\id 1PE
\h 1 Pedro
\toc1 1 Pedro
\mt Xa̱jo̱n ra tsikínda ítjòn jè Pedro
\c 1
\s ꞌÉn ra bíꞌtsia̱‑ni Pedro
\p
\v 1 ꞌA̱n Pedro, ra jè Jesucristo tsikíxáya‑na, tísixóꞌtà‑no ngaꞌtsì‑no ra jndíi̱ ra ján xìn titsa̱jna‑la na̱xi̱ndá‑no nga ya̱ titsa̱jnajion ya̱ nangi Ponto, Galacia, Capadocia, Asia ko̱ Bitinia,
\v 2 jiòn ra xá ko̱ꞌsín ti̱ꞌsa̱ kjotseé‑ni nga tsjahíjin‑no Nainá ra Na̱ꞌìn ꞌmì‑lá koni ꞌsín ta̱ꞌkoa̱ ijye tjíjin‑la̱; ko̱ ngi ko̱ó Inìma̱ Tsje‑la̱ kisìtsje‑no nga xi̱ta̱ tsje‑la̱ tsò‑no, mé‑ni nga si̱itjasòn‑la Jesucristo ko̱ mé‑ni nga ko̱tsje‑ni ijo‑no ra kjoa̱ ꞌtse̱ jé‑no koni tsa jè kjòn jní‑la̱ Jesucristo xa̱ájten‑jnó jiòn ra tsikíxten ꞌkia̱ nga ꞌken. Tse kjo̱nda ko̱ tse kjo̱ꞌnchán katasakó-isa‑la̱ inìma̱‑no.
\s Kjoa̱ ra ꞌsie̱én nga chiñá‑lá Nainá
\p
\v 3 ꞌNga katijna Nainá ra Na̱ꞌìn‑la̱ ma Jesucristo ra tíjna ítjòn‑ná, nga̱ tseé kjo̱hi̱ma̱takòn kiꞌse‑la̱ ra a̱ꞌta tsa̱jién: koni ꞌsín nga jaáya‑la̱ Jesucristo ra a̱ꞌta ꞌtse̱ kjo̱biya, ꞌkoa̱á ti̱ꞌsín jngo kjo̱binachon xi̱tse̱ kitsjà india‑ná mé‑ni nga ni̱jngo ni̱chjin kje̱heꞌtà kjoa̱ ra chiñá‑lá,
\v 4 nga tjábé‑ná kjo̱tjò ra tíjnatjò‑la̱ Nainá ya̱ ján ngajmi, kjo̱tjò ra mì kì fitson‑ni ta kjiá‑nioo̱, ko̱ ra ni̱kjiá matjé ko̱ ra ni̱kjiá chija koni ꞌsín nga ꞌki.
\v 5 Ta nga̱tjì‑la̱ nga ya̱ makjiín‑najiòn ra a̱ꞌta ꞌtse̱ Nainá, ngi ko̱ó jè ngaꞌñó‑la̱ nga tísíkonda̱‑najiòn mé‑ni nga ma kijchotji̱ngi‑la jè kjo̱nda‑la̱, nga ma kítjo̱kajion kjo̱hiꞌin ra kjoa̱ ꞌtse̱ jé‑no, koni ꞌsín ijye tjínda‑la̱ ra jè; ko̱ ꞌkia̱á jcha̱‑la̱ kjoa̱ kìi̱ ꞌkia̱ nga ijye ko̱chraña ni̱chjin nga kje̱heꞌtà i̱sàꞌnde.
\p
\v 6 Jñá kjoa̱ kìi̱ ra ꞌñó tsja ꞌbé‑la̱ inìma̱‑najiòn, ni̱ꞌsín skanda ꞌndi̱ ꞌndi̱, kjín ndi̱yá‑la̱ kóꞌsín nga i̱nchichjíꞌta‑najiòn nga i̱nchibatojin chiba ni̱chjin jiòn kjo̱hiꞌin.
\v 7 Jè kjoa̱ makjiín‑najiòn, ꞌkoa̱á ꞌsín ngoya‑la̱ koni tsa ki̱cha̱ sinè, tjíné‑la̱ nga niꞌí tjáꞌta‑ni mé‑ni nga jcha̱‑la̱ kóꞌki chjí‑la̱. Tsa chíkjoa̱‑la̱ ni̱ꞌsín ta mé kjoa̱ ra ko̱tojin, isa̱á ta ꞌñó chjí‑la̱ koni tsa jè ki̱cha̱ sinè ra bijchó ni̱chjin‑la̱ nga fe. ꞌKoa̱á ꞌsín tjín, ꞌkia̱ nga ijye tjáꞌta kjoa̱ ra makjiín‑najiòn, machjeén‑la̱ nga nda ki̱tjongi, nga jeya kíjna, ko̱ nga jcha̱xkón ꞌkia̱ nga kjꞌi̱í india‑ni Jesucristo.
\p
\v 8 Ni̱ꞌsín kjè kì ꞌyaxkon jiòn jè Jesucristo, tanga tsjachaá‑nájiòn; ko̱ ni̱ꞌsín takó kjè kì tsa i̱nchiꞌya jiòn, tanga makjiín‑najiòn ra a̱ꞌta ꞌtse̱ ko̱ ꞌñó matsja‑najiòn nga tjín jngo‑no kjo̱tsja ra ꞌñó jeya tjín, nga skanda tsín‑no ꞌén kóꞌsín nga kixó jiòn ra a̱ꞌta ꞌtse̱ kjo̱tsja ra tjín‑no.
\v 9 Nga̱ ijyeé títjábé‑no jè kjo̱nda ra ꞌtse̱ kjoa̱ makjiín‑no; ko̱ jè kjo̱nda ra̱kìi̱, jé‑ni nga i̱nchibítjo̱kàjion kjo̱hiꞌin ꞌtse̱ jé‑no.
\p
\v 10 Jñà xi̱ta̱ ra isìchjeén Nainá nga kiìchja̱ ngajo‑la̱, ra tje̱n tsiꞌkéna̱jmí a̱ꞌta ꞌtse̱ jè kjo̱nda ra Nainá tsjá kjo̱tjò‑najiòn, iskotaꞌyáko̱‑ní ko̱ ti̱ꞌkoa̱á tsakátsjiya‑ní a̱ꞌta ꞌtse̱ kjo̱nda kìi̱ nga ma kítjo̱kajieén kjo̱hiꞌin.
\v 11 Jñà xi̱ta̱ kìi̱ mejèn‑la̱ nga nda ske̱, mé ni̱chjin‑ni ko̱ka̱ma ko̱ kóꞌsín ko̱ma‑la̱ kjoa̱ kìi̱ koni ꞌsín nga ijye i̱nchisíchi̱ya‑la̱ jè Inìma̱ Tsje‑la̱ Cristo ra tíjnajin ya̱ inìma̱‑la̱, nga̱ tje̱n isìchi̱yaá‑la̱ a̱ꞌta ꞌtse̱ kjo̱hiꞌin ra tjínè‑la̱ nga ko̱tojin jè Cristo, ko̱ kóꞌki kjoa̱jeya ꞌse̱‑la̱ a̱skan‑nioo̱.
