\id GAL
\h Gálatas
\toc1 Gálatas
\mt Xa̱jo̱n ra tsikínda jè Pablo ra isìkasén‑la̱ xi̱ta̱ na̱xi̱ndá‑la̱ Cristo ra títsa̱jna ya̱ nangi Galacia
\c 1
\s ꞌÉn ra maꞌtsia̱‑ni
\p
\v 1‑2 Jiòn ra xi̱ta̱ na̱xi̱ndá‑la̱ Cristo ma jiòn ra ya̱ titsa̱jna ya̱ nangi Galacia, ꞌkoa̱á ꞌsín sixóoꞌta‑no ꞌa̱n ra ꞌmì‑na Pablo ko̱ ngaꞌtsì xi̱ta̱‑la̱ Cristo ra i̱ títsa̱jnako̱‑na. Jè xá ítjòn ra ꞌa̱n tsáꞌya̱, mì tsa kjo̱bítsjen ꞌtse̱ xi̱ta̱ inchrabà‑ni ko̱ mì tsa xi̱ta̱ i̱sàꞌnde ra ko̱ꞌsín tsikíꞌta‑na. Ngi jè sabá tsikíxáya‑na jè Jesucristo ko̱ Nainá ra Na̱ꞌìn ꞌmì‑lá ra kisikjaáya‑ila̱ ya̱ a̱jin‑la̱ miꞌken.
\v 3 Nainá ra Na̱ꞌín‑ná ko̱ jè Jesucristo ra tíjna ítjòn‑ná katasíchikonꞌtin‑no ko̱ katatsjá‑no kjo̱ꞌnchán ya̱ a̱jin inìma̱‑no.
\v 4 Ijyeé ꞌya‑nájiòn nga jè Jesucristo kitsjà kjo̱tjò ijo‑la̱ nga ꞌken ngajo‑ná ta nga̱tjì ꞌtse̱ jé‑ná, mé‑ni nga ma kítjo̱kajin‑ná jñà kjoa̱ꞌcho ra tjín ya̱ i̱sàꞌnde ra̱kìi̱. ꞌKoa̱á ꞌsín kiꞌsìn koni ꞌsín kjomejèn‑la̱ jè Na̱ꞌín‑ná ra Nainá ma.
\v 5 Jé Na̱ꞌín‑ná ra Nainá ra machjeén‑la̱ nga jeya katijna ta mé ni̱chjin‑nioo̱ ko̱ ta mé nó‑nioo̱, ko̱ꞌsín katama.
\s Tsìn jngo‑isa ꞌén xi̱tse̱ ra nda tsò a̱ꞌta ꞌtse̱ Cristo ra isa̱ kjꞌií tsò
\p
\v 6 ꞌA̱n, sí ta maxkón‑na nga ta ndi̱to̱ón kijmitákon jiòn Nainá, nga ya̱á tsangìtji̱ngi‑la jngo ꞌén ra kjꞌií ꞌsín kiꞌsena̱jmí‑no. Ko̱ ijyeé kiꞌchaàjiín‑no nga̱ jè Nainá xá kiìchja̱‑no nga ta jè kjo̱nda‑la̱ Cristo kjóꞌtatakòn.
\v 7 Mì tsa tsò‑ni kjoa̱ nga tjín jngo‑isa ꞌén nda‑la̱ Cristo ra isa̱ kjꞌií ꞌsín tsò. Majìn. Tanga tjín iꞌka xi̱ta̱ ra mejèn‑la̱ nga minchá skáya‑no nga mejèn‑la̱ si̱ìkitsón‑jin jè ꞌén nda‑la̱ Cristo nga si̱ìkaatjìya‑la̱.
\v 8 Tanga tsa tjín jngo xi̱ta̱ ra kjꞌií tsò ꞌén ra bakón‑ya koni ꞌsín tsò jè ꞌén nda‑la̱ Cristo ra ji̱n bakon‑ya‑laji̱n, jè Nainá katatsjá iꞌin‑la̱, ni̱ꞌsín ti̱ꞌa̱n‑na ko̱ ni̱ꞌsín jngo ìkja̱li̱ ra ngajmi nchrabá‑ni.
\v 9 Koni ꞌsín ijye ko̱tsiꞌkìn‑laji̱n nga ꞌsa̱ ítjòn, takó ꞌkoa̱á ꞌsín tíxian india‑no ꞌndi̱‑ni̱: Tsa yá xi̱ta̱ ra kjꞌií tsò ꞌén ra ꞌbéna̱jmíya‑najiòn koni ꞌsín tsó ꞌén xi̱tse̱ ra nda tsò ra ijye ichjíbé jiòn, jè Nainá katatsjá iꞌin‑la̱.
\s Kóꞌsín kjomà‑ni nga jè Pablo tsikíxáya‑la̱ Cristo
\p
\v 10 ꞌA̱n, mì tsa kjo̱nda‑la̱ xi̱ta̱ ra batsjía̱, kjo̱nda‑la̱ Nainá‑ní ra batsjía̱ ra ꞌa̱n. Ko̱ mì tsa ki batsjía̱ nga nda kóti̱jna ya̱ ngixko̱n xi̱ta̱, tsa ko̱ꞌsín mejèn‑na nga ꞌsiaa̱n, mì‑la tsa kixi̱‑ni kjoa̱ nga chi̱ꞌnda‑la̱ Cristo ma.
\p
\v 11 Jiòn ꞌndsé ko̱ tichjeé, ko̱ꞌsín nda katasijin‑no a̱ꞌta ꞌtse̱ jè ꞌén nda‑la̱ Cristo ra ꞌa̱n ꞌbenájmíya, nga mì tsa ta kjo̱bítsjen‑la̱ xi̱ta̱‑jìn;
\v 12 mì tsa taxki̱ xi̱ta̱‑jìn ra kitsjà‑na ko̱ ra tsakón‑ya‑na jñà ꞌén kìi̱; jè sabá Jesucristo ra tsakón tsijen‑na.
\p
\v 13 Kinaꞌyá‑la jiòn koni ꞌsín kíꞌsiaa̱n nga ti̱ꞌsa̱ ítjòn ꞌkia̱ nga ya̱ kijìꞌta‑la̱ kjo̱téxoma ꞌtse̱ xi̱ta̱ judío; kjojtike̱‑náa̱ jè na̱xi̱ndá‑la̱ Cristo nga tsahatji̱ngi‑la̱, nga mejèn‑na nga katachija.
\v 14 A̱ꞌta ꞌtse̱ kjo̱téxoma‑la̱ xi̱ta̱ judío, ꞌa̱án ísikíjne‑la̱ jñà xi̱ta̱ ra ta̱ña kjójchá‑ji̱n ya̱ na̱xi̱ndá‑na̱, nga̱ isa̱á ꞌñó nda kisìhitjasòn koni ꞌsín tjín xkósòn ra ꞌya‑ni jñà xi̱ta̱ jchínga‑na̱.
\v 15 Tanga jè Nainá, ꞌkoa̱á ꞌsín isasèn‑la̱ nga ꞌa̱n tsjahíjin‑na skanda ti̱ꞌkia̱‑ni nga ti̱ꞌsa̱ tjíhiꞌmaa̱ ya̱ a̱ya i̱ndsi̱ꞌba̱ na̱‑na̱ nga ta ko̱ó kjo̱nda‑la̱ nga ko̱ꞌsín kiìchja̱‑ná,
\v 16 ko̱ isikatsíjen‑na jè Iꞌndí‑la̱ mé‑ni nga ꞌa̱n ko̱ma ꞌkenájmí‑la̱ ꞌén nda‑la̱ jñà xi̱ta̱ ra mì tsa xi̱ta̱ judío. ꞌKia̱ nga ko̱ꞌsín kjomàꞌtiaa̱n, mì tsa yá xi̱ta̱ ra ískonangi‑la̱,
\v 17 ko̱ mì tsa ya̱ ndi̱to̱n kiì‑jiàa̱n ya̱ ján Jerusalén nga kiìkatsjía jñà ra ta̱ꞌkoa̱ ijye tsikíxáya ítjòn‑la̱ Cristo. Ta isa̱á jnchro ya̱á kijì ndi̱to̱n ya̱ i̱ꞌnde kixì ra chja̱‑ni na̱xi̱ndá Arabia ko̱ ra kjomà a̱skan‑nioo̱, tsáfaá india‑na ya̱ na̱xi̱ndá Damasco.
\s Kóꞌsín nga tsajo̱ó jè Pablo ko̱ xi̱ta̱ ra iꞌka ra ti̱ꞌkoa̱ jè Cristo tsikíxáya‑la̱
\p
\v 18 ꞌKia̱ nga tsato ján nó nga ijye kíjtsexkon Jesucristo, ꞌkia̱á kijiàa̱ ya̱ ján Jerusalén nga ikatsíjen‑la̱ jè Pedro, ko̱ chrjoꞌòn ni̱chjin ya̱ tsakáti̱jnaa̱ ya̱ niꞌya‑la̱.
\v 19 Mì kì kíjtse‑isaa̱ xi̱ta̱ ra kjꞌií ra ta̱ꞌkoa̱ ijye kisìxáya ítjòn‑la̱, ta jè ꞌndse̱ Na̱ꞌín‑ná ra ꞌmì Jacobo ra kíjtsee̱.
