\id 1TH
\h 1 Tesalonicenses
\toc1 1 Tesalonicenses
\mt Xo̱jo̱n carta‑la̱ San Pablo xi kiskiì ítjòn‑la̱ xi̱ta̱ na̱xa̱ndá‑la̱ Cristo xi títsa̱jna Tesalónica
\c 1
\s Kó tsò Pablo nga síhixatꞌaà jñà xi̱ta̱ na̱xa̱ndá‑la̱ Cristo xi títsa̱jna Tesalónica
\p
\v 1 Jñò xi xi̱ta̱ na̱xa̱ndá‑la̱ Nainá maà xi titsa̱jnaà ya̱ na̱xa̱ndá Tesalónica nga ya̱ titsa̱jnakjoòko̱o Nainá xi Na̱ꞌèn‑ná ko̱ jè Jesucristo xi otíxoma‑ná, ꞌa̱n xi ꞌmì‑na Pablo titsa̱nìhixotꞌaà‑nòje̱n ko̱ Silvano [ti̱jé‑ne xi ꞌmì Silas] ko̱ Timoteo. Nainá kàtatsjá‑nò kjo̱ndaà ko̱ kjoa̱ꞌnchán ya̱ i̱jiìn ini̱ma̱‑nò.
\s Kó tsò Pablo nga tsjá‑la̱ kjo̱ndaà Nainá
\p
\v 2 Kꞌe̱ nga nokjoàtꞌaà‑la̱je̱n Nainá, kjitꞌaà na̱chrjein ꞌbiì‑la̱je̱n kjo̱ndaà i̱tꞌaà tsa̱jòn.
\v 3 Bítsjeèn‑naje̱n nga nguixko̱n Nainá xi Na̱ꞌèn‑ná koni sꞌín nga titsa̱nìxá, koií kjoa̱‑la̱ nga mokjeiín‑nò i̱tꞌaà tsꞌe̱ Cristo, ti̱koa̱ ndaà nìxá‑là xi̱ta̱ xi kjꞌei̱í nga matsjacha, nga ti̱koa̱ kixi̱ titsa̱jnaà nga titsa̱chiñà‑là Jesucristo xi otíxoma‑ná.
\v 4 Ndí ꞌndsè, Nainá matsjakeè‑nò. ꞌYa‑náje̱n nga xó kꞌoa̱sꞌín jaàjiìn‑nò nga xi̱ta̱ na̱xa̱ndá‑la̱ ko̱maà.
\v 5 Nga jè ꞌén ndaà‑la̱ Nainá xi kjoa̱ tsꞌe̱ Cristo xi tsibèno̱jmí‑nòje̱n, mìtsà ta ꞌén tsa̱je̱n xi kinokjoáko̱‑nòje̱n. Jè Ini̱ma̱ Tsjeè‑la̱ Nainá kitsjaà‑naje̱n ngaꞌñó, ko̱ ti̱koa̱ ꞌñó ndaà kjòchi̱ya‑naje̱n nga nguì kixi̱ kjoa̱. Jñò, ndaà kiꞌyaà kꞌe̱ nga ya̱ tsakítsa̱jna‑je̱n, ndaà kinìchjátꞌaà‑nòje̱n xi kjo̱ndaà tsa̱jòn.
\p
\v 6 Jñò, kꞌoa̱á sꞌín kiꞌnè koni sꞌín kiꞌnè‑je̱n ko̱ koni sꞌín sꞌín Cristo. Jè Ini̱ma̱ Tsjeè‑la̱ Nainá kitsjaà‑nò kjo̱tsja nga komà kichjoétjò ꞌén‑la̱ Nainá na̱sꞌín ꞌñó tse kjo̱ꞌin tsatojioòn.
\v 7 Kꞌoa̱á ma‑ne jñò tsakoò jngoò‑là kjoa̱ xi ndaà tjín nga kiskinguì ngatsꞌiì xi̱ta̱ xi jye kòkjeiín‑la̱ ꞌén‑la̱ Nainá ya̱ nangui Macedonia ko̱ Acaya.
\v 8 Nga ya̱á kjòtsꞌia̱‑ne i̱tꞌaà tsa̱jòn nga tsabísòn jè ꞌén ndaà‑la̱ Na̱ꞌèn‑ná; mìtsà tà ya̱ nangui Macedonia ko̱ Acaya; xki̱ xi ján kinaꞌyà‑la̱ nga jñò, ndaà mokjeiín‑nò i̱tꞌaà tsꞌe̱ Nainá. Kꞌoa̱á ma‑ne nga mì ti̱ kiì mochjeén‑ne nga ngaje̱n kéno̱jmí‑la̱je̱n xi̱ta̱ i̱tꞌaà tsa̱jòn, nga jyeé beè‑nò xi̱ta̱.