\v 12 Jñà xi̱ta̱ kìi̱, kisìchi̱ya tsijen‑la̱ Nainá nga mì tsa kjo̱nda ꞌtse̱‑jìn nga ko̱ꞌsín tsiꞌkéna̱jmí; kjo̱nda tsa̱jión‑nájiòn. Ko̱ jñà ꞌén ra tsiꞌkéna̱jmí, ti̱jñá‑ni ꞌén xi̱tse̱ ra nda tsò a̱ꞌta ꞌtse̱ Cristo ra tíꞌsena̱jmí‑no skanda jè ni̱chjin ꞌndi̱. Nga̱ ti̱jé‑ni Inìma̱ Tsje‑la̱ Nainá ra ngajmi nchrabá‑ni tsjá‑la̱ ngaꞌñó xi̱ta̱ ra ꞌbéna̱jmí. Jñà kjoa̱ kìi̱ skanda jñà ìkja̱li̱, mejèn‑la̱ nga ske̱‑te.
\v 13 ꞌKoa̱á ma‑ni nga nda kjón‑ní ti̱kítsa̱jnanda kjo̱bítsjen‑no ko̱ chijmi kjón ti̱tsa̱jna. Ta jé nda jchíña‑la jè kjo̱nda ra jè tjábé kjo̱tjò‑no ꞌkia̱ nga kjꞌi̱í india‑ni jè Jesucristo.
\s Kóꞌsín machjeén nga tsje si̱jché ijo‑ná
\p
\v 14 Ko̱ꞌsín ꞌtia̱àn koni tsa jñà i̱xti ra nda ma‑la̱ síhitjasòn; kì ti̱ tsja ya̱ bìtsa̱jin‑no koni ꞌsín tjín kjoa̱ꞌcho ra kisíjé ijo‑no ꞌkia̱ nga ti̱kje ꞌyaxkon Nainá.
\v 15 ꞌKoa̱á ꞌsín tsje tahíko̱o kjo̱binachon‑no nga ta mé ra ꞌsia̱an, koni ꞌsín nga tsje jè Nainá ra xá kiìchja̱‑no.
\v 16 Nga̱ jè xa̱jo̱n ra tjíꞌta ꞌén‑la̱ Nainá, ꞌkoa̱á ꞌsín tíchja̱ nga tsò: “Xi̱ta̱ tsjeé katama jiòn nga̱ Xi̱ta̱ Tsjeé‑ná ra ꞌa̱n.”
\p
\v 17 Jè Nainá ra ngásòn ngáya ko̱ꞌsín bíndajín‑la̱ jé‑la̱ xi̱ta̱ koni ꞌsín tjín kjoa̱ ra ꞌsín nga jngó jngó xi̱ta̱, tsa Na̱ꞌìn ꞌmì‑la jiòn ꞌkia̱ nga nakjoáꞌta‑la, machjeén‑ní nga ti̱skón‑cha ra jè ngaꞌtsì ni̱chjin ra ki̱tsa̱kon i̱ a̱ꞌta nangi ñánda̱ nga mì tsa i̱ i̱ꞌnde‑no.
\v 18 Nga̱ ꞌya‑nájiòn nga mì tsa jñà tsajmì ra fitson kjóchjítjì‑najiòn nga ma titsa̱jnandio̱ó kjoa̱ꞌcho ra tsikitsa̱jnajin jiòn nga ti̱ꞌsa̱ kjotseé ra jñà xi̱ta̱ jchínga‑no tsakón‑ya‑no. Mì tsa to̱n sinè ko̱ mì tsa to̱n chroba kjóchjítjì‑najiòn.
\v 19 Nga ko̱ sabá jè jní ra tsikíxten Cristo, jè jní ra ꞌñó chjí‑la̱, jè kjóchjítjì‑nájiòn mé‑ni nga ma titsa̱jnandi̱í‑no. Jè jní‑la̱ Cristo, ꞌkoa̱á ꞌsín jngoya‑la̱ koni tsa jè jní‑la̱ jngo ndí forrè iꞌndí ra ꞌñó nda ꞌki ra ni̱mé ꞌchin tjín‑la̱.
\v 20 Nga̱ jè Cristo, xá ꞌkoa̱á ꞌsín itjonè‑la̱ nga ko̱ꞌsín ko̱ka̱maꞌtin skanda ti̱ꞌkia̱‑ni nga ti̱kjè sinda i̱sàꞌnde, tanga skanda ꞌndi̱í tíꞌya‑la̱ nga ko̱ꞌsín kjomà ra kjo̱nda tsa̱jiòn.
\v 21 Ko̱ a̱ꞌta ꞌtse̱ Cristo‑ní nga makjiín‑najiòn ra a̱ꞌta ꞌtse̱ Nainá, jè Cristo ra jè Nainá isikjaáya‑ila̱ ko̱ ti̱ꞌkoa̱á jeya isíkíjna. ꞌKoa̱á ma‑ni nga makjiín‑nájiòn a̱ꞌta ꞌtse̱ Nainá ko̱ i̱nchichiñá‑la jiòn nga tsjá‑no kjo̱nda koni ꞌsín nga ijye kitsjà ꞌén‑la̱.
\p
\v 22 Jè inìma̱‑najiòn ijyeé kjotsje, ta nga̱tjì‑la̱ nga i̱nchinitjasòn jiòn koni ꞌsín tjín ꞌén kixi̱‑la̱ Nainá, mé‑ni nga mì ta jò tjín‑ni takòn nga tsjacha ꞌsio̱on xàngio̱o. Ko̱ꞌsín ngi ko̱ inìma̱‑no nga ꞌñó tsjacha ꞌtia̱àn xàngio̱o nga jngó jngó‑no.
\v 23 Nga̱ ijyeé kitsin xi̱tse̱ india‑najiòn, tanga mì tsa a̱ꞌta ꞌtse̱ tje̱‑la̱ xi̱ta̱ ra feheꞌta ni̱chjin‑la̱ nga kitsin xi̱tse̱ india‑najiòn; a̱ꞌta ꞌtse̱é ꞌén‑la̱ Nainá ra tíjnakon ko̱ ra tíjna skanda ta mé ni̱chjin‑ni.
\v 24 Nga̱ ꞌkoa̱á ꞌsín tíchja̱ jè xa̱jo̱n ra tjíꞌta ꞌén‑la̱ Nainá, nga tsò:
\q Ngaꞌtsì jñà xi̱ta̱,
\q ꞌkoa̱á ꞌsín jngoya‑la̱ koni tsa xka̱ ijñá.
\q Ko̱ jè kjoa̱ nga jeya síkítsa̱jna ijo‑la̱,
\q ꞌkoa̱á jngoya‑la̱ koni tsa jè naxó‑la̱ xka̱ ijñá.
\q Jñà xka̱ ijñá, xì‑ní ko̱ jñà naxó‑la̱ katsangi‑ní;
\q
\v 25 tanga jè ꞌén‑la̱ Na̱ꞌín‑ná tíjna kiꞌtá‑ní skanda ta mé ni̱chjin‑nioo̱.
