\id 2TI
\h 2 Timoteo
\toc1 2 Timoteo
\mt Xo̱jo̱n carta‑la̱ San Pablo xi ma‑ne jò xi kiskiì‑la̱ Timoteo
\c 1
\s Kó tsò Pablo nga síhixatꞌaà Timoteo
\p
\v 1 ꞌA̱n, Pablo, tìkjiì‑lè xo̱jo̱n jè. Nga ꞌa̱n tsibíxáya‑na Jesucristo nga kꞌoa̱á sꞌín kjòmejèn‑la̱ Nainá. Kꞌoa̱á sꞌín kitsjaà tsoꞌba Nainá nga kíjnakon ini̱ma̱‑ná i̱tꞌaà tsꞌe̱ Cristo Jesús.
\v 2 Ngaji̱ Timoteo xi ꞌñó matsjake̱‑lè koni tsà kiꞌndí tsꞌa̱n xan‑lè, Nainá xi Na̱ꞌèn‑ná ko̱ Na̱ꞌèn‑ná Jesucristo kàtatsjá‑lè kjo̱ndaà, kàtahi̱ma̱keè‑lè, kàtasꞌe‑la̱ kjoa̱ꞌnchán i̱jiìn ini̱ma̱‑lè.
\s ꞌÉn xi tsjá Pablo i̱tꞌaà tsꞌe̱ Cristo
\p
\v 3 Mìkiì jchàajiìn‑na ko̱ na̱chrjein ko̱ ni̱tje̱n bìtsiꞌbatjì‑lè ti̱koa̱ tsjaà‑la̱ kjo̱ndaà Nainá, jè xi ꞌa̱n bexkoán koni sꞌín kijtseèxkón jñà xi̱ta̱ jchínga‑na̱ nga nguì tsjeè tjín kjo̱hítsjeèn‑na̱.
\v 4 Kꞌe̱ nga bítsjeèn‑na kjoa̱ tsꞌe̱ ndáxkoiìn mejèn‑na nga skoeè ìjngoò kꞌa‑lè mé‑ne nga ko̱tsja‑la̱ ini̱ma̱‑na̱.
\v 5 Bítsjeèn‑na nga nguì ndaà mokjeiín‑lè i̱tꞌaà tsꞌe̱ Cristo koni sꞌín kòkjeiín ítjòn‑la̱ nea̱ájchá‑lè Loida ko̱ nea̱‑lè Eunice. ꞌA̱n kꞌoa̱á sꞌín makixi̱‑na nga ngaji̱ ti̱koa̱á ndaà mokjeiín‑lè.
\p
\v 6 Koií kꞌoa̱sꞌín tìsìkítsjeèn‑lè nga ìsa̱ ndaà ti̱kjiín kjo̱tjò xi kitsjaà‑lè Nainá nga ndaà ti̱xá‑la̱, jè kjo̱tjò xi kitjoé‑lè kꞌe̱ nga ꞌa̱n tsakàsòn‑lè ndsa̱a.
\v 7 Nainá, mìtsà ini̱ma̱ tsakjón kitsjaà‑ná. Jè kitsjaà‑ná Ini̱ma̱ Tsjeè‑la̱ nga tsjá‑ná ngaꞌñó, nga tsjá‑ná kjoa̱tjòcha, nga tsjá‑ná kjo̱hítsjeèn kósꞌín sꞌe̱én nga kixi̱ si̱jchá yijo‑ná.
\v 8 Koií kjoa̱‑la̱ kì masobà‑lè nga nokjoàkoi̱i xi̱ta̱ i̱tꞌaà tsꞌe̱ Na̱ꞌèn‑ná Jesucristo. Ti̱koa̱ kì masobà‑lè xi i̱tꞌaà tsꞌa̱n nga nda̱yá tíjnaꞌya koií kjoa̱‑la̱ nga ya̱ sìxátꞌaà‑la̱ Na̱ꞌèn‑ná. Ti̱kjeiín‑ko̱‑ná kjo̱ꞌin xi i̱tꞌaà tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo. Jè Nainá tsjá‑lè ngaꞌñó xi ko̱chjeén‑lè.
