\id EPH
\h Efesios
\toc1 Efesios
\mt Xo̱jo̱n carta‑la̱ San Pablo xi kiskiì‑la̱ xi̱ta̱ na̱xa̱ndá‑la̱ Cristo xi títsa̱jna Éfeso
\c 1
\s Kó tsò Pablo nga síhixatꞌaà jñà xi̱ta̱ na̱xa̱ndá‑la̱ Cristo xi títsa̱jna Éfeso
\p
\v 1 Jñò xi xi̱ta̱‑la̱ Nainá ꞌmì‑nò xi titsa̱jnaà na̱xa̱ndá Éfeso, jñò, xi kixi̱ onguítꞌaà‑la Cristo Jesús, ꞌa̱n xi ꞌmì‑na Pablo tisìhixatꞌaà‑nò nga ꞌa̱n tsibíxáya‑na Jesucristo nga kꞌoa̱sꞌín kjòmejèn‑la̱ Nainá.
\v 2 Nainá xi Na̱ꞌèn‑ná, ko̱ jè Jesucristo xi otíxoma‑ná kàtatsjá‑nò kjo̱ndaà ko̱ kjoa̱ꞌnchán ya̱ i̱jiìn ini̱ma̱‑nò.
\s Kósꞌín síchikon‑tꞌin‑ná Nainá kꞌe̱ nga Cristo titsa̱jnakoa̱á
\p
\v 3 Jeya kàtìjna Nainá, Na̱ꞌèn‑la̱ Jesucristo xi otíxoma‑ná nga kisìchikon‑tꞌin‑ná, kitsjaà‑ná ngatsꞌiì kjo̱ndaà xi tsꞌe̱ ini̱ma̱‑ná xi ngajmiì nchrobá‑ne koi kjoa̱‑la̱ nga Cristo titsa̱jnakoa̱á.
\v 4 Nainá xó kꞌoa̱á sꞌín jaàjiìn‑ná kꞌe̱ nga ti̱kjꞌeè sindaà i̱sòꞌnde nga Cristo titsa̱jnakoa̱á mé‑ne nga ni̱mé jé sꞌe̱‑ná ko̱ tsjeè ki̱tsa̱jnaá nguixko̱n jè.
\v 5 Koi‑né nga matsjakeè‑ná nga kꞌoa̱sꞌín kiskoòsòn‑la̱ nga ti̱sa̱‑ne nga kiskoétjò‑ná koni i̱xti jcha̱n‑la̱ maá xi i̱tꞌaà tsꞌe̱ Jesucristo. Nainá kꞌoa̱á sꞌín kisꞌiìn koni sꞌín kisaseèn‑la̱ ta koi kjoa̱‑la̱ nga kꞌoa̱sꞌín kjòmejèn‑la̱.
\v 6 Koií kjoa̱‑la̱ nga jeya bìjna Nainá nga tse kjo̱ndaà kitsjaà‑ná nga kisìchikon‑tꞌin‑ná nga ya̱ titsa̱jnakoa̱á kiꞌndí‑la̱ xi ꞌñó matsjakeè.
\v 7-8 Jè jní‑la̱ Jesucristo tsibíchjítjì‑ná koa̱ kisìjchàatꞌaà‑ná jé‑ná nga Cristo titsa̱jnakoa̱á, nga ꞌñó tse kjo̱ndaà tjín‑la̱ Nainá nga tsjá‑ná kjo̱hítsjeèn ko̱ kjoa̱chji̱ne̱ xi tjín‑la̱.
\v 9 Kꞌoa̱á ma‑ne nga ti̱koa̱ tsakó‑ná jè kjoa̱tjíꞌma‑la̱ koni sꞌín kjòmejèn‑la̱ jè, ti̱koií‑ne kjo̱hítsjeèn‑la̱ xi ti̱jè‑ne kiskoòsòn‑la̱ nga ki̱tasòn.
\v 10 Koni sꞌín tjíndaà‑la̱ kjo̱hítsjeèn jè, ki̱jchò na̱chrjein nga ki̱tasòn tsjeè. Nainá, jé si̱ìjngoò yije ni̱ta̱ mé xi tjín ngajmiì ko̱ i̱tꞌaà nangui nga jè Cristo ko̱tìxoma.
\p
\v 11 Nainá jyeé kjòtseé jaàjiìn‑naje̱n nga Cristo titsa̱jnako̱‑je̱n. Kitjoé‑naje̱n kjo̱tjò xi tsjá Nainá koni sꞌín tjíndaà‑la̱ nga kꞌoa̱sꞌín bitasòn ꞌén‑la̱ koni sꞌín ndaà sasén‑la̱.
\v 12 Kꞌoa̱á sꞌín kisꞌiìn nga ngaje̱n kinìkítsa̱jna ítjòn‑je̱n nga jeya tíjna Nainá, ngaje̱n xi xi̱ta̱ judío ꞌmì‑naje̱n, ngaje̱én kòkjeiín ítjòn‑naje̱n i̱tꞌaà tsꞌe̱ Cristo.
\p
\v 13 Ti̱koa̱á jñò nga ya̱ titsa̱jnako̱o Cristo, kꞌe̱ nga kinaꞌyà ꞌén ndaà‑la̱ Nainá xi kjoa̱ kixi̱, jè xi tsachrjekàjiìn‑nò kjo̱ꞌin nga kòkjeiín‑nò i̱tꞌaà tsꞌe̱ Cristo, Nainá kitsjaà‑nò Ini̱ma̱ Tsjeè‑la̱; ya̱á tsibítꞌaà chi̱ba̱‑la̱ i̱jiìn ini̱ma̱‑nò, koni sꞌín jye kitsjaà tsoꞌba nga tsjá‑nò.
\v 14 Jè Ini̱ma̱ Tsjeè‑la̱ Nainá, jè‑né xi tjoé ítjòn‑ná nga kixi̱ kjoa̱ nga tjoé yije‑ná kjo̱tjò xi Nainá tsjá‑ná jè na̱chrjein kꞌe̱ nga ko̱ngásòn nga si̱ìkítsa̱jnandei̱í‑ná xi na̱xa̱ndá‑la̱ maá mé‑ne nga jeya kíjna‑ne Nainá.
\s Kósꞌín bítsiꞌba Pablo i̱tꞌaà tsꞌe̱ jñà xi̱ta̱ xi jye mokjeiín‑la̱
\p
\v 15 Koií kjoa̱‑la̱ kꞌe̱ nga kiꞌnchrè nga mokjeiín‑nò i̱tꞌaà tsꞌe̱ Jesucristo xi otíxoma‑ná, ko̱ nga matsjacha ngatsꞌiì xi̱ta̱‑la̱ Nainá;
\v 16 mìkiì sìjchàajñaà nga na̱chrjein inchijòn tsjaà‑la̱ kjo̱ndaà Nainá xi i̱tꞌaà tsa̱jòn; kꞌe̱ nga bítsiꞌba‑la̱, síjétꞌaà‑la̱ xi kjo̱ndaà tsa̱jòn
\v 17 mé‑nè nga jè Na̱ꞌèn‑ná xi jeya tíjna, jè xi Nainá tsò‑la̱ Jesucristo xi otíxoma‑ná, jè kàtasíkíhichi̱ya‑nò ko̱ kàtatsjá‑nò kjoa̱chji̱ne̱ xi tsꞌe̱ ini̱ma̱‑nò mé‑ne nga ìsa̱ ndaà jcha̱xkon‑nò Nainá.
\v 18 Kꞌoa̱á sꞌín síjétꞌaà‑la̱ Nainá nga si̱ìhiseèn‑la̱ kjo̱hítsjeèn‑nò mé‑nè nga jcha̱‑nò mé xi chiñà‑là nga xó kinokjoàa‑nò. Ti̱koa̱á jcha̱a nga ꞌñó ndaà tjín ko̱ ꞌñó jeya tjín kjo̱tjò xi Nainá tsjá‑la̱ jñà xi̱ta̱ na̱xa̱ndá‑la̱.