\m Ko̱ jè ꞌén ra̱kìi̱, jè‑ní jè ꞌén xi̱tse̱ ra nda tsò ra a̱ꞌta ꞌtse̱ Cristo ra ko̱ꞌsín ijye kiꞌsena̱jmíya‑najiòn.
\c 2
\s Na̱xi̱ndá xi̱tse̱‑la̱ Nainá
\p
\v 1 Kií machjeén‑ni nga ti̱kítsa̱jna ijye jiòn ngaꞌtsì kjoa̱ ra ꞌcho tjín, ngaꞌtsì ra ꞌmì kjoa̱ konda̱cha̱, kjoa̱ ra jò i̱sén tjín, ko̱ kjoa̱xìtakòn, ko̱ ngaꞌtsì ꞌén ꞌcho ra nakjoájno‑lá xàngie̱é.
\v 2 Ko̱ꞌsín ꞌtia̱àn jiòn koni ꞌsín ꞌsín jñà ndí i̱xti‑xó ꞌkia̱ nga ti̱ꞌsa̱ tsin; jè ꞌñó tjatsji jiòn ra ngi ta jè ꞌén‑la̱ Nainá, koni ngoya‑la̱ jñà ndí i̱xti‑xó, ꞌkia̱ nga ti̱ꞌsa̱ tsin, ngi ta tsjín bátsji. Tsa ko̱ꞌsín ꞌsia̱an jiòn, jè ko̱si̱ko̱‑no nga nda ko̱jchá jiòn ra a̱ꞌta ꞌtse̱ Nainá koni ꞌsín títsjá‑no kjo̱nda nga kítjo̱kajion kjo̱hiꞌin ra kjoa̱ ꞌtse̱ jé‑no.
\v 3 Nga̱ ijyeé i̱nchichjíꞌta‑najiòn nga jè Na̱ꞌín‑ná batoó nda xi̱ta̱.
\s Jè Na̱jo̱ ra tíjnakon
\p
\v 4 Ti̱chrañaꞌta‑la jè Jesucristo ra ꞌkoa̱á ngoya‑la̱ koni jngo na̱jo̱ ra tíjnakon; jè na̱jo̱ ra jñà xi̱ta̱ i̱sàꞌnde tsachrjengi; tanga ra a̱ꞌta ꞌtse̱ Nainá, xá itjahíjiín‑ni jè na̱jo̱ ra̱kìi̱, ko̱ batoó ꞌñó chjí‑la̱.
\v 5 Tsa si̱chrañaꞌta‑la jiòn, ꞌkoa̱á ti̱ꞌsín ka̱ma jiòn koni na̱jo̱ ra tjítsa̱kon; ko̱ jiòn ka̱ma jiòn na̱jo̱‑la̱ niꞌya tsje‑la̱, mé‑ni nga ya̱ si̱xá‑nájiòn koni na̱ꞌmì tsje‑la̱ Nainá nga a̱ꞌta ꞌtse̱ Jesucristo ꞌki̱‑la kjo̱tjò ra si̱ìtsjako̱ Nainá, jñà kjo̱tjò ra nda sasén‑la̱ ra jè.
\v 6 ꞌKoa̱á ma‑ni nga ko̱ꞌsín tíchja̱‑te jè xa̱jo̱n ra tjíꞌta ꞌén‑la̱ Nainá, nga tsò:
\q Jngo na̱jo̱ sìkíjnaa̱ ya̱ a̱jin na̱xi̱ndá‑la̱ Nainá ra tíjna sònꞌnga ya̱ nindo Sión,
\q jngo na̱jo̱ ra tíjna títjòn nga bíꞌñóya ya̱ nga chrja̱ngi̱‑la̱ niꞌya,
\q ra xá itjahájin‑ni ko̱ ra ꞌñó chjí‑la̱.
\q Jè ra ko̱kjiín‑la̱ a̱ꞌta ꞌtse̱ na̱jo̱ ra̱kìi̱, mì kì tsa kjo̱sabà ska̱jin‑jìn.
\m
\v 7 Jè na̱jo̱ ra̱kìi̱ batoó ꞌñó chjí‑la̱ a̱ꞌta tsa̱jiòn ra makjiín‑no; tanga jñà xi̱ta̱ ra mì kì makjiín‑la̱, ya̱á bitjasòn koni ꞌsín tíchja̱‑te jè xa̱jo̱n ra tjíꞌta ꞌén‑la̱ Nainá, nga tsò:
\q Jè na̱jo̱ ra tsachrjengi jñà xi̱ta̱ ra bínda chrjó,
\q jè tíma‑ni na̱jo̱ ngaꞌñó ra síjna títjòn ya̱ nga chrja̱ngi̱‑la̱ niꞌya.
\m
\v 8 Ko̱ ꞌkoa̱á ti̱ tsò‑te:
\q Jngo na̱jo̱ ra saténgie̱é, ko̱ ra síkàtje̱n‑ná.
\m Nga̱ jñà xi̱ta̱ ya̱á saténgi, ꞌkia̱ nga mì ma‑la̱ síhitjasòn koni ꞌsín nga tsò ꞌén ra ꞌsena̱jmíya‑la̱; ko̱ ꞌkoa̱á ꞌsín maꞌtin koni ꞌsín nga tjínè‑la̱ nga ka̱maꞌtin.
\s Yá kjòn‑ni jè na̱xi̱ndá‑la̱ Nainá
\p
\v 9 Tanga ra jiòn, jè tje̱‑najiòn, xá ꞌkoa̱á ꞌsín itjahájin‑ni. Jiòn ma jiòn na̱ꞌmì ra síxáꞌta‑la̱ Cristo ra Xi̱ta̱ Ítjòn tíjna. Na̱xi̱ndá tsje‑la̱ Nainá‑nájiòn, jngo na̱xi̱ndá ra jè Nainá kjomejèn‑la̱ nga ꞌtse̱ ki̱tso̱‑la̱. Kií ko̱ꞌsín kiꞌsìn‑ni Nainá mé‑ni nga jiòn ꞌkéna̱jmíya‑najiòn kjoa̱ ra ꞌñó nda tjín a̱ꞌta ꞌtse̱ jè ra tsachrjekàjin‑najiòn ya̱ kjoa̱ jñò ra titsa̱jnajin jiòn tsiki mé‑ni nga ma itjàha̱ꞌse̱n‑jin jiòn ya̱ ñánda̱ tíjna niꞌí‑la̱ ra ꞌñó nda síhisen‑ná.
\v 10 Nga ti̱ꞌsa̱ kjotseé skanda mí tsa xi̱ta̱ na̱xi̱ndá ꞌmì‑najiòn, tanga ꞌndi̱ ꞌndi̱ ijyeé na̱xi̱ndá‑la̱ Nainá ma jiòn. Nga ti̱ꞌsa̱ kjotseé mì kì mahi̱ma̱ke‑najiòn jè Nainá, tanga ꞌndi̱ ꞌndi̱, ijyeé mahi̱ma̱keé‑najiòn jè Nainá.
