\id COL
\h Colosenses
\toc1 Colosenses
\mt Xo̱jo̱n carta‑la̱ San Pablo xi kiskiì‑la̱ xi̱ta̱ na̱xa̱ndá‑la̱ Cristo xi títsa̱jna Colosas
\c 1
\s Kó tsò Pablo nga síhixatꞌaà jñà xi̱ta̱ na̱xa̱ndá‑la̱ Cristo xi títsa̱jna Colosas
\p
\v 1-2 Jñò xi xi̱ta̱ na̱xa̱ndá‑la̱ Cristo ꞌmì‑nò xi ján titsa̱jnaà na̱xa̱ndá Colosas nga kixi̱ onguítꞌaà‑là Cristo, ꞌa̱n xi Pablo ꞌmì‑na ko̱ ꞌndsè Timoteo titsa̱nìhixotꞌaà‑nòje̱n nga ꞌa̱n tsibíxáya‑na Jesucristo nga kꞌoa̱sꞌín kjòmejèn‑la̱ Nainá. Nainá xi Na̱ꞌèn‑ná, ko̱ jè Jesucristo xi otíxoma‑ná kàtatsjá‑nò kjo̱ndaà ko̱ kjoa̱ꞌnchán ya̱ i̱jiìn ini̱ma̱‑nò.
\s Kó tsò Pablo nga tsjá‑la̱ kjo̱ndaà Nainá
\p
\v 3 Kjitꞌaà na̱chrjein kꞌe̱ nga nokjoàtꞌaà‑la̱je̱n Nainá xi i̱tꞌaà tsa̱jòn, ꞌbiì‑la̱je̱n kjo̱ndaà Nainá xi Na̱ꞌèn‑la̱ Jesucristo jè xi otíxoma‑ná.
\v 4 Koií kjoa̱‑la̱ ngaje̱n jyeé kꞌoa̱sꞌín kinaꞌyà‑je̱n nga ndaà mokjeiín‑nò i̱tꞌaà tsꞌe̱ Cristo Jesús. Ti̱koa̱ matsjacha ngatsꞌiì xi̱ta̱‑la̱ Nainá.
\v 5 Koií kꞌoa̱sꞌín ꞌnè‑nò nga titsa̱chiñá‑là nga tjoé‑nò kjo̱ndaà xi tíjnatjò‑la̱ Nainá ján ngajmiì; koni sꞌín kjòchi̱ya‑nò kꞌe̱ nga kinaꞌyà ꞌén ndaà‑la̱ Nainá xi kjoa̱ tsꞌe̱ Cristo xi nguì kjoa̱kixi̱.
\v 6 Ti̱jè‑ne jè ꞌén ndaà‑la̱ Nainá xi kjoa̱ tsꞌe̱ Cristo xi jye kꞌoa̱sꞌín kinaꞌyà, ꞌñó tínokjoáya nga tíjtsa i̱sòꞌnde ko̱ ꞌñó kjìn xi̱ta̱ nchifatjìya‑la̱ kjo̱hítsjeèn‑la̱ koni sꞌín komàtꞌioòn jñò kꞌe̱ nga jahatjìya‑la̱ kjo̱hítsjeèn‑nò nga jahasꞌen‑jiìn‑nò kjo̱ndaà‑la̱ Nainá xi nguì kjoa̱kixi̱.
\v 7 Kꞌoa̱á sꞌín tsakóya‑nò Epafras jè xi̱ta̱ xi matsjacha‑je̱n nga ta̱ña nìxákjoò‑je̱n i̱tꞌaà tsꞌe̱ Nainá; nga jè Epafras, jngoò chi̱ꞌnda‑la̱ Cristo xi kixi̱ síxá xi i̱tꞌaà tsa̱jòn.
\v 8 Jyeé tsibéno̱jmí‑naje̱n nga jè Ini̱ma̱ Tsjeè‑la̱ Nainá síkítsjeèn‑nò nga ndaà matsjacha xi̱ta̱.
\p
\v 9 Kꞌe̱ nga kinaꞌyà‑je̱n, mìkiì nìjchàajiìn‑je̱n nga bìtsiꞌbatjì‑nòje̱n. Kꞌoa̱á sꞌín nìjétꞌaà‑la̱je̱n Nainá nga nguì ndaà kàtasíchi̱ya‑nò koni sꞌín mejèn‑la̱ jè; jè Ini̱ma̱ Tsjeè‑la̱ kàtatsjá‑nò kjo̱hítsjeèn ko̱ kjoa̱chji̱ne̱.
\v 10 Ti̱koa̱á nìjétꞌaà‑la̱je̱n nga kꞌoa̱sꞌín ti̱jchá yijo‑nò koni sꞌín okꞌìn‑la̱ nga si̱ìjchá yijo‑la̱ xi xi̱ta̱‑la̱ Nainá, nga kjitꞌaà na̱chrjein kꞌoa̱sꞌín tꞌe̱en koni sꞌín mejèn‑la̱, nga kꞌoa̱sꞌín tꞌe̱en ngatsꞌiì kjoa̱ xi ndaà tjín ko̱ nga ìsa̱ ndaà jcha̱xkon yá‑né xi Nainá.