\v 20 Jè ꞌén ra ko̱ꞌsín tíbiꞌtá‑no xa̱jo̱n, tíkotsíjen Nainá, mì tsa ꞌén ndiso‑jìn, ngi ꞌén kixi̱‑ní.
\p
\v 21 Ra kjomà a̱skan‑ni ya̱á kijiàa̱ ya̱ nangi Siria ko̱ nangi Cilicia.
\v 22 Tanga jñà ni̱chjin kìi̱, kjè kì tsa bexkon‑na jñà xi̱ta̱ na̱xi̱ndá‑la̱ Cristo ra títsa̱jna ya̱ nangi Judea.
\v 23 Jñà xi̱ta̱ kìi̱, tà kiíꞌnchré‑ró nga jè xi̱ta̱ ra tsahatji̱ngi‑la̱ kjotseé, ꞌndi̱ ꞌndi̱, jè‑ró ꞌbéna̱jmíya ꞌén nda‑la̱ Cristo, jè ꞌén‑la̱ Nainá ra mejèn‑la̱ kisìkitsón‑ya tsiki.
\v 24 Ko̱ jeya isíkíjna Nainá ꞌkia̱ nga kiíꞌnchré koni ꞌsín nga jahatjìya‑na.
\c 2
\s Kóꞌsín nga kitsjà ngaꞌñó‑la̱ jè Pablo jñà xi̱ta̱ ra tsikíxáya ítjòn‑la̱ Cristo
\p
\v 1 ꞌKia̱ nga a̱skan‑nioo̱ nga ijchò te ijòn nó, kijí india‑na ya̱ ján Jerusalén, tje̱n‑ko̱‑na Bernabé; ti̱ꞌkoa̱á tsakáhijtako̱‑na Tito.
\v 2 Kií kijì‑na nga ki̱tjasòn koni ꞌsín nga isìchi̱ya tsijen‑na Nainá. ꞌKia̱ nga ijye ya̱ tíjna̱, ya̱á ítsiꞌkena̱jmí‑la̱ kóꞌsín nga ꞌa̱n ítsakon‑yá‑la̱ ꞌén xi̱tse̱ ra nda tsò a̱ꞌta ꞌtse̱ Cristo jñà ra mì tsa xi̱ta̱ judío. A̱ꞌta xín ítsiꞌkena̱jmí‑la̱ jñà xi̱ta̱ ra xá ꞌnga tjín‑la̱ a̱ꞌta ꞌtse̱ ꞌén nda‑la̱ Cristo. Kií ko̱ꞌsín kíꞌsin‑na nga kataꞌya‑la̱ nga mì tsa ta kjo̱tjò‑ni jè xá ra tíꞌsiaa̱n ko̱ jè ra ijye kíꞌsiaa̱n.
\v 3 Ni̱ꞌsín takó xi̱ta̱ griego jè Tito ra tji̱ko̱‑na, mì tsa yá ra kjo̱ꞌñó kiꞌsìn‑la̱ nga isiꞌta chi̱ba̱ ijo‑la̱ ra kjoa̱ ꞌtse̱ circuncisión.
\v 4 Tanga tjín iꞌka xi̱ta̱ ndiso ra ta ꞌjahaꞌsen‑jin chijé‑ní ra ko̱ꞌsín kitsò nga ijyeé makjiín‑la̱ a̱ꞌta ꞌtse̱ Cristo. Tanga ta jè ra mejèn‑la̱ nga ske̱ mé ra ꞌnié, jién ra ijye titsa̱hijyondi̱í‑lá a̱ꞌta ꞌtse̱ kjo̱téxoma ꞌtse̱ Moisés, ta nga̱tjì‑la̱ nga ijye makjiín‑ná a̱ꞌta ꞌtse̱ Cristo Jesús; ta jñà mejèn‑la̱ xi̱ta̱ kìi̱ nga kjo̱ꞌñó ꞌsi̱n‑ná nga si̱hitjasén jè kjo̱téxoma ꞌtse̱ Moisés.
\v 5 Tanga ngaji̱n, mì kì inisin‑la̱ji̱n, nga̱ jè ra mejèn‑naji̱n nga jè kjoa̱kixi̱ ra ꞌtse̱ ꞌén nda‑la̱ Cristo, ya̱á katijnajin kiꞌta‑najiòn.
\p
\v 6 Jñà xi̱ta̱ ra xá ꞌnga tjín‑la̱, ni̱mé ra kjoa̱ xi̱tse̱ kitsjà-isa‑na koni ꞌsín nga ijye ꞌa̱n bakon‑yáa̱. Tanga ꞌa̱n, mì tsa jè fì‑na tsa jñà xi̱ta̱ ítjòn kìi̱ ꞌñó nda kiꞌyaxkón, nga̱ jè Nainá mì tsa jè kotsíjen kóꞌsín nga ꞌyaxkón xi̱ta̱.
\v 7 Ta isa̱á jnchro kjòchi̱yaá‑la̱ nga jè sabá Nainá kisìnga̱tsja‑na xá mé‑ni nga ꞌa̱n kichjàyajin‑la̱ ꞌén xi̱tse̱ ra nda tsò a̱ꞌta ꞌtse̱ Cristo jñà ra mì tsa xi̱ta̱ judío ra mì tsa tjíꞌta chi̱ba̱ ijo‑la̱ kjoa̱ ꞌtse̱ circuncisión; ko̱ jè Pedro kjonga̱tsja xá nga jè ki̱chja̱yajin‑la̱ jñà ra xi̱ta̱ judío ra tjíꞌta chi̱ba̱ ijo‑la̱ kjoa̱ ꞌtse̱ circuncisión.
\v 8 Jè Nainá ra isìkasén jè Pedro nga jè ki̱chja̱yajin‑la̱ ꞌén nda‑la̱ Cristo jñà ra xi̱ta̱ judío, ti̱jé‑ni ra isìkasén‑na nga ꞌa̱n kichjàyajin‑la̱ jñà ra mì tsa xi̱ta̱ judío.
\p
\v 9 Jè Jacobo, Pedro ko̱ jè Juan, jñà ra ko̱ꞌsín nda kiꞌyaxkón nga xi̱ta̱ ítjòn tsikìtsa̱hijyo‑la̱ xi̱ta̱ na̱xi̱ndá‑la̱ Cristo, kijtse‑ní nga jè Nainá kitsjà‑na jè kjo̱nda kìi̱; kjojngoó ikon a̱kjòn kitsjá‑naji̱n tsja ngajò‑na̱ji̱n, ꞌa̱n ko̱ jè Bernabé, mé‑ni nga kijcha‑la̱ nga ta jngoó xá i̱nchiꞌnià‑ji̱n. Ko̱ tsjaá kiꞌse‑la̱ nga ya̱ tsangì níxáko̱‑ji̱n jñà ra mì tsa xi̱ta̱ judío, ko̱ ra jñà, ya̱á isíxáko̱ jñà ra xi̱ta̱ judío.
\v 10 Ta jé‑ní jngo kjo̱nda isíjé‑naji̱n, nga mì kì tsa si̱jchaàjin‑ji̱n jñà xi̱ta̱ i̱ma̱. Ko̱ jñà jnchro kjoa̱ kìi̱ ra tíbiné‑la̱ ijo‑na̱ nga ꞌsiaa̱n.
\s Kóꞌsín nga jè Pablo tsakátiko̱ jè Pedro ya̱ na̱xi̱ndá Antioquía
\p
\v 11 India, ꞌkia̱ nga jè Pedro ꞌji i̱ na̱xi̱ndá Antioquía tsakatíko̱‑náa̱ ya̱ a̱jin‑la̱ xi̱ta̱, nga̱ mì kì nda tjín kjoa̱ ra kiꞌsìn.
\v 12 ꞌKia̱ nga ꞌsa̱ ítjòn, ya̱á tsakjèn‑ko̱ jñà xi̱ta̱‑la̱ Cristo ra mì tsa xi̱ta̱ judío; tanga ra kjomà a̱skan‑nioo̱, mì kì ti̱ ya̱ tsakjèn‑ko̱‑nì, ꞌkia̱ nga ꞌji jñà xi̱ta̱ judío ra ti̱ꞌkoa̱á makjiín‑la̱ a̱ꞌta ꞌtse̱ Cristo ra ya̱ tjímako̱ Jacobo; tsasènꞌtaxín‑ní, nga̱ jñà itsakjòn‑la̱ jñà xi̱ta̱ judío ra tje̱n‑ko̱ Jacobo, jñà ra kjo̱ꞌñó mejèn‑la̱ nga siꞌta chi̱ba̱ ijo‑la̱ xi̱ta̱‑la̱ Cristo ra mì tsa xi̱ta̱ judío ra a̱ꞌta ꞌtse̱ circuncisión.
\v 13 Ti̱ꞌkoa̱á jñà xi̱ta̱ judío ra iꞌka ra makjiín‑la̱ ꞌén‑la̱ Nainá, ya̱á isíngásòn‑ko̱ kjoa̱ ra kiskàjin Pedro ra jò i̱sén tsakón; skanda jè Bernabé kiskàjiín‑te kjoa̱ kìi̱.
