\id PHP
\h Filipenses
\toc1 Filipenses
\mt Xo̱jo̱n carta‑la̱ San Pablo xi kiskiì‑la̱ xi̱ta̱ na̱xa̱ndá‑la̱ Cristo xi títsa̱jna Filipos
\c 1
\s Kó tsò Pablo nga síhixatꞌaà jñà xi̱ta̱ na̱xa̱ndá‑la̱ Cristo xi títsa̱jna Filipos
\p
\v 1 Ngatsꞌioò xi titsa̱jnaà ján na̱xa̱ndá Filipos xi xi̱ta̱‑la̱ Nainá maà nga Cristo Jesús titsa̱jnako̱o, ti̱koa̱ jñò xi nìkitasòn xá nga nìkinda̱a na̱xa̱ndá‑la̱ Nainá ko̱ jñò xi nìchjátꞌaà, ꞌa̱n xi ꞌmì‑na Pablo ko̱ Timoteo titsa̱nìhixotꞌaà‑nòje̱n nga chi̱ꞌnda‑la̱ Jesucristo ꞌmì‑naje̱n.
\v 2 Nainá xi Na̱ꞌèn‑ná, ko̱ jè Jesucristo xi otíxoma‑ná kàtatsjá‑nò kjo̱ndaà ko̱ kjoa̱ꞌnchán ya̱ i̱jiìn ini̱ma̱‑nò.
\s Kó tsò Pablo nga chja̱tꞌaà‑la̱ Nainá i̱tꞌaà tsꞌe̱ xi̱ta̱ Filipos
\p
\v 3 Jè Nainá xi ꞌa̱n bexkoán, tsjaà‑la̱ kjo̱ndaà nga indiaà indiaà bítsjeèn‑na i̱tꞌaà tsa̱jòn.
\v 4 Kꞌe̱ nga indiaà indiaà chjàtꞌaà‑la̱ Nainá, ꞌñó ndaà matsja‑na nga ngatsꞌioò chjàtjì‑nò,
\v 5 koií kjoa̱‑la̱ nga jñò titsa̱nìchjátꞌaà‑ná nga ma chjàya ꞌén ndaà‑la̱ Nainá xi kjoa̱ tsꞌe̱ Cristo tje̱n‑ne jè na̱chrjein kꞌe̱ nga kòkjeiín‑nò skanda na̱chrjein i̱ꞌndei̱.
\v 6 ꞌA̱n, kꞌoa̱á sꞌín makixi̱‑na nga jè Nainá, koni sꞌín tsibítsꞌia̱ko̱‑nò nga tísíkjatjìya‑la̱ ini̱ma̱‑nò ko̱ kjo̱hítsjeèn‑nò, skanda kꞌe̱é si̱ìjngoò‑ne kjoa̱ koi jè na̱chrjein kꞌe̱ nga kjoi̱í ìjngoò kꞌa Na̱ꞌèn‑ná Jesucristo.
\v 7 Ndaà tjín nga kꞌoa̱sꞌín sìkítsjeèn‑nò ngatsꞌioò jñò xi ꞌñó matsjake̱‑nò nga ngásòn kitjoé‑nò kjo̱ndaà‑la̱ Nainá koni ꞌa̱n; nga jñò titsa̱nìchjátꞌaà‑ná nga ma beno̱jmí‑la̱ jñà xi̱ta̱ jè ꞌén ndaà‑la̱ Nainá xi kjoa̱ tsꞌe̱ Cristo na̱sꞌín nda̱yá tìjna̱a i̱ya, ko̱ na̱sꞌín xìn tìjna̱a nga ósi̱koa̱a jè ꞌén ko̱ okoò‑la̱ xi̱ta̱ nga ꞌén kixi̱‑né.
\v 8 Tíbeè Nainá nga kixi̱í kjoa̱ nga ngatsꞌioò, ꞌñó matsjake̱‑nò koni sꞌín tjín jè kjoa̱tjòcha xi ꞌñó tse tjín‑la̱ Jesucristo.
\v 9 Kꞌe̱ nga bìtsiꞌbatjì‑nò, kꞌoa̱á sꞌín síjétꞌaà‑la̱ Nainá nga jè kjoa̱tjòcha xi tjín‑nò, ìsa̱ ndaà ti̱tsjacha xinguio̱o, ìsa̱ ndaà kjo̱hítsjeèn kàtasꞌe‑nò ko̱ ìsa̱ ndaà kàtamachi̱ya‑nò ngatsꞌiì kjoa̱ xi kixi̱ tjín,
\v 10 mé‑ne ko̱ma chjaàjiìn‑nò kjoa̱ xi nguì ndaà tjín. Kꞌoa̱á sꞌín ko̱ma‑ne nga tsjeè si̱jchá yijo‑nò ko̱ ni̱mé jé sa̱kòtꞌaà‑nò jè na̱chrjein kꞌe̱ nga kjoi̱í ìjngoò kꞌa Cristo.
\v 11 Nga kàtaꞌya‑la̱ nga jñò, nguì kixi̱í tjín kjoa̱ xi ꞌnè nga ko̱ ngaꞌñó xi tjín‑la̱ Jesucristo mé‑ne jè Nainá jeya kíjna‑ne ko̱ ꞌnga kíjna.
\s Kó komà nga ìsa̱ kjìn xi̱ta̱ kòkjeiín‑la̱ ꞌén ndaà‑la̱ Nainá xi kjoa̱ tsꞌe̱ Cristo
\p
\v 12 Ndí ꞌndsè, mejèn‑na nga ndaà kàtasijiìn‑nò nga kꞌoa̱á sꞌín tímochjeén ngatsꞌiì kjoa̱ xi tímatꞌian nga ìsa̱ kjìn xi̱ta̱ mokjeiín‑la̱ ꞌén ndaà‑la̱ Nainá xi kjoa̱ tsꞌe̱ Cristo.