\v 11 Kꞌoa̱á ti̱sꞌín nìjétꞌaà‑la̱je̱n Nainá nga tse ngaꞌñó kàtatsjá‑nò koni sꞌín tjín ngaꞌñó‑la̱ xi mìkiì fehetꞌaà, mé‑ne nga kixi̱ ki̱tsa̱jna‑nò ni̱ta̱ mé kjoa̱ xi sa̱kò‑nò, ti̱koa̱ sꞌe̱‑nò kjoa̱tsejta ko̱ kjo̱tsja.
\v 12 Tjiì‑là kjo̱ndaà Na̱ꞌèn‑ná nga jè kisìkítsa̱jnandaà‑nò nga ti̱koa̱ tjoé‑nò kjo̱tjò xi jè jye tjíndaà‑la̱ ján ngajmiì ñánda iseèn choòn nga tsjá‑la̱ ngatsꞌiì xi̱ta̱‑la̱ xi ya̱ chja̱‑ne na̱xa̱ndá‑la̱ Nainá.
\v 13 Nainá kisìkítsa̱jnandei̱í‑ná i̱tꞌaà tsꞌe̱ ngaꞌñó‑la̱ xi̱ta̱ nei̱í jè xi otíxoma ñánda jñò choòn; ya̱á kisìkítsa̱jna‑ná ñánda tíhotíxoma Kiꞌndí‑la̱ xi ꞌñó matsjakeè,
\v 14 jè xi ko̱ jní‑la̱ tsibíchjítjì‑ná nga kisìkítsa̱jnandei̱í‑ná ti̱koa̱ kisìjchàatꞌaà‑ná jé‑ná.
\s Jè Cristo tíjna ítjòn‑la̱ ngatsꞌiì xi tsejèn ko̱ xi mìkiì tsejèn
\p
\v 15 Ni̱ sa̱á jngoò xi̱ta̱ beèxkon Nainá ta̱nga jè Kiꞌndí‑la̱ tsakó‑la̱ xi̱ta̱ yá‑ne xi Nainá. Nga̱ jè Kiꞌndí‑la̱ xi tíjna ítjòn‑la̱ ngatsꞌiì xi kisindaà i̱sòꞌnde.
\v 16 Nga ko̱ Cristo, Nainá tsibíndaà yije xi tjín ngajmiì ko̱ xi tjín i̱ i̱tꞌaà nangui, xi tsejèn ko̱ xi mìkiì tsejèn, ngatsꞌiì ngaꞌñó xi tjín i̱jiìn i̱sén, xi títsa̱jna ítjòn, xi otíxoma, xi xá ítjòn tjín‑la̱, ko̱ jñà ngaꞌñó xi mìkiì tsejèn‑ná; i̱tꞌaà tsꞌe̱é Cristo kisindaà yije‑ne ko̱ tsꞌe̱‑né.
\v 17 Cristo, ìsa̱á kjòtseé tíjna mì kꞌoa̱‑ne ngatsꞌiì tsojmì xi tjín, ko̱ jè tsjá‑la̱ ngaꞌñó ngatsꞌiì tsojmì mé‑ne nga ndaà kítsa̱jna‑ne.
\v 18 Jè Cristo tíjna sko̱‑la̱ na̱xa̱ndá‑la̱ nga ti̱jè‑ne yijo‑la̱ ko̱ i̱tꞌaà tsꞌe̱é kjòtsꞌia̱‑ne. Kꞌe̱ nga jaáya‑la̱ Cristo i̱tꞌaà tsꞌe̱ kjoa̱biyaà, jè tsibìjna ítjòn‑la̱ i̱tꞌaà tsꞌe̱ xi̱ta̱ xi faáya‑la̱ mé‑ne nga jè kíjna ítjòn‑la̱ ni̱ta̱ mé xi tjín.
\v 19 Nainá kꞌoa̱á sꞌín kisaseèn‑la̱ nga jngoò kꞌaá ya̱ tsibìjnajiìn yijo‑la̱ Cristo,
\v 20 nga i̱tꞌaà tsꞌe̱é Cristo, Nainá tsajoóndaàko̱ yije‑ne ngatsꞌiì xi tjín i̱sòꞌnde ko̱ xi tjín ngajmiì; i̱tꞌaà tsꞌe̱ jní‑la̱ Jesucristo xi kixíxteèn ján i̱tꞌaà krò, Nainá kisìkijne ꞌnchán kjoa̱.
\p
\v 21 Jñò, nga sa̱ ítjòn, ti̱koa̱á titsa̱jnatꞌaàxìn‑la Nainá; kondra̱á tsanguì‑là ya̱ i̱jiìn ini̱ma̱‑nò, koií kjoa̱‑la̱ nga chꞌo tjín kjoa̱ xi kiꞌnè.
\v 22 Ta̱nga i̱ꞌndei̱ jyeé ndaà tsajoóko̱‑nò Nainá koií kjoa̱‑la̱ jè kjo̱ꞌin xi kisìkjeiín Cristo i̱ i̱tꞌaà nangui kꞌe̱ nga kꞌen. Koií kꞌoa̱sꞌín kisꞌiìn‑ne mé‑ne nga tsjeè ki̱tsa̱jnaà‑nò, ko̱ ni̱mé jé xi sꞌe̱‑nò ko̱ ni̱mé xi chꞌo kítjo̱nguio nga nguixko̱n Nainá.