\v 19 Ti̱koa̱á síjétꞌaà‑la̱ nga jcha̱xkon kó kji ꞌñó tse ngaꞌñó tjín‑la̱ Nainá nga ko̱ma ko̱si̱ko̱‑ná jñá xi mokjeiín‑ná i̱tꞌaà tsꞌe̱. Ti̱koií‑ne ngaꞌñó xi ꞌñó tse tjín‑la̱ Nainá
\v 20 xi kisìkjeén nga kisìkjaáya‑la̱ Cristo kꞌe̱ nga kꞌen, i̱kjoàn jeya kisìkíjnatꞌaà chrja kixi̱‑la̱ ján ngajmiì
\v 21 ñánda nga ìsa̱ ta ꞌñó ꞌnga kisìkíjna ítjòn mì kꞌoa̱á‑ne tsà jngoò xi̱ta̱ ítjòn, xi̱ta̱xá ítjòn, ngatsꞌiì ngaꞌñó xi tjín i̱ i̱tꞌaà nangui ko̱ xi tjín i̱jiìn i̱sén, ngatsꞌiì xi tjín‑la̱ kjo̱tíxoma ngajmiì; tíjna ítjòn‑la̱ ngatsꞌiì xi tjín i̱sòꞌnde jè, ko̱ jè i̱sòꞌnde xi sa̱ nchrobá.
\v 22 Nainá, jè kisìnga̱tsja yije Cristo, ngatsꞌiì kjo̱tíxoma xi tjín; ti̱koa̱á jè kitsjaà yije‑la̱ Cristo nga jè ko̱ma xi sko̱‑la̱ na̱xa̱ndá‑la̱.
\v 23 Na̱xa̱ndá‑la̱ ti̱jè‑ne yijo‑la̱ Cristo; ko̱ jè tsjá yije‑la̱ ni̱ta̱ mé xi chija‑la̱. Ti̱jè‑ne Cristo xi síjngoò yije, ni̱ta̱ mé xi tjín i̱sòꞌnde.
\c 2
\s Kósꞌín síjchàatꞌaà‑ná jé‑ná Nainá
\p
\v 1 Jñò, nga sa̱ kjòtseé, kꞌoa̱á ngaya‑la̱ koni tsà titsa̱jna kꞌen‑nò i̱tꞌaà tsꞌe̱ Nainá nga jè kjoa̱‑la̱ jé‑nò nga chꞌo kiꞌnè.
\v 2 Kꞌoa̱á sꞌín tse tsitjaàyaà ndi̱yá jé‑la̱ xi̱ta̱ i̱sòꞌnde; jè kinìkitasòn‑là xi̱ta̱ nei̱í xi sko̱‑la̱ tjo̱ i̱jiìn i̱sén nga jè síxájiìn ini̱ma̱‑la̱ jñà xi̱ta̱ xi mìkiì ꞌnchréñijon‑la̱ Nainá.
\v 3 Ti̱koa̱á ngatsꞌiaá jñá, kꞌe̱ nga ìsa̱ kjòtseé, kꞌoa̱á ti̱sꞌín chinchaàtsjiaá jé koni sꞌín kjòmejèn‑la̱ yijo‑ná ko̱ kjo̱hítsjeèn‑ná. Tjín‑ne nga ngásòn tse kjo̱ꞌin kꞌoi̱‑ná tsà ndaà, koni jñà xi̱ta̱ xi kjꞌei̱í nga koi kjoa̱‑la̱ jé‑ná.
\v 4 Ta̱nga Nainá, tseé kjo̱hi̱ma̱takòn tjín‑la̱ nga ꞌñó matsjakeè‑ná.
\v 5 Nainá kisìkítsa̱jnakon ìjngoò kꞌa‑ná ko̱ Cristo, na̱sꞌín jye titsa̱jnakꞌeén xi kjoa̱ tsꞌe̱ jé‑ná. (Ko̱ jñò, tà kjo̱ndaà‑la̱ Nainá‑né nga bitjokàjñoò kjo̱ꞌin.)
\v 6 Nainá, kisìkjaáyakjoò‑ná ko̱ Cristo, nga ya̱ titsa̱jnakoa̱á, ko̱ ta̱ñaá kisìkítsa̱jnakjoò‑ná ján ngajmiì.
\v 7 Kꞌoa̱á sꞌín kisꞌiìn mé‑nè nga ko̱kò‑ne jñà na̱chrjein xi sa̱ nchrobá nga tse kjoa̱tjòcha tjín‑la̱ ko̱ tse kjo̱ndaà tjín‑la̱ i̱tꞌaà tsa̱ján nga Cristo Jesús titsa̱jnakoa̱á.
\v 8 Tà kjo̱ndaà‑la̱ Nainá‑né nga itjokàjñoò kjo̱ꞌin nga kòkjeiín‑nò i̱tꞌaà tsꞌe̱ Cristo. Mìtsà kjo̱ndaà tsa̱jòn nchrobá‑ne kjoa̱ koi; ta kitsjaà kjo̱tjò‑nò Nainá.
\v 9 Mìtsà koi kjoa̱‑la̱ nga xá kiꞌnè, mé‑nè nga ni̱jngoò xi̱ta̱ ndaà si̱ìkíjna‑ne yijo‑la̱.
\v 10 Nainá tsibíndaàya xi̱tse̱ ìjngoò kꞌa‑ná, nga ya̱ titsa̱jnakoa̱á Cristo, mé‑nè nga sꞌe̱én ngatsꞌiì kjoa̱ xi ndaà tjín, jñà kjoa̱ xi Nainá jyeé kꞌoa̱sꞌín kiskoòsòn‑la̱ nga ti̱sa̱ kjòtseé nga ko̱sꞌín si̱kitasoán.
\s Kjoa̱ꞌnchán xi tjín‑ná nga Cristo titsa̱jnakoa̱á
\p
\v 11 Jñò xi mì ya̱ tje̱n‑nò tje̱‑la̱ xi̱ta̱ judío, kꞌoa̱á tsò‑nò jñà xi̱ta̱ judío xi tjítꞌaà chi̱ba̱ yijo‑la̱ nga mìtsà xi̱ta̱‑la̱ Nainá ꞌmì‑nò, koií kjoa̱‑la̱ nga mì tjítꞌaà chi̱ba̱‑nò kjoa̱ tsꞌe̱ circuncisión. Ta̱nga jè kjoa̱ jè, tà tsja xi̱ta̱á bíndaàya‑ne yijo‑la̱.
\v 12 Ti̱kítsjeèn kꞌe̱ nga sa̱ kjòtseé jñò titsa̱tꞌaàxìn‑la Cristo; ti̱koa̱á titsa̱jnatꞌaàxìn‑la na̱xa̱ndá Israel, mìkiì ya̱ nokjoà‑nò koni sꞌín tsibíndaàjiìn‑ko̱ Nainá jñà xi̱ta̱ judío koni sꞌín kitsjaà‑la̱ tsoꞌba Nainá. I̱sòꞌnde jè, ni̱mé xi chiñà‑là ko̱ mìkiì yaxkon Nainá.
\v 13 Ta̱nga i̱ꞌndei̱, nga ya̱ titsa̱jnako̱o Cristo, Nainá jyeé kisìchrañatꞌaà‑nò jè kjoa̱‑la̱ jní xi tsibíxteèn Cristo, na̱sꞌín kjiìn tjatꞌaàxìn‑là Nainá nga sa̱ kjòtseé.
\v 14 I̱ꞌndei̱, jè Cristo xi tsjá‑ná kjoa̱ꞌnchán. Kisìkjoóndaà‑ná nga jngoò na̱xa̱ndá komà‑ne jñà xi̱ta̱ judío ko̱ xi mìtsà xi̱ta̱ judío. Jè kisìhixàña jè kjoa̱ kondra̱ xi jòya tjín nga sa̱ ítjòn kꞌe̱ nga kitsjaà kjo̱tjò yijo‑la̱ nga kꞌen‑tꞌaà krò.
\v 15 Ya̱á kisìkjehetꞌaà jè kjo̱tíxoma‑la̱ Moisés xi tjín‑la̱ jñà xi̱ta̱ judío; kjòjngoò‑ne ingajò na̱xa̱ndá; jngoò na̱xa̱ndá xi̱tse̱ komà‑ne nga jè titsa̱jnakoa̱á Cristo; kꞌoa̱á komà‑ne nga tsijne ꞌnchán kjoa̱.
