\id 1PE
\h 1 Pedro
\toc1 1 Pedro
\mt Xo̱jo̱n carta xi kiskiì ítjòn San Pedro
\c 1
\s Kó tsò Pedro nga síhixatꞌaà xi̱ta̱
\p
\v 1 ꞌA̱n xi ꞌmì‑na̱ Pedro, nga ꞌa̱n tsibíxáya‑na Jesucristo, sìhixatꞌaà‑nò ngatsꞌioò xi xó jaàjiìn‑nò Nainá nga mì ti̱ nangui‑nò titsa̱jna‑nò nga xki̱ xi ján na̱xa̱ndá kitsjohoya ya̱ nangui Ponto, Galacia, Capadocia, Asia ko̱ Bitinia;
\v 2 jñò xi xó kitjaàjiìn‑nò, koni sꞌín jye tjíndaà‑la̱ xi kjo̱hítsjeèn‑la̱ Nainá xi Na̱ꞌèn‑ná ma, nga jè Ini̱ma̱ Tsjeè‑la̱ kꞌoa̱á sꞌín kisìko̱‑nò nga nguì xi̱ta̱‑la̱ Nainá ma, mé‑ne nga si̱kitasòn‑là Jesucristo ko̱ mé‑ne ma xíxteèn‑jno‑nò jní‑la̱ nga matsjeèya ini̱ma̱‑nò kjoa̱ tsꞌe̱ jé‑nò. Tseé kjo̱ndaà ko̱ kjoa̱ꞌnchán kàtasꞌe‑la̱ ini̱ma̱‑nò.
\s Kjo̱tjò xi chiñàkjoa̱‑lá xi tíjnatjò‑la̱ Nainá ján ngajmiì
\p
\v 3 Jeya kàtìjna Nainá xi Na̱ꞌèn‑la̱ Jesucristo xi otíxoma‑ná. ꞌÑó tse kjoa̱hi̱ma̱takòn tjín‑la̱: koni sꞌín jaáya‑la̱ Jesucristo kjoa̱ tsꞌe̱ kjoa̱biyaà, kꞌoa̱á kisìko̱‑ná Nainá nga kitsꞌin xi̱tse̱ ìjngoò kꞌaá mé‑ne nga kjitꞌaà na̱chrjein chíñakjoa̱á
\v 4 nga tsjá‑ná kjo̱tjò xi jè tíjnatjò‑la̱ ján ngajmiì, kjo̱tjò xi mìkiì bitsꞌon ni̱ta̱ kjé‑ne, mìkiì biꞌndo ko̱ mìkiì bixòña. Kjo̱tjò jè, jñá tjoé‑ná.
\v 5 Ta nga̱tjì‑la̱ nga mokjeiín‑ná i̱tꞌaà tsꞌe̱ Nainá, jè ngaꞌñó‑la̱ síkinda̱‑ná skanda kꞌe̱ nga ki̱tjokàjñaá kjo̱ꞌin koni sꞌín tjíndaà‑la̱ Nainá kꞌe̱ nga jye kjoe̱hetꞌaà na̱chrjein.
\p
\v 6 Koií kjoa̱‑la̱, jñò, ꞌñó tsja tjín‑nò, na̱sꞌín tjín iꞌnga na̱chrjein nga makájno‑nò nga kjìn ska̱ya kjo̱ꞌin nìkjioón.
\v 7 Kꞌoa̱á ma‑ne nga kjo̱ꞌin nìkjioón nga ma chítꞌaà‑nò tsà ndaà mokjeiín‑nò. Kꞌoa̱á ngaya‑la̱ koni jè oro, mochjeén‑né nga ko̱ niꞌín ko̱tsjeèya‑ne. Ko̱ jè kjoa̱ nga mokjeiín‑nò ìsa̱á ꞌñó chjí‑la̱ mì kꞌoa̱á‑ne koni jè oro xi bitsꞌón‑ya. Jñò, kꞌe̱ nga jye chítꞌaà‑nò koni sꞌín mokjeiín‑nò, jeyaá ki̱tsa̱jnaà, ꞌngaá ki̱tsa̱jnaà ko̱ jcha̱xkón‑nò kꞌe̱ nga kjoi̱í ìjngoò kꞌa Jesucristo.
\p
\v 8 Jñò, matsjacha‑nò Jesucristo, na̱sꞌín mìkiì kiyaxkoòn. Mokjeiín‑nò i̱tꞌaà tsꞌe̱, na̱sꞌín mìkiì titsa̱ꞌyaà. ꞌÑó tsja ma‑nò skanda tsjìn ꞌén xi ma sꞌe̱no̱jmí nga ꞌñó tjín‑nò kjo̱tsja.
\v 9 Koií kjoa̱‑la̱ nga matsja‑nò nga jye titsa̱bitjokàjñoò kjo̱ꞌin ta nga̱tjì‑la̱ nga mokjeiín‑nò i̱tꞌaà tsꞌe̱ Cristo.
\p
\v 10 Jè kjoa̱ nga bitjokàjñoò kjo̱ꞌin, jñà xi̱ta̱ xi kiìchja̱ ngajo‑la̱ Nainá kjòtseé, kiskoòtaꞌyàko̱‑né ti̱koa̱á kiskònanguiya‑né, i̱kjoàn kiìchja̱ya jè kjo̱ndaà xi tsjá‑nò Nainá.
\v 11 Jñà xi̱ta̱ koi, jè Ini̱ma̱‑la̱ Cristo kisìkichi̱ya ítjòn‑la̱ mé kjo̱ꞌin xi si̱ìkjeiín Cristo ko̱ kjoa̱ jeya xi sꞌe̱‑la̱ kꞌe̱ nga ko̱ma i̱skan. Kiskònanguiya‑né mé na̱chrjein‑ne nga kꞌoa̱sꞌín ko̱matꞌin koa̱ kósꞌín ko̱ma.
