\id 2CO
\h 2 Corintios
\toc1 2 Corintios
\mt Xa̱jo̱n ra ma‑ni jò ra tsikínda jè Pablo ra isìkasén‑la̱ xi̱ta̱ na̱xi̱ndá‑la̱ Cristo ra títsa̱jna ya̱ Corinto
\c 1
\s Kóꞌsín jè Pablo síhixoꞌta xi̱ta̱ Corinto
\p
\v 1 ꞌA̱n Pablo, ra ko̱ꞌsín ꞌa̱n tsikíxáya‑na Cristo koni ꞌsín kjomejèn‑la̱ Nainá, i̱nchinìkasén‑laji̱n jè xa̱jo̱n ra̱kìi̱, ko̱ jè ꞌndsé Timoteo. I̱nchinìhixoꞌtá‑laji̱n jiòn ra xi̱ta̱ na̱xi̱ndá‑la̱ Cristo ꞌmì‑no ra titsa̱jna ya̱ na̱xi̱ndá Corinto. Ko̱ ngaꞌtsì ra ꞌndsé ma ra a̱ꞌta ꞌtse̱ Cristo ra ya̱ títsa̱jna nga tíjngo ya̱ nangi Acaya.
\v 2 Nainá ra Na̱ꞌín‑ná ma ko̱ jè Jesucristo ra tíjna ítjòn‑ná katatsjá‑no kjo̱nda ko̱ kjo̱ꞌnchán ya̱ a̱jin inìma̱‑no.
\s Kóꞌsín nga jè Pablo tsjá‑la̱ kjo̱nda Nainá
\p
\v 3 Nda kataꞌyaxkón Nainá ra Na̱ꞌìn‑la̱ ma Jesucristo ra tíjna ítjòn‑ná. Nga̱ jè Nainá ra Na̱ꞌín‑ná ma, tseé kjo̱hi̱ma̱takòn tjín‑la̱ ra a̱ꞌta tsa̱jién ko̱ jé‑ní Nainá ra ma‑la̱ síjetakòn kiꞌta‑ná.
\v 4 Jé síjetakòn inìma̱‑ná ni̱ꞌsín ta mé kjo̱hiꞌin ra kajieén, mé‑ni nga ti̱ꞌkoa̱ si̱jetakén jñà ra ti̱ꞌkoa̱ kjo̱hiꞌin tjín‑la̱; ko̱ꞌsín si̱jetakén inìma̱‑la̱ koni ꞌsín nga jè Nainá síjetakón‑ná ra jién.
\v 5 Koni ꞌsín nga tse kjo̱hiꞌin kajieén ra ti̱jñà‑ni kjo̱hiꞌin ra iskajin jè Cristo, ꞌkoa̱á ti̱ꞌsín a̱ꞌta ꞌtse̱ Cristo tseé kjoa̱jetakòn si̱jin ya̱ inìma̱‑ná.
\v 6 ꞌKia̱ nga ko̱ꞌsín i̱nchinikjiín‑ji̱n kjo̱hiꞌin, kií‑ní nga jiòn ma sa̱kò‑la̱ kjoa̱jetakòn inìma̱‑no ko̱ kítjo̱kajin‑no kjo̱hiꞌin. Ko̱ tsa jè Nainá i̱nchisíje takòn‑naji̱n, kií‑ní nga ma sa̱kò‑te‑najiòn kjoa̱jetakòn, ko̱ ngi ko̱ó inìma̱‑no chíkjoa̱ko̱‑te‑no koni jñà kjo̱hiꞌin ra i̱nchinikjiín‑ji̱n.
\v 7 Tjín kixi̱í takòn‑ji̱n kjoa̱ ra chiñá‑ji̱n ra a̱ꞌta tsa̱jiòn. ꞌYa‑náji̱n, nga̱ tsa ko̱ꞌsín i̱nchinikjiín‑te jiòn kjo̱hiꞌin koni ra ji̱n, ꞌkoa̱á ti̱ꞌsín i̱nchisakó‑te‑no kjoa̱jetakòn ra tjín‑naji̱n.
\p
\v 8 Jiòn ꞌndsé ko̱ tichjeé, jé ra mejèn‑naji̱n nga nda katasijin‑no jñà kjo̱hiꞌin ra iskajin‑ji̱n ya̱ ján nangi Asia. Nga̱ ꞌñó tse kjo̱hiꞌin inikjiín‑ji̱n ra ꞌñó iꞌin tjín ra mì kì bijchótji̱ngi‑la̱ ngaꞌñó‑ná, skanda tsixó‑náji̱n, mí‑la kì ti̱ ki̱tsa̱kon-isa‑né.
\v 9 ꞌKoa̱á ꞌsín kjomà‑naji̱n nga ijyeé‑la ko̱ꞌsín tjínè‑la̱ nga ki̱yá‑ji̱n. Jñà kjoa̱ ra ko̱ꞌsín kjomàꞌtin‑ji̱n, jé tsakón‑ya‑naji̱n nga mì kì machjeén nga ta ji̱n kjóꞌtatakòn‑ji̱n ijo‑na̱ji̱n, jé machjeén nga jè kjóꞌtatakòn‑ji̱n jè Nainá ra ma‑la̱ síkjaáya‑la̱ miꞌken.
\v 10 Jé Nainá isikatojin‑naji̱n kjo̱hiꞌin ra kjo̱biya kjiꞌta‑la̱, ko̱ ꞌkoa̱á ꞌsín si̱ikatojin-isa‑naji̱n. ꞌKoa̱á ꞌsín jè kjiꞌta takòn‑ji̱n nga jè si̱ikatojin-isa‑naji̱n ta mé kjo̱hiꞌin‑nì,
\v 11 tsa ki̱si̱ko̱ꞌtá‑náji̱n nga ki̱nákjoa̱ꞌta‑la jiòn Nainá ra a̱ꞌta tsa̱ji̱n. Tsa kjìn ma‑ni xi̱ta̱ ra ki̱chja̱ꞌta‑la̱ Nainá, kjín ko̱ma xi̱ta̱ ra ki̱tso̱: “Tse kjo̱nda kataꞌse‑li Na̱ꞌìn”, ꞌkia̱ nga ske̱ jè kjo̱nda ra Nainá títsjá‑naji̱n.
\s Mé‑ni mì kì kijì‑nì jè Pablo ya̱ Corinto
\p
\v 12 Tjín jngo kjoa̱ ra ma nda níkítsa̱jna‑naji̱n ijo‑na̱ji̱n, jé‑ní nga be‑la̱ takòn‑ji̱n nga tsje ko̱ kixi̱í i̱nchiníjchá‑ji̱n ijo‑na̱ji̱n ya̱ a̱jin‑la̱ xi̱ta̱ i̱sàꞌnde, ko̱ nga ꞌñó nda fìko̱‑no ra jiòn. Kjoa̱ kìi̱, a̱ꞌta ꞌtse̱é Nainá nchrabá‑ni, ko̱ mì tsa ta kjoa̱chji̱ne̱ ꞌtse̱ xi̱ta̱ i̱sàꞌnde ra i̱nchinìchjeén‑ji̱n; ngi jé kjoa̱chji̱ne̱ ra tsjá kjo̱nda‑la̱ Nainá.
\v 13 Xa̱jo̱n ra tsikìnda‑laji̱n, mì tsa kjꞌií tsò ꞌén ra tsikiꞌta‑laji̱n; kií tsikiꞌta‑ji̱n ꞌén ra ma chitáꞌyá jiòn ko̱ ra ma nda ko̱chi̱ya‑no ra a̱ꞌta tsa̱ji̱n; ꞌkoa̱á ꞌsín tíkoñáa̱ ra ꞌa̱n nga nda kjón‑ní katamachi̱ya‑najiòn.
\v 14 Koni ꞌsín ijye kjòchi̱ya chiba‑najiòn ra a̱ꞌta tsa̱ji̱n, ꞌkoa̱á ti̱ꞌsín tsja ꞌse̱‑najiòn ra a̱ꞌta tsa̱ji̱n ꞌkia̱ nga kjꞌi̱í india‑ni jè Jesús ra tíjna ítjòn‑ná, koni ꞌsín nga tsja ꞌse̱‑naji̱n ra a̱ꞌta tsa̱jiòn.
\p
\v 15 Nga̱ ꞌkoa̱á ꞌsín tsakaꞌtá takòo̱n kjoa̱ kìi̱, ꞌkoa̱á ma‑ni nga ko̱ꞌsín ísikítsjee̱n, nga ya̱á íkatsíjen ítjòn‑najiòn mé‑ni nga ma jò ꞌka̱ sa̱kò‑najiòn kjo̱nda, nga jò ꞌka̱ kjoáa̱to‑no.
\v 16 ꞌKoa̱á ꞌsín ísikítsjee̱n nga mején‑na ya̱ kjoáa̱to‑najiòn ꞌkia̱ nga kijiàa̱ ya̱ nangi Macedonia. Ko̱ india kjoáa̱to‑najiòn tsiki ꞌkia̱ nga koa̱áfa‑na, nga ma ki̱si̱ko̱ꞌtá‑nájiòn ꞌkia̱ nga kjiáa̱n ya̱ nangi Judea tsiki.
\v 17 ꞌKia̱ nga ko̱ꞌsín isíkítsjen, ¿a taxki̱ isíkítsjen‑ná? ¿A tsó‑ni kjoa̱ nga ꞌkoa̱á ꞌsín kíꞌsiaa̱n koni ꞌsín ꞌsín jñà ra xi̱ta̱ i̱sàꞌnde? Nga tsò: “Ko̱ma‑ní”, ko̱ a̱skan, tsò india‑ni: “Mì kì ko̱ma.”
\v 18 Ndaá tíbe Nainá nga jè ꞌén ra ꞌbena̱jmíya‑laji̱n mì tsa jò tjín‑la̱, nga̱ mì tsa bixó‑ji̱n: “Ko̱ma‑ní”, ꞌkia̱ nga mì kì tsa ko̱ma‑ni.
\v 19 Ra ꞌa̱n ko̱ Timoteo ko̱ Silvano, ꞌkia̱ nga i̱nchiꞌbèna̱jmíya‑laji̱n a̱ꞌta ꞌtse̱ Jesucristo ra Iꞌndí‑la̱ Nainá, jé ꞌbena̱jmíya‑ji̱n ꞌén‑la̱ Nainá ra bitjasòn ra mì tsa jò tjín‑la̱, nga̱ Cristo, ni̱kjiá nga jò ꞌka̱ chja̱ nga tsò: “Ko̱ma‑ní”, ko̱ mì kì ko̱ma. Nga̱ a̱ꞌta ꞌtse̱ Cristo‑ní nga bitjasòn jè ꞌén‑la̱ Nainá.
\v 20 Ta mé ꞌén ra ijye kitsjà Nainá nga ko̱ꞌsín ko̱ma, a̱ꞌta ꞌtse̱ Cristo‑ní nga bitjasòn ijye. ꞌKoa̱á ma‑ni ꞌkia̱ nga jè Nainá jeya níkíjneé bixó‑né: “Ko̱ꞌsín katama ra a̱ꞌta ꞌtse̱ Cristo.”
\v 21 Jé Nainá ra ko̱ꞌsín kixi̱ i̱nchisíkítsa̱jna‑ná nga ya̱ titsa̱jnake̱é jè Cristo [ra xá jahíjin‑ni], ko̱ jé Nainá ra ko̱ꞌsín tsjahíjin‑ná nga kitsjà xá‑ná.
\v 22 Ti̱ꞌkoa̱á ijyeé tsikíꞌta chi̱ba̱‑ná nga̱ ijyeé ꞌtse̱ tsó‑ná, ko̱ ijyeé tsikíjnajin ya̱ inìma̱‑ná, jè Inìma̱ Tsje‑la̱ ra tje̱n kitsjà ítjòn‑ná mé‑ni nga ijye tjín kixi̱‑ni nga tjábé ijye‑ná mé ra ijye tjínda‑la̱ nga tsjá‑ná.
\p
\v 23 Jé sabá Nainá síkíjna masen koni jngo xi̱ta̱ ra be, nga̱ jè nda tíkotsíjen kóꞌsín tíjna inìma̱‑na̱. Tsa mì kì ikatsíjen‑najiòn koni ꞌsín nga kíxian, ta kií‑ní nga majìn‑na nga ajò ko̱ma‑la̱ inìma̱‑najiòn jñà ꞌén ra ꞌa̱n tjín‑ni nga kokó‑no.
\v 24 Majìn‑naji̱n nga ji̱n ko̱tèxoma‑laji̱n koni ꞌsín nga makjiín‑najiòn a̱ꞌta ꞌtse̱ Nainá. Jé ra mejèn‑naji̱n nga ki̱si̱ko̱ꞌta-isa‑laji̱n nga isa̱ ꞌñó katasakó‑najiòn kjo̱tsja, nga̱ ijyeé ꞌñó kixi̱ titsa̱jnako̱ jiòn kjoa̱ ra makjiín‑no ra a̱ꞌta ꞌtse̱ Cristo.
\c 2
\p
\v 1 ꞌKoa̱á ma‑ni nga ko̱ꞌsín isíkítsjen nga mì kì ti̱ kiìjkon‑najiòn, nga̱ majìn‑na nga ta kjo̱ba kijchòko̱‑no.
\v 2 Nga̱ tsa ꞌa̱n kijchòko̱‑najiòn kjo̱ba, ¿yá ra ma tsjá india‑na kjo̱tsja? Nga̱ ijyeé ta baá ꞌse̱‑najiòn.\fig Paul with scrolls at desk (with hair) -50% (ALT) CN 02059 (Same as above but without hair)|63-cn02058B.tif|col|2CO 2:3‑4, 9||Kóꞌsín nga tsikínda xa̱jo̱n jè Pablo ra isìkasén‑la̱ jñà na̱xi̱ndá‑la̱ Nainá|2CO 2:2\fig*
\v 3 ꞌKoa̱á ma‑ni nga ta xa̱jo̱n ítsikindá‑no, tà nga̱tjì‑la̱ majìn‑na nga jiòn, ba ꞌké‑ná ꞌkia̱ nga kijchòjkon‑no, jé ra mejèn‑na nga tsja ꞌse̱‑naa̱ ko̱ ra jiòn. Ko̱ ꞌkoa̱á ꞌsín tjíjngo takoàa̱n nga tsa̱jión ꞌkín ijye‑la̱ kjo̱tsja‑na̱.
\v 4 ꞌKia̱ nga ítsikinda‑najiòn jè xa̱jo̱n ra̱kìi̱, taxki̱ tímakájnoó‑na ko̱ taxki̱ ꞌoón tíma‑la̱ inìma̱‑na̱ ko̱ taxki̱ ꞌñó tíkjindaya̱. Tanga mì tsa ki xá ítsikindá‑na mé‑ni nga kataba‑najiòn, kií‑ní mé‑ni nga jcha̱a‑najiòn kóꞌki ꞌñó tsjake̱‑no.
\s Mé ꞌén ra tsjá Pablo a̱ꞌta ꞌtse̱ jè xi̱ta̱ ra tsakátsji‑jé
\p
\v 5 Jè xi̱ta̱ ra ko̱ꞌsín tsakátsji‑jé mì tsa ta ꞌa̱n jiàa̱n ra tíbátsji‑na kjo̱ba, skanda ko̱ó‑te jiòn ꞌcho síkítsa̱jna chiba‑no. Ta chibaá ko̱tíxiaa̱n mé‑ni nga mì kì ko̱to chi̱ba̱‑la̱ koni ꞌsín nga tíchjàa̱.
\v 6 Ijyeé nda tjín jè kjo̱hiꞌin ra ko̱ꞌsín ijye tsikinè‑la jiòn ngaꞌtsì‑no jè xi̱ta̱ ra̱kìi̱.
\v 7 ꞌNdi̱ ꞌndi̱ jè ra machjeén nga ti̱jchaàꞌta‑la jiòn ko̱ ti̱jetakòn, mé‑ni nga mì tsa ta kjo̱ba ki̱yájin‑ni.
\v 8 ꞌKoa̱á ma‑ni nga ko̱ꞌsín tíbitsáꞌba‑no nga jchi̱baya‑no nga india tsjacha ꞌtia̱n‑no jè xi̱ta̱ ra̱kìi̱.
\v 9 Kií xá ítsikinda‑najiòn jè xa̱jo̱n, mé‑ni nga nda kataꞌya‑la̱ a kixi̱í kjoa̱, ¿a maá‑no nda nihitjasòn ijye?
\v 10 Jè xi̱ta̱ ra jiòn si̱jchaꞌta‑la, ti̱ꞌkoa̱á sijcháꞌtá‑te‑la̱ ra ꞌa̱n. Tsa tjín mé ra ma si̱jchaꞌtà‑la, kjo̱nda tsa̱jión‑nájiòn nga ko̱ꞌsín si̱jchaꞌtà‑la ya̱ ngixko̱n Cristo.
