\id 1TI
\h 1 Timoteo
\toc1 1 Timoteo
\mt Xa̱jo̱n ra tsikínda ítjòn jè Pablo ra isìkasén‑la̱ jè Timoteo
\c 1
\s Kóꞌsín síhixoꞌta Pablo jè Timoteo
\p
\v 1 ꞌA̱n Pablo, tíbindá‑la xa̱jo̱n ra̱kìi̱, ꞌa̱n ra ko̱ꞌsín tsikíxáya‑na Jesucristo koni ꞌsín kitsjà kjo̱hixi̱ Nainá ra bachrjekàjin‑ná kjo̱hiꞌin ko̱ Jesucristo ra tíjna ítjòn‑ná nga i̱nchichiñá‑lá kjo̱nda‑la̱.
\v 2 Ngaji̱ Timoteo, ra koni tsa iꞌndí‑na̱ xin‑la nga ꞌa̱n tsakon‑yá nda‑la koni ꞌsín makjiín‑ná a̱ꞌta ꞌtse̱ Cristo. Nainá ra Na̱ꞌín‑ná ma ko̱ jè Jesucristo ra tíjna ítjòn‑ná katatsjá‑li kjo̱nda, katamahi̱ma̱ke‑li, ko̱ kataꞌse‑la̱ kjo̱ꞌnchán ya̱ a̱jin inìma̱‑li.
\s Kóꞌsín si̱konde̱é a̱ꞌta ꞌtse̱ xi̱ta̱ ra kjꞌií kjo̱bítsjen bakón‑ya
\p
\v 3 Koni ꞌsín tsikitsáꞌba‑la ꞌkia̱ nga kia ya̱ ján nangi Macedonia nga kíxian‑la, ya̱ ti̱jni na̱xi̱ndá Éfeso mé‑ni nga ji̱ kíchjákjáya‑la̱ xi̱ta̱ ra kjꞌií kjoa̱ i̱nchibakón‑ya ya̱ a̱jin na̱xi̱ndá‑la̱ Nainá.
\v 4 Ngaji̱ Timoteo, ꞌkoa̱á ꞌsín tinè‑la̱ jñà xi̱ta̱ kìi̱, kì jñà sísin‑la̱ kuendo̱ jchínga ra mì tsa kixi̱ kjoa̱, ti̱ꞌkoa̱á kì jñà sísin‑la̱ kjoa̱ ra mì kì feheꞌta ꞌtse̱ xi̱ta̱ jchínga kjotseé. Kjoa̱ kìi̱, nì mé chjí‑la̱. Tà síkjaán‑kjo‑ná. Mì kì basìko̱‑ná nga makjiín‑ná a̱ꞌta ꞌtse̱ Cristo mé‑ni nga ka̱ma si̱hitjasón‑ná koni ꞌsín nga mejèn‑la̱ Nainá.
\p
\v 5 Kjoa̱ ra tíbiné‑la, jé‑ní nga kataꞌse‑ná kjo̱tsjacha. Tanga ítjòn machjeén nga tsje katijna inìma̱‑ná ko̱ tsje katijna kjo̱bítsjen‑ná ko̱ ngi nda katakjiín‑ná a̱ꞌta ꞌtse̱ Cristo. ꞌKoa̱á ꞌsín ka̱ma‑ni nga nda ko̱tsjacheé xàngie̱é.
\v 6 Tanga tjín iꞌka xi̱ta̱ ra tsinchaꞌtaxìn‑la̱ kjoa̱ kìi̱; ta xín ndi̱yá tjímaya; ta kií sísin‑la̱ ꞌén ra nìmé chjí‑la̱.
\v 7 Mejèn‑la̱ maestro ꞌtse̱ kjo̱téxoma‑la̱ Nainá kítsa̱jna. Tanga jñà, nda mí kì machi̱ya‑ila̱ ꞌén ra chja̱ nga ꞌñó chja̱ nga tsò nga kixi̱í kjoa̱ ꞌén ra bakón‑ya.
\p
\v 8 Tjíjin‑ná nga jè kjo̱téxoma ra kitsjà Nainá ndaá tjín tsa ko̱ꞌsín ko̱chjeén koni ꞌsín mejèn‑la̱ Nainá.
\v 9 ꞌYa‑ná nga jè kjo̱téxoma‑la̱ Nainá, mì tsa ꞌtse̱‑jìn jñà xi̱ta̱ ra nda ꞌsín. ꞌTse̱é‑ní xi̱ta̱ ra mì kì ꞌnchréhijon ko̱ ra mì kì síhitjasòn; ꞌtse̱é‑ní xi̱ta̱ ra mì kì bexkón Nainá ko̱ ra bátsji‑jé; ꞌtse̱é‑ní xi̱ta̱ ra mì kì tsje tjín kjo̱bítsjen‑la̱, ra tjé betákon jè kjoa̱ tsje‑la̱ Nainá; ti̱ꞌkoa̱á ꞌtse̱é‑ní xi̱ta̱ ra síꞌken na̱ꞌìn‑la̱ ko̱ na̱‑la̱, ko̱ ngaꞌtsì ra xi̱ta̱ síꞌken.
\v 10 Ti̱ꞌkoa̱á ꞌtse̱‑ní jñà xi̱ta̱ ra kjoa̱chijngi ꞌsín, ko̱ jñà xi̱ta̱ ꞌxi̱n ra ti̱ xi̱ta̱ ꞌxi̱n xákjén fahijoko̱‑nì, ko̱ xi̱ta̱ ra fìko̱ chijé xákjén nga batína. Ti̱ꞌkoa̱á ꞌtse̱‑ní jñà xi̱ta̱ ndiso ko̱ xi̱ta̱ ra mì tsa ꞌén kixi̱ chja̱, ko̱ xi̱ta̱ ra ꞌcho tjín kjoa̱ ra ꞌsín ra kondra̱ fì‑la̱ kjo̱bítsjen ra nda tjín.
\v 11 ꞌKoa̱á ꞌsín bakón‑ya jè ꞌén nda ra jeya tíjna a̱ꞌta ꞌtse̱ Cristo ra kitsjà Nainá ra tse kjo̱nda tíjnajin; ko̱ ꞌa̱án isìnga̱tsja‑na mé‑ni nga kichjàya.
\s Kjo̱nda‑la̱ Nainá a̱ꞌta ꞌtse̱ Pablo
\p
\v 12 Tse kjo̱nda kataꞌse‑la̱ Jesucristo ra tíjna ítjòn‑ná nga kitsjà‑na ngaꞌñó ti̱ꞌkoa̱ nda kijtsetákon‑na nga ꞌa̱n isìnga̱tsja‑na xá‑la̱.
