\id TIT
\h Tito
\toc1 Tito
\mt Xo̱jo̱n carta‑la̱ San Pablo xi kiskiì‑la̱ Tito
\c 1
\s Kó tsò Pablo nga síhixatꞌaà Tito
\p
\v 1 ꞌA̱n, Pablo, xi chi̱ꞌnda‑la̱ Nainá ma. Ti̱koa̱ ꞌa̱n tsibíxáya‑na Na̱ꞌèn‑ná Jesucristo mé‑ne nga ko̱kjeiín‑la̱ i̱tꞌaà tsꞌe̱ Cristo jñà xi̱ta̱ xi xó jè Nainá jaàjiìn‑ne, ti̱koa̱ skoe̱ xi kjoa̱kixi̱ nga ko̱ma‑la̱ skoe̱xkón Nainá.
\v 2 Xi̱ta̱ koi kꞌoa̱á sꞌín ko̱matꞌin nga tíjngoò ikon nga nchikoña‑la̱ nga kítsa̱jnakon ini̱ma̱‑la̱ ni̱ta̱ kjé‑ne koni sꞌín kitsjaà tsoꞌba Nainá skanda kꞌe̱ nga ti̱kjꞌeè sindaà i̱sòꞌnde. Nainá mìkiì kona̱cha̱n.
\v 3 Kꞌe̱ nga jye ijchò na̱chrjein, Nainá kisìkatsejèn ꞌén‑la̱ i̱tꞌaà tsꞌe̱ ꞌén ndaà‑la̱ Nainá xi kjoa̱ tsꞌe̱ Cristo xi ꞌa̱n chjàya. Na̱ꞌèn‑ná kisìnga̱tsja‑na xá jè nga kꞌoa̱á sꞌín tsatíxoma Nainá xi ochrjekàjiìn‑ná kjo̱ꞌin.
\v 4 Ngaji̱, Tito, koni tsà kiꞌndí tsꞌa̱n xan‑lè nga ngásòn mokjeiín‑ná i̱tꞌaà tsꞌe̱ Cristo, tìsìkasén‑lè xo̱jo̱n jè. Nainá xi Na̱ꞌèn‑ná ko̱ Na̱ꞌèn‑ná Jesucristo xi ochrjekàjiìn‑ná kjo̱ꞌin kàtatsjá‑lè kjo̱ndaà‑la̱, kàtahi̱ma̱keè‑lè, ti̱koa̱ ꞌnchán kàtasíkíjna ini̱ma̱‑lè.
\s Kjoa̱ xi mochjeén tsꞌe̱ xi̱ta̱ xi síkitasòn xá ya̱ i̱jiìn na̱xa̱ndá‑la̱ Nainá
\p
\v 5 Koií xá kisìkíjna‑lè ján nangui Creta nga sikixi̱yi xá xi chijatꞌaà‑ìsa. Kꞌoa̱á ti̱sꞌín tsatíxoma‑lè nga ki̱nchandeiì xi̱ta̱ jchínga xi si̱ìkinda̱ na̱xa̱ndá‑la̱ Nainá nga jngoò ìjngoò na̱xa̱ndá.
\v 6 Xi̱ta̱ jchínga xi si̱ìkitasòn xá, jñà‑né xi ndaà nchisíjchá yijo‑la̱ nga mì yá xi chꞌo ki̱tso̱‑la̱; xi jngoò ma chjo̱ón‑la̱. Ko̱ jñà i̱xti‑la̱ mochjeén‑né nga ndaà mokjeiín‑la̱ i̱tꞌaà tsꞌe̱ Cristo nga mìtsà yá xi̱ta̱ ónè‑la̱ kjoa̱ nga kjoa̱ská tjímajiìn ko̱ nga mìkiì ꞌnchréñijon.
\v 7 Jè xi̱ta̱ xi síkinda̱ na̱xa̱ndá‑la̱ Nainá xi xá‑la̱ Nainá síkitasòn, mochjeén‑né nga ndaà sꞌi̱in mé‑ne nga ni̱yá xi chꞌo ki̱tso̱‑la̱. Mìkiì mochjeén nga ꞌnga ikon ko̱ma; mì ta̱xki̱ ko̱jti‑la̱; mì xán ko̱hijtako̱; mì xi̱ta̱ ska̱àn‑ko̱; ko̱ mì to̱n chijé ko̱tsjakeè.