\v 13 Nga̱ ngatsꞌiì soldado xi síkinda̱ niꞌya osen ko̱ ngatsꞌiì xi̱ta̱ xi iꞌnga, tjíjiìn‑la̱ nga koií kjoa̱‑la̱ ꞌén‑la̱ Cristo nga nda̱yá tìjna̱a.
\v 14 Jñà xi̱ta̱ xinguia̱á xi ꞌndsé chibá, nga nchibeè nga nda̱yá tìjna̱aꞌya, kjìn ma‑ne xi maꞌñó ikon, mì ti̱ kiì tsakjón‑ne i̱tꞌaà tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo nga chja̱yajiìn‑la̱ xi̱ta̱.
\p
\v 15 Kixi̱í kjoa̱, tjín iꞌnga xi̱ta̱ xi ꞌén‑la̱ Cristo chja̱ya ta koií kjoa̱‑la̱ nga machi̱ni̱keè‑na nga jè xi mejèn‑la̱ nga ìsa̱ kjìn xi̱ta̱ kjitꞌaà‑la̱. Ta̱nga ti̱koa̱á tjín iꞌnga xi ndaà tjín ini̱ma̱‑la̱ nga béno̱jmí kixi̱ jè ꞌén‑la̱ Cristo.
\v 16 Jñà xi̱ta̱ xi ndaà tjín ini̱ma̱‑la̱, kꞌoa̱á sꞌín béno̱jmí nga matsjakeè‑na, nga jyeé ndaà tíjiìn‑la̱ nga Nainá i̱í kisìkíjna‑na nda̱yá mé‑ne nga ꞌa̱n kichjàtjià ꞌén ndaà‑la̱ Nainá xi kjoa̱ tsꞌe̱ Cristo.
\v 17 Ta̱nga jñà xi̱ta̱ xi iꞌnga, nga chja̱ya i̱tꞌaà tsꞌe̱ Cristo, mìtsà ko̱ ini̱ma̱‑la̱ béno̱jmí. Ta jè xi mejèn‑la̱ nga kjìn xi̱ta̱ kjitꞌaà‑la̱. Kꞌoa̱á sꞌín mejèn‑la̱ nga ìsa̱ tse kjo̱ꞌin si̱kjiaán nga jye nda̱yá tìjna̱aꞌya.
\v 18 Mìtsà mé‑ne, tsà ndaá tjín ini̱ma̱‑la̱ nga okóya ꞌén ndaà‑la̱ Nainá, ko̱ tsà majìn; mì ꞌa̱án oko̱‑na̱. Ta jè xi mejèn‑na nga kàtachja̱ya ꞌén ndaà‑la̱ Nainá xi kjoa̱ tsꞌe̱ Cristo. Kꞌoa̱á ma‑ne nga tsja ma‑na.
\s Mé xi ꞌñó mejèn‑la̱ Pablo
\p Nga tífì na̱chrjein ko̱tsjaá‑ìsa‑na,
\v 19 koií kjoa̱‑la̱ nga ngatsꞌiì kjoa̱ xi tíma, jyeé tíjiìn‑na nga ki̱jchò na̱chrjein nga kítjokàjñaà kjo̱ꞌin koi‑né nga jñò bìtsiꞌbatjì‑ná ko̱ nga tsjá‑ná ngaꞌñó Ini̱ma̱ Tsjeè‑la̱ Cristo.
\v 20 Ta jè xi ꞌñó mejèn‑na ko̱ tìkoña kjoa̱ nga mì ko̱sobà‑na nga chꞌo síkíjna Cristo. Jè xi mejèn‑na nga mì kì tsakjoòn‑la̱ xi̱ta̱ nga ma kichjà‑la̱ mé‑ne ꞌa̱n, tsà tìjna̱koan, ko̱ na̱sꞌín ki̱yá, jè Cristo jeya kíjna i̱tꞌaà tsꞌa̱n.
\v 21 ꞌA̱n, nga tìjna̱koan, jè‑né nga jeya kíjna Cristo. Ko̱ tsà ꞌa̱n ki̱yá, ìsa̱á‑la ndaà sꞌe̱.
\v 22 Ta̱nga tsà ta̱kó kóti̱jnakoan i̱ i̱sòꞌnde, tsà koií na̱chrjein‑la̱ sꞌi̱in‑ìsa xá‑la̱ Nainá. Kꞌoa̱á ma‑ne, mìkiì be mé xi ìsa̱ ndaà tjín.
\v 23 Ingajò kjoa̱ koi ꞌñó ꞌin ma‑na; jòya tjín kjo̱hítsjeèn‑na; mejèn‑na nga kàtiyaà mé‑ne nga ya̱ kóti̱jnakoa̱a Cristo; nga ìsa̱á‑la ꞌñó ndaà sꞌe̱.
\v 24 Ta̱nga xi kjo̱ndaà tsa̱jòn, ìsa̱ ꞌñó mochjeén nga kóti̱jnakon ìsa̱.
\v 25 Kꞌoa̱á sꞌín beè‑la̱ takoàn nga kóti̱jnakon ìsa̱, nga kꞌoa̱á sꞌín tíjngoò takoàn nga mochjeén‑nò i̱tꞌaà tsꞌa̱n. Kóti̱jnajiìn‑nò mé‑ne ko̱ma siìchjátꞌaà‑nò nga ìsa̱ tsja ko̱ma‑nò koni sꞌín mokjeiín‑nò ko̱ nga ìsa̱ ndaà ko̱kjeiín‑ìsa‑nò.