\v 13 Ni̱ꞌsín ꞌkia̱ nga ti̱ꞌsa̱ ítjòn, ꞌñó ꞌcho kíꞌsiaa̱n, kíchjàjnoó‑la̱ Nainá, kondra̱á tsakáti̱jna‑la̱, toón kíjtsee̱ jñà xi̱ta̱‑la̱. Tanga kjòhi̱ma̱keé‑na Nainá. Nga̱ kií ko̱ꞌsín kíꞌsin‑na nga kjè kì be ko̱ kjè kì makjiín‑na a̱ꞌta ꞌtse̱ Cristo.
\v 14 Tanga jè kjo̱tjò‑la̱ Na̱ꞌín‑ná isa̱á ꞌñó tse kitsjà‑na, ti̱ꞌkoa̱ tsasìko̱ó‑na nga kjomà kjokjiín‑na ko̱ kitsjá‑na kjo̱tsjacha‑la̱ nga jè Cristo tíjna̱ko̱.
\p
\v 15 Jñà ꞌén kìi̱, ngi ꞌén kixi̱‑ní. Machjeén‑ní nga ko̱kjiín ijye‑la̱ xi̱ta̱ nga jè Jesucristo ꞌji i̱ i̱sàꞌnde nga ko̱chrjekàjin kjo̱hiꞌin ngaꞌtsì xi̱ta̱ ra jé tjín‑la̱. Tíjna̱ ítjòn kjòo̱n ra ꞌa̱n nga isa̱ ꞌñó ꞌcho kíꞌsiaa̱n tà ngaꞌtsì xi̱ta̱.
\v 16 Tanga ni̱ꞌsín ꞌñó ꞌcho kíꞌsiaa̱n, jè Nainá kiꞌse‑la̱ kjo̱hi̱ma̱takòn ra a̱ꞌta tsa̱ꞌa̱n. Jñà xi̱ta̱, ꞌkia̱ nga ske̱ kóꞌsín nga isìko̱‑na Jesucristo nga ꞌñó tjín‑la̱ kjo̱jetakòn, ti̱ꞌkoa̱á ko̱kjiín‑te‑la̱ a̱ꞌta ꞌtse̱ Cristo nga ꞌse̱‑la̱ kjo̱binachon ni̱ta mé ni̱chjin‑nioo̱.
\v 17 Nainá ꞌnga katijna, kataꞌse‑la̱ kjoa̱jeya ni̱ta mé nó ko̱ ni̱ta mé ni̱chjin‑nioo̱. Nga̱ jè tíbatéxoma kiꞌta ko̱ mì kì kje̱heꞌtà ni̱chjin‑la̱ ni̱ta kjiá‑nioo̱, ti̱ꞌkoa̱á mì kì tsijen‑ni ñánda̱ tíjna, ngi tà jé ta̱jngo‑ni ra Nainá. Ko̱ꞌsín katama.
\p
\v 18 Ngaji̱ Timoteo ra koni tsa iꞌndí‑na̱ xin‑la, ya̱á singátsja‑la ꞌén kìi̱, koni ꞌsín kitsò xi̱ta̱ ra isìchjeén Nainá nga kiìchja̱ a̱ꞌta tsa̱ji, mé‑ni nga a̱ꞌta ꞌtse̱ ꞌén kìi̱, tsjá‑li ngaꞌñó nga nda si̱xá‑la̱ Nainá koni ꞌsín síxá jngo chíchàn.
\v 19 Nda katakjiín‑li a̱ꞌta ꞌtse̱ Cristo ti̱ꞌkoa̱ nda katijna kjo̱bítsjen‑li. Tjín iꞌka xi̱ta̱ ra mì kì isìsin kjo̱bítsjen ra nda tjióo̱n. ꞌKoa̱á ꞌsín kjomà‑ni nga isìkitsón kjoa̱ ra makjiín‑la̱.
\v 20 ꞌKoa̱á ꞌsín kjomàꞌtin jè Himeneo ko̱ Alejandro ra ꞌa̱n isíkítsa̱jnako̱ xi̱ta̱‑ni̱í, mé‑ni nga katakixi̱ya‑ni nga mì kì taxki̱ ki̱chja̱jno‑la̱ Nainá.
\c 2
\s Machjeén‑ní nga kítsaꞌbatjié xàngie̱é
\p
\v 1 Jè kjoa̱ ra isa̱ ꞌñó machjeén, ꞌkoa̱á ꞌsín tíbiné‑no nga titsaꞌbatjiò ngaꞌtsì xi̱ta̱, ti̱nákjoa̱ꞌta‑la Nainá, ti̱ꞌkoa̱ titsaꞌba‑te‑la, ko̱ꞌsín ꞌtin‑la jè Nainá nga tse kjo̱nda kataꞌse‑la̱ ra jè a̱ꞌta ꞌtse̱ ngaꞌtsì xi̱ta̱ ra tjín nga tjíjtsa i̱sàꞌnde.
\v 2 Machjeén‑ní nga kítsaꞌbatjié ra xi̱ta̱xá ítjòn títsa̱jna ko̱ ngaꞌtsì ra kjo̱téxoma tjíya tsja, mé‑ni nga ꞌnchán ki̱tsa̱jna‑né ti̱ꞌkoa̱á ta̱fi ta̱fi si̱jché ijo‑ná ti̱ꞌkoa̱á jcha̱xkén Nainá ko̱ jcha̱xkén kjoa̱ ra nda tjióo̱n.
\v 3 ꞌKia̱ nga ko̱ꞌsín ꞌsie̱én, ndaá tjín ko̱ ndaá sasén‑la̱ Nainá ra bachrjekatjì‑ná kjo̱hiꞌin.
\v 4 Nainá, jè ra mejèn‑la̱ nga ngaꞌtsì xi̱ta̱ ki̱tjokajin kjo̱hiꞌin ti̱ꞌkoa̱ si̱jin‑la̱ kóꞌsín tjín ra ngi kjo̱hixi̱.
\v 5 Jngoó‑ni ra Nainá; ti̱ꞌkoa̱á ta jngoó ma‑ni xi̱ta̱ ra chja̱tjì‑ná a̱ꞌta ꞌtse̱ Nainá, jè xi̱ta̱ ra Jesucristo ꞌmì.
\v 6 ꞌKia̱ nga ijchò ni̱chjin nga ko̱ꞌsín tjínda‑la̱ Nainá, Jesucristo kitsjà kjo̱tjó ijo‑la̱ nga ꞌken mé‑ni nga kjóchjítjì‑ni ngaꞌtsì xi̱ta̱. ꞌKoa̱á ꞌsín kiꞌsìn Nainá mé‑ni nga kjomà kijtse‑ni ngaꞌtsì xi̱ta̱.
\v 7 ꞌA̱án kjonga̱tsja jè xá ra̱kìi̱ nga ꞌa̱n tsikíxáya‑na Cristo, nga kichjàya ꞌén nda‑la̱ ti̱ꞌkoa̱ kokon‑yá‑la̱ jñà ra mì tsa xi̱ta̱ judío nga ko̱kjiín‑la̱ a̱ꞌta ꞌtse̱ Cristo ti̱ꞌkoa̱ ske̱ ra kjo̱hixi̱. ꞌÉn kixi̱í ra tíxin‑la, mì tsa ꞌén ndiso‑jìn.