\v 11 Mé‑ni nga mì jè xi̱ta̱‑ni̱í ma sa̱kò‑la̱ kóꞌsín nga si̱ìkijne‑ná, nga̱ ijyeé ꞌyeé kóꞌsín tjín kjoa̱ maña̱‑la̱.
\s Mé kjoa̱ ra ꞌñó kisíkájno jè Pablo
\p
\v 12 ꞌKia̱ nga ijchòo̱ ya̱ na̱xi̱ndá Troas, nga tsiꞌkènájmíya ꞌén xi̱tse̱ ra nda tsò a̱ꞌta ꞌtse̱ Cristo, ni̱ꞌsín itjáꞌxa̱ꞌnde‑na nga ísíxáa̱ ra a̱ꞌta ꞌtse̱ Na̱ꞌín‑ná,
\v 13 tanga jè inìma̱‑na̱ mì kì nda kiꞌse‑la̱, nga̱ mì kì iskajiàa̱n jè ndí ꞌndsé Tito. ꞌKoa̱á ma‑ni nga kítsjiaa̱n jñà xi̱ta̱ ra ya̱ i̱ꞌnde‑la̱, ko̱ ya̱á kijiàa̱ ya̱ nangi Macedonia.
\s Jñà ra síkijne ra a̱ꞌta ꞌtse̱ Cristo
\p
\v 14 Tse kjo̱nda kataꞌse‑la̱ Nainá, nga̱ ni̱chjin nchijón‑ní tíbakón kóꞌsín nga a̱ꞌta ꞌtse̱ Cristo i̱nchinìkijne‑ji̱n. Ko̱ a̱ꞌta tsa̱ji̱n‑náji̱n nga tímabísòn nga tíjngoo̱ jè kjoa̱chji̱ne̱ ra tjín‑la̱ koni jngo jta̱‑la̱ tsajmì ra nda jne̱.
\v 15 Ji̱n‑ji̱n, ꞌkoa̱á ꞌsín kjòn‑ji̱n ra a̱ꞌta ꞌtse̱ Nainá koni jta̱‑la̱ tsajmì ra ꞌñó nda jne̱ ra jè Cristo tsjá‑la̱ Nainá; jta̱ ra ya̱ i̱nchibijchókajin‑la̱ jñà xi̱ta̱ ra i̱nchibitjokajin kjo̱hiꞌin ra kjoa̱ ꞌtse̱ jé‑la̱. Ti̱ꞌkoa̱á ya̱á i̱nchibijchókajin‑la̱ jñà ra ta ya̱ i̱nchichijajin jé‑la̱.
\v 16 A̱ꞌta ꞌtse̱ jñà xi̱ta̱ ra ta ya̱ i̱nchichija, jè ꞌén ra ꞌbena̱jmíya‑ji̱n ꞌkoa̱á ꞌsín ꞌcho jne̱‑la̱ koni jngo jta̱ ra síꞌken‑ná; tanga jñà xi̱ta̱ ra i̱nchibitjokajin kjo̱hiꞌin ꞌtse̱ jé‑la̱, ꞌkoa̱á ꞌsín nda jne̱‑la̱ koni jngo jta̱ ra síkíjnakon‑ná. Ra ta kjo̱bítsjen ꞌtse̱, ni̱jngoó xi̱ta̱ ra chíkjoa̱‑la̱ nga ꞌke̱èna̱jmíya ꞌén kìi̱.
\v 17 Nga̱ mì tsa ko̱ꞌsín ꞌnià‑ji̱n koni ꞌsín kjín ma‑ni xi̱ta̱ ra ko̱ꞌsín ꞌsín iꞌka nga to̱n ꞌbéna̱jmíya‑ni jè ꞌén‑la̱ Nainá. Ngi ꞌkoa̱á ꞌsín tjín takòn‑ji̱n koni ꞌsín nakjoá‑ji̱n ya̱ ngixko̱n Nainá ra a̱ꞌta ꞌtse̱ Cristo, koni ꞌsín nga jè Nainá isìkasén‑naji̱n, nga xi̱ta̱ ꞌtse̱é tsò‑naji̱n.
\c 3
\s Jñà ra síxá a̱ꞌta ꞌtse̱ kjoa̱ xi̱tse̱‑la̱ Nainá
\p
\v 1 ꞌKia̱ nga ko̱ꞌsín bixó‑ji̱n, ¿a ta jé ijo‑na̱ji̱n nda i̱nchiníkítsa̱jna india‑naji̱n? Ko̱, ¿a ꞌkoa̱á ꞌsín mejèn‑najiòn tsa jngo xa̱jo̱n ko̱kón‑laji̱n ya̱ ñánda̱ nga nda tíchja̱ ra a̱ꞌta tsa̱ji̱n, o̱ ra jión ꞌki̱ jngo‑náji̱n xa̱jo̱n ya̱ ñánda̱ nga nda kixó jiòn ra a̱ꞌta tsa̱ji̱n koni ꞌsín ꞌsín iꞌka xi̱ta̱ ra kjꞌií?
\v 2 Jiòn sabá‑nájiòn xa̱jo̱n‑na̱ji̱n ra nda tíchja̱ ra machjeén‑naji̱n, jngo xa̱jo̱n ra ya̱ tjíndaꞌtá ya̱ a̱jin inìma̱‑na̱ji̱n, jè xa̱jo̱n ra nda bexkon ngaꞌtsì xi̱ta̱ ko̱ ti̱ꞌkoa̱ ma kotáꞌyá.
\v 3 ꞌKoa̱á ꞌsín nda ꞌya‑la̱ nga jión‑nájiòn xa̱jo̱n ra jè Cristo tsikínda, ra ji̱n tsako̱‑naji̱n nga inikaꞌbí‑ji̱n. Jngo xa̱jo̱n ra mì tsa tinda̱‑la̱ làpi̱ isinda‑ni, nga̱ ngi ko̱ó Inìma̱ Tsje‑la̱ Nainá ra tíjnakon isinda‑ni ra tjíꞌta. Mì tsa na̱jo̱ isindaꞌtá, ya̱á isindaꞌtá ya̱ a̱jin inìma̱‑la̱ xi̱ta̱.
\v 4 Nga̱ a̱ꞌta ꞌtse̱ Cristo‑ní nga ko̱ꞌsín tjíjngo takòn‑ji̱n nga ꞌkoa̱á ꞌsín tjín kjoa̱ kìi̱ ya̱ ngixko̱n Nainá.
\v 5 Mì tsa tsò‑ni kjoa̱ nga tsa̱ji̱n‑náji̱n ngaꞌñó ra nichjeén‑ji̱n ꞌkia̱ nga ko̱ꞌsín ꞌnià‑ji̱n kjoa̱ kìi̱. Nga̱ ngaꞌtsì kjoa̱ ra ma‑naji̱n ꞌnià‑ji̱n, a̱ꞌta ꞌtse̱é Nainá nchrabá‑ni ngaꞌñó.
\v 6 Jè sabá Nainá isìchji̱ne̱‑naji̱n mé‑ni nga si̱xáꞌta‑la̱ji̱n nga ki̱nákjoa̱ya‑ji̱n kóꞌsín tjín kjoa̱ ra tsikíndajín xi̱tse̱ india‑ni ra kjo̱nda ꞌtse̱ xi̱ta̱. Kjo̱nda ra tsikíndajín xi̱tse̱ Nainá, mì tsa ya̱ nchrabá‑ni jè kjo̱téxoma ra isinda, ya̱á nchrabá‑ni a̱ꞌta ꞌtse̱ Inìma̱ Tsje‑la̱ Nainá. Kjo̱téxoma ra ko̱ꞌsín isinda, kjo̱biyaá bíné‑ná, tanga jè ra a̱ꞌta ꞌtse̱ Inìma̱ Tsje‑la̱ Nainá nchrabá‑ni, síkíjnakoón inìma̱‑ná.
\p
\v 7 Jè kjo̱téxoma ra kiꞌtsì‑la̱ Moisés ra na̱jo̱ kisindaꞌtá, kjo̱biyaá bíné‑ná. Tanga ꞌñó kiꞌse‑la̱ kjoa̱jeya jè i̱sén‑la̱ Moisés ꞌkia̱ nga kiꞌtsì‑la̱ jè kjo̱téxoma kìi̱, nga̱ ꞌñó fate niꞌí tsatsíjen nga skanda jñà xi̱ta̱ Israel mì kì ti̱ ma iskotsíjenꞌá‑ni ya̱ i̱sén‑la̱ Moisés. Tsa ko̱ꞌsín kiꞌse‑la̱ kjoa̱jeya jè kjoa̱ ra ko̱ꞌsín tjínè‑la̱ nga ta ya̱ feheꞌta,
\v 8 ¿a mí tsa tjínè‑la̱ nga isa̱ ꞌñó kataꞌse‑la̱ kjoa̱jeya jè kjoa̱ xi̱tse̱ nga jè Nainá tsjá‑ná jè Inìma̱ Tsje‑la̱?
\v 9 Tsa ꞌkoa̱á ꞌsín ꞌñó jeya kjomà ꞌkia̱ nga jè Moisés kiꞌtsì‑la̱ jè kjo̱téxoma ra kjo̱hiꞌin bíné‑ná, ¿a mí tsa isa̱ tjínè‑la̱ nga ꞌñó kataꞌse‑la̱ kjoa̱jeya a̱ꞌta ꞌtse̱ kjoa̱ ra ꞌbena̱jmíya‑ji̱n nga ko̱ꞌsín jè Nainá, xi̱ta̱ kixi̱í bachrjengi‑ná?
\v 10 Ni̱ꞌsín ꞌñó kiꞌse‑la̱ kjoa̱jeya kjo̱téxoma ra ijye tsato, tanga mì kì ti̱ mangásòn‑ko̱‑ni koni jè kjoa̱jeya ra tjín‑la̱ jè kjoa̱ xi̱tse̱‑la̱ Nainá, nga̱ síkatoné‑la̱.
\v 11 Tsa jè kjoa̱ ra ta ya̱ feheꞌta, tseé kjoa̱jeya kiꞌse‑la̱, isa̱á machjeén nga isa̱ ꞌñó kataꞌse‑la̱ kjoa̱jeya jè kjo̱nda xi̱tse̱ ra mì feheꞌta skanda ta mé ni̱chjin‑ni.
\p
\v 12 Nga̱ ꞌkoa̱á ꞌsín tjíjngo takòn‑ji̱n nga i̱nchichiñá‑la̱ji̱n kjoa̱ kìi̱, ꞌkoa̱á ma‑ni nga mì tsa masabà‑naji̱n koni ꞌsín nga nakjoá‑ji̱n.
\v 13 Mì tsa ko̱ꞌsín ꞌnià‑ji̱n koni ꞌsín kiꞌsìn jè Moisés nga nikje xo̱ꞌba̱ tsakájtsa ya̱ i̱sén‑la̱ mé‑ni nga mì kì ske̱‑ni jñà xi̱ta̱ Israel jè kjoa̱jeya ra ko̱ꞌsín tjínè‑la̱ nga ta ya̱ feheꞌta.
\v 14 Tanga jñà xi̱ta̱ Israel kjótájajín inìma̱‑la̱ skanda ni̱chjin ꞌndi̱ ꞌndi̱. ꞌKia̱ nga kotáꞌyá jè xa̱jo̱n ra tjíꞌta kjoa̱ jchínga ra tsikíndajín ítjòn Nainá ra a̱ꞌta ꞌtse̱ xi̱ta̱, takó ꞌkoa̱á ꞌsín jngoya‑la̱ koni tsa jngo nikje xo̱ꞌba̱ kjijtsa kjo̱bítsjen‑la̱ ra mì kì tsjáꞌnde‑la̱ nga machi̱ya‑la̱. Nga̱ takó kjè kì tjahíxìn‑la̱ jè ra kjijtsa kjo̱bítsjen‑la̱. Nga̱ ta̱ jngoó a̱ꞌta ꞌtse̱ Cristo ma tjáhixìn‑la̱.
\v 15 Skanda ni̱chjin ꞌndi̱ ꞌndi̱‑ni̱, jñà xi̱ta̱ Israel ꞌkia̱ nga kotáꞌyá jè xa̱jo̱n ra jè Moisés tsikínda, takó koni jngoó nikje xo̱ꞌba̱ bíchjàjin kjo̱bítsjen‑la̱ nga mì kì machi̱ya‑la̱.
\v 16 Tanga ꞌkia̱ nga jngo xi̱ta̱ máfaꞌta‑la̱ Na̱ꞌín‑ná ra tíjna ítjòn‑ná nga makjiín‑la̱ ra a̱ꞌta ꞌtse̱, tjahíxín‑la̱ jè ra bíchjàjin kjo̱bítsjen‑la̱.
\v 17 Nga̱ jè Na̱ꞌín‑ná ti̱jé‑ni ra Inìma̱ Tsje. Ko̱ jè xi̱ta̱ ra ya̱ tíjnajin ya̱ inìma̱‑la̱ jè Inìma̱ Tsje‑la̱ Nainá, ijyeé tíjnandi̱í‑ní.
\v 18 Ngaꞌtsí‑né, ꞌkia̱ nga mì ti̱ mé kjijtsa‑ni kjo̱bítsjen‑ná, ꞌkoa̱á ꞌsín kjén koni jngo chi̱tsín ra ma chitsíjen‑yé, ra fate síkatsíjen jè kjoa̱jeya‑la̱ Na̱ꞌín‑ná; ko̱ ni̱chjin nchijón‑ní nga tífaatjìya‑ná koni ꞌsín nga i̱nchiꞌyeé kjoa̱jeya‑la̱; ꞌkoa̱á ꞌsín kjòn tímeé koni ꞌsín ꞌki ra jè, nga̱ jé Inìma̱ Tsje‑la̱ Na̱ꞌín‑ná ra ko̱ꞌsín tísíko̱‑ná.
\c 4
\s Xi̱ta̱ ra ꞌbéna̱jmíya a̱ꞌta ꞌtse̱ Jesucristo
\p
\v 1 ꞌKoa̱á ma‑ni nga mì kì mahinda inìma̱‑na̱ji̱n, nga̱ jé Nainá ra ko̱ꞌsín kjòhi̱ma̱ke‑naji̱n nga kitsjá‑naji̱n jè xá ra̱kìi̱.
\v 2 Nachrjengi‑náji̱n jñà kjoa̱ ra ta kjo̱ꞌma ꞌnié, kjoa̱ ra tsjá‑ná kjo̱sabà. Mì tsa ta kjoa̱ maña̱ ra ꞌnià‑ji̱n, ko̱ mì tsa kjꞌií kjoa̱ níkójin‑ji̱n jè ꞌén‑la̱ Nainá. Jè ra mejèn‑naji̱n nga nda ꞌkéna̱jmíya‑ji̱n kóꞌsín tjín kjoa̱kixi̱ mé‑ni nga jñà xi̱ta̱ nda katachi̱ya‑la̱ inìma̱‑la̱ kjoa̱ ra ꞌnià‑ji̱n ya̱ ngixko̱n Nainá.
\v 3 Tsa takó ko̱ꞌsín ma iꞌka‑la̱ jñà xi̱ta̱ nga koni tsa kjijnaꞌma jè ꞌén xi̱tse̱ ra nda tsò a̱ꞌta ꞌtse̱ Cristo ra ꞌbena̱jmíya‑ji̱n, ta jñá‑la ra ko̱ꞌsín ma‑la̱ jñà ra i̱nchichija ya̱ a̱jin jé‑la̱.
\v 4 Jè xi̱ta̱‑ni̱í ra tíbatéxoma‑la̱ ni̱chjin ra titsa̱jneé ꞌndi̱ ꞌndi̱, ra ko̱ꞌsín tíjna koni tsa nainá, jé tsikíchjàjin ya̱ a̱jin kjo̱bítsjen‑la̱ jñà xi̱ta̱ ra mì kì makjiín‑la̱ a̱ꞌta ꞌtse̱ Cristo, mé‑ni nga mì kì ko̱ma ske̱‑ni jè kjoa̱hisen‑la̱ jè ꞌén xi̱tse̱ ra nda tsò a̱ꞌta ꞌtse̱ Cristo ra jeya tíjna. Nga̱ jé Cristo ra bakón kóꞌki kjòn‑ni ra ngi jè Nainá.
\v 5 Mì tsa a̱ꞌta tsa̱ji̱n ra nda nakjoá‑ji̱n ꞌkia̱ nga ꞌbena̱jmíya‑ji̱n; jé ꞌbena̱jmíya‑ji̱n ra a̱ꞌta ꞌtse̱ Jesucristo nga bixó‑ji̱n: jé tíjna ítjòn‑ná. Ta chi̱ꞌndaá ma‑ji̱n ra a̱ꞌta tsa̱jiòn‑jiòn, ta nga̱tjì‑la̱ kjo̱tsjacha ra tjín‑naji̱n a̱ꞌta ꞌtse̱ Jesús.