\v 9 Nainá, jyeé tsachrjekàjiìn‑ná kjo̱ꞌin. Kꞌoa̱á sꞌín kiìchja̱‑ná nga tsjeè si̱jchá yijo‑ná. Mìtsà koi kjoa̱‑la̱ nga ndaà kiꞌné. Koi‑né nga kꞌoa̱sꞌín kjòmejèn‑la̱ Nainá ti̱koa̱ kitsjaà‑ná kjo̱ndaà‑la̱ xi i̱tꞌaà tsꞌe̱ Cristo skanda ti̱sa̱ tàtsꞌen‑la̱ kjoa̱ kꞌe̱ nga ti̱kjꞌeè sindaà i̱sòꞌnde.
\v 10 I̱ꞌndei̱ Nainá jyeé tsakó kjo̱ndaà‑la̱ nga jyeé jꞌiì Jesucristo xi ochrjekàjiìn‑ná kjo̱ꞌin. Jaàxìn‑ná ngaꞌñó‑la̱ kjoa̱biyaà. Xi i̱tꞌaà tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo, tsakó‑ná kjoa̱binachon ti̱koa̱ tsakó‑ná nga mìtsà jngoò kꞌa ki̱yá ni̱ta̱ kjé‑ne.
\p
\v 11 Nainá, ꞌa̱án kisìnga̱tsja‑na xá jè nga ꞌa̱n kichjàya ꞌén ndaà‑la̱ Nainá xi kjoa̱ tsꞌe̱ Cristo. Tsibíxáya‑na i̱tꞌaà tsꞌe̱ xá‑la̱ nga ꞌa̱n kokoòya‑la̱ jñà xi mìtsà xi̱ta̱ judío.
\v 12 Tseé kjo̱ꞌin tìsìkjiaán tà jè nga̱tjì‑la̱ ꞌén xi ꞌa̱n chjàya. Ta̱nga mìkiì masobà‑na. Jyeé tíjiìn‑na nga i̱tꞌaà tsꞌe̱ Cristo mokjeiín‑na. Ti̱koa̱á ndaà tíjiìn‑na nga ta̱ jngoò jè Nainá xi tjín‑la̱ ngaꞌñó. Ndaà si̱ìkinda̱ jè xá xi ꞌa̱n kisìnga̱tsja‑na skanda jè na̱chrjein kꞌe̱ nga kjoi̱í ìjngoò kꞌa‑ne Jesucristo.
\p
\v 13 Ndaà tíjiìn takoìn ꞌén ndaà xi ꞌa̱n tsakoòya‑lè koni sꞌín tjín ꞌén xi mokjeiín‑ná ko̱ kjoa̱tjòcha xi tjín‑ná nga Cristo titsa̱jnakoa̱á.
\v 14 Ndaà ti̱kitasoìn xá ndaà xi ji̱ kjònga̱tsjei. Jè si̱ìchjátꞌaà‑lè Ini̱ma̱ Tsjeè‑la̱ Nainá xi tíjnajiìn ini̱ma̱‑ná.
\p
\v 15 Jyeé tíjiìn‑lè ngatsꞌiì xi títsa̱jna nangui Asia, jyeé kitsjeiìn takòn‑na, koni jè Figelo ko̱ Hermógenes.
\v 16 Nainá kàtahi̱ma̱keè xi̱ta̱ niꞌya‑la̱ Onesíforo. Kjìn kꞌa jꞌiì síjehikon‑na. Mìkiì kjòsobà‑la̱ na̱sꞌín nda̱yá tíjnaꞌya.
\v 17 Tà sa̱á, kꞌe̱ nga jꞌiì i̱ Roma skanda mìkiì kisìkjáya nga ꞌñó tsohótsji‑na skanda kó nga kisakò‑la̱ ñánda tìjna̱a.
\v 18 Na̱ꞌèn‑ná kàtahi̱ma̱keè jè Onesíforo kꞌe̱ nga ki̱jchò na̱chrjein‑la̱ Nainá. Ngaji̱ jyeé ndaà tíjiìn‑lè, ndaà kisìchjátꞌaà‑ná ján Éfeso.
\c 2
\s Timoteo, jngoò soldado‑la̱ Cristo xi ndaà síxá‑la̱
\p
\v 1 Ngaji̱ Timoteo koni tsà kiꞌndí tsꞌa̱n xan‑lè, tjiì‑la̱ ngaꞌñó yijo‑lè i̱tꞌaà tsꞌe̱ kjo̱ndaà xi tsjá Jesucristo nga jè titsa̱jnakoa̱á.
