\id 2PE
\h 2 Pedro
\toc1 2 Pedro
\mt Xa̱jo̱n ra ma‑ni jò ra tsikínda jè Pedro
\c 1
\s Kóꞌsín jè Pedro síhixoꞌta xi̱ta̱ ra síkasén‑la̱ xa̱jo̱n
\p
\v 1 ꞌA̱n, ra Simón Pedro ꞌmì‑na, ra xi̱ta̱ chi̱ꞌnda‑la̱ Jesucristo ma ko̱ nga ti̱ꞌkoa̱á ꞌa̱n tsikíxáya‑na, tísikásén‑no jè xa̱jo̱n ra̱kìi̱, jiòn ra ngásòn nda makjiín‑no a̱ꞌta ꞌtse̱ Cristo koni ꞌsín nga ti̱ꞌkoa̱ nda makjiín‑naji̱n ra ji̱n; nga̱ xi̱ta̱ kixi̱í jè Cristo ra Nainá‑ná ra bachrjekàjin‑ná kjo̱hiꞌin.
\v 2 Koni ꞌsín nga isa̱ nda i̱nchiꞌyaxkon‑isa jiòn jè ra Nainá ko̱ jè Jesús ra tíjna ítjòn‑ná, ko̱ꞌsín isa̱ tse kjo̱nda ko̱ tse kjoa̱ꞌnchán katasakó-isa‑la̱ inìma̱‑no.
\s Kótjín ndi̱yá‑la̱ kjo̱nda ra machjeén nga ꞌse̱‑ná
\p
\v 3 Jè ngaꞌñó‑la̱ Nainá títsjá ijye‑ná ngaꞌtsì ra machjeén‑la̱ jè kjo̱binachon‑ná ko̱ ngaꞌtsì ra machjeén‑ná nga tsje si̱jché ijo‑ná. Kií ko̱ꞌsín títsjá‑ná ngaꞌtsì kjo̱nda kìi̱ ta nga̱tjì‑la̱ nga ijyeé nda ꞌyaxkeén jè ra xá kiìchja̱‑ná ko̱ batoó jeya tíjna ra jè, ko̱ xá ꞌkoa̱á ꞌsín nda‑ni xi̱ta̱.
\v 4 Ko̱ a̱ꞌta ꞌtse̱é kjoa̱ kìi̱ nga ko̱ꞌsín títjábé‑ná kjoa̱ ra ꞌñó nda tjín ko̱ ra ꞌñó chjí‑la̱ ra ijye ko̱ꞌsín kitsò Nainá nga tsjá‑ná, mé‑ni nga a̱ꞌta ꞌtse̱ kjoa̱ kìi̱ ko̱ko̱ꞌta‑te‑ná nga ko̱ꞌsín ꞌsie̱én koni ꞌsín ꞌsín Nainá, nga jién ijyeé tsinchaꞌtaxìn‑lá kjoa̱ꞌcho ra faajin‑la̱ ijo‑ná ra tjín ya̱ i̱sàꞌnde ra ta síkitsón‑ná.
\v 5 Kií ko̱ꞌsín machjeén‑ni nga ꞌti̱ ngaꞌñó‑la ijo‑no a̱ꞌta ꞌtse̱ jñà kjoa̱ kìi̱. Koni ꞌsín nga makjiín‑no a̱ꞌta ꞌtse̱ Cristo, ꞌkoa̱á ti̱ꞌsín nda xi̱ta̱ ꞌtia̱àn; tsa ijyeé nda jiòn xi̱ta̱, ꞌkoa̱á ti̱ꞌsín kataꞌse‑no kjoa̱chji̱ne̱;
\v 6 Tsa ijye tjín‑no ra kjoa̱chji̱ne̱, ko̱ꞌsín nda ta̱te̱xoma‑la ijo‑no; tsa ijye nda batexoma‑la ijo‑no, katachíkjoa̱ko̱‑no ta mé kjoa̱‑nioo̱; tsa chíkjoa̱ko̱‑no ta mé kjoa̱‑nioo̱, ti̱skón‑cha Nainá;
\v 7 Tsa tjín‑no kjoa̱skon a̱ꞌta ꞌtse̱ Nainá, tsjacha ꞌtia̱àn xàngio̱o nga jngó jngó‑no; ko̱ tsa tsjacha‑no xàngio̱o, ti̱ꞌkoa̱á tsjacha ꞌtia̱àn ra kjꞌií xi̱ta̱.
