\id 2TI
\h 2 Timoteo
\toc1 2 Timoteo
\mt Xa̱jo̱n ra ma‑ni jò ra tsikínda jè Pablo ra isìkasén‑la̱ jè Timoteo
\c 1
\s Kóꞌsín síhixoꞌta Pablo jè Timoteo
\p
\v 1 ꞌA̱n Pablo, tíbindá‑la̱ xa̱jo̱n ra̱kìi̱, ꞌa̱n ra ko̱ꞌsín tsikíxáya‑na Jesucristo koni ꞌsín nga kjomejèn‑la̱ Nainá. ꞌKoa̱á ꞌsín kitsjà tsaꞌba Nainá nga kíjnakoón inìma̱‑ná ra a̱ꞌta ꞌtse̱ Cristo Jesús.
\v 2 Ngaji̱ Timoteo ra ꞌñó matsjake̱‑la koni tsa iꞌndí‑na̱ xin‑la, Nainá ra Na̱ꞌín‑ná ma ko̱ jè Jesucristo ra tíjna ítjòn‑ná katatsjá‑li kjo̱nda, katamahi̱ma̱ke‑li, kataꞌse‑la̱ kjo̱ꞌnchán a̱jin inìma̱‑li.
\s ꞌÉn ra tsjá Pablo a̱ꞌta ꞌtse̱ Cristo
\p
\v 3 ꞌKia̱ nga bítsjen‑na ra a̱ꞌta tsa̱ji nga kjiꞌtà ni̱chjin, ko̱ ni̱chjin ko̱ ni̱tje̱n chjàꞌtà‑la̱ Nainá nga tsja‑la̱ kjo̱nda, nga ngi tsjeé tjín kjo̱bítsjen‑na̱ nga bexkóo̱n koni ꞌsín kijtsexkón jñà xi̱ta̱ jchínga‑na̱.
\v 4 ꞌKia̱ nga bítsjen‑na kjoa̱ ꞌtse̱ ndáxkìn, sí mejèn‑na nga ska̱jieén mé‑ni nga ko̱tsja‑ila̱ inìma̱‑na̱.
\v 5 Bítsjeén‑na nga ngi ndaá makjiín‑li ra a̱ꞌta ꞌtse̱ Cristo koni ꞌsín kjokjiín ítjòn‑la̱ na̱híꞌxtín‑li ra ꞌmì Loida ko̱ jè Eunice ra a̱má‑li ma. ꞌA̱n, ꞌkoa̱á ꞌsín kixi̱ tjíjin‑na nga ti̱ꞌkoa̱á ngaji̱ nda makjiín‑li.
\s Mì ki ma ko̱sabà‑ná a̱ꞌta ꞌtse̱ ꞌén nda‑la̱ Cristo
\p
\v 6 Kií ko̱ꞌsín tísíkítsjen‑la nga isa̱ nda ti̱chjiín kjo̱tjò ra kitsjà‑li Nainá nga nda ti̱xá‑la̱, jè kjo̱tjò ra itjábé‑li ꞌkia̱ nga ꞌa̱n tsakasón‑la ndsa̱.
\v 7 Nainá, mì tsa inìma̱ ra tsakjón kitsjá‑ná. Jé kitsjá‑ná Inìma̱ Tsje‑la̱ ra tsjá‑ná ngaꞌñó, tsjá‑ná kjo̱tsjacha, ti̱ꞌkoa̱ tsjá‑ná kjo̱bítsjen kóꞌsín ꞌsie̱én nga kixi̱ si̱jché ijo‑ná.
\v 8 Kií nga̱tjì‑ila̱, kì masabà‑li nga nakjoáki̱i xi̱ta̱ a̱ꞌta ꞌtse̱ Jesucristo ra tíjna ítjòn‑ná. Ti̱ꞌkoa̱ kì masabà‑li ra a̱ꞌta tsa̱ꞌa̱n nga nda̱yá tíjnaꞌya tà nga̱tjì‑la̱ nga ya̱ síxáꞌta‑la̱ Na̱ꞌín‑ná. Ti̱kjiín‑ko̱‑ná kjo̱hiꞌin ra a̱ꞌta ꞌtse̱ ꞌén nda‑la̱ Cristo. Jé Nainá tsjá‑li ngaꞌñó ra ko̱chjeén‑li.
