\id 2TH
\h 2 Tesalonicenses
\toc1 2 Tesalonicenses
\mt Xo̱jo̱n carta‑la̱ San Pablo xi ma‑ne jò xi kiskiì‑la̱ xi̱ta̱ na̱xa̱ndá‑la̱ Cristo xi títsa̱jna Tesalónica
\c 1
\s Kó tsò Pablo nga síhixatꞌaà jñà xi̱ta̱ na̱xa̱ndá‑la̱ Cristo xi títsa̱jna Tesalónica
\p
\v 1 Jñò xi xi̱ta̱ na̱xa̱ndá‑la̱ Nainá maà xi titsa̱jnaà ya̱ na̱xa̱ndá Tesalónica nga ya̱ titsa̱jnakjoòko̱o Nainá xi Na̱ꞌèn‑ná ko̱ jè Jesucristo xi otíxoma‑ná, ꞌa̱n xi ꞌmì‑na Pablo titsa̱nìhixotꞌaà‑nòje̱n ko̱ Silvano [ti̱jé‑ne xi ꞌmì Silas] ko̱ Timoteo.
\v 2 Nainá xi Na̱ꞌèn‑ná, ko̱ jè Jesucristo xi otíxoma‑ná kàtatsjá‑nò kjo̱ndaà ko̱ kjoa̱ꞌnchán ya̱ i̱jiìn ini̱ma̱‑nò.
\s Kó tsò Pablo nga tsjá‑la̱ kjo̱ndaà Nainá
\p
\v 3 Ndí ꞌndseé ko̱ tichjaá mochjeén‑nè nga kjitꞌaà na̱chrjein kꞌoi̱í‑la̱je̱n kjo̱ndaà Nainá xi i̱tꞌaà tsa̱jòn. Ndaà tjín nga kꞌoa̱sꞌín sꞌe̱n‑je̱n, koií kjoa̱‑la̱ nga na̱chrjein inchijòn ìsa̱ ndaà mokjeiín‑nò ko̱ ìsa̱ ndaà matsjacha xinguio̱o nga jngoò ìjngoò.
\v 4 Kꞌoa̱á ma‑ne nga ndaà matsja‑naje̱n i̱tꞌaà tsa̱jòn; kꞌoa̱á sꞌín bèno̱jmí‑la̱je̱n jñà xi̱ta̱ na̱xa̱ndá‑la̱ Cristo xi xìn nangui títsa̱jna nga jñò, ndaà mokjeiín‑nò ko̱ ndaà chíkjoa̱ko̱‑nò na̱sꞌín ꞌñó fì tji̱ngui kondra̱‑nò xi̱ta̱ ko̱ na̱sꞌín kjo̱ꞌin titsa̱nìkjioón.
\v 5 Ngatsꞌiì kjoa̱ koi, Nainá kꞌoa̱á sꞌín okó nga kixi̱ koi̱ìndaàjiìn; ko̱ kꞌoa̱á ma‑ne nga jñò, okꞌín‑nò nga ya̱ ki̱tsa̱jnajiìn‑là xi̱ta̱ xi jè tíhotíxoma‑la̱, nga ti̱koi‑ne kjoa̱‑la̱ Nainá nga kjo̱ꞌin titsa̱nìkjioón.
\p
\v 6 Nainá, xi̱ta̱ kixi̱‑né nga tsjá‑la̱ kjo̱ꞌin jñà xi̱ta̱ xi kjo̱ꞌin tsjá‑nò.
\v 7 Ko̱ jñò xi kjo̱ꞌin titsa̱nìkjioón, tsjá‑nò kjoa̱ꞌnchán ko̱ ngaje̱n, kꞌe̱ nga kji̱nchrobàjen ngajmiì Jesucristo xi otíxoma, tji̱ko̱ àkja̱le̱‑la̱ xi ꞌñó tse ngaꞌñó tjín‑la̱ nga kji̱nchrobàjen‑jiìn niꞌín.
\v 8 Nainá tsjá‑la̱ kjo̱ꞌin jñà xi̱ta̱ xi mìkiì beèxkón ni̱ mìkiì síkitasòn ꞌén ndaà‑la̱ Nainá xi kjoa̱ tsꞌe̱ Jesucristo xi otíxoma‑ná.
