\id HEB
\h Hebreos
\toc1 Hebreos
\mt Xo̱jo̱n carta xi kitjei‑la̱ xi̱ta̱ Hebreo
\c 1
\s Kósꞌín chja̱ko̱‑ná Nainá i̱tꞌaà tsꞌe̱ Kiꞌndí‑la̱
\p
\v 1 Nga ti̱sa̱ kjòtseé, jè Nainá kjìn kꞌa kiìchja̱‑la̱ xi̱ta̱ jchínga‑ná nga jñà kisìkjeén xi̱ta̱ xi kiìchja̱ ngajo‑la̱, nga kjìn ska̱ya tjín‑ne kósꞌín kiìchja̱‑la̱.
\v 2 Ta̱nga i̱ꞌndei̱, nga tífehetꞌaà na̱chrjein, Nainá, jè kiꞌndí‑la̱ tísíkjeén nga tíchja̱ko̱‑ná ko̱ ti̱jè‑ne kiꞌndí‑la̱ kisìkjeén nga tsibíndaà i̱sòꞌnde ko̱ jè kjònga̱tsja ngatsꞌiì nga yije tsojmì xi tjín i̱sòꞌnde.
\v 3 Ko̱ jè Kiꞌndí xi okó jè kjoa̱ i̱sén ko̱ kjoa̱ jeya‑la̱ Nainá; ko̱ i̱tꞌaà tsꞌe̱é ꞌya‑ná kó kji kjoàn‑ne Nainá. I̱tꞌaà tsꞌe̱ ngaꞌñó xi tjín‑la̱ ꞌén‑la̱ Cristo síjnanguiꞌñó‑la̱ i̱sòꞌnde. Kꞌe̱ nga jye kitsjaà kjo̱tjò yijo‑la̱ nga kisìtsjeè‑ná jé‑ná, i̱kjoàn tsijin ngajmiì nga tsibìjnatꞌaà chrja kixi̱‑la̱ Nainá.
\v 4 Nga jè Kiꞌndí‑la̱ Nainá tíjna ítjòn; ìsa̱á ꞌñó ꞌnga tíjna mì kꞌoa̱‑ne koni jñà àkja̱le̱, koií kjoa̱‑la̱ nga ìsa̱á ꞌñó ꞌnga tíjna jè ꞌín xi kitjoé‑la̱.
\p
\v 5 Nga jè Nainá, ni̱jngoò kꞌa kꞌoa̱sꞌín kitsò jngoò‑la̱ àkja̱le̱:
\q Ji̱‑né xi kiꞌndí‑na̱ xan‑lè,
\q ꞌa̱n‑ná Na̱ꞌèn‑lè.
\m Ti̱koa̱á ni̱jngoò àkja̱le̱ xi kitsò‑la̱:
\q ꞌA̱án ko̱ma Na̱ꞌèn‑la̱,
\q jè ko̱ma kiꞌndí‑na̱.
\m
\v 6 Kꞌe̱ nga kisìkasén kiꞌndítjòn‑la̱ i̱ i̱sòꞌnde ti̱koa̱á kꞌoa̱á sꞌín kitsò:
\q Ngatsꞌiì àkja̱le̱‑na̱ kàteèxkón.
\m
\v 7 I̱tꞌaà tsꞌe̱ àkja̱le̱, kꞌoa̱á tsò:
\q Nainá, maá‑la̱ tjo̱ sꞌín àkja̱le̱‑la̱;
\q jñà chi̱ꞌnda‑la̱ maá‑la̱ niꞌín sꞌín.
\m
\v 8 Ta̱nga i̱tꞌaà tsꞌe̱ kiꞌndí‑la̱ tsò‑né:
\q Ji̱‑né xi Nainá,
\q kixi̱í ko̱ti̱xomai ni̱ta̱ kjé‑né.
\q
\v 9 Matsjacha‑né kjoa̱ xi ndaà tjín
\q ko̱ majticha‑né kjoa̱ xi chꞌo tjín;
\q koií kjoa̱‑la̱, ꞌa̱n xi Nainá ꞌmì‑na̱ xó jaàjiìn‑lè
\q nga ìsa̱ ndaà jcha̱xkón‑lè
\q mé‑ne nga ìsa̱ tse kjo̱tsja sꞌe̱‑lè
\q koni jñà xi̱ta̱ xingui̱i xi báhijtako̱‑lè.
\m
\v 10 Ti̱koa̱á tsò‑né:
\q Ji̱ Na̱ꞌèn xi Nainá ꞌmì‑lè nga ji̱ otìxomai,
\q nga sa̱ tàtsꞌen‑la̱ kjoa̱, ji̱í tsibìndiì i̱sòꞌnde,
\q ti̱ji̱í‑ne xi tsibìndiì ngajmiì.
\q
\v 11 Ngaji̱ ki̱jna‑né ni̱ta̱ mé na̱chrjein‑ne.
\q Ta̱nga jè i̱sòꞌnde ko̱ ngajmiì kjoe̱hetꞌaà‑né;
\q kꞌoa̱á sꞌín ko̱jchá koni ma nikje nga ma jchínga.
\q
\v 12 Kꞌoa̱á sꞌín kíxkóyi koni jngoò xꞌió,
\q kꞌoa̱á sꞌín si̱kjatjìyi koni sꞌín fatjìya nikje.
\q Ta̱nga ngaji̱ mì kì kjoa̱tjìya‑lè ni̱ta̱ kjé‑ne
\q ko̱ jñà na̱chrjein‑lè mìkiì kjoe̱hetꞌaà.
\m
\v 13 Nainá ni̱ saà jngoò kꞌa kitsò‑la̱ jngoò àkja̱le̱‑la̱:
\q Ti̱jnatꞌeiì chrja kixi̱‑na̱
\q skanda kꞌe̱ nga sìkíjnanguia kondra̱‑lè
\q ya̱ ñánda nga nchasòn ndso̱koiì.
\m
\v 14 Ngatsꞌiì àkja̱le̱, ini̱ma̱‑né nga síxá‑la̱ Nainá; jñà nìkasén nga síchjátꞌaà‑la̱ jñà xi̱ta̱ xi tjoé‑la̱ kjo̱ndaà nga bitjokàjiìn kjo̱ꞌin kjoa̱ tsꞌe̱ jé‑la̱.
\c 2
\s Mé‑ne ꞌñó chjí‑la̱ ꞌén xi jye kinaꞌyá i̱tꞌaà tsꞌe̱ Cristo
\p
\v 1 Koií kjoa̱‑la̱, mochjeén‑né nga nguì sa̱ ndaà si̱sꞌin‑lá ꞌén xi jye kinaꞌyá, mé‑ne nga mì xìn ndi̱yá kjiaán koni sꞌín tjín ndi̱yá‑la̱ Nainá.
\v 2 Jñà kjo̱tíxoma xi Nainá kitsjaà nga kisìkjeén àkja̱le̱ na̱chrjein xi jye tsato, tjín‑la̱ o̱kixi̱, ko̱ jñà xi̱ta̱ xi tsohótsji jé nga mìkiì kisìkitasòn kjo̱tíxoma xi kitsꞌiì‑la̱, kjo̱ꞌiín kitjoé‑la̱ koni sꞌín okꞌìn‑la̱.
\v 3 Ko̱ jñá xi titsa̱jnaá na̱chrjein i̱ꞌndei̱, ìsa̱á ꞌñó sꞌe̱‑ná kjo̱ꞌin tsà mì kì si̱sꞌiaán ꞌén‑la̱ Cristo nga jè ko̱chrjekàjiìn‑ná kjo̱ꞌin. Nga̱ jè sobá Na̱ꞌèn‑ná kitsjaà ítjòn‑ná ꞌén koi. Ko̱ jñà xi i̱skan kiìꞌnchré ꞌén koi, ti̱koa̱á tsibéno̱jmí‑ná nga kixi̱ kjoa̱.
\v 4 Nainá, ti̱koa̱á kisìkixi̱ya ꞌén koi nga kjìn sko̱ya kjo̱xkón kisꞌiìn xi okó kjoa̱ jeya‑la̱ Nainá, ti̱koa̱ kisìkaꞌbísòn kjo̱tjò tsꞌe̱ Ini̱ma̱ Tsjeè‑la̱; kꞌoa̱á sꞌín kitsjaà koni sꞌín mejèn‑la̱ jè.
\s Yá xi ochrjekàjiìn‑ná kjo̱ꞌin kjoa̱ tsꞌe̱ jé‑ná
\p
\v 5 Nga̱ Nainá mìtsà jñà àkja̱le̱‑la̱ kitsjaà‑la̱ nga jñà ko̱tìxoma‑la̱ jè i̱sòꞌnde xi i̱skan kjoi̱í, jè xi titsa̱chibàya‑ná.
\v 6 Ta sa̱á tíchja̱á jngoò kꞌa Xo̱jo̱n‑la̱ Nainá ñánda nga tsò:
\q Ji̱ Na̱ꞌèn, ¿yá‑né xi xi̱ta̱?
\q ¿A okꞌìn‑la̱ nga ji̱ nìkítsjeèn‑ne ko̱ makájno‑lè i̱tꞌaà tsꞌe̱?
\q
\v 7 Ìsa̱á nangui kinìkíjni koni jñà àkja̱le̱,
\q kitsꞌiì‑la̱ kjoa̱ jeya ko̱ ꞌnga kinìkíjni nga tsatíxoma,
\q
\v 8 ji̱í kitsꞌiì‑la̱ ngaꞌñó nga ma ko̱tìxoma‑la̱ ngatsꞌiì tsojmì xi tjín.
\m Tsà Nainá kitsjaà‑la̱ ngaꞌñó nga jè ko̱tìxoma‑la̱ ngatsꞌiì tsojmì xi tjín tsòyaá‑ne nga ni̱mé tsojmì tjín xi mì jè otíxoma‑la̱. Kixi̱í kjoa̱, na̱chrjein i̱ꞌndei̱, kjꞌeè kiì ndaà ꞌya‑la̱ tsà jè tíhotíxoma‑la̱ ngatsꞌiì tsojmì xi tjín.
\v 9 Ta̱nga ꞌya‑ná nga jè Jesús, na̱sꞌín nangui kinìkíjna chiba na̱chrjein koni jñà àkja̱le̱, ta̱nga i̱ꞌndei̱, jeyaá tíjna ko̱ ꞌngaá tíjna nga tíhotíxoma, koií kjoa̱‑la̱ nga kjo̱ꞌin kisìkjeiín kꞌe̱ nga kꞌen. Nainá, ꞌñó matsjakeè‑ná nga kisìkasén Jesús nga jè kisìkjeiín kjo̱ꞌin tsꞌe̱ kjoa̱biyaà xi kjo̱ndaà tsꞌe̱ ngatsꞌiì xi̱ta̱.
\p
\v 10 Jè Nainá, xi tsibíndaà yije ni̱ta̱ mé xi tjín, ndaá okꞌìn‑la̱ koni sꞌín kisꞌiìn kꞌe̱ nga kisìkatojiìn kjo̱ꞌin Kiꞌndí‑la̱ mé‑ne nga i̱tꞌaà tsꞌe̱ kjo̱ꞌin xi tsatojiìn‑ne, ni̱mé kjoa̱ xi kichijàtꞌaà‑la̱ nga ko̱ma ko̱chrjekàjiìn‑ná kjo̱ꞌin kjoa̱ tsꞌe̱ jé‑ná ngatsꞌiì xi i̱xti‑la̱ Nainá maá xi jè mejèn‑la̱ nga ya̱ ki̱tsa̱jnakoa̱á ñánda nga jeya tíjna jè.
\v 11 Jè xi tísítsjeè xi̱ta̱ xi tjín‑la̱ jé, ko̱ jñà xi̱ta̱ xi tjímatsjeè, ta̱jngoó Na̱ꞌén ma. Koií kjoa̱‑la̱ jè Kiꞌndí‑la̱ Nainá mìkiì masobà‑la̱ nga ꞌndse̱ tsò‑la̱ xi̱ta̱ xi sítsjeè.
\v 12 Jè Xo̱jo̱n‑la̱ Nainá kꞌoa̱á sꞌín tjítꞌaà nga tsò:
\q Kèno̱jmí‑la̱ jñà xi̱ta̱ ꞌndsè xi i̱tꞌaà tsi̱ji,
\q seè‑lè ya̱ i̱jiìn‑la̱ xi̱ta̱ na̱xa̱ndá‑lè.
\m
\v 13 Ti̱koa̱á tjítꞌaà ñánda tsò:
\q Jé Nainá maꞌñótꞌaà takoàn.
\m Ìjngoò kꞌa tjítꞌaà ñánda tsò:
\q I̱í tìjna̱koa̱a i̱xti xi Nainá kitsjaà‑na.
\p
\v 14 Kꞌoa̱á sꞌín tjín koni i̱xti‑la̱ xi̱ta̱, ta̱jngoò jní‑né ko̱ ta̱jngoò yijo‑né. Jesús, kꞌoa̱á ti̱sꞌín jní ko̱ yijo kisꞌe‑la̱ mé‑ne nga i̱tꞌaà tsꞌe̱ kjoa̱ biyaà ma kisìkijne‑la̱ xi̱ta̱ nei̱í xi tjín‑la̱ ngaꞌñó nga ma‑la̱ síkꞌen xi̱ta̱.
\v 15 Jesús, kꞌoa̱á sꞌín komàtꞌin mé‑ne nga komà kisìkítsa̱jnandei̱í ngatsꞌiì xi̱ta̱ xi kitsakjòn‑la̱ kjoa̱ biyaà nga kꞌoa̱á sꞌín títsa̱jna koni tsà tjítꞌaàꞌñó‑la̱ kó tjín na̱chrjein bìtsa̱jnakon xi̱ta̱.
\v 16 Jesús, mìtsà koií xá jꞌiì‑ne nga jñà àkja̱le̱ si̱ìchjátꞌaà‑la̱, jñà xi̱ta̱ tje̱‑la̱ Abraham si̱ìchjátꞌaà‑la̱.
\v 17 Kꞌoa̱á sꞌín komà‑ne, jè Jesús tjínè‑la̱ nga ngásòn kꞌoa̱sꞌín xi̱ta̱ komà koni ꞌndse̱, mé‑ne nga no̱ꞌmiì ítjòn ko̱ma‑ne xi tjín‑la̱ kjo̱hi̱ma̱takòn xi ndaà síkitasòn xá‑la̱ Nainá nga ko̱ma ki̱ìchjítjì‑ne jé‑la̱ xi̱ta̱ i̱tꞌaà tsꞌe̱ kjoa̱ biyaà‑la̱.
\v 18 Koni sꞌín kichìtꞌaà nga kitsꞌiì‑la̱ kjo̱ꞌin, jè, kꞌoa̱á ti̱sꞌín ma‑la̱ osìko̱ jè xi̱ta̱ xi ko̱ kjo̱ꞌin tíchìtꞌaà‑ne.
\c 3
\s Mé‑ne ìsa̱ jeya tíjna‑ne Jesús mì kꞌoa̱‑ne Moisés
\p
\v 1 Jñò ndí ꞌndsè, xi xi̱ta̱ na̱xa̱ndá tsjeè‑la̱ Nainá ꞌmì‑nò, xi xó kꞌoa̱á sꞌín jaàjiìn‑nò Nainá nga xi̱ta̱ tsꞌe̱ tsò‑nò, kꞌoa̱á sꞌín ndaà ti̱kítsjeèn nga jè Cristo Jesús xi xó tsibíxáya‑la̱ Nainá ko̱ jè tíjna nga no̱ꞌmiì ítjòn i̱tꞌaà tsꞌe̱ kjoa̱ xi mokjeiín‑ná.
\v 2 Jesús ndaà síkitasòn xá‑la̱ Nainá, nga xó kꞌoa̱á sꞌín kitsꞌiì‑la̱ koni jè Moisés, ndaà kisìkitasòn i̱tꞌaà tsꞌe̱ na̱xa̱ndá‑la̱ Nainá.
\v 3 Jesús ìsa̱á jeya tíjna koni jè Moisés. Kꞌoa̱á ngaya‑la̱ koni jngoò xi̱ta̱ xi bíndaà niꞌya, ìsa̱á jeya bíjna nei‑la̱ mì kꞌoa̱á‑ne koni ti̱jè‑ne niꞌya.
\v 4 Ngatsꞌiì niꞌya, tsejèn tjín xi̱ta̱ xi tsibíndaà; ta̱nga jè Nainá xi tsibíndaà yije tsojmì xi tjín i̱sòꞌnde.
\v 5 Xi nguì o̱kixi̱, jè Moisés, nga xi̱ta̱ chi̱ꞌnda‑la̱ Nainá ma, ndaà kisìkitasòn xá‑la̱ i̱tꞌaà tsꞌe̱ xi̱ta̱ na̱xa̱ndá‑la̱ Nainá. Jè xá xi kisꞌiìn, jè‑né nga kitsjaà ꞌén kó sꞌín ki̱chja̱ Nainá kꞌe̱ nga ko̱ma i̱skan.