\v 9 Nga̱ ti̱jñà béno̱jmí‑ne nga ndaà kichjoétjò‑náje̱n kꞌe̱ nga ijchochoòn‑nòje̱n. Ti̱koa̱á tsò‑né nga jñò jyeé kinìkíjna kjoa̱ tsꞌe̱ xkósòn. I̱ꞌndei̱ jyeé ya̱ tjaàtꞌaà‑là xi nguì jè sobà Nainá xi kixi̱ kjoa̱ nga tíjnakon.
\v 10 Ti̱koa̱á béno̱jmí‑né nga titsa̱chiñà‑là Kiꞌndí‑la̱ Nainá nga ki̱tjojen ìjngoò kꞌa‑ne ngajmiì, jè xi ti̱jè‑ne Jesús xi Nainá kisìkjaáya‑la̱ kꞌe̱ nga kꞌen, nga jè‑né xi ko̱chrjekàjiìn‑ná kjo̱ꞌin tsꞌe̱ kjoa̱jti‑la̱ Nainá xi sa̱ nchrobá.
\c 2
\s Xá xi kisꞌiìn Pablo ya̱ na̱xa̱ndá Tesalónica
\p
\v 1 Jñò ndí ꞌndsè ko̱ ndí tichjaá, ꞌya‑nò kꞌe̱ nga ijchochón‑nòje̱n mìtsà ta kjo̱tjò.
\v 2 Nga jyeé ndaà tíjiìn‑nò koni sꞌín komàtꞌin‑je̱n ján na̱xa̱ndá Filipos, nga ꞌñó tse kjo̱ꞌin kinìkjeiín‑je̱n; ꞌñó kijtseètoòn‑naje̱n xi̱ta̱; ta̱nga Nainá kisìchjátꞌaà‑naje̱n nga kitsjaà‑naje̱n ngaꞌñó nga komà tsanguì‑je̱n ya̱ na̱xa̱ndá‑nò nga komà tsibèno̱jmí‑nòje̱n ꞌén ndaà‑la̱ Nainá na̱sꞌín ꞌñó kjìn ma kondra̱‑naje̱n.
\v 3 Nga ꞌén kixi̱í kinokjoàya‑je̱n, mìtsà jò tjín ini̱ma̱‑na̱je̱n nga tsibèno̱jmí‑nòje̱n, ti̱koa̱ mìtsà xi̱ta̱ kichona̱cha̱n‑la̱je̱n.
\v 4 Nga̱ Nainá jyeé kiskoòtꞌaà‑naje̱n ko̱ kꞌoa̱á kitsò nga okꞌín‑naje̱n nga ngaje̱n kjònga̱tsja‑je̱n ꞌén ndaà‑la̱ Nainá xi kjoa̱ tsꞌe̱ Cristo mé‑ne nga ko̱ma ki̱nókjoa̱ya‑je̱n. Mìtsà jè xi mejèn‑naje̱n nga ndaà ki̱tsa̱jna‑je̱n nguixko̱n xi̱ta̱; jè‑né nga ndaà ki̱tsa̱jna‑je̱n nguixko̱n Nainá nga jè xi tíbeè ini̱ma̱‑ná.
\v 5 Jyeé ndaà tíjiìn‑nò nga mìtsà ꞌén tsjén nokjoà‑je̱n koni tsà mé xi mejèn‑naje̱n nga kꞌoi̱‑náje̱n, ti̱koa̱á mìtsà to̱n binchaàtsjiꞌma‑je̱n. Kjoa̱ koi, Nainá tíbeè‑né.
\v 6 Mìtsà jè binchaàtsji‑je̱n nga jñò, ko̱ xi̱ta̱ xi kjꞌei̱í, nga ꞌnga si̱ìkítsa̱jna‑náje̱n. Tsà ji̱n xi mejèn‑naje̱n nga tsibìnè‑nòje̱n kjo̱tíxoma xi tjín‑naje̱n nga i̱tꞌaà tsꞌe̱ Cristo kisìxáya‑naje̱n, komaá‑la o̱kinìko̱‑nòje̱n.
\v 7 Ta̱nga mìtsà ko̱sꞌín kinìko̱‑nòje̱n. Ta sa̱á kꞌoa̱sꞌín kinìko̱‑nòje̱n koni ndí i̱xti. Kꞌoa̱á ngaya‑la̱ koni jngoò nea̱ xi síkaki i̱xti‑la̱ nga ndaà síjchá i̱xti‑la̱.
\v 8 ꞌÑó tjòcha kiꞌya‑nòje̱n. Kꞌoa̱á ma‑ne nga ko̱ kjo̱tsja‑naje̱n tsibèno̱jmí‑nòje̱n ꞌén ndaà‑la̱ Nainá xi kjoa̱ tsꞌe̱ Cristo. Ti̱koa̱á matsjaá‑naje̱n nga ndaà kinìko̱‑nòje̱n ni̱ta̱ mé kjoa̱ xi komàtꞌioòn ta koií kjoa̱‑la̱ nga ꞌñó matsjacha‑nòje̱n.
