\id JAS
\h Santiago
\toc1 Santiago
\mt Xa̱jo̱n ra tsikínda jè Santiago
\c 1
\s Kóꞌsín jè Santiago síhixoꞌta xi̱ta̱ ra tsikínda‑la̱ xa̱jo̱n
\p
\v 1 ꞌA̱n ra Santiago ꞌmì‑na, ra chi̱ꞌnda‑la̱ Nainá ma ko̱ ti̱ꞌkoa̱á chi̱ꞌnda‑la̱ Jesucristo ra tíjna ítjòn‑ná, tísixóꞌtà‑no jiòn ra ya̱ inchrabàꞌta‑no tje̱‑la̱ xi̱ta̱ na̱xi̱ndá Israel ra tejò kjomà, jiòn ra jndíi̱ ra ján titsa̱jna ta ñánda̱ i̱ꞌnde‑ni ta nga tíjngo i̱sàꞌnde.
\s Kóꞌsín machjeén nga ꞌñó kjóꞌtatakén jè Nainá ni̱ꞌsín kjoa̱ tíbatojieén
\p
\v 2 Jiòn ra ꞌndsé chibé a̱ꞌta ꞌtse̱ Cristo, ꞌkia̱ nga ni̱ꞌsín ta mé kjoa̱ ra ko̱tojiòn, ta isa̱á jnchro jngo kjá tsjaá ꞌtè‑la takòn.
\v 3 Ijyeé ꞌya jiòn ꞌkia̱ nga ko̱ꞌsín tjáꞌta a̱ꞌta ꞌtse̱ kjoa̱ ra makjiín‑najiòn, ya̱á sa̱kò-isa‑najiòn ngaꞌñó kóꞌsín ma ki̱chíkjoa̱jin‑no a̱ꞌta ꞌtse̱ kjoa̱ ra ko̱ka̱maꞌtin‑isa jiòn a̱skan‑nioo̱.
\v 4 Ko̱ jè ngaꞌñó ra sa̱kò‑no nga nda chíkjoa̱jin‑no, ndaá katasíxájin ya̱ inìma̱‑no mé‑ni nda katajchá‑ni kjo̱bítsjen‑la̱ inìma̱‑no, ko̱ ngi tíjna tíjngo‑ni nga ni̱mé ra jchi̱jaꞌta‑la̱.
\p
\v 5 Tsa tjín iꞌka jiòn ra tsìn‑no kjo̱bítsjen, ti̱jéꞌtà‑la Nainá; tsjá‑no ra jè. Nga̱ jé Nainá, ngi ko̱ó inìma̱‑la̱ nga tsjá, ko̱ mì tsa ta ko̱ kjo̱jti‑la̱ tsjá ꞌkia̱ nga yá ra síjéꞌta‑la̱.
\v 6 Tanga ngi nda kjón‑ní katakjiín‑no ꞌkia̱ nga si̱jé; kì tà chjàn tà jò ꞌbè‑la takòn; nga̱ jè xi̱ta̱ ra jò ꞌbé‑la̱ ikon, ꞌkoa̱á ꞌsín ngoya‑la̱ koni jè ndáchikon ꞌkia̱ nga jè tjo̱, ra fì ra nchrabá síko̱.
\v 7 Jè xi̱ta̱ ra ko̱ꞌsín tà jò tjín ikon, kì tà chjàn ko̱ꞌsín síkítsjen nga tjín ra tjábé‑la̱ ra a̱ꞌta ꞌtse̱ Na̱ꞌín‑ná.
\v 8 Nga̱ jè xi̱ta̱ ra mì kì tjíjngo ikon, kjꞌií ꞌsín tísíkítsjen ꞌndi̱ ꞌndi̱, ko̱ nchijòn ijyeé kjꞌií tsò‑ni kjo̱bítsjen‑la̱; ko̱ mì kì ma‑la̱ nga kjábé jè ndi̱yá ra kixi̱ tjín.
\p
\v 9 Tsa tjín iꞌka ꞌndsé ra ꞌñó iꞌin títsa̱jna, tsjaá kataꞌbé‑la̱ ikon, nga̱ ya̱ ngixko̱n Nainá ꞌngaá títsa̱jna.
\v 10 Tanga jñà ra xi̱ta̱ nchi̱ná, tsjaá kataꞌse‑la̱ nga nangi kítsa̱jna ya̱ ngixko̱n Nainá. Nga̱ jñà ra xi̱ta̱ nchi̱ná, ꞌkoa̱á ꞌsín ko̱ka̱maꞌtin koni ꞌsín ma jè naxó‑la̱ xka̱ ijñá ra mì tsa tse fichjin‑la̱.
\v 11 ꞌKia̱ nga bitjo tsáꞌbí ko̱ ꞌñó tsje ma ndabá‑la̱, jè xka̱ ijñá, xì‑ní, ko̱ jè naxó‑la̱ kàtje̱n‑ngi‑ní, ko̱ chija ijye‑ní koni ꞌsín nga nda ꞌki i̱sén‑la̱. Jè ra xi̱ta̱ nchi̱ná, ꞌkoa̱á ꞌsín ta ya̱ ki̱yájin a̱ꞌta ꞌtse̱ xá ra ꞌsín, ñánda̱ nga tse síkijnesòn to̱n‑la̱.
\p
\v 12 Mé ta̱ nda‑la̱ jè xi̱ta̱ ra chíkjoa̱‑la̱ ꞌkia̱ nga tjáꞌta. ꞌKia̱ nga ijye chíkjoa̱jin‑la̱ kjoa̱ ra sko̱óꞌta; tjábé‑la̱ kjo̱binachon ra mì feheꞌta koni ꞌsín ijye kitsjà tsaꞌba Nainá a̱ꞌta ꞌtse̱ jñà xi̱ta̱ ra tsjake. Tjábé‑la̱ kjo̱binachon koni tsa jngo corona si̱ꞌa sko̱ [koni ꞌsín nga tjábé jngo‑la̱ trofeo jñà xi̱ta̱ ra síská ꞌkia̱ nga síkijne].
\v 13 Tsa ꞌkia̱ nga tjáꞌta jiòn ko̱ kjoa̱hajin‑no nga mejèn‑no ꞌsia̱an kjoa̱ ra ꞌcho tjín, kì tà chjàn bixó: “Jé‑la Nainá ra ko̱ꞌsín tíkjóꞌtá‑ná.” Nga̱ jè Nainá mì tsa ko̱ꞌsín tjín kjo̱bítsjen‑la̱ nga ꞌcho ꞌsi̱in, ko̱ mì tsa ko̱ꞌsín mejèn‑la̱ nga jñà xi̱ta̱ katabátsji‑jé.