\v 6 Ta̱nga jè Cristo, nga Kiꞌndí‑la̱ Nainá ma, jè otíxoma i̱tꞌaà tsꞌe̱ na̱xa̱ndá‑la̱, jè na̱xa̱ndá‑la̱ xi ti̱jñá‑ná, tsà kixi̱ titsa̱jnaá skanda kꞌe̱ nga kjoe̱hetꞌaà na̱chrjein koni sꞌín nga mokjeiín‑ná i̱tꞌaà tsꞌe̱ Nainá nga ko̱ kjo̱tsja‑ná titsa̱chiñá xi kjo̱ndaà‑la̱ Nainá.
\s Mé xi mochjeén nga ki̱tjásꞌe̱én ñánda ma nìkjáyaá i̱tꞌaà tsꞌe̱ Nainá
\p
\v 7 Kꞌoa̱á tsò jè Ini̱ma̱ Tsjeè‑la̱ Nainá jè xo̱jo̱n xi tjítꞌaà ꞌén‑la̱ Nainá, nga tsò:
\q I̱ꞌndei̱, tsà titsa̱naꞌyà jñò ꞌén‑la̱ Nainá,
\q
\v 8 kì tájaàjiìn bitsa̱jnako̱o ini̱ma̱‑nò
\q koni sꞌín kisꞌiìn jñà xi̱ta̱ xi kondra̱ kiì‑la̱ Nainá
\q nga kiskoòtꞌaà ya̱ i̱ꞌnde i̱tꞌaà xìn ñánda nangui kixì choòn.
\q
\v 9 Jñà xi̱ta̱ jchínga‑nò kiskoòtꞌaà‑na
\q na̱sꞌín jye kijtseè ichán nó kjoa̱ xi kisꞌiaàn.
\q
\v 10 Koií kjoa̱‑la̱ nga tsohóti̱jna jchán‑la̱ jñà xi̱ta̱ koi,
\q kꞌoa̱á kixan‑la̱: “Jñò, kjitꞌaà na̱chrjein xìn ndi̱yá tjaàko̱o kjo̱hítsjeèn‑la̱ ini̱ma̱‑nò
\q ko̱ mìkiì yaxkon ndi̱yá‑na̱.”
\q
\v 11 Xi kjoa̱ jti‑na̱, kꞌoa̱á sꞌín kitsjaà ndso̱ba
\q nga mìkiì kjoa̱hasꞌen‑jiìn i̱ꞌnde tsꞌa̱n ñánda ma nìkjáya.
\p
\v 12 Ndí ꞌndsè, tꞌe̱en kinda̱ yijo‑nò, ni̱jngoò xi chꞌo síkíjna ini̱ma̱‑la̱ nga mìkiì mokjeiín‑la̱ mé‑ne nga mì ki̱nchatꞌaàxìn‑lá Nainá xi tíjnakon.
\v 13 Ta sa̱á, na̱chrjein nchijòn tjiì ngaꞌñó‑la̱à xinguio̱o, kꞌe̱ nga tíjna‑ìsa na̱chrjein, mé‑ne nga mìkiì ko̱tájaàjiìn‑ne ini̱ma̱‑nò nga mìkiì ma skóna̱cha̱n‑nò kjoa̱ tsꞌe̱ jé.
\v 14 Jñá ya̱á nokjoá‑aná i̱tꞌaà tsꞌe̱ Cristo, tsà kꞌoa̱sꞌín ndaà ko̱kjeiín‑ná skanda kꞌe̱ nga kjoe̱hetꞌaà na̱chrjein koni sꞌín ko̱kjeiín‑ná nga ti̱sa̱ tàtsꞌen‑la̱ kjoa̱.
\p
\v 15 Xo̱jo̱n‑la̱ Nainá kꞌoa̱á sꞌín tíchja̱ nga tsò:
\q I̱ꞌndei̱, tsà titsa̱naꞌyà jñò ꞌén‑la̱ Nainá,
\q kì tájaàjiìn bitsa̱jnako̱o ini̱ma̱‑nò
\q koni sꞌín kisꞌiìn jñà xi̱ta̱ xi kondra̱ kiì‑la̱ Nainá.
\m
\v 16 ¿Yá xi̱ta̱‑ne xi kiìꞌnchré ꞌén‑la̱ Nainá, i̱kjoàn kondra̱ kiì‑la̱? Ti̱jñà‑ne ngatsꞌiì xi̱ta̱ xi jè Moisés tsachrjekàjiìn i̱ꞌnde Egipto.
\v 17 ¿Ko̱ yá xi̱ta̱‑ne xi ichán nó tsibìjnajchán ko̱ Nainá? Jñà‑né xi̱ta̱ xi tsohótsji jé, xi ya̱ kꞌen ya̱ i̱ya ndi̱yá ya̱ i̱ꞌnde i̱tꞌaà xìn ñánda nangui kixì choòn.
\v 18 ¿Ko̱ yá xi̱ta̱‑ne xi Nainá kitsò‑la̱ nga mìkiì kjoa̱hasꞌen‑jiìn i̱ꞌnde ñánda tjín kjoa̱ nìkjáya? Jñà‑né xi̱ta̱ xi mìkiì kiìꞌnchréñijon‑la̱.
\v 19 Ko̱ kꞌoa̱á sꞌín tísijiìn‑ná nga mìkiì jahasꞌen‑jiìn i̱ꞌnde ñánda ma nìkjáya, koií kjoa̱‑la̱ nga mìkiì kòkjeiín‑la̱.
\c 4
\p
\v 1 Nainá kꞌoa̱á sꞌín kitsjaà‑ná ꞌén nga ki̱tjásꞌe̱én ya̱ i̱ꞌnde‑la̱ ñánda ma nìkjáyaá. Kꞌe̱ nga tákó tíjna‑ìsa ꞌén xi kitsjaà Nainá, ngatsꞌiaá mochjeén‑né nga ndaà si̱kinda̱á yijo‑ná mì kꞌoa̱‑ne tsà mì kì ki̱tjásꞌe̱én.
\v 2 Nga jñá, kꞌoa̱á ti̱sꞌín jye kisꞌeno̱jmíya‑ná ꞌén ndaà‑la̱ Nainá, koni sꞌín kisꞌeno̱jmíya‑la̱ jñà xi̱ta̱ jchínga‑ná. Ta̱nga jñà xi̱ta̱ jchínga‑ná ni̱mé kjo̱ndaà kisakò‑la̱ nga mìkiì ngásòn kòkjeiín‑la̱ koni jñà xi̱ta̱ xi iꞌnga xi kisìtasòn jñà ꞌén koi.
\v 3 Ta̱nga jñá xi jye mokjeiín‑ná, ki̱tjásꞌe̱n‑ná ya̱ i̱ꞌnde ñánda ma nìkjáyaá, ñánda kitsò Nainá:
\q Xi kjoa̱ jti‑na̱, kꞌoa̱á sꞌín kitsjaà ꞌén‑na̱ xi ndso̱ba kichjà‑na
\q nga mìkiì kjoa̱hasꞌen‑jiìn i̱ꞌnde tsꞌa̱n ñánda ma nìkjáyaá.
\m Ta̱nga Nainá jye kjòtseé jyehetꞌaà xá xi kisꞌiìn kóni skanda kꞌe̱ nga tsibíndaà i̱sòꞌnde.
\v 4 Xo̱jo̱n‑la̱ Nainá, kꞌoa̱á sꞌín tíchja̱ tsꞌe̱ xi ma‑ne itoò na̱chrjein:
\q Xi ma itoò na̱chrjein kisìkjáya Nainá nga komà jyehetꞌaà yije xá‑la̱.
\m
\v 5 Ti̱jè‑ne Xo̱jo̱n‑la̱ Nainá, ìjngoò kꞌa tíchja̱ ñánda tsò:
\q Mìkiì kjoa̱hasꞌen‑jiìn ya̱ i̱ꞌnde‑na̱ ñánda ma nìkjáya.
\m
\v 6 Jñà xi̱ta̱ xi kiìꞌnchré ítjòn ꞌén xi ndaà tsò, mìkiì jahasꞌen i̱ꞌnde ñánda ma nìkjáya nga mìkiì kisìtasòn; ta̱nga na̱chrjein i̱ꞌndei̱ tjín‑ìsa xi̱ta̱ xi chi̱ja nga ko̱ma kjoa̱hasꞌen‑jiìn i̱ꞌnde ñánda ma nìkjáya.
\v 7 Koií kjoa̱‑la̱ Nainá tsibíjna ìjngoò‑ìsa na̱chrjein xi̱tse̱, jè na̱chrjein i̱ꞌndei̱. Nga ìsa̱ ꞌñó komà i̱skan jè xi̱ta̱xá ítjòn xi kiꞌmì David, kꞌoa̱á sꞌín tsibítꞌaà Xo̱jo̱n‑la̱ Nainá jñà ꞌén xi tsò:
\q Jñò, na̱chrjein i̱ꞌndei̱ tsà titsa̱naꞌyà ꞌén‑la̱ Nainá
\q kì tájaàjiìn nìkítsa̱jnaà ini̱ma̱‑nò.
\m
\v 8 Jè Josué, nga mìkiì komà kitsjaà‑la̱ kjoa̱ nìkjáya jñà xi̱ta̱ Israel, koií kjoa̱‑la̱ Nainá kitsjaà ìjngoò‑ìsa na̱chrjein xi̱tse̱.
\v 9 Kꞌoa̱á ma‑ne jè na̱xa̱ndá‑la̱ Nainá tíjna ìjngoò‑la̱ na̱chrjein tsjeè tsꞌe̱ kjoa̱ nìkjáya;
\v 10 nga jè xi̱ta̱ xi fahasꞌen‑jiìn kjoa̱ nìkjáya xi tsꞌe̱ Nainá, ti̱koa̱á síkjáya‑ne kjoa̱ tsꞌe̱ xá‑la̱, koni sꞌín kisìkjáya Nainá i̱tꞌaà tsꞌe̱ xá xi kisꞌiìn.
\v 11 Mochjeén‑né nga kꞌoi̱‑lá ngaꞌñó yijo‑ná nga ki̱tjásꞌe̱n‑jñaá kjoa̱ nìkjáya‑la̱ Nainá; mìkiì kꞌoa̱sꞌín sꞌe̱én koni kisꞌiìn jñà xi̱ta̱ xi mìkiì kòkjeiín‑la̱ nga kisìkitasòn.
\p
\v 12 ꞌÉn‑la̱ Nainá tíjnakon‑né ko̱ tjín‑la̱ ngaꞌñó. Ìsa̱á ndaà ote mì kꞌoa̱‑ne jngoò ki̱chja̱ ndojò xi yijò nga ingajò ngobà‑la̱; fahasꞌen‑jiìn‑né skanda ya̱ i̱jiìn ini̱ma̱‑ná ko̱ ya̱ i̱jiìn kjo̱hítsjeèn‑ná. Ti̱koa̱á fahasꞌen‑jiìn‑né skanda ñánda tíkjoò nindaà‑ná ko̱ i̱ya nindaà‑ná; ótsjiya‑né kjo̱hítsjeèn‑la̱ ini̱ma̱‑ná mé xi mejèn‑la̱ nga sꞌi̱in.
\v 13 Ngatsꞌiì xi Nainá tsibíndaà, nì mé tjín xi tíjnaꞌma, nga ngatsꞌiì kjoa̱ tíjna tsejèn‑né; tíbeè‑ne xko̱n jè xi tjínè‑la̱ nga kꞌoi̱‑lá kinda̱.
\s Jè xi ngui no̱ꞌmiì ítjòn tíjna
\p
\v 14 Jesús xi kiꞌndí‑la̱ Nainá, jè‑né xi nguì sobà no̱ꞌmiì ítjòn tíjna i̱tꞌaà tsa̱ján, jè‑né xi jahasꞌen ngajmiì nga nguixko̱n Nainá. Kꞌoa̱á ma‑ne nga mochjeén‑né nga kixi̱ ki̱tsa̱jnakoa̱á jñà ꞌén xi mokjeiín‑ná.
\v 15 Jè xi no̱ꞌmiì ítjòn tíjna i̱tꞌaà tsa̱ján, ko̱maá ko̱hi̱ma̱keè‑ná kꞌe̱ nga mahindaà; nga̱ jè, kꞌoa̱á ti̱sꞌín kichìtꞌaà koni jñá, ta̱nga mìtsà jé tsohótsji.
\v 16 Kíjngoò‑lá takoán nga ki̱nchatꞌaá chrañà‑lá íxi̱le̱ kjo̱tíxoma‑la̱ Nainá xi tse kjo̱ndaà tjín‑la̱, mé‑ne nga skoe̱ i̱ma̱‑ná kjo̱ndaà xi tjín‑la̱ koa̱ ko̱si̱ko̱‑ná kꞌe̱ nga mé xi ko̱chjeén‑ná.
\c 5
\p
\v 1 Ngatsꞌiì jñà no̱ꞌmiì ítjòn, ya̱á tjaájiìn i̱tꞌaà tsꞌe̱ xi̱ta̱ na̱xa̱ndá. Jè xá tjínè‑la̱ nga chja̱tjì xi̱ta̱ nga nguixko̱n Nainá ti̱koa̱ tsjátꞌaà‑la̱ kjo̱tjò Nainá ko̱ síkꞌen cho̱ xi kjoa̱ tsꞌe̱ jé‑la̱ xi̱ta̱.
\v 2 Jñà no̱ꞌmiì, ti̱koa̱á mahindaàjiìn ini̱ma̱‑la̱; kꞌoa̱á sꞌín ma‑ne nga ma beèhi̱ma̱ jñà xi̱ta̱ xi mìkiì machi̱ya‑la̱ ko̱ xi xìn ndi̱yá tjímaya.
\v 3 Koií kjoa̱‑la̱ nga ma indaàjiìn ini̱ma̱‑la̱ no̱ꞌmiì, tjínè‑la̱ nga si̱ìkꞌen‑la̱ cho̱ kjo̱tjò xi tsjá‑la̱ Nainá xi kjoa̱ tsꞌe̱ jé‑la̱ ko̱ ti̱koa̱ si̱ìkꞌen cho̱ kjoa̱ tsꞌe̱ jé‑la̱ na̱xa̱ndá.
\p
\v 4 Jñà no̱ꞌmiì, mìtsà tà jñà ta̱jngoò bítꞌaà xá ꞌnga yijo‑la̱; jè Nainá xó chja̱‑la̱ koni sꞌín kiìchja̱‑la̱ jè Aarón.
\v 5 Kꞌoa̱á ti̱sꞌín tjín i̱tꞌaà tsꞌe̱ Cristo, mìtsà tà jè ta̱jngoò kiskoé xá xi tsꞌe̱ no̱ꞌmiì ítjòn, Nainá kitsjaà‑la̱ xá ꞌnga kꞌe̱ nga kitsò‑la̱:
\q Ji̱‑né xi Kiꞌndí‑na̱ xan‑lè;
\q ꞌa̱án‑ná xi Na̱ꞌèn‑lè.
\m
\v 6 Ti̱jè‑ne Xo̱jo̱n‑la̱ Nainá, ìjngoò kꞌa tíchja̱ ñánda tsò:
\q Ji̱‑né xi no̱ꞌmiì tijni ni̱ta̱ mé na̱chrjein‑ne,
\q xá‑lè, kꞌoa̱á sꞌín tjín koni xá xi kisìkitasòn Melquisedec.
\m
\v 7 Jè Cristo kꞌe̱ nga sa̱ tsibìjna i̱ i̱sòꞌnde, ꞌñó kiìchja̱tꞌaà‑la̱ Nainá, nguì ko̱ó ndáxko̱n tsibítsiꞌba‑la̱ koa̱ kisìjétꞌaà‑la̱ jè xi tjín‑la̱ ngaꞌñó nga ma‑la̱ ko̱chrjekátjì i̱tꞌaà tsꞌe̱ kjoa̱ biyaà; Nainá kiìꞌnchré‑la̱ nga ndaà kijtseèxkón.
\v 8 Jè Cristo, na̱sꞌín kiꞌndí‑la̱ Nainá ma, ya̱á komà‑la̱ kisìkitasòn, kꞌe̱ nga kisìkjeiín kjo̱ꞌin.
\v 9 Kꞌe̱ nga jye mì ti̱ mé xi kichijàtꞌaà‑la̱, kꞌoa̱á sꞌín tsibìjna nga jè ko̱chrjekátjì kjo̱ꞌin xi̱ta̱ ni̱ta̱ mé na̱chrjein‑ne, ngatsꞌiì xi ꞌnchréñijon‑la̱,
\v 10 Nainá kisìkíjna Jesús nga no̱ꞌmiì ítjòn tsibìjna, kitsjaà‑la̱ xá koni tsꞌe̱ Melquisedec.
