\id 2PE
\h 2 Pedro
\toc1 2 Pedro
\mt Xo̱jo̱n carta xi ma‑ne jò xi kiskiì San Pedro
\c 1
\s Kó tsò Pedro nga síhixatꞌaà xi̱ta̱
\p
\v 1 ꞌA̱n, xi Simón Pedro ꞌmì‑na̱, nga ꞌa̱n xi chi̱ꞌnda‑la̱ Jesucristo ma, ko̱ nga ti̱koa̱ ꞌa̱n tsibíxáya‑na̱, tìsìkasén‑nò xo̱jo̱n jè, jñò xi ngásòn ꞌñó ndaà mokjeiín‑nò koni sꞌín mokjeiín‑naje̱n; nga xi̱ta̱ kixi̱‑né jè Jesucristo xi Nainá ma ko̱ xi ochrjekàjiìn‑ná kjo̱ꞌin.
\v 2 Koni sꞌín nga ìsa̱ ndaà titsa̱yaxkon Nainá ko̱ jè Jesucristo xi otíxoma‑ná, kꞌoa̱á sꞌín ìsa̱ ndaà kàtasakó‑nò kjo̱ndaà ko̱ kjoa̱ꞌnchán ya̱ i̱jiìn ini̱ma̱‑nò.
\s Mé xi mochjeén nga sꞌe̱én nga ndaà jcha̱xkoán Nainá
\p
\v 3 Jè ngaꞌñó‑la̱ Nainá tsjá yije‑ná xi mochjeén‑ná nga titsa̱jnakoaán ko̱ nga ndaà yaxkoán Nainá. Koií kjoa̱‑la̱ nga tsjá‑ná ngatsꞌiì kjo̱ndaà koi nga yaxkoaán jè xi ko̱ kjoa̱jeya‑la̱ ko̱ ngaꞌñó tsjeè‑la̱ kiìchja̱‑ná.
\v 4 I̱tꞌaà tsꞌe̱ kjoa̱ koi, kitsjaà‑ná kjoa̱ xi ꞌñó ndaà tjín ko̱ xi ꞌñó tse chjí‑la̱ koni sꞌín kitsjaà tsoꞌba Nainá, mé‑ne nga ti̱koa̱ ko̱ko̱tꞌaà‑ná nga kꞌoa̱sꞌín sꞌe̱én koni sꞌín sꞌín Nainá nga jye chinchatꞌaàxìn‑là kjoa̱ xi chꞌo síjé yijo‑ná i̱ i̱sòꞌnde xi ta síkitsꞌón‑ná.
\v 5 Kꞌoa̱á ma‑ne, ꞌñó tìnè‑là yijo‑nò jñà kjoa̱ koi. Koni sꞌín nga mokjeiín‑nò i̱tꞌaà tsꞌe̱ Cristo, kꞌoa̱á ti̱sꞌín mochjeén‑né nga ndaà xi̱ta̱ kàtama jñò. Nga jye ndaà xi̱ta̱ ma, ti̱koa̱ mochjeén‑né nga kàtasꞌe‑nò xi kjoa̱ chji̱ne̱.
\v 6 Nga jye tjín‑nò kjoa̱ chji̱ne̱, ti̱koa̱á mochjeén‑né nga kixi̱ tatìxoma‑là yijo‑nò. Ko̱ nga jye kixi̱ otíxoma‑là yijo‑nò ti̱koa̱ mochjeén‑né nga sꞌe̱‑nò kjoa̱tsejta. Ko̱ nga jye tjín‑nò kjoa̱tsejta, ti̱koa̱á mochjeén‑né nga nguì ndaà cha̱xkón Nainá.
\v 7 Nga jye ndaà yaxkón Nainá, ti̱koa̱ mochjeén‑né nga ndaà ti̱tsjacha xinguio̱o. Ko̱ nga jye ndaà matsjacha xinguio̱o, ti̱koa̱á mochjeén‑né nga nguì ndaà ti̱tsjacha ngatsꞌiì xi̱ta̱ xi kjꞌei̱í.
