\id PHP
\h Filipenses
\toc1 Filipenses
\mt Xa̱jo̱n ra tsikínda jè Pablo ra isìkasén‑la̱ xi̱ta̱ na̱xi̱ndá‑la̱ Cristo ra títsa̱jna ya̱ Filipos
\c 1
\s Kóꞌsín síhixoꞌta Pablo xi̱ta̱ Filipos
\p
\v 1 Ngaꞌtsì‑najiòn ra xi̱ta̱‑la̱ Nainá ma jiòn ra a̱ꞌta ꞌtse̱ Cristo Jesús, ra ya̱ titsa̱jna ya̱ na̱xi̱ndá Filipos, ko̱ jiòn ra nìkinda̱a na̱xi̱ndá‑la̱ Nainá, ko̱ jiòn ra ya̱ bisìko̱ꞌta‑te, ꞌkoa̱á ꞌsín nìhixoꞌta‑laji̱n ꞌa̱n Pablo ko̱ Timoteo ra chi̱ꞌndaꞌñó‑la̱ Jesucristo ma‑ji̱n.
\v 2 Nainá ra Na̱ꞌín‑ná ma ko̱ jè Jesucristo ra tíjna ítjòn‑ná katatsjá‑no kjo̱nda ko̱ kjo̱ꞌnchán ya̱ a̱jin inìma̱‑no.
\s Kóꞌsín nga tsjá‑la̱ kjo̱nda Nainá jè Pablo ra a̱ꞌta ꞌtse̱ xi̱ta̱ Filipos
\p
\v 3 ꞌKia̱ nga india india bítsjen‑na ra a̱ꞌta tsa̱jiòn‑jiòn, ꞌkoa̱á ꞌsín xin‑la̱ ꞌa̱n jè Nainá ra ꞌa̱n bexkon nga tse kjo̱nda kataꞌse‑la̱ ra jè.
\v 4 ꞌKia̱ nga ta mé hora‑ni nga chjàꞌtà‑la̱ Nainá ngi ko̱ó kjo̱tsja ra tjíjin inìma̱‑na̱ nga bitsáꞌba‑la̱ ra a̱ꞌta tsa̱jiòn‑jiòn.
\v 5 Nga̱ ndaá i̱nchibisìko̱ꞌtá‑nájiòn nga i̱nchiꞌbèna̱jmíya ꞌén xi̱tse̱ ra nda tsò a̱ꞌta ꞌtse̱ Cristo skanda ꞌkia̱ nga ti̱ꞌsa̱ kjokjiín‑nájiòn ko̱ skanda ꞌndi̱‑ni̱.
\v 6 Ijyeé ko̱ꞌsín kixi̱ tjín takoàa̱n nga jè Nainá ra ko̱ꞌsín ya̱ a̱ꞌta tsa̱jiòn tsikíꞌtsia̱ko̱ kjo̱nda‑la̱, ꞌkoa̱á ꞌsín nda si̱ìjngo xá‑la̱ skanda ꞌkia̱ nga jè ni̱chjin ꞌkia̱ nga kjꞌií india‑ni jè Jesucristo.
\v 7 Tjín‑na kjo̱hixi̱ nga ko̱ꞌsín síkítsjee̱n ra a̱ꞌta tsa̱jiòn‑jiòn ta nga̱tjì‑la̱ nga̱ ꞌñó tsjake̱‑no. Ko̱ i̱nchiníngásòn-ko̱‑nájiòn ngaꞌtsì‑no jè kjoa̱nda ra Nainá títsjá‑na ko̱ kjiꞌtá ni̱chjin nga nda i̱nchibisìko̱ꞌtá‑nájiòn a̱ꞌta ꞌtse̱ ꞌén xi̱tse̱‑la̱ Cristo ra nda tsò, mì tsa ta ꞌndi̱‑ni̱ nga nda̱yá tíjna̱ya; ti̱ꞌkoa̱á bisìko̱ꞌta‑te‑nájiòn ꞌkia̱ nga báse̱n‑tjìa̱ ko̱ nga bakoo̱n nga ngi ꞌén kixi̱‑ní.
\v 8 Ndaá be jè Nainá kóꞌki ꞌñó tsjake̱‑najiòn ngaꞌtsì‑no, koni ꞌsín tjín jè kjoa̱tsjacha ra jè Jesucristo kitsjá‑ná.
\v 9 ꞌKia̱ nga bitsáꞌba‑la̱ ꞌa̱n Nainá, kií kjoa̱ kìi̱ ra síjéꞌta‑la̱ ꞌa̱n: nga katamatse‑isa jè kjo̱tsjacha ra tjín‑nájiòn ko̱ katatsjá‑no kjoa̱chji̱ne̱ ko̱ nda katamachi̱ya‑no,
\v 10 mé‑ni nga ta jé kjón chjáajin jiòn jñà kjoa̱ ra isa̱ nda tjín. Ko̱ ꞌkoa̱á ꞌsín tsje ki̱tsa̱hijyo ko̱ ni̱mé jé sa̱kò ra a̱ꞌta tsa̱jiòn jè ni̱chjin ꞌkia̱ nga kjꞌi̱í india‑ni Cristo,
\v 11 nga a̱ꞌta tsa̱jiòn kataꞌya‑la̱ kjoa̱ ra kixi̱ tjín ra a̱ꞌta ꞌtse̱ Cristo nchrabá‑ni mé‑ni nga jè Nainá jeya ko̱ ꞌnga kíjna‑ni.
\s Jè kjo̱binachon jè Cristo‑ní
\p
\v 12 Jiòn ndí ꞌndsé ko̱ ndí tichjeé ra makjiín‑no a̱ꞌta ꞌtse̱ Cristo, mején‑na nga nda katasijin‑no, nga ngaꞌtsì kjoa̱ ra tímaꞌtiaa̱n; ta isa̱á jnchro jñà títsjá ngaꞌñó‑isa nga nda tímabísòn‑isa jè ꞌén xi̱tse̱ ra nda tsò a̱ꞌta ꞌtse̱ Cristo.
\v 13 Nga̱ ngaꞌtsì chíchàn ra síkonda̱ ya̱ niꞌya masen ko̱ ngaꞌtsì xi̱ta̱ ra iꞌka, ꞌkoa̱á ꞌsín ijye i̱nchibe nga kií nda̱yá tíjna̱ꞌya‑na ta nga̱tjì‑la̱ nga Cristo síxáꞌta‑la̱.
