\id COL
\h Colosenses
\toc1 Colosenses
\mt Xa̱jo̱n ra tsikínda jè Pablo ra isìkasén‑la̱ xi̱ta̱ na̱xi̱ndá‑la̱ Cristo ra títsa̱jna ya̱ Colosas
\c 1
\s Kóꞌsín nga síhixoꞌta jè Pablo jñà xi̱ta̱ na̱xi̱ndá Colosas
\p
\v 1‑2 Jiòn, xi̱ta̱‑la̱ Nainá ra titsa̱jna ya̱ na̱xi̱ndá Colosas ra ko̱ꞌsín kixi̱ mangíꞌta‑la Cristo Jesús, jè ꞌndsé Timoteo ko̱ ꞌa̱n Pablo, ꞌkoa̱á ꞌsín i̱nchinìhixoꞌtá‑laji̱n, ꞌa̱n ra ko̱ꞌsín tsikíxáya‑na Jesucristo koni ꞌsín nga jè Nainá kjomejèn‑la̱. Nainá ra Na̱ꞌín‑ná ma, katatsjá‑no kjo̱nda ko̱ kjo̱ꞌnchán ya̱ a̱jin inìma̱‑no.
\s Kóꞌsín jè Pablo tsjá‑la̱ kjo̱nda Nainá
\p
\v 3 ꞌKia̱ nga nakjoáꞌta‑la̱ji̱n Nainá ra Na̱ꞌìn‑la̱ Jesucristo ra tíjna ítjòn‑ná, ꞌkoa̱á ꞌsín ꞌmì kiꞌta‑la̱ji̱n ra a̱ꞌta tsa̱jiòn nga tse kjo̱nda kataꞌse‑la̱ ra jè.
\v 4 Ta nga̱tjì‑la̱ ijyeé ko̱ꞌsín nda kinaꞌyá‑ji̱n nga ndaá makjiín‑no a̱ꞌta ꞌtse̱ Cristo Jesús, ko̱ kóꞌsín nga ꞌñó tsjacha jiòn ngaꞌtsì jñà ra xi̱ta̱‑la̱ Nainá.
\v 5 Ko̱ kií ko̱ꞌsín ꞌnià‑najiòn nga̱ jè i̱nchichiñá‑la jè kjo̱nda ra tjábé‑no ra jè Nainá tíjnatjò‑la̱ ján ngajmi; koni ꞌsín kjòchi̱ya‑no ꞌkia̱ nga kinaꞌyá jè ꞌén xi̱tse̱ ra nda tsò ra ngi kjo̱hixi̱.
\v 6 Jè ꞌén nda ra̱kìi̱ ra ko̱ꞌsín ijchòkàjin‑no, ꞌñó tínaꞌyá‑la̱ nga tíjngo i̱sàꞌnde ko̱ ꞌñó kjìn xi̱ta̱ i̱nchimakjiín‑la̱ ko̱ i̱nchifahatjìya‑la̱ kjo̱bítsjen‑la̱ koni ꞌsín kjomàꞌtin jiòn ꞌkia̱ nga ti̱ꞌsa̱ inaꞌyá jè kjo̱nda ra tjín‑la̱ Nainá ko̱ nga kjokjiín‑no nga ngi kjo̱hixi̱‑ní.
\v 7 ꞌKoa̱á ꞌsín tsakón‑ya‑no jè Epafras jè xi̱ta̱ ra ꞌñó tsjacha‑ji̱n ra ta̱ña níxákjo‑ji̱n a̱ꞌta ꞌtse̱ Nainá, nga chi̱ꞌnda‑la̱ Cristo ma nga kixi̱ tísíhitjasòn‑la̱ Nainá ra a̱ꞌta tsa̱jiòn.
\v 8 Ijyeé tsiꞌkéna̱jmí‑naji̱n nga ꞌñó tjín‑no kjo̱tsjacha ra a̱ꞌta ꞌtse̱ xi̱ta̱, koni ꞌsín nga jè Inìma̱ Tsje‑la̱ Nainá síkjinchrabájin inìma̱‑no.
\p
\v 9 ꞌKoa̱á ma‑ni, skanda ꞌkia̱ nga inaꞌyá‑ji̱n mì kì chaàjin‑naji̱n nga i̱nchinakjoáꞌta‑la̱ji̱n Nainá ra a̱ꞌta tsa̱jiòn; ꞌkoa̱á ꞌsín níjéꞌta‑la̱ji̱n nga ngi nda katasíchi̱ya‑no koni ꞌsín mejèn‑la̱ ra jè; ti̱ꞌkoa̱á katatsjá‑no kjo̱bítsjen ko̱ kjoa̱chji̱ne̱ mé‑ni nga nda katafìya‑no ra kjoa̱ ꞌtse̱ Nainá.
\v 10 Ko̱ ti̱ꞌkoa̱á nda si̱jchá ijo‑no koni ꞌsín tjínè‑la̱ nga ꞌsi̱in jñà ra xi̱ta̱‑la̱ Nainá, nga ni̱chjin nchijón ko̱ꞌsín ꞌsia̱an koni ꞌsín mejèn‑la̱ ra jè, ko̱ nga isa̱ nda si̱hitjasòn ta mé kjoa̱ ra nda tjín ko̱ nga kiꞌta ni̱chjin isa̱ nda jcha̱xkon ra jè.