\v 12 Ta̱nga jè Nainá kisìkichi̱ya‑la̱ nga mìtsà kjo̱ndaà tsꞌe̱ nga ko̱sꞌín kisꞌeno̱jmí‑la̱ ꞌén koi; kjo̱ndaà tsa̱jòn‑nò. Ko̱ jñà ꞌén koi, ti̱jñà‑ne ꞌén ndaà‑la̱ Nainá xi kjoa̱ tsꞌe̱ Cristo xi tísꞌeno̱jmí‑nò na̱chrjein i̱ꞌndei̱. Nga ti̱jé‑ne Ini̱ma̱ Tsjeè‑la̱ Nainá xi ngajmiì nchrobá‑ne tsjá‑la̱ ngaꞌñó jñà xi̱ta̱ xi béno̱jmí‑nò. Skanda jñà àkja̱le̱, mejèn‑la̱ skoe̱ kjoa̱ koi.
\s Mochjeén‑né nga tsjeè si̱jchá yijo‑ná
\p
\v 13 Koií kjoa̱‑la̱ jñò, titsa̱jnandaà, ndaà ti̱kítsjeèn, nguì ndaà chíñakjoa̱‑là kjo̱ndaà xi tjoé‑nò kꞌe̱ nga kjoi̱í ìjngoò kꞌa Jesucristo.
\v 14 Kꞌoa̱sꞌín ndaà ti̱jchá yijo‑nò koni i̱xti xi ndaà ꞌnchréñijon. Kì kꞌoa̱ ti̱sꞌín ꞌnè‑nò koni sꞌín kiꞌnè nga sa̱ ítjòn nga chꞌo tjín kjoa̱ xi kisìjé yijo‑nò kꞌe̱ nga ti̱kjꞌeè ndaà yaxkoòn Nainá.
\v 15 Ta̱ sa̱á tsjeè ti̱jchá yijo‑nò ngatsꞌiì kjoa̱ xi ꞌnè, nga jè Nainá xi xó kiìchja̱‑nò, xi̱ta̱ tsjeè‑né.
\v 16 Nga jè Xo̱jo̱n‑la̱ Nainá, kꞌoa̱á sꞌín tíchja̱ nga tsò: “Jñò, xi̱ta̱ tsjeè kàtama, nga ꞌa̱n, xi̱ta̱ tsjeè‑ná.”
\p
\v 17 Jñò, tsà Na̱ꞌèn ꞌmì‑là Nainá xi ta ngásòn tífìko̱ ngatsꞌiì xi̱ta̱ kꞌe̱ nga bìndaàjiìn‑la̱ ni̱ta̱ mé kjoa̱ xi sꞌín, mochjeén‑né nga kjitꞌaà na̱chrjein ndaà jcha̱xkón nga i̱ titsa̱jnaà i̱sòꞌnde nga mìtsà i̱ nangui‑nò.
\v 18 Jñò, jyeé ndaà tíjiìn‑nò nga mìtsà tsojmì xi ma‑la̱ bitsꞌon kjòchjítjì‑nò nga ma titsa̱jnandei̱í‑nò ngatsꞌiì kjoa̱ chꞌo xi ni̱mé chjí‑la̱ koni sꞌín tsakó‑nò xi̱ta̱ jchínga‑nò. Mìtsà to̱n oro ko̱ to̱n plata kjòchjítjì‑nò.
\v 19 Jè jní‑la̱ Cristo xi ꞌñó tse chjí‑la̱ kjòchjítjì‑nò. Cristo kitsjaà kjo̱tjò yijo‑la̱ nga kꞌen‑tꞌaà krò koni jngoò orrè xi tsjeè kji, xi ni̱mé chꞌin tjítꞌaà yijo‑la̱.
\v 20 Ti̱kꞌe̱‑ne nga ti̱kjꞌeè sindaà i̱sòꞌnde, Cristo, kꞌoa̱á sꞌín kisinè‑la̱ kjoa̱ xi si̱ìkitasòn. Ta̱nga jè na̱chrjein xi titsa̱jnaá i̱ꞌndei̱ kiꞌya‑la̱ nga jꞌiì Cristo nga kisìkitasòn kjoa̱ xi kisinè‑la̱ xi kjo̱ndaà tsa̱jòn.
\v 21 Xi i̱tꞌaà tsꞌe̱ Cristo, jñò mokjeiín‑nò i̱tꞌaà tsꞌe̱ Nainá; nga jè kisìkjaáya‑la̱ i̱tꞌaà tsꞌe̱ kjoa̱biyaà, ti̱koa̱ kitsjaà‑la̱ kjoa̱ jeya; kꞌoa̱á ma‑ne nga mokjeiín‑nò ko̱ chiñà nga si̱ìkitasòn Nainá koni sꞌín kitsjaà‑nò tsoꞌba.
\p
\v 22 Jè ini̱ma̱‑nò, jyeé kjòtsjeè, koií kjoa̱‑la̱ nga nìkitasòn koni tsò ꞌén kixi̱‑la̱ Nainá mé‑ne nga kixi̱ si̱tjòchaà xinguio̱o. Kꞌoa̱á ma‑ne nga mochjeén‑né nga ꞌñó ndaà ti̱tsjacha xinguio̱o nga tsjeè tjín ini̱ma̱‑nò.
\v 23 Jñò, ìjngoò kꞌa kitsꞌiìn xi̱tse̱ ìjngoò kꞌa‑nò. Ta̱nga mìtsà tje̱‑la̱ xi̱ta̱ xi biyaà kitsꞌiìn‑nò, jè tje̱‑la̱ Nainá xi mìkiì biyaà kitsꞌiìn‑nò. Nga̱ jè ꞌén‑la̱ Nainá xi tíjnakon ko̱ xi mìkiì fehetꞌaà ni̱ta̱ kjé‑ne kitsꞌiìn ìjngoò kꞌa‑nò.
\v 24 Nga kꞌoa̱á sꞌín tíchja̱ Xo̱jo̱n‑la̱ Nainá nga tsò:
\q Ngatsꞌiì xi̱ta̱, kꞌoa̱á sꞌín ngaya‑la̱ koni xka̱ ijñá;
\q kjoa̱jeya‑la̱ xi̱ta̱, kꞌoa̱á sꞌín ngaya‑la̱ koni naxó‑la̱ xka̱ ijñá;
\q jñà xka̱ ijñá, xì‑né; i̱kjoàn bixòjen naxó‑la̱.