\v 9 Nainá, ijyeé tsachrjekàjin‑ná kjo̱hiꞌin. Kií xá kiìchja̱‑ná nga tsje si̱jché ijo‑ná. Mì tsa kií‑ni nga nda kiꞌnié. Ki‑ní nga ko̱ꞌsín kjomejèn‑la̱ Nainá, ti̱ꞌkoa̱ kitsjá‑ná kjo̱nda‑la̱ ra a̱ꞌta ꞌtse̱ Cristo skanda ti̱ꞌsa̱ tjàꞌtsin‑la̱ kjoa̱, ꞌkia̱ nga ti̱kje sinda i̱sàꞌnde.
\v 10 ꞌNdi̱ ꞌndi̱, Nainá ijyeé tsakón kjo̱nda‑la̱ nga ijye ꞌji Jesucristo ra bachrjekàjin‑ná kjo̱hiꞌin. Tsjahíxín‑ná ngaꞌñó‑la̱ kjo̱biya. Ra a̱ꞌta ꞌtse̱ ꞌén nda‑la̱ Cristo, tsakón‑ná kjo̱binachon ti̱ꞌkoa̱ tsakón‑ná nga mì tsa jngó kjá ki̱yé ni̱ta kjiá‑nioo̱.
\p
\v 11 Nainá, ꞌa̱án isìnga̱tsja‑na xá ra̱kìi̱ nga ꞌa̱n kichjàya ꞌén nda‑la̱ Cristo. Tsikíxáya‑na a̱ꞌta ꞌtse̱ xá‑la̱ nga ꞌa̱n kokon‑yá‑la̱ jñà ra mì tsa xi̱ta̱ judío.
\v 12 Tà nga̱tjì‑la̱ ꞌén ra ꞌa̱n chjàya tseé kjo̱hiꞌin tísikjiáa̱n. Tanga mì kì masabà‑na. Ijyeé tjíjin‑na nga a̱ꞌta ꞌtse̱ Cristo makjiín‑na. Ti̱ꞌkoa̱á ndaá tjíjin‑na nga ta̱ jngoó jè Nainá tjín‑la̱ ngaꞌñó nga nda si̱ìkinda̱ jè xá ra ꞌa̱n isìnga̱tsja‑na skanda jè ni̱chjin ꞌkia̱ nga kjꞌi̱í india‑ni Jesucristo.
\p
\v 13 Nda tijin‑takìn ꞌén nda ra ꞌa̱n tsakon‑yá‑la koni ꞌsín tjín ꞌén ra makjiín‑ná ko̱ kjo̱tsjacha ra tjín‑ná nga Cristo titsa̱jnake̱é.
\v 14 Nda ti̱hitjasìn xá ra nda tjín ra ji̱ kjonga̱tsji. Jé ko̱si̱ko̱‑li Inìma̱ Tsje‑la̱ Nainá ra tíjnajin inìma̱‑ná.
\p
\v 15 Ijyeé tjíjin‑li, ngaꞌtsì ra títsa̱jna ya̱ nangi Asia, ijyeé kitsjin‑tákon‑na, koni jè Figelo ko̱ Hermógenes.
\v 16 Nainá katahi̱ma̱ke xi̱ta̱ ra tjíhijyo ya̱ niꞌya‑la̱ Onesíforo. Kjìn ꞌka̱ ꞌji síje ikon‑na. Mì kì kjosabà‑la̱ ni̱ꞌsín nda̱yá tíjna̱ꞌya.
\v 17 Tà isa̱á, ꞌkia̱ nga ꞌji i̱ Roma ꞌñó tsakátsji‑na skanda nga isakò‑la̱ ñánda̱ tíjna̱.
\v 18 Na̱ꞌín‑ná katahi̱ma̱ke jè Onesíforo ꞌkia̱ nga ki̱jchò ni̱chjin‑la̱ Nainá. Ngaji̱ ijyeé nda tjíjin‑li, ndaá tsasìko̱‑ná ya̱ Éfeso.
\c 2
\s Timoteo, jngo chíchàn‑la̱ Cristo ra nda síxá‑la̱
\p
\v 1 Ngaji̱ Timoteo ra koni tsa iꞌndí‑na̱ xin‑la, ꞌti̱ ngaꞌñó‑la̱ ijo‑li a̱ꞌta ꞌtse̱ kjo̱nda ra tsjá Jesucristo nga jè titsa̱jnake̱é.
\v 2 Jè ꞌén ra kinaꞌyá‑ná ꞌkia̱ nga kíchjàya ya̱ ngixko̱n xi̱ta̱ ra kjìn ma‑ni nga kiíꞌnchré, ta̱kón‑ya‑la̱ ra xi̱ta̱ kixi̱ ra nda ko̱ma‑te‑la̱ ko̱kòn‑ya‑la̱ xi̱ta̱ ra kjꞌií.
