\id 1TI
\h 1 Timoteo
\toc1 1 Timoteo
\mt Xo̱jo̱n carta‑la̱ San Pablo xi kiskiì ítjòn‑la̱ jè Timoteo
\c 1
\s Kó tsò Pablo nga síhixatꞌaà Timoteo
\p
\v 1 ꞌA̱n, Pablo, tìkjiì‑lè xo̱jo̱n jè, nga ꞌa̱n tsibíxáya‑na Jesucristo, nga kꞌoa̱sꞌín kitsjaà o̱kixi̱ Nainá xi ochrjekàjiìn‑ná kjo̱ꞌin ko̱ Na̱ꞌèn‑ná Jesucristo nga titsa̱chiñá‑lá kjo̱ndaà‑la̱.
\v 2 Ngaji̱ Timoteo, koni tsà kiꞌndí tsꞌa̱n xan‑lè nga ꞌa̱n tsakoòyandaà‑lè koni sꞌín mokjeiín‑ná i̱tꞌaà tsꞌe̱ Cristo. Nainá xi Na̱ꞌèn‑ná ko̱ Na̱ꞌèn‑ná Jesucristo kàtatsjá‑lè kjo̱ndaà, kàtahi̱ma̱keè‑lè, kàtasꞌe‑la̱ kjoa̱ꞌnchán i̱jiìn ini̱ma̱‑lè.
\s Pablo tsibínè‑la̱ Timoteo nga si̱ìkixi̱ya xi̱ta̱ xi kjꞌei̱í kjo̱hítsjeèn okóya
\p
\v 3 Koni sꞌín tsibìtsiꞌba‑lè kꞌe̱ nga kiaà nangui Macedonia, ya̱á ti̱jni na̱xa̱ndá Éfeso mé‑ne nga ki̱chakjáya‑la̱ xi̱ta̱ xi mìtsà ꞌén kixi̱ nchihokóya i̱jiìn na̱xa̱ndá‑la̱ Nainá.
\v 4 Ngaji̱ Timoteo, kꞌoa̱á sꞌín tjínè‑la̱ jñà xi̱ta̱ koi, kì kiì sísꞌin‑la̱ cuento jchínga xi mìtsà kixi̱ kjoa̱ ti̱koa̱ kì kiì sísꞌin‑la̱ kjoa̱ xi mìkiì fehetꞌaà tsꞌe̱ xi̱ta̱ jchínga kjòtseé. Kjoa̱ koi ni̱mé chjí‑la̱. Tà síkjaán‑kjoò‑ná. Mì kì osìko̱‑ná nga mokjeiín‑ná i̱tꞌaà tsꞌe̱ Cristo mé‑ne nga ko̱ma si̱kitasoán koni sꞌín mejèn‑la̱ Nainá.
\p
\v 5 Xá xi tìbìnè‑lè, jè‑né nga tsjeè tíjna ini̱ma̱‑ná, nga tsjeè tjín kjo̱hítsjeèn‑ná koa̱ nga nguì ndaà mokjeiín‑ná; ya̱á nchrobátꞌaà‑ne nga si̱tjòchaà xinguia̱á.
\v 6 Ta̱nga tjín iꞌnga xi̱ta̱ xi xìn ndi̱yá tjímaya; tà koií joóya‑ne ꞌén xi ni̱mé chjí‑la̱.
\v 7 Mejèn‑la̱ maestro tsꞌe̱ kjo̱tíxoma‑la̱ Nainá kítsa̱jna. Ta̱nga ti̱jñà‑ne, skanda mìkiì machi̱ya‑la̱ ꞌén xi chja̱ nga ꞌñó chja̱ nga tsò nga kixi̱ kjoa̱.
\p
\v 8 Tíjiìn‑ná nga jè kjo̱tíxoma xi kitsjaà Nainá, ndaà tjín tsà kꞌoa̱sꞌín ko̱chjeén koni sꞌín mejèn‑la̱ Nainá.
\v 9 ꞌYa‑ná, kjo̱tíxoma‑la̱ Nainá, mìtsà tsꞌe̱ jñà xi̱ta̱ xi ndaà sꞌín. Tsꞌe̱‑né jñà xi̱ta̱ xi mìkiì ꞌnchréñijon koa̱ mìkiì síkitasòn; tsꞌe̱‑né xi̱ta̱ xi mìkiì beèxkón Nainá koa̱ ótsji jé; tsꞌe̱‑né xi̱ta̱ xi mì tsjeè tjín kjo̱hítsjeèn‑la̱ xi tjé beèhikon jè kjoa̱tsjeè‑la̱ Nainá; tsꞌe̱‑né xi̱ta̱ xi síkꞌen na̱ꞌèn‑la̱ ko̱ nea̱‑la̱, ko̱ ngatsꞌiì xi̱ta̱ xi xi̱ta̱ síkꞌen.
\v 10 Ti̱koa̱ tsꞌe̱‑né jñà xi̱ta̱ xi kjoa̱ chijnguií sꞌín, jñà xi xi̱ta̱ xaꞌnda, xi̱ta̱ xi xíkjín fìko̱ chijé nga otíjna. Ti̱koa̱ tsꞌe̱‑né jñà xi̱ta̱ ndiso ko̱ xi̱ta̱ xi mìtsà ꞌén kixi̱ chja̱, jñà xi̱ta̱ xi chꞌo tjín kjoa̱ xi sꞌín xi kondra̱ tsꞌe̱ kjo̱hítsjeèn xi kixi̱ tjín.
\v 11 Jè kjo̱hítsjeèn kixi̱, kꞌoa̱á tjín xi okóya jñà ꞌén jeya‑la̱ Nainá xi kjoa̱ tsꞌe̱ Cristo. Nainá xi ꞌñó jeya tíjna, jè kisìnga̱tsja‑na nga ꞌa̱n kichjàya ꞌén koi.
\s Mé kjoa̱‑ne nga kitsjaà‑la̱ kjo̱ndaà Nainá jè Pablo
\p
\v 12 Tsjaà‑la̱ kjo̱ndaà Na̱ꞌèn‑ná Jesucristo. Ndaà chjí‑la̱ nga kitsjaà‑na ngaꞌñó ti̱koa̱ ndaà kijtseè ikon‑na nga ꞌa̱n kisìnga̱tsja‑na xá‑la̱,
\v 13 na̱sꞌín kꞌe̱ nga sa̱ ítjòn, ꞌñó chꞌo kisꞌiaàn; kichjàjno‑la̱ Nainá; kondra̱ kiìtji̱ngui‑la̱; toòn kijtseè xi̱ta̱‑la̱. Ta̱nga kjòhi̱ma̱keè‑na Nainá, nga kjꞌeè kiì be, koa̱ kjꞌeè kiì mokjeiín‑na i̱tꞌaà tsꞌe̱ Cristo.
