\id TIT
\h Tito
\toc1 Tito
\mt Xa̱jo̱n ra tsikínda jè Pablo ra isìkasén‑la̱ jè Tito
\c 1
\s Kóꞌsín síhixoꞌta Pablo jè Tito
\p
\v 1 ꞌA̱n Pablo, ra chi̱ꞌnda‑la̱ Nainá ma. Ti̱ꞌkoa̱á ꞌa̱án tsikíxáya‑na Jesucristo mé‑ni nga ko̱kjiín‑la̱ a̱ꞌta ꞌtse̱ jñà xi̱ta̱ ra xá jè Nainá tsjahíjin‑ni, ti̱ꞌkoa̱ ske̱ ra kjo̱hixi̱ nga ko̱ma‑la̱ ske̱xkón Nainá.
\v 2 ꞌKoa̱á ꞌsín ko̱ma tà nga̱tjì‑la̱ nga tjíjngo ikon nga i̱nchikoñá‑la̱ nga ꞌse̱‑la̱ kjo̱binachon inìma̱‑la̱ ni̱ta mé ni̱chjin‑nioo̱, koni ꞌsín ijye kitsjà tsaꞌba Nainá skanda ꞌkia̱ nga ti̱kjè sinda i̱sàꞌnde. Nainá mì tsa ꞌén ndiso chja̱.
\v 3 ꞌKia̱ nga ijye ijchò ni̱chjin, Nainá ra bachrjekàjin‑ná kjo̱hiꞌin isikatsíjeén ꞌén‑la̱ a̱ꞌta ꞌtse̱ ꞌén nda‑la̱ Cristo ra ko̱ꞌsín chjàya ko̱ ꞌkoa̱á ꞌsín kitsjà kjo̱hixi̱ nga ꞌa̱n isìnga̱tsja‑na xá ra̱kìi̱.
\v 4 Ngaji̱, Tito, ra koni tsa iꞌndí‑na̱ xin‑la nga ngásòn makjiín‑ná a̱ꞌta ꞌtse̱ Cristo, tísikásén‑la xa̱jo̱n jè. Nainá ra Na̱ꞌín‑ná ma ko̱ jè Jesucristo ra tíjna ítjòn‑ná katatsjá‑la kjo̱nda ko̱ kjo̱ꞌnchán ya̱ a̱jin inìma̱‑li.
\s Xá‑la̱ Tito ya̱ ján nangi Creta
\p
\v 5 Kií xá ya̱ isíkíjna‑la ján nangi Creta nga ji̱ si̱kixi̱yi xá ra chijaꞌta‑isa. ꞌKoa̱á ti̱ꞌsín kítsja‑la kjo̱téxoma nga ki̱nchandi xi̱ta̱ jchínga ra si̱ìkinda̱ na̱xi̱ndá‑la̱ Nainá nga jngó jngó na̱xi̱ndá.
\v 6 Xi̱ta̱ jchínga ra si̱hitjasòn xá, jñá‑ní ra nda i̱nchisíjchá ijo‑la̱ nga mì tsa yá ra ꞌcho tsò‑la̱; ra jngo ma‑ni chjo̱ón‑la̱. Ko̱ jñà i̱xti‑la̱ machjeén‑ní nga nda katakjiín‑la̱ a̱ꞌta ꞌtse̱ Cristo. Mì kì nda tjín tsa yá ra ki̱tso̱‑la̱ nga kjoa̱ ꞌtse̱ i̱sàꞌndeé tjímajin ko̱ nga mì ma‑la̱ ꞌnchréhijon.
\v 7 Jè xi̱ta̱ ra síkinda̱ na̱xi̱ndá‑la̱ Nainá ra xá‑la̱ Nainá síhitjasòn, machjeén‑ní nga nda ꞌsi̱in, mé‑ni nga mì yá ra ꞌcho ki̱tso̱‑la̱. Mì kì tjínè‑la̱ nga ꞌnga ikon ko̱ma; mì kì tjínè‑la̱ nga taxki̱ ko̱jti‑la̱; nga xán ko̱hijtako̱; nga xi̱ta̱ ska̱jàn‑ko̱; ko̱ mì kì tjíꞌnde tsa to̱n chijé ko̱tsjake.