\v 14 ꞌKia̱ nga kíjtsee̱ nga mì kì ko̱ꞌsín i̱nchisíhitjasòn koni ꞌsín tjín kjoa̱kixi̱ ra a̱ꞌta ꞌtse̱ ꞌén nda‑la̱ Cristo, ꞌkoa̱á ꞌsín kíxin‑la̱ jè Pedro ya̱ ngixko̱n ngaꞌtsì xi̱ta̱: “Ji̱, xi̱ta̱ judío‑ní, tanga mì tsa ko̱ꞌsín tjiníjchí ijo‑li koni tsa xi̱ta̱ judío, ¿kóꞌsín ma‑ni nga kjo̱ꞌñó ꞌnià‑la̱ ji̱ jñà ra mì tsa xi̱ta̱ judío nga ko̱ꞌsín katasíjchá ijo‑la̱ koni tsa xi̱ta̱ judío?”
\p
\v 15 ’Jién ni̱ꞌsín kixi̱ kjoa̱ nga tje̱‑la̱ xi̱ta̱ judío meé, nga mì tsa ya̱ kitsin‑jín‑lá jñà ra mì tsa xi̱ta̱ judío ra ko̱ꞌsín naꞌyá‑la̱ nga xi̱ta̱‑jé.
\v 16 Tanga ꞌya‑né nga ni̱jngo xi̱ta̱ ra kixi̱ kíjna ya̱ ngixko̱n Nainá ra ta nga̱tjì‑la̱ nga nda síhitjasòn kjo̱téxoma ra itjábé‑la̱ jè Moisés, ta jé‑ní tsa ya̱ ko̱kjiín‑la̱ a̱ꞌta ꞌtse̱ Jesucristo. Jién, ijyeé ya̱ kjokjiín‑ná a̱ꞌta ꞌtse̱ Jesucristo, ko̱ jè Nainá, xi̱ta̱ kixi̱ síkíjna‑ná ꞌkia̱ nga ijye ya̱ makjiín‑ná a̱ꞌta ꞌtse̱ Cristo. Ko̱ mì tsa ki‑ni nga nda nihitjasén kjo̱téxoma, ta nga̱tjì‑la̱ nga̱ ni̱jngo xi̱ta̱ ra kixi̱ kíjna ya̱ ngixko̱n Nainá ni̱ꞌsín nda si̱hitjasòn jè kjo̱téxoma ꞌtse̱ Moisés.
\p
\v 17 ’ꞌNdi̱‑ni̱, ꞌkoa̱á ꞌsín chiñá‑lá nga kixi̱ ki̱tsa̱jneé ya̱ ngixko̱n Nainá ta nga̱tjì‑la̱ nga ijyeé ya̱ makjiín‑ná a̱ꞌta ꞌtse̱ Cristo, [mì tsa ki‑ni nga i̱nchiniìtjasén kjo̱téxoma]. ꞌKoa̱á ma‑ni nga ko̱ꞌsín xi̱ta̱ jé bítjo̱ngieé [koni ꞌsín ꞌmì‑la̱ jñà ra mì tsa xi̱ta̱ judío]. Tanga, ¿a tsó‑ni kjoa̱ nga jé Cristo tímahítsjájin‑ná jé? Majìn, mì tsa ko̱ꞌsín tjín‑jìn.
\v 18 Tsa jè kjo̱téxoma ra ꞌa̱n ijye ítsachrjéngia, india sìhitjásòn india‑na, ya̱á jndáa̱ nga jé tíbatsjí‑la̱ ijo‑na̱.
\v 19 Ti̱jé‑ni kjo̱téxoma ra ya̱ kjójchájiaa̱n kisìꞌken‑na mé‑ni nga ꞌndi̱‑ni̱ ijyeé tíjna̱ndi̱í‑na a̱ꞌta ꞌtse̱ kjo̱téxoma ra̱kìi̱ nga ko̱ꞌsín ma kóti̱jnakon‑na nga sìhitjásòn‑la̱ Nainá.
\v 20 ꞌKia̱ nga ꞌken ya̱ a̱ꞌta krò jè Cristo, ya̱á ꞌkenꞌta‑te‑la̱ ra ꞌa̱n; ko̱ mì tsa ti̱ ꞌa̱n‑naa̱ ra tíjna̱kon; jé Cristo ra ya̱ tíjnajin ya̱ inìma̱‑na̱. ꞌNdi̱‑ni̱, kií tíjnakon‑na nga jè kjiꞌtatákon jè Iꞌndí‑la̱ Nainá ra kjotsjake‑na ko̱ kitsjá ijo‑la̱ nga jè ꞌken‑tjì ngajo‑na.
\v 21 Mì kì nda tjín nga ki̱náchrjengieé kjo̱nda ꞌtse̱ Nainá. Tsa ko̱ꞌsín kixé nga a̱ꞌta ꞌtse̱é kjo̱téxoma nga kixi̱ ki̱tsa̱hijyeé ya̱ ngixko̱n Nainá, mí‑la mé chjí‑la̱ nga ko̱ꞌsín ꞌken Cristo tsaꞌkoa̱.
\c 3
\s Mé kjoa̱‑ni nga ma tjábé‑ná jè Inìma̱ Tsje‑la̱ Nainá
\p
\v 1 ¡Jiòn xi̱ta̱ ra i̱ꞌnde Galacia tsa̱jiòn, mé ta̱ i̱ma̱kjoa̱‑no! ¿Yá ra ta̱ nda tsikíndisoko̱‑no? ¿A mí bítsjen‑no nga nda kjón‑ní tsakon‑ya‑laji̱n kóꞌsín nga jè Jesucristo ꞌkenꞌta krò ra kjo̱nda tsa̱jiòn?
\v 2 Ta jé ra mejèn‑na nga ko̱ꞌtín‑nájiòn: ¿A kií itjábé‑najiòn jè Inìma̱ Tsje‑la̱ Nainá nga nda inìhitjasòn jiòn jè Kjo̱téxoma o̱ ra kií‑ní nga nda kjokjiín‑najiòn ꞌén nda‑la̱ Nainá ra inaꞌyá?
\v 3 Nga ti̱ꞌsa̱ ítjòn, ndaá tsikiꞌtsia̱ko̱‑nájiòn kjo̱bítsjen ra kitsjà‑no Inìma̱ Tsje‑la̱ Nainá, ko̱, ¿mé‑ni ꞌndi̱‑ni̱, ta kjo̱bítsjen ꞌtse̱ xi̱ta̱ mejèn‑no nga isa̱ nda si̱jchá‑no ijo‑no? ¡Mé ta̱ i̱ma̱kjoa̱‑no!
\v 4 ¿A ta kjo̱tjó‑ni ngaꞌtsì kjo̱hiꞌin ra ijye tsato jiòn ꞌkia̱ nga kjokjiín‑no? ꞌKoa̱á ma‑na nga mì tsa ta kjo̱tjò‑jìn.
\v 5 ꞌKia̱ nga jè Nainá kitsjà‑no jè Inìma̱ Tsje‑la̱ ko̱ tsakón‑no kjo̱xkón‑la̱ ra nda tjín, ¿mé‑ni ko̱ꞌsín kiꞌsìn‑ni? ¿A kií‑ní nga nda kinìhitjasòn jiòn jè kjo̱téxoma? Majìn, kií‑ní nga nda kjokjiín‑no ꞌkia̱ nga inaꞌyá jè ꞌén nda‑la̱ Nainá.
\s Mé kjoa̱‑nì nga xi̱ta̱ kixi̱ kijtsetakòn Nainá jè Abraham
\p
\v 6 ꞌKoa̱á jngoya‑la̱ koni tsa jè Abraham, “ndaá kjokjiín‑la̱ a̱ꞌta ꞌtse̱ Nainá; ꞌkoa̱á ma‑ni nga ko̱ꞌsín kitsò‑la̱ Nainá nga xi̱ta̱ kixi̱‑ní.”
\v 7 Ko̱ꞌsín nda katasijin‑no: Jñà ra ko̱ꞌsín makjiín‑la̱ koni ꞌsín jè Abraham kjokjiín‑la̱ a̱ꞌta ꞌtse̱ Nainá, jñá‑ní ra ko̱ꞌsín ko̱ma i̱xti‑la̱ Abraham ꞌkín.
\v 8 ꞌKoa̱á ꞌsín ti̱ngi kitsjá‑ni ꞌÉn‑la̱ Nainá koni ꞌsín nga tíchja̱ Xa̱jo̱n‑la̱ nga xi̱ta̱ kixi̱í ꞌsi̱in jñà ra mì tsa xi̱ta̱ judío ꞌkia̱ nga ya̱ ko̱kjiín‑la̱ a̱ꞌta ꞌtse̱. Ya̱á ꞌya‑la̱ ñánda̱ nga Nainá tje̱n kitsjá‑la̱ Abraham jngo ꞌén ra nda tjín nga kitsò‑la̱: “Ngaꞌtsì jñà na̱xi̱ndá ra tjín ya̱ i̱sàꞌnde, a̱ꞌta tsa̱ji‑ní nga ko̱chikonꞌtin.”
\v 9 ꞌKoa̱á ma‑ni, koni ꞌsín kjòchikonꞌtin jè Abraham nga kjokjiín‑la̱ a̱ꞌta ꞌtse̱ Nainá, ti̱ꞌkoa̱á ya̱á machikonꞌtin‑ko̱ ngaꞌtsì jñà xi̱ta̱ ra ko̱ꞌsín ko̱kjiín‑la̱ a̱ꞌta ꞌtse̱ Nainá.
