\id ROM
\h Romanos
\toc1 Romanos
\mt Xo̱jo̱n carta‑la̱ San Pablo xi kiskiì‑la̱ xi̱ta̱ na̱xa̱ndá‑la̱ Cristo xi títsa̱jna Roma
\c 1
\s Kó tsò Pablo nga síhixatꞌaà jñà xi̱ta̱ na̱xa̱ndá‑la̱ Cristo xi títsa̱jna Roma
\p
\v 1 Jè xo̱jo̱n carta jè, ꞌa̱án tìkjiì‑nò xi Pablo ꞌmì‑na xi chi̱ꞌnda‑la̱ Jesucristo ma, xi xó kiìchja̱‑na Nainá nga ꞌa̱n tsibíxáya‑na ko̱ xó kitjaàjiìn‑na nga ꞌa̱n sìkaꞌbísoàn ꞌén ndaà‑la̱ Nainá.
\p
\v 2 I̱tꞌaà tsꞌe̱ ꞌén koi, Nainá jye kꞌoa̱sꞌín kitsjaà tsoꞌba nga ti̱sa̱ kjòtseé, koni sꞌín tíchja̱ Xo̱jo̱n Tsjeè‑la̱ xi kiskiì xi̱ta̱ xi kiìchja̱ ngajo‑la̱ Nainá.
\v 3 Nga ya̱ tíchja̱ i̱tꞌaà tsꞌe̱ Kiꞌndí‑la̱, jè Na̱ꞌèn‑ná Jesucristo xi jè otíxoma‑ná. Koni xi̱ta̱ i̱sòꞌnde, ya̱á inchrobàtꞌaà‑ne tje̱‑la̱ xi̱ta̱xá ítjòn David.
\v 4 Kꞌe̱ nga jaáya‑la̱ i̱tꞌaà tsꞌe̱ kjoa̱biyaà, Jesucristo, kꞌoa̱á sꞌín kiyaxkon‑la̱ nga Kiꞌndí‑la̱ Nainá‑né xi tse ngaꞌñó tjín‑la̱ koni sꞌín ndaà síkíchi̱ya‑ná jè Ini̱ma̱ Tsjeè‑la̱ Nainá xi sítsjeè‑ná.
\v 5 I̱tꞌaà tsꞌe̱ Jesucristo, kitjoé‑na kjo̱ndaà nga ꞌa̱n tsibíxáya‑na nga kèno̱jmíya‑la̱ ꞌén ndaà‑la̱ jñà xi̱ta̱ na̱xa̱ndá xi tjín nga tíjtsa i̱sòꞌnde nga kàtasíkitasòn ko̱ kàtakjeiín‑la̱ i̱tꞌaà tsꞌe̱ Cristo, mé‑ne nga jeya kíjna‑ne Cristo.
\v 6 Ti̱koa̱á jñò, xó kinokjoà‑nò nga xi̱ta̱‑la̱ Cristo kꞌoín‑nò.
\p
\v 7 Tìkjiì‑nò ngatsꞌioò xi titsa̱jnaà Roma xi matsjakeè‑nò Nainá nga ti̱koa̱ xó kinokjoà‑nò nga xi̱ta̱ tsjeè‑la̱ ko̱ma.
\p Nainá xi Na̱ꞌèn‑ná, ko̱ jè Jesucristo xi otíxoma‑ná kàtatsjá‑nò kjo̱ndaà ko̱ kjoa̱ꞌnchán ya̱ i̱jiìn ini̱ma̱‑nò.
\s Mé‑ne mejèn‑la̱ kjoi̱ Roma jè Pablo
\p
\v 8 Xi matsꞌia̱‑ne, i̱tꞌaà tsꞌe̱ Jesucristo tsjaà‑la̱ kjo̱ndaà Nainá xi i̱tꞌaà tsa̱jòn, koi kjoa̱‑la̱ nga xki̱ xi ján na̱xa̱ndá xi tjín nga tíjtsa i̱sòꞌnde, naꞌyá‑nò nga ndaà mokjeiín‑nò i̱tꞌaà tsꞌe̱ Cristo.
\v 9 I̱tꞌaà tsꞌe̱ Nainá xi ꞌa̱n sìxá‑la̱ nga tíjngoò takoàn nga sikaꞌbiá ꞌén ndaà‑la̱ xi kjoa̱ tsꞌe̱ Kiꞌndí‑la̱, jè tíbeè nga na̱chrjein nchijòn síkítsjeèn‑nò kꞌe̱ nga chjàtꞌaà‑la̱.
\v 10 Kꞌe̱ nga bìtsiꞌba‑la̱ Nainá, kꞌoa̱á sꞌín síjétꞌaà‑la̱ tsà ikon xi tsò nga chaán tsjáꞌnde‑na nga kjíkon‑nò.
\v 11 Ti̱koa̱á mejèn‑na skoe̱xkon‑nò mé‑ne nga tsja chiba‑nò kjo̱hítsjeèn tsꞌe̱ ini̱ma̱‑ná mé‑ne nga ìsa̱ kixi̱ ki̱tsa̱jna‑nò.
\v 12 Jè xi tìxan‑nò nga ngásòn kꞌoi̱‑lá ngaꞌñó xinguia̱á i̱tꞌaà tsꞌe̱ kjoa̱ xi mokjeiín‑ná.
\p
\v 13 ꞌNdsè, tichja, mejèn‑na nga kàtasijiìn‑nò nga kjòtseé tjín‑ne nga kjíkon‑nò ta̱nga skanda i̱ꞌndei̱ mì tà jngoò kjoa̱ bíchjoà ikòn‑na. Xi kjo̱hítsjeèn tsꞌa̱n, jè xi mejèn‑na nga siìxáko̱‑nò jñò, koni sꞌín kisìxá ñánda nga xìn na̱xa̱ndá mé‑ne nga ti̱koa̱ skoeè‑na kjo̱ndaà‑la̱ xá‑na xi ꞌa̱n sꞌiaàn i̱tꞌaà tsa̱jòn.
\v 14 Tjínè‑na nga kokoòya‑la̱ ngatsꞌiì xi̱ta̱ xi ꞌén griego chja̱ ko̱ xi mìkiì chja̱, xi̱ta̱ xi tjín‑la̱ kjoa̱chji̱ne̱ ko̱ xi tsjìn‑la̱.
\v 15 Kꞌoa̱á ma‑ne nga ꞌñó mejèn‑na nga ti̱koa̱ kichjàyajiìn‑nò jè ꞌén ndaà‑la̱ Nainá xi kjoa̱ tsꞌe̱ Cristo, jñò xi titsa̱jnaà na̱xa̱ndá Roma.
\s Mé ngaꞌñó xi tjín‑la̱ ꞌén ndaà‑la̱ Nainá xi kjoa̱ tsꞌe̱ Cristo
\p
\v 16 Mìkiì masobà‑na i̱tꞌaà tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo, nga ngaꞌñó‑la̱ Nainá‑né. Jè ꞌén xi ma‑la̱ síkítsa̱jnandei̱í xi̱ta̱ kjoa̱ tsꞌe̱ jé, ngatsꞌiì xi̱ta̱ xi mokjeiín‑la̱ i̱tꞌaà tsꞌe̱, matsꞌia̱ko̱‑ne jñà xi xi̱ta̱ judío ko̱ ti̱koa̱ xi mìtsà xi̱ta̱ judío.
\v 17 Jñà ꞌén ndaà‑la̱ Nainá xi kjoa̱ tsꞌe̱ Cristo okó‑ná kósꞌín sꞌín Nainá nga síkixi̱ xi̱ta̱. Tà jè‑né nga mokjeiín‑la̱ i̱tꞌaà tsꞌe̱ Cristo mé‑ne nga ìsa̱ ndaà ko̱kjeiín‑la̱. Kꞌoa̱á sꞌín tíchja̱ Xo̱jo̱n‑la̱ Nainá nga tsò: “Jè xi xi̱ta̱ kixi̱, i̱tꞌaà tsꞌe̱ kjoa̱ xi mokjeiín‑la̱ kíjnakon‑ne.”
\s Jé xi tjín‑la̱ xi̱ta̱ i̱sòꞌnde
\p
\v 18 Nga jè Nainá skanda ján ngajmiì tíhokó kjoa̱jti‑la̱ i̱tꞌaà tsꞌe̱ xi̱ta̱ xi mìkiì beèxkón ko̱ xi chꞌo sꞌín. Jè kjo̱hítsjeèn chꞌo xi tjín‑la̱ mì kì tsjáꞌnde‑la̱ nga kjoétjò xi kjoa̱kixi̱.
\v 19 Jè kjoa̱ xi ꞌya‑la̱ i̱tꞌaà tsꞌe̱ Nainá, ndaà tíjiìn‑la̱ jñà xi̱ta̱ koi, nga ti̱jè‑ne Nainá tíhokó‑ne.
\v 20 Nga jñà kjoa̱ tsꞌe̱ Nainá xi mìkiì tsejèn, ndaà tíyaxkon‑la̱ kóni nga ti̱sa̱ kisindaà i̱sòꞌnde. Yaxkoón‑la̱ nga tjín‑la̱ ngaꞌñó Nainá ni̱ta̱ mé na̱chrjein‑ne nga tà jè ta̱jngoò xi Nainá ꞌmì. Kjoa̱ koi tíꞌyaá‑la̱ i̱tꞌaà tsꞌe̱ tsojmì xi tsibíndaà Nainá. Kꞌoa̱á ma‑ne nga jñà xi̱ta̱ mì kì ko̱ma ki̱nchako̱ yijo‑la̱ nga ki̱tso̱: “Mìkiì tíjiìn‑na tsà tíjna Nainá.”
\v 21 Jñà xi̱ta̱ na̱sꞌín tíjiìn‑la̱ nga tjín Nainá xi tsibíndaà i̱sòꞌnde, ta̱nga mìkiì jeya kisìkíjna, ni̱ mìkiì kitsjaà‑la̱ kjo̱ndaà. Ta̱ sa̱á tà koií ꞌñó ndaà kisìsꞌin‑la̱ kjo̱hítsjeèn xi ni̱mé chjí‑la̱. Kjo̱hítsjeèn tájaà‑la̱ kisìjñò‑la̱.
\v 22 Xi kjo̱hítsjeèn tsꞌe̱, xi̱ta̱ chji̱ne̱é kitsò‑la̱ yijo‑la̱; ta̱nga mìtsà kixi̱ kjoa̱, xi̱ta̱ nchi̱kón‑né.
\v 23 Kisìkíjnatꞌaàxìn Nainá xi jeya tíjna xi mìkiì fehetꞌaà na̱chrjein‑la̱; ta̱ sa̱á koi kijtseèxkón i̱sén tsꞌe̱ xi̱ta̱ xi fehetꞌaà na̱chrjein‑la̱; skanda jñà i̱sén‑la̱ cho̱ xi tjímajiìn i̱sén kijtseèxkón, ko̱ i̱sén‑la̱ cho̱ xi ñijòn ma ndso̱ko̱ ko̱ i̱sén‑la̱ ye̱.
\p
\v 24 Koií kjoa̱‑la̱ nga kitsjeiìn takòn Nainá nga ta̱xki̱ kàtasꞌín nga kàtasꞌín ni̱ta̱ mé kjoa̱ chi̱nga̱ xi bitjokàjiìn ini̱ma̱‑la̱. Kꞌoa̱á ma‑ne nga tsohótsji‑la̱ kjoa̱ sobà yijo‑la̱ koni sꞌín kisìko̱ xíkjín.
\v 25 Kisìkjatjìyaá‑la̱ kjoa̱ kixi̱‑la̱ Nainá; ꞌén ndiso kiskoé. Jñà kijtseèxkón koa̱ jñà kisìtsjako̱ tsojmì xi jè Nainá tsibíndaà. Mìtsà jè kijtseèxkón koa̱ kisìtsjako̱ Nainá xi tsibíndaà tsojmì. Nainá kàtayaxkón ni̱ta̱ mé na̱chrjein‑ne, kꞌoa̱sꞌín kàtama.
\p
\v 26 Koií kjoa̱‑la̱ nga kitsjeiìn takòn Nainá nga ko̱ sꞌín kàtasꞌín‑ko̱ yijo‑la̱ kjoa̱ sobà xi chꞌo tjín. Jñà íchjín kisìkjatjìyaá‑la̱ koni sꞌín mochjeén xꞌi̱n; tjín íchjín xi ti̱jñà xíkjín kiskoé‑ne.
\v 27 Kꞌoa̱á ti̱sꞌín kisꞌiìn íchjá, kitsjeiìn takòn‑né koni sꞌín mochjeén íchjín. Tjín íchjá xi ꞌñó kisaseèn‑la̱ nga ti̱ xꞌi̱n xíkjín tsoyijòko̱‑ne. Tsohótsji‑la̱ kjoa̱ sobà yijo‑la̱. Kꞌoa̱á ma‑ne nga kjo̱ꞌin kisꞌe‑la̱ xi ti̱ yijo tsꞌe̱‑ne koni sꞌín okꞌìn‑la̱ kjoa̱ chꞌo xi kisꞌiìn.
\p
\v 28 Xi̱ta̱ koi, mìkiì kisìkítsjeèn tsà mochjeén‑né nga skoe̱xkon Nainá; kꞌoa̱á ma‑ne nga kitsjeiìn takòn Nainá nga kàtasíkjeén kjo̱hítsjeèn‑la̱ xi nì mée chjí‑la̱ mé‑ne nga kꞌoa̱sꞌín kàtasꞌín‑ne kjoa̱ xi mìkiì okꞌìn‑la̱.
\v 29 Xi̱ta̱ koi, ya̱á tjíjiìn yije ini̱ma̱‑la̱ ngatsꞌiì kjoa̱ xi chꞌo tjín koni: kjoa̱ chijngui, kjoa̱ tsꞌe̱n, kjoa̱ tse mejèn, kjoa̱ toòn, kjoa̱xìtakòn, kjoa̱ nga ma‑la̱ síkꞌen xi̱ta̱, kjoa̱ xi kjaán‑kjoò, kjoa̱ kona̱cha̱n, kjoa̱ xi chꞌo sꞌín, kjoa̱ ꞌén ndiso;
\v 30 nga chja̱jno‑la̱ xíkjín; nga síjtikeè Nainá; ochrjengui xíkjín; ꞌnga ikon; ndaà síkíjna yijo‑la̱; síkítsjeèn nga mejèn‑la̱ ìsa̱ chꞌo tjín kjoa̱ xi sꞌi̱in; mìkiì ꞌnchréñijon‑la̱ xi̱ta̱ jchínga‑la̱;
\v 31 mìkiì machi̱ya‑la̱; mìkiì síkitasòn ꞌén xi chja̱; mìkiì beètjò xi̱ta̱ xíkjín; tsjìn‑la̱ kjoa̱ nìjchàatꞌaà; koa̱ tsjìn‑la̱ kjoa̱hi̱ma̱takòn.
\v 32 Jñà xi̱ta̱ koi, ndaà tíjiìn‑la̱ nga kꞌoa̱á sꞌín tsjá o̱kixi̱ Nainá: ngatsꞌiì xi kꞌoa̱ tjín kjoa̱ xi sꞌín, okꞌín‑la̱ nga ki̱yá. Ta̱nga mìkiì majngoò ikon nga tà jñà xi kꞌoa̱sꞌín, skanda ti̱koa̱á matsja‑la̱ kꞌe̱ nga kꞌoa̱ ti̱sꞌín xi̱ta̱ xi kjꞌei̱í.
\c 2
\s Nainá, mé xi tsjá‑la̱ xi̱ta̱ xi ndaà sꞌín ko̱ xi chꞌo sꞌín
\p
\v 1 Kꞌoa̱á ma‑ne, ngaji̱, ni̱ta̱ yá xi̱ta̱‑ne ji̱, nga jé onè‑la̱ xingui̱i, mìkiì ko̱ma ko̱si̱koi̱i yijo‑lè nga nguixko̱n Nainá. Kꞌe̱ nga jé tìbìnè‑la̱ xi̱ta̱ xingui̱i, ti̱koa̱á ngaji̱, ti̱ji tìbìnè‑la̱ jé yijo‑lè nga kꞌoa̱ ti̱sꞌín ꞌnì.
\v 2 Ta̱nga ꞌya‑ná nga kixi̱ sꞌín Nainá kꞌe̱ nga tsjá‑la̱ kjo̱ꞌin jñà xi̱ta̱ xi koa̱ tjín jé xi ótsji.
\v 3 Ngaji̱ xi kjo̱ꞌin bìnè‑la̱ xi̱ta̱ xi kjꞌei̱í, ¿mé‑ne koa̱ sꞌín nìkítsjeèn‑ne nga jcha̱tꞌaà‑lè kjo̱ꞌin xi tsjá Nainá? Nga ji̱ kꞌoa̱á ti̱sꞌín ꞌnì.
\v 4 ¿A mì tíjiìn‑lè nga nachrjekàngui jè kjo̱ndaà‑la̱ Nainá nga tjín‑la̱ kjo̱jetakòn koa̱ tjín‑la̱ kjoa̱tsejta? ¿A mì tíjiìn‑lè nga jè kjo̱ndaà‑la̱ Nainá tíkoña‑né nga si̱kájnoi jé‑lè nga mì ti̱ jé ki̱nchátsji‑ne?
\v 5 Nga tájaàjiìn tjín ini̱ma̱‑lè nga mìkiì nìkájnoi jé‑lè, ìsa̱á tse kjo̱ꞌin tìbìnè‑la̱ yijo‑lè xi tsjá‑lè Nainá jè na̱chrjein kꞌe̱ nga kjoi̱íko̱ kjoa̱jti‑la̱ nga jcha̱‑la̱ kósꞌín kixi̱ koi̱ìndaàjiìn Nainá nga tsjá‑la̱ kjo̱ꞌin jñà xi̱ta̱.
\v 6 Nainá tsjá‑la̱ chjí‑la̱ mé kjoa̱ xi kisꞌiìn nga jngoò ìjngoò xi̱ta̱.
\v 7 Tsjá‑la̱ kjoa̱binachon ni̱ta̱ mé na̱chrjein‑ne jñà xi̱ta̱ xi nchihótsji kjoa̱jeya, ko̱ nchihótsji nga jcha̱xkón, ko̱ nchihótsji nga kítsa̱jnakon ni̱ta̱ mé na̱chrjein‑ne ján ngajmiì. Koií kjoa̱‑la̱ nga ndaà tjín kjoa̱ xi nchisꞌín nga kjitꞌaà na̱chrjein.
\v 8 Ta̱nga Nainá nga ko̱ kjoa̱jti‑la̱ tsjá‑la̱ kjo̱ꞌin jñà xi̱ta̱ xi kondra̱ fì‑la̱ nga mìkiì ꞌnchréñijon xi kjoa̱ kixi̱. Tà kjoa̱ nchi̱kón fìtji̱ngui‑la̱.
\v 9 Tseé kjoa̱ sꞌe̱‑la̱ ko̱ tseé kjo̱ꞌin sꞌe̱‑la̱ ngatsꞌiì xi̱ta̱ xi chꞌo sꞌín, matsꞌia̱ko̱ ítjòn‑ne jñà xi̱ta̱ judío, ti̱koa̱á ko̱ xi ta̱xki̱ xi̱ta̱ xi mìtsà xi̱ta̱ judío.
\v 10 Ta̱nga jñà xi̱ta̱ xi ndaà sꞌín, tjoé‑la̱ kjoa̱jeya, ndaà jcha̱xkón, ti̱koa̱á sꞌe̱é‑la̱ kjoa̱ꞌnchán ini̱ma̱‑la̱, matsꞌia̱ko̱ ítjòn‑ne jñà xi̱ta̱ judío, ti̱koa̱á ko̱ xi ta̱xki̱ xi̱ta̱ xi mìtsà xi̱ta̱ judío.
\p
\v 11 Nainá mìkiì faájiìn ni̱ta̱ yá xi̱ta̱‑ne, tà ngásòn fìko̱ yije.
\v 12 Ngatsꞌiì jñà xi̱ta̱ xi mìkiì tíjiìn‑la̱ kó tsò kjo̱tíxoma xi kiskiì Moisés, kꞌe̱ nga jé ótsji, chi̱ja‑né na̱sꞌín mìkiì kijtseè kjo̱tíxoma‑la̱ Moisés. Koa̱ jñà xi̱ta̱ xi ndaà tíjiìn‑la̱ kjo̱tíxoma‑la̱ Moisés, kꞌe̱ nga jé ótsji, kꞌoa̱á sꞌín ko̱jtso koni sꞌín tíchja̱ xi ti̱jè‑ne kjo̱tíxoma.
\v 13 Jñà xi̱ta̱ xi tà ꞌnchré‑la̱ kjo̱tíxoma xi kiskiì Moisés, mìtsà jñà xi xi̱ta̱ kixi̱ nga nguixko̱n Nainá. Jñà‑né xi xi̱ta̱ kixi̱ xi síkitasòn.
\v 14 Kꞌe̱ nga jñà xi ta̱xki̱ xi̱ta̱ xi mìkiì tíjiìn‑la̱ kósꞌín tíchja̱ kjo̱tíxoma‑la̱ Moisés, sà kꞌoa̱á tà ya̱á nchrobájiìn ini̱ma̱‑la̱ nga kꞌoa̱sꞌín sꞌín koni tsò kjo̱tíxoma‑la̱ Moisés, ya̱á ꞌya‑la̱ nga ti̱koa̱ tjíjiìn ini̱ma̱‑la̱ kjo̱tíxoma xi tsꞌe̱ na̱sꞌín tsjìn‑la̱ tsꞌe̱ Moisés.
\v 15 Kꞌe̱ nga ndaà sꞌín ya̱á ꞌya‑la̱ nga tíjiìn ini̱ma̱‑la̱ kjoa̱ xi síjé kjo̱tíxoma‑la̱ Moisés; jè ini̱ma̱‑la̱ okó kjoa̱ xi ndaà tjín ko̱ xi mìkiì ndaà tjín; ti̱jè‑ne kjo̱hítsjeèn‑la̱ sà kꞌoa̱á óngui ko̱ sà kꞌoa̱á osìko̱.
\v 16 Kꞌoa̱á sꞌín ko̱ma jè na̱chrjein kꞌe̱ nga Nainá koi̱ìndaàjiìn ngatsꞌiì jé xi tjíꞌma‑la̱ xi̱ta̱ i̱jiìn ini̱ma̱‑la̱; i̱tꞌaà tsꞌe̱ Jesucristo si̱ndaàjiìn, koni tsò ꞌén ndaà‑la̱ Nainá xi kjoa̱ tsꞌe̱ Cristo xi ꞌa̱n chjàya.
\p
\v 17 Ngaji̱ xi xi̱ta̱ judío ꞌmì‑lè; jè maꞌñótꞌaà takoìn kjo̱tíxoma xi kiskiì Moisés; ꞌngaá ma takoìn i̱tꞌaà tsꞌe̱ Nainá nga si tsi̱ji‑né;
\v 18 ꞌya‑né mé xi mejèn‑la̱ Nainá nga si̱kitasoìn; ma‑lè chjaàjiìn mé kjoa̱ xi nguì ndaà tjín koni sꞌín okóya‑lè Kjo̱tíxoma;
\v 19 kꞌoa̱á sꞌín nìkítsjiìn nga tíjngoò takoìn nga ji̱ okoò‑la̱ ndi̱yá kixi̱ xi̱ta̱ xi mìkiì machi̱ya‑la̱ nga tíchjoà xko̱n ko̱ kꞌoa̱á ma‑lè nga ji̱ nìhiseèn‑la̱ xi tjíjñò kjo̱hítsjeèn‑la̱.
\v 20 Ji̱, kꞌoa̱á sꞌín nìkítsjiìn nga ma‑lè okoòya‑la̱ xi ta̱xki̱ xi̱ta̱ xi tsjìn‑la̱ kjo̱hítsjeèn; nga maestro ꞌmì‑lè tsꞌe̱ xi̱ta̱ xi chiba ma‑la̱ i̱tꞌaà tsꞌe̱ Nainá; nga tjín‑lè kjoa̱ chji̱ne̱ ko̱ kjoa̱ kixi̱ xi okó‑lè i̱tꞌaà tsꞌe̱ Kjo̱tíxoma.