\v 26 Mé‑ne kꞌe̱ nga kìjchokon ìjngoò kꞌa‑nò, ìsa̱á tsja ko̱ma‑nò nga ìsa̱ ꞌnga si̱kíjna Cristo Jesús koni sꞌín osìko̱‑na.
\p
\v 27 Ta jè xi ꞌñó mochjeén nga kꞌoa̱sꞌín ti̱jchá yijo‑nò koni tsò ꞌén ndaà‑la̱ Nainá xi kjoa̱ tsꞌe̱ Cristo; mé‑ne tsà ko̱ma kjíkon‑nò ko̱ tsà mìkiì ko̱ma kjián, tákó kji̱ꞌnchrè‑ná nga kixi̱ titsa̱jnako̱o ꞌén, nga jngoó tjín kjo̱hítsjeèn‑nò nga ngásòn titsa̱bixkàn‑tjiò koni sꞌín mokjeiín‑nò ꞌén ndaà‑la̱ Nainá xi kjoa̱ tsꞌe̱ Cristo,
\v 28 nga mì tsakjoòn‑là jñà xi̱ta̱ kondra̱‑nò. Koni sꞌín titsa̱ꞌnè ngatsꞌiì kjoa̱ koi, kꞌoa̱á sꞌín si̱jna koni jngoò chi̱ba̱ xi okó nga jñà xi̱ta̱ kondra̱, kjoe̱hesòn‑né, ta̱nga jñò, ki̱tjokàjiìn‑nò kjo̱ꞌin. Kjoa̱ koi, i̱tꞌaà tsꞌe̱ Nainá nchrobá‑ne.
\v 29 Nga̱ Nainá ti̱koa̱á tsjá‑nò kjo̱ndaà nga kjo̱ꞌin titsa̱nìkjioón xi kjoa̱ tsꞌe̱ Cristo koni sꞌín kitsjaà‑nò kjo̱ndaà nga kòkjeiín‑nò ꞌén ndaà‑la̱.
\v 30 Nga jñà kjoa̱ xi tjín‑nò i̱ꞌndei̱, ti̱jñà‑ne xi ꞌa̱n kisꞌe‑na koni sꞌín kiꞌyaà jñò, ko̱ tákó koií kjoa̱ tjín‑na skanda na̱chrjein i̱ꞌndei̱ koni sꞌín titsa̱naꞌyà.
\c 2
\s Kjo̱hítsjeèn xi kisꞌe‑la̱ Cristo nga nangui kisìkíjna yijo‑la̱ i̱ i̱sòꞌnde
\p
\v 1 Jñò, nga Cristo tsjá‑la̱ ngaꞌñó ini̱ma̱‑nò, ko̱ nga jè kjoa̱tjòcha síje takòn‑nò, ko̱ nga jè Ini̱ma̱ Tsjeè‑la̱ Nainá ndaà síkítsa̱jnajtín‑nò nga nìxákjoò, ko̱ nga nguì ko̱ó ini̱ma̱‑nò tjín‑nò kjo̱hi̱ma̱takòn,
\v 2 kꞌoa̱á ma‑ne nga síjé‑nò nga ta jngoò kjo̱hítsjeèn kàtasꞌe‑nò, jngoò kjoa̱tjòcha, ngásòn tꞌè‑là takòn, ko̱ ngásòn chibà‑nò mé xi nìkítsjeèn mé‑ne nga ìsa̱ ndaà ko̱tsja‑na.
\v 3 Kì kjoa̱ ꞌnga takòn onguíchjaà, ko̱ kì ꞌnga nìkítsa̱jna yijo‑nò. Ta̱ sa̱á nangui ti̱kítsa̱jna yijo‑nò, kꞌoa̱á sꞌín jcha̱xkón xi̱ta̱ xi kjꞌei̱í koni tsà jñà títsa̱jna ítjòn.
\v 4 Kì ta koi nìkájno xi kjo̱ndaà tsa̱jòn. Ti̱koa̱á ti̱kájno‑nò mé xi mochjeén‑la̱ xi̱ta̱ xi kjꞌei̱í.
\p
\v 5 Kꞌoa̱á tjín kjo̱hítsjeèn xi kàtasꞌe‑nò koni tjín kjo̱hítsjeèn xi tjín‑la̱ Cristo Jesús.
\v 6 Na̱sꞌín ti̱jè sobà‑ne Nainá, mìtsà ko̱sꞌín kisìkítsjeèn nga kjo̱ꞌñó mejèn‑la̱ nga ko̱sꞌín kíjna koni sꞌín tíjna Nainá.
\v 7 Ta sa̱á ꞌñó nangui kisìkíjna yijo‑la̱ nga ko̱sꞌín tsibìjna koni jngoò xi̱ta̱ chi̱ꞌnda, koni xi ta̱xki̱ xi̱ta̱ i̱sòꞌnde.
\v 8 Kꞌe̱ nga jye ta̱xki̱ xi̱ta̱ komà, kisìkajeén‑la̱ ini̱ma̱‑la̱ nga ndaà kisìkitasòn yije‑la̱ Nainá skanda kó nga kꞌen nga ya̱ kinìkꞌen‑tꞌaà krò.
\v 9 Kꞌoa̱á ma‑ne, Nainá, kꞌe̱ nga jye kisìkjaáya‑la̱, ta̱xki̱ ꞌñó ꞌnga kisìkíjna. Kitsjaà jngoò‑la̱ ꞌín xi ìsa̱ ꞌñó ꞌnga tíjna mé‑ne jè ko̱tìxoma yije‑la̱ xi̱ta̱.