\p
\v 8 Jñò, tsà tjín‑nò kjo̱ndaà koi, ko̱ tsà kjitꞌaà na̱chrjein tíkꞌaasòn‑nò, mì jyò ki̱tsa̱jnaà; nguì ndaà ko̱chjeén‑nò nga ìsa̱á ndaà jcha̱xkoòn Jesucristo xi otíxoma‑ná.
\v 9 Ta̱nga tsà tjín iꞌnga xi tsjìn‑la̱ kjo̱ndaà koi, kꞌoa̱á ngaya‑la̱ koni xi̱ta̱ xka̱n xi mìkiì ndaà tsejèn‑la̱; jyeé kijchàajiìn‑la̱ nga Nainá jye kisìjchàatꞌaà‑la̱ jé xi kisꞌe‑la̱ nga sa̱ ítjòn.
\v 10 Kꞌoa̱á ma‑ne, jñò, ndí ꞌndsè, ìsa̱ ꞌñó tjiì‑là ngaꞌñó yijo‑nò nga ti̱kixi̱yaà kjoa̱ nga Nainá xó kꞌoa̱á sꞌín kiìchja̱‑nò ko̱ jaàjiìn‑nò. Tsà kꞌoa̱sꞌín sꞌe̱en kjitꞌaà, ni̱mé jé ska̱jñoò.
\v 11 Nga kꞌoa̱á sꞌín ko̱ma nga táxꞌa̱ꞌnde‑nò nga ki̱tjásꞌe̱en ñánda tíhotíxoma ni̱ta̱ kjé‑ne jè Jesucristo xi ochrjekàjiìn‑ná kjo̱ꞌin ko̱ xi otíxoma‑ná.
\p
\v 12 Koií kjoa̱‑la̱ kjitꞌaà na̱chrjein sìkítsjeèn yije‑nò kjoa̱ koi, na̱sꞌín jye ma‑nò ko̱ jye kixi̱ titsa̱jnako̱o jè kjoa̱kixi̱‑la̱ Nainá koni sꞌín mokjeiín‑nò na̱chrjein i̱ꞌndei̱.
\v 13 Kꞌe̱ nga tákó tìjna̱kon‑ìsa i̱ i̱sòꞌnde jè, mochjeén‑né nga síkítsjeèn‑nò nga ko̱sꞌín ti̱jchá yijo‑nò.
\v 14 Jè Jesucristo xi otíxoma‑ná jyeé kꞌoa̱sꞌín kitsò‑na nga jyeé kjòchrañàtꞌaà nga kjoe̱hetꞌaà na̱chrjein‑na̱.
\v 15 Ti̱koa̱á ꞌa̱n tìbìnè‑la̱ yijo‑na̱ nga tísíkítsjeèn‑nò mé‑ne kꞌe̱ nga ꞌa̱n xi jye ki̱yá, nga na̱chrjein nchijòn kꞌoa̱á sꞌín ti̱kítsjeèn kjoa̱ koi.
\s Ñánda jꞌiì‑ne ꞌén xi tjítꞌaà Xo̱jo̱n‑la̱ Nainá
\p
\v 16 Nga mìtsà ta cuento xi ta xi̱ta̱ kisìkítsjeèn koni sꞌín tsibeno̱jmí‑nòje̱n kó kji ngaꞌñó kisꞌe‑la̱ Na̱ꞌèn‑ná Jesucristo ko̱ nga kjoi̱í ìjngoò kꞌa. Nga xko̱ón kiꞌya‑naje̱n kjoa̱jeya‑la̱ nga ꞌñó tse ngaꞌñó tjín‑la̱.
