\id GAL
\h Gálatas
\toc1 Gálatas
\mt Xo̱jo̱n carta‑la̱ San Pablo xi kiskiì‑la̱ xi̱ta̱ na̱xa̱ndá‑la̱ Cristo xi títsa̱jna nangui Galacia
\c 1
\s Kó tsò Pablo nga síhixatꞌaà xi̱ta̱ na̱xa̱ndá‑la̱ Cristo xi títsa̱jna nangui Galacia
\p
\v 1-2 Jñò xi na̱xa̱ndá‑la̱ Cristo maà xi titsa̱jnaà ján nangui Galacia, titsa̱nìhixotꞌaà‑nòje̱n ꞌa̱n xi ꞌmì‑na Pablo, ko̱ ngatsꞌiì xi̱ta̱‑la̱ Cristo xi i̱ titsa̱jnako̱‑na. Jè xá ítjòn xi ꞌa̱n tjín‑na, mìtsà i̱tꞌaà tsꞌe̱ xi̱ta̱ i̱sòꞌnde kitjoé‑na ko̱ mìtsà ta̱xki̱ xi̱ta̱ tsibítꞌaà‑na. Jè sobà Jesucristo ko̱ Nainá tsibíxáya‑na, jè xi Na̱ꞌèn ꞌmì‑lá xi jè kisìkjaáya‑la̱ Jesús i̱tꞌaà tsꞌe̱ kjoa̱biyaà.
\v 3 Jè Na̱ꞌèn‑ná xi Nainá ko̱ Na̱ꞌèn Jesucristo xi otíxoma‑ná kàtatsjá‑nò kjo̱ndaà ko̱ kjoa̱ꞌnchán ya̱ i̱jiìn ini̱ma̱‑nò.
\v 4 Jñò, jyeé tíjiìn‑nò nga jè Jesucristo kitsjaà kjo̱tjò yijo‑la̱ nga kꞌen xi kjoa̱ tsꞌe̱ jé‑ná, mé‑ne nga ko̱chrjekàjiìn‑ná jñà kjoa̱chꞌo xi tjín i̱ i̱sòꞌnde. Jesucristo, kꞌoa̱á sꞌín kisìkitasòn koni sꞌín mejèn‑la̱ Na̱ꞌèn‑ná xi Nainá.
\v 5 Jeya kàtìjna Nainá ni̱ta̱ mé na̱chrjein‑ne, ni̱ta̱ mé nó‑ne. Kꞌoa̱sꞌín kàtama.
\s Tsjìn ìjngoò‑ìsa ꞌén ndaà‑la̱ Nainá xi kjoa̱ tsꞌe̱ Cristo xi kjꞌei̱í tsò
\p
\v 6 ꞌA̱n, tà maxkón‑na nga jñò, ta̱ ni̱to̱ón chinchatꞌaàxìn‑là Nainá nga kjꞌei̱í ꞌén tsanguìtꞌaà‑là ko̱ kijnei takòn Nainá xi xó kiìchja̱‑nò mé‑ne nga i̱tꞌaà tsꞌe̱ kjo̱ndaà‑la̱ Cristo si̱jchá yijo‑nò.
\v 7 Ta̱nga tsjìn ìjngoò‑ìsa ꞌén ndaà‑la̱ Nainá xi kjoa̱ tsꞌe̱ Cristo xi kjꞌei̱í tsò. Ta̱nga tjín iꞌnga xi̱ta̱ xi binchá ská‑nò xi mejèn‑la̱ si̱ìkjatjìya‑la̱ ꞌén ndaà‑la̱ Nainá xi kjoa̱ tsꞌe̱ Cristo.
\v 8 Ta̱nga tsà tjín xi̱ta̱ xi kjꞌei̱í tsò ꞌén xi okóya xi mì kꞌoa̱á tsò koni tsò ꞌén ndaà‑la̱ Nainá xi kjoa̱ tsꞌe̱ Cristo xi ji̱n bèno̱jmí‑je̱n, kàtatsjá‑la̱ kjo̱ꞌin Nainá, na̱sꞌín ti ꞌa̱n‑na, o na̱sꞌín jngoò àkja̱le̱ xi ngajmiì nchrobá‑ne kàtatsjá‑naje̱n kjo̱ꞌin.
\v 9 Koni sꞌín kiꞌmì‑nòje̱n nga sa̱ ítjòn, tákó kꞌoa̱á sꞌín tìxan ìjngoò kꞌa‑nò: Tsà yá xi kjꞌei̱í tsò ꞌén xi béno̱jmí‑nò koni tsò ꞌén ndaà‑la̱ Nainá xi jye kichjoétjò, Nainá kàtatsjá‑la̱ kjo̱ꞌin.
\s Mé kjoa̱ xi komàtꞌin Pablo nga i̱tꞌaà tsꞌe̱ Cristo kisìxáya‑la̱
\p
\v 10 ꞌA̱n, mìtsà kjo̱ndaà‑la̱ xi̱ta̱ otsjià, kjo̱ndaà‑la̱ Nainá otsjià. Mìtsà koií otsjià nga ndaà kóti̱jna nga nguixko̱n xi̱ta̱. Tsà ko̱sꞌín sꞌiaàn, mì‑là tsà kixi̱ kjoa̱ nga chi̱ꞌnda‑la̱ Cristo ma.
\p
\v 11 Jñò ꞌndseé ko̱ tichjaá, kꞌoa̱á sꞌín kàtasijiìn‑nò; jè ꞌén ndaà‑la̱ Nainá xi kjoa̱ tsꞌe̱ Cristo xi ꞌa̱n beno̱jmiá, mìtsà kjo̱hítsjeèn‑la̱ xi ta̱xki̱ xi̱ta̱.
\v 12 Mìtsà i̱tꞌaà tsꞌe̱ xi ta̱xki̱ xi̱ta̱ komà‑na ko̱ nga kjòchi̱ya‑na ꞌén koi; jè sobà Jesucristo kisìhiseèn‑na nga tsakóya‑na.
\p
\v 13 Jñò, jyeé kinaꞌyà kó kisꞌiaàn nga ti̱sa̱ ítjòn, kꞌe̱ nga ya̱ kiìtꞌaà‑la̱ kjo̱tíxoma‑la̱ xi̱ta̱ judío. ꞌA̱n, tsangatji̱ngui‑la̱ jñà xi̱ta̱ na̱xa̱ndá‑la̱ Cristo nga kòjtikeè; mejèn‑na nga kàtachija.
\v 14 Koni sꞌín tjín kjo̱tíxoma‑la̱ jñà xi̱ta̱ judío, kjìn jchán xi̱ta̱ na̱xa̱ndá‑na̱ xi ta̱ña jchínga‑je̱n, kisìkítsa̱jna tji̱nguia nga ꞌa̱n, ìsa̱ ꞌñó ndaà kisìkitasoàn koni sꞌín tjín xkósòn xi tjín‑la̱ xi̱ta̱ jchínga‑na̱.
\v 15 Ta̱nga Nainá kꞌoa̱á sꞌín kisaseèn‑la̱ nga ꞌa̱n jaàjiìn‑na kꞌe̱ nga tákó ya̱ tìjna̱yaꞌma i̱ndso̱ꞌba̱ nea̱‑na̱, nga nguì tà ko̱ó kjo̱ndaà‑la̱ nga ꞌa̱n kiìchja̱‑na̱;
\v 16 ko̱ kisìkatsejèn‑na̱ Kiꞌndí‑la̱ mé‑ne ko̱ma kichjàyajiìn‑la̱ ꞌén ndaà‑la̱ jñà xi mìtsà xi̱ta̱ judío. Mìtsà yá xi kiskònangui‑la̱ xi ta̱xki̱ xi̱ta̱;
\v 17 ko̱ mìtsà ya̱ kiaà ján na̱xa̱ndá Jerusalén ñánda títsa̱jna jñà xi̱ta̱ xi ìsa̱ kjòtseé tsibíxáya‑la̱ Cristo koni ꞌa̱n. Tà sa̱á ya̱ kiaà i̱ꞌnde Arabia; xi komà i̱skan‑ne inchrobà ìjngoò kꞌa‑na̱ ya̱ na̱xa̱ndá Damasco.
\p
\v 18 Kꞌe̱ nga jye tsato jàn nó, skanda kꞌe̱é kiaà ján Jerusalén nga mejèn‑na skoexkoan Cefas [xi ti̱koa̱ Pedro ꞌmì]; chrjꞌoòn na̱chrjein tsohóti̱jna ya̱ niꞌya‑la̱.
\v 19 Xi̱ta̱ xi kisìxáya‑la̱, mìtsà yá xi kìjtseèxkoan xi kjꞌei̱í, ta jè ta̱jngoò Jacobo xi ꞌndse̱ ma Na̱ꞌèn‑ná.