\v 14 Ta̱nga jè kjo̱tjò‑la̱ Na̱ꞌèn‑ná ìsa̱á ꞌñó tse kitsjaà‑na ti̱koa̱ kisìhiseèn‑na nga mokjeiín‑na ko̱ kitsjaà‑na kjoa̱tjòcha‑la̱ nga jè Cristo tìjna̱koa̱a.
\p
\v 15 Jñà ꞌén koi, nguì ꞌén kixi̱‑né. Mochjeén‑né nga ko̱kjeiín yije‑la̱ xi̱ta̱ nga jè Jesucristo jꞌiì i̱ i̱sòꞌnde nga ko̱chrjekàjiìn kjo̱ꞌin ngatsꞌiì xi̱ta̱ xi jé tjín‑la̱. Ngatsꞌiì xi̱ta̱ xi chꞌo sꞌín, ꞌa̱án tìjna̱ ítjoàn nga tsohotsjià jé.
\v 16 Na̱sꞌín ꞌñó chꞌo kisꞌiaàn, Nainá kisꞌe‑la̱ kjo̱hi̱ma̱takòn i̱tꞌaà tsꞌa̱n. Jñà xi̱ta̱, kꞌe̱ nga skoe̱ kó sꞌín kisìko̱‑na Na̱ꞌèn‑ná Jesucristo, nga ꞌñó tjín‑la̱ kjoa̱tsetakòn, ti̱koa̱á ko̱kjeiín‑la̱ i̱tꞌaà tsꞌe̱ Cristo nga sꞌe̱‑la̱ kjoa̱binachon ni̱ta̱ mé na̱chrjein‑ne.
\v 17 Nainá, ꞌnga kàtìjna, kàtasꞌe‑la̱ kjoa̱jeya ni̱ta̱ mé nó, ni̱ta̱ mé na̱chrjein‑ne nga jè otíxoma ni̱ta̱ mé na̱chrjein‑ne koa̱ mìkiì kjoe̱hetꞌaà na̱chrjein‑la̱ ni̱ta̱ kjé‑ne, ti̱koa̱ mìkiì tsejèn ñánda tíjna koa̱ nguì jè ta̱jngoò xi Nainá. Kꞌoa̱sꞌín kàtama.
\p
\v 18 Ngaji̱ Timoteo koni tsà kiꞌndí‑na̱ xan‑lè, sìnga̱tsja‑lè ꞌén koi, koni sꞌín kitsò xi̱ta̱ xi kisìkjeén Nainá nga kiìchja̱ i̱tꞌaà tsi̱ji, mé‑ne nga i̱tꞌaà tsꞌe̱ ꞌén koi, tsjá‑lè ngaꞌñó nga ndaà si̱xá‑la̱ Nainá koni sꞌín síxá soldado.
\v 19 Ndaà kàtakjeiín‑lè i̱tꞌaà tsꞌe̱ Cristo, ti̱koa̱ ndaà kàtìjna kjo̱hítsjeèn‑lè. Tjín iꞌnga xi̱ta̱ xi mìkiì kisìsꞌin kjo̱hítsjeèn xi ndaà tjín. Kꞌoa̱á komà‑ne nga kisìkje‑la̱ ikon nga mì ti̱ kiì kòkjeiín‑la̱.
\v 20 Kꞌoa̱á sꞌín komàtꞌin jè Himeneo ko̱ Alejandro xi ꞌa̱n kisìkítsa̱jnakoa̱a xi̱ta̱ nei̱í mé‑ne nga kàtakixi̱ya‑ne nga mì ta̱xki̱ ki̱chja̱jno‑la̱ Nainá.
\c 2
\s Mochjeén‑né nga kítsiꞌbatjiá xinguia̱á
\p
\v 1 Jè kjoa̱ xi ìsa̱ ꞌñó mochjeén, kꞌoa̱á sꞌín tìbìnè‑nò nga titsiꞌbatjiò ngatsꞌiì xi̱ta̱, ti̱nókjoa̱tꞌaà‑là Nainá, tìtsiꞌba‑là Nainá, tjiì‑là kjo̱ndaà i̱tꞌaà tsꞌe̱ ngatsꞌiì xi̱ta̱ xi tjín nga tíjtsa i̱sòꞌnde.
\v 2 Mochjeén‑né nga kítsiꞌbatjiá xi xi̱ta̱xá ítjòn títsa̱jna ko̱ ngatsꞌiì xi kjo̱tíxoma tjíya tsja mé‑ne nga ꞌnchán ki̱tsa̱jna‑ná ti̱koa̱ ta̱fì ta̱fì si̱jchá yijo‑ná ti̱koa̱ jcha̱xkoán Nainá ko̱ jcha̱xkoán kjoa̱ xi ndaà tjín.
\v 3 Kꞌe̱ nga kꞌoa̱sꞌín sꞌe̱én ndaà tjín koa̱ ndaà sasén‑la̱ Nainá xi ochrjekátjì‑ná kjo̱ꞌin.
\v 4 Nainá, jè xi mejèn‑la̱ nga ngatsꞌiì xi̱ta̱ ki̱tjokàjiìn kjo̱ꞌin ti̱koa̱ si̱jiìn‑la̱ kósꞌín tjín xi kjoa̱kixi̱.
\v 5 Tà jngoò ma Nainá; ti̱koa̱á tà jngoò ma xi̱ta̱ xi chja̱tjì‑ná i̱tꞌaà tsꞌe̱ Nainá, jè xi̱ta̱ xi Jesucristo ꞌmì.
\v 6 Kꞌe̱ nga kichìya na̱chrjein‑la̱ Nainá, Jesucristo kitsjaà kjo̱tjò yijo‑la̱ nga kꞌen mé‑ne nga ko̱chjítjì‑ne ngatsꞌiì xi̱ta̱ nga ma ki̱tjokàjiìn kjo̱ꞌin. Kꞌoa̱á sꞌín kisꞌiìn nga kisijiìn yije‑la̱ xi̱ta̱.
\v 7 ꞌA̱án kjònga̱tsja xá jè nga ꞌa̱n tsibíxáya‑na Cristo nga kichjàya ꞌén ndaà‑la̱ ti̱koa̱ kokoòya‑la̱ jñà xi mìtsà xi̱ta̱ judío nga ko̱kjeiín‑la̱ i̱tꞌaà tsꞌe̱ Cristo ti̱koa̱ skoe̱ xi kjoa̱kixi̱. ꞌÉn kixi̱í xi tìxan‑lè, mìtsà ꞌén ndiso.