\q
\v 25 Ta̱nga jè ꞌén‑la̱ Nainá tíjna‑né ni̱ta̱ kjé‑ne.
\m ꞌÉn jè, jè ꞌén ndaà‑la̱ Nainá xi kjoa̱ tsꞌe̱ Cristo xi jye kisꞌeno̱jmí‑nò.
\c 2
\s Na̱xa̱ndá xi̱tse̱‑la̱ Nainá
\p
\v 1 Chja̱àxìn‑là yijo‑nò xi kjoa̱ tsꞌe̱n, kjoa̱ chona̱cha̱n, kjoa̱ tsꞌe̱ xi̱ta̱ xi jò i̱sén tjín‑la̱, kjoa̱xìtakòn, ngatsꞌiì ꞌén ndiso.
\v 2 Ko̱sꞌín tꞌe̱en koni sꞌín ndí i̱xti xi sa̱ kitsꞌiìn nga ꞌñó síjé tsjín nga mejèn‑la̱ ko̱ki. Kꞌoa̱á ti̱sꞌín ꞌñó ti̱nchátsjioò jè ꞌén‑la̱ Nainá xi nguì ꞌén tsjeè mé‑ne nga jè ko̱jchá‑nò ko̱ ko̱chrjekàjiìn‑nò kjo̱ꞌin Nainá,
\v 3 nga jyeé kiꞌyaà jñò nga jè Na̱ꞌèn‑ná, ꞌñó ndaà xi̱ta̱.
\s Jè nda̱jo̱ xi tíjnakon
\p
\v 4 Jè Jesucristo, jè ngaya‑la̱ jngoò nda̱jo̱ xi tíjnakon, jè xi ochrjekàngui jñà xi̱ta̱, ta̱nga Nainá xó kꞌoa̱á sꞌín jaàjiìn‑ne nga ꞌñó tse chjí‑la̱. Jñò, kꞌe̱ nga binchatꞌaà chrañà‑là Cristo,
\v 5 ti̱koa̱á kꞌoa̱á sꞌín ngaya‑nò koni nda̱jo̱ xi títsa̱jnakon. Nainá tísíkjeén‑nò koni nda̱jo̱ nga tíbíndaà niꞌya tsjeè‑la̱ mé‑ne jñò, no̱ꞌmiì tsjeè ko̱ma nga ya̱ si̱xá nga i̱tꞌaà tsꞌe̱ Jesucristo kꞌoi̱‑là kjo̱tjò Nainá xi jè ndaà sasén‑la̱ koni sꞌín okóya Ini̱ma̱ Tsjeè‑la̱.
\v 6 Kꞌoa̱á sꞌín tíchja̱ Xo̱jo̱n‑la̱ Nainá nga tsò:
\q Chítsejèn‑là, ꞌa̱n síkíjna jngoaà nda̱jo̱ ngaꞌñó‑la̱ chrja̱ngui̱‑la̱ niꞌya ján na̱xa̱ndá Sión,
\q xi xó ꞌa̱n jaàjiìn‑na,
\q xi ꞌñó ndaà kji ko̱ ꞌñó tse chjí‑la̱.
\q Jè xi ko̱kjeiín‑la̱ i̱tꞌaà tsꞌe̱, mìkiì ko̱sobà‑la̱.
\m
\v 7 Jñò, xi mokjeiín‑nò i̱tꞌaà tsꞌe̱ nda̱jo̱ jè, bixón‑nò: ꞌñó tse chjí‑la̱. Ta̱nga jñà xi̱ta̱ xi mìkiì mokjeiín‑la̱, bitasòn‑né koni sꞌín tíchja̱ Xo̱jo̱n‑la̱ Nainá nga tsò:
\q Jè nda̱jo̱ xi tsachrjekàngui chji̱ne̱chrjó,
\q jè xi nda̱jo̱ sko̱‑la̱ ko̱ma tsꞌe̱ chrja̱ngui̱‑la̱ niꞌya.
\m
\v 8 Ìjngoò kꞌa tjítꞌaà Xo̱jo̱n‑la̱ Nainá ñánda tsò:
\q Nda̱jo̱ jè, kjìn xi̱ta̱ satíngui ko̱ kjìn xi̱ta̱ ki̱xangui.
\m Jñà xi̱ta̱ koi, kꞌoa̱á sꞌín matꞌin nga mìkiì síkitasòn koni tsò ꞌén‑la̱ Nainá; koií ko̱sꞌín matꞌin‑ne nga kꞌoa̱á sꞌín okꞌìn‑la̱.
\s Jè na̱xa̱ndá‑la̱ Nainá
\p
\v 9 Ta̱nga jñò, xi̱ta̱ na̱xa̱ndá xi xó kitjaàjiìn‑nò. Jñò, no̱ꞌmiì xi nìxá‑la Cristo, jè xi xi̱ta̱xá ítjòn tíjna. Jñò, xi na̱xa̱ndá tsjeè‑la̱ Nainá ꞌmì‑nò, jngoò na̱xa̱ndá xi ya̱ nokjoà‑nò i̱tꞌaà tsꞌe̱ Nainá mé‑ne nga ko̱ma ki̱nókjoa̱ya‑nò kjo̱ndaà‑la̱ Nainá xi tsachrjekàjiìn‑nò kjoa̱ tsꞌe̱ jé ñánda jñò choòn koa̱ ya̱á kisìkítsa̱jna‑nò ñánda iseèn choòn.
\v 10 Jñò, nga sa̱ kjòtseé skanda mìtsà xi̱ta̱ na̱xa̱ndá ꞌmì‑nò; ta̱nga i̱ꞌndei̱ na̱xa̱ndá‑la̱ Nainá ꞌmì‑nò. Nga sa̱ kjòtseé Nainá mìkiì mahi̱ma̱keè‑nò; ta̱nga i̱ꞌndei̱, jyeé mahi̱ma̱keè‑nò.
\p
\v 11 Jñò ndí ꞌndsè xi ꞌñó matsjacha‑nò, bítsiꞌba‑nò koni xi̱ta̱ xi mì ti̱ nangui‑nò titsa̱jna‑nò xi ta titsa̱bitjaàjtoò i̱ i̱sòꞌnde, kì kiì biìꞌnde‑la yijo‑nò kjoa̱ tsꞌe̱ jé xi síjé yijo‑nò xi kjaán‑ko̱ ini̱ma̱‑nò.