\v 9 Ndí ꞌndsè ko̱ ndí tichjaá, bítsjeèn‑nò kósꞌín kinìxá‑je̱n nga binchaàtsjiꞌa‑je̱n yijo‑naje̱n. Ko̱ na̱chrjein ko̱ ni̱tje̱n nìxá‑je̱n, mé‑ne nga mì jñò si̱jti‑nòje̱n jñà na̱chrjein kꞌe̱ nga kinokjoàyajiìn‑nòje̱n ꞌén ndaà‑la̱ Nainá.
\p
\v 10 Jñò, ndaà kiꞌyaà, ti̱koa̱á Nainá kijtseè‑né, nga ngaje̱n ndaà kinìko̱‑nòje̱n. Kꞌoa̱á sꞌín kinìko̱‑nòje̱n koni sꞌín sasén‑la̱ Nainá koni sꞌín tjín xi kjoa̱ kixi̱. Ko̱ ni̱yá xi jé ko̱ònè‑naje̱n koni sꞌín kinìko̱‑nòje̱n jñò xi mokjeiín‑nò ꞌén ndaà‑la̱ Nainá.
\v 11 Ti̱koa̱á jyeé ndaà tíjiìn‑nò nga je̱n, ndaà kinìko̱‑nòje̱n nga jngoò ìjngoò koni sꞌín síko̱ i̱xti‑la̱ jngoò xi̱ta̱ xi na̱ꞌèn ma.
\v 12 Kinìje ikon‑nòje̱n koa̱ kinìꞌñójiìn‑je̱n takòn ko̱ kꞌoa̱sꞌín tsibìnè‑nòje̱n nga kꞌoa̱sꞌín sꞌe̱en koni sꞌín okꞌìn‑la̱ xi xi̱ta̱‑la̱ Nainá maà; nga jè‑né xi síkíꞌnchré‑nò nga ya̱ titsa̱jnajiìn‑là xi̱ta̱ xi jye jè tíhotíxoma‑la̱ ko̱ ti̱koa̱ ya̱ titsa̱jnajñoò kjoa̱jeya‑la̱.
\p
\v 13 Kjitꞌaà na̱chrjein ꞌbiì‑la̱je̱n kjo̱ndaà Nainá koni sꞌín ndaà kichjoétjò ꞌén‑la̱ nga mìtsà kꞌoa̱sꞌín kichjoétjò koni ꞌén‑la̱ xi ta̱xki̱ xi̱ta̱. Kꞌoa̱á sꞌín kichjoétjò koni tjín xi nguì kjoa̱ kixi̱ nga ꞌén‑la̱ Nainá‑né. Jñà ꞌén koi, tíꞌyaá‑la̱ nga nchisíxájiìn ini̱ma̱‑nò jñò xi mokjeiín‑nò.
\v 14 Jñò ndí ꞌndsè ko̱ ndí tichjaá, kꞌoa̱á sꞌín komàtꞌioòn koni sꞌín komàtꞌin jñà xi̱ta̱ na̱xa̱ndá‑la̱ Nainá xi mokjeiín‑la̱ i̱tꞌaà tsꞌe̱ Cristo Jesús xi títsa̱jna ján nangui Judea. Ti̱jñà‑ne xi̱ta̱ na̱xa̱ndá judío xíkjín kiìtji̱ngui kondra̱‑la̱. Jñò ti̱jñà‑ne xi̱ta̱ na̱xa̱ndá tsa̱jòn kiìtji̱ngui kondra̱‑nò.
\v 15 Jñà xi̱ta̱ judío kisìkꞌen Na̱ꞌèn‑ná Jesús ko̱ ti̱jñà‑ne xi̱ta̱ jchínga‑la̱ kisìkꞌen jñà xi̱ta̱ xi kiìchja̱ya̱ nga̱jo̱‑la̱ Nainá kjòtseé. I̱ꞌndei̱, tákó kꞌoa̱á síko̱‑naje̱n nga fìtji̱ngui kondra̱‑naje̱n. Nainá mìkiì sasén‑la̱ kjoa̱ xi sꞌín xi̱ta̱ koi, nguì kondra̱á fì‑la̱ ngatsꞌiì kjoa̱,
\v 16 nga mìkiì tsjáꞌnde nga nokjoà‑la̱je̱n jñà xi mìtsà xi̱ta̱ judío mé‑ne nga ti̱koa̱ ki̱tjokàjiìn‑ne kjo̱ꞌin. Kꞌoa̱á ma‑ne xi̱ta̱ koi, skanda nchisíkatonè‑la̱ nga ótsji jé‑la̱ yijo‑la̱. Jyeé kjo̱meè fꞌiìkanè‑la̱ kjo̱ꞌin xi tji̱ko̱ kjo̱jti‑la̱ Nainá.