\v 10 Mé‑ne nga i̱tꞌaà tsꞌe̱ Jesús ki̱ncha-xkóꞌnchi‑la̱ ngatsꞌiì xi títsa̱jna ngajmiì, xi títsa̱jna i̱ i̱tꞌaà nangui, ko̱ xi títsa̱jna i̱jiìn nangui.
\v 11 Kꞌoa̱á sꞌín ki̱tso̱ ngatsꞌiì xi̱ta̱ nga Jesucristo, jè xi otíxoma; kꞌoa̱á ma‑ne nga jeya kíjna Nainá xi Na̱ꞌèn‑ná.
\s Mé xi sꞌe̱én nga i̱xti tsjeè‑la̱ Nainá ꞌmì‑ná
\p
\v 12 Kꞌoa̱á ma‑ne, jñò ndí ꞌndsè xi ꞌñó matsjake̱‑nò, kꞌe̱ nga tsohóti̱jnako̱‑nò, kjitꞌaà na̱chrjein ndaà kinìkitasòn. I̱ꞌndei̱ nga kjiìn tìjna̱a, tákó kꞌoa̱sꞌín ndaà ti̱kitasòn. Kꞌoa̱sꞌín tꞌe̱en nga kàtaꞌya‑nò nga jyeé itjokàjñoò kjo̱ꞌin kjoa̱ tsꞌe̱ jé‑nò koií kjoa̱‑la̱ nga ꞌñó tsakjoòn‑chaà yijo‑nò.
\v 13 Nga̱ jè Nainá xi ndaà tísíxájiìn ini̱ma̱‑nò. Jè síkítsjeèn‑nò nga kꞌoa̱á sꞌín mejèn‑nò koni sꞌín ndaà sasén‑la̱ Nainá ko̱ ti̱jè‑ne xi tsjá‑nò ngaꞌñó nga ma kꞌoa̱sꞌín ꞌnè.
\p
\v 14 Ndaà tꞌe̱en yije ni̱ta̱ mé kjoa̱‑ne; kì ta̱xki̱ tsajétꞌaà‑là Nainá ko̱ kì chitiya‑nò ni̱ta̱ mé kjoa̱‑ne.
\v 15 Kꞌoa̱á sꞌín ko̱ma‑ne nga i̱xti tsjeè‑la̱ Nainá kꞌoín‑nò; ni̱mé jé sꞌe̱‑nò nga titsa̱jnajiìn‑là xi̱ta̱ tsꞌe̱n ko̱ xi chꞌo sꞌín; jñò, kꞌoa̱á sꞌín kàtaꞌya‑nò koni niꞌín‑la̱ niꞌño xi síhiseèn ñánda jñò choòn.
\v 16 Ti̱kaꞌbísòn ꞌén ndaà xi síkíjnakon ini̱ma̱‑ná, mé‑ne jè na̱chrjein kꞌe̱ nga kjoi̱í ìjngoò kꞌa Cristo, ndaà ko̱tsja‑na nga mìtsà ta kjo̱tjò koni sꞌín kisꞌiaàn nga ꞌñó kisìxájiìn‑nò nga tsakoòya‑nò ꞌén ndaà‑la̱ Nainá xi kjoa̱ tsꞌe̱ Cristo.
\v 17 ꞌA̱n, matsjaá‑na ko̱ síjngoaà kjo̱tsja xi tjín‑nò na̱sꞌín kjo̱ꞌin tìsìkjiaán koni jñò nga kjo̱ꞌin titsa̱nìkjioón nga koií kjoa̱‑la̱ nga mokjeiín‑nò i̱tꞌaà tsꞌe̱ Cristo. Kjo̱ꞌin xi tjín‑nò kꞌoa̱á ngaya‑la̱ koni jngoò kjo̱tjò xi jñò ꞌbiì‑là Nainá, ko̱ jè kjo̱ꞌin xi ꞌa̱n tjín‑na ti̱koa̱á ꞌa̱n tsjaà‑la̱ Nainá koni kjo̱tjò tsa̱jòn.
\v 18 Jñò, kꞌoa̱á ti̱sꞌín kàtatsja‑nò mé‑ne ko̱jngoò‑ne kjo̱tsja xi tjín‑ná.
\s I̱tꞌaà tsꞌe̱ Timoteo
\p
\v 19 Kꞌoa̱á sꞌín tísíkítsjeèn, tsà Na̱ꞌèn‑ná Jesús mejèn‑la̱ nga sìkasén ni̱to̱n‑nò Timoteo, mé‑ne ꞌa̱n ko̱tsja‑na kꞌe̱ nga kjoi̱íko̱‑na o̱kixi̱ i̱tꞌaà tsa̱jòn kósꞌín titsa̱jnaà.
\v 20 Mì ti̱ yá xi̱ta̱ tjín ìsa̱‑na xi kꞌoa̱sꞌín ngásòn síkájno i̱tꞌaà tsa̱jòn koni jè Timoteo.
\v 21 Ngatsꞌiì xi̱ta̱ xi kjꞌei̱í, saà kjo̱ndaà tsꞌe̱é ótsji, mìkiì ótsji xi kjo̱ndaà tsꞌe̱ Cristo.
\v 22 Jñò, jyeé ndaà tíjiìn‑nò, jè Timoteo xi̱ta̱ kixi̱‑né. Ndaà síchjátꞌaà‑na i̱tꞌaà tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo, kꞌoa̱á ngaya‑la̱ koni tsà kiꞌndí tsꞌa̱n‑ná.
\v 23 Tìkoña kjoa̱‑ná nga sìkasén‑nò Timoteo kꞌe̱ nga skoeè kósꞌín si̱ndaàjiìn kjoa̱‑na̱.