\v 20 Jñà ꞌén koi xi ꞌa̱n tìsìkasén‑nò, nguì ꞌén kixi̱‑né, tíbeè Nainá, mìtsà ꞌén ndiso.
\p
\v 21 Kꞌe̱ nga jye komà i̱skan, kiaà ján nangui Siria ko̱ ya̱ nangui Cilicia.
\v 22 Ta̱nga jñà na̱chrjein koi, kjꞌeè kì beèxkon‑na jñà xi̱ta̱ na̱xa̱ndá‑la̱ Cristo xi títsa̱jna ya̱ nangui Judea.
\v 23 Tà kꞌoa̱á tsò ꞌén xi kiìꞌnchré: “Jè xi kiìtji̱ngui kondra̱‑ná nga sa̱ kjòtseé, i̱ꞌndei̱, ꞌén ndaà‑la̱ Nainá xi kjoa̱ tsꞌe̱ Cristo chja̱ya, jè ꞌén xi mejèn‑la̱ kisìchja nga sa̱ ítjòn.”
\v 24 Jñà xi̱ta̱ koi, jeya kisìkíjna Nainá nga jye jahatjìya‑na.
\c 2
\p
\v 1 Kꞌe̱ nga jye komà i̱skan nga jye ijchò te ñijòn nó, kiaà ìjngoò kꞌa ján Jerusalén ko̱ Bernabé; ti̱koa̱ kiìkoa̱a jè Tito.
\v 2 Koií kiì‑na̱ nga Nainá kꞌoa̱sꞌín kisìkichi̱ya‑na̱ nga tjínè‑na̱ nga kjián. Jñà xi̱ta̱ xi xá ꞌnga tjín‑la̱ ya̱ na̱xa̱ndá‑la̱ Cristo i̱tꞌaà xìn tsibeno̱jmí‑la̱ kó tsò ꞌén ndaà‑la̱ Nainá xi kjoa̱ tsꞌe̱ Cristo xi ꞌa̱n chjàya‑la̱ jñà xi mìtsà xi̱ta̱ judío. Majìn‑na nga jñà xi̱ta̱ koi ki̱tso̱‑na nga ni̱mé chjí‑la̱ xá xi ꞌa̱n tìsꞌiaàn ko̱ xi jye kisꞌiaàn.
\v 3 Jè Tito na̱sꞌín xi̱ta̱ griego nga ya̱ tji̱ko̱‑na, mìtsà yá xi kjo̱ꞌñó kisꞌiìn‑la̱ nga kisitꞌaà chiba‑la̱ yijo‑la̱ kjoa̱ tsꞌe̱ circuncisión.
\v 4 Ta̱nga tjín iꞌnga xi̱ta̱ ndiso xi jahasꞌen‑jiìn chijé nga tsò nga ti̱koa̱ jè Cristo fìtꞌaà‑la̱; ta jè xi mejèn‑la̱ nga kotsejèn chijé kósꞌín titsa̱ꞌné jñá xi mokjeiín‑ná i̱tꞌaà tsꞌe̱ Cristo Jesús nga jye titsa̱jnandia̱á kjoa̱ tsꞌe̱ kjo̱tíxoma xi kitjoé‑la̱ Moisés, ko̱ mejèn‑la̱ nga kjo̱ꞌñó sꞌi̱in‑ná nga si̱kitasoán kjo̱tíxoma.
\v 5 Ta̱nga ngaje̱n ni̱ i̱tsé kinìsꞌin‑la̱je̱n mé‑ne nga jè kjoa̱ kixi̱ xi tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo, ya̱á kàtìjnajiìn‑nò nga kjitꞌaà na̱chrjein.
\p
\v 6 Jñà xi̱ta̱ xi xá ꞌnga tjín‑la̱ ni̱mé kjoa̱ xi̱tse̱ kitsjaà‑ìsa‑na koni tsò ꞌén xi ꞌa̱n okoòya. Ta̱nga mìtsà ꞌa̱n tjín‑na kinda̱ tsà xi̱ta̱ ítjòn‑né ko̱ tsà majìn. Nga Nainá mìtsà faájiìn xi̱ta̱ yá‑ne xi títsa̱jna ítjòn ko̱ yá‑ne xi títsa̱jna tji̱ngui.
\v 7 Ta sa̱á kòkjeiín‑la̱ nga jè sobà Nainá kitsjaà‑na xá nga ꞌa̱n kichjàyajiìn‑la̱ ꞌén ndaà‑la̱ Nainá xi kjoa̱ tsꞌe̱ Cristo jñà xi mìtsà xi̱ta̱ judío xi mìkiì tjítꞌaà chi̱ba̱ yijo‑la̱ kjoa̱ tsꞌe̱ circuncisión. Ko̱ jè Pedro kitjoé‑la̱ xá nga jè kiìchja̱yajiìn‑la̱ jñà xi nguì xi̱ta̱ judío xi tjítꞌaà chi̱ba̱ yijo‑la̱ kjoa̱ tsꞌe̱ circuncisión.
\v 8 Nainá, koni kisìko̱ Pedro nga jè tsibíxáya‑la̱ nga kiìchja̱yajiìn‑la̱ ꞌén ndaà‑la̱ Nainá xi kjoa̱ tsꞌe̱ Cristo jñà xi nguì xi̱ta̱ judío, ꞌa̱n, kꞌoa̱á ti̱ kisìko̱‑na nga ꞌa̱án tsibíxáya‑na nga kichjàyajiìn‑la̱ ꞌén ndaà‑la̱ Nainá xi kjoa̱ tsꞌe̱ Cristo jñà xi mìtsà xi̱ta̱ judío.
\p
\v 9 Jacobo, Cefas [xi ti̱koa̱ Pedro ꞌmì] ko̱ Juan, xi ko̱sꞌín beèxkón xi̱ta̱ nga jñà títsa̱jna ítjòn ya̱ na̱xa̱ndá‑la̱ Cristo, kijtseè nga Nainá kitsjaà‑na kjo̱ndaà koi. Kjòjngoò ikon, i̱kjoàn kitsjaà‑na̱je̱n tsja, ꞌa̱n ko̱ Bernabé, mé‑ne nga kiꞌya‑la̱ nga ta jngoó xá titsa̱ꞌnè‑je̱n. Ndaà kisaseèn‑la̱ nga tsanguì nìxá‑la̱je̱n jñà xi mìtsà xi̱ta̱ judío, koa̱ jñà, kisìxáko̱ jñà xi nguì xi̱ta̱ judío.
\v 10 Tà koií kjoa̱ xi kisìjé‑na̱je̱n nga ko̱chjátꞌaà‑la̱ xi̱ta̱ i̱ma̱. Jñà kjoa̱ koi, ti̱koa̱á ꞌa̱n, jyeé ko̱sꞌín tìbìnè‑la̱ yijo‑na̱ nga kꞌoa̱ tìsꞌiaàn.
\s Mé‑ne tsohótiko̱‑ne Pedro jè Pablo ján na̱xa̱ndá Antioquía
\p
\v 11 Jngoò kꞌa kꞌe̱ nga jè Cefas [xi ti̱koa̱ Pedro ꞌmì] jꞌiì i̱ na̱xa̱ndá Antioquía, tsakatíkoa̱ nga nguixko̱n xi̱ta̱ kꞌe̱ nga kijtseè nga mìkiì ndaà tjín kjoa̱ xi tísꞌín.
\v 12 Kꞌe̱ nga sa̱ ítjòn, ya̱á tsakjèn‑ko̱ jñà xi̱ta̱‑la̱ Cristo xi mìtsà xi̱ta̱ judío. Nga komà i̱skan, kꞌe̱ nga jꞌiì xi̱ta̱ judío xi ti̱koa̱ mokjeiín‑la̱ i̱tꞌaà tsꞌe̱ Cristo, xi̱ta̱ xi tsꞌe̱ Jacobo, kꞌe̱é mì ti̱ kiì ya̱ tsakjèn‑ko̱‑ne; tsasìtꞌaàxìn‑né nga majìn‑la̱ nga chꞌo kíjnako̱ jñà xi̱ta̱ koi nga kjo̱ꞌñó mejèn‑la̱ nga sitꞌaà chi̱ba̱‑la̱ jñà xi mìtsà xi̱ta̱ judío.
\v 13 Ti̱koa̱á jñà xi̱ta̱ judío xi iꞌnga xi mokjeiín‑la̱ ꞌén‑la̱ Nainá, kꞌoa̱á ti kisꞌiìn koni jè Pedro nga kisìsꞌin‑la̱ kjoa̱ xi jò i̱sén tjín‑la̱, skanda jè Bernabé kꞌoa̱á ti kisꞌiìn.