\v 8 Ta isa̱á ndaá katasísin‑la̱ xi̱ta̱ ra bijchójkon. Jé katamatsjake kjoa̱ ra nda tjín. Indakjoa̱ káꞌté‑la̱ ikon. Kixi̱ katijnako̱ xi̱ta̱. Tsje katasíjchá ijo‑la̱ ya̱ ngixko̱n Nainá; nda katasíkinda̱ ijo‑la̱ nga mì taxki̱ ꞌsi̱in.
\v 9 Nda kjón kátíjin ikon ꞌén kixi̱ koni ꞌsín kiꞌsena̱jmí‑la̱, mé‑ni nga ko̱ ꞌén nda ra bakón‑ya ko̱ma ki̱ìꞌtin‑ni xi̱ta̱ nga ꞌñó káꞌté‑la̱ ikon, ti̱ꞌkoa̱á ko̱ma si̱ikixi̱ya ra kondra̱ fì‑la̱ jè ra kjo̱hixi̱.
\s Kóꞌsín ꞌsín xi̱ta̱ ra kjꞌií ꞌsín tjín ꞌén ra bakón‑ya
\p
\v 10 Tà nga̱tjì‑la̱, tjín jchán xi̱ta̱ ra tájajín tjín inìma̱‑la̱ nga bakón‑ya ꞌén ra nìmé chjí‑la̱ ti̱ꞌkoa̱ konda̱cha̱‑la̱ xi̱ta̱ ra kjꞌií; jñá kjón ra ꞌñó bínè‑la̱ xi̱ta̱ ra kjꞌií nga kjo̱ꞌñó si̱ꞌta chi̱ba̱ ijo‑la̱ kjoa̱ ꞌtse̱ circuncisión.
\v 11 Jñà xi̱ta̱ kìi̱ machjeén‑la̱ nga kíchjaꞌa, nga̱ jñá sískáya‑la̱ ngaꞌtsì xi̱ta̱ ra títsa̱jna nga jngó jngó niꞌya. Tà jé ra mejèn‑la̱ nga ta to̱n síchijéꞌta‑la̱ xi̱ta̱ nga ko̱tjín ꞌén ra bakón‑ya‑la̱ ra nìmé chjí‑la̱.
\p
\v 12 Jngo xi̱ta̱ chji̱ne̱ ra ti̱ya̱‑ni i̱ꞌnde‑la̱ nangi Creta, ꞌkoa̱á ꞌsín kitsò‑la̱ xi̱ta̱ xákjén: “Jñà xi̱ta̱ Creta, xi̱ta̱ ndiso‑ní, xi̱ta̱ ꞌtse̱n‑ní koni tsa cho̱ ijñá, xi̱ta̱ chrjáꞌa‑ní, xi̱ta̱ ꞌtsé‑ní.”
\v 13 ꞌÉn kixi̱í ra kiìchja̱ xi̱ta̱ ra̱kìi̱; ra ji̱ Tito, kií ko̱ꞌsín tíxian‑la, ꞌñó ti̱nákjoa̱ki̱i mé‑ni nga nda kítsa̱jna‑ni koni ꞌsín makjiín‑la̱ a̱ꞌta ꞌtse̱ Cristo,
\v 14 ko̱ mé‑ni nga mì jñà si̱ìsin‑la̱ kuendo̱ ra nìmé chjí‑la̱ ra fìtji̱ngi iꞌka‑la̱ xi̱ta̱ judío. Ti̱ꞌkoa̱ mì jñà si̱ìsin‑la̱ kjo̱téxoma‑la̱ xi̱ta̱ ra minchaꞌtaxìn‑la̱ ra kjo̱hixi̱.
\p
\v 15 Jñà xi̱ta̱ ra tsje tjín kjo̱bítsjen‑la̱, tsjeé ma ijye‑la̱ ni̱ta mé‑nioo̱. Tanga jñà xi̱ta̱ ra mì kì tsje tjín kjo̱bítsjen‑la̱ ko̱ mì kì makjiín‑la̱ a̱ꞌta ꞌtse̱ Cristo, sabà tjé ma‑la̱ ni̱ta mé‑nioo̱; skanda tjé tjín‑te jè kjo̱bítsjen‑la̱ ko̱ inìma̱‑la̱.
\v 16 ꞌKoa̱á ꞌsín tsò nga beé Nainá tanga jñà kjoa̱ ra ꞌsín, ya̱á bakón nga mì tsa kixi̱ kjoa̱. Xi̱ta̱ kìi̱, ꞌñó ꞌcho ꞌsín, mì kì ma‑la̱ ꞌnchréhijon, ti̱ꞌkoa̱ nì mé chjí‑la̱, nga ni̱jngo ma‑la̱ síhitjasòn xá ra nda tjióo̱n.