\s Kó kitsò Pablo nga mejèn‑la̱ kji̱kon jñà xi̱ta̱‑la̱ Cristo xi títsa̱jna ya̱ na̱xa̱ndá Tesalónica
\p
\v 17 ꞌNdseé ko̱ tichjaá, kꞌe̱ nga chinchatꞌaàxìn chiba na̱chrjein‑nòje̱n, na̱sꞌín mì ti̱ kiì kiyaxkon‑ná xinguia̱á, ngaje̱n ꞌñó nìkítsjeèn‑nòje̱n. ꞌÑó mejèn‑naje̱n nga onguíchoòn‑nòje̱n.
\v 18 Mejèn tsanguì‑je̱n. ꞌA̱n xi ꞌmì‑na̱ Pablo, kjìn kꞌa mejèn kiaà, ta̱nga jè xi̱ta̱ nei̱í mìkiì kitsjaàꞌnde‑naje̱n.
\v 19 Kjoa̱ tsa̱jòn‑nò nga titsa̱chiñá‑la̱je̱n nga ꞌñó ko̱tsja‑naje̱n ko̱ nga ndaà ki̱tjo‑je̱n kꞌe̱ nga kjoi̱í ìjngoò kꞌa Na̱ꞌèn‑ná Jesucristo.
\v 20 Kixi̱í kjoa̱ i̱tꞌaà tsa̱jòn‑nò nga ndaà ki̱tjongui‑je̱n ko̱ nga sꞌe̱‑naje̱n kjoa̱ tsja.
\c 3
\s Mé‑ne ya̱ kinìkasén‑ne Timoteo ján na̱xa̱ndá Tesalónica
\p
\v 1 Kꞌe̱ nga mì ti̱ kiì komà kichìkjoa̱ ìsa̱‑naje̱n nga mejèn‑naje̱n si̱jiìn‑naje̱n kó sꞌín titsa̱jnaà ján Tesalónica, kꞌoa̱á komà‑ne nga kichibàya‑naje̱n nga kinìkasén‑je̱n jè ꞌndsè Timoteo, ko̱ ngaje̱n ya̱á tsitsa̱jna‑je̱n Atenas.
\v 2 Kinìkasén‑je̱n jè ꞌndseé Timoteo, chi̱ꞌnda‑la̱ Nainá‑né nga ti̱koa̱á chja̱ya ꞌén ndaà‑la̱ Nainá xi kjoa̱ tsꞌe̱ Cristo koni ngaje̱n. Koií xá kiìkon‑nò mé‑ne nga kàtatsjá‑ìsa‑nò ngaꞌñó nga ìsa̱ ꞌñó ndaà kixi̱ ki̱tsa̱jnaà koni sꞌín mokjeiín‑nò,
\v 3 mé‑ne nga ni̱jngoò xi si̱hindaà‑ne kjoa̱ tsꞌe̱ kjo̱ꞌin xi titsa̱nìkjioón. Jñò, jyeé ndaà tíjiìn‑nò nga kꞌoa̱á sꞌín tjínè‑la̱ nga ko̱sꞌín ko̱matꞌiaán.
\v 4 Kꞌe̱ nga ti̱sa̱ ya̱ titsa̱jnako̱‑nòje̱n, kꞌoa̱á kiꞌmì‑nòje̱n nga kjo̱ꞌiín sꞌe̱‑ná. I̱ꞌndei̱, jyeé titsa̱ꞌyaà nga kꞌoa̱á sꞌín tímatꞌioòn.
\v 5 Koií kjoa̱‑la̱ nga mì ti̱ kiì kiskoòñà kjoa̱‑na; kisìkasén Timoteo nga mejèn‑na skoeè kósꞌín titsa̱jnako̱o jè ꞌén xi mokjeiín‑nò. Tìmakájno‑na tsà jye kiskoòna̱cha̱n‑nò jè xi̱ta̱ nei̱í. Tsà koií na̱chrjein‑la, xá xi kiꞌnè‑je̱n, tsà ta kichijà‑né.
\p
\v 6 I̱ꞌndei̱, jè Timoteo jyeé jꞌiì‑ne nga kiì Tesalónica; ndaà tsò o̱kixi̱ xi ꞌya‑naje̱n i̱tꞌaà tsa̱jòn koni sꞌín mokjeiín‑nò ko̱ nga tjín‑nò kjo̱tsjacha. Kꞌoa̱á sꞌín tsibéno̱jmí‑naje̱n nga kjitꞌaà na̱chrjein tsjaá ma‑nò nga nìkítsjeèn‑náje̱n. Ti̱koa̱á mejèn‑nò nga jcha̱xkoòn‑náje̱n koni ngaje̱n ti̱koa̱á mejèn‑naje̱n jcha̱xkoòn‑nòje̱n.