\p
\v 8 Tsa tjín‑no ngaꞌtsì kjo̱nda kìi̱, ko̱ tsa ni̱chjin nchijón‑ní tísakó-isa‑najiòn kjo̱nda kìi̱, tsó‑ni kjoa̱ nga mì tsa ta titsa̱hijyo ꞌtsè jiòn, ko̱ isa̱á tse kjo̱nda sa̱kò-isa‑najiòn koni ꞌsín nga i̱nchiꞌyaxkon‑isa Jesucristo ra tíjna ítjòn‑ná.
\v 9 Tanga tsa tjín iꞌka xi̱ta̱ ra mì kì ko̱ꞌsín i̱nchisíjchá ijo‑la̱, mì kì nda tsijen‑la̱, xi̱ta̱ xka̱‑ní, ijyeé kiꞌchaàjin‑la̱ nga ijyeé kinìhijchaàꞌta‑la̱ jé ra tjín‑la̱ ti̱ꞌsa̱ kjotseé.
\v 10 Jiòn ndí ꞌndsé ko̱ ndí tichjeé, ꞌti̱ ngaꞌñó‑la ijo‑no nga ti̱kixi̱ya kjoa̱ koni ꞌsín nga Nainá xá kiìchja̱‑no ko̱ tsjahíjin‑no. ꞌKia̱ tsa ko̱ꞌsín ꞌsia̱n kiꞌta jiòn, ni̱kjiá ska̱jen‑ngi jiòn.
\v 11 Ta isa̱á jnchro, ngi jngo ꞌká kjón‑ní tjáxa̱ꞌnde‑no nga ki̱tjáha̱ꞌse̱en ñánda̱ nga tíbatéxoma skanda ta mé ni̱chjin‑ni jè Jesucristo ra tíjna ítjòn‑ná ko̱ ra bachrjekàjin‑ná kjo̱hiꞌin.
\p
\v 12 Ko̱ ꞌkoa̱á ꞌsín síkítsjen‑yá kiꞌta‑najiòn jñà kjoa̱ kìi̱, ni̱ꞌsín takó ijye ꞌñó nda ꞌya jiòn ko̱ ni̱ꞌsín ꞌñó nda kjiꞌta takòn jiòn jè kjo̱hixi̱ ra ko̱ꞌsín ijye ꞌya jiòn ꞌndi̱ ꞌndi̱‑ni̱.
\v 13 ꞌKoa̱á ꞌsín machi̱ya‑na nga ꞌkoa̱á ꞌsín tjínè‑na nga síkítsjen‑yá‑la̱ kjo̱bítsjen‑najiòn, ꞌkia̱ nga takó tíjna̱‑isa i̱ i̱sàꞌnde.
\v 14 Nga̱ ijyeé be‑náa̱ nga ta chibaá ni̱chjin chija‑isa nga kje̱heꞌtà ni̱chjin‑na̱, nga̱ ꞌkoa̱á ꞌsín ijye isìchi̱ya tsijen‑na jè Jesucristo ra tíjna ítjòn‑ná.
\v 15 ꞌKoa̱á ꞌsín ítsikiné‑la̱ ijo‑na̱ mé‑ni nga ijye tjín kixi̱‑ni kjoa̱, nga ꞌkoa̱á ꞌsín síkítsjen‑yá kiꞌta‑najiòn kjoa̱ kìi̱, ꞌkia̱ ꞌa̱n ra ijye i̱ko̱‑na Na̱ꞌín‑ná.
\s Ñánda̱ nchrabá‑ní ꞌén ra̱kìi̱
\p
\v 16 Nga̱ mì tsa ya̱ tsangìtji̱ngi‑la̱ji̱n koni tsò xi̱ta̱ ra ꞌbéna̱jmí kuendo̱ ra ta jñà bínda, ꞌkia̱ nga ko̱ꞌsín tsiꞌkèna̱jmí‑laji̱n a̱ꞌta ꞌtse̱ ngaꞌñó ra tjín‑la̱ Jesucristo ra tíjna ítjòn‑ná ko̱ koni ꞌsín nga ko̱ma ꞌkia̱ nga kjꞌi̱í india‑ni ra jè. Nga̱ nda kjón‑ní kijcha‑ji̱n jè kjoa̱jeya‑la̱, ko̱ ꞌkoa̱á ꞌsín tsiꞌkèna̱jmí‑ji̱n.