\v 14 ꞌA̱n, kꞌe̱ nga kìjtseè nga mì kꞌoa̱á sꞌín nchisíkitasòn koni sꞌín tjín kjoa̱ kixi̱‑la̱ ꞌén ndaà‑la̱ Nainá xi kjoa̱ tsꞌe̱ Cristo, kꞌoa̱á kixan‑la̱ jè Cefas [xi ti̱koa̱ Pedro ꞌmì] nga nguixko̱n ngatsꞌiì xi̱ta̱: “Ngaji̱ nga xi̱ta̱ judío ꞌmì‑lè, kꞌoa̱á sꞌín tìnìjchí yijo‑lè koni tsà mìtsà xi̱ta̱ judío. ¿Mé‑ne kjo̱ꞌñó ꞌnè‑la̱ jñà xi mìtsà xi̱ta̱ judío nga kꞌoa̱sꞌín kàtasíjchá yijo‑la̱ koni tsà nguì xi̱ta̱ judío?”
\p
\v 15 ’Na̱sꞌín kixi̱ kjoa̱ nga tje̱‑la̱ xi̱ta̱ judío ꞌmì‑ná nga mì ya̱á kitsꞌiìn‑jiìn‑lá jñà xi mìtsà xi̱ta̱ judío xi xi̱ta̱ jé ꞌmì‑lá,
\v 16 ta̱nga ꞌya‑ná nga jñà xi̱ta̱, mìtsà kixi̱ kítsa̱jna nga nguixko̱n Nainá nga ta koi kjoa̱‑la̱ nga síkitasòn Kjo̱tíxoma xi kitjoé‑la̱ Moisés; ta jè‑né nga mokjeiín‑la̱ i̱tꞌaà tsꞌe̱ Cristo. Jñá, jyeé kòkjeiín‑ná i̱tꞌaà tsꞌe̱ Jesucristo, ko̱ jè Nainá kixi̱ síkíjna‑ná koi kjoa̱‑la̱ nga jye ya̱ kòkjeiín‑ná i̱tꞌaà tsꞌe̱ Cristo, mìtsà koií kjoa̱‑la̱ nga nìkitasoán kjo̱tíxoma. Ni̱jngoò xi̱ta̱ xi kixi̱ kíjna nga nguixko̱n Nainá nga ta koi kjoa̱‑la̱ nga síkitasòn Kjo̱tíxoma.
\p
\v 17 ’I̱ꞌndei̱ kꞌoa̱á sꞌín chiñá‑lá nga kixi̱ ki̱tsa̱jnaá ya̱ nguixko̱n Nainá ta koií kjoa̱‑la̱ nga mokjeiín‑ná i̱tꞌaà tsꞌe̱ Cristo, [mìtsà koi‑ne nga kjo̱tíxoma titsa̱nìkitasoán]. Kꞌoa̱á ma‑ne nga xi̱ta̱ jé tíꞌmì‑ná [koni jñà xi mìtsà xi̱ta̱ judío]. Ta̱nga, ¿a tsò‑ne kjoa̱ nga jè Cristo bítꞌin‑ná nga binchaàtsjiaá jé? Majìn, mì kꞌoa̱á sꞌín tjín.
\v 18 Tsà jè kjo̱tíxoma xi ꞌa̱n tsachrjekànguia nga sa̱ ítjòn, ko̱ tsà ìjngoò kꞌa sìkitasoàn, jé tìhotsjià.
\v 19 Jè kjo̱tíxoma xi kitjoé‑la̱ Moisés, jè kisìkꞌen‑na. I̱ꞌndei̱ tìjna̱ndei̱í‑ná kjoa̱ tsꞌe̱ kjo̱tíxoma mé‑ne ma kóti̱jnakon‑na nga sìkitasòn‑la̱ Nainá.
\v 20 Kꞌe̱ nga kꞌen‑tꞌaà krò Cristo, ꞌa̱n, ti̱koa̱á ya̱ kꞌen‑tꞌaàkoa̱. Ko̱ mìtsà ti̱ꞌa̱n‑na xi tìjna̱koan, jè Cristo xi tíjnajiìn ini̱ma̱‑na̱. I̱ꞌndei̱, koií tìjna̱kon‑na̱ nga jè Kiꞌndí‑la̱ Nainá maꞌñótꞌaà takoàn nga ꞌñó kjòtsjakeè‑na skanda jè kitsjaà kjo̱tjò yijo‑la̱ nga kꞌen ngajo‑na.
\v 21 Majìn‑na nga ochrjekànguia kjo̱ndaà‑la̱ Nainá. Tsà i̱tꞌaà tsꞌe̱ kjo̱tíxoma xi kitjoé‑la̱ Moisés, kixi̱ ki̱tsa̱jnaá nga nguixko̱n Nainá, mì‑la mé chjí‑la̱ nga kꞌen Cristo.
\c 3
\s Mé xi chjí‑la̱, a jè kjo̱tíxoma xi kitjoé‑la̱ Moisés, o xi jè‑né nga mokjeiín‑ná i̱tꞌaà Cristo
\p
\v 1 ¡Jñò xi nangui Galacia tsa̱jòn, mé ta tòndo̱‑nò! ¿Yá xi kiskoòna̱cha̱n‑nò? ¿A mì bítsjeèn‑nò koni sꞌín nga nguì ndaà tsibèno̱jmíya‑nòje̱n nga jè Jesucristo ya̱á kꞌen‑tꞌaà krò xi kjo̱ndaà tsa̱jòn?
\v 2 Tà koií kjoa̱ kjònangui‑nò: ¿A koií kjoa̱‑la̱ nga kinìkitasòn kjo̱tíxoma nga kitjoé‑nò Ini̱ma̱ Tsjeè‑la̱ Nainá, o xi koií‑né nga mokjeiín‑nò ꞌén‑la̱ Nainá koni sꞌín kinaꞌyà?
\v 3 Jñò, nga sa̱ ítjòn, tsibìtsꞌia̱ko̱‑nò kjo̱hítsjeèn‑la̱ Ini̱ma̱ Tsjeè‑la̱ Nainá; ko̱ i̱ꞌndei̱, mejèn‑nò nga tà kjo̱hítsjeèn‑la̱ xi̱ta̱ si̱kjehetꞌaà‑nò. ¡Mé ta tòndo̱‑nò!
\v 4 Jñò, tseé kjo̱ꞌin tsatojioòn nga kòkjeiín‑nò ꞌén ndaà‑la̱ Nainá. ¿A tà kjo̱tjò‑ne nga tse kjo̱ꞌin tsatojioòn? Majìn, mì‑la kiì ndaà tjín.
\v 5 Kꞌe̱ nga Nainá kitsjaà‑nò Ini̱ma̱ Tsjeè‑la̱ ko̱ kisꞌiìn kjo̱xkón xi ndaà tjín i̱jiìn na̱xa̱ndá tsa̱jòn, ¿mé‑ne kꞌoa̱sꞌín kisꞌiìn‑ne? ¿A koi‑né nga ndaà kinìkitasòn kjo̱tíxoma? Majìn, koií‑né nga kòkjeiín‑nò ꞌén ndaà‑la̱ Nainá.
\s Nainá, mé‑ne xi̱ta̱ kixi̱ kijtseè takòn‑ne Abraham
\p
\v 6 Koni jè xi̱ta̱ jchínga‑ná xi kiꞌmì Abraham kòkjeiín‑la̱ i̱tꞌaà tsꞌe̱ Nainá; kꞌoa̱á komà‑ne nga xi̱ta̱ kixi̱ kitsò‑la̱ Nainá.
\v 7 Jñò, kꞌoa̱á sꞌín ndaà kàtasijiìn‑nò: Jñà xi mokjeiín‑la̱, jñà‑né xi tje̱‑la̱ Abraham.
\v 8 Nga ti̱sa̱ kjòtseé, jyeé kꞌoa̱sꞌín kitsjaà ꞌén Nainá koni sꞌín tíchja̱ Xo̱jo̱n‑la̱ nga síkixi̱‑né jñà xi mìtsà xi̱ta̱ judío kꞌe̱ nga mokjeiín‑la̱ i̱tꞌaà tsꞌe̱. Ya̱á tíchja̱ ñánda jè Nainá tje̱n kitsjaà ítjòn‑la̱ Abraham jñà ꞌén ndaà‑la̱ xi tsò: “Ngatsꞌiì na̱xa̱ndá xi tjín i̱sòꞌnde, i̱tꞌaà tsi̱jií ko̱chikon‑tꞌin.”
\v 9 Kꞌoa̱á ma‑ne nga ngatsꞌiì xi̱ta̱ xi mokjeiín‑la̱ i̱tꞌaà tsꞌe̱ Nainá ngásòn ko̱chikon‑tꞌin ko̱ Abraham nga jè Abraham kòkjeiín‑la̱ i̱tꞌaà tsꞌe̱ Nainá.
