\id JAS
\h Santiago
\toc1 Santiago
\mt Xo̱jo̱n carta xi kiskiì Santiago
\c 1
\s Kó tsò Santiago nga síhixatꞌaà xi̱ta̱
\p
\v 1 ꞌA̱n, Santiago, xi chi̱ꞌnda‑la̱ Nainá ma, ko̱ tsꞌe̱ Na̱ꞌèn‑ná Jesucristo, tisìhixatꞌaà‑nò, jñò, xi ya̱ inchrobàtꞌaà‑nò xi tejò tje̱‑la̱ na̱xa̱ndá Israel xi xki̱ xi ján nangui titsa̱jnaà nga tíjtsa i̱sòꞌnde.
\s Ngaꞌñó xi sakó‑ná kꞌe̱ nga mé kjoa̱ xi otojñaá
\p
\v 2 Jñò, xi ꞌndsè chibá i̱tꞌaà tsꞌe̱ Cristo, nguì tsja tꞌè‑là ini̱ma̱‑nò kꞌe̱ nga ni̱ta̱ mé kjoa̱ xi ko̱matꞌioòn.
\v 3 ꞌYa‑nò kꞌe̱ nga tsà mé kjoa̱ xi ko̱matꞌioòn nga chítꞌaà‑nò koni sꞌín mokjeiín‑nò, jñà kjoa̱ xi ko̱tojñoò, ya̱á sa̱kò‑nò ngaꞌñó nga ki̱chìkjoa̱ko̱‑nò ni̱ta̱ mé kjoa̱ xi ko̱tojñoò.
\v 4 Kꞌoa̱á ma‑ne jè ngaꞌñó xi sa̱kò‑nò, ndaà kàtasíxájiìn ini̱ma̱‑nò mé‑ne nga ndaà ko̱jchínga‑ne ko̱ tíjngoò‑ne kjo̱hítsjeèn‑la̱ ini̱ma̱‑nò nga ni̱mé si̱chijatꞌaà‑la̱.
\p
\v 5 Tsà tjín iꞌnga xi̱ta̱ xi chijatꞌaà‑la̱ kjo̱hítsjeèn, ti̱jétꞌaà‑là Nainá; jè tsjá‑nò. Nga̱ jè Nainá nguì ko̱ó ini̱ma̱‑la̱ nga tsjá ko̱ mìtsà chꞌo tsò‑la̱ xi̱ta̱ kꞌe̱ nga síjé.
\v 6 Ta̱nga nguì ndaà kàtakjeiín‑nò kꞌe̱ nga si̱jé. Kì jò ꞌbeé‑là takòn. Jè xi̱ta̱ xi jò ꞌbeé‑la̱ ikon, kꞌoa̱á sꞌín ngaya‑la̱ koni ndáchikon kꞌe̱ nga ꞌba tjo̱, fìjen fìkjáko̱.
\v 7 Jè xi̱ta̱ xi jò ꞌbeé‑la̱ ikon, kì kꞌoa̱á sꞌín síkítsjeèn nga tjín xi tjoé‑la̱ i̱tꞌaà tsꞌe̱ Na̱ꞌèn‑ná,
\v 8 nga mìkiì tíjngoò ikon. Na̱chrjein i̱ꞌndei̱ kjꞌei̱í sꞌín tísíkítsjeèn, nchijòn‑lè ti̱koa̱á kjꞌei̱í kjo̱hítsjeèn tjín‑la̱. Mìtsà nguì jngoò ndi̱yá kjoé.
\p
\v 9 Jñà xi̱ta̱ xi ꞌndsè chibá i̱tꞌaà tsꞌe̱ Cristo xi i̱ma̱ títsa̱jna, tsja kàtasꞌe‑la̱ nga ꞌnga títsa̱jna nga nguixko̱n Nainá.
\v 10 Ta̱nga jñà xi̱ta̱ nchi̱ná, tsja kàtasꞌe‑la̱ nga nangui kítsa̱jna ya̱ nguixko̱n Nainá, nga jè xi̱ta̱ nchi̱ná, kꞌoa̱á sꞌín ko̱matꞌin koni jngoò naxó xi mìkiì fìchrjein‑la̱.
\v 11 Kꞌe̱ nga ꞌñó matsjè ndobá, jñà ijñá, xì‑né, i̱kjoàn bixòjen jè naxó‑la̱; chi̱ja i̱sén‑la̱ nga ndaà kjoàn. Kꞌoa̱á ti̱sꞌín ko̱matꞌin jñà xi̱ta̱ nchi̱ná, kꞌe̱ nga ꞌñó nchisíxáko̱ xá xi tjín‑la̱, ta ni̱to̱ón ki̱yá.
\p
\v 12 Mé ta ndaà‑la̱ jè xi̱ta̱ xi chíkjoa̱ko̱‑la̱ kꞌe̱ nga chìtꞌaà, mé‑ne kꞌe̱ nga jye si̱ìkijne, tjoé‑la̱ kjoa̱binachon koni sꞌín kitsjaà‑la̱ ꞌén Nainá, ngatsꞌiì xi̱ta̱ xi jè matsjakeè. Tjoé‑la̱ kjoa̱binachon kꞌoa̱á ngaya‑la̱ koni jngoò corona siꞌa sko̱ xi̱ta̱ xi síkijne kꞌe̱ nga síská.
\v 13 Jñò, kꞌe̱ nga chìtꞌaà‑nò nga mejèn‑nò nga chꞌo sꞌe̱en, kì kꞌoa̱á sꞌín nìkítsjeèn nga jè Nainá tíkotꞌaà‑nò. Nga jè Nainá mì yá xi ko̱ma‑la̱ skótꞌaà nga chꞌo kàtasꞌín Nainá. Ti̱koa̱á jè Nainá mì kì kotꞌaà xi̱ta̱ nga chꞌo kàtasꞌín.