\s Jñà xi̱ta̱ xi mìkiì machi̱ya‑la̱ mé kjoa̱ xi kixi̱ tjín
\p
\v 11 I̱tꞌaà tsꞌe̱ kjoa̱ koi, ꞌñó tjín‑ìsa kjoa̱ xi sꞌe̱no̱jmíya‑nò, ta̱nga ꞌñó chjá tjín nga sꞌe̱no̱jmí‑nò, koi kjoa̱‑la̱ nga jñò, mìkiì machi̱ya‑nò.
\v 12 Jñò, skanda kjòtseé maestroó‑là titsa̱jnaà tsà ndaà; ta̱nga jñò, tákó mochjeén‑nò nga chítaꞌyà xi̱tse̱ ìjngoò kꞌa ꞌén‑la̱ Nainá xi mì ꞌin chja̱ koni sꞌín komà‑nò nga sa̱ ítjòn. Kꞌoa̱á sꞌín tímatꞌioòn koni ndí i̱xti xi tákó tsjín ꞌbiì, mìkiì mochjeén‑la̱ nga tsojmì tájaà ski̱ne̱.
\v 13 Ngatsꞌiì xi tákó tsjín ꞌbiì, i̱xti‑né, mìkiì machi̱ya‑la̱ mé kjoa̱ xi kixi̱ tjín.
\v 14 Ta̱nga jñà tsojmì xi ma chine xi tájaà kjoàn, tsꞌe̱é xi̱ta̱ xi jye kòjchínga, jñà xi jye machi̱ya‑la̱ mé kjoa̱ xi ndaà tjín ko̱ mé kjoa̱ xi mìkiì ndaà tjín nga kꞌoa̱á sꞌín nchisíjchá yijo‑la̱.
\c 6
\p
\v 1 Koií ko̱sꞌín mochjeén‑ne nga chítaꞌyà ꞌén‑la̱ Cristo xi ìsa̱ ndaà ko̱jchíngakoa̱á kjoa̱ tsꞌe̱ Nainá mé‑ne nga ni̱mé chi̱jatꞌaà‑ná nga xi̱ta̱‑la̱ Cristo maá. Mì ti̱jñà ti̱jñà ꞌén chítaꞌyà‑aná xi kichìtaꞌyá nga sa̱ ítjòn i̱tꞌaà tsꞌe̱ Cristo. Mì ti̱jñà ti̱jñà ꞌén si̱kítsjeèn‑ya‑ná kó sꞌín ma nga nìkájnoaá jé xi tjín‑ná xi kjoa̱biyaà fìko̱‑ná. Ko̱ ti̱koa̱á mì ti̱jñà ti̱jñà ꞌén si̱kítsjeèn‑ya ìjngoò kꞌa‑ná kó sꞌín kòkjeiín‑ná i̱tꞌaà tsꞌe̱ Nainá
\v 2 ko̱ kósꞌín ma bautizar xi̱ta̱, ko̱ kósꞌín oyijòsòn‑lá ndsa̱á jñà xi̱ta̱ xi mokjeiín‑la̱ i̱tꞌaà tsꞌe̱ Cristo. Ko̱ ti̱koa̱á mì ti̱jñà ti̱jñà ꞌén si̱kítsjeèn‑ya ìjngoò kꞌa‑ná kó sꞌín kjoa̱áya‑la̱ jñà xi̱ta̱ xi jye kꞌen, ko̱ kósꞌín sꞌi̱in Nainá nga ki̱ìndaàjiìn‑la̱ xi̱ta̱ mé xi okꞌìn‑la̱ nga tsjá‑la̱ ni̱ta̱ kjé‑ne.
\v 3 Mochjeén‑né nga chítaꞌyà ꞌén xi ìsa̱ ndaà ko̱jchíngakoa̱á kjoa̱ tsꞌe̱ Nainá; tsà Nainá tsjáꞌnde nga ko̱sꞌín ko̱ma, kꞌoa̱sꞌín sꞌe̱én.
\p
\v 4 Nga jñà xi̱ta̱ xi jye kjòhiseèn‑la̱ kjo̱hítsjeèn‑la̱, xi jye kisaseèn‑takòn kjo̱ndaà xi tsjá Nainá, xi ti̱koa̱ jye ngásòn kitjoé‑la̱ Ini̱ma̱ Tsjeè‑la̱ Nainá,
\v 5 xi jye kisaseèn‑takòn ꞌén ndaà‑la̱ Nainá ko̱ ngaꞌñó‑la̱ i̱sòꞌnde xi sa̱ kjoi̱í,
\v 6 tsà ìjngoò kꞌa xìn ndi̱yá kjoi̱, tsà tsjìn takòn ꞌén‑la̱ Nainá, mì ti̱ kiì ko̱ma ko̱ndaàya‑ne kjo̱hítsjeèn‑la̱ nga ko̱ófatꞌaà ìjngoò kꞌa‑la̱ Nainá; nga jñà xi̱ta̱ koi, kjoa̱ xi nchisꞌín, kꞌoa̱á ngaya‑la̱ koni tsà krò nchihótꞌaà ìjngoò kꞌa jè Kiꞌndí‑la̱ Nainá nga tsjá‑la̱ kjo̱sobà nga nguixko̱n ngatsꞌiì xi̱ta̱.
\v 7 Kꞌoa̱á sꞌín ngaya‑la̱ koni jè nangui, kꞌe̱ nga ꞌba jtsí, maꞌnchi̱ꞌnde‑né. Tsà ndaà xka̱ xi bisò xi mochjeén‑la̱ xi̱ta̱ xi síxáko̱ nangui, jè Nainá síchikon‑tꞌin nangui.
\v 8 Ta̱nga tsà naꞌyá chi̱ni̱ ko̱ naꞌyá xanchroò bisò, ni̱mé chjí‑la̱, mìtsà nangui ndaà nga nguixko̱n Nainá; ki̱jchò na̱chrjein nga tà ki̱ti̱‑né.
\p
\v 9 Jñò ndí ꞌndsè, xi matsjacha‑nòje̱n, na̱sꞌín kꞌoa̱sꞌín nokjoà‑je̱n, kꞌoa̱á sꞌín tíjngoò takòn‑je̱n nga tjoé‑nò kjoa̱ xi ꞌñó ndaà tjín, ngatsꞌiì kjo̱ndaà xi tjín‑la̱ xi̱ta̱ xi jye itjokàjiìn kjo̱ꞌin.
\v 10 Nga Nainá, xi̱ta̱ kixi̱‑né, mìkiì síjchàajiìn xá‑nò xi jye kiꞌnè ko̱ kjoa̱tjòcha xi tjín‑nò nga nìchjátꞌaà‑là xi̱ta̱ na̱xa̱ndá‑la̱ Cristo, koni sꞌín titsa̱ꞌnè skanda na̱chrjein i̱ꞌndei̱.
\v 11 Ta̱nga ngaje̱n, kꞌoa̱á sꞌín mejèn‑naje̱n nga kjitꞌaà na̱chrjein nguì ko̱ó kjo̱tsja nga ko̱sꞌín ti̱xá nga jngoò ìjngoò skanda kꞌe̱ nga kjoe̱hetꞌaà na̱chrjein‑nò mé‑ne nga ki̱tasòn‑ne kjoa̱ xi titsa̱chiñá‑la̱á.
\v 12 Majìn‑naje̱n nga tsꞌeè sꞌe̱en. Chjínguì‑là jñà xi̱ta̱ xi jye nchitjoé‑la̱ kjo̱tjò koni sꞌín kitsjaà tsoꞌba Nainá koií kjoa̱‑la̱ nga ndaà mokjeiín‑la̱ ko̱ tjín‑la̱ kjoa̱tsejta.
\s Kó tsò ꞌén xi kiìchja̱ Nainá koni sꞌín kitsjaà‑la̱ tsoꞌba Abraham
\p
\v 13 Nainá kꞌe̱ nga kitsjaà‑la̱ tsoꞌba Abraham, kꞌoa̱á sꞌín kitsjaà kixi̱ ꞌén‑la̱ nga ti̱jè tsasèn‑ne nga mì ti̱ yá tjín‑ne xi ìsa̱ ꞌnga tíjna koni jè; kꞌoa̱á sꞌín kiìchja̱,
\v 14 nga kitsò: “ꞌA̱n, ꞌñó ndaà sichikon‑tꞌin‑lè, ti̱koa̱ ꞌñó ko̱kjìn‑ya jñà i̱xti‑lè.”
\v 15 Kꞌoa̱á sꞌín komà‑ne Abraham kiskoòñàkjoa̱, i̱kjoàn kitjoé‑la̱ koni sꞌín kitsò Nainá.
\v 16 Jñà xi ta̱xki̱ xi̱ta̱, kꞌe̱ nga tsjá ꞌén‑la̱, síkjeén jngoò ꞌín‑la̱ jngoò xi ìsa̱ ꞌnga tíjna mé‑ne nga síkixi̱ya‑ne ꞌén xi tsjá. Ko̱ tà ya̱á fehetꞌaà kjoa̱.
\v 17 Kꞌoa̱á sꞌín ma‑ne kꞌe̱ nga jè Nainá kꞌoa̱á sꞌín kjòmejèn‑la̱ nga kitsjaà kixi̱‑la̱ ꞌén jñà xi̱ta̱ xi tjoé‑la̱ kjo̱tjò nga si̱ìkitasòn koni sꞌín kitsjaà tsoꞌba, kitsjaà jngoò ꞌén xi ꞌñó xkón tjín nga ni̱mé xi ma kjoa̱tjìya.
\v 18 Jñà ꞌén koi xi jò ma‑ne xi mìkiì ma fatjìya, nga mìkiì ko̱ma skóna̱cha̱n‑ná Nainá, ya̱á ꞌñó sakó‑la̱ ngaꞌñó ini̱ma̱‑ná, jñá xi mejèn‑ná nga Nainá ko̱si̱ko̱‑ná nga nguì jè kjitꞌaà takoán nga titsa̱chiñá‑lá jè kjoa̱ kixi̱‑la̱ xi jè jye kitsjaà‑ná.
\v 19 Jè kjoa̱ kixi̱ xi titsa̱chiñá‑lá, kꞌoa̱á sꞌín síkíjna kixi̱ ini̱ma̱‑ná koni jngoò ki̱cha̱ xi sitꞌaàꞌñó‑ne chitso, ko̱ jè kjoa̱ kixi̱ xi o̱kji skanda maá jahasꞌen ya̱ i̱ꞌnde tsjeè ñánda tjo̱bájtoò nikje cortina,
\v 20 ya̱ ñánda jahasꞌen Jesús nga tsohójnandaà‑ná ndi̱yá, nga no̱ꞌmiì ítjòn tíjna ni̱ta̱ mé na̱chrjein‑ne koni jè Melquisedec.
\c 7
\s Jesús, kꞌoa̱á sꞌín ngaya‑la̱ koni jè no̱ꞌmiì ítjòn xi kiꞌmì Melquisedec
\p
\v 1 Melquisedec xi xi̱ta̱ xá ítjòn tsibìjna tsꞌe̱ na̱xa̱ndá Salem, ti̱koa̱ no̱ꞌmiì ítjòn tsibìjna tsꞌe̱ Nainá xi tíjna ngajmiì, kiì kaña‑la̱ Abraham kꞌe̱ nga tínchrobá‑ne nga jye kisìkijne yije‑la̱ xi̱ta̱xá ítjòn xi kiskaàn‑ko̱. Melquisedec kisìchikon‑tꞌin Abraham.
\v 2 Jè Abraham, teya kisꞌiìn tsojmì xi kisakò‑la̱ tsꞌe̱ kjoa̱jchán, ko̱ jngoòya kitsjaà‑la̱ Melquisedec. ꞌÍn xi ꞌmì Melquisedec, tsòyaá‑ne: xi̱ta̱xá ítjòn xi tjín‑la̱ o̱kixi̱. Ti̱koa̱ jè ꞌín xi ꞌmì xi̱ta̱xá ítjòn tsꞌe̱ Salem, tsòyaá‑ne: xi tjín‑la̱ kjoa̱ꞌnchán.
\v 3 Jè Melquisedec mìkiì ꞌya‑la̱ tje̱‑la̱, yá na̱ꞌèn‑la̱, yá nea̱‑la̱, ñánda kitsꞌiìn, ñánda kꞌen; kꞌoa̱á sꞌín mangásòn‑ko̱ koni Cristo xi Kiꞌndí‑la̱ Nainá nga jè Melquisedec ti̱koa̱ no̱ꞌmiì ítjòn tíjna ni̱ta̱ mé na̱chrjein‑ne.
\p
\v 4 Jñò ti̱kítsjeèn nga ꞌñó ꞌnga tsibìjna Melquisedec, skanda jè xi̱ta̱ jchínga‑ná Abraham teya kisꞌiìn tsojmì xi kisakò‑la̱ tsꞌe̱ kjoa̱jchán, ko̱ jngoòya kitsjaà‑la̱ Melquisedec.
\v 5 Kixi̱í kjoa̱, kꞌoa̱á sꞌín tíchja̱ kjo̱tíxoma‑la̱ Moisés xi Nainá kitsjaà‑la̱ nga jñà xi̱ta̱ na̱xa̱ndá tjínè‑la̱ nga teya si̱ìjòya tsojmì xi tjín‑la̱, jngoòya tsjá‑la̱ jñà no̱ꞌmiì xi tje̱‑la̱ Leví, na̱sꞌín ti̱ xi̱ta̱ xíkjín‑ne xi ya̱ nchrobátꞌaà‑ne tje̱‑la̱ Abraham.
\v 6 Ta̱nga jè Melquisedec, mìtsà tje̱‑la̱ Leví, ta̱nga kitjoé‑la̱ xi jngoòya oko̱‑la̱ tsojmì xi teya kisꞌiìn Abraham, i̱kjoàn kꞌe̱é kisìchikon‑tꞌin, na̱sꞌín jè Abraham xi kitjoé‑la̱ ꞌén xi tsoꞌba Nainá kiìchja̱‑ne.
\v 7 Nga jyeé tíjiìn‑ná, jè xi síchikon‑tꞌin xi̱ta̱, ìsa̱á ꞌnga tíjna mì kꞌoa̱á‑ne koni jè xi machikon‑tꞌin.
\v 8 Jñà no̱ꞌmiì xi tje̱‑la̱ Leví xi tjoé‑la̱ xi jngoòya oko̱‑la̱ xi teya sꞌín xi̱ta̱ na̱xa̱ndá Israel, mìtsà ta bìtsa̱jnakon kjitꞌaà, bijchó na̱chrjein nga biyaà; ta̱nga i̱tꞌaà tsꞌe̱ Melquisedec, jè Xo̱jo̱n‑la̱ Nainá, kꞌoa̱á sꞌín ꞌya‑la̱ koni tsà jngoò xi̱ta̱ xi tákó tíjnakon skanda na̱chrjein i̱ꞌndei̱.
\v 9 Jñà no̱ꞌmiì xi nchrobátꞌaà‑ne tje̱‑la̱ Leví xi tjoé‑la̱ xi jngoòya oko̱‑la̱ xi teya sꞌín xi̱ta̱ na̱xa̱ndá Israel, ko̱maá kꞌoa̱kixoán nga ti̱koa̱á jè Melquisedec kitjoé jngoòya‑la̱ i̱tꞌaà tsꞌe̱ xi̱ta̱ koi kꞌe̱ nga kitsjaà jngoòya‑la̱ Abraham,
\v 10 nga jñà no̱ꞌmiì xi tje̱‑la̱ Leví, ya̱á nchrobátꞌaà‑ne tje̱‑la̱ Abraham. Na̱sꞌín kjꞌeè kiì tsꞌiìn Leví kꞌe̱ nga jè Melquisedec ijchò kaña‑la̱ Abraham, kꞌoa̱á sꞌín ngaya‑la̱ koni tsà jñà no̱ꞌmiì Israel, jyeé ya̱ títsa̱jnako̱ Abraham nga nchitsjá‑la̱ kjo̱tjò xi jè tjoé‑la̱ Melquisedec.
\p
\v 11 Jñà kjo̱tíxoma xi kitjoé‑la̱ jñà xi̱ta̱ Israel, ya̱á inchrobàtꞌaà‑ne i̱tꞌaà tsꞌe̱ no̱ꞌmiì xi tje̱‑la̱ Leví; ta̱nga jñà no̱ꞌmiì koi, mìkiì komà‑la̱ nga jngoò kꞌa kisìkixi̱ya xi̱ta̱ nga mì ti̱ mé chijatꞌaà‑la̱. Kꞌoa̱á sꞌín komà‑ne nga jꞌiì ìjngoò no̱ꞌmiì xi jè mangásòn‑ko̱ Melquisedec, ko̱ mìtsà jè mangásòn‑ko̱ Aarón xi tje̱‑la̱ Leví.