\v 6 Jè Nainá ra ko̱ꞌsín kitsjà kjo̱hixi̱ nga katamahisen ya̱ ñánda̱ nga jñò chon; jé‑ní ra ko̱ꞌsín isìhisen ya̱ a̱jin inìma̱‑na̱ji̱n, mé‑ni nga ko̱ma si̱hisen‑te‑la̱ji̱n jñà xi̱ta̱ ra kjꞌií, nga katabexkon jè kjoa̱jeya‑la̱ Nainá ra ꞌñó fate mahisen ya̱ a̱ꞌta ꞌtse̱ Jesucristo.
\s Kóꞌsín nga ꞌñó tjín takén ni̱ꞌsín kjo̱hiꞌin ko̱tojieén
\p
\v 7 Jè kjoa̱hisen‑la̱ Nainá koni jngo tsajmì ra ꞌñó chjí‑la̱, ya̱á tíjnajin ijo‑na̱ji̱n ra ko̱ꞌsín jngoya‑la̱ koni jngo ti̱jí niꞌnde, mé‑ni nga nda kataꞌya‑la̱ nga jè ngaꞌñó ra bato ꞌñó nda tjín, mì tsa tsa̱ji̱n‑ji̱n, ꞌtse̱é Nainá‑ní.
\v 8 ꞌKoa̱á ma‑ni, ni̱ꞌsín jndíi̱ ra ján kàjin‑ji̱n kjoa̱, tanga mì tsa jñà kjoa̱ síkijne‑naji̱n. Ni̱ꞌsín tjín kjoa̱ ra ꞌñó makájno‑naji̱n, tanga mì tsa nìkjahajen‑la̱ji̱n takòn‑ji̱n.
\v 9 Ni̱ꞌsín mahatji̱ngi‑naji̱n xi̱ta̱, tanga mì tsa tsjin-tákon‑naji̱n Nainá; ni̱ꞌsín mejèn‑la̱ jñà xi̱ta̱ nga ki̱nchanè‑naji̱n, tanga mì kì chíkjoa̱‑la̱ nga síkjehesòn‑naji̱n.
\v 10 Ta ñánda̱ nga mangí‑ji̱n, kjiꞌtá ni̱chjin mejèn‑la̱ jñà xi̱ta̱ ko̱ꞌsín si̱ìꞌken‑naji̱n koni ꞌsín inìko̱ jè Jesús, mé‑ni nga a̱ꞌta tsa̱ji̱n kataꞌya‑la̱ nga jé Jesús ra tísíkíjnakon‑naji̱n.
\v 11 ꞌKia̱ nga titsa̱jnakon‑ji̱n, kjiꞌtá ni̱chjin kjo̱biya tísinè‑naji̱n ra ta nga̱tjì‑la̱ a̱ꞌta ꞌtse̱ Jesús, mé‑ni nga ti̱ꞌkoa̱ a̱ꞌta ꞌtse̱ ijo‑na̱ji̱n kataꞌya‑la̱ kjo̱binachon ra tsjá Jesús.
\v 12 ꞌKoa̱á ꞌsín tjín ra ji̱n, ta kjo̱biyaá i̱nchichiñá kiꞌta‑la̱ji̱n, tanga ra jiòn, jé kjo̱binachon ra mì feheꞌta tísakó‑no.
\p
\v 13 Jè xa̱jo̱n ra tjíꞌta ꞌén‑la̱ Nainá, ꞌkoa̱á ꞌsín tíchja̱ nga tsò: “Kjokjiín‑naa̱, ꞌkoa̱á ma‑ni nga kíchjàa̱.” ꞌKoa̱á ti̱ꞌsín tjín‑te inìma̱‑na̱ji̱n a̱ꞌta ꞌtse̱ ꞌén ra makjiín‑naji̱n; ndaá makjiín‑naji̱n, ꞌkoa̱á ma‑ni nga nakjoá‑ji̱n.
\v 14 ꞌYa‑náji̱n nga jè Nainá ra isikjaáya‑la̱ jè Jesús ra tíjna ítjòn‑ná, ꞌkoa̱á ti̱ꞌsín si̱ìkjaáya‑naji̱n koni ꞌsín nga jaáya‑la̱ Jesús; ko̱ a̱kjòn ngaꞌtsí‑né, ya̱á ta̱ña i̱ko̱‑ná ya̱ ñánda̱ nga tíjna ra jè sabà.
\v 15 Kjo̱nda tsa̱jión‑nájiòn ngaꞌtsì kjoa̱ kìi̱, mé‑ni nga isa̱ kjìn ma‑ni xi̱ta̱ ra katatjábé‑la̱ kjo̱nda‑la̱ Nainá, ko̱ jeya katijna Nainá ꞌkia̱ nga isa̱ kjìn ma‑ni xi̱ta̱ ra ki̱tso̱‑la̱: “Tse kjo̱nda kataꞌse‑li Na̱ꞌìn.”
\p
\v 16 ꞌKoa̱á ma‑ni nga mì kì mahinda inìma̱‑na̱ji̱n. Nga̱ ni̱ꞌsín tímajchínga ra ijo‑na̱ji̱n, tanga jè inìma̱‑na̱ji̱n ni̱chjin nchijón‑ní nga tíma-xi̱tse̱ya-isa.
\v 17 Jè kjo̱hiꞌin ra nìkjiín‑ji̱n i̱ i̱sàꞌnde, ta chibaá kjo̱hiꞌin tjín‑ni; nga̱ ta tíbato‑ní; ko̱ jngoó kjo̱nda tji̱ko̱ ra a̱ꞌta tsa̱ji̱n nga ya̱á sakó jngo‑naji̱n kjoa̱jeya ra ꞌñó tse ko̱ ra ni̱kjiá kje̱heꞌtà.
\v 18 Nga̱ mì tsa jñà chitsíjen‑la̱ji̱n jñà kjoa̱ ra ma i̱ i̱sàꞌnde ra tsijen‑ni; jñá chitsíjen‑la̱ji̱n jñà ra mì kì tsijen‑ni ra a̱ꞌta ꞌtse̱ Nainá nchrabá‑ni. Nga̱ jñà kjoa̱ ra ma i̱ i̱sàꞌnde, ta tíbato‑ní, tanga jñà ra mì kì tsijen‑ni ra ꞌtse̱ Nainá, mì kì kje̱heꞌtà skanda ta kjiá‑nioo̱.
\c 5
\p
\v 1 Jè ijo‑ná, ꞌkoa̱á ꞌsín jngoya‑la̱ koni tsa jngo niꞌya ra sinda i̱ a̱ꞌta nangi ra ta chiba ni̱chjin ma‑la̱ nga sasa fitsón‑ña. Tanga tsa kji̱tsón‑ña jè niꞌya ra̱kìi̱, tíjnaá jngo‑ná ya̱ ján ngajmi niꞌya ra tíjna skanda ta kjiá‑nioo̱ ra mì tsa xi̱ta̱ tsikínda, jé sabà Nainá tsikínda.
\v 2 ꞌKoa̱á ma‑ni nga i̱ma̱á fahátse‑la̱ inìma̱‑ná ꞌkia̱ nga ya̱ titsa̱jnaya iseé jè niꞌya ra̱kìi̱, nga̱ jé ra mejèn‑ná tsa ijye ya̱ titsa̱jnayeé jè niꞌya‑ná ra tíjna ya̱ ján ngajmi.
\v 3 Ni̱ꞌsín si̱jna ijo‑ná ra tjaꞌché ꞌndi̱‑ni̱, ìjngo‑isa ijo xi̱tse̱ tsjá‑ná jè Nainá. Jè inìma̱‑ná mì tsa ta ya̱ si̱jnajin i̱sén, ijo xi̱tse̱é ꞌse̱‑la̱.
\v 4 ꞌKia̱ nga takó tíjnakon‑isa ijo‑ná ra ꞌkoa̱ jngoya‑la̱ koni jngo niꞌya ra ta chiba ni̱chjin ma‑la̱, ꞌñó ꞌon tífahátse‑la̱ inìma̱‑ná, nga̱ majìn‑ná tsa katatjahíxín‑ná jè ijo‑ná ra tjínè‑la̱ nga ki̱yá; jé ra mejèn‑ná nga kataxi̱tse̱ya, mé‑ni nga jè ijo‑ná ra tjínè‑la̱ nga ki̱yá, jè kjo̱binachon xi̱tse̱ katasíjchijangi.
\v 5 Jé Nainá ra ko̱ꞌsín ijye tsikínda nga tísíkíjnanda‑ná mé‑ni nga ko̱ꞌsín katameé. Ko̱ jé kitsjá‑ná jè Inìma̱ Tsje‑la̱, mé‑ni nga ijye tjín kixi̱‑ni kjoa̱ nga tjábé‑ná kjo̱nda ra ijye tjínda‑la̱ nga tsjá‑ná.
\p
\v 6 ꞌKoa̱á ma‑ni tjíjngoó takén nga ni̱chjin nchijón‑ní nga jè Nainá kjiꞌtatakén, ꞌkia̱ nga takó tíjnakon‑isa ijo‑ná, takó kjiín titsa̱jna-isa‑lá ya̱ i̱ꞌnde ñánda̱ nga tíjna jè Na̱ꞌín‑ná ra tíjna ítjòn‑ná.
\v 7 ꞌKoa̱á ꞌsín i̱nchiníjché ijo‑ná koni ꞌsín tjín kjoa̱ ra makjiín‑ná; mì tsa ko̱ꞌsín i̱nchiꞌnié koni ꞌsín tjín kjoa̱ ra ta xkén tsijen‑la̱.
\v 8 Tanga ijyeé ko̱ꞌsín tjíjngo takén, nga̱ jé ra isa̱ ꞌñó mején‑ná tsa ijye ki̱jmié ijo‑ná ra tjaꞌché mé‑ni ma ya̱ ki̱tsa̱jna‑né ya̱ ñánda̱ nga tíjna Na̱ꞌín‑ná ra tíjna ítjòn.
\v 9 ꞌKoa̱á ma‑ni nga ko̱ꞌsín binè‑lá ijo‑ná nga ꞌkoa̱á ꞌsín ꞌnié koni ꞌsín tjín kjoa̱ ra sasén‑la̱ ra jè, ni̱ꞌsín ta ñánda̱ titsa̱jneé, a ya̱á titsa̱jneé ya̱ a̱ꞌta nangi o̱ ra ya̱á titsa̱jneé ya̱ ján ngajmi.
\v 10 Nga̱ ꞌkoa̱á ꞌsín tjíné‑ná ngaꞌtsì‑ná nga ya̱ kijcho kincheé ya̱ ngixko̱n ñánda̱ nga tíbatéxoma Cristo, mé‑ni nga ko̱ꞌsín katamaꞌtieén koni ꞌsín tjín kjoa̱ ra kiꞌnié ya̱ i̱sàꞌnde ꞌkia̱ nga tsikitsa̱jneé ya̱ a̱ꞌta nangi; tsa nda kiꞌnié, kjo̱ndaá tjábé‑ná, ko̱ tsa ꞌcho kiꞌnié kjoa̱ꞌchoó tjábé‑ná.
\s ꞌÉn ra tsjá‑ná kjo̱ꞌnchán ra a̱ꞌta ꞌtse̱ Nainá
\p
\v 11 ꞌKia̱ nga ijye ꞌya‑ji̱n nga machjeén‑ní nga ki̱skón‑cha‑ji̱n Nainá, nga ꞌkoa̱á ꞌsín jcha̱xkón‑ji̱n koni ꞌsín nga bakèn‑la̱ ra jè, ꞌkoa̱á ma‑ni nga ꞌbena̱jmíya‑la̱ji̱n jñà xi̱ta̱ mé‑ni nga katakjiín‑la̱ ra a̱ꞌta ꞌtse̱ Cristo. Jè Nainá ꞌñó nda tsijen‑la̱ koni ꞌsín tjín kjoa̱ ra ꞌnià‑ji̱n; ꞌkoa̱á ꞌsín mejèn‑na ra ꞌa̱n, tsa ko̱ꞌsín nda katachi̱ya‑te‑la̱ inìma̱‑najiòn kóꞌsín tjín kjòn‑ni kjoa̱ ra ꞌnià‑ji̱n.
\v 12 Mì tsa ta ki‑ni nga ji̱n mejèn‑naji̱n nga nda si̱kítsa̱jna india‑naji̱n ijo‑na̱ji̱n; jé ra mejèn‑naji̱n nga ti̱ꞌkoa̱á katatsja‑te‑la̱ takòn jiòn ra a̱ꞌta tsa̱ji̱n, mé‑ni nga sa̱kò‑no ꞌén kóꞌsín ꞌkín‑la̱ jñà xi̱ta̱ ra ta ijo‑la̱ nda síkítsa̱jna ko̱ mì tsa jè inìma̱‑la̱ nda síkinda̱ ítjòn.
\v 13 Nga̱ tsa ská‑naji̱n, a̱ꞌta ꞌtse̱ Nainá‑ní nga ská‑naji̱n; ko̱ tsa ngi ndaá tjín kjo̱bítsjen‑na̱ji̱n, kjo̱nda tsa̱jión‑nájiòn nga ko̱ꞌsín tjín.
\v 14 Jé kjoa̱tsjacha‑la̱ Cristo ra itsabáꞌñó‑naji̱n ra ko̱ꞌsín fìko̱‑naji̱n koni ꞌsín nga mejèn‑la̱. Ko̱ ki̱í ꞌsín ijye nda isìchi̱ya‑naji̱n: Jngoó‑ní ra ꞌken‑tjì‑la̱ ngaꞌtsì xi̱ta̱, ꞌkoa̱á ma‑ni nga ijyeé ꞌken‑te ngaꞌtsì jñà xi̱ta̱ ra tjín.
\v 15 Ko̱ ngaꞌtsì jñà xi̱ta̱, jé Cristo ꞌken ngajo‑la̱, mé‑ni nga jñà xi̱ta̱ ra títsa̱jnakon mì kì ti̱ ta jñà katatéxoma‑la̱ ijo‑la̱, jé Cristo katatéxoma‑la̱, jè ra ꞌken‑tjì‑la̱ ko̱ jaáya‑ila̱ ra ta kjo̱nda ꞌtse̱.
\p
\v 16 ꞌKoa̱á ma‑ni ꞌndi̱ ꞌndi̱, mì kì tsa ti̱ ko̱ꞌsín níkítsjen‑naji̱n ra a̱ꞌta ꞌtse̱ xi̱ta̱, koni ꞌsín isíkítsjen ijo jé‑na̱ji̱n. Ni̱ꞌsín tsa ko̱ꞌsín iníkítsjen‑ji̱n ra a̱ꞌta ꞌtse̱ Cristo nga ti̱ꞌsa̱ ítjòn; tanga ꞌndi̱ ꞌndi̱, mì tsa ti̱ ko̱ꞌsín níkítsjen‑naji̱n ra a̱ꞌta ꞌtse̱.
\v 17 ꞌKoa̱á ma‑ni, tsa jngo xi̱ta̱ ijye ya̱ tíjnako̱ Cristo, ijyeé xi̱ta̱ xi̱tse̱é kàma‑ni ra a̱ꞌta ꞌtse̱ Nainá. Jè kjoa̱ jchínga‑la̱ ijyeé kabato, saba kjoa̱ xi̱tse̱é kàma‑ni ꞌndi̱‑ni̱.
\p
\v 18 Ngaꞌtsì kjoa̱ kìi̱ a̱ꞌta ꞌtse̱ Nainá nchrabá‑ni nga ko̱ꞌsín a̱ꞌta ꞌtse̱ Cristo ma chibanda‑né ko̱ Nainá. Ko̱ jé kitsjáxá‑naji̱n nga ꞌkéna̱jmíya‑ji̱n kóꞌsín ma chibanda‑ná ko̱ Nainá.
\v 19 Tsó‑ni kjoa̱, nga jé Cristo kisìchjeén Nainá nga ma tsajo̱ónda‑ni ko̱ xi̱ta̱ i̱sàꞌnde, ko̱ mì tsa ti̱ kinda̱ kiꞌsìn‑ni kjoa̱ ꞌtse̱ jé ra tjín‑la̱ ngaꞌtsì xi̱ta̱. Ko̱ ji̱ín isìnga̱tsja‑naji̱n jè xá ra̱kìi̱, mé‑ni nga si̱kabíya‑ji̱n ꞌén kóꞌsín nga ma chibanda‑né ko̱ Nainá.
\v 20 ꞌKoa̱á ma‑ni, ngaji̱ín síkasén‑naji̱n Cristo nga nakjoá ngajo‑la̱ji̱n. ꞌKoa̱á jngoya‑la̱ koni tsa jè‑ni Nainá ra tíbítsaꞌba‑najiòn ꞌkia̱ nga ko̱ꞌsín ꞌmì‑laji̱n. A̱ꞌta ꞌtse̱ Cristo‑ní nga ko̱ꞌsín i̱nchibitsaꞌba‑laji̱n: “Jchi̱bànda‑no ko̱ jè Nainá.”