\v 14 Tanga tsa ꞌkia̱ jngo xi̱ta̱ tjáꞌta nga ko̱ꞌsín ꞌsín kjoa̱ ra ꞌcho tjín, ti̱jñá‑ni kjoa̱ꞌcho ra tsjake ra síkjaájin‑la̱ ko̱ sískáya‑la̱ kjo̱bítsjen‑la̱.
\v 15 ꞌKia̱ nga ijye matse jè kjoa̱ꞌcho ra jè matsjake, ya̱á nchrabá‑ni nga batsíjen ra kjoa̱ ꞌtse̱ jé, ko̱ ꞌkia̱ nga ijye matse jè ra kjoa̱ ꞌtse̱ jé, a̱kjòn ya̱á nchrabá jè ra kjo̱biya.
\p
\v 16 Jiòn ndí ꞌndsé ra ꞌñó tsjake̱‑no, kì ijo‑no chìndo̱cha̱‑la.
\v 17 Ngaꞌtsì kjoa̱ ra nda tjín ko̱ ra kixi̱ tjín ra tjábé‑ná, ya̱á iꞌngaá nchrabá‑ni ra a̱ꞌta ꞌtse̱ Nainá, jè ra tsikínda ngaꞌtsì tsajmì ra síhisen‑ná, jè Nainá ra ni̱kjiá fahatjìya‑la̱ kjo̱nda ra tsjá koni ꞌsín nga fahatjìya‑la̱ jè ꞌngién.
\v 18 Jè Nainá, ꞌkoa̱á ꞌsín kjomejèn‑la̱ nga a̱ꞌta ꞌtse̱ ꞌén kixi̱‑la̱ kitsin xi̱tse̱ india‑né, mé‑ni ta ngaꞌtsì ra jè tsikínda, jién ko̱meé koni jñà tsajmì tje̱ ra majchá ítjòn ra jè manga̱tsja.
\s Kóꞌsín machjeén nga ma‑ná si̱hitjasén koni ꞌsín tsò ꞌén ra naꞌyé
\p
\v 19 Jiòn ndí ꞌndsé ra tsjake̱‑no, nda katasijin‑no kjoa̱ kìi̱, machjeén‑ní nga ta ti̱tsa̱jnanda kiꞌta‑no nga nda ti̱náꞌya ko̱ nga sisin kjón‑ní ti̱nákjoa̱a ꞌkia̱ nga mé ꞌén ra ki̱nákjoa̱a, kì ta majti ndi̱to̱n‑no.
\v 20 Jngo xi̱ta̱ jtitakòn, mì tsa kixi̱ tjín kjoa̱ ra ꞌsín ya̱ ngixko̱n Nainá.
\v 21 ꞌKoa̱á ma‑ni, chjáaxìn‑la ijo‑no ngaꞌtsì kjoa̱ ra tjé tjín ko̱ ngaꞌtsì kjoa̱ꞌcho ra ꞌñó tjín i̱ i̱sàꞌnde. Ngi ko̱ó kjo̱hi̱ma̱takòn‑no chjíbétjò jè ꞌén ra ijye ya̱ isitje̱jin ya̱ inìma̱‑no, jè ra tjín‑la̱ ngaꞌñó nga ma‑la̱ ko̱chrjekàjin‑no kjo̱hiꞌin.
\p
\v 22 Mì tsa ta ya̱ kje̱heꞌtà nga ti̱náꞌya jè ꞌén nda‑la̱ Nainá; machjeén‑ní nga ki̱tjasòn, ko̱ tsa mì ko̱ꞌsín ꞌsia̱an, ti̱jión i̱nchichìndo̱cha̱‑la ijo‑no.
\v 23 Jè ra ta ꞌnchré ꞌén nda‑la̱ Nainá, ko̱ mì kì tsa tísíhitjasòn‑ni, ꞌkoa̱á ꞌsín jngoya‑la̱ koni jngo xi̱ta̱ ra kotsíjen‑yá chi̱tsín.
\v 24 Nda kjón‑ní nga kotsíjenꞌá i̱sén‑la̱, tanga ꞌkia̱ nga ijye síkáfa‑ni íꞌtsi̱n, ta ndi̱to̱ón ꞌchaàjin‑la̱ kóꞌki kjòn‑ni i̱sén‑la̱.
\v 25 Jè ra ngi ya̱ tjíꞌta xko̱n kóꞌsín nga tíchja̱ jè kjo̱téxoma ra ni̱mé chijaꞌta‑la̱, kjo̱téxoma ra síkíjnandi̱í‑ná, ko̱ ngi ya̱ tíjnajin kiꞌta kjo̱bítsjen‑la̱, mì kì tísíjchaàjin kóꞌsín nga tíchja̱ jè kjo̱téxoma ra̱kìi̱, ta isa̱á jnchro tísíhitjasòn, jè‑ní ra ꞌñó ꞌse̱‑la̱ kjo̱tsja ꞌkia̱ nga ko̱ꞌsín ꞌsi̱in.
\p
\v 26 Tsa tjín iꞌka xi̱ta̱ ra tsò nga ꞌñó nda bexkón Nainá, tanga tsa mí kì ma‑la̱ síkinda̱ jè ndi̱je̱n‑la̱, ti̱jé tíbíndo̱cha̱‑la̱ ijo‑la̱ ko̱ ni̱mé chjí‑la̱ ni̱ꞌsín ki̱tso̱ nga ndaá bexkón Nainá.
\v 27 ꞌKia̱ nga ngi kixi̱ kjoa̱ nga nda ꞌyaxkén Nainá ra Na̱ꞌín‑ná koni ꞌsín nga jè mejèn‑la̱, ꞌkia̱á‑ní ꞌkia̱ nga bisìke̱é jñà ndí i̱xti jchꞌa̱n ko̱ jñà íchjín jchꞌa̱n ra ꞌken ꞌxi̱n‑la̱ ꞌkia̱ nga i̱nchibato kjo̱hiꞌin ko̱ ꞌkia̱ mì tsa ya̱ tjiníjchájieén ijo‑ná jñà kjoa̱ꞌcho ra tjín i̱ i̱sàꞌnde.
\c 2
\s Mì kì ma ta iꞌka‑ni xi̱ta̱ ra nda si̱ke̱é
\p
\v 1 Jiòn ndí ꞌndsé, koni ꞌsín nga makjiín‑no a̱ꞌta ꞌtse̱ Na̱ꞌín‑ná Jesucristo ra jeya tíjna̱, kì tà chjàn ta chjáajion xi̱ta̱ xàngio̱o ra nda si̱sin‑la.