\v 23 Kjoa̱ koi mochjeén‑né nga kixi̱ ti̱tsa̱jnako̱o koni sꞌín mokjeiín‑nò. Ko̱ kì binchatꞌaàxìn‑là kjoa̱ xi titsa̱chiñà‑là i̱tꞌaà tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo, ꞌén xi jye kinaꞌyà‑là. Jè ꞌén jè, xki̱ xi ján tínokjoàyajiìn‑la̱ xi̱ta̱ kóho̱kji i̱sòꞌnde; ko̱ ꞌa̱n xi ꞌmì‑na Pablo, ꞌa̱án kjònga̱tsja nga okoòya ꞌén.
\s Xá‑la̱ Pablo
\p
\v 24 I̱ꞌndei̱ matsjaá‑na̱ nga kjo̱ꞌin tìsìkjiaán xi kjoa̱ tsa̱jòn nga kꞌoa̱á sꞌín tísíjngoaà i̱jiìn yijo‑na̱ koni sꞌín chijatꞌaà‑na kjo̱ꞌin xi kitsjaà‑na Cristo xi kjo̱ndaà tsꞌe̱ na̱xa̱ndá‑la̱ nga ti̱jé‑ne yijo‑la̱.
\v 25 ꞌA̱án tísíkjeén‑na Nainá nga ꞌa̱n tìsìxákoa̱a na̱xa̱ndá‑la̱, xá xi kisìnga̱tsja‑na xi kjo̱ndaà tsa̱jòn nga nguì ndaà kèno̱jmiá ꞌén ndaà‑la̱,
\v 26 jè ꞌén xi tíjnaꞌma‑la̱ Nainá nga ti̱sa̱ tàtsꞌen‑la̱ kjoa̱, ta̱nga na̱chrjein i̱ꞌndei̱, Nainá jyeé tsakó‑la̱ xi̱ta̱‑la̱.
\v 27 Jè Nainá kꞌoa̱á sꞌín kjòmejèn‑la̱ nga tsakó‑la̱ jñà xi̱ta̱‑la̱ kó sꞌín tjín kjoa̱ꞌma‑la̱ xi ꞌñó jeya tíjna xi kjo̱ndaà tsꞌe̱ xi mìtsà xi̱ta̱ judío. Jè kjoa̱ꞌma, jè‑né nga jè Cristo tíjnajiìn ini̱ma̱‑nò jñò xi mìtsà xi̱ta̱ judío ꞌmì‑nò, kꞌoa̱á ma‑ne nga titsa̱chiñà‑là jñò kjoa̱jeya‑la̱ Nainá xi tsjá‑nò ján ngajmiì.
\p
\v 28 Kꞌoa̱á sꞌín nokjoàyajiìn‑la̱je̱n ngatsꞌiì xi̱ta̱ i̱tꞌaà tsꞌe̱ Cristo; ꞌñó nokjoàko̱‑je̱n nga nguì ko̱ kjoa̱chji̱ne̱ okoòya‑la̱je̱n mé‑ne nga ngatsꞌiì xi̱ta̱ xi fìtꞌaà‑la̱ Cristo ni̱mé chi̱jatꞌaà‑la̱ jè na̱chrjein kꞌe̱ nga ngaje̱n si̱ìnga̱tsja‑je̱n nga nguixko̱n Nainá.
\v 29 Kꞌoa̱á ma‑ne nga ꞌñó tíbínè‑la̱ yijo‑na̱ nga tìsìxá, tìsìkjeén jè ngaꞌñó xi tsjá‑na Cristo.
\c 2
\p
\v 1 Mejèn‑na nga ndaà kàtasijiìn‑nò, nga ꞌñó tìkjaàn‑tji‑nò i̱tꞌaà tsa̱jòn ko̱ jñà xi̱ta̱‑la̱ Cristo xi títsa̱jna ján na̱xa̱ndá Laodicea, ko̱ i̱tꞌaà tsꞌe̱ ngatsꞌiì xi̱ta̱ xi kjꞌeè kiì beèxkon‑na.
\v 2 Koií kꞌoa̱sꞌín tìkjaàn‑tji‑nò mé‑ne nga kàtasꞌe‑la̱ ngaꞌñó ini̱ma̱‑nò ko̱ mé‑ne nga jè kjo̱tsjacha xi tjín‑nò si̱ìkítsa̱jnajtín‑nò. Jè xi mejèn‑na nga ìsa̱ ndaà ko̱kixi̱ kjo̱hítsjeèn‑nò nga nguì ndaà ko̱chi̱ya‑nò jè kjoa̱ xi tjíꞌma‑la̱ Nainá xi Na̱ꞌèn‑ná. Jè kjoa̱ꞌma jè, jè‑né Cristo.
\v 3 Nga ta jè Cristo tjín‑la̱ ngatsꞌiì kjo̱hítsjeèn ko̱ kjoa̱chji̱ne̱ xi ꞌñó chjí‑la̱.
\v 4 Koií kꞌoa̱sꞌín tìxan‑nò nga mì yá xi skóna̱cha̱n‑nò nga si̱ìkjeén ꞌén xi ndaà tsò ta̱nga mìtsà ꞌén kixi̱.