\v 16 Cristo, kꞌe̱ nga kꞌen‑tꞌaà krò, ya̱á kisìkjehetꞌaà kjoa̱ kondra̱ xi jòya tjín. Kisìkjoóndaà‑ne ingajò na̱xa̱ndá; jngoò na̱xa̱ndá komà‑ne koa̱ kitsjaà‑la̱ kjoa̱ꞌnchán i̱tꞌaà tsꞌe̱ Nainá.
\p
\v 17 Jñò xi kjiìn títsa̱jna‑là Nainá nga sa̱ ítjòn, ti̱koa̱á ngaje̱n xi titsa̱jnatꞌaà chrañà‑la̱je̱n, jꞌiì Cristo nga jꞌiì kéno̱jmí‑ná ꞌén ndaà xi tsjá‑ná kjoa̱ꞌnchán.
\v 18 Ndaà chjí‑la̱ Cristo nga ingajò na̱xa̱ndá‑ná jyeé tjíꞌnde‑ná nga ko̱ma chi̱koa̱á Nainá nga ti̱jè‑ne Ini̱ma̱ Tsjeè‑la̱ tsjá‑ná ngaꞌñó nga ingajoá.
\v 19 Kꞌoa̱á ma‑ne jñò xi mìtsà xi̱ta̱ judío ꞌmì‑nò, mìtsà ti̱ xi̱ta̱ xìn nangui‑nò. Jñò, i̱ꞌndei̱, ngásòn ya̱ ta̱jngoò nokjoà‑nò na̱xa̱ndá‑la̱ Nainá; xi̱ta̱ xinguio̱o‑nò ngatsꞌiì xi̱ta̱ na̱xa̱ndá‑la̱ Nainá.
\v 20 Kꞌoa̱á ngaya‑la̱ koni tsà jngoò niꞌya tísindaà. Jñò, jè ngaya‑la̱ nda̱jo̱ xi mochjeén‑la̱ chrjó niꞌya. Jñà xi̱ta̱ xi tsibíxáya‑la̱ Cristo ko̱ jñà xi kiìchja̱ ngajo‑la̱ Nainá, jñà‑né tàtsꞌen chrjó‑la̱ niꞌya. Ko̱ jè Cristo jè nda̱jo̱ chrja̱ngui̱‑la̱ chrjó niꞌya.
\v 21 Nga ko̱ Cristo ngatsꞌiì nda̱jo̱‑la̱ chrjó niꞌya, ndaà tísikjoò ko̱ tímajeya niꞌya mé‑nè nga niꞌya tsjeè‑la̱ Nainá ko̱ma‑ne.
\v 22 Ti̱koa̱á jñò, nga Cristo títsa̱jnakjoòko̱o, Nainá tísíkítsa̱jnakjoò‑nò ko̱ xi̱ta̱ xinguio̱o xi kjꞌei̱í, mé‑ne nga jñò ko̱ma‑nò niꞌya ñánda tíjna Nainá nga Ini̱ma̱ Tsjeè.
\c 3
\s Xá‑la̱ Pablo i̱tꞌaà tsꞌe̱ xi̱ta̱ xi mìtsà xi̱ta̱ judío
\p
\v 1 Kꞌoa̱á ma‑ne bìtsiꞌbà‑la̱ Nainá, ꞌa̱n xi ꞌmì‑na Pablo nga nda̱yá tìjna̱a, koií nga̱tjì‑la̱ nga ꞌa̱n beno̱jmí‑nò ꞌén ndaà‑la̱ Jesucristo, jñò xi mìtsà xi̱ta̱ judío ꞌmì‑nò.
\v 2 Nga jyeé‑la tíjiìn‑nò nga kjo̱ndaà tsꞌe̱ Nainá‑né nga ꞌa̱n kitsjaà‑na xá xi kjo̱ndaà tsa̱jòn,
\v 3 koni sꞌín kisìhiseèn‑na Nainá nga tsakó‑na jè kjoa̱ xi tjíꞌma‑la̱ skanda kjòtseé. Jyeé ìsa̱ kiskiì chiba‑nò jñà ꞌén koi.
\v 4 Kꞌe̱ nga tsà ndaà kíxke̱jñoò xo̱jo̱n jè koni sꞌín kiskiì ítjòn‑nò, ya̱á jcha̱a nga ꞌa̱n ndaà tíjiìn‑na̱ jè kjoa̱ tjíꞌma i̱tꞌaà tsꞌe̱ Cristo.
\v 5 Nga ìsa̱ kjòtseé, ni̱jngoò xi̱ta̱ tíjiìn‑la̱ jè kjoa̱ tjíꞌma; ta̱nga i̱ꞌndei̱ jè Ini̱ma̱ Tsjeè‑la̱ Nainá kisìhiseèn‑la̱ jñà xi̱ta̱ xi xó jaàjiìn‑ne Nainá, jñà xi̱ta̱ xi tsibíxáya‑la̱ Cristo ko̱ xi kiìchja̱ ngajo‑la̱.
\v 6 Jè kjoa̱ tjíꞌma, jè‑né nga jñà xi mìtsà xi̱ta̱ judío, kꞌe̱ nga mokjeiín‑la̱ ꞌén ndaà‑la̱ Nainá xi kjoa̱ tsꞌe̱ Cristo, ngásòn tjoé‑la̱ kjo̱tjò‑la̱ Nainá nga ngásòn i̱xti‑la̱ ma koni jñà xi̱ta̱ judío; jngoò na̱xa̱ndá ko̱ma yije kóho̱tjín; ko̱ jñà xi mìtsà xi̱ta̱ judío ngásòn tjoé‑la̱ kjo̱ndaà koni sꞌín kitsjaà‑la̱ tsoꞌba Nainá jñà xi̱ta̱ judío.
\p
\v 7 Ta kjo̱ndaà‑la̱ Nainá‑né nga ꞌa̱n kitjoé‑na xá jè. Jè kitsjaà kjo̱tjò‑na nga chi̱ꞌnda‑la̱ ma kꞌe̱ nga kitsjaà‑na ngaꞌñó‑la̱ mé‑ne nga ꞌa̱n kèno̱jmiá ꞌén ndaà‑la̱ Cristo.
\v 8 ꞌA̱n, na̱sꞌín ìsa̱ ꞌñó nangui tìjna̱‑la̱ ngatsꞌiì xi̱ta̱‑la̱ Nainá, ta̱nga Nainá kitsjaà‑na kjo̱ndaà jè, nga ꞌa̱n chjàyajiìn‑la̱ ꞌén ndaà‑la̱ Nainá xi kjoa̱ tsꞌe̱ Cristo jñà xi mìtsà xi̱ta̱ judío, mé‑nè nga skoe̱‑ne kó kji ꞌñó tse kjo̱ndaà tsjá Cristo skanda mìkiì bijchótji̱ngui‑la̱ kjo̱hítsjeèn‑ná.
\v 9 Jè xá xi ꞌa̱n kjònga̱tsja nga ꞌa̱n sìhiseèn‑la̱ jñà xi̱ta̱ mé‑ne nga skoe̱‑ne kó sꞌín tjín kjoa̱ xi tjíꞌma. Nainá xi tsibíndaà i̱sòꞌnde, jè tíjnaꞌma‑la̱ kjoa̱ jè skanda ti̱sa̱ tàtsꞌen‑la̱ kjoa̱.
\v 10 Koií kꞌoa̱sꞌín komà‑ne mé‑ne skoe̱‑ne i̱ꞌndei̱ ngatsꞌiì ini̱ma̱ chꞌo ko̱ ini̱ma̱ xi ndaà xi tjín‑la̱ ngaꞌñó i̱jiìn i̱sén nga kjìn sko̱ya kjoa̱chji̱ne̱ tjín‑la̱ Nainá. Ya̱á skoe̱ kjoa̱ koi i̱tꞌaà tsꞌe̱ na̱xa̱ndá‑la̱ Cristo.