\v 12 Kꞌe̱ nga fatjìya no̱ꞌmiì, kósꞌín síxá, ti̱koa̱á mochjeén‑né nga kjoa̱tjìya kjo̱tíxoma.
\v 13 Koni sꞌín tíchja̱ ꞌén‑la̱ Nainá, jè xi kitjoé‑la̱ xá koni tsꞌe̱ Melquisedec, kjꞌei̱í tje̱‑né; ya̱ ñánda inchrobàtꞌaà‑ne, ni̱ sa̱á jngoò no̱ꞌmiì bitjokàjiìn.
\v 14 Kꞌoa̱á sꞌín ꞌya‑la̱ nga jè Na̱ꞌén‑ná Jesucristo, ya̱á inchrobàtꞌaà‑ne tje̱‑la̱ na̱xa̱ndá Judá. Tje̱‑la̱ na̱xa̱ndá jè, mìkiì kisìkaxki̱ Moisés kꞌe̱ nga kiìchja̱ i̱tꞌaà tsꞌe̱ no̱ꞌmiì.
\p
\v 15 Kjoa̱ koi, ìsa̱á ndaà makixi̱ya‑ná tsà jè no̱ꞌmiì xi̱tse̱ si̱ìkitasòn koni sꞌín kisìkitasòn jè Melquisedec.
\v 16 Nga mìtsà kꞌoa̱á sꞌín kitjoé‑la̱ xá tsꞌe̱ no̱ꞌmiì koni sꞌín tíchja̱ kjo̱tíxoma yá tsꞌe̱ tje̱ xi inchrobàtꞌaà‑ne nga no̱ꞌmiì kisìkitasòn. Ta sa̱á kꞌoa̱á sꞌín kitjoé‑la̱ xá i̱tꞌaà tsꞌe̱ ngaꞌñó xi tjín‑la̱ nga mìtsà yá xi ko̱ma‑la̱ jngoò kꞌa si̱ìkꞌen.
\v 17 Kꞌoa̱á sꞌín tíchja̱ ꞌén‑la̱ Nainá xi i̱tꞌaà tsꞌe̱, nga tsò:
\q Ji̱‑né xi no̱ꞌmiì tijni ni̱ta̱ mé na̱chrjein‑ne,
\q kꞌoa̱á sꞌín mangásòn‑koi̱i koni jè Melquisedec.
\m
\v 18 Kꞌoa̱á sꞌín komà‑ne nga kichijàngui kjo̱tíxoma jchínga, koi kjoa̱‑la̱ nga tsjìn‑la̱ ngaꞌñó ti̱koa̱ mì ti̱ kiì tímochjeén‑ne.
\v 19 Nga jè kjo̱tíxoma jchínga xi kiskiì Moisés, ni̱mé xi kisìkixi̱ya xi̱ta̱; ta̱nga na̱chrjein i̱ꞌndei̱, tjín ìjngoò‑ná kjoa̱ xi ìsa̱ ndaà tjín xi titsa̱chiñá‑lá jè xi sikinchatꞌaà chrañà‑ná Nainá.
\p
\v 20 Nainá kꞌoa̱á sꞌín kitsjaà kixi̱ ꞌén‑la̱ xi xkón tjín kꞌe̱ nga kitsjaà tsoꞌba nga no̱ꞌmiì ítjòn kíjna Cristo. Jñà no̱ꞌmiì xi iꞌnga, ta kꞌoa̱á sꞌín kitjoé‑la̱ xá, mìtsà yá xi kitsjaà ꞌén‑la̱.
\v 21 Ta̱nga xi i̱tꞌaà tsꞌe̱ Na̱ꞌén‑ná Jesús, kꞌoa̱á sꞌín tíchja̱ xo̱jo̱n xi tjítꞌaà ꞌén‑la̱ Nainá nga kitsò:
\q Na̱ꞌèn‑ná kꞌoa̱á sꞌín kitsjaà kixi̱ ꞌén‑la̱;
\q mìkiì si̱ìkjatjìya‑la̱ kjo̱hítsjeèn‑la̱ nga tsò:
\q “Ji̱‑né xi no̱ꞌmiì ti̱jni ni̱ta̱ mé na̱chrjein‑ne.”
\m
\v 22 Kꞌoa̱á sꞌín ma‑ne nga jè Jesucristo osen‑tjì‑ná nga nguixko̱n Nainá nga jè bíndaàjiìn ko̱‑ná jngoò kjoa̱ xi̱tse̱ xi ìsa̱á ndaà tjín.
\v 23 Ti̱koa̱á jñà no̱ꞌmiì xi kisìxá xi tje̱‑la̱ Leví, jyeé kjìn ma xi jye kisìkitasòn xá‑la̱ ta̱nga koií kjoa̱‑la̱ nga biyaà nga mìkiì ma síxá‑ìsa.
\v 24 Ta̱nga jè Jesús tíjnakon‑ne ni̱ta̱ kjé‑ne, kꞌoa̱á ma‑ne nga no̱ꞌmiì tíjna ni̱ta̱ mé na̱chrjein‑ne.
\v 25 Kꞌoa̱á sꞌín ma‑ne nga ma‑la̱ ochrjekàjiìn kjo̱ꞌin xi̱ta̱ ni̱ta̱ mé na̱chrjein‑ne, ngatsꞌiì xi̱ta̱ xi i̱tꞌaà tsꞌe̱ Jesús bijchó nguixko̱n Nainá; jè tíjnakon‑né ni̱ta̱ kjé‑ne mé‑ne nga bítsiꞌbatjì xi̱ta̱.
\p
\v 26 I̱tꞌaà tsa̱ján, nguì jè Jesús xi mochjeén‑ná nga no̱ꞌmiì ítjòn tíjna: nga xi̱ta̱ tsjeè‑né; ni̱mé jé tjín‑la̱; mì tjé kji ini̱ma̱‑la̱; tíjnatꞌaàxìn‑la̱ xi̱ta̱ jé, ko̱ jè xi ìsa̱ ꞌnga tíjna ján ngajmiì.
\v 27 Mìtsà kꞌoa̱sꞌín koni sꞌín no̱ꞌmiì ítjòn xi iꞌnga, nga na̱chrjein nchijòn síkꞌen cho̱ nga tsjá kjo̱tjò‑la̱ xi kjoa̱ tsꞌe̱ jé‑la̱, i̱kjoàn tsjá tsꞌe̱ jé‑la̱ xi̱ta̱ na̱xa̱ndá. Ta̱nga Jesús kꞌe̱ nga kitsjaà kjo̱tjò yijo‑la̱ nga kꞌen, jngoò kꞌaá kitsjaà ni̱ta̱ kjé‑né.
\v 28 Jè kjo̱tíxoma xi kitsjaà Moisés, kꞌoa̱á sꞌín tíchja̱ nga jñà kítsa̱jna no̱ꞌmiì ítjòn xi ta̱xki̱ xi̱ta̱ xi chiba ngaꞌñó tjín‑la̱; ta̱nga jè ꞌén xi xkón tjín xi i̱skan kitsjaà Nainá, kꞌoa̱á sꞌín tíchja̱ nga jè Kiꞌndí‑la̱ Nainá, kíjna no̱ꞌmiì ítjòn, jè xi kꞌoa̱sꞌín kisìko̱ Nainá nga ni̱mé chijatꞌaà‑la̱ ni̱ta̱ kjé‑ne.
\c 8
\s Jè kjoa̱ xi̱tse̱ xi tsibíꞌñó Jesús
\p
\v 1 Ngatsꞌiì kjoa̱ xi chibàya‑ná, tjín jngoò xi ìsa̱á ꞌñó chjí‑la̱, jè‑né nga tíjna jngoò‑ná no̱ꞌmiì ítjòn xi tsibìjnatꞌaà chrja kixi̱‑la̱ íxi̱le̱ kjo̱tíxoma‑la̱ Nainá ján ngajmiì.
\v 2 Ya̱á síxá ya̱ ñánda tíjna xi nguì Niꞌya Tsjeè‑la̱ Nainá, xi jè sobà Nainá tsibíndaà; mìtsà ta̱xki̱ xi̱ta̱ tsibíndaà.
\p
\v 3 Ngatsꞌiì no̱ꞌmiì ítjòn, kꞌoa̱á sꞌín satíxoma‑la̱ nga kjo̱tjò tsjátꞌaà‑la̱ Nainá ko̱ cho̱ síkꞌen; kꞌoa̱á ma‑ne nga jè Cristo ti̱koa̱ tjínè‑la̱ nga kisꞌe‑la̱ mé kjo̱tjò xi kitsjaàtꞌaà‑la̱ Nainá.
\v 4 Jè Cristo, tsà i̱ tíjna i̱tꞌaà nangui, skanda mì‑la kiì ko̱ma nga no̱ꞌmiì kíjna, nga i̱ i̱tꞌaà nangui, jyeé tjín no̱ꞌmiì xi tsjátꞌaà‑la̱ kjo̱tjò Nainá koni sꞌín tjín kjo̱tíxoma xi kiskiì Moisés.
\v 5 Ta̱nga jñà no̱ꞌmiì xi tjín i̱ i̱tꞌaà nangui, ya̱á síxá niꞌya xi tà i̱sén‑la̱‑né ko̱ ꞌnguién‑la̱‑né jè Niꞌya Tsjeè‑la̱ Nainá xi tíjna ngajmiì; nga̱ jè Moisés kꞌe̱ nga jye mejèn koi̱ìtsꞌia̱ nga ki̱ìndaà niꞌya tsjeè‑la̱ Nainá xi nikje, jè Nainá kitsò‑la̱: “Ndaà chítsejìn, kꞌoa̱ kó kji tꞌi̱in koni kji xi tsakoò‑lè ya̱ nindoò Sinaí.”
\v 6 Ta̱nga na̱chrjein i̱ꞌndei̱, ìsa̱á ndaà tjín xá xi kitjoé‑la̱ Jesucristo nga no̱ꞌmiì ítjòn tíjna, nga jè osìjnajiìn jngoò kjoa̱ xi̱tse̱ xi ìsa̱ ndaà tjín xi tsibíndaàjiìn Nainá ko̱ xi̱ta̱, nga ya̱á nchrobátꞌaà‑ne ꞌén xi ìsa̱ ndaà tjín koni sꞌín jye kitsjaà tsoꞌba Nainá.
\p
\v 7 Tsà ni̱mé xi kisìchijàtꞌaà‑la̱ jè kjoa̱ xi kisindaàjiìn ítjòn, mì‑la kiì mochjeén nga ìjngoò kꞌa sindaàjiìn xi ma‑ne jò kꞌa.
\v 8 Ta̱nga Nainá kꞌe̱ nga tsohótiko̱, kꞌoa̱á kitsò:
\q Ki̱jchò na̱chrjein kꞌe̱ nga kìndaàjiìn‑ko̱ jngoò kjoa̱ xi̱tse̱
\q jñà xi̱ta̱ Israel ko̱ xi̱ta̱ Judá, kitsò Nainá.
\q
\v 9 Jè kjoa̱ xi̱tse̱ xi kìndaàjiìn‑koa̱a,
\q mìtsà kꞌoa̱sꞌín si̱ndaàjiìn koni tsꞌe̱ xi̱ta̱ jchínga‑la̱,
\q kꞌe̱ nga ꞌa̱n sobà kitsobà tsja
\q nga tsachrjekàjñaà nangui Egipto.
\q Jñà xi̱ta̱ koi, mìkiì kisìkitasòn koni sꞌín kisindaàjiìn,
\q kꞌoa̱á komà‑ne nga kitsjìn takoàn, tsò Nainá.
\q
\v 10 Kꞌe̱ nga jye ko̱ma i̱skan,
\q jè kjoa̱ xi̱tse̱ xi kíndaàjñaàkoa̱a xi̱ta̱ Israel, kiísꞌín sꞌe̱, tsò Nainá:
\q Kjo̱tíxoma‑na̱ ya̱á kíjnajñaà ya̱ kjo̱hítsjeèn‑la̱,
\q ko̱ ya̱á skiaà i̱jiìn ini̱ma̱‑la̱.
\q ꞌA̱n‑ná xi Nainá ki̱tso̱‑na,
\q ko̱ jñà‑né xi ko̱ma xi̱ta̱ na̱xa̱ndá‑na̱.
\q
\v 11 Mì ti̱ kiì ko̱chjeén‑ne nga xi̱ta̱ xíkjín ke̱èno̱jmíya‑la̱
\q ni̱ mìtsà jè ꞌndse̱ ke̱èno̱jmí‑la̱ nga skoe̱xkon Nainá,
\q nga ngatsꞌiì xi̱ta̱ skoe̱xkon‑na̱
\q matsꞌia̱ko̱‑ne xi ìsa̱ i̱xti skanda jñà xi ꞌñó xi̱ta̱ jchínga.
\q
\v 12 ꞌA̱án siìjchàatꞌaà‑la̱ ngatsꞌiì kjoa̱ chꞌo xi kisꞌiìn,
\q mì ti̱ kiì siìkítsjeèn‑na̱ jé xi tjín‑la̱.
\m
\v 13 Kꞌe̱ nga Nainá síkaxki̱ ìjngoò kjoa̱ xi̱tse̱, tsòyaá‑ne nga jè kjoa̱ xi kisindaàjiìn ítjòn, jyeé kòjchínga. Mì ti̱ kiì tímochjeén‑ne, jyeé tíchija.
\c 9
\s Jè Niꞌya Tsjeè‑la̱ Nainá xi nikje
\p
\v 1 Jè kjoa̱ xi tsibíndaàjiìn ítjòn Nainá kisꞌeé‑la̱ kjo̱tíxoma kósꞌín ma nga jeya nìkíjnaá Nainá ko̱ kisꞌe jngoò‑la̱ niꞌya tsjeè i̱ i̱tꞌaà nangui.
\v 2 Jè Niꞌya Tsjeè‑la̱ Nainá xi nikje, kꞌoa̱á sꞌín tjíndaà nga jngoò i̱ꞌnde tíjna ítjòn xi ꞌmì I̱ꞌnde Tsjeè, ñánda tíjna ki̱cha̱ xi tìya niꞌín ko̱ ñánda tíjna ími̱xa̱ xi nchasòn i̱nchra̱jín tsjeè‑la̱ Nainá.
\v 3 Jè nikje cortina xi ma jò‑ne xi tjo̱bá jngoò osen niꞌya nikje, ya̱ i̱jto̱n kjijna i̱ꞌnde xi ꞌmì I̱ꞌnde xi ìsa̱ ꞌÑó Tsjeè.
\v 4 I̱ꞌnde jè, ya̱á kjijna jngoò kaxa̱ xi nguì oro ñánda tìsòn chrjongó‑la̱ Nainá; ti̱koa̱ ya̱á kjijna kaxa̱ xi nguì oro yijàjno tsꞌe̱ kjoa̱ xi tsibíndaàjiìn Nainá. Kaxa̱ jè, tíjnaya jngoò ti̱jí ki̱cha̱ xi nguì oro ñánda ꞌncha i̱nchra̱jín xi ꞌmì maná, ti̱koa̱ ya̱á kjinaya yá nise‑la̱ Aarón xi tsibíjtsꞌén‑tꞌaà chrja‑la̱ ko̱ ya̱ ꞌncha jñà nda̱jo̱ teè ñánda tjítꞌaà kjo̱tíxoma‑la̱ Nainá xi kitjoé‑la̱ Moisés.
\v 5 Ya̱ i̱sòn kaxa̱ ꞌncha i̱sén‑la̱ àkja̱le̱ xi querubín ꞌmì xi tjín‑la̱ jnga̱á xi okó kjoa̱ jeya‑la̱ Nainá; jñà jnga̱á‑la̱ bíjtsaꞌma jè kaxa̱. Ta̱nga i̱ꞌndei̱, jñà kjoa̱ koi, mìkiì mochjeén nga íjngó íjngó ska̱ya ko̱xki̱.
\p
\v 6 Kꞌe̱ nga jye kꞌoa̱sꞌín kisinchaàndaà tsojmì koi, jñà no̱ꞌmiì, kjitꞌaà na̱chrjein fahasꞌen ya̱ Niꞌya Tsjeè‑la̱ Nainá xi nikje, jè i̱ꞌnde xi tíjna ítjòn, nga síkitasòn xá‑la̱ nga beèxkón Nainá.
\v 7 Ta̱nga jè i̱ꞌnde xi ma‑ne jò, ta jè ta̱jngoò no̱ꞌmiì ítjòn fahasꞌen jngoò kꞌa nga jngoò nó; kꞌe̱ nga fahasꞌen, tjínè‑la̱ nga jní‑la̱ cho̱ ꞌba xi tsjátꞌaà‑la̱ Nainá kjoa̱ xi ti̱tsꞌe̱‑ne jé‑la̱ ko̱ ngatsꞌiì jé‑la̱ xi̱ta̱ na̱xa̱ndá, jñà xi mìkiì tíjiìn‑la̱ tsà jé ótsji.