\v 11 Ti̱ꞌkoa̱á ꞌkoa̱á ꞌsín i̱nchiníjéꞌta‑la̱ji̱n Nainá nga katatsjá‑no ngaꞌñó‑la̱ ra ꞌñó jeya tíjna mé‑ni ꞌñó ki̱ncha‑no ko̱ ꞌkoa̱á ꞌsín ma‑ni nga ki̱chíkjoa̱ko̱‑no ko̱ ꞌse̱‑no kjoa̱jetakòn ko̱ kjoa̱tsja,
\v 12 nga ti̱ꞌkoa̱á ko̱ꞌsín ꞌkín‑la jiòn nga tse kjo̱nda kataꞌse‑la̱ Na̱ꞌín‑ná nga kitsjà‑no kjo̱nda‑la̱ nga ti̱ꞌkoa̱á tjábé‑no kjo̱tjò ra tsjá‑la̱ xi̱ta̱‑la̱ ya̱ ñánda̱ isen chon.
\v 13 Jé Nainá tsachrjekàjin‑ná ya̱ a̱ꞌta ꞌtse̱ ngaꞌñó‑la̱ xi̱ta̱‑ni̱í ñánda̱ nga jñò chon, ko̱ ya̱á isíkítsa̱jna‑ná ya̱ ñánda̱ tíbatéxoma Iꞌndí‑la̱ ra ꞌñó tsjake,
\v 14 jè ra ko̱ jní‑la̱ tsikíchjítjì‑ná nga kisíkítsa̱jnandi̱í‑ná ko̱ ti̱ꞌkoa̱á isìhijchaꞌta‑ná jñà jé‑ná.
\s Kóꞌsín nga jè Cristo tíjna ítjòn‑la̱ ngaꞌtsì ra tsijen‑ni ko̱ ra mì kì tsijen‑ni
\p
\v 15 Jè Cristo, jé‑ní ra ngi bakón tsijen‑ná yá kjòn‑ni jè Nainá jè ra mì kì tsijen‑ni. Ko̱ jé Cristo tíjna ítjòn‑la̱ ngaꞌtsì ta mé ra isinda i̱sàꞌnde.
\v 16 Ko̱ó Cristo nga tsikínda jè Nainá ngaꞌtsì ra tjín ya̱ ján ngajmi ko̱ ngaꞌtsì ra tjín i̱ a̱ꞌta nangi, jñà ra tsijen‑ni ko̱ jñà ra mì kì tsijen‑ni, ngaꞌtsì ngaꞌñó ra tjín a̱jin i̱sén, jñà ra tjítsa̱hijyo ítjòn, ko̱ jñà ra i̱nchibatéxoma, jñà ra tjín‑la̱ xá, ko̱ jñà ngaꞌñó ra mì kì tsijen‑ná; sabà ko̱ó Cristo kisinda ijye mé‑ni nga jè ko̱chjeén‑la̱.
\v 17 Ta̱ꞌkoa̱ tíjna Cristo ꞌkia̱ nga ti̱kje sinda ngaꞌtsì tsajmì ra tjín, ko̱ jé tsjá ngaꞌñó‑la̱ ngaꞌtsì tsajmì nga takó ya̱ títsa̱hijyo kiꞌta ya̱ i̱ꞌnde‑la̱.
\v 18 Jé Cristo tíjna sko̱ na̱xi̱ndá‑la̱ ra ti̱jè‑ni ijo‑la̱, ko̱ a̱ꞌta ꞌtse̱é kjoꞌtsia̱‑ni, ko̱ jé kjón kjoꞌtsia̱‑ni nga jaáya ítjòn‑la̱, mé‑ni nga jè kíjna ítjòn‑ni a̱ꞌta ꞌtse̱ ngaꞌtsì ra tjín.
\v 19 Nainá, ꞌkoa̱á ꞌsín isasèn‑la̱ nga jngo kjá ya̱ tsikijnajin ya̱ ijo‑la̱ Cristo,
\v 20 ko̱ a̱ꞌta ꞌtse̱é Cristo ma tsajo̱óndako̱‑ni Nainá ngaꞌtsì ra tjín nga tjíjtsa i̱sàꞌnde, ra tjín ján ngajmi ko̱ ra tjín i̱ a̱ꞌta nangi; ko̱ a̱ꞌta ꞌtse̱é jní‑la̱ ra ixaájten ya̱ a̱ꞌta krò nga ꞌnchán isíkítsa̱jna‑ni xi̱ta̱ ko̱ Nainá.
\s Kóꞌki tse kjo̱nda tjín‑ni nga tsachrjekàjin‑ná kjo̱hiꞌin Nainá
\p
\v 21 Jiòn, nga ꞌsa̱ ítjòn, kjiín titsa̱jna‑la Nainá, ko̱ kondra̱á tsikitsa̱jna‑la koni ꞌsín nga iníkítsjen ta nga̱tjì‑la̱ nga ꞌchoó tjín kjoa̱ ra kiꞌnià.
\v 22 Tanga ꞌndi̱‑ni̱ ijyeé nda kichiba‑no ko̱ Nainá ta nga̱tjì‑la̱ kjo̱biya ra kisìkjiín Cristo ꞌkia̱ nga tsikijna ya̱ a̱ꞌta nangi, ko̱ kií ko̱ꞌsín kiꞌsìn‑ni mé‑ni nga tsje ki̱tsa̱hijyo‑najiòn ko̱ nga ni̱mé jé ꞌse̱‑no ko̱ ni̱mé ra ma ko̱chrjengi‑no ya̱ ngixko̱n Nainá.
\v 23 Kií machjeén‑ni nga kixi̱ ti̱tsa̱jna koni ꞌsín nga makjiín‑no ko̱ kì minchaꞌtaxìn‑la kjoa̱ ra i̱nchichiñá‑la a̱ꞌta ꞌtse̱ ꞌén xi̱tse̱ ra nda tsò a̱ꞌta ꞌtse̱ Cristo ra ijye inaꞌyá; jè ꞌén nda ra̱kìi̱, jndíi̱ ra ján tíꞌsena̱jmíya‑la̱ xi̱ta̱ nga tíjngo i̱sàꞌnde, ko̱ ꞌa̱n ra ꞌmì‑na Pablo ꞌa̱án kjonga̱tsja nga ꞌkenájmíya.