\v 2 Tsa ya̱ ñánda̱ nga maxkóya jiòn kjoa̱haꞌsen jngo xi̱ta̱ nchi̱ná ra tjíkjá‑la̱ jto̱ngo ko̱ ꞌñó nda kjòn nikje ra kjiya, tsa ti̱ꞌkoa̱á kjoa̱haꞌsen jngo ndí xi̱ta̱ i̱ma̱ ra taxki̱ ꞌki ndí nikje ra kjiya,
\v 3 tsa jè isa̱ nda si̱sin‑la jiòn jè ra isa̱ nda ꞌki nikje‑la̱, nga ꞌkín‑la: “I̱ ti̱jni i̱jndíi̱, i̱ i̱ꞌnde ñánda̱ nga nda chon”, ko̱ jè ra ndí xi̱ta̱ i̱ma̱ tsa ꞌkín‑la: “Ti̱se̱n kixi̱‑la i̱tsí ya̱ i̱jndáa̱, ko̱ ñá tsa ꞌkín‑la: ta ya̱‑la ti̱jna i̱tsí ya̱ a̱ꞌta nangi.”
\v 4 Tsa ꞌkia̱ nga ko̱ꞌsín ꞌsia̱n jiòn, ¿a mí tsa ta i̱nchichjáhíjiòn xi̱ta̱ ra nda i̱nchinìsin‑la? Ko̱ ti̱jión ꞌcho i̱nchiníkíhijyo‑no kjo̱bítsjen‑no ꞌkia̱ nga ko̱ꞌsín i̱nchiꞌnià.
\p
\v 5 Jiòn ndí ꞌndsé ra ꞌñó tsjake̱‑no, nda ti̱náꞌya: Jè Nainá jñà jnchro fahájin jñà ra ndí xi̱ta̱ i̱ma̱ ra tjín i̱ i̱sàꞌnde mé‑ni nga ni̱mé ra si̱ìjchijaꞌta‑la̱ koni ꞌsín nga makjiín‑la̱ nga jñà tjábé‑la̱ ngaꞌtsì kjo̱nda ra tjín ñánda̱ nga jè Nainá tíbatéxoma, koni ꞌsín nga ijye kitsjà‑la̱ ꞌén‑la̱ jñà xi̱ta̱ ra tjín‑la̱ kjoa̱ matsjacha a̱ꞌta ꞌtse̱ Nainá.
\v 6 Tanga ra jiòn, ta isa̱á nachrjengio jñà ra ndí xi̱ta̱ i̱ma̱. ¿A mí tsa jñà xi̱ta̱ nchi̱ná ra ko̱ꞌsín beton‑najiòn ko̱ nga kjo̱ꞌñó fìko̱‑no ya̱ ngixko̱n xi̱ta̱xá nga bánè jé‑no?
\v 7 ¿A mí tsa ti̱ꞌkoa̱ jñà‑te ra ko̱ꞌsín chja̱jno‑la̱ jè ꞌí‑la̱ Cristo ra ya̱ nakjoá‑najiòn?
\p
\v 8 Ndaá i̱nchiꞌnià jiòn, tsa kixi̱ kitií kjoa̱ nga i̱nchinitjasòn jè kjo̱téxoma ra kitsjà jè Cristo jè ra xi̱ta̱xá ítjòn‑ná ma koni ꞌsín nga tíchja̱ xa̱jo̱n ra tjíꞌta ꞌén‑la̱ Nainá nga tsò: “Ko̱ꞌsín tsjacha ꞌti̱ìn xi̱ta̱ xàngi̱i koni ꞌsín nga tsjacha ꞌnì ijo‑li.”
\v 9 Tanga tsa ta chjaájin‑nájiòn xi̱ta̱ ra nda nìko̱ò, i̱nchifatsji-jé‑no ꞌkia̱ nga ko̱ꞌsín i̱nchibatonè‑la kjo̱téxoma, ko̱ ti̱jé‑ni kjo̱téxoma ra̱kìi̱ tíbánè jé‑no.
\v 10 Nga̱ tsa jngo xi̱ta̱ nda síhitjasòn ijye kjo̱téxoma, tanga tsa ta jngo‑ni ꞌén ra tíchja̱ ya̱ kjo̱téxoma ko̱tonè‑la̱, takó ska̱nè jé‑la̱, nga̱ ꞌkoa̱á ngoya‑la̱ koni tsa ni̱jngo kjo̱téxoma tísíhitjasòn‑ni.
\v 11 Tsa ꞌkoa̱á ꞌsín kitsò Nainá: “Kì kjoa̱chijngi ꞌnià”, tanga ti̱ꞌkoa̱á kitsò‑te: “Kì xi̱ta̱ nìꞌken.” Tsa mì tsa kjoa̱chijngi ꞌnié, tanga nìꞌken‑né xi̱ta̱, takó kjiné jé‑ná ta nga̱tjì‑la̱ nga tíbatonè‑lá jè kjo̱téxoma ꞌtse̱ Nainá.
\v 12 Machjeén‑ní nga si̱konde̱é ijo‑ná kóꞌsín nga ꞌsie̱én ko̱ kóꞌsín nga ki̱nákje̱é, nga̱ ki̱jchò ni̱chjin nga jè Nainá ki̱ìndajín‑ná. Ko̱ ꞌkoa̱á ꞌsín ki̱ìndajín‑ná koni ꞌsín nga tíchja̱ jè kjo̱téxoma‑la̱ ra síkítsa̱jnandi̱í‑ni xi̱ta̱.
\v 13 Jñà ra tsìn‑la̱ kjo̱hi̱ma̱takòn a̱ꞌta ꞌtse̱ xi̱ta̱ ra iꞌka, ti̱ꞌkoa̱á mì kì jcha̱hi̱ma̱takòn‑te ꞌkia̱ nga ki̱jchò ni̱chjin nga si̱ndajín‑la̱ ra kjoa̱ ꞌtse̱ jé‑la̱. Tanga jñà ra tjín‑la̱ kjo̱hi̱ma̱takòn, jñá si̱ìkijne ꞌkia̱ nga ki̱jchò ni̱chjin nga si̱ndajín‑la̱.
\s Kjo̱nda ra ꞌnié ꞌkia̱ nga makjiín‑ná
\p
\v 14 Jiòn ra ndí ꞌndsé xin‑no, ¿mé chjí‑la̱ tsa yá ra ki̱tso̱: “Ndaá makjiín‑na ra a̱ꞌta ꞌtse̱ Cristo”, tsa mì mé kjo̱nda tíꞌsín‑ni koni ꞌsín nga makjiín‑la̱? ¿A ko̱maá ta jè kjoa̱ makjiín‑la̱ xi̱ta̱ ra̱kìi̱, ko̱chrjekàjin kjo̱hiꞌin?
