\id 1CO
\h 1 Corintios
\toc1 1 Corintios
\mt Xo̱jo̱n carta‑la̱ San Pablo xi kiskiì ítjòn‑la̱ xi̱ta̱ na̱xa̱ndá‑la̱ Cristo xi títsa̱jna Corinto
\c 1
\s Kó tsò Pablo nga síhixatꞌaà jñà xi̱ta̱ na̱xa̱ndá‑la̱ Cristo xi títsa̱jna Corinto
\p
\v 1 ꞌA̱n xi ꞌmì‑na Pablo, xi xó kꞌoa̱sꞌín kinokjoà‑na nga ꞌa̱n tsibíxáya‑na Cristo Jesús, nga kꞌoa̱sꞌín kjòmejèn‑la̱ Nainá. Titsa̱nìhixatꞌaà‑nòje̱n ko̱ Sóstenes xi ꞌndseé chibá i̱tꞌaà tsꞌe̱ Cristo.
\v 2 Tìkjiì‑nò xo̱jo̱n carta jè, jñò xi na̱xa̱ndá‑la̱ Cristo maà xi titsa̱jnaà ján Corinto, xi jye kisìtsjeè‑nò Nainá nga ya̱ titsa̱kjoòko̱o Cristo Jesús nga xó kꞌoa̱sꞌín jaàjiìn‑nò Nainá mé‑ne nga xi̱ta̱ tsjeè‑la̱ ko̱maà ko̱ ngatsꞌiì xi̱ta̱ xi xki̱ xi ján chja̱tꞌaà‑la̱ nga jeya síkíjna jè Na̱ꞌèn‑ná Jesucristo xi otíxoma‑ná, ti̱koa̱ jè otíxoma‑la̱ xi̱ta̱ koi. Xi Na̱ꞌèn‑ná ꞌmì‑lá, ti̱koa̱ Na̱ꞌèn‑ná tsò‑la̱ jñà xi̱ta̱ koi.
\v 3 Nainá xi Na̱ꞌèn‑ná, ko̱ jè Jesucristo xi otíxoma‑ná kàtatsjá‑nò kjo̱ndaà ko̱ kjoa̱ꞌnchán ya̱ i̱jiìn ini̱ma̱‑nò.
\s ꞌÉn xi kiìchja̱ Pablo nga tsjá‑la̱ kjo̱ndaà Nainá
\p
\v 4 Kjitꞌaà na̱chrjein tsjaà‑la̱ kjo̱ndaà Nainá xi i̱tꞌaà tsa̱jòn koií kjoa̱‑la̱ jñà kjo̱ndaà xi kitsjaà‑nò Nainá nga ndaà kisìchikon‑tꞌin‑nò i̱tꞌaà tsꞌe̱ Cristo Jesús.
\v 5 Nga̱ ya̱á i̱tꞌaà tsꞌe̱ Cristo, Nainá kisìchikon‑tꞌin yije kjo̱hítsjeèn‑la̱ ini̱ma̱‑nò, kósꞌín nokjoà, ko̱ kósꞌín machi̱ya‑nò ꞌén‑la̱ Nainá.
\v 6 Nga̱ kꞌoa̱á sꞌín ꞌya‑la̱, nga jè ꞌén ndaà‑la̱ Nainá xi kjoa̱ tsꞌe̱ Cristo kjòkixi̱yaá i̱jiìn ini̱ma̱‑nò.
\v 7 Ni̱mé kjo̱tjò‑la̱ Nainá chijatꞌaà‑nò kꞌe̱ nga tákó titsa̱chiñá‑là nga kjoi̱í ìjngoò kꞌa Jesucristo xi otíxoma‑ná.
\v 8 Nainá tsjá‑nò ngaꞌñó skanda kꞌe̱ nga kjoe̱hetꞌaà na̱chrjein, mé‑ne nga ni̱mé jé sa̱kòtꞌaà‑nò kꞌe̱ nga ki̱tjojen ìjngoò kꞌa Jesucristo xi otíxoma‑ná.
\v 9 Nainá xi̱ta̱ kixi̱‑né, síkitasòn‑né koni sꞌín tsjá ꞌén‑la̱. Xó kꞌoa̱á sꞌín kiìchja̱‑nò nga ya̱ chrañà ki̱tsa̱jnakjoòko̱o Jesucristo xi kiꞌndí‑la̱ tsò‑la̱ nga jè otíxoma‑ná.
\s Mé‑ne kjòjòya‑ne na̱xa̱ndá‑la̱ Cristo ján Corinto
\p
\v 10 Ndí ꞌndsè ko̱ tichjaá, i̱tꞌaà tsꞌe̱ o̱kixi̱ xi kitsjaà‑na Jesucristo xi otíxoma‑ná, tìbitsiꞌbà‑nò ngatsꞌioò, ngásòn ngáya titsa̱jnako̱o xinguio̱o, mé‑ne nga mì ko̱jòya‑ne kjo̱hítsjeèn‑nò. Ta̱jngoò kjo̱hítsjeèn ti̱kjeén, ngásòn jchósòn‑là ni̱ta̱ mé kjoa̱‑ne.
\v 11 Koií ko̱xan‑nò ndí ꞌndsè, nga jñà xi̱ta̱ niꞌya‑la̱ Cloé, tsibéno̱jmí‑na̱ nga kjoa̱siì tjín‑nò.
\v 12 Koií kꞌoa̱sꞌín tìxan‑nò, tjín iꞌnga xi̱ta̱ xinguia̱á xi tsò: “ꞌA̱n, jé Pablo fìtꞌaà‑la̱.” Tjín xi tsò: “ꞌA̱n, jè Apolos fìtꞌaà‑la̱.” Tjín xi tsò: “ꞌA̱n, jè Cefas [xi ti̱koa̱ Pedro ꞌmì] fìtꞌaà‑la̱.” Tjín xi tsò: “ꞌA̱n, jè Cristo fìtꞌaà‑la̱.” ¿Mé‑ne o̱bixón‑nò?
\v 13 ¿A kjìn ya ma‑ne Cristo? ¡Majìn! ¿A jè Pablo xi kisitꞌaà krò i̱tꞌaà tsa̱jòn? ¡Majìn! ¿A i̱tꞌaà tsꞌe̱é Pablo komà bautizar? ¡Majìn!
\v 14 Ndaà chjí‑la̱ Nainá, ꞌa̱n, mìtsà yá xi̱ta̱ kisꞌiaàn bautizar ya̱ na̱xa̱ndá tsa̱jòn, ta jè Crispo ko̱ Gayo,
\v 15 mé‑ne nga mì yá xi̱ta̱ ki̱tso̱‑ne: “I̱tꞌaà tsꞌe̱é Pablo komà bautizar.”
\v 16 Sa̱á tíbítsjeèn‑na nga ti̱koa̱ kisꞌiaàn bautizar Estéfanas ko̱ xi̱ta̱ xíkjín, ta̱nga mìkiì bítsjeèn‑na̱ tsà kisꞌiaàn bautizar xi kjꞌei̱í xi̱ta̱.
\v 17 Jè Cristo mìtsà koi xá kisìkasén‑na nga xi̱ta̱ sꞌiaàn bautizar; koií xá kisìkasén‑na nga ꞌa̱n kichjàya ꞌén ndaà‑la̱ Nainá. Kꞌe̱ nga chjàya, mìtsà ꞌén‑la̱ xi̱ta̱ chji̱ne̱ sìkjeén; majìn‑na nga chi̱ja ngaꞌñó‑la̱ krò‑la̱ Cristo.
\s Jè Cristo, ngaꞌñó‑la̱ Nainá‑né ko̱ kjoa̱chji̱ne̱‑la̱ Nainá‑né
\p
\v 18 Jñà ꞌén xi tínokjoáya i̱tꞌaà tsꞌe̱ Cristo nga kꞌen‑tꞌaà krò, ta kjoa̱ ská ma‑la̱ jñà xi̱ta̱ xi ya̱ tjímaya ndi̱yá‑la̱ i̱ꞌnde kjo̱ꞌin. Ta̱nga jñá xi jye titsa̱bitjokàjñaá kjo̱ꞌin, kꞌoa̱á sꞌín mokjeiín‑ná nga jè ꞌén‑la̱ Cristo ngaꞌñó‑la̱ Nainá‑né.
\v 19 Kꞌoa̱á sꞌín tíchja̱ Xo̱jo̱n‑la̱ Nainá nga tsò:
\q Jñà xi̱ta̱ xi ꞌñó tjín‑la̱ kjoa̱ chji̱ne̱,
\q ꞌa̱án kokoò‑la̱ nga ni̱mé chjí‑la̱ kjoa̱chji̱ne̱‑la̱.
\q ꞌA̱án kochrjeènguia kjo̱hítsjeèn‑la̱
\q jñà xi̱ta̱ xi ꞌñó machi̱ya‑la̱.
\p
\v 20 Jñà xi̱ta̱ xi ꞌñó tjín‑la̱ kjoa̱chji̱ne̱, ko̱ xi ꞌñó chji̱ne̱ xo̱jo̱n ko̱ xi joóya‑ne kjoa̱ xi tjín i̱sòꞌnde, i̱ꞌndei̱, ¿ñánda títsa̱jnako̱ kjoa̱chji̱ne̱‑la̱? Jè Nainá, kisìskáya‑la̱ kjoa̱chji̱ne̱ xi tjín‑la̱ xi̱ta̱ i̱sòꞌnde.
\v 21 Nainá ꞌñó xi̱ta̱ chji̱ne̱, mìkiì kitsjaàꞌnde‑la̱ xi̱ta̱ nga i̱tꞌaà tsꞌe̱ kjoa̱chji̱ne̱‑la̱ i̱sòꞌnde kijtseèxkon. Nainá kꞌoa̱á sꞌín sasén‑la̱ nga ochrjekàjiìn kjo̱ꞌin jñà xi mokjeiín‑la̱ i̱tꞌaà tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo, ꞌén xi tsò‑la̱ xi̱ta̱ koi, kjoa̱ ská‑né.
\p
\v 22 Jñà xi̱ta̱ judío [mìkiì mokjeiín‑la̱] nga jé xi mejèn‑la̱ nga skoe̱ kjo̱xkón xi ꞌñó jeya tjín, ko̱ jñà xi mìtsà xi̱ta̱ judío [ti̱koa̱á mìkiì mokjeiín‑la̱] nga koií ótsji xi ꞌñó kjoa̱ chji̱ne̱.
\v 23 Ta̱nga ngaje̱n kꞌoa̱á sꞌín nokjoàya‑je̱n nga krò kꞌen‑tꞌaà Cristo [xi̱ta̱ xi xó kisìkasén‑ne Nainá]. Jñà xi̱ta̱ judío mìkiì mokjeiín‑la̱ kjoa̱ xi komàtꞌin Cristo, ko̱ jñà xi mì xi̱ta̱ judío, kjoa̱ ská ma‑la̱.
\v 24 Ta̱nga jñà xi̱ta̱ xi xó jaàjiìn‑ne Nainá, xi xi̱ta̱ judío ko̱ xi mìtsà xi̱ta̱ judío, kꞌoa̱á sꞌín mokjeiín‑la̱ nga jè Cristo ngaꞌñó‑la̱ Nainá‑né ko̱ kjoa̱ chji̱ne̱‑la̱ Nainá‑né.
\v 25 Kjoa̱‑la̱ Nainá xi ta kjoa̱ ská tsò‑la̱ xi̱ta̱ i̱sòꞌnde, kjoa̱ chji̱ne̱‑la̱ Nainá‑né. Ìsa̱á tse kjoa̱chji̱ne̱ tjín‑la̱ mì kꞌoa̱á‑ne koni kjoa̱chji̱ne̱ xi tjín‑la̱ xi̱ta̱ i̱sòꞌnde. Ko̱ jè kjoa̱‑la̱ Nainá xi ta kjoa̱ indaà tsò‑la̱ xi̱ta̱ i̱sòꞌnde, ngaꞌñó‑la̱ Nainá‑né. Ìsa̱á tse ngaꞌñó tjín‑la̱ mì kꞌoa̱‑ne koni ngaꞌñó xi tjín‑la̱ xi̱ta̱ i̱sòꞌnde.
\p
\v 26 Jñò ndí ꞌndsè ko̱ ndí tichjaá, ti̱kítsjeèn kꞌe̱ nga sa̱ jaàjiìn‑nò Nainá, chibaá ma‑nò xi xi̱ta̱ chji̱ne̱ tsò‑nò xi̱ta̱ i̱sòꞌnde, ko̱ chibaá ma‑nò xi xi̱ta̱ ítjòn titsa̱jnaà, ti̱koa̱ chibaá ma‑nò xi ya̱ niꞌya‑la̱ xi̱ta̱ sko̱‑la̱ kitsꞌiòn.
\v 27 Ta̱nga Nainá jaàjiìn jñà xi̱ta̱ xi tsò‑la̱ xi̱ta̱ i̱sòꞌnde nga chiba kjo̱hítsjeèn tjín‑la̱ mé‑ne ko̱sobà‑la̱ jñà xi̱ta̱ chji̱ne̱. Ti̱koa̱ jaàjiìn Nainá xi tsò‑la̱ xi̱ta̱ i̱sòꞌnde nga ni̱mé chjí‑la̱ mé‑ne ko̱sobà‑la̱ jñà xi̱ta̱ xi xi̱ta̱ ítjòn títsa̱jna.
\v 28 Nainá jaàjiìn xi̱ta̱ i̱ma̱ ko̱ xi̱ta̱ xi bitjongui xi tsò‑la̱ xi̱ta̱ i̱sòꞌnde nga nìmé chjí‑la̱, mé‑ne ki̱tjongui‑ne jñà xi̱ta̱ xi tsò nga jñà títsa̱jna ítjòn,
\v 29 mé‑ne ni̱jngoò xi̱ta̱ xi ꞌnga si̱ìkíjna‑ne yijo‑la̱ nga nguixko̱n Nainá.
\v 30 Ta̱nga ti̱jè‑ne Nainá kisìkítsa̱jnako̱‑ná Cristo Jesús. Kꞌoa̱á ti̱sꞌín kisꞌiìn nga i̱tꞌaà tsꞌe̱ Cristo sakó‑ná jè kjoa̱chji̱ne̱, nga jè Cristo, xi̱ta̱ kixi̱ sꞌín‑ná, xi̱ta̱ tsjeè sꞌín‑ná ko̱ síkítsa̱jnandei̱í‑ná kjoa̱ tsꞌe̱ jé‑ná.
\v 31 Koni sꞌín tíchja̱ Xo̱jo̱n‑la̱ Nainá nga tsò: “Jè xi jeya síkíjna yijo‑la̱, ta sa̱á Nainá jeya kàtasíkíjna.”
\c 2
\p
\v 1 Ndí ꞌndsè ko̱ tichjaá, kꞌe̱ nga kiìkon‑nò nga tsibeno̱jmí‑nò ꞌén‑la̱ Nainá, mìtsà koi ꞌén kichjà‑nò xi maxkón‑la̱ xi̱ta̱ kꞌe̱ nga ꞌnchré ko̱ xi tsò‑la̱ nga ꞌén‑la̱ xi̱ta̱ chji̱ne̱.
\v 2 Kꞌe̱ nga tsohóti̱jnako̱‑nò, kꞌoa̱á sꞌín kiskoòsòn‑la̱; mìtsà mé kjoa̱ xi kjꞌei̱í kisìkítsjeèn; nguì tà ꞌén‑la̱ Jesucristo tsibeno̱jmí‑nò, nga jè‑né xi krò kꞌen‑tꞌaà.
\v 3 Kꞌe̱ nga ijchò kèno̱jmí‑nò ꞌén‑la̱ Nainá, indaàkjoa̱á ijchoa. Titsakjoòn‑ná skanda tíhotsé‑ná.
\v 4 Kꞌe̱ nga kichjàyajiìn‑nò mìtsà ꞌén‑la̱ xi̱ta̱ chji̱ne̱ kisìkjeén mé‑ne nga ko̱kjeiín‑nò. Ta sa̱á jè Ini̱ma̱ Tsjeè‑la̱ Nainá tsakó ngaꞌñó‑la̱ nga kòkjeiín‑nò.
\v 5 Mé‑ne jè kjoa̱ xi mokjeiín‑nò i̱tꞌaà tsꞌe̱ Cristo, mìtsà ya̱ nchrobá‑ne kjoa̱ chji̱ne̱‑la̱ xi̱ta̱, ya̱á nchrobá‑ne ngaꞌñó‑la̱ Nainá.
\s Xi nguì kjoa̱ chji̱ne̱, i̱tꞌaà tsꞌe̱é Nainá nchrobá‑ne
\p
\v 6 Kixi̱í kjoa̱ ꞌén chji̱ne̱é nokjoàya‑la̱je̱n jñà xi̱ta̱ xi jye tímajchínga nga mokjeiín‑la̱ i̱tꞌaà tsꞌe̱ Cristo. Ta̱nga mìtsà kjoa̱ chji̱ne̱ tsꞌe̱ i̱sòꞌnde nokjoàya‑je̱n, ni̱ mìtsà tsꞌe̱ xi̱ta̱ ítjòn xi tjín i̱sòꞌnde xi jye tíchija ngaꞌñó‑la̱.
\v 7 ꞌÉn xi nokjoàya‑je̱n, kjoa̱ chji̱ne̱ tsꞌe̱ Nainá‑né, jè kjoa̱chji̱ne̱ xi tjíꞌma‑la̱ xi kꞌoa̱sꞌín kiskoòsòn‑la̱ skanda ti̱sa̱ kjòtseé nga jñá jeya ki̱tsa̱jnaá.
\v 8 Ni̱jngoò xi̱ta̱ ítjòn xi tjín i̱sòꞌnde kjòchi̱ya‑la̱ i̱tꞌaà tsꞌe̱ kjoa̱ chji̱ne̱ koi. Tsà kjòchi̱ya‑la̱, mì‑là kiì kꞌoa̱sꞌín krò kisìkꞌen‑tꞌaà Na̱ꞌèn‑ná Jesucristo xi tjín‑la̱ kjoa̱ jeya.
\v 9 Xo̱jo̱n‑la̱ Nainá, kꞌoa̱á sꞌín tíchja̱ nga tsò:
\q Jñà xi̱ta̱ xi matsjakeè Nainá,
\q jè tjíndaà‑la̱ kjoa̱ xi ni̱ sa̱á jngoò xi̱ta̱ xi xko̱n beè‑ne,
\q xi líká‑la̱ ꞌnchré‑ne
\q xi ko̱ ini̱ma̱‑la̱ machi̱ya‑la̱.
\m
\v 10 Nainá, i̱tꞌaà tsꞌe̱ Ini̱ma̱ Tsjeè‑la̱ tsakó‑naje̱n kjoa̱ koi. Nga̱ jè Ini̱ma̱ Tsjeè‑la̱ Nainá ótsjiya yije‑né skanda jñà kjoa̱ xi mìkiì ndaà fìya‑ná i̱tꞌaà tsꞌe̱ Nainá.
\p
\v 11 ¿Yá xi̱ta̱‑ne xi machi̱ya‑la̱ kó tsò kjo̱hítsjeèn xi tíjiìn ini̱ma̱‑la̱ xi̱ta̱ xi kjꞌei̱í? Tà jè tíjiìn ini̱ma̱‑la̱ kó tsò kjo̱hítsjeèn‑la̱. Kꞌoa̱á ti̱sꞌín tjín kjoa̱ tsꞌe̱ Nainá, ni̱jngoò xi̱ta̱ tíjiìn‑la̱ kó tsò kjo̱hítsjeèn‑la̱ Nainá; ta̱ jè Ini̱ma̱ Tsjeè‑la̱ tíjiìn‑la̱.
\v 12 Ngaje̱n, mìtsà jè ini̱ma̱‑la̱ xi̱ta̱ i̱sòꞌnde kitjoé‑naje̱n. Jè Ini̱ma̱ Tsjeè‑la̱ Nainá kitjoé‑naje̱n, mé‑ne nga jcha̱‑naje̱n kjoa̱ xi Nainá kitsjaà kjo̱tjò‑ná.
\v 13 ꞌÉn koi, kꞌoa̱á sꞌín nokjoà‑je̱n koni sꞌín okóya‑naje̱n Ini̱ma̱ Tsjeè‑la̱ Nainá. Mìtsà kjo̱hítsjeèn tsꞌe̱ xi̱ta̱ i̱sòꞌnde. ꞌÉn Tsjeè‑la̱ Nainá bèno̱jmí‑je̱n xi kjoa̱ tsꞌe̱ Ini̱ma̱ Tsjeè‑la̱.
\p
\v 14 Jè xi mìtsà xi̱ta̱‑la̱ Cristo, mìkiì machi̱ya‑la̱ ꞌén xi tsꞌe̱ Ini̱ma̱ Tsjeè‑la̱ Nainá. Tà kjoa̱ ská ma‑la̱. Mìkiì fahasꞌen‑jiìn‑la̱, nga mochjeén‑né nga i̱tꞌaà tsꞌe̱ Ini̱ma̱ Tsjeè‑la̱ Nainá ki̱nchátsjiyaá.
\v 15 Ta̱nga jè xi̱ta̱ xi Ini̱ma̱ Tsjeè‑la̱ Nainá tíjnajiìn ini̱ma̱‑la̱, maá‑la̱ ótsjiya yije ni̱ta̱ mé kjoa̱‑ne. Ta̱nga i̱tꞌaà tsꞌe̱ xi̱ta̱ jè, mì yá xi̱ta̱ xi ko̱ma‑la̱ ko̱hótsjiya kjo̱hítsjeèn‑la̱.
\v 16 Kꞌoa̱á sꞌín tíchja̱ Xo̱jo̱n‑la̱ Nainá nga tsò: “¿Yá‑né xi beè kjo̱hítsjeèn‑la̱ Nainá? ¿Yá‑né xi ko̱ma ko̱kòya‑la̱?” Ta̱nga jñá tjín‑ná kjo̱hítsjeèn xi tsꞌe̱ Cristo.
\c 3
\s Jñà xi̱ta̱ xi síxá i̱tꞌaà tsꞌe̱ Nainá ján Corinto
\p
\v 1 Jñò ndí ꞌndsè ko̱ tichjaá, mìkiì komà ko̱sꞌín kichjàko̱‑nò koni xi̱ta̱ xi ndaà tíjiìn ini̱ma̱‑la̱ Ini̱ma̱ Tsjeè‑la̱ Nainá. Ta kꞌoa̱á sꞌín kichjàko̱‑nò koni tsà ta̱xki̱ xi̱ta̱ i̱sòꞌnde xi tà kjoa̱ tsꞌe̱ yijo‑la̱ ótsji, koni tsà tákó ndí i̱xti xó xi i̱tꞌaà tsꞌe̱ Cristo.
\v 2 Mìtsà ꞌin tjín ꞌén xi tsakoòya‑nò; kꞌoa̱sꞌín ngaya‑la̱ koni ndí i̱xti xó xi sa̱ nchihoki, tà tsjín ꞌbiì, mìtsà tsojmì tájaà kine. Jñò, kjꞌeè kiì ndaà fahasꞌen‑jiìn‑nò ꞌén‑la̱ Nainá, kꞌoa̱á ngaya‑la̱ koni tsojmì tájaà xi kjꞌeè kiì ma chine skanda na̱chrjein i̱ꞌndei̱.