\v 8 Ta̱ sa̱á ndaà kàtasísꞌin‑la̱ xi̱ta̱ xi bijchókon. Kàtamatsjakeè kjoa̱ xi ndaà tjín. Indaà kàtìjna ikon. Kixi̱ kàtìjnako̱ xi̱ta̱. Tsjeè kàtasíjchá yijo‑la̱ nga nguixko̱n Nainá, ndaà kàtasíkinda̱ yijo‑la̱ nga mì ta̱xki̱ sꞌi̱in.
\v 9 Ndaà kàtíjiìn ikon ꞌén kixi̱ koni sꞌín kisꞌeno̱jmí‑la̱ mé‑ne nga i̱tꞌaà tsꞌe̱ ꞌén ndaà xi ko̱kòya ko̱ma ki̱ìtin‑la̱ xi̱ta̱ nga ꞌñó kàtꞌeé‑la̱ ikon ti̱koa̱ ko̱ma si̱ìkixi̱ya xi kondra̱ fìtji̱ngui‑la̱ xi kjoa̱kixi̱.
\p
\v 10 Koií kjoa̱‑la̱ tjín jchán xi̱ta̱ xi tájaàjiìn nga okóya ꞌén xi ni̱mé chjí‑la̱ ti̱koa̱ kona̱cha̱n‑la̱ xi̱ta̱ xi kjꞌei̱í; ko̱ ti̱jñà‑ne xi ꞌñó bínè‑la̱ xi̱ta̱ xi kjꞌei̱í nga kjo̱ꞌñó si̱tꞌaà chi̱ba̱‑la̱ yijo‑la̱ kjoa̱ tsꞌe̱ circuncisión.
\v 11 Jñà xi̱ta̱ koi mochjeén‑né nga kíchjoàꞌa nga sískáya‑la̱ ngatsꞌiì xi̱ta̱ xi títsa̱jna nga jngoò ìjngoò niꞌya. Tà jè xi mejèn‑la̱ nga to̱n síchijétꞌaà‑la̱ xi̱ta̱ nga kꞌoa̱ tjín ꞌén xi okóya xi ni̱mé chjí‑la̱.
\p
\v 12 Jngoò xi̱ta̱ chji̱ne̱ xi ti̱ya̱‑ne i̱ꞌnde‑la̱ Creta kꞌoa̱á kitsò‑la̱ xi̱ta̱ xíkjín: “Jñà xi̱ta̱ Creta, xi̱ta̱ ndiso‑né, xi̱ta̱ tsꞌe̱n‑né koni tsà cho̱ ijñá, xi̱ta̱ chrjáꞌa‑né, xi̱ta̱ tsꞌeè‑né.”
\v 13 ꞌÉn kixi̱í xi kiìchja̱ xi̱ta̱ jè; ngaji̱, Tito, koií kjoa̱‑la̱ ꞌñó ti̱nókjoa̱koi̱i mé‑ne nga ndaà kítsa̱jnako̱‑ne koni sꞌín mokjeiín‑la̱ i̱tꞌaà tsꞌe̱ Cristo,
\v 14 koa̱ mé‑ne nga mì jñà si̱ìsꞌin‑la̱ cuento xi nìmé chjí‑la̱ xi fìtji̱ngui iꞌnga‑la̱ xi̱ta̱ judío ti̱koa̱ mì jñà si̱ìsꞌin‑la̱ kjo̱tíxoma tsꞌe̱ xi̱ta̱ xi binchatꞌaàxìn‑la̱ kjoa̱kixi̱.
\p
\v 15 Jñà xi̱ta̱ xi tsjeè tjín kjo̱hítsjeèn‑la̱ tsjeè yije ma‑la̱ ni̱ta̱ mé‑ne. Ta̱nga jñà xi̱ta̱ xi mì tsjeè tjín kjo̱hítsjeèn‑la̱ koa̱ mìkiì mokjeiín‑la̱ i̱tꞌaà tsꞌe̱ Cristo, sa̱á tjé yije ma‑la̱ ni̱ta̱ mé‑ne; skanda jè ini̱ma̱‑la̱ ko̱ kjo̱hítsjeèn‑la̱ tjé tjín.
\v 16 Kꞌoa̱á tsò nga beèxkon Nainá ta̱nga jñà kjoa̱ xi sꞌín ꞌyaá‑la̱ nga mìtsà kixi̱ kjoa̱. Xi̱ta̱ koi, ꞌñó chꞌo sꞌín, mìkiì ꞌnchréñijon, ti̱koa̱ ni̱mé chjí‑la̱ nga ni̱jngoò ma‑la̱ síkitasòn xá xi ndaà tjín.