\p
\v 8 I̱tꞌaà tsꞌe̱ xi̱ta̱ xꞌi̱n, mejèn‑na kꞌe̱ nga chja̱tꞌaà‑la̱ Nainá ni̱ta̱ ñánda i̱ꞌnde títsa̱jna, tsjeè kàtasíkítsa̱jna ini̱ma̱‑la̱ kꞌe̱ nga skímiìtje̱n‑la̱ tsja Nainá. Kì kjoa̱jti tíjiìn ini̱ma̱‑la̱, koa̱ kì nchikjaán‑kjoò‑jèn.
\v 9 Ti̱koa̱ jñà íchjín, jè nikje xi ndaà okꞌìn‑la̱ kàtakjá. Kì nikje chjí ókjá. Kì ta̱xki̱ síꞌñójno sko̱ ko̱ yijo‑la̱ tsojmì xi ꞌñó chjí koni ki̱cha̱ oro ko̱ perla. Chiba chiba kàtíndaà yijo‑la̱ mé‑ne nga mì xi̱ta̱ skótsejèn‑jno‑ne.
\v 10 Ta̱ sa̱á xá xi ndaà tjín kàtasꞌín koni sꞌín okꞌìn‑la̱ jñà íchjín xi beèxkón Nainá.
\v 11 Jñà íchjín jyò kàtìtsa̱jna kꞌe̱ nga skótaꞌyà ꞌén‑la̱ Nainá; kàtaꞌnchréñijon‑la̱ jè xi okóya.
\v 12 ꞌA̱n, mìkiì tsjaàꞌnde nga jñà íchjín ko̱tìxoma‑la̱ xi xi̱ta̱ xꞌi̱n koa̱ ko̱kòya‑la̱. Íchjín, jyò kàtìtsa̱jna.
\v 13 Koií kjoa̱‑la̱ jè Nainá ítjòn tsibíndaà Adán, i̱skan tsibíndaà Eva.
\v 14 Mìtsà jè Adán xi kichona̱cha̱n‑la̱; jè Eva xi chjo̱ón‑la̱. Kꞌoa̱á sꞌín komà‑ne nga kisakò jé‑la̱.
\v 15 Ta̱nga, jñà íchjín, tsà si̱ìkitasòn koni sꞌín mejèn‑la̱ Nainá nga sꞌe̱‑la̱ i̱xti, ki̱tjokàjiín kjo̱ꞌin. Mochjeén‑né nga ndaà ko̱kjeiín‑la̱ i̱tꞌaà tsꞌe̱ Cristo, nga sꞌe̱‑la̱ kjoa̱tjòcha, nga tsjeè kítsa̱jnako̱ Nainá koa̱ ndaà si̱ìjchá yijo‑la̱.
\c 3
\s Kjoa̱ xi mochjeén tsꞌe̱ xi̱ta̱ xi síkinda̱ na̱xa̱ndá‑la̱ Nainá
\p
\v 1 ꞌÉn jè, nguì ꞌén kixi̱‑né: Tsà tjín jngoò xi̱ta̱ xi mejèn‑la̱ xá nga na̱xa̱ndá‑la̱ Nainá si̱ìkinda̱, ꞌñó ndaà tjín xá xi mejèn‑la̱.
\v 2 Jè xi̱ta̱ xi si̱ìkinda̱ na̱xa̱ndá‑la̱ Nainá mochjeén‑né nga ndaà sꞌi̱in mé‑ne nga mì yá xi chꞌo ki̱tso̱‑la̱. Jngoò chjo̱ón sꞌe̱‑la̱; jngoò xi̱ta̱ xi indaà tjín ikon; xi̱ta̱ xi ndaà kosòn‑la̱ yijo‑la̱; xi̱ta̱ xi yaxkón nga ndaà tísíjchá yijo‑la̱; xi ndaà sísꞌin‑la̱ xi̱ta̱ xi bijchókon; xi̱ta̱ xi ndaà ma‑la̱ okóya;
\v 3 xi mìtsà xi̱ta̱ chꞌi̱; xi mìtsà xi̱ta̱ kjaán‑ko̱; xi mìtsà to̱n chijé kjòtsjakeè. Jè xi̱ta̱ xi mochjeén xi ndaà xi̱ta̱, xi mìtsà kjoa̱siì sísꞌin‑la̱, xi mìtsà to̱n kájno‑la̱.
\v 4 Mochjeén‑né nga ndaà kjo̱tíxoma‑la̱ xi̱ta̱ niꞌya‑la̱; ndaà si̱ìkixi̱ i̱xti‑la̱ mé‑ne nga sꞌe̱‑la̱ kjo̱xkón i̱xti ti̱koa̱ si̱ìkitasòn koni sꞌín tsò xi̱ta̱ jchínga‑la̱.
\v 5 Tsà mìkiì ma‑la̱ otíxoma‑la̱ xi̱ta̱ niꞌya‑la̱, ¿kó sꞌín ko̱ma si̱ìkinda̱ xi̱ta̱ na̱xa̱ndá‑la̱ Cristo?
\v 6 Jè xi síkinda̱ xi̱ta̱ na̱xa̱ndá‑la̱ Nainá jè xi mochjeén xi kjòtseé kòkjeiín‑la̱, mé‑ne nga mì ꞌnga ikon ko̱ma‑ne nga mì kjo̱ꞌin sꞌe̱‑la̱ koni komàtꞌin xi̱ta̱ nei̱í.
\v 7 Mochjeén‑né nga ndaà si̱ìjchá yijo‑la̱ mé‑ne nga skoe̱xkón‑ne jñà xi̱ta̱ xi mìkiì mokjeiín‑la̱ i̱tꞌaà tsꞌe̱ Cristo nga mì chꞌo kíjna, nga mì jè xi̱ta̱ nei̱í si̱ìkijne‑la̱.
\s Kjoa̱ xi mochjeén tsꞌe̱ xi̱ta̱ xi si̱ìchjátꞌaà‑la̱ na̱xa̱ndá‑la̱ Nainá
\p
\v 8 Kꞌoa̱á ti̱sꞌín tjín tsꞌe̱ xi̱ta̱ xi si̱ìkitasòn xá nga si̱ìchjátꞌaà‑la̱ xi̱ta̱ na̱xa̱ndá‑la̱ Nainá, jñà mochjeén xi̱ta̱ xi yaxkón nga ndaà nchisíjchá yijo‑la̱. Mìkiì ko̱ma si̱ìkjatjìya‑la̱ ꞌén xi chja̱. Mìkiì ko̱ma xán koa̱hijtako̱. Mìkiì ko̱ma to̱n chijé ko̱tsjakeè.