\v 3 Tákó kꞌoa̱á sꞌín ꞌnè koni sꞌín xi̱ta̱ xi kjoa̱ tsꞌe̱ yijo‑la̱ ótsji. Machi̱ni̱cha‑nò xinguio̱o, chitiya‑nò ni̱ta̱ mé kjoa̱‑ne. Kjoa̱ koi, kjoa̱ tsꞌe̱ xi̱ta̱ i̱sòꞌnde‑né.
\v 4 Kꞌe̱ nga bixón: “ꞌA̱n, xi̱ta̱ tsꞌe̱ Pablo‑ná”, ko̱ jè xi ìjngoò tsò: “ꞌA̱n, xi̱ta̱ tsꞌe̱ Apolos‑ná”, jñò, kꞌoa̱á sꞌín nokjoà koni chja̱ xi ta̱xki̱ xi̱ta̱ i̱sòꞌnde.
\p
\v 5 ꞌA̱n xi Pablo ꞌmì‑na, ko̱ Apolos, tà xi̱ta̱ chi̱ꞌnda‑náje̱n xi nìxá‑la̱je̱n Nainá. I̱tꞌaà tsa̱je̱én kòkjeiín‑nò ꞌén‑la̱ Nainá, nga ìjngoò ìjngoò‑je̱n kiꞌnè‑je̱n xá xi Na̱ꞌèn‑ná kisìnga̱tsja‑naje̱n.
\v 6 ꞌA̱án tsakoòya‑nò ꞌén‑la̱ Nainá, kꞌoa̱á ngaya‑la̱ koni jngoò xi̱ta̱ xi bítje̱ xojmá, jè Apolos kiskinìndá‑la̱, ta̱nga jè Nainá tísíjchá.
\v 7 Mìtsà jè xi̱ta̱ xi bítje̱ tsojmì, ni̱ mìtsà jè xi kinìndá‑la̱ xi chjí‑la̱, ta̱ jngoò jè Nainá xi síjchá tsojmì xi sitje̱ xi ꞌñó chjí‑la̱.
\v 8 Jè xi bítje̱ ko̱ xi kinìndá‑la̱, ta jngoò xá tjín‑ne xi sꞌín. Ta̱nga jè Nainá tsjá‑la̱ chjí‑la̱ koni tjín xá xi kisꞌiìn nga jngoò ìjngoò.
\v 9 Ngaje̱n, ya̱á ta̱ña nìxákjoò‑je̱n xá‑la̱ Nainá. Koa̱ jñò‑nò i̱ꞌnde ñánda sitje̱ ꞌén‑la̱ Nainá. Ti̱koa̱á jñò‑nò niꞌya‑la̱ Nainá xi ngaje̱n bíndaà‑je̱n.
\v 10 Koni sꞌín tjín kjo̱ndaà‑la̱ Nainá xi kitjoé‑na, ꞌa̱n‑ná xi chji̱ne̱ chrjó ítjòn, xi tsibijnà tàtsꞌen chrjó‑la̱ niꞌya. Kjꞌei̱í xi̱ta̱á bíndaàsòn niꞌya. Ta̱nga jñà xi bíndaàsòn, ndaà kàtasíkinda̱ nga jngoò ìjngoò kósꞌín ki̱ìndaà.
\v 11 Mì ti̱ yá xi ko̱ma‑la̱ ki̱ìjna ìjngoò‑ìsa tàtsꞌen chrjó niꞌya koni jè xi jye tíjna, nga jè Jesucristo tíjna koni tàtsꞌen chrjó niꞌya.
\v 12 Tàtsꞌen chrjó niꞌya, ko̱maá sindaàsòn‑ne ki̱cha̱ oro, plata, nda̱jo̱ chjí xi ꞌñó ndaà kjoàn, na̱sꞌín yá, na̱sꞌín xka̱ paja, o xka̱ ndi̱ji.
\v 13 Ta̱nga jñà xá xi sꞌín nga jngoò ìjngoò xi̱ta̱, kꞌe̱é jcha̱‑la̱ jè na̱chrjein kꞌe̱ nga si̱ndaàjiìn‑la̱ xi̱ta̱. Na̱chrjein jè, niꞌín kjoi̱íko̱, koa̱ jè niꞌín skótꞌaà nga jngoò ìjngoò ska̱ya xá xi komà.
\v 14 Tsà jngoò xá ki̱chìkjoa̱ko̱‑la̱ niꞌín xi skótꞌaà, tjoé‑la̱ chjí‑la̱ jè xi̱ta̱ xi ki̱ìndaàsòn.
\v 15 Ta̱nga tsà jè xá xi kisindaàsòn, tsà ki̱ti̱, chijaá chjí‑la̱. Ta̱nga jè xi̱ta̱ ki̱tjokàjiín kjo̱ꞌin koni jngoò xi̱ta̱ xi bitjokàjiìn niꞌín.
\p
\v 16 Jñò, ¿a mìtsà tíjiìn‑nò nga niꞌya i̱ngo̱ tsjeè‑la̱ Nainá ꞌmì‑nò? Nga jè Ini̱ma̱ Tsjeè‑la̱ Nainá tíjnajiìn‑nò.
\v 17 Tsà yá xi̱ta̱ xi mejèn‑la̱ si̱ìkitsꞌón‑jiìn‑la̱ niꞌya tsjeè‑la̱ Nainá, Nainá ti̱koa̱á si̱ìkitsꞌón‑jiìn‑la̱ jè xi̱ta̱ xi kꞌoa̱sꞌín sꞌi̱in. Nga jè niꞌya‑la̱ Nainá, tsjeè‑né. Koa̱ jñò‑nò xi niꞌya tsjeè‑la̱ Nainá ꞌmì‑nò.
\p
\v 18 Kì yijo‑nò chona̱cha̱n‑là, tsà yá xi kꞌoa̱sꞌín síkítsjeèn nga ꞌñó tjín‑la̱ kjo̱hítsjeèn xi tsꞌe̱ kjoa̱ chji̱ne̱‑la̱ i̱sòꞌnde, ta sa̱á ko̱sꞌín kàtasꞌín koni tsà tsjìn‑la̱ kjo̱hítsjeèn, mé‑ne nga nguì xi̱ta̱ chji̱ne̱ ko̱ma‑ne.
\v 19 Jè kjoa̱ chji̱ne̱‑la̱ xi̱ta̱ i̱sòꞌnde, i̱tꞌaà tsꞌe̱ Nainá, kjoa̱ ská tsò‑la̱. Xo̱jo̱n‑la̱ Nainá, kꞌoa̱á sꞌín tíchja̱ nga tsò: “Nainá, kꞌoa̱á sꞌín sꞌín nga jñà xi̱ta̱ chji̱ne̱, ti̱jñà‑ne kjoa̱ maña̱‑la̱ ki̱xo̱jiìn‑ne.”
\v 20 Jè Xo̱jo̱n‑la̱ Nainá, ìjngoò kꞌa tjítꞌaà ñánda tsò: “Nainá, beè‑né nga ni̱mé chjí‑la̱ kjo̱hítsjeèn‑la̱ xi̱ta̱ xi chji̱ne̱ tsò‑la̱ yijo‑la̱.”
\v 21 Kꞌoa̱á ma‑ne, jñò, kì ni̱jngoò xi̱ta̱ xi ꞌnga nìkíjna. Nga̱ ngatsꞌiì xi tjín, kjo̱ndaà tsa̱jòn yije‑nò.
\v 22 Tsà jè Pablo, tsà jè Apolos, tsà jè Cefas [xi ti̱koa̱ Pedro ꞌmì], tsà jè i̱sòꞌnde, tsà jè kjoa̱binachon, tsà jè kjoa̱ biyaà, tsà jè na̱chrjein i̱ꞌndei̱, tsà jè na̱chrjein xi sa̱ nchrobá, kjo̱ndaà tsa̱jòn yije‑nò.
\v 23 Jñò, tsꞌe̱ Cristo‑nò, koa̱ jè Cristo tsꞌe̱é Nainá.
\c 4
\s Xá‑la̱ xi̱ta̱ xi tsibíxáya‑la̱ Jesús
\p
\v 1 Kꞌoa̱á sꞌín jcha̱takòn‑náje̱n koni xi̱ta̱ chi̱ꞌnda xi síxá‑la̱ Cristo, nga ngaje̱n kjònga̱tsja‑je̱n nga ko̱kóya‑je̱n kjoa̱ tjíꞌma‑la̱ Nainá.
\v 2 Jngoò xi̱ta̱ xi xá manga̱tsja, mochjeén‑né nga kàtaꞌya‑la̱ nga kixi̱ síkitasòn xá‑la̱.
\v 3 ꞌA̱n, mìkiì sìkájnoa xi i̱tꞌaà tsa̱jòn kó tsò kjo̱hítsjeèn‑nò, a ndaá tìsìkitasoàn, a xi chꞌoó tìsìkitasoàn xá xi ꞌa̱n kjònga̱tsja, ko̱ kó sꞌín síkítsjeèn jñà xi̱ta̱xá xi bíndaàjiìn‑la̱ xi̱ta̱ i̱sòꞌnde. Skanda ꞌa̱n, mì ti̱ kiì xan‑na tsà ndaà tjín ko̱ tsà chꞌoó tjín xá xi tìsꞌiaàn.
\v 4 ꞌA̱n, na̱sꞌín kꞌoa̱sꞌín sìkítsjeèn nga tsjìn‑na jé, ta̱nga mìtsà tsò‑ne kjoa̱ nga nguì xi̱ta̱ kixi̱‑ná. Nga̱ jè Na̱ꞌèn‑ná xi bíndaàjiìn‑na.
\v 5 Kꞌoa̱á ma‑ne kì tà chjà jé bìnè‑là xinguio̱o nga ti kjꞌeè bijchó na̱chrjein. Chíña‑kjoa̱a kꞌe̱ nga kjoi̱í Na̱ꞌèn‑ná xi síhiseèn nga jcha̱‑la̱ kjoa̱ xi tjíꞌma ñánda nga jñò choòn. Koa̱ si̱ìkatsejèn kó tsò kjo̱hítsjeèn xi tjíjiìn ini̱ma̱‑la̱ xi̱ta̱. I̱kjoàn Nainá jeya si̱ìkíjna koni sꞌín nga okꞌìn‑la̱ nga jngoò ìjngoò xi̱ta̱.
\p
\v 6 Ndí ꞌndsè ko̱ tichjaá, koi ꞌén tìchjàko̱‑nò kjoa̱ xi mangásòn i̱tꞌaà tsꞌa̱n ko̱ i̱tꞌaà tsꞌe̱ Apolos xi kjo̱ndaà tsa̱jòn mé‑ne nga mìkiì si̱katonè‑là koni tsò ꞌén‑la̱ Nainá. Kì kꞌoa̱á sꞌín nìkítsjeèn nga jngoò chi̱ꞌnda‑la̱ Nainá ìsa̱ ndaà nachrjenguioò koni chi̱ꞌnda xi iꞌnga.
\v 7 Jñò, ¿mé‑ne koa̱ bixón‑nò nga ìsa̱ ꞌñó chjí‑nò koni xi̱ta̱ xi iꞌnga? ¿Mé kjo̱ndaà xi tjín‑nò xi mìtsà Nainá kitsjaà‑nò? Tsà jye kitjoé‑nò ngatsꞌiì kjo̱ndaà, ¿mé‑ne nga ꞌnga ma‑ne takòn koni tsà ta ngaꞌñó tsa̱jòn kisakò‑nò?
\p
\v 8 Jñò, kꞌoa̱á sꞌín machi̱ya‑nò koni tsà jyeé ma yije‑nò, koni tsà ꞌñó xi̱ta̱ nchi̱ná i̱tꞌaà tsꞌe̱ Nainá. Kꞌoa̱á sꞌín nìkítsjeèn koni tsà xi̱ta̱xá ítjòn titsa̱jnaà ko̱ ngaje̱n mìtsà xi̱ta̱xá titsa̱jna‑je̱n. Ndaà‑la̱ tjín tsà kixi̱ kjoa̱ nga otìxoma, mé‑ne ngaje̱n ko̱ma kotìxomako̱‑nòje̱n.
\v 9 ꞌA̱n, kꞌoa̱á sꞌín sìkítsjeèn, ngaje̱n xi i̱tꞌaà tsꞌe̱ Cristo kisìxáya‑naje̱n, Nainá kꞌoa̱á sꞌín kiskoòsòn‑la̱ nga ngaje̱n‑náje̱n xi fehetꞌaà‑ne, xi tjínè‑naje̱n nga ki̱yá‑je̱n nga nguixko̱n i̱sòꞌnde, nga nguixko̱n xi̱ta̱ ko̱ àkja̱le̱. Jñà xi̱ta̱, tà nchikotsejèn‑naje̱n nga tsja ma‑la̱ mé kjo̱ꞌin xi tímatꞌin‑je̱n.
\v 10 Ngaje̱n, xi kjoa̱ tsꞌe̱ Cristo, xi̱ta̱ ská ꞌyatakòn‑naje̱n; ta̱nga jñò, i̱tꞌaà tsꞌe̱ Cristo, kꞌoa̱á sꞌín ꞌya‑nò nga ꞌñó tjín‑nò kjoa̱chji̱ne̱. Ngaje̱n, kꞌoa̱á sꞌín ꞌyatakòn‑naje̱n nga xi̱ta̱ indaàkjoa̱‑náje̱n; ta̱nga jñò, xi̱ta̱ tájaà‑nò. Ngaje̱n, mì yá xi̱ta̱ beèxkón‑naje̱n; jñò, beèxkón‑nò xi̱ta̱.
\v 11 Skanda jè hora jè, kjinchrá‑naje̱n, xíndá‑naje̱n, tsjìn‑naje̱n nikje xi chíkjá‑je̱n, ꞌñó beètoòn‑naje̱n xi̱ta̱, tà tjaàsòn‑naje̱n, tsjìn‑naje̱n niꞌya.
\v 12 Skanda bijtaá‑naje̱n nga ꞌñó nìxá‑je̱n. Kꞌe̱ nga chja̱ꞌon‑ko̱‑náje̱n xi̱ta̱, ngaje̱n, nìjétꞌaà‑la̱je̱n Nainá nga kàtasíchikon‑tꞌin. Kꞌe̱ nga kondra̱ fì‑na̱je̱n xi̱ta̱, chíkjoa̱ko̱ó‑naje̱n.
\v 13 ꞌOn chja̱ko̱‑naje̱n xi̱ta̱, ngaje̱n ndaà nokjoá‑la̱je̱n. Kꞌoa̱sꞌín beè takòn‑naje̱n koni tsà tjé‑la̱ i̱sòꞌnde. Skanda na̱chrjein i̱ꞌndei̱, jñà xi̱ta̱ kꞌoa̱á sꞌín beètakòn‑naje̱n koni tsojmì xi ningui‑ne nga bíxteèn.
\p
\v 14 Koni sꞌín tìkjiì‑nò, mìtsà tìsꞌiìn sobà‑nò. Kjo̱hítsjeèn tìtsja jngoò‑nò koni tsà i̱xti tsꞌa̱n xi matsjake̱.
\v 15 Na̱sꞌín te jmiì ma‑ne xi okóya‑nò i̱tꞌaà tsꞌe̱ Cristo, ta jngoò ma‑ne xi na̱ꞌèn‑nò. ꞌA̱n‑ná xi komà na̱ꞌèn‑nò nga mokjeiín‑nò i̱tꞌaà tsꞌe̱ Cristo Jesús nga ꞌa̱án tsibeno̱jmí ítjòn‑nò ꞌén ndaà‑la̱ Nainá xi kjoa̱ tsꞌe̱ Cristo.
\v 16 Kꞌoa̱á ma‑ne bìtsiꞌbà‑nò nga kꞌoa̱sꞌín ti̱jchá yijo‑nò koni ꞌa̱n.
\p
\v 17 Koií kjoa̱‑la̱ tìsìkasén‑nò Timoteo, xi kiꞌndí‑na̱ xan‑la̱ nga ꞌñó matsjake̱ ko̱ kixi̱ síxá‑la̱ Na̱ꞌèn‑ná. Jè si̱ìkítsjeèn‑nò kósꞌín tìjna̱koa̱ Cristo Jesús nga mokjeiín‑na̱ i̱tꞌaà tsꞌe̱, koa̱ kósꞌín okoòya‑la̱ xi̱ta̱ na̱xa̱ndá‑la̱ Cristo nga kijndà na̱xa̱ndá ñánda bijchoa.
\v 18 Tjín iꞌnga xi̱ta̱ xinguio̱o xi ꞌñó ꞌnga chja̱, kꞌoa̱á‑là sꞌín síkítsjeèn tsà mìkiì kjíkon‑nò.
\v 19 Ta̱nga tsà Nainá mejèn‑la̱, kjíkon ni̱to̱ón‑nò. Kꞌe̱ nga kìjchoa, skoeè jñà xi̱ta̱ xi ꞌnga chja̱, a ngaꞌñó‑la̱ Nainá xi tjín‑la̱ a xi tà jè ꞌén‑la̱ xi ꞌnga chja̱.
\v 20 Kꞌe̱ nga jè Nainá tíhotíxoma jngoò‑la̱ xi̱ta̱, mìtsà ta kjoa̱ tsꞌe̱ ꞌén mochjeén, ko̱ó ngaꞌñó‑la̱ Nainá mochjeén.
\v 21 Jñò, ¿kósꞌín mejèn‑nò nga kjián? ¿A mejèn‑nò nga kjo̱ꞌin tsjaà‑nò kꞌe̱ nga kìjchokon‑nò, a xi mejèn‑nò nga ko̱ kjo̱ndaà‑na̱ ko̱ kjo̱tsja‑na̱ kìjchokon‑nò?
\c 5
\s Jé xi kisakò ya̱ i̱jiìn na̱xa̱ndá‑la̱ Cristo ján Corinto
\p
\v 1 Jye naꞌyà‑la̱ nga kjoa̱chijngui tíma i̱jiìn tsa̱jòn. Kjoa̱ xi tíma, skanda jñà xi̱ta̱ xi mìkiì beèxkón Nainá, mì kꞌoa̱á sꞌín. Nga ya̱á tíjnajiìn jngoò‑nò xi̱ta̱ xinguio̱o xi nea̱jòn‑la̱ tsóhoko̱.
\v 2 Jñò, ¿mé‑ne ꞌnga nìkítsa̱jna‑nò yijo‑nò? Mochjeén‑né nga kjoa̱ba ki̱tsa̱jnajñoò, ko̱ jè xi̱ta̱ xi ko̱tjín jé tíhótsji, ti̱nachrjekàjioòn.
\v 3 ꞌA̱n, kixi̱í kjoa̱, kjiìn tìjna̱‑nò, ta̱nga kjo̱hítsjeèn‑la̱ ini̱ma̱‑na̱ ya̱á tíjnajiìn osen‑nò. ꞌA̱n, kꞌoa̱á ngaya‑la̱ koni tsà ya̱ tìjna̱jiìn‑nò, jyeé kiskoòsòn‑la̱ mé kjo̱ꞌin xi si̱nè‑la̱ jè xi̱ta̱ xi kꞌoa̱ tjín jé tíhótsji.
\v 4 Jñò, kꞌe̱ nga ko̱xkóya nga jeya si̱kíjna Jesucristo xi otíxoma‑ná, jè kjo̱hítsjeèn‑la̱ ini̱ma̱‑na̱ ya̱á kíjnajiìn‑nò, ti̱koa̱ ya̱á kíjnajiìn‑nò jè ngaꞌñó‑la̱ Na̱ꞌèn‑ná Jesucristo. Ko̱ i̱tꞌaà tsꞌe̱ Na̱ꞌèn‑ná Jesucristo,
\v 5 xi̱ta̱ jè, xi̱ta̱ nei̱í kàtanga̱tsja yijo‑la̱ nga kàtasꞌe‑la̱ kjo̱ꞌin, ko̱ kàtasíkájno jé‑la̱ nga mì ti̱ jé ko̱hótsji‑ne mé‑ne nga ki̱tjokàjiìn‑ne kjo̱ꞌin ini̱ma̱‑la̱, kꞌe̱ nga kjoi̱í ìjngoò kꞌa Jesucristo xi otíxoma‑ná.
\p
\v 6 Mìkiì ndaà tjín nga ꞌnga nìkítsa̱jna yijo‑nò. ¿A mì tíjiìn‑nò nga na̱sꞌín ta̱ chiba na̱ꞌyo̱ san sísan yije xíkjín na̱ꞌyo̱?
\v 7 Ti̱nachrjekàjioòn jè xi̱ta̱ xi ótsji jé kꞌoa̱á ngaya‑la̱ koni tsà na̱ꞌyo̱ san xi mì ti̱ ndaà‑ne nga síkitsꞌón‑nò, mé‑ne jñò kꞌoa̱sꞌín kjoàn ko̱ma‑nò koni na̱ꞌyo̱ xi̱tse̱ tsꞌe̱ i̱nchra̱jín xi tsjìn‑la̱ na̱ꞌyo̱ san. Nga jñò, jyeé kitjaàxìn‑nò kjoa̱ tsꞌe̱ jé koni na̱ꞌyo̱ san jchínga nga jè Cristo kꞌen ngajo‑ná koni jñà orrè xi kisìkꞌen xi̱ta̱ Israel kꞌe̱ nga Paxko̱.
\v 8 Koií kjoa̱‑la̱ jñá, kꞌoa̱á sꞌín ki̱náchrjeé sꞌeí nga jyeé kisìkítsa̱jnandei̱í‑ná Nainá kjoa̱ tsꞌe̱ jé, koni sꞌín xi̱ta̱ Israel kꞌe̱ nga Paxko̱ nga sítsjeè niꞌya‑la̱ nga faáxìn yije na̱ꞌyo̱ san. Jñá, kꞌoa̱á ti̱sꞌín chja̱àxián kjoa̱ tsꞌe̱ jé ko̱ kjoa̱ chꞌo ko̱ nguì kjoa̱tsjeè ko̱ kjoa̱kixi̱ si̱kjeén kꞌoa̱á ngaya‑la̱ koni i̱nchra̱jín xi tsjìn‑la̱ na̱ꞌyo̱ san.
\p
\v 9 Jè xo̱jo̱n xi kisìkasén ítjòn‑nò, kꞌoa̱á kixan‑nò nga mì ya̱ koa̱hijtako̱o jñà xi̱ta̱ xi kjoa̱ chijngui sꞌín.
\v 10 Kꞌe̱ nga kꞌoa̱ kixan‑nò, mìtsà jñà kisìkaxkia̱ jñà xi̱ta̱ i̱sòꞌnde xi kjoa̱ chijngui sꞌín, ko̱ jñà xi tse mejèn‑la̱, ko̱ jñà xi̱ta̱ chijé, ko̱ jñà xi xkósòn beèxkón. Xi̱ta̱ koi, xki̱ xi ján satíkjoò. Ta jè xi ko̱ma ki̱nchatꞌaàxìn‑là tsà xìn i̱sòꞌnde onguió.
\v 11 Jñà ꞌén xi kixan‑nò, jè‑né nga mì ya̱ tsjahijtako̱o jñà xi tsò nga xi̱ta̱‑la̱ Cristo xi ꞌndsè chibá tsà tákó kjoa̱ chijngui nchisꞌín, xi̱ta̱ xi tse mejèn‑la̱, xi xkósòn beèxkón, xi chꞌo chja̱jno‑ná, xi xán ꞌbiì, xi chijé sꞌín. Jñà xi̱ta̱ xi kꞌoa̱sꞌín sꞌín, skanda mìkiì mochjeén nga ki̱chiko̱o.