\v 17 Kiꞌya‑náje̱n kꞌe̱ jè Nainá xi Na̱ꞌèn‑ná nga jeya ko̱ ꞌnga kisìkíjna Jesucristo. Kinaꞌyà‑la̱ ya̱ i̱jiìn i̱sén ñánda ꞌñó ote kji ꞌén xi kitsò: “Jè jèe̱ xi kiꞌndí‑na̱ xi ꞌñó matsjake̱ nga xó ꞌa̱n jaàjiìn‑na.”
\v 18 Ngaje̱n sobà kinaꞌyà‑la̱je̱n jñà ꞌén xi ngajmiì inchrobà‑ne kꞌe̱ nga titsa̱jnako̱‑je̱n Jesucristo ya̱ i̱sòꞌnga nindoò tsjeè‑la̱.
\p
\v 19 Nga yije kjoa̱ koi, kꞌoa̱á sꞌín ìsa̱ ndaà makixi̱ya koni sꞌín kiìchja̱ jñà xi̱ta̱ xi kiìchja̱ ngajo‑la̱ Nainá. ꞌÑó ndaà ꞌnè nga naꞌyà‑la̱ ꞌén koi. Kꞌoa̱á sꞌín ngaya‑la̱ koni jngoò niꞌín xi síhiseèn ya̱ i̱ꞌnde ñánda jñò choòn skanda kꞌe̱ nga sꞌe̱ i̱sén, i̱kjoàn síhiseèn‑jiìn ini̱ma̱‑ná koni jè niꞌño tse.
\v 20 Ítjòn kꞌoa̱ sꞌín ndaà kàtasijiìn‑nò, jñà ꞌén xi tjítꞌaà Xo̱jo̱n‑la̱ Nainá, mìtsà ta jngoò xi̱ta̱ kitsjaà kjo̱hítsjeèn‑la̱ nga kitjei.
\v 21 Nga jñà xi̱ta̱ xi kiìchja̱ ngajo‑la̱ Nainá, ni̱jngoò ꞌén xi ta̱ kjo̱hítsjeèn tsꞌe̱ nga kiìchja̱ya. Jé Ini̱ma̱ Tsjeè‑la̱ Nainá kisìkichi̱ya‑la̱ kjo̱hítsjeèn‑la̱ xi̱ta̱ koi nga komà kiìchja̱ya ꞌén‑la̱ Nainá.
\c 2
\s Xi̱ta̱ ndiso xi okóya ꞌén xi mìtsà kixi̱ kjoa̱
\r (Judas 4‑13)
\p
\v 1 Ya̱ i̱jiìn na̱xa̱ndá Israel kisꞌe xi̱ta̱ ndiso xi kitsò nga ꞌén‑la̱ Nainá kiìchja̱ya, ta̱nga mìtsà kixi̱ kjoa̱. I̱tꞌaà tsa̱jòn, kꞌoa̱á ti̱sꞌín sꞌe̱ xi̱ta̱ ndiso xi ko̱kòyaꞌma kjo̱hítsjeèn xi síkitsꞌón‑jiìn‑la̱ xi̱ta̱ na̱xa̱ndá‑la̱ Nainá, skanda ko̱chrjengui jè Na̱ꞌèn‑ná xi tsibíchjítjì‑ná. Kꞌoa̱á ma‑ne nga jñà xi̱ta̱ koi, ti̱jñà nchihótsji‑la̱ kjoa̱biyaà yijo‑la̱ nga ta ni̱to̱ón jchi̱ja.
\v 2 ꞌÑó kjìn xi̱ta̱ kji̱tji̱ngui‑la̱ nga kꞌoa̱sꞌín sꞌi̱in kjoa̱ xi ꞌñó chꞌo tjín. Koií kjoa̱‑la̱ xi̱ta̱ ndiso koi, nga chꞌo ki̱náꞌya‑la̱ kjoa̱ tsꞌe̱ ndi̱yá kixi̱.