\s Ko̱ꞌsín si̱jché ijo‑ná koni nga chi̱ꞌnda‑la̱ Nainá ꞌmì‑ná
\p
\v 11 Jiòn ndí ꞌndsé ra ꞌñó matsjacha‑no, ꞌkoa̱á ꞌsín tíbitsáꞌba‑no koni tsa jñà xi̱ta̱ ra mì tsa ya̱ i̱ꞌnde‑la̱ ra ta jngohíjta títsa̱jna ya̱ i̱sàꞌnde ra̱kìi̱, ꞌtia̱àn kjo̱nda, kì ya̱ ꞌchaájioòn jñà kjoa̱ꞌcho ra faajin‑la̱ ijo‑ná ra kjaán‑ko̱ kiꞌta‑ná nga mejèn‑la̱ si̱ìkijne‑ná.
\v 12 Nda kjòn ti̱jchá ijo‑no ya̱ a̱jin‑la̱ xi̱ta̱ ra mì kì makjiín‑la̱ a̱ꞌta ꞌtse̱ Cristo, ni̱ꞌsín ko̱ꞌsín katachja̱jno‑najiòn koni tsa xi̱ta̱ ꞌcho kjòn jiòn. Tanga jè ni̱chjin ꞌkia̱ nga kjꞌi̱í india‑ni Cristo, jñà xi̱ta̱ kìi̱, jeyaá si̱ìkíjna‑ni Nainá ꞌkia̱ nga ske̱ nga ndaá tjín jñà kjoa̱ ra ꞌnià jiòn.
\s Jcha̱xkén jñà ra xi̱ta̱xá
\p
\v 13 Ta nga̱tjì‑la̱ nga mì yá ra ki̱chja̱jno‑la̱ Na̱ꞌín‑ná, nda ti̱hitjasòn‑la jñà xi̱ta̱xá ni̱ꞌsín ta ñáa̱ xá ra tjín‑la̱ i̱ a̱ꞌta nangi, koni jè xi̱ta̱xá ítjòn ra ꞌnga xá tjín‑la̱,
\v 14 ko̱ jñà xi̱ta̱ ra i̱nchibatéxoma‑la̱ nga jngó jngó na̱xi̱ndá iꞌi nga jñà, xá ꞌkoa̱á ꞌsín isìkasén‑ni jè xi̱ta̱xá ítjòn nga tsjá‑la̱ kjo̱hiꞌin xi̱ta̱ ra ꞌcho ꞌsín ko̱ nga nda si̱ìkítsa̱jna jñà xi̱ta̱ ra nda ꞌsín.
\v 15 Nga̱ jè ra mejèn‑la̱ Nainá nga nda ꞌtia̱àn jiòn, mé‑ni nga katasichjàꞌa‑ni jñà xi̱ta̱ ra mì kì machi̱ya‑la̱ ra mì kì be mé ꞌén ra chja̱.
\p
\v 16 ꞌKoa̱á ꞌsín ꞌtia̱àn jiòn, koni jñà xi̱ta̱ ra títsa̱jnandi̱í; tanga kì ta ki‑ni nga titsa̱jnandi̱í jiòn nga jñà ko̱ꞌsia̱an kjoa̱ ra ꞌcho tjióo̱n. ꞌKoa̱á ꞌsín nda ꞌtia̱àn jiòn koni ꞌsín nga chi̱ꞌnda‑la̱ Nainá ꞌmì‑no.
\v 17 Nda jcha̱xkón ijye ngaꞌtsì xi̱ta̱. Tsjacha ꞌtia̱àn jñà ra ꞌndsè chibà. Ti̱skón‑cha jè Nainá. Ko̱ nda jcha̱xkón jè ra xi̱ta̱xá ítjòn tíjna.
\s Kjoa̱ ra tjínè‑la̱ nga si̱hitjasòn jñà ra chi̱ꞌnda ꞌmì
\p
\v 18 Jiòn ra xi̱ta̱ chi̱ꞌnda ꞌmì‑no, nda jcha̱xkón ko̱ nda ti̱hitjasòn‑la xi̱ta̱ ra níxáꞌta‑la. Mì tsa ta jñà ra nda síko̱‑no ko̱ ra nda betjò‑no; ꞌkoa̱á ti̱ꞌsín nda ti̱hitjasòn‑la jñà ra ꞌñó beton‑te‑no.
\v 19 Nga̱ ndaá baxki̱ ya̱ ngixko̱n Nainá jñà xi̱ta̱ ra síkjiín kjo̱hiꞌin ra mì kì bakèn‑la̱ ko̱ chíkjoa̱ko̱ó‑la̱ kjo̱hiꞌin ki, ta nga̱tjì‑la̱ nga̱ fìyaá‑la̱ mé ra mejèn‑la̱ Nainá.
\v 20 Ni̱ ta yá ra nda ske̱xkón‑najiòn tsa ta kií nga̱tjì‑la̱ nga ꞌcho i̱nchiꞌnià nga ko̱tjín kjo̱hiꞌin tsjá‑no xi̱ta̱. Tanga tsa nda i̱nchiꞌnià jiòn ko̱ chíkjoa̱ko̱‑no kjo̱hiꞌin ra tsjá‑no xi̱ta̱, sakó‑no kjoa̱nda ya̱ ngixko̱n Nainá.
\v 21 Nga̱ kií xá ko̱ꞌsín kiìchja̱‑no Nainá, nga jè Cristo, ꞌkoa̱á ti̱ꞌsín isìkjiín kjo̱hiꞌin ra ta nga̱tjì tsa̱jiòn, ko̱ jngoó xkósòn tsikíjna‑najiòn mé‑ni nga ko̱ꞌsín ꞌsia̱an‑najiòn koni ꞌsín nga kiꞌsìn ra jè.
\v 22 Nga̱ jè Cristo, ni̱jngo jé tsakátsji ra jè, ko̱ ni̱jngo ꞌén ndiso kiìchja̱.
\v 23 ꞌKia̱ nga kiìchja̱jno‑la̱ jñà xi̱ta̱, mì tsa isíkáfa ngajo‑ni ra jè. Ko̱ ꞌkia̱ nga kjo̱hiꞌin kiꞌtsì‑la̱, mì tsa kitsò‑jìn, ꞌkoa̱á ti̱ꞌsín sikó ngajo‑no. Kjoa̱ ra kjomàꞌtin, tà ya̱á isìnga̱tsja jè Nainá ra ma‑la̱ nda kjòn bíndajín kóꞌsín tjín nga jngó jngó kjoa̱.
\v 24 Jè sabà Cristo ꞌtsamijìn jñà jé ra tjín‑ná, ya̱á iskanè ijye ya̱ ijo‑la̱ ya̱ a̱ꞌta krò, mé‑ni nga katiyeé ra jién ra a̱ꞌta ꞌtse̱ jé, ko̱ ya̱á si̱jchá‑jieén ijo‑ná a̱ꞌta ꞌtse̱ kjo̱binachon ra kixi̱ tjín. Kií xá kitijnó kitiꞌtá‑ni ijo‑la̱ Cristo nga itsiꞌon, mé‑ni nga ko̱nda‑ni ꞌchin ra tjín‑najiòn.
\v 25 Nga̱ ꞌkoa̱á ꞌsín kjòn jiòn nga ti̱ꞌsa̱ kjotseé koni tsa jñà ndí forrè ra ichijà. Tanga ꞌndi̱ ꞌndi̱‑ni̱ ijyeé ya̱ tsáfaꞌta‑la jiòn jè Cristo, koni jè chji̱ngo̱ ra nda tjíkinda̱‑la̱ kjo̱binachon‑no.