\v 11 Nga ti̱sa̱ tàtsꞌen‑la̱ kjoa̱, Nainá kꞌoa̱á sꞌín tjíndaà‑la̱ nga i̱tꞌaà tsꞌe̱ Cristo ki̱tasòn yije kjoa̱ koi.
\v 12 I̱ꞌndei̱, nga Cristo titsa̱jnakoa̱á, jyeé ꞌñó takoán. Ko̱maá chi̱koa̱á Nainá ñánda tíjna nga mì ti̱ kiì xkón‑oná nga jyeé mokjeiín‑ná i̱tꞌaà tsꞌe̱ Cristo.
\v 13 Kꞌoa̱á sꞌín siìjé‑nò nga kì nìkjajen‑là takòn jè kjo̱ꞌin xi tìsìkjiaán nga ꞌa̱n beno̱jmí‑nò ꞌén ndaà‑la̱ Nainá xi kjoa̱ tsꞌe̱ Cristo. Ìsa̱á ndaà kàtatsja‑la̱ ini̱ma̱‑nò nga kjo̱ndaà tsa̱jòn‑nò.
\s Kó tsò Pablo nga bítsiꞌbatjì na̱xa̱ndá‑la̱ Cristo xi títsa̱jna Éfeso
\p
\v 14 Koií kjoa̱‑la̱ nga ósi̱jna xkóꞌnchitꞌaà‑la̱ nga bìtsiꞌbà‑la̱ Nainá xi Na̱ꞌèn‑ná.
\v 15 Nga i̱tꞌaà tsꞌe̱é Nainá nchrobá‑ne nga tjín na̱ꞌèn ko̱ tjín i̱xti nga jngoò ìjngoò niꞌya xi̱ta̱ xi tjín ngajmiì ko̱ xi tjín i̱sòꞌnde.
\v 16 Nainá, nga tse ngaꞌñó tjín‑la̱, kꞌoa̱á sꞌín bìtsiꞌbà‑la̱ nga kàtatsjá‑nò ngaꞌñó‑la̱ xi tsꞌe̱ ini̱ma̱‑nò nga jè Ini̱ma̱ Tsjeè‑la̱ Nainá kàtasíxájiìn ini̱ma̱‑nò.
\v 17 Jè Cristo, ndaà kàtìjnajiìn ini̱ma̱‑nò, nga mokjeiín‑nò i̱tꞌaà tsꞌe̱; ꞌñó ndaà kàtasꞌe‑nò kjoa̱tjòcha‑la̱ Nainá koni jngoò yá xi na̱nga̱ fì i̱ma̱‑la̱, ko̱ koni jngoò niꞌya xi na̱nga̱ tjíhijiìn chrjó‑la̱.
\v 18 Kꞌoa̱á sꞌín ko̱ma‑ne nga jñò ko̱ ngatsꞌiì xi̱ta̱‑la̱ Nainá, jcha̱xkoòn koa̱ ko̱chi̱ya‑nò nga ꞌñó tse kjoa̱tjòcha xi tjín‑la̱ Cristo, ꞌñó tiyà, ꞌñó ndojò, ꞌñó na̱nga̱ ko̱ ꞌñó ꞌnga.
\v 19 Nguì ndaà jcha̱a jè kjoa̱tjòcha xi tjín‑la̱ Cristo xi ìsa̱ ꞌñó otonè‑la̱ ngatsꞌiì kjo̱hítsjeèn‑ná skanda mìkiì machi̱ya‑ná, mé‑ne nga ni̱mé chi̱jatꞌaà‑nò koni jè Nainá, ni̱mé chi̱jatꞌaà‑la̱.
\p
\v 20 Nainá, ꞌñó tse ngaꞌñó tjín‑la̱, tsà kꞌe̱ nga mé xi nìjé‑la̱á, skanda ìsa̱á ꞌñó síkatonè‑la̱ koni sꞌín nìjé‑la̱á ko̱ nga koni sꞌín nìkítsjeèn. Kꞌoa̱á sꞌín tsjá yije‑ná nga ko̱ ngaꞌñó‑la̱ xi síxájiìn ini̱ma̱‑ná.
\v 21 Jeya kàtìjna Nainá ya̱ i̱jiìn na̱xa̱ndá‑la̱ ko̱ i̱tꞌaà tsꞌe̱ Cristo ni̱ta̱ mé na̱chrjein‑ne, ni̱ta̱ mé nó‑ne. Kꞌoa̱sꞌín kàtama.
\c 4
\s Ti̱tsa̱jtión nga ko̱ Ini̱ma̱ Tsjeè‑la̱ Nainá
\p
\v 1 Koií kjoa̱‑la̱ nga kꞌoa̱sꞌín bìtsiꞌbà‑nò nga ndaà ti̱jchá yijo‑nò koni sꞌín okꞌìn‑la̱ kjoa̱ xi xó kinokjoà‑nò. ꞌA̱n, nda̱yá tìjna̱aꞌya jè nga̱tjì‑la̱ nga Nainá tìsìxá‑la̱.
\v 2 Jñò, kì ꞌnga ikon ꞌnè; indaàkjoa̱ tꞌe̱en, kàtasꞌe‑nò kjoa̱tsejta; ngásòn kàtachíkjoa̱‑nò mé kjoa̱ xi tjín‑nò nga matsjacha xinguio̱o.
\v 3 Tìnè‑là yijo‑nò nga titsa̱jnajtión‑ko̱o xinguio̱o koni sꞌín jye tsibítsa̱jnajtín‑nò jè Ini̱ma̱ Tsjeè‑la̱ Nainá, mé‑ne nga ꞌnchán ki̱tsa̱jna‑nò.
\v 4 Nga tà jngoò ma na̱xa̱ndá‑la̱ Nainá; ko̱ tà jngoò ma Ini̱ma̱ Tsjeè‑la̱ Nainá; ti̱koa̱ tà jngoò kjoa̱ chiñá‑lá nga Nainá xó kiìchja̱‑ná;
\v 5 ko̱ tà jngoò ma Na̱ꞌèn‑ná Jesucristo xi otíxoma‑ná; tà jngoò kjoa̱ tjín koni sꞌín mokjeiín‑ná i̱tꞌaà tsꞌe̱ Cristo; ti̱koa̱á tà jngoò kjoa̱ tjín nga ma bautizar xi̱ta̱.
\v 6 Ta jngoò ma Nainá nga ngatsꞌiaá Na̱ꞌèn‑ná ma, jè xi otíxoma‑ná nga ngatsꞌiaá, jè xi síxájiìn ini̱ma̱‑ná nga ngatsꞌiaá, ko̱ jè xi tíjnako̱‑ná nga ngatsꞌiaá.
\p
\v 7 Ta̱nga kitjoé‑ná kjo̱tjò koni sꞌín sasén‑la̱ Cristo mé xá‑la̱ Nainá xi sꞌe̱én nga jngoò jngoaá.
\v 8 Koií ko̱sꞌín tíchja̱‑ne Xo̱jo̱n‑la̱ Nainá nga tsò:
\q Kꞌe̱ nga jye kisìkijne nga tífìmijìn‑ne ngajmiì,
\q kiìko̱ preso jñà xi̱ta̱ xi kitsobàꞌñó,
\q ko̱ kitsjaà‑la̱ kjo̱tjò jñà xi̱ta̱.
\p
\v 9 ¿Kó tsòya‑ne jè xi tsò: “Tífìmijìn‑ne ngajmiì”? Tsòyaá‑ne nga [jè Cristo] ítjòn itjojen skanda ñánda ꞌñó na̱nga̱ i̱jiìn nangui.
\v 10 Jè xi itjojen‑tꞌaà skanda i̱tꞌaà nangui, ti̱jè‑ne xi tsijin ìjngoò kꞌa‑ne ñánda nga ìsa̱ ꞌñó ꞌnga tsibìjna koni ngatsꞌiì xi ꞌnga títsa̱jna mé‑ne nga jè si̱ìjngoò yije‑ne ni̱ta̱ mé xi tjín i̱sòꞌnde.