\v 9 Mochjeén‑né nga ndaà kàtafìtꞌaà‑la̱ kjoa̱tjíꞌma xi jye tsakó Nainá koni sꞌín mokjeiín‑ná i̱tꞌaà tsꞌe̱ Cristo. Ti̱koa̱ mochjeén‑né nga tsjeè kàtasíkítsa̱jna kjo̱hítsjeèn‑la̱.
\v 10 Jñà xi̱ta̱ xi si̱ìkitasòn xá nga si̱ìchjátꞌaà‑la̱ xi̱ta̱ na̱xa̱ndá‑la̱ Nainá, ítjòn kàtachìtꞌaà tsà ni̱mé kjoa̱ tjín‑la̱, i̱kjoàn, kꞌe̱é kàtasíkitasòn.
\v 11 Kꞌoa̱á ti̱sꞌín tjín tsꞌe̱ íchjín; mochjeén‑né nga yaxkón nga ndaà nchisíjchá yijo‑la̱. Mì ꞌén ndiso ki̱chja̱. Indaà kꞌoe̱è ikon. Ndaà si̱ìkitasòn yije ni̱ta̱ mé kjoa̱‑ne.
\v 12 Jè xi̱ta̱ xi síkitasòn xá nga síchjátꞌaà‑la̱ xi̱ta̱ na̱xa̱ndá‑la̱ Nainá, mochjeén‑né nga tà jngoò chjo̱ón sꞌe̱‑la̱. Ndaà kàtatíxoma‑la̱ i̱xti‑la̱ ko̱ xi̱ta̱ niꞌya‑la̱.
\v 13 Jñà xi̱ta̱ xi ndaà si̱ìkitasòn xá koi, ìsa̱ ndaà jcha̱xkón koa̱ ìsa̱ ꞌñó ndaà sꞌe̱ ikon koni sꞌín mokjeiín‑la̱ i̱tꞌaà tsꞌe̱ Cristo Jesús.
\s Kjoa̱ꞌma‑la̱ Nainá
\p
\v 14 Mejèn‑na nga kjíkon ni̱to̱n‑lè, ta̱nga tsà koií na̱chrjein‑la̱ ko̱chrjein‑ya‑na, kꞌoa̱á ma‑ne tìkjiì‑lè xo̱jo̱n jè
\v 15 mé‑ne nga jcha̱‑ne kósꞌín ki̱tsa̱jnakoa̱á xi̱ta̱ xinguia̱á ya̱ i̱jiìn na̱xa̱ndá‑la̱ Cristo xi tíjnakon. Jè na̱xa̱ndá‑la̱ Cristo tjíya tsja ꞌén kixi̱‑la̱ Nainá.
\v 16 Nguì ꞌén kixi̱‑né nga ꞌñó jeya jè kjoa̱ꞌma‑la̱ Nainá xi jye tsakó koni sꞌín yaxkoán Nainá:
\q Nainá, xi̱ta̱á komà nga jꞌiì i̱ i̱sòꞌnde;
\q i̱tꞌaà tsꞌe̱ Ini̱ma̱ Tsjeè‑la̱ kiꞌya‑la̱ nga tjín‑la̱ kjoa̱kixi̱;
\q jñà àkja̱le̱ kijtseè‑né;
\q ꞌén‑la̱ kinokjoàyajiìn‑la̱ ngatsꞌiì xi mìtsà xi̱ta̱ judío;
\q nga tíjtsa i̱sòꞌnde kòkjeiín‑la̱ xi̱ta̱ i̱tꞌaà tsꞌe̱ Cristo;
\q jeya kitjoétjò‑ne ján ngajmiì.
\c 4
\s Xi̱ta̱ xi mìtsà ꞌén kixi̱ ko̱kòya
\p
\v 1 Ta̱nga jè Ini̱ma̱ Tsjeè‑la̱ Nainá ndaà béno̱jmíya‑ná nga tsò: kꞌe̱ nga chiba na̱chrjein chija‑ìsa‑la̱ nga kjoi̱í ìjngoò kꞌa Cristo, sꞌe̱é xi̱ta̱ xi mì ti̱ kiì ko̱kjeiín‑la̱ i̱tꞌaà tsꞌe̱ Cristo. Ya̱á kji̱tꞌaà‑la̱ ini̱ma̱ chꞌo‑la̱ nei̱í xi kona̱cha̱n koa̱ kjo̱hítsjeèn‑la̱ nei̱í si̱ìkitasòn.
\v 2 Jñà kji̱ꞌnchré‑la̱ xi̱ta̱ ndiso xi jò i̱sén tjín‑la̱. Xi̱ta̱ koi, nga jye kjòtájaàjiìn kjo̱hítsjeèn‑la̱, mì ti̱ kinda̱ fìko̱‑ne kjoa̱chꞌo xi nchisꞌín.
\v 3 Jñà xi̱ta̱ koi mìkiì tsjáꞌnde nga ki̱xan xi̱ta̱. Ti̱koa̱á tjín tsojmì xi ma chine, mìkiì tsjáꞌnde nga ko̱ma chji̱ne̱. Ta̱nga tsojmì koi, Nainá tsibíndaà nga tjíꞌnde‑la̱ nga ko̱ma ski̱ne̱ xi̱ta̱ xi mokjeiín‑la̱ ko̱ xi ndaà tíjiìn‑la̱ kjoa̱kixi̱. Kꞌe̱ nga ski̱ne̱ tsjá‑la̱ kjo̱ndaà Nainá.
\v 4 Ngatsꞌiì tsojmì xi Nainá tsibíndaà, ndaà‑né, mìkiì ko̱ma ki̱náchrjenguiaá. Ko̱ma si̱kjeén yije tsà kꞌoi̱‑lá kjo̱ndaà Nainá kꞌe̱ nga si̱kjeén.
\v 5 Jè ꞌén‑la̱ Nainá si̱ìtsjeè tsojmì kꞌe̱ nga ki̱nókjoa̱tꞌaà‑lá.
\s Jngoò chi̱ꞌnda‑la̱ Cristo xi ndaà síxá
\p
\v 6 Ji̱, tsà kꞌoa̱sꞌín ko̱kóya‑la̱ jñà xi̱ta̱ xinguia̱á kjoa̱ koi, ꞌñó ndaà si̱xátꞌaà‑la̱ Cristo Jesús. Ska̱sòn‑ìsa̱ kjo̱hítsjeèn‑lè i̱tꞌaà tsꞌe̱ ꞌén xi mokjeiín‑ná ko̱ kjo̱hítsjeèn xi ndaà tjín xi ndaà tìꞌmìtji̱ngui‑la̱.