\v 14 Jñà ꞌndsé ko̱ tichjeé, ꞌkia̱ nga i̱nchibe nga nda̱yá tíjna̱ꞌya; kjín ma‑ni ra ꞌñó i̱nchiꞌbé‑la̱ ikon ra a̱ꞌta ꞌtse̱ Na̱ꞌín‑ná, mì tsa i̱nchitsakjón‑jìn, ta isa̱á i̱nchisítáhijín ijo‑la̱ nga i̱nchisíkaꞌbísòn jè ꞌén‑la̱ Nainá.
\p
\v 15 Kixi̱í kjoa̱, tjín iꞌka xi̱ta̱ ra ꞌbéna̱jmíya‑te a̱ꞌta ꞌtse̱ Cristo, tanga ta kjoa̱chi̱ni̱‑ní nga ko̱ꞌsín ꞌsín, nga̱ ta jé ra mejèn‑la̱ nga isa̱ nda si̱ìkítsa̱hijyo ijo‑la̱ nga isa̱ kjìn ko̱ma xi̱ta̱‑la̱. Tanga tjín‑te xi̱ta̱ ra xá nda tjín‑ni inìma̱‑la̱ ꞌkia̱ nga ko̱ꞌsín i̱nchiꞌbéna̱jmíya,
\v 16 nga ko̱ó kjo̱tsjacha‑la̱ nga chja̱ ra a̱ꞌta ꞌtse̱ Cristo. Ijyeé be‑ní nga kií xá i̱ isíkíjna‑na Nainá ya̱ a̱ya nda̱yá, mé‑ni nga ꞌa̱n kóse̱n‑tjìa̱ jè ꞌén xi̱tse̱ ra nda tsò a̱ꞌta ꞌtse̱ Cristo kóꞌsín nga kixi̱ tjín.
\v 17 Tanga jñà xi̱ta̱ ra iꞌka, ꞌkia̱ nga ko̱ꞌsín ꞌbéna̱jmíya ra a̱ꞌta ꞌtse̱ Cristo, ta ijo‑la̱á ra ko̱ i̱nchisíko̱, ta jé ra mejèn‑la̱ nga jñà nda si̱ìkítsa̱jna xi̱ta̱ ko̱ mì tsa ngi kixi̱ tjín‑ni ikon nga ko̱ꞌsín ꞌsín; ꞌkoa̱á ꞌsín mejèn‑la̱ nga katatse‑isa kjo̱hiꞌin ra ijye tísikjiáa̱n nga tíjna̱ꞌya nda̱yá.
\v 18 Tanga, ¿mé ra ko̱ma‑la̱? Ni̱ꞌsín ta kóꞌsín nga tíꞌsena̱jmíya jè ꞌén nda‑la̱ Cristo, a ngi ko̱ó kjo̱hixi̱‑la̱ nga i̱nchiꞌbéna̱jmíya o̱ ra mí tsa ngi ko̱ kjo̱hixi̱‑la̱, takó ꞌñó matsja‑na nga ko̱ꞌsín tíma.
\p Ko̱ isa̱á ta ꞌñó ko̱tsja‑isa‑na nga tífì ni̱chjin,
\v 19 nga̱ ijyeé be‑ná, tsa ko̱ꞌsín tíma, tsó‑ni kjoa̱ nga maá kóti̱jnandi̱í‑na kjo̱hiꞌin ra tíbatojiàa̱n, ta nga̱tjì‑la̱, nga̱ ꞌkoa̱á ꞌsín i̱nchibitsaꞌbatjí‑nájiòn ko̱ ꞌkoa̱á ꞌsín tíbasìko̱‑na jè Inìma̱ Tsje‑la̱ Nainá ra a̱ꞌta ꞌtse̱ Jesucristo nchrabá‑ni.
\v 20 ꞌKoa̱á ꞌsín ꞌñó mejèn‑na, ko̱ ꞌkoa̱á ꞌsín tíkoñáa̱ nga mì tsa mé kjo̱sabà sa̱kò‑na ra a̱ꞌta ꞌtse̱ Nainá; ta isa̱á jnchro mì tsa tsakjon jiàa̱n kóꞌsín nga kichjàa̱, koni ꞌsín nga tíꞌsin kiꞌta, mé‑ni jè Cristo jeya kíjna‑ni ta mé ra ko̱maꞌtiaa̱n, a kóti̱jnakoón‑isa o̱ ra ki̱yá‑náa̱.
\v 21 Nga̱ tsa kóti̱jnakon‑isa, ta a̱ꞌta ꞌtse̱ Cristo‑ní nga kóti̱jnakon‑na, ko̱ tsa ki̱yáa̱, ta sikíjnesón‑isa jnchro.
\v 22 Tanga tsa ndaá tjín xá ra ꞌsin‑isa a̱ꞌta ꞌtse̱ Nainá ꞌkia̱ nga tíjna̱kon‑isa, ya̱á jndáa̱ mì kì be mé ra ꞌsiaa̱n.
\v 23 ꞌÑó chjá ma‑na, mì kì be ñáa̱ ra kjoahíjiaa̱n ta ngajò kjoa̱ kìi̱; mején‑na tsa tsjaá ijye katìyaa̱ mé‑ni nga ya̱ íkáti̱jnako̱‑na jè Cristo ya̱ ján ngajmi, nga̱ be‑náa̱, isa̱á ta nda tjín tsa ko̱ꞌsín ko̱ma.
\v 24 Tanga ta nga̱tjì‑la̱ ra kjo̱nda tsa̱jiòn‑jiòn, isa̱á machjeén nga kóti̱jnakon‑isa i̱ i̱sàꞌnde.
\v 25 ꞌKia̱ nga ijye tjíjngo takoàn nga ꞌkoa̱ ꞌsín isa̱ nda tjín, be‑ná nga takó kóti̱jnakoón‑isa, ko̱ ya̱á kóti̱jnako̱‑najiòn mé‑ni nga kósi̱ko̱o‑no nga isa̱ ꞌñó kixi̱ katamakjiín-isa‑no ko̱ katasakó‑no kjoa̱tsja a̱ꞌta ꞌtse̱ kjoa̱ makjiín‑no,
\v 26 mé‑ni nga ꞌkia̱ ska̱jin india‑ná xàngie̱é, batoó tsja ꞌse̱‑najiòn koni ꞌsín nga kiꞌsìn Cristo nga tsasìko̱‑na.