\v 21 Jè Cristo, ni̱jngo jé tsakátsji ra jè; tanga ta nga̱tjì tsa̱jién‑ná nga ko̱ꞌsín jè Nainá tsakánè jé‑la̱, mé‑ni nga ko̱ꞌsín xi̱ta̱ kixi̱ ka̱ma‑né ya̱ ngixko̱n Nainá ꞌkia̱ nga ijye ya̱ titsa̱hijyoke̱é jè Cristo.
\c 6
\p
\v 1 Ngaji̱n, ra ya̱ i̱nchiníxáꞌta‑te‑la̱ji̱n Nainá, ꞌkoa̱á ꞌsín bitsaꞌba‑laji̱n: Nda ti̱chjeén jiòn kjo̱nda ra ta kjo̱tjò títsjá‑no Nainá.
\v 2 Nga̱ ꞌkoa̱á ꞌsín kitsò Nainá:
\q Jé kjón ni̱chjin ꞌkia̱ nga chi̱ba̱‑la̱ kjochjeén‑li kjo̱nda‑na̱, kíꞌnchrè‑la.
\q Ko̱ jè ni̱chjin ꞌkia̱ nga tjichiñá‑la̱ nga kítjo̱jin kjo̱hiꞌin, isíkíjnandi̱í‑ila.
\m Nda kjón ti̱náꞌya jiòn, ꞌndi̱í ꞌndi̱‑ni̱ nda chi̱ba̱‑la̱ nga tímachjeén‑no jè kjo̱nda‑la̱ Nainá, ko̱ ꞌndi̱í‑ni̱ nga ma kítjo̱jion jiòn kjo̱hiꞌin.
\s Kjo̱hiꞌin ra tsatojin Pablo
\p
\v 3 Mì tsa mé kjoa̱ꞌcho ra i̱nchiꞌnià‑ji̱n ra ma ꞌcho ka̱ma‑la̱ xi̱ta̱ ra kjꞌií, mé‑ni nga mì yá ra ꞌcho ki̱tso̱‑la̱ jè xá ra i̱nchiꞌnià‑ji̱n.
\v 4 Ta isa̱á, ꞌkoa̱á ꞌsín ngi nda i̱nchibakòn kiꞌta‑ji̱n ijo‑na̱ji̱n nga chi̱ꞌnda‑la̱ Nainá ꞌmì‑naji̱n. Nga ꞌñó tjín‑naji̱n kjoa̱tsetakòn, nga ꞌñó tse kjo̱hiꞌin titsa̱jin‑ji̱n, nga tíchijaꞌta‑naji̱n tsajmì ra machjeén‑naji̱n, nga chjá tíma‑naji̱n kjoa̱ ra tíbatojin‑ji̱n;
\v 5 nga tínikiꞌon‑naji̱n, nga nìkjahaꞌsen‑naji̱n nda̱yá, nga tsò‑naji̱n xi̱ta̱ nga ji̱ín‑ró fatsji‑la̱ji̱n kjo̱si xi̱ta̱ na̱xi̱ndá, nga iyí xá ra ꞌnià‑ji̱n, nga mì ti̱ tsa tsjafè‑naji̱n, nga i̱nchinikjiín‑ji̱n ra kjinchrá.
\v 6 Tanga ngi tsjeé i̱nchiníjchá‑ji̱n ijo‑na̱ji̱n; ko̱ ndaá machi̱ya‑naji̱n kóꞌsín tjín kjo̱hixi̱; ko̱ chíkjoa̱ko̱ó‑naji̱n ꞌkia̱ nga kó síko̱‑naji̱n xi̱ta̱; ko̱ tjín‑la̱ kjo̱nda inìma̱‑na̱ji̱n ra a̱ꞌta ꞌtse̱ xi̱ta̱; jé Inìma̱ Tsje‑la̱ Nainá tísíxájin inìma̱‑na̱ji̱n; ko̱ ngi ko̱ó inìma̱‑na̱ji̱n nga tjín‑naji̱n kjo̱tsjacha.
\v 7 Ngi ꞌén kixi̱í ra nakjoá‑ji̱n. Ngaꞌñó‑la̱ Nainá‑ní ra timako̱‑ji̱n. Ko̱ jñà kjoa̱kixi̱ ra ꞌnià‑ji̱n, ꞌkoa̱á ꞌsín jngoya‑la̱ koni jñà ki̱cha̱ ra ko̱ ngaskoán ko̱ nga kixi̱ nichjeén‑ji̱n nga basìko̱‑naji̱n.
\v 8 Saꞌkoa̱á nda ꞌyaxkón‑naji̱n ko̱ saꞌkoa̱á mì kì ꞌyaxkón‑naji̱n. Saꞌkoa̱á nda bítjo̱ngi‑ji̱n ko̱ saꞌkoa̱á mì kì nda bítjo̱ngi‑ji̱n. Saꞌkoa̱á xi̱ta̱ ndiso ꞌmì‑naji̱n, tanga ngi ꞌén kixi̱í ra nakjoá‑ji̱n.
\v 9 ꞌKoa̱á ꞌsín nìko̱‑naji̱n koni tsa mí kì ꞌyaxkon‑naji̱n, tanga ꞌñó nda ꞌyaxkon‑naji̱n. ꞌKoa̱á kjòn‑ji̱n koni tsa ijye i̱nchibiya‑ji̱n, tanga ꞌñó nda titsa̱jnakon-isa‑ji̱n. Tsjá‑naji̱n kjo̱hiꞌin jñà xi̱ta̱, tanga mì tsa síꞌken kjòn‑naji̱n.
\v 10 ꞌKoa̱á ꞌsín kjòn‑ji̱n koni tsa ba tjín‑naji̱n, tanga ꞌñó tsja tjín‑la̱ inìma̱‑na̱ji̱n. ꞌKoa̱á ꞌsín kjòn‑ji̱n koni tsa xi̱ta̱ i̱ma̱‑náji̱n ra ni̱mé kjo̱nda tísakó‑la̱, tanga ꞌñó kjìn xi̱ta̱ tísakó‑la̱ kjo̱nda ꞌtse̱ Nainá ra a̱ꞌta tsa̱ji̱n. ꞌKoa̱á kjòn‑ji̱n koni tsa ni̱mé ra tjín‑naji̱n, tanga ya̱ ngixko̱n Nainá ni̱mé ra chijaꞌta‑naji̱n.
\p
\v 11 Jiòn ꞌndsé ra ya̱ Corinto tsa̱jiòn, ꞌkoa̱á ꞌsín i̱nchinakjoá kixi̱í‑laji̱n, nga̱ ngi ko̱ó inìma̱‑na̱ji̱n nga tsjacha‑laji̱n.
\v 12 Mì tsa xkon tjín inìma̱‑na̱ji̱n ra a̱ꞌta tsa̱jiòn, tanga jión‑nájiòn ra xkon tjín inìma̱‑no ra a̱ꞌta tsa̱ji̱n.
\v 13 Mé‑ni nga ko̱ngásòn‑ni kjoa̱ ra si̱ke̱é xàngie̱é, ꞌkoa̱á ꞌsín tíbitsáꞌba‑najiòn koni tsa i̱xti‑na̱ xin‑no, kì xkon níkíjna inìma̱‑no.
\s Kóꞌsín nga machjeén nga ki̱nchaꞌtaxìn‑la ra kjoa̱ ꞌtse̱ jé
\p
\v 14 Kì jñà níngásòn‑ko̱o kjo̱bítsjen‑no ko̱ xi̱ta̱ ra mì tsa a̱ꞌta ꞌtse̱ Cristo makjiín‑la̱. Nga̱, ¿kóꞌsín ka̱ma‑ni nga ko̱ngásòn‑kjo jngo ra xi̱ta̱ kixi̱ ya̱ ngixko̱n Nainá ko̱ jngo xi̱ta̱ ra tsìn‑la̱ kjoa̱kixi̱‑la̱ Nainá? ¿A ka̱maá jñò ko̱chon ya̱ ñánda̱ nga tjín niꞌí ra síhisen?
\v 15 ¿A maá nga nda ko̱hijta jè Cristo ko̱ jè xi̱ta̱‑ni̱í? Ko̱, ¿a ka̱maá‑te nga ya̱ nda ko̱hijtako̱ jngo xi̱ta̱ ra makjiín‑la̱ a̱ꞌta ꞌtse̱ Cristo ko̱ jngo ra mì kì makjiín‑la̱?
\v 16 Majìn, nga̱ jè niꞌya i̱ngo̱‑la̱ Nainá, mì kì ma nga ya̱ si̱jnaya jngo xkósòn ra nainá tsò‑la̱ xi̱ta̱. Nga̱ jién jnchreé ra meé niꞌya i̱ngo̱‑la̱ Nainá ra tíjnakon. Koni ꞌsín ijye kitsò Nainá a̱ꞌta ꞌtse̱ xi̱ta̱ ra makjiín‑la̱ a̱ꞌta ꞌtse̱, nga kitsò:
\q Ya̱á kóti̱jnako̱ ko̱ ya̱á kojmejín‑la̱ na̱xi̱ndá‑na̱.
\q ꞌA̱án ko̱ma Nainá‑la̱ ko̱ jñá ko̱ma xi̱ta̱ na̱xi̱ndá‑na̱.
\m
\v 17 ꞌKoa̱á ma‑ni nga ko̱ꞌsín kitsò‑te a̱ꞌta ꞌtse̱ xi̱ta̱‑la̱:
\q Títjo̱kajion ya̱ a̱jin‑la̱ xi̱ta̱ kìi̱, ko̱ ti̱nchaꞌtàxìn‑la.
\q Kì jñà chaájion kjoa̱ ra tjé tjín ya̱ ngixkoàa̱n,
\q ꞌkoa̱á ꞌsín ka̱ma‑ni nga ꞌa̱n skábétjò‑no.
\q
\v 18 ꞌA̱n‑ná ra ska̱ábétjò‑no nga Na̱ꞌìn‑no ka̱ma,
\q ko̱ jión ka̱ma jiòn i̱xti ꞌxi̱n‑na̱ ko̱ i̱xti íchjín‑na̱,
\q ꞌkoa̱á xian‑no ꞌa̱n ra Nainá ꞌmì‑na ra tíjna̱ títjòn‑no,
\q ꞌa̱n ra ta ꞌa̱n ta̱jngo‑naa̱ ra ꞌñó tse ngaꞌñó tjín‑na.
\c 7
\p
\v 1 Jiòn ꞌndsé ra tsjake̱‑no, tsa ko̱ꞌsín tjín kjoa̱ ra tjínda‑la̱ Nainá ra a̱ꞌta tsa̱jién, machjeén‑ní nga ki̱nchaꞌtaxín‑lá ngaꞌtsì kjoa̱ ra tjé tjín ra síkitsón‑ná nga sítjé ijo‑ná ko̱ jè inìma̱ tsje‑ná. Kjiꞌtá ni̱chjin kjótsjieé nga isa̱ tsje ki̱tsa̱hijyeé a̱ꞌta ꞌtse̱ Nainá nga ko̱ꞌsín ki̱skón‑cheé ra jè.
\s Kjoa̱tsja‑la̱ Pablo ra a̱ꞌta ꞌtse̱ xi̱ta̱ Corinto
\p
\v 2 Chjíbétjò‑náji̱n ya̱ a̱jin inìma̱‑no. Ji̱n, kjè tsa yá ra ji̱n ꞌcho niko̱‑ji̱n, ko̱ kjè tsa yá ra kjo̱bítsjen‑la̱ nìkitsón‑ji̱n, ko̱ kjè tsa yá ra ji̱n chìndo̱cha̱‑la̱ji̱n.
\v 3 ꞌKia̱ nga ko̱ꞌsín tíxin‑no, mì tsa mé ra tíbanè jé‑no; ijyeé ko̱ꞌsín kíxin‑no ꞌkia̱ nga ꞌsa̱ ítjòn, jiòn‑jiòn, kjiꞌtá ni̱chjin tsjacha‑laji̱n ko̱ ya̱á titsa̱jnakjeé ko̱ ya̱á ki̱yákjeé.
\v 4 Ngi ꞌén kixi̱ kjón‑ní koni ꞌsín nga tíchjà‑no; ꞌñó ꞌbe‑la̱ takoàa̱n ra a̱ꞌta tsa̱jiòn, ꞌñó maꞌñó takoàn ko̱ ꞌñó sakó‑na kjo̱tsja ni̱ꞌsín ta mé kjo̱hiꞌin ra ꞌse‑naji̱n.
\p
\v 5 Skanda ꞌkia̱ nga ꞌjíi̱‑ji̱n i̱ nangi Macedonia, kjè tsa mé ra níkjáya‑ji̱n. Kjín sko̱ya kjoa̱ i̱nchibatojin‑ji̱n: jndíi̱ ra ján tjín‑naji̱n kjo̱si; ngi ta kjo̱skoón titsa̱jin kiꞌta‑ji̱n.
\v 6 Tanga jè Nainá ra ma‑la̱ síje ikon jñà ra inda tjín ikon; jé isìje ikon‑naji̱n ꞌkia̱ nga ꞌji jè Tito.
\v 7 Ko̱ mì tsa tà ki‑ni nga ꞌjiìjkón‑naji̱n nga kjoje takòn‑ji̱n, kií‑te nga ꞌñó tsja tjín‑la̱ ra a̱ꞌta tsa̱jiòn kóꞌsín nga inije takòn jiòn ra jè. Tsiꞌkéna̱jmí‑naji̱n nga ꞌñó mejèn‑najiòn nga ska̱jieén. ꞌKoa̱á ti̱ kitsò‑naji̱n nga ꞌñó tjín‑najiòn ra kjo̱ba ko̱ nga ꞌñó tímakájno‑najiòn ra a̱ꞌta tsa̱ꞌa̱n. ꞌKia̱ nga kíꞌnchree̱ ꞌén kìi̱ isa̱á ta ꞌñó tsja kiꞌse-isa‑na.
\p
\v 8 Ni̱ꞌsín ta kjo̱ba ítsakatsjí‑najiòn ꞌkia̱ nga ko̱ꞌsín ísikásén‑no xa̱jo̱n, kixi̱í kjoa̱ kjókájnoó‑na nga ti̱ꞌsa̱ ítjòn ra a̱ꞌta tsa̱jiòn nga baá kiꞌse chiba ni̱chjin‑najiòn. Tanga ꞌndi̱, mì kì ti̱ tsa tísíkájno‑naa̱.
\v 9 Ta isa̱á jnchro, ꞌñó tímatsja‑isa‑na, tanga mì tsa ki‑ni matsja‑na nga kjo̱ba tsakatsjí‑najiòn; kií‑ní nga jè kjo̱ba ra tsikitsa̱jnajin jiòn, jé tsasìko̱‑najiòn nga ma iníkájno jè jé‑no ko̱ nga ma tsáfaꞌta‑la jiòn Nainá. Tsa ko̱ꞌsín kjo̱ba‑najiòn koni ꞌsín mejèn‑la̱ Nainá, tsó‑ni kjoa̱ nga mì tsa mé kjoa̱ꞌcho ra tsakjatsji‑la̱ji̱n.
\v 10 ꞌKia̱ nga ko̱ꞌsín maba‑la̱ inìma̱‑ná koni ꞌsín nga jè Nainá mejèn‑la̱, jé basìko̱‑ná nga ma níkájneé jé‑ná ko̱ mì tsa ti̱ jé fatsji‑ná, mé‑ni nga ma kítjo̱kajieén kjo̱hiꞌin ꞌtse̱ jé‑ná, ko̱ mì tsa mé ra a̱skan níkájno‑ná. Tanga tsa ꞌkia̱ ya̱ nchrabá‑ni kjoa̱ ra síba‑la̱ inìma̱‑ná a̱ꞌta ꞌtse̱ kjoa̱ ra tjín ya̱ i̱sàꞌnde, ta kjo̱biyaá sakó‑ná.
\v 11 ꞌKia̱ nga ko̱ꞌsín kjoba‑la̱ inìma̱‑najiòn koni ꞌsín nga jè Nainá mejèn‑la̱, jión i̱nchiꞌya‑no ꞌndi̱‑ni̱ nga ꞌñó tse tjín‑ni kjo̱nda ra isakò‑no. Nga̱ ꞌñó i̱nchibinè‑la̱ ijo‑no kjoa̱ ra nda tjín, ko̱ ꞌñó i̱nchibixkàn‑tjiò ijo‑no nga mì mé kjoa̱ tjín‑no; ꞌñó i̱nchinìjticha a̱ꞌta ꞌtse̱ kjoa̱ ra ꞌcho tjín, ko̱ ꞌñó tjín‑no kjoa̱ skon, ꞌñó mejèn‑no nga ska̱jieén, ti̱ꞌkoa̱ ꞌñó makájno‑no jè ra a̱ꞌta tsa̱ꞌa̱n, ko̱ kiꞌtsí‑la̱ kjo̱hiꞌin jè xi̱ta̱ ra ꞌcho kiꞌsìn. Ta ngaꞌtsì‑ni kjoa̱ kìi̱, ꞌkoa̱á ꞌsín tsakon jiòn ijo‑no nga mì tsa mé jé tjín‑no ra a̱ꞌta ꞌtse̱ kjoa̱ kìi̱.