\v 12 Ndaà tanguíko̱o yijo‑nò ya̱ i̱jiìn‑la̱ xi̱ta̱ xi mìkiì mokjeiín‑la̱ i̱tꞌaà tsꞌe̱ Cristo. Jñà xi̱ta̱ koi, na̱sꞌín chja̱jno‑nò i̱ꞌndei̱, ta̱nga kꞌe̱ nga kjoi̱í ìjngoò kꞌa Cristo tsjá‑la̱ kjo̱ndaà Nainá koií kjoa̱‑la̱ nga skoe̱xkon‑nò nga ndaà titsa̱ꞌnè.
\s Jcha̱xkoán xi̱ta̱xá
\p
\v 13 Nga jeya kíjna‑ne Na̱ꞌèn‑ná, ti̱kitasòn‑là ngatsꞌiì xi̱ta̱ i̱sòꞌnde xi kjo̱tíxoma tjíya tsja, jñà xi ꞌñó ꞌnga xá tjín‑la̱, xi xi̱ta̱ sko̱‑la̱ títsa̱jna;
\v 14 ti̱koa̱ ti̱kitasòn‑là jñà xi gobernador títsa̱jna nga jè xi̱ta̱xá ítjòn síkasén nga tsjá‑la̱ kjo̱ꞌin xi̱ta̱ xi kjoa̱ ótsji; koa̱ jñà xi ndaà sꞌín, ndaà síkítsa̱jna.
\v 15 Nainá kꞌoa̱á sꞌín mejèn‑la̱ nga jñò, ndaà sꞌe̱en, mé‑ne jñà xi̱ta̱ xi mìkiì machi̱ya‑la̱ jyò kítsa̱jna‑ne, nìmé ꞌén ki̱chja̱ xi kondra̱ tsa̱jòn.
\p
\v 16 Jñò, kꞌoa̱á sꞌín ti̱jchá yijo‑nò nga titsa̱jnandei̱í‑nò, ta̱nga kì kꞌoa̱á sꞌín nìkítsjeèn nga tjíꞌnde‑nò nga chꞌo sꞌe̱en. Kꞌoa̱á sꞌín ti̱jchá yijo‑nò nga chi̱ꞌnda‑la̱ Nainá maà.
\v 17 Jcha̱xkón yije xi̱ta̱. Ti̱tsjacha xi ꞌndsè chibà. Ti̱skón‑chaà Nainá. Jcha̱xkón jè xi xi̱ta̱xá ítjòn tíjna.
\s Kjoa̱ xi tjínè‑la̱ nga si̱ìkitasòn xi chi̱ꞌnda ꞌmì
\p
\v 18 Jñò xi xi̱ta̱ chi̱ꞌnda ꞌmì‑nò, jcha̱xkón koa̱ ti̱kitasòn‑là nei‑nò. Mìtsà ta jñà nei‑nò xi ndaà síko̱‑nò ko̱ xi beètjò‑nò, ti̱koa̱á ti̱kitasòn‑là jñà xi chꞌo síko̱‑nò.
\v 19 Ndaà bìtsa̱jna nga nguixko̱n Nainá jñà xi̱ta̱ xi kjo̱ꞌin síkjeiín na̱sꞌín mì jé tjín‑la̱ ta jè nga̱tjì‑la̱ nga machi̱ya‑la̱ kó tsò Nainá.
\v 20 Jñò, tsà kjo̱ꞌin tsjá‑nò xi̱ta̱ nga jé binchaàtsjioò, ¿mé xi ndaà ki̱tsa̱jna‑nò? Ta̱nga tsà kjo̱ꞌin titsa̱nìkjioón nga ndaà ꞌnè, ndaà si̱ìkítsa̱jna‑nò Nainá.
\v 21 Nga koií xá kiìchja̱‑nò Nainá nga jè Cristo kisìkjeiín kjo̱ꞌin xi kjoa̱ tsa̱jòn. Tsibíjna jngoò‑nò chi̱ba̱ nga kꞌoa̱sꞌín si̱kitasòn koni sꞌín kisìkitasòn jè.
\v 22 Cristo, ni̱jngoò jé tsohótsji, ko̱ ni̱jngoò ꞌén ndiso kiìchja̱.
\v 23 Kꞌe̱ nga kiìchja̱jno‑la̱ xi̱ta̱, mìkiì tsà kiìchja̱jno ngajo‑la̱. Kꞌe̱ nga kisìkjeiín kjo̱ꞌin, mìkiì tsà koa̱ ti̱sꞌín kisꞌiìn ngajo‑ne. Ta Nainá tsibíya tsja, nga jè xi bíndaàjiìn kjoa̱kixi̱.
\v 24 Jè sobà Cristo tsakaje̱n jé‑ná kꞌe̱ nga kisìtjoòtꞌaà yijo‑la̱ ya̱ krò, mé‑ne jñá ki̱tsa̱jnakon‑ná nga nìkitasoán xi kjoa̱ kixi̱ nga jyeé titsa̱jnatꞌaàxìn‑lá kjoa̱ tsꞌe̱ jé koni tsà jye kꞌeén. Jè Cristo, koni sꞌín kisìkjeiín kjo̱ꞌin nga kitsìꞌon, jñò kjòndaá‑nò.
\v 25 Jñò, nga sa̱ kjòtseé, kꞌoa̱á sꞌín tsitjaà koni orrè xi kisìjchàaxkon ndi̱yá‑la̱, ta̱nga i̱ꞌndei̱, jyeé inchrobàtꞌaà‑là Cristo koni jngoò paxtò xi síkinda̱ ini̱ma̱‑nò.