\v 5 Na̱sꞌín mìtsà ya̱ tìjna̱ko̱‑nò, ta̱nga ini̱ma̱‑na̱ tìsìkítsjeèn kjitꞌaà‑nò. Matsjaá‑na nga tìꞌbe nga kixi̱ titsa̱jtión koni sꞌín onguíko̱o yijo‑nò ti̱koa̱ kixi̱ titsa̱jnaà nga mokjeiín‑nò i̱tꞌaà tsꞌe̱ Cristo.
\s Kjo̱ndaà xi tjín‑ná nga Cristo titsa̱jnakoa̱á
\p
\v 6 Koni sꞌín kòkjeiín‑nò i̱tꞌaà tsꞌe̱ Jesucristo xi otíxoma‑nò, kꞌoa̱á ti̱sꞌín kixi̱ ti̱tjátꞌaà kjitꞌaà‑là
\v 7 koni jngoò yá xi na̱nga̱ fì i̱ma̱‑la̱ ko̱ koni jngoò niꞌya xi tísindaàsòn‑ìsa nga kàtakixi̱ya jè kjoa̱ xi mokjeiín‑nò koni sꞌín kichìtaꞌyà; ko̱ tjiì kjitꞌaà‑là kjo̱ndaà Nainá.
\p
\v 8 Ti̱kinda̱a yijo‑nò nga mì jñà skóna̱cha̱n‑nò xi̱ta̱ xi ꞌén ndiso chja̱ xi ni̱ mé chjí‑la̱. Jñà kjo̱hítsjeèn koi, tà ya̱á nchrobá‑ne i̱tꞌaà tsꞌe̱ xi ta̱xki̱ xi̱ta̱ koni tsò kjo̱tíxoma xi tjín i̱sòꞌnde, mìtsà kjo̱tíxoma tsꞌe̱ Cristo.
\p
\v 9 Ya̱á tíjnajiìn yijo‑la̱ Cristo yá‑ne xi nguì jè sobà Nainá nga ni̱mé chijatꞌaà‑la̱.
\v 10 Nga Cristo titsa̱jnako̱o, tjín yije‑nò ni̱ta̱ mé xi mochjeén‑nò. Jè Cristo otíxoma‑la̱ ngatsꞌiì ngaꞌñó ko̱ kjo̱tíxoma xi mìkiì tsejèn.
\v 11 Ti̱koa̱á i̱tꞌaà tsꞌe̱ Cristo kisitꞌaà chi̱ba̱‑nò kjoa̱ tsꞌe̱ circuncisión, ta̱nga mìtsà jè xi tsja xi̱ta̱ bítꞌaà chi̱ba̱‑la̱ yijo‑ná, jè‑né nga jè Cristo tsibítꞌaà chi̱ba̱‑la̱ ini̱ma̱‑nò kꞌe̱ nga jaàxìn jé xi tjín‑la̱ yijo jé‑nò.
\v 12 Ti̱koa̱ kꞌe̱ nga komà bautizar, kꞌoa̱á ngaya‑la̱ koni tsà ya̱ kisìhijiìn‑tꞌaà‑là Cristo xi kjoa̱ tsꞌe̱ jé‑nò. Kꞌoa̱á ti̱sꞌín jaáya‑nò koni sꞌín jaáya‑la̱ Cristo koií kjoa̱‑la̱ nga mokjeiín‑nò ngaꞌñó xi tjín‑la̱ Nainá nga komà kiskímiìtje̱n Cristo i̱tꞌaà tsꞌe̱ kjoa̱ biyaà.
\v 13 Jñò, nga sa̱ ítjòn, titsa̱jnaà kꞌen‑nò i̱tꞌaà tsꞌe̱ Nainá koi kjoa̱‑la̱ jé‑nò nga jè Cristo kjꞌeè kiì bítꞌaà chi̱ba̱‑la̱ ini̱ma̱‑nò nga faáxìn jé xi tjín‑la̱ yijo jé‑nò. Ta̱nga i̱ꞌndei̱, Nainá jyeé kisìkítsa̱jnakon‑nò ko̱ Cristo nga kisìjchàatꞌaà‑nò ngatsꞌiì jé‑nò.
\v 14 Kꞌoa̱á ngaya‑la̱ koni tsà jye kisìkjeheya‑ne xo̱jo̱n xi kitjámiìꞌnga xi kondra̱ tsa̱ján. Jaàxìn‑ne, ya̱á tsohójnatꞌaà krò ñánda kꞌen‑tꞌaà Cristo.
\v 15 Jñà ngaꞌñó xi tjín i̱jiìn i̱sén ko̱ ngatsꞌiì xi otíxoma, Nainá jaàxìn yije‑la̱ ngaꞌñó‑la̱. Ya̱á kisìkijne‑la̱ kꞌe̱ nga jè Cristo kꞌen‑tꞌaà krò. Ko̱ ngatsꞌiì xi̱ta̱, ya̱á kijtseè nga kisìchja.
\s Kjo̱tíxoma‑la̱ xi̱ta̱ xi mì kiì fìtꞌaà‑la̱ Cristo
\p
\v 16 Kꞌoa̱á ma‑ne jñò, kì kiì nìsꞌin‑là xi̱ta̱ xi chja̱jno‑nò nga tsò‑nò nga mìkiì nìkitasòn kjoa̱ tsꞌe̱ tsojmì xi chine, xi ꞌyò, kjoa̱ tsꞌe̱ sꞌeí xi bitjo, kjoa̱ tsꞌe̱ nga otsejèn xi̱tse̱ ìjngoò kꞌa sá, ko̱ tsꞌe̱ na̱chrjein nìkjáya.