\v 12 ꞌKia̱ nga ko̱ꞌsín ítsikinda‑najiòn xa̱jo̱n, mì tsa jè ísikítsjee̱n a̱ꞌta ꞌtse̱ xi̱ta̱ ra ꞌcho kiꞌsìn, ko̱ a̱ꞌta ꞌtse̱ jè ra ꞌcho kjomàꞌtin. Jé‑ní ra mejèn‑na nga ti̱jiòn kjòn nda katachi̱ya‑no kóꞌsín nga tsjacha‑náji̱n.
\v 13 Jñá ngaꞌtsì kjoa̱ kìi̱ ra ꞌñó isìje takòn‑naji̱n.
\p Ni̱ꞌsín isakò‑naji̱n kjoa̱jetakòn ra a̱ꞌta ꞌtse̱ kjoa̱ kìi̱, tanga isa̱á ta ꞌñó kjotsja-isa‑naji̱n ꞌkia̱ nga kijcha‑ji̱n jè Tito nga ꞌñó tsja tjín‑la̱, ta nga̱tjì‑la̱ nga ꞌñó tse kjo̱nda ra isakò‑la̱ ra a̱ꞌta tsa̱jiòn.
\v 14 Ijyeé a̱sa ko̱kíxian‑la̱ jè Tito nga ꞌñó ꞌbe‑la̱ takoàa̱n ra a̱ꞌta tsa̱jiòn ko̱ mì tsa ꞌcho i̱nchiníkíjna‑nájiòn. Koni ꞌsín nga ngi ꞌén kixi̱‑ní ngaꞌtsì jè ꞌén ra ijye inakjoáko̱‑laji̱n, ꞌkoa̱á ti̱ꞌsín ꞌén kixi̱ kjomà‑ni jñà ꞌén ra ko̱tsiꞌkìn‑la̱ji̱n jè Tito ra a̱ꞌta tsa̱jiòn.
\v 15 Jè Tito, isa̱á ta ꞌñó matsjake-isa‑najiòn ꞌkia̱ nga bítsjen‑la̱ kóꞌsín nga nda inìhitjasòn‑la. Ko̱ nga ꞌñó nda ichjíbétjò jiòn ꞌkia̱ nga ijchòjkon‑no ko̱ ti̱ꞌkoa̱á ꞌñó nda kijchaxkón‑te.
\v 16 ꞌÑó matsja‑na nga ko̱ꞌsín nda ma baꞌtá takòn‑najiòn ra a̱ꞌta ꞌtse̱ ta mé kjoa̱‑ni.
\c 8
\s Mé‑ni machjeén‑ni nga ꞌki̱ jngeé kjo̱tjò ra a̱ꞌta ꞌtse̱ Nainá
\p
\v 1 Jiòn ꞌndsé ko̱ tichjeé, mején‑te‑naji̱n ꞌkéna̱jmí‑laji̱n kjo̱nda ra jè Nainá títsjá‑la̱ na̱xi̱ndá‑la̱ Cristo ra títsa̱jna ya̱ nangi Macedonia.
\v 2 Ni̱ꞌsín takó ꞌñó iꞌin tjín kjoa̱ ra i̱nchibatojin, ꞌñó tjín‑la̱ kjo̱tsja inìma̱‑la̱. Ko̱ ni̱ꞌsín ꞌñó ndí xi̱ta̱ i̱ma̱, isa̱á ta ꞌñó tse i̱nchitsjá kjo̱tjò ra jè Nainá i̱nchisínga̱tsja, ꞌkoa̱á jngoya‑la̱ koni tsa xi̱ta̱ nchi̱ná.
\v 3 ꞌA̱n kjón kíjtsee̱ nga ngi ko̱ó kjo̱tsja‑la̱ kitsjà koni ꞌki kjomà ra kiꞌsìn, ko̱ skanda isa̱á tse kitsjà‑isa koni ꞌki nga ijchòtji̱ngi ngaꞌñó‑la̱.
\v 4 ꞌÑó tsikítsaꞌba‑naji̱n nga kitsò‑naji̱n: “Ti̱ꞌnde‑náji̱n nga ko̱ma ꞌki̱ chiba‑te‑ji̱n kjo̱tjò ra ki̱ji̱‑la̱ jñà xi̱ta̱ tsje‑la̱ Nainá ra tíchijaꞌta‑la̱.”
\v 5 Isa̱á kjìn kjoa̱ kiꞌsìn‑isa koni ꞌsín nga i̱nchichiñá‑la̱ji̱n. Ítjòn nangi isíkítsa̱jna inìma̱‑la̱ ra a̱ꞌta ꞌtse̱ Nainá, ko̱ a̱kjòn, ꞌkia̱á ko̱ꞌsín kiꞌsìn‑te ra a̱ꞌta tsa̱ji̱n koni ꞌsín nga mejèn‑la̱ Nainá.
\v 6 ꞌKoa̱á ma‑ni nga ko̱ꞌsín tsikitsaꞌba‑la̱ji̱n jè Tito, nga takó jè katabíxkójin jñà kjo̱tjò ra nchrabájin inìma̱‑no koni jngo kjo̱nda ra si̱nga̱tsja jiòn Nainá. Ko̱ꞌsín katasíkjeheꞌta xá ra kiꞌtsì‑la̱ nga ti̱ꞌsa̱ ítjòn.
\v 7 Koni ꞌsín nga ꞌñó nda ꞌnià jiòn ngaꞌtsì kjo̱nda: nga nda makjiín‑najiòn a̱ꞌta ꞌtse̱ Cristo, nga tjín‑no ꞌén kóꞌsín nakjoá, ko̱ nga tjín‑no kjoa̱chji̱ne̱, ko̱ nga titsa̱jnanda‑no nga ma si̱itjasòn kjoa̱ ra nda tjín, ti̱ꞌkoa̱ nga tjín‑no kjo̱tsjacha ra a̱ꞌta tsa̱ji̱n; ꞌkoa̱á ti̱ꞌsín machjeén nga ti̱ꞌkoa̱ katama‑no ꞌtio̱o jè kjo̱nda ra̱kìi̱.
\p
\v 8 Mì tsa jngo kjo̱téxoma tíbiné‑no ꞌkia̱ nga ko̱ꞌsín tíxin‑no. Jé ra mejèn‑na nga jcha̱‑la̱ a kixi̱ kitií kjoa̱ nga tjín‑no kjo̱tsjacha, koni ꞌsín nga ꞌñó tjín‑la̱ kjo̱tsjacha jñà xi̱ta̱ ra iꞌka nga síxátíya‑la̱ ijo‑la̱ nga tsjá kjo̱tjò‑la̱.
\v 9 Ijyeé ꞌya‑nájiòn jè kjo̱nda‑la̱ Jesucristo ra tíjna ítjòn‑ná nga ta nga̱tjì‑la̱ nga ꞌñó kjotsjake‑najiòn, xi̱ta̱ i̱ma̱á kiꞌsìn ijo‑la̱, ni̱ꞌsín xi̱ta̱ nchi̱ná kjòn‑ni ra jè, mé‑ni nga koni ꞌsín nga xi̱ta̱ i̱ma̱ kjomà ra jè, tsa̱jión ꞌkín‑la kjoa̱nchi̱ná ra tjín‑la̱.
\p
\v 10 Tsjaá‑no kjo̱bítsjen‑na̱ ra a̱ꞌta ꞌtse̱ kjoa̱ kìi̱, nga̱ kjeèn‑no ndi̱yá; jiòn ra tsikìꞌtsia̱à nga ko̱ꞌsín kiꞌnià a̱ꞌta ꞌtse̱ kjoa̱ kìi̱, mì tsa ta mejèn‑no nga tsikìꞌtsia̱à, skanda ꞌñó kjomejèn‑no tsiꞌkiò, skanda ti̱ꞌkia̱‑ni ni̱chjin jngo inó.
\v 11 Ti̱kjeheꞌtin‑la ijo‑no nga ꞌkio̱ò ꞌndi̱‑ni̱, koni ꞌsín nga ꞌñó tsja tjín‑no nga mejèn‑no tsiꞌkiò, ꞌkoa̱á ti̱ꞌsín ti̱hitjasòn nga ꞌtio̱o kjo̱tjò‑no koni ꞌki nchrabájin inìma̱‑no.
\v 12 Tsa jngo xi̱ta̱ tíjnanda nga inìma̱‑la̱ nchrabájin‑ni nga mejèn‑la̱ tsjá, Nainá sasén‑la̱ koni ꞌki ra ma ra ꞌsín, mì tsa tsato tíníjé‑la̱.
\p
\v 13 Mì tsa jè ra mejèn‑la̱ Nainá nga katasíjchijaꞌta‑najiòn ꞌkia̱ nga ki̱si̱ko̱ jiòn jñà xi̱ta̱ ra iꞌkaa̱, jé‑ní nga ngásòn ngáya kataꞌse‑ná ngaꞌtsì‑ná ta mé ra machjeén‑ná.
\v 14 Kóꞌki tjín‑najiòn ꞌndi̱ ꞌndi̱, ꞌti̱‑la jiòn koni ꞌki chijaꞌta‑la̱, mé‑ni ꞌkia̱ nga jiòn ra si̱ìjchijaꞌta‑najiòn, ti̱ꞌkoa̱á jñá tsjá‑no kóꞌki ꞌse̱‑la̱, mé‑ni nga ngásòn ngáya ꞌse̱‑no mé ra ko̱chjeén‑no.
\v 15 Koni ꞌsín nga tíchja̱ Xa̱jo̱n‑la̱ Nainá nga tsò: “Jè ra kjìn tsikíxkó, mì tsa mé ra tsijnengi‑la̱; ko̱ jè ra chiba tsikíxkó, mì tsa mé ra ichijaꞌta‑la̱.”
\s Kóꞌsín nga inikasén jè Tito ya̱ na̱xi̱ndá Corinto
\p
\v 16 Tse kjo̱nda kataꞌse‑la̱ Nainá, nga ꞌkoa̱á ti̱ꞌsín isíkíjna inìma̱‑la̱ Tito nga ko̱ꞌsín isíkájno‑te ra a̱ꞌta tsa̱jiòn koni ꞌsín nga kjókájno‑na ra ꞌa̱n.
\v 17 Kixi̱í kjoa̱ jè Tito kjokjiín‑la̱ koni ꞌsín nga tsikiꞌtiáa̱n; tanga jè, ꞌñó kjomejèn ko̱ ꞌsa̱‑la̱ nga ikatsíjen‑najiòn ko̱ ngi ta kjo̱nda ꞌtse̱‑ní nga ko̱ꞌsín tífìkatsíjen‑najiòn ra jè.
\p
\v 18 Ya̱á ta̱ña i̱nchinìkasén‑ko̱‑ji̱n jè Tito, jngo ꞌndsé ra ijye nda naꞌyá‑la̱ ya̱ a̱jin‑la̱ ngaꞌtsì na̱xi̱ndá‑la̱ Cristo nga kóꞌsín tísíxáko̱ jè ꞌén xi̱tse̱ ra nda tsò a̱ꞌta ꞌtse̱ Cristo.
\v 19 Ko̱ mì tsa ki‑nì nga ijye nda ꞌyaxkon‑la̱, jñà sabá xi̱ta̱ na̱xi̱ndá‑la̱ Cristo ra ko̱ꞌsín tsjahíjin mé‑ni nga ta̱ña i̱ko̱‑naji̱n, ꞌkia̱ nga kongíko̱‑ji̱n kjo̱tjò ra ji̱n i̱nchibíxkó‑ji̱n, mé‑ni nga jè Na̱ꞌín‑ná isa̱ jeya katijna‑nì, ko̱ nda kataꞌya‑la̱ nga ya̱á nchrabájin‑ni ya̱ inìma̱‑na̱ji̱n nga ko̱ꞌsín ꞌnià‑ji̱n.
\v 20 ꞌKoa̱á ꞌsín ko̱ma‑ni nga mì yá xi̱ta̱ ꞌcho ki̱tso̱‑naji̱n a̱ꞌta ꞌtse̱ kjo̱tjò ra nda ꞌki tjín‑ni ra ji̱n i̱nchibíxkó‑ji̱n.
\v 21 Jè ra mejèn‑naji̱n nga mì tsa ta ya̱ ngixko̱n Na̱ꞌín‑ná kixi̱ katanaꞌyá‑naji̱n, ti̱ꞌkoa̱á kixi̱í katanaꞌyá‑te‑naji̱n ya̱ ngixko̱n xi̱ta̱.
\p
\v 22 Ìjngo‑isa ꞌndsé ya̱ ta̱ña i̱nchinìkasén‑ko̱‑ji̱n jè Tito, ra kjokjìn kjoa̱ ꞌya‑ji̱n nga bínè‑la̱ ijo‑la̱, ko̱ isa̱á ꞌñó bínè‑la̱ ijo‑la̱ ꞌndi̱ ꞌndi̱ ꞌkia̱ nga ko̱ꞌsín ijye nda báꞌta ikon‑no ra jiòn.
\v 23 Ra jè Tito, ya̱á ta̱ña báhijtako̱‑na ra jè, ko̱ ta̱ñaá níxá‑ji̱n ra a̱ꞌta tsa̱jiòn; a̱ꞌta ꞌtse̱ ꞌndsé ra iꞌka ra jò ma‑ni, jñá xi̱ta̱ na̱xi̱ndá‑la̱ Cristo isìkasén ra jñà, nga̱ ra a̱ꞌta ꞌtse̱ jñà xi̱ta̱ kìi̱, jé Cristo jeya bijna.
\v 24 Mé‑ni nga nda katabe‑ni ngaꞌtsì xi̱ta̱ na̱xi̱ndá‑la̱ Cristo, nda ti̱ko̱o jiòn jñà xi̱ta̱ kìi̱ nga ta̱kón‑la kóꞌki kjo̱tsjacha tjín‑no ra a̱ꞌta ꞌtse̱, mé‑ni nga ske̱‑ni ra jñà nga ꞌén kixi̱‑ní koni ꞌsín nga nda nakjoá‑ji̱n ra a̱ꞌta tsa̱jiòn.
\c 9
\s Jñà kjo̱tjò ra kjóxkó
\p
\v 1 A̱ꞌta ꞌtse̱ kjo̱tjò ra tímaxkó nga tíbisiko̱ꞌta jñà xi̱ta̱‑la̱ Nainá ra i̱nchichijaꞌta‑la̱, mì kì machjeén tsa mé ꞌén ra ꞌa̱n kindá‑najiòn.
\v 2 Nga̱ ijyeé be‑náa̱ nga titsa̱jnanda‑nájiòn nga ꞌkio̱ò kjo̱tjò‑no, ꞌkoa̱á ma‑ni nga ꞌñó matsja‑na ra a̱ꞌta tsa̱jiòn, ꞌkia̱ nga ítsiꞌkena̱jmí‑la̱ jñà xi̱ta̱ ra ya̱ nangi Macedonia títsa̱jna, nga ti̱ ni̱chjin jngo inó tjín‑ni nga mejèn‑najiòn ꞌkio̱ò kjo̱tjò‑no, jiòn ra ya̱ titsa̱jna ya̱ nangi Acaya. ꞌKia̱ nga ko̱ꞌsín ítsiꞌkena̱jmí‑la̱ nga ijyeé nda tihijyondá jiòn, isa̱á ta ꞌñó kjotsja‑la̱ nga ti̱ꞌkoa̱á mejèn‑la̱ nga tsjá‑te jñà kjo̱tjò‑la̱.
\v 3 Kií xá ísikásén‑najiòn jñà ꞌndsé kìi̱, mé‑ni nga mì tsa ta ꞌén ndiso ka̱ma‑ni koni ꞌsín nga ijye ꞌñó nda kíchjà ra a̱ꞌta tsa̱jiòn. Jé‑la ra nda tjín tsa ko̱ꞌsín ijye titsa̱jnanda jiòn koni ꞌsín ijye kíxian.
\v 4 Tsa tjín iꞌka‑ni xi̱ta̱ ra ya̱ i̱ꞌnde‑la̱ ya̱ nangi Macedonia ra mejèn‑la̱ nga i̱ko̱‑na ꞌkia̱ nga kjiáa̱n, tsa takó kjè kì titsa̱jnanda‑najiòn ꞌkia̱ nga kijcho‑ji̱n, koni ꞌsín nga chiñá‑ji̱n, ta ko̱sabáa‑naji̱n, ko̱ jiòn, isa̱á ta tse kjo̱sabà ki̱tsa̱jiòn.
\v 5 ꞌKoa̱á ma‑ni nga ko̱ꞌsín ísikítsjee̱n nga tsikitsáꞌba‑la̱ jñà ꞌndsé nga tje̱n katafikatsíjen ítjòn‑najiòn, mé‑ni nga tje̱n kátíxkó jè kjo̱tjò ra ijye ko̱ꞌsín tsikinè‑la ijo‑no nga ꞌkio̱ò, mé‑ni nga ijye tíjnanda‑ni koni jngo kjo̱tjò ra inìma̱‑no inchrabàjin‑ni ko̱ mì tsa jngo kjo̱tjò ra kjo̱ꞌñó i̱nchima‑no.