\p
\v 10 Ngaꞌtsì xi̱ta̱ ra jè maꞌñóꞌta takòn nga i̱nchisíhitjasòn kjo̱téxoma, tseé kjo̱hiꞌin kjinè‑la̱. Nga̱ ꞌkoa̱á ti̱ꞌsín tsò xa̱jo̱n ra tjíꞌta ꞌén‑la̱ Nainá nga tsò: “Kjo̱hiꞌin katasinè‑la̱ ngaꞌtsì xi̱ta̱ ra mì ko̱ꞌsín kixi̱ si̱hitjasòn ngaꞌtsì kjoa̱ ra tjíꞌta ya̱ xa̱jo̱n ꞌtse̱ kjo̱téxoma.”
\v 11 ꞌKoa̱á ꞌsín ma‑ni nga ya̱á ꞌya‑la̱ nga ni̱jngo xi̱ta̱ ra kixi̱ kíjna ya̱ ngixko̱n Nainá ta nga̱tjì‑la̱ nga síhitjasòn kjo̱téxoma; nga̱ tsò‑te xa̱jo̱n ra tjíꞌta ꞌén‑la̱ Nainá: “Jè ra xi̱ta̱ kixi̱, jè kíjnakon‑ni nga makjiín‑la̱ a̱ꞌta ꞌtse̱ Nainá.”
\v 12 Tanga jñà xi̱ta̱ ra kjo̱téxoma síhitjasòn, mì tsa Nainá kjiꞌta ikon. Nga̱ tsò Xa̱jo̱n ra tjíꞌta ꞌén‑la̱ Nainá: “Jè ra nda síhitjasòn kjo̱téxoma, ꞌkoa̱á ꞌsín tjínè‑la̱ nga ya̱ katasíjchájin ijo‑la̱.”
\v 13 Jè Cristo tsikíchjítjì‑ná nga ma tsachrjekàjin‑ná kjo̱hiꞌin ꞌtse̱ kjo̱téxoma, nga̱ jè iskanè jé‑la̱ ta nga̱tjì tsa̱jién, nga̱ ꞌkoa̱á ꞌsín tsò xa̱jo̱n ra tjíꞌta ꞌén‑la̱ Nainá nga tsò: “Ngaꞌtsì ra ko̱ꞌsín siꞌta krò, ꞌñó tse kjo̱hiꞌin katakanè‑la̱.”
\v 14 ꞌKoa̱á ꞌsín kjomà mé‑ni nga a̱ꞌta ꞌtse̱ Cristo tjábé‑la̱ jñà xi̱ta̱ na̱xi̱ndá ra mì tsa xi̱ta̱ judío jè kjo̱nda ra ijye Nainá ko̱kitsò‑la̱ jè Abraham, ko̱ mé‑ni ꞌkia̱ nga ko̱ꞌsín makjiín‑ná a̱ꞌta ꞌtse̱ Cristo maá tjábé‑ná jè Inìma̱ Tsje‑la̱ Nainá, nga̱ ijyeé ko̱ꞌsín kitsjà tsaꞌba Nainá nga tsjá‑ná.
\s Jè ngaꞌñó ra tjín‑la̱ jè ꞌén‑la̱ Nainá ra tsaꞌba kiꞌtsi‑la̱ Abraham
\p
\v 15 Jiòn ꞌndsé ko̱ tichjeé, kijná jngo‑no xkósòn koni ꞌkia̱ nga jñà xi̱ta̱ bájna masen jngo xa̱jo̱n nga bíndajín jngo kjoa̱. ꞌKia̱ nga jè xa̱jo̱n ra̱kìi̱ ijye ma firma, ko̱ sinchá‑la̱ sello, mì kì yá ra ma ko̱chrjengi ko̱ ni̱yá ra ma ki̱ìꞌtasòn-isa‑la̱ koni ꞌsín nga ijye tíchja̱.
\v 16 Nainá, ꞌkoa̱á ꞌsín kitsjá‑la̱ ꞌén‑la̱ jè Abraham ko̱ jè xi̱ta̱ ra tje̱‑la̱ ma. Jè xa̱jo̱n ra tjíꞌta ꞌén‑la̱ Nainá mì tsa tsò‑jìn: “jñà xi̱ta̱ tje̱‑la̱.” Ta tsò‑ní: “jè xi̱ta̱ tje̱‑la̱.” Nga̱ mì tsa kjìn ma‑ni xi̱ta̱ tje̱‑la̱ ra ko̱ꞌsín kiꞌtsì‑la̱ ꞌén, ta jngoó ma‑ni. Ko̱ jè Cristo ra ko̱ꞌsín kitsò‑la̱.
\v 17 Jè kjoa̱ ra tíꞌbènájmí‑najiòn, ki̱í ꞌsín tjín: Jè kjoa̱ ra tsikíndajín‑ko̱ Abraham jè Nainá, ta̱ꞌkoa̱ ijyeé kjotseé tíjna ꞌkia̱ nga ꞌji jè kjo̱téxoma. Ta̱ꞌkoa̱ kjo ijòn sindo̱ ko̱ katé nó tsato ꞌkia̱ nga tsiꞌkì‑la̱ kjo̱téxoma ra̱kìi̱ jè Moisés. Ko̱ mì kì ma bachrjengi jè kjoa̱ ra ijye tsikíndajín jè Nainá ko̱ jè Abraham, ti̱ꞌkoa̱ mì kì ma si̱ìkitsón‑jin jè ꞌén ra ijye kitsjà Nainá.
\v 18 ꞌKia̱ nga jè Nainá ko̱ꞌsín tsjá‑ná kjo̱nda‑la̱, mì tsa ki‑ni nga nihitjasén jè kjo̱téxoma, ki‑ní nga ijyeé ko̱ꞌsín kitsjà ꞌén‑la̱. Nga̱ ta kjo̱tjó kitsjà‑la̱ kjo̱nda jè Abraham koni ꞌsín nga ijye kitsò‑la̱.
\s Mé xá ra ꞌji‑ni jè kjo̱téxoma
\p
\v 19 ¿Mé xá isinda‑ni jè kjo̱téxoma tsaꞌkoa̱? Kií ko̱ꞌsín isinda‑ni ta nga̱tjì‑la̱ a̱ꞌta ꞌtse̱ kjoa̱ꞌcho ra ꞌsín jñà xi̱ta̱. Ko̱ isijna‑ní skanda ꞌkia̱ nga ijye ꞌji jè tje̱‑la̱ Abraham koni ꞌsín ijye kitsjà‑la̱ tsaꞌba Nainá. Jè kjo̱téxoma, jñà ìkja̱li̱ ꞌjiìkó nga isìchjeén jè Moisés mé‑ni ma kisikaꞌta‑la̱ jñà xi̱ta̱ ra iꞌka, nga̱ jè Moisés tsasijin‑la̱ xi̱ta̱.
\v 20 Tsa ꞌkia̱ jngo xi̱ta̱ ko̱ꞌsín jè basèn‑jin nga sindajín jngo kjoa̱, mì tsa ta jngo fì‑ni, tanga jè Nainá jngoó kijì‑ni ra jè, ꞌkia̱ nga kitsjà‑la̱ ꞌén Abraham nga tsikíndajín jngo kjoa̱.
\p
\v 21 ꞌKia̱ nga jè Nainá ꞌjiìkó kjo̱téxoma, mì tsa kondra̱ kijì‑la̱ ꞌén ra ta̱ꞌkoa̱ ijye kjotseé kitsjà‑la̱ Abraham. Tsa jé‑la kjo̱téxoma tjín‑la̱ ngaꞌñó nga ma tsjá ra kjo̱binachon, ma‑la xi̱ta̱ kixi̱ ko̱ma‑ni xi̱ta̱ tsaꞌkoa̱ tsa nda si̱hitjasòn kjo̱téxoma.
\v 22 Tanga jè xa̱jo̱n ra tjíꞌta ꞌén‑la̱ Nainá, ꞌkoa̱á ꞌsín tsò nga ngaꞌtsì jñà xi̱ta̱, ya̱á títsa̱jin jé. Ta jngoó ꞌkia̱ nga ko̱kjiín‑la̱ a̱ꞌta ꞌtse̱ Jesucristo ko̱ma tjábé‑la̱ kjo̱binachon ra ijye ko̱ꞌsín kitsò Nainá nga tsjá‑la̱ jñà xi̱ta̱ ra ko̱kjiín‑la̱.
\p
\v 23 ꞌKia̱ nga ti̱kjè ꞌfiì jè kjoa̱ ra makjiín‑ná, ya̱á itsabáꞌñó‑ná jè kjo̱téxoma, ko̱ ya̱á tsikítsa̱iꞌya‑ná skanda ꞌkia̱ nga kijcha‑la̱ jè kjoa̱ ra makjiín‑ná.
\v 24 Ko̱ jé kjo̱téxoma isikìnda̱‑ná koni ꞌsín makìnda̱ jñà i̱xti, skanda ꞌkia̱ nga ꞌji jè Cristo mé‑ni nga ma kixi̱ bìtsa̱jna‑ná ꞌkia̱ nga makjiín‑ná a̱ꞌta ꞌtse̱.
\v 25 ꞌNdi̱ ꞌndi̱ ꞌkia̱ nga ijye ꞌji jè kjoa̱ ra makjiín‑ná, mì tsa ti̱jè kjo̱téxoma itsabáꞌñó-isa‑ná.
