa̱jna ya̱ na̱xi̱ndá Roma, ra ꞌñó tsjake‑no Nainá ra xá ko̱ꞌsín inakjoá‑no nga xi̱ta̱ tsje‑la̱ ko̱ma jiòn.
\p Nainá ra Na̱ꞌìn ꞌmí‑lá ko̱ Jesucristo ra batéxoma‑ná katatsjá‑no kjo̱nda ko̱ kjo̱ꞌnchán ya̱ a̱jin inìma̱‑no.
\s Kóꞌsín jè Pablo mejèn‑la̱ nga ki̱ji̱ ya̱ Roma
\p
\v 8 Ra maꞌtsia̱‑nì, ra a̱ꞌta ꞌtse̱ Jesucristo ꞌñó chjàꞌtà‑la̱ Nainá ra a̱ꞌta tsa̱jiòn nga Nainá ra katíchjí‑la̱, nga̱ ꞌñó nda naꞌyá‑la̱ nga tíjngo na̱xi̱ndá ra tjín, kóꞌsín nga nda makjiín‑no ra a̱ꞌta ꞌtse̱ Cristo.
\v 9 Ni̱chjin nchijón‑ní nga síkítsjen‑najiòn ꞌkia̱ nga bitsáꞌba. Ndaá tíbe jè Nainá ra ngi tjíjngoó takoàn nga tísíxáꞌta‑la̱ nga tísikáꞌbísòo̱n jè ꞌén xi̱tse̱ ra nda tsò ra a̱ꞌta ꞌtse̱ Jesucristo, jè ra Iꞌndí‑la̱ ma.
\v 10 ꞌKoa̱á ꞌsín bitsáꞌba‑la̱ Nainá, tsa jè ra ko̱ꞌsín mejèn‑la̱, tsa chan katijchó jngo ni̱chjin nga katatjòꞌnde‑na nga íjkon‑najiòn.
\v 11 Nga̱ mejèn‑na nga ske‑najiòn, mé‑ni nga tsja‑no kjo̱bítsjen kóꞌsín nga ma tjábé‑no kjo̱nda ra ꞌtse̱ Inìma̱ Tsje‑la̱ Nainá, mé‑ni nga isa̱ kixi̱ kitsa̱jna‑no ra a̱ꞌta ꞌtse̱ Nainá.
\v 12 Koni ꞌsín kjòn tíxin‑no, jè‑ní nga ꞌki̱ ngaꞌñó koñá‑lá xàngie̱é a̱ꞌta ꞌtse̱ kjoa̱ ra ngásòn makjiín‑ná.
\p
\v 13 Mejèn‑na nga nda katasijin‑najiòn ra ꞌndsé chibé, nga ꞌñó kjokjìn ꞌka̱ mejèn‑na fìꞌtsè‑najiòn tanga skanda ꞌndi̱ ꞌndi̱ kjín kjoa̱ tjín‑ni ra tíbatéchjà‑na. Jè ra mejèn‑na nga ti̱ꞌkoa̱ ko̱ꞌsín kjísíxá‑jin‑te‑najiòn a̱ꞌta ꞌtse̱ ꞌén‑la̱ Nainá koni ꞌsín ijye ísíxáa̱ ya̱ a̱jin na̱xi̱ndá ra kjꞌií, mé‑ni nga ti̱ꞌkoa̱ ske‑na jngo kjo̱tjò ra ꞌtse̱ xá‑na̱ ra a̱ꞌta tsa̱jiòn.
\v 14 Tjínè‑na nga kokon‑yá‑la̱ ta yá xi̱ta̱‑ni, a xi̱ta̱ chikon‑ní o̱ ra mí tsa xi̱ta̱ chikon, a xi̱ta̱ chji̱ne̱‑ní o̱ ra mí tsa xi̱ta̱ chji̱ne̱.
\v 15 ꞌKoa̱á ma‑ni nga ijyeé tíjna̱nda nga ꞌñó mejèn‑na nga ti̱ꞌkoa̱ ꞌkenájmí‑najiòn jè ꞌén xi̱tse̱ ra nda tsò ra a̱ꞌta ꞌtse̱ Cristo, jiòn ra ya̱ titsa̱jna‑tse ya̱ na̱xi̱ndá Roma.
\s Kóꞌsín nga ngaꞌñó‑la̱ Nainá‑ní jè ꞌén xi̱tse̱‑la̱ Nainá
\p
\v 16 Mì kì masobà‑na a̱ꞌta ꞌtse̱ ꞌén xi̱tse̱ ra nda tsò ra a̱ꞌta ꞌtse̱ Cristo, nga̱ jè‑ní ra ngaꞌñó‑la̱ Nainá ra ma‑la̱ síkítsa̱jnandi̱í‑ni xi̱ta̱ ra kjoa̱ ꞌtse̱ jé‑la̱, ngaꞌtsì ra makjiín‑la̱ a̱ꞌta ꞌtse̱, maꞌtsia̱ kjòn‑ni jñà xi̱ta̱ judío, ko̱ ti̱ꞌkoa̱ jñà ra mì tsa xi̱ta̱ judío.
\v 17 A̱ꞌta ꞌtse̱ ꞌén xi̱tse̱ ra nda tsò, ya̱á nchrabá‑ni nga síkatsíjen‑ná Nainá kóꞌsín ꞌsín nga xi̱ta̱ kixi̱ ꞌsín‑ná ꞌkia̱ nga makjiín‑ná ra a̱ꞌta ꞌtse̱ Cristo, mé‑ni nga isa̱ ꞌñó katakjiín-isa‑ná. Nga̱ ꞌkoa̱á ꞌsín tíchja̱ Xa̱jo̱n ra tjíꞌta ꞌén‑la̱ Nainá nga tsò: “Jè ra xi̱ta̱ kixi̱, jè kíjnakon‑ni nga makjiín‑la̱ a̱ꞌta ꞌtse̱ Nainá.”
\s Kóꞌsín tjín kjoa̱ꞌcho ra ꞌsín xi̱ta̱ ra mì kì bexkón Nainá
\p
\v 18 Nga̱ jè Nainá bakón tsijeén‑ní jè kjo̱jti‑la̱ ra nchrabá‑ni ján ngajmi nga nchrabánè jñà xi̱ta̱ ra ꞌcho ꞌsín, jñà ra mì kì bexkón, nga̱ jñá kjoa̱ꞌcho ra tjín‑la̱ mì kì tsjáꞌnde nga makjiín‑la̱ ra a̱ꞌta ꞌtse̱ kjoa̱kixi̱.
\v 19 Kjoa̱ ra ma ꞌyaxkeén a̱ꞌta ꞌtse̱ Nainá, ndaá tíjna tsijen‑la̱ jñà xi̱ta̱ kìi̱, nga̱ ndaá tíbakón tsijen‑la̱ Nainá.
\v 20 Nga̱ jñà kjoa̱ ra mì kì tsijen‑ni a̱ꞌta ꞌtse̱ Nainá, ndaá tíꞌya‑la̱ skanda ti̱ꞌsa̱‑ni nga isinda i̱sàꞌnde, nga síchi̱ya‑ná ꞌkia̱ nga chitsíjen‑lá ngaꞌtsì tsajmì ra jè tsikínda. Ya̱á ꞌya‑la̱ nga tjín‑la̱ ngaꞌñó ra mì kì feheꞌta skanda ta mé ni̱chjin‑nioo̱, ko̱ nga ta jè ta̱jngoó‑ní ra Nainá. ꞌKoa̱á ma‑ni nga jñà xi̱ta̱ mì kì ma kjóꞌma nga ki̱tso̱: “Mì kì mé ꞌya‑ji̱n.”
\v 21 Jñà xi̱ta̱, ni̱ꞌsín takó ijye kijtse yá‑ni ra Nainá, tanga mì tsa jè Nainá jeya isíkíjna ko̱ nda isíkíjna; ta isa̱á jñà ꞌñó isìsin‑la̱ kjo̱bítsjen ra ni̱mé chjí‑la̱, ra isa̱ ꞌñó tsikíchjàjin‑isa jè inìma̱ tájajín‑la̱.
\v 22 ꞌKoa̱á ꞌsín kitsò‑la̱ ijo‑la̱ nga ꞌñó xi̱ta̱ chji̱ne̱, tanga ta isa̱á ꞌñó xi̱ta̱ tájajín kjomà.
\v 23 Xìn isíkíjna kjoa̱jeya ra bakèn‑la̱ Nainá ra mì kì feheꞌta ni̱chjin‑la̱; ta isa̱á jñà jeya isíkítsa̱jna ra ta i̱sén‑la̱ xi̱ta̱ ra feheꞌta ni̱chjin‑la̱, ko̱ jñà i̱sén‑la̱ cho̱ ra tjotjén, ko̱ i̱sén‑la̱ ngaꞌtsì cho̱ ra ijòn tjín ndsa̱ko̱, ko̱ ngaꞌtsì i̱sén‑la̱ cho̱ ra bíꞌndo̱feꞌta nangi ijo‑la̱.
\p
\v 24 ꞌKoa̱á ma‑ni nga jè Nainá kitsjin-tákon nga taxki̱ kataꞌsín kjoa̱tjé ra sasén‑la̱ ijo‑la̱ nga ko̱ꞌsín kataꞌsín koni ꞌsín tjín kjoa̱ chi̱nga̱ ra tjíjin ya̱ inìma̱‑la̱. ꞌKoa̱á ma‑ni nga a̱ꞌta ꞌtse̱ kjoa̱ ra isìko̱ xákjién, tseé kjo̱sabà tsakátsji‑la̱ ijo‑la̱.
\v 25 Ta isa̱á, jñà kjoa̱ndiso kijìtji̱ngi‑la̱ ko̱ mì tsa jè kjoa̱kixi̱‑la̱ Nainá kijìtji̱ngi‑la̱. Ta isa̱á jñà kijtsexkón ko̱ isitsjako̱ nga ꞌnga isíkítsa̱jna jñà tsajmì ra jè Nainá tsikínda. Mì kì tsa jè kijtsexkón ko̱ kisitsjako̱ Nainá ra tsikínda ngaꞌtsì tsajmì ra tjín, jè Nainá ra machjeén‑la̱ nga jè nda si̱kíjneé ta mé ni̱chjin‑nioo̱. Ko̱ꞌsín katama.
\p
\v 26 ꞌKoa̱á ma‑ni nga jè Nainá kitsjin-tákon nga taxki̱ kataꞌsín jè kjoa̱ꞌcho ra sasén‑la̱ ijo‑la̱ jè ra ꞌñó tse kjo̱sabà tji̱ko̱. Nga̱ skanda jñà íchjín‑la̱, mì kì ti̱ ko̱ꞌsín isìchjeén‑ni ijo‑la̱ koni ꞌsín nga kiꞌtsì‑la̱ nga íchjín ꞌmì.
\v 27 ꞌKoa̱á ti̱ꞌsín kiꞌsìn jñà ra xi̱ta̱ ꞌxi̱n. Kitsjin-takón kjoa̱ ra xá ko̱ꞌsín tjín‑ni nga ꞌsi̱in ko̱ íchjín‑la̱. Tjín xi̱ta̱ ꞌxi̱n ra ꞌñó tse kjoa̱ chi̱nga̱ jahajin‑la̱ ijo‑la̱ nga ti̱jñá xi̱ta̱ ꞌxi̱n xákjén tsakjahijyoko̱‑ni. ꞌÑó tse kjo̱sabà tsakátsji‑la̱ ijo‑la̱. ꞌKoa̱á ma‑ni nga tseé kjo̱hiꞌin isakò‑la̱ ijo‑la̱ ra ti̱jñà tsakátsji‑ni ra bakèn‑la̱ jñà kjoa̱ꞌcho ra kiꞌsìn.
\p
\v 28 Ta nga̱tjì‑la̱ nga jñà xi̱ta̱ kìi̱, mì kì isíkítsjen tsa machjeén‑ní nga ske̱xkon Nainá; ꞌkoa̱á ma‑ni nga kitsjin-tákon Nainá nga taxki̱ kataꞌsín; katasíchjeén kjo̱bítsjen ra ꞌñó ꞌcho tjín, mé‑ni nga kataꞌsín kjoa̱ ra ni̱mé chjí‑la̱.
\v 29 Jñà xi̱ta̱ kìi̱, ya̱ inìma̱‑la̱, ngi ta kií kitsejín ngaꞌtsì kjoa̱ꞌcho ra mì kixi̱ tjín, koni ra kjoa̱chijngi; ꞌcho kjo̱bítsjen tjín‑la̱; ta kií mejèn ijye‑la̱ mé ra tjín‑la̱ xákjién; ta kjoa̱toón ꞌsín, kjoa̱xìtakòn, kjoa̱ ra ma‑la̱ síꞌken xi̱ta̱, kjoa̱ nga kjaán‑ko̱ xákjín, kjoa̱ chìndo̱cha̱, kjoa̱ ra xá ꞌcho ꞌsín‑ni, ko̱ kjoa̱ ndiso.
\v 30 Chja̱jno‑la̱ xi̱ta̱ xákjín; síjtike Nainá; bachrjengi xi̱ta̱ xákjín; ꞌnga ikon; ndaá síkítsa̱jna ijo‑la̱; tà jñá i̱nchisíkítsjen kóꞌsín isa̱ ꞌchoó ꞌsi̱in‑isa; mì kì ma‑la̱ síhitjasòn‑la̱ xi̱ta̱ jchínga‑la̱;
\v 31 mì kì machi̱ya‑la̱; mì kì síhitjasòn ꞌén ra chja̱; mì kì ma‑la̱ betjò xi̱ta̱ xákjín; tsìn‑la̱ kjoa̱nìhijchaꞌta a̱ꞌta ꞌtse̱ xi̱ta̱ xákjín; ti̱ꞌkoa̱á tsìn‑la̱ kjo̱hi̱ma̱takòn.
\v 32 Jñà xi̱ta̱ kìi̱, ni̱ꞌsín ijye nda tjíjin‑la̱ nga ijyeé ko̱ꞌsín kitsjà kjo̱hixi̱ Nainá nga ngaꞌtsì ra ko̱ꞌsín tjín kjoa̱ ra ꞌsín, bakèn‑la̱ nga ki̱yá; tanga mì tsa ta ya̱ majngo ikon nga ko̱ꞌsín ꞌsín, skanda ti̱ꞌkoa̱á matsjaá‑la̱ ꞌkia̱ nga ꞌkoa̱ ti̱ꞌsín ꞌsín jñà xi̱ta̱ ra kjꞌií.
\c 2
\s Kóꞌsín nga jè Nainá tsjá‑la̱ chjí‑la̱ nga jngó jngó xi̱ta̱
\p
\v 1 ꞌKoa̱á ma‑ni, tsa títsa̱jin iꞌka‑no ra ma‑la̱ bíndajín‑la̱ xi̱ta̱ xákjién, nga síkinda̱ jé‑la̱, mì kì ko̱ma kóꞌsín ko̱si̱ko̱ ijo‑la̱, ni̱ꞌsín ta yá xi̱ta̱‑ni ra jè. ꞌKia̱ nga bánè jé‑la̱ xi̱ta̱ xákjién, ti̱jé tíbánè jé‑la̱ ijo‑la̱, nga̱ ꞌkoa̱á ti̱ꞌsín tíꞌsín ra jè koni ꞌsín ꞌsín jñà xi̱ta̱ ra iꞌka.
\v 2 Tanga ꞌya‑ná nga kjoa̱ kixi̱í ra ꞌsín Nainá ꞌkia̱ nga tsjá‑la̱ kjo̱hiꞌin jñà xi̱ta̱ ra ko̱tjín kjoa̱ ra ꞌsín.
\v 3 Ngajiòn ra nìkinda̱a xi̱ta̱ xàngio̱o nga fanè jé‑la, ¿mé‑ni nga ko̱ꞌsín níkítsjen‑no nga ko̱to‑nájiòn jè kjo̱hiꞌin ra tsjá Nainá? Nga̱ ti̱ꞌkoa̱á ra jiòn, ꞌkoa̱á ti̱ꞌsín i̱nchiꞌnià koni ꞌsín ꞌsín jñà xi̱ta̱ ra iꞌka.
\v 4 ¿A mí ꞌya nga jè i̱nchinachrjengio jè kjo̱nda‑la̱ Nainá ra ꞌñó nda tjín, ko̱ kjoa̱jetakòn‑la̱ nga tíkoñá kjoa̱? ¿A mí machi̱ya‑no nga jè kjo̱nda ra tjín‑la̱ Nainá, jé ra títsjá‑no ni̱chjin nga ma si̱kájno jé‑no nga mì ti̱ jé kjótsji‑no mé‑ni nga ya̱ kongítji̱ngi‑la ra jè?
\v 5 Tanga ta nga̱tjì‑la̱ nga tájajín tjín jè kjo̱bítsjen‑no nga mì kì níkájno jé ra tjíjin inìma̱‑no, isa̱á tse kjo̱hiꞌin i̱nchinitseꞌtion ijo‑no jè ra tsjá‑no Nainá ꞌkia̱ nga kji̱íko̱ kjo̱jti‑la̱, jè ni̱chjin ꞌkia̱ nga kjꞌi̱í nga ko̱ꞌsín kixi̱ kjòn ki̱ìndajín, nga jcha̱‑la̱ yá‑ní ra ko̱ko̱‑la̱ kjo̱hiꞌin.
\v 6 Jè Nainá, ꞌkoa̱á ꞌsín tsjá‑la̱ chjí‑la̱ jñà xi̱ta̱, koni ꞌsín tjín mé ta̱ kjoa̱ ra kiꞌsìn nga jngó jngó.
\v 7 Ko̱ tsjá‑la̱ kjo̱binachon ra mì feheꞌta ni̱ ta mé ni̱chjin‑nioo̱, jñà xi̱ta̱ ra i̱nchibátsji nga jeya kítsa̱jna ñánda̱ tíjna Nainá nga jcha̱xkón ko̱ nga mì kì jchi̱ja ta mé ni̱chjin‑nioo̱, ta nga̱tjì‑la̱ nga̱ ndaá tjín kjoa̱ ra i̱nchiꞌsín nga ni̱chjin nchijòn.
\v 8 Tanga ngi ko̱ó kjo̱jti‑la̱ Nainá nga tsjá‑la̱ kjo̱hiꞌin jñà xi̱ta̱ ra táhijín ꞌsín nga kondra̱ fì‑la̱ Nainá, jñà ra mì kì ma‑la̱ ꞌnchréhijon‑la̱ ra kjoa̱kixi̱. Tà isa̱á jñà kjoa̱ ra ꞌcho tjín fìtji̱ngi‑la̱.
\v 9 Tseé kjo̱hiꞌin ko̱ tseé kjoa̱ ꞌse̱‑la̱ ya̱ inìma̱‑la̱ ngaꞌtsì xi̱ta̱ ra ꞌcho ꞌsín, maꞌtsia̱ kjòn ítjòn‑ni jñà ra xi̱ta̱ judío, ko̱ ti̱ꞌkoa̱á jñà ra taxki̱ xi̱ta̱ ra mì tsa xi̱ta̱ judío.
\v 10 Tanga jñà xi̱ta̱ ra nda ꞌsín, tjábé‑la̱ ra kjoa̱jeya, ti̱ꞌkoa̱ jcha̱xkón‑ní, ko̱ ꞌse̱é‑la̱ kjo̱ꞌnchán, maꞌtsia̱ kjòn‑ni jñà ra xi̱ta̱ judío, ko̱ ti̱ꞌkoa̱á ra taxki̱ xi̱ta̱ ra mì tsa xi̱ta̱ judío.
\v 11 Nga̱ jè Nainá mì tsa ta iꞌka‑ni xi̱ta̱ fahájin nga nda síko̱.
\p
\v 12 Ngaꞌtsì jñà xi̱ta̱ ra bátsji‑jé ra mì kì tjíjin‑la̱ kóꞌsín tjín kjo̱téxoma ra itjábé‑la̱ jè Moisés, takó ꞌseé‑la̱ kjo̱hiꞌin ra mì kì feheꞌta ni̱ꞌsín mì kì kiíꞌnchré jè kjo̱téxoma‑la̱ Moisés. Ko̱ jñà xi̱ta̱ ra bátsji‑jé ra nda kijtse kóꞌsín tjín kjo̱téxoma‑la̱ Moisés, ngásòn ꞌse̱‑la̱ kjo̱hiꞌin nga a̱ꞌta ꞌtse̱é kjo̱téxoma si̱ndajín‑la̱.
\v 13 Nga̱ tà jñá xi̱ta̱ ra ma‑la̱ síhitjasòn kjo̱téxoma‑la̱ Moisés, ra xi̱ta̱ kixi̱ ya̱ ngixko̱n Nainá, mì tsa jñà‑jìn ra ta ꞌnchré ra xi̱ta̱ kixi̱ ya̱ ngixko̱n Nainá.
\v 14 Nga̱ ꞌkia̱, jñà ra taxki̱ xi̱ta̱ ra mì kì tjíjin‑la̱ kóꞌsín tíchja̱ kjo̱téxoma‑la̱ Moisés, tanga ta ya̱á nchrabájin‑ni ya̱ inìma̱‑la̱ nga ko̱ꞌsín ꞌsín kjoa̱ ra nda tjín koni ꞌsín tsò kjo̱téxoma, jñà xi̱ta̱ kìi̱, ni̱ꞌsín tsìn‑la̱ kjo̱téxoma, ꞌyaá‑la̱ nga ya̱á tjíjin ya̱ inìma̱‑la̱ kjo̱téxoma ꞌtse̱.
\v 15 ꞌKia̱ nga ko̱ꞌsín nda ꞌsín, ꞌyaá‑la̱ nga ya̱á tjíjin ya̱ inìma̱‑la̱ kjoa̱ ra síjé kjo̱téxoma ꞌtse̱ Moisés; jè inìma̱‑la̱ ko̱ꞌsín tsò‑la̱ mé kjoa̱ ra nda tjín ko̱ mé kjoa̱ ra ꞌcho tjín; ko̱ ti̱jé‑ni kjo̱bítsjen‑la̱ sa ꞌkoa̱ bánè jé‑la̱, ko̱ sa ꞌkoa̱á basìko̱tjì.
\v 16 ꞌKoa̱á ꞌsín ko̱ma jè ni̱chjin ꞌkia̱ nga jè Nainá kjꞌi̱í, nga ki̱ìndajín ngaꞌtsì jé ra tjíꞌma‑la̱ ya̱ a̱jin inìma̱‑la̱ xi̱ta̱; nga̱ jè Jesucristo ki̱ìndajín ngaꞌtsì kjoa̱ kìi̱, koni ꞌsín tsò ꞌén xi̱tse̱ ꞌtse̱ Cristo ra ꞌa̱n tíꞌbènájmíya.
\s Kóꞌsín nga jñà xi̱ta̱ judío ta jñá ꞌnga síkítsa̱jna ijo‑la̱
\p
\v 17 Tanga jiòn ra xi̱ta̱ judío ꞌmì‑la ijo‑no; ya̱á ꞌñó maꞌñóꞌta takòn kjo̱téxoma ꞌtse̱ Moisés ko̱ ꞌñó ꞌnga ma takòn ra a̱ꞌta ꞌtse̱ Nainá.
\v 18 Ndaá ꞌya ra jiòn mé ra mejèn‑la̱ Nainá; ko̱ ndaá ꞌya mé kjoa̱ ra isa̱ nda tjín ra a̱ꞌta ꞌtse̱ koni ꞌsín bakón‑ya‑no jè kjo̱téxoma.
\v 19 ꞌKoa̱á ꞌsín ꞌñó ma takòn nga jiòn ra ma‑no bakon‑ya‑la ndi̱yá kixi̱, jñà xi̱ta̱ ra mì kì machi̱ya‑la̱ ra tjíchjàjin kjo̱bítsjen‑la̱; ko̱ nga ma‑no nìhisen‑la jñà ra kjoa̱jñò tjítsa̱jin.
\v 20 Nga ꞌkoa̱á ꞌsín níkítsjen nga maá‑no jiòn nda ko̱kón‑ya‑la kjo̱téxoma ra taxki̱ xi̱ta̱ ra tsìn‑la̱ kjo̱bítsjen; ko̱ nga jiòn ma‑no ko̱kón‑ya‑la jñà xi̱ta̱ ra ni̱mé ma‑la̱; ngajiòn ra tjín‑no kjoa̱chji̱ne̱ ko̱ kjoa̱kixi̱ ra bakón‑ya‑no a̱ꞌta ꞌtse̱ kjo̱téxoma.
\v 21 Jiòn ra ko̱ꞌsín ma‑no bakon‑ya‑la xi̱ta̱ ra kjꞌií, ¿mé‑ni mì tsa ti̱ jiòn bakon‑ya‑la ijo‑no? Jiòn ra ko̱ꞌsín bakon‑ya nga mì kì ma nichijé, ¿a mí nichijé ra jiòn?
\v 22 Jiòn ra ko̱ꞌsín bakon‑ya nga xkón‑ni nga jò jàn ꞌsie̱én íchjín‑ná, ¿a mí ko̱ꞌsín ꞌnià ra jiòn? Ko̱ ꞌkoa̱á ti̱ꞌsín bixó nga nachrjengi‑no jñà xkósòn ra nainá tsò‑la̱ xi̱ta̱, tanga, ¿mé‑ni nga ya̱ bitjàha̱ꞌse̱n‑no ya̱ i̱ngo̱‑la̱ nga nichijé tsajmì ra ya̱ tjín?
\v 23 Jiòn, ꞌñó ꞌnga ma takòn nga ndaá ꞌya jè kjo̱téxoma, tanga ꞌkia̱ nga mì nda nihitjasòn‑la koni ꞌsín tíchja̱ kjo̱téxoma, ¿a mí tsa jè Nainá mì nda i̱nchiꞌyaxkón jiòn?
\v 24 Nga̱ ꞌkoa̱á ꞌsín tíchja̱ xa̱jo̱n ra tjíꞌta ꞌén‑la̱ Nainá nga tsò: “Ta nga̱tjì tsa̱jiòn‑no nga chja̱jno‑la̱ Nainá jñà ra taxki̱ xi̱ta̱.”