\v 24 Ta̱nga jè Na̱ꞌèn‑ná maꞌñótꞌaà takoàn, nga tsjáꞌnde‑na nga ti̱koa̱ ꞌa̱n ko̱ma kjíkon ni̱to̱n‑nò.
\s I̱tꞌaà tsꞌe̱ Epafrodito
\p
\v 25 Ta̱nga kꞌoa̱á sꞌín kisìkítsjeèn nga ítjòn siìkasén ìjngoò kꞌa‑nò jè ꞌndsè Epafrodito. Ndaà kisìxáko̱‑na. Kꞌoa̱á sꞌín tsajmeiìko̱‑na koni jngoò soldado nga bixkàn‑tji‑je̱n ꞌén‑la̱ Nainá. Nainá kàtíchjí‑nò nga kinìkasén‑ná kꞌe̱ nga ꞌñó tímochjeén‑na. Ndaà kisìchjátꞌaà‑na.
\v 26 I̱ꞌndei̱, mejèn‑la̱ nga skoe̱xkon‑nò ngatsꞌioò, ꞌñó tísíkájno nga jñò jyeé kinaꞌyà nga kjòxkꞌén‑né.
\v 27 Kixi̱í kjoa̱ nga kjòxkꞌén‑né, kjo̱meé kꞌen. Ta̱nga Nainá kjòhi̱ma̱keè; mìtsà ta jè xi kjòhi̱ma̱keè, ko̱ó ꞌa̱n, mé‑ne nga mì ìsa̱ tse kjoa̱ba sꞌe̱‑na.
\v 28 Kꞌoa̱á ma‑ne nga tìsìkasén ni̱to̱n‑nò, mé‑ne kꞌe̱ nga jcha̱xkoòn ìjngoò kꞌa, ko̱tsja‑nò i̱tꞌaà tsꞌe̱, koa̱ ꞌa̱n, tjáxìn chiba‑na kjoa̱ba.
\v 29 Chjoétjò nga ko̱ kjo̱tsja‑nò nga ꞌndseé chibá i̱tꞌaà tsꞌe̱ Na̱ꞌèn‑ná. Cha̱xkón yije xi ngásòn okꞌìn‑la̱ koni jè.
\v 30 Koií kjoa̱‑la̱ i̱tꞌaà tsꞌe̱ xá‑la̱ Cristo nga kjo̱meé kꞌen. Jè kjoa̱ xi jñò mìkiì komà kinìchjátꞌaà‑ná, jé Epafrodito, ꞌñó tsibínè‑la̱ yijo‑la̱ nga ndaà kisìchjátꞌaà‑na na̱sꞌín kjo̱meé kꞌen.
\c 3
\s Mé kjoa̱ xi ìsa̱ ꞌñó chjí‑la̱ nga kixi̱ ki̱tsa̱jnaá nguixko̱n Nainá
\p
\v 1 Ndí ꞌndsè, kꞌoa̱á xan‑nò, tsja tꞌè‑là ini̱ma̱‑nò nga Na̱ꞌèn‑ná Jesús titsa̱jnako̱o. ꞌA̱n, mìkiì masiì‑na̱ nga tìkjiì ìjngoò kꞌa‑nò jñà kjoa̱ xi jye kòkjìn kꞌa kjiì‑nò nga kjo̱ndaà tsa̱jòn‑nò.
\v 2 Ti̱kinda̱a yijo‑nò i̱tꞌaà tsꞌe̱ jñà xi̱ta̱ xi kjo̱ꞌñó mejèn‑la̱ nga otetꞌaà yijo‑la̱ xi̱ta̱ nga bítꞌaà chi̱ba̱‑la̱ kjoa̱ tsꞌe̱ circuncisión. Ti̱kinda̱a xi̱ta̱ koi nga ni̱mé chjí‑la̱. Ti̱kinda̱a nga ꞌñó chꞌo sꞌín.
\v 3 Jñá‑ná xi nguì kixi̱ kjoa̱ nga tjítꞌaà chi̱ba̱‑ná nga ꞌya‑la̱ nga xi̱ta̱‑la̱ Nainá ꞌmì‑ná. Jñá‑ná xi ndaà yaxkoán Nainá nga jè Ini̱ma̱ Tsjeè‑la̱ síchjátꞌaà‑ná. ꞌÑó ndaà matsja‑ná nga jè maꞌñótꞌaà takoán Cristo Jesús nga mìtsà jè kjoa̱ tsꞌe̱ yijo‑ná maꞌñótꞌaà takoán.
\v 4 ꞌA̱n, mìtsà kjoa̱ tsꞌe̱ yijo‑na̱ maꞌñótꞌaà takoàn na̱sꞌín kjìn sko̱ya kjo̱ndaà kisìkitasoàn. Tsà tjín iꞌnga xi̱ta̱ xi koi maꞌñótꞌaà takòn kjo̱ndaà xi tjín‑la̱, ta̱nga ꞌa̱n mì kꞌoa̱á sꞌín tìsꞌiaàn na̱sꞌín tsato kjìn sko̱ya kjo̱ndaà kisìkitasoàn.
\v 5 Kꞌe̱ nga tjín‑la̱ jiìn na̱chrjein nga kitsꞌian, kisitꞌaà chi̱ba̱‑na̱ kjoa̱ tsꞌe̱ circuncisión. ꞌA̱n, xi̱ta̱ Israel‑ná, tje̱‑la̱ Benjamín‑ná. Xi̱ta̱ Hebreo‑ná, ko̱ jñà xi̱ta̱ jchínga‑na̱ nguì xi̱ta̱ Hebreo‑né. ꞌA̱n, nguì xi̱ta̱ fariseo‑ná nga jñà kjo̱tíxoma‑la̱ xi̱ta̱ judío nguì ndaà kisìkitasoàn.