\s Kóꞌsín tjínè‑la̱ nga ꞌsi̱in ra xi̱ta̱ ꞌxi̱n ko̱ íchjín
\p
\v 8 A̱ꞌta ꞌtse̱ xi̱ta̱ ꞌxi̱n, jé ra mejèn‑na ꞌkia̱ nga ki̱chja̱ꞌta‑la̱ Nainá ta ñánda̱ i̱ꞌnde títsa̱jna, tsje katasíkítsa̱jna inìma̱‑la̱ ꞌkia̱ nga ski̱ímítje̱n‑la̱ tsja Nainá. Kì kjo̱jti tjín‑jìn inìma̱‑la̱ ko̱ kì i̱nchikjaán‑kjo‑jìn.
\v 9 Ti̱ꞌkoa̱ jñà íchjín, jñà nikje ra nda bakèn‑la̱ katjaya. Chi chiba kátínda ijo‑la̱ mé‑ni nga mì xi̱ta̱ ꞌcho sko̱òtsíjen‑jnó‑ni. Kì jñà nikje ra ꞌñó chjí‑la̱ faya. Kì taxki̱ bíꞌta sko̱ ko̱ ya̱ ijo‑la̱ tsajmì ra ꞌñó chjí koni ki̱cha̱ oro ko̱ perla.
\v 10 Tà isa̱á jñá kataꞌsín xá ra nda tjín koni ꞌsín bakèn‑la̱ jñà íchjín ra bexkón Nainá.
\v 11 Jñà íchjín jyó katitsa̱jna ꞌkia̱ nga chitáꞌyá ꞌén‑la̱ Nainá; kataꞌnchréhijon‑la̱ jè ra bakón‑ya.
\v 12 ꞌA̱n, mì kì tsjaꞌndée̱ nga jñà íchjín ko̱tèxoma‑la̱ jñà ra xi̱ta̱ ꞌxi̱n ti̱ꞌkoa̱ nga jñà ko̱kòn‑ya‑la̱. Jñà íchjín, jyó katitsa̱jna.
\v 13 Tà nga̱tjì‑la̱ jè Nainá, ítjòn tsikínda Adán, ko̱ a̱skaán tsikínda Eva.
\v 14 Mì tsa jè Adán ra ichìndo̱cha̱‑la̱; jé chjo̱ón‑ní. ꞌKoa̱á ꞌsín kjomà‑ni nga isakò jé‑la̱.
\v 15 Tanga jñà íchjín, tsa si̱hitjasòn koni ꞌsín mejèn‑la̱ Nainá nga ꞌse̱‑la̱ i̱xti, ki̱tjokajiín kjo̱hiꞌin. Machjeén‑ní nga ngi nda tjín ikon nga ko̱kjiín‑la̱ a̱ꞌta ꞌtse̱ Cristo, ti̱ꞌkoa̱ ꞌse̱‑la̱ kjo̱tsjacha, ko̱ tsje kítsa̱hijyoko̱ Nainá nga nda si̱ìjchá ijo‑la̱.
\c 3
\s Kjoa̱ ra machjeén ꞌtse̱ xi̱ta̱ ra síkinda̱ na̱xi̱ndá‑la̱ Nainá
\p
\v 1 Jè ꞌén ra̱kìi̱, ngi ꞌén kixi̱‑ní: tsa tjín jngo xi̱ta̱ ra mejèn‑la̱ xá nga na̱xi̱ndá‑la̱ Nainá si̱ìkinda̱, ꞌñó nda tjín xá ra mejèn‑la̱.
\v 2 Jè xi̱ta̱ ra síkinda̱ na̱xi̱ndá‑la̱ Nainá machjeén‑ní nga nda ꞌsi̱in mé‑ni nga nì yá ra ꞌcho ki̱tso̱‑la̱. Jngoó chjo̱ón ꞌse̱‑la̱; jngo xi̱ta̱ ra inda tjín ikon; xi̱ta̱ ra nda kosòn‑la̱ ijo‑la̱; xi̱ta̱ ra ꞌyaxkón nga ndaá tísíjchá ijo‑la̱; ra ndaá sísin‑la̱ xi̱ta̱ ra bijchójkon niꞌya‑la̱; xi̱ta̱ ra nda ma‑la̱ bakón‑ya;
\v 3 ra mì tsa xi̱ta̱ ꞌchi̱; ra mì tsa xi̱ta̱ kjaán‑ko̱; ra mì tsa to̱n chijé matsjake. Jé machjeén xi̱ta̱ ra nda xi̱ta̱, ra mì kjo̱si sísin, ra mì tsa to̱n kájno‑la̱.
\v 4 Machjeén‑ní nga nda ko̱tèxoma ya̱ niꞌya‑la̱; ko̱ jñà i̱xti‑la̱ nda katasíkixi̱, mé‑ni nga si̱hitjasòn‑la̱ ko̱ nda ske̱xkón xi̱ta̱ xákjín.
\v 5 Tsa mì kì ma‑la̱ batéxoma niꞌya‑la̱, ¿kóꞌsín ka̱ma si̱ìkinda̱‑ni xi̱ta̱ na̱xi̱ndá‑la̱ Cristo?
\v 6 Jè xi̱ta̱ ra síkinda̱ na̱xi̱ndá‑la̱ Nainá jé machjeén ra ijye kjotseé kjokjiín‑la̱, mé‑ni nga mì ꞌnga ikon ko̱ma‑ni a̱skan‑nioo̱ nga mì kjo̱hiꞌin sa̱kò‑la̱ koni ꞌsín kjomàꞌtin jè xi̱ta̱‑ni̱í.
\v 7 Machjeén‑ní nga nda si̱ìjchá ijo‑la̱ mé‑ni nga ske̱xkón‑ni xi̱ta̱ ra mì kì makjiín‑la̱ a̱ꞌta ꞌtse̱ Cristo, nga mì ꞌcho kíjna, nga mì jè xi̱ta̱‑ni̱í si̱ìkijne‑la̱.
\s Kjoa̱ ra machjeén ꞌtse̱ xi̱ta̱ ra ko̱si̱ko̱ꞌta na̱xi̱ndá‑la̱ Nainá
\p
\v 8 ꞌKoa̱á ti̱ꞌsín tjín ꞌtse̱ xi̱ta̱ ra si̱hitjasòn xá nga ko̱si̱ko̱ꞌta xi̱ta̱ na̱xi̱ndá‑la̱ Nainá; jñá machjeén xi̱ta̱ ra ꞌyaxkón nga ndaá i̱nchisíjchá ijo‑la̱; mì kì ko̱ma si̱ìkaatjìya‑la̱ ꞌén ra ki̱chja̱. Mì kì ko̱ma xán ko̱hijtako̱; mì kì ko̱ma to̱n chijé ko̱tsjake.