\p
\v 10 Ngatsꞌiì xi̱ta̱ xi jè maꞌñótꞌaà takòn koni sꞌín nchisíkitasòn kjo̱tíxoma, kjo̱ꞌiín tjínè‑la̱, nga mìtsà kixi̱ kjoa̱ nga ndaà síkitasòn ngatsꞌiì kjoa̱ xi ya̱ tjítꞌaà. Nga kꞌoa̱á sꞌín tíchja̱ Xo̱jo̱n‑la̱ Nainá nga tsò: “Kàtasinè‑la̱ kjo̱ꞌin jè xi mì kixi̱ síkitasòn ngatsꞌiì kjoa̱ xi tjítꞌaà jè xo̱jo̱n tsꞌe̱ kjo̱tíxoma.”
\v 11 O̱kixi̱‑né nga ni̱jngoò xi̱ta̱ xi kixi̱ kíjna nga nguixko̱n Nainá nga kjo̱tíxoma síkitasòn. Nga̱ jè ꞌén‑la̱ Nainá tsò‑né: “Jè xi xi̱ta̱ kixi̱, jè kjoa̱ xi mokjeiín‑la̱ kíjnakon‑ne.”
\v 12 Jñà xi̱ta̱ xi kjo̱tíxoma síkitasòn mìtsà Nainá maꞌñótꞌaà ikon. Nga kꞌoa̱á sꞌín tíchja̱ Xo̱jo̱n‑la̱ Nainá, nga tsò: “Xi̱ta̱ xi kjo̱tíxoma síkitasòn, kꞌoa̱á sꞌín tjínè‑la̱ nga kꞌoa̱sꞌín si̱ìjchá yijo‑la̱ koni tsò kjo̱tíxoma.”
\p
\v 13 Jè Cristo tsibíchjítjì‑ná kjo̱ꞌin xi ya̱ titsa̱jnajñaá nga kjo̱tíxoma titsa̱nìkitasoán nga jè kisìkjeiín kjo̱ꞌin xi jé tsa̱ján; nga kꞌoa̱á sꞌín tíchja̱ xo̱jo̱n nga tsò: “Kjo̱ꞌiín si̱nè‑la̱ ngatsꞌiì xi krò sitꞌaà.”
\v 14 Jè Cristo, koií o̱kisꞌiìn‑ne mé‑ne nga jñà kjoa̱ machikon‑tꞌin xi kitjoé‑la̱ Abraham ti̱koa̱ tjoé yije‑la̱ ngatsꞌiì na̱xa̱ndá xi tjín i̱sòꞌnde nga jñà kjoa̱ machikon‑tꞌin, ya̱á nchrobá‑ne i̱tꞌaà tsꞌe̱ Cristo mé‑ne nga i̱tꞌaà tsꞌe̱ kjoa̱ xi mokjeiín‑ná, tjoé‑ná Ini̱ma̱ Tsjeè‑la̱ Nainá xi jye kꞌoa̱sꞌín kitsjaà tsoꞌba Nainá nga tsjá‑ná.
\s Ngaꞌñó xi tjín‑la̱ ꞌén‑la̱ Nainá koni sꞌín kitsjaà‑la̱ tsoꞌba Abraham
\p
\v 15 Jñò ꞌndsè ko̱ tichjaá, kèno̱jmí jngoò‑nò kjo̱tíxoma xi tsꞌe̱ i̱sòꞌnde. Kꞌe̱ nga sindaàjiìn jngoò kjoa̱ nga xo̱jo̱n tjámiìꞌnga, nga jye ma firma ko̱ sasén‑la̱ sello, mì ti̱ kiì ko̱ma ki̱tsꞌón‑ya‑ne koni sꞌín sindaàjiìn, ti̱koa̱á mì ti̱ kiì ko̱ma si̱ìtꞌaàsòn‑ìsa‑la̱ ꞌén xi kjꞌei̱í tsò koni sꞌín jye kasindaàjiìn.
\v 16 Kꞌoa̱á sꞌín kitsjaà‑la̱ tsoꞌba Nainá jè Abraham ko̱ jè xi̱ta̱ tje̱‑la̱. Jè Xo̱jo̱n‑la̱ Nainá mìtsà tsò “jñà xi̱ta̱ tje̱‑la̱”, ta tsò‑né: “jè tje̱‑lè.” Nga mìtsà kjín ma tje̱‑la̱ Abraham xi kitjoé‑la̱ koni tsò ꞌén xi kitsjaà‑la̱ Nainá, ta jngoó ma‑ne. Nga jè tíhoxki̱tꞌaà Cristo.
\v 17 Jè kjoa̱ xi tìbeno̱jmiá, kiísꞌín tjín: Nainá ko̱ Abraham tsibíndaàjiìn jngoò kjoa̱, i̱kjoàn kisìkixi̱ya [koni ma kꞌe̱ nga jye ma firma]. Kꞌe̱ nga jye tsato ñijòn sìndo̱ ko̱ katé nó, jꞌiì kjo̱tíxoma tsꞌe̱ Moisés; ta̱nga jè kjo̱tíxoma mìkiì ma síkitsꞌóña jè kjoa̱ xi jye kisindaàjiìn ko̱ mìkiì ma ki̱tjongui xi Nainá jye kꞌoa̱sꞌín kitsjaà tsoꞌba.
\v 18 Jè Nainá kꞌe̱ nga tsjá‑ná kjo̱ndaà‑la̱, mìtsà koi kjoa̱‑la̱ nga nìkitasoán kjo̱tíxoma, koi‑né nga jye kꞌoa̱sꞌín kitsjaà tsoꞌba. Nga Nainá, tà kjo̱tjò kitsjaà‑la̱ kjo̱ndaà Abraham nga jyeé kꞌoa̱sꞌín kitsjaà‑la̱ tsoꞌba.
\s Mé xá xi tjín‑la̱ kjo̱tíxoma
\p
\v 19 Ta̱nga jè kjo̱tíxoma, ¿mé xá kitjei‑ne? Koií kꞌoa̱sꞌín kitjei‑ne koií kjoa̱‑la̱ nga chꞌo nchisꞌín xi̱ta̱. Kꞌoa̱á sꞌín kisijna skanda kꞌe̱ nga jꞌiì tje̱‑la̱ Abraham xi Nainá xó kꞌoa̱sꞌín kitsjaà‑la̱ tsoꞌba. Jè kjo̱tíxoma, jñà àkja̱le̱ jꞌiìko̱ ko̱ jè Moisés tsasìjnajiìn osen nga kisìkatoya ꞌén ko̱ kiìchja̱tjì xi̱ta̱ nguixko̱n Nainá.
\v 20 Kꞌe̱ nga jngoò xi̱ta̱ osìjnajiìn osen, mìtsà ta jngoò xi̱ta̱ fìtꞌaà‑la̱, fìtꞌaà‑la̱ ngajò. Ta̱nga jè Nainá ta jè ta̱jngoó kitsjaà‑la̱ ꞌén Abraham.
\p
\v 21 Nainá, kꞌe̱ nga kitsjaà kjo̱tíxoma, mìtsà kondra̱ kiì‑la̱ koni sꞌín jye kitsjaà‑la̱ tsoꞌba Abraham. Tsà jè‑la‑ne kjo̱tíxoma ma‑la̱ síkítsa̱jnakon xi̱ta̱, maá‑la kixi̱ kítsa̱jna xi̱ta̱ nga kjo̱tíxoma síkitasòn.
\v 22 Ta̱nga jè Xo̱jo̱n‑la̱ Nainá, kꞌoa̱á tsò nga ngatsꞌiì xi̱ta̱ sa̱á jé títsa̱jnajiìn. Kꞌoa̱á ma‑ne nga jñà xi̱ta̱ xi mokjeiín‑la̱ i̱tꞌaà tsꞌe̱ Jesucristo, tjoé‑la̱ kjoa̱binachon xi Nainá jye kꞌoa̱sꞌín kitsjaà tsoꞌba nga tsjá‑la̱ jñà xi̱ta̱ nga mokjeiín‑la̱.
\p
\v 23 Kꞌe̱ nga ti̱kjꞌeè fꞌiì jè kjoa̱ xi mokjeiín‑ná, jè kjo̱tíxoma kitsobàꞌñó‑ná koni tsà nda̱yá tsibìtsa̱jnaꞌya‑ná skanda jè na̱chrjein kꞌe̱ nga kiꞌya‑la̱ jè kjoa̱ xi mokjeiín‑ná.