\v 7 Kꞌoa̱á ma‑ne ndí ꞌndsè ko̱ ndí tichjaá, na̱sꞌín kjo̱ꞌin ko̱ kjoa̱ kondra̱ titsa̱jnajiìn‑je̱n, kꞌe̱ nga kinaꞌyà‑je̱n i̱tꞌaà tsa̱jòn nga ꞌñó ndaà mokjeiín‑nò i̱tꞌaà tsꞌe̱ Cristo, ti̱koa̱á ngaje̱n, ꞌñó ndaà kjòtsja‑naje̱n.
\v 8 Kꞌe̱ nga kinaꞌyà‑je̱n nga kixi̱ onguítꞌaà‑là Na̱ꞌèn‑ná, ngaje̱n jyeé mì ti̱ mé makájno‑naje̱n.
\v 9 Ngaje̱n, ꞌñó tse kjo̱tsja tjín‑naje̱n nga nguixko̱n Nainá xi kjoa̱ tsa̱jòn skanda mì‑la kiì kjoe̱hetꞌaà na̱chrjein nga kꞌoi̱‑la̱je̱n kjo̱ndaà Nainá.
\v 10 Ko̱ na̱chrjein ko̱ ni̱tje̱n nokjoàtꞌaà‑la̱je̱n Nainá mé‑ne nga tsjáꞌnde‑ne nga ko̱ma ko̱nguíchoòn‑nòje̱n. Ti̱koa̱ ko̱ma ko̱kòya‑ìsa‑nòje̱n mé‑ne nga ko̱jngoò‑ne ꞌén xi chijatꞌaà‑nò koni sꞌín mokjeiín‑nò.
\s Kjoa̱ bítsiꞌba‑la̱ Pablo
\p
\v 11 Mejèn‑naje̱n nga ti̱jè‑ne Na̱ꞌèn‑ná xi Nainá ko̱ jè Jesucristo xi otíxoma‑ná, kàtatsjáꞌnde‑naje̱n nga ko̱ma ko̱nguíchoòn‑nòje̱n.
\v 12 Jè kjo̱tsjacha‑la̱ Na̱ꞌén‑ná ìsa̱ ndaà kàtasijiìn ini̱ma̱‑nò, mé‑ne nga ìsa̱ ndaà ko̱tsjacha‑nò xinguio̱o ko̱ ngatsꞌiì xi̱ta̱ xi kjꞌei̱í, koni ngaje̱n, ndaà matsjacha‑nòje̱n.
\v 13 Jè Na̱ꞌèn‑ná kàtatsjá‑la̱ ngaꞌñó ini̱ma̱‑nò mé‑ne nga ni̱mé jé sa̱kòtꞌaà‑nò ko̱ tsjeè ki̱tsa̱jnaà nga nguixko̱n Nainá xi Na̱ꞌèn‑ná kꞌe̱ nga kjoi̱í ìjngoò kꞌa‑ne Jesucristo xi otíxoma‑ná nga tji̱ko̱ ngatsꞌiì xi ya̱ chja̱‑ne.
\c 4
\s Kjoa̱ xi sasén‑la̱ Nainá
\p
\v 1 Ndí ꞌndsè ko̱ ndí tichjaá, kꞌoa̱á sꞌín tsakoòya‑nòje̱n nga kꞌoa̱sꞌín si̱jchá yijo‑nò koni sꞌín sasén‑la̱ Nainá. Ko̱ kixi̱í kjoa̱, jyeé ko̱sꞌín titsa̱ꞌnè. Ta̱nga i̱ꞌndei̱ bítsiꞌba‑nòje̱n ti̱koa̱ bìnè‑nòje̱n i̱tꞌaà tsꞌe̱ Jesús xi otíxoma‑ná nga ìsa̱ ꞌñó ndaà tjiì‑là ngaꞌñó yijo‑nò nga ko̱sꞌín ti̱kitasòn.
\p
\v 2 Jyeé tíjiìn‑nò kó sꞌín tjín kjo̱tíxoma xi kitsꞌiì‑nòje̱n koni sꞌín kitsjaà‑naje̱n Jesucristo xi otíxoma‑ná.
\v 3 Jè xi mejèn‑la̱ Nainá nga nguì tsjeè si̱jchá yijo‑nò, mì ti̱ kjoa̱ chijngui si̱sꞌin‑là.
\v 4 Nga jngoò ìjngoò‑nò ti̱kinda̱a yijo‑nò; kꞌoa̱sꞌín ti̱kjeén nga nguì tsjeè ti̱tsa̱jna koni sꞌín sasén‑la̱ Nainá.