\v 21 Ji̱ xi ma‑lè okoòya‑la̱ xi̱ta̱ xi kjꞌei̱í, ¿mé‑ne mìkiì okoòya‑la̱ xi ti̱ yijo tsi̱ji‑ne? Ji̱ kꞌoa̱á sꞌín nokjoàyi nga mìkiì ma si̱chijé; ji̱, ¿mé‑ne nìchijé‑ne?
\v 22 Ji̱, kꞌoa̱á si nga mìkiì ndaà tjín nga kjoa̱ chijngui sꞌi̱in xi̱ta̱; ji̱, ¿mé‑ne nga kꞌoa̱ ti̱sꞌín ꞌnè‑ne? Ji̱, kꞌoa̱á si nga jtichiì xkósòn; ¿mé‑ne nga i̱ngo̱ bitjaàsꞌen‑ne nga nìchijí tsojmì‑la̱ xkósòn?
\v 23 Ji̱, ꞌngaá takoìn nga ndaà tíjiìn‑lè kjoa̱ tsꞌe̱ kjo̱tíxoma ta̱nga, ¿a mìtsà tìnachrjekàngui Nainá nga mìkiì nìkitasòn‑la̱ koni sꞌín tíchja̱ kjo̱tíxoma?
\v 24 Kꞌoa̱á sꞌín tíchja̱ Xo̱jo̱n‑la̱ Nainá nga tsò: “Kjoa̱ tsa̱jòn‑nò xi xi̱ta̱ judío ꞌmì‑nò nga chja̱jno‑la̱ Nainá jñà xi ta̱xki̱ xi̱ta̱.”
\p
\v 25 Tsà ndaà si̱kitasoìn kjo̱tíxoma xi kiskiì Moisés, jè kjoa̱ tsꞌe̱ circuncisión nga tjítꞌaà chi̱ba̱‑lè, chjí‑la̱‑né; ta̱nga tsà mìkiì si̱kitasoìn, kꞌoa̱á ngaya‑la̱ koni tsà mìkiì tjítꞌaà chi̱ba̱‑lè.
\v 26 Jñà xi mìtsà xi̱ta̱ judío, na̱sꞌín mìkiì tjítꞌaà chi̱ba̱‑la̱ koni xi̱ta̱ judío, ta̱nga tsà kixi̱ síkitasòn kjo̱tíxoma tsꞌe̱ Moisés, Nainá skoétjò‑né koni tsà tjítꞌaà chi̱ba̱‑la̱.
\v 27 Jñà xi̱ta̱ xi síkitasòn kjo̱tíxoma tsꞌe̱ Moisés, na̱sꞌín mìkiì tjítꞌaà chi̱ba̱‑la̱ yijo‑la̱, jñà koi̱ìndaàjiìn‑nò nga mìkiì nìkitasòn na̱sꞌín tjítꞌaà chi̱ba̱‑nò, na̱sꞌín tjín‑nò xo̱jo̱n tsꞌe̱ kjo̱tíxoma‑la̱ Nainá.
\v 28 Jngoò xi xi̱ta̱ judío, mìtsà tà jè nga ndaà ꞌya‑la̱ kjoa̱ xi sꞌín; koa̱ jngoò xi̱ta̱ xi tjítꞌaà chi̱ba̱‑la̱ kjoa̱ tsꞌe̱ circuncisión, mìtsà tà jè xi mochjeén nga tjítꞌaà chi̱ba̱‑la̱ i̱sòꞌnga yijo‑la̱.
\v 29 Jè xi nguì xi̱ta̱ judío, jè xi chjí‑la̱ koni sꞌín tjín i̱jiìn ini̱ma̱‑la̱. Ko̱ jè xi nguì tjítꞌaà chi̱ba̱‑la̱, jè xi chjí‑la̱ koni sꞌín tjítꞌaà chi̱ba̱‑la̱ ya̱ i̱jiìn ini̱ma̱‑la̱. Kjoa̱ koi, mìtsà tsꞌe̱ kjo̱tíxoma xi xo̱jo̱n tjítꞌaà; tsꞌe̱é Ini̱ma̱ Tsjeè‑la̱ Nainá. Jñà xi kꞌoa̱sꞌín síkitasòn, Nainá ndaà chja̱ xi i̱tꞌaà tsꞌe̱, na̱sꞌín mìkiì ndaà chja̱ xi̱ta̱ xi kjꞌei̱í.
\c 3
\s Mé kjoa̱ xi ꞌñó chjí‑la̱ i̱tꞌaà tsꞌe̱ xi̱ta̱ judío
\p
\v 1 Tsà kꞌoa̱á sꞌín tjín, ¿mé kjo̱ndaà xi ìsa̱ tse tjín‑la̱ nga xi̱ta̱ judío ꞌmì? Ko̱ ¿mé chjí‑la̱ nga tjítꞌaà chi̱ba̱‑la̱?
\v 2 Kjìn sko̱ya chjí‑la̱. Jè xi tíjna ítjòn, jè‑né nga jñà xi̱ta̱ judío kjònga̱tsja ꞌén‑la̱ Nainá.
\v 3 Jñà xi̱ta̱ judío, na̱sꞌín tjín iꞌnga xi mìkiì síkitasòn ꞌén xi kjònga̱tsja, ¿a ko̱ma sikjatjìya‑la̱ kjoa̱kixi̱‑la̱ Nainá nga mìkiì ki̱tasòn koni sꞌín kitsjaà tsoꞌba?
\v 4 Majìn, mìkiì ko̱ma. Nainá, xi̱ta̱ kixi̱‑né, na̱sꞌín xi̱ta̱ ndiso ngatsꞌiì xi̱ta̱ xi tjín i̱sòꞌnde; koni sꞌín tíchja̱ xo̱jo̱n nga tsò:
\q Mé‑ne nga kàtaꞌya‑la̱ nga kixi̱ kjoa̱ ꞌén xi nokjoì
\q si̱kijne‑né kꞌe̱ nga yá xi ko̱hòngui‑lè.
\p
\v 5 Tjín iꞌnga xi̱ta̱ xi tsò: Kꞌe̱ nga chꞌo ꞌnè, ìsa̱á ndaà ꞌya‑la̱ kjoa̱kixi̱‑la̱ Nainá. Tsà kꞌoa̱sꞌín tjín, ¿kó kixoán? ¿A kixón‑ná nga mì kjoa̱ kixi̱ tísꞌín Nainá nga kjo̱ꞌin tsjá‑ná? (Tsà ko̱sꞌín kixoán, jngoò kjo̱hítsjeèn‑la̱ xi ta̱xki̱ xi̱ta̱ titsa̱nìkjeén.)
\v 6 Ta̱nga majìn, mì kꞌoa̱á sꞌín tjín. Tsà mìtsà kixi̱ sꞌín Nainá nga kjo̱ꞌin tsjá‑ná, ¿kósꞌín ko̱ma koi̱ìndaàjiìn‑la̱ xi̱ta̱ i̱sòꞌnde?
\p
\v 7 Ti̱koa̱á tsà kꞌoa̱ ki̱tso̱ xi̱ta̱ koi: “Ta̱nga tsà kjoa̱ndiso‑na̱ okó nga jè kjoa̱ kixi̱‑la̱ Nainá ìsa̱ jeya kíjna, ¿mé‑ne kꞌoa̱sꞌín tísinè‑na nga xi̱ta̱ jé tíyatakòn‑na?”
\v 8 Ti̱koa̱á‑ne chꞌo sꞌe̱én mé‑ne nga kàtasakó‑ìsa‑ná kjo̱ndaà‑la̱ Nainá. Tjín xi̱ta̱ xi ko̱tsò nga kꞌoa̱á tjín ꞌén xi okoòya; jè xi mejèn‑la̱ nga chꞌo síkíjna‑na. Jñà xi̱ta̱ xi ko̱tsò, okꞌín‑la̱ nga tjoé‑la̱ kjo̱ꞌin xi Nainá tsjá.
\s Mé jé xi tjín‑la̱ ngatsꞌiì xi̱ta̱
\p
\v 9 ¿Kó sꞌín nìkítsjeèn? Jñá xi xi̱ta̱ judío ꞌmì‑ná, ¿a ìsa̱á ndaà xi̱ta̱á koni jñà xi̱ta̱ xi kjꞌei̱í? Majìn, jyeé kꞌoa̱á kixan‑nò, tà ngásòn jé titsa̱jnajñaá ngatsꞌiaá xi xi̱ta̱ judío ꞌmì‑ná ko̱ xi ta̱xki̱ xi̱ta̱.
\v 10 Koni sꞌín tíchja̱ Xo̱jo̱n‑la̱ Nainá nga tsò:
\q Ni̱jngoò xi̱ta̱ tjín xi xi̱ta̱ kixi̱, ni̱ tsà tà jngoò.
\q
\v 11 Ni̱jngoò tjín xi machi̱ya‑la̱,
\q ni̱jngoò tjín xi ótsji Nainá.
\q
\v 12 Ngatsꞌiì xi̱ta̱, sa̱á xìn ndi̱yá kiì; ngatsꞌiì nìmée chjí‑la̱ kjoa̱ xi sꞌín;
\q ni̱jngoò xi ndaà sꞌín, ni̱ tsà tà jngoò.
\q
\v 13 Na̱xájta̱‑la̱, kꞌoa̱á kjoàn koni ngajo‑la̱ mikꞌen kꞌe̱ nga táxꞌa̱jto;
\q ni̱je̱n‑la̱ nguì ꞌén ndisoó chja̱;
\q ꞌén xi chja̱, kꞌoa̱á ngaya‑la̱ koni tsà xán‑la̱ ye̱.
\q
\v 14 Chja̱jno‑la̱ xi̱ta̱ ko̱ nguì koi ꞌén chja̱ xi ꞌon ma‑la̱ ini̱ma̱‑ná.
\q
\v 15 Mìkiì koña kjoa̱, ni̱to̱ón síkꞌen xi̱ta̱.
\q
\v 16 Ni̱ta̱ ñánda nga fì, síhi̱ma̱ ko̱ síkjehesko xi̱ta̱ xi kjꞌei̱í.
\q
\v 17 Mìkiì beèxkon ndi̱yá ñánda tjín kjoa̱ꞌnchán.
\q
\v 18 Mìkiì tsakjón‑keè Nainá i̱tꞌaà tsꞌe̱ kjoa̱ xi sꞌín.
\p
\v 19 Jyeé ꞌyaá nga ngatsꞌiì ꞌén xi tjítꞌaà kjo̱tíxoma tsꞌe̱ Moisés, jñá chja̱‑la̱ ngatsꞌiì xi̱ta̱ xi ya̱ fìtꞌaà‑la̱, mé‑ne nga ngatsꞌiì xi̱ta̱, mìkiì ko̱ma ki̱chja̱ nga ki̱nchako̱ yijo‑la̱ nga nguixko̱n Nainá; ngatsꞌiì xi̱ta̱ xi tjín i̱sòꞌnde koi̱ìndaàjiìn‑la̱ Nainá nga jcha̱‑la̱ nga jé tjín‑la̱.
\v 20 Ni̱jngoò xi̱ta̱ xi kixi̱ kíjna nga nguixko̱n Nainá tà koi kjoa̱‑la̱ nga ndaà tísíkitasòn Kjo̱tíxoma tsꞌe̱ Moisés. Nga jè Kjo̱tíxoma, tà kꞌoa̱á sꞌín mochjeén nga béno̱jmíya‑ná nga jé tjín‑ná.
\s Kó síko̱‑ná Nainá nga kixi̱ ki̱tsa̱jnaá nguixko̱n jè
\p
\v 21 Ta̱nga i̱ꞌndei̱, Nainá okó‑ná kósꞌín sꞌín Nainá nga xi̱ta̱ kixi̱ beètakòn‑ná. Ko̱ mìtsà kjoa̱ tsꞌe̱ Kjo̱tíxoma nga bitasòn. Jñà xo̱jo̱n jchínga tsꞌe̱ kjo̱tíxoma‑la̱ Nainá ko̱ tsꞌe̱ xi̱ta̱ xi kiìchja̱ ngajo‑la̱ Nainá kꞌoa̱á ti̱sꞌín béno̱jmíya‑ná,
\v 22 nga jñà xi̱ta̱ kꞌe̱ nga mokjeiín‑la̱ i̱tꞌaà tsꞌe̱ Cristo, kixi̱í bìtsa̱jna nguixko̱n Nainá. Kꞌoa̱á sꞌín síko̱ yije kóho̱tjín xi mokjeiín‑la̱. Nga ngatsꞌiì xi̱ta̱ ngásòn jé tjín‑la̱,
\v 23 nga ngásòn ótsji jé‑né; kjiìn títsa̱jnatꞌaàxìn‑la̱ Nainá ñánda nga jeya tíjna.
\v 24 Ta̱nga Nainá, nga ndaà xi̱ta̱, kitsjaà kjo̱tjò‑ná kjo̱ndaà‑la̱ mé‑ne nga kixi̱ ki̱tsa̱jnaá nguixko̱n jè. Jè Jesucristo tsibíchjítjì ngajo‑ná jé‑ná mé‑ne nga ki̱tsa̱jnandei̱í‑ná xi kjoa̱ tsꞌe̱ jé.
\v 25 Nainá kitsjaà kiꞌndí‑la̱ koni jngoò kjo̱tjò xi faáxìn jé‑ná nga nguixko̱n Nainá kꞌe̱ nga mokjeiín‑ná i̱tꞌaà tsꞌe̱ Jesucristo, nga jè tsibíxteèn jní‑la̱ kꞌe̱ nga kꞌen. Nainá kꞌoa̱á sꞌín okóya‑ná kósꞌín tjín kjoa̱kixi̱‑la̱. Koií kjoa̱‑la̱ nga ngasa̱ kjòtseé, Nainá, tíkoña kjoa̱‑né, mìkiì ni̱to̱n kitsjaà‑la̱ kjo̱ꞌin xi̱ta̱ koni sꞌín okꞌìn‑la̱ jé xi tsohótsji.
\v 26 Ta̱nga i̱ꞌndei̱ tíꞌya‑la̱ nga i̱tꞌaà tsꞌe̱ Jesucristo tísindaàjiìn‑la̱ xi̱ta̱ jñà kjoa̱‑la̱ jé xi kisìchroba mé‑ne nga kàtaꞌya‑la̱ Nainá nga xi̱ta̱ kixi̱‑né ko̱ ti̱koa̱á ti̱jè‑ne Nainá xi kixi̱ síkítsa̱jna xi̱ta̱ xi mokjeiín‑la̱ i̱tꞌaà tsꞌe̱ Jesús.
\p
\v 27 ¿A ꞌngaá ko̱ma takoán nga kixi̱ titsa̱jnaá nguixko̱n Nainá? Majìn, mìkiì ꞌnga ko̱ma takoán. Nga mìtsà koi kjoa̱‑la̱ nga kjo̱tíxoma nìkitasoán. Jè‑né nga mokjeiín‑ná i̱tꞌaà tsꞌe̱ Jesús nga kixi̱ síkítsa̱jna‑ná Nainá.
\v 28 Kꞌoa̱á tsòya‑ne ngatsꞌiì kjoa̱ koi nga Nainá síkixi̱ xi̱ta̱ kꞌe̱ nga mokjeiín‑la̱ i̱tꞌaà tsꞌe̱ Jesús; mìtsà koi nga kjo̱tíxoma tsꞌe̱ Moisés síkitasòn.
\p
\v 29 ¿A tà tsꞌe̱é xi xi̱ta̱ judío Nainá? ¿A mìtsà ti̱koa̱ tsꞌe̱ xi ta̱xki̱ xi̱ta̱? Kjoa̱ kixi̱‑né, ti̱koa̱á tsꞌe̱‑né xi ta̱xki̱ xi̱ta̱ xi mìtsà xi̱ta̱ judío.
\v 30 Nainá, tà jngoò ma xi kixi̱ síkítsa̱jna ngatsꞌiì xi̱ta̱ kꞌe̱ nga mokjeiín‑la̱ i̱tꞌaà tsꞌe̱ Jesús. Ngásòn síko̱ jñà xi̱ta̱ judío xi tjítꞌaà chi̱ba̱‑la̱ ko̱ xi ta̱xki̱ xi̱ta̱ xi mìkiì tjítꞌaà chi̱ba̱‑la̱.
\v 31 Jè kjoa̱ nga mokjeiín‑ná i̱tꞌaà tsꞌe̱ Jesucristo, ¿a tíchahingui‑né kjoa̱ tsꞌe̱ Kjo̱tíxoma? Majìn, mìtsà tíchahingui; ta̱ sa̱á tímajngoò‑ne koni jè xá xi tjín‑la̱.
\c 4
\s Abraham, mé‑ne kixi̱ tsibìjna‑ne nga nguixko̱n Nainá
\p
\v 1 ¿Kó kixoán? ¿Mé kjoa̱ kixi̱ xi kisakò‑la̱ na̱ꞌèn‑jchá‑kjiìn‑ná Abraham nga kixi̱ tsibìjna nguixko̱n Nainá?
\v 2 Na̱ꞌèn‑jchá‑ná Abraham, tsà koií‑la kjoa̱‑la̱ nga ndaà xá xi kisꞌiìn nga kixi̱ tsibìjna nguixko̱n Nainá, okꞌín‑la̱ nga jeya si̱ìkíjna yijo‑la̱, ta̱nga majìn nga nguixko̱n Nainá.
\v 3 Nga kꞌoa̱á sꞌín tíchja̱ Xo̱jo̱n jchínga‑la̱ Nainá nga tsò: “Abraham, jè‑né nga kòkjeiín‑la̱ i̱tꞌaà tsꞌe̱ Nainá; kꞌoa̱á ma‑ne nga kiskoétjò Nainá nga xi̱ta̱ kixi̱ kitsò‑la̱.”
\v 4 Jngoò xi̱ta̱ xi síxá, jè to̱n xi tjoé‑la̱, mìtsà tà kjo̱tjò tjoé‑la̱; jè chjí‑la̱ nga síxá.
\v 5 Ta̱nga jè xi̱ta̱ xi mìtsà xá‑la̱ maꞌñótꞌaà takòn, ta̱nga mokjeiín‑la̱ i̱tꞌaà tsꞌe̱ Nainá xi kixi̱ síkítsa̱jna xi̱ta̱ xi jé tjín‑la̱, xi̱ta̱ jè, Nainá kꞌoa̱á sꞌín skoétjò nga xi̱ta̱ kixi̱ tsò‑la̱.
\v 6 Jè xi̱ta̱xá ítjòn xi kiꞌmì David kꞌoa̱á ti̱sꞌín kiìchja̱ nga tsja sꞌe̱‑la̱ xi̱ta̱ xi Nainá kjoétjò nga xi̱ta̱ kixi̱ tsò‑la̱; Nainá mì ti̱ kinda̱ sꞌín‑ne ni̱ta̱ mé xi sꞌín.
\v 7 David kitsò:
\q Mé tà ndaà‑la̱ jñà xi̱ta̱ xi jye kichàatꞌaà‑la̱ kjoa̱ chꞌo‑la̱
\q ko̱ xi jye tíjtsaꞌma jé‑la̱.
\q
\v 8 Mé ta ndaà‑la̱ jñà xi̱ta̱ xi mì ti̱ kinda̱ sꞌín‑ne Nainá kjoa̱ tsꞌe̱ jé‑la̱.
\p
\v 9 Jè kjo̱ndaà jè, ¿a tà tsꞌe̱é xi̱ta̱ judío xi tjítꞌaà chi̱ba̱‑la̱? ¿A xi ti̱koa̱á tsꞌe̱‑né xi ta̱xki̱ xi̱ta̱ xi mìkiì tjítꞌaà chi̱ba̱‑la̱? Jye o̱kixan nga jè xi̱ta̱ jchínga Abraham, kꞌe̱ nga kòkjeiín‑la̱ i̱tꞌaà tsꞌe̱ Nainá, kiskoétjò‑né nga xi̱ta̱ kixi̱ kitsò‑la̱.
\v 10 ¿Kósꞌín komà nga kiskoétjò Nainá Abraham nga xi̱ta̱ kixi̱ kitsò‑la̱? ¿A kꞌe̱‑né nga jye tjítꞌaà chi̱ba̱‑la̱? ¿A xi kꞌe̱‑né nga ti̱kjꞌeè tjítꞌaà chi̱ba̱‑la̱? Majìn, kꞌe̱‑né nga ti̱kjꞌeè tjítꞌaà chi̱ba̱‑la̱.
\v 11 Abraham, kꞌe̱ nga jye kiskoétjò Nainá nga xi̱ta̱ kixi̱ kitsò‑la̱, i̱skaán kisitꞌaà chi̱ba̱‑la̱ koni jngoò chi̱ba̱ xi okó nga jye xi̱ta̱ kixi̱ nga kòkjeiín‑la̱ i̱tꞌaà tsꞌe̱ Nainá kꞌe̱ nga ti̱kjꞌeè tjítꞌaà chi̱ba̱‑la̱. Kꞌoa̱á komà‑ne nga xi̱ta̱ jchínga kitsò‑la̱ Abraham ngatsꞌiì xi̱ta̱ xi mokjeiín‑la̱ i̱tꞌaà tsꞌe̱ Nainá na̱sꞌín mìkiì tjítꞌaà chi̱ba̱‑la̱.
\v 12 Abraham, ti̱koa̱á xi̱ta̱ jchínga‑la̱‑né jñà xi̱ta̱ judío xi tjítꞌaà chi̱ba̱‑la̱, ta̱nga mìtsà tà koií kjoa̱‑la̱ nga tjítꞌaà chi̱ba̱‑la̱, ti̱koa̱á koi‑né nga ya̱ tjímatji̱ngui‑la̱ nga mokjeiín‑la̱ i̱tꞌaà tsꞌe̱ Nainá, koni sꞌín kòkjeiín‑la̱ Abraham kꞌe̱ nga ti̱kjꞌeè tjítꞌaà chi̱ba̱‑la̱.
\p
\v 13 Nainá, kꞌoa̱á sꞌín kitsjaà‑la̱ tsoꞌba Abraham ko̱ ngatsꞌiì xi̱ta̱ tje̱‑la̱, nga jè ko̱nga̱tsja i̱sòꞌnde; mìtsà koi kjoa̱‑la̱ nga Kjo̱tíxoma kisìkitasòn, jè‑né nga kòkjeiín‑la̱ koni sꞌín kiìchja̱ Nainá, kꞌoa̱á ma‑ne nga xi̱ta̱ kixi̱ kitsò‑la̱.
\v 14 Tsà tà jñà tjoé‑la̱ kjo̱ndaà xi̱ta̱ xi síkitasòn Kjo̱tíxoma, tsà kꞌoa̱á sꞌín tjín kjoa̱, ni̱mé‑là chjí‑la̱ nga mokjeiín‑ná i̱tꞌaà tsꞌe̱ Nainá; ti̱koa̱á mì‑là kiì ki̱tasòn koni sꞌín kitsjaà tsoꞌba Nainá.
\v 15 Kꞌe̱ nga tjín Kjo̱tíxoma, kjo̱ꞌiín sinè‑ná; ta̱nga tsà tsjìn kjo̱tíxoma, ni̱mé tjín xi ko̱tonè‑la̱ kjo̱tíxoma.
\p
\v 16 Jñà xi̱ta̱, nga mokjeiín‑la̱ i̱tꞌaà tsꞌe̱ Nainá tjoé‑la̱ kjo̱ndaà koni sꞌín kitsjaà‑la̱ tsoꞌba Nainá jè Abram. Nainá tsjá kjo̱tjò kjo̱ndaà koi mé‑ne nga jcha̱‑ná nga kixi̱ kjoa̱ nga ki̱tasòn i̱tꞌaà tsꞌe̱ ngatsꞌiì tje̱‑la̱ Abraham. Mìtsà tà jñà tjoé‑la̱ xi̱ta̱ judío xi tje̱‑la̱ Abraham nga tjín‑la̱ kjo̱tíxoma; ti̱koa̱á tjoé‑la̱ jñà xi̱ta̱ xi mìtsà xi̱ta̱ judío xi ti̱koa̱á tje̱‑la̱ Abraham ma koií kjoa̱‑la̱ nga mokjeiín‑la̱ koni sꞌín kòkjeiín‑la̱ Abraham. Kꞌoa̱á ma‑ne nga jè Abraham, xi̱ta̱ jchínga‑ná ma ngatsꞌiaá
\v 17 nga nguixko̱n Nainá. Koni sꞌín tíchja̱ Xo̱jo̱n‑la̱ Nainá nga tsò: “Kjìn na̱xa̱ndá xi̱ta̱ xi jye kisìnga̱tsja‑lè xi xi̱ta̱ jchínga tsò‑lè.” Abraham, kòkjeiín‑la̱ i̱tꞌaà tsꞌe̱ Nainá xi ma‑la̱ síkjaáya‑la̱ xi̱ta̱ xi jye kꞌen xi ti̱koa̱ tsjá ꞌén‑la̱ koni tsà jye tsitasòn kjoa̱ xi kjꞌeè bitasòn.