\c 3
\s Kjoa̱ ra tjínè‑la̱ nga ꞌsi̱in jngo chjo̱ón ko̱ jè ꞌxi̱n ra ijye títsa̱jnako̱ xákjén
\p
\v 1 ꞌKoa̱á ti̱ꞌsín tjín a̱ꞌta tsa̱jiòn‑jiòn ra íchjín ꞌmì‑no, nda jcha̱xkón ꞌxi̱n‑no nga nda ti̱hitjasòn‑la, mé‑ni nga tsa tjín iꞌka ra mì kì makjiín‑la̱ jè ꞌén‑la̱ Cristo, chaán ta ya̱ ko̱chi̱ya‑la̱ ꞌkia̱ nga ske̱ kóꞌsín i̱nchiníjchá ijo‑no, ni̱ꞌsín mì tsa jiòn ko̱ꞌkín‑la; nga ko̱kjiín‑te‑la̱
\v 2 ꞌkia̱ nga ske̱‑no nga tsje i̱nchiníjchá ijo‑no ko̱ tjíjin ya̱ inìma̱‑no kjoa̱skon‑la̱ Nainá.
\v 3 Ko̱ kì ta ya̱ a̱sònꞌnga‑la̱ ijo‑no ko̱ ꞌsín ta nda bínda bíchji̱neè nga ꞌñó nda ꞌbè tsja̱skò ko̱ bingioò ndáto̱n ra ngi ki̱cha̱ sinè, ko̱ tsjaya jchꞌó ra ꞌñó chjí‑la̱.
\v 4 Jé ra machjeén nga ya̱á katabitjo‑ni ya̱ inìma̱‑najiòn, ra nda katasíkatsíjen‑no. Jñá kjo̱nda ki ra mì kì kje̱heꞌtà, tsa jè inìma̱‑najiòn indakjoa̱ tíjna ko̱ tjíjin kiꞌta kjo̱ꞌnchán. Tsa ko̱ꞌsín tíjna inìma̱‑najiòn, jé ra ꞌñó chjí‑la̱ ya̱ ngixko̱n Nainá.
\v 5 Nga̱ jñá kjoa̱ kìi̱ ra nda kisìkatsíjen‑ni ijo‑la̱ jñà íchjín tsje ra nda tsakáꞌta ikon Nainá nga ti̱ꞌsa̱ kjotseé ko̱ kijtsexkón ꞌxi̱n‑la̱ nga nda isìhitjasòn‑la̱.
\v 6 Koni jè Sara ꞌkoa̱á ꞌsín nda isìhitjasòn‑la̱ jè Abraham nga ꞌkoa̱á ꞌsín kijtsexkón nga jè tíjna ítjòn‑la̱. Tsa ko̱ꞌsín nda si̱jchá ijo‑no, tsa mì kì ki̱skón‑la ni̱ꞌsín ta yá ra ki̱ncháxkón‑no, ꞌkoa̱á ꞌsín i̱nchiꞌnià jiòn koni tsa i̱xti‑la̱ Sara ma jiòn.
\p
\v 7 Ko̱ jiòn ra ꞌxi̱n ꞌmì‑no nda kjón‑ní ti̱tsa̱jnako̱o jñà íchjín‑no, nga ndaá katafìya‑no nga isa̱ inda kjiꞌta‑la̱ íchjín koni jiòn‑jiòn. Nda kjón‑ní jcha̱xkón koni ꞌsín nga bakèn‑la̱, nga ꞌkoa̱á ꞌsín Nainá tsjá‑te‑la̱ kjo̱binachon koni jngo kjo̱tjò koni ꞌsín nga tjábé‑no ra jiòn. ꞌKoa̱á ꞌsín ꞌtia̱àn mé‑ni nga mì mé ra ko̱techjà‑no ꞌkia̱ nga jiòn ra ki̱nákjoa̱ꞌta‑la Nainá.
\s Kjoa̱ ra tjínè‑la̱ nga ꞌsi̱in ngaꞌtsì ra xi̱ta̱‑la̱ Nainá
\p
\v 8 Ta ngaꞌtsì kjoa̱ kìi̱, ko̱ꞌsín nda ti̱tsa̱jnajtión; jngoó inìma̱ ꞌtia̱àn kjo̱bítsjen‑no; ꞌñó tsjacha ꞌtia̱àn xàngio̱o koni tsa ꞌndsè chibà; kataꞌse‑no kjoa̱hi̱ma̱takòn; indakjoa̱ ti̱jchá ijo‑no.
\v 9 Tsa yá ra ꞌcho síko̱‑no, kì tà chjàn ko̱ꞌsín nìko̱ ngajo‑no, ko̱ tsa yá ra chja̱jno‑no kì tà chjàn nakjoájno ngajo‑la; ta isa̱á ti̱jé‑la̱ Nainá nga katatsjá‑la̱ kjo̱nda jñà xi̱ta̱, nga̱ kií xá kinakjoá‑no nga tjábé‑no kjo̱nda.
\v 10 Nga̱:
\q Jè ra mejèn‑la̱ nga ꞌse̱‑la̱ kjo̱tsja ni̱chjin ra tíjnakon,
\q nga mejèn‑la̱ nga ske̱ ni̱chjin ra nda,
\q katasíkonda̱ ndi̱je̱n‑la̱ nga mì ꞌén ra ꞌcho tsò katachja̱
\q ko̱ nga ni̱mé ꞌén ndiso katabitjo tsaꞌba.
\q
\v 11 Ti̱nchaꞌtàxìn‑la kjoa̱ ra ꞌcho tjín,
\q ko̱ jñà ꞌtia̱àn kjoa̱ ra nda tjín;
\q tjatsjio kjoa̱ ra ꞌnchán tjín ko̱ jè tangítji̱ngi‑la̱.
\q
\v 12 Nga̱ ya̱á tjíꞌta‑la̱ xko̱n Na̱ꞌín‑ná jñà ra xi̱ta̱ kixi̱;
\q ko̱ minchá‑la̱ chíká‑la̱ ꞌkia̱ nga bítsaꞌba xi̱ta̱ kìi̱;
\q tanga báꞌmaá‑la̱ i̱sén‑la̱ jñà xi̱ta̱ ra ꞌcho ꞌsín.
\p
\v 13 ¿Yá ra ma ꞌcho si̱ìko̱‑najiòn, tsa ꞌkoa̱ ꞌsín kínè kiꞌta‑la ijo‑no nga nda ꞌsia̱an?
\v 14 Tanga kì tà chjàn skon ko̱ kì tsakjón inìma̱‑no tsa ꞌkia̱ mé kjo̱hiꞌin ra ska̱jiòn ra ta ki nga̱tjì‑la̱ nga kixi̱ ꞌnià, nga kjo̱nda tsa̱jión‑nó kjoa̱ kìi̱.