\v 2 Jè ꞌén xi kinaꞌyà‑ná nga kichjàya nguixko̱n nga kjìn ma xi̱ta̱ xi kiìꞌnchré, kꞌoa̱á sꞌín ta̱kóya‑la̱ xi xi̱ta̱ kixi̱ xi ndaà ma‑la̱ okóya mé‑ne kꞌoa̱ ti̱sꞌín ko̱kòya ngajo‑la̱ xi̱ta̱ xi kjꞌei̱í.
\p
\v 3 Ngaji̱ Timoteo, ti̱kjeiín‑ko̱‑ná kjo̱ꞌin nga ndaà mìtꞌaà‑la̱ Jesucristo koni jngoò soldado xi síkjeiín kjo̱ꞌin.
\v 4 Jngoò xi̱ta̱ xi soldado síkitasòn mìkiì tjíꞌnde‑la̱ nga kjꞌei̱í xá skóngajiìn xi tjín i̱sòꞌnde, tjínè‑la̱ nga ya̱ si̱kitasòn‑la̱ jè xi kitsjaà‑la̱ xá mé‑ne nga ndaà kíjnako̱.
\v 5 Kꞌoa̱á ti̱sꞌín tjín jè tsꞌe̱ xi̱ta̱ xi síská. Tsà mì kixi̱í si̱ìská koni sꞌín tjín kjo̱tíxoma‑la̱ mìkiì tjoé‑la̱ chjí‑la̱.
\v 6 Xi̱ta̱ xi bínè‑la̱ yijo‑la̱ nga ndaà síxá nga bítje̱ tsojmì tjè, kꞌe̱ nga jye ko̱jchá tsojmì, jè tjoé ítjòn chiba‑la̱ tsojmì xi majchá koni tsà chjí‑la̱.
\v 7 Ti̱kítsjiìn koni sꞌín tìxan‑lè. Jè Nainá ìsa̱ ndaà tsjáya yije‑lè kjo̱hítsjeèn.
\p
\v 8 Ti̱kítsjiìn i̱tꞌaà tsꞌe̱ Jesucristo, jè xi jaáyajiìn‑la̱ mikꞌen xi tje̱‑la̱ xi̱ta̱xá ítjòn xi David kiꞌmì. Kꞌoa̱á tsò ꞌén ndaà‑la̱ Nainá xi kjoa̱ tsꞌe̱ Cristo xi ꞌa̱n chjàya.
\v 9 Koií kjoa̱‑la̱ ꞌén ndaà‑la̱ Nainá xi kjoa̱ tsꞌe̱ Cristo xi ꞌa̱n chjàya, tìsìkjiaán kjo̱ꞌin skanda naꞌñó ki̱cha̱ tjítꞌaàꞌñoá nga tìjna̱ꞌya nda̱yá koni jngoò xi̱ta̱ xi ꞌñó tsꞌe̱n. Ta̱nga jè ꞌén‑la̱ Nainá mìtsà tjítꞌaàꞌñó i̱ya nda̱yá.
\v 10 Koií kjoa̱‑la̱ tìsìkjiaán yije kjo̱ꞌin xi kjo̱ndaà tsꞌe̱ xi̱ta̱ xi xó jaàjiìn‑ne Nainá mé‑ne nga ti̱koa̱ ki̱tjokàjiìn‑ne kjo̱ꞌin xi i̱tꞌaà tsꞌe̱ Cristo Jesús; sꞌe̱é‑la̱ kjoa̱jeya xi mìkiì fehetꞌaà ni̱ta̱ kjé‑ne.
\p
\v 11 ꞌÉn koi, ꞌén kixi̱‑ne nga tsò:
\q Nga ya̱ kꞌen‑koa̱á Cristo, ti̱koa̱á ya̱á ki̱tsa̱jnakon‑koa̱á.
\q
\v 12 Tsà chíkjoa̱‑ná kjo̱ꞌin ti̱koa̱á ya̱á ko̱ti̱xomakoa̱á Cristo.
\q Tsà kixoán mìkiì bexkoan, jè kꞌoa̱á ti̱ ki̱tso̱‑ná mìkiì bexkoan.
\q
\v 13 Tsà mìkiì si̱kitasoán ꞌén xi nokjoá, ta̱nga Nainá síkitasòn ꞌén xi chja̱.
\q Mìkiì ko̱ma si̱ìkjatjìya ꞌén‑la̱.