\s Xá‑la̱ Pablo
\p
\v 24 ꞌNdi̱‑ni̱ tsjaá ꞌbé‑na jè kjo̱hiꞌin ra tísikjiáa̱n ra ta kjoa̱ tsa̱jiòn, nga ꞌkoa̱á ꞌsín tísíjngoko̱ ijo‑na̱ jè kjo̱hiꞌin ra chijaꞌta‑na koni ꞌsín nga kitsjà‑na Cristo nga si̱ìkjiín kjo̱hiꞌin ijo‑na̱ ra ta kjo̱nda ꞌtse̱ na̱xi̱ndá‑la̱ ra ti̱jè‑ni ijo‑la̱ Cristo.
\v 25 ꞌA̱án tísíchjeén‑na Nainá nga ya̱ tísíxáko̱o na̱xi̱ndá‑la̱ jè xá ra jè kisìnga̱tsja‑na ra kjo̱nda tsa̱jiòn nga ngi nda ꞌkenájmíya ꞌén nda‑la̱,
\v 26 jè ꞌén ra tíjnaꞌma‑la̱ Nainá skanda nga ti̱ꞌsa̱‑ni kjotseé nga kiꞌse xi̱ta̱; tanga ni̱chjin ꞌndi̱ ꞌndi̱ ijyeé tsakón‑la̱ jñà xi̱ta̱‑la̱.
\v 27 Jè Nainá, ꞌkoa̱á ꞌsín kjomejèn‑la̱ nga tsakón‑la̱ jñà xi̱ta̱‑la̱ kóꞌsín ꞌñó jeya tjín kjòn‑ni jè kjoa̱ꞌma ra tjínda‑la̱ ra a̱ꞌta ꞌtse̱ ra mì tsa xi̱ta̱ judío. Ko̱ jè kjoa̱ꞌma ra̱kìi̱, jé‑ní nga Cristo, ya̱á tíjnajin masen‑no ko̱ ꞌkoa̱á ꞌsín ma‑ni nga i̱nchichiñá‑la nga ꞌse̱‑te‑no jè kjoa̱jeya‑la̱.
\p
\v 28 ꞌKoa̱á ꞌsín nakjoáya‑la̱ji̱n ngaꞌtsì xi̱ta̱ a̱ꞌta ꞌtse̱ Cristo, ko̱ ꞌñó i̱nchinakjoá‑la̱ji̱n nga i̱nchiꞌbi‑la̱ji̱n ngaꞌtsì kjo̱bítsjen mé‑ni nga ni̱mé ra jchi̱jaꞌta‑la̱ ngaꞌtsì xi̱ta̱ ra Cristo títsa̱jnako̱ jè ni̱chjin ꞌkia̱ nga ki̱jchò ya̱ ngixko̱n Nainá.
\v 29 Kií ko̱ꞌsín tísíxá‑na nga ꞌñó tíbiné‑la̱ ijo‑na̱ nga tísichjée̱n jè ngaꞌñó ra títsjá‑na Cristo.
\c 2
\p
\v 1 Mején‑na nga nda katasijin‑najiòn nga ꞌñó tíkjaán‑tjìa̱ ra a̱ꞌta tsa̱jiòn ko̱ ra a̱ꞌta ꞌtse̱ jñà xi̱ta̱ ra títsa̱jna ya̱ na̱xi̱ndá Laodicea ko̱ a̱ꞌta ꞌtse̱ ngaꞌtsì xi̱ta̱ ra kjè bexkon‑ná.
\v 2 Kií ko̱ꞌsín tíkjaán‑tjì‑na mé‑ni nga kataꞌse‑la̱ ngaꞌñó inìma̱‑la̱, ko̱ mé‑ni nga jñà kjo̱tsjacha ra tjín‑la̱ nga jngó jngó nda katasíkítsa̱jtín mé‑ni nga nda katamakixi̱jin‑ni ya̱ kjo̱bítsjen‑la̱ nga ngi nda kjón katamachi̱ya‑la̱ jè kjoa̱ꞌma‑la̱ Nainá ra Na̱ꞌín‑ná, kjoa̱ꞌma ra jé kjón‑nì Cristo.
\v 3 Nga̱ ta jé Cristo ra tjín‑la̱ ngaꞌtsì kjo̱chji̱ne̱ ko̱ kjoa̱ ra síchi̱ya‑ná ra batoó ꞌñó chjí‑la̱.
\v 4 Kií ko̱ꞌsín tíxin‑no mé‑ni nga mì yá ra sko̱ónda̱cha̱‑no nga si̱ìchjeén ꞌén ra ndi̱to̱n ko̱kjiín‑no ra mì tsa ꞌén kixi̱.
\v 5 Ni̱ꞌsín mì tsa ya̱ tíjna̱ko̱ tsijen‑no, tanga tíbítsjen kiꞌta‑na a̱ꞌta tsa̱jiòn ko̱ matsjaá‑na nga be nga kixi̱ titsa̱jtión ko̱ kixi̱ titsa̱jna nga kjiꞌta takòn jè Cristo.
\p
\v 6 Koni ꞌsín nga kjokjiín‑no a̱ꞌta ꞌtse̱ Jesucristo ra tíjna ítjòn‑no, ꞌkoa̱ ti̱ꞌsín ya̱ ti̱maꞌta‑la koni ꞌsín nga bakèn‑la̱ xi̱ta̱ ra ya̱ títsa̱jnajtín‑ko̱ Cristo.