\v 3 Jñà xi̱ta̱ ndiso koi, ta to̱ón tse mejèn‑la̱; ko̱chrjekájno‑nò to̱n nga skóna̱cha̱n‑nò nga ko̱kòya‑nò ꞌén ndiso. Nainá, jyeé kjòtseé tjíndaà‑la̱ nga tsjá‑la̱ kjo̱ꞌin ko̱ mìkiì ko̱jno‑la̱ kjo̱ꞌin xi sꞌe̱‑la̱.
\p
\v 4 Nga Nainá mìkiì kisìjchàatꞌaà‑la̱ jñà àkja̱le̱ xi tsohótsji jé. Ján kiskinìjiìn i̱ꞌnde kjo̱ꞌin ñánda títì niꞌín. Naꞌñó ki̱cha̱ cadena tsibítꞌaàꞌñó. Ya̱á kisìkítsa̱jnaya nga̱jo̱ ñánda jñò choòn, skanda jè na̱chrjein kꞌe̱ nga si̱ndaàjiìn.
\v 5 Nainá, ti̱koa̱á mìkiì kisìjchàatꞌaà‑la̱ i̱sòꞌnde xi kisijna kjòtseé; kisìkasén jtsí xkón xi kisìkjehesòn yije xi̱ta̱ xi kisꞌe na̱chrjein koi. Tà jè Noé kisìjchàatꞌaà‑la̱, koi kjoa̱‑la̱ nga ꞌén kixi̱ kiìchja̱yajiìn‑la̱ xi̱ta̱, ko̱ itoò xi̱ta̱ xíkjín tsiningui‑ne.
\v 6 Nainá ti̱koa̱á kisìkjehesòn yije xi̱ta̱ tsꞌe̱ na̱xa̱ndá Sodoma ko̱ Gomorra. Jngoò kꞌaá tsaká, ta chijo kisinchaà. Kꞌoa̱á sꞌín tsibíjna jngoò‑la̱ chi̱ba̱ nga kꞌoa̱á ti̱sꞌín ko̱matꞌin jñà xi̱ta̱ xi kondra̱ títsa̱jna‑la̱ Nainá.
\v 7 Ta̱nga jè Lot nga xi̱ta̱ kixi̱, itjokàjiìn kjo̱ꞌin. ꞌÑó chꞌo komà‑la̱ kjoa̱ tsꞌe̱ jé xi nchisꞌín jñà xi̱ta̱ na̱xa̱ndá koi.
\v 8 Xi̱ta̱ jè nga xi̱ta̱ kixi̱‑né, nga ya̱ tíjnajiìn‑la̱ jñà xi̱ta̱ koi nga chꞌo nchisꞌín, kjo̱ꞌiín tísíkjeiín nga ꞌon ma‑la̱ ini̱ma̱‑la̱ nga na̱chrjein nchijòn beè koa̱ ꞌnchré‑la̱ kjoa̱ xi chꞌo nchisꞌín xi̱ta̱ koi.
\v 9 Ya̱á tíꞌya‑la̱ nga jè Na̱ꞌèn‑ná osìko̱‑né jñà xi̱ta̱ xi beèxkón nga síkítsa̱jnandei̱í mé kjoa̱ xi tjín‑la̱, ti̱koa̱ síkítsa̱jnaꞌñó‑né jñà xi̱ta̱ xi chꞌo sꞌín nga tsjá‑la̱ kjo̱ꞌin jè na̱chrjein kꞌe̱ nga si̱ndaàjiìn.
\p
\v 10 Jñà títsa̱jna ítjòn nga sꞌe̱‑la̱ kjo̱ꞌin jñà xi̱ta̱ xi ꞌñó fìtji̱ngui‑la̱ kjoa̱ chꞌo xi síjé yijo‑la̱ ko̱ jñà xi ochrjekàngui kjo̱tíxoma‑la̱ Nainá.