\v 8 Jè Ini̱ma̱ Tsjeè‑la̱ Nainá kꞌoa̱á sꞌín síkíchi̱ya‑ná, kꞌe̱ nga tákó jè tímochjeén Niꞌya Tsjeè xi nikje xi kisindaà ítjòn, kjꞌeè kiì táxꞌa̱ꞌnde nga ko̱ma ki̱tjásꞌe̱én jè I̱ꞌnde xi Ìsa̱ ꞌÑó Tsjeè.
\v 9 Jñà kjoa̱ xi komà kjòtseé, tà kjoa̱ mangásòn‑né koni sꞌín tíma na̱chrjein i̱ꞌndei̱; nga jñà kjo̱tjò ko̱ jní‑la̱ cho̱ xi kixíxteèn i̱ꞌnde jè, tsjìn‑la̱ ngaꞌñó nga si̱ìtsjeè kjo̱hítsjeèn‑la̱ xi̱ta̱ xi kꞌoa̱sꞌín beèxkón Nainá.
\v 10 Kjoa̱ koi, tà kjoa̱ tsꞌe̱é yijo‑la̱ xi̱ta̱, mé tsojmì xi ma chine ko̱ xi ma ꞌyò, koa̱ kósꞌín sítsjeè yijo‑la̱ xi̱ta̱; tà kꞌoa̱á sꞌín tje̱n ko̱chjeén skanda kꞌe̱ nga jè Nainá si̱ìkjatjìya‑la̱ ngatsꞌiì kjoa̱ koi.
\s Ngaꞌñó xi tse tjín‑la̱ jè jní xi tsibíxteèn Cristo
\p
\v 11 Ta̱nga jyeé jꞌiì Cristo nga no̱ꞌmiì ítjòn tíjna i̱tꞌaà tsꞌe̱ kjo̱ndaà‑la̱ Nainá xi jye tíma. Ya̱á jahasꞌen Niꞌya Tsjeè‑la̱ Nainá jè xi ìsa̱ ꞌñó ndaà choòn ko̱ xi ìsa̱ kixi̱ tjín, nga mìtsà tsja xi̱ta̱ kisindaà‑ne jè xi tsò‑ne kjoa̱ nga mìtsà i̱ i̱tꞌaà nangui kisindaà.
\v 12 Cristo, jngoò kꞌaá jahasꞌen ya̱ I̱ꞌnde Tsjeè. Mìtsà ti̱ jní‑la̱ tíndsó ko̱ jní‑la̱ nchra̱ja̱ jahasꞌen‑ko̱‑ne. Tsꞌe̱ sobá jní jahasꞌen‑ne. Kꞌoa̱á sꞌín kisꞌiìn nga tsibíchjítjì jé‑ná, mé‑ne nga komà kisìkítsa̱jnandei̱í‑ná ni̱ta̱ mé na̱chrjein‑ne.
\v 13 Jè jní‑la̱ nchra̱ja̱ ko̱ jní‑la̱ tíndsó ko̱ chijo‑la̱ nchra̱ja̱ kitì xi nchra̱ja̱ chjo̱ón kiꞌndí, maá‑la̱ sítsjeè yijo‑la̱ xi̱ta̱ xi xa̱ꞌya̱‑la̱ kꞌe̱ nga xíxteèn‑jno.
\v 14 Tsà kꞌoa̱á sꞌín bitasòn kjoa̱ koi, jè jní xi tsibíxteèn Cristo, ìsa̱á tse ngaꞌñó tjín‑la̱. Nga i̱tꞌaà tsꞌe̱é ngaꞌñó‑la̱ Ini̱ma̱ Tsjeè xi tíjnakon ni̱ta̱ mé na̱chrjein‑ne nga kitsjaà kjo̱tjò‑la̱ Nainá yijo‑la̱ xi mìtsà mé jé tjín‑la̱. Jè jní‑la̱ Cristo sítsjeèya kjo̱hítsjeèn‑nò nga mì ti̱ kiì koa̱ ti̱sꞌín sꞌe̱n‑nò kjoa̱ xi fìko̱‑ná kjoa̱biyaà, mé‑ne nga ma si̱xá‑là Nainá xi tíjnakon.
\s Jè kjoa̱ xi̱tse̱ xi tsibíndaàjiìn Nainá ko̱ xi̱ta̱
\p
\v 15 Kꞌoa̱á ma‑ne nga jè Cristo osìjnajiìn osen koni sꞌín tsibíꞌñó jngoò kjoa̱ xi̱tse̱. Kꞌe̱ nga kꞌen ngajo‑la̱ xi̱ta̱, jè tsibíchjítjì jé‑la̱ xi tsohótsji xi̱ta̱ kꞌe̱ nga ti̱sa̱ jè tíhotíxoma kjoa̱ xi kisindaàjiìn ítjòn, mé‑ne ngatsꞌiì xi̱ta̱ xi xó jaàjiìn‑ne tjoé‑la̱ kjo̱tjò xi tsjá Nainá ni̱ta̱ kjé‑ne koni sꞌín kitsjaà ꞌén‑la̱ Nainá xi tsoꞌba kiìchja̱‑ne.
\v 16 Kꞌe̱ nga jngoò xi̱ta̱ mejèn‑la̱ síkaꞌbí tsojmì xi tjín‑la̱, bíndaà jngoò xo̱jo̱n xi bíꞌñó. Skanda kꞌe̱é mochjeén kꞌe̱ nga biyaà jè xi̱ta̱ xi bíndaà.
\v 17 Ta̱nga xo̱jo̱n jè, ni̱mé chjí‑la̱ kꞌe̱ nga ti̱kjꞌeè biyaà xi̱ta̱ xi tsibíndaà; skanda kꞌe̱é chjí‑la̱ kꞌe̱ nga ki̱yá.
\v 18 Jè kjoa̱ xi kisindaàjiìn ítjòn kꞌoa̱á ti̱sꞌín kisindaàjiìn nga cho̱ kꞌen mé‑ne komà kixíxteèn‑ne jní.
\v 19 Moisés, kꞌe̱ nga jye tsibíxke̱jiìn‑la̱ xi̱ta̱ na̱xa̱ndá ngatsꞌiì kjo̱tíxoma‑la̱ Nainá, i̱kjoàn kiskoé jní‑la̱ tíndsó ko̱ jní‑la̱ nchra̱ja̱ kiꞌndí ko̱ kisìkájiìn nandá; ko̱ kiskoé jngoò chrja‑la̱ yá hisopo ko̱ tsja̱‑la̱ orrè xi inì kjoàn; jahajiìn jní‑la̱ cho̱; i̱kjoàn tsibíxteèn‑jno jè xo̱jo̱n xi tjítꞌaà kjo̱tíxoma‑la̱ Nainá; kꞌe̱é tsibíxteèn‑jno ngatsꞌiì xi̱ta̱ na̱xa̱ndá.
\v 20 Moisés kitsò: “Jè jní jè xi síkixi̱ya kjoa̱ nga ko̱ma si̱kitasòn koni sꞌín tsibíndaàjiìn‑ko̱‑nó Nainá.”
\v 21 Moisés, ti̱koa̱á tsibíxteèn‑jno jní jè Niꞌya Tsjeè‑la̱ Nainá xi nikje ko̱ ngatsꞌiì tsojmì xi mochjeén kꞌe̱ nga yaxkón Nainá.
\v 22 Koni sꞌín tíchja̱ xo̱jo̱n xi tjítꞌaà kjo̱tíxoma‑la̱ Nainá, mejèn tsà ngatsꞌiì kjoa̱, sa̱á jní matsjeèya‑ne; tsà mìkiì xíxteèn jní, mìkiì ko̱ma jcha̱tꞌaà‑la̱ jé‑la̱ xi̱ta̱.
\p
\v 23 Kꞌoa̱á sꞌín kjòchjeén nga jní‑la̱ cho̱ matsjeèya‑ne jè Niꞌya Nikje Tsjeè ko̱ tsojmì xi tjíya xi mochjeén kꞌe̱ nga yaxkón Nainá; jñà tsojmì koi, ta okó‑né koni choòn ján ngajmiì; ta̱nga jñà xi tjín ngajmiì, mochjeén‑né nga biyaà jngoò xi ìsa̱ xkón tjín mé‑ne ko̱ma ko̱tsjeèya‑ne.
\p
\v 24 Ta̱nga Cristo, mìtsà ya̱ jahasꞌen Niꞌya Nikje Tsjeè xi tsja xi̱ta̱ kisindaà‑ne, xi ta okó xi tjín ngajmiì. Cristo, nguì ya̱á jahasꞌen ngajmiì nga nguixko̱n Nainá nga tíchja̱tjì‑ná.
\v 25 Mìkiì kꞌoa̱sꞌín kjìn kꞌa jahasꞌen ya̱ ngajmiì nga kitsjaàtꞌaà kjo̱tjò yijo‑la̱, koni sꞌín no̱ꞌmiì ítjòn nga xki̱ nó fahasꞌen I̱ꞌnde xi ꞌÑó Tsjeè, nga fahasꞌen ko̱ jní xi mìtsà tsꞌe̱.
\v 26 Cristo tsà kjìn‑la kꞌa jahasꞌen ngajmiì ti̱koa̱ tjínè‑la̱ nga kjìn kꞌa si̱ìkjeiín kjo̱ꞌin kó‑ne skanda kisindaà i̱sòꞌnde. Ta̱nga i̱ꞌndei̱, nga jye tífehetꞌaà na̱chrjein, ta jngoò kꞌa jꞌiì nga kitsjaà kjo̱tjò yijo‑la̱ nga tsibíxteèn jní‑la̱, mé‑ne nga kitjaàxìn‑ne kjoa̱ tsꞌe̱ jé ni̱ta̱ mé na̱chrjein‑ne.
\v 27 Kꞌoa̱á sꞌín tjín nga ngatsꞌiì xi̱ta̱, ta jngoò kꞌa biyaà, ko̱ i̱skan kjoi̱í jè na̱chrjein nga si̱ndaàjiìn‑la̱.
\v 28 Kꞌoa̱á ti̱sꞌín tjín i̱tꞌaà tsꞌe̱ Cristo, ta jngoò kꞌa kitsjaàtꞌaà kjo̱tjò yijo‑la̱ nga tsibíxteèn jní‑la̱, mé‑ne nga kjìn xi̱ta̱ tjáxìn‑ne jé‑la̱. Xi ma‑ne jò kꞌa, ki̱tjojen ìjngoò kꞌa‑ne ngajmiì; mìtsà ti̱ jé kjoa̱áxìn‑ne; koií xá kjoi̱í‑ne nga ko̱chrjekàjiìn kjo̱ꞌin jñà xi̱ta̱ xi nchikoña‑la̱.
\c 10
\s Mé‑ne ꞌñó chjí‑la̱ jè kjoa̱ biyaà‑la̱ Cristo
\p
\v 1 \fig Dead sheep as burnt offering on altar without horns -25% HEB 10 |68-LB00255B.TIF|col|HEB 10||Chrjó nda̱jo̱ ñánda tìsòn cho̱ xi biyaà xi kjo̱tjò‑la̱ Nainá|HEB 10.1\fig*Jè kjo̱tíxoma‑la̱ Nainá xi kitjoé‑la̱ Moisés, mìtsà nguì jñà kjo̱ndaà xi i̱skan jꞌiì; ta ꞌnguién‑la̱ né xi tsakó. Kꞌoa̱á ma‑ne nga jngoó kꞌa mìkiì ko̱ma nguì tsjeè si̱ìkítsa̱jna xi̱ta̱ xi xki̱ nó síchrañatꞌaà‑la̱ Nainá nga ti̱jñà ti̱jñà kjo̱tjò tsjá‑ne.
\v 2 Jè kjo̱tíxoma, tsà jngoò kꞌa kisìtsjeèya jé‑la̱ xi̱ta̱, mì‑la ti̱ kiì si̱ìkájno‑ne tsà jé tjín‑la̱; ti̱koa̱á mì‑la ti̱ kiì jní‑la̱ cho̱ tsjá kjo̱tjò‑ne.
\v 3 Ta̱nga jè jní‑la̱ cho̱, xki̱ nó xki̱ nó síkítsjeèn‑ya jé‑la̱ xi̱ta̱.
\v 4 Nga jè jní‑la̱ nchra̱ja̱ ko̱ jní‑la̱ tíndsó mìkiì ma‑la̱ faáxìn jñà jé‑la̱ xi̱ta̱.
\p
\v 5 Cristo, kꞌe̱ nga jꞌiì i̱ i̱sòꞌnde kitsò‑la̱ Nainá:
\q Majìn‑lè jní‑la̱ cho̱ xi biyaà, ko̱ kjo̱tjò xi tsjátꞌaà‑lè xi̱ta̱,
\q ta̱nga jè yijo‑na̱ kinìkíjnandei.
\q
\v 6 Mìkiì sasén‑lè cho̱ xi kitì, ko̱ ni̱ jñà kjo̱tjò xi tsjá‑lè xi̱ta̱ xi kjoa̱ tsꞌe̱ jé‑la̱.
\q
\v 7 Kꞌe̱é kichjà, kixan‑lè: “Koni sꞌín tíchja̱ xo̱jo̱n‑lè xi i̱tꞌaà tsꞌa̱n,
\q i̱í tìjna̱a nga sìkitasoàn koni sꞌín mejèn‑lè,
\q ji̱ xi Nainá ꞌmì‑lè.”
\m
\v 8 Cristo, ítjòn kitsò: “Majìn‑lè ko̱ mìkiì sasén‑lè jní‑la̱ cho̱ xi biyaà ko̱ kjo̱tjò xi tsjá‑lè xi̱ta̱, cho̱ xi kitì ko̱ kjo̱tjò xi tsjá xi kjoa̱ tsꞌe̱ jé‑la̱”, na̱sꞌín kꞌoa̱sꞌín tíchja̱ kjo̱tíxoma nga tjínè‑la̱ nga koa̱tjín xi tsjá xi̱ta̱.
\v 9 I̱kjoàn kitsò ìsa̱: “I̱í tìjna̱a nga sìkitasoàn koni sꞌín mejèn‑lè.” Kꞌe̱ nga o̱sꞌín kiìchja̱, tsòyaá‑ne nga jè Cristo jaàxìn jè kjoa̱ jchínga mé‑ne nga kisìkíjna ngajo‑ne xi kjoa̱ xi̱tse̱.
\v 10 Kꞌoa̱á sꞌín komà nga kisìtsjeèya ini̱ma̱‑ná Nainá i̱tꞌaà tsꞌe̱ Na̱ꞌèn‑ná Jesucristo kꞌe̱ nga ko̱sꞌín kisìkitasòn koni sꞌín mejèn‑la̱ Nainá nga ta jngoò kꞌa kitsjaà kjo̱tjò yijo‑la̱ ni̱ta̱ kjé‑ne kꞌe̱ nga kꞌen.
\p
\v 11 Ngatsꞌiì no̱ꞌmiì, na̱chrjein nchijòn síkitasòn xá‑la̱ nga kjìn kꞌa tsjátꞌaà‑la̱ Nainá xi ti̱jñà ti̱jñà‑ne kjo̱tjò xi mìkiì ma‑la̱ faáxìn jé‑la̱ xi̱ta̱.
\v 12 Ta̱nga Jesucristo ta jngoò kꞌa kitsjaàtꞌaà kjo̱tjò yijo‑la̱ kjoa̱ tsꞌe̱ jé ni̱ta̱ kjé‑ne, i̱kjoàn tsibìjnatꞌaà chrja kixi̱‑la̱ Nainá.
\v 13 Ya̱á tíkoña skanda kꞌe̱ nga ki̱jchò na̱chrjein nga jñà xi̱ta̱ kondra̱‑la̱ si̱ìchija nga jè Nainá si̱ìkítsa̱jnangui ndso̱ko̱.
\v 14 Ta jngoò kꞌaá kitsjaàtꞌaà kjo̱tjò yijo‑la̱ mé‑ne nga nguì ndaà kjòkixi̱ya‑ne xi̱ta̱ ni̱ta̱ kjé‑ne, jñà xi̱ta̱ xi tímatsjeè.
\v 15 Jè Ini̱ma̱ Tsjeè‑la̱ Nainá ndaà síkixi̱ya‑ná kjoa̱ koi; nga sa̱ ítjòn tsò‑né:
\q
\v 16 Jè kjoa̱ jè xi kìndaàjiìn‑koa̱a jñà xi̱ta̱
\q kꞌe̱ nga jye ko̱ma i̱skan, tsò Na̱ꞌèn‑ná:
\q Jñà kjo̱tíxoma‑na̱ sìkíjnajñaà ini̱ma̱‑la̱,
\q ko̱ ya̱á skia̱a i̱jiìn kjo̱hítsjeèn‑la̱.