\v 9 Xi̱ta̱ koi, ꞌñó tse kjo̱ꞌin si̱ìkjeiín ni̱ta̱ kjé‑ne; mì ya̱á kítsa̱jna nguixko̱n Na̱ꞌèn‑ná, ko̱ mìkiì skoe̱ kjoa̱jeya‑la̱ xi ꞌñó tse ngaꞌñó tjín‑la̱.
\v 10 Kjoa̱ koi, kꞌoa̱á sꞌín ko̱ma jè na̱chrjein kꞌe̱ nga ki̱tjojen ìjngoò kꞌa Na̱ꞌèn‑ná mé‑ne nga i̱tꞌaà tsꞌe̱ xi̱ta̱‑la̱ jeya kíjna‑ne ko̱ ngatsꞌiì xi̱ta̱ xi mokjeiín‑la̱ i̱tꞌaà tsꞌe̱, ta ko̱xkón‑la̱. Ti̱koa̱á jñò ya̱á ki̱tsa̱jnaà, koií kjoa̱‑la̱ nga kòkjeiín‑nò koni sꞌín tsibèno̱jmí‑nòje̱n.
\p
\v 11 Kꞌoa̱á ma‑ne nga kjitꞌaà na̱chrjein bítsiꞌba‑la̱je̱n Nainá i̱tꞌaà tsa̱jòn, mé‑ne nga Nainá ki̱tso̱ nga okꞌìn‑nò nga ya̱ ki̱nókjoa̱‑nò na̱xa̱ndá‑la̱ nga xó kꞌoa̱á sꞌín kiìchja̱‑nò. Nga ko̱ ngaꞌñó‑la̱ kàtasíkitasòn ngatsꞌiì kjo̱ndaà xi jñò sasén‑nò ko̱ xá xi ꞌnè nga Na̱ꞌèn‑ná maꞌñótꞌaà takòn.
\v 12 Kꞌoa̱á sꞌín ko̱ma nga i̱tꞌaà tsa̱jòn jeya kíjna Jesucristo xi otíxoma‑ná. Ti̱koa̱ jè ndaà si̱ìkítsa̱jna‑nò koni sꞌín tjín‑la̱ kjo̱ndaà jè Nainá ko̱ jè Jesucristo xi otíxoma‑ná.
\c 2
\s Kꞌe̱ nga kjoi̱í ìjngoò kꞌa‑ne Jesucristo
\p
\v 1 Ndí ꞌndseé ko̱ tichjaá, i̱ꞌndei̱ jè kéno̱jmí‑nòje̱n kó sꞌín ko̱ma kꞌe̱ nga kjoi̱í ìjngoò kꞌa Jesucristo xi otíxoma‑ná ko̱ kꞌe̱ nga ya̱ ko̱xkóyatꞌaà‑lá. Kꞌoa̱á ma‑ne bìtsiꞌba‑nòje̱n
\v 2 tsà yá xi̱ta̱ xi ki̱tso̱‑nò nga jyeé jꞌiì ìjngoò kꞌa Jesucristo, kì tà ni̱to̱n mokjeiín‑nò; kì tsakjoòn‑là tsà yá xi̱ta̱ xi ki̱tso̱‑nò: kꞌoa̱á tsò ꞌén‑la̱ Nainá xi kjònga̱tsja Pablo; kꞌoa̱á sꞌín chja̱ya, ko̱ kꞌoa̱á sꞌín kisìkasén jngoò xo̱jo̱n.
\v 3 Kì yá xi̱ta̱ xi kona̱cha̱n‑nò. Nga jè na̱chrjein kꞌe̱ nga o̱ko̱ma, ítjòn sꞌe̱ na̱chrjein nga jñà xi̱ta̱, ꞌñó kondra̱ kítsa̱jna‑la̱ Nainá. I̱kjoàn ta ni̱to̱ón ko̱tsejèn jè xi̱ta̱ xi ꞌñó chꞌo sꞌi̱in, jè xi tjínè‑la̱ nga kjo̱ꞌin si̱ìkjeiín ni̱ta̱ kjé‑ne.