\v 6 Nga ꞌñó fìtꞌaà‑la̱ koni sꞌín tjín kjo̱tíxoma‑la̱ xi̱ta̱ judío, ꞌa̱n skanda kiìtji̱ngui kondra̱á‑la̱ xi̱ta̱ na̱xa̱ndá‑la̱ Cristo. ꞌA̱n, nguì kixi̱í kisìkitasoàn kjo̱tíxoma‑la̱ xi̱ta̱ judío, ni̱jngoò xi mìkiì ndaà kisìkitasoàn.
\v 7 Nga sa̱ ítjòn, ꞌa̱n, kꞌoa̱á sꞌín kisìkítsjeèn nga ꞌñó tse chjí‑la̱ ngatsꞌiì kjoa̱ koi; ta̱nga i̱ꞌndei̱ nga Cristo fìtꞌaà‑la̱ ni̱mé chjí‑la̱ kjoa̱ koi.
\v 8 Xi nguì o̱kixi̱, ngatsꞌiì kjoa̱ xi ꞌa̱n maꞌñótꞌaà takoàn nga sa̱ kjòtseé, i̱ꞌndei̱, kꞌoa̱á sꞌín beè takoàn nga ni̱mé chjí‑la̱ mì kꞌoa̱à‑ne koni sꞌín bexkoan Cristo Jesús xi otíxoma‑na nga ìsa̱ ꞌñó tsato chjí‑la̱. Ngatsꞌiì kjoa̱ koi, jyeé tsachrjenguia yije xi kjoa̱‑la̱ Cristo. Ta tjé beè takoàn mé‑ne nga ya̱ ma fìtꞌaà‑la̱ Cristo
\v 9 ko̱ mé‑ne nga ya̱ kóti̱jnakjoòkoa̱a. Nga kixi̱ óti̱jna nga nguixko̱n Nainá, mìtsà koi kjoa̱‑la̱ nga ꞌa̱n ndaà sìkitasoàn kjo̱tíxoma‑la̱ xi̱ta̱ judío, koi‑né nga mokjeiín‑na i̱tꞌaà tsꞌe̱ Cristo. Jè Nainá xi kixi̱ síkíjna‑na koií kjoa̱‑la̱ nga mokjeiín‑na.
\v 10 Mejèn‑na̱ nga ìsa̱ ndaà skoexkoan Cristo; skoeè ngaꞌñó xi tjín‑la̱ nga jaáya‑la̱ i̱tꞌaà tsꞌe̱ kjoa̱biyaà; kàtamajngoò kjo̱hítsjeèn‑na̱ ko̱ tsꞌe̱ Cristo koni sꞌín komàtꞌin nga kisìkjeiín kjo̱ꞌin skanda kꞌe̱ nga kꞌen,
\v 11 mé‑ne kꞌoa̱ ti̱sꞌín kjoa̱áya‑na̱ i̱tꞌaà tsꞌe̱ kjoa̱biyaà koni sꞌín jaáya‑la̱ Cristo.
\s Mé xi sꞌín Pablo nga ma ki̱jchò tji̱ngui‑la̱ kjo̱tjò xi tsjá Nainá
\p
\v 12 Mìtsà tsò‑ne kjoa̱ nga jye kjòngásòn yije‑na kjoa̱ koi. Kjꞌeè tsà nguì xi̱ta̱ kixi̱ ꞌmì‑na̱. Ta̱nga tífì tji̱ngui‑la̱ nga mejèn‑na nga ìsa̱ ndaà skoexkoan skanda kó nga ki̱jchò tji̱ngui‑la̱ mé kjoa̱‑ne nga ijchò tji̱ngui‑na̱ Cristo Jesús.
\v 13 Ndí ꞌndsè, kꞌoa̱á sꞌín machi̱ya‑na̱, kjꞌeè kiì bijchó tji̱ngui yije‑la̱ kjo̱ndaà xi tjín‑la̱ Cristo. Ta̱nga jngoò kjoa̱ tìsꞌiaàn, tìsìjchàajñaà yije kjoa̱ xi jye tsato, tíbínè‑la̱ yijo‑na̱ nga ki̱jchò tji̱ngui‑la̱ kjoa̱ xi sa̱ nchrobá.
\v 14 Tífì tji̱ngui‑la̱ skanda ñánda fehetꞌaà‑ne, mé‑ne nga tjoé‑na kjo̱tjò xi Nainá tsjá‑na nga xó kiìchja̱‑na Nainá ján ngajmiì nga Cristo Jesús tìjna̱koa̱a.
\p
\v 15 Ngatsꞌiaá xi jye ndaà mokjeiín‑ná i̱tꞌaà tsꞌe̱ Cristo, ngásòn ngáya kꞌoa̱sꞌín si̱kítsjeén. Jñò, tsà mìkiì kꞌoa̱sꞌín nìkítsjeèn, Nainá si̱ìkíchi̱yandaà‑nò.
\v 16 Ta̱nga mochjeén‑né nga kꞌoa̱sꞌín si̱kitasoán koni kji jye machi̱ya‑ná skanda na̱chrjein i̱ꞌndei̱.
\p
\v 17 Ndí ꞌndsè, kꞌoa̱á sꞌín ti̱jchá yijo‑nò koni sꞌín tìsìjchá yijo‑na̱. Chjínguì‑là jñà xi̱ta̱ xi kꞌoa̱sꞌín ndaà nchisíjchá yijo‑la̱ koni sꞌín titsa̱ꞌnè‑je̱n.