\s Kóꞌsín tísiꞌtieén nga ma‑ná ꞌkie̱é kjo̱tjò
\p
\v 6 Ti̱kítsjen jè ꞌén ra tsò: Jè xi̱ta̱ ra chiba tsajmì bítje̱, chibaá tsajmì majchá‑la̱; ko̱ jè ra kjìn tsajmì bítje̱, kjín tsajmì majchá‑la̱.
\v 7 Ko̱ꞌki ꞌtio̱o nga jngó jngó‑no koni ꞌki nga nchrabájin inìma̱‑no; kì tà ko̱ kjo̱ba‑no nga ꞌbiò ko̱ kì tà jò tjín‑no nga ꞌbiò. Nainá, jé tsjake xi̱ta̱ ra ngi ko̱ kjo̱tsja‑la̱ tsjá.
\v 8 Jè Nainá maá‑la̱ nga ko̱ꞌsín ꞌsi̱in nga ꞌse̱ ijye‑najiòn ta mé kjo̱nda‑ni, mé‑ni nga sa̱kò kiꞌta‑najiòn kóꞌki tsajmì machjeén‑no; nga skanda ki̱jnengií‑no ra sa̱kò‑no, mé‑ni ko̱ꞌsín ma ki̱si̱ko̱ꞌta‑no ta ñáa̱ kjoa̱ ra nda tjín.
\v 9 ꞌKoa̱á ꞌsín tíchja̱ xa̱jo̱n ra tjíꞌta ꞌén‑la̱ Nainá nga tsò:
\q Nda kjón isìkaꞌbí nga kitsjà‑la̱ jñà ra xi̱ta̱ i̱ma̱.
\q Ko̱ jè kjoa̱kixi̱ ra ꞌsín, tíjna kiꞌta‑ní skanda ta kjiá‑nioo̱.
\m
\v 10 Jé Nainá ra tsjá tje̱‑la̱ tsajmì nga síxáko̱ nangi jñà xi̱ta̱, ko̱ ti̱ꞌkoa̱ tsjá‑la̱ ni̱ño̱ ra bakjèn; jé tsjá‑no mé tsajmì ra kítje̱e ko̱ ꞌkoa̱á ꞌsín ꞌsi̱in nga isa̱ ko̱kjìn‑ya tsajmì‑no, ko̱ kjín kjo̱nda sa̱kò‑najiòn koni ꞌsín tjín kjo̱nda ra ꞌsia̱an.
\v 11 ꞌSe̱é‑no ta mé kjoa̱nchi̱ná‑ni, mé‑ni nga ngi ko̱ó inìma̱‑no nga ꞌkio̱ò ta mé kjo̱tjò‑ni; mé‑ni nga kjìn xi̱ta̱ ki̱tso̱‑la̱ Nainá: “Tse kjo̱nda kataꞌse‑li Na̱ꞌìn a̱ꞌta ꞌtse̱ jè kjo̱tjò ra kitsjà xi̱ta̱ kìi̱.”
\v 12 ꞌKia̱ nga ko̱ꞌsín i̱nchimahíko̱o‑la̱ji̱n jè ngaꞌñó ra̱kìi̱ jñà ꞌndsé, mì tsa ta jè‑ni nga ma tíbisiko̱ mé ra chijaꞌta‑la̱ jñà xi̱ta̱‑la̱ Cristo. Ti̱ꞌkoa̱á ya̱á nchrabá‑ni nga ꞌñó kjìn xi̱ta̱ i̱nchitsò‑la̱ Nainá: “Tse kjo̱nda kataꞌse‑li.”
\v 13 Jñà xi̱ta̱ kìi̱, ꞌkia̱ nga ko̱nga̱tsja kjo̱tjò kìi̱, jeyaá si̱ìkíjna Nainá ta nga̱tjì‑la̱ nga ma‑najiòn ko̱ꞌsín nihitjasòn jiòn koni ꞌsín nga makjiín‑no ra a̱ꞌta ꞌtse̱ ꞌén xi̱tse̱‑la̱ Cristo ra nda tsò, ko̱ nga maá‑najiòn ꞌbiò kjo̱tjò‑no ra tíbisiko̱ꞌta ra jñà, ko̱ jñà xi̱ta̱ ra kjꞌií‑isa.
\v 14 Ti̱ꞌkoa̱á ꞌñó tsja ꞌse̱‑la̱ nga ki̱chja̱ꞌta‑la̱ Nainá ra a̱ꞌta tsa̱jiòn; ya̱á jcha̱‑la̱ nga ꞌñó tsjake‑najiòn ta nga̱tjì‑la̱ nga tseé kjo̱nda tísakó‑najiòn ra a̱ꞌta ꞌtse̱ Nainá.
\v 15 ¡Tse kjo̱nda kataꞌse‑la̱ Nainá, nga ijye tsikíjnanda jngo‑ná kjo̱tjò ra ꞌñó chjí‑la̱, skanda mí kì sakó‑ná ꞌén kóꞌsín nga ꞌki̱‑lá kjo̱nda!
\c 10
\s Kóꞌsín nga chja̱tjì xá‑la̱ Pablo koni nga chi̱ꞌnda‑la̱ Cristo ma
\p
\v 1 ꞌA̱n ra Pablo ꞌmì‑na, ꞌkoa̱á ꞌsín tíbitsáꞌba‑no a̱ꞌta ꞌtse̱ Cristo jè ra indakjoa̱ tíjna ko̱ ra tjín‑la̱ kjo̱nda. Nga̱ tjín iꞌka xi̱ta̱ ra tsò nga ꞌkia̱‑ró ya̱ tíjna̱jin‑najiòn, ꞌñó‑ró i̱ma̱ kjoa̱ ꞌsiaa̱n, ko̱ ꞌkia̱ nga kjin tíjna̱, ꞌñó‑ró xíjiaa̱n.
\v 2 ꞌKoa̱á ꞌsín tíbitsáꞌba‑no nga tje̱n tindajín iꞌka kjoa̱ ra tjín, mé‑ni nga ꞌkia̱ nga kijchòo̱, mì tsa ti̱ ꞌa̱n ꞌñó kokó‑na jñà xi̱ta̱ ra ko̱ꞌsín i̱nchichja̱jno iꞌka‑naji̱n, nga tsò nga ta ꞌkoa̱á‑ró ꞌsín i̱nchiꞌnià‑ji̱n koni ꞌsín ꞌsín jñà ra taxki̱ xi̱ta̱ i̱sàꞌnde; ko̱ tsa majìn, ꞌa̱n ijyeé ko̱ꞌsín tíjnanda nga ko̱ꞌsín ꞌñó kokóo̱ jñà xi̱ta̱ kìi̱.
\v 3 Kixi̱í kjoa̱, xi̱ta̱ i̱sàꞌnde‑náji̱n, tanga mì tsa ko̱ꞌsín ꞌnià‑ji̱n koni ꞌsín ꞌsín jñà ra taxki̱ xi̱ta̱ i̱sàꞌnde ꞌkia̱ nga mé kjoa̱ ra bixkàn‑ko̱‑ji̱n.
\v 4 Jñà ngaꞌñó ra nichjeén‑ji̱n koni tsa ki̱cha̱ nga bixkàn‑tjì‑ji̱n ijo‑na̱ji̱n ya̱ i̱sàꞌnde, mì tsa a̱ꞌta ꞌtse̱ xi̱ta̱ nchrabá‑ni. A̱ꞌta ꞌtse̱é Nainá nchrabá‑ni, ko̱ maá‑la̱ nga síkjehesòn ngaꞌtsì ngaꞌñó‑la̱ ni̱í ra batéchjà‑la̱ ꞌén‑la̱ Nainá.
\v 5 Ko̱ nìkitsón‑ña‑náji̱n ngaꞌtsì kjo̱bítsjen ra ꞌcho tjín, ko̱ jngó jngó kjoa̱ꞌngatakòn ra batéchjà nga kondra̱ fì‑la̱ koni ꞌsín tjín kjoa̱chji̱ne̱‑la̱ Nainá, bìchjàꞌya tsje‑náji̱n kjo̱bítsjen kìi̱ mé‑ni nga ta jè Cristo katasíhitjasòn‑la̱.
\v 6 Titsa̱jnanda‑náji̱n nga ꞌki̱‑la̱ji̱n kjo̱hiꞌin ngaꞌtsì ra mì si̱hitjasòn, ꞌkia̱ nga ijye jcha̱‑ji̱n nga ijyeé nda i̱nchinitjasòn ra jiòn.
\p
\v 7 ꞌKoa̱á ꞌsín chítsijen koni ꞌsín tjín kjoa̱ ra tíma. Tsa tjín jngo xi̱ta̱ ra ko̱ꞌsín tsò‑la̱ ijo‑la̱ nga jè Cristo isìkasén, ꞌkoa̱á ꞌsín nda katasíkítsjen nga ti̱ꞌkoa̱á ji̱n, jé kjón Cristo kisìkasén‑te‑náji̱n koni ra jè.
\v 8 Ni̱ꞌsín saꞌkoa̱ ꞌa̱n ꞌñó nda sìkíjnaa̱ ijo‑na̱ a̱ꞌta ꞌtse̱ xá ra ji̱n tsiꞌkì‑naji̱n, mì kì masabà‑na; nga̱ kií xá isìnga̱tsja‑naji̱n jè Na̱ꞌín‑ná jè xá ra̱kìi̱ mé‑ni nga jiòn, isa̱ nda ki̱tsa̱jna‑najiòn, mì tsa ki‑ni nga ji̱n si̱kitsón‑ya‑laji̱n,
\v 9 mé‑ni nga mì ko̱ꞌsín ki̱ya‑najiòn nga ta jè ra mejèn‑na nga minchaxkón‑najiòn ꞌkia̱ nga ko̱ꞌsín sikásén‑no xa̱jo̱n.
\v 10 Nga̱ tjín iꞌka xi̱ta̱ ra tsò: “Jñà xa̱jo̱n‑la̱ ra síkasén, sí ꞌñó tíchja̱, ko̱ sí ꞌñó tjín ꞌén ra síkasén. Tanga ꞌkia̱ nga ijye tíjna saba kjòn‑ni ra jè, mì tsa sí xkón ꞌki‑ni, ko̱ jñà ꞌén ra chja̱, nda mí yá ra nda sísin‑la̱.”
\v 11 Jè xi̱ta̱ ra ko̱ꞌsín tsò, ko̱ꞌsín nda katasijin‑la̱, koni ꞌsín tsò jñà ꞌén ra biꞌta‑ji̱n ya̱ xa̱jo̱n ra nikasén‑ji̱n ꞌkia̱ nga kjin titsa̱jna‑ji̱n, ꞌkoa̱á ti̱ꞌsín ꞌsia̱n‑ji̱n ꞌkia̱ nga ijye titsa̱jna masen kjòn‑ji̱n ya̱ a̱jin‑la̱ xi̱ta̱.
\p
\v 12 Kixi̱í kjoa̱, mì kì tsò takòn‑ji̱n nga ya̱ nijngoko̱‑ji̱n ijo‑na̱ji̱n ko̱ mì tsa ya̱ níngásòn‑ko̱‑ji̱n jñà xi̱ta̱ ra ti̱jñà ꞌnga síkítsa̱jna‑ni ijo‑la̱. Jñà xi̱ta̱ kìi̱, ꞌkia̱ nga ti̱jñà síngásòn‑kjo‑ni ijo‑la̱ ko̱ ti̱jñà kotsíjen‑jnó‑ni xákjén, mì kì machi̱ya‑la̱ mé kjoa̱ ra ꞌsín.
\v 13 Mì tsa jè nda si̱kítsa̱jna‑naji̱n ijo‑na̱ji̱n ya̱ ñánda̱ mì tsa ya̱ bako̱‑naji̱n. Ko̱ mì kì tsa ko̱tonè‑la̱ji̱n chi̱ba̱‑la̱ koni ꞌki nga ijye tjínda‑la̱ Nainá nga ma si̱xá‑ji̱n. Nga̱ jé kitsjáꞌnde‑naji̱n nga ma ijchò‑ji̱n skanda ya̱ ñánda̱ nga titsa̱jna jiòn ra xi̱ta̱ Corinto ꞌmì‑no.
\v 14 Kixi̱í kjoa̱, tsa mì‑laji̱n ijchò ítjòn‑ji̱n, i̱nchinìkatonè‑la̱ji̱n chi̱ba̱‑la̱ koni ꞌsín ꞌki kiꞌtsìꞌnde‑naji̱n. Tanga ji̱ín ijchòko̱ ítjòn‑laji̱n jè ꞌén xi̱tse̱ ra nda tsò a̱ꞌta ꞌtse̱ Cristo.
\v 15 Mì tsa jñà nda i̱nchiníkítsa̱jna‑naji̱n ijo‑na̱ji̱n jñà xá ra kiꞌsìn xi̱ta̱ ra kjꞌií; tsa ko̱ꞌsín ꞌsia̱n‑ji̱n, ꞌkia̱á‑la nga ko̱tonè‑la̱ji̱n chi̱ba̱‑la̱. Jé ra mejèn‑naji̱n, koni ꞌsín nga isa̱ ꞌñó ko̱kjiín-isa‑najiòn, ꞌkoa̱á ꞌsín isa̱ ko̱tse‑isa jè xá ra ꞌsia̱n‑ji̱n ya̱ a̱jin tsa̱jiòn, tanga ta ꞌkoa̱á ꞌsín tje̱n si̱xá‑ji̱n koni ꞌki ijye tje̱n chi̱ba̱‑la̱.
\v 16 ꞌKoa̱á ꞌsín ꞌkéna̱jmíya-isa‑ji̱n jè ꞌén xi̱tse̱ ra nda tsò a̱ꞌta ꞌtse̱ Cristo ya̱ i̱ꞌnde ra fì‑isa nga bateé na̱xi̱ndá‑no ya̱ ñánda̱ nga kjè tsa yá ra bijchó ꞌkéna̱jmíya, mé‑ni nga mì jñà xá ra ijye kiꞌsìn xi̱ta̱ ra kjꞌií, nda si̱kítsa̱jna‑naji̱n ijo‑na̱ji̱n.
\p
\v 17 Jè ra jeya si̱ìkíjna ijo‑la̱, ta isa̱á jnchro jè Nainá jeya katasíkíjna.
\v 18 Nga̱ mì tsa jè ra nda ki̱tjongi jè ra ti̱jè nda síkíjna‑ni ijo‑la̱, jé‑ní ra jè Nainá ko̱ꞌsín ki̱tso̱ nga bakén‑la̱ nga nda kíjna.
\c 11
\s Kóꞌsín basìko̱tjì ijo‑la̱ Pablo
\p
\v 1 ¡Mején‑na tsa katachíkjoa̱ jngohíjta‑najiòn nga ki̱náꞌya‑ná, nga̱ ꞌkoa̱á ꞌsín kichjàa̱ koni tsa mì nda tjín kjo̱bítsjen‑na̱! ¡ꞌTia̱àn kjo̱nda katachíkjoa̱ jngohíjta‑no!
\v 2 Nga̱ ꞌkoa̱á ꞌsín makájno‑na ra a̱ꞌta tsa̱jiòn‑jiòn koni ꞌsín makájno‑la̱ jè Nainá mé‑ni nga mì kjꞌií kohíko̱‑no. Nga̱ jngoó ꞌxi̱n ijye isíkíjnaꞌñó‑no ra jè Cristo ko̱ ꞌkoa̱á ꞌsín mejèn‑na singátsja‑no a̱ꞌta ꞌtse̱ Cristo koni tsa jngo chjo̱ón xa̱ngó ra tsje tíjna.
\v 3 Tanga jé ra títsakjoo̱n, koni ꞌsín kiꞌsìn jè ye̱ nga ko̱ó kjoa̱ maña̱‑la̱ nga iskonda̱cha̱‑la̱ jè chjo̱ón ra tsiꞌkìn Eva, tsa ko̱ꞌsín ko̱ka̱maꞌtin‑te jiòn, tsa ko̱ꞌsín ki̱ꞌnde‑te jiòn nga si̱ìkitsón kjo̱bítsjen‑no nga ngakjá kongió koni ꞌsín nga ijye kixi̱ kjiꞌtatákon jiòn jè Cristo.