\c 3
\s Kósꞌín si̱ìjchá yijo‑la̱ jè xꞌi̱n ko̱ chjo̱ón
\p
\v 1 Kꞌoa̱á ti̱sꞌín tjín i̱tꞌaà tsa̱jòn xi íchjín ꞌmì‑nò, nangui titsa̱jna‑là xꞌi̱n‑nò, mé‑ne jñà xi̱ta̱ xꞌi̱n‑nò tsà tjín iꞌnga xi mìkiì mokjeiín‑la̱ ꞌén‑la̱ Nainá, ko̱kjeiín‑la̱, na̱sꞌín mìkiì ki̱nókjoa̱ko̱o kjoa̱ tsꞌe̱ Nainá. Kꞌe̱ nga skoe̱xkon‑nò nga ndaà titsa̱nìjchá yijo‑nò ti̱koa̱á si̱ìkjatjìyaá‑la̱ yijo‑la̱.
\v 2 Skótsejèn‑nò nga tsjeè titsa̱nìjchá yijo‑nò nga ndaà yaxkón Nainá.
\v 3 Ko̱ kì tà i̱sòꞌnga‑la̱ yijo‑nò ꞌñó ndaà bíndaà, nga ꞌñó ndaà bíꞌñó tsja̱ skoò, nga ndáto̱n chjí nìkjeén xi nguì oro, nga jñà nikje xꞌió‑nò ꞌñó xkón kjoàn.
\v 4 Majìn, jè xi nchrobájiìn ini̱ma̱‑nò xi ndaà síkatsejèn‑nò, jè‑né xi mìkiì bitsꞌon, jè ini̱ma̱ xi indaàkjoa̱ ko̱ xi ꞌnchán tíjna. Jè xi ꞌñó tse chjí‑la̱ nga nguixko̱n Nainá.
\v 5 Nga sa̱ kjòtseé, jñà íchjín xi ndaà kijtseèxkón Nainá nga kiskoòñà‑la̱, kꞌoa̱á sꞌín ndaà tsatsejèn nga nangui tsibìtsa̱jna‑la̱ xꞌi̱n‑la̱.
\v 6 Kꞌoa̱á sꞌín kisꞌiìn Sara nga kisìkitasòn‑la̱ Abraham. Kꞌoa̱á ma‑ne nga ndaà kijtseèxkón nga jè xi Na̱ꞌèn tíjna. Jñò, tsà ndaà ꞌnè ko̱ tsà nìmé kjo̱xkón tjín‑nò, tje̱‑la̱ Saraá ma.
\p
\v 7 Jñò xi xꞌi̱n ꞌmì‑nò, ndaà ti̱tsa̱jnako̱o jñà íchjín‑nò nga ndaà kàtachi̱ya‑nò nga ìsa̱á indaàkjoa̱. Ndaà jcha̱xkón íchjín‑nò nga ngásòn tjoé‑nò jè kjo̱ndaà‑la̱ Nainá, jè kjoa̱binachon xi jè Nainá jye tjíndaà‑la̱ nga tsjá‑nò. Kꞌoa̱á sꞌín tꞌe̱en mé‑ne kꞌe̱ nga nokjoàtꞌaà‑là Nainá, ni̱mé si̱ìjti‑nò.
\s Kósꞌín si̱ìjchá yijo‑la̱ ngatsꞌiì xi̱ta̱‑la̱ Nainá
\p
\v 8 Nga yije kjoa̱ koi, ngatsꞌioò, ta jngoò kjo̱hítsjeèn kàtasꞌe‑nò; ti̱jetakòn xinguio̱o; tjòcha tꞌe̱en xinguio̱o nga ꞌndsè chiba; chahi̱ma̱a xinguio̱o; i̱ma̱ kjoa̱ tꞌe̱en.
\v 9 Tsà yá xi chꞌo síko̱‑nò, kì kꞌoa̱á ti̱sꞌín ꞌnè ngajo‑nò. Tsà yá xi ꞌon chja̱jno‑nò, kì kꞌoa̱á ti̱sꞌín nokjoàjno ngajo‑là. Jñò, ta̱ sa̱á ti̱jétꞌaà‑là Nainá nga kàtasíchikon‑tꞌin; nga jyeé ꞌyaà nga koií xá kinokjoá‑nò nga Nainá si̱ìchikon‑tꞌin‑nò.
\v 10 Nga:
\q Jè xi mejèn‑la̱ nga tsja sꞌe‑la̱ nga tíjnakon,
\q nga mejèn‑la̱ skoe̱ na̱chrjein xi ndaà,
\q kàtasíkinda̱ ni̱je̱n‑la̱ nga mì chꞌo ki̱chja̱;
\q ko̱ kàtasíkinda̱ tsoꞌba, nga mì ꞌén ndiso ki̱chja̱.
\q
\v 11 Ti̱nchatꞌaàxìn‑là kjoa̱ xi chꞌo tjín; ndaà tꞌe̱en.
\q ꞌNchán titsa̱jnako̱o xinguio̱o ni̱ta̱ mé kjoa̱ xi tjín‑nò.
\q
\v 12 Nga jè Na̱ꞌèn‑ná tísíkꞌaá xko̱n nga tísíkinda̱ xi xi̱ta̱ kixi̱,
\q tíbinchá líká‑la̱ nga tíꞌnchré‑la̱ kꞌe̱ nga chja̱tꞌaà‑la̱,
\q ta̱nga jñà xi̱ta̱ xi chꞌo sꞌín bíꞌmaá‑la̱ i̱sén‑la̱ nga kondra̱ tsꞌe̱‑né.
\p
\v 13 Jñò, tsà kjitꞌaà na̱chrjein nga ndaà titsa̱ꞌnè, mì yá xi̱ta̱ xi chꞌo si̱ìko̱‑nò.
\v 14 Ta̱nga mé ta ndaà‑nò tsà kjo̱ꞌin titsa̱nìkjioón ta koi kjoa̱‑la̱ nga kixi̱ ꞌnè. Ta̱nga ni̱ jngoò xi̱ta̱ tsakjoòn‑là, kì binchaxkón‑là yijo‑nò.
\v 15 Jè ti̱kíjna ítjòn Cristo nga jè kàtatíxoma‑nò ya̱ i̱jiìn ini̱ma̱‑nò. Ti̱tsa̱jnandaà nga kjitꞌaà na̱chrjein mé‑ne nga ko̱ma kéno̱jmíya‑là jñà xi̱ta̱ xi sko̱nanguiya‑nò i̱tꞌaà tsꞌe̱ kjoa̱ xi titsa̱chiñá‑là i̱tꞌaà tsꞌe̱ Cristo.