\c 2
\s Kjo̱bítsjen ra nda tjín ta̱kón‑yi
\p
\v 1 Ngaji̱, ꞌkoa̱á ꞌsín ti̱nákji̱i koni ꞌsín bakèn‑la̱ ꞌén nda ra jién bakon‑yeé.
\v 2 Jñà xi̱ta̱ jchínga ꞌtse̱ na̱xi̱ndá‑la̱ Nainá, indakjoa̱ kataꞌsín; nda kataꞌyaxkón; nda kjo̱bítsjen kataꞌse‑la̱; nda katitsa̱jnako̱ kjoa̱ ra makjiín‑la̱ ko̱ kjo̱tsjacha‑la̱, tse inìma̱ kataꞌse‑la̱ mé‑ni chíkjoa̱‑la̱ kjo̱hiꞌin.
\v 3 Jñà íchjín jchínga, ꞌkoa̱á ꞌsín katasíjchá ijo‑la̱ koni xi̱ta̱‑la̱ Nainá. Kì xi̱ta̱ chja̱jno‑la̱. Kì xán báhijtako̱. Kií katakón‑ya kjoa̱ ra nda tjín.
\v 4 ꞌKoa̱á ꞌsín katakón‑ya‑la̱ íchjín ra ꞌsa̱ i̱xti, nga tsjake kataꞌsín ꞌxi̱n‑la̱, ti̱ꞌkoa̱ tsjake kataꞌsín i̱xti‑la̱.
\v 5 ꞌKoa̱ ꞌsín nda katakón‑ya nga nda katasíjchá ijo‑la̱; tsje katitsa̱jnako̱ ijo‑la̱; nda katasíkinda̱ niꞌya‑la̱; nda xi̱ta̱ katama; kataꞌnchréhijon‑la̱ ꞌxi̱n‑la̱; mé‑ni nga mì yá ra ki̱chja̱jno‑ila̱ ꞌén‑la̱ Nainá.
\p
\v 6 ꞌKoa̱ ti̱ꞌsín tinè‑la̱ jñà xi̱ta̱ ꞌxi̱n ra i̱xti‑isa, nga nda katasíjchá ijo‑la̱.
\v 7 Ni̱ta mé kjoa̱‑ni ra tjín, ji̱í ti̱jna ítjìn nga nda ꞌti̱ìn. ꞌKia̱ nga ko̱kón‑ya‑la̱ xi̱ta̱, kixi̱ ti̱kíjni kjo̱bítsjen‑li, ꞌén kixi̱ ti̱nákji̱i;
\v 8 nda tsò ꞌén ra ti̱nákji̱i ra mì yá bachrjengi mé‑ni ꞌkia̱ nga kji̱ꞌnchré‑la̱ jñà ra xi̱ta̱ kondra̱, ko̱sabá‑la̱, ni̱mé sa̱kò‑la̱ ra ꞌcho ki̱tso̱‑ná.
\p
\v 9 Ko̱ꞌtìn‑la̱ jñà xi̱ta̱ ra chi̱ꞌnda títsa̱jnaꞌñó, nda katasíhitjasòn ijye‑la̱ ni‑la̱, nda katasísin‑la̱ mé‑ni nga tsja ꞌse̱‑la̱, kì kjingíꞌa‑jìn;
\v 10 kì síchijéꞌta‑la̱ ni‑la̱. Tà isa̱á nda kataꞌsín nga kataꞌya‑la̱ nga xi̱ta̱ kixi̱‑ní. ꞌKoa̱á ꞌsín ske̱‑ni xi̱ta̱ ra kjꞌií nga nda tjín kjo̱téxoma‑la̱ Nainá ra bachrjekàjin‑ná kjo̱hiꞌin.
\p
\v 11 Nainá ijyeé tsakón kjo̱nda‑la̱ nga ngaꞌtsì xi̱ta̱ ra tjín nga tjíjtsa i̱sàꞌnde maá ki̱tjokajin kjo̱hiꞌin.