\v 9 Machjeén‑ní nga nda katafìꞌta‑la̱ kjoa̱ ra tjíꞌma ra ijye tsakón Nainá koni ꞌsín makjiín‑ná ra a̱ꞌta ꞌtse̱ Cristo. Ti̱ꞌkoa̱ machjeén‑ní nga tsje katasíkítsa̱jna kjo̱bítsjen‑la̱.
\v 10 Jñà xi̱ta̱ ra si̱hitjasòn xá nga ko̱si̱ko̱ na̱xi̱ndá‑la̱ Nainá, ítjòn katachíꞌta tsa nìmé kjoa̱ tjín‑la̱, a̱kjòn ꞌkia̱á katasíhitjasòn.
\v 11 ꞌKoa̱á ti̱ꞌsín tjín ꞌtse̱ íchjín; jñá machjeén ra ꞌyaxkón nga ndaá i̱nchisíjchá ijo‑la̱; jñà ra mì ꞌén ndiso chja̱; jñà ra inda tjín ikon; jñà ra nda síhitjasòn ijye ta mé kjoa̱‑nioo̱.
\v 12 Jñà xi̱ta̱ ra si̱hitjasòn xá nga ko̱si̱ko̱ na̱xi̱ndá‑la̱ Nainá, machjeén‑ní nga tà jngoó chjo̱ón ꞌse̱‑la̱; nda katatéxoma‑la̱ i̱xti‑la̱ ko̱ xi̱ta̱ ra tjíhijyo ya̱ niꞌya‑la̱.
\v 13 Jñà xi̱ta̱ ra nda si̱hitjasòn xá kìi̱, isa̱á nda jcha̱xkón ko̱ isa̱á ꞌñó nda ꞌse̱ ikon koni ꞌsín makjiín‑la̱ a̱ꞌta ꞌtse̱ Cristo Jesús.
\s Kjoa̱ꞌma‑la̱ Nainá ra ijye tsakón
\p
\v 14 Mején‑na nga íjkon ndi̱to̱n‑la, tanga tsa kií ni̱chjin‑la̱ ki̱chjin‑na, ꞌkoa̱á ma‑ni nga tíbindá‑la xa̱jo̱n ra̱kìi̱,
\v 15 mé‑ni nga jcha̱‑ni kóꞌsín ki̱tsa̱jnake̱é xi̱ta̱ xàngie̱é ya̱ a̱jin na̱xi̱ndá‑la̱ Nainá ra tíjnakon. Jñà xi̱ta̱ na̱xi̱ndá‑la̱ Nainá, ya̱á tjíya tsja ꞌén kixi̱‑la̱ Nainá.
\v 16 Ngi ꞌén kixi̱‑ní nga ꞌñó jeya tíjna jè kjoa̱ ra tjíꞌma‑la̱ Nainá ra ijye tsakón koni ꞌsín nga ꞌyaxkén Nainá. Kií tsò:
\q Nainá, xi̱ta̱á kjomà nga ꞌji i̱ i̱sàꞌnde,
\q a̱ꞌta ꞌtse̱ Inìma̱ Tsje‑la̱ kijchaá‑la̱ nga tjín‑la̱ kjo̱hixi̱,
\q jñà ìkja̱li̱ kijtse‑ní;
\q ꞌén‑la̱, kiꞌsena̱jmíya‑la̱ ngaꞌtsì ra mì tsa xi̱ta̱ judío;
\q nga tjíjtsa i̱sàꞌnde kjokjiín‑la̱ xi̱ta̱ a̱ꞌta ꞌtse̱ Cristo;
\q jeyaá itjábétjò‑ni ján ngajmi.
\c 4
\s Xi̱ta̱ ra mì tsa ꞌén kixi̱ ko̱kòn‑ya
\p
\v 1 Tanga jè Inìma̱ Tsje‑la̱ Nainá ndaá ꞌbéna̱jmíya‑ná nga tsò: ꞌkia̱ nga tà chiba ni̱chjin chija‑isa nga kjꞌi̱í india‑ni Na̱ꞌín‑ná, ꞌse̱é xi̱ta̱ ra mì kì ti̱ ko̱kjiín‑la̱ a̱ꞌta ꞌtse̱ Cristo. Ya̱á ki̱ji̱ꞌta‑la̱ inìma̱ ꞌcho‑la̱ ni̱í ra konda̱cha̱ ko̱ kjo̱bítsjen‑la̱ ni̱í si̱hitjasòn‑la̱.
\v 2 Jñá kji̱ꞌnchré‑la̱ xi̱ta̱ ndiso ra jò i̱sén tjín‑la̱. Xi̱ta̱ kìi̱, nga ijye kjótájajín kjo̱bítsjen‑la̱, mì ti̱ kinda̱ fìko̱‑ni kjoa̱ꞌcho ra i̱nchiꞌsín.
\v 3 Jñà xi̱ta̱ kìi̱, mì kì tsjáꞌnde nga ki̱xan xi̱ta̱. Ti̱ꞌkoa̱á tjín tsajmì ra ma chine, ra mì kì tsjáꞌnde nga ko̱ma chji̱ne̱. Tanga tsajmì kìi̱, Nainá tsikínda nga tjínè‑la̱ nga ko̱ma ski̱ne̱ xi̱ta̱ ra makjiín‑la̱ ko̱ ra nda be kjo̱hixi̱. ꞌKia̱ nga ski̱ne̱, ki̱chja̱ꞌtá‑la̱ Nainá nga ki̱tso̱‑la̱: “Tse kjo̱nda kataꞌse‑li Na̱ꞌìn a̱ꞌta ꞌtse̱ tsajmì kìi̱.”
\v 4 Ngaꞌtsì tsajmì ra Nainá tsikínda, nda‑ní, mì kì ko̱ma ki̱náchrjengieé. Ko̱maá si̱chjeén ijyeé tsa ki̱nákjoa̱ꞌtá‑lá Nainá ꞌkia̱ nga si̱chjeén nga ꞌkín‑lá: “Tse kjo̱nda kataꞌse‑li Na̱ꞌìn.”
\v 5 Jè ꞌén‑la̱ Nainá sítsjeé tsajmì, ko̱ ti̱ꞌkoa̱á matsjeé‑te ꞌkia̱ nga nakjoáꞌta‑lá Nainá.
\s Jngo chi̱ꞌnda‑la̱ Cristo ra nda síxá
\p
\v 6 Ji̱, tsa ko̱ꞌsín ko̱kón‑ya‑la̱ jñà xi̱ta̱ xàngie̱é kjoa̱ kìi̱, ꞌñó nda si̱xáꞌta‑la̱ Cristo Jesús. ꞌÑó nda si̱jin‑isa‑li kjo̱bítsjen a̱ꞌta ꞌtse̱ ꞌén ra makjiín‑ná ko̱ kjo̱bítsjen ra nda tjín ra nda tjiꞌmìtji̱ngi‑la̱.