\v 5 Kì biìꞌnde‑là nga síkijne‑nò jñà kjoa̱ chꞌo xi síjé yijo‑nò koni sꞌín jñà xi̱ta̱ xi mìkiì beèxkon Nainá.
\v 6 Jñò xi ꞌndseé chibá i̱tꞌaà tsꞌe̱ Cristo, kì kꞌoa̱á tjín kjoa̱ xi kaàjñoò mé‑ne nga mì xinguio̱o chóna̱cha̱n‑là nga mì xinguio̱o jcha̱toòn. Tsà kꞌoa̱sꞌín sꞌe̱en, kjo̱ꞌiín tsjá‑nò Nainá. Jyeé kꞌoa̱sꞌín tsibèno̱jmí‑nòje̱n.
\v 7 Nainá mìtsà koi xá kiìchja̱‑ná nga chꞌo sꞌe̱én, jè xi mejèn‑la̱ nga tsjeè ki̱tsa̱jnaá.
\v 8 Jè xi ochrjekàngui kjoa̱ koi, mìtsà kjo̱hítsjeèn tsꞌe̱ xi̱ta̱ ochrjekàngui, kjo̱hítsjeèn tsꞌe̱ Nainá ochrjekàngui; nga jè xi tsjá‑nò Ini̱ma̱ Tsjeè‑la̱.
\p
\v 9 Mìkiì mochjeén nga xo̱jo̱n skiìtꞌaà‑ìsa‑nò xi tsꞌe̱ kjoa̱tjòcha. Nainá jye tsakóya‑nò kósꞌín si̱tjòchaà xinguio̱o nga jngoò ìjngoò.
\v 10 Jyeé ko̱sꞌín titsa̱ꞌnè nga matsjacha ngatsꞌiì xi̱ta̱ xinguio̱o xi títsa̱jna kóho̱kji ya̱ nangui Macedonia. Ta̱nga kꞌoa̱á sꞌín bìtsiꞌba‑nòje̱n nga ìsa̱ ndaà ti̱tsjacha xinguio̱o.
\v 11 Tìnè‑là yijo‑nò nga ꞌnchán ti̱tsa̱jna, kì kjoa̱‑la̱ xinguio̱o chingàjñoò, tꞌe̱en xá‑nò koni tjín xá xi ma‑nò, koni sꞌín jye kiꞌmì‑nòje̱n ngatsꞌiì kjoa̱ koi.
\v 12 Mé‑ne nga skoe̱xkón‑nò jñà xi̱ta̱ xi mìkiì mokjeiín‑la̱ ꞌén‑la̱ Nainá. Koa̱ jñò, ni̱mé chijatꞌaà‑nò.
\s Kꞌe̱ nga kjoi̱í ìjngoò kꞌa‑ne Na̱ꞌèn‑ná Jesucristo
\p
\v 13 Ndí ꞌndsè ko̱ ndí tichjaá, mejèn‑naje̱n nga kàtasijiìn‑nò mé kjoa̱ xi matꞌin jngoò xi̱ta̱ xi biyaà, mé‑ne nga mì ko̱baá‑nò koni jñà xi̱ta̱ xi ni̱mé nchikoña‑la̱.
\v 14 Koni sꞌín mokjeiín‑ná nga Jesús kꞌen, i̱kjoàn jaáya‑la̱, kꞌoa̱ ti̱sꞌín mokjeiín‑ná nga Nainá si̱ìkjaáya‑la̱ xi̱ta̱ xi jye kꞌen, jñà xi mokjeiín‑la̱ i̱tꞌaà tsꞌe̱ Jesús.
\p
\v 15 Nga̱ koií ꞌén bèno̱jmíya‑je̱n koni tsò ꞌén xi tsibíjna Jesús nga jñá xi titsa̱jnakoaán skanda kꞌe̱ nga kjoi̱í ìjngoò kꞌa Na̱ꞌèn‑ná Jesucristo, mìtsà jñá kjiín ítjòn‑lá jñà xi jye kꞌen.
\v 16 Nga̱ jè sobà Na̱ꞌèn‑ná ki̱tjojen ìjngoò kꞌa‑ne ngajmiì; ꞌñó ki̱chja̱ nga tsjá o̱kixi̱, ki̱náꞌya jngoò‑la̱ jta̱ tsꞌe̱ àkja̱le̱ ítjòn, ko̱ ki̱náꞌya‑la̱ chrjo‑la̱ Nainá; i̱kjoàn jñà xi̱ta̱ xi jye kꞌen nga mokjeiín‑la̱ i̱tꞌaà tsꞌe̱ Cristo, kjoa̱áya ítjòn‑la̱.