\c 2
\s Kjo̱hítsjeèn xi ndaà tjín ta̱kóyi
\p
\v 1 Ngaji̱, Tito, kꞌoa̱á sꞌín ti̱nókjoi̱i koni sꞌín okꞌìn‑la̱ ꞌén ndaà xi jñá okoòyaá
\v 2 nga jñà xi̱ta̱ jchínga tsꞌe̱ na̱xa̱ndá‑la̱ Nainá, indaàkjoa̱ kàtasꞌín; ndaà kàtayaxkón; ndaà kjo̱hítsjeèn kàtasꞌe‑la̱; ndaà kàtìtsa̱jnako̱ kjoa̱ xi mokjeiín‑la̱, ko̱ kjoa̱tjòcha‑la̱ ko̱ kjoa̱tsejta‑la̱ mé‑ne nga ki̱chìkjoa̱ko̱‑la̱ kjo̱ꞌin.
\v 3 Jñà íchjín jchínga, kꞌoa̱sꞌín kàtasíjchá yijo‑la̱ koni xi̱ta̱‑la̱ Nainá. Kì xi̱ta̱ chja̱jno‑la̱. Kì xán báhijtako̱. Koií kàtakóya kjoa̱ xi ndaà tjín.
\v 4 Kꞌoa̱á sꞌín kàtakóya‑la̱ íchjín i̱xti nga tjòkeè kàtasꞌín íchjá‑la̱, ti̱koa̱ tjòkeè kàtasꞌín i̱xti‑la̱.
\v 5 Kꞌoa̱á sꞌín ndaà kàtakóya nga ndaà kàtasíjchá yijo‑la̱; tsjeè kàtìtsa̱jnako̱ yijo‑la̱; ndaà kàtasíkinda̱ niꞌya‑la̱; ndaà xi̱ta̱ kàtama; kàtaꞌnchréñijon‑la̱ íchjá‑la̱, mé‑ne nga mì yá xi ki̱chja̱jno‑la̱ ꞌén‑la̱ Nainá.
\p
\v 6 Kꞌoa̱ ti̱sꞌín tìnè‑la̱ jñà íchjá xi i̱xti‑ìsa nga ndaà kàtasíjchá yijo‑la̱.
\v 7 Ni̱ta̱ mé kjoa̱ xi tjín, ji̱ ti̱jna ítjoìn nga ndaà tꞌi̱in. Kꞌe̱ nga ko̱kóya‑la̱ xi̱ta̱, kixi̱ ti̱kíjni kjo̱hítsjeèn‑lè; ꞌén kixi̱ ti̱nókjoi̱i;
\v 8 ndaà tsò ꞌén xi ti̱nókjoi̱i xi mì yá ko̱chrjekàngui mé‑ne kꞌe̱ nga kji̱ꞌnchré‑la̱ jñà xi xi̱ta̱ kondra̱, ko̱sobà‑la̱; ni̱mé sa̱kòtꞌaà‑la̱ xi chꞌo ki̱tso̱‑ná.
\p
\v 9 Koa̱tìn‑la̱ jñà xi̱ta̱ xi chi̱ꞌnda títsa̱jnaꞌñó, ndaà kàtasíkitasòn yije‑la̱ nei‑la̱, ndaà kàtasísꞌin‑la̱ mé‑ne nga tsja sꞌe̱‑la̱, kì kjinguìꞌa‑jèn;
\v 10 kì síchijétꞌaà‑la̱ nei‑la̱. Tà sa̱á ndaà kàtasꞌín nga kàtaꞌya‑la̱ nga xi̱ta̱ kixi̱. Kꞌoa̱á sꞌín skoe̱‑ne xi̱ta̱ xi kjꞌei̱í nga ndaà tjín kjo̱tíxoma‑la̱ Nainá xi ochrjekàjiìn‑ná kjo̱ꞌin.
\p
\v 11 Nainá jyeé tsakó kjo̱ndaà‑la̱ nga ngatsꞌiì xi̱ta̱ xi tjín nga tíjtsa i̱sòꞌnde ko̱ma ki̱tjokàjiìn kjo̱ꞌin.