\p
\v 3 Ngaji̱ Timoteo, ti̱kjiín‑ko̱‑ná kjo̱hiꞌin nga nda tjiꞌmiꞌta‑la̱ Jesucristo koni jngo chíchàn ra síkjiín kjo̱hiꞌin.
\v 4 Jngo xi̱ta̱ ra chíchàn tísíhitjasòn, mì kì tjíꞌnde‑la̱ nga kjꞌií xá ska̱ájin ra tjín ya̱ i̱sàꞌnde, tjíné‑la̱ nga ya̱ si̱hitjasòn‑la̱ jè ra kitsjà xá‑la̱ mé‑ni nga nda kíjnako̱‑ni.
\v 5 ꞌKoa̱á ti̱ꞌsín tjín a̱ꞌta ꞌtse̱ xi̱ta̱ ra síská. Tsa mì kì kixi̱ síská koni ꞌsín tjín kjo̱téxoma‑la̱ ra maská, mì kì tjábé‑la̱ chjí‑la̱.
\v 6 Jè xi̱ta̱ ra bínè‑la̱ ijo‑la̱ nga nda síxá nga bítje̱ tsajmì tjé, ꞌkia̱ nga ijye majchá tsajmì, jé tjábé ítjòn chiba‑la̱ tsajmì ra majchá koni chjí‑la̱.
\v 7 Ti̱kítsjin koni ꞌsín tíxin‑la. Jè Na̱ꞌín‑ná isa̱á nda si̱ichi̱ya‑la̱ kjo̱bítsjen‑li.
\p
\v 8 Ti̱kítsjin a̱ꞌta ꞌtse̱ Jesucristo jè ra jaáya‑ila̱ ya̱ a̱jin‑la̱ miꞌken, ra ya̱ nchrabá‑ni tje̱‑la̱ xi̱ta̱xá ítjòn ra tsiꞌkìn David. ꞌKoa̱á ꞌsín tsò ꞌén nda‑la̱ Cristo ra ꞌa̱n chjàya.
\v 9 Tà nga̱tjì‑la̱ ꞌén nda‑la̱ Cristo ra ꞌa̱n chjàya, kjo̱hiꞌiín tísikjiáa̱n, skanda naꞌñó ki̱cha̱á tjíꞌtáꞌñó‑na nga tíjna̱ꞌya nda̱yá koni jngo xi̱ta̱ ra ꞌñó ꞌtse̱n. Tanga jè ꞌén‑la̱ Nainá mì tsa ya̱ tjíꞌtáꞌñó ya̱ a̱ya nda̱yá.
\v 10 Ta kií nga̱tjì‑la̱ nga ko̱ꞌsín tísikjiáa̱n kjo̱hiꞌin nga kjo̱nda ꞌtse̱ xi̱ta̱ ra xá tsjahíjin‑ni Nainá, mé‑ni nga ti̱ꞌkoa̱á ki̱tjokajin‑ni kjo̱hiꞌin ra a̱ꞌta ꞌtse̱ Cristo Jesús; ꞌse̱é‑la̱ kjoa̱jeya ra mì kì feheꞌta ni̱ta kjiá‑nioo̱.
\p
\v 11 ꞌÉn kìi̱, ꞌén kixi̱‑ni nga tsò:
\q Nga ya̱ ꞌken‑ke̱é Cristo, ti̱ꞌkoa̱á ya̱á ki̱tsa̱jnakon‑ke̱é.
\q
\v 12 Tsa chíkjoa̱‑ná kjo̱hiꞌin ra ska̱jieén, ti̱ꞌkoa̱á ya̱á ko̱texomake̱é Cristo.
\q Tsa kixé; mì kì bexkon, jè, ꞌkoa̱á ti̱ꞌsín ki̱tso̱‑ná; mì kì bexkon‑no ra jiòn.
\q
\v 13 Tsa mì kì si̱hitjasén ꞌén ra nakjé, tanga ra jè Nainá si̱hitjasòn ꞌén ra chja̱.
\q Mì kì ko̱ma si̱ìkaatjìya‑la̱ ꞌén‑la̱ ra jè.