\s Nga ꞌkoa̱á ꞌsín si̱jché ijo‑ná koni ꞌsín tsò ꞌén xi̱tse̱‑la̱ Nainá
\p
\v 27 Ni̱ꞌsín ta mé ra katama, jè ra machjeén nga ꞌkoa̱á ꞌsín ꞌtia̱àn jiòn koni ꞌsín nga bakèn‑la̱ nga ꞌsi̱in jñà xi̱ta̱ ra makjiín‑la̱ ꞌén xi̱tse̱‑la̱ Cristo ra nda tsò. ꞌKoa̱á ꞌsín ꞌtia̱àn jiòn tsa íkatsíjen‑no o̱ ra mí íkatsíjen‑no; jè ra mejèn‑na nga kjiꞌnchrè ra a̱ꞌta tsa̱jiòn‑jiòn nga kixi̱í titsa̱jna jiòn nga i̱nchibixkàn‑tjiò koni ꞌsín nga makjiín‑ná ra a̱ꞌta ꞌtse̱ ꞌén xi̱tse̱‑la̱ Cristo ra nda tsò.
\v 28 Ko̱, kì tà chjàn biꞌnde jiòn nga jñà mincháxkón‑no xi̱ta̱ ra kondra̱ fì‑no. Jñà xi̱ta̱ kìi̱, ya̱á ske̱‑ni ra jñà, nga ta ya̱á jchi̱ja; tanga ra a̱ꞌta tsa̱jiòn‑jiòn, ya̱á nda jcha̱‑la̱ nga kítjo̱kajin‑no kjo̱hiꞌin a̱ꞌta ꞌtse̱ jé‑no. Ko̱ jñà kjoa̱ kìi̱ ra ko̱ꞌsín o̱ko̱ma, a̱ꞌta ꞌtse̱ Nainá nchrabá‑ni.
\v 29 ꞌKoa̱á ti̱ꞌsín tjín kjoa̱nda ra ijye kiꞌtsì‑najiòn, nga mì tsa ta jè‑jìn nga ta katamakjiín‑najiòn ra a̱ꞌta ꞌtse̱ Cristo, ti̱ꞌkoa̱á skanda ska̱jiín‑te jiòn kjo̱hiꞌin ra a̱ꞌta ꞌtse̱.
\v 30 Nga̱ takó ꞌkoa̱á ꞌsín tjín kjo̱si ra tíchíkjoa̱jin‑najiòn koni ꞌsín tjín kjo̱si ra kijcha jiòn nga kísikjiáa̱n ra ꞌa̱n, ko̱ takó tísikjín‑náa̱ kjo̱hiꞌin koni ꞌsín nga naꞌyá jiòn.
\c 2
\s Kóꞌsín nga ꞌñó nangi iníkíjna jè Cristo nga ꞌsa̱ ítjòn ko̱ nga jeyaá iníkíjna‑ni ra ma a̱skan
\p
\v 1 ꞌNdi̱‑ni̱ nga ijye tjín‑najiòn kjoa̱jetakòn ra a̱ꞌta ꞌtse̱ Cristo, ko̱ nga ijye ko̱ kjoa̱tsjacha‑la̱ ma nìjetakòn‑no, nga ijye nda titsa̱jtín‑ko̱o jè Inìma̱ Tsje‑la̱ Nainá, nga ijye tjín‑no jngo kjoa̱tsjacha ra ngi inìma̱‑no nchrabájin‑ni, ko̱ nga ijye tjín‑no kjo̱hi̱ma̱takòn,
\v 2 ꞌkoa̱á ma‑ni, ti̱jngoko̱o jiòn jè kjo̱tsja ra tjín‑na nga ko̱ꞌsín ngásòn nda ti̱jngo kjo̱bítsjen‑no, nga ko̱ꞌsín‑te ngásòn jngo kjo̱tsjacha kataꞌse‑no nga jngó jngó‑no, ko̱ ngi ta jngo inìma̱ kataꞌse‑no nga ti̱tsa̱jtión, ko̱ ngi ta jngoó kjo̱bítsjen tangió.
\v 3 Kì ni̱mé kjoa̱ ꞌnià jiòn ra ta jè ijo‑no ꞌnga si̱kítsa̱jna, ko̱ nga nda ki̱náchrjengi‑no; ta isa̱á nangií ti̱kítsa̱jna jiòn ijo‑no ko̱ ꞌkoa̱á ꞌsín ti̱kítsjen jiòn koni tsa isa̱ ꞌñó xkón títsa̱jna ra iꞌka koni ra jiòn‑jiòn.
\v 4 Kì tà jè níkájno ra kjo̱nda tsa̱jiòn; ta isa̱á jnchro jñà ti̱kájno mé kjo̱nda ra chija‑la̱ ra kjꞌií xi̱ta̱.
\v 5 ꞌKoa̱á ti̱ꞌsín jè kjo̱bítsjen kataꞌse‑najiòn koni jè kjo̱bítsjen ra tjín‑la̱ Jesucristo.
\v 6 Nga̱ ni̱ꞌsín jè Cristo jè sabá Nainá, mì tsa jè kjo̱ꞌñó kjomejèn‑la̱ nga ko̱ꞌsín tsikijna koni tsa Nainá.
\v 7 Ta isa̱á ꞌkoa̱á ꞌsín kitsjà‑la̱ ikon nga ꞌñó nangi isíkíjna ijo‑la̱, ko̱ ꞌkoa̱á ꞌsín isíkíjna ijo‑la̱ koni tsa jngo ndí xi̱ta̱ ra chi̱ꞌndaꞌñó tíjna, ko̱ ꞌkoa̱á ꞌsín ꞌki kjomà koni ngaꞌtsì ra xi̱ta̱ i̱sàꞌnde.
\v 8 ꞌKia̱ nga tsikijna i̱ i̱sàꞌnde koni tsa taxki̱ xi̱ta̱, ti̱jé ꞌñó nangi isíkíjna‑ni ijo‑la̱; ndaá isìhitjasòn skanda iniꞌken‑ní, ko̱ skanda krò ꞌkenꞌta [koni tsa jngo xi̱ta̱ ra ꞌñó ꞌcho kiꞌsìn].