\p Jñà xi̱ta̱ ndiso koi, xi̱ta̱ tájaàjiìn nga ꞌñó ꞌnga ikon. Mìkiì tsakjón nga chja̱jno‑la̱ jñà ngaꞌñó xi mìkiì tsejèn.
\v 11 Jñà àkja̱le̱, na̱sꞌín ìsa̱ tse ngaꞌñó tjín‑la̱ koa̱ tjín‑la̱ kjo̱tíxoma, mì kꞌoa̱á sꞌín chja̱jno‑la̱ ngaꞌñó xi mìkiì tsejèn nga nguixko̱n Na̱ꞌèn‑ná.
\p
\v 12 Jñà xi̱ta̱ koi, chja̱jnoó‑la̱ kjoa̱ xi mìkiì fìya‑la̱. Kꞌoa̱á sꞌín ngaya‑la̱ koni cho̱ xi mìkiì síkítsjeèn nga tà xó kꞌoa̱á sꞌín kitsꞌiìn‑ne nga ki̱ndo̱ba̱ꞌñó i̱kjoàn si̱kꞌen. Xi̱ta̱ koi, ya̱á ki̱yájiìn kjoa̱ tsꞌe̱ jé‑la̱.
\v 13 Koií kjo̱ꞌin tjoé ngajo‑la̱ koni tjín kjo̱ꞌin xi kitsjaà‑la̱ xi̱ta̱ xi kjꞌei̱í. Jñà xi̱ta̱ koi, na̱sꞌín na̱chrjein, tsjaá ma‑la̱ nga sꞌín kjoa̱ xi ꞌñó chꞌo tjín. Kꞌe̱ nga jñà xi̱ta̱ koi, báhijtako̱‑nò tsà sꞌeí tjín‑nò, síkitsꞌón‑jiìn‑né nga sísobà‑nò nga chꞌo tjín kjoa̱ xi sꞌín.
\p
\v 14 Kꞌe̱ nga beèxkon jngoò chjo̱ón, ni̱to̱ón fahajiìn‑la̱ ko̱ mìkiì ma síkíjna kjoa̱ tsꞌe̱ jé. Kona̱cha̱n‑la̱ xi̱ta̱ xi mì kixi̱í tjín kjo̱hítsjeèn‑la̱. Ini̱ma̱‑la̱, kjitꞌaà na̱chrjein tjín mé xi mejèn‑la̱. Xi̱ta̱ koi, tjínè‑la̱ nga kjo̱ꞌin tjoé‑la̱.
\v 15 Jyeé kisìkíjna ndi̱yá kixi̱. Jè fìtji̱ngui‑la̱ ndi̱yá xi chꞌo tjín, jè ndi̱yá tsꞌe̱ Balaam, kiꞌndí‑la̱ Beor, jè xi ꞌñó kjòtsjakeè to̱n nga mejèn‑la̱ sꞌi̱in kjoa̱ xi mìtsà kixi̱ tjín.
\v 16 Ta̱nga tsaká‑la̱ kjoa̱ tsꞌe̱ jé‑la̱. Jngoò búrró chjo̱ón xi mìkiì ma‑la̱ chja̱, kiìchja̱‑la̱ koni tsà xi̱ta̱; mìkiì kitsjáꞌnde‑la̱ nga kiìko̱‑ìsa kjoa̱ská‑la̱.
\p
\v 17 Jñà xi̱ta̱ ndiso koi, kꞌoa̱á sꞌín ngaya‑la̱ koni nga̱jo̱ nandá xi tsjìn‑la̱ nandá, koni ifi xi nìmé jtsí fìko̱, ni̱to̱ón fìko̱ tjo̱. Kꞌoa̱á sꞌín tjínè‑la̱ nga ya̱ kítsa̱jnajiìn i̱ꞌnde jñò tsꞌe̱ kjo̱ꞌin ni̱ta̱ mé na̱chrjein‑ne.