\v 17 Ngatsꞌiì kjoa̱ koi, kꞌoa̱á ngaya‑la̱ koni tà ꞌnguién‑la̱á kjoa̱ xi i̱skan jꞌiì; ta̱nga jè xi nguì kjoa̱ kixi̱, jè Cristo.
\v 18 Kì kiì biìꞌnde nga faáxìn‑nò jè kjo̱ndaà xi jye titsa̱jnajñoò jñà xi̱ta̱ xi beèxkón àkja̱le̱; kꞌoa̱á tsò‑la̱ yijo‑la̱ nga mìtsà xi̱ta̱ ꞌnga ikon. Jè xi mejèn‑la̱ nga jñò kꞌoa̱ ti̱sꞌín sꞌe̱en. Jñà xi̱ta̱ koi tsò‑né nga i̱nga nijñá kisꞌeno̱jmí‑la̱ kjoa̱ jè, ko̱ ꞌñó ꞌnga síkítsa̱jna yijo‑la̱ xi ta kjo̱hítsjeèn tsꞌe̱, ta̱nga ni̱mé chjí‑la̱.
\v 19 Xi̱ta̱ koi mìtsà ya̱ ndaà fìtꞌaà‑la̱ Cristo. Nga jè Cristo tíjna sko̱‑la̱ na̱xa̱ndá‑la̱ ko̱ jè tsjá‑la̱ kjo̱hítsjeèn ko̱ ngaꞌñó ko̱ jè síkítsa̱jnajtín xi̱ta̱‑la̱ koni sꞌín ma yijo‑ná nga jñà naxá‑ná bítéya nindaà‑ná, mé‑ne nga ndaà si̱ìxá‑ne na̱xa̱ndá‑la̱ Cristo koni sꞌín mejèn‑la̱ Nainá.
\p
\v 20 Jñò, ta̱ñaá kꞌen‑ko̱o Cristo, kꞌoa̱á ma‑ne nga mìkiì ti̱ tjíꞌnde‑nò nga jñà si̱kitasòn kjo̱tíxoma xi tjín i̱sòꞌnde. ¿Mé‑ne tákó kꞌoa̱sꞌín ꞌnè‑nò koni tsà kjoa̱ tsꞌe̱ i̱sòꞌnde otíxoma‑nò nga nìkitasòn‑nò kjo̱tíxoma
\v 21 xi tsò: “Kì kiì nìkoi̱i tsojmì koi, kì kiì chiniì, kì ndsei̱i nìko̱‑ne.”?
\v 22 Jñà kjo̱tíxoma koi, tà tsꞌe̱é tsojmì xi chija kꞌe̱ nga tímochjeén. Tà kjo̱tíxoma tsꞌe̱ xi̱ta̱‑né koni sꞌín okóya.
\v 23 Jñà kjo̱tíxoma koi, kꞌoa̱á sꞌín ꞌya‑la̱ koni tsà tjín‑la̱ kjoa̱chji̱ne̱ ta̱nga mìtsà kixi̱ kjoa̱. Nga̱ síjé‑ná nga ndaà si̱kitasoán kjoa̱ xi ꞌin tjín mé‑ne nga ndaà jcha̱xkoán kjo̱tíxoma xi tjín‑la̱ i̱ngo̱; ti̱koa̱á tsò‑né nga mochjeén nga mì xi̱ta̱ ꞌnga ikon ko̱maá, ko̱ nga kínè‑lá kjo̱ꞌin yijo‑ná. Ta̱nga jñà kjoa̱ koi ni̱mé chjí‑la̱, nga mìkiì ma osìko̱‑ná nga nìkítsa̱jnaá jñà kjoa̱ chꞌo xi síjé yijo‑ná.
\c 3
\p
\v 1 Jñà kjoa̱ ti̱nchátsjioò kjo̱ndaà xi tjín ngajmiì ya̱ ñánda tíjna Cristo nga ya̱ tíjnatꞌaà chrja kixi̱‑la̱ Nainá, koií kjoa̱‑la̱ nga ya̱ jaáyakjoò‑nò ko̱ Cristo,
\v 2 Koií ti̱kítsjeèn kjitꞌaà mé kjoa̱ xi tjín ngajmiì, kì koií nìkítsjeèn kjoa̱ xi tjín i̱sòꞌnde.
\v 3 Nga̱ jñò, jyeé kꞌen kjoa̱ tsꞌe̱ i̱sòꞌnde, ko̱ jè kjoa̱binachon xi̱tse̱ xi tjín‑nò nga ya̱ titsa̱jnako̱o Cristo, ya̱á tíjnatjò nga nguixko̱n Nainá.
\v 4 Jè Cristo, jè‑né xi kjoa̱binachon‑nò; kꞌe̱ nga jè xi ko̱tsejèn ìjngoò kꞌa, jñò, ti̱koa̱á ya̱á ko̱tsejèn‑ko̱o nga jeya ki̱tsa̱jnaà.