\s Jngo xi̱ta̱ ra nda síxá‑la̱ Cristo
\p
\v 14 Ti̱kítsjen‑la̱ kjoa̱ kìi̱. Ti̱nákjoa̱ki̱i ya̱ ngixko̱n Nainá mé‑ni nga mì ta jñá koa̱atiya‑ni kjoa̱ ꞌtse̱ ꞌén. Jè kjoa̱ ra chitiya‑ni ni̱mé chjí‑la̱. Ta isa̱á síkitsón xi̱ta̱ ra ꞌnchré‑la̱.
\v 15 ꞌÑó nda tinè‑la̱ ijo‑li mé‑ni nga nda ki̱jna‑ni ya̱ ngixko̱n Nainá. Nì mé ra ko̱sabà‑li nga ndaá tjín xá‑li ko̱ nga ndaá bakon‑yi ꞌén kixi̱‑la̱ Cristo.
\v 16 Kì taxki̱ nakjoá‑jìn ꞌén ra mì kì sasén‑la̱ Nainá, ra nì mé chjí‑la̱. Jñà xi̱ta̱ ra ko̱ꞌsín chja̱, tà isa̱á ꞌñó minchaꞌtaxìn-isa‑la̱ Nainá.
\v 17 Jñà ꞌén ra ꞌcho tsò, ꞌkoa̱á ꞌsín jngoya‑la̱ koni ꞌchin ra fiꞌndojno‑ni ijo‑ná. ꞌKoa̱á ꞌsín chja̱ jè Himeneo ko̱ Fileto,
\v 18 nga̱ ijyeé tsinchaꞌtaxìn‑la̱ ra kjoa̱kixi̱ nga tsò: jè kjoa̱ ra faháya‑la̱ miꞌken ijyeé tsato‑ní. ꞌKoa̱á ma‑ni nga sískáya iꞌka‑la̱ xi̱ta̱ kjoa̱ ra makjiín‑la̱.
\v 19 Tanga Nainá ijyeé tsikíjnaꞌñó tjàꞌtsin jngo kjoa̱ ra kixi̱ tíjna ñánda̱ nga tjíꞌta ꞌén ra tsò: “Nainá be‑ní yá xi̱ta̱‑ni ra ꞌtse̱”; ti̱ꞌkoa̱ tsò: “Ngaꞌtsì ra tsò: xi̱ta̱‑la̱ Cristo‑ná, katinchaꞌtaxìn‑la̱ kjoa̱ ra ꞌcho tjióo̱n.”
\p
\v 20 Jngo niꞌya ra je ꞌkioo̱, tjín tsajmì ra oro ko̱ plata. Ti̱ꞌkoa̱á tjín tsajmì ra yá, ko̱ ra niꞌnde. Tjín tsajmì ra ni̱chjin nchijòn machjeén, ko̱ tjín ra tà ꞌkia̱ machjeén ꞌkia̱ nga nda tíma.
\v 21 Tsa si̱tsjeé kjo̱bítsjen‑ná nga ki̱nchaꞌtaxín‑lá kjoa̱ ra ꞌcho tjióo̱n, ꞌkoa̱á ꞌsín si̱ìchjeén‑ná Nainá koni jñà tsajmì tsje ra tà ꞌkia̱ machjeén ꞌkia̱ nga nda tíma, nga titsa̱jnandeé nga si̱hitjasén ni̱ta mé xá‑la̱ Nainá ra nda tjín.
\p
\v 22 Ngaji̱ Timoteo, ti̱se̱nꞌtaxìn‑la̱ kjo̱bítsjen ra ꞌcho tjióo̱n koni ꞌsín síkítsjen ra i̱xti. Kií ꞌtin‑tji̱ngi‑la̱ kjo̱hixi̱, ko̱ kjoa̱ ra makjiín‑ná a̱ꞌta ꞌtse̱ Cristo, ko̱ kjo̱tsjacha, ko̱ kjo̱ꞌnchán-tákon. Ko̱ꞌsín ꞌtin‑tji̱ngi‑la̱ kjoa̱ kìi̱, ko̱ xi̱ta̱ ra tsje tjín inìma̱‑la̱ nga chja̱ꞌta‑la̱ Nainá.
\v 23 Kì jñà kjoa̱ táhijín nisin‑la̱ ra ni̱mé chjí‑la̱. Ijyeé nda tjíjin‑li kjoa̱ kìi̱, tà síkjaán‑kjoó‑ni xi̱ta̱.
\v 24 Jngo chi̱ꞌnda‑la̱ Nainá mì kì machjeén nga ya̱ ska̱ájin ñánda̱ kjaán‑kjo xi̱ta̱. Ndaá katasíko̱ ijye ngaꞌtsì xi̱ta̱. Katijnanda nga ko̱kòn‑ya ꞌén‑la̱ Nainá. Katachíkjoa̱‑la̱ inìma̱‑la̱ ni̱ꞌsín tà mé kjoa̱ ra ko̱ka̱maꞌtin.