\v 18 Nguì ꞌén ꞌngaá chja̱ xi ni̱mé chjí‑la̱. ꞌÑó ꞌnga ikon nga síchjeén kjoa̱chꞌo xi sasén‑la̱ yijo‑la̱ nga kona̱cha̱n‑la̱ jñà xi̱ta̱ xi sa̱ nchibinchatꞌaàxìn‑la̱ jñà xi̱ta̱ xi chꞌo nchisíjchá yijo‑la̱.
\v 19 Kꞌoa̱á tsò‑la̱ jñà xi̱ta̱ nga kítsa̱jnandei̱í, ta̱nga ti̱jñà‑ne ti̱koa̱á ya̱á títsa̱jnajiìnꞌñó kjoa̱chꞌo‑la̱. Kꞌe̱ nga jngoò xi̱ta̱ xi bíjnajiìnꞌñó jngoò kjoa̱, jè kjoa̱ jè tjín‑la̱ ngaꞌñó nga jè otíxoma‑la̱.
\v 20 Jñà xi̱ta̱ xi jye kijtseèxkon Jesucristo xi otíxoma‑ná, nga jè tsachrjekàjiìn kjo̱ꞌin, nga jye chinchatꞌaàxìn‑la̱ kjoa̱ chꞌo‑la̱ i̱sòꞌnde, tsà ìjngoò kꞌa kꞌoa̱sꞌín sꞌi̱in, tsà si̱ìkijne ìjngoò kꞌa‑la̱ kjoa̱ xi chꞌo tjín, nga ko̱ma i̱skan, ìsa̱á chꞌo ko̱matꞌin mì kꞌoa̱‑ne kꞌe̱ nga sa̱ ítjòn.
\v 21 Ìsa̱á‑la ndaà tjín tsà mìkiì kijtseèxkon ndi̱yá kixi̱‑la̱ Cristo, mì kꞌoa̱‑ne nga jye chinchatꞌaàxìn‑la̱ kjo̱tíxoma tsjeè‑la̱ Nainá xi jye kitjoé‑la̱.
\v 22 Xi̱ta̱ koi, kꞌoa̱á sꞌín kisꞌiìn koni tsò ꞌén xi tíjna‑la̱ xi̱ta̱ xi tjín‑la̱ kjoa̱chji̱ne̱ nga tsò: “Nañá, ti̱jè kine ìjngoò kꞌa‑ne ndábisò‑la̱” koa̱: “Jè chi̱nga̱ kꞌe̱ nga jye ongáya, ìjngoò kꞌa ongáyajiìn‑ne ndási.”
\c 3
\s Kꞌe̱ nga kjoi̱í ìjngoò kꞌa Na̱ꞌèn‑ná Jesucristo
\p
\v 1 Ndí ꞌndsè xi ꞌñó matsjake̱‑nò, xo̱jo̱n jè, jè xi ma‑ne jò nga tìkjiì‑nò. Ingajò xo̱jo̱n koi, kꞌoa̱á sꞌín bìnè‑nò nga si̱kítsjeèn kjoa̱ xi nguì kixi̱ tjín;
\v 2 mé‑ne nga si̱kítsjeèn‑nò jñà ꞌén xi kjòtseé tsakóya xi̱ta̱ tsjeè‑la̱ Nainá xi kiìchja̱ ngajo‑la̱. Ti̱koa̱ si̱kítsjeèn kjo̱tíxoma‑la̱ Na̱ꞌèn‑ná Jesucristo xi tsachrjekàjiìn‑ná kjo̱ꞌin koni sꞌín tsakóya‑nò jñà xi̱ta̱ xi tsibíxáya‑la̱.
\p
\v 3 Jè xi ꞌñó mochjeén nga ndaà kàtasijiìn‑nò, jñà na̱chrjein xi sa̱ nchrobá nga jyeé tífehetꞌaà na̱chrjein, kjoi̱í xi̱ta̱ xi si̱ìsobà‑nò tsꞌe̱ kjoa̱ kixi̱; ya̱á ko̱jchájiìn kjoa̱chꞌo xi síjé yijo‑la̱.