\v 12 Jè kjo̱ndaà‑la̱ Nainá kꞌoa̱á sꞌín okóya‑ná nga mì ti̱ kiì kꞌoa̱ sꞌe̱n‑ná nga mì ndaà yaxkoán Nainá ti̱koa̱ mì ti̱ kiì kꞌoa̱ sꞌe̱n‑ná kjoa̱chꞌo xi síjé yijo‑ná xi tsꞌe̱ i̱sòꞌnde. Kꞌe̱ nga jye si̱kítsa̱jnaá kjoa̱ koi, indaàkjoa̱ si̱kíjnaá kjo̱hítsjeèn‑ná, xi̱ta̱ kixi̱ ko̱maá, ti̱koa̱ ndaà jcha̱xkoán Nainá na̱chrjein xi titsa̱jnaá i̱ꞌndei̱.
\v 13 Kꞌoa̱á sꞌín sꞌe̱én kjoa̱ koi nga titsa̱chiñá‑lá kjo̱ndaà xi ꞌñó ndaà tjín nga jcha̱á kjoa̱jeya‑la̱ Jesucristo kꞌe̱ nga kjoi̱í ìjngoò kꞌa. Jesucristo xi Nainá nga ꞌñó ꞌnga tíjna nga jè xi ochrjekàjiìn‑ná kjo̱ꞌin.
\v 14 Jè Na̱ꞌèn‑ná Jesucristo kitsjaà yijo‑la̱ nga kꞌen ngajo‑ná. Jè tsibíchjítjì‑ná mé‑ne ko̱ma ki̱tjokàjñaá ngatsꞌiì kjoa̱ tsꞌe̱ jé ti̱koa̱ jngoò kꞌa si̱ìtsjeè‑ná nga nguì xi̱ta̱ na̱xa̱ndá tsꞌe̱ ko̱maá. Ko̱ nguì tíjngoò takoán nga si̱kitasoán ni̱ta̱ mé kjoa̱ xi ndaà tjín.
\p
\v 15 Kꞌoa̱á sꞌín ta̱kóyi ti̱koa̱ tìtꞌin‑la̱ xi̱ta̱. ꞌÑó ti̱nókjoa̱koi̱i koni sꞌín tjíꞌnde‑lè nga ko̱ti̱xomai. Kì yá xi ochrjekàngui‑lè.
\c 3
\s Ndaà ti̱kitasòn jñà ꞌén xi mokjeiín‑ná
\p
\v 1 Ti̱kítsjeèn‑la̱ nga kàteèxkón xi xi̱ta̱xá títsa̱jna ko̱ ngatsꞌiì xi kjo̱tíxoma tjíya tsja. Kàtaꞌnchréñijon‑la̱. Kàtasíkitasòn ngatsꞌiì xá xi ndaà tjín.
\v 2 Koa̱tìn‑la̱ kì xi̱ta̱á chja̱jno‑la̱; kì xi̱ta̱á kjaán‑ko̱; tà sa̱á kjo̱ndaà kàtasꞌe‑la̱; nguì indaàkjoa̱ kàtìtsa̱jnako̱ ngatsꞌiì xi̱ta̱.
\p
\v 3 Nga sa̱ kjòtseé, jñá, ti̱koa̱á xi̱ta̱ tòndo̱ó komá. Mìkiì naꞌyàñijoaán. Xìn ndi̱yá tsitjaàyaá. Kꞌoa̱á sꞌín kiꞌné ngatsꞌiì kjoa̱ xi chꞌo tjín xi síjé yijo‑ná ko̱ kjoa̱ xi sasén‑la̱. Ya̱á tsitsa̱jnajñaá xi kjoa̱chꞌo ko̱ kjoa̱xìtakòn. Tsakꞌìn‑ná nga kisìjtikeè‑ná xi̱ta̱. Ti̱koa̱ jñá kinìjticha ngajo‑ná xinguia̱á.
\v 4 Ta̱nga Nainá xi ochrjekàjiìn‑ná kjo̱ꞌin, kꞌe̱ nga tsakó kjo̱ndaà‑la̱ ko̱ kjoa̱tjòcha‑la̱ i̱tꞌaà tsꞌe̱ xi̱ta̱,
\v 5 tsachrjekàjiìn‑ná kjo̱ꞌin. Mìtsà koi kjoa̱‑la̱ nga ndaà tjín kjoa̱kixi̱ xi kiꞌné. Tà koi‑né nga kjòhi̱ma̱keè‑ná. Kꞌe̱ nga kjòtsjeè ini̱ma̱‑ná, kitsꞌiìn xi̱tse̱ ìjngoò kꞌa‑ná ko̱ jè Ini̱ma̱ Tsjeè‑la̱ Nainá kisìxi̱tse̱ya ìjngoò kꞌa‑ná.