\p
\v 25 Jè kjoa̱ ꞌtse̱ circuncisión nga tjíꞌta chi̱ba̱ ijo‑no, chjí‑la̱ tsa nda si̱itjasòn kjo̱téxoma ꞌtse̱ Moisés. Tanga tsa mì kì si̱itjasòn kjo̱téxoma, ꞌkoa̱á jngoya‑ila̱ koni tsa mì tsa tjíꞌta chi̱ba̱‑ni ijo‑no.
\v 26 Jè ra taxki̱ xi̱ta̱, ni̱ꞌsín mì kì tjíꞌta chi̱ba̱ ijo‑la̱ koni xi̱ta̱ judío, tanga tsa nda síhitjasòn kjo̱téxoma ꞌtse̱ Moisés, Nainá, ꞌkoa̱á ꞌsín ki̱tso̱‑la̱ koni tsa tjíꞌta chi̱ba̱ kjòn‑ni ijo‑la̱.
\v 27 Jè xi̱ta̱ ra si̱hitjasòn kjo̱téxoma ꞌtse̱ Moisés, ni̱ꞌsín mì kì tjíꞌta chi̱ba̱ ijo‑la̱, jè ko̱ko̱‑la̱ nga ki̱ìndajín‑no, jiòn ra mì kì nihitjasòn ni̱ꞌsín tjíꞌta chi̱ba̱ ijo‑no, ti̱ꞌkoa̱ ni̱ꞌsín tjín‑no xa̱jo̱n ꞌtse̱ kjo̱téxoma‑la̱ Nainá.
\v 28 Jngo ra xi̱ta̱ judío ꞌmì, mì tsa tà a̱sònꞌnga‑jìn nga ko̱ꞌsín ꞌmì; ko̱ jè ra tjíꞌta chi̱ba̱ ijo‑la̱, mì tsa jè‑ni ra nda bijna‑ni ya̱ ngixko̱n Nainá nga tjíꞌta chi̱ba̱ ijo‑la̱ ya̱ a̱sònꞌnga‑la̱.
\v 29 Jè ra ngi xi̱ta̱ judío jè‑ní ra ngi ya̱ inìma̱‑la̱ jahatjìya‑la̱; ko̱ jé ra chjí‑la̱ nga ya̱ tjíꞌta chi̱ba̱ ya̱ inìma̱‑la̱, ko̱ mì tsa jè kjo̱téxoma ra ta xa̱jo̱n tjíꞌta, jé‑ní ra Inìma̱ Tsje‑la̱ Nainá isìkaatjìya‑la̱ inìma̱‑la̱. Jè ra ko̱ꞌsín síhitjasòn, mì tsa ta xi̱ta̱‑jìn ra nda xi̱ta̱ ko̱chrjengi, ngi jè sabá kjón Nainá ra nda ko̱chrjengi.
\c 3
\s Kóꞌsín nga jè Nainá kixi̱ ꞌsín
\p
\v 1 Tsa ꞌkoa̱á ꞌsín tjín, ¿mé kjo̱nda ra isa̱ tse tjín‑la̱ jñà ra xi̱ta̱ judío ꞌmì? Ko̱ ¿mé chjí‑la̱ kjoa̱ ꞌtse̱ circuncisión nga siꞌta chi̱ba̱ ijo‑la̱?
\v 2 ꞌÑó kjìn sko̱ya tjín‑ni kóꞌsín chjí‑la̱, tsa jién ra nda si̱kítsjeén. Jè ra tíjna ítjòn, jè‑ní nga jñà xi̱ta̱ judío kjonga̱tsja jè ꞌén‑la̱ Nainá.
\v 3 Tanga, tsa tjín iꞌka jñà xi̱ta̱ judío ra mì kì kixi̱ i̱nchifìko̱ jè kjo̱hixi̱ ra kjonga̱tsja, ¿a jñà kjoa̱‑la̱ xi̱ta̱ kìi̱ ko̱techjà nga jè Nainá mì ti̱ kì kixi̱ i̱ko̱‑ni xi̱ta̱?
\v 4 Majìn, mì tsa ko̱ꞌsín ko̱ma‑jìn. Ra jè Nainá, síhitjasòn kiꞌta‑ní koni ꞌsín tjín kjo̱hixi̱‑la̱, ni̱ꞌsín takó xi̱ta̱ ndiso jñà xi̱ta̱ i̱sàꞌnde; koni ꞌsín tíchja̱ xa̱jo̱n ra tjíꞌta ꞌén‑la̱ Nainá nga tsò:
\q Jñá ꞌén ra ji̱ ki̱nákji̱i, xi̱ta̱ kixi̱ kataꞌsín‑li,
\q mé‑ni nga ji̱ si̱kijni tsa ꞌkia̱ nga yá ra koa̱àngi‑li.
\p
\v 5 Jñà kjoa̱ ra mì kì nda tjín ra ꞌnié ra jién, tsa nda síkatsíjen jè kjoa̱‑la̱ Nainá ra kixi̱ tjín, ¿kóꞌsín kixé? ¿A kixó‑ná nga mì kixi̱ tíꞌsín Nainá nga ko̱ꞌsín ta̱ tse kjo̱hiꞌin títsjá‑ná? (Tsa ko̱ꞌsín kixé, jngo kjo̱bítsjen‑la̱ ra taxki̱ xi̱ta̱ i̱nchinìchjeén.)
\v 6 Tanga majìn‑jìn, mì tsa ko̱ꞌsín tjín‑jìn. Tsa kixi̱ kjoa̱ nga jè Nainá mì tsa kixi̱ ꞌsín nga kjo̱hiꞌin tsjá‑ná, ¿kóꞌsín ko̱ma‑ni nga ki̱ìndajín‑la̱ ngaꞌtsì xi̱ta̱ i̱sàꞌnde?
\p
\v 7 Tjín‑la iꞌka ra ma ki̱tso̱: “Tsa jñà ꞌén ndiso ra ꞌa̱n chjàa̱, jeya síkíjna‑ni Nainá nga bakón jè kjoa̱kixi̱ ra ꞌsín, ¿mé‑ni nga takó ko̱ꞌsín tísinè‑na kjo̱hiꞌin koni tsa xi̱ta̱ jée̱ ra ꞌa̱n?”
\v 8 ¿A maá ko̱ꞌsín kixé koni ꞌsín tsò ꞌén ra tsò?: “Isa̱á‑la nda‑ni nga ꞌcho ꞌsia̱n iseé mé‑ni nga katasakó-isa‑ná ra kjo̱nda.” Koni ꞌsín tsò iꞌka ra xi̱ta̱ ndiso, nga ꞌkoa̱á‑ró ꞌsín tsò ꞌén ra ꞌa̱n tíbakon‑yá. Xi̱ta̱ ra ko̱ꞌsín tsò, ꞌñó nda bakèn‑la̱ nga ꞌki̱‑la̱ kjo̱hiꞌin.
\s Ni̱jngo xi̱ta̱ ra nda ꞌsín
\p
\v 9 ¿Kóꞌsín si̱kítsjeén? ¿Jién ra xi̱ta̱ judío ꞌmì‑ná, a isa̱á nda i̱nchiꞌnié koni jñà xi̱ta̱ ra iꞌka? Majìn, ijyeé ko̱ꞌsín kíxin‑no, nga ta ngásòn ngáyaá ya̱ kitsabáꞌñó‑ná ra kjoa̱ ꞌtse̱ jé, jién ra xi̱ta̱ judío ꞌmì‑ná, ko̱ jñà ra taxki̱ xi̱ta̱.
\v 10 Koni ꞌsín tíchja̱ xa̱jo̱n ra tjíꞌta ꞌén‑la̱ Nainá nga tsò:
\q Tsìn jngo ra xi̱ta̱ kixi̱, ni̱jngo tíjna.
\q
\v 11 Ni̱yá tjín xi̱ta̱ ra machi̱ya‑la̱,
\q ni̱yá tjín ra ma‑la̱ bátsji Nainá.
\q
\v 12 Ngaꞌtsì xi̱ta̱ sabà kjꞌií ndi̱yá iskábé;
\q ta jngoó ndi̱yá kijì, nga ni̱mé chjí‑la̱ kjoa̱ ra ꞌsín;
\q ni̱yá tjín ra ma‑la̱ nda ꞌsín, ni̱jngo tíjna.
\q
\v 13 Na̱xíjta̱‑la̱ xi̱ta̱ kìi̱,
\q ꞌkoa̱á ꞌsín ꞌcho kjòn koni ꞌsín kjòn jngo nga̱jo̱‑la̱ miꞌken ꞌkia̱ nga tjáꞌxa̱jto;
\q ngi ta ꞌén ndisoó chja̱ ni̱je̱n‑la̱;
\q jñà ꞌén ra tjíꞌa tsaꞌba, ꞌkoa̱á jngoya‑la̱ koni tsa xán‑la̱ ye̱.
\q
\v 14 Ngi ta ꞌén ꞌchoó kitseꞌá tsaꞌba nga chja̱jno‑la̱ xi̱ta̱,
\q ko̱ ꞌén ra ajò ma‑la̱ inìma̱‑ná.
\q
\v 15 Mahachikon kjòn nga síꞌken xi̱ta̱ xákjín nga bíxten jní‑la̱.
\q
\v 16 Ta ñánda̱ nga bima, ngi nga síton‑ní, nga síkjehesko mé ra tjín.
\q
\v 17 Mì kì be jè ndi̱yá ra ya̱ fìko̱‑ná ñánda̱ tjín kjo̱ꞌnchán.
\q
\v 18 Tsìn‑la̱ kjo̱skon‑la̱ Nainá a̱ꞌta ꞌtse̱ kjoa̱ ra ꞌsín.
\p
\v 19 Ijyeé ꞌya‑ná koni ꞌsín tsò ijye jè kjo̱téxoma ra ꞌtse̱ Moisés, jñá‑ní ra ko̱ꞌsín títsò‑la̱ jñà xi̱ta̱ ra ya̱ fìꞌta‑la̱, mé‑ni nga ngaꞌtsì xi̱ta̱, mì kì ma ki̱chja̱‑ni ya̱ ngixko̱n Nainá; ko̱ mé‑ni jè Nainá ki̱ìndajín‑la̱ jè ra kjoa̱ ꞌtse̱ jé‑la̱, ngaꞌtsì xi̱ta̱ ra tjín i̱ i̱sàꞌnde.
\v 20 Ni̱jngo xi̱ta̱ ra xi̱ta̱ kixi̱ ko̱ma‑ni ya̱ ngixko̱n Nainá, ra ta nga̱tjì‑la̱ nga nda si̱hitjasòn kjoa̱ ra síjé kjo̱téxoma ꞌtse̱ Moisés. Ta nga̱tjì‑la̱ jè kjo̱téxoma, ta kií xá tíjna‑ni nga isa̱ nda ꞌya‑la̱ jè jé ra tjín‑ná.
\s Kóꞌsín nga ta kjo̱tjó‑ní nga síjchaàꞌtá‑ná Nainá
\p
\v 21 Tanga ꞌndi̱ ꞌndi̱, tíꞌyaá‑la̱ kóꞌsín ꞌsín Nainá nga xi̱ta̱ kixi̱ ꞌsín‑ná, ko̱ mì tsa ki‑ni nga nihitjasén kjo̱téxoma. Ta kií‑ní nga makjiín‑ná a̱ꞌta ꞌtse̱ Cristo. Nga̱ ti̱jé‑ni Kjo̱téxoma, ꞌkoa̱á ꞌsín tsjá ꞌén, ko̱ ꞌkoa̱á ti̱ꞌsín kitsò xi̱ta̱ ra kiìchja̱ ngajo‑la̱ Nainá kjotseé
\v 22 nga ya̱á nchrabá‑ni nga xi̱ta̱ kixi̱ ꞌsín‑ná Nainá ꞌkia̱ nga makjiín‑ná ra a̱ꞌta ꞌtse̱ Cristo. Ko̱ ꞌkoa̱á ꞌsín si̱ìko̱ ijye ngaꞌtsì ra ko̱kjiín‑la̱. Nga̱ ngásòn ngáya kjòn ngaꞌtsiòo̱,
\v 23 ta nga̱tjì‑la̱ nga̱ ngaꞌtsí xi̱ta̱ nga tsakátsji‑jé; kjiín tjítsa̱jna‑la̱ ya̱ ñánda̱ nga tíjna jè kjoa̱jeya‑la̱ Nainá.
\v 24 ꞌKoa̱á ma‑ni nga jè Nainá ta ko̱ó kjo̱nda‑la̱ ko̱ ngi ta kjo̱tjó‑ní nga xi̱ta̱ kixi̱ ꞌsín‑ná. Ta kií‑ní nga̱ jè Jesucristo tsikíchjítjì‑ná, ꞌkoa̱á ma‑ni nga ma tsikìtsa̱jnandi̱í‑ná ra kjoa̱ ꞌtse̱ jé‑ná.
\v 25 Nainá kitsjá Iꞌndí‑la̱ koni jngo kjo̱tjò ra faháxìn jé‑ná ya̱ ngixko̱n Nainá, ꞌkia̱ nga makjiín‑ná a̱ꞌta ꞌtse̱ Jesucristo, nga jè tsikíxten jní‑la̱ ꞌkia̱ nga ꞌken. Nainá, ꞌkoa̱á ꞌsín bakón tsijen kóꞌsín nga kixi̱ ꞌsín ra jè; ta nga̱tjì‑la̱ nga ti̱ꞌsa̱ kjotseé, Nainá maá‑la̱ nga iskoñákjoa̱, mì tsa ta ndi̱to̱n kitsjà‑la̱ kjo̱hiꞌin xi̱ta̱ koni ꞌsín bakèn‑la̱ ta nga̱tjì‑la̱ jñà jé ra tsakátsji.
\v 26 Ko̱ jè ni̱chjin ra titsa̱jneé ꞌndi̱, ꞌkoa̱á ꞌsín isìkasén jè Jesucristo mé‑ni nga ki̱ìndajín‑ni kjoa̱ ra tsikíjna chróꞌbá. ꞌKoa̱á ma‑ni nga xi̱ta̱ kixi̱í ra jè, ko̱ nga ta jé‑ní ra ma‑la̱ xi̱ta̱ kixi̱ ꞌsín jñà xi̱ta̱ ra báꞌta ikon jè Jesús.
\p
\v 27 ¿Ñánda̱ sijna‑ni jè kjoa̱ ra jè xi̱ta̱ nda bachrjengi ijo‑la̱? Ta ya̱á chija, mì kì ti̱ mé chjí‑la̱. ¿Tanga mé‑ni? ¿Ñánda̱ nchrabá‑ni kjo̱hixi̱? ¿A kií‑ní nga i̱nchiniìtjasén jè Kjo̱téxoma? Majìn, ta kií‑ní nga tjín jngo kjo̱hixi̱ nga makjiín‑ná ra a̱ꞌta ꞌtse̱ Jesús.
\v 28 ꞌKoa̱á ꞌsín machi̱ya‑ná ra feheꞌta‑ni, nga jè Nainá, ta kií xi̱ta̱ kixi̱ ꞌsín‑ná, ta nga̱tjì‑la̱ nga makjiín‑ná a̱ꞌta ꞌtse̱ Jesús; mì tsa ki‑ni nga Kjo̱téxoma ꞌtse̱ Moisés nda si̱hitjasén.
\p
\v 29 Jè Nainá, ¿a tà Nainá‑la̱ xi̱ta̱ judío‑ní? ¿A mí tsa ꞌtse̱‑te ra taxki̱ xi̱ta̱? Ngi kixi̱í kjoa̱ nga ꞌtse̱é‑te ni̱ꞌsín ta yá xi̱ta̱‑ni.
\v 30 Nga̱ jngoó‑ni jè Nainá. Jè‑ní ra ma‑la̱ nga xi̱ta̱ kixi̱ ꞌsín jñà ra xi̱ta̱ judío ra tjíꞌta chi̱ba̱ ijo‑la̱, ꞌkia̱ nga ko̱kjiín‑la̱ a̱ꞌta ꞌtse̱ Jesús; ti̱ꞌkoa̱á xi̱ta̱ kixi̱í ꞌsi̱in‑te jñà ra taxki̱ xi̱ta̱ ra mì kì tjíꞌta chi̱ba̱ ijo‑la̱, ꞌkia̱ nga ko̱kjiín‑te‑la̱ ra a̱ꞌta ꞌtse̱ Jesús.
\v 31 ꞌKia̱ nga makjiín‑ná a̱ꞌta ꞌtse̱ Jesucristo, ¿a i̱nchinachrje‑ngi‑ná jè kjoa̱ ꞌtse̱ kjo̱téxoma? Majìn, mì tsa i̱nchinachrjengieé; ya̱á jnchro nda i̱nchinikatsíjeén nga kií xá tjín‑la̱ jè kjo̱téxoma.
\c 4
\s Mé ra bakón‑ya‑ná xkósòn ꞌtse̱ Abraham
\p
\v 1 ¿Tanga kó kixé ra a̱ꞌta ꞌtse̱ xi̱ta̱ jchínga‑ná Abraham? ¿Mé kjo̱nda ra isakò‑la̱?
\v 2 ¿A kií nga̱tjì‑la̱ nga nda kiꞌsìn nga xi̱ta̱ kixi̱ kitsò‑la̱ Nainá? Majìn. Nga̱ tsa ꞌkoa̱à‑la ꞌsín kiꞌsìn, kjomaá‑la ti̱jè nda isíkíjna‑ni ijo‑la̱. Tanga, mí‑la tsa ya̱ ngixko̱n Nainá.
\v 3 Tanga, ¿kó tsò jè xa̱jo̱n ra tjíꞌta ꞌén‑la̱ Nainá? Ki̱í ꞌsín tsò: “Jè Abraham, ndaá kjokjiín‑la̱ a̱ꞌta ꞌtse̱ Nainá; ꞌkoa̱á ma‑ni nga ko̱ꞌsín kitsò‑la̱ Nainá nga xi̱ta̱ kixi̱‑ní.”
\v 4 Jè to̱n ra tjábé‑la̱ xi̱ta̱ ra síxá, mì tsa ta ꞌbì kjo̱tjò‑la̱. Jé‑ní chjí‑la̱ nga síxá.
\v 5 Jngo xi̱ta̱ ra mì tsa jè báꞌta ikon jñà kjoa̱nda ra ꞌsín, tanga makjiín‑la̱ ra a̱ꞌta ꞌtse̱ Nainá, jè‑ní ra xi̱ta̱ kixi̱ ma ya̱ ngixko̱n Nainá. Nga̱ ta jè‑ni Nainá ra ma‑la̱ nga xi̱ta̱ kixi̱ ꞌsín jñà xi̱ta̱ ra ꞌcho tjín kjoa̱ ra ꞌsín, tà nga̱tjì‑la̱ nga makjiín‑la̱ ra a̱ꞌta ꞌtse̱.
\v 6 Jè xi̱ta̱ jchínga‑ná ra tsiꞌkìn David, ꞌkoa̱á ꞌsín kitsò ra a̱ꞌta ꞌtse̱ kjo̱nda ra ꞌse̱‑la̱ xi̱ta̱, ra mì tsa jñà nga̱tjì‑la̱ kjoa̱ ra ꞌsi̱in nga jè Nainá xi̱ta̱ kixi̱ ki̱tso̱‑la̱.
\v 7 Nga kitsò:
\q Mé ta̱ tsja‑la̱ jñà xi̱ta̱ ra ijye inìhijchaꞌta‑la̱ jñà kjoa̱ꞌcho ra kiꞌsìn,
\q ko̱ ra ijye kjóchjítjì jñà jé ra tjín‑la̱.
\q
\v 8 Mé ta̱ tsja‑la̱ jñà xi̱ta̱ ra mì ti̱ kì kinda̱ ꞌsín‑ni Nainá jñà jé ra tjín‑la̱.
\p
\v 9 Jñà kjo̱nda kìi̱ ra tsjá Nainá, ¿a tà ꞌtse̱é jñà xi̱ta̱ judío ra tjíꞌta chi̱ba̱ ijo‑la̱? ¿A mí tsa ti̱ꞌkoa̱ ꞌtse̱‑te ra taxki̱ xi̱ta̱ ra mì tsa tjíꞌta chi̱ba̱ ijo‑la̱? Ijyeé ko̱ꞌsín kíxin‑no nga jè xi̱ta̱ jchínga‑ná Abraham, ꞌkia̱ nga kjokjiín‑la̱ a̱ꞌta ꞌtse̱ Nainá, ꞌkoa̱á ꞌsín kitsò Nainá nga jè Abraham, xi̱ta̱ kixi̱‑ní.
\v 10 Tanga Abraham, ꞌkia̱ nga xi̱ta̱ kixi̱ kitsò‑la̱ jè Nainá, ¿a ta̱ ꞌkoa̱ tjíꞌta chi̱ba̱á ijo‑la̱? Majìn; ꞌkia̱á‑ní ꞌkia̱ nga ti̱kjè tjíꞌta chi̱ba̱ ijo‑la̱.
\v 11 Abraham, ꞌkia̱ nga ijye ko̱ꞌsín xi̱ta̱ kixi̱ kitsò‑la̱ Nainá, a̱kjòn ꞌkia̱á isiꞌta chi̱ba̱ ijo‑la̱ koni jngo sello nga ya̱á ꞌya‑la̱ nga ijyeé xi̱ta̱ kixi̱‑ní, ta nga̱tjì‑la̱ nga kjokjiín‑la̱ ra a̱ꞌta ꞌtse̱ Nainá ꞌkia̱ nga ti̱kjè tjíꞌta chi̱ba̱ ijo‑la̱. ꞌKoa̱á ma‑ni nga jè ma xi̱ta̱ jchínga‑la̱ ngaꞌtsì xi̱ta̱ ra makjiín‑la̱ ni̱ꞌsín mì kì tjíꞌta chi̱ba̱ ijo‑la̱. Ko̱ ꞌkia̱ nga makjiín‑la̱ xi̱ta̱ kìi̱, xi̱ta̱ kixi̱í tsò‑la̱ Nainá.
\v 12 Abraham jè ma xi̱ta̱ jchínga‑la̱ jñà ra xi̱ta̱ judío ra tjíꞌta chi̱ba̱ ijo‑la̱; tanga mì tsa ta ki‑ni nga tjíꞌta chi̱ba̱ ijo‑la̱; jñá‑ní ra ꞌkoa̱ ti̱ꞌsín i̱nchikjábé xkósòn‑la̱ Abraham nga ti̱ꞌkoa̱ i̱nchimakjiín‑la̱ koni ꞌsín nga kjokjiín‑la̱ Abraham ꞌkia̱ nga ti̱kjè siꞌta chi̱ba̱ ijo‑la̱.
\s Mé kjo̱nda ra tsjá Nainá ꞌkia̱ nga makjiín ra a̱ꞌta ꞌtse̱
\p
\v 13 Nainá ꞌkia̱ nga ko̱ꞌsín kitsjà‑la̱ tsaꞌba jè Abraham nga jé ko̱nga̱tsja jè i̱sàꞌnde ko̱ jñà xi̱ta̱ tje̱‑la̱ nga ꞌtse̱ ki̱tso̱‑la̱; mì tsa ki‑nì nga nda isìhitjasòn kjo̱téxoma, ta kií‑ní nga kjokjiín‑la̱ koni ꞌsín kiìchja̱ Nainá; ꞌkoa̱á ma‑ni nga xi̱ta̱ kixi̱ kjomà ya̱ ngixko̱n Nainá.
\v 14 Tsa tà jñá‑la ko̱nga̱tsja kjo̱nda kìi̱ jñà xi̱ta̱ ra síhitjasòn kjoa̱ ꞌtse̱ kjo̱téxoma, mí‑la ti̱ mé chjí‑la̱ nga makjiín‑ná a̱ꞌta ꞌtse̱ Nainá tsaꞌkoa̱; ko̱ mí‑la kì ki̱tjasòn‑ni koni ꞌsín ijye kitsjà tsaꞌba Nainá.
\v 15 Ra kjo̱téxoma ꞌmì, kjo̱hiꞌiín bíné‑ná; tanga tsa tsìn kjo̱téxoma, mí‑la tsa mé kjo̱téxoma ki̱tjá ítjòn‑lá ni̱ꞌsín ta mé ra ꞌsie̱én.
\p
\v 16 Koni ꞌsín tsò ꞌén ra Nainá kitsjà‑la̱ Abraham, ꞌtse̱é‑ní jñà xi̱ta̱ ra makjiín‑la̱. Ta tsjá kjo̱tjò‑la̱ kjo̱nda‑la̱, mé‑ni nga katasijna kixi̱‑ni ꞌén nga ki̱tjasòn‑ní ꞌén kìi̱ a̱ꞌta ꞌtse̱ ngaꞌtsì xi̱ta̱ ra ya̱ nchrabá‑ni tje̱‑la̱ Abraham. Mì tsa ta a̱ꞌta ꞌtse̱ jñà xi̱ta̱ ra tjín‑la̱ kjo̱téxoma, ti̱ꞌkoa̱á ꞌtse̱é‑te jñà ra taxki̱ xi̱ta̱ ra ti̱ꞌkoa̱ makjiín‑la̱ a̱ꞌta ꞌtse̱ Nainá koni ꞌsín kjokjiín‑la̱ Abraham. ꞌKoa̱á ma‑ni nga xi̱ta̱ jchínga ꞌmì‑lá Abraham ngaꞌtsì‑ná ra makjiín‑ná a̱ꞌta ꞌtse̱ Nainá.
\v 17 Koni ꞌsín nga tíchja̱ xa̱jo̱n ra tjíꞌta ꞌén‑la̱ Nainá nga tsò: “Kjín na̱xi̱ndá ra ijye ji̱ ísingátsja‑la nga ji̱ ka̱mi xi̱ta̱ jchínga‑la̱.” Ko̱ ꞌkoa̱á ꞌsín tíjna jè Abraham ya̱ ngixko̱n Nainá. Jè Abraham kjokjiín‑la̱ koni ꞌsín kiìchja̱ Nainá ra ma‑la̱ síkjaáya‑la̱ xi̱ta̱ ra ijye ꞌken; ko̱ ti̱ꞌkoa̱á ma‑la̱ chja̱ kixi̱ a̱ꞌta ꞌtse̱ kjoa̱ ra kjè mé tjín koni tsa ijye ko̱tíma kjòn.