\v 12 Jè kjo̱nda‑la̱ Nainá, ꞌkoa̱á ꞌsín bakón‑ya‑ná nga mì ti̱ kì ko̱ꞌsín ꞌsia̱n‑ná nga mì ma‑ná ꞌyaxkén Nainá, ti̱ꞌkoa̱ mì ti̱jñà si̱sin‑lá kjoa̱ꞌcho ra síjé ijo‑ná ra tjín i̱sàꞌnde. ꞌKia̱ nga ijye ki̱jmié kjoa̱ kìi̱, indakjoa̱ si̱kíjneé kjo̱bítsjen‑ná, xi̱ta̱ kixi̱í ka̱meé, ti̱ꞌkoa̱á nda jcha̱xkén Nainá ni̱chjin ra titsa̱jneé ꞌndi̱ ꞌndi̱.
\v 13 ꞌKoa̱á ꞌsín ꞌsie̱én kjoa̱ kìi̱ nga i̱nchichiñá‑lá kjo̱nda ra ꞌñó nda tjín nga jche̱é kjoa̱jeya‑la̱ Jesucristo ꞌkia̱ nga ki̱tjojen india‑ni. Jesucristo ra Nainá ra ꞌñó ꞌnga tíjna ra bachrjekàjin‑ná kjo̱hiꞌin.
\v 14 Jè Jesucristo kitsjá ijo‑la̱ nga ꞌken ngajo‑ná. Jè tsikíchjítjì‑ná mé‑ni nga kítjo̱kajin‑ná ngaꞌtsì kjoa̱ ꞌtse̱ jé ra itsabáꞌñó‑ná ti̱ꞌkoa̱ si̱ìtsje‑ná nga ngi xi̱ta̱ na̱xi̱ndá ꞌtse̱ ka̱meé. Ko̱ ngi tjíjngo takén nga si̱hitjasén kjoa̱ ra nda tjióo̱n.
\p
\v 15 ꞌKoa̱á ꞌsín ta̱kón‑yi, ti̱ꞌkoa̱ tìꞌtin xi̱ta̱. ꞌÑó ti̱nákjoa̱ki̱i koni ꞌsín tjíꞌnde‑li nga ko̱te̱xomi. Kì yá ra bachrjengi‑li.
\c 3
\s Nda si̱hitjasén jñà ꞌén ra makjiín‑ná
\p
\v 1 Ti̱kítsjen‑la̱ nga katabexkón ra xi̱ta̱xá títsa̱jna ko̱ ngaꞌtsì ra kjo̱téxoma tjíya tsja, nda kataꞌnchréhijon‑la̱. Katasíhitjasòn ngaꞌtsì xá ra nda tjín.
\v 2 Ko̱ꞌtìn‑la̱ kì xi̱ta̱ chja̱jno‑la̱; kì xi̱ta̱ kjaán‑ko̱; kjo̱nda‑ní ra kataꞌsín, ngi indakjoa̱á katasíko̱ ngaꞌtsì xi̱ta̱.
\p
\v 3 Nga̱ ti̱ꞌkoa̱á jién, nga ti̱ꞌsa̱ kjotseé, mì kì mé machi̱ya‑ná. Mì kì ma‑ná naꞌyáhijeén. Xín ndi̱yá tsikimayeé. Jñá kiꞌnié ngaꞌtsì kjoa̱ ra ꞌcho tjín koni ꞌsín síjé ijo‑ná ko̱ kjoa̱ ra sasén‑la̱. Ya̱á tsikìtsa̱jnajieén kjoa̱ꞌcho ko̱ kjo̱xìtakòn. Tsakén‑ná nga isìjtike‑ná xi̱ta̱ ko̱ ti̱ꞌkoa̱á jién inijtichaá‑teé xàngie̱é.
\v 4 Tanga Nainá ra bachrjekàjin‑ná kjo̱hiꞌin, ꞌkia̱ nga tsakón kjo̱nda‑la̱ ko̱ kjo̱tsjacha‑la̱ a̱ꞌta ꞌtse̱ xi̱ta̱,
\v 5 tsachrjekàjin‑ná kjo̱hiꞌin. Mì tsa ki‑ni nga kixi̱ kiꞌnié. Ta ki‑ní nga kjòhi̱ma̱ke‑ná. ꞌKia̱ nga isìtsje inìma̱‑ná, kitsin xi̱tse̱é india‑ná ko̱ jé Inìma̱ Tsje‑la̱ Nainá isìxi̱tse̱ya‑ná.