\p
\v 7 Ta̱nga kì ta̱xki̱ nìsꞌin‑la̱ ꞌén jchínga tsꞌe̱ i̱sòꞌnde xi nìmé chjí‑la̱ xi tà kjo̱hítsjeèn‑la̱ xi̱ta̱. Tìnè‑la̱ yijo‑lè nga cha̱xkoín Nainá.
\v 8 Tsà kínè‑lá yijo‑ná nga kꞌoi̱‑lá ngaꞌñó, sakó chiba‑la̱ kjo̱ndaà, ta̱nga tsà kínè‑lá ini̱ma̱‑ná nga ndaà jcha̱xkoán Nainá, ìsa̱á sakó‑ná kjo̱ndaà xi mochjeén‑ná nga kjitꞌaà na̱chrjein. Sakó‑ná kjo̱ndaà i̱ i̱tꞌaà nangui ko̱ nga ko̱ma i̱skan ti̱koa̱á sakó‑ná ján ngajmiì.
\v 9 ꞌÉn koi, ꞌén kixi̱‑né. Mochjeén‑né nga kàtakjeiín yije‑la̱ xi̱ta̱.
\v 10 Koií kꞌoa̱sꞌín bìnè‑lá xá yijo‑ná, ti̱koa̱ nìkjiaán kjo̱ꞌin nga jè titsa̱chiñá‑lá Nainá xi tíjnakon xi ma‑la̱ ochrjekàjiìn kjo̱ꞌin ngatsꞌiì xi̱ta̱. Jñà‑né xi ki̱tjokàjiìn kjo̱ꞌin xi mokjeiín‑la̱ i̱tꞌaà tsꞌe̱ Cristo.
\p
\v 11 Kꞌoa̱á sꞌín tatìxoma‑la̱ jñà xi̱ta̱, kꞌoa̱ tì sꞌín ta̱kóya‑la̱ ꞌén koi.
\v 12 Kì yá xi ochrjekàngui‑lè na̱sꞌín nguì sa̱ i̱xti‑ìsi. Ya̱ i̱jiìn‑la̱ xi̱ta̱ xi mokjeiín‑la̱ i̱tꞌaà tsꞌe̱ Cristo, ji̱, ndaà tꞌin ítjoìn mé‑ne skíngui‑ne kósꞌín nokjoì, kósꞌín ꞌnì, kósꞌín tjòcha ꞌyi Nainá ko̱ xi̱ta̱, [kósꞌín ndaà tíjna ini̱ma̱‑lè], kósꞌín mokjeiín‑lè i̱tꞌaà tsꞌe̱ Nainá, kósꞌín tsjeè tìnìjchí yijo‑lè nga nguixko̱n Nainá.
\v 13 Skanda kꞌe̱ nga kìjchokon‑lè, kꞌoa̱á sꞌín tꞌi̱in: tìxke̱jiìn‑la̱ xi̱ta̱ ꞌén‑la̱ Nainá; tìnè‑la̱ nga ꞌñó kàtꞌeé‑la̱ ikon; ti̱koa̱ ta̱kóya‑la̱.
\v 14 Kì nìjchàajiìn‑jèn nga si̱xátꞌaà‑la̱ Nainá i̱tꞌaà tsꞌe̱ kjo̱tjò xi kitjoé‑lè kꞌe̱ nga jñà xi̱ta̱ jchínga‑la̱ na̱xa̱ndá‑la̱ Nainá tsohósòn‑lè tsja nga jñà kiìchja̱ ngajo‑la̱ Nainá i̱tꞌaà tsi̱ji.
\p
\v 15 I̱tꞌaà tsꞌe̱ kjoa̱ koi, kjitꞌaà na̱chrjein ti̱yakoi̱i, ti̱koa̱ ti̱xákoi̱i mé‑ne nga skoe̱ yije‑ne xi̱ta̱ nga ndaà tímajchíngakoi̱i.
\v 16 Ndaà ti̱kindi̱i yijo‑lè mé xi ꞌnì. Ti̱koa̱ tꞌi̱in kinda̱ jè ꞌén xi okoòya‑la̱ xi̱ta̱. Kixi̱ ti̱jni. Tsà kꞌoa̱sꞌín si̱kitasoìn, ngaji̱, ki̱tjokàjiìn kjo̱ꞌin; ti̱koa̱á ki̱tjokàjiìn kjo̱ꞌin jñà xi̱ta̱ xi ꞌnchré‑lè.
\c 5
\s Kjo̱ndaà xi mochjeén i̱tꞌaà tsꞌe̱ xi̱ta̱ xi kjꞌei̱í
\p
\v 1 Jñà xi̱ta̱ xi jye ꞌñó jchínga, kì ta̱xki̱ nìkaká‑la̱; kꞌoa̱á sꞌín tèno̱jmíya‑la̱ koni tsà na̱ꞌèn‑lè ma; ti̱koa̱ jñà xi ìsa̱ i̱xti‑ìsa, kꞌoa̱á sꞌín tèno̱jmíya‑la̱ koni tsà ꞌndsì ma.
\v 2 Jñà íchjín xi jye ꞌñó jchínga, kꞌoa̱á sꞌín tèno̱jmíya‑la̱ koni tsà nea̱‑lè ma. Jñà xi íchjín i̱xti kꞌoa̱á sꞌín tèno̱jmíya‑la̱ koni tsà tichji ma nga nguì tsjeè tíjna kjo̱hítsjeèn‑lè.
\p
\v 3 Ti̱si̱ko̱ò jñà íchjín xi jye kꞌen xꞌi̱n‑la̱ tsà kixi̱ kjoa̱ nga tsjìn xi osìko̱.
\v 4 Tsà tjín íchjín kaꞌàn xi tjín‑la̱ i̱xti, ko̱ tsà tjín‑la̱ i̱xti ꞌndei̱í, i̱xti koi, ítjòn kàtasíkitasòn ya̱ niꞌya‑la̱ kósꞌín beèxkón Nainá. Kàtasìko̱ xi̱ta̱ xíkjín, mé‑ne nga tsjá ngajo‑la̱ kjoa̱tjòcha tsꞌe̱ xi̱ta̱ jchínga‑la̱. Kjoa̱ koi, ndaà tjín. Kꞌoa̱á sꞌín sasén‑la̱ Nainá.
\v 5 Jè chjo̱ón kaꞌàn xi kixi̱ kjoa̱ nga tíjna ta̱jngoò, Nainá ꞌñótꞌaà‑takòn ko̱ na̱chrjein ko̱ ni̱tje̱n bítsiꞌba nga chja̱tꞌaà‑la̱ Nainá.