\v 6 I̱tꞌaà tsꞌe̱ Na̱ꞌèn‑ná Jesucristo xi ochrjekàjiìn‑ná kjo̱ꞌin, Nainá, ꞌñó ndaà kisìkíjnajiìn ini̱ma̱‑ná Ini̱ma̱ Tsjeè‑la̱.
\v 7 Kꞌe̱ nga jè kjo̱ndaà‑la̱ Nainá jye kisìkixi̱ya‑ná, kꞌoa̱á sꞌín ki̱tsa̱jnaá nga tíjngoò takoán nga titsa̱chiñá‑lá kjoa̱binachon xi mìkiì fehetꞌaà ni̱ta̱ kjé‑ne, jè kjo̱tjò xi tsjá‑ná Nainá nga i̱xti‑la̱ tsò‑ná.
\p
\v 8 ꞌÉn koi, ꞌén kixi̱‑né. Kꞌoa̱á sꞌín mejèn‑na nga ꞌñó tìnè‑la̱ xi̱ta̱ mé‑ne jñà xi̱ta̱ xi mokjeiín‑la̱ i̱tꞌaà tsꞌe̱ Nainá ndaà kàtasísꞌin‑la̱ kjoa̱ xi ndaà tjín. Kjoa̱ koi, ndaà tjín; mochjeén‑la̱ ngatsꞌiì xi̱ta̱.
\v 9 Ta̱nga kì kiì nìsꞌin‑la̱ xi kjoa̱ tòndo̱ ko̱ kjoa̱ tsꞌe̱ xi̱ta̱ jchínga kjòtseé xi mìtsà kixi̱ kjoa̱. Kì kjoa̱siì nìsꞌin‑la̱ ko̱ kjoa̱ xi chitiya‑ná i̱tꞌaà tsꞌe̱ kjo̱tíxoma‑la̱ Moisés. Kjoa̱ koi, mìkiì mochjeén, ni̱mé chjí‑la̱.
\p
\v 10 Jè xi̱ta̱ xi na̱xa̱ndá‑la̱ Cristo mejèn‑la̱ si̱ìjòya, jò, jàn kꞌa ti̱nókjoa̱ ꞌnchré‑la̱à. Tsà mìkiì ꞌnchréñijon‑lè, na̱chrjekàjiìn.
\v 11 Ji̱, jyeé ꞌyi nga xi̱ta̱ jè, jyeé itsꞌoòn kjo̱hítsjeèn‑la̱. Chꞌo tísꞌín. Jé tíhónè‑la̱ yijo‑la̱.
\s ꞌÉn xi títsjá‑la̱ Tito jè Pablo
\p
\v 12 Kꞌe̱ nga sìkasén‑lè Artemas, o xi jè Tíquico, ti̱xátíyi nchrobáchón‑ná Nicópolis. Kꞌoa̱á sꞌín kiskoòsòn‑la̱, ya̱á kóti̱jna na̱chrjein cho̱ ꞌnchán.
\v 13 Ti̱chjátꞌaà‑la̱ Zenas, maestro tsꞌe̱ kjo̱tíxoma, ko̱ Apolos; tjiì‑la̱ mé xi mochjeén‑la̱ mé‑ne nga ko̱ma kjoi̱‑ne ñánda nchifì nga ni̱mé si̱chijatꞌaà‑la̱.
\v 14 Jñà xi xi̱ta̱ tsa̱ján, kꞌoa̱á ti̱sꞌín kàtama‑la̱ kjo̱ndaà xi ndaà tjín nga kàtasíchjátꞌaà‑la̱ xi̱ta̱ xi chijatꞌaà‑la̱ tsojmì mé‑ne nga ndaà si̱ìkjeén‑ne na̱chrjein‑la̱ nga títsa̱jnakon, ko̱maá si̱ìkíjna jngoò kjoa̱ xi ndaà mochjeén.
\s ꞌÉn xi fehetꞌaà‑ne
\p
\v 15 Ngatsꞌiì xi̱ta̱ xi i̱ títsa̱jnako̱‑na tísíhixatꞌaà‑lè. Ti̱koa̱ ti̱ixatꞌeì yije jñà xi matsjakeè‑ná nga ngásòn mokjeiín‑ná i̱tꞌaà tsꞌe̱ Cristo. Kjo̱ndaà‑la̱ Nainá kàtìjnako̱‑nò ngatsꞌioò. Kꞌoa̱sꞌín kàtama.