\id PHM
\h Filemón
\toc1 Filemón
\mt Xo̱jo̱n carta‑la̱ San Pablo xi kiskiì‑la̱ Filemón
\c 1
\s Kó tsò Pablo nga síhixatꞌaà Filemón
\p
\v 1 Ji̱ Filemón xi ndaà matsjake̱‑lè xi ngásòn xá‑la̱ Na̱ꞌèn‑ná titsa̱ꞌné, ꞌa̱n Pablo nga nda̱yá tìjna̱aꞌya kꞌoi̱í kjoa̱‑la̱ nga xá‑la̱ Cristo tìsꞌiaàn, tisìhixatꞌaà‑lè ko̱ ꞌndsè Timoteo.
\v 2 Ti̱koa̱á tisìhixatꞌaà xi̱ta̱ na̱xa̱ndá‑la̱ Cristo xi ya̱ bixoña niꞌya‑lè ko̱ tichjaá Apia ko̱ ꞌndseé Arquipo xi ti̱koa̱ xá‑la̱ Nainá nchikjaán‑tji koni ꞌa̱n.
\v 3 Nainá xi Na̱ꞌèn‑ná, ko̱ jè Jesucristo xi otíxoma‑ná kàtatsjá‑nò kjo̱ndaà ko̱ kjoa̱ꞌnchán ya̱ i̱jiìn ini̱ma̱‑nò.
\s Kjoa̱tjòcha xi tjín‑la̱ Filemón
\p
\v 4 Kꞌe̱ nga chjàtꞌaà‑la̱ Nainá, kjitꞌaà na̱chrjein sìkítsjeèn i̱tꞌaà tsi̱ji, kꞌoa̱á ma‑ne nga tsjaà‑la̱ kjo̱ndaà Na̱ꞌèn‑ná,
\v 5 Koií kjoa̱‑la̱ nga jyeé kiꞌnchrè nga ndaà mokjeiín‑lè i̱tꞌaà tsꞌe̱ Na̱ꞌèn‑ná Jesucristo ti̱koa̱ ndaà matsjachi ngatsꞌiì xi̱ta̱‑la̱ Nainá.
\v 6 Kꞌoa̱á sꞌín sìjétꞌaà‑la̱ Nainá nga ndaà ki̱tasòn koni sꞌín nokjoàkoi̱i xi̱ta̱ xi iꞌnga i̱tꞌaà tsꞌe̱ kjoa̱ xi mokjeiín‑lè mé‑ne nga ìsa̱ ndaà jcha̱xkoin ngatsꞌiì kjo̱ndaà xi ko̱ma si̱kitasoán i̱tꞌaà tsꞌe̱ Cristo.
\v 7 Ji̱ ndí ꞌndsè, ꞌñó tsja ma‑na ko̱ maꞌñó takoàn i̱tꞌaà tsꞌe̱ kjoa̱tjòcha xi tjín‑lè, nga i̱tꞌaà tsi̱ji‑né, nga jye ndaà tìnìjetakoìn ini̱ma̱‑la̱ jñà xi̱ta̱‑la̱ Nainá.
\s Kó tsò Pablo nga chja̱tjì Onésimo
\p
\v 8 Kꞌoa̱á ma‑ne na̱sꞌín i̱tꞌaà tsꞌe̱ Cristo tjíꞌnde‑na̱ nga kìnè‑lè mé kjoa̱ xi sꞌi̱in, ta̱nga mìtsà ko̱sꞌín tìbìtꞌin‑lè.
\v 9 Ta jngoò kjo̱ndaà tísíjé‑lè, nga̱ tíjiìn‑ná nga tjòcha ꞌyaá xinguia̱á. Ko̱ jyeé tíjiìn‑lè, ꞌa̱n Pablo, jyeé xi̱ta̱ jchínga‑ná, ti̱koa̱ nda̱yá tìjna̱aꞌya xi jè nga̱tjì‑la̱ Cristo Jesús.
\v 10 Kꞌoa̱á ma‑ne nga tísíjé jngoò‑lè kjo̱ndaà nga ndaà chjoétjoì jè Onésimo xi koni kiꞌndí‑na̱ komà nga kòkjeiín‑la̱ ꞌén ndaà‑la̱ Nainá xi ꞌa̱n tsibeno̱jmí‑la̱ nga i̱ tìjna̱aꞌya nda̱yá.
\p
\v 11 Nga sa̱ kjòtseé, jè Onésimo, jngoò xi̱ta̱ chi̱ꞌnda xi mìkiì ndaà kjòchjeén‑lè, ta̱nga i̱ꞌndei̱ jyeé ndaà ko̱chjeén‑ná ingajoá.
\v 12 Tìsìkasén ìjngoò kꞌa‑lè, ꞌa̱n nga ꞌñó matsjake̱.