\p
\v 18 Xi̱ta̱ jchínga Abraham kòkjeiín‑la̱ koni kitsò‑la̱ Nainá; kiskoñá kjoa̱‑né na̱sꞌín mìkiì tíjiìn‑la̱ kósꞌín ko̱ma nga ki̱tasòn. Kꞌoa̱á sꞌín komà nga kjìn na̱xa̱ndá xi xi̱ta̱ jchínga tsò‑la̱, koni sꞌín kitsjaà‑la̱ tsoꞌba Nainá nga kitsò‑la̱: “Kꞌoa̱á sꞌín kjìn jchán ko̱ma tje̱‑lè.”
\v 19 Abraham, mìkiì kjòhindaà koni sꞌín kòkjeiín‑la̱ i̱tꞌaà tsꞌe̱ Nainá, na̱sꞌín ko̱sꞌín beè‑la̱ ikon nga mì ti̱ mé chjí‑la̱ yijo‑la̱ nga jye ꞌñó xi̱ta̱ jchínga; jyeé kjo̱meè jngoò sìndo̱ nó tjín‑la̱; Sara xi chjo̱ón‑la̱, ti̱koa̱á chjo̱ón ꞌndi̱‑né; mì ti̱ kiì ko̱ma sꞌe̱‑la̱ i̱xti.
\v 20 Abraham, mìtsà jò tsiꞌbeé‑la̱ ikon koni sꞌín mokjeiín‑la̱ ꞌén xi kitsjaà‑la̱ Nainá. Tà ìsa̱á ꞌñó tsiꞌbeé‑la̱ ikon nga ndaà kòkjeiín‑la̱. ꞌÑó jeya kisìkíjna Nainá.
\v 21 Abraham, nguì ndaà tíjngoò ikon nga Nainá tjín‑la̱ ngaꞌñó nga ko̱maá‑la̱ si̱ìkitasòn yije kóho̱tjín kjoa̱ koni sꞌín kitsjaà‑la̱ tsoꞌba.
\v 22 Kꞌoa̱á ma‑ne Nainá, kꞌe̱ nga kijtseè nga ndaà mokjeiín‑la̱ Abraham, kiskoétjò nga xi̱ta̱ kixi̱ kitsò‑la̱.
\p
\v 23 Mìtsà tà i̱tꞌaà tsꞌe̱ Abraham kitjei xo̱jo̱n jè nga Nainá kiskoétjò nga xi̱ta̱ kixi̱ tsò‑la̱.
\v 24 Ti̱koa̱á i̱tꞌaà tsa̱ján kitjei nga Nainá skoétjò‑ná nga ngásòn xi̱ta̱ kixi̱ ki̱tso̱‑ná koi kjoa̱‑la̱ nga mokjeiín‑ná i̱tꞌaà tsꞌe̱ Nainá, jè xi kisìkjaáya‑la̱ Na̱ꞌèn‑ná Jesucristo i̱tꞌaà tsꞌe̱ kjoa̱biyaà.
\v 25 Kjònga̱tsja xi̱ta̱ nga kisìkꞌen Jesús jè nga̱tjì‑la̱ jé‑ná; ti̱koa̱á jaáya‑la̱ mé‑ne nga kixi̱ ki̱tsa̱jnaá nguixko̱n Nainá.
\c 5
\s Mé kjo̱ndaà xi sakó‑ná nga jye xi̱ta̱ kixi̱ tsò‑ná Nainá
\p
\v 1 Kꞌe̱ nga jye xi̱ta̱ kixi̱ ꞌmì‑ná nga mokjeiín‑ná i̱tꞌaà tsꞌe̱ Nainá, jyeé ꞌnchán titsa̱jnakoa̱á Nainá i̱tꞌaà tsꞌe̱ Na̱ꞌèn‑ná Jesucristo.
\v 2 Jè Cristo tsjá‑ná nga sꞌe̱‑ná kjo̱ndaà jè, nga mokjeiín‑ná i̱tꞌaà tsꞌe̱. Jè kjo̱ndaà jè, ꞌñó ndaà tíjiìn ini̱ma̱‑ná; matsjaá‑la̱ ini̱ma̱‑ná nga chiñà kjoa̱á nga ti̱koa̱ sꞌe̱‑ná kjoa̱jeya‑la̱ Nainá.
\v 3 Mìtsà tà koi kjoa̱ nga matsja‑ná, ti̱koa̱á matsja‑ná kꞌe̱ nga mé kjo̱ꞌin xi otojñaá. Kꞌe̱ nga kjo̱ꞌin otojñaá, ya̱á sakó‑ná ngaꞌñó nga tseejta sꞌe̱én ini̱ma̱‑ná.
\v 4 Kꞌe̱ nga tseejta sꞌe̱én ini̱ma̱‑ná, ya̱á sakó‑ná nga ndaà ki̱tjoa̱á; tsà nga ndaà ki̱tjoa̱á, ti̱koa̱á ya̱á sakó‑ná nga skóña kjoa̱ ini̱ma̱‑ná kjo̱ndaà xi tsjá Nainá.
\v 5 Jè kjoa̱ xi chiñá‑lá nga tíjngoò takoán, mìkiì masobà‑ná nga mìkiì ki̱tasòn; jè Nainá jyeé ndaà kisìkíjnajiìn ini̱ma̱‑ná kjo̱tjòcha‑la̱ i̱tꞌaà tsꞌe̱ Ini̱ma̱ Tsjeè‑la̱ Nainá xi kitsjaà‑ná.
\p
\v 6 Kꞌe̱ nga kichóya na̱chrjein, Cristo, kꞌen ngajo‑ná jñá xi xi̱ta̱ jé ꞌmì‑ná, koií kjoa̱‑la̱ nga tsjìn‑ná ngaꞌñó nga ma bitjokàjñaá jé‑ná.
\v 7 Mì‑là yá xi̱ta̱ tjín xi ki̱yátjì ngajo‑la̱ jngoò xi̱ta̱ kixi̱, ta̱nga tsà koi na̱chrjein‑la̱ tsà tjín jngoò xi ko̱ꞌñó ikon nga ki̱yátjì ngajo‑la̱ jngoò xi ꞌñó ndaà xi̱ta̱.
\v 8 Ta̱nga jè Nainá okó‑ná nga ꞌñó tsjakeè‑ná nga jè Cristo kꞌen ngajo‑ná, kꞌe̱ nga tákó xi̱ta̱ jé ꞌmì‑ná.
\v 9 I̱ꞌndei̱ nga jye xi̱ta̱ kixi̱ tsò‑ná Nainá nga jè Cristo tsibíxteèn jní‑la̱ kꞌe̱ nga kꞌen ngajo‑ná, ìsa̱á ꞌñó tíkixi̱ kjoa̱ nga i̱tꞌaà tsꞌe̱ Cristo ki̱tjokàjñaá kjo̱ꞌin jè na̱chrjein kꞌe̱ nga si̱ìkasén kjo̱jti‑la̱ Nainá.
\v 10 Kꞌe̱ nga kondra̱ titsa̱jna‑lá Nainá, jè Kiꞌndí‑la̱ kisìkijne ꞌnchán kjoa̱ kꞌe̱ nga kꞌen. I̱ꞌndei̱, kꞌe̱ nga jye ndaà chibà‑ná, ìsa̱á ꞌñó tjíkixi̱ kjoa̱ nga ki̱tjokàjñaá kjo̱ꞌin i̱tꞌaà tsꞌe̱ Cristo nga jè tíjnakon‑né.
\v 11 Mìtsà tà jñà kjoa̱ koi, ti̱koa̱á ꞌñó matsja‑ná i̱tꞌaà tsꞌe̱ Nainá koni sꞌín kisìko̱‑ná i̱tꞌaà tsꞌe̱ Na̱ꞌèn‑ná Jesucristo nga i̱tꞌaà tsꞌe̱ Cristo ꞌnchán titsa̱jnakoa̱á Nainá nga jye kichibàndaà‑aná.
\p
\v 12 Kꞌe̱ nga jahasꞌen jé i̱sòꞌnde, jngoò xi̱ta̱ xi kiꞌmì Adán tsohótsji jé, i̱kjoàn kꞌen; kꞌoa̱á sꞌín komà nga kjòtsꞌia̱ nga biyaà yije kóho̱tjín xi̱ta̱, koií kjoa̱‑la̱ nga jé ótsji yije kóho̱tjín.
\v 13 Kꞌe̱ nga ti̱kjꞌeè tjoé‑la̱ Kjo̱tíxoma Moisés, xi̱ta̱ xi tjín i̱sòꞌnde jyeé tjín yije‑la̱ jé. Ta̱nga mìkiì ma kinda̱ jé‑la̱ kꞌe̱ nga tsjìn kjo̱tíxoma.
\v 14 Tje̱n‑ne na̱chrjein tsꞌe̱ Adán skanda tsꞌe̱ Moisés, tjínè‑la̱ nga ki̱yá yije xi̱ta̱ kóho̱tjín na̱sꞌín mì kꞌoa̱á tjín jé xi tsohótsji koni kisꞌiìn Adán nga kisìkatonè‑la̱ o̱kixi̱ xi kitsjaà‑la̱ Nainá. Adán, jè ngaya‑la̱ [Cristo] xi i̱skan jꞌiì.
\p
\v 15 Ta̱nga jé xi tsohótsji Adán, mìkiì mangásòn koni jè kjo̱ndaà xi Nainá tsjá; nga tà jè nga̱tjì‑la̱ jé xi tsohótsji xi tà jngoò xi̱ta̱, kꞌoa̱á ma‑ne nga kjìn xi̱ta̱ biyaà; ta̱nga ìsa̱á ꞌñó tse kjo̱ndaà tjín‑la̱ Nainá nga kjìn xi̱ta̱ machikon‑tꞌin kjo̱tjò xi tsjá Nainá i̱tꞌaà tsꞌe̱ xi tà jngoò xi̱ta̱ xi ꞌmì Jesucristo.
\v 16 Jé xi tsohótsji xi tà jngoò xi̱ta̱, mìkiì mangásòn koni jè kjo̱ndaà xi Nainá tsjá. Kꞌe̱ nga kisakò jé ítjòn, Nainá kitsjaà o̱kixi̱ nga tsibínè‑la̱ kjo̱ꞌin ngatsꞌiì xi̱ta̱. Ta̱nga kꞌe̱ nga jye kjìn jé tsohótsji xi̱ta̱, jꞌiì kjo̱ndaà‑la̱ Nainá nga kixi̱ kítsa̱jna xi̱ta̱ nguixko̱n Nainá.
\v 17 Jè nga̱tjì‑la̱ jé‑la̱ xi tà jngoò xi̱ta̱, tjínè‑la̱ nga ki̱yá xi̱ta̱. Ta̱nga i̱ꞌndei̱, ìsa̱á ꞌñó tjíkixi̱ kjoa̱ nga i̱tꞌaà tsꞌe̱ xi tà jngoò xi̱ta̱ xi ꞌmì Jesucristo, tjíꞌnde‑la̱ nga jeya kítsa̱jnakon jñà xi̱ta̱ xi ꞌñó tse kjo̱ndaà‑la̱ Nainá kjoé, ko̱ xi ꞌñó tse kjo̱tjò tjoé‑la̱ nga kixi̱ kítsa̱jna nguixko̱n Nainá.
\p
\v 18 Jè kjoa̱‑la̱ jé xi tsohótsji xi tà jngoò xi̱ta̱ kisinè‑la̱ kjo̱ꞌin ngatsꞌiì xi̱ta̱, ta̱nga jè kjoa̱ kixi̱ xi kisꞌiìn Jesucristo ti̱koa̱á kixi̱ kisìkítsa̱jna ngatsꞌiì xi̱ta̱ nga kítsa̱jnakon nguixko̱n Nainá.
\v 19 Jè kjoa̱‑la̱ nga mìkiì kiìꞌnchréñijon‑la̱ Nainá xi tà jngoò xi̱ta̱ xi ꞌmì Adán, kꞌoa̱á ma‑ne nga kjìn xi̱ta̱ kisakò jé‑la̱. Ta̱nga jè kjoa̱‑la̱ nga kiìꞌnchréñijon‑la̱ Nainá xi tà jngoò xi̱ta̱ xi ꞌmì Jesucristo, kjìn xi̱ta̱ xi kixi̱ kítsa̱jna nga nguixko̱n Nainá.
\p
\v 20 Jꞌiì Kjo̱tíxoma‑la̱ Moisés mé‑ne nga ndaà kiꞌya‑la̱ nga ìsa̱ ꞌñó ìsa̱ ꞌñó tísꞌe jé; ta̱nga kꞌe̱ nga ìsa̱ tse jé tísakó, ìsa̱á ꞌñó tse kjo̱ndaà‑la̱ Nainá jꞌiì.
\v 21 Nga sa̱ ítjòn, jè kjoa̱ tsꞌe̱ jé tsatíxoma‑la̱ xi̱ta̱, mé‑ne nga kisakò‑la̱ kjoa̱biyaà xi̱ta̱; ta̱nga i̱ꞌndei̱, kꞌoa̱á ti̱sꞌín kàtatíxoma kjo̱ndaà‑la̱ Nainá kꞌe̱ nga kixi̱ síkítsa̱jna xi̱ta̱ nga nguixko̱n Nainá mé‑ne nga sꞌe̱‑la̱ kjoa̱binachon ni̱ta̱ mé na̱chrjein‑ne xi i̱tꞌaà tsꞌe̱ Na̱ꞌèn‑ná Jesucristo.
\c 6
\s Mé‑ne nga jè kjoa̱ tsꞌe̱ jé, mì ti̱ mé ngaꞌñó tjín‑la̱ nga jè ko̱tìxoma‑ná
\p
\v 1 ¿Kó kixoán? ¿A ndaà tjín nga ki̱nchátsji‑jé‑ìsa mé‑ne nga ìsa̱ tse kjo̱ndaà tsjá‑ne Nainá?
\v 2 Majìn, mì kiì ti̱ kꞌoa̱ sꞌe̱n‑ná. Jyeé titsa̱jnatꞌaàxìn‑lá kjoa̱ tsꞌe̱ jé koni tsà jye kꞌeén xi i̱tꞌaà tsꞌe̱; mì ti̱ kiì ko̱ma ya̱ ki̱tsa̱jnajiìn‑ìsaá kjoa̱ tsꞌe̱ jé.
\v 3 ¿A mìtsà jye tíjiìn‑nò kꞌe̱ nga komà bautizar i̱tꞌaà tsꞌe̱ Cristo ngatsꞌiaá nga ti̱koa̱ ya̱ titsa̱kjoòkoa̱á kꞌe̱ nga kꞌen?
\v 4 Kꞌe̱ nga ma bautizar xi̱ta̱, kꞌoa̱á sꞌín ngaya‑la̱ koni tsà ya̱ sihijiìn‑tꞌaà‑là Cristo kꞌe̱ nga kꞌen. Koni sꞌín jaáya‑la̱ Cristo i̱tꞌaà tsꞌe̱ ngaꞌñó‑la̱ Nainá xi ꞌñó jeya tíjna, kꞌoa̱á ti̱sꞌín mochjeén nga ko̱sꞌín si̱jchá yijo‑ná nga ki̱jnakon xi̱tse̱ ìjngoò kꞌaá.
\p
\v 5 Koni sꞌín titsa̱kjoòkoa̱á Cristo kꞌe̱ nga kꞌen, jñá kꞌoa̱á ti̱sꞌín kjoa̱áya‑ná koni sꞌín jaáya‑la̱ jè.
\v 6 Tíjiìn‑ná nga jè kjoa̱ jchínga‑ná koni sꞌín kiꞌné nga ìsa̱ kjòtseé, ya̱á kisitꞌaà krò‑la̱ Cristo mé‑ne nga kàtachija‑ne ngaꞌñó‑la̱ yijo jé‑ná nga mì ti̱ jé kjo̱tíxoma‑ìsa‑ná.
\v 7 Jngoò xi̱ta̱ xi jye kꞌen, jyeé tíjnandei̱í kjoa̱ tsꞌe̱ jé.
\v 8 Nga ya̱ kꞌen‑koa̱á Cristo, mokjeiín‑ná nga ti̱koa̱ ya̱ ki̱tsa̱jnakoa̱á.
\v 9 ꞌYa‑ná kꞌe̱ nga jaáya‑la̱ Cristo kꞌe̱ nga kꞌen, nì ti̱ jngoò na̱chrjein ki̱yá ìjngoò kꞌa‑ne. Mì ti̱ mé ngaꞌñó tjín‑la̱ kjoa̱biyaà nga jè ko̱tìxoma‑la̱.
\v 10 Kꞌe̱ nga kꞌen Cristo, jngoò kꞌa kꞌen xi kjoa̱ tsꞌe̱ jé‑ná; i̱ꞌndei̱ nga ìjngoò kꞌa tíjnakon‑né koií kjoa̱ tíjnakon‑ne nga jeya síkíjna Nainá.
\v 11 Jñò, kꞌoa̱á ti̱sꞌín ti̱kítsjeèn koni tsà jye kꞌeèn xi kjoa̱ tsꞌe̱ jé; ti̱tsa̱jnakon‑nò xi kjoa̱ tsꞌe̱ Nainá nga ya̱ titsa̱jnako̱o Na̱ꞌèn‑ná Jesucristo.
\p
\v 12 Koií kjoa̱‑la̱, mì ti̱ kiì biìꞌnde‑là yijo jé‑nò nga jè kjoa̱ tsꞌe̱ jé ko̱tìxoma‑nò kꞌe̱ nga kjo̱ꞌñó sꞌín‑nò nga nìkitasòn‑là kjoa̱ xi chꞌo tjín xi síjé yijo‑nò.
\v 13 Kì ya̱ nìnga̱tsja yijo‑nò kjoa̱ tsꞌe̱ jé nga jè jé síkjeén nga chꞌo ꞌnè, ta̱ sa̱á jè Nainá ti̱nga̱tsja yijo‑nò koni jngoò xi̱ta̱ xi jye jaáya‑la̱ i̱tꞌaà tsꞌe̱ kjo̱biyaà. Nainá ti̱nga̱tsja yijo‑nò nga kàtasíkjeén kjoa̱ xi kixi̱ tjín.
\v 14 Kjoa̱ tsꞌe̱ jé, mì ti̱ mé ngaꞌñó tjín‑la̱ nga jè ko̱tìxoma‑nò nga mìtsà kjoa̱ tsꞌe̱ kjo̱tíxoma‑la̱ Moisés titsa̱jnajñoò; kjo̱ndaà‑la̱ Nainá titsa̱jnajñoò.
\p
\v 15 ¿Kó bixoán? ¿A ndaà tjín nga ki̱nchátsji jé ìsa̱á nga kjo̱ndaà‑la̱ Nainá titsa̱jnajñaá nga mìtsà kjoa̱ tsꞌe̱ kjo̱tíxoma titsa̱jnajñaá? Majìn, mìkiì ndaà tjín.
\v 16 Ndaà tíjiìn‑nò tsà ya̱ si̱nga̱tsja yijo‑nò tsꞌe̱ xi̱ta̱ xi bítje̱ chi̱ꞌnda nga jè nìkitasòn‑là, chi̱ꞌnda‑la̱ ko̱maà tsꞌe̱ xi̱ta̱ jè. Kjo̱ꞌñó tjín‑ne nga jè si̱kitasòn‑là. Kꞌoa̱á sꞌín tjín, tsà chi̱ꞌnda‑la̱ jé ko̱maà nga jè si̱kitasòn‑là, ki̱yá‑nò; ta̱nga tsà chi̱ꞌnda‑la̱ Nainá ko̱maà nga jè si̱kitasòn‑là, kixi̱í ki̱tsa̱jnaà nguixko̱n jè.
\v 17 Jñò, nga ìsa̱ kjòtseé, kꞌoa̱á sꞌín kinìkitasòn‑là kjoa̱ tsꞌe̱ jé koni tsà jngoò chi̱ꞌnda, ta̱nga i̱ꞌndei̱, ndaà chjí‑la̱ Nainá nga ko̱ ini̱ma̱‑nò ndaà nìkitasòn koni sꞌín nguì ndaà tjín ꞌén kixi̱ xi kisꞌeno̱jmí‑nò.
\v 18 I̱ꞌndei̱ jyeé titsa̱jnandei̱í‑là kjoa̱ tsꞌe̱ jé; chi̱ꞌnda tsꞌe̱ kjoa̱kixi̱‑nò; tjínè‑nò nga si̱kitasòn koni sꞌín síjé kjoa̱kixi̱.
\v 19 Koi ꞌén tìchjàko̱‑nò xi mìtsà ꞌin chja̱ koií kjoa̱‑la̱ nga indaà tjín takòn; mìkiì ndaà machi̱ya‑nò kjoa̱ tsꞌe̱ Nainá. Koni sꞌín kiꞌnè nga ìsa̱ kjòtseé nga ya̱ kinìnga̱tsja yijo‑nò i̱tꞌaà tsꞌe̱ ngatsꞌiì kjoa̱chꞌo xi tjín nga jè tsatíxoma‑nò koni xi̱ta̱ chi̱ꞌnda; i̱ꞌndei̱ kꞌoa̱á ti̱sꞌín ti̱nga̱tsja yijo‑nò i̱tꞌaà tsꞌe̱ kjoa̱ kixi̱ mé‑ne jè kjoa̱ kixi̱ kàtatíxoma‑nò koni chi̱ꞌnda xi tsjeè títsa̱jna nga nguixko̱n Nainá.
\p
\v 20 Kꞌe̱ nga kjoa̱ tsꞌe̱ chi̱ꞌnda‑la̱ jé titsa̱jnajñoò, mìkiì titsa̱nìkitasòn‑là kjoa̱kixi̱‑la̱ Nainá.
\v 21 Ta̱nga, ¿mé xi kisakò‑nò kjoa̱ tsꞌe̱ jé? I̱ꞌndei̱ tà masobà‑nò kjoa̱ koi; tà ya̱á fìko̱‑ná ñánda tjín kjoa̱biyaà.
\v 22 I̱ꞌndei̱ nga jye titsa̱jnandei̱í‑là xi kjoa̱ tsꞌe̱ jé, chi̱ꞌnda‑la̱ Nainá ma; kjo̱ndaà xi sakó‑nò jè‑né nga tsjeè titsa̱jnaà nga nguixko̱n Nainá. Xi fehetꞌaà‑ne, sꞌe̱‑nò kjoa̱binachon ni̱ta̱ mé na̱chrjein‑ne.
\v 23 Chjí xi tjín‑la̱ kjoa̱ tsꞌe̱ jé, kjoa̱biyaà‑né. Ta̱nga kjo̱tjò xi tsjá Nainá, kjoa̱binachon‑né ni̱ta̱ mé na̱chrjein‑ne nga ya̱ titsa̱jnakoa̱á Cristo Jesús xi Na̱ꞌèn‑ná ma.
\c 7
\s Kó sꞌín ma fehetꞌaà ngaꞌñó‑la̱ jè kjo̱tíxoma
\p
\v 1 Jñò, xi ꞌndseé chibà, tìchjàko̱‑nò xi jyeé tíjiìn‑nò kósꞌín tíchja̱ kjo̱tíxoma; ꞌya‑nò nga tjín‑la̱ ngaꞌñó jè kjo̱tíxoma kósꞌín otíxoma‑la̱ xi̱ta̱ kꞌe̱ nga títsa̱jnakon‑ìsa skanda kꞌe̱ nga ki̱yá.