\v 9 ꞌKoa̱á ma‑ni nga jè Nainá taxki̱ ꞌñó ꞌnga isíkíjna ítjòn, nga̱ jè tíjna ítjòn‑la̱ ta yá‑isa‑ni; ko̱ ꞌkoa̱á ꞌsín Nainá kitsjá jngo‑la̱ xá ítjòn ra isa̱ ꞌñó ꞌnga tíjna koni ta ñáa̱‑isa‑ni xá ra ꞌse‑la̱ xi̱ta̱,
\v 10 mé‑ni ngaꞌtsì‑ni ra ya̱ tjítsa̱jna ya̱ ján ngajmi, ngaꞌtsì ra tjítsa̱jna i̱ a̱ꞌta nangi ko̱ ngaꞌtsì ra tjítsa̱jna ya̱ a̱jin nangi katinchaxkóꞌnchi nga katabexkón jè Jesús.
\v 11 Nga ko̱ꞌsín katatsjá ꞌén‑la̱ nga jè Jesucristo ra tíjna ítjòn‑ná, mé‑ni nga jeya katijna‑ni jè Nainá ra Na̱ꞌìn ꞌmí‑lá.
\s Kóꞌsín tjínè‑la̱ nga katatsíjen jiòn
\p
\v 12 ꞌKoa̱á ma‑ni, jiòn ndí ꞌndsé ra ꞌñó tsjake̱‑no, koni ꞌsín nga nda i̱nchinitjasòn kiꞌta jiòn, ko̱ mì tsa ta ꞌkia̱‑jìn ꞌkia̱ nga ya̱ tíjna̱ko̱ kjòn‑no; isa̱á nda ti̱hitjasòn‑isa jiòn ꞌkia̱ nga mì tsa ya̱ tíjna̱ko̱‑no; tinè‑la ijo‑no nga nda kjòn kataꞌya kiꞌta‑la̱ nga jè Nainá ijyeé tsachrjekàjin‑no kjo̱hiꞌin ra ꞌtse̱ jé‑no ko̱ ni̱chjin nchijón‑ní ti̱skón‑ya.
\v 13 Nga̱ jé Nainá‑ní ra ko̱ꞌsín síkjinchrabájin inìma̱‑najiòn ꞌkia̱ nga mejèn‑no mé ra ꞌnià, ko̱ jè síchi̱ya‑no ꞌkia̱ nga mé kjoa̱ ra ꞌnià jiòn, mé‑ni nga katitjasòn‑ni kjoa̱ ra nda tjín ra jè mejèn‑la̱.
\p
\v 14 ꞌKia̱ nga mé ra ꞌsia̱an jiòn, kì tà chjàn ta i̱nchitsjajé kiꞌta ko̱ kì tà mé ra chitiya‑no,
\v 15 mé‑ni nga ni̱mé jé katasakó‑ni ra a̱ꞌta tsa̱jiòn ko̱ ti̱ꞌkoa̱á ngi tsjeé katijna inìma̱‑no nga ngi i̱xti‑la̱ Nainá ra tsje títsa̱jna katama jiòn ya̱ a̱jin‑la̱ xi̱ta̱ ra ta ngakjá fìko̱ kjo̱bítsjen‑la̱ ko̱ ra ꞌcho ꞌsín. Ko̱ ya̱á kataꞌya‑la̱ kjoa̱tsje‑najiòn koni jngo nitse ra fate tsijen ya̱ ñánda̱ nga jñò chon.
\v 16 Jiòn jiòn, jngoó ꞌén nda ra tsjá kjo̱binachon i̱nchibakon‑la jiòn. ꞌKoa̱á ma‑ni, ꞌkia̱ nga kjꞌi̱í jè Cristo, ꞌñó tsja ꞌse̱‑na nga mì tsa ta kjo̱tjò‑ni nga ko̱ꞌsín tsàjmesòo̱n nga kísikáꞌbía̱ jè ꞌén nda‑la̱ Cristo, ko̱ mì tsa ta kjo̱tjò‑ni nga ko̱ꞌsín ta ꞌñó kisíxáa̱.
\v 17 Jè kjo̱hiꞌin ra i̱nchinikjiín jiòn ra ta nga̱tjì‑la̱ nga makjiín‑no a̱ꞌta ꞌtse̱ Cristo ꞌkoa̱á jngoya‑la̱ koni tsa jngo kjo̱tjò i̱nchinìnga̱tsja jiòn Nainá. Ko̱ jè kjo̱hiꞌin ra tísikjiáa̱n ti̱ꞌkoa̱á jè jngoya‑la̱ jngo kjo̱tjò ra ya̱ tísíjngoko̱ kjo̱tjò ra jiòn i̱nchiꞌbì‑la Nainá; ꞌkoa̱á ma‑ni nga ko̱ꞌsín ꞌñó matsja‑na ko̱ skanda ya̱á sijngó‑ko̱ kjo̱tsja‑na̱ ko̱ kjo̱tsja ra tjín‑najiòn.
\v 18 ꞌKoa̱á ti̱ꞌsín ꞌñó tsja kataꞌse‑najiòn, ko̱ katajngo kjo̱tsja ra tjín‑najiòn ko̱ kjo̱tsja tsa̱ꞌa̱n.
\s A̱ꞌta ꞌtse̱ Timoteo
\p
\v 19 ꞌKoa̱á ꞌsín koñáa̱ tsa jè Jesús ra tíjna ítjòn‑ná ko̱ꞌsín mejèn‑la̱ nga ndi̱to̱n sikásén‑najiòn jè Timoteo, mé‑ni nga ti̱ꞌkoa̱ kataꞌñó‑ni takoàa̱n ꞌkia̱ nga kjiꞌnchrè kóꞌsín titsa̱jna jiòn.
\v 20 Nga̱, mì tsa ti̱ yá tjín‑isa‑ni ra ko̱ꞌsín mangásòn‑ko̱ kjo̱bítsjen‑na̱ koni jè Timoteo ra ngi kixi̱ kiti kjoa̱ ra síkájno a̱ꞌta tsa̱jiòn.
\v 21 Ngaꞌtsì xi̱ta̱ ra kjꞌií, sabà ta kjo̱nda ꞌtse̱é bátsji, ko̱ mì tsa jñà bátsji kóꞌsín nga síhitjasòn‑la̱ Cristo Jesús.
\v 22 Tanga ijyeé nda ꞌya jiòn kóꞌsín nga kixi̱ ꞌsín jè Timoteo, nga ꞌñó nda tíbasiko̱ꞌta‑na nga tíꞌbéna̱jmíya jè ꞌén xi̱tse̱ ra nda tsò a̱ꞌta ꞌtse̱ Cristo; ꞌkoa̱á ꞌsín tíꞌsín koni ꞌsín basìko̱ꞌta jngo ti jè ra na̱ꞌìn‑la̱ ma.