\v 6 Nainá ꞌñó nda isíkíjnajin ya̱ inìma̱‑ná jè Inìma̱ Tsje‑la̱ ra a̱ꞌta ꞌtse̱ Jesucristo ra bachrjekàjin‑ná kjo̱hiꞌin.
\v 7 ꞌKia̱ nga ijye isìkixi̱ya‑ná kjo̱nda‑la̱ Nainá, ꞌkoa̱á ꞌsín ki̱tsa̱jneé nga i̱nchichiñá‑lá ko̱ tjíjngoó takén nga jè inìma̱‑ná ꞌse̱é‑la̱ kjo̱binachon ra mì feheꞌta, ra tjábé‑ná tà nga̱tjì‑la̱ i̱xti‑la̱ Nainá ꞌmì‑ná.
\p
\v 8 ꞌÉn kìi̱, ngi ꞌén kixi̱‑ní. ꞌKoa̱á ꞌsín mejèn‑na nga ꞌñó tinè‑la̱ xi̱ta̱, mé‑ni jñà xi̱ta̱ ra makjiín‑la̱ a̱ꞌta ꞌtse̱ Nainá nda katasísin‑la̱ kjoa̱ ra nda tjín. Kjoa̱ kìi̱ ꞌñó nda tjín; machjeén‑la̱ ngaꞌtsì xi̱ta̱.
\v 9 Tanga kì jñà nisin‑la̱ kjoa̱ ra nìmé síchi̱ya‑ná ko̱ kjoa̱ ra ꞌtse̱ xi̱ta̱ jchínga kjotseé ra mì tsa kixi̱ kjoa̱. Kì kjo̱si nisin‑la̱ ko̱ kjoa̱ ra chitiya‑ná ꞌtse̱ kjo̱téxoma‑la̱ Moisés. Kjoa̱ kìi̱, mì kì machjeén, nìmé chjí‑la̱.
\p
\v 10 Jè xi̱ta̱ ra na̱xi̱ndá‑la̱ Cristo mejèn‑la̱ si̱ìjòya, ti̱nákjoa̱ ꞌtaxìn jò jàn ꞌka̱‑la̱. Tsa mì kì kji̱ꞌnchréhijon‑li, ti̱náchrjekajin ya̱ na̱xi̱ndá‑la̱ Nainá.
\v 11 Ji̱, ijyeé ꞌyi nga jè xi̱ta̱ ra̱kìi̱, ijyeé itsón kjo̱bítsjen‑la̱. ꞌChoó tíꞌsín. Jé tíbánè‑la̱ ijo‑la̱.
\s ꞌÉn ra tsjá‑la̱ jè Tito jè Pablo ra feheꞌta‑ni
\p
\v 12 ꞌKia̱ nga sikásén‑la Artemas ko̱ ñá tsa jè Tíquico, ti̱xátíyi nga nchrabájchon‑ná ya̱ Nicópolis. Ijyeé ko̱ꞌsín ískosòn‑la̱, nga̱ ya̱á kóti̱jna ꞌkia̱ nga ni̱chjin cho̱ ꞌnchán.
\v 13 Ti̱si̱ki̱i Zenas, jè ra nda be kjo̱téxoma, ko̱ Apolos; ꞌtiì‑la̱ mé ra machjeén‑la̱ mé‑ni nga ko̱ma ki̱ji̱‑ni ñánda̱ nga i̱nchifì, nga nìmé ra si̱ìjchijaꞌta‑la̱.
\v 14 Jñà ra xi̱ta̱ tsa̱jién, ꞌkoa̱á ti̱ꞌsín katama‑la̱ kjoa̱ ra nda tjín, nga katasiko̱ xi̱ta̱ tsa mé ra chijaꞌta‑la̱, mé‑ni nga nda katasíchjeén‑ni ni̱chjin ra tíꞌbì‑la̱ nga kátíjna jngo kjoa̱ ra chjí‑la̱.
\s Kjoa̱ nìhixoꞌta ra feheꞌta‑ni
\p
\v 15 Ngaꞌtsì xi̱ta̱ ra i̱ títsa̱jnako̱‑na tísíhixoꞌtà‑li. Ti̱ꞌkoa̱á ti̱hixoꞌtì ijyi jñà ra matsjake‑ná nga ngásòn makjiín‑ná a̱ꞌta ꞌtse̱ Cristo. Kjo̱nda‑la̱ Nainá katijnako̱‑no ngaꞌtsì‑no. Ko̱ꞌsín katama.