\v 24 Ko̱ jè kjo̱tíxoma kisìkinda̱‑ná koni sꞌín makinda̱ jñà i̱xti, skanda kꞌe̱ nga jꞌiì Cristo, mé‑ne kꞌe̱ nga mokjeiín‑ná i̱tꞌaà tsꞌe̱ Cristo, kixi̱ ki̱tsa̱jnaá nga nguixko̱n Nainá.
\v 25 I̱ꞌndei̱ nga jye jꞌiì kjoa̱ xi mokjeiín‑ná, mì ti̱ ya̱á titsa̱jnaꞌñó‑ná i̱tꞌaà tsꞌe̱ kjo̱tíxoma.
\p
\v 26 Jñò, ngatsꞌioò, saà i̱xti‑la̱ Nainá maá koi kjoa̱‑la̱ nga mokjeiín‑nò i̱tꞌaà tsꞌe̱ Cristo Jesús.
\v 27 Kꞌe̱ nga ya̱ titsa̱jnakjoòko̱o Cristo nga komà bautizar, kꞌe̱é jahatjìya‑nò koni jngoò xi̱ta̱ xi síkjatjìya nikje‑la̱. Jè sobá Cristo xi komà nikje xi̱tse̱‑nò.
\v 28 Mì ti̱ kiì mochjeén‑ne nga tjájiìn xi̱ta̱ yá‑né xi xi̱ta̱ judío ko̱ yá‑né xi mìtsà xi̱ta̱ judío, yá xi chi̱ꞌndaꞌñó títsa̱jna ko̱ yá xi títsa̱jnandei̱í, yá‑né xi xꞌi̱n ko̱ yá‑né xi chjo̱ón. Ngatsꞌioò ta̱ jngoò yijo ma‑nò nga ya̱ titsa̱jnakjoòko̱o Cristo Jesús.
\v 29 Jñò, nga xi̱ta̱‑la̱ Cristo ma, kixi̱í kjoa̱ nga tje̱‑la̱ Abraham ma, ti̱koa̱ tjoé‑nò kjo̱tjò koni sꞌín kitsjaà‑la̱ tsoꞌba Nainá jè Abraham.
\c 4
\p
\v 1 Ti̱koa̱á kèno̱jmí jngoò‑nò kjo̱tíxoma: Jngoò ti, kꞌe̱ nga tákó i̱tsé kji, kꞌoa̱á ngaya‑la̱ koni tsà chi̱ꞌnda tíjna nga kjꞌeè tsà jè be mé tsojmì xi tjín‑la̱ na̱ꞌèn‑la̱ na̱sꞌín kꞌe̱ nga ko̱ma i̱skan jè tjoé‑la̱ tsojmì xi tjín.
\v 2 Nga xi̱ta̱á síkinda̱ skanda kꞌe̱ nga majchínga, ko̱ tjín xi̱ta̱ xi síkinda̱ jñà tsojmì‑la̱ skanda kꞌe̱ nga ki̱chóya na̱chrjein‑la̱ koni sꞌín tsibíjna chi̱ba̱ na̱ꞌèn‑la̱.
\v 3 Jñá xi xi̱ta̱ ꞌmì‑ná, kꞌoa̱á ti̱sꞌín komàtꞌiaán koni matꞌin jñà i̱xti kꞌe̱ nga ti̱kjꞌeè mokjeiín‑ná i̱tꞌaà tsꞌe̱ Cristo nga jñà kjo̱tíxoma xi tjín i̱sòꞌnde ꞌñó tsatíxoma‑ná koni sꞌín matꞌin jñà xi chi̱ꞌnda títsa̱jnaꞌñó nga mìkiì tjíꞌnde‑la̱ nga kítsa̱jnandei̱í.
\v 4 Ta̱nga kꞌe̱ nga kichóya na̱chrjein koni sꞌín tjíndaà‑la̱ Nainá, jè Nainá kisìkasén kiꞌndí‑la̱ i̱ i̱tꞌaà nangui; ko̱ i̱tꞌaà tsꞌe̱ chjo̱ón kitsꞌiìn koni sꞌín tsꞌiìn xi ta̱xki̱ xi̱ta̱ i̱sòꞌnde. Ko̱ ya̱á kjòjchájiìn kjo̱tíxoma tsꞌe̱ xi̱ta̱ judío.
\v 5 Kꞌoa̱á kisꞌiìn Nainá, mé‑ne nga jè Jesucristo si̱ìkítsa̱jnandei̱í jñà xi̱ta̱ xi ya̱ títsa̱jnajiìn‑ꞌñó kjo̱tíxoma ko̱ mé‑ne nga ngásòn skoétjò‑ná Nainá nga i̱xti‑la̱ ko̱maá.
\p
\v 6 Koií kjoa̱‑la̱ nga jye i̱xti‑la̱ maá, Nainá kisìkasén Ini̱ma̱ Tsjeè‑la̱ xi tsꞌe̱ Kiꞌndí‑la̱ ya̱ i̱jiìn ini̱ma̱‑ná. Kꞌe̱ nga nokjoátꞌaà‑lá Nainá, kꞌoa̱á tsò Ini̱ma̱ Tsjeè‑la̱: “Ndí a̱pa”, tsò‑né.
\v 7 Kꞌoa̱á ma‑ne nga i̱ꞌndei̱ mìtsà ti̱ xi̱ta̱ chi̱ꞌnda titsa̱jnaá; jyeé i̱xti‑la̱ Nainá ꞌmì‑ná; ko̱ ti̱koa̱á tsjá‑ná Nainá ngatsꞌiì kjo̱tjò xi jñá tjoé‑ná nga i̱xti‑la̱ ꞌmì‑ná.
\s Mé‑ne síkájno‑ne Pablo i̱tꞌaà tsꞌe̱ xi̱ta̱ Galacia xi mokjeiín‑la̱ ꞌén‑la̱ Nainá
\p
\v 8 Jñò kꞌe̱ nga sa̱ kjòtseé, kꞌe̱ nga ti̱kjꞌeè yaxkon xi nguì jè sobà Nainá, chi̱ꞌndaꞌñó tsitsa̱jnaà nga kjo̱ꞌñó‑né nga jñà tsanguìtꞌaà‑là xi mìtsà kixi̱ kjoa̱ nga Nainá.
\v 9 Ta̱nga i̱ꞌndei̱ nga jye yaxkoòn xi nguì jè sobà Nainá, (ta̱nga xi nguì kixi̱ kjoa̱, jè Nainá xi jye ndaà beèxkon‑nò), ¿mé‑ne kꞌoa̱sꞌín nìkítsjeèn‑nò nga jñà onguítꞌaà ìjngoò kꞌa‑là jñà kjo̱tíxoma i̱ma̱ xi tjín‑nò, jè xi tsjìn‑la̱ ngaꞌñó, ko̱ xi ni̱mé chjí‑la̱? ¿A mejèn‑nò nga ya̱ si̱ìkítsa̱jnaꞌñó ìjngoò kꞌa‑nò?
\v 10 Jñò, tákó ꞌñó yaxkón na̱chrjein tsꞌe̱ sꞌeí, tsꞌe̱ sá, ko̱ tsꞌe̱ nó.
\v 11 ꞌA̱n, makájno‑na̱ jè xá xi kisꞌiaàn nga kisìxájiìn‑nò tsà tà kjo̱tjò‑ne.
\p
\v 12 ꞌA̱n nga jye tsohósi̱jnatꞌaàxìn‑la̱ jè kjo̱tíxoma, ti̱koa̱á ya̱á kisìngásòn‑ko̱‑nò, nga jñò, mìkiì tíjiìn‑nò i̱tꞌaà tsꞌe̱ kjo̱tíxoma. I̱ꞌndei̱ kꞌoa̱á sꞌín tìsìjé‑nò nga ti̱nchatꞌaàxìn‑là kjo̱tíxoma koni ꞌa̱n jyeé tsohósi̱jnatꞌaàxìn‑la̱. Nga sa̱ ítjòn ni̱mé kjoa̱ tjín xi chꞌo kinìko̱‑ná.
\v 13 Jyeé tíjiìn‑nò kꞌe̱ nga sa̱ kiaà ítjoàn nga kichjàyajiìn‑nò ꞌén ndaà‑la̱ Nainá xi kjoa̱ tsꞌe̱ Cristo, koií kjoa̱‑la̱ nga chꞌin tjín‑la̱ yijo‑na̱.
\v 14 Jñò, mìkiì kinachrjengui‑ná ni̱ mìtsà xìn kinìkíjna‑ná, na̱sꞌín kjoa̱ tsohótsji‑nò nga chꞌin tjín‑la̱ yijo‑na̱. Tà sa̱á kichjoétjò‑ná koni jngoò àkja̱le̱‑la̱ Nainá, koni tsà jè sobà Cristo Jesús.