\s Xi kjoa̱ jchínga ko̱ xi kjoa̱ xi̱tse̱
\p
\v 5 Ti̱kítsa̱jna kjoa̱ chꞌo xi síjé yijo jé‑nò xi kjoa̱ tsꞌe̱ i̱sòꞌnde: koni jñà kjoa̱ chijngui, ko̱ kjoa̱ tjé ko̱ kjoa̱ chꞌo xi sasén‑la̱ yijo‑nò ko̱ ngatsꞌiì kjoa̱ chꞌo xi fahajiìn‑nò, ko̱ nga kjìn tsojmì mejèn‑nò. Kjoa̱ jè ti̱jé‑ne koni tsà xkósòn yaxkón.
\v 6 Koií kjoa̱‑la̱ nga kjo̱ꞌin tsjá‑la̱ Nainá jñà xi̱ta̱ xi mìkiì ꞌnchréñijon‑la̱.
\v 7 Jñò, ti̱koa̱á kꞌoa̱á tjín kjoa̱ xi kiꞌnè kjòtseé kꞌe̱ nga ya̱ titsa̱jnajñoò kjoa̱ xi chꞌo tjín.
\v 8 Ta̱nga i̱ꞌndei̱ ti̱kítsa̱jna yije kjoa̱ koi: jñà xi kjoa̱ jti, ko̱ jñà xi kjoa̱ tsꞌe̱n, ko̱ jñà kjoa̱ xi chꞌo tjín, ko̱ jñà kjoa̱ xi nokjoàjno‑la xi̱ta̱, ko̱ jñà ꞌén xi chꞌo tsò nga nokjoà.
\v 9 Kì ꞌén ndiso nokjoàko̱o xinguio̱o nga jyeé kichjaàxìn‑là yijo‑nò kjoa̱ jchínga‑nò ko̱ ngatsꞌiì kjoa̱ xi kiꞌnè nga sa̱ kjòtseé.
\v 10 Jyeé kichjoé xi kjoa̱ xi̱tse̱. Jyeé jahatjìya‑la̱ kjo̱hítsjeèn‑nò. Kꞌoa̱á sꞌín tímaxi̱tse̱ya koni kji i̱sén‑la̱ Nainá xi tsibíndaà‑nò skanda kóni nga ìsa̱ ndaà jcha̱xkoòn yá‑ne xi Nainá.
\v 11 I̱ꞌndei̱, mì ti̱ kiì ꞌñó mochjeén‑ne yá‑né xi xi̱ta̱ griego, o yá‑né xi xi̱ta̱ judío, yá‑né xi tjítꞌaà chi̱ba̱‑la̱, o yá‑né xi kjoa̱ tsꞌe̱ circuncisión, yá‑né xi xi̱ta̱ xìn nangui‑la̱ ko̱ yá xi̱ta̱‑ne xi i̱ma̱ tímajchá, yá‑né xi chi̱ꞌnda tíjnaꞌñó, o yá‑né xi tíjnandei̱í. Jè Cristo xi ìsa̱ ꞌñó chjí‑la̱; ko̱ jè xi tíjnajiìn ini̱ma̱‑la̱ ngatsꞌiì xi̱ta̱‑la̱.
\p
\v 12 Jñò xi xó kꞌoa̱sꞌín jaàjiìn‑nò Nainá ko̱ xi nguì xi̱ta̱ tsjeè‑la̱ maà nga ndaà matsjakeè‑nò, kꞌoa̱á sꞌín chjoé xi kjoa̱ xi̱tse̱ nga kàtahi̱ma̱cha xi̱ta̱; kàtasꞌe‑nò kjo̱ndaà; kì ꞌnga matakòn; indaàkjoa̱ tꞌe̱en; ko̱ kàtasꞌe‑la̱ kjoa̱tsejta ini̱ma̱‑nò.
\v 13 Ni̱ta̱ mé kjoa̱ xi tjín‑nò ti̱kjeiín‑là xinguio̱o, ti̱jchàatꞌaà‑là xinguio̱o tsà mé kjoa̱ xi chꞌo síko̱‑nò. Jñò, kꞌoa̱á ti̱sꞌín tꞌe̱en, koni sꞌín kisìko̱‑nò Cristo nga kisìjchàatꞌaà‑nò.
\v 14 Jè xi tíjna ítjòn tsꞌe̱ kjoa̱ koi, jè‑né nga ti̱tsjacha xinguio̱o, nga jè kjoa̱tjòcha xi ndaà síkítsa̱jnajtín‑ná.
\v 15 Kjoa̱ꞌnchán‑la̱ Cristo ndaà kàtatíxoma i̱jiìn ini̱ma̱‑nò; nga̱ Nainá xó kꞌoa̱á sꞌín kiìchja̱‑nò nga ꞌnchán ki̱tsa̱jnako̱o xinguio̱o mé‑ne nga ta jngoò yijo ko̱ma‑nò. Ko̱ mochjeén‑né nga kjitꞌaà na̱chrjein tjiì‑là kjo̱ndaà Nainá.