\s Jngoò xi̱ta̱ xi ndaà síxá‑la̱ Cristo
\p
\v 14 Ti̱kítsjeèn‑la̱ kjoa̱ koi. Ti̱nókjoa̱koi̱i nga nguixko̱n Nainá mé‑ne nga mì ko̱hótiya‑ne kjoa̱ tsꞌe̱ ꞌén. Jè kjoa̱ xi chitiya‑ne ni̱mé chjí‑la̱. Ta̱ sa̱á síkitsꞌón xi̱ta̱ xi ꞌnchré.
\v 15 ꞌÑó ndaà tjínè‑la̱ yijo‑lè mé‑ne nga ndaà ki̱jna‑ne nga nguixko̱n Nainá. Ni̱mé xi ko̱sobà‑lè nga ndaà tjín xá‑lè koa̱ ndaà okoòyi ꞌén kixi̱‑la̱ Cristo.
\v 16 Kì ta̱xki̱ nokjoà‑jèn ꞌén xi mìkiì sasén‑la̱ Nainá xi ni̱mé chjí‑la̱. Jñà xi̱ta̱ xi kꞌoa̱sꞌín chja̱, ìsa̱á ꞌñó binchatꞌaàxìn‑ìsa‑la̱ Nainá.
\v 17 Jñà ꞌén xi chꞌo tsò kꞌoa̱á ngaya‑la̱ koni chꞌin nchikòn xi biꞌndo‑ne yijo‑ná. Kꞌoa̱á sꞌín chja̱ Himeneo ko̱ Fileto
\v 18 nga jyeé chinchatꞌaàxìn‑la̱ xi kjoa̱kixi̱ nga tsò: “Jè kjoa̱ xi faáya‑la̱ mikꞌen jyeé tsato‑né.” Kꞌoa̱á ma‑ne sískáya iꞌnga‑la̱ xi̱ta̱ kjoa̱ xi mokjeiín‑la̱.
\v 19 Ta̱nga Nainá jyeé tsibíjnaꞌñó tàtsꞌen jngoò kjoa̱kixi̱ ñánda tjítꞌaà ꞌén xi tsò: “Nainá beèxkon‑né xi xi̱ta̱ tsꞌe̱”; ngatsꞌiì xi tsò: “ꞌA̱n, xi̱ta̱‑la̱ Cristo‑ná, kàtinchatꞌaàxìn‑la̱ kjoa̱ xi chꞌo tjín.”
\p
\v 20 Jngoò niꞌya xi je kji, tjín tsojmì xi oro ko̱ plata. Ti̱koa̱á tjín tsojmì xi yá ko̱ xi niꞌnde. Tjín tsojmì xi na̱chrjein nchijòn mochjeén koa̱ tjín xi tà kꞌe̱ mochjeén kꞌe̱ nga ndaà tíma.
\v 21 Tsà si̱tsjeé kjo̱hítsjeèn‑ná nga ki̱nchatꞌaàxìn‑lá kjoa̱ xi chꞌo tjín, kꞌoa̱á sꞌín si̱ìkjeén‑ná Nainá koni tsojmì tsjeè xi tà kꞌe̱ mochjeén kꞌe̱ nga ndaà tíma. Titsa̱jnandaà nga si̱kitasoán ni̱ta̱ mé xá‑la̱ Nainá xi ndaà tjín.
\p
\v 22 Ngaji̱ Timoteo, ti̱si̱tꞌaàxìn‑la̱ kjo̱hítsjeèn‑la̱ i̱xti xi chꞌo tjín. Koií tꞌin tji̱ngui‑la̱ xi kjoa̱kixi̱, ko̱ kjoa̱ xi mokjeiín‑ná i̱tꞌaà tsꞌe̱ Cristo, ko̱ kjoa̱tjòcha, ko̱ kjoa̱ꞌnchán takòn. Kꞌoa̱sꞌín tꞌin tji̱ngui‑la̱ kjoa̱ koi ko̱ xi̱ta̱ xi tsjeè tjín ini̱ma̱‑la̱ nga chja̱tꞌaà‑la̱ Nainá.
\v 23 Kì kjoa̱ nchi̱kón nìsꞌin‑la̱ xi ni̱mé chjí‑la̱. Jyeé ndaà tíjiìn‑lè nga kjoa̱siì ótsji.
\v 24 Jngoò chi̱ꞌnda‑la̱ Nainá mìkiì mochjeén nga kjoa̱siì skóngajiìn. Ndaà kàtasìko̱ yije xi̱ta̱. Kàtìjnandaà nga ko̱kòya ꞌén‑la̱ Nainá. Kàtasꞌe‑la̱ kjoa̱tsetakòn mé kjoa̱ xi matꞌin.