\v 15 ꞌKoa̱á ꞌsín jngoya‑la̱, tsa jngo ra ꞌndsé chibé ko̱ tsa jngo ndí chjo̱ón ra tichjeé chibé, tsa tsìn‑la̱ nikje ra faya ko̱ tsa tsìn‑la̱ tsajmì ra kjine ya̱ niꞌya‑la̱ nga ni̱chjin nchijòn,
\v 16 tsa tjín iꞌka jiòn ra ꞌkín‑la: “Tangí‑la nda‑nda‑no, ya̱ tsjaya nikje‑no ko̱ nda ti̱chioò kó ꞌki mejèn‑no”, tanga tsa ni̱mé tsajmì ra machjeén‑la̱ ꞌki̱‑la jiòn, ni̱mé chjí‑la̱ ni̱ꞌsín ta ko̱ꞌsín ꞌkín‑la.
\v 17 ꞌKoa̱á ti̱ꞌsín tjín‑ni a̱ꞌta ꞌtse̱ kjoa̱ ra makjiín‑ná, tsa mí mé kjo̱nda ra ma‑ná ꞌnié, ni̱mé chjí‑la̱ koni ꞌsín nga makjiín‑ná.
\p
\v 18 Tanga tsa titsa̱jnaá iꞌka jiòn ra mejèn‑no ꞌkín‑ná: “¿A makjiín‑li ra a̱ꞌta ꞌtse̱ Cristo?” ꞌA̱n, maá xín‑la: “Jon, tísihítjasón‑náa̱ jè kjo̱nda‑la̱. Ko̱ ji̱, ¿kóꞌsín ko̱ma ko̱kón‑náa̱ nga makjiín‑li a̱ꞌta ꞌtse̱ Cristo, tsa mí kì tjinihitjasìn kjo̱nda‑la̱? Tanga ra ꞌa̱n, tísihítjasón‑náa̱ kjo̱nda‑la̱; ꞌkoa̱á ma‑ni nga ma kokon‑la̱ nga ngi kixi̱ kitií kjoa̱ nga makjiín‑na a̱ꞌta ꞌtse̱ Cristo.”
\v 19 Ji̱, ꞌkoa̱á ꞌsín makjiín‑li nga jngoó‑ni Nainá, ko̱ ndaá tjín a̱ꞌta ꞌtse̱ kjoa̱ ra̱kìi̱; tanga jñà inìma̱ ꞌcho‑la̱ ni̱í, skanda ti̱ꞌkoa̱á makjiín‑te‑la̱ ra jñà ko̱ skanda fatsé‑ní nga tsakjón‑la̱.
\v 20 Ji̱ xi̱ta̱ ra tsìn‑li kjo̱bítsjen, machjeén‑ní nga nda katasijin‑li, nga̱ ni̱ꞌsín kixé nga ndaá makjiín‑ná, tanga tsa ni̱mé kjoa̱ ra nda tjín ma‑ná ꞌnié, ni̱mé chjí‑la̱ koni ꞌsín nga makjiín‑ná.
\v 21 ¿Mé‑ni ko̱ꞌsín kitsò‑ni Nainá nga jè xi̱ta̱ jchínga‑ná Abraham, xi̱ta̱ kixi̱í kjomà? ¿A mí tsa ki nga isìhitjasòn ꞌkia̱ nga kiìko̱ iꞌndí‑la̱ ra tsiꞌkìn Isaac ñánda̱ nga tsakájnasòn chrjó na̱jo̱ nga si̱ìꞌken koni jngo kjo̱tjò ra tsjá‑la̱ Nainá tsiki?
\v 22 ¿A mí ꞌyi, nga ta jngoó kjoa̱ kjomà‑ni koni ꞌsín nga kjokjiín‑la̱ ko̱ koni ꞌsín nga isìhitjasòn jè Abraham? Ko̱ ꞌkia̱ nga ko̱ꞌsín isìhitjasòn ya̱á kjòjngoko̱‑ni jè kjoa̱ ra ko̱ꞌsín kjokjiín‑la̱.
\v 23 ꞌKoa̱á ꞌsín itjasòn koni ꞌsín tíchja̱ xa̱jo̱n ra tjíꞌta ꞌén‑la̱ Nainá nga tsò: “Abraham, ndaá kjokjiín‑la̱ a̱ꞌta ꞌtse̱ Nainá; ꞌkoa̱á ꞌsín kjomà‑ni nga xi̱ta̱ kixi̱ kitsò‑la̱.” Ko̱ ꞌkoa̱á ꞌsín kijcha‑la̱ nga ꞌñó nda tsakáko̱ Nainá.
\p
\v 24 Ya̱á ꞌya‑la̱ nga ko̱ó‑te jñà kjoa̱ ra nda ꞌsín xi̱ta̱ nga xi̱ta̱ kixi̱ bitjongi ya̱ ngixko̱n Nainá, ko̱ mì tsa ta jè‑ni nga ko̱kjiín‑la̱.
\v 25 ꞌKoa̱á ti̱ꞌsín tjín a̱ꞌta ꞌtse̱ chjo̱ón chijngi ra tsiꞌkìn Rahab. Jè Nainá chjo̱ón kixi̱í tsachrjengi ta nga̱tjì‑la̱ jè kjo̱nda ra kiꞌsìn, ꞌkia̱ nga kitsjáꞌnde ya̱ niꞌya‑la̱ nga isíkjáya‑ni jñà xi̱ta̱ ra ta ijchòkatsíjenꞌma ko̱ ra kjomà a̱skan‑nioo̱ tsasìko̱ó‑te nga ma xìn ndi̱yá kijì‑ni jñà xi̱ta̱ kìi̱.
\v 26 Tsa ni̱mé kjoa̱nda i̱nchibakeén a̱ꞌta ꞌtse̱ kjoa̱ makjiín‑ná, jè kjoa̱ makjiín‑ná, ꞌkoa̱á ngoya‑la̱ koni jngo miꞌken ra mì ti̱ mé inìma̱ tjín‑la̱.
\c 3
\s Kóꞌki tse kjoa̱ꞌcho tje̱n‑ko̱ ndi̱je̱n‑ná
\p
\v 1 Jiòn ra ꞌndsé xin‑no, kì tà ngaꞌtsì‑no nga maestro ꞌnià ijo‑no; nga̱ ijyeé ꞌya‑nájiòn, ngaji̱n ra bakon‑ya‑ji̱n, isa̱á tse kjo̱hiꞌin si̱nè‑naji̱n tsa mì kì nda si̱itjasòn‑ji̱n.
\v 2 Ngaꞌtsí‑né, kjín sko̱ya‑la̱ kjoa̱ꞌcho ra kajieén. Tsa tjín jngo xi̱ta̱ ra ni̱mé kjoa̱ꞌcho kàjin ꞌkia̱ nga chja̱, jè xi̱ta̱ ra̱kìi̱ ngi xi̱ta̱ kixi̱‑ní, ko̱ ti̱ꞌkoa̱á chíkjoa̱á‑la̱ nga ma‑la̱ si̱ìkonda̱ kóhoꞌki ijo‑la̱ nga mì ya̱ ska̱jin kjoa̱ ra ꞌcho tjín.