\v 17 I̱kjoàn jñá xi tákó titsa̱jnakoaán jè na̱chrjein jè, ya̱á tjámijìn‑tje̱n‑koa̱á i̱jiìn ifi nga kixokjoaá Nainá ya̱ i̱jiìn i̱sén. Kꞌoa̱á sꞌín ko̱ma nga ya̱ ki̱tsa̱jnakoa̱á Nainá ni̱ta̱ mé na̱chrjein‑ne.
\v 18 Kꞌoa̱á ma‑ne nga ti̱je takòn xinguio̱o nga tèno̱jmíya‑là koni tsò jñà ꞌén koi.
\c 5
\p
\v 1 Ndí ꞌndsè ko̱ ndí tichjaá, mìkiì mochjeén nga xo̱jo̱n si̱tꞌaà‑nò mé na̱chrjein‑ne nga o̱ko̱ma.
\v 2 Jñò, nga̱ jyeé ndaà tíjiìn‑nò, jè na̱chrjein kꞌe̱ nga kjoi̱í ìjngoò kꞌa Na̱ꞌèn‑ná Jesucristo, kꞌoa̱á sꞌín kjoi̱í koni jngoò xi̱ta̱ chijé xi fꞌiì nga ni̱tje̱n kꞌe̱ nga ni̱yá xi nchikoñaá‑la̱.
\v 3 Kꞌe̱ nga ki̱tso̱ jñà xi̱ta̱: “ꞌNchán titsa̱jnaá, ni̱mé kjoa̱ tjín.” Kꞌe̱é tà ni̱to̱ón ki̱tjojenè‑la̱ kjo̱xkón koni sꞌín matꞌin jngoò chjo̱ón xi bijchó na̱chrjein‑la̱ nga kiꞌndí ꞌbeé, mìkiì ko̱jno‑la̱.
\v 4 Ta̱nga jñò ndí ꞌndsè ko̱ ndí tichjaá, mìtsà i̱jiìn jñò titsa̱jnaà jñò. Ko̱ kꞌoa̱á ma‑ne nga mì kꞌoa̱á sꞌín ko̱matꞌioòn jè na̱chrjein jè, koni ma kꞌe̱ nga ta ni̱to̱ón fì jngoò xi̱ta̱ chijé.
\v 5 Ta̱nga jñò, ngatsꞌioò, iseèn choòn ñánda titsa̱jnaà, ko̱ na̱chrjein‑né. Nga̱ jñá, mìtsà i̱jiìn jñò titsa̱jnaá ko̱ mìtsà ni̱tje̱n titsa̱jnaá.
\v 6 Kꞌoa̱á ma‑ne nga mìkiì kꞌoa̱ sꞌe̱én koni sꞌín xi̱ta̱ xi kjꞌei̱í nga mì titsa̱jnandaà‑jèn mé kjoa̱ xi tjín kꞌoa̱á ngaya‑la̱ koni tsà kjiyijòfè. Mochjeén‑né nga ki̱tsa̱jnandaá koni jngoò xi̱ta̱ xi tíjnakon, xi nguì ndaà tjín ikon.
\v 7 Nga jñà xi̱ta̱ xi oyijòfè, kꞌe̱é oyijòfè kꞌe̱ nga jñò. Ko̱ jñà xi machꞌi̱, kꞌe̱é machꞌi̱ kꞌe̱ nga jñò.
\v 8 Ta̱nga jñá, ya̱á titsa̱jnaá ñánda iseèn choòn. Kꞌoa̱á ma‑ne nga ndaà si̱jchá yijo‑ná. Jè ꞌén xi mokjeiín‑ná ko̱ jè kjoa̱tjòcha, jñà ko̱si̱ko̱ ini̱ma̱‑ná koni jngoò soldado xi ndaà kijtsa ini̱ma̱‑la̱ jè chrjoa̱ xi ꞌmì coraza. Ko̱ kꞌe̱ nga nguì tíjngoò takoán nga chiñá‑lá jè na̱chrjein kꞌe̱ nga ki̱tjokàjñaá kjo̱ꞌin, jè ngaya‑la̱ tsíꞌnguién ki̱cha̱ xi osìko̱ sko̱ soldado.
\v 9 Nainá mìtsà koi xá jaàjiìn‑ná nga kjo̱ꞌin tsjá‑ná, jé‑né nga ki̱tjokàjñaá kjo̱ꞌin i̱tꞌaà tsꞌe̱ Jesucristo xi otíxoma‑ná.
\v 10 Nga jè kꞌen ngajo‑ná mé‑ne kꞌe̱ nga kjoi̱í ìjngoò kꞌa‑ne, tsà titsa̱jnakoaán, ko̱ tsà jye kꞌeén, ya̱á ki̱tsa̱jnakoa̱á.