\v 14 Jngoò xi̱ta̱, kꞌe̱ nga chìtꞌaà, ti̱jñà‑ne kjoa̱ chꞌo‑la̱ xi matsjakeè bínga nga tsobàꞌñó.
\v 15 Ko̱ jè kjoa̱ chꞌo xi matsjakeè, kꞌe̱ nga jye bitasòn, ya̱á sakó jé. Kꞌe̱ nga jye bitasòn kjoa̱ tsꞌe̱ jé, i̱kjoàn fꞌiì kjoa̱ biyaà.
\p
\v 16 Jñò ndí ꞌndsè xi matsjake̱‑nò, kì yijo‑nò chona̱cha̱n‑là.
\v 17 Ngatsꞌiì kjo̱ndaà ko̱ kjo̱tjò xi tjoé‑ná, i̱tꞌaà tsꞌe̱ Nainá xi tíjna ngajmiì nchrobá‑ne, jè xi tsibíndaà ngatsꞌiì tsojmì xi ꞌya‑la̱ ngajmiì, jñà xi síhiseèn. Nainá, mì kꞌoa̱á sꞌín fatjìya‑la̱ koni ma jñà tsojmì xi síhiseèn ngajmiì nga fatjìya‑la̱ koni ma ꞌnguién.
\v 18 Nainá, kꞌoa̱á sꞌín kjòmejèn‑la̱ nga kisìkítsa̱jnakon xi̱tse̱ ìjngoò kꞌa‑ná xi kjoa̱ tsꞌe̱ ꞌén kixi̱‑la̱, mé‑ne nga jñá si̱nga̱tsjaá yijo‑ná Nainá koni tsojmì xi majchá ítjòn xi jè tsibíndaà.
\s Mochjeén‑né nga si̱kitasoán kꞌe̱ nga jye naꞌyá ꞌén‑la̱ Nainá
\p
\v 19 Jñò, ndí ꞌndsè xi matsjake̱‑nò, ti̱kítsjeèn ngatsꞌioò, ìsa̱ ndaà titsa̱jnandaà nga ki̱náꞌya‑là xi̱ta̱ xinguia̱á xi kjꞌei̱í, chiba chiba ti̱nókjoa̱a, ko̱ kì ta̱xki̱ majti‑nò.
\v 20 Jngoò xi̱ta̱ xi jti takòn, mìkiì kixi̱ síkitasòn koni sꞌín mejèn‑la̱ Nainá.
\v 21 Chja̱àxìn‑là yijo‑nò ngatsꞌiì kjoa̱ tjé ko̱ kjoa̱ chꞌo xi xki̱ xi ján tjín, mé‑ne nga indaàjiìn chjoé‑nò jñà ꞌén ndaà‑la̱ Nainá xi jye kinaꞌyà, jñà ꞌén koi xi ko̱ma ko̱chrjekàjiìn‑nò kjo̱ꞌin.
\p
\v 22 Ti̱kitasòn koni tsò ꞌén‑la̱ Nainá. Kì tà naꞌyà‑jèn. Tsà mìkiì si̱kitasòn, ti̱ yijo‑nò titsa̱chona̱cha̱n‑là.
\v 23 Ni̱ta̱ yá xi̱ta̱‑ne xi ꞌnchré ꞌén‑la̱ Nainá, tsà mìkiì si̱ìkitasòn, kꞌoa̱á ngaya‑la̱ koni jngoò xi̱ta̱ xi chi̱tsín tíkotsejèn‑ya.
\v 24 Kꞌe̱ nga jye beè i̱sén‑la̱ kó kji, i̱kjoàn fì, ya̱á jchàajiìn‑la̱ kó kji i̱sén‑la̱.
\v 25 Ta̱nga jè xi nguì ndaà kotsejèn‑la̱ kjo̱tíxoma kixi̱ xi síkíjnandei̱í‑ná, nga koií ꞌén síkítsjeèn kjitꞌaà koni tsò kjo̱tíxoma, ko̱ mìkiì síjchàajiìn ꞌén xi ꞌnchré nga ndaà síkitasòn, xi̱ta̱ jè, ya̱á sakó‑la̱ kjoa̱ machikon‑tꞌin kꞌe̱ nga kꞌoa̱sꞌín tísꞌín.
\p
\v 26 Tsà jngoò xi̱ta̱ xi tsò: “Beèxkón‑ná Nainá”, koa̱ tsà mìkiì bíchjoà‑la̱ ni̱je̱n‑la̱ nga chja̱ ngatsꞌiì ꞌén xi chꞌo tsò, yijo‑la̱á tíkona̱cha̱n‑la̱; ni̱mé chjí‑la̱ nga tsò: “Beèxkón‑ná Nainá.”
\v 27 Kꞌe̱ nga nguì kixi̱ kjoa̱ nga Nainá xi Na̱ꞌèn‑ná yaxkoán, koni sꞌín mejèn‑la̱, jé‑né nga si̱chjátꞌaà‑lá xi i̱xti jcha̱n, ko̱ íchjín kaꞌàn xi jye kꞌen xꞌi̱n‑la̱, jñà xi kjo̱ꞌin tjín‑la̱, ti̱koa̱ mì kì ki̱ꞌnde‑lá yijo‑ná nga kjoa̱ chꞌo jchi̱nìjñaá xi tjín i̱sòꞌnde.
\c 2
\s Mì kiì mochjeén nga chjaàjñaá xi̱ta̱ xinguia̱á nga ndaà si̱sꞌin‑lá
\p
\v 1 Jñò, ndí ꞌndsè, koni sꞌín mokjeiín‑nò i̱tꞌaà tsꞌe̱ Na̱ꞌèn‑ná Jesucristo xi jeya tíjna, kì chjaàjñoò xi̱ta̱ xinguio̱o.