\v 11 Ti̱koa̱ ti̱jè‑ne xi kitsjaà‑la̱ xá xi̱ta̱‑la̱ mé xá xi sꞌi̱in nga jngoò ìjngoò. Tjín xi tsibíxáya‑la̱ Jesucristo nga si̱ìkaꞌbísòn ꞌén ndaà‑la̱; tjín xi jñà ki̱chja̱ ngajo‑la̱; tjín xi ꞌén ndaà‑la̱ Nainá xi kjoa̱ tsꞌe̱ Cristo béno̱jmíya; tjín xi síkinda̱ na̱xa̱ndá‑la̱ Nainá; ti̱koa̱ tjín xi okóya ꞌén‑la̱ Nainá.
\v 12 Kꞌoa̱á sꞌín kitsjaà‑la̱ xá xi̱ta̱‑la̱ nga jngoò ìjngoò mé‑nè nga kàtatsjá‑la̱ kjo̱hítsjeèn xi̱ta̱ na̱xa̱ndá‑la̱ nga ko̱ma si̱ìxá‑la̱ Nainá, nga ìsa̱ tse ngaꞌñó sꞌe̱‑la̱ na̱xa̱ndá‑la̱ Cristo.
\v 13 Kꞌoa̱á sꞌín ko̱ma‑ne nga jngoò kjo̱hítsjeèn sꞌe̱‑ná ngatsꞌiaá koni sꞌín mokjeiín‑ná i̱tꞌaà tsꞌe̱ Nainá ko̱ koni sꞌín yaxkoaán Kiꞌndí‑la̱ mé‑ne nga nguì xi̱ta̱ kixi̱ ko̱maá. Nguì kꞌoa̱á sꞌín ko̱ngásòn‑kjoaá kóho̱tjián koni jè Cristo nga ni̱mé chijatꞌaà‑la̱.
\v 14 Mì ti̱ kꞌoa̱sꞌín sꞌe̱n‑ná koni sꞌín ndí i̱xti nga ni̱to̱n mokjeiín‑la̱ yá xi̱ta̱ xi kona̱cha̱n‑la̱; nga fìjen fìkjáko̱ koni tsà tjo̱ tísískáko̱; nga fìtji̱ngui‑la̱ kjo̱hítsjeèn‑la̱ xi̱ta̱ maña̱ xi ꞌén ndiso okóya nga kjꞌei̱í ndi̱yá tjímaya.
\v 15 Tà sa̱á ꞌén kixi̱‑la̱ Nainá ki̱nókjoa̱á nga matsjachaá xinguia̱á mé‑nè nga ko̱sꞌín ìsa̱ ndaà ska̱sòn kjo̱hítsjeèn‑ná koni sꞌín tjín kjo̱hítsjeèn‑la̱ Cristo nga jè tíjna xi sko̱‑la̱ na̱xa̱ndá‑la̱ Nainá.
\v 16 Nga jè na̱xa̱ndá‑la̱ Nainá, kꞌoa̱á kji koni jngoò yijo‑la̱ xi̱ta̱. Jè Cristo tíjna xi sko̱‑la̱; ko̱ jè tsjá‑la̱ nga jngoò ìjngoò xá xi oko̱‑la̱; i̱kjoàn síjngoò koni sꞌín tjín yijo‑ná nga títéya naxá‑la̱ nindaà‑ná; nga jngoò ìjngoò ska̱ya, katjín katjín xá‑la̱. Kꞌe̱ nga ndaà síxá yije yijo‑ná maje‑né koa̱ maꞌnga‑né. Kꞌoa̱á ti̱sꞌín tjín jè na̱xa̱ndá‑la̱ Cristo nga ko̱je‑né koa̱ ko̱ꞌnga‑né kꞌe̱ nga jngoò ìjngoò xi̱ta̱‑la̱ ndaà si̱ìxá nga matsjakeè xíkjín.
\s Kósꞌín si̱jchá yijo‑ná kꞌe̱ nga jè Nainá síxi̱tse̱ya ini̱ma̱‑ná ko̱ kjo̱hítsjeèn‑ná
\p
\v 17 I̱tꞌaà tsꞌe̱ kjo̱tíxoma xi tsjá‑na Cristo, kꞌoa̱á xan‑nò ko̱ bìtꞌin‑nò nga mì ti̱ kꞌoa̱sꞌín sꞌe̱n‑nò koni sꞌín xi̱ta̱ xi kjꞌei̱í xi mìkiì beèxkon Nainá, nga tákó tjímako̱ kjo̱hítsjeèn‑la̱ xi nìmée chjí‑la̱.
\v 18 Tà tjíjñò kjo̱hítsjeèn‑la̱. Tsjìn‑la̱ kjoa̱binachon xi i̱tꞌaà tsꞌe̱ Nainá nchrobá‑ne; mìkiì beè kó sꞌín si̱ìjchá yijo‑la̱ nga jè ini̱ma̱‑la̱ tájaàjiìn tjín; mìkiì tsjáꞌnde nga fahasꞌen‑jiìn kjo̱hítsjeèn xi ndaà tsò.
\v 19 Mì ti̱ kiì beè‑ne xi kjo̱sobà ꞌmì, jyeé kòxo̱xꞌín. Tà kjoa̱ chijngui ꞌñó sísꞌin‑la̱; kjitꞌaà na̱chrjein ótsji ngatsꞌiì kjoa̱ chꞌo xi tjín i̱sòꞌnde.
\v 20 Ta̱nga jñò, mì kꞌoa̱á tjín kjoa̱ xi kisꞌeno̱jmí‑nò i̱tꞌaà tsꞌe̱ Cristo.
\v 21 Nga jye ndaà kinaꞌyà‑là ꞌén‑la̱ ko̱ ndaà kichìtaꞌyà kó sꞌín tjín xi nguì kjoa̱ kixi̱ i̱tꞌaà tsꞌe̱ Jesús.
\v 22 Kꞌoa̱á sꞌín kisꞌeno̱jmí‑nò nga chja̱àxiòn kjoa̱ jchínga xi tjín‑nò nga sa̱ kjòtseé koni sꞌín kinìjchá yijo‑nò; i̱ꞌndei̱ jyeé mì ti̱ mé chjí‑la̱ kjoa̱ koi koií kjoa̱‑la̱ nga jñà kjoa̱ chꞌo xi kisaseèn‑la̱ yijo‑nò kiskoòna̱cha̱n‑nò.
\v 23 Tjíꞌnde‑là Nainá nga jè kàtasíxi̱tse̱ya ini̱ma̱‑nò ko̱ kjo̱hítsjeèn‑nò.
\v 24 Chjoé ìjngoò kꞌa xi kjoa̱ xi̱tse̱ xi kꞌoa̱sꞌín kisindaà koni kji i̱sén‑la̱ Nainá mé‑ne nga kixi̱ ko̱ tsjeè si̱jchá yijo‑nò koni sꞌín tjín xi nguì kjoa̱kixi̱.
\p
\v 25 Kꞌoa̱á ma‑ne i̱ꞌndei̱, kì ti̱ ꞌén ndiso nokjoà‑nò. ꞌÉn kixi̱ ti̱nókjoa̱ko̱o xinguio̱o nga jngoò ìjngoò nga tà ngásòn xi̱ta̱ xinguia̱á ma kóho̱tjián.
\p
\v 26 Tsà kꞌe̱ nga majti‑nò, kì jé binchaàtsjioò; kì nìjti‑là yijo‑nò kóni nga ꞌba na̱chrjein skanda kꞌe̱ nga o̱katjì tsꞌoí.
\v 27 Kì kiì biìꞌnde‑là xi̱ta̱ nei̱í nga jè kona̱cha̱n‑nò.
\p
\v 28 Jè xi chijé sꞌín nga sa̱ ítjòn, kì ti̱ chijé sꞌín‑ne i̱ꞌndei̱; ti̱koa̱á‑ne kꞌoa̱sꞌín kàtasíkjeén tsja nga kixi̱ kàtasíxá mé‑nè nga sa̱kò‑la̱ to̱n xi tsjá i̱tsé‑la̱ xi̱ta̱ i̱ma̱ xi ni̱mé tjín‑la̱.