\v 25 Ko̱ó kjo̱nda‑la̱ katasíkixi̱ya jñà ra xi̱ta̱ kondra̱, tsa kií ni̱chjin Nainá tsjá‑isa‑la̱ ni̱chjin nga si̱íkájno‑ni jé‑la̱, nga mì ti̱ jé koa̱àtsji‑ni, mé‑ni nga ko̱kjiín‑la̱ a̱ꞌta ꞌtse̱ kjo̱hixi̱.
\v 26 ꞌKia̱ nga tjáꞌxa̱ngi‑ni xko̱n, ko̱maá ki̱tjokajin‑ni ya̱ kjoa̱ chònda̱cha̱‑la̱ xi̱ta̱‑ni̱í ya̱ ñánda̱ nga tjíꞌtáꞌñó‑la̱, nga mejèn‑la̱ ko̱ꞌsín si̱hitjasòn‑la̱ koni ꞌsín mejèn‑la̱ ra jè.
\c 3
\s Ni̱chjin ra ꞌsa̱ nchrabá iꞌin ka̱ma‑la̱ xi̱ta̱
\p
\v 1 Ngaji̱ Timoteo, katasijin‑li jè ni̱chjin ꞌkia̱ nga ijye tímachraña nga kjꞌi̱í india‑ni Jesucristo, kjín sko̱ya kjoa̱ ꞌse̱ ra mì kì nda tjín.
\v 2 Jñà xi̱ta̱ ra ꞌse̱, tà jñá ijo‑la̱ ꞌñó si̱ìsin‑la̱, jé to̱n ꞌñó ko̱tsjake, jñá ijo‑la̱ isa̱ nda si̱ìkítsa̱jna, xi̱ta̱ ꞌnga ikoón ko̱ma, ꞌñó ki̱chja̱jno‑la̱ Nainá ko̱ xi̱ta̱, mì kì kji̱ꞌnchréhijon‑la̱ xi̱ta̱ jchínga‑la̱, mì kì ko̱ma‑la̱ tsjá ngajo‑ni kjo̱nda, mì kì ske̱xkón Nainá.
\v 3 Mì kì ko̱tsjake xákjín, jngó kjá mì kì si̱ije‑la̱ ikon, ꞌén ndisoó koa̱ànè‑la̱ xákjín, mì kì si̱ìkinda̱ ijo‑la̱ mé kjoa̱ ra ꞌsi̱in, xi̱ta̱ cho̱ó ko̱ma, kondra̱á ki̱ji̱‑la̱ kjoa̱ ra nda tjín,
\v 4 kondra̱á ki̱ji̱‑la̱ xi̱ta̱ ra nda báko̱, mì tsa ítjòn si̱íkítsjen mé kjoa̱ ra ꞌsi̱in, ꞌñó ꞌnga ikon ko̱ma, jé ko̱tsjake kjoa̱ ra sasén‑la̱ ijo‑la̱, mì kì ko̱tsjake Nainá.
\v 5 ꞌKoa̱á ꞌsín ꞌsi̱in koni tsa bexkón Nainá, tanga mì kì tsjáꞌnde nga jè ngaꞌñó‑la̱ Nainá si̱íxájin inìma̱‑la̱. Kì jñà nisin‑la̱ xi̱ta̱ kìi̱.
\v 6 Jñà xi̱ta̱ kìi̱, bátsjiꞌnde‑la̱ nga ꞌfahaꞌsen ya̱ niꞌya‑la̱ íchjín ra mì kì bexkón ijo‑la̱ ko̱ ra tse jé tjín‑la̱ nga ma konda̱cha̱‑la̱. Íchjín kìi̱, ya̱á fìtji̱ngi‑la̱ kjoa̱ ra isa̱ ꞌcho tjín koni ꞌsín síjé ijo‑la̱.
\v 7 Kjiꞌtá ni̱chjin i̱nchikotáꞌyá ꞌén xi̱tse̱, tanga ni̱jngo ni̱chjin bijchótji̱ngi‑la̱ kjo̱bítsjen‑la̱ nga machi̱ya‑la̱ ra kjo̱hixi̱.