\v 12-13 Mìtsà jñá oko̱‑ná nga bíndaàjiìn‑lá jñà xi̱ta̱ i̱sòꞌnde. Jè Nainá ki̱ìndaàjiìn‑la̱ jñà xi̱ta̱ koi. Ta̱nga jñò oko̱‑nò nga kíndaàjiìn‑là xi̱ta̱ na̱xa̱ndá‑la̱ Nainá xi tsa̱jòn. Kꞌoa̱á ma‑ne nga xan‑nò, chja̱àxiòn jè xi̱ta̱ xi chꞌo tísꞌín xi ya̱ tíjnajiìn‑nò.
\c 6
\s Kósꞌín sꞌi̱in jñà xi̱ta̱‑la̱ Cristo nga ti̱jñà xíkjín koi̱ìndaàjiìn‑la̱
\p
\v 1 Jñò, kꞌe̱ nga tsà kjoa̱siì tjín‑nò ko̱ xi̱ta̱ xinguio̱o, ¿mé‑ne jñà mejèn‑nò koi̱ìndaàjiìn‑nò jñà xi̱ta̱xá xi mìtsà xi̱ta̱‑la̱ Cristo? ¿A mìtsà tà jñà kàtíndaàjiìn‑nò xi xi̱ta̱ na̱xa̱ndá‑la̱ Cristo?
\v 2 ¿A mìtsà tíjiìn‑nò nga jñá xi xi̱ta̱ na̱xa̱ndá‑la̱ Cristo ꞌmì‑ná, jñá kíndaàjiìn‑lá xi̱ta̱ i̱sòꞌnde? Tsà jñò koi̱ìndaàjiìn‑là xi̱ta̱ i̱sòꞌnde, ¿a mì chíkjoa̱‑nò nga ta jñò kíndaàjiìn‑là xi̱ta̱ xinguio̱o kjoa̱ xi chiba tjín?
\v 3 ¿A mìtsà tíjiìn‑nò nga ti̱koa̱ i̱tꞌaà tsa̱ján kíndaàjiìn‑lá àkja̱le̱? Tsà jñá kíndaàjiìn‑lá àkja̱le̱, ¿a mì ko̱ma‑ná kíndaàjiìn‑lá xi̱ta̱ xinguia̱á kjoa̱ xi tjín i̱ i̱sòꞌnde?
\v 4 Kꞌoa̱á ma‑ne tsà ta kjoa̱ tsꞌe̱ i̱sòꞌnde‑né xi tjín‑nò, ti̱nókjoa̱ jngoò‑là xi̱ta̱ ꞌndsè xi jñò nachrjenguioò nga ꞌmì‑là ni̱mé chjí‑la̱, jè kàtíndaàjiìn‑nò.
\v 5 Koií koa̱ xan‑nò mé‑ne nga kàtasobà‑nò. ¿A mìtsà tíjna jngoò xi̱ta̱ xinguio̱o xi tjín‑la̱ kjo̱hítsjeèn nga ko̱ma‑la̱ koi̱ìndaàjiìn‑la̱ xi̱ta̱ xi ꞌndsé chibá?
\v 6 Mìtsà ta koií kjoa̱‑la̱ nga bixkàn‑ko̱o xinguio̱o, skanda ya̱á onguíko̱o xinguio̱o nguixko̱n xi̱ta̱xá xi mìkiì beèxkon Nainá nga bìndaàjiìn‑nò.
\p
\v 7 Kixi̱í kjoa̱, chꞌoó tjín kjoa̱ kꞌe̱ nga ti̱jñò bixkàn‑ko̱‑nò xinguio̱o. ¿Mé‑ne mìtsà ta sa̱á nìkjeiín‑là xinguio̱o kꞌe̱ nga chꞌo síko̱‑nò? Ta saà ti̱kjeiín‑la nga kàtasíchijé‑nò.
\v 8 Ta̱nga jñò, kꞌoa̱á ti̱sꞌín chꞌo nìko̱o xinguio̱o, ti̱jñò nìchijé‑là.
\p
\v 9 ¿A mìtsà tíjiìn‑nò nga jñà xi mìtsà xi̱ta̱ kixi̱, mìkiì kjoa̱hasꞌen‑jiìn i̱ꞌnde ñánda tíhotíxoma Nainá? Jñà xi̱ta̱ xi kjoa̱ chijngui sꞌín, jñà xi xkósòn beèxkón, jñà xi̱ta̱ xi jye chixàn xi kjoa̱ chijngui sꞌín, jñà xi̱ta̱ xi̱ꞌndè xi ti̱ xꞌi̱n xíkjín oyijòko̱‑ne,
\v 10 jñà xi̱ta̱ chijé, jñà xi̱ta̱ tse mejèn, jñà xi̱ta̱ xi xán ꞌbiì, jñà xi xi̱ta̱ chja̱jno‑la̱, jñà xi̱ta̱ xi kona̱cha̱n‑la̱ xíkjín nga síchijé‑la̱, kì yijo‑nò chona̱cha̱n‑là nga jñà xi̱ta̱ xi koa̱tjín kjoa̱chꞌo xi sꞌín mìkiì kjoa̱hasꞌen‑jiìn ñánda tíhotíxoma Nainá.
\v 11 Jñò, kꞌe̱ nga sa̱ kjòtseé kꞌoa̱ ti̱sꞌín kiꞌnè iꞌnga; ta̱nga i̱ꞌndei̱, jye kisaníjno kjoa̱ tsꞌe̱ jé‑nò, jye xi̱ta̱ tsjeè‑la̱ Nainá komà, ko̱ jye xi̱ta̱ kixi̱ komà i̱tꞌaà tsꞌe̱ ngaꞌñó‑la̱ Jesucristo xi otíxoma‑ná ko̱ i̱tꞌaà tsꞌe̱ Ini̱ma̱ Tsjeè‑la̱ Nainá.
\s Kó sꞌín si̱chjeén yijo‑ná mé‑ne nga jeya kíjna Nainá
\p
\v 12 Tjín iꞌnga xi̱ta̱ xinguio̱o xi tsò: “ꞌA̱n tjíꞌndeé‑na ni̱ta̱ mé kjoa̱ xi sꞌiaàn.” Kixi̱í kjoa̱ tjíꞌnde‑né, ta̱nga mìkiì okꞌìn‑la̱ tsà kꞌoa̱sꞌe̱n yijeé ngatsꞌiì kjoa̱; kꞌoa̱á ma‑ne, ꞌa̱n, mìkiì tsjaàꞌnde‑la̱ yijo‑na̱ nga si̱ìkijne‑na jngoò kjoa̱.
\v 13 Ti̱koa̱á tjín iꞌnga xi tsò: “Jñà tsojmì xi ma chine, tsꞌe̱é i̱ndso̱ꞌbá, koa̱ jè i̱ndso̱ꞌbá mochjeén‑la̱ tsojmì xi ma chine.” Kixi̱í kjoa̱, ta̱nga ingajò kjoa̱ koi, Nainá si̱ìkjehetꞌaà. Ta̱nga jè yijo‑ná, mìtsà ko̱sꞌín ko̱chjeén nga kjoa̱ chijngui sꞌe̱én; i̱tꞌaà tsꞌe̱ Nainá ko̱chjeén; yijo‑ná, tsꞌe̱é Nainá.
\v 14 Koni sꞌín kisꞌiìn Nainá nga kisìkjaáya‑la̱ Na̱ꞌèn‑ná Jesús, jñá kꞌoa̱á ti̱sꞌín kjoa̱áya‑ná i̱tꞌaà tsꞌe̱ kjoa̱ biyaà nga tjín‑la̱ ngaꞌñó Nainá.
\p
\v 15 ¿A mìtsà tíjiìn‑nò nga jè yijo‑ná, ya̱á tíkjoòko̱ tsꞌe̱ Cristo? ¿A ko̱maá si̱kjeén yijo‑la̱ Cristo nga si̱jngoòtꞌaà‑lá tsꞌe̱ chjo̱ón ská? Majìn, mìkiì ko̱ma.
\v 16 ¿A mìtsà ꞌyaà, kꞌe̱ nga jngoò xi̱ta̱ xꞌi̱n, tsà chjo̱ón ská kíjnako̱, jngoò yijoó ko̱ma? Nga kꞌoa̱á sꞌín tíchja̱ Xo̱jo̱n‑la̱ Nainá nga tsò: Ingajò xi̱ta̱ koi, jngoò yijoó ko̱ma.
\v 17 Ta̱nga jè xi Na̱ꞌèn‑ná tíjnako̱, ya̱á majngoòko̱ ini̱ma̱‑la̱ ko̱ tsꞌe̱ Na̱ꞌèn‑ná.
\p
\v 18 Ti̱nchatꞌaàxìn‑là kjoa̱ chijngui. Jngoò xi̱ta̱, ni̱ta̱ mé jé xi ótsji xi kjꞌei̱í jé, mìtsà yijo‑la̱ tíbeètoòn. Ta̱nga jè xi̱ta̱ xi kjoa̱ chijngui sꞌín, yijo‑la̱á beètoòn.
\v 19 ¿A mìtsà tíjiìn‑nò nga jè yijo‑nò niꞌya‑la̱ Ini̱ma̱ Tsjeè‑la̱ Nainá‑né xi jñò kitsjaà‑nò Nainá nga tíjnajiìn ini̱ma̱‑nò? Yijo‑nò, mìtsà ti̱ tsa̱jòn‑nò.
\v 20 Nainá jye tsakatse‑nò, tseé tsibíchjítjì‑nò. Koií kjoa̱‑la̱ jcha̱xkón Nainá, ndaà ti̱kjeén yijo‑nò nga tsꞌe̱é Nainá.
\c 7
\s Kjoa̱ tsꞌe̱ xi̱ta̱ xi bixan
\p
\v 1 I̱tꞌaà tsꞌe̱ ꞌén xi kichjìnangui‑ná nga kinìkasén‑ná xo̱jo̱n nga bixón: “Ndaà‑la tjín, jngoò xi̱ta̱ xꞌi̱n ko̱ jè chjo̱ón tsà mìkiì ki̱xan.”
\v 2 Ta̱nga koií kjoa̱‑la̱ nga ꞌñó tjín kjoa̱ chijngui, nga jngoò ìjngoò xi̱ta̱ xꞌi̱n kàtasꞌe‑la̱ chjo̱ón, ko̱ nga jngoò ìjngoò chjo̱ón kàtasꞌe‑la̱ xꞌi̱n.
\v 3 Koni sꞌín tjín kjo̱tíxoma tsꞌe̱ kjoa̱ bixan, jè xꞌi̱n, ndaà kàtasísꞌin‑la̱ chjo̱ón‑la̱ kꞌe̱ nga kójnako̱, ti̱koa̱ jè chjo̱ón, ndaà kàtasísꞌin‑la̱ xꞌi̱n‑la̱.
\v 4 Jè chjo̱ón, mìtsà ti̱jè otíxoma‑la̱ yijo‑la̱, jè xꞌi̱n‑la̱ otíxoma‑la̱. Ti̱koa̱ jè xꞌi̱n mìtsà ti̱jè otíxoma‑la̱ yijo‑la̱, jè chjo̱ón‑la̱ otíxoma‑la̱.
\v 5 Kꞌe̱ nga tsjáyijòko̱o xinguio̱o, kì yijo‑nò nìxkon‑là xinguio̱o. Tà kꞌe̱‑né tsà ngásòn chibàya‑nò kótjín na̱chrjein mìkiì tsjáyijòko̱o xinguio̱o tsà Nainá ki̱nókjoa̱tꞌaà‑là. Xi ko̱ma i̱skan mochjeén‑né nga si̱sꞌin‑là xinguio̱o nga mì jè xi̱ta̱ nei̱í skóna̱cha̱n‑nò kꞌe̱ nga tsà mì ti̱ kiì chíkjoa̱‑nò nga xìn tsjáyijò‑là xinguio̱o.
\p
\v 6 ꞌÉn xi tìxan‑nò tà ꞌa̱n‑ná xi tìtsjaàꞌnde‑nò; mìtsà kjo̱tíxoma tìbìnè‑nò.
\v 7 Xi i̱tꞌaà tsꞌa̱n, mejèn‑na̱ tsà ngatsꞌiì xi̱ta̱ kꞌoa̱sꞌín kàtìtsa̱jna ta̱jngoò, koni ꞌa̱n, ta̱jngoó tìjna̱a. Ta̱nga ìjngoò ìjngoò xi̱ta̱ kitsꞌiì‑la̱ kjo̱tjò xi Nainá kitsjaà‑la̱, kósꞌín kítsa̱jna. Ka̱kjꞌei̱í ka̱kjꞌei̱í sꞌín títsa̱jna nga ìjngoò ìjngoò xi̱ta̱.
\p
\v 8 Jñà xi̱ta̱ xi títsa̱jna ta̱jngoò ko̱ jñà íchjín xi jye kꞌen xꞌi̱n‑la̱, ndaà‑la tjín tsà tà kꞌoa̱sꞌín kítsa̱jna ta̱jngoò koni ꞌa̱n.
\v 9 Ta̱nga tsà mìkiì chíkjoa̱‑la̱ nga bìtsa̱jna íjngó, ìsa̱á ndaà‑ne tsà kàtixan, mì kꞌoa̱‑ne tsà tsjè si̱ìkꞌen.
\p
\v 10 ꞌA̱n, kꞌoa̱á sꞌín bìnè‑la̱ jñà xi̱ta̱ xi jye chixàn, nga mìkiì ko̱ma tsjeín xíkjín. Jè chjo̱ón, mìkiì ko̱ma si̱ìkíjna xꞌi̱n‑la̱. Mìtsà kjo̱tíxoma tsꞌa̱n xi tsjaà‑nò; tsꞌe̱é Nainá.
\v 11 Jè chjo̱ón xi tsjeiìn xꞌi̱n‑la̱, mìkiì tjíꞌnde‑la̱ nga kjꞌei̱í xꞌi̱n ki̱xan‑ko̱ ìjngoò kꞌa. Ti̱koa̱á‑ne kàtajoóndaà‑ne. Ti̱koa̱ jè xꞌi̱n, mìkiì tjíꞌnde‑la̱ nga tsjeín chjo̱ón‑la̱.
\p
\v 12 Jñà xi̱ta̱ xi iꞌnga, kꞌoa̱á xan‑la̱, xi tà kjo̱hítsjeèn tsꞌa̱n, mìtsà jè Na̱ꞌèn‑ná tsibíjna kjo̱tíxoma jè. Tsà jngoò xi̱ta̱ xꞌi̱n xi mokjeiín‑la̱ ꞌén‑la̱ Nainá, tsà jè chjo̱ón‑la̱ xi tíjnako̱, tsà mìkiì mokjeiín‑la̱, tsà tsò ikon jè chjo̱ón nga bìjnako̱, kàtìjnako̱, kì tsjeiìn takòn jè chjo̱ón‑la̱.
\v 13 Tsà jngoò chjo̱ón xi mokjeiín‑la̱ ꞌén‑la̱ Nainá, jè xꞌi̱n xi tíjnako̱, tsà mìkiì mokjeiín‑la̱, tsà tsò ikon jè xꞌi̱n nga bìjnako̱, kàtìjnako̱, kì tsjeiìn takòn jè xꞌi̱n‑la̱.
\v 14 Jè xꞌi̱n xi mìkiì mokjeiín‑la̱ ꞌén‑la̱ Nainá, i̱tꞌaà tsꞌe̱ chjo̱ón‑la̱á matsjeè‑né; ti̱koa̱á jè chjo̱ón xi mìkiì mokjeiín‑la̱, i̱tꞌaà tsꞌe̱ xꞌi̱n‑la̱á matsjeè‑né. Tsà majìn, jñà i̱xti‑la̱ mìtsà xi̱ta̱ kixi̱ nga nguixko̱n Nainá, ta̱nga i̱ꞌndei̱ i̱xti‑la̱, ya̱á chja̱‑ne na̱xa̱ndá‑la̱ Cristo.
\v 15 Ta̱nga tsà jè chjo̱ón xi mìkiì mokjeiín‑la̱ ꞌén‑la̱ Nainá tsà mejèn‑la̱ tsjeín xꞌi̱n‑la̱ xi mokjeiín‑la̱, kàtatsjeiìn. Ko̱ tsà jè xi̱ta̱ xꞌi̱n xi mìkiì mokjeiín‑la̱ ꞌén‑la̱ Nainá, tsà mejèn‑la̱ nga tsjeín chjo̱ón‑la̱ xi mokjeiín‑la̱, kàtatsjeiìn. Jñà xi̱ta̱ koi mìkiì tjínè‑la̱ nga kjo̱ꞌñó kítsa̱jnako̱ xíkjín. Nainá, jè xi mejèn‑la̱ nga ꞌnchán kítsa̱jna.
\v 16 Ji̱ chjo̱ón xi mokjeiín‑lè i̱tꞌaà tsꞌe̱ Cristo, mìkiì tíjiìn‑lè tsà koi na̱chrjein i̱tꞌaà tsi̱ji ko̱ma ki̱tjokàjiìn kjo̱ꞌin xꞌi̱n‑lè. Ko̱ ji̱ xi xꞌi̱n ꞌmì‑lè nga mokjeiín‑lè i̱tꞌaà tsꞌe̱ Cristo, mìkiì tíjiìn‑lè tsà koi na̱chrjein i̱tꞌaà tsi̱ji ko̱ma ki̱tjokàjiìn kjo̱ꞌin chjo̱ón‑lè.
\p
\v 17 Jngoò kjoa̱ mejèn‑na nga ndaà síkíjna‑la̱ ngatsꞌiì xi̱ta̱ na̱xa̱ndá‑la̱ Cristo, nga ìjngoò ìjngoò xi̱ta̱ xꞌi̱n ko̱ chjo̱ón, mochjeén‑né nga ko̱sꞌín kàtasíjchá yijo‑la̱ koni sꞌín kitsjaà‑la̱ Nainá koni sꞌín títsa̱jna kꞌe̱ nga Nainá kiìchja̱‑la̱ nga xi̱ta̱‑la̱ komà.
\v 18 Tsà tjín iꞌnga xi̱ta̱ xi jye tjítꞌaà chi̱ba̱ yijo‑la̱ kjoa̱ tsꞌe̱ circuncisión kꞌe̱ nga xi̱ta̱‑la̱ Cristo komà, tà kꞌoa̱á sꞌín kàtìjna. Tsà tjín iꞌnga xi kjꞌeè kiì tjítꞌaà chi̱ba̱ yijo‑la̱, kì bítꞌaà chi̱ba̱‑la̱ yijo‑la̱.
\v 19 Xi kjoa̱ tsꞌe̱ circuncisión, tsà tjítꞌaà chi̱ba̱‑nò ko̱ tsà majìn, mìtsà mé‑ne. Jè xi chjí‑la̱ nga ndaà si̱kitasòn jè kjo̱tíxoma‑la̱ Nainá.
\v 20 Nga jngoò ìjngoò, kꞌoa̱á sꞌín ti̱tsa̱jna koni sꞌín titsa̱jnaà kꞌe̱ nga kiìchja̱‑nò Nainá.
\v 21 Kꞌe̱ nga kiìchja̱‑lè Nainá, tsà chi̱ꞌnda tijni, kì makájno‑lè. Ta̱nga i̱ꞌndei̱ tsà ko̱ma ki̱jnandei̱í‑ne, ndaà sꞌe̱, ti̱jnandei̱í‑ne.
\v 22 Jè xi chi̱ꞌnda tísꞌín kꞌe̱ nga kiìchja̱‑la̱ Nainá nga kòkjeiín‑la̱ ꞌén‑la̱, i̱ꞌndei̱ tíjnandei̱í‑né i̱tꞌaà tsꞌe̱ Cristo. Kꞌoa̱á ti̱sꞌín tjín, jè xi tíjnandei̱í kꞌe̱ nga kiìchja̱‑la̱ Nainá, i̱ꞌndei̱ chi̱ꞌnda‑la̱ Cristo‑né.
\v 23 Jñò, Nainá jye tsatse‑nò, kì kiì biìꞌnde nga xi̱ta̱ xi kjꞌei̱í chi̱ꞌnda ꞌnè‑là.
\v 24 Jñò ndí ꞌndsè ko̱ tichjaá, koni sꞌín titsa̱jnaà nga jngoò ìjngoò kꞌe̱ nga kiìchja̱‑nò Nainá, kꞌoa̱á sꞌín ti̱tsa̱jna ya̱ nguixko̱n Nainá.
\p
\v 25 I̱tꞌaà tsꞌe̱ xi̱ta̱ xi títsa̱jna ta̱jngoò, tsjìn jngoò‑na kjo̱tíxoma xi tsꞌe̱ Na̱ꞌèn‑ná. ꞌA̱n, kꞌoa̱á sꞌín kosòn‑la̱ koni tsò kjo̱hítsjeèn‑na̱ nga Nainá kisꞌe‑la̱ kjo̱hi̱ma̱takòn mé‑ne nga i̱tꞌaà tsꞌa̱n kjoa̱àtꞌaà takòn‑na jñà xi̱ta̱.
\v 26 Koií kjoa̱‑la̱ nga ꞌñó ꞌin choòn na̱chrjein i̱ꞌndei̱, ꞌa̱n, kꞌoa̱á sꞌín sìkítsjeèn, ìsa̱á‑la ndaà tjín, tà kꞌoa̱sꞌín kàtìtsa̱jna xi̱ta̱ koni sꞌín títsa̱jna skanda na̱chrjein i̱ꞌndei̱.
\v 27 Tsà tjín‑lè chjo̱ón, kì nìkíjna‑jèn chjo̱ón‑lè. Tsà tsjìn‑lè, kì chjo̱ón binchaàtsji.
\v 28 Tsà kixein, mìtsà jé tìbinchaàtsji. Ko̱ tsà jngoò chjo̱ón xo̱ngó xi ki̱xan, ti̱koa̱á mìtsà jé tíhótsji. Ta jè‑né, kꞌe̱ nga jye ki̱xan, kjoa̱á sꞌe̱‑nò. ꞌA̱n, mejèn‑na nga mì kjoa̱ kàtasꞌe‑nò.
\p
\v 29 Ndí ꞌndsè, mejèn‑na̱ nga kàtasijiìn‑nò, nga chiba jchán na̱chrjein chija nga ma si̱xá‑lá Nainá. Koií kjoa̱‑la̱ jngoò xi̱ta̱ xꞌi̱n xi tjín‑la̱ chjo̱ón, kꞌoa̱á sꞌín kàtasꞌín koni tsà tsjìn‑la̱ chjo̱ón.
\v 30 Ko̱ jñà xi̱ta̱ xi kjoa̱ba títsa̱jnajiìn, kꞌoa̱á sꞌín kàtìtsa̱jna koni tsà mì ba títsa̱jna. Koa̱ jñà xi sꞌeí tjín‑la̱, kꞌoa̱á sꞌín kàtìtsa̱jna koni tsà mì sꞌeí tjín‑la̱. Koa̱ jñà xi tsojmì otse, kꞌoa̱á sꞌín kàtasꞌín koni tsà nìmé tjín‑la̱.
\v 31 Ko̱ jñà xi fìtji̱ngui‑la̱ kjoa̱ xi tjín i̱sòꞌnde, kꞌoa̱á sꞌín kàtasꞌín koni tsà mì ya̱ fìtji̱ngui‑la̱; nga jè i̱sòꞌnde xi titsa̱jnasoán i̱jndé, kjoe̱hetꞌaà‑né.