\p
\v 26 Ngaꞌtsì‑najiòn ijyeé i̱xti‑la̱ Nainá ma jiòn ta nga̱tjì‑la̱ nga ya̱á titsa̱jnako̱o Cristo nga makjiín‑no a̱ꞌta ꞌtse̱.
\v 27 ꞌKia̱ nga ya̱ titsa̱jnakjoko̱o jiòn Cristo nga isatíndá jiòn, ꞌkia̱á jahatjìya‑najiòn koni ꞌsín ꞌsín jngo xi̱ta̱ nga síkaatjìya nikje‑la̱; ko̱ jè sabá Cristo ra kjomà nikje xi̱tse̱ ra itsjaya jiòn.
\v 28 Mì tsa jñà tíma kinda̱, a xi̱ta̱ griego‑ní, o̱ ra xi̱ta̱ judío‑ní; a ndí xi̱ta̱ chi̱ꞌndaꞌñó‑ní o̱ ra majìn‑ní; a xi̱ta̱ ꞌxi̱n‑ní o̱ ra chjo̱ón‑ní; nga̱ ngaꞌtsì‑no ta jngoó ijo ma‑najiòn, ta nga̱tjì‑la̱ nga ya̱ titsa̱jnakjo‑ko̱o Cristo Jesús.
\v 29 Nga xi̱ta̱‑la̱ Cristo ma jiòn, ti̱ꞌkoa̱ tje̱‑la̱ Abraham ma‑te jiòn, ko̱ ti̱ꞌkoa̱á tjábé‑nájiòn jè kjo̱tjò ra Nainá tsjá, koni ꞌsín ijye kitsjà‑la̱ tsaꞌba jè Abraham.
\c 4
\p
\v 1 Ìjngo‑isa xkósòn kijná‑no: ꞌKia̱ nga ꞌsa̱ jtobá ꞌki jngo ti, ta ma ta ya̱á mangásòn‑ko̱ jè chi̱ꞌnda, kjè tsa jè be ya̱ niꞌya‑la̱, skanda ꞌkia̱‑ní, ꞌkia̱ nga ijye bijchó nó‑la̱ nga jè ma ni‑la̱ ngaꞌtsì tsajmì ra tjín‑la̱ na̱ꞌìn‑la̱.
\v 2 Nga ꞌkia̱ ꞌsa̱ jtobá ꞌki‑isa, machjeén‑ní nga xi̱ta̱ síkinda̱‑isa ra jè, ko̱ tsijen tjín‑te xi̱ta̱ ra síkinda̱ jñà tsajmì ra ꞌtse̱, skanda ꞌkia̱ nga bijchó jè ni̱chjin nga ngi jè si̱ìkinda̱ sabà koni ꞌsín ijye tsikíjna ni̱chjin jè na̱ꞌìn‑la̱.
\v 3 Jién ra xi̱ta̱ ꞌmí‑ná, ꞌkoa̱á ti̱ꞌsín kjòn kjomé koni tsa i̱xti; ꞌkia̱ nga ti̱kjè makjiín‑ná a̱ꞌta ꞌtse̱ Cristo, jñà kjo̱téxoma ra tjín i̱ i̱sàꞌnde, jñá ꞌñó tsatéxoma‑ná koni tsa chi̱ꞌndaꞌñó‑la̱ kjomé.
\v 4 Tanga ꞌkia̱ nga ijchò ni̱chjin koni ꞌsín nga ijye tjínda‑la̱ Nainá; jé Nainá isìkasén Iꞌndí‑la̱ i̱ a̱ꞌta nangi nga i̱ kitsin, nga isìchjeén jngo ndí chjo̱ón nga jè kitsin‑la̱, koni ꞌsín tsin xi̱ta̱ i̱sàꞌnde, ko̱ ya̱á kjojchájin kjo̱téxoma ꞌtse̱ xi̱ta̱ judío.
\v 5 Kií ko̱ꞌsín kiꞌsìn‑ni Nainá nga kisìkasén Iꞌndí‑la̱, mé‑ni jñà xi̱ta̱ ra ya̱ títsa̱jin kjo̱téxoma, ko̱ma kítsa̱jnandi̱í‑ni ko̱ mé‑ni ngásòn ngáya ma ska̱ábétjó‑ná Nainá nga i̱xti‑la̱ ki̱tso̱‑ná.
\p
\v 6 ꞌKoa̱á ma‑ni ꞌndi̱‑ni̱, ꞌkia̱ nga ijye i̱xti‑la̱ ꞌmì‑ná, jè Nainá isìkasén jè Inìma̱ Tsje ra ꞌtse̱ Iꞌndí‑la̱ ya̱ a̱jin inìma̱‑ná. Jè Inìma̱ Tsje ra isìkasén tsò‑ní: “Ji̱ a̱pá.”
\v 7 ꞌKoa̱á ma‑ni nga ꞌndi̱ ꞌndi̱ mì tsa ti̱ chi̱ꞌndaꞌñó titsa̱jna‑ná. Ijyeé i̱xti‑la̱ tsó‑ná jè Nainá; ko̱ ꞌndi̱‑ni̱ nga ijyeé i̱xti‑la̱ tsó‑ná, ꞌkoa̱á ꞌsín tsjá‑te‑ná jè kjo̱tjò ra ko̱ꞌsín tíjnanda‑la̱ nga si̱ìnga̱tsja jñà ra i̱xti‑la̱ ma.
\s Kóꞌsín nga síkájno Pablo a̱ꞌta ꞌtse̱ xi̱ta̱ Gálatas ra makjiín‑la̱ ꞌén‑la̱ Nainá
\p
\v 8 ꞌKia̱ ti̱ꞌsa̱ kjotseé nga ti̱kjè ꞌyaxkon jiòn jè ra ngi jè sabà Nainá, ya̱á kjomà jiòn chi̱ꞌndaꞌñó‑la jñà nainá ra mì tsa kixi̱‑ni kjoa̱ nga nainá.
\v 9 Tanga ꞌndi̱ ꞌndi̱, ꞌkia̱ nga ijye ꞌyaxkon jiòn ra ngi jè sabà Nainá, (o̱ ra isa̱á nda jnchro tsa ki̱ꞌsín xián‑no, ꞌndi̱ ꞌndi̱ ꞌkia̱ nga ijye jè sabà Nainá bexkon‑no), ¿mé‑ni ko̱ꞌsín nikaatjìya‑la jè kjo̱bítsjen‑no nga mejèn‑no ya̱ mangíꞌta‑la jñà kjo̱téxoma i̱ma̱ ra tjín‑no, jè ra tsìn‑la̱ ngaꞌñó ko̱ ni̱mé chjí‑la̱? ¿A mején‑no nga ya̱ jtsa̱ba̱ꞌñó india‑no?
\v 10 Jiòn takó ꞌñó ꞌyaxkón jiòn jñà ni̱chjin ra ꞌtse̱ ꞌsí, ni̱chjin ra ꞌtse̱ sá, ko̱ ni̱chjin ra ꞌtse̱ nó.
\v 11 Makájno‑na koni ꞌsín nga i̱nchiꞌnià jiòn. ꞌKoa̱á ma‑na, nga ta ra ꞌáa‑na ꞌkia̱ nga ko̱ꞌsín kisíxá‑jin‑najiòn.
\p
\v 12 Ra ꞌa̱n, tsáse̱nꞌtáxín‑la̱ jè kjo̱téxoma koni ꞌsín nga tinchaꞌtàxìn‑la jiòn ti̱ꞌsa̱ kjotseé. Ko̱ ꞌkoa̱á ꞌsín síjé‑no ꞌndi̱‑ni̱ nga ko̱ꞌsín ti̱nchaꞌtàxìn‑la koni ꞌsín nga ꞌa̱n tsáse̱nꞌtaxìn‑la̱. Nga̱ ngàꞌsa̱ ítjòn mì tsa mé ra tsiꞌkín‑nájiòn.
\v 13 Tjíjiín‑najiòn nga ta kií nga̱tjì‑la̱ jè ꞌchin ra tjín‑na nga ko̱ꞌsín ijchòo̱ ya̱ na̱xi̱ndá‑najiòn, ko̱ ya̱á kinaꞌyá ítjòn jiòn jè ꞌén xi̱tse̱ ra nda tsò a̱ꞌta ꞌtse̱ Cristo ra ꞌa̱n tsiꞌkènájmíya‑no.
\v 14 Ni̱ꞌsín kísijtí chiba‑najiòn ta nga̱tjì‑la̱ jè ꞌchin ra tjín‑na, mì tsa inachrjengi‑nájiòn ko̱ ni̱ mì tsa iníkíjnaꞌtaxìn‑nájiòn; ta isa̱á jnchro nda ichjíbétjò‑nájiòn koni tsa ìkja̱li̱ ꞌtse̱ Nainá ko̱ koni tsa jè sabá Cristo Jesús.
\v 15 ¿Ñánda̱ tíjna jè kjo̱tsja ra ko̱ꞌsín ta nda kiꞌse‑najiòn nga ti̱ꞌsa̱ ítjòn? Maá ko̱xiáa̱n ra a̱ꞌta tsa̱jiòn, ꞌkia̱ nga ti̱ꞌsa̱ ítjòn, sí mején‑najiòn nga ki̱náchrje jiòn jñà xkòn, nga mejèn‑no nga tsiꞌkí‑ná.