\v 13 Ndaá‑la sꞌe̱ tsà i̱ kíjnako̱‑na mé‑ne nga si̱ìchjátꞌaà‑na koni tsà ji̱ tìnìchjátꞌaà‑ná, kꞌe̱ nga ta̱kó nda̱yá tìjna̱aꞌya nga jè nga̱tjì‑la̱ ꞌén ndaà‑la̱ Nainá xi kjoa̱ tsꞌe̱ Cristo.
\v 14 Ta̱nga majìn‑na nga kjo̱ꞌñó siìkíjna tsà ngaji̱ mìkiì tíjngoò takoìn, mé‑ne jè kjo̱ndaà xi tìsìjé‑lè mì kjo̱ꞌñó ko̱ma‑lè; ini̱ma̱‑lè kji̱nchrobàjiìn.
\v 15 Tsà koi na̱chrjein, jè Onésimo, koií kjoa̱‑la̱ tsasìtꞌaà xìn chiba na̱chrjein‑lè mé‑ne i̱ꞌndei̱ ko̱ma chjoétjò ìjngoò kꞌa‑ne nga ya̱ kíjnako̱ kjitꞌaà‑lè.
\v 16 Ta̱nga kì kꞌoa̱á sꞌín ꞌya takoìn koni tsà jngoò xi ta̱xki̱ chi̱ꞌnda; ìsa̱á ꞌñó ndaà jcha̱takoìn koni tsà jngoò ꞌndsì xi ꞌñó ndaà matsjachi. ꞌA̱n, ꞌñó matsjake̱; ta̱nga ngaji̱ ìsa̱á ꞌñó ti̱tsjachi mìtsà ta koi kjoa̱‑la̱ nga chi̱ꞌnda tsi̱ji ko̱ma, koi‑né nga jyeé ꞌndsè chibà i̱tꞌaà tsꞌe̱ Cristo.
\p
\v 17 Tsà kixi̱í kjoa̱ nga kꞌoa̱sꞌín ꞌyatakòn‑ná nga ꞌndseé chibá i̱tꞌaà tsꞌe̱ Cristo, chjoétjoì Onésimo koni tsà ꞌa̱n xi tichjoétjò‑ná.
\v 18 Tsà tjín mé kjoa̱ xi chꞌo kisìko̱‑lè, koa̱ tsà mé xi kitje̱n‑tꞌin‑lè, ꞌa̱án ti̱kichjí‑ná.
\v 19 ꞌA̱n, Pablo, ꞌa̱n sobá tìkjiì‑lè xo̱jo̱n jè. ꞌA̱n kíchjiá yije xi tje̱n‑la̱. Mìkiì mochjeén nga ꞌa̱n ko̱xán‑lè, jyeé tíjiìn‑lè nga ꞌa̱án kitje̱n‑tꞌin‑ná kjoa̱binachon‑lè.
\v 20 Ndí ꞌndsè, kꞌoa̱á sꞌín tìsìjé‑lè nga kàtasakó jngoò‑na̱ kjo̱ndaà i̱tꞌaà tsi̱ji, koni sꞌín okꞌìn‑la̱ nga ꞌndseé chibá i̱tꞌaà tsꞌe̱ Na̱ꞌèn‑ná; ti̱je takoìn ini̱ma̱‑na̱ i̱tꞌaà tsꞌe̱ Cristo.
\v 21 Be‑ná nga sìkitasòn‑né; kꞌoa̱á ma‑ne nga tìsìkasén‑lè xo̱jo̱n jè; skanda ꞌbeé‑la̱ takoàn, nga ìsa̱á tsatoó sꞌi̱in koni sꞌín tìxan‑lè.
\v 22 Kꞌoa̱á ti̱sꞌín tìxan‑lè nga ti̱kíjnandaà jngoò‑ná i̱ꞌnde ñánda ma síkjáya. Kꞌoa̱á sꞌín tìkoña nga jè Nainá kji̱ꞌnchré‑né koni sꞌín titsa̱nokjoàtꞌaà‑là, nga tsjáꞌnde‑na nga ko̱ma kjíkon‑nò.
\s ꞌÉn‑la̱ Pablo xi fehetꞌaà‑ne
\p
\v 23 Tísíhixatꞌaà‑lè Epafras, xinguia̱á xi ngásòn nda̱yá titsa̱jna‑je̱n nga jè nga̱tjì‑la̱ Cristo Jesús.
\v 24 Ti̱koa̱á tísíhixatꞌaà‑lè Marcos, Aristarco, Demas ko̱ Lucas, xi síchjátꞌaà‑na kjoa̱ tsꞌe̱ xá xi tìsꞌiaàn.
\p
\v 25 Jè kàtìjnajiìn ini̱ma̱‑nò kjo̱ndaà‑la̱ Jesucristo xi otíxoma‑ná.