\p
\v 18 Xi̱ta̱ jchínga‑ná Abraham nda kjokjiín‑la̱ koni ꞌsín kitsò‑la̱ Nainá ko̱ ndaá iskoñá‑la̱ kjoa̱ kìi̱; ni̱ꞌsín mì kì tjíjin‑la̱ kóꞌsín ko̱ma‑la̱ nga ki̱tjasòn. ꞌKoa̱á ꞌsín kjomà‑ni nga kjìn na̱xi̱ndá, xi̱ta̱ jchínga tsò‑la̱, koni ꞌsín nga Nainá ijye kitsjà‑la̱ tsaꞌba nga kitsò‑la̱: “ꞌKoa̱á ꞌsín ꞌñó kjìn ko̱ma ra xi̱ta̱ tje̱‑li.”
\v 19 Jè Abraham, mì kì isikjahajen‑la̱ ikon koni ꞌsín nga kjokjiín‑la̱ a̱ꞌta ꞌtse̱ Nainá, ni̱ꞌsín ko̱ꞌsín isíkítsjen nga mì ti̱ mé chjí‑la̱ ijo‑la̱ nga ijyeé ꞌñó xi̱ta̱ jchínga; kja̱meé bijchó‑la̱ jngo sindo̱ nó; ti̱ꞌkoa̱á jè chjo̱ón‑la̱ Abraham ra ꞌmì Sara, chjo̱ón ꞌndi̱‑ní ko̱ ya̱ ñánda̱ majcháya i̱xti, mì kì ti̱ mé chjí‑la̱.
\v 20 Tanga jè Abraham mì tsa jò tsiꞌké‑la̱ ikon koni ꞌsín tsò ꞌén ra kitsjà‑la̱ Nainá. Ta isa̱á ꞌñó nda kjokjiín‑isa‑la̱ ra a̱ꞌta ꞌtse̱ Nainá. Ko̱ ꞌñó jeya isíkíjna;
\v 21 ngi ndaá tsikíjngo‑la̱ ikon nga jè Nainá, ꞌñó tjín‑la̱ ngaꞌñó nga maá‑la̱ si̱hitjasòn ijye koni ꞌsín nga ijye kitsjà‑la̱ ꞌén‑la̱.
\v 22 ꞌKoa̱á ma‑ni ꞌkia̱ nga kijtse Nainá nga ndaá kjokjiín‑la̱ Abraham, ꞌkoa̱á ꞌsín kitsò‑la̱ nga xi̱ta̱ kixi̱‑ní.
\v 23 Nga ko̱ꞌsín tíchja̱ xa̱jo̱n, mì tsa tà a̱ꞌta ꞌtse̱ Abraham‑jìn nga tíchja̱.
\v 24 Ti̱ꞌkoa̱á a̱ꞌta tsa̱jién‑ná nga tíchja̱ ꞌén kìi̱; nga ti̱ꞌkoa̱á ꞌsi̱ín‑te‑ná kinda̱ Nainá nga xi̱ta̱ kixi̱ ki̱tso̱‑ná ta nga̱tjì‑la̱ nga makjiín‑ná a̱ꞌta ꞌtse̱ Nainá ra isikjaáya‑la̱ jè Na̱ꞌín‑ná Jesucristo a̱ꞌta ꞌtse̱ kjo̱biya;
\v 25 nga̱ kií xá‑ni ya̱ kjonga̱tsja‑ni kjo̱biya jè Jesús ta nga̱tjì‑la̱ jè jé ra tjín‑ná; ko̱ kií xá jaáya‑ila̱ mé‑ni nga xi̱ta̱ kixi̱ ko̱ma‑ná ya̱ ngixko̱n Nainá.
\c 5
\s Kóꞌsín ma‑ni nga xi̱ta̱ kixi̱ tsó‑ná Nainá
\p
\v 1 Ijyeé xi̱ta̱ kixi̱‑ná ra a̱ꞌta ꞌtse̱ Nainá, ta nga̱tjì‑la̱ nga makjiín‑ná ra a̱ꞌta ꞌtse̱, ꞌkoa̱á ma‑ni nga ijyeé tjín‑ná kjo̱ꞌnchán ko̱ ra jè. Jè kjo̱ꞌnchán ra a̱ꞌta ꞌtse̱ Na̱ꞌín‑ná Jesucristo sakó‑ná.
\v 2 Ti̱ꞌkoa̱á ya̱á nchrabá‑ni a̱ꞌta ꞌtse̱ kjo̱nda ra̱kìi̱, ta nga̱tjì‑la̱ nga makjiín‑ná ra a̱ꞌta ꞌtse̱; ꞌñó tjíjngo takén a̱ꞌta ꞌtse̱ kjo̱nda kìi̱, ko̱ ꞌñó matsja‑ná nga ko̱ꞌsín chiñá‑lá kjo̱nda‑la̱ nga ti̱ꞌkoa̱á ꞌse̱‑ná jè kjoa̱jeya‑la̱ Nainá.
\v 3 Mì tsa tà a̱ꞌta ꞌtse̱ kjoa̱ kìi̱ nga ꞌñó matsja‑ná, ti̱ꞌkoa̱á matsjaá‑te‑ná ꞌkia̱ nga kjo̱hiꞌin batojieén. ꞌYa‑ná nga ꞌkia̱ nga kjo̱hiꞌin batojieén, ya̱á sa̱kó‑ná ngaꞌñó nga kóꞌsín ma chíkjoa̱jin‑ná.
\v 4 ꞌKia̱ nga sakó‑ná ngaꞌñó kóꞌsín nga chíkjoa̱jin‑ná, ya̱á ꞌya‑la̱ kóꞌsín kjén; ꞌkia̱ nga ꞌya‑la̱ kóꞌsín kjén, ya̱á nchrabá‑ni nga chiñá‑lá jè kjo̱nda ra tsjá‑ná Nainá.
\v 5 Ko̱ jè ra chiñá‑lá mì tsa kjo̱sabà tsjá‑ná a̱skan‑nioo̱, ki̱tjasón‑ní; nga̱ jè Nainá ijyeé nda isíkíjnajin ya̱ inìma̱‑ná jè kjo̱tsjacha‑la̱ ra a̱ꞌta ꞌtse̱ Inìma̱ Tsje‑la̱ nchrabá‑ni, Inìma̱ Tsje ra jè Nainá kitsjá‑ná.
\p
\v 6 ꞌKia̱ nga ijchò ni̱chjin‑la̱, jè Cristo ꞌken‑tjì ngajo‑ná, ngaꞌtsì‑ná ra tjín‑ná jé, ta nga̱tjì‑la̱ tsìn‑ná ngaꞌñó kóꞌsín nga ma ta jién kítjo̱kajieén jé‑ná.
\v 7 Mì tsa taxki̱ tjín xi̱ta̱ ra mejèn‑la̱ nga ki̱yá ngajo‑la̱ ra kjꞌií xi̱ta̱, ni̱ꞌsín xi̱ta̱ kixi̱. Tanga tsa kií ni̱chjin tjín iꞌka‑ni xi̱ta̱ ra tsjá‑la̱ ikon nga ki̱yá‑tjì‑la̱ jngo xi̱ta̱ ra ꞌñó nda xi̱ta̱, tanga iꞌiín tjín.
\v 8 Tanga jè Nainá ndaá bakón nga ꞌñó tsjake‑ná ra jién, nga ni̱ꞌsín takó ꞌñó tse jé titsa̱jnajieén, jè Cristo ꞌken ngajo‑ná.
\v 9 Tsa jè nga̱tjì‑la̱ jní ra tsikíxten Cristo nga ijye xi̱ta̱ kixi̱ ma‑ná ra a̱ꞌta ꞌtse̱ Nainá, isa̱á ta tjín kixi̱ kjoa̱ ꞌndi̱‑ni̱ nga a̱ꞌta ꞌtse̱‑ní ma kítjo̱kajieén kjo̱hiꞌin ra tsjá Nainá ꞌkia̱ nga kje̱heꞌtà ni̱chjin.
\v 10 ꞌKia̱ nga jè ni̱chjin nga kondra̱ tsikitsa̱jna‑lá Nainá, ti̱jé‑ni Nainá tsikíndajín‑ko̱‑ná kjoa̱ a̱ꞌta ꞌtse̱ kjo̱biya‑la̱ Iꞌndí‑la̱. ꞌNdi̱ ꞌndi̱ ꞌkia̱ nga ijye nda báko̱‑ná Nainá, isa̱á tjín kixi̱ kjoa̱ nga maá kítjo̱kajieén kjo̱hiꞌin ꞌtse̱ jé‑ná ra a̱ꞌta ꞌtse̱ Cristo, ta nga̱tjì‑la̱ nga jaáya‑ila̱ ko̱ tíjnakon‑ní.
\v 11 Ko̱ mì tsa tà jñà‑nì kjoa̱, ti̱ꞌkoa̱á ꞌñó matsja‑ná a̱ꞌta ꞌtse̱ Nainá ta nga̱tjì‑la̱ nga makjiín‑ná ra a̱ꞌta ꞌtse̱ Jesucristo ra batéxoma‑ná; nga̱ a̱ꞌta ꞌtse̱‑ní nga ma chibanda‑ná ko̱ jè Nainá.
\p
\v 12 ꞌKia̱ nga ꞌjahaꞌsen kjoa̱ ꞌtse̱ jé ya̱ i̱sàꞌnde, jngo‑ní xi̱ta̱ ra tsakátsji‑jé. Ko̱ jé kjoa̱ ꞌtse̱ jé ra ꞌjiìkó kjo̱biya; ꞌkoa̱á ma‑ni nga ko̱ꞌsín sakó‑la̱ ngaꞌtsì xi̱ta̱ ra ꞌmì kjo̱biya; ta nga̱tjì‑la̱ nga̱ ngaꞌtsí‑ni xi̱ta̱ nga iskajin jé.
\v 13 ꞌKia̱ nga ti̱kjè kjo̱téxoma tjín‑ni ya̱ i̱sàꞌnde, ta̱ꞌkoa̱ ijyeé tjín ra kjoa̱ ꞌtse̱ jé. Tanga mì tsa kinda̱ ma ra kjoa̱ ꞌtse̱ jé, ꞌkia̱ nga mì tsa mé kjo̱téxoma tjín.
\v 14 Skanda ꞌkia̱‑ni jè ni̱chjin ꞌtse̱ Adán skanda ni̱chjin ꞌtse̱ Moisés, jè kjo̱biya tsatéxoma a̱ꞌta ꞌtse̱ ngaꞌtsì xi̱ta̱, ni̱ꞌsín mì tsa ko̱ꞌsín tjín jé ra tsakátsji koni ꞌsín kiꞌsìn jè Adán nga tsatonè‑la̱ kjo̱hixi̱ ra kitsjà‑la̱ Nainá. Jè Adán, ti̱jé ngoya‑la̱ jè ra a̱skan ꞌji.
\s Yá nga̱tjì‑la̱ nga ꞌji ra jé ko̱ nga ꞌji jè ra kjo̱nda
\p
\v 15 Tanga kjoa̱ ꞌtse̱ jé ra tsakátsji Adán, mì kì mangásòn‑ko̱ koni jè kjo̱nda ra kitsjà kjo̱tjò Nainá; ta nga̱tjì‑la̱ kjoa̱ ꞌtse̱ jé ra tsakátsji jngo xi̱ta̱, kjín xi̱ta̱ tsako̱‑la̱ kjo̱biya; tanga jè kjo̱nda ra kitsjà kjo̱tjò Nainá a̱ꞌta ꞌtse̱ jngo xi̱ta̱, jè ra ꞌmì Jesucristo, isa̱á tse kjo̱nda tjín‑la̱ nga̱ kjín xi̱ta̱ machikonꞌtin‑ni.
\v 16 Ko̱ mì kì mangásòn‑ko̱ jè kjo̱nda ra tsjá kjo̱tjò Nainá ko̱ kjoa̱ ꞌtse̱ jé ra tsakátsji ra tà jngo‑ni xi̱ta̱. Nga̱ ta kií nga̱tjì‑la̱ nga jngo xi̱ta̱ tsakátsji‑jé, nga ko̱ꞌsín kitsjà kjo̱hixi̱ Nainá nga kjo̱hiꞌin kataꞌse‑la̱ ngaꞌtsì xi̱ta̱. Tanga ꞌkia̱ nga ꞌñó kjìn xi̱ta̱ tsakátsji‑jé, kií nga̱tjì‑la̱ nga ko̱ꞌsín kitsjà jnchro kjo̱nda Nainá nga jñà xi̱ta̱, kixi̱ katitsa̱jna ya̱ ngixko̱n.
\v 17 Tsa ta jè nga̱tjì‑la̱ nga jngo xi̱ta̱ ra tsakátsji‑jé nga tsatonè‑la̱ jngo kjo̱téxoma, nga ko̱ꞌsín jè kjo̱biya tsatéxoma, isa̱á ta ꞌñó nda kítsa̱jnakon jñà xi̱ta̱ ra ꞌñó tse kjo̱nda‑la̱ Nainá tjábé‑la̱, ti̱ꞌkoa̱ ꞌñó tse kjo̱tjò‑la̱ Nainá ꞌki̱‑la̱ nga xi̱ta̱ kixi̱ kítsa̱jna ya̱ ngixko̱n Nainá, ta nga̱tjì‑la̱ jngo xi̱ta̱ ra ꞌmì Jesucristo.
\p
\v 18 Koni ꞌsín nga ta jè nga̱tjì‑la̱ kjoa̱ ꞌtse̱ jé ra tsakátsji jngo xi̱ta̱ ra kiꞌmì Adán, nga ko̱ꞌsín kjo̱hiꞌin iskanè‑la̱ ngaꞌtsì xi̱ta̱, ꞌkoa̱á ti̱ꞌsín jè kjoa̱kixi̱ ra kiꞌsìn jè Jesucristo, ya̱á nchrabá‑ni nga xi̱ta̱ kixi̱ ma ngaꞌtsì xi̱ta̱, mé‑ni nga kataꞌse‑la̱ kjo̱binachon.
\v 19 Koni ꞌsín nga ta jè‑ni nga̱tjì‑la̱ jngo xi̱ta̱ ra mì kì nda isìhitjasòn‑la̱ Nainá, nga ko̱ꞌsín jé iskajin ngaꞌtsì xi̱ta̱, ꞌkoa̱á ti̱ꞌsín nga ta jè nga̱tjì‑la̱ jngo xi̱ta̱ ra nda isìhitjasòn‑la̱ Nainá jè ra ꞌmì Jesucristo, nga ko̱ꞌsín kjìn xi̱ta̱ kixi̱ ko̱ma‑ni ya̱ ngixko̱n Nainá.
\p
\v 20 Kií xá itjo‑ni jè kjo̱téxoma ꞌtse̱ Moisés, mé‑ni nga isa̱ nda ko̱chi̱ya-isa‑la̱ kóꞌsín kjokjìn‑ya‑isa ra kjoa̱ ꞌtse̱ jé. Tanga ꞌkia̱ nga ꞌñó kjokjìn‑ya‑isa ra kjoa̱ ꞌtse̱ jé, isa̱á ngi ko̱ꞌki iskasòn‑isa jè kjo̱nda‑la̱ Nainá.
\v 21 Koni ꞌsín nga jè tsatéxoma ra kjoa̱ ꞌtse̱ jé nga biya xi̱ta̱, ꞌkoa̱á ti̱ꞌsín jè kjo̱nda ra tsjá Nainá katatéxoma nga xi̱ta̱ kixi̱ katameé ya̱ ngixko̱n Nainá mé‑ni nga kataꞌse‑ná kjo̱binachon ra mì feheꞌta skanda ta mé ni̱chjin‑ni ra a̱ꞌta ꞌtse̱ Na̱ꞌín‑ná Jesucristo.
\c 6
\s Kóꞌsín chja̱‑ni ꞌkia̱ nga satíndé
\p
\v 1 ¿Kóꞌsín kixé? ¿A ndaá tjín nga kjótsji‑jé iseé mé‑ni isa̱ tse kjo̱nda katatsjá-isa‑ni Nainá?
\v 2 Majìn, mì kì ti̱ ma‑ni tsa ko̱ꞌsín ꞌsie̱én. Jién tsa ijyeé titsa̱jnaꞌtaxín‑lá ra kjoa̱ ꞌtse̱ jé koni tsa ijye ꞌkeén ra a̱ꞌta ꞌtse̱, ¿kóꞌsín ko̱ma‑ni nga takó ya̱ ki̱tsa̱jnajin iseé?
\v 3 ¿A mí ꞌya jiòn nga ngaꞌtsì‑ná ra a̱ꞌta ꞌtse̱ Jesucristo isatíndé, mé‑ni nga jngo ka̱ma‑ná ra ko̱ jè, kií xá isatíndá‑ná nga ya̱ bitjàha̱ꞌse̱nꞌtá‑lá a̱ꞌta ꞌtse̱ kjo̱biya‑la̱?
\v 4 ꞌKia̱ nga satíndé, ꞌkoa̱á ꞌsín jngoya‑la̱ koni tsa ya̱ sihiꞌndeꞌtá‑lá Cristo ya̱ a̱ꞌta ꞌtse̱ kjo̱biya‑la̱. Koni ꞌsín nga a̱ꞌta ꞌtse̱ ngaꞌñó‑la̱ Nainá ra ꞌñó jeya tíjna jaáya india‑ila̱ jè Cristo; ꞌkoa̱á ti̱ꞌsín machjeén nga ko̱ꞌsín si̱jché ijo‑ná nga jngo kjo̱binachon xi̱tse̱ chjíbé.
\p
\v 5 Tsa ya̱ itjàha̱ꞌse̱nꞌtá‑lá jè Cristo koni ꞌsín nga ꞌken ra jè, ꞌkoa̱á ti̱ꞌsín kjoa̱áya‑ná ra jién koni ꞌsín nga jaáya‑la̱ ra jè.
\v 6 ꞌYa‑ná nga jè kjoa̱ jchínga ra kiꞌchá‑ná, ya̱á isiꞌtako̱ Cristo ya̱ a̱ꞌta krò, mé‑ni nga katachija‑ni jè ngaꞌñó ra tjín‑la̱ ijo jé‑ná; nga mì ti̱jè si̱ìkijne‑ná.
\v 7 Nga̱ jngo xi̱ta̱ ra ijye kàbiya, ijyeé tíjnandi̱í‑ni ra a̱ꞌta ꞌtse̱ jé.
\v 8 ꞌKia̱ nga ijye ya̱ ꞌkenꞌtá‑lá jè Cristo, tjíjngoó takén nga ya̱ ki̱tsa̱jnakon‑ke̱é.
\v 9 ꞌYa‑ná nga koni ꞌsín nga jaáya‑la̱ jè Cristo ꞌkia̱ nga ꞌken, ni̱ì‑ti̱‑jngo ni̱chjin ki̱yá india‑ni. Jè ra ꞌmì kjo̱biya, mì kì ti̱ mé ngaꞌñó tjín‑la̱ ra a̱ꞌta ꞌtse̱.
\v 10 ꞌKia̱ nga ꞌken jè Cristo, ta india kjón‑ní ꞌken ra ta nga̱tjì‑la̱ kjoa̱ ꞌtse̱ jé; nga tíjnakon ꞌndi̱ ꞌndi̱, ngi a̱ꞌta ꞌtse̱ Nainá tíjnakon‑ni nga tísíhitjasòn‑la̱.
\v 11 Jiòn, ꞌkoa̱á ti̱ꞌsín ti̱kítsjen koni tsa ijye ꞌken ra a̱ꞌta ꞌtse̱ jé; tanga titsa̱jnakon‑nájiòn ra a̱ꞌta ꞌtse̱ Nainá nga ya̱ titsa̱jnako̱o jè Na̱ꞌín‑ná Jesucristo. Ko̱ a̱ꞌta ꞌtse̱ Nainá titsa̱jnakon‑no ꞌndi̱.
\p
\v 12 ꞌKoa̱á ma‑ni, kì ti̱ tsja biꞌnde‑no nga kjoa̱ ꞌtse̱ jé batéxomajin‑isa ya̱ ijo‑jé‑no, mé‑ni nga ko̱ma si̱kijne‑la, nga mì tsa ti̱ ya̱ si̱itjasòn‑la koni ꞌsín tjín kjoa̱ꞌcho ra sasén‑la̱ ijo‑ná.
\v 13 Kì ya̱ nìnga̱tsja ijo‑no ra kjoa̱ ꞌtse̱ jé, nga ko̱ꞌsín katachjeén koni tsa jñà ki̱cha̱ ra ꞌcho machjeén. Ta isa̱á jè Nainá ti̱nga̱tsja jiòn ijo‑no koni tsa jngo xi̱ta̱ ra ijye ꞌken nga jaáya‑ila̱ ra a̱ꞌta ꞌtse̱ kjo̱biya. Nga ko̱ꞌsín katasíchjeén‑najiòn Nainá koni jngo ki̱cha̱ ra a̱ꞌta ꞌtse̱ kjo̱nda machjeén.
\v 14 ꞌKoa̱á ꞌsín ko̱ma‑ni nga mì ti̱ kjoa̱ ꞌtse̱ jé ko̱tèxoma‑ni ra a̱ꞌta tsa̱jiòn, ta nga̱tjì‑la̱ nga mì tsa a̱ꞌta ꞌtse̱ kjo̱téxoma ꞌtse̱ Moisés titsa̱jna‑no ꞌndi̱‑ni̱, ta a̱ꞌta ꞌtse̱é kjo̱nda‑la̱ Nainá ra ta tsjá kjo̱tjò titsa̱jna‑no.
\s Mé ra nikijne‑lá ꞌkia̱ nga ta kjoa̱ ꞌtse̱ jé fahijtake̱é
\p
\v 15 ¿Kó kixé, a kjótsji‑jé iseé ꞌkia̱ nga a̱ꞌta ꞌtse̱ kjo̱nda‑la̱ Nainá titsa̱jna‑ná nga mì tsa ti̱ a̱ꞌta ꞌtse̱ kjo̱téxoma‑la̱ Moisés titsa̱jna‑ná? Majìn, mì tsa ko̱ꞌsín tjín‑jìn.
\v 16 ¿A mí ꞌya jiòn, tsa ꞌkia̱ yá ra ngi ya̱ si̱itjasòn kiꞌta‑la nga ya̱ si̱xáꞌta‑la; ngi chi̱ꞌnda ꞌtse̱é ꞌsi̱n‑no? ꞌKoa̱á ti̱ꞌsín tjín, tsa ꞌkia̱ nga jè kjoa̱ ꞌtse̱ jé si̱nga̱tsja ijo‑no, ki̱yá‑nó; tanga tsa jè Nainá si̱nga̱tsja ijo‑no, ya̱á si̱itjasòn‑la nga kixi̱ ꞌsia̱an ya̱ ngixko̱n ra jè.
\v 17 Tanga tse kjo̱nda kataꞌse‑la̱ Nainá, nga ni̱ꞌsín ya̱ inìnga̱tsja jiòn ijo‑no ra kjoa̱ ꞌtse̱ jé, nga ya̱ inìhitjasòn‑la koni tsa jngo chi̱ꞌndaꞌñó‑la̱, ꞌndi̱ ꞌndi̱ ijyeé ngi ko̱ó inìma̱‑no nga ko̱ꞌsín i̱nchinitjasòn koni ꞌsín ngi nda tjín ꞌén kixi̱ ra kiꞌsena̱jmíya‑no.
\v 18 ꞌNdi̱‑ni̱ ijyeé titsa̱jnandi̱í‑no ra kjoa̱ ꞌtse̱ jé; ijyeé chi̱ꞌnda‑la̱ ra ꞌtse̱ kjoa̱ kixi̱í ma jiòn; ko̱ tjíné‑no nga ko̱ꞌsín si̱itjasòn koni ꞌsín síjé ra kjoa̱kixi̱.
\v 19 Jñà ꞌén ra tíchjà nga tíbakó‑no mì tsa jñà‑jìn ra chjá tsò, ta nga̱tjì‑la̱ kjè tsa ꞌñó tjín jè takòn, takó kjè tsa nda fìya‑no ra kjoa̱ ꞌtse̱ Nainá. Koni ꞌsín kiꞌnià ti̱ꞌsa̱ kjotseé nga ya̱ inìnga̱tsja ijo‑no kjoa̱ ra tjé tjín ko̱ ra ꞌcho tjín ko̱ jñà tsatéxoma‑no; ꞌndi̱‑ni̱, ꞌkoa̱á ti̱ꞌsín ti̱nga̱tsja ijo‑no a̱ꞌta ꞌtse̱ kjoa̱kixi̱ mé‑ni nga jè kjoa̱kixi̱ katatéxoma‑no nga tsje ki̱tsa̱jna ya̱ ngixko̱n Nainá.
\p
\v 20 ꞌKia̱ nga ko̱ꞌsín ya̱ kiìchja̱ꞌnda‑no ra kjoa̱ ꞌtse̱ jé, mì tsa ya̱ inìhitjasòn‑la ra kjoa̱kixi̱ ꞌtse̱ Nainá.
\v 21 Tanga, ¿mé kjo̱tjò ra inikijne‑la jiòn ra a̱ꞌta ꞌtse̱ kjoa̱ ꞌtse̱ jé? Ko̱ ꞌndi̱‑ni̱ skanda masabà‑najiòn ꞌtse̱ kjoa̱ kìi̱, nga̱ tà ya̱á fìko̱‑ná ñánda̱ nga tjín kjo̱biya.
\v 22 ꞌNdi̱ ꞌndi̱ ꞌkia̱ nga ijye titsa̱jnandi̱í‑no ra kjoa̱ ꞌtse̱ jé, chi̱ꞌnda‑la̱ Nainá‑nájiòn; jè kjo̱tjò ra títjábé‑no jè‑ní nga tsje i̱nchibitsa̱jna jiòn ya̱ ngixko̱n Nainá. Ko̱ ra feheꞌta‑ni, ꞌse̱‑nó kjo̱binachon ra mì feheꞌta ni̱ ta mé ni̱chjin‑nioo̱.