\p
\v 29 Ni̱jngoò ꞌén xi chꞌo tsò nokjoà; jñà ꞌén ti̱nókjoa̱ko̱o xinguio̱o xi ndaà tsò xi ko̱chjeén‑la̱ xinguio̱o nga ìsa̱ kixi̱ kítsa̱jna mé‑nè nga ko̱chikon‑tꞌin‑ne jñà xi̱ta̱ xi kji̱ꞌnchré‑nò.
\v 30 Kì nìba‑là jè Ini̱ma̱ Tsjeè‑la̱ Nainá, jè xi tsibítꞌaà chi̱ba̱‑ná mé‑ne nga kàtaꞌya‑ná nga xi̱ta̱‑la̱ Nainá ꞌmì‑ná skanda jè na̱chrjein kꞌe̱ nga si̱ìkítsa̱jnandei̱í‑ná Nainá xi kjoa̱ tsꞌe̱ jé.
\p
\v 31 Chja̱àxiòn yije i̱jiìn ini̱ma̱‑nò jñà kjoa̱ xi chꞌo tjín xi kondra̱ tsꞌe̱ xi̱ta̱ xi kjꞌei̱í koni kjoa̱ bínguitakòn, kjoa̱jti, kjoa̱ xi makjan‑nò, kjoa̱ nga chítiko̱o xinguio̱o, ko̱ nga nokjoàjno‑là xinguio̱o, ko̱ ngatsꞌiì kjoa̱tsꞌe̱n.
\v 32 Ndaà chibàko̱o xinguio̱o; kàtasꞌe‑nò kjo̱hi̱ma̱takòn; ti̱jchàatꞌaà‑là jé‑la̱ xinguio̱o koni sꞌín kisìko̱‑nò Nainá i̱tꞌaà tsꞌe̱ Cristo nga kisìjchàatꞌaà‑nò jé‑nò.
\c 5
\s Kó sꞌín si̱jchá yijo‑ná nga i̱xti‑la̱ Nainá ꞌmì‑ná
\p
\v 1 Kꞌoa̱á ma‑ne nga kꞌoa̱sꞌín ti̱jchá yijo‑nò koni sꞌín Nainá nga koi kjoa̱‑la̱ nga i̱xti‑la̱ Nainá ꞌmì‑ná nga ꞌñó matsjakeè‑ná.
\v 2 Kꞌoa̱á ti̱sꞌín tjòcha chaà xinguio̱o koni Cristo tjòkeè kijtseè‑ná nga jè kitsjaà ngajo‑ná yijo‑la̱ nga kꞌen, jngoò kjo̱tjò xi ndaà kjòtsjakeè Nainá.
\p
\v 3 Jè xi kjoa̱ chijngui, ngatsꞌiì kjoa̱ chꞌo xi ꞌñó tjé tjín ko̱ kjoa̱ nga maxìtakòn‑chaà xinguio̱o mì ti̱ kꞌoa̱á tjín kjoa̱ xi ko̱xki̱‑ne i̱tꞌaà tsa̱jòn. Nga̱ jñò, xi̱ta̱ tsjeè‑la̱ Nainá ꞌmì‑nò.
\v 4 Kì ꞌén tsaꞌa nokjoà, ko̱ ꞌén nchi̱kón, ko̱ ꞌén xi chꞌo tsò nga bijnòkeè xi̱ta̱. Jñà kjoa̱ koi, ti̱koa̱á mìkiì okꞌìn‑la̱ nga ko̱sꞌín ki̱nókjoa̱a. Tà saà kjo̱ndaà tjiì‑là Nainá.
\v 5 Jye tíjiìn‑nò nga mìkiì ko̱ma kjoa̱hasꞌen ñánda tíhotíxoma Cristo ko̱ Nainá, ngatsꞌiì xi̱ta̱ xi kjoa̱ chijngui sꞌín, xi kjoa̱ xi ꞌñó tjé sꞌín ko̱ nga maxìtakòn‑keè xíkjín. Jñà xi̱ta̱ xi kꞌoa̱sꞌín sꞌín, ta jñà kjoa̱ koi beèxkón nga nei‑la̱ ma.
\v 6 Kì yá xi̱ta̱ xi kona̱cha̱n‑nò xi ta̱xki̱ ꞌén béno̱jmí‑nò xi ni̱mé chjí‑la̱ i̱tꞌaà tsꞌe̱ jé koi. Ta jè nga̱tjì‑la̱ nga kjo̱ꞌin tsjá‑la̱ Nainá jñà xi̱ta̱ xi mìkiì ꞌnchréñijon‑la̱.
\v 7 Kì ya̱ tsjahijtako̱o xi̱ta̱ koi.
\p
\v 8 Jñò, nga sa̱ kjòtseé, jè kjo̱hítsjeèn‑nò tjíjñò‑la̱, ta̱nga i̱ꞌndei̱, jyeé iseèn titsa̱jnaà nga Na̱ꞌèn‑ná Jesucristo titsa̱jnako̱o. Kꞌoa̱á sꞌín ti̱jchá yijo‑nò koni sꞌín okꞌìn‑la̱ jñà xi̱ta̱ xi ya̱ títsa̱jna ñánda iseèn choòn.
\v 9 Kꞌe̱ nga kjoa̱ iseèn tíjiìn ini̱ma̱‑ná ndaà sꞌe̱én, ya̱ ki̱tjáyaá ndi̱yá kixi̱, koa̱ nguì ꞌén kixi̱ ki̱nókjoa̱á.
\v 10 Ti̱nchátsjioò mé kjo̱ndaà xi sasén‑la̱ Na̱ꞌèn‑ná.
\v 11 Kì ya̱ chingàjñoò kjoa̱ xi ni̱mé chjí‑la̱ koni sꞌín xi̱ta̱ xi tjíjñò kjo̱hítsjeèn‑la̱. Jñò, ta̱ saà ta̱kó nga kàtaꞌya‑la̱ nga mìkiì ndaà tjín kjoa̱ xi sꞌín.
\v 12 Skanda masobà‑ná nga nokjoá jñà kjoa̱ꞌma xi chꞌo tjín xi sꞌín jñà xi̱ta̱.
\v 13 Ni̱ta̱ mé kjoa̱‑ne xi si̱jna ñánda iseèn choòn, ni̱to̱ón beè xi̱ta̱ mé kjoa̱‑ne, a ndaà tjín, a xi mìkiì ndaà tjín. Nga jè kjoa̱ iseèn okó yije xi ndaà tjín ko̱ xi mìkiì ndaà tjín.
\v 14 Koií ko̱tsò‑ne ꞌén xi tsò:
\q Ngaji̱ xi titsa̱jnafì, ti̱kjaá‑la yijo‑lè.
\q Ti̱sítje̱n‑jiìn‑la̱ mikꞌen;
\q jè Cristo si̱ìhiseèn‑lè.
\p
\v 15 Ndaà ti̱kinda̱a koni sꞌín titsa̱nìjchá yijo‑nò; kꞌoa̱á sꞌín ti̱tsa̱jna koni xi̱ta̱ xi tjín‑la̱ kjoa̱chji̱ne̱; kì kꞌoa̱á ꞌnè koni sꞌín xi tsjìn‑la̱ kjo̱hítsjeèn.
\v 16 Ndaà ti̱kjeén na̱chrjein mé xi sꞌe̱en; nga na̱chrjein i̱ꞌndei̱, ꞌñó tjín kjoa̱ chꞌo.
\v 17 Kì chꞌo onguíko̱o kjo̱hítsjeèn‑nò; ndaà kàtachi̱ya‑nò mé xi mejèn‑la̱ Nainá.
\v 18 Kì xán ꞌyò, jè xán síkitsꞌón‑ná, tà sa̱á jè Ini̱ma̱ Tsjeè‑la̱ Nainá ndaà kàtasꞌen‑jiìn ini̱ma̱‑nò nga kàtakó‑nò ndi̱yá kixi̱.
\v 19 Chi̱ko̱o xinguio̱o ꞌén‑la̱ Nainá. Ti̱jndá‑là sò xi ꞌmì salmo, himno koa̱ ti̱jndá i̱jiìn ini̱ma̱‑nò jè xi okóya‑nò Ini̱ma̱ Tsjeè‑la̱ Nainá. Jeya ti̱kíjna Nainá nga ko̱ ini̱ma̱‑nò.