\v 7 Ngi nda kjón kixi̱ katamakjiín‑no a̱ꞌta ꞌtse̱, koni jngo yá ra ꞌñó na̱nga̱ fì kja̱ma̱‑la̱ ko̱ koni jngo niꞌya ra ꞌñó tjín chrjó tjàꞌtsin nga ꞌnga tímihijin. Ko̱ꞌsín isa̱ ꞌñó katamakjiín-isa‑no koni ꞌsín nga tsakon‑ya‑no, ko̱ ko̱ꞌtìn kiꞌta‑la nga tse kjo̱nda kataꞌse‑la̱ Nainá.
\s Kóꞌsín nga ijyeé tjíꞌta chi̱be̱é ra a̱ꞌta ꞌtse̱ Cristo
\p
\v 8 Nda ti̱kinda̱a ijo‑no mé‑ni nga mì jñà sko̱ónda̱cha̱‑no jñà ra ta kjo̱bítsjen ra ni̱mé chjí‑la̱ síchjeén nga chja̱ ꞌén ndiso. Nga̱ jñà kjo̱bítsjen kìi̱, ta ya̱á nchrabá‑ni a̱ꞌta ꞌtse̱ kjoa̱ ra ta xi̱ta̱ bínda koni ꞌsín tjín kjo̱téxoma‑la̱ xi̱ta̱ ra tjín i̱ i̱sàꞌnde, ra mì tsa ko̱ꞌsín tjín koni ꞌsín tjín kjo̱téxoma ꞌtse̱ Cristo.
\p
\v 9 Ya̱á ꞌya ijo‑la̱ Cristo kóhoꞌki tíjngo kjòn‑ni ra jè saba Nainá.
\v 10 Ko̱ ya̱á majngoꞌtáko̱ jiòn nga Cristo titsa̱jnako̱o. Nga̱ jé Cristo tíjna ítjòn‑la̱ ngaꞌtsì ngaꞌñó ko̱ ngaꞌtsì ra batéxoma ya̱ a̱jin i̱sén.
\v 11 Ko̱ a̱ꞌta ꞌtse̱‑ní nga isiꞌta chi̱ba̱ jiòn koni ꞌsín tjín kjoa̱ ꞌtse̱ circuncisión, tanga jngo chi̱ba̱ ra mì tsa tsja xi̱ta̱ isiꞌta‑ni, jè‑ní ra Cristo tsikíꞌta chi̱ba̱‑no ꞌkia̱ nga jahíxìn ngaꞌtsì jé ra tjín‑la̱ ijo jé‑no.
\v 12 ꞌKia̱ nga isatíndá jiòn, ꞌkoa̱á jngoya‑la̱ koni tsa ya̱á isìhiꞌndeꞌta‑la̱ Cristo, ko̱ ꞌkia̱ nga jaáya‑ila̱ Cristo ya̱á jaáya‑te‑no ra jiòn ta nga̱tjì‑la̱ nga kjokjiín‑no a̱ꞌta ꞌtse̱ ngaꞌñó‑la̱ Nainá ra isikjaáya‑la̱ Cristo a̱ꞌta ꞌtse̱ kjoa̱biya.
\v 13 Jiòn nga ꞌsa̱ ítjòn, miꞌken‑nájiòn a̱ꞌta ꞌtse̱ Nainá ta nga̱tjì‑la̱ kjoa̱ ꞌtse̱ jé ra tjín‑no, ko̱ ta nga̱tjì‑la̱ nga kjè kì tsa bíꞌta chi̱ba̱‑no Cristo nga kjè kì tsa faháxìn jé ra tjín‑la̱ ijo jé‑no. Tanga ꞌndi̱‑ni̱, Nainá, ijyeé isíkítsa̱jnakon‑no ko̱ Cristo, nga̱ ngaꞌtsí‑ná nga ijye isìhijchaꞌta‑ná ngaꞌtsì jé ra tjín‑ná.
\v 14 ꞌKoa̱á jngoya‑ila̱ koni tsa jè Nainá ijye isikjeheya‑ni xa̱jo̱n ra itjahítje̱n ra kondra̱ tsa̱jién, jè ra batéchjá‑ná tsiki. Jngo kjá ya̱ jahíxìn ꞌkia̱ nga ꞌkenꞌta krò Cristo.
\v 15 Nainá jahíxìn ijyeé‑la̱ ngaꞌñó ra tjín‑la̱ jñà ra batéxoma ya̱ a̱jin i̱sén. Ya̱á kisikijne‑la̱ ꞌkia̱ nga jè Cristo ꞌkenꞌta krò. Ko̱ ya̱á tsinchá masen ya̱ ngixko̱n ngaꞌtsì xi̱ta̱, mé‑ni nga tsakón‑la̱ nga jè isikijne.
\s Kóꞌsín nga mì kì ma‑la̱ ko̱si̱ko̱‑ná ra ta kjo̱téxoma‑la̱ xi̱ta̱ i̱sàꞌnde
\p
\v 16 ꞌKoa̱á ma‑ni, kì ya̱ nisin‑la tsa yá ra kó ki̱tso̱‑no a̱ꞌta ꞌtse̱ tsajmì ra chine ko̱ mé nandá ra ꞌsio̱ò; ko̱ tsa mì kì nihitjasòn jiòn ꞌkia̱ nga bitjo ꞌsí, ko̱ ꞌkia̱ nga bitjo xi̱tse̱ india‑ni sá, ko̱ tsa mì kì ꞌyaxkón jiòn ni̱chjin níkjáya.