\v 2-3 Tsà jngoò xi̱ta̱ ki̱jchò ya̱ i̱ꞌnde ñánda bixoña, xi ta̱ngò oro tíkjá na̱jnó tsja, ti̱koa̱ ꞌñó ndaà kjoàn nikje chjí xi kikjá. Jñò, tsà ꞌñó ndaà si̱sꞌin‑là, kꞌoín‑la: “Ti̱jni i̱jndé ñánda ndaà choòn.” Tsà ti̱koa̱ ki̱jchò jngoò xi̱ta̱ i̱ma̱ xi kixajndàjno kixajndàtꞌaà nikje‑la̱, tsà kꞌoín‑la: “Ta̱xki̱ ti̱si̱jni ya̱, ko̱ tsà majìn, ta̱xki̱ ti̱jnatꞌeiì ya̱ nangui.”
\v 4 Jñò, kꞌe̱ nga ko̱sꞌín sꞌe̱en, xinguio̱o titsa̱nachrjekànguiò nga chjaàjñoò xi̱ta̱ xinguio̱o koni sꞌín xi̱ta̱xá xi chꞌo tjín kjo̱hítsjeèn‑la̱.
\p
\v 5 Jñò ndí ꞌndsè xi ꞌñó matsjake̱‑nò, ti̱náꞌya: Nainá xó kꞌoa̱á sꞌín jaàjiìn‑ne jñà xi xi̱ta̱ i̱ma̱ xi tjín i̱ i̱sòꞌnde, mé‑ne nga jñà kítsa̱jna ítjòn‑ne koni sꞌín mokjeiín‑la̱ ti̱koa̱ tjoé kjo̱tjò‑la̱ ngatsꞌiì kjo̱ndaà xi Nainá tsjá‑la̱ jñà xi̱ta̱ xi jè otíxoma‑la̱ nga jyeé kꞌoa̱sꞌín kitsjaà ꞌén‑la̱ nga tsjá‑la̱ xi̱ta̱ xi matsjakeè.
\v 6 Ta̱nga jñò, ta sa̱á nachrjekànguioò jñà xi̱ta̱ i̱ma̱. ¿A mìtsà jñà xi̱ta̱ nchi̱ná xi jñò beètoòn‑nò nga fìko̱‑nò nguixko̱n xi̱ta̱xá nga óngui‑nò?
\v 7 ¿A mìtsà jñà xi̱ta̱ nchi̱ná xi chja̱jno‑la̱ i̱tꞌaà tsꞌe̱ ꞌín‑la̱ Cristo, xi jè otíxoma‑nò?
\p
\v 8 Jñò, ndaà ꞌnè‑nò tsà kixi̱ kjoa̱ nga nìkitasòn jè kjo̱tíxoma‑la̱ Cristo xi otíxoma koni sꞌín tíchja̱ Xo̱jo̱n‑la̱ Nainá nga tsò: “Ti̱tsjachi xi̱ta̱ xingui̱i xi iꞌnga koni tsà ti̱ yijo tsi̱ji‑ne.”
\v 9 Ta̱nga tsà chjaàjñoò xi̱ta̱ xinguio̱o, tjín xi ndaà nìsꞌin‑la̱à ko̱ tjín xi mìkiì ndaà nìsꞌin‑la̱à, jé binchaàtsji‑la̱ yijo‑nò, nga nìkatonè‑là kjo̱tíxoma; ti̱jè‑ne kjo̱tíxoma tíbínè‑nò jé.
\v 10 Nga tsà jngoò xi̱ta̱ xi ndaà síkitasòn yije kjo̱tíxoma ta̱nga tsà tà jngoò kjoa̱ síkatonè‑la̱, jye kisakò jé yije‑la̱ i̱tꞌaà tsꞌe̱ kjo̱tíxoma‑la̱ Nainá.
\v 11 Nga̱ kꞌoa̱á tsò Nainá: “Kì kjoa̱ chijngui ꞌnè.” Ta̱nga ti̱koa̱á tjítꞌaà ñánda tsò: “Kì xi̱ta̱ nìkꞌeèn.” Jñò, tsà mì kjoa̱ chijngui ꞌnè, ta̱nga tsà xi̱ta̱ nìkꞌeèn, jye kisakò jé‑nò i̱tꞌaà tsꞌe̱ kjo̱tíxoma.
\v 12 Jñò, kꞌoa̱á sꞌín ti̱nókjoa̱a ko̱ kꞌoa̱á sꞌín tꞌe̱en koni xi̱ta̱ xi Nainá ki̱ìndaàjiìn‑la̱ tsà kꞌoa̱sꞌín tíbitasòn‑la̱ koni tsò kjo̱tíxoma xi síkítsa̱jnandei̱í xi̱ta̱.
\v 13 Jñà xi̱ta̱ xi tsjìn‑la̱ kjo̱hi̱ma̱takòn i̱tꞌaà tsꞌe̱ xi̱ta̱ xi kjꞌei̱í, ti̱koa̱á mìkiì sꞌe̱‑la̱ kjo̱hi̱ma̱takòn kꞌe̱ nga si̱nè‑la̱ kjo̱ꞌin. Ta̱nga jñà xi tjín‑la̱ kjo̱hi̱ma̱takòn, mì kjo̱ꞌin si̱nè‑la̱ kꞌe̱ nga si̱ndaàjiìn‑la̱.
\s Kjo̱ndaà xi ꞌné kꞌe̱ nga mokjeiín‑ná
\p
\v 14 Ndí ꞌndsè, nìmé chjí‑la̱ tsà jngoò xi̱ta̱ xi tsò: “ꞌA̱n, mokjeiín‑na i̱tꞌaà tsꞌe̱ Nainá”, tsà mìkiì tíꞌya‑la̱ kjo̱ndaà‑la̱. Xi̱ta̱ jè, xi ta jè kjoa̱ mokjeiín‑la̱, mìkiì ko̱ma ki̱tjokàjiìn kjo̱ꞌin.