\v 8 Jñà xi̱ta̱ kìi̱, ꞌkoa̱á ti̱ꞌsín mincha ikon‑la̱ ra kjo̱hixi̱ koni ꞌsín kiꞌsìn xi̱ta̱ ra tsiꞌkìn Janes ko̱ Jambres nga tsincha ikon‑la̱ Moisés. Xi̱ta̱ kìi̱, jngó kjá ꞌcho tjín kjo̱bítsjen‑la̱. Bitjongi‑ní ya̱ ngixko̱n Nainá nga mì kì makjiín‑la̱ ra kjo̱hixi̱.
\v 9 Tanga mì kì si̱ìkijne. Ki̱jchó ni̱chjin nga ske̱ ijye xi̱ta̱ kjoa̱ chi̱koán‑la̱. ꞌKoa̱á ꞌsín jcha̱ꞌtín‑la̱ koni jè Janes ko̱ Jambres.
\s Kóꞌsín bíꞌtin Pablo jè Timoteo nga ꞌén kixi̱ ko̱kòn‑ya
\p
\v 10 Tanga ra ji̱ Timoteo, ꞌkoa̱á ꞌsín tjiꞌmìtji̱ngi‑la̱ koni ꞌsín tsakon‑yá‑la, koni ꞌsín tísíjchá ijo‑na̱, koni ꞌsín tjín kjo̱bítsjen‑na̱ mé kjoa̱ ra tífìtji̱ngi‑la̱. ꞌKoa̱á ti̱ꞌsín makjiín‑li koni ꞌsín makjiín‑na a̱ꞌta ꞌtse̱ Cristo. ꞌKoa̱á ꞌsín tse tíjna inìma̱‑li ko̱ tjín‑li kjo̱tsjacha koni ra ꞌa̱n. ꞌKoa̱á ti̱ꞌsín chíkjoa̱ ijye‑li ni̱ta mé kjoa̱‑nioo̱ koni ꞌa̱n.
\v 11 Tjíjin‑li kóꞌsín ísikjiáa̱n kjo̱hiꞌin a̱ꞌta ꞌtse̱ Cristo ko̱ kóꞌsín mahatji̱ngi‑na xi̱ta̱ kondra̱, koni ꞌsín kjomàꞌtiaa̱n ya̱ ján na̱xi̱ndá Antioquía, Iconio ko̱ Listra. ¡Taxki̱ ndaá tsahatji̱ngi‑na xi̱ta̱, tanga jè Na̱ꞌín‑ná tsachrjejin ijyeé‑na ngaꞌtsì kjoa̱ kìi̱!
\v 12 Kixi̱í kjoa̱, ngaꞌtsì xi̱ta̱ ra mejèn‑la̱ ske̱xkón Cristo Jesús, ꞌkoa̱á ti̱ꞌsín ꞌse̱‑la̱ kondra̱ nga koa̱àtji̱ngi‑la̱.
\v 13 Tanga jñà xi̱ta̱ ra ꞌcho ꞌsín, ra konda̱cha̱, kjiꞌtá ni̱chjin, nga sa ꞌñó sa ꞌñó ꞌcho ꞌsi̱in nga sko̱ónda̱cha̱, ti̱ꞌkoa̱ jchónda̱cha̱á‑te‑la̱ ra jñà.
\p
\v 14 Tanga ra ji̱, ndaá kixi̱ tiki̱i jñà kjoa̱ ra ichitáꞌyí ra ijye ko̱ꞌsín nda kjokjiín‑li. Ijyeé tjíjin‑li yá ra tsakón‑ya‑li.
\v 15 Skanda ti̱ꞌkia̱á‑ní nga ndí ti i̱tsé ꞌki, nga ꞌyaxkin Xa̱jo̱n Tsje ra tjíꞌta ꞌÉn‑la̱ Nainá, jè ra ma‑la̱ si̱ìchji̱ne̱‑li kóꞌsín kítjo̱kajin kjo̱hiꞌin nga makjiín‑li a̱ꞌta ꞌtse̱ Cristo Jesús.
\v 16 Ngaꞌtsì ꞌén ra tjíꞌta Xa̱jo̱n‑la̱ Nainá, kjo̱bítsjen ꞌtse̱ Nainá‑ní. ꞌKoa̱á ꞌsín machjeén nga bakón‑ya‑ná, nga síkatsíjen‑ná kjoa̱ꞌcho ra ꞌnié, nga síkixi̱yanda‑ná, nga bakón‑ya‑ná kóꞌsín kixi̱ si̱jché ijo‑ná,
\v 17 mé‑ni jién ra xi̱ta̱‑la̱ Nainá ꞌmì‑ná jngo kjá nda ki̱tsa̱jnandeé nga si̱hitjasén ijyeé ngaꞌtsì kjoa̱ ra nda tjín.