\v 6 Ta̱nga jè chjo̱ón kaꞌàn xi kjo̱tsja tsꞌe̱ i̱sòꞌnde xi chꞌo tjín tsjá‑la̱ yijo‑la̱, i̱tꞌaà tsꞌe̱ Nainá tíjnakꞌen‑né na̱sꞌín tíjnakon.
\v 7 Kꞌoa̱á sꞌín tatìxoma‑la̱ kjoa̱ koi mé‑ne nga ndaà si̱ìjchá‑ne yijo‑la̱ nga mì yá xi chꞌo ki̱tso̱‑la̱.
\v 8 Tsà yá xi mìkiì si̱ìkinda̱ xi̱ta̱ xíkjín nga si̱ìchjátꞌaà‑la̱, matsꞌia̱ko̱ ítjòn‑ne xi ya̱ títsa̱jnako̱ niꞌya‑la̱, tsà mì kꞌoa̱á sꞌín ko̱si̱ko̱ xíkjín, mìkiì nchisíkitasòn ꞌén xi mokjeiín‑la̱ i̱tꞌaà tsꞌe̱ Cristo. Ìsa̱á chꞌo nchisíkítsa̱jna yijo‑la̱ mì kꞌoa̱á‑ne koni jñà xi̱ta̱ xi mìkiì mokjeiín‑la̱ ꞌén‑la̱ Nainá.
\p
\v 9 Íchjín kaꞌàn xi si̱tꞌaà xo̱jo̱n nga ko̱chjátꞌaà‑la̱, tà jñà‑né xi tsato jàn kaàn nó tjín‑la̱ xi kixi̱ tsibìtsa̱jnako̱ xꞌi̱n‑la̱,
\v 10 jñà xi ꞌya‑la̱ nga ndaà kisìjchá yijo‑la̱ tsꞌe̱ xá xi ndaà tjín: tsà ndaà kisìjchá i̱xti‑la̱, tsà ndaà kisìsꞌin‑la̱ xi̱ta̱ xi ijchòkon niꞌya‑la̱, tsà tsaníjno ndso̱ko̱ xi̱ta̱‑la̱ Cristo nga ndaà kisìsꞌin‑la̱, tsà kisìchjátꞌaà‑la̱ xi̱ta̱ xi kjoa̱ títsa̱jiìn. Tsà kꞌoa̱sꞌín kisìkitasòn yije xá xi ndaà tjín, ko̱ma si̱tꞌaà xo̱jo̱n.
\p
\v 11 Ta̱nga jñà íchjín kaꞌàn xi sa̱ i̱xti ìsa̱ mìkiì ko̱ma xo̱jo̱n si̱tꞌaà. Kꞌe̱ nga xꞌi̱n kjoa̱ajiìn‑la̱, mìtsà ꞌiín ko̱ma‑la̱ nga ki̱nchatꞌaàxìn‑la̱ Cristo nga ki̱xan ìjngoò kꞌa‑ne.
\v 12 Tsà kꞌoa̱sꞌín sꞌi̱in, kjo̱ꞌiín sꞌe̱‑la̱ nga mìkiì nchisíkitasòn koni sꞌín kitsjaà tsoꞌba nga sa̱ ítjòn.
\v 13 Íchjín koi, ti̱koa̱á mangaá‑la̱ nga xki̱ xi ján niꞌya binchimajto. Ma tsꞌeè‑né. Mìtsà tà ma tsꞌeè. Ti̱koa̱á ꞌén ndiso bíxkó. Chja̱jiìn chja̱ꞌa ñánda mì jñà oko̱‑la̱.
\v 14 ꞌA̱n, kꞌoa̱á sꞌín mejèn‑na nga kàtixan ìjngoò kꞌa‑ne jñà íchjín kaꞌàn xi sa̱ i̱xti ìsa̱. Kàtasꞌe‑la̱ i̱xti. Ndaà kàtatíxoma niꞌya‑la̱ mé‑ne nga mì chꞌo ki̱chja̱jno‑ná xi kondra̱.
\v 15 Tjín iꞌnga íchjín kaꞌàn xi jye tsohófaya‑ne, jè kiìtꞌaà ìjngoò kꞌa‑la̱ xi̱ta̱ nei̱í.
\p
\v 16 Tsà jngoò xi̱ta̱ xi mokjeiín‑la̱ ꞌén‑la̱ Nainá tsà tjín xíkjín xi chjo̱ón kaꞌàn, mochjeén‑né nga kàtasíchjátꞌaà‑la̱ xíkjín mé‑ne nga mì jè na̱xa̱ndá‑la̱ Cristo ꞌñó ska̱nè‑ne xá. Jè na̱xa̱ndá‑la̱ Cristo ko̱maá ko̱si̱ko̱ xi kixi̱ kjoa̱ nga nguì ndí chjo̱ón kaꞌàn i̱ma̱.
\p
\v 17 Jñà xi̱ta̱ jchínga xi ndaà otíxoma ya̱ na̱xa̱ndá‑la̱ Nainá, okꞌín‑la̱ nga ìsa̱ ndaà jcha̱xkón koa̱ ko̱chjátꞌaà‑la̱ xi mochjeén‑la̱, matsꞌia̱ko̱‑ne jñà xi chja̱ya koa̱ okóya ꞌén‑la̱ Nainá.
\v 18 Xo̱jo̱n‑la̱ Nainá, kꞌoa̱á sꞌín tíchja̱ nga tsò: “Jè nchra̱ja̱ xi síxá, kì na̱ꞌya bìꞌa tsoꞌba.” Ti̱koa̱á tjítꞌaà xi tsò: “Jè xi̱ta̱ xi síxá, mochjeén‑né nga kàtachjí‑la̱.”
\p
\v 19 Kì kiì nìsꞌin‑la̱ tsà yá xi óngui xi̱ta̱ jchínga xi otíxoma tsꞌe̱ na̱xa̱ndá‑la̱ Nainá tsà mì jò jàn ma‑ne xi̱ta̱ xi kijtseè‑ne xko̱n kjoa̱ xi komà.
\p
\v 20 Ta̱nga jñà xi̱ta̱ jchínga xi ótsji jé‑ìsa, ti̱kaká‑la̱ nga nguixko̱n ngatsꞌiì xi̱ta̱ na̱xa̱ndá‑la̱ Nainá, mé‑ne jñà xi̱ta̱ xi iꞌnga kꞌoa̱á sꞌín sincháxkón‑ne.