\v 2 Kꞌoa̱á ngaya‑la̱ jngoò chjo̱ón xi tjín‑la̱ xꞌi̱n, kꞌoa̱á tsò kjo̱tíxoma nga mìkiì ko̱ma tsjín xíkjín kꞌe̱ nga tákó títsa̱jnakon ingajò. Ta̱nga tsà jè xꞌi̱n ki̱yá, jè chjo̱ón, jye tíjnandei̱í i̱tꞌaà tsꞌe̱ kjo̱tíxoma xi tsꞌe̱ kjoa̱bixan.
\v 3 Jè chjo̱ón, kꞌe̱ nga tsà tákó tíjnakon xꞌi̱n‑la̱, tsà kjꞌei̱í xꞌi̱n ki̱xan‑ko̱, kjoa̱ chijnguií tísꞌín; ta̱nga tsà jye kꞌen xꞌi̱n‑la̱, jè chjo̱ón, jyeé tíjnandei̱í xi kjoa̱ tsꞌe̱ kjo̱tíxoma jè; ko̱maá ki̱xan‑ko̱ ìjngoò kꞌa‑ne xi kjꞌei̱í xꞌi̱n. Mì ti̱ kjoa̱ chijnguií tísꞌín‑ne.
\p
\v 4 Jñò ndí ꞌndsè, kꞌe̱ nga kꞌen‑kjoòko̱ò Cristo, ya̱á kꞌen i̱tꞌaà tsꞌe̱ ngaꞌñó‑la̱ kjo̱tíxoma, mé‑ne nga ya̱ ki̱nókjoa̱‑nò i̱tꞌaà tsꞌe̱ Cristo xi jye jaáya‑la̱ tsꞌe̱ kjoa̱biyaà nga kꞌoa̱sꞌín kàtaꞌya‑la̱ i̱tꞌaà tsa̱ján jè kjo̱ndaà xi sasén‑la̱ Nainá.
\v 5 Kꞌe̱ nga ti̱sa̱ ya̱ tjaàjñaá kjoa̱ xi tjín i̱sòꞌnde, jè kjo̱tíxoma tsibítꞌin‑ná mé‑ne nga jñà kjoa̱ chꞌo xi síjé yijo‑ná, ìsa̱ ꞌñó chꞌo kisìxájiìn yijo‑ná; kꞌoa̱á komà‑ne nga kisakò‑ná kjoa̱biyaà.
\v 6 Ta̱nga i̱ꞌndei̱ jyeé titsa̱jnandei̱í‑lá kjoa̱ tsꞌe̱ kjo̱tíxoma. Jyeé kꞌeén i̱tꞌaà tsꞌe̱ kjoa̱ xi bítꞌaàꞌñó‑ná, mé‑ne nga ko̱ma si̱xá‑lá Nainá xi kjoa̱ xi̱tse̱ koni sꞌín okóya‑ná Ini̱ma̱ Tsjeè‑la̱ Nainá. Mìtsà kꞌoa̱sꞌín si̱xá‑lá koni sꞌín tjín kjoa̱ jchínga xi tjítꞌaà xo̱jo̱n.
\p
\v 7 ¿Kó kixoán xi kjoa̱ tsꞌe̱ kjo̱tíxoma? ¿A chꞌo tjín? ¿A kjoa̱ tsꞌe̱ jé‑né? Majìn, ndaà tjín. Ta̱nga ꞌa̱n, tsà mìkiì kìjtseèxkoan kjoa̱ tsꞌe̱ kjo̱tíxoma, ti̱koa̱á mì‑là kiì kìjtseè kjoa̱ tsꞌe̱ jé. Mì‑là kiì kisijiìn‑na nga mìkiì ndaà tjín nga ꞌa̱n fahajiìn‑na tsojmì xi mìtsà tsꞌa̱n, tsà jè kjo̱tíxoma mì kꞌoa̱á sꞌín béno̱jmí nga tsò: “Kì ji̱ nìkjaàjiìn tsojmì xi mìtsà tsi̱ji.”
\v 8 Kjoa̱ tsꞌe̱ jé, ya̱á kisakò‑la̱ ngaꞌñó i̱tꞌaà tsꞌe̱ kjo̱tíxoma; kꞌoa̱á komà‑ne nga ìsa̱ ꞌñó jahajiìn‑na tsojmì xi mìtsà tsꞌa̱n. Ta̱nga tsà tsjìn kjo̱tíxoma, tsjìn‑la̱ ngaꞌñó kjoa̱ tsꞌe̱ jé.
\v 9 Kꞌe̱ nga sa̱ kjòtseé, kjꞌeè kiì bexkoan kjo̱tíxoma. Ta̱nga kꞌe̱ nga kìjtseèxkoan kjo̱tíxoma, kjoa̱ tsꞌe̱ jé, ìsa̱á ndaà kisꞌe‑la̱ ngaꞌñó; kjoa̱biyaà kisakò‑na.
\v 10 Kjoa̱ tsꞌe̱ kjo̱tíxoma, tjínè‑la̱ nga kjoa̱binachon tsjá‑na, ta̱nga tà sa̱á kjoa̱ biyaà kitsjaà‑na.
\v 11 Kjoa̱ tsꞌe̱ jé, ya̱á kisakò‑la̱ ngaꞌñó i̱tꞌaà tsꞌe̱ kjo̱tíxoma nga kiskoòna̱cha̱n‑na, kꞌoa̱ kisìkꞌen‑na.
\p
\v 12 Kꞌoa̱á sꞌín tjín nga jè Kjo̱tíxoma, tsjeè‑né; koni sꞌín otíxoma jñà ꞌén xi tjítꞌaà, tsjeè‑né, kixi̱‑né, koa̱ ndaà‑né.
\v 13 ¿Kó bixón? ¿A jè kjoa̱ tsꞌe̱ kjo̱tíxoma xi ndaà tjín xi kisìkꞌen‑na? Majìn, mìtsà koi kjoa̱‑la̱. Kjoa̱ tsꞌe̱ jé‑né. Kꞌoa̱á sꞌín kiꞌya‑la̱ nga kixi̱ kjoa̱ nga jé‑né. I̱tꞌaà tsꞌe̱ kjo̱tíxoma xi ndaà tjín, jè kjoa̱ tsꞌe̱ jé kisakò‑la̱ ngaꞌñó nga kisìkꞌen‑na, mé‑ne nga kiꞌya‑la̱ i̱tꞌaà tsꞌe̱ kjo̱tíxoma nga ꞌñó chꞌo tjín xi kjoa̱ tsꞌe̱ jé.
\s Kó tsò xi̱ta̱ xi otíxoma‑la̱ kjoa̱ tsꞌe̱ jé
\p
\v 14 Kjoa̱ tsꞌe̱ kjo̱tíxoma, ꞌya‑ná nga kjo̱hítsjeèn tsꞌe̱ Ini̱ma̱ Tsjeè‑la̱ Nainá; ta̱nga ꞌa̱n, yijo jé tsohoya; yijo‑na̱ ya̱á kjònga̱tsja kjoa̱ tsꞌe̱ jé nga jè otíxoma‑na.
\v 15 Mìkiì fìya‑na mé kjoa̱ xi sꞌiaàn. Kjoa̱ xi ndaà tjín xi mejèn‑na nga sꞌiaàn mìkiì koa̱ sꞌiaàn. Tà sa̱á jñà kjoa̱ xi mìkiì sasén‑na sìkitasoàn.
\v 16 Kꞌe̱ nga kꞌoa̱ sꞌiaàn jñà kjoa̱ xi mìkiì mejèn‑na, kꞌoa̱á xan nga tjíkixi̱ kjoa̱ nga ndaà tjín koni sꞌín tíchja̱ kjo̱tíxoma.
\v 17 Kꞌe̱ nga kꞌoa̱ sꞌiaàn nga otsjià jé, mìtsà ꞌa̱n xi kꞌoa̱ sꞌiaàn, jè kjoa̱ tsꞌe̱ jé xi tíjiìn‑na bítꞌin‑na.
\v 18 ꞌA̱n xi xi̱ta̱ i̱sòꞌnde ꞌmì‑na, be‑ná nga mìkiì ndaà tjín kjoa̱ xi tíjiìn yijo‑na̱. Mejèn‑na nga ndaà sꞌiaàn, ta̱nga mìkiì sakó‑na kó sꞌín sꞌiaàn kjoa̱ xi ndaà tjín.
\v 19 Kꞌe̱ nga mejèn‑na ndaà sꞌiaàn, mìkiì sìkitasoàn; tà sa̱á koi sìkitasoàn kjoa̱ xi chꞌo tjín xi majìn‑na nga koa̱ sꞌiaàn.
\v 20 Kꞌe̱ nga kꞌoa̱sꞌín sìkitasoàn kjoa̱ xi chꞌo tjín xi majìn‑na nga koa̱ sꞌiaàn, mìtsà ꞌa̱n xi kꞌoa̱ sꞌiaàn, jè kjoa̱ tsꞌe̱ jé xi tíjnajiìn‑na xi kꞌoa̱sꞌín.
\p
\v 21 Jngoò kjoa̱ matsji‑na na̱sꞌín mejèn‑na nga ndaà sꞌiaàn, tà sa̱á tà koi sakó‑na kjoa̱ xi chꞌo tjín.
\v 22 Xi i̱jiìn ini̱ma̱‑na̱ matsja‑na i̱tꞌaà tsꞌe̱ Kjo̱tíxoma‑la̱ Nainá.
\v 23 Ta̱nga tjín ìjngoò kjoa̱ xi tísíxájiìn yijo‑na̱ xi mìkiì tsjáꞌnde‑na nga ndaà sꞌiaàn; jè kjoa̱ tsꞌe̱ jé kjaán‑kjoò kjo̱hítsjeèn‑na xi mejèn‑la̱ nga ndaà sꞌiaàn. Kjoa̱ tsꞌe̱ jé xi tísíxájiìn yijo‑na̱ síkijne‑na nga chꞌo sꞌiaàn.
\p
\v 24 I̱ma̱ xó‑na ꞌa̱n; ¿yá xi si̱ìkíjnandei̱í‑na i̱tꞌaà tsꞌe̱ yijo jé‑na̱ xi kjoa̱biyaà tjín‑la̱?
\v 25 Ndaà chjí‑la̱ Nainá nga i̱tꞌaà tsꞌe̱ Na̱ꞌèn‑ná Jesucristo síkíjnandei̱í‑ná kjoa̱ tsꞌe̱ jé.
\p Nga jñà ꞌén xi ko̱tìxan‑nò nga ꞌa̱n, ya̱ i̱jiìn kjo̱hítsjeèn‑na̱ mejèn‑na sìkitasoàn kjo̱tíxoma‑la̱ Nainá, ta̱nga ya̱ i̱jiìn yijo jé‑na̱, tà sa̱á kjoa̱ tsꞌe̱ jé sìkitasoàn.
\c 8
\s Mé kjo̱ndaà xi sakó‑ná kꞌe̱ nga kꞌoa̱sꞌín titsa̱nìjchá yijo‑ná koni sꞌín mejèn‑la̱ Ini̱ma̱ Tsjeè‑la̱ Nainá
\p
\v 1 Ta̱nga i̱ꞌndei̱, jñà xi̱ta̱ xi ya̱ títsa̱jnakjoòko̱ Cristo, mì ti̱ mé kjo̱ꞌin si̱nè‑la̱, jñà xi̱ta̱ xi mì kꞌoa̱á sꞌín nchisíjchá yijo‑la̱ koni tjín jé xi síjé yijo‑la̱; tà sa̱á kꞌoa̱á sꞌín nchisíjchá yijo‑la̱ koni sꞌín mejèn‑la̱ Ini̱ma̱ Tsjeè‑la̱ Nainá.
\v 2 Jè ngaꞌñó‑la̱ Ini̱ma̱ Tsjeè‑la̱ Nainá xi síkítsa̱jnakon‑ná nga ya̱ titsa̱jnakjoòkoa̱á Cristo; ko̱ ti̱jè‑ne ngaꞌñó xi kisìkítsa̱jnandei̱í‑ná i̱tꞌaà tsꞌe̱ ngaꞌñó‑la̱ kjoa̱ tsꞌe̱ jé ko̱ i̱tꞌaà tsꞌe̱ kjoa̱biyaà.
\v 3 Kjo̱tíxoma tsꞌe̱ Moisés mìkiì kichìkjoa̱‑la̱ nga síkítsa̱jnandei̱í‑ná i̱tꞌaà tsꞌe̱ jé, nga tsjìn‑la̱ ngaꞌñó, koi kjoa̱‑la̱ nga jè yijo‑ná síjé jé xi tjín i̱sòꞌnde. Ta̱nga Nainá kichìkjoa̱á‑là nga kisìkasén Kiꞌndí‑la̱ koni jngoò xi xi̱ta̱ i̱sòꞌnde xi yijo kisꞌe‑la̱ koni jñá xi xi̱ta̱ jé ꞌmì‑ná. Kiꞌndí‑la̱ kitsjaà kjo̱tjò yijo‑la̱ nga kꞌen xi kjoa̱ tsꞌe̱ jé‑ná. Nainá kꞌoa̱á sꞌín kisꞌiìn nga jngoò kꞌa kisìkjehetꞌaà kjoa̱ tsꞌe̱ jé xi tjín‑la̱ yijo‑ná.
\v 4 Nainá kꞌoa̱á sꞌín kisꞌiìn mé‑ne nga i̱tꞌaà tsa̱ján kàtitasòn‑ne jè kjoa̱ kixi̱ xi tsꞌe̱ kjo̱tíxoma, jñá xi mì kꞌoa̱á sꞌín titsa̱nìjchá yijo‑ná koni tjín jé xi síjé yijo‑ná, nga kꞌoa̱sꞌín titsa̱nìjchá yijo‑ná koni sꞌín mejèn‑la̱ Ini̱ma̱ Tsjeè‑la̱ Nainá.
\p
\v 5 Jñà xi̱ta̱ xi kꞌoa̱ sꞌín koni tjín xi síjé yijo‑la̱, kꞌoa̱á tjín kjoa̱ xi nchisíkítsjeèn; ta̱nga jñà xi kꞌoa̱ sꞌín koni sꞌín tjín xi síjé Ini̱ma̱ Tsjeè‑la̱ Nainá, kꞌoa̱á tjín kjoa̱ xi nchisíkítsjeèn.
\v 6 Jñà xi̱ta̱ xi kꞌoa̱sꞌín nchisíkítsjeèn koni tjín xi mejèn‑la̱ yijo‑la̱, kjoa̱biyaà tjín‑la̱. Ta̱nga jñà xi̱ta̱ xi kꞌoa̱sꞌín nchisíkítsjeèn koni sꞌín mejèn‑la̱ Ini̱ma̱ Tsjeè‑la̱ Nainá, tjín‑la̱ kjoa̱binachon ko̱ kjoa̱ꞌnchán.
\v 7 Xi̱ta̱ xi tà koi kjoa̱ nchisíkítsjeèn koni tjín kjoa̱ chꞌo xi síjé yijo‑la̱, kondra̱ tsꞌe̱ Nainá‑né koií kjoa̱‑la̱ nga mìkiì síkitasòn ko̱ mìkiì chíkjoa̱‑la̱ nga síkitasòn kjo̱tíxoma‑la̱ Nainá.
\v 8 Jñà xi̱ta̱ xi kꞌoa̱sꞌín sꞌín koni tjín xi síjé yijo‑la̱, mìkiì ma‑la̱ sꞌín koni sꞌín sasén‑la̱ Nainá.
\p
\v 9 Ta̱nga jñò, mì ti̱ kꞌoa̱á ꞌnè‑nò koni tjín xi síjé yijo‑nò; kꞌoa̱á sꞌín titsa̱ꞌnè koni tjín xi síjé Ini̱ma̱ Tsjeè‑la̱ Nainá, nga jè tíjnajiìn ini̱ma̱ tsa̱jòn Ini̱ma̱ Tsjeè‑la̱ Nainá. Jñà xi̱ta̱ xi tsjìn‑la̱ Ini̱ma̱ Tsjeè‑la̱ Nainá xi kitsjaà Cristo, mìtsà xi̱ta̱ tsꞌe̱ Cristo.
\v 10 Ta̱nga tsà ya̱á tíjnajiìn ini̱ma̱ tsa̱jòn Cristo, ini̱ma̱ tsa̱jòn tíjnakon‑né nga xi̱ta̱ kixi̱ ꞌmì‑nò nga nguixko̱n Nainá, na̱sꞌín kꞌoa̱sꞌín tjínè‑la̱ nga ki̱yá yijo‑nò xi kjoa̱ tsꞌe̱ jé.
\v 11 Jè Nainá xi kisìkjaáya‑la̱ Jesucristo i̱tꞌaà tsꞌe̱ kjoa̱biyaà, tsà ya̱ tíjnajiìn ini̱ma̱‑nò jè Ini̱ma̱ Tsjeè‑la̱, kꞌoa̱á ti̱sꞌín si̱ìkítsa̱jnakon ìjngoò kꞌa yijo‑nò xi kjoa̱ tsꞌe̱ kjoa̱biyaà i̱tꞌaà tsꞌe̱ ngaꞌñó‑la̱ Ini̱ma̱ Tsjeè‑la̱ Nainá xi tíjnajiìn ini̱ma̱ tsa̱jòn.
\p
\v 12 Kꞌoa̱á ma‑ne, jñá xi ꞌndseé chibá, tíjna jngoò xi tjínè‑ná nga si̱kitasòn‑lá, ta̱nga mìtsà jè yijo‑ná si̱kitasòn‑lá; mì ti̱ kiì kꞌoa̱sꞌín sꞌe̱n‑ná koni tjín kjoa̱ chꞌo xi síjé yijo‑ná.
\v 13 Tsà tákó kꞌoa̱á sꞌín sꞌe̱en nga ya̱ onguítꞌaà‑là kjoa̱ xi chꞌo mejèn‑la̱ yijo‑nò, ki̱yá‑nò. Ta̱nga tsà koi̱ꞌnde‑là Ini̱ma̱ Tsjeè‑la̱ Nainá nga jngoò kꞌa si̱ìkijne‑la̱ kjoa̱ xi chꞌo mejèn‑la̱ yijo‑nò, ki̱tsa̱jnakon‑nò.
\p
\v 14 Jñà xi̱ta̱ xi jè Ini̱ma̱ Tsjeè‑la̱ Nainá okó‑la̱ ndi̱yá, jñà‑né xi i̱xti‑la̱ Nainá ꞌmì.
\v 15 Jè Ini̱ma̱ Tsjeè xi kitsjaà‑nò Nainá mìtsà ta̱xki̱ ini̱ma̱ i̱ma̱ xi kjo̱ꞌñó sꞌín‑nò koni jngoò chi̱ꞌnda xi tsꞌe̱ jé nga ma‑la̱ bíxkón‑nò; ta̱ sa̱á jè Ini̱ma̱ xi kitsjaà‑ná Nainá skoétjò‑ná nga i̱xti‑la̱ ko̱maá, ti̱jè‑ne Ini̱ma̱ Tsjeè‑la̱ Nainá béno̱jmíya‑ná nga ma nokjoà‑lá Nainá nga Ndí A̱pa ꞌmì‑lá.
\v 16 Jè Ini̱ma̱ Tsjeè‑la̱ Nainá tsjá kixi̱‑la̱ ꞌén ini̱ma̱ tsa̱ján nga i̱xti‑la̱ Nainá ꞌmì‑ná.
\v 17 Kꞌe̱ nga jye i̱xti‑la̱ maá, ti̱koa̱á tsa̱ján‑ná kjo̱tjò‑la̱ Nainá xi jye kꞌoa̱sꞌín kitsjaà tsoꞌba nga tsjá‑ná; ta̱ñaá tjoékjoò‑ná ko̱ Cristo nga ti̱koa̱ ko̱ jè titsa̱nìkjiaán kjo̱ꞌin mé‑ne nga jeya ki̱tsa̱jnako̱‑ná Cristo.
\p
\v 18 ꞌA̱n, kꞌoa̱á xan nga kixi̱ kjoa̱, koni tjín kjo̱ꞌin xi titsa̱nìkjiaán i̱ꞌndei̱ mìkiì mangásòn koni tjín kjoa̱jeya‑la̱ Nainá xi sꞌe̱‑ná kꞌe̱ nga ko̱ma i̱skan.
\v 19 Jñà tsojmì xi Nainá tsibíndaà, ꞌñó nchikoña kjoa̱ nga mejèn‑la̱ skoe̱ na̱chrjein kꞌe̱ nga Nainá jngoò kꞌa ndaà ko̱kò kó kjoàn xi i̱xti‑la̱ ma.
\v 20 Jñà tsojmì xi tsibíndaà Nainá, jngoò kꞌa itsꞌoòn‑jiìn koni sꞌín tjínè‑la̱ nga ko̱chjeén nga sa̱ ítjòn; mìtsà kjo̱tsja tsꞌe̱ i̱sòꞌnde nga kꞌoa̱sꞌín komàtꞌin; koi‑né nga jè Nainá kꞌoa̱á sꞌín kiskoòsòn‑la̱; ta̱nga i̱ꞌndei̱ jñà xi tsibíndaà Nainá nchikoñaá‑la̱
\v 21 nga kjoi̱í na̱chrjein kꞌe̱ nga ti̱koa̱ kítsa̱jnandei̱í xi tsibíndaà Nainá nga mì ti̱ kiì ki̱tsꞌón‑jiìn‑ne; Nainá jeya si̱ìkítsa̱jnandei̱í ìjngoò kꞌa‑ne koni sꞌín si̱ìko̱ i̱xti‑la̱.
\v 22 ꞌYa‑ná ngatsꞌiì xi Nainá tsibíndaà, skanda i̱ꞌndei̱, nchitsiné‑né, kjo̱ꞌin nchisíkjeiín koni jngoò chjo̱ón xi kiꞌndí tíꞌbeé.
\v 23 Mìtsà tà koi xi tjín i̱sòꞌnde xi tsiné; ti̱koa̱á jñá xi jye tjín‑ná Ini̱ma̱ Tsjeè‑la̱ Nainá koni jngoò kjo̱ndaà xi tje̱n kitjoé ítjòn‑ná, ti̱koa̱á tsiné‑ná nga kjo̱ꞌin titsa̱nìkjiaán nga titsa̱chiñá‑lá nga ꞌñó mejèn‑ná nga skoétjò‑ná Nainá nga jngoò kꞌa ya̱ ki̱tsa̱jnakoa̱á koni i̱xti‑la̱ maá; yijo‑ná kíjnandei̱í‑ne i̱tꞌaà tsꞌe̱ kjoa̱ xi síkitsꞌón‑ná.
\v 24 Nga jye titsa̱jnandia̱á, i̱ꞌndei̱ jè titsa̱chiñá‑lá nga jngoò kꞌa kàtitasòn. Ta̱nga tsà tsejèn tíjna xi chiñá‑lá mìkiì ma chiñá‑lá. ¿Yá xi koña‑la̱ xi tsejèn tíjna?
\v 25 Ta̱nga tsà jè chíña‑lá xi mìkiì tsejèn tíjna, ta̱fì ta̱fì chíñakjoa̱‑lá.
\p
\v 26 Kꞌoa̱á ti̱sꞌín sꞌín jè Ini̱ma̱ Tsjeè‑la̱ Nainá kꞌe̱ nga indaàjiìn tjín ini̱ma̱‑ná síchjátꞌaà‑ná. Kꞌe̱ nga mìkiì ma‑ná kó sꞌín si̱jétꞌaà‑lá Nainá kꞌe̱ nga bìtsiꞌba‑lá, ti̱jè‑ne Ini̱ma̱ Tsjeè‑la̱ Nainá bítsiꞌbatjì‑ná, ni̱mé ꞌén xi tsejèn chja̱, ni̱ i̱tsé fìya‑ná kó tsòya‑ne.
\v 27 Jè Nainá xi ma‑la̱ bíxke̱jiìn ini̱ma̱‑ná, tíjiìn‑la̱ mé xi tíbítsjeèn‑la̱ jè Ini̱ma̱ Tsjeè‑la̱. Kꞌe̱ nga bítsiꞌbatjì xi̱ta̱ tsjeè‑la̱ Nainá kꞌoa̱á sꞌín síjétꞌaà‑la̱ koni sꞌín mejèn‑la̱ Nainá.