\v 23 ꞌKoa̱á ꞌsín koñáa̱ nga jé sikásén ndi̱to̱n‑najiòn, ꞌkia̱ nga ijye skee̱ kóꞌsín fì kjoa̱‑na̱.
\v 24 ꞌÑó tjín takoàn ra a̱ꞌta ꞌtse̱ Na̱ꞌín‑ná nga ti̱ꞌkoa̱á ndi̱to̱ón kijchòjkon sabà‑te‑najiòn.
\s A̱ꞌta ꞌtse̱ Epafrodito
\p
\v 25 Ti̱ꞌkoa̱á, ꞌkoa̱á ma‑na nga nda‑la tjín nga sikásén india‑najiòn jè ndí ꞌndsé Epafrodito, jè ra nda tíbasiko̱ꞌta‑na ko̱ ti̱ꞌkoa̱ nda tíbáhijtako̱‑na kjoa̱ ra i̱nchibixkàn‑tjì‑ji̱n; jè ra jiòn sabà inikasén jiòn, mé‑ni nga jè sko̱òtsíjen‑ni ngaꞌtsì mé ra chijaꞌta‑na.
\v 26 Batoó bátsji‑la̱ inìma̱‑la̱ ra a̱ꞌta tsa̱jiòn‑jiòn ko̱ batoó ba tjín‑la̱, ta nga̱tjì‑la̱ be‑ní nga ijyeé inaꞌyá jiòn a̱ꞌta ꞌtse̱ ꞌchin ra iskaꞌta‑la̱.
\v 27 Kixi̱ kitií kjoa̱ ꞌñó kjokiya, skanda kja̱meé ꞌken; tanga jè Nainá kjòhi̱ma̱ke‑ní, ko̱ mì tsa ta jè ra kjòhi̱ma̱cha, ti̱ꞌkoa̱á kjòhi̱ma̱keé‑te‑na Nainá ra ꞌa̱n, mé‑ni nga mì ti̱ kjo̱ba katasakó-isa‑na ra ꞌa̱n.
\v 28 ꞌKoa̱á ma‑ni nga ndi̱to̱n kjòn‑ní nga tísikásén‑najiòn, mé‑ni nga tsja kataꞌse‑najiòn ꞌkia̱ nga jcha̱ india‑no, ko̱ ti̱ꞌkoa̱á ra ꞌa̱n, mì tsa ti̱ mé ra ꞌñó síkájno‑na ra a̱ꞌta tsa̱jiòn.
\v 29 Ngi ko̱ó kjo̱tsja‑najiòn nga nda ti̱sin‑la ꞌkia̱ nga ki̱jchò koni ꞌsín nga bakèn‑la̱ jngo xi̱ta̱ ra makjiín‑la̱ a̱ꞌta ꞌtse̱ Cristo; ko̱ ko̱ꞌsín nda jcha̱xkón kiꞌta jiòn jñà xi̱ta̱ ra ko̱ꞌsín ꞌsín‑te koni jè Epafrodito.
\v 30 Nga̱ ta kií nga̱tjì‑la̱ nga jè xá‑la̱ Cristo tíꞌsín ꞌkia̱ nga ko̱ꞌsín kja̱me ꞌken; kitsjá‑la̱ ikon nga ni̱ꞌsín katiya mé‑ni nga ma si̱hitjasòn‑ni jè xá ra mì kì ma tsisìko̱ꞌtá‑nájiòn.
\c 3
\s Ngaꞌtsì kjoa̱ ra tjín a̱ꞌta ꞌtse̱ Cristo
\p
\v 1 Ra fì‑isa jiòn ndí ꞌndsé ko̱ ndí tichjeé, jè‑ní nga tsja kataꞌse‑najiòn ra a̱ꞌta ꞌtse̱ Na̱ꞌín‑ná. Mì tsa masi‑na ra ꞌa̱n ni̱ꞌsín ti̱ꞌkoa̱ ti̱ꞌsín tsò‑ni ꞌén ra kindá india‑najiòn koni ꞌsín tsò ra a̱sa ítsikindá‑no, nga̱ kjo̱nda tsa̱jión‑nó koni ꞌsín nga tíxian‑no.
\v 2 Ti̱kinda̱a ijo‑no a̱ꞌta ꞌtse̱ xi̱ta̱ ꞌcho ra ngi ta kjoa̱ ꞌtse̱ ni̱í‑ní ra ꞌsín ra kjo̱ꞌñó mejèn‑la̱ nga bateꞌta ijo‑la̱ xi̱ta̱ nga bíꞌta chi̱ba̱.
\v 3 Jién‑nájién ra ngi kixi̱ kjoa̱ nga tjíꞌta chi̱be̱é mé‑ni nga ꞌya‑la̱ nga xi̱ta̱‑la̱ Nainá ꞌmì‑ná. Ko̱ jién‑ná ra ngi ko̱ ngaꞌñó ꞌtse̱ Inìma̱ Tsje‑la̱ Nainá nga ꞌyaxkén ra jè; ko̱ ꞌñó matsja‑ná a̱ꞌta ꞌtse̱ Cristo Jesús nga̱ mì tsa jñà kjiꞌtatakén kjoa̱ ra ꞌtse̱ ijo‑ná.
\v 4 ꞌA̱n, mì tsa kjoa̱ ꞌtse̱ ijo‑na̱ kjiꞌtatákon, ni̱ꞌsín kjìn sko̱ya kjo̱nda ra kiꞌse‑na. Tsa tjín iꞌka xi̱ta̱ ra jè maꞌñóꞌta takòn kjo̱nda ra tjín‑la̱, tanga ra ꞌa̱n isa̱á tse kjo̱nda tjín‑na ra ma ko̱ꞌñóꞌta takoàa̱n, tanga mì tsa ko̱ꞌsín tíꞌsiaa̱n.
\v 5 Kjo jin ni̱chjin tjín‑na ꞌkia̱ nga isiꞌta chi̱ba̱ ijo‑na̱ a̱ꞌta ꞌtse̱ kjoa̱ ꞌtse̱ circuncisión. Xi̱ta̱ israelita‑ná ra ꞌa̱n, ya̱á nchrabá‑ni tje̱‑na̱ a̱ꞌta ꞌtse̱ xi̱ta̱ ra tsiꞌkìn Benjamín. Ngi xi̱ta̱ Hebreo‑ná ra ꞌa̱n, nga̱ xi̱ta̱ Hebreo jñà xi̱ta̱ jchínga‑na̱. Ko̱ xi̱ta̱ fariseo kjomà ra ꞌa̱n, ꞌkoa̱á ꞌsín nda kjòn ísihitjásòo̱n ngaꞌtsì kjo̱téxoma ꞌtse̱ xi̱ta̱ judío.