\m
\v 17 I̱kjoàn tsò‑ìsa:
\q ꞌA̱n, mì ti̱ kiì siìkítsjeèn‑na̱ jé xi tjín‑la̱
\q ko̱ ngatsꞌiì kjoa̱ chꞌo xi sꞌín.
\m
\v 18 Kꞌe̱ nga jye jcha̱tꞌaà‑ná jé‑ná, mì ti̱ mé kjo̱tjò ko̱chjeén‑ne xi kjoa̱ tsꞌe̱ jé.
\s Mé kjoa̱‑ne nga ìsa̱ ndaà ki̱nchatꞌaà chrañà‑lá Nainá
\p
\v 19 Jñò ndí ꞌndsè, kꞌoa̱á ma‑ne na̱chrjein i̱ꞌndei̱, tjíꞌnde‑ná nga ki̱tjásꞌe̱én jè I̱ꞌnde‑la̱ Nainá xi ꞌÑó Tsjeè, koií kjoa̱‑la̱ jè jní xi tsibíxteèn Jesús.
\v 20 Nga jè kiskíxꞌa̱ jngoò‑ná ndi̱yá xi̱tse̱ xi fìko̱‑ná ñánda tjín kjoa̱binachon, nga ko̱ma ko̱tokjá jè nikje cortina xi tjo̱hóya jngoò osen I̱ꞌnde Tsjeè‑la̱ Nainá. Jè nikje, kꞌoa̱á ngaya‑la̱ koni yijo‑la̱ Jesús.
\v 21 Nga̱ tjín jngoò‑ná no̱ꞌmiì xi ꞌñó jeya tíjna xi otíxoma ya̱ niꞌya‑la̱ Nainá.
\v 22 Kꞌoa̱á ma‑ne nga mochjeén‑né nga ìsa̱ ndaà ki̱nchatꞌaà chrañà‑lá Nainá, nga nguì kixi̱ si̱kíjnaá ini̱ma̱‑ná ko̱ nguì tíjngoò takoán xi i̱tꞌaà tsꞌe̱, nga jè Cristo jye kisìtsjeè ini̱ma̱‑ná kjoa̱ tsꞌe̱ jé, ko̱ jè yijo‑ná, kꞌoa̱á ngaya‑la̱ koni tsà nguì nandá tsjeè tsaníjno‑ne.
\v 23 Kixi̱ ki̱tsa̱jnakoa̱á kjoa̱ xi titsa̱chiñá‑lá koni sꞌín mokjeiín‑ná nga mì kijen kikjá‑lá takoán; nga Nainá, xi̱ta̱ kixi̱‑né, si̱ìkitasòn‑né koni sꞌín jye kitsjaà ꞌén‑la̱.
\v 24 Ki̱nchátsjiꞌnde‑lá nga ꞌén ndaà ki̱nókjoa̱‑lá xinguia̱á mé‑ne nga ìsa̱ ndaà sꞌe̱‑ná kjo̱tsjacha; ko̱ sꞌe̱én kjoa̱ xi ndaà tjín.
\v 25 Mìkiì si̱jchayaá jè na̱chrjein kꞌe̱ nga bixoñaá, koni sꞌín iꞌnga xi̱ta̱ nga mì ti̱ kiì bixoñatꞌaà‑la̱ xíkjín. Ta saà mochjeén‑né nga kꞌoi̱‑lá ngaꞌñó xinguia̱á nga jngoò ìjngoò; ìsa̱á ꞌñó ko̱sꞌia̱án kꞌe̱ nga ya̱á nga jye tínchrobá machrañà na̱chrjein‑la̱ Nainá.
\p
\v 26 Tsà kꞌoa̱sꞌín tjín takoán nga ki̱nchátsji jé ìsa̱á kꞌe̱ nga jye kiyaxkoaán kjoa̱ kixi̱‑la̱ Nainá, mì ti̱ mé jní ko̱ma xíxteèn‑ne xi ma kjoa̱áxìn jé‑ná.
\v 27 Tà jè ko̱ko̱ ìsa̱‑ná kjo̱ꞌin xi ꞌñó xkón tjín ko̱ niꞌín jnga̱ xi síkjehesòn yije xi̱ta̱ xi kondra̱ fì‑la̱ Nainá.
\v 28 Kꞌe̱ nga tsà jngoò xi̱ta̱ xi mìkiì síkitasòn kjo̱tíxoma‑la̱ Nainá xi kitjoé‑la̱ Moisés, tsà tjín jò, jàn xi̱ta̱ xi tsjá ꞌén nga kixi̱ kjoa̱, mìkiì mahi̱ma̱cha, nìkꞌen‑né.
\v 29 ¿Kósꞌín beè‑la̱ takòn jñò, a mìtsà ìsa̱ tse kjo̱ꞌin okꞌìn‑la̱ jñà xi̱ta̱ xi binchanè jè Kiꞌndí‑la̱ Nainá, ko̱ ochrjekàngui jè jní xi tsibíxteèn, ko̱ ti̱koa̱ chja̱jno‑la̱ Ini̱ma̱ Tsjeè‑la̱ Nainá xi tjín‑la̱ kjo̱ndaà? Jè jní xi ochrjekàngui, jè‑né xi Nainá kisìkjeén nga tsibíndaàjiìn‑ko̱ xi̱ta̱ jngoò kjoa̱ xi̱tse̱, ko̱ jè xi kisìtsjeè‑ne ini̱ma̱‑la̱ xi̱ta̱ koi.
\v 30 Jyeé tíjiìn‑ná nga kꞌoa̱á tsò Nainá: “ꞌA̱án oko̱‑na nga tsjaà‑la̱ kjo̱ꞌin xi̱ta̱, ꞌa̱án tsjaà‑la̱ chjí‑la̱.” Ìjngoò kꞌa tsò: “Jè Na̱ꞌèn‑ná ki̱ìndaàjiìn‑la̱ xi̱ta̱ na̱xa̱ndá‑la̱.”
\v 31 ¡Ta̱xki̱ ꞌñó tse kjo̱xkón tjín kꞌe̱ nga ya̱ kàyaá tsja Nainá xi tíjnakon!
\p
\v 32 Ta̱nga ti̱kítsjeèn kósꞌín komàtꞌioòn na̱chrjein xi jye tsato, kꞌe̱ nga sa̱ kinaꞌyà ítjòn ꞌén kixi̱ xi kisìhiseèn‑nò, nga kichìkjoa̱‑nò nga tse kjo̱ꞌin kinìkjioòn.
\v 33 Kisꞌeé na̱chrjein kꞌe̱ nga jñà xi̱ta̱ kiìchja̱jno‑nò ko̱ kiskaàn‑ko̱‑nò nga nguixko̱n xi̱ta̱ na̱xa̱ndá. Ti̱koa̱á kisꞌeé na̱chrjein nga jñò kitsjahijtako̱o jñà xi̱ta̱ xinguio̱o xi ti̱koa̱ kjo̱ꞌin nchisíkjeiín.
\v 34 Jñò, kjòhi̱ma̱cha xi̱ta̱ xi kjo̱ꞌin nchisíkjeiín nga nda̱yá títsa̱jna; ko̱ ti̱koa̱ mìkiì kòjti‑nò kꞌe̱ nga kjòchijé‑nò tsojmì‑nò, ta sa̱á kjòtsjaá‑nò nga jye tíjiìn‑nò nga ján ngajmiì tjín‑nò tsojmì xi ìsa̱ ndaà kjoàn xi mìkiì fehetꞌaà ni̱ta̱ mé na̱chrjein‑ne.
\v 35 Kì nìchija‑jèn koni sꞌín kjitꞌaàtakòn Nainá nga ya̱á tjoé‑nò jè xi ꞌñó tse chjí‑la̱.
\v 36 Mochjeén‑né nga sꞌe̱‑nò kjoa̱tsetakòn kjoa̱ tsꞌe̱ kjo̱ꞌin, mé‑ne kꞌe̱ nga jye ki̱tasòn koni sꞌín mejèn‑la̱ Nainá, tjoé‑nò xi tsjá‑nò koni sꞌín jye kitsjaà ꞌén‑la̱ xi tsoꞌba kiìchja̱‑ne.
\v 37 Kꞌoa̱á sꞌín chja̱ xo̱jo̱n xi tjítꞌaà ꞌén‑la̱ Nainá nga tsò:
\q Ta jngoò tjò chija‑la̱ nga kjoi̱í jè xi sa̱ nchrobá.
\q Mìkiì ko̱chrjein‑la̱.
\q
\v 38 Jè xi xi̱ta̱ kixi̱ kíjnakon‑né nga mokjeiín‑la̱,
\q ta̱nga tsà ko̱sitꞌaà xìn, mìkiì sasén‑la̱ ini̱ma̱‑na̱.
\m
\v 39 Ta̱nga jñá, mì kꞌoa̱á sꞌe̱én koni sꞌín xi̱ta̱ xi ítsꞌi̱n fì‑ne nga síchija ini̱ma̱‑la̱. Ta sa̱á ya̱ kjiaán ya̱ i̱ꞌnde ñánda ki̱tjokàjiìn kjo̱ꞌin ini̱ma̱‑ná koi kjoa̱‑la̱ nga mokjeiín‑ná.
\c 11
\s Kjoa̱ xi mokjeiín‑ná
\p
\v 1 Jè kjoa̱ xi mokjeiín‑ná, jè‑né nga tjín kixi̱ nga tjoé‑ná jñà kjoa̱ xi chiñá‑lá; jè‑né nga tíjngoò takoán nga ki̱tasòn na̱sꞌín mìkiì titsa̱ꞌyaá xi kjoa̱ ni̱to̱n.
\v 2 Jñà xi̱ta̱ jchínga kjòtseé, koií kjoa̱‑la̱ nga kòkjeiín‑la̱ nga ndaá kiꞌya‑la̱.
\p
\v 3 Ta koi‑né nga mokjeiín‑ná nga ko̱sꞌín machi̱ya‑ná nga jè Nainá, tà ko̱ó ꞌén‑la̱ tsibíndaà i̱sòꞌnde; kisìkatsejèn tsojmì xi mìkiì tsejèn nga sa̱ ítjòn.
\p
\v 4 Abel, koií kjoa̱‑la̱ nga kòkjeiín‑la̱, kitsjaàtꞌaà‑la̱ Nainá kjo̱tjò xi ìsa̱ ꞌñó ndaà kjoàn, mì kꞌoa̱à‑ne koni tsꞌe̱ Caín. Kꞌoa̱á sꞌín komà‑ne nga xi̱ta̱ kixi̱ kitsò‑la̱ Nainá Abel; kiskoé kjo̱tjò xi ijchòko̱‑la̱; skanda na̱chrjein i̱ꞌndei̱, tákó kꞌoa̱á sꞌín tíchja̱ nga mokjeiín‑la̱, na̱sꞌín jye kꞌen.
\p
\v 5 Enoc, ti̱koa̱á kòkjeiín‑la̱; kꞌoa̱á sꞌín komà‑ne nga kiìko̱ tíkon Nainá ján ngajmiì; mì ti̱ kiì kisakò‑ne kꞌe̱ nga jye kiìko̱. Kꞌe̱ nga sa̱ tsibìjna i̱ i̱sòꞌnde, Enoc, kꞌoa̱á sꞌín kiꞌya‑la̱ nga ndaà kisaseèn takòn Nainá.
\v 6 Tsà mìkiì mokjeiín‑ná i̱tꞌaà tsꞌe̱ Nainá, mìkiì ko̱ma sꞌe̱én kjoa̱ xi sasén‑la̱ Nainá. Jè xi̱ta̱ xi síchrañatꞌaà‑la̱ Nainá mochjeén‑né nga ndaà ko̱kjeiín‑la̱ nga tíjna Nainá, ti̱koa̱ ko̱kjeiín‑la̱ nga ngatsꞌiì xi̱ta̱ xi ótsji Nainá, tsjá‑la̱ kjo̱tjò xi ndaà tjín.
\p
\v 7 Noé koií‑né nga kòkjeiín‑la̱, kꞌe̱ nga tsibéno̱jmí‑la̱ Nainá kjoa̱ xi i̱skan ko̱ma, kisìkitasòn; ko̱ó kjo̱xkón‑la̱ nga tsibíndaà jngoò chitso xi ꞌñó je kji, mé‑ne nga mìkiì ki̱yá‑ne jñà xi̱ta̱ niꞌya‑la̱. Noé, nga ndaà kòkjeiín‑la̱, kꞌoa̱á sꞌín tsibínè‑la̱ kjo̱ꞌin xi̱ta̱ i̱sòꞌnde nga jé tjín‑la̱; ko̱ jè Noé kitjoé‑la̱ kjo̱tjò xi tsjá Nainá nga xi̱ta̱ kixi̱ kitsò‑la̱ ta koií kjoa̱‑la̱ nga kòkjeiín‑la̱.
\p
\v 8 Abraham, nga kòkjeiín‑la̱ kꞌe̱ nga kiìchja̱‑la̱ Nainá, kisìkitasòn. Itjokàjiìn nangui‑la̱, kiì ya̱ i̱ꞌnde ñánda tà kjo̱tjò tsjá‑la̱ Nainá, ta̱nga skanda mìkiì tíjiìn‑la̱ ñánda tífì.
\v 9 Koií kjoa̱‑la̱ nga kòkjeiín‑la̱, nga ko̱sꞌín kisìjchá yijo‑la̱ koni tsà xi̱ta̱ xi xìn nangui‑la̱ na̱sꞌín ya̱ tsibìjna ya̱ i̱ꞌnde ñánda nga kꞌoa̱ kitsò‑la̱ Nainá nga tsjá kjo̱tjò‑la̱. Niꞌya nikjeé tsibìjnaya. Nga kiì‑ìsa na̱chrjein, kꞌoa̱á ti̱ komàtꞌin jè Isaac ko̱ Jacob, xi ti̱koa̱ kꞌoa̱sꞌín kitsjaà‑la̱ ꞌén Nainá nga tsꞌe̱ ko̱ma nangui.
\v 10 Abraham tíkoña jngoò‑la̱ na̱xa̱ndá xi ꞌñó ndaà tjín tàtsꞌen chrjó‑la̱, nga jè Nainá kiskoòsòn‑la̱ kósꞌín si̱ndaà ko̱ ti̱jè‑ne Nainá tsibíndaà.
\p
\v 11 Koií kjoa̱‑la̱ nga kòkjeiín‑la̱ Abraham, nga na̱sꞌín chjo̱ón ꞌndi̱ jè chjo̱ón‑la̱ xi ꞌmì Sara, ko̱ na̱sꞌín jye ꞌñó xi̱ta̱ jchínga, kisꞌeé‑la̱ ngaꞌñó nga kisakò jngoò‑la̱ kiꞌndí jè Sara, koií kjoa̱‑la̱ nga kòkjeiín‑la̱ nga Nainá si̱ìkitasòn koni sꞌín jye kitsjaà‑la̱ ꞌén‑la̱.
\v 12 Kꞌoa̱á ma‑ne nga ta jè ta̱jngoò xi̱ta̱ jè, na̱sꞌín jye tífehetꞌaà na̱chrjein‑la̱, kjìn jchán ma i̱xti‑la̱ xi tje̱ tsꞌe̱ kꞌoa̱á ngaya‑la̱ koni jñà niꞌño xi tjín ngajmiì ko̱ tsomì xi jncha i̱ndiì ndáchikon nga mìkiì ma maxke̱ya.
\p
\v 13 Ngatsꞌiì xi̱ta̱ koi, kꞌoa̱á sꞌín mokjeiín‑la̱ skanda kꞌe̱ nga kꞌen, na̱sꞌín mìkiì kitjoé‑la̱ tsojmì xi Nainá kꞌoa̱sꞌín kitsjaà ꞌén‑la̱ nga tsjá‑la̱; ta kꞌoa̱á sꞌín kjòchi̱ya‑la̱ koni tsà ta kjiìn kijtseè‑ne; tsjaá kisꞌe‑la̱ nga kitsò nga mìtsà i̱ i̱ꞌnde‑la̱, ta nchifahato‑né nga títsa̱jna i̱ i̱tꞌaà nangui.
\v 14 Jñà xi̱ta̱ xi koa̱tsò, kꞌoa̱á sꞌín béno̱jmí kixi̱‑né nga sa̱á nchihótsji jngoò nangui xi nguì tsꞌe̱ ko̱ma.
\v 15 Tsà jè nchisíkítsjeèn nangui ñánda itjokàjiìn, o̱kixi̱‑né komá‑la kiì ìjngoò kꞌa‑ne i̱ꞌnde ñánda inchrobà‑ne.