\v 25 Ko̱ó kjo̱ndaà‑la̱ kàtasíkixi̱ya jñà xi xi̱ta̱ kondra̱, tsà koi na̱chrjein Nainá tsjá ìsa̱‑la̱ na̱chrjein nga si̱ìkájno jé‑la nga mì ti̱ jé ko̱hótsji‑ne mé‑ne nga ko̱kjeiín‑la̱ xi kjoa̱kixi̱.
\v 26 Kꞌe̱ nga táxꞌa̱nguì xko̱n, ko̱maá ki̱tjokàjiìn kjoa̱na̱cha̱n‑la̱ nei̱í nga ya̱ tjítꞌaàꞌñó‑la̱ nga kꞌoa̱sꞌín síkitasòn‑la̱ koni sꞌín mejèn‑la̱ nei̱í.
\c 3
\s Mé kjoa̱ chꞌo xi sꞌi̱in xi̱ta̱ kꞌe̱ nga tímachrañà nga kjoe̱hetꞌaà na̱chrjein
\p
\v 1 Ngaji̱ Timoteo, kàtasijiìn‑lè kꞌe̱ nga tímachrañàtꞌaà na̱chrjein nga kjoi̱í ìjngoò kꞌa‑ne Cristo, kjìn sko̱ya kjoa̱ sꞌe̱ xi mìkiì ndaà tjín.
\v 2 Jñà xi̱ta̱ xi sꞌe̱, tà yijo‑la̱á ꞌñó si̱ìsꞌin‑la̱; to̱ón ꞌñó ko̱tsjakeè; yijo‑la̱á ꞌñó ndaà si̱ìkítsa̱jna; xi̱ta̱ ꞌnga ikoón ko̱ma; ki̱chja̱jno‑la̱ Nainá ko̱ xi̱ta̱; mìkiì kiìꞌnchréñijon‑la̱ xi̱ta̱ jchínga‑la̱; mìkiì tsjá ngajo‑ne kjo̱ndaà, mìkiì skoe̱xkón Nainá,
\v 3 mìkiì si̱ìtjòkeè xíkjín, jngoò kꞌa mìkiì si̱ìje‑la̱ ikon, ꞌén ndiso tsjátꞌin xíkjín, mìkiì si̱ìkinda̱ yijo‑la̱ mé kjoa̱ xi sꞌi̱in, xi̱ta̱ chꞌo ko̱ma, kondra̱á kjoi̱‑la̱ kjoa̱ xi ndaà tjín,
\v 4 kondra̱á kjoi̱‑la̱ amigo‑la̱, mìtsà ítjòn si̱ìkítsjeèn mé kjoa̱ xi sꞌi̱in, ꞌñó ꞌnga ikon ko̱ma, jè si̱ìtsjakeè kjoa̱ tsꞌe̱ i̱sòꞌnde xi sasén‑la̱ yijo‑la̱, mìkiì si̱ìtsjakeè Nainá.
\v 5 Kꞌoa̱á sꞌín sꞌi̱in koni tsà beèxkón Nainá, ta̱nga mìkiì tsjáꞌnde nga jè ngaꞌñó‑la̱ Nainá si̱ìxájiìn ini̱ma̱‑la̱.
\p Xi̱ta̱ koi kì kiì nìsꞌin‑la̱.
\v 6 Jñà xi̱ta̱ koi, ótsjiꞌnde‑la̱ nga fahasꞌen niꞌya‑la̱ íchjín xi mìkiì beèxkón yijo‑la̱ ko̱ xi tse jé tjín‑la̱ nga ma kona̱cha̱n‑la̱. Íchjín koi, ya̱á fìtji̱ngui‑la̱ kjoa̱ xi ìsa̱ ꞌñó chꞌo tjín koni sꞌín mejèn‑la̱ yijo‑la̱.
\v 7 Kjitꞌaà na̱chrjein nchikotaꞌyà ꞌén xi̱tse̱ ta̱nga ni̱jngoò na̱chrjein fahasꞌen‑jiìn‑la̱ xi nguì kjoa̱kixi̱.