\v 6 Batoó ꞌñó nda tsakaꞌtá ikon jñà kjo̱téxoma ꞌtse̱ xi̱ta̱ jchínga‑na̱ skanda ítsangatji̱ngií‑la̱ jñà ra xi̱ta̱ na̱xi̱ndá‑la̱ Cristo ma. Koni ꞌsín tjín kjo̱téxoma ꞌtse̱ xi̱ta̱ judío nga kóꞌsín nga kixi̱ si̱jché ijo‑ná, ꞌa̱n, ni̱yá ra ma tsatéꞌta‑na.
\v 7 Tanga ngaꞌtsì kjoa̱ ra ko̱ꞌsín kíxian‑la̱ nga ꞌsa̱ ítjòn nga ꞌñó chjí‑la̱; ꞌndi̱‑ni̱ mì tsa ti̱ mé chjí‑la̱ ra a̱ꞌta tsa̱ꞌa̱n, ta nga̱tjì‑la̱ nga jè Cristo tsjake̱ ꞌndi̱‑ni̱.
\v 8 Ta ngaꞌtsì kjoa̱ kìi̱, mì kì ti̱ mé tjín‑ni ra isa̱ ꞌñó chjí‑la̱ koni jè kjo̱nda ra tísakó‑na ꞌndi̱‑ni̱ nga tíbexkon Cristo Jesús ra tíjna ítjòn‑na. Ta nga̱tjì ꞌtse̱ Cristo, ijyeé ítsachrjéngi ijye‑náa̱ ngaꞌtsì kjoa̱ ra ꞌa̱n kjóꞌñóꞌta takoàa̱n, ko̱ ꞌndi̱‑ni̱ ta tjé betákon‑isa, mé‑ni nga ngi ta jè Cristo kjín-tji̱ngi‑la̱,
\v 9 ko̱ mé‑ni nga ma ya̱ nda kóti̱jnako̱‑na ra jè. Mì tsa ta kjo̱nda tsa̱ꞌa̱n‑jìn ko̱ mì tsa ki‑ni nga nda sìhitjásòo̱n kjo̱téxoma nga xi̱ta̱ kixi̱ kítjo̱ngiaa̱ ya̱ ngixko̱n Nainá, ta ki‑ní nga a̱ꞌta ꞌtse̱ Cristo makjiín‑na. Jè Nainá‑ní ra xi̱ta̱ kixi̱ ꞌsín‑na ta nga̱tjì‑la̱ nga makjiín‑na.
\v 10 Jé ra mejèn‑na nga isa̱ nda skexkon‑isa jè Cristo, ko̱ ti̱ꞌkoa̱ ske jè ngaꞌñó ra kiꞌse‑la̱ ꞌkia̱ nga jaáya india‑la̱; nga ko̱ꞌsín ti̱jè kjo̱bítsjen kataꞌse‑na koni jè Cristo ꞌkia̱ nga kisìkjiín kjo̱hiꞌin ko̱ skanda ꞌkia̱ nga kinìꞌken,
\v 11 mé‑ni nga ko̱ꞌsín ko̱ma kjoa̱áya‑na a̱ꞌta ꞌtse̱ kjo̱biya.
\s Ya̱á ngajmi nakjoá‑ná
\p
\v 12 Tanga mì tsa tsò‑ni kjoa̱ nga ijye ijchòo̱ ñánda̱ nga mejèn‑na nga kijchòo̱ ko̱ tsa mì ti̱ mé ra chijaꞌta-isa‑na; ta isa̱á jnchro ꞌñó tíbiné-isa‑la̱ ijo‑na̱ nga kijchòtji̱ngi‑la̱ mé kjoa̱ kjòn‑ni ra tjínda‑la̱ jè Cristo Jesús ꞌkia̱ nga ko̱ꞌsín ijchòtji̱ngi‑na.
\v 13 Jiòn ndí ꞌndsé ko̱ tichjeé, mì tsa ko̱ꞌsín síkítsjen jiàa̱n, tsa ijyeé ꞌñó nda bexkoo̱n ra jè Jesús. Tanga jngoó kjoa̱ ꞌsiaa̱n, sijcháhajin ijye‑náa̱ ngaꞌtsì kjoa̱ ra ijye tsato ko̱ ta jè tíbiné‑la̱ ijo‑na̱ nga kijchòtji̱ngi‑la̱ kjo̱nda ra ꞌsa̱ nchrabá.
\v 14 Jè tjíya skoàa̱ nga kijchòo̱, kóo nda sikíjne jè kjo̱tjò ra a̱ꞌta ꞌtse̱ Cristo si̱ìnga̱tsja‑na Nainá koni ꞌsín nga xá kiìchja̱‑na ján ngajmi.
\p
\v 15 ꞌKoa̱á ma‑ni, ngaꞌtsí‑ná ra ijye nda makjiín kixi̱‑ná ra a̱ꞌta ꞌtse̱ Nainá, machjeén‑ní nga ꞌkoa̱ ti̱ꞌsín si̱kítsjeén. Ko̱ tsa isa̱ kjꞌií ꞌsín bítsjen iꞌka‑najiòn, jè Nainá si̱ichi̱ya nda‑no kóꞌsín nga si̱kítsjen.
\v 16 Tanga jè ra ꞌñó machjeén, nga ꞌkoa̱á ꞌsín si̱jché ijo‑ná koni ꞌsín nga ijye machi̱ya‑ná skanda ꞌndi̱‑ni̱.
\p
\v 17 Jiòn ndí ꞌndsé ko̱ tichjeé, ko̱ꞌsín ꞌtia̱àn jiòn koni ꞌsín nga tísíjchá ijo‑na̱ ra ꞌa̱n, ko̱ jñà chjíngi‑la ra ko̱ꞌsín i̱nchisíjchá ijo‑la̱ koni ꞌsín tjín xkósòn ra ji̱n i̱nchiꞌbi‑laji̱n.
\v 18 Nga̱ ꞌñó kjìn ma‑ni xi̱ta̱ ra ko̱ꞌsín i̱nchisíjchá ijo‑la̱ nga kondra̱ tjíhijyo‑la̱ koni ꞌsín nga tíꞌsena̱jmíya nga kóꞌsín isiꞌta krò jè Cristo, koni ꞌsín nga ijye kjokjìn ꞌka̱ ko̱xian‑no, ko̱ ꞌndi̱ ꞌndi̱ ngi ko̱ó ndáxkoaa̱n nga india ko̱tíxian‑no.