\v 23 Jè chjí‑la̱ ra kjoa̱ ꞌtse̱ jé, ta kjo̱biya‑ní ra nikijne‑lá. Tanga jè kjo̱tjò ra tsjá‑ná Nainá jé‑ní kjo̱binachon ra mì feheꞌta ni̱ta mé ni̱chjin‑ni, ra ꞌbí‑ná nga ya̱ titsa̱jnake̱é Cristo Jesús ra batéxoma‑ná.
\c 7
\s Mé ngaꞌñó ra tjín‑la̱ jè kjo̱téxoma
\p
\v 1 Jiòn ꞌndsé ndaá tjíjin‑no, jè kjo̱téxoma, skanda ya̱á feheꞌta ngaꞌñó‑la̱ ꞌkia̱ nga biya jè xi̱ta̱. Jiòn‑nó ra ko̱ꞌsín tíxian‑no, jiòn ra ijye nda tjíjin‑no kóꞌsín tíchja̱ kjo̱téxoma.
\v 2 ꞌKoa̱á ngoya‑la̱ koni jngo chjo̱ón ra tjín‑la̱ ꞌxi̱n; ꞌkoa̱á ꞌsín tsò kjo̱téxoma nga mì kì ko̱ma tsjín‑ni xákjén ꞌkia̱ nga takó títsa̱jnakon ngajòo̱. Tanga tsa ki̱yá jè ꞌxi̱n‑la̱, jè chjo̱ón, ijyeé tíjnandi̱í‑ni a̱ꞌta ꞌtse̱ kjo̱téxoma ra̱kìi̱.
\v 3 ꞌKia̱ takó tíjnakon ꞌxi̱n‑la̱ jè chjo̱ón, ko̱ tsa kjꞌií xi̱ta̱ ꞌxi̱n ki̱xan‑ko̱, kjoa̱ chijngií ra tíꞌsín, tanga tsa ijye ꞌken ꞌxi̱n‑la̱, jè chjo̱ón, ijyeé tíjnandi̱í‑ni ra kjoa̱ ꞌtse̱ kjo̱téxoma ra̱kìi̱; ko̱maá ki̱xan‑ko̱ india‑ni ra kjꞌií xi̱ta̱ ꞌxi̱n. Mì tsa ti̱ kjoa̱ chijngi‑ni ra ꞌsi̱in.
\p
\v 4 ꞌKoa̱á ti̱ꞌsín tjín ra a̱ꞌta tsa̱jiòn‑jiòn ra ꞌndsé chibé, ijyeé ꞌken‑nájiòn ra a̱ꞌta ꞌtse̱ ngaꞌñó ra tjín‑la̱ kjo̱téxoma, ta nga̱tjì‑la̱, ꞌkia̱ nga ꞌken jè Cristo, ya̱á ta̱ña ꞌkenꞌta‑la jiòn, mé‑ni nga ꞌndi̱ ꞌndi̱ jè ki̱chja̱ꞌnda‑no jè Cristo ra jaáya‑la̱ ya̱ a̱jin‑la̱ miꞌken, ko̱ mé‑ni nga kataꞌya‑la̱ ra a̱ꞌta tsa̱jién kjo̱nda ra jè Nainá sasén‑la̱.
\v 5 ꞌKia̱ nga ti̱ꞌsa̱, ya̱á tsikìtsa̱jnajieén kjoa̱ ꞌtse̱ jé ra isíjé ijo‑ná. Ko̱ ꞌkia̱ nga ꞌji jè kjo̱téxoma, ta isa̱á jnchro isa̱ ꞌñó isíjé ijo‑ná jñà ra kjoa̱ꞌcho. Ko̱ jñà kjoa̱ꞌcho ra iskajieén, kjo̱biyaá ìko̱‑ná.
\v 6 Tanga ꞌndi̱ ꞌndi̱, ijyeé ꞌkeén ra a̱ꞌta ꞌtse̱ kjo̱téxoma ra kitsabáꞌñó‑ná kjotseé; titsa̱jnandi̱í‑ná ko̱ ijyeé maá si̱xá‑lá Nainá nga jngo kjoa̱ xi̱tse̱ tjaꞌché koni ꞌsín bakón‑ya‑ná jè Inìma̱ Tsje‑la̱ Nainá. Mì tsa ti̱ ko̱ꞌsín ꞌsia̱n‑ná koni ꞌsín tjín kjo̱téxoma jchínga ra xa̱jo̱n tjíꞌta.
\p
\v 7 ¿Kóꞌsín kixé? Ra kjoa̱ ꞌtse̱ kjo̱téxoma, ¿a ꞌchoó tjín? ¿A kjoa̱ ꞌtse̱ jé‑ní? Majìn. Mì tsa ko̱ꞌsín tjín‑jìn. ꞌKoa̱á ngoya‑la̱ koni tsa ꞌa̱n, tsa tsìn kjo̱téxoma, mí‑la kì kíjtsee̱ ñáa̱‑ni ra kjoa̱ ꞌtse̱ jé. Ko̱ mí‑la kì kjòchi̱ya‑na kótsò‑ni nga mì kì ma si̱kjaájieén tsajmì ra mì tsa̱jién, tsa mì jè kjo̱téxoma ko̱ꞌsín ꞌbéna̱jmí‑ná nga tsò: “Kì jñà nìkjaajin tsajmì ra mì ji̱ bako̱‑li.”
\v 8 Tanga jè kjoa̱ ꞌtse̱ jé, ta isa̱á ya̱ isakò-isa‑la̱ ngaꞌñó ra a̱ꞌta ꞌtse̱ kjo̱téxoma; ꞌkoa̱á kjomà‑ni, ta isa̱á ꞌñó kjín ndi̱yá‑la̱ tsajmì ra jahajin‑isa‑na ra mì tsa ꞌa̱n bako̱‑na. ꞌKoa̱á ma‑ni, tsìn‑la̱ ngaꞌñó ra kjoa̱ ꞌtse̱ jé, ꞌkia̱ nga mì tsa kjo̱téxoma tjín.
\p
\v 9 ꞌKia̱ nga ti̱ꞌsa̱ kjotseé, ta ꞌkoa̱á ꞌsín tsakáti̱jnaa̱ nga mì kì kíjtsee̱ kóꞌsín tjín kjo̱téxoma. Tanga ꞌkia̱ nga ijye kíjtsexkon jè kjo̱téxoma, jè kjoa̱ ꞌtse̱ jé isa̱á ꞌñó kiꞌse‑la̱ ngaꞌñó; ꞌkoa̱á ma‑ni nga ta kjo̱biyaá isakò‑na.
\v 10 Jè kjo̱téxoma ra tjínè‑la̱ nga kjo̱binachon tsjá‑ná, tà isa̱á kjo̱biya kitsjá‑na.
\v 11 Tanga jè kjoa̱ ꞌtse̱ jé, ta isa̱á ya̱ isakò‑la̱ ngaꞌñó ra a̱ꞌta ꞌtse̱ kjo̱téxoma nga iskonda̱cha̱‑na, ꞌkoa̱á ma‑ni nga kjo̱biya isakò‑na.
\v 12 Ra kixi̱ kjòn‑ni kjoa̱, jè kjo̱téxoma, tsjeé tjín; nga koni ꞌsín batéxoma jñà ꞌén ra tjíꞌta, tsje‑ní, kixi̱‑ní, ko̱ ndaá tjín.
\v 13 ¿Tanga kóꞌsín tjín? ¿A ta isa̱á jnchro jè kjoa̱ ra nda tjín ꞌjií síꞌken‑na? Majìn, mì tsa ko̱ꞌsín tjín‑jìn. Mé‑ni kataꞌya‑la̱ nga jè kjoa̱ ꞌtse̱ jé, nga ꞌñó ꞌcho tjín, ꞌkoa̱á ma‑ni nga jè jnchro kjoa̱ ꞌtse̱ jé, kiìko̱jin‑na kjo̱biya nga iskábé ra kjoa̱ ꞌtse̱ kjo̱téxoma ra nda tjín, mé‑ni nga a̱ꞌta ꞌtse̱ kjo̱téxoma kataꞌya‑la̱ nga ꞌñó ꞌcho tjín ra kjoa̱ ꞌtse̱ jé.
\s Kóꞌsín kjaán‑kjo ijo‑ná ko̱ kjo̱bítsjen‑ná ra a̱ꞌta ꞌtse̱ Nainá
\p
\v 14 ꞌYa‑ná nga jè kjoa̱ ꞌtse̱ kjo̱téxoma, kjo̱bítsjen ꞌtse̱ Inìma̱ Tsje‑la̱ Nainá‑ní; tanga ra ꞌa̱n, ijo jé tsáꞌya̱; ya̱á nga̱tsja‑na ra kjoa̱ ꞌtse̱ jé.
\v 15 Mì kì machi̱ya‑na mé kjoa̱ ra ꞌsín ijo‑na̱. Jñà kjoa̱ ra nda tjín ra mejèn‑na nga ꞌsiaa̱n, mì tsa jè sìhitjásòo̱n. Tà isa̱á jñà kjoa̱ ra mì kì sasén‑la̱ inìma̱‑na̱ síhitjasòn ijo‑na̱. Jñà kjoa̱ ra ꞌsiaa̱n, mì kì machi̱ya‑na.
\v 16 ꞌKia̱ nga ko̱ꞌsín ꞌsín ijo‑na̱ jñà kjoa̱ ra mì tsa ꞌa̱n mejèn‑na, ꞌkoa̱á ꞌsín xiaa̱n nga kixi̱í kjoa̱ nga ndaá tjín koni ꞌsín tíchja̱ kjo̱téxoma.
\v 17 ꞌKia̱ nga ko̱ꞌsín ꞌsín ijo‑na̱ nga bátsji‑jé, mì tsa ti̱ ꞌa̱n‑naa̱ ra ko̱ꞌsín ꞌsiaa̱n, jè kjoa̱ ꞌtse̱ jé ra ya̱ tíjnajin ya̱ ijo‑na̱ ra ko̱ꞌsín ꞌsín.
\v 18 ꞌA̱n ra xi̱ta̱ i̱sàꞌnde ꞌmì‑na, be‑ná nga mì kì nda tjín kjoa̱ ra tíjnajin ya̱ ijo‑na̱. Nga̱ mejèn‑na nga nda ꞌsiaa̱n ra ꞌa̱n, tanga jè ijo‑na̱ mì kì ma‑la̱ síhitjasòn kjoa̱ ra nda tjín.
\v 19 Mì tsa ko̱ꞌsín ꞌsiaa̱n koni ꞌsín tjín kjo̱nda ra ꞌa̱n mejèn‑na ꞌsiaa̱n; tà isa̱á jñà sìhitjásòo̱n jñà kjoa̱ꞌcho ra mì ꞌa̱n mejèn‑na ꞌsiaa̱n.
\v 20 ꞌKia̱ nga ko̱ꞌsín ꞌsiaa̱n jñà kjoa̱ꞌcho ra mì jè inìma̱‑na̱ mejèn‑la̱, mì tsa ti̱ ꞌa̱n‑naa̱ ra ko̱ꞌsín ꞌsiaa̱n, jé kjoa̱ ꞌtse̱ jé ra ya̱ tíjnajin ijo‑na̱ ra ko̱ꞌsín ꞌsín.
\v 21 Nga̱ ni̱ꞌsín mejèn‑na nga nda ꞌsiaa̱n, ta isa̱á kjꞌií ꞌsín tjín kjo̱hixi̱ ra sakó‑na a̱ꞌta tsa̱ꞌa̱n: Nga tà kjoa̱ꞌcho tíjnajin kiꞌta ya̱ ijo‑na̱.
\v 22 Tanga ra ya̱ a̱jin inìma̱‑na̱ batoó matsja‑la̱ ra a̱ꞌta ꞌtse̱ kjo̱téxoma‑la̱ Nainá.
\v 23 Tanga tjín ìjngo kjoa̱ ra ya̱ tísíxájin ya̱ ijo‑na̱ ra mì kì tsjáꞌnde‑na nga nda ꞌsiaa̱n; jè kjoa̱ ꞌtse̱ jé ra tíjnajin‑na, kjaán‑kjo‑ní ko̱ kjo̱bítsjen‑na̱ ra mejèn‑la̱ nga nda ꞌsi̱in. Ko̱ jé kjoa̱ ꞌtse̱ jé ra tísíxájin ijo‑na̱ síkijne‑na nga ko̱ꞌsín ꞌcho ꞌsiaa̱n.
\v 24 I̱ma̱‑ró‑na ra ꞌa̱n. ¿Yá ra ma‑la̱ ko̱chrjekàjin‑na a̱ꞌta ꞌtse̱ ngaꞌñó‑la̱ kjo̱biya ra tjín‑la̱ ijo jé‑na̱?
\v 25 Ta̱ jngoó jè Nainá. Kií ko̱ꞌsín xin‑la̱ a̱ꞌta ꞌtse̱ Na̱ꞌín‑ná Jesucristo nga tse kjo̱nda kataꞌse‑la̱ ra jè.
\p Jè ꞌén ra ko̱tíxian‑no, jè‑ní nga ya̱á a̱jin kjo̱bítsjen‑na̱ sìhitjásòo̱n koni ꞌsín tjín kjo̱téxoma‑la̱ Nainá, tanga jè ijo‑na̱, takó ya̱á kjinè‑la̱ kjo̱téxoma ra kjoa̱ ꞌtse̱ jé.
\c 8
\s Yá kjòn‑ni ra ngi i̱xti‑la̱ Nainá ma
\p
\v 1 Tanga ꞌndi̱ ꞌndi̱, mì tsa ti̱ mé kjo̱hiꞌin tjín‑ni a̱ꞌta ꞌtse̱ xi̱ta̱ ra ya̱ títsa̱jnako̱ Cristo, [jñà xi̱ta̱ ra mì tsa ti̱ ko̱ꞌsín i̱nchisíjchá‑ni ijo‑la̱ koni ꞌsín tjín kjoa̱ꞌcho ra síjé ijo‑ná; nga ꞌkoa̱á ꞌsín i̱nchisíjchá ijo‑la̱ koni ꞌsín síjé jè Inìma̱ Tsje‑la̱ Nainá].
\v 2 Jé ngaꞌñó‑la̱ Inìma̱ Tsje‑la̱ Nainá tsjá‑ná kjo̱binachon ꞌkia̱ nga ya̱ titsa̱jnake̱é jè Cristo; ko̱ jé síkíjnandi̱í‑ná a̱ꞌta ꞌtse̱ ngaꞌñó ra tjín‑la̱ kjoa̱ ꞌtse̱ jé ko̱ jè kjo̱biya.
\v 3 Jè kjo̱téxoma ꞌtse̱ Moisés mì kì kiꞌse‑la̱ ngaꞌñó nga isíkítsa̱jnandi̱í‑ná ra kjoa̱ ꞌtse̱ jé‑ná, ta nga̱tjì‑la̱ jè ijo‑ná ta jñá bátsji kjoa̱ ꞌtse̱ jé ra tjín ya̱ i̱sàꞌnde. Jè kjoa̱ ra mì kì ichìkjoa̱‑la̱ jè kjo̱téxoma, jé‑ní ra Nainá kiꞌsìn ꞌkia̱ nga isìkasén jè Iꞌndí‑la̱ koni jngo xi̱ta̱ i̱sàꞌnde ra ijo kiꞌse‑la̱ koni jñà xi̱ta̱ ra tjín‑la̱ jé. Kitsjà kjo̱tjó ijo‑la̱ Iꞌndí‑la̱ nga ꞌken, ta nga̱tjì‑la̱ ra kjoa̱ ꞌtse̱ jé‑ná. Nainá, ꞌkoa̱á ꞌsín kiꞌsìn nga jngó‑kjá tsjahíxìn jè kjoa̱ ꞌtse̱ jé ra tjín‑la̱ ijo‑ná.
\v 4 Nainá kií ko̱ꞌsín kiꞌsìn‑ni mé‑ni nga a̱ꞌta tsa̱jién katitjasòn‑ni koni ꞌsín síjé kjo̱hixi̱ ꞌtse̱ kjo̱téxoma, jién ra mì tsa ti̱ ko̱ꞌsín i̱nchiníjchá‑ná ijo‑ná koni ꞌsín mejèn‑la̱ ijo jé‑ná, nga̱ ijyeé ko̱ꞌsín i̱nchiníjché ijo‑ná koni ꞌsín mejèn‑la̱ jè Inìma̱ Tsje‑la̱ Nainá.
\p
\v 5 Jñà xi̱ta̱ ra ko̱ꞌsín ꞌsín koni ꞌsín síjé ijo jé‑la̱, ta jñá i̱nchisíkítsjen jñà kjoa̱ ra mejèn‑la̱ ijo‑la̱; tanga jñà ra ko̱ꞌsín ꞌsín koni ꞌsín nga síjé Inìma̱ Tsje‑la̱ Nainá, jñá i̱nchisíkítsjen jñà kjoa̱ ra mejèn‑la̱ Inìma̱ Tsje‑la̱ Nainá.
\v 6 ꞌKia̱ nga ta jñá níkítsjeén jñà kjoa̱ ra mejèn‑la̱ ijo‑ná, kjo̱biyaá fìko̱‑ná. Tanga ꞌkia̱ nga jñà níkítsjeén jñà kjoa̱ ra mejèn‑la̱ Inìma̱ Tsje‑la̱ Nainá, jè ꞌse̱‑ná ra kjo̱binachon ko̱ ra kjo̱ꞌnchán.
\v 7 Jñà kjo̱bítsjen ꞌcho ra ta jè kájno‑la̱ ijo‑ná, kondra̱ ꞌtse̱ Nainá‑ní. Nga̱ mì kì mejèn‑la̱ ko̱ mì kì ma‑la̱ síhitjasòn kjo̱téxoma ra ꞌtse̱ Nainá.
\v 8 Ko̱ jñà xi̱ta̱ ra ko̱ꞌsín ꞌsín koni ꞌsín tjín kjoa̱ ra síjé ijo‑la̱, mì kì ma‑la̱ nga ꞌsi̱in kjoa̱ ra sasén‑la̱ Nainá.
\p
\v 9 Tanga ra jiòn‑jiòn, mì tsa ti̱ ko̱ꞌsín i̱nchiníjchá‑no ijo‑no koni ꞌsín mejèn‑la̱ ijo jé‑no; ꞌkoa̱á ꞌsín titsa̱jna jiòn ꞌndi̱ ꞌndi̱ koni ꞌsín tjín ra síjé jè Inìma̱ Tsje‑la̱ Nainá nga ijyeé ya̱ tíjnajin inìma̱‑no jè Inìma̱ Tsje‑la̱ Nainá. Jñà xi̱ta̱ ra tsìn‑la̱ Inìma̱ Tsje‑la̱ Nainá ra tsjá jè Cristo, mì tsa xi̱ta̱ ꞌtse̱ Cristo‑jìn.
\v 10 Ijyeé ya̱ tíjnajin ya̱ inìma̱‑no jè Cristo, ꞌkoa̱á ma‑ni nga jè inìma̱‑no tíjnakon, ta nga̱tjì‑la̱ nga ijyeé xi̱ta̱ kixi̱‑najiòn ya̱ ngixko̱n Nainá; ni̱ꞌsín jè ijo‑no ijyeé ko̱ꞌsín tjínè‑la̱ nga ki̱yá ta nga̱tjì‑la̱ ra kjoa̱ ꞌtse̱ jé.
\v 11 ꞌKia̱ nga ya̱ tíjnajin inìma̱‑no jè Inìma̱ Tsje‑la̱ Nainá ra isikjaáya‑la̱ Jesucristo a̱ꞌta ꞌtse̱ kjo̱biya, Nainá, ꞌkoa̱á ti̱ꞌsín jè si̱íkítsa̱jnakon india‑ni ijo‑najiòn ra a̱ꞌta ꞌtse̱ Inìma̱ Tsje‑la̱ ra ya̱ tíjnajin inìma̱‑no.
\p
\v 12 Jién ra ꞌndsé chibé, tíjnaá jngo‑ná ra machjeén‑la̱ nga nda si̱hitjasón‑lá; tanga mì tsa jè‑jìn ijo‑ná ra machjeén‑la̱ takó ko̱ꞌsín si̱hitjasón‑lá koni ꞌsín tjín kjoa̱ꞌcho ra síjé.
\v 13 Nga̱ tsa takó ko̱ꞌsín ꞌsia̱an jiòn nga ya̱ kongíꞌta‑la kjoa̱ꞌcho ra mejèn‑la̱ ijo jé‑no, ki̱yá‑nájiòn. Tanga tsa ki̱ꞌnde‑la jè Inìma̱ Tsje‑la̱ Nainá nga jngó‑kjá katjahíxìn kjoa̱ꞌcho ra mejèn‑la̱ ijo jé‑no, ki̱tsa̱jnakon‑no.
\v 14 Nga̱ ngaꞌtsì jñà xi̱ta̱ ra jè Inìma̱ Tsje‑la̱ Nainá síchi̱ya‑la̱ kóꞌsín nga ꞌsi̱in, jñá‑ní ra i̱xti‑la̱ Nainá ꞌmì.
\v 15 Mì tsa jè kitsjá‑ná Nainá jngo inìma̱ ra takó ya̱ síkíjnajinꞌñó‑ná ra kjoa̱ ꞌtse̱ jé nga ya̱ ki̱tsa̱jin iseé ra kjo̱skon; jè Inìma̱ Tsje‑la̱ Nainá ra kitsjá‑ná, jé‑ní ra kjábétjò‑ná nga i̱xti‑la̱ Nainá ka̱meé, ra skanda maá ꞌmí‑lá Nainá ra a̱ꞌta ꞌtse̱: “Ji̱ A̱pá.”
\v 16 Jè Inìma̱ Tsje‑la̱ Nainá ꞌbéna̱jmí kixi̱‑la̱ jè inìma̱‑ná, nga ngi kixi̱í kjoa̱ nga i̱xti‑la̱ Nainá ꞌmí‑ná.
\v 17 ꞌKia̱ nga ijye i̱xti‑la̱ Nainá ꞌmì‑ná, ti̱ꞌkoa̱á tsa̱jién‑ná kjo̱tjò ra tjínda‑la̱ Nainá koni ꞌsín ijye kitsjà tsaꞌba nga tsjá‑ná; kjo̱tjò kìi̱ ya̱á ta̱ña tjábé‑ná ko̱ jè Cristo, tsa ti̱ꞌkoa̱ i̱nchinikjiín‑te kjo̱hiꞌin koni ꞌsín isìkjiín kjo̱hiꞌin ra jè, mé‑ni nga ꞌkia̱ ko̱ma a̱skan‑nioo̱, ya̱á ta̱ña jeya ki̱tsa̱jnake̱é.
\s Kóꞌsín tjín kjoa̱ ra chiñá‑la̱ ra ꞌsa̱ nchrabá
\p
\v 18 ꞌA̱n, ꞌkoa̱á ma‑na, koni ꞌsín tjín kjo̱hiꞌin ra i̱nchinikjieén ꞌndi̱‑ni̱, mì kì mangásòn‑ko̱ koni ꞌsín tjín kjoa̱jeya‑la̱ Nainá ra ꞌse̱‑ná ꞌkia̱ nga ko̱ma a̱skan‑nioo̱.
\v 19 Ngaꞌtsì ra jè Nainá tsikínda ra tjín ya̱ i̱sàꞌnde, ꞌñó i̱nchikoñá‑la̱ nga mejèn‑la̱ nga ske̱ jè ni̱chjin ꞌkia̱ nga jè Nainá ko̱kòn tsijen yá kjòn‑ni ra i̱xti‑la̱ ma.
\v 20 Ngaꞌtsì ra jè Nainá tsikínda, jngó‑kjá itsón‑jin‑ní koni ꞌsín tjínè‑la̱ nga ko̱chjeén kjòn‑ni, tanga mì tsa ki‑ni nga ta jñá ko̱ꞌsín kjomejèn‑la̱; kií‑ní nga jè Nainá ijye ko̱ꞌsín iskosòn‑la̱; tanga takó i̱nchikoñá‑ní
\v 21 nga ki̱jchó jè ni̱chjin ꞌkia̱ nga ti̱ꞌkoa̱ kítsa̱jnandi̱í‑ni a̱ꞌta ꞌtse̱ kjoa̱ ra ma‑la̱ síkitsón‑jin nga ki̱jchòtji̱ngi‑la̱ kjoa̱jeya ra ꞌse̱‑te‑la̱ jñà ra i̱xti‑la̱ Nainá ma.
\v 22 ꞌYa‑ná nga ngaꞌtsì ra jè Nainá tsikínda, skanda ꞌndi̱ ꞌndi̱ ngásòn ngáyaá i̱nchichja̱jé, ko̱ tseé kjo̱hiꞌin i̱nchisíkjiín koni jngo chjo̱ón ra iꞌndí títsin‑la̱.
\v 23 Mì tsa tà jñà‑jìn ra i̱nchichja̱jé; ti̱ꞌkoa̱á jién ra ijye tje̱n kitsjá‑ná Nainá jè Inìma̱ Tsje‑la̱, ti̱ꞌkoa̱á ꞌñó i̱nchibátéjé‑te inìma̱‑ná ra jién, nga i̱nchichiñé nga ꞌñó mejèn‑ná ꞌkia̱ nga ska̱ábétjó‑ná Nainá nga jngó‑kjá ya̱ ki̱tsa̱jnake̱é koni i̱xti‑la̱, ko̱ jè ijo‑ná kíjnandi̱í‑ni a̱ꞌta ꞌtse̱ kjoa̱ ra síkitsón‑ná.