\v 18 Nga kjìn ma xi̱ta̱ xi tjíma xi kondra̱ fì tji̱ngui‑la̱ jè ꞌén xi tísꞌeno̱jmíya nga krò kꞌen‑tꞌaà Cristo. Kòkjìn kꞌa kꞌoa̱ xan‑nò; i̱ꞌndei̱ skanda ko̱ó ndáxkoaàn tìbìxteèn nga ìjngoò kꞌa kꞌoa̱ tìxan‑nò.
\v 19 Xi̱ta̱ koi, kꞌe̱ nga kjoe̱hetꞌaà na̱chrjein‑la̱, kjo̱ꞌiín si̱ìkjeiín ni̱ta̱ kjé‑ne. Ta koií ótsji kjoa̱ xi síjé yijo‑la̱ ko̱ mìtsà Nainá ótsji. ꞌNga síkítsa̱jna yijo‑la̱ kjoa̱ xi tjínè‑la̱ nga ko̱sobà‑la̱. Tà koií síkítsjeèn kjoa̱ tsꞌe̱ i̱sòꞌnde.
\v 20 Ta̱nga jñá, ján i̱ꞌnde‑ná ngajmiì. ꞌÑó ndaà titsa̱chiñá‑lá nga ya̱ kji̱nchrobà‑ne jngoò xi ko̱chrjekàjiìn‑ná kjo̱ꞌin, jè‑né Jesucristo xi otíxoma‑ná.
\v 21 Jè si̱ìkjatjìya‑la̱ yijo niꞌnde‑ná; kꞌoa̱á kji ko̱ma koni kji tsꞌe̱ jè, nga jeya kji. Jè si̱ìkjeén ngaꞌñó xi tjín‑la̱ nga jè otíxoma yije‑la̱ ni̱ta̱ mé xi tjín.
\c 4
\s Mé xi sꞌe̱én nga jye kixi̱ titsa̱jnakoa̱á Cristo
\p
\v 1 Kꞌoa̱á ma‑ne jñò ndí ꞌndsè xi ꞌñó matsjake̱‑nò, ko̱ nga ꞌñó makájno‑na nga mejèn‑na skoexkon‑nò, ko̱ nga nìtsja‑là ini̱ma̱‑na̱, ko̱ jñò xi kjo̱tjò‑na̱ ma i̱tꞌaà tsꞌe̱ xá‑na, kꞌoa̱á xan‑nò nga kixi̱ titsa̱jnako̱o Na̱ꞌèn‑ná, jñò xi ꞌñó matsjake̱‑nò.
\p
\v 2 Tìbitsiꞌbà‑la̱ jè Evodia ko̱ Síntique, nga ngásòn ndaà kàtjìko̱ xíkjín nga ndichja joó xi i̱tꞌaà tsꞌe̱ Na̱ꞌèn‑ná.
\v 3 Ti̱koa̱á ngaji̱ ndí ꞌndsè xi ngásòn ta̱ña nìxá, tìsìjétꞌaà‑lè, ti̱chjátꞌaà‑la̱ íchjín koi; nga ndaà kisìxáko̱‑na i̱tꞌaà tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo. Ko̱ jè Clemente ko̱ xi̱ta̱ xi iꞌnga ti̱koa̱á ndaà kisìxáko̱‑na. Xi̱ta̱ koi, jye tjítꞌaà ꞌín‑la̱ xo̱jo̱n tsꞌe̱ kjoa̱binachon ján ngajmiì.
\p
\v 4 Tsja tꞌè‑là ini̱ma̱‑nò nga Na̱ꞌèn‑ná titsa̱jnako̱o. Ìjngoò kꞌa kꞌoa̱ xan‑nò: ¡Tsja tꞌè‑là takòn!
\v 5 Jñò, kàtabeè yije‑nò xi̱ta̱ nga xi̱ta̱ ndaà ꞌmì‑nò. Jyeé tímachrañà nga kjoi̱í ìjngoò kꞌa Na̱ꞌèn‑ná.
\p
\v 6 Kì mé kjoa̱ nìkájno. Ta ìsa̱á ti̱jétꞌaà‑là Nainá kꞌe̱ nga mé xi mochjeén‑nò. Ti̱koa̱ tjiì‑là kjo̱ndaà.
\v 7 Kꞌoa̱á sꞌín ko̱ma‑ne nga tsjá‑nò kjoa̱ꞌnchán Nainá. Jè kjoa̱ꞌnchán xi tsjá‑nò fahatonè‑la̱ koni sꞌín bítsjeèn‑la̱ xi̱ta̱. Kjoa̱ꞌnchán jè, jè xi si̱ìkinda̱ ini̱ma̱‑nò ko̱ kjo̱hítsjeèn‑nò nga Cristo Jesús titsa̱jnako̱o.
\p
\v 8 Ndí ꞌndsè kꞌoa̱á xan‑nò xi fehetꞌaà‑ne. Ti̱kítsjeèn xi kjoa̱ kixi̱, kjoa̱ xi ndaà yaxkón, kjoa̱ xi ndaà tjín nga nguixko̱n Nainá, kjoa̱ xi tsjeè tjín, kjoa̱ xi ndaà sasén‑ná, ko̱ ngatsꞌiì kjoa̱ xi ndaà naꞌyà‑la̱. Ko̱ tsà tjín‑ìsa kjoa̱ xi kjꞌei̱í xi ꞌñó ndaà tjín, xi okꞌìn‑la̱ nga ꞌnga kítsa̱jna, koií kjoa̱ ti̱kítsjeèn.