\s Ni̱mé xi ko̱ma ko̱chrjetꞌaàxìn‑ná kjoa̱tjòcha‑la̱ Nainá xi jye tjín‑ná i̱tꞌaà tsꞌe̱ Cristo Jesús
\p
\v 28 Tíjiìn‑ná nga i̱tꞌaà tsꞌe̱ jñà xi̱ta̱ xi tjòkeè beè Nainá, ngatsꞌiì kjoa̱ xi matꞌin, Nainá kꞌoa̱á sꞌín síkjeén xi kjo̱ndaà tsꞌe̱ xi̱ta̱. Kꞌoa̱á sꞌín síko̱ jñà xi̱ta̱ xi xó jè kiìchja̱‑la̱ koni sꞌín mejèn‑la̱,
\v 29 jñà xi̱ta̱ xi jye tíjiìn‑la̱ nga ti̱sa̱ tàtsꞌen‑la̱ kjoa̱ nga i̱xti‑la̱ ko̱ma; ti̱koa̱á kꞌoa̱á sꞌín kiskoòsòn‑la̱ nga ngásòn kjoàn ko̱ma koni kji Kiꞌndí‑la̱ mé‑ne nga jè Cristo Kiꞌndítjòn ko̱ma koa̱ kjìn ko̱ma xi̱ta̱ xíkjín xi ꞌndse̱.
\v 30 Nainá nga kꞌoa̱sꞌín kiskoòsòn‑la̱ i̱tꞌaà tsꞌe̱ xi̱ta̱ koi, ti̱koa̱á xó kiìchja̱‑la̱, jñà xi xó kiìchja̱‑la̱ ti̱koa̱á kixi̱í kisìkítsa̱jna, jñà xi kixi̱ kisìkítsa̱jna ti̱koa̱á jeya kisìkítsa̱jna.
\p
\v 31 ¿Mé xi kixoán i̱tꞌaà tsꞌe̱ kjoa̱ koi? Nga Nainá tíjnako̱‑ná, ni̱jngoò xi̱ta̱ kondra̱‑ná si̱ìkijne‑ná.
\v 32 Nainá mìkiì ꞌon komà‑la̱, nga kitsjaà kjo̱tjò Kiꞌndí‑la̱ i̱tꞌaà tsa̱ján ngatsꞌiaá skanda kjoa̱biyaà. ¿A mìtsà ti̱koa̱ tsjá kjo̱tjò‑ná ngayije nga ko̱ Cristo?
\v 33 ¿Yá xi ko̱ma ko̱hòngui‑ná jñá xi Nainá xó jaàjiìn‑ná? Mì yá xi ko̱ma ko̱hòngui‑ná nga jé Nainá jye kixi̱ kisìkítsa̱jna‑ná.
\v 34 ¿Yá xi koi̱ìꞌnè‑ná kjo̱ꞌin? Nga jé Cristo Jesús kꞌen ngajo‑ná, ti̱koa̱ jaáya‑la̱ kjoa̱ tsꞌe̱ kjoa̱biyaà. Ya̱á tíjna i̱tꞌaà kixi̱‑la̱ Nainá nga tíbítsiꞌbatjì‑ná.
\v 35 ¿Yá xi ko̱chrjetꞌaàxìn‑ná kjoa̱tjòcha‑la̱ Cristo? ¿A kjo̱ꞌin‑né? ¿O xi kjoa̱ba‑ne? ¿O xi jè‑né nga ongatji̱ngui‑ná xi̱ta̱? ¿O xi kjoa̱ tsꞌe̱ kjinchrá‑ne? ¿O xi koií‑né nga tsjìn‑ná nikje xi chíkjá? ¿O xi jè kjoa̱ xi xkón tjín? ¿O xi jè kjoa̱ biyaà nga xi̱ta̱ síkꞌen‑ná? Majìn, ni̱mé kjoa̱‑ne.
\v 36 Kꞌoa̱á sꞌín tíchja̱ Xo̱jo̱n‑la̱ Nainá nga tsò:
\q Xi kjoa̱ tsi̱ji kjitꞌaà na̱chrjein tjín kjo̱xkón nga ki̱yá‑je̱n,
\q kꞌoa̱á sꞌín tíyatakòn‑na̱je̱n koni orrè xi tíjnandaà nga ki̱yá.
\m
\v 37 Ta̱nga i̱tꞌaà tsꞌe̱ ngatsꞌiì kjoa̱ koi, jye tsato titsa̱nìkijne‑lá xi i̱tꞌaà tsꞌe̱ Cristo xi kjòtsjakeè‑ná.
\v 38 Kꞌoa̱á sꞌín tíjngoò takoán nga ni̱jngoò kjoa̱ xi ko̱ma ko̱chrjetꞌaàxìn‑ná xi kjoa̱tjòcha‑la̱ Nainá, ni̱ jè kjoa̱ biyaà, ni̱ kjoa̱binachon, ni̱ àkja̱le̱, ni̱ jñá ngaꞌñó xi tjín i̱sòꞌnde ni̱ jñà xi tjín i̱jiìn i̱sén, ni̱ jñà kjoa̱ xi tjín na̱chrjein i̱ꞌndei̱, ni̱ jñà kjoa̱ xi ko̱ma na̱chrjein xi sa̱ nchrobá,
\v 39 ni̱ jè xi ìsa̱ ꞌnga, ni̱ jè xi ìsa̱ na̱nga̱, ni̱ta̱ mé tsojmì xi Nainá tsibíndaà, ni̱mé xi ko̱ma ko̱chrjetꞌaàxìn‑ná kjoa̱tjòcha‑la̱ Nainá xi jye tjín‑ná i̱tꞌaà tsꞌe̱ Cristo Jesús xi Na̱ꞌèn‑ná.
\c 9
\s Mé‑ne mìkiì ijchòtji̱ngui‑la̱ kjoa̱ kixi̱‑la̱ Nainá jñà xi̱ta̱ Israel xi xó jaàjiìn‑ne
\p
\v 1 O̱kixi̱í xi xan i̱tꞌaà tsꞌe̱ Cristo; mì ꞌén ndiso chjà; jè Ini̱ma̱ Tsjeè‑la̱ Nainá síkíchi̱ya‑la̱ kjo̱hítsjeèn‑na̱ nga tsjá ꞌén i̱tꞌaà tsꞌa̱n,
\v 2 nga kjitꞌaà na̱chrjein ba tjín‑na̱ koa̱ ꞌon ma‑la̱ ini̱ma̱‑na̱,
\v 3 i̱tꞌaà tsꞌe̱ jñà xi̱ta̱ ꞌndsè xi xinguia̱a ma koi‑né nga ꞌñó matsjake̱. ꞌÑó mejèn‑na nga kàtasakó‑la̱ kjo̱ndaà. Skanda ko̱maá‑là kósi̱tꞌaàxìn‑la̱ Cristo tsà kꞌoa̱sꞌín sa̱kò‑la̱ kjo̱ndaà jñà xi̱ta̱ xinguia̱a xi tsꞌe̱ na̱xa̱ndá Israel, ta̱nga mìkiì tjíꞌnde‑na nga ko̱sꞌín sꞌiaàn.
\v 4 Nga̱ jñà xi̱ta̱ Israel, jè Nainá kiskoétjò nga i̱xti‑la̱ ma, ko̱ ya̱á kiꞌya‑la̱ kjoa̱jeya‑la̱ Nainá, ko̱ kitjoé‑la̱ jñà kjoa̱ xi tsibíndaàjiìn‑ko̱, ti̱koa̱ kitjoé‑la̱ kjo̱tíxoma‑la̱ Moisés, ko̱ kitjoé‑la̱ o̱kixi̱ kósꞌín skoe̱xkón Nainá, ko̱ kitjoé‑la̱ ꞌén koni sꞌín kitsjaà‑la̱ tsoꞌba Nainá.
\v 5 Jñà xi̱ta̱ Israel ya̱á inchrobàtꞌaà‑ne tsꞌe̱ xi ꞌñó xi̱ta̱ jchínga kjiìn xi Nainá xó jaàjiìn‑ne. Jè Cristo [xi xó kisìkasén‑ne Nainá] nga xi̱ta̱ i̱sòꞌnde komà, ya̱á inchrobàtꞌaà‑ne i̱tꞌaà tsꞌe̱ xi̱ta̱ jchínga koi. Jè Cristo xi Nainá; jè otíxoma yije‑la̱ kjoa̱; jeya kàtìjna ni̱ta̱ kjé‑ne. Kꞌoa̱sꞌín kàtama.
\p
\v 6 [Nga mìtsà mokjeiín‑la̱ ngatsꞌiì xi̱ta̱ Israel], mìtsà koi kjoa̱‑la̱ nga jè ꞌén‑la̱ Nainá mìkiì bitasòn. Koi‑né nga i̱tꞌaà tsꞌe̱ Nainá, mìtsà ngatsꞌiì xi̱ta̱ xi ya̱ nchrobátꞌaà‑ne tje̱‑la̱ Israel nga nguì kixi̱ kjoa̱ nga ya̱ chja̱‑ne.
\v 7 Na̱sꞌín ya̱ tje̱n‑la̱ i̱tꞌaà tsꞌe̱ Abraham, mìtsà ngatsꞌiì nga kitjoé‑la̱ kjo̱ndaà nga i̱xti‑la̱ ma. Nga kꞌoa̱á tsò Xo̱jo̱n‑la̱ Nainá: “Jñà xi̱ta̱ tje̱‑lè, ya̱á kji̱nchrobà‑ne i̱tꞌaà tsꞌe̱ Isaac.”
\v 8 Kjoa̱ koi, kꞌoa̱á tsòya‑ne, nga jñà i̱xti‑la̱ Nainá, mìtsà jè xi chjí‑la̱ yá tsꞌe̱ tje̱ xi nchrobátꞌaà‑ne. Ta jñà‑né xi i̱xti‑la̱ Nainá ma jñà xi jye kꞌoa̱sꞌín kitsjaà tsoꞌba Nainá nga i̱xti‑la̱ ko̱ma. Tà jñá‑né xi kꞌoa̱sꞌín oxki̱tꞌaà nga kixi̱ kjoa̱ nga nguì tje̱‑la̱ Abraham ma.
\v 9 Nga̱ jè ꞌén xi Nainá kitsjaà‑la̱ tsoꞌba Abraham, kꞌoa̱á tsò: “Jè nó xi sa̱ nchrobá kjoi̱í ìjngoò kꞌa‑na; jè Sara, kiꞌndí sꞌe̱ jngoò‑la̱.”
\p
\v 10 Mìtsà ta jñá kjoa̱ koi xi komà. Ti̱koa̱á jè Rebeca kisꞌe‑la̱ i̱xtiꞌño̱ xi tsꞌe̱ Isaac, jè xi xi̱ta̱ jchínga‑ná ma.
\v 11 Nainá kꞌoa̱á sꞌín kitsjaà tsoꞌba kꞌe̱ nga ti̱kjꞌeè tsꞌiìn jñà i̱xtiꞌño̱ nga ti̱kjꞌeè kiì ꞌya‑la̱ mé kjoa̱ xi sꞌi̱in, a jè xi ndaà tjín, o jè xi mìkiì ndaà tjín. Kꞌoa̱á sꞌín kjòkixi̱ nga Nainá tjíꞌnde‑la̱ nga kjoa̱ájiìn xi̱ta̱ koni sꞌín jye tjíndaà‑la̱ nga ki̱chja̱‑la̱ jñà xi̱ta̱ xi jè mejèn‑la̱. Mìtsà kinda̱ sꞌín mé xi jye kisꞌiìn xi̱ta̱.
\v 12 Nainá kꞌoa̱á kitsò‑la̱ Rebeca: “Jè ti‑lè xi jtsꞌín ítjòn, chi̱ꞌnda‑lá ko̱ma jè xi i̱skan jtsꞌín.”
\v 13 Kꞌoa̱á sꞌín tíchja̱ Xo̱jo̱n‑la̱ Nainá nga tsò: “Jè Jacob kjòtsjakeè‑ná, ko̱ jè Esaú kòjtikeè‑ná.”
\p
\v 14 ¿Mé xi kixoán? Nainá, ¿a mìtsà kjoa̱ kixi̱ xi sꞌín? Majìn, mì kꞌoa̱á sꞌín tjín.
\v 15 Nainá kꞌoa̱á kitsò‑la̱ Moisés: “Ko̱hi̱ma̱keè‑ná xi ꞌa̱n mejèn‑na̱ nga ko̱hi̱ma̱keè, skoehi̱ma̱‑ná jè xi mejèn‑na̱ nga skoehi̱ma̱.”
\v 16 Kꞌoa̱á sꞌín tjín kjoa̱ koi, mìtsà koi nga jñá mejèn‑ná nga sꞌe̱‑ná, ni̱ mìtsà koi nga ꞌñó binchaàtsjiaá; jè Nainá tsjá‑la̱ kjo̱ndaà‑la̱ jñà xi̱ta̱ xi jè mejèn‑la̱ mahi̱ma̱keè.
\v 17 Kꞌoa̱á sꞌín tíchja̱ Xo̱jo̱n‑la̱ Nainá nga kitsò‑la̱ Faraón: “Koií kꞌoa̱sꞌín kisìkíjna‑lè nga xi̱ta̱xá tijni ya̱ na̱xa̱ndá Egipto mé‑ne nga i̱tꞌaà tsi̱ji kokoaà ngaꞌñó‑na̱ ti̱koa̱ skoe̱xkon‑na xi̱ta̱ nga tíjtsa i̱sòꞌnde.”
\v 18 Kꞌoa̱á sꞌín sꞌín Nainá, tjín‑la̱ kjo̱hi̱ma̱takòn i̱tꞌaà tsꞌe̱ xi̱ta̱ xi jè mejèn‑la̱; ti̱koa̱á ma‑la̱ sítájaàjiìn ini̱ma̱‑la̱ xi̱ta̱ xi jè mejèn‑la̱ nga kàtasítájaàjiìn ini̱ma̱‑la̱.
\p
\v 19 Ta̱nga tsà ji̱ kꞌoa̱ kꞌoín‑ná: “Tsà kꞌoa̱sꞌín sꞌín Nainá, ¿mé‑ne jé bínè‑la̱ jñà xi̱ta̱?, nga ni̱ yá xi̱ta̱ xi ko̱ma kondra̱ kjoi̱‑la̱ koni sꞌín mejèn‑la̱ jè.”
\v 20 Ta̱nga ji̱, xi ta̱xki̱ xi̱ta̱‑né, ¿yá‑né ji̱, nga Nainá otìkjoòkoi̱i? Jngoò ti̱jí xi xó kisindaà‑ne, ¿a ko̱maá ki̱tso̱‑la̱ jè xi tsibíndaà: “Mé‑ne kꞌoa̱sꞌín tsibìndaà‑ná”?
\v 21 ¿A mì tjíꞌnde‑la̱ jè xi ma‑la̱ bíndaà ti̱jí niꞌnde nga ti̱jè‑ne ndási koi̱ìndaà jngoò‑ne ti̱jí xi tà kꞌe̱ mochjeén kꞌe̱ nga tjín sꞌeí koa̱ koi̱ìndaà jngoò xi na̱chrjein nchijòn mochjeén?
\p
\v 22 Tsà Nainá mejèn‑la̱ tsakó kjoa̱jti‑la̱ ko̱ ngaꞌñó‑la̱, ¿a chꞌo tjín nga kiskoòñà kjoa̱ i̱tꞌaà tsꞌe̱ xi̱ta̱ xi tjoé‑la̱ kjo̱ꞌin ko̱ xi tjínè‑la̱ nga kjoe̱hesòn?
\v 23 Mìtsà chꞌo tjín; nga koií kꞌoa̱sꞌín kisꞌiìn‑ne mé‑ne nga ma tsakó kjoa̱jeya‑la̱ xi i̱tꞌaà tsa̱ján nga kjòhi̱ma̱keè‑ná. Nga jè tsibítsa̱jnandaà‑ná skanda ti̱sa̱ kjòtseé, mé‑ne ti̱koa̱ sꞌe̱‑ná kjoa̱jeya‑la̱.
\v 24 Nainá kꞌoa̱á sꞌín xó kiìchja̱‑ná. Tjín xi̱ta̱ xi ya̱ itjokàjiìn tsꞌe̱ xi̱ta̱ judío; ti̱koa̱á tjín xi̱ta̱ xi ya̱ itjokàjiìn tsꞌe̱ xi ta̱xki̱ xi̱ta̱ xi mìtsà xi̱ta̱ judío.
\v 25 Kꞌoa̱á sꞌín tíchja̱ xo̱jo̱n‑la̱ Oseas xi̱ta̱ xi kiìchja̱ ngajo‑la̱ Nainá nga tsò:
\q Jè xi mìtsà na̱xa̱ndá‑na̱ ma nga sa̱ ítjòn, na̱xa̱ndá tsꞌa̱án ko̱ma;
\q jè xi mì tjòkeè kijtseè nga sa̱ ítjòn, tjòkeè skoeè.
\q
\v 26 Ti ya̱‑ne i̱ꞌnde ñánda o̱kiꞌmì‑nò:
\q “Mìtsà na̱xa̱ndá tsꞌa̱n xan‑nò”,
\q “i̱xti‑la̱ Nainá xi tíjnakon” kꞌoín‑nò.
\m
\v 27 Isaías, xi̱ta̱ xi kiìchja̱ya̱ ngajo‑la̱ Nainá, kꞌoa̱á ti̱ tsò i̱tꞌaà tsꞌe̱ na̱xa̱ndá Israel: “Na̱sꞌín kjín jchán ma‑ne i̱xti‑la̱ koni tsomì tsꞌe̱ ndáchikon, tà chiba ma‑ne xi ki̱tjokàjiìn kjo̱ꞌin.
\v 28 Nga jè Na̱ꞌèn‑ná ni̱to̱ón si̱ìkitasòn jè kjoa̱kixi̱‑la̱ xi jye jè kitsjaà koni sꞌín tjínè‑la̱ jñà xi̱ta̱ nga tíjtsa i̱sòꞌnde.”
\v 29 Koni sꞌín kitsò Isaías nga ti̱sa̱ ítjòn:
\q Jè Na̱ꞌèn‑ná, xi tse ngaꞌñó tjín‑la̱,
\q tsà mìkiì kisìkiningui chiba‑ne tje̱‑ná,
\q jyeé‑la kisìkjehesòn yije‑ná
\q koni kisìko̱ na̱xa̱ndá Sodoma ko̱ na̱xa̱ndá Gomorra.
\p
\v 30 ¿Mé xi kixoán? Jñà xi mìtsà xi̱ta̱ judío, xi mìkiì fìtji̱ngui‑la̱ kjoa̱ kixi̱, i̱ꞌndei̱, jyeé xi̱ta̱ kixi̱‑né nga nguixko̱n Nainá tà koií kjoa̱‑la̱ nga mokjeiín‑la̱ i̱tꞌaà tsꞌe̱ Nainá.
\v 31 Ta̱nga jñà xi̱ta̱ Israel xi fìtji̱ngui‑la̱ Kjo̱tíxoma‑la̱ Moisés nga nchihótsji nga kixi̱ kítsa̱jna nguixko̱n Nainá mìkiì ijchòtji̱ngui‑la̱.
\v 32 ¿Mé‑ne nga kꞌoa̱sꞌín komà‑ne? Koií kjoa̱‑la̱ nga mìkiì mokjeiín‑la̱ i̱tꞌaà tsꞌe̱ Nainá. Tà kꞌoa̱á sꞌín ꞌñó tsohótꞌaàhikon nga ndaà tjín kjoa̱ xi kisꞌiìn i̱tꞌaà tsꞌe̱ Kjo̱tíxoma. Kꞌoa̱á ma‑ne [kꞌe̱ nga jꞌiì Cristo] ya̱á kisatíngui koni jngoò Nda̱jo̱ xi kijnahikòn.
\v 33 Xo̱jo̱n‑la̱ Nainá kꞌoa̱á sꞌín tíchja̱ [i̱tꞌaà tsꞌe̱ Cristo] nga tsò:
\q Ya̱ nindoò Sión kijnaá jngoaá nda̱jo̱ xi kíjnahikòn,
\q jngoò Nda̱jo̱ xi satíngui xi̱ta̱,
\q ta̱nga jè xi ko̱kjeiín‑la̱ i̱tꞌaà tsꞌe̱ Nda̱jo̱ jè mìkiì ko̱sobà‑la̱.
\c 10
\s Mé xi sꞌe̱én nga ki̱tsa̱jnandei̱í‑ná xi kjoa̱ tsꞌe̱ jé‑ná nga kixi̱ ki̱tsa̱jnaá nguixko̱n Nainá
\p
\v 1 Jñò ndí ꞌndsè, xi nguì o̱kixi̱, koií xi ꞌñó mejèn‑la̱ ini̱ma̱‑na̱ ko̱ xi ꞌñó sìjétꞌaà‑la̱ Nainá i̱tꞌaà tsꞌe̱ na̱xa̱ndá Israel, nga kàtìtsa̱jnandei̱í kjoa̱ tsꞌe̱ jé‑la̱.
\v 2 ꞌA̱n be kixi̱‑ná nga ꞌñó mejèn‑la̱ nga ndaà skoe̱xkón Nainá jñà xi̱ta̱ Israel, ta̱nga mìkiì mangásòn kjo̱hítsjeèn‑la̱ koni sꞌín tjín jè kjo̱hítsjeèn xi nguì kixi̱ tjín.
\v 3 Nga mìkiì fahasꞌen‑jiìn‑la̱ nga tà jngoò jè Nainá xi ma‑la̱ kixi̱ síkítsa̱jna xi̱ta̱. Tà jè xi mejèn‑la̱ nga tà jñà kixi̱ si̱kítsa̱jna yijo‑la̱. Majìn‑la̱ kjoé xi o̱kixi̱‑la̱ Nainá xi ma‑la̱ kixi̱ si̱ìkíjna‑ná.
\v 4 Nga jè Cristo kisìkjehetꞌaà kjoa̱ tsꞌe̱ kjo̱tíxoma mé‑ne nga sꞌe̱‑la̱ kjoa̱ kixi̱ ngatsꞌiì xi̱ta̱ xi mokjeiín‑la̱ i̱tꞌaà tsꞌe̱ Nainá.
\p
\v 5 Jè Moisés, kꞌoa̱á sꞌín kiskiì i̱tꞌaà tsꞌe̱ xi̱ta̱ xi mejèn‑la̱ kixi̱ kítsa̱jna i̱tꞌaà tsꞌe̱ kjo̱tíxoma nga tsò: “Jè xi̱ta̱ xi si̱ìkitasòn kjo̱tíxoma, i̱tꞌaà tsꞌe̱é kjo̱tíxoma kíjnakon‑ne.”
\v 6 Ta̱nga i̱tꞌaà tsꞌe̱ xi̱ta̱ xi kixi̱ kítsa̱jna kꞌe̱ nga mokjeiín‑la̱, kꞌoa̱á tsò: “Kì kꞌoa̱á tsò ini̱ma̱‑lè: ¿Yá xi kji̱mijìn ngajmiì?” (ꞌÉn koi tsòyaá‑ne nga mejèn‑la̱ kji̱nchrobàjen‑ko̱ Cristo.)
\v 7 Ko̱, kì kꞌoa̱á tsò ini̱ma̱‑lè: “¿Yá xi ma koi̱ìsꞌen‑jiìn i̱ꞌnde ñánda nchisíkjeiín kjo̱ꞌin jñà mikꞌen?” (ꞌÉn koi tsòyaá‑ne nga mejèn‑la̱ skímiìꞌnga ìjngoò kꞌa‑ne Cristo ya̱ i̱jiìn‑la̱ mikꞌen.)
\v 8 Ta̱nga, ¿kó tsò‑ìsa ꞌén‑la̱ Moisés? Tsò‑ne: “Chrañàtꞌaà tíjna‑lè jè ꞌén, ya̱á tíjnaꞌa ndso̱boi, ya̱á tíjnajiìn ini̱ma̱‑lè.” Kꞌoa̱á tsò ꞌén xi ꞌa̱n chjàya xi mochjeén nga ko̱kjeiín‑ná.