\v 24 ꞌKia̱ nga jè Cristo ijye isíkítsa̱jnandi̱í‑ná, ꞌkoa̱á ꞌsín chiñá‑lá nga ꞌkoa̱á ꞌsín ki̱tjasòn kjoa̱ kìi̱. Tanga tsa ijyeé‑la tíꞌya‑la̱ jñà kjoa̱ ra i̱nchichiñá‑lá, mì‑la kì ti̱ mé jchíña‑isa‑lá; nga̱ jngo kjoa̱ ra ijye tíꞌya‑la̱, ¿mé ra ma jchíña‑isa‑lá ra a̱ꞌta ꞌtse̱?
\v 25 Tanga tsa ꞌkia̱ jè jchíñá‑lá jngo kjoa̱ ra kjè batsíjen‑ná, machjeén‑ní nga jchíñakjoa̱‑la nda‑nda‑lá.
\s Kóꞌsín basìko̱‑ná jè Inìma̱ Tsje‑la̱ Nainá
\p
\v 26 ꞌKoa̱á ti̱ꞌsín tjín, nga jè Inìma̱ Tsje‑la̱ Nainá basìko̱ꞌta‑ná a̱ꞌta ꞌtse̱ kjoa̱ ra síhinda takén. ꞌKia̱ nga mì sakó‑ná ꞌén kóꞌsín nga si̱jé‑lá Nainá ꞌkia̱ nga bitsaꞌba‑lá, jé Inìma̱ Tsje‑la̱ Nainá bítsaꞌbatjì‑ná jñà ꞌén ra mì kì ma‑ná nakjé ra jién.
\v 27 Jè Nainá ra ma‑la̱ kjóꞌta kóꞌsín tíjna jè inìma̱‑ná, ijyeé be‑ní kóꞌsín tjín jè ra mejèn‑la̱ Inìma̱ Tsje‑la̱. Nga̱ jè Inìma̱ Tsje‑la̱ Nainá ꞌkia̱ nga bítsaꞌbatjì xi̱ta̱ tsje‑la̱ Nainá, ꞌkoa̱á ꞌsín bítsaꞌba koni ꞌsín nga jè Nainá mejèn‑la̱.
\s Kóꞌsín nga ni̱mé tjín ra ma si̱ìkasénꞌtaxín‑ná ra a̱ꞌta ꞌtse̱ Nainá
\p
\v 28 Tjíjin‑ná, nga ngaꞌtsì kjoa̱ ra maꞌtin jñà xi̱ta̱ ra tsjake Nainá, ꞌkoa̱á ꞌsín ꞌsín Nainá nga basìko̱ꞌta tsje‑ní nga sakó‑la̱ kjo̱nda; ꞌkoa̱á ꞌsín síko̱ Nainá jñà xi̱ta̱ ra xá jè kiìchja̱‑ila̱ koni ꞌsín nga ijye jè tjínda‑la̱,
\v 29 jñà xi̱ta̱ ra xá ko̱ꞌsín ijye tsikíꞌta xko̱n‑ni Nainá nga ti̱ꞌsa̱ tjàꞌtsin‑la̱ kjoa̱; ti̱ꞌkoa̱á ijyeé ko̱ꞌsín iskosòn‑la̱ nga ngásòn ko̱ma koni jè Iꞌndí‑la̱, mé‑ni nga jè ra Iꞌndí‑la̱, ꞌkoa̱á ꞌsín kíjna koni nga Iꞌndí‑tjòn ya̱ ñánda̱ nga kjìn ma‑ni i̱xti ꞌndse̱.
\v 30 A̱ꞌta ꞌtse̱ jñà xi̱ta̱ ra jè Nainá ijye ko̱ꞌsín iskosòn‑la̱, ti̱ꞌkoa̱á xá kiìchja̱‑ila̱; ko̱ jñà ra xá kiìchja̱‑ila̱, ti̱ꞌkoa̱á xi̱ta̱ kixi̱í kiꞌsìn ra a̱ꞌta ꞌtse̱; ko̱ jñà ra xi̱ta̱ kixi̱ kiꞌsìn; ti̱ꞌkoa̱á kitsjá‑la̱ kjoa̱jeya‑la̱.
\p
\v 31 ¿Kóꞌsín kixó iseé a̱ꞌta ꞌtse̱ kjoa̱ kìi̱? ꞌKia̱ nga jè Nainá tíbasiko̱tjì‑ná, ni̱yá‑la ra ma kó si̱ko̱‑ná.
\v 32 Jè Nainá nda skanda mí ꞌon kjomà‑la̱ jè Iꞌndí‑la̱, ta isa̱á kitsjà kjo̱tjó‑ní nga ꞌken ngajo‑ná ngaꞌtsì‑ná. Koni ꞌsín nga ijye kitsjá‑ná Iꞌndí‑la̱, ¿a mí ti̱ꞌkoa̱á ya̱ ta̱ña tsjá‑te‑ná ta mé kjo̱nda ra ko̱chjeén-isa‑ná?
\v 33 ¿A tjín yá ra ma‑la̱ koa̱ànè jé‑isa‑ná jién ra xá Nainá jahíjin‑ná? Nga̱ jé jnchro Nainá ra ijye xi̱ta̱ kixi̱ kiꞌsín‑ná ra jién.
\v 34 ¿A tjín yá ra ma‑la̱ nga ki̱ìnè‑isa‑ná kjo̱hiꞌin? Nga̱ jé jnchro Cristo Jesús ra ꞌken ngajo‑ná, ti̱ꞌkoa̱á jaáya india‑ila̱ ꞌkia̱ nga ꞌken. Ko̱ ya̱á tíjna ya̱ nga kixi̱‑la̱ Nainá nga tíbítsaꞌbatji‑ná.
\v 35 ¿A tjín yá ra ma‑la̱ ko̱chrjeꞌtaxín‑ná a̱ꞌta ꞌtse̱ kjo̱tsjacha‑la̱ Cristo? ¿A kjo̱hiꞌin‑ní? ¿A kjo̱ba‑ní? ¿O̱ ra jè‑ní nga mahatji̱ngi‑ná xi̱ta̱? ¿O̱ ra kjoa̱ kjijnchrá‑ni? ¿O̱ ra jè‑ní tsa tsìn‑ná nikje ra tsjayeé? ¿O̱ ra jè kjoa̱ ra kjo̱skon ꞌmiòo̱? ¿O̱ ra jé‑ni nga si̱ìꞌken‑ná xi̱ta̱? Majìn, ni̱jngo kjoa̱ kìi̱ ra ki̱chíkjoa̱‑la̱.
\v 36 Koni ꞌsín tíchja̱ xa̱jo̱n ra tjíꞌta ꞌén‑la̱ Nainá nga tsò:
\q Ra a̱ꞌta tsa̱ji, kjiꞌtà ni̱chjin tjín‑la̱ kjo̱skon nga mejèn ki̱yá‑ji̱n,
\q ꞌkoa̱á ꞌsín betákon‑naji̱n xi̱ta̱
\q koni kjòn jñà forrè ra ijye tjíhijyo‑ndá nga ki̱yá.
\m
\v 37 Tanga ni̱ꞌsín takó ya̱ i̱nchibatojieén ngaꞌtsì kjoa̱ kìi̱, ta isa̱á jnchro jién bato ꞌñó nda i̱nchinìkijne‑lá nga jè tíbasìko̱‑ná jè Cristo ra ꞌñó kjotsjake‑ná.
\v 38 ꞌKoa̱á ma‑ni ngi tjíjngoó takoàn ra ꞌa̱n, nga ni̱yá‑la ra ko̱ma‑la̱ ki̱nchaꞌtaxín‑ná ra a̱ꞌta ꞌtse̱ kjo̱tsjacha‑la̱ Nainá, ni̱ mì tsa jè kjo̱biya, ni̱ mì tsa jè kjo̱binachon, ni̱ mì tsa jñà ìkja̱li̱, ni̱ mì tsa jñá ngaꞌñó ra tjín ya̱ i̱sàꞌnde ko̱ jñà ngaꞌñó ra tjín ya̱ a̱jin i̱sén, ni̱ mì tsa jñà kjoa̱ ra tjín ni̱chjin ꞌndi̱ ꞌndi̱, ko̱ ni̱ mì tsa jñà kjoa̱ ra ꞌsa̱ ko̱ka̱ma,
\v 39 ni̱ mì tsa jè kjoa̱ ra isa̱ ꞌnga tíjna, ni̱ mì tsa jè kjoa̱ ra isa̱ na̱nga̱ tíjna, ko̱ ni̱jngo‑isa tsajmì ra jè Nainá tsikínda ma‑la̱ ki̱nchaꞌtaxín‑ná a̱ꞌta ꞌtse̱ kjo̱tsjacha‑la̱ Nainá ra ijye tsakón‑ná a̱ꞌta ꞌtse̱ Jesucristo ra batéxoma‑ná.
\c 9
\s Kóꞌsín nga xá itjahájin‑ni jè na̱xi̱ndá Israel
\p
\v 1 Ngi ꞌén kixi̱í ra tíchjà a̱ꞌta ꞌtse̱ Cristo, mì tsa ꞌén ndiso‑jìn [nga ꞌñó makájno‑na jñà xi̱ta̱ xàngia̱]; jè inìma̱‑na̱, ꞌkoa̱á ꞌsín síchi̱ya kixi̱‑na, nga̱ jè sabá Inìma̱ Tsje‑la̱ Nainá ra ko̱ꞌsín síchi̱ya‑la̱,
\v 2 nga ꞌñó tse kjo̱ba tjín‑na, ko̱ kjiꞌtá ni̱chjin nga ꞌon tíma‑la̱ inìma̱‑na̱,
\v 3 skanda ko̱maá‑la kóse̱nꞌtaxìn‑la Cristo tsa tà kóꞌsín‑ni nga sa̱kò‑la̱ kjo̱nda jñà xi̱ta̱ xàngia̱a ra ꞌtse̱ na̱xi̱ndá Israel, tanga mì kì tsjáꞌnde‑na Nainá nga ko̱ꞌsín ꞌsiaa̱n.
\v 4 Nga̱ jñà xi̱ta̱ Israel, jè Nainá, ꞌkoa̱á ꞌsín iskábétjò nga i̱xti‑la̱ kitsò‑la̱, ko̱ tsakón‑la̱ kjoa̱jeya‑la̱, ko̱ jñá‑ní ra tsikíndajín‑ko̱ jngo kjoa̱ nga jngo ꞌén tsakájna‑la̱, ti̱ꞌkoa̱á itjábé‑la̱ kjo̱téxoma ꞌtse̱ Moisés, ko̱ ti̱ꞌkoa̱á kiꞌtsì‑te‑la̱ kjo̱hixi̱ kóꞌsín ske̱xkón Nainá, ko̱ itjábé‑la̱ ꞌén koni ꞌsín nga kitsjà tsaꞌba Nainá.
\v 5 Jñà xi̱ta̱ Israel ya̱á nchrabá‑ni tje̱‑la̱ a̱ꞌta ꞌtse̱ xi̱ta̱ jchínga ra xá jahíjin‑ni Nainá; ko̱ jè Cristo [ra xá isìkasén‑ni Nainá] nga xi̱ta̱ i̱sàꞌnde kjomà, ti̱ꞌkoa̱á ya̱á inchrabàꞌta‑te‑ni a̱ꞌta ꞌtse̱ tje̱‑la̱ xi̱ta̱ jchínga kìi̱. Jè Cristo, jè‑ní Nainá ra tíbatéxoma ijye‑la̱ ngaꞌtsì ta mé ra tjín, nga jeya tíjna kiꞌta skanda ta mé ni̱chjin‑ni. Ko̱ꞌsín katama.
\p
\v 6 [Nga mì kì makjiín‑la̱ jñà xi̱ta̱ Israel], mì tsa ki‑ni nga jè ꞌén‑la̱ Nainá mì kì nda itjasòn a̱ꞌta ꞌtse̱ xi̱ta̱ kìi̱. Kií ko̱kjamà‑ni nga mì tsa tà ngaꞌtsì‑ni xi̱ta̱ ra ya̱ nchrabá‑ni a̱ꞌta ꞌtse̱ tje̱‑la̱ Israel, na̱xi̱ndá Israel ma.
\v 7 Ni̱ꞌsín jñà xi̱ta̱ ra ya̱ inchrabà‑ni a̱ꞌta ꞌtse̱ tje̱‑la̱ Abraham, mì tsa ta ngaꞌtsì‑ni nga itjábé‑la̱ kjo̱nda koni i̱xti‑la̱; nga̱ jè xa̱jo̱n ra tjíꞌta ꞌén‑la̱ Nainá, ki̱í ꞌsín tsò: “Jñà xi̱ta̱ tje̱‑li, ta ya̱á kji̱nchrabàꞌtà‑ni ra a̱ꞌta ꞌtse̱ Isaac.”
\v 8 Jñà kjoa̱ kìi̱, ꞌkoa̱á ꞌsín tsò‑ni, nga jñà i̱xti‑la̱ Nainá, mì tsa jè ra chjí‑la̱ yá ꞌtse̱ tje̱ ra nchrabáꞌta‑ni. Ta jñá‑ní ra i̱xti‑la̱ Nainá ma jñà ra ijye ko̱ꞌsín kitsjà‑la̱ tsaꞌba Nainá nga i̱xti‑la̱ ki̱tso̱‑la̱. Tà jñá kjón‑ní ra ko̱ꞌsín baxki̱ꞌta nga kixi̱ kjoa̱ nga tje̱‑la̱ Abraham ꞌmì.
\v 9 Nga̱ ki̱í tsò ꞌén ra kiꞌtsì‑la̱ Abraham a̱ꞌta ꞌtse̱ Nainá: “ꞌNdi̱ inó kjíhi̱ꞌtse india‑la, ko̱ jè chjo̱ón‑li Sara, jngo ndí iꞌndí ꞌse̱‑la̱.”
\p
\v 10 Ko̱ mì tsa ta jñá‑nì kjoa̱ kìi̱ ra kjomà; jè Rebeca i̱xtiꞌño̱ó kiꞌse‑la̱ ra ꞌtse̱ Isaac, jè ra xi̱ta̱ jchínga‑ná ma.
\v 11‑13 ꞌKia̱ nga ti̱kje tsin jñà i̱xtiꞌño̱ kìi̱, ko̱ ti̱kjè mé kjoa̱ ra ma‑la̱ ꞌsín ra nda tjín ko̱ kjoa̱ ra ꞌcho tjín, Nainá, ꞌkoa̱á ꞌsín kitsò‑la̱ jè Rebeca: “Jè ra ma jchínga, chi̱ꞌndaá ko̱ma‑la̱ ra isa̱ iꞌndí.” Koni ꞌsín tíchja̱ xa̱jo̱n ra tjíꞌta ꞌén‑la̱ Nainá nga tsò: “Jè ra ꞌmì Jacob isa̱á ꞌñó nda kjotsjàke̱, ko̱ jè ra ꞌmì Esaú kjojtike̱‑ná.” ꞌKoa̱á ꞌsín kjòkixi̱ nga Nainá tjíꞌndeé‑la̱ nga kjoa̱hájin xi̱ta̱ koni ꞌsín ijye jè tjínda‑la̱ nga ki̱chja̱‑la̱ jñà xi̱ta̱ ra jè mejèn‑la̱. Mì tsa kinda̱ ꞌsín mé ra ijye kiꞌsìn xi̱ta̱.
\s Kóꞌsín nga ta̱jngoó jè Nainá ra be mé kjo̱nda ra tsjá‑la̱ xi̱ta̱
\p
\v 14 ¿Kóꞌsín kixé? ¿A kjoa̱ꞌchoó ra ꞌsín Nainá? Majìn, mì tsa ko̱ ꞌsín tjín‑jìn.
\v 15 Jè Nainá, ꞌkoa̱á ꞌsín kitsò‑la̱ Moisés: “Ko̱hi̱ma̱ke‑náa̱ jè xi̱ta̱ ra ꞌa̱n mejèn‑na nga ko̱hi̱ma̱kee̱, ko̱ ꞌoón ko̱ma‑na jè ra ꞌa̱n mejèn‑na nga ꞌon ko̱ma‑na.”
\v 16 ꞌKoa̱á ꞌsín tjín jè kjo̱nda‑la̱ Nainá, mì tsa ki‑ni tsa jién ko̱ꞌsín mejèn‑ná nga tjábé‑ná, ni̱ mì tsa ki‑ni tsa jién ꞌñó binè‑lá ijo‑ná nga fatsjieé Nainá; ta̱jngoó Nainá tsjá‑la̱ kjo̱nda jñà xi̱ta̱ ra jè mahi̱ma̱ke.
\v 17 ꞌKoa̱á ꞌsín tíchja̱ xa̱jo̱n ra tjíꞌta ꞌén‑la̱ Nainá nga kitsò‑la̱ Faraón: “Kií xá isíkíjna‑la nga xi̱ta̱xá ítjòn‑la̱ na̱xi̱ndá Egipto tijni, mé‑ni nga a̱ꞌta tsa̱ji kokon ngaꞌñó‑na̱ ko̱ mé‑ni nga ngaꞌtsì xi̱ta̱ i̱sàꞌnde katabexkon‑na.”
\v 18 ꞌKoa̱á ꞌsín ꞌsín jè Nainá nga tjín‑la̱ kjo̱hi̱ma̱takòn a̱ꞌta ꞌtse̱ xi̱ta̱ ra jè mejèn‑la̱, tanga ti̱ꞌkoa̱á maá‑la̱ nga sítájajín inìma̱‑la̱ xi̱ta̱ ra jè mejèn‑la̱ nga sítája.
\p
\v 19 Tanga maá‑la ꞌkín‑ná ra ji̱: “Tsa ꞌkoa̱á ꞌsín ꞌsín Nainá, nga mì kì ma yá ra kondra̱ ki̱ji̱‑la̱ koni ꞌsín nga mejèn‑la̱ ra jè, ¿mé‑ni nga bánè jé‑isa‑la̱ xi̱ta̱?”
\v 20 Tanga ra ji̱ ra xi̱ta̱ ꞌmì‑li, ¿yá‑ni ra ji̱ nga ji̱ si̱jé‑la̱ kinda̱ Nainá? Tsa jngo ti̱jí niꞌnde ra xá kisinda‑ni, ¿a ko̱maá ki̱tso̱‑la̱ jè xi̱ta̱ ra tsikínda: “Mé‑ni nga ko̱ꞌsín tsikìnda‑náa̱”?
\v 21 ¿A mí tjíꞌnde‑la̱ jè xi̱ta̱ ra ma‑la̱ bínda ti̱jí niꞌnde nga ti̱jè‑ni ndási ki̱ìnda jngo ti̱jí ra tà ꞌkia̱ machjeén nga tjín ꞌsí, ti̱ꞌkoa̱á ki̱ìnda jngo ti̱jí ra ni̱chjin nchijòn machjeén?
\p
\v 22 Tsa jè Nainá ko̱ꞌsín kjomejèn‑la̱ tsakón kjo̱jti‑la̱ ko̱ tsakón ngaꞌñó‑la̱, tanga, ¿a ꞌchoó tjín nga jè Nainá, nga ko̱ꞌsín ꞌñó iskoñá kjoa̱ ra a̱ꞌta ꞌtse̱ xi̱ta̱ ra tjábé‑la̱ kjo̱hiꞌin ko̱ ra tjíné‑la̱ nga kje̱hesòn?
\v 23 Ko̱ mí‑la tsa ꞌcho tjín‑te tsa ko̱ꞌsín kiꞌsìn nga tsakón kjoa̱jeya‑la̱ ra a̱ꞌta ꞌtse̱ xi̱ta̱ ra jè kjòhi̱ma̱ke nga̱ tsikítsa̱jnanda skanda ti̱ꞌsa̱‑ni kjotseé mé‑ni nga ti̱ꞌkoa̱ ꞌse̱‑la̱ jè kjoa̱jeya‑la̱.
\v 24 Ko̱ jién‑nájién ra ko̱ꞌsín tsikítsa̱jnanda‑ná nga ko̱ꞌsín kiìchja̱‑ná, tjín ra ya̱ a̱jin‑la̱ xi̱ta̱ Israel kiìchja̱‑ná ko̱ tjín ra mì tsa ya̱ a̱jin‑la̱ xi̱ta̱ Israel kiìchja̱‑ná.
\v 25 ꞌKoa̱á ꞌsín tíchja̱ xa̱jo̱n ra tsikínda Oseas, xi̱ta̱ ra kiìchja̱ ngajo‑la̱ Nainá kjotseé nga tsò:
\q Na̱xi̱ndá tsa̱ꞌa̱án xín‑la̱ jè ra mì tsa na̱xi̱ndá‑na̱ ma tsiki,
\q ti̱ꞌkoa̱á ko̱tsjake̱‑náa̱ jè ra mì kì kjotsjacha nga ti̱ꞌsa̱ kjotseé.
\q
\v 26 Ko̱ ya̱ na̱xi̱ndá ñánda̱ kiꞌmì‑la̱:
\q “Mì tsa na̱xi̱ndá tsa̱ꞌa̱n xin‑no”,
\q “i̱xti‑la̱ Nainá ra tíjnakon” ꞌkín‑ni.
\m
\v 27 Isaías jè xi̱ta̱ ra kiìchja̱ ngajo‑la̱ Nainá kjotseé, ꞌkoa̱á tsò‑te a̱ꞌta ꞌtse̱ na̱xi̱ndá Israel: “Ni̱ꞌsín ko̱ꞌsín ꞌñó kjìn ma‑ni jñà i̱xti‑la̱ koni chrjo̱ ra tjín ya̱ a̱ndi ndáchikon, ta jñá ra ki̱jnengi chiba‑ni ra ki̱tjokajin kjo̱hiꞌin.
\v 28 Nga̱ jè Na̱ꞌín‑ná ndi̱to̱ón si̱hitjasòn jè kjo̱hixi̱‑la̱ ra ijye kitsjà nga jngó kjá kjo̱hiꞌin tsjá‑la̱ jñà xi̱ta̱ i̱sàꞌnde.”
\v 29 Koni ꞌsín kitsò nga ti̱ꞌsa̱ ítjòn jè Isaías:
\q Jè Na̱ꞌín‑ná, ra tse ngaꞌñó tjín‑la̱,
\q tsa mí‑la isìkijnengi iꞌka‑ni xi̱ta̱ ra isìtje̱‑ná,
\q ijyeé‑la ko̱ꞌsín ijyehesòn ijyeé
\q koni ꞌsín kjomà jè na̱xi̱ndá Sodoma ko̱ na̱xi̱ndá Gomorra.
\m
\v 30 ¿Kóꞌsín kixé tsaꞌkoa̱? Jñà xi̱ta̱ ra mì tsa xi̱ta̱ Israel, ni̱ꞌsín mì kì tsakátsji nga kixi̱ kítsa̱jna ngixko̱n Nainá, ijyeé xi̱ta̱ kixi̱í baxki̱, ta nga̱tjì‑la̱ ijyeé kjokjiín‑la̱ a̱ꞌta ꞌtse̱ Nainá.
\v 31 Tanga jñà xi̱ta̱ Israel ra a̱ꞌta ꞌtse̱ Kjo̱téxoma ꞌñó tsakátsji nga kixi̱ kítsa̱jna ngixko̱n Nainá, mì kì ijchòtji̱ngi‑la̱.
\v 32 ¿Mé‑ni nga ko̱ kjomà‑ni? Kií ko̱ꞌsín kjomà‑ni nga mì kì tsa makjiín‑la̱ a̱ꞌta ꞌtse̱ Nainá. Ta jñá ꞌñó tsakáꞌta ikon jñà kjo̱nda ra kiꞌsìn koni ꞌsín tjín Kjo̱téxoma ꞌtse̱ Moisés. ꞌKoa̱á ma‑ni [ꞌkia̱ nga ꞌji Cristo] ya̱á isaténgi koni jngo Na̱jo̱ ra tíjnachjà.
\v 33 Jè xa̱jo̱n ra tjíꞌta ꞌén‑la̱ Nainá, ꞌkoa̱á ꞌsín tíchja̱ [a̱ꞌta ꞌtse̱ Cristo] nga tsò:
\q Ya̱ nindo ra ꞌmì Sión, ꞌa̱án kijná jngo Na̱jo̱
\q jè ra sa̱téngi xi̱ta̱ ko̱ jè ra ko̱jndo.
\q Tanga jè ra ko̱kjiín‑la̱ a̱ꞌta ꞌtse̱ Na̱jo̱ ra̱kìi̱,
\q mì kì kjo̱sabà sa̱kò‑la̱.
\c 10
\s Kóꞌsín tjínè‑la̱ nga ko̱kjiín‑ná nga ma kítjo̱kajieén kjo̱hiꞌin
\p
\v 1 Jiòn ndí ꞌndsé, ngi ꞌén kixi̱ kjòn, kií ra ꞌñó mejèn‑la̱ inìma̱‑na̱ ko̱ ra ꞌñó síjéꞌta‑la̱ Nainá a̱ꞌta ꞌtse̱ na̱xi̱ndá Israel nga katitsa̱jnandi̱í‑ni ra kjoa̱ ꞌtse̱ jé‑la̱.
\v 2 ꞌA̱n be‑náa̱ nga ꞌñó mejèn‑la̱ nga ske̱xkón Nainá jñà xi̱ta̱ Israel tanga mì tsa ko̱ꞌsín bátsji Nainá koni ꞌsín tjín kjoa̱chji̱ne̱ ra ngi kjo̱hixi̱.
\v 3 Nga̱ mì kì ꞌfahaꞌsen‑jin‑la̱ kóꞌsín nga ta̱ jngoó jè Nainá ra ma‑la̱ kixi̱ síkítsa̱hijyo xi̱ta̱; ta jñá mejèn‑la̱ nga kixi̱ si̱ìkítsa̱jna ijo‑la̱, majìn‑la̱ kjábé kjo̱hixi̱ ꞌtse̱ Nainá ra ma‑la̱ kixi̱ síkítsa̱jna‑ná.
\v 4 ꞌKia̱ nga ꞌji jè Cristo, ya̱á kjòjngo jè kjo̱téxoma mé‑ni ngaꞌtsì ra ko̱kjiín‑la̱ a̱ꞌta ꞌtse̱, sakó‑la̱ kjo̱hixi̱ nga nda kítsa̱jnako̱ Nainá.