\v 3 ꞌKoa̱á ngoya‑la̱ koni jngo kabàyo̱ ꞌkia̱ nga síꞌa freno tsaꞌba, chíkjoa̱ko̱‑ná nga ma basen‑jyé kóhoꞌki jè ijo‑la̱.
\v 4 ꞌKoa̱á ti̱ꞌsín tjín‑te koni ꞌsín nga síxá jñà chitso. Ni̱ꞌsín ꞌñó iꞌi kjòn, ko̱ ni̱ꞌsín ꞌñó tjín‑la̱ ngaꞌñó tjo̱ nga mejèn‑la̱ xìn i̱ko̱, ta i̱tsé sa̱á‑ni ki̱cha̱ ra ꞌmì timón ra síxáko̱‑ni xi̱ta̱ nga ma fìko̱ koni ꞌsín nga jè mejèn‑la̱.
\v 5 ꞌKoa̱á ti̱ꞌsín tjín ra a̱ꞌta ꞌtse̱ ndi̱je̱n‑ná, i̱tsé sa̱á‑ni, tanga taxki̱ maá‑la̱ kóꞌsín síkìchja̱‑ná ko̱ ta ya̱á si̱kítsjeén kóꞌsín nga tsò. Ni̱ꞌsín ta i̱tsé sa̱a‑ni niꞌí ra ko̱tse, batoó tse ijñá bakángi.
\v 6 Jè ndi̱je̱n‑ná ꞌkoa̱á ꞌsín ngoya‑la̱ koni jngo niꞌí; ya̱á ꞌya tsjé tsje ngaꞌtsì kjoa̱ꞌcho ra tjín ya̱ i̱sàꞌnde; i̱tsé sa̱á‑ni nga kjijnaꞌa ya̱ ndsa̱ꞌbé, tanga maá‑la̱ tsjá ꞌchin‑la̱ kóhoꞌki ijo‑ná, ꞌkoa̱á ngoya‑la̱ koni jngo niꞌí ra tíbaká nga tíjngo kjo̱binachon‑ná skanda ngaꞌtsì ni̱chjin nga bìtsa̱keén, ko̱ jè niꞌí ra̱kìi̱ ya̱á nchrabá‑ni ñánda̱ tjín kjo̱hiꞌin ra mì feheꞌta.
\v 7 Jñà xi̱ta̱, maá chíkjoa̱á‑la̱ nga síꞌndé ngaꞌtsì cho̱ ra tjín ya̱ i̱sàꞌnde, koni tsa jñà cho̱ ra ꞌñó ꞌtse̱n, ko̱ jñà ra tjín‑la̱ na̱jngá, ko̱ jñà ye̱, ko̱ jñà cho̱ ra tjín ya̱ a̱ngi ndáchikon.
\v 8 Tanga ni̱jngo xi̱ta̱ ra ma‑la̱ síꞌndé ndi̱je̱n‑la̱. Nga̱ jè ndi̱je̱n‑ná jngoó kjoa̱ꞌcho tjín‑la̱ ra mì kì tsjáꞌnde nga ma maꞌndé ko̱ ya̱á kitse ꞌchin ra koni xán‑la̱ ye̱ ra síꞌken‑ná.
\v 9 Ti̱jé‑ni ndi̱je̱n‑ná jeya níkíjna‑né Nainá ra Na̱ꞌìn ꞌmì‑lá, ko̱ ti̱jè nakjoájno‑lá xi̱ta̱ ra jè Nainá tsikínda koni ꞌsín ꞌki ra jè.
\v 10 Ta̱ jngoó ndsa̱ꞌbé bitjo‑ni ꞌén ra jeya níkíjna‑né Nainá ko̱ jè ꞌén ꞌcho ra nakjoájno‑lá xi̱ta̱. Jiòn ra ndí ꞌndsé xin‑no, jñà kjoa̱ kìi̱, mì kì tjínè‑la̱ nga ko̱ꞌsín ko̱ma.
\v 11 Jngo nga̱jo̱ ñánda̱ tíbitjo nandá, mì kì ko̱ma ti̱ya̱ ki̱tjo‑ni nandá tsje ko̱ nandá tjé.
\v 12 Jñà yá‑la̱ to igo̱, ¿a ko̱maá to‑la̱ ítjachó ko̱ja̱‑la̱? Ko̱ jè naꞌñó tatséjé, ¿a ko̱maá to igo̱ ko̱ja̱‑la̱? Jiòn ra ndí ꞌndsé xin‑no, ꞌkoa̱á ti̱ꞌsín tjín ra a̱ꞌta ꞌtse̱ nandá, mì kì ko̱ma ta̱jngo nga̱jo̱ ki̱tjo‑ni nandá tsje ko̱ nandá tjé.
\s Kóꞌsín tjín kjoa̱chji̱ne̱ ra nchrabá‑ni ján ngajmi
\p
\v 13 Tsa títsa̱jin iꞌka‑najiòn jñà ra ꞌñó chji̱ne̱ ko̱ ra ꞌñó nda machi̱ya‑la̱, ꞌkoa̱á ꞌsín kataꞌya‑la̱ nga ndaá i̱nchisíjchá ijo‑la̱, kóꞌsín nga ꞌndé tjín ikon a̱ꞌta ꞌtse̱ kjoa̱chji̱ne̱ ra tjín‑la̱.
\v 14 Tanga tsa ngi ta kjoa̱xìtakòn kitsejín inìma̱‑no ko̱ tsa tà jé mejèn‑no nga jiòn ki̱tsa̱hijyo ítjòn kiꞌta, kì tà chjàn ko̱ꞌsín níkítsjen nga ndaá i̱nchiꞌnià, kì kjoa̱ ndiso níkójiòn ko̱ kjoa̱ ra kixi̱ tjín.
\v 15 Jñà kjoa̱chji̱ne̱ kìi̱, mì tsa a̱ꞌta ꞌtse̱ Nainá nchrabá‑ni. Ta ꞌtse̱ i̱sàꞌnde‑ní, ko̱ ta kjo̱bítsjen ꞌtse̱ xi̱ta̱‑ní, ko̱ a̱ꞌta ꞌtse̱é xi̱ta̱‑ni̱í nchrabá‑ni.
\v 16 Ya̱ ñánda̱ nga tjín kjoa̱xìtakòn ko̱ jè kjo̱bítsjen ra ta jè mejèn‑ná nga jién ki̱tsa̱hijyo ítjén, ya̱ i̱jndáa̱ ta maskáya‑la̱ kjo̱bítsjen‑ná ko̱ ya̱á i̱jncha ngaꞌtsì kjoa̱ ra ꞌcho tjín.
