\id PHM
\h Filemón
\toc1 Filemón
\mt Xa̱jo̱n ra tsikínda jè Pablo ra isìkasén‑la̱ jè Filemón
\c 1
\s Kóꞌsín síhixoꞌta Pablo jè Filemón
\p
\v 1 Tísixóꞌtá‑la ji̱ ꞌndsé Filemón ra ꞌñó tsjake̱‑la, ji̱ ra ti̱jè‑ni xá tjiꞌnì koni jè xá ra tíꞌsiaa̱n. ꞌA̱án‑ná Pablo ra ta nga̱tjì ꞌtse̱ Jesucristo nga nda̱yá tíjna̱ꞌya, ꞌkoa̱á ꞌsín tíbindá‑la jè xa̱jo̱n ra̱kìi̱ ko̱ jè ꞌndsé Timoteo.
\v 2 Ti̱hixoꞌtá‑ná jè tichjeé Apia ko̱ jè xi̱ta̱ xàngie̱é Arquipo ra ta̱ña i̱nchibixkàn‑tjié kjoa̱ kìi̱; ko̱ ti̱hixoꞌta‑te‑ná ngaꞌtsì jñà xi̱ta̱ na̱xi̱ndá‑la̱ Cristo ra ya̱ maxkóya ya̱ niꞌya‑li.
\v 3 Nainá ra Na̱ꞌín‑ná ma ko̱ jè Jesucristo ra tíjna ítjòn‑ná katatsjá‑no kjo̱nda ko̱ kjo̱ꞌnchán ya̱ a̱jin inìma̱‑no.
\s Kóꞌsín nga ꞌñó makjiín‑la̱ ra a̱ꞌta ꞌtse̱ Cristo jè Filemón
\p
\v 4 ꞌKia̱ nga chjàꞌtà‑la̱ jè Nainá, síkítsjen‑yá kjiꞌtá‑la ra ji̱ ko̱ ꞌkoa̱á ꞌsín xin‑la̱ nga tse kjo̱nda kataꞌse‑la̱ ra jè, ra a̱ꞌta tsa̱ji.
\v 5 Nga̱ ijyeé kiꞌsena̱jmí‑na kóꞌsín nga ꞌñó kjiꞌtatakìn a̱ꞌta ꞌtse̱ Jesús ra tíjna ítjòn‑ná ko̱ kóꞌsín nga ꞌñó tsjachi jñà xi̱ta̱‑la̱ Nainá.
\v 6 ꞌA̱n, ꞌkoa̱á ꞌsín tísíjé‑la̱ Nainá nga nda katabitjasòn koni ꞌsín nga nda tjinìngásòn‑ki̱i jñà xi̱ta̱ xàngi̱i ra iꞌka jè kjoa̱ ra kjiꞌtatakìn mé‑ni nga nda jcha̱xkon-isa‑ni ngaꞌtsì kjo̱nda ra ma ꞌnié a̱ꞌta ꞌtse̱ Cristo.
\v 7 Ji̱ ꞌndsé batoó matsja‑na ko̱ batoó maꞌñótakoàa̱n ꞌkia̱ nga ko̱ꞌsín tjín‑li kjo̱tsjacha, nga̱ a̱ꞌta tsa̱jií‑ní ji̱ ndí ꞌndsé nga ꞌnchán tjín‑ni inìma̱‑la̱ xi̱ta̱‑la̱ Nainá.
\s Kóꞌsín jè Pablo isíjétjì jè Onésimo
\p
\v 8 ꞌKoa̱á ma‑ni, ni̱ꞌsín tjíꞌnde‑na ra a̱ꞌta ꞌtse̱ Cristo nga ma kiꞌtín‑la mé ra machjeén nga ꞌsi̱in, mì tsa ko̱ꞌsín tíbiꞌtín‑la,
\v 9 nga̱ ta jngoó kjo̱nda tísíjé jnchro‑la; nga̱ be‑náa̱ nga matsjacha‑ná xàngie̱é; isa̱á koni ꞌsín ꞌkiaa̱ ra ꞌa̱n, ijyeé xi̱ta̱ jchínga‑na̱, ꞌa̱n ra ꞌmì‑na Pablo, ko̱ ti̱ꞌkoa̱á nda̱yá tíjna̱ ra ta nga̱tjì ꞌtse̱ Cristo Jesús.
\v 10 ꞌKoa̱á ma‑ni nga ko̱ꞌsín tísíjé jngo‑la kjo̱nda ra a̱ꞌta ꞌtse̱ Onésimo, jè ra ko̱ꞌsín ma‑na koni tsa iꞌndí‑na̱ ma skanda ꞌkia̱ nga kjokjiín‑la̱ ra a̱ꞌta ꞌtse̱ Cristo; nga̱ ꞌkia̱á ítsiꞌkena̱jmíya‑la̱ ꞌkia̱ nga ko̱ꞌsín tíjna̱ ꞌa̱n nda̱yá.
\p
\v 11 Nga ti̱ꞌsa̱ kjotseé, mì kì nda kjochjeén‑li jè Onésimo, tanga ꞌndi̱ ꞌndi̱ ijyeé maá ko̱chjeén‑li, ko̱ maá ko̱chjeén‑te‑na.