\p
\v 5 Jè Moisés, ꞌkoa̱á ꞌsín tsikínda xa̱jo̱n a̱ꞌta ꞌtse̱ xi̱ta̱ ra mejèn‑la̱ nga kixi̱ kítsa̱jna a̱ꞌta ꞌtse̱ kjo̱téxoma nga tsò: “Jè xi̱ta̱ ra nda si̱hitjasòn kjo̱téxoma, a̱ꞌta ꞌtse̱é kjo̱téxoma kíjnakon‑ni.”
\v 6 Tanga a̱ꞌta ꞌtse̱ xi̱ta̱ ra kixi̱ kítsa̱jna ꞌkia̱ nga makjiín‑la̱ a̱ꞌta ꞌtse̱ Cristo, tsó‑ní: “Kì tà chjàn tsò jè inìma̱‑li: ¿Yá ra ma ki̱ji̱ ján ngajmi?” (Nga̱ jè ꞌén ra̱kìi̱, ꞌkoa̱á ꞌsín tsò‑ni nga koni jè Cristo nga ki̱nájenꞌta nangieé.)
\v 7 Ko̱, kì tà chjàn tsò jè inìma̱‑li: “¿yá ra ma kjoa̱àꞌsen‑jin ñánda̱ i̱nchisíkjiín kjo̱hiꞌin jñà miꞌken?” (Jè ꞌén ra̱kìi̱, ꞌkoa̱á ꞌsín tsò‑ni koni jè Cristo i̱nchinikasítje̱en ya̱ a̱jin‑la̱ miꞌken.)
\v 8 Tanga, ¿kóꞌsín títsò Moisés? Tsó‑ní: “Chrañaꞌta tíjna‑li jè ꞌén; ya̱á tíjnaꞌa ya̱ ndsa̱ꞌbì ko̱ ya̱á tíjnajin ya̱ inìma̱‑li.” ꞌKoa̱á ꞌsín tjín jñà ꞌén ra nakjoáya‑ji̱n ra machjeén nga ko̱kjiín‑ná.
\v 9 Tsa ndsa̱ꞌbì kjón ꞌkéna̱jmí‑ni nga jé Jesucristo ra Na̱ꞌín‑ná ma, ko̱ tsa ngi ko̱ó inìma̱‑li ko̱kjiín‑li nga jé Nainá isikjaáya‑la̱ a̱ꞌta ꞌtse̱ kjo̱biya, ki̱jnandi̱í‑ni ra a̱ꞌta ꞌtse̱ jé‑li.
\v 10 Nga̱ ko̱ó inìma̱‑ná makjiín‑ná mé‑ni nga xi̱ta̱ kixi̱ ka̱meé ya̱ ngixko̱n Nainá; ti̱ꞌkoa̱ ngi ko̱ó ndsa̱ꞌbé ꞌbèna̱jmí‑ná nga jè Jesucristo ra Na̱ꞌín‑ná ma mé‑ni nga ka̱ma ki̱tsa̱jnandi̱í‑ná ra a̱ꞌta ꞌtse̱ kjoa̱ ꞌtse̱ jé‑ná.
\v 11 Nga̱ ꞌkoa̱á ꞌsín tíchja̱ jè xa̱jo̱n ra tjíꞌta ꞌén‑la̱ Nainá nga tsò: “Ngaꞌtsì ra ko̱kjiín‑la̱ a̱ꞌta ꞌtse̱ Cristo mì tsa kjo̱sabà sa̱kò‑la̱.”
\p
\v 12 Jñà ra xi̱ta̱ judío ko̱ ra mì tsa xi̱ta̱ judío, ta ngásòn kjòn a̱ꞌta ꞌtse̱ Nainá; nga̱ ti̱jé‑ni ra Na̱ꞌìn tsò‑la̱ ngaꞌtsiòo̱; ꞌñó nda síchikonꞌtin ngaꞌtsì ra chja̱ꞌta‑la̱.
\v 13 Nga̱ ꞌkoa̱á ti̱ꞌsín tsò xa̱jo̱n‑la̱ Nainá: “Ngaꞌtsì ra ki̱chja̱ꞌta‑la̱ Na̱ꞌín‑ná, kítsa̱jnandi̱í‑ni ra kjoa̱ ꞌtse̱ jé‑la̱.”
\v 14 Tanga mì kì ko̱ma ki̱chja̱ꞌta‑la̱ Cristo jè xi̱ta̱ ra kjè kì makjiín‑la̱. Ko̱ mì kì ko̱ma ko̱kjiín‑la̱ jè xi̱ta̱ ra kjè kì mé ꞌén ꞌnchré ra a̱ꞌta ꞌtse̱ Cristo. Ti̱ꞌkoa̱á mì kì ko̱ma kji̱ꞌnchré tsa mì yá ra ꞌke̱èna̱jmí‑la̱ a̱ꞌta ꞌtse̱ Cristo.
\v 15 Ko̱ mì kì ko̱ma ꞌke̱èna̱jmí‑la̱ xi̱ta̱ tsa mì yá ra si̱ìkasén. ꞌKoa̱á ꞌsín tjíꞌta xa̱jo̱n ra tjíꞌta ꞌén‑la̱ Nainá nga tsò: “Mé ta̱ nda‑ni ꞌkia̱ nga jè Nainá síkasén xi̱ta̱ ra ꞌbéna̱jmíya ꞌén nda‑la̱ Cristo ra tjín‑la̱ kjoa̱ꞌnchán.”
\v 16 Tanga mì tsa ngaꞌtsì‑ni xi̱ta̱ Israel ra isìkitjasòn jè ꞌén xi̱tse̱ ra nda tsò a̱ꞌta ꞌtse̱ Cristo koni ꞌsín kiíꞌnchré. Nga̱ jè Isaías, xi̱ta̱ ra kiìchja̱ ngajo‑la̱ Nainá, ꞌkoa̱á ꞌsín kitsò: “Na̱ꞌìn, ¿yá ra kjokjiín‑la̱ jñà ꞌén ra inakjoáya‑ji̱n?”
\v 17 ꞌKoa̱á ma‑ni, ꞌkia̱ nga makjiín‑ná, tjínè‑la̱ nga ítjòn ki̱náꞌyé jngo ꞌén; ko̱ jè ꞌén ra ki̱náꞌyé, ya̱á kji̱nchrabà‑ni a̱ꞌta ꞌtse̱ ꞌén‑la̱ Cristo.
\p
\v 18 Tanga kií xiaa̱n ra ꞌa̱n: ¿A mí kiíꞌnchré jè ꞌén nda‑la̱ Cristo jñà xi̱ta̱ Israel? Kiíꞌnchré‑ní. Nga̱ ꞌkoa̱á tsò xa̱jo̱n‑la̱ Nainá:
\q Nga tíjngoó i̱sàꞌnde, ijyeé tsabísòn jñà ꞌén‑la̱;
\q ijyeé ijchó skanda ñánda̱ feheꞌta‑ni nangi.
\m
\v 19 India‑la̱ ko̱tíxian‑na. Jñà xi̱ta̱ Israel, ¿a mí kisijin‑la̱? Kisijiín‑la̱. Nga̱ ítjòn kitsò Moisés:
\q ꞌA̱án ko̱ꞌsín ꞌsiaa̱n nga katamachi̱ni̱cha jiòn
\q jngo na̱xi̱ndá ra mì tsa ꞌñó chjí‑la̱,
\q ko̱ katajticha jiòn a̱ꞌta ꞌtse̱
\q jngo na̱xi̱ndá ra mì kì machi̱ya‑la̱.
\m
\v 20 Ti̱ꞌkoa̱á Isaías, ꞌñó tsiꞌké‑la̱ ikon ꞌkia̱ nga tsiꞌkéna̱jmí jè ꞌén‑la̱ Nainá nga kitsò:
\q Ijchòtji̱ngií‑na jñà ra mì tsa ꞌa̱n i̱nchibátsji‑na,
\q ti̱ꞌkoa̱ tsakoón‑la̱ kjo̱nda‑na̱ jñà ra mì tsa ꞌa̱n iskonangiya‑na.
\m
\v 21 Tanga ra a̱ꞌta ꞌtse̱ xi̱ta̱ Israel, ꞌkoa̱á ꞌsín kitsò Nainá nga isìkìchja̱ Isaías: “Ni̱chjin nchijón‑ní ítsikjen‑la̱ ndsa̱ nga kíchjaꞌndé‑la̱ jngo na̱xi̱ndá ra mì kì isìhitjasòn ko̱ ra kondra̱ kiì‑la̱ ꞌén‑na̱.”
\c 11
\s Kóꞌsín ꞌsín Nainá ra a̱ꞌta ꞌtse̱ na̱xi̱ndá Israel
\p
\v 1 ꞌA̱n, ꞌkoa̱á ꞌsín kjonangiaa̱: Jè Nainá, ¿a kitsjin-takón jè na̱xi̱ndá Israel ra jè chja̱ꞌnda? Majìn, mì tsa ko̱ꞌsín tjín‑jìn. Nga̱ ti̱ꞌkoa̱á ꞌa̱n, xi̱ta̱ Israel ꞌmì‑naa̱, ya̱á nchrabá‑na ya̱ tje̱‑la̱ Abraham, ko̱ xi̱ta̱ xàngia̱á ma jñà xi̱ta̱ ra nchrabá‑ni a̱ꞌta ꞌtse̱ tje̱‑la̱ Benjamín.
\v 2 Nainá mì tsa tíbachrjengi jè na̱xi̱ndá‑la̱ ra ijye xá ko̱ꞌsín tsikíꞌta xkon nga ti̱ꞌsa̱ tjàꞌtsin‑la̱ kjoa̱. ¿A mí tjíjin‑no koni ꞌsín tsò jè xa̱jo̱n ra tjíꞌta ꞌén‑la̱ Nainá a̱ꞌta ꞌtse̱ Elías, xi̱ta̱ ra kiìchja̱ ngajo‑la̱ Nainá, nga ꞌkoa̱á ꞌsín kiìchja̱ꞌta‑la̱ Nainá ra kondra̱ ꞌtse̱ na̱xi̱ndá Israel?, nga kitsò:
\v 3 “Na̱ꞌìn, jñà xi̱ta̱‑li ra chja̱ ngajo‑li ijyeé kisiꞌken jñà xi̱ta̱, ko̱ jñà i̱ꞌnde‑li ñánda̱ nga jñà xi̱ta̱ bísòn kjo̱tjò‑la̱ nga sínga̱tsja‑li ijyeé kisìkitsóñà; ko̱ ta ꞌa̱n ta̱jngoó tíjna̱‑isa ko̱ mejèn‑la̱ nga si̱ìꞌken‑te‑na.”
\v 4 Tanga ki̱í tsò ꞌén ra kitsjà‑la̱ Nainá: “Majìn, mì tsa ta ji̱ ta̱jngo tijni, itoó jmi ma‑isa‑ni xi̱ta̱ ra títsa̱jnatjò‑na ra kjè tsa ya̱ mincha-xkóꞌnchiꞌta‑la̱ jè nainá ra ꞌmì Baal.”
\v 5 Ni̱chjin ꞌndi̱ ꞌndi̱, takó ꞌkoa̱á ꞌsín ma; takó tjín‑isa xi̱ta̱ Israel ra títsa̱jnatjò‑la̱ Nainá ra xá tsjahíjin‑ni ra ta kjo̱nda ꞌtse̱.
\v 6 ꞌKia̱ nga ta kjo̱nda ꞌtse̱ Nainá nga ko̱ꞌsín tsjahíjin xi̱ta̱, tsó‑ni kjoa̱ nga mì tsa ki‑ni nga nda kiꞌsìn xi̱ta̱; tanga tsa ta jñá‑la‑ni nga̱tjì‑la̱ jñà kjoa̱ ra nda kiꞌsìn xi̱ta̱, jè kjo̱nda ra kitsjà kjo̱tjò Nainá mí‑la tsa mé chjí‑la̱ tsaꞌkoa̱.
\p
\v 7 ¿Kóꞌsín tjín tsaꞌkoa̱? Kií ko̱ꞌsín tjín‑ni, nga̱ kjín xi̱ta̱ Israel ra mì ijchòtji̱ngi‑la̱ kjoa̱ ra tsakátsji. Tà jñá xi̱ta̱ ra xá tsjahíjin‑ni Nainá ijchòtji̱ngi‑la̱. Ko̱ jñà xi̱ta̱ ra iꞌka, tà kjótájajín inìma̱‑la̱.
\v 8 ꞌKoa̱á ꞌsín tjíꞌta xa̱jo̱n ra tjíꞌta ꞌén‑la̱ Nainá nga tsò: “Nainá, ꞌkoa̱á ꞌsín kitsjà‑la̱ nga kisijñòjin ya̱ inìma̱‑la̱ ko̱ nga jñà xko̱n mì kì tsatsíjen‑la̱ ko̱ jñà chíká‑la̱ mì kì kiíꞌnchré skanda ni̱chjin ꞌndi̱‑ni̱.”
\v 9 Jè David, ꞌkoa̱á ti̱ꞌsín tsò:
\q Ti̱jè‑ni jñà ꞌsí ra bínda
\q katama chi̱n‑la̱ nga katakangi,
\q ko̱ katasiyaꞌñó na̱ꞌya
\q ko̱ ti̱jñá katasaténgi‑ni,
\q mé‑ni nga katako̱‑la̱ kjo̱hiꞌin.
\q
\v 10 Katasichjà jñà xko̱n
\q mé‑ní nga mì kì ko̱tsíjen‑la̱,
\q ko̱ katamatsiꞌtin íꞌtsi̱n skanda ta kjiá‑nioo̱.
\p
\v 11 ꞌA̱n, ꞌkoa̱á ꞌsín kjonangiaa̱, ¿a jngó‑kjá kichijá jñà xi̱ta̱ Israel ꞌkia̱ nga iskajin kjoa̱ kìi̱? Majìn, mì tsa ko̱ꞌsín tjín‑jìn. Tà nga̱tjì‑la̱ nga mì kì isìhitjasòn jñà xi̱ta̱ Israel, ꞌkoa̱á ma‑ni nga jñà ra mì tsa xi̱ta̱ Israel itjábé‑la̱ jè kjo̱nda nga tsikìtsa̱jnandi̱í‑ni ra kjoa̱ ꞌtse̱ jé‑la̱ mé‑ni nga jñà xi̱ta̱ Israel katamachi̱ni̱‑ni a̱ꞌta ꞌtse̱ kjo̱nda‑la̱ Nainá.
\v 12 Tsa jñà xi̱ta̱ i̱sàꞌnde tse kjo̱nda‑la̱ Nainá isakò‑la̱ ꞌkia̱ nga jñà xi̱ta̱ Israel mì kì isìhitjasòn‑la̱ Nainá ko̱ isìjchija kjo̱nda‑la̱ Nainá, isa̱á‑la ta nda ko̱chikonꞌtin-isa jè i̱sàꞌnde ꞌkia̱ nga jñà xi̱ta̱ Israel jngo kjá koa̱áfaꞌta india‑ila̱ Nainá.
\p
\v 13 Jiòn ra ko̱tíxian‑no ꞌndi̱‑ni̱ ra mì tsa xi̱ta̱ judío ꞌmì‑no. ꞌA̱n, bexkón‑ná jè xá ra ꞌa̱n kisìxáya‑na nga ꞌa̱n kichjàya‑la̱ jñà ra mì tsa xi̱ta̱ judío.
\v 14 Tsa kií ni̱chjin‑ni ko̱chi̱ni̱ iꞌka jñà ra xi̱ta̱ xàngia̱ ra ta nga̱tjì‑la̱ jè kjo̱nda ra tjín‑no, mé‑ni nga ti̱ꞌkoa̱á ko̱ma kítsa̱jnandi̱í‑ni ra kjoa̱ ꞌtse̱ jé‑la̱.
\v 15 Tsa jñà xi̱ta̱ i̱sàꞌnde isakò‑la̱ kjo̱ꞌnchán a̱ꞌta ꞌtse̱ Nainá ꞌkia̱ nga jñà xi̱ta̱ judío inachrjengi, isa̱á tse kjo̱nda sa̱kò ꞌkia̱ nga jñà xi̱ta̱ judío ska̱ábétjò india‑ni Nainá; skanda ꞌkoa̱á ngoya‑la̱ koni tsa jñà xi̱ta̱ ra ijye ꞌken kjoa̱áya india‑la̱.
\v 16 ꞌKoa̱á ngoya‑la̱ tsa jè Nainá ijye kjonga̱tsja jè ni̱ño̱ ra chjàn ítjòn koni jngo kjo̱tjò, ijyeé ꞌtse̱é ko̱ma na̱ꞌyo̱ ra ko̱chjeén‑isa ra ko̱ma a̱skan‑nioo̱. Ko̱ tsa jè kja̱ma̱‑la̱ jngo yá ijye kjonga̱tsja jè Nainá koni jngo kjo̱tjò, ijyeé ꞌtse̱é‑te jñà chrja‑la̱ yá.
\p
\v 17 Jñà xi̱ta̱ Israel, ꞌkoa̱á ꞌsín ngoya‑la̱ koni jngo yá olivo ra nda ra kitiꞌtá chrja‑la̱, ko̱ jiòn, ꞌkoa̱á ꞌsín ngoya‑la̱ koni jngo chrja‑la̱ yá olivo ijñá nga ya̱á isiꞌta ngajo‑la jiòn; ꞌkoa̱á ma‑ni nga ya̱á i̱nchichjíbé jiòn jè ngaꞌñó‑la̱ kja̱ma̱‑la̱ yá olivo ra nda.
\v 18 Tanga kì tà chjàn jiòn nda nachrjengio ijo‑no koni tsa jñà chrja‑la̱ yá olivo ra nda ra xá kitiꞌtá‑ni. Ti̱kítsjen nga̱ tà isiꞌta sònꞌnga‑no jiòn ko̱ mì tsa jiòn ra i̱nchiꞌbì‑la ngaꞌñó kja̱ma̱‑la̱ yá olivo, ta isa̱á jiòn i̱nchitjábé‑no ngaꞌñó ꞌtse̱ kja̱ma̱‑la̱.
\p
\v 19 Tanga jiòn, kì ꞌnga ma takòn nga kixó: “Kií ko̱ꞌsín kitiꞌtá‑ni chrja‑la̱ yá olivo nga ji̱n si̱ꞌta ngajo‑la̱ji̱n.”
\v 20 Ti̱kítsjen, nga̱ kií ko̱ꞌsín kitiꞌtá‑ni nga mì kì kjokjiín‑la̱; tanga jiòn, kií‑ní nga makjiín‑no nga ya̱ titsa̱ꞌtà‑no, tanga kì tà chjàn ꞌnga nìkíhijyo ijo‑no, tà isa̱á jnchro ti̱skón.
\v 21 Nga̱ jè Nainá, tsa mì kì iskoñákjoa̱‑la̱ chrja‑la̱ yá olivo ra nda, ti̱ꞌkoa̱á jiòn, tsa mì kì kixi̱ ki̱tsa̱jna, ti̱ꞌkoa̱á mì kì sko̱óñakjoa̱‑te‑no.
\v 22 Chítsijen‑la Nainá, ꞌñó nda xi̱ta̱; tanga ti̱ꞌkoa̱á jè ra mejèn‑la̱ nga nda ki̱tjasòn jè ꞌén ra chja̱. Mì kì behi̱ma̱ jñà xi̱ta̱ ra itjoꞌtaxìn‑la̱; tanga ra jiòn, nda i̱nchisíko̱‑no. Tanga machjeén‑ní nga ko̱ꞌsín ti̱tsa̱jna koni ꞌsín tjín jè kjo̱nda ra i̱nchitsjá‑no. Tsa mì kì ko̱ꞌsín ꞌsia̱an, ti̱ꞌkoa̱á ko̱teꞌtá‑no.
\v 23 Tsa jñà xi̱ta̱ Israel koni nga chrja‑la̱ yá olivo ra kitiꞌtá, tsa tsjín‑ni jè kjo̱bítsjen ra ko̱ꞌsín mì kì makjiín‑la̱, maá ska̱ya‑ni ya̱ i̱ꞌnde‑la̱. Nga̱ jè Nainá tjín‑la̱ ngaꞌñó nga ko̱ma ki̱iꞌtà india‑ni ya̱ i̱ꞌnde‑la̱ ñánda̱ nga itjoꞌta‑ni.
\v 24 Ra jiòn, tsa ya̱á inchrabà‑no nga kitiꞌtá jiòn jè yá olivo ijñá nga ya̱ isikjoꞌá‑la̱ jñà yá olivo ra nda ra mì tsa ya̱ bako̱‑no tsiki, isa̱á‑la ta ndi̱to̱n tjábétjò india‑ni jñà chrja‑la̱ yá olivo nda ra xá itjahájin‑ni nga si̱kjoꞌá india‑ila̱ ya̱ ñánda̱ nga itjoꞌta‑ni nga ti̱ꞌsa̱ ítjòn.
\p
\v 25 Jiòn ꞌndsé, mején‑na nga nda katasijin‑no jè kjoa̱ꞌma ra ijye ko̱ꞌsín tjínda‑la̱ Nainá, mé‑ni nga mì tsa ta jiòn ꞌñó chji̱ne̱ ki̱náchrjengio ijo‑no koni jñà xi̱ta̱ Israel. Nga̱ jñà xi̱ta̱ Israel ra tájajín iꞌka inìma̱‑la̱, skanda ꞌkia̱á ko̱kjiín‑la̱ ꞌkia̱ nga ijye ko̱jngo‑ni kóhotjín ngaꞌtsì jñà ra mì tsa xi̱ta̱ judío nga kjoa̱haꞌsen ñánda̱ nga tíjna Nainá.
\v 26 ꞌKia̱ nga ijye ko̱ꞌsín ko̱ka̱ma, ngaꞌtsì jñà xi̱ta̱ Israel kítsa̱jnandi̱í‑ni ra kjoa̱ ꞌtse̱ jé‑la̱, koni ꞌsín tíchja̱ xa̱jo̱n ra tjíꞌta ꞌén‑la̱ Nainá nga tsò:
\q Ya̱á nindo Sión kji̱nchrabà‑ni jè ra ma‑la̱ si̱ìkíhijyondi̱í‑ná,
\q ko̱ nga kjo̱híxìn‑la̱ jé‑la̱ xi̱ta̱ ra tje̱‑la̱ Jacob.
\q
\v 27 Jè kjoa̱ ra̱kìi̱ ra ꞌa̱n kindájín‑ko̱
\q ꞌkia̱ nga kjohíxìn‑la̱ jñà jé ra tjín‑la̱.
\p
\v 28 Tanga ꞌndi̱ ꞌndi̱, jñà xi̱ta̱ Israel, ꞌkoa̱á ꞌsín títsa̱hijyo‑la̱ Nainá koni tsa xi̱ta̱ kondra̱‑la̱, ta nga̱tjì‑la̱ ꞌén xi̱tse̱ ra nda tsò a̱ꞌta ꞌtse̱ Cristo; tanga kií ko̱ꞌsín kisìko̱‑ni mé‑ni nga jiòn katatjòꞌnde‑no nga katamakjiín‑no ꞌén nda‑la̱ Cristo. Tanga Nainá takó tsjakeé jñà xi̱ta̱ Israel ta nga̱tjì‑la̱ ijyeé ko̱ꞌsín kitsjà‑la̱ tsaꞌba jñà xi̱ta̱ jchínga‑la̱ nga na̱xi̱ndá‑la̱ ki̱tso̱‑la̱.
\v 29 Nga̱ jè Nainá mì kì tsa ti̱ faꞌán‑ni jè kjo̱tjò ra tsjá, ti̱ꞌkoa̱ mì tsa ti̱ faháxìn‑ni ꞌén‑la̱ koni ꞌsín nga chja̱.
\v 30 Jiòn, ꞌkoa̱á ti̱ꞌsín kiꞌnià ꞌkia̱ nga ti̱ꞌsa̱ kjotseé, mì kì inìhitjasòn‑la̱ Nainá. Tanga ꞌndi̱ ꞌndi̱, jè Nainá mahi̱ma̱keé‑no, ta nga̱tjì‑la̱ nga mì kì isìhitjasòn jñà xi̱ta̱ Israel.
\v 31 Jè ni̱chjin ꞌndi̱ ꞌndi̱, jñà xi̱ta̱ Israel mì kì i̱nchisíhitjasòn‑la̱ Nainá; kií jiòn itjábé‑no kjo̱hi̱ma̱takòn‑la̱ Nainá mé‑ni nga jñà xi̱ta̱ Israel ske̱hi̱ma̱takòn‑te‑ni.
\v 32 Nga̱ jè Nainá xá ko̱ꞌsín tsikítsa̱hijyoꞌñó‑ni ngaꞌtsì xi̱ta̱ nga mì kì kiíꞌnchréhijon, ko̱ xi̱ta̱ Israel, ko̱ ra mì tsa xi̱ta̱ Israel, mé‑ni nga ꞌkia̱ ka̱ma a̱skan‑nioo̱, ngásòn ngáyaá ko̱hi̱ma̱ke‑ni ngaꞌtsiòo̱.
\p
\v 33 Mé ta̱ ꞌñó tse ma‑ni kjoa̱chji̱ne̱ ra tjín‑la̱ Nainá ko̱ kjo̱bítsjen ra tjín‑la̱; ni̱jngo xi̱ta̱ ra ma ko̱chi̱ya‑la̱ kóꞌsín kosòn‑la̱ ko̱ kóꞌsín tjín kjòn‑ni kjoa̱ ra ꞌsín.
\v 34 ¿A tjín jngo xi̱ta̱ ra machi̱ya‑la̱ kóꞌsín tjín kjòn‑ni jè kjo̱bítsjen ra tjín‑la̱ Nainá? ¿A ra tjín jngo xi̱ta̱ ra ko̱ma tsjá‑la̱ ꞌén Nainá?
\v 35 ¿A tjín yá ra kitsjà ítjòn‑la̱, mé‑ni nga jè Nainá si̱ìkáfa‑la̱ a̱skan‑ni?