\v 8 Jñà xi̱ta̱ koi, kꞌoa̱á ti̱sꞌín binchahikon‑la̱ xi kjoa̱kixi̱, koni kisꞌiìn xi̱ta̱ chji̱ne̱ xi ma‑la̱ bíndaà xi kiꞌmì Janes ko̱ Jambres nga chinchahikon‑la̱ Moisés. Xi̱ta̱ koi, jngoò kꞌaá chꞌo tjín kjo̱hítsjeèn‑la̱. Bitjongui‑né nga nguixko̱n Nainá nga mìkiì mokjeiín‑la̱ xi kjoa̱kixi̱.
\v 9 Ta̱nga mìkiì si̱ìkijne. Ki̱jchò na̱chrjein nga skoe̱ yije xi̱ta̱ kjoa̱ tòndo̱‑la̱. Kꞌoa̱á sꞌín jcha̱tꞌin‑la̱ koni jè Janes ko̱ Jambres.
\s Kó tsò Pablo nga bítꞌin‑la̱ Timoteo nga ꞌén kixi̱ ko̱kòya
\p
\v 10 Ta̱nga ji̱ Timoteo kꞌoa̱á sꞌín tìꞌmìtji̱ngui‑la̱ koni sꞌín tsakoòya‑lè, koni sꞌín tísíjchá yijo‑na̱, koni sꞌín tjín kjo̱hítsjeèn‑na̱ mé kjoa̱ xi tìfitji̱ngui‑la̱. Kꞌoa̱á ti̱sꞌín mokjeiín‑lè koni sꞌín mokjeiín‑na ꞌa̱n i̱tꞌaà tsꞌe̱ Cristo. Kꞌoa̱á sꞌín tjín kjoa̱tsetakòn‑lè ko̱ kjoa̱tjòcha‑lè koni sꞌín tjín tsꞌa̱n. Kꞌoa̱á ti̱sꞌín chíkjoa̱ yije‑lè ni̱ta̱ mé kjoa̱‑ne koni ꞌa̱n.
\v 11 Tíjiìn‑lè koni sꞌín tìsìkjiaán kjo̱ꞌin i̱tꞌaà tsꞌe̱ Cristo ti̱koa̱ ongatji̱ngui‑na xi̱ta̱ kondra̱ koni sꞌín komàtꞌian ján na̱xa̱ndá Antioquía, Iconio ko̱ Listra. ¡Ta̱xki̱ toòn kijtseè‑na xi̱ta̱ nga tsangatji̱ngui‑na ta̱nga jè Na̱ꞌèn‑ná tsachrjekàjiìn yije‑na kjoa̱ koi!
\v 12 Kixi̱í kjoa̱, ngatsꞌiì xi mejèn‑la̱ skoe̱xkón Na̱ꞌèn‑ná Jesucristo, kꞌoa̱á ti̱sꞌín sꞌe̱‑la̱ kondra̱ nga kji̱tji̱nguikeè xi̱ta̱.
\v 13 Ta̱nga jñà xi̱ta̱ xi chꞌo sꞌín, xi kona̱cha̱n, kjitꞌaà na̱chrjein, sa̱á ꞌñó, sa̱á ꞌñó chꞌo sꞌi̱in nga skóna̱cha̱n‑la̱ xi̱ta̱, ta̱nga kꞌoa̱á ti̱sꞌín ko̱matꞌin ngajo‑ne nga skóna̱cha̱n‑la̱ xi̱ta̱ xi kjꞌei̱í.
\p
\v 14 Ta̱nga ngaji̱, ndaà kixi̱ tikoi̱i jñà kjoa̱ xi kichìtaꞌyì xi jye kꞌoa̱sꞌín ndaà kòkjeiín‑lè. Jyeé tíjiìn‑lè yá xi̱ta̱ xi tsakóya‑lè.
\v 15 Skanda ti̱kꞌe̱‑né nga ti̱sa̱ ndí ti titsjoi, kiyaxkoin Xo̱jo̱n Tsjeè‑la̱ Nainá jè xi ko̱ma‑la̱ si̱ìchji̱ne̱‑lè kó sꞌín ki̱tjokàjiìn kjo̱ꞌin nga mokjeiín‑lè i̱tꞌaà tsꞌe̱ Cristo Jesús.
\v 16 Ngatsꞌiì ꞌén xi tjítꞌaà Xo̱jo̱n‑la̱ Nainá, kjo̱hítsjeèn tsꞌe̱é Nainá nga kitjei. Kꞌoa̱á sꞌín mochjeén nga okóya‑ná, nga okó‑ná kꞌe̱ nga chꞌo ꞌnè, nga síkixi̱yandaà‑ná, nga okó‑ná ndi̱yá kixi̱,
\v 17 mé‑ne jñá xi xi̱ta̱‑la̱ Nainá ꞌmì‑ná jngoò kꞌa ndaà ki̱tsa̱jnandaá nga si̱kitasoán yije kjoa̱ xi ndaà tjín.