\v 15 ¡Nga sa̱ ítjòn, ꞌñó tsja tjín‑nò! I̱ꞌndei̱, ¿mé xi komà‑nò? Kꞌoa̱á xan‑nò, skanda jñà xkoòn mejèn kinachrje nga ꞌa̱n kitsꞌiì‑ná.
\v 16 I̱ꞌndei̱, ¿a kondra̱á kóti̱jnako̱‑nò, tà koií kjoa̱‑la̱ nga ꞌén kixi̱ beno̱jmí‑nò?
\p
\v 17 Jñà xi̱ta̱ [xi mejèn‑la̱ nga kjo̱tíxoma si̱kitasòn], ꞌñó bínè‑la̱ yijo‑la̱ i̱tꞌaà tsa̱jòn, ta̱nga mìkiì ndaà tjín kjo̱hítsjeèn‑la̱. Tà jè xi mejèn‑la̱ nga ko̱chrjetꞌaàxìn‑nò i̱tꞌaà tsa̱je̱n mé‑ne nga jñà ko̱nguítꞌaà‑là.
\v 18 Jñò, ndaà tjín kꞌe̱ nga ꞌñó bínè‑là yijo‑nò i̱tꞌaà tsꞌe̱ kjoa̱ xi mejèn‑nò tsà ndaà tjín kjo̱hítsjeèn‑nò ko̱ tsà kjitꞌaà na̱chrjein kꞌoa̱sꞌín sꞌe̱en, mìtsà tà kꞌe̱ nga ꞌa̱n tìjna̱ko̱‑nò.
\v 19 Jñò xi koni tsà ndí i̱xti‑na̱ xan‑nò, ꞌa̱n, kꞌoa̱á sꞌín tímatꞌian koni jngoò chjo̱ón xi kiꞌndí tíꞌbeé; tseé kjo̱ꞌin tìsìkjiaán xi kjoa̱ tsa̱jòn. Jè kjo̱ꞌin xi tìsìkjiaán skanda kꞌe̱é‑la kjoe̱hetꞌaà kꞌe̱ nga kꞌoa̱sꞌín si̱jchá yijo‑nò koni Cristo.
\v 20 Mejèn‑na nga ya̱ kóti̱jnako̱‑nò jè hora jè, mé‑ne nga kjꞌei̱í tsò ꞌén xi kichjàko̱‑nò. Jyeé mì ti̱ kiì be‑na kósꞌín sìkítsjeèn i̱tꞌaà tsa̱jòn.
\s Kó tsòya‑ne i̱tꞌaà tsꞌe̱ chjo̱ón Agar ko̱ Sara
\p
\v 21 Jñò xi mejèn‑nò nga kjo̱tíxoma si̱kitasòn, ¿a kjꞌeè naꞌyà‑là kó tsò ꞌén xi tjítꞌaà kjo̱tíxoma‑la̱ Moisés?
\v 22 Kꞌoa̱á tsò nga jè Abraham, jò komà i̱xti‑la̱, jngoò tsꞌe̱ chjo̱ón chi̱ꞌnda‑la̱; jè xi ìjngoò, tsꞌe̱é xi nguì chjo̱ón‑la̱ xi mìtsà chi̱ꞌnda tíjna.
\v 23 Jè kiꞌndí‑la̱ xi chjo̱ón chi̱ꞌnda kꞌoa̱á sꞌín kitsꞌiìn koni sꞌín tsꞌiìn ngatsꞌiì ndí i̱xti. Ta̱nga jè tsꞌe̱ xi nguì chjo̱ón‑la̱ xi mìtsà chi̱ꞌnda tíjna, kꞌoa̱á sꞌín kitsꞌiìn nga tsitasòn koni sꞌín kitsjaà‑la̱ tsoꞌba Nainá Abraham.
\v 24 Kjoa̱ tsꞌe̱ íchjín koi, kꞌoa̱á ngaya‑la̱ koni jñà kjoa̱ xi jò tsibíndaàjiìn Nainá. Jè chjo̱ón Agar, jè ngaya‑la̱ kjoa̱ xi kisindaàjiìn ya̱ nindoò Sinaí kꞌe̱ nga kitjoé‑la̱ kjo̱tíxoma Moisés. Ngatsꞌiì xi̱ta̱ tje̱‑la̱ chi̱ꞌndaá tsibìtsa̱jna.
\v 25 Jè chjo̱ón Agar, jè ngaya‑la̱ nindoò Sinaí xi síjna ján Arabia, ko̱ na̱chrjein i̱ꞌndei̱ jè mangásòn‑ko̱ na̱xa̱ndá Jerusalén, nga jñà xi̱ta̱‑la̱ chi̱ꞌndaꞌñó títsa̱jna nga tákó kjo̱tíxoma sísꞌin‑la̱.
\v 26 Ta̱nga jè Jerusalén xi kijna ngajmiì, tíjnandei̱í‑né ko̱ ya̱á nokjoá‑ná ya̱ na̱xa̱ndá jè; kꞌoa̱á ngaya‑la̱ koni tsà nea̱‑ná ma.
\v 27 Kꞌoa̱á tsò Xo̱jo̱n‑la̱ Nainá nga tsò:
\q Kàtatsja‑lè ngaji̱ xi chjo̱ón ꞌndi̱ ꞌmì‑lè nga tsjìn‑lè i̱xti.
\q ꞌÑó chìhindáyi nga ko̱ kjo̱tsja‑lè nga mìkiì ꞌyi kósꞌín ma nga tsꞌiìn i̱xti.
\q Nga jè chjo̱ón xi kijnei takòn,
\q ìsa̱á kjìn ko̱ma i̱xti‑la̱ mì kꞌoa̱‑ne jè xi tjín‑la̱ xꞌi̱n.
\p
\v 28 Isaac kꞌoa̱á sꞌín kitsꞌiìn koni sꞌín kitsjaà tsoꞌba Nainá. Jñò ti̱koa̱á i̱xti‑la̱á maá xi̱ta̱ jchínga‑la̱ Isaac koni sꞌín kitsjaà‑la̱ tsoꞌba Nainá.
\v 29 Jè kiꞌndí xi tà kꞌoa̱sꞌín kitsꞌiìn koni tsꞌiìn yije xi̱ta̱ i̱sòꞌnde, kiìtji̱ngui kondra̱‑la̱ jè xi i̱tꞌaà tsꞌe̱ Ini̱ma̱ Tsjeè‑la̱ Nainá kitsꞌiìn‑ne. Koni sꞌín komà jñà na̱chrjein koi, tákó kꞌoa̱á sꞌín ma skanda na̱chrjein i̱ꞌndei̱.
\v 30 Ta̱nga, ¿kó tsò Xo̱jo̱n‑la̱ Nainá? Kꞌoa̱á tsò: “Ti̱yótji̱ngui‑la̱ jè chjo̱ón chi̱ꞌnda ko̱ kiꞌndí‑la̱; nga jè kiꞌndí‑la̱ ni̱mé kjo̱tjò tjoé‑la̱, tà jè tjoé‑la̱ kjo̱tjò jè kiꞌndí‑la̱ xi mìtsà chjo̱ón chi̱ꞌnda.”
\v 31 Jñò ndí ꞌndsè ko̱ ndí tichjaá, kꞌoa̱á sꞌín tjín, jñá mìtsà i̱xti‑la̱ chjo̱ón chi̱ꞌnda maá, jñá‑ná xi i̱xti‑la̱ chjo̱ón xi mìtsà chi̱ꞌnda tíjna.
\c 5
\s Kósꞌín si̱jchá yijo‑ná nga jye titsa̱jnandia̱á i̱tꞌaà tsꞌe̱ kjo̱tíxoma xi kitjoé‑la̱ Moisés
\p
\v 1 Jè Cristo, jngoò kꞌaá kisìkítsa̱jnandei̱í‑ná i̱tꞌaà tsꞌe̱ kjo̱tíxoma xi kitjoé‑la̱ Moisés; kꞌoa̱á ma‑ne jñò ꞌñó kixi̱ ti̱tsa̱jna koni sꞌín kisìkítsa̱jnandei̱í‑nò Jesucristo. Kì ti̱ ya̱ onguítꞌaà‑là kjoa̱ tsꞌe̱ kjo̱tíxoma xi kitsobàꞌñó‑nò skanda kjòtseé.
\p
\v 2 ꞌA̱n sobá‑ná xi ꞌmì‑na Pablo, ti̱náꞌya‑ná koni xan‑nò: tsà si̱tꞌaà chi̱ba̱‑nò kjoa̱ tsꞌe̱ circuncisión, mì ti̱ mé kjo̱ndaà sa̱kò‑nò i̱tꞌaà tsꞌe̱ Cristo.