\v 16 Kꞌe̱ nga ki̱nókjoa̱a, indaàkjoa̱ tꞌe̱en. Cha̱xkón jñà xi kéno̱jmíya‑là, tsjeè kàtìjna kjo̱hítsjeèn‑nò, mé‑ne jñà xi̱ta̱ xi chꞌo chja̱jno‑nò nga ndaà ꞌnè nga mokjeiín‑nò i̱tꞌaà tsꞌe̱ Cristo, ko̱sobà‑la̱ nga jñò chja̱jno‑nò.
\v 17 Ìsa̱á ndaà tjín tsà ko̱sꞌín mejèn‑la̱ Nainá nga kjo̱ꞌin si̱kjioón kꞌe̱ nga ndaà ꞌnè, mì kꞌoa̱‑ne tsà kꞌe̱ nga chꞌo ꞌnè.
\p
\v 18 Nga skanda jè Cristo, jngoò kꞌaá kisìkjeiín kjo̱ꞌin kꞌe̱ nga kꞌen xi kjoa̱ tsꞌe̱ jé‑ná. Cristo, mìtsà jé tsohótsji; xi̱ta̱ kixi̱‑né; kisìkjeiín kjo̱ꞌin i̱tꞌaà tsꞌe̱ xi̱ta̱ xi jé tjín‑la̱ mé‑ne nga ko̱ma kji̱ko̱‑ná nguixko̱n Nainá. Yijo‑la̱, jñà xi̱ta̱ kisìkꞌen, ta̱nga i̱tꞌaà tsꞌe̱ Ini̱ma̱‑la̱ jaáya ìjngoò kꞌa‑la̱.
\v 19 Ko̱ jè Ini̱ma̱‑la̱ Cristo kiì i̱ꞌnde ñánda títsa̱jna ini̱ma̱ xi títsa̱jnaya nda̱yá nga kiìchja̱yajiìn‑la̱.
\v 20 Ini̱ma̱ koi, tsꞌe̱é xi̱ta̱ xi mìkiì kiìꞌnchréñijon‑la̱ Nainá na̱chrjein tsꞌe̱ Noé. Nainá tseé kiskoòñà kjoa̱ kꞌe̱ nga Noé tsibíndaà chitso je. Ya̱ i̱ya chitso, tà jiìn ma‑ne xi̱ta̱ xi itjokàjiìn kjo̱ꞌin nga mìkiì kꞌen kꞌe̱ nga tsꞌa jtsí xkón.
\v 21 Ko̱ jè nandá tsꞌe̱ jtsí xkón, jè ngaya‑la̱ nandá xi ma‑ná bautizar na̱chrjein i̱ꞌndei̱ nga bitjokàjñaá kjo̱ꞌin. Ta̱nga nga maá bautizar, mìtsà yijo‑ná matsjeè‑ne, jè‑né nga nìjétꞌaà‑lá Nainá nga tsjeè kàtasꞌe kjo̱hítsjeèn‑ná. Ko̱ bitjokàjñaá kjo̱ꞌin, koií kjoa̱‑la̱ nga jaáya‑la̱ Cristo,
\v 22 ko̱ kiì mijìn ján ngajmiì nga ya̱ tíjnatꞌaà chrja kixi̱‑la̱ Nainá. Jé tíhotíxoma‑la̱ àkja̱le̱ ko̱ ini̱ma̱ xi tjín‑la̱ kjo̱tíxoma ko̱ ngatsꞌiì xi tjín‑la̱ ngaꞌñó.
\c 4
\p
\v 1 Cristo, koni sꞌín kisìkjeiín kjo̱ꞌin yijo‑la̱, jñò, ti̱koa̱á mochjeén‑né nga ki̱tsa̱jnandaà nga si̱kjioón kjo̱ꞌin. Nga̱ jè xi jye kisìkjeiín kjo̱ꞌin, ya̱á jyehetꞌaà jé‑la̱,
\v 2 mé‑ne jñà na̱chrjein xi kíjna ìsa̱ i̱sòꞌnde, kꞌoa̱á sꞌín kàtìjna koni sꞌín mejèn‑la̱ Nainá, mìtsà kꞌoa̱sꞌín kíjna koni sꞌín mejèn‑la̱ yijo‑la̱.
\v 3 Jyeé ꞌñó kjìn na̱chrjein kinìkato nga chꞌo kiꞌnè koni sꞌín xi̱ta̱ xi mìkiì beèxkon Nainá. Kꞌoa̱á sꞌín kinìko̱ò yijo‑nò kjoa̱ xi chꞌo tjín koni kjoa̱ chijngui, kjoa̱ chꞌo xi síjé yijo‑nò, ko̱ kjoa̱ chꞌi̱, kjoa̱ tsꞌe̱ sꞌeí xi chꞌo tjín, ko̱ nga ta xán kiꞌyò kjitꞌaà, ko̱ nga xkósòn kiyaxkón nga mìtsà kixi̱ kjoa̱ nga Nainá.
\v 4 I̱ꞌndei̱ jñà xi̱ta̱ koi, ta maxkón‑la̱ i̱tꞌaà tsa̱jòn nga mì ti̱ kiì ya̱ tsjahijtako̱‑nò kjoa̱ xi chꞌo tjín; bijnòkeè‑nò; chꞌoó chja̱jno‑nò.
\v 5 Ta̱nga jñà xi̱ta̱ koi, tjínè‑la̱ nga tsjá‑la̱ kinda̱ Nainá; jè Nainá xi tíjnandaà nga koi̱ìndaàjiìn‑la̱ xi̱ta̱ xi títsa̱jnakon ko̱ xi jye kꞌen.
\v 6 Koií kjoa̱‑la̱ nga kꞌoa̱ ti̱sꞌín kisꞌeno̱jmí‑la̱ ꞌén ndaà‑la̱ Nainá xi kjoa̱ tsꞌe̱ Cristo jñà xi̱ta̱ xi jye kꞌen, mé‑ne na̱sꞌín jñà yijo‑la̱ kisìkjeiín kjo̱ꞌin koni sꞌín bìndaàjiìn xi̱ta̱ i̱sòꞌnde, ta̱nga jñà ini̱ma̱‑la̱ títsa̱jnakon‑né ni̱ta̱ kjé‑ne koni sꞌín tíjnakon kjitꞌaà Nainá.