\v 17 Ta ngaꞌtsì kjoa̱ kìi̱, ꞌkoa̱á ꞌsín jngoya‑la̱ koni jñà ꞌngién‑la̱ kjoa̱ ra a̱skan ꞌji. Tanga ra ngi kjoa̱kixi̱, jé Cristo.
\v 18 Kì biꞌnde yá ra faháxìn‑no jè kjo̱tjò ra ijye tsa̱jiòn, koni a̱ꞌta ꞌtse̱ jñà xi̱ta̱ ra mejèn‑la̱ nga ko̱ꞌsín ꞌsia̱an jiòn koni ꞌsín ꞌsín ra jñà, nga bexkón ìkja̱li̱ ko̱ nda xi̱ta̱ bachrjengi ijo‑la̱, ra ko̱ꞌsín tsò nga ya̱á sakò‑la̱ kjo̱bítsjen ꞌkia̱ nga batsíjen tsijen‑la̱ kjo̱xkón ra Nainá bakón; ko̱ ta kjo̱tjó‑ní nga ko̱ꞌsín ndaá bachrjengi ijo‑la̱ a̱ꞌta ꞌtse̱ kjoa̱ ra nì mé chjí‑la̱ ra ta kjo̱bítsjen ꞌtse̱.
\v 19 Xi̱ta̱ kìi̱ mì tsa ya̱ tjíjngoko̱ Cristo jè ra tíjna ítjòn nga sko̱ ma. Nga̱ jé Cristo ra ma sko̱ na̱xi̱ndá‑la̱, ko̱ jé síkihijin nga tsjá‑la̱ ngaꞌñó, ko̱ síjngoko̱ xákjén koni ꞌsín nga tjíkjo ninda‑la̱ ijo‑ná ko̱ koni ꞌsín tjín naxá‑la̱ ra itsabajin, mé‑ni nga nda ki̱hijin‑ni koni ꞌsín nga ijye kiskosòn‑la̱ Nainá.
\s Jé si̱kítsjeén kjoa̱ ra tjín ya̱ ján ngajmi
\p
\v 20 Ijyeé ya̱ ꞌken‑ko̱o jiòn Cristo, ko̱ mì tsa ti̱ ya̱ itsabáꞌñó‑no jè ngaꞌñó ra batéxoma jè i̱sàꞌnde ra̱kìi̱. ¿Tanga mé‑ni takó ko̱ꞌsín titsa̱hijyo‑no koni tsa ya̱ nakjoá‑no jè i̱sàꞌnde ra̱kìi̱ nga nihitjasòn kjo̱téxoma ra tsò:
\v 21 “Kì ko̱tjín ra chaájni, kì jñà tsajmì kiòo̱ chine‑jìn, ko̱ kì ndsi̱i chjíbé‑ni”?
\v 22 Jñà kjo̱téxoma kìi̱, ta ꞌtse̱é jñà tsajmì ra ta ya̱ fe ꞌkia̱ nga ijye machjeén; ko̱ ta xi̱ta̱á ra bínda ko̱ ra bakón‑ya.
\v 23 Jñà kjoa̱ kìi̱, ꞌkoa̱á ma‑ná koni tsa nda tjín nga ꞌkoa̱á ꞌsín bíꞌtin‑ná nga kínè‑lá ijo‑ná nga jcha̱xkén Nainá, ko̱ nga nda xi̱ta̱ ꞌsie̱én, ko̱ kóꞌsín nga kínè‑lá kjo̱hiꞌin ijo‑ná mé‑ni nga ko̱kixi̱ya‑ná. Tanga ra ngi ꞌén kixi̱ kjòn‑ni, ni̱ ta mé ra basìko̱‑ná kjoa̱ kìi̱ nga ma ki̱jmié kjoa̱ꞌcho ra síjé ijo‑ná.
\c 3
\p
\v 1 Jñà tjatsjio kjo̱nda ra tjín ya̱ ján ngajmi ya̱ ñánda̱ nga tíbatéxoma Cristo nga tíjnaꞌta ya̱ nga kixi̱‑la̱ Nainá ta nga̱tjì‑la̱ nga ijyeé ya̱ jaáya‑no ko̱ Cristo.
\v 2 Kií ti̱kítsjen kiꞌta jñà kjoa̱nda ra tjín ya̱ ján ngajmi; kì tà chjàn jñà níkítsjen jñà kjoa̱ ra ma i̱ i̱sàꞌnde.
\v 3 Nga̱ ijyeé ꞌken jiòn ra a̱ꞌta ꞌtse̱ i̱sàꞌnde ko̱ ꞌndi̱‑ni̱ jè kjo̱binachon xi̱tse̱ ra tjín‑no, ya̱á tíjnatjòko̱ Cristo ya̱ ngixko̱n Nainá.
\v 4 Jè Cristo, jè sabá ra kjo̱binachon‑najiòn. ꞌKia̱ nga jè ra ko̱tsíjen india‑ni, ya̱á ta̱ña ko̱tsíjen‑ko̱ jiòn nga ti̱ꞌkoa̱ jeya ki̱tsa̱jna.
\s Kjoa̱ jchínga ko̱ kjoa̱ xi̱tse̱
\p
\v 5 Jngo kjá ti̱jchija ngaꞌtsì kjoa̱ꞌcho ra ꞌya‑ni ijo jé‑no koni jñà ra kjoa̱chijngi, ko̱ kjoa̱ ra tjé tjín, ko̱ jñà kjoa̱ꞌcho ra síjé ijo‑no ko̱ ta mé‑isa‑ni kjoa̱ ra síkjahajin ijo‑no koni jè‑te nga mejèn‑no tse to̱n ꞌse̱‑no. Jè kjoa̱ ra̱kìi̱, ꞌkoa̱á jngoya‑ila̱ koni tsa nainá xkósòn ꞌyaxkón jiòn.