\c 4
\s Kóꞌsín tjínè‑la̱ jè Timoteo nga ki̱chja̱ya ꞌÉn‑la̱ Nainá
\p
\v 1 ꞌÑó tíbiné‑la ya̱ ngixko̱n Nainá ko̱ Jesucristo ra tíjna ítjòn‑ná jè ra jeya kjꞌi̱í india‑ni koni xi̱ta̱xá ítjòn nga ki̱ìndajín‑la̱ xi̱ta̱ ra títsa̱jnakon ko̱ ra ijye ꞌken.
\v 2 Ti̱nákjoa̱yi ꞌén nda‑la̱ Cristo. Ti̱jnandi nga kiꞌta ni̱chjin ni̱ta kó chon. Ko̱ꞌtìn‑la̱ xi̱ta̱ ꞌkia̱ nga ꞌcho ꞌsi̱in; nda ti̱kixi̱yi; tìꞌtin nga ꞌñó kaꞌté‑la̱ ikon. ꞌKia̱ nga ko̱ꞌsín ꞌsi̱in, ꞌñó ꞌtè‑la̱ inìma̱‑li ti̱ꞌkoa̱ ko̱ó kjo̱nda‑li ta̱kón‑ya‑la̱.
\v 3 Ki̱jchó ni̱chjin nga jñà xi̱ta̱ mì ti̱ kì ko̱kjiín‑la̱ nga kji̱ꞌnchré ꞌén nda ra kixi̱ tjín ra jién bakon‑yeé a̱ꞌta ꞌtse̱ Cristo. Tà isa̱á kjín maestro koa̱àtsji ra ko̱ꞌsín ko̱kòn‑ya‑la̱ koni ꞌsín jñà mejèn‑la̱ nga kji̱ꞌnchré.
\v 4 Ki̱nchaꞌtaxìn‑la̱ ra kjo̱hixi̱, ko̱ jñá ki̱ji̱ꞌta‑la̱ ra taxki̱ kuendo̱ ꞌtse̱ xi̱ta̱ jchínga ra mì tsa kixi̱ kjoa̱.
\v 5 Tanga ji̱ Timoteo, inda ꞌtè‑la takìn ni̱ta mé kjoa̱‑nioo̱, ti̱kjiín kjoa̱ ꞌtse̱ kjo̱hiꞌin, kií xá ꞌti̱ìn nga ti̱kaꞌbísìn ꞌén nda‑la̱ Cristo, nda ti̱hitjasìn xá ra ji̱ kjonga̱tsji.
\p
\v 6 ꞌA̱n, ijyeé títsja‑ná ijo‑na̱ koni jngo kjo̱tjò ꞌtse̱ Nainá. Ijyeé ijchó ni̱chjin‑la̱ nga ki̱yáa̱.
\v 7 Ijyeé nda kískajàn‑tjìa̱ xá‑la̱ Cristo; ijyeé nda ísihitjásòo̱n xá ra ꞌa̱n kjonga̱tsja; ndaá tsakáti̱jnako̱ jè ꞌén ra ꞌa̱n makjiín‑na a̱ꞌta ꞌtse̱ Cristo.
\v 8 ꞌNdi̱ ꞌndi̱, jè Cristo ra xi̱ta̱xá kixi̱ tíjna, tíjnatjò jngo‑la̱ koròna̱ ján ngajmi ra ꞌa̱n tsjá‑na tà nga̱tjì‑la̱ nga kixi̱ tsakáti̱jnako̱. ꞌKia̱ nga kjꞌi̱í india‑ni ra jè, mì tsa tà ꞌa̱n ra tjábé‑na, ti̱ꞌkoa̱á tjábé‑te‑la̱ ngaꞌtsì ra tjíjngo ikon nga i̱nchikoñá‑la̱ Na̱ꞌín‑ná.
\s Kóꞌsín tjín ꞌén ra bíꞌtin Pablo jè Timoteo
\p
\v 9 Ti̱xátíyi nga ndi̱to̱n nchrabájchon‑ná.
\v 10 Nga̱ jè Demas, ijyeé kitsjin‑tákon‑na. Jè ꞌñó matsjake kjoa̱ ra tjín i̱ i̱sàꞌnde. Ya̱á kijì ya̱ na̱xi̱ndá Tesalónica. Crescente, ya̱á kijì nangi Galacia, ko̱ jè Tito ya̱á kiì nangi Dalmacia.