\p
\v 32 ꞌA̱n, kꞌoa̱á sꞌín mejèn‑na nga ni̱mé kjoa̱ tsꞌe̱ i̱sòꞌnde si̱kítsjeèn. Jè xi̱ta̱ xꞌi̱n xi tíjna ta̱jngoò, koií síkítsjeèn kjoa̱ tsꞌe̱ Nainá, mé xi sꞌi̱in nga ko̱tsja‑la̱ Nainá.
\v 33 Ta̱nga jè xi jye chjo̱ón tjín‑la̱, koií síkítsjeèn kjoa̱ xi tjín i̱sòꞌnde mé xi sꞌi̱in nga ko̱tsja‑la̱ chjo̱ón‑la̱,
\v 34 kꞌoa̱á ma‑ne nga jò kjoa̱ síkítsjeèn. Ti̱koa̱á jè chjo̱ón kaꞌàn xi jye kꞌen xꞌi̱n‑la̱ ko̱ jè chjo̱ón xi tíjna ta̱jngoò xi kjꞌeè xꞌi̱n tjín‑la̱, koií síkítsjeèn kjoa̱ tsꞌe̱ Nainá mé‑ne nga tsjeè síkítsa̱jna‑ne yijo‑la̱ ko̱ ini̱ma̱‑la̱. Ta̱nga jè chjo̱ón xi xꞌi̱n tjín‑la̱, koií síkítsjeèn kjoa̱ tsꞌe̱ i̱sòꞌnde mé xi sꞌi̱in nga ko̱tsja‑la̱ xꞌi̱n‑la̱.
\p
\v 35 Kjoa̱ xi beno̱jmí‑nò kjo̱ndaà tsa̱jòn‑nò, mìtsà xan‑nò nga ꞌa̱n ósi̱jna ikon‑nò, jè‑né nga nguì ndaà si̱jchá yijo‑nò nga ni̱mé kjoa̱ ki̱ìchjoà ikon‑nò nga si̱xá‑là Nainá.
\p
\v 36 Tsà jngoò xꞌi̱n xi ko̱sꞌín tísíkítsjeèn nga mì ndaà tísíko̱ chjo̱ón nga mì xátí tíbixan‑ko̱ nga jye tíhóto nó‑la̱ chjo̱ón, kꞌoa̱á sꞌín kàtasꞌín koni sꞌín síkítsjeèn, kàtixan; jè kjoa̱ bixan, mìtsà jé nchihótsji.
\v 37 Ta̱nga tsà jngoò xi kꞌoa̱sꞌín bínè‑la̱ yijo‑la̱ ko̱ ini̱ma̱‑la̱ nga majìn‑la̱ ki̱xan, nga kjo̱hítsjeèn tsꞌe̱‑né, ko̱ tsà chíkjoa̱‑la̱ yijo‑la̱ nga mìkiì ki̱xan, ko̱ tsà jye ko̱sꞌín kiskoòsòn‑la̱, ndaà tjín.
\v 38 Jñà xi̱ta̱ xi bixan, ndaà sꞌín, ta̱nga jñà xi mìkiì bixan, ìsa̱á ndaà sꞌín.
\p
\v 39 Jngoò chjo̱ón xi xꞌi̱n tjín‑la̱, mìtsà tíjnandei̱í. Kꞌe̱é‑né tsà jye kꞌen xꞌi̱n‑la̱ nga jye tíjnandei̱í. Ko̱ma ki̱xan‑ko̱ ni̱ta̱ yá xꞌi̱n‑ne xi matsjakeè tsà ta̱nga mokjeiín‑la̱ ꞌén‑la̱ Nainá.
\v 40 ꞌA̱n, kꞌoa̱á sꞌín sìkítsjeèn, ndaà‑la tjín tsà mì ti̱ kiì ki̱xan‑ne jñà íchjín kaꞌàn. Ti̱koa̱á ꞌa̱n, kꞌoa̱á sꞌín machi̱ya‑na nga jè Ini̱ma̱ Tsjeè‑la̱ Nainá tísíchi̱ya‑na.
\c 8
\s Tsojmì xi sinchásòn ya̱ nguixko̱n xkósòn
\p
\v 1 Jè kjoa̱ xi tsꞌe̱ yijo‑la̱ cho̱ xi síkꞌen‑la̱ xkósòn‑la̱ xi̱ta̱ i̱sòꞌnde nga tsjá‑la̱ kjo̱tjò, jñò bixón‑nò nga ngatsꞌiaá jyeé tjín‑ná kjoa̱chji̱ne̱ i̱tꞌaà tsꞌe̱ kjoa̱ koi. Kixi̱í kjoa̱, ta̱nga kꞌe̱ nga tjín‑ná kjoa̱chji̱ne̱, maꞌngaá takoán. Ta̱nga kꞌe̱ nga tjín‑ná jè kjo̱tsjacha, ìsa̱á ndaà ꞌbiì‑lá ngaꞌñó xinguia̱á.
\v 2 Tsà tjín iꞌnga xi̱ta̱ xi tsò nga ndaà machi̱ya‑la̱, chijaá ìsa̱‑la̱; kjꞌeè kiì beè yije koni sꞌín tjínè‑la̱ nga skoe̱.
\v 3 Jngoò xi̱ta̱ xi matsjakeè Nainá, jè Nainá ndaà beèxkon.
\p
\v 4 Kꞌoa̱á xan‑nò kó sꞌín tjín, tsà ma chine yijo‑la̱ cho̱ xi ya̱ biyaàtꞌaà‑la̱ jñà xkósòn. Tíjiìn‑ná nga jñà xkósòn xi tjín i̱ i̱sòꞌnde, ni̱mé ngaꞌñó tjín‑la̱. Nga ta jngoò ma‑ne xi Nainá.
\v 5 Jñà xi̱ta̱, kꞌoa̱á sꞌín síkítsjeèn nga kjìn ma nainá xi tjín ján ngajmiì ko̱ i̱tꞌaà nangui. (Kixi̱í kjoa̱ i̱tꞌaà tsꞌe̱ xi̱ta̱ koi, kjìn ma xi nainá ko̱ na̱ꞌèn‑ná tsò‑la̱.)
\v 6 Ta̱nga jñá, ꞌya‑ná nga ta jngoò ma‑ne Nainá xi Na̱ꞌèn‑ná nga i̱tꞌaà tsꞌe̱é inchrobà‑ne ni̱ta̱ mé xi tjín. Jñá, koií xá tjín‑ná nga si̱kitasoán xá‑la̱. Ti̱koa̱á ta jngoò ma‑ne xi otíxoma‑ná, jè Jesucristo; nga i̱tꞌaà tsꞌe̱é ngaꞌñó‑la̱ kisindaà yije ni̱ta̱ mé xi tjín ko̱ ti̱koa̱á jñá, i̱tꞌaà tsꞌe̱é titsa̱jnakoaán.
\p
\v 7 Ta̱nga mìtsà ngatsꞌiì xi̱ta̱ tíjiìn‑la̱ kjoa̱ koi. Tjín iꞌnga xi̱ta̱ ꞌndseé xi jye kꞌoa̱sꞌín kjòꞌnga‑la̱ kjoa̱ tsꞌe̱ xkósòn kꞌe̱ nga ti̱kjꞌeè mokjeiín‑la̱. Ta̱nga i̱ꞌndei̱, kꞌe̱ nga kine yijo‑la̱ cho̱ xi ya̱ biyaàtꞌaà‑la̱ jñà xkósòn, kꞌoa̱á sꞌín síkítsjeèn nga jñà nchibeèxkón xkósòn xi nainá tsò‑la̱ xi̱ta̱ i̱sòꞌnde. Nga jò tjín kjo̱hítsjeèn‑la̱, kꞌoa̱á sꞌín fìya‑la̱ nga jé ótsji nguixko̱n Nainá.
\v 8 Jñò bixón‑nó nga jñà tsojmì xi ma chine, mìtsà koi kjoa̱‑la̱ nga ìsa̱ ndaà skoétjò‑ná Nainá. Tsà ki̱chiaá mìtsà ìsa̱ ndaà ki̱tsa̱jnaá ko̱ tsà mìkiì ki̱chiaá mìtsà ìsa̱ chꞌo ki̱tsa̱jnaá nga nguixko̱n Nainá.
\v 9 Kixi̱í kjoa̱, tjíꞌnde‑ná ni̱ta̱ mé xi chji̱ne̱é. Ta̱nga jñá jchósòn‑lá yijo‑ná nga mì kꞌoa̱á tjín xi chji̱ne̱é mé‑ne jñà xi̱ta̱ ꞌndseé xi indaàjiìn tjín kjo̱hítsjeèn‑la̱ mì jé sa̱kò‑la̱.
\v 10 Tsà tjín jngoò xi̱ta̱ xinguio̱o xi tsò nga tjín‑la̱ kjo̱hítsjeèn nga ma chine ni̱ta̱ mé yijo‑ne, ko̱ ya̱á fì kakjèn ya̱ i̱ꞌnde ñánda yaxkón xkósòn; tsà koi na̱chrjein‑la ya̱ skoe̱ jngoò ꞌndsé xi indaàjiìn tjín kjo̱hítsjeèn‑la̱ nga ya̱ tíkjèn. Jè xi̱ta̱ ꞌndsé, kꞌoa̱á ti̱sꞌín sꞌi̱in.
\v 11 Kjo̱hítsjeèn‑la̱ xi̱ta̱ jè nga tsò nga maá chine yije ni̱ta̱ mé‑ne, koií kjoa̱‑la̱ nga kjo̱ꞌin si̱ìkjeiín jè ꞌndsè xi indaàjiìn tjín kjo̱hítsjeèn‑la̱ xi Cristo kꞌen nga̱jo̱‑la̱.
\v 12 Kꞌe̱ nga jé binchaàtsjioò xi kondra̱ tsꞌe̱ xi̱ta̱ ꞌndseé nga nìkitsꞌón‑jñoò kjo̱hítsjeèn‑la̱ xi indaàjiìn tjín, jé binchaàtsjioò xi kondra̱ tsꞌe̱ Cristo.
\v 13 ꞌA̱n, tsà ta koií kjoa̱‑la̱ tsꞌe̱ tsojmì xi kíne̱e nga jé sa̱kò‑la̱ jè ꞌndsè, ti̱koa̱á‑ne, jngoò kꞌa mì ti̱ kiì skíne̱‑na yijo, mé‑ne nga mì jé sakó‑la̱ ꞌndsè.
\c 9
\s Kjoa̱ xi tjíꞌnde‑la̱ xi̱ta̱ xi tsibíxáya‑la̱ Cristo
\p
\v 1 ꞌA̱án tsibíxáya‑na Cristo. Tìjna̱ndei̱í‑ná. Xkoaàn kijtseè‑na jè Jesús xi otíxoma‑ná. Nga̱ xá‑la̱ Na̱ꞌèn‑ná tìsꞌiaàn, i̱ꞌndei̱ jñò‑nò xi xi̱ta̱‑la̱ Cristo maà.
\v 2 Kꞌoa̱á xó tsò iꞌnga xi̱ta̱ xi kjꞌei̱í nga mì xó tsà ꞌa̱n tsibíxáya‑na Cristo, ta̱nga jñò, ndaà tíjiìn‑nò nga ꞌa̱án kisìxáya‑na, nga i̱tꞌaà tsꞌa̱n‑ná nga mokjeiín‑nò ꞌén‑la̱ Nainá. Kꞌoa̱á sꞌín bitjo kixi̱ kjoa̱.
\p
\v 3 Kꞌe̱ nga jngoò xi̱ta̱ kjònangui‑na xi kondra̱ tsꞌa̱n, ꞌa̱n, kií xan‑la̱ nga ósi̱koa̱a yijo‑na̱:
\v 4 ¿A mìtsà tjíꞌnde‑naje̱n nga kꞌoi̱‑naje̱n tsojmì xi chine‑je̱n ko̱ xi sꞌio̱‑je̱n nga xá‑la̱ Nainá titsa̱ꞌnè‑je̱n?
\v 5 ¿A mìtsà tjíꞌnde‑naje̱n nga ki̱tjáko̱ jngoò‑je̱n xi chjo̱ón‑naje̱n ma xi ꞌén‑la̱ Nainá mokjeiín‑la̱, koni sꞌín xi̱ta̱ xi iꞌnga xi tsibíxáya‑la̱ Cristo koni jñà ꞌndse̱ Na̱ꞌèn‑ná ko̱ Cefas [xi ti̱koa̱ Pedro ꞌmì]?
\v 6 ¿A tà ꞌa̱n‑ná ko̱ Bernabé xi tjínè‑naje̱n nga kjꞌei̱í xá sꞌe̱n‑je̱n mé‑ne nga sa̱kò‑na̱je̱n tsojmì xi chi̱ne̱‑je̱n?
\v 7 ¿A tjín xi̱ta̱ xi soldado síkitasòn xi ti̱jé bíchjí‑la̱ yijo‑la̱? ¿A tjín xi̱ta̱ xi bítje̱ tsojmì tjé, koa̱ mìkiì kine toò xi ojà‑la̱? ¿A tjín xi̱ta̱ xi cho̱ síjchá, koa̱ mìkiì ꞌbiì tsjìn xi ochrje?
\v 8 Kì kꞌoa̱á sꞌín nìkítsjeèn nga tà kjo̱hítsjeèn tsꞌa̱n koni sꞌín tìxan. Ti̱koa̱á tíchja̱á kjo̱tíxoma tsꞌe̱ Moisés.
\v 9 Kjo̱tíxoma‑la̱ Nainá xi kiskiì Moisés, kꞌoa̱á sꞌín tíchja̱ nga tsò: “Jñà nchra̱ja̱ xi bínchi, kì na̱ꞌya bìꞌa tsoꞌba.” ꞌÉn koi mìtsà tsò‑ne kjoa̱ nga Nainá ꞌñó síkinda̱ nchra̱ja̱,
\v 10 \fig Man plowing with yoked oxen - 33% 1COR 9:10|61-LB00018B.TIF|col|1COR 9:10||1COR 9:10|1CO 9.10\fig*jñá‑ná xi síkinda̱‑ná Nainá; nga i̱tꞌaà tsa̱ján tíchja̱ kjo̱tíxoma. Jè xi síkínchi nchra̱ja̱ ko̱ xi sítsjeè tsojmì xi majchá‑la̱, nchikoñaá‑la̱ nga tjoé chi̱ba̱‑la̱ tsojmì xi majchá‑la̱.
\v 11 ꞌÉn ndaà‑la̱ Nainá xi kjoa̱ tsꞌe̱ Cristo xi ji̱n tsakoòya‑nòje̱n jè ngaya‑la̱ koni tachó xi kisìtje̱ i̱jiìn ini̱ma̱‑nò. ¿A mì ndaà sꞌe̱ tsà tjoé chiba‑naje̱n tsojmì xi majchá‑nò?
\v 12 Tsà jñà xi kjꞌei̱í xi̱ta̱ tjoé chiba‑la̱ tsojmì xi tsa̱jòn, ngaje̱n, ¿a mìtsà ìsa̱ ndaà tjíꞌnde‑naje̱n nga ti̱koa̱ tjoé‑naje̱n?
\p Ta̱nga mì kꞌoa̱á sꞌín titsa̱ꞌnè‑je̱n koni sꞌín tjíꞌnde‑naje̱n mé‑ne nga mìkiì ko̱ma sichjoà ikon‑la̱ ꞌén ndaà‑la̱ Nainá xi kjoa̱ tsꞌe̱ Cristo.
\v 13 Jñò, ndaà ꞌyaà, jñà xi̱ta̱ xi ya̱ síxá ya̱ I̱ngo̱ Ítjòn‑la̱ Nainá, koií tsojmì kine xi tjín ya̱ i̱ꞌnde jè; ko̱ jñà xi ya̱ síxá i̱ꞌnde tsjeè‑la̱ Nainá ya̱ ñánda binchásòn kjo̱tjò xi tsjá‑la̱ Nainá jñà xi̱ta̱, oko̱ó chiba‑la̱ yijo‑la̱ cho̱ xi ya̱ binchásòn.
\v 14 Nainá kꞌoa̱á sꞌín kitsjaà o̱kixi̱: jñà xi chja̱ya ꞌén ndaà‑la̱ Nainá xi kjoa̱ tsꞌe̱ Cristo ya̱á sa̱kò‑la̱ tsojmì xi ski̱ne̱.
\v 15 ꞌA̱n, mì kꞌoa̱á sꞌín tìsìkjeén jñà kjoa̱ xi tjíꞌnde‑na. Ti̱koa̱á mìtsà koi xá tìkjiì‑nò nga ko̱sꞌín síko̱‑ná. Ìsa̱á‑la ndaà tjín tsà kàtiyaà mì kꞌoa̱á‑ne tsà tjín xi̱ta̱ xi kjoa̱áxìn‑na̱ kjo̱tsja xi tjín‑na nga ta kjo̱tjò ꞌa̱n chjàya ꞌén ndaà‑la̱ Nainá xi kjoa̱ tsꞌe̱ Cristo.
\p
\v 16 Nga ꞌén ndaà‑la̱ Nainá xi kjoa̱ tsꞌe̱ Cristo chjàya, mìkiì tsà jeya síkíjna yijo‑na̱. ꞌA̱n, xó kꞌoa̱á sꞌín tjínè‑na nga ꞌa̱n kichjàya; i̱ma̱ xó‑na tsà mìkiì kichjàya jè ꞌén ndaà‑la̱ Nainá xi kjoa̱ tsꞌe̱ Cristo.
\v 17 Tsà tà kjo̱hítsjeèn tsꞌa̱án‑là nga ko̱sꞌín tìsꞌiaàn, tjínè‑la nga ko̱chjí‑na, ta̱nga mìtsà tà kjo̱hítsjeèn tsꞌa̱n, jè tìsìkitasoàn xá xi kisìnga̱tsja‑na Nainá.
\v 18 Jè chjí xi tísakó‑na̱, jè‑né nga tsja tjín‑na̱ nga chjàya ꞌén ndaà‑la̱ Nainá xi kjoa̱ tsꞌe̱ Cristo nga mìtsà chjí‑na̱ sìjé, na̱sꞌín tjíꞌnde‑na nga jè ꞌén ndaà‑la̱ Nainá xi kjoa̱ tsꞌe̱ Cristo kóti̱jnakon‑na.
\p
\v 19 ꞌA̱n tìjna̱ndei̱í‑ná, ta̱nga i̱ꞌndei̱, kꞌoa̱á sꞌiaàn koni tsà chi̱ꞌnda‑la̱ ma ngatsꞌiì xi̱ta̱, mé‑ne nga ìsa̱ kjìn xi̱ta̱ ko̱ma kichjà‑la̱ ꞌén‑la̱ Cristo nga ko̱kjeiín‑la̱.
\v 20 Kꞌe̱ nga ya̱ tìjna̱jiìn‑la̱ jñà xi̱ta̱ xinguia̱a judío, kꞌoa̱á sꞌín sꞌiaàn koni sꞌín xi̱ta̱ judío mé‑ne nga ko̱ma kichjà‑la̱ ꞌén‑la̱ Cristo nga ko̱kjeiín‑la̱. Kixi̱í kjoa̱ nga ꞌa̱n, mìkiì kjo̱ꞌñó tjínè‑na nga ko̱sꞌín sìkitasoàn koni tsò kjo̱tíxoma xi kiskiì Moisés, ta̱nga kꞌe̱ nga ya̱ tìjna̱jiìn‑la̱ jñà xi̱ta̱ judío xi kjo̱tíxoma‑la̱ Moisés títsa̱jnajiìn, ꞌa̱n kꞌoa̱á ti sꞌiaàn, ta jè xi mejèn‑na nga ko̱ma kichjà‑la̱ ꞌén ndaà‑la̱ Nainá xi kjoa̱ tsꞌe̱ Cristo nga ko̱kjeiín‑la̱.
\v 21 Kꞌe̱ nga ya̱ tìjna̱jiìn‑la̱ jñà xi̱ta̱ xi mìtsà ya̱ títsa̱jnajiìn kjo̱tíxoma‑la̱ Moisés, ꞌa̱n, kꞌoa̱á ti sꞌiaàn koni tsà mì ya̱ tìjna̱jñaà kjo̱tíxoma mé‑ne nga ko̱ma kichjà‑la̱ ꞌén‑la̱ Cristo nga ko̱kjeiín‑la̱ xi̱ta̱ xi mì ya̱ títsa̱jnajiìn kjo̱tíxoma. Mìtsà tsò‑ne kjoa̱ nga tìjna̱tꞌaà xìn‑la̱ kjo̱tíxoma‑la̱ Nainá. Ya̱á tìjna̱jñaà kjo̱tíxoma‑la̱ Cristo.
\v 22 Kꞌe̱ nga ya̱ tìjna̱jiìn‑la̱ jñà xi̱ta̱ xi indaàjiìn tjín kjo̱hítsjeèn‑la̱, ꞌa̱n, kꞌoa̱á sꞌiaàn koni tsà ti̱koa̱á indaàjiìn tjín kjo̱hítsjeèn‑na mé‑ne nga ko̱ma kichjà‑la̱ ꞌén‑la̱ Cristo xi̱ta̱ koi. Ya̱á sìngásòn yijekoa̱a mé kjoa̱ xi títsa̱jnajiìn ngatsꞌiì xi̱ta̱ mé‑ne nga ko̱ma ko̱chrjekàjiìn iꞌnga‑na kjo̱ꞌin kjoa̱ tsꞌe̱ jé‑la̱.
\v 23 Kꞌoa̱á sꞌiaàn xi kjo̱ndaà tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo mé‑ne nga sꞌe̱‑na kjoa̱ machikon‑tꞌin i̱tꞌaà tsꞌe̱ ꞌén.
\p
\v 24 Jñò, jyeé tíjiìn‑nò kꞌe̱ nga síská xi̱ta̱ xi ongachikon, ngatsꞌiì‑né nga ongachikon, ta̱nga ta jngoò‑né xi tjoé‑la̱ kjo̱tjò, ta jè xi síkijne. Jñò, kꞌoa̱á sꞌín ti̱jchá yijo‑nò nga xi̱ta̱‑la̱ Cristo ꞌmì‑nò koni jngoò xi̱ta̱ xi ongachikon mé‑ne nga tjoé‑nò kjo̱tjò xi Nainá tsjá‑nò.
\v 25 Jñà xi̱ta̱ xi sískákjoò nga mejèn‑la̱ si̱ìkijne, ítjòn bìtsa̱jnandaà nga mì ti̱jñà si̱ìkjeén‑ne tsojmì xi chꞌo síko̱; koi kꞌoa̱sꞌín‑ne nga mejèn‑la̱ tjoé jngoò‑la̱ kjo̱tjò. Kꞌe̱ nga jye ma i̱skan, jè kjo̱tjò xi tjoé‑la̱, ta bitsꞌon‑né. Ta̱nga jñá bitsa̱jnandaá nga tjoé jngoò‑ná kjo̱tjò xi mìkiì bitsꞌon ni̱ta̱ kjé‑ne.
\v 26 ꞌA̱n, mìtsà kꞌoa̱sꞌín ongachikoa̱n [kjoa̱ tsꞌe̱ xá‑la̱ Nainá] koni jngoò xi̱ta̱ xi mìkiì beè ñánda ki̱jchò. Ti̱koa̱á mìtsà kꞌoa̱sꞌín [sìxá i̱tꞌaà tsꞌe̱ Nainá] koni sꞌín xi̱ta̱ xi ta ꞌbeéjiìn i̱sén kꞌe̱ nga kjaán‑ko̱ xíkjín.