\p
\v 7 Tanga kì taxki̱ nisin‑la̱ ꞌén jchínga ꞌtse̱ i̱sàꞌnde ra nìmé chjí‑la̱ ra tà kjo̱bítsjen‑la̱ xi̱ta̱. Tinè‑la̱ ijo‑li nga jcha̱xkín Nainá.
\v 8 Tsa kínè‑lá ijo‑ná nga ꞌki̱‑lá ngaꞌñó, sa̱kó chiba‑la̱ kjo̱nda, tanga tsa kínè‑lá inìma̱‑ná nga nda jcha̱xkén Nainá, isa̱á sa̱kó‑ná kjo̱nda ra machjeén‑ná nga kiꞌta ni̱chjin. Sa̱kó‑ná kjo̱nda i̱ a̱ꞌta nangi ko̱ ján ngajmi.
\v 9 ꞌÉn kìi̱, ꞌén kixi̱‑ní. Machjeén‑ní nga katakjiín ijye‑la̱ xi̱ta̱.
\v 10 Kií ko̱ꞌsín biné‑ilá xá ijo‑ná, ti̱ꞌkoa̱ nìkjieén kjo̱hiꞌin, nga̱ jé i̱nchichiñá‑lá Nainá ra tíjnakon ra ma‑la̱ bachrjekàjin kjo̱hiꞌin ngaꞌtsì xi̱ta̱. Tanga tà jñá kjón ki̱tjokajin kjo̱hiꞌin jñà ra makjiín‑la̱ a̱ꞌta ꞌtse̱ Cristo.
\p
\v 11 Ko̱ꞌsín ta̱te̱xoma‑la̱ xi̱ta̱, ti̱ꞌkoa̱ ko̱ꞌsín ta̱kón‑ya‑la̱ ꞌén kìi̱.
\v 12 Kì yá ra bachrjengi‑li ni̱ꞌsín isa̱ iꞌndí ra ji̱. Ya̱ a̱jin‑la̱ xi̱ta̱ ra makjiín‑la̱ a̱ꞌta ꞌtse̱ Cristo, ji̱í nda ꞌtin ítjìn mé‑ni nga ski̱íngi‑li xi̱ta̱ kóꞌsín nakjí, kóꞌsín nga ꞌnì, kóꞌsín nga tsjacha ꞌyi Nainá ko̱ xi̱ta̱, [kóꞌsín nga nda tíjna inìma̱‑li], kóꞌsín nga makjiín‑li a̱ꞌta ꞌtse̱ Nainá, ko̱ kóꞌsín nga tsje tjiníjchí ijo‑li ya̱ ngixko̱n Nainá.
\v 13 Skanda ꞌkia̱ nga kijchòjkon‑la, ꞌkoa̱á ꞌsín ꞌti̱ìn: chjítáꞌyájin‑la̱ xi̱ta̱ ꞌén‑la̱ Nainá; ko̱ꞌsín tinè‑la̱ nga ꞌñó kataꞌbé‑la̱ ikon; ti̱ꞌkoa̱á ta̱kón‑ya‑la̱.
\v 14 Kì niìjchaàjin nga si̱xáꞌta‑la̱ Nainá a̱ꞌta ꞌtse̱ kjo̱tjò ra itjábé‑li ꞌkia̱ nga jñà xi̱ta̱ jchínga‑la̱ na̱xi̱ndá‑la̱ Nainá tsakásòn‑li tsja nga jñà kiìchja̱ ngajo‑la̱ Nainá a̱ꞌta tsa̱ji.
\p
\v 15 A̱ꞌta ꞌtse̱ kjoa̱ kìi̱, kjiꞌtá ni̱chjin chjítáꞌyáki̱i, ti̱ꞌkoa̱ ti̱xáki̱i mé‑ni nga ske̱‑ni xi̱ta̱ nga tímajchíngako̱‑ní kjoa̱ kìi̱.
\v 16 Nda ti̱kondi̱i ijo‑li mé ra ꞌnì. Ti̱ꞌkoa̱ ꞌti̱ìn kinda̱ jè ꞌén ra bakon‑ya‑la̱ xi̱ta̱. Kixi̱ ti̱jni. Tsa ko̱ꞌsín si̱hitjasìn, ngaji̱ kítjo̱kajin‑ní kjo̱hiꞌin; ti̱ꞌkoa̱á ki̱tjokajiín jñà xi̱ta̱ ra ꞌnchré‑li.
\c 5
\s Kjo̱nda ra machjeén a̱ꞌta ꞌtse̱ xi̱ta̱ ra kjꞌií
\p
\v 1 Jè ra ijye nàmi̱híꞌxtín, kì taxki̱ nikjaká‑la̱; ꞌkoa̱á ꞌsín ꞌtèna̱jmíya‑la̱ koni tsa na̱ꞌìn‑li ma; ti̱ꞌkoa̱ jñà ra isa̱ i̱xti, ꞌkoa̱á ꞌsín ꞌtèna̱jmíya‑la̱ koni tsa i̱xti ꞌndsì ma.
\v 2 Jñà ndí íchjín ra ijye na̱híꞌxtín, ꞌkoa̱á ꞌsín ꞌtèna̱jmíya‑la̱ koni tsa na̱‑li ma. Jñà ra i̱xti íchjín‑isa, ꞌkoa̱á ꞌsín ꞌtèna̱jmíya‑te‑la̱ koni tsa tichji ma, ko̱ ngi tsje katijna kjo̱bítsjen‑li.
\p
\v 3 Ti̱si̱ko̱o jñà íchjín ra ijye ꞌken ꞌxi̱n‑la̱, tsa ngi kixi̱ kjoa̱ nga tsìn yá ra basìko̱ꞌta.
\v 4 Tsa tjín íchjín ra ijye ꞌken ꞌxi̱n‑la̱ ra tjín‑la̱ i̱xti, ko̱ tsa i̱xti‑ndi̱í, jñà i̱xti kìi̱, ítjòn katasíhitjasòn ya̱ niꞌya‑la̱ kóꞌsín nga bexkón Nainá. Katasiko̱ xi̱ta̱ xákjén, mé‑ni nga tsjá ngajo‑ila̱ kjo̱tsjacha xi̱ta̱ jchínga‑la̱. Kjoa̱ kìi̱, ndaá tjín. ꞌKoa̱á ꞌsín sasén‑la̱ Nainá.
\v 5 Jè chjo̱ón ra ijye ꞌken ꞌxi̱n‑la̱ ra kixi̱ kjoa̱ nga tíjna ta̱jngo, jé Nainá ꞌñó báꞌta ikon ko̱ ni̱chjin ko̱ ni̱tje̱n bítsaꞌba nga chja̱ꞌta‑la̱ Nainá.