\v 15 Tsà jngoò ꞌndsé ko̱ tsà jngoò tichjaá xi tsjìn‑la̱ nikje xi ókjá ko̱ tsà tsjìn‑la̱ tsojmì xi kine;
\v 16 jñò, tsà kꞌoín‑laà: “Tꞌin‑là ndaà‑ne, ndaà chi̱kjeí nikje‑lè, ndaà chi̱ni̱i tsojmì xi mejèn‑lè.” Ko̱ tsà mìkiì si̱chjátꞌaà‑là mé xi mochjeén‑la̱, ni̱mé chjí‑la̱.
\v 17 Kꞌoa̱á ti̱sꞌín ma kjoa̱ xi mokjeiín‑ná, tsà mìkiì tíꞌya‑la̱ kjo̱ndaà‑ná, ni̱mé chjí‑la̱ kjoa̱ xi mokjeiín‑ná.
\p
\v 18 Tjín iꞌnga xi̱ta̱ xi kjònangui, tsò: “¿A mokjeiín‑lè i̱tꞌaà tsꞌe̱ Cristo?” ꞌA̱n, xan‑la̱: “Tíꞌyaá‑la̱ kjo̱ndaà‑na. ¿A ko̱maá ko̱kó‑ná nga mokjeiín‑lè i̱tꞌaà tsꞌe̱ Cristo tsà ni̱mé kjo̱ndaà tìꞌnì? Ta̱nga ꞌa̱n tìsꞌiìn‑ná kjo̱ndaà, kꞌoa̱á ma‑ne kokoò‑lè nga kixi̱í kjoa̱ nga mokjeiín‑na.”
\v 19 Ngaji̱ ndaá tjín nga mokjeiín‑lè nga jngoò ma Nainá. Ta̱nga ti̱koa̱á jñà ini̱ma̱ chꞌo‑la̱ nei̱í mokjeiín‑la̱ nga tjín Nainá, skanda otsé‑né nga tsakjón‑la̱.
\v 20 Jñò, xi̱ta̱ xi tsjìn‑nò kjo̱hítsjeèn, ¿a mì fìya‑nò nga nìmé chjí‑la̱ kjoa̱ xi mokjeiín‑nò tsà mìkiì tíꞌya‑la̱ kjo̱ndaà‑nò?
\v 21 Na̱ꞌèn jchán kjìn‑ná Abraham, ¿mé‑ne xi̱ta̱ kixi̱ kitsò‑la̱ Nainá? Koií kjoa̱‑la̱ nga ndaà kisìkitasòn koni sꞌín kitsò‑la̱ kꞌe̱ nga kitsjaà kjo̱tjò Isaac xi kiꞌndí‑la̱ ma nga tjín‑ne nga si̱ìkꞌen.
\v 22 ¿A mì ꞌya‑jèn nga jè Abraham koni sꞌín nga kòkjeiín‑la̱, kꞌoa̱á ti̱sꞌín kisìkitasòn? Koni sꞌín kisìkitasòn, ya̱á kjòjngoò kjoa̱ mokjeiín‑la̱ nga ni̱mé kisìchijàtꞌaà‑la̱.
\v 23 Kꞌoa̱á sꞌín tsitasòn koni sꞌín tíchja̱ Xo̱jo̱n‑la̱ Nainá nga tsò: “Abraham kòkjeiín‑la̱ i̱tꞌaà tsꞌe̱ Nainá; kꞌoa̱á sꞌín komà‑ne nga Nainá kiskoétjò nga xi̱ta̱ kixi̱ kitsò‑la̱.” Amigo‑la̱ Nainá kiꞌmì Abraham.
\p
\v 24 Ya̱á ꞌyaà, nga Nainá kjoétjò xi̱ta̱ kjoa̱ tsꞌe̱ kjo̱ndaà xi síkitasòn, mìtsà tà koi kjoa̱‑la̱ nga mokjeiín‑la̱.
\v 25 Kꞌoa̱á ti̱sꞌín tjín tsꞌe̱ chjo̱ón chijngui xi ꞌmì Rahab; Nainá kiskoétjò nga xi̱ta̱ kixi̱ kitsò‑la̱ koií kjoa̱‑la̱ kjo̱ndaà xi kisꞌiìn nga kitsjaàꞌnde‑la̱ jñà xi̱ta̱ xi ijchò katsejèn‑ꞌma, i̱kjoàn kisìchjátꞌaà‑la̱ nga xìn ndi̱yá kisìkasén‑ne xi̱ta̱ koi.
\v 26 Kꞌoa̱ ti̱sꞌín tjín jè yijo‑ná, ni̱mé chjí‑la̱, tíjna kꞌen‑né tsà tsjìn ini̱ma̱‑ná. Kꞌoa̱á ti̱sꞌín ma kjoa̱ xi mokjeiín‑ná, tsà mìkiì tíꞌya‑la̱ kjo̱ndaà‑ná, ni̱mé chjí‑la̱.
\c 3
\s Kjoa̱ tsꞌe̱ ni̱je̱n‑ná nga nokjoá
\p
\v 1 Jñò ndí ꞌndsè, i̱tꞌaà tsa̱jòn, kì kjìn ma‑ne xi maestro ma. Jyeé ꞌya nga ngaje̱n xi okoòya‑je̱n, tsà mé kjoa̱ xi chꞌo ꞌnè‑je̱n, ìsa̱á tse kjo̱ꞌin si̱nè‑naje̱n.