\v 17 Tanga jñà xi̱ta̱ ra tjín‑la̱ kjoa̱chji̱ne̱ ra a̱ꞌta ꞌtse̱ Nainá nchrabá‑ni, tsjeé síjchá ijo‑la̱, kjoa̱ꞌnchán bátsji, kjoa̱ndaá ra ꞌsín, xi̱ta̱ ꞌndé‑ní, tjín‑la̱ ra kjoa̱hi̱ma̱takòn, kjiꞌtá ni̱chjin nda tjín kjoa̱ ra ꞌsín, xi̱ta̱ kixi̱‑ní, ko̱ mì tsa jò fì‑ni.
\v 18 Jñà xi̱ta̱ ra mejèn‑la̱ nga kjoa̱ꞌnchán kataꞌse, ítjòn ꞌnchán bìtsa̱jnako̱ jñà xi̱ta̱ ra iꞌka mé‑ni nga a̱skan‑nioo̱ ma sa̱kò‑la̱ jè kjo̱nda ra kixi̱ tjín.
\c 4
\s Jñà ra ya̱ báhijtako̱ kjoa̱ ra tjín ya̱ i̱sàꞌnde
\p
\v 1 ¿Ñánda̱ nchrabá‑ni jè kjo̱jchán ko̱ jè kjoa̱ nga ko̱ꞌsín bixkàn‑kjo jiòn? ¿A mí tsa ya̱ nchrabá‑ni a̱ꞌta ꞌtse̱ kjoa̱ꞌcho ra mejèn‑no ꞌnià, ra ꞌñó kjaán‑ko̱ jè inìma̱‑no?
\v 2 Mején‑najiòn nga ꞌse̱‑no ta mé tsajmì‑ni, tanga mì kì sakó‑no, ya̱á nchrabá‑ni nga nìꞌken jiòn xi̱ta̱ xàngio̱o nga̱ batoó tjíjin ya̱ inìma̱‑no ra kjoa̱xìtakòn ꞌmì, mì kì sakó‑no mé ra mejèn‑no; ꞌkoa̱á ma‑ni nga bixkàn‑kjo ko̱ a̱kjòn sakó‑no ra kjo̱jchán ꞌmì. Mì kì sakó‑no mé ra mejèn‑no, ta nga̱tjì‑la̱ nga̱ mì tsa níjé‑la Nainá.
\v 3 Ko̱ tsa ꞌkia̱ nga níjé‑la jiòn Nainá, mì kì ꞌbì‑najiòn, ta nga̱tjì‑la̱ nga̱ ꞌchoó níjé jiòn; ta jé ra mejèn‑najiòn nga ya̱ si̱chjeén a̱ꞌta ꞌtse̱ kjoa̱tsja ra sasén‑la̱ ijo‑no.
\v 4 Jiòn, xi̱ta̱ ra mì tsa kixi̱ ꞌnià a̱ꞌta ꞌtse̱ Nainá, ¿a mí ꞌya jiòn, nga tsa ꞌkia̱ jè ko̱tsjacheé jñà kjoa̱ꞌcho ra tjín i̱ i̱sàꞌnde, jé Nainá kondra̱ i̱nchimangí‑lá? Nga̱ ngaꞌtsì xi̱ta̱ ra jè matsjake kjoa̱ꞌcho ra tjín i̱ i̱sàꞌnde, kondra̱á fì‑la̱ Nainá.
\v 5 ¿A bixó‑nájiòn, tsa ta ꞌkoa̱á tsò jè xa̱jo̱n ra tjíꞌta ꞌén‑la̱ Nainá, ꞌkia̱ nga tsò: “Jè Inìma̱ Tsje ra Nainá kitsjá‑ná, batoó ꞌñó machi̱ni̱ ta nga̱tjì‑la̱ nga batoó nda matsjake‑ná”?
\v 6 Tanga jè Nainá isa̱á nda basìko̱‑ná nga tsjá‑ná kjo̱nda‑la̱. ꞌKoa̱á ma‑ni nga ko̱ꞌsín tsò jè xa̱jo̱n ra tjíꞌta ꞌén‑la̱ Nainá, nga tsò: “Jè Nainá kondra̱á tíjna‑la̱ jñà xi̱ta̱ ra ꞌnga ikon, tanga tseé kjo̱nda tsjá‑la̱ jñà ra ndí xi̱ta̱ ꞌndé.”
\v 7 Ti̱ꞌnde nga jè Nainá katatéxoma‑no, tanga ti̱tája‑la jè xi̱ta̱‑ni̱í, ko̱ kja̱beé ko̱se̱nꞌtáxín‑no.
\v 8 Ti̱chrañaꞌta‑la Nainá mé‑ni nga ti̱ꞌkoa̱ jè Nainá si̱ìchrañaꞌta‑no. Jiòn ra fatsji‑jé, ta kjoa̱tsje ra ꞌtia̱àn jiòn ꞌndi̱‑ni̱ ra a̱ꞌta ꞌtse̱ Nainá, mé‑ni nga jñà ndsa̱à katatsje‑nì. Ko̱ jiòn ra ta jò tjín takòn nga ko̱ꞌki matsjacha jè Nainá ko̱ ko̱ꞌki matsjacha jè kjoa̱ ꞌtse̱ i̱sàꞌnde, ti̱tsje jè kjo̱bítsjen ra tjíjin ya̱ inìma̱‑no mé‑ni ngi tsje katijna‑ni.
\v 9 ꞌÑó ti̱kájno, chjíndáya ko̱ ajò katama‑la̱ inìma̱‑no tà nga̱tjì‑la̱ nga jé tjín‑no. Jè kjoa̱ bijnòcha‑no, ndáxko̱n katama‑ni; ko̱ jè kjoa̱tsja‑no, kjo̱baá katama‑ni.
\v 10 ꞌÑó nangi ti̱kítsa̱jna ijo‑no ya̱ ngixko̱n Na̱ꞌín‑ná mé‑ni nga jè ꞌnga si̱ìkíjna‑no.
\p
\v 11 Jiòn ndí ꞌndsé, kì xàngio̱o nakjoájno‑la nga jngó jngó‑no ko̱ ra ìjngo ko̱ ra ìjngo. Nga̱ jè ra ko̱ꞌsín chja̱jno‑la̱ ꞌndse̱ nga bánè jé‑la̱, chja̱jno‑la̱ jè kjo̱téxoma‑la̱ Nainá ko̱ ti̱ꞌkoa̱á bánè jé‑la̱. Tsa ji̱ ra ko̱ꞌsín nakjoájno‑la jè kjo̱téxoma, mì tsa tjinihitjasòn‑jìn, ta isa̱á jnchro ji̱ tjiꞌnì ijo‑li koni jngo xi̱ta̱xá ra bíndajín jè kjo̱téxoma.