\v 17 ꞌKia̱ nga jè Nainá ra Na̱ꞌìn ꞌmì‑lá jeya ko̱ ꞌnga isíkíjna; inchrabà jngo‑ni ꞌén ya̱ a̱jin i̱sén iꞌngaá ñánda̱ nga ꞌñó jate tsatsíjen ra kitsò: “Jé ra̱kìi̱ Iꞌndí‑na̱ ra ꞌñó tsjake̱, batoó tsja tjín‑la̱ takoàa̱n ra a̱ꞌta ꞌtse̱.”
\v 18 Ngaji̱n sabá inaꞌyá‑la̱ji̱n ꞌén ra̱kìi̱ ra ngajmi inchrabà‑nì, nga̱ ya̱á ta̱ña titsa̱jnako̱‑ji̱n jè Jesucristo ꞌkia̱ nga ko̱ꞌsín kjomà ya̱ a̱sònꞌnga‑la̱ nindo tsje.
\p
\v 19 Ti̱ꞌkoa̱á tíjnaá‑te‑ná ꞌén ra síkixi̱ya‑ná, ra kiìchja̱ jñà xi̱ta̱ ra kiìchja̱ya ngajo‑la̱ Nainá. ꞌÑó nda‑ni ꞌkia̱ nga ko̱ꞌsín nda i̱nchinìsin‑la jñà ꞌén kìi̱, ra ko̱ꞌsín jngoya‑la̱ koni jngo kandì ra síhisen ya̱ i̱ꞌnde ñánda̱ jñò chon, skanda ꞌkia̱ nga ijye nda ko̱tsíjen nga ko̱ ni̱chjin, ko̱ ko̱hisen‑jín ya̱ inìma̱‑najiòn koni tsa tjó kjòn jè nitse‑xó ra tjo ꞌkia̱ nga xa̱ya.
\v 20 Jè ra nda katasijin ítjòn‑najiòn, jé‑ní, nga ni̱jngo ꞌén ra tjíꞌta ya̱ xa̱jo̱n ñánda̱ nga tíchja̱ ꞌén‑la̱ Nainá, ra ta sko̱ xi̱ta̱ tsachrje‑nì ꞌkia̱ nga kisinda.
\v 21 Nga̱ ni̱jngo ꞌén‑la̱ Nainá ra kiìchja̱ya xi̱ta̱ kìi̱ ra ta kjo̱bítsjen ꞌtse̱ xi̱ta̱ inchrabà‑ni; jè sabá Inìma̱ Tsje‑la̱ Nainá kisìhichi̱yajin‑la̱ kjo̱bítsjen‑la̱ jñà xi̱ta̱ kìi̱ ꞌkia̱ nga ko̱ꞌsín kiìchja̱ya ngajo‑la̱ Nainá.
\c 2
\s Xi̱ta̱ ndiso ra bakón‑ya ꞌén‑la̱ Nainá ra mì tsa kixi̱ kjoa̱
\r (Judas 4‑13)
\p
\v 1 Tanga kiꞌseé‑te ya̱ a̱jin na̱xi̱ndá Israel xi̱ta̱ ra ta iskonda̱cha̱, ra mì tsa kixi̱ kjoa̱ nga jè Nainá kiìchja̱ya ngajo‑la̱; ꞌkoa̱á ti̱ꞌsín ꞌse̱‑te ya̱ a̱jin tsa̱jiòn, xi̱ta̱ ra ta sko̱ónda̱cha̱‑te ra ki̱tso̱ nga maá‑la̱ bakón‑ya ra a̱ꞌta ꞌtse̱ Nainá. Jñà xi̱ta̱ kìi̱, nda mí jcha̱‑la̱ kóꞌsín nga si̱ìkjahaꞌsen‑jin‑najiòn kjo̱bítsjen ra si̱ìkitsón‑no ra a̱ꞌta ꞌtse̱ Nainá. Ko̱ skanda ko̱chrjengií jñà xi̱ta̱ kìi̱ Na̱ꞌín‑ná ra tsikíchjítjì‑ná; tanga ꞌkia̱ nga ko̱ꞌsín ꞌsi̱in, ti̱jñá koa̱àtsji‑ni kjo̱hiꞌin ra ta ndi̱to̱ón si̱ìjchijajin ijo‑la̱.
\v 2 Kjín xi̱ta̱ ya̱ ki̱ji̱tji̱ngi‑la̱ nga ko̱ꞌsín ꞌsi̱in koni ꞌsín tjín kjoa̱ nañá ra ꞌsín; ko̱ ta jñá nga̱tjì‑la̱ jñà xi̱ta̱ ndiso kìi̱ nga̱ jè ra ndi̱yá kixi̱ ꞌchoó ki̱nákjoa̱jno‑la̱.