\v 19 Tanga jñà xi̱ta̱ kìi̱, ra kje̱heꞌtà‑ni kjoa̱, ya̱á ki̱jchò ya̱ i̱ꞌnde ꞌtse̱ kjo̱hiꞌin. Nga̱ ta jñá ꞌñó makájno‑la̱ kjoa̱ ra mejèn‑la̱ ijo‑la̱ ko̱ xín kisíkíjna Nainá. Ko̱ jñá ꞌnga bíhijyo‑ni ijo‑la̱ kjoa̱ ra tjínè‑la̱ nga ko̱sabà‑la̱. Ta jñá síkítsjen kjoa̱ ra tjín i̱ i̱sàꞌnde ra̱kìi̱.
\v 20 Tanga ra jién, ya̱á ngajmi ján tíjna ra ngi na̱xi̱ndá‑ná. Ko̱ ꞌkoa̱á ꞌsín ijye i̱nchichiñá‑lá nga ya̱á kji̱nchrabà‑ni jè ra ko̱chrjekàjin‑ná kjo̱hiꞌin, jè Jesucristo ra tíjna ítjòn‑ná.
\v 21 Jè si̱ìkaatjìya‑la̱ ijo niꞌnde‑ná nga ìjngo ra xi̱tse̱ tsjá‑ná ra ko̱ꞌsín ꞌki koni ꞌsín ꞌki ijo‑la̱ ra jè nga jeya tíjna; ꞌkia̱ nga ko̱ꞌsín ꞌsi̱in, ti̱jé ngaꞌñó si̱ìchjeén‑ni jè ra síchjeén nga batéxoma‑la̱ ngaꞌtsì ta mé tsajmì ra tjín i̱ i̱sàꞌnde.
\c 4
\s Kjoa̱ ra machjeén nga jñà si̱kítsa̱jna ítjén a̱ꞌta ꞌtse̱ kjo̱binachon‑ná.
\p
\v 1 ꞌKoa̱á ma‑ni, jiòn ndí ꞌndsé ra ꞌñó tsjake̱‑no ko̱ ra ꞌñó síkájno‑no, jiòn‑jiòn ra tsja ꞌbè‑la inìma̱‑na̱, jión ma jiòn kjo̱tjò ra tjábé‑na ra a̱ꞌta ꞌtse̱ xá‑na̱; ꞌkoa̱á ꞌsín tíxian‑no nga ꞌñó nda ti̱ncha ra a̱ꞌta ꞌtse̱ Na̱ꞌín‑ná, jiòn ra ngi ko̱ó inìma̱‑na̱ nga tsjake̱‑no.
\p
\v 2 ꞌKoa̱á ꞌsín tíbitsáꞌba‑la̱ jñà tichjeé Evodia ko̱ Síntique, nga ꞌkoa̱á ꞌsín jngo kataꞌsín kjo̱bítsjen‑la̱ ra a̱ꞌta ꞌtse̱ Na̱ꞌín‑ná.
\v 3 ꞌKoa̱á ti̱ꞌsín tíbitsáꞌba‑la ji̱ ndí ndsè ra ta̱ña nda i̱nchiníxákjeé, nga ti̱si̱ko̱ꞌti jñà ndí íchjín kìi̱ ra ta̱ña isíxáko̱‑na nga inikaꞌbísòn‑ji̱n jè ꞌén xi̱tse̱ ra nda tsò a̱ꞌta ꞌtse̱ Cristo ko̱ jè Clemente ko̱ jñà xi̱ta̱ ra iꞌka ra kisíxáko̱‑na; ngaꞌtsì xi̱ta̱ kìi̱ ijyeé ya̱ kjiꞌta ꞌí‑la̱ jè xa̱jo̱n ꞌtse̱ kjo̱binachon ra tíjna ya̱ ján ngajmi.
\p
\v 4 Tsja kataꞌse kiꞌta‑no a̱ꞌta ꞌtse̱ Na̱ꞌín‑ná. India‑isa ko̱ꞌsín tíxian‑no, ¡tsja kataꞌse‑no!
\v 5 Katabe ngaꞌtsì xi̱ta̱ nga ꞌñó nda inìma̱ tjín‑najiòn. Ijyeé machraña‑ní nga kjꞌi̱í india‑ni jè Na̱ꞌín‑ná.
\p
\v 6 Kì tà chjàn mé ra ꞌñó níkájno jiòn; ta isa̱á jè Nainá ti̱jé‑la ta mé ra mejèn‑no, ꞌkia̱ nga ki̱nákjoa̱ꞌta‑la, ꞌkia̱ nga kítsaꞌba‑la ko̱ ko̱ꞌtìn‑la̱ nga tse kjo̱nda kataꞌse‑la̱ ra jè.
\v 7 Ko̱ jè kjo̱ꞌnchán ra tsjá Nainá ra isa̱ ꞌñó nda tjín koni ꞌsín machi̱ya‑la̱ xi̱ta̱, jè nda ko̱si̱ko̱ inìma̱‑no ko̱ kjo̱bítsjen‑no nga ya̱ titsa̱jnako̱o Cristo Jesús.
\s Kjoa̱ ra machjeén nga jñà ꞌñó si̱kítsjen‑jién
\p
\v 8 Ra feheꞌta‑ni jiòn ndí ꞌndsé ko̱ ndí tichjeé, ꞌkoa̱á xián‑no, jñà kjón nda ti̱kíjna ítjòn jiòn kjoa̱ kìi̱: jñà ꞌén ra ngi kixi̱ tjín, jñà kjoa̱ ra ꞌñó nda ꞌyaxkón, ko̱ kóꞌsín nga kixi̱ si̱jché ijo‑ná, ko̱ kjoa̱ ra tsje tjín, ko̱ ra nda sasén‑la̱ xi̱ta̱, ko̱ ngaꞌtsì kjoa̱ ra nda naꞌyá‑la̱. Ko̱ tsa tjín‑isa kjoa̱ ra ꞌñó nda tjín, ra machjeén‑la̱ nga ꞌnga si̱kíjna, jñà kjòn isa̱ nda ti̱kítsjen ítjòn jiòn.