\v 20 I̱tꞌaà tsꞌe̱ ꞌín‑la̱ Na̱ꞌèn‑ná Jesucristo, na̱chrjein nchijòn tjiì‑là kjo̱ndaà Nainá xi Na̱ꞌèn‑ná ngatsꞌiì xi tsjá‑nò.
\s Kjoa̱ xi tjínè‑la̱ nga si̱ìkitasòn jñà xi̱ta̱ xꞌi̱n ko̱ jñà íchjín
\p
\v 21 Nangui titsa̱jna‑là xinguio̱o koni sꞌín yaxkón Cristo.
\p
\v 22 Jñò, íchjín xi xꞌi̱n tjín‑nò, nangui titsa̱jna‑là xꞌi̱n‑nò koni sꞌín nangui bìtsa̱jna‑là Cristo.
\v 23 Nga jè xꞌi̱n, jè xi sko̱ tíjna‑la̱ chjo̱ón, koni Cristo, jè xi sko̱‑la̱ na̱xa̱ndá‑la̱. Ko̱ jè Cristo xi ochrjekàjiìn kjo̱ꞌin na̱xa̱ndá‑la̱ nga ti̱jè‑ne yijo‑la̱.
\v 24 Koni jè na̱xa̱ndá‑la̱ Cristo nangui tíjna‑la̱, kꞌoa̱á ti̱sꞌín jñà íchjín, nangui kàtìjna‑la̱ xꞌi̱n‑la̱ ni̱ta̱ mé kjoa̱‑ne.
\p
\v 25 Jñò xi xꞌi̱n mì‑nò, ti̱tsjacha íchjín‑nò, koni jè Cristo matsjakeè na̱xa̱ndá‑la̱ nga jè kitsjaàtjì yijo‑la̱ nga kꞌen.
\v 26 Koií ko̱sꞌín kisꞌiìn‑ne nga tsjeè si̱ìkíjna na̱xa̱ndá‑la̱ nga nguixko̱n Nainá. Jè jaàxìn jé‑la̱ nga ko̱ ꞌén ndaà‑la̱ koni sꞌín xi̱ta̱ nga oníjno yijo‑la̱,
\v 27 mé‑nè nga ti̱jè ko̱kò‑ne nga tsjeè kji ko̱ ti̱jè skoétjò‑ne nga tsꞌe̱ ko̱ma, jngoò na̱xa̱ndá xi jeya tíjna, xi mì chꞌoó kji, mì tjíyó kji, mì tjé kji, jngoò kꞌa tsjeè kji, ko̱ ni̱mé jé tjín‑la̱.
\v 28 Ti̱koa̱á jè xꞌi̱n kàtamatsjakeè chjo̱ón‑la̱ koni sꞌín matsjakeè xi ti yijo tsꞌe̱‑ne; nga jè xi matsjakeè chjo̱ón‑la̱, ti̱jè‑ne yijo‑la̱ tímatsjakeè.
\v 29 Ni̱jngoò xi̱ta̱ xi ti̱jè beètoòn‑ne yijo‑la̱; ta sa̱á tsjá‑la̱ ngaꞌñó nga síkinda̱ yijo‑la̱ koni sꞌín jè Cristo nga síkinda̱ na̱xa̱ndá‑la̱.
\v 30 Nga jè na̱xa̱ndá‑la̱ ti̱jè‑ne yijo‑la̱; ko̱ jñá, ti̱koa̱á ya̱á nokjoàtꞌaà‑ná yijo‑la̱.
\v 31 Koií kjoa̱‑la̱ nga kꞌoa̱sꞌín tíchja̱ Xo̱jo̱n‑la̱ Nainá nga tsò: “Jè xꞌi̱n xi bixan si̱ìkíjna na̱ꞌèn‑la̱ ko̱ nea̱‑la̱ nga kíjnako̱ chjo̱ón‑la̱. Ingajò, tà jngoò xi̱ta̱ ko̱ma.”
\v 32 Jñà ꞌén koi, jngoò kjoa̱ xi ꞌñó ꞌin tjín skanda mìkiì fìya‑ná. Ta̱nga ꞌa̱n, jè tìsìkaxkia̱ Cristo ko̱ na̱xa̱ndá‑la̱.
\v 33 Kꞌoa̱á xan‑nò ngatsꞌioò nga jngoò ìjngoò, ti̱tsjacha íchjín‑nò koni sꞌín matsjacha yijo‑nò; ko̱ jè chjo̱ón kàteèxkón xꞌi̱n‑la̱.
\c 6
\s Kjoa̱ xi tjínè‑la̱ nga si̱ìkitasòn jñà i̱xti ko̱ xi̱ta̱ jchínga
\p
\v 1 Jñò xi i̱xti ꞌmì‑nò, ti̱náꞌyañijon‑là xi̱ta̱ jchínga‑nò nga Cristo titsa̱jnako̱o. Koií kjoa̱ xi kixi̱ tjín.
\v 2-3 Nga̱ tsò jè Xo̱jo̱n‑la̱ Nainá: “Jcha̱xkoín na̱ꞌèn‑lè ko̱ nea̱‑lè, mé‑nè nga ndaà ki̱jna‑ne koa̱ tseé ko̱ma‑lè i̱ i̱sòꞌnde.” Ngatsꞌiì kjo̱tíxoma xi kitsjaà Nainá, jè jèe̱ xi tsjá ítjòn jngoò‑la̱ kjo̱ndaà jñà xi̱ta̱ xi síkitasòn.
\p
\v 4 Jñò xi na̱ꞌèn ꞌmì‑nò, kì i̱xti‑nò nìjti‑là; kꞌoa̱á sꞌín ti̱jchá nga ndaà ti̱kixio̱o koa̱ ndaà ta̱kóya‑là koni sꞌín mejèn‑la̱ Na̱ꞌèn‑ná.
\s Kjoa̱ xi tjínè‑la̱ nga si̱ìkitasòn xi chi̱ꞌnda ꞌmì
\p
\v 5 Jñò xi chi̱ꞌnda maà, ndaà ti̱kitasòn‑là xi nei‑nò ma i̱ i̱tꞌaà nangui; ndaà jcha̱xkón nga tíjngoò takòn koni tsà xá tsꞌe̱ Cristo titsa̱ꞌnè.
\v 6 Ndaà ti̱xá‑là nei‑nò; mì tà kꞌe̱ ndaà nìxá kꞌe̱ nga tímakinda̱ nga tà jè nei‑nò ndaà ki̱tsa̱jnako̱o; kꞌoa̱á sꞌín tꞌe̱en koni tsà chi̱ꞌnda‑la̱ Cristo maà nga nguì ko̱ó ini̱ma̱‑nò ti̱xá koni sꞌín mejèn‑la̱ Nainá.
\v 7 Kꞌoa̱á sꞌín ti̱xá nga nguì ko̱ kjo̱tsja‑nò koni tsà xá‑la̱ Na̱ꞌèn‑ná titsa̱ꞌnè ko̱ mìtsà tsꞌe̱ xi ta̱xki̱ xi̱ta̱.
\v 8 Ndaà ꞌyaà nga jngoò ìjngoò xi̱ta̱, Nainá, kꞌoa̱á sꞌín tsjá‑la̱ chjí‑la̱ koni tjín xá xi sꞌín, na̱sꞌín xi̱ta̱ chi̱ꞌnda ko̱ xi mìtsà xi̱ta̱ chi̱ꞌnda.
\p
\v 9 Jñò xi nei‑la̱ xá ꞌmì‑nò, kꞌoa̱á ti̱sꞌín tjò tꞌe̱en chi̱ꞌnda‑nò. Kì ta̱xki̱ chítiko̱o chi̱ꞌnda‑nò nga mejèn‑nò kjo̱ꞌin bìnè‑là. Ndaà tíjiìn‑nò nga jè Nei‑la̱ xi̱ta̱ chi̱ꞌnda‑nò ko̱ jè Nei‑nò, ti̱jé‑ne xi tíjna ján ngajmiì. Nga jè, mìkiì faájiìn xi̱ta̱; tà ngásòn fìko̱.