\v 3 Jñà xi̱ta̱ kìi̱, ta jé mejèn‑la̱ nga isa̱ tse tsajmì ꞌse̱‑la̱; ꞌkoa̱á ma‑ni nga ta tsò ta maá ꞌén ra bínda nga ma ko̱chrjekàjno‑no to̱n. Jñà xi̱ta̱ kìi̱, ti̱ꞌsa̱ kjotseé tíjnanda‑ni kjo̱hiꞌin ra ko̱ko̱‑la̱, ko̱ mì kì ma ko̱tojin kjo̱hiꞌin kìi̱.
\p
\v 4 Jè Nainá nda mí isìhijchaꞌta‑la̱ jñà ìkja̱li̱ ra tsakátsji‑jé; ta isa̱á ya̱á isìkatsajo ya̱ i̱ꞌnde ñánda̱ tjín kjo̱hiꞌin, ko̱ ya̱á isíkítsa̱jnaꞌñó ya̱ ñánda̱ jñò chon mé‑ni nga ya̱ katakoñá‑ni skanda ꞌkia̱ nga jè Nainá ki̱ìndajín‑la̱.
\v 5 Jè Nainá, ti̱ꞌkoa̱á skanda mí isìhijchaꞌta‑la̱ xi̱ta̱ i̱sàꞌnde ra kiꞌse kjotseé, ta isa̱á jngo jtsí xkón isìkasén‑nè ngaꞌtsì xi̱ta̱ ꞌcho ra tjín ꞌkia̱. Ta jé xi̱ta̱ ra tsiꞌkìn Noé isikatojin, jè ra kiìchja̱ya‑la̱ xi̱ta̱ kóꞌsín nga kixi̱ si̱ìjchá ijo‑la̱, ko̱ ngi ito xi̱ta̱ tsato‑isa ra a̱ꞌta ꞌtse̱ jtsí xkón.
\v 6 Nainá ti̱ꞌkoa̱á skanda isikjehesòn ijyeé‑te ngaꞌtsì xi̱ta̱‑la̱ na̱xi̱ndá Sodoma ko̱ na̱xi̱ndá Gomorra. Ngi ta chijoó kiꞌsìn‑isa, ꞌkoa̱á ꞌsín tsikíjna koni jngo xkósòn, mé‑ni nga kataꞌya‑la̱ kóꞌsín ko̱maꞌtin jñà xi̱ta̱ ra kondra̱ títsa̱hijyo‑la̱ Nainá.
\v 7 Tanga jè xi̱ta̱ ra tsiꞌkìn Lot ra xi̱ta̱ kixi̱ ya̱ ngixko̱n Nainá, isikatojiín kjo̱hiꞌin. Jè Lot ꞌñó ꞌcho kjomà‑la̱ koni ꞌsín ta ꞌcho isíjchá ijo‑la̱ xi̱ta̱ kìi̱.
\v 8 Nga̱ ya̱á tsikijnajin‑la̱ jñà xi̱ta̱ kìi̱ ra ꞌñó ꞌcho kiꞌsìn, tseé kjo̱hiꞌin isìkjiín ndí inìma̱‑la̱ nga ni̱chjin nchijòn, ta nga̱tjì‑la̱ jñà kjoa̱ ra ꞌñó ꞌcho tjín ra kijtse ko̱ ra kiíꞌnchré nga kiꞌta ni̱chjin.
\v 9 I̱í i̱jndíi̱ síchi̱ya‑ná nga jè Na̱ꞌín‑ná maá‑la̱ síkatojin kjoa̱ jñà xi̱ta̱ ra nda kjiꞌta ikon Nainá; ko̱ síkítsa̱jnandaá jñà xi̱ta̱ ra ꞌñó ꞌcho ꞌsín, mé‑ni nga tsjá‑la̱ kjo̱hiꞌin ꞌkia̱ nga ki̱jchò ni̱chjin nga si̱ndajín‑la̱ ngaꞌtsì xi̱ta̱.
\p
\v 10 Ko̱ jñá kjón tsjá ítjòn‑la̱ kjo̱hiꞌin, jñà xi̱ta̱ ra ꞌñó tsjake kjoa̱ ra faajin‑la̱ ijo‑la̱ ra ꞌñó tjé tjín ya̱ ngixko̱n Nainá ko̱ nga bachrjengi kjo̱téxoma ra tjín‑la̱ Nainá.