\v 16 ¿A kondra̱á tíjna̱‑najiòn ꞌndi̱‑ni̱, ꞌkia̱ nga ko̱ꞌsín kíxin‑najiòn koni ꞌsín tjín ra ngi kjo̱hixi̱?
\p
\v 17 Jñà xi̱ta̱ ra ko̱ꞌsín tsò‑najiòn nga machjeén‑ní nga si̱hitjasòn kjo̱téxoma, batoó ꞌñó mejèn‑la̱ nga ya̱ kongítji̱ngi‑la jiòn, tanga mì tsa kjo̱bítsjen nda‑jìn ra tjín‑la̱. Ta jé ra mejèn‑la̱ nga kítjo̱ꞌtaxín‑náji̱n mé‑ni nga ya̱ kongíꞌta‑la jiòn.
\v 18 Ndaá tjín ꞌkia̱ nga jngo kjoa̱ ꞌñó mejèn‑ná ꞌsie̱én, tanga tsa ta ndaá tjín kjoa̱ ra mejèn‑ná. Jé ra mejèn‑na nga ko̱ꞌsín ꞌsia̱n kiꞌta jiòn; mì tsa ta ꞌkia̱‑jìn ꞌkia̱ nga ya̱ tíjna̱ko̱‑najiòn.
\v 19 Jiòn ra koni tsa ndí i̱xti‑na̱ xian‑no, ra a̱ꞌta tsa̱jiòn tísikjín india‑na kjo̱hiꞌin koni ꞌsín síkjiín kjo̱hiꞌin jngo ndí chjo̱ón ꞌkia̱ nga tsin ndí iꞌndí. Jè kjo̱hiꞌin ra̱kìi̱, ꞌkia̱á kje̱heꞌtà skanda ꞌkia̱ nga ijye jè Cristo nda kíjnajin ya̱ inìma̱‑najiòn.
\v 20 ¡Sí mején‑na tsa ya̱ tíjna̱ko̱ kjòn‑najiòn ꞌndi̱ ꞌndi̱, mé‑ni nga ma kokóna̱jmí‑najiòn ꞌén ra kjꞌií tsò, nga̱ ijyeé mì kì ti̱ be‑na kóꞌsín síkítsjen ra a̱ꞌta tsa̱jiòn!
\s Kó tsò‑ni kjoa̱ ra kjomà a̱ꞌta ꞌtse̱ chjo̱ón ra ꞌmì Sara ko̱ Agar
\p
\v 21 Jngo ꞌén ko̱ꞌtín‑ná, jiòn ra jè mejèn‑no nga kjoa̱ ꞌtse̱ kjo̱téxoma si̱itjasòn. ¿A kjeé naꞌyá‑la jiòn kóꞌsín tsò jè kjo̱téxoma ra tjíꞌta xa̱jo̱n ꞌtse̱ Moisés?
\v 22 ꞌKoa̱á ꞌsín tsò nga jè Abraham, jò i̱xti kiꞌse‑la̱; jngo ra ꞌtse̱ chjo̱ón chi̱ꞌnda‑la̱ ko̱ jngo ra ngi ꞌtse̱ ra ngi chjo̱ón‑la̱.
\v 23 Jè iꞌndí‑la̱ chjo̱ón chi̱ꞌnda, ꞌkoa̱á ꞌsín kisakò koni ꞌsín sakò ngaꞌtsì ra ta kjꞌií i̱xti; tanga jè iꞌndí ra ngi ꞌtse̱ chjo̱ón‑la̱, ꞌkoa̱á ꞌsín kisakò‑la̱ nga jè itjasòn koni ꞌsín ijye kitsjà‑la̱ ꞌén‑la̱ Nainá jè Abraham.
\v 24 Kjoa̱ kìi̱, tjín jngo kjoa̱ ra bakón‑ya‑ná; ngajò íchjín kìi̱ jñà chja̱‑ni ngajò kjoa̱ ra tsikíndajín Nainá; jè chjo̱ón ra ꞌmì Agar, ꞌkoa̱á jngoya‑la̱ koni jè kjoa̱ ra kisindajín ya̱ nindo Sinaí ꞌkia̱ nga tsiꞌkì‑la̱ kjo̱téxoma jè Moisés. Nga̱ jñà i̱xti‑la̱ jè chjo̱ón ra ꞌmì Agar ta xi̱ta̱ chi̱ꞌndaá kjomà kiꞌta.
\v 25 Jè chjo̱ón ra ꞌmì Agar jè jngoya‑la̱ jè nindo Sinaí ra síjna ya̱ ján nangi Arabia; ko̱ ꞌkoa̱á jngoya‑te‑la̱ jè na̱xi̱ndá Jerusalén ra tíjna ꞌndi̱‑ni̱, nga̱ jñà xi̱ta̱‑la̱ na̱xi̱ndá ra̱kìi̱ chi̱ꞌndaꞌñó títsa̱hijyo a̱ꞌta ꞌtse̱ kjo̱téxoma.
\v 26 Tanga jè na̱xi̱ndá Jerusalén ra tíjna ya̱ ján ngajmi, tíjnandi̱í‑ní, ko̱ ya̱á nakjoá‑ná a̱ꞌta ꞌtse̱ na̱xi̱ndá ra̱kìi̱; ꞌkoa̱á jngoya‑la̱ koni tsa na̱‑ná ma.
\v 27 Nga̱ ꞌkoa̱á ꞌsín tíchja̱ xa̱jo̱n ra tjíꞌta ꞌén‑la̱ Nainá nga tsò:
\q ꞌÑó tsja ꞌtè‑la̱ takìn ji̱ ra chjo̱ón ꞌndi̱ ꞌmì‑li,
\q ngaji̱ ra mì tsa i̱xti kitsin‑li.
\q ꞌÑó chjíndáya‑ni kjo̱tsja‑li,
\q nga̱ mì kì ꞌyi ji̱ kóꞌsín ma ꞌkia̱ nga tsin i̱xti.
\q Nga̱ jè chjo̱ón ra kijmitákon, isa̱á kjìn ma‑ni i̱xti‑la̱,
\q nda mí ꞌkoa̱‑ni koni jè chjo̱ón ra tjín ꞌxi̱n‑la̱.
\p
\v 28 Jiòn ndí ꞌndsé ko̱ tichjeé, ꞌkoa̱á jngoya‑te‑la jiòn‑jiòn ko̱ jè Isaac, ya̱á majngoꞌtá‑la jiòn i̱xti ra jè Nainá ko̱ꞌsín kitsò‑la̱ nga tsjá‑la̱ jè Abraham ko̱ Sara.
\v 29 Jè iꞌndí ra taxki̱ isakò ra a̱ꞌta ꞌtse̱ chjo̱ón chi̱ꞌnda, kjojtike‑ní ko̱ tsahatji̱ngi‑la̱ jè iꞌndí ra a̱ꞌta ꞌtse̱ Inìma̱ Tsje‑la̱ Nainá ꞌji‑ni; koni ꞌsín kjomà jñà ni̱chjin kiòo̱, takó ꞌkoa̱á chon ni̱chjin ꞌndi̱ ꞌndi̱.
\v 30 Tanga, ¿kó tsò jè xa̱jo̱n ra tjíꞌta ꞌén‑la̱ Nainá? Tsó‑ní: “Ti̱ìtji̱ngi‑la̱ jè ra chjo̱ón chi̱ꞌnda ko̱ jè iꞌndí‑la̱; nga̱ jè iꞌndí‑la̱, mì tsa mé kjo̱tjò ra tjábé‑la̱; ta jé tjábé‑la̱ kjo̱tjò jè iꞌndí‑la̱ ra mì tsa chjo̱ón chi̱ꞌnda.”
\v 31 ꞌKoa̱á ma‑ni jiòn ndí ꞌndsé ko̱ jiòn ndí tichjeé, ra jién, mì tsa i̱xti‑la̱ chjo̱ón chi̱ꞌnda meé ra jién; jién‑ná i̱xti‑la̱ ra mì tsa chjo̱ón chi̱ꞌnda.
\c 5
\s Kóꞌsín machjeén nga kixi̱ ki̱tsa̱jneé ꞌkia̱ nga ijye titsa̱jnandie̱é
\p
\v 1 Jè Cristo jngó kjá isíkítsa̱jnandi̱í‑ná a̱ꞌta ꞌtse̱ kjo̱téxoma‑la̱ Moisés; ꞌkoa̱á ꞌsín xian‑no nga kixi̱ ti̱tsa̱jna jiòn koni ꞌsín nga ijye isíkítsa̱jnandi̱í‑no jè Cristo; kì ti̱ ya̱ mangítji̱ngi india‑la jè kjo̱téxoma ra itsabáꞌñó‑no nga ti̱ꞌsa̱ kjotseé ꞌkia̱ nga chi̱ꞌndaꞌñó‑la̱ kjomà jiòn.
\p
\v 2 ꞌA̱n ra ꞌmì‑na Pablo, ti̱náꞌyá‑ná, ꞌkoa̱á ꞌsín tíxin‑no; tsa kíꞌta chi̱ba̱‑isa jiòn ijo‑no ra kjoa̱ ꞌtse̱ circuncisión, mì ti̱ mé kjo̱nda sa̱kò‑no ra a̱ꞌta ꞌtse̱ Cristo.