\s Kjoa̱ xi tsjá‑la̱ ngaꞌñó ini̱ma̱‑ná
\p
\v 10 Jñò ꞌndseé, jñà kjoa̱ koi xi fehetꞌaà‑ne; kꞌoa̱á xán‑nò: Ti̱nchátsjioò ngaꞌñó tsꞌe̱ ini̱ma̱‑nò i̱tꞌaà tsꞌe̱ Na̱ꞌèn‑ná Jesucristo; ꞌñó ti̱tsa̱jnako̱o ngatsꞌiì ngaꞌñó xi ꞌñó tse tjín‑la̱ Cristo.
\v 11 \fig Roman soldier in armor- 33% EPH 6:11|65-lb00196c.tif|col|EPH 6:11||Jngoò soldado xi Roma chja̱‑ne|EPH 6.11\fig*Ti̱si̱ko̱ò yijo‑nò, chjoé yije ngaꞌñó xi tsjá‑nò Nainá mé‑nè nga tájaà titsa̱jna‑nò nga mì jè xi̱ta̱ nei̱í skóna̱cha̱n‑nò. Kꞌoa̱á ngaya‑la̱ koni jñà soldado nga ꞌya yije ki̱cha̱‑la̱ kꞌe̱ nga fì kjo̱jchán.
\v 12 Nga mìtsà jñà xi̱ta̱ i̱sòꞌnde titsa̱bixkán‑koa̱á. Jñà kondra̱‑ná xi xi̱ta̱xá ítjòn tjín‑la̱ i̱jiìn iseèn, jñà xi mìkiì tsejèn, ngatsꞌiì xi tjín‑la̱ kjo̱tíxoma tsꞌe̱ xi̱ta̱ nei̱í, koa̱ xi sko̱‑la̱ títsa̱jna nga jñà otíxoma i̱sòꞌnde jñò, ngatsꞌiì ngaꞌñó‑la̱ xi̱ta̱ nei̱í xi tjíma i̱jiìn i̱sén nga tíjtsa i̱sòꞌnde.
\p
\v 13 Koií ko̱xan‑nò, chjoé yije ngaꞌñó xi tsjá‑nò Nainá mé‑nè nga ꞌñó ki̱tsa̱jna‑nò jè na̱chrjein kꞌe̱ nga mejèn‑la̱ skóna̱cha̱n‑nò xi̱ta̱ nei̱í. Kꞌe̱ nga jye si̱kijneè, tákó kꞌoa̱á sꞌín kixi̱ ki̱ncha‑là ni̱ta̱ mé kjoa̱‑ne.
\v 14 Kꞌoa̱á sꞌín ꞌñó kixi̱ ti̱tsa̱jnandaà; nguì ꞌén kixi̱ ti̱nókjoa̱a mé‑ne nga ki̱tsa̱jnandaà kjoa̱ tsꞌe̱ xi̱ta̱ nei̱í koni sꞌín jñà soldado nga ꞌñó bíkjá xincho̱‑la̱ [mé‑ne nga mì si̱ìjti‑la̱ nikje‑la̱ kꞌe̱ fì kjo̱jchán]. Ko̱ nguì kixi̱ titsa̱jnaá nga nguixko̱n Nainá mé‑ne nga ndaà kójtsa ini̱ma̱‑nò koni jngoò soldado xi ndaà kijtsa ini̱ma̱‑la̱ jè chrjoa̱ xi ꞌmì coraza.
\v 15 Kjitꞌaà na̱chrjein titsa̱jnandaà nga si̱kaꞌbió ꞌén ndaà‑la̱ Nainá mé‑ne nga kàtasꞌe‑la̱ kjoa̱ꞌnchán jñà xi̱ta̱. Kꞌe̱ nga ko̱sꞌín sꞌe̱en, ꞌñó ki̱tsa̱jnaà koni jngoò soldado nga tjín‑la̱ ngaꞌñó xo̱xté‑la̱ nga ma fì.
\v 16 Kꞌe̱ nga ndaà mokjeiín‑nò i̱tꞌaà tsꞌe̱ Nainá, jè ko̱si̱ko̱‑nò xi kjoa̱ tsꞌe̱ xi̱ta̱ nei̱í kꞌe̱ nga jè bítꞌin‑nò nga binchaàtsjioò jé; kꞌoa̱á ngaya‑la̱ koni sꞌín jngoò soldado nga kjoé escudo‑la̱, jè xi síkitsꞌo niꞌín flecha xi títì‑la̱ xi̱ta̱ nei̱í.
\v 17 Jè kjoa̱ nga bitjokàjñoò kjo̱ꞌin, jè ngaya‑la̱ jè tsíꞌnguién ki̱cha̱ xi osìko̱ sko̱ soldado. Koa̱ jñà ꞌén ndaà‑la̱ Nainá jè ngaya‑la̱ ki̱cha̱ ndojò xi tsjá Ini̱ma̱ Tsjeè‑la̱ Nainá.
\v 18 Kì bìkjoàn‑là nga bìtsiꞌbà‑là Nainá; ti̱jétꞌaà kjitꞌaà‑là koni sꞌín béno̱jmíya‑nò Ini̱ma̱ Tsjeè‑la̱ Nainá. Kjitꞌaà na̱chrjein titsa̱jnandaà; kì nìhindaà‑jèn nga bìtsiꞌbatjiò ngatsꞌiì xi̱ta̱ na̱xa̱ndá‑la̱ Nainá.
\v 19 Ti̱koa̱ titsiꞌbatjì‑ná i̱tꞌaà tsꞌa̱n mé‑nè nga Nainá tsjá‑na ꞌén xi kichjà, koa̱ mé‑ne nga mìkiì tsakjoòn‑na kꞌe̱ nga kèno̱jmí‑la̱ xi̱ta̱ jè ꞌén ndaà‑la̱ Nainá xi kjoa̱ tsꞌe̱ Cristo xi ochrjekàjiìn‑ná kjo̱ꞌin mé‑ne nga ko̱ma skoe̱‑ne jè kjoa̱ꞌma xi tíjna‑la̱ Nainá skanda kjòtseé.
\v 20 Nainá kisìkasén‑na nga ꞌa̱n kichjà ngajo‑la̱ i̱tꞌaà tsꞌe̱ ꞌén ndaà‑la̱; koií kjoa̱‑la̱ nga nda̱yá tìjna̱aꞌya; sìjétꞌaà‑nò nga titsiꞌbatjì‑ná mé‑ne nga mì tsakjoòn‑na nga kèno̱jmiá ꞌén ndaà‑la̱.
\s ꞌÉn xi fehetꞌaà‑ne
\p
\v 21 Tìsìkasén‑nò jè ꞌndsé Tíquico jè xi matsjachaá, ti̱koa̱ ndaà síxá‑la̱ Nainá. Jè o̱ki̱tso̱ yije‑nò xi i̱tꞌaà tsꞌa̱n, kó sꞌín tìjna̱a, ko̱ mé xi tìsꞌiaàn.
\v 22 Koií xá tìsìkasén‑nò nga ke̱èno̱jmí‑nò xi i̱tꞌaà tsa̱je̱n kósꞌín titsa̱jna‑je̱n ko̱ mé‑ne nga kàtatsjá‑nò ngaꞌñó tsꞌe̱ ini̱ma̱‑nò.
\p
\v 23 Jè Nainá xi Na̱ꞌèn‑ná ko̱ jè Jesucristo xi otíxoma‑ná kàtasíkíjna ꞌnchán i̱jiìn ini̱ma̱‑nò ngatsꞌioò xi xinguia̱á chibá; kàtatsjá‑nò kjo̱ndaà nga tjòcha tꞌe̱en xinguio̱o, nga mokjeiín‑nò i̱tꞌaà tsꞌe̱ Nainá.
\v 24 Jè kjo̱ndaà‑la̱ Jesucristo xi otíxoma‑ná kàtìjnako̱ ngatsꞌiì xi̱ta̱ xi mìkiì síkjahatjìya‑la̱ kjo̱hítsjeèn‑la̱ nga kjitꞌaà na̱chrjein ndaà matsjakeè Na̱ꞌèn‑ná Jesucristo. Kꞌoa̱sꞌín kàtama.