\v 11 Kꞌoa̱á ma‑ne nga ti̱jetakòn ko̱ tjiì‑la ngaꞌñó xinguio̱o koni sꞌín jye titsa̱ꞌnè.
\s Kjo̱tíxoma xi kitsjaà Pablo
\p
\v 12 Ndí ꞌndsè ko̱ ndí tichjaá, nìjé‑nòje̱n kjo̱ndaà, jcha̱xkón xi̱ta̱ xi síxáko̱‑nò nga jñà títsa̱jna ítjòn ya̱ i̱jiìn na̱xa̱ndá‑la̱ Nainá ko̱ nga okóya‑nò.
\v 13 Ndaà jcha̱xkón ti̱koa̱ ndaà ti̱tsjacha xi̱ta̱ koi, jè kjoa̱‑la̱ xá xi sꞌín. ꞌNchán titsa̱jnako̱o xinguio̱o.
\p
\v 14 Kꞌoa̱ ti̱sꞌín bìtsiꞌba‑nòje̱n ndí ꞌndsè ko̱ ndí tichjaá, ko̱tꞌìn‑là nga kàtasíxá jñà xi̱ta̱ xi ta jyò tjíma nga majìn‑la̱ síxá; ti̱ꞌñó ikon jñà xi indaà tjín ikon; ti̱chjátꞌaà‑là jñà xi tsjìn‑la̱ ngaꞌñó ya̱ i̱jiìn ini̱ma̱‑la̱; ko̱ kàtasꞌe‑nò kjoa̱tsejta i̱tꞌaà tsꞌe̱ ngatsꞌiì xi̱ta̱‑la̱ Nainá.
\p
\v 15 Tsà kꞌe̱ nga mé kjoa̱ xi chꞌo síko̱‑nò xi̱ta̱ xi kjꞌei̱í, ti̱kinda̱a xinguio̱o nga mì si̱ìjndà ngajo‑ne. Ta̱ sa̱á tìnè‑là yijo‑nò nga kjitꞌaà na̱chrjein ndaà ti̱ko̱o xinguio̱o ko̱ ngatsꞌiì xi̱ta̱ xi kjꞌei̱í.
\p
\v 16 Kjitꞌaà na̱chrjein tsja tꞌè‑là ini̱ma̱‑nò.
\v 17 Titsiꞌba kjitꞌaà‑là Nainá.
\v 18 Ni̱ta̱ mé kjoa̱‑ne, tjiì kjitꞌaà‑là kjo̱ndaà Nainá. Kꞌoa̱á sꞌín mejèn‑la̱ Nainá nga kꞌoa̱sꞌín sꞌe̱en ngatsꞌioò xi mokjeiín‑nò i̱tꞌaà tsꞌe̱ Cristo Jesús.
\p
\v 19 Kì bichjoá ikòn‑là xá xi sꞌín Ini̱ma̱ Tsjeè‑la̱ Nainá.
\v 20 Kì nachrjekànguioò ꞌén‑la̱ xi̱ta̱ xi chja̱ ngajo‑la̱ Nainá.
\v 21 Ndaà ndaà chítꞌaà yije ngatsꞌiì ꞌén. Jñà ti̱kítsa̱jnatjò xi ndaà tsò.
\v 22 Ngatsꞌiì xi chꞌo tsò, kì kiì nìkitasòn.
\p
\v 23 Jè Nainá xi tsjá kjoa̱ꞌnchán, jngoò kꞌa tsjeè kàtasíkítsa̱jna‑nò. Ndaà kàtasíkinda̱ ini̱ma̱‑nò, yijo‑nò ko̱ kjo̱hítsjeèn‑nò mé‑ne nga ni̱mé jé sꞌe̱‑nò jè na̱chrjein kꞌe̱ nga kjoi̱í ìjngoò kꞌa jè Jesucristo xi otíxoma‑ná.
\v 24 Nga xi̱ta̱ kixi̱‑né jè Nainá xi xó kiìchja̱‑nò, si̱ìkitasòn yijeé kjoa̱ koi.
\s Kó kitsò Pablo nga síhixatꞌaà xi̱ta̱
\p
\v 25 ꞌNdseé ko̱ tichjaá, titsiꞌbatjì‑náje̱n.
\p
\v 26 Ti̱ixotꞌaà ngatsꞌiì xi̱ta̱ ꞌndseé nga nguì ko̱ ini̱ma̱‑nò.
\p
\v 27 ꞌA̱n, tsja‑nò o̱kixi̱ nga nguixko̱n Na̱ꞌèn‑ná nga kàtaxke̱jiìn‑la̱ xo̱jo̱n jè ngatsꞌiì xi̱ta̱ na̱xa̱ndá‑la̱ Nainá.
\p
\v 28 Jè kàtìjnako̱‑nò kjo̱ndaà‑la̱ Jesucristo xi otíxoma‑ná.