\v 6 Nga̱ ya̱á nchrabá‑ni nga ko̱ꞌsín síkjinchrabá kjo̱hiꞌin Nainá a̱ꞌta ꞌtse̱ xi̱ta̱ ra mì kì síhitjasòn‑la̱.
\v 7 ꞌKoa̱á ti̱ꞌsín kiꞌnià‑te jiòn ꞌkia̱ nga ya̱ tsikitsa̱jion kjoa̱ kìi̱ nga ꞌsa̱ kjotseé.
\v 8 Tanga ꞌndi̱‑ni̱ ti̱jmió ngaꞌtsì jñà kjoa̱ kìi̱: jñà ra kjoa̱jtitakòn, ko̱ jñà ra kjoa̱ꞌtse̱n ko̱ jñà kjoa̱ ra ꞌcho tjín, ko̱ jñà kjoa̱ nga nakjoájno‑la xi̱ta̱, ko̱ ngaꞌtsì ꞌén ꞌcho ra sa ꞌkoa̱ nakjoá.
\v 9 Kì ꞌén ndiso chìko̱o jñà xàngio̱o, nga̱ ijyeé itjahíxìn‑no jè kjo̱binachon jchínga‑no ko̱ ngaꞌtsì kjoa̱ ra kiꞌnià ti̱ꞌsa̱ kjotseé.
\v 10 Ko̱ ijyeé jngo kjo̱binachon xi̱tse̱ ichjíbé jiòn koni ꞌsín ꞌki jè Nainá ra tsikínda‑no. Ko̱ jè kjo̱binachon xi̱tse̱ ra tjín‑no tímaxi̱tse̱ya‑ní skanda ꞌkia̱ nga nda kjòn jcha̱xkon Nainá.
\v 11 ꞌNdi̱‑ni̱ mì tsa ti̱jè ꞌñó machjeén‑ni yá‑ni ra xi̱ta̱ griego ko̱ yá‑ni ra xi̱ta̱ judío, yá ra tjíꞌta chi̱ba̱ ijo‑la̱ ko̱ yá ra mì kì tsa tjíꞌta chi̱ba̱ ra kjoa̱ ꞌtse̱ circuncisión, yá‑ni xi̱ta̱ ra xìn nangi, ko̱ yá‑ni ra tísíjchá i̱ma̱ ijo‑la̱, ko̱ yá‑ni ra chi̱ꞌnda tíjnaꞌñó ko̱ yá‑ni ra tíjnandi̱í; ta jé Cristo ra ꞌñó chjí‑la̱; nga̱ jé ra tíjnajin ya̱ inìma̱‑la̱ ngaꞌtsì xi̱ta̱ ra makjiín‑la̱ a̱ꞌta ꞌtse̱.
\p
\v 12 Nainá tsjakeé‑no, ko̱ ꞌkoa̱á ꞌsín jahájin‑no nga tsikítsa̱hijyoꞌtaxìn‑no nga ngi na̱xi̱ndá tsje‑la̱ kiꞌsìn‑no. ꞌKoa̱á ma‑ni nga chjíbé kjoa̱ xi̱tse̱ koni jñà kjo̱hi̱ma̱takòn ra inìma̱‑no katanchrabájin‑ni, ꞌtia̱àn kjo̱nda ra nda tjín, kì xi̱ta̱ ꞌnga ikon ꞌnià, indakjoa̱ ꞌtia̱àn, ko̱ kataꞌse‑no kjoa̱jetakòn.
\v 13 Katachíkjoa̱‑no nga jngó jngó a̱ꞌta ꞌtse̱ xàngio̱o; ko̱ ti̱jchaàꞌta‑la̱ xàngio̱o tsa ꞌkia̱ mé kjoa̱ ra síko̱‑no. ꞌKoa̱á ti̱ꞌsín ꞌtia̱àn koni ꞌsín kiꞌsìn jè Cristo nga isìhijchaꞌta‑no.
\v 14 Tanga jè ra tíjna ítjòn a̱ꞌta ꞌtse̱ kjoa̱ kìi̱, jè‑ní nga ꞌñó tsjacha ꞌtia̱àn jñà xi̱ta̱ xàngio̱o, nga̱ jé kjo̱tsjacha ra nda síkítsa̱jnajtín‑ná.
\v 15 Ko̱ jè kjoa̱ꞌnchán‑la̱ Cristo nda katatéxoma ya̱ a̱jin inìma̱‑no, nga̱ xá ꞌkoa̱á ꞌsín kiìchja̱‑no Nainá nga ꞌnchán ki̱tsa̱hijyo‑ko̱o xàngio̱o nga jngó jngó‑no nga jngo ijo ko̱ma‑no. Ko̱ ko̱ꞌsín ꞌti̱‑la kjo̱nda.
\p
\v 16 Jè ꞌén‑la̱ Cristo ꞌñó nda katasijin kiꞌta ya̱ a̱jin inìma̱‑no. Ta̱kón‑ya‑la xàngio̱o ko̱ ti̱kixi̱ya nga ti̱chjeén kjo̱bítsjen ra tjín‑la̱ kjoa̱chji̱ne̱. Ko̱ ngi ko̱ó inìma̱‑no ꞌti̱‑la kjo̱nda Nainá nga ti̱jndá‑la so koni ꞌsín nchrabá ya̱ Salmo, ko̱ so ra jeya síkíjna Nainá, ko̱ so ra ya̱ nchrabájin‑ni ya̱ inìma̱‑no.