\v 36 Ngaꞌtsì tsajmì ra tjín, jè Nainá tsikínda, jè tjíkinda̱‑la̱ nga títsa̱jnakon, ko̱ jè tímachjeén‑la̱ koni ꞌsín nga jè mejèn‑la̱.
\p Jè Nainá jeya katijna skanda ta mé ni̱chjin‑nioo̱. Ko̱ꞌsín katama.
\c 12
\s Kóꞌsín ꞌsie̱én ꞌkia̱ ijye jè Nainá chja̱ꞌnda‑ná
\p
\v 1 ꞌKoa̱á ma‑ni ꞌndsé, tà nga̱tjì‑la̱ ngaꞌtsì kjo̱hi̱ma̱takòn ra tjín‑la̱ Nainá, ꞌkoa̱á ꞌsín bitsáꞌba‑najiòn nga ko̱ꞌsín ti̱nga̱tsja ijo‑no Nainá koni jngo kjo̱tjò ra tíjnakon, ra tsje tíjna, ra nda sasén‑la̱ Nainá. Jñà kjoa̱ kìi̱, jeyaá síkíjna Nainá ꞌkia̱ nga ngi ko̱ó inìma̱‑no ko̱ ngi ko̱ó kjo̱bítsjen‑no si̱itjasòn‑la.
\v 2 Kì ko̱ꞌsín mangí‑ko̱o ijo‑no koni ꞌsín tjín kjo̱téxoma ra tjín ya̱ i̱sàꞌnde; ti̱xi̱tse̱ya jè kjo̱bítsjen‑no mé‑ni nga katafatjìya‑la̱ kóꞌsín si̱jchá ijo‑no mé‑ni nga jcha̱‑no mé kjoa̱ ra mejèn‑la̱ Nainá, koni jñà kjoa̱ ra nda tjín, ra ngi kixi̱ tjín, ko̱ ra ngi nda sasén‑la̱ Nainá.
\p
\v 3 A̱ꞌta ꞌtse̱ xá ra ꞌa̱n kjonga̱tsja, ꞌkoa̱á ꞌsín tíxian‑no nga jngó jngó‑no: kì isa̱ ꞌñó ꞌnga mahíko̱o jè kjo̱bítsjen‑no koni ꞌsín tjínè‑la̱ nga si̱kítsjen; nda kjón‑ní ti̱kítsjen koni ꞌsín bijchó chi̱ba̱‑la̱ kjo̱nda ra kitsjà‑no Nainá ꞌkia̱ nga kjokjiín‑no a̱ꞌta ꞌtse̱ Cristo.
\v 4 Koni ꞌsín tjín jè ijo‑ná nga kjín sko̱ya tjín‑ni, tanga kja̱‑tjín kja̱‑tjín xá‑la̱ nga jngó jngó;
\v 5 ꞌkoa̱á ꞌsín tjín ra a̱ꞌta tsa̱jién nga ꞌñó kjìn ma‑ná, tanga ta jngoó ma‑ná ra a̱ꞌta ꞌtse̱ Cristo; ꞌkoa̱á ꞌsín ki̱nda̱ba̱ꞌñé xàngie̱é koni ꞌsín nga itsabáꞌñó xákjién ijo‑ná.
\p
\v 6 Koni ꞌsín kjomejèn‑la̱ Nainá nga kjìn sko̱ya xá kitsjá‑ná nga jngó jngó‑ná, jè xi̱ta̱ ra kiꞌtsì xá‑la̱ nga ki̱chja̱ ngajo‑la̱ Nainá, ꞌkoa̱á ꞌsín katachja̱ koni ꞌsín nga makjiín‑la̱.
\v 7 Tsa jè xá kiꞌtsì‑la̱ nga ko̱si̱ko̱ꞌta xi̱ta̱, ko̱ꞌsín kataꞌsín; ko̱ tsa jè xá itjábé‑la̱ nga ko̱kón‑ya, ko̱ꞌsín katakón‑ya.
\v 8 Jè ra itjábé‑la̱ xá nga síje ikon xi̱ta̱, ko̱ꞌsín kataꞌsín; jè ra ma‑la̱ nga síkaꞌbí tsajmì, ngi ko̱ó inìma̱‑la̱ nga katasíkaꞌbí; jè ra xá ítjòn kjonga̱tsja, nda kjón katasíhitjasòn; jè ra basìko̱ jñà ra tsìn‑la̱, ngi ko̱ó kjo̱tsja‑la̱ nga katabasìko̱.
\p
\v 9 Ngi ko̱ó inìma̱‑no nga tsjacha ꞌtia̱àn xàngio̱o. Ti̱náchrjengio jñà kjoa̱ ra ꞌcho tjín; jè tangítji̱ngi‑la kjoa̱ ra nda tjín.
\v 10 Tsjacha ꞌtia̱àn xàngio̱o koni ꞌsín nga ꞌndsè chiba; nda jcha̱xkón xi̱ta̱ xàngio̱o nga jngó jngó; jñà isa̱ nda ti̱kíhijyo ítjòn nga jngó jngó xi̱ta̱.
\v 11 Kì tà chjàn niꞌtsè‑ko̱o jè xá ra ꞌtse̱ Nainá, ngi ko̱ó inìma̱‑no ko̱ ngi ko̱ó kjo̱tsja ti̱xá‑la Na̱ꞌín‑ná.
\v 12 Tsja ꞌtè‑la takòn a̱ꞌta ꞌtse̱ kjoa̱ ra i̱nchichiñá‑la; katachíkjoa̱‑la̱ jè inìma̱‑no ra a̱ꞌta ꞌtse̱ kjo̱hiꞌin ra i̱nchinikjioón; ni̱chjin nchijón titsaꞌba‑la Nainá.
\v 13 ꞌTiì‑la mé ra machjeén‑la̱ jñà xi̱ta̱‑la̱ Nainá; tsjacha ꞌtia̱àn jñà xi̱ta̱ ra bijchó ya̱ niꞌya‑no.
\p
\v 14 Ti̱jé‑la Nainá nga katasíchikonꞌtin jñà xi̱ta̱ ra ꞌcho síko̱‑no; kì tà chjàn kjo̱hiꞌin níjéꞌtion.
\v 15 Ti̱tsjako̱o jñà xi̱ta̱ ra tsja tjín‑la̱, ko̱ tìxten‑ko̱o ndáxkòn jñà ra ndáxko̱n i̱nchibíxten.
\v 16 Nda ti̱jngo kjo̱bítsjen‑no nga jngó jngó‑no; kì tà chjàn ꞌnga ikon ꞌnià; ya̱á tjahijtako̱ó jñà ra xi̱ta̱ i̱ma̱; kì tà chjàn ꞌñó chji̱ne̱ nachrjengio ijo‑no.
\v 17 Jñà xi̱ta̱ ra ꞌcho síko̱‑no, kì tà chjàn ꞌcho nìko̱ ngajo‑no; ndaá ꞌtia̱àn ya̱ ngixko̱n ngaꞌtsì xi̱ta̱.
\v 18 Skanda kóꞌsín tje̱n jiòn bako̱‑no, jiòn tjínè‑no nga ꞌnchán ki̱tsa̱jnako̱o ngaꞌtsì xi̱ta̱.
\v 19 Jiòn ndí ꞌndsé ra matsjake̱‑no ꞌkia̱ nga mé ra ko̱maꞌtion kì tà chjàn jiòn nijndà‑no; ta isa̱á ya̱á ti̱nga̱tsja jè Nainá jè kjoa̱‑no mé‑ni nga jè Nainá katakosòn‑la̱ a̱ꞌta ꞌtse̱ kjo̱hiꞌin; nga̱ jè xa̱jo̱n‑la̱ Nainá, ꞌkoa̱á ꞌsín tsò: “ꞌA̱án ra be nga kindájín‑la̱ xi̱ta̱, ꞌa̱án tsja‑la̱ chjí‑la̱, tsó Na̱ꞌín‑ná.”
\v 20 Ti̱ꞌkoa̱á tsò‑te: “Jè xi̱ta̱ ra mì kì nda báko̱‑li, tsa tsìn‑la̱ tsajmì ra kjine, ꞌti̱‑la̱, tsa xándá‑la̱, ꞌti̱‑la̱ nandá ra kataꞌbi; ꞌkia̱ nga ko̱si̱ki̱i, ngi nga ko̱hiní i̱sén‑la̱ koni xóꞌbí nga ko̱sabà‑la̱.”
\p
\v 21 Kì jè kjoa̱ ra ꞌcho tjín síkijne‑no, ta isa̱á jè ꞌtia̱àn kjoa̱ ra nda tjín mé‑ni nga si̱kijne‑la kjoa̱ ra ꞌcho tjióo̱n.
\c 13
\s Kóꞌsín machjeén nga ki̱náꞌyahijòn‑la jñà ra xi̱ta̱xá
\p
\v 1 Ngaꞌtsì xi̱ta̱ nda katasíhitjasòn‑la̱ jñà ra xi̱ta̱xá, tà nga̱tjì‑la̱ tsìn jngo xi̱ta̱ ra xá tjín‑la̱ ra mì a̱ꞌta ꞌtse̱ Nainá nchrabá‑ni; ko̱ ngaꞌtsì jñà xi̱ta̱ ra tjín‑la̱ xá, jè Nainá xá ko̱ꞌsín tsikítsa̱jna‑ni nga xi̱ta̱xá ma.
\v 2 ꞌKoa̱á ma‑ni jñà xi̱ta̱ ra sítája‑la̱ kjo̱téxoma‑la̱ xi̱ta̱xá, kondra̱á títsa̱jna‑la̱ jñà xi̱ta̱ ra xá Nainá tsikítsa̱jna‑ni; jñà xi̱ta̱ ra ko̱ꞌsín sítája, ti̱jñà bátsji‑ila̱ kjo̱hiꞌin ijo‑la̱.
\v 3 Jñà xi̱ta̱xá, mì tsa ki xá títsa̱jna‑ni nga jñà ki̱ncháxkón‑la̱ xi̱ta̱ ra nda ꞌsín, ta jñá‑ní xi̱ta̱ ra ꞌcho ꞌsín; tsa mejèn‑li nga mì kì ki̱skón‑la̱ jñà xi̱ta̱xá, nda ꞌti̱ìn, ko̱ jñà xi̱ta̱xá ndaá si̱ìkíjna‑li.
\v 4 Nga̱ jñà xi̱ta̱xá, xá ꞌtse̱ Nainá‑ní ra i̱nchisísin mé‑ní nga nda ki̱jna‑ni ra ji̱; tanga tsa ꞌcho tjín kjoa̱ ra tjiꞌnì, ti̱skón‑ní. Nga̱ mì tsa ta ya̱‑ni nga xá tjín‑la̱ xi̱ta̱xá; jñà xi̱ta̱xá, tjíꞌndeé‑la̱ nga tsjá‑li kjo̱hiꞌin. Nga̱ xá‑la̱ Nainá i̱nchiꞌsín nga nda ki̱ìndajín‑la̱ xi̱ta̱ ko̱ nga tsjá‑la̱ kjo̱hiꞌin xi̱ta̱ ra ꞌcho ꞌsín.
\v 5 ꞌKoa̱á ma‑ni nga machjeén‑ní nga nda kjòn si̱hitjasén koni ꞌsín tsò xi̱ta̱xá, mì tsa tà ki‑ni nga kjo̱hiꞌin tsjá‑ná; ta ki‑ní nga xá ꞌkoa̱á ꞌsín tjínè‑la̱ nga si̱hitjasén.
\v 6 ꞌKoa̱á ma‑ni nga ko̱ꞌsín katamachjí jè to̱n ra síjé xi̱ta̱xá, nga̱ jñà xi̱ta̱xá, ꞌkoa̱á ꞌsín i̱nchisíhitjasòn‑la̱ Nainá nga ni̱chjin nchijón‑ní kií xá i̱nchiꞌsín.
\v 7 Tíchjí ijye tsa mé ra tje̱n‑no; jè ra tje̱n‑la̱ to̱n ra síjé xi̱ta̱xá, kátíchjí; jè ra tje̱n‑la̱ tsajmì ra machjítjì, katabíchjítjì‑te; jè xi̱ta̱ ra machjeén‑la̱ nga jcha̱xkón, kataꞌyaxkón; jè xi̱ta̱ ra machjeén‑la̱ nga nda ki̱náchrjengi, ko̱ꞌsín nda ti̱náchrjengio.
\v 8 Kì tà chjàn yá ra tsjenꞌtin‑la; tanga tjín jngo kjoa̱ ra machjeén nga mì kì jcha̱àjin‑ná nga tje̱nꞌtin‑ná, jè‑ní nga tsjacha ꞌsie̱én xàngie̱é. Nga̱ jè xi̱ta̱ ra tsjake xákjién, ijyeé tísíhitjasòn ijye Kjo̱téxoma.
\v 9 Jñà kjo̱téxoma, tsó‑ní: “Kì kjoa̱chijngi ꞌnì, kì xi̱ta̱ nìꞌkin, kì chijé ꞌnì, kì ꞌén ndiso nakjí, kì xàngio̱o maxitakòn‑cha.” Ngaꞌtsì kjo̱téxoma kìi̱, ko̱ tsa mé kjo̱téxoma-isa‑nioo̱, ya̱á majngoko̱ ijye‑ni ra tsò: “Tsjacha ꞌti̱ìn jñà xi̱ta̱ xàngi̱i nga koni ꞌsín nga tsjachi ijo‑li.”
\v 10 Jè ra kjoa̱tsjacha, mì tsa ꞌcho síko̱ jñà xàngie̱é; jè ra tsjake xi̱ta̱ xákjén ijyeé nda tísíhitjasòn Kjo̱téxoma.
\p
\v 11 Ko̱ꞌsín ꞌsie̱én koni ꞌsín nga tíxin‑no. Ijyeé i̱nchiꞌya‑ná jè ni̱chjin ra titsa̱jneé ꞌndi̱‑ni̱. Ijchò‑la̱ chi̱ba̱‑la̱ nga si̱ꞌká‑lá ijo‑ná, nga̱ ijyeé ꞌñó tímachrañaꞌtá‑ná ni̱chjin nga jngo kjá ki̱tsa̱jnandie̱é ra kjoa̱ ꞌtse̱ jé‑ná, koni ꞌkia̱ nga ti̱ꞌsa̱ kjokjiín‑ná a̱ꞌta ꞌtse̱ Cristo.
\v 12 Ijyeé ꞌñó ni̱tje̱n, ijyeé tímachraña nga ꞌse̱ i̱sén nga ìjngo‑isa ni̱chjin xi̱tse̱ ki̱tsa̱jneé. Ki̱náchrjengieé ngaꞌtsì kjoa̱ꞌcho ra ma ñánda̱ nga jñò chon ko̱ ki̱tsa̱jnandeé koni jngo chíchàn ra kjábé ki̱cha̱‑la̱; jién chjíbé ngaꞌñó‑la̱ Nainá ra tsjá‑ná ya̱ ñánda̱ nga i̱sén chon.
\v 13 Machjeén‑ní nga nda kjòn si̱jché ijo‑ná nga ngi iseén ki̱meé. Mì kì machjeén nga bato ꞌñó si̱sieén ra ꞌsí. Mì kì machjeén nga xi̱ta̱ ꞌchi̱ ko̱meé. Mì kì machjeén nga íchjín kjóhijtake̱é, ko̱ mì kì ma jndíi̱ ján ꞌse̱é‑ná íchjín. Mì kì machjeén nga xi̱ta̱ ki̱xkàn‑ke̱é. Ko̱ mì kì machjeén nga kjoa̱xìtakòn ko̱híjcha‑lá jñà xi̱ta̱ xàngie̱é.
\v 14 ꞌKoa̱á ꞌsín katatsíjen jiòn koni ꞌsín ꞌki Cristo. Kì tà chjàn jñà ꞌbì‑la ijo‑no koni ꞌsín tjín kjoa̱ꞌcho ra mejèn‑la̱.
\c 14
\s Kóꞌsín mì kì machjeén nga ta jñá jchi̱tiya‑ná kjoa̱ ra mì tsa ꞌñó chjí‑la̱
\p
\v 1 Nda jchi̱ko̱o jñà xi̱ta̱ xàngio̱o jñà ra mì tjíjngo ikon mé kjoa̱ ra tjíꞌnde‑la̱ nga ꞌsi̱in; kì tà chjàn jñà kjoa̱ chitiya‑no, ni̱ꞌsín mì kì mangásòn kjo̱bítsjen‑no jñà kjoa̱ ra ꞌsín.
\v 2 Tjín xi̱ta̱ ra ko̱ꞌsín síkítsjen nga ma chine ngaꞌtsì tsajmì ra tjín; ti̱ꞌkoa̱ tjín‑te xi̱ta̱ ra mì kì makjiín‑la̱ tsa maá chine ijye tsajmì ra tjín; tà jñá kjine tsajmì ra majchá ya̱ a̱jin nangi.
\v 3 Jè ra kjine ijye tsajmì ra ma chine kì tà chjàn bachrjengi jè ra mì kì taxki̱ kjine ijye tsajmì, ko̱ jè ra mì kì ma‑la̱ taxki̱ kjine ijye tsajmì, kì tà chjàn chja̱jno‑la̱ jè ra ma‑la̱ kjine ta mé‑nioo̱; nga̱ jè Nainá ijyeé iskábétjò nga iꞌndí‑la̱ tsò‑la̱.
\v 4 ¿Yá‑ni ra ji̱ nga ji̱ nikìnda̱‑ni chi̱ꞌnda ra kjꞌií? Kinda̱ ꞌtse̱é Nainá ra ni‑la̱ ma chi̱ꞌnda ra̱kìi̱ tsa kixi̱ tíjna, ko̱ tsa mì kixi̱ tíjna. Ko̱kixi̱yaá‑ni, nga̱ jè Na̱ꞌín‑ná tseé ngaꞌñó tjín‑la̱ nga ma kixi̱ si̱ìkíjna.
\p
\v 5 Tjín xi̱ta̱ ra tsò: Tjín ni̱chjin ra isa̱ xkón koni jñà ni̱chjin ra iꞌkaa̱. Ko̱ tjín ra tsò: Jñà ni̱chjin, ta ngásón kjòn nga ni̱chjin nchijòn. Nga jngó jngó xi̱ta̱, ꞌkoa̱á ꞌsín nda katíjngo‑la̱ ikon koni ꞌsín tsò‑la̱ kjo̱bítsjen‑la̱.
\v 6 Jñà xi̱ta̱ ra fahájin jngo ni̱chjin nga bexkón, jeyaá síkíjna Nainá; ko̱ jñà xi̱ta̱ ra tsò nga ta ngásòn ngáyaá jñà ni̱chjin, ti̱ꞌkoa̱á jeyaá síkíjna Nainá. Jñà xi̱ta̱ ra kjine ijye ta mé tsajmì‑nioo̱, a̱ꞌta ꞌtse̱ Nainá‑ní nga ko̱ꞌsín kjine, nga̱ tsjá‑la̱ kjo̱nda Nainá nga tsò‑la̱: “Tse kjo̱nda kataꞌse‑li”; ko̱ jñà xi̱ta̱ ra mì taxki̱ kjine tsajmì, ti̱ꞌkoa̱á a̱ꞌta ꞌtse̱ Nainá‑ní nga mì kì kjine, ko̱ ti̱ꞌkoa̱á ti̱ꞌsín chja̱ꞌta‑la̱ Nainá.
\p
\v 7 Jién, ꞌkia̱ nga titsa̱jnakeén, mì tsa ki‑ni nga jién jeya si̱kíjneé ijo‑ná. Ko̱ ꞌkia̱ nga ki̱yé, mì tsa ki‑ni nga jeya si̱kíjneé kjo̱biya‑ná.
\v 8 Tanga kií xá titsa̱jnakon‑ná nga jè Nainá, jeya kíjna. Ko̱ ꞌkia̱ nga biyeé, kií ko̱ꞌsín biya‑ná nga jè Nainá jeya katijna. Tsa titsa̱jnakeén, ko̱ tsa ki̱yé, jè Nainá jeya kíjna, nga a̱ꞌta ꞌtse̱é titsa̱jna‑ná.
\v 9 ꞌKoa̱á ma‑ni nga ꞌken jè Cristo, ko̱ a̱kjòn jaáya‑ila̱ nga tsikijnakon‑ni, mé‑ni nga jè ka̱ma Ni‑la̱ jñà xi̱ta̱ ra ijye ꞌken, ko̱ ra takó títsa̱jnakon.
\p
\v 10 Tanga ji̱ ra nakjoájno‑la̱ ꞌndsì, ¿mé‑ni ko̱ꞌnìa‑ni? Ti̱ꞌkoa̱á ji̱ ra nachrjengi ꞌndsì, ¿mé‑ni ko̱ꞌnìa‑te‑ni? Nga̱ ngaꞌtsì‑ná, kijcho kincheé ya̱ ngixko̱n Nainá nga jè ki̱ìndajín saba‑ná.
\v 11 ꞌKoa̱á ꞌsín tjíꞌta jè xa̱jo̱n‑la̱ Nainá:
\q Tíjna̱kon‑ná tsó Na̱ꞌín‑ná;
\q ngaꞌtsí xi̱ta̱ ya̱ ki̱nchaxkónchiꞌta‑na
\q ko̱ ngaꞌtsí xi̱ta̱ ko̱ki̱tso̱ nga ꞌa̱n‑ná ra Nainá.
\m
\v 12 Nga̱ ngaꞌtsí‑ná ꞌki̱í‑lá kinda̱ jè Na̱ꞌín‑ná ngaꞌtsì kjoa̱ ra kiꞌnié ꞌkia̱ nga i̱ tsikitsa̱jneé i̱ i̱sàꞌnde.
\p
\v 13 Kií jnchro‑ni nga mì ti̱ xàngie̱é ki̱nákjoa̱jno‑lá; ta isa̱á jnchro ndaá si̱kítsjeén nga mì ko̱ꞌsín ꞌsie̱én jè kjoa̱ ra síkitsón‑ya koni ꞌsín makjiín‑la̱ xàngie̱é, mé‑ni nga mì tsa ta ko̱tjín‑ni kjoa̱ ra india ska̱jin‑ni jé.
\v 14 ꞌA̱n, koni ꞌsín nga makjiín‑na a̱ꞌta ꞌtse̱ Cristo Jesús, ꞌkoa̱á ꞌsín fìya‑na nga ngi kixi̱í kjoa̱ nga ngaꞌtsì tsajmì ra ma chine, tsìn‑jìn ra xkón‑ni nga chineé. Tanga tsa yá ra ko̱ꞌsín makjiín‑la̱ nga tsò: tjín iꞌka tsajmì ra xkón‑ni nga ma chine, ta a̱ꞌta ꞌtse̱‑ní nga xkón‑ni.
\v 15 Tanga tsa ta kií‑ni nga̱tjì‑la̱ tsajmì ra chinì, jè ꞌndsì ꞌchoó ka̱ma‑la̱, jè kjoa̱ ra tjiꞌnì mì tsa ti̱ kjo̱tsjacha‑ni; kì tà chjàn biꞌnde‑jìn nga kji̱tsón jè ꞌndsì ra jè Cristo ꞌken‑tjì ngajo‑la̱ nga ta nga̱tjì‑la̱ jñà tsajmì ra chinì.
\v 16 Kì ko̱tjín kjoa̱ ra ꞌnià, mé‑ni nga mì tsa jñà xi̱ta̱ ki̱chja̱jno‑la̱ kjoa̱nda ra makjiín‑no.
\v 17 ꞌKia̱ nga jè Nainá tíbatéxoma‑ná, mì tsa ki ra ꞌñó chjí‑la̱ mé ra ꞌsie̱é ko̱ mé ra chji̱ne̱é; jè‑ní nga kixi̱ ki̱tsa̱jneé, nga ꞌnchán ki̱tsa̱jneé, ko̱ nga ꞌse̱‑ná kjo̱tsja; jñá kjoa̱ kìi̱, ra tsjá jè Inìma̱ Tsje‑la̱ Nainá.
\v 18 Jñà xi̱ta̱ ra ko̱ꞌsín si̱hitjasòn‑la̱ jè Cristo jñà kjoa̱ kìi̱ nda sasén‑la̱ Nainá, ko̱ nda ki̱tjongi ya̱ ngixko̱n xi̱ta̱.
\p
\v 19 Kií machjeén‑ní nga jè kongítji̱ngi‑lá kjoa̱ ra ꞌnchán síkítsa̱jna‑ná ko̱ nga ki̱si̱ko̱ kañé xàngie̱é a̱ꞌta ꞌtse̱ kjoa̱ ra makjiín‑ná.
\v 20 Kì tà chjàn xá‑la̱ Nainá nikitsóñì ra ta jè nga̱tjì‑la̱ tsajmì ra chinì. Kixi̱í kjoa̱, ngaꞌtsì tsajmì ra tjín, tsje‑ní. Tanga, jé ra ꞌcho tjín ꞌkia̱ nga tà nga̱tjì‑la̱ jè tsajmì ra chinì si̱ìkitsón‑jin kjoa̱ ra ko̱ꞌsín makjiín‑la̱ xi̱ta̱ xàngi̱i.
\v 21 Isa̱á nda‑ni, kì tà chjàn ijo chji̱ni̱i, kì tà chjàn xán ꞌyì, ko̱ kì mé kjoa̱ ra ꞌnì jè ra si̱ìkitsón‑jin jè kjoa̱ ra makjiín‑la̱ ꞌndsì.
\v 22 Koni ꞌsín makjiín‑li a̱ꞌta ꞌtse̱ kjoa̱ kìi̱, tà ji̱í tijin‑takìn ko̱ Nainá. ¡Mé ta̱ nda‑la̱ jè xi̱ta̱ ra ko̱ꞌsín ꞌsín koni ꞌsín nga makjiín‑la̱ ko̱ mì kì a̱skan si̱íkájno‑ni jñà kjoa̱ ra ꞌsín!