\v 3 ꞌKoa̱á ꞌsín tíxian india‑no, ngaꞌtsì xi̱ta̱ ra bíꞌta chi̱ba̱ ijo‑la̱ ra kjoa̱ ꞌtse̱ circuncisión, kjo̱ꞌñó tjínè‑la̱ nga si̱hitjasòn ijye koni ꞌsín tjín kjo̱téxoma.
\v 4 Jiòn ra ko̱ꞌsín mejèn‑no nga a̱ꞌta ꞌtse̱ kjo̱téxoma, kixi̱ ki̱tsa̱jna ya̱ ngixko̱n Nainá, ijyeé tsinchaꞌtaxìn‑la jè Cristo ko̱ ijyeé tsinchaꞌtaxìn‑te‑la jè kjo̱nda ra tsjá kjo̱tjò‑ná Nainá.
\v 5 Tanga ra ji̱n, a̱ꞌta ꞌtse̱é jè Inìma̱ Tsje‑la̱ Nainá i̱nchichiñá‑la̱ji̱n nga ma kixi̱ ki̱tsa̱jna‑ji̱n ya̱ ngixko̱n Nainá ta nga̱tjì‑la̱ nga makjiín‑naji̱n a̱ꞌta ꞌtse̱ Cristo.
\v 6 Tanga ra a̱ꞌta ꞌtse̱ Cristo Jesús, mì tsa ti̱jè ma‑ni kinda̱ a tjíꞌta chi̱ba̱á o̱ ra mí tsa tjíꞌta chi̱ba̱ ijo‑la̱ xi̱ta̱ ra kjoa̱ ꞌtse̱ circuncisión; ta jé ra ma kinda̱ kóꞌsín nga makjiín‑ná a̱ꞌta ꞌtse̱ Cristo ko̱ kóꞌsín nga tjín‑ná kjo̱tsjacha.
\p
\v 7 Ndaá ndi̱yá i̱nchimangí jiòn tsiki; yá ra tsatéchjà‑no nga mì ti̱ nihitjasòn‑no ꞌén nda‑la̱ Nainá ra ngi kjo̱hixi̱.
\v 8 Jñà kjo̱bítsjen kìi̱, mì tsa ya̱ nchrabá‑ni a̱ꞌta ꞌtse̱ Nainá ra xá kiìchja̱‑najiòn.
\v 9 Ti̱kinda̱ ko̱sa̱‑no ijo‑no, nga̱ “ni̱ꞌsín ta i̱tsé‑ni na̱ꞌyo̱ san ra koa̱ájin‑la̱ jè na̱ꞌyo̱ ra ma ni̱ño̱ nchra̱jín, sísan ijye‑ní ni̱ꞌsín takó tse ma‑ni na̱ꞌyo̱.”
\v 10 ꞌA̱n, ꞌkoa̱á ꞌsín baꞌtá ikon Nainá nga mì tsa kjꞌií kjo̱bítsjen kji̱nchrabà‑najiòn koni ꞌsín nga kíxian‑no. Tanga jè Nainá tsjá‑la̱ kjo̱hiꞌin jè xi̱ta̱ ra tísíkitsón‑jin‑najiòn, ni̱ꞌsín ta yá xi̱ta̱‑nì.
\p
\v 11 Jiòn ꞌndsé ko̱ tichjeé, tsa takó ꞌkoa̱à‑la ꞌsín tíꞌbènájmíya ra ꞌa̱n, nga machjeén‑ní nga katasiꞌta chi̱ba̱ ijo‑la̱ xi̱ta̱ ra kjoa̱ ꞌtse̱ circuncisión, mí‑la tsa ko̱ꞌsín koa̱àtji̱ngi‑na jñà xi̱ta̱ judío, nga̱ mì tsa mé ra ꞌcho ki̱ya‑la̱ koni ꞌsín tsò ꞌén ra ꞌa̱n ꞌbenájmíya a̱ꞌta ꞌtse̱ Cristo ꞌkia̱ nga isiꞌta krò ra jè.
\v 12 Tsa jngó kjá ngi katabateꞌtá jnchro ijo‑la̱ xi̱ta̱ kìi̱, jñà ra ko̱ꞌsín síkitsón‑jin‑najiòn nga tsò‑no nga machjeén‑ní nga siꞌta chi̱ba̱ ijo‑no ra kjoa̱ ꞌtse̱ circuncisión.
\p
\v 13 Jiòn ꞌndsé ko̱ tichjeé, kií xá inakjoá‑najiòn nga ki̱tsa̱jnandi̱í jiòn, tanga ni̱ꞌsín titsa̱jnandi̱í jiòn kì tà chjàn ko̱ꞌsín ꞌnià koni ꞌsín tjín kjoa̱ ra mejèn‑la̱ ijo‑no; jè ra machjeén nga ti̱si̱ko̱ kañá jiòn xàngio̱o ko̱ nga kataꞌse‑no kjoa̱tsjacha nga jngó jngó‑no.
\v 14 Nga̱ ngaꞌtsì kjo̱téxoma ra kitsjà Nainá ya̱á bitjasòn ijye a̱ꞌta ꞌtse̱ jè ra tsò: “Ko̱ꞌsín tsjacha ꞌti̱ìn jñà xi̱ta̱ xàngi̱i koni ꞌsín nga tsjachi ijo‑li.”
\v 15 Tanga tsa ti̱jiòn i̱nchichinejin i̱nchichineꞌa‑no xàngio̱o, ti̱kinda̱a ijo‑no nga̱ ki̱jchó ni̱chjin nga ti̱jiòn si̱kitsón‑no xàngio̱o tsa ko̱ꞌsín ꞌnià.
\s Mé kjoa̱ꞌcho ra síjé ijo‑ná
\p
\v 16 ꞌKoa̱á ꞌsín tíxian‑no: Ti̱ꞌnde‑la nga jè Inìma̱ Tsje‑la̱ Nainá nda kjón ndi̱yá katafìko̱‑no, mé‑ni nga mì ya̱ koa̱àtji̱ngi‑la kjoa̱ꞌcho ra síjé ijo‑no.
\v 17 Jñà kjoa̱ꞌcho ra síjé ijo‑ná kondra̱á fì‑la̱ jè Inìma̱ Tsje‑la̱ Nainá. Ko̱ jñà kjoa̱ ra mejèn‑la̱ jè Inìma̱ Tsje‑la̱ Nainá kondra̱á fì‑la̱ jñà kjoa̱ꞌcho ra mejèn‑la̱ ꞌsín ijo‑ná. Jñà kjoa̱ kìi̱, kjaán‑kjoó ma. ꞌKoa̱á ma‑ni nga jiòn, mì kì ko̱ꞌsín ꞌnià jiòn koni ꞌsín nga mejèn‑no nga ꞌsia̱an.
\v 18 Tanga tsa jè Inìma̱ Tsje‑la̱ Nainá tíbasén ndi̱yá‑no nga ni̱chjin nchijòn, mì tsa ti̱jè‑ni kjo̱téxoma tíjna ítjòn‑no.
\p
\v 19 Nga̱ tsijeén ꞌya‑la̱ jñà kjoa̱ꞌcho ra síjé ijo‑ná: koni jñà ra kjoa̱chijngi, kjoa̱ꞌcho ra ꞌñó tjé tjín, ko̱ kjoa̱ chi̱nga̱ ra ꞌcho níkítsjeén,
\v 20 ko̱ nga ꞌyaxkén nainá xkósòn, ko̱ ra kjoa̱tjꞌee̱, ko̱ nga majticheé xàngie̱é, ko̱ nga bixkàn‑ke̱é xàngie̱é, ko̱ nga machi̱ni̱cheé xàngie̱é, ko̱ ꞌkia̱ nga ta ndi̱to̱n majti‑ná, ꞌkia̱ nga nachrjengieé xàngie̱é nga mejèn‑ná nga jién ki̱tsa̱jna ítjén, ko̱ nga nijòyeé xàngie̱é nga xìn maxkóyeé,
\v 21 nga maxitakòn‑cheé xàngie̱é, nga maꞌchie̱é, ko̱ ngaꞌtsì kjoa̱chrjáꞌa ra ma ñánda̱ nga bitjo ꞌsí, ko̱ ngaꞌtsì kjoa̱ ra ya̱ mangásòn‑ko̱ jñà kjoa̱ kìi̱. ꞌKoa̱á ꞌsín tíxin‑no koni ꞌsín ijye a̱sa kíxin‑no nga ꞌsa̱ ítjòn, nga jñà xi̱ta̱ ra ko̱ꞌsín tjín kjoa̱ ra ꞌsín, ni̱mé kjo̱nda tjábé‑la̱ ya̱ ñánda̱ nga jè Nainá tíbatéxoma.
\s Mé kjo̱nda ra tsjá jè Inìma̱ Tsje‑la̱ Nainá
\p
\v 22 Tanga jñà kjo̱nda ra tsjá jè Inìma̱ Tsje‑la̱ Nainá, jè‑ní nga tsjacha ꞌsie̱én xàngie̱é, nga tsja ꞌse̱‑ná, nga ꞌnchán ki̱tsa̱jneé, nga jchíñakjoa̱‑lá xàngie̱é, nga tsjakjoa̱ ꞌsie̱én, ko̱ nga ꞌsie̱én kjoa̱nda ra nda tjín, nga kixi̱ kongíkeé kjo̱bítsjen‑ná,
\v 23 nga indakjoa̱ ꞌsie̱én, ko̱ nga kixi̱ ko̱te̱xoma‑lá ijo‑ná. Jñà kjoa̱ kìi̱, tsìn kjo̱téxoma ra kondra̱ tíjna‑la̱.