\p
\v 21 Tìbìnè‑lè nga nguixko̱n Nainá ko̱ Na̱ꞌèn‑ná Jesucristo ko̱ àkja̱le̱‑la̱ xi xó jè jaàjiìn‑ne, ndaà ti̱kitasoìn kjoa̱ koi. Ni̱mé kjoa̱ xi bìndaàjiìn kꞌe̱ nga kjꞌeè kiì ꞌya‑la̱ tsà kixi̱ kjoa̱. Kì chjaàjiìn xi̱ta̱ xi nìsꞌin‑la̱; ngásòn ti̱sꞌin yije‑la̱.
\v 22 Kì yá xi̱ta̱ xi ta̱xki̱ chjaàjiìn nga kjósòn‑la̱ ndsei̱i kꞌe̱ nga kꞌoi̱‑la̱ xá i̱jiìn na̱xa̱ndá‑la̱ Nainá. Ítjòn ndaà ti̱kítsjiìn mé‑ne nga mì ji̱ ko̱ko̱tꞌaà‑lè jé‑la̱ xi̱ta̱ xi kjꞌei̱í. Tsjeè ti̱jni.
\p
\v 23 Nga chꞌin tjín kjitꞌaà‑la̱ i̱ndso̱ꞌboì, kì tà nandá ꞌyoì, ti̱koa̱á tꞌi chibi nandá vino.
\p
\v 24 Tjín iꞌnga xi̱ta̱ xi ti̱kꞌe̱ ꞌya‑la̱ jé‑la̱ kꞌe̱ nga ti̱kjꞌeè si̱ndaàjiìn. Ta̱nga ti̱koa̱á tjín iꞌnga xi i̱skan ꞌya‑la̱.
\v 25 Kꞌoa̱ ti̱sꞌín tjín xá xi ndaà tjín, tjín xi ni̱to̱n beè xi̱ta̱. Ti̱koa̱á tjín xá ndaà xi mì ni̱to̱n ꞌya‑la̱ ta̱nga mìkiì ko̱ma jngoò kꞌa si̱jnaꞌma. I̱skan jcha̱‑la̱.
\c 6
\p
\v 1 Ngatsꞌiì xi̱ta̱ na̱xa̱ndá‑la̱ Nainá xi chi̱ꞌnda títsa̱jnaꞌñó, ndaà kàteèxkón nei‑la̱ mé‑ne nga mì yá xi chꞌo ki̱chja̱jno‑la̱ Nainá ko̱ ꞌén xi okoòyaá i̱tꞌaà tsꞌe̱ Cristo.
\v 2 Jñà xi̱ta̱ chi̱ꞌnda xi mokjeiín‑la̱ nei‑la̱ i̱tꞌaà tsꞌe̱ Cristo, mochjeén‑né nga ngásòn ndaà kàteèxkón nei‑la̱ nga ꞌndse̱é joó i̱tꞌaà tsꞌe̱ Cristo. Ìsa̱á ndaà kàtasíxá‑la̱ nga ngásòn mokjeiín‑la̱ ꞌén‑la̱ Nainá ti̱koa̱ tsjakeè xíkjín.
\p Jñà ꞌén koi, ta̱kóyi ti̱koa̱ ti̱nókjoa̱yi.
\s Kjoa̱ xi sakó‑ná kꞌe̱ nga to̱n matsjachaá
\p
\v 3 Tsà tjín xi̱ta̱ xi kjꞌei̱í tsò ꞌén xi okóya nga mì tíjngoò ikon koni tsò ꞌén ndaà‑la̱ Na̱ꞌèn‑ná Jesucristo ti̱koa̱ mìkiì tíjngoò ikon i̱tꞌaà tsꞌe̱ kjo̱tíxoma koni sꞌín yaxkoán Nainá.
\v 4 Xi̱ta̱ koi, xi̱ta̱ ꞌnga takòn‑né, ni̱mé machi̱ya‑la̱. ꞌÑó tsjakeè nga ótiya‑ne ꞌén xi nìmé chjí‑la̱. Ya̱á nchrobátꞌaà‑ne nga maxìtakòn‑chaá xinguia̱á, nga bixkán‑kjoaá, nga nokjoàjno‑lá xinguia̱á ꞌén xi chꞌo tsò, ti̱koa̱ chꞌo nìkítsjeèn i̱tꞌaà tsꞌe̱ xi̱ta̱ xi kjꞌei̱í.
\v 5 Ti̱koa̱á ya̱á nchrobátꞌaà‑ne nga kjitꞌaà na̱chrjein nchikjaán‑kjoò jñà xi̱ta̱ xi mì kixi̱ síkjeén kjo̱hítsjeèn‑la̱ ko̱ mì kjoa̱kixi̱ fìtꞌaà‑la̱. Kꞌoa̱á sꞌín síkítsjeèn, tsò‑né: tsà ndaà jcha̱xkoán Nainá, ya̱á sakó‑ná to̱n. Ngaji̱, kì kꞌoa̱á tjín kjoa̱ xi nìkítsjiìn.
\v 6 Kixi̱í kjoa̱, tseé kjo̱ndaà sakó‑la̱ xi̱ta̱ kꞌe̱ nga beèxkón Nainá tsà ti̱koa̱ tsja tjín‑la̱ ini̱ma̱‑la̱ mé xi tjín‑la̱.
\v 7 Nga ni̱mé xi kichꞌá kꞌe̱ nga kitsꞌiaán i̱ i̱sòꞌnde. Ti̱koa̱á ni̱mé xi kjikoa̱á kꞌe̱ nga ki̱yá.
\v 8 Tsà tjín‑ná tsojmì xi chineé koa̱ tjín‑ná nikje xi chíkjá, mochjeén‑né nga tsjaá kíjngoò‑lá takoán.
\v 9 Ta̱nga jñà xi̱ta̱ xi mejèn‑la̱ kjoa̱nchi̱ná, nga mìkiì chíkjoa̱ko̱‑la̱ kjo̱hítsjeèn xi chꞌo tjín nga kjìn tsojmì mejèn‑la̱, ya̱á ki̱xo̱ngui chꞌa̱n koa̱ ya̱á si̱nguiꞌñó. ꞌÑó mejèn‑la̱ kjoa̱ xi ni̱mé chjí‑la̱ koa̱ xi chꞌo síko̱‑ná, kjoa̱ xi síkitsꞌón xi̱ta̱ koa̱ ya̱á chi̱jajiìn.