\v 17 Ngaꞌtsì mé kjoa̱ ra ꞌsia̱an, tsa mé ꞌén ra ki̱nákjoa̱a ko̱ tsa mé ra mejèn‑no nga ꞌsia̱an, ngi ꞌkoa̱ kjón ꞌsín ꞌtia̱àn koni ꞌsín tjínè‑la̱ nga ꞌsi̱in xi̱ta̱ ra chja̱‑ni a̱ꞌta ꞌtse̱ Jesucristo ra tíjna ítjòn‑ná. Ko̱ ngi a̱ꞌta ꞌtse̱‑ní nga ko̱ꞌtìn‑la Nainá nga tse kjo̱nda kataꞌse‑la̱.
\s Kjoa̱ ra machjeén a̱ꞌta ꞌtse̱ xi̱ta̱‑la̱ Cristo
\p
\v 18 Jiòn íchjín ra ijye tjín‑no ꞌxi̱n, nda ti̱náꞌyahijon‑la ꞌxi̱n‑no nga ꞌkoa̱á ꞌsín síjé jè Cristo ra tíjna ítjòn‑no.
\v 19 Jiòn ra xi̱ta̱ ꞌxi̱n ꞌmì‑no, tsjacha ꞌtia̱àn jñà íchjín‑no; kì tà chjàn ꞌyaton.
\v 20 Jiòn ra i̱xti ꞌmì‑no nda ti̱hitjasòn‑la jñà xi̱ta̱ jchínga‑no, nga̱ jè Nainá ndaá sasén‑la̱ jñà kjoa̱ kìi̱.
\v 21 Jiòn ra na̱ꞌìn ꞌmì‑no, kì taxki̱ si chitiko̱o jñà i̱xti‑no mé‑ni nga mì si̱ìkjahajen‑la̱ ikon.
\v 22 Jiòn ra chi̱ꞌnda ꞌmì‑no nda ti̱hitjasòn ijye‑la ta mé xá ra ki̱ìꞌtin‑no jñà ra ni‑no ma i̱ a̱ꞌta nangi; kì tà ꞌkia̱ nda níxá ꞌkia̱ nga tíkotsíjen‑no tsa ta jè mejèn‑no nga nda kítjo̱ngio ya̱ ngixko̱n; ngi ko̱ó inìma̱‑no nga nda ti̱hitjasòn‑la, nga̱ ꞌya‑nó nga jé Na̱ꞌín‑ná tíkotsíjen‑no.
\v 23 ꞌKia̱ nga mé xá ra ꞌsia̱an, kì ko̱ꞌsín ꞌnià koni tsa xi̱ta̱ i̱nchiníxá‑la̱, ngi ko̱ó kjo̱tsja‑no nga nda ti̱hitjasòn koni tsa jè Na̱ꞌín‑ná i̱nchiníxá‑la̱.
\v 24 Ijyeé ꞌya jiòn nga jè Jesucristo tsjá‑no chjí‑no ꞌkia̱ nga si̱ìnga̱tsja‑no jè kjo̱tjò ra bako̱‑no, ta nga̱tjì‑la̱ nga̱ jè Jesucristo ra tíjna ítjòn‑no i̱nchiníxáꞌta‑la.
\v 25 Tanga jè xi̱ta̱ ra ꞌcho tjín kjoa̱ ra ꞌsi̱in, ꞌkoa̱á ꞌsín ko̱chjí‑la̱ koni ꞌsín tjín kjoa̱ꞌcho ra ꞌsi̱in. Nga̱ jè Nainá mì tsa fahájin xi̱ta̱; ta ngásòn ngáyaá fìko̱ ngaꞌtsiòo̱.
\c 4
\p
\v 1 Jiòn ra ni‑la̱ xá ma, nda jchatjò jñà xi̱ta̱ chi̱ꞌnda‑no koni ꞌsín tjín ra kjoa̱kixi̱; nga̱ jiòn, ꞌya‑nó nga ti̱ꞌkoa̱á tíjna jngo‑no ra Ni‑no ma ya̱ ján ngajmi.
\s Kjoa̱ ra isa̱ ꞌñó machjeén nga ꞌsie̱én
\p
\v 2 Ti̱tsa̱nda kiꞌta ꞌkia̱ nga kítsaꞌba; kì ni̱kjiá bìkjòn‑la nga nakjoáꞌta‑la Nainá; ko̱ ko̱ꞌtìn kiꞌta‑la nga tse kjo̱nda kataꞌse‑la̱ ra jè.
\v 3 ꞌKoa̱á ti̱ꞌsín titsaꞌbatjì‑náji̱n mé‑ni nga jè Na̱ꞌín‑ná katakjíꞌxa̱ꞌnde‑ni nga ko̱ma ꞌkéna̱jmí‑ji̱n jè ꞌén‑la̱ ko̱ mé‑ni nga ma ko̱kón‑naji̱n jè ꞌén ra tjíꞌma a̱ꞌta ꞌtse̱ Cristo nga ꞌsa̱ ítjòn, jè ra ta kií kjoa̱‑ni nga nda̱yá tíjna̱ꞌya.
\v 4 Titsaꞌbatjì‑nájiòn mé‑ni nga ꞌse̱‑na ngaꞌñó nga nda kjón‑ní kixi̱ kichjàyajin‑la̱ xi̱ta̱ koni ꞌsín nga tjínè‑la̱ nga kichjà.
\p
\v 5 Nda kjón ti̱chjeén ni̱chjin ra titsa̱hijyo nga nda tjahíko̱o kjo̱bítsjen‑no ya̱ a̱jin‑la̱ xi̱ta̱ ra kjè kì be ꞌén‑la̱ Nainá.