\v 6 Tanga jè chjo̱ón ra ijye ꞌken ꞌxi̱n‑la̱ ra kjo̱tsja ꞌtse̱ i̱sàꞌnde ra ꞌcho tjín tsjá‑la̱ ijo‑la̱, miꞌken‑ní a̱ꞌta ꞌtse̱ Nainá ni̱ꞌsín tíjnakon‑ni ijo‑la̱.
\v 7 ꞌKoa̱á ꞌsín ta̱kón‑ya ijye‑la̱ kjoa̱ kìi̱, mé‑ni nga nda si̱ìjchá‑ni ijo‑la̱ nga mì yá ra ꞌcho ki̱tso̱‑la̱.
\v 8 Tsa yá ra mì kì síkinda̱ xi̱ta̱ xákjén nga ko̱si̱ko̱, maꞌtsia̱ ítjòn‑ni jñà ra ya̱ títsa̱jnako̱ niꞌya‑la̱, tsa mì ko̱ꞌsín ko̱si̱ko̱ xákjén, mì kì i̱nchisíhitjasòn ꞌén ra makjiín‑la̱ a̱ꞌta ꞌtse̱ Cristo. Isa̱á ꞌcho i̱nchisíkítsa̱jna‑ni ijo‑la̱ nda mí ꞌkoa̱‑ni koni jñà xi̱ta̱ ra mì kì makjiín‑la̱ ꞌén‑la̱ Nainá.
\p
\v 9 Íchjín ra ijye ꞌken ꞌxi̱n‑la̱ ra si̱ꞌta xa̱jo̱n nga ko̱ma ki̱si̱ko̱, tà jñá‑ní ra tsato jàn‑kan nó tjín‑la̱ ra ngi kixi̱ tsikitsa̱jnako̱ ꞌxi̱n‑la̱.
\v 10 Jñà ra ꞌya‑la̱ nga nda isíjchá ijo‑la̱ ꞌtse̱ xá ra nda tjín; tsa ndaá isíjchá i̱xti‑la̱, tsa ndaá isìsin‑la̱ xi̱ta̱ ra ijchòjkon niꞌya‑la̱, tsa tsiníjnoó ndsa̱ko̱ xi̱ta̱‑la̱ Cristo nga nda isìsin‑la̱, tsa tsasìko̱ó xi̱ta̱ ra kjoa̱ tjín‑la̱. Tsa ko̱ꞌsín isìhitjasòn ngaꞌtsì xá ra nda tjín ko̱ma si̱ꞌta xa̱jo̱n.
\p
\v 11 Tanga jñà íchjín ra ijye ꞌken ꞌxi̱n‑la̱ ra ꞌsa̱ i̱xti‑isa mì kì ko̱ma xa̱jo̱n si̱ꞌta. ꞌKia̱ nga ꞌxi̱n kjoa̱hajin‑la̱, mì tsa iꞌin ko̱ma‑la̱ nga ki̱nchaꞌtaxìn‑la̱ Cristo nga ki̱xan ìjngo ꞌká‑ni.
\v 12 Tsa ko̱ꞌsín ꞌsi̱in, kjo̱hiꞌiín sa̱kò‑la̱ nga mì kì i̱nchisíhitjasòn koni ꞌsín kitsjà tsaꞌba nga ti̱ꞌsa̱ ítjòn.
\v 13 Íchjín kìi̱, ti̱ꞌkoa̱á mangaá‑la̱ nga jndíi̱ ra ján minchimajto niꞌya. Maꞌtsè‑ní, mì tsa tà maꞌtsè. Ti̱ꞌkoa̱á ꞌén ndiso bíxkó. Fajin faꞌa kjoa̱ ra mì ya̱ bako̱‑la̱ ko̱ taxki̱ chja̱á ꞌén ra mì kì bakèn‑la̱.
\v 14 ꞌA̱n, ꞌkoa̱á ꞌsín mejèn‑na nga katixan‑ni jñà íchjín ra ijye ꞌken ꞌxi̱n‑la̱ ra ꞌsa̱ i̱xti‑isa. Kataꞌse‑la̱ i̱xti. Nda katatéxoma ya̱ niꞌya‑la̱ mé‑ni nga mì ꞌcho ki̱tso̱‑ni ra kondra̱ fì‑ná.
\v 15 Tjín iꞌka ra ijye tsáfaya‑la̱, ya̱á kiìtji̱ngi ìjngo ꞌká‑ila̱ xi̱ta̱‑ni̱í.
\p
\v 16 Tsa jngo xi̱ta̱ ra makjiín‑la̱ ꞌén‑la̱ Nainá tsa tjín íchjín xákjén ra ijye ꞌken ꞌxi̱n‑la̱, machjeén‑ní nga katasiko̱ xákjén mé‑ni nga mì jè na̱xi̱ndá‑la̱ Cristo ꞌñó ska̱nè‑ila̱ xá. Jè na̱xi̱ndá‑la̱ Cristo ka̱ma ko̱si̱ko̱ jè chjo̱ón ra ijye ꞌken ꞌxi̱n‑la̱ ra ngi kixi̱ kjoa̱ nga iꞌin tíjna.
\p
\v 17 Jñà xi̱ta̱ jchínga ra nda batéxoma ya̱ na̱xi̱ndá‑la̱ Nainá, bakèn‑la̱ nga nda jcha̱xkón ko̱ ti̱ꞌkoa̱ ki̱si̱ko̱ꞌta mé ra machjeén‑la̱, maꞌtsia̱ko̱ kjòn‑ni jñà ra síxá nga chja̱ya ko̱ nga bakón‑ya ꞌén‑la̱ Nainá.
\v 18 Xa̱jo̱n ra tjíꞌta ꞌÉn‑la̱ Nainá, ꞌkoa̱á ꞌsín tíchja̱ nga tsò: “Jè nchra̱ja̱ ra síxá, kì na̱ꞌya bìꞌa tsaꞌba.” Ti̱ꞌkoa̱á tjíꞌta‑te ra tsò: “Jè xi̱ta̱ ra síxá, machjeén‑ní nga katachjí‑la̱.”
\p
\v 19 Kì tà chjàn nisin‑la̱ tsa yá ra bángi xi̱ta̱ jchínga ra batéxoma ꞌtse̱ na̱xi̱ndá‑la̱ Nainá, tsa mì jò jàn ma‑ni xi̱ta̱ ra kijtse kjòn‑ni xko̱n kjoa̱ ra kjomà.
\p
\v 20 Tanga jñà ra bátsji-jé‑isa, ti̱kjaká‑la̱ ya̱ ngixko̱n ngaꞌtsì xi̱ta̱ na̱xi̱ndá‑la̱ Nainá, mé‑ni jñà xi̱ta̱ ra iꞌka, ꞌkoa̱á ꞌsín jtsa̱kjòn‑nì.