\v 10 Kꞌe̱ nga to̱n matsjachaá, ya̱á matsꞌia̱‑ne kjoa̱ tsꞌe̱ jé ko̱ ngatsꞌiì kjoa̱ xi chꞌo tjín. Tjín iꞌnga xi̱ta̱ xi jye chinchatꞌaàxìn‑la̱ kjoa̱ xi mokjeiín‑ná i̱tꞌaà tsꞌe̱ Cristo jè nga̱tjì‑la̱ nga tse to̱n mejèn‑la̱. Kꞌoa̱á sꞌín ma‑ne nga ti̱jñà‑ne tse kjo̱ꞌin tsjá‑la̱ yijo‑la̱.
\s Tìnè‑la̱ yijo‑lè kjoa̱ xi mokjeiín‑lè
\p
\v 11 Ta̱nga ngaji̱ xi xi̱ta̱‑la̱ Nainá ꞌmì‑lè, ti̱si̱tꞌaàxìn‑la̱ ngatsꞌiì kjoa̱ koi. Jè tꞌin tji̱ngui‑la̱ xi kjoa̱kixi̱. Jcha̱xkoín Nainá. Ndaà kàtakjeiín‑lè i̱tꞌaà tsꞌe̱ Cristo. Kàtasꞌe‑lè kjoa̱tjòcha. Kàtasꞌe‑lè kjoa̱tsetakòn. Indaà kjoa̱ ti̱kíjni ini̱ma̱‑lè.
\v 12 Ndaà ti̱xkàtjì kjoa̱ xi mokjeiín‑ná i̱tꞌaà tsꞌe̱ Cristo. Kì nìkíjna‑jèn ndi̱yá kixi̱ tsꞌe̱ kjoa̱binachon xi mìkiì fehetꞌaà ni̱ta̱ kjé‑ne. Nga koií xá kiìchja̱‑lè Nainá. Ngaji̱ jyeé kꞌoa̱sꞌín ndaà kitsꞌiì ndso̱boi nga kinìkixi̱yi ꞌén xi mokjeiín‑lè i̱tꞌaà tsꞌe̱ Cristo nga nguixko̱n xi̱ta̱ xi kjìn ma‑ne nga kiìꞌnchré.
\v 13 I̱ꞌndei̱ jngoò xá tìbìnè‑lè nga nguixko̱n Nainá xi síkítsa̱jnakon yije ni̱ta̱ mé xi tjín, ti̱koa̱ nguixko̱n Jesucristo xi ndaà kitsjaà tsoꞌba nga kisìkixi̱ya ꞌén ndaà‑la̱ kꞌe̱ nga kiìchja̱ nga nguixko̱n Poncio Pilato.
\v 14 Kꞌoa̱á sꞌín tìhotiìxoma‑lè, ndaà ti̱kitasoìn kjo̱tíxoma koi; kì nìkjatjìya‑la̱ mé‑ne nga mì yá xi ko̱chrjengui‑lè skanda kꞌe̱ nga kjoi̱í ìjngoò kꞌa Na̱ꞌèn‑ná Jesucristo.
\v 15 Kꞌe̱ nga ki̱jchòya na̱chrjein, Nainá, kꞌoa̱á sꞌín si̱ìkitasòn yije kjoa̱ koi. Mé tà ndaà‑la Nainá nga jè ta̱jngoò tíhotíxoma. Jè tíjna ítjòn‑la̱ jñà xi xi̱ta̱xá ítjòn títsa̱jna ti̱koa̱ tíjna ítjòn‑la̱ jñà xi xi̱ta̱ sko̱‑la̱ títsa̱jna.
\v 16 Ta̱jngoò Nainá xi xó kꞌoa̱sꞌín tíjna‑ne nga mìkiì biyaà. Ya̱á tíjnajiìn kjoa̱hiseèn ñánda mì yá xi ko̱ma ki̱jchò kinchatꞌaà‑la̱. Ni̱ sa̱á jngoò xi̱ta̱ beèxkon ni̱ mìkiì tjíꞌnde‑la̱ nga skoe̱xkon. Nainá, kjitꞌaà na̱chrjein jeya kàtìjna. Kàtayaxkón kjo̱tíxoma‑la̱ ni̱ta̱ kjé‑ne. Kꞌoa̱sꞌín kàtama.
\p
\v 17 Jñà xi̱ta̱ nchi̱ná xi tjín i̱ i̱sòꞌnde, kꞌoa̱á sꞌín tìnè‑la̱: “Kì bíꞌnga‑la̱ ikon.” Kì koií maꞌñótꞌaà ikon kjoa̱nchi̱ná xi tjín‑la̱ nga tà ni̱to̱n fehetꞌaà. Jè kàtamaꞌñótꞌaà ikon Nainá xi tíjnakon nga jè tsjá yije‑ná xi mochjeén‑ná skanda síkatonè‑la̱ mé‑ne nga ko̱ kjo̱tsja si̱kjeén tsojmì xi tsjá‑ná.
\v 18 Koa̱tìn‑la̱, kjo̱ndaà kàtasꞌín. Kàtasꞌe‑la̱ kjoa̱nchi̱ná nguixko̱n Nainá i̱tꞌaà tsꞌe̱ kjo̱ndaà xi sꞌín. Kì kjoa̱xkon fìkjaá, ko̱ ini̱ma̱‑la̱ kàtatsjá i̱tsé‑la̱ xíkjín mé xi tjín‑la̱.
\v 19 Tsà kꞌoa̱sꞌín si̱ìkitasòn na̱chrjein i̱ꞌndei̱, sꞌe̱é‑la̱ kjoa̱nchi̱ná xi mìkiì kjoe̱hetꞌaà kꞌe̱ nga jye títsa̱jna nguixko̱n Nainá. Ti̱koa̱á tjoé‑la̱ kjo̱ndaà xi nguì tsꞌe̱ kjoa̱binachon.
\s ꞌÉn xi fehetꞌaà‑ne
\p
\v 20 Ngaji̱ Timoteo, ndaà ti̱kitasoìn ꞌén ndaà‑la̱ Nainá xi ji̱ kjònga̱tsjei. Kì kiì naꞌyà‑la̱ ꞌén ndiso xi ni̱mé chjí‑la̱. Kì kiì nìsꞌin‑la̱ kjoa̱ xi chitiya‑ná tsꞌe̱ kjoa̱chji̱ne̱ ndiso.
\v 21 Tjín iꞌnga xi̱ta̱ xi kꞌoa̱ tjín kjo̱hítsjeèn fìtji̱ngui‑la̱. Kꞌoa̱á ma‑ne nga chinchatꞌaàxìn‑la̱ kjoa̱ xi mokjeiín‑ná i̱tꞌaà tsꞌe̱ Cristo.
\p Jè kàtìjnako̱‑lè kjo̱ndaà‑la̱ Nainá.