\v 4 Sko̱nangui, ki̱tso̱‑nò: “Na̱chrjein i̱ꞌndei̱, ¿mé‑ne mì tíbitasòn‑ne ꞌén xi tíjna xi tsò nga kjoi̱í ìjngoò kꞌa Cristo? Jyeé kjòtseé kꞌen xi̱ta̱ jchínga‑ná, tákó kꞌoa̱á choòn skanda kóni nga kisindaà i̱sòꞌnde.”
\v 5 Jñà xi̱ta̱ xi kꞌoa̱ tsò, xó kꞌoa̱á sꞌín‑ne nga síjchàajiìn nga jñà ꞌén xi kiìchja̱ Nainá na̱chrjein kjòtseé, jñà kisindaà‑ne ngajmiì ko̱ nangui. Ti̱jè‑ne nandá inchrobàtꞌaà‑ne ko̱ ti̱jè tíjnakon‑ne.
\v 6 Xi komà i̱skan, ti̱jè‑ne ꞌén‑la̱ Nainá ko̱ nandá kisìkje‑ne i̱sòꞌnde jchínga kꞌe̱ nga tsangasòn nandá.
\v 7 Ti̱ jé‑ne ꞌén xi kitsjaà Nainá kꞌoa̱á sꞌín tíchja̱ nga jè ngajmiì ko̱ nangui ñánda titsa̱jnasoán na̱chrjein i̱ꞌndei̱, títsa̱jnandaà‑la̱ mé‑ne nga ki̱ti̱‑ne jè na̱chrjein kꞌe̱ nga si̱ndaàjiìn‑la̱ xi̱ta̱ ti̱koa̱ kjoe̱hesòn jñà xi̱ta̱ xi mìkiì beèxkón Nainá.
\p
\v 8 Jñò ndí ꞌndsè xi matsjake̱‑nò kì nìjchàajiìn‑jèn kjoa̱ koi: xi i̱tꞌaà tsꞌe̱ Nainá, jngoò na̱chrjein kꞌoa̱á ngaya‑la̱ koni tsà jngoò jmiì nó tjín‑ne, koa̱ jngoò jmiì nó, Nainá, jngoò na̱chrjein tsò‑la̱.
\v 9 Na̱ꞌèn‑ná mìtsà tísíkichrjein nga si̱ìkitasòn ꞌén‑la̱ koni tsò iꞌnga xi̱ta̱; tíkoña kjoa̱á‑nò Nainá; jè xi mejèn‑la̱ nga ni̱jngoò xi̱ta̱ jchi̱ja, nga kàtasíkájno jé‑la̱ nga mì ti̱ jé ko̱hótsji‑ne.
\p
\v 10 Ta̱nga jè na̱chrjein‑la̱ Nainá, kꞌoa̱á sꞌín kjoi̱í koni sꞌín fꞌiì xi̱ta̱ chijé. Ngajmiì, jngoò kꞌaá jchi̱ja kꞌe̱ nga ki̱náꞌya‑la̱ nga chꞌo jchán kjo̱ne. Jè tsꞌoí, sá ko̱ niꞌño ki̱ti̱‑ne. Jè nangui ko̱ ni̱ta̱ mé xi tjín i̱ i̱tꞌaà nangui, jngoò kꞌaá ki̱ti̱.
\p
\v 11 Koni sꞌín ko̱ma nga jchi̱ja ngatsꞌiì tsojmì xi tjín, ꞌñó mochjeén nga tsjeè si̱jchá yijo‑nò koni sꞌín síjé Nainá,
\v 12 ko̱ nga chíñakjoa̱‑là jè na̱chrjein kꞌe̱ nga kjoi̱í Nainá. Ti̱xátíya‑là na̱chrjein jè. Ko̱ ngatsꞌiì tsojmì xi tjín i̱sòꞌnde ko̱ ngajmiì, jngoò kꞌaá ko̱ngandá nga ki̱ti̱.