\p Jñà xi̱ta̱ ndiso kìi̱, batoó xi̱ta̱ táhijín ko̱ ni̱ ta mé ra sasén‑la̱; mì kì tsa tsakjón nga chja̱jno‑la̱ jñà ra títsa̱jna ítjòn ra tse ngaꞌñó tjín‑la̱, jñà ra mì kì tsijen‑ni.
\v 11 Skanda jñà ìkja̱li̱ ꞌtse̱ Nainá ra isa̱ tse ngaꞌñó tjín‑la̱ ko̱ isa̱ tse kjo̱téxoma tjín‑la̱, mì tsa ko̱ꞌsín chja̱jno‑la̱ ya̱ ngixko̱n Nainá jñà ra títsa̱jna ítjòn nga tse ngaꞌñó tjín‑la̱.
\p
\v 12 Tanga jñà xi̱ta̱ kìi̱, skanda chja̱jnoó‑la̱ jñà kjoa̱ ra mì kì fìya‑la̱. Mì kì síkítsjen kjoa̱ ra ꞌsín. ꞌKoa̱á ꞌsín ngoya‑la̱ koni tsa cho̱ ra xá ko̱ꞌsín kitsin‑ni nga ma ki̱nda̱ba̱ nga si̱ꞌken. Ko̱ ꞌkoa̱á ꞌsín ko̱maꞌtin koni jñà cho̱ nga ta ya̱á jchi̱jajin i̱sén.
\v 13 ꞌKoa̱á ti̱ꞌsín tjín kjo̱hiꞌin ra ꞌki̱‑la̱ koni ꞌsín tjín kjoa̱ꞌcho ra kisìko̱ xi̱ta̱ ra kjꞌií. Nga̱ ni̱ꞌsín ꞌkia̱ ni̱chjin ꞌñó matsja‑la̱ nga ko̱tjín kjoa̱ꞌcho ra ꞌsín ya̱ a̱jin‑la̱ xi̱ta̱. ꞌÑó tse kjo̱sabà‑ni jñà kjoa̱tjé ra ꞌsín ꞌkia̱ nga ya̱ síngásòn‑ko̱‑najiòn nga bíjna ꞌsí, nga̱ ya̱á sítsjako̱ ijo‑la̱ ko̱ kjoa̱ꞌcho ra bíndisoko̱‑no.
\p
\v 14 Tsa ꞌkia̱ jngo chjo̱ón be, ndi̱to̱ón faajin‑la̱; mì kì majngo ikon tsa mì koa̱àtsji‑jé; sasaá bíndisoko̱ ndí xi̱ta̱ ra mì ꞌñó tjín ikon; ngi ta jé mejèn tsje‑la̱ ta mé‑ni; xi̱ta̱ ra ko̱ꞌsín ꞌsío̱n, xá ꞌkoa̱á ꞌsín ꞌya‑ni nga kjo̱hiꞌin ska̱jin.
\v 15 Ijyeé kitsjin-tákon ra ndi̱yá kixi̱. Mì kì ti̱ be‑ni ñánda̱ tjíma, ya̱á i̱nchifìtji̱ngi koni ꞌsín kiꞌsìn jè xi̱ta̱ ra kiìchja̱ya ngajo‑la̱ Nainá ra tsiꞌkìn Balaam, ti‑la̱ xi̱ta̱ ra tsiꞌkìn Beor. Jè Balaam, jè ra ꞌñó kjotsjake to̱n ra mì tsa ko̱ kjo̱hixi̱‑la̱ isikijne.
\v 16 Ta nga̱tjì‑la̱ jè kjoa̱ꞌcho ra kiꞌsìn Balaam jaká‑la̱. Jngo burra ra mì ma‑la̱ chja̱, kiìchja̱‑la̱ koni ꞌsín chja̱ jngo xi̱ta̱; ko̱ ꞌkoa̱á ꞌsín kisatechjá‑la̱ kjoa̱ská ra tíꞌsín jè xi̱ta̱ ra̱kìi̱.
\p
\v 17 Jñà xi̱ta̱ ndiso kìi̱, ꞌkoa̱á ꞌsín ngoya‑la̱ koni jngo nga̱jo̱ nandá ra tsìn‑la̱ nandá, koni ifi jñò ra ꞌñó fiikó tjo̱. Ijyeé ko̱ꞌsín tjínè‑la̱ nga ya̱ si̱ìkjiín kjo̱hiꞌin skanda ta mé ni̱chjin‑ni ya̱ i̱ꞌnde ñánda̱ nga ꞌñó jñò chon.