\p
\v 7 Jyeé tímachrañà nga kjoe̱hetꞌaà i̱sòꞌnde, koií kjoa̱‑la̱ jñò, ndaà titsa̱jnako̱o kjo̱hítsjeèn‑nò; kjitꞌaà na̱chrjein tìtsiꞌba‑là Nainá.
\v 8 Jè xi tíjna ítjòn, jè‑né nga ꞌñó tjòcha tꞌe̱en xinguio̱o. Tsà tjín‑nò kjoa̱tjòcha, ko̱maá si̱jchàatꞌaà‑là jé‑la̱ xinguio̱o.
\v 9 Chjoétjò xi̱ta̱ xinguio̱o kꞌe̱ nga bijchókon‑nò tsà mejèn‑la̱ nga si̱ìkjáya ya̱ niꞌya‑nò. Tsja tꞌè‑là ini̱ma̱‑nò; kì chꞌo chibàya‑nò.
\v 10 Nga jngoò ìjngoò, koni sꞌín tjín kjo̱ndaà xi kitsjaà‑nò Nainá, kꞌoa̱sꞌín ti̱si̱ko̱ò xinguio̱o nga ndaà ti̱chjeén, nga kjìn sko̱ya tjín‑ne kjo̱ndaà xi kitjoé‑nò.
\v 11 Jè xi̱ta̱ xi kꞌoa̱sꞌín kitsꞌiì‑la̱ nga ꞌén‑la̱ Nainá ki̱chja̱ya, kꞌoa̱á sꞌín kàtìchja̱ya koni tsò ꞌén‑la̱ Nainá. Ko̱ jè xi̱ta̱ xi kꞌoa̱sꞌín kitsꞌiì‑la̱ nga si̱ìxá, kꞌoa̱á sꞌín kàtasíxá koni tjín ngaꞌñó xi tsjá‑la̱ Nainá. Ni̱ta̱ mé xi sꞌe̱en, kꞌoa̱á sꞌín tꞌe̱en mé‑ne nga i̱tꞌaà tsꞌe̱ Jesucristo jeya kíjna‑ne Nainá. Nga tsꞌe̱é Cristo jè kjoa̱jeya ko̱ ngatsꞌiì ngaꞌñó xi tjín skanda ni̱ta̱ kjé‑ne. Kꞌoa̱sꞌín kàtama.
\s Si̱kjiaán kjo̱ꞌin nga xi̱ta̱‑la̱ Cristo ꞌmì‑ná
\p
\v 12 Jñò ndí ꞌndsè xi matsjake̱‑nò, kì maxkón‑nò nga ꞌñó ꞌin tjín kjoa̱ xi nchrobánè‑nò nga tíchìtꞌaà‑nò.
\v 13 Ta̱ sa̱á kàtasꞌe‑nò kjo̱tsja nga tíhoko̱ chiba‑nò kjo̱ꞌin tsꞌe̱ Cristo, mé‑ne nga ti̱koa̱ sꞌe̱‑nò kjo̱tsja kꞌe̱ nga jcha̱‑la̱ kjoa̱jeya‑la̱ Cristo.
\v 14 Jñò, mé ta ndaà‑nò kꞌe̱ nga tsà xi̱ta̱ ko̱títꞌaà‑nò xi kjoa̱ tsꞌe̱ Cristo nga jè kjoa̱jeya‑la̱ Ini̱ma̱ Tsjeè‑la̱ Nainá ya̱á tíjnako̱‑nò.
\v 15 Tsà kjo̱ꞌin titsa̱nìkjioón, chítsejèn‑là yijo‑nò, a koií kjoa̱‑la̱ nga chꞌo ꞌnè, nga xi̱ta̱ nìkꞌeèn, nga chijé ꞌnè, nga chingájiìn chingáꞌa kjoa̱. Kì kꞌoa̱á tjín jé xi binchaàtsjioò.
\v 16 Ta̱nga tsà kjo̱ꞌin titsa̱nìkjioón nga xi̱ta̱‑la̱ Cristo maá, kì masobà‑nò; ta sa̱á jeya ti̱kíjna Nainá nga xi̱ta̱‑la̱ tsò‑nò.
\p
\v 17 Jyeé ijchò na̱chrjein nga ko̱tsꞌia̱ nga si̱ndaàjiìn‑la̱ xi̱ta̱ na̱xa̱ndá‑la̱ Nainá. Tsà jñá tímatsꞌia̱ ítjòn ko̱‑ná, ¿mé xi ko̱matꞌin jñà xi̱ta̱ xi mìkiì síkitasòn ꞌén ndaà‑la̱ Nainá?
\q
\v 18 Jè xi xi̱ta̱ kixi̱, chjá ko̱ma‑la̱ nga ki̱tjokàjiìn kjo̱ꞌin.
\q ¿Kósꞌín ko̱matꞌin jñà xi̱ta̱ xi mìkiì beèxkón Nainá ko̱ xi jé ótsji?
\p
\v 19 Kꞌoa̱á ma‑ne, jñà xi̱ta̱ xi kjo̱ꞌin síkjeiín nga ko̱sꞌín mejèn‑la̱ Nainá, kì bíkjoàn‑la̱ nga ndaà sꞌín. Jè Nainá kàtaꞌñótꞌaà takòn nga jè kàtasíkinda̱, nga jè tsibíndaà jñà xi̱ta̱ ko̱ jè síkitasòn‑né koni sꞌín tsjá tsoꞌba.
\c 5
\s Jñà xi̱ta̱ jchínga xi xá ítjòn tjín‑la̱ ya̱ na̱xa̱ndá‑la̱ Nainá
\p
\v 1 Sìjétꞌaà‑la̱ jñà xi̱ta̱ jchínga xi xá ítjòn tjín‑la̱ nga ya̱ síxájiìn‑nò ya̱ na̱xa̱ndá‑la̱ Nainá. Ti̱koa̱á ꞌa̱n, xi̱ta̱ jchínga‑ná nga xá ítjòn tjín‑na koni jñà xi̱ta̱ koi; kìjtseè‑ná kjo̱ꞌin xi kisꞌe‑la̱ Cristo; ti̱koa̱á sꞌe̱é‑na kjoa̱jeya xi i̱skan jcha̱‑la̱.