\p
\v 21 ꞌKoa̱á ꞌsín tíbiné‑la ya̱ ngixko̱n Nainá ko̱ Jesucristo ra tíjna ítjòn‑ná ko̱ ìkja̱li̱‑la̱ ra xá tsjahíjin‑ni, nda ti̱hitjasìn kjoa̱ kìi̱. Kì ni̱mé kjoa̱ ra bindajín ꞌkia̱ nga ti̱kjè ꞌya‑la̱ a kixi̱í kjoa̱. Kì tà iꞌka xi̱ta̱ chjaájin nga nda kíndajín‑la̱. Ngásòn nda tindajín ijye‑la̱.
\v 22 Kì yá xi̱ta̱ ra taxki̱ chjaájin nga kjósòn‑la̱ ndsi̱i ꞌkia̱ nga ꞌki̱‑la̱ xá ya̱ a̱jin na̱xi̱ndá‑la̱ Nainá; nda ti̱kítsjen ítjìn mé‑ni nga mì ji̱ ko̱ko̱ꞌta‑li jé‑la̱ xi̱ta̱ ra kjꞌií. Tsje ti̱jni ra ji̱.
\p
\v 23 Nga ko̱ꞌsín ta ꞌchin tjín kiꞌta‑la̱ i̱ndsi̱ꞌbì, kì tà nandá ꞌyì, ti̱ꞌkoa̱á ꞌtio̱ chibi nandá xán ꞌtse̱ uva.
\p
\v 24 Tjín iꞌka xi̱ta̱ ra ti̱ꞌkia̱ ꞌya‑la̱ jé‑la̱ ꞌkia̱ nga ti̱kjè sindajín‑ni. Tanga ti̱ꞌkoa̱á tjín iꞌka ra a̱skan ꞌya‑la̱.
\v 25 ꞌKoa̱á ti̱ꞌsín tjín xá ra nda tjióo̱n, tjín ra ndi̱to̱ón ꞌya‑la̱. Ti̱ꞌkoa̱á tjín xá ra nda tjióo̱n ra mì tsa ndi̱to̱n ꞌya‑la̱ tanga mì kì ka̱ma si̱jnaꞌma kiꞌta. Takó jcha̱á‑la̱ a̱skan‑nioo̱.
\c 6
\p
\v 1 Ngaꞌtsì xi̱ta̱ na̱xi̱ndá‑la̱ Nainá ra chi̱ꞌnda títsa̱jnaꞌñó, nda katabexkón ni‑la̱ mé‑ni nga mì yá ra ꞌcho ki̱chja̱jno‑la̱ Nainá ko̱ jè ꞌén ra bakon‑yeé a̱ꞌta ꞌtse̱ Cristo.
\v 2 Jñà xi̱ta̱ chi̱ꞌnda ra makjiín‑la̱ ni‑la̱ a̱ꞌta ꞌtse̱ Cristo, machjeén‑ní nga ti̱ꞌkoa̱ nda katabexkón‑te ni‑la̱, nga̱ ꞌndse̱é jo̱ó a̱ꞌta ꞌtse̱ Cristo. Ndaá katasíxá‑la̱, nga̱ ngásòn makjiín‑la̱ ꞌén‑la̱ Nainá ti̱ꞌkoa̱á tjín‑la̱ kjo̱tsjacha nga ꞌndse̱ jo̱ó.
\p Jñà ꞌén kìi̱, ta̱kón‑yi ti̱ꞌkoa̱ ti̱kaꞌbísìn.
\s Ra ngi kjoa̱nchi̱ná kjo̱hixi̱
\p
\v 3 Tsa tjín xi̱ta̱ ra kjꞌií tsò ꞌén ra bakón‑ya, nga mì tjíjngo ikon koni ꞌsín tsò ꞌén nda‑la̱ Jesucristo ra tíjna ítjòn‑ná, ti̱ꞌkoa̱ mì kì tjíjngo ikon a̱ꞌta ꞌtse̱ kjo̱téxoma nga ꞌyaxkén Nainá.
\v 4 Xi̱ta̱ kìi̱, xi̱ta̱ ꞌngatakón‑ní, nìmé machi̱ya‑la̱. ꞌÑó tsjake nga bátiya‑ni ꞌén ra nìmé chjí‑la̱. Ya̱á nchrabá‑ni nga maxitakòn‑cheé xàngie̱é, nga bixkàn‑kjeé, nga nakjoájno‑lá xàngie̱é ꞌén ra ꞌcho tsò, ti̱ꞌkoa̱ ꞌcho níkítsjeén a̱ꞌta ꞌtse̱ xi̱ta̱ ra kjꞌií.
\v 5 Ti̱ꞌkoa̱á ya̱á nchrabá‑ni nga kjiꞌtá ni̱chjin nga i̱nchikjaán‑kjo jñà xi̱ta̱ ra mì kì kixi̱ síchjeén kjo̱bítsjen‑la̱ ko̱ mì kì tsa nda fìꞌta‑la̱ ra kjo̱hixi̱. ꞌKoa̱á ꞌsín síkítsjen, tsò‑ní: tsa nda jcha̱xkén Nainá, ya̱á sa̱kó‑ná to̱n. Ra ji̱, kì ꞌkoa̱á tjín kjoa̱ ra níkítsjin.
\v 6 Kixi̱í kjoa̱, tseé kjo̱nda sakó‑la̱ xi̱ta̱ ꞌkia̱ nga bexkón Nainá, tsa ꞌkia̱ nga tsja tjín‑la̱ inìma̱‑la̱ mé ra tjín‑la̱.
\v 7 Nga̱ ni̱mé ra kiꞌché ꞌkia̱ nga kitsieén i̱ i̱sàꞌnde. Ti̱ꞌkoa̱á ni̱mé ra ko̱híke̱é ꞌkia̱ nga ki̱yé.
\v 8 Tsa tjín‑ná tsajmì ra chineé ko̱ tsa tjín‑ná nikje ra tsjayeé, machjeén‑ní nga tsja ꞌse̱‑ná ko̱ kíjngo‑lá takén.
\v 9 Tanga jñà xi̱ta̱ ra kjoa̱nchi̱ná mejèn‑la̱, nda mí be‑ni, ya̱á síkijne‑la̱ kjoa̱ ra ꞌcho tjín, koni tsa ꞌkia̱ jngo cho̱ kangi chi̱n. Jñà ꞌñó ma mejèn‑la̱ kjoa̱ ra ni̱mé chjí‑la̱ ra ꞌcho síko̱‑ná. Tanga jñà kjoa̱ kìi̱ síkitsón ko̱ síjchijaá xi̱ta̱.