\v 18 Ngi ta ꞌén ꞌnga ikoón chja̱ ra ni̱mé chjí‑la̱. Ko̱ jñà síchjeén kjoa̱ꞌcho ra sasén‑la̱ ijo‑la̱ nga bíndo̱cha̱‑la̱ jñà ndí xi̱ta̱ ra ꞌsa̱á bíꞌtsia̱ nga i̱nchibitjokajin‑la̱ xi̱ta̱ ra ꞌcho i̱nchisíjchá ijo‑la̱.
\v 19 ꞌKoa̱á ꞌsín tsò‑la̱ jñà ndí xi̱ta̱ ra bíndo̱cha̱‑la̱, nga si̱ìkítsa̱jnandi̱í‑ni a̱ꞌta ꞌtse̱ kjoa̱ ra ꞌcho tjín, tanga ra jñà, skanda mì kì ma bitjojin kjoa̱ꞌcho ra títsa̱jin. ꞌKia̱ nga jngo kjoa̱ síkijne‑la̱ xi̱ta̱, ya̱á tjíꞌtáꞌñó‑la̱.
\v 20 Tsa ijyeé itjojin jnchro kjoa̱ ꞌtse̱ jé ra tjín ya̱ i̱sàꞌnde, ꞌkia̱ nga kijtsexkon Jesucristo ra tíjna ítjòn‑ná ra ma‑la̱ bachrjekàjin‑ná kjo̱hiꞌin; tanga tsa ya̱ ska̱jin india‑ni kjoa̱ꞌcho ra tjín ya̱ i̱sàꞌnde, isa̱á ta ꞌcho ko̱maꞌtin india‑ni, nda mí ꞌkoa̱‑ni koni nga ꞌsa̱ ítjòn.
\v 21 Isa̱á‑la nda‑la̱ jñà xi̱ta̱ kìi̱ tsa mì kijtsexkon ndi̱yá kixi̱ ꞌtse̱ Nainá, nga̱ íꞌtsi̱ín kijì‑la̱ kjo̱téxoma tsje‑la̱ Nainá ra kiꞌtsì‑la̱ ꞌkia̱ nga ijye kijtsexkon.
\v 22 Tanga ꞌkoa̱á ꞌsín i̱nchimaꞌtin jñà xi̱ta̱ kìi̱, koni ꞌsín tsò ꞌén kixi̱ ra tsò: “Jè nañá, ti̱jé kjine india‑ni jè ndábisò‑la̱”, ko̱ jè ra tsò: “ꞌKia̱ nga ijye nikindòya jngo chi̱nga̱, indiaá ya̱ fikjajnajin india‑ni ya̱ ñánda̱ nga i̱jncha ndási.”
\c 3
\s ꞌKia̱ nga kjꞌi̱í india‑ni Na̱ꞌín‑ná Jesucristo
\p
\v 1 Ndí ꞌndsè ra ꞌñó matsjake̱‑no, jé xa̱jo̱n ra̱kìi̱ ra ma‑ni jò ra tíbindá‑no; ta ngajò xa̱jo̱n kìi̱, ꞌkoa̱á ꞌsín síkítsjen‑yá‑no nga jñà tiya skò kjo̱bítsjen ra kixi̱ tjín,
\v 2 mé‑ni nga ko̱ꞌsín si̱kítsjen‑yá‑najiòn jñà ꞌén ra tsakón‑ya nga ꞌsa̱ kjotseé jñà xi̱ta̱ tsje‑la̱ Nainá ra isìchjeén nga kiìchja̱ ngajo‑la̱, ko̱ jñà kjo̱téxoma ꞌtse̱ Na̱ꞌín‑ná ra tíjna ítjòn‑ná ko̱ ra tsachrjekàjin‑ná kjo̱hiꞌin koni ꞌsín nga kitsò‑no jñà xi̱ta̱‑la̱ ra jè tsikíxáya‑la̱.