\v 2 Ngatsꞌiì‑ná, kjìn ska̱ya kjoa̱chꞌo xi ꞌné, ta̱nga jngoò xi̱ta̱ xi mì chꞌo tsò ꞌén xi chja̱, jè‑né xi nguì xi̱ta̱ kixi̱, xi komà‑la̱ ko̱tìxoma yije‑la̱ yijo‑la̱.
\v 3 Kꞌoa̱á ngaya‑la̱ koni kohòyo̱ xi siꞌa freno tsoꞌba mé‑ne nga si̱ìkitasòn‑ne koni sꞌín mejèn‑ná nga kjoi̱, kꞌoa̱á sꞌín maꞌnchré yije yijo‑la̱.
\v 4 Kꞌoa̱á ti̱sꞌín tjín koni sꞌín síxá jñà chitso, na̱sꞌín tákó iꞌí kjoàn, ko̱ na̱sꞌín ta̱kó ꞌñó ꞌba tjo̱ xi fàhitje̱n, jè xi̱ta̱ xi síxáko̱ na̱sꞌín jtobá kji yá xi ꞌmì timón xi síxáko̱, maá fàhitje̱n nga fìko̱ ni̱ta̱ kósꞌín mejèn‑la̱ nga kji̱ko̱.
\v 5 Kꞌoa̱á ti̱sꞌín ma xi kjoa̱ tsꞌe̱ ni̱je̱n‑ná. Tà yijo jtobá kji, ta̱nga ꞌñó ꞌnga chja̱ ni̱ta̱ mé kjoa̱‑ne. Kꞌoa̱á ngaya‑la̱ koni jngoò niꞌín xi i̱tsé kji, ko̱maá ko̱kángui ijñá na̱sꞌín ta̱kó tse ma.
\v 6 Ni̱je̱n‑ná kꞌoa̱á ngaya‑la̱ koni jngoò niꞌín, ya̱á tjíꞌa yije ngatsꞌiì ꞌén chꞌo xi tjín i̱sòꞌnde xi ma‑la̱ síkitsꞌón yije yijo‑ná. Jè niꞌín xi tjín ya̱ i̱ꞌnde tsꞌe̱ kjo̱ꞌin ñánda ꞌmì infierno, jè bítꞌaꞌí‑la̱ ni̱je̱n‑ná nga chja̱ ꞌén xi chꞌo tsò xi ko̱ma‑la̱ ko̱kà‑ná koni tjín na̱chrjein ki̱tsa̱jnakoaán.
\v 7 Ngatsꞌiì cho̱ xi tjín i̱ i̱sòꞌnde ma maꞌnchré, koni jñà cho̱ xi tjín i̱jiìn ijñá, ko̱ xi tjímajiìn i̱sén, ko̱ jñà cho̱ xi nangui bífejno yijo‑la̱ ko̱ jñà xi tjín i̱jiìn ndáchikon, jñà xi̱ta̱ ma‑la̱ síꞌnchré.
\v 8 Ta̱nga ni̱jngoò xi̱ta̱ xi ma‑la̱ síꞌnchré ni̱je̱n‑la̱. Nga jè ni̱je̱n‑ná jngoò kjoa̱ chꞌo tjín‑la̱ xi mìkiì tsjáꞌnde nga maꞌnchré. Ya̱á tjíꞌa koni xán kjan‑la̱ ye̱ xi ma‑la̱ síkꞌen‑ná.
\v 9 Ti̱jè‑ne ni̱je̱n‑ná jeya síkíjna Nainá xi Na̱ꞌèn‑ná, ko̱ ti̱jè‑ne nokjoàꞌon‑koa̱á xi̱ta̱ xi ko̱sꞌín kisindaà koni kji Nainá.
\v 10 Ti̱jè‑ne ndso̱baá bitjo‑ne ꞌén xi jeya síkíjna Nainá ko̱ ti̱jè bitjo‑ne xi nokjoàꞌon‑koa̱á xi̱ta̱. Ndí ꞌndsè, mìkiì ndaà tjín kjoa̱ koi.
\v 11 Jngoò nga̱jo̱ ñánda tíbitjo nandá, mìkiì ko̱ma ki̱tjo nandá jnchra koa̱ ki̱tjo nandá ndaà.
\v 12 Jñà yá toò iko̱, ¿a ko̱maá ko̱ja̱‑la̱ toò xi ꞌmì aceituna? Jè yá uva, ¿a ko̱maá ko̱ja̱‑la̱ toò iko̱? Jñò ndí ꞌndsè kꞌoa̱á ti̱sꞌín tjín kjoa̱ tsꞌe̱ nandá, jngoò nga̱jo̱ mìkiì ko̱ma ki̱tjo nandá jnchra ko̱ ki̱tjo nandá ndaà.
\s Kósꞌín tjín kjoa̱chji̱ne̱ xi nchrobá‑ne ján ngajmiì
\p
\v 13 Jñà xi̱ta̱ xinguio̱o, tsà tjín iꞌnga xi tjín‑la̱ kjoa̱ chji̱ne̱ ko̱ xi ndaà fìya‑la̱, kàtakó kjoa̱chji̱ne̱‑la̱ nga indaà ikon tísíjchá yijo‑la̱.
\v 14 Jñò, tsà biìꞌnde‑la̱à yijo‑nò nga kjoa̱xìtakòn si̱jiìn ini̱ma̱‑nò nga mejèn‑nò nga jñò ki̱tsa̱jna ítjòn‑là xinguio̱o, kì kꞌoa̱á sꞌín nokjoà nga ndaà titsa̱ꞌnè; kì ꞌén ndiso nokjoà nga kondra̱ onguí‑là kjoa̱ kixi̱‑la̱ Nainá.