\v 9 Tsà ndso̱boi kéno̱jmí‑ne nga Jesucristo, jè xi Na̱ꞌèn‑ná, koa̱ tsà ko̱ ini̱ma̱‑lè ko̱kjeiín‑lè nga Nainá kisìkjaáya‑la̱ i̱tꞌaà tsꞌe̱ kjoa̱biyaà, ki̱jnandei̱í‑né xi kjoa̱ tsꞌe̱ jé‑lè.
\v 10 Nga ko̱ó ini̱ma̱‑ná mokjeiín‑ná mé‑ne nga kixi̱ ki̱tsa̱jnaá nguixko̱n Nainá ti̱koa̱ ko̱ó ndso̱baá bèno̱jmiá nga Jesucristo, jè xi Na̱ꞌèn‑ná, mé‑ne nga ko̱ma ki̱tsa̱jnandei̱í‑ná xi kjoa̱ tsꞌe̱ jé‑ná.
\p
\v 11 Kꞌoa̱sꞌín tíchja̱ Xo̱jo̱n‑la̱ Nainá nga tsò: “Ngatsꞌiì xi ko̱kjeiín‑la̱ i̱tꞌaà tsꞌe̱ Cristo mìkiì ko̱sobà‑la̱.”
\v 12 Jñà xi̱ta̱ judío ko̱ xi mìtsà xi̱ta̱ judío, tà ngásòn‑né xi i̱tꞌaà tsꞌe̱ Nainá; nga ti̱jè‑ne Cristo xi Na̱ꞌèn tsò‑la̱ ngatsꞌiì xi̱ta̱. Jè kjo̱ndaà xi ꞌñó tse tjín‑la̱ Cristo, jè tsjá‑la̱ ngatsꞌiì xi̱ta̱ xi chja̱tꞌaà‑la̱.
\v 13 Nga kꞌoa̱á ti̱ tsò Xo̱jo̱n‑la̱ Nainá: “Ngatsꞌiì xi̱ta̱ xi ki̱chja̱tꞌaà‑la̱ Na̱ꞌèn‑ná, kítsa̱jnandei̱í‑né xi kjoa̱ tsꞌe̱ jé‑la̱.”
\v 14 Ta̱nga mìkiì ko̱ma ki̱chja̱tꞌaà‑la̱ Cristo jè xi̱ta̱ xi kjꞌeè kì mokjeiín‑la̱. Ko̱ mìkiì ko̱kjeiín‑la̱ xi̱ta̱ xi kjꞌeè mé ꞌén ꞌnchré i̱tꞌaà tsꞌe̱ Cristo. Koa̱ mìkiì ko̱ma kji̱ꞌnchré xi̱ta̱ tsà mì yá xi̱ta̱ tjín xi ke̱èno̱jmí‑la̱ i̱tꞌaà tsꞌe̱ Cristo.
\v 15 Koa̱ jè xi̱ta̱ xi ke̱èno̱jmí ꞌén, mìkiì ko̱ma si̱ìxá tsà mì yá xi si̱ìkasén. Kꞌoa̱sꞌín tjítꞌaà xo̱jo̱n: “Mé tà ndaà‑ne nga kꞌoa̱sꞌín binchimasòn jñà xi̱ta̱ xi chja̱ya ꞌén ndaà‑la̱ Nainá xi kjoa̱ tsꞌe̱ Cristo xi tsꞌe̱ kjoa̱ꞌnchán.”
\p
\v 16 Ta̱nga mìtsà tà ngatsꞌiì xi̱ta̱ Israel kisìkitasòn jè ꞌén ndaà‑la̱ Nainá xi kiìꞌnchré. Nga jè Isaías xi̱ta̱ xi kiìchja̱ ngajo‑la̱ Nainá, kꞌoa̱á kitsò: “Na̱ꞌèn, ¿yá xi kòkjeiín‑la̱ ꞌén xi ji̱n kinokjoàya‑je̱n?”
\v 17 Kꞌoa̱á ma‑ne, kꞌe̱ nga mokjeiín‑ná, ya̱á nchrobátꞌaà‑ne kꞌe̱ nga naꞌyá‑lá ꞌén. Kꞌoa̱ jñà ꞌén xi naꞌyá, ꞌén ndaà‑la̱ Nainá xi kjoa̱ tsꞌe̱ Cristo‑né.
\p
\v 18 Ta̱nga, kꞌoa̱á xan: ¿A mìtsà kiìꞌnchré xi̱ta̱ Israel jè ꞌén ndaà‑la̱ Nainá? Jon, kiìꞌnchré‑né. Nga kꞌoa̱á tsò jè Xo̱jo̱n‑la̱ Nainá:
\q Kijndà i̱sòꞌnde jyeé tsabísòn ꞌén‑la̱.
\q Jyeé ijchò skanda ñánda fehetꞌaà‑ne nangui.
\m
\v 19 Ti̱koa̱á xan‑ná: jñà xi̱ta̱ Israel, ¿a mì kisijiìn‑la̱ kjoa̱ koi? Kisijiín‑la̱. Jè xi tíjna ítjòn, kꞌoa̱á kitsò Moisés:
\q ꞌA̱n, kꞌoa̱á sꞌín sꞌiaàn nga kàtachi̱ni̱cha jñò jngoò na̱xa̱ndá xi mìtsà na̱xa̱ndá tsꞌa̱n xan‑la̱.
\q Kàtamajticha i̱tꞌaà tsꞌe̱ na̱xa̱ndá xi chiba kjo̱hítsjeèn tjín‑la̱.
\m
\v 20 Ti̱koa̱á Isaías ꞌñó tsiꞌbeé‑la̱ ikon nga kiìchja̱ ꞌén‑la̱ Nainá nga kitsò:
\q Kisakò‑la̱ jñà xi̱ta̱ xi mìkiì ꞌa̱n tsohótsji‑na.
\q Tsakó‑la̱ kjo̱ndaà‑na̱ jñà xi̱ta̱ xi mìkiì ꞌa̱n kiskònanguiya‑na.
\m
\v 21 Ta̱nga jè Isaías kꞌoa̱á sꞌín kiskiì i̱tꞌaà tsꞌe̱ xi̱ta̱ Israel koni sꞌín kitsò Nainá: “Na̱chrjein nchijòn tsijmeé‑la̱ ndsa̱a nga kichjàꞌnchré‑la̱ jngoò na̱xa̱ndá xi kondra̱ kiì‑la̱ ꞌén‑na̱ nga mì kì kisìkitasòn.”
\c 11
\s Kjo̱hi̱ma̱takòn xi tjín‑la̱ Nainá i̱tꞌaà tsꞌe̱ na̱xa̱ndá Israel
\p
\v 1 ꞌA̱án kjònanguia, jè Nainá, ¿a kitsjeiìn takòn na̱xa̱ndá‑la̱ Israel? Majìn, mì kꞌoa̱á sꞌín tjín. ꞌA̱n, ti̱koa̱á xi̱ta̱ Israel‑ná, tje̱‑la̱á ma Abraham, xi̱ta̱ xinguia̱á ma xi ya̱ nchrobátꞌaà‑ne tsꞌe̱ Benjamín.
\v 2 Nainá mìtsà tsachrjekàngui na̱xa̱ndá‑la̱ nga jye tíjiìn‑la̱ nga ti̱sa̱ tàtsꞌen‑la̱ kjoa̱ nga i̱xti‑la̱ ko̱ma. ¿A mì tíjiìn‑nò koni tsò Xo̱jo̱n‑la̱ Nainá i̱tꞌaà tsꞌe̱ Elías nga kꞌoa̱sꞌín chja̱tꞌaà‑la̱ Nainá xi kondra̱ tsꞌe̱ Israel? Tsò:
\v 3 “Na̱ꞌèn, jñà xi̱ta̱‑lè xi kiìchja̱ ngajo‑lè, jyeé kisìkꞌen xi̱ta̱, koa̱ jñà i̱ꞌnde tsjeè‑lè jyeé kisìkitsꞌóña; tà ꞌa̱n ta̱jngoò tìjna̱a ìsa̱, ti̱koa̱á mejèn‑la̱ si̱ìkꞌen‑na̱.”
\v 4 Ta̱nga kꞌoa̱á tsò ꞌén xi tsjá Nainá: “Majìn, mìtsà tà ji̱ ta̱jngoò tijni. Itoò jmiì ma‑ne xi̱ta̱ xi ꞌa̱n títsa̱jnatjò‑na̱ xi kjꞌeè tsà ya̱ bincha-xkóꞌnchitꞌaà‑la̱ xkósòn‑la̱ Baal.”
\v 5 Na̱chrjein i̱ꞌndei̱ tákó kꞌoa̱á sꞌín ma, tjín ìsa̱ xi̱ta̱ Israel xi títsa̱jnatjò‑la̱ Nainá xi xó jaàjiìn‑ne xi kjo̱ndaà tsꞌe̱.
\v 6 Tsà tà kjo̱ndaà tsꞌe̱é Nainá nga kꞌoa̱sꞌín jaàjiìn xi̱ta̱, tsòyaá‑ne mìtsà koi kjoa̱‑la̱ kjo̱ndaà xi kisꞌiìn. Ta̱nga tsà koií kjoa̱‑la̱ kjo̱ndaà xi kisꞌiìn, mì‑la tsà ti̱ kjo̱ndaà‑la̱ Nainá kjòchjeén‑ne nga kitjaàjiìn xi̱ta̱.
\p
\v 7 ¿Kó sꞌín tjín kjoa̱? Tsòyaá‑ne nga kjín xi̱ta̱ Israel mìkiì ijchòtji̱ngui‑la̱ jè kjoa̱ xi tsohótsji. Ta̱nga kisꞌe iꞌnga xi̱ta̱ xi xó jaàjiìn‑ne Nainá xi jye ijchòtji̱ngui‑la̱. Jñà xi̱ta̱ xi iꞌnga, ꞌñó kjòtájaàjiìn ini̱ma̱‑la̱.
\v 8 Kꞌoa̱á sꞌín tjítꞌaà Xo̱jo̱n‑la̱ Nainá nga tsò: “Nainá, kitsjaà‑la̱ nga kisìjñòjiìn ini̱ma̱‑la̱; jñà xko̱n mìkiì tsejèn‑la̱, ko̱ líká‑la̱, mìkiì ꞌnchré skanda na̱chrjein i̱ꞌndei̱.”
\v 9 Jè xi̱ta̱xá ítjòn David kꞌoa̱á ti kitsò:
\q Jè sꞌeí xi ochrje, ti̱jè kàtama‑ne chꞌa̱n nga kàtakaàngui, kàtasiyaꞌñó na̱ꞌya,
\q ko̱ ti̱jñà kàtasatíngui‑ne mé‑ne nga kàtasꞌe‑la̱ kjo̱ꞌin.
\q
\v 10 Kàtasichjoà xko̱n mé‑ne nga mìkiì ko̱tsejèn‑la̱
\q nga kjitꞌaà na̱chrjein kàtamatsitꞌin ítsꞌi̱n.
\p
\v 11 ꞌA̱n kjònangui‑ná, ¿a jngoò kꞌa chixòtꞌaà nangui jñà xi̱ta̱ Israel kꞌe̱ nga kisatèngui? Majìn. Mì kꞌoa̱á sꞌín tjín kjoa̱. Jè kjoa̱‑la̱ nga mìkiì kisìkitasòn jñà xi̱ta̱ Israel, jñà kitjoé‑la̱ xi mìtsà xi̱ta̱ judío nga tsibìtsa̱jnandei̱í xi kjoa̱ tsꞌe̱ jé‑la̱. Kꞌoa̱á sꞌín komà mé‑ne nga jñà xi̱ta̱ judío kàtachi̱ni̱‑ne i̱tꞌaà tsꞌe̱ kjo̱ndaà‑la̱ Nainá.
\v 12 Tsà jñà xi̱ta̱ i̱sòꞌnde kisakò‑la̱ kjoa̱nchi̱ná‑la̱ Nainá kꞌe̱ nga jñà xi̱ta̱ judío mìkiì kisìkitasòn‑la̱ Nainá ko̱ kisìchijà kjo̱ndaà‑la̱, ìsa̱á ta ꞌñó ndaà sꞌe̱‑la̱ kjoa̱ machikon‑tꞌin jè i̱sòꞌnde kꞌe̱ nga jñà xi̱ta̱ judío ìjngoò kꞌa skoé i̱ꞌnde‑la̱ ya̱ nguixko̱n Nainá.
\p
\v 13 Jñò chjàko̱‑nò xi mìtsà xi̱ta̱ judío mì‑nò. ꞌA̱n kisìxáya‑na̱ nga ꞌa̱n kichjàjiìn‑la̱ jñà xi mìtsà xi̱ta̱ judío. ꞌA̱n beèxkón‑ná xá xi kitsꞌiì‑na.
\v 14 Tsà koií na̱chrjein‑la̱ ko̱chi̱ni̱í iꞌnga xi̱ta̱ xinguia̱a mé‑ne nga ti̱koa̱ ko̱ma kítsa̱jnandei̱í‑ne xi kjoa̱ tsꞌe̱ jé‑la̱.
\v 15 Tsà jñà xi̱ta̱ i̱sòꞌnde kisakò‑la̱ kjoa̱ꞌnchán i̱tꞌaà tsꞌe̱ Nainá kꞌe̱ nga jñà xi̱ta̱ judío itjokàngui, ìsa̱á tse kjo̱ndaà sa̱kò‑la̱ jñá xi̱ta̱ judío kꞌe̱ nga skoétjò ìjngoò kꞌa‑ne Nainá. Skanda kꞌoa̱á sꞌín ko̱matꞌin koni jngoò xi̱ta̱ xi jye kꞌen ko̱ kjoa̱áya‑la̱ i̱tꞌaà tsꞌe̱ kjoa̱biyaà.
\v 16 Tsà tsjeè ni̱ño̱ xi sindaà ítjòn nga ko̱nga̱tsja Nainá, ti̱koa̱á tsjeè‑né na̱ꞌyo̱ xi ko̱chjeén nga sindaà ni̱ño̱ kꞌe̱ nga ko̱ma i̱skan. Tsà tsjeè i̱tꞌaà tsꞌe̱ Nainá i̱ꞌma̱‑la̱ yá, jñà chrja‑la̱ ti̱koa̱á tsjeè‑né.
\p
\v 17 Jñà xi̱ta̱ Israel, kꞌoa̱á sꞌín ngaya‑la̱ koni jngoò yá olivo ndaà xi kitiìtꞌaà chrja‑la̱, koa̱ ngaji̱ kꞌoa̱á sꞌín ngaya‑la̱ koni chrja‑la̱ yá olivo i̱jiìn ijñá nga ya̱ kisìkjoòkoi̱i ya̱ ngajo‑la̱ chrja‑la̱ yá olivo ndaà; kꞌoa̱á ma‑ne nga ya̱ tíchjoí jè ngaꞌñó‑la̱ i̱ꞌma̱‑la̱ yá olivo ndaà.
\v 18 Kì ꞌnga nìkíjni yijo‑lè nga ya̱ titsa̱kjoòkoi̱i chrja‑la̱ yá olivo ndaà. Ti̱kítsjiìn nga tà kisìkjoòko̱‑nè; mìtsà ji̱ ꞌbiì‑la̱ ngaꞌñó jñà i̱ꞌma̱‑la̱ yá olivo ndaà, tà saà ji̱ tsjá‑lè ngaꞌñó jñà i̱ꞌma̱‑la̱ yá olivo ndaà.
\p
\v 19 Ji̱, kì kꞌoa̱á si: “Kitiìtꞌaà chrja‑la̱ yá olivo ndaà, nga ꞌa̱n kisìkjoòkoa̱a.”
\v 20 Ti̱kítsjiìn koií kjoa̱‑la̱ nga mìkiì mokjeiín‑la̱ nga kitiìtꞌaà‑ne. Ta̱nga ji̱ koií kjoa̱‑la̱ nga mokjeiín‑lè nga ya̱ ti̱jnatꞌeiì. Kì ꞌngaá beè‑la̱ takoìn, ti̱skón‑la̱ Nainá.
\v 21 Nainá, tsà mìkiì kitsjaàꞌnde‑la̱ jñà chrja‑la̱ jè yá olivo ndaà nga ya̱ kíjnakjoòko̱ ti̱koa̱á ngaji̱ tsà mì ti̱ kiì mokjeiín‑lè mì ti̱ kiì tsjáꞌnde‑lè nga ya̱ ki̱jnakjoòkoi̱i.
\v 22 Chìtsejèn‑la̱ Nainá, ꞌñó ndaà xi̱ta̱ ta̱nga ti̱koa̱á jè xi mejèn‑la̱ nga ndaà ki̱tasòn ꞌén xi chja̱. Mìkiì beè i̱ma̱ jñà xi̱ta̱ xi chinchatꞌaàxìn‑la̱ Nainá. Ta̱nga i̱tꞌaà tsi̱ji títsjá‑lè kjo̱ndaà. Tà jè xi mochjeén nga kꞌoa̱sꞌín ki̱jni koni sꞌín tjín kjo̱ndaà xi kitsjaà‑lè. Tsà majìn ti̱koa̱ ko̱tetꞌaà‑lè koni jngoò chrja‑la̱ yá.
\v 23 Jñà xi̱ta̱ judío xi chrja‑la̱ yá xi kitiìtꞌaà, tsà ko̱kjeiín ìjngoò kꞌa‑la̱, ko̱maá sincháya‑ne i̱ꞌnde‑la̱, nga Nainá tjín‑la̱ ngaꞌñó, ko̱maá kìkjoò ìjngoò kꞌa‑ne.
\v 24 Ji̱, nga ya̱ kitiìtꞌaà‑ne jñà yá olivo i̱jiìn ijñá koa̱ kisìkjoòkoi̱i yá olivo ndaà na̱sꞌín mìkiì ya̱ okꞌìn‑lè. ¡Ìsa̱á tà ndaà okꞌìn‑la̱ nga jñà chrja‑la̱ yá olivo xi xó kitjaàjiìn‑ne nga sincháya ìjngoò kꞌa‑ne i̱ꞌnde‑la̱ xi ti̱jè‑ne yijo‑la̱ yá!
\p
\v 25 ꞌNdsè, mejèn‑na̱ nga ndaà kàtasijiìn‑nò kjoa̱ꞌma koi koni sꞌín tjíndaà‑la̱ Nainá mé‑ne nga mì ꞌñó chji̱ne̱ ki̱nachrje yijo‑nò. Jè kjoa̱ nga tjín iꞌnga xi̱ta̱ Israel xi kjòtájaàjiìn ini̱ma̱‑la̱ nga mìkiì mokjeiín‑la̱, ta̱nga skanda kꞌe̱é ko̱kjeiín‑la̱ kꞌe̱ nga jye ko̱kjeiín yije‑la̱ xi mìtsà xi̱ta̱ judío.
\v 26 Kꞌe̱ nga jye kꞌoa̱sꞌín ko̱ma, ngatsꞌiì xi̱ta̱ Israel kítsa̱jnandei̱í‑né xi kjoa̱ tsꞌe̱ jé‑la̱, koni sꞌín tíchja̱ xo̱jo̱n nga tsò:
\q Ya̱á nindoò Sión kji̱nchrobà‑ne xi ma‑la̱ si̱ìkítsa̱jnandei̱í xi̱ta̱ Israel xi kjoa̱ tsꞌe̱ jé‑la̱,
\q jè xi kjoa̱áxìn‑la̱ jé‑la̱ jñà xi̱ta̱ tje̱‑la̱ Jacob.
\q
\v 27 Jè kjoa̱ xi bìndaàjiìn‑koa̱a
\q kꞌe̱ nga kjoa̱áxìn‑la̱ jñà jé xi tjín‑la̱.
\p
\v 28 Kjoa̱ tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo, jñà xi̱ta̱ judío, kondra̱‑la̱á ma Nainá mé‑ne jñò sa̱kò‑nò kjo̱ndaà. Ta̱nga jè kjoa̱ nga xó kitjaàjiìn‑ne xi̱ta̱ koi, tákó matsjakeè Nainá nga jye ko̱sꞌín kitsjaà‑la̱ tsoꞌba jñà xi̱ta̱ jchínga kjiìn‑la̱.
\v 29 Nainá mìkiì faáxìn kjo̱tjò xi tsjá, ti̱koa̱ mìkiì faáxìn ꞌén xi chja̱‑ná.
\v 30 Jñò, kꞌoa̱á ti̱sꞌín kiꞌnè nga sa̱ kjòtseé; mìkiì kinìkitasòn‑là Nainá, ta̱nga i̱ꞌndei̱ jyeé kisakò‑nò kjo̱hi̱ma̱takòn, koií nga̱tjì‑la̱ nga mìkiì kisìkitasòn jñà xi̱ta̱ judío.
\v 31 Na̱chrjein i̱ꞌndei̱ jñà xi̱ta̱ judío mìkiì síkitasòn‑la̱ Nainá. Ta̱nga tà koi‑né nga jè Nainá tjín‑la̱ kjo̱hi̱ma̱takòn xi i̱tꞌaà tsa̱jòn mé‑ne jñà xi̱ta̱ koi ti̱koa̱á sꞌe̱‑la̱ kjo̱hi̱ma̱takòn tsꞌe̱ Nainá.
\v 32 Nainá, kꞌoa̱á tsò nga ngatsꞌiì xi̱ta̱ judío, ko̱ xi mìtsà xi̱ta̱ judío, mìkiì síkitasòn‑la̱ nga jè xi mejèn‑la̱ Nainá nga ngásòn ngáya ko̱hi̱ma̱keè ngatsꞌiì xi̱ta̱.
\p
\v 33 ¡Mé tà ꞌñó tse ma kjoa̱nchi̱ná xi tjín‑la̱ Nainá, ko̱ ꞌñó tse kjoa̱chji̱ne̱ tjín‑la̱ ko̱ kjo̱hítsjeèn‑la̱! Ni̱jngoò xi̱ta̱ xi machi̱ya‑la̱ kósꞌín kosòn‑la̱ kꞌe̱ nga bíndaàjiìn ko̱ kósꞌín tjín ndi̱yá‑la̱.
\v 34 ¿Yá xi beè kósꞌín tjín kjo̱hítsjeèn‑la̱ Nainá? Mì yá xi ko̱ma‑la̱ si̱ìkíchi̱ya‑la̱ Na̱ꞌèn‑ná.
\v 35 ¿Yá xi̱ta̱ xi jè kisìkìña ítjòn‑la̱ xi mochjeén‑la̱ Nainá mé‑ne nga jè si̱ìkátji ngajo‑la̱?
\v 36 I̱tꞌaà tsꞌe̱é Nainá nchrobátꞌaà‑ne ngatsꞌiì tsojmì xi tjín, ti̱koa̱ i̱tꞌaà tsꞌe̱‑né nga títsa̱kon, ko̱ kꞌoa̱á sꞌín mochjeén nga jeya kíjna.
\p Nainá, kàtasꞌe‑la̱ kjoa̱jeya ni̱ta̱ mé na̱chrjein‑ne. Kꞌoa̱sꞌín kàtama.
\c 12
\s Mé xi sꞌe̱én nga tsjeè si̱jchá yijo‑ná koni sꞌín sasén‑la̱ Nainá
\p
\v 1 Kꞌoa̱á ma‑ne ꞌndsè, nga tse kjo̱hi̱ma̱takòn tjín‑la̱ Nainá xi i̱tꞌaà tsa̱ján, ꞌa̱n bìtsiꞌbà‑nò nga kꞌoa̱sꞌín ti̱nga̱tsja yijo‑nò i̱tꞌaà tsꞌe̱ Nainá koni jngoò kjo̱tjò xi tíjnakon, xi tsjeè tjín, xi ndaà sasén‑la̱ Nainá; nga nguì ko̱ ini̱ma̱‑nò ko̱ kjo̱hítsjeèn‑nò jeya si̱kíjna Nainá.
\v 2 Kì kꞌoa̱sꞌín onguíko̱ yijo‑nò koni sꞌín tjín kjo̱tíxoma‑la̱ i̱sòꞌnde. Ti̱xi̱tse̱ya kjo̱hítsjeèn‑nò nga kàtatjìya‑nò koni sꞌín titsa̱nìjchá yijo‑nò mé‑ne nga jcha̱‑nò mé xi mejèn‑la̱ Nainá i̱tꞌaà tsa̱jòn, jñà kjoa̱ xi ndaà tjín, xi nguì tjíkixi̱, xi jè ndaà sasén‑la̱.