\v 15 Ko̱ ꞌkoa̱á ꞌsín nda jcha̱xkón Cristo nga jè ti̱kíjna ítjòn nga katatéxoma ya̱ a̱jin inìma̱‑najiòn. ꞌKoa̱á ꞌsín nda ti̱tsa̱jnanda kiꞌta jiòn nga ꞌkéna̱jmí‑la jiòn jñà xi̱ta̱ ra sko̱nangi‑no nga mé‑ni nga ko̱ꞌsín jè Cristo kjiꞌtatákon‑no nga ko̱ꞌsín i̱nchichiñákjoa̱‑la.
\v 16 Tanga indakjoa̱ kjón‑ní nga nda ti̱nákjoa̱‑la̱ xi̱ta̱ ko̱ tsje kjón‑ní ti̱kíjna kjo̱bítsjen‑no, mé‑ni jñà ra chja̱jno‑no koni ꞌsín nga nda ꞌnià jiòn ra makjiín‑no a̱ꞌta ꞌtse̱ Cristo, ti̱jñá ꞌén‑la̱ katasísabaꞌa‑ni jñà xi̱ta̱ kìi̱.
\v 17 Isa̱á nda‑ni ni̱ꞌsín ko̱tjín kjo̱hiꞌin ska̱jieén tsa ꞌkia̱ nga nda i̱nchiꞌnié, tsa jè Nainá ko̱ꞌsín mejèn‑la̱ nga ko̱ꞌsín ko̱ma, nda mí ꞌkoa̱‑ni tsa ko̱ tjín kjo̱hiꞌin ska̱jieén ꞌkia̱ nga ꞌcho i̱nchiꞌnié.
\p
\v 18 Nga̱ skanda jè Cristo india kjón‑ní isìkjiín kjo̱hiꞌin nga ꞌken ta nga̱tjì‑la̱ jñà jé ra tjín‑ná. Jè Cristo mì tsa mé jé tsakátsji ra jè, tanga isìkjiín kjo̱hiꞌin ra ta jñà nga̱tjì‑la̱ jñà xi̱ta̱ ra ꞌcho ꞌsín, mé‑ni nga ma i̱ko̱‑ná ya̱ ñánda̱ tíjna Nainá. Kinìꞌkeén ra ijo i̱sàꞌnde‑la̱ tanga ꞌkia̱ nga jaáya‑ila̱, jngoó ijo xi̱tse̱ ꞌtse̱ Inìma̱ Tsje‑la̱ Nainá kiꞌse‑la̱.
\v 19 Ko̱ jè Inìma̱ xi̱tse̱‑la̱, kií ya̱ i̱ꞌnde ñánda̱ nga títsa̱hijyo inìma̱ ra títsa̱ꞌya nda̱yá nga kiì ꞌkéna̱jmí‑la̱ [nga isikijne‑la̱ kjo̱biya ra jè]
\v 20 jñà inìma̱‑la̱ xi̱ta̱ ra mì ma‑la̱ isìhitjasòn kjotseé, ꞌkia̱ nga jè ni̱chjin ꞌtse̱ xi̱ta̱ ra tsiꞌkìn Noé. Nga̱ jè Nainá iskoñá nda nda ꞌkia̱ nga jè Noé tíbínda jè chitso ra ꞌñó je ꞌki kiꞌsìn, ya̱ ñánda̱ nga ta chibaá xi̱ta̱ tsatojin kjo̱hiꞌin ra a̱ꞌta ꞌtse̱ jtsí xkón; ta jiín tjín‑ni xi̱ta̱ ra itjokàjin kjo̱hiꞌin nga mì kì tsa ya̱ ꞌken‑jin nandá.
\v 21 Jè nandá kìi̱, ꞌkoa̱á ꞌsín kiìchja̱‑ni nga jé‑ní ra satíndá‑ná nga ma bítjo̱kajieén kjo̱hiꞌin ꞌndi̱ ꞌndi̱. ꞌKia̱ nga satíndé, mì tsa jè ijo sònꞌnga‑ná ra matsje, jè‑ní nga níjé‑lá Nainá nga tsje kataꞌse kjo̱bítsjen‑ná, ko̱ jè Nainá bachrjekàjin‑ná kjo̱hiꞌin ta nga̱tjì‑la̱ nga ijyeé jaáya‑la̱ jè Jesucristo,
\v 22 ko̱ ya̱á kijìmijìn ya̱ ján ngajmi, nga tíjnaꞌta ya̱ nga kixi̱‑la̱ Nainá, ko̱ ya̱á i̱nchisíhitjasòn‑la̱ jñà ìkja̱li̱ ko̱ ngaꞌtsì i̱sén ni̱chjin tsje ra batéxoma ya̱ a̱jin i̱sén ko̱ ngaꞌñó ra tjín ya̱ a̱jin i̱sén.
\c 4
\s Nda si̱chjeén kjo̱nda‑la̱ Nainá ra títsjá kjo̱tjò‑ná
\p
\v 1 Koni ꞌsín nga isìkjiín kjo̱hiꞌin ijo‑la̱ Cristo, machjeén‑te nga ꞌkoa̱ ti̱ꞌsín titsa̱jnanda jiòn nga si̱kjioón mé kjo̱hiꞌin ra ska̱jiòn. Nga̱ jè ra ijye isìkjiín kjo̱hiꞌin ijo‑la̱, ijyeé isikijne‑la̱ kjoa̱ ꞌtse̱ jé.
\v 2 Ko̱ kií ko̱ꞌsín machjeén‑ni nga ko̱ꞌsín ti̱jchá ijo‑no jñà ni̱chjin ra kitsa̱jna‑isa koni ꞌsín nga Nainá mejèn‑la̱, ko̱ mì tsa ti̱ ko̱ꞌsín ꞌsia̱an‑no koni ꞌsín tjín kjoa̱ ra sasén‑la̱ ijo jé‑no.
\v 3 Ijyeé inìkato‑jiòn chi̱ba̱‑la̱ nga ko̱ꞌsín ta ꞌcho kiꞌnià koni xi̱ta̱ ra mì bexkon Nainá. Nga̱ ya̱á tsikìtsa̱jnajion kjoa̱ꞌcho ra ya̱ itsabáꞌñó ijo‑no, ko̱ jè tsakjàtsji jiòn kjoa̱ꞌcho ra sasén‑la̱ ijo‑no, ko̱ kjoa̱ꞌchi̱, ko̱ ꞌsí ra ꞌñó ꞌcho tjín, ko̱ ñánda̱ nga inìkato‑nájiòn chi̱ba̱‑la̱ ꞌkia̱ nga ta xán kiꞌyò kiꞌta, ko̱ ti̱ꞌkoa̱á kijchaxkón jiòn nainá xkósòn ra jtike Na̱ꞌín‑ná.
\v 4 ꞌNdi̱ ꞌndi̱‑ni̱ jñà xi̱ta̱ kìi̱, ꞌchoó ma‑la̱ ꞌkia̱ nga mì ti̱ ya̱ fahijtako̱‑najiòn koni ꞌsín tjín kjoa̱ꞌcho ra i̱nchisíjchájin ijo‑la̱; ꞌkoa̱á ma‑ni nga ꞌcho tsò‑najiòn.