\v 3 Ìjngoò kꞌa ko̱xan‑nò, ni̱ta̱ yá xi̱ta̱‑ne xi si̱tꞌaà chiba‑la̱ kjoa̱ tsꞌe̱ circuncisión, kjo̱ꞌñó tjínè‑la̱ nga si̱ìkitasòn yije koni tsò ꞌén xi tjítꞌaà xo̱jo̱n tsꞌe̱ kjo̱tíxoma.
\v 4 Jñò xi kꞌoa̱sꞌín mejèn‑nò nga i̱tꞌaà tsꞌe̱ kjo̱tíxoma kixi̱ ki̱tsa̱jnaà nga nguixko̱n Nainá, jyeé chinchatꞌaàxìn‑là Cristo, jyeé chinchatꞌaàxìn‑là kjo̱ndaà xi tsjá kjo̱tjò‑ná Nainá.
\v 5 Ta̱nga ngaje̱n, i̱tꞌaà tsꞌe̱é Ini̱ma̱ Tsjeè‑la̱ Nainá titsa̱chiñá‑la̱je̱n nga kixi̱ ki̱tsa̱jna‑je̱n nga nguixko̱n Nainá nga ta koi kjoa̱‑la̱ nga mokjeiín‑naje̱n i̱tꞌaà tsꞌe̱ Cristo.
\v 6 Nga i̱tꞌaà tsꞌe̱ Cristo Jesús, mì ti̱ mé chjí‑la̱ yá‑ne xi tjítꞌaà chi̱ba̱‑la̱ ko̱ yá‑ne xi tsjìn‑la̱ chi̱ba̱ kjoa̱ tsꞌe̱ circuncisión. Jè xi chjí‑la̱ nga ꞌya‑la̱ koni sꞌín mokjeiín‑ná i̱tꞌaà tsꞌe̱ Cristo, nga tjín‑ná kjo̱tsjacha.
\p
\v 7 Jñò, kꞌe̱ nga sa̱ ítjòn, ndaà titsa̱honguíko̱o kjo̱hítsjeèn‑nò. ¿Yá xi tsatekjáya‑nò nga mì ti̱ kiì nìkitasòn‑nò xi kjoa̱ kixi̱?
\v 8 Jè kjo̱hítsjeèn jè, mìtsà ya̱ nchrobá‑ne tsꞌe̱ Nainá xi xó kiìchja̱‑nò.
\v 9 Ti̱kinda̱a yijo‑nò; nga̱ kꞌoa̱á tsò jngoò ꞌén: “Na̱sꞌín i̱tsé‑ne na̱ꞌyo̱ san xi si̱jiìn na̱ꞌyo̱ i̱nchra̱jín, sísan yije‑né na̱sꞌín tse ma‑ne na̱ꞌyo̱.”
\v 10 Jè Nainá otꞌaà takoàn i̱tꞌaà tsa̱jòn nga mìtsà kjꞌei̱í sꞌín si̱kítsjeèn. Jè Nainá tsjá‑la̱ kjo̱ꞌin ni̱ta̱ yá xi̱ta̱‑ne xi mejèn‑la̱ si̱kitsꞌón‑jiìn‑nò.
\p
\v 11 Jñò ndí ꞌndsè ko̱ ndí tichjaá, nga mì kꞌoa̱á sꞌín tìhokoòya nga si̱tꞌaà chi̱ba̱‑la̱ xi̱ta̱ kjoa̱ tsꞌe̱ circuncisión, koií kjoa̱‑la̱ nga fìtji̱ngui kondra̱‑na jñà xi̱ta̱. Ta̱nga tsà mì kꞌoa̱sꞌín okoòya, mì‑la kiì kji̱tji̱ngui kondra̱‑na, mì‑la ti̱ kiì ko̱jtikeè‑ne ꞌén xi chjàya i̱tꞌaà tsꞌe̱ krò‑la̱ Cristo.
\v 12 Jñà xi̱ta̱ xi mejèn‑la̱ si̱kitsꞌón‑jiìn‑nò, kì tà bítꞌaà chi̱ba̱‑la̱ yijo‑la̱, ta̱ saà jngoò kꞌa kàtatetꞌaà yijo‑la̱.
\p
\v 13 Jñò ꞌndseé ko̱ tichjaá, kꞌoa̱á sꞌín kiìchja̱‑nò Nainá nga ki̱tsa̱jnandei̱í‑nó i̱tꞌaà tsꞌe̱ kjo̱tíxoma. Ta̱nga i̱ꞌndei̱ nga titsa̱jnandei̱í‑nó, kì chꞌo ꞌnè koni sꞌín mejèn‑la̱ yijo‑nò. Mochjeén‑né nga ti̱si̱ko̱ò xinguio̱o, kàtasꞌe‑nò kjo̱tjòcha nga ìjngoò ìjngoò‑nò.
\v 14 Nga ngatsꞌiì kjo̱tíxoma, ya̱á majngoò yije jè xi tsò: “Ti̱tsjachi xi̱ta̱ xingui̱i koni tsà ti̱ yijo tsi̱ji‑ne.”
\v 15 Tsà ti̱jñò titsa̱bixkàn‑ko̱‑nò xinguio̱o koni sꞌín nañá, tꞌe̱en kinda̱ yijo‑nò nga mì ti̱jñò si̱kjehesòn‑nò xi̱ta̱ xinguio̱o.
\s Kjoa̱chꞌo xi síjé yijo‑ná
\p
\v 16 Kꞌoa̱á xan‑nò: Tjiìꞌnde‑là yijo‑nò nga jè Ini̱ma̱ Tsjeè‑la̱ Nainá kàtakó‑nò ndi̱yá mé‑ne nga mì koi kjoa̱ si̱kitasòn kjoa̱chꞌo xi síjé yijo‑nò.
\v 17 Jñà kjoa̱chꞌo xi síjé yijo‑ná kondra̱á fì‑la̱ jè Ini̱ma̱ Tsjeè‑la̱ Nainá, ko̱ jè kjoa̱ xi mejèn‑la̱ Ini̱ma̱ Tsjeè‑la̱ Nainá kondra̱á fì‑la̱ jè xi mejèn‑la̱ yijo‑ná. Jñà kjoa̱ koi kondra̱á títsa̱jna‑la̱ xíkjín. Kꞌoa̱á ma‑ne nga jñò, mìkiì kꞌoa̱sꞌín sꞌe̱en koni sꞌín mejèn‑nò.
\v 18 Ta̱nga tsà jè Ini̱ma̱ Tsjeè‑la̱ Nainá tíhokó‑nò ndi̱yá, mì ti̱jè kjo̱tíxoma otíxoma‑nò.
\p
\v 19 Jyeé ꞌyaá mé kjoa̱chꞌo xi síjé yijo‑ná koni jè kjoa̱chijngui, kjoa̱xòpa, kjoa̱chi̱nga̱,
\v 20 kjoa̱ nga xkósòn yaxkoán, kjoa̱tjꞌe, kjoa̱ nga majtichaá xinguia̱á, nga bixkán‑koa̱á xinguia̱á, nga machi̱ni̱chaá xinguia̱á, nga jti takoán, nga nachrjenguiaá xinguia̱á, nga xi̱ta̱ nìjòyaá ko̱ nga binchatꞌaàxìn‑lá xinguia̱á,
\v 21 kjoa̱xìtakòn, kjoa̱chꞌi̱, ko̱ ngatsꞌiì kjoa̱chrjáꞌa xi ma ñánda bitjo sꞌeí. Tjín ìsa̱ kjoa̱ xi kjꞌei̱í, xi mangásòn‑ko̱ kjoa̱ koi. Koni sꞌín kixan‑nò nga sa̱ ítjòn, tákó kꞌoa̱á xan‑nò skanda i̱ꞌndei̱, jñà xi̱ta̱ xi kꞌoa̱ tjín kjoa̱ xi sꞌín, ni̱mé kjo̱ndaà sa̱kò‑la̱ ya̱ ñánda nga tíhotíxoma Nainá.
\s Kjo̱ndaà xi tsjá Ini̱ma̱ Tsjeè‑la̱ Nainá
\p
\v 22 Ta̱nga jñà kjo̱ndaà xi tsjá Ini̱ma̱ Tsjeè‑la̱ Nainá, jñà‑né nga tjòcha sꞌe̱én xinguia̱á, nga tsja sꞌe̱n kjitꞌaá, nga ꞌnchán si̱jchá yijo‑ná, nga sꞌe̱‑ná kjoa̱tsejta, nga tsjakjoa̱ sꞌe̱én, nga sꞌe̱n‑ná kjo̱ndaà xi ndaà tjín, nga kixi̱ tjín kjo̱hítsjeèn‑ná,
\v 23 nga indaàkjoa̱ sꞌe̱én ko̱ nga kixi̱ ko̱ti̱xoma‑lá yijo‑ná. Jñà kjoa̱ koi, tsjìn kjo̱tíxoma xi kondra̱ tíjna‑la̱.