\v 10 ꞌKia̱ nga to̱n matsjacheé, ya̱á maꞌtsia̱‑ni kjoa̱ ꞌtse̱ jé ko̱ ngaꞌtsì kjoa̱ ra ꞌcho tjióo̱n. Tjín iꞌka xi̱ta̱ ra tà nga̱tjì‑la̱ tse to̱n mejèn‑la̱ ꞌse̱‑la̱, ijyeé tsinchaꞌtaxìn‑la̱ kjoa̱ ra makjiín‑ná a̱ꞌta ꞌtse̱ Cristo. ꞌKoa̱á ꞌsín ma‑ni nga ti̱jñà ꞌñó i̱nchitsjá‑ila̱ kjo̱hiꞌin ijo‑la̱.
\s Tinè‑la̱ ijo‑li kjoa̱ ra makjiín‑li
\p
\v 11 Tanga ngaji̱ ra xi̱ta̱‑la̱ Nainá ꞌmì‑li, ti̱se̱nꞌtaxìn‑la̱ ngaꞌtsì kjoa̱ kìi̱. Jè ꞌtin‑tji̱ngi‑la̱ ra kjo̱hixi̱. Jcha̱xkín Nainá. Nda katakjiín‑li a̱ꞌta ꞌtse̱ Cristo. Kataꞌse‑li kjo̱tsjacha. Tsejta katama inìma̱‑li nga ma‑li jchíñakji̱i, ko̱ indakjoa̱ ti̱kíjni inìma̱‑li.
\v 12 Nda ti̱xkan‑tjì kjoa̱ ra makjiín‑ná a̱ꞌta ꞌtse̱ Cristo. Kì nìkíjna‑jìn ndi̱yá kixi̱ ꞌtse̱ kjo̱binachon ra mì feheꞌta ni̱ta kjiá‑nioo̱. Nga̱ kií xá kiìchja̱‑li Nainá. Ngaji̱ ijyeé ko̱ꞌsín nda kiꞌtsì ndsa̱ꞌbì ꞌkia̱ nga inìkixi̱yi ꞌén ra makjiín‑li a̱ꞌta ꞌtse̱ Cristo ya̱ ngixko̱n xi̱ta̱ ra kjìn ma‑ni nga kiíꞌnchré.
\v 13 ꞌNdi̱ ꞌndi̱, jngo xá tíbiné‑la ya̱ ngixko̱n Nainá ra síkítsa̱jnakon ijye ni̱ta mé ra tjín, ti̱ꞌkoa̱ ya̱ ngixko̱n Jesucristo ra nda kitsjà tsaꞌba nga isìkixi̱ya ꞌén nda‑la̱ ꞌkia̱ nga kiìchja̱ ya̱ ngixko̱n Poncio Pilato.
\v 14 ꞌKoa̱á ꞌsín tíbatexóma‑la, nda ti̱hitjasìn kjo̱téxoma kìi̱; kì ni̱mé nikaatjìya‑la̱ mé‑ni nga mì ko̱chrjengi‑li xi̱ta̱ skanda ꞌkia̱ nga kjꞌi̱í india‑ni Jesucristo ra tíjna ítjòn‑ná.
\v 15 ꞌKia̱ nga ki̱jchò ni̱chjin‑la̱, jè Nainá, ꞌkoa̱á ꞌsín si̱hitjasòn ijye kjoa̱ kìi̱. Nga̱ ta jè ta̱jngoó‑ni ra ꞌñó tíbatéxoma ko̱ nga tse kjo̱nda tíjnajin ra jè. Jé tíjna ítjòn‑la̱ jñà ra xi̱ta̱xá ítjòn títsa̱jna, ti̱ꞌkoa̱ tíjna ítjòn‑la̱ jñà ra xi̱ta̱ ítjòn títsa̱jna.
\v 16 Ta̱jngoó Nainá ra xá ko̱ꞌsín tíjna‑ni nga mì kì biya. Ya̱á tíjnajin kjoa̱hisen ñánda̱ nga mì yá ra ko̱ma ki̱jchò kaꞌta‑la̱. Ni̱ kjè sa jngo xi̱ta̱ be, ni̱ mì kì tjíꞌnde‑la̱ nga ske̱. Nainá, kjiꞌtá ni̱chjin jeya katijna. Kataꞌyaxkón kjo̱téxoma‑la̱ ni̱ta kjiá‑nioo̱. Ko̱ꞌsín katama.
\p
\v 17 Jñà xi̱ta̱ nchi̱ná ra tjín i̱ i̱sàꞌnde, ꞌkoa̱á ꞌsín ꞌñó tìꞌtin: kì báꞌnga‑la̱ ikon. Kì ya̱ maꞌñóꞌta ikon kjoa̱nchi̱ná ra tjín‑la̱ ra tà ndi̱to̱n feheꞌta. Jè katamaꞌñóꞌta ikon Nainá ra tíjnakon, nga̱ jé tsjá ijye‑ná ra machjeén‑ná, skanda síkatoné‑la̱ mé‑ni nga ko̱ kjo̱tsja‑ná si̱chjeén tsajmì ra tsjá‑ná.
\v 18 Ko̱ꞌtìn‑la̱, kjo̱nda kataꞌsín. Kataꞌse‑la̱ kjoa̱nchi̱ná ya̱ ngixko̱n Nainá a̱ꞌta ꞌtse̱ kjo̱nda ra ꞌsi̱in. Kì kjo̱xkon fíꞌká, ngi ko̱ó inìma̱‑la̱ katatsjá i̱tsé‑la̱ xákjién mé ra tjín‑la̱.
\v 19 Tsa ko̱ꞌsín si̱hitjasòn ni̱chjin ꞌndi̱ ꞌndi̱, ꞌse̱é‑la̱ kjoa̱nchi̱ná ra mì kì feheꞌta ꞌkia̱ nga ijye títsa̱jna ya̱ ngixko̱n Nainá. Ti̱ꞌkoa̱á tjábé‑la̱ kjo̱nda ra ngi ꞌtse̱ kjo̱binachon.
\s Ti̱hitjasìn xá ra Nainá kitsjà‑li
\p
\v 20 Ngaji̱ Timoteo, nda ti̱hitjasìn ꞌén nda‑la̱ Nainá ra ji̱ kjonga̱tsji. Kì jñà naꞌyá‑la̱ ꞌén ndiso ra nìmé chjí‑la̱, ko̱ kì jñà nisin‑la̱ kjoa̱ ra chitiya‑ná ꞌtse̱ kjo̱chji̱ne̱ ra ꞌén ndiso.
\v 21 Tjín iꞌka xi̱ta̱ ra ko̱tjín kjo̱bítsjen fìtji̱ngi‑la̱. ꞌKoa̱á ma‑ni minchaꞌtaxìn‑la̱ kjoa̱ ra makjiín‑ná a̱ꞌta ꞌtse̱ Cristo.
\p Nainá katasíchikonꞌtin‑li. Ko̱ꞌsín katama.