\p
\v 16 Jè ꞌén‑la̱ Cristo ꞌñó ndaà kàtasijiìn kjitꞌaà ya̱ i̱jiìn ini̱ma̱‑nò. Ta̱kóya‑là xinguio̱o ko̱ ti̱kixi̱yaà nga ti̱kjeén kjo̱hítsjeèn xi tjín‑la̱ kjoa̱chji̱ne̱. Ti̱jndá‑là Nainá nga tjiì‑là kjo̱ndaà xi tíjiìn ini̱ma̱‑nò; ti̱jndá‑là sò tsꞌe̱ salmo, ko̱ sò xi jeya síkíjna Nainá, ko̱ sò xi ya̱ nchrobá‑ne ya̱ i̱jiìn ini̱ma̱‑nò.
\v 17 Ngatsꞌiì ꞌén xi nokjoà ko̱ ngatsꞌiì xá xi ꞌnè, i̱tꞌaà tsꞌe̱ Jesucristo xi otíxoma‑ná koa̱tꞌe̱en. Ko̱ i̱tꞌaà tsꞌe̱ Jesucristo tjiì‑là kjo̱ndaà Nainá xi Na̱ꞌèn‑ná.
\s Kjoa̱ xi mochjeén nga si̱ìkitasòn xi̱ta̱‑la̱ Cristo
\p
\v 18 Jñò íchjín xi xꞌi̱n tjín‑nò, nangui titsa̱jna‑là xꞌi̱n‑nò koni sꞌín okꞌìn‑la̱ jñà xi̱ta̱‑la̱ Cristo.
\v 19 Jñò xi íchjín tjín‑nò, tjòcha jcha̱a íchjín‑nò, kì toòn ꞌyaà.
\p
\v 20 Jñò xi i̱xti ꞌmì‑nò, ndaà ti̱náꞌyañijon‑là xi̱ta̱ jchínga‑nò, nga jè Nainá ndaà sasén‑la̱ kjoa̱ koi.
\v 21 Jñò xi Na̱ꞌèn ꞌmì‑nò, kì ta̱xki̱ siì nokjoàko̱o i̱xti‑nò mé‑ne nga mì sìkàjeèn‑la̱ ikon.
\p
\v 22 Jñò xi chi̱ꞌnda maà, ndaà ti̱kitasòn yije‑là nei‑nò i̱ i̱tꞌaà nangui; kì tà kꞌe̱é nìxá kꞌe̱ nga tíkotsejèn‑nò nga ta jè xi mejèn‑nò nga ndaà ki̱tsa̱jnako̱o. Nguì ko̱ó ini̱ma̱‑nò nga ti̱kitasòn‑là koií kjoa̱‑la̱ nga yaxkón Nainá.
\v 23 Ni̱ta̱ mé kjoa̱ xi sꞌe̱en, nguì ko̱ó ini̱ma̱‑nò nga tꞌe̱en koni tsà i̱tꞌaà tsꞌe̱ Na̱ꞌèn‑ná titsa̱nìkitasòn ko̱ mìtsà i̱tꞌaà tsꞌe̱ xi ta̱xki̱ xi̱ta̱.
\v 24 Jyeé ꞌyaà nga jè Na̱ꞌèn‑ná Jesucristo tsjá‑nò chjí‑nò nga tjoé‑nò jè kjo̱tjò xi tsjá‑nò Nainá nga i̱xti‑la̱ maà koi kjoa̱‑la̱ nga jè titsa̱nìxátꞌaà‑là Jesucristo xi otíxoma‑nò.
\v 25 Ta̱nga jè xi chꞌo tjín kjoa̱ xi sꞌín, kꞌoa̱á sꞌín ko̱chjí‑la̱ koni tjín kjoa̱ chꞌo xi sꞌín. Nainá mìtsà faájiìn xi̱ta̱, ngásòn ngáya fìko̱ ngatsꞌiì.
\c 4
\p
\v 1 Jñò xi nei‑la̱ xá ma, ndaà ti̱ko̱o jñà xi̱ta̱ chi̱ꞌnda‑nò koni sꞌín tjín xi kjoa̱ kixi̱, nga jñò ꞌyaà‑nò nga ti̱koa̱ tjín jngoò‑nò xi Nei‑nò ma ján ngajmiì.
\p
\v 2 Kì bìkjoàn‑là nga nokjoàtꞌaà‑là Nainá; kjitꞌaà na̱chrjein titsa̱jnandaà nga ti̱nókjoa̱tꞌaà‑là ko̱ tjiì‑là kjo̱ndaà Nainá.
\v 3 Kꞌoa̱á ti̱sꞌín titsiꞌbatjì‑náje̱n, mé‑ne jè Na̱ꞌèn‑ná kàtatsjáꞌnde nga ko̱ma kéno̱jmí‑je̱n ꞌén‑la̱ Cristo xi tjíꞌma‑la̱ Nainá nga sa̱ ítjòn; nga koií kjoa̱‑la̱ nga nda̱yá tìjna̱aꞌya.
\v 4 Titsiꞌbatjì‑ná mé‑ne nga sꞌe̱‑na ngaꞌñó nga ndaà kixi̱ kichjàjiìn‑la̱ xi̱ta̱ koni sꞌín tjínè‑la̱ nga kichjà.
\p
\v 5 Jñò, ndaà ti̱kjeén kjo̱hítsjeèn‑nò mé‑ne nga ndaà ki̱tsa̱jnako̱o jñà xi̱ta̱ xi mìkiì beèxkon ꞌén ndaà‑la̱ Nainá xi kjoa̱ tsꞌe̱ Cristo. Ndaà ti̱kjeén na̱chrjein xi tíꞌbiì‑nò nga ko̱sꞌín ti̱kitasòn.