\p
\v 3 I̱tꞌaà tsꞌe̱ xá xi ꞌa̱n kitjoé kjo̱tjò‑na, kꞌoa̱á xan‑nò nga jngoò ìjngoò, kì ꞌnga onguíko̱o kjo̱hítsjeèn‑nò koni sꞌín tjínè‑la̱ nga si̱kítsjeèn; tà saà ndaà ti̱kítsjeèn koni sꞌín okꞌìn‑la̱ kjo̱ndaà xi kitsjaà‑nò Nainá kꞌe̱ nga kòkjeiín‑nò i̱tꞌaà tsꞌe̱ Cristo.
\v 4 Koni sꞌín tjín yijo‑ná nga kjìn sko̱ya tjín‑la̱ ta̱nga ka̱kjꞌei̱í ka̱kjꞌei̱í xá tjín‑la̱ nga ìjngoò ìjngoò sko̱ya.
\v 5 Kꞌoa̱á sꞌín ma i̱tꞌaà tsa̱ján nga kjìn ma‑ná, ta̱nga xi i̱tꞌaà tsꞌe̱ Cristo tà jngoò ma‑ná nga ìjngoò ìjngoá; kꞌoa̱á sꞌín ki̱ndo̱ba̱ꞌñoá xinguia̱á koni sꞌín kitsobàꞌñó xíkjín yijo‑ná.
\p
\v 6 Koni sꞌín kjòmejèn‑la̱ Nainá jye kitsjaà‑ná xá xi sꞌe̱én nga jngoò ìjngoá. Jngoò xi̱ta̱, tsà jè xá kitjoé‑la̱ nga xi̱ta̱ ki̱chja̱yajiìn‑la̱, kꞌoa̱á sꞌín kàtasíkjeén koni sꞌín mokjeiín‑la̱.
\v 7 Tsà jè xá kitjoé‑la̱ nga xi̱ta̱ ko̱si̱ko̱, kꞌoa̱á sꞌín kàtasíkjeén nga ndaà kàtasìko̱ xi̱ta̱. O xi jè xá kitjoé‑la̱ nga ko̱kòya, kꞌoa̱sꞌín kàtasíkjeén nga ndaà kàtakóya.
\v 8 Jè xi kitjoé‑la̱ xá nga si̱ìjehikon xi̱ta̱, kꞌoa̱sꞌín kàtasꞌín. Jè xi ma‑la̱ sìkaꞌbí tsojmì, nguì ko̱ó ini̱ma̱‑la̱ kàtasíkaꞌbí; jè xi xá ítjòn kjònga̱tsja, ndaà kàtasíkitasòn; jè xi síchjátꞌaà‑la̱ jñà xi̱ta̱ i̱ma̱, ko̱ó kjo̱tsja‑la̱ kàtasíchjátꞌaà‑la̱.
\p
\v 9 Nguì ko̱ó ini̱ma̱‑nó ti̱tsjacha xinguio̱o. Ti̱jticha kjoa̱ xi chꞌo tjín. Koií tanguítji̱ngui‑là kjoa̱ xi ndaà tjín.
\v 10 Ko̱ó kjo̱tsja‑nò ti̱tsjacha xinguio̱o nga ꞌndsè chiba. Ìsa̱ ndaà jcha̱xkón xi̱ta̱ xinguio̱o xi iꞌnga; jñà ti̱kítsa̱jna ítjòn nga jngoò ìjngoò.
\p
\v 11 Kì tsꞌeè ꞌnè xi xá tsꞌe̱ Nainá. Nguì ko̱ó ini̱ma̱‑nò ti̱xá‑là Na̱ꞌèn‑ná.
\p
\v 12 Tsja te‑lá takòn jè kjoa̱ xi chiñà‑là. Ko̱ ini̱ma̱‑nò kàtachíkjoa̱ko̱‑nò kjo̱ꞌin xi titsa̱nìkjioón. Na̱chrjein nchijòn tìtsiꞌba‑là Nainá.
\p
\v 13 Tjiì‑là mé xi mochjeén‑la̱ jñà xi̱ta̱ tsjeè‑la̱ Cristo. Chjoétjò xi̱ta̱ xi bijchó ya̱ niꞌya‑nò.
\p
\v 14 Ti̱jétꞌaà‑la̱ Nainá nga kàtasíchikon‑tꞌin jñà xi̱ta̱ xi chꞌo síko̱‑nò; kì kꞌoa̱á sꞌín nìjétꞌaà‑là nga kjo̱ꞌin tsjá‑la̱.
\p
\v 15 Ti̱tsjako̱o jñà xi̱ta̱ xi tsja tjín‑la̱. Chìhindáyako̱o jñà xi nchikjindáya.
\p
\v 16 Tà jngoò tꞌe̱en kjo̱hítsjeèn‑nò. Kì ꞌnga ikon ꞌnè yijo‑nò, ya̱ tsjahijtako̱o jñà xi̱ta̱ i̱ma̱. Kì ꞌñó chji̱ne̱ nachrjenguioò yijo‑nò.
\p
\v 17 Jñà xi̱ta̱ xi chꞌo síko̱‑nò, kì chꞌo nìko̱o ngajo‑nò. Kjitꞌaà na̱chrjein ndaà tꞌe̱en nga nguixko̱n ngatsꞌiì xi̱ta̱.
\v 18 Skanda ñánda sakóꞌnde‑nò, jñò tjínè‑nò nga ꞌnchán titsa̱jnako̱o ngatsꞌiì xi̱ta̱.
\v 19 Ndí ꞌndsè xi matsjake̱‑nò, kꞌe̱ nga mé xi matꞌioòn, kì jñò ꞌnè ngajo‑nò. Tsja Nainá ti̱kíjnaya kjoa̱‑nò mé‑ne nga jè tsjá‑ne kjo̱ꞌin. Kꞌoa̱á sꞌín tíchja̱ Xo̱jo̱n‑la̱ Nainá nga tsò: “Tsò Na̱ꞌèn‑ná: ꞌA̱án oko̱‑na nga kìndaàjiìn‑la̱ xi̱ta̱, ꞌa̱án tsja‑la̱ chjí‑la̱.”
\v 20 Kꞌoa̱á ma‑ne, tsà jè kondra̱‑lè, tsà tsjìn tsojmì xi kine, ji̱í tjiì‑la̱; tsà xíndá‑la̱, tjiì‑la̱ nandá nga kàtꞌiì. Kꞌe̱ nga koa̱ si̱koi̱i, ko̱sobà tìꞌbiì‑la̱ kondra̱‑lè, chi̱ba̱‑la̱ ko̱hinì i̱sén‑la̱ koni xáꞌí.
\v 21 Jè kjoa̱ xi chꞌo tjín, kì jè síkijne‑nò; ti̱koa̱á‑ne jè kàtitasòn xi kjo̱ndaà, mé‑ne nga si̱kijne‑là kjoa̱ xi chꞌo tjín.
\c 13
\s Mé kjoa̱‑ne nga nìkitasòn‑lá xi xi̱ta̱xá títsa̱jna
\p
\v 1 Ngatsꞌiì xi̱ta̱ kàtasíkitasòn‑la̱ xi xi̱ta̱xá títsa̱jna, nga Nainá kitsjaà‑la̱ kjo̱tíxoma. Jñà xi xi̱ta̱xá títsa̱jna, Nainá kitsjaà‑la̱ xá.
\v 2 Jñà xi̱ta̱ xi bìtsa̱jna tájaà‑la̱ kjo̱tíxoma‑la̱ xi̱ta̱xá, kondra̱á bìtsa̱jna‑la̱ jñà xi̱ta̱ xi Nainá kitsjaà‑la̱ xá. Jñà xi̱ta̱ koi, ti̱ yijo‑la̱á tíbínè‑la̱ kjo̱ꞌin.
\v 3 Jñà xi̱ta̱xá mìtsà koi xá títsa̱jna‑ne nga jñà ki̱nchaxkón‑la̱ xi̱ta̱ xi ndaà sꞌín, jñà‑né xi̱ta̱ xi chꞌo tjín kjoa̱ xi sꞌín. Tsà mejèn‑lè nga mìkiì ki̱skón‑la̱ xi̱ta̱xá, ndaà tꞌi̱in, ko̱ jñà xi̱ta̱xá ndaà si̱ìkíjna‑lè.
\v 4 Jñà xi xi̱ta̱xá tjín‑la̱, xá tsꞌe̱ Nainá nchisíkitasòn, mé‑ne nga ndaà ki̱jna‑ne. Ta̱nga tsà chꞌo tjín kjoa̱ xi tìꞌnì, ti̱skón‑la̱ xi xi̱ta̱xá tjín‑la̱, nga tjíꞌnde‑la̱ nga tsjaà‑lè kjo̱ꞌin. Nga xá‑la̱ Nainá nchisꞌín kꞌe̱ nga bíndaàjiìn kjoa̱ ko̱ nga tsjá‑la̱ kjo̱ꞌin jñà xi̱ta̱ xi chꞌo sꞌín.
\v 5 Kꞌoa̱á ma‑ne nga mochjeén‑né nga ndaà si̱kitasòn‑lá jñà xi xi̱ta̱xá títsa̱jna, mìtsà tà koi‑ne nga kjo̱ꞌin tsjá‑ná; koi‑né nga xó kꞌoa̱sꞌín beè‑la̱ takoán nga tjínè‑ná nga si̱kitasoán.
\v 6 Koií kjoa̱‑la̱ nga ti̱koa̱ machjí to̱n sá, nga jñà xi̱ta̱xá kꞌoa̱á sꞌín nchisíkitasòn‑la̱ Nainá ko̱ kjitꞌaà na̱chrjein koa̱tjín xá xi nchisꞌín.
\p
\v 7 Tichjió yije mé xi kitje̱n‑nò. Jè xi kitje̱n‑la̱ to̱n sá, kàtíchjí. Jè xi kitje̱n‑la̱ tsojmì xi machjítjì, kàtíchjítjì. Jè xi̱ta̱ xi mochjeén‑la̱ nga jcha̱xkón, kàtayaxkón. Jè xi̱ta̱ xi mochjeén‑la̱ nga ndaà kíjna, ndaà ti̱kíjna.
\v 8 Kì mé xi jmeètꞌioòn yijo‑nò. Ta̱nga kitje̱én‑nò tsꞌe̱ kjoa̱tjòcha i̱tꞌaà tsꞌe̱ xi̱ta̱ xinguio̱o. Nga jè xi matsjakeè xíkjín, jyeé kisìkitasòn yije Kjo̱tíxoma.
\v 9 Jñà kjo̱tíxoma tsò‑ne: “Kì kjoa̱ chijngui ꞌnì, kì xi̱ta̱ nìkꞌin, kì chijé ꞌnì, kì ꞌén ndiso nokjoì, kì maxìtakòn‑chiì xingui̱i.” Ngatsꞌiì kjo̱tíxoma koi, ko̱ xi kjꞌei̱í, ya̱á mangásòn yije jè kjo̱tíxoma xi tsò: “Ti̱tsjachi xi̱ta̱ xingui̱i koni tsà ti yijo tsi̱ji‑ne.”
\v 10 Jè xi matsjakeè xíkjín, mìtsà chꞌo síko̱ xi̱ta̱ xíkjín. Jè xi matsjakeè xíkjín, jyeé ndaà tísíkitasòn Kjo̱tíxoma.
\p
\v 11 Kꞌe̱ nga kꞌoa̱sꞌín sꞌe̱én yijeé kjoa̱ koi, jcha̱‑ná na̱chrjein i̱ꞌndei̱ mé kjoa̱ xi tíma nga jye ijchò chi̱ba̱‑la̱ nga si̱kja‑lá yijo‑ná nga titsa̱fè. Koni kꞌe̱ nga sa̱ kòkjeiín‑ná, jye ꞌñó kjòchrañàtꞌaà na̱chrjein nga ki̱tsa̱jnandia̱á kjoa̱ tsꞌe̱ jé‑ná.
\v 12 Ni̱tje̱n, jyeé tífahato, jyeé tímachrañà na̱chrjein nga sꞌe̱ i̱sén nga ki̱tjojen ìjngoò kꞌa Na̱ꞌèn‑ná. Ki̱nachrjenguiaá ngatsꞌiì kjoa̱ xi ma ñánda nga jñò choòn ko̱ chjoé ngaꞌñó‑la̱ Nainá koni sꞌín mochjeén ñánda iseèn choòn koni tsà ki̱cha̱ tsꞌe̱ soldado.
\v 13 Kꞌoa̱á sꞌín iseèn ki̱tjá koni na̱chrjein nga ndaà si̱jchá yijo‑ná. Mì kì mochjeén nga ta̱xki̱ chji̱ne̱é tsojmì ko̱ nga machꞌia̱á. Mìkiì mochjeén nga íchjín kjóhijtakoa̱á, ko̱ mì kì ma ta̱xki̱ si̱koa̱á yijo‑ná. Mìkiì mochjeén nga xi̱ta̱ ki̱xkàn‑koa̱á ko̱ mìkiì mochjeén nga kjoa̱xìtakòn kichjà‑lá xinguia̱á.
\v 14 Kꞌoa̱á sꞌín ti̱jchá yijo‑nò koni sꞌín kisꞌiìn jè Na̱ꞌèn‑ná Jesucristo, kì kiì nìkitasòn‑là yijo‑nò kjoa̱ chꞌo xi síjé.
\c 14
\s Kꞌe̱ nga mìkiì mangásòn kjo̱hítsjeèn‑ná i̱tꞌaà tsꞌe̱ kjoa̱ xi mì xó kiì tjíꞌnde‑ná nga sꞌe̱én
\p
\v 1 Chjoétjò xi̱ta̱ xinguio̱o xi mìkiì tíjngoò ikon mé kjoa̱ xi tjíꞌnde‑la̱ nga sꞌi̱in; kì chibàya‑nò jñà kjoa̱ xi mìkiì mangásòn kjo̱hítsjeèn‑nò.
\v 2 Tjín xi̱ta̱ xi kꞌoa̱sꞌín mokjeiín‑la̱ nga ma chine yije tsojmì xi tjín, ti̱koa̱ tjín xi̱ta̱ xi mìkiì mokjeiín‑la̱ tsà ma chine yije tsojmì xi tjín. Tà jñà tsojmì xi nangui síjchá kine.
\v 3 Jè xi kine yije tsojmì xi ma chine mìkiì ko̱ma ko̱chrjekàngui jè xi mìkiì ma‑la̱ kine yije tsojmì; ko̱ jè xi mìkiì ma‑la̱ kine yije tsojmì, mìkiì ko̱ma ki̱chja̱jno‑la̱ jè xi ma‑la̱ kine yije tsojmì xi tjín, nga Nainá jyeé kiskoétjò nga kiꞌndí‑la̱ ma.
\v 4 ¿Yá‑né ji̱ nga nìkindi̱i chi̱ꞌnda xi mìtsà tsi̱ji? Nga chi̱ꞌnda tsꞌe̱ Nainá‑né. Jè chi̱ꞌnda jè, kinda̱ tsꞌe̱é nei‑la̱ tsà kixi̱ tíjna ko̱ tsà mì kixi̱ tíjna. Ta̱nga kixi̱í kíjna, nga̱ jè Na̱ꞌèn‑ná tjín‑la̱ ngaꞌñó nga kixi̱ si̱ìkíjna.
\p
\v 5 Tjín xi̱ta̱ xi tsò: tjín na̱chrjein xi ìsa̱ xkón. Ti̱koa̱ tjín xi tsò: Na̱chrjein, tà ngásòn ngaya‑né nga na̱chrjein nchijòn. Nga jngoò ìjngoò xi̱ta̱, kꞌoa̱á sꞌín ndaà katíjngoò‑la̱ ikon koni sꞌín síkítsjeèn.
\v 6 Jñà xi̱ta̱ xi faájiìn jngoò na̱chrjein nga beèxkón, kꞌoa̱á sꞌín nga jeya síkíjna Na̱ꞌèn‑ná; koa̱ jñà xi̱ta̱ xi tsò nga ta ngásòn ngáya na̱chrjein, ti̱koa̱á kꞌoa̱á sꞌín sꞌín nga ti̱koa̱ jeya síkíjna Na̱ꞌèn‑ná. Jñà xi̱ta̱ xi kine yije tsojmì, i̱tꞌaà tsꞌe̱ Na̱ꞌèn‑ná kine, nga tsjá‑la̱ kjo̱ndaà Na̱ꞌèn‑ná kꞌe̱ nga kine; kꞌoa̱ jñà xi̱ta̱ xi tsò nga tjín tsojmì xi mìkiì ma chine, ti̱koa̱á i̱tꞌaà tsꞌe̱é Na̱ꞌèn‑ná nga mìkiì kine tsojmì, ko̱ ti̱koa̱á tsjá‑la̱ kjo̱ndaà Na̱ꞌèn‑ná.
\p
\v 7 Jñá, kꞌe̱ nga titsa̱jnakoaán, mìtsà koi xá titsa̱jnakon‑ná xi ta kjo̱ndaà tsa̱ján. Ko̱ kꞌe̱ nga ki̱yá, mìtsà ta kjo̱ndaà tsa̱ján ki̱nchátsjiaá nga ki̱yá.
\v 8 Ta̱nga kꞌe̱ nga titsa̱jnakoaán, koií xá titsa̱jnakoaán xi kjo̱ndaà tsꞌe̱ Na̱ꞌèn‑ná. Ko̱ nga ki̱yá, ti̱koa̱á koií xá ki̱yá‑aná xi kjo̱ndaà tsꞌe̱ Na̱ꞌèn‑ná. Kꞌoa̱á ma‑ne tsà titsa̱jnakoaán ko̱ tsà ki̱yá kjo̱ndaà tsꞌe̱ Na̱ꞌèn‑ná nga tsꞌe̱ tsò‑ná.
\v 9 Koií kjoa̱‑la̱ nga kꞌen Cristo koa̱ jaáya‑la̱ nga tsibìjnakon‑né, mé‑ne nga jè ko̱ma‑ne Nei‑la̱ jñà xi̱ta̱ xi biyaà ko̱ xi títsa̱jnakon.
\p
\v 10 Ta̱nga ji̱ xi nokjoàjno‑la̱ ꞌndsì, ¿mé‑ne koa̱ꞌnè‑ne? Ti̱koa̱á ji̱ xi nachrjekàngui ꞌndsì, ¿mé‑ne nachrjekàngui‑ne? Nga ngatsꞌiì‑ná ki̱jchò kinchanguiaá ndso̱ko̱ Cristo ñánda nga jè tíhotíxoma.
\v 11 Kꞌoa̱á sꞌín tíchja̱ Xo̱jo̱n‑la̱ Nainá nga tsò:
\q Tsò Na̱ꞌén‑ná: ꞌA̱n tìjna̱kon‑ná,
\q ngatsꞌiì xi̱ta̱ ki̱ncha-xkóꞌnchitꞌaà‑na
\q ko̱ ngatsꞌiì xi̱ta̱ skoe̱xkón Nainá.
\m
\v 12 Ngatsꞌiaá kꞌoi̱‑lá kinda̱ Nainá mé kjoa̱ xi kiꞌné nga tsitsa̱jnaá i̱sòꞌnde.
\p
\v 13 Kꞌoa̱á ma‑ne nga mì ti̱ xinguia̱á ki̱nókjoa̱jno‑lá; jñò, ta sa̱á ndaà ti̱kítsjeèn nga ni̱mé xi sꞌe̱en xi si̱kitsꞌón‑jiìn koni sꞌín mokjeiín‑la̱ xinguio̱o mé‑ne nga mì jé ska̱jiìn ìjngoò kꞌa‑ne.
\v 14 ꞌA̱n ndaà tíjngoò takoàn i̱tꞌaà tsꞌe̱ Na̱ꞌèn‑ná Jesús nga kixi̱ kjoa̱ nga tsjìn tsojmì xi xkón tjín nga mìkiì ma chine; ta̱nga jè xi̱ta̱ xi kꞌoa̱sꞌín síkítsjeèn nga tjín tsojmì xi xkón tjín nga mìkiì ma chine, xkón tjín‑la̱ i̱tꞌaà tsꞌe̱ tsà ski̱ne̱.
\v 15 Ta̱nga tsà ta koií kjoa̱‑la̱ tsꞌe̱ tsojmì xi chiniì, jè ꞌndsì chꞌo ma‑la̱, jè kjoa̱ xi tìꞌnì mìtsà ti̱ kjoa̱tjòcha‑ne; kì kiì biìꞌndi nga jè ꞌndsì xi Cristo kꞌen ngajo‑la̱ ki̱tsꞌón‑jiìn‑la̱ xi tà kjoa̱ tsꞌe̱ tsojmì xi chiniì.
\v 16 Kì kꞌoa̱á sꞌín ꞌnè mé‑ne nga mì xi̱ta̱ ki̱chja̱jno‑nò i̱tꞌaà tsꞌe̱ kjoa̱ xi titsa̱ꞌnè nga kꞌoa̱sꞌín mokjeiín‑nò nga ndaà tjín.
\v 17 Kꞌe̱ nga jè Nainá tíhotíxoma‑ná mìtsà jè xi ìsa̱ ꞌñó chjí‑la̱ mé xi sꞌioa̱á ko̱ mé xi chi̱ne̱é. Jè xi ꞌñó mochjeén nga kixi̱ ki̱tsa̱jnaá, ꞌnchán si̱jchá yijo‑ná, ko̱ tsja kꞌoé‑lá ini̱ma̱‑ná; koi kjoa̱ xi tsjá Ini̱ma̱ Tsjeè‑la̱ Nainá.
\v 18 Jè xi kꞌoa̱sꞌín síkitasòn kjoa̱ koi kꞌe̱ nga síxá‑la̱ Cristo, ndaà sasén‑la̱ nguixko̱n Nainá, ti̱koa̱á ndaà bìjna nga nguixko̱n xi̱ta̱.
\p
\v 19 Kꞌoa̱á sꞌín kjitji̱ngui‑lá kjoa̱ xi ꞌnchán síkíjna‑ná ko̱ kjoa̱ xi ꞌbì‑lá ngaꞌñó xinguia̱á nga jngoò jngoaá koni sꞌín mokjeiín‑ná.
\v 20 Kì xá‑la̱ Nainá nìkitsꞌón‑jiìn‑la̱ xi ta kjoa̱ tsꞌe̱ tsojmì xi ma chine. Kixi̱í kjoa̱, ngatsꞌiì tsojmì xi tjín, tsjeè‑né. Ta̱nga jè xi chꞌo tjín kꞌe̱ nga ta koi kjoa̱‑la̱ tsojmì xi chineé bitsꞌón‑jiìn‑la̱ kjoa̱ xi mokjeiín‑la̱ i̱tꞌaà tsꞌe̱ Nainá jñà xi̱ta̱ xi kjꞌei̱í.
\v 21 Ìsa̱á ndaà‑ne nga mì yijo chji̱ne̱é, nga mì xán sꞌioa̱á, nga ni̱mé kjoa̱ xi sꞌe̱én jè xi si̱ìkitsꞌón‑jiìn‑la̱ jè ꞌndsì nga sakó‑la̱ jé.
\v 22 Koni sꞌín mokjeiín‑lè i̱tꞌaà tsꞌe̱ kjoa̱ koi, tà ji̱í tíjiìn takoìn ko̱ Nainá. ¡Mé ta ndaà‑la̱ jè xi mì kjo̱ꞌin bínè‑la̱ yijo‑la̱ kꞌe̱ nga tíjngoò ikon nga ndaà tjín kjoa̱ xi sꞌín!
\v 23 Jè xi jò tjín‑la̱ kꞌe̱ nga mé tsojmì xi kine, jé tíhónè‑la̱ yijo‑la̱ nga mìkiì tjíjngoò ikon tsojmì xi kine. Tsà mìkiì tjíjngoò takoán kꞌe̱ nga mé kjoa̱ xi sꞌe̱én, jé titsa̱honè‑lá yijo‑ná.