\c 4
\s Kó tsò Pablo nga tíbínè‑la̱ Timoteo nga ꞌÉn‑la̱ Nainá ki̱chja̱
\p
\v 1 ꞌÑó tìbìnè‑lè nga nguixko̱n Nainá ko̱ Na̱ꞌèn‑ná Jesucristo jè xi jeya kjoi̱í ìjngoò kꞌa‑ne koni xi̱ta̱xá ítjòn nga koi̱ìndaàjiìn‑la̱ xi̱ta̱ xi títsa̱jnakon ko̱ xi jye kꞌen.
\v 2 Ti̱nókjoa̱yi ꞌén ndaà‑la̱ Nainá xi kjoa̱ tsꞌe̱ Cristo. Ti̱jnandeiì nga kjitꞌaà na̱chrjein ni̱ta̱ mé kjoa̱ xi tjín. Chi̱koi̱i xi̱ta̱ kꞌe̱ nga chꞌo sꞌín; ti̱kixi̱yi; tìtꞌin‑la̱ nga ꞌñó kàtꞌeé‑la̱ ikon. Kꞌe̱ nga kꞌoa̱sꞌín sꞌi̱in, tseé tꞌi̱in takoìn, ko̱ kjo̱ndaà‑lè ta̱kóya‑la̱.
\v 3 Ki̱jchò na̱chrjein kꞌe̱ nga jñà xi̱ta̱ mì ti̱ kiì ko̱kjeiín‑la̱ nga kji̱ꞌnchré ꞌén ndaà xi kixi̱ tjín xi jñá okoòyaá i̱tꞌaà tsꞌe̱ Cristo. Kjìn maestro ko̱hótsji xi ko̱kòya‑la̱ kjoa̱ xi jñà ko̱mejèn‑la̱ nga kji̱ꞌnchré‑la̱.
\v 4 Ki̱nchatꞌaàxìn‑la̱ xi kjoa̱kixi̱, koií kji̱tꞌaà‑la̱ xi ta̱xki̱ cuento jchínga xi mìtsà kixi̱ kjoa̱.
\v 5 Ta̱nga ngaji̱ Timoteo, indaà tꞌè‑la̱ takoìn ni̱ta̱ mé kjoa̱‑ne, ti̱kjeiín kjoa̱ tsꞌe̱ kjo̱ꞌin, koi xá tꞌi̱in nga ti̱kaꞌbísoìn ꞌén ndaà‑la̱ Nainá xi kjoa̱ tsꞌe̱ Cristo, ndaà ti̱kitasoìn xá xi ji̱ kjònga̱tsjei.
\p
\v 6 ꞌA̱n, jye tìtsjaà kjo̱tjò‑la̱ yijo‑na̱ Nainá. Jyeé ijchò na̱chrjein nga ki̱yá.
\v 7 Jyeé ndaà kiskaàn‑tjià xá‑la̱ Cristo; jyeé ndaà kisìkitasoàn xá xi ꞌa̱n kjònga̱tsja; jyeé ndaà tsohóti̱jnakoa̱a jè ꞌén xi mokjeiín‑na i̱tꞌaà tsꞌe̱ Cristo.
\v 8 I̱ꞌndei̱, Cristo, xi xi̱ta̱xá kixi̱ tíjna, tíjnatjò jngoò‑la̱ corona ján ngajmiì xi ꞌa̱n tsjá‑na nga kixi̱ tsohóti̱jnakoa̱a. Kꞌe̱ nga kjoi̱í ìjngoò kꞌa‑ne, mìtsà tà ꞌa̱n xi tjoé‑na. Ti̱koa̱á tjoé‑la̱ ngatsꞌiì xi̱ta̱ xi tíjngoò ikon nga nchikoña‑la̱ Cristo.
\s Kó kitsò Pablo nga kisìxátíya‑la̱ Timoteo nga kjoi̱kon ni̱to̱n
\p
\v 9 Ti̱xátíyi nga ni̱to̱n nchrobáchon‑ná.