\v 16 Ta̱nga jngoò i̱ꞌnde nchihótsji xi ìsa̱ ndaà choòn, i̱ꞌnde xi tsꞌe̱ ngajmiì. Kꞌoa̱á ma‑ne nga jè Nainá, mìkiì masobà‑la̱ nga ki̱tso̱‑la̱ xi̱ta̱: jè jèe̱ xi Nainá, nga jyeé kisìkíjnandaà jngoò‑la̱ i̱ꞌnde ñánda na̱xa̱ndá‑la̱ ko̱ma nga ya̱ kítsa̱jna.
\p
\v 17 Abraham, kꞌe̱ nga kichìtꞌaà, koií kjoa̱‑la̱ nga kòkjeiín‑la̱ nga kiskoé Isaac nga kitsjaàtꞌaà kjo̱tjò‑la̱ Nainá. Tsibìjnandaà nga tsjá‑la̱ kiꞌndí‑la̱ xi ta jè ta̱jngoò‑ne, na̱sꞌín xó kꞌoa̱sꞌín kitsjaà‑ne ꞌén Nainá i̱tꞌaà tsꞌe̱ kiꞌndí‑la̱, kꞌe̱ nga kitsò:
\v 18 “I̱tꞌaà tsꞌe̱ Isaac, kjìn jchán ko̱ma xi̱ta̱ tje̱‑lè.”
\v 19 Abraham kꞌoa̱á sꞌín kisìkítsjeèn nga Nainá tjín‑la̱ ngaꞌñó nga ma‑la̱ síkjaáya‑la̱ xi̱ta̱ na̱sꞌín jye kꞌen. Kitjoé ìjngoò kꞌa‑la̱ kiꞌndí‑la̱ koni tsà jaáya‑la̱ i̱tꞌaà tsꞌe̱ kjoa̱biyaà.
\p
\v 20 Isaac, koií kjoa̱‑la̱ nga mokjeiín‑la̱ nga kisìjétꞌaà‑la̱ Nainá nga kàtasíchikon‑tꞌin Jacob ko̱ Esaú i̱tꞌaà tsꞌe̱ kjoa̱ xi i̱skan ko̱ma.
\p
\v 21 Koií kjoa̱‑la̱ nga mokjeiín‑la̱ Jacob, kꞌe̱ nga jye tíbiyaà, kisìjétꞌaà‑la̱ Nainá nga kàtasíchikon‑tꞌin ingajò i̱xti‑la̱ José; sínguiꞌñó tsja yá nise‑la̱ nga jeya kisìkíjna Nainá.
\p
\v 22 Koií kjoa̱‑la̱ nga mokjeiín‑la̱ José, kꞌe̱ nga jye tíbiyaà, tsibéno̱jmí kósꞌín ko̱matꞌin jñà xi̱ta̱ Israel nga ki̱tjokàjiìn na̱xa̱ndá Egipto. Ti̱koa̱ kitsjaà o̱kixi̱ i̱tꞌaà tsꞌe̱ nindaà‑la̱ ñánda kji̱ko̱.
\p
\v 23 Xi̱ta̱ jchínga‑la̱ Moisés, koií kjoa̱‑la̱ nga kòkjeiín‑la̱ nga jàn sá kisìkíjnaꞌma kiꞌndí‑la̱ kꞌe̱ nga sa̱ kitsꞌiìn, nga kijtseè nga ꞌñó ndaà kji i̱sén‑la̱ kiꞌndí‑la̱, ko̱ mìkiì kitsakjòn‑la̱ kjo̱tíxoma‑la̱ xi̱ta̱xá ítjòn tsꞌe̱ na̱xa̱ndá Egipto.
\p
\v 24 Kꞌe̱ nga jye kòjchínga Moisés, koií kjoa̱‑la̱ nga kòkjeiín‑la̱ nga mìkiì kisaseèn‑la̱ nga nea̱‑la̱ kitsò‑la̱ tsòti‑la̱ faraón.
\v 25 Tà sa̱á jè jaàjiìn nga kjo̱ꞌin kisìkjeiín ko̱ na̱xa̱ndá‑la̱ Nainá, mì kꞌoa̱‑ne nga kjo̱tsja tsjá‑la̱ yijo‑la̱ xi kjoa̱ tsꞌe̱ jé.
\v 26 Kꞌoa̱á sꞌín kiskoòsòn‑la̱ nga ìsa̱ ꞌñó chjí‑la̱ kjo̱ꞌin xi si̱ìkjeiín xi i̱tꞌaà tsꞌe̱ Cristo mì kꞌoa̱á‑ne nga kjo̱tsja tsjá‑la̱ yijo‑la̱ xi kjoa̱ nchi̱ná tsꞌe̱ na̱xa̱ndá Egipto. Kiskoñákjoa̱á‑la̱ kjo̱ndaà xi i̱skan tsjá‑la̱ Nainá.
\p
\v 27 Koi‑né nga ti̱koa̱ kòkjeiín‑la̱ nga itjokàjiìn na̱xa̱ndá Egipto; mìkiì kitsakjòn‑la̱ kjoa̱jti‑la̱ jè xi̱ta̱xá ítjòn; kixi̱í tsibìjna koni tsà xko̱n tíbeè‑ne Nainá xi ni̱ sa̱á jngoò xi̱ta̱ beèxkon.
\p
\v 28 Moisés, nga kòkjeiín‑la̱, tsjachrje sꞌeí Paxko̱. Kꞌoa̱á kitsò‑la̱ ngatsꞌiì xi̱ta̱ Israel nga jní si̱ìkaàjno xotjoa̱ niꞌya‑la̱ mé‑ne jè àkja̱le̱‑la̱ Nainá mìkiì si̱ìkꞌen jñà xi kiꞌndítjòn‑la̱ tsꞌe̱ xi̱ta̱ Israel.
\p
\v 29 Jñà xi̱ta̱ Israel, nga kòkjeiín‑la̱, tsatojiìn jè xi ꞌmì Ndáchikon Inì koni tsà nangui kixì. Jñà xi̱ta̱ Egipto, kꞌe̱ nga kijtseè, mejèn‑la̱ nga kꞌoa̱ ti̱sꞌín kisꞌiìn, ta̱nga ta ya̱á kꞌen yije ya̱ i̱jiìn ndáchikon.
\p
\v 30 Nga kòkjeiín‑la̱ xi̱ta̱ Israel, kisìkixòjen chrjó xi tjíndiì‑la̱ na̱xa̱ndá Jericó, kꞌe̱ nga jye kjò itoò na̱chrjein bítjindiì‑la̱ jé na̱xa̱ndá.
\v 31 Koií nga kòkjeiín‑la̱ Rahab xi chjo̱ón chijngui nga mì ya̱ kꞌen‑ko̱ jñà xi̱ta̱ xi mìkiì mokjeiín‑la̱, koií kjoa̱‑la̱ nga ndaà kijtseètjò jñà xi̱ta̱ Israel xi ítjòn ijchò kotsejèn ꞌma‑la̱ nangui.
\p
\v 32 ¿Mé kjoa̱ xi kèno̱jmí ìsa̱? Mì‑la kiì chíya‑na na̱chrjein nga kichjà i̱tꞌaà tsꞌe̱ Gedeón, tsꞌe̱ Barac, tsꞌe̱ Sansón, tsꞌe̱ Jefté, tsꞌe̱ David, tsꞌe̱ Samuel ko̱ ngatsꞌiì xi̱ta̱ xi kiìchja̱ ngajo‑la̱ Nainá.
\v 33 Koií nga kòkjeiín‑la̱ xi̱ta̱ koi nga kisꞌe iꞌnga xi kisìkijne‑la̱ kjoa̱ tsꞌe̱ kjo̱jchán, xi kixi̱ tsibíndaàjiìn kjoa̱, xi Nainá kitsjaà‑la̱ koni sꞌín jye kitsò‑la̱ xi tsoꞌba kiìchja̱‑ne, xi tsibíchjoàjto tsoꞌba xa.
\v 34 Kisꞌeé iꞌnga xi kisìkitsꞌo ngaꞌñó‑la̱ niꞌín jnga̱, xi itjomachinga‑la̱ nga ki̱cha̱ ndojò kꞌen‑ne, xi kisꞌe ìjngoò kꞌa‑la̱ ngaꞌñó na̱sꞌín xkꞌén kjoàn, xi kisꞌe‑la̱ ngaꞌñó kjoa̱ tsꞌe̱ kjo̱jchán, xi kisìkijne‑la̱ xi̱ta̱ kjo̱jchán xi kondra̱ tsꞌe̱.
\v 35 Kisꞌeé iꞌnga íchjín xi kitjoé ìjngoò kꞌa‑la̱ xi̱ta̱ xíkjín xi jye kꞌen nga jaáya‑la̱.
\p Ta̱nga tjín iꞌnga xi ya̱ kꞌen‑jiìn kjo̱ꞌin; mìkiì kjòmejèn‑la̱ nga tsibìtsa̱jnandei̱í, nga kꞌoa̱á sꞌín kjòmejèn‑la̱ nga ìsa̱ ndaà kítsa̱jna kꞌe̱ nga kjoa̱áya‑la̱.
\v 36 Xi iꞌnga, kisìkjeiín kjo̱ꞌin nga kinìsobà‑la̱, kiskaàn‑ko̱ xi̱ta̱, skanda naꞌñó ki̱cha̱ cadena kisitꞌaàꞌñó i̱ya nda̱yá.
\v 37 Tjín iꞌnga xi nda̱jo̱ kisinè nga kinìkꞌen; tjín iꞌnga xi ki̱cha̱ serrote kjòjòya‑ne; tjín xi ki̱cha̱ ndojò kꞌen‑ne. Xki̱ xi ján chinchimasòn, tà chrjoa̱‑la̱ orrè ko̱ chrjoa̱‑la̱ tíndsó tsakakjá nga ꞌñó i̱ma̱ chinchima, tseé kjo̱ꞌin kisꞌe‑la̱ ko̱ ꞌñó kiꞌyatoòn.
\v 38 Jñà xi̱ta̱ koi, nga ꞌñó ndaà kòkjeiín‑la̱ i̱tꞌaà tsꞌe̱ Nainá, skanda mìkiì okꞌìn‑la̱ nga i̱ tsibìtsa̱jna i̱sòꞌnde. Xki̱ xi ján chinchimasòn ya̱ i̱ꞌnde i̱tꞌaà xìn ñánda nangui kixì choòn, kóho̱kji i̱jiìn ijñá ko̱ i̱ngui nguijo ko̱ nga̱jo̱ xi ti̱xꞌá i̱jiìn nangui.
\p
\v 39 Ngatsꞌiì xi̱ta̱ koi, koni sꞌín nga ndaà kòkjeiín‑la̱ ndaá kiꞌya‑la̱, ta̱nga ni̱jngoò kitjoé‑la̱ xi Nainá tjín‑ne nga tsjá‑la̱ koni sꞌín jye kitsjaà‑la̱ ꞌén‑la̱.
\v 40 Nainá tsibíndaà jngoò‑ná kjoa̱ xi ìsa̱ ꞌñó ndaà tjín, mé‑ne jñà xi̱ta̱ koi, ngásòn ko̱ngásòn‑kjoaá nga ni̱mé chi̱jatꞌaà‑ná nga kixi̱ ki̱tsa̱jnaá.
\c 12
\s Ndaà chítsejèn‑là Jesús
\p
\v 1 Nga ꞌñó kjìn ma‑ne xi̱ta̱ xi títsa̱jnandiì‑ná xi ndaà mokjeiín‑la̱, kꞌoa̱á ma‑ne nga ti̱koa̱á jñá, jngoò kꞌa si̱kítsa̱jnaá ngatsꞌiì kjoa̱ xi síꞌin‑ná ko̱ kjoa̱ tsꞌe̱ jé xi tsobàꞌñó‑ná nga kona̱cha̱n‑ná; mochjeén‑né nga kꞌoa̱ sꞌín sꞌe̱én koni jngoò xi̱ta̱ xi ongachikon nga chíkjoa̱ko̱‑la̱ nga ki̱jchò skanda ñánda nga tjín‑nè‑la̱ nga ki̱jchò.
\v 2 Ndaà chítsejèn‑lá Jesús; jè tsibítsꞌia̱ ítjòn koni sꞌín mokjeiín‑ná ko̱ jè síjngoò kjoa̱ koni sꞌín mokjeiín‑ná. Jesús nga jye tíjiìn‑la̱ nga ko̱ma i̱skan sꞌe̱é‑la̱ kjo̱tsja, kꞌoa̱á ma‑ne nga kichìkjoa̱ ko̱‑la̱ kjo̱ꞌin i̱tꞌaà krò, mìkiì kjòsobà‑la̱ koni sꞌín kꞌen; i̱kjoàn tsibíjnatꞌaà chrja kixi̱‑la̱ Nainá nga ya̱ tíhotíxoma.
\p
\v 3 Ti̱kítsjeèn i̱tꞌaà tsꞌe̱ Jesús; kichìkjoa̱ ko̱ó‑la̱ kjo̱ꞌin xi tsibínè‑la̱ jñà xi̱ta̱ jé, mé‑ne jñò mìkiì ki̱jta‑nò ko̱ mìkiì sìkàjeèn‑là takòn.
\v 4 Koni sꞌín titsa̱bixkàn‑ko̱o kjoa̱ tsꞌe̱ jé, kjꞌeè tsà yá xi̱ta̱ xi tsò ikon nga síkꞌen‑nò.
\v 5 ¿A jye kijchàajiìn‑nò koni tsò‑nò Nainá nga i̱xti‑la̱ tsò‑nò? Kꞌoa̱á sꞌín tíchja̱ xo̱jo̱n xi tjítꞌaà ꞌén‑la̱ Nainá nga tsò:
\q Nga kiꞌndí‑na̱ xan‑lè, kì nachrjekàngui‑jèn kꞌe̱ nga síkixi̱ya‑lè Na̱ꞌèn‑ná,
\q ko̱ kì nìkjajen‑la̱ takoìn kꞌe̱ nga síkaká‑lè.
\q
\v 6 Na̱ꞌèn‑ná síkixi̱ya‑né jè xi̱ta̱ xi tsjakeè,
\q tsjá‑la̱ kjo̱ꞌin ngatsꞌiì xi kjoétjò nga kiꞌndí‑la̱ tsò‑la̱.
\m
\v 7 Nainá kꞌoa̱á sꞌín beèhikon‑nò nga kiꞌndí‑la̱ tsò‑nò; ti̱kjioón kꞌe̱ nga kjo̱ꞌin tsjá‑nò. Ngatsꞌiì xi Na̱ꞌèn ma, tsjá‑la̱ kjo̱ꞌin i̱xti‑la̱ nga síkixi̱ya.
\v 8 Ta̱nga tsà Nainá mìkiì si̱ìkixi̱ya‑nò koni sꞌín síko̱ ngatsꞌiì xi i̱xti‑la̱ ma, mìtsà kixi̱ kjoa̱ nga nguì i̱xti‑la̱ Nainá maà.
\v 9 Kꞌe̱ nga sa̱ i̱xtiaá, jñà xi̱ta̱ jchínga‑ná xi tjín i̱ i̱tꞌaà nangui, kisìkixi̱ya‑ná koa̱ ndaà kiyaxkoán. ¿A mìtsà ìsa̱ ndaà jcha̱xkoán Na̱ꞌèn‑ná xi tíjna ngajmiì, mé‑ne nga kàtasꞌe‑ná kjoa̱binachon?
\v 10 Xi̱ta̱ jchínga‑ná i̱ i̱tꞌaà nangui tsjá‑ná kjo̱ꞌin nga síkixi̱ya‑ná koni sꞌín mejèn‑la̱, na̱sꞌín ta chiba na̱chrjein titsa̱jnaá. Ta̱nga Nainá síkixi̱ya‑ná xi kjo̱ndaà tsa̱ján mé‑ne nga tsjeè ki̱tsa̱jnaá koni jè Nainá nga tsjeè tíjna.
\v 11 Kixi̱í kjoa̱, tsjìn kjo̱ꞌin xi kjo̱tsja tsjá, tà kjoa̱ba tsjá nga ꞌon ma‑la̱ yijo‑ná, ta̱nga komà i̱skan‑ne sꞌe̱é‑ná kjoa̱ kixi̱ xi ꞌnchán tjín nga ndaà ki̱tsa̱jnakoa̱á Nainá ngatsꞌiaá xi biìꞌndeé nga tímakixi̱yaá.
\p
\v 12 Kꞌoa̱á ma‑ne nga tjiì‑là ngaꞌñó yijo‑nò, chjímiìꞌngaà ndsa̱a xi mìkiì ma síkjaníyá, ko̱ xkó ndso̱koò xi tsjìn‑la̱ ngaꞌñó;
\v 13 ti̱nchátsjioò xi ndi̱yá kixi̱ nga kàtandaà‑ne ndso̱koò xi tsáꞌyá kji, mé‑ne nga mìkiì ìsa̱ ndaà ko̱tsóꞌño̱‑ne.