\v 12 Jngoó‑ni jè ra ma‑la̱ tsjá kjo̱téxoma, ti̱jé‑ni xi̱ta̱xá ra ma‑la̱ bíndajín, ko̱ ti̱jé‑ni ra ma‑la̱ si̱ikatojin‑ná kjo̱hiꞌin ko̱ ti̱ꞌkoa̱á ma‑la̱ ki̱ìné‑ná kjo̱hiꞌin. Tanga, ¿yá‑ni ra ji̱, nga ji̱ fanè jé‑la̱ xi̱ta̱ xàngi̱i?
\s ꞌÉn ꞌnga ikon
\p
\v 13 Nda ti̱náꞌya jiòn xi̱ta̱ ra ki̱ꞌsín bixó: “ꞌNdi̱ ꞌndi̱ ko̱ ñá tsa nchijòn, ya̱á kjieén ya̱ na̱xi̱ndá ra̱kiòo̱, jngo nó ya̱ ki̱tsa̱jneé nga ko̱ti̱nayeé tsajmì ko̱ ndaá ki̱jne‑ná to̱n.”
\v 14 Ko̱ nda mí ꞌya‑najiòn, mé ra ko̱maꞌtin jiòn ni̱chjin ra ꞌsa̱ nchrabá. Jiòn, ta ꞌkoa̱á ꞌsín ngoya‑la̱ koni jè ifi‑xa̱, ta jngohíjtaá mangaya tíjngo‑ni, ko̱ ta jngohíjtaá feheya‑ni.
\v 15 Jè ra machjeén tsa ki̱ꞌsín kixó jiòn: “Tsa jè Na̱ꞌín‑ná ra ko̱ꞌsín mejèn‑la̱ nga tsjá‑isa‑ná kjo̱binachon, ko̱maá‑la ꞌsie̱én ta mé xá‑ni.”
\v 16 Tanga ra jiòn, batoó nakjoá jiòn ra ꞌén ꞌnga ikon, ko̱ taxki̱ nakjoá‑nájiòn a̱ꞌta ꞌtse̱ kjoa̱ ra nda mí kì ꞌya jiòn kóꞌsín tjín kjòn‑ni. Ngaꞌtsì ꞌén ꞌnga ikon ra ko̱ꞌsín nakjoá jiòn, batoó ꞌcho tjín.
\v 17 Jè xi̱ta̱ ra be kóꞌsín tjín kjoa̱ ra nda tjín, ko̱ mì kì tsa ko̱ꞌsín ꞌsín‑ni, tíbátsji-jé‑la̱ ijo‑la̱.
\c 5
\s Tje̱n sijna chi̱ya‑la̱ ra xi̱ta̱ nchi̱ná
\p
\v 1 Ti̱náꞌya jiòn ra xi̱ta̱ nchi̱ná ꞌmì‑no. Chjíndáya ba ba nga̱ ꞌñó tse kjo̱hiꞌin tjín‑ni ra tínchrobánè‑no.
\v 2 Jè kjoa̱nchi̱ná‑no ijyeé tífiꞌndo ko̱ ngaꞌtsì jñà nikje‑najiòn ijyeé ijye‑la̱ jñà cho̱ inda.
\v 3 Jñà to̱n sinè ko̱ jñà to̱n chroba ra tjín‑no ijyeé títjochi̱. Ko̱ jé chi̱‑la̱ ko̱kòn ra kondra̱ tsa̱jiòn jè ni̱chjin ꞌkia̱ nga si̱ndajín, nga niꞌí jti̱‑ni nga tíjngo ijo‑no. Ngi ta i̱nchiminchaxkó‑nó kjoa̱nchi̱ná‑no skanda ꞌndi̱, ni̱ꞌsín ijye tífeheꞌta ni̱chjin.
\v 4 Jñà ndí xi̱ta̱ chi̱ꞌnda ra isíxá‑no, jñà ra mì kì tsikíchjí‑la jiòn, batoó ꞌñó i̱nchikjindáya nga i̱nchifajéꞌta‑la̱ Nainá ra kondra̱ tsa̱jiòn, ko̱ jè Nainá ra bato tse ngaꞌñó tjín‑la̱, ijyeé kiíꞌnchré koni ꞌsín i̱nchifajé.
\v 5 Jiòn batoó nda titsa̱jna i̱ i̱sàꞌnde ko̱ batoó nda i̱nchiꞌbì‑la kjo̱tsja jè ijo‑no. I̱nchinìsiín‑la inìma̱‑no nga i̱nchiꞌbì‑la kjo̱tsja ra síjé ko̱ nda mí ꞌya‑no tsa ijyeé ijchò ni̱chjin nga ki̱yá jiòn.
\v 6 Jñà ra xi̱ta̱ kixi̱ ra ni̱mé jé tjín‑la̱, jiòn fanè jé‑la, ko̱ nìꞌken‑no. Ko̱ jñà xi̱ta̱ kìi̱, nda mí basìko̱tjì ijo‑la̱. Ta tsjáꞌnde kjo̱nda‑ní nga nìꞌken jiòn.
\s Kjoa̱ ra ꞌsie̱én ꞌkia̱ nga ti̱kje ꞌfiì jè Cristo
\p
\v 7 ꞌKoa̱á ma‑ni jiòn ndí ꞌndsé, jchíñakjoa̱‑la jiòn skanda ꞌkia̱ nga kjꞌi̱í india‑ni jè Na̱ꞌín‑ná. Ko̱ꞌsín ꞌtia̱àn koni ꞌsín ꞌsín jè ndí xi̱ta̱ ra ma‑la̱ síxáko̱ nangi, nga koñá kjoa̱à‑la nda nda nga ꞌkoa̱ jtsí ra ꞌba ítjòn ko̱ ra a̱skan ꞌba, nga tsjá ngaꞌñó‑la̱ nga mihijin jñà tsajmì tjé, mé‑ni ko̱ma nga sa̱kò‑la̱ jñà to‑la̱ ra ꞌñó chjí‑la̱.
\v 8 ꞌKoa̱ ti̱ꞌsín jchíñakjoa̱a‑la nda nda ra jiòn, kì tà chjàn nìkjahajen‑la takòn nga̱ ijyeé ꞌñó kjimachraña jè ni̱chjin nga kjꞌi̱í india‑ni jè Na̱ꞌín‑ná.