\v 10 Nga jè Demas, jyeé kitsjeiìn takòn‑na. Jè ꞌñó matsjakeè kjoa̱ xi tjín i̱ i̱sòꞌnde. Ján kiì na̱xa̱ndá Tesalónica. Crescente, ján kiì nangui Galacia, koa̱ jè Tito ján kiì nangui Dalmacia.
\v 11 Tà jè Lucas tíjnako̱‑na. Kꞌe̱ nga kji̱nchroboì, tjàjchatoi Marcos, nchrobákoi̱i. Ko̱chjeén‑na kjoa̱ tsꞌe̱ xá xi tjín‑na.
\v 12 Jè Tíquico, ján kisìkasén Éfeso.
\v 13 \fig Scrolls - 25% 2TI 4:13 |67-cn02086b.tif|col|2TI 4:13 ||Xo̱jo̱n xi tjítꞌaà ꞌén‑la̱ Nainá |2TI 4.13\fig*Kꞌe̱ nga kji̱nchroboì, jcha̱‑ná i̱nchro̱kisòn‑na̱ xi tsakajná ya̱ na̱xa̱ndá Troas ya̱ niꞌya‑la̱ Carpo. Jchꞌi̱i xo̱jo̱n‑na̱; jñà xi ìsa̱ ꞌñó mochjeén‑na xi chrjoa̱ kjoàn.
\p
\v 14 Alejandro, jè xi chji̱ne̱ ki̱cha̱, ꞌñó chꞌo tjín kjoa̱ xi tísíko̱‑na. Nainá, jè kàtatsjá‑la̱ kjo̱ꞌin kjoa̱ xi tísꞌín.
\v 15 Ngaji̱ Timoteo, ti̱kindi̱i yijo‑lè i̱tꞌaà tsꞌe̱ xi̱ta̱ jè. ꞌÑó kondra̱ fìtji̱ngui‑la̱ ꞌén xi okoòyaá.
\p
\v 16 Kꞌe̱ nga kisindaàjiìn ítjòn‑na nga nguixko̱n xi̱ta̱xá, ni̱yá xi tsasìko̱‑na. Ngatsꞌiì xi̱ta̱ kitsjeiìn takòn‑na. Kì kinda̱á sꞌín Nainá kjoa̱ koi.
\v 17 Ta̱nga Na̱ꞌèn‑ná tsasìko̱‑na. Kitsjaà‑na ngaꞌñó mé‑ne nga komà kichjàjiìn‑la̱ jñà xi̱ta̱ ꞌén ndaà‑la̱ Nainá xi kjoa̱ tsꞌe̱ Cristo. Kꞌoa̱á sꞌín komà‑ne nga kiìꞌnchré yije xi mìtsà xi̱ta̱ judío. Nainá tsasìko̱‑na nga mìkiì kisìkꞌen‑na xi̱ta̱ xi tsibíndaàjiìn‑na.
\v 18 Na̱ꞌèn‑ná ko̱si̱ko̱‑na i̱tꞌaà tsꞌe̱ ngatsꞌiì kjoa̱ xi chꞌo tjín. Kji̱ko̱‑na ñánda tíhotíxoma ján ngajmiì. Nainá, kàtasꞌe‑la̱ kjoa̱jeya ni̱ta̱ mé nó‑ne ni̱ta̱ mé na̱chrjein‑ne. Kꞌoa̱sꞌín kàtama.
\s Xi fehetꞌaà‑ne, Pablo síhixatꞌaà xi̱ta̱ xíkjín
\p
\v 19 Ti̱ixatꞌeì jè Priscila ko̱ Aquila ko̱ xi̱ta̱ niꞌya‑la̱ Onesíforo.
\v 20 Erasto, ján tsibìjna na̱xa̱ndá Corinto. Jè Trófimo, ján kisìkíjna na̱xa̱ndá Mileto. Xkꞌén‑né.
\v 21 Ti̱xátíyi nga ni̱to̱n nchrobáchón‑ná kꞌe̱ nga ti̱kjꞌeè fꞌiì na̱chrjein choòn ꞌnchán. Tísíhixatꞌaà‑lè Eubulo, Pudente, Lino ko̱ Claudia, ko̱ ngatsꞌiì xi̱ta̱ xi ꞌndsè chibá.
\p
\v 22 Jè kàtìjnako̱‑lè Jesucristo xi otíxoma‑ná. Ngatsꞌioò, jè kàtìjnako̱‑nò kjo̱ndaà‑la̱. Kꞌoa̱sꞌín kàtama.