\v 4 Xi̱ta̱ jè, jè xi kondra̱ kíjna‑la̱ ngatsꞌiì xi Nainá tsò‑la̱ xi̱ta̱ ko̱ ni̱ta̱ mé‑ìsa‑ne xi beèxkón nga jè mejèn‑la̱ kíjna ítjòn. Skanda ya̱á kíjnaya i̱ngo̱ ítjòn‑la̱ Nainá koni tsà jè sobà Nainá, kꞌoa̱á ki̱tso̱‑la̱ yijo‑la̱ nga Nainá jè.
\p
\v 5 ¿A mì bítsjeèn‑nò kꞌe̱ nga sa̱ ya̱ tsohóti̱jnako̱‑nò, kꞌoa̱á kixan‑nò nga kꞌoa̱á sꞌín ko̱ma?
\v 6 I̱ꞌndei̱ jye tíjiìn‑nò mé kjoa̱ xi bíchjoà ikòn‑la̱ xi̱ta̱ jè nga mì xátí fꞌiì; skanda kꞌe̱é kjoi̱í kꞌe̱ nga ki̱chóya na̱chrjein‑la̱.
\v 7 Jè ngaꞌñó‑la̱ kjoa̱chꞌo, jyeé tísíxáꞌma i̱ i̱sòꞌnde, ta̱nga tíjna jngoò xi tíjna ikòn nga mìkiì tsjáꞌnde ko̱ ta jè chija nga tjáxìn.
\v 8 Ko̱ i̱kjoàn kꞌe̱é ko̱tsejèn jè xi̱ta̱ xi chꞌo sꞌín. Ta̱nga Jesucristo xi otíxoma, ta jngoò ꞌén ki̱chja̱ nga tsjá‑la̱ kjo̱ꞌin ni̱ta̱ kjé‑ne. Tà ma tà jé nga ote kji nga kjoi̱í, jngoò kꞌa kjoa̱áxìn ngaꞌñó‑la̱.
\v 9 Kꞌe̱ nga kjoi̱í jè xi̱ta̱ xi chꞌo sꞌín, jè xi̱ta̱ nei̱í tsjá‑la̱ ngaꞌñó nga kjìn ska̱ya kjo̱xkón ko̱kò xi mìtsà kixi̱ kjoa̱.
\v 10 Si̱ìkjeén yije kjoa̱ xi chꞌo tjín nga skóna̱cha̱n‑la̱ xi̱ta̱ xi kjo̱ꞌin si̱ìkjeiín ni̱ta̱ kjé‑ne, koií kjoa̱‑la̱ nga jñà xi̱ta̱ koi mìkiì matsjakeè xi kjoa̱ kixi̱ xi ma ki̱tjokàjiìn‑ne kjo̱ꞌin kjoa̱ tsꞌe̱ jé‑la̱.
\v 11 Kꞌoa̱á ma‑ne Nainá tsjáꞌnde‑né nga tíjna jngoò xi skóna̱cha̱n‑la̱ xi̱ta̱ koi, mé‑ne kàtakjeiín‑la̱ kjoa̱ ndiso,
\v 12 nga kàtasꞌe‑la̱ kjo̱ꞌin ngatsꞌiì xi mìkiì mokjeiín‑la̱ kjoa̱ kixi̱. Nguì ta kjoa̱ chꞌoó sasén‑la̱.
\s Mé kjoa̱‑ne nga jaàjiìn‑ná Nainá
\p
\v 13 Ndí ꞌndsè ko̱ ndí tichjaá, mochjeén‑né nga kjitꞌaà na̱chrjein ꞌbiì‑la̱je̱n kjo̱ndaà Nainá xi i̱tꞌaà tsa̱jòn xi ꞌñó matsjakeè‑nò Na̱ꞌèn‑ná, nga xó kꞌoa̱á sꞌín jaàjiìn‑nò Nainá kóni nga ti̱sa̱ tàtsꞌen‑la̱ kjoa̱, mé‑ne nga ki̱tjokàjñoò‑nò kjo̱ꞌin, nga jè Ini̱ma̱ Tsjeè‑la̱ Nainá sítsjeèya‑nò ko̱ nga ndaà mokjeiín‑nò xi kjoa̱ kixi̱.
\v 14 Xó kꞌoa̱á sꞌín kiìchja̱‑nò Nainá i̱tꞌaà tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo xi ngaje̱n nokjoàya‑je̱n, mé‑ne nga jñò, ti̱koa̱ sꞌe̱‑nò kjoa̱jeya‑la̱ Jesucristo, jè xi otíxoma‑ná.