\v 13 Ta̱nga i̱tꞌaà tsa̱ján, jè titsa̱chiñá‑lá ngajmiì xi̱tse̱ ko̱ nangui xi̱tse̱ koni sꞌín kitsjaà tsoꞌba Nainá, ya̱ ñánda sꞌe̱ kjoa̱ kixi̱ ko̱ kjo̱ndaà.
\p
\v 14 Koií kjoa̱‑la̱ jñò ndí ꞌndsè xi matsjake̱‑nò, nga kꞌoa̱ tjín kjoa̱ xi titsa̱chiñà‑là, tjiì‑là ngaꞌñó yijo‑nò, mé‑ne kꞌe̱ nga kjoi̱í ìjngoò kꞌa Jesucristo, kꞌoa̱á sꞌín sa̱kòtꞌaà‑nò nga ꞌnchán ki̱tsa̱jnaà nga tsjeè titsa̱nìjchá yijo‑nò ko̱ ni̱mé jé tjín‑nò.
\v 15 Kꞌoa̱á sꞌín kàtasijiìn‑nò, jè kjoa̱tsejta‑la̱ Nainá nga tse titsa̱chiñá, jè‑né nga ki̱tjokàjiìn kjo̱ꞌin jñà xi̱ta̱. Jè ꞌndsè Pablo xi̱ta̱ xinguia̱á xi ꞌñó matsjachaá, ti̱koa̱á jye ìsa̱ kiskiì‑nò koni sꞌín tjín kjoa̱chji̱ne̱ xi kitsjaà‑la̱ Nainá.
\v 16 Nga jngoò ìjngoò xo̱jo̱n carta xi kiskiì Pablo, kꞌoa̱á sꞌín tíchja̱ kjoa̱ koi. Ta̱nga tjín iꞌnga xi ꞌñó ꞌin chja̱, mìkiì ndaà machi̱ya‑ná kó tsòya‑ne. Kꞌoa̱á ma‑ne jñà xi̱ta̱ xi mìkiì ndaà fìya‑la̱ ko̱ xi mì kixi̱ tjín kjo̱hítsjeèn‑la̱, síkjatjìya‑la̱ ꞌén. Kꞌoa̱á ti̱ síko̱ jñà Xo̱jo̱n‑la̱ Nainá xi kiskiì xi kjꞌei̱í xi̱ta̱. Kꞌoa̱á ma‑ne jñà xi̱ta̱ xi koa̱síko̱ ꞌén‑la̱ Nainá, ti̱jñà nchihótsji‑la̱ kjo̱ꞌin yijo‑la̱.
\s ꞌÉn xi fehetꞌaà‑ne
\p
\v 17 Kꞌoa̱á ma‑ne, jñò ndí ꞌndsè xi matsjake̱‑nò, nga jye ndaà tíjiìn‑nò kjoa̱ koi, ti̱kinda̱a yijo‑nò, mé‑ne nga mì skóna̱cha̱n‑nò jñà xi̱ta̱ xi chꞌo sꞌín nga xìn ndi̱yá kiìko̱‑nò xi mì kixi̱ tjín ko̱ ya̱á jchi̱ja nga kixi̱ titsa̱jnako̱o Nainá.
\v 18 Ìsa̱á ndaà kàtasakó‑ìsa‑nò kjo̱ndaà‑la̱ ko̱ kjo̱hítsjeèn‑la̱ Jesucristo xi otíxoma‑ná nga jè ochrjekàjiìn‑ná kjo̱ꞌin. Jeya kàtìjna i̱ꞌndei̱ ko̱ ni̱ta̱ mé na̱chrjein‑ne. Kꞌoa̱sꞌín kàtama.