\v 15 Kjoa̱ chji̱ne̱ jè, mìtsà i̱tꞌaà tsꞌe̱ Nainá nchrobá‑ne. Kjoa̱ chji̱ne̱ tsꞌe̱ i̱sòꞌnde‑né. Kjo̱hítsjeèn tsꞌe̱ xi̱ta̱‑né, ko̱ ti̱ tsꞌe̱é‑ne xi̱ta̱ nei̱í.
\v 16 Kꞌe̱ nga maxìtakòn‑chaá xinguia̱á ko̱ nga mejèn‑ná nga jñá ki̱tsa̱jna ítjòn‑laà, ya̱á sakó‑ná kjoa̱siì, ngatsꞌiì kjoa̱ chꞌo xi tjín i̱sòꞌnde.
\v 17 Ta̱nga jñà xi̱ta̱ xi tjín‑la̱ kjoa̱ chji̱ne̱ xi i̱tꞌaà tsꞌe̱ Nainá nchrobá‑ne, tsjeè síjchá yijo‑la̱, kjoa̱ꞌnchán ótsji, tjín‑la̱ kjo̱ndaà, xi̱ta̱ ꞌnchré‑né, tjín‑la̱ kjo̱hi̱ma̱takòn, ndaà tjín xá xi sꞌín, mì jò fì‑ne, ko̱ ꞌén kixi̱í chja̱.
\v 18 Jè xi̱ta̱ xi mejèn‑la̱ nga sꞌe̱ kjoa̱ꞌnchán, ꞌnchán bìjnako̱ xi̱ta̱ xi iꞌnga mé‑ne nga ma i̱skan sa̱kò‑la̱ kjo̱ndaà xi kixi̱ tjín.
\c 4
\s Jè xi matsjakeè kjoa̱ tsꞌe̱ i̱sòꞌnde, kondra̱ tsꞌe̱é Nainá
\p
\v 1 ¿Ñánda nchrobá‑ne kjo̱jchán nga bixkàn‑ko̱o xinguio̱o? Ya̱á nchrobá‑ne kjoa̱chꞌo xi kjitꞌaà na̱chrjein síjé ini̱ma̱‑nò nga bixkàn‑ko̱o kjo̱hítsjeèn chꞌo‑nò.
\v 2 Mejèn‑nò tsojmì xi tsjìn‑nò ta̱nga mìkiì sakó‑nò, kꞌoa̱á ma‑ne nga nìkꞌeèn xi̱ta̱ koa̱ maxìtakòn‑chaà xi̱ta̱, ta̱nga mìkiì sakó‑nò tsojmì xi mejèn‑nò. Kꞌoa̱á ma‑ne nga sakó‑nò kjo̱jchán nga bixkàn‑ko̱o xinguio̱o. Mìkiì sakó‑nò tsojmì xi mejèn‑nò koií kjoa̱‑la̱ nga mìkiì nìjé‑là Nainá.
\v 3 Kꞌe̱ nga nìjé‑laà Nainá, mìkiì tsjá‑nò nga mìkiì ndaà nìjé‑laà. Nga̱ jè xi mejèn‑nò nga ya̱ si̱chjeén i̱tꞌaà tsꞌe̱ kjo̱tsja xi chꞌo síjé yijo‑nò.
\v 4 Jñò xi mìtsà xi̱ta̱ kixi̱ ꞌmì‑nò, ¿a mìtsà ꞌya nga jè xi matsjakeè kjoa̱ tsꞌe̱ i̱sòꞌnde, kondra̱ tsꞌe̱é Nainá? Ni̱ta̱ yá‑ne xi mejèn‑la̱ ko̱tsjakeè kjoa̱ tsꞌe̱ i̱sòꞌnde, kondra̱‑la̱ Nainá ma.
\v 5 Koií kꞌoa̱ tsò‑ne Xo̱jo̱n‑la̱ Nainá nga tsò: “Jè Ini̱ma̱ Tsjeè xi Nainá kitsjaà‑ná, skanda machi̱ni̱‑né nga ꞌñó matsjakeè‑ná.”
\v 6 Ta̱nga Nainá, nga ko̱ kjo̱ndaà‑la̱ ndaà síchjátꞌaà‑ná. Kꞌoa̱á tsò Xo̱jo̱n‑la̱ nga tsò: “Nainá kondra̱á tíjna‑la̱ jñà xi̱ta̱ xi ꞌnga ikon, ta̱nga ko̱ó kjo̱ndaà‑la̱ ndaà síko̱ jñà xi xi̱ta̱ i̱ma̱ kjoa̱.”
\v 7 Tjiìꞌnde nga Nainá kàtatíxoma‑nò, ko̱ ꞌñó tájaàjiìn titsa̱jna‑laà xi̱ta̱ nei̱í mé‑ne nga ko̱si̱tꞌaàxìn‑nò.
\v 8 Ti̱chrañàtꞌaà‑laà Nainá mé‑ne jè Nainá si̱ìchrañatꞌaà‑nò. Jñò xi jé binchaàtsjioò, kì ti̱ jé binchaàtsji‑nò, ti̱tsjeè ndsa̱a. Ti̱tsjeèya kjo̱hítsjeèn‑la̱ ini̱ma̱‑nò, jñò xi jò kjo̱hítsjeèn tjín‑nò nga o̱kji matsjacha Nainá ko̱ o̱kji matsjacha i̱sòꞌnde.
\v 9 Ti̱kájnoò jé‑nò, ba ti̱tsa̱jna ko̱ chìhindáyaà. Jè kjoa̱ bijnò‑nò, kjoa̱ tsꞌe̱ ndáxko̱ón kàtama. Ko̱ jè kjo̱tsja‑nò, kjoa̱ba kàtama.
\v 10 Nangui titsa̱jna‑là Nainá mé‑ne jè Nainá ꞌnga si̱ìkítsa̱jna‑nò.