\p
\v 9 Ko̱ꞌsín ꞌtia̱àn jiòn koni ꞌsín tjín ngaꞌtsì kjoa̱ ra a̱ꞌta tsa̱ꞌa̱n kjomà‑no, ko̱ ra a̱ꞌta tsa̱ꞌa̱n itjábé‑no, kjoa̱ ra a̱ꞌta tsa̱ꞌa̱n inaꞌyá jiòn, ko̱ ra a̱ꞌta tsa̱ꞌa̱n kijcha; ko̱ꞌsín ti̱hitjasòn jiòn ko̱ jè Nainá ra ma‑la̱ tsjá‑ná kjo̱ꞌnchán nda kíjnako̱ kiꞌta‑no.
\s Kóꞌki tse chjí‑la̱ kjo̱nda ra kitsjà xi̱ta̱ Filipenses ra a̱ꞌta ꞌtse̱ Pablo
\p
\v 10 Taxki̱ ꞌñó matsja‑na ra a̱ꞌta ꞌtse̱ Na̱ꞌín‑ná, ꞌkia̱ nga be nga takó ꞌñó níkájno jiòn ra a̱ꞌta tsa̱ꞌa̱n. Mí‑la tsa tsò‑ni kjoa̱ nga mì ti̱ iníkájno‑nájiòn ra a̱ꞌta tsa̱ꞌa̱n nga ti̱ꞌsa̱ ítjòn; ta jé‑ní nga mì kì ndi̱to̱n itjoꞌnde‑najiòn kóꞌsín ma inikasén jiòn kjo̱tjò‑no.
\v 11 Mì tsa ta ki ko̱tíxin‑na nga tjín ra tíchijaꞌta‑na; ra ꞌa̱n, ijyeé nga‑na nga tsjaá tjín kiꞌta‑na ni̱ꞌsín ta kóꞌsín tíjna̱.
\v 12 Ijyeé be‑náa̱ kóꞌsín ma ꞌkia̱ nga ꞌñó iꞌin‑ya bìtsa̱jneé, ko̱ be‑ná kóꞌsín ma ꞌkia̱ nga tjín kiꞌtá‑ná mé ra nichjeén. Ijyeé isakò‑na kóꞌsín nga tsja ꞌse̱ kiꞌta‑na tsa ski tjín i̱ndsi̱ꞌbàa̱ o̱ ra kjinchrá tíbato, a ꞌñó tse tsajmì tjín‑na, o̱ ra ni̱mé tjín‑na.
\v 13 Maá ko̱tojian ni̱ꞌsín ta mé kjoa̱‑ni, nga̱ jè Cristo títsjá ngaꞌñó kiꞌta‑na.
\v 14 Tanga takó ndaá tjín nga ko̱ꞌsín i̱nchibisìko̱ꞌtá‑nájiòn ꞌndi̱‑ni̱ ꞌkia̱ nga ko̱ꞌsín kjo̱hiꞌin tijna̱jiaa̱n.
\p
\v 15 Jiòn ra xi̱ta̱ Filipo ꞌmì‑no, ndaá tjíjin‑najiòn, ꞌkia̱ nga ijye ítjo̱jian ya̱ Macedonia nga ítsikiꞌtsiáa̱ nga tsiꞌkènájmíya jè ꞌén xi̱tse̱ ra nda tsò ra a̱ꞌta ꞌtse̱ Cristo, ni̱jngo na̱xi̱ndá‑la̱ Cristo ra kjꞌií tsasìko̱‑na; ta jión‑najiòn ra kjomà‑no kiꞌtsí‑ná mé‑nioo̱ ra kjochjeén‑na.
\v 16 Skanda nga ti̱ꞌkia̱á‑ni nga tsakáti̱jnaa̱ ya̱ na̱xi̱ndá Tesalónica, ti̱ india ti̱ ijan inikasén‑nájiòn kjo̱tjò ra kjochjeén‑na.
\v 17 Mì tsa kì ko̱xian‑na tsa mé kjo̱tjò ra mejèn-isa‑na ra a̱ꞌta tsa̱jiòn, ta jé‑ní ra mejèn‑na nga katama kinda̱ ya̱ ngixko̱n Nainá kjo̱tjò ra ꞌbiò jiòn.
\v 18 Ijyeé tse tjín‑ni kjo̱tjò ra inikasén‑nájiòn ko̱ skanda tsatoné‑la̱ koni ꞌki nga machjeén‑na. Skanda jnengií chiba‑na ꞌndi̱‑ni̱, nga̱ ijyeé ꞌji jè kjo̱tjò ra inikasén‑ko̱ jiòn jè Epafrodito. Jè kjo̱tjò ra inikasén jiòn, ꞌkoa̱á ꞌsín ngoya‑la̱ koni jngo kjo̱tjò ra nda jne̱‑la̱ ko̱ nda sasén‑la̱ Nainá.
\v 19 ꞌKoa̱á ma‑ni, jè Nainá ra kjiꞌta takòo̱n, jè si̱ìkasén ijye‑najiòn mé ra machjeén‑no, koni ꞌsín nga ꞌñó jeya tjín kjoa̱nchi̱ná ra tjín ra a̱ꞌta ꞌtse̱ Cristo Jesús.
\v 20 Jè Nainá ra Na̱ꞌìn ꞌmì‑lá, ꞌñó jeya katijna kiꞌta skanda ta mé ni̱chjin ko̱ skanda ta mé nó‑ni. Ko̱ꞌsín katama.
\s ꞌÉn ra feheꞌta‑ni nga síhixoꞌta jè Pablo jñà xi̱ta̱ Filipos.
\p
\v 21 Ti̱hixoꞌta ijye‑ná jngó jngó xi̱ta̱ na̱xi̱ndá‑la̱ Nainá ra a̱ꞌta ꞌtse̱ Cristo Jesús makjiín‑la̱. Jñà ꞌndsé ra títsa̱jnako̱‑na ti̱ꞌkoa̱á síhixoꞌtá‑no ngaꞌtsì‑najiòn.
\v 22 Ngaꞌtsì jñà xi̱ta̱ na̱xi̱ndá‑la̱ Nainá ra a̱ꞌta ꞌtse̱ Cristo makjiín‑la̱ síhixoꞌtá‑no, títsa̱jna ítjòn kjòn jñà ra ya̱ síxá a̱ꞌta ꞌtse̱ xi̱ta̱xá ítjòn ra ꞌmì César.
\p
\v 23 Ko̱ꞌsín katatsjá‑no kjo̱nda‑la̱ jè Jesucristo ra tíjna ítjòn‑ná. Ko̱ꞌsín katama.