\p
\v 3 Jé ra ꞌñó machjeén nga nda katasijin‑najiòn, ꞌkia̱ nga ko̱chraña nga kje̱heꞌtà ni̱chjin, ꞌse̱é xi̱ta̱ ra si̱itsjaꞌtin‑najiòn, ra ya̱ kítsa̱jin kjoa̱ꞌcho ra síjé ijo‑la̱;
\v 4 nga ki̱tso̱: “¿Ñánda̱ tíjna‑ni jñà ꞌén ra kitsò nga kjꞌi̱í india‑ni Cristo? Ijyeé ꞌken tsje‑ni xi̱ta̱ jchínga, ko̱ takó ꞌkoa̱á chon ꞌndi̱‑ni̱ koni ꞌsín chon skanda ꞌkia̱ nga ti̱ꞌsa̱ isinda i̱sàꞌnde.”
\v 5 Tanga jñà xi̱ta̱ kìi̱, ta xá ꞌkoa̱á ꞌsín síjchaàjin‑ni nga jè ngajmi tíjna‑ni skanda ti̱ꞌsa̱ kjotseé, ko̱ jè nangi a̱ꞌta ꞌtse̱é nandá inchrabàꞌta‑ni ko̱ ya̱á tsatsíjen ya̱ a̱jin nandá koni ꞌsín tsò ꞌén ra kiìchja̱ Nainá.
\v 6 Ko̱ ti̱jé‑ni ꞌén ra kiìchja̱ Nainá ra ko̱ꞌsín kiꞌsìn nga nandá kisìkjehesòn jñà xi̱ta̱ ra tjín jè i̱sàꞌnde ra tíjna ni̱chjin ꞌkia̱.
\v 7 Jè ꞌén ra kitsjà Nainá, ꞌkoa̱á ꞌsín tsò‑te nga jè ngajmi ko̱ nangi ra tjín ꞌndi̱ ꞌndi̱, ꞌkoa̱á ꞌsín ijye tjítsa̱jnanda mé‑ni nga ki̱ti̱‑ni ꞌkia̱ nga ki̱jchò ni̱chjin nga si̱ndajín‑la̱ ngaꞌtsì xi̱ta̱ i̱sàꞌnde ko̱ ti̱ꞌkoa̱ kje̱hesòn ijye ngaꞌtsì xi̱ta̱ ra mì kì bexkón Nainá.
\p
\v 8 Jiòn ndí ꞌndsé ra tsjake̱‑no, kì niìjchaàjin jiòn kjoa̱ kìi̱: Nga̱ jè Na̱ꞌín‑ná, ra jngo ni̱chjin, ꞌkoa̱á ꞌsín tsò‑la̱ koni tsa jngo jmi nó tjín‑ni; ko̱ jè ra jngo jmi nó, ꞌkoa̱á ꞌsín tsò‑la̱ koni tsa jngo ni̱chjin tjín‑ni.
\v 9 Mì tsa tsò‑ni kjoa̱ nga jè Na̱ꞌín‑ná ijyeé tífichjin‑la̱ nga mì kì tísíhitjasòn jè ꞌén‑la̱ ra ijye kitsjà koni ꞌsín tsò iꞌka xi̱ta̱; jé‑ní nga batoó tse inìma̱‑la̱ Na̱ꞌín‑ná nga tíkoñákjoa̱‑ní ra a̱ꞌta tsa̱jiòn; majìn‑la̱ nga ni̱jngo xi̱ta̱ jchi̱ja, jé mejèn‑la̱ nga ngaꞌtsì xi̱ta̱ katasíkájno‑ni jé‑la̱ nga kátáfaꞌta‑la̱ Nainá.
\p
\v 10 Tanga jè ni̱chjin‑la̱ Na̱ꞌín‑ná, ꞌkoa̱á ꞌsín kjꞌi̱í koni ꞌsín ꞌfiì jngo jè ra xi̱ta̱ chijé. ꞌKia̱ nga ki̱jchò ni̱chjin, jè ngajmi ta indaá jchi̱ja ko̱ taxki̱ ꞌchoó ki̱náꞌya‑la̱ koni ꞌsín nga ko̱ma. Jñà nitse, jè tsáꞌbí, ko̱ jè sá ngi ta niꞌí ko̱nandá‑ni. Ko̱ jè nangi ko̱ ta mé‑isa‑nioo̱ ra tjín a̱ꞌta nangi, jngo ꞌká jti̱.