\v 27 ꞌA̱n, kꞌoa̱á sꞌín bìnè‑la̱ yijo‑na̱ nga kàtasꞌe‑na kjo̱ꞌin mé‑ne kꞌe̱ nga kjoe̱hetꞌaà na̱chrjein nga okoòya‑la̱ xi̱ta̱ ꞌén ndaà‑la̱ Nainá xi kjoa̱ tsꞌe̱ Cristo, Nainá mì ki̱tso̱‑na: “Nì mé chjí‑la̱ xá‑lè.”
\c 10
\s Kjoa̱ tsꞌe̱ xkósòn xi mìtsà kixi̱ kjoa̱ nga Nainá
\p
\v 1 Jñò ndí ꞌndsè ko̱ tichjaá, kì nìjchàajiìn‑jèn nga jñà xi̱ta̱ jchínga kjiìn‑ná, [kꞌe̱ nga itjojiìn na̱xa̱ndá Egipto], ya̱á tsibítsa̱jnangui yije i̱jiìn ifi [nga tsakó‑la̱ ndi̱yá], ti̱koa̱á ngatsꞌiì tsatojiìn ndáchikon.
\v 2 Kꞌoa̱á ngaya‑la̱ koni tsà komà bautizar ya̱ i̱jiìn ifi ko̱ i̱jiìn ndáchikon mé‑ne nga xi̱ta̱‑la̱ Moisés ko̱ma‑ne.
\v 3 Kꞌoa̱á ti̱sꞌín jngoò ska̱ya tsojmì kiskine xi kjo̱xkón ndaà tsꞌe̱ Nainá.
\v 4 Ti̱koa̱á ta jngoò ska̱ya nandá kitsꞌiì xi kjo̱xkón ndaà tsꞌe̱ Nainá, jè nandá xi ya̱ na̱xi̱ itjo‑ne nga jè Nainá kitsjaà‑la̱. Jè na̱xi̱, jè ngaya‑la̱ Cristo nga jè tsajmeèyako̱ ndi̱yá ñánda chinchimaya.
\v 5 Ta̱nga jñà xi̱ta̱ jchínga koi, kjìn jchán kꞌen ya̱ ñánda nangui kixì choòn nga Nainá mìkiì kisaseèn‑takòn koni sꞌín kisꞌiìn ngatsꞌiì xi̱ta̱ jchínga koi, ta chibaá tsiningui‑ne.
\p
\v 6 Jñà kjoa̱ xi kꞌoa̱sꞌín komà, jñà okóya‑ná nga mì jñà si̱kjaàjñaá kjoa̱ xi chꞌo tjín koni kisꞌiìn jñà xi̱ta̱ jchínga‑ná.
\v 7 Kì kꞌoa̱ sꞌín sando̱ xkósòn yaxkón koni kisꞌiìn iꞌnga xi̱ta̱ jchínga koi, nga kꞌoa̱á sꞌín tíchja̱ Xo̱jo̱n‑la̱ Nainá nga tsò: “Jñà xi̱ta̱ na̱xa̱ndá tsibìtsa̱jna nga tsakjèn koa̱ kitsꞌiì, i̱kjoàn tsasítje̱n nga kitè [nga jè kisìtsjako̱ xkósòn].”
\v 8 Ti̱koa̱á mìkiì kjoa̱ chijngui sꞌe̱én koni sꞌín kisꞌiìn iꞌnga xi̱ta̱ jchínga koi, nga tà jngoò na̱chrjein kaàn jàn jmiì xi̱ta̱ kꞌen.
\v 9 Mì kì ta̱xki̱ chítꞌaá Na̱ꞌèn‑ná koni sꞌín kisꞌiìn iꞌnga xi̱ta̱ jchínga koi; kꞌoa̱á komà‑ne nga kꞌen nga kiskine‑la̱ ye̱.
\v 10 Ti̱koa̱á kì íꞌñó‑ìsa tsajétꞌaà‑là Nainá koni sꞌín kisꞌiìn iꞌnga xi̱ta̱ jchínga koi. Kꞌoa̱á komà‑ne nga jè àkja̱le̱‑la̱ kjoa̱biyaà kisìkꞌen xi̱ta̱ koi.
\p
\v 11 Ngatsꞌiì kjoa̱ koi, kꞌoa̱á sꞌín komàtꞌin jñà xi̱ta̱ jchínga‑ná ko̱ kꞌoa̱á sꞌín kisijna chi̱ba̱ mé‑ne si̱jiìn‑ná. Kisitꞌaà Xo̱jo̱n‑la̱ Nainá nga jcha̱á jñá mé kjo̱ꞌin xi si̱nè‑ná tsà kꞌoa̱ ti̱sꞌín sꞌe̱én jñá xi titsa̱jnakoaán na̱chrjein xi jye tífehetꞌaà.
\v 12 Kꞌoa̱á ma‑ne jè xi ko̱sꞌín síkítsjeèn nga kixi̱ tíjna, kàtasíkinda̱ yijo‑la̱ nga mì jé sakó‑la̱.
\v 13 Jñò, kjꞌeè mé kjoa̱ xi matꞌioòn nga tíchìtꞌaà‑nò xi ìsa̱ ꞌñó ꞌin tjín koni matꞌin xi̱ta̱ xi kjꞌei̱í. Nainá, xi̱ta̱ kixi̱‑né, jè kàtaꞌñótꞌaà takòn nga mìkiì tsjáꞌnde nga ìsa̱ tsato chítꞌaà‑nò koni kji chíkjoa̱ko̱‑nò. Ti̱jè‑ne Nainá ko̱kò ndi̱yá kósꞌín ki̱chìkjoa̱‑nò koni sꞌín tíchìtꞌaà‑nò skanda kꞌe̱ nga kjoe̱hetꞌaà kjoa̱.
\p
\v 14 Jñò ndí ꞌndsè, ni̱ i̱tsé kjoa̱ tsꞌe̱ xkósòn nìkítsjeèn nga mejèn‑nò jcha̱xkón.
\v 15 ꞌA̱n, kꞌoa̱á sꞌín tìchjà‑nò koni xi̱ta̱ xi tjín‑la̱ kjo̱hítsjeèn. Jchósòn‑là ꞌén xi xán‑nò, a kixi̱í kjoa̱.
\v 16 Kꞌe̱ nga ꞌyoaá vino xi tjíya chi̱tsín nga nìjétꞌaà‑lá Nainá nga kàtasíchikon‑tꞌin, ¿a mìtsà ya̱ nìngásòn‑koa̱á ko̱ jní‑la̱ Cristo? Ko̱ kꞌe̱ nga nìxkoa̱yaá i̱nchra̱jín, ¿a mìtsà ya̱ nìngásòn‑koa̱á ko̱ yijo‑la̱ Cristo?
\v 17 Jñá, na̱sꞌín ꞌñó kjìn ma‑ná, jè i̱nchra̱jín xi bichiaá, ta jngoò ma‑ne; kꞌoa̱á ma‑ne nga ngatsꞌiaá, ta jngoò yijo ma‑ná.
\p
\v 18 Chítsejèn‑là xi̱ta̱ na̱xa̱ndá Israel, jñà xi kine yijo‑la̱ cho̱ xi biyaà ya̱ i̱ꞌnde tsjeè nga tsjá‑la̱ kjo̱tjò Nainá. Xi̱ta̱ koi, ya̱á síngásòn‑ko̱ kjo̱tjò xi tsjá‑la̱ Nainá ya̱ i̱ꞌnde tsjeè.
\v 19 Kꞌe̱ nga kꞌoa̱ xan‑nò, mìtsà xan‑nò nga tjín‑la̱ o̱kixi̱ jñà xkósòn ko̱ tsojmì xi sinchátꞌaà‑la̱.
\v 20 Jñà ꞌén xi xan‑nò, jñà kjo̱tjò xi fìko̱ jñà xi̱ta̱ xi mìkiì beèxkon Nainá, jñà fìko̱‑la̱ ini̱ma̱ chꞌo‑la̱ nei̱í, mìtsà jè sobà Nainá. ꞌA̱n, majìn‑na̱ nga ya̱ sìngásòn‑ko̱o ini̱ma̱ chꞌo‑la̱ nei̱í.
\v 21 Mìkiì ndaà tjín, kꞌe̱ nga jye ꞌyò vino xi tsꞌe̱ Jesús, xi otíxoma‑ná, i̱kjoàn sꞌio̱o xi tsꞌe̱ ini̱ma̱ chꞌo‑la̱ nei̱í. Ti̱koa̱á mìkiì ndaà tjín, kꞌe̱ nga jye bichioò i̱nchra̱jín xi tsꞌe̱ Jesús, i̱kjoàn bichioò xi tsꞌe̱ ini̱ma̱ chꞌo‑la̱ nei̱í.
\v 22 ¿A xi mejèn‑nò si̱kjàn‑là Na̱ꞌèn‑ná nga kàtachi̱ni̱? ¿A ìsa̱á tjín‑nò ngaꞌñó mì kꞌoa̱‑ne Nainá?
\s Jè ki̱nchátsjiaá ítjoán kjo̱ndaà tsꞌe̱ xi̱ta̱ xi kjꞌei̱í
\p
\v 23 Tsò jñà xi̱ta̱: “Tjíꞌnde‑né ni̱ta̱ mé xi sꞌe̱én.” Kixi̱í kjoa̱ tjíꞌnde‑né, ta̱nga mìtsà ngatsꞌiì kjoa̱ nga ndaà tjín. Tjíꞌnde‑né ni̱ta̱ mé kjoa̱ xi sꞌe̱én, ta̱nga mìtsà ngatsꞌiì kjoa̱ tsjá‑ná ngaꞌñó.
\v 24 Mìtsà tà kjo̱ndaà tsa̱jòn binchaàtsjioò ítjòn, jè ti̱nchátsjioò ítjòn kjo̱ndaà tsꞌe̱ xi̱ta̱ xi kjꞌei̱í.
\p
\v 25 Maá chi̱ne̱e ni̱ta̱ mé yijo xi satíjna ya̱ ñánda biyaà cho̱. Kì kiì chjinanguio ñánda jꞌiì‑ne mé‑ne nga mì chꞌo ko̱ma‑la̱ kjo̱hítsjeèn‑nò.
\v 26 Nga tsꞌe̱é Na̱ꞌèn‑ná jè nangui ko̱ ngatsꞌiì tsojmì xi tjín‑la̱.
\p
\v 27 Tsà jngoò xi̱ta̱ xi mìkiì mokjeiín‑la̱ ꞌén‑la̱ Nainá, ki̱chja̱‑nò nga ki̱chiko̱o, tsà mejèn‑nò nga onguió, chji̱ne̱e yije‑nò xi tsjá‑nò. Kì mé xi chjinanguio nga mì chꞌo ko̱ma‑la̱ kjo̱hítsjeèn‑nò.
\v 28 Tsà jngoò xi̱ta̱ xi ki̱tso̱‑nò: “Jñà tsojmì koi, ya̱á kisinchaàtꞌaà‑la̱ xkósòn.” Jè kjoa̱‑la̱ xi̱ta̱ xi o̱kitsò‑nò, kì kiì chine, mé‑ne nga mì chꞌo ko̱ma‑la̱ kjo̱hítsjeèn‑la̱.
\v 29 Mìtsà kjo̱hítsjeèn tsa̱jòn xi tìxan‑nò, tsꞌe̱é xi̱ta̱ xi o̱kitsò.
\p Ta̱nga tsà tjín iꞌnga xi̱ta̱ xi sko̱nangui nga ki̱tso̱: “¿Mé‑ne mì tjíꞌnde‑na nga sꞌiaàn ni̱ta̱ mé kjoa̱ xi mejèn‑na nga ta koi kjoa̱‑la̱ nga mì chꞌo ko̱ma‑la̱ kjo̱hítsjeèn‑la̱ xi̱ta̱ xi kjꞌei̱í?
\v 30 ꞌA̱n, tsà tsjaà‑la̱ kjo̱ndaà Nainá i̱tꞌaà tsꞌe̱ tsojmì xi kíne̱e, mìkiì ndaà tjín tsà chꞌo ki̱tso̱‑la̱ xi̱ta̱ jñà tsojmì xi jye kàtsjaà‑la̱ kjo̱ndaà Nainá.”
\v 31 Ta̱nga jñò, kꞌe̱ nga bichioò ko̱ tsà ꞌyò, ni̱ta̱ mé kjoa̱ xi ꞌnè, kꞌoa̱á sꞌín tꞌe̱en nga jeya kàtìjna Nainá.
\v 32 Kì jé binchaàtsji‑là jñà xi̱ta̱ judío, ko̱ xi mìtsà xi̱ta̱ judío, ko̱ jñà xi̱ta̱ na̱xa̱ndá‑la̱ Nainá.
\v 33 ꞌA̱n, kꞌoa̱á sꞌín sꞌiaàn yije koni sꞌín sasén‑la̱ xi̱ta̱ xi kjꞌei̱í. Mìtsà jè otsjià ítjoàn xi kjo̱ndaà tsꞌa̱n, jè otsjià ítjoàn kjo̱ndaà tsꞌe̱ xi̱ta̱ xi kjꞌei̱í mé‑ne nga ki̱tjokàjiìn‑ne kjo̱ꞌin.
\c 11
\p
\v 1 Koni sꞌín sꞌiaàn ꞌa̱n nga kjinguì‑la̱ Cristo, kꞌoa̱ ti̱sꞌín chjínguì‑ná.
\s Kó sꞌín skoe̱xkón xꞌi̱n‑la̱ jñà íchjín kꞌe̱ nga chja̱tꞌaà‑la̱ Nainá
\p
\v 2 Ndí ꞌndsè ko̱ tichjaá, ndaà ꞌnè‑nò nga nìkítsjeèn i̱tꞌaà tsꞌa̱n ngatsꞌiì kjoa̱ xi sꞌiaàn; ti̱koa̱ nìkitasòn kjo̱tíxoma xi ꞌa̱n kisìkatoya‑nò.
\v 3 Ta̱nga mejèn‑na nga kàtasijiìn‑nò nga jngoò ìjngoò xi̱ta̱ xꞌi̱n, jè Cristo xi sko̱‑la̱ ma, ko̱ jè chjo̱ón, jè xi̱ta̱ xꞌi̱n xi sko̱‑la̱ ma, koni jè Cristo, jè Nainá xi sko̱‑la̱ ma.
\v 4 Tsà jngoò xi̱ta̱ xꞌi̱n xi tíjtsa sko̱ kꞌe̱ nga chja̱tꞌaà‑la̱ Nainá, o kꞌe̱ nga chja̱ya ꞌén‑la̱ Nainá, mìkiì beèxkón Cristo nga jè tíjna sko̱‑la̱.
\v 5 Ta̱nga tsà jngoò chjo̱ón, tsà mìkiì bíjtsa sko̱ kꞌe̱ nga chja̱tꞌaà‑la̱ Nainá, o kꞌe̱ nga chja̱ya ꞌén‑la̱ Nainá, mìkiì beèxkón xꞌi̱n‑la̱ nga jè tíjna sko̱‑la̱. Kꞌoa̱á ngaya‑la̱ koni tsà kisijno‑la̱.
\v 6 Tsà jngoò chjo̱ón xi majìn‑la̱ bíjtsa sko̱, ti̱koa̱á‑ne kàtasijno‑la̱ tsja̱ sko̱. Ko̱ tsà masobà‑la̱ nga sijno‑la̱, kàtíjtsa sko̱.
\v 7 Jè xi̱ta̱ xꞌi̱n, mìkiì tjíꞌnde nga ki̱ìjtsa sko̱, nga kꞌoa̱á sꞌín ꞌya‑la̱ koni Nainá, ko̱ i̱tꞌaà tsꞌe̱ xi̱ta̱ xꞌi̱n, ꞌyaá‑la̱ kjoa̱jeya‑la̱ Nainá; ta̱nga i̱tꞌaà tsꞌe̱ chjo̱ón ꞌyaá‑la̱ kjoa̱jeya‑la̱ xꞌi̱n‑la̱.
\v 8 Jè xꞌi̱n, mìtsà ya̱ itjokàtꞌaà‑ne tsꞌe̱ chjo̱ón; jè chjo̱ón xi i̱tꞌaà tsꞌe̱ xi̱ta̱ xꞌi̱n itjokàtꞌaà‑ne.
\v 9 Jè xi̱ta̱ xꞌi̱n, mìtsà kjoa̱ tsꞌe̱ chjo̱ón kisindaà‑ne; ta̱nga jè chjo̱ón, kjoa̱ tsꞌe̱ xꞌi̱ín kisindaà‑ne.
\v 10 Koií kjoa̱‑la̱ jè chjo̱ón tjínè‑la̱ nga ki̱ìjtsa sko̱, seña‑né nga beèxkón xꞌi̱n‑la̱, mé‑ne nga ti̱koa̱ skoe̱‑ne jñà àkja̱le̱.
\v 11 Ta̱nga koni sꞌín tjíndaà‑la̱ Na̱ꞌèn‑ná, tsà tsjìn chjo̱ón, mìkiì tíjna xꞌi̱n; ko̱ tsà tsjìn xꞌi̱n, mìkiì tíjna chjo̱ón.
\v 12 Koni sꞌín komà nga jè chjo̱ón, i̱tꞌaà tsꞌe̱ xꞌi̱ín kisindaà‑ne; ti̱koa̱á jè xꞌi̱n, i̱tꞌaà tsꞌe̱ chjo̱ón tsꞌiìn. Ta̱nga i̱tꞌaà tsꞌe̱ Nainá nchrobá yije‑ne.
\p
\v 13 Jñò, ndaà ti̱kítsjeèn: ¿A ndaà tjín tsà mìkiì tíjtsa sko̱ jñà íchjín kꞌe̱ nga chja̱tꞌaà‑la̱ Nainá?
\v 14 Ti̱jé‑ne i̱sòꞌnde, béno̱jmíya‑ná nga kjoa̱sobà‑né kꞌe̱ nga jè xi̱ta̱ xꞌi̱n síndojò tsja̱ sko̱.
\v 15 Ta̱nga ndaà tsejèn kꞌe̱ nga jngoò chjo̱ón xi ndojò kjoàn tsja̱ sko̱. Kjoa̱jeya tsꞌe̱‑né. Koií xá kitsꞌiì‑la̱ tsja̱‑la̱ nga ndojò kjoàn, mé‑ne nga ki̱ìjtsa‑ne sko̱ koni tsà payo̱.
\v 16 Tsà tjín xi̱ta̱ xi mìkiì tíjngoò ikon koni bixón‑je̱n, kꞌoa̱á sꞌín kàtasijiìn‑la̱, ngaje̱n ko̱ na̱xa̱ndá‑la̱ Cristo, nguì kꞌoa̱á sꞌín ꞌnè‑je̱n, tsjìn xi kjꞌei̱í sꞌín.
\s Kjoa̱ xi mìkiì ndaà tjín kꞌe̱ nga bichiaá koni sꞌín tsakóya Cristo
\p
\v 17 Nga tìkjiì ìsa̱‑nò, mìkiì ndaà síkítsa̱jna‑nò, koií kjoa̱‑la̱ nga mìkiì ndaà titsa̱ꞌnè kꞌe̱ nga maxkóya; chꞌo titsa̱ꞌnè.
\v 18 Jè kjoa̱ xi tíjna ítjòn i̱tꞌaà tsa̱jòn, kꞌoa̱á sꞌín kiꞌnchrè, jñò xi na̱xa̱ndá‑la̱ Cristo ꞌmì‑nò, kꞌe̱ nga maxkóya, jò xó ya maà. Mejèn tsà mokjeiín‑na tsà koií na̱chrjein‑la̱ tsà kꞌoa̱á sꞌín titsa̱ꞌnè.
\v 19 Ta xó kꞌoa̱á‑la ko̱matꞌin‑nò nga sꞌe̱é xi̱ta̱ xinguio̱o xi si̱ìjòya‑nò, mé‑ne nga jcha̱‑la̱ yá‑ne xi tjín‑la̱ o̱kixi̱.
\v 20 Kꞌe̱ nga maxkóya nga bichioò, koni sꞌín tsakóya Cristo, mìtsà kixi̱ kjoa̱ nga jè nìkítsjeèn‑yaà koni sꞌín komàtꞌin Na̱ꞌèn‑ná kꞌe̱ nga kꞌen.
\v 21 Kꞌe̱ nga bichioò, tjín iꞌnga xi̱ta̱ xi ítjòn kjèn tsojmì xi bijchóko̱; mìkiì koña‑la̱ xíkjín nga tsjá i̱tsé‑la̱; skanda tjín xi machꞌi̱. Ta̱nga jñà xi̱ta̱ xi iꞌnga, i̱ma̱á ijò‑la̱ nga mìkiì tsjá i̱tsé‑la̱.
\v 22 Jñò, ¿a tsjìn‑nò niꞌya ñánda nga bichioò ko̱ nga ꞌyò? ¿Mé‑ne nachrjekàngui‑nò xi̱ta̱ na̱xa̱ndá‑la̱ Cristo koa̱ nìsobà‑là xi̱ta̱ i̱ma̱ xi tsjìn‑la̱ tsojmì xi kine? Kꞌe̱ nga kꞌoa̱sꞌín ꞌnè, ¿kó sꞌín xán‑nò? ¿A ndaà síkítsa̱jna‑nò? Majìn, mìkiì ndaà síkítsa̱jna‑nò.
\s Kꞌe̱ nga jè Na̱ꞌèn‑ná tsakjèn‑ko̱ xi̱ta̱‑la̱ kꞌe̱ nga kòjñò
\r (Mateo 26:26‑29; Marcos 14:22‑25; Lucas 22:14‑20)
\p
\v 23 \fig Jesus eating last supper with disciples - 33% 1COR 11:23-25|62-LB00320B.TIF|col|1COR 11:23-25||1COR 11:23-25|1CO 11.23\fig*Koni sꞌín tsakóya‑na Na̱ꞌèn‑ná, ti koií‑ne xi ꞌa̱n tsakoòya‑nò. Jè ni̱tje̱n kꞌe̱ nga Na̱ꞌèn‑ná Jesús kitsobàꞌñó xi̱ta̱, kiskoé i̱nchra̱jín,
\v 24 kitsjaà‑la̱ kjo̱ndaà Nainá, i̱kjoàn kisìxkoa̱ya, kitsò: “Chjoé, jè‑né xi yijo‑na̱ nga tìtsjaà kjo̱tjò nga ki̱yá xi kjo̱ndaà tsa̱jòn. Kꞌoa̱ ti̱ sꞌín tꞌe̱en nga ti̱xkoa̱ya i̱nchra̱jín, mé‑ne nga si̱kítsjeèn‑nò i̱tꞌaà tsꞌa̱n.”
\v 25 Kꞌoa̱á ti̱sꞌín kisꞌiìn kꞌe̱ nga jye tsakjèn, kiskoé chi̱tsín, kitsò: “Vino xi tjíya chi̱tsín jè, jè jní‑na xi síkixi̱ya kjoa̱ xi̱tse̱ xi bìndaàjiìn‑ko̱‑nò. Jñò, kꞌe̱ nga ìjngoò ìjngoò kꞌa sꞌio̱o, kꞌoa̱á sꞌín tꞌe̱en mé‑ne nga si̱kítsjeèn‑nò i̱tꞌaà tsꞌa̱n.”