\v 6 ꞌKia̱ nga jchi̱ko̱o xi̱ta̱, jñà ti̱chjeén ꞌén ra nda tsò ko̱ ra nda sasén‑la̱. ꞌKoa̱á ꞌsín ko̱ma‑ni nga sa̱kò‑no ꞌén kóꞌsín nga ꞌkín‑la̱ tsa ꞌkia̱ mé ꞌén ra sko̱nangi‑no.
\s Kóꞌsín jè Pablo síhixoꞌta xi̱ta̱
\p
\v 7 Ngaꞌtsì mé kjoa̱ ra tímaꞌtiaa̱n, jé ko̱ki̱tso̱‑no jè ꞌndsé Tíquico ra ti̱ꞌkoa̱ tsjacha‑ji̱n ra nda tíbasìko̱‑na nga nda níxákjo‑la̱ji̱n Na̱ꞌín‑ná.
\v 8 Kií xá tísikásén‑no nga jè ꞌke̱èna̱jmí‑no ra a̱ꞌta tsa̱ji̱n kóꞌsín titsa̱jna‑ji̱n, ko̱ jé si̱ìjetakòn‑no nga ꞌse̱‑la̱ ngaꞌñó inìma̱‑no.
\v 9 Ti̱ꞌkoa̱á ya̱á tíbáhijtako̱‑te jè Onésimo jè ra xi̱ta̱ xàngio̱o ma, jngo ꞌndsé ra xi̱ta̱ kixi̱ ra ꞌñó tsjacha‑ji̱n. Jñà ꞌke̱èna̱jmí‑no mé ta̱ kjoa̱ ra tíma i̱jndíi̱.
\p
\v 10 Jè Aristarco ra ta̱ña titsa̱jnaꞌya‑ji̱n nda̱yá, tísíhixoꞌtá‑no, ko̱ ti̱ꞌkoa̱ tísíhixoꞌtá‑no jè Marcos ra ti xákjén ma Bernabé; nga̱ ijyeé a̱sa ijchò jngo‑no xa̱jo̱n a̱ꞌta ꞌtse̱ Marcos; tsa ꞌkia̱ nga ki̱jchòjkon‑no, nda chjíbétjò.
\v 11 Ti̱ꞌkoa̱á tísíhixoꞌtá‑no Jesús ra ti̱ꞌkoa̱á Justo ꞌmì‑te. Ta jñà‑nì ꞌndsé kìi̱ ra xi̱ta̱ judío ra ko̱ꞌsín nda i̱nchisíxáko̱‑na a̱ꞌta ꞌtse̱ kjo̱téxoma‑la̱ Nainá, ko̱ nda i̱nchitsjá ngaꞌñó‑na.
\v 12 Jè chi̱ꞌnda‑la̱ Cristo ra ꞌmì Epafras ra xi̱ta̱ xàngio̱o ma, tísíhixoꞌtá‑te‑no. Kjiꞌtá ni̱chjin nga ꞌñó bítsaꞌba ra a̱ꞌta tsa̱jiòn‑jiòn ꞌkia̱ nga chja̱ꞌta‑la̱ Nainá. ꞌKoa̱á ꞌsín síjé nga ngi kixi̱ ki̱tsa̱jna kiꞌtà ko̱ ngi nda kjón‑ní katasijin‑no mé kjòn‑ni ra mejèn‑la̱ Nainá ra a̱ꞌta tsa̱jiòn.
\v 13 ꞌA̱n ndaá tíbe kóꞌsín nga jè Epafras ꞌñó makájno‑la̱ ra a̱ꞌta tsa̱jiòn ko̱ makájnoó‑te‑la̱ a̱ꞌta ꞌtse̱ ꞌndsé ra títsa̱jna ya̱ na̱xi̱ndá Laodicea ko̱ ra títsa̱jna ya̱ na̱xi̱ndá Hierápolis.
\v 14 Tísíhixoꞌtá‑no jè chji̱ne̱xki ra ꞌmì Lucas ra ꞌñó tsjacha‑ji̱n; ko̱ jè Demas.
\p
\v 15 Ra a̱ꞌta tsa̱ꞌa̱n ti̱hixoꞌtá‑ná jñà ꞌndsé ra títsa̱jna ya̱ na̱xi̱ndá Laodicea. Ko̱ ti̱hixoꞌta‑te‑ná jè Ninfa ko̱ ngaꞌtsì xi̱ta̱ na̱xi̱ndá‑la̱ Cristo ra ya̱ maxkóya ya̱ niꞌya‑la̱.
\v 16 ꞌKia̱ nga ijye ya̱ chjítáꞌyá ya̱ a̱jin‑la̱ xàngio̱o jè xa̱jo̱n ra̱kìi̱, ti̱kasén‑la̱ jñà xi̱ta̱ na̱xi̱ndá‑la̱ Cristo ra títsa̱jna ya̱ Laodicea mé nì nga ti̱ꞌkoa̱ katakotáꞌyá‑ni; ko̱ jè xa̱jo̱n ra ꞌtse̱ na̱xi̱ndá Laodicea ti̱ꞌkoa̱á chjítáꞌyá‑te ra jiòn.
\v 17 Ko̱ꞌtìn‑la̱ jè Arquipo: nda katasíhitjasòn jè xá ra kitsjà‑la̱ Cristo.
\p
\v 18 ꞌKoa̱á ꞌsín tísixóꞌtà‑no ꞌa̱n ra ꞌmì‑na Pablo. Ndsa̱ sabá tíbindá‑na ñánda̱ nga feheꞌta‑ni xa̱jo̱n ra̱kìi̱. Ti̱kítsjen nga nda̱yá tíjna̱ꞌya. Nainá katasíchikonꞌtin‑no. Ko̱ꞌsín katama.