\p
\v 15 Ndí ꞌndsè ko̱ tichjaá, kꞌoa̱á sꞌín kixi̱ ti̱tsa̱jna. Kì nìjchàajiìn‑jèn jñà ꞌén kixi̱‑la̱ Cristo xi ngaje̱n kinìkatoya‑nòje̱n, jñà xi ta ꞌén kinokjoà‑nòje̱n ko̱ xi xo̱jo̱n carta tsakoòya‑nòje̱n.
\v 16 ꞌA̱án síjétꞌaà‑la̱ Jesucristo, jè xi otíxoma‑ná ko̱ jè Nainá xi Na̱ꞌèn‑ná, jè xi ꞌñó matsjakeè‑ná nga tsjá‑ná kjoa̱jetakòn‑la̱ xi mìkiì kjoe̱hetꞌaà, ko̱ tsjá kjo̱tjò‑ná kjo̱ndaà‑la̱ nga tíjngoò takoán nga titsa̱chiñá‑lá.
\v 17 Kꞌoa̱á sꞌín síjétꞌaà‑la̱ nga ìsa̱ tse ngaꞌñó kàtatsjá‑la̱ ini̱ma̱‑nò mé‑ne nga ìsa̱ kixi̱ ki̱tsa̱jnaà koni sꞌín ꞌnè kjoa̱ xi ndaà tjín ko̱ koni sꞌín nokjoà ꞌén xi ndaà tsò.
\c 3
\s Kꞌoa̱á tsò Pablo nga mejèn‑la̱ si̱tsiꞌbatjì
\p
\v 1 Xi fehetꞌaà‑ne ndí ꞌndsè ko̱ ndí tichjaá, titsiꞌbatjì‑náje̱n mé‑ne jè ꞌén‑la̱ Nainá ni̱to̱n xki̱ xi ján katijchó, ti̱koa̱ ndaà kàteèxkón jñà xi̱ta̱ xi skoétjò ꞌén koni sꞌín kiꞌnè jñò nga ndaà kiyaxkón.
\v 2 Ti̱koa̱ titsiꞌbatjì‑náje̱n mé‑ne nga jè Na̱ꞌèn‑ná kì kiì tsjáꞌnde nga chꞌo si̱ìko̱‑naje̱n xi̱ta̱ tsꞌe̱n ko̱ xi chꞌo sꞌín, nga mì tà ngatsꞌiì xi̱ta̱ mokjeiín‑la̱.
\v 3 Na̱ꞌèn‑ná xi̱ta̱ kixi̱‑né, síkitasòn ꞌén‑la̱, kixi̱í si̱ìkítsa̱jna‑nò ti̱koa̱ si̱ìkinda̱‑nò mé‑ne nga mì chꞌo si̱ìko̱‑nò jè xi̱ta̱ nei̱í.
\v 4 Nga i̱tꞌaà tsꞌe̱ Na̱ꞌèn‑ná mokjeiín‑naje̱n nga titsa̱nìkitasòn‑nò koni sꞌín tìtsahotiìxoma‑nòje̱n ko̱ tákó kꞌoa̱á sꞌín sꞌe̱en‑ìsa.
\v 5 Jè Na̱ꞌèn‑ná kàtasíchjátꞌaà‑nò nga ko̱sꞌín tjòcha jcha̱a xinguio̱o koni sꞌín tjòkeè kijtseè‑nò Nainá; ko̱ nga kàtachíkjoa̱ko̱‑nò kjo̱ꞌin koni sꞌín kichìkjoa̱ko̱‑la̱ Cristo.
\s Mochjeén‑né nga kàtasíxá jñà xi̱ta̱
\p
\v 6 Ndí ꞌndsè ko̱ ndí tichjaá, kꞌoa̱á sꞌín bìnè‑nòje̱n, i̱tꞌaà tsꞌe̱ Na̱ꞌèn‑ná Jesucristo, kì ti̱ ya̱ tsjahijtako̱‑nò jñà xi̱ta̱ ꞌndseé ko̱ tichjaá xi majìn‑la̱ síxá, jñà xi mìkiì kꞌoa̱sꞌín síkitasòn koni sꞌín tjín kjoa̱ kixi̱ xi ngaje̱n kinìkatoya‑nòje̱n.