\v 26 Kꞌe̱ nga ìjngoò ìjngoò kꞌa ki̱chioò i̱nchra̱jín jè, koa̱ sꞌio̱ya vino chi̱tsín jè, i̱tꞌaà tsꞌe̱é kjoa̱biyaà‑la̱ Na̱ꞌèn‑ná ki̱nókjoa̱ya, skanda kꞌe̱ nga kjoi̱í ìjngoò kꞌa Cristo.
\s Mìkiì ma ta̱xki̱ bichikoa̱á Na̱ꞌèn‑ná
\p
\v 27 Ni̱ta̱ yá xi̱ta̱‑ne xi ko̱kje̱n i̱nchra̱jín jè, o xi skoíya chi̱tsín tsꞌe̱ Na̱ꞌèn‑ná, tsà mìkiì skoe̱xkón kꞌe̱ nga ko̱kje̱n, jé tíhótsji i̱tꞌaà tsꞌe̱ Na̱ꞌèn‑ná nga tíhochrjengui yijo‑la̱ ko̱ jní‑la̱.
\v 28 Koií kjoa̱‑la̱, ítjòn ndaà ti̱kítsjeèn i̱jiìn ini̱ma̱‑nò kósꞌín titsa̱jnako̱o Nainá ko̱ xi̱ta̱ xinguio̱o. I̱skan ti̱chioò i̱nchra̱jín koa̱ tꞌio̱ya chi̱tsín tsꞌe̱ Na̱ꞌèn‑ná.
\v 29 Tsà yá xi̱ta̱ xi ko̱kje̱n i̱nchra̱jín koa̱ skoí vino xi tjíya chi̱tsín, tsà mìkiì si̱ìkítsjeèn nga jè yijo‑la̱ Na̱ꞌèn‑ná, xi̱ta̱ jè, kjo̱ꞌiín tíbínè‑la̱ yijo‑la̱.
\v 30 Kꞌoa̱á ma‑ne kjìn xi̱ta̱ xinguio̱o xi chꞌin bítꞌaà‑la̱ koa̱ tjín xi indaàkjoa̱ títsa̱jna, skanda jye kjò kjìn biyaà.
\v 31 Tsà ndaà si̱kítsjeén kósꞌín titsa̱jnakoa̱á Nainá ko̱ xi̱ta̱ xinguia̱á, Na̱ꞌèn‑ná mìkiì kjo̱ꞌin tsjá‑ná.
\v 32 Ta̱nga tsà jè Na̱ꞌèn‑ná tsjá‑ná kjo̱ꞌin, koi‑né nga mejèn‑la̱ síkixi̱ya‑ná mé‑ne mìkiì ko̱ko̱tꞌaà‑ná kjo̱ꞌin xi mìkiì fehetꞌaà ni̱ta̱ kjé‑ne xi tjoé‑la̱ jñà xi̱ta̱ i̱sòꞌnde xi mìkiì beèxkón Nainá.
\p
\v 33 Kꞌoa̱á ma‑ne jñò ndí ꞌndsè kꞌe̱ nga maxkóya nga bichioò, chíñakjoa̱‑là xinguio̱o.
\v 34 Tsà tjín iꞌnga xi ꞌñó ijò‑la̱, ti̱chioò niꞌya‑nò, mé‑ne kꞌe̱ nga ko̱xkóya mì kjo̱ꞌin tsjá‑nò Na̱ꞌèn‑ná. Jñà kjoa̱ xi iꞌnga xi tjín ìsa̱‑nò, kꞌe̱ kìjchokon‑nò kíndaàjñaá.
\c 12
\s Kó sꞌín tjín kjoa̱ chji̱ne̱ xi tsjá Ini̱ma̱ Tsjeè‑la̱ Nainá xi kjo̱ndaà tsꞌe̱ na̱xa̱ndá‑la̱
\p
\v 1 Ndí ꞌndsè ko̱ tichjaá, ꞌa̱n mejèn‑na kàtasijiìn‑nò jñà kjoa̱ chji̱ne̱ xi tsjá Ini̱ma̱ Tsjeè‑la̱ Nainá.
\p
\v 2 Jñò, ndaà tíjiìn‑nò kꞌe̱ nga ti̱kjꞌeè mokjeiín‑nò ꞌén‑la̱ Nainá, ya̱á tsanguìtꞌaà‑là xkósòn xi mìkiì ma chja̱ nga xìn ndi̱yá kiìko̱‑nò nga mìtsà kixi̱ kjoa̱ nga Nainá.
\v 3 Kꞌoa̱á xan‑nò, ni̱yá xi̱ta̱ xi ko̱ma ki̱tso̱‑la̱ Jesús: “¡Chꞌo kàtamatꞌin!”, tsà i̱tꞌaà tsꞌe̱ Ini̱ma̱ Tsjeè‑la̱ Nainá tíchja̱. Ti̱koa̱á tsà mìtsà ngaꞌñó tsꞌe̱ Ini̱ma̱ Tsjeè‑la̱ Nainá tíchja̱, mìkiì ko̱ma ki̱tso̱‑la̱: “¡Ji̱‑né Jesús xi otìxomai!”
\p
\v 4 Ya̱ i̱jiìn na̱xa̱ndá‑la̱ Nainá, kjìn ska̱ya kjoa̱ chji̱ne̱ tjín kjoa̱ tsꞌe̱ xá xi síkitasòn xi̱ta̱, ta̱nga jè xi tsjá kjoa̱ chji̱ne̱, ti̱jè‑ne Ini̱ma̱ Tsjeè‑la̱ Nainá.
\v 5 Jñà xi̱ta̱, kjìn ska̱ya xá tjín‑la̱ nga si̱ìxá‑la̱ Na̱ꞌèn‑ná, ta̱nga ti̱jè‑ne Na̱ꞌèn‑ná xi maxá‑la̱.
\v 6 Kjìn ska̱ya ngaꞌñó tjín kósꞌín maxá, ta̱nga ti̱jè‑ne ngaꞌñó‑la̱ Nainá xi síxájiìn‑la̱ ngatsꞌiì xi̱ta̱.
\v 7 Nga jngoò ìjngoò xi̱ta̱, tjoé‑la̱ jngoò kjoa̱ chji̱ne̱ xi okó nga ya̱á tíjnajiìn ini̱ma̱‑la̱ Ini̱ma̱ Tsjeè‑la̱ Nainá mé‑ne nga ngatsꞌiì xi̱ta̱ na̱xa̱ndá‑la̱ Nainá ko̱chjeén‑la̱ kjo̱ndaà xi tjoé‑la̱.
\v 8 Xi i̱tꞌaà tsꞌe̱ Ini̱ma̱ Tsjeè‑la̱ Nainá tjín xi̱ta̱ xi ꞌbiì‑la̱ ꞌén xi tjín‑la̱ kjo̱hítsjeèn; koa̱ tjín iꞌnga xi ꞌbiì‑la̱ ꞌén xi tjín‑la̱ kjoa̱ chji̱ne̱, nga ti̱jè‑ne Ini̱ma̱ Tsjeè‑la̱ Nainá tsjá.
\v 9 Tjín xi tjoé‑la̱ kjoa̱chji̱ne̱ nga ndaà mokjeiín‑la̱ nga ti̱jè‑ne Ini̱ma̱ Tsjeè‑la̱ Nainá tsjá‑la̱, ti̱koa̱á tjín xi tjoé‑la̱ kjoa̱chji̱ne̱ nga síndaà‑ne xi̱ta̱ xi xkꞌén, nga ti̱jè‑ne Ini̱ma̱ Tsjeè‑la̱ Nainá tsjá‑la̱.
\v 10 Tjín xi tjoé‑la̱ kjoa̱chji̱ne̱ nga ma‑la̱ sꞌín kjo̱xkón xi ndaà tjín, ko̱ xi ma‑la̱ chja̱ ngajo‑la̱ Nainá, ko̱ xi machi̱ya‑la̱ mé ini̱ma̱ xi tísíxájiìn ini̱ma̱‑la̱ xi̱ta̱ xi chja̱. Ko̱ tjín xi tjoé‑la̱ nga ma‑la̱ chja̱ ꞌén xi kjꞌei̱í tsò xi mì yá xi̱ta̱ fìya‑la̱, ti̱koa̱ tjín xi ma‑la̱ síkatoya ꞌén xi kjꞌei̱í tsò xi mì yá xi̱ta̱ fìya‑la̱.
\v 11 Ti̱jè ta jngoó‑ne Ini̱ma̱ Tsjeè‑la̱ Nainá xi síxá i̱tꞌaà tsꞌe̱ ngatsꞌiì kjoa̱ koi nga síkaꞌbí‑la̱ nga jngoò ìjngoò xi̱ta̱ kjoa̱chji̱ne̱ xi jè mejèn‑la̱ nga tsjá‑la̱.
\p
\v 12 Yijo tsa̱ján, kjìn jchán ska̱ya tjín‑la̱; ta̱nga koni sꞌín tíkjoò, ta̱ jngoò ma‑ne yijo. Na̱xa̱ndá‑la̱ Cristo, kꞌoa̱á ti̱sꞌín tjín, ta jngoò ma‑ne.
\v 13 Jñà xi xi̱ta̱ judío ko̱ xi mìtsà xi̱ta̱ judío, xi xi̱ta̱ chi̱ꞌnda títsa̱jna ko̱ xi̱ta̱ xi títsa̱jnandei̱í ta jngoò ma‑ne. Ngatsꞌiaá jñá, tà ngásòn komaá bautizar i̱tꞌaà tsꞌe̱ xi ti̱jè‑ne Ini̱ma̱ Tsjeè‑la̱ Nainá nga jngoò na̱xa̱ndá‑la̱ Nainá ko̱maá koni tsà jngoò yijo. Nga jngoò ìjngoaá, Nainá kitsjaà‑ná xi ti̱jè‑ne Ini̱ma̱ Tsjeè‑la̱.
\p
\v 14 Jè yijo‑ná, mìtsà tà jngoò ska̱ya tjín‑ne; kjìn jchán ska̱ya tíkjoòya.
\v 15 Tsà jè ndso̱koaá ki̱tso̱: “ꞌA̱n, mìtsà tsja xi̱ta̱ ma, mìtsà ya̱ chjà‑na jè yijo.” Mìtsà koi kjoa̱‑la̱ nga o̱ki̱tso̱ nga mì ya̱ chja̱‑ne yijo.
\v 16 Tsà jñà líká ki̱tso̱: “ꞌA̱n, mìtsà xko̱n xi̱ta̱ ma, mìtsà ya̱ chjà‑na jè yijo.” Mìtsà koi kjoa̱‑la̱ nga o̱ki̱tso̱ nga mì ya̱ chja̱‑ne yijo.
\v 17 Tsà kóho̱kji yijo‑ná, tsà nguì xkoaán ko̱ma, ¿kósꞌín ki̱náꞌya‑ná? Tsà jè yijo‑ná, tsà nguì líká ko̱ma, ¿kósꞌín ki̱jne̱‑ná?
\v 18 Ta̱nga Nainá nga jngoò ìjngoò ska̱ya yijo‑ná, ya̱á kisìkítsa̱jna i̱ꞌnde‑la̱ yijo‑ná ñánda nga jè kjòmejèn‑la̱.
\v 19 Yijo‑ná tsà tà jngoò sko̱ya ko̱ma, mì‑la tsà yijo xi nguì tíjngoò.
\v 20 Kixi̱í kjoa̱ na̱sꞌín kjìn ska̱ya tíkjoòya yijo‑ná, ta̱nga ta̱jngoò ma‑ne.
\p
\v 21 Jñà xkoaán mìkiì ko̱ma ki̱tso̱‑la̱ jñà ndsa̱á: “Mìkiì mochjeén‑na̱.” Jè skoaá ti̱koa̱á mìkiì ko̱ma ki̱tso̱‑la̱ jñà ndso̱koaá: “Mìkiì mochjeén‑na̱.”
\v 22 Ta̱nga i̱tꞌaà tsꞌe̱ yijo‑ná, tjín‑né xi ꞌmì‑lá nga chiba ngaꞌñó tjín‑la̱ ta̱nga ìsa̱á ndaà mochjeén.
\v 23 I̱tꞌaà tsꞌe̱ yijo‑ná xi ꞌmì‑lá nga mìkiì ndaà tsejèn, jñà‑né xi nìkakjá nikje mé‑ne nga ìsa̱ ndaà ko̱tsejèn‑ne. Bíjtsaꞌma‑né jè yijo‑ná, jñà xi mìkiì tjíꞌnde‑la̱ nga jcha̱‑la̱.
\v 24 Mìkiì mochjeén nga sijtsaꞌma yijo‑ná xi tsejèn. Nainá jye kꞌoa̱sꞌín tsibíndaà nga ìsa̱ ndaà jcha̱xkón jè xi ꞌmì‑lá nga ìsa̱ chiba chjí‑la̱,
\v 25 mé‑ne nga mì ko̱jòya‑ne. Ta̱ sa̱á nga jngoò ìjngoò ska̱ya kàtasíkinda̱ xíkjín.
\v 26 Tsà tjín jngoò ska̱ya yijo‑ná ñánda ijò ma, okꞌín yije‑la̱ xíkjín kóho̱kji nga ma ijò. Koa̱ tsà tjín ñánda ndaà tíyaxkón, ndaá sꞌe yije‑la̱ kóho̱kji yijo.
\p
\v 27 Jñò, kꞌoa̱á ngaya‑la̱ koni yijo‑la̱ Cristo. Katjín, katjín xá xi kitjoé‑nò ya̱ i̱jiìn na̱xa̱ndá‑la̱ Nainá.
\v 28 Nainá kꞌoa̱á sꞌín kiskoòsòn‑la̱ mé xá xi sꞌi̱in xi̱ta̱: jñà títsa̱jna ítjòn xi̱ta̱ xi bíxáya‑la̱ Nainá; xi ma‑ne jò, xi̱ta̱ xi chja̱ ngajo‑la̱ Nainá; xi ma‑ne jàn, xi̱ta̱ xi okóya ꞌén‑la̱ Nainá. Ti̱koa̱ tjín xi ma‑la̱ sꞌín kjo̱xkón xi ndaà tjín. Ko̱ tjín xi ma‑la̱ síndaà‑ne xi̱ta̱ xi xkꞌén; tjín xi ma‑la̱ síchjátꞌaà; tjín xi otíxoma mé kjoa̱ xi ko̱ma; ko̱ tjín xi chja̱ ꞌén xi kjꞌei̱í tsò xi mì yá xi̱ta̱ fìya‑la̱.
\v 29 Mìtsà ngatsꞌiì nga ma bíxáya‑la̱ Nainá. Mìtsà ngatsꞌiì nga Nainá chja̱ ngajo‑la̱. Mìtsà ngatsꞌiì nga ma‑la̱ okóya ꞌén‑la̱ Nainá. Mìtsà ngatsꞌiì nga ma‑la̱ sꞌín kjo̱xkón xi ndaà tjín.
\v 30 Ko̱ mìtsà ngatsꞌiì nga ma‑la̱ síndaà‑ne xi̱ta̱ xkꞌén. Mìtsà ngatsꞌiì nga ma‑la̱ chja̱ ꞌén xi kjꞌei̱í tsò xi mì yá xi̱ta̱ fìya‑la̱. Mìtsà ngatsꞌiì ma‑la̱ síkatoya ꞌén xi kjꞌei̱í tsò xi mì yá xi̱ta̱ fìya‑la̱.
\v 31 Ta̱nga jñò, mochjeén‑né nga ti̱nchátsjioò jñà kjoa̱chji̱ne̱ xi ìsa̱ ndaà tjín.
\p Ta̱nga i̱ꞌndei̱ ꞌa̱án kokoò‑nò jngoò ndi̱yá xi ìsa̱ ndaà tjín kó sꞌín si̱jchá yijo‑nò.
\c 13
\s I̱tꞌaà tsꞌe̱ kjoa̱tjòcha
\p
\v 1 ꞌA̱n, tsà ma‑na chjà jñà ꞌén xi kjꞌei̱í tsò xi chja̱ xi̱ta̱ na̱sꞌín jñà ꞌén xi chja̱ àkja̱le̱, ta̱nga tsà tsjìn‑na kjoa̱tjòcha, nìmé chjí‑la̱; kꞌoa̱á ngaya‑na koni jngoò ki̱cha̱ xi ꞌñó one, o koni jñà ki̱cha̱ tsji̱n xi chꞌo one kꞌe̱ nga kaàkjoò.
\v 2 Tsà tsjìn‑na kjoa̱tjòcha, ni̱mé chjí‑na na̱sꞌín ma‑na chjà ngajo‑la̱ Nainá, na̱sꞌín machi̱ya yije‑na kjoa̱ xi tjíꞌma‑la̱ Nainá; na̱sꞌín ma yije‑na kjoa̱ chji̱ne̱, na̱sꞌín ndaà mokjeiín yije‑na i̱tꞌaà tsꞌe̱ Nainá, skanda ma‑na síkjaníyá‑la̱ nindoò.
\v 3 Tsà sikaꞌbiá yije tsojmì xi tjín‑na nga ko̱kje̱n xi̱ta̱ i̱ma̱, koa̱ tsjaà kjo̱tjoà yijo‑na̱ nga ki̱ti̱ xi kjo̱ndaà tsꞌe̱ xi̱ta̱ xi kjꞌei̱í, ta̱nga tsà tsjìn‑na kjoa̱tjòcha, ni̱mé sìkijne.
\p
\v 4 Jè xi̱ta̱ xi tjín‑la̱ kjoa̱tjòcha, tjín‑la̱ kjoa̱tsetakòn ni̱ta̱ mé kjoa̱‑ne; tjín‑la̱ kjo̱ndaà; mìkiì maxìtakòn; mìtsà ꞌén ꞌnga chja̱; ko̱ mìtsà ti̱jè ndaà síkíjna‑ne yijo‑la̱;
\v 5 mìtsà ta̱xki̱ sꞌín; mìtsà tà kjo̱ndaà tsꞌe̱ ótsji; mìkiì ta̱xki̱ majti‑la̱; ni̱mé kjoa̱ bíngui takòn;
\v 6 mìtsà matsja‑la̱ i̱tꞌaà tsꞌe̱ kjoa̱ xi chꞌo tjín, tsꞌe̱é kjoa̱ kixi̱ xi matsja‑la̱.
\v 7 Jè xi tjín‑la̱ kjoa̱tjòcha, síkjeiín yije‑la̱ ni̱ta̱ mé kjoa̱‑ne, mokjeiín yije‑la̱, koña yije‑la̱, chíkjoa̱ko̱ yije‑la̱ ngatsꞌiì kjoa̱.
\p
\v 8 Jè kjoa̱tjòcha mìkiì kjoe̱hetꞌaà. Ta̱nga ki̱jchò na̱chrjein nga mì ti̱ yá xi ki̱chja̱ ngajo‑la̱ Nainá, nga mì ti̱ yá xi ki̱chja̱‑ne ꞌén xi kjꞌei̱í tsò xi mì yá xi̱ta̱ fìya‑la̱ ko̱ nga mì ti̱ yá xi tjoé‑la̱ kjo̱hítsjeèn xi tjíꞌma‑la̱ Nainá.
\v 9 Nga kjꞌeè tsà nguì ndaà tíjiìn yije‑ná kjo̱hítsjeèn xi tjíꞌma‑la̱ Nainá, ko̱ kjꞌeè tsà nguì ndaà nokjoà ngajo‑lá Nainá.
\v 10 Ta̱nga kꞌe̱ nga ki̱jchò na̱chrjein nga kjoi̱í xi ni̱mé chijatꞌaà‑la̱, ya̱á kjoe̱hetꞌaà jñà kjoa̱ xi ta chiba machi̱ya‑ná.
\p
\v 11 Kꞌe̱ nga sa̱ chítia, kꞌoa̱á sꞌín kichjà koni chja̱ i̱xti, kꞌoa̱sꞌín kisìkítsjeèn koni sꞌín síkítsjeèn i̱xti, kꞌoa̱sꞌín kiskoòsòn‑la̱ koni i̱xti. Ta̱nga kꞌe̱ nga jye kòjchínga, kisìkíjna‑ná kjoa̱ tsꞌe̱ i̱xti.
\v 12 I̱ꞌndei̱, ta kꞌoa̱á sꞌín ꞌyaá Nainá koni tsà chi̱tsín jmà chítsejèn‑yaá nga mìkiì ndaà tsejèn‑ná. Ta̱nga ki̱jchò na̱chrjein kꞌe̱ nga ndaà ko̱tsejèn‑ná nga chíꞌaán Nainá. I̱ꞌndei̱ ta̱ chibaá machi̱ya‑na, ta̱nga ki̱jchò na̱chrjein nga ndaà ko̱chi̱ya‑na koni sꞌín beèxkon‑na Nainá.
\p
\v 13 Ján kjoa̱ tjín xi mìkiì kjoe̱hetꞌaà, jngoò kjoa̱ nga mokjeiín‑ná i̱tꞌaà tsꞌe̱ Nainá, ìjngoò nga chiñà‑lá xi tjoé‑ná, ìjngoò nga sꞌe̱‑ná kjoa̱tjòcha. Jñà ingajàn kjoa̱ koi, jè kjoa̱tjòcha xi ìsa̱ ꞌñó chjí‑la̱.
\c 14
\s Jè xi ma‑la̱ chja̱ ꞌén xi kjꞌei̱í tsò
\p
\v 1 Jè kjoa̱tjòcha tanguítji̱ngui‑là; ti̱koa̱ mochjeén‑né nga ti̱nchátsjioò jñà kjoa̱chji̱ne̱ xi tsjá Ini̱ma̱ Tsjeè‑la̱ Nainá. Ko̱ jè xi ìsa̱ ꞌñó mochjeén nga ki̱nókjoa̱ ngajo‑là Nainá.
\v 2 Jngoò xi̱ta̱ xi kjꞌei̱í tsò ꞌén xi chja̱, mìtsà ta̱xki̱ xi̱ta̱ tíchja̱‑la̱; Nainá tíchja̱tꞌaà‑la̱. Nga̱ mì yá xi̱ta̱ fìya‑la̱ kó tsò ꞌén xi tíchja̱. Jñà ꞌén xi chja̱, tsꞌe̱é Ini̱ma̱ Tsjeè‑la̱ Nainá nga tíchja̱ꞌma‑né.
\v 3 Ta̱nga jè xi̱ta̱ xi chja̱ ngajo‑la̱ Nainá, jñà xi̱ta̱ na̱xa̱ndá‑la̱ Nainá chja̱jiìn‑la̱, mé‑ne nga ìsa̱ ndaà ko̱ma‑la̱, ìsa̱ ndaà ko̱ꞌñójiìn‑ne kjo̱hítsjeèn‑la̱ koa̱ ìsa̱ ndaà si̱ìje takòn‑ne xi̱ta̱ na̱xa̱ndá‑la̱ Nainá.
\v 4 Jè xi̱ta̱ xi chja̱ ꞌén xi kjꞌei̱í tsò xi mì yá xi̱ta̱ fìya‑la̱, ti̱ yijo‑la̱á tsjá ngaꞌñó‑la̱. Ta̱nga jè xi chja̱ ngajo‑la̱ Nainá, jñà xi̱ta̱ na̱xa̱ndá‑la̱ Cristo tsjá‑la̱ ngaꞌñó.