\p
\v 11 Nga̱ xá ꞌkoa̱á ꞌsín tjínè‑la̱ nga kje̱hesòn ngaꞌtsì tsajmì ra tjín. ¿A mí tsa tjínè‑la̱ nga isa̱ tsje si̱jchá jiòn ijo‑no?, ko̱ ti̱ꞌkoa̱ isa̱ nda jcha̱xkón jiòn Nainá nga ni̱chjin nchijòn,
\v 12 nga jchíña‑la nga kjꞌi̱í jè ni̱chjin ꞌtse̱ Nainá; ko̱ ko̱ꞌsín kínè‑la ijo‑no nga isa̱ ndi̱to̱n kjꞌi̱í jè ni̱chjin ra kìi̱, ꞌkia̱ nga jè ngajmi, jngo kjá ta ya̱á jchi̱ja nga ki̱ti̱; ko̱ ngaꞌtsì tsajmì ra tjín i̱sàꞌnde, jngo kjá ta ya̱á ko̱nandá nga ki̱ti̱.
\v 13 Tanga ra jién, ijyeé ko̱ꞌsín chiñá‑lá jè ꞌén ra ijye kitsjá‑ná Nainá; nga jngoó ngajmi xi̱tse̱ ko̱ jngo nangi xi̱tse̱ tíjnanda‑ná ra jién, ya̱ ñánda̱ nga ngi ta kjo̱kixi̱í ra ꞌse̱.
\p
\v 14 ꞌKoa̱á ma‑ni jiòn ndí ꞌndsé ra ꞌñó tsjake̱‑no, tsa ijyeé ko̱ꞌsín i̱nchichiñá‑la jñà kjo̱nda kìi̱, ꞌti̱ ngaꞌñó‑la ijo‑no nga ꞌnchán ti̱tsa̱jna ko̱ tsje ti̱tsa̱jna mé‑ni nga ni̱mé jé titsa̱jin‑no ꞌkia̱ nga kjꞌi̱í india‑ni Jesucristo.
\v 15 ꞌKoa̱á ꞌsín nda katasijin‑no, nga koni ꞌsín tíkoñákjoa̱ jè Na̱ꞌín‑ná, kií‑ní nga mejèn‑la̱ nga ngaꞌtsì xi̱ta̱ katitjokàjin kjo̱hiꞌin. ꞌKoa̱á ꞌsín ijye tsikínda‑te‑no xa̱jo̱n jè ꞌndsé Pablo ra ꞌñó matsjacheé, koni ꞌsín jè Nainá kitsjà‑la̱ kjoa̱chji̱ne̱.
\v 16 Kja̱meé ta ngaꞌtsì xa̱jo̱n ra tsikínda jè ꞌndsé Pablo ko̱ꞌsín tíchja̱ ra a̱ꞌta ꞌtse̱ kjoa̱ kìi̱. Ko̱ tjín iꞌka ya̱ ñánda̱ nga ꞌñó iꞌin tíchja̱, ko̱ jñà xi̱ta̱ ra kjè mé be kjin, ko̱ jñà ra mì tsa jngo tjín kjo̱bítsjen‑la̱ síkaatjìyaá‑la̱ koni ꞌsín nga fìya‑la̱. Ko̱ ꞌkoa̱á ti̱ꞌsín síko̱ ta ñáa̱‑isa xa̱jo̱n‑la̱ Nainá. ꞌKia̱ nga ko̱ꞌsín ꞌsín, ti̱jñá i̱nchisíjchija‑ni ijo‑la̱.
\s ꞌÉn ra feheꞌta‑ni
\p
\v 17 ꞌKoa̱á ma‑ni jiòn ndí ꞌndsé ra ꞌñó tsjake̱‑no, ꞌkia̱ nga ijye tjíjin‑no ra a̱ꞌta ꞌtse̱ kjoa̱ kìi̱, nda ti̱kinda̱a ijo‑no, mé‑ni nga mì ya̱ ki̱ìꞌndo̱‑no nga ya̱ i̱ko̱‑no ndi̱yá ndiso‑la̱ jñà xi̱ta̱ ra ꞌñó ꞌcho tjín kjoa̱ ra ꞌsín. Ko̱ tsa ya̱ ska̱jiòn kjoa̱ ndiso‑la̱, si̱jchija‑no koni ꞌsín nga kixi̱ tincha a̱ꞌta ꞌtse̱ Nainá.
\v 18 Ya̱á isa̱ nda katajchájin jiòn a̱ꞌta ꞌtse̱ kjo̱bítsjen ko̱ kjo̱nda ra tsjá‑no jè Jesucristo ra tíjna ítjòn‑ná ko̱ ra bachrjekàjin‑ná kjo̱hiꞌin. Ko̱ꞌsín jeya katijna ra jè, ꞌndi̱ ꞌndi̱ ko̱ skanda ta mé ni̱chjin‑nioo̱. Ko̱ꞌsín katama.