\v 5 Tanga jñà xi̱ta̱ kìi̱, ya̱á tjínè‑la̱ nga tsjá‑la̱ kinda̱ mé ni̱chjin‑nioo̱, jè Na̱ꞌín‑ná ra ijye tíjnanda nga ki̱ìndajín kjoa̱ ꞌtse̱ jé‑la̱ jñà xi̱ta̱ ra títsa̱jnakon‑isa ko̱ ra ijye ꞌken.
\v 6 ꞌKoa̱á ma‑ni, nga skanda jñà xi̱ta̱ ra ijye ꞌken, kiꞌsena̱jmíya‑la̱ jè ꞌén xi̱tse̱ ra nda tsò, mé‑ni ni̱ꞌsín jñà ijo‑la̱ tse kjo̱hiꞌin kisìkjiín, koni ꞌsín nga tsikíndajín‑la̱ xi̱ta̱ i̱sàꞌnde, tanga jñà inìma̱‑la̱ títsa̱jnakon‑ní koni ꞌsín nga jè Nainá tíjnakon.
\s Kóꞌsín ma ki̱si̱ko̱ꞌté xi̱ta̱ xàngie̱é
\p
\v 7 Tanga ijyeé tímachraña‑ní nga kje̱heꞌtà ni̱chjin‑la̱ ngaꞌtsì tsajmì ra tjín, ꞌkoa̱á ma‑ni nga machjeén‑ní nga nda kjón ꞌtè takòn ko̱ ngi ta jè tjàꞌtà takòn kiꞌta nga ti̱nákjoa̱ꞌta‑la Nainá.
\v 8 Jè kjoa̱ ra ꞌñó tíjna ítjòn, jè‑ní nga ꞌñó kataꞌse‑no kjoa̱tsjacha ra a̱ꞌta ꞌtse̱ xàngio̱o; nga̱ tsa tjín‑no kjoa̱tsjacha, maá‑no si̱jchaꞌta‑la xàngio̱o ta mé jé‑nioo̱.
\v 9 Nda ti̱sin‑la nga jngó jngó xàngio̱o ꞌkia̱ nga ya̱ ki̱jchòjkon‑no ya̱ niꞌya‑no; kì tà chjàn yá xàngio̱o ra ꞌcho chibàya‑no.
\v 10 Nga jngó jngó‑najiòn ko̱ꞌsín ꞌtiì‑la ndsa̱à xàngio̱o nga ti̱si̱ko̱ꞌta koni ꞌsín tjín kjo̱nda ra jè Nainá títsjá‑no. Ko̱ꞌsín kataꞌya‑la̱ nga ndaá i̱nchinìchjeén jiòn kóhotjín sko̱ya tjín‑ni jè kjo̱nda ra jè Nainá tsjá.
\v 11 Jè ra ko̱ꞌsín kiꞌtsì‑la̱ nga ꞌén‑la̱ Nainá ki̱chja̱ya, ko̱ꞌsín ꞌén‑la̱ Nainá katachja̱ya. Ko̱ jè ra ko̱ꞌsín kiꞌtsì‑la̱ nga ma‑la̱ ko̱si̱ko̱ꞌta xi̱ta̱, ko̱ꞌsín kataꞌsín koni ꞌki ngaꞌñó ra tsjá‑la̱ Nainá, mé‑ni ko̱ꞌsín jè Nainá jeya kíjna‑ni a̱ꞌta ꞌtse̱ Jesucristo ra ꞌtse̱ kjoa̱jeya ko̱ ngaꞌtsì ngaꞌñó ra tjín skanda ni̱ ta kjiá‑nioo̱. Ko̱ꞌsín katama.
\s Kjo̱tsja ra tjín, ni̱ꞌsín kjo̱hiꞌin ꞌse̱‑ná
\p
\v 12 Jiòn ndí ꞌndsè ra ꞌñó matsjake‑no, kì tà chjàn maxkón‑najiòn nga ko̱tjín kjo̱hiꞌin i̱nchibatojion nga i̱nchitjáꞌta. Kì tà chjàn bixó jiòn, ¿mé‑ni ko̱tjín kjo̱xkón i̱nchikajin‑ná?
\v 13 Ta isa̱á ꞌñó tsja kataꞌse‑najiòn nga ti̱ꞌkoa̱á ti̱jé‑ni kjo̱hiꞌin tíkajin jiòn koni jè kjo̱hiꞌin ra tsatojin jè Jesucristo, mé‑ni nga ti̱ꞌkoa̱á ꞌñó ꞌse̱‑la̱ kjo̱tsja jè inìma̱‑najiòn ꞌkia̱ nga ko̱tsíjen kjoa̱jeya‑la̱ Cristo.
\v 14 Mé ta̱ tsja‑najiòn tsa ꞌkia̱ yá ra chja̱jno‑no ra ta nga̱tjì‑la̱ Cristo, nga̱ jè Inìma̱ Tsje‑la̱ Nainá ra ꞌñó jeya tíjna ya̱á tíjnako̱ kiꞌta‑najiòn nga ni̱chjin nchijòn.
\v 15 Kixi̱í kjoa̱ tsa xi̱ta̱ nìꞌken, tsa chijé ꞌnià, tsa ꞌñó ꞌcho ꞌnià, ko̱ tsa ya̱ tsjajin tsjaꞌa kjoa̱ ra tjín‑la̱ xi̱ta̱, bakén‑no nga kataꞌbì‑no kjo̱hiꞌin. Ti̱kinda̱a ijo‑no nga mì ko̱tjín kjoa̱ ska̱jiòn.
\v 16 Tanga tsa ta kií kjoa̱‑la̱ nga kjo̱hiꞌin i̱nchikajin jiòn, nga xi̱ta̱‑la̱ Cristo ma jiòn, kì tà chjàn masabà‑no; ta isa̱á jeya ti̱kíjna jiòn jè Nainá nga ko̱ꞌsín ꞌyaxkon‑no.
\p
\v 17 Nga̱ ijyeé ijchó chi̱ba̱‑la̱ nga ya̱ ki̱ìꞌtsia̱‑ni Nainá nga ki̱ìndajín‑la̱ na̱xi̱ndá‑la̱. Tsa ko̱ꞌsín jién ki̱ìꞌtsia̱ko̱‑ná Nainá nga ki̱ìndajín‑ná ra na̱xi̱ndá‑la̱ tsó‑ná, kóꞌsín ko̱maꞌtin jñà ra majìn‑la̱ síhitjasòn ꞌén nda‑la̱ Nainá.
\q
\v 18 Tsa jñà ra xi̱ta̱ kixi̱, iꞌiín bitjojin‑ni kjo̱hiꞌin,
\q ¿kóꞌsín ko̱maꞌtin‑ni̱ jñà xi̱ta̱ ra mì bexkón Nainá
\q ko̱ jñà ra jé títsa̱jin?
\p
\v 19 Tsa ꞌkoa̱á ꞌsín mejèn‑la̱ Nainá nga si̱kjiín jiòn kjo̱hiꞌin, jé ti̱nga̱tsja inìma̱‑no ko̱ ti̱hitjasòn‑la, nga jé tsikínda ijye ta mé ra tjín ko̱ síhitjasòn ra jè koni ꞌsín ijye kitsjà ꞌén‑la̱.