\p
\v 11 Ndí ꞌndsè, kì nokjoàjno‑là xinguio̱o. Jè xi chja̱jno‑la̱ ꞌndse̱ nga tsò: “Mìkiì ndaà tísꞌín”, jè kjo̱tíxoma tíchja̱jno‑la̱ nga tsò nga mìkiì ndaà tjín kjo̱tíxoma. Ko̱ tsà kꞌoa̱á sꞌín si nga mìkiì ndaà tjín kjo̱tíxoma, mìkiì tìnìkitasoìn koni tsò kjo̱tíxoma. Kꞌoa̱á ngaya‑la̱ koni tsà xi̱ta̱xá tijni nga ji̱ tìbìndaàjiìn.
\v 12 Tà jngoò ma‑ne xi tsjá kjo̱tíxoma, ti̱jé‑ne xi xi̱ta̱xá tíjna nga bíndaàjiìn‑la̱ xi̱ta̱. Ko̱ ti̱jé‑ne xi ma‑la̱ ko̱chrjekàjiìn‑ná kjo̱ꞌin, ti̱koa̱ ti̱jé‑ne xi ma‑la̱ tsjá‑ná kjo̱ꞌin. ¿Yá‑ne ngaji̱ nga jé bìnè‑laà xingui̱i?
\s Xi̱ta̱ xi chja̱ ꞌén ꞌnga ikon
\p
\v 13 Jñò, ndaà ti̱náꞌyaà koni xán‑nò. Jñò bixón‑nò: “Na̱chrjein i̱ꞌndei̱, o nchijòn‑lè, xìn na̱xa̱ndá kjiaán, jngoò nó ki̱tsa̱jnaá nga si̱xá mé‑ne tse to̱n si̱kijneé.”
\v 14 Ta̱nga jñò, mìkiì tíjiìn‑nò mé xi ko̱matꞌioòn nchijòn‑lè nga titsa̱jnakon. Jñò, kꞌoa̱á sꞌín ngaya‑la̱ koni ifi. Jngoò tjò fahaya, i̱kjoàn ni̱to̱ón fìya‑ne.
\v 15 Jñò, kií sꞌín ti̱nókjoa̱a: “Tsà Nainá mejèn‑la̱ nga si̱ìkítsa̱jnakon‑ná, ko̱maá sꞌe̱én xá koi, o sꞌe̱én xá xi kjꞌei̱í.”
\v 16 Ta̱nga jñò, ꞌñó ꞌnga ꞌén nokjoà na̱sꞌín mìkiì tíjiìn‑nò mé xi ko̱ma nga tífì‑ìsa na̱chrjein. Ngatsꞌiì ꞌén ꞌnga xi nokjoà, jé‑né.
\v 17 Jè xi tíjiìn‑la̱ kjoa̱ xi ndaà tjín ko̱ mìkiì síkitasòn, jé tíhótsji‑la̱ yijo‑la̱.
\c 5
\s Kjo̱ꞌin xi si̱ìkjeiín xi̱ta̱ nchi̱ná
\p
\v 1 Jñò xi xi̱ta̱ nchi̱ná ꞌmì‑nò, ti̱náꞌyaà ꞌén xi xán‑nò. Chìhindáyaà ba ba i̱tꞌaà tsꞌe̱ kjo̱ꞌin xi si̱kjioón.
\v 2 Kjoa̱ nchi̱ná‑nò, ni̱mé chjí‑la̱, tíbiꞌndo‑né. Nikje xi kichíkjá, jye nchisíkje cho̱ kixo.
\v 3 To̱n oro‑nò ko̱ to̱n plata‑nò jyeé tímachi̱. Jè na̱chrjein kꞌe̱ nga si̱ndaàjiìn, jñà chi̱‑la̱ ko̱chjeén xi kondra̱ tsa̱jòn. Ko̱ó niꞌín ko̱kà yije yijo‑nò. Nga jñò, titsa̱bincháxkó to̱n na̱sꞌín jye tífehetꞌaà na̱chrjein.
\v 4 Jñà xi̱ta̱ chi̱ꞌnda xi kisìxá nangui‑nò, nchikjindáya nga ótsjiya chjí‑la̱ nga jñò kichona̱cha̱n‑là. Nainá xi tsꞌe̱ yije ngaꞌñó xi tjín, jyeé kiìꞌnchré‑la̱ koni sꞌín nchikjindáya.
\v 5 Jñò, nga i̱ titsa̱jnaà i̱tꞌaà nangui, ndaà titsa̱jnaà nga ni̱mé chija‑nò, ꞌbì‑la kjo̱tsja yijo‑nò. Titsa̱nìsiín‑là ini̱ma̱‑nò nga ꞌbì‑là kjo̱tsja xi síjé kꞌoa̱á ngaya‑la̱ koni cho̱ xi mìkiì tíjiìn‑la̱ tsà jye ijchò na̱chrjein‑la̱ nga ki̱yá.
\v 6 Jñò, tsohònè‑là jé koa̱ kinìkꞌeèn jñà xi xi̱ta̱ kixi̱ xi mì jé tjín‑la̱. Jñà xi̱ta̱ koi, mì kì komà tsasìko̱ yijo‑la̱.
\s Mé kjoa̱ xi sꞌe̱én nga titsa̱chiñá‑lá nga kjoi̱í ìjngoò kꞌa Cristo
\p
\v 7 Jñò ndí ꞌndsè, chíñakjoa̱a kóni skanda kꞌe̱ nga kjoi̱í ìjngoò kꞌa Na̱ꞌèn‑ná. Kꞌoa̱sꞌín chíña koni sꞌín xi̱ta̱ xi síxáko̱ nangui nga koñakjoa̱‑la̱ jè jtsí xi ꞌba ítjòn ko̱ xi i̱skan ꞌba nga síxáko̱ jñà tsojmì tjè mé‑ne nga ko̱ma koi̱ìxkó‑ne tsojmì tjè‑la̱ xi majchá nga ꞌñó chjí‑la̱.