\v 4 Nga̱ biꞌnde‑no ꞌkia̱ nga bijchójkon‑no jñà xi̱ta̱ ra isa̱ kjꞌií ꞌsín ꞌbéna̱jmíya‑no ra a̱ꞌta ꞌtse̱ Jesús koni ꞌsín ijye tsiꞌkèna̱jmíya‑laji̱n. Ko̱ makjiín‑te‑najiòn ꞌkia̱ nga isa̱ kjꞌií ꞌsín tsò kjo̱bítsjen ra ꞌbéna̱jmíya‑no a̱ꞌta ꞌtse̱ Inìma̱ Tsje‑la̱ Nainá ra ijye ichjíbé jiòn ya̱ a̱jin inìma̱‑no. Ti̱ꞌkoa̱á makjiín‑te‑najiòn ꞌkia̱ nga isa̱ kjꞌií tsò ꞌén xi̱tse̱ ra nda tsò a̱ꞌta ꞌtse̱ Cristo ra ꞌbéna̱jmíya‑no koni ꞌsín tsò jè ra kjokjiín ítjòn‑no. Ta isa̱á sasén‑no nga naꞌyá‑la jñà xi̱ta̱ kìi̱.
\v 5 ꞌKoa̱á ꞌsín síkítsjen ra ꞌa̱n, nga mì tsa mé ra isa̱ nangi tíjna̱‑la̱ jñà xi̱ta̱ ra ko̱ꞌsín ꞌyaxkon jiòn nga jñà títsa̱jna ítjòn‑la̱ xi̱ta̱ ra tsikíxáya‑la̱ Cristo.
\v 6 Ni̱ꞌsín mì tsa tsijen ískotáꞌyáa̱ koni ꞌsín nga chjàa̱, tanga mì tsa mé kjo̱bítsjen ra chijaꞌta‑na ra a̱ꞌta ꞌtse̱ ꞌén‑la̱ Nainá. Ko̱ ꞌkoa̱á ꞌsín ijye nda tsakon kjòn‑laji̱n a̱ꞌta ꞌtse̱ ngaꞌtsì kjoa̱ ra ijye kiꞌnià‑ji̱n.
\p
\v 7 ¿A ꞌchoó tjín koni ꞌsín kíꞌsiaa̱n ꞌkia̱ nga ta ítsakon‑yá kjo̱tjò‑najiòn jè ꞌén xi̱tse̱‑la̱ Nainá ra nda tsò, nga mì tsa mé ra ísíjé‑no? Nda kísihi̱ma̱á‑na ijo‑na̱ mé‑ni nga jiòn nda tsikitsa̱jna‑najiòn.
\v 8 Skanda jñà xi̱ta̱ na̱xi̱ndá‑la̱ Cristo ra xìn i̱ꞌnde tjítsa̱jna ítsachrjéjno‑la̱ nga kítsjaꞌndé‑la̱ nga tsikíchjí‑na, mé‑ni nga kjomà ísíxáko̱o‑no ra jiòn.
\v 9 ꞌKia̱ nga mé ra kjochjeén‑na ꞌkia̱ nga ya̱ tsakáti̱jnako̱‑no, ni̱yá ra ísijtí‑la̱. Ta mé tsajmì ra kjochjeén‑na, jñá ꞌndsé ra ꞌji‑ni ya̱ nangi Macedonia kitsjà‑na. ꞌKoa̱á ꞌsín kíꞌsiaa̱n nga majìn‑naa̱ nga jiòn iꞌin‑ya kjomà‑no, ko̱ takó ꞌkoa̱á ꞌsín ꞌsin‑isaa̱.
\v 10 Ngi ko̱ó ꞌén kixi̱‑la̱ Cristo ra ijye ko̱ꞌsín tíjnajin‑na nga ko̱ꞌsín chjàa̱, nga̱ mì kì yá ra ma ko̱techjà‑na ya̱ nga tíjngo nangi Acaya nga nda ma síkíjna ijo‑na̱ a̱ꞌta ꞌtse̱ kjoa̱ ra kíꞌsiaa̱n, nga̱ ta kjo̱tjò ítsakon‑yá‑no.
\v 11 ¿Mé‑ni ko̱ꞌsín xian‑na? ¿A kií‑ní nga mì kì tsjake̱‑najiòn? Jè Nainá ndaá be nga ꞌñó tsjake̱‑najiòn.
\p
\v 12 Koni ꞌsín tíꞌsiaa̱n, takó ꞌkoa̱á ꞌsín ꞌsi̱in‑isa, mé‑ni nga mì kì tjóꞌnde‑la̱ jñà xi̱ta̱ ra mejèn‑la̱ nga ta ijo‑la̱ jeya si̱ìkítsa̱jna a̱ꞌta ꞌtse̱ kjoa̱ ra ꞌsín, nga mejèn‑la̱ ko̱ꞌsín kítsa̱jna koni ra ji̱n.
\v 13 Nga̱ jñà xi̱ta̱ kìi̱, mì tsa yá ra tsijen tsikíxáya‑la̱. Ta kií xá ꞌsín nga xi̱ta̱ bíndo̱cha̱‑la̱, nga ko̱ꞌsín síngoya ijo‑la̱ koni tsa ngi jè saba Jesucristo tsikíxáya‑la̱.
\v 14 Ko̱ mí‑la tsa ko̱xkón‑ná kjoa̱ kìi̱, nga̱ skanda jè xi̱ta̱‑ni̱í maá‑la̱ ko̱ꞌsín si̱ìngoya ijo‑la̱ nga ko̱ꞌsín ko̱tsíjen koni jngo ìkja̱li̱ ra ꞌñó fate niꞌí‑la̱, koni tsa ìkja̱li̱ ꞌtse̱ Nainá.
\v 15 ꞌKoa̱á ma‑ni nga jñà xi̱ta̱ ra ya̱ síxáꞌta‑la̱ jè xi̱ta̱‑ni̱í, mì tsa jngo kjoa̱ ra ko̱xkón‑ná tsa ko̱ꞌsín síngoya ijo‑la̱ nga ko̱ꞌsín ko̱ma koni tsa xi̱ta̱ ra ꞌbéna̱jmíya kjoa̱ kixi̱‑la̱ Nainá. Tanga jñà xi̱ta̱ kìi̱, ꞌkoa̱á ꞌsín tjábé‑la̱ chjí‑la̱ a̱skan‑nioo̱, koni ꞌsín tjín kjoa̱ꞌcho ra i̱nchiꞌsín.
\s Mé kjoa̱ ra jeya síkíjna‑ni ijo‑la̱ Pablo
\p
\v 16 ꞌKoa̱á ꞌsín tíxin india‑no, kì ti̱ tsja yá ra ko̱ꞌsín tsò‑ni nga mì nda tíjna kjo̱bítsjen‑na̱; ni̱ꞌsín tsa ko̱ꞌsín níkítsjen jiòn, ti̱ꞌnde‑ná nga ko̱ꞌsín kokó‑no koni tsa mì nda tíjna kjo̱bítsjen‑na̱, mé‑ni nga ti̱ꞌkoa̱á ꞌa̱n, ko̱ma‑te nda síkíjna‑na ijo‑na̱.
\v 17 Jñà ꞌén ra tíchjàa̱ nga ꞌa̱n nda sìkíjnaa̱ ijo‑na̱, ꞌkoa̱á ꞌsín tíchjàa̱ koni tsa mì nda tíjna kjo̱bítsjen‑na̱ nga jngoó ꞌén ra mì kì sasén‑la̱ Na̱ꞌín‑ná.
\v 18 Koni ꞌsín kjìn ma‑ni xi̱ta̱ ra ꞌñó nda síkítsa̱jna ijo‑la̱ a̱ꞌta ꞌtse̱ kjoa̱ ra ꞌsín ya̱ i̱sàꞌnde, ꞌkoa̱á ti̱ꞌsín mejèn‑na ra ꞌa̱n nga nda sìkíjnaa̱ ijo‑na̱.
\v 19 ꞌKoa̱á bixó jiòn nga ꞌñó tjín‑no kjo̱bítsjen, tanga biꞌnde‑nájiòn nga kótsò‑no xi̱ta̱ ra mì kì nda tjíhijyo kjo̱bítsjen‑la̱.
\v 20 Nga̱ skanda biꞌndeé‑la jñà xi̱ta̱ nga chi̱ꞌndaꞌñó‑la̱ ꞌsín‑no, ko̱ nga bachrjejno‑no tsajmì ra tjín‑no, ko̱ nga beton‑no, ko̱ jñà ra ti̱ꞌkoa̱á bachrjengi‑no, ko̱ skanda síjtsinꞌá ya̱ i̱sén‑no.
\v 21 ¿Kó bixó jiòn? ¿A masabá‑na nga mì ko̱ꞌsín inakjoá‑laji̱n? Nga̱ ꞌkoa̱á bixó jiòn nga batoó indakjoa̱ kiꞌnià‑ji̱n.
\p Tanga tsa jñà xi̱ta̱ ra iꞌka ꞌñó ꞌnga ma ikon nga ꞌñó chja̱, ra ꞌa̱n, ꞌkoa̱á ti̱ꞌsín ꞌñó kichjà‑te nga ꞌñó ꞌke‑te‑la̱ takoàn, ni̱ꞌsín ꞌkoa̱ ꞌsín tíchjàa̱ koni tsa mì nda tíjna kjo̱bítsjen‑na̱.
\v 22 Jñà xi̱ta̱ kìi̱, ¿a ꞌngaá ma‑la̱ nga ꞌén hebreo chja̱? Ra ꞌa̱n ti̱ꞌkoa̱á chjà‑te ꞌén hebreo. ¿A ꞌngaá ma‑la̱ nga xi̱ta̱ Israel ra jñà? Ti̱ꞌkoa̱á Israel‑te tsa̱ꞌa̱n. Ko̱, ¿a ꞌngaá ma‑la̱ nga jé Abraham ra kjomà xi̱ta̱ jchínga‑la̱? Ti̱ꞌkoa̱á ꞌa̱n, jé‑te kjomà xi̱ta̱ jchínga‑na̱.
\v 23 ¿A chi̱ꞌnda‑la̱ Cristo‑ní jñà xi̱ta̱ kìi̱? Ra ꞌa̱n, isa̱á ꞌñó nda tísíxá‑la̱ jè Cristo. (ꞌKia̱ nga ko̱ꞌsín tíchjà, ꞌkoa̱á ꞌsín jngoya‑la̱ koni tsa mì kì nda tíjna kjo̱bítsjen‑na̱). Isa̱á ꞌñó tse xá tjín‑na ra ꞌa̱n, isa̱á ꞌñó kjo kjín ꞌka̱ kaya nda̱yá, ko̱ isa̱á ta ꞌñó kjo kjín ꞌka̱ nda síkiꞌon‑na jñà xi̱ta̱, ko̱ taxki̱ kjo kjín ꞌka̱ batojiaa̱n ñánda̱ nga kja̱me síꞌken‑na jñà xi̱ta̱.
\v 24 Ra a̱ꞌta ꞌtse̱ xi̱ta̱ judío, kjo ꞌòn ꞌka̱ ko̱ꞌsín bajá‑na nga tsjá‑na kjo̱hiꞌin ra kàchrjóꞌòn ijòn ꞌka̱ tsajá‑na naꞌñó xo̱xín nga jngó jngó ꞌka̱.
\v 25 Jàn ꞌka̱ tjín‑ni nga kiꞌtsì‑na kjo̱hiꞌin nga kiꞌse‑na xka̱ i̱jnchra̱, ko̱ jngo ꞌká kja̱meé isìꞌken‑na xi̱ta̱ nga tsikínè‑na na̱jo̱. Jàn ꞌka̱ iskajin‑ndá jè chitso ñánda̱ ya̱ chi̱ba̱‑la̱ tíjna̱ya̱; ko̱ jngo ni̱chjin ko̱ jngo ni̱tje̱n ya̱ tsakáti̱jnajiaa̱n ya̱ nga masen‑la̱ ndáchikon.\fig Ship wrecked, people making for shore -50%|64-cn02045B.tif|col|2CO 11:25|| |2CO 11:25\fig*
\v 26 Ta ñánda̱ nga bajme, ta kjo̱skon tjín kiꞌta‑la̱; tjín kjo̱skon ya̱ xa̱ngá ñánda̱ bato, ko̱ tjín kjo̱skon a̱ꞌta ꞌtse̱ xi̱ta̱ chijé. Tjín kjo̱skon a̱ꞌta ꞌtse̱ ra xi̱ta̱ judío ko̱ a̱ꞌta ꞌtse̱ ra mì tsa xi̱ta̱ judío. Ískajiín‑te kjo̱skon ya̱ a̱jin‑la̱ na̱xi̱ndá, ko̱ ya̱ i̱ꞌnde ñánda̱ nga tsìn xi̱ta̱. Tjín kjo̱skon ya̱ a̱jin‑la̱ ndáchikon, ko̱ ya̱ a̱jin‑la̱ jñà xi̱ta̱ ra ko̱ꞌsín tsò nga ꞌndsé ma.
\v 27 Kjín xá tíbatojiàa̱n ra ꞌñó síkiꞌon‑na. Kjo kjín ꞌka̱ mì kì fájna̱fèe̱ nga ꞌkia̱ nga ni̱tje̱n. Tíbatojin‑náa̱ kjo̱hiꞌin ra ꞌtse̱ kjinchrá a̱ꞌta ꞌtse̱ tsajmì ra chineé ko̱ nandá ra ꞌyé, saꞌkoa̱á skanda mí kì bákje̱n. Tísikjín‑la̱ ꞌnchán nga skanda tsín‑na nikje ra fána̱ya.
\p
\v 28 Kjín kjoa̱ tjín‑ni ra tíbatojin‑isa; mì tsa tà jñà‑nì kjoa̱ kìi̱. Ko̱ tímahiyí‑te‑na nga ni̱chjin nchijòn tísíkájno a̱ꞌta ꞌtse̱ ngaꞌtsì na̱xi̱ndá‑la̱ Cristo ra tjín.
\v 29 Tsa ꞌkia̱ yá ra mahinda ikon a̱ꞌta ꞌtse̱ kjoa̱ ra makjiín‑la̱, ¿a mí tsa ti̱ꞌkoa̱ kaꞌta‑te‑la̱ inìma̱‑na̱ ꞌkia̱ nga ko̱ꞌsín ma? Ko̱ ꞌkia̱ nga yá ra kaníjin‑no jé, ¿a mí tsa ꞌñó majti‑na ra ꞌa̱n?
\v 30 Tsa machjeén nga nda sìkíjnaa̱ ijo‑na̱, maá‑la nda sikíjna‑na ijo‑na̱ a̱ꞌta ꞌtse̱ kjoa̱ ra mahinda‑ni jè takoàa̱n.
\v 31 Nainá ra Na̱ꞌìn‑la̱ ma Jesucristo ra tíjna ítjòn‑ná, jé ra bakèn‑la̱ nga nda kataꞌyaxkón skanda ta mé ni̱chjin‑ni, jé nda tíbe nga mì tsa ꞌén ndiso‑jìn ra tíchjàa̱.
\v 32 Ya̱ Damasco jè xi̱ta̱ ra ya̱ tíbatéxoma ra jè kitsjà‑la̱ xá jè xi̱ta̱xá ítjòn ra ꞌmì Aretas, isìkasén xi̱ta̱‑la̱ nga isikìnda̱ ya̱ xo̱tjo̱ba̱‑la̱ na̱xi̱ndá, nga mejèn‑la̱ nga jtsa̱ba̱ꞌñó‑na.
\v 33 Tanga jñà xi̱ta̱, naꞌñó tsikíꞌta jngo ndi̱si̱yá ra isíkíjnaya‑na, mé‑ni nga tsaje̱n‑ngi‑na ya̱ ñánda̱ ti̱ꞌxákji jè chrjó ra tjíchjàndi‑la̱ na̱xi̱ndá. ꞌKoa̱á ꞌsín kjomà‑ni nga ma jáhachinga.
\c 12
\s Kjoa̱ ra kjòchi̱ya tsijen‑la̱ Pablo
\p
\v 1 Kixi̱í kjoa̱ ni̱mé chjí‑la̱ tsa nda síkíjna ijo‑na̱, tanga machjeén‑ní nga ꞌkenájmí‑najiòn kjoa̱ ra tísíchi̱ya‑na Nainá ko̱ kóꞌsín tjín kjoa̱ ra jè tsakón tsijen‑na.
\v 2 Bexkoón jngo ra xi̱ta̱‑la̱ Cristo. Fí‑la tsa te ijòn nó nga itjamítje̱n nga kijì skanda ñánda̱ nga tíjna ra ma‑ni ján ngajmi. Mì kì be, a ꞌkoa̱á ꞌsín kijì ko̱ ijo‑la̱ o̱ ra ta jé inìma̱‑la̱ kijì; tanga jè Nainá ra nda be.
\v 3‑4 Tanga beé‑ná nga jè xi̱ta̱ ra̱kìi̱, ya̱á kijì ngajmi, ya̱ i̱ꞌnde ñánda̱ nga ꞌñó nda chon. Mì kì be, a ꞌkoa̱á ꞌsín kijì ko̱ ijo‑la̱ o̱ ra ta jé inìma̱‑la̱ ra kijì; tanga jè Nainá ra nda be. Ko̱ ya̱á kiíꞌnchré ꞌén ra ꞌñó ꞌma tjín, ra mì kì tjíꞌnde‑la̱ nga ni̱jngo xi̱ta̱ ko̱ma ki̱chja̱.