\v 23 Jè ra jò tjín‑la̱ ꞌkia̱ nga mé tsajmì ra kjine, nga mì kì tsa tjíjngo‑ni ikon nga kjine, jé tíbánè‑la̱ ijo‑la̱. Jngo xi̱ta̱, tsa jè kjoa̱ ra ꞌsín, mì kì tjíjngo ikon nga nda tjín ya̱ ngixko̱n Nainá, tíbátsji-jé‑ní.
\c 15
\s Kóꞌsín matsja‑la̱ a̱ꞌta ꞌtse̱ Nainá jñà ra mì tsa xi̱ta̱ judío
\p
\v 1 Jién ra ijye ꞌñó tinche̱é koni ꞌsín nga makjiín‑ná a̱ꞌta ꞌtse̱ kjoa̱ ra tjíꞌnde‑ná nga ꞌsie̱én, machjeén‑ní nga ti̱ꞌkoa̱ ki̱chíkjoa̱ko̱‑ná jñà xi̱ta̱ ra ko̱ꞌsín makjiín‑la̱ nga mì kì tjíꞌnde‑la̱ mé kjoa̱ ra ꞌsi̱in. Mì tsa tà jñà kjoa̱ ra nda sasén‑ná kjótsjieé.
\v 2 Nga jngó jngó‑ná machjeén‑ní nga jè ko̱ꞌsie̱én kjoa̱ ra nda tjín ra sasén‑la̱ xi̱ta̱ xàngie̱é ra kjo̱nda ꞌtse̱‑ni, mé‑ni nga ki̱hijin‑isa‑ni kjo̱bítsjen‑la̱ a̱ꞌta ꞌtse̱ kjoa̱ ra makjiín‑la̱.
\v 3 Nga̱ ti̱ꞌkoa̱á jè Cristo mì tsa jñà tsakátsji kjoa̱ ra nda isasèn‑la̱ ijo‑la̱; ta isa̱á a̱ꞌta ꞌtse̱é itjasòn koni ꞌsín tíchja̱ jè xa̱jo̱n ꞌtse̱ Salmo nga tsò: “Jñà ꞌén ꞌcho ra kiìchja̱jno‑li xi̱ta̱, sabà ꞌa̱án kiskanè‑na.”
\v 4 Jñà ꞌén ra isinda nga ti̱ꞌsa̱ kjotseé, kií xá isinda‑ni nga jién ko̱kòn‑ya‑ná, mé‑ni nga jè xa̱jo̱n ra tjíꞌta ꞌén‑la̱ Nainá si̱ije ikon‑ná, ko̱ ko̱si̱ko̱‑ná nga kixi̱ ki̱nchieé mé‑ni nga jchíña‑lá kjo̱nda ra nchrabá‑ni ꞌtse̱ Nainá.
\v 5 Nainá ra ma‑la̱ síje ikon‑ná ko̱ ma‑la̱ basìko̱‑ná nga kixi̱ minchieé, ko̱ꞌsín jngo kjo̱bítsjen katatsjá‑no nga jngó jngó‑no koni ꞌsín nga kitsò jè Cristo Jesús,
\v 6 mé‑ni nga ngaꞌtsì‑no ngásòn ta̱jngo jta̱ jeya si̱kíjna jè ra Nainá ko̱ ra Na̱ꞌìn tsò‑la̱ Jesucristo ra tíjna ítjòn‑ná.
\p
\v 7 ꞌKoa̱á ma‑ni, ko̱ꞌsín chjíbétjò jiòn xàngio̱o nga jngó jngó‑no, koni ꞌsín nga iskábétjò‑no jè Cristo mé‑ni nga jeya kíjna‑ni Nainá.
\v 8 ꞌKoa̱á xin‑no, jè Cristo Jesús, kií xá ꞌji‑nì nga ꞌji síxájin‑la̱ jñà xi̱ta̱ judío ra tjíꞌta chi̱ba̱ ijo‑la̱ nga tsakón kjoa̱kixi̱ ꞌtse̱ Nainá, ko̱ nga ji̱í síhitjasòn koni ꞌsín ijye kitsjà‑la̱ tsaꞌba Nainá jñà xi̱ta̱ jchínga‑la̱ kjotseé.
\v 9 Ko̱ kií xá ꞌji‑te‑ni, mé‑ni nga jñà ra mì tsa xi̱ta̱ judío, jeya si̱ìkíjna‑ni Nainá ta nga̱tjì‑la̱ kjo̱hi̱ma̱takòn ra tjín‑la̱, koni ꞌsín tíchja̱ xa̱jo̱n ra tjíꞌta ꞌén‑la̱ Nainá nga tsò:
\q ꞌKoa̱á ma‑ni nga ꞌa̱n, jeyaá síkíjna ya̱ a̱jin‑la̱ xi̱ta̱ na̱xi̱ndá ra mì tsa xi̱ta̱ judío
\q ko̱ se‑náa̱ a̱ꞌta tsa̱ji jè ꞌén ra nda tsò.
\m
\v 10 Tjíꞌta‑te ñánda̱ nga tsò:
\q Jiòn ra mì tsa xi̱ta̱ judío ꞌmì‑no, tsjaá ꞌtè‑la takòn ko̱ xi̱ta̱ na̱xi̱ndá‑la̱ Nainá.
\m
\v 11 Ti̱ꞌkoa̱ tíchja̱á ñánda̱ nga tsò‑te:
\q Ngaꞌtsì ra mì tsa xi̱ta̱ judío ꞌmì‑no jeya ti̱kíjna jè Na̱ꞌín‑ná,
\q ko̱ ngaꞌtsì na̱xi̱ndá, ꞌnga katasíkíjna Nainá.
\m
\v 12 India tíchja̱‑isa ya̱ xa̱jo̱n ꞌtse̱ Isaías nga tsò:
\q Ya̱á ki̱tjoꞌta jngo‑ni jtsꞌén ya̱ tje̱‑la̱ Isaí ra ko̱tèxoma‑la̱ jñà ra mì tsa xi̱ta̱ judío,
\q ko̱ jé jtsꞌén ra̱kìi̱ koa̱àꞌta ikon, jñà ra mì tsa xi̱ta̱ judío nga sko̱óña‑la̱.
\p
\v 13 Nainá ra faꞌtatakén nga ma chiñá‑lá kjo̱nda‑la̱, tse katatsjá‑no kjo̱tsja‑la̱ ko̱ kjoa̱ꞌnchán‑la̱, jiòn ra makjiín‑no a̱ꞌta ꞌtse̱. Ko̱ jè ngaꞌñó ra tjín‑la̱ Inìma̱ Tsje‑la̱, katasiko̱‑no nga isa̱ nda kjóꞌta takòn nga jchíñakjoa̱‑la jè kjo̱nda‑la̱.
\s Kóꞌsín kisíxáko̱ jè Pablo ra mì tsa xi̱ta̱ judío
\p
\v 14 Tanga jiòn ꞌndsè, tjíjngoó takoàn ra a̱ꞌta tsa̱jiòn nga ꞌñó tjín‑no kjo̱nda ko̱ nga nda machi̱ya‑no tà mé kjoa̱‑ni, nga maá‑no jiòn si̱kixi̱ya xi̱ta̱ xàngio̱o nga jngó jngó‑no.
\v 15 Ndí ꞌndsé, ꞌkoa̱á ꞌsín tíbindá‑no jè xa̱jo̱n ra̱kìi̱ nga ꞌñó kítsja‑la̱ takoàa̱n nga tíchjà kixi̱‑no koni ꞌsín tjín ra ngi kjo̱hixi̱ mé‑nì nga mì kì si̱jchaàjin‑no jè ꞌén ra tjíꞌta xa̱jo̱n ra tísikásén‑no. Kií ko̱ꞌsín tísíkítsjen‑no nga̱ ꞌa̱án kitsjà‑na kjo̱tjò‑la̱ Nainá nga kitsjà xá‑na,
\v 16 nga chi̱ꞌnda‑la̱ Jesucristo ko̱ma ya̱ a̱jin‑la̱ jñà ra mì tsa xi̱ta̱ judío. Jè xá ra kitsjà‑na Nainá, jè‑ní nga nda sixáko̱ ꞌén xi̱tse̱‑la̱ Nainá ra nda tsò, mé‑ni nga jñà ra mì tsa xi̱ta̱ judío, katakjábétjò Nainá koni jngo kjo̱tjò ra nda sasén‑la̱, jñà ra ijye Inìma̱ Tsje‑la̱ Nainá isìtsje.
\p
\v 17 ꞌKoa̱á ma‑ni nga ꞌñó tsja tjín‑na jè xá ra tíꞌsiaa̱n a̱ꞌta ꞌtse̱ Nainá koni ꞌsín nga tísíchjeén‑na jè Cristo Jesús.
\v 18 Ni̱mé kjoa̱ tjín ra taxki̱ tíchjàa̱, ta jé‑ní koni ꞌsín tísíko̱‑na jè Cristo nga ꞌa̱n tísíchjeén‑na nga tísíxáko̱ jñà ra mì tsa xi̱ta̱ judío mé‑ni nga si̱hitjasòn‑ni koni ꞌsín mejèn‑la̱ Nainá. ꞌKoa̱á ꞌsín tíma koni ꞌsín nga tíchjàa̱ ko̱ nga tíꞌsiaa̱n,
\v 19 nga tíꞌyaá‑la̱ ngaꞌñó‑la̱ kjo̱xkón ra bakón kjoa̱jeya‑la̱ Nainá ko̱ ngaꞌñó‑la̱ Inìma̱ Tsje‑la̱ Nainá. Nga ko̱ ꞌsín ijye nda ísikáꞌbísòo̱n jè ꞌén xi̱tse̱ ra nda tsò a̱ꞌta ꞌtse̱ Cristo ítsikiꞌtsiá kjòn‑na ya̱ Jerusalén ko̱ nga tíjngo skanda ján Ilírico.
\v 20 Ko̱ ꞌkoa̱á ꞌsín ítsikiné‑la̱ ijo‑na̱ nga mì tsa ya̱ tsiꞌkènájmíya ꞌén xi̱tse̱ ra nda tsò a̱ꞌta ꞌtse̱ Cristo ya̱ i̱ꞌnde ñánda̱ ijye kiꞌsena̱jmíya ra a̱ꞌta ꞌtse̱, mé‑ni nga mì ꞌa̱n kokon‑yá nda‑la̱ jñà xi̱ta̱ ra a̱sa kiíꞌnchré a̱ꞌta ꞌtse̱ Cristo ra kjꞌií xi̱ta̱ tsiꞌkéna̱jmí‑la̱.
\v 21 ꞌKoa̱á ꞌsín tíꞌsiaa̱n koni ꞌsín tíchja̱ jè xa̱jo̱n ra tjíꞌta ꞌén‑la̱ Nainá nga tsò:
\q Jñà xi̱ta̱ ra mì yá tsiꞌkéna̱jmíya‑la̱ ra a̱ꞌta ꞌtse̱, ske̱‑ní;
\q ko̱ jñà xi̱ta̱ ra kjè mé ꞌén ꞌnchré ra a̱ꞌta ꞌtse̱, ko̱chi̱yaá‑la̱.
\s Kóꞌsín jè Pablo mejèn‑la̱ ki̱ji̱ ya̱ Roma
\p
\v 22 Tà nga̱tjì‑la̱ xá ra tíꞌsiaa̱n, kjokjìn ꞌka̱ satéchjà‑na nga mì ma fìjkon‑no.
\v 23 Tanga ꞌndi̱ ꞌndi̱, ijyeé ijyeheꞌtà xá‑na̱ i̱ i̱ꞌnde ñánda̱ tsáꞌba̱; ti̱ꞌkoa̱á kjo kjín nó tjín‑ni nga mejèn‑na fìjkon‑najiòn.
\v 24 ꞌKia̱ nga kjiáa̱n ján España, mején‑na nga a̱kjòn ya̱ íjkon‑no. Mejèn‑na nga skexkon‑no ꞌkia̱ nga kjoáha̱to mé‑ni ꞌkia̱ nga ijye jchi̱bana̱jmí jngohíjteé, ka̱ma ki̱si̱ko̱‑nájiòn nga kjín‑isa ñánda̱ tífia.
\v 25 Tanga ꞌndi̱ ꞌndi̱, ya̱á tífia ya̱ Jerusalén nga tífìko̱ jngo‑la̱ ngaꞌñó jñà xi̱ta̱‑la̱ Cristo ra ya̱ títsa̱jna.
\v 26 Nga̱ jñà xi̱ta̱‑la̱ Nainá ra títsa̱jna ya̱ Macedonia ko̱ Acaya, ꞌkoa̱á ꞌsín kjotsja‑la̱ nga tsikíxkó jngo ngaꞌñó ra kjo̱tjò ꞌtse̱ na̱xi̱ndá‑la̱ Cristo ra xi̱ta̱ i̱ma̱ ra títsa̱jna ya̱ Jerusalén.
\v 27 Ngi ta kjo̱tsja ꞌtse̱‑ní nga ko̱ꞌsín kitsjà. Nga̱ tje̱nꞌtin‑te‑la̱ kjo̱nda. Tsa jñà xi̱ta̱ ra mì tsa xi̱ta̱ judío, ꞌkoa̱á ꞌsín isakò‑la̱ kjo̱nda ya̱ a̱jin inìma̱‑la̱ ra ta nga̱tjì ꞌtse̱ xi̱ta̱ judío, ti̱ꞌkoa̱á tjínè‑te‑la̱ nga ko̱si̱ko̱ ngajo‑ni a̱ꞌta ꞌtse̱ ngaꞌtsì tsajmì ra ko̱chjeén‑la̱ ijo‑la̱ jñà xi̱ta̱ judío.
\v 28 ꞌKia̱ nga ijye kje̱heꞌtà kjoa̱ kìi̱ nga ijye singátsja jè kjo̱tjò ra ꞌkoà‑la̱ ra ijye kjóxkó, a̱kjòn ꞌkia̱á kjoáa̱to‑no ꞌkia̱ nga kjián ján España.
\v 29 Be‑ná nga ꞌñó nda si̱ichikonꞌtin‑ná Cristo ꞌkia̱ nga kijchòjkon‑no.
\p
\v 30 Tanga ꞌkoa̱á ꞌsín bitsáꞌba‑no a̱ꞌta ꞌtse̱ Jesucristo ra tíjna ítjòn‑ná ko̱ a̱ꞌta ꞌtse̱ kjo̱tsjacha ra tsjá‑ná jè Inìma̱ Tsje‑la̱ Nainá, ti̱nákjoa̱ꞌta‑la Nainá ra a̱ꞌta tsa̱ꞌa̱n, jiòn ra ndí ꞌndsé xin‑no,
\v 31 mé‑ni nga ko̱si̱ko̱‑na Nainá a̱ꞌta ꞌtse̱ xi̱ta̱ ra mì kì makjiín‑la̱ ra títsa̱jna ya̱ Judea ko̱ mé‑ni jè kjo̱tjò ra tífìko̱‑la̱ xi̱ta̱‑la̱ Cristo ra títsa̱jna ya̱ Jerusalén nda katasasén‑la̱;
\v 32 mé‑ni nga, tsa ko̱ꞌsín mejèn‑la̱ Nainá, nda kijchòjkon‑no nga ngi ko̱ó kjo̱tsja‑na̱ síkjáyako̱‑no.
\v 33 Jè Nainá ra tsjá‑ná kjo̱ꞌnchán katijnako̱‑no ngaꞌtsì‑no. Ko̱ꞌsín katama.
\c 16
\s Kóꞌsín síhixoꞌta jè Pablo ngaꞌtsì xi̱ta̱ ra ijye bexkon
\p
\v 1 ꞌKoa̱á ꞌsín tísikásén‑no jè tichjeé Febe ra tjín‑la̱ xá ya̱ na̱xi̱ndá‑la̱ Cristo ra tíjna ya̱ na̱xi̱ndá Cencrea.
\v 2 Nda chjíbétjò tichjeé ra̱kìi̱ koni jngo xàngie̱é ra ti̱ꞌkoa̱ makjiín‑la̱ a̱ꞌta ꞌtse̱ Cristo nga ꞌkoa̱á ꞌsín bakèn‑la̱ ra xi̱ta̱‑la̱ Cristo ma; ko̱ ti̱si̱ko̱o ni̱ꞌsín ta mé ra ko̱chjeén‑la̱ nga̱ jè xàngie̱é ra̱kìi̱, ꞌñó kjo kjìn xi̱ta̱ basìko̱, skanda ꞌa̱n ti̱ꞌkoa̱á tsasìko̱ó‑te‑na.
\p
\v 3 Ti̱hixoꞌtá‑ná jè Priscila ko̱ Aquila jñà xi̱ta̱ ra ta̱ña iníxákjo‑ji̱n a̱ꞌta ꞌtse̱ Cristo Jesús.
\v 4 Jñà xi̱ta̱ kìi̱, kja̱meé kisìꞌken‑tjì ngajo‑na ijo‑la̱; ko̱ mì tsa ta ꞌa̱n‑jiàa̱n ra ko̱xin‑la̱ nga Nainá ra ki̱íchjí‑la̱, ti̱ꞌkoa̱á ti̱ tsò‑ni ngaꞌtsì xi̱ta̱ na̱xi̱ndá‑la̱ Cristo, jñà ra mì tsa xi̱ta̱ judío.
\v 5 Ti̱ꞌkoa̱á ti̱hixoꞌtá‑ná jñà xi̱ta̱ na̱xi̱ndá‑la̱ Cristo ra ya̱ maxkóya ya̱ niꞌya‑la̱ Priscila ko̱ Aquila. Ti̱hixoꞌtá‑ná Epeneto ra ꞌñó matsjake̱ nga̱ jè kjokjiín ítjòn‑la̱ a̱ꞌta ꞌtse̱ Cristo ya̱ nangi Acaya.
\v 6 Ti̱hixoꞌtá‑ná jè María, jè chjo̱ón ra ꞌñó nda isíxá ra a̱ꞌta tsa̱jiòn.
\v 7 Ti̱hixoꞌtá‑ná jè Andrónico, ko̱ jè Junias ra xi̱ta̱ xàngia̱ ma, ra ta̱ña tsikitsa̱jna‑ji̱n ya̱ nda̱yá; jñà xi̱ta̱ kìi̱, ꞌñó nda ꞌyaxkón‑la̱ ya̱ a̱jin‑la̱ xi̱ta̱ ra tsikíxáya‑la̱ Cristo, ko̱ isa̱á ítjòn kijtsexkon jè ꞌén‑la̱ Cristo koni ꞌa̱n.
\v 8 Ti̱hixoꞌtá‑ná jè Amplias, jè xi̱ta̱ ra ꞌñó matsjake̱ a̱ꞌta ꞌtse̱ Na̱ꞌín‑ná.
\v 9 Ti̱hixoꞌtá‑ná jè Urbano, jè ra ta̱ña níxá‑ji̱n a̱ꞌta ꞌtse̱ Cristo Jesús, ko̱ jè Estaquis ra ti̱ꞌkoa̱ ꞌñó matsjake̱.
\v 10 Ti̱hixoꞌtá‑ná jè Apeles, jè ra ijye ko̱kitsò Cristo nga xi̱ta̱ kixi̱‑ní; ti̱ꞌkoa̱ Ti̱hixoꞌtá‑ná jñà xi̱ta̱ ra ya̱ títsa̱jna niꞌya‑la̱ Aristóbulo.
\v 11 Ti̱hixoꞌtá‑ná jè Herodión ra xi̱ta̱ xàngia̱ ma; ti̱ꞌkoa̱ Ti̱hixoꞌtá‑ná jñà xi̱ta̱ ra tjíhijyo ya̱ niꞌya‑la̱ Narciso ra nda kjiꞌta ikon Na̱ꞌín‑ná.
\v 12 Ti̱hixoꞌtá‑ná jè Trifena, ko̱ jè Trifosa, jñà íchjín ra ꞌñó nda síxá‑la̱ Na̱ꞌín‑ná, ko̱ jè tichjeé Pérsida ra ꞌñó tsjacheé ra ti̱ꞌkoa̱ ꞌñó nda síxá‑la̱ Na̱ꞌín‑ná.
\v 13 Ti̱hixoꞌtá‑ná jè Rufo ra xá jahíjin‑ni Nainá, ko̱ ti̱hixoꞌta‑te‑ná jè na̱‑la̱ ra koni tsa na̱‑na̱ ma.
\v 14 Ti̱hixoꞌta‑te‑ná jè Asíncrito, ko̱ jè Flegonte, ko̱ jè Hermas, ko̱ jè Patrobas, ko̱ jè Hermes, ko̱ ti̱hixoꞌta‑te‑ná jñà xi̱ta̱ ꞌndsé ra ya̱ títsa̱jnako̱.
\v 15 Ti̱hixoꞌta‑te‑ná jè Filólogo ko̱ jè Julia, jè Nereo, ko̱ jè ndichja, ko̱ jè Olimpas, ko̱ ngaꞌtsì xi̱ta̱ ra makjiín‑la̱ ra a̱ꞌta ꞌtse̱ Cristo ra ya̱ títsa̱jnako̱.
\v 16 Ngi ko̱ó inìma̱‑no ti̱kjáya‑la xàngio̱o nga jngó jngó‑no. Ngaꞌtsì xi̱ta̱ na̱xi̱ndá‑la̱ Cristo ra i̱ títsa̱jna síhixoꞌta‑no.
\p
\v 17 Ndí ꞌndsè, ꞌkoa̱á ꞌsín tíbitsáꞌba‑no nga chítsijen‑la jñà xi̱ta̱ ra síjòya ko̱ ra síkitsón‑jin koni ꞌsín makjiín‑no ra kondra̱ fì‑la̱ jè kjo̱bítsjen ra ichitáꞌyá jiòn. Ti̱nchaꞌtàxìn‑la jñà xi̱ta̱ kìi̱.
\v 18 Jñà xi̱ta̱ kìi̱, mì tsa Na̱ꞌín‑ná Jesucristo síxáꞌta‑la̱, ta ijo‑la̱á síxátjì nga ꞌén sin ꞌén nda chja̱ nga konda̱cha̱‑la̱ inìma̱‑la̱ jñà xi̱ta̱ ra mì kì nda machi̱ya‑la̱.
\v 19 ꞌA̱n matsjaá‑na ra a̱ꞌta tsa̱jiòn, nga̱ ijyeé nda naꞌyá‑la̱ nga maá‑no nda nihitjasòn; tanga ꞌa̱n mejèn‑na nga xi̱ta̱ chji̱ne̱e katama jiòn ra a̱ꞌta ꞌtse̱ kjoa̱ ra nda tjín. Ko̱ jngo kjá ni̱mé ra kjoa̱ꞌcho katama‑no.
\v 20 Machrañaá ni̱chjin nga jè Nainá ra tsjá‑ná kjoa̱ꞌnchán, ngi ski̱íxoba jè xi̱ta̱‑ni̱í nga tsjá‑no ngaꞌñó nga ma si̱kijne‑la. Jè kjo̱nda‑la̱ Na̱ꞌín‑ná Jesucristo katijnako̱‑no.
\p
\v 21 Tísíhixoꞌtá‑no jè Timoteo jè ra ta̱ña níxákjo‑ji̱n; ti̱ꞌkoa̱ síhixoꞌta‑no jè Lucio, ko̱ jè Jasón, ko̱ jè Sosípater jñà ra xi̱ta̱ xàngia̱a ma.
\p
\v 22 ꞌA̱n ra Tercio ꞌmì‑na ra tíbindáa̱ jè xa̱jo̱n ra̱kìi̱ tísixóꞌtà‑no ra a̱ꞌta ꞌtse̱ Na̱ꞌín‑ná.
\p
\v 23 Ti̱ꞌkoa̱ tísíhixoꞌtá‑no jè Gayo; ꞌa̱n i̱í tíjna̱‑naa̱ ya̱ niꞌya‑la̱ ñánda̱ nga maxkóya ngaꞌtsì xi̱ta̱ na̱xi̱ndá‑la̱ Cristo. Ti̱ꞌkoa̱ tísíhixoꞌtá‑no jè Erasto ra bítjò to̱n ꞌtse̱ niꞌya masen ꞌtse̱ na̱xi̱ndá; ti̱ꞌkoa̱ tísíhixoꞌtá‑no jè ꞌndsé ra ꞌmì Cuarto.
\p
\v 24 Kjo̱nda‑la̱ Na̱ꞌín‑ná Jesucristo katijnako̱‑no ngaꞌtsì‑no.
\s ꞌÉn ra feheꞌta‑ni
\p
\v 25 Jeya katijna jè Nainá ra tíjnako̱‑no ra tsjá‑no ngaꞌñó nga ma‑la̱ kixi̱ si̱ìkítsa̱jna‑no, koni ꞌsín tsò ꞌén xi̱tse̱ ra nda tsò ra ꞌa̱n bakon‑yáa̱ ra ijye kiꞌsena̱jmíya‑no a̱ꞌta ꞌtse̱ Na̱ꞌín‑ná Jesucristo. Ijyeé tíꞌya‑la̱ jè kjoa̱ꞌma‑la̱ Nainá ra isijnaꞌma skanda ni̱chjin kjotseé,
\v 26 tanga ꞌndi̱ ꞌndi̱, ijyeé kijcha‑la̱ koni ꞌsín tíchja̱ jè xa̱jo̱n tsje ra tsikínda jñà xi̱ta̱ ra kiìchja̱ ngajo‑la̱ Nainá kjotseé, nga ꞌkoa̱á ꞌsín kitsjà kjo̱hixi̱ jè Nainá ra tíjna nda skanda ta mé ni̱chjin‑nioo̱. Jè kjoa̱ ra tsikíꞌma Nainá tsiki, ijyeé ko̱ꞌsín kiꞌsena̱jmí ijye‑la̱ xi̱ta̱ nga tjíjtsa i̱sàꞌnde mé‑ni nga katasíhitjasòn‑ni koni ꞌsín makjiín‑la̱.
\p
\v 27 ¡Tà jè ta̱jngoó‑ni Nainá ko̱ tà jé‑ní ra ꞌñó chji̱ne̱, tà jé kataꞌse‑la̱ kjoa̱jeya a̱ꞌta ꞌtse̱ Jesucristo skanda ta mé ni̱chjin‑nioo̱! Ko̱ꞌsín katama.