\v 2 Ti̱kinda̱a jñà xi̱ta̱‑la̱ Nainá xi jñò kjònga̱tsja koni tsà orrè; kì kjo̱ꞌñó ꞌnè‑là yijo‑nò; ko̱ó kjo̱ndaà‑nò nga ti̱kinda̱a koni sꞌín mejèn‑la̱ Nainá. Mìtsà koií kjoa̱ nga tse to̱n si̱kijneè. Tà ko̱ó kjo̱tsja‑nò nga kꞌoa̱ tꞌe̱en.
\v 3 Kì yatoòn‑jèn jñà xi̱ta̱ xi jñò manga̱tsja koni tsà nei‑la̱ ma. Jñò ti̱ncha ítjòn‑là, ta̱kó‑la̱ ndi̱yá‑la̱ Nainá mé‑ne ko̱ma skíngui‑nò.
\v 4 Mé‑ne kꞌe̱ nga kjoi̱í ìjngoò kꞌa jè Paxtò ítjòn, tjoé‑nò kjoa̱jeya‑la̱ Nainá koni jngoò corona xi mìkiì fehejno ote‑la̱ ni̱ta̱ kjé‑ne.
\p
\v 5 Ti̱koa̱ jñò xi i̱xti xo̱ngó ꞌmì‑nò, ti̱kitasòn‑là jñà xi̱ta̱ jchínga xi otíxoma ya̱ i̱jiìn na̱xa̱ndá‑la̱ Nainá. Ngatsꞌioò, indaàkjoa̱ tanguíko̱o xinguio̱o, nga:
\q Jè Nainá kondra̱á tíjna‑la̱ jñà xi̱ta̱ xi ꞌnga ikon;
\q koa̱ jñà xi̱ta̱ xi indaàkjoa̱ tjín ini̱ma̱‑la̱, tsjá‑la̱ kjo̱ndaà.
\m
\v 6 Nangui titsa̱jna‑là Nainá nga tse ngaꞌñó tjín‑la̱ koni sꞌín síko̱‑nò, mé‑ne kꞌe̱ nga ki̱jchò na̱chrjein jè Nainá ꞌnga si̱ìkítsa̱jna‑nò.
\v 7 Tsja Nainá ti̱kítsa̱jnaya ngatsꞌiì kjoa̱ xi makájno‑nò nga jè tísíkinda̱‑nò.
\p
\v 8 \fig Male lion -25% 1PE 5:8|69-HK00046B.TIF|col|1PE 5:8||Jngoò xa tíkjindáya nga ꞌñó ijò‑la̱|1PE 5.8\fig*Ti̱kinda̱a yijo‑nò, kjitꞌaà na̱chrjein titsa̱jnandaà, nga jè xi̱ta̱ nei̱í xi kondra̱‑nò, kꞌoa̱á sꞌín tsóbandiì‑nò kꞌoa̱á ngaya‑la̱ koni jngoò xa xi tíkjindáya nga ꞌñó ijò‑la̱, nga tíhótsji yá xi ski̱ne̱.
\v 9 Nga ndaà mokjeiín‑nò, ꞌñó ti̱ncha‑là xi̱ta̱ nei̱í. Nga jyeé tíjiìn‑nò nga jñà xi̱ta̱ xinguio̱o xi títsa̱jna nga tíjtsa i̱sòꞌnde, ti̱koa̱á kꞌoa̱á tjín kjo̱ꞌin xi nchisíkjeiín.
\v 10 Kꞌe̱ nga jye ko̱to chiba na̱chrjein nga titsa̱nìkjioón kjo̱ꞌin, jè sobà Nainá si̱ìndaàya‑nò, si̱ìkíjnandaà‑nò, tsjá‑nò ngaꞌñó, ko̱ kixi̱ si̱ìkítsa̱jna‑nò. Ti̱jé‑ne Nainá xi ko̱ kjoa̱tjòcha‑la̱ kiìchja̱‑ná nga sꞌe̱‑ná kjoa̱jeya‑la̱ ni̱ta̱ kjé‑ne nga Jesucristo titsa̱jnakoa̱á.
\v 11 Tsꞌe̱é Nainá ngatsꞌiì ngaꞌñó xi tjín skanda ni̱ta̱ kjé‑ne. Kꞌoa̱sꞌín kàtama.
\s Xi fehetꞌaà‑ne, Pedro síhixatꞌaà xi̱ta̱
\p
\v 12 Silvano, xi ꞌndsè xan‑la̱, nga kixi̱ tjín xá‑la̱, jè kisìchjátꞌaà‑na nga kiskiì‑nò xo̱jo̱n carta jè. Kꞌoa̱á sꞌín tìbìnè‑nò ko̱ tìsìkixi̱ya‑nò nga ngatsꞌiì ꞌén xi tìsìkasén‑nò, nguì kꞌoa̱á sꞌín tjín kjo̱ndaà‑la̱ Nainá. Kixi̱ titsa̱jnako̱o kjo̱ndaà koi.
\p
\v 13 Nchisíhixatꞌaà‑nò jñà xi̱ta̱ na̱xa̱ndá‑la̱ Cristo xi i̱ títsa̱jna Babilonia xi xó ta̱ña kitjaàjiìn‑nò. Ko̱ jè Marcos xi kiꞌndí‑na̱ xan‑la̱ i̱tꞌaà tsꞌe̱ Cristo, ti̱koa̱á tísíhixatꞌaà‑nò.
\v 14 Ti̱ixotꞌaà xinguio̱o nga nguì ko̱ ini̱ma̱‑nò.
\p Kàtasꞌe‑la̱ kjoa̱ꞌnchán i̱jiìn ini̱ma̱‑nò ngatsꞌioò xi ya̱ nokjoà‑nò i̱tꞌaà tsꞌe̱ Cristo. Kꞌoa̱sꞌín kàtama.