\v 12 ꞌKoa̱á ꞌsín tísikásén india‑la, ni̱ꞌsín bato ꞌñó tsjake̱.
\v 13 Ndaá‑la ꞌse̱ tsa i̱ katijnako̱‑naa̱ tsiki, koni tsa ji̱ kjòn‑ni ra bisìko̱‑ná i̱ nda̱yá ñánda̱ nga tíjna̱ ra ta nga̱tjì ꞌtse̱ ꞌén nda‑la̱ Cristo.
\v 14 Tanga majìn‑na jngo kjoa̱ ꞌsiaa̱n, ra kjè sa ji̱ tjíjngo takìn, nga̱ majìn‑na ta kjo̱ꞌñó katama‑li jè kjo̱nda ra tísíjé‑la; jé mejèn‑na tsa inìma̱‑li katanchrabájin‑ni.
\v 15 Tsa kií ko̱ꞌsín kjomà jnchro‑ni nga jè Onésimo tsasìꞌtaxìn chiba ni̱chjin‑li, mé‑ni nga ꞌndi̱, ꞌkoa̱á ꞌsín ma chjíbétjò‑ni nga ya̱ kíjnako̱‑li skanda ta kjiá‑nioo̱.
\v 16 Tanga ꞌndi̱‑ni̱, kì chjàn ta ko̱ꞌsín chjíbétjì koni tsa jngo chi̱ꞌnda ra ta si̱íxá kjo̱tjò‑li; nga ꞌndi̱‑ni̱, isa̱á chjí‑la̱, nda mí ꞌkoa̱‑ni koni tsa jngo chi̱ꞌnda. Ndaá chjíbétjì ꞌndi̱‑ni̱ koni jngo ꞌndsì ra bato ꞌñó tsjachi. Ra ꞌa̱n, batoó ꞌñó tsjake̱; ko̱ ji̱ tjínèa̱‑la̱ isa̱ ꞌñó ko̱tsjachi, isa̱á ꞌndi̱, mì tsa ta chi̱ꞌnda‑li ma, ijyeé ꞌndsè chiba jiòn ra a̱ꞌta ꞌtse̱ Na̱ꞌín‑ná.
\p
\v 17 Tsa kixi̱ kitií kjoa̱, nga ꞌndsì ꞌmí‑ná ra a̱ꞌta ꞌtse̱ Cristo, ꞌkoa̱á ꞌsín chjíbétjì koni tsa ꞌa̱n kjòn‑na ra tjichjíbétjó‑ná.
\v 18 Tsa mé ra isìko̱‑li ko̱ tsa kóꞌki tje̱nꞌtin‑li, ꞌa̱n ti̱kíchjí‑ná.
\v 19 ꞌA̱n Pablo, ꞌa̱n sabá tíbindá xa̱jo̱n ra̱kìi̱, ꞌa̱án kíchjí tsje‑la; ni̱ꞌsín ijye tjíjin‑te‑li nga ꞌa̱án tje̱nꞌtin‑ná kjo̱binachon ra tjín‑li ꞌndi̱‑ni̱.
\v 20 Ji̱ ndí ꞌndsé, ꞌkoa̱á ꞌsín tjín kjo̱nda ra tísíjé‑la, mején‑na nga katasakó jngo‑na kjo̱nda ra a̱ꞌta tsa̱ji koni ꞌsín nga bakèn‑la̱ ra ꞌndsé chibé a̱ꞌta ꞌtse̱ Na̱ꞌín‑ná; ko̱ꞌsín ti̱jetakìn inìma̱‑na̱ ra a̱ꞌta ꞌtse̱ Cristo.
\p
\v 21 Be‑náa̱ nga ꞌkoa̱á ꞌsín si̱hitjasìn; ꞌkoa̱á ma‑ni nga ko̱ꞌsín tíbindá‑la xa̱jo̱n ra̱kìi̱; ko̱ skanda maá‑li nga isa̱ kjìn kjoa̱ ꞌsia̱n isi koni ꞌsín tjín ra tísíjé‑la.
\v 22 Ti̱ꞌkoa̱á tje̱n tinda i̱tsé‑ná i̱ꞌnde ya̱ niꞌya‑li, nga̱ ꞌkoa̱á ꞌsín tíkoñáa̱ koni ꞌsín nga i̱nchiníjéꞌta‑la jiòn Nainá, ki̱jchó ni̱chjin nga kijcho katsíjen‑no.
\s ꞌÉn‑la̱ Pablo ra feheꞌta‑ni
\p
\v 23 Tísíhixoꞌtà‑li jè Epafras, xi̱ta̱ xàngie̱é ra ta̱ña titsa̱jna‑ji̱n nda̱yá ra ta nga̱tjì ꞌtse̱ Jesucristo.
\v 24 Ti̱ꞌkoa̱á tísíhixoꞌtà‑li jè Marcos, Aristarco, Demas ko̱ jè Lucas, xi̱ta̱ ra i̱ i̱nchibasiko̱ꞌta‑na.
\p
\v 25 Jè katatsjá‑no kjo̱nda‑la̱ Jesucristo jè ra tíjna ítjòn‑ná nga katjahaꞌsen‑jin ya̱ inìma̱‑no. Ko̱ꞌsín katama.