\p
\v 9 Kꞌoa̱sꞌín tꞌe̱en koni sꞌín tsakoòya‑nò o̱kixi̱ xi ꞌa̱n kitsjaà‑nò, ꞌén xi kinaꞌyá‑ná, koni sꞌín kiꞌya‑ná nga kisꞌiaàn; tákó kꞌoa̱sꞌín tꞌe̱en. Nainá xi tsjaà‑la̱ kjoa̱ ꞌnchán ini̱ma̱‑ná, jè kíjnako̱‑nò.
\s Kjo̱ndaà‑la̱ tsꞌe̱ xi̱ta̱ Filipos i̱tꞌaà tsꞌe̱ Pablo
\p
\v 10 ꞌÑó matsja‑na̱ koni síko̱‑na Na̱ꞌèn‑ná nga ijchò na̱chrjein, ìjngoò kꞌa kinìkítsjeèn‑ná. ꞌA̱n kꞌoa̱á sꞌín síkítsjeèn nga mìtsà kinìjchàajñoò xi i̱tꞌaà tsꞌa̱n, tà jè‑né nga mìkiì xátí kitjòꞌnde‑nò nga kinìchjátꞌaà‑ná.
\v 11 Mìtsà koi kjoa̱‑la̱ nga kꞌoa̱tìxan‑nò tsà mé tsojmì xi chijatꞌaà‑na̱. Jyeé kjòꞌnga‑na nga majngoò takoàn mé xi tjín‑na.
\v 12 Be‑ná kó ma nga i̱ma̱ tísíjchá yijo‑na̱. Ti̱koa̱á be‑ná kó ma kꞌe̱ nga tjín‑na tsojmì. Jye tíbe ni̱ta̱ mé kjoa̱ xi tímatꞌian. Ti̱jé‑na̱ tsà skiì tíjna i̱ndso̱ꞌbà, ko̱ tsà kjinchrá tìbiyaà, tsà ningui‑na̱ tsojmì ko̱ tsà ni̱mé tsojmì tjín‑na̱.
\v 13 Ko̱ma yijeé‑na ni̱ta̱ mé kjoa̱‑ne nga jè Cristo tsjá‑na ngaꞌñó.
\v 14 Ta̱nga jñò, tákó ndaà kiꞌnè‑nò nga kinìchjátꞌaà‑ná kꞌe̱ nga kjoa̱ tìjna̱jñaà.
\p
\v 15 Jñò xi na̱xa̱ndá Filipo tsa̱jòn, tíjiìn‑nò nga ta jñò‑nò xi kinìchjátꞌaà‑ná mé xi kjòchjeén‑na, jè na̱chrjein kꞌe̱ nga kiaà nangui Macedonia kꞌe̱ nga sa̱ tsibìtsꞌia̱a nga kichjàko̱‑nò ꞌén ndaà‑la̱ Nainá xi kjoa̱ tsꞌe̱ Cristo. Ni̱jngoò na̱xa̱ndá‑la̱ Cristo xi kjꞌei̱í xi ma‑la̱ kisìchjátꞌaà‑na.
\v 16 Ti̱koa̱á kꞌe̱ nga tsohóti̱jna na̱xa̱ndá Tesalónica, jngoò jò kꞌa kinìkasén‑ná kjo̱tjò xi kjòchjeén‑na.
\v 17 Mìtsà mé kjo̱tjò tsa̱jòn xi mejèn‑ìsa‑na, ta jè xi mejèn‑na nga ìsa̱ ndaà kàtasíchikon‑tꞌin‑nò Nainá.
\v 18 Jyeé kiskaàtꞌaà yije‑na ngatsꞌiì xi kinìkasén‑ná. Jyeé tjín yije‑na xi mochjeén‑na skanda ninguií‑na nga jyeé jꞌiìko̱‑na ngaꞌñó xi kinìkasén‑ná ko̱ Epafrodito. Kjo̱tjò xi kinìkasén‑ná kꞌoa̱á sꞌín ngaya‑la̱ koni chrjongó‑la̱ Nainá xi ꞌñó ndaà jne̱, jñà kjo̱tjò xi ꞌñó ndaà sasén‑la̱ Nainá.
\v 19 Kꞌoa̱á ma‑ne, jè Nainá xi ꞌa̱n kjitꞌaàtakoàn, tsjá yije‑nò ni̱ta̱ mé xi chijatꞌaà‑nò koni sꞌín jeya tjín kjoa̱ nchi̱ná xi tjín‑nò nga Cristo Jesús titsa̱jnako̱o.
\v 20 Jè Nainá xi Na̱ꞌèn‑ná, jeya kàtìjna ni̱ta̱ mé na̱chrjein‑ne, ni̱ta̱ mé nó‑ne. Kꞌoa̱sꞌín kàtama.
\s Xi fehetꞌaà‑ne, Pablo síhixatꞌaà xi̱ta̱ Filipos
\p
\v 21 I̱tꞌaà tsꞌa̱n, ti̱ixatꞌaà yije jñà xi̱ta̱ na̱xa̱ndá‑la̱ Cristo xi ya̱ títsa̱jna. Jñà xi̱ta̱ ꞌndseé xi i̱ títsa̱jnako̱‑na, ti̱koa̱á nchisíhixatꞌaà‑nò.
\v 22 Ngatsꞌiì xi̱ta̱‑la̱ Cristo síhixatꞌaà‑nò. Jñà nchisíhixatꞌaà ítjòn‑nò xi títsa̱jna niꞌya‑la̱ César xi xi̱ta̱xá ítjòn tsꞌe̱ Roma.
\p
\v 23 Ngatsꞌioò, jè kàtìjnako̱‑nò kjo̱ndaà‑la̱ Jesucristo xi otíxoma‑ná. Kꞌoa̱sꞌín kàtama.