\v 5 Maá‑la nda sìkíjnaa̱ koni ꞌsín kjomàꞌtin xi̱ta̱ ra̱kìi̱. Tanga mì kì ma ti̱ꞌa̱n nda síkíjna‑na ijo‑na̱. Ta jè nda síkíjna‑na ijo‑na̱ a̱ꞌta ꞌtse̱ kjoa̱ ra mahinda‑ni takoàa̱n.
\v 6 Tanga tsa nda síkíjna ijo‑na̱ koni ꞌsín kjomàꞌtiaa̱n, mí‑la tsa tsò‑ni kjoa̱ nga ská‑na, ꞌén kixi̱í‑la ra kichjàa̱; tanga majìn‑na nga ko̱ꞌsín ꞌsiaa̱n, mé‑ni nga mì yá ra ko̱ꞌsín ta jè kjoa̱ ra tsa̱ꞌa̱n isa̱ nda si̱íkítsjen‑ni, koni ꞌsín nga ꞌki kjòn‑na ko̱ koni ꞌsín tsò ꞌén ra chjàa̱.
\p
\v 7 Mé‑ni nga mì ꞌa̱n nda kóti̱jna‑na ngaꞌtsì kjoa̱jeya ra tsakón tsijen‑na Nainá, ꞌkoa̱á ma‑ni nga jngo kjo̱hiꞌin tsiꞌkì‑na ra ꞌkoa̱á jngoya‑la̱ koni tsa naꞌyá i̱nchajin ijo‑na̱, ra jè xi̱ta̱‑ni̱í isìkasén mé‑ni nga ske̱ton‑na.
\v 8 Kjo jàn ꞌka̱ bitsáꞌba‑la̱ jè Na̱ꞌín‑ná nga katjahíxìn‑na jè kjo̱hiꞌin ra̱kìi̱;
\v 9 tanga ta ki̱í ꞌsín kitsò‑na: “Jè kjo̱nda‑na̱ ra ijye kítsja‑la, jè ko̱si̱ko̱ꞌta‑li, nga̱ mì mé jchi̱jaꞌta‑li ngaꞌñó‑na̱ ꞌkia̱ nga mahinda takìn.” ꞌKoa̱á ma‑ni, jè kjoa̱ ra mahinda‑la̱ takoàa̱n, jé ra nda síkíjna‑na ijo‑na̱, mé‑ni nga jè ngaꞌñó‑la̱ Cristo ya̱á kíjnako̱ kiꞌta‑na.
\v 10 ꞌKoa̱á ma‑ni, ꞌñó matsja‑na ꞌkia̱ nga mahinda takoàa̱n, ko̱ ꞌkia̱ nga yá ra chja̱jno‑na, ꞌkia̱ nga mé ra tíchijaꞌta‑na, ko̱ ꞌkia̱ nga yá ra mahatji̱ngi‑na, ꞌkia̱ mé kjoa̱ ra chjá ma‑na, matsjaá‑na nga a̱ꞌta ꞌtse̱ Cristo sikjiáa̱n kjo̱hiꞌin. Nga̱ ki, ꞌkia̱ nga mahinda takoàa̱n, ꞌkia̱á jnchro nga isa̱ ꞌñó tjín‑la̱ ngaꞌñó inìma̱‑na̱.
\p
\v 11 ꞌKoa̱á ꞌsín tíꞌsiaa̱n koni tsa ská‑na, tanga jión kjo̱ꞌñó kiꞌniá‑nájiòn nga ko̱ꞌsín kíꞌsiaa̱n. Jión kjón‑najiòn ra tjínè‑la̱ nga nda ki̱náchrjengi‑nájiòn tsa nda kjòn‑ni, nga̱ mì tsa isa̱ nangi tíjna̱‑la̱ ꞌa̱n jñà xi̱ta̱ ra ko̱ꞌsín ꞌyaxkón jiòn nga jñá títsa̱jna ítjòn‑la̱ xi̱ta̱ ra tsikíxáya‑la̱ Cristo; kja̱ ni̱ꞌsín nìmé chjí‑na ra ꞌa̱n.
\v 12 ꞌKia̱ nga ya̱ tsakáti̱jnajin‑no, kichíkjoa̱ko̱ó‑na nga kítsakon‑no kjo̱xkón ra bakón nga ngi ꞌa̱n kiti‑ná ra tsikíxáya‑na Cristo; nga kítsakon‑no kjo̱xkón ra bíya chi̱ya, kjo̱xkón ra bakón kjoa̱jeya‑la̱ Nainá ko̱ ra tse ngaꞌñó tji̱ko̱.
\v 13 ¿Mé ra isa̱ nangi isíkíjna‑najiòn koni jñà na̱xi̱ndá‑la̱ Cristo ra iꞌka? ¿O̱ ra ꞌchoó ma‑no nga ni̱mé ra isíjé‑no? Ti̱jchaàꞌtá‑ná tsaꞌkoa̱ tsa ko̱ꞌsín kíꞌsiaa̱n.
\s ꞌKoa̱á ꞌsín isíkítsjen jè Pablo nga ki̱ji̱ ya̱ Corinto ra ma‑ni jàn ꞌka̱
\p
\v 14 Ijyeé tíjnanda‑náa̱ nga íjkon‑no ra ma‑ni jàn ꞌka̱. Ko̱ takó mì tsa jiòn sijtí‑no mé ra chijaꞌta‑na. Mì tsa ki batsjía̱ mé ra tjín‑najiòn; jión‑nájiòn ra tíbatsjí‑no. Nga̱ mì tsa jñà ra i̱xti tjínè‑la̱ ki̱itjò to̱n ra machjeén‑la̱ na̱ꞌìn‑la̱; jè na̱ꞌìn ra tjínè‑la̱ nga ki̱itjò to̱n ra ko̱chjeén‑la̱ i̱xti‑la̱.
\v 15 ꞌA̱n skanda ngi ko̱ó kjo̱tsja‑na̱ nga sikjéheya to̱n ra tsa̱ꞌa̱n, ko̱ skanda sikjé‑te ngaꞌñó ra ꞌtse̱ inìma̱‑na̱, ta nga̱tjì‑la̱ nga ꞌñó tsjake̱‑najiòn. Koni ꞌsín ꞌñó tsjake̱‑najiòn, ¿a ta isa̱á jnchro chiba ko̱tsjacha‑nájiòn?
\p
\v 16 Ni̱ꞌsín ta kóꞌsín‑isa, ꞌa̱n mì tsa mé ra jiòn ísijtí‑no. Kja̱ ni̱ꞌsín tjín iꞌka xi̱ta̱ ra tsò, nga ta maña̱‑ró ra ꞌa̱n nga ískonda̱cha̱‑najiòn.
\v 17 ¿Mé ra ískonda̱cha̱‑najiòn ꞌkia̱ nga ísikásén iꞌka‑no xi̱ta̱?
\v 18 Jè Tito ítsikitsáꞌba‑la̱ nga ísikásén‑no ko̱ jè ꞌndsé ra ìjngo. ¿A ta iskonda̱cha̱á‑no Tito? ¿A mí tsa ngásòn tjín kjo̱bítsjen‑na̱ji̱n ko̱ inìma̱‑na̱ji̱n?
\p
\v 19 ¿A ꞌkoa̱á ꞌsín i̱nchiníkítsjen kiꞌta jiòn nga jé ijo‑na̱ji̱n i̱nchinakjoátjì‑ji̱n? Tanga mì tsa ko̱ꞌsín tjín‑jìn. Ji̱n ra chi̱ꞌnda‑la̱ Cristo, ngixko̱n Nainá‑ní koni ꞌsín nga i̱nchinakjoá‑ji̱n. Jiòn ꞌndsé ra ꞌñó tsjake̱‑no, ngaꞌtsì kjoa̱ ra i̱nchiꞌnià‑ji̱n, jè ra mejèn‑naji̱n nga katatjo ngaꞌñó‑isa jiòn.
\v 20 Makájno‑na tsa mì ko̱ꞌsín titsa̱jna jiòn ꞌkia̱ nga kijchòjkon‑no koni ꞌsín nga mejèn‑na ra ꞌa̱n. Ko̱ tsa mì ko̱ꞌsín ꞌsiaa̱n ra ꞌa̱n ꞌkia̱ nga kijchòo̱ koni ꞌsín nga i̱nchichiñá jiòn. ꞌKia̱ kijchòo̱, tsa i̱nchibixkàn-kjoó‑nájiòn, ko̱ tsa kjoa̱xìtakòn tjín‑jin inìma̱‑no, ko̱ tsa kjo̱jti tjíjin ya̱ inìma̱‑najiòn, tsa jò jàn ya tjín jiòn, ko̱ tsa ꞌén ndiso i̱nchiniya‑la xàngio̱o, tsa xàngio̱o i̱nchichibaya‑no, tsa kjoa̱ ꞌnga takòn tjín‑no, ko̱ tsa mì nda titsa̱jna‑la̱ xàngio̱o nga jngó jngó‑no.
\v 21 Ti̱ꞌkoa̱á makájno‑na tsa ꞌkia̱ nga kijchòjkon india‑najiòn, tsa jè Nainá ꞌñó nangi si̱ìkíjna‑na ya̱ ngixko̱n jiòn. Ko̱ tsa ya̱ skindaya̱tjìa̱ jñà xi̱ta̱ ra takó ko̱ꞌsín i̱nchibátsji‑jé kiꞌta koni kjotseé nga kjè kì síkájno‑ni ngaꞌtsì kjoa̱tjé ra i̱nchiꞌsín, ko̱ kjoa̱chijngi‑la̱, ko̱ kjoa̱ chi̱nga̱ ra i̱nchiꞌsín ko̱ ngaꞌtsì kjoa̱ꞌcho ra mì kì nda tjín.
\c 13
\s ꞌÉn‑la̱ Pablo ra feheꞌta‑ni
\p
\v 1 Ya̱á ma‑ni jàn ꞌka̱ nga kijchòjkon‑no ꞌndi̱ ꞌndi̱. Katafìya‑no koni ꞌsín tsò xa̱jo̱n‑la̱ Nainá: ꞌkia̱ nga sindajín jngo kjoa̱, tjínè‑la̱ tsa jò ko̱ tsa jàn xi̱ta̱ tsjá ꞌén‑la̱ ra xko̱n kijtse‑ni kjoa̱ ra kjomà.
\v 2 ꞌKoa̱á ꞌsín ijye kíxian kixi̱‑no ꞌkia̱ nga ijchòjkon‑no ra ma‑ni jò ꞌka̱, ko̱ ꞌkoa̱á ꞌsín tíxian india‑no ꞌndi̱‑ni̱, ni̱ꞌsín ta kjin tíjna̱‑na; jñà ra ko̱ꞌsín tsakátsji‑jé ko̱ ra i̱nchibátsji-jé‑isa ꞌndi̱‑ni̱: Tsa ꞌkia̱ nga kijchòjkon india‑no mì tsa taxki̱ sijcháꞌta‑la̱ kjoa̱ ra tjín‑la̱ nga jngó jngó xi̱ta̱.
\v 3 Nga̱ ꞌkoa̱á ꞌsín mejèn‑najiòn nga jcha̱a a kixi̱í kjoa̱ nga jè Cristo chjà ngajo‑la̱. Tanga jè Cristo mì tsa ta indakjoa̱ ꞌsi̱in ra a̱ꞌta tsa̱jiòn‑jiòn, ta isa̱á ya̱ kíjnajin‑no jè ngaꞌñó‑la̱.
\v 4 Kixi̱í kjoa̱ jè Cristo ꞌkia̱ nga isiꞌta krò, ꞌkoa̱á ꞌsín ꞌki kjomà koni tsa tsìn‑la̱ ngaꞌñó; tanga ngi ko̱ó ngaꞌñó‑la̱ Nainá tíjnakon‑ni ꞌndi̱ ꞌndi̱. ꞌKoa̱á ti̱ꞌsín kjòn‑te‑ji̱n koni Cristo, koni tsa tsìn‑te‑naji̱n ngaꞌñó; tanga ko̱ó ngaꞌñó‑la̱ Nainá ko̱ma ya̱ ta̱ña ki̱tsa̱jnako̱‑ji̱n Cristo mé‑ni nga ma si̱xá‑naji̱n ra a̱ꞌta tsa̱jiòn.
\p
\v 5 Nda ti̱chi̱yajin‑la̱ inìma̱‑no, ¿a takó ndaá makjiín‑no ra a̱ꞌta ꞌtse̱ Cristo? Ti̱jiòn nda chjíꞌta‑no ijo‑no, kóꞌsín titsa̱jna. ¿A kjeé nda machi̱ya‑no nga jè Jesucristo ya̱á tíjnajin ya̱ inìma̱‑no? Kja̱ ta̱jngoó‑la tsa mì kì tsatojion koni ꞌsín nga itjáꞌta.
\v 6 ꞌKoa̱á ꞌsín koñáa̱ ra ꞌa̱n, nga ꞌkoa̱á ꞌsín nda katasijngo takòn ra jiòn, ra ngaji̱n, skanda ꞌndi̱ tsatojin‑náji̱n koni tjín ꞌka̱ ijye itjáꞌta‑ji̱n.
\v 7 ꞌKoa̱á ꞌsín i̱nchinakjoáꞌta‑la̱ji̱n Nainá mé‑ni nga ni̱jngo kjoa̱ ra ꞌcho tjín ꞌsia̱n jiòn; mì tsa tsò‑ni kjoa̱ nga ji̱ín ko̱ꞌsín kataꞌya‑naji̱n nga ndaá i̱nchibatojin‑ji̱n kjoa̱; jé‑ni mé‑ni nga ko̱ꞌsín ꞌtia̱àn jiòn kjoa̱ ra nda tjín, ni̱ꞌsín ko̱ꞌsín katatsíjen‑ji̱n ra ji̱n koni tsa mì kì chíkjoa̱‑naji̱n kjoa̱ ra batojin‑ji̱n.
\v 8 Nga̱ mì kì ma ji̱n kó ꞌkín‑la̱ji̱n xi̱ta̱ ra síhitjasòn kjoa̱kixi̱, ta jé‑la jnchro ꞌki̱ ngaꞌñó isa‑la̱ji̱n.
\v 9 ꞌKoa̱á ma‑ni ta isa̱á matsja‑naji̱n ꞌkia̱ nga inda tjín takòn‑ji̱n, mé‑ni nga isa̱ kataꞌse‑la̱ ngaꞌñó inìma̱‑no ra jiòn; ko̱ i̱nchinakjoáꞌtá-isa‑la̱ji̱n Nainá mé‑ni nga ni̱mé jchi̱jaꞌta‑no ra a̱ꞌta ꞌtse̱.
\v 10 Kií ko̱ꞌsín tje̱n tíbindá‑no xa̱jo̱n ra̱kìi̱, ꞌkia̱ nga ti̱kjè ya̱ tíjnako̱‑no, mé‑ni nga ꞌkia̱ nga kijchòo̱, mì tsa bato ꞌñó kokó‑no nga sikjée̱n kjo̱téxoma ra ko̱ꞌsín jè Na̱ꞌín‑ná kitsjà‑na; ko̱ mì tsa ki xá kiꞌtsì‑na kjo̱téxoma ra̱kìi̱ nga ta isa̱ jiòn sikítsón‑no; kií‑ní mé‑ni nga isa̱ katasakó-isa‑najiòn ngaꞌñó ra ꞌtse̱ Nainá.
\s Kóꞌsín nga síhixoꞌta xi̱ta̱ Corinto jè Pablo jè ꞌén ra feheꞌta‑ni
\p
\v 11 Jiòn ꞌndsé ko̱ tichjeé, ta ngaꞌtsì kjoa̱ kìi̱, jè ra ꞌñó machjeén nga ꞌñó tsja kataꞌse‑la̱ inìma̱‑najiòn. Nga kixi̱ titsa̱jna jiòn ya̱ ngixko̱n Nainá, ti̱jetakòn jiòn xi̱ta̱ xàngio̱o, jngoó kjo̱bítsjen kataꞌse‑no ta ngaꞌtsì‑no, ko̱ ꞌnchán ti̱tsa̱jnako̱o xàngio̱o. Jè Nainá ra tjín‑la̱ kjo̱tsjacha ko̱ ra tjín‑la̱ kjo̱ꞌnchán ya̱á kíjnako̱‑no.
\v 12 Ngi ko̱ó inìma̱‑no ti̱kjáya‑la xàngio̱o nga jngó jngó‑no.
\v 13 Ngaꞌtsì xi̱ta̱‑la̱ Nainá, ꞌkoa̱á ꞌsín i̱nchisíhixoꞌta‑no.
\p
\v 14 Nda katijnako̱‑no ngaꞌtsì‑no jè kjo̱nda‑la̱ Jesucristo ra tíjna ítjòn‑ná, ko̱ kjo̱tsjacha‑la̱ Nainá, ko̱ jè Inìma̱ Tsje‑la̱ Nainá ra síkítsa̱jnakjo‑ná. Ko̱ꞌsín katama.