\v 7 \fig Paul sewing a tent (with hair) -33% 2TH 3:7-10|66-CN01997B.TIF|col|2TH 3:7-10||Xá xi kisꞌiìn Pablo nga tsibíndaà niꞌya nikje|2TH 3.7\fig*Jñò, jyeé tíjiìn‑nò nga mochjeén‑né nga chjínguì‑náje̱n koni sꞌín kiꞌnè‑je̱n kꞌe̱ nga ya̱ tsitsa̱jnako̱‑nòje̱n; mì jyò tsitsa̱jna‑je̱n, kinìxá‑náje̱n.
\v 8 Mìtsà ta kjo̱tjò chichi‑je̱n. Ta̱ sa̱á ꞌñó kiníxá‑je̱n ko̱ na̱chrjein ko̱ ni̱tje̱n kinìkijta‑je̱n yijo‑naje̱n, mé‑ne nga mì jñò si̱ìjti‑nòje̱n.
\v 9 Kinìxá‑náje̱n na̱sꞌín tjíꞌnde‑naje̱n nga si̱jé‑nòje̱n mé tsojmì xi mochjeén‑naje̱n. Jè xi mejèn‑naje̱n nga chjínguì‑náje̱n mé‑ne kꞌoa̱ ti̱sꞌín sꞌe̱en koni ꞌnè‑je̱n.
\v 10 Kꞌe̱ nga tsitsa̱jnako̱‑nòje̱n kꞌoa̱á sꞌín kiꞌmì‑nòje̱n: Tsà jngoò xi̱ta̱ xi majìn‑la̱ síxá, ti̱koa̱ mìkiì tjíꞌnde‑la̱ nga ko̱kje̱n.
\v 11 Jyeé kinaꞌyà‑je̱n nga tjímajiìn iꞌnga xi̱ta̱ xi majìn‑la̱ síxá nga tà jyò binchima, nga ta jñà chja̱jiìn chja̱ꞌa ñánda mì jñà oko̱‑la̱.
\v 12 Jñà xi̱ta̱ koi, i̱tꞌaà tsꞌe̱ Jesucristo xi otíxoma‑ná, kꞌoa̱á sꞌín bìtsiꞌba‑la̱je̱n, ti̱koa̱ bìnè‑la̱je̱n nga kàtasíxá, mé‑ne nga kàtátsjiꞌa‑ne yijo‑la̱.
\p
\v 13 Jñò ndí ꞌndsè ko̱ ndí tichjaá, kì bijta‑nò nga ndaà ꞌnè.
\v 14 Tsà tjín iꞌnga xi mìkiì síkitasòn koni tsò xo̱jo̱n jè, chítsejèn‑là yá‑né, kì ya̱á báhijtako̱o, mé‑ne nga ko̱sobà‑la̱.
\v 15 Ta̱nga kì kꞌoa̱á sꞌín nìko̱o koni jngoò xi̱ta̱ kondra̱, kꞌoa̱á sꞌín tèno̱jmíya‑là nga ꞌén ndaà chiko̱o nga ꞌndseé chibá.
\s ꞌÉn xi fehetꞌaà‑ne
\p
\v 16 Ti̱jè‑ne Na̱ꞌèn‑ná xi tsjá kjoa̱ꞌnchán, kjitꞌaà na̱chrjein kàtatsjá‑nò kjoa̱ꞌnchán ni̱ta̱ mé kjoa̱‑ne. Na̱ꞌèn‑ná kàtìjnako̱‑nò ngatsꞌioò.
\p
\v 17 Nga jye tífehetꞌaà xo̱jo̱n jè, ko̱ó ndsa̱a tìkjiì‑nò ꞌa̱n xi ꞌmì‑na Pablo, nga tisìhixatꞌaà‑nò. Nga̱ kꞌoa̱sꞌín sꞌiaàn firma‑na̱, ko̱ kꞌoa̱á sꞌín kjiaà.
\v 18 Ngatsꞌioò, jè kàtìjnako̱‑nò kjo̱ndaà‑la̱ Jesucristo xi otíxoma‑ná.