\c 15
\p
\v 1 Jñá xi jye kixi̱ mokjeiín‑ná i̱tꞌaà tsꞌe̱ kjoa̱ xi tjíꞌnde‑ná mé xi sꞌe̱én, mochjeén‑né nga ti̱koa̱ ki̱chìkjoa̱ko̱‑ná jñà xi̱ta̱ xi kꞌoa̱sꞌín mokjeiín‑la̱ nga mìkiì tjíꞌnde‑la̱ mé kjoa̱ xi sꞌi̱in. Mìtsà tà jñà kjoa̱ xi ndaà sasén‑ná ki̱nchátsjiaá.
\v 2 Nga jngoò ìjngoaá, mochjeén‑né nga kꞌoa̱sꞌín sꞌe̱én jè kjoa̱ xi sasén‑la̱ jñà xi̱ta̱ xinguia̱á xi kjo̱ndaà tsꞌe̱, mé‑ne nga kijin‑ìsa kjo̱hítsjeèn‑la̱ jè kjoa̱ xi mokjeiín‑la̱.
\v 3 Nga ti̱koa̱ jè Cristo mìtsà jè tsohótsji kjoa̱ xi sasén‑la̱ yijo‑la̱, tà sa̱á i̱tꞌaà tsꞌe̱é tsitasòn koni sꞌín tjítꞌaà xo̱jo̱n tsꞌe̱ Salmo, nga tsò: “ꞌÉn chꞌo xi ji̱ kiìchja̱jno‑lè, ꞌa̱án kiskaàtꞌaà‑na̱.”
\v 4 Jñà ꞌén xi kitjei nga sa̱ kjòtseé, koií xá kitjei‑ne nga ko̱kòya‑ná mé‑ne nga i̱tꞌaà tsꞌe̱ Xo̱jo̱n‑la̱ Nainá, tseé sꞌe̱én takoán ti̱koa̱ sꞌe̱‑la̱ kjoa̱ꞌnchán ini̱ma̱‑ná, mé‑ne nga ko̱ma chíñakjoa̱‑lá i̱tꞌaà tsꞌe̱ Nainá.
\v 5 Nainá xi ma‑la̱ tsjá‑ná kjoa̱tsetakòn ko̱ xi ma‑la̱ síꞌnchán‑jiìn ini̱ma̱‑ná, kꞌoa̱sꞌín jngoò kjo̱hítsjeèn kàtatsjá‑nò nga jngoò ìjngoò koni tsò Cristo Jesús,
\v 6 mé‑ne ngatsꞌioò ngásòn jngoò jta̱ jeya ti̱kíjna Nainá, Na̱ꞌèn‑la̱ Jesucristo xi otíxoma‑ná.
\p
\v 7 Koií kjoa̱‑la̱ kꞌoa̱sꞌín chjoétjò xinguio̱o nga jngoò ìjngoò koni sꞌín kiskoétjò‑nò Cristo mé‑ne nga jeya kíjna‑ne Nainá.
\v 8 Kꞌoa̱á xán‑nò, jè Cristo Jesús, koií xá jꞌiì‑ne nga jꞌiì síxájiìn‑la̱ xi̱ta̱ judío xi tjítꞌaà chi̱ba̱‑la̱ kjoa̱ tsꞌe̱ circuncisión mé‑ne nga tsakó‑ne kjoa̱kixi̱‑la̱ Nainá ti̱koa̱ síkitasòn koni sꞌín jye kitsjaà‑la̱ tsoꞌba Nainá jñà xi̱ta̱ jchínga kjiìn‑la̱.
\v 9 Ti̱koa̱á koií xá jꞌiì‑ne mé‑ne nga jñà xi mìtsà xi̱ta̱ judío jeya si̱ìkíjna Nainá i̱tꞌaà tsꞌe̱ kjo̱hi̱ma̱takòn xi tjín‑la̱ Nainá koni sꞌín tíchja̱ Xo̱jo̱n‑la̱ Nainá, nga tsò:
\q Koií kjoa̱‑la̱ nga jeya siìkíjna‑lè i̱jiìn‑la̱ xi̱ta̱ na̱xa̱ndá xi mìtsà xi̱ta̱ judío.
\q I̱tꞌaà tsi̱ji sé‑lè sò xi ndaà tsò.
\m
\v 10 Ìjngoò kꞌa tjítꞌaà xo̱jo̱n ñánda nga tsò:
\q Jñò xi mìtsà xi̱ta̱ judío ꞌmì‑nò,
\q tsjaá tꞌè‑lá takòn ko̱ xi̱ta̱ na̱xa̱ndá‑la̱ Nainá.
\m
\v 11 Ìjngoò kꞌa tjítꞌaà xo̱jo̱n ñánda tsò:
\q Jñò ngatsꞌioò xi mìtsà xi̱ta̱ judío ꞌmì‑nò,
\q jeya ti̱kíjna Na̱ꞌèn‑ná,
\q ngatsꞌioò xi na̱xa̱ndá ꞌmì‑nò jeya ti̱nachrjeè Nainá.
\m
\v 12 Ìjngoò kꞌa tjítꞌaà xo̱jo̱n tsꞌe̱ Isaías ñánda tsò:
\q Jè tje̱‑la̱ Isaí ki̱tjotꞌaà jngoò‑ne jtsꞌén‑la̱ xi ko̱tìxoma‑la̱ jñà xi mìtsà xi̱ta̱ judío,
\q ko̱ jè jtsꞌén jè ko̱òtꞌaà ikon nga skóña‑kjoa̱‑la̱.
\p
\v 13 Nainá xi tsjá nga chiñàkjoa̱á, kàtatsjá yije‑nò kjo̱tsja ko̱ kjoa̱ꞌnchán nga mokjeiín‑nò i̱tꞌaà tsꞌe̱, mé‑ne nga ìsa̱ ndaà chíñakjoa̱ ìsa̱a xi ko̱ ngaꞌñó‑la̱ Ini̱ma̱ Tsjeè‑la̱ Nainá.
\s Pablo chi̱ꞌnda‑la̱ Jesucristo
\p
\v 14 Ta̱nga ndí ꞌndsè, ꞌa̱n tíjngoò takoàn xi i̱tꞌaà tsa̱jòn xi ti̱jñò‑nò tjín‑nò kjo̱ndaà ti̱koa̱ machi̱ya‑nò nga ko̱ma ti̱jñò sìkixi̱ya‑là xi̱ta̱ xinguio̱o nga ìjngoò jngoò.
\v 15 Ndí ꞌndsè, ꞌñó tíbeè‑la̱ takoàn nga tìkjiì‑nò xo̱jo̱n jè; tìchjà kixi̱‑nò, mé‑ne nga mìkiì jchàajiìn‑nò koni tsò xo̱jo̱n jè. Koií kꞌoa̱sꞌín tìsìkítsjeèn‑nò nga ꞌa̱n kitjoé‑na kjo̱tjò‑la̱ Nainá kꞌe̱ nga kitsjaà‑na xá,
\v 16 mé‑ne nga ꞌa̱n ko̱ma‑na chi̱ꞌnda‑la̱ Jesucristo i̱tꞌaà tsꞌe̱ xi mìtsà xi̱ta̱ judío. Sìxákoa̱a ꞌén ndaà‑la̱ Nainá, mé‑ne jñà xi mìtsà xi̱ta̱ judío ndaà sasén takòn‑nè Nainá koni jngoò kjo̱tjò xi ꞌñó sasén‑la̱ Nainá nga i̱tꞌaà tsꞌe̱ Ini̱ma̱ Tsjeè‑la̱ Nainá jyeé kjòtsjeè.
\p
\v 17 ꞌA̱n tjín‑na mé kjoa̱‑ne nga matsja‑na i̱tꞌaà tsꞌe̱ Cristo tsꞌe̱ xá xi tìsꞌiaàn.
\v 18 Nì mé kjoa̱ tjín xi maꞌñótꞌaà takoàn nga ma chjà, ta jè kjoa̱ tsꞌe̱ Cristo nga ꞌa̱n síkjeén‑na̱ nga sìxákoa̱a jñà xi mìtsà xi̱ta̱ judío mé‑ne nga ko̱ma si̱kitasòn‑la̱ Nainá. Kꞌoa̱á sꞌín kisꞌiaàn i̱tꞌaà tsꞌe̱ ꞌén xi kichjà ko̱ i̱tꞌaà tsꞌe̱ xá xi kisꞌiaàn,
\v 19 ko̱ i̱tꞌaà tsꞌe̱ kjo̱xkón xi okó kjoa̱jeya‑la̱ Nainá ko̱ i̱tꞌaà tsꞌe̱ ngaꞌñó‑la̱ Ini̱ma̱ Tsjeè‑la̱ Nainá. Jyeé ndaà kisìngásoàn ꞌén ndaà‑la̱ Nainá xi kjoa̱ tsꞌe̱ Cristo, tsibìtsꞌia̱ko̱‑na ján Jerusalén kóho̱kji nga jngoò itjandiì‑la̱ skanda ján Ilírico.
\v 20 Kꞌoa̱á sꞌín tsibìnè‑la̱ yijo‑na̱ nga kichjàya ꞌén ndaà‑la̱ Nainá xi kjoa̱ tsꞌe̱ Cristo ya̱ i̱ꞌnde ñánda kjꞌeè yá béno̱jmíya i̱tꞌaà tsꞌe̱ Cristo, mé‑ne nga mì ꞌa̱n kokoòya ndaà‑la̱ xi̱ta̱ xi kjꞌei̱í xi jye tsakóya ítjòn‑la̱ i̱tꞌaà tsꞌe̱ Cristo.
\v 21 Koni sꞌín tjítꞌaà Xo̱jo̱n‑la̱ Nainá nga tsò:
\q Skoe̱‑né jñà xi̱ta̱ xi mì yá tsibéno̱jmí‑la̱ i̱tꞌaà tsꞌe̱;
\q ko̱chi̱yaá‑la̱ jñà xi̱ta̱ xi kjꞌeè mé ꞌén ꞌnchré xi i̱tꞌaà tsꞌe̱.
\s Kósꞌín tísíkítsjeèn Pablo nga mejèn‑la̱ kjoi̱ Roma
\p
\v 22 Kò kjìn kꞌa mejèn‑na fìkon‑nò ta̱nga jñà xá xi ꞌa̱n tìsꞌiaàn i̱ i̱ꞌnde jé mìkiì tjòꞌnde‑na nga ma fia.
\v 23 Ta̱nga i̱ꞌndei̱ nga jye jyehetꞌaà xá‑na̱ i̱jndé, ko̱ ti̱koa̱ kò kjìn nó tjín‑la̱ nga mejèn fìkon‑nò,
\v 24 kꞌoa̱á sꞌín tìsìkítsjeèn, kꞌe̱ nga kjián ján España, kꞌe̱é kichjàjto‑nò mé‑ne nga skoe̱xkon‑nò. Kꞌe̱ nga jye chibá jngoò tjoà ko̱ma ki̱nchako̱‑ná nga ko̱ma kjián ñánda nga tìfia.
\v 25 Ta̱nga i̱ꞌndei̱ ján Jerusalén tìfia, nga tìfiko̱ jngoò‑la̱ ngaꞌñó jñà xi̱ta̱‑la̱ Cristo xi ya̱ títsa̱jna.
\v 26 Nga jñà xi̱ta̱ na̱xa̱ndá‑la̱ Nainá xi títsa̱jna Macedonia ko̱ Acaya kjòtsja tsꞌe̱‑né nga tsibíxkó chiba to̱n koni jngoò ngaꞌñó xi kjo̱tjò tsꞌe̱ xi̱ta̱ i̱ma̱ na̱xa̱ndá‑la̱ Cristo xi títsa̱jna ján Jerusalén.
\v 27 Nguì kjo̱tsja tsꞌe̱‑né koni sꞌín kisꞌiìn jñà xi̱ta̱ koi. Nga tje̱n‑tꞌin‑la̱ kjo̱ndaà. Tsà jñà xi̱ta̱ xi mìtsà xi̱ta̱ judío kꞌoa̱á sꞌín kisakò‑la̱ kjo̱ndaà ya̱ i̱jiìn ini̱ma̱‑la̱ i̱tꞌaà tsꞌe̱ xi nguì xi̱ta̱ judío, ti̱koa̱á tjínè‑la̱ jñà xi mìtsà xi̱ta̱ judío nga ki̱nchako̱ nga tsjá‑la̱ tsojmì xi mochjeén‑la̱.
\v 28 Kꞌe̱ nga jye kjoe̱hetꞌaà kjoa̱ koi nga jye sìnga̱tsja jè to̱n xi kjòxkó, i̱kjoàn skotsejèn jngoò tjò‑nò, kꞌe̱é kjián ján España.
\v 29 Be‑ná nga ꞌñó ndaà si̱ìchikon‑tꞌin‑ná Cristo kꞌe̱ nga kìjchokon‑nò.
\p
\v 30 Ta̱nga jñò ndí ꞌndsè, bìtsiꞌbà‑nò i̱tꞌaà tsꞌe̱ Na̱ꞌèn‑ná Jesucristo ko̱ i̱tꞌaà tsꞌe̱ kjoa̱tjòcha xi tsjá‑ná Ini̱ma̱ Tsjeè‑la̱ Nainá, ti̱nókjoa̱tꞌaà‑là Nainá xi i̱tꞌaà tsꞌa̱n,
\v 31 mé‑ne nga ko̱si̱ko̱‑na̱ Nainá i̱tꞌaà tsꞌe̱ xi̱ta̱ xi mìkiì mokjeiín‑la̱ xi títsa̱jna ján Judea, ko̱ mé‑ne nga jè to̱n xi tìfiko̱‑la̱ xi̱ta̱‑la̱ Cristo xi títsa̱jna ján Jerusalén ndaà kàtasasén‑la̱,
\v 32 mé‑ne nga, tsà kꞌoa̱sꞌín mejèn‑la̱ Nainá, nga ko̱ kjo̱tsja‑na̱ kìjchokon‑nò, ti̱koa̱ ko̱ma ndaà siìkjáya chiba na̱chrjein‑ko̱‑nò.
\v 33 Jè Nainá xi tsjá‑ná kjoa̱ꞌnchán kàtìjnako̱‑nò ngatsꞌioò. Kꞌoa̱sꞌín kàtama.
\c 16
\s Kósꞌín kisìhixatꞌaà Pablo ngatsꞌiì xi̱ta̱ na̱xa̱ndá‑la̱ Nainá xi títsa̱jna Roma
\p
\v 1 I̱tꞌaà tsa̱jòn sìnga̱tsja‑nò jè tichjaá Febe, jè xi síchjátꞌaà na̱xa̱ndá‑la̱ Cristo xi ya̱ tíjna Cencrea;
\v 2 ndaà chjoétjò xi̱ta̱ jè nga xinguia̱á ma nga ti̱koa̱á mokjeiín‑la̱ i̱tꞌaà tsꞌe̱ Na̱ꞌèn‑ná nga kꞌoa̱á sꞌín okꞌìn‑la̱ xi xi̱ta̱‑la̱ Cristo. Ti̱chjátꞌaà‑là ni̱ta̱ mé xi ko̱chjeén‑la̱ nga ꞌñó kjín xi̱ta̱ tsasìko̱, ti̱koa̱ ꞌa̱n kisìchjátꞌaà‑na.
\p
\v 3 Ti̱ixatꞌeì jè Priscila ko̱ Aquila, jñà xi̱ta̱ xi ta̱ña nìxákjoò‑je̱n i̱tꞌaà tsꞌe̱ Cristo Jesús.
\v 4 Jñà xi̱ta̱ koi kjo̱meè kinìkꞌen xi kjoa̱ tsꞌa̱n. Mìtsà tà ꞌa̱n xi tsjaà‑la̱ kjo̱ndaà ti̱koa̱ tsjá‑la̱ kjo̱ndaà ngatsꞌiì xi̱ta̱ na̱xa̱ndá‑la̱ Cristo xi mìtsà xi̱ta̱ judío.
\v 5 Ti̱koa̱ ti̱ixatꞌeì jñà xi̱ta̱ na̱xa̱ndá‑la̱ Cristo xi maxkóya ya̱ niꞌya‑la̱ Priscila ko̱ Aquila. Ti̱ixatꞌeì jè Epeneto xi ꞌñó matsjake̱ nga jè kòkjeiín ítjòn‑la̱ i̱tꞌaà tsꞌe̱ Cristo ya̱ i̱ꞌnde Acaya.
\v 6 Ti̱ixatꞌeì jè María, chjo̱ón xi ꞌñó ndaà kisìxá i̱tꞌaà tsa̱jòn.
\v 7 Ti̱ixatꞌeì jè Andrónico ko̱ Junias, xi xinguia̱á ma nga ta̱ña tsitsa̱jnaꞌya‑je̱n nda̱yá. Jñà xi̱ta̱ xi tsibíxáya‑la̱ Cristo ꞌñó matsjakeè xi̱ta̱ koi. Ko̱ ìsa̱ ítjòn kijtseèxkon ꞌén‑la̱ Cristo koni ꞌa̱n.
\p
\v 8 Ti̱ixatꞌeì jè Amplias, jè xi̱ta̱ xi ꞌa̱n ꞌñó matsjake̱ i̱tꞌaà tsꞌe̱ Na̱ꞌèn‑ná.
\v 9 Ti̱ixatꞌeì jè Urbano xi ta̱ña síxáko̱‑na̱ i̱tꞌaà tsꞌe̱ Cristo Jesús ko̱ jè Estaquis xi ꞌa̱n ꞌñó matsjake̱.
\v 10 Ti̱ixatꞌeì jè Apeles xi ndaà kixi̱ mokjeiín‑la̱ i̱tꞌaà tsꞌe̱ Cristo. Ti̱ixatꞌeì jñà xi̱ta̱ xíkjín xi ya̱ títsa̱jna niꞌya‑la̱ jè Aristóbulo.
\v 11 Ti̱ixatꞌeì jè Herodión xi xinguia̱á ma. Ti̱ixatꞌeì jñà xi̱ta̱ xíkjín xi ya̱ títsa̱jna niꞌya‑la̱ Narciso xi Na̱ꞌèn‑ná títsa̱jnako̱.
\v 12 Ti̱ixatꞌeì jè Trifena ko̱ Trifosa jñà íchjín xi ꞌñó síxá‑la̱ Na̱ꞌèn‑ná, ko̱ tichjaá Pérsida xi ꞌñó matsjachaá nga ti̱koa̱ ndaà síxá‑la̱ Nainá.
\v 13 Ti̱ixatꞌeì jè Rufo xi xó jaàjiìn‑ne Nainá. Ko̱ nea̱‑la̱ xi ꞌa̱n kꞌoa̱ ti̱sꞌín beètakoàn koni tsà nea̱‑na̱.
\v 14 Ti̱ixatꞌeì jè Asíncrito, jè Flegonte, jè Hermas, jè Patrobas, jè Hermes ko̱ xi̱ta̱ ꞌndseé xi ya̱ títsa̱jnako̱.
\v 15 Ti̱ixatꞌeì jè Filólogo, jè Julia, jè Nereo ko̱ ndichja, ko̱ Olimpas, ngatsꞌiì xi̱ta̱ xi mokjeiín‑la̱ i̱tꞌaà tsꞌe̱ Cristo xi ya̱ títsa̱jnako̱.
\p
\v 16 Jñò nga jngoò ìjngoò, kꞌe̱ nga si̱xatꞌaà xinguio̱o, nguì ko̱ó ini̱ma̱‑nò ti̱ixatꞌaà xinguio̱o nga ko̱ o̱kixi̱‑nò. Ngatsꞌiì xi̱ta̱ na̱xa̱ndá‑la̱ Cristo xi i̱ títsa̱jna síhixatꞌaà‑nò.
\p
\v 17 Ndí ꞌndsè kꞌoa̱á sꞌín bìtsiꞌbà‑nò nga chítsejèn‑là jñà xi̱ta̱ xi síjòya ko̱ xi síkitsꞌón‑jiìn koni sꞌín mokjeiín‑nò, jñà xi kondra̱ fꞌiì‑la̱ kjo̱hítsjeèn koni sꞌín kichìtaꞌyà jñò. Ti̱nchatꞌaàxìn‑là jñà xi̱ta̱ koi.
\v 18 Jñà xi̱ta̱ koi, mìtsà Na̱ꞌèn‑ná Jesucristo síxá‑la̱, tà yijo‑la̱á síxátjì. ꞌÉn sin ꞌén ndaà chja̱ nga kona̱cha̱n‑la̱ xi̱ta̱ xi mìkiì ndaà machi̱ya‑la̱.
\v 19 ꞌA̱n, matsjaá‑na i̱tꞌaà tsa̱jòn nga jye ndaà naꞌyà‑nò nga ndaà nìkitasòn. Ta̱nga ꞌa̱n mejèn‑na nga xi̱ta̱ chji̱ne̱e kàtama i̱tꞌaà tsꞌe̱ kjoa̱ xi ndaà tjín. Ko̱ jñà kjoa̱ xi chꞌo tjín, kjꞌeè kiì naꞌyà‑nò.
\v 20 Jè Nainá xi tsjá‑ná kjoa̱ꞌnchán, tà chibaá chija‑la̱ nga ya̱ si̱ìkíjnangui ndso̱koò jè xi̱ta̱ nei̱í mé‑ne nga ko̱ma ki̱nchanè. Kjo̱ndaà‑la̱ Na̱ꞌèn‑ná Jesucristo kàtìjnako̱‑nò.
\p
\v 21 Tísíhixatꞌaà‑nò jè Timoteo xi ta̱ña nìxákjoò‑je̱n, ko̱ Lucio, ko̱ Jasón ko̱ Sosípater jñà xi xi̱ta̱ xinguia̱a ma.
\p
\v 22 ꞌA̱n xi Tercio mì‑na̱, xi tìkjiì‑nò xo̱jo̱n jè, i̱tꞌaà tsꞌe̱ Na̱ꞌèn‑ná, sìhixatꞌaà‑nò.
\p
\v 23 Ti̱koa̱ tísíhixatꞌaà‑nò Gayo; ꞌa̱n i̱í tìjna̱a i̱ niꞌya‑la̱ nga ti̱koa̱ i̱í bixoña ngatsꞌiì xi̱ta̱ na̱xa̱ndá‑la̱ Cristo. Tísíhixatꞌaà‑nò Erasto xi̱ta̱ xi bítjò to̱n tsꞌe̱ niꞌya osen; ti̱koa̱á síhixatꞌaà‑nò jè ꞌndseé xi ꞌmì Cuarto.
\p
\v 24 Ngatsꞌioò, jè kàtìjnako̱‑nò kjo̱ndaà‑la̱ Jesucristo xi otíxoma‑ná.
\s ꞌÉn xi fehetꞌaà‑ne
\p
\v 25 Jeya kàtìjna jè Nainá xi tíjnako̱‑nò. Jè xi komà tsjá‑nò ngaꞌñó ti̱koa̱ komà kixi̱ si̱ìkítsa̱jna‑nò koni tsò ꞌén ndaà‑la̱ Nainá xi ꞌa̱n okoòya‑nò ko̱ jñà ꞌén xi nokjoàyajiìn‑nò i̱tꞌaà tsꞌe̱ Na̱ꞌèn‑ná Jesucristo. Nga jyeé tíꞌya‑la̱ kjoa̱ xi tjíꞌma‑la̱ Nainá skanda sa̱ kjòtseé;
\v 26 ta̱nga i̱ꞌndei̱ jye kiꞌya‑la̱ koni sꞌín tíchja̱ Xo̱jo̱n‑la̱ Nainá xi kiskiì jñà xi̱ta̱ xi kiìchja̱ ngajo‑la̱ Nainá kjòtseé. Kꞌoa̱á sꞌín tíchja̱ kjo̱tíxoma‑la̱ Nainá xi tíjna ni̱ta̱ mé na̱chrjein‑nè. Jè kjoa̱ꞌma‑la̱ Nainá, jye kisꞌeno̱jmí yije‑la̱ ngatsꞌiì xi̱ta̱ na̱xa̱ndá xi tjín nga tíjtsa i̱sòꞌnde mé‑ne nga kàtasíkitasòn‑ne koni sꞌín mokjeiín‑la̱.
\p
\v 27 Jè Nainá xi ta̱jngoò ma‑ne, xi tjín‑la̱ kjoa̱chji̱ne̱, kàtasꞌe‑la̱ kjoa̱ jeya i̱tꞌaà tsꞌe̱ Jesucristo ni̱ta̱ mé na̱chrjein‑ne. Kꞌoa̱sꞌín kàtama.