\v 6 Kꞌe̱ nga chiko̱o xi̱ta̱, jñà ꞌén ti̱nókjoa̱a xi ndaà tsò ko̱ xi ndaà sasén‑la̱ mé‑ne nga ko̱ma si̱kátji‑là ꞌén xi sko̱nangui‑nò.
\s Kó tsò Pablo nga síhixatꞌaà xi̱ta̱
\p
\v 7 Ngatsꞌiì kjoa̱ xi tímatꞌian, jè ke̱èno̱jmí yije‑nò jè ꞌndseé Tíquico xi ꞌa̱n ꞌñó ndaà matsjake̱ nga jè ndaà síchjátꞌaà‑na koa̱ ndaà nìxákjoò‑la̱je̱n Nainá.
\v 8 Koií xá tìsìkasén‑nò nga ke̱èno̱jmí‑nò xi i̱tꞌaà tsa̱je̱n kósꞌín titsa̱jna‑je̱n ko̱ mé‑ne nga kàtatsjá‑nò ngaꞌñó tsꞌe̱ ini̱ma̱‑nò.
\v 9 Ti̱koa̱á ya̱ tíbáhijtako̱ Onésimo xi xi̱ta̱ tsa̱jòn, xi ꞌndsè ma i̱tꞌaà tsꞌe̱ Cristo. Nga xi̱ta̱ kixi̱‑né ko̱ ꞌñó matsjacha‑je̱n. Jñà ke̱èno̱jmí‑nò mé kjoa̱ xi tíma i̱jndé.
\p
\v 10 Jè Aristarco xi ta̱ña titsa̱jnaya‑je̱n nda̱yá, tísíhixatꞌaà‑nò. Ko̱ jè Marcos xi ti xíkjín ma Bernabé ti̱koa̱á tísíhixatꞌaà‑nò. Jyeé kisꞌeno̱jmí‑nò i̱tꞌaà tsꞌe̱ Marcos; tsà ya̱ ki̱jchòkon‑nò, tꞌe̱en kjo̱ndaà ndaà chjoétjò.
\v 11 Ti̱koa̱á tísíhixatꞌaà‑nò Jesús xi ti̱koa̱ Justo ꞌmì. Tà jñà‑né xi xi̱ta̱ judío xi mokjeiín‑la̱ xi kꞌoa̱sꞌín ꞌñó ndaà nchisíxáko̱‑na i̱tꞌaà tsꞌe̱ kjo̱tíxoma‑la̱ Nainá ko̱ ꞌñó ndaà síjehikon‑na.
\v 12 Epafras, xi chi̱ꞌnda‑la̱ Cristo, ti̱koa̱á tísíhixatꞌaà‑nò nga xi̱ta̱ tsa̱jòn‑nò. Kjitꞌaà na̱chrjein bìtsiꞌbatjì‑nò mé‑ne nga nguì kixi̱ ki̱tsa̱jnaà koa̱ ndaà ki̱tsa̱jnandaà nga si̱kitasòn mé xi mejèn‑la̱ Nainá.
\v 13 ꞌA̱n, ndaà tìbe nga jè Epafras ꞌñó síkájno xi i̱tꞌaà tsa̱jòn ko̱ i̱tꞌaà tsꞌe̱ xi̱ta̱ xi títsa̱jna ján na̱xa̱ndá Laodicea ko̱ xi títsa̱jna ján na̱xa̱ndá Hierápolis.
\v 14 Tísíhixatꞌaà‑nò Lucas jè xi chji̱ne̱xkiì xi ꞌñó matsjacha‑je̱n, ti̱koa̱ tísíhixatꞌaà‑nò jè Demas.
\p
\v 15 Xi i̱tꞌaà tsꞌa̱n ti̱ixatꞌaà‑ná jñà ꞌndseé xi títsa̱jna ján na̱xa̱ndá Laodicea, ko̱ jè chjo̱ón tichjaá Ninfa, ko̱ ngatsꞌiì xi̱ta̱ na̱xa̱ndá‑la̱ Cristo xi ya̱ bixoña niꞌya‑la̱.
\v 16 Kꞌe̱ nga jye kíxke̱jiìn‑là xinguio̱o xo̱jo̱n jè, ti̱koa̱á kàtaxke̱jiìn‑la̱ na̱xa̱ndá‑la̱ Cristo xi títsa̱jna ján Laodicea; koa̱ jè xo̱jo̱n xi tsꞌe̱ Laodicea ti̱koa̱á tíxke̱jñoò.
\v 17 Koa̱tìn‑la̱ jè Arquipo: kàtasíkitasòn xá xi kitsjaà‑la̱ Cristo.
\p
\v 18 Nga jye tífehetꞌaà xo̱jo̱n jè, ko̱ó ndsa̱a tìkjiì‑nò ꞌa̱n xi ꞌmì‑na Pablo, nga tisìhixatꞌaà‑nò. Ti̱kítsjeèn nga nda̱yá tìjna̱ꞌya. Jè kàtìjnako̱‑nò kjo̱ndaà‑la̱ Nainá. Kꞌoa̱ sꞌín kàtama.