\v 24 Jién ra ijye xi̱ta̱‑la̱ Cristo ꞌmì‑ná; ngaꞌtsì jñà kjo̱bítsjen ra ꞌcho tjín ko̱ jñà kjoa̱ꞌcho ra síjé ijo‑ná, ya̱á kinìꞌkeén ya̱ a̱ꞌta krò ra isitja̱ꞌbáꞌta Cristo.
\v 25 ꞌNdi̱‑ni̱, ꞌkia̱ nga a̱ꞌta ꞌtse̱ Inìma̱ Tsje‑la̱ Nainá titsa̱jnakon‑ná, ko̱ꞌsín ko̱se̱n ndi̱yé ijo‑ná koni ꞌsín jè Inìma̱ Tsje‑la̱ Nainá batéxoma‑ná.
\p
\v 26 Mì kì ki̱ꞌndeé nga jè kjoa̱ꞌngatakòn katasíkijne‑ná nga si̱jticheé xàngie̱é ko̱ nga ko̱chi̱ni̱cheé xàngie̱é.
\c 6
\s Kóꞌsín machjeén‑ní nga ngásón ki̱si̱ke̱é jñà xàngie̱é
\p
\v 1 Jiòn ꞌndsé ko̱ tichjeé, tsa tjín iꞌka xàngio̱o ra ya̱ kàjin jé, jiòn‑jiòn ra nda titsa̱jna a̱ꞌta ꞌtse̱ Inìma̱ Tsje‑la̱ Nainá, nda xi̱ta̱ ti̱ko̱o ko̱ ti̱si̱ko̱o mé‑ni nga katamakixi̱ya india‑ni; tanga ti̱kinda̱a ijo‑no ra jiòn, mé‑ni nga mì jé ska̱jin‑te‑no ra jiòn.
\v 2 Ti̱si̱ko̱ kañá jñà xàngio̱o tsa ꞌkia̱ mé kjoa̱ ra chjá ma‑no; ꞌkoa̱á ꞌsín ko̱ma‑ni nga si̱itjasòn jè kjo̱téxoma ra kitsjà Cristo.
\p
\v 3 Tsa tjín iꞌka xi̱ta̱ ra nda bachrjengi ijo‑la̱, tanga tsa mí tsa kixi̱‑ni kjoa̱, ti̱jñá i̱nchibíndisoko̱‑ni ijo‑la̱.
\v 4 Isa̱á nda‑ni tsa ítjòn kjón nda chítsijen‑jnó ijo‑no mé kjoa̱ ra i̱nchiꞌnià. Tsa nda i̱nchiꞌnià, maá tsja kataꞌse‑no, tanga mì tsa tsò‑ni kjoa̱ nga isa̱ nda i̱nchiꞌnià jiòn koni ra kjꞌií xi̱ta̱.
\v 5 Nga̱ jngó jngó xi̱ta̱, kja̱ ya̱á kjinè‑la̱ a̱ꞌta ꞌtse̱ mé kjoa̱ ra ꞌsín nga jngó jngó.
\p
\v 6 Jñà ra i̱nchikotáꞌyá ꞌén nda‑la̱ Nainá, machjeén‑ní nga katabasìko̱ꞌta tsa mé ra machjeén‑la̱ jè xi̱ta̱ ra bakón‑ya‑la̱.
\p
\v 7 Kì ko̱ꞌsín chìndo̱cha̱‑la̱ ijo‑no: nga̱ ni̱yá ra ma si̱ískáko̱ jè Nainá; koni ꞌsín tjín kjoa̱ ra ꞌsín jñà xi̱ta̱, ꞌkoa̱á ti̱ꞌsín tjín kjoa̱ ra sakó‑la̱.
\v 8 Nga̱ jè ra ko̱ꞌsín ꞌsín koni ꞌsín mejèn‑la̱ ijo‑la̱, kjo̱biyaá sa̱kò‑la̱ a̱ꞌta ꞌtse̱ kjoa̱ ra síjé ijo‑la̱; tanga jè ra ko̱ꞌsín ꞌsín koni ꞌsín mejèn‑la̱ jè Inìma̱ Tsje‑la̱ Nainá, jé sa̱kò‑la̱ kjo̱binachon ra mì feheꞌta skanda ta kjiá‑nioo̱.
\v 9 ꞌKoa̱á ma‑ni nga mì kì machjeén nga ko̱si‑ná nga si̱hitjasén kjoa̱ ra nda tjín; nga̱ ki̱jchó ni̱chjin nga sa̱kó‑ná kjo̱nda, tsa mì kì si̱kjahajen‑lá takén.
\v 10 Tsa ꞌkia̱ ma ra ꞌnié, ko̱ꞌsín nda si̱ko̱ ijyeé ngaꞌtsì xi̱ta̱, maꞌtsia̱ kjòn‑ni ko̱ jñà xi̱ta̱ xàngie̱é ra ngásòn makjiín‑ná a̱ꞌta ꞌtse̱ Cristo.
\s Jè kjoa̱ ra síkíjna ítjòn Pablo
\p
\v 11 Chítsijen‑la kó kjòn tsiña‑ni jñà letra ra ndsa̱ tíbindá‑na.
\v 12 Jñà xi̱ta̱ ra kjo̱ꞌñó ꞌsín‑najiòn nga mejèn‑la̱ si̱ꞌta chi̱ba̱ ijo‑najiòn ra kjoa̱ ꞌtse̱ circuncisión, ta jé ra mejèn‑la̱ nga jñà nda kítsa̱jna ya̱ ngixko̱n xi̱ta̱ ra iꞌka, ko̱ majìn‑la̱ tsa yá ra koa̱àtji̱ngi‑la̱ ra ta nga̱tjì‑la̱ nga ko̱ꞌsín makjiín‑la̱ nga ya̱á sakó kjo̱nda a̱ꞌta ꞌtse̱ nga krò ꞌkenꞌta Cristo.
\v 13 Jñà xi̱ta̱ ra tjíꞌta chi̱ba̱ ijo‑la̱ ra kjoa̱ ꞌtse̱ circuncisión, skanda mí kì síhitjasòn‑ni koni ꞌsín tjín kjo̱téxoma, tanga ꞌkoa̱á ꞌsín ꞌñó mejèn‑la̱ nga katasiꞌta chi̱ba̱ jiòn, mé‑ni nga a̱ꞌta tsa̱jiòn nda si̱ìkítsa̱jna‑ni ijo‑la̱ ꞌkia̱ nga ijye tjíꞌta chi̱ba̱ jiòn.
\v 14 Tanga ra ꞌa̱n, ni̱mé kjoa̱ tjín ra mejèn‑na nga a̱ꞌta ꞌtse̱ nda síkíjna‑na ijo‑na̱, ta̱jngoó a̱ꞌta ꞌtse̱ koni ꞌsín makjiín‑na; nga̱ ya̱á sakó kjo̱nda ꞌkia̱ nga makjiín‑ná nga krò ꞌkenꞌta Jesucristo ra tíjna ítjòn‑ná. Ya̱á nchrabá‑ni nga mì ti̱ mé kinda̱ ꞌsin‑na jñà kjoa̱ꞌcho ra tjín i̱ i̱sàꞌnde; ko̱ ra ꞌa̱n, mì ti̱ mé kinda̱ ma‑na ya̱ a̱jin kjoa̱ꞌcho kìi̱.
\v 15 Ra a̱ꞌta ꞌtse̱ Cristo mì tsa jè ra chjí‑la̱ a tjíꞌta chi̱ba̱‑ná ꞌtse̱ circuncisión, o̱ ra mí tsa tjíꞌta chi̱be̱é; jè ra chjí‑la̱ nga jè Nainá ijyeé xi̱ta̱ xi̱tse̱ kiꞌsín‑ná.
\v 16 Kataꞌse‑la̱ kjo̱ꞌnchán ko̱ kjo̱hi̱ma̱takòn ya̱ a̱jin inìma̱‑la̱ ngaꞌtsì ra ko̱ꞌsín i̱nchifìko̱ kjo̱hixi̱‑la̱ koni ꞌsín tsò ꞌén ra ko̱tíxian‑la̱, jñà ra ngi kixi̱ kjoa̱ nga xi̱ta̱ na̱xi̱ndá‑la̱ Nainá ma.
\p
\v 17 ꞌKoa̱á ꞌsín tíxin‑no kì ti̱ tsja ko̱tjín kjoa̱ ra fatsji-isa‑ná; nga̱ takó tjíꞌta nijndaá‑isa ijo‑na̱ a̱ꞌta ꞌtse̱ kjo̱hiꞌin ra kitsjà‑na xi̱ta̱, ra ta nga̱tjì ꞌtse̱ Jesús ra tíjna ítjòn‑ná.
\s Kjoa̱ nìhixoꞌta ra feheꞌta‑ni
\p
\v 18 Jiòn ꞌndsé ko̱ tichjeé, jè kjo̱nda‑la̱ Jesucristo ra tíjna ítjòn‑ná nda katijnajin ya̱ inìma̱‑no. Ko̱ꞌsín katama.