\v 11 Tà jé Lucas tíjnako̱‑na. ꞌKia̱ nga kji̱nchrabì, tjáha̱jchatí Marcos, nchrabáki̱i. I̱í ko̱chjeén‑na a̱ꞌta ꞌtse̱ xá ra tíꞌsiaa̱n.
\v 12 Jè Tíquico, ya̱á ísikásée̱n Éfeso.
\v 13 ꞌKia̱ nga kji̱nchrabì, ꞌjcha̱‑ná katò‑na̱ ra tsakajná ya̱ na̱xi̱ndá Troas ya̱ niꞌya‑la̱ Carpo. ꞌJcha̱‑ná jñà xa̱jo̱n‑na̱, tanga jñà ra isa̱ ꞌñó ꞌñó machjeén nga ꞌjcha̱‑ná, jñá ra chrja̱ba̱ kjòo̱n.\fig Scrolls -25%|67-cn02086b.tif|col|2TI 4:13||Xa̱jo̱n ra kisindaꞌtá ꞌén‑la̱ Nainá|2TI 4:13\fig*
\p
\v 14 Alejandro, jè ra chji̱ne̱ ki̱cha̱, ꞌñó ꞌcho tjín kjoa̱ ra tísíko̱‑na. Nainá katatsjá‑la̱ kjo̱hiꞌin tà nga̱tjì‑la̱ kjoa̱ ra tíꞌsín.
\v 15 Ngaji̱ Timoteo, ti̱kondi̱i ijo‑li a̱ꞌta ꞌtse̱ xi̱ta̱ ra̱kìi̱. ꞌÑó kondra̱ fì‑la̱ ꞌén ra bakon‑yeé.
\p
\v 16 ꞌKia̱ nga isindajín ítjòn‑na ya̱ ngixko̱n xi̱ta̱xá, ni̱yá ra tsasìko̱‑na. Ngaꞌtsì xi̱ta̱ kitsjin-takón‑na. Kì kinda̱ ꞌsín Nainá kjoa̱ kìi̱.
\v 17 Tanga jè Na̱ꞌín‑ná tsasìko̱ó‑na. Kitsjá‑na ngaꞌñó mé‑ni nga kjomà kíchjàjin‑la̱ jñà xi̱ta̱ jè ꞌén nda‑la̱ Cristo. ꞌKoa̱á ꞌsín kjomà‑ni nga kiíꞌnchré ijye ra mì tsa xi̱ta̱ judío. Nainá tsasìko̱‑na nga mì tsa ti̱ꞌkia̱ kiꞌtsì‑na kjo̱hiꞌin nga ngi iniꞌken‑na. ꞌKoa̱á ꞌsín kjomà‑ni nga tsato, nga mì ya̱ isìkàtje̱n‑jin‑na jñà xi̱ta̱ ya̱ ñánda̱ nga kitse xa.
\v 18 Na̱ꞌín‑ná ko̱si̱ko̱‑na a̱ꞌta ꞌtse̱ ngaꞌtsì kjoa̱ ra ꞌcho tjióo̱n. Ko̱ i̱ko̱ó‑na ñánda̱ nga tíbatéxoma ján ngajmi. Nainá, kataꞌse‑la̱ kjoa̱jeya ni̱ta mé nó ko̱ ni̱ta mé ni̱chjin‑nioo̱. Ko̱ꞌsín katama.
\s Ra feheꞌta‑ni, Pablo síhixoꞌta xi̱ta̱ xákjén
\p
\v 19 Ti̱hixoꞌtì jè Prisca ko̱ Aquila ko̱ xi̱ta̱ ra tjíhijyo niꞌya‑la̱ Onesíforo.
\v 20 Erasto, ya̱á tsikijna ya̱ na̱xi̱ndá Corinto. Jè Trófimo, ján isíkíjna na̱xi̱ndá Mileto. Kiya‑ní, mì tsa nda tíjna.
\v 21 Ti̱xátíyi nga ndi̱to̱n nchrabájchon‑ná ꞌkia̱ nga ti̱kje ꞌfiì ni̱chjin‑la̱ cho̱ ꞌnchán. Tísíhixoꞌtà‑li jè Eubulo, Pudente, Lino ko̱ Claudia, ko̱ ngaꞌtsì xi̱ta̱ ra ꞌndsé chibé.
\p
\v 22 Jè Jesucristo ra tíjna ítjòn‑ná katijnako̱‑li. Ngaꞌtsì‑no kataꞌse‑no kjo̱nda‑la̱. Ko̱ꞌsín katama.