\v 24 Jñá xi jye xi̱ta̱‑la̱ Cristo maá, ngatsꞌiì kjo̱hítsjeèn‑ná xi chꞌo tsò ko̱ xi chꞌo síjé yijo‑ná, ya̱á kinìkꞌen‑tꞌaá krò‑la̱ Cristo.
\v 25 I̱ꞌndei̱ nga jè Ini̱ma̱ Tsjeè‑la̱ Nainá tísíkíjnakon‑ná, mochjeén‑né nga ko̱sꞌín kjiaán koni sꞌín okó‑ná ndi̱yá.
\v 26 Mìkiì ndaà tjín nga ꞌnga ko̱ma takoán, nga ti̱jñá si̱jti‑lá xinguia̱á, ko̱ nga ko̱xìtakòn‑chaá xinguia̱á.
\c 6
\s Mé xi mochjeén nga ndaà si̱koa̱á ngatsꞌiì xi̱ta̱
\p
\v 1 Jñò ndí ꞌndsè ko̱ ndí tichjaá, tsà tjín iꞌnga xi̱ta̱ xi jé ótsji, jñò xi ndaà onguítꞌaà‑là jè Ini̱ma̱ Tsjeè‑la̱ Nainá, jñò ti̱si̱ko̱ò nga kàtakixi̱ya ìjngoò kꞌa‑ne nga indaàkjoa̱ ti̱nókjoa̱‑là. Ta̱nga jñò, tꞌe̱en kinda̱ yijo‑nò, mé‑ne nga mì jé ska̱jiìn‑nò.
\v 2 Ti̱si̱ko̱ò xinguio̱o kꞌe̱ nga tsà mé kjoa̱ xi ꞌin tjín títsa̱jnajiìn; kꞌoa̱á sꞌín ko̱ma‑ne nga si̱kitasòn jè kjo̱tíxoma xi kitsjaà Cristo.
\p
\v 3 Tsà tjín iꞌnga xi̱ta̱ xi ndaà ochrjengui yijo‑la̱, koa̱ tsà mìtsà kixi̱‑ne kjoa̱, jñà xi̱ta̱ koi, tà yijo‑la̱á nchikona̱cha̱n‑la̱.
\v 4 Ìsa̱á ndaà‑ne nga chítꞌaà yijo‑nò nga jngoò ìjngoò‑nò, a ndaà titsa̱ꞌnè; tsà ndaà titsa̱ꞌnè, ta ya̱ tíjiìn takòn, kì kꞌoa̱á sꞌín nìkítsjeèn nga jñò, ìsa̱á ndaà titsa̱ꞌnè mì kꞌoa̱‑ne koni jñà xi̱ta̱ xi kjꞌei̱í.
\v 5 Nga jngoò ìjngoò, ya̱á kjinè‑la̱ kósꞌín tísíjchá yijo‑la̱.
\p
\v 6 Jñà xi̱ta̱ xi nchikotaꞌyà ꞌén ndaà‑la̱ Nainá, mochjeén‑né nga kàtatsjá‑la̱ mé xi ko̱chjeén‑la̱ maestro‑la̱ nga ꞌén okóya.
\p
\v 7 Kì yijo‑nò chona̱cha̱n‑là; nga Nainá mìkiì ko̱ma si̱skákoa̱á. Nga ìjngoò ìjngoò xi̱ta̱, koni tjín kjoa̱ xi sꞌín, kꞌoa̱á ti̱ tjín kjoa̱ xi sa̱kò‑la̱.
\v 8 Nga jè xi kꞌoa̱sꞌín sꞌín koni sꞌín mejèn‑la̱ yijo‑la̱, kjoa̱biyaá tjoé‑la̱ i̱tꞌaà tsꞌe̱ kjoa̱ chꞌo xi síjé yijo‑la̱, ta̱nga jè xi kꞌoa̱sꞌín sꞌín koni sꞌín mejèn‑la̱ Ini̱ma̱ Tsjeè‑la̱ Nainá, i̱tꞌaà tsꞌe̱ Ini̱ma̱ Tsjeè‑la̱ Nainá tjoé‑la̱ kjoa̱binachon xi mìkiì fehetꞌaà ni̱ta̱ kjé‑né.
\v 9 Mìkiì ndaà tjín tsà ko̱siì‑ná nga ndaà sꞌe̱én; nga ki̱jchò na̱chrjein nga sa̱kò‑ná kjo̱ndaà tsà mì kì si̱hindaà‑lá takoán.
\v 10 Koií kjoa̱‑la̱, kꞌe̱ ma xi ꞌné i̱tsé, ndaà si̱koa̱á ngatsꞌiì xi̱ta̱, jñà títsa̱jna ítjòn jñà xi̱ta̱ xinguia̱á xi ngásòn mokjeiín‑ná ꞌén‑la̱ Nainá.
\s Mé kjoa̱ xi síkíjna ítjòn Pablo
\p
\v 11 Chítsejèn‑là tsí ki̱tsian‑ne letra xi ndsa̱a tìkjiì‑nò.
\v 12 Jñà xi̱ta̱ xi mejèn‑la̱ nga kjo̱ꞌñó sꞌín‑nò nga sitꞌaà chi̱ba̱‑nò kjoa̱ tsꞌe̱ circuncisión, tà koií xi mejèn‑la̱ nga ndaà síkítsa̱jna yijo‑la̱ nga nguixko̱n xi̱ta̱; ko̱ majìn‑la̱ nga xi̱ta̱ kji̱tji̱ngui kondra̱‑la̱ tsà ko̱sꞌín ke̱èno̱jmíya nga ya̱ kꞌen‑tꞌaà krò Cristo.
\v 13 Jñà xi̱ta̱ xi tjítꞌaà chi̱ba̱‑la̱ kjoa̱ tsꞌe̱ circuncisión, ti̱koa̱á mìkiì síkitasòn kjo̱tíxoma, ta̱nga mejèn‑la̱ nga si̱tꞌaà chi̱ba̱‑nò mé‑ne nga i̱tꞌaà tsa̱jòn ndaà si̱ìkítsa̱jna‑ne yijo‑la̱ kꞌe̱ nga skoe̱ nga jñò jye tjítꞌaà chi̱ba̱‑nò.
\v 14 Ta̱nga ꞌa̱n, ni̱mé kjoa̱ xi mejèn‑na nga ndaà sìkíjna yijo‑na̱; ta jè ta̱jngoó krò‑la̱ Na̱ꞌèn‑ná Jesucristo nga ndaà sìkíjna yijo‑na̱. Kꞌoa̱á ma‑ne nga jñà kjoa̱ chꞌo xi tjín i̱sòꞌnde, i̱tꞌaà tsꞌa̱n, títsa̱jnakꞌen‑né ko̱ ꞌa̱n tìjna̱kꞌeén‑la̱ jè i̱sòꞌnde. Mì ti̱ kꞌoa̱á tjín kjoa̱ xi sisꞌin‑na.
\v 15 Xi i̱tꞌaà tsꞌe̱ Cristo, mìtsà jè xi chjí‑la̱ tsà tjítꞌaà chi̱ba̱‑ná ko̱ tsà tsjìn‑ná chi̱ba̱ kjoa̱ tsꞌe̱ circuncisión; jè xi chjí‑la̱ nga jè Nainá jyeé kisìkjatjìya‑ná ko̱ jyeé xi̱ta̱ xi̱tse̱ kjoán.
\v 16 Kàtasꞌe‑la̱ kjoa̱ꞌnchán ko̱ kjoa̱ i̱ma̱ takòn ya̱ i̱jiìn ini̱ma̱‑la̱ ngatsꞌiì xi̱ta̱ xi kꞌoa̱sꞌín nchisíkitasòn koni tsò ꞌén jè; jñà‑né xi xi̱ta̱‑la̱ Nainá tsꞌe̱ na̱xa̱ndá Israel.
\p
\v 17 Kꞌoa̱á ma‑ne i̱ꞌndei̱, kì ti̱ yá xi kjoa̱ ótsji‑ìsa‑na nga jyeé tjítꞌaà chi̱ba̱‑la̱ yijo‑na̱ kjo̱ꞌin xi kitsjaà‑na̱ xi̱ta̱ xi kjoa̱ tsꞌe̱ Na̱ꞌèn‑ná Jesús.
\p
\v 18 Jñò ndí ꞌndsè ko̱ ndí tichjaá, jè kàtasijiìn ini̱ma̱‑nò kjo̱ndaà‑la̱ Jesucristo xi otíxoma‑ná. Kꞌoa̱sꞌín kàtama.