\v 8 Jñò, kꞌoa̱á ti̱sꞌín chíñakjoa̱a, ꞌñó tꞌè‑là takòn nga jyeé nchrobá machrañà nga kjoi̱í ìjngoò kꞌa Na̱ꞌèn‑ná.
\v 9 Ndí ꞌndsè, kì xki̱ xi ján tsajétꞌaà‑là xinguio̱o, mé‑ne nga mì kjo̱ꞌin si̱nè‑nò. Nga̱ jè Na̱ꞌèn‑ná jyeé tíjnandaà nga kjoi̱í mé‑ne koi̱ìndaàjiìn‑la̱ xi̱ta̱.
\p
\v 10 Ndí ꞌndsè, jñò, kꞌoa̱á sꞌín tꞌe̱en koni sꞌín kisꞌiìn jñà xi̱ta̱ xi kiìchja̱ ngajo‑la̱ Nainá nga kichìkjoa̱ko̱‑la̱ nga kisìkjeiín kjo̱ꞌin koií kjoa̱‑la̱ nga ꞌén‑la̱ Nainá kiìchja̱ya.
\v 11 Kꞌoa̱á sꞌín ꞌya‑la̱ nga jñà xi̱ta̱ xi chíkjoa̱ko̱‑la̱ kjo̱ꞌin, sꞌe̱é‑la̱ kjo̱ndaà. Jyeé tíjiìn‑nò nga jè Job kꞌoa̱á ti̱sꞌín kichìkjoa̱ko̱‑la̱ kjo̱ꞌin. Ko̱ jyeé ꞌyaà mé xi kitsjaà‑la̱ Na̱ꞌèn‑ná kꞌe̱ nga jyehetꞌaà‑ne kjoa̱. Na̱ꞌèn‑ná ꞌñó ndaà xi̱ta̱, tjín‑la̱ kjo̱hi̱ma̱takòn.
\p
\v 12 Jñò ndí ꞌndsè, kꞌe̱ nga ꞌbioò ꞌén‑nò, kì yá xi nìkítsa̱jna ítjòn. Kì jè ngajmiì ko̱ nangui, o xi kjꞌei̱í tsojmì nìkjeén. Tà kꞌoa̱á sꞌín tixón: “Jon”, o xi “Majìn”, mé‑ne nga mì kjo̱ꞌin si̱nè‑nò tsà mìkiì ki̱tasòn.
\s Kjoa̱ bìtsiꞌba
\p
\v 13 Tsà tjín iꞌnga xi̱ta̱ xinguio̱o xi ba tjín‑la̱, kàtítsiꞌba‑la̱ Nainá. Tsà tjín iꞌnga xi tsja tjín‑la̱, kàtaseè‑la̱ Nainá nga jeya kàtasíkíjna.
\v 14 Tsà tjín iꞌnga xi̱ta̱ xinguio̱o xi xkꞌén, kàtakinìkjaá xi̱ta̱ jchínga xi tjín‑la̱ xá ya̱ i̱jiìn na̱xa̱ndá‑la̱ Cristo mé‑ne nga katítsiꞌbatjì‑ne ko̱ i̱tꞌaà tsꞌe̱ ngaꞌñó‑la̱ Na̱ꞌèn‑ná kàtasíkájno‑la̱ asìti̱.
\v 15 Kꞌe̱ nga bìtsiꞌbatjiò xi̱ta̱, tsà ndaà mokjeiín‑nò, jè xi̱ta̱ xi xkꞌén ko̱ndaà‑ne. Jè Na̱ꞌèn‑ná si̱ìndaà‑ne nga ko̱ma ko̱sítje̱n‑ne. Tsà jé tjín‑la̱ jcha̱tꞌaà‑la̱ jé‑la̱.
\v 16 Chja̱hatakòn‑là xi̱ta̱ xinguio̱o jé‑nò. Ti̱koa̱ titsiꞌbatjiò xinguio̱o mé‑ne nga ko̱ndaà‑nò. Kꞌe̱ nga jngoò xi̱ta̱ kixi̱ bítsiꞌba, tjín‑la̱ ngaꞌñó nga ki̱tasòn.
\v 17 Jè xi̱ta̱ xi kiìchja̱ ngajo‑la̱ Nainá xi kiꞌmì Elías, kꞌoa̱á ti̱sꞌín xi̱ta̱ koni jñá. ꞌÑó kisìjétꞌaà‑la̱ Nainá nga mì ti̱ jtsí kꞌoa̱‑ne; ko̱ ján nó osen mì ti̱ kiì tsꞌa‑ne jtsí.
\v 18 Ìjngoò kꞌa tsibítsiꞌba‑la̱ Nainá nga kàtꞌa jtsí. Tsꞌaá ìjngoò kꞌa‑ne jtsí ko̱ jè nangui kòjchá tsojmì tjè.
\p
\v 19 Ndí ꞌndsè, tsà tjín iꞌnga xinguio̱o xi chinchatꞌaàxìn‑la̱ xi kjoa̱ kixi̱, koa̱ tsà jngoò xi̱ta̱ ki̱chja̱‑la̱ nga kàtjanchrobátꞌaà ìjngoò kꞌa‑la̱ Nainá,
\v 20 jè xi̱ta̱ xi ki̱chja̱‑la̱ nga ke̱èno̱jmí‑la̱ nga chꞌo tjín ndi̱yá xi tsóꞌbaya, kꞌoa̱sꞌín kàtasijiìn‑nò nga jngoò xi̱ta̱ tíhochrjekàjiìn kjo̱ꞌin xi tsꞌe̱ kjoa̱biyaà. ꞌÑó kjìn jé jcha̱tꞌaà‑la̱.