\p
\v 9 Jiòn ndí ꞌndsé, kì xàngio̱o tsjajé‑la nga jngó jngó‑no nga bixó: “ꞌChoó tísíko̱‑na jè xi̱ta̱ ra̱kìi̱”, mé‑ni nga mì kjo̱hiꞌin si̱nè‑no, nga̱ jè Xi̱ta̱xá ra ma‑la̱ bíndajín‑la̱ xi̱ta̱, ijyeé tínchrabá chraña.
\v 10 Jiòn ra ꞌndsèe̱ xin‑no, chjíngi‑la koni ꞌsín nga isìkjiín kjo̱hiꞌin ko̱ nga ichìkjoa̱‑la̱ jñà xi̱ta̱ ra isìchjeén Nainá nga kiìchja̱ ngajo‑la̱, ꞌkia̱ nga kiìchja̱ ra a̱ꞌta ꞌtse̱.
\v 11 ꞌKoa̱á ꞌsín ijye ꞌya‑la̱ nga batoó nda‑la̱ jñà xi̱ta̱ ra chíkjoa̱jin‑la̱ jè kjo̱hiꞌin ra ꞌse‑la̱. Ijyeé inaꞌyá jiòn koni ꞌsín nga ichìkjoa̱jin‑la̱ jè xi̱ta̱ ra tsiꞌkìn Job jñà kjo̱hiꞌin ra kiꞌse‑la̱, ko̱ ijyeé ꞌya‑nájiòn koni ꞌsín nga isìko̱ Na̱ꞌín‑ná nga ijyeheꞌtà‑ni kjoa̱; nga̱ jè Na̱ꞌín‑ná batoó tse kjo̱hi̱ma̱takòn tjín‑la̱ ko̱ batoó nda xi̱ta̱.
\p
\v 12 Tanga jè ra isa̱ ꞌñó chjí‑la̱, jiòn ndí ꞌndsé, jè‑ní ꞌkia̱ nga ꞌkio̱ò ꞌén‑no, kì tà chjàn yá ra nikàxkio̱o nga bixó: “Tíbe‑ní”. Ko̱ kì tà chjàn bixó: “Tíbeé jè ngajmi”. Ko̱ ti̱ꞌkoa̱á kì tà chjàn bixó: “Tíbeé jè nangi”, ko̱ ra kjꞌií‑isa tsajmì. Tsa ꞌkia̱ nga kixó jiòn: “Jon, ꞌkoa̱á ꞌsín tjín”, ꞌkoa̱á ꞌsín ti̱hitjasòn. Ko̱ tsa ꞌkia̱ nga kixó jiòn: “Majìn”, ꞌkoa̱á ꞌsín ti̱hitjasòn, mé‑ni nga jè Na̱ꞌín‑ná mì kjo̱hiꞌin tsjá‑no.
\s Kótjín ndi̱yá‑la̱ nga ma kítsaꞌbeé
\p
\v 13 Tsa tjín iꞌka jiòn ra ba tjín‑no, ti̱nákjoa̱ꞌta‑la Nainá; ko̱ tsa tjín iꞌka jiòn ra tsja tjín‑no, ti̱jndá‑la Nainá nga jeya ti̱kíjna.
\v 14 Tsa tjín iꞌka jiòn ra ꞌchin tjín‑no, ti̱nákjoa̱‑la jñà xi̱ta̱ jchínga ra tjín‑la̱ xá a̱ꞌta ꞌtse̱ na̱xi̱ndá‑la̱ Cristo mé‑ni nga katabítsaꞌbatjì‑no ko̱ a̱ꞌta ꞌtse̱ ꞌí‑la̱ Na̱ꞌín‑ná katamahíjno‑no sihìti̱.
\v 15 Tsa nda makjiín‑no ꞌkia̱ nga kítsaꞌbaꞌtion jñà xi̱ta̱ ra kiya, ko̱ndaá‑ni jè ꞌchin‑la̱; ko̱ jè Na̱ꞌín‑ná si̱ikasítje̱n‑ni; ko̱ tsa mé jé ra tsakátsji, si̱hijchaꞌta‑la̱.
\v 16 ꞌKoa̱á ma‑ni nga machjeén‑ní nga ꞌtèna̱jmí kañá‑la xàngio̱o mé jé ra tjín‑no nga jngó jngó‑no, ko̱ titsaꞌbatjì kañá xàngio̱o nga jngó jngó‑no, mé‑ni katanda‑no tsa mé ꞌchin ra tjín‑no. Nga̱ tsa ꞌkia̱ jngo xi̱ta̱ ra kixi̱ tíjna ya̱ ngixko̱n Nainá, jè kjoa̱ bitsaꞌba‑la̱, batoó tjín‑la̱ ngaꞌñó nga manda‑ni xi̱ta̱.
\v 17 Jè xi̱ta̱ ra isìchjeén Nainá nga kiìchja̱ ngajo‑la̱ ra tsiꞌkìn Elías, ꞌkoa̱á ꞌsín ta xi̱ta̱ i̱sàꞌnde kjomà koni ra jién. ꞌÑó tsikítsaꞌba‑la̱ Nainá nga isíjé‑la̱, nga mì ti̱ jtsí kataꞌba‑ni, ko̱ ján nó masen mì kì ti̱ ꞌtsa‑ni jtsí.
\v 18 Ra kjomà a̱skan, tsikítsaꞌbaá india‑la̱ Nainá nga kataꞌba india‑ni jtsí, ko̱ ꞌtsaá india‑ni jtsí ra iꞌngaá inchrabà‑ni ko̱ jè nangi india kitsjá‑ni kjo̱nda nga tsajà to‑la̱ tsajmì ra isìtje̱.
\s Mé kjo̱nda ra sakó ꞌkia̱ nga jngo ra tíbátsji‑jé nìkasítje̱én
\p
\v 19 Jiòn ndí ꞌndsé, tsa tjín iꞌka jiòn ra tsinchaꞌtaxìn‑la̱ ra a̱ꞌta ꞌtse̱ kjoa̱kixi̱‑la̱ Nainá, ko̱ tsa tjín jngo xi̱ta̱ ra si̱ìkáfa india‑no nga si̱ikixi̱ya‑no,
\v 20 ko̱ꞌsín katasijin‑no, tsa jngo xi̱ta̱ ra ijye jé tíbátsji nga ya̱ tsáꞌbaya jè ndi̱yá ra mì kì nda tjín, ko̱ tsa jngo xi̱ta̱ ko̱ꞌsín ki̱tso̱‑la̱ nga kátáfaꞌta india‑ila̱ jè Nainá, ya̱á tíbachrjekàjin jè kjo̱hiꞌin ra ꞌtse̱ kjo̱biya, ko̱ ꞌkoa̱á ꞌsín tísíko̱ nga ꞌñó tse jé si̱hijchaꞌta‑la̱ Nainá jè xi̱ta̱ ra̱kìi̱.