\s Kì binchatꞌaàxìn‑là kjo̱ndaà‑la̱ Nainá
\p
\v 14 ꞌNchán ti̱tsa̱jnako̱o ngatsꞌiì xi̱ta̱; tsjeè ti̱tsa̱jna nga nguixko̱n Nainá. Nga ni̱jngoò xi̱ta̱ skoe̱xkon Nainá tsà mì tsjeè tíjna.
\v 15 Ndaà chítsejèn nga ni̱jngoò xi̱ta̱ ko̱si̱jnatꞌaàxìn‑la̱ kjo̱ndaà‑la̱ Nainá, mé‑ne nga mì kꞌoa̱á sꞌín ko̱matꞌioòn koni tsà jngoò xka̱ ijñá ki̱so̱ xi tsja i̱ma̱‑la̱ xi síkitsꞌón xi̱ta̱ nga tsjá chꞌin‑la̱.
\v 16 Jñò, ni̱jngoò xi xi̱ta̱ chijngui ko̱ma, kì nachrjekànguioò tsojmì xi tsjeè; kì kꞌoa̱á sꞌín ꞌnè koni kisꞌiìn Esaú nga tà jngoò chroba tsojmì xi ma chine tsatíjna‑ne xi jè tjín‑ne nga ko̱ko̱‑la̱ koni kiꞌndí tjòn.
\v 17 Jñò jyeé tíjiìn‑nò, kꞌe̱ nga jye komà i̱skan, Esaú kꞌe̱ nga kjòmejèn‑la̱ nga si̱ìchikon‑tꞌin na̱ꞌèn‑la̱, kinachrjekàngui‑né, mì ti̱ kiì komà kjòchikon‑tꞌin‑ne, na̱sꞌín ta̱kó ꞌñó kiskindàya.
\p
\v 18 [Koni sꞌín komàtꞌin xi̱ta̱ Israel nga kjìn kjo̱xkón kijtseè], jñò, mìtsà ko̱sꞌín ya̱ ijchò kinchatꞌaà‑là nindoò xi ma nìko̱, jè nindoò ñánda títì niꞌín jnga̱, ñánda skanda mì ti̱ kiì kjòtsejèn‑ne nga jñò choòn ko̱ ñánda tíꞌba tjo̱ xkón.
\v 19 Mìkiì kinaꞌyà‑là jta̱‑la̱ chrjo, ti̱koa̱ mìkiì kinaꞌyà‑là jta̱‑la̱ Nainá kꞌe̱ nga kiìchja̱. Jñà xi kiìꞌnchré‑la̱ Nainá, tsibítsiꞌba‑ne nga majìn‑la̱ nga ki̱chja̱‑ìsa,
\v 20 koií kjoa̱‑la̱ nga mìkiì kichìkjoa̱‑la̱ koni sꞌín tjín kjo̱tíxoma xi kisinè‑la̱ nga tsò: “Jè xi̱ta̱ xi ko̱sìjna jngoò ndso̱ko̱ ya̱ i̱tꞌaà nindoò, na̱sꞌín jngoò cho̱, nda̱jo̱ó ki̱yá‑ne ko̱ tsà majìn ki̱cha̱á ko̱tosìkjá yijo‑la̱.”
\v 21 ꞌÑó xkón tjín kjoa̱ xi kiꞌya‑la̱, skanda ti̱jè‑ne Moisés kitsò: “Tsakjoòn jchán‑ná skanda chi̱ba̱‑la̱ tíhotsé‑ná.”
\p
\v 22 Ta̱nga jñò, ya̱á ijchò kinchatꞌaà‑là nindoò Sión, jè na̱xa̱ndá‑la̱ Nainá xi tíjnakon, xi ti̱jè‑ne Jerusalén xi tsꞌe̱ ngajmiì, ñánda kjìn jmiì àkja̱le̱ títsa̱jna xi nchisítsjako̱ Nainá nga jeya nchisíkíjna,
\v 23 ñánda títsa̱jnajtín i̱xti‑la̱ Nainá xi tjoé‑la̱ kjo̱tjò xi tsꞌe̱ i̱xtitjòn xi tjítꞌaà ꞌín‑la̱ xo̱jo̱n tsꞌe̱ ngajmiì. Ijchò kinchatꞌaà‑là Nainá xi xi̱ta̱xá tíjna nga jè bíndaàjiìn‑la̱ ngatsꞌiì xi̱ta̱. Ti̱koa̱á ijchò kinchatꞌaà‑là ini̱ma̱‑la̱ xi̱ta̱ kixi̱ xi Nainá jye kisìtsjeè nga ni̱mé chijatꞌaà‑la̱.
\v 24 Ijchò kinchatꞌaà‑là Jesús xi osìjnajiìn‑ná jngoò kjoa̱ xi̱tse̱ ko̱ jè jní‑la̱ xi kixíxteèn [nga kisìtsjeè‑ná] xi ìsa̱ ndaá chja̱‑ná mì kꞌoa̱á‑ne koni tsꞌe̱ Abel [xi síjé nga sindaàjiìn].
\p
\v 25 Jñò, tꞌe̱en kinda̱ yijo‑nò. Kì nachrjekànguioò jè xi tíchja̱‑ná. Jñà xi̱ta̱ jchínga kjòtseé xi tsachrjekàngui koni sꞌín kinokjoà‑la̱ i̱ i̱tꞌaà nangui nga kinìkaká‑la̱, mìkiì tsajno‑la̱ nga kitjoé‑la̱ kjo̱ꞌin. Jñá, ìsa̱á ꞌñó ꞌin tjín tsà ki̱nachrjekànguiaá Nainá kꞌe̱ nga skanda ján ngajmiì chja̱‑ná nga síkaká‑ná; mìkiì ko̱jno‑ná nga tjoé‑ná kjo̱ꞌin.
\v 26 Jè na̱chrjein jè, jta̱‑la̱ Nainá, skanda jè nangui kisìjtiya‑la̱, ta̱nga na̱chrjein i̱ꞌndei̱, kꞌoa̱á tsò: “Ìjngoò kꞌa siìjtiya‑la̱, mìtsà tà jè nangui siìjtiya‑la̱ ko̱ó ngajmiì.”
\v 27 Jè ꞌén, kꞌe̱ nga tsò “ìjngoò kꞌa siìjtiya‑la̱”, kꞌoa̱á sꞌín machi̱ya‑ná nga tjáxìn tsojmì xi xó kisindaà‑ne, jñà xi ma oníyá‑la̱, mé‑ne nga kítsa̱jna‑ne xi mìkiì ma oníyá‑la̱.
\v 28 I̱tꞌaà tsꞌe̱ Nainá tsjá‑ná o̱kixi̱ nga ya̱ ko̱ti̱xomakoa̱á ya̱ i̱ꞌnde ñánda mìkiì ma oníyá‑la̱. Ndaà chjí‑la̱ Nainá jñà kjoa̱ koi. Jeya si̱kíjnaá ko̱ jcha̱xkoán koni sꞌín sasén‑la̱ jè.
\v 29 Nga “jè Nainá, kꞌoa̱á ngaya‑la̱ koni niꞌín xi síkjehesòn yije ni̱ta̱ mé xi tjín.”
\c 13
\s Kjoa̱ xi mochjeén nga sꞌi̱in jñà xi̱ta̱‑la̱ Cristo
\p
\v 1 Jñò, ti̱tsjacha xi̱ta̱ xinguio̱o xi ꞌndsè chibá xi i̱tꞌaà tsꞌe̱ Cristo.
\v 2 Kì nìjchàajioòn jñà xi̱ta̱ xi bijchókon‑nò niꞌya‑nò, ti̱sꞌin‑là nga kàtasíkjáya. Kꞌoa̱á komàtꞌin iꞌnga xi̱ta̱, kiskoétjò xi̱ta̱ xi mìkiì beèxkon, ta̱nga àkja̱le̱‑né.
\p
\v 3 Ti̱kítsjeèn jñà xi̱ta̱ xi nda̱yá títsa̱jna; kꞌoa̱sꞌín tꞌè‑là takòn koni tsà ngásòn kjo̱ꞌin titsa̱jnaà. Ti̱kítsjeèn jñà xi̱ta̱ xi tíyatoòn koni tsà jñò xi ti̱koa̱ kꞌoa̱sꞌín tíyatoòn‑nò.
\p
\v 4 Jñò xi jye chixàn, ngásòn jcha̱xkón xinguio̱o. Kì chꞌo bitsa̱jnako̱o xinguio̱o. Nga jñà xi kjoa̱chijngui sꞌín, Nainá tsjá‑la̱ kjo̱ꞌin.
\p
\v 5 Kì to̱ón ꞌñó matsjacha; kàtajngoò takòn koni kji tjín‑nò. Nainá kꞌoa̱á tsò: “Mìkiì tsjeiìn takòn‑nò, ko̱ mìkiì ta̱jngoò siìkíjna‑nò.”
\v 6 Kꞌoa̱á ma‑ne nga ma kꞌoa̱sꞌín kixoán:
\q Jè Na̱ꞌèn‑ná ko̱si̱ko̱‑ná,
\q mìkiì ki̱skoán mé kjoa̱ xi si̱ko̱‑ná xi̱ta̱.
\p
\v 7 Ti̱kítsjeèn jñà xi̱ta̱ xi chincha ítjòn nga tsakóya‑nò ꞌén‑la̱ Nainá; ti̱kítsjeèn kó sꞌín kisìjchá yijo‑la̱ xi̱ta̱ koi ko̱ kꞌoa̱á sꞌín chjínguì‑là koni sꞌín kòkjeiín‑la̱.
\p
\v 8 Jesucristo mìkiì fatjìya, ti̱jè‑ne ngojña̱, ti̱jè‑ne na̱chrjein i̱ꞌndei̱, ko̱ ti̱jè‑ne ni̱ta̱ mé na̱chrjein‑ne.
\v 9 Kì kiì nìsꞌin‑là kjo̱hítsjeèn xi kjꞌei̱í tsò ko̱ xi mìkiì yaxkon‑la̱ nga xìn ndi̱yá fìko̱‑ná. Ìsa̱á ndaà tjín nga jè ini̱ma̱‑ná sꞌe‑la̱ ngaꞌñó i̱tꞌaà tsꞌe̱ kjo̱ndaà‑la̱ Nainá mì kꞌoa̱á‑ne koni tsꞌe̱ tsojmì xi ma chine; nga jñà tsojmì xi ma chine, ni̱mé ngaꞌñó kitsjaà‑la̱ jñà xi kꞌoa̱ tjín kjoa̱ kisìsꞌin‑la̱.
\p
\v 10 Jñá, tjín jngoò‑ná i̱ꞌnde tsjeè [ñánda kitsjaà kjo̱tjò yijo‑la̱ Cristo nga kꞌen], ta̱nga jñà no̱ꞌmiì xi tákó ya̱ síxá i̱tꞌaà tsꞌe̱ kjoa̱ jchínga ya̱ Niꞌya xi nikje, mìkiì tjíꞌnde‑la̱ nga tjoé‑la̱ kjo̱ndaà nga ya̱ ko̱kje̱n.
\v 11 Nga̱ jè yijo‑la̱ cho̱ xi síkꞌen jñà no̱ꞌmiì, [mìkiì tjíꞌnde‑la̱ nga tjoé‑la̱ nga ski̱ne̱]; ta jè jní‑la̱ cho̱ fìko̱ jè no̱ꞌmiì ítjòn ya̱ i̱ꞌnde tsjeè‑la̱ Nainá xi kjoa̱ tsꞌe̱ jé. Ta̱nga jè yijo‑la̱ cho̱, i̱tꞌaà xìn i̱ꞌnde fìko̱ nga tì.
\v 12 Kꞌoa̱á ti̱sꞌín komàtꞌin Jesús, i̱tꞌaà xìn‑la̱ na̱xa̱ndá kisìkjeiín kjo̱ꞌin, mé‑ne nga kisìtsjeè‑ne na̱xa̱ndá i̱tꞌaà tsꞌe̱ xi nguì jní tsꞌe̱.
\v 13 Kꞌoa̱á ma‑ne jñá, ki̱tjokàjñaá na̱xa̱ndá. Jè kji̱tji̱ngui‑lá Jesús nga si̱kjiaán‑koa̱á kjo̱ꞌin xi jè kisìkjeiín.
\v 14 Nga i̱ i̱tꞌaà nangui tsjìn‑ná na̱xa̱ndá xi nguì jngoò kꞌa tíjna ni̱ta̱ kjé‑ne; jè titsa̱chiñá‑lá na̱xa̱ndá xi i̱skan ko̱tsejèn.
\v 15 Koi kjoa̱‑la̱ mochjeén‑né nga kjitꞌaà na̱chrjein jeya si̱kíjnaá Nainá i̱tꞌaà tsꞌe̱ Jesucristo koni jngoò kjo̱tjò xi ꞌbì‑lá Nainá, ꞌén xi nguì tsoꞌbaá bitjo‑ne nga bèno̱jmiá yá‑né jè.
\v 16 Kì nìjchàajioòn nga ndaà tꞌe̱en, tjiì i̱tsé‑là xinguio̱o mé xi tjín‑nò; kꞌoa̱á tjín kjo̱tjò xi sasén‑la̱ Nainá.
\p
\v 17 Ti̱kitasòn‑lá jñà xi̱ta̱ xi jncha ítjòn‑nò, ti̱náꞌyañijon‑là. Nga̱ jñà síkinda̱‑nò nga mì jchi̱ja ini̱ma̱‑nò koií kjoa̱‑la̱ nga tjínè‑la̱ nga tsjá‑la̱ kinda̱ Nainá. Ti̱kitasòn‑là koni sꞌín ki̱tso̱‑nò mé‑ne nga nguì ko̱ kjo̱tsja‑la̱ si̱ìxá‑ne nga mì ba sꞌe̱‑la̱; tsà ba sꞌe̱‑la̱, ni̱mé kjo̱ndaà sꞌe̱‑nò.
\p
\v 18 Ti̱jétꞌaà‑là Nainá i̱tꞌaà tsa̱je̱n, nga kꞌoa̱á sꞌín tíjngoò takòn‑je̱n nga ndaà tjín kjo̱hítsjeèn‑na̱je̱n, mejèn‑na̱je̱n nga ndaà sꞌe̱n‑je̱n ni̱ta̱ mé kjoa̱‑ne.
\v 19 Ìsa̱á ndaà síjé‑nò nga ti̱jétꞌaà‑là Nainá xi i̱tꞌaà tsꞌa̱n, mé‑ne nga kàtatsjáꞌnde‑na nga ni̱to̱n kjíkon‑nò.
\s ꞌÉn xi fehetꞌaà‑ne
\p
\v 20 Jè Nainá xi tsjá kjoa̱ꞌnchán xi kisìkjaáya‑la̱ i̱tꞌaà tsꞌe̱ kjoa̱ biyaà Na̱ꞌèn‑ná Jesucristo, xi paxtò ítjòn‑la̱ tsꞌe̱ orrè, jè xi ko̱ jní‑la̱ tsibíꞌñó‑ne jngoò kjoa̱ xi̱tse̱ xi mìkiì kjoe̱hetꞌaà ni̱ta̱ kjé‑ne,
\v 21 kàtasíkixi̱yandaà‑nò ngatsꞌiì kjoa̱ xi ndaà tjín, mé‑ne nga kàtitasòn‑ne koni sꞌín mejèn‑la̱ Nainá; i̱tꞌaà tsꞌe̱ Jesucristo, kꞌoa̱sꞌín kàtasíko̱‑ná koni sꞌín sasén‑la̱ Nainá. ¡Jeya kàtìjna Cristo ni̱ta̱ mé na̱chrjein‑ne! Kꞌoa̱á sꞌín kàtama.
\p
\v 22 Bìtsiꞌbà‑nò ndí ꞌndsè, ndaà chjoétjò ꞌén xi tìkjiì‑nò koni sꞌín tìbìnè‑nò nga̱ ta chiba ꞌén tìkjiì‑nò.
\v 23 Kàtasijiìn‑nò jè ꞌndseé Timoteo jye tíjnandei̱í‑ne xi kjoa̱ tsꞌe̱ kjo̱ꞌin; tsà kjoi̱í ni̱to̱n, kjíko̱‑ná kꞌe̱ nga kjián katsejèn‑nò.
\p
\v 24 Ti̱ixatꞌaà yije jñà xi̱ta̱ xi jncha ítjòn‑nò ko̱ ngatsꞌiì xi̱ta̱‑la̱ Cristo. Jñà xi Italia tsꞌe̱ nchisíhixatꞌaà‑nò.
\p
\v 25 Ngatsꞌioò, jè kàtìjnako̱‑nò kjo̱ndaà‑la̱ Nainá.