\c 5
\s A̱ꞌta ꞌtse̱ jñà xi̱ta̱ ra títsa̱jna ítjòn‑la̱ na̱xi̱ndá‑la̱ Nainá
\p
\v 1 Mejèn‑na nga ti̱ꞌkoa̱á tsja‑la̱ ꞌén jñà xi̱ta̱ jchínga ra xá tjín‑la̱ ya̱ a̱jin‑la̱ na̱xi̱ndá‑la̱ Nainá ra nakjoá‑najiòn; koni ꞌa̱n ra xi̱ta̱ jchínga tíjna̱‑te; ko̱ ꞌa̱n ra xkoàa̱n kíjtse‑na jñà kjo̱hiꞌin ra kisìkjiín jè Cristo, ra ti̱ꞌkoa̱á ko̱ko̱‑te‑na kjoa̱jeya ra tjínè‑la̱ nga ꞌsa̱ jcha̱‑la̱.
\v 2 Ti̱kinda̱a jñà xi̱ta̱‑la̱ Nainá ra jiòn tsako̱‑no nga si̱kinda̱a; ngi inìma̱‑no katanchrabájin‑ni nga ko̱ꞌsín ꞌtia̱àn; ko̱ꞌsín ꞌtia̱àn koni ꞌsín jè Nainá mejèn‑la̱; kì tà chjàn ta kjo̱ꞌñó ꞌnià‑la ijo‑no ko̱ kì tà to̱n ma mejèn‑no nga ko̱ꞌsín ꞌnià; ngi ko̱ó kjo̱tsja‑no nga ko̱ꞌsín ꞌtia̱àn.
\v 3 Kì tà chjàn ko̱ꞌsín ꞌnià koni tsa jiòn ma ni‑la̱ jñà xi̱ta̱ ra jiòn bako̱‑no nga nikonda̱a; ta isa̱á jnchro jiòn nda ti̱ncha ítjòn‑la xi̱ta̱ nga tijna jngo‑la̱ xkósòn ra nda tjín,
\v 4 mé‑ni ꞌkia̱ nga ki̱tjojen india‑ni jè Chji̱ngo̱ Ítjòn (ra jè Cristo), tsjá‑najiòn kjoa̱jeya‑la̱ koni jngo corona ra ni̱kjiá kje̱hejno fate‑la̱.
\p
\v 5 Jiòn i̱xti ra ꞌsa̱ i̱nchiníjchá ijo‑no, ꞌkoa̱á ti̱ꞌsín nda ti̱hitjasòn kóꞌsín nga ko̱tèxoma‑no jñà xi̱ta̱ jchínga ra títsa̱jna ítjòn ya̱ na̱xi̱ndá‑la̱ Nainá. Ko̱ ngaꞌtsì‑no, indakjoa̱ tjahíko̱o kañá xàngio̱o, nga̱:
\q Jè Nainá kondra̱á tíjna‑la̱ jñà xi̱ta̱ ra ꞌnga ikon,
\q tanga tseé kjo̱nda tsjá‑la̱ jñà xi̱ta̱ ra indakjoa̱.
\m
\v 6 Nangi ti̱kítsa̱jna ijo‑no ya̱ ngixko̱n Nainá, jè ra ꞌñó tse ngaꞌñó tjín‑la̱ nga ma‑la̱ ko̱si̱ko̱tjì‑no, mé‑ni jè ꞌnga si̱ìkítsa̱jna‑no ꞌkia̱ nga ki̱jchò chi̱ba̱‑la̱.
\v 7 Ya̱á ti̱nga̱tsja ijye jè Nainá ngaꞌtsì kjoa̱ ra jiòn níkájno. Nga̱ jè Nainá ni̱chjin nchijón‑ní nga síkinda̱‑no.
\p
\v 8 Nda kjón‑ní ti̱kinda̱a ijo‑no ko̱ nda kjón chítsijen kiꞌta, nga̱ jè xi̱ta̱‑ni̱í ra ꞌñó kondra̱ tíjna‑no, ꞌkoa̱á ꞌsín jngo tjandi tsáꞌba koni tsa jngo xa ra ꞌñó ajò‑la̱, ꞌñó tíbátsji yá ra mejèn‑la̱ nga ski̱ne̱.\fig Male lion -25%|69-HK00046B.TIF|col|1PE 5:8||Jngo xa ra ꞌñó ajò‑la̱|1PE 5:8\fig*
\v 9 ꞌÑó ti̱ncha‑la jiòn ko̱ kixi̱ ti̱ncha jiòn koni ꞌsín nga makjiín‑no. Nga̱ ijyeé ꞌya jiòn nga ꞌkoa̱á ti̱ꞌsín tjín kjo̱hiꞌin ra i̱nchibatojin ngaꞌtsì xàngio̱o kó nga tíjngo i̱sàꞌnde.
\v 10 Tanga jè Nainá ra tjín ijye‑la̱ ra ta mé kjo̱nda‑ni, jè ra xá ko̱ꞌsín kiìchja̱‑ná nga ya̱ ki̱tsa̱jnajin‑teé ya̱ ñánda̱ tíjna kjoa̱jeya‑la̱ ra mì kì kje̱heꞌtà, ta nga̱tjì‑la̱ nga ya̱ titsa̱jnake̱é Jesucristo. ꞌKia̱ nga ijye ko̱tojiòn ni̱chjin ra si̱kjioón kjo̱hiꞌin, jè Nainá, si̱ìkítsa̱jnanda india‑no, ndaá ki̱ncha‑no, tsjá ngaꞌñó‑no, kixi̱ kjón‑ní si̱ìkítsa̱jna‑no.
\v 11 Jè Nainá, ta jé ra isa̱ tse ngaꞌñó tjín‑la̱ skanda ta mé ni̱chjin‑ni. Ko̱ꞌsín katama.
\s Kóꞌsín síhixoꞌta jè Pedro ra feheꞌta‑ni
\p
\v 12 Jè Silvano, ra ko̱ꞌsín tíjna‑na koni jngo ꞌndsé ra ma faꞌtatakén, jé kiꞌsìn‑na kjo̱nda nga tsikínda‑asa‑na jè xa̱jo̱n ra tísikásén‑najiòn, ñánda̱ nga ko̱xian‑najiòn ko̱ sijétakòn‑no koni ꞌsín tjín ra ngi kjo̱nda‑la̱ Nainá. Kixi̱ tjahíko̱o a̱ꞌta ꞌtse̱ kjo̱nda ra kìi̱.
\p
\v 13 I̱nchisíhixoꞌtá‑no jñà xi̱ta̱ na̱xi̱ndá‑la̱ Cristo ra títsa̱jna i̱ Babilonia ra ta̱ña jahíjin‑no Nainá. Ko̱ ti̱ꞌkoa̱á tísíhixoꞌtá‑no jè Marcos jè ra koni tsa iꞌndí‑na̱ xin‑la̱.
\v 14 ꞌKia̱ nga si̱kjáya‑la xàngio̱o, ngi ko̱ó inìma̱‑no nga ti̱kjáya‑la.
\p Ngaꞌtsì ra ya̱ nakjoá‑no a̱ꞌta ꞌtse̱ Cristo, kataꞌse kjoa̱ꞌnchán ya̱ a̱jin inìma̱‑no. Ko̱ꞌsín katama.