\p
\v 5 ꞌA̱n, kꞌoa̱á sꞌín mejèn‑na tsà ngatsꞌioò ko̱ma‑nò ki̱nókjoa̱a ꞌén xi kjꞌei̱í tsò xi mì yá xi̱ta̱ fìya‑la̱. Ta̱nga ìsa̱á‑la ndaà tjín tsà ko̱ma‑nò ki̱nókjoa̱ ngajo‑là Nainá. Jè xi Nainá chja̱ ngajo‑la̱ ìsa̱á ꞌñó chjí‑la̱ mì kꞌoa̱‑ne koni jè xi chja̱ ꞌén xi kjꞌei̱í tsò. Ta jngoó‑la tsà tjín xi̱ta̱ xi ko̱ma‑la̱ si̱ìkatoya ꞌén xi kjꞌei̱í tsò mé‑ne ìsa̱ ndaà sꞌe̱‑la̱ ngaꞌñó xi̱ta̱ na̱xa̱ndá‑la̱ Cristo.
\p
\v 6 Ndí ꞌndsè ko̱ tichjaá kꞌoa̱á ngaya‑la̱ tsà ꞌa̱n mejèn‑na kjíkon‑nò, tsà kjꞌei̱í tsò ꞌén xi kichjàko̱‑nò xi mìkiì naꞌyà‑là, kósꞌín ko̱chjeén‑nò. Ta jé‑la tsà ꞌén‑la̱ Nainá sikíchi̱ya‑nò, tsà kèno̱jmí chiba‑nò kjo̱hítsjeèn xi ndaà tsò, tsà kichjàjiìn‑nò ꞌén kixi̱, ko̱ kokoòya‑nò ꞌén xi ndaà tsò.
\p
\v 7 Jñà chrjo‑la̱ música ko̱ níꞌñó xi tíhone tsà ngásòn kjo̱ne, ¿kósꞌín jcha̱‑la̱ ñá‑la̱á xi tíhone nga tà ngásòn tsò?
\v 8 Tsà jè chrjo trompeta‑la̱ xi̱ta̱ kjo̱jchán, tsà mìkiì ndaà ski̱ndàya, ¿yá xi̱ta̱ xi kítsa̱jnandaà nga kjoi̱ kjo̱jchán?
\v 9 Jñò, kꞌoa̱á ti̱sꞌín matꞌioòn tsà mìtsà ꞌén tsa̱jòn ki̱nókjoa̱a nga kji̱ya‑la̱ xi̱ta̱, ¿kó sꞌín ki̱náꞌya‑la̱ mé ꞌén xi titsa̱nokjoà? Tà i̱jiìn i̱sén‑la titsa̱nokjoà.
\v 10 Kjìn jchán sko̱ya ꞌén tjín nga tíjtsa i̱sòꞌnde, ta̱nga ngatsꞌiì ꞌén tjín‑la̱ kjo̱hítsjeèn kó tsòya‑ne nga jngoò ìjngoò sko̱ya.
\v 11 ꞌA̱n, tsà mìkiì fìya‑na kó tsò ꞌén xi tíchja̱ jngoò xi̱ta̱, xi̱ta̱ xìn nanguií ko̱ma‑na. Ko̱ jè xi̱ta̱ xi tíchja̱, kꞌoa̱á ti̱ ko̱ma‑la̱ i̱tꞌaà tsꞌa̱n koni xìn nanguií i̱ꞌnde‑na̱.
\v 12 Jñò, nga mejèn‑nò jñà kjoa̱chji̱ne̱ xi tsjá Ini̱ma̱ Tsjeè‑la̱ Nainá, mochjeén‑né nga ìsa̱ ndaà ti̱nchátsjioò jñà kjoa̱chji̱ne̱ xi ko̱ma ndaà si̱chjátꞌaà‑la̱ na̱xa̱ndá‑la̱ Cristo mé‑ne nga ìsa̱ tse ngaꞌñó sꞌe̱‑la̱.
\p
\v 13 Kꞌoa̱á ma‑ne jè xi̱ta̱ xi kjꞌei̱í tsò ꞌén xi chja̱ xi mì yá xi̱ta̱ fìya‑la̱, kàtasíjétꞌaà‑la̱ Nainá nga kàtatsjá‑la̱ kjoa̱chji̱ne̱ mé‑ne ko̱ma si̱ìkatoya‑ne ꞌén xi chja̱.
\v 14 ꞌA̱n, kꞌe̱ nga chjàtꞌaà‑la̱ Nainá nga kjꞌei̱í tsò ꞌén xi tìchjà xi mìkiì fìya‑na, tà jè tíchja̱ Ini̱ma̱ Tsjeè‑la̱ Nainá xi tíjnajiìn ini̱ma̱‑na̱. Ta̱nga jè kjo̱hítsjeèn‑na̱, ni̱mé kjo̱ndaà sa̱kò‑la̱ nga mìkiì fìya‑na kó sꞌín tìchjà.
\v 15 ꞌA̱n, ¿mé xi sꞌiaàn? Mochjeén‑né nga kichjàtꞌaà‑la̱ Nainá ꞌén xi bíjiìn ini̱ma̱‑na̱ Ini̱ma̱ Tsjeè‑la̱ Nainá. Ti̱koa̱á mochjeén‑né nga kichjàkoa̱a Nainá ꞌén xi ndaà fìya‑na. Kꞌe̱ nga seè, ti̱koa̱á mochjeén‑né nga seè sò xi bíjiìn ini̱ma̱‑na̱ Ini̱ma̱ Tsjeè‑la̱ Nainá. Ta̱nga ti̱koa̱á mochjeén nga seè sò xi ndaà fìya‑na.
\v 16 Kꞌe̱ nga jeya nìkíjni Nainá, tsà tà jñà ꞌén nokjoì xi bíjiìn ini̱ma̱‑lè Ini̱ma̱ Tsjeè‑la̱ Nainá, tsà kji̱ꞌnchré‑la̱ ꞌén‑lè jñà xi̱ta̱ xi mìkiì fìya‑la̱, mìkiì ko̱ma ki̱tso̱: “Kꞌoa̱á sꞌín kàtama”, nga mìkiì fìya‑la̱ kó tsò ꞌén xi nokjoì.
\v 17 O̱kixi̱‑né, kjo̱ndaà xi tìꞌbiì‑la̱ Nainá, ndaà tjín, ta̱nga jñà xi̱ta̱ xi iꞌnga, nì mé ngaꞌñó tísakó‑la̱ nga mìkiì fìya‑la̱.
\v 18 ꞌA̱n, tsjaà‑la̱ kjo̱ndaà Nainá nga ìsa̱á ndaà ma‑na chjà ꞌén xi mì yá xi̱ta̱ fìya‑la̱ mì kꞌoa̱‑ne koni jñò.
\v 19 Ta̱nga kꞌe̱ nga ya̱ tìjna̱jiìn‑la̱ xi̱ta̱ na̱xa̱ndá‑la̱ Cristo, ìsa̱á ndaà tjín tsà tà ꞌòn ꞌén kichjà xi tjín‑la̱ kjo̱hítsjeèn nga kokoòya‑la̱ xi̱ta̱, mì kꞌoa̱‑ne tsà te jmiì ꞌén kichjà xi kjꞌei̱í tsò xi mìkiì ꞌnchréya‑la̱ xi̱ta̱.
\p
\v 20 Ndí ꞌndsè ko̱ tichjaá, kì kꞌoa̱á sꞌín nìkítsjeèn koni i̱xti. Ta̱nga tsꞌe̱ kjoa̱ xi chꞌo tjín, kꞌoa̱á sꞌín tꞌe̱en koni i̱xti xi kjꞌeè ndaà machi̱ya‑la̱. Ta̱nga i̱tꞌaà tsꞌe̱ kjo̱hítsjeèn‑nò, kꞌoa̱á sꞌín tꞌe̱en koni xi̱ta̱ xi jye ndaà machi̱ya‑la̱.
\v 21 Xo̱jo̱n‑la̱ Nainá kꞌoa̱á sꞌín tíchja̱ nga tsò: “Nga kichjà‑la̱ na̱xa̱ndá‑na̱, xi̱ta̱ xìn nanguií sìkjeén xi kjꞌei̱í ꞌén chja̱ nga ko̱ma ki̱chja̱‑la̱. Ta̱nga na̱sꞌín kꞌoa̱sꞌín sꞌiaàn mìkiì kji̱ꞌnchréñijon‑na, tsò Na̱ꞌèn‑ná.”
\v 22 Kꞌe̱ nga nokjoá ꞌén xi kjꞌei̱í tsò xi mì yá xi̱ta̱ fìya‑la̱, kjo̱xkón okó‑la̱ Nainá jñà xi̱ta̱ xi mìkiì mokjeiín‑la̱, mìtsà tsꞌe̱ xi̱ta̱ xi mokjeiín‑la̱. Ta̱nga kꞌe̱ nga nokjoà ngajo‑lá Nainá, tsꞌe̱é xi̱ta̱ xi mokjeiín‑la̱, mìtsà tsꞌe̱ xi̱ta̱ xi mìkiì mokjeiín‑la̱.
\v 23 Jñà xi̱ta̱ na̱xa̱ndá‑la̱ Cristo kꞌe̱ nga maxkóya, tsà ngatsꞌiì nga kjꞌei̱í ꞌén ki̱chja̱ xi mì yá xi̱ta̱ fìya‑la̱, tsà kjoa̱hasꞌen jngoò xi̱ta̱ xi ta̱xki̱ xi̱ta̱ xi mìkiì mokjeiín‑la̱ ꞌén‑la̱ Nainá, ki̱tso̱‑né: “Jñá xi̱ta̱ koi, xi̱ta̱ ská‑né.”
\v 24 Ta̱nga tsà ngatsꞌioò nga ꞌén‑la̱ Nainá titsa̱nokjoáya ngajo‑lá, tsà kjoa̱hasꞌen jngoò xi ta̱xki̱ xi̱ta̱ xi mìkiì mokjeiín‑la̱ ꞌén‑la̱ Nainá, kꞌe̱ nga kji̱ꞌnchré‑nò, ko̱kjeiín‑la̱ ko̱ ko̱chi̱yaá‑la̱ nga xi̱ta̱ jé‑né.
\v 25 Jè kjoa̱ xi tíjnaꞌma i̱jiìn ini̱ma̱‑la̱, jcha̱á‑la̱; ko̱ jè xi̱ta̱, ko̱si̱jna-xkóꞌnchi‑la̱ Nainá nga skoe̱xkón; ko̱kjeiín‑la̱ nga kixi̱ kjoa̱ nga ya̱ tíjnajiìn‑nò Nainá.
\s O̱kixi̱ xi kitsjaà Pablo kó sꞌi̱in xi̱ta̱ kꞌe̱ nga maxkóya nga jeya síkíjna Nainá
\p
\v 26 Jñò ndí ꞌndsè ko̱ tichjaá, ¿kó sꞌín fìya‑nò jñà ꞌén koi? Tsòyaá‑ne, kꞌe̱ nga maxkóya nga jeya nìkíjna Nainá, tjín iꞌnga xi̱ta̱ xinguio̱o xi seè‑la̱ Nainá; tjín iꞌnga xi ma‑la̱ okóya ꞌén‑la̱ Nainá; tjín xi ma‑la̱ béno̱jmí ꞌén xi jye tsakó‑la̱ Nainá; tjín xi chja̱ ꞌén xi kjꞌei̱í tsò xi mì yá xi̱ta̱ fìya‑la̱; ti̱koa̱á tjín xi ma‑la̱ síkatoya ꞌén xi kjꞌei̱í tsò. Ngatsꞌiì xá koi, kꞌoa̱á sꞌín kàtabitasòn mé‑ne nga ìsa̱ ndaà sꞌe̱‑la̱ ngaꞌñó ini̱ma̱‑la̱ jñà xi̱ta̱ na̱xa̱ndá‑la̱ Nainá.
\v 27 Tsà tjín xi̱ta̱ xi ma‑la̱ chja̱ ꞌén xi kjꞌei̱í tsò xi mì yá xi̱ta̱ fìya‑la̱, tà jò ko̱ tsà jàn ki̱chja̱; ta̱nga ta ìjngoò ìjngoò ki̱chja̱; ko̱ jngoò xi si̱ìkatoya ꞌén koi.
\v 28 Tsà tsjìn xi̱ta̱ xi ma‑la̱ síkatoya, tà jyò kàtìtsa̱jna nga nguixko̱n na̱xa̱ndá‑la̱ Cristo, ti̱koa̱á‑ne tà i̱jiìn ini̱ma̱‑la̱ kàtìchja̱ko̱ Nainá.
\v 29 Kꞌoa̱á ti̱sꞌín tjín tsꞌe̱ xi̱ta̱ xi chja̱ ngajo‑la̱ Nainá, tà jò‑ne ko̱ tsà jàn xi ki̱chja̱. Jñà xi̱ta̱ xi iꞌnga, tà kji̱ꞌnchré‑né; ta si̱ìngásòn‑kjoò‑né a ndaà tjín, o xi majìn‑né.
\v 30 Jñà xi̱ta̱ xi títsa̱jna, tsà ki̱tjokàjiìn jngoò xi̱ta̱ xi Nainá si̱ìkíchi̱ya‑la̱ ꞌén xi mejèn‑la̱ nga ki̱chja̱, jè xi̱ta̱ xi tíchja̱ya ti̱koa̱á‑ne ta jyò kàtìjna, kàtatsjáꞌnde‑la̱ nga jè kàtìchja̱.
\v 31 Kꞌoa̱á ma‑ne, ngatsꞌioò xi ma‑nò nokjoà ngajo‑là Nainá ko̱maá ki̱nókjoa̱a nga ìjngoò ìjngoò‑nò mé‑ne nga ìsa̱ ndaà ko̱ma‑nò ko̱ ìsa̱ ndaà ko̱tsja‑nò ngatsꞌioò.
\v 32 Jñà xi̱ta̱ xi ma‑la̱ chja̱ ngajo‑la̱ Nainá, mochjeén‑né nga ti̱jñà skósòn‑la̱ kósꞌín ki̱chja̱.
\v 33-34 Nga Nainá, jè xi mejèn‑la̱ nga sꞌe̱ kjoa̱ꞌnchán, majìn‑la̱ nga kjoa̱siì sꞌe̱.
\p Jñà íchjín, jyò kàtìtsa̱jna, koni ma ngatsꞌiì na̱xa̱ndá‑la̱ Cristo ñánda maxkóya xi̱ta̱‑la̱; mìkiì tjíꞌnde nga ki̱chja̱; ndaà kàtaꞌnchréñijon koni sꞌín tíchja̱ kjo̱tíxoma.
\v 35 Tsà mé kjoa̱ xi mejèn‑la̱ nga skoe̱, ya̱á niꞌya‑la̱ kàtakjònangui‑la̱ xꞌi̱n‑la̱. Mìkiì ndaà tjín tsà jngoò chjo̱ón ki̱chja̱jiìn ñánda maxkóya xi̱ta̱ na̱xa̱ndá‑la̱ Nainá.
\p
\v 36 ¿A kꞌoa̱á sꞌín nìkítsjeèn nga ta i̱tꞌaà tsa̱jòn kisindaà ꞌén‑la̱ Nainá? ¿A kꞌoa̱á ma‑nò tsà ta jñò‑nó xi kitjoé‑nò?
\v 37 Tsà tjín iꞌnga xi̱ta̱ xinguio̱o xi kꞌoa̱sꞌín síkítsjeèn nga ma‑la̱ chja̱ ngajo‑la̱ Nainá, o xi ndaà machi̱ya‑la̱ kjo̱hítsjeèn‑la̱ Ini̱ma̱ Tsjeè‑la̱ Nainá, kꞌoa̱sꞌín kàtakixi̱ya‑la̱ nga jñà ꞌén xi tìkjiì‑nò, kjo̱tíxoma tsꞌe̱é Na̱ꞌèn‑ná.
\v 38 Tsà tjín xi̱ta̱ xi mìkiì sasén‑la̱ koni sꞌín okoòya‑nò, ti̱koa̱á Nainá mìkiì sasén takòn xi̱ta̱ jè.
\p
\v 39 Ndí ꞌndsè ko̱ tichjaá, kꞌoa̱á sꞌín ꞌñó ti̱nchátsjioò nga ti̱nókjoa̱ ngajo‑là Nainá; ta̱nga kì bìtsa̱jna ikòn‑là jñà xi ma‑la̱ chja̱ ꞌén xi kjꞌei̱í tsò xi mì yá xi̱ta̱ fìya‑la̱.
\v 40 Ta̱nga ngatsꞌiì kjoa̱ koi, nguì ndaà tꞌe̱en, kixi̱ tanguíko̱o.
\c 15
\s Kꞌe̱ nga jaáya‑la̱ Cristo
\p
\v 1 I̱ꞌndei̱ ndí ꞌndsè ko̱ tichjaá, ꞌa̱n mejèn‑na nga sìkítsjeèn‑nò jè ꞌén ndaà‑la̱ Nainá xi kjoa̱ tsꞌe̱ Cristo xi ꞌa̱n kichjàyajiìn‑nò xi kichjoétjò ko̱ nga kixi̱ titsa̱jnako̱o.
\v 2 Jè ꞌén ndaà‑la̱ Nainá xi kjoa̱ tsꞌe̱ Cristo xi ko̱ma ko̱chrjejiìn‑nò kjo̱ꞌin tsà kixi̱ titsa̱jnako̱o skanda i̱ꞌndei̱ koni sꞌín nga kichjàyajiìn‑nò nga ti̱sa̱ ítjòn; tsà majìn, ni̱mé chjí‑la̱ nga kòkjeiín‑nò.
\p
\v 3 Jè kjoa̱ xi ìsa̱ ꞌñó tjín, jè‑né nga ko̱sꞌín tsakoòya‑nò koni tjín xi ꞌa̱n kitjoé‑na, nga jè Cristo kꞌen ngajo‑ná xi kjoa̱ tsꞌe̱ jé‑ná nga kꞌoa̱á sꞌín tíchja̱ Xo̱jo̱n‑la̱ Nainá;
\v 4 nga kisìhijiìn, koa̱ nga ijchò jàn na̱chrjein jaáya‑la̱, koni sꞌín tíchja̱ Xo̱jo̱n‑la̱ Nainá.
\v 5 Kꞌe̱ nga jaáya‑la̱, tsakó‑la̱ yijo‑la̱ jè Cefas [ti̱jè‑ne Pedro], i̱kjoàn tsakó‑la̱ yijo‑la̱ jñà xi̱ta̱‑la̱ xi iꞌnga, ya̱ tejò ma‑ne ko̱ Pedro.
\v 6 Xi komà i̱skan, tsato ꞌòn sìndo̱ ma‑ne xi̱ta̱ ꞌndsè xi títsa̱jnajtín nga tsakó‑la̱ yijo‑la̱. Jñà xi̱ta̱ koi, tjín iꞌnga xi jye kꞌen, ta̱nga kjìn ma xi tákó títsa̱jnakon skanda i̱ꞌndei̱.
\v 7 I̱kjoàn tsakó‑la̱ yijo‑la̱ jè Jacobo. Xi komà i̱skan tsakó yije‑la̱ yijo‑la̱ jñà xi̱ta̱‑la̱ xi tsibíxáya‑la̱.
\p
\v 8 Xi jyehetꞌaà‑ne, i̱kjoàn ꞌa̱án tsakó‑na yijo‑la̱. ꞌA̱n, kꞌoa̱á sꞌín ngaya‑la̱ koni tsà jngoò kiꞌndí xi mì jé na̱chrjein kitsꞌiìn koni sꞌín chíya na̱chrjein‑la̱.
\v 9 ꞌA̱n‑ná xi ìsa̱ ꞌñó nangui tìjna̱‑la̱ kóho̱tjín jñà xi̱ta̱ xi tsibíxáya‑la̱ Jesús. Skanda mìkiì okꞌìn‑na nga kꞌoa̱sꞌín kꞌoín‑na; nga ꞌa̱án kiìtji̱ngui kondra̱‑la̱ jñà xi̱ta̱ na̱xa̱ndá‑la̱ Cristo.
\v 10 Ta̱nga jè kjo̱ndaà‑la̱ Nainá ndaà tsasìko̱‑na; kꞌoa̱á komà‑ne nga ꞌa̱n tsibíxáya‑na. Jè kjo̱ndaà‑la̱, mìtsà tà kjo̱tjò kitsjaà‑na. Ta̱nga ꞌa̱n, ìsa̱á ꞌñó kisìxá mì kꞌoa̱‑ne koni ngatsꞌiì xi̱ta̱‑la̱ xi iꞌnga. Kixi̱í kjoa̱, mìtsà ngaꞌñó tsꞌa̱n, kjo̱ndaà tsꞌe̱é Nainá.
\v 11 Tsà ꞌa̱n‑ná, ko̱ tsà jñà xi̱ta̱‑la̱ xi iꞌnga xi ndaà síxá, ta̱nga jè xi chjí‑la̱ nga kꞌoa̱ sꞌín nokjoàya‑je̱n, koa̱ jñò, kꞌoa̱á sꞌín mokjeiín‑nò.
\s Kꞌe̱ nga kjoa̱áya‑la̱ jñà xi̱ta̱ xi jye kꞌen
\p
\v 12 Kꞌoa̱á sꞌín tínokjoáya nga jè Cristo jaáyajiìn‑la̱ xi̱ta̱ xi jye kꞌen, ta̱nga, ¿mé‑ne tjín iꞌnga‑ne xi̱ta̱ xinguio̱o xi tsò: “Jñà xi̱ta̱ xi jye kꞌen mì ti̱ kiì kjoa̱áya‑la̱.”?
\v 13 Tsà mìkiì kjoa̱áya‑la̱ xi̱ta̱ xi jye kꞌen, ti̱koa̱á jè Cristo, mì‑la tsà kixi̱ kjoa̱ nga jaáya‑la̱.
\v 14 Tsà mìkiì jaáya‑la̱ Cristo, jñà ꞌén xi nokjoàya‑je̱n ni̱mé‑la chjí‑la̱, ti̱koa̱á ni̱mé‑la chjí‑la̱ koni sꞌín mokjeiín‑nò.
\v 15 Ti̱koa̱á ngaje̱n, xi̱ta̱ ndisoó kítjokàngui‑je̱n i̱tꞌaà tsꞌe̱ Nainá, nga̱ kꞌoa̱á sꞌín nokjoàya‑je̱n ꞌén‑la̱ Nainá nga bixón‑je̱n: “Jè Nainá kisìkjaáya‑la̱ Cristo.” Nga tsà jñà mikꞌen mìkiì kjoa̱áya‑la̱, mì‑la tsà kixi̱ kjoa̱ nga kisìkjaáya‑la̱ Cristo.
\v 16 Tsà jñà xi̱ta̱ xi jye kꞌen mìkiì kjoa̱áya‑la̱, ti̱koa̱á jè Cristo mì‑la tsà kixi̱ kjoa̱ nga jaáya‑la̱.
\v 17 Jè Cristo, tsà mìkiì jaáya‑la̱, ni̱mé‑la chjí‑la̱ koni sꞌín mokjeiín‑nò i̱tꞌaà tsꞌe̱, tákó ya̱á‑la titsa̱jnajñoò jé‑nò.
\v 18 Ti̱koa̱á jñà xi̱ta̱ xi jye kꞌen nga kòkjeiín‑la̱ i̱tꞌaà tsꞌe̱ Cristo, jngoò kꞌaá‑la kichijà, tsà mì jaáya‑la̱ Cristo.
\v 19 Jè kjoa̱ xi chiñà‑lá i̱tꞌaà tsꞌe̱ Cristo, tsà tà i̱í i̱sòꞌnde kjoe̱hetꞌaà, jñá‑la xi nguì xi̱ta̱ i̱ma̱ ꞌmì‑ná kó ngatsꞌiì xi̱ta̱ xi tjín i̱sòꞌnde.
\p
\v 20 Ta̱nga nguì kixi̱í kjoa̱ nga jè Cristo jaáyaá‑la̱ i̱tꞌaà tsꞌe̱ kjoa̱ biyaà. Kꞌoa̱á ngaya‑la̱ koni tsojmì xi majchá ítjòn, nga jè Cristo jaáya ítjòn‑la̱ ngatsꞌiì xi̱ta̱ xi i̱skan kjoa̱áya‑la̱ [nga mì ti̱ kiì ki̱yá‑ne].
\v 21 Koni sꞌín komà nga i̱tꞌaà tsꞌe̱ jngoò xi̱ta̱ kjòtsꞌia̱ nga biyaà xi̱ta̱, kꞌoa̱á ti̱sꞌín komà nga i̱tꞌaà tsꞌe̱ jngoò xi̱ta̱ jꞌiì nga kjoa̱áya‑la̱ xi̱ta̱ xi jye kꞌen.
\v 22 Koni sꞌín ma nga biyaà ngatsꞌiì xi̱ta̱ xi i̱tꞌaà tsꞌe̱ tje̱‑la̱ Adán kitsꞌiìn, kꞌoa̱á ti̱sꞌín ma nga kjoa̱áyaá‑la̱ ngatsꞌiì xi̱ta̱ xi i̱tꞌaà tsꞌe̱ Cristo tsꞌiìn xi̱tse̱‑ne.
\v 23 Ta̱nga jngoò ìjngoò ꞌncha ndi̱yá‑né nga kjoa̱áya‑la̱ koni sꞌín oko̱‑la̱. Jè Cristo, tíjna ítjòn nga jaáya‑la̱; kꞌe̱ nga kjoi̱í ìjngoò kꞌa Cristo, kꞌe̱é kjoa̱áya‑la̱ xi xi̱ta̱ tsꞌe̱.
\v 24 Cristo, ítjòn si̱ìkjehesòn ngatsꞌiì xi kondra̱ fì‑la̱, ngatsꞌiì xi títsa̱jna ítjòn, xi tjín‑la̱ ngaꞌñó ko̱ xi otíxoma. I̱kjoàn jè Cristo si̱ìnga̱tsja kjo̱tíxoma‑la̱ Nainá xi Na̱ꞌèn‑ná ma; kꞌe̱é kjoe̱hetꞌaà i̱sòꞌnde.
\v 25 Mochjeén‑né nga jè Cristo kàtatíxoma skanda kꞌe̱ nga jye si̱ìkítsa̱jnangui yije ndso̱ko̱ jñà xi kondra̱‑la̱.
\v 26 Ko̱ jè kondra̱‑la̱ xi fehetꞌaà‑ne nga chi̱ja, jé kjoa̱ biyaà.
\v 27 Ni̱ta̱ mé xi tjín, Nainá, ya̱á kisìkítsa̱jnangui yije ndso̱ko̱ Cristo. Jè tíhotíxoma yije‑la̱. Ta̱nga mìtsà tsò‑ne kjoa̱ nga jè Nainá, ya̱á tíjnangui ndso̱ko̱ Cristo. Nga jè sobá Nainá xi kisìkítsa̱jnangui ndso̱ko̱ ni̱ta̱ mé xi tjín.
\v 28 Kꞌe̱ nga jye ya̱ títsa̱jnangui yije ndso̱ko̱ Cristo ni̱ta̱ mé xi tjín, jè Cristo, nga Kiꞌndí‑la̱ Nainá ma, ti̱koa̱á nangui si̱ìkíjna yijo‑la̱ nga nguixko̱n Nainá nga jè sobà Nainá tsibítsa̱jnangui ndso̱ko̱ Cristo ni̱ta̱ mé xi tjín, mé‑ne nga jè Nainá jngoò kꞌaá jè kíjna ítjòn‑la̱ ni̱ta̱ mé kjoa̱‑ne.
\p
\v 29 Ta̱nga tsà jñà xi̱ta̱ xi jye kꞌen mì ti̱ kiì kjoa̱áya‑la̱, jñà xi̱ta̱ xi i̱tꞌaà tsꞌe̱ mikꞌen ma‑ne bautizar, ¿kó sꞌín síkítsjeèn? ¿Mé‑ne i̱tꞌaà tsꞌe̱ mikꞌen ma‑ne bautizar, tsà kixi̱ kjoa̱ nga mì ti̱ kiì kjoa̱áya‑la̱ xi̱ta̱?
\v 30 Ko̱ ngaje̱n, ¿mé kjoa̱‑ne nga na̱chrjein nchijòn binchaxkón‑la̱je̱n yijo‑naje̱n, tsà mì ti̱ kiì kjoa̱áya‑la̱ xi̱ta̱?
\v 31 Ndí ꞌndsè ko̱ tichjaá, kꞌoa̱á xan‑nò nga nguì kixi̱í kjoa̱ nga na̱chrjein nchijòn tjín‑na kjo̱xkón tsà ya̱ ki̱yá, koni sꞌín nga nguì kixi̱í kjoa̱ nga matsja‑na i̱tꞌaà tsa̱jòn nga ngásòn mokjeiín‑ná i̱tꞌaà tsꞌe̱ Na̱ꞌèn‑ná Jesucristo.
\v 32 Tsà tà jñà kjoa̱ tsꞌe̱ i̱sòꞌnde‑né nga kiskaàn‑koa̱a xi̱ta̱ koni tsà xa ján Éfeso, ¿mé xi kisìkijne? Tsà jñà xi̱ta̱ xi jye kꞌen mì ti̱ kiì kjoa̱áya‑la̱, ti̱koa̱á‑ne: “Ki̱chiaá, sꞌioa̱á nga nchijòn‑lè ki̱yá‑ná.”
\p
\v 33 Kì yá xi̱ta̱ xi kona̱cha̱n‑nò i̱tꞌaà tsꞌe̱ kjoa̱ koi. Nga tjín jngoò ꞌén xi tsò: “Jñà xi̱ta̱ xi tsjahijtakoa̱á xi mìkiì ndaà sꞌín, jñà síkitsꞌón‑jiìn kjoa̱ xi ndaà tjín koni sꞌín titsa̱nìjchá yijo‑ná.”
\v 34 Ndaà ti̱kítsjeèn i̱tꞌaà tsꞌe̱ kjoa̱ koi; kì tà tsjaà jé binchaàtsjioò. Nga tjín iꞌnga xi̱ta̱ xinguio̱o xi mìkiì beèxkon Nainá. Kꞌoa̱á xan‑nò mé‑ne nga kàtasobà‑nò.
\s Kó kjoàn ko̱ma mikꞌen kꞌe̱ nga kjoa̱áya‑la̱
\p
\v 35 Tsà koi na̱chrjein‑la̱ tjín iꞌnga xi̱ta̱ xi tsò: “¿Kósꞌín ko̱ma nga kjoa̱áya‑la̱ xi̱ta̱ xi jye kꞌen? ¿Kó kjoàn yijo xi ki̱tjokàjiìn‑ko̱?”
\v 36 ¡Mé tà tòndo̱‑nò! Kꞌe̱ nga ꞌbè tje̱, jñà no̱jmé nga sihijiìn, biyaà‑né, mé‑ne nga ki̱so̱ xi̱tse̱‑ne jno̱, nga ìjngoò kꞌa kítsa̱jnakon.
\v 37 Kꞌe̱ nga ꞌbè tje̱, mìtsà jñà xi jye jno̱ bìtje̱e; tà jñà no̱jmé bìtje̱e, o xi trigo‑né.
\v 38 Ta̱nga jè Nainá, kꞌoa̱á kjoàn sꞌín koni sꞌín mejèn‑la̱; kꞌoa̱á kjoàn sꞌín nga jngoò ìjngoò ska̱ya xojmá koni kjoàn tje̱‑la̱.
\v 39 Jñà yijo, mìtsà ngásòn kjoàn. Yijo‑la̱ xi̱ta̱, kjꞌei̱í kjoàn; yijo‑la̱ cho̱, kjꞌei̱í kjoàn; yijo‑la̱ ti̱n, kjꞌei̱í kjoàn; yijo‑la̱ ni̱se, kjꞌei̱í kjoàn.
\v 40 Koni choòn i̱ i̱sòꞌnde nga tjín yijo xi kjꞌei̱í sꞌín tsejèn, kꞌoa̱á ti choòn ngajmiì nga tjín xi kjꞌei̱í sꞌín tsejèn. Mìtsà ta ngásòn tsejèn xi tjín ngajmiì ko̱ xi tjín i̱sòꞌnde.
\v 41 Jè tsꞌoí kjꞌei̱í sꞌín tsejèn, jè sá kjꞌei̱í sꞌín tsejèn, jñà niꞌño kjꞌei̱í sꞌín tsejèn. Kꞌa kjꞌei̱í, kꞌa kjꞌei̱í sꞌín tsejèn nga jngoò ìjngoò sko̱ya.
\p
\v 42 Kꞌoa̱á ti̱sꞌín ma nga kjoa̱áya‑la̱ xi̱ta̱ xi jye kꞌen. Jè yijo xi sihijiìn, bitsꞌon‑né, ta̱nga jè yijo xi kjoa̱áya‑la̱, mì ti̱ kiì ki̱tsꞌón‑ne.
\v 43 Sihijiìn‑né xi nìmé chjí‑la̱; jè xi kjoa̱áya‑la̱ jeya‑né. Xi sihijiìn, yijo indaà‑né; xi kjoa̱áya‑la̱ tjín‑la̱ ngaꞌñó.
\v 44 Jè yijo xi sihijiìn, ta̱xki̱ yijo‑né, tsꞌe̱ i̱sòꞌnde‑né. Yijo xi kjoa̱áya‑la̱, yijo xi̱tse̱‑né, tsꞌe̱é Ini̱ma̱ Tsjeè‑la̱ Nainá. Tjín xi ta̱xki̱ yijo, ti̱koa̱ tjín xi tsjá Ini̱ma̱ Tsjeè‑la̱ Nainá.
\p
\v 45 Kꞌoa̱á sꞌín tíchja̱ Xo̱jo̱n‑la̱ Nainá nga tsò: “Jè xi̱ta̱ xꞌi̱n tjòn xi kiꞌmì Adán, jngoò xi xi̱ta̱ komà xi tsibìjnakon.” Ta̱nga [jè Cristo], jngoò ini̱ma̱ xi síkítsa̱jnakon xi̱ta̱, nga jè jꞌiì ngajo‑la̱ Adán nga jyehetꞌaà‑ne kjoa̱.
\v 46 Ta̱nga jè xi ini̱ma̱, mìtsà jè jꞌiì ítjòn; jè jꞌiì ítjòn xi ta̱xki̱ yijo tsꞌe̱ i̱sòꞌnde, i̱skaán jꞌiì xi ini̱ma̱.
\v 47 Jè xi̱ta̱ xꞌi̱n xi tjòn, i̱ i̱tꞌaà nangui tsꞌe̱; niꞌndeé kisindaà‑ne. Jè xi̱ta̱ xꞌi̱n xi ma‑ne jò, ngajmiì tsꞌe̱, ya̱á inchrobà‑ne, [nga jè xi Na̱ꞌèn‑ná].
\v 48 Ngatsꞌiì xi̱ta̱ xi i̱ i̱sòꞌnde tsꞌe̱, kꞌoa̱á kjoàn yijo‑la̱ koni kji tsꞌe̱ Adán nga niꞌndeé kisindaà‑ne. Ngatsꞌiì xi ngajmiì kítsa̱jna, kꞌoa̱á kjoàn ko̱ma yijo‑la̱ koni kji tsꞌe̱ Cristo xi ngajmiì inchrobà‑ne.
\v 49 I̱ꞌndei̱, jñá, kꞌoa̱á kjoàn tsejèn yijo‑ná koni kji xi niꞌnde kisindaà‑ne; nga komà i̱skan, kꞌoa̱á kjoàn ko̱tsejèn yijo‑ná koni kji xi ngajmiì jꞌiì‑ne.
\p
\v 50 Ndí ꞌndsè, kꞌoa̱á xan‑nò jè yijo‑ná nga jní tjín‑la̱ mìkiì ma kjoa̱hasꞌen‑jiìn ñánda tíhotíxoma Nainá. Ti̱koa̱á jè yijo‑ná xi biꞌndoya mìkiì okꞌìn‑la̱ nga ya̱ kjoa̱hasꞌen‑jiìn ñánda tjín xi mìkiì biꞌndoya.
\v 51 Kèno̱jmí jngoò‑nò kjoa̱ꞌma tsꞌe̱ Nainá: Jñá xi xi̱ta̱‑la̱ Cristo ꞌmì‑ná, mìtsà ngatsꞌiaá nga ki̱yá, ta̱nga ngatsꞌiì‑ná ta jngoò tjò kjoa̱tjìya‑ná,
\v 52 kꞌoa̱á ngaya‑la̱ koni kꞌe̱ nga tsíxꞌa̱á koa̱ bíchjoà xkoaán, ti̱kꞌe̱é‑ne nga ski̱ndàya chrjo trompeta xi fehetꞌaà‑ne. Kꞌe̱ nga kjo̱ne chrjo trompeta, jñà mikꞌen kjoa̱áya‑la̱, mì ti̱ kiì ki̱ꞌndo‑ne ni̱ta̱ kjé‑ne. Koa̱ jñá kjoa̱tjìya‑ná.
\v 53 Jè yijo‑ná nga biyaà ko̱ nga biꞌndo, mochjeén‑né nga tjoé jngoò‑la̱ yijo xi mì ti̱ kiì ki̱yá‑ne ko̱ mì ti̱ kiì ki̱ꞌndo‑ne ni̱ta̱ kjé‑ne.
\v 54 Kꞌe̱ nga kꞌoa̱sꞌín ko̱ma nga jè yijo‑ná tjoé jngoò‑la̱ yijo xi mì ti̱ kiì ki̱yá‑ne ko̱ mì ti̱ kiì ki̱ꞌndo‑ne ni̱ta̱ kjé‑ne, kꞌe̱é ki̱tasòn koni sꞌín tíchja̱ Xo̱jo̱n‑la̱ Nainá nga tsò: “Jè kjoa̱ xi síkijne jngoò kꞌaá síchija kjoa̱biyaà.
\v 55 Ji̱ xi kjoa̱ biyaà ꞌmì‑lè, ¿ñánda‑ne nga kinìkijni? ¿Ñánda tíjna naꞌyá‑lè xi ma‑la̱ síkꞌen xi̱ta̱?”
\v 56 Jè naꞌyá xi tjín‑la̱ kjoa̱ biyaà, jé kjoa̱ tsꞌe̱ jé. Ko̱ jè ngaꞌñó xi tjín‑la̱ jè kjoa̱ tsꞌe̱ jé, jé kjo̱tíxoma.
\v 57 Ndaà chjí‑la̱ Nainá nga jè tsjá‑ná ngaꞌñó xi i̱tꞌaà tsꞌe̱ Jesucristo xi otíxoma‑ná nga nìkijne‑lá kjoa̱ biyaà ko̱ kjoa̱ tsꞌe̱ jé.
\p
\v 58 Jñò ndí ꞌndsè xi matsjake̱‑nò, kixi̱ ti̱tsa̱jna. Ni̱yá xi si̱ìkjatjìya‑la̱ kjo̱hítsjeèn‑nò. Kjitꞌaà na̱chrjein ìsa̱ ꞌñó ti̱xá‑là Na̱ꞌèn‑ná. Nga̱ tíjiìn‑nò nga jè xá xi ꞌnè xi tsꞌe̱ Na̱ꞌèn‑ná, mìtsà tà kjo̱tjò.
\c 16
\s To̱n xi maxkótꞌaà‑la̱ jñà xi̱ta̱ na̱xa̱ndá‑la̱ Cristo
\p
\v 1 Jè to̱n xi maxkótꞌaà‑la̱ xi̱ta̱ na̱xa̱ndá‑la̱ Cristo, kꞌoa̱sꞌín tꞌe̱en koni sꞌín kixan‑la̱ xi̱ta̱ na̱xa̱ndá‑la̱ Nainá ján nangui Galacia.
\v 2 Jñò, nga jngoò ìjngoò, nga jiìn jiìn na̱chrjein kꞌe̱ nga tahàngo̱, titjò chiba to̱n‑nò koni sꞌín machikon‑tꞌioòn, mé‑ne nga mì kꞌe̱ kíxkó‑nò kꞌe̱ nga ꞌa̱n xi kìjchoa.
\v 3 Kꞌe̱ nga kìjchokon‑nò ya̱ Corinto, sìkasén ján Jerusalén xi̱ta̱ xi jñò chjaàjñoò. Tsjaà‑la̱ xo̱jo̱n carta nga kji̱ko̱ jè to̱n xi maxkótꞌaà‑nò.
\v 4 Tsà mochjeén nga ti̱koa̱ ꞌa̱n kjián, ko̱maá kji̱ko̱‑na jñà xi̱ta̱ koi.
\s Kꞌe̱ nga kisìkítsjeèn Pablo nga kjoi̱ ján Corinto
\p
\v 5 Mejèn kjíkon‑nò kꞌe̱ nga jye kjoáha̱toaa̱ ján nangui Macedonia, nga kꞌoa̱á sꞌín tjíndaà‑na nga ya̱ kjoáha̱toaa̱ mé‑ne nga i̱kjoàn kìjcho‑na Corinto.
\v 6 Tsà ko̱ma ya̱ kóti̱jnako̱ chiba na̱chrjein‑nò, ko̱ tsà koií na̱chrjein‑la̱ nga ya̱ kóti̱jnako̱‑nò skanda kꞌe̱ nga kjoe̱hetꞌaà na̱chrjein‑la̱ cho̱n ꞌnchán, mé‑ne jñò ko̱ma si̱chjátꞌaà‑ná kꞌe̱ nga tsà ñánda kjián nga ko̱ma i̱skan.
\v 7 Majìn‑na nga tà jngoò tjò skotsejèn‑nò; jè xi mejèn‑na̱ nga kjìn na̱chrjein kóti̱jnako̱‑nò, tsà Nainá mejèn‑la̱ nga tsjáꞌnde‑na.
\v 8 I̱í kóti̱jna na̱xa̱ndá Éfeso skanda na̱chrjein tsꞌe̱ sꞌeí Pentecostés, [jè sꞌeí xi bitjo kꞌe̱ nga jye bijchó icháte na̱chrjein nga bitjo sꞌeí Paxko̱].
\v 9 Ndaà títjoꞌnde‑na nga tìsꞌiaàn xá‑la̱ Nainá xi ꞌñó ndaà tíbitasòn, na̱sꞌín ꞌñó kjìn ma‑ne xi̱ta̱ xi kondra̱ títsa̱jna‑na.
\p
\v 10 Tsà ki̱jchòkon‑nò jè Timoteo, chítsejèn‑là nga tsja kàtasꞌe‑la̱ nga kíjnako̱‑nò nga mì yijo‑la̱ ki̱nchaxkón‑la̱, nga ti̱koa̱ xá‑la̱ Nainá tísꞌín koni ꞌa̱n.
\v 11 Kꞌoa̱á ma‑ne, kì nachrjenguioò jñò, ta̱ sa̱á ti̱chjátꞌaà‑là nga ꞌnchán kàtjanchrobákon‑na; ꞌa̱n, tíkoñaá‑la̱ ko̱ xi̱ta̱ ꞌndseé xi iꞌnga.
\p
\v 12 ꞌA̱n ꞌñó tsibìtsiꞌba‑la̱ jè ꞌndsè Apolos, nga katahijtako̱ jñà xi̱ta̱ ꞌndseé xi tjínè nga kji̱kon‑nò, ta̱nga majìn‑la̱ nga fì; kꞌe̱é‑la kjoi̱ kꞌe̱ nga ko̱ꞌa‑la̱.
\p
\v 13 Ndaà titsa̱jnakon. ꞌÑó kixi̱ titsa̱jnako̱o jè ꞌén xi mokjeiín‑nò. Kì yá xi tsakjoòn‑là, kàtasꞌe‑nò ngaꞌñó.
\v 14 Ngatsꞌiì kjoa̱ xi ꞌnè, ko̱ó kjoa̱tjòcha‑nò kꞌoa̱ tꞌe̱en.
\p
\v 15 Jñò ndí ꞌndseé ko̱ tichjaá, jyeé tíjiìn‑nò nga jñà xi̱ta̱ niꞌya‑la̱ Estéfanas, jñà kòkjeiín ítjòn‑la̱ ꞌén‑la̱ Cristo ya̱ nangui Acaya. Jñà xi̱ta̱ koi, kꞌoa̱á sꞌín bínè‑la̱ yijo‑la̱ nga jñà xi̱ta̱ na̱xa̱ndá‑la̱ Cristo si̱ìchjátꞌaà‑la̱.
\v 16 Ndí ꞌndsè, bìtsiꞌbà‑nò nga ti̱náꞌyañijon‑là xi̱ta̱ xi kꞌoa̱sꞌín síxá koni jñà xi̱ta̱ koi, ko̱ ngatsꞌiì xi̱ta̱ xi mìkiì bijta‑la̱ nga síxá‑la̱ Nainá.
\v 17 Matsja‑na nga jꞌiìkon‑na Estéfanas, Fortunato ko̱ Acaico [nga jñò kinìkasén], nga jñà jꞌiì síkitasòn xi jñò mìkiì komà kinìtasòn nga inchrobàchon‑ná.
\v 18 Jñà jꞌiì síje ikon‑na ko̱ tsa̱jòn. Kꞌoa̱á ma‑ne jcha̱xkón jñà xi̱ta̱ xi kꞌoa̱sꞌín sꞌín koni jñà xi̱ta̱ koi.
\s Pablo síhixatꞌaà na̱xa̱ndá‑la̱ Cristo
\p
\v 19 Jñà na̱xa̱ndá‑la̱ Cristo xi títsa̱jna nangui Asia síhixatꞌaà‑nò. Jè Aquila ko̱ Priscila ko̱ xi̱ta̱ na̱xa̱ndá‑la̱ Cristo xi bixoña ya̱ niꞌya‑la̱, i̱tꞌaà tsꞌe̱ Na̱ꞌèn‑ná ndaà síhixatꞌaà‑nò.
\v 20 Ngatsꞌiì xi̱ta̱ ꞌndseé, síhixatꞌaà‑nò. Jñò ti̱ixatꞌaà nga jngoò ìjngoò xi̱ta̱ xinguio̱o nga ko̱ ini̱ma̱‑nò.
\p
\v 21 ꞌA̱n, xi Pablo ꞌmì‑na̱, tisìhixatꞌaà‑nò nga ko̱ ndsa̱a tìkjiì‑nò xo̱jo̱n jè.
\p
\v 22 Tsà tjín xi̱ta̱ xi mìkiì matsjakeè Jesucristo xi otíxoma‑ná, jè xi̱ta̱ nei̱í kàtjìko̱. Na̱ꞌèn, ji̱ ni̱to̱n nchroboí.
\p
\v 23 Jè kàtìjnako̱‑nò kjo̱ndaà‑la̱ Jesucristo xi otíxoma‑ná.
\v 24 Kjitꞌaà na̱chrjein kàtasꞌe‑nò kjoa̱tjòcha‑na̱ nga jè Cristo Jesús titsa̱jnakoa̱á. Kꞌoa̱á sꞌín kàtama.